NÂO VÁ Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: NÂO VÁ Becky Rafa Renthlei (Completed)

Unread post by Ngaia » June 24th, 2019, 6:19 pm

7.NÁO VÂ

Becky Rafa Renthlei-BRR

Ring deuh deuhva ṭawng ka hriat chuan peih lo zet hian ka meng chhuak a, ka awmna hmun ka hre thei lawk lo!

Ni lo, kan accident tak alawm le!

Damdawi in khumah ka lo mu reng chu niin! Khawiah nge Valpuia kha.

"Kei aia i thlan hian a venghim zo meuh lo che chu a ni e?" Thlengliana ṭawng ri chu a ngeiawm takzet. Helai hmunah eng nge a lo tih! Ka bân tih chêt ka tum chuan a na nghal zawk a.

"Thlamuanpui, khawi hmunah mah min kalsan hlen tak tak dawn lo," tih pah hian ka tukkhum samah a rawn phih dawrh a, ka ṭê chhuak ṭhawt a.

"Valpui.." Thlenga thusawi ngaihtuah miah lovin a hming ka lam lui ve ngat, "I bân nâ kha ka haider palh ang e aw," tia min vauna chu ka run kher mai.

"Lalfakawma kha ka hre lo emaw i ti ang e, ka hre lutuk a nia, veng khat kan nia mihur awm ṭha duh lo ang maia i zui duan duan khân thihna kotlangah a dah che hi i hria maw," ati leh tûn tûn a, ka chhâng buai duh ta lo.

Nurse leh doctor an rawn inzui lût a, Thlenga chhuak tura an hrilh hnu chuan, "I pasal ala harh chhuak lo va a kiangah i kal duh em? I bân tih loh chu hliam dang eng mah i nei lo a nia," dam thlapa atih chuan ka hlauhthawnna a nasa zual sauh.

Valpuia hmaia thisen luang nguai te, 'kal suh' tia a ṭawng ri te kha ka hre nawn awn awn mai.

"Doctor, a dinhmun a ṭha lo viau em ni?"

"Zêp lovah chuan a ṭha lutuk lo, a kianga i kal duh chuan kan phalsak reng che a nia," ati dam leh thlup a.

Chumi hnu chuan Valpuia an muttirna room-ah min hruai lut ta a.

A hmêl dâng lap leh da riap te, a mitmeng fiah kâk ṭhin vâi ruaite ka'n hmuh meuh chuan ka mittui a tla nghal zung zung a, "ICU aṭanga lak chhuak i duh em?" Tia min zawhna chu chhân pawh ka chhâng thei lo, a mutna lamah kal hnaiin a vawikhat nân Lalfakawma âwm nghengin ka ṭap chhuak ta a.

'Ni lo, thi tur atan chuan ka phal lo, thil tam tak min tiam a, ti hlawhtling turin ka pa hnen kan pan asin,' ka rilru na lutuk chu puakkeh thei dâwna ka inhriat avangin thâwk ka la kâwk a.

Rei awm an phal loh avangin ka awmna ward-ah min lêt phei tir leh ta a.

Thlengliana hmuh tur a awm tawh lova he mihring tenawm lutuk ka huatzia em em hi.

Valpuia din hmun a ṭha lo tih ka hriatna hian min ti na ngawih ngawih a, ka phone awmna pawh ka hriat loh avangin nurse duty phone hawh sakin ka pa ka call ta a.

Chanchin an lo hriat vek tawh thu leh Valpuia û nen Aizawl pana an lokal mêk thu min hrilh chuan ka hahdam huai huai. Kei erawh hliam na lutuk lovin ka awm a, ka bân ruh tliak leh pem neuh neuh ka neih chu a ni deuh mai.

Vanduaina hian min umzui zel emaw tih mai tur a ni, Valpuia hi a thi a nih chuan ka dam chhungin ka inthiam thei ngai lovang. 'Lalpa, thih tir lul suh,' tiin ka ṭawngṭai ru mawlh mawlh a ni ber.

Khatia kan accident lai kha min hmu tu an lo awm a, inpun khâwmin min rawn buaipui vat a ni awm e. Chuti ni lo se Valpuia hi tunah nung damin a awm hauh lovang! Thisen a hloh hnem em em a, thi lo a ruangin an la chhuak a ni deuh ber. Nikhua ka hriat zui tâk loh avang khân min buaipuitute zinga mi pakhat ka zawt ta kha a ni a, chiang taka min hrilh hnuah ka hre ve chauh zawk.

Valpuia din hmun hi tunah ṭha lo mah se Pathian zarah eng êm atih loh ka la beisei fan a, nuthlawi eng mah ni lo min buaipui avanga tuar a nih tlat avangin ka chhungrilah inthiam lohna nasa tak ka nei bawk.

Nupuia min neih tum nghet tlattu Lalfakawma hi a dam chhuak a nih phawt chuan ka dam chhunga thlah leh tawh ngai lo turin ka vuan ngei ang.

After 7 hours

Ka pa leh Valpuia û an lo thlen laiin ka lo muhil daih a!

"Mate, i harh tiraw?" Min sâwi dat dat tu an awm avangin ka meng chiang kher mai, ka taksa a chau ve êm a ka lo chhîng leh sek ṭhin.

"Pa..."

"Valpuia û pawh a hrilhhai ang e, ṭah awih loh aw.." ka samah a chûl hliau hliau a.

Ka pa nen room kan chhuahsan laiin Thlengmisuala hmêl pawh kan hmu leh ta! Tun hma anga hlauh tûkna kha ka nei ta hauh lo. Theih nise chum hrep a nia ka duh ni.

"Ka pu, i lo thleng tawh elaw?" Inti polite taka ka pa a biak chuan ka lo ner ru sawk a.

"Rawn thleng lo ila min hmu dawn em ni?" Ka pa chhânna chu a va ṭha sihsah ve le.

Lalthlengliana hmel ner suk chu ka hmu hman reng. Valpuia awmna room panin kan kalsan ta daih a, zak ve thei ngai a nih chuan zahna tham chu a ni reng.

Aringi, Valpuia û ka hmuh meuh chuan ka mittui ka dang zo leh ta lo.

"Mama, min kalsan suh aw, nupui neih hlân i nghahhlelh em kha, hei Sentei a hrilhhai a nia, Mama, ka koh che hi.." a unaupa neih chhun biangah chûlin a lo ṭap tlawk tlawk a, ka chhungril a nghawr dawt thei nia.

An chhungkaw chanchin engkim ka hriat vek tawh avangin ka khawngaih ngawih ngawih a, an unau inhmangaihzia pawh hrilh nawn ka ngai bik lo.

"U Aring," ka ko sap a.

"Sente, Mama hi a dam a ngai a nia, ani lo unau ka nei lo asin," ṭah aw ṭiau hian ati leh a.

Ka pa pawh a hrilhhai tih ka hria, eng mah hre lova mu Valpuia hmel hian ṭah ati chhuak ngawih ngawih.

A dam ṭhat laia tlangval inringtawk tak ni ṭhin kha keimah min neih a duh vângin tihian a awm ta chu a nia, ka nâ a ni.

Aringi pawh a khawngaihthlak khawp mai, ka pa erawh patling a ni a, eng mah a sawi kûr nguai lem lo nâ a, a rilru a hrehawm tih ka hria. Puitling ṭhah, engkim hrethiam rual vek kan ni a, kan hlauthawng a ni.

Kei pawh damdawi in chhuahsan min phalsak avangin ka pa nen ka in luah lamah haw ve phawt kan tum a, Aringi'n a nau a lo awmpui rih ang a, chaw leh thil ṭul ken sakin kan kal leh ang.

Valpuia kalsan hreh mah ila intihfai ka mamawh tawh bâkah ka bân nâ avang hian ka che ṭha hleithei lo.

"Sente, kan inah lo awm rih mai rawh u, in duh dan dan khân lo che tawp ula, in awmna a hla bawk nen a awlsam zawk ang," Aringi'n atih chuan ka pa ka mitmei zauh a.

"A pawi chuang hleinem, inbuaipui tur chuang kan awm si lova kan lo lêt leh thuai ang," ka pa'n atih tâkah chuan ka lawm ru ang reng; ka pa hian Valpuia hi ka pasal atan a iai lo ang tih ka hria; mahse, pasal ka ṭhenna ala rei lo êm a, chuti rum ruma inneih erawh a remti lo mai thei bawk.

Valpuia te in leh Thlengliana te in a inhlat lo a; hun dang chu ni se ka kal duh miah lo ang a. Amaherawh chu, tûn hun a nih tlat avangin tûma mitmei ka vêng tawh hauh lo.

Ka intihfai chhungin ka pa'n eitur a lo siam a, chêttîr duh lo mah ila tihngaihna dang awm hek lo le.

"Mate, Valpuia hi pasal atan i duh rêng em?" Ka lam hawiin ngun tak hian min en a.

"Duh e, ka tân ani tluk an awm lo, a dam chhuak a nih phawt chuan ka nei ngei ang." Inringtawk takin ka ti ve hmiah a.

"A ṭhat chu, Pathianin ati dam em em ang, lungngai lo phawt ila, i ta tur atana a ruat a nih chuan intân kawng a inhawng tho tho ang," ati dam thluam a, ka pa leh Valpuia inbiak dan eng mah hre si se lo mah ila a thinlung a lo hmin der tawh tihna a nia, mipa danglam tak zawng a lo ni e.

Zanriah hma takah kan ei a, Aringi chaw pe turin ka pa nen kan kal leh ta a, a car a lo keng hlauh chu a tihchi hlê mai; hausa hluah ni lo mah ila ka pa hian min enkawl hneh hle a ni. An thusawi zawm lova pasal nei ka nih vângin keimah zawk ka inthlahrung dâk a; harsatna ka tawh meuh chuan 'ka pa' lo chu inhumhimna ka nei chuang lo.

Damdawi in kan thlena Aringi hmel hlim siah kan hmuh chuan angaihna ka hre lo deuh dawn a! Nichina kan kalsan lai kha chuan a ṭap deuh reng kha a ni a! "Sen, Mama a lo harh tawh," lawm avanga mittui tling pamin min lo hrilh vat a, "Maw!?" A bak sawi tur ka haihchham.

"Nichin mai khan a rawn harh a, a lam ngun tawh khawp mai che, va lut ve rawh," ka chhânna pawh ngaichâng lo hian min kalpui zui daih a, ka pa pawh kan hnungah hmanhmawh takin a rawn kal ve bawk.

Thil mak tak a ni.

A awmna room kan thleng chiah chu mak tih luatah ka meng phâwk hrâ a, a mit meng vâi rûai te kha hmuh tur a awm miah lo! Nui suk chung hian, "I ṭha em, Sente?" A ti sup a.

"Umn, i ṭha zawk maw!?" Ka'n laih viau chu le.

"Lokal teh, min lo chhuahsan lawk ula," a û lam hawiin a nui leh suk a, a va'n hmelṭha tak.

Aringi leh ka pa chhuah hnuah, "Sen, ka ti hlauthawng che tiraw? I thi ta emaw ka tih laia ka hrehawmzia kha.." ka kutah vuanin a chûl riak riak a, a ṭawng dan aṭang chuan thâwk a harsat tih ka hrethiam mai, "Eng mah nâ ka nei hleinem, ṭawng tawh rih suh, i dam anga inbiakna hun kan la ngah dawn lutuk," tiin zak miah lo hian a hmuiah ka fawp zauh a.

Eng thil mak nge thleng tih hre lo mah ila a lo harh chhuak hrim hrim hi ka lawm a ni tawp mai.

Doctor lo luh lai pawh chuan insi rialin kan la awm a, a natna chiah hre lo mah ila hmâ a sawn hrim hrim.

"Nangni pahnih chu, in lo induat lutuk ang e, rei tak inpa bulah khân awm kan phal lo a nia," nui ṭhâ chunga min fiam chuan ka nui chhuak hak a.

Doctor hnenah chiang zawka a natna zawh fiah ka tum kha a ni a, nikhaw hre lova rei tak a awmna chhan leh a tukkhum aṭanga thisen chhuak kha a hlauhawm em tih thlengin, tunah harh viau mah se ka chhungrilah hlauh thawnna nasa tak a la awm cheu nia.

Ni rei lote hnuah kan chhuah theih tur thu leh thlakhatah vawihnih tal incheck up ziah tura min hrilh chuan ka ngaih a ṭha lo telh telh. Ka hlauhthâwnna chu ka hmêlah a lo lang deuh nge, "Hlauthâwng mah ta che, a tukkhum hliam hi a dam chuan engkim a ṭha leh vek mai ang, accident hi chu damlohna dang nen a inang lova; x-ray leh thil dang tih kan duh vang mai a nia," doctor thusawi ngun takin kan ngaithla ve ve a, han sawi zui vak ngaihna erawh ka hre lo.

Zanah pawh Cabin-ah kan insawn a, Aringi a rawn thleng phei tawh bawk a, ka pa erawh in lamah a haw thung.

Aringin nen kan riahpui dawn a, dik tak chuan a hma anga tîm tlatna kha ka nei tawh miah lo; a kiangah ka tâp deuh chawt a, ani ve thung chu a muhil deuh reng.

"Sente, Mama dam ṭhat veleh innei thuai rawh u aw, mite anga ropui bûng bûnga tih kher pawh a ngai lo a nia, a awlsam thei ang berin ti hmiah rawh u," ka dinhmun hrethiam zetin ati a.

"Valpuia thu thu a ni mai," ka ti sam êt a.

"Ka thu thu a nih chuan, inneihna hun buatsaih kher a ngai lo, i pa hnenah i man hlân fel ila nupa kan ni mai," Lalfakawma thil rawn sawi avang chuan a û nen kan nui tawp.

"Mam, chutiang ngawt a ni thei hleinem, chhungkaw hriatpuia inneih hi a ṭha a, nau in pâi lâwk te a nih loh chuan.."

"Teuh lo.." ka lo ti vat a.

"Pai lâwk chu sawi loh, a deh pawh ka la dek chhin eih lo," nui duh miah lovin ala ti zui a, ka va ngei mai mai tak.

Buaina lutuk awm lovin ni li damdawi inah kan awm a, treatment in lama chhunzawm tur min pêk leh incheck up ṭha tura min hrilh hnuah damdawi in kan chhuahsan ve ta a.

Ka bân erawh thlakhat hnuah a tuamna phelh tur a ni a, mahnia awm chi ka nih loh avangin ka pa hnenah Lungleia awm ka tum ta rih a.

"Lungleia i awm daih te'n engtin nge ka lo awm ang?" In a kan haw hnuah Valpuia'n ati ta a.

"I û te hnenah awm ve rih la, nupa kan nih loh chuan awm dun, chên dun a rem si lo alawm," ka tih chuan, "A rang lamin innei mai ang, min kalsan tumna rilru pu suh," ati nghut a.

"Valpui..."

"Ka ti tak tak a nia, tunah innei ila nakinah hun remchang dangah Pastor inkutsuih tîrin kan la ti ṭha leh dawn nia," zuk ti tlat a.

"Ngai awlsam mai siah.." a hmanhmawh lutuk hi a nuihzatthlak.

"Awlsam ni lovin ka nghâk rei tawh êm che asin, a rang thei ang bera inneih kha ka duh a ni mai, lokal teh ka bulah hian," atih zawm zat a.

Ka pa leh Aringi damdawi inah an la khawmuang a, bill te tifelin, keini pahnih kan haw hmasa thung.

A mutna bula ka va ṭhut chuan, "Nang ka nei thei dawn lo che a nih ai chuan harh chhuah leh hi ka duh hauh lo," amah si chêtin min kuah a, ka bân na lo lama min vawnna chu a nghet mah mah.

"Ka kal san dawn lo che, inneih pawh ka duh reng a; mahse, kan dam ṭhat phawt a ngai alawm,"

"Ka kianga i awm chuan ka dam a ni mai." A sawi zawh rualin ka hmuiah a rawn fâwp ta vang vang a, rei tak inhmu tawh ngai lo ang maia duhthawh leh uara min fawhna chuan ka chhungril thlengin a fan raih raih thei nia.

After 1 Month

Inneih thutiam kan chham laia Lalfakawma hmêl tak rûn mai leh mitmeng fîm zet chuan min ti zâm lek lek alawm le.

Min duhna leh min hmangaihna a mitah ka chhiar thei hial! Coat suit dum dak hlarh inbelin a hnuaiah kamis var thianghlim zet a hâ a; a sam dum hlap leh a pian inkhaithli zuih te chu hmuh a nuam thlâwt.

Lalthlengliana'n nupui a neih hmasak tâk avang khân kei erawh zalên takin pastor hmaah ngei 'Tiam tlat e' ka ti thei ta thung. Ka dam chhunga ni chhinchhiah tlâk tak a ni bawk.

"Hey, zan lamah min duat deuh ka ngai ang," ka beng bulah min hrilh ru sup a.

"Eng vangin?"

"Paradise kawtchhuah i kal fo tawh si a, min hruai ve ang chu," a nui suk a, ka ngei lutuk.

Ni e, nuthlawi ka ni a, nupa nun hmang tawh ka ni bawk, chumi a sawi tumna chu a ni ngei ang.

"Vawi tam tak ka hruai ang che," zak map lova ka chhânna chuan ati nui leh suk a, "Ka nghâkhlel," tih pahin min fawh a tum leh ringawt nia!

"Ang lo lutuk, mi an awm ve hi.."

"Mi ah ka buai lo, ka nupui ka fawp duh a nih chuan ka thu thu," ati hmiah.

An inah sawm bik mi tlemtê te nen chawhlui kan kil ho a, Aringi te chhungkua, ka pa leh kan chhung hnai tlemte, ka thawhpui te anni mai a, anni lam pawh an tam lem lo khawp mai. Mahse, ei tur erawh kan hnianghnar hlê.

A hma a ka lo awm tawhna ṭhin vêngah ka lawi lût leh ta chu a ni a, min dem fê fê pawh an tam ang; mahse, ka kiangah Valpuia a awm chhung hi chuan ka thlâ a muanga ka inringtawk bawk.

Inlêng an ṭîn fel tawh a, a khum zaupuia kan mut meuh chuan zan dar sawm a ri dêr!

"Ka nupui kiangah eng thiam thil nge ka show ang aw," boxer chauh inbelin bathroom aṭangin a rawn chhuak a, a sam huh hliam chu towel-in a rawn hru pah nawk nawk a.

"Thiam thil ka mamawh lo, ka thiamsa hman chhuah a ngai zawk," nui var var chunga ka chhân chuan, "Vanlalthlamuanpui, zak ve la.."

"Nupa khumah zah ka hre lo.." tiin ka inlet thak a.

"Hus! Kan la hria ang chu," ka kiangah a rawn inthawlh sawk sawk a, "Ṭawngṭaiin bul kan ṭan phawt ang a, chumi zawhah i thiam thil kan en ang," min ṭhut chhuat tir ve nghal a, kan pahnihin kan ṭawngṭai dawn emaw ka tih laiin ka kutah a rawn hûm vang vang a. Amah a ṭawngṭai ta a.

Thlenga nen an danglamna chu hei hi a ni rêng a ni, rinawmnain a hual vel leh amah dintu leh siamtu hnenah kan nupa a kawltir thlap, ka va'n ngaisâng si êm.

"Ka ta i nih theih nân hmâ han hruai rawh le," ka fawh turin a hmui a rawn dawh a, "Ka duh lo," tih chi ninghal lo chuan.

Amah ka fawh rualin duhthawh zetin min rawn fâwp let nghal a, a kut pawh a awm mai mai ta lo, dîm leh duat taka min sawngbawlna chuan ka chhungril a fan hneh kher mai, ka vawikhatna ang maiin ka zak deuh nia maw le.

A bâna thisen zâm pâwng ṭâlh ṭâlh khawpa inbeng khalhin hmangaihna kan chen dun ta a.

Ruih hlo leh sum leh paiin atih buai loh, nuthlawi ka ni chung pawha rinawmna min tiamtu Lalfakawma ta ka nih meuh chuan a mitmeng a nung sar a; "Min kalsan suh,(NÁO VÂ)" tia phun sup chung hian nghet zetin min kuah ta chial a.

"Yes, ka kalsan hauh lovang che, ka hmangaih che.."

Khawvar dawnah kan muhil ve ta chauh a, a thlan hnâwng chap ka hrûksak lai te chuan ka nui leh sak zel.

Ka awmna tur dik takah ka awm a, ka mu bawk.

"Sen, Sente, tho ang le.." ka mutui lai min rawn kai harh a, ka awmna hmun ka hai teuh kher mai.

"Umn, dâr engzat nge?"

"Dar kua a ri dawn," ka taksa a rawn chûl kual dan dan a, lo dan ka tum hauh lo, ka pasal tâna hlimna leh lungawina pêk hi ka tihtur liau liau a ni.

Ka nun dan inpersan ta dawrh te, pasal ka nei leh ngawt te hi min dem duh tân chuan demawm ka ni; mahse, pasala ka neih tâk Lalfakawma erawh ka hmangaih kumkhua dawn tih ka hria, ani paw'n min thlah dawn lo tih ka chiang bawk.

##
VALPUIA
Ka nupui Vanlalthlamuanpuii nen thla ruk zet kan innei ve ta, a zaidam lutuk leh min dawh thei lutuk te hi ka inthlahrung zâwk.

Kan inchung pawh kan sak zawm nual tawh a, thlathum hnu velah chuan kan luah thei ve tawh ang chu.

Tunah nau thlathum mi a pai ve mêk a, Guwahati lamah zan hnih riakin ka kalsan ta kha ni a, ka ngai ngei mai. Tu emaw riahpui tur sawm rawh ka tih lahin a duh mang reuh si lo va, amah ngaihtuah rêng rêngin ka muhil thei dawn lo tawp.

Ka lo rin lâwk ang chiahin mi hmangaihna a ngah a, a phâk tawkah min duat thiam viau bawk. A hna chawlh san tura ka tih erawh chuan a duh îkhaw lo.

"Hna hmuh mai mai a harsa a, nakinah fate kan neih ve hun atan ala ṭangkai dawn asin," atih tlat avangin ka nawr lui ta bik lo.

Thlenga nen an inneih lai khan nau a pai miah lo va! Mahse, Pathian remruat liau liau a ni ang awlsam têin tunah a pai leh mai si a, ka lawm fâl ngei mai.

A pasal hlui chanchin vawikhat mah kan sawi chhuak ngai lova hmuh mawh tur pawhin a awm ngai hek lo, Thlengliana erawh kan in bul velah hmuh tur a awm leh zeuh ṭhin; mahse, eng tin min tih lêm loh avangin ka ngawi hmiah thung.

Ka phone a rîk chuan Sentei a nih ka ring deuh a; mahse, nichin lawka kan inbiak avangin ka ring ngam chiah lo deuh.

"Hello.." number lâwng ringawt a nih vângin ka pick lo ṭêp a.

"Valpui, eng lo.." mipa aw sîn lam deuh a rawn ṭawng chuan, "Eng nge?" Ka ti nghâl vat a.

"Innu in accident a tawk a, Civil hospital casualty-ah kan kalpui, YMA president Ruatkima ka ni e." A rawn ti ta mai.

"Maw!? Nichin lawkah pawh kan inbe reng alawm,"

"A rang lama i lo haw theih chuan," atih zui tâkah phei chuan ka ngaih a ṭha hlawl tawh lo, "Pu Ruat, han sawi chiang deuh teh." Ka ti nghut a.

"Seni ṭê thâwm in ṭhenawmnu in a lo hria a, an nupaa an va luh chuan chhuatah thisen nen a lo in chiah piah nuai a ni awm e, pachang takin awm la, a rang lamin i lo tlân haw thei ang chu tiraw!?" A thusawi tawp lam pawh ka hre mumal tawh lo. Phone ka thlauh tawp a, ka lû a rawn na nghal tluk tluk bawk.

Eng thil nge thleng ta hi!?

Kan accident-na avang khân ka lu hian ngai a awh chiah lo deuh tih ka hria, ka nupui hriat lohvin damdawi ka ei fo va; a rilru tihnat ka hlauh vang a ni.

Ka thlenna hotel bill ka pek fel vek hnu-ah Mizoram panin ka tlân chhuak ta a, ka ngaihtuahna bîng chum chum te, ka thluak nu but tih reh tumin thâwk ka la leh hawk ṭhin. Ka nupui chungah eng thil nge thleng tih mawlh chu ka thil hriat duh ber a ni.

Ka phone a ri reng a, ka û leh ka puzawn hnen aṭanga ka thu hriat phei chuan min ti na ngei mai.

Sentei chu mi kut tuar a nih an rin thu leh FIR an theh luh thu an rawn sawi leh ta nghâl a, thinrim engphiarin a nia ka awm ni.

Tu pawi mah sawi lo ka nupui hian mi kut a tuar a nih tak tak chuan Lalfakawma hi tû fa mahin min bengdai lo vang.

Khawiah mah chawl khawmuang lova tlân ka ni bawk a, Pathian hruaina liau liau vin Aizawl ka lut ta. Civil hospital lam ka pan ding nghal a, ka hmel pawr fap leh mit sen rûm te chu ka ngai pawimawh peih tawh lo.

Casualty kawtah police leh kan vêng YMA hruaitu te ka hmu nghâl pang a, pu Ruatkima kha ka thlen chin ka hrilh zel avangin parking area ka tlân luha ka indah fel chuan min rawn chîm deuh nak nak a, ka chhungkhat tumah ka hmu lo.

"Valpui, i lo thleng tluanga a lawmawm hle mai," Pu Ruatkima'n min chibai paha atih chuan ka bu nghut ringawt.

Zawhna chhân sên loh ka nei na-in ka nupui hmuh hmasak ka duh ber.

Casualty ka luh ruala ka thil hmuh chu leh!

Ka nupui, oxygen hîp kâwk kâwk leh a hmêl dâng lap te, minung pawh a ang ta lo!

Thinrim inseh ruh ṭeuh chung hian a mutna lam ka pan a, ka û leh ka puzawn hmel phak chap te chuan ka thinrimna ati zual.

"Mâm, i lo thleng tawh maw!?" Ka û mittui tling piau a min lo betu kuahin ka thaw hawk a, "Tû tih nge?" A bâk eng mah ka sawi lo.

"Kan la hre lo, Mâm, intipachang rawh aw.."

Ka puzawn a ngawi reng a, a fanu eng mah hre lova mu chu a thlîr tlawk tlawk ringawt, kei pawh min hmu angin a lang lo.

"Sente, Vanlalthlamuanpui, ka lo haw a nia," ka aw a thâm ṭuak a, mipa mah ni ila ka insûm zo dawn hleinem maw le.

Min chhâng lo mai ni lovin eng mah a hre lo hrim hrim, ICU ah an dah lo hi mak ka ti viau a; mahse, a chhan ka hre chhuak vat tho, tih chêt ngam loh khawpin a taksaah hliam a ngah a, thisen unit thum an pêk hnuah rei lotê a rawn harh zawk a, abâk a rawn meng tawh lo hrim hrim a ni âwm e.

Khawih sawn ngam a ni rih lo.

Tih theih ka nei lo hle mai, thinrim viau pawh ni ila tunah engtin nge ka tih chuan ang. A kut vuana rei fê ka ṭhut hnuah police-in thil zawh tur min neih avangin min rawn ko ta a.

Ka nupuiin hmelma a neih leh neih loh te, an hriat duh apiang min zawt a, ṭha takin ka chhâng vek. Min ringhlel deuh em mawni tih mai a awl khawp mai. Ka awm loh laia thilthleng a ni bawk si a.

A pasal hlui Lalthlengliana chanchin min zawhna chu ka hriat theih ang ang ka chhâng a; kan inneih hmâa atih dan te pawh ka sawi tel nual bawk.

"Mama..." ka û hlauthawng âw ka hriat chuan rang lutukin police pa ka tlânsan nghal a, Sentei hmel ka hmuh leh rualin ka âwmah hnawhtu a rawn awm nghâl.

Nurse leh doctor te'n an lo buaipui mêk a, oxygen pawh a full in an herh tawh tih a rîk dan aṭang chuan ka hrethiam mai.

A Bp an check lai te chuan hnai lutukah ka lo ding a, ṭawng chhuah tum niawm taka a hmui a rawn tih chêt chuan ka kûn hniam nghal vat a.

"Sente, min hria tiraw?" Mitmeng davâ zet hian min rawn melh a; min hmu ang pawhin alang lo. A kuta ka vawnna erawh ka hmer nghet hle.

Minute sawm dawn an buaipui hnu-in vawilehkhatah a âwm a rawn sêp kâng dâwrh dâwrh a, "Va..l.." a zawi viau nâ a ka hming lam a tum tih ka hre mai.

"Sente, ka phal lo..hei..Thlamuanpui.." eng ang pawhin chelh din tum ila kan thei ta lo, ka û a ṭap râwih râwih a, ka puzawn hmel erawh ka hmu lo, a en thei lo tepawh a ni mahna.

"NÁO VÂ"

Ka nupui chatthla lai hmu tur ringawtin em ni he hmunah hian ka thlen!

"Vanlalthlamuanpui, kal suh, min kalsan suh.." aw râwl chhuah meuhvin ka ṭap chhuak ta a. Ka dâra min kuahtu ka puzawn mittui far zung zung chunga min entu chu kei aiin a na lo bik hauh lovang.

"Náo Vâ.., hmabâk kan la ngah êm kha, Sente, ka phal lo," a âwmah ka bawk thla thlawp a, tûma hmai ka zah zo ta lo; ka nupui, ka hmangaih leh ka engkim, ka fâ pai mêktu chunga hetiang thlen tir tu hi ka ngaidam chatuan lovang.

'KA NGAIDAM LOVANG'

Doctor in a confirm vek hnuah pawh ka la awih phal ta lo fo. Ka ṭah a chhuak tawh lova damdawi in khuma mu ka nupui an sâwngbawl lai chuan ka khawhmuh a phê ruai a, inthin harh ka tum ngial pawhin a harsa mah mah a ni.

Kan hmabâk êng tak kha a thim thut a, mi kut tuarin min kalsan ta ringawt chu a nia, thinrimna sawi hleih theih loh ka kawchhung aṭanga rawn irh chhuak thunun tur hian ka nupui chauh a ni ka mamawh.

Ṭap thâwm kârah ka melh ngai melhin ka ṭhu kun lap a, ka khawvel a tawp nimaiin ka hria.

Ambulance-a ka nupui ruang an hlân chhoh laite chuan mi â ang maiin ka ngawi reng a, ka û leh ka puzawn, ṭhenrual ṭhate min kohna pawh ka bengkhawn lo hrim hrim. Ruang zui nachâng lah ka hre hek lo.

Ka ṭap thei lova ka kawchhunga hnawhtu awm hi a kian meuh chuan Lalfakawma hian phuba a la lovang tih tunge sawi thei?

#Aringi

Ka nau mit sen rûm leh thinlung tâwt lutuk hmêl ka hmuh hian nu leh pa neih ka châkna a zual. Sentei hi ka thinlung takin ka ngaina a, ka nau ang chiahin ka en nghal hmiah. Pianpui unau hmeichhia ka neih loh avang leh Lunglei lam mi a nih vangte, ka unaupa in a hmangaih êm avang te pawh a ni maithei, heti em em a ka duhsak.

A naupai tirh pawhin min rawn hrilh hmasa ber a, tuna a chunga thilthleng ka ngaihtuah hian ka na ngawih ngawih. Chu zawng ai chuan ka nau Valpuia ka ngaihtuah leh zual.

Tunah hian police lamin rinhlelh annei tawh a, a hming sawi lang chiah lo mah se an man chhuak a nih phawt chuan a châk lo khawp ang le. Ka unaupa hmangaih lâksak tu hi dam tlâk a ni lo.

Kan inpui kan thleng tawh a, kawt zâwl leh garage-ah mipui an ṭhu khat hmur a, ṭap thawm a nasa ngei mai; ṭhen rual kawm tam lo mah se ka nau hi mi tâna ṭangkai a ni a, a nupui pawhin mi ngainat a hlawh viau tih ka hria.

Ruang an zâwn luh laite chuan chhuak lutukin ka ṭap hawm hawm a, an hlim ni rei lo lutuk hi ka khawngaih êm a ni. Ka nau hmêl pawr fap leh rilru nâ tih hriat lutuka thaw chhuak hap hap te chu en hrehawm ka ti a, Sentei pa hmel pawh ka en rei ngam lo.

Zingkara thi a nih vângin taivarpui tur a ni lo a, engkim hi a tawp fai vek nimaiin ka hria.

"Sente, kan in kan thleng tawh a nia aw.." Valpuia aw zuai ruih chu ka va lainat êm.

Mipa mah nise a insûm thei lo achhâ chu a ni e.

Chhungkaw aiawha thusawiah Sentei pa a ding a, he thihna thlen chungchânga mawhphurtu hi kan hrechhuak a nih ngat chuan... tih a sawi laia ka nau lo inhûm ruh ngat ngat ka hmu reng. Ni e, Lalfakawma, mipaah pawh pá tak hi a nasa lo viau ang.

Vuina hunserh a zo a, kuang an chhin dawn meuh chuan mipa na tuar awrawl a rawn ri chhuak a, "Kal suh aw, khawngaih takin min kalsan suh," ka nau mittui luang zawih zawih chu ka tân pawh en a har ngei mai.

Pathian hian kan hlim hi a phal lo em mawni? Tih hial tur a ni. Mahse, vûi ngam tur kan ni lo a, min dintu hian 'kan ṭhatna turin engkim a thawk ṭhin' tih chauh hi kan unau inhnemna tur chu a ni.

Thlalâkna hun kan hmang zo ṭan tihah mipui an thûm huk a, phun ri nuai nuai leh mipa thinrim inhrosa ri a nasa ngei mai. Kan in piah kawng chhak aṭang chuan police paruk vel leh YMA hruaitute'n Lalthlengliana hmai vûng chur an rawn chhawm chhuak a, kawtkawl a bun rup bawk.

Ni e, saw mihring ngei sawn alawm ka nau nupui kutthlâka vittu chu!

Ṭhalai rualin kut an thlâk hrep tawh tih hriat tak hian a mit pawh a meng mang tawh lo va. Kan awmna zâwn an rawn thlen chuan pu Ruatkima'n ding turin a hrilh a, Valpuia a mitmei nghal bawk.

Ka nau chezia ngun takin ka lo en rân a, thil pawi lutuk atih loh hrâm ka beisei.

"Thlenga, ka nupui hian i eng pawi nge a sawi?" Thinrim insûm zeta a ṭawng chhuak chu a chang ṭha khawp mai.

Chhânna a dawn loh avangin zawhna ngai bawk a zawt leh a, "In pahnih khân ka pawi insawi, nang pawh ka la that ang che," a sawi zawh rualin a bek ding lam.a ri chawrh a, "Pu Ruat, kalpui rawh u, min thah duhtu leh tumtu chu ka rawn hmu nawn leh ang." Thinrim hmêl dur khupa Valpuia ṭawng chhuak chu ati mai mai lo tih ka hre thiam mai.

Chumi hnu chuan thlânmual panin Sentei ruang an kalpui ta a...

#Lalfakawma of Valpuia.

Ka nupui leh ka fâ thattu, kei mah thleng pawha min thah tumtu Lalthlengliana hi hremna sâng ber ka pe ngei ang.

Sentei hlim hmel te, nupa ni a kan hlim hun chhung rei loh zia ka ngaihtuah hian min tihtawp saktu hi thah hial a nia ka duh. Ka nupui, ka hmangaih leh ka engkim ni ṭhin tel lo hian ka dam zo dawn em ni?

Kan nupa room-ah dingin kan inneih thlalâk banga intâr chu mit khap miah lovin ka en a, "Min kalsan suh ka ti lovem ni! Kei mah chiaha min hnutchhiah tâk mai le, Sente.. ka koh che hi, i pasal Lalfakawma hian ka thlah phal lo che.." ka mittui far hian a kokîr zo ta si lo.

"I phuba la tur leh hremna pêk sak tur che in i tân rinawm takin ka bei zel ang,"

'NÁO VÂ' ka sawi zo hman ṭâwk, ka khaw hmuh a thim tial tial a, ka nupui hlim hmel suangtuah chungin ka maimitchhing ta a...

Khawvel kan kum hlun lohna tur hmun leh kan khualzinna ramah hian kan hmangaihte leh min hmangaihtute kan ṭhen zel zawng a ni a, a dam a te hi kan va pawimawh si êm..

A TAWP TA.

B+>[BeckirafARenthleI]<+®®

Note: He story hi long story tur atana ka buatsaih a ni lo ka tih tawh kha. Happy ending tur atana ka hual lâwk a ni lo atin ni.

Ka story post zawng zawng zingah problem a ngah ber a, min chhiarsak ṭhintute ka ti beidawng fo mai che u hi ka inthiam lovin hrehawm ka ti hle. In mi hriatthiamna ka ngen takmeuh e.

Ka long story pangngai tur 'The Rapsagyan Family' nen inhmuh kan tum leh dawn nia. Ka story thar tur hi a style a dan deuh avangin, Rapsagy, Segundo, Ka thlah lo'ng che, tih leh tuna mi Náo vâ story chhiar lo te chuan an hrethiam dawn lo a, chuvangin min chhiarsak ṭhin tute khân ka târlan zingah chhiar loh inneih chuan in lo en ka beisei.

COMING SOON: THE RAPSAGYAN FAMILY

Thank u all BRR



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)