THE ARROGANT GUNS. (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

THE ARROGANT GUNS. (COMPLETED)

Unread post by Rozami pachuau » December 19th, 2018, 3:29 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 1
(Rozami Pachuau)

Kum sawmhnih dawn a ni ta....

An ranch fal tak, luitê kam hmun reh taka mi kha a la hre reng a. Khaw lum lai ber pawhin an in bula thing bukte khan a zar hlim a, a dai raih ṭhin a nih kha. Chu ina a nu leh pate nena an chenho lai chu mumang ang maia chiang lovin, hla takah a la hre riai ruai a. Thawh rim lûat avanga hmel hram tak pu, a nu leh a pa chuan a suangtuahna an la luah fo ṭhin, theihnghilh theih a ni tlat lo!

Nia, Red Indian hnam chi khat, Comanches an tih chuan an rawn run a. A nu thlabar ṭe ri leh amah ngei pawhin a hlauhzia te kha mumang ang mai ni tawh mah se, tun thlengin a ngaihtuahna an la ti buai fo a ni.

Matt Wyatt-a chu naupang nikhaw hre rual tak a ni tawh a, thil eng emaw ti tur pawhin an tir an tir ve tawh a. Tûk khat chu khaw var chian hmain hremna ang deuhvin a pain pawnah a chhuahtir a.

Leilung chu a la hmuh chian theih loh va; Matt-a zawng, naupang luhlul ngang a ni a, nuar bengchheng mai lovin luitê kam hnim bukah vâwt tia khur hlak hlak chungin a va tawm ta a. Chutia a tawm bo hlan chuan a ni Commanche-ho chuan an in chu an rawn beih thut ni.

Che sawn ngam lovin a tawmnaah chuan a ṭhu ngawi reng a. Silai ri ṭhuai ṭhuai kara na tuar chiau vawng vawng leh sakawr hnar tum nghur nghur ri te chu a hria a; Commanche-ho chu an sakawra chak taka tlan kualin an khek vak vak a; an in kang chu a inhlap ri hlup hlup a, thawm râpthlâk tak chu a ngaithla reng a.

Indian-ho an kal sawn hnuah pawh a la che chhûak mai ngam ta chuang lo va. Rilṭam Ieh tuihalin a tawmnaah chuan nileng leh zankhuain a mu zûi a, a mangang êm êm mai a. A awmna lam hawia thli a rawn thâwt chang chuan an in kang rim chu a nam vung vung a. A tûk leh khua a var felah a tho chhûak ngam chauh va, a tana thil hmuh hrehawm tak mai chu a va hmu ta a ni.

Vutdukin a bawh luk chungah chuan a nu leh pa ruang chu a han hmu phawt a; chutah, an vawk leh ar kang ût ruamte chu a han hmu leh a; an sakawrte pawh chu an lo ru zo vek tawh a. An puanthuah kang bang awm chhun chuan a nu leh pa ruang chu a khuh ta a. Chutih lai chuan kum nga mi lek a ni.

A rilṭam chuan an in kang tlu karah chuan ei tur a va zawng a, a ṭam hnem tâwk tur chu a hmu ve mai a; mahse, engtia khawsak zûi tur nge tih chu a ngaihtuah pha hauh lo a ni.

A rilṭam apiangin a ei tur hmuh ang angin a inhnawh puar a; zanah chuan an in chung leh ban tlu karah a mu leh ringawt mai ṭhin a. A nu leh pa ruang leh, an ran kang rim te chu chhe telh telh mah se, pawisak ngaihna vak a hre chuang lo. Chutiang chuan eng chen nge a awm tih pawh a inhre tawh lo a ni.

Tûk khat chu mi pakhat, pa tê lam, cowboy thawmhnaw pangngai inbel, sakawr lian tak chunga chuang hi a lo lang nawlh mai a, zing ni chhûak chuan a sakawr chu a chhun buang thung a. Matt-a chuan a mit nuai chat chatin a lo thlir reng a, a bul a lo thlen chuan lungchhe tak hian, "Indian-hovin ka chhungte min thahsak a ni," a lo ti nghâl tawng mai a.

Sakawr chunga chuang chu thinur takin a insang ruh a, rei tâwk fang Matt-a chu a thlir reng ringawt a. A hmel chu ni sa tuar ṭhang tih a hriat hle a; chutah, a sakawr ata a lo chhuk a, in kang bang kar aṭangin suahdur a la a, ngawi rengin thlan a lai ta a.

Matt-a chuan hrilhhai takin a lo thlir reng a. Chu pa chuan thlan a laih zawhin ruang pahnih chu kawmawlin a tuam a, a phum fel hnuin Matt-a hnenah chuan, "Lo kal rawh‚ ka hnenah ka hruai ang che,” a ti ta a.

Matt-a chu a sakawrah a hlang nawlh a, hmar lam panin a kalpui ta a. "Engtin nge ka enkawl dawn che ka hre rih lo va; mahse, nangmah enkawl thei tur Mexican hmeichhia hmuh theih ka inring a; mingo erawh chu hêng lai ram pilrilah hian an vang maithei," a ti a.

Texas kal tlangin New Mexico, Spanish leh Pueblo-ho chenna hmun an thleng ta a. Tlai thim hmulah dawr awmna khaw tê reuh têah an lût a, silaimu leh thil dang eng emaw an lei hnuin an chhuahsan leh nghâl a. Chu khua aṭanga khaw thlang lam mel sawm pahniha hla ram palailengah riahbûk an sual a, rawng an inbawl chawp a; zanriah an ei khamah kawmawlin an intuam tawp a, an mu ta a.

Matt-a chu sakawr hnar tlir ri hraih hian a ti harh a, thimthamah chuan mihring hlimthla hi a va hmu ta a. Chu mi chuan an sakawr chu a lo pan mek a, a hlau kher mai! A thauvah a man a, a nu leh pa an thah zan ang mai kha niin a hria a ni.

Amah enkawltupa chu zawhtê ang maia thawm nei lovin a rawn tho va, thim zingah chuan rifle nen a veh phei ta a. Rei lo têah Matt-a chuan silai ri leh na tuar chiau ṭhawt ri a hre ta a.

Thawm a reh hnuin a pu chu a lo kir Ieh a,, "Thlaphang reng reng suh, ka veng zel dawn che alawm," tiin Matt-a chu a rawn thlamuan a. Matt-a koki-ah chuan vuanin, "Dan Lafferty-a ka ni; nang tu nge i hming?" tiin a han zâwt a.

Matt-a chuan lungmuanthlâk a ti hle a, "Ka nu leh pa chuan Matt tiin min ko va; kan awmnaah khan miin min rawn tlawh khat êm êm a ni," a han ti ve a.

Lafferty-a chuan, "Matt tih chu i hming bul a ni ngei ang a, a dawtah eng nge awm?" a han ti leh a.

Ani chuan, "Matt Wyatt," a lo ti a. A pu chuan, "A ṭha e. Ti rawh insiam la, i kal nghâl ang. Nichina mite kha an zinga pakhat ka kâp hlum a, an lo kir leh ngeiin a rinawm," a ti ta a.

Hêng hi tun hma kum sawmhnih ral tawha Matt Wyatt-a'n a naupan lai chanchin a la hriatte chu a ni.

Lafferty-a chuan a enkawl ta a. A pu chu a ring êm êm a, naupang tê ni chungin a hnung a zûi chawt reng a; bâwng vengin sakawr chungah an vâk nileng zak zak fo ṭhin a ni.

A pu, Lafferty-a chu mi rorum leh tum ruh elkhen a ni a. A pawisa khâwl sa beitham tak nen chu lai Two Bar hmunah chuan bâwng tlem tê vulhin bul a ṭan ta a. Mit thim tlin tâwka ram awl zau, tu ma dîp phâk lohna hmun khawhar tak mai a ni a, an hnaih ber khua pawh mel sawmnga laia hla a ni.

A tirah chuan bâwng tlem tê chauh a nei a, Mexican cowboy 'Vaqueroes' pathum a ruai a. Bâwng a vulh bâkah Two Bar aṭanga khaw thlang lam mel zahnih vêla ram sakawr kawlh an man ṭhin bawk a; chûng sakawrte chu State Plains-a Red lndian-ho hnenah hralhin Texas bawng ki sei chi za sawmnga zet Lafferty-a chuan a lei ta a.

Hla taka a zin bo dawn chuan Matt-a chu Vaquero pakhat nupui nen in a nghahtir ṭhin a. A ram a zauvin hnim te a duah ṭha bawk a, Lafferty-a bâwngte chu kum rei lo têah a lêtin an lo pung ta thur thur a, an thauvin an hrisel êm êm bawk a ni.

Matt-a pawh chu a ṭhang duh hle a. A têt tê aṭanga sakawr chung chuan zir ṭhin a ni bawk a, Red lndian angin a zin phah lohvah a chuang a, a bawp a la tawi deuh avangin sakawr zin phah chu a kâr zo lo a ni.

Lafferty-a nen chuan an inzûi chawt a, a pa ang chiahin a en a. Lafferty-a chuan, "I mit tlin tâwk aia zau hi ka ram a ni a, nakinah chuan rûk sen loh khawpin kan bâwngte hi an lo pungin kan la ding chhûak ngei ang," Matt-a hnenah chuan a ti a.

Matt-a pawh a ṭhang lian ve tawh fu tih thlengin Lafferty-a chuan nupui a la nei lo va. A tawp a tawpah zawng nupui zawngin a chhûak ta a. Chutih lai chuan Matt-a chu kum riat mi a ni.

Lafferty-a'n a han chhuah bosan tâkah chuan a khua a harin a thla pawh a phang hle a. Lafferty-a kal chhuah hlan chuan old dragon colt, pûakruk lianpui hi Lafferty-a pindanah a chhar a, khawlaiah a keng chhûak a, ban filawr chu a han kâp ṭhuai mai a.

A vawi khat kahna a ni bawk a, a nghawr chu na a ti hle a, a kut a thlawh ta emaw a ti hial a. A insang phêk a, "Eng nge ni vêi," tiin a kut khing hniha humin a han kâp leh a, a hmet zûi ṭhuai ṭhuai a, nakinah chuan a kah tum chu a kâp fuh thei ta a. A tûk lamah pawh pûakruk kah chu a zir chhunzawm ta zel a.

Chawlhkar hnih hnuah Lafferty-a chu hmeichhe pakhat nen an lo haw ta a.

Lafferty-a nupui rawn hawn chu a tirah chuan Matt-a chuan mak a ti deuh hle a. Nu hleitling tak, bawp sei leh darpharh hlai tak, hawi sang lam leh hnute bu lian tak a ni a, a hmel pawh a ṭha khat hle a. Alberquenque saloon-a a va chhar chawp; hmel an inhmuh hnu darkar hnih leka a va neih fel nghâl mai hi a lo ni.

Matt-a chuan chu nu chu a lo en vang vang a, a ngainat zawng a ni hran lem lo a ni.

Lafferty-a'n a nupui a rawn hawn hlima an chenna in leh a vêl a nupui tharin mak ti fahrana a thlir kual kha Matt-a chuan tun thlengin a la theihnghilh thei lo.

Matt-ate in chu hnawhsaruma sak tih hriat tak, khawsak ve theihna ṭâwk ṭâwk chauh hi a ni a. A chung atan chuan thingtuai lian pui pui an khang khâwm a, phaitual hnim leh chhawlin an khuh leh ringawt a, ruah sur tam deuh ṭum chuan a far nguah nguah mai ṭhin a. Matt-ate putu chuan in hnung lamah chuan store angreng hi pawnchhia mai mai bel khâwmin an zar bawk a.

Lily; Lafferty-a nupui rawn hawn chu in chung far tluah tluah hnuaiah chuan a ding a, a hnung lama Lafferty-a leh Matt-a lo kal chu thinrim hmai sen ṭan hian a lo en a. A pasal hnenah chuan, "Mi hausa tak turah ka lo ngai che a; uicho mai i lo nih hi! Chutianga ring tur che chuan min bum lehnghâl,” tiin mittui tla chungin a lo àn khum a.

A nupui aiin Lafferty-a chu a tawi zâwk a, a ding khawng auh mai a, "Ram ka neih thu ka hrilh che a, i hmuh phâk aia zau ka nei tih ka hrilh che. Bâwng pawh sang chuang zet ka nei tih ka hrilh bawk che a; mahse, in mawi leh nuam tak ka nei tih ka sawi miah lo," tiin a chhang a.

Lily chuan, "Pa tê sual tak i lo nih hi! Dâwt te min han hrilh khanglang a; hetiang in chhiaah te hi chuan ka cheng ṭhuai lo vang," a ti leh hlawih hlawih a.

Lily-i'n a àn khum laia Lafferty-a hmel awm dan chu Matt-a chuan ngun deuhvin a lo thlir a, a thisen a khang vek ta emaw tih khawp hian a ding khawng a. Lily hnenah chuan, “I awmna, Alberquerque-ah ngei chuan tunah kal chhûak nghâl rawh; mahse, nang hruai haw tur che hian hun ka khawh ral dawn miah lo, nangmahin kal nghâl rawh," a ti ta a.

Lily chu tuihâwk zingah chuan a ṭhu a, a pawnfen tlang chu chirhah a inchiah tih pawh hre lovin lungchhe zet hian a ṭap a. Lafferty-a chuan ngawi rengin rei fe a en ngawt ngawt a.

Matt-a chuan hlau deuh tak hian a lo thlir ve ringawt a, tlan bo daih te a duh rum rum a; mahse, tlan bona tur a hre bawk si lo. Lily chu a khawngaih angreng hle a, a nu chu ang lo hlein hre mah se, a ngaihtuah chhuahtir a ni. Ruah nan hrep chung pawhin Lily chu hmelṭha a ti hle a, Lafferty-a chuan thlem lungawi thuai se a ti rilru hle a.

A pheikhawka chirh thai pahin Lafferty-a chuan, "Ti teh, inhauh lam chu bansanin in chhungah i lût teh ang, ei tur i ngaihtuah ang u. In ṭha zâwk zawng i la nei ngei ang; mahse, hun min pe phawt mai la, i duh ang chu neihtir che ka tum alawm, i la nei ngei bawk ang," a han ti a.

Lily chu lungawi ta deuhvin a lang a, "Ni e, ka nei ngei tur a ni; mahse, kumkhua chuan ka nghâk peih lo vang," a ti ve ta a.

Lafferty-a chuan a nupui, amah aia sâng zâwk chu pawm luh tumin a kâwngah a va kuah a. Lily chuan, "Min khawih suh,” a lo ti vin hlar a; mahse, an inpawm lût ta tho va.

Matt-a chuan mak ti fe hian a lo en ran a. Mei an nun a, coffee leh ei tur dangte an siam zûi ta a. Zanriah ei khamah Lafferty-ate nupa chu pindanah an lût a, Matt-a pawh a mu ve ta a.

Zan rei tawhah chuan Lily chu a ṭap leh ta vak vak mai a, a pasal chu a àn khum bawrh bawrh a. An thawmah chuan Matt-a chu a harh a, eng dang vang ni lovin an in chung far vang bawk a lo ni a. Chumi zan ang reng reng chuan a hmain a la far nasa ngai lo.

Lafferty-a chuan darkar chanve chhung zet chu a nupui áng ri chu a ngaithla a; ani chuan a bauh reng mai bawk a. Thâwk leh khatah, Lafferty-a chuan a thawmhnaw a ha sawk sawk a, pawnah a chhûak ta daih a. Matt-a chuan sakawr tlan thawm a hre zûi a, Lily chu a ṭap zûi reng bawk a.

An ineih tirh aṭangin inhau reng rengin an khawsa a, zing, chhun, zanah chuan a ziaawm tawh ang chu maw Matt-a'n a tih chang pawhin a ngai reng tho a ni. Lily chuan anchhia a hriat apiang a phuh chhûak reng a, "In ṭha deuh min saksak thuai loh chuan Alberquerque-ah ka hawsan daih ang che, pa tê sual!" a ti deuh reng bawk a.

A tawpah zawng Lafferty-a chuan in sak phawt mai chu ṭulin a hre ta a. Pawisa khâwl sa nei hek lo, an bâwng ṭhenkhat chu khalh khâwm a, hralh hmasak a ngaih avangin Santa Fe-ah an va hralh ta a. Matt-a nen rei tak an thang hnu chuan supply pawimawh nen an haw leh a, hlawhfaa rawih tur Red Indian eng emaw zât an hruai haw nghâl bawk a.

In sak chu an han ṭan ta tak tak a. A bang atan tawlailir phur tam tak leirawhchan an han thiar khâwm phawt a; khawpui aṭangin hmanraw pawimawh an chaw khâwm zel bawk a; mahse, an awmna a hlat êm avangin an in sak chhung chu a rei hle a ni.

In chu lian tâwk tak, 'U' shape-in an sa a; tin, kawtlaiah chuan tuikhuah an siam a; a bathlar hual vêlin corridor an zuah bawk a. In nuam leh ropui takin a tawpah zawng an peih ta nge nge a.

In chhung bungraw lam an la khâwm ta thung a, mawihnai tak vek an ni. Chhûatphah phei chu Navazo Indian-ho tah ngat an hmang a. In an sak zawh meuh chuan Lily chuan nau, thla kaw mi a pai a, a neih a hun ṭep a ni.

An in thar lawm tur chuan an chheh vêl mai pawh ni lovin, mel zahnih laia hlaa awmte thlengin an sawm a. Hmun tin aṭangin an lo thleng a, Red Indian leh Mexican leh mi chi hrang hrang an inpawlh nuai a.

Lily erawh chu an mikhualte lo chhàwn duh lovin a tum bar reng a. A khât tâwkin a nau hrin tur chuan a rawn ṭhoh bawk a, na tuarin a vial ngawt ngawt ṭhin lah tak a. A phunchiar a zual tawlh tawlh a, a pasal chuan dawh thei reng bîk hek lo, thinrim hmai sain a chhang ve ta a.

Kut a thlâk mai ang tih hlauvin Matt-a chuan kal bosan daih a duh a, sakawrah a chuang a, hun eng emaw chen a rawl bo ta a. A kir leh chuan hla tak aṭangin Lily ṭe ri a hre ta a.

In a han thlen chuan Lily chuan nau a lo hring fel der tawh a, a hmingah chuan Lincoln-a an sa a; Link tiin a awlsam zawngin an ko ta a.

Nausen lian tak leh duhawm pui a ni nâin a pa chuan a ngaihsak vak lo va, inah a awm khat bawk a, a mi chhawrte nen chuan an chhuak reng a ni ber mai. Ina a lo haw chang pawhin Lily chuan ṭawngkam pangngaiin a be ngai lo va, a vin reng a ni ringawt mai a. Matt-a chuan, "Eng tikah tak la that ang maw?" a ti rilru a, a dawh theihnain a tlin fo a ring lo a ni.

Matt-a chu a inngaihtuah mûk hle a, Lafferty-a hnenah chuan thil eng emaw tak sawi tur neiin a inhria a. A va pan a, a nu leh pate chu a rilru-ah an lo lût a, "Thil eng emaw lungkham ka nei," a va ti ta a.

Lafferty-a chuan, "Lily chanchin a nih ka ring, a hûat thu a chhiat ang ang hian kan fapa Link-a pawh a zirtir dawn a nih hi! Lily hian a rilru chhungah mi hûatna hranpa a nei pawh a ni lo; a àn chhiat leh a hûat thu chhiat hi a naupan sen lai aṭanga a seilennain a zir loh vang nge, zir vang zâwk? Eng pawh ni se, a sim thei tawh lo a nih hi,” a lo ti a.

Lafferty-a chuan Lily chu a hmangaih tak zet a ni tih a hria a, a nun khawlo leh, amah huaa áng ṭhin a nih pawh a ring phal lo va; mahse, a ring sual deuh a ni. An fapa pawh a pa haw turin a zirtir a, Matt-a tan chuan a nuam lo hle a ni.

Lafferty-a chuan Matt-a chu Lily nen in nghâkah a dah a, amah chu a kal chhûak daih a. Thla ruk chhung ngawt khawiah mah chhûakvak thei lovin a tawm chawt a, a ning hluah hluah mai.

Ṭum khat Lily-i'n a chanchin a hrilh chu a la hre reng a, "Mi sual Ieh hmusitawma min entu, a tu-ate pawh hi an dik vekin ka hre ṭhin. Kan khuaa zawnghri a len vak ṭumin gentleman mi fel tak ni àwm taka lang, mi pakhat hian an chhungkaw ṭanpui turin an inah min awmpui a, chutih lai chuan kum sawm pathum mi chauh ka la ni.

"Ka awmna-pa chuan a rûkin min mutpui ṭhin a, nula puitling ka nih thlengin nawm chen nan min hmang a; chumi hnuah saloon-a thawk turin min tir chhûak ta a. Matt, nang chu chutiang mihring chu i ni ve êm lo vang chu,” a ti hliam hliam a.

Matt-a chuan, "Lafferty-a pawh a ni bîk hlei nem," a lo ti thuai a.

Lily chuan, "A ni lo tih chu ka hria alawm," a ti a. A han ngawi vang vang a; chutah, "Kan inneih tirh phat aṭang khan ka mizia ka chhuah a, ṭawngkam chhe tinrengin ka àn khum a; tunah chuan inchhir turin a tlai tawh, a mi en dan a pangngai reng tho vang, demna reng reng ka nei lo," a ti a.

Matt-a rilru chu a buai deuh nak mai. Lily thu sawi chu a ngaihna a hre lo hle a, Lily pawhin mak a inti ve viau bawk a ni.

Lafferty-a chuan a ranch tih changtlun zel nan hna a thawk rim hle a; in chhung khawsak lam erawh chu a ngaihthah dèr thung a ni.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 20th, 2018, 5:23 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 2
(Rozami Pachuau)

Two Bar chu mikhualin an tlawh khat hle a, a chang chang chuan rawn tlawhtu an awm ve leh zauh ṭhin bawk a. Two Bar-a hna thawktute leh Matt-ate chuan eng emaw changa rawn tlawhtu awm chhun chu an lo chîk thei hle a.

Rawn tlawhtute zinga pakhat chu San Juan aṭanga lo kal, Jack Lane-a a ni. A lo kal hmasak ber ṭum chuan hlim hmel pu tak hian Matt-a chu a rawn nuih a, a kutin a zâp a, dai kawngkhar pan chuan a lo kal a.

Cavalry ni mai àwm hian ngil zetin a sakawrah chuan a ṭhu a. Amah pawh hmel chhe lem lo, pa lian sang thlerh thlawrh tak a ni. Thawmhnaw dum vek a inbel a, Spanish lukhum parh hi sang takah a khum er chho van a. Pûakruk pakhat, enkawl ngun tih hriat tak hi a kawrchung hnuaiah chuan a pai a, a pên zawng chuan a lang tle zak zak a, Navy colt .36 lian riang ruang tak hi a ni a. A pheikhawk pawh chu a tle ṭha hle a, Spanish sakawr khenna a vuah bawk a.

Gate a lo thlen chuan in chhung aṭangin Lily chuan a rawn chhàwn a. Mak ti àwm fe hian a tirah chuan a en a; mahse, leng lût turin a sawm ta var a.

Lane-a chu zei fe hian a sakawr aṭang chuan a lo ṭum thla chhak a, a sakawr chu Red Indian naupang pakhat hnenah lo dah ṭha turin a tir a, Lily nen chuan in chhungah an lût ta nghâl a. Nilengin kawng inkhar hnanin in chhungah an awm a, tlai thim thet thetah an lo chhûak leh ta chauh va.

Lane-a chu a sakawrah a chuang a, Lily chuan pawnah a rawn thlah chhûak a, nui sangin an inmangṭha ta a. In kil sir hmun pakhat aṭangin Lafferty-a chuan a lo hmu ve vek a; eng mah sawi zûi phei zawng a awm lem lo.

Chutih lai chuan Matt-a chu kum sawm pakhat a ni ve tawh a. A rilruin puitlin lam chu la ngaihtuah pha lo mah se, Jack Lane-a inchei dan leh a han khawsak dan vêl chu a awt rilru hle a. Chu pa anga nalh tâwka incheia sakawra han lêu vêl chu a châk ve a ni.

Lane-a chu a khat tâwkin a lo lang ta fo va. A vawi ruk lo kalnaah Lafferty-a nen chuan an intawng a, hmaichhana an intawh hmasak bera an inen dan aṭang chuan an inkarah eng emaw inṭhoh a awm tih Matt-a chuan a man thiam nghâl mai a ni.

Lafferty-a chuan rum tak; mahse, hawihhawm angreng tak si hian a bia a. Lane-a pawh chuan nelawm tak; mahse, eng emaw thup nei ang hian a melh a. Chuta ṭang chuan Lafferty-a chuan pûakruk a pai chhûak ve ta a ni.

Kum sawm pakhat mi lek tan chuan chu mite pahnih inen dan chu hriat thiam a harsa hle a. Lane-a lo len fona chhan chu a ngaihna a hre lo va; Lafferty-a erawh chuan a hre thiam lutuk mah mah zâwk a ni.

Jack Lane-a lo lan apianga Lafferty-a thinrim ṭhin chu Matt-a chuan a hai bîk lo va, "He mi hi i ngaina vak lo a ni maw?" tiin a zâwt ta phawng a.

Lafferty-a chuan, "Ngaina miah lo. Nangmah rawn fiama rawn kawm hlim tur che pawh ni lovin Lily zâwk hi a rawn rim ṭhin a ni. Mi nupui rim fo hi chin loh tawp tur a ni asin," a ti a, a âw chu a vâwt hle a.

Matt-a chuan, "Engati nge, lo leng tawh lo tura i hrilh mai loh?" tiin a han zâwt leh a.

Ani chuan, "A sim chuang lo vang, sâwtna pakhat mah a awm lo. Thil eng emaw tum a nei a ni," a ti a.

Matt-a chuan, ”Eng nge a thil tum chu?" tiin a zâwt ta zel a.

Lafferty-a chu a rum nghat a, "Kei min thah a; Lily hi nupuia neih a, Two Bar hi pum hmawm a tum a ni,” a ti ta a.

Matt-a thinlung chu eng emaw tak hian a rawn kam a. Lafferty-a chu pa ang tak takin a en tawh a, a hmangaih bawk a, amah lo chu tu mah dang belh tur a nei hek lo. A hnenah chuan, "Mahse, i thi lo vang ti raw?" a han ti a.

"Ka hre lo le. Jack Lane-a hi a phawi rang hlein ka ring."

Matt-a chuan hlauthawng takin, "Chu! A kah mai che i ring a ni maw?" tiin a han zâwt leh a.

Lafferty-a chuan, "Ring ni lovin a hriatin ka hria, hun remchang a nghâk lek a ni. A tum dan tak chu buaina siam hmasatu ni turin min nawr tê tê ang a; chutah, loh theih loh thilah mahni invenna tiin min kâp ang, Lily hriat thiam zawng turin," a ti ta a.

Matt-a chuan, "Sheriff pun la a ni mai alawm," a ti a, a âw chu a khur hlak hlak a.

Lafferty-a chuan, "Buaina la siam rih hek lo; pun mai ngaihna a awm lo," tiin a lo chhang mai a.

Matt-a chuan, "Kei chu ka hriat thiam zawng a ni ve lo. A thil phiar i hre tlang sa a, a la kâp ngei dawn che tih a chiang bawk si a," a han ti leh a.

“Min kâp ngei ang. Hun ka pe mawlh bawk ang. Lo thleng teh phawt se."

"Thah theih i inring lo a nih pawhin mi tam tak, 'Ti rawh' i tih apiang zawm nghâl tur i nei reng tho alawm," Matt-a chuan a ti ta zel a.

Lafferty-a chuan, "Ka that thei zâwk pawh a ni maithei; mahse, ka inring ngam chiah bîk lo a ni. A enga pawh ni se, tu mah dang pun lovin Jack Lane-a hi keima tum tur liau liau a ni. A inpeih hun hun kei pawh ka inpeih hun a ni mai; mi dang lo inrawlh ve-na tur a ni lo," a ti a.

Matt-a chuan eng tik hunah tak lo thleng ang maw tiin hun lungngaihthlâk, thihna rawn thlen ngei tur chu a nghâk ta ringawt a.

Zan khat chu haw lovin Lane-a lo leng chu a riak nghâl a. A dan pangngai angin chumi tûk chuan Matt-a chu hma takah a tho va, inphih fai turin tui pump awmna lam chu a mit nuai nawk nawk chungin a pan a, Jack Lane-a’n Lafferty-a awmna lam kawngkharpui a lo en lai chu a va hmu ta a.

Lafferty-a chu in chhung aṭang chuan a lo chhûak ve nghâl a, Gunman tih dan pangngaiin pûakruk a pai a, a thên theih loh nan a hmawr chu a khêlah a hreng bet bawk a.

Matt-a chuan chu mite pahnih men danah chuan thil chu a nih dan tur ang ang a lo thleng dawn ta, tun hi a vawrtawp a ni ang tih a rilru-ah hriatna eng emaw tak a nei nghâl a. A thinlung chu hnawhtu awmin a hria a, Lafferty-a chu a thi zâwkah ṭang ta hlauh se..., a tirilah hlauhthawnnain a rawn ṭham ar ar a.

A hnu rei fe thlengin thih pawh huama Lafferty-a’n Lane-a beih a duhna chhan hi a hre thiam pha lo. A nupui rinawm lo tak lakah thiam channa a zawng rilru em ni? Lane-a thah a duh rau rau a nih pawhin ama tana hlauhawm miah lovin kawng dang tam takin a dah ṭha thei tih a hre chiang si a.

Mahse, tun hnuah hian a hre thiam ve ta. Mi huaisen a ni a, mi tlawmngai leh hnung tawlh ngai lo a ni a, mi dangte zah a phurh zel nan pawh a ni bawk ang.

Lafferty-a chuan a hmelma chu tim miah lo hian a pan dîng a.

Lane-a hmai chu a dáng bai a, hmeichhe ngo deuh, thisen tlachham hmai ang mai a ni; che lo chang lovin a lo nghâk ta a. A mit chu zing ni chhuah sarah chuan zim tak hian a meng de sat a, a pûakruk phawina hun remchang a zawng a, Lafferty-a chu a din veleh lo kah a rilrûk a ni.

Mahse, Lafferty-a chuan hun remchang, Lane-a lo beisei rilrûk chu a pe hauh lo va, a hmelah chuan danglamna chhe tê mah a lang hek lo. A thinrim hle tih erawh chu Matt-a chuan a hre thiam a ni.

Lafferty-a chuan a ke chheh ti danglam miah lovin a pan hnai zel a, “Nizanah i mutpui em ni?” a han ti khawl a.

Lane-a chuan, “Teh reng mai. Engtin nge i ngaih?” a lo ti ve hmiah a.

Lafferty-a chuan, “Ka that dawn che,” a ti a. A aw chu a vin lo nâin a hriam var mai.

Lane-a chuan, “Han tum chhin ta che, pa tê reuh tê; khawi hmunah nge phum i duh?” tiin a lo chhang lêt a.

Matt-a chuan Jack Lane-a chu a han en ve thung a. A hmai chu a dáng var vek ni hian a hria a; a kut chu a pûakruk kawm bulah a ti mu-ke ṭa a, phawi mai tum niin a lang. Lafferty-a chu a hlauhthawnpui hle a, a va au va, “Cho thinur lui ṭalh suh, a duhthusam i tih hlawhtlinsak lek a ni,” a va ti ta vak a.

Lafferty-a chuan Matt-a chu a rawn en lo va, chhàn pawh a chhang lo va; mahse, hriat zawng a hria tih a chezia aṭang chuan a lang. Lafferty-a chuan a pan hnai zel a, a ke pên pawh a nghet chat mai. A chêt dan aṭang chuan amah a inrin tâwkzia chu a lang chiang hle a, silai nena inbeih châk tak hmel hi a pu a ni.

Matt-a chuan Lane-a chu a han en ve leh thung a, Lafferty-a’n a hnaih phei zel chu a beisei lo tawp niin a lang. A mangang ru tawh hle ni hian a hriat a, a hmui a han liak zauh va. Chumi a han hmuh chuan Lafferty-a chuan a nuihsawh hle a. Lane-a’n a pûakruk a chuh hma chu hnaih zel tum ni àwm tak hian a pên hmiah hmiah a, fimkhur takin a pan zel a.

Lane-a hmelah chuan an thil tih tur chu pumpelh theih ni se a duh hle niin a hriat ta! Tunah chuan a zam chhe ta der niin a lang; mahse, khua a tlai tawh, pumpelhna hun a awm tawh lo.

Lane-a lo dinna aṭanga pên tlem têah Lafferty-a chu Lane-a chêt hun nghâkin a ding ve ta hram a.

Lane-a chuan kawl phe zawk ang maia rang hian a pûakruk chu a han phawi a, a pûak riin a zûi nghâl a.

Matt-a chuan eng mah hmaih lovin Lane-a che vêl chu a lo en kar a; mahse, Lafferty-a kuta .44 old Army colt pawh chu a pûak ve tho mai. Silaimu pakhatna chuan Lane-a dàrah a va deng a; mu hnihnain a áwmah. A vir nawk a, a tlu ta a. A mu thumna chuan leia a tlu tawh hnu keah chuan a fuh leh a.

Lane-a chu gallery chhûatphahah chuan a tlu a, thisenin a chiah nuai mai a. Matt-a chuan Lafferty-a lam chu a hawi ngam lo va, tlu ve ngeiin a ring a ni. A rilru-ah eng emaw hian a phuar a, thil eng mai pawh chu inlet but hian a hria a.

Lafferty-a aw ngei chuan, “Matt, tunah chuan engkim a fel tawh e‚ han en ve mah teh,” a rawn ti ta a.

Chu aw a hriat chuan Matt-a chu a ṭap ta hlawp hlawp a. Chêt a han tum a; a che sawn hlei thei lo va, a taksa pumin a khur a; mahse, a rilru chu lawmnain a khat thung si. Lehlam kawngka aṭang chuan hmeichhe ṭe chul ri a hre leh a; a han en a, Lily a lo ni a.

A lo phei a, Jack Lane-a ruang chu a ṭhutchilh a, fawh tumin a zuk kun a; mahse, thisenin a hmai a bual nasat êm avang chuan a fâwp ta êm lo; lungchhe zetin a ṭap zûi ta chiam a.

Lafferty-a chuan Matt-a chu nghet deuh hian a pawm a, Matt-a mittui tla zung zung pawh chu a reh zûi ta a. Lafferty-a chuan, “Matt, tunah chuan engkim a fel leh vek tawh ka tih kha. Engtin mah min ti na ve lo, ka him pial e,” a han ti a.

Matt-a chu thlahin Lafferty-a chuan Lane-a ruang bula Lily ṭhu reng chu a pan phei ta a. Matt-a chuan uiin a pu a zûi ang mai hian a hnungah a zûi hnak hnak a. Lane-a pûakruk phawi ranzia kha a hmuh chian êm avangin Lafferty-a thu sawi chu âwih harsa a ti zâwk hial a; mahse, a mit ngeiin a hmu tlat bawk si a, hliam eng mah tuar ve tlat si hek lo!

A bula a pasal lo phei chu Lily chuan hûat hmel tak hian a lo en chho va.

Lafferty-a chuan thu pe aw tak hian, “Tho vat rawh,” a han ti ṭhawt a.

Mittui dir zawih zawihin Lily chuan a lo melh khai mai a. Rang deuh hian Lafferty-a chu khawih tumin a han ban a; mahse, a kut chu Lafferty-a chuan hneh zet hian a lo mansak a. Lily chuan a kut lehlamin a theih tawpa ham vak hi a han tum leh a, a sik nawk nawk bawk a; Lafferty-a chuan a kut khing hnihin a ṭham khâwmsak ta tlat a.

Rei fe a dawm beh hnu chuan a nupui chu chiang zet hian a mitah a han en a, “Tunah in chhungah lût rawh; chuti lo chu, amah ang hian ka that ve nghâl ang che!” a ti ta a. A aw chu a chang fel fawl hle a, Lily pawh chu eng mah ti ngam tawh lovin in chhungah chuan a lût ta a.

Lafferty-a mi chhawr, Red Indian leh Mexican-te chu an nupui fanaute nen an lo chhûak a. Ani chuan, “A ruang hi la bo vat ula, khawiah pawh va phum rawh u. He laia thisen kai zawng zawng hi ti fai nghâl bawk rawh u,” a ti a. A inher a, in chhunga ama pindanah chuan a lût a, chawhnu thlang her thlengin a inkhung ta a.

Matt-a chuan a pu luhna kawngkhar inkhar chu ngawi reng hian rei deuh mai a en a. A thinlungah chuan mak tihna leh râpna a lo lût a, thihna ko tlanga dâk reng chung sia a puin hlauhna chhe tê mah a lantir lo kha mak a ti êm êm a ni.

Mi pahnihin Lane-a ruang chu an rawn la sawn a; hmeichhiate chuan chhûata thisen kai chu pawnchhe huhin an hru fai ta a.

Matt-a chuan sakawr pakhat a la chhûak a, tum bîk eng mah nei lem lovin a teihawi kual ta mai mai a. Lafferty-a chu a ngaihtuah zûi neuh neuh va. A thinrim lai chuan mi hlauhawm ber leh thinchhe ber hmel a pu a; a hnua hmeichhe zaidam theih tawp ang maia a han lang zûi leh mai kha mak a ti tawp thei lo a ni.

*******************

Lafferty-a ranch, Two Bar chu New Mexico ram chhunga awm a ni a. United State tualchhung buaina; chhim leh hmar, bâwih ban duh leh duh loh avanga indona râpthlâk tak lo chhûak khan chu lai huam chhung pawh chu a rawn tuam thleng ve ta thuai a.

Chanchinbu chuan Lafferty-ate awmna chu thleng pha lo mah se, San juan khawpui chu a rawn thleng pha ve a. Chanchinbu editor, Wilhite-a chuan chhim leh hmar chu indo mai peiha an in-ep thu leh, indona pawh chhûak thuaia a rin thu uar deuhvin a ziak a.

Chumi hnu lawk chuan tualchhung indona; America civil war kha a lo chhûak a, chhim lam chuan Union-ho kut aṭangin Fort Summer an la tih chanchinbu chuan a rawn sawi leh ta a.

Matt-a chuan bâwih a la hmu ngai lo va, buai lo chhuahna chhan chu a bul leh bal a chhui pha lo reng reng a, a ngaihna pawh a hre hek lo.

Lafferty-a erawh chuan a bulthum aṭangin a hre chiang hle a. San Juan-ah te, Alberquerque-ah te leh Santa Fe-ah te vantlang inhmuh khâwmnaah a tel ve fo va. Texas-a piang ni mah se, hmar lam; Union-ho chu an dik zâwkin a hria a, a thlawp pawh a thlawp zâwk a; chu bâkah, chhim leh hmar a hranga awm lo va, state inpum khata awm tlan dial dial chu a duh a ni.

Matt-a chuan Lafferty-a'n Union sipai a zawm ve-na chhan chu a nupui Lily laka inthiar flhlim a duh vang emaw, a pianphungah mi vantlang aia chenbeh leh pa tê a nih vangin mi pangngai a nihzia lantir a tumna kawng emaw niin a ring ber a.

Tûk khat chu Fort Union aṭangin cavalry regiment rual khat Two Bar-ah chuan an lo kal a, Lafferty-a chuan a sakawr lian zet chu a bûatsaih sawk sawk a, a thuamhnaw tlem nen chûngho rual chuan a kal ve ta daih a. A kal dawn chuan ama pindanah Matt-a chu a ko lût a.

Chutih lai chuan Matt-a chu kum sawm pahnih mi lek la ni mah se Lafferty-a ai chuan a sang zâwk mah tawh a. Two Bar ram, mel kil li tam tak bial pawh chu vawi tam fe a fang tawhin a hre chiang hle tawh bawk a ni.

Lafferty-a chuan ngun takin Matt-a chu a han en ang ren rawn a, "Tunah chuan naupang chumchiap mai ni tawh lovin mipa naupang fel tak i ni tawh zâwk a; kal bosan mai tur che chu ka ni rih lo nâin kal bosan che a ṭul tlat si a, ka kal poh aniang chu," a ti a.

Matt-a chu a bu nghat ringawt a.

Lafferty-a chuan, "Ka kal bo hlanin engkim hi i kutah ka hnutchhiah dawn a, i lo enkawl thei ang ti raw?" a han ti leh a.

Matt-a chuan huphurh hmel tak; mahse, chiang tak si hian, "Thei ang," tiin a lo chhang a.

Lafferty-a chuan, "Ka hre thiam e. Ka kalsan tur che niin ka hre Ieh ta lo zâwk, i la naupang lu deuh a ni," a ti a.

Matt-a chuan, "Naupang chhia mai zawng ka ni tawh lo ve, pawisa kan neih loh chuan bâwngte pawh khalh khâwmin ka hralh ve thei tho va. Hna thawh hmang engkim chu i hnen aṭangin ka zir zo vek tawh alawm," a ti a.

Tun hma pawha kar khat emaw, thla tam fe chhung emaw Lafferty-a chuan zin bosan chang a neih ngun tawhzia a ngaihtuah a; mahse, a kum thu hlaah zawng a la hriat phâk loh thil a ni.

Kawtzawla Union sipaiho zinga Lafferty-a va tel ve ta chu Matt-a chuan rilru nuam vak lo hian a en zûi vawng vawng a, Lafferty-a chuan Two Bar chu hloh hlen ta ang maiin a chan deuh rum rum a ni.

Lafferty-a chu a lo hawi lêt a, “Ka thei ang i tih chuan i theih ngei pawh ka ring, lo bei chhin phawt mai teh,” a ti a. Chutah, Officer pakhat hi a han áu ṭhawt a, an inher ta a.

An kal liam pah chuan Lafferty-a chuan Matt-a chu a rawmawlin a rawn vai a, an tlan liam ta a.

Matt-a chu amah chauhvin tualzawlah chuan a ding a, sipaiho kal liam tur chu an lan theih chhung zawng a thlir zûi a. A hnu deuhah chuan kawngkapui aṭangin Lily chu nau pawm chungin a lo chhûak ta a.

Lily chu hun rei tak pawn chhûak miah lovin a inkhar khum tlat a, Jack Lane-a leh Lafferty-a an inkah aṭang khan a tawm-im ta tlat a ni. A pasal kal bo daih tur pawh chu Lily hmelah chuan eng mah danglamna awmin Matt-a chuan a hre lo va, pawn borûak rawn dawng satliah ang mai hian a lang a ni.

Matt-a chu gallery kal tlangin Lafferty-a room-ah chuan a lût a, a thil hnutchhiahte chu ngun takin a en a, a pûakruk .44 a hmuh chuan mak a ti hle a. Muangchangin a la a, a mu te thunin a han hreng chhin a; mahse, a kawnghren chu a duh aia a thawl avangin ama hren tâwk turin a verh a, a han hreng ṭha Ieh a.

Lafferty-a chuan a enkawl turin a kutah engkim a hnutchhiah ta a; mal ngawih ngawiha inhriatna a nei a, a lung a lengin a ṭah te pawh a chhûak hial a, a insang ruh ṭeuh mai a. Jack Lane-a nen an in-draw lai te kha a mitthlain a hmu a, a rilruin, “Lafferty-a ang hian mi tak tak ka ni ve zo ang em?” tiin a inngaihtuah neuh neuh va.

Chumi ni chuan tih tur hranpa eng mah nei lovin Two Bar ram chu a fang nileng a. Lafferty-a kut chak takin Two Bar a enkawl dan chu a rilru-ah a khat a. Amah chuan a enkawl ve thei ang em? Chutiang hlir a ngaihtuah ṭhinna chu thla khat hnuah chuan a reh fel ve ta a, a ngaihtuah leh tawh ngai lo.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 21st, 2018, 8:44 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 3
(Rozami Pachuau)

lndo thangva chu a thawm a ring deuh deuh va. Thla khat hnuah Lafferty-a chuan Fort union aṭangin lehkha a rawn thawn a; a hnu lehah Chicago aṭangin; a bâk chu a reh ta daih a.

Thla tam fe hnuah San Juan chanchinbu-ah chuan Bull Run-ah Confederate (Chhim Iam sipai) chu hneh an nih thu headline-a hmangin a rawn chhuah a; khual thu thang aṭangin Lafferty-a chuan captain a kai tih a hre ta a.

Thla tam fe a ral leh hnuin Lafferty-a chuan Matt-a chu lehkha a rawn thawn leh a, indo chanchin leh a kai san thu eng mah a rawn hrilh lo. Lafferty-a lehkha aṭangin Matt-a chuan a pu-teho; Union lam chu an tlawm thuai a ring ringawt a, chuti a nih chuan Lafferty-a pawh a rawn haw thuai a beisei bawk a ni.

Mahse, indo chu a tawp mai awzawng lo va, Lafferty-a pawh a lo haw mai bawk hek lo. General Sibley-ate chu Texas aṭangin Rio Grande lamah an thawk chho va; mahse, Santa Fe kiang lawk Glorieta Pass-ah Union-ho chuan an lo ûm kir a ni.

San Juan chanchinbu chuan inbeihna hmun hrang hrangah chhim lam sipaite chan ṭhatna a chhuah khat hle a; hmar lam sipaite chak thu erawh chu hriat tur a awm reng thung.

Tunah chuan Matt-a chu kum sawm pali a ni tawh a. Chutih lai chuan Lily chu a hmu khat hle a, a fapa chu Maria Chaves, Mexican cowboy an chhawr pakhat nupuiin a awm ṭhin a. Lily chuan a hun tam ber chu San Juan-ah leh Alburquerque-ah a hmang a; a lo haw chang pawhin a pindanah a tawm daih a, tu ma chim buai lova ni rei tak a tawm bo hnuin a kal bo leh daih ṭhin a ni.

Chutih lai chuan Lafferty-a chuan major a kai tih tlangkam aṭangin an hre leh a; Two Bar nun erawh chu a la pangngai reng a; amaherawhchu, a ni telin an bâwngte chu a pung a, Matt-a chuan hun awl a nei ngai lo, bâwng notê thar chhinchhiah te, man khâwm Ieh an tilreh thlengin a thawk ṭhin a ni.

Mexican leh Indian cowboy pariatte nen thawh zawh tih nei lovin nileng ṭhak ṭhakin ranch-ah chuan an buai ṭhin a. Hun inher dan ang zelin bâwng rualte chu an awmna sawn kual a ngai fo va, nipui lai chuan Two Bar ram chhung tlang bulṭhut tui tlan tur tamna lamah an khalh khâwm a; chutiang bawkin thlasik lai chuan phairuam vur tlâk tlemna hmunah an khalh khâwm thung ṭhin.

A tlangpui thuin vur tlâk lai denchhenin bâwng an hralh a; in lamah sakawrte sâwizawiin thil siam ṭhat ngai leh sakawr in te, cowboy-ho riahna te an chei ṭha bawk ṭhin.

Matt-a chu kum sawm panga a lo nih chuan feet ruk a tling ṭhelh a, hna a thawh rim avangin puitling kum sawmhnih rual vêl angin a lang a, ni sa a tuar nasa tih a hmai sen uk khak danah chuan a hriat hle bawk a.

Lafferty-a pûakruk .44 chu chu a pai a, ni tin hian hun eng emaw ti chhung tal chu silai kah a zir ngei ngei ṭhin a. A pu Lafferty-a’n a hrilh angin phawi ran chu zir tel tho mah se, a tum kah fuh lam a bei ngawrh zâwk a. Lafferty-a’n Jack Lane-a a thah laia a pai ang chiah khan a pai ve a ni.

Kum 1864 October thlain Two Bar-ah chuan mi pakhat, pawr zet mai hi sakawr zin phah loh chunga chuangin a lo thleng hlawl mai a. Chu pa chu a ã deuh emaw ni tih mai tur hi a ni a, San Juan khua Red Indian-hovin zana an run thu leh mi pariat lai an thah thu hlauhthawn hmel takin a rawn sawi a; Ranch danga mite hrilh zel turin a tlan liam leh ta nghâl a.

Lily chu ranch-a a awm lai tak a ni a, mikhualpa thu sawi chu hrilh turin Matt-a chu Lily pindanah a han kal ta a. Chumi ṭum chu Matt-a’n rei tak chhung a biak tawh loh hnua a biak lehna hmasa ber a ni. Lily hmel chu tun hma aiin a danglam hlein Matt-a chuan a hria a, lungawi lo tum bur hmel a lo pu lo ve tlat a, Matt-a chu a lo melh ralh a.

Matt-a chuan a aw a han thian tê tê a, “Commanche ho khatin nizan mai khan San Juan an run a‚ mi pawh an that nual a ni àwm e. Nang pawh khawiah mah chhûakvâk lovin inah tawm reng la a ṭha ang,” tiin a han hrilh a.

Lily hmelah chuan pawisakna leh hlauhna reng reng hmuh tur a awm lo. Matt-a chu a leh alingin a lo ngaih melh a, “Ṭhu teh Matt, ka khua hi a har ṭhin teh asin! Nang lah hi kawm hman loh lek hian i awm a, hmun hran hranah i buai reng mai si a,” tiin a lo ngen a.

Matt-a chu nuam ti lo chung chungin Lily hma chair-ah chuan a ṭhu a, titipui tur a vàn kher mai. Lily chu khawhar hmel taka a Ian avang chuan a khawngaih deuh va; mahse, Lane-a a ngaihtuah chhûak thut a, Lily a lainatna zawng zawng chu a bo ta nghâl vek a.

Lily chuan, “Dan-a chanchin i hre hnai em?” tiin a'n zâwt a.

“Hre ngai lo, rei tak chhung lehkha mi rawn thawn tawh lo; ka hriat hnuhnun ber chu Dan-a’n Major a kai tawh,” Matt-a chuan a ti a.

“A chhuah tirh aṭang khan kei pawh lehkha min la thawn lo reng reng,” vui hmui pu deuh hian Lily chuan a lo ti a.

Matt-a chu eng mah sawi tur hre lem lovin a ṭhu ngawi kar a.

Lily chuan, “Eng nge i ngaihtuaha i ngawih reng?” a ti ta a.

Matt-a chuan, “Kan bâwngte chu a kal tâk achinah khan a lêt zetin an pung tawh asin,” a ti ta ringawt a. Chutiang thu chu Lily ngaihven zawng a ni hran lo.

Chu nuin a melh dan chu nuam a ti ta ngang lo va, “Gate te an kalh ṭha emaw, ngun deuh zâwka en fel ka duh a; kan mite’n silaimu an ngah leh ngah loh ka hre duh bawk,” tiin chhuanlam a siam a, a chhuahsan ta a.

Lily-i’n a melh dan chu a ngaihtuah a, a thinrim dawn dawn a. An ranch hna thawkte chu hung chhunga awm vek turin a ti a, an sakawr neih zawng zawng pawh a huangah an khung vek tawh a.

Lily chu a thawmhnaw nalh ber insilhin, a sam pawh ngun taka cheiin pawnah a lo chhûak ve a, an insingsa che vêl leh an inbûatsaih lai chu a lo thlir ngawi reng a. Nakin deuhvah chuan Matt-a chu a rawn au ta a.

Matt-a chuan a va pan nghâl a. Ani chuan, “Matt, zanin chu chaw i ei dun teh ang, mahni chauhva chaw ei reng mai zawng a khawharthlâkin tui pawh a tui thei lo,” a lo ti a.

Matt-a chuan hnial mai hi a han tum zet a; mahse, a lainat ru ta riau va. Tunah chuan ngaihzawng te vanga pasal te that duh hmel pawh a pu lo va, San Juan vêla nuam chena vâk vêl mai mai hmeichhe lepchiah ang pawhin a lang hek lo.

Matt-a chu kum sawm panga a ni tawh a, mihring dan pangngaiah chuan rawlthar chhûak chauh a la ni a; mahse patling, puitling a ni tawh, puitling mawh phurhna a Ia miau tawh a. Mihring nihphungah tun ang hun hi hmeichhe tam takin an ngaihzawn hun lai a ni tlat a ni.

A insil fai a, a inthlâk fel zawhin Lily nen chuan dawhkanah chaw an kil dun ta a. Chaw an ei khamin Lily chuan a fapa, Link-a chu a mut a, Matt-a buIah chuan a rawn ṭhu a, “Commanche-ho chu hêng thleng thlenga an lo kal i ring tak tak em ni?” a han ti a.

Matt-a chuan, “Ring hranpa lem lo," a ti a.

“San Juan-ah chuan an lo bei lêt ve lawm ni?”

“Eng mah hlauthawng duh suh,” tiin Matt-a chuan a han hnem ve tak nâ a; an in, a têt laia hmun fianrial deuhva a nu Ieh pate nen an chenna an rawn beih dan te kha a rilru-ah a rawn lang uar uar a, tu khaw ngaihsak mah hlawh lova a nu Ieh pa ruang let reng kha a mitthlain a Ia hmu chiang viau a ni.

A rilru-ah nawm loh rûkna a lo lût thut a, “Pawnah thil ka va en fel ang e, ka chhuahsan mai teh ang che," a ti ta a.

Lily chuan, “Biak pawh min be ṭha duh lo ti raw?” a lo ti a; mahse, a mitmeng chu a no hle thung a.

Matt-a chuan a hmaa a lo melh tawh dan a ngaihtuahin Lily rilru chu man thiamin a inhria a. Pawnah a chhûak a, a thlanfimin a bawh huh hluam a, a rilru chu bing mup hian a hria a, a kut chu a thing nawk nawk a, 'Lafferty-a chuan zanin hian eng tak ti ve ang maw?' tiin a ngaihtuah a.

Red Indian ral chuan rawn run tak tak ta se, engtin nge an lo tih ang? Eng mah vak tih theih neiin a inhre lo hle a, a tih ngaihna hre lo chuan a lu a hiat a, “A..., an lo lang tak tak êm lo vang," a han ti ringawt a; mahse, borûakah chuan hlauhawm rim cham rengin a hria a ni.

Chutih lai chuan sakawr pakhat hian a hnar a tum nghur nghur a, Red lndian-ho chu an lo thleng reng tawh a; varṭiana chêt tumin an la nghâk rih mai mai niin a ring ta a. Indian-ho chuan zan thimah ral an bei ngai zen zen tlat lo a ni.

Zan chu a rei duh hle mai. Matt-a chu bathlar tawpah chuan a va phei a, dai-kawngkhar hungna pal te chu a en ngun hle a. Commanche-ho tan chuan han bahlah phahna tur chhan eih awm hian a hre lo va, a hnim lutuk tlat.

In chhung pawh chu ṭan han khawhna chi ni hian a hre bawk hek lo va, Indian-ho laka himna khawpa in sak chu thil awlai tak zawng a ni lo reng a ni. Tlem tê tal ni se a ti hle mai a, San Juan runtute zawng zawng chu an rawn thawh vek a han ring lo rilru ringawt a; mahse, a ring tak tak ngam chuang si lo.

'Lafferty-a awm lai ni se,' a rilru chuan a ti vawng vawng a; nimahsela, Lafferty-a chu a awm miau si lo. Zanina a tih chu Matt-a tih a ni mai. Lafferty-a chu a ngaihtuah zûi duh ta lo va, ama hovin an lo do mai tur a ni.

Tuna Commanche-te zingah hian a nu leh pa thattute kha tel ve tak ang maw? A thin chu a han rim thut a; mahse, thinrim rikngawt pawh chu thil dik niin a hre leh lo va.

Eng vanga chu lai hmar lam ram hla tak thleng thlenga Commanche-ho chuan rawn run duh tlat nge an nih? Zawhna a inzâwt a, amah bawkin a chhanna chu a ngaihtuah chhûak a.

Sipaihovin an nek chêp vang ni berin a hria a; tin, tunlai ang indo hun lai hi chuan chûng lai an awmna hmun fianrial takah chuan sipai leh mipa an tlem a, chu chuan Red Indian-ho chu a ti ngampa zual a ni.

A rilru-ah thil pakhat a lo lang thut a; Indian-ho hi chuan sakawr hi an thil duh ber a ni a; an awmna bialah chuan sakawr man tur a vang tawh hle a; chutah, ngaih dan a nei ta a. A thil ngaihtuah chu ṭha dawn hle hian a hria a.

Khaw var dawn hnaihah chuan borûak chu a vâwt ta ruih a, thawm a reh vawng vawng a. Matt-a chuan Indian-ho hmuh mai inbeiseiin dai-kawngkharah chuan a va lawn a, an lo kalna tur àwm lam nia a rin chu a thlir kual a.

A bulah chuan chinchang ngaithlaa an ral veng, Greef-a a lo kal a, “Piah deuhvah sawn an awmin ka hria,” a rawn ti ta a.

Sakawr ina an sakawr thlun khâwm chu a phelh vek a, hung chhung tualzawlah chuan a khalh chhûak ta a. Chutih lai chuan mi dangte pawhin an rawn bawr khâwm a.

Ring deuh mai hian Matt-a chuan, “Commanche-ho chuan kan lak aṭang hian thil duh pakhat chauh an nei, chu chu kan sakawrte hi a ni. An lo thlen hunah dai-kawngkhar hi hawng ila, hmeichhe pakhatin an lam hawi hian va khalh chhûak se, an lungawi maiin ka ring. Sakawr an duh khawp an hmuh tawh ber chuan thih huama min rawn beih luih ṭalh an tan pawh a ṭul tawh lo vang, duh pawh an duh lo vang,” a han ti a.

Mi dangte pawh chuan kawng dang a awm lo tih hriain leh, dâwih zâwk chan a ṭul tih an hre thiam a, Matt-a rem ruat chu an rem ti tlang hle a. An bulah chuan hmeichhe pahnih an lo ding ve a.

Tunah chuan Red Indian-ho lo kal pawh chiang deuhvin an hmu thei tawh a, mi sawmnga thuar vel ni àwmin an lang a. Mahse, pakhat tê têa inzûiin thawm nei miah lovin sakawr chungah an chuang a, an rawn pan hnai zel a.

Matt-a chuan a nu leh pa thattu, amah fahraha siamtu-teah a chan thut a, a lûak a chhûak ut ut mai a.

Indian-ho ngawi renga lo kalte chu an che ṭan ta a. An ralthuamte chu a hmuh theih a, rifle te, chemtê leh sairawkherhin an infam ṭup mai a. An chêt hmangah chuan ral hrât mi an ni tih a hriat hle a. Rei lo têah an lo hnai ta hle mai a.

Matt-a chuan, “Dai-kawngkhar kha hawng vat ula, sakawr kha khalh chhûak nghâl rawh u,” tiin thu a han pe a.

Sakawr an ûm chhuah veleh hung chhungah chuan silai an kâp ri ta chiam a, a ṭhen an au vak vak bawk a, an thawm chuan sakawrte chu a ti hlau a, a mak a makin sakawrte chu an tlan ta dur dur a.

Matt-a chuan pal hungnaa chuangin a han thlir zûi a, rawn pan zel lovin Commanche-ho chu an ding ta a.

Dai-kawngkhar chu an khar nghâl a, Matt-a chuan, “Inring rawh u,” a han ti a. Pal hungna phenah chuan an insem darh a, thil awm dan tur chu an lo ngaichang ta a.

Anmahni lam pana sakawr rual lo tlan ta huk chuan Red indian-ho pawh chu hun eng emaw ti chhung a ti hamhaih a; chutah, sakawr man tum chuan an phusa ta hlawm a.

Two Bar-a mite chuan Red Indian-ho chu sakawr nena an in-ûm bo vek thlengin an thlir a.

Chumi hnu chuan pal hungna kawngkhar chu hawngin Matt-a chu a va chhûak a. Khua a vâwt hle nâin a thlantui chuan a bual huh hnêp a, a tirilah a khur der der a. Sakawr sawmthum chuanga Two Bar-a awmte nunna an chhan theih avang chuan hlawhtling a inti hle a ni.

Chutih lai chuan hung chhung lamah chuan thawm bengchheng tak a lo chhûak a; a ṭhen an ṭap a; a ṭhen an nui a, an ri nuai nuai mai a, an hlim tlang a ni ber ang chu.

Lily chuan kawngkharpui aṭangin Matt-a chu ngun deuh hian a lo thlir reng a; a bulah chuan a rawn phei a, a thlaphang ve hle pawh a ni ang, a hmel chu a dáng var pap mai a.

Matt-a chuan a lainat rilru deuh va. Lily chuan, “Matt, lo kal teh, kan pahnihin in tur kan mamawh a ni,” a han ti a. Ani chuan a pindanah a zûi lût ve ta mai a.

Lily chuan almira a hawng a, saidawium a la chhûak a, no pahnihah hian a thli a.

Matt-a chuan vawi khat mah zu a la tem chhin ngai lo va, duh pawh a duh hek lo; amaherawhchu, tunah chuan Lily chu hnial fithlâk a tum hauh lo.

Zu rim ringawt pawh chu a ngaithei mang lo va, tuisik in ang hian a han thâwkkhat pawp a; a pum leh a hrawk vél chu sa huai huaiin a hria a, a inthing nawr nawr a, a khuh khiah khiah mai bawk a. Mittui tla phungin Lily chu a han melh khai a.

Lily chuan a lo nuih lo va, hlau hmel a la pu deuh va. Matt-a hnenah chuan, “Ka han thlit leh che ang a, tlem i in leh chuan a hma ang kha a ni tawh hauh lo vang," a han ti a.

Matt-a chuan a châk tawh lo kher mai a; mahse, a in hmasak chuan hna a rawn thawk ṭan a, a ngaihtuahna te chu zangkhai ta vah hian a hria a. No dang Lily-i'n a rawn pêk leh chu a han lem leh pawp pawp a, nuam tihna rilru a nei ta tial tial a. A no thumna chu rang mangkheng hian a han tlâk leh pawp a, “Indian-te kha an lo kir leh hlauh tâkin pawnah tih tur ka nei, ka kal tawh ang e,” a ti ta a.

Chu velah Lily chuan, “Mi mak tak i ni, Matt. Rawlthar hawklak mai mai ni lovin pachang tak tak i lo ni tawh a nih hi,” a han ti heuh heuh va.

Matt-a chu a nui sak a. Lily chu a bulah a rawn ṭhu hnai sauh va, a hnute chuan a rawn nawk thawi a. Matt-a chuan Lily chu rimtui a ti hle a.

Lily chuan, “Min hlau a ni maw, Matt?” zawi sap hian a han ti a.

Ani chuan, “Ka hlau awzawng lo che,” a lo ti a. A rui tawh viau va, nuam hlein a hria a, pawisak tur êm êm pawh awmin a hre lo; mahse, Lily-i’n a beisei tlat mai chu a duh dan a ni lo hle a ni.

Lily chuan a rawn hnaih sauh sauh va, a nghawngah kuahin, a hmuiin a rawn nawr kual vêl a.

Matt-a chu a tho that a, a tan kal sawn thuai ṭha berin a hre ta a. A thinlungah inthiam lohna a lo lût a, thlemna a tuar a, a do zo lo ṭhelh a ni.

Lily pawh chu a ding ve nghâl a, thlem thlûk theihah a ngai ta lo a ni ang, a bula la awm tur pawh chuan a sawm zûi duh ta bîk lo va.

Matt-a chuan a lukhum a la a, pawnah a chhûak ta a. Khawi maw lai kil aṭanga ṭingṭang lo ri ṭeng ṭeng chuan a mipatna a ti zauthau thar leh teh reng emaw ni, Lily pindanah chuan va luh leh châkna a neihtir ta tlat a.

A kir leh ta nge nge a. Kawngkhar bul a va thlen chuan Lily chuan kawngkhar chu a rawn hawng ve chiah a; Matt-a a han hmuh chuan eng khaw sawi sei set lo hian ànchhe tinreng a lawh nghâl ta bawrh bawrh a.

Matt-a chu chak deuhvin a tlan a, a pindanah a inkharkhîp ta tlat a. A lungphu a su dup dup a, a inthiam lo nasa êm êm mai a.

Lily khan a hma ang bawk khan lo be ṭha chu ni nâ se zawng..., a ngaihtuah ṭha ngam lo. Lafferty-a lo hawn hunah Lily chuan an awm dan hrilhin, a nau chuam anga a en a lo mutpui theih avang chuan a lo uan khum ngei ang a, a chan tur chu a va’n zahthlâk dawn êm! Jack Lane-a chunga thil thleng te kha a han ngaihtuah a, khur der derin a muhil ta a.

Commanche-ho chu an lo kir leh ta lo va. Two Bar cowboy chhawr zinga Red Indian ve tho chu an hnu chhui zûi turin an tir a, chhim lam hla takah an kal bo tâ tih a va hria a, ngaihngam takin Two Bar-a mite chu an awm leh thei ta a.

Matt-a chu inah a awm ngai mang lo va, Lily pawhin a ti buai nawn leh tawh bawk hek lo. Indian-ho lo lan zan aṭang khan Lafferty-a nupui chuan zana mutpui tur mipa a mamawh hle tih a hre chiang a, chu chu a thupui ber a ni hial àwm e!

Matt-a chuan an bâwngte chu an thlahna phaizawlah a awm chilh rawt a, in ai chuan nuam pawh a ti zâwk a; Lily hmel hmuh fo chu a kham ve deuh bawk a ni. Two Bar ramri dep khawi maw lai laiah an cowboy-te chu ral ven bûk a saktir thluah a, a khat tâwkin a kan lawr fo ṭhin a, an hna thawhna kawngah pawh a remchang hle a ni.

Chutih lai chuan Lafferty-a chuan colonel a kai tawh a; mahse, chanchin eng mah Lafferty-a hnen aṭang chuan a hre ngai lo va, lehkha pawh a rawn thawn ngai tawh hek lo. Lily a ngaihtuah chhuah apiangin a pu lakah chuan inthiam lohna nasa tak a nei ṭhin a ni.

An ran vulh a pun ang hu tâwkin mi pawh an rawih belh ve zel a. Chûng an mi chhawrte thunun tur leh an hna enpui turin inpui a tlawh ve reng a ngai fo va, ina a va haw chang pawh chuan Commanche-hovin rawn run an tum zan ang kha chuan Lily chuan a lo uksak ngai tawh lo a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 22nd, 2018, 11:17 am

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 4
(Rozami Pachuau)

Jefferty-a fapa, Link-a chu kum sarih mi a ni tawh a. Lafferty-a emaw, Lily emaw chhunna a nei hauh lo va. A kum ngaihtuahin a ṭhang chak hle a, ria ṭheu, mitmu dum, sam ngil tak, dawldang zet hi a ni a.

Two Bar ranch chu a ṭhang lian tawh bawk a, inpui chu mi tam takin an rawn tlawh ṭhin a. Matt-a chuan chûng rawn tlawhtute chu a lo ngaihsak ngai teh chiam hran lo va, a hna niin a hre lo bawk a ni. An ranch-a lo kal mi ṭhenkhatte chu vanneihna zawnga vâk kual vâk kual mi an tih angte hi an ni nawk a, Lafferty-a chu indonaa a thih palh tâk hlauva Lily rim thlûk a, Two Bar rochun inbeisei tâte an ni.

Lily-i chuan a mipa mamawh bansan thei mawlh hek lo, an cowboy chhawrte, mingo an ni emaw, Mexican an ni emaw, a tu pawh, Indian thlengin a hmel duh zawng chu pawisak nei miah lovin a riahpui hmiah hmiah mai tih Matt-a chuan a hre chhuak ta a. Chutianga Lily lo khawsakpuitu chu kah hluma vaute pawh Matt-a chuan a nei nual a; mahse, Lily ber chuan a sim thei chuang lo.

Matt-a chuan kum sawm paruk (16) mi a nihin an mi chhawrte chu a duh angin a thunun thei tawh a, tu ma’n a thu an hnial ngam ngai lo. A duh loh zawng chu a ban mai ṭhin a, tu mahin an cho ngam bawk hek lo. Englai pawhin pûakruk a pai a, a phawi ranzia leh a kah thiamzia chu an hre chiang a; chu bâkah, tharuma insual ralah pawh duai lo tak a ni.

Manuel Vargus-a leh Texas mi, Lucas Payne-ate chuan Lily an mutpui ṭhin a.

Thlasik vur tlâk zual lai tak hian Matt-a chu a pindanah ranch thil pawimawh vêl buaipuiin a ṭul hle mai a. Khawlaiah chuan mipa aw vin taka han au ṭhat ṭhat hi a han hria a, eng thil nge thleng ta tiin pawnah chuan a va chhûak ta a.

Mi pakhat, pûakruk vilik chunga kawngkharpui lam hawia ding hi a va hmu a, in chhung aṭanga khawnvar engin a chhun avangin chu pa chu Manuel Vargus-a a ni tih a hre nghâl a. Chu pa chu an mi rawih thar a ni a; san lamah Matt-a chu a chen thuak a; a taksa erawh chu a pan zâwk a.

Matt-a chuan khawi lai hmunah emaw chuan Vargas-a chu wanted a ni ngeiin a ring a. A rui hle a, pawn lam aṭang chuan Lily chu kawngkhar hawng turin a àu vak vak a; Lily pindana awm, Lucas Payne-a chu a cho tel nghâl bawk a.

Matt-a chuan sir lam aṭangin a va pawh thut a‚ "Bengchheng tawh suh! I hlawh rawn la la, Two Bar ram chhung hi i chhuahsan nghâl ang,” a ti ta a.

Vargas-a chuan a pûakruk phawi mai a han tum a; mahse, Matt-a hmel a hmuh chuan a kut chu a dah thla nghâl thuai a. Rui aw tak hian, “Tuna in chhunga thil thleng mek saw i ngai pawimawh na nge?” tiin a lo zâwt a.

Matt-a chuan, “Eng nge thleng a?” tiin a han zâwt lêt a.

Thîk aw tak hian Vargas-a chuan, “Payne-a nen an awm dun alawm,” a'n ti nghat a.

Matt-a chuan chang tak hian, “Eng nge chu chu a pawina? I ta a ni hlei nem,” a'n ti a.

Vargas-a chuan, “Lily hi maw?” a han ti ha a.

Matt-a chuan, “Ranch chhuahsan turin ka hrilh tawh che kha. Ka hrilh nawn leh kher che i phût dawn em ni? Nang pawhin Lily hi i tawmpui ve tho. Lucas Payne-a pawh nangmah ang bawkin naktûkah a chhûak ve ang. A tua mah mahin in khuaikhem tawh dawn lo!” aw chiang hrêk hrâwkin a ti ta hmiah a. “Tunah i hlawh la turin mi rawn zûi rawh,” thu pe aw khauh tak hian a han ti zûi a.

Vargas-a chuan thîp zet hian Matt-a chu a han melh a; mahse, Matt-a thu chu a hnial ngam lo, sawi nawi chu thihna a ni ngei dawn tih a hre tlat a ni.

Hlawh an inpêk fel hnu chuan Vargas-a chu a chhûak ta hna hna a. A hnu lawkah chuan kawngkhar chu a rawn inhawng a, Payne-a chu a lo chhûak ta a.

Matt-a chuan, “Payne,” tiin a han ko ṭhawt a.

Ani chuan a rawn pan phei a, Matt-a chuan a hlawh lo pêk pahin, “I tha leh zung kan mamawh tawh lo, khaw var veleh Two Bar i chhuahsan nghâl tur a ni. Naktûk hnu lama ka la hmuh che chuan ka that ang che,” a han ti hrâwk a. A thinrim hle nâin, Lafferty-a awm lo chu a lawm hle a ni.

Payne-a chuan chaltlai zet hian, “I huang bîk; mi dang kal phal lohna chin rawn daiah min ngai em ni?” a han ti a.

Matt-a chuan eng khaw sawi set set lovin a hmaiah a hnek ṭhuai mai a. A hnek na tâwk bawk a ni ang, Payne-a chu gallery lung rem chungah chuan a tlu zangthal ta hual a. A ka aṭang chuan thisen a lo chhûak zur zur a, Matt-a chu thah châk tih hriat tak hian a han en a, dai-kawngkhar lam panin a kal phei ta a.

Matt-a chu a pindanah a lût a, thukah meihawl tlem a dah belh a, a thawmhnaw a hlîp a, a mu ve ta a. Eng tikah tak indo chu tawpin Lafferty-a chu lo haw ve tak ang maw tia inngaihtuah chungin a muhil ta a.

Thil ri ṭhuai hian a mu tui lai chu a ti harh zawk a, “Eng chu ni dawn maw?” tiin a tho va, khumah chuan a ṭhu a, thawm a ngaithla ta vang vang a. Nakinah chuan a pûakruk paina kawnghren a hreng a, kawr pawh ha chuang lovin pawnah chuan a chhûak ta a.

Vurzam chunga pheikhawk rahna hnu chu a hmu ta a. Lily pindan lam hawiin hniak chu a phei a, Matt-a chuan a pan ve ta vat a. Kawngkhara Vargas-a lo chhûak chiah nen chuan an intawh chilh a, Matt-a chuan a pûakrukin a lu-ah a lo tin a, in chhungah chuan a nawr lût leh ta a.

Chutih lai chuan Link-a chu thlabar takin a ṭap vak vak a; Lily thawm erawh chu a reh hmiah thung a. In chhung chu a thim hle a, dawnkanah chuan nawhalh leh khawnvar a dap fuh ta a. Khawnvar chu a chhi a, pindan chhung chu a han melh kual ruai a, Lily chu chhuatlaiah thisen chiah nuaiin a lo tlu a, Link-a chuan mangang tak hian a nu chu a lo kuah a.

Matt-a chu a han ṭhingṭhi hniam a, Lily chu a lo la thaw hrâwk hrâwk a; mahse, a thaw ri aṭang chuan a thi thuai ang tih a hriat hle a. Lily chuan harsa ti takin Matt-a chu a rawn melh ṭâwk ṭâwk a, eng emaw sawi tumin a hmui a han chêt a; mahse, eng mah sawi thei lovin a mel âwrh âwrh a, a che zûi ta lo va.

Matt-a chuan Link-a chu a en vawng vawng a, a tan engmah tih theih a nei lo. Lily chu a thi tawh a, Vargas-a chu a thattu a ni a, khai hlum tur a ni mai.

Mi dangte pawh Lily pindanah chuan an lo lût a. Matt-a chuan Vargas-a chu kâwkin, cowboy dangte hnenah chuan, “Phuar ula, naktûkah San Juan-ah kan hruai dawn nia,” a han ti a.

Lily ruang chu puanin an khuh a. Matt-a chuan a naupan lai zawnga lo enkawltu Maria-i hnenah chuan, “Maria, Lily ruang hi lo chei ula, naktûkah Vargas-a rualin San Juan-ah kan phur phei ve nghâl dawn nia,” a han ti leh a.

Lily ruang chu Two Bar ram chhunga phum a duh lo reng reng a. Lafferty-a leh ama tan pawh Lily thlan hmuh fo chu thil nuam a ni kher lo vang.

Khawfing a lo chat ṭan a, Matt-a chuan kawr a ha lo tih a inhriatin inthuam lum turin a pindanah a lût a. An chaw chhum Slen-a chuan ei tur tlem a rawn lâksak a; eng mah phei chu a ei lo.

Matt-a chu a insiam peih hnuin pawnah a va chhûak a, tawlailir pahnih chu kal mai peihin a lo awm tawh a. Lily ruang phurtu zâwk chu mi pahnih a khalhtir a; Vargas-a phurhna chu amahin a khalh thung a.

Vargas-a pawh chu a rawn harhfim tawh a, a pawi khawih leh a chunga thil lo thleng tur pawh chu a hre tlang nghâl vek a, lungngai takin a ngawi reng a.

San Juan County-a an Sheriff chu pa hang deuh tak a ni a, a hming chu Jaramillo a ni. Matt-a’n Lily thih dan a sawi chu ngun deuhvin a lo ngaithla a, Vargas-a chungchang a kalpui dan tur pawh a hmel aṭang chuan a chhuidawn thei a ni.

Lily chu San Juan thlanmualah chuan an vui a, Matt-a leh a ruang phurtu mi tlem tê tih loh chu mi dang tu mah Lily vuinaah chuan an tel lo.

Ranch lam pana an haw kawngah Matt-a chuan, 'Lily chu a awm tawh lo va, tunah hian la dam reng ni se; Lafferty-a lo hawn hunah Commanche-ho lo lan zana thil awm dan kha dâwt tlem belh zeuhvin, Matt-a nen kan mu dun han ti mai se,' tih angreng vêl a rilruin a ngaihtuah mai mai a.

Kawng ṭhenkhatah chuan a thi ta mai chu hnara hlît phawi ang huai ni zâwkin a hria a. Amah vangin Jack Lane-a a thi a, ni rei lo têah Vergas pawh an khai hlum dawn bawk. La dam zel ta ang se, Lafferty-a pawh a hnawt bo emaw, a thihna hial emaw pawh a thlen maithei a ni.

Matt-a chu la naupang hle mah se, Lily pian sualna, mipa laka a sihhnip êm êm chu a chhan a ngaihtuah a. A tun hma nun a hriatpuiin amah Lily ngei pawhin insiam ṭhat duh hle mah se, a theih lohzia a hriat chianpui a. A khawlohna khan a nun a vaw lêt nasa tih pawh hriatsakin a inhria a ni.

Santa Fe aṭanga Judge an chah chu thla khat ral hmain San Juan-ah a lo kal a. Thubuai sawinaah chuan Matt-a chu amah chauhvin a kal a; a thil hriat, Lily-i kah a nih veleha Vargas-a chu pûakruk hum chunga kawngkhar bula a man thu a sawi a.

Darkar chanve pawh tling lovah ro reltu chuan an thubuai chu a rel fel ta der a. Vargas-a chuan thiam loh a chang a, khai hlum turin a chungthu an rel a, an khai hlumna ni atan chuan April ni 9 rûat a ni.

An thubuai sawi zawhin Matt-a chu khawi hmun dangah mah khawtlai lovin Two Bar-ah chuan a kir leh ta nghâl a.

Ni eng emaw zât a ral hnuin indo a tawp hnai tawh tih San Juan chanchinbu chuan tlem têin a ziak ve a. Chhim lam sipaite chu hmun tinrengah an chan a chhia tih theih a ni.

Matt-a chuan Vargas-a chu hûatna hranpa nei lo mah se, an khai hlumnaa awm ve ngei chu Lafferty-a duh dan a nih a ring a, April ni 8-ah chuan San Juan lam panin a chhûak leh ta a. Tlai thim dawnah a thleng a, Hotel-a a innghah fel hnuin kawtthlera an khai hlumna tur chu a va en ta a.

An khai hlum laia lo thlir ve mai mai chu thil danglam teh chiam turah a rûat hran lo va, lâk run turah pawh a ngai hek lo. Jack Lane-a thi lai a hmu tawh a; Lily pawh chuti bawk; Vargas-a pawh chuti tho tur.

Nimahsela, a tûka Vargas-a, jail aṭanga khai hlumna tur hmun an rawn panpui lai a hmuh meuh chuan a ngaih ang ngawt chu a ni lo tawp a, a rilru chhunga a thawh dan a danglam ta zar mai!

Khai hlumna dawh sana a lawn tur chu Sheriff Jaramillo-a’n a hnung lam aṭangin a han dawm chho va, Vargas-a hmai chu puan dumin an tuam ta a. Matt-a chuan mit la lo lekin a lo thlir a. Vargas-a lu-ah chuan hruih valh chu a khai hlumtu tur-pa chuan a han rawlh a, a valh insuihna chu a hma lam aia tlema sir hretah a dah a.

Khua a vâwt bawk a, mi an tam lo hle a. San Juan Mission puithiam pakhatin Vargas-a chu thu tlem a hrilh a; chumi hnuah a thlarau tan a ṭawngṭaisak a; a thu chham chu Matt-a chuan eng mah a hre lo.

Dawh san aṭanga puithiam a chhuk hnuin Vargas-a dinna thang hum chu an kuai phet a, borûakah chuan a inthen ta nawlh a. Vargas-a chalchang han insang mar vêl chu Matt-a chuan hmuh hrehawm a ti kher mai, lehlam a hawi sawn daih a, a khua te pawh sik ur urin a hre hial a.

Vargas-a thâwk tawp rual vêl chiah hian chhim lam sipai, Confederation-ho pawh an thâwk a tawp ve ang a ni a. A tûkah chuan Appomaltox-ah General Lee-a'n an tlawmna thu a ziak fel ta a. America tualchhung buai chu a tawp a, hmar lam; Union-hovin hnehna an chang a; chawlhkar khat hnuah Dan Lafferty-a pawh in lam panin a lo haw ve ta a.

*********************

Lafferty-a chu April thla laihawl vêlah lo chhûak mah se, in a rawn thlen tak chu June thlaah daih a ni a. Matt-a chuan a hmûak a, ralkhat aṭang pawhin a hmel a paih hle tih a hre thei a.

Tun hma ai khan a cher hle a, a sipai colonel form chuan a la inthuam nâin vaivutin a bawh nasa lutuk a, sipai officer pawh a ang lo. A hmai te pawh chu a chuar tawh a, a mitmeng chu a hah hmel hle a.

An han inhmuh chuan Lafferty-a pawhin Matt-a chu mak a ti hle mai a, “Good God!! Matt, ka lawm kher mai, nangmah i ni tak zet maw? I ni tak tak em?” a ti chul a.

Matt-a chuan bing chuk chukin a inhria a, han pawm chawt mai a duh a, “Keimah ngei kha zawng ka la ni alawm; hman ai kha chuan ka lo ṭhang lian ta deuh a ni ang,” a han ti ve a.

Lafferty-a chuan, “I ṭhang tak zet mai, a ṭha zawngin i ṭhang lehnghâl. I naupan lai ai kha chuan i hmel pawh a ṭha zâwk daih, ka lawm kher mai. Engtin nge Lily-i?” a han ti a. Lily hming a lam rual chuan a mitmeng pawh a fiah sawt a.

Suan mu dawlh ang mai hian Matt-a chu a áwmah hnawhtu a awm tlat a, ṭawng pawh a ṭawng hlei thei lo. Lafferty-a hmel pawh chu en ngam lovin a hawi sawn a.

Lafferty-a chuan aw chiang hrêk hrâwk hian, “Lily chanchin ka zâwt che a ni,” a han ti leh a.

“A awm tawh lo.”

An mit takah an inen a. Matt-a chuan, “A thi tawh,” a han ti leh hram a.

Lafferty-a hmelah chuan manganna a lo lang a, “A nih leh ka fapa ve kha?” a ti a, a aw chu a tham ṭuak a.

Matt-a chuan, “Engtin mah a awm lo, a ṭha e,” a ti a.

Lafferty-a chuan hmai sen awp awpin, “Eng vanga thi nge?” tiin a zâwt ta a.

Matt-a chuan Lafferty-a thindamna zawnga thluaithlum dan tur a han ngaihtuah hmasa tê tê a. Lafferty-a chuan a dawh thei tawh lo, hruia han vai fua ang mai hian, “Tunah a thih dan ka hre duh,” a han ti fiak ṭhawt a.

Matt-a chuan, “Kah hlum a ni. A kâp hlumtu chu kan cowboy-te zinga pakhat Vargas-a a ni a; ani lo pawh bialpa dang mi pakhat a la nei. An pahnihin i kal bo hnua kan chhawr a ni," a ti a.

Chutiang thu lungchhiatthlâk sawi chu hahthlâk a ti hle a. Colonel hmel buai nak chu a en ran mai a. Lafferty-a hmel chu a dang láp mai a; chuti taka a tuar hmel chu a hmuhin Matt-a chu a tim sawk a, a vei tak meuh niin a hria a, hlauh pawh a hlau deuh rum rum a.

Lafferty-a chuan, “Vargas-a chu engtin nge ni ta?” tiin a han zâwt a.

“Chhim lam sipaite tlawm ni chiah khan an khai hlum.”

“I hre chiang chiah a maw?”

“Hre chiang e, an khai hlumnaah ka kal ve a, a thi chiang bal.”

Colonel chu rei fe a han ngawi vang vang a; a tawpah chuan Lily chanchin sawi zûi a duh tawh loh thu Matt-a chu a hrilh a, “Ti rawh le, in lam i pan ang,” a ti a, an sakawrah an zuang kai ta a.

An haw kawngah chuan Matt-a chuan titi pangngai a vawrh leh thei ta deuh a. Lafferty-a chu a awm loh chhunga ranch-a thil thleng pawimawh zawng zawngte chu a hrilh a. Tin, Two Bar lo ṭhan dan Ieh an ran lo pun dan te, bâwng hralhna man pawisa ṭhahnem tâwk tak a khâwl tawh thu te a hrilh vek a.

Amaherawhchu, mi sual, tute’n emaw an bâwng an rûk zeuh zeuh thu erawh chu a hrilh tel duh lo va, a inah Lafferty-a ngeiin hmu chhûak se, a duh ang takin an chungchang rel rawh se tiin a khêksak a ni. Lafferty-a chuan a duh dan ang ngeiin a kalpui ta ngei reng a.

Colonel chuan in a thlen veleh a thawmhnaw a thlâk a, ama pindan pangngaiah chawhma a inkhar khum a; chawhnu lamah a lo chhûak zawk a; chumi hnua a lût leh chu a tûk khaw var thlengin a tawm ta vang vang a.

A lo lan leh chuan Link-a chu a rawn pawm chhûak a, chumi tûk aṭang chuan a sipai form chu a ha leh ta ngai lo reng reng a. Cowboy thawmhnaw pangngaia inthuamin sakawr a la chhûak a, Link-a tan sakawr dang pakhat a buatsaih bawk a. Sakawr chunga a han chuantir chuan Link-a chu hlauvin a ṭe chhe nasa mai a, Lafferty-a chuan tih ngaihna a hre lo hle a ni.

Nilengin an pafain an va chhûakvâk a, an lo haw leh lam pawhin Lafferty-a chuan Link-a sakawr chung chuan hlauhna chu a ti reh chuang lo. A pa hmel a en apiangin Link-a chuan hûatna nen a en ṭhin.

Lafferty-a chuan, “Hmeichhiate’n an fate an tih khawloh theihzia hi Link-a aṭang hian a hriat hle mai!” a ti ta thlawt a.

Matt-a chuan, “Kum sarih mi chauh a la ni a, sakawr a hlau pawh hi a àwm ve bawk alawm,” tiin a thlavang chu a lo hauhsak a.

Lafferty-a chuan, “Nang chu i ni ve lo,” a ti a.

Link-a chu sakawr chung chuan zirtir tumin ni eng emaw ti chhung a chuan luihpui a; nimahsela, eng lai mahin chu mite pafa chu an inkawm ngeih ngai lo.

Link-a chu a tum deuh reng mai a, a pain a tih theih tâwk àwm leh zir thiam ve se a tih ang chu a ti duh lo fai vek a. A nuin a pa haw àwm taka a hau ṭhin te kha la chhawngin ànchhe lawh mai a ching hle a, a nu khan a pa chu haw ve hrim hrim turin a zirtir pawh a ni maithei. Lafferty-a dawh theihna chuan a tlin lo vang tih Matt-a chuan a lo hlauthawng hle ṭhin a.

Ṭum khat chu Matt-a leh Lafferty-a kal chhûak chu Rel station tê reuh tê-ah hian ruahpui leh rialin a dang a.

Chumi ṭum chuan Lafferty-a chuan, “Link-a chungchang hi ka ngaihtuah hle mai!” a ti chhûak ta phawng a.

Matt-a chuan, “Kei pawh,” a lo ti vat a.

Lafferty-a chuan, “Theih tawp chhuahin sakawr chùan ka zirtir a; mahse, tun thlengin a sakawr hlauhna pawh a la reh chuang lo. Ka beih nasatzia chu nang pawhin i hria; mahse, a sâwt mawlh lo. Nangmah ang tur hian ka duh a ni,” a ti a.

Matt-a chu a ngawi reng a.

“Thil ṭha lo lam apiang hi a nuam tih zawng a ni a; chu bâkah, ṭawng chhe pui puia mi chhan vak vak te hi a ching dawklak tawh zu nia!”

Matt-a chuan, “Keimah hi alawm, thil zirtirtu ber tur ka nih teh lul nen, hun ka nei lo êm a; a nu ànchhia chauh tunah chuan a zir chhuak a ni,” a lo ti a.

Lafferty-a chuan, “A rundalah hrui hman dan leh cowboy hna thawh ṭhenkhatte chu a zir ve nâin a chang chang chauhvin a ni; thiam tak tak tumna a nei miah lo va, a peih bawk lo,” a ti chuai leh raih a.

Ruah a ban hnuin Matt-a chuan thirhrui thawntu chu Rel an la nan hman tur leh tur loh a va zâwt a, an la hman thu a lo hrilh a, in lam panin a haw ve leh ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 22nd, 2018, 10:19 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 5
(Rozami Pachuau)

Indo a han reh fel tâkah chuan San Juan khaw borûak pawh a dang ta hle a. Mite an zalenin nuam lenga theulêu mai mai pawh an tam hle a. Chhim lam sipai leh hmar lam sipaite chu innel takin saloon-ah zu an in tlang a, indo laia an inhmelmâkna chu an hre zûi reng lem lo.

Hna mumal nei lo, têi rawlai mai mai an tam a, pûakruk hmachhuana ei zawng; gunman; pawisa hlawh nana eng mah tih hreh nei lo an zi nuk bawk a. Chutianga mi leh sa inpawlhna karah chuan Two Bar bâwng rûk hmangte pawhin an la ching chhunzawm zel a.

Lafferty-a chuan a hre chhûak ta thuai a. A fapa nen sakawr chung chuanga an ram an fanna lamah mi pahnihin an bâwng an lo khalh ringawt chu an va hmu a; mahse, ûm zûi lovin ina an hawn hnuah Matt-a chu a zâwt chiang a, “Kan bâwng, mi pahnihin an ru lai ka hmu a, tun hmain an ching tawh em?” a han ti a.

Matt-a chuan, “Thla hnih vêl a ni tawh ang. An hnu ka hmu zauh zauh fo va; mahse, tam phei zawng a ni lo. Tute emaw chuan ei zawn nan an hmang ni àwm tak a ni‚” a ti a.

Lafferty-a chuan a hauh nek a ring deuh va; mahse hau lovin, “Tun achinah chuan kan ti tawp vat tur a ni; a chhan chu, tlem tê têin min rûksak rei lo vang, him taka tlem an rûk theih chuan tam deuhvin a zûi thuai ang,” a ti ta hlauh a.

Matt-a chuan, “San Juan-ah kalin sheriff ka va pun dawn em ni?” tiin a han zâwt a.

Lafferty-a chuan a Iu a bu nghat a. A tûk zingah Link-a hruaiin San Juan-ah chuan an va kal ta a.

Tlaia an lo kir leh chuan a mitmeng chu thinrimnain a khat a. Matt-a hnenah chuan, “Engtin maha min ṭanpui theih loh thu leh, Two Bar bâwng rûk ching ûm tura deputy a neih loh thu min lo hrilh a. Rûkruho lak aṭang chuan keimahni lo inenkawl ve mai turin min ti bawk. Anni rin chhan lovin keimahni’n dan kan chelek a ngai ta a nih chu, kan inenkawl thei ngei bawk ang,” a ti a.

A duh ang takin Lafferty-a chuan a bâwng rutute lakah chuan kut a thlâk ta reng a. Chu thil chu Matt-a leh San Juan khuaa mite chuan an theihnghilh thei tawh ngai lo vang. San Juan aṭanga a lo kir hlim khan an cowboy-te hnenah, “Rustler-ho hnu thar in hmuh veleh min hrilh nghâl thuai tur a ni; pakhat chauh pawh ni se,” tiin thu a pe a. Mi sualhovin bâwng an rawn rûk leh hun chu an nghâk ta a.

Chawlhkar khat hnuah an cowboy chhawr pakhat, Vigil-a chuan bâwng sawm panga (15), mi paliin an rûk thu chawhnu thlang her, tlai tawh takah hian a rawn thlen a. Lafferty-a chuan a cowboy-te chu amah ngeiin kilkâwiin, Link-a leh Matt-ate pawh telin Vigil-a hnu-hma hmuhna lamah chuan a tlai a tlaiin an chhûak ta nghal a.

Zankhuain an kal a, khaw var hma deuhvin rûkruho chêtna hmun chu an va thleng ta a. Leilung a lan chian theih veleh an theih anga chakin an ûm ta vat a. An sakawr a chauh hnua a thlâkna tur sakawr dang an keng bawk a, an tlan chak hle a, chawchhun fâk hun hnaiah ran pal khûk vaivut chu an hmu pha ta a.

Lafferty-a chuan hmelma beih dan, indona aṭanga a zir chhuah chu a hmang a. An hnu chhui thiam, Red Indian-pa leh mi dang pahnihin mi sualho chu an ûm ngar ngar ang a; mahse, hmuh mai theih loh turin an inthup tur a ni.

Lafferty-a leh mi dangte chu an hnung deuhvah an hmaa mite thawm hre phâkin an awm zel ang a; chutah, bâwng rutute chuan an bâwng khalh lai chu tlanchhiatsan a, khawi lam hawi zawng pawha tlan bo an tum a nih chuan an lo lehkhalh dawn a ni.

Rûkruho chuan tlan bona hun an nei eih lo, an va nanchin dawn chuan Matt-a chu a phur kher mai. Rustler-ho chuan tlanchhiat pawh tum chhin lovin Lafferty-ate chu an lo nghâk ṭham a, an lo inpe tawp mai a ni.

Lafferty-a chuan, “In silaite kha paih thla rawh u; a nih loh leh, hman han tum chhin teh u; mahse, ngun takin inngaihtuah hmasa ula,” a han ti a.

Rustler zinga pakhat chuan a pûakruk chu a han chuh nghal rap a; mahse, Lafferty-a silai chu a ri ṭhuai a; Matt-a pûakrukin a zûi nghâl zat bawk a, chu pa chu pum dawm vawng vawngin vaivutah a tla ta hnawk a. Mi dang pathumte chuan an ban an phar a, Vigil-a chuan an silai a va khâwmsak ta a.

An mi mante nen chuan an haw Ieh ta a. Lafferty-a chuan engtin nge a tih dawn tih Matt-a chuan a hre lo nâin, dàn kuta a hlan chu a ring chiah lo a ni.

Sakawra an tlan laiin Lafferty-a chuan Matt-a chu ngawi rengin a va melh leh zauh ṭhin a, eng emaw tak tum a nei tih chu a hriat hle a. Lungngai hmel a pu lek lek a, a thinrimna chu a la up hram hram a ni.

Colonel hnungah chuan Link-a chuan a zûi a, a hmel chu a dáng var bai mai, a tum bar a, lungawi tak hmel hi a pu ngai lo reng reng a ni.

Matt-a chuan a ngaihtuah neuh neuh va, Lafferty-a hian mihring pangngaia din chhuah chu a tum a ni phawt a. Tunah kum riat mi lek a la ni nâin, tharum thawhna a hmu hnem lutuk tawh niin a hria a; chuvangin, rustler-ho chu an kâp hlum emaw, an khai hlum emaw pawh ni se, a eng amah chu hmu ve miah lo se a duh a ni.

Mahse, Lafferty-a chuan chutiang chuan a tih a ring bawk si lo. Amah Link-a chuan en duh lo pawh ni se, a pa zâwk chuan a nawr luih tho tho a ring a ni.

Link-a hnung chiahah chuan Red Indian hnu chhuitu Julio-a chu a kal a, a hmel chu a ngeng lûp a. Matt-a chuan, 'Eng tak ngaihtuah ve ang maw?' a ti rilru a.

Julio-a hnungah chuan an mi mante chu a indawtin an ṭingmit a, an inzui ngui thliai a. Pahnih chu pa valai tak an ni a; pakhat erawh chu rawlthar chhûak chauh a la ni a, a zam êm êm mai lehnghâl a, a khur zawih zawih reng mai a.

Matt-a chuan a kah hlum tâk ruang phurtu sakawr chu a sakawrah a thlun zawm a, chuti chung chuan rûkru pathumte chu a chhawm a, a hnungah cowboy dangte chuan an rawn zûi ve leh a.

Rûkru zinga naupang ber chuan Matt-a chu a rawn lehhawi a, “Hei, engtin nge min tih dawn?” tiin a'n zâwt a.

Rûkru pakhat chuan, “Joy, eng mah sawi suh. Nangma thuin kan zingah i lo tel a, pawisa i duh a, bâwng i duh bawk a; tun hi i leiba rulhna tur a ni mai,” tiin a lo khak a.

Chu rawlthar chu a mangang nasa khawp a, a ṭap deuh pur a. Matt-a chuan a khawngaih rilru hle a, a khur hlawk hlawk tawp thei lo chu a en reng a.

Nilenga an kal hnu chuan chawlh zai an rel ta a. Mei an chhem a, an ei tur kente chu an buatsaih a.

Khua a rawn thim a, an mi tangte pawh chu an kut phuarna an phelhsak a, an ei turte chu an pe ve a. Joy-a an tih chuan an coffee pêk chu a khurh nasat avangin a in thei lo va, leiah a paih ta ringawt a. A ṭhiante chuan an lo melh rân a.

Eng emaw chen an chawlh hnu chuan an mi mante chu an phuar leh a, kal an siam leh ta a.

Link-a chu sakawr chungah chuan a muhil bawrh bawrh a, Matt-a chuan a khat tâwkin a va melh leh zauh ṭhin a.

Khawfing chah rualin ranch an thleng ta a. Matt-a rin loh ang deuhvin Lafferty-a chuan, “Kan mi tangte hi ventir la; kan ruang hawn hi mi ṭhenkhatin phum nghâl bawk sela; keiniho erawh chu kan rimtawng tawh bawk a, i mu phawt teh ang,” a ti ta a.

Matt-a chuan Lafferty-a hian ranch an thlen veleh an mi mante chu a khai hlum loh vek pawhin a kah hlum nghâl mai a ring deuh va; mahse, chutiang chuan a ti ta lem si lo va, a ngaihna a hre lo letling zâwk hle a ni.

Lafferty-ate pafa chu in chhungah an lût a, kawng an inkhar khum ta nghâl a.

Matt-a chuan an mi tangte chu ei tur a pêktir hnuah pindan pakhatah a khung a, mi pahnih a ventir a. Tin, mi dang pathum, ina lo awmte hnenah chuan an mitthi hawn chu phum nghâl turin a hrilh bawk a.

Chumi hnuah chuan chau takin a pindan lam a pan a, chair-ah a ṭhu hnawk a, kawngkhar lam chu a melh zauh zauh reng a. A rilruin ar bo a zawng a, Lafferty-a hian an mi mante chu thu neitute kutah a hlan duh ang em tih a ngaihtuah a, a chhanna chu a hre nghâl; a teuh lo mai.

A pûakruk paina kawnghren chu a phelh a, a pûakruk chu a mu a inthun khat em tih a han endik leh a; chutah, a lukham bulah chuan a dah a, a thawmhnaw pawh hlîp chuang lovin a mu ve ta a. A rilru chuan darkar khat bâk muthilh a tum lo va, Lafferty-a thawh ruala thawh hman a tum a ni.

A khum chu insâwi hluau hluauvin a hria a. Lafferty-a chuan rustler-ho chu khai hlum a tum a nih chuan a dan theih a inring lo va. He pa tê reuh tê hian a tum tawh chu tlang takin a hlen zel tih a hre chiang a ni. Ni tlang san tawh feah chuan inngaihtuah thlan tla phung chungin a muhil ve ta hram a.

A mu tui lai chu mang chhe pui hian a ti harh zawk a. A pindan chu a lo thim vek a, mang chhiain a ti harh tih a han hriat chuan a thaw huai a. Khumah chuan a kut lukhamin a han mu leh rih vang vang a; chutah a tho va, a boot a bun a, a gunbelt a hreng a, pawnah a va chhûak ta a.

A han hawi kual a, tang veng tura a dahte chu a hmu lo phawt a; a va tlan phei a, tang dahna pindan chu a lo rûak huai tawh a; inpui lam chu a han bih leh a, tukverh aṭanga mei êng lo chhûak a hmuh chuan nilengin a muhil tih a inhre ta chauh va.

Chaw chhumtu hnenah chuan, “Khawiah nge an awm zawh vek?” tiin a han zâwt a, a aw chu a hmanhmawh hle a.

“Colonel-in khawpuiah a hruai vek.”

“An chhuahna a rei tawh em?”

“Darkar thum vêl a ni tawh ang.”

Matt-a chuan a ngaihna hre lo tak hian‚ "Sheriff hnena hlan a tum em ni?” tiin a'n zâwt leh a.

Chaw chhum Slen-a chuan, “Chutiang eng mah a sawi lo,” ti ngawtin a lo chhang a.

“Mi eng zât nge a hruai?”

“Keimah tih chauh loh mipa dang zawng zawng chu a hruai vek.”

Matt-a chu a mak a maka rangin sakawr huangah a tlan lût a, sakawr pakhat chu a man sawk sawk a, a kaw dawmin San Juan lam panin a lim ve ta pur pur a.

Tunah chuan Lafferty-a thil tum chu hre chiangah a inngai ta. A tira an mi mante a khai hlum nghâl mai lohna chhan kha San Juan kawtthler lun lai berah, mi tam tak hmuh tura khai hlum a tum a ni. Two Bar bâwngte an rûk tawh loh nan chûng an mi mante chu entir nana hman a tum a ni.

Thu neitute kuta hlan tum ni se, a mite zawng zawng hruai kher a ngai lo. Tang, ralthuam nei lo leh phuar hlawm sa hruai tur chuan mi pahnih khat lek pawh a tâwk a ni. Chu bâkah, amah Matt-a hian a hnial kalh dawn tih a hriat avangin Lafferty-a chuan a thlim a ni.

A sakawr chu chau viauva a hriat hnuah zawi deuhvin a kaltir a; chutah, a tlantir leh ṭhin a. Chutiang hlira a kal chuan darkar nga (5) chhungin San Juan chu a thleng hman dawn tih a inhria a ni.

Khaw chhung a luh chuan ni a chhûak sang fe tawh a, kawtthlerah chuan mi an lo chhûak ṭan a. Matt-a sakawr chuan ar leh vawkte chu a su darh ur ur a. Domingo Street chu a kilah a va tlan hual pawp a; chutah, kawtthler pathumna; chutah, Plaza hmun lam hawin; chutah chuan mipui an lo pung khâwm luih luih a. A sakawr chuan mihring a sut hlauvin a pawt ding ta chawt a.

Lafferty-a chuan darkar thum vêla a lo hmakhalhna chu a lo hlâwkpui hman hle a. Khai hlumna dawh tharah chuan bâwng rûk hmang mi pathumte chu an khai hlum hun nghâkin an nghawngah hruih valh sa a lo invuah a, sakawr chungah an lo ṭhu far a. Sakawrte chu an lo hnawt tlan dawn chiah a, Lafferty-a chuan sakawr vûakna whip kengin a lo pan mek a.

An khai hlum tur zinga naupang ber chuan, “Khawngaih takin min zuah hram rawh u,” a lo ti lawm lawm a.

Matt-a awmna chu a la hla deuh va, kawtthler tawp aṭang chuan, “Min lo nghâk rawh u,” tiin a va au vak a; mahse, Lafferty-a chuan hre lo ang hmiahin a thil tih lai chu a ti hmiah hmiah a.

Matt-a chuan Lafferty-a mitmeng chu va hmu kher lo mah se, a men dan tur chu a hre thiam vek a; Jack Lane-a a thah dawn ṭum ang kha a ni ngei ang, a mitmengah khan sar a zam tel tlat a ni.

A naupang ber chuanna sakawr chu Lafferty-a chuan a'n vaw ta pawp a.

A chuanna sakawrin a tlansan tâkah chuan chu rawlthar chu borûakah chuan a inkhai thên ta nawlh a; mahse, hrui valh chuan a hrawk a khalh fuh chiah lo a ni ang, a awhna hrui chu phelh tumin a invai chat chat mai a. Chutah, a thi tur han thaw ri hrâwk hrâwk chu Matt-a chuan mipui zahnih lai rum huk karah chuan a hre thei tho va, Vargas-a kha a hre chhuak zawk nghe nghe a ni.

Sakawr pahnihna leh pathumna chu Lafferty-a chuan a han vaw tlan leh ta a. An pathum chuan an inkhai ta far a, borûakah chuan an ke an leng vat vat a.

Matt-a chuan a pum te chu rûak huaiin a hria a, a khua a sik ur ur bawk a. Mipui lungawi lo phun mur mur chu a hre zûi a.

Vawi leh khatah, a sakawr chu a kheng vak a, a sakawr han zuang zawk chuan a hmaa mi chu a su tlu ta nawk a. Ṭhenkhatin a keah an lo dawm a, a sakawr nen chuan an han tlu ve leh rih a.

A han thawh leh chuan mite chuan kawng an lo kian sap sap a. Khai hlumna thing kham lamah chuan Matt-a chu a tlan phei rûak rûak a, a va thlen chuan a kekawr iptêa a chemtê kawih thleh chu a han phawrh a.

Lafferty-a chuan a lo vuan ding a, sakawr chil hlauvin Matt-a sakawr la dawm reng chung chuan a sir lamah a per ta zauh a; chutia sakawr dawm din thut han phu lâwp chuan Matt-a chu leiah a vawrh thla ta ṭhuai a.

Matt-a tla chu a hnang awl awl a; a han thawh leh chuan dawh san siam chawpa mi pathum inkhai then nawlh nawlhte chu chhan theih an ni tawh lo tih a hre nghal mai a. Lafferty-a chu thinur takin a han en ang khei khawi a, “Hetiang hi i ti tur a ni lo. An chungchang relsak...,” a han ti hman chauh va.

Lafferty-a chuan, “Eng chu maw? Sheriff kutah ka hlan ang maw?” a lo ti ha a. “An chungthu chu he lai ro reltute hian han rel ta teh reng sela; he khaw mipui tam tak hian ka bâwng an rûk hi an ei asin! Ho deuhvin an chhuah leh thuai ang tih ka hre tlang sa a ni. A man chhût chhûakin min rul bawk hek lo vang,” a ti vin ṭhawt a.

Matt-a chu a lûak a chhûak nghual a, Lafferty-a chu a la melh khai reng a, “I thil tih hi a nun rawnthlâk chauh pawh ni lovin, hêng San Juan mipuite chona hi a ni. Buaina nasa zâwkah i la inhnûk lût ngei ang,” a han ti leh a.

Lafferty-a ngaih danin a bâwngte chu an ru leh tawh kher lo vang; mahse, dàn a pawisak lohzia a entir a ni.

Matt-a chu a sakawrah a lawn a, a kheng lim puat a. Lafferty-a leh a hote pawh chuan an rawn zûi ve nghâl a.

Mipui kara an han kal tlang chu an lawm lo hle tih an hmel aṭang chuan a hriat a. An mi khai hlumte ruang chu a han en nawn leh a, an boot-in lei rap pha lo chiaha an inkhai far chu Matt-a chuan a hmu a; chutah, Lafferty-a chu a han en leh a.

Indona aṭanga a lo haw leh hnu hian a nungchang a danglam ta hlein a hria a. Mi chak tak ni mah sela tun ang hian a nun a la rawng ngai lo; chu chang a ni lo, a hmelah inchhirna emaw, han lâk run deuhna emaw pawh chhe tê mah a lang lo va; lawm hle pawhin a lang chuang lo. An mi khai hlumte chuan a nun an khawih pha reng reng lo niin a lang a, chinghne kâp tluk lehah a inngai niin Matt-a chuan a hre hial a ni.

San Juan mipui chu an ngawi mai mai lo vang. Plazza an pelh laia mipui thinur rum thawm a hriat khan indo chu an ṭan der tawh a ni, an rum thawm kha a ring lutuk. Dan nen an indo dawn a; Lafferty-a chu tlu chhe sa tlukah a ngai a ni.

In lam pana an haw ta chu kalkawngah chuan an ṭawng tlem hle a. Colonel chuan ding takin hma a hruai a, an thil tih chu a chhe lamin emaw, a ṭha lamin emaw an ngaihtuah tlang ṭheuh a ni ang.

Matt-a erawh chuan indona an ṭan ta niin a ngai a. Lafferty-a chu a han en ṭhin a, a haw hle a ni ang, a chil a rial a, a ra pawh a so hialin a hria a. Colonel thil tih dan leh a hnua thil lo thleng leh zel tur chu a ngaihtuah a, eng pawh lo thleng se, engti kawng mahin amah Matt-a pawh chu a bang thei bîk dawn lo.

Two Bar an thlenin Lafferty-a chuan a hote chu, “Mu hahchawl r’u, in phu e; mahse, inring rengin awm ang che u,” tiin a hrilh a.

Ani pawhin buaina bubit an chawk tho dawn niin a ring a ni maithei; mahse, a hmelah erawh chuan a ngaihtuah a hriat loh. Khawng lah hian a sakawr aṭangin a chhuk a, indona hneha haw thleng hlim ang ni mah se tunah chuan a hmelah hlimna reng reng a lang lo, nguia chau hluah hluah hmel a pu zâwk a ni.

Matt-a chuan a sakawr leh Lafferty-a sakawr chu sakawr huangah a va khung a, a lo kir leh chu Lafferty-a chuan a lo nghâk a. Link-a chu pawnah a lo chhûak ve a, a pa chu mitmeng danglam tak hian a rawn en a.

Matt-a’n chu chu a han hmuh chuan naupang kum riat mi lek mitmeng ni theiin a hre lo va, engkim hre thiam vek ang maiin a mitmeng chu a fing lutuk a ni. Naupang mitmengah chuan a mak a ni, thil dang inzep telin a hre tlat a; a naupan lai a han ngaihtuah lêt erawh chuan, Link-a chu dem theih bîk niin a hre lo.

Lafferty-a chuan, “Matt, tunah chuan sawi tur i neih ang chu mi han hrilh tawh teh le,” a lo ti a.

Tunah chuan a pa tak tak ang chiaha hriatna a nei leh tawh a, “Sheriff chuan i thil tih hi a ngaihthah hauh lo vang,” a han ti a.

“Chu vang tak chuan alawm ka hote inring reng tura ka hrilh reng ni,” Lafferty-a chuan a lo ti awlsam mai a. Buai a cho hle niin a lang.

“A hote nen lo thleng ta phut se, engtia lo dawnsawn nge i tum?”

Za lo deuhva nui chungin Lafferty chuan, “Kan bâwng bo ka report khan, keimahni inenkawl tura min hrilh thu kha ka lo hriat nawntir ang,” a ti a.

Matt-a chuan, “Plaza kawta khai hlum tur erawh chuan a ti kher lo che,” a han ti khauh a.

“Nia, min hrilh chiah lo,” ngai thupui lo tak hian Lafferty-a chuan a lo ti mai a.

“Chu chiah chu. I man veleh a hnena hlan turin a ti che alawm,” Matt-a chuan a ti a.

Mahse, a rilru chu a buai nak mai. Khawthlang lama an dan hman chu a han ngaihtuah chiang a, dan ken kawh hleih theih lohna hmunah chuan a tu-ate pawhin mahni chakna hmachhuana dan siam chawp lek kawh chu a ṭul hun a awm tlat a ni.

A nu leh pa thattute chunga dànin phuba a lâksak lohzia a ngaihtuah chhûak ta zel a.

Laffferty-a’n Jack Lane-a a thah te kha dan chu a ni mai tih a ngaihtuah a; chuvangin, dan mumal lohnaah chuan mimir nun chu a him loh bâkah a thlamuang lo tih a hre chiang ta sauh a ni.

Lafferty-a chuan, “He lai hmunah hian mi pangngaite tih dan pangngai anga khawsak hleih theih a ni lo tih chu keimah ang bawkin i hre chiang alawm. Inpawng nekna aṭanga seilian i ni a, khâng lai ai khan tuna kan awm dan hi a chhe tawh zâwk asin. San Juan khawpui saw chinghne khawpui a nih saw.

"Dan ro relsak tur chuan mi pathumte kha kan hlan thei nameuh mai; mahse, Jury-te saw ngaihtuah teh, thiam loh an chantir i ring em ni? Tuna Jury-ho zinga a chanvete saw Rustler-ho nen an inthu rual lo tih i sawi thei em? Kan mi pathumte pawh kha an chhuah nghâl thuai ang tih ka hria,” a ti a.

Mahse, Matt-a chuan Lafferty-a chu thiam a chantir chuang lo. Rustler-hote chu lo chhuah ta pawh ni se, ro relna dik a awm tawh lohna hmunah pawh a zawng chhûaktu tur niin a hre tlat. Tin, San Juan mipuite pawhin dàn chu lo palzut ta deuh pawh ni se, a zualkai bera lo ṭan chu dik a ti thei chuang lo.

“Rustler-ho tih bo dan chu kawng dang pawhin kan ngaihtuah thei tho alawm. A chhe zawnga an en tawn tura insiam kher kha chu ṭulin ka hre lo a ni.”

Lafferty-a chuan fiah takin Matt-a chu a en reng a, “Sawi zel teh,” a lo ti a.

Matt-a chuan han sawi mai tur a vàn ta hle a; sawi tur a hre lo pawh ni lovin a sawi chhûak thiam lo a ni ber. A rilru chuan Lafferty-a awm dan leh tuna a thil tih chhan te pawh chu chiang takin a hria a ni.

Lafferty-a tan chuan indona chu a nêp lutuk tlat. A duh anga rura a tawng lo; thihna a cho tel tlat. A rilru lenzia leh a huaisenzia tih lanna khawp tawng zo lovin indona aṭangin a lo haw a ni chiah mai. Lily-i’n a thihsan a, a thih chhan te; a fapa, amah hûatna hlira khat - hêng thilte hian a nun a ti beidawng a ni.

Indonaah a thil duh khawp a va tawng lo va, a lo haw hnua a thil hmuh leh hriatte nena infâwk khâwmin rawng takin a che ta a ni, chu chuan phurna a pe niin a ngai tlat a. Lafferty-a hnenah chuan, “Dan i palzut thei a nih pawhin a ai i awh tur a ni,” a ti ta khauh a.

Lafferty-a chuan zah taka melhin, “Ka mizia i hre chiang hle mai,” a lo ti a.

Matt-a chuan, “I mizia ka hre lo asin, ka hre miah lo tak tak," a ti a, rilru nuam lo deuhvin a kal sawn ta nghâl a.

Lafferty-a chuan dàn a cho va; a thil tum chu tih danglam theih a ni lo. A kal tlangpui ngei ang a, khawpui hel lakah chuan a inphah hniam dawn lo. Tin, San Juan khua chu Two Bar hneh tur chuan an la chak tâwk rih lo; mahse, tuna a dinhmun ang reng hi San Juan chu a ni dawn lo.

A dawt lehah eng nge lo thleng ang le? Chumi hnu zelah engtin nge ni dawn? Tuna a tlawm zâwka an lan avangin Lafferty-a chuan a hma aiin a zuam ang a, engah mah a ngai lo vang. Vawi khat a hlawhtlin tawh chuan Lafferty-a chuan awlsam hle dawnin a ngai dawn tlat; chu chuan indona a thlen ngei ang a, a tawpah Lafferty-a chu a tlu zâwkah a ṭang tho tho vang. Chu chu Matt-a ngaih dan a ni.

Chutah, a pindanah a lût a, khumah ṭhuin Lafferty-a chungchanga a ngaih dan chu a lutuk lam hrat ni hian a hre leh hnuhnawh a. A chang leh a ding a; chhûatah chuan zau tak taka pênin a vei kual sek a. A thil ngaihtuah chu mi dangte pawhin an ngaihtuah ve tho te pawh a han ring thla ngawt a.

Kawngka aṭang chuan tualchar chu a va thlir a, mi dang hmel a va hmuhte chu thil ngaihtuah mûk tak nei vekin an lang hlawm a. Daihlimah chuan mi ṭhenkhat chu inring takin an ding a; a ṭhenin an silai an ti fai a.

Ni a tlâk dawn hnaih chuan mi pakhat hian, “Colonel, Matt, an lo kal e,” tiin a rawn au ta a.

Matt-a chu pawnah a va chhûak a, sakawrin vaivut an pal khûk laih laih chu a va hmu a.

Lafferty-a pawh chu a lo chhûak a, kawngka bul pawn lamah chuan a ding kâk ta ṭai mai a.

Matt-a chuan va pan hnaiin a bulah chuan a va ding ve a. Lafferty-a chu a dik lo zâwkah ṭang mah se, eng lai mahin phatsan a tum lo.

Lafferty-a chuan a’n lehhawi tê tê a, Matt-a hmaiah chuan chiang takin a han melh a, Matt-a chu a buai nak mai. Lafferty-a chuan, “An hmuh thei lohna turah biru rawh, i rifle kha inchhawp reng la,” a ti a.

Vaivut khu chu a a lo hnai telh telh a, a khâwm deuhva an kal hnuah Matt-a chuan a han chhiar a, an vai chuan mi sawm pakhat (11) an ni.

An sheriff ria tak, Spanish thlah, hang lampang chuan hma a rawn hruai a, Gate chhungah chuan an rawn inzûi lût a, tuallaiah chuan an sakawrte chu an dintir ta a.

Sheriff, Raphael Jarmilo-a chu huaisenin rorum hle mah se, a nunna hlan ṭhak tur erawh chuan a la inpeih tâwk lo tih Matt-a chuan a hria a. Lafferty-a leh Matt-a lam chu a hawi a, “Beaunes tardes Senores,” a han ti a, Lafferty chuan a lo hmachhawn a.

Jarmilo-a chuan a iptê aṭangin lehkha a han phawrh a, “Nangmah manna tur, warrant...,” a’n ti dek dek a.

Lafferty-a chuan, “Eng atan maw? Min man nan maw? San Juan-a ka lo kal khan ka bâwng bo thu leh rustler-ho thil tih ka hrilh lo che em ni? Eng nge ti tura min lo ràwn kha?” tiin cho takin a han zâwt a.

Sheriff chuan Lafferty-a hmel chu a en ngam lo a ni ber ang chu, a kuta a lehkha ken chu a en ringawt a, eng mah pawh a la sawi lo.

Lafferty-a chuan, “I la hre reng em? I la hre ngei ang. Keimahni inenkawl tura min hrilh kha. Two Bar-a kal turin mi ka nei lo i tih te kha? I thu ang chiahin Rustler-ho chu ka ṭingmit ta a ni mai,” a ti nghek nghek a.

Jarmilo-a chu a thin a rim ta kher mai, chutiang bawkin Lafferty-a pawh.

“Keimah leh dàn i hmusit a ni; chutiang bawkin, dàn ṭan chhana danin a hum zawng zawngte pawh.”

Lafferty-a chuan vaivutah chil a han chhâk phawrh a.

Sheriff chuan a lehkhaa thu inziak chu a chhiar a, a sap ṭawng chu a ze nak mai. Rustler-ho a khai hlumte hming chu a han chhiar hmasa a; chutah, Lafferty-a’n dàn pawisa lova a chêt avanga amah manna tur court thu chhûak chu a chhiar khum a.

Lafferty-a chuan, “Pawt chhia la, paih nghâl rawh; min man i tum lui tlat a nih chuan, he lai hmun hi damin i chhuahsan miah lo vang,” a han ti phawt a. Chutah, a hma aia ring zâwkin, “Kal chhûak vat rawh; nge, i han tum chhin dawn?” a ti ta khawl mai a.

Chutih lai chuan tukverh leh kawngka aṭang chuan rifle hmawr hi a lo lawr fur a, in chung aṭangte chuan an rawn tin ṭhup mai a.

Sheriff chuan a pûakruk chuh mai hi a han tum hman zuau va; mahse, a rilru a thlâk leh thut a, a mi hruaite lam chu a hawi ta zâwk a.

Matt-a chuan thil awm dan chu ngun takin a lo en a, a awmzia pawh a hre ta mai a. Sheriff chuan inbeih chu amahin cho mah se, a hote chuan an ngam lo va, a ã fala ṭan chu a duh bîk lo a ni.

Sheriff chuan Lafferty-a chu mitmeng hriam, thîp tak mai hian a han melh a, “Senor, i la inchhir mawlh ang. Nang ngei pawh hian dan chu i la mamawh ve tho ang tih ka hrilh a che,” a ti a.

Lafferty-a chuan engtin mah a chhang lo. Sheriff leh a hote chu San Juan lam pan chuan an thil tih tuma hlawhchhamin an kir leh ta dial a.

Matt-a chuan Jarmilo-a chu a thlangtu, mipuite chuan bang turin an nawr lui ngei dawn tih a hriat avangin pawi a lo tihpui viau mai a. Lafferty-a a man theih loh chu chhuanlamah hmangin loh theih lohvin a hna aṭanga bang turin an nawr dawn tih a hre chiang a ni.

Matt-a chuan Lafferty-a hnenah chuan, “Tunah chuan hnehtu chan i la chang rih zawng a ni e. Bâwng rutute pawh i duh ang takin i ti bo nâ a; hmelma tam tak i insiam phah thung a nih hi,” a ti a, thinrim ru tak chungin a kal kiang ta a.

Kawng ṭhenkhatah erawh chuan Lafferty-a chuan dikna a nei. Rustlers pathumte kha court-ah an chungthu relsak ni ta se, ni khat êm pawh jail-ah tang lovin an chhuah leh nghâl maiin a rinawm a. Chutiang a nih hlauh chuan Lafferty-a bâwng chu tawpin tai awm lovin a bo fo vang.

Chu bâkah, Lafferty-a chu Sheriff hnenah khan lo inpe ta se, San Juan mipui thinrim chuan an khai hlum ve maithei bawk. A enga pawh chu ni se, Matt-a ngaih danin Lafferty-a chuan a tawpah amah la ti chhetu tur hmelma a insiam ta reng rengah a ngai a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » December 24th, 2018, 7:39 pm

THE ARROGANT GUNS
AUTHOR : LEWIS B PATTEN
PUBLISHED BY : REMSANGPUII (4Cee Publication)
Chapter 6
(Rozami Pachuau)

Jarmilo-a chu chawlhkar khat hnuah Sheriff aṭangin a bang ta a. A ai awhtu Spanha, pa rorum leh tawr ṭha tak, deh khirh zet mai, kum sawmnga (50) mi chuan a hna a chelh ni la lain Two Bar a rawn tlawh nghâl a, ṭhuihruai pakhat mah a rawn hruai lo.

Lafferty-a a rawn hmuh chuan, “Court chuan nangmah manna tur warrant kha an hnûk kir leh tawh a, khuaah buaina siam turin lo kal tawh lo la a tâwk mai. Jarmilo-a ang kha chu ka ni ve lo, man tur chea min tih chuan ka man ngei ang che. A ṭul phawt chuan a khamphei pawhin ka thlen tho tho ang che,” a rawn ti a.

Lafferty-a chu a bu nghat a, Spanha pawh chu a haw leh nghâl mai bawk a.

Lafferty-a chu a pindanah nilengin a inkhung a, a tûk lehah sakawrin Santa Fe panin a zin chhûak ta a.

Chawlhkar hnih a va thang hnu chuan tawlailir, bungruaa khat tlat eng emaw zât a lo thleng a, chûng tawlailirte chuan furniture, chaw ei thleng leh note an rawn phur a.

Mi thar tam fe an lo thleng bawk a. Chu mite chuan Matt-a hnenah Lafferty-a mi rawih tharte an nih thu leh, Santa Fe aṭanga lo kal an nih thu an rawn hrilh a. An zingah chuan pûakruk chauh hmang thiam, kut no chum biang buang an awm nuk mai. Chûngho lo pawh chu San Juan aṭangin an lo thleng ṭeuh mai a, Chinese chaw chhum te leh mi chi hrang hrang te an ni.

Lafferty-a pawh chu a lo thleng ve ta a. A lo haw lam chu sakawr pakhat chauhva hnuh chi tawlailir, buggy-in a lo thleng a, man chawia a rawn hawh a ni. A rual chuan pa upa lam, hmai dáng deuh, sumdawng ni àwm tak, suit nalh taka induang zaih hi a lo tel bawk a.

Ranch an lo thlen tûk maiah Lafferty-a chuan a mi rawn hruai chu San Juan-ah thil eng emaw ti turin a kaltir nghâl a, ni khat a thang hnuin chu pa chu a lo kir leh a.

Lafferty-a chuan Matt-a hnenah chuan, “Santa Fe khuaa Banker a ni a, pawisa thilah min ṭanpui a ni,” a ti a. Two Bar chu tih len zel a tum thu leh a ruahmannate a hrilh a; mahse, Matt-a chuan Lafferty-a hma lâk tum dan chu eng mah a hriat thiampui lo.

Lafferty-a chuan hma a zauh hle a; hmun sang lam, thing ngil deuh deuh ṭona hmunah chuan thing kittu pawl a dah a.

A hnu rei vak lovah, thingzai khawl hraw pui hi tawlailir lian chi, tui hu khawl hmanga tih kal hian a rawn phur thleng ruau mai a. Tawlailirte chuan thingtum lian pui pui chu a zai sawmna khawlah a phur khâwm a, an thing zai sa chu Santa Fe-ah te, San Juan-ah te an tawlh ṭhin a.

Chu bâkah, Two Bar-ah chuan in lian pui pui an sak belh thluah bawk a; Cowboy-ho chenna in, nupui nei leh nei loho luah tur te, chhêk in leh sakawr dahna tur te an sa thar a.

A kum khatnaah chuan thingzai, fit maktaduai khat an thawn chhûak a; a kum hnihnaah chuan a lêtin a pung a.

A kum lehah chuan an thing zai khawl bunna bulah chuan marble quarry an hmu chhûak a. Lafferty-a chuan laih chhuah turin hma a la nghâl zat a.

Chu mai chu a la duh tâwk hauh lo, hma thar a valh nghâl zat a, Two Bar ram chhungah chuan Saw Mill pathum an bun zûi leh nghâl a, thing tamna apiangah an bun tam a.

Chûng zawng zawng chu Matt-a enkawl turin Lafferty-a chuan a ti a; amah chu Santa Fe-ah te, St Louise, Denver leh San Francisco-ahte a zin chhûak deuh reng a.

Ṭum khat a khawpui kal lo haw chuan buggy tam tak leh mi chi hrang hrang a rawn kawi duah mai a. Ranch-ah chuan rimawi tumtu leh lam mite nen party ropui takin a siam a, ram hrang hrang aṭangin nula hmel ṭha tak tak an lo tel a, zu chu a luanin a luang a ni ber mai.

A party rawn chhimtute zingah chuan mi lian leh thil ti thei zet zet, New Mexico governor leh Legislative member te, Judge leh Congress member-te an lo tel nawk hlawm a. A duhthusam ang takin Two Bar chuan hma a sâwn rûak rûak a, hmuh theihin a ṭhang awk awk a ni.

Link-a chu a ṭhang duang hle a, kum sawm pahnih (12) a nihin a pa aiin a sang tawh a; mahse, bean kung ang maia ria leh sa pan a ni thung. A chang changin Matt-a nen sakawr chunga chuangin an chhûak dun ṭhin a; mahse, an inbe ngai mang lo. A chang chuan a pa nen an têihawi mai mai a; ama duh thua chhuahvah changte pawh a nei tho ṭhin.

Lafferty-a chuan siam ṭhat tumna pawh a nei tawh lo niin a lang. Ama awm awmin a awmtir a ni tawh ber mai a; mahse, a rilru a thlâk thut a, sikul kal se a ti leh ta zâwk a.

Matt-a pawhin ṭha a tihpui hle a. Two Bar chu sumdawnna chi hrang hranga a lo ṭhan tâkah chuan lehkha thiam an mamawh thuai ang; mahse, Link-a chu lehkha han zir ṭha leh tur chuan a lian deuh tawh lam zawng a ni e. A ti ṭha duh ang nge maw, Matt-a chuan a hlauthawng deuh zawng a ni.

Link-a chu San Juan-ah sikul lût tur chuan a kal ta a. Hmeithai fa 4 nei tawh Willingby-i inah a va awm a. A pa chuan a kal tur chu thlah pawh a thlah lo va, eng thu ṭha mah a hrilh bawk hek lo.

Hun eng emawti hnuah Link-a chanchin ngaihven turin Lafferty-a chuan Matt-a chu San Juan-ah a tir ta a.

San Juan chu a lo danglam hman hle tawh mai. In ṭha pui puite a lo ding khup a, Plaza ep chiahah chuan hotel thar, chhawng thuma sak hi a lo ding uai a; hmana mi pathum an khai hlumna hmunah kha chuan hnim a lo ṭo khat tlat tawh a.

Matt-a chu Hotel-ah a innghat a, ruah a sur vangin rei fe a han chawl hmasa tê tê a. Ruah sur ban veleh Link-a kalna sikul zawng turin a chhûak ta a.

Sikul a va thlen dawn chuan kawt hmaia naupang za (100) vêl lo awm nak nak zingah chuan Link-a hmel àwm a han zawng deuh va; mahse, chûngho zingah chuan a hmu lo va.

Matt-a chuan a sakawr chu a han kal sawntir a, a piah deuh hnimbuk karah chuan Link-a chu a va hmu ta a. Mipa naupang ṭhenkhatte’n an lo bial laih a, a hma taka ding naupang chu amah ang rual vêl, amah ang tiat vêl tho a ni a.

Matt-a chuan an ṭawng hre phâk turin a va hnaih a. Link-a bula naupang pakhat chuan, “Link Lafferty, i pa chu mi sual lutuk a ni a, kan hre chiang teh asin. Mi zawng zawng pawhin sual an ti,” tiin a lo kâwk sawk sawk mai a.

Link-a chuan chu naupang chu a han hnek siah mai a, a zuan zûi a, hnim zingah chuan an let dun ta thial thial a. Chutah, naupang dangte chuan an rawn hnaih tuau tuau va; mahse, chutih lai tak chuan dár a rawn ri ta hlauh va, naupang dangte chu sikulah an lût ta dial a.

Link-a leh a sualpui naupang chauh chu pawnah an la awm a, an la inchai buai hle a. A sualpuipa chuan Link-a chu a hneh zâwk bawk a, a ṭum ri ta awk awk mai a. Matt-a chuan a va hnaih a, Matt-a a hmuh veleh Link-a sualpui naupang chu a tlanchhe ta a.

Matt-a chu a sakawr aṭang chuan a chhuk a, “Hello Link,” a han ti a.

Link-a chuan a mit nuai nak nakin a lo melh khai a; a hmaiah chuan chirh a kai luam a, a ka aṭangin thi a lo chhuak a, a biangah chuan tina hamna a inrin raih bawk a. A taksa hmun dangah pawh ser hmuh tur a awm nual a.

Matt-a chuan, “Insual i ching viau a ni maw?” a han ti a.

Link-a chuan thinur takin a lo melh khai mai a, chhan pawh a chhang lo va. Chutah, a hma aia nasaa ner chungin lehlam a hawisan ta hmak a.

“Link, Colonel chuan engtin nge i awm tih hre turin min rawn tir a ni,” Matt-a chuan aw dam têin a han ti leh a.

“Hremhmunah liam daih rawh se,” Link-a chuan a lo ti thung a.

Matt-a chuan a rilrua vei nei tak chung chuan, “Colonel sual vang a ni hlei nem,” a han ti a.

Link-a chuan thinrim zet hian, “I hre ve reng. Tuna ka sualpui kha hmana Colonel-in a khai hlum tâk fapa a nih kha,” a han ti lêt a.

“Chu, tun hma pawn in lo insual tawh ṭhin a ni maw? A bet zâwkah i ṭang ziah ṭhin em ni, tun ang khan?” Matt chuan a'n ti leh a.

Link-a chuan “Ka ṭang reng hauh lo vang. Hun remchangah ka la that ang. Ka lût dawn,” a ti ta hmak a.

Matt-a’n, “Mamawh i nei em?” a tih chuan Link chuan a Iu a lo thing a. Matt-a chuan, “Chuti chu kal mai rawh,” a ti ta a.

Link-a kal ta chuan mamawh nei lo anga a insawi chu a inchhir leh deuh va, mamawh chu a nei khawp mai.

Matt-a chuan Link-a dinhmun chu a ngaihtuah nauh nauh va, Link-a chuan mi zawng zawng chu a laka hel vek turah a ngai niin a ring a. A nuin a hriat theih tirh ata hûatna hlir a zirtir vang a ni ngei ang, ṭhatna awmzia hre miah lovin a chawi lian tlat si a. Tunah chuan kuttumin an inbei a; mahse, silai an chelek hun a thleng thuai ang. A tun hnu hun tur chu a thim hle hian a hriatpui a; 'a pawi' tih mai loh chu eng mah tih theih a awm tawh si lo.

Khaw thim hnuah Matt-a chuan Two Bar a thleng leh a. Lafferty-a chuan, “Engtin nge?” tiin a va kalna chanchin chu a lo zâwt vat a.

Matt-a chuan, “A ṭha e” a ti mai a.

Chu zawng chu a ni. Link-a awm dan leh a ngaih dante chu han sawi dawn se, buaithlâk tham niin a hria a. Link-a chuan San Juan mite chu a hua a, a pa a haw bawk a; an pahniha a do tlat si chuan a tan chhiatna mai lo chu hmabâk a nei lo tih a ngaihtuah a.

**********************

Matt-a chu Two Bar ram chhung tlawh lovin chawlhkar khat a rawl chhûak a, Link-a chu a rilru chhungril aṭangin a paih bo thei ta a.

In a thlen leh chuan Two Bar ṭhan dan chu a ngaihtuah vang vang a. Dai-kawngkhar pawnah te chuan wagon eng emaw zât, thingzai leh sailungvar chher sa phur khat tlatin an inpel zut zut a. In thar tam tak an sak belhah chuan mi tin mi tang an cheng khâwm a, khaw thar an din hi a ni ringawt mai.

Matt-a thang bo lo haw chu Lafferty-a chuan a ko va, ani chuan a va pan vat a. Matt-a hnenah chuan, “Sa talhna in sak a, sa ṭin siamna din ka tum asin,” phur hmel tak hian a lo ti a.

Matt-a chuan chhang lovin thil kalphung chu a han ngaihtuah vang vang a, “A senso a va tam àwm ve?” a ti a.

Lafferty-a chuan, “Pawisa lam chu a harsa lo vang, tunah pawh marble quarry leh Saw Mill atana ka pûk zawng zawng pawh kan rul leh vek tawh. Tunah hian kan lian tâwk hle a; mahse, len lehzual kan tum tur a ni. Kan ropui tulh tulh ang,” a lo ti a.

Matt-a chuan, “Eng nge a ṭulna teh chiam?” tiin a han zâwt a.

Lafferty chuan nuihsawh lek lek hian, “Ka han hrilh ang che. Hetiang ringawt hian kan nihna pangngai hi kan awh reng thei lo vang. Ram a ṭhang a, mi mal an ṭhang a; keini ang sumdawnna beia kal chho mekte hi mi mit la ber kan ni a, min itsika min tih chhiat tum an kat nuk ang. Chutiang dinhmunah chuan tunah hian kan ding a ni,” a ti a. Mahse, a rilru a buai deuh hlek ni tur a ni, thâwk leh khatah, tukverh lam chu a hawi ta daih a.

Lafferty-a thu sawi lai han tawp ta chawt chu Matt-a chuan a zâwt zûi duh bîk lo. A chhan a hre tlat. Lafferty-a chu pa vantlang tling pha lo a ni a, pa tê a nihna avang chuan pa lian aia thil ti thei nih a duh a, chu chu lan chhuahtir a tum a ni.

Napolean-a chanchin an sawi ṭhin ang mai niin Matt-a chuan a hria a. A theih ang chen chen Lafferty-a chuan a bei ang a; a tawpah a la tlûk chhiat phah ngei ang tih a ring a. Mahse, a rin dan chu ti lang lovin, “Khawi laiah nge sa talhna leh sa ṭin siamna chu kan din ang,” tiin a han zâwt a.

Ani chuan, “Soda canyon lui chhuah lamah khuan a ni ang chu,” tiin a lo chhang a.

Matt-a chu a bu nghat a. Chu lai chu hmun remchang tak pawh a ni reng a. A kawr a thûkin a dàm hnawng hle a, ni pawh a tlang san lai a nih loh chuan a hmu lo. Chu bâkah, hmun zawl, in eng emaw zât sak theihna tur a ni a, vur tui khuah nan hmun remchang tak a ni bawk.

Matt-a chuan‚ “Ngaih dan ṭha tak a nih chu,” a lo ti mai a.

Mahse, Lafferty-a chu Matt-a chhanna leh ṭawng chuan a ti lawm vak lo. Chhum lo chat lovin darkar khat chhung ngawt a hrilh ta erh mai a.

A tûkah chuan Lafferty-a chu Chicago panin a chhûak leh nghâl a. Bungrua, khawl lian chi te leh rangva tam tak mai chu khawchhak lam aṭangin a lo thleng zut zut mai a. Tin, Chicago aṭangin mi eng emaw zât, sa ṭin siamna hmuna thawk ṭhin an lo thleng bawk a. Kawng ṭhenkhatah chuan Lafferty-a’n a hna kawng hrang hranga mi thiam a ruai zel mai chu Matt-a chuan fing a ti hle a ni.

A tum ang takin Lafferty-a chuan a han ṭan ta a. Two Bar ran rualte chu Santa Fe lamah emaw, Alburquerque kawng hla tham takah emaw hralh tura khalh ngai lovin, anmahni ram chhungah ngei chuan sa talhna hmunah an khalh khâwm dum dum ta zâwk a. Thliin a beng fuh changin an ram chhunga sa talh chu rim chhe ṭhin hle mah se pawisa a tam tlat a, hnar phalzia a ni lo.

Favang a lo thâwk chuan Lafferty-a chuan sumdawnna dang a ṭan leh ta a. A sumdawnna thar chu sakawr vulh a, sipaiho hnena supply a ni. Mexico aṭangin sakawr nu tam tak an chaw lût a, sipaiho hnen aṭang te, hmun dang aṭang pawhin sakawr pa chi ṭha chi, a chi thlah tur an lei ṭeuh bawk a.

Thil dang zawng aiin Matt-a chuan bâwng vulh chu a tui ber a, in lama haw lovin bâwng tlatna phaizawlah an cowboy-te nen chuan an riak fo va.

Mi chi tin mi tang karah chuan a huho deuh pawhin innghirghona eng emaw chhûak mai thei a ni reng a, chutiang buaina ṭhelh mittu tur, venghimtu pawl Lafferty-a chuan a din bawk a.

Tlai khat chu thim hmulah sakawr chunga chuang mi pakhat hi hmanhmawh deuhvin a lo tlan a, in a rawn thlen hmain kawtlai aṭang chuan, “Colonel, Colonel,” tiin a a rawn au tuar tuar a.

Matt-a chu a va chhûak thuai a, Lafferty-a pawh a pindan aṭangin a lo chhûak a. Sikul chawlh lai a nih avangin Link-a pawh in lamah a awm a, a pa chu a rawn zûi chhûak a, a lungawi lo hmel chu a la kiang chuang lo.

Chu pa chuan, “Sa ṭin siamna hmunah buaina a chhûak, chin fel vat a ngai ang,” a ti a.

Lafferty-a chuan, “Eng nge thil awmzia han sawi chiang teh,” a han ti a.

Ani chuan, “Colonel, hlawh pun an ngiat a ni. Hotu-a i dah, Al-a hnenah...,” a tih laiin Lafferty-a chuan, “Engati nge a tirah in rawn sawi loh?” a lo ti a. An mi rawih chuan, “Al-a’n nangmah ti buai kher lova chin fel a tum a ni,” a ti a.

Chu thu rawn thlentu chu office-a hna thawk a nih Matt-a chuan a ring a. Lafferty-a chuan, “Engtin nge ni ta zel?” tiin a han zâwt a.

Ani chuan, “Hna an thawk duh lo. Vawiin chhunah khan Al-a’n a han kâp ringawt a; chu veleh an thinrim a sosang a, an thil hmuh engkim mai tih chhiatah an ramṭang a. Al-a chu silai keng tho mi pahnihin an ṭanpui a, mi pathum an kâp a; pahnih an thi a. Tunah chuan savun dahna inah an tawm khâwm a; i hmeh daih vat loh chuan an hãl darh vek ang,” a ti a.

Lafferty-a chuan, “Matt, a rang thei ang berin mi i hmuh ang ang khâwm rawh,” a ti ta a.

Matt-a chuan van lam hawiin a pûakruk chu vawi hnih a han kâp pûak a, an lo chhûak khâwm ta ṭak ṭak a. Matt-a chuan, “A tlem berah mi sawm pahnih (12) tal inzawng khâwm thuai r’u,” a han ti a.

Sakawr an bûatsaih sawk sawk a, Lafferty-a chuan hma a hruai a, cannary lam pan chuan an phêk chhûak ta a.

An kalna tur chu zanah chuan a rei lo berah pawh darkar khat leh a chanve kal a ni a, a hmun an thlen hmain thil pawi eng tak lo thleng hman ang maw? An bawraw viau phei chuan a thih pawh an va thih phah maithei tih Matt-a chuan sakawra tlan pur pur chung chuan a ngaihtuah a. Sa ṭin siamna hmun aṭanga mei khu hmuh mai a inring ru reng a, a rin ang ngeiin rala an awm laiin mei khu chu an hmu ta a, silai ri an hre zûi bawk a.

An va thlen chuan in lai ta hmaah chiah chuan Lafferty-a chuan a sakawr chu a pawt ding a, savun siamna in kang hluah hluah chu a han bih zawr a; chutah, sa ṭin siamna in a en leh a; a hnuhnung berah sa talhna in a en a. A rawl tawpin, “Al,” a han ti ngheng a.

Ani chuan, “Colonel, heta hi ka awm e,” a lo ti a.

Lafferty-a chuan, “Tunah khawiah nge an awm?” tiin a han zâwt a.

Al chuan, “Savun dahna in hnung lamah an tawm khâwm. A mal mala ka kah hlum an hlau va, an lo chhûak ngam rih lo; mahse, an phen ber a kan tâk si-ah chuan...,” a ti a.

Matt-a chuan a pûakruk a phawi a, savun dahna in chu a pawh phei a, mei êngah chuan helho chu a va hmu ta a. Chutah, mi pakhat hian a rawn kâp a, a Iu bulah chuan silaimu chu a ving thiak a. Chutih lai chuan lehlam aṭangin Lafferty-a chu a lo lang a, Matt-a kâptu chu a sir lam aṭangin a rawn kâp a, a tlu hlawm ta tawp a.

Helho zinga pakhat dang, pa lian tak chuan chemtê tle zet mai, sei riang ruang hian Lafferty-a chu vawm a lo tum mek a, chutia a insang ping lai chu Matt-a chuan a dàrah a va kâp a; mahse, chu mai chuan chu pa thil tum chu a ṭhulhtir hauh lo.

Matt-a’n a han kah nawn leh erawh chuan vawi thum ngawt kah chu a ngai ta lo. Chemtê chu mei êngah chuan na vak lovin a vir phei nawk nawk a, Lafferty-a ke bulah chuan a tla ta bal a. Chemtê vawmtupa áwmah chuan thisen a lo chhûak a, a tlu ta a.

Lafferty-a chuan, “In ralthuamte pawnah rawn paih chhûak rawh u,” tiin a han au va.

Pakhat khatin an silaite chu an rawn theh chhûak a. Lafferty-a chuan, “Tunah bucket la ula, mei alh hian in dang a kan kai hmain i ṭhelh thuai teh ang u,” a han ti leh a.

Matt-a pawh chuan a hote chu in kang ṭhelh tur chuan a tir ve ta vat a. Chutia beihpui an thlâk tâkah chuan in kang chu an ṭhelh rêm ta thuai a. Matt-a chuan a fal deuhvin, “Hêng mite hi engtia tih nge i tum?” tiin Lafferty-a chu a han zâwt a.

Lafferty-a chuan, “An hlawh ka tih punsak ang,” a lo ti awlsam mai a. Chutah, Matt-a chu a han en ṭha leh tê tê a, “Eng dang vak nge ti tura min beisei? Ṭingmit vek ila min ti em ni?” tiin a'n lehzawh a.

Matt-a chu a kal sawn ta daih a. Lafferty-a khawsa zia chu mak a ti êm êm mai a, kum sangkhat pawh vei leh se, hre thiam chuangin a inring lo a ni.

Buaina a chin fel hnuah Lafferty-a chuan buaina dang a lo thlen leh tâk thutah pawh a tudai turin police pawl angreng a din a; Gunman rorum tak, Les Saxon-a chu a hotu berah a dah a. Matt-a chuan chûng thil pawh chu a hre thiam chuang lo, Lafferty-a chu hlat tawlh tawlhin a inhriat phah a ni.

Vanneihthlâk takin Two Bar sa ṭin siamnaa thawk mi pali an kah hlum avang chuan buaina hran an neih phah lo va. Anmahni cho chhuah, thihna chovah hna thawktu dangte chuan an ngai mai a ni.

Mahse, eng tik hunah emaw an chhungte’n an ngawih bopui theih loh hun a lo thleng ngei ang. A hmaa rustler pathum an khai hlum tâkte laina leh vua leh vangte nen khan thu khat vuain Lafferty-a chu an rawn do rawn mai ang tih Matt-a chuan a hlau a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)