THE FIRST FAST DRAW (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

THE FIRST FAST DRAW (COMPLETED)

Unread post by Rozami pachuau » December 5th, 2018, 7:09 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 1
(Rozami Pachuau)

Hulhliap chungah chuan Far thingzar buk ṭha tak hi a han dah leh phawt a, a chhungah chuan a lût ta a. Khua a hnawngin a vâwt kher mai a, mahni chenna ṭhin rama rawn haw hlim ni mah se han inkulhna mai tur chu a haihchham ve hle a ni. Chutah, mei a chhem ta a.

A ril a ṭam mai bâkah dûm zingah a sabengtungin a tlûkpui avangin a huh zawr hnêp mai bawk nen; mahse, pa fimkhur tak leh thil chian hmasak phawt zel tum mi a nih avangin chuti maia inpuan chu a tum rih tlat lo.

Tun hma pawhin tu mahin an 'chu e kha' ngai lo va, ani pawhin tu mah a engto bîk hlei lo va. Amah an hriat chhuah pawhin thinurna leh hûatna nen chauh a ni ang tih a hre chiang êm êm a; mahse, chu lai ram chu ama chenna leh mahni ram anga a lo en ve ṭhin a ni tawh tlat!

Thingzar aṭang te chuan dài an far fuap fuap reng a, a hulhliap chung khuh kar aṭanga a rawn far chang te chuan mei chu a far ri leh sar sar ṭhin a, ruah tla chiap chiap leh tui far ri bâk chu thawm dang hriat tur a vang hle.

Thawm riva dang deuhvin a beng a rawn verh tâkah chuan a beng chu a chhi nghâl hra a, chu thawm chu zawi hle mah se ruahsur leh ramsa thawm a ni hauh lo tih chu a hre thei nghâl mai a.

A thawm hriat chu sakawr kal ri a ni a, an thawm dim danah chuan an fimkhur hle tih pawh a hriat a. A hulhliap chu âwihtlan liam, ramngaw pik karah a nih avangin chuti mai chuan an rawn hmuh theih a ring lo.

Sakawr chung chuang chu an lo kal hnai zel a, hulhliap siamtu chuan a hnu-hma chu ruahin chhilh bo vek hman se a ti kher mai; tunah chuan buaina bâk tawn a inring lo reng reng a ni. Kawngṭum hlui, a pa ruang zalhna tal chu hmu hman se a inti hle a.

Chu pa chu thawmhnaw siam chawp inbelin ruah sur seng seng hnuaiah chuan fimkhur leh beng chhi ran chungin a ding vang mai a. Chu lai vêl pal tlang ṭhinte zingah chuan ṭhian a neih leh neih loh a han ngaihtuah leh vang vang a; chutah, Caddos Indian tlem tih mai loh chu ṭhian a nei lo tih pawh a inhre chiang khawp mai.

Tunah chuan ruah far tliah tliah bâk chu thawm hriat tur awm lovin a reh leh vawng vawng tawh a, thli chu a thaw vûk vûk reng bawk a; chutih karah chuan a thawm hriat bawk kha a hre leh ta a.

A hnunga a sabengtung pawh chuan a Iu kàn vuhin beng a chhi ve hru a, thawm chu a pu chauh ni lo, amah ngei pawh chuan a hria a ni tih a hriat mai. Han kal sawn Ieh mai tur pawhin sabengtung lah chu a chau ve hle tawh a, a pu ngei pawh chuan inthiar fihlim chu tumna pawh a nei tawh bîk lo.

A awmna aṭanga chhak lam, âwihtlan ko chungah chuan kawng, thing kar aṭanga lang zauh zauh thei chu a awm a, chu lai kawngah ngei chuan sakawr chung chuang pahnihte chu an rawn lang ta hlawl a. An pahnih chuan a lo thlirtupa ang bawka pawr leh chauh hmel hi an ni ve a.

A lo thlirtupa chuan a hnung maia a tun reng, a spencer carbine chu a la a, .56 caliber mu sarih thun theih, la thar zet mai hi a ni a. Chu silai chu Nation lama mi pakhat, hmangtu tur pawh awm tawh lova hremhmun lama liam tawh ta a ni nghe nghe.

Spencer kengtu dinna Iai chu a bul fit ruk lekah pawh kal tlang se, an hmu hauh lo vang tih tur khawpa biru hi a ni a; mahse, eng lai pawhin, 'fimkhur tluka ṭha a awm lo' tih hi a thu vawn ve ber a ni tlat thung a ni. Tun hun liam tâ eng emaw chen kha‚ chu ram, ṭhian neih Iohna hlirah chuan a Io kal tawh ṭhin a; chuvangin, a silai chuan a kut a hlat ngai lo reng reng a ni.

Thing kar hla bera a hmuh hmasak ber sakawr chung chuang pakhat chuan poncho hlui tawh tak a bât tih leh a ṭhianpa chuan Confederate kawrchung hlui tawh tak a ha tih chu a hre thei a. Mahse, chu mite chu thing karah an bo leh thuai a; amaherawhchu, spencer kengtu an rawn hnaih tawpah erawh chuan yard sawmthum (30) bâk a ni dawn lo tih zawng a chiang khawp thung mai.

Spencer kenga chuan chu lai hmun vêl chu a hre chiang hle a, a ding lamah chuan dûm hmun a awm a, a vei lama hnim pik awm lah chu han pal tlang rual a ni bawk hek lo, a phui hian a phui mup mai a ni.

Dûm chu a hnung lamah pawh a awm bawk a, chumi hmun lam aṭanga kawng pakhat lo chhûak chuan a hnung lam bawka thing hmun chu a rawn pawh a; mahse, chu kawng chu amah leh Caddo Indian tlem tih loh chuan an hre ve hauh lo.

A vei lama hnim pik chu tawn tlang hram hram theih lai hmun a ni chuan a hria a; mahse, thawm a ring duh dawn tlat a, a tan pawh tum chi a ni lo.

Spencer keng-pa chu Texas hmar thlang lama chengte pawhin tun hma aṭangin an lo ngaina vak lo ve reng reng a, chhim leh hmar indo lah a la rei lovin, hmanni lawka inrem kha an la ni mai a; chuvangin, han inthlahdahna chi hi a ni lo reng reng a ni.

Chu lo rengah, a tleirawl chhuah hlim pawhin tu mah pawl ngai lo leh maltlat duh mi a nih avangin mi tih dan ang apianga khing lêt mai zel chi a ni a, chu vang chuan khaw chhunga chengte chuan an ngaina lo hle a. Indona te chuan han chim hnan bawk mah se, an Ia theihnghilhin a rinawm tlat lo a ni.

Amaherawhchu, chuti chung pawh chuan chu lai ram chu mahni ta anga a lo cheibawl tawh avanga lo kir leh a ni a. Chu lai dûm hmun reh ruih mai te, thing zinga chhumleivâk kal nguai nguai te chu a theihnghilh thei ngai lo. Chu lo rengah, a ram lei chu a ṭha a, thlai chi tinreng chin nan pawh duhthusam a ni bawk.

Sakawr chung chuang pahnihte chu hmuh tawhna nei hian a inhre tlat mai a; mahse, chu lai Texas ram kil tak maiah chuan chhungkua inbahna leh inhûatna a lo tam tawh avangin a hmuh hnu pawh chu an ni ve thei tho bawk a. Indo a tawp hlimchhawn deuh chauh bawk si a, mikhual hriat ngai Ioh lo biak nghâl ngawt mai chu thil tih chi zawng a ni hauh lo.

Spencer keng-pa mei chhemna chu thing lian tak phenah a ni a, chutiang ang hmuna a lo tal tam tawh avang chuan a phuiin a ûap ṭha phian a, chuti mai chuan an hmu thei dawn lo a ni. ln pangngai chhunga a riah lohna pawh kum hnih zet a tling ta!

Sakawr chung chuang pahnihte chu thlang deuh thing karah chuan an ding ta a, rifle phei chuan han kah ṭhelhna tur chi hi an ni lo reng reng a. An han inbe zawk a, chutia an ṭawng a han hriat chuan spencer keng-pa chuan pakhat zâwk âw chu hriatna a nei tawh tih a hre mai a, a awmna aṭang chuan a pên chhûak ta a.

A fimkhur hle a, hnahthel rah tur pawh a huh ngei a rap zel a, a pan thla ta a. A ṭul thuta hmang mai thei turin a spencer a ken bâkah a kâwng hma lamah chuan dragon colt a pai bawk a. A hnaih tâk viau hnu chuan, “Bob Lee,” tiin a han ko ta thut mai a.

Chu veleh sakawr chung chuang pahnihte chu mak ti tak hian an rawn hawi rual ṭhawt a, anmahni rawn betu chu ngun zet hian an rawn en dun hu a, a ria zâwk phei chuan a hria tih a hmel aṭangin a lang thei bawk a.

Anmahni betu chuan lukhum dum, hlui tawh tak hi a khum a, savuna siam Jacket, Ute Indian kut hnu ngei mai hi a ha bawk a. A kekawr pawh a hlui tawhin, pheikhawk rawng sang, sipaiho dawn ṭhin ang hlui zet hi a bun bawk a. Amah chu fit 6 leh inchi 2’ vêla sang, hang lam deuh, pound zahnih (200) vêla rit tur hi a ni a. A hmelah chuan nun a hmang hahthlâkin, hmangaihna leh duhsakna a dawng tlem hle a ni ang tih a rin theih a ni.

Sakawr chung chuang, ria zâwk chuan, “Cullen, hrep tak che chuan! Kan va inhmu lo rei ta ve le,” a rawn ti chhûak ve ta a.

“Kum thum zet a ni.... Chu ai chuan a rei mah tawh ang.”

“Chu ai chuan a rei tawh mahin ka hria asin; hei, ka ṭhianpa hi Bill Longley a ni,” a ṭhianpa lam chu hawiin, “Ani hi Cullen Baker a nih hi, tunlai hian he lai ram vêla kan mamawh tak tur pawh a nih ka ring,” tiin a ṭhianpa hnenah chuan hmelhriattir pahin a han hrilh a.

Cullen chuan, “I thu sawi chu ka pawm mai hauh lo, a hma pawhin tu mahin min duh lo a nih kha,” a lo ti ve thung a.

“Tlangval khirh tak chu i ni reng a ni Cullen‚ kan vaiin kan do che emaw i ti a nih kha.”

Cullen Baker chuan, “Coffee ka nei," tih leh inher a rual a. Chutianga ṭawngkam ṭha a dawng chu a lawm rilru hle a.

Bob Lee chu pa hmai hriam deuh, lehkha chhiar tam leh Gentleman dik tak a ni a, chhim lam chhungkaw challang tak aṭanga lo chawr chhûak leh mi zah kai pha a ni a, hriamhrei lam pawh zei taka chelek thei zel mihring a ni bawk. Mahsela, pa rilru ṭha tak a ni bawk a, sawi chhiat pawh a tâwk ngai lo viau mai.

Bill Longley chu kum sawm pariat mi vêl, ruhrel lian leh ruakhau zet mai a ni thung a, a hnu lawkah phei chuan Texas-a Gunman hlauhawm bera sawi a ni ta hial a ni. A hming hi Cullen chuan Nation lama an sawi rîk zeuh zeuh chu a lo hre tawh bawk.

Cullen chuan a no a phawrh a, Bob Lee-te pahnih pawh chuan an no ve ve an la chhûak a, an bel ung zet maia coffee tam lo tak chu an in tlang ta a. Cullen chuan a thil neih chu tlem tê pawh ni se, tu mah dang rovin a hnar ngai lo tlat a ni.

Bob Lee chuan, “Hun thim lai takin i lo haw a nih hi, Cullen. Ram din thar duh pawl an tih maite chuan an duh duh an la a, chhim lam tana sipai lo ṭang tawhte phei chu an dinhmun a chhe thei viau a ni. I ram an la chhuh lo che a nih pawhin an la lâksak tho tho ang che,” a ti charh charh a.

Cullen chuan, “Chuti a nih chuan, buaina an duh tel tihna a ni mai alawm,” a lo ti ve mai a.

“Buaina neih chu pawi an ti lovin, an duh zawng tak a ni asin. Sipai an chah a, an lo thlen belh zel zâwk si nen, he lai vêlah hian ram ṭha chanchin hrilh duhtu ṭhian an nei ru ṭeuh bawk si a,” a ti a.

Longley chu rawn ṭawng chhûak vein, “An thu zawm loh chuan ṭan khawh a ngai a ni mai,” a lo ti ve bawk a.

“Inbeih leh buai hi ka kham tawh teh a nia, tu lakah mah buaina neih hi ka duh lo.”

“I duh leh duh loh chuan kawngro a su vak lo vang, Cullen. An duh chu i nei a nih chuan an lâksak tho tho dawn che a; an duh dan i pawm loh chuan buaina i nei bawk ang.”

Bob Lee chu a han ngawi vang vang a, Cullen chu en reng chungin, “Kei pawh ka buai viau tawh a ni,” a han tih zawm leh a.

Ruah chu a la tla seng seng reng a. Cullen-a rilru-ah chuan thinurna mai bâkah pawi tihna a lian hle a. Buaina nei lo hian a inen liam mai mai theih lul loh em ni aw...? Tun hma pawhin buaina a duh vanga buai a ni lo va, buai pawi ti lova rawn pantu an awm miau vang zâwk a ni.

Naupang tê si, chutianga khawsak chu thil duhawm tak zawng a ni hauh lo; tunah chuan patling, harsatna tam tak kal tlang tawh a ni. Tunah hian mahni ram nia a lo neihah a lo kir leh a, buaina a duh hek lo; mahse, rei pawh a la awm hmain buaina chu a inṭan a ni Ieh ta reng mai si.

Longley chuan thing tuah tur a va fawm a, an sakawr chu a buaipui zûi nghâl bawk a.

Coffee chhuan rim chu a tui ram ram hle a, ruah tla seng seng pawh chu a ngai reng a la ni bawk a.

Cullen chuan Bob Lee nen ber kher ṭhian anga an inen thei chu a ngaihtuah neuh neuh a, mak tihna tak pawh a nei bawk a. Inkawm ngeih tia han sawi tur phei chu an ni lo va; mahse, Bob Lee chuan a mizia chu hriat thiamna tak a nei ve tlat a ni.

Bob Lee-te chhungkua chu awm thei tak an ni a, ṭhian an ngah bawk nen, indo lai pawhin Colonel a kai hiala sawi a ni. Tunah a lo kir Ieh a, a buaina tawn chu dam taka han 'aw e' chu thil awlsam tak a ni thei hauh lo vang tih pawh a chiang a ni.

Cullen Baker pawh, chu lai mite tan chuan han theihnghilh mai chi chu a ni bîk lo. Hawtu ngah tawh nâk alaiin Texas-a Union lam ṭang, hna leh ram nei loho chuan an la rawn nawr buai hle ang tih a chiang bawk. Chutiang mihring chu a lo haw leh lam pawhin a hmu ṭeuh a, chûngho chu ram tana rinawmna nei lo leh mahni pumpui chauh hmangaih chi an ni deuh ziah bawk a ni.

Mei lum ai chung chuan titi khawchang an sawi a, Bob Lee chuan indo lai chanchin leh Texas chanchin te chu a sawi tui hle a, thil lo la awm chhoh dan tur nia a ngaih te pawh chu a sawi bawrh bawrh a. Cullen Baker te ang tan chuan hmun a chep nghâl riau mai!

Cullen chu chhung leh khat, vua Ieh vãng nei tawh lo a ni a, naupang tê a nih laiin a nuin a boralsan a, khawthlang lama a awm hlanin a pa a lo boral Ieh bawk a. Tu mah han ngaihtuahtu nei lo mah se, chu lai hmunah chuan in leh lo ram a nei ve tlat a, chutah chuan thlai chin a, dinhmun insiam rem a tum mek a ni.

Tun ṭum phei chu Tennessee aṭanga an lo thlen hlim ang lo taka thil tih a tum a. A hmasa kha chuan tleirawl tê a ni a, a thin a ram lutuk pawh a ni maithei a; patling leh rilru nei taka hma lâk a rilrûk tawh a ni.

Civil war a lo chhuah khan Rocky thlang lamah a awm a, indona pawh khan rilru a la peng teh chiam lo, khawi lam nge dik zâwk tih pawh a ngaihtuah teh chiam loh avangin mut tui loh phah nan pawh a hmang chuang lo a ni.

Khawchhak lam a rawn thlen leh chuan chhim lam aṭanga lo kal a nih miau avangin chhim lam chu zawm ve mai àwm tak a ni reng a, a hnaih ber, Quantrill-te pawl chu a zawm ta a.

A tir aṭang rengin chu pawl thil tih dan chu a mil loh zawng tak mai a ni nghâl a. Zu heh pui pui, nunau pawh dim lova khawih ching an ni. Indonaa tel tumin Utah aṭangin a lo chho a ni a, an thil tih dan aṭang chuan pawl dik lovah a lo tel a ni tih pawh a hre thiam ta nghâl mai a.

A telna pawl hlãwm hotu ber Captain Weaver chu pasaṭha nelh nulh, khabe hmul sen thur mai leh pa ti deuh thur thur chi hi a ni a, insawi thei tak; buaina a lo awma bibo leh daih chi hi ni berin a lang. A bulah chuan tleirawl tê; sakawr rûk ching Dingus an tih leh a unaupa, Bible pawm reng mai hi an tel ve a, a tua mah mah chu Cullen chuan a ngaina thei lo.

Mi pawi sawi lo chhungkhat an suasam tûk hian Cullen chuan Weaver chu a pan phei a, “He pawl thil tih dan hi ka duh lo, ka inthiar flhlim nghâl dawn,” a ti tlang ta khawl mai reng a.

Weaver chuan Cullen chu a'n en vang vang a, “Phalna tel lovin khawiah mah i kal thei lo vang; phalna ka pe dawn bawk hek lo che,” a ti ve tlat a. A bulah chuan Dingus-te unau pawh chu an lo awm ve a.

“Phalna ka dil lo che, ka chhûak dawn a ni mai! He pawl thil tih dan hi ka duh zawng a ni lo, mi in leh lo suasam Ieh ti chhia a, nunaute khawih hi ka duh lo! Kei pawh huan thlai nei ṭhin ka ni a, hetiang thil hi ka tih theih zawng a ni lo," Cullen chuan a ti a.

Weaver chu a sen awp awp a, a pûak keh mai dawn emaw tih hial tur a ni. Aw vin zet hian, “Minute hnih chhunga i awmna i pan loh chuan Court Martial i ni ang,” a ti vin ta tawk a.

Cullen chuan an inhmachhawn tirh khan a spencer hmawr chu Weaver lam hawiin a keng a, a kutzungchalin a hmeh perna hual khungtu chu a chelh ran bawk a; chu bâkah, Dingus-te unau chu mit lâk sawnsan ngam chi niin a hre lo bawk a ni. “I duh ang chu han ṭan ta che, i thil tih dan hmuh pawh a châkawm alawm," a tih khum ta siah mai a.

Weaver chuan a silai phawi chu a han tum ve uk a; mahse, spencer inkau ri rap a hriat tâkah chuan a che zûi leh ngam ta lo va. “Ngawi teh, i thil tih hi...,” a han ti ve leh hram a.

Cullen erawh chuan, “Ka ti fel vek tawh," tih pahin fimkhur leh inring tak chung chuan chu lai hmun chu a tawlh chhuahsan ta a. Chutah, a sakawr chu chak takin a kaltir a, a hnu-hma chu a thup pah zel bawk a.

Tunah chuan Cullen chuan a lo chenna ṭhin chu a thleng leh ṭep chu a ni ta a; mahse, a hua emaw haw lo emaw, enghelhtu an awm ngai lo. Chu lai hmun vêl chu a naupan lai hun hmanna a ni a, mahni maia vâk mai mai ṭhin a nih avangin Caddo Indian hriat miah loh ramte pawh a lo hre nual reng a ni.

An in leh lo ramah chuan thei huan bâkah Ranch te pawh a hming chuan a awm ve a. A ram phei chu a zau hle a, tun hma chuan mi an la thawl avangin ram pawh zau tak tak an nei a, a hlutna pawh a la hniam viau reng a. Tunah chuan mahnia hma la turin a lo haw a, tu mahin ngaihsak lo mah se a pawi ti hauh lo.

A hmasa berah thlai a ching phawt ang a, pawisa a neih deuh hunah sakawr vulh pun tur a lei Ieh ang a, chumi a lo pun hun chuan a dinhmun pawh a ziaawm ve hret hret theih a beisei a. Virginia leh Kentucky-te a lo pal tlang tawh avangin sakawr hlutna pawh a hai lo hle a ni. Chhim lama sakawr vulh ṭhinho chu indo avangin an chhe deuh vek hlawm a, chuvangin, sakawr rual ṭha tak nei tan chuan din chhuah a harsa lo a ni.

Mipa naupang dangte ang bawkin eng tikah emaw chuan intih hausak a, nula hmaa han inlâk len vêl te pawh a lo suangtuah ve tawh ṭhin a; mahse, tunah chuan a tlem Ieh tam lam ni lovin lungawina a pawimawh ber tih a hre chhûak chiang ta hlein a inhria a ni. Nupui te pawh la duh dawn se, ram dang daiha mi la zawn hial ngai dawnin a ring a, a chhan pawh, chu lai vêlah chuan Cullen Baker hming chu, hming ngainatawm a ni tlat lo!

Buaina pawh a la awm ngei ang tih pawh a hai lo; mahse, mi a kawp loha a hnaih Ioh na nâ na chuan buaina chuan a rawn pan ṭâlh bîkin a ring lo a ni.

Longley mu lai chu thawm nei miah lo hian a tho va, thing ro tam fe mai hi a va fawm a. Ni thum zet ruah sur tawhah pawh thing ro a la hmu thei ta fo mai chu kawp tlâk tak a ni ang tih Cullen chuan a hre nghâl mai a.

Bob Lee pawh chu a rawn ṭhu chhûak hlawl a, mei a ṭan nghâl a.

Longley chuan, “Thawm a reh fu mai,” a han ti bauh a. Amah vek chuan, “Bob, Bostar-a Carpetbaggar (In Ieh lo nei loho ti mai ang)-ho khan min rawn zawn i ring em?” a han tih zawm Ieh a.

Bib Lee chuan, “An hmel en aia an ã a nih ngawt loh chuan min rawn zawn chu ka ring lo. I harh em, Cullen? Thil awmzia han hrilh fiah che ṭhain ka hria. Bostar-ah buaina kan nei deuh va, mi pakhat ka kâp hlum hlauh a ni,” a'n ti a.

“A phu ve reng a ni ang chu. Mi chapo ve tâwk tak i ni nâ a, Bob Lee! Mahse, phu hliah hliah lo i kah hlum a, i silai i chelek ran lutuk pawh ka la hre ngai lo.”

An titi zawm zel a, ram awm dan Ieh borûak chu Cullen lo kir leh tan pawh chuan duhawm vak lo hian a lang tial tial a. Thil pakhat an sawi loh leh an hriat ve loh chu Cullen hmelma lian ber chungchang a ni a, ani pawh chu chhim lam mi leh Carpetbaggar-ho nena inkungkaih nghet tak a ni.

Chumi hnu chuan an vaiin mutmu an tuah ta hlawm a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 5th, 2018, 7:44 pm

(Cowboy lam chhiartute pawhin Advertisement click ve tho tur a nia aw, a hnuaia fakna lam milem lang khu click tur chu a ni e, in hmu thei lo a nih chuan in browser ah ad blocker off a ngai tihna a nia, ad blocker off dan comment lamah emaw Admin te in zawh dawn nia)

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 6th, 2018, 7:45 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 2
(Rozami Pachuau)

A tûka an zing tho chu an inbe tam lo tlang hle a. Cullen chuan Sulphur swamps a tih mai hmun chu a hrilh nghâl a, chumi chhim lam hnai têah chuan Lake Caddo a awm a, chu phei chu hria an tlem hle a ni.

An inṭhen dawn chuan, “Lo kal ve mai rawh, Cull, buaina bâk eng mah i tawng lo vang. ka hre chiang che a, i dang rei hauh lo vang,” tiin Bob Lee chuan a sawm ta a.

“Mahni in ngeia riah ka tum tlat a ni.”

Longley chuan nui sang chung hian, “Hmeithai nu saw hnaih suh, Union sipai inhlawm khâwm ai pawhin buaina a siamsak tam ang che,” a lo ti ve a.

A ṭhian pahnihte kal sawn hnu chuan Cullen pawh chuan a sabengtung chu a kaltir ve ta a. A sabengtung chu sakawr ai daiha daih rei leh zan lamah pawh vengtu ṭha fahran mai a ni.

Longley khan hmeithai te kha a sawi a, indona thleng lo pawh ni se, hmeithai pun chakna ram a ni reng reng a ni. Cullen chuan a hming lo than tawh dan te a ngaihtuah a, hmeichhe pangngai tana han duh theih tur chi niin a inhre lo va; chu bâkah, hna thawh tur a ngah dawn avangin hmeichhia ngaihtuah hman a ni lo tih pawh a inhria a ni.

A dragon colt chu a phawi a, a han endik a, mihring kah nan chuan hman ṭul leh tawh ngai lo se a ti hle a; mahse, inring renga awmte chuan pehhêl an tâwk fo tih a hre chiang êm êm a ni. A kawnghren karah chuan invenna dang zeh rûk a la nei ta fo va, chu chu deringer ngul phir, 41 Caliber a ni a, a ṭul tawpah lo chuan a hmang ngai lo.

In hnung lam kawngṭum chu thui vak lo a zawh a, gate chu a thleng ta hlawl a. Kum thum a lo vah bosan tawh a, kum sawm chuang zet ni hial hian a hria a. ln hnung lam tualcharah pawh chuan hnim Ieh ramhrui a lo ṭo nasa tawh hle a, in pawh chu a lang tawh mang lovin a ṭhen lai phei chu a chhe nasa tawh hle a.

Cullen chu a sabengtung aṭang chuan a chhuk a, gate chu a pan phei ta a. A mitthlaah chuan a nu leh pa dam lai te chu a hre chhûak uai uai a, gate hawn pawh chu a hriat rengna hawng ang deuh a nih avangin khawharnain a rawn tuam ve nghâl a, a sabengtung, kawta a Iût tlang pawh chu a hnuk a ulh ve ṭeuh mai.

ln chhung chu a reh ruih mai si a! A pa nen harsa ti taka choka kawngkhar an vuah dun, a kawpza atana an hman savun an vuah pawh chu a lo bal lek lek tawh a, savun taka phei chu a lo sawng chhe nasa hle tawh a.

Bathlar Ieh choka chhûat thingphel vêl chu a lo chhe nasa tawh hle a; a nuin, in bul vêla Iris par a phunte erawh chu an lo la vul ṭha hle a, mihringte thil siam hi a siamtu aiin a tlo zâwk ṭhin tih pawh a hre chiang hle.

Cullen chuan kawngkhar chu a nem hawng a, a Iût ta a. ln chhung pawh chu a rûak chiang hle a, thil lâk theih àwm chu an ru bo vek tawh a ni tih a lang thei mai. Kil khata dára siam, ketli lian tak erawh chu sakawra phurh a remchan loh avang chauhvin a lo la awm a‚ bang ṭhenkhat chu a tla bal nual tawh a.

A nu ruang chu in hnung huan bulah an phum a, a pa pawh a bul maiah an phum ni àwma hrilh a ni a. Choka chu chhimbuk a lo riah ṭhin avangin a hnawk hle a, vaivutin a bawh nasa êm êm bawk nen, Cullen chuan a nu dam laia a fai ṭhat ṭhinzia te chu a hre chhûak a. Thuk bulah chuan zan riakte'n an ei ban chu tlem an la hnutchhiah a.

Cullen chu pawnah a chhûak leh a, a han hawi vêl a, hna a ngah turzia pawh a hmu thei nghâl mai a, “Aw le, ka pa, i duh ang chuan rawn tih ngei ka tum ang,” tiin a phun chhûak sap a.

A sabengtung chu hnim hring peh tur tamna lai berah a thlung a, a spencer nen dûm hmun lamah chuan a chhuk thla ta a. A naupan laia a lo zawh tawh leh fan tawhna ṭhin kawnga a han kal leh chuan a naupan lai chu a rilru-ah a rawn lang Ieh uar uar a.

Chu lai vêlah chuan sakhi a awm ṭhin a; mahse, kum thum zet kal tâ thil a nih avangin beisei ngam chi a ni tawh chiah lo; chu vang chuan varak, tui cheng zo hlim chu zanriah atan a kâp ta zâwk a.

A in lam pana a chhoh leh chuan kawtlai tualzawl vêla ṭawng ri chu a hre ta mai a, buaina eng emaw chu a lo thleng a ni tih pawh a hre thiam mai a ni.

Kawtah chuan sakawr chung chuang pathum hian Cullen-a sabengtung chu an lo thlir ṭhap a. Pakhat chu pa sang tâwk tak a ni a; a bula ding ve chu Cullen-a lo hmelhriat tawh ṭhin, Joel Reese a ni a; pakhat leh chu han en mai pawha hlauhawm tak hmel pu hi a ni a.

An hotu ber ni àwm tak chuan, “Tu sabengtung nge?” thu nei hmel tak hian a han ti lang lang a; mahse, amah a inrin ang êma thu nei chu a ni lo tih erawh chu a lang thei mai a, “Tu mah an cheng lo i ti si a, Reese?” a han tih zawm leh a.

“Mi vâk mai mai emaw, zan riah tum emaw a ni ang. He hmun hi kum tam a rûak tawh a, zan riah nan an hmang ve fo ṭhin reng a ni."

Cullen chu an lo hmu miah lo va, “He hmun hi a rûak lo, hralh theih pawh a ni lo; ka cheng dawn!” bung tak hian a ti chhûak ta thut a.

Cullen awmna lam chu an rawn hawi rual ṭhap hlawm a. Joel Reese chuan nelawm loh zeta nuih sawng pah hian, “Colonel, hei hi ka sawi ṭhin, Cullen Baker chu a nih hi,” a bula pa sanga hnenah chuan a han ti a.

Colonel mitmeng chu a thîpin ngaihno a bei lo kher mai a; an zinga a pathumna ber chu Cullen-a mit latu tak a ni thung. Reese te ang chu an chan a ṭhat viau dawn loh chuan an che mai mai ngai lo va; an zinga a pathumna ber erawh chu a hmel leh awm danah pawh mi deh khirh tak a ni tih Cullen chuan a hre thei a ni. Chiang tâwka en kal chung chuan, “Hre àwm tak che ka niin ka hria?” a ti ta a.

“Ka hming chu John Tower a ni a, he ram i chhuahsan hnua lo thleng hi ka ni.”

“Rockies thlang Iamah i kal tawh em?”

Tower chuan mitmeng fiah zet hian, “Maithei. Mipa hi chu kan vâk tam alawm,” a lo ti leh bauh a.

Colonel chuan, “Baker, Confederate lamah i ṭang! I lak aṭangin buaina ka duh lo a nia, i hria em? I lak aṭang hian buaina chhe tê emaw, ram din thar lehna chungchanga inrawlhna i nei emaw a nih chuan tan inah khung i ni ang. Chu bâkah, i ram hmelma anga ngaih i ni a; chuvangin, i ram hi lâksak i ni dawn bawk,” a ti ta nghut a.

“I ṭan khawh chhan hi bih chiang teh, Colonel, tu lamah mah khan thu ziahna i hmu hauh lo vang. Indo chhung khan khawthlang lamah ka awm daih a, Ute leh Commanche-ho bâkah tu mah ka bei lo,” Cullen chuan a ti ve tlat a.

Colonel chuan, “Engtin a?” a lo ti hu a. Hmai sen ṭeuh hian Reese lam chu a hawi a, “A sawi chu a dik em?” a han ti Ieh nghut a.

Reese chuan ngaih ṭhat loh hmel fe hian, “Colonel Belser, chhim Iam tan a ṭang tih ka hria a ni, a tan ṭan han khawh dan tur kawng dang a awm lo reng reng,” a lo ti ve thung a.

Cullen chuan chang fal hian, “Joel Reese hi mi dâwihzep ber pawl a ni ṭhin a, hetia dik lo taka a hruai che pawh hi zak hle tur i ni zâwk!

"Thu dik a hria a nih chuan indo chhung khan New Mexico leh Utah-ah ka awm tih chu a hria ang. lndo hnu lawk khan khawchhak lamah bâwng rual ka rawn khalh a, ka hralh a; tichuan, kum thum hnuah khawthlang lamah ka kir Ieh ta a ni.

"Reese hi tu mahin engah mah an ngaih loh avangin mi a vai hûat vek a, a thu hrilhah che hian fimkhur la ka duhpui ngawt mai che. A chungah hian thil ti dik lote chunga phuba lâk dan kawng ngaihtuah a ngaiin, thil dik lo pawh a la tihtir mai ang che,” a ti ta a.

Colonel Belser chuan thinur zet hian, “I thurawn ka mamawh lo,” tih Ieh a sakawr pawh her a rual a, “Confederate lama i tel leh tel loh record hluite en a ni ang a, min la hmu Ieh ang," a ti ta nghut a.

“He laiah hian vaimim chin ka tum a, rawn hmuh ka har hauh lo vang,” Cullen chuan a ti ve ta ngat a.

Berser leh Reese-te an kal sawn tâk hnu chuan John Tower chu a la muangchang bîk a, “New Mexico leh Utah bâkah California i thleng em?” a han ti ve leh hram a.

“Ka sakawr nen hian kan vâk thui khat viau chu a nia lawm,” Cullen chuan a tihsan mai a.

“Tun lo hi intawnna kan nei tawh em?”

“Mi tam tak ka tawng tawh a, mi hnu ka hmuh tawh chu ka theihnghilh leh tawh ngai lo bawk.”

“Chuti chu, ka hnu pal tlang la, i hre reng ang i tihna em ni?”

“Aw, hre reng ang.”

Chutah, John Tower pawh chuan a sakawr chu a pawt her a, a kheng kal ve ta nghâl a. A hmel leh chêt danah pawh mahni inring tâwk leh pa hlauhawm tak a ni tih a hriat mai a; chu bakah, mi inring lo lai beih ching lo, hmachhawn ngat duh chi a ni tih a hriat theih bawk a ni.

An kal liam hnua Cullen-a han inher chuan in bul thing hnuaia nula ding chu a hmu ta thut a. Chutiang hmeichhia chu a hmuh lohna a rei tawh hle a, han en reng reng pawha hmeichhe nem leh lady dik tak mai chuan Cullen Baker-a te ang, pa rothap leh hlauh nei lo chu chhan ṭha tâwk awm lo chuan a rawn pan hauh lo vang tih a chiang a ni.

Chu hmeichhia chu hmeichhe pangngai aia sang lam deuh mah, sam dum ṭha tak leh vun sen nalh tak mai hi a ni a. Thawmhnaw var a inbel a, la naupang hlein lang mah se a mitmeng erawh chu a fin hmel kher mai thung a, nula nalh leh duhawm, mit la tak zawng a ni chiang alawm. Aw tliang nalh zet mai hian, “Min hmu hi mak i ti em?" a han ti a.

Cullen chuan, “Hmuh che chu ka inring lo chu a nia lawm,” a lo ti ve mai a.

“Blackthorne-a mi, Katy Thorne ka ni.”

Cullen tan chuan Thorne-ho hi chu ngainatna chhan tur a awm lo reng reng a; an zingah chuan Will Thorne nen chiah inhriat thiamna an nei a ni. Will chu a danglam ve hrim hrim bawk a; a nu nuṭa, Chance Thorne phei chu Cullen hmelma lian ber a ni tlat. Katy Thorne tih hming pu hriat a neih loh avangin, “Will nen in-unauna in nei em?” tiin a zâwt ve ta a.

“A unau fa nupui, hmeithai ka ni."

“Hmeithai a?”

“Sipai a ni a, Geltysburg inbeihnaah khan Pickett hnung a zûi a; chutah chuan a huaisen lutuk ta deuh a ni. Sipai i ni ve em, Mr Baker?”

Cullen chuan bung nghat hian, “Ni lo. Pawimawha han sawi tham nihna eng mah ka nei lo, Mrs Thorne; Cullen Baker ka ni tawp mai,” tiin a chhang a.

“I nihna chu a pawimawh viau bawk lawm ni?”

“Eng emaw zawng chuan a dik thei ang chu. Keima tan ber hian a pawimawh maithei; mahse, he lai chheh vêla tu mah hian min ngaina lo va, keiin ngainatna eng mah ka nei bîk bawk hek lo.”

“Ka hria alawm, Cullen Baker. Chhangphut herna hmuna Chance Thorne i sawisa lai pawh kha ka hmu ve asin.”

Cullen chuan mak ti deuh hian, “I hmu ve a maw?” a ti ta ha a.

“Tawlailir aṭangin ka pa Ieh Will-ate nen kan lo thlir reng che a ni. Chance Thorne kha chuan a phu tâwk a hmu ta niin ka hria.”

Chumi ni chu Cullen chuan eng tikah mah a theihnghilh thei tawh lo, a mitthla-ah a rawn lang leh uar uar ṭhin.

Chutih lai chuan Tennessee aṭanga an rawn thlenna pawh a la rei lo va, chhangphut her tur kengin khuaah, vaimin ip puin a kal a. Chance chuan a lo hmuh veleh tih duhdah a ṭan nghâl mai a, a ṭhiante lah chuan an hotu ber a nih avangin a thu chu an zawm zel mai bawk si nen.

Chance chuan Cullen-a thawmhnaw inbel, tah chawp chu hmusit tak hian a lo diriam nghâl ngawt a, a hlui tawhin a inbel ṭup tawh mai reng a. Cullen tan erawh chuan a neih chhun a nih ve miau avangin a hlu êm êm thung.

An lo nuihsawhna chu hai derin chhangphut tur vaimim chu a va hertir a, a rawn pu chhûak leh chu an zûi ta a. A sabengtung awmna thleng chuan an nuihsawh phei zel a; chutah, an rawn pan hnai thut a, a kekawr dàrbah chu an pawh thlâksak a, lei nawi te chuan an theh zûi ṭhawt ṭhawt bawk a.

Cullen chu hmanhmawh lo taka thil ti mi a ni a, a kekawr chu a ha ṭha a, a darbah pawh chu a siam ṭha leh mawlh mawlh phawt a. Chhangphut dip chu a sabengtung chungah a hlang Ieh a, thing bung a chhar a, amah ti buaitute chu a pan phei ve ta chauh va. Chance tih loh chu an darh nghâl ar ar a.

Chance chuan a bul a thlen hun chu a lo nghâk run a, a sangin a pa lian bawk a, thawmhnaw pawh man to tak hi a inbel a. Chutah, hmusit zet hian, “I thing bung ken kha dah rawh, ka sawisa hrep dawn che,” a lo ti chheu chheu mai a.

Chutih lai chuan patling dawrzawn hnih zet tur hian an lo thlir tuau tawh a. Cullen chuan ṭhian a nei lo tih chu inhre mah se, a thing bung ken chu a dah ve ta tho va. Chance chuan a rawn pan phei nghâl ta bawk a; chutah, Cullen han ding ngil leh lai chiah chu a hmaia hnek tumin a kuttum chu a rawn vai ta fua a.

Mahse, Cullen chu a khawsak dan aṭang reng pawhin rothap ve tak ṭhin leh patling hial pawh lo sual ve tawh ṭhin a ni miau a, Chance-a chêt tum dan chu hre thiam nghâlin, ding ngil duh ta lo chuan a maltê-ah tak a lo tlawh zawt a, a tlawh thlu ta zuah a.

Chu veleh Chance-a tho leh tur chiah chu a hmuiah tak kak hluai khawpin a hnek zûi nghâl siah a; chutah, a hmuia thisen chhûak zawih zawih avang chuan a kawr pawh chu a bual sen zûi nghâl hnuang a.

Chance tan chuan ama thisen a hmuh hmasak ber pawh a la ni maithei e, a thinur mai bâkah a thin a ṭhawng hle bawk a. A kuttum pahnih hum ruh ṭeuh chung chuan a tho va, Cullen chu a pan phei leh a, a ṭhiante chuan an lo fuih nasa ve mai bawk a.

Mi khawhar leh ṭantu nei Io, Cullen Baker rilru-ah chuan hûatna lian tak a rawn lût ta a, a kut pahnih vai fua chung leh tawlh tum miah lo chuan a pan hnai ve ta sauh sauh a. A thinrim kut thlâk chu a na ngiang bawk reng a, Chance chu a mitmeng a zam tih hriat zet hian a tawlh lêt hmasa ta a, ṭanpuitu koh mai pawh a duh rum rum hial tawh a ni.

Cullen chu a kun zauh va, Chance hmel aṭang chuan na a ti hle tih pawh a hriat theih a; chutah, a hmaiah tak Cullen chuan a han pet zûi leh ta siah a. Chu veleh Chance chu a let hlawm tawp a, tho leh mai thei phei zawng a ni; mahse, tho leh ta mai lo chuan a awm ngaiin a awm ta reng a. Cullen chuan a dam chhung hmelma tur a insiam a ni tih pawh a hre thiam nghâl ve tho bawk a ni.

Vaimim herna hmun aṭang chuan mi eng emaw zât hi an rawn tlan khâwm a, an zingah chuan Chance-a pa leh a patea pawh an tel nghe nghe a.

Cullen chuan a thing bung paih chu a chhar leh vat a, hnung zawngin a tawlh kir nghâl bawk a. Tleirawl tê mai leh puitu pawh nei ve lo a nih avangin a lung pawh a chhe angreng hle a, a hnuk a ulh ṭeuh mai a.

Mi pakhat, sang zeih zawih leh changkang hmel tak hian, “Ti buai tawh suh u, Chance khan a ti lui tlat a nih kha,” a rawn ti ta a. Chu pa chu a hnuah Cullen chuan Will Thorne a ni tih pawh a hre chhûak leh ta chauh nghe nghe a ni.

Chance-a pa chuan thinur avanga sen ṭawn ṭawn chung hian, “I lo inrawlh ve-na tur a awm lo, Will. He naupang sual tak hi...,” a han ti a. Cullen chu a sabengtung hnungchhawn zawng Ieh a thing bung keng reng chunga a la awm ve avangin a hnaih mai ngam bîk lo va.

Cullen chu naupang tak la ni mah se a pumrua a lianin hna a thawk tam a, tharum thawh kawngah pawh thahrui nei tak a ni a, pawngpaw zuam mai chi a ni bîk hauh lo. “Mi rawn hnaih vaih teh, ka vaw thlu che a ni nghâl mai,” tiin a vau lêt ve ta chhar chhar a.

Chance-a pa chuan a kuttum lek pah chuan, “Ka sawisaktir hrep dawn che, tlangval!” tiin a han vau lêt ve ngawt a.

Cullen chu a sabengtung chungah chuan a lawn a, hmanhmawh hauh lovin khua chu a chhuahsan ta a.

A hnu ni rei lo têa Cullen-a, khuaa a va kal leh chuan Thorne chuan whip nen a lo chãng a; mahse, Cullen chuan vanneihthlâk takin a lo hmu hmasa hlauh a, a sabengtung chu a pawt her a, a kheng tlan ta vak a. Thorne chu khaw mipui tam zâwkte hmuh lai ngeiin tualcharah a tlu ta hawl hawl mai a, Cullen chu a inthiar fihlim nghâl daih bawk a.

A hnu lawkah chuan chu aia thil pawi zâwk chu a thleng leh ta tlat mai! Cullen-ate pafa lei let lai chu mi pali lai maiin an rawn bei thut a, pakhat chuan Cullen-a pa chu talhtumin a vaw thlu nghâl a, Cullen chu whip-in an sawisak rawn ta a.

Mahse, âw chhuah miah Iovin a tuar chhûak a, an duh tâwka an khawih hnu meuh chuan thisen pawh a chhûak nasa hle a ni. A pa nen chuan thei leh thei lovin in lamah an inkuah hawng ta a. Cullen chuan a pa chu a muttir phawt a; chutah, a laiphir a la a, khaw lam a pan ta a.

Amah sawisatu pahnih Heas leh Gibson chuan an hlawhin saloon-ah zu an lo in mek a, Cullen-a'n an zu inna saloon kawt a thlen chuan khua a thim tawh a, saloon a va luh chuan Heas-a'n a lo hmu hmasa zâwk a, “En teh, Gib, Gib,” a ti khur ta dut dut a.

Gibson chu a rawn inher a, a pûakruk a chuh ta nghâl a. Chu veleh Cullen chuan a laiphir chu a hmet pûak ta dur a; mahse, kah hlum tum a nih loh avangin an inkarah chuan a kap phei pawp a, musep tlem ve ve erawh chu lawmman an dawng a ni. A thal zawng an thal dun chiang hle a; mahse, an musep dawn chu thihpui tham tur êm chu a ni hauh lo.

Cullen chuan, “In pawi ka sawi hauh lo va; mahse, ka pa nena kan hna thawk lai min rawn khawih buai a, nangni chu ni ila ka inthiar fihlim daih ngei ang. Ka pa kha a thi a nih ngat phei chuan ka rawn zawng leh ngei ang che u, rei in dam bawk hek lo vang," a ti ta hmiah a.

Chutah, pawn lam a pan phei a; mahse, a han hawi lêt leh a, “He tleirawl hi sawksak tum tawh lo ula a ṭha ang,” a han tih khum leh salh a.

Chumi nipui chuan Cullen chu kum sawm panga (15) a ni ve chiah a.

Khuaa Cullen a va kal chang pawh chuan miin an nel loh phah hle a; chu vang chuan, a hun tam zâwk chu dûm hmunah, ram pilrilah hlir a hmang a. Chuta ṭang chuan a hming a thang chhiain, mi tin maiin an fanaute an zilh mawlh mawlh hlawm a, patlingho lahin an ti duhdah Ieh ngai ta bawk hek lo.

Cullen-a pa chu chuta ṭang chuan a dangIamin tun hma ang a ni thei tawh ngai lo. A chhan ber pawh a fapa Ieh a nupui tana beiseina a neih ṭhin chu hlawhtlin theih a inrin loh vang a ni berin a lang. An nu thih hnu chuan rei a daih hauh Io vang tih pawh Cullen chuan a hmu thiam mai bawk a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 7th, 2018, 5:38 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 3
(Rozami Pachuau)

Cullen chuan Katy en vang vang chung chuan, “Thorne-ho hi ngainatna chhan tur ka nei lo; Will erawh kha chu ka ngaina khawp mai,” a han ti leh bauh a.

“Pangpar lawr tura lo kal ka ni a, ka hmu che pawh kha mak ka ti khawp asin.”

Cullen chu bathlarah chuan a phei a, a rifle a dah a, a varak kah hmul chu a pawt ṭan ta a.

Katy pawh chuan rawn hnaih vein, “Vawi khat chiah i kâp a ni maw?” a han ti sap a.

“Varak pakhat chauh a ni miau alawm."

“Varak hi chu rei lo tê tal repin a tui bîk asin.”

“Ka kawchhungah ka rep tawh mai aniang chu, ka zanriah tur a ni miau si a.”

“Patling riltam ṭan chuan a tê tham mah mah a ni. Blackthorne-ah chaw ei turin lo kal ta che, vawk sa ur hmin kan nei alawm.”

“I mi sawmna chu i hre thiam em, ka pi? Cullen Baker hian Blackthorne-ah chaw a ei ang maw? Silai a pûak mai ang. Chu chu lo pehhêl thei pawh ni ila, mi sawi i hlawh phah hle tho vang."

“I awm lo rei lutuk ta a nih hi, Cullen Baker. Blackthorne chu indo zawh aṭang khan luahtu awm lo a ni asin. Tuna ka chenna chu Will ta a ni ṭhin a, min rochun a ni. Ka Ni, Flo-i nen chauh kan cheng a, tu mah an awm lo.”

“Khawiah nge Chance a awm?”

“Boston-ah a nih ka ring; a nih loh vek pawhin kei chu min rawn tlawh ngai lo. Texas khawpui te hi a ngaina zâwk a; Ranch leh chenna hmun fál te hi a ngaina ve lo a ni.”

Cullen Baker chu Thorne-te Ranch-ah chuan va kal mah se, a kal hmasak ber a ni dawn hauh lo, tun hma pawhin vawi hnih khat chu a lo tlawh tawh a, Will Thorne nen chuan an inhre thiam a, a lo tlawh ve tawh ṭhin reng reng a ni.

A ngaih danah pawh Will Thorne chu an vaia belh khâwm ai pawha chungnung leh rin tlâk niin a hria a, a ṭawng tam lem lo nâ a, a tum a ruhin a rilru pawh a ngil riau tlat a ni. Chu bâkah, thu leh hla lamah Will chu a tui hle tih Cullen chuan a puitlin hnu deuhvah a hre chauh a, ani, hming ziak thei ngawr ngawr chauh tan chuan a ngaih sanawm hle reng a ni.

Cullen chuan Will chu dûm hmun kawng rûk tam takah chuan a lo hruai kual tawh ṭhin a. Fort Kelknap-a Cullen-a'n mi pakhat a thah ṭuma Will zawhna awm chhun chu, “I thil tih hi dikin i hria em?" tih chauh a ni a, chuta ṭang chuan Will rilru put hmang tur pawh thui tak Cullen chuan a hre thei a ni.

Will chuan, 'Mi dangte ngaih dan thlir lovin, mahnia lungawina neih hi a pawimawh ber a ni,' a lo ti tawh ṭhin a, mi thu sawi leh ngaih dan te chu a dik loh ve theih avangin hei hian dikna lai tak pawh a nei ve reng a; chu bâkah, 'Lungawi lohna leh hûatna hian sâwtna a nei lo,' a lo ti tawh ṭhin a.

Katy chuan an choka an thlen hnu chuan‚ “Naupang tê ka nih laiin Will chuan i chanchin hi min hrilh tawh ṭhin a, naupang fel tak leh mi tih buai lohva pa fel tak ni thei tur i nih thu te a sawi ṭhin a. Hmanlai Scotland rama cheng phei chu ni lo la, mi chungnung leh hruaitu i nih thuai a rin thu pawh a sawi ṭhin a ni. Chu bâkah, i thisen hi chawh thawh hlauhawm tak a nih thu pawh min hrilh bawk. Mahse, a tawpah chuan Gentleman dik tak leh pa rilru ṭha tak i nih thuin a tlip ṭhin a ni,” a ti a.

Chu ṭawngkam leh fakna avang chuan Cullen chu a zak deuh rum rum zâwk a, fakna âw-ka a hriat khat êm avangin thil àwm lo a ni bîk lem lo a ni. Pa ṭha-ah a lo inngai ngai lo va, Will Thorne chu thil chhût sual ngai lo tak a lo ni bawk nen, nuam a ti lo rum rum tak meuh a ni. Mahse, a thinurna chungchang a sawi te chu dik a ti hle bawk si.

Choka dawhkan kîl chungin Katy nen chuan an ṭhu dun a, hmeichhe che vêl leh bungbel han khawih rîk te chu ngaihthlâk nuam hle hian a hre zo vek tawh a, mahni maia lo tal ṭhin tan chuan hahdamna sawng sawng tur thil pawh a tling ve hial a ni.

Katy ni, Flo-i chu pindan pakhatah a muhil a. Cullen chuan ani tan meuhva Thorne thisen kaiin ei tur a han bûatsaih ta mai chu mak a tiin âwih harsa a ti hial zâwk a.

Katy chuan an chaw eina tur chu kil khat dawhkanah chuan a rem malh malh a, sathau khawnvar êng vak lo hi a chhi zûi nghâl a. Cullen chuan a intih fai hman loh avang ringawt chuan pawi tihna a lo nei hle a; chu mai bâkah, a thawmhnaw hlui inbel chu zahpuiawm hle hian a hria a.

Mahse, Katy chu nelawm leh ngainatawm tak, a bula awm hahdamthlâk hliah hliah mai hi a ni a. Cullen chuan hmeichhia chu a lo hre ve nual tawh nâ a, han fak tlâk leh Katy han el pha tur chu sawi thawi tur pawh a hre lo.

An in tur coffee a thlit zawh chuan Katy chuan, “Khawthlang lam chanchin min han hrilh teh, ngaihnawm ka tih zawng tak a ni. Mipa chu ni ila, ka liam thlâkna a rei tawh ang,” a ti barh barh a.

Cullen chuan han sawi mai ngaihna a hre lo hle a. Engtin nge phaizawl tawp nei lo te, ni sen sa vawl vawl mai te, silaia buaina an chin fel mai dan te Ieh hliam, puan bal tak taka an tuam mai dan te bâkah buffalo rual sang tam tak te chu a han sawi fiah tâk ang?

Cullen chuan, “Khawthlang ram chu mak tak a ni, Mrs Thorne. A zauzia pawh sawi thiam a har khawp mai a; ni ruk, sakawra kal pawhin hmun ngaia la awm reng emaw intih mai a awl a ni. 'Rih artui phur' an sawi ang mai hi niin ka hria a, chutiang khawpa zau chu a ni. Tlang khawkrawk leh chhengchhe tak tak, filh rel rul mai karah te chuan mi ngoho la tlawh miah Ioh ruam zau pui pui mai hi a awm hlawm a.

"Zanah mei lum aiin van lam han thlir ila, vana arsi de chuah chuah mai te chu nangmah ang bawka mi zinvâkte mei chhem de emaw i ti mai ang. Tin, ralkhata sihal u rawng rawng te i hria ang a, chinghnia te nen; mei khu rim nam rum rum karah Comanche-ho an awm hnai em tih ngaihtuah pawh thil awlai tak a ni. I sakawr chuan i mei lum chu a rawn chhim ve ang a, thimtham lam hawiin a beng a han tun ang a, i ngaihtuahna chuan thui tak thlengin a chhui thei hial ang," a han ti phawt a.

“A chang chuan zing ni chhuah thleng thlengin ka mu ṭhin a, sakhi rual, sih tui in turte chu ka thlir ṭhin a. Sih hnaih takah chuan tu mah an riak ngai lo, a him lo tlat! Chu bâkah, tui mamawh ve ramsate an awm thei a, lo chenchilh ngawt chu thil dik a ni lo hrim hrim bawk.

“Hêng bakah hian thil mak tak tak tawn chang a awm bawk a. Vawi khat chu Grizzly savawm theihmu dum eina aṭanga fit sawm (10) emaw lekah ka ding a, min rawn melh zawk a, theihmu chu a ei chhunzawm leh ta mual mual a. Eng dang a ngaihtuah thei lo a ni ber mai.

"Ka duh tâwk ka ei hnu chuan ka sakawr lam ka pan phei a, ‘Dam takin, putar,’ ka va ti a. A ban a phar a; âwih harsa i ti pawh a ni maithei ka pi, tichuan inher meuhvin min rawn thlir vung vung asin,” tiin a han sawi zawm ta zel a.

A duh ai maha a sawi tam tâk avang chuan Cullen chu zak deuh lek lek chung hian a ngawi ta a.

In chung pindana thawm lo awm chu Katy ni, Flo-i ni ngeiin a lang; mahse, a rawn chhuk thla nghâl mai rih lo va, Cullen chu a rilru tak chuan a thaw deuh huai a. Mi ṭawng tam lutuk lo leh mi tam tak zingah chuan sawi tur hre lo ve tak a ni tlat a ni.

“Cullen, khawthlang lam chu nuam i tih hle si chuan engah nge i rawn kir leh kher a?”

“Ka in leh lo, ka lu nghahna neih chhun a ni ve miau alawm, ka pi. Ka thei huan hlui saw an ruang zalhna hmun a ni a; ram saw ka ta a ni bawk. Hlawhtlin ngei tumin ka pa chuan a lo thawk rim êm êm ṭhin a, amah avanga ka lo tlangnel tawhna a nih vang te pawh a ni thei ang chu. Ka lo kir Ieh chhan tak pawh khawthlang lamah chuan keima pual eng mah thil a awm lo va, dik tak chuan vah vêl nuam ti mi ka ni ve hrim hrim lem lo te pawh a ni ang e.”

Katy chuan, “Awihawm Ioh Ioh a nih chu. Mrs Thorne tiin min ko suh, ṭhian hlui kan ni a, ‘Katy’ tiin min ko tawh zâwk dawn nia,” tih pahin a tho va, an chaw eina vêl chu a senghawi nghâl a. Cullen pawh chu tho ve nghâlin a lukhum a la a.

Katy chuan, “Ṭhian kawm tur i duhin emaw, i thil siam i nin deuh chang chuan i lo kal ṭhin dawn nia,” a lo ti seuh seuh a.

Kawngka-ah chuan Cullen chu a ding a. “Katy..., ka pi, ka chhuah hmain sathau khawnvar kha khawngaihin chhem hlum ta che. Hêng laiah hian min kah nghâl mai châk zek zek an tam a nia,” a han ti a. A thim hnu chuan a pên chhûak ta chauh a, kawngkhar sir thim lamah chuan a tawlh phei nghâl vat a.

Ngun takin a beng a han chhi leh phawt a, ngaih ṭhat lohna tur a awm lo nia a hriat hnu chuan a sabengtung awmna lam chu a pan phei a, a saddle a siam fel hnu chuan a lawn kai a, a lo kalna kawng chiah lo deuhvah chuan ama in lam panin a kaltir ta buk buk a.

Hnimhnah ṭawih leh tui bawlhhlawh rim a nam rum rum a. A in bul a va thlen chuan pal chhe tawh lam, a in sir chu a pan phei a.

Cullen chuan a in hnung lam huan a thleng chiah tih chuan thil fel zan lo eng emaw a awm a ni tih a hre ta a, a sabengtung chu a pawt ding nghâl a.

A beng chhi ranin thawm a han ngaithla a, chawp leh chilhin chhimbuk hram ri a hre ta a; chhimbuk tak tak ni lova rinna a nei nghâl bawk a. Bob Lee-a'n a chenna hmun a hriat tawh dan te, lo nghâk ta se, khawi laiah nge a lo nghah ang tih te chu a ngaihtuah ta zung zung a; in chhungah chuan a lo nghâk hauhvin a ring lo.

Thing lubul pakhat lian leh nghet zet mai, a pa nen pawha an buaipui peih loh, inhmuh nana an hman ṭhin chu a hre chhûak zawk a, Bob Lee pawhin a la theihnghilh bîk a rin loh avangin chu lam pan chuan a sabengtung chu fimkhur takin a kaltir ta a.

Thing pakhat bul a va thlen chuan hla deuh zâwka chhimbuk hram ni àwm tak hian a han ti ve a. Rang takin chhanna a hre nghâl zat a, a spencer chu hmeh puah mai theih tura lek vah chungin hnim zinga thing lubul chu a pan phei ta a.

A bul aṭang chuan mi pahnih hi an rawn ding chhûak nghâl a, Bob Lee âw ngei mai chuan, "Cull," a rawn ti ta a.

“Ni e, keimah ka ni; eng nge ni ta?”

“I lo thleng tih hi Chance Thorne chuan a hre tawh a, he lai ram aṭanga hnawh chhuah ngei che a tum thu pawh chhechham meuhvin a sawi a ni. Vawiin khan Joel Reese-a i biak bâka hmutu che mi dang an awm bawk a ni.”

“Min rawn zawng a nih chuan ka awmna a hria alawm, hna thawh ṭan thuai ka tum a ni."

“Ṭhiante mamawh hun i neih chuan ka awmna chu i hre mai ang. Thil kan hriat beih zel a Cullen, ei tur leh tawm bona tur min ngaihtuahsak theitu tur pawh kan hriat belh tawh asin.”

Thingbula ṭhu chung chuan darkar khat zet an inkawm khâwm ta a. Bob Lee chu vua leh vang ngah tak a ni bawk a, thil pawh a hre chak hle a. Chu chu chutiang hunah chuan a hahdamthlâk hle reng a ni.

Bill Longley erawh chuan eng mah sawi lovin an thu sawi chu a lo ngaithla ringawt thung a. Tlangval, kum phu lohva pumraw lian leh nelawm loh tak ni mah se Cullen chuan a ngaina ru ve riau tlat a ni.

Bob Lee chuan ding chungin, “Kan dam chhung kumah hian kum nga kan belh leh theih chuan kan vannei hleah ka ngai ang‚ thi turin min veh reng tawh a ni,” a ti ta a.

Bill Longley chuan, “Kum nga a? Kei chu hre chiang thei dawn ila chuan, kum khat pawh ka lawm tâwk êm êm ang,” a lo ti ve thung a.

Bob Lee chu a lo ding ngawi vang vang a, an tih dan chu a nihna leh a dinhmun nen a inrem loh êm avang chuan a dawh mai mai theih a rinawm loh reng a ni.

Cullen ve thung chuan buaina chu pumpelh dan kawng dap hram hram a tum rilru tlat a.

Bob Lee chuan, “Ralthuam nena inring renga kan awm loh chuan kan tan beisei a bo viau ang. Hre reng rawh Cullen, lei i lehnaah pawh i lei lehna vawnbanah i spencer bawm kha ṭawn bet tlat ang che,” a han ti leh a.

Cullen chuan, “He lai hi ka ram a ni a, buh leh thlai thar ka tum bawk. Ka theih hunah sakawr leh bâwng ka lei bawk ang,” a ti leh ta bauh a.

“Ram pilril, hnim hnawk zingah sawn bâwng rual an awm asin. Um chhûak ila, Fort Worth-a hralh tur tlem azawng chu kan nei thei mai ang. I duh chuan sawi la, he laiah hian ni rei lo tê chhungin min pui tur mi sawmnga (50) zet ka rawn hruai thei mai ang.”

“Chutianga buaipui tham an awm em ni?”

“An tam mai; va ûm chhûak dawn chiah ila chuan ṭan pawh an khawh ve viau maithei a ni.”

Bob Lee-te ṭhiandun inthiar fihlim hnu chuan Cullen chuan an thu sawi chu a ngaihtuah zûi nauh nauh a, dik pawh a ti hle a. A hna thawk lai an rawn ṭhawng thut a nih pawhin silai inchhawp reng tluka ṭha chu a awm lo vang tih pawh a hre chiang a ni. Inremna thu sawi dawn pawhin rahbi nghet ṭha tak a awm hmasak hi a ṭul ber tlat a; chu vang chuan, spencer chu nei tho mah se pûakruk dang neih belh leh chu ṭha dawn hlein a hre ta a.

Cullen chuan a hnung lama thawm ri zawi tak a hriat chuan a hawi vat a; mahse, a tlai lu ta deuh tlat mai! Silai kaw hmawr chuan a hnungzangah a rawn hawlh nghâl dawt a, tu emaw hian a pûakruk pai chu a rawn phawisak ta mai a. A hnunga silai kaw hmawr inchuktuah reng avang chuan a spencer ken lai pawh chu hman ngaihna awm ta hek lo, a hum ve satliah ta ringawt a.

Chutah, a hnung lam aṭang chuan Chance Thorne-a âw tih hriat tak hian elsen deuh hian, “Kan lo lawm haw a che, Cullen, i thang bo hlen mai ang tih kan lo hlau hman tawh asin,” a rawn tih khum ta salh mai a.

Cullen tan chuan tih ve theih a awm tâk loh avang chuan a ngawi reng ringawt a. A ṭhiante pahnih kal tâ lah kha an thawm pawh hre phâk lovah an awm ngei tawh àwm si a; a hmabâk chu amah ngeiin a inhâi ven chawp a ngai ta tih pawh tu hrilh fiah mah a ngai bîk hek lo.

Reese âw ngei mai chuan, “Kan hruai haw dawn nge, he laiah hian kan hnutchhiah mai dawn?” a rawn ti ve ta a.

“Colonel khan biak a duh a; mahse, ṭan a lo khawh ngeiin a ring a; chuvangin, hmel phuai deuh pheng phung leh zawhna, phur taka chhang thei tur tâwk si-a kan hruai haw ngei chu a ṭul ang.”

Reese chuan, “Chuti chu eng nge kan la nghah?” tih leh hnek a rual nghâl ta mai a.

Mahse, Cullen chu a lo thle sawn zauh a, Reese-a kapah tak mai chuan a lo petsak ta nghek zâwk a. Reese-a na ti lutuk chu a ṭe ṭhawt a; chu veleh mi dangin Cullen chu an rawn bawh zûi ta a.

Cullen chuan pakhat chu hnar ruh tliak rawp khawpin a lo hnek leh siah a, a kut khing hnih vai buan buan chungin ṭan a lo khawh ve zel a; mahsela, an intam hleih deuh êm avangin a tukhumah tak pûakruk ngulin an vaw fuh ta hlauh a.

Cullen chu a ṭhingṭhi nghâl hnawk a, an rawn chhuih zûi ta Iuai luai a. A ṭhen chu lum sawn chungin a lo bum hman hram a; mahse, han bum sen vek rual an ni ngang lo a ni.

Chance chuan mi dangte chu a rawn keu âwng tawlh tawlh a, “Hei hi ka nghahna a rei tawh teh a nia!” tih pahin Cullen lu-ah tak mai chuan a rawn chhuih ṭhuai mai a.

Cullen chu a lo thlêk hman deuh avangin a nat tur angin a na ta lo hlauh zâwk a. A hnuah chuan hnim zingah a hmai phumin a thidang der ta a, a chau ve thawkhat tawh reng reng bawk nen.

A lu chu a na ut ut a, a keh dawn emaw tih tur a ni tawh a, chiang lo ruaia pakhatin, “Sakawrah hlang rawh u,” a tih lang lang ri chu a hre thei a. A derringer pai an hmu chhûak lo hlauh chu lawmawm a ti rilru kher mai.

Eng pawh ni se, an tih dan thungrul tur chuan dam chhuah leh ngei tumna lian tak a nei tlat a, a mala bei ngam lova an rawn beih rawn mai chu a ngaih thiam zawng a ni ve dèr lo.

Reese-a âw ngei chuan, “Ka thu ràwn che kha pawm la chuan, tunah hian i khai hlum ngei ang‚” a han ti leh lang lang a.

Hmusit âw fe hian Chance chuan‚ "I thu min ràwn ka pawm i hre tawh ngai em ni?" a lo tih khum hmiah thung a.

Sakawra an hlang chu chiang lo ruaiin Cullen chuan a hre thei a, sakawr a kal tâk hnu chuan an kawng zawh pawh chu khawi kawng ber nge tih a hre thuai a, ama ram chhung a la ni miau alawm. Chumi kawng an zawh zel chuan a tan beiseina a la awm thei dawn tih pawh a hria a, thidanga an la ngaih reng avang chuan an tih ang anga awm phawt a, hun remchang chuh ve chu a tum rilru ran a ni.

Amah phurtu, sakawra chuang ve pheikhawk leh a lu chu a inhnaih hle a, chu pa sakawr khenna spur chu sakawr kal zawng chuan a ri deuh chhak chhak a.

Dûm hmun awmna kawng kawi an thleng ta chiah tihin Cullen chuan amah phurtu, a chuanpui-pa pheikhawk chu a vuan thut a, a spur chuan a sakawr chu a khentir ta vak mai a. Chu veleh sakawr chu kawngṭum sir lam hawi chuan a zuang zawk a, dûm hmun an thlen rual rualin Cullen pawh chu sakawr aṭang chuan a let thla ve nghâl thawk bawk a.

Sakawra chuang ve chuan a sakawr a buaipui vêl chhung chuan Cullen chu vawi li emaw lai a zuang sawn hman tawh a, hnim pikah chuan a zuang lût ta zauh va; hma lam panin a tlan zûi leh nghâl zat a.

A hnung lamah chuan an au chel chul a, Cullen-a Iu chung lawk lawka hnim te chu silaiin an rawn kâp chhawk ṭhawt ṭhawt bawk a, a tlanna chu a diak tual tual a, tui awmna a ni ta thuai a.

Thingtum nal zul mai hi Cullen chuan a rap fuh palh a, Awle emaw tiin a kut chu a la vat a. Tichuan, ral lehlam, dûm kam chu a vâk thleng thuai a, a kamah chuan a let zûi ta tawp tawp a.

A Iu chu a na ut ut bawk a, a taksa chu a pum mai hian na ṭhem ṭhum hian a hre bawk a, a thisen tlem a chhuah bawk avangin dûmah chuan a dinhmun chu a lêtin a derthawng a ni tih pawh a hre nghâl a, a dinhmun chu rei a him lo tih leh minute rei lo têah chêt chhuah nghâl a ṭul dawn a ni tih pawh a hai lo.

A hnung lama au thawm leh tui dai ri bawrh bawrh a hriat te chu an rawn hnai zel a, an rawn ang bawrh bawrh bawk a.

Hei hi Cullen Baker-a'n a in Ieh lo a thlen leh hmasak ber zana a thil tawnte chu a lo ni ta a. A rilru-ah chuan thinurna leh hûatna nasa tak a rawn lût a, a chhan pawh awm lovin hetia sawisak hi a tâwk a ni a; mahse, anni chuan indo rawn puang mah se ani chuan a puang ve lo va, an chungah eng pawh lo thleng se, an cho chhuah hrim hrimah a ngai ve tlat tawh a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 10th, 2018, 3:57 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 4
(Rozami Pachuau)

A thaw chu a pangngai ta deuh bawk a ,a han mu rih vang vang a, chêt zel dan tur a ngaihtuah nghâl zung zung bawk a. Dûm kam, feet sawmruk (60) aia hla lovah a la awm tih a hria a, chu laiah chuan sangha a lo man fo tawh avangin chûng lai hmun awm dan vêl chu a hre chiang thawkhat hle tawh a, dûm aṭanga khawmual thui lo takah tui a rawn inkhawh chhûak mai a ni.

Chu bâkah, chu lai hmun chu mi pathum lai lo ei zo tawhtu, Awle; Gi Joe an tih mai chêttlatna hmun ber a ni a; mahse, a hleuh kai ngei a ngai a ni tih Cullen chuan a inhria a, huphurhawm tak tur chu a ni.

Chu lai hmun chu Chance leh Reese chuan minute rei lo têah an rawn hre chhûak ve ngei ang tih pawh a hre bawk a; khawmual lama a kir leh lah chuan rei lo têah an lo man leh mai dawn tih pawh thil chiang tak a ni bawk si a. A inngaihtuah fe hnu chuan a tho va, bai saih saih chung chuan chu lai lei sakhat kam lehlam chu a pan phei ta a.

A han chêt zawng chuan a nâk chu a na zawk zawk a, a ke lehlam chu na a ti hle bawk a. Awle chu hlau hle mah se a tan himna kawng dang a awm lo tih a hre bawk si a, a lo awm hnai a nih ngat phei chuan a thisen rim pawh a rawn hre thuai ang tih a hre chiang a ni. Mahse, amah rawn ûmtute chu a ti tim ve hle tho dawn tih erawh chu a hai lo.

Cullen chuan tui chu a áwm thlengin a dai a, a hleuh ṭan ta a. A naupan lai aṭanga tui chenchilh ve tawh ṭhin a ni bawk a, ke na chung pawhin ri mang lo chuan a hleuh thei ve mai a, a hleuh chak phian nghe nghe a.

A taksa chu silin chau hle mah se, lei sakhat awmna chu yard zahnih (200) vêl lai hleuh hnua thlen theih a ni chauh si a, chu lai hnaia Awle awm ve ṭhin chu ngaihtuah loh tum lui hram hram chung chuan a hleuh phei zel a.

A kalsan tâk lama au thawm a hriat tâk chulah chuan a hnu-hma chu an rawn hmu ta tih pawh a hre thiam ta mai a, a han hawi kir zawk a, dûm hmun sira khawnvar êng sup sup chu a va hmu thei ta a.

Eng emaw chen a hleuh hnu chuan a hma lawk, tui aṭanga thing ding chu a hmu ta a, a zung sang tak taka inkam kang uaih a nih avang chuan a zung thlár phena chawl hahdam turin a lawn kai ta vat a. Vâwt a tih deuh avangin a khur hlak hlak a, thing zung inbât kawkalh nuai kar remchang lai berah chuan a kawnghrenin a inhreng bet a, thosi vir nuai nuai karah chuan a chawl ta rih a.

A thihdan hmaa a thil hmuh hnuhnung ber chu ralkhata khawnvar êngte chu an ni mai a. A han harh leh meuh chuan khua pawh a lo êng ruih tawh a, dûm kama amah zawngtute riahbûk mei êng chu a lo la alh ṭha hlawm hle a.

A khaw hmuh a fiah loh êm avangin Cullen chuan a mit chu a han khawih a, a lehlam chu a vung phui lek lek tawh hi a lo ni a. A beng lehlam bul chu a duk ruih a, a lu chu a kak duai bawk nen, a taksa pum mai chu a na ut ut a, a ban vei lam chu spur-a khenna tih hriat tak hian a kak thûk hle bawk a.

A tawmna chu zan lamah chuan him hle mah se, chhun êngah chuan an rawn hmu thei thuai dawn tih a hriat avangin insawn vat a ṭul tih pawh a hre chiang a ni.

A mit lehlam avanga khaw hmu hmu fiah lo ruai chung chuan a han hawi kual a, a bihrûkna thingzar aṭanga ram hrui lo uai thla kara thing bung tang reng chu a hmu ta a.

Dûm kama awmte che vêl leh an ṭawngte pawh chu a hre pha a, a awmna aṭang chuan chhuk thlain thingtum chu a pawt chhûak ta a. Amah changtute âw aṭang chuan zu an in a ni tih pawh a hre thei a, an man leh vaih chuan a tan a pawi hle dawn a ni tih pawh a hre chiang êm êm bawk.

Thingtum chu a nawr sawn a, tuiah chuan a hleuh leh ṭan ta a.

Chu lai dûm hmun, peng ngah tak chu Lake Caddo peng khat mai a ni a, kum za (100) a ral leh pawhin tu ma'n an la hre chiang thei tak tak lo vang tih tur khawpin peng a ngah a. Dûm hmun leh chutiang hmun danglama lo chetla ṭhang a nih avangin Cullen chuan Texas leh Louisiana-a chutiang hmun chu belchiang thawkhat viau vekin a inhria a ni.

Thingtuma inphen pah reng chunga hleuh zelin vaukam lam chu a pan ṭan leh ta a. A kalna chu dûm hmun pilril zual lam hawi a nih avangin rawn chhui thiam pawh ni se, an rawn zûi chak thei vakin a ring lo a ni.

Cullen chuan mi hriat ve miah loh thliarkar a tih mai chu thlen ngei ngei a tum ran a. Chu hmun chu chhim leh hmar indo hma pawh khan mi pakhat bâk hre chiang thei an awm lo va, a hnuah an inhruai te a nih ngawt loh chuan hriat belh an awmin a ring lo bawk a ni.

Chu thliarkar chu ram hrui hnawk tak takin a hliah tlat a, a panna hmun pawh lily par leh tuia nung chi, thlai ṭo mak tak takin a hliah phui mup a. A len lam pawh mel chanve tling lo mah tur, yard za (100) ai maha zim a ni a, a hmun sang lai ber pawh fit ruk (6) aia hniam an ni deuh vek mai a, yard sawm pahnih (12) vêl aṭang chuan hriat mai theih pawh a ni meuh lo.

Caddo Indian-ho chuan an hre nual a, chumi tih lohvah chuan chûng lai ram chheh vêl hnaivaia cheng Caddo leh Negro inthlah pawlh hovin an hre leh nual a ni chauh va, chu chu thil awm dan chu a ni mai àwm e.

Chutiang thliarkar chu a dang pawh a awm nual a; mahse, a dangte chu a aia langsar leh tê zâwk an ni hlawm. A enga pawh chu ni se, Boston, Texas aṭanga lo kalte chuan an hre kherin a rinawm loh a ni.

Hnim zing aṭang chuan kanghlai a rawn thlâwk chhûak phut a, tui hrut dalh dalh chungin a thlâwk sawn leh ta a. Cullen chuan lu na leh sil ṭhem ṭhum chungin a hleuh zel a, a lily tawn kûakte chu a hnung lamah chuan an insi khâwm leh nghâl zel a.

Eng chena thui nge a kal tawh ang? Mel khat nge mel hnih? Amah rawn zawngtute chu a theih anga kal hlatsan tum ve hram hramin a hleuh fat fat a.

Vaukam a thlen hmaa an rawn nan hman hlauh chuan invenna tur derringer chauh a kawl tawh tih a inhre reng bawk a, hla deuha mi kah nan phei chuan a hman tlâk dèr si loh; chu lo rengah, an sawisakna avang chuan a chauvin, chawlh hahdam rih pawh a chak êm êm bawk si. A thliarkar pan mekah chuan Bob Lee, Bill Longley leh Bickerstaff-te chuan an lo nghah ngei a ring tlat a ni.

Ni chu a sa hle tawh a, tui chu a che miah lo ni hian a lang a, a changin tui leh lily par buk lutuk chu hêl a ngaih chang a awm leh zauh bawk ṭhin a. Cullen chuan Awle chu a awm hnai a nih chuan a rawn inlan daih tawh pawh a ring a ni.

A taksa a chauh êm avang chuan tui hleuh chu harsa a ti tial tial a, tui chu a thûk deuh avangin li mawng a dai phâk lohna pawh a rei tawh a, a la hleuh kang reng a ni. A taksa a chauh mai bâkah a tui hleuhna avang ngawt pawh chuan chauhna tham a ni ve reng reng tawh si a.

Ni a sat êm avangin a tui pawh a hal huam huam a, tui hleuh reng e ti lo chuan tui in tur a nghei tlat a; a chhan pawh dûm tui a ni miau va, in theih ni bawk mah se, khawsik a hlau tlat a, a insum a ni. Khawsik a kai lo chung pawha buaina a ngah tawhzia Cullen chuan a hre chiang êm êm si a.

Chau tak leh khua pawh hmu fiah bàr tawh lo chunga a han hleuh leh zak zak hnu chuan thingtum a kuah chu leiah a innghat pha ta hlauh a.

Peih leh peih lova han meng hram hramin Cullen chu a han hawi vêl a, chu thliarkar a thlen tâk chu a la hmuh ngai ni pawhin a hre lo va; mahse, vaukamah chuan a lawn kai ta vat a.

Tui aṭanga a chhuah veleh chau zet hian a mu zawi nghâl thlawp a, a thil ngaihtuah te chu a buai nuai a, a han tho chhûak leh tur te chu harsa a ti kher mai. Dûm hmuna luh tawh chuan mi chak loh leh chaute'n rei an daih ngai lo tih pawh a hre chiangtu a ni a; chu vang chuan chêt thuai thuai a ṭul a ni tih pawh a hre chiang êm êm a ni.

Vaukam bul hnai a kalsan chuan thing a tam bawk a, a thim deuh chhulh a, lei chu a thim deuh ruai a, a hnawng churh mai bawk a. Cullen chuan Diamond back rattle snake a tâwk sual ṭhelh nghe nghe a; mahse, a hmu hma hlauh va, fimkhur takin a hêl thei ta hlauh zâwk a.

A chau lutuk chu a ṭhingṭhi hnawk a, thawh chhuah leh pawh harsa a ti kher mai. Chiang lo ruaia engkim thlir chungin a kal leh hram hram a, a chang chuan nghawng thleng hmawka thûk, tuiah te a han tla leh rih pawrh ṭhin a.

Nakinah zawngin a ram vêl pawh chu a lo hriat tawh hnu a ni tih a hre chhûak leh thei ta a. Hmun thlengthaw lai deuh a thlen hnu chuan a ṭhu hnawk a, a bawkvâk ta ngawt a, chutih lai tak chuan Bill Longley chuan a rawn hmu fuh ta a.

Cullen chu an khawih sil-awng nasa bawk a, ni thum lai chu eng mah hre mumal lovin a awm a. Ni thum hnuah chuan tlem tlemin a ziaawm ve leh ta hret hret bawk a, a rilru-a thinurna nasa tak chu hûatna ril takah a inlet ta a ni. Harsatna tam tak tawn tlanga a lo haw lehna chhan te chu chán mai dawna inhriatna a nei a, a beidawng rilru hle mai a.

A ngaihtuahna chu a vâk thui hle a; a thil tawn avanga beidawng mai turah erawh a indah thei bawk si lo. A inring lo lai khawih rawn a niin, sil-awng hle mah se, a nihna chu theihnghilh tur leh a tira a tum pangngai chu tum luih hram hram tho ṭha berin hriatna a nei nghet ve ta hmiah a.

A tir chuan amah khawihtute chu silai nen a mal tê têa zawn chhuah a han rilrûk deuh va, Chance phei chu a hnuhnung bera muangchanga thah a châk tlat a, nuamsa taka thihtir mai atan chuan a ui tlat a ni.

Mahse, inthahna a tam tawhin, a tawpah chuan eng nge a dinhmun ni ta ang? Outlaw; man nei nih chiah a hmabâk dawn a ni. Tunah hian sawisak tâwkin, che chhe hle mah se, ama ram chhung ngeiah a nih avangin hriat thiamna, mahni inthiamna lian tak a nei tlat a ni.

Chu thliarkarah chuan mi dawrzawn khat tur zet hi an lo awm a, Bob Lee, Bill Longley leh Bickerstaff-te pawh chu an lo awm ngei a. Chûngho chu Taxas-in Mexico laka zalenna a sual chhuah laia anmahni lêt tam tak Mexico lo thih chilh a, Alamo leh San Jacinto-a nunna lo petu, Texas-ho nen khan danglamna an nei lo reng reng a ni. An pian hun a inang lo chu an danglamna awm chhun a ni deuh mai àwm e.

Chûngho titi ngaithla chung chuan Cullen chu a inngaihtuah nasa hle a. Hmun pakhat, kil thuma dûm hmunin a hual vêl vek, Fairlea a tih mai, a pa-ina tlawm têa a lo lei, langsar lo leh kilkhawr taka mi chu a ngaihtuah chhûak ta a. Chu lai hmun chu a pa ta a nih hria an awmin a rinawm chiah lem lo va, a tan pawh tawm bona ṭha tak ni thei dawnin a hre ta a.

Cullen-a ngaih dan chu Bob Lee chuan, “Hmelma i ngah lutuk, thlai chu lo ching pawh ni teh reng mah la, sengna hun i nei thei chuang lo vang," tiin a lo hnial ve thung a.

“Mahse, ka rilru put dan a ni miau si a; man ngawtna chhan tur thil tih sual ka nei lo. Chance Thorne khan ama duh thua thil rawn ti mai a nih ka ring; chuvangin, min rawn ti buai zûi lo thei ve tlat a ni.”

Longley chuan hul hak hian, “Maithei; mahse mi ṭhenkhat, nangmah hre chiang lem lo, i mizia pawh la hre miah lo an awm ngei dawn a, mihringte hian kan hlauh zawng reng reng chu nuai bo kan tum zel bawk si a,” a lo ti leh bauh a.

“Thil dang ngaihtuah tur ka neiin ka hria; chu chu Barlaw a ni. Ramhnuaia a tawm bo hlanin a thil rûk, mi thah leh a suahsual rawng bawl reng reng mai chu kan tihah a puh zel mai a,” tiin Bickerstaff chuan thu dang a rawn sawi kai ta a.

Jack English chuan, “Thil awm dan hrilhtu ṭhian a nei ṭha a, sipaiho awm lohna apiang hi a hre thei riau mai lehnghâl a,” a lo ti ve bawk a.

Cullen chuan Fairlea hmun chu a lo ngaihtuah leh daih tawh a, vanneihna nen chuan tu ma hriat lohva thlai thar theih a la inring fan mai a; chumi hlâwkna chuan bâwng rual khalh khâwmin Sedallie emaw, Mountgomery-ah emaw a sumdawng thei dawn a ni.

Mahse, a thil hriat chian êm êm chu, a hma anga sawisak a tuar leh hmain hremhmun lama liam tlan dial a thlang zâwk a; chu chu ti tura a pên chhuah a ngai. Chu lam a ngaihtuah tâkah chuan a silai an chhuhsak vek tih a han hre chhûak leh thut a, chu vang chuan a rang thei ang berin spencer rifle leh dragon colt a mamawh hmasa ber a ni.

Chutah a tho va, Bill Longley-a'n a sabengtung a rawn hruai thlensak chu lawm takin a pan phei a, a saddle a phah mawlh mawlh lai chuan, “Kal tumna i nei em ni, Cull?” Bob Lee chuan a rawn ti a.

“Ka silaite kha ka mamawh dawn si a, ka va lam teh ang,” Cullen chuan a lo ti mai a.

Phul zinga mu chunga hnah seh vêl mai maitu, Longley chu a rawn ṭhu chhûak nghâl vat a, chîk deuh hian Cullen chu a rawn en a.

Bob Lee chuan, “Nangmah maia kal i tum em ni?” dam duam hian a han ti leh a.

“He lai ramah hi chuan mipa chuan mahni sakawr an hmang ṭhin chu a nia lawm, in lo kal ve duh a nih pawhin ka hnial lem lo.”

Longley pawh chuan, "Thil awm dan hmuh ve ka châk tlat mai,” tih leh thawh chhuah a rual ve nghâl a.

Tichuan, mi palite chuan khua chu an panpui ta a, chûngte chu Bob Lee, Jack English, Bickerstaff leh Longley-te an ni. Cullen chuan amah thlawp tur chuan chutiang mite bâk chu beisei tur dang an awm tawh chuang lo tih pawh a hre chiang êm êm a ni.

**************************

Jefferson khua chu ni sa tak chuan a hem tlawk tlawk a; kawng sir, mihring kalna tura dawh sanah chuan naupang pakhat hi a zuang lauh lauh a; kawtthler lai takah chuan ui pakhat hi vaivut zingah thatchhe fahran mai hian a mu hlu hlu bawk a, sakawr chung chuang hovin an rawn kal pelh pawh chuan tho chuang lovin a mei a vai peih ṭâwk chauh a; mi pahnih hi dawr bathlar daihlimah chuan an muthlu bawrh bawrh bawk a.

Kawtthler chu a reh hian a reh tlawk tlawk mai a, tu pawh rawn têi chhuak mah se mi vâk-rawlai tam lai a nih avangin sakawr chung chuang pangate chuan mak tih pawh an hlawh a rinawm lem loh. Cullen pawh chu a hmel chiang taka lo hmu tawhtu Reese tih loh chuan an hre kher lo maithei bawk.

Cullen chuan a sabengtung chu a pawt ding a, a chhuk ta a.

Dawr tukverh darthlalanga ama thla chu chiang takin a hmu thei a; a thawmhnaw hâk hlui tawh dan leh a kawr tâwt dan te pawh chu a hmuh hmaih hauh lo. Pawisa neih hmasak bera thawmhnaw a lei Ioh phei chuan rûakin khawlaia a len a ngai thuaiin a ring hial a ni. A sam dum ṭha tak chu a dàr thleng deuhthaw a ni sung tawh a, a hmawr chu tlemin a kawm a.

A dinna lai chu sipai Headquarter kawt zâwn chiah a ni a, Cullen chuan kawngkharpui chu a hawng a, a pên lût ta a.

Kawngkhar bulah chuan sipai pakhat hi chair-a ṭhu chung Ieh a mal chunga rifle khang ruah hian a lo muthlu ang phuau mai a. Cullen lo Iût thawmah chuan a rawn harh vat a, a silai leka din chhuah mai tum hmel hi a pu a; mahse, Cullen-a mitmeng, nelawmna tel miah lo a hmuh tâkah chuan a che sawn ngam Ieh ta lo va. Rawn che vaih se chuan, tho leh tur awm hauh lova kuk thluk tawp mai Cullen chuan a duh a ni.

Chu sipai chu a la junior hle tih a hriat theih a, mihring chu sawi loh, thehlei bâk a la kâp hlum dawn em ni tih mai àwm hi a ni a; chuvangin, a bula pa rothap hmel zet mai, hmel bumro leh pawisak nei lo hmel tak mitmeng a han hmuh chuan chêt zûi chi a nih lohzia a hre chiang ve hle ni ngeiin a lang.

Colonel Belser chu a chair-ah chuan ãwn du hian a lo ṭhu a, lehkha pawimawh hmel tak tak hi a lo bih vung vung a. A pindanah lo Iût an awm tih a'n han hriat chuan a lo en vat a, a hmelah chuan a hre nghâl mai a ni tih leh a lawm lo hle a ni tih chu a hriat theih a.

Cullen chuan thu pehhêl set set lem lo tak hian, “Colonel, hman zanah ka ramah Chance Thorne leh a hote lo kalin min rawn ṭhawng thut mai a; min sawisak hrep bâkah ka spencer leh pûakruk min chhuhsak a, chumi chu la lêt leh turin ka lo kal a ni,” a han ti nghâl tawng a.

Belser chuan a han tih dan teh tawng chu mak a ti hle a; mahse, mi ã a nih loh avangin a ṭawng chhuah hma chuan a han inngaihtuah hmasa rih tê tê a.

Chance khan ama thuin a rawn tàwng ni ngeiin Cullen chuan a hria a, Chance chu thil ti thei tâwk tak a nih bawk si avangin Colonel pawh chu a inngaihtuah hmasa tê tê niin a lang. Chutah, rawn ṭawng chhûak tâin, “An sawisa che a nih chuan i phu ve reng a ni mai alawm; silai chungchang chu hriat ka nei hauh lo mai,” tiin a chhang ta a.

“Hêng lai ram angah hi chuan mi tinin silai an mamawh a, mi ṭha lo tak tak tawn tur an tam si a, ka silai chu ka mamawh a, ka duh a ni, Colonel.”

Chutia Cullen-a'n a han tih tâkah chuan Belser hmelah chuan a thinur hle tih a hriat theih a. Chu laiah chuan lal ber a ni a, chutianga zahpah lo leka ṭawngkam phuh chhuah khumtu chu a la tawng ngai lo reng reng a ni.

Thinrim zet hian, “Baker, he lai aṭang hian thlâwk chhûak nghâl vat rawh! Khua hi chhuahsan nghâl vang vang bawk ang che! I silai chungchang eng mah hriat ka nei lo; i chanchin ka hriat phat aṭang rengin silai nei lova i awm hi a ṭha phian zâwk ta ve ang,” a ti ta phiar phiar mai a.

Cullen chuan eng mah sawi set set lovin Colonel dawhkana dragon colt chu a la a, a mu inthunna lai chu a han tuai vir a, a mu pawh a lo inthun khat ṭhap bawk a. Chutah, aw nem dap hian, “Chuti a nih chuan, hei hi ka hmang mai aniang chu, silai ṭha ve tak chu niin a lang,” a tihsan ve ta mai a.

Colonel Belser chuan, “Rang deuhvin dah rawh, ka silai a nih kha!” a lo ti vin leh hlur a.

Cullen erawh chuan chu thu pêk chu pawisa lo zet hian chu colt chu ama kawnghren karah chuan a zep ta daih a. In daidangtu atana an siam, pal ang deuh chu a kân a, rifle intun tlar tuarna lam chu a pan phei leh ta ngat a. Rifle eng emaw zât intung ṭhut zinga spencer rifle chu a la a, a han endik leh zung zung a, chutah pawh chuan a mu a lo inthun khat leh ṭhap a.

Chu veleh Belser chu a ṭhutna aṭang chuan a rawn tho va, a rawn pan phei tur chiah chu a dul zâwnah tak spencer rifle kaw hmawr chuan a lo chuktuah khum ta teu mai a. Belser chu a ding chawt a, a mitmeng aṭang chuan inphah hnuai zâwk nih leh dâwih zâwka ṭan chu a hreh hle tih pawh a lang thei a.

Cullen chuan aw dam thlap hian, “Colonel, he lai ramah hian mahni hna chauh engto turin ka lo haw leh a, tu nen mah buaina neih ka duh lo. Mahse, beih rawn Ieh sawisak ka tâwk nghâl kau si a, min khawihtute pawh ka hria a, a hun ka tih hunah chuan an vaiin Pathian lehkhabu thianghlim ka la chhiar khum anga ti nia.

“Nang pawhin he lai hmunah hian buaina i duh lo niin a lang a; buaina a awm a nih chuan Washington leh Austin khaw lam aṭang pawhin i che fel tâwk lovah an rawn ngai maithei a, min ti buai tawh lovin‚ Chance Thorne hnenah pawh lo inham buai tawh lo turin hrilh bawk rawh. Min rawn ti buai leh a nih chuan he ram aṭang hian ka ûm chhûak ngei ngei ang che,” tiin a vau ta chher chher a.

An bul hnai maia sipai awm ve pawh chuan buaina a chhuah mai hlau ni àwm takin lei lam a bih ngar reng ringawt a, Cullen pawh chu eng mah dang sawi leh tawh lovin a chhûak ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 11th, 2018, 8:10 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 5
(Rozami Pachuau)

Kawtthler lehlama dawr bathlar ban ngheng hian Bill Longley chu a ding a, cigar dum hi a pet khu hlat hlat a. Bob Lee pawh chu an sakawr thlun khâwmna bulah chuan a lo ding bawk a; kawtthler tawpah chuan Jack English pawh chuan a Bowie chemtê chuan thing a lo thel nawi vêl mai mai bawk a.

Longley chuan, “He lai hmun kan thleng ta sâ sâ bawk a, tlem chu han lem hlek ila maw le,” a han ti a.

Jack erawh chu buaina thleng thut thei reng a nih avangin a awmna ngaiah chuan ral vengtu angreng deuh hian a la hnufual rih a; mi dangte erawh chuan saloon lam chu an pan phei ta dam dam a.

Chutih lai tak chuan Joel Reese pawh chu a rawn pên chhûak ve ta chiah a, a han zi mar tur chiah chuan a rin loh deuhvin Cullen leh a ṭhiante chu a hmu ta thut mai a, chu veleh a hmel chu a dáng ta sâwp sâwp a.

Cullen chuan aw pangngai leh dam thlap si hian, “Bob, he pa hi min rawn kawm hlimtute zinga pakhat chu a nih hi; Pathian thu tlem chu han hrilh ve hlek ṭhain ka hria,” a tih khum ta charh charh a.

Thutak hmel fe hian Bob Lee pawh chuan, “A nih tak chu. Chuti a nih chuan, Joba bung 4 : 8 thu kha han chhiarsak la a ṭha ang e,” a lo ti ve mai bawk a.

Joel Reese chu a tawlh kir nghâl vat a, ṭanpuitu beisei tih hriat zet hian a hawi vêl ruai a, a inthiar fihlimna tur àwm berah lah chuan Bill Longley chu a lo ding tau tawh bawk si a, an hual chêp chu a ni ta reng mai. Bill Longley chu la naupang hmel hle mah se, han en mai pawhin zuam ang ngawt zawng a ni dawn lo tih a lang reng bawk si nen.

Reese chuan eng emaw hi sawi a han tum deuh zuau zuau a; mahse, Cullen chuan thu sawina hun awma a hriat loh avangin a hmuiah tak chuan a bensak ta thlawp a, pa lian leh hna rum thawk rim tak ṭhin a ni bawk a, Reese chu a inher lawih mai a.

Reese chuan Cullen chu hnek a han tum ve a; mahse, ani chu a lo thle zauh a, a hmuiah chiah bawk chuan a han beng leh chawrh a, Reese hnar aṭang chuan thisen a rawn baw ta zawih zawih a.

Kawngkhar bul maiah Colonel Belser chu a rawn chhûak thleng ve tawh a, rifle a keng bawk a, “Hey, duh tâwk tawh rawh u!” a rawn ti khur khur a.

Bill Longley chuan a pûakruk a lo phawi fel hman reng tawh a, Colonel en chung chuan, “Mister Belser, bawh chhiatna rah hahthlâkzia entir mek i ni a; i bawh chhe thui zel a nih phei chuan i dulah khan ngen mu i pai thuai mai ang, a ṭul lova ṭawng duh viau hi a pawi a nia,” a ti ta a.

Colonel tan chuan a silai hmang tur chuan inher rem tê tê a ngai a; Longley lah chuan kah mai inpeihin pûakruk a hum ran tawh mai bâkah, a piah lawkah Jack English chu inpeih atin a lo ding ve tau bawk si a; chu vang chuan a tan, silaimu pumpelh thei tura silai han chelek ve chu tum chhin chi a ni tawh lo tih pawh a hre ve ta thuai a. Office chhunga a lo inkhung ta mai mai zâwk lo chu a inchhir ve hle tawhin a rinawm.

Cullen chuan, an lo sawisak tawh dan te chu la hre rengin Reese chu dim lo baksak hian a khawih a, ani lah chu a pai nawk nawk a. Cullen chuan, “Min tih buai leh chuan silai chelek a ngai tawh ang,” a han tih khum salh a.

Chutia Reese an sawisa lai chu a office tukverh aṭangin Judge, Tom Blaine chuan a lo thlir reng a, ani hi chu Carpetbaggars a ni ve lo va, Mexican war-ah pawh a lo tel ve hrep tawh a ni. Jefferson khua chuan, chûng mi thar nikhua lo tak tak an hlau êm êm mai ṭhin chu pawm zam mai mai harsa a lo ti ve hle ṭhin zâwk a; chu vang chuan, Cullen leh a ṭhiante'n Reese-a chunga chutianga an han ti pawh chu thlir nuam a tiin lungawithlâk a ti hle a ni.

Cullen-a'n duh tâwk a ngah hnu chuan a ṭhiante chuan an lo nghâk ṭhap a, an piah deuha dawr pakhatah chuan silaimu lei turin a lût ta rih a.

A mamawh tâwk a lei zo fel âwrh tih chuan Katy Thorne chu a rawn lût ve ta a. Cullen-a hmel, la dawldang tak leh la bui char mai a han hmuh chuan mak a tiin, a rilru pawh a na hle ni hian a hriat a. “Chance chuan an thil tih dan chu min hrilh a; mahse, heti êm êm hi a ni ang tih erawh chu ka lo ring hauh hlei nem,” Cullen hnenah chuan a ti ta hial a.

“Chance chu a falin ka la kawm ang e," Cullen chuan a lo ti awlsam ve mai a.

Katy Thorne chuan a bana vawn pahin, “Cullen, an awmtir mai mai dawn lo che tih i hria a, engah nge i kal bo daih mai loh? Mi dangte'n ti buai lo che mah sela, Chance hian a la chawk buai tho tho dawn che a ni, a haw riau che a nia,” a han ti a.

“Ka tlanchhe dawn lo, he laia ka awmna hi ka ram a ni miau a, thlai thar ngei ka tum a ni. In Ieh lo pawh ka pa duh ang ngeiin din ka tum bawk; ka inthiar fihlim mai chuan a bul a lo ṭan tawh zawng zawng kha a thlawn a ni mai dawn a ni.”

“Nangma tana thawk a ni a; tunah chuan hna ni lovin, nangma himna tur hi a pawimawh tawh zâwk.”

“Min ning viau a ni maw?”

“Chutiang lam a ni lo, la dam reng rih turin ka duh êm êm zâwk che a ni.”

Cullen-a chuan Katy chu a han en vang vang a, a tum loh deuh hian, “I awmna hmunah lo chuan nung tak takah ka inngai lo vang,” a ti ta a. Chutah, a inher vut a, rang deuhvin pawnah a chhûak ta daih a. A thu sawi chu eng vanga han phuh chhûak ta ngawt nge a nih pawh a inhre lo va; mahse, chu aia dik chu a sawi a la hre tlat bawk si lo.

Tun hma chu ni se, mahni zawlpui bul ni lova chutiang thu han sawi chu a dinhmun a derthawng hle maithei a; mahse, Cullen chuan chutianga a rilru ang chiah a phuh chhûak ta mai chu ṭha zâwk dawn tlata hriatna a nei tlat zâwk a.

Mahse, Cullen chuan dawr tukverh darthlalanga a lan dan chu a ngaihtuah lêt a, hmeichhe han hip thei tur hi amahah chuan awm lo hlein a inhria a. Pa lian tak, thawmhnaw ṭha fumfe pawh nei lo, inbeihnaa tel fo ṭhin a ni ringawt a, mi pawh a lo that fo tawh lehnghal. Heti taka mi en tlêu leh dan chêp mek hi nulate chuan engah teh lul nge an han ngaih san tawh ang ni?

Bob Lee chu thil chinchang man chak tak a ni bawk a, Cullen-a chu a lo en vang vang a, “Ka dem hauh lo che a nia, Cullen,” a lo ti nghâl mai a.

Jack English chuan, “Dema dem Ioh turin eng angin nge maw a awm le? Joel Reese-a a khawih phar deuh vang kha em ni? Kei zâwk chu ni ila, kha ai khan ka khawih nasa maithei asin, mi nikhua lo lutuk tak a ni si a,” a lo ti daih thung a.

Bob Lee chuan, “I kalna apiangah a zûi hreh hauh lo vang che,” a lo ti leh bauh a.

“Hmusit mai lo la a ṭha ang, Bob!”

“Chutiang lam a ni awzawng lo. Hmeichhia tu mah ka hmusit ngawt ngai lo‚ Cullen. Mahse, tuna mi kha chuan a hmangaih tak zet che a ni tih ka hre thei a ni.”

“Chutiang lam pawha sawi chi a nih loh chu! Hmeichhe fing pangngaiin engah teh lul nge min tih ang ni? Eng chen nge ka la dam dawn tih pawh hriat a ni si lo. Hmelma nei ṭheuh kan ni a, eng chen nge kan dam dawn hriat a nih loh hi.

"Nang pawh Peacock-ho nen in inhua a, kei lahin Chance Thorne hmelma ka nei a; he lai ram rawn siam ṭhat tumtute nen! Thil pakhat ka hrilh ang che, Bob; thil ni thei ni lo mah se, min nei duh a nih pawhin tu mahin ka ruang rawn ṭah lo turin ka duh a ni. Hetiang hi ka hmu tam lutuk tawh tlat!” Cullen chuan a ti ta duah a.

Rei vak lo an chawlh khâwm hnu chuan kal zai an rel ta a. An sakawrah chuan an lawn kai a, ngawi rengin an kaltir ta hlawm a.

Bob Lee chuan sawi zawm lehin, “Hmangaihna hian awmzia a nei vakin ka hre lo, Cullen. Thisen leh tisain an inhmangaih a; ngaihtuahna ni lovin an rinawmna pawh dûm hmun tui chen leka pawnlang a ni bawk; inhmangaihte chu lo induh ve mai mai hlawm teh se,” a han ti leh bauh a.

“Kan inkarah chuan chutiang thil eng mah a awm lo. A patea; Will Thorne hi ka'n ngainat deuh vanga min khawngaih ve mai a ni lek zâwk ang.”

“I ngaih dan dan le. Hmeichhe chanchin hi i la zir deuh zawng a ngai ngei dawn a nih hi, Cullen.”

Mahni tâwka thil hria nih duh ve nâk alaia chutia Bob Lee-a'n a han ti ta mai chu Cullen-a chuan ngaihthlâk nuam a ti fahran lo hle a. Hmeichhia eng emaw zatte chuan an duh leh hmangaih thu te pawh an lo fah ve tawh ṭhin a; mahse, Katy meuh erawh hi chuan ani ang hi chu duh ve thei tak tak turah a ngai pha lo reng reng a ni.

Jack English chuan, “Belser hi rei fe chu ka lo mitmei tawh ṭhin a, Katy Thorne leh Petraine nuthlawi hi a ngaihven riau a ni. An pahnih hian a duh a; mahse, Katy chu a biak vaih chuan, lo that mai duh tur an awm a, Petraine nuthlawii lah hi mahni inveng thei tak a lo ni bawk si a,” a lo tih zawm ve a.

Hei hi Cullen-a'n Lacy Petraine-i chanchin an sawi a hriat hmasak ber a ni a, a chanchin chu an sawi zawm bawrh bawrh a.

New Orleans lam mi leh mi thar a la ni a, New Orleans a thlen hma pawh hian hmun hran hranah a lo cheng kual ve nual tawh a ni àwm a; pawisa fai pawh a nei nual a, hetiang hi heti lai hunah hi chuan thil vang leh hlu tak a ni.

An sawi danin, nula hang ngaihno bei tak leh Lady dik tak a ni a; khawthlang lama pem duh mi ṭhenkhat in leh lo a leisak a, engtin nge cheibawl a tum tih erawh chu hriat a ni chiah lo.

Chumi zan chuan Cullen leh a ṭhiante chu an awmna thliarkarah chuan an titi laih laih a, Sam Barlow chanchin bawk chu an sawi leh ta a. A hma lawkin San Augustine khuaa Sam Barlow-a'n mi in a hal thu leh mi pakhat thata a ram a rûksak thu Matt Kirby-a'n a rawn thlen a ni.

Jack English chuan, “Kei chu, he lamah a lo kal a nih chuan he lai ram aṭanga ka ûm chhûak lo a nih vek pawhin, khai hlum nghâl mai ṭhain ka hria,” a ti lang lang a.

Chu thliarkara awm khâwm mekte chu hmun hran hrana ṭhian nei an nih ve hlawm tho avangin chanchin thar chu rang takin an hre ve zung zung thei tlat a. Sam Barlow chu mi hlauhawm tak a ni a, a thil tih chu anmahni tiha puh a nih zel chuan thu thar rawn thlentu, ṭhian pawh an nei lo thuai ang tih an vai chuan an hre chiang a ni.

A tûk zingah Cullen chuan a sabengtungah chuan saddle a phah mawlh mawlh a, chu thliarkar chhuahsanna tur remchang‚ kal-khàn; lei kawrawng ti mai ang, tui hnuai lama awm daih, zau lo tak chu a zawhpui ta a.

Chu kawng chu fimkhur taka zawh a ngai a, dai sual palh vaih chuan a hnuai lam thûk taka tui leh chirh awmah chuan tlâk hmiah a ni mai dawn a. Chu kawng chu Caddo Indian pakhat hrilh a ni a, Cullen chuan a ṭhiante hnenah a hrilh chhawng ve leh a.

Dîng takin a hma daih aṭanga a lo ngaihtuah tawh, Fairlea lam chu a pan ta vang vang a. A hla teh chiam lem lo bawk a, a hmaa an ram pakhat buaipui a tum ai tak phei kha chuan ram pawh a ṭha zâwk a. Mahse, a huan-thlai siam tumna tak chu Fairlea aṭanga peng lehchhawng, Acres za (100) vêl zeta zau; mahse, thing hmunin a daidan thliah thliah hi a ni a, chûng lai hmunte chu awlsam têa inpawh zung zung theih a ni.

Tun hma chuan chu lai hmunah chuan in ropui tak a awm ṭhin a; mahse, Cullen-ate chhung lo thlen ve hmain a kang ral vek hman tawh a. A neitupa chuan a ram chu Cullen-ate chhungkaw hnenah hralhin New Orleans lamah a pemsan ta a. A ram leilung a ṭhain thlai chi tinreng ngeih tur khawpa duhawm a ni.

Fimkhur taka a kal lai chuan sakawr ke pên thawm a hre ta a, chu a thawm hriat chu ngun lehzual hian a ngaithla ta ran a.

Chu lai kawngṭum chuan zawhtu a nei ngai lo hle a, a hnim nasa tawh mai bawk si nen; tunah phei chuan a hma aiin chu lai kawng zawhtu chu an tlem fe tawh lehnghâl si a. Chu bâkah, chu lai hmun rawn tlawhpawhtu chuan kawng ualau zâwk a zawh loh avang chuan a inthup ve hle a nih a rin theih bawk a ni.

Ṭhal lai, boruak nawm lai tak a ni a, ni pawh a sa ṭha fu mai a. Cullen chuan sakawr thawm a hriatna lam hawiin pal chungah a spencer chu a nghat a, a lo nghâk ta ran a. Chutia inring hmasaa a lo ṭang thei hlauh chu vanneihthlâk tak a ni; a chhan pawh, a mi nghah chu Sam Barlow a lo ni.

Barlow chu pa lian leh sa ṭha nulh mai, áwm hmul dur mai hi a ni a, a chanchin hi a ṭihbaiawm zawng pawhin a thang nasa hle reng a. Indo lai khan Guerilla-ah a tang a; chumi hnu chuan ama mi ngopuite vek chu fimkhur tak chungin a suasam ta ṭhin a. Tunah pawh hian Recontruction-ho chu inhliah khuh nana hmangin Louisiana Ieh Arkansas vêlah pawh mi a suamin mi nunna pawh a la nasa hle a.

A thil tih tam tak chu Bob Lee-ate mawh phurh tir a ni tlat mai lehnghâl a. Amah hi pa fing kherkhiap lutuk tak mai leh pawisak nei lo zet mai a ni bawk a, sipai-ho awm lohna lai te hi a hre thei phian lehnghal a. Amah zûitu, sakawr chung chuang sawm pahnih emaw lai turte chu hmel pawr leh rinawmna tlachham tak tak hlir an ni tih pawh a hriat theih a.

An inkar fit sawmnga (50) emaw vêl chauh a ni ta tihah Barlow chuan Cullen-a chu a rawn hmu ta a; a thil hmuh chu âwih harsa a tih hmel hle a.

Barlow chuan a ha eng ṭhut mai lang ṭhua cigar a seh kawh vu chu a la thla a, “Chibai, he lai vêlah hian i cheng a ni maw?” a han ti ngawt a.

Cullen chuan a spencer chuan Barlow-a áwm chu a tin zâwn siah a, “Aw, he lai vêlah hian ka cheng,” a han ti lêt ve siah a.

“Ka hming chu Sam Barlow a ni.”

A hming a sawi avanga Cullen-a chu ti zam mai tura a lo ring a nih ngai zawngin a ti sual chhiava ngei ang le. Barlow aia pa hlauhawm leh deh khirh tak takte pawh lo tawng tawh ṭhin tan chuan a ho tham sit set êm mai!

“Tu nge i nih chu hrilh ngai lovin ka hria. Hmar lam ram i rawn dai thûk hle mai maw?” Cullen chuan a ti ve mai a.

Barlow chuan, “Hei aia hmar lam hi ka la pan cheu dawn. Ka hmun ngainat zawng tak a ni,” tih pahin a cigar zûk bung chu a pet kawh leh a; chumi rual deuhthaw chuan Cullen-a spencer lek kawh reng chu a hmu ve ta chauh va. A hmui chu a pet fun a, fimkhur taka meng sur chungin Cullen-a chu a en ta reng mai a, “Tu nge maw i nih hrep le?” a han ti a.

A hmelah chuan a thinur hle a ni tih a hriat mai a, .56 caliber silai chu sut luih ngei tum hmel a put avang chuan an sawi ang êma fing chu niin a lang ta lo. A mitmeng aṭang chuan chêt mai a tum a ni tih a hriat a; mahse, a hnung lawka sakawr chung chuang pakhat chuan, “Sam, Cullen Baker-a a nih kha,” tiin a rawn hrilh ta a.

Chu veleh Sam Barlow pawh chu chawp leh chilhin a inthlah dul nghâl ta ruai ruai a, a chanchin, cho mai mai chi a nih loh thu chu a lo hre tawh ṭhin tlat a ni. A sakawr chu hma lamah inchi khat lek pawh pên leh vaih se chuan a thi nghâl dawn a ni tih pawh a inhre chiang tawh tlat mai le!

Mahse, a hote hmaa chan chhe zâwk changtu-a han ṭan mai erawh chu zahthlâk a ti bawk si a, a tih ngaihna hre lo chuan, “Baker, i chanchin hi ka lo hre nual tawh a, kan zingah hian rawn awm ve la, i ṭangkai viau ka ring,” tiin a sawm ta ngawt a.

Cullen chuan, “He lai ram hi rawn dai tawh suh, Barlow. Chhim lamah kir leh la, rawn inlan tawh ngai suh ang che. Chu chu, i tan a hrisel zâwk bawk ang. Ka thu zawm lova i rawn lang leh a nih ngat chuan ka ngaih dan a ni hauh dawn lo a nia. I thi ngei bawk ang,” a tihsan ta hmiah a.

Barlow hmel chu a dur nghâl khup a, a sakawr chu khen liam puat mai a han rilrûk deuh va; mahse, Cullen-a spencer chu a inkau ri ta rap a, “I hote nen khan thlâwk bo nghâl rawh u! I ka kha i ang leh a nih vaih chuan i saddle-ah khan pherh nuai khawpin ka kâp che a ni mai," tiin Cullen-a chuan a vau ta a, a tum pawh chu a ti ngam leh ta lo va.

Sam Barlow thinur lutuk chu a pûakkeh lo chauh hi a ni tawh a; chutiang êm êma a hmaa zam lo leh chaldelh taka vautu chu a tawn lohna pawh a rei fu tawh ta ve ang. Tih ngaihna dang awm ta hek lo, dam a la duh si avangin a sakawr chu lungawi lo tak chungin a pawt her ta vut a, an lo kalna lamah bawk chuan an inzûi kir leh ta thluah thluah a.

Cullen-a chuan an lo kir Ieh ngei ang tih chu a hre chiang êm êm a, Sam Barlow-ate ang tan chuan chutiang khawpa hmuhsitna leh vau behna thu chu a puan darh zau hmaa dah ṭhat hmiah mai an duh ngei dawn avangin an lo kir Ieh ngei a ring tlat a ni. Mahse, an lo kir leh hmain ngun lutuk maiin thil tih dan tur an ruahman fel hmasak phawt pawh a rinawm bawk.

Cullen-a chu a han inher a, a hnung lama sakawr chung chuang pali (4) lo kal mekte chu a hmu ta a. Rei lo têah Matt Kirby, Bill Longley, Bickerstaff-te an ni tih chu a hre thei ta thuai a, a fal deuhvin sir deuhvah hian Bob Lee pawh chu a rawn kal ve a.

A bul hnai an lo thlen chuan Kirby chuan “Barlow chu a tlawm chiang hle mai maw?” a rawn ti sarh sarh a.

“Awmzia teh vak nei thei ta hek lo. .56 mu pai ṭawih tum mai zawng a la thlang lo deuh chu a nih kha.”

Thupui fun tak hian Bob Lee chuan, “An lo kir leh ngei ngei ang,” a han ti charh charh a. Cullen pawhin a lo rin dan ve chiah bawk a ni a.

Nui sang chung hian Bill Longley chuan, “Chuti chu, um zûi vat zâwk ila a ni mai alawm, Bob!” a lo ti a.

Cullen erawh chuan chhang lovin, a inring lo lai an rawn ṭhawng palh ta thut a nih pawha rang lutuka pûakruk chelek dan tur lam a lo ngaihtuah daih a. Chuti a nih loh chuan rei a him bîk dawn lo tih a inhre tlat a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)