THE FIRST FAST DRAW (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: THE FIRST FAST DRAW Chapter 5

Unread post by Rozami pachuau » December 12th, 2018, 8:16 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 6
(Rozami Pachuau)

A tlangpuiin pûakruk chu pài a nih Ioh vek pawhin kâwngah tal zeh a la ni ṭhin a, pûakruk pawh chuti taka a la lar loh bâkah a chi hrang pawh a la tam lua lo a ni. Dragon Ieh walker pûakrukte chu duh aia an rit lutuk hret avangin chûng lai vêla mi tam tak chuan an pûakruk chu an sakawr saddle-ah an pai daih mai ṭhin a, rang taka hriamhrei chelek duh tan chuan pûakruk tluka ṭha hi a awm lo a ni.

Cullen chuan Fort Belknap-ah Laimal eng emaw zât chu pûakrukin a lo thleng tawh a, chutah chuan sipai hovin dragon colt mu an thun ran dan te a lo zir ve nual tawh a, cavalry tam takte aiin a thiam zâwkin a rang zâwk ta thuai nghe nghe a. Naupan lai aṭanga kut lo hmang ṭhang tawh a nih avangin rei lo têah chutiang lam chu a man zung zung mai thei a ni.

Rang tak leh ṭhelh hauh lo tura pistol chelek thei tan lo chuan pài satliah ringawt chuan awmzia a nei der si lo va. Cullen chuan sipaiho zingah pûakruk kah pawh a lo zir ve nasa hle tawh a, anni ai daihin a kâp thiam zâwk bawk a, inchawinaah pawh a mantu zâwkah a ṭang fo tawh ṭhin reng a ni.

Chumi zana a mu chu a inngaihtuah nasa hle a. Rang taka pûakruk phawi leh khawi lam hawi zawng pawha bahlah hauh lo tura kah dan ngawt mai chuan a rilru a luah ta a.

Zanah chuan muhil thei ta hek lo, a ṭhiante hriat loh chuan a tho va, hmuh phâk loh tura hlaah a kal ta a. Hmun fai lai deuhvah chuan dingin pûakruk phawi ran ngawt mai chu a zir ta chiam mai a; amah ngei pawh chuan phawi muang a inti hial fo mai.

Chutah, pûakruk kâp tura han tin kher ngai lova kut zungchala kâwk anga kâp nghâl zat zat thei tura thiam chu dik ber dawnin a hre ta a. Mahse, a hmeh perna khawih dan turah chuan fimkhur a ngai dawn hle a ni tih erawh chu a hria. Amah rawn beitute chu tu pawh ni se, a mal mai chuan an ni dawn lo tih a hria a; chu vang chuan tu pawh ni se, rang taka silai a chelek theih chuan a tan beiseina sang tak a awm thei dawn a ni.

Kuttuma inbeihnaah pawh a hnek hmasatu apiang an ding chang deuh zel ṭhin a; silai chungchangah pawh a ni tho dawn lawm ni? Eng pawh ni se, rang lutuka pûakruk phawi theih chu a pawimawh ta ber phawt a ni.

Cullen chuan a pûakruk chu rang taka phawi dan a zir ta ngat ngat a; mahse, a hmawra a en zâwnna chuan lo bah palha tlai hret chang a neih ṭhin avangin nawh thlâka paih daih mai a duh ta a. Tichuan, a nunna humhim turin rang lutuka phawi a, ṭhelh hauh lo tura kah thiam chu a pawimawh ta ber a ni.

A duh ang tâwk leh a lungawina ang tâwka a phawi ran theih tâk hnu pawh chuan silaimu pakhat sen thlawn ringawt pawh dik dawna a hriat loh avangin a sir leh hnung lama awmte kâp tur ang tak chuan a inher kual zawk zawk ṭhin a. Vawi sawmnga (50) vêl zet, pûakruk phawi ran leh kah dik chu a zir ta a; chu mai ni lovin pûakruk kawm nghet taka dawm dan te thleng chuan a zir ta zel a.

A tûk khaw var chuan thliarkar tawp lama a ṭhiante hmuh phâk lovah chuan a kal leh ta a, chutah chuan pûakruk chelek dan chu darkar thum vêl zet a zir leh ta a. Darkar chanve a chawl a, a zir zawm leh a. A hlawhtlinna chu a nunna innghahna a ni thei dawn tih a hriat avangin niin vanlaizawl a thlen thlengin a zir ta ngat ngat a, pûakruk phawi zawnga ban dah dan tur te thlengin.

Chutih lai hun chuan tu mahin rang taka pûakruk chelek dan an la thiam chiah lo va, silaia buaina ching fel te pawh inhnungchhawn zawng ve vea dingin dàn ang thlapin an inkâp mai ṭhin a. Chu bâkah, pûakruk chhûak hmasa ber, walker colt an tih mai, Samuel Colt-a duan chhuah chu a lianin a rit lutuk reng reng bawk a.

Eng lai pawha khawi hmun aṭang emaw rawn bei thut duh mai tur tan, rang taka pûakruk phawi thiam chu a pawimawh ta hrim hrim a ni.

Ni hmasa ber chuan darkar sarih (7) zet Cullen-a chuan silai chelek chu a zir a, a kut leh ban pawh a sil ṭhum reng a; mahse, a hma aia hlawhtling riauvin a inhre thung a ni.

A tûkah chuan a pa hmelhriat, lo neitu pakhat bâwng hawhin Fairlea hmunah lei chu a let ṭan ta a. Chu lai hmun a pan dawn chuan ngun takin ram awm dan chu a thlithlai hmasa zel a, chu lai hmun chu a ta a ni tih hretu an tam a ring lo va, Sam Barlow leh a hote ngei pawh chuan an hriat a rinawm loh a ni.

Cullen chuan ni li-ah lei chu a let zo va, vaimim a tuh nghâl a. Texas-a a lo kir leha a pawisa neih sa tlem tê pawh chu thlai chi lei nan a hmang zo a ni deuhthaw ta mai a.

Inthiam lo hle mah se a tum loh takin Katy chu a rilru-ah a rawn lang leh ṭhin a. Va tlawh a, va hmuh pawh a châk hle a; mahse, kal lo turin a inthunun tlat a; neih nei lo leh mi tam takte hmelma a nih chu a inhre chiang êm êm si a.

Sam Barlow leh a hote pawh chu an reh ta vang vang rih a. Lake Coddo aṭanga Oklahoma leh Arkansas inri-na lam chu a va tlawh ngai miah lo ni àwm tak a ni. Bob Lee leh a ṭhian dangte erawh chu sipaiho nen an inkâp hlek a, sipaiho chu a che chhe zâwk an ni nghe nghe a.

Texan tam zâwk chuan 1867-a Reconstruction Act leh Governor, Trockmorton chu indo puannaah an ngai deuh vek a. Texas-ah chuan Carpetbaggars leh Union lam thlawptu, mi nikhua lo tak takho chu hausak thuai duhin an lo lût ruih ruih a, an zingah chuan nikhua deuh leh khawtlang fak hlawh chin deuh chu mi tlem tê chauh an ni.

Chûng lo thleng tharho chuan Texas-a an anpuite chu thu rualpuiin an duh zawng chu silai hmanga neih an tum a; mahse, tam tak chuan tlawm duh lovin ṭan an lo khawh a, a ṭhen chu dûm hmun, zawn hmuh harsa takah an raltlan a.

Texas khaw chhak lam, chu lai bawr vêl chu Pine thingin a bit tlat a; chu bâkah, mihring aia sang sang katchat leh nauban chite pawh a tam mai a. Chûng hmun pik tak tak chu han pawngpaw sut tlang mai theih pawh an ni hlawm lo a ni.

Chûng ram chhim lama Big Thicket an tih mai chu mel za leh mel sawmnga vêla zau a ni a. Thing leh hnim chi hrang hrangin a khat tlat a‚ chûng karah chuan lui leh dil-te a awm ve thluah bawk a. Tin, ramsa bâkah bâwng tlan bo inthlah chhawng, kawlh fe fe eng emaw zât an awm bawk a.

Shelbyvilla War laia Moderator leh Regulator-ho inbeihna pawh khan chûng lai hmunah chuan mi tam tak an bibo tawhin an raltlan a. Cullen Baker-a lo seilenna a ni bawk a, ani aia chûng lai chinchang hretu chu an tam vak chuangin a rinawm loh. Mi pakhat dam chhung maia a vaia chinchang han hriat vek sen chi lah a ni bawk hek lo a ni.

Bob Lee-te pawh an rawn lang khat hle a, mahni hma chu mahni ngeiin sut tlang tur tih a nih zel avangin tu mah an inngaihtuah hman hlawm lo a ni ber mai.

Mahse, rawn tlawh leh zauh changte chu an nei leh bawk ṭhin. Vawi khat an rawn tlawh ṭum pawhin Cullen chuan, “Bill, thil pakhat min tihsak thei ang em?" tiin Longley-a hnenah chuan a han zâwt chawt mai a.

“Ka theih zawng a nih athu a ni ang chu."

“Chance Thorne leh a hote hian chhim lam an pan fo mai a, eng nge an va tih hriat tum la ka duh a ni.”

Bill Longley chu a ngawi ta vang vang a, “A kalna tak hi rin dan i nei em?” tiin a han zâwt lêt ve a.

“Big Thicket an panin ka ring.”

Bickerstaff chuan, “Sam Barlow-a ram awp chin a ni a, kei chuan chu chu ka ring chiah lo," a lo ti thung a.

“I sawi dik maithei e.”

A cigar ṭan pahin Bob Lee chuan, “Sipaiho chungchang Barlow hnena hrilh ṭhintu hi a nih i ring deuh tihna em ni?” a lo ti bauh a. Amah vek chuan, “I ngainat loh avangin hûat tur i zawng ve hrim hrim deuh ta a ni ang e," a han tih zawm leh charh charh a.

“Chu pawh chu a dik leh maithei; mahse, a dik leh dik lohin ka thlir dan chu a tih danglam phah ka ring lo. Chance kha mahni tana hlâwkna leh ṭha tur hre deuh mai a ni a, Thornes chhungkaw dang anga neinung a nih ve lohna hi a ngaithei lo a nih ka ring ber. Pawisa a neih theihna tur a nih dawn phawt chuan tu lam pawh thlawp dawn se pawi a tih ka ring hauh lo.”

Ni hnih hnuah chuan Cullen-a'n a vaimim hmun a thlawh fai lai takin kawngṭumah chuan sakawr chung chuang pakhat hi a rawn lang ta a. Cullen chuan a piah deuh thing nghenga a spencer tun chu a pan phei vat a. Sakawr chung chuangin a awmna a rawn thlen chuan a chunga chuang ai mahin a sakawr chuan a mit a la ta zâwk mah mai a, a chunga chuang chu hmeichhia a ni.

Sakawr chunga chuang chuan aw zangkhai vah hian, “Min lo hmuah dan chu a lawmawm fahran lem lo hle mai, Mr Baker,” a han ti a. Chu nu chu a hmeichhe hmuh tawhah chuan a la ṭha ber hial hian Cullen chuan a hria a.

“I sakawr chu a duhawm kher mai.”

Lacy Petraine chuan hmel danglam hauh lo hian, “Ni e, a ṭha khawp mai, nangmah ang bawk a nih hi‚” a ti ta mai a. Cullen chu ṭha a lo ti ve hle em ni ang?

Cullen chuan chu nu chu a han en vang vang a, chutah, “Hetianga sakawr ṭha hi ka lo ngaihtuah ve nasa tawh ṭhin a, neih theih ngei pawh ka la tum a ni,” a han ti leh a.

“Hna chungchangah rawn biak che ka duh a ni.”

“Tu mah ruai thei dinhmunah pawh ka ding rih lo.”

Lacy chuan a thu sawi chu hre àwm pawh hian a lang lo, hna thawh tur zawng ni lovin, hna thawktu tur a zawng a ni zâwk si a, “Mipa ka mamawh a ni...,” a han ti leh sap a.

A sawi zawh hma hmain Cullen chuan. “Hmeichhe tam zâwkte chuan mipa hi an mamawh reng a ni,” a lo tih khalh leh zung zung a.

Lacy chuan thinur inpet ruh ṭeuh chung hian, “Ka hun ka rawn khawh ral mai mai dawn a ang hle mai, Mr Baker. Reconstruction-ho nena in buaina pawh hi ka hria a, an chungah pawh thu ka nei ve fu asin. Ka hna sawi chu i pawm theih chuan an ti buai tawh ngai lo vang che tih pawh ka tiam a che,” a han ti leh a.

A thinur hle nâ a, a rawn tih dan leh mitmeng avang chuan Cullen chu a la huangtau ve hle reng a.

Lacy bawk chuan, “Mr Baker, ram ka lei mek a, pawisa fai paipawn chang te ka lo nei ve ṭhin a, tu emaw, min zah deuhtu, silai chelek thiam si min puitu tur ka mamawh a ni. Mipat hmeichhiatna lama mipa mamawh ka ni lo! Sam Barlow leh a hote ang avang hian ka ṭi riau tawh a ni," a han ti leh hram a.

“Colonel Belser va bia la a ṭha ang chu, a hote chu sawi loh, amah ngei pawhin a veng reng peih ang che chu,” Cullen chuan a han ti leh a.

“Min puih a hreh loh thu chu a sawi ngei a; mahse, ani nena inkungkaih ka duh lo a ni. He lai hmunah hian in leh lo din ka tum a, Carpetbaggars-ho nena inchul nel vak chu; an awm loh hunah nuam dawnin ka hre lo a ni.”

Cullen chuan, “Chu chu Chance Thorne-a hriat ve ngei àwm tak a nih chu,” a han ti leh bauh a. Chutah, pal chu zuan khûmin, Lacy sakawr chu kal hêl meuhvin a thlêk ta vang vang a.

A chunga hmeichhe chuang chuan whip keng chung hian ngawi rengin a lo en ve thung a. Cullen chuan dûat zetin sakawr chu a chul hauh hauh a.

Lacy chuan, “Sakawr ṭha i ngaina tak zet a nih hmel hle mai, ka hnuaiah rawn thawk la, ṭha tak tak ka nei asin,” tiin a han thlem leh a.

Cullen erawh chuan chu sawmna ṭawngkam lam chu a uksak lo hle mai a, “Engtin nge he laiah ka awm tih pawh i hriat theih reng reng a?” a lo ti leh daih a.

“I hmel leh pianhmang min hrilh a, ka rawn zawng tawp mai che a ni, lei tur ka zawng pah zel bawk.”

“Kei chu chutianga lei chi ka ni hlei nem!"

Lacy chuan thinur zet hian, “I inngai ropui lutuk a nih hi, Mr Baker. Ka hnena thawk tura ka sawmna che chu ka hlawhchham a nih ber chu, ka beiseina che chu a tawp ta!” a ti hmak a, sakawr chu a pawt her a, a kal ta nghâl a.

Cullen chuan a hna chu thawh zawm leh a han tum ngawt a; mahse, a thathona zawng zawng chu a lo bo zo vek hman tawh a. Tichuan, dûm hmun lam a pan a, pûakruk phawi chu a zir leh ta thung a. A hma ai thlâwt chuan ziaawm leh ta deuh pawhin a inhre ta a, a hum dan te pawh a duh ang thlap a ni ta bawk.

Lacy hmu zo hlim chauh a ni bawk a, a rilru-ah Katy chu a ngaihtuah chhûak zawk a. Lacy nena a han khaikhin chuan a ṭhat dan a dang hle hian a hria a, hmuh dan tur kawng dap ṭhain a hre ta a.

Lacy kha chu kum sawmhnih pathum (23) bawr vêla upa a nih a ring a; mahse, Matt Kirby kha chuan chu aia kum ruk (6) vêl laia upa ni àwmin a sawi thung a. A sawi zel danin New Orleans bulah a pain huan zau tak a nei a, Lacy pawh kha French-Spanish leh Iris thlah pawlh a nih hmel a ni.

A lo puitlinin a pa chuan pawisa khelhnaah an ram zawng zawng deuhthaw chu a lo paih zo hman tawh a; tichuan, a pa nen New Orleans-ah an cheng ta a. Kum sawm paruk (16) a nihin a pa chu yelow fever-in a thi a; a hnu deuhah Lacy chuan Irish Gambler, Terence O’ Donnell chu pasalah a nei ta a. Matt sawi zel danin Gentleman dik tak a ni a‚ an inneih chuan kum sawmthum pahnih (32)-a upa a ni.

New Orleans chhuahsanin Atlanta an pan a; chuta ṭang chuan Charlestan, Richmond leh New York an pan leh a, Havana pawh an thleng hial a ni. Zan khat chu lawnga card an khelhnaah buaina a chhûak a, Lacy pasal chu a vanduaiah a ṭang ta a, a nupui hnenah chuan card leh dollar singkhat sang li (14,000) chiah a hnutchhiah a.

Kum sawm pariat (18) a nihin Negro nula pasal pahnih leh Negro putar kum sawmruk (60)-a upa; mahse, la chak zet mai nen Europe an pan a; kum hnih chhungin Paris, London, Vienna, Rome, Venice leh Madrid-te a tlawh chipchiar hman hle a.

French mi hausa deuh, Andre Petraine chu pasalah a nei leh a; chu pa chuan a pa blackmail a tum avangin an that ta a; chumi zan vek chuan Lacy chu New York lama kal tur Ieh, awm hlen turin a zin ta nghâl a.

A lo haw kawngah Pocker khelh a rawn zir a, a pasal hlui ṭhian pakhat hnenah pawisa pûk tirin Charlestansh pawisa khelhna an hawng a; indo hmain a chan ai a hralh hmiah a, lapua zuarin a sumdawng ta a‚ a hlawhtling phian a, indo chhung chuan London-ah a awm ta a ni.

**************************

Cullen chuan ngun takin a hma lâk dan chu a ngaihtuah nauh nauh va, silai chelek zir loh ni a nei ngai lo.

Zan khat chu an ṭhianhova mei lum an kîl ṭhap laiin an bul maia dil tuiah chuan sangha a rawn inperh ri pawrh mai a, mei kiltuho chu rang lutukin thimtham zingah chuan an bibo nghâl diak a.

Cullen chuan a tawmna hnimbuk kara a hriat loh hlana pûakruk a lo hum fel hman reng chu a han ngaihtuah chhuah chuan mak a inti zâwk hle a, a lawm kher mai. A hma ai thlâwt zawngin a che rang fe a ni tih pawh a hria a ni.

Hnim kara a ṭhiante rifle ngul rawn lang chu a hmu thei nual a; chutih lai tak chuan an lam pana sakawr rawn kal thawm chu an hre ta a. Rei lo têah sakawr chungchuang chu mei êngah chuan a rawn lang a, Matt Kirby a lo ni a, chutah zawngin anniho pawh an tawmna aṭang chuan an rawn chhûak ta hlawm a.

Matt Kirby chu pa sa ṭha leh hmai hlai, khabe invuah nghet tlut mai a ni a; a ṭawng tam lovin zu erawh chu a duh ve hle a, sipaiho awm lohna pawh hre thei tak a ni roh nghe nghe. A sakawr aṭang chuan a chhuk a, coffee a inthlit nghâl a, "Chhim Iamah sawn insuamna a thleng a, hmeichhe pakhat a thi; Cullen-a tih ni àwmin a thang Iehnghâl!” a han ti a.

Longley pawh chuan, “Ka sawi kha i la hria em, Cullen? Thil chu a inṭan dawn ta chiah a nih chu,” a lo ti nghâl a.

“A titu chu ûm zûitu, pawl thum an chhûak a, an thu pêk hmuh chu kâp hlum nghâl tura tih an ni. An man che a nih pawhin khai hlum nghâl tur chea thu pêk an ni,” Matt chuan a ti ta zel a.

Cullen chuan, “Barlow thil tih a nih chu, he lai hnai rawn chawk buai lo turin ka hrilh asin maw le,” hul hak hian a ti chhar chhar a.

“Cullen, inthiar fihlim vat la a ṭha ang,” tih pahin Bickerstaff pawh chu a ding chhûak ve nghâl a.

“Ka tlanchhe dawn lo,” Cullen chuan a ti hmak a.

Bob Lee chuan, “Devils Den pan ila a ṭhain ka ring, hmar lam a hnaih bâkah tu ma'n min rawn zawng hmu miah lo vang‚” a lo ti ve a.

Cullen pawh chuan Devils Den awmna chu a hre ve tho va, hmuh chhuah harsa tak leh zawn hmuh mai mai chi loh tak, ṭan hmun siamna remchang tak si hi a ni a. An rawn hmu chhûak tâ a nih pawhin mi ã lo tan chuan han pawng sut mai mai chi a ni bawk hek lo.

Cullen chuan, “In duh leh lo va kal ta ula; kei chu Big Thicket-ah ka kal dawn,” a la ti ta fan a.

An vai chuan ngawi rengin Cullen chu an en ṭhap a, a rilru put dan chu hre thiam chiah an awm lo a ni ber mai. Cullen chuan Barlow nena inhmachhawn hun chu a theng dawn ta ni ngei hian a hria a, pawi tihna pawh eng mah a nei tawh bîk lo.

Matt Kirby chuan, “Blackthorne ramah mi dawrzawn khat zet tur an inkulh a, he lam ka rawn pan tur hian ka hmu hlauh a ni,” a han ti leh bauh a.

Cullen chuan Barlow mi leh sate ngei an nih a rin ngheh tlat avangin Katy chuan buaina a nei dawn tih a hre nghâl mai a, chu vang chuan rilru dang reng a pu thei tawh lo. A tho ta vat a, a sabengtungah chuan saddle a phah nghâl mawlh mawlh a.

Longley chuan a rawn pan phei a, “Engtizia nge ni, Cull? I inthiar fihlim mai dawn em ni zâwk?" a rawn ti a.

“Blackthorne-ah chuan Katy leh a nî chauh an cheng si a ni,” ngaihtuah hmel takin Cullen chuan a lo ti mai a.

“Nula chu i ngaihtuah viau em ni?”

“Ngaihtuah teh reng mai.”

Chutah zawngin Bob Lee pawhin a sakawr chu saddle nen a pan phei ve ta nghâl a, “Mahni maia buaina hmachhawn i tum hi ka hriat thiam loh zawng tak a ni, Cull. Ṭhian nei lo ang maiin an lo ngai palh ang che,” a ti ta hial a. Cullen puih chu a inhuam kher mai.

“A lawmawm hle mai!”

Cullen pawh chuan a ṭhiante saddle phelh malh malh hlawm chu rilru hlim deuh hian a lo thlir a, phatsan lotu ṭhian, chutiang a nei chu a lawm a ni. Ṭhian tel lova têi mai mai ṭhin a nih avangin a thla a muang huai a.

Chu lai hmun an han chhuahsan meuh chuan Lal ral do tur ai pawhin a lung a awi mah zâwk àwm e. A ṭhiante chu amah ang bawka a kaw tawpa ṭang chi leh mi sual lakah chuan pawisak nei miah lo tur hlir an ni tih pawh a hria a, Blackthorne-ah Barlow chu a lo awm hlauh chuan inthiar fihlim rang se a vannei zâwk hlein a ring a ni.

Thla chu a êng riai ruai a, kawngṭumah chuan an sakawrte chu hmanhmawh lutuk lovin an kaltir a, thimthama che ṭhang an nih avangin thla êng chu an mamawh teh vak lo.

Kirby chuan, “Awm hmun benbel nan hun an duh deuh ka ring a, lui Ieh in inkar thing lian tak hnuaiah khan an inkulh a ni,” a ti leh charh charh a.

Chu in a sawi chu Blackthorne inpui ber leh lian tak a ni a; mahse, Katy chu chuta ṭanga yard zathum (300) vêla hla, in hrangah a cheng thung a, inpui ber pawh chu rawk an tum a ni maithei a, an hlawhtling viau ta ve ang chu.

Cullen ve thung chuan inpui chu lo rawk ta mai mai pawh ni se, pawi tihna a nei hauh thung lo va; chu ai chuan Katy chunga a ṭuan tur anga a han suangtuah chuan pawm zam mai zawng a thei thlawt lo. An lo ti hrehawm a nih ngat chuan Barlow chu thûk taka phum a tum nghet bur a ni.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 13th, 2018, 4:57 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 7
(Rozami Pachuau)

An chhuah tirha thla la sang vak lo chu Blackthorne hungna pal an thlen chuan a sang fu tawh a, thing karah chuan a lang thei ruau ruau va. Thei huan chu pal tlangin thing kara kawngah chuan an inzûi chho dam dam a, an vanneih zawngin tu ma hmuh lohvin an thlen theih ngei a rinawm.

Mihring thawm a reh hle a; chungu erawh chu an hram chuah chuah thung a. Thei huan hnuhnung zâwk an kal tlang dawn mek lai chuan kawngkhar chum ri dawt dawt leh zu rui au ṭeng pui pui ri an hre ta a, a hun takah thleng fuh hlein an inhria a ni.

Kawngkhar chumtu chuan, “Hawng vat rawh u, kawngkhar kan tih chhiat hma hian rawn hawng vat rawh u!” a han ti ṭeng chhur chhur a.

Cullen thinur lutuk chu a pûak keh lo chauh a ni tawh a; mahse, a insum hram hram a. In chhung aṭang chuan Katy âw ngei mai chuan, “Min kalsan daih rawh u; min kalsan loh chuan ka kâp dawn che u a nia,” a lo ti lang lang a.

Kawngkhar bula ding pakhat chuan, “Ngawi mai mai teh nula, min kâp hlum vek hman chuang lo vang. Rawn luh kan tum tho si a, ṭha takin rawn hawng zâwk mai teh,” a han ti leh lung lung a.

Chu zan borûak reh reih rawih takah chuan zàwi leh fiah angreng tak si hian Cullen chuan, “Ani chuan a kâp hlum seng lo che u pawh a ni maithei e; mahse, keiniho chuan kan mang hneh viau ang che u!” tiin au lung lunga chu a chhang ve ta thut mai le!

Chu veleh a ngaihna hre lo zet hian kawngkhar bula mite chu an inher vat a, Barlow-a mi leh sate an nih avangin miin an hlau va, tun thleng hian dodalna reng an tâwk ngai lo a ni si a; tun ṭum zet zawng a dan a dang ta zar mai!

Chûngho chu hmeichhe chak lo pawngsual ching leh tual thah hreh miah lote an ni a; chutah, an zinga pakhat chuan, “Tu pawh ni la, lo inrawlh ve lo la i tan a ṭha zâwk ang,” a han ti lêt ve ngawt a.

Cullen chu za hauh lo hian a han nui lui hak a, “Barlow hote in ni em?” a han ti ve ngat a.

“Ni e; engtia tih nge i tum?"

“Barlow kha he lai ram rawn dai tawh lo turin ka ti kha a ni a; mahse, ka thu in pawisa duh dèr lo chu a nih hi. In inthiar fihlim dawn nge, he laiah hian phum in duh zâwk?”

Thing kar aṭanga thla lo lang chuan chiang takin Katy kawngkhar leh bathlar vêl chu a chhun êng raih a. Barlow hote chu darhsarh tak hian an ding hlawm a; mahse, anniho betu chu thimthama awm a nih avangin hmuh ngaihna a awm ve miah thung lo.

Barlow hote chu nuam ti lo tih hriat zet hian an phun bul bul hlawm a, anmahni betu chu mi pakhat chauh a ni ang em?

Cullen chuan a spencer chu a saddle chungah chuan a chhuang a, a tin ran a. Kawngkhar hnaih bertu chuan a rifle a lek kang ve ta a; chu veleh Cullen chuan a spencer chu a hmet pûak ta ṭhuai a, chu pa chu a hlawm ta nawk a.

Cullen sir ding lam thim zing aṭang bawk chuan silai a rawn pûak zûi ve ta zawt zawt a, Barlow hote chu an thal ta phawk phawk a.

Chutah, Cullen chuan a sabengtung chu a kheng tlan zawt a, an inkar, fit thum emaw chauh a ni ang tih tura lo awm, amah hnaih bertu chu a Iu-ah tak a spencer chuan a han kâp leh a, a tlu chiang kher mai!

Silai chu a pûak zûi Ieh zawt zawt a, Barlow hote chu an thal hlawl hlawl hlawm a. A han tho thei chhunte pawh chu an kal pãi chawn chawn a, pakhat erawh chu silai zenin a kawr a kan tih hlum tumin leiah a let tawp tawp bawk a.

Chûngho bûk chu in lehlama awm a ni a, Cullen leh a ṭhiante chuan Rebel au hla phuh chhûak chungin an sakawr an lim phei tir a‚ an hmuh apiang, che hlek chu an kâp nghâl pawp pawp bawk a.

Barlow hote mei chhemna aṭang chuan pa pakhat hi a lo tlan sawn chiah a, Bill Longley silai chu a pûak nghâl zawt bawk a. Chu pa chu a tlu bawkkhup thlawrh a, thawh leh a han tum ngial nâ a, silaimu pathum ngawtin a deng zûi leh nghâl ṭhawt avangin tho leh tur reng a awm ta lo.

Chutah, an sakawr aṭangin an chhuk a, an kah thlûk hnuhnun ber chu Bickerstaff chuan a han kuai thal tawp a, a hmai chu hamna tih hriat zet hian a lo inrin rûak mai a, a hma lawka hmeichhe pawngsualtu ber chu a ni ang tih a rin theih mai a.

Barlow hote bûkah chuan dragon colt pahnih, henry rifle thar var, laimal pahnih leh bollard rifle hi a lo awm a. Coffee, chini, buhfai leh chhang ur hmin sa eng emaw zât a awm bawk a, Cullen-te ṭhianzaho chuan an la fai ta vek a. Dragon colt chu Bill Longley nen pakhat ve vein an insem a; Bob Lee chuan bollard rifle chu a chang thung a.

An vai chuan in bathlar lam chu an pan phei a, kawngkhar inhawng bulah chuan Katy chuan hliam pakhat hi a lo ṭhutchilh ran a, din chhuah pahin, “He pa hi in chhungah mi hruai luhsak thei ang em?” a lo ti a.

Bickerstaff chuan, “Ka pi, rawn luh luih tum a ni a‚ mi hlauhawm a nih kha; thi se a ṭha zawk ang," a lo ti bung nghat a.

“Chuti a nih chuan a tir khan thah nghâl tur alawm; ka kawngkharah hian mihring chu sawi loh, chinghnia tak ngial pawh ngaihven lohvin an thi tur a ni lo,” Katy chuan a ti ve ta tlat a.

Chutah zawng, hliam tuarpa chu an zawn lût a, Katy chuan tui a chhuang ta nghâl a. Cullen-te zingah erawh chuan hliam tuar tak ngial pawh an awm ve lo, an barakhaih hneh êm avangin Barlow hote chu silai pawh tin zâwn mumal thei lovin an chi-ãi ni berin an lang a ni.

Kawngkhar bula ṭhu pakhat bâkah pathum ruang chu an va hmuh belh leh a, pakhat hliam na tak tuar an chhar bawk a. Chûng bâkah hliam na tak tuar, inthiar fihlim thei pahnih emaw chu an awm niin a lang a; chu bâkah chuan hmun hrangah hliam, thihpui ngei tur an awm ngeiin Cullen chuan a ring a ni.

“Sam Barlow ngaih dan chu a ni ta hauh lo vang le,” tih pahin Kirby chuan a vaibel chu a ṭan kai mek a.

Bickerstaff pawh chuan‚ “A rawn thawk har hauh lo vang,” a lo ti ve bawk a.

Hul hak hian Cullen chuan, “Rawn lang thuai se a ṭha zâwk ang chu, keima'n ka zawn buai ngai lo hian,” a lo ti ve thung a, “Hêngho phum zawh hian suahdur kha ka hmang leh duh dawn a nia‚ Barlow thlan tur ka lai lâwk ang a, a hming tarin, a hman mai theih turin ka hnutchhiah dawn a ni,” a han tih zawm leh zat a.

Longley chuan, “Ka lawm zawng tak a ni mai, Barlow-a'n a hriat huna a hmel awm dan tur te phei chu hmu thei ngat dawn ila chuan ka dam chhung kum khat hi chu ka pe duh ngei ngei ang. Suahdur hmang vetu nih pawh ka châk ngawt ang, Cullen,” a ti ta a, a chek zûi tlak tlak a.

Chutah, hliam tuarpa chuan Cullen Baker chu en huin, "Tu nge i nih chu ka hre lem lo va, nangma thlan tur i lai dawn tihna a nih chu. Barlow chuan a that ngei ngei ang che,” harsa ti tak chung hian a han ti a.

“Ka hming chu Cullen Baker a ni. Katy Thorne ti buaitu chu tu pawh ni se, ka dim dawn lo reng reng.”

Hliam tuarpa chuan mak ti fe hian Katy chu a han en leh a, “Thorne chhungkuaa mi i ni a maw? Chance nen in inchhungkhat hnaivai em?” thei leh thei lo chuan a han ti ve leh ta thung a.

“A monu ka ni.”

“Lalpa! Barlow chuan hemi avang ngawt pawh hian min that duh ngei ang!” a ti ta roh va.

Chutah, hliam tuarpa chuan eng mah sawi leh tawh lovin in chhung lam ngawt chu a melh ta reng a, Cullen leh Katy chu an inmelh ralh a.

A zan a zan chuan thla eng hnuaiah mitthite phumna tur chu an lai zûi ta a; a hnuah chuan thlan dang an lai leh a, an laih zawh meuh chuan thla pawh a liam ve ṭep tawh a. Thlan rûak ko tlangah chuan, ran chhinchhiahna thir rawh lin hian thingphelah hetianga thu ziak hi an tar ta a.

HE LAIAH HIAN SAM BARLOW ZALH A NI.

MI DÂWIHZEP, RÛKRU, TUAL THAH HMANG CHU

CULLEN BAKER-A'N A THAT TA.

tih hi.

Zing lam, ni chhuah hnu darkar thum pawh a la tling lo vang tihah chu thu ziak intar chu a thang chak bawk a, ni a tlâk leh meuh chuan Lujkin leh Boston lamah pawh an hre hman vek tawh a ni.

Dûm hmuna mi tam tak bibote pawh chuan chu chanchin an lo hriat chuan thil awmzia hriat thuai thuai hlan an nghâkhlel hlawm kher mai.

Big Thicket-a thil awm dan Sam Barlow-a'n a lo hriat meuh chuan a thinur lutuk chu a ã lo chauh niin a hmutute'n chuan an sawi a. A ang buan buan a, anchhia a phuh chhûak a, a tawpah chuan a ngawi ta hmiah a; chutia a ngawih tâk hmuk chuan a hma ai fein a hlauhawm ta zâwk a ni.

**********************

Cullen chuan Fairlea-ah pûakruk chelek chu ngawrh takin a zir zûi reng a, pûakruk chu a kutah, amaha nunna nei ni ve àwm hialin, rang lutuk leh dik chat chatin a rawn invuah chat chat thei tawh a.

A thlai leh vaimin vêl len fe tawh hnuin Cullen chuan Katy-te chu tlawh turin a kal chhûak ta a. An pahnih chauhva sathau khawnvar ênga chaw an kil dun te kha a han ngaihtuah chhûak a, chuti maia ngawih bopui chu a thei tlat lo.

Katy chu amah chauhvin a rim a ni bîk lo va, Chance pawhin a tlawh zauh zauh va; school zirtirtu pakhat Thomas Warren pawhin a rim ve fo bawk ṭhin.

Thomas chu intuai fai peih leh hawi sang tak a ni a, dûm hmuna cheng, amah hre chiangtute chuan an nuihzat thei hle ṭhin a; mahse, lehkha chhiar zau tih takah sawi tur a hre tam êm êm a ni.

Cullen va thlen chuan zing lam la hma angreng tak a la ni a; mahse, Katy-te choka mei khu chhuahna aṭang chuan mei khu a rawn zam chhûak ngiai ngiai tawh a. A ni Flo-i chu a thawh tlai ṭhin avangin Katy zâwk a ni ngei ang tih a ring nghâl a.

Kawngkhar aṭangin Cullen chu a lo hmu vat a, “I sakawr kha va dah fel rawh, tûkṭhuan ka peih der tawh a nia,” a lo ti nghâl seuh seuh a.

A hma zana mahni ei tur pawh bûatsaih hman lo khawpa a thawh rim avangin chu ṭawngkam chu Cullen-a tan chuan a lawmawm tak meuh a ni.

Reconstruction-ho chuan la rawn ti buai chiah lo mah se Colonel Belser silai a lâksak avanga man a nih mai theih tur thu sawi rîk a hre zauh zauh a. Cullen erawh chuan a hmain a hote'n a silai an lâksak ai a nih thu fel taka ziakin lehkhain a thawn tawh a ni.

Kawngkhara Cullen-a lût tur chu Katy chuan ngaihtuah hmel deuh hian a lo en ha a, “An rawn ṭhawng thut mai ang che tih ka hlau ngawt mai, Cullen, rilru pawh a nuam thei lo. Zan hmasa khan Thomas chuan miin man che an duh thu an sawi a hria a ni,” a lo ti thuai thuai a.

“Mi i tia law?”

“Aw ti e, Reconstruction-ho bâkah hmar lama lo neituho a ni, an sawi chu.”

“A dik ang, ka ringhlel lo. Min ngaina lotu chu eng lai pawhin an awm ang. Mi ṭhenkhat chuan Barlow thil tih apiangah min mawh puh ṭhin thu an sawi a, a pawi ngawt mai; mahse Katy, miin min sawi dan tur chu ka hrilh lâwk vek tawh che kha.”

Katy chuan nui saih chung hian, “He lai rama chengte hian eng tik aṭangin nge Thorne thisen kai hi tih tur Ieh tih loh tur an hrilh chu le? I duh hun hunah lo kal la, i duh chen chen i leng dawn nia," a ti ve ta a.

“Chuti chu, lo kal mah se min ngaihtuah duh suh, hmun hnihah ral veng kan indah a, kan hre hmasa hman ngei ang.”

Katy chuan Cullen-a pûakruk pai pahnih chu a han en vang vang a, “Khâng kha pai reng tur em ni?” a han ti sap a.

“Pai lo turin min duh a maw, Katy? Mahse, i zungbun leh bakilh ai khan ka nunna innghahna an nih avangin an pawimawh zâwk êm êm asin. Hemi hmang hian ka nung a, ka la thihpui maithei bawk; mahse, ka dam chhung chuan ka kut hlatah an awm ka rem ti tlat lo a ni.

"Silai hian min thlamuan a; mahse, thihna thlen thei thil a nih avangin infiamna ang mai maia ngaih chi erawh chu a ni hauh lo. Silai chu hmeichhia leh sakawr ang a ni a, a hre thiam lo tan chuan chul nel vak chi pawh a ni hek lo.”

“Hmeichhe mizia chu i hre viau a ni maw?"

“Pûakruk anga dim leh dûat taka enkawl ngai a ni tih chu ka hria; chuti a nih loh chuan an pûak keh mai thei ve tlat a ni,” tih pahin Cullen chu a kiai suk a, “Dûm hmun hi hmeichhe chanchin zir nan chuan a ṭha fahran lo a ni,” a han ti leh a.

“A nih, khawthlang lamah te? Mormons-ho chanchin i sawi te kha ka hria a, nupui pathum laite hi i lo nei reng lo maw?”

“Pakhat pawh ka la nei lo, Katy.... Ka neih zawng chu sakawr leh silaite hi an ni mai.”

Katy chuan a coffee thlit lai chu a nghat a, “Cullen, engah nge he lai ram hi i chhuahsan mai loh? Silai mamawh lohna hmun i pan thei mai lawm ni? Heti hrim hrima nunkhua hman te chu a hlauhawmin pehhêl hram a ṭha alawm,” a han ti leh a.

“Ka inthiar fihlim mai thei bîk lo a ni, Katy. Ka pa bul lo ṭan tawh zawng zawng hi ka ti hlawhchham ang a maw? Tuna ka tlanchhiat mai chuan eng tikah emaw tlanchhiat a ngai leh ang a; ka pa kha vanduainain a tlâk bûak nasa a, a tawpah he lai ram hi a nei thei ta hram a; tunah hian ka hnenah a hnutchhiah tawh a ni si a, chuti mai chuan ka tlansan dawn lo!”

“He laiah hi chuan nangmah hûatna hlirin an khat a nih hi, Cullen. Mi ṭha tak nia ka lo ngaih ṭhinte pawhin an hlau che a; eng ang pawhin thil inher chho mah se, an ring ngam lo chein, he lai vêla cheng kumkhua tur hi chuan an duh hauh lo vang che.”

Katy thu sawi chu dik a tih êm avangin Cullen chu a beidawng rilru ta deuh va, a hmabâk pawh chu thim hle dawn hian a hre ve a, “Mi danglam tak ka nih avang hian min thah mai duhtute pawh hi an demawm hranpa bîk lo. Ramsa tin mai hian thil danglam deuh chu an nel ngai lo va, chutiang thil chuan hlauhawmah a kai lût mai ang tih an hlau ṭhin.

"He lai ka lo thlen pawh hian mikhual leh mi danglam bîk ka nihzia chu hriain min lo bei nghâl a, mi mal mai ka nih avangin min tuk zâl theih mai an inring a; mahse, mahni chauh ka nihna chuan mahni chauh inrintirna leh chhelna min siamsak ve thung tlat a ni,” a ti ta duah a.

“I tana kawng awm chhun chu inthiar fihlim mai a ni; Sam Barlow chuan a rawn zawn che i ring em?”

“Zawn chu min rawn zawng êm êm ang‚ a tan thil tih mâkmawh a ni tlat. Nang pawhin mi rawn hnaih suh ang che, Katy. Buaina hian min pan tlat zel a, kei pawhin buaina leh lungngaihna chauh ka rawn thlen theih dawn che avangin hnaih loh che hi ṭhain ka hria.”

“Hrehawm aṭang chuan min chhan chhûak tawh alawm.”

“A ni viau mai; ka lo thi palh a nih pawhin Fairlea leh ka buh leh thlai tharte nei tur sawn ka duh che a ni."

Katy chuan mak ti hmel deuh hian, “Huan-thIai i nei a maw?” a lo ti ha a.

“Nei e, ka rawn thlen tirha ka tih hmasak ber a ni, ka tum ber a ni bawk. Buaina duh lo leh nun thar din tuma lo kir leh ka ni a; mahse, loh theih lohvin min rawn nawr lui ta si a nih hi.... Chance a hmasa ber a; Barlow a ni leh a; chu bâkah, Outlaw ang maia min sawi bawrhbangtute an han awm zûi leh a.

“He lai ram hi ka ngaina a, ka neih chhun tak meuh a ni bawk, a tel lo chuan sakawr leh silai bâkah ṭan khawh duhna rilru ka nei. Tun hmaa Lalte'n an rawih ṭhin sipai, “Soldier of Fortune” an tihte ang deuhva zalen kha ka ni. Ka nihna ril zâwk lak aṭanga min chhan theitu awm chhun chu ka ram chauh hi a ni. Pa thin thawk na leh pawisak nei lo ka ni a, chuvangin, ka tan chuan hahdamna tur hi a vang teh asin, Katy.”

“A nih leh i thlai rahte chu seng ta la, engtia tih zel nge i tum?”

“A ṭhen chu a chi atan ka dah ang a; ka ṭhiante nen ramhnuaia bâwng tla darh kan zawng khâwm ang a, hmar lamah kan kalpui ang a; chumi aṭanga pawisa ka hmuh chuan sakawr chi thlah tur ka lei leh ang a, ka thi lo a nih ngat chuan chu chu tih ngei ka tum bawk.”

“Thih thu te chu i sawi a, i inhmeh lo êm mai, Cullen.”

“Chu chu ngaihtuah chang a awm lo thei si lo a ni. Ka rilru luah fotu pakhat pawh a ni. Mi ṭhenkhat an thi ve dawn lo anga ngaihtuahna âtthlâk tak nei chi ka ni ve lo, tu chungah pawh, eng lai pawhin thihna hian thla a zar thei miau a ni; a ṭul bâka fimkhur nachang hre lo chu mi ã nihna a ni mai.”

Katy chuan thutak hmel deuh hian, “Kal bo lul teh, khawthlang lam emaw pan mai zâwk rawh, Cullen. Tlanchhia i ni dawn chuang lo va, i dam chhûak a nih ngat chuan i chak zâwk tihna a ni dawn a; eng ang pawhin lo ngai ta se, eng nge pawi teh hrep ang le?" tiin a himna tur chu a ngaihtuahpui ve nasa hle a.

Ni pawhin vanlaizawl a thleng dawn ta tihin Cullen chu haw tumin a tho ta uaih a. Kawngkhar bul a thlen chuan, “Min ngaihtuah duh suh, enghelh tlâk ka ni hlei nem,” a ti leh mai a.

Katy chuan, “Chu chu i ngaih dan a nih chuan mi ngaih dan tur che pawh a ni ve tho vang. Zahna hi mahni intih zahawmna aṭang chiah hian a inṭan a ni," vin deuh hlar hian a lo ti ve a.

Cullen chu a han ngawi vang vang a, “I sawi dik hle mai,” a han ti bauh a; chutah, a sakawr awmna lam chu a pan ta a, chumi ni chuan a sabengtung aiah sakawr a hmang thung a ni.

Rei lo têah amah lo nghâktu, Jack English awmna chu a thleng phei a, Bill Longley lo nghahna lam chu a pan ta nghâl a. A hma pawha inhmuh khâwm tum sa an nih avangin rei lo têah Matt Kirby leh Bob Lee-te pawh chuan an rawn fin ve ta thuai a.

Chutih lai chuan thu thar ngaihnawm lem lo tak an hre tawh a, Barlow chuan hmar lam Linden khaw bul maiah mi in a hãl a, an ran a hnawh darhsak vek bawk a. Mahse, Lo nei mi ṭang rualte chuan ṭan an lo khawh ve tâk avangin Barlow-te chu an inhnuk dâwk ta zâwk a, sipai hovin an va chhui zûi leh pawhin eng mah hmuh tur an nei thei ta chuang lo a ni.

Zu rui pathum hian Lacy Petraine in chu an hual a, an bengchheng hle nghe nghe a. In chhunga luh an tum lai chu kil khat aṭangin an rin loh takin pa pakhat hian a rawn khap ta tlat mai a; chu veleh an vai chuan an silai an chuh ta nghâl a. Mahse, rawn khaptupa chuan pahnihte chu awlsam takin a kâp thal nghâl tawl mai a, pakhat ve thung chu hliam na tak tuar leh zawn sawn ngaiin a awm thung a.

Chu pa chu John Tower a ni a, Lacy hian a ruai tawh a lo ni. Thimthamah chuan mi pahnihte chu a kâp hlum a, pakhat na takin a hliam bawk a, silai kâp thiam tak a ni tih chu a hriat a ni. Chûng chanchin vêl avang chuan Cullen pawhin John Tower chu hriat reng chi a ni tih a hriat chian phah hle a.

Longley-te inkawmho chhung chuan Cullen chu an piah deuh hmuh theih lohvah a va kal fal ta a. A han nghâk rih hlek a, chungû hram rualin a pûakruk chu a phawi a, rang lutukin a kau nghâl rap a; mahse, a silai kau chu a sût leh a; chutah, a han phawi leh zawk a, rang thawkhat hle chuan a inhria a. Mahse, a hun lo thleng tak tak ta se, a rang tâwk thei ang em?

A ṭhiante lo nghahna lamah chuan a kir phei leh ta a. Eng vangin nge maw hetia ramsa ang maia ramhnuaia biru bo reng mai nge maw an nih le? Mutmu pawh an tuah hman mumal lo va, chaw tuihnai deuh pawh an ei meuh lo a ni si a.

Cullen chuan, “Barlow hnena thil hri|h ṭhintu chu Chance a nih ka ring,” a ti ta a.

Bob Lee chuan, “Vawiin khan heta ṭanga chhim lam mel sawmnga (50)-ah mi i suam ni àwmin an sawi asin. Tu takin âwih ang maw?” a han ti lar lar a.

Cullen chuan, "Chuti chu khuaah kan va kal ang a, dâwt a nihzia kan va hmuhtir a ni ang chu,” a ti ta a.

Cullen-ate lo hmu hmasa bertu, Colonel Belser chu a meng phâwk nasa hle a.

“Mi suam leh rawktu angin min sawi thang vêl a; kan sakawrte hi en la, hman hlim chauh an ni tih chu in hre thei ang,” Cullen chuan a han ti khawl mai a.

Mi eng emaw zâtin an lo thlir ṭhup avangin Colonel Belser chu a thinur hle a, ani ai chuan Cullen chu a lan danah an ngaina zâwk tih a hre bawk si a. Thinur zet hian, “An khai hlum lai che hi hmuh ngei ka tum a ni, Cullen Barker!" a ti ta ringawt a. Amah vek chuan, “Hruizen dawmtu zingah pawh a hmasa ber ka ni ang‚" a han ti leh salh a.

Cullen chuan a kut pahnih chu a saddle horn-ah a nghat a, aw nelawm loh zet hian, “Colonel, he lai ram emaw, a hûap chin chhungah emaw reng reng tun aṭanga kar khat chhung i la awm a nih chuan i phu tâwk i la hmu ngei ang. Nangni Carpetbagger uicho-ho hi ûm chhuah in hun ta a nih hi!” a tih khum ta hmiah a.

Belser chuan, “Ngawi teh, ka...,” tiin hnial a han tum a, Cullen chuan, “Ka sawi chu i hria alawm," a lo ti leh hmak a.

Chutah zawng, Belser thinur leh rilru nuam lo chu a dáng nghâl lâwp a, “Eng mah i ni chuang lo vang, Cullen Baker. Tuna ngai sangtu che hian kan awm loh hunah chuan an ûm zûi leh thuai tho vang che,” a ti ta ngawt a.

Khua an chhuahsan lai pawhin Belser-a thu sawi chu Cullen chuan dik hle chuan a ring ve tho va, tu ngainat mah a hlawh ngai lo reng a ni. Carpetbaggers-ho lo do lêt anga an ngaih avang chauhvin an pawla mi angin an en thei rih a ni mai a; thil a fel hnuah chuan a nihna hlui chu an hre chhûak leh tho vang tih chu a chiang a ni.

Belser a vau hnu phei chuan an rawn zawng nasa hlein Cullen chuan a ring a. Pawisa pawh a hma aia tam an mamawh dawn a, a hma kha chuan sum a mamawh tlem hle a; tunah erawh chuan eng mah neih a nei tawh lo a ni. Chu bâkah, dûm hmun an dap chhunga Thicket lama lo bîkbo chu ṭha hlein a hria a; mahse, a hun hma chuan eng mah sawi chhuah loh ṭhain a hre ta zâwk a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 14th, 2018, 4:54 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 8
(Rozami Pachuau)

Thicket chu a hming nen pawh a inrem hle a, a hnawkin a pik kher mai! Khua lah a lum a, ni a sa vawl vawl mai bawk si a. Cullen-ate chuan kar khat zet thi leh thau pawlha an beih hnu chuan ram bâwng (ramhnuaia bâwng tla darh) za (100) vêl chu an khalh chhûak thei ta hram a. Chûng bâwngte chu chal ṭha tak tak, kawlh fe mai an ni a.

Chutiang hmuna hna an thawh chiah chuan mihringin thlantui eng zât nge an neih tih chu a hriat theih a ni. A chang chuan ni tam tak thlifim a thaw miah lo va, tlip seh na fe fe, Vatê (sava) tiat tiat hi an tam hle mai lehnghâl a. Cullen-ate ṭhianho chuan hah takin an thawk a, bâwng zathum (300) chu an nei thei ta a.

Engtia tih zel tur nge ni ang tih chu an sawi ho va, Longley chuan, “Barlow hian a bâwng rûk sa zahnih (200) vêl a kawl a, kei chuan va chhuhsak mai ka duh,” a han ti lang lang a. Ani hi buaina cho at reng mai, pawisak nei lo zet mai a ni bawk a.

Cullen chuan, “Va lâksak pawh ni ila, bâwng man chu kan ta a ni dawn chuang tlat lo. Bill, ran hlohtu tam takte hian pawisa an beisei tlat dawn a ni,” a lo ti ve a.

“Bâwng leh pawisa lam ka ngaihtuah lo; Barlow hi chhuhsak ka châk ve hrim hrim ringawt mai a ni,” Bill Longley chuan a ti Ieh mai a.

Cullen chuan, “Matt, Lost River hi i hre ngai em?” tiin Kirby hnenah chuan a han zâwt a.

“Hre àwm tak chu ka ni, a kamah ka seilian a ni thawthang alawm.”

“Hman deuh khan mi pakhatin a kam vêla bâwng a tamzia thu a sawi a, mi cheng pawh an awm vak lo niin a sawi.”

Kirby chu a ngawi vang vang a, “Khu lai vêlah khuan phaitual hnim pawh a tam a, bâwng inthlah pun nan pawh duhthusam a ni ang; mahse, ka naupan lai bâk chu ka la kal leh ta bîk lo a ni," a han ti a.

Hmar lam aṭanga an thu dawn dan chuan dûm kam vêleh Belser leh Chance-te chu an che nasa tih hriat a ni a, an zingah chuan Joel Reese pawh a tel bawk; mahse, riahbûk rauhsan bâk chu hmuh tur an nei lo ni àwmin hriat a ni.

Chûng zawng zawng ai chuan Katy Thorne-i an enthla reng a ni tih thu chuan Cullen-a rilru chu a la lehzual bîk a, an hliam enkawl pawh sakawr chung chuang pahnihin an rawn hruai a, Katy erawh chu engtin mah an ti lo.

Lost River kam vêla bâwng chu an dap leh ta a. Texas-a mi ngo lo thleng hmasate pawh khan ramhnuaia bâwng awm tâte inthlah chhawngho chu an rawn hmu nual a, chûng bâwngte chu tun hmaa Spanish-ho kalsante an ni a, chhim leh hmar indo khan tam takin an va fin a ni. Chûng laia bâwngte chu lian tak tak leh hlauh nei hauh lote an ni a, khalh khâwm pawh thil hautak lutuk a ni reng a ni.

Chu lai ram chinchang chu Kirby leh mi ṭhenkhat chuan an hre viau a, hah taka an beih hnuah, bâwng zathum (300) zet chu an khalh khâwm leh thei ta hram a. Tichuan, an bâwng rualte chu hmar lam an panpui a, rei lo têah an huang tur ṭha fahran mai pawh an hmu leh ta a.

Chu huang chu Mexican-hovin sai pawhin a sut tlang theih loh tura hnimhnawk leh ram hruia an phan bur mai hi a ni a, a chhungah chuan tui leh hnim tam tak pawh a awm bawk a. Chutah chuan Cullen-te chuan an bâwngte chu an khalh lût ta a.

An awmna lai chu Big Thicket bul mai a ni a, an ran rualte an dah fel hnu chuan Big Thicket hmuna kawngṭumah chuan a indawt thliaiin an inzûi chhûak leh ta a. An sir tawna hnimhnahte chuan an rawn hrut leh zauh ṭhin a, an silai chu hmang mai thei turin an inring êm êm vek a, inbeihna an tâwk thuai ang tih pawh an ring a, chu vang chuan an inring hle vek a ni.

Borûak chu a lum ûap churh a, kawngṭum chu sazupui hian a rawn kân zawk a, hnimpik hla lo têah chuan sanghal an innawr ngek ruai ruai bawk a. Cullen-ate chuan nghalchang tawh palh thut an hlau rilru hle a, a hlauhawmzia an hre hneh êm êm vek si a, a hun hmaa silai hmeh puah a ngai ang tih an hlau tlat a ni.

Chumi zan chuan phul zawl zau vak lovah hian riahbûk an sual a, zawi tê tê hlir hian an inbe hlawm a. Borûak awm danah chuan ruahpui rawn thleng mai dawn ni hian a lang a, ngun takin an silai pawh chu an hru fai hauh hauh hlawm a. Barlow leh a hote chuan buaina siam tumin an rawn pan leh ngat a, anni pawhin lo tih hlawhchham an tum bîk hauh lo.

Cullen chuan a spencer bâkah dragon colt pahnihte chu ngun takin a ti fai a, Bowie chemtê a la pai ta fo bawk a. Mahse, Barlow hote zinga ṭhenkhat chuan pûakruk panga / paruk laite an pai hlawm a, rang taka silaimu thun a buaithlâk ṭhin avangin a mu thun khah sa ṭhap chu an pai ṭeuh mai a ni.

Cullen chuan Quantrell Raiders zinga ni rei lo tê a awm chhung pawhin mi ṭhenkhatin an kâwnga pistol an pai bâkah sakawrah te an la thiat lawr fur ṭhin te pawh a lo hmu tawh thin a. Rûkru, Omgus pawh khan pali panga lai a pai a; mitmeng sen rum leh khap zaih zaih ṭhin a ni a; a hnu deuhah Outlaw angin a thang chho va, a hming tak chu Jesse Woodson James a ni.

Cullen-ate ṭhianho chuan niin vanlaizawl a thlen veleh chuan an sakawr awmna chu an pan sang sang a, chu chu an mi va ṭhawn turte tan chuan an chhun mut hun a ni.

Cullen-ate chuan an sakawrte chu an kaltir ta a. Barlow hote riahna chu an hriat sa tawh avangin dîng takin an pan vang vang a, a bul hnai an va thlen chuan an sakawr chu an pawt ding ta a.

Cullen chuan nuih sak pah hian, “Sakawr tlantir paha kah tur,” a han ti zauh a.

An hma lawk hnim bukah chuan hmeichhe pakhat hi a han ṭe ṭhat a; mi pakhat hi a nui zûi huk huk a, tu emaw hian bengchheng lo turin a lo vin tuar bawk a.

Cullen-ate chuan sakawr huang chhunga sakawr tam fe leh thuk eng emaw zât chunga ei tur inchhuang mek chu an hmu thei tawh a, a bul vêlah chuan mi ṭhenkhatte chu inthlahdah zet zet hian an tlu zal bawk a.

Hmun fai laiah chuan mi pakhat hian a kut lehlamin hmeichhe pakhat hi a lo chelh bet a, a kut lehlam chuan whip a keng bawk a, “Min tlanchhiatsan i tum khanglang a maw? Min hriat reng nan ka han hlap hrep teh ang che, hmeichhe vûak loh hi zawng an ṭha thei tak tak ngai lo,” a lo ti tun tun a.

Cullen-ate hnena chanchin rawn hrilhtuin mi sawm panga (15) vêl ni àwma a rawn hrilh kha a ti sual deuh a ni. Barlow hote chu sawmthum (30) vêl zet an lo ni a; mahse, ṭhenkhat sakawr hah danah chuan rawn thleng hlim hlawl pawh an ni thei bawk.

Longley chuan, “An tam fu mai, Cullen; mahse, va ṭhawn ngei chu kan duh si a ni lawm ni kha?” a han ti sar sar a.

Hul leh ban charh hian Cullen chuan, "Vawi khat ṭheuh kan kah hnuah tlan luh tur, tu mahin ṭhelh miah loh bawk tur. Tun ṭuma Barlow hote kan hmuh theih zawng chu an nih hmel a, tu mah kan chhuah tur a ni lo,” a lo ti a, sakawr chu a kaltir ta nghâl a.

Sakawr chuan vaivut a rap khu sat sat a. Khua a lum bawk a, Cullen-a biang leh taksaah chuan thlantui a luang zawih zawih a; hla deuh takah hian choâk a hram lauh lauh a.

A ruala va ṭhawng tur pawhin an sakawrte nen phei chuan an intam hleih kher mai; mahse, an va barakhaih fuh hlauh chuan an chan a ṭha zâwk thei dawn tih erawh chu tu mahin an hai lo.

Barlow hote chuan khaw dang hawi miah lovin whip kengtu leh nula lam hlir chu an lo thlir huang hlawm a.

Chutah, whip kengtuin hmeichhia chu vûak tuma a lek kan lai takin Cullen chuan a silai chu a hmet pûak ta thawr a, chu veleh silai ri eng emaw zât hian a zûi nghâl zawt zawt a.

Whip kengtu chuan nula a vawn chu a thlah nghâl hlawl a, leiah a tlu bawkkhup ta thlawrh a.

Thing pakhat bul aṭangin mi pakhat, a ṭhiante aia che rang deuh bîk chu a rawn ding chhûak zawk a; mahse, amah leh mi dangte pawh chu silaimu chuan a deng hlãwm nghâl ta nawk nawk a.

Chutah, Cullen-ate chu pali ve vea inṭhenin Barlow hote chu an tlan hual ta pawp pawp a, silai chu an hmet pûak ṭhuai ṭhuai reng bawk a.

Barlow hote chu an tlan darh ta sung sung a; mi pakhat, laiphir rawn lek vetu ber lah chu a ha hmai bal ṭhawt khawpin silaimuin a deng zat a, a lir nghâl tawl a.

Chutah, Longley chuan thuka mei intuah alh hliah hliah lai chu a sakawr aṭanga kun hniamin a zuk pawt dâwk a, piah deuhva chawlhbûk chungah chuan a vawm kai a, a alh zûi ta hluah hluah a.

Bob Lee chuan an nula vûak tum mek chu a sakawrah a pawt kai nawlh a, chu lai hmun aṭang chuan a tlan chhuahpui ta daih a.

Matt Kirby pawh chuan sakawr huang kawngkhar chu a va hawng a, sakawrte chu a ûm darh ta vek a.

Kil khat aṭang chuan silai a rawn pûak ve leh ta phauh a; chu lai hmun chu silaimu pathum ngawtin a va chhang lêt nghâl zawt a. Hnimbuk aṭang chuan mi pakhat rawn pên chhûakin, hmai lei nawr nawkin a tlu ta a; chutah, a inlet thawk a, van lam thlir ru leh a mit chuan eng mah a hmu tawh chuang lo tih hriat tak hian a mu thal ta reng a.

Cullen-ate chuan chu lai hmun aṭang chuan an sakawr chu an tlan chhuahtir a, Barlow hote riahbûk chu a alh hluah hluah a, bâwng an lo kawl hote chu an khalh hawsak ta vek a.

Kawngṭum sir aṭang chuan hmeichhe pakhat hi a rawn ding chhûak a, ṭanpui a lo ngen chul a. Chu nu chu an hren beh reng, hun remchang a hmuh tâk veleha tlan chhûak ve hi a lo ni a. An sakawr pakhatah chuan an chuantir a; chutah, chak takin an tlan zûi ta a.

Khua a thim chuan chu lai Thicket hmun chu an chhuahsan fel tawh a, Louisiana State ramri an thleng hman tawh a. An nula chhan chhuah chuan, bâwng pathum leh sakawr pakhat chu a pa ta a nih thu a sawi a, an khalh hransak ta a.

Fort worth an hnaih tâkah chuan nula chu mahni in lam pana a kal a ngai ta a. Tichuan, a sakawrah chuan inherin Cullen-ate chu a han en a, “Pathianin min chhan chhûak tura a rawn tirh che u avangin in chungah ka lawm tak zet a ni. Tute nge in nih?” a ti ta a.

“Hei hi Bob Lee a ni a; kei hi Cullen Baker ka ni,” tiin Cullen chuan an vaia hming chu a han sawi diat diat a.

“Cullen Baker chu Sam Barlow aia khirh leh sual zâwk fe ni àwmin miin an sawi ṭhin si a!” mak ti fe hian nula chuan a ti ta ha mai a.

Bill Longley chuan, “Awih duh hauh suh! Cullen hi chu pa ṭha tawp a ni a; mahse, ṭan khawh lo thei lovin an nawr chêp mai a ni zâwk. Caddo Lake chhim lama Barlow dang bet thei turin keini hi min chah ve ta a ni,” a lo ti vat a.

Nula chuan lawm tih hriat zet hian, “Ka lawm tak zet a ni, in thil tih hi ka theihnghilh tawh ngai lo vang, min chhanhim tâk dan hi mi zawng zawng ka hrilh ang,” a ti ve ta seuh seuh a.

Cullen pawh chuan, “Va haw leh ta la, in chenna a lo chhe tawh a nih pawhin a thar va din leh tawh u, buaina hi chu a la kiang mai ang,” a han ti ve leh a.

Tichuan, Fort Worth chu an pan dîng ta nghâl a, an ran rualte chu an hralh ṭhen nual a; mahse, a tam zâwk chu Fort Worth-ah an hralh thung.

Kalkawngah an fimkhurin an kal chak thei lem lo bawk a, an hna thawh chanchin chuan Fort Worth a lo thlen khalh hman daih tawh a. An sawi dan phei chuan, 'Cullen Baker leh a hote, mi sawmnga (50) vêlin Barlow-te riahbûk an suasam,' tih a lo ni a, mi tam tak phei chu an lawm hle nghe nghe a ni.

Barlow-te va beitu takte kha chu pariat (8) chauh an ni a, hliam tuar pakhat mah an awm lo bawk a ni. An inring lo lai an va nang fuh a ni bawk a; chu lo rengah chumi ṭum chu Barlow leh a hote an hmuh chhuah leh beih hmasak ber a la ni.

Cullen-ate chhût dan chuan pasarih aia tlem lo chu an kâp hlum ngei a, tam fe chu an hliam bawk a; chutah, an bâwng rûk sa an chàn vek bâkah an ei tur Ieh silai tam tak an chán vek bawk a ni.

Fort Worth an thlen chuan mak ti hmel deuh hian Buck Tinney chuan, “Khuaah hian mi sangkhat (1000) chuang lai an awm mai ang,” a lo ti ha a. Khawpuia la kal ngai lo a ni bawk a, a àwm viau tho mai.

A unaupa Joe chuan, “Hêng aia khaw lian pawh hi a awm alawm. New Orleans te chu lian tak zâwk a ni a; Natchez pawh a lian fe zâwkin ka ring,” tiin a lo hrilh fiah a.

“Awih harsa ka tih zawng tak a ni.”

Cullen-ate chu Hotel-ah an lût a; an inbual a; an inmêt fai a; an sam te an mehtir a, khuaa an rawn luh tirh ai kha chuan an dang ta vûk mai a.

Tinney-te unau chuan khuaa mi veivâkte chu hmuhnawm ti fe hian an lo thlir reng a.

Cullen-a'n, “Ni tlâkah chuan Hotel-ah hian kim leh vek ila a ṭha ang. Buaina a awm loh chuan kan riak ang a; buaina a awm erawh chuan kan inthiar fihlim nghâl a ṭul thung ang,” tia a ṭhiante hnena a sawi hnu chuan an vâk darh ta hlawm a.

Kawtthler lehlama mi pakhat chu a hmuh tawh hnu ni tlata a hriat avangin Cullen chuan nuam a ti lo rilru deuh hle a, anmahni hmelhriattu an awm hi chuan buaina a chhûak chawk ṭhin si a.

Bob Lee nen chuan zu in turin an inzûi ta a. Bob Lee chuan, “Chaw tui tak leh thawmhnaw ka mamawh ngawt mai,” a han ti nang nang a.

Cullen pawh chuan thawmhnaw thar a mamawhzia chu a hai bîk lo. An ran hralhnaah an hlâwk bawk bâkah thawmhnaw thar chu mahni intih danglam nan pawh ṭulin a hria a ni. A tum loh deuh hian, “Khawthlang lama kal i ngaihtuah ve tawh ngai em?” a han ti chhûak phut a.

Minute khat vêl a ngawih vang vang hnuin Bob Lee chuan, “Ka vua leh vangte he laiah hian an awm vek a; Peacock chhungkua nen kan inrem thei der lo lehnghâl a; eng tikah nge kan inrem ang tih lah hriat phâk a ni dèr bawk hek lo. Ni e, khawthlang lam chu ka ngaihtuah ṭhin alawm, Mexico te pawh pan ta daih ila a ṭhat ka ring,” a ti ve ta a.

“Kei pawh ka ngaihtuah nasa ṭhin khawp asin.”

"He laiah chhungte tu mah i nei bawk si lo va."

“Ni e, hming chhe taka thanna chiah a ni ka hlawh ni."

“Chu vang chuan em ni bâwng hi kan hralh? Khawthlang lama kalna tur phuhrûk nan i ti deuh a ni maw?”

Cullen chuan a chhan hmain a kut ding lam chuan no chu a han chawi kang a, John Tower chu a hmu ta a. A vei lama Bar ngheng a ni a, a vei lama pûakruk chu Bar tlang rawn lawr deuh chuan a dal tlat lehnghâl a, a tan chuan han chêt thut chu a rem lo kher mai.

Tower chuan, "Lacy Petraine-i'n a hmu duh che," a lo ti a.

Longley chuan, “Fimkhur hle rawh, thang a ni maithei a nia,” Cullen hnenah chuan a lo ti ve a.

Tower bawk chuan ram hmak hian, “Thang ka mamawh lo, ka buaina chu keimah ngeiin ka ching fel ṭhin,” a lo ti a.

Lacy Petraine chu kawtthler lehlam, hmeithai thingpui dawrah hian a lo ṭhu vang a, Cullen-a va lût chu a inchei danglam ta êm bawk a, a lo hre mai lo va; a hriat chhuah tâkah chuan, “Gentleman dik tak i ni ta, Mr Baker, khatiang thawmhnaw kha inbel fo la a ṭhat dawn kha,” a lo ti a.

“Min hmuh duhna i nei deuh em ni?”

"I ram zawng zawng hi leisak che ka duh a ni.”

Cullen chuan Lacy ep chiahah chuan ṭhut hmun a rem a, a pain hna a lo thawh hah tawh dan te ngaihtuah chung chuan, “Hralh theih a ni lo,” a ti hmak a.

Lacy chuan dawhkan rawn bawh pah hian, “Cullen, i rilru chu ka hre thiam alawm; mahse, he laiah i tan tih theih a awm tawh lo. Inanna tam tak kan neih avangin i rilru puthmang chu ka hre thiam êm êm a; mahse, i tana beiseina awm chhun chu inthiar fihlim a ni mai,” a han ti leh a. A rimtui inhnawih te chu a rim a na chiai chiai hle lehnghal a.

Lacy thu sawi dikzia chu Cullen chuan a hre chiang êm êm a, Carpetbaggars-ho chuan awm loh hun nei pawh ni se, Chance Thorne a la awm ta fo va, a dang a nalin chhung leh khat a nei ṭha si a, a insawi fihlim thuai thei dawn tlat a ni.

Mahse, tuin nge Cullen Baker-a chu ring a, thubuai sawipui ve ta ang? Bob leh mi dangte pawh kha an cham reng duh dawn em ni? Chu ringawt pawh chu zawhna lian tham tak a tling a ni.

“Ka thu sawi chu pawm mai teh Cullen, i hneh theih hauh loh tur i do a ni si a. Kei pawhin hneh ngei tumin hetiang hi vawi hnih ngawt ka bei tawh a; mahse, ka chanchinin min zûi zel a; nang erawh chu tu ma hriat loh, khawthlang lamah i kal bo daih thei a ni,” Lacy chuan a han ti leh a.

“Ni e, i sawi chu a dik maithei.”

“I ti zam êm êm a, Cullen.... Tunah hian thah ngei che pawh an tum a, i dam reng hi an tan thil hlauhawm ber a ni tawh tlat.”

Cullen chuan a hmaa coffee no chu a tlâk ta a, a ding chhûak a, dawhkana pawisa dah pahin, "A lawmawm khawp mai; mahse, tunah chuan ni rih lo ve,” a ti ve ta tlat a.

Lacy Petraine chuan, “Inngaihtuah rei suh ang che,” a han ti zûi ve leh hram a.

Cullen chuan tukverh aṭangin pawn lam a han thlir vang vang a, Dud Butler-te an rawn inrawlh ve ta a; tichuan, Bob Lee dinhmun atan pawh a hlauhawm hle dawn tih a hre mai bawk a.

Lacy chuan zàwi leh fiah tak si hian, “Cullen, Katy Thorne pawhin pasal a nei dawn, rawn ngaihtuah buai duh suh,” a han ti leh sap a.

Cullen chuan, chu thu a hriat laia Lacy hmuh theih loh tura lehlam a hawi hlauh chu lawmawm hle hian a hria a. Katy pasal nei tur chu thil theih a ni dawn em ni? A hnenah eng emaw tal sawi àwm tak a ni a.... Mahse, engah nge ani teh lul chu a hrilh kher ang?

Chutah, ban charh hian, “Ka lo hre ve hauh hlei nem,” ti ngawtin a chhang ta a.

“Hman aṭanga thil inṭan tawh a ni, Cullen. I lo haw hma daih aṭang tawh khan, i hre hauh lo chu a mak zâwk hle mai.”

"Tu nge a pasal tur chu?”

“Zirtirtu Tom Warren a ni. Kum khat kal tâ aṭang khan a rim ṭan tawh a, Katy ni; Florence te nen pawh hla deuh hlek aṭang chuan thisen inzawmna pawh an nei àwm asin.”

Lacy chu a rawn tho chhûak ve ta a, Cullen-a bulah chuan rawn ding vein pawn lam chu a thlir ve vang vang a, “I ram chu min leitir leh lo mai rawh, Cullen...; mahse, khawngaihin kal bo la ka duh a ni,” a han ti leh a.

“Eng vanga min ngaihtuah viau nge i nih?” Cullen-a'n a han tih chuan Lacy chuan chhan ngaihna a hre lo hle a ni tih a lang thei a. Cullen chuan han kuah mai pawh ni se, a ṭang hauh lo vang tih pawh a hre thei mai a, a hmel pawh ṭha a ti êm êm a ni. Chutah, Cullen vek chuan sawi tur dang hre lo zet hian, “Ka kalsan mai ang che,” a han ti leh ringawt a.

Lacy chuan a bana dawm pahin, “Khawngaihin mi rawn hmu leh ta che, Cullen,” a han ti leh hram a.

“Ni e, ka rawn lang leh ngei ang.”

Cullen chuan kawtthler chu ngun takin a thlir phawt a, pawnah chuan a chhûak ta chauh a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 15th, 2018, 12:46 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 9
(Rozami Pachuau)

Kawtthlerah chuan Wagon a awm nual a; mahse, chawhnu her a nih tawh avangin mi veivâk pawh an tlem pharh tawh a.

Cullen chuan chu khua chu chhuahsan vat duhna a nei ta thut a, ramhnuai reh taka mahnia ngun taka inngaihtuah a duh tlat tawh a ni. Katy chuan tu pawh lo nei ta se, a tan eng nge a pawina vak tur?

Cullen chuan kawtthler chu thlir ngun ve fea a lo inngaih laiin, a rin loh deuhvin a hnung lam aṭang chuan, “Cullen Baker, ka that dawn che!” Dud Butler-a âw ngei mai chuan a rawn ti ta thut mai a.

Chu veleh Cullen chu inngaihtuahna hun pawh nei mumal hman lovin a vir zawk a; chutih rual chuan a dragon colt chu a phawi dâwk nghâl zawk a, Dud Butler-a ṭawng zo hman deuh chauh chu a kâp ta ṭhuai a.

Butler chu a dingdihlip âwk a, a hma lamah a pai nawk a, hmai lei si chawrhin a tlu ta thlawrh a. Lei a thlen hma hma chuan a thi fel hman der tawh a ni.

Silai hmet pûak mai thei tura inring ran chungin a ṭhiante chuan amah hnungchhawn zawngin Cullen-a chu an rawn din hual nghâl vat a. Kirby chuan an sakawr a rawn kai a; Jack English chuan spencer a keng vang a; Bickerstaff chuan lehlam hawiin .44 Henry rifle a hum ran bawk a, Cullen chu an rawn veng nghâl ṭhap a ni.

Pa sang deuh, hmui hmul buang thung hian Butler-a ruang chu a rawn en chiang a, rawn dah chhuah leh pah chuan, “A dik lohna awm lovin ka hria; mahse, khatiang khawpa silai phawi rang thei kha ka la hmu ngai miah lo,” a ti ta a.

Mi an rawn pung khâwm ta ṭuk ṭuk a, pakhat chuan Cullen chu en ha chung hian, “He pa, thi tâ hian, 'Cullen' a ti tlat chein ka hria?” a han ti a.

Nui sang chung hian Bill Longley chuan, “Cullen-a a ni hlei nem, Gulf kam aṭanga bâwng vulhtu, kan pu a nih hi,” tiin a lo chhan khalh a.

Matt Kirby chuan a sakawra lawn kai pahin Butler-a ruang chu a han en vang vang a, hre chhûak ta thut ni àwm tak hian, “Hei chu Barlow hote zinga mi a ang hle mai, Dud Butler-a a nih loh tâkah!” a han ti chhûak phawng a.

Chutah, Cullen-ate ṭhianzaho chu an sakawrah an lawn kai nghâl a, khua chu chak takin an chhuahsan ta a. An hnu-hma ti buai thei turin bâwng rual hnu-hma chu thui fe an zawh a; chhim lam pana thui fe an kal hnu chuan khawchhak lam panin an kal leh ta a. Hmun hniam lai hlir an chuh a, tu ma'n an rawn ûm zûi chu ring chiah lo mah se an inthlahdah chuang hauh lo.

Trinity lui chu an hnu-hma thup nan thui fe chu an zawh leh a, a kamah an hahchawl ta rih a. Mut hmun an rem fel meuh chuan zanlai a pel mah tawh a.

Longley chuan, “Nichina putar sawi kha a dik a ni, khatiang khawpa pûakruk phawi rang kha kei pawhin ka la hmu bîk lo reng reng,” tih pahin a pheikhawk a phelh mawlh mawlh a.

Thliin hnimhnah a rawn chhem ri sang sang a, thla a êng hle bawk a, ralkhatah chuan chinghnia a û rawng rawng bawk a.

Cullen chuan mei a zial a; “I sawi kha a dikna lai a tam àwm e, khawthlang lam pan vek ila a ṭha ang,” Bob Lee chuan a ti ve ta a.

Cullen Baker-a muhil a rawn harh chuan kawl a lo êng ruih tawh a. A vâwt kher mai a; tichuan, a tho va, a bula mei chhem thi lek lek tawh chu a ti nung ṭha leh ta a. A rilru chu a vâk thuiin a inngaihtuah nasa êm êm a, eng vanga kir leh nge a lo nih reng reng? Awlsam taka bibo thei mai tur a ni si a, hahdam taka awm thei mai tur a nih vei nen!

A hma zan khan an la hmelhriat ngai miah loh mi pakhat hi an mikhual a. A tua mah chuan an hre ngai lovin, riahpui chu châk vak lo mah se, mikhual han hnar chu an tih ngai loh tak a ni hlawm si a, an kiangah chuan an riahtir ve ta a. Chanchin thar sawi tur lah chu a hre êm êm mai lehnghâl a.

A sawi danin Marshal khuaah chuan sipai Regiment pawl khat ngawt mai an lo thleng a, Jefferson leh Clarksville-ah pawh eng emaw zât chu an indah dawn ni àwmin a sawi bawk a. Chûngho phei chu sipaia ṭang hlim, chinchang hre lo ang mai mai an ni ve lo va, an deh pawh a khirh ṭalh ngei ang. Mikhual chuan Chance Thorne leh sipai hovin dûm hmun vêl an dap thu a sawi tel bawk a.

Cullen chu a inngaihtuah nasa hle a, a coffee chhuan a so chuan Blackthorne va tlawh ngei a tum nghet ta a. A inmêt fai lai chu Kirby chuan, “Nula rim tur te hi chu an in uluk ṭhin reng a ni,” tiin a lo fiam a.

“Tih tur pawimawh a awm e, Blackthorne chu ka tlawh ngei ka ring.”

Kirby chuan, “An lo chãng ngei ngei tawh ang che. Kan pianhmang leh sam thleng hian an inang deuh va, ka lo bum kawi dawn em niang, Cull?” a lo ti a.

“Keimah avanga in lo tawrh chu dikin ka hre lo, keimah ngeiin ka ti fel thei maiin ka ring."

Bob Lee pawh chuan, “Elbow-ah khan kan lo nghâk dawn che nia,” a lo ti ve a.

Cullen pawh chuan buai inring reng renga khawsak chu a ninawm tih ve chang te a nei thut ṭhin a, chutianga rilru pu nauh nauh chung chuan a sakawr saddle chu a buatsaih ta mawlh mawlh a.

Blackthorne thei huan a thlen phei chuan ni pawh a sang fu tawh a. Kawtah chuan sakawr inthlung sa pakhat a lo awm a, Katy chauh va hmuh tum a nih avangin Cullen chu a lawm lo rilru kher mai.

Tukverh aṭang chuan in chhung chu a han bih hmasa ngawt a, a mi la hmuh ngai loh, tlangval inchei nalh tak chu a va hmu thei a, zirtirtu Warren chu a nih hmel hle mai. Lacy khan Katy pasal tur anga a lo sawi tawh avangin Cullen chuan a thik rilru nghâl hle a; mahse, eng mah a nih lohzia chu a inhre chiang êm êm bawk si!

Cullen chu Aunt Flo chuan a lo lawm thiam hle a, Katy pawh chuan nui chung hian, “Cullen, ka lo beisei miah lo che asin. Sipaiin an zawng che ni àwmin ka lo hria a; hei hi Thomas Warren, he laia zirtirtu hna thawk a ni,” a lo ti zung zung a.

Cullen chuan, “Kan inhmachhawn chu a lawmawm hle mai,” tih pahin a kut chu a phar chhûak a; Warren erawh chuan, lo chibai lêt ve tum miah lo hian, “Kei chuan lawmawmah pawh ka ngai lo. Miss Thorne hi i ngaina a nih chuan inthiar fihlim vat rawh,” a lo ti ta daih a. Petterson colt ni ngei tur hi a pai ve nghe nghe a.

Katy chuan mak ti hmel fe hian, “Mai mai a, Tom! Cullen hi ka ṭhian ṭha lutuk a nih hi,” a lo ti ve vat a.

“A mak pawh ka ti hle a ni; Lady dik tak siin eng... engtin nge hetiang... hetiang....”

Hmu awm pawha lang lo hian Cullen chuan, “Ka hmu leh che chu lawmawm ka ti ngawt mai, Katy,” a han ti ve leh ngat a. Thawmhnaw thar a inbel chuan a ti lang danglam ve hle tih pawh a hre chiang êm êm a ni.

Katy pawh chuan, “Chhim lam Gentleman dik tak ang chiah i ni ta. Chaw i ei tawh em?" a lo ti var a.

Katy Ni, Flo chu choka lamah a che nghâl vat a; Warren erawh chu a la ding reng a, a hmelah chuan a thinur hle tih a hriat theih a. Mi dang chu ni se, han zilh deuh hlak pawh Cullen chuan a duh a; mahse, Katy inleng a ni miau a, a pasal hûal a lo ni lehzel bawk nen.

Warren chuan, “Sipaiho lo kal ta thut se, thil awm dan tur i hria em?” a han ti leh a.

Katy chuan Warren chu a han en vang vang a, “Uncle Will dam lai pawh khan Cullen hi kan lo Iawm êm êm ṭhin a, eng lai pawha Iawm zûi zel a ni bawk ang. I ngaih dan a ni lo chu pawi ka ti ngawt mai, Tom. Cullen Baker nen hian in khata awm i duh lo a nih chuan i thu a ni a, la awm la chu kan duh ngawt mai,” a tihsan ta hmiah a.

Warren chu a dáng ta sawp sawp a, a chhûak mai dawn emaw an ti hman a; mahse, a ṭhu ta hnawk zâwk a.

Katy chuan Fort Worth lam chanchin te Cullen chu a zâwt a, Dud Butler chanchin pawh chu a hre ve ta thuai a. “A mak ka ti vak lo, mi tih buai ching Ieh buaina zawng hrim hrim mi a ni tlat a ni,” zawi sap hian a lo ti ve a.

Warren chuan mak ti hmel fe hian Katy chu a en ta ha a.

Katy chuan, “Mr Warren hi New England aṭanga lo kal a ni a, min la hmu mawlmang deuh a nih hi,” tiin Cullen-a hnenah chuan a hrilh fiah a.

Rang deuh hian Warren chuan, “Nang chu teuh lo mai,” a lo ti thuai thuai a.

Cullen chuan, “He lai hi khawthlang ramri a ni a, New England-ah pawh Biak in chhungah te hial silai an pai luh chang a awm maw le‚” a lo ti ban ve charh a.

“A in-ang hlei nem, Indian-ho vang alawm."

"Hnam mawl leh ã hi chi hrang hrang an awm reng a ni.”

Bung deuh hian Warren chuan, “Tehkhin chi chu a nih ka ring lo. Indian thah leh kawtthlera mi ngo thah chu a kar a hla khawp mai,” a lo ti a.

“Will Thorne chuan vawi khat chu Puritans hovin Baltimore-a chengte'n rimawi, lam leh zai an ngainat avanga zuk hal darh vek mai an duh thu min hrilh a, chu pawh chu mawlthlâk tak ni ve thovin ka hria.”

Warren chu a ding ta hluai a, “Ka kalsan teh ang che u, inleng dang i lo beisei tih ka hre lo a ni,” Katy hnenah chuan a ti nghat a, a chhûak nghâl ta daih a.

Cullen-ate pahnih chu an ngawi vang vang a, sawi tur an vàn dun kher mai.

Cullen chuan Warren chu Katy tan chuan neih chi niin a hre lo va; mahse, ani lo sawi ve tur awmin a hre chiah bawk si lo. Warren dik lohna chu sawi thei chiah lo mah se, han en mai pawha sakawr sual a hriat theih ang deuh hi niin a hria a; chu lo rengah, ngaihsaktu a neih miah loh laiin Katy chuan a lo khawngaih a ni si a.

Cullen chuan sathau khawnvar êngah chuan a han en vang vang a, a hmangaih hle a ni tih pawh a inhre thei a, hetiang êm hian hmeichhe lakah rilru a la pe ngai lo.

Katy chuan, “I vaimim vêl pawh an lo lian ta hle mai,” a han ti daih a.

“Ka ngaihtuah rei hman lo vang, Texas ka chhuahsan dawn,” Cullen chuan a lo ti thung a.

“I kal tak tak ang a maw?”

“Dawn lawm ni?”

“Eng tikah nge kal i tum dawn, a nih leh?”

“Rei tak ka awm tawh lo vang‚ ka kal thuai ang.”

“Cullen, kei pawhin hei hi ka lo duhpui reng che asin!”

“Min lo ning hle a ni maw?”

Katy chuan Cullen-a kut vawn pah chuan, "Chuti lam zawngin a ni lo tih chu i hre ve tho alawm. He laiah chuan i tan beisei tur a awm lo a ni; hmun hranah bul ṭan leh la, mi pangngai angin i awm leh thei dawn alawm,” a lo ti vat a.

“Ka neih zawng zawng he laiah hian a awm a, ka kalsan chuan eng mah ka nei tawh dawn lo a ni.”

“Engkim i kal bopui zâwk dawn alawm, Cullen. I la naupang a, i fing hle thung a, thahrui i nei bawk a, i tum chuan tih theih loh i nei hlei nem.”

Cullen chuan Katy chu a han en vang vang a, eng ang pawhin duh mah se; thil pakhat, neih theih loh niin a ngai nghet tlat tawh a. A chan leh a dinhmun hahthlâk tak mai chu a han ngaihtuah a, lawmna tur reng awmin a hre tawh lo. Mahse Katy’n, he laiah tih theih a nei tawh lo tih a hrilh chu dik a ti êm êm bawk si. Chutah, a ding chhûak a, “Ka kal leh tawh ang e," a ti ta a.

Katy chuan, “Ngawi lawk rawh," tih pahin sathau khawnvar chu a han chhem hlum vek phawt a, Cullen chu thimthamah chuan a pên chhûak ta a.

Thli thaw aṭang chuan dûm leh lei ṭha rim a rawn nam huk huk a, Cullen chuan chutiang te chu hre pha tawh ngai lo turin a kalsan thuai tawh dawn tih a hre ve reng a; chu vang chuan thinurna nasa takin a rilru chu a rawn luah ta a. Eng pawh ni se, Katy chuan tu pawh neih tum se, han sawi lan ve reng reng chu ṭhain a hre leh ta a, “Katy...‚” a han ti bah nak a.

A sawi zawh hma hma chuan thimtham zingah amah hual rutute chuan an rawn dinchilh hman der tawh hi a lo ni a, Cullen-a tan pawh chêtna hun reng reng a awm ta lo.

Amah hualtute chu mi paruk (6) vêl lai an ni a, an rifle chuan kâp mai thei turin Cullen chu an tin zâwn sa vek bawk lehnghâl a. Thla a en vak loh avangin an lang riai ruai thei chauh va, Cullen chuan a chêt hmasak vaih chuan Katy chuan silaimu a tawng palh thei dawn tih a hriat avangin an chêt hmasak chu a nghâk ta zâwk a.

Thimtham aṭang hian Chance Thorne-a âw ngei mai chuan, “Che sawn miah suh, Cullen, kan rêk fuh ta chiah mai che,” a rawn ti ta a. Chutah, amah pawh chu êng riai ruaiah chuan a rawn pên chhûak ve ta a, “Tunah chuan kan khai hlum ngei tawh dawn che,” a han tih zawm leh a.

Mi pakhat hian a hnung lam aṭangin Cullen-a pûakruk pahnih pai chu a rawn phawisak ta nghâl a.

Katy chuan a bula la ding reng chung chuan, “Cullen, eng nge min zawh i tum kha?" a han ti leh hram a.

“Eng mah a ni lo, thil âtthlâk tak a ni.”

Chance chuan, “Katy, in chhungah lût rawh, eng thil pawh a thleng thei a, i hmuh ve chi a ni lo,” a lo ti a.

In hnung lam aṭang chuan mi hang pakhat hi a rawn chhûak a, chu pa chu Bert-a a ni. Katy sal hlui leh rinawm deuh mai a ni a, Katy chuan, “Bert, ka sakawr kha hman mai theihin lo bûatsaih teh,” a ti ta zâwk a.

Chance chuan lawm lo hmel fe hian, “Chu zawng ka rem ti hauh lo, inkahna pawh a thleng thei asin,” a lo ti a.

Nui chung hian Katy chuan, “Chu vang tak chuan alawm ka tel ve dawn, inkahna a awm loh phah ka ring zâwk; in mi man hian tan in a thleng ngei em tih ka hre duh a ni,” a ti ta mai si a, Chance chuan han dan vak ngaihna a hre lo hle a ni.

Cullen chuan khai hlum an tum ngei tih pawh a hria a, Katy avang chauhva an tum dan keng kawh mai thei lo an ni tih pawh a hre bawk. Mahse, a tana chêt dan hun remchang tur chu melh ran a la tum ve fan a. “Ngaihtuahawm ka ni lo vang,” tiin Katy chu a han hnem ve ngawt a.

Thimtham zing aṭanga elsen zeta nui chungin Joel Reese chuan, “Chu zawng ring lutuk duh suh, hruizen ka hum reng tawh a nia," a rawn ti ve ta a.

Cullen chuan amah an hlauh dan leh, a ruala awm khâwm an nih avang chauha inti huaisen an nih chu a hre reng a, a mal chuan tu mah huaisen tak tak an awm lo tih a hre chiang a ni. Chek tlak tlak chung hian, “Hruizen i nei nâ a, thimtham aṭanga rifle mu lo kal i hmu thei ang em, Joel?" a han ti lêt ve sak a.

An awm dan aṭang chuan ngaih ṭhat lohna rûk an nei ta tih chu a hre thei nghâl mai a, Cullen chu khai hlum duh hle mah se dam an la thlang tlat a ni tih pawh an hmel aṭang chuan hai rual a ni ta lo.

Cullen chuan, “Hetah hian keimah maia ka lo kal in ring em ni? Ka ṭhiante'n thimtham chin aṭang sawn min lo thlir reng tih hi theihnghilh ma ta che u; ka chungah eng pawh a lo thleng a nih vaih chuan damin tu mah in chhûak hauh lo vang. In ngam a nih chuan tunah in tum chu ṭan nghâl rawh u le,” tiin a sawi ṭhaih ta a.

Reese chuan hlauthawng chung leh intih huaisen tum tih hriat tak hian, “I daw chiang lutuk!” a han ti thlarawk a; mahse, eng mah zawng a ti ngam bîk dèr lo.

Chutah, Cullen-a kut chu a sakawr saddle horn-ah chuan an phuar behsak a, chu lai hmun aṭang chuan an inzûi chhûak ta a, a ke pawh a rahchhanah chuan an phuar bet tlat bawk a.

A sirah chuan sakawr chung chuang pahnih hian an kar cheh tawn a; pathumin hma an hruai a; pathum dangin an dãwl a; mi dangte chu silai kenga inring sa rengin an kal darh a. Mi paruk (6) lek pawh an lo ni lo tawp mai.

Chutianga an kalpui tâk hnu pawh chuan an chungah eng mah a la thleng ta hauh lo; mahse, Cullen-a sawi ṭhaihna avang chuan an tim hle tih chu a la hriat a. An sir lawka thingṭang a han tliah rîk rap tâkah chuan chu lam hawi chuan an silai kaw hmawr nen an hawi rual ṭhawt hlawm a.

Cullen chuan zamna tel miah lo hian, “Ṭan khawh chu tum duh ting lo mai rawh u, an duh hunah chuan an rawn nuai chimit barh dawn tho che u. Tunah rih chuan min khawih na lo tih an hmuh ve reng avangin in la dam a nih hi; min khawih nat vaih erawh chuan dama khaw lût thei in awm hauh lo vang,” a lo ti vat a.

Reese chuan, “I hmui kha chip hmiah rawh‚ khua kan thlenpui hunah che chuan thil awm dan chu kan hre mai dawn alawm," a lo ti vin ve hluk a.

Cullen sira kal, pa sa ṭha nelh nulh chu a rawn kun hniam a, “An khaina tur che hruihrual hi nei thei tura dam ngei ka tum a ni, Baker. Hralh pawh ni ila, 'Baker-a an khai hlumna a nih hi,' tiin zuar ila, hralh a tla phianin ka ring,” a rawn ti sur sur roh a.

Kawng sir thimtham lai aṭang chuan chhimbuk hi a rawn hram ta dut dut a, Cullen chuan a sawi ṭhaihna ang kha a dik ta chiah a ni tih a hre mai a, chu chu Bill Longley âw ngei a ni tih pawh a hre chiang tlat a ni. An hma lam kawng sir aṭang bawk chuan chhimbuk dang ni ngei tur hian a rawn chhawn ve nghâl zat a; chutah, an hnung leh sir tin mai aṭang chuan an rawn hram zûi ve ta zel mai le!

Reese chuan anchhia a phuh chhûak bawrh bawrh a; mahse, a âw tham ruai danah chuan a zam hle tih a chiang kher mai! A hnunga rawn zûitute pawh chu an innek khâwm nasa ta mai a.

Cullen chuan, “Min chhuah mai ula in tan a ṭhat zâwk ka ring; ka sakawr aṭanga ka tla palh a nih vaih chuan mitthi in let phung mai dawn a ni,” a han ti zûi lehnghâl a.

Amah mantute chu a ṭhiante aia an tam zâwk avangin an tan rawn chhan chhuah ngawt chi a ni bîk rih lo. Rawn bei tâ pawh ni se, Cullen ber pawh chuan a thih phah hlauh mai theih dawn avangin buaina eng mah thleng lovin him takin khua chu an thlen luihpui ta tho va; an thlen veleh Cullen chu Jail-ah an khung ta nghâl hmak a.

Tan in pindan pawn lam thir kham kar aṭangin Chance chuan, “Tunah chuan i tawpna a thleng dawn ta, i ṭhiante pawh kan nuai chimit thuai ang,” a han tih khum salh a.

“Chu zawng, thil harsa lutuk a nih chu!”

“Tunah hian nangmah hmangin kan hip khâwm tawh a; sipaiho kan chah ang a, hla deuh tak aṭangin kan hual ṭan ang a, khaw thleng rawk hian kan hawl khâwm tawh mai dawn a ni."

Cullen chu a ngawih reng avangin Chance bawk chuan, “Hektu kan nei ṭha a, Bob Lee pawh an in a tlawh leh hunah chuan kan man nghâl hmak thei tawh ang; chutiangin Bill Longley pawhin a daih rei bîk bawk lo vang,” a han tih zawm leh a.

“Kei min man avang ngawt hian thil dangah pawh vannei ta zel turah chuan inngai ngawt teh suh!”

“Kan hektu pangngaite hnen aṭang ni lovin‚ tuna i awmnaah khan man theih i ni tho tih kan hria asin.”

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 17th, 2018, 1:44 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 10
(Rozami Pachuau)

Cullen chuan a tanna tukverh aṭang chuan chumi tualzawl zau lai leh Tom Blaine-a office chu a hmu thei a, Judge chu Katy ṭhian a ni nghe nghe.

Khua a lumin a reh vawng vawng mai a, kawtthlerah chuan thil che hlek han hmuh tur pawh pakhat mah a awm lo. Kawtthler sira in pakhat tukverh aṭanga khawnvar êng rawn inkâp chhûak raih chuan kawtlai te chu an ti êng ve deuh uar thei a. Kawtthler sir, mihring kal nana hmun dawh sana kal an awm chang chuan thing phel a ni bawk a, a ri leh kauh kauh ṭhin a; khaw sir lehlamah chuan ui a bauh lauh lauh a.

Cullen-a chuan tukverha thir kham chu a han sâwi chhin a, a mihring hriat tawhah chuan Colorado-a German mi pakhat a tawn tih loh chu a aia chawi hnem leh pawt chak a la hre ngai lo; mahse, chu tukverh thir kham chu a lo nghet phian mai a, a han phih nawn leh pawhin a hma ang thovin a la nghet bur mai a.

Pindan chhungah chuan a tei kual chhat chhat a, chhuah theih dan tur ringawt chu a ngaihtuah a ni.

Tukverh thir kham pawn lama kawngkhar thir kham tho awm chu han khawih chhin a châk hle a; mahse, tukverh aṭang chuan chhûak thei ta teh reng pawh ni se, vengtu an awm tlat si.

Katy inah a Ieng tih thu chu tu takin hrilh ni ang maw? Warren kha a ni thei ang em? Sipaiho lo kal palha Katy vanduai theih dan tur te kha a sawi si a, ani chu a ni thei dawn em ni?

Cullen chu dîng taka inngaihtuah chungin a mu ta ngawt a, a rawn harh chhuah leh chuan ar a khuang tawh a. A ṭhu chhûak nghâl hlawl a; chutah, a derringer pai chu a han hre chhûak leh zawk a, a pûakrukte chu chán tawh mah se ralthuam tênau deuh chu a la kawl tho va, a lawm hle nghe nghe a ni. Chutiang derringer chu hmeichhe silai ang leka ngaih ni mah se, a kah phâk chinah chuan .44 mu pahnihte chu Hmeichhia lo tak an ni ve tlat tho a ni.

Mi pakhat, sang deuh, thawmhnaw dumpawla inthuam hian ei tur a rawn pe a, khai hlum ngei an tumzia te chu a rawn sawi nawn ve leh a; mahse, a hun tur erawh chu a hre mai bîk lo. A ṭawng zawng chuan a hrawk bawk a kal rawlh rawlh a, an titi dun zûi ta bawrh bawrh a.

Pindan pawn lam aṭang chuan, “Hey, Wesley,” tiin an rawn ko ta a. A lo kir leh chuan chanchinbu, kar khat lai liam tawha mi hi a rawn keng lût a, chutah chuan Cullen chu, “Sulphur lui sihal” ti tein an ziak nasa hle a, a chanchin vêl chu dik mang hlei lo hian an ziak kur ve luai a.

Cullen chuan tukverh aṭangin pawn lam chu a han thlir leh a, dawr bathlara Seth Ramos-a ding chu a va hmu ta a. Chu pa chu Bob Lee-a ṭhian ṭha tak leh deh khirh tak mai a ni nghe nghe a; mahse, Jefferson khuaah hi chuan hria an awm lo thung. Seth chuan a vaibel a beng mawlh mawlh a.

Seth chu chu khuaah chuan eng vanga rawn lût nge tih Cullen chu hrilh hran a ngai hauh lo, a hre thiam nghâl mai a ni. Amah lâk chhuah theih dan tur kawng a dap mek a ni ang tih pawh a rin hriat theih mai a; mahse, amah avanga buaina lian zâwk an tawh a hlauh avangin rawn hnaih lo se Cullen chuan a duh hle thung.

Pindanah chuan John Tower chu a rawn lût ve ta a. A hawi lêt leh zawk a, zawi sap hian, “Lacy chuan hei hi a hlau reng a ni,” a han ti a.

“Min hrilh lâwk fe reng a ni.”

Tower chuan a hma aia ring hian, “Chhûak thei la a duh a, i ram leisak che a la duh reng a ni,” a han ti leh a.

“Chumi vang chuan maw chhûak tura min duh?”

Tower chuan mitmeng nelawm vak lova Cullen chu melh pahin, “I ngaih ang ngawt hmeichhia chu a ni lo, i chhuah a duh a ni ringawt," a ti bung nghat a.

“Chu lamah chuan kan inthu rual viauvin ka ring.”

“Tih dan kawng hriat i nei em?”

Cullen chuan a han ngaihtuah a, kawng dap ngaihna a hre lo hle tih a hai lo; mahse, chu lai hmun aṭang chuan a tan chhuah chu thil tih mâkmawh a ni tih a hria a; chhuah dan tur erawh chu a bangbo ve hle a ni. Bang chu a chhahin, tukverh thir kham lah chu a nghet hle mai bawk si a.

Kawngkhar chu fit 6 x fit 4-a lian, lung banga inrem fahran maia rem hi a ni a; chuta tukverh chu a zim bâkah thir a la inkham bawk a, hun nei tan chuan lâk thlâk dan chu a awm thei mai ang a; mahse, vengtu an awm hnai reng si a, thahrui a ngai hle dawn a ni. Tlan chhuahna kawng atan chuan innghahna chi a ni lo tih pawh a hre chiang hle a ni.

Niin vanlaizawl a pelh hretah Katy chu a rawn lût ve ta hlawl a. A hmai a dángin a meng val kal mai a, hlauthawng hmel hi a pu hliah hliah mai a.

Cullen chuan, “Eng nge maw i enghelh teh chiam ni le?” aw dam thluam hian a han ti a.

“Chutiang te chu min zâwt a maw? Oh, Cullen! Ka lo hlauthawn rûk ang ngei a ni, ka mangang lutuk!”

Cullen chuan bar a dawmna a kut chu a en vang vang a; chutah, Katy chu a han en leh a, “Chance hnenah khan i hnena ka rawn kal chanchin hi hrilhtu, tu emaw chu an awm tih a chiang mai a, Warren kal hnu lawk khan a ni lehnghâl si a,” a ti ta a.

Katy chuan, “Cullen, chu zawng a âwihawm loh lutuk, i ring thei bîk em ni?" a ti ta hlut a.

“Ani a nih loh chuan mi dang tu nge awm thei ang?”

Katy chu a han ngawi vang vang a, a tawpah chuan, “Judge Tom-a'n he thil hi a khap thei maithei asin,” a ti ta a.

“Min khai hlum an tum chungchang hi maw? Chûng te chu ka hre ve vek tho alawm.”

An ngawi dun ta vang vang a; chutah, Cullen chuan zawi sap hian, a ṭhiante chu Jefferson khua rawn hnaih lo tur leh amah chu thang chah anga an hman thu hrilh turin a ngen ta a.

Khai hlum an tum nâ a, engtia tih nge an tum chiah ni ang le? A chungthu ngaihtuahna fumfe an neih loh chuan miin nakin hunah sawi chhuah hun an la nei maithei a ni.

Barlow-te'n Jail aṭang chuan an rawn la chhûak lui thei tih pawh Cullen chuan a hria a; chu chu ani pawhin a hlauh ber pakhat a ni. Chance Thorne duh dan tak pawh a lo ni maithei bawk. Amahin mawh phurna eng mah a neih loh phah thei dawn a, dan pawna hnâwl, pawl hnih inkara thil thleng ang chauh a ni dawn a ni.

Cullen chuan, “Katy, khua hi chhuahsan la, Blackthorne lo va pan la a ṭha ang. Thil a fel hmain buaina a chhûak ngei dawn a, ka ṭhiante chu rawn inrawlh lo se ka lawm kumkhua zâwk ang tih i lo hrilh dawn nia,” a han ti leh a.

Katy chu la tawi khawmuang se a tih avangin eng eng emaw an sawi zûi dun a, ani pawhin kalsan mai chu a hreh hle niin a lang. Cullen chuan buaina chu chhum dum chhah takin ruah a rawn thlen ngei dawn tih hriat lâwk theih ang hi niin a hria a ni.

Katy chuan, “Ka zam tak zet a ni, Cullen,” a han ti leh sap a.

Cullen tan chuan rilru pawh hneh thei tak a ni a, puitling a nih hnua ngaihtuahtu a neih leh hmasak ber a ni a, amah tak pawhin a dinhmun chu a han ngaihtuah a, nuam chu a ti bîk chiah lo. Chance Thorne leh a hote làwm atana hruizena inkhai kan reng chu châk bik hauh lo mah se, han chhuahna mai tur kawng a hmu bîk lo a ni.

Derringer chu a nei ve ngei mai a, eng mah lo ai thlawt chuan a ṭha tak meuh mai. Mahse, mu hnih chauh thun theih a ni si a, a hman dawna vauna chu engah mah an ngai lo a nih phei chuan a tan thihna ngei ngei tur a ni dawn a ni.

“Katy, va haw rawh, buaina a awm ngei dawn a, i fimkhur loh phei chuan i vanduai phah mai ang,” a han ti leh a.

“Cullen, nangmah hi a ni ngaihtuahawm chu ni.”

Za lo taka nuih hak pah hian Cullen chuan, "Insum rawh khai. Kan pahniha kan mangan mai chuan a dik lo vang‚” a lo ti a.

Katy chhûak tur chu sawi duh nei ni àwm tak hian a ding leh chawt a; mahse, eng mah sawi ta chuang lo chuan a kal leh ta a.

Cullen chuan a thlir zûi vawng vawng a, a hmangaih a ni tih pawh a inhre chiang tulh tulh a, a tir aṭang reng khan hmangaih leh beiseina a awm loh êm avanga a rilru puthmang hmet mit lui niin a inhre ta a.

Katy’n a han chhuahsan meuh chuan rûak ta huai hian a inhria a, chu lai hmun chhuahsan dan tur ringawt chuan a rilru a luah khat ta nghâl a. Chu lai hmun chhuahsan dan tur kawng chu awm ngeiin a ring a; mahse, thih phah erawh chu a tum hauh thung lo.

Chhûatah chuan a vêi kual a, tukverh thir kham chu a han sâwi leh chhin a, a nghet tlut mai si a; kawngkhar thir kham chu a han sâwi Ieh a, chu pawh chu a nghet tlut mai bawk a.

Chhûat chu lung rem inphah rual ṭha zet mai hi a ni a, kawng khat chauh chu chhuahna awm chhun ni mai dawnin a lang ta. Zan lamah beih chhin ngei a rilrûk ta a.

A thing dawh khumah chuan a ṭhu a, chawhnu dar hnih vêl a ni tawh a, a lum kher mai bawk a. Wesley chuan tui a rawn pe a, a chhuah hnu chuan Cullen chu a lo chhing sek a.

A rawn harh leh chuan kawngkhar thir kham phen aṭangin Chance chuan a lo en reng tawh a. “I dam chhung hun tur tlem tê chu mut nan hman ral i tum em ni? Kei chu darkar rei lo tê chauh dam tur ni tawh ila chuan, ka dam chhung nun ka chen ngei ang‚” a rawn ti a.

Cullen chu a tho va, a han zi mar a, a hmelah eng mah lang lo mah se a rilru tak chuan an inkar dai dangtu thir kham chu awm lo se, Chance chu han chin hrep mai tak a nâp a, “Min enghelh duh teh vak suh, i thlàna chil chhâk tur chuan dam ka tum tlat,” a han ti lêt ve sak a.

Chance hmelah chuan a lawm lo hle tih a hriat theih mai a, Cullen chu inphah hnuaia zahngaihna dil ruai turin a duh a ni a; mahse, a beisei chu a hlawhchham chiang hle thung si.

Chance chuan, “Tlan chhuah theih chu inbeisei suh, Bob Lee leh a ṭhiante chuan an rawn pui thei tawh lo che. He khua hi sipaiin an hual ping vek tawh a; a ṭhen chuan i ṭhiante zawngin dûm hmun an pan mek bawk a; Peacock leh a hote'n Lee chu a haw tawh leh tawh Ioh an enthla mek a, a rei berah pawh kar hnih khat bâk a dam tawh lo vang‚” a han tih khum leh a.

Cullen chuan an rilru puthmang tak tak hriat a duh avangin, “Ka chungthu ngaihtuah hmasa lo chuan min khai hlum ngawt thei lo vang,” a lo ti lêt ve a.

Chek tlak tlak chung hian Chance chuan, “Thu neitu ni lo, tu emawin a khai hlum che a nih chuan tu ma'n an chhui zûi hauh lo vang. Sipaiho chuan Bob Lee awmna chu hriain kal ta vek se, khuaah hian eng nge lo thleng dawn tih i hre hlei nem, hmelma i insiam hnem tawh si a; entir nan, Barlow-te ang hi‚” a han ti leh a.

Chance-te rilru puthmang chu Cullen chuan a hre thiam ta nghâl mai a. A hnua thil thleng a hriat chu a hnuah Katy’n a hrilh fiah a; Jane Watson, an nula chhan chhuah pawh khan a hrilh belh nual bawk a.

Cullen chuan Jane Watson chu a awm ve tih hre tawh lo mah se, amah puih dan a awm tâkin tih thu-ah nula chu Jefferson khuaah chuan a lo kal a, tan inah pawh Cullen chu a va tlawh a, a lo kal hmaa a thil tawnte chu Cullen hnenah chuan a hrilh ve ta vek a.

Dawr pakhatah Katy leh an zirtirtu Thomas Warren chu an inhmu a ni àwm a, Katy puanthan en lai bulah Warren chu a rawn phei a, “Chanchin thar kha i hre ve em?” a rawn ti a.

“Chanchin thar a?”

“Cullen Baker an man a, an khai hlum dawn a ni àwm e.”

Katy chuan sawi nuam ti lo hmel deuh hian, “A chungthu an ngaihtuah hmasak ka ring,” a lo ti a.

“Tun maiah lâk chhuaha khai hlum an tum ni àwmin thu a thang a ni.”

“I ngaina vak lo a ni ti raw?”

“Outlaw leh tual thah hmang a ni a, engtin nge ka han ngainat theih teh lul ang?”

"A nih leh keiin ka ngaina tih chu i hai lo vang ti raw?”

Warren chuan a dàr a san uk a, “He lai ram mi a nih bâkah i pate Will-a'n a ngainat vanga ngaina ve turah i inngai a nih hi; buaina leh hming hliauna bâk a rawn thlen lo vang che,” a ti a.

“Ka hming hliau leh hliau loh chu ka thu a ni,” Katy chuan a ti ve ta ngat a.

Warren chuan, “I pasal thu a nih hun a la awm dawn a; chu vang chuan a nia ka ngaihmawh,” a ti ram hmak a.

Katy chuan mak ti hmel deuh hian‚ “I tan ngaihmawh a ṭul lo vang. Tom, ka ngaina che a; ka pasal tur anga ngaih che erawh thil theih a ni lo vang‚” a ti ve ta a.

“Eng vangin maw a theih loh ang?”

Katy chuan Warren chu a din hlatsan a, “Mr Warren, ka lo ngaihtuah miah loh i lo pawm nghet palh a nih chu. Cullen chu tu pawhin engtin pawh sawi se, mi ṭha tak a ni tih ka hre tlat a ni,” a tihsan ta hmiah mai a.

Warren chuan sen awp awp chung hian, “Hruizen hmawrah chuan a lang ṭha rei hauh lo vang. Mi sual a ni a, chu vang a nia ka...,” a han ti a, sawi zawm zel ta lo chuan a ngawi ta daih a.

“I..., engtin maw?”

Warren chu a inher a, a kal sawn ta a. Kawngkhar aṭang chuan a rawn hawi lêt Ieh a, “A awm loh hunah i rilru a la danglam mai ang; tichuan, ka lo kir leh ang,” a han ti leh hram a, a chhûak ta nghâl a.

Lacy Petraine chu a rawn lût ve chiah a, Katy chu a rawn pan dîng nghâl a, “Miss Thorne, i puih ka mamawh a ni,” a rawn ti nghâl tawp mai a.

Jane Watson pawh chuan a va fin ve a, Jefferson a rawn pan chhan te chu a va sawi ve nghâl bawk hi a lo ni a.

Cullen-a rilru-ah chuan Chance-a thu sawi pakhat cham reng a awm a, an khai hlum hmaa Joel Reese leh mi ṭhenkhatin rawn kawm hlek an duh thu a sawi chu a ni. Thih châk hliah hliah tur khawpa Cullen chu sawisak an tum a ni.

Katy chuan Tom Warren chanchin chu Cullen hnenah a lo hrilh ve nual tawh avangin Cullen tan pawh a mizia chu thui tak a ngaih rûat thiam theih mai a. A nî pahnihte enkawl seilen a ni a, ngawrh takin lehkha an zirtir a, sualna chi reng reng a ti ngai bawk lo. Mahni fel tâwka inngai leh dika inngai tlat mi a ni a, kawm thiam pawh a awlai lo hle reng a ni.

Tukverh aṭang chuan pawn lam a han thlir leh vang vang a, dawr aṭang chuan Katy leh Jane Watson-te chu an rawn inzûi chhûak ve chiah a; an ep chiah kawtthler sir thing hlim aṭang hian Warren pawhin a lo thlir ve reng a.

Chutianga hmeichhe mizia leh dinhmun inang lo tak tak pathumte inkawp khâwm ta mai chuan Cullen ngaihtuahna chu a vah thuitir kher mai. Eng vang nge ni ta ang?

Tan in pindan pawn lam chu niin a rawn chhun iar avangin a awmna pindan chhung chu a lum hle a. Kawtthlera Wagon kal thawm leh mi ṭawng rite chu chiang takin a hriat theih a.

Tan in office pawn lam thawm chu a reh êm avangin vengtu chu pawn bathlar dai hlimah a ṭhu a nih a rinawm a.

Tan inah chuan pindan rûak pathum a awm a, Cullen tan chuan kawngkhar kal tlangin vengtu pahnihte chu va tuk zal thei mah se, kawtthler reh lai, a ṭhiante hmuh tur awm miah lohnaah a chhuah a ngai dawn a; chuvangin, a derringer pawh chu ṭangkaipui thei tur chuan tu ma awm loh huna a chhuah a ngai dawn a ni. Chumi hnuah pawh khaw hualtu, sipaiho hmuh lohva dûm hmun a thlen theih a la ngai ta fo bawk a. Beiseina chu sangkhatah pakhat emaw lek chauh a awm thei ang chu.

Cullen chuan pawn lam borûak pawh a ṭang ru hle tih a hai hauh lo, a ṭhiante chu a hre sual hle a nih loh chuan, *_eng thu pawh chah kur luai mah se an phatsan dawn chuang lo, lâk chhuah theih dan tur chu an dap tho tho ang tih a hre chiang a ni._*

Chu chu Colonel Berser leh Chance Thorne-te pawhin an hai bîk lovin, lo luhna tur kawng chu an hawng ngeiin a rinawm a, an vaia man barh chu an duh dan a ni tlat. Chance Thorne sawi kha a dik a nih vaih chuan Sam Barlow pawh a rawn inrawlh thuai a rinawm bawk.

Hmeichhe pathumte lah chuan mahni tana pawi tur pawh ngaihtuah chang lovin chhan chhuah dan tur chu an dap ve mek bawk a, pa hming thang mawi lo leh mi hlauh leh ṭih êm êm si tan chuan ṭhian nei lo a nih bîk lohzia a ti lang chiang viau bawk a ni.

Mahse, a tua mah chuan an rawn puih hman hmaa mahnia tlan chhuah dan tur kawng zawn chu thil ṭul hmasa ber a ni ta. Amah avanga a ṭhiante tu emaw tak an thih phah mai chu Cullen-a hlauhthawn rûk ber a ni. Khuaa Seth Ramos rawn inlar dan aṭang chuan eng emaw tak chu a inmung a ni tih a hriat theih a; Lacy thil tih apiangah John Tower a tel ve dawn tih lah thil chiang lutuk a ni bawk si.

Ni pawh a tla lek lek tawh a, Barlow-teho pawh an rawn thawk dawn a nih chuan zanlai, Chance Thorne leh a hote'n an rawn kawm zawh hnu lamah a nih Cullen chuan a ring a; chu vang chuan, eng emawti kawng zawng tala zanlai thlen hmaa tlan chhuah hman a ngai dawn ta a ni, a chhuah hma leh a lawmawm a ni mai.

Chutih lai tak chuan Jane Watson chu tang vengtu chuan a rawn hruai lût ta a. Wesley kal sawn leh hnu chuan zawi tak leh rang tak si hian Jane chuan, “Zanin dar sawm (10)-ah chiah John Tower-a'n tang vengtute a vau bet ang a, pawnah tawlailir nen kan lo nghâk ang che. John pawhin sakawr pahnih a rawn keng dawn a, hma kan hruai ang a, min rawn ûm vat dawn a ni,” a ti ta zung zung a.

Cullen erawh chuan an thil tum âtthlâkzia chu a lo sawi tlang nghâl a, thil ruahmanna fel lo ber angin a lang nâ a; a hlawhtling hlauh thung thei bawk tih erawh chu a hre ve tho va.

Tower pawh dàn pawna hnâwl a ni nghâl dawn a, a rilru put dan chu mak a tih thu Jane hnenah pawh chuan a sawi lang nghe nghe a.

“A ngaina tho che a; mahse, nangmah vanga ti chu a ni lo, Lacy saw a âtchilh tlat a ni zâwk.”

Jane chuan, John Tower-a'n Lacy pasal, Terence-a thattu a nih thu pawh pehhêl miah lova a inpuan dan leh pawi a tihzia a sawi dan zawng zawngte chu Cullen hnenah chuan a hrilh ve nghâl vek a. Lacy pawh chuan a duh vang renga ti a ni bîk lo tih a hriat avangin hriat thiamna thui tak a lo nei ve bawk a; tichuan, an inchhawr a, an pahniha inkar borûak pawh a lo dang chho ta hle reng a ni.

“Aw le, Jane, in thil ruahman dan chu a âtthlâk hle nâ a, a hlawhtling mial thei bawk a. Chuti a nih tâk rau rauah chuan Webstar-a sakawr dahna hnung lamah khan sakawr saddle phah sa diam leh silai lo dah thei bawk ula ka duh ngawt mai,” tiin Cullen chuan a chah zûi ve ta a.

Wesley chuan tui a rawn pe Ieh a, chu pa chu pa ṭha tak a ni tih a hriat mai a, chu vang chuan Cullen pawhin a lakah kut thlâk ngai lo hram se a ti hle a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 18th, 2018, 10:40 am

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 11
(Rozami Pachuau)

Cullen chuan thil pahnih chiah enghelh a nei - chu lai hmun chhuahsan leh a thlàn lo laihsak sâ-a Barlow ruang zalh tura a duhnate chu an ni. Chance Thorne-a ruang a phum tel theih hlauh phei chuan duhthusam ni hian a hria a; Belser ve thung chu a tlan chhûak tih a hriat chuan thlamuang leh thinthiin a awm ngai tawh lo vang tih pawh a hria a, chumi chu hrem nan chuan a tâwk thawkhat hlein a hria a ni.

Tukverh aṭang chuan Tilden-a buhpawl dahna in phena ni tla mek chu a lang thei a. Tu emaw hian tui a pump chhûak ri ṭawt ṭawt a; borûakah chuan an zanriah tur bûatsaih rim chu a nam chiai chiai a. Cullen chuan, a lo vanduai ta hlauh a nih chuan chumi ni bâk chu ni tla tur pawh a hmu tawh hauh lo vang tih a inhre chiang êm êm a ni.

Khaw bul maiah chuan chhimbuk a rawn hram dut dut a, chhimbuk hram nan chuan a la hma fu mai; mahsela, chhimbuk chi khat chauh a awm hlei nem!

Chhimbuk chu a han hram leh a, Cullen chuan dam a la duh a nih chuan chhuah dan kawng dap a hun ta tih pawh a hre nghâl mai a. Chaw ei tura mi an haw nual tawh avangin kawtthler chu a rûak huai tawh a, chêt hun lai tak ni pawhin a hria a.

Beng chhi ran leh fimkhur êm êmin kawngkhar chu a pan phei ta a. Thir kham chu a vuan a, a thahrui zawng zawng sawm khâwmin a han phih nghek a; mahse, thir kham chu chêt pawh a che eih lo. A han beih nawn leh pawhin eng mah a ni thei ta chuang lo va, a hlawhchham chu a ni ta ber a.

A rilru-ah chuan hlauhthawnna lian tak a rawn lût ve ta a. A lo innghahna ve ber lah a khawih che zo ta dèr si lo va, a hma lawka thil lo thleng tur lah a hai hauh si lo. A rilru chu a hnual ve ta rawih mai a, a thlanfim a tla zawih zawih a, a ka a ro hulh a, a dinhmun chu beidawnthlâk hle hian a hre ta a.

In chung lam chu a han thlir chho va, in chung ceiling thingphel‚ thira kilh beh chu a hmu ta a. A khai kanna thir chu eng zât nge ni ang? Ceiling âwng chu Cullen chuan a zuan ta vak a, a ban phâk lo deuh hlek a. Tukverh aṭang chuan pawn lam chu a han thlir leh a, arsi a lang pe uar tawh a, hun a ngah tawh lo kher mai.

Chutah, Cullen chu tukverhah chuan a lawn kai ta vat a, ceiling kua chu a zim deuh avangin thingphel pakhat chu a tha neih zawng zawngin a han nem nghek a, a kilhna perek chu a dâwk ri ta hrawih a. Thawm a han ngaithla leh phawt a; thawm eng mah a hriat tâk loh avang chuan thawm dim takin thingphel chu a han nem kau leh a, ceiling-ah chuan a lawn lût chho thei ta a.

Ceiling chhung chu a thim mup mai a, ai-mit thlawn ang hlauh a ni ta mai a. Tichuan, a bawkvâk a, a vahna tur chu ngun takin a dap hmasa zel a, in chhung lam chu a pan ta a. In chhunga thingphel an hman pakhat chu a nghet lutuk lo hlauh va, a han nem a, a inkau ri leh ta zawt a.

Cullen chuan thin phu dawt dawt chungin thawm a han ngaithla leh rih phawt a. In hnung lamah chuan mi pakhat kal ri kauh kauh hi a hriat theih a; mahse, a kal sawn leh ta mai a.

An dahna pindan kha eng lai pawha rawn endik theih reng a nih avangin a tih tur chu muangchang lova a tih zung zung a ngai si a; tichuan, in chung âwngah chuan a lawn chhûak vat a, a tawlh thla a, leiah a ṭum thla thei ta mai a. Chu veleh muangchang lovin Webstar-a in, sakawr an lo dahna tur hmun chu a pan phei ta vat a.

A kalna tur kawngah chuan kawtthler tawp lam, ṭin khat hmun tur àwm vêl zeta zau hi kal tlang a ngai a, mi in phenah a kal phawt a, tualzawl chu a pal tlang phei ta a. A hnung lam in pakhat kawngkhar chu a rawn inhawng a, mi pakhat hian a rawn en zûi a; mahse, hre àwm pawha lang lo Ieh hmanhmawh phah duh chuang lovin Cullen chu a phei zel a. Mahse, ṭim sung sung hian a inhria a, tlan vak mai pawh a duh rum rum a; mahse, a chi si loh....

A kal tumna, sakawr dahna tura an tih Webstar-a in pawh a hnaih ta hle a. Webstar-a chu Union mi leh sa a nih bâkah Chance leh Belser-te lam ṭang a nih avangin man a nih vaih chuan a pui duh hauh lo vang tih pawh Cullen chuan a hria a ni.

Tunah tak hi chuan buaina bâk a tan hmuh beisei tur a awm lo tih pawh a hria a. A ṭhiante hnena a chah ang hun hmaa che chhûak a nih avangin sakawr pawh chu an lo la dah lo maithei tih te thleng chuan a ngaihtuah a, a va thlen chuan a hlauhthawn rûk ang ngeiin sakawr pakhat mah a lo la awm lo ta tak tak a.

Cullen chu a inher vat a, chu lai thing hmun vêl te chu ngun takin a han thlêk kual zung zung a. Chu lai hmun chu a zau lo bawk a, sakawr chu lo awm sela, kal theih nghâl mai tur hi a ni.

Chutih lai tak chuan a sir lam aṭang chuan sakawr thlun Ioh, a lam pana lo phei a hmu ta a. Kawtthler leh Jail vêlah chuan an in-au luai luai tawh a, an ang bawrh bawrh hlawm bawk a. Cullen-a tlan chhuah thu chu an hre tawh tih pawh a hriat kher mai.

Cullen chuan sakawr chu a pan phei dawn chiah tihin a bul lawka hnim zing aṭang chuan hmun thum aṭangin meichher a rawn alh ta thut mai a.

A hmuh hmasak ber chu Chance Thorne-a a ni a, a bulah Joel Reese a ding bawk a, an sir tawnah mi paruk emaw lai an awm lehnghâl. An vai chuan rifle, hmet pûak thei mai turin an keng sa vek bawk nen.

Reese chuan a rifle chu leiah a'n dah a, thir khaidiat a hren lai chu nui sawng chung hian a phelh nghâl mawlh mawlh a. Pakhat chuan a kawnghren, buckle lian fe mai nei chu a phelh ve mek bawk a; mi dangte erawh chuan an kut lehlamin talhtum an keng fur a, an rifle te chu leiah dah vein Cullen chu an rawn pan hnai ṭan ta a.

Nuam tih hmel zet hian Reese chuan, “Hruizen chu ka la nei reng a, duh tâwk kan ngah hunah chuan khai hlum chu i thlahlel hluah hluah tawh mai ang‚" a han ti phar phar a.

Cullen chu an din hual vek tawh a, ani chuan a kawnghren karah a kutzungpui a bilh lût tat a, “In la che tluang hle zel rih maw; min rawn hnaih hmasa apiang chu ka that ang,” zam miah lo hian a lo ti chhar chhar a. Mei êng fiah lo takah chuan a kawnghren kar aṭanga derringer a phawi chhûak lai chu tu mahin an hmu hauh lo. A silaimu pahnih chuan Chance Thorne leh Joel Reese-te chu kah hlum ngei a tum ruh hle bawk.

Reese chuan, “Nula sakawr rawn kai lai kha kan lo hmu a, tun ang zana hmeichhia lehnghâl, sakawr rawn kai tâ chu chhui zûi deuh ṭhain kan hria a, kan ti fuh ta viau reng a nih hi,” lungawi àwm fahran hian a han ti leh phar phar a.

An rawn hnaih hrat hrat zel a, an sakawr saddle-ah chuan silai chu awm nual mah se Cullen-a tan chuan beisei a bo hle mai. Mi pahnihte chu kâp hlumin han chuh dawn pawh ni se, an kâp hlum ve hman tho maithei a, an vaiin pûakruk an pai vek si a, beisei a sang lo hle a ni.

Chance chuan inti thu nei fe hian, “Aw le, khawih rawh u le,” tiin thu a han pe ta a.

Reese chuan a thir khaidiat chu a hnung lamah a han vai kual ṭan ta a; chu veleh Cullen chuan a silai neih chhun, derringer chu a hmet pûak ve ta a. Cullen chuan a kâp ṭhelh hlauh va; mahse, a hnunga kawnghren keng-pa dulah tak chuan a verh sawr mai thung a, chu pa chu a ṭe nghâl ṭhawt a.

“Fimkhur rawh u, silai a nei a nia,” tiin Reese pawh chu a au chhûak nghâl tuar a.

Pakhat chuan a pûakruk a chuh ve a; mahse, a phawi hman hmain derringer mu chuan a dulah bawk a verh leh ta phawr mai a.

Ral beih au dan dik takin tu emaw hi a rawn khek phei chiam a, “Che tawh suh u!” a rawn ti zûi nghâl hmiah bawk a. Silai a pûak thawr a, Cullen-a hualtute zinga pakhat chu a hlawm leh ta tawp a. Rawn chhantu âw aṭang chuan Cullen chuan Seth Ramos a ni tih a hre thei ta a.

Chutah, John Tower-a âw ngei mai chuan, “Ni e, tu mah che tawh suh u,” a rawn ti zûi ve zat a.

Cullen chu a inher a, a sakawr tura rûat sa ni ngeia a lawn hnu chuan silai a lek chhûak a, "Nula kha in kut hmawr pawha in lo khawih zeuh chuan in vaiin dûmah ka vui liam ngei ngei ang che u,” tiin amah hualtute chu a han vau ve leh a.

Cullen-a hualtute zinga pakhat chuan, “Reese-te inah kan kalh hnan,” a lo ti vat a.

Thimtham aṭangin Tower-a âw bawk chuan, “Keima'n ka chhuah tawh; in ti buai leh a nih vaih chuan Baker-a thu sawi kha ka ring nghâl bawk ang,” a rawn ti ve Ieh ta a.

Chutah zawngin Cullen-a hualtute chu tu mah che ngam an awm ta lo. Mi pahnihte âw chauh hre mah se, an rin aia tamin an lo hual bet ve reng thei a ni tih an hai bîk tlat lo a ni.

Cullen chuan thimthama Seth Ramos-a sakawr chung chuang chu fiah lo ruai hian a hmu thei a, a sakawr chu zawi tê hian a kaltir ta a.

Seth chuan, “Tu mah che suh u,” a han ti Ieh phawt a‚ a sakawr chu Cullen sirah chuan a rawn kaltir ve ta a. Kawng nuam chin an thlen chuan, “Muangchan loh a ṭha ang Cullen, Tower pawh a inthiar fihlim tawh,” a ti a, an sakawrte chu chak takin an tlantir ta nghâl a.

Cullen chuan a chuanna sakawr saddle-a pûakruk leh rifle chu a mu a inthun khah leh khah loh a han endik pah zung zung a, duhthusam ang thlap a lo ni a.

Thui fe an tlan hnuah Seth chuan a sakawr chu a pawt ding ta a, “Ka ṭhiante va fin ila a ṭha ang; tichuan, nang pawhin harsa lo takin dûm hmun chu i thleng thei ang a,” a han ti a, an inṭhen ta a.

Cullen chuan fimkhur leh chak tak si hian a sakawr chu a tlantir a, khua a var meuh chuan dûm kama in pakhat chu a thleng ta ṭâwk a. Ui a rawn bauh khar khar a; chutah, mi pakhat hi a rawn chhûak vat a, Cullen chu a lo nghâk ta a.

“Keimah ka nia, Mike! Buaina kan nei tlat mai."

“Lo lût rawh.”

Caddo Mike chu pa upa lam deuh, sa ṭha tak leh la chak hmel tak hi a ni a, a in sakna pawh chu hmun sang lai leh lei nghet ṭha tak laiah a ni a. An awmna hmun chu Cullen chuan Indian thlahtute lo thlen hma pawha lo awm tawh leh‚ a siamtute pawh an hriat phâk tawh loh khawp a ni tih a hre chhûak ve nghâl a.

Mike chuan Cullen sakawr chu a kai a, thing zinga lei hnuai pindan zau deuh pakhatah hian a va dah ta a. Chu sakawr huang bangah chuan lung hlui tawh tak tak hi a inrem kual put a, sakawr ṭha fe fe mai pali lai hi an lo awm bawk a. Cullen chu a va lût ve a, kawngkhara puanzar han hlim chuan êng tlem a lût ve thei chauh va.

Caddo Mike chuan, “Mi ngoho khan rangkachak an zawng ṭhin a, ka pu hun lai pawhin a ni tho va; eng mah an hmu lo. Hmanlai mite khan eng mah an lo nei lo a ni,” a ti chuar chuar a.

Mike chu hmai zur deuh tawh a ni a, Cullen-ate lo thlen tirh pawhin chutiang reng chu niin a lang tawh a. A damlo khawsik an enkawl a, a dam chhuah leh hnu chuan an tan ṭhian ṭha tak a ni zûi ta a ni.

Cullen chuan chaw an ei pahin Mike hnenah chuan thil awm dan chu a hrilh vek a, “Mike, khuaa thil awm dan ka hriat a ngaih bâkah Katy hnena thu thawn ka duh a ni," tiin a thu sawi chu a han tlip a.

Mike kal sawn hnu chuan Cullen chu a ṭul thut pawha hman mai theih tura pûakruk inchhawp chungin a tlu zal a, rawn veh hnaih tum an awm palh pawhin Mike-a ui chuan a hriat hmasak ngei a ring bawk a ni.

Chawhnu her hretah Cullen chu a muhil a rawn harh hlawl a; mahse, che miah lovin beng a han chhi leh rih phawt a, thawm riva a hriat tâk lohvah chuan a tho ta chauh a. A insil fai a, a silai chu a endik leh zung zung a.

Cullen chuan amahin zanriah a ei a, ni pawh a hniam ta hle mai. Mike pawh chu a rin ai takin a thang rei a, a beisei loh leh rin loh takin Mike chuan chanchinbu leh magazine hi a lo kawl nual a, chu chu hun khawh ral nan a bih lawr ta hlawm a.

A chanchinbu chhiar lai chuan a han muthlu leh lâwp lâwp ṭhin a; chutah, a tho chhûak a, khawnvar chu a herh mit a, pawnah a chhûak ta a. Ui pakhat hi a bulah chuan a rawn kal vat a.

Zan chu a reh êm avangin Cullen chu a ngaih a ṭha lo viau zâwk mai a. A hawi kual a, a kal sawn hret a, a awmna lei hnuai pindan chu a han thlir lêt vang vang a, fit ruk (6) vêl zet aṭang chuan chhun a ni emaw zan a ni emaw hmuh mai theih a ni lo tih pawh a hre thei ta a.

Cullen chuan chutia awm mai mai reng chu a nin tâk deuh avangin a awmna piah lawka kawngṭum, chiang lo ruaia lang chu a pan phei ta a. Fit sawmthum (30) pawh a kal hma chuan sakawr rual kal thawm a hre thut mai le!

Thawm a hriat rual chuan a ding nghâl chawt a, mi pakhat hi a ṭawng lang lang a; a changin a vin hlar a, bengchheng lo turin a kalpuite chu a han hrâwk leh rih ṭhin a.

Rawn ṭawng hmasa chu an kah hliam‚ Katy enkawl dam tâk kha a ni tih pawh a hre thei a, chuta aṭang chuan hrilh kher pawh ngai lovin chûngho chu Barlow leh a hote an ni tih pawh a hre chiang ta a ni.

Cullen chuan che sawn miah lovin a han ngaithla leh vang vang a, 'Sam' an tih maiin eng emaw a han sawi bal bal ri chu fiah lo tak hian a hre leh thei a. Chûngho nena an inkarah chuan Mike chu a lo awm a, an lo man palh ta a ni. Tichuan, an rawn zawng zûi ta mai em ni ang? Mahse, ṭhiante phatsan ai chuan Mike chuan thih pawh a thlang zâwk ngei ang tih erawh chu Cullen chuan a hre chiang êm êm a ni.

Cullen chuan a piah deuha lui, fit sawm panga (15) vêla zau awmna lam chu a pan phei ta a; a ral lehlama sakawr rual kal thawm a hriat tâkah chuan a ṭhu hniam vat a, an thawm aṭang chuan sipai rual an nih ngei pawh a ring a.

Cullen chuan ngaihtuah chhuah thar a nei ta thut a; ring lutuk si lo, hriat phâk ngei tur si hian, “Cullen Baker in zawng a nih chuan inthiar fihlim nghâl vat rawh u, buai inpeih sâ atin a rawn pan mek che u a nia,” a ti ta a.

Chu veleh aw fiak‚ thu pe ṭhang tih hriat zet hian, “Tu nge i nih? Rawn inlan vat rawh,” a ti ta ṭhak a.

Barlow-teho chuan hre pha lo hram se Cullen chuan a duh rilru hle a, a awmna pawh chu rang tak leh fimkhur tak si hian a sawn nghâl vat a. Mike-a in thlen pheia inthiar fihlim vat chu a duh dan a ni. A ring sual hle a nih loh chuan rei lo têah silai a pûak ngei ang.

Barlow hote pawh chuan an hma lamah sipaiho an awm tih hre lovin hma lam an rawn pan phei ve zel a. A hnu lawkah mi pakhat hian, “Hey, kha...‚ tu nge i nih? Kâp nghâl rawh u,” a ti ṭeng ta chhak a.

Sipaite chu sawm chuang zet chu an ni ve ngei ang; chutah, an silai chu a rual deuhthaw hian a pûak nghâl ṭhawt hlawm a. Chutah, a reh leh vang vang a, a han pûak leh ṭhuai ṭhuai a, inral epin Barlow hote leh sipaiho chu an insai ta pawp pawp mai a, an au chel chul bawk a.

Cullen chuan kawng lehlam a thleng fel hman chiah tihin sakawr chung chuang pakhat hi a rawn lim phei ziai ziai a; chutah, a sakawr a pawt ding a, thawm a han ngaithla ta a. Mi pakhat hi a rawn tlan phei leh a; a tlu thlawrh a; a tho leh vat a, thaw hlawp hlawp chung hian a rawn tlan zel a, sakawra chuangpa chuan chu pa awmna lam pan chuan a sakawr chu a kaltir leh ta vat a.

Kea rawn tlanpa chuan hah tih hriat zet hian, “Bravo?” a lo ti hlawp hlawp a.

“Sam, mi dang tlan chhûak thei an awm em?”

“Ed kha dûmah a tlan lût a, a tlan chhûak thei maithei.”

“A nih leh mi dang?”

“An vaiin an thi tawh.”

Cullen chuan Sam Barlow chu han tih khawtlai rih a châk hle a; mahse, sipaiho an hnai si a, man palh leh a hlauhawmzia lah a hai hauh si lo.

Barlow chuan, “Tu emaw-in thang an kam a ni chiang mai,” a han ti leh a.

“Thorne a ni ang, min mamawh tawh lovin a inhria a nih ka ring.”

Barlow chuan, "Ani chu a ni lo vang," a han ti thlarawk a; ama âw aṭang ngei pawh chuan a ringhlel a ni tih chu a hriat ve tho mai.

Bravo chuan, “lnthiar fihlim vat teh ang, khaw var hunah meuh chuan he lai hi an rawn kâp chereu vek tawh ngei ang,” a ti a. Tichuan, sakawr pakhatah chuan an chuang dun a, an tlan sawn ta a.

Cullen chuan ina mi ei tur tlem a la a, a sakawr dah rûkna bul, hnimbuk zingah chuan a biru ta a. A awmna aṭang chuan in leh a panna kawng chu a lang thei vek a, a ṭhiante chu eng nge an dinhmun ni ta zel ang tih Ieh Katy rilru put dan tur thleng mai chuan hriat hlan a nghâkhlel tak zet a ni.

Khawthlang lam pan chu thil ṭha ber niin a hre ta a; mahse, Katy tel lovin em ni a kal ang? Cullen chuan a ngaihtuah nasat poh leh Katy chuan a duh ve tak tak a ring lo leh ṭhin bawk si a; khawthlang lam ram chu a pan dawn a nih pawhin a rawn kalsan tâk ramte kha kal tlang a ngai leh dawn chu a ni si.

Chutih lai tak chuan sakawr chung chuang pahnih hi an rawn lang ta hlawl a, chu mite chu thui tak pawh kal zel ta lo chuan Cullen-a'n an ṭawng a hriat phâk lekah chuan an ding ta a.

Pakhat zâwk chuan, “Hun khawh ral vak a ṭul em ni le? Sergean khan engti pawhin sawi se, tu mah kan hmu tawh lo vang. Kha kha Cullen Baker-ate ni lovin Barlow leh a hote an nih kha. Ka hre lutuk alawm. The Thicket-ah keimah ngei pawh ka kal ve fo tawh a ni,” a ti ta bawrh bawrh mai a! Cullen leh a ṭhiante zawngtute ngei an ni.

Pakhat zâwk chuan hriat theih mang loh hian a chhang sup sup a.

A ṭawng hmasa zâwka bawk chuan, “Barlow hote paruk an thi a; pakuate chu hliam leh man an ni a, a hlawhtlinthlâk khawp tho alawm,” a han ti leh a.

“A nih leh, tu nge min rawn autu kha ni ta ang le?"

A ṭawng ring zâwka chuan, “Tu nge nia i rin?” a han ti ve ringawt a, a chek zûi tlak tlak a. Chutah, an sakawr an pawt her a, an kir Ieh ta mai a.

Khaw var fel hnu lawkah Caddo Mike chu a rawn thleng ve ta hlawl a.

Mike chuan a rawn thlen rual rualin, “He lai hmun aṭang hian inthiar fihlim vat rawh, Cullen,” a'n ti nghâl tawng a.

“Mike, Katy Thorne i lo hmu em?"

“Willow Bluff kha i hria a; Bowie Country lawnglenga an inthiar kaina ṭhin bûk kha, kha laiah khan a lo nghâk ang che.”

Chu lai hmun chu fál leh reh raih mai, far thing bitna lai hi a ni a, Cullen tan pawh harsa lo taka thlen theih a nih a rinawm.

“Amah chuan kal lo se a ṭhat chu maw le!”

“Amah maiin a nih ka ring lo. An zawng nasa che a nia, sipai-hovin an zawng che a, Barlow an zawng bawk a; ani chuan nangmah a zawng lehchhawng bawk che a.”

“Bob Lee chanchin i hria em?”

“Sipaiho nen an inbei hlek a; Joe Tinney chu a thi tawh. Buck khan va puih a tum a; ani pawh an kâp hlum nghâl.”

Buck-a mizia chu Cullen chuan a lo hriat chian tawh avangin a unaupa va puih a tum pawh chu thil mak vakah a ngai lo.

An vaia tawpna chu a lo ni ta reng mai a; Cullen chuan Willow Bluff chu sawi loh, Katy pawh chu hmu leh tawh miah lo tur anga inrinna te a neih phah rum rum hial a.

Jefferson khuaa va luh a, Chance Thorne chu uicho ang leka va kah hlum hlãwm tawp mai a châk et et tawh a, a buaina te, a ṭhiante thihna chhan te pawh chu amah, Chance-a vang vek ni ber hian a hre tawh a.

Mike chuan, “Mi hlauhawm tak tak an ni a, fimkhur hle ang che,” tiin Cullen chu a chah leh a. Chutah, a sakawr ráng, chak tih hriat fahran mai chu a pe bawk a.

Cullen chu sakawrah chuan a lawn kai a, Mike chu a han en leh vang vang phawt a, chutah, “Dam takin le,” zawi sap hian a ti a, hawi lêt leh tawh hauh lovin a sakawr chu a kaltir ta zel a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)