THE BUZZARD'S NEST - BILL JORDAN (Completed )

Western cowboy Re-type, lehlin leh mizo phuahchawp dahna

Moderator: writers

Jakob l hd
Posts: 44
Joined: May 31st, 2018, 1:03 am

THE BUZZARD'S NEST - BILL JORDAN (Completed )

Unread post by Jakob l hd » December 30th, 2018, 3:26 am

THE BUZZAR’S NEST
TOM WEST
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG - 1
Ni tla tur chuan Rio Grande luipui kam velte chu a rawn chhun tle sur mai a, ralkhat atanga thlir chuan Santa Monte ram aia mawi zawk chu a awm lo vang tih hial tur hi a ni a. Tlang mum pel pul hnaih lam a tuifawn rawn inchhawrdawh velte chu a phuan var sur mai nen. Mahse a hmun hnaiah erawh chuan chutiang awzawng a ni si lo. Inchung tlabal tawh tak takah te chuan mulukawlh rual hi an fu dum fur mai a, khawlaia mi cher fe fe hi an phili sek mai leh nghal nen; hi bawlhhlawh tawih rim hi a uih hmun ringawt mai a ni !
Mahse helai hmun hi hmingthang zet mai chu zuk ni tehtlat a. A chhan chu Danin a khawih phak lohna chin chiah a nih avang a ni. He lai hmun hi musual chi hrang hrangte chuan tlan him nan an hmang thin a. Rio Grande chu America ramri tawp a nih avangin, chu luipui miin an kai tawh chuan Dan chelektu misual chhuitute pawhin an va khawih ngam mai tawh bik thin lo a ni. Chung lai a an tawmbuk lun ber mai chu Paloma zu dawr chu a ni.
Chu Zudawr tawp zet mai dawhkan, zu buain a leih huh zuih tawhah chuan, Mexican zu lum deuh perh purh hi a um dawmin, sakawr chung chuangmi pakhat hi a chawl hahdam a. Tlangval inmet fai veng vawng, fithla zeih zawih, a hmel thlasik ni em char rem rawm hi a ni a. Chulai hmuna Mexicanho, lukhum parh dum hlai hliap hluap, mengtle ru maite nena han tehkhin chuan arawn zinga chinghne maltlat hi ni awm tak a ni a. Acorduroy kekawrtlawn hmawr lam chu sakawr chungchuan boots ah thun lutin, a kamis hak pawh chu a hlui tawh kher bawk a, a Stenson lukhum parh lah chu kum tam hmu tawh hmelpu hi a ni a. Savun pai hlui tawh tak a a .45 puakruk pai lah chu a hlui hmel hle tawh bawk a, mahse tha taka enkawl leh tuaihnum niin a lang thung.
Han en mai chuan chu tlangval, Bill Jordan-a chu eng teh ual hi niin a lang lo ; mahse La Paloma mikhual hluite chuan chu tlangval chu thlaler tlangdung sakawr ang mai a nih thu leh a khen pawh a nat zawk hlei hlei thu chu an hrilh thei ang che. An sawi dan chuan ranrual tam tawk tak lui a rawn kaipui chu a hralh a, mahse ral lehlamah Texas Rangers hovin an dan kawlawk avangin, Mexican ramah chuan a tal ve ta mai mai niin an sawi.
Chu Zudawr siling hniam chur mai boruak a meizuk khu nen, an zu thur in rim nen boruak chu a up churh mai a. Jordan-a chuan beer chu in pah chung hian, a vela mite chu a han thlir kual a,chutia mi che vel lo thlir chu a hmuhnawm ber zawkin a hria ni tur a ni.
Hmuh pawh hmuhnawm tak an ni reng a. A tam zawkte chu Mexican dul kiar hiar huar , nui then the thu, hman peih renga, chemte pai uai zel zulte hi an ni hlawm a. Chu mi bakah chuan khawii lai laiah emaw chuan, Rio Grande ral leh lampanga an mi zawn, luman nei rura tak tak, puakruk pai fual hne hnaw tak takte hi hmuh tur an awm nawlh nawlh hlawm bawk a. Chutiangho zingah chuan dan pakhar chauh a awm a : ha aia ha, mit aia mit, a buru ru, a cherang rang - a ni tawh mai.
Jordan-a chuan American pa lian pui mai, dar pharh hlai diai duai , inmeh fai lohna rei tawh awm deuhin, a bul dawhkana Mexican pali te nena lehkhadenga pawisa inchawiin, cards mawm hliam hluam a phan noh noh hi a thlir bik deuh a. A Stenson lukhum parh buang hnuaiah chuan sam dum hlep hlup hi a rawn lang chhuak a , mitmeng zim sen sun, mit khur inhnaih tak hi a ni roh a.
Tunah chuan chawlhkar khat zet a chamna a ni ve tawh a. Chu pa chu zu heh tak mahnia zu in thin ve bawk, a ruih phei chuan mi tihbuai hrat tak a ni tih pawh Jordana chuan a hria a; a lan dan atang reng reng chuan America atanga rawn tlan bo ni awm tak hian a lang a. Pa awm hle hle thei lo, midangte enghlel chi a nih avang tak chuan, khawilai " Wanted Poster " ah emaw chuan a awm ve ngeiin a rinawm a ni. Chu mai bakah lehkhadena inkhelhna ah pawh chuan " trick " hai chi a ni tih pawh Jordan-a chuan a hria a. Vawi hnih lai mai chu dawhkan ke hnung lama a khup chuan card a zep ru tawh a ni tih pawh a hria a.
Buaina la tawk ngei dawnin, Jordan-a chuan a ring tlat a. Heng mitmeng zim sen sun, hmai tlang chhah ber bur " Vaqueros " an tihhote hi tih thinrim vek chuan rulmuk ang mai a hlauhawm an ni tih pawh a hai lo. Han fiam sual vaih teh, i silai a pai atanga i phawi chhuah hmain an chemte chuan an zai thler duai hman tawh ngei ang che. Jordan-a chuan khaw dang a thlir san leh ta a.
Lehkhadenna dawhkan lama inhnial thawmah chuan a han hawi kit leh vat a. Chu pa lianpui chuan a kut vei lamin dawhkan laia pawisa mawm hliam hluam intiang khawm a va ban lai tak chu a va hmu hman a. A khelhpuite chuan thinrim zet hian Spanish anchhia an han lawh tuarh a. Chutah mikhualpa chuan tho kang deuh uaih hian, a puakruk pai chu a chuh ta a. Chemte pathum hi khawnvar engah chuan a rawn tle chhuak sawr a. Chu mi lai la la chuan Jordan-a .45 puakruk chu a puak ve nghal thawr a. Vaquero pakhat chu a vir mawpa, a chemte chu thlauin, a kokia thisen rawn hnam chhuak tuam tuam chu a hup ta a. Jordana chuan silai cheng chu a han kau zui leh nghal rap a.
" A che leh leh chu ka kap hlum tawh ang. Tlan bo rawh u, " vin fe hian Jordana chuan a han ti a.
Vaqueros dang la hliam ve lote chuan, mitmeng tle ra chungin an mahni rawn tintu silai chu an melh hruk hruk a. Tichuan lunghnur zet chungin, an chemte chu savun paiah an khung leh ta zal zal a. An thianpa chu a sir lehlam leh lama dawmin, kawngkhara puan zar lehlamah chuan an chhuahpui ta a.
Second reilote chhung chauh a awh a. Boruakah chuan silai zen rim chu a nam rum rum nachungin, tumahin an rawn bengkhawn vak mang lo va. Silai han puak thawrah khan hawi zawng an rawn hawi nameuh hlawm mai; mahse thawm a han reh leh takah chuan ngai an awh leh ta mai a. An titi leh nuaih nuaih tawh a. Silai puak ri leh chemte han tle zawr zawr te chu La Paloma ah chuan ngaiah an nei tawh a. Inthah chu a naran zo vek tawh a; luipui luang dam duai mai chuan mithi ruangte chu a lo phur bo mai thin a ni.
Bill Jirdan-a chuan a puakruk chu a paiah a thun leh tawh a, a lo inrawlh ve ta mai chu atthlak tia mahni anchhia inlawh mawlh mawlh chung chuan, a zu um chu a ban leh ta a. Mikhual chu chair-ah chuan a han thu leh a, cards chu a han hui darh chuai a, dawhkana pawisa chu a tham khawm a, a kekawr ipteah chuan a thun ta mawlh mawlh a. A rawn tho va, Jordan-a dawhkan rawn panin, chair-ah chuan a thu rawp a.
Nui vur vur chung hian, " Ka lawm khawp mai ! Min kohna chu Smith-a a ni e, " a rawn ti ta a.
Jordana chuan ngaihsak mang lo zet hian, " Hremhmun lam kawng zawh i la tum mai lo anih chuan, khawmual kaikuang zawng chhaih kawlh tawh suh ang che, " a lo ti hmak a.
Chu pa chu zu dawr chhungah chuan a han hawi vel vut vut a, " Mai mai a, eng dangin nge ka chhaih kawlh si ang ? " a ti ta a.
Jordana chuan a koki a san-ak a, mei zuk tur a zial ta malh malh a. Smith-a intipa chuan dawr nghaktu vei chhen chu a han au va. Chu pa, thawmhnaw bal zet ha chuan a rawn pan phei tuang tuang a.
Jordana chu han melh zohvin, Smith-a chuan, " Nang eng chi nge i in duh ? " tiin a han zawt a.
Ani chuan, " Ka intodelh thei ! " a lo ti hluk a.
Smith-a chuan beer um chanve la awm chu a han melh zauhva, " Pumpui thuah faina lek ! Tequila rakzu ! " tiin a nghuk hruih a, zu semtupa thlengah chuan silver dollar hi a lo dah a.
Chu pa han kal kian leh hnu chuan, Smith-a chuan a kamis ipte atangin zial tur a rawn phawrh a. " I rawn kap fuh palh hlauh kha chu a vanneihthlak phian mai. Pawisa reng ka hul tawh a, tunah chuan ka khawtawm tawh bik love, " tiin a kekawr ipte chu a han beng thuk thuk a.
" Mex-ho kha i bum a nih roh kha, "
Smith-a chuan, " Engnge a pawina ? " tiin a no chu a han vawi khat pup a. " Bum hlum phiar thei ila ka tih nak alaia ! Tak taka, khawnge; maktaduai chanve zet rangkachak leh pawisa nawt nei ka ni asin ! " a ti ta a.
Jordan-a chuan chhan pawh a chhang lova, chu a hmaa pa lianpui, hmui hmul zuah chhep chhup chu a en mai mai a. La Paloma zu dawrah chuan chutiang titi phungleng chu a lo hre hnem tawh khawp a. Pa khawhar, mahni in leh lo atanga ram hla taka awmte chuan, mikhualte hnenah chuan an uan khum chawk rengah a ngai mai a.
Smith-a chuan a meizuk tankai pah chuan, " I lo ngai pawimawh awm lo ve. Pawisa fai khawn uaih ka kalsan avangin ka sakawr zin ka hralh tawh a, bepui mai mai ka ring tawh anih hi, " a han ti leh a.
Jordan-a chuan, " Ka ngaihtuah zawng a ni ve lo, " a lo tihsan mai a.
Smith-a chuan, " Tangka fai dollars maktaduai chanve zet pawh i ngaihtuah zawng a ni lova maw!? Chuti em em a aa maw i nih ! " tiin a meizuk lai chu a tuai vut vut a. " Dan laka tlanbo ka nih hi ! " a ti ta roh va.
" Kan ni theuh alawm ! " ngai pawimawh awm lo dwuh hian Jordan-a chuan a tihsan leh mai a.
" Arizona Territory-ah chuan ka luma Dollar 5000 zet a sin ! "
Jordan-a chuan ning awm deuh hian, " I in atanga i awmna reng a hla mai, " a la tihsan ta fo va.
A tequila zu in chuan mikhualpa chu a titawng duh deuh pawh a ni mahna, nge ni a, chawlhkar khat zet a lo ngawih bopui tawh han vau maupuah chhuahpui ve pawh chu a chak tawh a ni ang chu; Jordan-a chuan a chhan chiah a hre lova, a pawi sa nek bawk hek lo. He " homber " (thianpa) hi mamawh pawh a mamawh lo va, mahse chu chuan Dollar maktaduai chave chu a mamawh lo tihna phei zawng a ni chuang lo. Chu zu dawr uap churh maiah chuan, meng diar diar chungin, chu pa thusawi mawlh mawlh chu a a lo pawng paw ngaihthlak ve ta chawrh chawrh ringawt mai a.
Smith-a chuan, “ Copper Valley an tih hi i la hre ngai lo mai thei. Arizona rama Black Kaweahs khawthlang lam panga awm a ni a. Awle, Kaweahs-ah chuan darsen rawhtuina lian pui pui pali a awm a, chuta hnathawkte hlawh tur chu chulai hmunpui Clarwater-ah chuan an rawn thawn thin a. Thla tin hian, Chicago & Rio Grande relkawngah Well Fargo Expree relin a rawn phur lut thin a ni, “ a ti a.
A zu no ruak chu keng kangin, “ Hey, Waiter ! “ tiin a han au vak a. Dawra zu semtpa chuan a rawn thlit khahsak leh vat a. Smith-a chuan Jordan-a chu a han melh kawk a, “ I muhil elo, “ a ti khu khu a.
Jordan-a chuan ham bai bai chungin, “ Muhil lo. Engting nge chu maktaduai chanve zet chu i neih theih dan tih ka lo ngaihtuah zawk a ni, “ a ti a.
Chu pa chuan, “ Awlsam lutuk maw le ! Kei leh ka thiante pathumte nen rel chu kan va bei a, Express car kan bomb chhia a, pawisa awm chu kan la chhuak a kan tlan bopui hmiah mai. Kei chuan a chanve chu saiip a funin Cold Creek lam panin ka tlanpui a. A rih zia mai chu (h) ! Min umzuitute an lo danna lamah, Swiveleye chu a awmah an kap ta a. Chu tlaktlai lo pa hrep chu a inpuang ta lawm. Tichuan kei chu min umzui ta zel a. Ka thiante nen chuan nakin hnua ka ram chhunga la inhmuhkhawm leh a, la insem kan rawt ta a. Awle, min umtute chuan min rawn nangching lo chauh a ni tawh mai si a. Pawisa sum chu ka thukru a, ramri hi ka rawn pan ta a ni. Tunah chuan Copper Valley-a ka ram chhungah Dollar maktaduai chanve zet ka phum ruk chu va lak mai ngaihna ka hre tawh si lo. Chu chu lungkham thlak ve rem rawm hlein i hre lo maw ? “ a ti ta a.
Mahse Jordan-a chuan ngaihsak awm pawhin a la lang chuang lova. Zu dawr tukverh pawn lam chhawng chu a thlir daih a. Inchhung lama khawnvar eng atang chuan pawna sakawr thlunte chu a lang thei a. Vaqueros pahnihin kal paha tukverh atanga rawn bih zawkte chu a va hmu hman a. Vaqueros-te chu a hriat chian em avangin, phuba lak an tum ni ngeiin a ring a.
“ I la fihlim awzawng lo mai, “ ngaihtuah vak lo hian a han tichhuak a.
Chu tlanbo-pa chuan , “ Sawi sawi a ngai hlei nem, dollar maktaduai chanve zet, khawsak nuam taka chen tur kha, he laiah ka tangkhang ta mai mai rih a nih hi, “ a lo ti a.Jordana chuan, “ I thiante chuan pawisa chu an la daih tawh ang,” a lo ti leh a.
Smith-a chuan tawi tuk hian,“ Engmah an la lovang, a awmna hre miau hek lo. “ tiin alo chhang a.
Jordan-a chuan chu rel rawktupa chu ngun deuh mai hian a en ta ran a. Chu pa chu misual tang rang, mahnia chetla thin niin a hria a. Vaqueros te kha a chansawm tir ta mai lo kha a inchhir rum rum zawk a. Ring fe hian, “ Santa Monte hi i chhuahsain ka ring chuang lo, “ a ti ta a.
Smith-a chuan nui thu chungin, “ Chutiangin ti ngawt teh suh. Tunah chuan pawisa ka nei tawh bawk a, sakawr ka lei ang a, ka tlan chhuak mai ang, “ tiin a chhang a.
Jordan-a chuan ro hulh hian, “ Ni chhuahah chuan i ruh filh kha Rio Grande luipuiah hian a lang thla nulh nulh tawh zawk ang, “ a tihsan ta mai a.

BUNG – 2

Chutia a han sawi takah chuan Smith-a chu a phu zawk a. Hlauh hmel zet hian a meng rang ta nasa mai a, chu pa chuan a hlauh hmel zet a ni tih a hriat mai a.
" Min tihthaih a ni lo maw ? " aw tham tuak hian a ti ta a.
Jordan-a chuan a zu han tem zauh pah chuan, tukverh kha a va bih ta a. Eng riai ruai karah chuan Vaqueros pahnihte chu pawn lamah chuan a va hmu thei a. Pakhat chuan tukverh phenah chuan a rawn bih nghe nghe a.
Chutah zet zawng Smith-a chuan a khabe hmul chu a tuai ta noh noh va. " Chemte zuma min vih an tum em ni ? " a ti ta a.
Jordan-a chuan, " Vaqueros reng reng bum tum tur a ni hlei nem - helai hmunah kher hi chuan, " a ti a.
Smith-a chu a han hawi kual vel a, tanpuitu hmel zawng niawm tak hian inchhung bit tak chu a han thlir vel a, a thian hmel awm reng reng a hmu ta lova.
Jordan-a chuan pawiti awm fahran hian, " I tan beiseina reng reng a awm tawh lo. Rio-ah hi chuan intalh mai mai hi kalphung a ni tawh a nia, " a lo ti mai si a.
Smith-a chuan a kut dinglam chuan a ipte a han zen a. Pawisa nawt bal fe fe hi a rawn hum chhuak teuh va, Dorllar leh siver pawisa nawi nen dawhkanah chuan a dah ta hnawk a. " Heta tang hian him takin min hruai chhuak la, a vai hian nei vek ang che, " a ti ta a.
Jordan-a chuan ngai pawinawh awm lo deuh hian, " Chu zawng theihnghilh zawk rawh. Arte chaw khawpkham lek hlawhin ka inham buai ngai lo, chu lo rengah dawihzep chu ka buaipui peih awzawng hlei nem, " a lo tihsan mai a.
Muangchangin, chupa chuan pawisa chu a han huikhawm leh a, a kut chuan a hum khur ta dur dur a.
Jordan-a chuan hmuhnawm ti deuh hian a lo thlir reng a. " Ngaihtuah ngun deuh ila, rem pawh kan insiam thei ang chu, " a ti ve ta a.
" Inremsiam maw ? " tiin Smith-a chu a meng phawk ta hru a.
Jordan-a chuan, " Tunah tak hi chuan, keipawh ka tan Texas ram chu a muanawm bik vak lova. Aw le, Copper Velley-a i ram chanve chu ka ta tur angin ziak la, heta tang hian him takin ka hruai chhuak ang che, " a ti ta a.
Smith-a chuan, " Ka ram maw !? " I aa ta elo ? Chutah chuan pawisa ka thukru teuh ka tih chu, " a ti a.
Jordan-a chuan pawiti lo zet hian, " Aw le, i hmang dawn chuang hlei nem, " a tihsan mai a.
Sen awp awpin, chu pa chu a thutna ngaiah chuan a han thu leh a. Tukverh darthlalang bal zet mai lam chu a hawi chhen a.
" Ka ram chanve i neih chuan dollar maktaduai chanve chu zawn i tum tihna a nih chu ! " a ti a.
Jordan-a chuan, " Ka rin dan a tak chuah. I ram chu an dap chipchiar durh tawh ang, hmuh pawh an hmu daih tawh ang, " a lo ti a.
Smith-a chuan nur nung chung hian, " Han ring nawn leh teh ! Copper Valley a mi zawng zawng pawhin bawngtuthlawh nen pawh hai ta se la, an hai chhuak mai mai lovang. Ka thuhrukna hmunah chuan kum sawm, kum sawmhnih hnuah pawh a awm reng ang, " a ti ta a.
Smith-a chuan tukverh dartlalang vaivut tam zet phen atanga mitmu pahnih rawn thlir zuk zuktu chu a va hmu a. Awm nuam lo zet hian, a thutthlengah chuan a che sawn chhen a.
Jordan-a chuan, " Kan inrem siamna chu i ram chanve anih chu, " a lo ti leh hmuk a.
Chu luman neipa chuan, " Hrep tak chuan, ni mai ang hmiang ! " a ti ta a.
Jordan-a chu a bu nghat a. Engemaw chen tukverh lam chu a han thlir leh vang vang phawt a. Chutah, a tho thut a. " Min rawn zui rawh ! " a ti ta a.
Jordana chu dawhkan karah chuan kaltlang phei zelin bar dawhkan chu a a va pan a. A nghaktupa hnenah chuan Spanish tawngin engemaw hi a han sawi zauh va, dawhkanah chuan rangkachak pawisa dollar sawm hi a dah a.
Bar dawhkan tawp a thlen phei chuan, Smith-a khan a rawn zui zel a, zu dawr nghaktupa chuan kawmchar lam kawngkhar chu a va hawng ta a. Thimtham hnuaiah chuan, thil dahkhawmna pindan kal tlangin chu pa chu a zui zel a. A tawpah chuan kawngkhar dang va thleng lehin, bar nghaktupa chuan a kalhna a han hawng a, a han nam a. Kawngkhar chu a chik deuh tuah tuah a, a inhawng a, thla eng hnuaiah chuan an chhuak ta a. Kawngkhar chu a han khar leh a, anni pahnih chu zu dawr hnung lama kalkawng bumboh deuhah hian an ding ta a.
Jordan-a chuan, " Khawiah nge i khawsak ? " tiin a han zawt a.
Smith-a chuan awm nuam lo zet chung chuan, " Lui bul buk chhe zetah khuan, " tiin a lo hrilh a, thla eng hnuaia thing hlimte chu a melh vel ruai a.
Khawilaiah emaw chuan tingtang hi an perh ri tlang tlang a, chu lo chu thawm dang engmah a awm lova. Jordan-a chuan thawm a han ngaithla leh vang vang a, chutah, a mit len chung zel chuan a zui ta a.
A tawpah chuan hnim zinga buk tawngtawl tawh zet mai hi an zuk thleng a. Smith-a chuan kawngkhar chu a han pawt hawng a, a chhungah chuan an lut dun ta a. Inneitupa chuan nawalh chu a han nawt enga, dawhkan laia sathau khawnvar chu a han chhi eng a. Jordan-chuan chhuat a dingin, inchhung chu a han hawi vel a, a rimchhe kher mai a. Vawkin pawh chu aia rimtui zawk chu a lo hmu fo tawh thinin a in hria a. Dawhkan chhe zet mai chunga bepui kan mawm zel zul, a chanve ei tawh chu thovin an lo bawm nuaih nuaih a.
Thaw huai hian dawhkan hnungs thutthlengseiah chuan Smith-a chu a han thu chawt a. Nui thu hian, " Aw le, kan lu lak tum hnamho chu kan bum leh ta chu a ni a ! " tiin, meizial chu a rawn phawrh a.
Jordana chuan tho vaikian pah hian, " Aw le, kan inrem siamna chu ! " a ti ta a.
Smith-a chuan pawisa vak awm lo hian, " Khai, chuti em em a chhaw ka ni bik hlei nem, " a ti a. A kekawr ipte chu a han zen a, pawisa nawt chuar zet mai te leh pawisa nawi bawk kha a rawn phawrh leh a. " Dollar sawmhnih zet anih kha, i hlawh awlsam kher mai, " a ti ta a.
Jordan-a chuan aw nem tak hian, " Kan inremsiamna kha i theihnghilh ta em ni ? " a lo ti a.
Smith-a chuan, " Khai, ka tifiam mai mai alawm, " tih pahin pawisa chu a han ak tha leh te te a, chutah puakruk a rawn phawrh ta thut a. Jordan-a chu a tin zawn ta a.
" Pawisa hi la la, tlan chhuak vat la a ni mai ! " Smith-a chuan a ti a.
Jorda-a chuan a koki a han san ak a. Phur lo zet hian, " I tih chuan ni mai e mawle, " tiin hma lamah chuan a rawn pen chhuak a, Smith-a pawisa rawn phawrh leh chiah chu a ban a.
Chutia a tih pah chuan, rang fahran mai hian a taksa rihna nen chuan dawhkan tlang chu a han tauh nghek mai a. Smith-a laiah chuan a va tauh bur a. Thutthlengsei chu a tlu a, a chunga thupa pawh chu hnung lamah a tlu ve ta hawl hawl a. A silai chu a puak thawr a, chu buk chhung zimte chu a khawk rum rum a. A tinsan em avang chuan silaimu chu a lu chunga khanchhukah chuan a lut siah a.
Dawhkan hnuaiah chuan rang fahran mai hian Jordan-a chuan a ke ding lam chuan a va chhir a. A sakawr boot chhip zum chuan chu pa lo tlu nakah chuan a va chhir fuh dawt a. Jordan-a chuan zuan phei vatin, a silai hum lai chu a chhir len sak ta lawp a. Chutah thutthlengsei chu a han dah rem leh te te a, a chungah chuan a thu a, chu luman neipa chhuat a natuara vial ngul ngul chu dam thluam hian a zuk thlir chhuk ta a.
Rei vak lo hnuah chuan, Smith-a chu a rawn thu chhuak a, a dul chu a dawm ngawih ngawih a.
Jordan-a chuan, " I ke hnung lam khan ding vat rawh, " a lo ti tuar a. Tunah chuan a aw chuang ngaihnobeina reng a nei tawh lo.
Thaw hlawp hlawp chung chuan, relrawktupa chu a rawn ding pai tuang tuang a, natuar leh thinrim hmel zet hian amah mantupa chu a melh run a.
Jordan-a chuan nuihzat fahran hian, " Intihfiamna maw ni chu ! Kei zawng ka tifiam ve lo a nia, kan inremsiamna kha pharh anih vat loh chuan, Mister Smith, tho rual chaw kha i ni ringawt mai, " a ti ta chheu chheu mai a.
Smith-a chuan, " Ram ka nei tak tak hlei nem. Ka duhthusam mai mai anih kha, " a ti ta nuah nuah a.
" A va pawi ve, " Jordan-a chuan a ti bal bal a. A .45 puakruk cheng chu a han kau ri rap a.
" Hremhmun lamah kan inhmu leh dawn a nia, " a ti ta mai a.
" Ngawi rawh ! " Smith-a chuan a lo ti tuarh a.
Meng pawng hlawt chung, kawmawl chhe pui pui intiankhawmna lamah chuan a pai phei ta tuang tuang a. Jordan-a chuan a che vel chu a lo enthla reng a. Smith-a chuan kawmawl chu a han hai let a, a hnuaia ip chu a rawn phawrh chhuak a. Ip chhung chu a zuk dap nawk nawk a, lehkha pawimawh inthlep hi a rawn phawrh chhuak a. Harsa ti tak chung chuan dawhkan chu a rawn pan a, Jordan-a hnenah chuan a rawn dah ta a.
Ani chuan, " Bang ngheng khan ding rawh, " a han ti hmak a.
Tualthah mai pawh inpeih reng a Smith-a a hnungtawlh leh takah chuan lehkha inthlep chu a han phelh a, a han bih nghala. Copper Valley, Arizona Territory-a ram, acres 320 a zau Cold Creek leh Sandy River hmar lam inkar a mi neihna lehkha a lo ni a. Mahse chu ram neitupa hming chu ‘ Jed Harker ‘ tiin a inziak tlat mai a.
Jordan-a chu a rawn hawi chhuak a, " Jed Harker-a maw i nih ? " a han ti a.
Chu pa chu lungawi lo hian a bu nghut a.
Jordan-a chuan a kamis atangin pencil a rawn phawrh chhuak a, chu ram pass-na bulah chuan a theh thla a, a rawn tho va, " Hei hi ziak rawh, kha ram pass-na lehkha ah khan. ' A hlutna man min hlan avangin, he ram hi a vaiin, a neitu nihna Bill Jordan-a hnenah hian ka hlan e, ' tiin . Dan ang chiah phei zawng a ni lo na a, mahse dan anga kan tih theih hnai ber niin ka hria, " a ti ta a.
Smith-tia invuahpa chu a han tawi deuh va, silai hmachhawn chuan a han rum ngul ngul a. Chutah thinrim deuh va rum ngul ngul zel chung chuan, thutthleng seiah chuan a rawn thu a, Jordan-a sawi ang chuan a han ziak a, lungnilo zetin pencil chu a theh thla ta thlawrh a.
Jordan-a chu a nui kuk kuk a, " I hming i ziak theihnghilh alawm, chutah a tahrik ni pawh kan dah tur a niin ka hria, " a lo ti a.
A pakhat zawkin chutianga a han tih zawh hnu chuan, Jordan-a chuan a han en vang vang a, chu ram pass-na chu a kekawr ipte-ah hnawh lutin, kawngkhar lam hawi chuan a hnungtawlh chhuak a. Chhuatlai a kal pelh hma chuan a han ding leh rih a, luman neitupa chu a han thlek vang vang a, " Ngaithla rawh Harker. Tlan chhuak rawh, tunah ngei hian tlan chhuak vat rawh. Santana Monte hmun hi i tan hmun him a ni tawh lo. I tan chuan thlanmual a ni hlauh tawh, " a ti ta a.
Chu pa chu a rum ngul ngul ringawt a.
Jordan-a chuan La Paloma chhawng hnihna ah chuan pindan a luah hawh a, chu chu pawn lam atangin thing leihlawna kai chhoh theih a ni a. Fimkhur takin chu lamah chuan a kir leh a. La Paloma kawtah chuan sakawrte chu a lo la inthlung dul a, inchhung lamah chuan dan pangngaiin Spanish tawngin ring fe fe hian an au hlawm a. Mahse Smitha'n a bum Vaqueros ho kha chu a hmu tawh lova. Chu mite pahnih chuan lo nghah ringawt pawh chu an ning ve tawh pawh a ni thei e. Mahse Jordan-a, anmahni hre chiangtu chu bumin a awm chuang hauh lova.
A kailawnah chuan a lawn chhova, thimthamah chuan phei zelin, pidan dangte chu a kal pel zel a. A pindan a va thlen chuan silai a phawi a, a han kau va, a kawngkhar chu a han hawng rawp a, sir lamah a persawn thuai a. Mahse engmah a awm ta chuang lova.
Invengthawng deuh chungin, inchhung chu a va bih a. Kawngkhar sir chu thlawp zaih hian, rei fe chhung chu milim ang maiin a han ding leh rih a. Pindan chu a ruak a ni tih a hriat chian hnu chauh chuan, a chhungah chuan a lut a, kawng chu khar lehin, inchhung pindana chair awm chuan kawngkhar chu a do va.
Santa Monte-ah chuan vawi khat fimkhur luh chuan thihna a thlen a ni chawpchilh mai si a. Tunah chuan inthlahdul ta in khawnvar a chhi a, khumah chuan a va thu a, a boots chu a han phelh a. Thawklehkhatah a tim chawiha, a heh a pet ruh ta a. A lukhamah chuan saruh fawng chemte luzum hi, a fawng thleng hmawk hian a lo bur reng mai a. Chu chemte vawmtu chuan, a tum chu hai rual a ni lo.


Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » November 29th, 2018, 10:06 pm

THE BUZZAR’S NEST :TOM WEST. BUNG -3
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG - 3
Khawchhak lamah chuan kawl a rawn sen tan mek a, Rio Grande luiruam pawh tiau chhumin a la bawh churh lai chuan, Bill Jordan-a chu Santa Monte khawpui atang chuan a tawlh chhuak ru ta a. Amah ang mai a sakawr cher leh paukhauh chungah chuangin, luipui lam pan chuan inte chu a kal pel zel a. Khawlai ui vakvel leh kelte mai lo chu hmuh tur pawh an la awm lo va.
Hriat a chak hrim hrim vangin Smith-a inti, Harker-a chenna buk tawp zet lamah khan a her kual a. Kawngkhar chu hawnsa in a lo awm a.
A sakawr atanga chhukin, buk chhung lam chu a va bih a. Thimthamah chuan engmah a lang thei lova. Bang chu hai thiat deuhvin, a han bih kual leh a. A ruak huai mai a.
Smith-a chu a kal chhuak ta a ni ngei ang tih a ngaihtuah lai tak chuan, lei chhuat hnawmhnawk zinga Stetson lukhum parh hlui zet lo let reng chu a han hmu ta a. Inchhungah chuan a a va lut thuai a, dawhkan mawm hluam a sathau khawnvar bung awm chu a han chhi eng a.
Kawmawlte chu in kilah chuan a la invawm khawm reng a. A zuk kun a, a zuk khawih chuan a lo hnawng churh a. Mei engah chuan a kut zungtangte chu a va en a. A sen hnawng chuap mai a.
Chuti anih chuan Vaqueros-te khan Smith-a chu an va hmu ta a ni phawt mai. Aw le, a aia mi tha thate pawhin Rio Grande luipui chu an lo al tawh thin alawm, a ti ta mai a, lui kanna lam chu a pan ta zel a.
Sakawr sen-uk chunga chuangin, kawr buang ther thur ha pa chuan phairuam zau pui mai chu a tan tlang phei zel a. A veil amah chuan, willows thing kur nghiai nghuaite hian lui luang a awm a ni tih an rawn lantir a. Khawchhak lamah chuan, tlang dung hi a lang dum kul phei run a. Chu mi phairuamah chuan meikhu hi a ngir chho ngiai ngiai a, chu chu Black Kaweahs chu a ni tawh ngeiin a ring a, meikhu zam chu darsen rawhtuina meikhu a ni phawt ang. Kha pa hrawl pui Smith-a invuah thlarawk kha a daw tam puiin a lang lo ve.
Bill Jordan-a chuan lui lam chu a pan thla zel a. Chutah sakawr chuan tui a zuk dai ta a, chu lui chu Sandy River an tih chu a ni ngeiin sakawr chunga chuangpa chuan a ring a, sakawr chuan tui chu a dawt kuang kuang bawk a.
Jordan-a chuan mei zuk tur a han zial a, a han tan kai hnu chuan a kal leh ta zel a. Ralkhatah chuan bawng rual lui lam pan a inzui thla duah duah hi a va hmu a. ni a lo tlangsan deuh chuan, sakawr chung chuangpa chuan phairuam chu a zawh zel a, ralkhatah chuan inchungte a va hmu phak ta a.Ranrual dahkhawmna huangte chu kal pel phei zelin, kawtthler zau tak, vaivut dur zet a va thlen hnu chuan, a sakawr kal pawh chu a ti zawi ta deuh va.
Chuti chuan Clearwater chu a lo ni a ! A Stetson lukhum parh vaivut paw thung tawh chu a han kai kun deuh va, hmuhnawm ti takin a hawi vel a. Chu laiah chuan khua a mite pawh an lo vei vel tawh a, pala an sakawr thlunte chuan an meiin anmahni rawn bawmtu thote chu an hawl luap luap hlawm a. Thingin pakhat, a hming ‘ Maverick Saloon ‘ tih intar kawtah chuan sakawr a lo inthlung tam deuh ber a.
Tlangvala hawi vel chuan lumettu dawr te, thil chi hrang hrang nepnawi zawrhna dawr te, in sei pui mai, a banga ‘ Clearwater Hotel ‘ tih chul deuh rup tawha lo intar te chu a hmu phei zel a. In hlim lai laiah chuan buhpawl a siam lukhum parh khum Mexican hote, ranrual vengtu cowboy hote hi an lo chawl hahdam a, dawr kawtah chuan nu pahnih hi pangpar thiah luk lukhum khumin an lo titi mawlh mawlh a.
Chungte chu kal pel zelin, Jordana chuan a ding lam leh vei lam chu a thlek phei zel a. A tawpah chuan kawtthler atanga fal deuh nalh hian leirawhchan sena sak in pakhat, a kawtah pawh leirawhchan kailawn inrem chho hi a va hmu ta a. A kawngka luhna chungah chuan CAMAS COUNTRY COURTHOUSE tih hi a lo intar a.
Chu Courthouse kawtkaiah chiah chuan a sakawr chu tidingin, rei tak sakawr chunga a chuan tawh avanga rawl thumin a lo chhuk a. Kailawnah chuan a lawn chho va, Oak thing kawngkhar chu nam hawngin, inchhung inkalpawhna kawngah chuan a phei zel a, pindan hrang hrang kawngkhar lu chungah te chuan Country Auditor, Tax Collector, Courtroom tihte hi a lo intar hlawm a. Recorder tih lo intarna ah chuan a ding a, zawitein kawngkhar chu a han nam hawng a, a lut ta a.
Pa te takte hnar zum deuh mai hi thutthleng atang chuan a lo tho va, inzar danna thirlen chhanah chuan a rawn en a.
Jordan-a chuan, “ Sandy River hmar lamah hian ram ka lei a. Chu chu ka rawn ziak lut ang chu ka ti. “ tiin a han hrilh a. Ram neitu nihna Harker-a, Smith-a inti in a hming a ziahna lehkha chu thirlen inzar karah chuan a nawr lut a.
Pisa ziaktupa chuan a tarmit thir tlang kawm chu a han la thla a, nemhulna lehkhapuan chuan a han hru fai nawk nawk a, ram pass-na lehkha chu a han thlek ngial a. A lo thlirtu, Jordan-a chuan phu deuh zawk hian a lo hmu a. Chu pa chu a rawn dak chho va, ngaihtha lo tak hian a dawrtu chu a han melh chho va.
Hek deuh tawngkam hian, “ Hei chu Jed Harker-a ram alawm ! “ a ti ta a.
Jordana chuan pawisa mang lo zet hian, “ Lo ni ta pawh ni se ? “ a lo ti a.
“ Harker-a chu thil sual titu, man tura zawn lai a ni, “ Jordan-a chuan, “ Ani nihna ka hre hlei nem. A ram ka lei sak a, chu chu a ni mai, “ tiin a chhang a.
A ngaihna hre lo tak hian, Clerk chuan ram lehkha chu a han ennawn leh a, ngaihdam dil niah niah chung hian,lehkhabu lian pui pui intiang khawm phenah chuan a kal phei ta a.
A lo let leh chuan chi-ai hmel tak hian mei a rawn pak khu hluah hluah a, “ Engtinnge hming kan thlak dan tur chu, Mr. “ a ti a.
“ Jordan”
“ Mr. Jordan,a dan a dang viau mai. Aw le, dan ang phei zawng a ni mai thei e. Engpawhni se la, tuneitute ka rawn phawt a ngai a ni, he lehkha hi chu ka lo kawl rih ang e, “ tiin Clerk chuan lehkhapuahah hian a han ziak nghal mawlh mawlh a, thirlen pal chhanah chuan a rawn nawr phei a, “ I receipt “ a ti a.
Tihkhawtlaina a zawng rih a ni tih Jordan-a chuan a hria a. Aw le, duhtawkin han ching phawt ang hmiang. A mamawh chu Harker-a ram chhunga duh tawk va hai a ni mai a, chumi atan chuan neitu nihna erawh zawng a ngai a ni. “ Ni ang hmiang, “ tiin a dar a san uk a, receipt lehkha chu a kamis ipte-ah a hnawh lut a, kawngkhar lam chu a pan ta a.
Inchhung inkalpawhna a va thlen chiah chuan, Deputy Sheriff pahnih hian lo nghakin, an rawn karcheh ta nghal a.
Jordan-a chuan makti awm pawhin a lang chuang lova. Lawm zawk ni mai awm hian chu mite chu a han entawn a.
A hmasa zawk, pa hmai chang tak, phiar deuh fet fawt zawk chuan, “ Sheriff Haslipp-an a duh che, “ a ti hmuk a.
A chhan hre lo awm tak hian, Jordan-a chuan, “ Eng atan ? “ a lo ti a.
Chhan pawh chhang lem lo chuan, chu Deputy chuan chu tlangval koki ah chuan a han kuah thawk a. Jordan-a chuan a lo thing thla a, a kut ding lam chu a silai pai lamah chuan a han thlak thla zauh va. Rul chuk ai pawh a rawng zawk hian a puakruk pai chu a rawn dawk zawk a. Deputy a tumah zawk chuan an silai an chuh hma chuan, Jordan-a chuan a tin ta chheu mai a.
‘’ Che tawh su “ a ti thawp sat a, silaimu pahnih ang mai a rum hian a melh ta ran a. Chu Deputy hmai ruh zawka hnenah chuan, “ Warrant pawh nei si lovin, i chawthing barna kut khan ka koki han sawk leh vaih the, I paitawih zawh rual loh damdawi mum ka barh ang che, “ a ti ta a.
Deputy pakhat zawk chuan dam duai hian, “ Ngawi teh thianpa, chutia hmulthi tihdin sung sung ngawt tur a ni hlei nem, “ a lo ti a. A thianpa chu pen khatin a tawlh hnung dawrh a, invengthawng taka Jordan-a chu melhin, a silai kawm bulah chuan a kut a thlak thla ve hman a.
Jordan-a chuan, “ Min rawn pawngpaw zuam ringawt lo ula a ni mai reng alawm. Aw le, khawiah nge in Sheriff tiha chu ka hmuh ang ? “ a ti ta a.
Deputy nelawm zawk, hmui tlang chhah deuh zawka chuan thlang lam kal thlaknaa pindan lam hawi chuan a han bu nghut a.
Jordan-a chuan a puakruk chu a paih a khung leh a, anni chu a kal pel ta a. Anni pahnih chuan an rawn umzui nghal a. ‘ Country Sheriff ‘ tih lo intarna kawngkharah chuan a ding a, a lut ta a.
Pindan chung sang vei vawi tawp lamah chuan dawhkan kil hian pa upa lam deuh tawh tur hi, churut dum zu khu hluah hluah chung hian a lo thu a.A kamis dumpawlah chuan Sheriff chhinchhiahna ansi lem hi a intar vah a, a kekawttlawn dum-uk lam chu a khup thleng boots rawng sangah a nem lut a. Jordan-an a han en vang vang chuan, hranghlui, pa un tak tawh, sakawr zin ai chuan atan thut-mutna thutthleng pawh thlanawm zawk tawh tur hmel puin a hmu a.
Bang kila thutthlengsei inhunna chung lamah chuan an mi sual zawn laite, Wanted Posters, thlalak hi a intar hlawm a. A kilah silai tunna ah hian elhbu ngul tan tawi/ chhum te hi a inhung/ tung phei dul a.
Deputy pahnihte khan pindanah chuan an rawn zui lut ve nghal a. A hmel ruh zawk chuan Sheriff hnenahah chuan, " Kha pa kha, rul chhaih kawlh ang mai a nia. A silaiin min chuktuah nghal ringawt mai, " a rawn ti a.
Sheriff chuan nui vur vur chung hian, " Theihnghilh hmak rawh, Pecos, " a ti sup a. Jordan-a lam hawi chuan nelawm tak hian, " Thu rawh khai, " a ti ta a.
Chu tlangval chu thutthlengsei bula chair-ah chuan a han thu a, a ram pass-na lehkha kha Sheriff hma dawhkanah chuan inpharhin a han hmu a.
Sheriff Haslipp-a chuan, " He ram hi i lei niin i inchhal em ni ? " tiin a han zawt a.
Jordana chuan, " Tehreng mai ! Hnialna a awm em ni ? " tiin a chhang a.
Sheriff chuan mikhualpa enreng chung chuan, a churut chu a han fawp vang vang a, " Engvanga hralh nge anih ka hre hlei thei lo a ni, " a ti ta a.
" Tualthah avanga tlan bo a ni tih Harker-a chu i hre lo em ni ? " Shriff chuan a han tih leh a.
" Ka hriat tur em ni ang ? " Jordana chhan letna chu Sheriff chuan a lo ngaihthah mai a.
" Chutah rangkachak leh pawisa nawt maktaduai chanve lai a ram chhungah chuan a thukru bo tih pawh ? "
Jordana chuan nui var var chung hian, " Chuti anih lek phei chuan ka che fuh nasa nia, " a ti leh mai a.
Sheriff Haslipp-a chuan aw chang deuh hian, " Pehhelna zawng suh ! Harker-a nen chuan in inthurual pawh a ni thei a ni, " a ti ta a.
" Ka kawm chi a ni ve lo, " tlangval chuan a ti leh ringawt a.
" Kha zawngsenpa nen khan khawiah nge in intawn ? "
" Texas ram piah, Rio Grande-ah. "
" Anih leh amah chu tunah khawiah nge a awm ? "
" Nangmah ang chiah bawk ka ni, Sheriff, ka hre bik lo. "
Deputy hmai ruh changa khan an misual zawnlaite thlalak a lo bih kual lai chu, Jordan-a chuan a han melh zawk a. " Khatah min hmu lovang, " a lo ti satliah mai a.
" Chutin ring ngawt suh, " deputy pakhat zawk chuan a lo ti chhur chhur a.
Sheriff chuan fiak thak hian, " Tunah ngaithla teh, Jordan, i awmdan anga chhaw tak pawh hi i lo ni mai thei a, mahse chu zawng ka ring hauh lo. Ka rin dan chuan Harker-a nen hian in inremsiam ang a, ani chuan a sum thuhruk chu lai chhuak turin a tir che a, khawiah emaw inhmuh dun leh in intiam a ni, " a ti ta a.
Jordan-a chuan, " Ka mizia i hre sual der anih chu, Sheriff, " tiin a lo hnial a.
Dan kengkawhtupa chuan, " Nih pawh a ni thei e, mahse hei hi hre reng rawh - chu sum thuhruk chu i khawih veleh anmahni nena inthurual ang a ngaih i ni ang. Puhna chu, rel rawk leh tualthah a ni. Chu chuan hruizena khaihlum a kawk anih chu ! " a ti ta a.

" Khawtual mi pangngai lo inchibai nan chuan a va rura fir fer deuh ve ! "
Sheriff chuan, " Mahse tihpalh thil thu a chu sum phumruk chu i chhar palh anih chuan, Wells Fargo chuan pawisa sum chu kir leh anih chuan zaah samhnih lawmman a phal a ni. Harker-a hnenah chuan min hruai la, a luman dollar 5000 /- i tel dawn a nia. A thiante pahnih man tur pawhin, pakhat lumanah dollar 1000 /- ve ve a awm a ni, " tiin a han hrilh a.
Jordan-a chuan, " Chuti anih chuan velvet ( buikelek puan ) khumah ka tal hawl hawl tawh dawn tihna a nih chu, " a lo ti a. A tho thut a, " Aw le, ka kal thei tawh ang em ? " a ti ta a.
Haslipp-a chuan ro hulh hian, " Chelh theihna chhan che chu ka nei lo alawm - rih a na. Thu rawn duh erawh chu ka nei che a, " a han ti a.
" Ka ngaithla reng alawm, " Jordan-a chu a nui tat tat a.
" Harker-a ram chu hnuchhawn rawh. "
Bill Jordana chuan a chal a chuar nung a. " Mai mai a, ka ram asin ! " a lo ti a.
Sheriff Haslipp-a chuan a dar a san uk a. " Nih pawh a la ni mai thei e. Mahse i luah ni la la atangin i thihna tur hming i ziak a ni mai. "
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 1st, 2018, 6:34 pm

THE BUZZAR’S NEST :
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG - 4
Court house kailawn tawp berah chuan, Bill Jordan-a chuan meizuk tur zial tumin a han ding rih a, engtin nge a thil chu a kalpui zel ang tih chu a ngaihtuah vang vang a. Sheriff in, chu Harker-a ram chu a luah vaih chuan atan chuan thihna a ni mai- a tih pawh kha engah phei zawng a ngai chuang lo va. Mi thenkhatte hi chuan an fiamthu tawh dan hi a mak mang e, a tihsan mai a.
Chutia mei a zial lai tak chuan, kawtthler reh tak chu a han thlir kual vel a. Ni chu a tla dawn suar suar tawh a, ui rualkhat hi kawmkar chep laiah chuan an ri laih laih a, khawlaiah chuan mipa naupang pahnih hian kal pahin vaivut an chhir khu laih laih a, hmeichhe naupang rual khat hi dawr bathlar hlim laiah chuan an phul bian bawk a. Sikul kal pawh an bang tawh niin a hria a.
Chutah, nula pakhat, pawnfen dum feng, kawr var ha, inkhaithli zeih zawih deuh mai hmelthat hmel fahran zet mai hi, rorelnain rawn panna kawtthlera a rawn kal dir ai ai mai chu a hmu ta a. A khabe invuah nalh fahran mai a han dahkhamphei dan, a pheikhai zan dan, a pianphung sakruang nalh fahran mai te chuan a hip ta hle mai a. A luchhip atanga a keler thleng mai chuan, chu nula chu a inzo haih haih hle mai hian a lang a.
Kawngkhar hnuai hlimah chuan a lo awm ve tih pawh a hre lova, a hnuai kawtthlera a rawn kaltlang lai chuan, zawite hian nula chuan eng hla emaw hi a sa rat rat a. A sam, rangkachak ang mai a senbuang thang mai khuh nana pangpar lukhum, ' bonnet ' chu a kutah kengin a vai lauh lauh va, a kut leh lam chuan lehkhabu hi a keng bawr teuh bawk a.
Nula la naupang tak, no tak, sakawr no harh tak ang mai a zalen zak mai ni hian a hria a. Kum sawmhnih pawh a la tling thathum lo in a ring a. Mitmeng kham deuh tawh tan chuan chu nula han hmuh ringawt pawh chu damdawi tha tak mai niin a hria a. Chu nula pheikhai zang tak mai chuan, a lo awm ve tih pawh hre hauh lovin, a dinna zawn chu a rawn kal pel dawn chiah a.
Ui bauh thawm kha a ring tulh tulh a. Chutah khawlaia ui rualho hian uite buang pakhat satlang hlawm pu hi an rawn umzui luai luai a, kawmkar atanga kawtthler ah rawn tlan chhuak an ni.
An bauh luai luai a, nula awmna lamah chuan an tlan phei zel a. Ui dangten a satlang put chu chhuhsak tumin an rawn umzui zel avang chuan uite buang chu tlanchhe chungin a phili buai nasa tawh mai a. Jordan-a chuan a meizial zuk tur zial lai mek chu a thlauh ta a. Fimkhur tura nula chu han auh tuma a an zuau lai tak chuan, uite buang chu nula ke karah chuan a tlan lut ta mai a !! Nula pawnfenah chuan a intel ta nawk nawk mai a. Chuveleh nula ke chu a phet a, mawngsawh dawt a a han tlu chu a au khek chhuak rawih mai a. A lehkhabute chu a darh phung a, amah lah chu ui rual chuan an rap phei nawk naqk mai bawk a.
Jordan-a chu kailawn atang chuan a lo tlan thla vat a, ui bauh chel chul ho chu a zuk pet darh nawk nawk a, nula tlu chu a kawngah a zuk pawm tho va, a han tungding a. Khawlai ui dang pakhat chuan satlang chu a la leh nawlh a, ui dangte chuan an umzui leh ta luai luai hlawm a.
Jordan-a chuan nula tlu pawr chhap mai chu a lo en reng a. Tunah chuan a kamis var leh pawnfen dum chu vaivutin a bawh paw luai tawh a, a sam pawh chu a darah a tla thur buk chhap tawh bawk a. Chu nula chu a chi-ai mai leh a mittui hial pawh a tlak a lo beisei hi a ni a, chutiang awzawng hmwl a pu ta lova, hlauh a hnekin mak a tih hmel lek zawk a.
Nula chuan "Khai, Clearwater-ah zet chuan tawnloh loh tur pawh tawna awl hi mawle ! " a ti ta a.
" I na em ? " Jordan-a chuan a lo ti a.
Ani chu a nui mai a, a han nuih zawng chuan a hmaia vaivut kai liam te chu, powdera,hmai-biang sen tawk taka chulh ang mai hian a lang a. Hlim deuh seng mai hian, " Ka lunglai a na zawk a ni. Choak hlau a tar tlak lek ka nih tawh mai hmel e, " tiin a thawmhnaw vaivut kai te chu a han beng thawk thawk a, a lu thur chhep chhawp te pawh chu a han huih mam deuh va. A lo hawi chhuah leh chuan nelawmna tak hi a awm a.
" Lawmthu pawh ka la hrilh hlei nem che, Mr... " a han ti a.
" Jordan. Bill Jordan-a ka nia " a lo ti vat a.
" Kei chu Carol Hall, sikul zirtirtu ka ni, " a lehkhabu chharkhawm pah chuan a ti a.
Jordan-a chuan, " Tawite chu ka han kalpui ang che chu. Ui rial kha an lo tlan kir leh mai thei a nia, " a han ti a.
Nula chuan a han nuih seih a, " Khuaah hian mikhual i nih hmel, Mr. Jordan, a tam zawkte hi chu ka hmelhriat hlawm a, " a ti a.
" Rio Grande atangin ka lo thleng hlim hlawl a la ni. Hei Harker-a ram hi rawn enkawl ka tum a ni, " Jordan-a chuan a han ti a.
" Jed Harker-a !! " Nula chuan a han ti tuar a, a ding chawt a, Jordan-a lam chu hawiin a en ta ha a.
" Ni chiah e " ani chuan a lo ti mai a.
" Harker-a chu tualthattu a ni a sin, a tlan bo leh nghal, " a han ti a.
Jordan-a chuan a dar chu a han chhin ak a, nula chu a enran mai a. Chutah, heh pet ruhin khawdang a hawisan ta a. Kalkawng chu an han zawh dun leh chuan a laka a awmdan kha a thlak ta daih tih Jordan-a chuan a hria a. An inthianna chu a rei loin a lo bo ta a ni.
Jordan-a chuan, " Ngawi rawh, lo ngaithla lawk teh. Harker-a chu ka thian a ni hauh lo asin. Rio Grande-ah kan inhmu thut ringawt a. Ram hralh tur a lo nei a. Keiin ka leisak ta mai a ni, " a han ti a.
Nula chuan nelawm lo aw deuh hian, " A rel rawkna pawisa sum insem turin a ni ang chu, " a lo ti hmak a.
" Rel rawkna aa..! " bangbo deuh hian Jordan-a chuan a lo ti a.
Nula chuan vawt raih hian, " Mr. Jordan, mi aa ka ni lova sin. A pakhatna ah chuan, tangka sum maktaduai chanve lai a phumna ram chu Harker-a chuan a hralh lo tawp ang. Pahnihnaah chuan, ram i la hmuh ngai reng reng loh i pawngpaw lei mai chu ka awih ring duh suh, " a ti ta ngat ngat a.
Jordan-a chuan mahni inveng tak hian, " A inman tawk em atin alawm, " a lo ti a.
Nula chuan, " Chu zawng ngaihdan ka nei thiam mai. Harker-a chuan engzat chiahin nge a rem siampui che ? " a ti a.
Jordan-a chu a ngawi ta reng a, ngawi reng chuan an kal dun zel a. Chutah nula chu a han tawng leh a, a awki pawh a nem leh deuh tawh a. " Ka ring sual che anih chuan min ngaidam ang che, Mr. Jordan, mahse kha mi sual pawl ho kha a bikin ngeina tak ka nei a ni. Kha Company-a ziaktu , Harker-a thah, Rom Furness-a kha ka laichinpa a ni. A nupui leh naupang pahnih a kalsan a ni, " a ti ta a.
Jordan-a chuan engtinmahin a la chhang chuang lova. Engmah sawi tur awm pawhin a lang lo. Nula chu a dinga, a lehkhabu pawmsak chu a rawn ban a. Titak hmel deuh hian, " Ka lawm e, ka awmna in chu he kawtthler tawp, khulai mai khu a ni tawh, " a han ti ta a.
Engmah pawh sawi lovin, Jordan-a chuan lehkhabute chu a pe ringawt a. He sikul zirtirtu nula thothang tha tak mai leh hmeltha duhawm tak mai hian Jed Harker-a thuihruai te lampang reng reng chu a kungkaih duh lo a ni tih a tilang tawh . A kir leh mai tur chu nula chuan a rawn au leh a.
“ Mr. Jordan, Harker-a ram chungthuah chuan thawnthu mak deuh mai an sawi tak asin. Mite chuan chu ranvulhna chuan anchhia a dawng a, a thlam ( buk ) a riak tawh reng reng chu an thi ziah an ti a sin. Ranrual enkawttute pawhin an kal hel thin, " a han ti a. Ani chuan nuihzat awm deuh hian, " Chuti maia tih hlauh chi ka ni lo, ka pi, " tiin a lo chhang a.
Nula chuan, " Ka hrilh lawk che a lawm, " a han ti leh hram a.
" Khawtual mite chuan mikhual tute'n emaw a sum phum ruk chu an lo hai chhuak mai ang tih an hlau a ni ta ve ang, " Jordan-a chuan a han ti a.
" Chu pawh chu a dik thei e, " nula chuan a lo ti leh a.
Jordan-a chuan, “ Ka in enkawl thei e, “ a lo ti leh a.
Carol Hall-I pawh chuan, “ Chu chu ka beisei, “ a tih pahin a kal ta nghak a.
Nula kal chhuk thla ta chu Jordan-a chuan a thlir zui vang vang a. Chu rel rawktupa ramah chuan mikhualte luhtir loh tuma phiarrukna Clearwater-ah chuan a awmin a ring ta a.
Courthouse lamah khan a kir leh a, a sakawr thlun kha a va phelh a, a chuang a, kawttthler thlang lam panga Merchitile Store a hmuh kha a pan ta a.
Dawr chhungah chuan a hma tlaia a mamawh tur a ziah chhuahna kha a han phawrh a. Dawrkaipa, pa upa lam tawh, sam tho fia fua chuan a nepnawi mamawh, vawksa, coffee, chhangphut bête te chu a han zawn sak a. A duh zawng a ngahsak hnu chuan saiip-ah a khung ta a.
Thuphungin, “ Thil laih chhuah tur zawnga vakvel em ni I nih ? “ tiin a han zawt a.Jordan-a chuan, “ Ranvulhtu ka nia. Harker-a ram hi ka rawn lei a ni, “ tiin a chhang a.
Dawrkaipa chuan a han melh zawk a, a ka a ang zuau va, a ngawi leh ta a, a dawrtupain rangkachak dollar sawmhnih tlang a dah chu a la ta zawk a.
Jordan-a chuan, “ Engemaw sawi tum nei niin I lang a ? “ a han ti a.
Dawrkaipa chuan ban deuh hian, “ Tangka fai a min dawrtu han chan leh mai chu tih ka ngaihtuah a nia, “ tiin a chhang a.
Jordan-a chuan, “ Mai mai a,ka lo kir le hang, “ a han ti a.
Dawrkaipa chuan a lu thin nur nur pah chuan, “ Ni e, an rawn kir leh ang che anga, Boothill-ah an phum ang che. Harker-a chuan a buk a kalsan hnu khan pa pahnih an riak leh tawh a, an ruang hlawm an ni asin, “ a ti a.
Jordan-a chuan, “ Hlauh vanga lungphu chawla thi maw ? “ a lo ti a.
Dawrkaipa chuan, “ Ni lo ve, kah hlum ! .45 miin an chaldar a kah ve ve an ni, “ tiin a chhang a.
“ Man an nei em ? “ Jordan-a chuan a han ti a.
“ Man a ni ?! Tuinnge, tunge a man ang ? “ dawrkaipa chuan a han ti a.
Pawnah chuan Jordan-a chuan a sakwr zin hnung lamah a ip chu a phuar bet a. Kawtthler pui / lun lam chu a pan chho ta zel a. Dawrkaipa khan, Harker-a ram chu hmar lam pang mel sawmhnih a hla, Sandy River ramri, Cold Creek-a awm a ni tih a hrilh a. Chulai ram chu pan lo turin a thlem ngial nghe nghe a.
Sakawr chuan lui dung chu a zawh zel a, ni tlakah chuan luipui kama willoos thing hnuaiah chuan, Jordan-a chuan riahbuk a sual ta a. Zanriah a ei kham chuan meilum aiin, chu zan reh tak maiah chuan a inngaihtuah ta a. Lui luang chu a phuan buah buah a, sanghate hi an leu lang leh zawk zawk thin a.
Hnim karah chuan sazupuite chuan an mei kawh varte chu an rawn hem lang leh zawk thin a. Zan sava hramte pawh hriattur a awm bawk a. Chutiang karah chuan, kan tlangval Jordan-a chuan, kha sikul zirtirtu, nula hmeltha tak kha a ngaihtuah vang vang a. Nula ngaihno bei tak mai, hmeltha tak, zuan zang bawk si niin a hria a. Pasal pawh a neih thuai a ring tawh a, khatianga nula hmeltha kha chuan tlangval duhtu pawh a ngah nak nak kherin a ring bawk a. Engtin emaw tak hian Carol Hall-I pasal neu tura a han chan chuan a ti lunghnur ta riau mai a.
Chutah, Harker-a ramah chuan anchhia awm niawm tak a ansawi kha a han ngaihtuah leh a. A nuih tak a ti za zawk a. Sheriff leh dawrkaipa kha chuan an fiam mai maiah pawh a ngai a, mahse nula pawh khan a ti tak hle mai si a.
Pahnihin an thih phah tawh ! Ngaihtuah nuam tak zawng a ni lem lo.
Phairuama mite chuan mi tih hlauh nan pawh an phuahchawp a ni thei e,tangka sum phumruk chu hmuh anih vaih chuan anmahni tan an duh vek ngei awm si a.
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 2nd, 2018, 6:43 pm

THE BUZZAR’S NEST : Bung- 5
By:Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG – 5
Pen sawmpahnih vela an la inhlat chuan Jordan-a chuan a sakawr chu a han pawt ding a. A malchungah chuan a kut dahin, nelawm loh deuh hian a lo thlir a. A lo hmasa zawk chu pa pian tha tak, thahrui ngah fet fawt, a Stetson lukhum parh hlui fe tawh hnuai lama sam dum hlap mai lo lang chhuak hi a ni a. A khabe ruh kual deuh leh a hnarngul sawi deuh chuan, a hmel phei zawng a lan thattir lem hauh lo va, a chalah chuan chemte hnuhma ser hi a la awm leh ta nghal a. A puakruk chu fual fe hian a pai a, a phawiran theih nan a malpuiah chuan satha hruiin a hreng nghe nghe a. A thianpa, pa thau deuh zawk, kekawr bal tawh zet ha chu zum zawk awm deuhin a lang a, a rawn huangtau lo zawk nghe nghe a.
“ Buaina chawh chhuah i tum elaw, Mister ? “ chalsera chuan a rawn ti nghal tawng a.
Jordan-a chuan dam thluam hian, “ Tum love, ka ram ka chingfel mai a ni, “ tiin a lo chhang a.
Chu pa chuan chil a han chhak phurh a, “ I ram a ni ! Hei hi Harkera ram a ni a, Harker-a chu a tlan bo daih tawh alawm, “ a ti tuar a.
“ Ka lei tawh alawm “
Chalsera chuan, “ I va han dawheh phiangsen deuh ve. Engpawh nisela, Turtle-in hnim tlatna tur a mamawh a, Turtle chu hetah hian a tla dawn a ni mai, “ a ti nghut a. A thianpa hnenah chuan, “ Bawng dangte pawh kha luiah han khalh kai vek rawh, “ a han ti zui a.
Pathau zawk chu sakawrah chuan awm nuam lo zet hian a thu a, a hawivel ruai a. A thianpa chuan a kut chu a puakruk hnaih deuhah a zuk thlak thla a, “ Va khalh vat rawh, Baldy, “ tiin a han tur zui a.
Jordan-a chuan awka nem deuh tho hian, “ Bawng pakhat pawh ka ram chhungah hian rawn khalh lut leh vaih teh u, ka thal nghal thlawrh che u a ni mai, “ a ti ta a.
Chalsera mitmeng chu nelawm loh deuh hian a de ta sawr sawr a, “ I duhthlan a ni a, Mister, i duh chu i hmu ang chu, “ a ti ta ngal ngal a. A kut chuan a puakruk chu a zuk vuan chawt a. a .45 puakruk chu a rawn phawi chhuak ta a.
A silai a han phawi a,a kau rap chiah chuan, Jordan-a kut dinglam chu a phe thla vuai a, a puakruk hmawr atang chuan a rawn de chhuak zuai mai a.
Silaimu chuan chalsera chu a sakawr zinah chuan a va phih her lawih a, a tla thla thelh nghe nghe a, a silai chu leiah a thlauh a, a koki dinglam atang chuan thisen a rawn hnam thla zaih zaih a. Mak ti leh natuara ka ho hian Jordan-a chu a rawn en a, a kut veilam chuan a kokia thisen rawn hnam chhuak tuam tuam chu a hup a.Silai hmawr la lek khu vang vang chung chuan, Harker-a ram neitu thar tlangval chuan cowboy Baldy-a chu a han en a, “ Nang pawh i duh em ? “ a la ti ta chheu chheu mai a.
Pathauva chuan, “ Duh awzawng lo, Mister ! Kha Sudden-a kha zawng silai chelek a awlsam thin em a ni. Kei zawng bawng vengtu mai ka ni e, “ a lo ti khur dur dur a.
Jordan-a chuan, “ Chuti anih chuan bawng vengtupa, in Turtle bawngte kha lui piah lamah sawn khalh kir leh rawh, an vai khan. Tun hnuah chuan lui in rawn kai leh vaih chuan… “ tiin a vau ta a.
Bady-a chuan hmanhmawh zet hian, “ Tehreng mai, “ lo tih vat pah chuan a sakawr chu a kai her ta thuai bawk a.
Jordan-a chuan Turtle ranrual vengtuin lui a bawng rual a khalh kai leh lai chu mei zuk tur zial chungin a lo thlir reng a. Cowboy hliam zawk chalser ruah a kha chu a sakawr atangin a chhuk a, a puan nghawngawrh chu a kamis dar thi hnuangah chuan a theih ang angin a hnawh lut mawlh mawlh a.
Chalsera( hmaisera) chuan a sakawr rinchhan chung chuan, “ I mi han tihdan vei chuh ! I vun kha Buck-an chhekin bangah a la kap parh ngei ang maw le ! “ a han ti nang nang a.
Jordana chuan pawisa lo zet hian, “ Tunge Buck-a chu ? “ a lo ti mai a.
Baldy-a chuan,” Buck Burdock-a chu kan pu a ni. Phairuam chunglam ram zawng zawng deuh thaw, Turtle ranvulhna khi a ta a ni, “ tiin a rawn chhang a.
Jordan-a chuan, “ A la duham belh ta fo a ni maw, kal vat rawh u, “ a ti ta a.
Pathauva chuan a thianpa chu a sakawrah a hlangkai a, an pahnih chuan lui chu an kan phei ta a. An lan theih tawp thlengin a thlir zui a, chutah a sakawr chu a kai her a, buk lam pan chuan a kir veleh ta a.
Inchhung kawngka inhawngah chuan a va lut a, inchhung velah chuan pawisa phumruk chu an lo dap nasa tawh hle a ni tih a lang mai a, an hai hnawk let rem rum a. Chhuat chu leirawhchan sen phah hi a ni a, chung thleng chuan an cho let rem rum tawh bawk a. Chung han tihfel vel chu hna mai a ni dawn lo tih hriain, Jordan-a chuan thawk a han la vang vang a.
Pawnah a chhuak leh a, a sakawr zinte chu a phelh thla a, a tlattir ta a. Chutah chhekin lam chu a va en leh a, chu pawh chu a chhuat an lo lai vung durh a. Kil khatah chuan baltin pahnih leh suahdur leh hmanraw dangte hi a lo awm a. Baltin chu a han khai kanga, a lo la pawp lova. Chu chuan a piah luite a tui chu a va thal a, baltin pakhat chu a sakawr a intir a, pakhat chu inchhungah chuan a khai lut a. A silai paina kawnghren chu a phelh a, inchhung chu a thianfai ta a.
Mutphah tet nuaih tawhte chu a paih chhuak a, thuk chu a siam tha a, in chhung chhuatte chu a chul mam ta a. Darkar khat hnuah chuan in chhung chu luah tlakin a a chhuah ta a. Chhuat leh bungbel vel a tihfai lai tak chuan; pawn lama sakawr ke thir pheikhawk bunin lung chang a han rah rik rap hi a han hria a. Rang fahranin a silai kawnghren chu a chuh tharh a,a hreng nghal mawlh mawlh a.
Kawngkhar chu hawngin a va dak chhuak a. Pa pakhat hi sakawr zin phah lova chuang hian a awmna lam chu rawnpan hian a va hmu a. Chu pa chuan kamis sen leh jeans kekawr bal tawh zet hi a ha a. Pa cher thiak thuak, biang ruh sang tak hi a ni a.Moccasins pheikhawk bunin, sombrero lukhum parh hlai zet mai hi a samsen thur maiah chuan a khum a. Jordana’n a han en vang vang chuan, chu pa chuan puakruk a pai lo tih a hmu a, mahse a hnung lamah chuan a ahna hruihrualin rifle a ak thung a.
In chhung lang lo atanga lo thlir rengin, Jordan-a chuanna sakawr pawna a tlun chu,chu chu pa chuan a lo thlir vung vung chu a hmu a,chutah buk kawngka lam chu a rawn pan ta a. Pawng atang chuan, “ Hello, awm in awm em ? “ tiin a rawn au ta vak a.
“ Chibai ! “ Jordan-a chuan lo tiin, pawnah chuan a lo chhuak lang ve ta a.
Chu pa chuan chibai nan a ban chu rawn phar chhuakin, a sakawr atang chuan a lo chhuk thla a. Pa sang pui mai, bawp sei thliang thluang, cher thuak mai hi a ni a. A mitmeng chu a dumpawl ruih a.
Jordan-a chuan chu pa chu a suak,thlah chanve niin a hria a. Mikhualpa chuan, “ Silai ri kha ka lo hria a, engnge nita tiin ka lo kal a ni, Ka hming chu Irish-a a ni e, “ tiin a han hrilh a.
Jordan-a chuan, “ Turtle ranrual vengtute nen kan han inhnial hlek a awm mawle. Harker-a ram hi ka lei a, ka han insingsa vel a nia, “ a lo ti a.
Chu, Anglo-pa sangpui chuan, “ Sual deuh an nia ! Turtle i lo hnar chuan buaina I thlen a ni mai, buaina namen lo tak, “ a lo ti hluk a.
“ Ka inveng thei tho, “ Jordan-a chuan a lo ti a.
Irish-a chuan a en vung vung a, “ Mahna, “ a lo ti leh hluk a.
Jordan-a chu thutthlengseia thut pah chuan, “ Chawl hahdam rawh khai, “ tiin a sawm ta a. Irish-a chu a bulah chuan a lo thu ve a. In hisap dun ranin mei an zial dun ta a.
Chu pa chuan U.S. Calvary Scout hlui a ni tih leh, Chulai ram Cold Creek piah lama awm chu a ni tih a hrilh a. Sakawr a vulha,sawrkar hnenah a hralh thin niin a sawi bawk a.
Jordan-a chuan ranvulh a tum thu a lo hrilh ve a. Chu pa sangpui chuan engmah a zawt lo nachungin, a thu sawi chu a awih chiah lo a ni tih a mitmeng dumpawl ruih atang chuan a hmu thei a.
Jordan-a chuan, “ Chu, nang pawhin Turtle nen chuan buaina nei niin i insawi a. He Buck Burdocka hi pa tawrawt take m ni ? “ tiin a zawt a.
Irish-a chuan, E khai, khawmual kaikuang ai pawhin a luhlul zawk mawle, Chutah duham tak mail eh nghal. Helai luikamah hian ranvulhtu pathum kan awm a – kei, ka thlang lamah Plummer-a, chhak lamah Razorback. Turtle nen hian buaina tawk kan nei theuh alawm. Burdock-a ram hi acres singhnih vel anih ka riing a, mahse chu pawh a la duh tawk lo a ni. Kan ram lamah a rante a la rawn tlattir tho. “ a ti a.
“ Chu chu in ngaithei a maw ? “ Jordan-a chuan a lo ti a.
Irish-a chuan a koki hruanghrau pui chu a han san uk a. “ Engnge kan tih theih ang ? Burdock—a chuan mikawlhsen tak tak chhawrlai sawm a nei a, ka ram chu ka hung ve bawk a, mahse Burdock-a chu hmeichhe zurui huangtau tak ang mai a ni, min nawr min nawr ringawt a. Plummer-a phei chuan pem bo san a tum hial tawh a ni, “ a ti a.
Jordan-a chuan, “ Kei chu, chute mai a chhuak mai mai chi ka ni ve lo, “ a lo ti hluk a.
Irish-a chuan, “ Burdock-a chu pawisak nei lo deuh a nia, “ a ti a. A han ding chhuak a, Jordan—a ai chuan a sang hle a, “ Helai hmun hi chu hrisel lo deuh a nia, “ tih nuah nuah pahin, a moccasins pheikhawk chuan thawm pawh nei lovin a sakawr awmna lam chu a pan leh ta a.
Chu pa chuan a sakawr zin pawh phah lova awlsam fahrana a perkai nulh chu Jordan-a chuan a thlir zui vang vang a. Chu thlah-chanvepa chu pa mak tak ni awmin a hria a. Engnge ni, “ Hrisel lo, “ a tih chu ni ta ang ?
Tunah chuan a in chhung tihfai chu a zo tawh a, rawng a bawl soh soh va. Chutah, San Marcos tlang lama ni a tlak chuan meizuk tur a zial a, a cabin hma a thutthlengsei-ah chuan a thu a, a hahchawl ta a.
A hmaah chuan Oak thing hmun hnuaiah hian phaitual hnim ram tha tak mai chu a inpharh duai a, a piah lamah chuan Sandy River chu a luang cham duai a. Turtle ranrual thenkhatte chuan an lo tlatna ram lam chu rawn panin, lui an rawn kai leh tawh hlawm a. Chu luikamah chuan pal hung a ngai ngei dawn niin a hria a, chuti lo chu Turtle ranrual chuan anmahni thu pawhin an la rawn chim buai ngei dawn niin a lang.
Arizona ram chu a duh zawng tak niin a hria a. Ramri piah lama mi rawvaho lak atanga fihlim te, thlaler ram chhengchhe pui mai ringawt thlirna atanga fihlim te leh bawng bu thawm han hriatte chu thlanawm tak niin a hria a.
Chutah pawisa sum phum rukna lam chu a han ngaihtuah ta a. Khawilai ah hian nge tlanchhe chunga rangkachak leh pawisa nawt maktaduai chanve zet chu a phum bo tak ni ang ? An rawn umzui zel anih si chuan, phumna tur hun a nei tlem hle a rinawm sia. Mahse hmun himah chuan a ni phawt ang, amah Harker-a ngei khan tumahin an hmuh lohna lohna turn i khan a sawi si a. Tlang lam pukah te chuan a ni mai thei. In bul vel chu midangin an lo hai fai hneh hle tawh niin a ring a. Harker-a khan Dan chu a lo bum tawh a, ani chuan Harker-a chu a bum leh chhawng thei phawt ang chu.
Thawklehkhatah, a insang mar thut a, khawchhak lampang tlangah chuan engemaw han de zawk hi a hmu a. Ni tla turin darthlalang keh a rawn chhun eng zawr pawh hi a ni thei e. Nge ni a, entlang darthlalang rawn de zawk.? Tute’n emaw an lo enthla reng pawh a ni mai thei. Harkera khan a ro phum ruk pawrh turin a tir anih ring vangin, Sheriff Deputy pakhatin a lo enthla ru reng pawh a ni mahna. Anni chu han bum rih a, ranrual vulh tum ang a han lan chu thil tha ber niin a hre ta a. Harker-a chu a thi tawh a, a ro phumruk chu a him rih alawm.
Khua chu a rawn thim telh te;h zel a, a tho va, in chhung thim hnuaiah chuan a lut ta a. Laltin zawng a awm na a, chhit pawh a tum chuang lo va. Kawng chu kharin, inchhung lam atang chuan a do va. A mut puan chu pharhin, a pheikhawk a phelh a, a tluzal ta a. A mutthilh dawn chuan, Carol Hall-i, zirtirtu nula hmeltha tak thusawi kha a han hre chhuak zawk a – chu Harker-a cabin a riah chu thihna ngei nge. Thimthamah chuan a nui rah rah a. An la hria ang chu !!
Zing khawvar eng chu tukverh te tak tea lo lut chuan a rawn tiharh a. Pawn lamah chuan sava an hram chiah chiah a,khawilaiah emaw chuan bawng a bu ruah ruah bawk a.
Ham bai bai chungin pheikhawk a bun a. Ni a lo chhuak reng tawh a,mahse a la dam a, a dam chiang khawp mai ! Harker-a cabin-ah chuan zan chu a riak a, an thusawi zawng zawng kha thu vauk ani tih a finfiah ta alawm. A rin ang ngeiin, khawtual mite chuan hnar nan an lo sawi thaih mai mai thin ni ngei tur a ni.
In chhung chu a uap churh mai a, kawngkhar lam chu a pan a, kawngkhar a dona chu a han phet a, kawngkhar chu a hawng ta a. Pawn boruak thianghlim lo lut chu a han hip vang vang a, pawnah chuan a pen chhuak ta a.
Tlang awihtlan thingbul tinchhan chuan, a lo changtupa chuan a Winhcester rifle chu a kokiah a han chhuang a, a tinzawn vang vanga, a hmet per ta a.
Jordan-a thophang chuan a kawtkai chiaha an lo laih khuar a lo hnawh hmaih kha a a la hre ta lo fo va, a ke dinglam chuan khuar chu zuk daiin, hmai leisi chawrhin a hma lamah chuan a tlu ta a.A tluk chiah chuan silaimu in kawngkhar chu a va deng ri sawk ri chu a han hria a, chu chu siali puak ri thawr chuan a rawn zui nghal zat a. Thawklehkhatah chiang deuh maia rawn harh chhuakin, rang takin a let tawp tawp a. Silaimu dang chuan vaivut a rawn kap leng leh chuai a, mahse ani chuan inkil lehlam chu lo lum thleng tawhin, amah rawn thah tumtupa lak atang chuan a bibo hman ta a.
Vaivut paw thuala bawkkhupin, a thaw hlawp hlawp a. Chutah a dinhmun chu a han ngaihtuah chiang a, a kawlawk hle niiin a inhria a. Cabin hliah tlang pangah chuan amah rawn thah tumtupa chuan Winchester rifle nen a chang a. Ani Jordan-a chuan silai pawh a lo pai ve si lo, a mutna bul inchhungah khan a puakruk chu a khai a, a rifle lah chu thuk bulah khan a tung a ni si a.
A khawi zawk pawh va lak tum se la, kawngkhara luh a ngai ngei ngei dawn a, chu chu atan hremhmun kawngka a ni tawh mai si. A duh hun hunah, chu tlangpanga lo changtupa chu a lo chhuk thla thei dawn a ni. Chinghne ka-a sazupui ang lek ni tawhin a inhre tawh a, a dam khawchhuah theihna awmchhun chu, bihrukna hmun tur chuh vat a ni tawh mai.
A tho va, cabin kawmchar lamah chuan a tlan kual ta a. A vei lamah chuan kaihlet hlingbawn hian Cold Creek lam chu a tuam thla a, mahse chumi buk zuk thleng tur chuan silaimu a tawn a ngai si a. A ding lamah lah han phen tur chhete pawh a awm chai silo. Chuti anih chuan cabin hnung lama luikawr chu a ni tawh mai, chu lamah chuan phen tur a awm mahna le.
Chak deuha tlanin, cabin sirah chuan a tlan chhuak phei a, hlingbawn karah chuan a tawlh lut a; chung chuan an lo chhun nawk nawk a. Rang deuhin cabin hliah lai chu a tlan tlang thuai dawn a ni tih pawh a inhria a,chutah chuan a lo changtupa chuan a hmu thei dawn si a. A hnungzanga rawn kah thawr mai emaw, a zangruh han sawp nuaih mai tur chu a han ngaihtuahin a duhawm loh kher mai. Tlan kawi zawr zawrin, thing ding karah chuan a tlan phei ta a. Pen sawmthum velah chuan a thaw ri mail o chu thawm a la reh thap a, chutah silaimu chuan a piah thingkawr chu a rawn deng khem thla hlawk mai a,silaimu chu a khawk ruih ruih mai bawk a.
A tlan nawk nawk a, a han tlan kawi leh chiah chuan, a piah lawka thingzar hniam deuh chu a rawn deng bal hlawk a. Hnim a lo pik deuh va, chu chuan chet vel a ti harsa zual deuh a,mahse phentuah a tangkai bawk si. A tlu rawpa,a bawkvak ta thung a. A lo kalna lamah bawk khan bawkvakin a phei leh a,silaimu pahnih dang pawngpaw kah tih hriat deuh hian a rawn deng leh a. A reh leh tak vang vangah chuan hnimbuk karah chuan a bawkvak lut thuk deuh deuh va, atawpah chuan thingzar hnuaiah hian a bawk phek ta reng a. Sava hram nuk nuk tih mai loh chu a reh ta vang vang a.
Thaw hlawp hlawpin, ramsa umzui ang maiin a bawk phek reng a, mahse rawn umzui thawm a awm ta lova. Ni a sang deuh deuh zel a, tlangpangte pawh a rawn en ta uar a.
Tunah chuan thawk lak pawh awlsa a ti deuh tawhin, chu tlanchhepa Jordan-a chuan chet lak zel dan tur chu a ngaihtuah vang vang a. Zawhte leh chaichim impel ang main i hian a inhria a. a bihruk rei poh leh tlangpanga amah kahhlum tumtupa chu a biru rei ve mai dawn niin angai a. A han chet hlek leh a rawn kap chilh a ni nghal mai bawk si nen. A tang kawlawk tawh a, tih theih a nei tawh lo. A tih theih chhun chu nghak reitu zawka tan chu a ni mai. Silai keng lo va a chhuak ta kha a inchhir kher mai, mahse khatiang kha anih a ring lo a ni.
Hun chu a inher zel a, ni chu a tlang sang tulh tulh a. Hnimbukah chuan a biru ve bawk nachungin, ni chuan a rawn chhuntlang a,a hnungzang vel chu a sat hian a sa hlur tawh mai a. Laiking hian a hnar bul mai chu a rawn vak thlang a, a piah lungpui chungah chuan chipte hi a fu vang a. Cold Cree lui luang ri chu a hre phak riai ruai a, a tuihal chu a sa huam huam tawh a,. Lui lampanga vah thlak tak chu a nap a, chu chu thil atthlak tak anih dawn avangin a insum hram hram a. A han chet chhuah vaih chuan Winchester kengtupa khan a lo chang reng dawn a ni si a.
“ Hey, Jordan, khawnge i awm ? “ tih au aw a han hriat veleh chuan a insangmar thut a. Kha thlah-chanve pa aw kha chu hai rual a ni lo. Irish-a chu amah rawn kaput kha ani thei ang em ? Jordan-a tuihal chuan a lei pawh vung vekin a inhre tawh a, a hnungzang pawh chu a sa rut tawh mai bawk si a, a hma khan silai ri khan kha thlah-chanvepa kha a rawn kaltir kha a ni a. Tunah pawh hian a rawn kaltir a ni zawk mahna. Ni raw se sek- a ti ta ringawt a, a rawn thu chhuak a, hnimbuk atang chuan a chhuak ta a.
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 3rd, 2018, 6:23 pm

THE BUZZAR’S NEST . BUNG - 6
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG- 6
Cabin sira a rawn kual chuan, Irish-a chu kawngka bulah a lo ding a, a rifle chu a dinglamah a zakzeh a. Jordan-a bawrchhawr deuh va rawn chhuak a hmuh chuan, a lo thlir reng a, chutah a nuih tak a za zawk a.
“ Zan mut khawpkham lo i va ang chiap chuap ve mawle, ? a lo ti a.
Jordan-a chuan,” A kawchhung atanga phihchuah ang mai ka “ ati. Cabin chhungah chuan a lut thuai a, a puakruk kawnghren chu a hreng nghal mawlh mawlh a, tui a han in zui khawlh khawlh a. A nuam ta deuh tih chuan a chhuak ve ta a.
“ Engvanga lo kal nge i nih ? “ tiin a han zawt tawng a.
Irish-a chuan, “ Silai ri ! Indona dang I chawk chhuak leh ta em ni ? “ a lo ti a.
“ Ni lo ve, mikhual pakhatin zing thingpui hmeh atan silaimu mi rawn suah a ni, “ tiin a hrilh chiang ta a. “ A landan chuan, Turtle tlumtherh pakhatin ,min rawn kah hlum a tum ringawt niin a lang, “ a ti a.
“ Midang pawh an awm ve tho alawm, “ Irish-achuan a lo ti a.
“ Tu dangin nge ka luvun hik duh ang ? “
“ Harker-a thian te’n, Joe Lagget-a leh Bill Negg “
“ Anni chu dan kengkawhtuten an umzui lawm ni ? “
Chu thlah chanvepa chuan, “ Umzui thereng e ! Mahse Dan chu heta tanga nikhat kal, Clearwaterah daih alawm awm, anni lah chu Bad Lands lamah daih an bibo tawh si, “ a ti a. Hmar lampanga tlang chhengchhe deuh lam hawi zawng chuan a han thle bak a. “ Aw le, khawiah nge chu pa chuan a lo chan che ? “ a ti ta a.
“ Silai det dan atang chuan khi tlang chanve lamah khian, “ tiin Jordan-a chuan khawthlang lam tlangpang chu a han kawk zoh va.
Engmah sawi zawm leh chuang lovin, Irish-a chuan luikawm lam pan chuan hma a hruai a, a pen zau pui mai chu umphak tumin Jordan-a chuan a hnungah a umzui ta a. Kawr chu an kai a, tlang awihpangah chuan an lawn chho ta a.
Irisha chuan, “ Lo chawl rih rawh. Hnuhma i khawih chingpen zo vang e, “ a ti a. Hma lamah chuan fimkhur deuh va hnuhma zawngin a chho ta a. Atawpah chuan a lo ding a, a rawn hui a, Jordan-a chu a lawn chho veleh ta a.
Red Indian suakpa bul lawkah chuan lungpui tohlawt hi a lo awm a, chumi bulah chuan thing a ding a, chu thing bulah chuan silaimu ruak engemaw zat hi ni engah chuan a de sat hlawm a. Jordan-a chuan va lak mai a tum a, mahse Irish-a chuan a ban sei pui chuan lo dangin, a lo dal a. Jordan-a chu silai a pe a, Jordan-a chuan a han en chuan Calvary carbine hlui, Spencer mu khat thunna chi a ni tih a lo hmu a. Chulaia silaimu ruakte erawh chu Winchester .44 kartut a ni hlawm a.
Irish-a chu a bawkvak a, lei chu ngun taka bihin, a bawkvak kual ta chung a. A tawpah chuan a bawp sei pui mai chuan a rawn ding chhuak ta zuah a, a kekawr chu a beng fai thuk thuk a, “ Ka hriat dan chuan a lo changtupa che chu fit nga leh inchi riat mi vel, pasaltha vak lo, sakawr chung chuan boots bun, helaiah hian rei vaklo chu a awm a,meizial chanve vel tlawn nga a zu hman a, a hlauthawng deuh niin a lang. Hmanhmawh deuh vin a kal chhuahsan leh ta a ni, “ a ti ta a.
Jordan-a chuan makti tak hian, “ Anih leh a sam rawng engnge ni ? “ a lo ti a.
Irish-a chuan bahlah miah chuang lo hian, “ Samsen ther thur,a mitmeng chu a buang a ni. Hmai cher tak, hriam hreih hrawih,hmai chik, ha hmai pahnih kuh. Chu chu ka hriat dan a ni. Joe Legget-a a niin ka hria, “ a ti a.
“ Harker-a thianpa pakhat maw ? “
Irish-a chu a bu nghut a.
“ Tunah chuan tlumtherh rimchhe zet pa chu ram hla takah a awm tawh a ni lawm ni,” Jordan-a chuan a ti a.
“ Mahse, a lo kir leh tho alawm “
Jordan-a chuan a han ngaihtuah vang vang a, “ Chuvang chuan a ni maw Harker-a ram kha a hrisel lo i tih ? A aia tam pawh i la sawi thei ang,” a ti a.
A suakpa chuan, “ Ka hna ni hek lo le. Khawnge, sakawr sawizawi tur ka nei tak asin, “ a ti a, lehlam a hawisan ta daih a.
Jordan-a chuan, “ Kei pawh hna ka nei taka sin. He Plummer-a hi bawng leiah ka va dawn dawn a ni, “ a lo ti ve a.
Red Indian thlah chanvepa chuan, “ Bansan mai zawng i tum hauh lo mai maw, “ a ti a, hma a hruai chhuak leh ta a.
Cy Plummer-a chu pa sang kul kho mai, upa lam tawh, khabe hmul tuak phirsi taka zuah a ni a. A ram chu Irish-a khawsakna atang chuan lui hnar lam mel khat vela hla hi a ni a. Hung pawh ni lovin, Turtle ranrual leh a ranrual chu an intlat pawlh mai ni hian a lang a.
Jordan-a lo kal thawm a hriat chuan, di in atang hian a lo chhuak a. Insirah hian sakawr nu tar kebai hian hnim a pet mawlh mawlh bawk a.
A ranrual lei atan rawn dawn a tum tih a hriat chuan a phur hle mai a. Bawng hralh rual sawmpanga emaw, sawmhnih lai pawh a ni mai thei , bawng a nei a. A lo chhiar chiang chiah lova, a vanglai tak an ni a, pawisa mamawhviau lo se la chu a zuar phal hauh loving, a man chu pakhatah dollar 25 zel a ni.
Jordan-a chuan a dar a han chhin uk a, pakhatah dollar 15 zel in a han dawn a, chutia a remtih loh chuan lei loh mai a tum a tum a, putara chuan a remti ta nghal a. Mahse a ranrualte chu Turtle ranrual nen an infin nuk mai a, Chuvangin thliar hran deuh rih a la ngai ang tih a hrilh a.
Jordan-a chuan, “ Ni hnih chhungin Harker-a ramah rawn thlen rawh, chuti anih loh chuan kan indawr thei lo a ni mai. Hei i ram chhung hi ping dang ta che mawle ? “ a ti a.
Putara chuan, “ Vawi khat zawng ka ping ve tawh bawk a,mahse Burdocka’n pal pinte chu engahmah ngai chuang hek lo, ka pin leh vaih chuan, hruihrual nghawngawrh min awrhtir a tum a ni, “ a ti a.
“ Irish-a pawhin a ping a sin, “ “ Ani zawng, Turtle ho hian an duhsak bik a ni ang. A chang chuan Burdocka hian sakawr sawizawi turin a a chhawr ve bawk thin a, “ tiin Plummer-a chuan a chhang a.
“ Chuvang chuan a nia a la khawsak zui zel theih ni, “
Putara chuan, “ Naihdan ka nei mai, Irish-a hi chuan Harker-a sum ruk chhuah phum bo hi hai chhuah a la inbeisei a ni ang. He Apache thlah hi chu verther tak a ni a, hnuhma chhui lah a thiam khawp a, “ a ti ta a.
A ran lei thar pana a haw kawngah chuan, Jordan-a chuan chu putara'n Irisha chanchin a sawi chu a ngaihtuah vang vang a. Chu thlah suakpa chu venthawn tur pakhat ni ngeiin a ring ta a. Chuti anih chuan Sheriff Haslipp-a leh a deputies te tiam lovin, mi pathum ro phum ruk rawn chuhpuitu tur an awm niin a hria a. Chutah Turtle ho chuan englai pawha amah rawn bei let thei an ni bawk si a. Burdocka leh a hote chuan lui dungah chuan anmahniin dan an siam mai a, Suddena a lo hliam kha paitawih ral thei mai mai dawnin a hre bawk si lova. Chu dollar maktaduai chanve chu a laihchhuah hmain, engemaw zawng a la tawk ngei dawnin a inhre ta a.
Khua a thim chuan tukverh pahnihte chu a khar a, laltin chu a chhi ta a. Khawnvar engah chuan langsar hle ni hian a inhria a; chuvangin laltin chu a han ti mit leh a, arsi eng hnuaiah chuan pawnah a chhuak ta a. Kawmawl zial a pu a, a Winchester rifle a keng tel bawk a. Thing hlim hnuaiah chuan kal tlang zelin, a lo changtupa channa tlang lam kha a pan chho zel a. Amah thah tumtupa khan a lo chang leh anih chuan, a lo channa ngai, a rem hriatsa ah bawk khan a lo chan leh ngei a ring tlat a ni.
Tlang awihtlanah chuan lawn chho zelin, kha lungpui tohlawt awmna chungah khan a lawn chho zel a, chutah a innghat ta a. A hmasain a kawmawl chu leia mi seh thei rannung a lo awm takin a han vai fai hmasa leh te te a, a kawmawl chu a phah a, reilote chhungin a muhil chawpchilh nghal ta mai a.
Jordan-a a han harh chuan khawfing a lo chat tawh a, kawl a rawn sen tan ta a, vawttiin a khawng thum mai a. Awihtlan a zuk thlir thlak chuan engmah vak a lang chiang thei lo va. Mei a han zial a, mahse tan leh ngam ta chuang lovin, a thi chuan a pet kawh ta ringawt a. Khaw en chian deuh chu a nghak ta a.
Khua chu a rawn eng tulh tulh a, hnuai lamah chuan lui chu a luang cham put a, bawng rualte chu an rawn inzui thluah thluah a. Khawchhak lamah chuan ni rawn chhuak tur thlarah Black Kaweahs tlang chu a lang dum khual bawk a.
A han thlir vang vang pawh chuan engmah che reng Jordan-a chuan thil dang a la hmuh belh ta chuang lova. Chutah zing vartian reh vawng vawng karah chuan thir han inkhawng ri rak ri hi a han hre ta a. Tuemaw hian rifle-ah kartut a thun lut a ni tih pawh a hre nghal mai a. Ngun deuhin a zuk thlek thla tha leh a. Chutah zawng lungpui tohlawt bulah chuan, mihring riruang hi a zuk hmu ta a, a awmna atanga pen sawmthum pawh tling lo turah hian a ni a, a hma tuka Irish-a nen kartut ruak an hmuhna teuh ah khan a ni.
A bawkphek thlur a, a rifle a koki a duhdah taka chhuang hian, pa pakhat hian cabin lam chu a thlir vang vang a. A hnung lam atanga han kah dak awrhah chuan a itawm kher mai, a rem nasa mai si a. Mahse Jordan-a chuan thaw hakin, a rifle chu a dah thla leh ta a. Chutianga a mi hriat ngai pawh ni si lo, inring lo lai leh nghal zuk kah hlum rik ngawt mai chu a tihchi niin a hre lova. Thawm dim deuhin, zawhte ang maiin chu pa awmna lam hawi chuan a vak thla ta tham tham a.
Hmanhmawh hauh lovin amah kah hlum tuma lo changtupa lamah chuan a vak thla zel a. Chu mikhualpa ke hmawr chu a zuk khawih phak lek lek tawh tihah chuan, engvang emaw ni teh hian chu pa chu a rawn leh hawi a, Jordan-a chuan mitmeng buang, a hmaichik hmel chu a hmu ta nge nge a. A khabe zum deuhah chuan khabe hmul tlem a zawng hi a zuah ve chhap a, makti deuh mai hian, a ha-hmai kuh pahnih lang thu chuan a heh pan deuh chuan a rawn ang sawi bui a.
Jordan-a chuan fiak thak hian, " Han che vaih teh, i mawng keh kakah hian suan tlang ka rawn thun lut pawlh a ni nghal mai, " a ti ta chheu chheu mai a. A rawn tho nghal a, chu pa lo bawk phek thlur chu tinzawn chung zelin, a zuk pan thla a, a Winchester rifle chu a chhir lensak ta lawp a.
" Tho vat rawh !! " tiin a han vin leh that a.
A heh hnuai lam pet fun chungin, chu pa chu khawng thum ni awmtak hian muangchangin a lo tho chhuak a.
Jordan-a chuan chu pa awma Winchester rifle a tin chung chuan, " I gunbelt kha phelh rawh, " tiin thu a han pe leh a.
Hreh tak chung hian, chu zawnghrik hmaichik-pa chuan a gunbelt chu a phelh a, a thlauh thla ta a.
Jordan-a chuan, " Tunah hnungtawlh rawh, tawlh zel rawh, " a han ti ngul ngul a, chu mi pah chuan chu pa awmah chuan a rifle hmawr chuan a hawlh zui zel a.
Engmah pawh la sawi chuang lo chuan, chu pa chu a hnungtawlh zel ringawt a.
Jordan-a chuan chu pa gunbelt chu a chhar a, a koki ah a bat a. Tenawm deuh hian, " Tichuan nang chu Joe Legget-a i ni maw chu ! Mi changa lambuntu dawihzep fahran, tawngtaina chham tur i hriat chuan, tunah chham nghal rawh, " a ti ta hmiah a.
Chu zawnghrik hmaichika chuan, " Chiar chiar lo khan min kap hlum la a ni mai ! " a lo ti a.
Jordan-a chuan, " Mulukawlh chaw ah mai lo chuan i ruang chu a tangkai chuang lovang. Kha dollar 1000 luman i neihna ah khan - a thi pawh, a nung pawh - tih a inziak leh ziak loh reng ka lo hre ta lo a ni, " a ti a.
Chu pa chuan a heh hnuai lam chu a pet keh fan fan a. A khabe hmul meh lohvah chuan thisen a rawn luangthla zawih zawih a.
Jordan-a chuan, " A manin man zawk che i la a tha awm e. Cheng sangkhat han chan tawp mai zawng a ni lo ve. Khawiah nge i sakawr ? " a ti ta a.
Chu pa chu hmui chip chungin a rum ngul ngul a.
Jordan-a chuan, " Aw le, kein kal chhuk rawh le, " a ti ta a.
Chu pa chu a thaw huai a. Hnuai lam lui luang tle sur mai lam pan chuan a chhuk thla tan ta a.
Buk pawnah chuan, Leggeta'n savun hruihrual fip kawnghrena a hman chuan a hnungkhirh ta a. " Che vaih teh, i kekawr kha a pit thla ang a, i inpal awk buai vek a ni mai. " tiin a sakawr dahna lam chu a pansan a.
Hmanhmawh lo deuh mai hian, a sakawr zin chu a phah a, a rawn chuang chhuak a. Hruihrual hi pawhzih theiin a valh a, chu a mi manpa nghawngah chuan a hling a, a pawt zip ta a.
" Duhthlan tur pahnih i nei. Kha tianga Clearwater thlenga kal kha nge i duh a, i sakawr dahna min hrilh ? A khawi zawk zawk pawh ka pawisa hauh lo a nia, " a ti a.
Ngur chhar chhar chung hian Legget-a chuan luikawr lam pan chuan a hruai kit leh ta a. A sakawr tho lo bawm nuaih nuaih chu tlang sirah khan a lo thlung niin.
Ni a tla tep tawh tih chuan, Clearwater khaw chhung mite, dawrkai bathlar sira lo thute chuan thil mak an lo hmu ta a. Sakawr chungchuang pahnih hian kawtthler pui vaivut chu paw thur hian an rawn pal khu phei sawt sawt a. A hmasa zawkah chuan pa hmaichik, a banreka sakawr zin ki-a phuar beh tlat, a nghawnga hruihrual tawt deuh va inthlung hi a lo kal a. Chu mi rawn zui chuan, a hmasa zawk nghawnga inthlunna hruihrual hmawr lam kha a sakawr zina thlungin, kamis buang leh corduroy kekawrtlawn ha hian a rawn zui a.
Courthouse pana an kal chu mite chuan an enzui lut lut a. Vahchap kang duh tak ang maiin, an inhrilh chhawng zel a. " Tuinemaw Joe Legget-a a rawn man ! " an ti huai huai tawh mai a ni.
Pisa chhunga Jordan-an a mi man nghawnga hruaihrual hlinga a kaihluh lai chuan, Sheriff Haslipp-a chuan a dawhkan a lo kil a, a deputy Pecos-a zawk kha chu chair-ah a lo thu thluang dur dur a.
" Chhei khaw !! Engnge ni ta ngai ?! " tiin Pecos-a chu a lo rak tuarh a.
Chutia a rak tak tuar ah chuan, Sheriff chu a lo hawi a, chu hruihruala hlinpa, hmaichika leh a rawn kai luttu chu a han hmu a, " E heu !! Joe Legget-a zuk nia le ! I ti tha e, Jordan!" a lo ti a.
Jordan-a chuan, " Rel rawkna avanga in lo thlun theih loh pawhin, tualthah tum angin hekna ka rawn theh lut ang e, " tiin a hruihrual hlinna chu a phelh ta a.
Sheriff Haslipp-a chuan rum tak hian, " Joe-a hrenna tur chu kan ngah a lawm. Hruihrual nghawngawrh, awrh a pumpelh thei anih pawhin, a kum khaw chenna tur Yuma lungin ropui deuh mai a nei tho alawm. Dap la, khung lut nghal rawh, Pecos, " a ti ta a.
Deputu Sheriff chuan an mi man tum fo chu a han dap a, chemte zum, sahdah, vaihlo zial tur leh pawisa nawi tlem a zawng a kawr ipte atang a rawn phawrh chu Jordan-a chuan a lo thlir reng a. Chutah Pecos-a chuan an mi tang chu pisa atang chuan a hruai chhuak ta a.
Jordan-a chuan bang a " Wanted Posters " an tar thlir in a la awm ta reng a.
Sheriff chuan, " Nghah reng a ngai tawh hlei nem. Joe-a khaihlum na khawp tur chu amah hekna kan nei tho ka tih kha, " a han ti a.
Jordan-a chuan, " Chulam chuan min tibuai lo, " a lo ti a.
Sheriff chuan, " A luman maw ? Inngaihtuah buai suh suh, a thubuai sawi zawhah i la hmu mai ang, " a han ti a.
Jordan-a chu a bu nghat, han kal mai a tum a.Haslipp-a aw chuan a han chelh leh rih a, Sheriff chuan, “ Rokhawmtu tur i nei em ? “ a ti ta daih a.
Jordan-a chuan, “ Engvangin nge chu chu min zawh ? “ a ti a.
Dan kengkawhtupa chuan, “ E le, kha pa luman kha dawng turin. Bill Negg-a chu la man lohin a awm si a. Bill-a leh Joe-a chu laiphir ang mai a inkawp an ni a. Chutah, Turtleho i tibuai tih ka lo hre si a. Buck Burdock-a i chhaih kawlh vaih chuan savawm hliam i chhaihkawlh tihn a ni mai. Chutah, Bill Negg-a lah mi that pawisa miah lo a lo ni bawk nen. I thlan lai lawk mai rawh, Jordan ! “ a lo ti a.
Jordan-a chuan, “ Chu lo chu rawn tur dang i la nei em ? “ a han ti a.
Sheriff chuan, “ Anih loh leh, Rio Grande lamah tlan kir leh vat mai rawh. I vannei kumkhua chuang lovang, “ a lo ti leh nghut nghut a.
Jordana chuan nui var var chung hian, “ Ka lo inngaihtuah a ni poh ang chu, “ a ti ta a.
Sheriff chuan a dar hlai pui chu a han san uk a, “ Inngaihtuahna hun pawh a awm fumfe lovang – thlanmual-boothill a ni ringawt, “ a lo ti leh a.
Court-house kawtah chuan Jordan-a chu a han tawi rih deuh va, Kawtthler vaivut tak mai chu a han thlir vang vang a. A chhan chu a hre chiah lo nain engemaw ti takin, kha nula inkhaithli thlerh thlawrh, kamis var ha a, pawnfen dum feng, hmui sen vam ham mai leh mitmeng de sar mai, sikul zirtirtu nula hmeltha tak mai kha hmuh leh mai a inbeisei a, mahse a hmu ta si lo.
Han kal leh mai chu a hreh deuh a, sakawr dahna inah chuan a sakawr chu chaw leh tui lo pe turin a va dah a, ani chuan Maverick Saloon lam chu a pan thla ta a.
Zu dawrah chuan Beer um khat a lei a, bang kil lam a pan pui ta a. A dan pangngaiin in kila thu chung chuan, mi che vel chu a thlir lumlam vel mai mai a.
Pa hlim huah huah deuh mai, hmai bial chem chawm, thau pui mai hian a mit chu a la ta deuh ber a. Chu Pathauva chu kal kual velin, mitin mitang chu a be chung a. Pawisa khelh hrat kawr, kawrchung dum hnung lam hlai tak leh kamis var nghawng khawng chi a ha a. A kawrhmaa a pin mawi kilha lunghlu chu a hrawl kher mai.
Chu pa chuan Jordan-a chu a rawn pan phei ta a. “ Tichuan, nang hi maw Joe Legget-a rawn mantu chu ! A lawm nan zu leisak i phu a lawm, a thlawn vekin, “ a rawn ti a. Chutah ring deuh mai hian, “ Scoth Boubon um khat hetah, a tha ber chi kha, “ a han ti loh loh a.
Bar nghaktupa hmel nur deuh chuan zu um leh no dawhkanah chuan a rawn chhawp a. Chu Pathauva chuan a han thli khat pum a, no chu Jordan-a lamah chuan a nawr tawlh phei a.
Nelawm tak hian, “ Keeno tiin min ko thin. He Saloon hi ka ta a nia, “ a ti ta a.
Jordan-a chu a bu nghat a, zu chu a han tem hlak a, no a hung thla leh chu, Pathauva chuan heh uai thuah hian sikret hawnsa hi a lo pharh a.
Keeno-a chuan, “ Jed Harker-a hmunah i cheng niin an sawi che a,” a ti tan ta a.
Jordan-a chuan, “ Bawng tlema zawng vulh ve ka tum a ni, “ tiin a chhang a.
Pathuava chuan, “ Ran enkawl aiin silai hman i thiam hmel zawk ka ti, “ a lo ti leh a.
“ Engvangin maw? “ Jordan-a chuan a ti a.
Chu Saloon neitupa chuan, a silai pai fual tak chu enin, a nui vur vur a., “ E le, min an sawi nuk nuk alawm. Kha Turtle-pa kha entirnan, Pa naran mai chuan Joe Legget-a kha an rawn man thei ang a maw ? Khawnge kan lehkhaden chu i han pharh law law teh ang!! Ka rindan chuan tangka fai maktaduai chanve zet avangin Jed-a hmun hi i luah niin ka han ring thla rawk a. Mahse, Sheriff verther zet hian a ven reng chhung che chuan a harsa khawp ang. Tawlh bo pui ka tihna anih chu. A hun a lo thlen hunah puitu tur che thian i mamawh a ni, “ a ti ta a.
“ Tichuan ? “ Jordan-a chuan a lo ti a.
Saloon neitupa chu a nui sung a, “ Keeno-a hian a kawppui tawhte chu a phatsan mai mai ngai lo asin. Tlemte tein ka hnenah rawn dahtha mai la, i tlan bopui dan tur chu keiman ka lo ngaihtuah vek mai ang, “ a ti ta roh va.
“ I chan ve tur ? “
Pathuava chuan a kutphah var pui chu a han pharh hluai a, “ Keeno-a hi vawkpui ang a duham em ni anih ? Zaah sawnhnih-panga chauh ! “ a ti sup a.
Jordan-a chuan, “ A phurawm khawp mai. Tunah tak chuan engemaw min hrilhin min pui thei ang, “ a han ti a.
“ Tehreng mai “ keeno-a chuan a lo ti thuai a.
Jordan-a chuan, “ Kha Indian thlah chanvepa, Harker-a ram dawt chiaha awm kha, Engang mi nge anih le ? “ a ti ta a.
Keeno-a chuan nui vur vur hian, “ Irish !! Tumahin Irish-a awmdan hi an hrethiam thei lo. A awm loh lai hi chuan, mi thenkhat chuan, kha rel rawkna a tel ve niawm te khan an sawi thin, tiin a chhang a.
“ Chu chu a chianna a awm em ? “
“ Awm hauh lo. Harker-a kha a thenawmpa a ni a, inlaichin hnai an ni tih mai a ni, “
Chutia a sawi zo chu Saloon neitupa chu a tho va, borbon zu um chu a han vaiin, “ Kha i in zawh vek tur anih kha, a man pek a ngai loving, “ a ti a, nelawm suah suah tak chuan a kalsan ta a.
Chuti anih chuan Irish-a chuan rel rawktute nen chuan inzawmna pawh an nei a ni mai thei, tih Jordan-a chuan a ngaihtuah a. Chuti anih phei chuan, Irish-a chuan ro phumruk chu chuh ve a tum ang a, Jordana chuan a awmna a hriain a ring ni ngei tur a ni ang. Chuvangin tunah chuan Rio Grande lampang tlangval chu a enthla a ni ngei ang a. Chuvang chuan Irish-a chuan damtir rih la duhin, a thla a rawn hual thin pawh chu a ni mahna.
Thil pakhat chu a chiang bang. Chu dollar maktaduai chanve zet bengvartu chu mi dang pawh an awm ve tih hi a ni.
Show post links
Top
Local Advertisement
MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni.

Hrechiang duh tan Contact : 9612099411 / 9862016122

Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 4th, 2018, 7:55 pm

THE BUZZAR’S NEST . BUNG - 7
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
Bung- - 7
A tuka Jordan-an Harker a ram a va thlen leh chuan ni a tla dawn hnai tawh a. Bawng rual kha an lo tla leh a. Thirhlingnei a inhung hnan loh chuan, an lo tlatna fo anih tawh avangin, Turtle ranrual chu a dang zo dawn chuang lo niin a inhre ta a. Cabin a va hnaih zel chuan, buk kawtah chuan sakawr tawlailir ding a va hmu a, a bul thutthlengsei a thu chu, khawpui chhung mi ni ngei tur hian kuaite zu in a lo thu a.
Amah rawn tlawhtu chu tu tak ni ang maw- ti chung zelin,a sakawr huang bulah Jordan-a chu a chhuk a, sakawr zina kawmawl huh chuap chu a pho va. Buk a rawn pan chuan amah rawn tlawhtupa chu a lo tho va, “ A mawi hle mai ! Ram mawi tak a nih hi ! a lo tiphungchang a.
Eng rawn ti tur nge tih hriat tumin, Jordan-a chuan chu pa chu a han en vang vang a. Khawpui mi ni ngei awm hi a ni a, British tawngkam awphawi a hmang nghe nghe a. Pa vantlang, sanghet deuh, thau lam deuh hi a ni a. Hmuihmul tuaimam fai tak mai hi a zuah a,. A kawr suit hak pawh chu nalh taka tuai fai niin, silk kamis var leh a nghawngawrh tial pawh chu ngun taka tuai fai niin alang bawk a. Stetson lukhum parh fai veng vawng hi a bul tutthleng chungah chuan a dah bawk a.
Makti awm taka Jordan-an a han en takah chuan, chu pa chuan rawn nuih vur vurin, “ Ka sumdawng ka lo vak thleng mai mai a nia, thlalatu ka ni e, “ tiin a bu nguih a, chibai buk pah hian lehkhakhawng hming ziakna hi a rawn phawrh a. Jordan-a chuan lo lain, a han chhiar a.
REGINALD CHUMBLEY
THLALATU
A HLAWPA THLALAK THIAM BIK RIAU.
Jordan-a chuan, “ E khai, Reggie, he laiah hian i hna chu thlalera tuikeplung zawn ang deuh a ni ang a ! Khawpui lama awm tur i nih hi. Hetah hlawkna a awm lovang, “ a ti a.
Chu pa chuan, “ Pawisa ringawt hi um tur pawh a ni lo ve, ka thian. Kei zawng ka tuina lam anih avangin, ram thla han lak velte hi ka chak ve hrim hrim a ni, “ tiin a chhang a.
Jordan-a chuan a han en leh vang vang a, “ Saruaka hetiang ram hruanghrauva lo kal te chu a hlauh pawh i hlau lawm ni ? “ a ti a.
Chu pa chu makti awm tak hian a ang ho va, “ Saruakin a ni ? “ a ti a.
“ Silai tel lovin mawle ! “
Chu pa chu a nui ta hawk hawk a, “ Oh, a ni tak maw ! Ralthuam hi zawng ka ten zawng tak mai a ni a. Khai, i in thla emaw, i sakawr thla emaw, nangma thla emaw lak i duh lawmni ? “ tiin a zawt ta daih a.
Jordan-a chuan, “ Duh lo ! Mahse hei chen chen lo kal ta che chu, i sakawr kha tlattir la, zan riak ve ang che, “ tiin a sawm ta a.
Thlalatupa chuan, “ Ni lo ve, thianpa. Mr. Irish-a hnenah riah ka lo tum tawh a ni. Kha pa kha pa mak tak niin ka hria, Irish-a kha, “ a ti a. In chhungah chuan Jordan-a chu a zui lut a, mei a chhem laite chuan a lo be mawlh mawlh a. Lui hnar lamah pawh han kal tawhin, Irish-a leh Cy Plummer-a pawh a han hmelhriat tawh niin a insawi a.
Vawksa kan ro leh bête Jordan-a chuan a eipui hnuin, chu English-pa chuan a chair chu han hung sawnin, “ Khawthim hmain kha thianpa Irish-a kha, ka lo kir leh ang tiin ka lo tiam tawh si a, kan la inhmu leh fo ang chu, “ a ti ta a.
“ Helai velah la teihawi i tum em ni ? “ tiin Jordan-a chuan a han zawt a. Chumbley-a chuan, “ Tum mai thei ? “ tiin a chhang a.
Sakawr tawlailira a kal leh ta chu Jordan-a chuan a han en zui vang vang a. Limleys (English)-ho reng reng chuan atna kawng khat an nei deuh niin a hria a, chu lai hmuna thlalak tur zawnga lo kal tak chu, Chumbley-a pawh chu phutkhat deuh niin a hria a.
Bawngtuthlawh leh suahdur nen, Jordan-a chuan a in vela an chawhkhuarte chu a vur zui ta a, amah rawn tlawhtu pawh a theihnghilh leh ta thuai a.
Ni a lo chhuah chuan thingkunga sava chiar nak nakte chuan Jordan-a muhil lai chu an rawn tiharh a; mut la chhuak tak chung chuan a lo tho va.
Sakawr ke chhep thawm a han hriat takah chuan a harh chiang kawk mai a. Tukverh chu va panin, a va dak chhuak a. Khua chu a la eng chiang vak lo nain, lui atanga rawn kai phei sakawr chungchuang rualte chu chiang takin an lang thei tawh a. A han chhiar a – panga, puruk pasarih. “ Turtle-ho ! “ a ti hluk a, kawtah an inzar pharh a,an ding ta chu a thlir reng a.
Aw thum pui hian ring fahranin, “ Jordan, lo chhuak rawh “ tiin a rawn au ta a.
Jordan-a chuan a boots a bun a, a gunbelt a hreng a, kawngkhar chu a va hawng ta a. A kawnghren chu vuan kak tah hian kawta lo ding kualte chu a va thlir a. An hma lam hrat ah chuan, a fal deuh hlek hian sakawr dum a chuang, pa lianpui mai, nghawng chum tak leh khabe ruh kual lian tak hi a sakawr chunga chuangin a lo dinga. A hmel chu chang ro mai hian alang a. Savun kawrbah ban nei lo a ha bik e tih mai loh chu ranrual vengtu dangte inthuam ang bawk chuan a inthuam a. A dul kiar lianpui ah chuan silai hawnghren hi a hreng a.
Jordan-a chu ngun deuh mai hian a rawn en vung vung a.
Jordan-a chuan, “ Aw le, hei ka lo chhuak alawm, engnge ni ta ? “ a ti a. Chu pa chu Turtle neitupa, Buck Burdocka a nih chu a ring nghal mai a.
Ranvulhtupa chuan, “ Thlawk do rawh ! “ a han ti nghut a. Tangkaraw kawma siam sana lian nelh nawlh hi a rawn phawrh chhuak a, “ Kha in ram atang khan i thawmhnaw lak chhuahna turin minit nga chiah hun i nei, chutah zawng ka hal darh vek tawh dawn a ni,“ a han ti a.
Jordan-a chuan, “ Phalna la lo va lo lut inni, “ a han ti ve nghat a.
Palian pui chuan, “ Chiar chiar lovin insiam vat la a ni mai, “ a lo ti ngul ngul a.
A thu zawm ta ni awm tak chuan, Jordan-a chuan, “ I tih tlat si chuan le, “ hrehawm ti awm deuh hian a han ti a, in chhunga luh leh tum ni awm tak hian a han inher a. Chutah, Kawlphe ai pawh a rang zawkin, a rawn vir kual zawk a, a kutah chuan silai a rawn dawk chhuak zawk mai bawk a. Chu silai hmawr chuan ranvulhtupa chu a rawn tin ta chheu mai a. Jordan-a chet dan chu a lo beisei loh ang tak a niin a che rang em kher a, pakhatmah chuan ‘ eih ‘ pawh an lo ti hman ve lo va.
Jordan-a chuan, “ Tunah ngaithla rawh, Burdock, nang emaw i naute emaw hi vawi khat pawh han che vaih teh u; ka thil nghal pawlh che u a ni mai. Sheriff Haslipp-an helai ram rawn thlir rengtu tur tlangah khian deputy a dah asin, “ tiin khawchhak lam hawi chuan a lu chu a han thle nghat a, “ Mahni inven nana kap che u ka ni tih chu a pha lovang. Tunah kei chuan minit hnih hun ka pe ang che – heta tang hian chhuak rawh u, chuti lo zawng damdawi mum pai tawih harsa tak ka barh che u a ni mai, “ a ti ta a.
Burdock-a chuan, “ Ka naute hian an kap sisep vek mai tur che a nia, “ a ti ngul ngul a.
“ Chu chu i tan engnge sawt tawh chuang ang ? “ Jordan-a chuan a tihsan mai a.
Second sawm chhung velni awm chu ranvulhtupa chuan inngaihtuah nan a han hmang a, a mit chuan .45 puakruk kua rawn tintu chu a en run a. Chutah chum hmuk hian a inher thut a. A ranrual vengtute chuan a hnung an zui a, lui lam pan chuan an tlan kir leh ta a.
Jordan-a chuan a thlir zui reng a. Tun tum chu Burdocka chu a lo bum thei ta chu a ni a, mahse atawp na tur erawh chu a ni awzawng dawn lo tih pawh a hai lo va.Chu pa chu chutianga han tlawm mai mai chi niin a lang lo. Turtle-ho chu an lo la kir leh ngei ngei ang.
Luite sir lampang zawk hnimbuk atanga sakawr dang pakhat a lo chhuah tak thut ah chuan a vir kual mawp a, chu sakawr chuan amah chu a rawn pan a. Chu sakawr zin ah chuan, Inkhaithli zeih zawih, Jeans kekawrtlawn leh Flannel kamis ha hi a lo chuang a. Chutah sakawr chunga chuang chu hmeichhia a ni tih a han hre ta a, a sambuang kir nalh tawk chhep chhawp chu thlifim hian a rawn chhem kang ak ak a. Vaivut leh lungte thil rawn pal per chuai chuaiin, Jordan-a makti leh beisei loh tak bulah chuan a sakawr chu a rawn tiding a, a zin atang chuan a lo chhuk thla ta a. Jordan-a chu meng zau kawk chungin a thin a phu deuh dawt a mai a. Chu sakawr chunga chuang chu, a lo ngaihtuah fo, zirtirtu nula, Carol Hall-i ngei mai kha a lo ni reng mai a.
Thawk han la hap chung hian, nula chuan, “ I che nalh kher mai ! Burdock—a te ho kha vaivut i barh a ni ringawt alawm, “ a rawn ti a. A mitmeng chu a de chiai mai a. “ Kha pa lian pui khan kum tam tak chhung luikama ranvulhtu tenaute hi a ti chi-ai tawh thin asin, pakhatmah lahin an kalh ngam si lo. Engtin nge i tih bik ? “ a ti ta chung a.
Jordan-a chuan, “ A mi vauna ka han barh let ve mai anih kha ! tiin Carol-i chu ngun takin a han en a.
Nula chuan, “ Misual tawrawt pasarih pawh i tlawm a ni maw ! Ka awih lo rum rum mai, ka hmuh sual em ni zawk dawn ? “ a han ti leh a. Jordana chuan thudang sawiin, “ Hetah engnge i rawn tih reng reng a ? “ tiin a zawt ta daih a.
“ E, heta cheng hi ka ni alawm,” tiin, nula chu a nui ta hawk hawk a.
Jordan-a chuan, “ Khawchhungah khan sikul zirtirtu ni awm khan i insawi si a, “ tiin a han chhuahchhal a.
“ Ni reng e ! Mrs. Holiday-i inah pindan pakhat ka luah ve reng a lawm. Hetah chuan ka unaupa hnenah chawlhkar tawp ka rawn hmang ve mai a ni. Khi lai ruamah khian vawk a vulh a, “ Carol-i chuan a ti a.
“ Razorback maw ? “
Carol-i chu a bu nghat a.
Jordan-a chuan a khabe chu a tuai noh noh va, inmeh faina hun tal lo nei hman ni se a duh hle a. Nula chuan, “ Aw le, chaw kan ei dawn em ? Tukthuan ei turin ka lo kal asin, “ a ti ta a.
Jordan-a chuan vannei inti tak mai leh phur fahran hian, “ Tehreng mai, tehreng mai, “ a ti ta sawk sawk a.A han ding kianga, kawngka lam hawi chuan a kut a han vai a, “ Lut ang le, ka pi, “ a ti a.
Nula chuan, “ Ka pi min tih chu le ! Carol tiin min ko rawh. Nang pawh Mr. Jordan ka la ti reng dawn che em ni ? “ a han ti deuh hnap a.
“ Bill “ tih pahin Jordan-a chu a nui ta hawk hawk a, tui dahna bucket ruak chu a la lawk a, zotui thiang luanna lam kawrte pan chuan a tlan ta thuai a.
A lo kir leh chuan, Carol-i chu thukah a lo tul hle tawh a, Jordan-a chuan nula sakawr chu a zinte a lo va la thla a, tuite intirin, daihlimah a lo va thlung a. Carol-in a rawn auh chuan a kir leh vut a, tukthuan tuihnai fahran Carol-in a lo siam peih diam tawh chu a rawn hmu ta a.
Tunhma lamin chutiang renga tukthuan a la eitui chu Jordan-a chuan a la hre ngai lo. Thleng an silfai zawh hnu chuan, pawna thutthlengseiah chuan an va thu dun ta a.
Rin loh deuhin Carol chuan, “ Vanneihna i tawng em ? “ a ti ta thut a.
Ani chuan a ngaihna hre lo deuh hian, “ Eng vanneihna maw? “ a han ti a.
“ Ka sawi hrethiam awm lo tak a, “ tiin nula chuan a han nuih seih a.
“ Cy Plummer-an bawngrual sawmhnih chu min leitir dawn, chu chu i sawi tum anih chuan, “
“ Chu chu inthup nan i hmang dawn a ni a maw ? “
Tlangval chuan, “ I sawi awmzia pawh ka hre lo, ka.. Miss Carol, “ a ti ta a.
Nula chuan makti deuh hian a han melh a, “ Mi bum chu i la tum reng em ni ? Aw le, Bill, Harker-a pawisa phum bo chu i hai chhuah chuan, Sherif hnenah i hlan ang tih min tiam rawh le, “ a ti ta a.
Jordan-a chuan, “ Tu dang hnenah nge tualchhung mi pangngai ka hlan ang ? “ a lo ti a.
Nula chu a thaw hak a, “ Chu tak chu a buaithlakna chu a ni. Tualchhung mi pangngai i ni chiah em- tih pawh ka la hre chiang hlei nem, “ a ti a. A rawn tho va, a kutphah no tak, te takte chu a rawn pe a, “ Aw le, ka kal tawh ang e. Chawlhkartawp, engtik ni ah emaw i lo la leng ve dawn a nia. Lui te dung hi rawn zawh chho rawh, “ a ti ta a.
Jordan-a chuan, phur tak hian, “ Tehreng mai, “ a lo ti a.
Chhun lai vel chuan, Cy Plummer-a chuan ranrual tlem azawng rawn khalhin,a lo lang ta a. Hlobet hmunah chuan tlattirin, buk chu a rawn pan a, pawnah chuan Jordan-a chuan khuarte chu a lo hnawh mawlh mawlh a.
Plummera chu sakawr atang chuan a lo chhuk a, a sakawr nu te takte chu a han thlung a. “ Sawm aia tam chu ka rawn inhmu zo lo. Irish-a chhinchhiah an ni hlawm a. Kei chuan chhinchhiahna thirtlawn pawh nei hek lo i ! “ a ti a.
Jordana chuan dollar 150 hi nawtin a han chhiar chhuak a, chu pa kut mawm zel zulah chuan a han dah thawk a, a hralhna lehkha chu lain a ak ta bawk a, “ Chu i pem dawn em ni ?” tiin a han zawt satliah a.
Putar lutuak tawh Cy Plummer-a chuan, “ Khawpuiah hian ka tap rih deuh ang. Ka ram chu Limley mi aa hnenah ka hralh a. Hralhna ka hre hlauh chu ka lawm kher mai, “ tiin a chhhang a.
“ Tu mi aa hnenah maw ? “ Jordan-a chuan a lo ti thuai a.
Plummer-a chuan hlim awm tak hian, “ Mister Reginald Chumbley-a, thlalakna lianpui rawn kengtu hnenah khan. Tunah tak chuan insak tir turin Irish-a a dawr mek, “ a ti a. A sakawr chungah chuan a lawn kai chut chut a, a kal leh ta a.
Tichuan kha Limley-pa kha Plummer-a hmunah chuan a awm dawn ta anih chu. Engvang nge ? Chu thlalatu invuah pa mak tak mai, chu lai hmuna a lo lang hlawl mai chu a chhan ngaihven chi tak anih chu. Ralthuam lam chi reng reng kha chu ten hluah hluah awm khan a insawi chungin, a zakhnuai veilam panga a kawrchung hnuaiah khan puakruk a pai ru tut reng si a, tih chu Jordan-a chuan a ngaih tuah ta vang vang a.

THE BUZZAR’S NEST . BUNG - 8
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )

Bung-8

Zan chuan Clearwater khua chu a rawn tuam tawh a, khawchhung mite pawh an nu tawh hlawm a; a tuihhal zualte erawh chu Maverick Saloon-ah chuan an inhawr khawm laih laih a.
Courthouse chu a thim thap tawh a, tukverh pakhat chauh erawh chu a la eng a. Chu tukverh en na chu Sheriff pisa kha a ni a, a chhungah chuan pa phahinh hi khun khan takin an titi dun a. Pa khat chu amah Sheriff Haslipp-a kha a ni a, a thianpa chu pa inmet fai veng vawng, mitmeng fir tak, pa nuih duh deuh hi a ni a. Han en thuak chuan mi tam takte chuan Sam Leppman-a chu ranrual leitu emaw, nepnawi zuara vakvel emaw an ti ngei ang; thil zuartu tawngkam duah tak nei hi a ni a, mahse Stetson lukhum parh buang hnuaiah chuan han phawrh mai theih hian a nihna thirphek te takte chhinchhiahna chu a khum hnan a. Chutah : Pinkerton. No. 875 tih hi a inziak kalh a.
Sheriff Haslipp-a chuan a churut chu a han fawp khu tulh tulh a, “ Chu in naute chuan a tawpah Harker-a chu an va hmu ta nge nge a maw, ? “ a ti a.
Leppman-a chu a nui var var a, “ Han sawi takah chuan a ni mai ang chu. Mahse Harker-a chu han dawp chhuah chi rual a ni roh lo. Tuinemaw a darah chemte a vit bur ngur tawh a ni. Mexican pakhatin a ruang chu Rio Grande lui a a lo lang thla, Santa Monte antih hmunah a lo char a ni, “ a han ti a.
Sheriff chu a lo bu nghut a, ‘’ Awmzia a nei ta deuh alawm, “ a ti ta a.
“ Santa monte-ah chuan thu han zawh vel chu uchang hmel ang deuh va harsa a ni. Harker-a chuan zu dawrah zu a in khat hle a ni tih erawh zawng kan hre thei a. Tichuan buaina a awm deuh a ni awm a. Ani leh Jordan-a chu kawmchar lamah an tlan chhuak ni awmin an sawi. A bak erawh chu Harker-a ruang lo lang ta hlawl chu a ringawt tawh mai,“ Leppman-a chuan a ti a.
Haslipp-a chuan, “ Tunah chuan a chiang uar tawh alawm. He Jordan-a hi rulmuk ang mai a hlauhawm a ni a. A ram chuh turin Harker-a chu a nawrlui ang a, chutah vit hlumin, a ruang chu luiah a paih ta mai ni ngei tur a ni, “ a ti a.
“ Tunah chuan chu pa chuan an rel rawkna pawisa sum phumruk chu phawrh chhuah a, tlanbo puina hun remchang a melh reng tawh ang chu,” Leppman-a chuan a ti a.
Sheriff chuan, “ Engpawhni se la,a tlanbopui hla lo vang. Khawthlang lamah San Marcos-in a dang a. Hmar lamah lah chuan thlalerin, tui awm hek lo, kawng awm bawk si lo. Khawchhak lamah lah, Kaweahs kal tlangna khan zawng zawng chu kan chang vek tawh bawk si. Chutah chhim lamah thlaler ram, Harker-a kawng zawh kha a la awm a. Chutah chuan tui awmna hmun a piangah mi ka dah tawh bawk si. Kan dang tawngkhawng tawh niin ka hria, “ tiin, lungawi awm tak hian Pinkerton-pa chu a han melh a.
Chu misual hnu chhuitu hmingthang tak, Pinkerton mi leh sa chuan, “ Nih pawh a ni thei e. Mahse chu pa chu a chet hma loh chuan eng inti thei si lo anih chu, “ a han ti a.
Haslipp-a chuan, “ Ni chiah e. Pawisa sum kan duh a ni. Tunah Jordan-a chu han man rawk mah ila, a ngawi chipcham reng mai dawn si a, “ a ti a.
Leppman-a chuan nui var var chung hian, “ Tichuan, chu pa chu tlanchhuahpui tura kan nawr angai ta a ni. A dik em ? Chulam chu ka tih theih ka ring, chu pa chu kan ti hlau phawt mai tur a ni ang, “ a ti ta a.
“ Tih hlauh mai mai chi pawh a ni si lo, “
Pinkerton-pa chu a nui ta kuah kuah a, “ Mitin hian mahni hma kan sial theuh va, Khawnge, lui dung chu ka’n zawh chho the reng ang. Thirhlingnei ka hralh thei mahna, “ a ti ta a.
“ Thinrhlingnei a ni !! “
“ Chu chu ka inhliahkhuhna tur a alawm, sumdawng Whirlaway Windmills leh Wait-aBit Barbed Wire zuartupa. Hmun tam zawkah chuan a tangkai hle thin asin, “ a ti ta a.
*************************
Sam Leppman-an a ram a rawn pan lai chuan, Jordana chu luikam lehlama Turtle bawbg rual khalh chhuakin a lo buai lai tak hi a ni a. Bawng hi ran dangte ang bawkin, lo chin than nei an ni a. Huan luh hmang laklawh tawhte hi chu an huangtau hle thin. Chuttiang bawk chu Turtle bawng rualte pawh chu an ni. Hareker-a ram chu an lo tlat tawh thinna anih avangin khalh luh loh pawhin anmahni thuin an lo lut tho a, Chuvangin um chhuah an ngai reng a ni.
Jordana-an luikam a bawngrual a sakawr a a um tlan han tawh, a lo chawlh hahdampui lai tak chuan, Leppman-a chuan a va pan ta a.
“ Chibai “ hlim tak mai chuan a han ti a. Sakawr hah thaw hlawp hlawp leh luirala bawng bu chuah chuah lam chu a hawi a, “ Thenawmte bawng an nghal hle a ni maw? “ a han ti a.
Jordana chuan, “ Nghal mai pawh a ni lo. Khuai chhaihkawlh chu nepte zawk mawle, “ a lo ti ngal ngal a.
Sam Leppmana chuan, “ Chuti anih phei chuan a hun takah ka lo thleng anih chu. Ka chemkalna ve che thirhlingnei pal tur, Wait-a Bit thirhlingnei a ni a, a tha ber chi mawle. WaitaBit thirhlingnei chi chuan sai rual pawh a dang zo vang. Damrei dam chin daih, a inthuah, tui-ek mai mai lo chi, “ a han ti a. Lui dung lam chu a han thlir a, “ Palban paruk, pasarih vel chu a tawk mai ang, chutah zet zawng i harsatna zawng zawng chu a fihlim huai tawh ang, “ a ti ta zung zung a.
Jordan-a chuan, “ Chutiang chu ka lo ngaihtuah lai tak a ni asin. Hawh teh, buk lamah i hho teh ang, “ tiin a sawm ta a.
Tichuan an indawrna chu an tifel a, thirhlingnei leh palban turte chu rawn thawn vat turin an inremsiam a, Leppman-a chu zanriah ei turin a chambang ta nghe nghe a. Chaw eikhamah chuan meizuk turte an han siam kai a.
Leppman-a chuan a dar a han san uk a, “ Ka vakvel ka inzuar kual zel a. Chuta ka vanneihna ah chuan ka zawn loh pawh ka va tawng thin alawm, “ a han ti a.
Jordan-a chuan, “ Engang maw ? “ a lo ti a.
Chu pa chuan, “ Thuthanga tam ber chu, entir nan, Clearwater Sheriff nen pawn no kan rawn dawm dun a, a tawng duh deuh va, helaia rel rawktu Harkera chu ramri piahlamah an hmuh chhuah tak thute min hrilh nual a. A hnungah chemte a vih hlum niin, Rio Grande lui atangin an phawrh chhuak niin a sawi, “ a han ti a. Jordan-an ngun taka a lo ngaithla reng chu Leppman-a chuan a mitsir zoh va. “ Sheriff chuan ngaihdan a nei mai a, Harker-a vit hlumtupa chuan a sum thuhruk awmna chiang takin a hria niin a ring a ni. Lui chhak lam pang hi i han tlawh ngai na nge ? “ a ti ta a.
Jordan-a chu a nui var var a, a bu nghat a.
Leppman-a chuan, “ Aw le, Sheriff chuan a thattu chu man chhuah thuai a inring niin ka hria, “ tiin a tho hluai a. “ Ka kal ta’nge, i thenawmte hi a han tlawh kual ang a. Thirhlingnei an lo lei ve duh mial mahna, “ a ti ta a.
Leppmana sakawr tlan liam hnu chuan, Jordan-a chuan thil awmdan chu a ngaihtuah nauh nauh va. Sheriff Haslipp-an, Harker-a thattu ah chuan a puh ngei dawn a, chu chu thil awmdan ang chuan, awm pawh awm viau reng a. Mahse hriatpuitu a neih dawn si loh avangin, chu Dan kengkawhtupa chuan a puhthlu mai thei bik lovang. Rinhlelh thil thu a man theihna erawh chu Haslipp-a chuan a nei nameuh mai. A man vaih chuan rophum ruk a hai chhuah theihna zawng zawng pawh a dal thei dawn a ni.
A han ngaihtuah rei poh leh Sheriff chuan a man duh a ring lo tulh tulh a, Sheriff chuan pawisa sum haichhuah a, hmuh kir leh a duh a ni a. Chutia tualthattu a puh a, Jordana chu a man mai chuan, a sum hmuh chhuah lehna tur zawng pawh a dal dawnin a inhre ngei dawn a. Chuvangin Sheriff chuan lo nghah rih a, lo enthlithlai rih chu a thlang zawk ngei ang. Rangkachak tangka leh tualthattua puh chu vawi khatah a hui mai thei dawn a ni. Mahse Jordan-a chu man nghal lo mahse, a thlahthlam mai maiin a rinawm loh.
A tukzingah chuan luikawr lam chu ngun takin a dap a. Harker-a kha man tumin an umzui a ni a, Chuvangin an sum ruk chu thuhrukna turin hun rei a neih a ring lo va. Cabin atang chuan hla vakah a thuhruk a rinawm loh. Cabin leh a vel zawng zawngte chu miin an lo hai chipchiar tawh hle in a rinawm bawk si a. Chuti anih chuan kawr lam pang emaw, phaitual hnim ram pharh lam emaw, cabin chhak lam leh hmar lam hnimbuk vel emaw, a chhak tlang lungpui khawkrawk hmun lam emaw chu a nih a rinawm a, rinthua dap vak mai a ngai dawn a ni.
Atan chuan engah nge Oak thing lian pui pui dinna bul vel chu a hai loh ang ? Ro thukru reng reng chuan engemaw chhinchhiahna a neih a ngai dawn a, chutiang Oak thingkunga chhinchhiahna tha thil dang a awm dawn em ni ?
Bawngtuthlawh nen, Jordan-a chuan Oak thing bul tin chu a fang kual vel ta a. Chutia a kal kual vellai chuan, luikawtah chuan sakawr tawlailir a lo kal a, a thir hlingnei lei leh palban te chu a rawn dah ta a. Turtle bawng rualte chu a ramah an tla leh dum dum tawh si a. A thil zawn chu chawlhsanin, palban phun chu a tum ta rih zawk a.
A kawng thlenga inphelh ruakin, thirhlingnei a va sam vel lai tak chuan rawn tlawhtu dang a lo lang leh ta a !!
Chulai ram pilril tak chu khawpui kawtthler ang zetin a lun ta niin a ngai hial a. Chu mikhualpa a rawn thlen hnaih chuan, makti fahran hian a lo thlir ta reng a. Chutiang ang mihring reng reng a la hmu ngai lo.
Sabengtung tawp deuh mai a lo chuang chu, pa lian pui mai, sang kul kheu kho, biang ruh kual bawk lian zet mai, khabe hmul buk fahran, koki thlenga sam dum zuah buk thla hnuang mai hi a ni a. A sabengtunga chuan nan chuan sakawr zin pawh a phah hek lo va, a bawp sei pui mai chuan rahchhan pawh nei lovin, sabengtung pang sirah chuan lei chu zuk rap pha thelh hian a khai uai thla zul mai a.
A kamis man tlawm deuh mai hma chu a inhawng thla huaiin, a awm hrawlpui mai hmul chu a lang dum dur a. Kekawrtlawn tawp pui mai hi a kawngah satha hruia tawnin, a ven hian a vengkhawm luih a, a tlang hmawr lam chu boots rawn sang ah hian a thun lut a. Kawrchung dum fual thui pawr fahran hi a ha a, a kawrchung hmawr chu mei pahnih ang mai hian, a kawnga puakruk lianpui a paina kawnghren chu a lang tut a. A kutphah lian pui mai khing khat chuan a lakam chu a chelh a, a khing lehlam chuan lehkhabu hrawl zet mai hi a pawm tut a.
Chu mikhualpa chuan Jordan-an makti hmel deuh va a lo en reng chu, mitmeng dum kel kul mitkhur thuk du hian a rawn thlir let ve a. A mit hnuaiah chuan a hnar ngul chu a kul run a, mupui hmui hi ang awm hlein Jordan-a chuan a hria a.
Cu pa pui chuan a awm hrawl pui mai atanga rawn tawng chhuak ni mai awm hian leh thum khul mai hian, “ Miin chhandamna hmu zo ta si lo sela, a hnathawh rah leh a thlantui sen zawng zawng chu engahnge ni ta ang ? “ a rawn ti chhur chhur a.
Jordan-a chuan, “ Ka hlawh chu kut durh phung a ni mai. Nang tunge ni ta che le, mister?“ a lo ti ve a.
“ Thuhriltu Paula ka ni, unaupa. Lalpa chhiahhlawh tlawm tak, misualte hnena thuchah ropui thlentu chu, “ tih pahin a sabengtung chuanna atang chuan a lo chhuk a. Jordan-a chuan chu pa pui chu khawilai hmunah emaw hmuh tawh thanin a inhria a, mahse a han ngaihtuah vang vang pawhin,a hmuhna awm a hre chhuak thei tawh lova.
Chal chuar nang hian Jordan-a chuan, “ Tunhmain kan inhmu tawh lo maw ? tiin a han zawt a.
Paula chuan, “ Unaupa, buhchi thehtu chuan – Thu chu hmun tinah a theh thin alawm. Chi tha chu Rio grande atanga Red river thlengin, Santa Fe atanga Sierras thlengin ka theh tawh a. A va pawi em, tam tak chu lung hmunah te an tla a ni. Eng chu i hnu tawh em, nge ni a, hremhmun thuk ber a mei alhte chuan an lo nghak reng che ? “ a ti thum kul kul a. Jordan-a chuan a chala thlantui te chu a han hui pawk pawk a, “ Ka buai lutuk, tunah chuan thuhnu lam thil tur pawh ka ngaihtuah buai hman loh hi ! “ a lo ti a.
Paula chuan, “ Ringlo phiangsenpa, mi khawngaihthlak, hremhmuna hem ro in i awm dawn em ni ang, “ a ti ta nek a.
Jordana chuan, “ Ngaihtuah hman pawh ka ni rih lo. Tunah tak chuan hei thirhlingnei zam tur ka nei anih hi, “ a ti a.
Rin loh deuh maiin, Thuhriltupa aw chu a hniam ta ruih. “ Kei pawhin ka lo pui thei ang che chu. Inpui tawn thin ula, Lalpa pawhin a tia lawm le, “ a ti ta thluam a.
Thudang pawh sawizawm leh ta lo chuan, a lehkhabu hrawlpui chu lungpui chungah a dah a, a kawrchung fual uai duah duah chu a phelh soh soh a, a kamis ban chu a hlim sang a, a ban thahrui phiar tuk mai chu a rawn hlim lang a. Chutah hna chu a thawk ta a.



Link:
BBcode:
HTML:
Hide post links
Show post links

Jakob l hd
Posts: 44
Joined: May 31st, 2018, 1:03 am

Unread post by Jakob l hd » December 30th, 2018, 3:32 am

THE BUZZAR’S NEST . BUNG - 9
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG – 9
Rei pawh chu thuhriltupa chuan a thawh hma chuan, Paula chu mi pahnih hen hial ni ringawt hian Jordan-a chuan a hria a. Tawlailir hnuktu bawngpa ang a chakin,nisa rum rut mai pawh chu pawisa lo lekin a thawk buan buan a, thirhlingnei chu a tel atanga phelhin an thlung zel a. Ni thlak hmain an hna chu an thawk zo ta der a. Jordan-a chuan chau leh rawl thum chuan an han thawk zo chu a thaw huai a. Thuhrilhtupa ve thung chu a lo kal hlim ang maia la thar sur khan, hah pawh hah ve lo niawm fahran hian, a kawrchung fual chu a ha leh ta soh soh va. Thuhriltupa hnungah chuan, ui ang maia sabengtung chuan a rawn zui zelin, thlam-in lampang chu an pan chho dun ta a.
Cabin kawta an han insilfai lai chuan, Jordan-a chuan chu pa hmuihmul leh khabehmul dum dur mai chu a rawn lehhawi ta thut mai a, “ Hrep tak chuan, tunah chuan ka hre ta che ! “ a han ti ta vak a.
Paula chuan nuihzat awm deuh va lo en chung hian, “ Miin midang hek a tum chuan, amah inngaihtuah hmasa rawh se. A mita khanchhuk hmu si lovin, engahnge unaute mita hmawlte tak te awm chu a ngaimawh ? “ a lo ti a.
Jordan-a chuan, “ Sam Larson-a, Scripture Sam-a an tih bawk kha i ni ! Silai nen mi suam leh Bank rawk vangin, Santa Monte-ah ka hmu tawh che a ni tak e. I hmuihmul leh i incheina i tih danglam vang a ni, “ a han ti a.
Thuhrilhtu Paula chuan, “ Thil sual tiin, beram angina a kan kal bo vek tawh hlawm a, “ bah miah lo hian a han ti a. A sawizawm zel a : “ I sawi chu a dik e, unaupa. Misualte pawh ka lo kawp tawh thin tih leh, ka Lalpa mithmuhah thil ka lo tisual tawh thin tih chu zak chungin ka inpuang e. Tunah erawh chuan, “ a ban thahrui phiar tuak mai chu a han hlim soh soh va, “ Eng chu ka lo hmu ta a. Lalpa chuan, Sim rawh u, tichuan insualna te chu ngaihdamin a awm ang, a ti asin. Hmanah chuan Setana ang a dum ka ni a, tunah erawh chuan vur anga var ka lo ni ta a ni. Chutah zawi sup hian, “Tunhmaa min nun dante chu hmuh khawloh phah nan I hmang dawn em ni, “ a ti ta sup a.
Jordan-a chuan, “ Hmang lo ve, “ a lo ti ve mai bawk a. Mahse chu pa khabehmula insawi ang chuan a piangthar tak tak an gem ? Copper Valley-a chu pa lo lanna chhan chu dollar maktaduai chanve zet phumruk a awm vang a ni mai thei zawk ang em ?
Mahse chutianga rophum ruk lam pang reng reng chu Thuhriltupa chuan ngaihsak pawhin alang lo va.Thenawm vela awmte chanchin chu a zawt a, an hnenah chuan chanchintha hria tum thute a sawi ta zawk a.Chu mi zan chuan pawna riah chhuah a thlang zawk a, a tukzing ni chhuah chuan a lo bo hman leh daih tawh a. Jordan-a chuan a rinhlelhna chu ngaihruatna mai maiah ngai tain, Oak thing hnuaiah bawk chuan ro phumruk chu zawn a tum leh ta a. Nilenga hah taka a dap hnu pawhin, engmeh a hmu ta chuang lo va. Chuvangin Cabin hnung lam panga luikawr zimte lam chu dap leh thung a tum ta zawk a.
Zan chu a reh hle mai a. A hmalakna ngaihtuah chuan khumah a tluzal a, sakawr huang lampang atang chuan sakawr hnar tum dut dut a han hriat chuan a zuaang tho nghal a. A sakawr chuan keite emaw a hmu em ni ang ? Khawnvar chu a khai a, sakawr huang lam chu a pan ta a.
Thla chu a eng hle mai a, chulai hmun vel chu a chhun eng ruih a. Engmah awm pawhin alang lo va, mahse a sakawr erawh chuan chi-ai takin a huang chu a vel thur thur a. Keite rim a hria a ni ang, tiin Jordan-a chuan buk lam a pansan leh ta a.
Kawngka inhawngah chuan a lut leh ta a; dawhkanah chuan khawnvar chu a hung leh chiah tih chuanm aw fiak thak hian, “ I ban phar chho rawh, “ tiin thu a rawn pe ta a.
Kawngka inhawng phen atang chuan, pa pakhat cher deuh thiak thuak, thawmhnaw tawngtawl tawh tak inbel hi a rawn pen chhuak a. A kawng zawnah hian .45 puakruk a rawn keng lang a. Chu pa chu pa hmai phiar fen fun, a hmai dang takah chuan a meng tle ru mai a, mi that pawisa awm lo deuh mai hi nin Jordan-a chuan a hria a.
Rang deuh hian Jordan-a chuan a koki zawl chuan a ban khinghnih chu a phar chho va, a beisei loh taka rawn tlawhtu chu a hisap pah ran a. A rawn tlawhtupa chu darpharh kul deuh, zang pawh kul deuh hi a ni a, Stetson lukhum chuar tawh zet hi a khum a. A hmuihmul leh khabe hmul chu meh lohin a to phirsi nuaih tawh a, a hmai chu niin a em dum rut bawk a. A kamis dumpawl chu a thlan ri-in a tikhawng uaih a, a jeans kekawr pawh chu hmun tam fe ah a tet tawh bawk a. a ha tam fe lang chuan a ngur chhur chhur a, a tinte pawh chu mupui tin ang mai ni tawhin Jordan-a chuan a hria a. A che vel reng reng chu a chi-ai kher bawk a, chuvang chuan chu pa chu pa hlauhawm tak, tualthah pawh pawiti map lo, mi thah peih reng hmelpu niin a lang a.
Chu mikhualpa chuan hnung zawngin kawngkhar chu a han kheng khar a.Hnar atanga aw chhuak tial deuh ruan mai hian, “ I gunbelt kha phelh rawh, zawi muangin, “ a ti ta chhur chhur a.
Jordan-a chu thuawih awm tak hian a bu nghut a, hlau deuh ni awm hian a han tawlh hnung a, dawhkan bul a va thlen thleng chuan a tawlh zel a, chu mi pah chuan khawr awm deuh hian a silai paina kawnghren chu a han dap nuap nuap a. Chhuatah chuan a thlauh thla ta bawl a.
Mikhualpa chuan a rawn pan a, a kal dana tang chuan a bai tih a hriat a, “ Saw i sakawr hrep sawn mi han kheng khang lang a lawm, “ a ti bul bul a.
Jordan-a chuan nui lek lek hian, “ A pawi khawp mai, thianpa,. Engvanga sakawr chu va khawih reng reng nge i nih a ? “ inring tak chung hian a ti a.
“ Ka sakawr tlaktlailopa’n a ke a ulh a, chuanna tur dang ka mawmawh a ni, “
“ Sakawr hnungah pakhat chu a awm reng alawm. Engah nge mi rawn tihbuai kher a ? “
“ Ka kal leh hmain leiba pek tur ka nei a ni, Joe-a tan, “
“ Joe ? “ makti awm tak hian Jordan-a chuan a han ti a.
“ Joe Legget, ka thianpa. Dan hnuaiah nang hian i hlan daih alawm, “
Chutah zawng Jordan-a chuan tunge anih a hre ta a. Chu pa chu Bill Neg-a a lo ni reng mai ! An rel rawkna a pathumna, Sheriff Haslipp-an a sawi thianpa kha.
Jordan—a chuan, “ Mai mai a, Legett-a mi changing mi kah hlum a tum alawm, “ tiin a lo hnial a.
Chu pa ria sang deuh mai chuan, “ I phu reng a ni ! Jed Harker-a khan min phatsan a, nang hi rel rawkna a sum la turin a rawn tir che anih hi. Aw le, i tlan bopui thei teuh lo em mai ! “ a ti ta a.
Jordan-a chuan phur deuh hian, “ I hre sual der anih chu Bill. He ram hi ka lei a ni mai a, hetah hian sum phumruk a awm anih chuan la la, tlan bopui daih la a ni mai alawm, “ a ti a.
Chu pa chuan, “ Chutin phun kual vel mai mai suh, “ a lo ti ngal ngal a. A hmel chu a phiar teuh mai tawh a. Jordan-a hlat lampang thutthlengsei-ah chuan a thu hnawk a, dawhkan chung chu tinchhanin Jordan-a chu a tin zui zel a.
Jordan-a chu a han inngaihtuah zung zung a. Hepa hi huatna tur phul tawh a ni a, rulmuk ang mai a hlauhawm anih hi. Khur dar dar chung hian, “ Anih leh inremsiam ila, ? “ a ti ta a.
Chu pa cher thiak thuaka chuan, “ Ka rin ang reng a ni. Jed-a I rawn thurualpui a. Aw le, mister, an khai kan hun che a i bawp han leng vel chu a hmuhnawm khawp amg, “ a ahn ti a.
Jordan-a chuan, “ Lo ngaithla the ! Harker-a chuan sum chu khulai luikawrah khuan a phumru a. Tahchuan ka kawhhmuh thei ang che. Ka nunna chu maktaduai hmun li a then a hmun khatin ka thleng ang e. “ tiin a ngen ta a.
Negg-a hmel chu lawm awm takin alang ta a. A rawn tho pai tuang tuang a, “ Chhei tak le ! Luiruam lamah chuan min hruai ta che. Min bum tum vaih teh, mister, i zangruh kha ka kap chum mai ang, “ tiin a vau a.
Jordan-a chuan a ban chu a thlak thla ta a, phur awm deuhin hma lamah chuan a rawn pen chhuak ta a. Dawhkan a pelh dawn chiah chuan, a gunbelt kha a zuk pal a, a pai dawt dawt a, chutah kawlphe ang mai a rang hian a han che ta a. A taksa chu sir lamah thenpheiin, dawhkan chu a su leng lawp a. Laltin chu a tlu a, a tlakeh ta a, mei eng chu a thim ta vek a. Chutihlai la la chuan, Negg-a sialai chu a puak thawr a. A piahlama bang chu a va verh kaw sawr a. Chu silai han de zawkah chuan, Jordan-a chuan a gunbelt chu a lo hmu hman zawk a, a char nghal hmiah a.
Silai rawn puak leh chu a de eng zuai a. Jordan-a lu bul lawkah chuan sialimu chuan dawhkan chu a rawn verh sawr a. Tunah chuan .45 colt puakruk chu a phawi ve tawh a, a thaw pawh a veng ta deuh huai a.
A han reh vang vang a.Silai zen rim chu in chhung thim khuoah chuan a nam rum rum a, chu chuan Jordan-a rhawk chu a rawn zem a. Zawimuangin, a khing khata silai humin, a khing lehlama gunbelt chu kengin dawhkan saisir huu hnung lamah chuan a tawlh phei zel a. A pheikhawk khing lehlam chuan laltin chimni keh chu a rap ri a,. Chu inchhung reh takah chuan chu mi thawm chu a ring hle mai a. Kawngkhar lam atang chuan silai a rawn puak leh thawr a, hniam takah hian. Rang deuhin Jordan-an vawihnih a han kap let ve zawt zawt a. Mahse thir linga zuk deh ang zawr mai hian, a chawnpuam ding lam chu a na ta zawr a. Ngawi rengin dawhkan tle phenah chuan , a ke chu a kekawr chhung atangin a zuk dap a, a kut a rawn lak chhuah leh chuan a a lo huh hlup a.
Insehruh chungin a lo nghak ta ran a. A tu emaw zawk zawk chuan, anih loh leh an pahnih pawhin,chu inchhung chu damin an chhuahsan dawn lo reng reng a ni.
Zen rim chuuan mi a ur nasa ta hle mai a, in chhung lah chu a up bawk si nen. A khuh chhuak tur chu a insum tang tang a. Kawngkhar lam atang chuan ri a awm zui leh ta lo va, mahse chu lamah chuan Negg-a chuaan kul khovin, a che zeuh rawn hmuh tumin, silai a la rawn tin reng tih chu a hai lo.
Fimkhur deuhva chhuatlai chu dap zelin, laltin chu a han dap fuh a. chu chu vuanin dawhkan atang chuan a tawlh kianpui zel a, darthlalang keh chu a rap ri leh ang tih a hlau hle a.A khum lam pang chu a pan zel a, atawpah chuan thawm dim fahranin a va thu kang thei ta a. A puakruk chu ding lama humin, laltin chu vei lamin a khingpuipa che zeuh emaw, hlimthla emaw chu hmuh beiseiin a han bih leh dak dak a. Kawngkhar lamah chuan awmhmun han tirem ni awm taka han che zeuh hi a hmu ta a. Che miah lovin laltin chu a han theh phei dawrh a, amah pawh chu a bawk nghal rawp a. Ri rawng hian laltin chuan kawngkhar chua a va deng a, chutah silai vawi hnih a rawn puak leh dawt dawt a.
Chu silai puak de zawk zawkah chuan,kawngkhar chu hnunglam chhawnin Bill Negg-a hlimthla kul dum khual mai chu a han hmu zawk a. Vawi nga silai a hmet puk tawh tih a chhinchhiah kar a. A chhiar dan dchuanchu pa ilaichu tunah chan a ruak tawh ring a. Han tinzawn vang vangin, ani pawh .45 Colt puakruk chu a han hmet puak zawt zawt a. Rum thawn zawi ruih hi a beng chuan a hria a, chutah a reh leh ta vang vang a.
Zuk dapin a silaimu ruak chu a zuk phawrh a, a tak awmin a thun khat leh ta a. A ke a rawn dingin, dawhkan lo tlu reng chu a dap fuh a, a han nawr kual ruak a. Chu dawhkan tawlh riruakah pawh chuan silai a puak ta chuang lova. Bawk phek thlur chuang chuan a han ngaithla leh vang vang a.Thaw hrawih hrawih ri hi a han hre leh a, chu bak chu engmah a awm lo. Reife chhung chu a han nghak leh rih a, chutah kawngkhar inkhar lamhawi chuan a tawlh phei ta hret hret a. A hma lam chu dap phei zelin, a kut zungtang chuan a pheikhawk hmawr chu a va khawih ta a. Rang mangkhenin chu pa lo let reng chu a bawh thut a, mahse a hnuaia mi chu a lo zawi nguai tawh a. A rawn ding chhuak leh a, nawalh a han nawt eng a, mei engah chuan a zuk bih a. Bill Negg-a chu thisen kai zul hian a lo let reng a, nunna nei tawh lo kut zungtang chuan puakruk chu zawi hnuang hian a lo la vuan reng a. Nawalh bawk a han thih chuan Jordan-a chuan a puakruk chu a chhir leng ta lawp a.
Nawalh a han nawt eng leh a, Laltin a chimni keh tawh chu a va char a, a phita chu a han hal a, sential ruai hian a alh ta teng teng a.Dawhkan chu hung tha lehin, a chungah laltin chu a hung a, a ken a chu a ngaihven ta thung a. Silaimu hian a ti chu a per hek hlawk mai a, a thi duh kher mai, a nghawngawrh chu chiah huhin a han dep a, chu aia a na zawk lo chu vannei a inti hle bawk a, inhrukpuan pawt thlerin a tuam ta a. Chutah Bill Negg-a ruang zawi hnuang tawh mai chu pawnah a hnuh chhuak a. Rel rawktute zinga a tawp ber chu a that ta niin a inhria, a thaw chu a veng huai a,tunah chuan khawih buai lohin rophumruk chu a zawng thei tawh ang.
Bill Jordana tan chuan ni rawn chhuak leh chu a hlimawm vak lo a ni. Zankhuain a ke hliam chuan a tur ut ut a, tunah chuan a khawngin a khawng vek tawh a. Chu mi bakah, Bill Negga ruang dah bo turin a la nghak bawk si. A tihngaihna tak pawh a hre lova, a dik tak chuan khawpuiah phur lutin, Sheriff hnenah thil awmdan chu a hrilh tur a ni a, mahse Sheriff Haslipp-a kha a kawm a nuam vak mang tawh bawk si lova. Mahni inven nan a that a ni tih hriatpuitu pawh a nei si lo. Chu aia tenau zawk pawh Dan kengkawhtute chuan an mi man lungina an khung mai mai te pawh chu a hre hnem tawh bawk si a.
A han chet vel sekah chuan a ke khawng na them thum pawh chu a lo reh ta zawk a., coffee tak deuh mai a han in chuan a awm pawh a tinuam ta deuh sawng sawng a. Chu mithi ruang chu phum bova, theihnghilh daih mai chu thil tha ber niin a hria ta a. Lei laih awl lai ber kha chu kawrte ruam lampang kha niin a hria a. Hmun dangah chuan lei chu a thlang lam luikawr kamah chuan renchang awm deuh a han thlang a, phur lo fahran chuan a lai ta a.
Khuarkhurum fit ruk a sei, kawng thleng vela thuk a han laih hnu chuan, ni lah chu a sa rum rut bawk si a, a thlan a tla zawih zawih tawh a, a ke hluam lah chuan a tur na ut ut mai bawk si nen. Suahdur nen khuarkhurum lam a pan lai chuan amah rawn au aw hi a hria a, a ding chawt a. Mithi ruang pu uaih chung chuan a han lehhawi a, Reginald Chumbey-a kha a han hmu ta a. Chu English pa chu makti in a lo ka ho mai a, hlauthawng awm fahran mai hian mitmeng pawng hlawtin mithi ruang chu a rawn melh a.
Chu thlalatupa chuan, “ A va han rapthlak ngai em ! “ a ti ta chul a.
A rilruin Jordan-a chuan chu pa rawn inrawlh ve ta chu anchhiah a lawh hlawih hlawih a. Timahin rawn hmu lo se a duh a ni, “ Silaia inbeihna ! pa chian ka sakawr ruk a tum alawm, “ a ti hluk a. Kawrruam lam chu a pan thla zel a.
Chumbey-a chuan engeng emaw zawtin a hnungah chuan a rawn umzui tuang tuang zel a. Thlan tla zul chung chuan, Jordan-a chuan Bill Negg-a phumna ah chuan chu English-pa pawh chu phum tel ve nghal law law tak a nap tawh a. Mithi ruang chu khur chhungah chuan a theh thla thlawrh a, chutah ngaihdan hlimawm tak a nei ta a.
“ Reggie, suahdur kha la la, he pa hi han chilh rawh le, “ a ti ta a.
English-pa chuan, “ Thlan laih lampang zawng ka hna a ni lo, “ a lo ti a.
Jordan-a chuan, “ Aw le, chutiang zawnga i ngai dawn a nih chuan, nia maw le, “ tiin chu pa chu a han melh rum a, a silai kawm chu a beng ta thek thek mai a.
Reggie-a chuan ka ho hian silai chu a en a, a kutphah var no tak maite chu a han bih leh a, a ngaihna hre lo zet hian a ing zum ta a.
“ Aw le ? “ tiin Jordan-a chuan a silai chu a rawn phawi chhuak ta a.
Leivunga suahdur let reng chu Reggie-a chuan a chuh ta vat a, phur awm fahran hian leivung chu a theh lut ta mawlh mawlh a. Jordan-a chu thing hlimah lo chawlin, lungawi takin Reggie-a thlan tla chu a lo thlir ve ta thung a.
Chhekin piaha sakawr lung han rah rik rak thawmah chuan a zuang tho thuai a. Tunge ni leh ta ? Rin rei vak pawh a ngai ta lo. Deputy Sheriff pahnih a lo tawn tawhte khan an awmna lam an rawn pan chu a hmu ta a.
Negg-a ruang phum bo daih chu a ngaihtuahna lamah, Jordan-a chuan Sheriff Pisa hnathawkten Harker-a ram chu an thlir ru reng a ni tih kha a lo theihnghilh daih tawh hi a ni a. Entlang hmangin, chu dan kengkawhtute chuan a chevel zawng zawng chu an lo thlir ru kar a ni ngei tur hi a ni a, Cabin atanga mithi ruang a pu chhuakte pawh kha an lo hmu rengin, rawn chian tumin an lo kal ta a ni.
Pecosa, kha deputy hmai ruh zawk a khan thlan kotlang chu a rawn pan a, a zuk bih a. “ Bill Neg ! Hrep tak chuan, “ a ti ta vak a. Chutah suahdur a keng a,ngaihtha lo taka rawn thlir chhotu, Chumbey-a hnenah chuan, “ Hetah hian telvena i nei em ni ? “ tiin a zuk zawt a.
English-pa chuan, “ Nei teh nang ! i dam em- tih tuma va tlawh mai ka tum a, he thil rapthlak tak mai hi ka va tawng ta alawm, “ a ti khur dur dur a.
“ Anih leh engatinge Negg-a kha i vur si ? “
Chumbey-a chuan Jordan chu ha kawkin, “ Kha pa khan min vur luih tir alawm ! “ a ti ta a.
Jordan-a chu hmalamah rawn pen chhuakin, “ Chu chu a dik e. Ani kha chu a rawn pawngpaw len mai mai a ni e. Nizan khan sialai nen inbeihnaah Negg-a hi ka kap hlum ta a ni, “ a ti a.
Pecos-a chuan, “ Engvanginnge ruang hi khawpui a rawn la a, i report loh ? “ a ti a.
Jordan-a chuan a dar a chin uk a.
Deputy chuan, “ Tualthat a ni thei ang. Thu zawh tur chein kan hruai dawn che a, “
Ani chuan lo dal chu a sawngsawhlawtna awm lo va a hriat avangin .45 puakruk pawh chu a phawi tir mai a. Chulai hun remchang chu thep bo nan Reggie-a chuan a lo hmang ta hlauh va.
Chu mi tlai chuan chu mite pathum chuan Clearwater khua chu an lut ta a. Deputy pahnihte chuan Irish-a sakawr hawh sakin, Bill Negg-a ruang chu an phurh tir a.
Sheriff Haslippa chuan chair vir theia thu chungin Pecos-a report chu a ngaithla a. A tawpah chuan Jordan-a lungawi lo deuh lam lam chu a rawn hawi a, “ Aw le, engnge sawi ve tur i neih ? “ a ti ta a.
Tawitein Jordan-a chuan a sakawr chuang a rawn tihbuai te, a in chhunga a rawn luhchilh dan leh an inbeih dan chanchin chu a hrilh ta a.
Sheriff chuan a han ngaihtuah vung vung a, “ Hriatpuitu che an awm lova maw ? “ a ti hmuk a.
Jordan-a chuan, “ Awm lo, ka chawn dinglama silaimu hrutna mai lo hi chu. Mahse nang pawhin i la hria ang chu, Sheriff, Negg-a chuan mi thah a la rawn tum ngei ang tih min hrilhlawk kha, “ tiin a lo chhang a.
Haslipp-a chuan ngawi rengin a churut chu a thial nuap nuap a. Thawklehkhatah, “ Kawl buntir rawh u ! “ a ti ta thut a. Pecos-a chuan kawl khinghnih a rawn phawrh a, an mi man banrek ah chuan a buntir ta a.
Sheriff chuan, “ Tunah chuan kalsan tawh rawh u, naute u. He pa hi ka be duh e- amah chauhvin, “ a han ti a.
Deputy pahnih an chhuah hnu chuan, Haslipp-a chu chair lam hawiin a bu nghut a, “ Thu chawl rawh ! “ a ti ta a.
A banrek pahiha kawla hlin chung chuan, Jordan-a chu rawl thumin a thu ta a.
Titi phungchang sawi niawm tak hian, Sheriff chuan, “ I vanneihna chuan tunah chuan tlak hniam lam a pan ta deuh niin a lang. Harker-a kha Rio Grande atangin an phawrh chhuak a. Ka ngaihdan chuan kha pa kha i inpuantir a, chutah i vit hlum zui ta niin a lang. Chu mi hnu chuan ro phumruk phawrh turin Copper Valley lam i rawn pan ta vang vang a. I fing verther kher mai, Jordan, verther tak i ni, “
Churut chu a han tankai leh te te a, “ Kan venthawn che i hlauh avangin, ran rual tlem a zawng i lei a, ranbulh tum ni awm takin i lang der a. A remchan hun veleh, tangka sum chu lak a tlan bo daih mai i tum a ni. Jordan, Joe Legget-a khan i thil tum chu a tichingpen hman thelh a, tunah hei Bill Negg-a hi. I vannei kher mai, mahse i vannei zozai tawh dawn lo anih hi, “ a han ti a.Jordan-a chuan, “ I tawng danah chuan a thli i thial ni awm tak a ni, “ a lo ti a.
Haslipp-a chu a nui ruh ruh a, “ In leh lo ram tawh lei a rawn chei thar leh turin, mel zaruk zet i rawn kal phah a ni tih ring tura mi ngaih chuan i aa hle zawk ang. Chutah Jed Harker-a chuan ram chu a leitir che a maw ? Dan kengkawhtu pa aa tak pawh ka ni thei e, mahse chutiang thu va-uk ring tur chuan ka aa tawk lo, “ a ti ta hmuk hmuk a.
An mi tangpa chuan, “ Ngaithla teh ! A awmna pawh ka hriat hleih loh, a awm a ni tih pawh ka hriat bawk si loh, engtinnge ka hai chhuah ngawt theih ang ? a ti ve thung a.
Haslipp-a chu a nui vur vur ringawt a. “ Awle, hetiang hian inremsiam ang. Pawisa sum rukchhuah phumrukna hmunah chuan min hruai la, dollar sangkhat nen i kal chhuak dawn nia. Chu chu Legget-a i man avang khan a luman i hlawh chhuah a ni. “ a ti a.
Jordana chuan, “ Luman dollar 50,00 ka dawn tur chu hnutchhiahin maw ? Chu chuan awmzia a nei em ? “ a ti ve thung a.
Sheriff chuan, “ Duhthusam mai mai the suh! Chu maktaduai chanve chu i lak chhuah hunah chuan, luman mai mai te chu i nghak hrim hrim lovang. Kan dang kawlawk tawh che anih hi, thianpa. Tunah duh thlang rawh le - dollar sangkhat leh zalenna nge, tualtha phuba lungin tan ?“ a han ti a.
“ Mahni invenhimna lamah pawh tualthat ka la ni tho ang maw ? “
“ Sum hmuhna tur awmchhun i nih lain, Bill Negg-a chuan thah che a tum ang maw ? “
“ Tum sateh si alawm ! “
“ Nih pawh a ni ta ve ang, “ Pecosa chu ring deuh hian Sheriff chuan a han au va. Kha deputy hmai ruha kha a lo lang vat a.
“ Ziak lut rawh. Tualthata rinhlelh, “ Sheriff chuan a han ti a.
Court hnung lampang tannin pindanah chuan lungawi lo zet hian Jordan-a chuan a dinhmun chu a ngaihtuah a. Vanneihna Lalnu chuan tunah zet chuan a hnuchhawn ta niin a inhria a. Bill Negg-a ruang kha thim tham hnuaiah lo phum bo ta mai chu ni sela, hetiang hi a tang lo tur niin a inhria a. Thubuai sawi hun a neih hma ringawt pawhin, an chhui vel chhung hun rei tak chu ran ang mai a khung bo a ni rih phawt dawn reng reng niin a lang ta.
Ni chu a la tla chiah lo nain, chu tannin pindan chhung te tak te chu a hmu thim ruih tawh a. Lei she china awm niin, eng lo luhna chu tukverh sang deuh va te tak awm atang mai chuan a ni a. Pindan chhungah lah chuan, mutna thutthlengdei hniamte chungah hian phuai deuhin buhpawl hi an phah lim liam a, chutah thir tuibel a inhung leh tawl ringawt a. In kil tawp lehlama tannin pindan, Jordan-a awmna piahlam daihah chuan, Joe Legget-a kha lunghnur deuhin a lo insawh a lo insawh ve bawk a.
Chutia khua thim thlak ruai tuai lai chuan, deputy pakhat chu laltin eng rawn khaiin, thing kailawnah chuan a lo chhuk thla ta a. Kawngkhar bula a khainaah chuan khawnvar chu a khai ta a.
Deputy rawn zuitu nula a han hmuh takah chuan, Jordana chu a kang awk mai a. Chu khawnvar eng sen rum hnuaiah pawh chuan a hmel chu chiang deuh mai hian a lo lang a. Carol Hall-i a ni !! Jordan-a thin chu a phu ta dup dup a.


Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 9th, 2018, 8:52 pm

THE BUZZAR’S NEST . BUNG - 10
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
Bung - 10
Nula chuan thirtlawn pal chu a rawn pan a, Jordan-a pawh chuan a lo pan ve nghal a.
Carol-i chuan, “ Hei i tang chu a ni ta reng mai a, “ a rawn ti a.
Jordana chu nuihza lo deuh hian a han nui lui a, “ Sheriff khan ngaihdan atthlak deuh mai, an tangka sum phumrukna chu ka hriat a ring tlat si alawm, “ a ti a.
Caroli chuan, “ Sheriff Haslipp-a hi fing deuh a nia. Mahse rinhlelh thu ngawt chuan an tantir nang che, “ a han ti leh a.Jordan-a chuan, “ Tualthat ah min puh alawm. “ tiin thil awmdan zawng zawng chu a hrilh ve ta a.
Caroli chuan, “ Mahse mahni inhumhimna I tumna lamah a nih si chuan, tual i that tih chianna a awm chuang hlei nem, “ tiin a han hnem a.
Jordana chuan, “ Ka that ani tih finfiahna tur chuan Negg-a ruang chu a awm miau bawk si alawm. Chutah phum bo a tum lai takin min rawn man a ni lehnghal, a lan dan a tha vak lo a ni, “ a han ti leh a.
Carol0-i chuan, “ Legget-a ang bawk khan,thah che rawn tum a nia lawm. Hengho hi chinghnia hlauh an ni a, chu chu Sheriff pawh hian a hre reng alawm. Mr. Haslipp-a hi lekhden khelh thiam hmingthang a ni a, a bum rih mai mai che niin ka ring, “ a han ti leh a.
Jordan-a chuan, “ Nih pawh ni fahmiang, mahse chu chuan heta tang hian min la chhuak dawn si lo alawm, “ tiin a chhang a.
Carol-I bawk chuan, “ Tualchhung roreltute chuan an tantir chuang lovang che, “ a lo ti a.
“ Mahse nghah hi a ninawm ber, “ Jordan-a chuan a ti a.
Nula Carol-i chuan thilpal a vawnna kut chu a rawn vawn saka, “ A pawi ka ti khawp mai Bill, He thil rapthlak takah hian inrawlh ve lo tawp tur i ni na a le, “ a han tisap a.
Jordan-a chuan lungni lo deuh hian, “ Ka han tawrh chhuah rih chu a ngai dawn anih awm hi, “ tih pahin Carol-chu a han en a.
“ Hun atawp ta, Miss Hall ! “ tangvengtupa chuan a rawn ti ta loh loh va.
Carol-i chuan, “ Dam takin le ! Tihsak theih che a nei em, engpawh mai ? “ tiin, engpawh tihsak huan hmel tak leh mitmeng ngaihnobei tak hian Jordan-a chu a han en a.
Jordana chuan fiamthu deuh tak hian, “ Ih, vaihlo zial tur chu ka duh ngawt mai, “ a ti ta a.
Tangvengtu chu zui chhovin, Carol-i chuan kailawn zawh chhoh pah chuan vawikhat a rawn hawi let leh zawk a,Jordana pawh chuan a lo la thlir reng a. Inchhung kalpawhna an han thlen chhoh chuan tangvengtupa chuan Sheriff pisa chhunga lut tur chuan a han hrilh a. A chhan rin neiin, Carol-i chuan hmai zangthal ha hian Sheriff pisa chhungah chuan a lut ta a.
A chair-ah chuan lo thu kul runin, nula inkhaithli thlarh mai lo lut thang thang chu, Sheriff Haslipp-a chuan a lo thlir reng a.
Carol Hall-i chu nula hmeltha tak mai a ni a,a hmelthat mai bakah, nula lar tak hi a ni a. Naupangte chuan an ngaisangin, chu mi khuaa mipa tawh phawt chuan a hna thawhsak nan an ngalruh tauh tliah pawh an huamin a rinawm hial a ni. Chuvang tak chuan Sheriff awm loh hlanin, tangvengtupa pawh chuan Jordan-a chu a lo hmuhtir mai niin Haslipp-a chuan a ring a. Pawi phei zawng a pawi dang lova, chutianga nula hmeltha si in lungin tang misual naran mai mai nena inchiahpiah ta chu a duh loh zawng a ni zawk a ni. Engvangin nge a kutzungchal han kawm zauh pawh a tlangval tha tha dawrzawn khat lai hui khawm thei reng tur siin, lungin tang satliah mai mai chu a va ngaihven ?!
Dawnkan tlanga han thu kang aih pah chuan, Carol-i chuan, “ Min hmu duh em ni, Sheriff ? “ tiin a han zawt a.
Haslipp-a chuan, “ Tichuan, ‘ Hank ‘ pawh min ti duh ta na nge ? “ a lo ti a.
Nula chuan, “ Pisa chhungah chuan ni lo ve, Chutah, khatia chil phuan tla duaha i thut laite chuan ka nel ngam lo che alawm, ? “ a han ti a.
Shriff chu a thaw hruih a, a aw ki chu a han thlak a, “ Saw ramri lampanga kan mulukawlh man nen sawn engnge inlaichinna in neih ? “ a ti ta a.
Carol-i chuan aw zangkhai fahran hian, “ Thenawmpa a nia lawm ! “ a lo ti leh mai a.
Haslipp-a chuan, “ Thenawmpa !! Engvanginnge saw pa hrep sawn Harker-a ram a rawn pan i hria em ? Sum ruk chhuah vangin ! Jordan-a saw mi thah hmang keite, rul thisen kai tualthattu, chinghne verther anih saw ! “ a ti hrep mai a.
Nula chu inpet ruh tak hian, “ Anih leh chutianga i puh theihna chu chhan a awm em ? “ a ti a.
Sheriff Haslipp-a chuan, “ Ele, Jed Harker-a hnungah chemtein a vithlum a, Negg-a a kap hlum a, Turtle ranrual vengtu a kap hliam bawk a, “ a han ti a.
Nula chuan ngai pawimawh awm lo deuh hian, “ Chung chemte a invih tih lampang chu engmah hriat ka nei ve lo, mahse Bill Negg-a chu mahni inhumhim nan a that a ni tih ka hria. Chutah, kha ranrual vengtu kha chu, ka hriat theih tirh a ta Buck Burdock-a leh a hote chuan ranvulhtu tenaute chu an tibuai reng zawk alawm, “ a han ti ve a.
Haslipp- chuan ngeiawm deuh hian, “ Chutichuan Jordan-a thusawi chu a zavaiin i lo pawm vek tihna anih chu, “ a lo ti hmuk a.
“ Bill Jordan-a chu mi hnung lam atanga vit mai mai chi a ni ve lo, “ Carol-i chuan a lo ti leh a.
Sheriff chuan a tihdan a thlak ta thut a, “ Ngaithla the, Carol, naupang te inkawibah rual i nih atanga lo hre tawh che ka ni a. He phairuam piah lam ram hi chu tlawh pawh i la tlawh ngai lo va, Chuvangin misual lemchangtu mai mai te chu lo ngaihsak vak the suh. He bumhmangpa hian bum ve tur che in ka duh lo a ni, “ a ti ta a.
Nula chuan dam diai hian, “ Jordan-a hian mi bum a tum reng reng lo,i sawi angin. Diklo taka hek a niin ka hria, Chutah chuan atan din ka tum a ni, “ a han ti ta a.
Sheriff chuan, “ He pa lama i tan vaih chuan miin an sawi duh hle ang che le. Sikul zirtirtu i ni bawk si a, Carol, i hming tih hliau chu i duh dawn em ni ? “ a ti a.
Nula chuan a lu a lo thing nak a, “ Nula kum sawmhnih pakhat mi, zalen leh pawisawi lo ka ni. Sikul hotute hian ka thian tur thlenga min thlan sak tur a ni hlei nem, mi sawi te mai mai chu a !! “ tiin, ngeiawm deuh hian a dar a han chin ak a.
Haslipp-a chuan tih theih dang a nei ta lo. Hmeichhia zawng hnial hneh theih an ni lo an aat a ta lamah !! ‘’
Sheriff bawk chuan, “ Jordan-a chuan thian pakhat chauh a nei a sin - a silai ! I rawn tlawh thei tawh lovang. “ a ti ta a.
“ A tha vek e, Sheriff ! “ tiin nula chu a tho phat a. Kawngka atang chuan a rawn lehhawi leh a, zaidam deuh hian, “ Jordana chu vaihlo leh a zialna tur lehkha tlem azawng rawn thawn ta ila, rorelna ban chu a sawinghing angem ? “ a han ti a.
Sheriff Haslipp-a chuan, “ Phurr-rr-rr ! “ tih ngawt loh chu tih theih dang a nei ta lo.
Bung-11
Lungintangpa tan chuan ni a rei duh kher mai. Zankhua a rei chhunni a sei si- tih ang kha taninah chuan a ni phawt mai a. Vawiin pawh hi ni a rei leh dawn hle mai chu a ni phawt a, mahse a tukthuan tur an rawn lak zingah chuan vaihlo ip leh a zialna lehkha a lo tel nawlh mai a. A vaihlo karah chuan vaihlo zialna lehkha themah hian thu hlimawm deuh mai hi Carol-i chuan hawrawp nalh fahran hian a rawn thai zauh bawk nen, a rilru chu a hlim ta deuh huai a.

Tuk khat chu sazu ninhlei tlan vel zak zak a thlir lai chuan, thil beiseiawm lo deuh a lo thleng ta thut a. Deputy thau zawk Bunker-a khan tannin pindan kawngkhar chu a rawn hawng rup rup a, zau deuh hian a hawng ta huai mai a, “ Chhuak rawh ! “ tiin a nghuk hruih a.
Lungintangpa chuan, “ I fiamthu emaw ni pek le ? “ tiin, zawimuangin a rawn tho chhuak a.
Deputy chuan, “ Sheriff thupek . Pisa-ah i silai leh thuamhnaw te chu i lakhawm dawn a nia, “ a ti leh hmuk a.
A thil tawn chu awih harsa ti deuh chung hian Jordan-a chuan Burker-a chu a zui chho ta a. Sheriff pisa a han lut chu a mit a nuai ringawt a. Sheriff bulah chuan pa hmai per dei duai, pa lianpui kul kho mai, khabe hmul dum hlup a zuah, kawrchungfual ha dulh mai hi a lo thu a.
Jordan-a chuan, “ Paul, nangmah elaw, heta tanga min la chhuaktu ? “ a han ti a.
Thuhriltupa chuan, “ Lalpa ban tha chu a chak a. Misualte chungah pawh khawngaihna leh dikna a lantir thin asin. Thil dik lo chu tihdikin a awm ta “ a lo ti a.
Jordan-a chuan, “ Awle, engmah hnialna ka nei lo ve, “ a ti a. A gunbelt chu a hreng mawlh mawlh a, a chemte, pawisa nawi leh thil dangte chu a kekawr ipteah chuan a hnawh lut a. Chutah Haslipp-a chu a han en a, “ Ka lawm khawp mai, Sheriff “ a han ti a.
Sheriff chuan,"Thuhriltupa hnenah khan lawmthu sawi zawk rawh !! Khaihlum tur a rawn chhanchhuak che a ni a, mahse i lo kir leh thovang ! “ a han ti hram a.
“ Chutiang chuan ring ringawt suh ! “ Jordan-a chuan a lo ti tawi hmuk a.
Thuhriltupa chuan rawn zui zelin, lungintang chhuakpa chuan inchhung inkalpawhna dung chu a zawh zel a. Pawna a va dak chu a han ding a, boruak a han hip vang vang a. “ Tanin pindan rimchhe zet lakah chuan boruak a thiang ngei mai, “ a han ti a.
Paul-a chuan “ Mi pangngai chuan thingthiin, chhanchhuah an nihnaah lawmthu an sawi ngei ang, “ a lo ti a.
Jordan-a chuan, “ Mi pangngai pawh ka nih loh hi. Min han hrilh teh, engtinnge kha arsi bel luruh ring tak kha i va bum dan ? “ a ti a.
Paul-a chuan thum kul kul hian, “ Nghak hram hram la, engkim a fel vek mai ang, Lalpa’n a ti “ a ti khul khul a.Chutah aw pangngai deuh hian, “ Tunah tak hi chuan laiphir leh hruihrual tha deuh, fip fer fawr kan mamawh a ni, “ a ti ta daih a.
“ Eng maw kan mamawh !? “ Jordan-a chuan a lo ti ha a.
Thuhriltupa chuan a han en kul a, “ Mi aa pawh a ngawih reng chuan mi fing anga ngaih ani thin. Mercantile Dawrah va kal la, silaimute pawh rawn theihnghilh suh. Silaimu ruak chu thluak kawrawng lumum ang chauh a ni si, “ a ti a.
Hniat set set lovin Jordan-a chuan dawr lam chu a pan a, a sawi ang chuan a va lei ta ringawt a.
A hnuah Harker-a ram pana luikam an zawh lai chuan, Thuhriltupa chuan khami zana Harker-a rama a lo kir leh thu kha a hrilh ta a. “ Lalpa kutin min nam kir leh a ni, “ tiin; khami zana cabin a rawn pan leh lai chuan laltin khaia Jordan-an sakawr dahna in lam a pan kha a va hmu a,Chutah midang, pa pakhat buk chhunga lut ta zauh a hmuh chuan mak a ti viau mai a. Tichuan a ni chu sakawr atanga lo chhukin, a bul hnaiah chuan a lo biru ta a.
Jordan-a a lo kir leh chuan, Negg-a khan a lo cho thawm a hre ta a. Chutah kawngkhar chu an khar a, a hnu deuhah chuan a thim ta a, silai a puak a. Thuhriltupa chu pawn thutthlengseiah khan a lo thu reng a, thil awmdan chu a lo pawngpaw tuilian nghah ta ngawt ngawt ringawt a. Engemaw chen hnuah chuan, Negg-a ruang kha a rawn pu chhuak ta a. Thuhriltupa chuan mimal innghirnghona lek nia ngaiin, a kalsan leh ta mai a. Zanriah ei dawnah chuan tualthata puha Jordan-a an man tu a lo hre ve ta a. Tichuan Clearwater chu a rawn pan vang vang a, Sheriff hnenah chuan thil awmdan a hrilh ta a ni.
Amah avanga tang chhuak a ni chu a lawm viau tak nain, Jordan-a chuan chu pa awmdan chu a ngaihna tak pawh a hre thei lo va. Engvanginnge khawthim hnuah, Thuhriltupa chu Cabin lamah a lo kir leh ? Negg-a ruang phum bo daih a tum tak khan, engvanginnge kha thlalatupa Reginald Chumbley-a kha a rawn lan hlawl ? Sakawr chungah pawh rawn chuang lo leh nghalin ?
Ring deuh hian tih tak hmel zet hian, “ Awle, mi la chhuak chu a lawmawm takzet mai, “ a ti ta a.
Paul-a chuan, “ Miin i chunga an tih i duh ang bawkin, mi chungah pawh ti ve rawh, “ a lo ti thum chhur a.
Harker-a ram an va luh leh chuan, Jordan-a chu thinrimin a han ang chhuak tuar a. Turtle bawng rual an lo tla leh nuk nuk tawh a. Luikama thirhlingnei pal an thlun kha an lo sawi thiat leh vek tawh a. palbante chuah kha a lo ding a, thirhlingneite kha a sirah a lo kual hnawk ringawt a.
Thuhriltupa chuan a thlirna lam chu rang takin a thlir ve nghal a.” Burdock-a mitah chuan thirhlingnei hi a ninawm viau ta ve ang. Naktukah pal chu kan hung tha leh mai ang chu “ a lo ti a.
Jordan-a chuan, “ Turtle ho zai chah leh mai mai turin maw ? “ a lo ti a.

Thuhriltupa chuan nui deuh tuh tuh chung hian a heh chu a petsawi luih a, “ Chu chu a venna kan siam dawn alawm, “ a lo ti mai
Jordan-a chuan a chal a chuar nung a,. Paul-an a venna tur a tih chu a laiphir leh hruihrual fip deuh an leina chhan kha a nih a ring thei mai a.
Chhekinah chuan thirhlingnei kual dang hman bang an la dah a. Ni a chhuah chuan, an pahnih chuan thirhlingnei chu phelhin an buai leh tan ta a. An lo tanchhum tawite te chu Paul-a luikama dah atan tiin a la khawm a. Luikamah chuan hnim hi sakawr dul thleng vel hian a to buk luih a, Paula-a remhriatnain chulai hmunah chuan thirhlingnei inkual hnawk velte chu hling bawn atan an theh darh ta nuaih a.
Thirhlingnei chuan Jordan-a kut leh ke teh chu a ring pilh neng nung a, mahse a pawiti chuang lova. Chutiang an han tih zawh meuh chuan khua pawh a lo tlai duai tawh a.
A tawpah chuan Paul-a chuan palban rinawm deuh pahnih hi a phun ta a; palban chu lei atanga fit hnih awm leka sang hi a ni a, kalkawng sir tawn lui kaina laiah chuan pen za vela I hlat hian a phun a. Chutah chuan pala puak mai tur hian laiphir a kam ta a. Chutiang chuan sakawr chungchuangte rawn pal puah tur ‘ Fal ‘ a buatsaih ta a ni. Chu mi a han tih zawh chuan, Thuhrilhtupa chu a inbeng fai thuk thuk a, a hnathawh chu lungawi awm tak hian a thlir vung vunga a khabe hmul chu a tuia vat vat bawk a.
“ Tunah chuan i hrethiam taw hem ? “ a ti ta a.
Jordan-a chu a nui ta var var a, a hmai thlan zul chu a han huih pawk pawk a, “ Hrethiam tawh e. Thuhriltupa-ah chuan fing vervek pawl tak i nih dawn hi. Khawthimah ka thirhlingnei pal hi tanchhum leh turin Turtle ho chu an lo thawk leh ngei dawn a, hnim zinga kan thirhlingnei dahhnawk nuaih khuan an sakawrte chu a ching buai ngei dawn a, Chutah a hruihrual fip thlun hi an rawn pal hunah vaih chuan, laiphir hian a han phin dawn a ni a, an nasa loving mawle ! “ a ti ta a.
Paul-a chu a lo bu nghut nghut a, “ Misual chu a sualna chuan a uai thla thin, “ a lo ti a.
Chu mi zan chuan luikama laiphir puak ta dur chuan Jordan-a chu a rawn tiharh a.Thuhriltupa sabengtung chu sakawr dahna huangah chuan a lo la awm a, amah erawh chu khawilai hnimbuk phenah emaw a lo awm daih a.
Jordan-a chuan a boots a bun mawlh mawlh a, a Winchester rifle chu a chuh vat a, pawnah a tlanchhuak ta a. Tiauchhum a zing phui churh a, luiral lehlam chu a hliah vek a, mahse chu mi karah chuan sakawr hlauthawng khek tuar tuar te, hnimbuk kara an tlan phi chung thawmte leh mihring thinrim au tawm chel chulte chu a hriat theih a. Zawi zawiin an thawn chu a reh deuh deuh va. Zingkhua a lo var chuan, an thirhlingnei pal chu him pialin a lo la awm a.
Tukthuan an ei lai chuan, Jordana chuan Thuhriltupa hnenah chuan, " Tunah chuan Turtle ho chuan thirhlingnei hmuamhma chu an buaipui nasa hlawm the ang chu ! “ a ti a.
Thuhriltupa chuan satlang keih tuam tuam chuang chuan, “ Bawhchhetute kalkawng chu a hnawk reng thin asin. Mahse kan luruh ringho chu an la rawn kir leh tho vang, Chutah zawng thirhlingnei chaicheh mai zawng an rawn keng tawh hauh lovang, “ a ti nuah nuah a.
Chawhnu herah chuan pa sang pui kamis sen ha hi sakawr zin phah loha chuangin lei chu a rawn zawh thla a. Jordan-a chuan Paul-a hnenah chuan, “ Ka thenawm-pa, Irish-a a nih saw “ a lo ti a.
Chu pa sang pui chuan an piah deuhvah chuan a sakawr chu a ti dingin, chu mite pahnih thutthlengseia lo thute chu a han thlek ngial a. A tawpah chuan, “ Nizan zet chu in thawm a tha hle mai, “ a rawn ti ta a.
Jordan-a chuan, “ I hre sual a nih nek chu. Kei leh Paul-a chu tui takin kan mu hle hle ringawt alawm, “ Irish-a hnenah chuan a lo ti a.
Irish-a chu a sakawr atanga lo chhuk pah chuan, “ Chuti anih chuan, tuinemaw athlo a ei anih pek dawn chu. Buck-a sakawr thenkhat va sawizawi sak turin Turtle-ah ka va kal a. Kan putara chuan ramhuai ki nen lam ei fai mai peih hialin a so nasa mai. Turtle sakawr pahnih phei chu kahlum mai an ngai a, a dang paruk lai mai chu thirhlingneiin a hliam bawk. Pa pahnih chu an sakawr atangin an tla a, pakhat chuan a kerek a sawh tliak a. A chhan chu tuemaw hrepin hrui pal tur a lo thun vang niin an sawi, “ tiin, Jordan-a bula thutthlengseiah chuan a rawn innghat ve a. “ A huphurhawm kher mai “ a han ti zui a.
“ Eng huphurhawm maw ? “ Jordan-a chuan a lo ti a.
“ E le, Buck-a chuan silaimua verh phirsi vek che a tum tawh mawle. A la rawn tlawh thuai chein ka ring, “
“ Min rawn hrilh avangin ka lawm khawp mai “
An han ngawi vang vang a, Chutah Irish-a chuan, Tlang lamah i tlanbo san daih a ni ang chu maw ? “ a ti a.
Jordana chuan zawimaung ruih hian, “ Turtle nauteho chuan lo hmuaktu an nei tha hlein ka ring,” a ti ta daih a.
“ Chuti anih chuan thlan laihsa i nei bawk alawm le, “
Jordan-a chuan nui var var chung hian, “ Ni e, ka phum khawm vek mai ang chu,” a ti a.
Irish-a chuan, " I lo la awm vaih chuan, chhihri-ah an chan dawn che a ni phawt mai. Darkar khat kalah hian Bad Lands hmun i thleng thei mai ang a. U.S. Calvary pawhin an zawn hmuh zawh lohna tur hmunah ka hruai ang che, “ a ti a.
Thuhriltupa aul-a chuan, “ R angkachak ai chuan finna neih chu a hlawk zawk ang. Tlang lamah chuan tlanchhe zawk mai rawh. “ a lo ti ve a.
Jordan-a chuan luhlul tain, “ Ngaihdan dang daih ka nei. Tunah tak hi chuan Dan vawngtuten min lo thlir ru rengin ka ring tlat a ni. “ tiin, tlang panga darthlalang niawm tak de zawk a hmuh kha a han hrilh a. “ Ka thih chuan ka ruang chu mulukawlh tawktarhah chauh a tlak dawn a. Ka dam chhung chuan, Sheriff chuan tangka sum phumruk a hai chhuah theihna tur kawng awm chhun nin min ngai tlat a ni, “ a ti a.
Irish-a chuan, “ Dan chuan an rawn chhan chein i ring em ni ? “ tiin a zawt a.
Jordan-a chuan, “ Ka han ring thlarawk chu a ni a. Turtle hovin min beih vaih chuan, min lo enthlatute chu khawpui chhungah an tlan lut vat ang a, Sheriff chuan min chhantu tur a rawn hruai duah mai ang. “ tiin a chhang a.
Thuhriltupa chuan, “ Tangka duham chu sual zawng zawng bul a ni. Chu rangkachak chu helai velah hian a awm tihna a ni maw ? “ a han ti a.
Jordan-a chuan, “ Kan rindan chu a inchen reng reng a ni, “ a lo ti a.
Irisha chuan, “ Harker-a chuan khawi laiah emaw hi chuan a thukru chu a ni phawt mai. “ a ti a. A thova, “ Awle, kei ka lo inrawlh vena tur pawh a awm lo va, ka kal tawh ang e, nang suanmu ei tur chuan i la chambang dawn em ni ? tiin thuhriltupa chu a han melh a.
Paul-a chuan dam duai hian, “ Ka lo inngaihtuah rih ang e, unaupa.Lalpa chuan,‘ hnehchhiahtute chu thlamuan turih min chah alawm, ? “ tiin a lo chhang a.
Chu Indian thlah chanvepa chu sakawrin luilam a pan lai chuan, Saloon neitupain, Irish-a pawh chu misual zinga telve a ni mai thei tih a sawi kha, Jordan-a chuan a ngaihtuah vang vang a. Jed Harker-a kha a laichin anih phawt chuan, mi tha vak chu a nih a rinawm bik vak loh. Mahse Irish-a khan rawn hlauhthawnpuiin, bihrukna kawhhmuh pawh kha a rawn tiam a ni bawk si a. Irish-a chuan a thi ai chuan a nungin Jordan-a chu a hmantlak zawk ang tih a ring ve pawh chu a hmiang.
Ni chu sa rut hian a tlangsang zel a. Jordan-a chuan bucket pahnihte chu tui a tikhat a, cabin chhhungah chuan a hung lut a, Chutah laiphir zuk la tur chuan luilam a pan thla ta a. Haslippa lo thlen thlenga Turtle ho lo dan a tum anih dawn chuan, sialai leh a mu zawng zawng chu a mamawh ngei dawn niin a inhria a.
Thuhriltupa chu a la vuaicha kher mai. Ni a tlak dawn chuan Jordan-a chuan, “ Nang pawh i kal bo ve tur niin ka ring, Paul. Turtle ho chu an lo lang tep tawhin ka ring a ni, “ tiin a tur a.
Paul-a chuan, “ Misual chu um lohin an tlan thin. Dikna ralthuamin ka inthuam tawh a, P-athian mite chu engmahin a tina thei lovang, “ tiin a lo chhang a.
Jordana chuan, “ Chutiang ringawt chu ka ngaihdan a ni ve lo. Silaimu chuan thlan bik a nei chuang lo. “ a ti a.
A Cabin chu a han enkual vel a, thingtuma sak a ni a, chung thingtumte chu tunah chuan a ro vek tawh a, lei/chirhin a bawk luk a. Chutah tukverh lam chu a va pan a, kawrruam chu a han thlir vel a. khawi lamah pawh chuan pen sawmnga awm vel hi chu bihrukna pawh awm lo, kawlh vul mai a ni hlawm a. A vanneih chuan chu Cabin chu engenaw chen chu a venghim zovin a ring a. Khua a thim hnuah erawh chuan kawng hran a ni ta.
Arsi a rawn lan chuai pawh chuan, Thuhriltupa chuan kal zai reng a la rel ta chuang lo va, Jordan-a lahin a tur tawh bik hek lo. Thuhriltupa chuan a ngaithla ringawt mai ni hian a lang a. Chutah zawng Jordan-a chuan ngaihdan a nei ta a.
Thuhrriltupa hnenah chuan, “ Tunah chuan ka hre ta. Maktaduai chanve chu neih theih dan i zawng a nih dawn hi. Min rawn kap hliam ang a, chuta ka thih hmain tangka sum phumrukna hmun chu ka puan mai i ring a ni ang, “ a ti ta a.
Paula chuan, “ Khaih ! Nang lawman chang hre lo pa ! Chu chu tannin atanga ka chhanchhuah che a, sual dona kawnga ka puihna che a ka lawmman hmuh tur chu a ni maw ? Zak rawh, ringhlelpa, hremhmun mawng tawp ratah hnawh thlakin i la awm ang ! “ a ti a. A khabehmul chu a chul noh noh va, a nui ta ruh ruh a. Chutah awki pangngai hian, “ I mi hnar tum dan chu a tha viau reuh e, mahse lo tanpui tur che a chamban ka tum a ni. “ a ti ta a.
Chu mi zan chuan, a hmasa ber atan, inchhungah chuan chhuatah a riak lut ve ta a.
Luidung tiauchhumin a bawh chuk la kian hma chuan, Jordan-a chu a tho va, a han kal kual vel a. Kawl a rawn eng tan dawn tawh a. Khawchhak lamah chuan Black Kaweahs tlang chu a lang dum khual a.
Paula chu a thaw suk suk a, a harh daih tawh a, savawm lianpui hmul them thum ang mai hian a rawn tho thurh a, “ Unaupa, nitlak hmain i thlarau chuan pialral kawng a zawh tan tawh dawn a ni. Thingthi rawh, misualpa, i thiltih sual tam takah chuan ngaihdam dil rawh le, “ a ti thum hlut a.
“ Chutiang zawng ka tih chi a ni lo, Thuhriltupa. “ tiin Jordan-a chuan mei a chhem sauh sauh va.
Paula chuan, “ Chuti anih chuan hremhmunah kal daih rawh, “ a ti ta hluk a.
Coffee sa tak mai an indun lai chuan, Paula chu a insangping ta thut a. “ Sakawr ker chhep ti“ a ti tawi tuk a. Jordan-a chu tukverhah a va dak thuai a. Luia tiauchhum kar atang chuan sakawr chung chuang rualkhat hi an lo chhuak chho va, an vai chuan pasarih an ni a. Mahse tun tum chu in rawn pan mai tum tawh lovin, an inzar pharh a, an kal hual a, chhekin lam chu panin hnimbuk zingah chuan an biru bo ta dial a.
Cabin-ah chuan tukverh pahnih hma lam leh hnung lamah a awm a. Hnung lam tukverh atang chuan, chu mite chuan in chu hual an tum a ni tih Jordan-a chuan a va hmu thei a.
Ngui raih hian, “ Min dang chep ta ! “ a ti a.
Thuhriltupa chu a lo bu nghut ringawt a, a no chu a dah a, laiphir chu a chuh ta a. Jordan-a chuan laiphir chu hmun hnai atan chuan a hmantlak loh a ni tih a hria a. Tunah rih chuan an chhawr tur chu Winchester rifle chauh a ni.
Silai ngul kuaah chuan silaimu a han hnawh lut a., tukverh sirah chuan a va ding leh ta a.
Tukverh darthlalang chu a ri sawk a, darthlalang them chu tukverhah chuan a rawn per lut chuai a, a piah bang chu silaimu chuan a va verh sawr a. Suantlang chuan pindan darthlalang chu a rawn kap keh chuai chuai a. Meikhu chhuahna rangva khawr pawh chu a ri thla bawng bawng a. Inchhungah chuan meikhu a zam ta chuai chuai a. Jordan-a chuan tapchhak lam chu bawkvakin a pan a, mei chu a va thelh mit ta a. Tukverh darthlalang bal zo tawhah chuan thlifim a rawn thaw lut a, inchhung meikhu pawh a rawn chhem fai ta thuai a.
An rawn kah zawt zawt hnu chuan thawm chu a reh leh deuh va, chutah a khat tawkin an rawn kap ta reng a. Jordana chuan chemte a la a, pawn lam a va bihna turin bang thingtum pahnih inkar chirh ro chu a va ker kua a. Chuti anih loh chuan han bihna tur dang pawh a awm si lo va, hmuh lohvin a rawn beitute chuan Cabin chu an rawn pan hnai thei mai dawn a ni.
Thuhriltupa pawh chuan chutiang bawk chuan, inkil lehlamah chuan a lo buai ve bawk a.
Chutia a lo thlirna tur a verh kuak zawh chuan, Jordana chuan tukverh lam bawk chu a va hnaih leh a. A indawt zat hian, a hnar bul lawka tukverh biang chu silaimu chuan a rawn deng leh sawk thin a. A lo kalna lam chu a ngai reng niin a lang a. A rawn kaptupa chu hmuh tumin Jordana chuan a bih kual vel a, chutah silai khu laih laih hi Oak thing hnuai lungpui phen atanga lo chhuakhi Jordan-a chuana han hmu ta a. A thlir lai tak chuan silaimu dangin tukverh biang chu a rawn deng leh sawk a.
Jordan-a chuan, " Entlang chu han nei tehreng ila chuan saw pa luvun saw ka hik thei tur, " a ti nang nang a.
Engmah pawh sawi lovin Paula chuan a kawtchung fual ipte chu a hai nuap nuap a, engtlang phir, savun bawma khung hi a rawn phawrh chhuak ta mai a. Hlim deuh mai hian engtlang chuan Jordana chuan lungpui lam chu a thlir ta vang vang a.
A zawn chu a va hmu chawpchilh deuh mai a. Pakhat kawng chunglam lang hian lungpui chungah rifle hi a lo bawhchhan a. A rawn kah ve loh avanga fimkhur lo deuhvin, a dar a chin lu lam chu a lang vek a.
Chulai hmun chu ngun deuh va chhinchhiahin, Jordana chuan entlang chu a dah a, a Winchester rifle chu tukverh biangah chuan a han chhuang ta a. Ngun fahran maiin a han tinzawn a, a rifle chu a hmet puak ta thawr a, entlang chu a han chuh leh nghal vat a. Lungpui velah chuan vaivut a khu chum chum a, pa pakhat hi a rawn tal lang tawp a, a chalchang chu a tal ta uih uih a.
Lungawi tak hian Jordana chuan, " Ka fuh chiang kher mai, " a ti sak a.
Paula chuan, " Khandaih lentute chu khandaih vekin an thi dawn si a. Unaupa, tukverh kha hnaih lutuk suh, " a han ti a.
A thurawn chu a hmantlak kher mai. Silaimu chuan cabin bang hmun tin mai chu a rawn deng zui ta dawt dawt a.
Darkar engemawzat chu a liam tawh a. Silai ri chu tlang ruamah chuan a thangkhawk rum rum a. Mahse a rawn beitute chu pakhatmah an rawn inlan lo va.
Jordan-a chuan , " An lo kal hnaih hmain, khawthim an nghak a ni phawt tur a ni. " a ti a.
Paula chuan tui chu a han in khawlh khawlh a. " Nitlak hmaa min rawn chhan hmanna turin tawngtai rawh, unaupa. He cabin ro tak hi an rawn hliau phak vaih chuan ..... " a ti nuah nuah a.
" Hremhmun – meidil, " Jordana chuan ro hulh hian a lo ti a.
Ngaihtuah hlimawm tak zawng a ni hauh lo mai le, mahse nitlak hma loh chuan Jordana chuan chu mawlh mai chu a ngaihtuah ta reng a. A tawpah chuan tlang lam thing hlimte pawh a sei ta hle mai a. Sheriff Haslipp-a leh a deputy-ten an lo enthla reng a ni tih a rinna chu a ngai sual a ni thei ang em ? Lo ngai sual ni ta sela engtinnge ni ta ang le ?
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 11th, 2018, 10:49 pm

THE BUZZAR’S NEST . BUNG - 12/13
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
Bung -12
Khaw rawn tulh tulh zel hu tukverh darthlalang keh kara a va bih chuan, Jordana chuan an dinhmun chu a han ngaihtuah vang vang a. Dan vawngtute chuan an rawn chhan kha a ring thlarawk kha a ni a, mahse a lo hisap sual der niin a lang ta a. Zan a lo nih chuan, Turtle ho chuan in chu an rawn hnaihin, thim tham hnuaiah chuan cabin chu an rawn hal thei mai dawn niin a lang a. Insakna thingtumte lah chu a ro hle mai si a, a kang duh dawn kher em a.
Chutah engemaw tak hriat hmaih a nei niin a hre ta a. Tunah chuan a rawn beitute khan an rawn kah lohna a rei ta hle mai a. An rawn kap zui ta hauh lo mai niin a lang a. Thuhriltupa lam chu a han hawi a, chu cabin chhunga lo ding thim khual hnenah chuan, "Nauvate chuan an halpuah hal chu an chawlhsan ta ni awm takin a lang " a han ti a.
Paula chuan, " Lo kal hnai leh vaih teh se, Betsy hian a lo hlap hrep mai ang, " tiin a laiphir chu a beng thuk thuk a.
" Mu khatah hian suan tlang sawmpariat ve ve a awm a. Thawk na tak a nia, unaupa, " a lo ti a.
Jordana chian, " Damdawi chak tak chu a ni a lawm, mahse barhna turin hnaih chilh a ngei deuh a ni, " a lo ti a.
An pahnih chuan inchhungah chuan an vei tawn sek a, awng atang chuan an bih kual dun dun a. Chutah sakawr ke chhep ri an han hria a, a hla tulh tulh a, a reh ta a.
Jordana chuan, " Hrep tak hlawm chuan ! I lo hria em, Thuhriltupa ? " a ti a.
Paula chuan thum chhak hian, “ Lalpa chuan kan hmelmate lak atangin min chhanchhuak ta. Thilmak a rawn thlen ta a ni e. Lalpa chu fakin awm rawh se, “ a lo ti chhur chhur a.
“ Thilmak zawng a ni lo ! “ tiin Jordan-a chu tukverhah chuan a han ngaithla vang vang a. “ Kan phawk fuh ta a ni zawk – Sheriff leh a hote ! “ a lo ti a.
Anmahni rawn pana sakawr tlanri an hre leh a, reilote-ah cabin kawt chu an rawn thleng ta a.
Hmanhmawh deuh maiin Jordan-a chuan kawngkhar chu a hawng rawp rawp a, pawnah chuan a va chhuak ta a. Sakawr chung chuangho chu zan thim hnuaiah chuan an lo ding thim muk hlawm a. An hmaah Sheriff chu lo kal chhuakin, “ Buaina i tawk em ni ? “ tiin a rawn au ta a.
Jordan-a chuan, “ Tawk teh meuh mai ! Turtle hovin nichhuah atang khan min rawn bei tawh a ni. An kiang chiah a ni, “ tiin a lo chhang a.
“ Nangmah chauh i ni na nge ? “
“ Thuhriltupa pawh a awm ve, “
Sheriff Haslipp-a chu a lo kal hnai deuh va, a sakawr atang chuan a chhuk ta a. “ Tangka sum chu i rawn hlan hma loh chuan buaina chu i la tawk zel dawn a ni. Pathian hmingin, engahnge i rawn hlan mai loh, fing ta che “ a rawn ti loh loh a.
Thuhriltu Paula pui chu kawngkaah chuan a rawn lang ve a. “ Milem betute chu an chung a pik e. Suan mu pai ai chuan, unaupa, thinglung thinlung thianghlim neih hi a hlu zawk, “ a rawn ti kul kul a.
Jordan-a chuan, “ Chu sum chu a awmna hria ni ila chuan, hetah hian ka la tap reng i ring em ni ? “ a lo ti a.
Sheriff chuan, “ Ring lo, i tlan bo vat ang, hmanhmawh deuh vin. Tunah pawh hian tlan bo turin i inpeih reng tawh mai thei, “ a lo ti leh a.
Hnial thui zel pawh a sawt chuang lo tih hriain, Jordan-a chuan a dar a han chhin ak a. Sheriff chuan rophum ruk chu a awmna a hriat ngei a ring tlat si a.
Sheriff Haslipp-a chuan sakawr chung chungho lam chu a han hawi a, “ In sakawr atang khan lo chhuk ula, chawl hahdam rawh u, naute u, “ a ti ta a.
Jordan-a chuan laltin tawng fe tawh chu a han chhi eng a, chu Dan vawngtupa chu tukverh darthlalang kehte leh banga silaimu hnuhma te chu a han kawh hmuh a.
“ Buck Burdock-a chu engmah ti lo in i chhuah mai dawn em ni ? Kha thlunglu lawkpa khan engvangin nge heti fakauva ka in leh lo rawn suasam theihna a neih reng reng ? “ Jordan-a chuan a han ti a.
Tunah zawng Sheriff tan chuan ngawih chipcham a hun ve ta. A nihna chu a thlana thlan lal a ni a. Ranvulhtute chu an inkungkaih thum hlawm si a. Ranvulhtute laka lo awm thar parawl mai lehnghal a chhan chuan vote a hmuh tlem phah dawn si. Thla thum chhungin inthlan a hun leh mai tawh dawn a ni bawk si nen. Rel rawkna a an pawisa ruk chhuah a la hmu let lo fo chu miten an sawi duh tan hle tawh bawk si a, Arsi chu a bel rei lutuk nite pawhin mi chuan an sawi tawh a. Rawlthar firfiak zawk a aiah an thlan mai pawh a hlauhawm tawh niin Haslipp-a chuan a hre si a.
Sheriff leh a hote an kal kian leh hnua chuan, Jordan-a leh Thuhriltupa chuan thutthlengseia thuin, meizuk tur an zial a. Nilenga inchhung lum huam mai a tawm tawh hnu, zan arsi eng hnuaia boruak thiang han hip chu a nuam sawng sawng a ni.
Jordana chuan, “ He an rophum ruk tih teivet hian mulukawlh rual a rawn vir tir huai huai mai niin a lang. A hmasa berin Leggeta, Chutah a thianpa Negg-a. Irish-a hi Harker-a laichin niin an sawi a, Ani pawh hian a beisei a ni ta ve ang. Chutah kha an Limleypa, Reginald Chumbey-a kha…. “
Paula chuan, “ A hming dang leh chu Five-Ace-Freddy-a a nia lawm. Kansas City atanga an rawn um chhuah tawh a ni a. El Paso lamah a rawn par chhuak leh hluai a. Chutah chuan White Chapel Willy a invuah thung. Pawisa sum awlsam taka hmuh theihna lampang reng reng chu a vir chung zel mai a ni. Tih pianthar hleih theih tawh loh, misual rawva mawle, “ a lo ti a.
Jordan-a chuan, “ A lo nih hrep tak chu ! Chuti anih chuan kan Limley-pa chuan maktaduai chanve chu a rawn chhui anih phawt dawn chu, “ tiin, Paula chu a han melh ralh a, “ Nang pawh hi ka hrethiam chiah lo che, “ a ti ta a.
Thuhriltupa chuan, “ I rinna chu hausakna ah nghat suh; ka hausakna chu chatuan atan a ni, unaupa. Lalpa chuan, in ro te chu vanah khawlkhawm zawk rawh u- a ti asin, “ a lo ti a.
“ Texas rama kawhmawh i bawl atang kha chuan i lo inthlak danglam nasa ta tak tak ta nih hi ! “ Jordan-a chuan a ti a.
“ Eng chu ka hmu tawh alawm, “ Paula chuan a lo ti hmuk a.
A tuk ni chhuah chuan Thuhriltupa chu a lo kal bo leh hman daih tawh a. Chu hmuihmula pui chu hriat thiam harsa tak a ni. Hmana suahsual rawng a bawl ang bawk khan, tunah chuan chhandamna hna chu phur tak in a thawk ni awmin a lang a. Hlauh lah chu nei awm pawhin a lang hek lo. Chutah Jordan-a chuan ama chanchin chu a han ngaihtuah ta a. Harker-a ram chu han chen reng nan chuan a ralti lutuk niin a lang a. Sum phumruk chu a hmuh vat loh phei chuan a la tuar ngei dawn ni pawhin a lang a. Chuvangin kawr ruam lam chu a dap vat vat ngai tawh niin a inhre ta a.
Tukthuan eikham chuan, tlang pang awihtlana tui luan kawr hlui lam, tuna lungpui hmun lam chu a pan ta a. Zawi zawiin a lawn sang deuh zel a. Chulai hmunah chuan thing ding pawh a tam lo va., thang (hnim) hmun hi a ni mah mah zawk. Lungpui insir khep khup karah chuan thlansa phul kaiin a vak vel a, mahse engmah a hmu chuang si lo. Thaw huam huam chungin a chawl ta rih a.
Hmun za tam tak, hmun sang tam tak mai, miin chutiang sum a thuhruk theihna hmun tur chu chu laiah chuan a awm niin a hria a. Lungpui kar vel chu haiin, miin kum khat pawh, kum sawm zet pawh, hmang mahsela, hlawhchhamin a inhai buai thei mai dawn niin a hre ta a. Chu lai hmunah chuan Harker-a chuan,sum chu a thukru anih chuan, a awm hlen dawn a ni tihna maiah a ngai ta a.
Lungpui khawkrawk zinga chhuk leh ta lo chuan, tlang sir lehlamah chuan a hel kual leh ta zawk a. A tawpah chuan mual zawl, vaivut khuh pawt thur thutthlengsei lo indawhna hmun hi a zuk thleng thla ta hlawl a. A hnuai lamah chuan ni hian Cabin chu a chhun eng sut a. Han kalsan leh mai a tum lai tak chuan, a piah thingbul tar tawh tak bulah chuan, thil pakhat ke pathum nei inhung, puan duma khuh, a tawpa thir lo lawr chhuak hi a hmu ta thut mai a.
Invengthawng deuh maiin a han hawi kual vel a, a silai kawm a vuan ran bawk a. Tumah dang chu laiah chuan an awm ve pawhin a lang lo va. Chutah ke pathum neia ding kak ti te chu a va pan a, a khuhna puan chu a han hlim a. Telescope tha fahran mai hi a lo invuah reng mai a. A zuk kun a, chu entlang sei teng rawng atanga a han buh chuan, a in (cabin) chu chiang fahran mai hian a lang a. In vel, engkim mai chu lunga vawm phak mai awma hnai hian a lang ta a. Jordana chuan mak pawh a ti lo.
Chuti anih chuan khawchhak lam atanga rawn enthlatu deputy Sheriff chauh kha amah lo enthlatu chu a ni dawn hauh lo mai; heta hi a chevel lo bihthla rengtu pakhat chu a chhar chhuak leh ta a ni a. Reilote chhung chu han din vang vang pahin a khabe chu a han tuai vat vat a, chutah entlang inhung chu a khuh tha leh ta a. Thutthlengsei chu kal pelin, hnimbuk bihrukna remchang deuh hi a lo awm a, chuta tang chuan a lo chang ta a.
Rei vak pawh a la nghah hman hma chuan, fimkhur lo deuh va lungte chhir len lawp thawm hi a han hria a. Hnimbuk hnuai atang chuan a lo bih ran a.
English-pa, Reginalh Chumbey-a kha a lo lang ta a !
Thlalatupa chuan a kamis silk var leh a stetson lukhum tharlam tak mai te kha chu thuamhnaw dang chu lai ram vela chet awlsam zawkna tur chuan a lo thlak tawh a. Kamis buang deuh leh Jeans dumpawl hi a ha a. Lukhum hlui, Cy Plummer-a thehthang tawh ni awm tak, lian hliap hluap mai hi a beng khuh thla deuh thaw hian a khum a.
Lai fahrana faifuk rut rut chung hian, entlang khuhna puan chu a hlip a, fimkhur deuhvin a han thlep tha a. Chutah tih fo tih hriat reng hian a han bih vung vung a, a han inher leh a, entlang khuhna puan chu lungpui chungah phahin a thu a, kuaite leh vaihlo a rawn phawt chhuak ta a.
A hnung lamah chuan Jordan-a chu ngawi rengin a rawn tho chhuak a, thutthlengsei lam chu a tawn pan phei a. Fimkhur hle mahse, a thawm atang chuan, Chumbey-a chu hlauthawng awm deuh hian a lo hawi phei thuai a. Jordan-an amah a rawn veh phei a hmuh veleh chuan, a kut dinglam chuan a kamis chhung lam chu a chuh thuai a.
Mahse Jordan-a chuan a silai a lo phawi chhuak hman tawh a, " I kawr kha zen vaih teh, satlaw i ni ringawt mai, " a rawn ti ta chheu chheu mai a.
Hreh tak chungin English-pa chuan a kut chu a phawi leh ta zal zal a.
Jordana chuan a rawn pan hnai a. A kut veilamin chu pa kamis chhung chu a zuk zen a, a .41 derringer tawi tek tawk hi a rawn phawrh chhuak ta a.
" Tichuan ralthuam lam reng reng hi chu a tenin i ten hluah hluah maw ni, " tiin, chu silai te takte chu a kekawr ipteah chuan a thun a. " Tunah Mister Chumbey, han sawi teh le, rang deuhin. Engvanga mi lo thlir ru reng nge i nih ? " a han ti a.
Chu thlalatupa hmai sen seng sung chuan a rilru a lo siam hman tawh a. A chal a chuar nung a, " I thusawi awmzia chu ka hre thiam hauh lo mai a, unaupa ? " tiin a chhang a.
" Chhaw awm takin lang der suh ! " tih tuar pahin Jordana chu entlang lam hawi chuan a bu nghut a.
Chumbley-a chuan pawisawi lo awm tak hian a han nuih sun sun a, " Kha kha maw ! Ramhuai nungcha, sava chevel thlir nan ka hmang anih kha. Nimin mai pawh khan- ".
Jordana chuan, " Pehhel vel mai mai suh ! Kha entlang kha ka Cabin thlir nana vuah a nih kha. Kha vang khan Negg-a ka phum tur pawh kha mi lo hmu a, rawn hriat chian tumin i lo kal anih kha, " a ti a.
English-pa chuan, " Nih phei zawng a ni thei e. Mahse ka ti tak zet, kha kha chu ka rawn hmu palh mai mai che a ni, " tiin a la hnual ta fan a.
" Min enthla a ni ! "
" Chutiangin min puh ngawt thei lovang ! " Chumbley-a chuan a lo ti hmuk a.
Jordana chuan, " Ka han sawi fiah deuh ang e, White Chapel Willy, tunah chuan i sum lakkhawm nite chu a kiam ta. Kal vat rawh, " a han ti tuar a.
" Awm lo lutuk ! " tiin chu pa chuan a la hnial ta fo va. Zuk kunin, a kuaite leh a vaihlo ip a thlauh kha a zuk chhar leh a. Jordana chuan a hnungah chhawmin, Cabin lam pan chuan an chhuk thla dun ta a.
Cabin an zuk thlen chuan, Irish-a ruangam sang pui mai chu thutthlengsei atangin a lo tho va. A mitmu dumpawl phut mai chuan Jordana chu a en vung vung a, " I la vannei ta fo maw ni chu. Tingtang kaih sak tlak hial i ni hi mawle, " a lo ti a. Chutah Chumbley-a lam chu a hawi a.
Jordana chuan, " He pa hian sava a lo thlir a ni. Sava chu keimah ka nia. " a ti a.
English-pa chuan, " Kan inhre sual mai mai lek a ni, " a lo ti a.
Jordan-a chuan ngaihsak lo zet hian, Indian suakpa hnenah chuan, " U.S. Calvary-ah khan enthlatute chu engtinnge an tih thin kha ? " a ti ta daih a.
Irish-a chuan pawitih loh hmel zet hian, " Chutiang mitenawm te chu an kap hlum mai thin, " tiin a lo chhang a.
" Ngaihdan tha tak anih chu, " Jordan-a chuan a lo ti nghut a. Chumbley-a lam chu a han hawu a, " Saw chhekin piah lam saw pan rawh le ! " a ti ta a.
English-pa chuan engemaw hi sawi a han tum a, mahse a sawi chhuak hlei thei ta hauh lo va. Jordan-a chuan chhawmin, Irisha chuan an hnungah rawn zui bawkin chhekin lam chu an pan ta a. Chhekin chu an kal pel a, luiruam chu an kal kai leh a, chu mi piahah chuan Negg-a phumna tur a thlan laihsa kha a chhunga leivung tlem azawng lo tla darh nuaih hian chhilh lohin a lo la awm ta reng a. Suahdur a fung sei fe hi a bulah chuan a lo la let tlan a.
Jordan-a chuan thlan chu a han endik a, " A vung hai chhuah tur tlem a awm a. Suahdur kha la la, zuk hai chhuak rawh, Reggie ! " a ti ta mai a.
Englishp-a chuan, " I mi fiamna chu a tawk tawh hle a ni lawm ni le ! " a ti nung nung a. A chalah chuan thlanfim a rawn bawl tan tan a.
Jordan-a chuan, " Ka fiam che ni a i la rin cheu chuan, i aa let der anih chu, " a ti a. A .45 Colt chuan a tin ran mai a, " Mawihnai taka phum nge i duh, nge ni a, ti khan ka kap thla nghal thlawrh mai dawn che ? " a ti ta chheu chheu mai a.
Chumbley-a chu beidawng takin Irisha lam chu a rawn hawi a. Aw khur dar dar hian, " Min that lai chu ti khan dingin i lo en reng ringawt dawn em ni ang ? " tiin a han zawt a.
Chu Indian suakpa chuan a thusawi pawh hre awmin a lang chuang lo va, che miah lo hian a ding zum zui a, a mit chauh chuan Jordan-a leh English-pa chu a sir rulh rulh a.
" An khaihlum ngei ang che mawle, " aw tham tuak hian Chumbley-a chuan Jordan-a chu a han ti a.
Ani lah chun, " Tu teh lul in nge mi hek ang ? " a tihsan mai a. Irish-a lam chu a rawn hawi a, " Ka lam tang i ni em, thianpa ? " tiin a han zawt a.
Chu thlah chanvepa chuan a hmel landan ti danglam chuang miah lo chuan, " Meidil vura a khawn hlo thleng pawhin le ! " a lo ti mai si a.
Jordan-a chuan, " Chu i hria em, Reggie ? Tunah chuan vaivut khu zuk theh chhuak rawh le, tuitang mang lova inthah zawng ka tih chi a ni mang lo va nia, " a ti khur khur a.
Rit lutuk ang mai hian Chumbley-a chuan thlan kotlang chu a va pan a, phur lo fahran hian suahdur chu a la a, a inher thut a, amah thah tumtupa chu a han vawm ta a. Jordana, amah lo vengthawng rengtu chu a persawn dawrh a.
Chutah zawng beisei bo tawhin, English-pa chu thlan khurah chuan a lut thla ta a. Jordan-a chuan suahdur chu a la a, a zuk theh thlak sak a. Chiang lo ruai hian Chumbley-a chuan leivung chu a rawn theh chhuak tan ta a.
Meizial zial pahin thlan kotlang atang chuan, Jordan-a chuan chu pa thau pui mai in rilru mangang fahrana engmah pawh hre chiang kuang tawh lo va, leivung a rawn theh chhuak chu a lo thlir reng a. Chu misual tawrawt, thlalatu anga inchhal dera chuan Harker-a ram chu a rawn pan hnaih leh ngam tawh lohna turin, tihhlauh a tum chauh phei zawng a ni a. Thah tak tak phei zawng a tum hauh lo.
Chutah English-pa chu a raen dah chhoh leh huan, a hmel beidawng tak kha beiseina thata rawn eng chhuak leh ta hi Jordan-a chuan a hmu ta thut a. Engvangnge tih pawh a ngaihtuah hma chuan, thil chang tak leh rit deuh mai hian tuboh ang maiin alu-ah chuan a rawn khawng bur a. Rawn thim nghal mup karah hian a lo hmu de chuai bawk a. A kaihza tha chu a thlep hnawk a, che zui thei lovin a let ta reng a.
" I ti tha lutuk ! " rawn ti chhuan tuarin, Chumbley-a chu a rawn au chhuak a. Suahdur chu a theh thla lawk a, thlan atang chuan rawn chhuah mai a tum a, leivung chu a rap tawlh a, a tla lut leh ta a.
- Irish-a, Jordan-a let hnunga lo ding chuan, a lungtum ken chu a sir lamah a paih lawp a. Chutah a kut dinglam chuan zuk banin, chu pa thidan .45 puakruk chu a zuk chhar a.
Chumbley-a chu leivung kai phung chuan a lo tho chhuak leh a. Irish-a lam chu rawn banin, " Min lo kai chhuak teh ! " a rawn ti a.
Aw lai fahran hian chu thlah chanvepa chuan, " Ngawi rawh, " a lo ti fan ruih a.
English-pa chuan, chu pa sang pui mai hmel bumro tak pu chu a han en chho va. A khabe chu zawi ta huaiin, tawng pawh a tawng chhuak thei ta lo va. Makti fahran mai hian amah rawn tintu .45 Colt puakruk kua chu a en chho ta ho mai a.
Silai chu a puak thawr a, silaimu thawkna deuh mai chuan Chuambley-a chu hnung zawngin a vawrh dawrh a. A pai awn awn a, hnung zawngin a tlu ta a, ringhlel hmel deuhin a mit chu a meng ru ru a. A kawr uk awm zawnah chuan thisen hi a rawn luang chhuak nguai nguai a. A ke chu a leng uih uih a, a maimitchhinga, a hnuk a chat ta ni awm hian a zawi ta hnawk a.
Hmanhmawh lo fahran mai hian Irish-a chuan, puakruk chu Jordan-a holster ( silai paina) ah chuan a thun lut a. A kekawr ipte atangin satha hruihrual a rawn phawrh a, Jordana thidang tlu reng chu a hnungkhirh ta a.
Jordan-a chu kawr thimtham thuk tak mai atang chuan a rawn harh chhuak leh mek a. A mit chu a han khap suksuk a, ni engah chuan a rawn meng chhuak mai ngam lo va, a lu chu chet tum chuan a rum tuah tuah a, a dul thuar atang chuan rawn hnawh chhoin, a luak a chhuak hlui mai a. A ngaihtuahna chu chiang lo ruai mai hian a awm a, na a rawn hre tan a, thil hriat chian tumin a lu na zet mai chu a han thing a.
A tawpah chuan a rawn thu chhuak a, Chumbley-a ruang thisen kai hnuang chu a zuk hmu a, lu hai fahran hian a han hawi kual a. Irish-a lo tho hlim chu a hmu leh a. Jordan-a chuan ngun zet hian chu pa sang pui mai chu hmuh chian tumin a lu chu a han her a, "Khu khu i tih a ni maw ? " aw tham tuak hian a ti ta a.
Chhan pawh chhang lovin Irish-a chuan chhekin lam a pan phei a. Amah chauh va hnutchhiaha a awm tak hnu chuan Jordan-a chu a han mu zangthal thla leh thlawp a, thil han ngaihtuah chian deuh theihna turin, minit khat tal chu a lu na han dam deuh sela a duh hle mai a. Chutia a han tluk zal leh takah chuana lu na ngut ngur pawh chu rawn ziaawm deuh zelin, a nat in a na tluk tluk a. Tunah chuan thil awmdan kha a han ngaihtuah tha leh a, Chumbley-a makti mitmeng te, a tukhuma rawn ri bur te kha tunah chuan a hre chiang ta. Hnung lam atangin Irish-a khan a tukhumah a rawn chhu thlu a, chutah English-pa kha a kap hlum ta a ni phawt mai. Engvanginnge ?
Chu zawhna erawh chu chhan harsa kherin a lang !
A hnu deuhah chuan, Jordan-a chuan lui lampang atang chuan silai ri a han hria a. A han thu chhuak leh a, a kut hnungkhirhna chu talchhuah tumin a han tal vak thin tak na a, satha hrui chuan a banrek chu a hreng na ting mai hi a ni a. Irish-a chu a lo lang leh ta a. Saiip lian pui ang mai a sakawr pang lehlam lehlama rawn uai hnuang hnuang chu bawngvun tharlam hi a ni a. Silai ri chu tunah chuan a chhan a hriat theih ta a, chu thlah chanvepa chuan bawng a kap hlum a, a vun chu a rawn lip niin.
Irish-a chuan savun hring a theh thla hnawk a, a sakawr chu a dintir a, a mi man pa chu a rawn hnaih ta a. A mitmeng, saidawium dumpawl ang mai a chang khul chuan Jordan-a chu a rawn en a.
Jordan-a chuan, " Chuti anih chuan Harker-a rangkachak chung chang pawh i lo zawng ve tihna a ni dawn maw ! Chumbleya nen hian min that a, nangmaha hui vek i tum em ni? " a lo ti a.
" Ni mai thei, " chu pa chuan a lo ti hluk a.
" Awle, chuti chu min that thuai thuai la."
" A dam pawh i dam khawchhuak mai thei. "
" Engtianginnge kan inremsiam dawn ? " zawh ngai lo pui hi a zawt niin Jordan-a chuan a in hria a.
Irish-a thiltih dan chu a chiang tawk hle hian a lang a. Sheriff ngaihdan ang bawk khan, Harker-a chuan a rophum ruk chu rawn hai chhuak turin a tir anih a ring a. Dollar maktaduai chanve zet zawnna ah chuan tualthah mai mai te chu pawisak awm lo hlein a lang na a, chu pa chuan rophum ruk awmna chu hria a a rin tlat avangin, Irish-a chuan thah nghal mai chu a tum lo niin alang. A fimkhur loh vang vek niin Jordan-a chuan a inhria a. Irish-a kha a rawn inrawlh ve dawn anih lo ring ni sela chuan, Jordan-a chuan a lo veng fimkhur ve deuh tur ngei hi a ni a. Mahse hetianga nunrawng taka kut a thlak duh mai dawn a ni ang tuinnge hre bik ang le ?
Chu Indian thlah suakpa chuan, " Jed Harker-a nen khan in inremsiam chu a ni phawt mai a. Ro chu nangin va hai chhuakin, insem intum a ni a. Mahse Sheriff chuan a lo enthla reng si che anih kha. Thuhriltupa pawh khan a enthla reng bawk che, " Chutah English-pa ruang lam mitsir rulhin, " Chumbley-a pawh hian a lo veng reng che a. Kei pawhin. Chuvang chuan i nghak ta rih a, mahse i nghak rei lutuk ta niin a lang. Buck Burdock-a khan a rawn that ngei ngei dawn che a, chuti anih chuan kha rophum kha a bo hlen a ni tawh mai dawn a ni. I sawi vek a tha ang- tunah ! " a ti ta a.
" I hre sual anih chu, engmah sawi tur ka nei lo, " tiin Jordan-a chuan a lo hnial a.
" Kan la hria ang chu, " thlahchanvepa chuan a ti hmuk a.
A tho va, chu savun tharlam a han pharh ta duai chu Jordan-a chuan makti tak hian a lo thlir a. Chutah a han hriat thiam takah chuan a ip ta chawih chawih mai a.
Savun chu a han pharh duai a, chutah chu Red Indian suakpa chuan Jordan-a chu zo fahran mai hian a va pawm phei lawp a, savun sir khat chungah chuan a va mut ta a. Chu savun sir khat chuan a mi manpa chu a tuam a, savun chungah chuan a nem lir phei tawp a, chu savun chu zampher ang mai a hmangin, Jordan-a taksa chu a tuamhlawm ta tlat mai a. A tawpah chuan a chemte chuan savun chu hruihrual atan sei fe hi a han hlep a, savun hringa tuam tlat Jordan-a chu a phuar hlawm ta a.
Savun huh rimchhe zet maia zial hnan tlat, a lu leh a ke hmawr chauh lang thei chuan, chu a mi man zial hlawm chuan a lu chauh langin, amah mantupa chu a en hrek hrek thei chauh mai hi a ni tawh a. Chu pa chuan a thil theihnghilh han hre chhuak thut ni awm hian, Jordan-a a rawmawl awrh chu a phih thla a, nghet takin a ka hup nan chuan a suih ta hmiah a.
A hnaah chuan lungawi tawk takin a rawn en chhuk a, " Bawgvun hring chu i hria alawm maw ? Nisa a pho chuan a lo sawng tulh tulh a, ro hma tak a ni. Apache ho chuan an mi man lu hren nan an hmang thin a. Savun chu a lo sawng tulh tulh a, a sawng te tulh tulh zel a, chutah a thluak chu artui hmeh keh ang mai a sawr chhuak ta zul zul thin a ni, " a han ti a.
Ni, vanlai zawl pel tawh chu a han thlir vung vung a, " Cabin lamah khan ka lo va hahchawl ang a, nithlakah ka lo kir leh ang. Chutah zet zawng i sawi tawh ngei ang, i sawi hnem kher bawk ang ! " a ti a.
A sawi zawh chuan a sakawr awmna lam chu a pan ta a, tui a dai phei buan buan thawm chu Jordan-a chuan a hria a, chutah a reh ta duk a.
Chu nisa rum rut mai hnuaia hnutchhiah Jordan-a chu a luak a chhuak kher mai. Chuti chung chuan a din hmun chu a han ngaihtuah hram hram a. Nisa hnuaiah chuan savun han ro sawng tur tawrhhlelhawm dan tur pawh chu a hai hauh lo va. Mexican hovin chutianga mi pakhat an phuar hlawm ruang pherh nuaih chu a lo hmu tawh a, chu chuan a luak a tichhuak hluah hluah mai a ni.
Chi-ai mai lo tura insum hram hramin, a dinhmun tur chu a ngaihtuah a. A tihngaihna tak avang hle mai a. Thuhriltupa a han ngaihtuah a, mahse thuhriltupa pawh lo kal ni ta reng se, Irish-a kha bukah khan a lo awm dawn si a, rinawm takin a bum kual mai awm si a. Engemawni hi a ke-ah chuan a lo vak a, thawklehkhatah a hlau chu a tim ta sung sung a. A insang sek a, a leng vak vak a, a kut hnungkhirh chu tal chhuah tumin savun huh thlur chu han theh kian lawp mai tum hian a tal ta vak a, mahse engmah a sawt chuang si lo. A chau chu a thlan a tla zul a, chutah a khur ta tlawk tlawk a.
A inseh ruh a, a ka puan hnawh phui tlat karah chuan a rak vak a, engtin emaw tak kha thlah suakpa kha han auh vak a, chutiang hrep mai ai chuan ,amah chu rawn kap hlum law law tira lo ngen lawm lawm tak hi a nap tawh a. Nisa hnuaiah chuan savun chu a sawng te zel a, a awmruh, a nakruh leh a khelruh te chu a hreng ri tuar tuar ang a, a hreng sawm vek mai dawn chu a ni ta si a.
A luna pawh chu hre chang tawh lovin, rilru fim takin a inngaihtuah a. A tawpah chuan chi-ai zui tawh lovin a lu chu a han kan a, a bul vel chu a han enthli thlai a. Hnung lamah chuan luite kama hnimbuk tr kha a awm a. A piah deuh vah chuan chhekin kha a awm leh a. Chu mi bul lawkah chuan leivung thlan laihna kha a awm leh a. Lui lamah chuan a khaw hmuh chu hnimbuk khan a lo dang a, lui hnar lamah chuan tlang hual vel hian kawr dung a awm bawk a.
Chu savun hring amah tuamna chu a zuk bih chhuk a, rapthlak deuh mai a zuk hmu ta a. Chu savun hringah chuan, savun tharlam rimah chu rawn bawmin fanghmir an lo vak dum tuar tawh mai a. Nitlak hma daihin a taksa chu an rawn bawh ang a, a miite, a hnar leh bengah te chuan vak lutin, an kher ngawng ngawng mai dawn a ni tak si a. Engmah a tih theih bawk si loh avangin, chutiang thil a tawrhna chuan a rilru pawh a ti aa vek dawn a ni. Kha Indian thlah chanvepa kha a lo kir leh hunah meuh chuan, fanhmirin a nung chungin an lo tlan hut hut tawh mai dawn a ni ta si a.
Chutianga phuar hlawm tlat chuan, savun hring thi hnuang mai rim thang uih nghur mai chuan a hnar kua a rawn ur chho va, a rilru chuan fanghmir vak nuaih nuaih mai chu a ngai thei lo tih a hre reng mai bawk si a. Hnungkhirh leh ka tuam phui tlat chung chuan, savun han sawng te chuan a hrek tan ta a. Anih nih ni mai teh se tia a han inthlah dul dawn pawh chuan, dam chu a la thlahlel bawk si a. A insang ping a, a tal vak vak a, a banrek hlinna na pawh hre chang lo hial khawpa a tal pawhin a hah thlawn chauh mai a si a. Awm kang awk awk hian a han thaw hlawp hlawp a.
Chutianga a han hahchawlh lai chuan, Cold Creek lui luang ri her her chu a hre thei a. Chutah tan a han la leh vak a, bawngvun hring nen chuan an insawi lawk lawk a. A tawpah chuan sir zawngin a lum let thei ta a, a sir zawnga mu chuan lui luang lam chu a thlir vawng vawng a. Ngun tak maiin a awmna leh lui inkar ram awihtlan chu a hisap a, pen sawmhnih vel tur hi niin a hria a. A thil ruahman chu engemaw ko deuh a lo awm chuan a tibahlah mai thei a ni.
Mahse vanneihna lalnu chuan a lo la kalsan lova. Chulai hmun awihtlan leh phaitual hnim vel mai lo chu engmah dang pawh awmin a lang lova. Luikamah chuan hnim chu a to chhah deuh va, chhekin atanga kal kaina erawh chu a fai thla hun a.
Beiseina han ti thar lehin, a han insawi leh vak vak a, mahse a insawi nasat hle chung pawhin a insawi lum zo chuang lova. A tawpah chuan, chu tangpa chuan thlantui bual huh zul chung chuan beidawngin a chawlhsan leh ren rawn a. Chutah fanghmir chuan a hnungzang an rawn seh tan ta a, a kamirah chuan rawn vak chhovin, a nghawng an rawn seh tan ta bawk nen. Mi aa ang maiin a theih ang ang chuan a inthing ta buan buan a.
Chutianga a inthin tak buan buanah chuan a lum tan ta a, zawite in chu savun tel chu a lum ta tung tung zel a. A theih ang angin lui kaina lam hawi chuan Jordan-a chu a in khalh zel a. A lum chak thut chuan chu savun tela intuam chung chuan, luiah chuan a tla bawrh ang a, tuiah chuan a tla hlum mai dawn niin a inhre bawk si a. Engpawhnisela, chu zawng thihna nuam tak a ni tawh thung ang chu, tiin amah leh a mah chu a inhnem a.
Mahse chirhdum tlema zawng lo awmna ah chuan, bawngvun tel lum thla chu a ding ta mauh mai a. Thang ( hnim) hian a lo dang niin, hmun fai lai chu a zau tawk lo deuh hlek hi a lo ni a. Jordan-a hmai chu a lumnaah a pilh phung tawh a, a han in sawi leh vak vak a, a ke lampang tel chu a tawlh hmasa thei ta thung a. A han tawlh thla leh deuh hret a, mahse thingtang tang khawm hian a lo dang leh ta a.
A zuk bih thla a, a hnuaiah chuan lui chu a luang del del a. Chulai hmunah chuan fit sawm vela zau, kawng thleng vela thuk tur ni hian a hria a, tuiluang chuan lungpui lianpui hi a su phuan buah buah a. Tahchuan a khampheia a lum thlak theih pawhin, khawvela vanneihna zawng zawng pawhin tuia a tla hlum tur chu chhanchhuak zo chuang pawhin a ring lo. Mahse beisei tak chungin a tawlh thlak theih a inring ta a. A ke lam hmasak a, luia a tawlh thlak theih phawt chuan, tuiah chuan a tlak hlum loh theih dawn niin a hre ta a. Han tal leh vakin, thingtang a tang chuan a intal chhuak leh thei ta hlauh a.
Zawi zawiin chu savun intel buarchuar tak mai chu a tawlh thla hun hun zel a, a ke lam tui zuk tap phak chuan a tawlh ta la. Jordan-a chuan a taksa chu sir zawngin a han thing nawr nawr a, tuiah chuan a inchiah thuk thla ta tawlh tawlh a. A khup thlenga a chiah takah chuan a harh sawng sawng mai a. Han inthing leh nawr nawr in, tui chuan a malpui thleng a rawn chiah chho ta a.
Tuizangkhauh chuan a bak chu a rawn chhunzawm ve a, luiah chuan a tla thla tur chu engtinemaw a tang hram hram zawk a. Tui chuan savun chu a rawn tih huh takah chuan a han pilthuk leh hret a. A han tawp leh chuan a lu chu fimkhur deuh chuan a rawn kan ta a.
A koki atanga hnuai lam zawng chu tui chuan a chim vek tawh a. Tuizangkhauh chuan chu savun tel chu a rawn sawi nawk nawk thin tak nain, lungpui karah chuan a tang bet ta tlat a. Tui vawt chuan a ruhte chu a rawn seh vawng vawng a, mahse chu a vawt tawrh chu a rilru ngaihtuahna tifimtu a ni hlauh thung a. Savun hring hi a ro chuan a khawr sawngte thin a ni a; tuiah erawh chuan a nemin, a puam pharh zawk thung. Lungawi deuh mai chuan, inchiah huhin a awm ta hle hle a.
Engemaw chen hnuah chuan, a hnungkhirhna savun hruihrual kha a han chet chhin a. Amah tuamna savun ang kha ni lovin, kha hruihrual kha chu a ro a ni a. Dawh thei takin a hnung lamah chuan a kuttum a han hum ruh a, a han phih chhin a, a hreng na kher mai.chutah a kut chu a han pharh leh a, a tawp a tawpah chuan a han thawl ta hret a. Rei ngial a beih leh hnu chuan a kut phuarna chu a phelh thei ta a.

Bung-13
Tilai phek hi a tla a kim lo mai, lo ngaihruat mai teh u.

Pawisa awm lo deuh mai hian, Jordan-a chuan chu pa ruang chu a chhir let thawk a.Indian suakpa nghawngawrh ' Bandana ' chu a phih thla a, a kamis sen nen chuan. Bandana nghawngawrh chu luiah chuan a va su fai nawk naqk a, ni- ah a pho ta a. Thlankhur lampangah chuan lo kir leh in, a zuk zuang lut a. Chumbley-a hiam silaimu luhna zawnah chuan nghawngawrh chu a zuk hnawh a, kamis sen chu pawt thlerin a tuam nan a hmang ta a. Chutah chupa taksa zawi hnuang chu a pu kang lawp a, thlankhur atang chuan lawn chhuah puiin, chhekin lam chu a pan pui ta zel a.
Chhekin chhung a va mut hnu chuan, chu thlah chanvepa awmna lam kha a zuk pan leh a. A chau tawh kher mai, " Kan rimchhepa chu mulukawlh chaw ah ka hnutchhiah mai nang chuan, " tichung zelin a dar chu a han san uk a, a ke khinghnihah a la lawk a, chu ruang chu thlan khurah chuan a theh thla ta a. Zawimuangin, chau deuh mai hian a vur ta a.
Tunah chuan a ruh zawng zawngte chu na thum tawh hian a hria a. Chhekin lam chu a pan leh a, Chumbley-a chu a han en leh vang vang a. Maimitchhingin zawi hnuang hian, chu pa chu a let reng a.
Engtia tihtur nge ni ang ? Jordan-a chuan a thluak chawmawlh chu sawi harh a tum hram hram a. A luruh chu hreipui a cheh ang mai niin, a taksa chu sakawr chil nek hnu ang mai ni hian a hra a. Mut thlawpa hahchawlh a chak tawh kher mai. Mahse a mutsan vaih chuan, tanpuitu a pun theih hmain Chunbley-a chu a thi hman mai dawn a ni tih pawh a bawk si a.
Irish-a chhutna lu pawng hlawt chu a han tuai nawk nawk a, rem a ruat ta a. Irish-a sakawr khan chu mi hliam chu Clearwater khua a panpui chuan kawng lakah a insawh hlum mai a ring bawk si a. Chutah a tihdan tur a hre chhuak ta thut a., luihnar lam, Razorbak-a hmun kha. Tahchuan Carol Hall-i pawh kha a lo awm mai thei a; ani chuan tihdan tur a hre ngei ang. A ngaihtuahna chau tak chuan eng ni nge tih a han ngaihtuah a. Calrol-i khan chawlhkar tawpah a unaupa hnenah a va hmang thin ni khan a insawi a, mahse Jordan-a chuan eng ni nge tih pawh a hre chhuak zo tawh si lo.
Razorbok-a cabin chu pindan pathum, Cold Creek lui luan tlangna, phulin a a hual hi a ni a. A piahlamah chuan vawkin te chu a awm hlawm a. Dik tak chuan mel thum emaw vel leka hla hi a ni a. Jordan-a chau tawh chuan mel za vel laia hla ni awmin a hre tawh a ni.
Mahse,kha nula hmeltha, inkhaithli nalh tak leh zuanzang tak Carol-i kha a lo awm chuan?
Khawthim dawnah sakawr chunga thle lawk lawk chung chuan, Chumbley-a, Irish-a sakawr chungah khan a phuar bet a, kai chungin chulai hmun chu a thleng chho ta a.
Carol Hall-i chuan sikul naupangte chhanna endika a lo buai lai takin, kawtah chuan sakawr ke pen ri a han hre ta thut a, rang taka zuang tho nghalin, chulai hmun chu miin an rawn tlawh zen zen loh avangin mak pawh a ti hle a. Mahse a rilruah thil pakhat a rawn lang zawk a, ' Jordan ! Bill Jordan-a !!
Kawngkhar a va hawn chuan Jordan-a sakawr chung chuang a rawn kal thle hnawp hnawp leh mi ruang ni awm tak sakawr chunga rawn phur hnawp hnawp a va hmuh takah chuan mak pawh a ti kher mai.
" Engngeni, Bill, engngeni ta !? " a han ti tuar a.
Jordan-a chu ngawi rengin sakawr atang chuan a lo chhuk thla a, Chumbley-a chu kawkin, " Silaia kah a ni, a awmah. Daktawr koh vat a tha ang, " chau aw tak leh chher chhuai hian a han ti a. A pai awn awn a. Chuveleh Carol-i chuan, " Bill ! " han tih thawt pahin Jordana lamah chuan a lo tlan phei ngal a. Jordana han pai awn awn chuan sakawr zinah a va invuan ding tur chu a rawn pui ta vat a.
Nula chuan, " Bill, nang pawh i thi lo chauh a nih kha ! " a han ti sap a. A aw a han san deuh va, " Jack, lo kal vat teh, " tiin a han au a.
Tlangval hmai bual deuh, satha tak hi kekawr inzawm ha hian Cabin chu a rawn kal hual phei a. Bualin a hman tur, bucket-a a tui khai chu a dah lawk a, hmanhmawh takin a rawn tlan phei ta nghal a.
Nula chuan Chumbleya chu kawkin, " He pa hi a hliam na awm khawp mai, tin hei hi Bill Jordan-a, kan thenawmpa anih hi. Ani pawh hi a sawprawp lo chauh niin a lang, " a lo ti a.
Chhah mup hian Jordan-a chuan a lo ngaithla a. A tha hrui zawng zawng chu luang chhuak bo ta vek hian a hria a, a lu lah chu a na tlut tlut mai bawk sin nen. Mahse Jack Hall-a chu pa tuan tha tak mai, thu zawt kawi kual vel mai mai lo chi a ni tih hre tur chuan a rilru a la harh hram a. A lawm hle nghe nghe a ni.
Engmah pawh sawi chuang lovin chu tlangval chuan, Chumbley-a phuarna hrui chu a phelh mawlh mawlh a, chu pa zawi hnuang mai chu inchhungah chuan a pu lut ta nghal a. Jordana chuan chet pawh a tum tawh lo. A sakawr zin a vawnna chu a thlah hlauh chuan Carol-i chu a bawhthlu mai ang tih a hlau bawk si a. Carol-i chuan a zakhnuaiah a kuah a, dam diai leh aw nu hnap mai hian, " Lo kal rawh le, Bill. Joe-an sakawrte chu a lo tifel mai ang," a han ti a.
Kawngka ah chuan Carol-i chuan a hnuk lut ti tih a.Khuma a hna mu thlawp leh dawnkan fai tliang hliau chunga laltin inchhi alh teng teng a han khaki sak chu a hre thei a; Carol-i vhuan a pheikhawk a phelhsak a, a ke chu khumah a hlangkai ta a. Chutah a chau lutuk chu a muhil zui ta siai siai a.
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 13th, 2018, 7:36 pm

THE BUZZAR’S NEST . BUNG - 14
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
Bung-14
Jordan-a han harh hlawl chu, maktiin a hawi vel ruai a, engvanga khum nuam tak, lukham nem deuh khama a lo mu ta mai chu a ngaihna a hre hlei thei mang lova. Chhuat chu thingphel chhuat hi a ni a, fai tak mai a phiahfai niin, a tliang han bawk a. Bangah chuan milem nalh tak tak hi thianghlim takin a intar thluah a. Bang kil khatah chuan puanthui khawl hi dawhkanah a inhung a, dawhkan bial te tak te khum bulah chuan inhungin, pangpar mawi deuh mai hi a inkhawi bawk a.
Chutah a han ngaihtuah chhuak leh a, Irish-an a phatsan te, bawngvun la thi huh dup mai te, Chumbley-a kah te, thimtham hnuaia Razoback hmuna Carol-i awm beisei taka a pan tak dante, chutah Carol-i awrawl no nalh fahran mai leh hlauthawng aw tak a a hminga a lo koh te kha !! Chuti anih chuan Razorback hmun chu a lo thleng ta a nih ngei chu !!
A ke chu leiah athlak thlain, a pheikhawk a han bun a. A mutna khum hnung lam puanzar chu ni engin a rawn chhun tlanga; a han hawng a, ni engah chuan a mit a han khap sak sak a. Chhunlai a lo ni thelh tawh a, a muhil rei hle niin a inhria a.
A hnung lam kawngkhar inkhar piah lamah chuan bel leh thleng vel ri tlang tlang hi a han hria a, chutah che vel thawm a han hre leh. Kawngkhar chu a va hawn chuan, a piah mai chu choka a lo ni a. Carol-i chuan inchhunga hak chi puan kawrfual hain, tapchhakah chuan rawng bawlin a lo buai hle mai a.
Jordana chuan, " Paradise-a angel rual zingah ka rawn harh chhuak ta emaw ka ti mai a sin, " Caroli hnung lam a tang chuan a han ti a.
Nui var var chungin nula chu a rawn leh hawi a, " Oh, Bill, i tha em ? Nizan lakah chuan i thar sar tawh mai, " a lo ti ve vat a.
" Tunah zet chuan , ni e, ka tha leh vang tawh mai, " tiin Jordan-a chuan a lo nuih let var var a. Chutah zawi deuh sap hian, " Engtinge Chumbleya kha ? " a ti ta a.
Nula chuan a cake ur chu vil vat vat chung hian, " Mi hliam kha maw ? A dam tawng tawng chauh a ni. I tih... " a tawp chawt a, han sawizawm ngaihna pawh a hre ta lo va.
Jordan-a chuan, " Ni lo ve, Limley-pa kha ka kah a ni lo. Khawpuia kalpui ka tum zet na a, mahse a thlen zawh ka ring lo va, " tiin a han chhang a.
Nula chuan, " Nizan khan Jack-a kha Clearwateah a kal ta nghal a. Khawthim hmain Daktawr Herley-a nen an rawn kir leh ang. An lo tlai loh ka beisei, " a ti a. Jordan-a banrek sen tuak chu a han hmu a, " Bil, eng thil nge thleng chiah ber a ? " a ti ta a.
Jordan-a chuan a koki a san ak a, " Sawi tur a tam mai, " a ti ringawt a.
Carol-i chuan " Awle, thu la han sawi vek teh. Coffee ka han thlit ang che anga, tukthuan chu kan ei tlai deuh hlek mai dawn a nia. I sawi loh chuan tukthuan kan ngei ang, " a ti ta a.
Chutia rawngbawla a buai chung lai chuan, a hma nia thil awmdan zawng zawng, kha entlang a hmuh atanga Indian thlah chanvepa a phum thleng khan, Jordan-a chuan a hrilh ta mawlh mawlh a.
A sawi zawh chuan Carol-i chuan, " Kha Indian suakpa lakah khan fimkhur tur chein ka lo hrilh ta lo che a ni. Ani khan Legget-a leh Negg-a kha thukru ta lo se chuan an pahnih khan an man daih tawh ang, tiin mite chuan an sawi a sin, " a lo ti a.
Jordan-a chuan, " Awle, chu pa laka buaina chu tunah chuan a fihlim tawh a lawm, " a lo ti a. Vawksa leh artui, alu kan ro te chu tukthuana coffee tak tawk nena han hmeh chu a chak tawh kher mai.
Carol-i chuan, " An sum phumruk chu i la zawng chhunzawm zel dawn em ni ang ? " tiin a han zawt a.
" Mai thei " Jordan-a chuan a lo ti ringawt a.
" Anih leh i hmuh chuan Sheriff Haslipp-a hnenah i hlan ang ti raw ? " zawi sap leh mitmeng de sar sar ngaihno bei tak a en chung hian Jordan chu a han zawt leh a.
He nula hmeltha tak leh fing tak mai hi chu a tawrhhlelawm a ni.
" Tu dang hnenah nge ka hlan chuan ang ? " Jordan-a chuan a lo ti leh a.
Nula chuan rawn melh leh zauh pahin a han nui sak a, thudang erawh a sawi lem lo va.
Tukthuan an eikham chuan , nula chuan mutna pindan pakhatah hian a hruai phei a. Khum nalh deuh maia puanvar inkhuhah hian Chumbley-a chu a lo mu a. English-pa hmai sen sung pawh kha tunah chuan a tla kuk tawhin, a lo dang zo vek tawh a. Harsa ti tak mai hian a thaw hrawih hrawih a, a hmuiah chuan chilphuan a chuak nguai bawk a.
Carol-i chuan pawiti tak hian, " A chuap niin a lang ! Kei chuan engmah tih theih ka nei lo tak zet a ni, " a han ti a. Jordan-a pawh chuan, midang pawhin engmah tih theih an neih a ring bik lo va, Chumbleya chu a dam chhuak zo tawh dawn lo niin a hria. Chutah thil ngaihtuah nuam lamah a per kaisan a, nilengin Carol-i nen chuan an inkawm thei dawn a ni !!
Mahse awm mai mai thei chu a ni dawn lo tawp mai tih a han inhre thuai a. Amah chauh chu Razorbacka mipa hnathawk tur awm chhun chu a ni rih si a, hnathawh tur lah chu a tam hle mai bawk si. Bawnghnute sawr tur a awm a, vawk chawk pek tur lah chu a tam hle mai si. Tui pump chhuah tur a awm, sakawrte chu enkawl an ngai bawk si. Chutiang zawng zawng chutiang zawng zawng a tih zawh hnu a a chawlh hahdam lai chuan, Razorback neitupa, Carol-i unaupa ni bawk Jack-a leh pa luvar deuh vo tawh, khawpui kawr suit ha hi a lo thleng ta a. A sakawr zina ip dum a khai atang chuan daktawr a ni tih chu a hriat nghal mai a.
Mi hliam chu a ngaihtuah hmasa ber a, daktawr chuan zai a tum tih a hriat chuan, Jordan-a chuan a cabin lamah kir leh a tum ta thung a.
A hmun a va thlen leh a, a sakawr huanga sakawr zin a han lakthlak lai chuan, a sakawr chu awm nuam ti lo zet hian a hawi hruau hruau a, a phit leh dut dut thin a, Jordan-a chu a han hawi kual vel thin a, engmah chu a hmu bawk si lo va.
Chutah mitmeng sen rem rum han khap sawk mai ang hian, luidung hnimbuk phen lam atang chuan silai hi a rawn de ta zawk a. Ralkhat atang chuan silai dang a rawn puak nawn leh ta zawt zawt a. Suantlang chuan vaivut a deng phut sut sut a, cabin bangte chu a rawn deng ta sawk sawk a. Silaimu hmasa ber ri ah khan, Jordan-a chu inchhungah a tlan lut nghal vat a.
Kawngkhar chu pawr khar nghal vatin, a kalh nghal hmiah a. Thimtham hnuaiah chuan a rifle chu a dap kual vel a,a dap fuh veleh a mu a han thun nghal a. Kul kho hian a cabin hual vela silai rawn puak zawt zawt thawm chu a lo ngaithla a, tukverh biang leh bangte chu silaimu chuan a rawn deng sawk sawk a.
Chal chuar nungin, chutia an rawn beih tak thut mai dan chu a han ngaihtuah a. An rawn kah nasat dan atang chuan amah rawn beitute chu hai rual a ni lo va. Turtle ho an ni ngei mai ! Sheriff leh a hoten an rawn tibahlah kha, rawn chhunzawm leh an tum a ni.
Tunah chuan Sheriff leh a hoten an rawn chhan leh chu a beiseiawm vakin a hre lo va. Zing khawvar hma chuan Clearwater atang chuan tumah an rawn thleng hman dawn lo va, chuvangin ni chhuah hma ngeiin mulukawlh chaw atana tawktarh tur lek a ni mai dawn niin a inhria a.
Tukverh biang atanga a va thlir chuan, silai rawn puak sen zawk zawk tih mai loh chu engmah a va hmu thei lova. Rawn pawmchilh mai chu antum lovin a hria a.
Amah haw em em tu, Burdock-a chuan Red Indian ho tihdan angina tlang lamah chuan Sheriff leh a hote lo kal leh kal loh enthlatu tur a dah tih pawh a hre lo va. Chuvangin tunah zet zawng tuma rawn tihbuai lohvin, chu Harker-a ram luahtupa ngawltawt tak mai chu seng fel thei tawhin,Burdock-a chuan a ngai a ni.
Silai ri chu a ngawrh zual sauh sauh va. A lo kah let ve na lamah chuan, Jordan-a chuan silaimu a seng thlawn mai mai dawn tih a inhria a. Turtle-ho chuan a thi tawh ni a an rin chuan an lo kal hnai ngei ngei dawn a, Chutah chuan a tan hun remchang a la rawn inhawng dawn niin a hria a.
A hnar a han len a, a insang khawng ta thut a. Boruakah chuan thing kang rim a rawn nam chhuak ta a. Thangro hnim rawn kang ri tawk tawk chu a hria a. A zuang tho thuai a,a inchhungah chuan a tlan kual vel ruai a, a va bih a. A bang thingtum kar kua atang chuan mei de hi chiang takin a va hmu thei a. Lehlamah chuan hnimro lo chhek khawmin, an rawn hal kang hi a ni a.
Mei a han nasat zelah chuan a puak ri tawk tawk pawh chu a ring deuh deuh zel a. Thinghmun lam atang chuan meikhu a lo zing chho mup mup a, meikhu a rawn chhah deuh deuhah chuan, a lum tulh tulh bawk a. Jordan-a chu a han inngaihtuah a, rawn ur chhuah an tum a ni ngei mai. Mahse Cabin sir vel mei chuan a rawn en a, amah a lan chian theih hmain, atan chuan tlan chhuah vat mai chu thil tha zawk a ni tih a hria a. A tlan chhuah mai loh chuan, a kanghlum ngei dawn a ni tih Turtle-ho pawh chuan an hria a. Chuvangin, kawngkhar zawn chu an lo chang ngei dawn tih pawh a hai lo.
Tunah chuan meikhuin a rawn bawh nasa ta hle mai a, mitmen pawh a harsa tawhin, a hrawk lam pawh a awn zem tan tawh a. chhuat laiah chuan a bawk rawp a,thawk chu a han awlai deuh hlek a. Kawngkhar lamah chuan vak pheiin, a han ban chhova, a kalhna thingkham chu a han hawng a. Kawngkhar chu hawngin a bawk phek thlawp a.
A rin ang ngeiin an rawn kap zui nghal zawt zawt a, kawngkaah chuan suanmu a lo leng fur fur a.
Kawmchar lampang tukverh pan chuan, a Winchester rifle ngul chuan tukverh darthlalang keh bang chu a hawl thla chuai chuai a, silai chu a dah lawk a, tukverh awngah chuan a inhnawh ta a.
A koki chu a tawt kher mai, a kamis chu a hrut thler phung a. Mahse a inhnawh chhuak thei ta hram a. A lu lam hmasakin leiah chuan a tla thla nawk a, cabin sirah chuan a vak kual a, thimthamah chuan a biru ta a. Rifle te chu a la puak zawt zawt zel a, Turtle-ho chuan kawngka inhawng lampang hlir kha an la kap ta reng a. Jordan-a chu nui rah rah chung hian, Burdock-a chuan silaimu manah a inseng hnem fein a ring a.
A bawha bawk vakin, Jordan-a chuan lui lampang chu a pan thla ta a. An au ri atang chuan an rawn hmu ta a ni tih a hriat mai a. Suanmu chu a awmna lamah chuan a rawn ving fur fur a. Jordan-a chu a zuang tho va, chak deuh mai hian hnimbuk phenah chuan a tlankawi ta zawr zawr a.
Chinghne rualin an saseh tur an zim ang meuhin, sir tin atangin cowboy ho chu an rawn au chel chul a. A hrawk ro hulh tawh chuan boruak hipin, Jordan-a chuan hnumbuk hniam deuhte chu a zuan khum zawk zawk a, a vanneih a siamin chhum chuan thla chu a rawn hliah deuh va, chu chuan lui lam pana a tlan thla pawh chu hmuh a ti har zual a ni.
Thaw hlawp hlawpin a han muang deuh va, a hnung lam chu a han lehhawi a. Tunah chuan Cabin chu a kang hluah hluah tawh a, meialh chuan in chung lam chu a hliau chho zuai zuai a. Chu mei eng thlarah chuan, amah rawn beitute chevel chu an lang chiang hle a, a lam chu an rawn pan a, mahse amah ang bawk chuan an sakawr boots keartui sang avang chuan an tlan chak thei bik lo va.
An rawn au chhuak leh vak a, silaimu a rawn ving leh tak fur furah chuan, amah chu an rawn hmu leh ta ani tih a hria a, muangchan theih a ni lo. Tichuan hnimbuk phena biru chung zel chuan, a theih ang angina a tlan ta zel a.
Thui pawh a tlan hmain, hnimbukah hian a tlan lut ta a. A ban chuan a hmai a hliah a,hnimbuk chu a su phei buan buan a. Chutah thawklehkhatah, a lei rah chu a lo awih ruam thut a, a lum thla ta a, a lum thla nawk nawk zel a, luiah chuan tla thlain tui chu a zuk delh per ta chuai a; tui chu a hak zui a.
Tui hak bawrh bawrh chung chuan, a rawn ding chhuak leh a,chu tuizangkhauh chak taka luang chu a bawh phei a. Thimthamah chuan a dap vel chungin, luikam atanga thingzung lo filawr thla hi a dap fuh ta a, Chutah a han inuai tang ta rih a. Thawkte han lain a han chawl rih te te phawt a. A kawr huh hnuang tawh mai chuan a chiah vawt kher mai., a khur hlawk hlawk a. khaw han hawina turin a thim lutuk bawk si, luikam sir tawna ko awm thla zui mai lo chu eng dang vak a hmuh theih lohva. Hnimbuk vela thawm ri sun sun atang chuan, amah umzuitute chuan an rawn zawng zel a ni tih erawh chu a hriat theih a.
Chet zui zel a ngai niin a hria a, ni chhuah hmain hmuntin mai chu an dap ang a, an la rawn zawng hmu ngei dawn ni pawhin a hria a. Zawi zawia inham tangin, luidung chu a zawh chho ta thung a. Lui luang zim deuhah chuan tuizangkhauh chuan a la thelh nghe nghe a. Vawikhat phei chu a chung lawkah chuan cowboy pakhat hlimthla a han hmu thut a, a tawmim chawih nghe nghe a.
Chutah thla hliahtu chhum kha a lo kiang tawh a, tunah chuan thla eng chuan lui tui chu a rawn en tle sur tawha. Harsa ti taka inham tang chho zelin, luikam tuak lah chu a ko bur mai si a, Jordan-a chu a rum kawk a, tunah zet chuan an rawn hmu chhuak ngei dawn niin a in hria a.
Show post links
Top
Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 14th, 2018, 3:44 pm

THE BUZZAR’S NEST . BUNG - 15
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
Bung- 15
Thla eng hnuaiah chuan lang chiang takin Jordana chu a han ding leh rih ren rawn a. A bul hnaiah chuan, amah umtuten hnimbuk an sut rik sun sun te chu a hre phak a. Engtikah emaw chuan tuemaw khan luikam chu rawn panin, luikawr chu a zuk bih ang a, a la rawn hmu ngei dawn niin a inhria a, chu chu Bill Jordana tawpna tur a ni mai. Luikam atanga thingkung lian pui hi a zar filawr thla chu a han vuan a. A chungah chuan thingkung lianpui chu a ding a, tui chuan a bul chu a ei hek zel avangin, a zung chu a lang thuau tawh hi a ni a.
A umtute zinga mi tuinemaw hian hnimbuk a rawn sut thlak thawm chu a lo hnai telh telh a. Chu chu a tawpna tur ni ngei tawhin a inngai tawh a. Han biheukna tur hmun pawh awm hauh lovin, tho-in thil ban deuh mai a bawm ang mai hian, a tang tlat tawh ni hian a inhria a. An rawn hmuh tih harsa deuh turin luikam lam hnaihah chuan a inhai phei a, thingzung hnuaia hnimbuk chu a va bel ta ringawt a.
Mak deuh maiin chu hnimbuk piahlam chu a kawrawng a. Jordana chuan tui chu khup thlenga daiin a va dap a, chutah chuan puk hi a lo awm niin. A va pen phei leh deuh va, a hnung lamah chuan thingzung leh hnimbuk lo zam thla chuan a hliah ta a.
Zankhuain chu laiah chuan vawtti a khur hlawk hlawk chungin, thingzung vuan chuan tui a dai ta a. A velah chuan amah zawngtute au ri leh, hninbuk an sut rik sun sun thawm te a changa silai puak leh thawr thin te chu zankhuain a hria a. Mahse amah a bihruk tlat si avangin wngmah phei chu a va hmu thei ta lova.
Zawi zawiin khua chu a lo eng zel a, an rawn umzui thawm chu a reh ve ta zel a. Khua a rawn var chian chuan thawm engmah a hre ta lo va. A ke rawl them thumte chu a han chet vel a, a kut leh ke te chu vawt tiin a tangkhang zo tawh a, a thawmhnaw lah chu a la huh hnuang a. Tui atanga han inhma chhuahna tur zawngin a han bih kual vel a. Chutah chu puk chhung chu thingzung hnuaiah chuan, tui chim phak lohin a a kaw chho rul a ni tih a han hmu a. Lawm takin, lui tui atang chuan a inham chhuak a, thingzung karah chuan a tawlh chho ta a. A khup chuan engemawni hriam deuh hi a tauh palh a, a te thawt nghe nghe a.
A zuk bih chuan leivungin a chanve vel a khuh, thingrem sir kil hi a lo ni a. Makti takin a zuk en a, a kut khinghnihin a zuk chawi chhuak a. Hruiin a lo inthlung a, a kekawr ipte zuk zenin, chemte zum hnawng chap chuan a han zai chat a, a makti chu a phu zawk nghe nghe a. Khat al mai chuan chu thingrem chhung ah chuan pawisa nawt hi inthlep tha deuh hian a lo inhnawhkhat tlat a, pawisa nawt tharlam la hman chhuah loh hi a ni a. Dollar sawmhnih nawt tel khat chu tham chhuakin, thinphu hlawp hlawp chuan a han en chiang a. Engemaw ti takin a lo vannei phian niin, Jed Harker-a sum thuhruk chu a chhar chhuak ta a lo ni reng mai.
Mahse chu mi thingrema pawisa nawt chu dallars maktaduai chanve han tling tham tur a ni si lova. A pawisa nawt phawrh chhuah chu thingremah thun lut lehin, a chhin chu a khar leh a, chemte chuan lei chu a cho ta a. Thuk pawh a la cho lo tih chuan, a kutzungtang chuan chuan saiip khawng khurh mai hi a zuk dap fuh a. A han cho thuk leh deuh va, a han khai chhuak ta a. A ritin a chang kher mai, saiip tlanga a tawnna hrui chu a chemte chuan a han zai chat a, a han zen a, ip dang savun ip hi a han khai chhuak nawlh a. A ri chhuai chhuai a. A thin chu phu zawih zawihin chu savun ip chu a han hawng a, a han letling ta a.
Rangkachak pawisa fai hi tle sutin a rawn tla chhuak chum chum a, a mumang emaw ti rum rum chungin, rangkachak pawisa chu a han khawih a, chutah leia tla darh nuaih chu a zik tham a, a kekawr ipteah chuan a thun ta mawlh mawlh a.
A tawp a tawpah chuan, Rio Grande atanga a rawn pan rophum ruk chu a hai chhuak ta ngei mai le !! A mumang lamah pawh a la man phak loh hausakna chu a chhar chhuak ta. Mahse a hlawkna chu chhawr turin a dam khawchhuak zo ang em ?
Amah rawn umzuitute au thawm a hriat leh thin avangin, chu mi nileng chuan chu laiah chuan a tawm ta a. Vanneihthlak takin, tumahin luidung chu rawn zawh chho lovin, chulai luikam vel chu rawn dap nachang an hre lo va.
Mahse tuin nge puk a awm ang tih hria ang. Jed Harker-a pawh khan amah ang bawkin a lo hmu palh ve ni ngei tur a ni.
Khua a lo tlai lam chuan engtinnge a chet zawm leh dan tur chu a ngaihtuah leh ta nauh nauh a. Chulai pukah chuan han tawm reng theih pawh chu a ni bawk si lo va. Riltamin an la um chhuak tho tho dawn a. Mahse Buck Burdock-a khan, a sakawr kha a lo um bo tawh a nih chuan, Chutah tuma tihbuai lohin chu sum chu a phurhtir ang a, Harker-a ram chu a chhuahsan tawh ang.
Luidung a han reh leh tak ruihah chuan, a ril atam tawh bawk si a, chulaiah chuan Jordan-a chu a tawm reng thei tawh lova. Inveng thawng takin thingzung karah chuan a rawn tawlh chhuak leh ta a.
Thla chu a eng cham ruih a, luikam leh a vel thingbuk te chu a en tle sur a. Chu thingzung peng tuai chu luikam lawn chhoh nan chuan vawn banah a hmang ta a.
A han ngaithla leh vang vang a, a reh leh vek tawh hian a hria a, inring reng chungin, hnimbuk karah chuan a kal chhuak ta a.
A hma lam khawilaiah emaw chuan sakawr hi a han khek vak a, sakawr dangin a lo chhawn a. Jordan-a chu a ding chawt a, chute anih chuan an lo la chang reng a ni ang. Fimkhur deuhin hma lam pan chuan a kal ta zel a.
A tawpah chuan hnimbuk phen atang hian a cabin awmna chu a han bih chho va. Tunah chuan meivapah a chang zo vek tawh a, a kang dum khual chauh lo chu hmuh tur pawh a awm tawh lo va.
Chhekin leh a sakawr huang lam chu han thlir lehin, chhekin kawtah chuan awmtual meichhem hi a han hmu a. Chu mi ai chuan pa pali hi an lo thu a. A bul hnaiah chuan midang pakhat hi a vei chhen a, chu pa chu a puk luih dana tang chuan Buck Burdock-a a ni tih a hriat mai a.
Chu Burdock-a chu mulukawlh ai pawhin a huangtau zawk niin a hria a. A hote nen chulaia an la awm chhung chuan, tangka sum chu han lakchhuah ngaihna pawh a awm dawn si lo va. Jordan-a chuan eng chen nge a la nghah theih ang ? Tunah tak hi chuan sakawr zin pawh ei thei mai khawpin a ril a tam tawh si a,chaw han lamna tur hnai ber lah chu, Razorback hmun kha a ni tawh mai a. Burdock-a chuan chulai pawh chu kalkawng a lo hnawh ping tawhin a rinawm si a. Eitur ramsa emaw sava emaw han kah pawh chu a ngamawm bawk si loh, a silai ri ah chuan Turtle-ho chu khuai kawlh ang maiin an rawn tleh thla leh mai dawn bawk si a.
A hnungah chuan thingtang ro hi a han ri bak a, a vir zawk a, pa pakhat hlimthla hi a han hmu thuak a. Rang mangkhenin, chu pa chu a va bawh rawp a, a au chhuak tur chu a hrawka va reh hlum mai tum hi a ni. Ban hrawl pui mai pahnih hian a lo kuah chawt a, a han kuah nat deuhah phei chuan, Jordan-a chuan a nakruh chu a tliak vek dawn ta emaw a ti hial hman tawh a. A kutzungtangte chuan khabehmul buk pui mai hi a han dap fuh a, Chutah a beihpui pa hrawk chu a han man ta a.
An pahnih chuan inkuah thual thualin an tlu a, an lum tawp tawp a, an thaw hrawih hrawih a. Chu pa dulthuara a khupa a han tauh nghekah chuan chu pa chu a rum kawk a. Chutah chu pa chuan boruakah chuan a theh leng ta lawp a. A hnungzang sawha a han tla thla dawt chu a hnang awl awl a, engmah dang pawh ti thei lovin a thaw hlawp hlawp a. Chutia a chet leh theih hma chuan a rawn bawh bet a, a kutzungtang hruanghrau pui chuan a hrawkah reh pin tumin a zuk man ta a.
Thuhriltu Paula aw thum chhuk mai chuam, “ Unaupa, Petera nen kut thingin chibai in inbuk dawn ta anih hi, “ a han ti ta a.
Jordan-a chuan, “ Thuhriltupa, ka hai e, “ a ti ta chul a.
“ E heu !! “ ti nuah nahin, Paula pui chuan a rehna chu a han thlahdul a. “ Turtle-hovin phihawh tuma an buaipui luih luih, kan sakawr kawlh zet chu lo ni reng che a ! “ a tiin, a tho ta thum thum a.
Jordan-a chu a rawn thu chhuak a, a hrawk chu a dawm vang vanga, “ I mi fam dan chu abumro kher ma a ! “ a ti nang nang a.
Paula chuan nui var var chung hian, “ Nang pawh unaupa, i nem bik chiah lo ve, “ a lo ti a.
Jordana chuan, “ Nang pawh chinghne rualin i in halin, um chhuak che sela, i lungawi vak dawn em ni ? “ a ti a.
Thuhriltupa chuan thum chhuk hian, “ In hmelmate chu hmangaih ula, tichuan vanah lawman inhmu ang, “ a ti nghut a.
Jordan-a chuan, “ Ka hmelmate ka um kian theih phawt chuan, lawmman lam chu ka lungkham kher lovang, “ a lo ti ve leh a.
Thuhriltupa chuan ngun deuh mai hian a han en a, a zuk kun a,lei atang chuan engemaw ni hi a zuk chhar a.
“ Burdock-a hi misual tak a ni. Thu chu a nuihzat a. Hetiang mihian hremhmun meidil chu an chhawm sauh sauh thin a ni, “ Paula chuan a han ti ta ngul ngul a.
Jordan-a chu, “Ngawih teh, Khingho ki heta tanga kan um chhuah vat hi a ngai a ni, “ a ti ta a
Thuhriltupa chu a nuih ruh ruha phaitualhnim ro zing atang chuan, eng eng emaw ni hi a char zoh zoh va, “ Chu chu a hmanhmawh thlak hle em ni ? “ a ti a.
“ Ka rama ni tlat alawm“ Jordan-a chuan a han ti zui a, mahse a tanchhan chuan a kori a tu vakin a hre lem lo va.
Thuhriltupa chuan a khabehmul chu han tuaiin, “ Burdock-a hi chu awm ta lo sela chuan, an tibuai hauh loving che. Ani hi chuan huat a neih tawh vek chu a haw tuk mai a. A hnathawkte erawh hi chuan an tihtur anti a ni mai a, an thiltih hi phur taka ti pawh an ni lem vak lo asin, “ a ti ta a.
“ Burdock-a chu awm ta lo sela an bang mai ang maw ? “
“ Chhunin zan a rawn zawm zat mai ang hian, “ Paula chuan a lo ti a.
Jordan-a chuan chu chu a han ngaihtuah vang vang a, “ Burdock-a chu bitumin, inhmatawna inbei turin la hrang thei hlauh ila chu, “ a ti ta vawng vawng a.
Thuhrihtupa chu ngun taka inngaihtuahin, a khabehmul chu a chul hoh hoh a. Chutah thum chhuk hian, “ Tual i that tur a ni lo, Lalpa chuan a ti. Mahse chu lehkhabu tha chuan thah hun a awm tih min hrilh bawk si a, “ a han ti thum kul kul a.
Chutah aw pangngai hian, “ A ngaihtuah theih ang chu ! Ka incheina thuamhnaw inbel hi zahin kei chu min zah asin. Fimkhur takin an awmtual chhem saw va pan ta la. Cowboy ho lam ka va pan lai takin, Burdock-a chu i khawih dawn a nia, “ a ti ta mai a. A puakruk chu a phawi a,a mu thunna chu a han tuaivir a.
Jordan-a chu phur deuh mai hian a rawn zuang tho va, “ Ka kal chhuah hmain silaimu panga min han pe teh. Ka silaimu zawng a huh nasa em mai, a tlawlh palh ka hlau a ni, “ a ti a.
Engmah pawh sawi chuang lovin, Thuhriltupa chuan a gunbelt atang chuan silaimute chu a la thla a, chu tlangvala kutphah ah chuan a dah ta a.
Jordan-a hnimbuk kara a kal chhuak phei ta chu pa khabehmula pui chuan mitmeng tle ru hian a enzui vung vung a, a lawm zawng niawm tak hian alang a.
Thinghlim chu bel phei zelin, Jordan-a chuan meilum aitute awmna lam chu zawi zawiin a hnaih phei hret hret zel a. Sahdah hmuamin, anni pali chu an ti ti laih laih a. Burdock-a chuan, chu zan chu anchhia lawhin, an bulah chuan a lo ding puk hlut a.
Thuhriltupa Paula chu mei enga a rawn lan chhuah tak pho-ah chuan, Cowboy ho chu an lo hawi phei thap a. Thuhriltupa chu awmtual chhemna piah ah chuan a ding chut a, Burdock-a chu chibaiin a han au va. Chu bawngvulhtupa chu rawn lehhawiin, a rawn kal hma deuh hrat a.
Tunah chuan bihrukna hmun pawh a awm tawh loh avangin, Jordan-a chu a lo ding chhuak a, awmtual chhemna lam pan chuan a lo kal phei ta zel a. Paula chu a hlawhchham vaih chuan, minit hnih aia tlemah chhihri ang maiin a kaw chuk tawh mai dawn a ni tih chu a inngaihtuah a.
Cowboy pakhat han khek raih-ah chuan amah chu an hmu ta a ni tih a hria a. Chu pa rawn zuan thawh lai tak chuan, Paula pui chuan a puakruk .45 chu a phawi dawk zawk a. A aw thum pui mai chuan, “ Awm hle hle rawh u, unaute u ! In chet vaih chuan hremhmunah in zuang lut a ni mai ! “ a ti ta chhuk chhuk a.
Chu Colt puakruk bumro tak mai rawn tintu chu an pali chuan an en thap a. An palli chuan tumah chu an che sawn ngam ta chuang lo va.
Buck Burdock-a chu a inher mawp a, Jordan-a a han hmuh chuan a khek tuar a, a silai a chuh nghal a. Jordan-a silaimuin a chaldar a rawn verh siahah chuan, a puakruk chu a lo phawi chhuak ve hman hram a. A pai uan uan a, thei leh thei lovin a ban chu a han char chho va, a silai chu a hmet puak ve hram a. Silaimu chuan vaivut a kap phut sawrh a. A silai chu a thlauh nghal a. Thing kih thluk ang maiin a tlu ta dum a, a tlu thawm han nat zia chu lei a nghawr nghing lawih hian a hriat a, a che zui ta lo va. Jordan-a chuan a puakruk khu hlat hlat chu a paiah a khung leh a, cowboy ho lo ka hau chu a thlir kual a, “ In zingah khan inphawiran siak ngam in awm em “ram hmak hian a an ti a.
A chon a chu ngawi rengin an lo thlir thap ringawt a.
Jordan-a chuan, “ In ngam lo anih chuan, tlan bo vek rawh u ! Phal lohin in lo lut tih pawh ka hria. Ka ram atang hian chhuak rawh u ! “ a ti ta .
Thil awmdan chu makti takin, seconds reilote chhung chu Turtle ho chu an la chambang a. Chutah pakhat chu a tho va, midang pawh chu an tho zui ve nghal a. An vai chuan sakawr huang lam chu an pan ta dial a.
Thuhriltupa chuan a silai chu a paiah a khung a. Thum khul bawk chuan, “ Lalpa chuan misualte chu a tiboral dawn si a, mahse ringtute tan erawh chuan chatuan nunna a awm a ni, “ a lo ti a.
Jordan-a chuan, “ Tunge chatuana nun te chu duh awm ang ni ? Khawnge, meizial tur i nei em ? “ a lo ti nghal a.
An pahnih chuan Turtle ranrual vengtuten an sakawr zin an phaha, zan thim hnuaia an kal chhuak ta chu an thlir zui a. Meizial pah chuan Jordan-a chuan, “ He lai velah hian- Burdock-a hote midang la awm awmin i hria ? “ tiin a zawt a.
Paula chuan, " Awm lo, unaupa. Kha mite bak kha chu an hotupa khan a tir haw vek tawh. Burdock-a chu rilru taka ran vulhtu a ni a, a ram chhungah hna dang awm a phal lo a ni, " tiin a chhang a.
" I hre hle mai, " Jordana chuan a han ti ringawt a.
Thuhroltupa chuan, " Fimkhur lo taka i rangkachak pawisa vawrh darhte thleng khan ka lo kawl that sak che a sin, " a ti a. A kawrchung fual ipte chu a han zen a. Jordan-a makti tak lamah chuan rangkachak tangka pakhat hi a rawn theh phei a. A dang pawh a la rawn theh phei zui ta zel a.
Paula chuan, " Kan inbuanna hmun hnim zingah khan a dang pawh a la awm a sin, unaupa. Ui-in uihli a thing per ang maiin, rangkachak tangka i thing per chuai chuai mai alawm le ! " a ti ta a.
Show post links
Top
Local Advertisement
MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni.

Hrechiang duh tan Contact : 9612099411 / 9862016122

Jakob l hd
Posts: 42
Joined: May 30th, 2018, 10:33 pm
Contact: Contact Jakob l hd
Post by Jakob l hd » December 15th, 2018, 9:23 pm

THE BUZZAR’S NEST . Bung – 16
By : Tom West
Lettu : James Lian Mawia
Chhuahtu : Zirkungi ( Zirte-i )
( Jakob L HD )
BUNG- 16
Jordan-a chuan a rangkachak tangka rawn theh pheite chu lo dawngin,a rilru tinatu ber mai chu lantir loh hram hram a tum a. Rang deuh mai, rang lutuk deuh mai hian, “ Ka pawisa paina kawnghren a lo inhawng a ni ang. Heng tangkate hi chu ka lo pai rei tawh teh asin, “ a han ti thla rawk a.
Chutah a lei chu seh chum hmawk tak a nap a. Mei engah mai pawh chuan chung rangkachak tangkate chu chhun thar a ni tih hriat tak hian a tle sur mai si a.
Mahse Paula chuan ngaihtuah awm pawhin a lang lo va. Mei ah chuan thing bung dangte chu a chhir lut a, meilumah chuan a kutphah a hem soh soh va, “ In hi i sa tha leh dawn em ni ang, unaupa ? “ tiin a han zawt a.
Jordan-a chuan meilum a rawn ai ve a, “ Dawn lo, ka bansan daih dawn. Harker-a ram hi nin pawh ka ning ta deuh. Buaina chauh mai min thlentu anih hi. Rio Grande lamah kir leh daih mai a ni ka tum ni, “ tiin a chhang a.
Paula chuan, “ Hausakna umzui i tum tawh lo amaw ? “ a ti a. A aw phawiah chuan Thuhriltupa chuan nuihzatna deuh a neiin Jordan-a chuan a hria a, mahse chu pa lah chu a awm ngaiin a awm mai si a.
Jordana chuan, “ Harker-a rophum ruk kha i ngaihtuah anih chuan, theihnghilh rawh. Mangman mai mai lek a ni e, “ a ti a.
Thuhriltupa chuan a aw tthum pui bawk chuan, “ Leia hausakna zawngtu chuuan a chan ang. Mifing chuan Vanramah ro a khawl khawm a ni. Ka va law mem, unaupa, finna i chhar ta chu, “ a ti ta hlut a.
( Helai phek hi a kim leh tlat lo mai, Paula, Thuhriltupa hian Jordan-a hi manin,rophum ruk a hmuh chhuah chu a laktir a, mahse Jordan-a hian a bum let hlauh zawk a ni. )
Jordan-a chuan, “ Keiin Irish-a ka kap hlum vet hung alawm! Kha aia mahni invenna thiltih kha a awm chuang lovang, “ tiin thutthleng pakhatah chuan a han thu hnawk a, vawt ruih hian, “ Buck Burdock-a pawh ka that, “ a han ti leh hluk a.
Haslipp-a chuan hlauthawng fahran aw hian, “ Buck-a i that maw !!? “ a ti ta nghek mai a. Ranrual vulhtute vote a hmuh tur chu a kiam duai mai dawnin a ring a.
“ Ni e ! “ inchhir loh hmel deuh mai hian amah rawn tlawhtupa Jordana chuan a ti a. “Kha lawichal hruanghraupui khan ka in a hal alawm. K ava nangchinga, a silai pawh a phawi hmasa zawk a, mahse ka kah khalh ta a ni. Thu hretu pawh pali ka nei – Turtle ranrual vengtute, “ a han ti leh a. Sheriff chu a inngaihtuah vung vung lai chuan, “ Harker-a ram chu ka chhuahsan daih tawh dawn ! “ Jordan-a chuan a ti ta a.
Chuti anih chuan, Haslipp-a chuan Sheriffa tana thlan nawn leh a nihna tur leh rel rawkna a an pawisa ruk hmuh chhuah leh theih a inrinna zawng zawng kha a bo vek dawn ta niin a hria a. Chu mi rophum ruk awmna ah chuan chu Rio Grande lam chinghne maltlat chuan a hruai ngei a ring kha a ni si a; a beiseina zawng zawng bo zo ta ni hian a hre ta a.
Ngui ruih hian chu tlangval lam chu a rawi hawi leh a, “ Engngeni i chakkhai, lawmpuina tawngkam em ni ? “ a han ti a.
Jordan-a chu a nui var var a, “ Ni e, rophum ruk chu ka chhar chhuak tawh alawm, “ a ti ta a.
“ Engtin a !! “ Sheriff Haslipp-a churut zuk lai chu a hmui atang chuan a tla thla tawp a. Ringhlel deuh mai hian amah rawn tlawhtupa chu a en ta reng mai a.
Jordan-a chuan, “ Khawpuiah ka rawn la lut nghe nghe asin. Saw, tunah tak chuan pawnah sawn a awm, “ a han ti zui leh a.
Silai zen zuk thut puak dup ni mai awm hian, Haslipp-a chu a zuang tho zawk mai a, kawngkhar lamah chuan a thla phei ta rawk rawk a. Chu tlangval chuan rawn umzuiin, inchhung inkal pawhna dungah chuan a tlan thla a, Courthouse kailawn thla-ah chuan a sawh hian a sawt thla hi a ni tak meuh va. Nuihzat taka Jordan-a lo din lai chuan, sakawr phur tawnna hrui chu a phelh chut chut a.
“ Min tihder vaih chuan , Jordan, ka kap let nghal tawp ang che, mai mai chuan, “ a ti nung nung a.
Minit nga hnu-ah chuan, dollar nawt tlang thuah tun mai leh rangkachak tangka tle sur mai a han hail an takah chuan, Sheriff Haslipp-a chu a keh hian a keh vur mai a. Sakawr phur chu an zawn lut a, dawhkanah chuan an dahkhawm ta ruih mai a. Chutihlai chuan, Jordan-a chuan an bang a, “ Wanted “ hriattirna antar chu a lo enkual dan dan a. An thlalak tar pakhat hma-ah chuan a ding chat a, pencil a rawn phawrh chhuak a, chu thlalakah chuan hmui hmul a han ziak ta a.
Haslipp-a chu hlim fahrana nui keh vur chung chuan a lo hawi phei a, “ Lawmman tam tawk tak mai lak tur i nei ni tain ka hria, rangkachak tangka sang sawmgnga zet mai, “ a ti ta a.
Jordan-a chuan pawisa awm lo deuh mai hian, “ Kei pawn chu chu ka chhut dan a ni. Tunah chuan ka hausa ta bawk a, ka bansan tawh a ni ang chu, “ a ti ta a.
“ Bansan i ti elo !? “ a ngaihna hre lo zet hian Sheriff chuan a lo ti a.
Jordan-a chuan, “ Texas Ranger, Texas Ranger inthup ka ni asin. Santa Monte-ah khan a ruka hnu chhuia dah ka ni a. Khatah khan Harker-a kha ka tawng ta a, kha chemte a vawm hlumtu kha ka ni awzawng lo, “ a ti ta a.
Seriff Haslipp-a chu a ka ta ho mai a. Han inthin harh tumin a lu chu a han thing ringawt a. Texas Ranger maw lungin-ah a lo khung ? Engnge ni zel dawn ? tih pawh a hre hlei thei tawh lo va.
Texas Ranger Jordan-a chuan, “ He pa hi i hre tawh ngai em ? “ tiin a han zawt a.
Sheriff chuan a va pan a, Jordan-an “ Wanted “ poster a kawhhmuh chu a han en a. Chu thlalak chu pa chawl kawlh vel vul, mitkhur inhnaih tak, meng tle ru mai hi a ni a. Jordan-an hmuihmul buk pui mai a neihtir hma kha chuan, inmet fai veng vawng hi a ni a.
A hnuaia inziak chu Haslipp-a chuan a han chhiar a :
$. 1000 Luman:
‘ Samuel Larsen, Scripture Sam an tih bawk thin mantir theitu a piang hnenah. Amah hi ralthuam nen bank a rawk vanga duh a ni. San zawng fir ruk leh inchi 2, kum 32, rihlam 220 p. Sam dum, hnar kul, Winchester Country Bank, Culver City Bank leh National Bank of Peublo rawktu a ni. Silai keng mi hlauhawm tak, lehkha thiam tak, Holy Order atana inzirna nei tawh leh mahnia chetla thin.
G.H. Wilson, Sheriff.
Culver Country, Texas. Tih hi a lo inziak a.
Sheriff Haslipp-a chuan a han ngaihtuah vung vung a,” Kha pa kha sabengtung chunga chuanga phairuam rawn fang kualtu, kha Sam hlasatu khabehmul buk pui kha a va ni awm ve, “ a ti ta a.
“ Kei pawh niin ka ring, “ Jordan-a chuan a lo ri ve a.
Sheriff chuan, “ Ka nauteho ka han ko khawm ang a, an man vat mai ang, “ a han ti a.
Jordan-a chuan, “ Chu zawng i tlai deuh anih ka ring. Tunah tak hi chuan luipui tiau vaivut saiip hnih, sakawra phurin Barrens lam a pan mek a ni, “ a ti ta a.
Haslipp-a chuan, “ Luipui tiau vaivut i tia law ? Chu pa chu a aa em ni ? tiin a chal a chuar ta tup a.
“ A saiipte kha a hawn hunah meuh chuan, mahni inthat duh khawpin a aa tawk taw hang i ti teh ang, “ tih pahin Jordan-a chu a nui ta khiah khiah a.
Sheriff Haslipp-a pawh chuan a han hriat thima takah chuan a lo nui ve ta khiah khiah bawk a.
****
Pal nghenga ding ar ar chung hian, tlangval inkhaithli zeih zawih pakhat, Jordan-a chuan sikul chhung atanga naupang lo tleh chhuak dam dam chu a lo thlir reng a. A hnu lawkah chuan an zirtirtu Carol Hall-i chuan kut khing khata a lukhum( bonnet) par chhing chheng rawn vai lap lap leh nui sang chung hian kawngka ah chuan a lo chhuak ve a. Kawngkhar chu a kalh a, gate lamah chuan a rawn phei ta zel a. Chu tlangval Jordan-a pawh chuan tawk tur in nula awmna lam chu a pan phei ve ta nghal a.
Nula chuan, “ E he, Bill, khawpuiah engnge i rawn tih tak ? “ nuih saih pah hian a lo ti a.
Bill Jordan-a chuan thutak fe mai hian, “ Sheriff hnenah dollar maktaduai chanve Chicago & Santa Fe rel rawkna pawisa sum kha ka va hlan a ni, “ tiin a han chhang a.
Carol-i chu au chuak rawih pah leh makti taka meng bial kal chung hian “ I hmu chhuak ta maw ! Chu sum chu i va pe lut a maw ! I hlan tak tak pawh ka lo ring……. “ a tawp chawt a, a heh chu a pet ta fan fan a. Jordan-a chuan mitmeng hlim tak hian, “ I thil sawi hi i puitlin ngai na nge ? Eng maw i rin loh chu, ? “ tiin a han zawt a.
Nula chuan khingbai tak hian, “ Chu i lo kalna lamah i kir leh dawn em ni ang, ? “ bah nak hian a han ti ta daih a.
“ Chu zawng la ngaihtuah chi a ni ang. A innghahna thu a ni ang chu.. “ tiin Jordan-a chuan a thusawi chu a tawp ve chat a.Nula chu a nui ta var var, Jordan-a banah chuan rawn vuanin, “ Chu nang pawhin i sawi zo bik hlei nem. Eng innghahna thu maw, ? “ a han ti ta sap a.
“ Bank neitupa-in tun maia a mi sawmna kha ka pawm dawn anih chuan, Bank chuan Turtle in leh lo kha a chang thei dawn a ni awm a, Burdock-a kha a lo indahkham nasa mai lo ni rengin. Tichuan dollar sangkhat a ka rulh sak chuan, chu ram chu a vaiin, a zawng a zain ka chang thei mai dawn a ni, “ a han ti a.
“ Chuti chu that nasat chu, “
“ Mahse chu chu a khirhkhanna dang a la awm a ni.”
“ Eng khirhkhanna maw ? “ makti tak hian nula chuan zawt pahin a han en chho hau a.
“ Awle, he Bank neitupa hrep hian parawl maiin a chutiang ram zau pui mai enkawl chu a buaithlak ang a tia lawm. A hautak lu deuh Sheriff pawhin a ring a ni, “
“ Tichuan ? “ thin phu dup dun leh zawi thawp sat hian Carol-i chuan a lo ti a. A tawng zawih em avangin Jordan-a chuan a lo hre chang chang chauh hi a ni a.
“ Tichuan, ka tihtur min bituk chu Rio Grande hmar lam tlang dung zawng zawnga nula hmeltha ber mai leh ngaihawm tak fing bawk si hian he tlang dung a sakawr hman tlak loh fahran, ke pen thlurh thlurh ringawt mai hi pasal-ah a nei duh ang em ti a zawh chi a ni ta a ni, “ nui sang hian a han ti a.
Chu nula duhawm lutuk rawn hawi chho mitmengah chuan arsi hi a detin a de chai chiai ni mai hian a lang a.
Thawp sat hian, “ Oh, Bill, a chhanna chu, “ AW “ tih a ni tawp mai, chu sakawr chu ‘ Bill Jordan ‘ tih hming a put phawt chuan, “ a lo ti ta hnap a.
Chu kawtthler puia tualchhung mi lo awm ve tlemte te chuan, chu tlangval kamis kawrbuang hain an sikul zitirtu-nu khawlai kawtthler dung a, indo hnehna lawm ni awm tak a,a han lam kual pui ta vak mai an hmuh chuan, makti takin en in an ka ho hlawm a. Nula pawh chu lawm fahan hian a lang bawk si a.
Tichuan chu kawtthler-ah chuan mi an awm ve tih pawh hre lo leka inpawm chungin an infawp ta vawng vawng a.
A tawp ta.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)