UNKNOWN MAN by. Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: UNKNOWN MAN by. Becky Rafa Renthlei (Completed)

Unread post by Ngaia » December 20th, 2017, 7:17 pm

UNKNOWN MAN

by.Becky Rafa Renthlei

Chapter-19


George Malakian chuan min duh ta lo leh min pawm ta lo a nih chuan ngai ka awh tihna a ni mai. Theihtawp chhuah erawh ka tum! Induh larh leh hawisang vah hian chung hian inhnuai pan chuan ka chhuk ta a.

Țhutkhawmna pindan zau zeta Sofa dûp nuam taka țhu chung a, mitmeng buang thak mai, Dominic mitmeng ang takin chîk zet leh nelawm loh taka min lo en pawh chuan ka hlau hran lo.

Muangchang hian a rawn ding chhuak a, ka phu zawk mai! Putar nelawm loh leh thinchhe tak hmuh ka tum chu hmuh tur a awm hauh lo. Ka ngaihdan lo siam ve vak vak hi a țulna a awm hrep lo, amah ka hmuh hma hauhva lo rinkual vel chiam kha thil țha ber pawh a ni hek lo...

Dominic ang maia sáng a ni a, a sam chu a chhahin a dum țha hle a, a bek sam vel erawh chu a țuak phauh phauh thung! A hmel pawh a țha roh hle a ni. A ngaina lo tu tan chuan hlauhawm tak tur a ni a, a nêl tu tan erawh țhian țhatak a ni ngei ang tih ka hria. Ka pa ka hrechhuak zawk mai!

"Hei hi i nupui chu a nia maw, ka fapa?" A hmel ang mai áwka nghet churh chuan a ti a. A mitmeng chuan min hawisawn san lo reng reng..Zam rum rumna khawp hian min melh ngur a.

"Kiara Forbes a nih hi," Dominic chuan a lo ti vat a.

"Ka fapa tan hian țha tawkah i ingai em ni?" chang fahran hian George chuan a ti a.

A áw ang chiahah nelawm loh hian, "Țha lutuk mah mah, min phu lo i fapa hian, a hma zawng chuan Malakian a ni ngai lo; kár kalta mai ațang khan Hetfield ațangin Malakianah a kaisang ta a, eng ber nge a hming tak pawh ka hre hrep lo e, Mr.Malakian." Ka ti nghat a.

Chutah ka la ngawi mai duh lo, "Mi rethei anga awm hmasak hi in chhungkaw kalphung aniang chu ka ti mai a, Jaguar țáwng zetin nangpawh i lo kal hial lo maw!? Malakian car company neitu anga a insawi hi a tak tak a ni em? tih pawh ka hrefiah thuaiin ka ring." Ka ti leh duah a.

Engemaw chen chu a reh țhap a, Dominic chuan rum mangkheng hian min rawn melh...mahse ka en duh lo..an pafa hian ka hlauh em em na tur ka hre bik lo e a...

"Sum leh pai vanga nei i ni lo a nimaw?" George chuan a ti hmuk a.

"Sum leh pai lam chu ka mamawh loh lam tak a ni. Company ka nei ve hauh lo nain, ka mamawh tur chu ka nei ve e." Nui sángin ka ti a.

George chuan min en vang vang a. Thinrim puak keh tur ang mai hian awmin tháwk a la hawk a. Chutah a nui ta vur vur a, "I leili a hriam țha hle mai maw! I kawlh zekin ka ring bawk." A ti ta a.

"Ka duh lohna ah chuan ka luhlul viau bawk," ka ti leh hram a.

Zam ru viau e ti lo chuan ka nuih a za deuh tlat a. Interview ropui lutuk a ni ringawt a lawm le...! ka nui sak a.

"Eng thilin nge i nuih tiza a?" George chuan a ti thut a. "Ka thurawn pawh la lovin in lo innei ringawt a, ka fapa upa zawk nupui neihna ah pawh ka tel lo a nia!"

"Inneihnaah i tel ve lo chu pawi ka ti, i fapa in a hrilh miau loh che chuan thiam lohna ka nei lo. Kei pawh ka nu leh pa fa neih chhun ka ni a, an duh thusamin pasal ka nei bik lo, chu pawh i fapa hian min nawr chuk chuk a, blackmail hmangin, i duhdan a nih te chuan hetah kan innei țha leh anga a nimai alawm!" Ka ti ve hmiah a.

An pahnih hmela maktihna lo lang avang chuan ka nuih a za tulh tulh a. Ka zamna pawh a reh duak!

"Pathian hmingin i nupui hi i lamțang a nih ngei ka beisei...induhtawk dan pawh a thiam larh larh khawp e, Dominic," George chuan a ti ta a.

Dominic chuan ngeiawm tak hian min nuih suk a. Insum deuh rawh tih melh hian min melhin ka hria. Ho lutuk ka nihna ang hian lang hmiah ila inthup țit țet ka peih lo.

"Kan sumdawnna enkawl tur hian i tlingtawk em? Tih ka ngaihtuah a ni," George bawk chuan ti lehin min melh chang kher mai.

"Sumdawnna enkawl tur nilovin, nupui ka nia lawm, i fapa nupui."

"Hetah hian lokal teh, ka lo enchiang teh ang che!"

George bul ka thlen phei chuan, "I hmelțha reuh hle mai! Kum engzat nge i nih?"

"Sawmhnih pahnih ka pum ve tawh," ka ti sap a.

"I la naupang hle mai, kan mo i ni ta rau rau bawk a, țha taka enkawl tur i niin ka hria! Mr.Malakian tiin min ko suh ang che." Thunei aw tak hian a ti a.

"Ka la ko reng reng lo che."

"I tana țha tur i hria a nih chuan 'ka pa' tiin min ko rawh, ka fapa te min koh angin."

"I fanu anga min pawm phawt loh chuan ka pa ka ti dawn lo che, a derin thil ka ti ve ngai lo. Ka tilang nghal mai țhin." Ka ti chang rat a.

A puakkeh mai dawn emaw tih tur hian a ner sawk a. Chutah min ngaihsan hmel fe hian a nui ta sun sun a.

"Awle, chuti mai chuan i tihhlauh theih loh a nih hi, ka fanu i ni e, Kiara" la nui reng chung chuan a ti ta a.

Chutia awlsam taka a pa in min pawm ta mai chu Dominic chu a lawm hauh lovang le! Amy kha a pawm ve mang si lova..

"Ka awm rei hman dawn lova, zaninah restaurant-ah in inneih lawmna kan nei dawn nia, i secretary chimawm zet kha lo hrilh ang che. Ka fanu thar hi hmel hriattir ka duh e.." George chuan a ti leh a.

"Awle, ka pa," Dominic nen chuan kan țawng rual țhawt a. George pawh a lo nui ve vur vur ringawt!

Dominic-a pa in min kalsan hnu chuan intifai turin pindan ka pan a, ka hnungah Dominic pawh chuan min zui ve nghal zat a.

Mit tharin George Malakian khan min en tawh a, a fanu ah min pawm nghet hmak tih ka hre thei a ni.

Bathroom-a ka lut tur chu Dominic chuan min pawt ding leh rih a.

"Kan inbual dun thei reng alawm."

"Ni lo ve, ka lo va ti hmasa ange kan insiam chhung a rei țhin a, i inbual chhungin ka lo inchei thung dawn alawm."

"Ho viau teh suh i inchei chu ka nghak thlap ang che..hawh le..min hnial tawh lo la." Ngen ngawl deuh tak hian a ti a.

Shower hnuaiah ruak vekin ka ding dun a, Dominic chu a chimawm leh kher mai! Hmanhmawh hauh lova inbualin hmangaihna kan chendun leh te te a. Bathroom ațanga min pawm chhuah chuan ka la nui hak hak a, a zei thlawt a ni. Amahah hian mipa nihna a kim thlap...

"Ka pa khan a ngaina hle che a ni, mi danglam tak zawng i lo ni e," tiin towel chuan ka sam huh chu min hruk sak a. Min duat viau hian hmeichhia hliah hliah a inhriatna ka nei tlat zel...

"I pa chu ka pa a ni ve thova, nang ai hian min la duat em em ang!" Uang takin ka ti a. A nui ve hawk hawk tho.

Wardrobe ațang chuan kawrfual hring ghalh mai ka phawrh chhuak a, a țhui dan tunlai zet chu ka duhzawng tak a ni. Dominic pawh dinner suit, cream rawng hain a nalh leh pek hle a. Ka insiam lai chu ngunthlûk fahran hian min en reng a. Nuam dangdai riau..

Dominic chuan a kekawr ipte ațang chuan bawm te hi phawrhin a hawng nghal a. Dressing table ah chuan a dah ta a.

"Hei hi zanin a i inchei nan ka rawn laksak che a ni," zawi sap hian a ti a.

Bawm chhungah chuan țhi leh bengbeh inang chiah lunghlu hi a lo awm a, engin a chhun zawng chuan a de sar sar a.

"Oh..nilo, ka inbel thei lo...." ka ti sap a.

"Kiara i hausa tih chu ka hria, ka nupui i ni a, ka hausa hle tih an hre vek bawk a. Lunghlu i inbel hi a țul tlat a ni." A ti hmiah a.

Dim vak lo hian min kuai her a, țhi chu min awrh tir ta a. Bengbeh pawh min beh tir leh thlap. Ka thawmhnaw hâk nen pawh a inrem hle a, a nalh hle a ni.

"Khati kha a nimai alawm," I nalh takzet!

Ka dar ruak kangah chuan a rawn fawp zauh a. Dominic hmaah chuan ka intheh kual vel a, a lo nui var var thung. "Ka pa chuan nalh a ti ngawt ang che, ka nu ta a ni a, mo hmasa ber inbel tura kan dah țhat a ni." A ti ta a. Ka thil inbel hlut dan tur chu ka hrethiam mai!

*******

Kan kalna club chu mi hausa fuan khawmna hmun a ni a. Dominic chu an lo lawm hle a, a nupui ka ni tiin a hrilh zel hlawm a. George a lo thlen pawh chuan club chhunga awm ho chuan an lawm thiam hle a ni.

Dominic leh a pa chuan min karcheh a. Intur no hnih lai ka dawm tawh bawk, dinner ei a kan țhut meuh chuan a lum ham ham tawh khawp mai, ka thil in vang leh George an min fak deuh reng vang chu a ni pakhat a, chhungkaw lungrual tak kan ni tih lantir an tum ber ni hian ka hria.

"Dominic, George," Makti em em niawm fahran hian Amy chu kan bulah a rawn kal a. Dominic secretary a nia, an lo sawm tel ve tho a nih dawn hi.. țhian pakhat a rawn hruai bawk a.

"Ka fanu thar nena dinner ei hi ka châk tawh êm avangin, chawpchilh deuh takin kan lo sawm che a ni e," George chuan Amy lam hawi chuan a ti ta a.

Amy nui lui hmel ka hmuh chuan nuam ka ti ru veng veng.

Dinner kan ei lai chuan kan țawng mang lo. Dominic chuan min rawn melh zauh zauh a. Amy leh a țhianpa pawh chu an ngawi ve reng tho.

"Ka fapa te nupa pual hian ka inah party siam ka tum a, Amy, ruahmanna lo siam rawh aw," George chuan a la ti tak deuh deuh a.

"Umn..awle.." Amy țawng bah nak chu Dominic chuan a melh zauh a.

"Ka fanu, naktuk hian ka rualin company ah lo kal ang che..., Australian merger kan neih zing a țha ber, car pek che ka duh; in inneih present a tana ka tih a ni." A tih leh chuan Dominic chu a hawi hai hle a.

"Pa, kha chu ka tih tur a ni," Dominic chuan a lo ti ve a. An pafa a min duhsakna chuan Amy thin a tirim hle tih a hmel dur deuh khap ațang chuan ka hre thei a ni.

George chu ding chhuakin, Club a lo awm zawng zawng te hriattur chuan, "Zanin hian ka fapa upa zawk Dominic Dron Malakian leh a nupui Kiara Malakian te inneih lawm nan in ei man leh intur man zawng zawng kha ka tum vek dawn a ni." A ti ta a.

Kut beng ri chu a ring kher mai! Dominic chuan ka țhutna ațang chuan min pawt thovin, club chhunga awm zawng zawng te hmuh theih tur chuan min fawp ta siah a.

Min fawh dan dam thlap chuan ka thinlung a hneh kher mai. He pa hi ka hmangaih a ni.

George chuan min chhuan hmel zet hian min lo en bawk a. Amy erawh chuan thinur mitmeng sen rám hian Dominic chu a melh a.

Kei lah chuan run luih ka chák zek zek a, Dominic chu inti tatu deuh hian a kawngah ka kuah deuh tlat a. Ani lah chuan nuam ti awm deuh hian min kuah lêt ve mai bawk.

Zanin zet chu a nuam dangdai hle mai.

Malakian monu thar ka ni bawk a, min en duh hlawm kher mai..Artist lar tak 'Maxi' ka ni tih an hriat hun phei chuan engtin tak ngai ang maw!

George pawh hian a la hre miah lo.

I la châk lo khawp ang tih melh hian Amy chuan rum zet zet hian min melh a.

Ka hlau lo ve chiang emai!

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 7:17 pm

UNKNOWN MAN

by.Becky Rafa Renthlei

Chapter-20

Club kan chhuahsan hnu a, George an min hawsan dawn chuan min kuah hlu hluin ka biangah min fawhsak a. A chenna hmuna kal vat turin min sawm bawk a, kan inneih lawmna party ropui taka min lawm sak a tum a ni. A birthday a ni dawn bawk a, kan kal loh a hlau hle a ni.

Kan chenna hmun kan thlen chuan, Dominic chu a ngawi chawi riau a, Amy vang kha a nih ka ring? Amy lak ațang hian Dominic hi ka hum tlat ang? Ka pasal a ni tawh a, midang hmuhah mualpho ka tum reng reng lo.

Bedroom-a kan awm tawh hnu chuan ka thawmhnaw ka phelh sat sat a, ka bulah Dominic chu rawn dingin, "Ka pa rilru i hneh țan der tawh chu a nia!" a ti sup a.

"Chu..i lawm vak nange?"

"A kawi zawng hian ngai țhin lo la, ka chhuang khawp mai che."

"Ka hria alawm, Amy ang lo takin min ngaina ta chu a nia, kei paw'n ka ngaina hle a ni." Ka ti a.

"Mi bumhmang niin min sawi a, nang pawh i ni tho a ni, Kiara! Kan inang reng, ka pa i hneh chungchangah kha chuan lawm lohna ka nei lo a nia," a ti ta a.

"Enge bumhmang ka nih na chu?"

"Min mamawh lo ang maiin i lang tlat a. Chu chu bumna tho asin, ka nupui tereuh te! Chhungrilah chuan min ngaiin min mamawh hle si a." In ringtawk tak hian a ti a.

Chutiang a nih lohzia sawi tum chuan ka áng zuau a, mahse a tlai hman hret, Dominic chuan min rawn fawp a.

"Dominic..." tia lo dan ka tumna pawh chu nuam tia thaw a la halh thawm chuan a zui a. Chutah khum lamah chuan min kuai muin ka ir leh bek velah chuan a rawn fawp kual a, ka bra kilhna chu phelhin ka taksa lum thar thar chu a rawn chul kual țan ta a.

"Zantir ațang tawh khan hetia fawh che hi ka châk tawh," thám sap hian a ti a.

"Ni lo, tunah chuan intihfai ve te ka duh a."

"Ka nupui i nia lawm Kiara, pumkhat kan ni a, engkimah kan inpawh tur a ni. Intihfai lam chu nakinah le. Kiara. Oh, ka duh ngawih ngawih che."

Dim tak leh hmanhmawhna nei hauh lo hian min chul kual leh țan ta a. Chutih chhung pawh chuan min hawisawn san lo reng reng a. Zauthauna nasa tak ka neih chu ka thunun thei bik lo. Ka taksa ruak kang chu a en leh vang vang a, keipawhin zak hauh lovin ka en ve bawk a, ka pasal a ni...Ka pasal dik tak..

Chutah muangchangin hmangaihna min chenpui leh ta a. Kan zawh hnu chuan ka sirah rawn mu thlain min kuah hle hle a.

"Invenna kan hmang ngai si lova, Kiara?"

"Chu lam chu ka lo ngaihtuah hauh lo," ka ti țha ve mai a.

"Min duh a ni tih hi phat buai tum tawh suh, naute kan neih thuai theih nan țan kan lák deuh angai dawn a ni. Ka pa hian tú hmel hmuh a chak tawh viau a nia!" Nui hak chung hian a ti a.

"Tun anga kan awm zel chuan kan nei vat mai ang," tiin a sam thur deuh chhap chu ka chûl sak a. Ka áwmah chuan beiin duatna a khat mitmeng hian min en a. Ka duh zual sawt.

"Mipa nge i duh hmeichhia?" Dominic chuan nui suk chung hian min zawt a.

"Mipa leh hmeichhia," rang takin ka chhang a. "Chutiang a theih loh," tiin ka pum chu a chul a.

"Phir kan neih chuan ka tihna, nangni pawh phir tho in nia," ka ti leh a.

"Huhh, kan sawi thui mah mah! muhil dawn ang le, naktuk ațang chuan hna ka zawm tawh dawn a, inlamah i lo awm thung dawn a ni." Tiin a hám zui zat a.

"Awle, husband...."

A tukah chuan nunphung pangai zawh țanin Dominic pawh company lamah a kal ta a. Ka nu leh pa nen reife kan inbe leh te te a, chumi hnu chuan ka hna lam chhunzawm turin ka insiam ve ta a. Drawing room zau pui maiah chuan lemziakna dawhkan kilin ka țhu ran a. George a birthday present atan an nupa lemziah ka tum a ni. Sitting room báng a, Dominic nu leh pa thlalak intar chu ka mitthla rauh rauh a. Țhahnem ngai taka nitin ka ziah chuan karkhat chhungin ka peih fel hman chuan ka ring!

Talinda pawh ka la be ta lo fo, ka ngai viau nain min tihdan kha ka lawm chiah lo. Chuvangin min rawn bia anih loh chuan biak ka tum bik lo.

Lunch ei țhulh țhakin lemziak chu ka bei țan ta a, Elina pawh drawing room ah luh ka phal chuang lo...Ka peih fel hmain tuma hmuh ka phal lo bur.

Dominic pawh ka hrilh chuang lem lova. Surprise ka tum miau avangin...

Tlaiah chuan Dominic lo haw hun nghakin tukverhah ka dak ka dak a, nilengin min rawn be bawk si lo. Hnaah a chawlh rei deuh tawh avangin an buai rih a nih ka ring ta ber a. Dinner ei hun tawhah pawh chanchin engmah a la rawn sawi chuang lo.

"Ma'am, dinner hi i ei mai dawn nge? I pasal i nghak dawn?" Elina chuan min zawt a. Tun thleng thleng a chanchin pawh sawi tum lo chu nghah kher țul ka ti ta lo.

"Ka lo ei ange, a lo haw hunah ei ve mai rawh se!"

Elina eitur siam tui hmel tak tak ka hmuh chuan ka rilțam zia ka hre nghal a. Lunch pawh ka ei ta lo kha a nia! Ka duh tawka ka ei hnu chuan țhu khawmuang lovin, drawing room ah bawk chuan ka lut leh ta a, chhung lamah ka kalh thlap bawk.

Dominic em em pawh hi...Engtin nge chanchin sawi lova heti chen chen a awm ni? Dar sawm a rik takah chuan ka tuar ta ngang lo a...Drawing room chu chhuah sanin, silk pyjama var chu hain khumah chuan ka mu ta daih a.

Nizanah min ngaihsak ber angin a awm a, nikhat hna a țan dek dek a, tihian a awm leh a..ka ngaihdan a ni lo bur...

Chutia ka mut men kar lai chuan car ding thawm leh kawngkhar inhawng ri chu ka hria a. Step-a Dominic rawn chho thawm ka hriat chuan maimitchhingin ka muhil der ta a.

Pindan chhunga a rawn luh chuan light pawh ti eng hran lovin a in phelh mawlh mawlh a, ka bulah chuan a rawn inthawlh ve nghal a. "I muhil lo tih ka hria, Kiara mangtha le," tiin a rawn phun sap a. Lehlam a hawi nghal hmak bawk, kár lovah a muhil zui nghal a.

Dominic khawsak phung chu ka ngei zawng tak a ni. Țha takin thil a sawi dun theih! A tih ang hian ka ti ve thiam khawp mai!

Khum bul dawhkana thingpui no innghat ri chuan ka mutui lai chu min ti harh a. Makti takin ka meng chhuak nghal vat.

Khum bulah chuan Dominic chu inchei peih diam hian a lo awm a, a nui deuh var var a. Mahse nizana a awmdan avang khan ka lungawi hlawl lo.

"Thingpui min pek kha angai hran lo ang, Elina khawnge?" Ka ti hmak a.

"Keimah ngeiin pek che ka duh si alawm."

"Ka lawm e, nidangah chuan min pek angai tawh lovang, ka mamawh chu Elina ka hrilh mai ang."

"Kiara, nizan kha pawi ka ti lutuk..."

"I duh danin i nung thei alawm Dominic, min ngaihtuah der anga lan kha a țul hran lo a nia." Ka thinrim zia hi hria se chuan a insawi fiah nghal zung zung duh ang chu...Mahse 'a pawi ka ti lutuk' tih bak sawi tur a nei hleinem...

"Thinrim ringawt țhin lo la...kan buai lutuka rawn phone na hun che pawh ka nei lo."

"A nih chu..."

"Vawiinah ka rualin company ah lokal turin ka duh che, i car tur chu rawn thlang la a țha ang," a ti leh a, thinrim hmel pawh a pu lo..a dam thluam a, chu chuan ka thin a tirim tulh tulh thung!

"Ka mamawh lo ka tih kha, bákah i pa in min pe dawn! Min pe lo a nih leh ka lei ve mai ang!"

"Ka pa ti teivet suh." A ti hluk a.

"Ka pa a nia lawm, i pa pawh a ni tho bawk. Min lo chhuahsan theih chuan intihfai ve ka duh a nia," ka ti hmak hmak a.

"Kiara, i lung a awilo a nih chuan min hau mai la, hetia naupang chhia taka awm hi bansan a hun tawh khawp mai!" a ti zawk mah a. Lutuk hian, amah zawk hi lawm dik lo chu....

"Min puh țhak suh...niminah pawh..."

"Kiara, nimin leh nizan chungchang kha chu ka sawifiah thei!"

"Oh...kal phawt mai teh, i rualin ka kal dawn lo tih ka sawi nawn leh e," tia thovin bathroom lam ka pan san ta daih a.

A phun hluk ri chu ka hre pha a, enge a sawi tih ka hre tawh lem lo.

Dominic Pov*

Kha zan a ka nau leh Kiara lo mudun ka hmuh khan ka thinlung hi vih zawk ang maiin a na a. Mahse, mak ka tih em em chu engtin nge Kiara room-ah Gavin kha a chhoh theih!? Tlai a ka phone lai pawhin Talinda bulah dinner a eitur thu min hrilh thlap a. Talinda ka biak khan chutiang engmah a sawi lang leh bawk si lo.

An pahnih khan zu rim an nam hum hum a, Kiara aimahin Gavin kha a rui zawk bawk. An pahnih khan an chesual lovang tih ka thinlung hian a hre thei tlat a ni. Tu emaw chuan kan unau inkár tihchhiat a tum chiang! inrawlh chu an awm a ni.

Talinda han puh ngawt dawn ila ințhianțha tak an ni bawk si. Rilru buai zetin tun thleng hian ka la awm phah a. Gavin nen pawh kan inkár a hla dawrh lo thei lo.

Rang takin Kiara ka nei ta chuk chuk kha a nia. Inneih thutiam kan chham zawh hma kha chuan ka thla a muang thei lo. A luhlul ve nasa si a, a rilru thlákin min nei leh duh lo mai ang tih ka hlau a ni. Kiara ala thianghlim tih ka hriat zan a ka hlim zia kha... Nula thianghlim hi ka mutpui ang tih ka mumang lamah pawh ka la mang chhin ngai lo...

Min haw viau emaw ka tih lai hian mak deuhin a rilru a hmin hma leh lawi sia..A țhiannuin a țawngkhum dan kha ná a ti hle tih ka hria! Hnem ka duh a, mahse a hunlai khan ka thinrim ve em a ni. Kan mut dun hnu lawkah ka unaupa nen khum khatah saruak deuh thawin an lo awm dun a. Rilru nat lutuk leh thinrim lutuk hian duh ang paw'n a lo chét theih loh a nih hi...

Kan inneih chungchang ka pa ka hrilh khan a lawm lo mai nilovin a thinrim hle a. Kiara hmuh pawh kha a tum lo...theihtawpa ka nawr fe hnu ah áw min pawh chauh ta kha a nia. Amy ka secretary leh ka girlfriend hlui ni bawk hi a ngaithei țhak lo. Company tan țangkai hle lo phei se chuan a pêt chhuak daih tawh ang.

Seattle-a ka penthouse hi ka pa min pek a ni a, Gavin pawhin penthouse a nei tho na a, Jane boral hnu khan ka pa bulah a cheng ta a ni.

Ka pa Villa ah hian Kiara lemziak engemawzat hmuhtur a awm a. A tam zawk chu ka pa leh Gavin-a lei an ni. Pathum vel ka lei ve bawk. 'Maxi' tiin an hre miau sia! Ka pa pawh ka la hrilhfiah lo.

Kiara nen hmangaihna chendun hi ka kham thei ngai lovang! A taksa nél thep leh a pian fuh zet te, a engkim mai hian min hîp vel vek a ni ber mai!

Ka pa nen inhmel hriattir kha ka huphurh hle a. Amy ang khan ná takin a lo hau ang tih ka hlauh vang a ni. Mahse ka ring sual chiang hle tih ka pa leh Kiara an inhmuh khan ka hre chiah. Sakeibaknei thinlung ti ném thei khawp a luhlul ka nupui tereuh hian ka pa George Malakian chu a hneh thei tlat.

Ka pa in ngaisang taka Kiara a melh ka hmuh khan ka lo hlim ve veng veng mai!

Ka rin phak baka rangin kan inneih lawmna dinner a buatsaih ta lehnghal a! Amy sawm tura min tih khan ka nuih a za ru viau! Ka pa ngaihah chuan Kiara hian engmah thiam a nei lo a, anihna diktak a hriatchhuah hunah chuan mak a ti ve khawp ang!

Nimin nilengin ka hnaah ka buai a. Luxurious car chhuak thar kan sales chungchangah meeting vawihnih kan nei a. Kiara biakna hun pawh ka nei lo. Ka inthiam lo hle a, dinner pawh ka ei mumal hman lo.

In thlen hlan ka nghakhlel hle a, ka nupuiin min nghah ka beisei ve em em laiin a lo mu daih sia, a muhil lo tih ka hre ru vek tho...min nghah loh vanga ka lungawi lohna chu thuhran ni se. .. a muhil der kher kha ka tei thei țhak lo.

Tukinah a thinrimna a tilang ta reng a, thiam lo zawk niawm fahranin min la chhuah zui! A duh hi chuan chimawm thiam thei tak a ni tih ka hre ve tawh tlat! Tih lungawi tumin thingpui ka pe ve em em a. Awmzia a awm lo chu a nih hi...

Car present pek ka tum pawh hi ala duh dawn chuang lo tih ka hria. Ka pa in pek a tum thu min la sawikhum lehnghal a! Ngeiawm hian...

Vawiin nilengin vawitam ka call tawh, a pick duh țhak lo a. Luhlul lutuk mai!

Hma tawkah ka haw a, penthouse ka thleinin dar li pawh ala ri lo. Elina leh Joshu chauh an lo awm a, Kiara hmel hmuh tur a awm miah lo. Kan room-ah ka chho vat a, chutah pawh chuan a awm chuang lo...

A wardrobe ka hawng a engkim a awm bawk si...khawiah tehhrep nge a awm le..?

"Elina, khawnge ka nupui?"

"Sir, Drawing room ah ala inkhung char char.." Elina chuan zang vah hian min chhang a. He nu pui roh pawh hian Kiara hi a țan leh tûk tawh..Amy hi a haw em em thung a. Zankhat a lo riah ve pawh khan hmel hlim a hmuh duh țhak lo..

Drawing room lam pan chuan ka pen phei páwk pâwk a. Chhung lamah a la inkalh bur zui...

"Kiara,..."

"Kiara," Drawing room kawngka chu a rawn hawng a, a hmel ka hmuh chuan ka thaw huai mai! Reilote ka hmuh loh pawhin ka buai vek zel chu a nia! Hahthlak hian...!

"I lo va haw hma ve.."

"Ka ngai tawh che," tiin ka pan hnai ruak a. A lo țang țeuh thung.

"Rawng ka kai ania, Dominic."

"A pawi lo..eng em em nge i lo ziah a?"

"Sawi chi loh," a ti sap a. Chutia atih veleh drawing room-ah chuan luh tumin ka pen a. "No, Dominic, ka la zo lo, tumah luh ka phal lo." A ti hlar a.

"I pasal ka nia lawm, ka hmu ve ngei tur a ni."

"Ka hna ka zawh hmain tumah ka entir ngai lo," tiin ka áwmah min nam dat dat a.

"Ka lut dawn tho tho," tih pahin amah chu ka nam sawn deuh a. Chu veleh rang zet hian ka nghawngah min rawn kuahin ka hmuiah a rawn fawp ta hmiah a. A chetdan maksak zet avang chuan ka ham haih viau!

Duhthawh tak hian min fawp tán tán a. A hmui lum ham ham leh a ka chhung sa hiam chuan min tiphur kher mai! Min fawp reng chung chuan zawimuangin min penpui pah zel a.
Phakar reuh lutuk!

Țhutkhawmna pindan kan thlen chuan thawchham lek lekin kan inthlah ta a. A meng phelh phang mai!

Ka business suit hák chuar lai chu a rawn chul mam thuak thuak a, chutia a tih pah chuan ka mipatna chu a tawk pah zauh a. Chimawm lutuk hian a nui hak bawk.

"Wife..kan hna țan ang le..." tiin min hnial hman hma chuan ka pawm nawlh a, bedroom-ah ka luhpui ta a.

Carpet dup tak chungah chuan dimte hian ka nghat a. "I thawmhnaw a bal vek dawn a nih kha," a ti leh sap a.

"I tan te chuan ka thawmhnaw zawng zawng pawh bal ang hmiang," ka tih chuan nui sáng hian min chum taih a. A chang hi chuan a chét dan hi a cute riau zel.

Bathroom-ah ruak vekin kan lut a, shower hnuaiah ding dunin kan inphuhtir leh sar sar a. Scrubber-a, a hnung ka nawh sak lai chuan keimah zawk hi ka dik lo leh tlat tawh...!

"I vun mám nalh zet ka nawh pilh hma hian min náwt ve rawh le.."

"Dominic... kan hmanhmawh loh chuan Elina kan ti thinrim ange, dinner ei a hun dawn a nia!" A ti ta a.

"Elina buaipui lovin i pasal hi min buaipui zawk rawh..." ka tih chuan a nui sak a. A chezia engkim hian min hip vel vek a ni.

Kiara hmai huh hliam chu ka kut chuan ka dawm a, tléma kuai dák deuhvin a hmuiah chuan ka fawp ta a. A taksa ka chul lawr dan dan a, ani pawh chuan ka hnungah a lo chul ve riak riak a, he nu hi chuan min ti á thei takngial dawn!

Bathroom-ah a vawihnih nan duhthawh zetin hmangaihna ka chenpui leh ta a.

Chumi hnu chuan towelin ka tuam leh thlap a. Keipawh chuan towel ka veng ve nghal bawk. Kiara nui har har chu room-ah ka pawm lut ta a.

Kan khuma țhu ka hmuh chuan Kiara nui lai chu a tawp chawt a. Keipawh ka hrilh haiin ka thinrim hle bawk!

Khum bula sofa-ah chuan Amy chu file pawm țeuh chung hian a lo țhu a, kan nupa room-a alo lut ngam ringawt pawh hi ka hua...

Kiara ka lo pawm avang chuan a meng thip deuh rám a. He nu tak hi chu..kan inkar a tawp tawh tih ka hrilh chian teh lul nen....

"Dominic min nghat thla tawh la.." Kiara áw chuan ngaihno a bei fahran lo..

Khumah chuan dimte hian ka nghat a, thinrim insum zet hian..."mikhual room ah ka lo va inthlák ange...kan nupa room hi a lo zalen viau anih dawn hi.." a ti ta a.

Kan boruak țha tur pawh Amy vang hian a chhe leh dawn ta a nih hi...

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 7:19 pm

UNKNOWN MAN

by.Becky Rafa Renthlei

Chapter-21

Kan nupa room chu thinrim țúnin ka chhuahsan ta a. Mikhual pindanah ka lut ta ringawt a. Kei hi enge maw ka ngaihtuah le..thawmhnaw hák tur ka nei reng reng lo. Engtin nge ka tih tak ang?

Ho lutuk kan room alawm le, engvangin nge ka tlanchhiat ngawt ang? Towel nen bawk chuan kan nupa room ah chuan ka lut leh ta a. Dominic leh Amy chu inhnaih fahran hian lo țhu dunin file an lo bih dun a..

Ka lut min lo hmuh chuan Dominic chuan min lo be vat a, "Kiara kan zo har deuh dawn a, Amy paw'n dinner hetah ei law law mai rawh se," a lo ti a.

"I thu thu nimai," tiin ka thawmhnaw hák tur chu ka phawrh zung zung a.

"Kiara min hrethiam mai niang chu, zaninah tihfel ngei ngei angai a, Dominic tel lo chuan a theih si lohva," no zet a Amy țawng chu ka ngaithei țhak lo.

"A țha lawm, nidangah chuan kan nupa room ah nilovin, sitting room ah emaw, study room in pan tawh dawn nia," ka ti hmak a. Dominic nui deuh suk chu rum zet a melh nghekin ka chhuahsan leh ta a.

Mikhual pindanah ka inthlak fel vek a, an ruala dinner ei kha ka chák fahran lo. Pawn lamah chhuakin engahnge ka ei mai lohvang!?

Chokaah Elina chuan dinner tur a lo buatsaih mawlh mawlh a. "Pawn lamah dinner ka ei dawn a, a hranpa a Amy eitur kha kêp a ngai lovang," ka tih chuan a hawi phàwk hle a. "Ma'am, a tihchi lohvang! I pasal thin a rim ange," a ti a.

"Seattle han fankual vel pawh ka chák ve alawm, Joshu hnenah car chahbi ka mamawh thu i va hrilh lawk dawn en niang!?"

"Awle, ma'am," tiin min hnial hreh tih hriat tak hian chu nu thaupui mai chu a kal ta a. Joshu hi Dominic car enkawl tu bik a ni a, company car hire theih ho zawng zawng pawh a ma kutah a awm vek a ni. Elina leh Joshu an lo lét leh chuan verandah ah ka lo ding vang tawh a.

"Ma'am, engber nge i hman dawn, boss in a hria em?" Min zah hle tih ka hre mai...!

"A hnaah a buai deuha, pawnlamah dinner ei ka duh deuh a. Min hruai mai ta che."

"Ok..Ma'am, i tih dan dan a ni mai!"

Joshu chu a hmelțha reuh hle a, English ho vun rawng a pu deuh. A sam buang thang mai chu sei lutuk lovin a zuah a. Garage ațang chuan Mersides chu rawn khalh chhuakin ka luh nan kawngkhar min hawnsak thlap a. Engmah sawi tawh lovin kan tlan chhuak ta a.

"Kal duhna deuh bik i nei em, ma'am?" Joshu chuan car khalh pah chuan min rawn melh zeuh a.

"Seattle-a restaurant changkang ber leh tuina berah," tiin ka nui var var a. Joshu pawh a nui ve ta hak hak a, he pa hi a fel dawn reuh tlat...Thianghlim takin hmanruaah ka hmang dawn em niang?

Ka phone vibrate char char chu Dominic bák a ni chuang lovang...ka switch off ta daih a.

Joshu min hruaina restaurant chu a nuam hle a, ka bula țhu tura ka sawm tlat avangin nuam lo ti hmel deuh min hnial ngam si lo hian a țhu a. Kawm tlángnel a Amy chungchang zawh ka tum a ni.

"Josh, inthlahrung lovin wine kha in rawh, rui khawp erawh chuan in lo la," nelawm thei ang berin ka nuih a.

"Ma'am ka lawm e," a polite hle hian ka hria.

"Ma'am ti a, min ko tawh lovin Kiara min ti ve mai la, țhian kan ni thei reng alawm."

"Mahse...Boss hi.."

"A ho lutuk, ka hnuaia thawk i ni hleinem! Dominic hnuaia thawk zawk i nia, a pawiti awm lo emai!" Ka ti vat a.

Hahdam huai hmel a pu...

Waiter-in wine min thlit sak chu ka lem hlek hlek a. Kan eitur chah a lo thlen meuh chuan no hnih ka in zo der tawh.

"Amy hi company ah a thawhna a rei tawh em?"

"Rei tawh e, Mr.Malakian senior zawk a chawlh tâk ațang khan ala thawk char char."

"Dominic nen hian an inkawp țhin tih ka hria a, engvanga innei lo nge an nih!"

"Malakian mo atan a tling tawk lo an ti a," Joshu chuan tím deuh hlek a ti ta a.

"Ka dil chhût mai mai a nia, Gavin phone number ka ti bo daih a...min pek tur i nei mial em?"

"Yes, Ma'am, Gavin Sir, nen chuan zu kan indun țhin alawm." tiin a phone chu a phawrh a. Gavin number lehkha themah chuan min ziah sak thlap a. He pa hi a fel reuh riau a ni.

"Josh, mamawhna che ka nei fo in ka ring a, min puih zel ka ngai dawn a nia. Malakian motors company in a, an siam chhuah zingah hian ka duh ber car ka thlang thei a, eng hi nge țha ang?"

"Tuna a thar ber chu BMW 7 leh Jaguar XJ, a ni a. An nalhin khalh pawh a nuam viau, i thlang dawn a nih chuan ka sawi pahnih te hi an țha," a ti a.

"Ok..ka lo hre reng dawn nia, i plate a mi kha ei tawh rawh le..." ka tih chuan thuawih tak hian a plate lam chu min ngaihven san ta a. Kei pawh țawng zawm tawh lovin eitur tui hmel tak tak chu ka ei ve ta a.

Car changkang tak neih hi ka chákna a rei tawh bawk a. Amy runluih nan hrim hrim pawh naktukah company ah chuan ka va kal ang! Dominic hruai lovin Joshu hi ka hruai bawk anga!

Dominic..Pov*

Bathroom a hmangaihna kan chen hnu chuan ka hlim hle a, Kiara hian thup tum viau mahse min duh ve hle tih leh tisa thil tak pawhin min mamawh tih ka hria! A tan a mipa hmasa ber ka ni a. Chu chu engthil mahin a thlák danglam thei tawh dawn lo.

Kan bedroom a Amy lo țhu ka hmuh chuan ka thinrim phat a. Kiara pawh a lawm hauh lo, engtin nge helai thleng thlenga a lo luh ngam ni!?

Ka rin ang chiahin Kiara chu a thinrim ta ngei a, mikhual pindanah inthlák turin min chhuahsan hmak. Amy kha a hau hrep ka ring deuh kha a nia, chutianga ti ta lo chuan keimah zawk min dem hmel a pu daih a, chu chuan ka awm a ti nuam chiah lo.

Office ka chhuahsan hma avangin sign tur engemaw zat rawn thleng leh Super car ho test na tur atan a kan oil chah list rawn thleng chu Amy in a rawn dah a. Kiara chhuah hnu khan Amy chu ka hau nghe nghe a ni.

"Naktuk nghak mai ta che, kan nupa room hial rawn luh phah nan chuan a ho deuh lo maw Amy!? Ka ti chang fak a.

"Oh...Dominic pawi ka ti lutuk, mahse zaninah list hi ka thawn lêt angai sia lawm," fel ber ang mai hian a ti a.

"Chupawh nise min rawn phone thei reng alawm!"

"Phone ah i hming i sign thei a mi?" A ti leh khauh a. A dik angreng viau bawk si. Engpawh ni se, a lo kal ta rau rau bawk a, ka buaipui mai niang chu...

Dinner eitura kan chhuk chuan Kiara ka zawng nghal vat a. Amy pawh ei ve nghal law law turin ka ti a, kan la zawh fel hman chiah loh avangin dinner ei zawh a, chhunzawm atan kan dah rih ta kha a nia.

Kiara hmel hmuh tur a awm leh ta lo. Drawing room ah a awm ringin ka va kal a, a lo in kalh țhap bawk si. Khawiah tehhrep nge maw a awm leh ták ni...?

Elina chuan tûm deuh hmak hian dawhkanah eitur chu a chhawp mawlh mawlh a. Kiara a awm lo tih hre awm pawhin a lang lo. A tih tur a ti hmiah hmiah a, Amy phei chu melh pawh a melh lo.

"Khawnge Kiara?" Ka tih chuan chhum deuh hmak hian, "Páwn lamah dinner ei turin a chhuak," a ti ta a.

"Tunen, engin nge a kal."

"Chulam chu a pawimawh viau em ni? Ka hre miah lo. Pawn lamah a ei dawn tih chiah a sawi."

"I lo remti mai amaw? Lo dan tur che alawm, a nih loh pawhin min hrilh thei reng Elina!" Ka tih chuan inthiam lo hmel pawh pu chuang lovin, "Mrs.Malakian a nia lawm, ka dan theih a ni hleinem! 'Ei pui tur a nei thova Seattle hi kan fang kual ange' a ti anih kha," a ti ta a. Kiara mai mai chu.. ka house keeper te nen lam a lamțangah reilote chhungin a siam fel der chu a nia!

"Duhtak, ka ril a țam viau a nia, i nupui chu a lo kir leh em em ang, khatiang polite lo lutuk leh thiam nei bawk si lo kha, engtin nge maw i neih theih zawk le...?" Amy țawng dan mai mai chuh...

"Lo ngawi hmak rawh," ka ti tuarh a.

"Sawi dik loh ka nei em ni? A tawpah chuan keimah bawk min rawn pan leh tho ang, Dominic, min runluih nan nupui i nei tih ka hria alawm," zám map lo hian a la ti zui ah...Elina hi chu awm lo se ka béng tawh hial maithei a ni...he nu hian min tibuai reng dawn a nih chuan ka bán mai angai dawn a ni.

Hna leh mimal thil inkaihnawihtir ka duh hauh lo nain, ka tih ngei chu a la ngaih hmel...

Amy nen chuan ngawirengin dinner chu kan ei dun ta a. Ka thil ei pawh a tui nek lo ve.. Kiara ringawt ka ngaihtuah a. Amy ka haw tawlh tawlh thung! Wine chu ka in deuh mawlh mawlh a, ka plate a eitur inchhawp pawh ka khawih bar lo.

"Dominic, i eitur kha ei ve phawt la," Amy chuan no zeta min melh pah chuan a ti a. He nu beidawng duh lo lutuk hi engtia tih chi nge maw ni...?

"Ka ril a țam lutuk lo, tikhan lo ei la, intur ka lo dawm ange. Kan hna hi khawih zo vat ila haw thuai ang che."

"Darling...engemaw i sawi le...i nupui láktlak loh zet kha theihnghilh teh."

Ka chháng buai peih tawh lo.

Țhutkhawmna pindan lamah ka phei san ta daih a. Zan dar kua a ri tawh a, Whisky tak țha zet chu ka lem khawlh a. Ka nupui...chu ringawt chu ka ngaihtuah!

Amy nen list kan peih fel meuh chuan a tlai tawh hle a. Penthouse kawt a car ding ri ka hriat chuan chhuak lo turin ka insum țang țang.

Kiara leh Joshu rawn lut ka hmuh chuan mak ka ti hle a, taxi a hmang mai turah ka ngai kha a nia. Joshu a lo hruai tel ang tih ngaihdan ka nei hauh lo.

"Khawiah nge in kal.." Kiara en lovin Joshu chauh chu ka melh a. Ka hnathawk te zinga rintlak leh fel ber a thlang nghal chat thei a nia! Ka nupui nge nge a fing teh e...

"Sir, Kiara hi dinner ei turin ka hruai chhuak mai a nia!"

"Kiara a....hming hmasa a in ko ngam tur khawpin in lo innel hman a maw!" Ka ti hmuk a. Ka lawm hauh lo...kei ai chuan Joshu hi a naupang daih a..nula lamah pawh a tla na ve riau! Kiara hian a lo mitmei a nih vaih chuan...He mite pahnih hi enthlak deuh an ngai dawn a ni. Joshu hi hna thiam tak a ni bawk.

"Dominic, tun hi thil sawina hun a ni lo, inbiak i duh chuan study room ah kan inbe thei ang, i hnathawk te awm laia insawifiah ka tum miah lo," tiin Amy chu a melh deuh kher a. Chutah Joshu lam hawiin, "Restaurant nuam takah min hruai vangin ka lawm e, Josh..i kal thei tawh ang!" zám eih lo hian a ti ta a.

Joshu chuan min bûk khum zauhvin ka nupui chu hmel hlim tak a hmuh a.. a mangțha sap hnu chuan a chhuak ta nghal a. Kiara pawh chuan a en zui deuh vang vang nghe nghe.

"I kianga dinner ei ai chuan i hnathawk bula inhnawh puar a chák zawk a ang hle mai, i nupui chuan," Amy chuan meng ralh ralh chung hian a ti a.

"Amy lo țawng suh..." Ka ti hluk a.

"Hna chungchangah hi chuan inrawlh ve ka tum lo a, ka pasal hi ka ring tawk a ni. Páwn lama dinner ka eichhuah chhan i hre duh anih chuan sawm loh mikhual nen a dawhkan khat kil ka duh lo mai a nia! Nidangah chuan dinner, lunch, breakfast engpawh chu ni rawh se, kan company hnuaia thawk i nihna angin kan sawm hun che i nghak țhin dawn nia...Miss Raymond." Kiara chuan a ti dam thlap a. A mitmeng erawh chu a kawlh hrá thung.

"I pasal company hi i ta emaw i ti nghal ngawt tihna mi? Kiara," Amy chuan a ti bak hlar a. Ka inrawlh duh rih lo, engtin nge an in tih tehreng ka hre chák tlat pek a nih chu.

"Ka ta nilovin, kan ta mawle..chuan Kiara nilovin Mrs.Malakian tiin min ko la ka lawm khawp ang! I boss nupui ka ni tih theihnghilh lo bawk la, Miss Raymond," nui lui sang hian a ti leh a. Nui chhuak lo turin ka insum char char.

Ka pa khan a lo sawi dik hle mai! 'Leili hriam tak, luhlul leh kawlh bawk si' Kiara a sawidan kha tuna a khawsa zia chimawm tak hi a ni chiah. Ka pa, khawvel pum huap a, Motors company lian ber chairman pawh hlau lo tu ka nupui kha a ni miauva. A hlau lo ka tih hian a sual ém e; tihna a ni lo. Rilru țhatak pu tho chung siin a dikna ah chuan a țang ngam tlat!

Ka nupui hi a lo hlu hleuh hleuh em a ni. A rilru țhatna hi ka pa hian a hmuh hmaih lo tih ka hrethiam ve chiah...

Amy te ang sum chauh ngaihtuah ai chuan a lo țha fê...ka thlang sual lo ve, min han hmangaih bur phei se chuan ka nun hi a famkim mai tur!

Kiara chhan dan avang chuan Amy hmai chu a sen deuh țáwn țáwn a, a thin a rim hle tih ka hria. "Dominic, i nupui hi zilh deuh la a țha ang, mi hausa nunphung a tem thut a, awmdan a thiam lo a nih hi.." ka lam hawi chuan țap lek lek hian a ti ta a.

"Mi nupa room a lut dûk dûk secretary hi ka ngaisang lem lo," ti hmakin Kiara chuan a pheikhawk bun chu a tlawh phelh a. Amy pawh chhang lem lo chuan Kiara che vel chu ka en reng.

"Dom, min thlah tawh la, taxi in ka lo kal a, tun ang hunah chuan taxi vák vel hmuh tur a vang tawh awm sia" tiin ka țhutna bul chetah chuan a rawn tawlh phei a. He nu hian boruak a ngam mah mah chu a ni. Mahse ka secretary a la ni tlat sia, a haw dan tur chu ka buaipui a ngai dawn a ni.

"Honey, Amy hi ka va thlah lawk dawn em niang?" Kiara chu ka ráwn a. Tun dinhmunah chuan tih thinrim ka duh miah lo.

"Joshu ni lo, driver dang kha ko mai rawh, taxi chu a awm tho chuan ka ring a, dar sawm chiah a la nia...." ngeiawm lam lek lek hian a nui hak a.

"Ok...Amy...pawn thleng ka thlah ang che." Ka tih chuan a meng kal ralh a. Ka bánah a rawn vuan chat a, chu chu Kiara chuan a hmuh hmaih miah lo tih ka hria.

"Room-ah ka lo han chho ange.." a ti ta a.

Amy nen pawn lamah kan inzui chhuak a, ka Penthouse piah mai a cottage ah ka hnathawk ho te hi an chéng a. Chu lam chu ka pan pui ta a.

End of Dominic pov*

Dominic leh Amy chhuah hnu chuan kan room-ah ka chho ve nghal a, kha nu min țawngkhum dan kha pai daih harsa ka ti kher mai.

Pindan tukverh zawn hnuai lama nui thawm awm chuan ka beng a verh zar mai! Curtain chhah țha zet chu ka keu nghal vat. Inchhung éng chhun phák a hmeichhe ding chu ka hmu a, a hmel hmu lo mahila a sam dum hlap ațang chuan Amy Raymond tih ka hre thei!

Thim zing ațang chuan Dominic chu a rawn pen chhuak a, Amy kutah chuan a chelh sak ta a. Nui thawm ka hriat pawh kha an pahnih hi an ni ngei ang!? Ka hmuh laia an induat hman ták loh vangin pawn lamah an chhunzawm dawn a nih khu...

Hawisawn san daih ka duh a, mahse ka hawisawn mai thei si lo. Mercides car dinna lamah chuan Amy chuan Dominic chu hruaiin chu hmeichhia chuan Dominic nghawngah chuan kuahin alamah a kuai kun leh deuh a. A hmuiah chuan a fawh sak ta a.

Ka ten lutuk! An pahnih chuan duhthawh zet hian an infawp a.

'Â lutuk, á lutuk.....'sehchilh deuh rap rap chung hian ka ti chhuak a, pindanah chuan ka vei sek. Chutah khumah chuan ka bawk leh thlawp a, an lo inthlah thei ngang lo a nih dawn kha...Kei hi ka lo á takzet a ni...Bum nuam min va ti dawn ve..

Hmeichhe dang a fawp ka hmuh chiah khan ka thinlung chhungril ber hi a che dat...A chhan chu Dominic hi ka duh mai ni lovin ka lo hmangaih vang a ni. Ka thil hriat thar chuan min ti lungngai sawt a. Hmeichhe dang nei reng tu hi ka lo hmangaih ta a nia... Engtin nge hmá ka lák tak ang!?

Step-a pen thawm ka hriat chuan nui hmel ka pu lui hram hram a. Engtia lo hmachhawn tur nge niang? Ka áng chiam dawn nge? Ka lo sual hrep dawn?

Ka thinrimna, ka mitmenga langchhuak lo turin ka inthunun fe a ngai dawn a ni. Room kawngka chu a rawn inhawng a, Dominic chu a rawn lut ta a. Ka thawmhnaw pawh thlák lova khuma ka lo la țhu a hmuh chuan, "Eng thil nge i ngaihtuah a?" tiin a nui hawk a.

"Engmah ka ngaihtuah lo."

"I hmel kha a chiai tlat Kiara," tiin ngun fe hian min rawn en a. Ka kalsan lai che kha chuan hetiang hmel hi i pu hauh lo."

"Min rawn tiphu deuh alawm mawle.." nui lui chung hian ka ti a. "Awle, i phut vanga khatiang hmel kha pu i nih chuan honey, i thinur laia i hmel landan nen a inang chiah tih ka hrilh ang che. Amy vang kha a nih chuan pawi ka ti khawp mai! Khatiang kha a thleng nawn tawh lovang!" Dam thluam hian a ti a.

"A dik, kha nu kha ka lawm hauh lo. I la duh anih te chuan a bulah khan kal law law la."

Ka țawngkam hman avang chuan Dominic chu a khawng deuh lah a. "Enge i sawi awmzia Kiara? Ka nupui bulah lo hian khawimah kal tumna ka nei lo. Zaninah hian," a ti hmuk a.

"Pawna thil thleng ve thung kha? Tunge a secretary kut vuan a, fawp tu kha!?" Ka ti chhuak ta nge nge a.

"Kha chu ka sawifiah thei Kiara, ka tum reng vang a ni lo."

"Ka mit a del lo a nia aw, Dominic, tihpalh ni lovin, thilthleng tur diktak a ni. I girlfriend thup nan kei hi nupuiah min nei a ni...Tenawm lutuk!" ka ti țhawt a.

"Chutiang a ni lo, ka sawifiah thei ka tih chu..." Dominic áw a hrehawm tihna lo lang chu ka hre lo der ve tlat.

"Ni e, Amy nen in infawp lai kha sawlai tukverh ațang sawn ka hmu. Phat tum tawh suh," tiin tukverh lam chu ka káwk va a.

"Kiara, kha chu tihpalh a nih kha, khatiang khan a che ang tih ka hre bik miah lo!" tiin min rawn pan hnai a. Rum zet a ka lo melh avang chuan a ding leh chawt. "Khawngaihin thinrim suh, kan inkár a tawp daih tawh ani nen khan."

"A la tawp lo chu a nih kha, kan mutna pindan thleng thlengin a rawn lut a. Chutah in la infawp leh ta nghal...Ka lawm hle mai, i nihna diktak ka hre chhuak hma a, chuti ni lo se chuan min duh ve tak tak emaw tiin hmangaihna ka chenpui leh che emaw a nia nga...!"

"Ka duh che...Ani kha ka duh lo, vawi engzat nge maw ka sawifiah a ngaih dawn le... min ring rawh ka tih chu.." Dominic áw a beidawnna lang chu ka hre thei. Mahse ka rilru ka sawh sawn dawn lo...Amy nen an infawh lai khan duh lo tak tak ni se, a nem sawn em em ang!? Chutianga ti lovin a infawhtir tho...Dominic hi ka hua....An pahnihin ka haw lutuk...

"Awle...min lo hrethiam la..." Ka thinrimna chu tilang duh tawh lovin, "Pindan hran nei ila a țha in ka hria, zanin ațang hian.." ka ti ta a.

Dominic hmel chu thinrim vangin a dur deuh khup a. Chutah khuma ka țhu lai chu min pawt thovin, "He pindanah hian ka awm anga, nangpawh i awm bawk ang!" Ka mitah tak min en chungin a ti thum chhak a.

"Teuh lo, nang nen khum khata mut dun ka duh tawh lo," tiin min vawnna ațang chuan tál chhuah ka tum a.

"I mu ang, i mu khawp ang, ka khawih i duh lo a nih erawh chuan ka ti lui lovang che, hmeichhe duh lo chung khawih luih hi ka châk lo ve," tiin min thlah thut a. Chak zet hian pindan chu a chhuahsan ta a.

Ka ruak nghal huai mai! Mahse hmeichhe dang nen min kawptu lakah hian inpek ka tum tawh lo....

Hmeichhe dang a kawp thei a nih chuan mipa dang hmanruaah hmangin ka kawp ve thei khawp mai!

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 7:20 pm

UNKNOWN MAN

by.Becky Rafa Renthlei

Chapter-22

Dominic a'n min chhuahsan hnu chuan kan nupa khum zaupui maiah keimah te chuan ka mu meng kar a. Tunah chuan ka rilru chiangtakin ka hre tawh a. Dominic hi chán ka duh lo, ka hmangaih a, hmeichhe dang lakah phei chuan chán ka duh lo leh zual.

Mipa a thîk tur han kawp mai tur ka hre bawk si lo. Huizz..ka rilru a buai! Joshu kha a țhat viau ka ring a. Mahse Dominic tan chuan a hnathawk te chu er tham an ni dawn hauh lo...

Gavin a țha ber ang! Ka harsatna zawng zawng hi hrilh vek ila min pui thei ngeiin ka ring!

A tlai tawh viau na a, ka call lui ta thova, vanneihthlak takin a pick hlauh.

"Hello, Gavin, Keimah Kiara," Tháwk a lak hawk danah mak a ti hle tih ka hre mai!

"Kiara, nang maw! Ka ú chu a lung a la awi thei na nge?"

"Chulam aimah chuan, min puih ka ngai a ni...khawngaihin arang lamin Washington-ah i lo kal thei angem?"

"Engthil nge ni ta? Pawi ka ti lutuk! Hman zana thil thleng kha..."

"Kha lam kha chu theihnghilh hmiah rawh!"

"Ok..naktip ah rawn kal ka tum dawn nia!" A ti ta a.

Phone ka dah hnu chuan muhil thei lovin ka let kual sek a, zinglam dar thum a rik pawh chuan Dominic chu ala rawn mu lo...Duh leh mu lo daih rawh se...Amy chenna hmunah a kal zawk pawh a ni mahna...

A tuk zing a Dominic hmel ka hmuh meuh chuan breakfast ka ei diam tawh a. A hmel pawr fap leh meng sen rám ațang chuan mut a hmu bik vak lo a nih hmel! Nizan lamah an che nasa viau a nih dawn hi...Ka chhungril na zawk avang chuan biak pawh ka tum lem lo.

Kan mutdun hmasak ber ațang khan thla aral tawh a, achangin min duat awm em em in a awm a. A hmei nu thup nana min nei hi ka haw lutuk tlat..mahse ka hmangaih tho si...

"Kar leh thawhlehni khi ka pa in a party kan neih hun tur kha a nia, i lo inbuatsaih dawn nia," chhum hmuk hian a ti a. Ka pa (George) tiin ka sawi zel tawh ang. Ka pa inah kan party dawn a nih chuan ka lemziak kha a rang lama peih hman ka ngai dawn tihna a nia!

"Awle..min ngaihtuah duh suh ka inbuaipui ve thei e.." ka ti ve hmak. Mitmeng zim san a min en chu rum zetin ka melh lét nghek a. A hawi sawn rang khawp mai...

Dominic pawh ngaihsak tawh chuang lovin, kan room-ah ka chho a, ka thawmhnaw ka thlák vek bawk a. Vawiin hian an company car siam chhuah thar ber chu ka lei dawn khawp mai! Ka duh duh a ka hman a tan! Ka credit card ka keng thlap a. A thláwna dawn ka tum ta lo mai... Ka pa in a hriat chhuah hunah chuan a lawm hauh dawn lo tih chu ka hre sa a...Sum lian tham em em hmanna tur ka nei hleinem!

Ka chhuak tur Dominic a'n min koh țáwk țáwk na pawh chu hre lo der in ka kal lui ngáng ngáng a. Ka in enkawl ve thei chiang emai...

Malakian Motors company tih inziah kulhna ka thlen chuan zam miah lovin ka lut a. Counter hmasa ber a lo țhu, mipa chuan min lo dawngsawng țha hle. "Puih theihna che ka nei em?"

"Joshu hi khawnge ka hmuh theih ang." Tukinah hma takah a kal tih Elina khan a sawi tlat.

An boss nupui ka ni tih hi hriattir ka tum rih lo. Dominic leh Amy an lo thlen hma ngei a tihfel hman ka duh..

"Show room lamah a awm a, ka hruai dawn che em ni Miss?" Polite tak hian a ti leh a. "Maxi Forbes, Maxi tiin min ko dawn nia," ka artist hming ka hrilh ve hmiah.

"Maw! Maxi maw! London-a artist hmingthang deuh kha chu i ni lo tiraw!" a ti leh te te a. Ka nui ru sak!

"I hre dik chiah e..Boy.." Tiin ngaihno bei thei ang berin ka nuih a.

"Oh...My God... ka awih thei lo...ka hmu che hi ka lawm e, kan company hian kan lo lawm bawk a che.." Phur sarh hian a ti a. Ka plan a fuh chho țan dawn chiah...

"BMW 7 en ka duh deuh a, tin, Joshu hmuh ka duh bawk..."

"Kan manager Josh nen in inhriatdan chu ka zawt lo mai ang che," tiin counter chu rawn chhuahsanin, show room lamah min hruai ta a.

Show room chu pui tak a ni...Luxurious car tam tham zet a tlar dul a, Malakian hausak dan tur chu pui tak a ni.

Joshu kan hmuh tákah chuan counter nghaktu chuan nui var var chung hian min lét san ta a.

"Hi..Kiara...Ma'am.." Joshu nui hmel ka hmuh chuan Dominic laka ka thinurna pawh a kiang huai mai.

"Ma'am tih tel kher lo khan aw...Tunah chuan boss nupui ka ni tih an hriat ka duh lo.." a beng bulah ka va hrilh ru sap a. Min hrethiam zetin car chhuak thar chu min kawh hmuh țan ta a.

Darkar chanve tehmeuh kan en hnu chuan BMW 7 1.17 Crores man chu ka thlang ta a. A colour pawh metallic ngat, Alpine white ka thlang a. A chhan chu colour dang a tam viau a ka thlan ang kher hi chu company first choice a ni. Malakian cars company chhuan vawr ber a ni bawk.

A man zawng zawng leh tihfel ngai ang kan tihfel vek hnu chuan ka ta liau liau a ni ta. Lunch pawh company counter duty leh show room a sales manager thlengin ka treat vek a. Vawiin hi ka hlim ni ve ber a ni. Kiara forbes hmán a mi kha ka ni leh ta.

Company-a hnathawk ho chuan min ngaisang tak hian hmel hlim tak min hmuh vek a. Maxi forbes hmingin car kha ka lei miau alawm...Kiara chu an hre lo...Maxi, Artist lar, Thompson fanu lemziaktu turu zet kha ka ni tlat alawm.

Dominic dron Malakian nupui ka ni tih an hriat hunah phei chuan engtin tak awm ang maw!

Nileng deuh thawin company ah chuan ka awm a. Dominic leh Amy hmel reng reng ka hmu lo. Joshu erawh chuan a boss nupui ka nihna angin min zah viau a. Maxi ka ni tih a hriat laia a hmel landan kha nuih zat thlak tak a ni.

Tlailamah Seattle bazarah thawmhnaw engemaw zat ka lei a, vawiin bák chu chhuahna hun ka nei dawn tawh rih lo. Party zana hák tur thawmhnaw ka lei ve ngei ang chu... Engkimah a țha thei ang bera lan zel ka tum tawh a ni. Ka nihna ka thup reng hi a țulna pawh ka hre tawh lo!

Shopping mall tam tham fe ka tlawh a, tlailam kawrfual leh pheikhawk engemaw zat ka lei bawk. Tumah dipdal tu awm lova hun tháwl tak hnuaia tei vel chu nuam ka ti kher mai.

Tlailam darthum arik chuan, Penthouse lam ka pan ve ta chauh a.

Inchhung ka luh chuan sofa-ah Dominic chu lo țhuin, zu no hi a lo dawm a. Ka in pawm báwr lûk a hmuh chuan rum zetin min melh a. "Khawiah nge i kal, engtinnge i rawn haw?" a lo ti hlur a, a mitmeng chu a hlauhawm kher mai!

Ka mitko chu ka san khum ák a, ngaipawimawh lo thei ang ber a lan tumin, Car chahbi chu ka khai lang va va a, "Car thar ka lei mawle, ka bazar nghal bawk."

Nghet lo deuh takin a rawn ding chhuak a, "Takzet? Car lei ngai khawpa rethei ka ni em ni? Hman tur nei lo ka nia mi?" a ti vin tuarh a. A rui hle tih ka hre mai!

"I car alawm, keima puala neih hi a dik lohna ka hre lo ve," ka ti ve hmak.

"Kiara, min cho thinrim suh aw, car hmansen loh ka nei a, a thar pawh pek che ka tum a nih kha, i pasal hi engahmah min ngai lo a ni maw?"

"I duh leh i secretary kha pe la, kha Amy ve khan min țawngkhum na tura awm ka tum reng reng lo."

"Amy rawn sawi tel suh, i car thar chuan tu mipa nge i lo chhuah pui vel a?" Sehchilh deuh hian a ti leh a.

"I hriat ve zel a țulna ka hre lo ve, zanin ațang chuan mikhual pindan ka hmang tawh ang! Chu chu i lo hre dawn nia," ka ti ta a.

"Kan pindan kha i chhuahsan ngam phawt chuan chhuahsan ang che, mahse enge ka tih tur i lo thlir dawn nia!" A ti chhar chhar a.

"I rui a nih kha," tiin ka thil lei ho chu chhuatah dahin choka lamah ka luhsan ta daih a. Elina chu ka thil lei vel min thiar chhohpui turin ka sawm ta a.

Mikhual pindanah a zualpui chu ka inthiar phei ta vek a. Duh leh Dominic chu thinrim mai mai rawh se. Kan nupa room; a hmei te'n duh duh a an rawn palzam kha ka en liam mai mai dawn lo.

Ka inbual zawha ka inpeih fel meuh chuan dinner ei hun a ni daih tawh a. Inhnuai lam thawm reh țhiap chu mak ka ti angreng viau! Elina chauh a lo awm a.

"Khawnge Dominic?"

"Ma'am a inkhalh chhuahna a rei tawh."

"Engtik laiin, a rui hle sia!" Engtin nge khatiang chunga motor a khalh ngam zawk le...

"Inchunga i awm hlan khan. Dinner chu ei san daih mai rawh." Elina chuan lawm hmel vak lo hian a ti a.

"Awle, a duh thu a chhuak a nia, nakinah ka phone ange!" Pangai tak hian ka ti ve mai a. Elina chu thawveng huai hmel a pu.

Dinner ei țhulh khawpa pawimawh chhuahna tur a neih ka hre lo. Mahse..ka ngaihtuah ru tho si..khawiah nge maw a kal ni! Rui chung lehnghalin....ka thil ei pawh a tui nek lo e.

Dar kua thleng țhutkhawmna pindanah ka nghak a. A rawn haw ták siloh ah chuan inchung lamah ka chhoh san ta a. Ka pa phone ila a țha ang!

Reife a ring hnu chuan a la ve hram a.

"Pa, Kiara ka nia, Dominic alo kal mial em?" Ka ti nghal tawp a.

"Kiara bawihi, engtizia nge? A rawn kal miah lo."

"Tlai ațanga a chhuak kha a lo la haw lova, kha lamah a lo kal tâkin ka ti mawle," ka ti sap a.

"In inhau deuh em ni? I phone chhin tawh nge? a la duh lo?" Inti hre zet hian arawn ti a.

"Phone lem nang! Amy nizanah a rawn kal a, ka lawm vak lo,"

"Chu nu mai mai chuh...lo lungngai lutuk duh suh, keiman ka lo chingfel ang!" A rawn ti ta a.

Thil hrang hrang party chungchang leh company lam te kan sawi țeuh hnu chuan kan inbiakna chu ka ti tawp ta a.

Engpawh nise Dominic kan phone ve hrim hrim ange!

Reife a a ring hnu ah hmeichhia hian min rawn chhang ta a. Bar nghaktu a nih thu leh a phone a theihnghilh thu arawn sawi ta a. "Bar-ah hmeichhe pakhat nen an rawn kal a, an chhuahna arei deuh tawh" a rawn ti ta a. Ka sa zak mai! Amy a nih ngei pawh ka ring? Bar awmna lai ka zawh hnu chuan Dominic phone lam tur chuan ka chhuak ta a.

Ka car thar khalh chhuak lovin, Dominic Jaguar car chu ka keng chhuak a. Ka thinrim hi ka puakkeh takngial dawn! Phone theihnghilh khawpin a rui a ni ngei ang!?

Bar-ah chuan mi an tam vak tawh lova, Nichin maia ka biak nu khan phone chu min pe in ngaihțha lo hmel tak hian min en a. "Ka pasal a nia, nupa dangte ang bawkin inhnialna kan neih vang a nia," tiin ka sawifiah a. Ka pasal ti a ka sawi zawng ringawt pawhin ka thinrim țun mai.

Chutia ka tih tákah chuan min hriatthiam hmel tak hian a nui ve ta sak a. Hmeichhe sam dum pakhat nen an nih thu țha takin min hrilh a. Amy ngei a ni tih ka hre mai...Ka rilru natna chu thupin bar chu ka chhuahsan ta a.

Zankhuain Dominic chu a rawn haw ta lo. A phone check ka tum deuh uk a, mahse ka ti ta chuang lo...mikhual pindanah pawh ka riak ta chuang lova, kan nupa khumah chuan ka tlaivar țhak!

Zing hma takah ka lemziahna thawmhnaw inbelin Drawing room-ah chuan ka lut ta a. Ka nu leh pa lem ka ziah chu ka chhunzawm ta zawk a, party zanah pek hman ngei ka duh ve bawk si.. Dominic ngaihtuah duh lovin ka bur ta ngar ngar a. Breakfast eiin ka chhuak zawk a, Elina chuan zawhna mitmeng nen min melh a, mahse ka hre lo der tlat thung!

Dominic Pov*

Ka lu na tluk tluk avang chuan peih lo zet hian ka meng chhuak a. Ka mutna chu kan room a ni miah lo. Nimina Kiara chhuah hnu ațang khan zu ka in char char a, office ah pawh ka kal lo..

Ka bula thaw ri sák sâk ri ka hriat chuan ka hawi phei vat a. Amy chu ka bulah a lo mu ve reng a nih chu...Engtin nge a nih theih? Rang zet hian ka tho chhuak a, Amy pawh kaitho lo chuan bathroom-ah ka lut nghal a. Ka intihfai vek hnuah ka thawmhnaw ngai chu ha lehin Amy chenna chu ka chhuahsan ta a.

Ka phone ka dap ngial pawhin ka hmu zo țhak lo. Khawiah tehhrep nge maw ka dah le... Kiara ka ngaihtuah chhuak zawk a. Ka chungah a thinrim hle tih ka hria a, Amy in min fawp lai kha min lo hmu a nih kha...Ka inrin loh laia min fawp thut a nih vangin ka ham haih deuh bawk nen chét sawn mai nachang ka hre lo va. Kiara'n min lo hmu chu hrehawm ka ti viau! Ka inthiam lo hliah hliah bawk.

Ka penthouse ka thlen chuan a lo reh leh țhiap tawh a. Tlaia thinrim chunga ka inkhalh chhuah khan Bar-ah ka kal ta kha a nia! Amy nen engtin nge kan inhmuh tih ka hre miah lo...Kiara'n a hriat vaih chuan kan boruak a chhe zual khawp ang..Lalpa hriattir lo hram teh...

Kan Garage ah khan kan company car thar ber ka hmu tlat! Ka pa hian min lo chét khalh a nih vaih chuan...á ka pa phone tum pawh ni ila..ka phone awmna pawh ka hre chuang bawk si lo. Engkim hi Kiara vang vek...

Elina ka ko tuar tuar a. Kiara awmna ka zawh chuan drawing room lam bawk chu min kawh hmuh leh a. Eng em em nge maw a tih ni! Ka saruak lem te kha a lo ziak a nih vaih chuan! Huhh...hetia a inkhung reng danah hian a ziak a ni ngei ngei ang!?

Ka en sak dawn khawp mai!

Drawing room kawngkhar chu chhunglamah a inkalh leh tlat tawh..

"Kiara," Min chhang lo. Vawi sawm chuang ka koh pawhin min chhang duh chuang lo...he nu em em hi chu aw...a thin ka la tirim reng a nih dawn hi...pawi lo nghak leh rih phawt mai ang!
Ka va'n nép tak hmeichhe pakhat vangin ka talbuai chûk tawh chu a nia..Hmangaihna hi chuan min lo thlák danglam thei takzet a nih dawn hi...

Engang pawhin ko nasa mahila a luhlul a chhuah tawh chuan ka chhaihkawlh mai mai! Kan nupa room ah chuan ka chhoh san leh nge nge a.

Ka thawmhnaw thlákin company lamah ka kal leh mai niang chu..ka garage a car khu chhui chian a ngai tak alawm le...

Company ka thlen chuan Register office-ah ka lut hmasa ber a.

Don segal ka manager pakhat zawk chu ka ko vat a. "Niminah tu hnenah nge BMW 7 in hralh han en vat teh." Ka tih chuan rang tak hian min chhang a. "Boss, Maxi Forbes a ni e, kan first choice la tu chu..."

"Maw! Kiara maw!" Ka țawng ring kher mai! Staff dangte chuan min hlauh hmel takin min en a.

"Boss, Kiara nilovin Maxi ka ti anih chu," Don Segal bawk chuan min chhang leh a. " A payment nge? Ka pa hmingin?" zawi deuh zawka ka tih leh chuan Quatation card chu original chu min hmuhtir ta a.

Maxi Forbes...tih hming pu in ka nupui chuan a lo register thlap. A hausa thawkhat tih chu ka hria a, mahse 1.17crores man a lei thei hi mak ka ti lo thei lo. Ka nupui hi mi namai lo a ni tih ka hre thar leh ta. Amy lah khan a lo hmusit ve em em a. Ka hausakna leh ka company a lo ngainep viau pawh kha a mak ka ti ta lo...!

Ka office ka thlen chhoh chuan ka mak tihna tizual turin ka pa a lo țhu lehnghal! Vawiin ka hun tawng zet chu..

"Dominic i va tlai ve," Ka pa áw chang fak chu makti takin ka en a. Kiara car lei kha sawi chhuah a tum a ni ngei ang!?

"Ka pa, enge ka office ah te i rawn tih ve teh mial a?" a zawhna chu haiderin ka zawt let khauh a. "Chulam chu i lo buai ve angai lovang, nizanah khawiah nge i nupui i riah chhuah san?"

"Maw! Engtin....engtin nge i hriat?"

"Ka hria a ni mai, kha mi laktlak loh Miss Raymond vang khan ka fanu rilru i tina a nih leh vaih chuan, a pawi khawp ang..arang thei ang berin i secretary thlák ang che." Thinrim insum zet hian a ti leh a. Thil thlendan hi ka hrethiam teh nuai lo e a.

"Awle, ka pa..mahse..Kiara'n a hrilh che em ni? Nizan chungchang kha?" Ka tih chuan min chhan tum lo tih hriat tak hian lehlam a hawi hmuk a. Ka nupui tereuh chu a che rang hle mai!

"Ka sawi ang chuan ti la a ni mai, tunah lunch ei a hun dawn tawh a, i penthouse lamah kan ei ang," hnial theih miah loh hian a ti leh a.

Ka pa nen company kan chhuahsan chuan chawhnu dar khat a ri dawn tawh a. Kiara kha drawing room ah ala inkhung reng a nih vaih chuan ka pa hian min puh leh ngei ang!

Ka apartment kan thlen chuan vanneihthlak takin Kiara chu verandah ah alo țhu a. Drawing room a inkhung tawh lova a lo chhuak ringawt pawh chuan min ti lawm hle a ni.

Mercides ațanga ka pa nen kan chhuak a hmuh chuan hmel hlim tak hian min lo chhawn vat a. Nidang zawng aiin ka hmu hmelțha lehzual! Mahse keimah min en lovin ka pa chauh chu a en a. Verandah ațang chuan kan awmna lam chu rawn panin ka pa chu arawn pan ding nghal chat a.

"Ka fanu chu enge a lo an le?" tiin ka pa chuan a lo kuah vat lehnghal a. Kei a pasal zawk chu ka chuang der mai!

"A pasal lo lawmna hun pawh a nei lo a nih hmel!"Ka lo ti hmanhmawh a, Kiara chuan rum zetin min rawn melh a. Chutah ka pa lam hawi a nui var var chung hian, "I lo kal dawn tih i sawi miah lova," a ti sap a. Ka awm ve tih hre lo ang hmiahin a awm leh tawh.

Kiara kawngah ka pa chuan kuahin in lamah chuan a hruai ta a. Ka pa ka thîk ber țum a ni hial ang chu...

"Ka fanu ka rawn tlawh zeuh zeuh tawh ang che."

"A lawmawm ngawt ang! I birthday party zanah kan rawn riak dawn nia!" Min ráwn der miah lovin Kiara chuan a ti leh a.

"Tehreng mai, ka lo beisei ang che u." ka pa țawng dam ta thluam chu ka ngei kher mai. Nichinah lem bung zet zetin min bia a. Hrep tak hian!

Inchhung a kan luh hnu pawhin Kiara chuan min be chuang lova. Ka pa nen ngawt inbiain min ngaihsak țhak lo. Thinrimin min hau chiam se a nuam zawk daih ang! Hetia awm ve lo ang mai a min pehhél hian ka tan a nuam miah lo.

"Lunch ei hmain ka'n inthlák ve lawk ange!" Kiara'n a tih tákah chuan ka lo lawm khawp mai a! Ka pa mitmei pawh veng duh lovin Kiara chu ka zui chho ve ta a.

Kan room-ah inhmachhawnin kan ding a. "Min la hria ang chu maw?" Ka ti deuh hmuk a.

"Hre ve ang chu mawle, i lo haw pawh ka ring chiah lo zawk a!?" Engemaw sawi a tum chiah le? Ka nupui hian...

"Ka lo haw chu a nih hi...midang zingah min haider tawh suh." tiin a bánah chuan ka hmer a, a țé deuh țhat a. "He inah hian ka pa chu a pahnihna chauh a ni a, i nunah pawh a pahnihna chauh a ni tur a ni. Ka pa ni lovin kei hi i pasal ka ni, chu chu theihnghilh tawh miah suh ang che." Ka ti chhum hmak a.

A biangah chuan dawmin ka fawp ta a. A duh lo tál vel chuan min ti thinrim țan der. Chutah tál leh phutin ka biangah chuan min beng ta țhuai a.

"Tenawmpa, ka haw lutuk che!" tiin ka áwmah chuan min chum dawt dawt a. Lo dan pawh ka tum lo, a thinrimna zawng zawng reh vek khawpin che phawt teh se...!

"I duh leh Amy bulah kal leh rawh. Kal mawlh rawh," a ti leh a. Nizanah Amy kiangah ka riak tih a hria a ni chiang mai! Van zia lo tak!

"Ka sawifiah thei ka tih kha...inbengdai phawt teh!" ka ti ta ringawt a.

"Ka hua che, Dominic," ti chang fakin bathroom lamah a tlan phei ta daih a. Umzui pawh ka tum lem lo...

Inhnuai lamah ka chhuk san ta a. Pindan pakhata kan pahnih chauha kan awm reng hian kan nupa inkár a tih țhat phah chuang lo... Nghak rih phawt mai ang!

Ka pa nen chauh chuan wine kan in dun a, Elina lunch siam pawh Kiara a lo la chhuk loh avangin kan ei rih lo...

"I nupui hian a hmangaih hle che a ni. Zanin hian London ațangin i unaupa a rawn haw dawn a, in hnenah a cheng ve rih ang. Min hnial țhak suh ang che." Ka pa in a tih chuan ka thinrim kher mai.

Aparment a nei ve reng a, kan hnena a rawn chen ve ngawtna chhan tur ka hre lo. Tun dinhmunah ngat phei chuan ka hmuh duh loh ber te zing a mi a ni.

Ka nupui hnaih a, awmtur atan ka duh rih lo. Ka lo dan ngei angai ang!?

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 7:20 pm

UNKNOWN MAN

by.Becky Rafa Renthlei

Chapter-23

Kiara a rawn chhuk hnu chuan lunch chu kan ei ta a. Ka pa chuan serthlum tui leh croissant tharlam tak tak te chu Kiara hmaah a nawr phei a. A thinlung takin a fanu ah a pawm hmiah tih ka hriat hian ka chhungril hi a hlim ru phian! Mahse...Kiara hian min kalsan ta se, 'No' chutiang ka ngaihtuah duh lo..

"Ka pa, Gavin a rawn thlen dawn chuan kan zingah dinner chu ei ve law law rawh aw.." ka pa lam hawi chuan a ti sap a. Ka pa chuan nui vur vur chung hian, "Ka chák zawng tak alawm, lunch ei zawh hian i pasal tellovin i tei chhuak dun teh ang!" ala ti zui ah....

Kiara'n a chhan hman hma in ka lo inrawlh vat a. "Nimin lawkah a chhuak tawh, bakah ka tel lovin chhuak tawh lo rawh se.." ka pa chu ka melh run a.

"Pa, ka inpeih reng..," he nu sual reuh zia hi chuh...

"Dominic, nangte chuan i hnaih reng thei alawm; i pa ve thung hi chuan vawikhat chauh ka chhuahpui dawn a nia. Lo buai duh suh himdam takin kan lo haw ang," Ka pa chuan a ti dam thluam a, hnial engang mahila awmzia a nei chuang dawnin ka hre lo. Ka kal tel an hlauh hmel em em lehnghal a. An luhlul dun vang a nih hi..an inpawh viau nachhan!

Lunch kan ei zawh chuan ka pa leh Kiara chuan driver hruaiin min chhuahsan ta a. Ka nupui a awm loh hi chuan ka ruak huai zel...

Kiara..Pov*

Ka pa nen Dominic kan chhuahsan hnu ah, Seattle-a hmun mawi tak tak min fan pui a.

"Fanu ka neih loh avang hian, ka awt ve em em țhin a, Dominic te unau an pian hnu kum ruk hnuah ka nupuiin min boral san ta kha a nia! An unau hian Elina kutah ka dah tawp mai a ni. Ka ngaihsak em em reng bawk a..ka company zauh zel ka duh vangin nupui pawh ka nei ta lo a. Phir ve si ah chuan an tui zawng a hrang hlauh. Dominic hian ka sumdawnna a tuipui a, Gavin ve thung hi chuan racing lam a tuipui thung." tiin ka pa chuan min hrilh a.

"Nupui neih leh mai chu a harsa awm tawp si lova," ka lo tih sap chuan a nui suk a. Hetia a nuih hian Dominic nen an inang takzet.

"Harsa lo ve, mahse ka sum ûm a min neih tum hi an ni deuh zel..ka fapa te hmakhua ka ngaih avangin ka nei ta lo a ni. Amy ka duh loh chhan pawh i hrethiamin ka ring..company chungchang leh sum kal dan a hre vek a. Dominic hi a hmangaih vang ni lovin, a sum lam zawk hi a duh ber a ni tih ka hmu thiam tlat alawm!"

Pa fing tak zawng a ni ngei e! A sumdawnna kawnga a hlawhtlin dan ațang hian ka hre thei mai!

Jaguar hnungah kan țhu dun a, ka nu leh pa chanchin min zawt nual.. engmah zep nei lovin ka hrilh vek a. Artist ka ni tih erawh ka sawi tel lo thung! Surprise ka tum miauva...!

Eitur chi hrang hrang zawrhna dawr lian zet kawtah car chu tiding turin a hrilh a. Ka bánah vuanin dawrah chuan min luhpui ta a.

"Kiara, i eichâk zawng leh duhzawng kha thlang rawh le..i duhzawng hriat vek ka tum a nia," a ti leh a.

Dawr nghaktu chuan zah takin George chu a lo bia a. Chhuang takin a fanu tiin a hmelhriat a hmuh apiang te chu min hmel hriattir zel a. A chét dan naupangchhia tak chu ka lo nuih pui hak hak a.

Eitur leh champagne engemaw zat kan lei ho chu driver chuan car-ah a dah lut a. Thil changkang leh tui, hrisel lam chi pawh a hre khawp mai!

"Salonis, restaurant ah intur dawm dun ila," ka pa min sawmna chu ka pawm zawng tak a ni.

"Umn..mahse..kan awm rei lutuk chuan Gavin a lo thleng hman ang tih ka hlau deuh!" ka ti a.

"Lo thleng pawh nise, Dominic a awm tho alawm, lo inbuaipui rawh se," a ti sam ét a. An unau boruak țhalo a hre ve lo phawt chu a nia.

Saloni restaurant chu a lun hle a. Mahse George an lo hmuh chuan cabin pakhatah min hruai ghal hmak a. An zah leh hle bawk ...Malakian chhungkaw tan hi chuan khawi hmun pawh a nuam vek a nih hi...

Dawhkan pakhat kilin kan inhmachhawn ran a. "Eng lam nge i in duh ang?" Ka duh zawng hriat a tum lutuk chuan ka nuih a ti za tlat a. Ka nui chhuak ta nge nge a.

"Kiara, nuihzat thlak ka sawi em ni!?" Angaihna hriat loh hmel tak hian a țhen suk a....

"Oh...chutiang lam pawh a ni lo...i duh duh kha chah rawh ka in thei vek!"

"Ok...eitur i duh tel em?"

"Chips lam a nimai, tuna ka inhnawh puar leh chiam chuan dinner ka kil pui peih lo ang che..." nui hak hak hian ka ti a. George hi ka ngaina takzet tawh. Dominic nen kan inkár chu engpawh nise..ka pa tak tak ang chiahin ka ngaina a ni.

Waiter-in kan no ah wine min rawn thlit sak chu ka in a. A tui kher mai..ka pa chuan chips chu a ei ve lem lo a, ka wine no a chanve vel ka in tawh chu lem leh tumin ka hmui bulah ka dah chho chiah chu ka pum a rawn lêt but but a. Ka luak dawn ta mai! Ka hmel a danglam a ni ngei ang! Ka pa chuan, "Kiara, i țha em? Engtizia nge? Min zawt vat a. Ka chhang thei lo...ka țawng vaih chuan ka luak a ni nghal mai!

Ka țhutna ațanga thawh tum chuan ka ding chhuak a, ka luhai lutuk vang chuan ka áwn ta riai riai a, ka inthunun thei ngang tawh lo..

"Kiara."

Ka pa min kohna pawh chu hla taka ri nimai hian ka hria. Chutah ka vel thim mup bâk chu hriat ka nei ta lo....

Ka harh leh chuan doctor niawm tak pakhat leh ka pa chu an lo in be mawlh a. Ka awmna room chu damdawi in ka tih dawn chuan ni chiahin ka hre bawk si lo. Ka mutna khum leh sofa leh dawhkan pakhat bak a awm lo. Ka dáng ro lutuk avang chuan tui intur zawngin ka hawikual a.

Ka chevel thawm chu an hria a niang? Ka pa leh a bula ding pa chuan min rawn pan vat a, "I lo harh ta a nimaw? Ka fanu!" Ka pa nui hmel ka hmuh chuan ka hahdam huai huai mai!

"Tui, ka duh," ka ti sap a.

"Awle,"Tiin rang zeta tui bottle chhin chu hawngin min pe ta a. Ka in khawlh khawlh hnu chuan pe let lehin, zawhna mitmeng hian ka pa chu ka melh a.

"Hahdam rawh, engmah hlauhthawn tur a awm lo. Hei hi doctor Alex a nih hi," tiin a bul a ding chu a kawk zauh a.

"Doctor maw! Engtin nge ka awm? Khawi hmun nge ka awmna hi!?" Saloni restaurant....ka hrechhuak leh ta uar uar mai...

"Umn..ka lawmpui lutuk Mrs.Malakian, naute thlakhat leh kárhnih a upa i pai e..., nikhaw hre lovin i awm rei deuh a, ka clinic ah i pa hian a rawn hruai che a ni."

"Maw? Nau ka pai maw!" Engtinmah ka awm ngai tawp si lo a, ka va'n awih lo tak!

"A dik alawm Kiara, nakinah a kimchangin ka hrilh ang che. Alex hi kan be fál lawk anga, kan haw dawn nia, i pasalin a ngaihtuah tawh ang che." tiin min chhuahsan dun ta a.

Lalpa...engtin nge ka tih ták ang? Naute hi ka duh lutuk! Mahse..Dominic leh Amy hi..ka rilru a buai takzet!

Ka pa rawn kir leh hma chuan khum ațang chuan ka tho chhuak a. Zan dar sarih a ri tawh..Gavin pawh a lo thleng tawh ngei anga! Ka pa hian in lampang a lo hrilh a nih vaih chuan...

Huizz...A hrilh loh hram ka beisei..

Ka bag ațang chuan silk scarf ka pai chu phawrh chhuakin ka lu ka tuam hlán a. Boruak vawt deuh chuan ka awm a ti nuam lo..ka pum chu dimte in ka chul a, Dominic fa ka pai chu a ni ta der mai! Ka beisei aia hmain a thleng ta chu a nia! A rang deuh mah mah a ni.

Ka pa arawn lêt chuan min nuih nghal var var a, "Kiara ka lawm takzet! Engtin nge nau i pai tih i hriat loh theih zawk le? Chhuahpui lo phei che ila chuan kan la hre dawn miah lo tihna a nia! Pathian hnenah lawmthu awm rawh se!" a ti ta a.

Car-a kan chuan hnu chuan Dominic a hrilh tawh nge hrilh lo tih chu ka zawt ta nge nge a. "Pa, Dominic i hrilh tawh em?"

"Kiara mi á niléng ka ni bik lo ania, engmah ka sawi lo. I mut hlan khan vawi tamtak a rawn call che a, kan haw tlai deuh tur thu chauh ka hrilh.. A thinrim khawp mai! Mahse..i pa ka awm alawm hlauthawng reng reng suh. Hrilh nghal i duh nge duh lo?" A ti sam ét a.

George nge nge! A fing țhin e...

"Hrilh rih lo ve, Amy nen an inkár chingfel phawt rawh se..chumi hnuah ka hrilh chauh ang!?" Tiin ka rilru diktak ka hrilh a.

"A țha e, i inpeih hun hunah i sawi dawn nia, Amy vang chuan i rilru tibuai duh suh. I duh phawt chuan ka inah pawh i rawn insawn thei reng ania!"

"I birthday party thleng hi nghak ila, chumi zawh lamah chuan kan hrilh dawn nia."

"Awle, ka sawi ngai lovin in inkawl țha hle ang che, Dominic pawisa i dil hreh deuh a nih chuan ka credit card pakhat hi i kawl dawn nia!" A ti leh zel a. Ka mamawh loh thu sawi ka tum zet naa ka ngawi leh ta zawk a.

Tihian engmah nei lo ang hian min ngai rih phawt rawh se..Kár leh maiah ka nihna diktak a hre tawh dawn tho a. Ka nghak leh rih mai aniang chu...

"Tunah rih chuan hman tur ka nei alawm, ka mamawh chuan ka rawn sawi zel mai ang," ka ti ta zawk a.

"Awle, i tih dan dan le... ka fapa mangang tálbuai vel tur chu ka hmu chák ngawt mai. Hei tunah pawh min lo call leh tawh a nih hi.." Tiin a phone chu a hmet hlum zauh a. A nui pah huk huk bawk a, a nelawm takzet.

Kan chenna hmun kan thleng a, Car ațanga kan chhuah fel hma hma chuan Dominic chu kan lam panin vung fé hian a rawn phei a. A hmel dur deuh khup ațang chuan a thinrim hle tih a hriat mai!

"Awle, khawiah tehhrep nge in kal tih chu ka zawt lo law law ang che u." Tiin ka pa nen chuan min melh tawn sek a.

"Dominic in beng dai la...kan thil lei ho hi i hnathawkte kha inchhunglamah dah turin hrilh zawk teh." Ka pa chuan dam thlapin a chhang a.

Kei erawh engmah sawi lovin ka ngawi reng thung!

"Ka pa, i ti lutuk deuh lo maw? Kiara hi i nupui nilovin, ka nupui a ni," Chhum hmuk a tiin, ka bánah a rawn vuan a, dim vaklo hian in lam chu min pan pui ta dawr dawr a. Ka lo tál ve bawk tak naa, awmzia a nei lem lo.

Inchhungah kan lut fel chiah tihah mikhual pindan ațang chuan Gavin chu a rawn chhuak ta a. Chutia a û in min lo chelh tlat a hmuh chuan min siai zauh a. Gavin nen game kan khel dawn tih ka hre thiam ve mai!

"Hi, honey...ka lo thlen laiin dad nen inlo chhuak daih a," nui sang hian a ti a. Ka pa chuan hriat thiam hmel tak hian a lo nuih suk bawk...Diminic lo rum nghut chu ka hre ru reng.

"Hi, Gavin ka rin aiin i lo thleng har a, ka pa nen i lo thlen hun kan nghakhlel viau a nia," tih pahin Dominic min vawnna chu ka thingthla nghal zaih a.

Ngaihdan nih loh hmel zet a min enin, "Kiara, inbiak kan ngai..." a ti sup a.

"Haa...sawi tur tehchiam kan neih pawh ka hre lo Dominic," tiin ka pheikhawk chu ka tlawh phelh a. Elina chu dinner buatsaih turin ka hrilh zui bawk. Dominic chu awmlo ang hmiah a, kal pelin ka pa leh Gavin-a intur thlit sak turin cupboard awmna ka pan nghal a.

"Kiara, kha thil kha i tih angai hauh lo." Dominic thinrim insum áw ri chu a ring miah lo..mahse a hlauhawm ru riau thung..A pa awm lai te chuan engtin mah min ti ngam tawp nang! Whisky bottle leh shot glass chu la chhuakin dawhkanah chuan ka thli lui ve ngat a.

Zanriah kan kil lai chuan Dominic chu a ngawi ngul a. A phone kha ka la pe lét lo tih ka hre chhuak chiah...

Gavin leh ka pa chuan duhsak tak hian eitur ho chu min suah chhawk sek a, ka ei hnem tawh khawp mai. Kan kim țhap lai hian a phone chungchang kha sawi chhuak ila a țha ang!?

"Dominic, khawnge i phone?" Meng buai deuh nak hian min en a.

"Ka dahna ka hre lo." A ti hmuk a.

"Keiin ka hria alawm, Amy nen bar-ah in kal tih pawh ka hria," ka tih leh chuan a meng hnual raih a.

"Kiara, inbiak kan ngai ka tih kha, i eitur kha ei vat la, pindanah min lo zui chho ang che," a ti hmuk a.

"Ni lo e, chhungkua vek kan nia lawm, a hranpa a sawi a ngaihna ka hre lo, i phone chu bar-ah nizan khan ka va lam tawh e, drawer ah khan a awm." Chang fak hian ka ti a.

Chutia ka tih chuan a hma aiin Dominic hmel chu a chang sawt.

"Bro, Amy nen bar-ah chuan in kal dun tak tak em?" Gavin chuan a lo ti ve bawk a.

A fork ken lai chu dah thlain Gavin chu rum tak hian a melh leh te te a, "Lo in rawlh tum suh, Gavin! Kan nupa buaina ah hian midang tel ve a rem lo. Ka pa, nang pawh Kiara hi rawn ngaihven chûk a ngai lovang! Ka nupui chu ka mawhphurhna a ni." A ti thum chhak a.

A țhutna a,ațanga thovin, "Amy nen in inzui tih ka hriat leh chuan Dominic, Kiara hi ka bulah acheng ang! Ințhen lam te kha chu ngaihtuah pawh ngaihtuah chhin suh." A ti ve ta a.

"Ințhen maw? Chu chu i duh tihna mi Kiara, ka pa hnenah hian eng chiah nge maw i lo sawi le?" Ti supin a tho chhuak vut a. A plate a eitur awm pawh pakhatmah a ei lo. Thinrim tih hriat zet hian a chhuak ta daih a.

Keini pathum chu inhrethiam zet hian kan inmelh ralh ralh a. Gavin phei chu insum thei lovin a nui hawk hawk a. "Lamțang i nei țha e, Kiara Malakian," Ti a, ka biangah fawp zauhvin min chhuahsan ve ta a.

Ka pa nen chauh kan ni ta. Naute chungchang chu a intiam angin Dominic chu a hrilh ta lo phawt chu a nia! Kan țan tlan chuan Amy lak ațangin kan pawt hrang thei ngei ang..Ka pa leh Gavin ka lama an țan chhung chuan...


Dinner kan ei zawh hnu chuan, țhutkhawmna pindanah coffee kan in leh te te a. Dominic erawh chu a lo lang ta lo. Ka pa haw tur verandah thleng ka thlah a. Gavin a'n a thlah dawn a ni.

"Kiara in enkawl țha la, ka sawi kha zawm hram i tum dawn nia! Ka birthday hmang thei turin lo hrisel țha ang che," ka biangah fawp zauhin, min kal san ta a. Ka țah a chhuak țun mai! Hetiang tak hian ka pasala pa hi ka ngaina ang tih ka hre lo...

Inchhunga ka luh chuan Elina che vel thawm bak hriat tur a awm lova. Dominic hi khawiah nge a awm daih le..? Rilru nuam lo zet hian kan nupa pindan chu ka pan hna hna a. Ka pum chhunga naute vang tal pawh hian intihchak ka ngai a ni.

Kan room-a sofa ah chuan Dominic chu a lo țhu thluang duai a. A chhuak daih emaw ka ti kha a nia. Ka thawm a hriat chuan a rawn dák chhuak a.

"Ințhen i duh a mi?" A ti bul hmuk a.

"Ka duh tih ka sawi awm ka hre lo. Mahse i duh tlat te chuan ka hnial thei lo thung che a." Ka ti ve hmak a.

"I duh si loh chuan ka pa khan engvangin nge a lo sawichhuah?" A àw danglam thut avang chuan a mitah tak chuan ka en a. A meng rum hle a, a țhial pawna thisen zam chu a pawng țawlh țawlh a. "Ka pa sawi apiang hi ka hrilh a ni kher lo." Ka tih chuan kut min thlák mai duh hmel a pu tawh.


"I chungah hian ka lungawi lo khawp mai! Kiara."

"Ka lung awi bik em ni? Ni reilote chauh kan la innei a, i hmei nu i zui leh duan duan a, mihring ve tho ka nih hi..!? Ka ti hlar a.

"Hmeichhe thikthu chhe lutuk kan ni a ni maw? Kan tinzum kan tilang ta em ni?" elsen zet hian a ti leh a.

"Ka tin a zum kher lo." Ka lo ti hmanhmawh a.

"A zum chu a ni ber alawm, i tan Amy thik angai lovang tih ka sawi nawn leh e," a ti sup a.

"Tunge ka thik ti? Nupui nei i nih chuan hmeichhe dang fawh kher kha i tih tur a ni lo. Mi á emaw min ti a mi?"

"Ka sawifiah vek tawh kha, a bul ațangin țan zel țhin suh."

"Nizanah pawh in riak dun khum khatah in mu bawk! I sawifiah leh dawn em?" Tiin inti hre zet hian ka țawng leh a.

"Kiara, Pathian hmingin ka kut hmawr pawhin ka khawih lo. Ka rui ém a, engmah ka hriat loh laiin ka bulah a lo mu a ni ngei ang? Ka harh leh chuan ka bulah alo mu ngei a, mahse ka hriatpuina a tel lo. Ngawi rengin ka rawn haw san a ni." A ti zawi ruih a.

An mudun tih ka hre teuh lo..ka rinthu ka sawi mai mai ania. Ka rindan pawh a lo dik chiah e...An lo mu dun ngei a nih chu, engtinmah awm lo mahse..kha nu bula a mu hrim hrim pawh kha ka hua!

"A țha e, i pindanah hian mu la, mikhual pindan Gavin-a hman loh zawk saw ka hmang ang." Ka ti ve hmak a. Inherin kawngkhar lam chu ka pan ta a. Ka thleng țep tihah, Dominic chuan min rawn man bet leh hram...

"Min khawih suh," ka ti tuarh a. Mahse engahmah a ngai lo thung! Ka thin tertek a chhuak leh ta, "I kut hmawr pawh a min khawih leh chuan...Dominic Dron Malakian, ka chhuahsan khawp ang che..hmeichhe dang i khawihna kut khan min khawih tawh hlek suh."

Dominic chuan min vawnna chu a thlah riai riai a. A hmel chu a chang țha hle bawk, a kut chu a thlakthla ta zan a. A mitmengah thinrimna nasa tak a lang bawk a, "A țha e, mikhual pindanah chuan riah angai lovang. Kan nupa inkar buaina ka unaupa hriat kher ka duh lo, i duh ang chuan ka khawih lo ang che." A ti ta a.

"Ka ring dawn che em?" Ka ti țalh a.

Naute chungchang hi hrilh tumna pakhatmah ka nei lo..Gavin zawk erawh chu zanin hian ka hrilh ang! Ka la mamawh dawn tlat!

"Min ring rawh, ka tiam a che...min chhuahsan lohna tur a nih chuan ka khawih lovang che." Tiin a chhuak zui ta nghal a.

Ka chhuahsan hlau awm tak te chuan a țawng lehnghal a..Lutuk hian a...

Darkar chanve dawn shower chuan ka inphuh tir a. Ka nu leh pa ka ngai takzet..Naute chungchang ka hrilh hun a an lawm dan tur te ka mitthla thei hial! An fanu hian nau ka pai ve tih an hre ve ngei tur a ni...

Bathroom ațanga ka chhuah chuan ka mutkawr hlui ka nu min leisak ngei mai kha ka ha leh a. Coffee sa țha ver vawr in a chákawm alawm!

Elina chu a mu daih tawhin ka ring a, Gavin pawh a rawn lét tawh ngei ang! Naute chungchang hrilh vat ka duh a ni...incheck up ka ngai thuai dawn a, Gavin hi min hruai turin sawm ta ila...

Inhnuaiah chuan ka chhuk thla a, țhutkhawmna pindan lama inhnial thawm ka hriat chuan ka ding deuh dat.

Hmeichhe áwki sangtak ri chu Amy bawk a ni..ka hai hauh lo...

"Dom...Kha nu kha engtin nge kei aiin i thlan zawk theih a?"

"Amy, hetia inneih thut hi kan tum dan a ni bik lo..A nu leh pa in thil an hriat sual palh vanga innei kan nia...hriatthiam tum teh.." Dominic áw chu a zawi vak bik lova..Amy insût hlap hlap ri ka hre zui bawk...

He inah hian ka leng ve lo a nih hi...ka va lût thut dawn nge? Kan room ah ka lét leh dawn?

Tenawm dun lutuk....Ka va runluih hrep zawk dawn em ni..khawnge Gavin pawh hi a awm daih le... hreh viau mahila lem kan chan ngei chu a ngai dawn ta e.....

©<++++[BeckirafARenthleI]++++>®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 20th, 2017, 7:21 pm

UNKNOWN MAN

by.Becky Rafa Renthlei

Chapter-24


Kan nih nih nimai ila a tha tawh zawk! Dominic leh Amy inhnialna room ah chuan ka lut ve ta a. Thawm ka dim tehchiam lo bawk nen min lo hmu nghal vat a. Amy chu sofa ah țhuin Dominic zawk erawh chu tukverh bulah a ding thung a. Inhnaih taka an awmdun ka rin tehreng nen! An inhlat phian sia.. Mak chu ka ti deuh!

"Kan inchhungah hian enge i la rawn tih fo a?" Amy chu rum tak hian ka melh a. Zám miah lo leh mitmeng de sar hian min en lêt a. "Nizanah i pasal hi a lo riak tih chu i hre thovin ka ring a!" Ngeiawm tak hian a nui hak a.

"Hre tehreng mai, a ruih laiin i khumah i muttir a, a bulah i mu ve tih pawh ka hre tho. Mipa zu rui engmah ti thei lo pawh i lo thlahlel hle tihna a nia!" Ka ti ta hrep a.

"Duh tawk tawh rawh u..Amy nangpawh haw tawh rawh..naktuk ațangin i hna rawn zawm angai tawh lovang!" Dominic áw chu a ring miah lo..mahse a hlauhawm ru riau..Amy tan pawh hnial ngam chi a ni lo..

"Mahse, Dom..ani vang mai mai hian ka hna ațanga bán tir min tum abmaw!?" Tiin min sawisak chák hmel takin rum lutuk hian min melh a. A hmel țhatna zawng zawng a bo vek hian ka hria. Hawi sawn duh map lovin ka lo en lét ve siah a...

"Ani i tih hi ka nupui Kiara, a nih hi...I boss nupui i biak danah fimkhur rawh.." a ti leh a. Chutia Dominic a'n min țan anga alan tákah phei chuan Amy chu a thinrim hle a, "I neih chhan pawh i sawi vek kha..London i kal hma khan kan affair ala tawp reng reng lo. Rinawm lo hmasa zawk chu nangmah i ni," a ti leh tawn tawn a. Dominic lo rum nghut ri ka hriat chuan amah chu ka en vat a. Thinrim insum zet hian a inseh ruh țawlh țawlh a.

"Kan affair chu a tawp daih tawh, i pawm duh lo mai zawk a ni. Ka inah hian buaina siam tum tawh suh," a ti tuarh a. A áwka vin zet a vang chuan ka lo ip chawih mai!

"In hlim rei chuang lovang, hetiang mi hnuaihnung lutuk hi chuan hlimna leh tisa nawmna ka pek țhin ang che pawh kha a pe ve thei ngût che emaw!?" Mahni indah sang larh chunga tiin, chak fé hian ka lam a rawn pan a.

"Tenawm nu, Dominic nen kan inkarah hian rawn tla zep lo la chuan kan innei tawh ang," tiin ka inrin hman hma chuan ka biangah arawn beng ta țhuai a. A thip zawk mai! A chétdan chu ka rin loh lutuk thil a nih avangin lo dawnsawn dan tur pawh ka hre mai lo, áng pam chung hian ka biang chu ka dawm vang vang a.

"Amy, enge maw i tih le..?" Dominic chu ka bulah a rawn thleng chawpchilh nghal a. Ka darah chuan vuanin, "I țha em?" Amy pawh ngaihven lo chuan a ti a. Amy lo nui hawk ri ka hriat chuan ka thinrimna a kaitho ta..Dominic min vawnna chu ka thingthla a, zawimuang hian ka pan phei ta a.

"Hetiang mizia i neih vang a nih ngei dawn hi..ka pasal hian a nei duh loh che, tenawm chu kei ni lovin nang zawk hi hi ni!" Tiin a inrin hman hma chuan a biangah ka beng ve ta țhuai a, ka kut a thip zawk mai! Thinrim lutuka beng ka ni bawk a, a hawi sawk.

"Nang nu hian kut min thlák ngam a maw?" Țap deuh țiau hian a ti a.

Țahbelh reuh mange..Min beng hmasa te te a, amah a țap leh țeuh sia..! Ve lutuk a..ka țap awm lo chiang e...

"Engvangin nge ka ngam loh ang, ka inchhung ngeia kut min thlak hmasa tu chu nangmah i ni! Tunah hian i chhuak dawn nge? Ka nawr chhuak zawk dawn che!?" Ka ti ram hmarh a.

Ka țawng zo deuh chiah tihah Dominic chuan Amy chu kawngkhar pui lam pan chuan a kai phei dawr dawr a. A dimlo viau lehnghal! Amy chu rawn hawi lêt leh in, "I chák lo khawp ang! Lo nghak reng ang che, enge ka tih theih chu i la hre mai ang!?" A la rawn ti hram a. Ka chhang peih vel lo e a.

Kan room-ah thinrim țûnin ka lut a. Dominic, a rawn inrawlh lo kha ka lawm viau zawk! Hmeichhe pahnih te inhnial kha uluk fahran a min entawn sek lai ka mitsirin ka hmu ru reng..Nidang chu ni se, ka nuih a za ngawt ang! Va inrawlh lo tur ka ni tih chu ka hria a, mahse ka pasal a ni miauva..a hmei nu beng lo khan..amah Dominic ben zawk awm tak! Nep lutuk mai...

Amy car tlan chhuak thawm ka hriat hnu lawkah, Dominic chu room-ah a lo lut ve nghal a.

"Kiara, țha takin zanin chu sawidun teh ang, i lungawi lohna lai leh insiamțhat ka ngaihna laite min hrilh la, i rilru diktak min hrilh rawh, khawngaihin! A hma ang khan awm leh ka duh!" Khuma țhut pah chuan a ti sup a. Ka rin loh lam daih a rawn sawi leh ta..Keipawhin inrem taka awm te chu ka duh ve reng alawm..

"Amy nen hmuh dun leh che u ka duh tawh lo..hmeichhe dang reng reng pawh," ka ti sap a.

"A va huam zau deuh ve, hmeichhe tam tak hnathawkah ka chhawr țeuh sia, chung zawng zawng chu ka bán vek dawn tihna mi?"

"Ka sawi kha i hrethiam reng! Hmeichhe țhian bik nei tawh suh ka tihna a nih chu..Amy te ang chi kha..kan inchhungah zah lo taka kut min thlak ngam ringawt te kha.. zak lo lutuk mai!" Ka ti hlak hlak a.

"A pawi ka ti khawp mai! A pawi ka ti takzet, a thleng nawn tawh lovang," thutak zet hian a ti ta a.


Dominic ka neih khan phuba lák chu ka tum ngei mai! Mahse ka hmangaih ta tlat si a. A mahin min țhen duh a nih si loh chuan țhen tumna ka nei lo. Naute chungchang hrilh chu ka duh deuh ut ut a. Mahse George birthday zanah law law hrilh ta zawk ila...

"Umn...kan inneih chhan chu engpawh nise..Amy bula min neih chhan i sawi pawh kha ka hria a. Thinrim viau mahila ka theihnghilh mai aniang chu!" Ka lung ala awi zán lo nain inrem lo taka awm reng hi ka kham ve hrim hrim..

"Kan thusawi zawng zawng kha i hre vek lo anih chu..ka neih chhan che ka sawi lai chauh i hria a. A hmalama ka sawi i hre leh si lo a, ka sawi chu..." a țawng lai chu bán vaiin ka lo titawp a. "Ka hriat kher a țul tawh hleinem..kan inneih chhan i sawi kha a dik alawm," ka ti ta a.

Sawi thui zel chuan inhnialna a tam mai mai! Kei pawh ka dik vek bik lo..Hmanruaah Gavin hman ka tum ve tho alawm..

"Gavin a rawn awm dawn chuan, I țhiannu Talinda kha chah ve la," Dominic chuan a ti ta a.

"Haa, kan inkár boruak i hriat vek kha.."

"A thinrim reng tawh bik nang! I biak hreh chuan ka be thei thova," thinrim tawh lovin a țawng dam thluam a.

Hei tak hi Dominic țhat ve na chu a ni..A insum thei em em a, dawhtheihna angah bawk..

"A țha lawm, i tih dan dan," ka ti ve ta zawk a. Talinda a lo kal chuan Gavin pawh a khua ahar lo deuh ang chu.. Kan nupa inkâr buaina fel duak lo mahse ziaawm lam a pan turah ngai ang!

"Ok..ka lo phone dawn nia, mu dawn tawh ang le..a tlai tawh a nia, ka sawi tawh ang khan pindan hranga riah ka phallo tih chu i hriat kha.."

"Umn..ka hrethiam e," ka inthlahdul ta riai riai a. A thusawi dan khan awmze dang a nei niin ka lo ring hmanhmawh a...ka hmui ro tak chu liak zauhin khumah chuan ka mu ta kak a. Ngawi rengin ka bulah chuan a rawn inthawlh ve a...a kut lum thar thar chu ka dulah a rawn nghat a. Dah sawn sak ka tum chuan, "Khawngaihin Kiara, engtinmah ka ti lovang che, kuah chung che a mut ka duh mai a nia!" A ti sup a. Ka dah sawn sak ta bik lo..

Zinga ka harh chuan Dominic chu a lo tho daih tawh a. Sana ka en chuan dar sawm a ri tawh, min kaihthawh ve tur a nia!

Ka intihfai vek hnu ah inhnuai lamah ka chhuk thla a. Dominic chu chokaah a lo buai hle a...

"Khawnge Elina?" Ka tih chuan ka lam hawiin a rawn inher ta chauh. Ka lut thawm a hre miah lo aniang!?

"A pasal a dam țha lova, chawlh ka pe a nih kha..Gavin a'n station thleng a thlah dawn a.."

"Oh..a nih chu..min kaitho ve mai lo a.." inthiam chiah lo hian ka ti sap a.

"I mutui ém alawm, bákah ka eisiam tui i tih țhin kha ka la hrereng a nia!" Nui suk hian a ti a. Shirt dum body fit a ha a, cotton kekawr thawl hnekhnawk a ha leh tawp..a inhmeh em em tho nia!

"A dik chiah, eisiam lamah hi chuan ka tluk lo che a ni e," nui var var chungin ka ti ve a. Hetia inpawh taka awm hi ka chák ber kha a ni reng a.

"I eisiam peih loh vang a, thiam loh der tawp ang chi kha chu ka ngaina tehchiam lo." Fiamthu titak deuh hian a ti a. "Ka thiam lo der kher lo aw.." tih pahin salad dawhkana a dah chu ka hmawm zauh a.

"Lo țhu la...ka inpeih a nimai..a siam lam ka tum tawh a, silfai lam chu i tum ve thung ang!"

"Ok...boss.." Chimawm tak hian ka nui a, ani pawh a nui ve suk tho.

Dominic eitur siam chu a tui leh pek hle a. Ka ril a țám tawh deuh bawk nen ka ei hnem kher mai! Dominic chuan theitui chu a rawn thli a. Ka in zo leh nghal vek a hmuh chuan mak tih hmel takin min en ta reng a. "I pumah kháng zawng zawng kha aleng vek chu a nia," tiin spanish omlette chu ka plate ah a rawn dah belh a. "A tui êm alawm.." tih pahin ka ei leh ta a...

"A țha e, wife..i duhtawk khan ei rawh le.." a ti ta a. Ka naupai vang nge ka hre lo nai, ka thil ei tui ta lutuk chu ka hrethiam tawh bik lo.

"Dominic, office-ah i kal dawn lo a mi?"

"Dawn e, i car thar hi ka lo test dawn em niang?" Nuihzat hmel tak hian a ti a. A hre chhuak ta nge nge e..

"A neitunu hian ka khalh ve phawt ang chu.."

"Maxi Forbes, huhh..chimawm si," tiin ka ei ruahna plate chu a seng mawlh mawlh a. "Ka lo seng ve mai dawn alawm insiam tawh rawh le.." ka inthiam vak bik lo..ka ei na leh zel tihfel tir chu ka duh lo.

"Kan pahnihin silfel ila, chuan..min insiam pui anga.." naupangchhia takin a ti leh a. Kan inhau loh hi chuan Dominic mizia hi ngainatawm tak a ni țhin reng a ni...

"Ok...Shower i neih chhungin ka lo sil ang..ka zawh veleh ka rawn chho dawn nia."

Min kalsan hnu chuan kan eina vel chu ka sil țan ta a. Elina hi chawlh tir reng tur zawk a ni..Kan nupa chauhva kan awm hian a nuam dangdai tlat! Gavin ka chah ve em em a, mahse ațangkai dawn ta lo a ang riau..a pawi lo e..an unau inkar țha lo pawh kan hnena a chen ve hian a ziaawm phian thei a sin.

Kan room-a ka han chhoh chuan Dominic chu towel veng țat hian dressing table hmaah a lo ding a. A taksa nalh tak mai ka hmuh leh meuh chuan ka lum deuh pap thei nia..

"Tikhan min thlir reng dawn nge? Ka hák tur min thlan sak dawn?" Nui sáng hian a ti a. Ka lai leh ringawt tawh!

"Vawiin chu ka duh ang thlapin ka chei ang che. Sawisel awih loh.." Ka tih chuan a nui suk a.

"Ka nupui kawlh em em te, i tih dan dan le..."

A thawmhnaw dahna wardrobe chu hawngin kamis intlar dul chu ka keu lawr dan dan a. Ka hnunga Dominic ding chuan ka chét a ti khaihlak lek lek mai. A tawpah kamis pawl tak a ruka țial chu ka thlang ta a. Business suit dum dak hlarh mai nen chuan inrem dawn riauva ka hriat vang a ni.

Ka thawmhnaw thlan chu sawisel miah lohvin a inbel a. Ka thlang sual lo e, a inhmeh thlawt...A palianin a sang țha si a, a chhip sam buk deuh lai chu a ti phir hlek bawk a. Dressing table a kan inneih zungbun a dah chu lain..

"Min buntir leh rawh le..ka inbual dawnah ka phelh a."

"Kei chuan vawikhatmah ka la phelh lo. Tuna ka buntir che hi phelh leh tawh suh ang che. Duh hun huna phelh leh atan ka buntir lo che a nia!" Nui duh miah lovin ka ti a. Ka rilru diktak a ni bawk..

"Sorry, ka phelh tawh miah lovang, za tibuai deuh che em ni?" A ti ta a.

"Tibuai chiang e..kha zungbun i bun chhan kha nupui nei tawh i ni tih chhinchhiahna a ni. Hmeichhe dangin an rawn hnaih dawn apiang che in..hrechhuak țhin ang che.."

"Awle, nangpawhin i thusawi zawh chiah kha vawng reng la... Ka unaupa emaw mipa dang, nangmah hnaih tum che an awm apiangin hre chhuak ve ang che." Ka țawng dan ki chiah chuan a ti ve a.

"Ok..min han fawp teh..husband," áw tham deuh țiak hian ka ti a. Bul țan țha leh tur hian ka pasal chauh hma la tur a ni bik lo..kei pawhin inrem ka duh a nih chuan hma ka la ve tur a ni.

"Oh, ka tum alawm, thinlung takin ka lo nghakhlel hle bawk."

"Tak tak maw."

"Tak tak ni e, i nghakhlel ve lo em ni?" Min zawt lêt khauh a.

Ka nghahhlelh zia chu ka inhrechiang khawp mai!

Min rawn fawh tákah chuan ka hlim veng veng tawh mai! Kan taksa chu a insi thlap bawk a.

"Oh, Kiara!" Min fawh karlakah chuan a ti sap sap a. Ka hmui bul vel te chu dam tak hian a fawp kual a. A nghawng a ka kuahna chu dimte a la thlain, "Kal tawh rawh le..i tlai lutuk ang," tiin ka inlahrang ta a.

"Kal ka lo tum ta kher kher a ni.." hreh zet hian min vawnna chu thlahin a rangkachak sana bun chu a bih zauh a. "Pawn thleng min thlah turin ti ta che ila, ka phût sang viau i ti angem?"

"I sawi hma khan thlah che ka tum chiang alawm," tiin ka nuih var var a.

"Ka lawm e..Kiara, chance min pek avangin," ti a, ka kutah kaiin room chu kan chhuahsan ta a.

Garage ațang chuan Joshu in Rolls a rawn khalh chhuak, a lo nghak reng tihna a ni maw! Kan pahnih chuan min rawn nuih var var a, a hmel nelawm tak hi alawm ka ngainat chhan...

"Kiara, enge i lo tih ang..i bula awm ka chák zia hi..."

"Drawing room-ah ka awm ang."

"Awle, indim la..lunch ei hmana ka rawn haw dawn chuan ka lo phone hmasa dawn che nia, mahse kan buai deuh mai thei a, engmah ka tiam thei lo che!" tiin kan inneih zungbun, ka bunna lam kut chu lakangin a fawp zauhva. Lungawi hmel pu hliah hliah chungin car-ah chuan a lut ta a.

Hetiang hian awm reng thei ila tih ka lo ngaihtuah hmanhmawh a, a nupui hian ka zir phawt chuan ka pasal rilru hi ka hneh thei em em ang! Min hmangaih lo mahse min thlahlel ve hle tih ka hre ve tlat...'Kiara țang hle rawh' tiin ka infuih ru sauh sauh a.

Dominic te tlan chhuak ta chu an lan theih chhung ka thlir a, ka pum chu chul zauhin, 'Papa hian min la hmangaih em em ang,' tiin inchhungah chuan ka lut ve ta a. A office kal hreh hmel lutuk kha ka theihnghilh thei tawh lo mai thei a ni..

Drawing room-ah ka inkhung leh ta a. Naktuk friday nileng ka ziah leh chuan ka zo theiin ka ring a. Ka pa ka present hun tur ka ngaihtuah a piang hian ka chák zek zek tawh...

A intiam lo nain, lunch ei hunah chuan a rawn haw ta thova. Drawing room-ah ka awm vangin a thawm ka hre lawk si lova. Inah tumah an awm chuang lo tiin ka lo inkalh hnan si lo..ka hnung lama pen thawm ka hriat chuan rang lutukin ka hawi lêt a. Ka lemziah pawh thuhrukna hman a awm ta lo..Dominic chuan a hmu ta nge nge a..ka zo deuh thaw tawh lehnghal! Naktukah chûlmam chauh ka hmabák a sin le...

"Kiara, engthil nge ka hmuh hi..." Dominic áw thám deuh țuak ka hriat chuan amah chu ka en vat a. Min en miah lo hian a nu leh pa lem ka ziah chu a en tlawk tlawk a nih chu...

'My God...engtin nge i ngaihtuah chhuah theih zawk le?" Tiin hnai zetah a bih leh ngat a, "A ang hle mai, ka nu phei hi chu a dam lai hmel hmu ang mai ka nia lawm le..!"

"I hmuh ala hun lo asin le...!" Ka lo ti ve thung a. Ka tüm deuh bár bawk. Ka lemziak reng reng a hun hmain tumah ka hmuhtir ngai lo. Ka nu leh pa takngial pawh kha en ka phal lo țhin kha a nia! Tun țumah erawh chuan loh theih lovin, ka lo thup ve țang țang chu ka pasalin a hmu ta chu a nia!

Kan inhauh buai lai kha chu ni se..ka nasa ngawt ang..Mahse kan inkár a fel ve țan chauh a, ka thinrim ngam ta lo. Buaina chawk chhuaktu zawk nih loh hram ka duh bawk si...huizz...ka hrehawm vek...!

"Ka saruak lem i ziak emaw tiin, ka lo hlauthawng ve em em a." A hmui a tih sawih dan velah a nuih a za hle tih a lang reng a. "Min tih thinrim chuan ka ziak lovang tih tunge sawi thei!?" Cho ár hian ka ti let ve a.

"Thleng lo hram rawh se..hetianga a tak tak a ang dawn a nih phei chuan, mitinin i pasal kumkár an hmu vek dawn asin." Insum theilo niawm tak hian a nui chhuak ta hawk a.

"Chu tak chu ka tum a ni," ka nui ve ta hak hak a. "Ka pa in a hmuh hunah, engtin nge a hmel a awm ang tih ka hmu chák kher mai!"

"A lawm viau a nih loh chuan, mak tiin a meng pháwk vak ang!?"

"Chu tak chu ka hmu chák reng a ni! I lu ûm teruhte ah hian thluak chu a lo awm ngei e...my dear," tiin ka țhutna ațang chuan min pawt thovin amah si chét in min kuah ta hle hle a.

"Hey, i thawmhnaw hi...a bál vek dawn ania aw..."

"Ka hrilh tawh che kha, ka hnaih theihna tur che a nih phawt chuan ka thawmhnaw zawng zawng bál vek mahse pawi ka ti lo." ti thum chhakin a hmui lum ham ham chuan min fawp ta a.

Min thlah leh hnu chuan a thaw chhuak ham ham a. "I hmelțhat ang bawkin i fing a, a chang chuan ka rilru put dan hi mak ka ti fo țhin. Lunch ei lovin helai hmunah hian hmangaihna chenpui che ka duh hial mai!" A ti leh a.

Dominic in min thlakhlehna a tihlan hian nuam ka ti ru veng veng zel!

"Ka pasal i ni tih hi ka la awih hlei thei lo," ka tih chuan "Ka ni chiang e..keimah Dominic Dron Malakian, i pasal ngei ka ni e..a tak ka ni nge ni lo, ka fiah thei reng bawk!" a tih chuan a biangah ka fawp zauh a. "Ka lemziak hi thup tur a ni tih i hria ang chu maw! Duhtak..."

"Ka thu i awih viau a ngai dawn a nih chu...chuti lo chu...." a'n sawizawm duh lo ngei a..sual thiam ve tak a ni.

"Min blackmail leh dawn tihna mi? Nupuia min neih i tum dan style khan.." Chimawm taka ka tih chuan, "Shit..kha thil kha sawi tam chi loh...hawh le..lunch ei turin ka hruai chhuak ang che, i car thar kha i keng thei ang!? Tiin thudangah a pakai ta daih a.

Dominic chuan ka thawmhnaw thlak chhung takngial pawhin min kalsan phal lo. Ka hák tur ka zawn lai chuan underwear leh bra nen chauh ka awm a. A insum hmel ka hmuh chuan ka nuih a za ru viau! Min tur chhen a...

Chiffon kawrfual, a kamis hák rawng ang deuh chu ka ha ve a, a țhuidan simple zet chu ka duhzawng tak a ni. Ka mitmeiin ka nalh em? tih ka rawn zauh a. A lo bu deuh nghat...lungawi hmel tak hian ka car thar lam pan chuan min kalpui ta a.

Min hruaina restaurant chu a lun hle a, dawhkan a lo hauhsa thlap bawk. "Kiara, i țhiannu chu ka phone tawh a, zanin hian Washington a rawn thleng ang!" tiin ka țhut nan chair min pawh chhuah sak a.

Talinda khan sum a nei tehchiam silova ka ngaihtuah ru riau! Ka hmelah ka ngaihtuahna chu a lang deuh nge? Dominic chuan, "Ka private jet in Gavin a'n a hruai dawn alawm, hlauthawng suh...kan hnena a chen chhung zawngin a mamawh engkim ka ngaihtuah sak ang!?" A ti ta a.

Hei vang hi a nimaw! Gavin kha a lo reh em em, Elina thlah tur chauhva kal si..a hmel hmuhtur a awm miah loh... Phakar dun reuh mang e..mahse ka thin a rim lo...Talinda ka hmu chák tawh hle a ni.

Waiter-in champagne ka no a, thlit a tum chuan ka lo hnial a. Nimin lama ka awmdan avang khan insum rih ka tan a țha tih ka hria...Chutia ka lo hnial chuan Dominic chu a nûr deuh nâng a. "Engtizia nge?" a ti thuai a.

Ka lu thing mat mat chungin, "Ka chák lo satliah mawle.. tui vawt tawk ka duh zawk!" Ka ti ta ringawt a. Diktak chuan naute chungchang ka thup avang hian ka inthiam chiah lo.

Eitur kan chah a lo thlen hma chuan kan inbe lem lo..Dominic chuan Champagne chu a lem hlek hlek a. A mitmeng buang thak chuan min hawi san meuh lo..

"Dominic..."

"Dominic darling," hmeichhe áw mawi tak hian a rawn ti ta thut a. "Ka hmu leh che chu a lawmawm hle mai! Tunlai chu i inlahrang ngawt mai duhtak," a la rawn ti cheuva. Dominic chauh chu a en a, min hmu ve awm pawhin a lang lo.

Ka hmuh tawh a zawnga hmeichhe hmelțha ber a ni hial ang chu...a sam sen thar chu a tle siauva. Chunu nen chuan kan inchen hialin ka ring! A sang țha ve khawp mai! A kawr hák hnunglam chu a zauvin a taksa a lang hnem hle a, a nalhin a man pawh a to hle ang..Amy ai chuan nalh chungchuang tak a ni.

A hmel ka enchian chuan a mitmeng thip tak chu ka hmu nghal mai! Ve lutuk a...buaina dang min thlen loh hram ka beisei...

Dominic lam a hawi leh chuan a mitmeng thip tak chu a lang dam leh thlap lawi a..ka ngaihtheih tur chi a ni lo tih ka hre mai!

Dominic chu a ding chhuak nghal a. "Suzy" a ti deuh hmuk ringawt.

"Min inhmelhriat tir pawh i tum dawn nange darling," tih ham ham pah chuan min rawn en deuh kher a. A perfume rim na zet chuan ka luak a ti chhuak nghulh thei nia!

Chu hmeichhiain min rawn tibuai chu lawm lo tih hriat tak hian a tüm hmuk a. 'Ka nupui a nih hi' tih bak engmah a sawi lo..ka hming pawh a hrilh lo a, ka lo lawm ve em em tawp...

"Ka hmuh hnu a ang hle mai," Suzy chuan a la ti hram a.

"I hmu tawh ngei ang," a ti leh hmuk a. "I secretary thar ber a ni em? Nge model zawk? Model a nih ka ring mah zawk..a pian en hian," a ti leh zat zat a.

Dominic chu a thinrim a ni tih a thisen zám pawng țalh țalh ațang chuan ka lo hre thei mai! Chuti chung chuan a la inbengdai thei zel thova, "Ka nupui hi model nilovin artist a ni."

"Tak zet?" Mitko san ák hian suzy chuan a ti leh a. "I secretary Amy aia a țhat bikna ka hmu ve hauh lo."

"Min kalsan thei tawh ang, Suzy..ka nupui leh kei hian kan mamawh lem lo che tih i hriatthiam ka ring," vin hauh si lo, kha fak hian a ti leh a.

Ka lo ngawi reng a, an inbiak vel dan chu ngaihthlak a nuam tlat!

"I nupui chu...Pathian leh.. a la naupang hle a ni lawm ni? Tu emaw..Maxi a ang deuh! Mahse a ni si lo a nilawm ni?" Chal chuar nang in min en a.

Min hre lo hram se ka va'n ti tak..Dominic chu ka melh vat a...'Sawi suh' tih melh hian ka melh a. A lo man vat!

"I hriat ve zel angaihna ka hre hrep lo ve.." A ti hmuk a.

"I khuma mutpui a, chutah an aia hmelțha emaw nalh emaw i tawn leh huna thlauhthlak leh i chin dan kha a hre ve lo ani ngei ang! Nge chutianga palzam theih loh khawp a luhlul a ni zawk?" Suzy chuan a ti sak sak a.

A girlfriend hlui a nih ngei dawn hi...

"I sawi hnem tawk tawh in ka hria..." Dominic áw fiak țhak chu a ring miah lo.

"Hnem khawp mai...tui takin chaw in ei ka beisei mi mawl nu..i pasala i thlan ták hi i hriatchian ngei ka ring!?" tih nghauh pahin a kal sawn ta a.

Dominic chu a thinrim em em mai a. thinrim awm tak pawh a ni. Kei erawh chu ka thinrim lo ve teh tlat! Suzy khan Dominic hi ala duh reng a, nupui a nei tih a hriat khan ná a ti nimaiin ka hria!

Ka pasal hi a lo lar vet vet em a nih hi... Kei aia hmelțha leh nalh tamtak a hmu țeuh dawn tih pawh ka hre fiah uar a..a nupuia min thlang hi ka lawm ta phian zawk...

Suzy nen an inbiak chhung zawng khan Dominic chu a ding char char a. A mitmeng chu hlauhawmna hian a khat tawh, a hmui a pet ruh nasa mai bawk. "I chhuak teh ang," tih pahin ka bánah chuan a chelh a, min kaitho ta a.

Hrilhhai tak hian ka en a, "Engmah pawh kan la ei si lova," ka ti sap a.

"I ril a țám tawh viau em ni?"

"Aw..țám thove, a țam tak tak.." ka ti a.

"Kan inah tui deuh ka siam ang che..ka mood a off vek..Kiara min hrethiam rawh.." a ti sup a.

"Awle...min siam sak dawn te chuan," lungawi takin ka ti ve mai a. A thinrimna tih reh tumin a biangah ka fawh sak zauh a. A nui suk.

Kan chenna hmunah kan lét leh ta ringawt a....Dominic chuan eitur a buatsaih mawlh mawlh a. Tihpui ve ka tum pawhin a phal țhak lo.

A soup siam lai chawl meuhvin min rawn en a, a chevel hmuhnawm ti taka ka lo en lai a ni bawk nen kan mit a intawng sak a. "I thinrim ve miah lo em ni?" Maktih hmel takin min zawt a.

"Thinrim tur ka ni em ni?"

"God, Suzy awmdan khan min ti mualpho hle a ni."

"A pawimawh vak hleinem..ala duh vang che a nih kha..i nupui neih a la ná deuh mai chauh a nih kha..." hnem tum tak hian ka ti a.

"Min duh vanga kan lunch tur min tih buai kher kha thil țul lo tak a ni..kut ka thlak teuh zia kha..nang lah i ngawi hmak si..." min en deuh vang vang chung hian a ti ta a.

"Ka lo inrawlh chuan a chi náng...ka thin tertek chhuak a dawl lovang!" Tiin ka nui sak a.

Dominic hmel chu a dáng ve deuh lap a. "Nichina Suzy awmdan tenawm tak, hawihhawmna awm hauh lo ang chi kha i tawh leh hi ka phal tawh ngai lovang. Ka tan chuan mi bîk i ni a, min ring thei em, Honey? a ti dam ta thlap a.

"Ka ring che alawm, i ta chauh ka ni bawk, chuan ka ril a țam tawh takzet," ka tih chhunzawm zat a.

Tháwk ala ham ham a, "I thil ngaihtuah zawng hi chu ka thlák hlei thei lo chu a nih hi...ok..dawhkan lo buatsaih la, ka rawn chhawp ang," nui hawk hawk chungin a ti ve ta a.

Suzy chungchang sawi tawh lovin hlim takin lunch kan kil dun ta a.

Chawhnu lam pawh company ah a kal ta lo law law a, drawing room-ah a luh ka phalsak ve tih ka hrilh chuan lawm hmel takin min en a.. Ka lemziah lai chuan min tihbuai hlau zet hian ka bula chair ah chuan thatchhe tak hian a lo țhu a...ngaihsanna mitmeng hian min en leh zauh țhin!

"Talinda leh Gavin tan hian theihtawp kan chhuah dawn lawm ni?" A tih chuan ka nuih a za hle. Gavin hi a la thîk deuh tlatin ka hria...

Ka pasal chauh lo hi chu mipa dang ka duh thei ngai lovang...

Tlailam dar li a rik chuan ka lemziah chu chawlhsanin, Dominic țhutna lam ka va hawi phei a..remlo zet hian a lo muhil a, ka khawngaih reuh tawp!

Dimtein a hmuiah ka fawh sak a, a rawn che deuh țuah țuah a, chutah chiang taka rawn mengin alamah min kuah hnai a, duhthawh takin min fawp ta vawng vawng a.....

©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)