THE ARROGANT GUNS. (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: THE ARROGANT GUNS. Chapter 6

Unread post by Rozami pachuau » December 26th, 2018, 6:16 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 7
(Rozami Pachuau)

Hun eng emawti hnuah Lafferty-a chuan harsatna dang a tâwk leh ta a. Chu lai ram bial ṭha zawng zawng chu Two Bar chuan a hauh vek a; San Juan county court chuan Two Bar ram hauh zozai chu a zau lutuk a, mi dangte bâwng vulhna tur ṭheh ve se an ti a ni deuh ber a, a neih dan dik tak court-ah sawi fiah turin an phût a ni.

Tin, ran vulh nan chauhva hmang lo va, sumdawnna chi hrang hrang hmunpuia a hmang chu phalna a nei em tih insawi fiah tura kohna lehkha a lo thleng a. Homstead Act of 1863 dan hmangin San Juan court chuan chutiang chuan a ti thei miau si a ni.

Sheriff Spanha-a’n court thu chhûak lehkha a pêk chuan Lafferty-a chuan eng dang mah a sawi kawi hran lo va, “Aw le,” a ti ringawt a.

Sheriff chuan a lo hnial ngei a ring a, chutia a lo ti ṭha ta mai chu a ngaih pawh a ṭha lo hial a, hrilhhai angreng takin a haw leh ta a.

Matt-a chuan, “Dan angin an rawn ti buai thei reng che em ni? Ramte hi a bul aṭanga engtia i neih nge?” tiin a han zâwt a.

“A ṭhen hi chu Spanish Land grant hnuai aṭanga ka neih a ni a; mahse, hei hi chu a zim khawp mai. Chu vang chuan a dang zawngte hi chu a neitu hmasate hnen aṭanga acre khat, cent sawmhnih panga (25) zela ka lei a ni a, acre sanghnih (2000) zeta zau a nih avangin a man pawh nikum khan ka pe tla chauh a ni.”

Matt-a chuan, “Thil dang chu?” tiin a'n zâwt leh a.

Lafferty-a chuan, “Hêng Soda canyon ran talhna leh sa ṭin siamna te, marble quarry leh Saw Mill kan dinnate hi chu sorkar ta a ni a. Phalna chu a hming chuan ka nei a; mahse, an duh chuan min la khawih buai thei tho. Santa Fe-ah kan kal vat a ṭul a ni, eng nge ka tih theih an hre ve mai ang,” a ti a.

A tûkah Santa Fe lam pan chuan an chhûak ta a. Two Bar aṭang chuan ni nga (5) kal a ni a. Matt-a chuan nuam a ti hle a, Two Bar-ah a inhmang rim bawk a, a tan chuan chawlh hahdamna nuam tak a ni mai.

Santa Fe-ah chuan Lafferty-a chu a buai hle a, a kalnaah chuan Matt-a chu a hruai ve ngai lo. Zing aṭanga chhûakin a bo vang vang a, zan mut hunah a lo haw Ieh chauh ṭhin a.

Matt-a thung chu khaw chhungah a leng kual vak vak a, kawtthler zawng zawng a hrut a; saloon hran hranah a lût kual a, hmanlai in sak leh Biak in hluite chu hmuhnawm ti takin a thlir mai mai a.

Ni thum an cham hnu pawhin Lafferty-a chu a duh angin a la hlawhtling lo a ni ang, tlai tak takah a lo haw a, eng mah a sawi lo va, Matt-a pawh chu a be mang lo va. A ni lina zanah erawh chuan a hmel a rawn hlim ta sarh a.

Matt-a chuan, “Zanin chu i hmel a danglam ta hle mai, lawmna deuh i va hmu ni àwm tak a ni. Eng nge chanchin?” a lo ti a.

Lafferty-a chuan, “Ka nei maithei, Matt. Chawlhkar leh khian Governor chu Washington-ah kal a tum a, Senator fel tak tak leh Congress member-te hriat a ngah a, chûngho hnenah chuan tu mahin min chim buai theih lohna tur bill, Congress-ah leh Senate-ah put luhtir theih a inbeisei a ni,” a ti ta a.

Matt-a chuan, “Chutianga thil ropui te engtin nge i tih theih?” tiin a'n zâwt leh a.

Lafferty-a chuan, “Thil awlai tak chu a ni lo reng asin; tih dan kawng erawh chu a awm zel,” a lo ti mai a.

Matt-a chuan a rilruin, 'Sum eng zât tak seng ang maw?' a ti a.

Lafferty-a chuan Matt-a ngaihtuahna chu hria ni àwm takin, “Thamna eng mah ka pe lo; Governor chu thuin ka hmin a ni. Two Bar hi tih ṭhuanawp a nih vaih chuan he lai Territory hian sum leh paiah nasa takin a tlâk hniam phah ang a, tuna kum sawmhniha a dinhmunah bawk khan a awm Ieh dawn a ni mai tih ka hrilh a. Chu chu kei pawhin ka rin dan a ni, ka ring tak meuh mai,” a ti a.

A hmel Ian dan aṭangin Colonel chuan inthiam lohna neiin Matt-a chuan a hre tho va.

Lafferty-a chuan zu a thli a, Matt-a pawh chu a thlit kêp a, “Ṭawngkam thiamna hmachhuana hetiang thil buaipui neuh neuh hi ka tih mi pawh a ni lo. Kan chunga ṭha àwm taka an lan lai hi fimkhur ngaih hun a ni. Matt, chu chu vawng reng ang che,” a ti a. A zu no chu a han thâwkkhat pawp a, “Tunah chuan kan tih tur kan zo ta, naktûkah kan haw thei tawh e,” a han ti leh a.

Matt-a chuan, “Bill chu tlang ta lo sela,” tiin a han zâwt leh hram a.

Lafferty-a chuan a hmui chu a han hru a, “A tlang ang, Matt, a tlang ngei ngei ang. He thilah hian buaina dang tâwk tawh lo hram ila ka ti ngawt mai,” a ti a.

Matt-a rilruah chuan tun hmaa a la ngaihtuah ngai miah loh a lo lang a. Lafferty-a hnena la awm reng tur nge ni ang, mahnia khawsak inrel hrang ve tawh tura Lafferty-a hmuh phâk lohva kal bo daih? Nupui zawngin tum tâwk hmu ve ta se, Lafferty-a chu a la bèl zel dawn em ni? A fapa tak tak anga enin a rosumte hi a khâwmtir ve ang em? Lafferty-a’n a rawn chhara a enkawl chhoh zûi zel dan te chu ngaihtuah neuh neuh chungin a muhil ta a.

Buggy-in Santa Fe aṭang chuan an haw a. Matt-a chu an bâwng thlahna cowboy-ho zingah hlir a khawsa a, inpuiah chuan a haw ngai meuh lo. Cowboy hna tih loh, sumdawnna lam chu a ngaihtuah ve ngai lo a ni.

Lafferty-a chuan ukil ṭha ber a ruai a, San Juan court-i’n thubuai an siamsak chu a rei thei ang ber a chelh khawtlai a; chutih chhung kum hnih hnuah U.S Congress chuan Two Bar ram hauh chin chu tu mahin an chuh buai theih lohna turin bill an ti chhuak a; chu mai ni lovin, an ram neih sa bâkah Congress chuan ram zau tak Two Bar chu an pêk belh zâwk a ni.

Pawn lama Lafferty-a buaina chu reh tawhin lang mah se, chhung lamah Link-a chu phurrit buaipuiawm tak a lo ni ta a. Kum sawm paruk (16) a nihin Link-a chu Matt-a tlukin a sang a, fit 6 a tawng a. Sikul pawh a kal tawh lo va; eng emaw changin inah a lo haw zauh zauh va, a pa chu a be ngai mang lo; tu mah a nel lo va, a mi hrang hliah hliah mai a ni.

Lafferty-a chu a thawk rim hle a, a lal ram zau tak, Two Bar ram chhunga hna thawktute chu a vil kual reng a. Zing leilung lanah a chhûak a; thimah a lo haw a, a chaw ei lai leh mut lai tih chauh lo chu awl hun a nei lo. A hmelah chuan a rilru hahna te, a thawh rim lûatna te chu a lo lang chhûak a, a ni telin a rawih a, a vun te pawh a zur ṭan tawh a.

Matt-a nen chuan an inhmu khat hle a, an inhmuh chang apiangin Matt-a chuan Colonel chu chhe sawt sawt hian a hria a, Lafferty-a chuan a mamawh a ni tih a inhre ta a.

Vawi khat chu hreh chung chungin Matt-a chuan, “I rilru a hahin vei nei hmel i pu tlat rengin ka hre mai. Eng nge ni?” tiin a zâwt ta dawt a.

Lafferty-a chuan, “Eng vang mah a ni lo,” a lo ti mai a.

Mahse Matt-a chuan, “Link-a em ni?” a'n ti leh a.

Lafferty-a chuan Matt-a chu chiang fahran hian a han melh a, “Ni chiah e. Link-a hi ka bulah a awm duh lo reng reng a, ka be hlei thei lo, kawng min kalh khum a ni ber mai,” a ti ta a.

“I hnenah eng emaw tal sawi a nei lo maw?”

“Nei miah lo, haw ngawih ngawih ang hian min melh reng a, inah pawh a lo haw ngai lo. Tun hma deuh kha chuan Two Bar ramah hian a vâk kual mai mai ṭhin a; tunah hi chuan khawpuiah a awm a, eng lai pawhin zu a in reng tih ka hria, sikul pawh a kal tawh lo. Eng nge a thinurna chhan hi zâwt tur pawhin ka tàwng thei lo.”

Matt-a chu a ngawi reng a. Lafferty-a rilru hahna chu a hriat thiampui hle a; Link-a chungchangah erawh chuan lo sawi ve tur eng mah neiin a inhre lo a ni.

Lafferty-a chuan, “Matt, min hûatna i nei em ni?” a ti ta phut a.

Matt-a chuan Colonel chu mak ti takin a han en a, “Kei hian maw hua ang che? Texas aṭangin min chhar a, thi ngei ngei tur min chhan chhûak a; min enkawl...,” a sawi lai sawi zo lo chuan a tawp ta chawt a, a chhan chu Lafferty-a chuan a ngaithla hauh lo tih a hriat vang a ni.

Lafferty-a chuan, aw tham lam lek lek hian, “Matt, nang chuan min haw si lo va; engati nge Link-a hian min hûat ngawt?” a ti ta a.

Matt-a chuan chu zawhna chu tun hma pawh khan a lo ngaihtuah tawh ṭhin a, a chhan bulpui ber chu Lily a ni. Link-a’n nikhua a hriat tirh ata a pa haw turin a zirtir tlat alawm.

Lafferty-a hnenah chuan, “A chhan ber chu Lily kha a ni. Link-a rilru-ah túr a thun a, thil dang pawh tam tak...,” a tih laiin Lafferty chuan, “Mahse, a nun siam ṭhat tumin keimah ngeiin ka bei a...,” a lo ti a.

Matt-a chuan, “I bei a maw? Link-a chu sakawr anga sâwizawi i tum a, a hlauhvin a hlau che a ni. A pian tirh aṭangin khawhar takin i siam a; a nu chuan zu leh mipa chauh a ngaihtuah a, khatih lai khan i hlamchhiah a ni. A nu an kah hlum lai a hmu a; chutah, nang i lo haw a....

"Colonel, Link-a hian a ṭih che a ni. Bâwng rûk hmang i kah hlum laiin i bulah a awm a; a dang pathum i khai hlum lai a hmu bawk a. San Juan-ah sikul i kaltir a, chutah chuan eng nge a tih? Chutah chuan ni tin a sikul kalpuite nen an intibuai ṭhin asin. Ngaihtuah rawh, a sen têt ata thil ṭha lo a hmu tamin a hre zing lutuk a ni ber mai; chu chu a ṭhan hnan ta a nih hi,” a ti ta khawl a.

Lafferty-a chuan, “Engtin nge kan tih tâk ang? Ka lakah chuan lungpui biak ang maiin a inchhu ngawng hmiah tawh mai si a,” a ti a.

Matt-a chuan, “Kei pawhin tih ngaihna tak ka hre bîk hauh lo; mahse, ti tura min tih chuan ka bei chhin ang e. Amah a la naupang bawk a, a nu mizia pawh kha a hre tak tak hman lo vang. A chhungrila hûatna hlir intuh tawh hi a la siam ṭhat theih mial mahna; in inkar hi,” a ti ta a.

Lafferty-a hmelah chuan lawmna a lo lang a, a kum pawh naupang leh ta sawt hian a hriat a.

Mahse, Matt-a chuan Colonel tih theih loh chu engtin nge a tih bîk ang? A huphurh hle a, a lo intiam ta mai chu a inchhir leh hnuhnawh rum rum a.

**********************

Lafferty-a’n a sawi angin Link-a chuan San Juan-ah zu a tlan a, a lo haw khat hle a. A lo haw mial tâkah tiin Matt-a chuan chhûakvâk lovin ranch inpuiah chuan hun eng emaw chen a lo pawng nghah a; mahse, lo haw tih reng a awm thei si lo.

Lafferty-a mangang chuan, “Ti rawh, khawpuiah chuan i va pawngpaw zawn râwih mai teh ang, ka ngaih a ṭha thei lo, a chungah thil duhawm lo tak te hi a thleng a ni maithei," a ti ta a.

Matt-a chuan Lafferty-a chu a hmu tar bâwi a, tun hmaa a la hmuh ngai loh a bek sam ṭûak te chu a hmu a, a khawngaih rilru hle a.

Vanneihna chhiar sen loh nen Two Bar ram zau tak hi a ti puitling a; mahse, tu mah tak tak a hlawhtlinna lawmpuitu leh ṭhian leh laina a nei lo, a mal êm êm a ni. Amah pawhin, “Ka duh thu samin he lai ram rûak hi ka din puitling a; mahse, eng mah lo mai a lo ni, eng mah a ni lo,” a ti hial a. Matt-a chuan Lily leh Link-a laka a beidawn vanga sawi a ni tih a hria a.

Lafferty-a chu mi ṭhenkhat chungah chuan rãwngin ṭihbaiawm tak pawh ni mah se, Lily leh Link-a lakah erawh chuan mi nunnem tawpkhawk a tling a. An nawmsakna turin mi pangngai aia dinhmun ṭha zâwkah hlan a tum a, a tha leh zung zawng zawng an tan a seng a, an nufain a hmangaih êm êm a; chuti chuan a beiseina lung phum tak tak erawh chu eng mah lo mai a ni.

Matt-a chuan, 'Heti êm chuan inti lungngai ma ta che, kei ka awm alawm; kei zawngin ka phatsan ve dawn tawp lo che,' han tih mai a han tum a; mahse, Lafferty-a nen chuan thisena inzawmna pakhat mah nei lo, naupang vâk vai a chhar chawp mai mai a ni tih a inngaihtuah chhûak thut a, a ngawi ta reng a.

Chawhnu thlang herah San Juan khua chu an lût a. Rei lo tê chhung khan a lo ṭhang chak nasa hle mai a. In sak thar ṭha fe fe chu Lafferty-a hmelma te; an chhungte a khai hlumsak tâkte in a ni tih Matt-a chuan a hre mai a. Chûng mite chu San Juan khuaa mi challang leh hlun tak tak an ni a, laina tam tak an nei bawk a ni.

Matt-a chuan, “Kan inzûi zel dawn nge, keimahin ka va zawng dawn?” a han ti a.

Lafferty-a chuan, “Nangmahin va zawng ta mai che, ṭanpui i ngaih chuan Hotel-ah hian ka lo awm reng ang,” a ti a.

Matt-a chu Plazza-ah a va kal a, saloon pakhatah a lût a, beer a han lam a. Chu hmunah chuan Link-a a awm lo phawt; in chung lamah te a tawm a nih loh chuan.

Zawn hmuh a harsa viau maithei. San Juan-ah chuan saloon ringawt pawh sawm (10) chuang fe a awm a, zawng chhûak vek mah se, a lo awm lo thei bawk. Khawi maw lai kawmkarah emaw a lo mu bo reng pawh a ni thei.

A beer in zawh chuan a chhûak a, a dawttu saloon-ah chuan a va lût leh a; mahse, chutah pawh chuan a lo awm chuang lo va.

Plazza huam chhung saloon a en kim vek hnu pawhin Link-a chu a la hmu lo va, Spanish-ho bitna kawtthler lamah a kal leh ta a. Chu lai hmun chu Lafferty-a hmelmate bubitna lai a ni.

A awmna àwma a rin a en kual zar zar hnu chuan a va hmu ta hram a. Link-a lo tawmna chu kawtthler hnung lama in tla bal tak, te tak têah hian a ni a. Dawhkan bawhin a lo muthlu a, a hmaah chuan saidawium rûak hi a inhung a.

Matt-a chuan a han en vang vang a, Link-a sam chu a seiin a thuamhnawte pawh a ṭawp kher mai a. A bula chair-ah chuan a va ṭhu a, “Link,” a han ti a; mahse, Link-a chu a ngai rengin a awm a.

Matt-a chuan koh nawn leh pahin a dàrah a han sâwi a, a lo harh chuan zim sen sawn hian a meng thîp khai a. A tirah chuan tu nge rawn ti harh a hre mai lo va; mahse, Matt-a a ni tih a han hriat chuan, “Thlâwk bo vat rawh, keimah chauhva awm ka duh,” a ti vin ta tuar a. A Iu chu dawhkanah a nghat zûi Ieh mai a.

Matt-a chuan, “Teuh lo mai; min rawn zûi rawh, coffee te inin chaw pawh i ei dun teh ang,” a han ti a.

Link-a chu a lo tho zi ṭuah ṭuah a; thâwk leh khatah, a hmaa saidawium rûak chuan Matt-a chu a vawm ta ṭhuai mai a; mahse, Matt-a chuan a lo bum hman a, chhûatah chuan saidawium chu a tla keh ta chuai a.

Matt-a chu a tho vat a, Link-a chu a tukhumah dawmin a kâwngah a man a, a nawr chhûak ta rawk rawk a. Pawna an chhuah hnu chuan a thlah thut a, Link-a chu a pai uan uan a, a tlu ṭhelh a; anchhe lawh bawrh bawrhin a han insiam rem a, a ding kâk ta ṭa a.

Matt-a chuan a pan hnai a, a hmaiah a han beng sawk sawk a, “Eng mah sawi lovin min zûi ringawt mai rawh,” a han ti leh a.

Link-a chu a tal buan buan a, Matt-a chu hnek ṭhuai tumin a ban a han vai fua a; Matt-a chuan lo thlêk sawn zauh pahin Link-a hmaiah chuan a han beng leh ṭhuai a. A kâwng leh a dàra dawm chungin saloon te reuh têah hian a hruai lût ta a.

Matt-a chuan coffee a in a, Link-a’n zu no thum a han tlâk pap pap hnuah chuan a biak theih deuh tawhin a ring a, “I pa’n nangmah hruai haw tur chein min tir a ni,” a han ti a.

Link-a chuan, “I hnenah eng mah tih tur ka nei lo,” a lo ti a.

Matt-a chuan, “Thil pahnih lek sawi dun tur kan nei. Lo kal la, mi zûi rawh,” a ti a, a tho nghâl a.

Link-a erawh chu a ṭhutna ngaiah a ṭhu lui reng a; Matt-a chuan a phih tho thut a, a nawr chhûak Ieh ta nge nge a. “Mi ã luhlul tak i ni, engati nge nawr luih kher i ngaih?” a han ti a.

“Two Bar neih i duh vang maw le; a chungah ṭhat i chhuah der vêl a!"

Matt-a chuan lungawi lo zet hian, “Sawi zel rawh,” a lo ti ram hmak a.

Link-a chuan, “Nia maw le, ka sawi mawlh ang. Ka nu a tlan bosan a, sipaiah ka ṭang e te a ti vêl a, colonel-ah a insiam chawp a; tlan bosan lo se chuan ka nu kha a thi hauh lo vang,” a ti ta a.

Matt-a chuan, 'Chu chu a rilru a lo ni ngei mai maw!” tiin a ngaihtuah a. Link-a hnenah chuan, “I pa sipai ṭan leh ṭan lohvin i nu chungah eng mah danglamna a siamsak lo,” a han ti a.

“I daw chiang!”

Matt-a chuan a han ngaihtuah a, Link-a hian a nu chanchin dik tak a hriat a hun tawhin a hria a, “Thil a nihna tak hre turin khatih lai khan i la naupang êm mai a; tunah chuan engkim i hriat ve vek a hun ta tak zet mai. I nu kha nu ṭawp leh buan chak lo tak a ni asin. Amah hnaih deuh mipa tawh phawt chu a mutpui zel a; chutiang tlangval zinga pakhat chuan a that a nih kha,” tiin a nihna tak chu a sawi ta fâwk fâwk a.

Link-a hmel chu a sen awp awp a, a mitmeng chu a kha êm êm mai a.

Matt-a chuan a sawi zel a‚ “I pain Alburquerque saloon pakhat aṭanga a chhar a ni a; chenna tur in ṭha tak a saksak a, hmeichhe pangngaia siam a tum a; mahse, a thih thlengin i nu kha nu zahawm a ni ngai lo,” a han ti leh khawl a.

“Dâwt hlawm, dâwt bur mai i ni!"’

Matt-a chuan a duh aiin a kal thui lu deuh tih a inhre thuai a. Silai chuh lo thei lovin a nawr ta tlat mai!

Link-a chu fit sawmhnih (20) vêla hlaah a tawlh sawn a, Matt-a chu tur taka melhin a pûakuk phawi tumin a kut a ti mu-ke ta ṭha ṭha mai a.

Matt-a erawh chuan Link-a lakah chuan pûakruk chuh thiang niin a inhre lo va, Lafferty-a fapa chu a kâp thei lo.

Mahse, Link-a chuan kah hlum a tum miau si a, mu hnih khat chu a pumpelh thei mial mahna; mahse, Link-a pûakrukah chuan mu ruk a awm tlat. A tih ngaihna hre lo chu che lo chang lovin a ding ta reng a, "Link,” a'n ti tuar a.

Ani chuan, “Phawi rawh, dâwt bur!” a lo ti vin ṭhawt a.

Link-a chuan a ban a thên thla a, a pûakruk a chuh a, Matt-a chu a kâp ta a. Matt-a chu zuan vak pahin a bawkkhup thlawp a.

Link-a chuan a rawn kâp nawn leh ṭhuai a, Matt-a chu a lum tawp tawp a; chutah, a pûakruk a han phawi ve a, Link-a áwmah chuan a vawmin a vawm ta nghek a.

Mahse, chu chuan Link-a silai kah chu a ti bahlah chuang lo. A mitmeng chu tual thah châknain a khat a, a han kâp nawn leh ṭhuai a, Matt-a malpuiah chuan a fuh a, thisen a lo chhûak ta zur zur a.

A theih tawpin Link-a lamah chuan a va zuang vak a, silai kâp thei lova nanchin a tum a ni; chutih lai chuan Link-a pûakruk chu a vawi li-na atan a han pûak leh a; silaimu chuan Matt-a kun chunga a zuang titih lai chu a beng bulah thawi fuain a hnungzangah a tihrawl hrutin a lût ta a.

Matt-a chu a insang ping a, a kokiin Link-a chu a va su ta nghek mai a, a per lâwp a, a tlu ta hual a.

Sakeiin a sa seh a bawh bet ang maiin Matt-a chuan Link-a chu a ṭhut bet a, a hnek ta chawrh chawrh mai a. A silai chhuhsak tuma a man lai chuan a vawi nga-na chu a pûak leh ta a, Matt-a hmai chu a kâp chim buaih teuh hle mai, tlem tê chauhvin a ṭhelh a ni. Silai hlo chuan Matt-a áwm leh hmai chu a phuh ût nuau a.

Chutah, Link-a chuan a chunga mi chu a sual lêt ta buan buan a. Matt-a hnungzang leh a malpui hliam chu a na zawr zawr a, rei daihin a inring tawh lo. A hnuaia mi chu a thlah vaih chuan ama silai kha chharin a kâp hlum ngei ang tih a hre chiang si a. Link-a hrawkah chuan a rêk a, a ri hrawp hrawp a, chuti chung chuan a lu chu leiah a tauhtir chawrh chawrh a.

Chutih lai chuan Matt-a chu a hnung lam aṭangin kut tha chak tak hian a rawn man a, a per lâwp a, vaivutah chuan a let hlawm ta hlawl a.

Lafferty-a chuan a fapa chu a kai tho va, Link-a chuan a thawh veleh leia Matt-a pûakruk tla reng chu a chuh leh nghâl a; mahse, rang takin Lafferty-a chuan a kutah a man a, silai chu a phih thlâksak a, a piah deuhvah chuan a theh phei ta daih a.

Link-a chu a han ding mar a, a hmai chu vaivutin a khat a. Lafferty-a chuan a sipai rawlin, “In lam pan dîng nghâl rawh,” a han ti fiak ṭhak a. Chutah, Matt-a bulah chuan a lo phei a, “Be pawp turin ka tir che a; ti hlum tur erawh chuan ka ti lo che,” a han ti a, a thinrim tih a hriat hle a.

Matt-a chuan, “Khanglang chai che chuan! A silai ruah ṭhak thlengin min kâp a; that duh ni ila, nung damin i rawn hmu hauh lo vang. He laiah hian a thi tlaw reng tawh ang,” a lo ti lêt a.

Lafferty-a chuan Matt-a pûakruk chu a kua a han en a; chutah, Matt-a chu a pe ta chauh va. Ani chuan a páiah a lo thun a.

Lafferty-a chuan Matt-a silai chu kah loh a ni tih a hriat chuan Link-a silai chu a chhar a, a han endik ve leh a, a kawnghrenah a zep ta daih a. Matt-a chu a kai tho va, a sakawr thlunna lam panin a kalpui a, “Nangmahin i chuang thei ang em?” tiin a han zâwt a.

Matt-a chuan a Iu a bu nghat a. A kawr hnung lam chu thisenin a chiah huh vek tawh a, a kekawr pawh thisen hlir a ni mai. Sakawr chunga a chuang tur chu inrap kai zo lovin leiah a tla hnawk a; a khaw hmuh a thim nghâl a, nikhaw hre lovin a thidang ta dêr a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 27th, 2018, 3:45 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 8
(Rozami Pachuau)

Matt-a lo harh leh chu khum nuam takah hian a lo mu a. A han hawi vêl a, bang chu chinai hnawih var vek a ni a‚ tukverhte pawh puan zar a ni a. Sakawra a tlâk dawn khan khua a rawn dur a, nasa takin ruah a sur zûi nghâl kha a ni a; tunah erawh chuan ni pawh a lo chhûak mawi leh êm êm tawh a. Matt-a chuan zankhuaa ṭêk tla rum rum leh ruahpui van-awn thawm ri bur bur te chu a hre miah lo a ni.

Tukverh lam chu a va hawi a, puan zar a nih avangin pawn lam chu a hmu thei lo va. A thuamhnaw zawng zawng hlihsak vek a ni a, a hnungzang leh a malpui tuamna puanah chuan thisen, nasa vak lovin a lo val chhûak a. A chauh êm êmzia a ngaihtuah chuan thisen a hloh hnem hle a ni tih a inhre mai a. A rilruin Link-a’n thah a tum dan te chu a ngaihtuah rauh rauh va.

A hnu deuhah chuan pa valai tak leh hmeichhia, a vara inthuam hi an lo lût a. A mipa zâwk chu hang lam deuh a ni a, Matt-a banah chuan a han hmer a. Chu pa bula hmeichhe ding chu Matt-a chuan ngun fe hian a lo melh a. Mipa chuan Matt-a banreka a dawmna thlah leh pahin, “Kei hi Doctor Chavez-a ka ni a, ka bula mi hi Laura Peabody-i a nih hi. Tichuan, eng nge i an?” a han ti a.

Matt-a chuan, “Ka chau hle ringawt a ni,” a lo ti a.

A puan sin hnuaiah chuan thawmhnaw eng mah a inbel lo tih a han inhre chhûak a, a bulah nula a awm avang chuan a zak rilru deuh va, a va melh ralh lai tak chuan ani pawh chuan a lo melh ve chiah a.

Dr Chavez-a chuan, “Miss Peabody hian nurse-a ṭan a tum a, min ṭanpuitu ber a ni,” a lo ti a.

Nula chuan Matt-a chu a en vang vang a, “Ei tur i duh em?" tiin a han zâwt a.

Matt-a chuan a lu bûk nghat pahin, “Khawiah nge Lafferty-a a awm?" tiin a'n zâwt a.

Dr Chavez-a chuan, “Nizanah khan a fapa nen inah an haw leh nghâl. I ṭhat chhuah leh hma chu heta awm reng turin a ti che a ni,” a ti a.

Matt-a chu a ngawi vang vang a, “Eng tikah nge ngai ka awh leh theih ang?” a han ti leh a.

“l vanglai tak a ni a, chawlhkar khat chhung lekin i ṭha fel leh mai ang,” Dr Chavez-a chuan a ti a, a inher a, pindan chu a chhuahsan ta a.

Laura Peabody-i chu Matt-a awmna lamah chuan a lo kal hnai a, Matt-a kawmawl sin chu a han siam marsak vêl a. Matt-a chuan ṭang ru deuh ṭeuhvin a kawmawl chu a lo pawt ve a.

Laura chuan, “Lo inti fekfawn vak teh suh khai, ka zak e ti àwm fahrana ṭan khawh te i lo tum le; i thuamhnaw phelha i hliam tuamtu ka ni asin,” a ti a, a nuih saih a, “Mr Wyatt, i vannei tak zet mai, i thih lohna chu samzai bawk chauh a ni,” a'n ti leh a.

Matt-a chuan chhan ngaihna tak pawh a hre lo. Laura chu pindan aṭang chuan a chhûak ve ta a. A chhuah hnuin Matt-a chuan chu nula mitmeng dumpawl raih chu a suangtuah zûi nasa mai a. A hmai tlangkawm zahawm tak te, a mal zen zaih te, a tukhum lama a sam ṭawn khâwm bawr laih te, hlim deuh maia a han nui seih mai te kha.

Tun hmain nula a la rim ngai lo va, ngaihzawng chu sawih loh, a hmeichhe hmuh ve chhunte chu Lily leh cowboy-ho nupui te, Mexican hmeichhia-te an ni mai a. Chutiang chu a nih avangin Laura-i’n a thinlung a deh dan chu ṭêk den ang zawr niin a hre hial a ni.

Darkar chanve hnu vêlah Laura chu thlenga ei tur chawiin a lo lût leh ta a, Matt-a mutna bul dawhkan têah chuan a thil rawn ken chu a nghat a.

Matt-a chu thil ei tur chuan a tho chhûak nghâl a, a thawh zawng chuan a hnungzang leh a malpui chu na zawr zawr hian a hria a. Laura chuan khum sira ṭhutthlengah chuan a chaw ei chu a lo vil a.

Matt-a chuan sa tui hang hawp pahin, “San Juan-ah hian engtia rei nge i awm tawh?” tiin a han zâwt phawng a.

Nula chuan, “Kum sawm (10) mi lek ka nih aṭang tawh khan,” tiin fel takin a lo chhang a. Chutia a sawi lai chuan a hmel a inthlâk thut a, aw khur lek lek hian, “Kum riat kal ta vêl kha a ni, chutih lai chuan ka patea hnenah ka awm a; mahse, Colonel Lafferty-a’n ka uncle chu Plazza-ah khan a khai hlum a. Min chawmtu a thih tâkah chuan ka pa tak tak a lo kal a; tichuan, San Juan-ah hian awmhmun kan bengbel nghet ve ta a ni,” a ti a.

Matt-a chuan nuam lo a ti hle a, “A pawi ka tihpui ngawt mai che,” a han ti ringawt a.

La nuih luih ṭalh tum chungin Laura chuan, “Ka pate-a chanchin kha eng mah hriat chianna ka nei lo va; eng pawh ni se, i tan pawi tihna chhan tur leh ka laka inthlahrunna chhan tur a awm lo. Ka patea chu Colonel-i’n a khai hlum dawn khan dan i tum zâwk a nih kha,” tiin an inkar borûak rit riau chu a han ti dai deuh a.

Matt-a chuan, “Engtin nge chûng te chu i lo hriat?” a han ti a.

Ti tak deuh maiin Laura chuan, “Ka hre chiang khawp asin. Ka pain a sawi a sawi ṭhin a, vawi sang khat aia tam ka hre hial ang chu,” a lo ti a.

Matt-a chuan, “I pa chuan Colonel chu a haw ngawt ang ti raw?” a'n ti leh a.

Laura chuan hmel ngui deuh hian, “Thu dang kan sawi dun thei zâwk lawm ni?” a ti ta a.

“A nih leh, i chanchin min hrilh ta che.”

Nuih saih pahin Laura chuan, “Santa Fe-ah sikul ka kal a, chuta ka awm lai chuan nurse nih hi ka tum ta a...," a han ti a.

Matt-a chuan a ngaithla nâin eng nge a sawi a hre lo, a thinlungah thil dang eng emaw takin a khawih tlat a. A hnu lamah pawh an inkawm zûi ta zel a. Atir tê aṭangin an pahniha inkarah chuan boruak danglam tak a awm nghâl a ni.

Doctor sawi lâwk angin Matt-a chu kar khat hnu lekah a lo ṭha chhûak Ieh ta a. Two Bar-a a haw dawnin Matt-a chuan, “Ka rawn leng fo vang, min kawm duh chuan,” a ti a.

Laura chuan, “Kan inah chuan lo kal suh. Two Bar nena inzawmna nei tawh reng reng chu ka pa’n hmelma angin a en vek a; lui kamah kan inhmu ṭhin zâwk dawn nia,” a ti a.

San Juan lui chu khua aṭanga fing hnih leka hla a ni a, lui kamah chuan chawlhkar khatah vawi hnihte an inhmu ṭhin a. A hmuh tirh phat aṭang khan Matt-a chuan nupuia neih a duh a, an inkawm thûk ta telh telh a. Nimahsela, chumi kum October thla a lo dêt chuan an beisei loh tawp thil thlengin an inkar borûak chu a ti danglam ta thut a.

Chumi zan chuan thla a êng hle a, San Juan lui kamah chuan an dan pangngaiin hlim takin an inrim a. Thingṭang han tliak ri bak hi an hria a; chutah, Matt-a hnungah chuan rifle kaw hmawr hian a rawn hawlh a; mi sawm leh pahnih hian an rawn din hual nghâl ta khup khup a.

Laura chu, “Ka pa, engati nge?” tiin a ṭe ta vak a.

Peabody-a’n, “Sam, hruai haw vat rawh,” a tih chu Matt-a chuan a hria a.

Laura chuan, “Ka pa, ka haw dawn lo. Matt-a hi ka hmangaih a, ani pawhin nupuia min neih a duh bawk a ni,” hlau miah lo hian a lo a ti a.

Peabody-a chu za hauh lovin a han nui phawt a, “Sam, rang takin hruai haw rawh ka tih chu,” a han ti vin leh ṭhawt a.

Chutah mi pakhat, khabe hmul buk tak hian Laura banah chuan a han phih lâwp a; ani chu a lo ṭang nasa mai a.

Matt-a thin chu a thawk thut a, Laura-i vuan bettu khabe-ah tak chuan a han hnek ta bur mai a; chutih rual chuan hnung lamah a per sawn nghâl thuai a.

A belebutin an ri ta rum rum a. Matt-a chu a hnung lam aṭangin thil rit tak hian an rawn vaw ri chawrh a, a tlu ta hnawk a. Leia a tlu tawh hnu chu a remchang lai laiah an chhir rawn ta chiam a.

Matt-a chuan Laura-i au vak vak chu a hria a, a hnu deuhvah chuan a reh zûi ta hmiah a. A theih tâwpin han ṭang ve bawk mah se, an tam hneh bawk a, tih theih a nei lo hle, an pet thum awk awk mai a.

Peabody-a chuan, “Ka fanu a awm tawh lo bawk a; naute u, he sáwn lu lawk hi amah leh Lafferty-a’n an theihnghilh mai mai tawh loh turin eng emaw han tihsak teh u le,” a ti ta a.

Matt-a chuan San Juan lui chu a hnungchhawn a. Mi pakhat hian a rawn zuan a; a zuantupa khabe-ah chuan a khûpin a lo do va, hnung lamah a bin liam a, chu pa chu luiah chuan a zuk tla ta bawrh a.

Mi pakhat hian a hnung lam aṭangin a nghawngah a rawn rêk a, mi dangin a hma lam aṭangin an khawih rawn ta sawk sawk a. Matt-a chuan a theih tâwpin a lo vai lêt thûak thûak a, hnek fuh amual mual pawh a nei a; mahse, an bawr hneh hrim a, luiah chuan an nawr thla ta a.

Mahse, a chhûak leh thuai a, a biang chu nasa fein a kak a, a beng ding lam a thler bawk a, a hliamah chuan thisen a lo chhûak zur zur a, a nâk ruhte pawh a tliak nual tawh a. An la chhuih zûi chawrh chawrh a, tui pawnlang deuhvah chuan a tlu leh ta a, tui chu a hâk lehnghâl a.

Peabody-a chuan, “Tunah han kai tho ula; kut ka la thlâk ve lo va, ka han che ve hlek teh ang,” a ti a.

Tui aṭang chuan a zakah an dawm chhûak a, tui a lo lem hnem deuh tawh avangin a thaw ri hrawp hrawp a.

Peabody-a chuan, “Tikhan dawm ding ula, a tawpna chu ka chan pual a ni, ka han tlâk fel law law ang e,” a ti a.

Matt-a chu a ban tawnah mi pahnih hian an chep ding a, a lu a kun tlat a, a khûp a tawm a. Chutah, a thahrui la neih zawng zawng a han sawm khâwm a; thâwk leh khatah, a ding char thut a, a theih tawp tak meuhvin Peabody-a kapah tak mai chuan a han pet ta pawp a.

Peabody-a chu a bu ngâwih a, a hmai a var nghâl vek a, a na tuar a vial ngawlh ngawlh lai chuan a hote chuan Matt-a chu an ching leh ta hrep a. Mahse, Peabody-a chu harsa ti takin a lo dâk chhûak a, “Khawih tawh suh u, a tawpna chu ka kutah ka tih tawh kha,” a ti a.

Matt-a chu hneh deuhvin an dawm bet ta tlat a. A hmai bul chenah Peabody-a chuan, “Nang, sáwn tenawm hlawm khâwm!” a ti a, Matt-a hmaiah chuan a duk ta zawt zawt a.

Matt-a hmai chu thisen hlirin a bual tawh avangin a rîkin a ri chuap chuap a. Vawi sawmhnih, sawmthum, sawmli a hnek hnu chuan Matt-a khaw hmuh chu a mit ta sulh a, a taksa pawh amah vuantute kutah a in-uai tang ta der a. Hla tak aṭanga lo chhûak ang maia Peabody-a’n, “Tuiah khan theh thla ula, i hawsan tawh ang u,” a tih ri chu a hre riai ruai a.

Vaukam hrulah tui chuan a len thla nawk nawk a, a thûk loh avangin tlâk hlumna tham êm a ni lo hlauh va. Vaukamah chuan inhâi chhuah tumin a han bei ngial ṭhin a; mahse, a harsat hle mai.

A thihdan mai chuan tuiah a inbirh hlum ngei dawn tih a inhria a, a bei fat fat a, zung khat bawk lek lekin hma a sawn a. Nakinah chuan vaukam ṭiauphovah chuan a inham chhûak a, a kâwng lam tuia inchiah reng chung chuan nikhaw hre lovin a bawk ta hnawk a.

A harh chhuah leh chuan a hnungzang chu ni sain a lo em a, Spanish ṭawnga naupang chiar nak nak hi a hre ta a. Men a han tum a; mahse, a mit a vùn phui tlat avangin a meng thei si lo. Chutah, ṭawng a han tum a; chu pawh, a ka chu thi kharin a hnawh tlat avangin a thei ta chuang lo va.

Naupangho thawm a reh hnu chuan nikhaw hre lovin a awm leh ta a. Chumi hnua a rawn harh chhuah leh chuan kut tha chak tak hian tawlailirah a hlang tih a hre riai ruai a. Sheriff Spanha aw chuan, “Two Bar-ah kalpui ula, Lafferty-a hnenah thlen thuai rawh u,” a tih chu a hre leh a.

Zan lama a chunga thil thleng chu a ngaihtuah a, Laura-i an hnuh sawn laia a ṭe tuar tuar chu a bengah a cham reng a. Tunah chuan Laura-i pa leh a ṭhuihruaite’n an sawisa tih a hre chhûak leh ta vek a.

Sakawr tawlailir khalhtu chuan dimna chhe tê mah nei lovin sakawrte chu a tur hmanhmawh a, a insawh bawp bawp a. Khawpui an chhuahsan a, Two Bar chu a kual thui zawngin a la hêlpui ta rawl nen, ni sa chuan Matt-a hmaiah a rawn chhun fo lehnghâl a.

Tawlailir insawh zawng chuan a na chuan a rawn vilh zawk zawk a, Two Bar an thlen hmain vawi tam a thidang hman hial a ni. Ni tlâk dawnah ranch an thleng a. Matt-a chuan spanish ṭawng te, sap ṭawng te a hriat pawlh ta nawk a.

Chutah, Lafferty-a aw ngei mai chuan, “Tu tih nge?” a ti ta hrak a. A aw-ah chuan a thinrimzia a hriat a.

Tawlailir khalhtu chuan hlauva aw khur hlawk hlawkin, “Eng mah ka hre lo Colonel. Naupanghovin tûkinah San Juan lui kamah an hmu a; Sheriff Spanh-a’n i hnena rawn hruai turin min ti a, ka rawn thlen ve mai a ni. Chu bâk eng mah ka hre lo,” a ti a.

Matt-a chu in chhungah an pawm lût a, khuma an mut hnuin kut dam tak hian a hliam chu a bâwihsawm ta a. A nâkah chuan ṭhem an dawh a, a mit ko chu lapaw chiah huhin an dep a.

Chutia an enkawl lai chuan Lafferty-a chuan aw dam tê hian, “Matt, tute nge?” a rawn ti a.

Matt-a chuan chhang lovin a rum ṭiah tiah ringawt a. Tum se chuan a ṭawng pawh a ṭawng thei tawh mahna; mahse, Lafferty-a chuan chawp leh chilha thil awm dan a hriat vaih chuan Peabody-a chu a that duh ngei ang tih a hria a ni.

A hliam bâwihsawmtu Elena-i chuan, “Senor Lafferty, a la biak theih rih loh a ni,” tiin a lo chhang a.

Lafferty-a chu rei tâwkfang a bula a ṭhut hnuin, “Aw le Matt, naktûk lamah kan la sawi dawn nia‚” a ti a‚ Matt-a pindan aṭang chuan a chhûak ta a.

Elena-i tih chauh loh mi dang zawngte pawhin an chhuahsan ta a. Matt-a chu a hliam te chuan a rawn tur ut ut a, chuti chung chuan a inngaihtuah a, tuna a buaina tawh hian buaina nasa zâwk a chawh chhuah loh nan Lafferty-a chu eng mah hrilh loh a tum nghet tlat a, tui takin a muhil zûi ta a.

*****************************

Chawlhkar khat hnuah Matt-a chu khum aṭangin a lo tho kang a, hruipui tiang nen a inhawl chhûak leh thei ta a.

Lafferty-a chuan amah sawisatute chu hriat tumin ni tin a zâwt a; mahse ani chuan, “Ka hre lo‚” a ti tlat thung a.

A dam fel veleh San Juan-a kal a; a rûka Laura-i hruai a; khawi maw lai, Lafferty-a Ieh Laura-i chhungte hriat phâk lohna hmuna kal bopui a, chhungkaw din ve a rilrûk a ni.

Chawlhkar hnih hnuah chuan a sakawr nen San Juan a pan leh thei ta a. Khaw thim hnua khaw chhung luh tumin tlai deuh takah Two Bar chu a chhuahsan a. A hmai vêla a hliamte chu a la dam chiang lovin a taksa dangte pawh dimdawih a la ngai hle a ni.

Ralkhat aṭangin Two Bar chu a han thlir kir a, chhuahsan hlen tura a han kalsan ta mai chu amah pawhin mak inti zâwk hle a. Sum leh paiah Lafferty-a chuan mamawh lo hlein inhre mah se, eng mah hrilh lova kal bosan daih chu a inthiam lo hle a; chu bâkah, amah tluka Lafferty-a nun hriat thiampuitu, tu mah an awm lo tih a hre chiang a ni.

A rilru lehlamah erawh chuan tun aṭanga rei lo têah Laura chu a hmu ang a, khaw var hmain San Juan chu a chhuahpui ang a, ram dang hmun hla takah a kalpui daih ang tih a ngaihtuah a, a rilru a hlim hle a.

Thim thet thetah San Juan khua chu a thleng a, Dr Chavez-a in chu a pan dîng nghâl a; a sakawr a thlun fel hnuin doctor kawngkhar chu a han kik ta a. Chavez-a chuan a rawn hawn thuai a.

Matt-a chuan, “Laura ka rawn zawng a ni, hetah a awm mial lo maw?” a'n ti tlang nghâl a.

Dr Chavez-a chuan lu thin pahin, “Lo lût phawt teh,” a lo ti a. Matt-a chu chîk deuhvin a lo en a, “An khawih na hle mai che a!” a'n ti zûi a.

Matt-a chuan, “Ni khanglang e maw le; mahse, Laura chanchin ka zâwt che a, min la chhang miah lo a nia,” nghâkhlel tak hian a han ti a.

Chavez-a chuan, “Ka hre chiah bîk lo, San Juan-ah hi chuan a awm lo tih ka hria a. An sawisak hnu lawkah che khan Laura chu a pain khawchhak lamah a kaltir a ni àwm e,” a ti ta a.

Matt-a chuan khawvêl chu rûak ta vek hian a hria a. Amah, Matt-a thih leh dam pawh hre lovin Laura chu a pa’n a thawn bo tih a ngaihtuah a; han phêk zawn ngawt ngaihna lah a hre der si lo. Chavez-a hnenah chuan, “A kal dawnin nang tal chu a rawn hmu lo che em ni?” tiin a han zâwt Ieh a.

Doctor chuan a Iu a thing a, “In inkarah eng emaw chu a awm tih ka hria a; nimahse...,” a tih laiin Matt-a chuan, “Kan inhmuh tirh phat aṭang khan kan inhmangaih nghâl a. An inah ka rim ṭhin ang tih ka hrilh a; mahse, Two Bar nena inzawmna nei rêng rêng, tu pawh a pain a hmelmâk thu a sawi a. An inah ni lo, San Juan lui kama hmun pakhatah inkawm a remchan zâwk tur thu min hrilh a.

"A rawtna ang chuan hun eng emaw chhung kan inrim ṭhin a; mahse, a pain a lo hre ve a ni ang, khami zan khan a ṭhuihruaite nen an lo lang ve ta thut a. Eng ang pawhin min dal tum mah se, nupuia neih ka tum ruh hle a ni,” a ti a.

Chavez-a chuan beidawng hmel takin Matt-a chu a en a, “A awmna hriat hun kan la nei mial mahna,” a ti zawi sup a.

Matt-a chuan a Iu a thing nawr nawr a, “A pawi lo ve, a ṭha vek e. Ka awmna a hria a, min hmangaih ve tak tak a nih ngai chuan eng hunah pawh, khawi aṭang pawhin lehkha min thawn thei reng alawm, min theihnghilh bîk hauh lo vang,” a ti ta nghat a.

Two Bar lam pana a kir leh chu a thinrim thut a, Laura-i chu a pa’n a duh lo chung tih luihnain a kal botir a nih ngei a ring a. Ni e, a hria a ni. A sakawr chu a han kheng nghek a, a sakawr hlau chu a lim zawk a, a tlu ṭhelh nghe nghe a.

A thinrim pawh a dai leh ta deuh a, engti kawng mahin Laura-i chu a dem thei lo tih a hria a; Lafferty-a chungchang a ngaihtuah ta zâwk a. Hmelma a insiam hnem tawh hle a, hnehtu chan a la chang zel a; mahse, a nunna lâk tuma hun remchang melh ran an awm rengin a ring tlat a, a ring dik hle.

Nipui a lo thaw leh ṭan a. Matt-a chuan cowboy paruk hruaiin bâwng rual chu nipui laia an tlatna ṭhin, tlang sang lamah an khalh chho va. An kir leh lam chu an mi rawih pakhatin kawng lakah a lo hmûak a, hmanhmawh taka lo tlan tih a hriat hle a. Matt-ate a han hmuh chuan, “Colonel an kâp, hrilh tur chein ka lo tlan vang vang a ni,” a'n ti nghâl a.

Matt-a chuan a kalpuite hnenah chuan, “A sakawr hi thlâksak teh u,” a han ti a.

Chu pa sakawr chu an thlâk fel hnuin Matt-a chuan, “Lafferty-a chu eng nge a an?” tiin a han zâwt a.

Ani chuan, “A sakawr an kâp hlum a, Colonel chu a keah an kâp fuh bawk. Amah an va hmuh chuan thisen a lo hloh hnem hman tawh viau mai,” a ti a.

Lafferty-a tawrh chhelzia a hriat avangin a keah an kâp ringawt a nih chuan an kâp hlum lo vang tih a hria a. An hmanhmawh hle chung pawhin zankhaw tairekah in an thleng thei ta chauh va.

Matt-a chuan, “Sakawr thar ṭhah bûatsaih ula, naktûk leilung lan veleh Lafferty-a an kahna hmunah kan kal ang a, a kâptute hnu kan chhui zûi nghâl ang; Julio kha lo hrilh ula,” a ti a.

Hlauthawng takin in chhungah chuan a lût a. Lafferty-a chu khumah a lo mu a, a hmai a dáng hle a, a bulah chuan Mexican hmeichhe pahnih Maria leh Elena-ite an lo awm a.

Matt-a chuan, “Eng nge a an? Silaimuin a ruh a khawih em?” tiin a han zâwt nghâl a.

Maria chuan, “A khawih lo a ni ang; mahse thisen a chhûak hnem êm mai a, a chau viau a ni,” a lo ti a.

Matt-a chuan, “Tuin nge a hliam hi bâwihsawm?” a ti a.

Maria chuan, “Keima’n ka ti fai a, a hmuamhmaah whiskey ka thlawr a, ka tuam hnan a ni. Tunah doctor ko turin San Juan-ah ka pasal a thang mek,” a ti a.

Lafferty-a bulah chuan Matt-a chu a ṭhu a, ani chu chau zet hian a lo meng dava diar a.

Matt-a chuan, “A kâptu che i hmu em?” a han ti a.

Lafferty-a chuan, “An sakawr ke rah ri chauh ka hria; mihring chu tu mah ka hmu lo,” a lo ti a.

Zanlai pehlah Maria pasal leh Dr Chavez-ate chu an lo thleng a, Matt-a chuan a lo chhawn a.

Doctor chuan a ip khai aṭangin hmanrua a la chhûak a, Lafferty-a hliam tuamna chu a phelh nghâl sawk sawk a.

Nghâkhlel takin Matt-a chuan, “A hlauhthawnawm em?” a lo ti a.

Doctor chuan, “A ruh a khawih lo va, thisen kalna dawt pawh a khawih lo hlauh. Silaimu hian a thisen dawt chu deng fuh se, kan chhan hman kher lo vang; mahse, a khawih fuh lo va, a dam leh thuai ang,” a lo ti a.

Matt-a chuan aw chang fal hian, “A nih chuan, ka kalsan mai ang e,” a ti ta a.

Dr Chavez-a chuan, “Matt, Colonel kâptu hi in va man chuan, dàn kutah i hlan dawn nia,” tiin a chah a.

Pawna a va chhuah chuan a mi hruai turte chuan an lo nghâk ṭhap tawh a, an zingah chuan an lndian hnu chhui thiam Julio pawh a tel a.

Matt-a chuan cowboy pakhat hnenah chuan, “Khawi lai takah nge Lafferty-a chu in va chhar?” tiin a han zâwt a.

Ani chuan, “Kawr ruam hmar lam tuikhur bulah khan,” tiin a lo hrilh a.

Lafferty-a an kahna hmun an va thlen chuan zing dar thum (3) a pel tawh a. Matt-a chuan a vêl chu ngun takin a han en a; hnu chhui hranpa teh chiam pawh ngaiin a hre lo, San Juan lam panin hniak chu a kal tho a ni. A lang chiang hle a, hnu thup ngaiin a hre lo pawh a ni ang; mahse bum a tum pawh a ni maithei. An hnu chhui chu lo hloh palh ta pawh ni se, Peabody-a tuala chhui luh mai tur, thil chiang sâ-ah a ngai a ni.

Khaw var hmain Matt-a leh a hote chu ramhnuaiah chuan an mu a; Julio erawh chuan an awmna chheh vêl chu ngun deuh zâwkin a lo fang kual a.

Matt-a chu a hah rimtawngnain a ur hneh tawh bawk a, a muhil bawrh bawrh a. A harh chuan kawl a lo êng tawh a.

An hnu chhui chuan lung hmun fing hnih vêl a zawh hnuin San Juan lam a pan dîng nal nal a.

Matt-a chuan Dr Chavez-a’n dan hmaa thlen hmasa tura a chah kha a hre reng a. Mahse, an hnu chhui chu khawpui chhungah hniak dang dang, tawlailir leh mihring hnuin a lo chhilh bo vek chuan rin thu-a mi va hek ngawt chu tih chi-ah a ngai lo va. Peabody-a chang lo pawh Lafferty-a haw êm êmtu an tam hle si a; chu bâkah, sheriff Spanh-a chuan thil chiang fek fawk a duh ngei ang.

Khaw daifem thlengin an hnu chhui chu bahlah lovin an chhui a. Julio chuan sakawr aṭanga chhuk meuhvin uisathiam ang mai hian kawtthlerah chuan a chhui zel a, mi dang chuan yard sawm pahnih (12) vêl aṭangin an zûi a; mahse, Plazza hmunah chuan a hnu chhui lai chu a hloh hmin ta der a.

Matt-a chuan, “Kawtthler vêl hi han fang ngun deuh la, vawi khat dang han bei ṭha leh teh,” a han ti a.

Julio chuan han bei leh ngial mah se, a hlawhtling chuang lo va. Matt-a chuan a hote chu Peabody-a in lam panin a hruai ta ngawt a.

Sakawr in hnungah chuan Julio chu a chhuk thla a, sakawr pahnih lo awm chu a han en chiang a; mahse, a eng amah mah chu an hnu chhui lai sakawr a ni tlat lo.

Matt-a chuan Peabody-a chu Lafferty-a kâptute zingah chuan a tel ngei ngei ang tih a ring nghet tlat a; mahse, Sheriff han hminna tham êm finfiahna a hmu si lo.

Peabody-a chu ralthuam eng mah hum lovin pawnah a lo chhûak a. A mitmeng leh a chêtzia aṭangin Matt-a chuan a lo rinhlelhna chu chiang ta vekin a hria a.

Peabody-a chuan, “Tak che u hian, eng nge hetah in lo tih? Rang deuhvin kal bo nghâl rawh u; chuti lo chu, Sheriff hnenah ka zualko ngei ang,” a han ti vêi thur thur a.

Matt-a chuan seh chilh rap hian, “Khawiah nge i sakawr thuhrûk chu?” a han ti a.

Peabody-a chuan, “Eng ka sakawr maw? Eng nge i thu sawi awmzia chu?” a ti a. A hmelah thil hai der luih a nei tih a hriat hle.

Matt-a chuan, “Lafferty-a i lambunnaa i sakawr hman kha maw le!” a ti ta khawl a. San Juan lui kama an sawisak rawn lai leh Laura thlabar au ri te a han ngaihtuah chuan a thin a rim tak meuh a.

Peabody-a chuan, “I thu sawi chu a awmzia ka hre phâk hrep lo ve; amaherawhchu, Lafferty-a an kâp tih ka hriatin ka lawm kher mai, a thih ngei pawh ka beisei,” a ti ve ta hmiah a.

Matt-a chuan, “Tih lunghnual che chu ka hreh ngawt mai; mahse, a thi lo tlat,” a lo ti a.

Peabody-a hmel chu chîk fahranin a en ran a, Lafferty-a a thi lo tih a hriat chuan a thinrim zual sauh tih a hriat a.

Amah, Matt-a tak pawh chu a thinur zual sauh va. Peabody-a’n Lafferty-a a kâp ngei tih finfiahna ṭha tâwk a neih loh avang te hlei hlei chuan a thin a sa zual sauh sauh va; Peabody-a chu a mawh phurtu a ni ngei ang tih a ring nghet nasa mai si a.

Hachang ṭhial rap rapin Matt-a chuan, “Julio, a hnung lamah khan lo veng rawh,” a han ti a.

lndian-pa chu Peabody-a hnung lamah chuan a zuang phei vat a. Peabody-a chu puh chhuahna zawngin a hawi vêl ruai a; mahse, a tlan chhuahna tur chu an dang char hmiah a.

Matt-a chuan, “I hote min chelh behtir a, thi ngei turin min sawisa a; tunah Lafferty-a i kâp a, pawi dang i khawih leh ta a; chuvangin, ka thungrul ve dawn che a ni. Kei chuan ka hote ka dawm behtir ve dawn lo che; amaherawhchu, ding chunga in chhung i luh leh theih chuan i vannei tawpkhawk a ni ang,” a ti ta a.

Peabody-a chu Matt-a ang bawka pa lian Ieh dàr pharh hlai a ni a. Pa tar lam hnaih tawh a nih avangin a sam te pawh a ṭuak ṭan a, a dul pawh a kiar tawh a; mahse, a hmel chu a rum kher mai. An inmal beih dawn tih a hriat avangin tlan chhuah pawh a tum ta lo va, châk zek zêk zâwk ang hian Matt-a chu a en a‚ a huphurh bîk lo hle niin a lang.

Matt-a chuan, “Kan mihringa hi ka hneh lo a nih pawhin ṭha takin in chhuah dawn nia," a hote hnenah chuan a ti a.

Julio chuan, “Teh reng mai boss; mahse, i hneh tho vang," kiai sak hian a lo ti a.

Matt-a chuan fimkhur takin a veh phei ta a. Insual satliah mai an ni dawn lo tih a hria a, Peabody-a chuan tih hlum ngei a tum dawn a, Matt-a pawhin thi si lo; dam si lo, a theihnghilh tawh ngai loh tura sawisak a tum a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 28th, 2018, 5:16 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 9
(Rozami Pachuau)

Peabody-a leh Matt-a inkarah chuan hnim tawi te tê a ṭo tih mai loh chu eng mah hnawk a awm lo va. Peabody-a hnungah chuan thingkhawn a awm a, Matt-a pawhin sakawr huang; corral hnungchhawn zawngin a ṭanhmun chu a han siam rem a.

Thâwk leh khatah, Peabody-a chuan kun chungin Matt-a chu a bawh phei ta rûak rûak a. Matt-a chu sir pêk deuhvin a lo inher a; mahse, Peabody-a chuan a lu-ah chiang vak lovin a hnek fuh hman ta tho va.

Matt-a chu a han pai nak a; mahse, a ding ngil leh thuai a. Peabody-a inrin ṭhat leh hmain a hnarah a han hnek ve ta siah a.

Peabody-a hnar aṭang chuan thisen a rawn baw ta hawk a. A kut hnungin a hnar chu a han hru a, a kutphah chu thiin a sen nghâl nuau va, a mitmengah chuan tual thah châkna a lo lang a.

Matt-a chuan a hnek zûi zawt zawt a. Peabody-a chu a tawlh vêl ruai a, sakawr huang chuan a lo dang ta a. A remchang lai apiangah Matt-a chuan a tlir mial mial a.

Peabody-a chu rin aiin a lo ṭang thei daih a, eng tin tin emaw Matt-a dan chêpna ata chu a tawlh chhûak thei ta hram a. A tlan vak a, thingkhawn sira hreipui chu a va chuh thut a, Matt-a chu cheh hlum tumin a rawn veh phei ta a.

Engtia lo inven tur nge ni ang tia Matt-a a inngaihtuah lai chuan a hote zinga pakhat chuan, “Zawngsen, i hreipui kha i dah thuai loh chuan ka kâp ang che‚” a lo ti ta a.

Mahse, Matt-a chuan, “A pawi lo, lek mai mai teh se,” a ti a, sakawr inah chuan a tlan lût ve nghâl a, chutah chuan buhpawl leh ran êk an hâina thirkut zum awm ngeiin a ring a ni. A rin ang takin kil khata buhpawl zinga tlum hmaka a lo inthawlh chu a va hmu thuai a, a chuh ve ta nghâl vat a.

Peabody-a chuan au ṭial ruan ruan chungin a rawn bawh phei buan buan a; sakawr pahnih lo inthlungte chu an tang hru mai a, an ke perin an hnar an phit dur dur a.

A hreipui kenin Peabody-a chuan a vawmin Matt-a chu a va vawm ta a; Matt-a chu buhpawl chungah chuan a bawk a, a lu chung lawkah hreipui chu a lo thlâwk phei fur a.

Matt-a thawh chhuah leh hmain Peabody-a chuan a rawn nangching hman a, buhpawl karah chuan an inlehthal thiak thiak a, thirkut chu an inchuh ta ṭiang ṭiang a.

Nakinah chuan Matt-a chuan Peabody-a ke-ah chuan a man ta thut a; ani chuan a lo leng ṭhuai a, Matt-a hmaiah tak chuan a tlawh fuh a, a mittui a tla phung nghe nghe a.

A thinrimna chuan Matt-a chu thahrui a rawn pe thar leh a. Peabody-a ke a vawn chu a thlah thut a, rang deuhvin a tho thuai a; Peabody-a taksa chu zuan khumin thirkut zum chu a va ban pha ta a; rang deuhvin a lek kang a, a kibar zung hrual pakhat chuan Peabody-a lo tho ve mek malpuiah chuan a vit ta thawih a.

Peabody-a na ti lutuk chu ui ang maiin a chiau teng tung mai a, thirkut chu a tal dâwk a, corral kilah chuan a vâk phei ṭâwk ṭâwk a.

Matt-a chuan thirkut chu a lek kang leh a, Peabody-a taksa kar cheh chuan a ding ta run a. Ani khan hreipuiin cheh hlum a tum zo chauh kha a ni a; tun hmain San Juan lui kamah thi hnu kalsanin a kalsan tawh bawk a; chutah, Two Bar-ah rawn lût ruin Lafferty-a kah hlum tumin a lo lambun a.

Chu bâkah, thirkut chu chan khalh hlauh se chu a that ngei ngei ang tih a hre chiang hle a. A thinrim lutuk chuan vih hlum nghâl mai pawh a duh rum rum a; mahse, a rilru-ah chuan thil dang‚ Laura a lo lang a‚ eng ang pawhin sual mah se, Peabody-a chu Laura-i pa a ni tlat. A en ta reng ringawt mai a.

Peabody-a malpui aṭang chuan thisen tak ngen ngun a lo phuan chhûak buah buah a, a hmai pawh a dáng var nghâl vek a.

Matt-a chuan a thirkut ken chu sakawr in bangah chuan a han khawh vak a, a bur chawt a, a sai ngar ngar mai a. A hote chuan kawngka aṭangin an lo en ṭhap a. A hote chu a kal pel a, pawnah a chhûak a, a hnungah a hote chuan an rawn zûi a, an sakawrah an lawn a, an kal ta a.

Peabody-a chu sakawr in kawngkhar bulah a lo tawlh chhûak a, Matt-ate kal liam tur chu hûatna namen lo nen a thlir zûi vawng vawng a.

Matt-a leh a hote chu khua aṭang chuan ranch panin an haw leh nghâl a. Matt-a chu a hawi kir miah lo. A taksa chu a na vêl ṭhem ṭhum a, Peabody-a chu thidang khawpa chin hrep a duh a; mahse, a duh aiin a kal thui ang tih a hlau a ni.

Lafferty-a chu a ṭha chhûak leh thuai a, thla khat hnuah chuan a chhûakvak leh thei tawh a.

Mahse, Matt-a chuan Lafferty-a’n hmelma a ngahzia a ngaihtuah a, Peabody-a leh a chekkawite’n an hûatna chu a nasa deuh deuh vang tih a hria a, amah emaw, Lafferty-a emaw an thah hma loh chuan an bansan lo vang tih a ring tlat a ni.

Peabody-a phei chuan a hma aia ngawrhin thah a rawn tum leh ngei ang; chuvangin, Matt-a chuan amah chauhvin Lafferty-a chu a thlah ngam tawh lo va, a hlimthla ang maia zûi chawt reng a tum tawh a ni.

Hun a liam zel a, thlasik khaw vâwt a rawn inṭan tirhin Peabody-a chuan Lafferty-a thah a rawn tum leh ta ngei a.

Ni khat chu mi pahnih hian rustler-ho hnu an hmuh thu leh bâwng sawmli (40) vêl an khalh thu an rawn hrilh a. Chu mite pahnih chu an mi rawih thar an ni a.

Bawng rutute chêtna hnu an sawi chu an va thleng a. Matt-a chuan chu mite pahnih chêt dan chu danglam riau hian a hria a, a ringhlel ta tlat a. Rustler-ho hnu chu ngaihsak duh lovin chu mite pahnih chu a thlithlai ru ta khiau zâwk a.

Nakinah chuan an awmna aṭanga ding lam, dûm tui awm lohna aṭang chuan mi pakhat hian Lafferty-a chu a rawn kâp ta thut a, an inkar chu yard za (100) vêl a ni.

Silai puah hma chiah khan Lafferty-a chuan dûm hmuna thil eng emaw che a hmuh avangin a sakawr a lo kheng vak hman a, a kâptu chuan a ṭhelh phah ta hlauh a ni.

Matt-a leh Lafferty-a chu fit sawmli (40) vêlin an inhlat a. Matt-a chu anmahni rawn kâptu awmna lamah chuan a lim chhûak zawk a, Lafferty-a pawhin a rawn ûm zûi ve nghâl vat bawk a.

Mahse mi pahnih, thu rawn thlentute kha chu kawng dangah an lo relh bo hman tawh a. Matt-a chuan a sakawr chu dûm ko tlangah chuan a zuan pheitir zawk a, Peabody-a tlanchhiat tum lai chu a hnungah a sakawr chuan a va su her ta sawk a.

Peabody-a chu a tlu bawkkhup thlawp a, a rifle chu a thlauh leng daih a. Matt-a hnungah chuan Lafferty-a pawh chu a lo thleng chawpchilh ve nghâl a.

Peabody-a chu a inlet kual a, a pûakruk a phawi leh ta thut mai a; mahse, Lafferty-a chu rang deuhvin a sakawr aṭangin a zuang thla a, Peabody-a pûakruk chu a pet persak lâwp a, ama pûakruk chu phawiin a tin ta a.

Matt-a chuan eng emaw sawi tumin a han ang hman zuau va; mahse, Lafferty-a ṭawng hun niin a hria a, eng mah sawi lovin a ngawi leh ta zâwk a.

Matt-a hlauhthawn angin Lafferty-a chuan a kâp ta mai bîk lo va, “A nih leh Matt, dàn chu chance i han pe ve chhin ang hmiang, i rawt fo bawk a,” a ti ta then a.

Peabody-a hmel chu a zamin a buai nak mai a. Matt-a chuan, “Khai le, sakawrah lawn la, San Juan panin kal nghâl rawh,” a ti a, an inchhawm ta hnak hnak a. Peabody-a kut chu an phuarsak lo va; Lafferty-a chuan tlan chhuah tum se a ti zâwk hlein a lang.

Khawpui an thlen meuh chuan zan a rei tawh viau a, jail chhungah chuan lalṭin a lo inchhi teng teng a. Matt-a chuan kawngkhar chu a han kik a, Sheriff chuan a rawn hawng nghâl a.

Matt-a leh Lafferty-a te thu sawi a ngaihthlâk zawhin Spanh-a chuan Peabody-a chu jail-ah a khung ta a.

A hnu chawlhkar thumah an thubuai chu an sawi a, Lafferty-a leh Matt-a pawh San Juan court-ah chuan an va kal ve a.

An thubuai sawi hma hian Sheriff chuan an inlambunna hmun chu a lo ve en fiah vek tawh a. Juries-ho chuan thu an peih sam hle, Peabody-a chu thla ruk lung in tang turin an rem ta a.

Matt-a chuan an thubuai rem dan chu ṭha thawkkhat viauin a hria a. Hun kal tawh te chu a ngaihtuah a, theihnghilh vek a, inrem taka awm a duh tawh hle a ni.

**********************

Link-a chu a pangngai reng a la ni a, amaha sual intuh tlat tawh chu a paih thei tawh lo a ni.

Lafferty-a thung chuan Two Bar sumdawnna chu a ti changtlung deuh deuh va, beram vulh lam a en chhin ta thung a. Beram sang tel a chaw lût a, a enkawltu atan Mexican leh Basque beram vengtute a ruai a.

Tin, textile mill; puan tahna khawl a bun thar bawk a, puan tahnaa thawk tur chuan chutiang lama thiamna nei khawchhak lam aṭangin mi tam tak a ruai bawk a.

Khawchhak lama a han zinnaah chuan Wild West Show a han en a. (Wild West Show - Mingo-hovin America ram thar an dai dar ṭan tirh lai vêl nun, Red Indian-ho culture leh lawi rual an pelh vêl dan entirna a ni ber ang.) A tuipui hle ni ngei tur a ni, a lo haw thlâk leh hnu chuan chutiang lam ennawm chhuah tur chuan pawl siam ve a tum ta a. Lem chan thiam a ruai a, chu show chu a tih hlawhtlin chuan Two Bar sumdawnna - sa ṭin, puan, thingphel leh marble-te theh lar nan a remchang dawn hlein a hria a ni.

Kum khat a han liam leh meuh chuan Red Indian sakawr chung chuan dan dangdai taka thiam bîk riau te; cowboy, sakawr hel sâwi hmin thiam tak te; hruizen phih awh hnehsawh tak leh kawng hrang hranga thil thiam danglam bîk tak neite chu a ruai khâwm leh ta ṭeuh a.

Tunah chuan Two Bar hmasawnna chu a tlanin a tlan rûak rûak a. Matt-a chuan an hna thawktu zatve pawh a hre seng tawh lo va, mikhual ta dui hian a inhria a ni. Two Bar hausakna chu pakhat mah a pual tur awmin a hre lo va, ngawi renga chhuahsan daih mai te a duh ta hial a.

A hma lam hun tur a ngaihtuah chang chuan kut rûakin Lafferty-a chuan a la chhuahtir mai te pawh a ring rilru rum rum ṭhin a; tin, a mamawh lo telh telhin a hre bawk a. Ama puala in Ieh lo chhe tê tal a din loh chuan a tan khua a tlai zo mai dawn a ni.

Two Bar-ah chuan Lafferty-a awm loh pawh a hriat lem loh va, a zin bo hlan pawhin hna hrang hrang chu a kal ngaiin a kal tluang pat reng tho a.

Sa ṭin siamnaa thawkte chuan anmahni liau liauvin clerk Ieh hotu chhawng hran neiin pawl dang lakah a inla hrang fel nalh thei a; chutiang bawkin textille mill leh marble quarry-a mite pawh an inla hrang bawk a.

inpui aṭanga hnai takah chuan office building lianpui a awm a, chuta clerk leh officer-te chuan Two Bar hna thawh pumpui chu an khai khâwm a; San Juan lam panin dak ip lian pui pui a chhûak zut zut reng a; chutiang vêl bawk chu eng lai pawhin Two Bar-ah a lo lût reng bawk a.

Lafferty-a leh a party-te chu Wild West Show neiin khawchhak lamah thla ruk (6) zet an han têi kual a. Ni khat chu dak ip pakhatah hian Matt-a lehkha tur zawr deuh hi a rawn thleng tel nawlh mai a, chu lehkhathawn chu Indian hnu chhui thiam Julio rawn ken a ni.

Matt-a chuan, “Julio, tu emaw chuan min la hre reng a nih dawn hi,” nui sak chung hian a ti a. Lehkhathawn chu a han hawng a, Lafferty-a’n Kansas city aṭanga a rawn thawn a lo ni a, hetiang hian a lo inziak a :

Matt, Laura Peabody-i ka hmu a, i Ia ngaihven cheu a nih chuan West pointaI-ah i hmu thei ang. Thla khat hnua lo haw ka tum.

Lafferty.

Matt-a chuan lehkhathawn chu rei tak a en reng a, a chhiar nawn leh ṭhin a. Julio chuan Matt-a chu ngun tak hian a lo en ve reng bawk a, “Senor, buaina a awm em ni?” tiin a han zâwt a.

Ani chuan, “Buaina lam a ni lo ve, hmun hla taka ka kal a ngai dawn a nih hi,” a ti a, in lam pan chuan a haw ta nal nal a.

Santa Fe pelin a la zin ngai lo va, tun ṭum chu Missouri thleng rawkin a kal dawn a ni. A phur kher mai a; mahse, hlauhthawnna tak a nei a. Laura chuan a rilru a lo thlâk tawh maithei, lo duh tawh lo ta ang se.... Chutiang thil a ngaihtuah chuan a bing mup mai.

In a thlen chuan thuamhnaw tlem leh rangkachak pawisa kengin San Juan lam pan chuan a chhûak ta a.

San Juan a thlen chuan thawmhnaw zawrhna dawrah a lût nghâl a. Suit thar a lei a; lukhum nalh deuh a zawng leh a, derby lukhum a lei bawk a. Pûakruk paina kawnghren la hren ṭung reng chu miin an nuihzat ang tih hlauvin, dawr nghâktu hnenah chuan a hnutchhiah a, a pûakruk chu a kawrchung iptêah a ak ta zâwk a. Zinnaa ken chi ip a lei leh a, hmui hmul mehna, kamis leh kekawr bâkah, mawza leh thil dang eng eng emawin a hnawh khat a, khualzin tawlailir dinna lamah chuan a phei ta a.

Stage tawlailir chu dar sawm (10)-a chhûak tur a ni a. A nghah chhung chuan a hmaa a hlauhthawnna bawk kha vawi tam fe a ngaihtuah nawn a, a tawpah chuan San Juan chu an chhuahsan ta nge nge a.

Amah chauh chu an chuannaah chuan passenger a ni a. Zanlai vêlah chuan a mut a chhûak ta hle a, a’n muhil dawn a, a harh leh ṭhin a, a muhil thei meuh lo.

A chuanna chu Santa Fe hmar lam panin a kal zel a. Varṭianah stage station pakhat hi an va thleng a; an tawlailir hnûktu sakawr an thlâk chhung an chawl zawk a; tûkṭhuan an ei nghâl a; chawl khawtlai lovin an kal leh ta ngar ngar a.

Ni leh zante chu a ral zel a, Matt-ate pawh mel tam fe an kal tawh a. Santa Fe aṭang chuan Santa Fe hlui lam kawng an zawh a; a chuanna tawlailir chu vawi tam tak a inthlâk a; San Miguel, Las Vegas, Cimmaron Spring, Cimmaron Crossing, Pony Rock Council Grove-te an pal tlang a.

Matt-a chu a sil urh tawh mai a, an chawlh apianga stage aṭanga chhuk Ieh lawn ringawt pawh chu a ning hle a ni.

Tûk khat chu zing ni chhûak mawi takah hian Missouri lui a lo lang ta ruih mai a. West point chu Santa Fe aiin a lian bîk hran lo va; mahse, an in sak leh mihring khawsak dan chu a danglam hle. Mi reng reng chu hmanhmawh êm êm hian an che vek a; Santa Fe-ah kha chuan chutiang chu a ni ve lo a ni.

Matt-a chu hotel changkang takah hian a thleng a. A inbual fai a, a inchei fel vek hnuin Laura zawng turin kawtthlerah chuan a chhûak ta a. Suit thar leh lukhum thara a han induang zaih chuan a danglam hle a ni.

Chawhma zet a zawn hnu pawhin Laura-i chu a la hmu ta chuang lo va. A tawpah chuan a rilruin, 'Puan ṭhui dawra zawn a tih chi ber ang,' a ti ta a.

Puan ṭhuina dawr pathum a luh hnuin a pathumna chuan Laura Peabody-i chu an lo hre hlauh a. A tirah chuan chu nu chuan a tarmit phen aṭangin Matt-a chu ringhlel àwm zet hian a lo melh a; mahse, Matt-a chuan a han chhimbudawi kual a, a hnu lawkah chuan Laura chenna panin an inzûi chhûak ta nge nge a.

Laura-i chenna chu in ṭha deuh mai, chhawng thuma sak a ni a, a bathlar te pawh chu thingzaia mawi taka chei vek a ni a. Pawnah chuan dár pawh rîkna hrui hi a lo inkhai a, Matt-a chuan a han pawt ri tlang tlang a.

Hmeichhe upa lam deuh hian kawng chu a rawn hawng a. Matt-a chuan, “Miss Laura hmuh tuma lo kal ka ni a, Matt Waytt-a hetah a awm tih min han hrilhsak ta che,” a han ti a. Chu nu chu lu bu nghauhvin a kir leh ta a.

Laura-i’n a rawn hmuh thut chuan mak a ti hle a, ṭêkin a deng ta emaw tih mai tur hian a meng phâwk ta vak a.

“Laura...,” eng mah sawi tur hre lo chuan Matt-a chu a tawp chawt a.

Laura chuan “Nangmah i ni tak tak em? Oh.. Matt, nangmah i ni tak zet maw?” a lo ti chul a.

Matt-a chu hnai deuhvah a va ding a, “Aw, keimah ngei ka ni e,” a han ti a.

Chutah zawng, Laura chu Matt-a nghawngah chuan a uai ta hnawk a. Matt-a hmaia ser nung, a pa Ieh a hote’n an sawisakna chu a kut nem tak chuan a han khawih a, a khur der der bawk a. Matt-a chuan nghet deuhvin a khur reh hma loh chu a pawm ta vawng vawng a.

Bathlarah chuan an ṭhu dun a. Matt-a chuan “Engati nge i pa chuan a thawn bo daih che mi han hrilh teh,” a han ti a.

Hun eng emaw chen Laura chuan Matt-a chu lehlam a hawisan a, a mittui chu a far zawih zawih a. A tawpah zawng, zawi sap hian, “Ka that tawh a ti che alawm. Tin, khami zan khan thi kalsanin an kalsan che a; i thi lo tih a han hriat khan kan inhmuh leh vaih chuan thah ngei ngei che a tum thu min hrilh a. Lafferty-a nen a hûatzia che u ka ngaihtuahin a thah duh tak tak che ka ring a ni,” a ti ta a.

Matt-a chuan, “Tum zawng a tum alawm; mahse, eng ang pawhin tum mah se ka hlau lo, a lak aṭangin ka inveng him zo tâwk a, nang pawh ka enkawl thei che. Inneih ka duh, vawiinah ngei hian. Hetah innei ila, in lam panin kan haw dawn nia,” a'n ti a.

Laura chu a khur leh ta chiam a.

Matt-a chuan “Hlau reng reng suh, kan inneih hnuah phei chuan eng mah a ti thei lo vang,” tiin a han hnem a.

Laura chuan, “Lafferty-a kha ka hmu asin, a show pawh ka en ve,” a ti ta daih a.

Thu dang daiha a pakai avangin tuna inneih mai chu a la tiam lo deuh niin Matt-a chuan a ring a, “Amah, Lafferty-a chu alawm hetah i awm tih min hrilhtu, lehkha min rawn thawn a,” a han ti ve a.

Laura chuan chhum lo chat lovin thu ho mai mai a sawi zel a. Matt-a'n, “Laura, ngawi tawh teh, tuna inkut suih mai hi ka duh tawh tak zet a nia,” a'n ti leh tâkah chuan Laura pawh chu a ngawi ve ta a; mahse, ringhlel angreng tak hian Matt-a chu a en a.

Matt-a chuan, “Kan inneih chuan i pa pawh a hlauhawm tawh miah lo vang, mi ã nileng a ni hlei nem," a han ti leh a.

“Oh! Matt, ka ring ngam tâwk che asin.”

Matt-a chu a kun hniam deuh va, Laura-i hmuiah chuan a zuk fâwp zauh va, “Ring mai rawh Laura, ka duh ngawih ngawih che a ni. Ka hmangaih che a ni,” a ti ta mial mial a. A rinhlelhna chu ṭiauchhum, zing ni chhûakin a rawn em ral ang mai hian a kiam ve ta telh telh a.

Matt-a chuan a kut chu a hmersak a, “Han insiam vat vat teh, duh aiin kan rei mai dawn alawm,” a ti ta a.

Laura chu in chhungah a lût a, in chhunga lo awmnu nen chuan eng thu emaw an sawi dun a; mahse, Matt-a chuan an thu sawi chu a hre lo. Laura chuan thawmhnaw ip a rawn khai chhûak a, kawrchung bâtin lukhum par chhak hi a khum a.

Matt-a chuan, “Khawiah nge Biak in hnai ber a awm?” tiin a'n zâwt a.

Laura-i chuan, “Kawtthler lehlam maiah sawn,” tiin a lo chhang var a.

Matt-a chuan Laura-i bag chu a khaisak a, thing daihlim hnuaiah chuan kut insuih rialin an kal ta a.

Biak in chu an thleng thuai a. Laura chu puithiam chenna inah a va lût a, Matt-a chuan pawnah a lo nghâk a. Rei lo têah puithiam leh Laura chu an lo chhûak leh thuai a, Biak in pan chuan an phei tlang ta a.

Biak in an luh dawn chuan Sheriff hi hmanhmawh takin a lo kal a. An bul a lo thlen chuan, “Hei, eng nge a awmzia?” a rawn ti khur khur a.

Puithiam chuan, “Kan ṭhiante hian inneih an tum a ni,” a lo ti a.

Sheriff chuan, “Miss Peabody-i khan chuti lam eng mah min va hrilh lo ve?” a ti a.

Laura chuan, “Kan tum miau chu a nih hi,” hlauthawng takin a lo ti a.

Matt-a chuan, “Chu..., khawlhkham min siam i tum deuh em ni, Sheriff," a han ti a, a ṭawngkam chu a vâwt raih mai a.

Sheriff chuan, “Keia dan theih che u in ni hlei nem,” a lo ti thuai a. Chutah, “Puitling lungfing in ni ve ve tawh a, va innei tak rawh u, in ṭhianah ka lo ṭang nghe nghe ang e,” a ti ta hlauh a.

Biak inah chuan an inzui lût a, inneihna hun serh chu dan ang thlapin an tlâk thuai a. Biak in aṭang chuan khawi dangah mah peng kual lovin stage station an pan dîng a, New Mexico panin an chhûak leh ta nghâl a.

West Point aṭanga mel sawm panga (15) vêla hla, stage station tê reuh têah an inneih zan hmasa ber chu an hmang a, an hlim hle a.

A tûk zingah chuan Laura-i'n a pa a hlauhna pawh chu a reh ta deuh va, an inneih tawh ber chuan a rilru hmin theih a inbeisei a. Eng pawh lo thleng se, Matt-a chu kalsan a tum tawh lo reng reng a ni.

Matt-a chu a vanglai a ni a, a tha a la chak bawk a, tu lakah pawh a nupui chu venhim a inhuam hle a. Eng pawh ni se, Peabody-a chuan vawi khat thinrim chu a la rawn nei hrim hrim ang tih a ring a, khuareiah a la nem ve mahna tih chauh chu an innghahna a ni a.

Tunah zawng nupui a nei ta a, Two Bar-ah an awm ve rih phawt ang a; eng tikah emaw anmahni puala in leh lo din ve turin Two Bar chu an chhuahsan a la ngai dawn tho tho va; Peabody-a thinrim rawn thawk tur nen, an hmabâk la ko hlein a hria a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 29th, 2018, 4:07 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 10
(Rozami Pachuau)

Matt-ate chuan Santa Fe chu chhunah an thleng a, an inzin chau tawh hle a.

Santa Fe pàwh turin rel kawng an sial thuai dawn tih mite chuan an lo sawi a; chuti a nih chuan, Lafferty-a pawhin Two Bar ram chhun turin hma a la ve ngei ang tih Matt-a chuan a ring a. Two Bar hlâwkna tur a nih phawt chuan Lafferty-a chuan a lo zuan zat zat zel a, tih sual a la nei ngai lo.

New Mexico hmasawnnaah hian Colonel Lafferty-a chuan tha a thawh tam hlein a hria a; mahse, Matt-a chuan rel kawng emaw, New Mexico lo ṭhan zelna tur lam emaw pawh, eng mah ngaihtuah a nei lo; a vei ber chu Laura-i pa a ni.

Two Bar an thlen chuan Lafferty-a inpui sir khat an luah a, an chenna tur in hran sak chu Lafferty-a’n rem a ti dawn lo tih a hria a ni.

Peabody-a chuan a rilru kap teh mah se, Laura-i a han nei ta chu a hlim êm êm mai a. Tunah chuan Lafferty-a’n mi vâk vai a chhar mai kha a ni tawh lo. A rilruin in leh lo hran a benbel dan tur chu a duang chhin vêl a, a ruahmanna chu eng tikah nge Lafferty-a hrilh tur ni ang aw?

Chu lovah, Peabody-a chuan an inneih chu a hriat thuai a ring a. A farnu khan lehkhain a rawn hrilh ngei ang a; hrilh lo pawh ni sela, a hre thuai dawn tho tho. Eng tikah nge a lo thawh ang? Engtin nge a chêt ang?

Laura pawh a ni telin a hlauhthawnna a zual emaw tih mai turin a hmel a ngui sat sat a. A pasal tel lo chuan an chenna in chu a chhuahsan ngai lo va, zanah pawh kawng a khar uluk hle ṭhin a ni.

Matt-a pawhin fimkhur thu-hlaah zanah chuan ral vengtu a dah ta hial a. A mi rin zawng parukte chu a kaiza veng turin khawi hmunah pawh a hruai ta fo va, pûakruk pai lovin a chhûak ngai hek lo.

Lo enthla ru rengtu an awm tâkah tiin Matt-a chu ranch chheh vêlah chuan a chhûakvâk reng a. Ni khat chu mel khat vêlah hian anmahni enthlatu sulhnu a hmu ta a. Sikret bung, thing hnaha zial chi hi sawntlung pawng sirah a chhar a, a bul hnimbuk hnuaiah chuan a vah kualna hniak a hmu bawk a. Anmahni enthlatu chu San Juan lamah a haw ding Ieh nal nal tih a sakawr hniak aṭang chuan a lang a.

Matt-a chuan Laura hnenah, “I pa hian min veh reng tih ka hria, lung inah min tantir a ni ringawt alawm; hetiang reng renga khawsak reng ai chuan inchapchar law law ka duh. Ka zawng chhûak ang a, eng nge a tum chiah ka zâwt ang,” a ti ta a.

A nupui hmai chu a dáng sâwp sâwp a. Matt-a chuan, "I sakawr chuanna tur ka han bûatsaih ang a, nangmaha leng vêl mai mai angin i lang ang a, a rûkin ka lo veng zel ang che. I chungah eng pawi mah an ti hman lo vang. l rilrem zawng a ni em?” a han ti leh a.

Laura-i chuan a lu a bu nghat a, a pasal chu a ring tâwk a ni.

An rawt angin Laura chu sakawra chuangin ranch aṭanga hla deuh takah a va leng chhûak a. A vawi khat chhuahvahnaah enthlatu chuan a lo hmu nghâl a; mahse, Matt-a thawm hriain khawpui panin a tlanchhe hman a.

Chumi hnuah chuan an tih dan an thlâk a. Laura a chhuahvah dawn chuan a hmain a kalna turah Matt-a mi thlan mi parukte kha an lo awm hmasa ṭhin a, Matt-a chuan hmun dang aṭangin a veh reng bawk a.

Chawlhkar khat hnuah Laura chu ranch in aṭangin a leng chhûak leh ta a. Thui fe amaha a kal hnuin thâwk leh khatah, Peabody-a leh a hote chu an lo lang ta thut a. Matt-a pawh chuan a tawmna aṭangin a lo thlir reng a.

Laura chuan a sakawr chu a kheng thut a, Matt-a lo bihrûkna lam pan chuan a tlan ta vak a. A hnungah a pate chuan an rawn ûm zûi ve nghâl a; mahse, Matt-a hote kha an rawn lang ta a; chu veleh Peabody-a Ieh a hote chu San Juan lam panin an tlanchhe ta a.

Matt-a pawh chu a tawmna aṭangin a lo dawk chhûak zawk a, sakawr chunga chuang chungin a rifle chu a han tin a, Peabody-a sakawr chu a kâp let ta ṭhuai a.

Sakawr tlu tur chuan Peabody-a chu leiah a vawrh thla tawp a, a lum zûi ta a. A hote chuan an sakawr an ti ding a, Peabody-a chu bâwihsawm an han tum a; chutih lai chuan an bulah Matt-a chu a lo thleng hman reng tawh a, “In silaite kha thlauh rawh u,” a han ti fiak ṭhat a.

An zinga pakhat chuan a pûakruk chuh a han tum a; mahse, Matt-a silai chu a pûak ṭhuai a, chu pa chu a sakawr ata a hlawm thla nawk a, na tuarin a rum ta hum hum a.

Matt-a hote pawh an lo thleng nghâl a, Laura pawh chu a lo thleng a; mahse, Matt-a'n, “Lo inthiar fihlim rawh,” a tih avangin a kal sawn leh ta a.

Peabody-a leh a hote silai chu an khâwmsak vek a. Matt-a chuan, “Peabody, engtiziaa buaina siam tum reng nge i nih?” a han ti a.

Peabody-a thinrim hmel ang êma hûatna pai nasa chu Matt-a chuan a la hmu ngai lo. A mitmeng chu a alh a ni ber mai a, inmelh hlum theih chu ni se, Matt-a chu a thi chiang ngawt ang. A thinrim chu a khurh hian a khur hlawk hlawk a, ṭawng zai pawh a rel thei lawk lo va. Nakinah chuan, “Ka fanu ka duh a ni. Nang sáwn fa lu lawk hian i bum chhûak a, i hreng bet a,” a ti ta chiam a.

Matt-a chuan Laura chu a han ko va, ani chu a lo kal thuai a. A hmel chu a dáng vek a, a pa hnenah chuan, “Matt-a hi ka hmangaih a, ka duh thlan ngeia ka neih a ni a, kumkhuain a kianga awm ka duh a ni,” a rawn ti a.

Peabody-a chalah chuan thisen zam a lo pawng ṭawlh ṭawlh a, a chêt thut a hlauh avangin Matt-a chuan silaiin a lo tin thuai a. Mahse, a rin angin Peabody-a chu a che ta lem lo, a ṭhuihruaite kiangah chuan a va ding a; chutah, an tlan liam ta dial a.

Matt-a chuan Laura lo khur hlawk hlawk chu duat takin a kuah a, a sakawrah a hlang a, an haw ve ta a.

Laura chuan a pasal hnenah, “Ka pa khan engtin nge a tih leh tâk ang?” tiin a han zâwt a.

Matt-a chuan, “Tunah mai chuan eng mah a tiin ka ring lo,” a lo ti a. A han ngaihtuah a, Peabody-a chuan bansan mai a tum dawnin a lang lo va, eng nge lo thleng zel ang tih chu lo sakuh ser nghah tawp a ngai a ni.

Lafferty-a chuan a Wild West Show chu a hlâwkpui hle a, khawpui tam tak an fan hnuin an lo kir leh ta a.

Chutih lai chuan rel kawng chuan Santa Fe a rawn thleng a; chuta ṭang chuan chhim lamah kal zelin kum 1880 khan San Juan khua an rawn sial thleng ve ta a; chumi kum vek chuan Two Bar sa ṭin siamna hmun pawh pàwh turin kawng an zawng nghâl a.

Laura chuan San Juan-a kal a la ṭih ta fo va; Peabody-a erawh chuan eng mah thawm a rawn nei hran ta lem lo; mahse, Matt-a chuan a rilru a la ti danglam chuang lo vang tih a ring tlat a ni.

Peabody-a chuan a hûatna chu kawng dangin a lantir a, Matt-ate nupa lakah ni lovin Link-a chungah a lo thleng thung a ni.

Laura chuan fa, thla ruk mi a pai a, chutia fa hial a han pai tâkah chuan a pa hmin theih a inbeisei ta deuh a. Matt-a’n an chuanna tur tawlailir a bûatsaih a, an pahnihin Peabody-a hmu turin San Juan-ah an kal ta a.

Peabody-a kailawn an thlen chuan kawngkhar bula dar pawhrîk chu an han pawt ri bal bal a, Peabody-a chu a lo chhûak a.

Laura chuan, “Ka pa, biak duhna che ka nei,” a'n ti a.

Ani chuan, “Eng nge ni?” a lo ti bung nghut a. A aw-ah chuan nelawmna reng reng a lang lo.

Laura chuan, “Ih e, fa ka pai a, i hriat ve ka duh a,” inthlahrung takin a han ti a.

Peabody-a chuan, “Two Bar sáwn maw? Ka in aṭang hian kumkhua atan kal bo rawh, inhmuh leh ka duh tawh lo,” a lo ti chang ta fal a.

Matt-a chu kailawnah a lo chho va, Laura banah chuan a vuan a; mahse, Laura chuan a pasal kut vai sawn pahin, “Ka pa, khawngaih takin...,” a ti ta lawm lawm a.

Peabody-a chuan a fanu chu a hnungchhawn a, in chhunga luh pahin kawng a khar ta ṭhuai a.

Matt-a leh Laura chu beidawng takin an inkhalh haw leh ta a. Laura chu a ṭap deuh reng mai a.

Chumi zan chuan a ni Peabody-a’n Link-a kut a thlâk ni. A hote nen kawtthlerah an lo lambun a, thichhawngin an kalsan a. Sakawr tawlailirin Link-a chu San Juan aṭangin Two Bar-ah an rawn thlen a. Link-a ban vei lam chu hmun hnihah a tliak a, a taksa hmun dangah pawh duk rui khawpin an vaw bawk a. San Juan-ah doctor-in a hliam chu an sawisak sak tawh a, puan varin an tuam luk a.

Lafferty-a khawchhak lama a zin bo hlan a ni hlauh va; chuti chu ni suh se, Peabody-a that turin San Juan-ah a zan a zanin a thawk chhûak nghâl ngei ang. Matt-a chuan Sheriff hnenah Peabody-a hek turin mi pakhat a tlantir a. Link-a chu kar hnih che thei lovin khumah a mu a ni.

Mahse, chu chu a tawpna a la ni lo, Link-a tan a ni lo lehzual. Sakawr chung chuanga a chhuah theih veleh San Juan a pan leh ta nghâl nal nal a.

Link-a, khawpui panin a chhûak tih Matt-a’n a hriat chuan darkar hnih a ral tawh a, a ngaih a ṭha lo kher mai. Lafferty-a’n rustIers-ho a khai hlum ṭum pawh khan tun ang deuh bawk hian darkar hnih chuangin a tlai a ni.

A sakawr a bûatsaih sawk sawk a, San Juan lam panin a lim chhûak ve ta nghâl a. Link-a chu zu Ieh nula duhin khawpuiah a kal lo tih a hre chiang a; a dam loh laia a thinrim mitmengah khan phuba lâk châkna a khap tel tih a hria a ni.

San Juan a thlen chuan Sheriff office a pan dîng nghâl a. Sheriff Spanh-a chuan jail pindan pakhat chu a office atan a hmang nghâl a. Pindan chhungah chuan mi tam fe an lo awm a.

Sheriff-in kawngkhar a rawn hawn chuan Matt-a chuan, “Sheriff, Link-a i lo hmu em?” a han ti nghâl a. Sheriff chuan, “Hetah a awm; lo lût rawh," a lo ti a.

Matt-a chuan, “Eng vanga awm nge? A bail theih mai lawm ni?” tiin a han zâwt a.

Sheriif chuan, “Tual a thah avangin man a ni a; bail theih a ni lo,” a ti bung nghut a. A han ngawi hlek a, chumi hnuah, “I duh chuan i va hmu thei ang,” a ti ta a.

Matt-a chu a thaw kâwk a, “Peabody-a em ni?” a han ti a.

Sheriff chuan, “Silai keng lo a kâp hlum a ni,” a lo ti a. Rum lehzualin a han meng a, “Peabody-a hian ka tan ṭangkaina a nei miah lo va. Link-a chuan a silaimu thun zawng zawng a kah ruah vek hnuah, a thi tawh chu a lu-ah a silai kawmin a zu vaw leh chawrh chawrh a, hmuh tui lo khawpin a sawisa zûi a ni‚” a ti a.

Matt-a chuan, “Link-a chu ka va hmu ang e,” a han ti leh a.

Spanh-a chuan Matt-a chu jail hnung lamah a hruai phei a, kawngkhar a hawng a, Link-a an khungnaah chuan an lût ta a. Ani chu ṭhuthlengah hian a lo ṭhu kun bur a, a kut na lam, a ban vei lam chu a la awrh reng a. A thawmhnaw chu vaivut leh thisenin a bawh khat vek a.

Matt-a chuan, “Link,” a han ti a. Link-a chuan thîp zetin a lo en a. Matt-a chuan, “I pa hnenah thirhrui ka thawn nghâl dawn,” a han ti leh ringawt a.

Link-a chuan a lu a lo thinsan a, chhûat lam chu a melh leh ta daih a. A naupan têt aṭanga Link-a nun kal chho zel a ngaihtuahin a tawpna chu tuna a thil tih leh a dinhmun nen hian a inphu tâwk chiah niin a hria a. Nimahsela, chutah chuan amah pawh a inthiar fihlim thei bîk lo.

A bul tumtu chu Lafferty-a a ni a; a dawttu chu amah, Matt-a ngei hi a ni; chutah, Link-a hian a hmawr a rawn bawk ta nawlh niin a ngai a. Kawng lehlama ngaihtuah chuan Lafferty-a nena an hmelma chu Link-a hian a thahsak ta a ni ve thei tho bawk a; mahse, chu chuan a rilru a ti nuam chuang lo.

Rel station-ah a va kal a, Lafferty-a awmna tur nia a rin deuh deuh hmun ruk (6)-ah thirhrui a vua a; chumi hnuah in lam panin a haw leh ta a. Laura hrilh chu a huphurh kher mai a; chu ai mah chuan Lafferty-a lo haw hun chu a tawrhhlelhawm zâwk dawnin a hria a ni.

************************

Rel station-ah Matt-a chuan Lafferty-a chu a lo hmûak a, rel aṭanga Lafferty-a lo chhûak, platform-a a lo chhuk chu Napoleon-a lem an ziah chiah chiah ni maiin a lang a. Kawrfual leh lukhum hma thlâwk, kil thum nei chi khum phei se chuan an danglamna a vang viau ang.

Matt-a'n thirhrui a thawn aṭanga ni thumah Lafferty-a chu a lo thleng a. Matt-a a hmuh veleh, “A ti tak tak em ni? Peabody-a chu a kâp hlum tak tak em ni?” a ti nghâl mawlh mawlh a.

Matt-a chuan, “Sheriff Spanh-a’n a kâp hlum lai hmutu, mi sawm chuang a hria,” a lo ti a.

Lafferty-a chuan aw tham lek lek hian, “I sawi ang khan a silaimu ruah ṭhak thlengin maw?” a han ti leh a.

Matt-a chuan a lu a lo bu ringawt a.

Lafferty-a chuan a lo hawn nan rel tê chi a rawn hmang a, gunman pakhatin a rawn zûi haw bawk a.

Matt-a chuan, “Engtin nge i tih dawn?” a'n ti a.

Lafferty-a chuan, “Tunah chuan engtin chiah nge ka tih dawn ka hre bîk lo,” beidawng takin a ti a.

Matt-a chuan, “Tan in aṭanga tharum nena lâk chhuah i tum a nih chuan hei hi hre hmasa rawh. Sheriff Spanh-a chuan Fort Union aṭangin sipai a chah a, nimin khan an lo thleng a, darkar sawmhnih pali (24) an veng tawh,” a ti a.

Lafferty-a chuan, “Chutiang ka tum hlei nem,” a lo ti mai a.

Matt-a chuan a âwih hreh hle mai.

Lafferty-a chu jail lam panin a phei a, a hnungah Matt-a Ieh a gunman lo hawn chuan an zûi ve nghâl a. Spanh-a’n an ralthuamte a lo hlihsak hnuin jail chhungah chuan a luhtir ta a.

Link-a chu Matt-a’n a tlawh hmasak ṭuma a awm dan ngai ang chiah khan a lo ṭhu kun lûp a. Matt-a leh a pa a hmuh chuan, “Min khai hlum lai en tuma lo kal em ni in nih?” a lo ti a.

Lafferty-a chuan, “An khai hlum lo vang che,” a ti a.

Link-a chuan, “Teuh lo mai, eng mah tih theih i nei lo,” a ti ram hmak a.

“Ka thei ngei ang, thlamuang takin awm rawh.”

Link-a hmelah chuan eng mah a lang chhûak lo. Lungngai àwmin a lang lo va, thimrim hmel a pu lek lek a.

Lafferty-a chuan mak ti takin a en a, “Link‚ engah mah i ngai na nge?” tiin a zâwt ta hlawl a.

Ani chuan, “Aw, ka pawi ti miah lo. Min kalsan rawh u, ka awm awmin ka awm ang,” a ti a. Matt-ate chuan an chhuahsan Ieh ta a.

Lafferty-a chu Santa Fe lam panin a rel rawn hman bawk khan a kal chhûak leh nghâl a; ni hnih hnu, Link-a thubuai an sawi dawn ni chawhma lamah a lo thleng leh a. An ro relna pindan chhungah chuan Matt-a nen an ṭhu dun a, Matt-a hnenah chuan, “Governor ka va bia a, thubuai hi han rel fel phawt se, thi tura an rem chuan tih danglam theih ka inbeisei,” a ti a.

Ro reltu chuan thubuai chu a han hawng ta a. Ro relna in leh a vêl chu sipaiin an veng a, ro relna ina lût tur reng reng chu an ralthuam an lo hlihsak zel a. Link-a aiah chuan ukil, Leonard Lewis-a a ding a.

Prosecuting Attorney chuan Link-a hekna thu chu a han chhiar chhûak ta a. A chiang fek fawk hle, thu hretute pawh chuan inang vekin an thil hmuh leh hriat dan an sawi thliah thliah a. Link-a chuan a silai a kah ruah vek hnuah Peabody-a chu lu dup ul khawpin, miin an hnuh sawn thlengin a chhu zûi tih an sawi ṭheuh va.

Matt-a chuan ro reltute (Juries) chu a han en ṭhin a, an hmel a huphurhawm hlein a hria a, a tu-a mah chuan a nêp zawnga thu an lâk a ring lo a ni.

Chutah, defence Attorney Lewis-a chuan Link-a ṭan zawngin thu a han sawi ve ta a Peabody-a Ieh a chekkawite’n Link-a thichhawnga an sawisak thu te, Peabody-a'n Lafferty-a leh Link-a chena thah a tumzia te, Two Bar mi leh sa tawh phawt a hûat thu leh, chumi chungchanga Link-a vanduai fàlzia te chu a han sawi a.

A hektute leh an hekate lam thu an lâk khâwm hnuin judge chuan jury-ho chu an thu tlûkna siam turin a hrilh a. Jury-ho chu pindanah hranah an va lût a, mipuite chuan an thu tlûkna an lo ngaichang a.

(Khawthlang ramah chuan he lai angin magistrate-in thubuai an rem mai lo. Jugde-in court a kai hruai a, tualchhunga mi rinawm deuh deuh, thu tawp keuh thlutu tur jury an ruat a. Jury-te chuan an inkhinna thu ngun taka an buk tawn hnuah thubuai an rem ṭhin. Jury zât hi bituk a awm hran Io va, an ngaih dan pawh a thuhmun vek lo; chutiang hunah chuan jury-ho vote lain thubuai hi an rem ṭhin a ni.)

Court chu hun eng emawti chhung an han chawl lailâwk a. Minute sawm hnuah chuan jury-ho chu an lo kir Ieh vek a. Judge chuan, “Eng nge in thu tlûkna?” tiin a lo zâwt a. Anni chuan, “Thubuai neitu chu an puh angin tual thah thu-ah thiam loh changin kan ti tlu,” an ti ta a.

Matt-a chuan Lafferty-a chu a thinrim tak meuh tih a hmel aṭang chuan a hria a, a mitmeng te chu a ling hlar mai a ni.

Judge chuan, “Kan mi tang chuan a duh chuan thu a sawi thei ang,” a ti a.

Lewis-a chuan Link-a chu thu sawi ve turin a han ti a, Link-a chu a hamhaih hmel hle.

Judge chuan Link-a chu a zuk en a, “Tual thah thu-ah thiam loh chantir i ni a, hremna tur kan puan hmain sawi duh i nei em?” tiin a zâwt a.

Link-a chuan a Iu a thing mai a. Judge chuan Lafferty-a leh Matt-a te chu a en hmasa tê tê a; chutah, Link-a chu a zuk en leh a, “Ro relna chu peih a ni ta; khai hlum turin thubuai chu rem a ni. June ni sawm paruk zingah khai hlum a ni ang,” a ti a, thing tubohvin dawhkan vawi thum a chhu ri dup dup a, “Tunah Court khar a ni ta,” a ti ta a.

Ngaithlatute chu an ri hak a, mi pakhat chuan, “Lafferty-a chungah Pathianin phuba a la a ni mai,” a ti lauh lauh a.

Mi ṭhenkhat chu an nui a; Lafferty-a chu a khur hlawk hlawk a. Matt-a chuan, “Lo kal rawh, i chhûak thuai ang,” tiin pawnah a kai chhûak ta a.

Mipui chuan an nuihsawh niin a hria a, chu chuan a thinrim a ti sosang hle a. Lafferty-a tan chuan mualphona a ni. Kum sawmhnih laia tar ta bâwi hian a lang a.

Matt-a chuan, “Colonel, la na lutuk duh suh, khawvel tâwpna tur a la ni hlei nem,” a ti a.

Lafferty-a chuan, “Keimah a ni min khin; mahse, ani an khaihlum thung dawn,” a ti a.

Matt-a chuan, “Governor-in a ti danglam maithei i tih kha....”

“Aw, a ni tak, ka hrilh che ti raw?”

Rel tê chi an hawh a, Matt-a nen chuan Santa Fe lam panin an chhûak ta nghâl a.

Lafferty-a chuan rel enkawltute chu a tur hmanhmawh bawk a, an tlan thaw fur fur a. Santa Fe an thlen chuan governor chenna an pan ding nghâl a.

Governor chu a lo mu tawh a; mahse, an kaih thawhtir a. Matt-a chuan governor kuta thirhrui lehkha awm ṭeuh chu a hmuhin eng vak an tih theih a ring lo sa mai a.

Governor chuan, “Colonel, hêng thirhrui zawng zawng hi vawiina ka hmuh vek a ni a. I fapa chu ro relnain a tih anga hrem ngei an duh thu San Juan mipuiin an rawn sawi a ni. Mi zawng zawngin inrawlh lo turin min ngen a ni,” a lo ti a.

Lafferty-a chuan, “Thil pakhat hrilh tur che ka nei,” a ti a.

Governor chuan, “Min hrilh ta che Colonel; mahse, hremna chu ka ti danglam thei lo,” a ti a.

Lafferty-a chuan thlem nen, thamna leh vauna nen kawng tinrengin governor chu a bei a; mahse, a sâwt lo. A tawpah Lafferty-a chuan, “Ar talh dan kawng khat chauh a awm lo; kawng dang ka zawng mai ang,” a ti ta hmak a.

Governor chuan, “Kawng dang zawng lo la ka ti ngawt mai, Colonel Lafferty,” a lo ti lêt a.

Lafferty-a chuan, “Ka fapa chu an khai hlum miah lo vang, kan hria ang chu,” a ti nghat a.

Two Bar lam pana an haw leh chu sawi tur an chham hle a, anmahni ngaihtuahnaah ve ve an bur a.

Lafferty-a hmelah chuan lungngaihna leh beidawnna bâk hmuh tur awmin Matt-a chuan a hre lo. “Colonel, thil tam tak a thlengin a danglam thei bawk. Pawisa i ngah tâwk alawm,” a han ti a.

Colonel chuan a Iu a lo bu nghat a; mahse, Matt-a ngei pawhin a thu sawi chu thu awmze nei lo niin a hria a. Amaherawhchu, Link-a lung in aṭanga la chhûak theitu an awm a nih chuan Lafferty-a chauh chu niin a hre tho bawk a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 30th, 2018, 3:46 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 11
(Rozami Pachuau)

In an thlen veleh Matt-a chuan thil dang a tih hmain Laura a hmu hmasa ber a, a kuah a, a fâwp zauh va. Laura chuan nui hmel a pu tak nâ a, a lungngai a ni tih a hmel aṭang chuan a lang reng mai a.

Matt-a chuan, “Governor chuan San Juan mipuiin lo inrawlh lo tura an ngenna thirhrui za (100) vêl a dawng a; chuvangin, Link-a hremna chu engtin mah a ti danglam dawn lo tih min hrilh,” a han ti nghâl a.

Laura chuan, “Colonel Lafferty-a chuan engtin nge a ngaih?” a lo ti a.

Matt-a chuan, “Engtin vak nge a tih chùan ang? State do thu a awm dawn em ni? Sheriff Spanh-a chuan Fort Union aṭangin sipai a chah a, tunah pawh jail chu an veng khup tawh a ni. San Juan-a cavalry-ho mai pawh saw engtin nge a do hneh ang? Link-a chungchangah tih theih a nei tawh lo. Jail aṭanga lâk chhuah tum chu lung bang sut ang tlat a ni ang,” a ti a.

Laura ngaih dan tur chu a mitmeng aṭang chuan hriat tum ni àwm takin a en ngun hle a, “Eng nge i an?” tiin a’n zâwt a.

Laura chuan, “Ka ṭha tawh khawp mai, tun aṭanga thla hnihah chuan engkim a fel vek tawh ang. Fapa kan nei dawn..., fapa; nangmah ang,” a ti a.

“Engtin nge fapa a ni ang tih i hriat‘?”

“Ka duh êm vang pawh a ni ang.”

Laura chu a nui deuh sak a; mahse, a nui hmel chu a reh leh thuai a, “A mawh phurtu zingah kei pawh hi bang bîkin ka inhre lo. Nau ka pai thu kha lo va hrilh tâk malek tur‚ kha khan ka pa chu a ti thinur sosang a, Link-a chungah khan a ṭuan ta vak niin ka ring...," Laura chu a han ngawi hlek a, chutah, “A ni chiah alawm, kha vang khan tuna kan buaina zawng zawng hi a rawn inkahpupchaw chho ta vek a ni,” a han tih zawm leh a.

A pasal chuan, “Thil dang vang pawh a ni ve thei tho, i pa leh Link-a chanchin tur tu mahin an sawi lâwk thei lo,” a lo ti a.

Laura chuan mut kham lo rimtawng tak hmel a pu a. Matt-a chuan, “I tan engkim hi theihnghilh mai theih a ni lo vang tih ka hria; mahse, chawlh hahdam i mamawh hle a ni,” a ti a.

Laura chuan, “Ka ṭha khawp asin; mahse, ka pum chhunga mi vang tal pawh hian ka’n mu zal ang e,” a ti ta a.

Matt-a chu pawnah a va chhûak a, Lafferty-a chu inngaihtuah mûk zet hian a lo ding a. A hmel chu a lo inthlâk daih mai a, a hma lawka Lafferty-a, chau êm êm kha a ni tawh lo va; tunah chuan Lafferty-a pangngai, mi chak leh thil ti thei, huaisen êm êm kha a lo ni leh ta.

A bulah a va phei a, Lafferty-a chuan, “Matt, kan rel hawh hi hmang la, Dodge City-ah va kal rawh. Gun fighter te, Buffalo hunter te, tu pawh Gun-man i hmuh apiang va khâwm ringawt mai rawh. Rangkachak pawisa i vawrh vir phawt chuan tu pawhin an rawn zûi ang che. Dollar sing tel han tiam phawt mai la,” a ti ta a.

Matt-a chuan, “Eng atan nge i mamawh?” tiin a han zâwt a; mahse, Colonel thil tum chu a hai lo.

Ani chuan, “Eng dang vak nge i rin? Tan in aṭangin Link-a ka la chhûak dawn, chu chu a ni mai,” a lo ti ram hmak a.

Matt-a chuan, “San Juan lung in chu Fort Union aṭangin sipaiin an rawn veng thuahthip ṭhut asin,” a han ti leh a.

Lafferty-a chuan, “Hei hi tualchhung buaina a ni a, sipaihovin rawn inrawlhna chhan tur an nei miah lo,” a lo ti a.

Matt-a chuan, “An nei asin, an nei chiang khawp mai. Spanh-a'n a pun a, sipai an inrawlh loh chuan dànin awmzia a nei lo vang tiin a hrilh êm êm ang,” a'n ti leh a.

“An inrawlh hauh lo vang," Lafferty-a aw chu a chang fek fawk hle a.

Matt-a chuan a dàr a han chhin a. Lafferty-a chuan eng tik lai mahin thil tak tak hmachhawn a hlau ngai lo. Sipaiho chu thil tak tak an ni; dan humhim turin San Juan mipuite chuan an ṭahawh a, Lafferty-a’n a vau zam mai mai theih an ni lo tih te a ngaihtuah a.

Lafferty-a chuan, “Engah nge i la khawtlai reng? Tunah kal nghâl rawh ka tih chu. Thil dang, a aia ṭul tih tur pakhat mah i nei lo‚” a ti vin tuar a.

Matt-a chuan khauh tak hian, “Colonel, ka kal dawn lo, gunmen rawih tur i duh chuan mi dang tir zâwk rawh; kei chu ka kal dawn lo‚” a ti ve hmiah a.

Lafferty-a chuan Matt-a thu sawi chu a hre sual emaw a inti hial a, “l kal lo chiah ang maw?" a han ti a, a thinrimzia chu a hriat a.

Matt-a chuan, “Vawi khat mah i thu ka la hnial ngai lo va; tun ṭumah erawh hi chuan ka hnial dawn che. Peabody-a'n Link-a a sawisa hrep kha a thiam lo hul hual a; Link-a’n Peabody-a a that zûi kher kha a ti dik lo leh bawk.

"Chuti chuan, tunah hian nang pawhin thiam thu sawi tur i nei miah lo bawk. San Juan mipui leh sipai i do lui ṭalh a nih chuan nang leh kei kan tawp ang a, Two Bar pawh a tlu chhia ang. A tlem berah mi sawmnga (50) chuang an thi ang a, thil dang pawh a kaihhnawih chho zel ang,” a ti ta a.

Lafferty-a chuan, “I kal duh loh pawhin ka security hotu, Les Saxon-a ka tir tho vang," a lo ti leh a.

Matt-a chuan, "I duh leh ani chu tir ta che. Ka nupui Laura chuan a pa phuba la tura min duh loh ang bawkin Link-a avanga ka tawp a rem ti lo tawp ang a; a pa thattu chhan tura ka thawh chhuah pawh a ngai thiam hek lo vang. Chuvangin, ka khawlhkhamzia hi min hriatpui ve ta bawk che,” a ti a.

Lafferty-a chu a inngaihtuah buai hle a, a lu a dawm a, “I thu sawi chu ka hria, Les Saxon-a kal rawh se,” a ti ta a.

Matt-a chuan Lafferty-a kal sawn chu a thlir zûi reng a, a rilruin a dap thui hle a.

Darkar khat hnuah Les Saxon-a chu Dodge City panin relah a chhûak ta a. A iptê puar nawlhin Lafferty-a chuan pawisa a kentir a, June ni 16 ral hmain gun-man sawmnga (50) aia tlem lo a rawn hruai haw dawn a ni.

Chumi zan chuan Matt-a chuan Lafferty-a hma lâk tum dan engkim chu Laura a hrilh ve vek a. A nupui chuan, “Engtin nge i tih ve dawn?” tiin a zâwt a.

Matt-a chuan, “Engti kawngin maw?” tiin a lo zâwt lêt a. A nupui thu sawi awmzia chu a hria a; mahse a chhang thei lo a ni.

A nupui chuan, “Lafferty-a tana i rinawmzia hi ka hre chiang hle a; mahse, hman aṭang tawh khan duh thlan tur i insiam a ngaih hun hi a lo la thleng ngei ang tih ka ring ṭhin a,” a ti ta a.

Matt-a chuan, “Ka tan duh thlan tur maw?” tiin a zâwt zel a; mahse, Laura-i thu sawi chu a hre chiang lutuk. A pum te chu sa hulh hulhin a hria a, a hlauhthawn ber a sawi lang ta a ni. A tan tuilairapa din theih a ni lo; Lafferty-ate pafa nge a thlan dawn a nupui chu?

Laura chuan, “Hla takah mitthi dar ri ka hria a, a tlai hma hian min la bo rawh. Matt, ka nunna ai pawhin ka la hmangaih zâwk che a, hun kan la neih lai hian i kal bo daih ang. Lafferty-a hian a ti rawp ral vek dawn che a ni,” a ti mawlh mawlh a.

Matt-a chuan a nupui chu a en ngam lo. “Laura, Lafferty-a nena kan inkar hi a nghet lutuk. Fahrah vâk vai min tuam hlawm a; ani chu awm lo se, kei pawh tunah hian ka awm tawh lo vang. Texas aṭangin New Mexico-ah hian min hruai thleng a, Two Bar hi a din tirh aṭanga hriatpuitu ka ni.

"Tunah chuan mi chak tak kan lo ni ta a, Lafferty-a pang khing ka nih ang bawkin ani pawh ka pang khing a ni ve a, kan inzawmna hi a thûk lutuk. A tana hun khirh berah hian engtin nge ka kalsan mai theih ang?” a han ti a.

A pasal chu chiang kêk kâwkin a en a, “Matt, Lafferty-a hian i thisen far tawp thlengin a zûk ral vek dawn che. Tuna i kalsan lo a nih chuan i thi ngei ngei ang. In inkungkaihna chu a ṭul tâkah chuan i ti chat mai tur a ni. Tunah chuan ani aia ngaihtuah tur i nei; kei leh i fapa hi,” a ti ta a.

Lafferty-a aiin Matt-a dinhmun chu a khirh zâwk ngial àwm e. A hun kal tawh zawng zawng te chu a han ngaihtuah lêt Ieh a, “Ka kalsan thei lo, ka thei lo tawp, Laura. Tun hma zawng aiin tunah hian min mamawh a, min mamawh ber hunah hian ka phatsan thiang lo,” a ti ta a.

Laura chuan a pasal ban chu a va vuan a, “Matt, a mamawh deuh deuh ang che, ni tin a mamawh zual zel ang che. Eng nge a chhan? Ani chu a rawih tawlh tawlh a; nang i chak tulh tulh thung a,” a han ti a.

A nupui thu sawi chuan a ngaihtuah a ti thui hle a, “He hmun aṭang hian kan la chhûak êm êm ang; mahse, June ni 16 hma chuan ka thei lo,” a ti a.

“Chuti a nih chuan, kumkhuain kan kal chhûak ngai dawn lo a nih chu!”

Sawi tur dang a awm ta lo, ngawi rengin an awm ta tlawk tlawk a.

Nakinah chuan, “Eng mah lo sawi miah lo tur zâwk ka ni nâ aleh,” Laura chuan zawi sap hian a han ti a. Hmeichhe tuar chhel leh rilru lian tak a ni a; mahse, a mittui a tla ta zawih zawih a.

Matt-a chuan, “Han sawi zel teh,” a lo ti a.

Laura chuan, “Hei hi han ngaihtuah ve teh. Ka pa chu ka pa a ni a, eng ang pawhin dik lo mah se a ṭhalbe chhûak ka nihna a bo chuang lo; chuti chuan, ka pa thahtu tih zalen tuma i kut i lek chuan San Juan mipui bâkah, dàn leh state sawrkar kalh zawngin i kal dawn a ni a. Chu chu i duh thlan a nih tlat si chuan keia dan theih rual i ni lo ve; mahse, damin lo kir leh mah la, ka chhuahsan tho vang che,” tiin thu tawp a siam ta a.

Matt-a chuan a nupui chu ringhlel takin a han en a, “Min kalsan chu i tum tak tak em ni?” a ti a.

Laura chuan aw khur dar dar leh harsa ti tak hian, “Aw,” a lo ti a.

Matt-a chu a thinrim thut a, pawnah a chhûak ta daih a. Thla ral lam êng chau tawh takin Two Bar ram chhung a chhun pâwt ruih chu a thlir kual a.

Laura chungah a lungni lo va, Lafferty-a chungah pawh a lungawi bawk hek lo. Tun boruak kher hi chu innawr luih hun loh lai ber niin a hria a. A hmangaih neih chhun pahnihte inkarah duh thlanna engtin nge a siam ang? A thli bengna lam azirin a tawn mawp mawp mai a ni ang chu.

A sakawr a buatsaih a, pan lam tur bik pawh hre chuang lovin a kaw dawm meuhvin a lim ta puat puat a.

Khaw vàr dawn hnaihah an cowboy-ho riahbûk a va thleng a, cowboy-ho zingah chuan a riak ve ta a. A tûkah pawh ram palailengah a pingpei kual nileng a; zanah chuan luitê kamah a riak a.

Eng mah duh thlan tur a hre chuang lo. Laura chuan a chhuahsan hlen tak tak êm chu a ring lo va, a ring phal lo a ni.

Mahse, a dam chhung ni a chhiar liam ṭêp tawh tho e. Lafferty-a nen Link-a, lung in aṭanga lâk chhuah an tum a nih chuan damin an kir leh tawh lo vang. An pahnihin an thi ngei ngei ang. Chuti chuan, engtin nge ni zel ang? A ngaihtuahna chu a chawmawlh zo vek tawh a.

Laura nena an inkar chu Lafferty-a nen a buk a, Lafferty-a lam a khin ta zâwk niin a hria a. A chhungril chuan chu lam chu a pan tlat a ni. Lafferty-a, hlauh nei ngai lo chuan a duh thlanna chu a kawl chiang ta. Ni chiah e, thih a hlau lo; hlawhchham a hlau.

Lafferty-a chuan a hun a hnai tawh tih a hria a, State meuh chu hneh a inring miah lo va; mahse, bansan theih niin a inhre tawh lo.

Tunah chuan Matt-a pawhin a rilru a siam fel ta a, Lafferty-a tan a thinlung chu a nghet a ni.

*************************

Ruah a tla fuap fuap a. Matt-a chuan hla taka rel mei khu nguah nguah chu a thlir a, “En teh an lo thleng ta,” Lafferty-a hnenah chuan a han ti a.

An pahnih chuan rel station platform-ah an ding a.

Lafferty chuan Matt-a kawhna lam chu a thlir a, “Matt, ka...,” a thu sawi chu a sawi zawm thei lo va, a hrawk a han thian leh tê tê a, “Hêng thilte hi lo thleng lo sela chu...; mahse, nimin piah khan thurochhiah ka ziak fel vek tawh Matt; kei leh Link-a chu kan awm tawh dawn lo, nang chauh hi i ni ang...,” a thu sawi lai chu a chhunzawm hlei thei ta lo va. Eng emaw ni hian a kawchhung aṭangin a hnawh tlatin a hria a, a ngawi ta daih a.

Matt-a erawh chuan tun hma zawng aiin Lafferty-a, colonel pa tê tak tê chu a ngaina zual a. Lafferty chuan a thi dawn tih a inhria, chutiang bawkin Link-a pawh; mahse, tawpsan chu a tum chuang lo. Mi dang tam tak chuan an ṭhulh ngei ang; mahse, Colonel Lafferty-a a ni miau a ni.

Chutih lai chuan Mexican hmeichhe pakhat hi a fate kaiin khawlaiah a lo chhûak a, a inpawm bawr nasa hle bawk a. Chûng hmeichhiate pawh chuan thil inmung chu an hre ve ni àwm tak a ni. Tunah chuan Matt-a chuan a rilru a siam fel tawh a, awm nawm lohna pawh a nei hran lo.

Les Saxon-a chu rel aṭang chuan a lo chhûak hmasa ber a, Lafferty-a chu zah takin chibai a rawn bûk a, “Colonel, indo mi tam tak ka rawn hruai e,” a ti a.

Lafferty-a chu a lo bu nghauh a. Les Saxon-a chuan Matt-a chu, “Heta i la awm cheu hi ka ring ngam tawh mang lo asin!” a lo ti a.

Matt-a chuan “I rin ang ka ni lo reng alawm,” a ti a, a inher a, Les Saxon-a mi rawn hruaiho lo chhuk mek chu a ensan ta daih a.

Chûng Les Saxon-a rawn hruaite chu Matt-a’n a lo rin lâwk ang chiah an ni.

Lawi pel mite an ni a. Pakhat chu pa te reuh tê, mipui pung khâwm zinga hmuh hmaih awl tak; mahse, a silai nen chuan palzut mai mai theih loh tawp tur a ni a.

Pakhat dang leh chu pa lian tak, inchei uluk angreng tak, sam, koki vaw hnuang hnuang leh hmuihmul buk tak, pawisa a hmuhna tur a nih chuan a nu ngei pawh a that hreh lo vang tih tur a ni a.

A tam ber chu sipai bang an ni a, indo tawpna chu kum sawm panga (15) lai ni tawh mah se, confederate sipai lukhum hlui zet zet la khumte pawh an ni nawk a.

Tam tak chu ramri vêla che ṭhin, Matt-a'n hnung lam chhawn chi miah lova a ngaihte an ni hlawm bawk a. Sheriff office banga an thlalâk a hmuh tawhte pawh mi sawmnga (50) zingah chuan an kat tel nawk a ni.

Station platform-ah chuan Lafferty-a mi rawih tharte chu an intlar a. Lafferty-a chu an hmaah a ding a, a pa tê nâ a, a hmelah chuan thu pe ṭhang a ni tih a hriat hle a, “Dollar zanga (500) ṭheuh in dawng tawh a; hna kan zawh hunah a dang dollar zanga (500) chu in dawng leh ang,” a'n ti mawl tawp a.

Chutah, “Dollar sang khat chuan thil namai lo tak ti turin a phût che u tih eng nge in tih tur ka sawi hma pawhin in hre thiam nghâl vek ang. Chuti chuan, San Juan jail ti chhe turin kan thawk dawn a, anni pawh an inring ṭhuap tawh ang; chuti a nih chuan, kan inbeih fe a ngai dawn tihna a ni mai a.

"Ka thu hnuaia intulût tawh reng reng tu mahin a tawp hmain min bansan a thiang tawh lo, chu chu theihnghilh hauh suh u; chuvangin, tu mah in hnung tawlh leh loh a ṭha ang. Kan hlawhchham chuan in dâwihzep vangah ka puh ang a, in hlawh ka pêk tawh che u kha ka laksak leh ang che u; in chêt danin a hril ang,” a han tih zawm leh a, sipai general ang mai hian a ding vang a.

Buffalo Hunter pakhat chuan, “Colonel, San Juan lung in chu sipaiin an veng niin an sawi a, engtin nge?” tiin a lo zâwt a.

Lafferty-a chuan, “San Juan-ah chuan cavalry sipaite chu an awm ngei mai, sawmthum (30) vêl an ni ang; mahse, hei hi cavalry-ho hna a ni lo, an lo tel ve tak tak pawh ka ring chiah lo. An lo tel a nih pawhin kan bei tho vang; mahse, an tel leh tel loh tur chu ka sawi thei bîk lo,” a ti a.

A hote, mi luhlul pui pui chu a mal mala a en kual zawh hnu chuan, “Zawh duh nei in awm em?” a han ti a.

Tu ma'n zawhna an siam tâk lohvah chuan, “Aw le, hei hi khawpui chhung awm dan a ni,” tiiin San Juan khaw chhung hmelhmang chu platform bangah chuan pencil lian chi hian a ziak phawt a. Khaw chhung an luh ṭanna tur chu pencil hmawrin a'n kâwk a, “He lai hi jail; he lai hi duty awmna; he lai hi kan inbeihna tur,” tiin a hrilh fiah vek a.

A hote chu a han en lawr leh dan dan a, beiseina a nei ta deuh va. Mi huphurhawm tak tak a hruai luh chuan San Juan mipui chuan an lo beih lêt ngam a ring lo a ni.

Khawpui awm dan a hrilh fiah zawh chuan zawhna nei an awm em tih a’n ngaichang leh tê tê a, chumi hnu chuan sakawr leh a zin a pe ta a.

An sakawrte an bûatsaih fel hnu chuan pakhat tê têa inzûiin San Juan run tur chuan an chhûak ta a. An gun-man rawih tharte bâkah Two Bar cowboy-te pawh an zingah chuan an tel bawk a.

Rel station chu Two Bar ram chhung, a hmawr lam deuha awm a ni a, chuta ṭang chuan San Juan chu mel sawm (10) vel leka hla a ni a. Lafferty-a'n hma a hruai a, a sir tawnah chuan Matt-a leh Les Saxon-te’n an kar cheh a.

Rel station an pelh fel hnuin Matt-a chuan Two Bar lam chu a han hawi kir a, hla taka buggy, anmahni lam pana lo kal nal nal chu a va hmu a. Lafferty-a hnenah chuan, “Ka rawn um phâk leh thuai ang che u; buggy-a rawn chuang saw Laura a nih ka ring,” a ti a.

Lafferty-a chuan eng mah sawi lovin a Iu a lo bu nghat a.

Matt-a chuan a sakawr chu a pawt her a, tawlailir tâwk zawng chuan a tlan lêt leh ta a. Chirh a dai per chuai chuai a, rei lo têah a va tâwk ta a.

Ruah sur hnuaia lo kal ni mah se Laura chu a huh lo va, a sam chu a hnawng deuh chep chep chauh va. A sam chu a hnung lamah a hûi liam a, a mitmeng chu a zahawm kêk kâwk kher mai. Buh deuh nak hian, “Matt, ka vâk kual satliah mai mai a ni e,” a lo ti a.

Matt-a chu sakawr aṭangin a chhuk a, buggy hrulah chuan a ding a; mahse, Laura chu a khawih hauh lo va. Laura mittui tling kiau, a bianga lo far thla fep fep chu ngawi rengin a han en phawt a. Chutah, “Hei chen chena hla rawn chhûak tur i ni lo asin, i hriselnain a tuar ang e,” a ti a.

“I rilru i la thlâk lo a ni maw, Matt?” Laura chuan a ti a.

Lu thin pahin Matt-a chuan, “Kum sawmhnih panga (25) pum khat kan ni tawh a, a thil tihna zawng zawngah ka tel ve zel a, ka phatsan thei lo. A tana hun khirh berah hian ka phatsan thei ngang lo,” tiin a sawi nawn a.

A tih takzia chu a hmel leh cheziaah chuan hai rual a ni lo. “Tunah hian mi sawmnga (50) aia tam a nei a; mahse, ka tel lo chuan mal ngawih ngawihin a inhria a; Laura, kawng dang thlan tur ka tan a awm lo,” a han ti leh a.

Laura chu a bu nghat a, ani tak pawh chu Matt-a tel lo chuan a mal ngawih ngawih a; mahse, sawi chhuah kher ṭulin a hre lo a ni. Tunah nau a nei ṭep tawh a; an fa pawh lo piang se, a mal ngawih ngawih leh dawn tho. Nunna nei tawh lo ang mai hian beidawng hmel a pu a.

Matt-a chuan, “Laura, ka kal ang e, ka la ûm phâk hman ka ring,” a ti a. A darah a va vuan a, a hmel chu ngun deuhvin a han en a; chutah, a hmuiah a fâwp ta a. A inher a‚ a sakawrah a han zuang kai a.

“Matt...”

Matt-a chu a hawi kir leh a.

Laura chuan, “Ka kalsan miah lo vang che. Rel station-ah hian ka lo nghâk reng ang che‚” a ti a, a mittui a hru hul a, huaisen hmel takin a nui ta zâwk a.

Matt-a chuan a pum chu ni nghualin a hria a, a mittui a parawl ṭeuh bawk a, “Laura, ka hmangaih che,” a ti a, a sakawr chu a tlantir ta a.

Hla deuh hlek a thlen chuan a hawi lêt a, Laura-i buggy, zawi zawia kal chu a va hmu a; chutah, a sakawr chu a kheng ṭhuai a, San Juan lam pan chuan a lim ta zawk a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 31st, 2018, 5:26 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 12 (Last Chapter)
(Rozami Pachuau)

Chu indona lo chhûak tur chu rustler-ho an khai hlum aṭang khan Matt-a chuan a lo suangtuah daih tawh a; hlawhtlin inrinna pakhat mah a nei lo. Chu ai chuan a tawpna, Lafferty-a nena an tawpna ni a lo thleng niin a hria a; mahse, phatsan a tum chuang lo. Tunah chuan Lafferty-a tawrh ang ang chu tawrh ve a inhuam a ni. A sakawr chu a tur sauh sauh a, San Juan thlen hmain Lafferty-ate chu a va fin leh hman a.

Colonel chuan, “Laura chu?” a lo ti a.

Matt-a chuan, “A ṭha e,” a ti ringawt a.

Lafferty-a chuan, “Tel ve lo turin a duh che ti raw?” tiin a han zâwt a.

Matt-a chuan a lu a lo bûk khum nghat a. Lafferty-a chuan ti tak zet hian, “Matt, haw rawh, tunah hian kir rawh,” a ti ta a.

Matt-a chuan engtin mah a chhang lo. Lafferty-a chuan a ti mai mai lo tih a hria a ni.

Eng emaw chen chu ṭawng lovin an kal zel a. Lafferty-a chuan, “Matt, engati nge mi la rawn zûi fo? Ka thu sawi kha i hre lo em ni?” a ti vin hle a.

Matt-a chuan, “Ka hria a sin Colonel; mahse, ka kir dawn lo,” a ti a.

Lafferty-a chuan mitmeng hriam tak hian a lo melh kâwk a; mahse, Matt-a chuan Lafferty-a mita mittui parawl chu a hmuh hmaih hauh lo. “Hêng thil hi kan tih zawh hunah,” a ti ringawt a.

Lafferty-a chuan a Iu a lo bu nghat a. San Juan khaw hmawr chu an thleng tawh a, a sakawr chu a ti ding a, a hawi lêt a, a hote hnenah chuan, “Khaw chhung awm dan ka hrilh che u kha in la vawng reng ang a, in silaite kha endik rawh u. Plaza kan thlen hma chuan buaina kan tawh ka ring lo va; mahse, chu lai hmun chu min kal pelhtir mai lo vang,” a ti a.

A hote chu an ngawi ṭhup a. Les Saxon-a lam chu a han hawi a, “Les, nangin hnung han dawl la, bichilh taka intlarin Plaza kan tuam phei dawn nia,” a ti a.

A thu sawi awmzia chu Les-a leh Matt-ate chuan an hre thiam kher mai. Huphurhawm taka inlantir a, vau zam a tum a ni phawt mai.

“Tu mah kha kal faltir suh la; tu ma’n min bansan leh hni hne tur a ni bawk hek lo. Chutiang àwm deuh i hmuh chuan kâp ṭhuai zel mai rawh,” Les Saxon-a hnenah chuan a'n ti leh a.

Lafferty-a leh Matt-a chu hma lamah an kal dun a, Les-a chuan a puakûk hum chungin hnung a rawn dawl a.

Kawtthler kawng kawi zim laiah chuan an inzûi chho va, Plaza-ah chuan an lût dawn ta.... An hma maiah thihnain a ka a ang tih an hai lo.

Kawtthlerah lo lambun tum an awm em tih ngun takin Matt-a chuan a han thlithlai a. Kawtthler chu a rûak huai mai a, khawpui rauhsan ni àwm tak a ni.

Lafferty-a chu a heh pet ṭeuhvin a insang ruh a, a sakawr lakam chu a thlah dûl hle a.

Plaza an thlen hma deuhvin Lafferty-a chuan Matt-a hnenah, “Ka mit a lo del rei hle mai," a han ti bauh a.

Matt-a chuan a chhang lo va. Lafferty-a bawk chuan, "‘Mi pangngai chuan amah thlâktu tur fapa a duh ṭhin a; nimahsela...,” a tawp chawt a.

A hnu deuhvah chuan, “Link-a ai chuan nang hian min hnaihin kan inbelbul fe zâwk a. Thisena inzawm tih mai mai te chu eng mah a lo ni lo ve; Link-a chu Lily fapa a ni a; kei chuan fapa, nangmah ka nei thung che a.”

Khaw dang a han hawi zawk a, Matt-a chu a rawn en leh a. A mitah chuan lungngaihna awm mah se lungawina a inphum tel tlat a; a thih hun a hnai tawh tih pawh hre mah se, a tih tur nia a hriat tluang taka a la tih theih zel avang chuan a la induh ngeng lalh mai a.

Matt-a chu a hnuk a ulh ṭeuh va, an hun tawp thlenga Lafferty-a nen an awm dun zel theih dawn avang chuan lungawithlâk tihna riau a nei a. Lafferty-a aia a pa ang emaw, kawppui atan emaw thlan tlâk mi tling khawvêlah hian an awm chuangin a hre lo va. Tun hma zawng zawng khan Lafferty-a laka a lawmna chu tunah a zual a, chu Colonel pa te tak tê kianga awm chu thlamuanthlâk hlein a hre bawk a ni.

Tunah chuan Lafferty-a kut khur te chu a reh vek tawh a, hrehawm tuar hmel lah a pu hek lo‚ inrin tâwkna a ngahzia chu a che ziaah a lang a. Matt-a hnenah chuan, “Matt, keini pahnih hian hlawhtlinna kawng thui tak kan zawh tawh a, eng mah kan hmaih lo; chu chu Two Bar, a tir tê aṭanga kan din kha tunah hian a lo puitling ta a ni. Vawi khat pian manah hei bâk eng nge awm chuang?” a han ti a.

Matt-a chuan “Colonel, nangma tih vek alawm,” a lo ti a.

Lafferty-a chuan, “Teuh lo mai; a bul aṭanga ti dun chho ngar ngar kan ni zâwk. Hun harsat lai ber pawhin min tlanchhiatsan ngai lo va, i tel lo hian tih theih ka nei lo. Tunah hian khâng kan din tirh lai te kha ka ngaihtuahin thil nuihzatthlâk tak ka lo suangtuah a ni.

"Chu thil chu Two Bar hi Link-a leh Lily tan tiin ka rilruin ka lo vauchher ṭhin kha a ni a; tunah chuan nang leh kei atan chauh a ni tih ka hre chhûak ta. Ka lo âtzia ka ngaihtuah hian ka nuih te pawh a za zâwk a ni. I tan leh ka tan a ni,” a ti ta a.

Matt-a chuan eng mah a sawi lo. Kawtthler kawi zim lai chu pelin Plaza awmna hmun ualau chu an thleng ta thut a.

Lafferty-a chuan hriam hrêk hrâwk hian, “Matt, sir lamah khan kal la, a awh zau zawngin inzar pharh rawh u. Hêng zawngsenho hian eng zât nge kan nih han hre phawt teh se,” a ti a.

Matt-a chu sir lam deuh Domingo Street lam ànah chuan a tawlh phei a. Lafferty-a nen an inkarah chuan an gun-man rawihte chu an intlar a, a zau zawngin an inzar arh a. An hmelah chuan hlau Ieh zam hmel pu àwm an awm lo, an rorum hliah hliah mai a ni. A tawp thlenga ṭang peih hmel an pu ṭheuh va; an huaisen hrim hrim nge, Les Saxon-a hian a fuih hneh zâwk?

Matt-a chuan phaitual hnimin a bawh khah vek tawh Plaza hmun chu a han en ṭhin a. Chu lai hmun chu a ni, kum tam tak kal tâa an bâwng rutute an khai hlumna kha; chu hmunah vek chuan tunah indo turin an in-ep a, a bul ṭanna leh a tawpna atan Lafferty-a chuan a hmang dawn niin a hria a ni. Pianphungah mi aiin a pa te a; chu vang chuan mi dang aia a chungnun theihna turin a bei a, indona mualah chuan Napolean-a ang mai a ni.

Plaza sir lehlamah chuan cavalry sipaiho chu inring takin an lo intlar ṭhah a, sawmthum (30) vêl an ni a.

Kawtthler sir tâwn tâwnah chuan San Juan mipui za thuar vêl hi an intlar bawk a. Cavalry chu awm lo se, chûngho chu pawisak tham an ni lo. A hming chuan sipai ang deuhvin an intel muk a, silai pawh an keng ve tho va. Cavalry-ho chakna hmachhuana rawn thawk an ni bawk a, huaisen àwm fu fute pawh an tam ve mai.

Lafferty-a tan chuan en a hrehawm hle ang. Indo lai khan chûng cavaIry-te chu a lo kaihruai ve tawh ṭhin a; tunah, anmahni do zawnga a pên ta tlat chu thil ni thei a màwi pawh a ni lo. Tunah chuan a sipaipuite chuan sawrkar laka mi hel angin an lo bei dawn a ni.

Colonel chuan a thil tih tur chu lungngai hmel pu takin a ngaihtuah rauh rauh va. Chutah, Matt-a thin chu a rim ta thut mai a, Laura emaw, a ro khâwm tur; Two Bar lam emaw a ngaihtuah tawh bîk lo. Tuna Lafferty-a awm dan chuan a thinlung a khawih a ni ber àwm e. “Colonel,” tiin a han au tuar a.

Lafferty-a’n Matt-a thinrim hmel a hmuh chuan mak a ti hle a. A bulah Matt-a chu a va phei a, “Tun aruaia hetia i awm?” a'n ti a.

Lafferty-a chuan engtin mah a lo chhang lo.

Matt-a vek chuan, “Hneh ngei turin kan bei dawn lo em ni?” a han ti leh a.

Lafferty-a chuan chhan tumin a ka a’n ang zuau a; mahse, chhang lovin a ngawi leh ta zâwk a.

Matt-a bawk chuan, “Sipaia i ṭan laiin eng angin nge ral in rèl ṭhin? Indo dan chu i zir vek àwm si a; i hote zawng zawng a langsar laia i tlar vek chuan mang pak loh chu hmabâk a awm lo. Kan hloh ngei ang,” a ti leh a.

Lafferty-a chuan, “I ṭanhmunah kir leh rawh,” vin zet hian a lo ti ṭhawt a.

Matt-a chuan, “Thihnaah min barh luih i tum em ni? Mi ṭhenkhat hi ka hruai ang a‚ sipaiho saw an hnung lam aṭangin ka va ṭhawng ang e. Mi eng emaw zât ka duh; min pe dawn nge keima thuin ka hruai mai dawn?” a ti rum ta rat mai a.

Chutih lai chuan Plaza sir lehlam aṭang chuan âw hian, “Lo ngawi lawk teh u,” a rawn ti a.

Cavalry commander bulah chuan mi pahnih hi an ding a. Matt-a chuan pakhat chu governor a ni tih a hria a, a bula mi chu Sheriff Spanh-a a ni. Sheriff leh Lieutenant chuan governor chu an karcheh a, Lafferty-a tâwk turin an lo phei ta a.

Chutih lai tak chu ṭanhmun siamna hun remchang tak niin Matt-a chuan a hria a. Lafferty-a chu a’n ráwn leh a, Lafferty-a pawh chuan rem a ti tih nan lu a lo bûk khum nghat a. Matt-a chu amah lo nghâktu mi ṭhenkhatte bulah chuan a tawlh kir leh ta a.

Ruah a hàn tawh a, ni sa chuan a rawn chhun a; khawi emaw lai aṭang hian naupang a lo ṭap a.

Governor chuan ring fek fawk hian, “Colonel, i thil tih hi bansan rawh. Tuna i thil tih hi i hre chiang em? Han ngaihtuah nawn leh teh. Tunah hian ralthuam nen state lakah i hel a, i cho chhuah a ni. Tunah hnehtu pawh ni la, i beihte hi sipai an ni tih hre rawh; a tawpah chuan an la nuai bo tho tho ang che,” a ti a.

Matt-a chuan, “Mi sawm panga (15) emaw vêlin min zûi ula, an hnung lam aṭang sawn ruang chaicheh thlâk i tum teh ang,” a ti a, a sakawr aṭang chuan a chhuk a, mi dangte chuan fimkhur takin an zûi bawk a.

Domingo street aṭangin kawtthler zim lai deuh chu an pel phei a. Mi hmuh loh deuh lai an thlen chuan Matt-a chu a sakawrah chuan a lawn leh a, kawtthler hnung lamah chuan a zau thei ang berin an insem darh a, an hual chhûak ta vek a.

Lafferty-a chuan governor chu be buai rei deuh se Matt-a chuan a ti hle a. Chumi chhung chuan ṭanhmun remchang; Plaza hmuna sipai leh khawtualho hup barh theihna tur lo thlan fel a tum a ni.

An hêl kual hnuin an sakawrte chu an thlung ta a. Matt-a chuan hma a hruai a, kawtthler zim laiah chuan pawl hnihah an inṭhen hrang leh a, an bibo ta vek a.

Matt-a leh mi dang pahnih chu in chungah an lawn a, chutah chuan silaimu inphen nana rem tak, thil chhun pàwn a lo awm a, a mi hruaite nen chuan an behchhan ta a. Tuna an ṭan hmun aṭang hi chuan sipaiho chu an hnung lamah awlsam têin an ṭhawng thei tawh dawn a ni.

Matt-a chu a han hawi kual vêl a, Plaza chu an hual hneh hlein a hria a. Khawlai fai zau laiah chuan Lafferty-a chu a sakawr chungah a chuang a, a hma zâwnah chuan governor, Spanh-a leh sipai Lieutenant-te chu an awm bawk a.

Lafferty-a chuan, “Ka fapa ka duh a ni, rawn chhuah ula, buaina a awm lo vang,” a han ti tawng a.

Governor chuan, “Colonel, tual a that a; thi tura a chungthu rel a ni tawh,” a ti a.

Lafferty-a chuan, “Min pe mai rawh u; chuti lo chu mi tam takin an thih khalh ngei ang,” tiin a vau ta a.

Governor chuan Lieutenant lam chu beidawng takin a han hawi a, chutih lai chuan Matt-a pawhin Lieutenant chu a rifle-in a lo tin reng a. Sipai officer chu a dáng var pup a; mahse, hlau hmel chu a pu hran lo, lungawi lo takin a lu a thing nar nar zâwk a.

Governor chuan, “Colonel, tunah chuan min hneh ta e, i fapa chungthu an rem tawh chu ka ti danglam e; khai hlum aiah dam chhung tang turin ka ti zâwk ang. Chu chu a ni lawm ni i duh?” a ti ta a.

Matt-a chuan thâwk a’n la hak a. Colonel Lafferty-a beisei phâk bâk ngaihdamna ropui tak niin a hria a. Colonel chuan lawm taka a lo pawm mai a beisei a.

Lafferty chuan in chung leh a sir vêl te chu a’n melh kual tê tê a, Matt-a leh a mi rawihte chu a hmu nual bawk a. Lu thing nar nar chungin, “Chu chu kan lo thawh chhan a ni lo, ka duh lo tih pawh in hre ve reng. Ka thil duh chu ka fapa zalenna a ni,” a ti ta a.

Lieutenant chuan, “Governor, hun kan khawh ral mai mai. Hêng mi rawichak loho hi ka han ṭhet sawm vek ang a, buaina chu a reh mai ang,” a ti hmak a.

Matt-a chuan a riffle chu a han kau ri rap a, chumi ri avang chuan governor leh Lieutenant chu an rawn hawi a.

Hmun sang lam pawh Lafferty-a mi leh sate’n an luah tawh tih a hmuh chuan governor chu a zam ta hle a, a ṭawng chhûak leh chu a nemin Lafferty-a chu a ngenin a ngen hi a ang ber tawh zâwk a, "Pathian hmingin Lafferty, han inngaihtuah chiang leh deuh teh.

"Tun hma chuan hêng cavalry-hote hi i kaihruai ṭhin a, indonaah pawh hnehtu in ni alawm. Nangma mi leh sate ngei kha an la nih hi; tunah eng vangin nge an lam hawia silai lek i duh tâk mai?” a han ti a.

Lafferty-a chuan, “Governor, Link-a i chhuah dawn loh chuan Plaza piah lamah sawn insawn nghâl rawh,” a ti vin ṭhak a.

Governor chuan Lafferty-a chu eng mah sawi lovin a en ta reng a; chutah, Plaza kal tlang chuan a insaseng ve ta a.

Lafferty-a chu a hote lamah a tawlh kir a, a ban chu a han lek chho va. A sir tûakah Gun-man pahnihin an kar cheh a.

Matt-a chuan tual thattu nun rawng takah a zuk chan thut a; mahse, a rilru chu a thlâk leh ta nghâl vat a. A thil ngaihtuah dan chu a ṭha lo tawp mai. Lafferty-a’n, 'ti rawh' a tih chu ihe lovin a zawm mai tur a ni.

Plaza tuala sipaite chu an awmna aṭang chuan phera pho ang maiin an lang chiang a; chuvangin, silaimu an seng thlawn tur a ni lo tih Matt-a chuan a ngaihtuah ta zâwk a.

Lafferty-a’n a ban a lâk thlak Ieh rual chiahin Plaza hmun chu indo thawm chuan a luah khat ta nghâl a. Borûak thiang tak chu zen khu chuan a rawn tuam a; sakawrte chu mangang takin an ter ut ut a, an ke an vawr vak vak a; mi ṭhenkhat chu mangangin an au chul bawk a.

Lafferty-a hote chuan cavalry-ho chu an hnaih phei zel a.

Anmahni char chhawn zawnga cavalry sipai pakhat, kah rem êm ema awm hi Matt-a chuan a zuk hmu ta a. A’n tin vang vang a; mahse, a silai a hmet per thei ta tlat lo mai a, chu pa sakawr chu a zuk kâp thlu ta tawp zâwk a. Cavalry-ho chuanna sakawr dangte pawh chu a kâp thlu ta zel a.

Cavalry sipaiho chu an tal buai ta hle mai a, paruk (6) lai chu tualcharah an thal dèr tawh a. Chuangtu awm lo sakawr chu silai hlo khu karah chuan chak zet zet hian an lim pûat pûat a.

Lafferty-a chuan hnehna a chang ngei dawnin Matt-a chuan a hria a, mak pawh a ti hle a ni. Mit khap kar lekah indo chu a tawp mai a ring ta a, sipaiho an hnungtawlh chuan tualchhung mite chu an tlanchhe ve nghâl ngei ang.

Nimahsela, rin loh takin thil a inthlâk ta tlat mai. Hnehna chang ngei tura an lan tawh hnuah Lafferty-a hote chu an hnungtawlh ta tlat mai le!

Mi ṭhenkhat chuan an sakawr an pawt her a, indona tual ata chu an tlanchhe vawn vawn a; rei lo têah Lafferty-a gun-man rawihte chu an tlan bo zo ta vek a.

Matt-a pawlte ṭanhmun aṭang pawhin silai ri a reh ta vek bawk a. .

Matt-a chuan mak ti deuhvin a han thlir kual a, an tlanchhiatna chhan chu a hre ta; Lafferty-a a thih vang a ni. A sakawr chu chuangtu awm lovin khawlaiah chuan a zuk hmu a, a ngaihtuahna chu a vir mawp mai.

Plaza tuala Lafferty-a ruang let reng a hmuh chuan a meng bial kâwk a, rin harsa a ti kher mai!

A bula amah ṭanpui mi pahnihte pawh chu an ṭhiante ang bawkin in chung aṭang chuan an zuang thla ve ta a; Matt-a chuan melh pawh a melh zûi eih lo.

A rifle chu a lek hniam a, Lafferty-a chu a la chêt leh chêt loh en pahin zawi muangin a tho va, hnuai lama mite chuan an rawn thlir chho ṭhuap a.

In chung aṭanga chhuk a tum lai chuan a dàrah silaimuin a rawn deng dawt a, a ip chawi a, a zuang vak a, tual charah chuan a hlawm thla ta hnawk a. A kawr chu thisenin a chiah huh hnuang a, a ban chu hik mupin a hria a, a khaw hmuh pawh a vai nghâl ruai a.

Lafferty-a ruang tlûkna lamah chuan a pai phei chawn chawn a, cavalry-ho leh mi dang inkarah chuan pawisak them tê pawh nei miah lovin a inzep lût zel a.

Lafferty-a chu Plaza hmun lai takah chuan a saisir deuhvin a lo tlu a; kum tam tak ral tawha rustlers-ho a khai hlumna bulah chiah khan a ni. A hnuaia phaitual hnim chu thisenin a chiah kâwi zûi a.

Matt-a chu Colonel chal dawmin a ṭhingthi a, ringhlel zetin a han en chiang a, a tak ngei chu a ni si! Lafferty-a chu silaimu sawm pahnih (12)-in a deng fuh a, a thawmhnaw chu sa seh kawr ang hnuangin a chik hrup a. A mittuiin a khaw hmuh a ti phe a, thil eng kim chu buai nuai nuai vek hian a hria a.

Hmun tin aṭangin âw a lo chhûak a, thawm a ri nuak nuak a; hnehchhiahna rawl leh khawngaihna dil aw a inpawlh a; hliam tuar chiau ri nen khaw chhung chu a khat a. Naupang leh hmeichhiate pawh chu pawnah an lo chhûak ta a.

Tualchhung mite chuan Two Bar mi leh sa, tlanchhe ve lote chu an ṭingmit ta hmiah hmiah a. Matt-a pawh chu a kut hnungkhirh an tum a; mahse, Sheriff Spanh-a chuan, “Ding rawh u, in awmna ngaiah khan eng mah ti lovin ding rawh u,” a lo ti tuar a.

Tualchhung mi leh sipai ṭhenkhat chuan Matt-a chu ngaihno bei lo zet hian an en a, “Lafferty-a kut ding lam a nih kha! Sheriff, ti boral ve nghal rawh‚” an rawn ti tuar tuar a.

Mahse, Spanh-a chuan hre lo ang hmiahin mipui chu a melh khui khui hlawm a.

Chutih lai chuan ngawi rengin governor chu Plaza-ah chuan a lo lang a, Lafferty-a ruang chu a pan phei a, a ruang bulah chuan a ding a, “Mi ropui leh huaisen tak chu a ni ngei a, a pamhmai khawp mai,” a ti ta a.

Matt-a’n governor thu sawi a'n hriat chuan, “Ka pu, Lafferty-a hian a dik lo tih a inhria a; mahse, a fapa a hmangaih vang leh a fapa chunga a tih tur ti zo tâwk lova a inngaih avangin he indona hi a su lui a; a hlohtu zâwk a ni dawn tih inhre reng chungin a ni a lo thawh chhuah. A fapa chungah chauh tih loh chuan a la hlawhchham ngai lo,” a lo ti a.

San Juan khuaah chuan mihring an zi noh noh a; chutih lai tak chuan a reh ṭhuap lawi si a.

Matt-a pawh chu luhai leh harsa ti tak chungin a ding ve hram hram a, a ngaihtuahna chu a vâk darh nasa hle a. Lafferty-a ang mihring hi an váng hle a‚ a tel lo chuan a nun chu rûak tlatin a hria a, a rilruin ar bo a zawng tak meuh a ni. He pa te reuh tê hi a ngai sang tawp thei lo a ni.

Nakinah chuan tualchhung mi pakhat hian Sheriff hnenah chuan, “Hêngho hi engtin nge kan tih dawn?” tiin Les Saxon-a leh mi dang, kawtthlera silai nena ven renga awmte chu a han kâwk a.

Sheriff chuan governor chu a mitin a va ráwn a. Governor chuan zawi tê, fiah zet, hnial rual loh hian, “Vawiin atan chuan thisen kan inchhuah tam tâwk tawh e; Sheriff, an vai khan chhuah vek rawh,” a ti ta a.

San Juan mipui chu an lungawi lo hle a, an phun mur mur a; mahse, Sheriff chuan rum deuhvin a han melh kual a, "Ruang leh hnawkte hi thian fai rawh u,” tiin thu a pe ta a. Matt-a hnenah chuan, “Doctor i mamawh a nih kha, ka hruai ang che,” a ti a.

Matt-a chuan lu thingin a lo hnial a. Lafferty-a ruang chu, “Engtin nge ni dawn?” tiin a han zâwt a.

Sheriff chuan, “Hawn la, va phum rawh,” a ti ta a.

Chutih lai chuan Laura chu a buggy nen a lo lang a, Lafferty-a ruang chu buggy-ah chuan an hlang ta a.

Governor chu tawlailir sirah chuan a lo phei a, Matt-a hnenah chuan, “Tluang takin Two Bar chu i enkawl dawn nia, he lai bial vêl ti changkangtu ber a nih hi,” a han ti a.

Matt-a leh Laura-te chu an inkhalh haw ta a. Tunah chuan a tir aṭanga ṭhahnem ngai taka a lo enkawl, Two Bar chu an nupain an rochun a. Matt-a rinawmna leh thawh rimna rah chu an seng dawn ta a ni.

A TAWP TA.

(Kan chhiar fo ṭhin ang, 'kawl phe ai pawha rang zâwka silai phawi' tih vêl chu a awm lo hle a; mahse, he thawnthu hian mihring nun tar lanna tam tak a neih bâkah zirtir, hnutchhiah a nei ṭha hlein ka hria a, a ngaihnawm dan hi a ril ru tlat ka ti - Rz).

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)