SOLOMOS BRIDE BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: SOLOMOS BRIDE BY Becky Rm Renthlei (Completed)

Unread post by Ngaia » January 28th, 2018, 1:37 pm

SOLOMOS BRIDE

by Becky Rafa Renthlei

Chapter-24

Solomos Villa Nsw Living room

Oliver Solomos chuan ngun zet hian min en a, Dazel thusawi pawh zawm lem lovin living room lai takah ka ding khawng auh a.

Tim Hathaway hmaah hian tlanchhiat ka tum reng reng lo. Dawt hlang hlaka min puhna hi ka enliam mai anga maw? Teuh lo mai!

"I duh ang ang chu sawi ta che Hathaway," ka áw damtak phena khauh ru far chu a hriatthiam ka ring.

"Briena, engvanga phat tum tlat nge i nih tih hi Pathian chauhvin a hria ang, ka rin i ang lo hle mai," a sawi zo hman chiah Dazel chu rawn che thutin Tim biangah a hnek ta țhuai a. A chet ran mai bakah thinrim lutuka hnek a ni bawk a, Tim chu a hawi sawk thei nia!

"Ka nupui hi ngaihdam i dil lo a nih chuan tualthah ka hreh hauh lo ania." A ti thum chhak a. A aw a ring lo náin pawisak a nei hauh lovang tih a hriat theih.

"Dazel, i nupui hian a bum che a ni. I pa ngei pawh hian i lakah zep a nei tih hre tura fing i ni emaw ka ti a!" Tim chu a nui sawng a. A hmel țhatak țhin kha hmuhtur a awm tawh lo, a nihna diktak rawn lang chhuak ta hi ka ngainat zawng lah a ni hek lo. Tenawm lutuk!

"Kan chhungkaw chungchang leh ka company sawi chhe ngam tur hian tunge i nih?" Dazel chuan a ti nghut a.

"Tunge ka nih tih i hriat duh chuan i nu leh pa zawt mai rawh." Tim mitmenga Dazel a huatna rawn lang chhuak chu hmuh hmaih chi a ni lo. Oliver ngawi ngul lam chu ka en a, thinrim puakkeh tur ang mai angin a insehruh țun a. Țawng tum hmel a la pu ta lo fo. Hundanga a thuneihna hmanga mite thunun țhintu kha a hmel a ți duk a. A chhan awm ang ka ring thiam chiah lo.

"Tim min chhuahsan phawt mai teh." Cheryl aw thâm țiak chu a zawi hle a.

"Ka sawitur ka sawi zawh hma chuan chhuah ka tum lo, i lo inrawlh angai lovang Mrs.Solomos." Tim chuan a ti nghut a. Tlangval zaidam leh fiamthu duh tak țhin kha engvanga hetia awm ngawt nge tih ka lo ngaihtuah rauh rauh a. Kei min huatna chhan tur ka hre der lo, chutiang bawkin Dazel pawh a boss a nia, a awmdan hi a mak tulh tulh!

"Brie, ka room-ah han chho rawh le.." Ka lam hawia Dazel an a tih chuan ka diinna ngaiah ka ding ngar a. Tim min puhna hi sawifiah lovin kalsawl ka tum teuh lo.

"Ni lo ve, min puhna hi chuti maia tlanchhiatsan ka tum lo, i fâ engtik laiin nge ka lo pai a Tim?" Amah ka melh ngar a. "Chutiang si se sawi ka tum lo, i hriat chian khawp kha." A ti hmuk a. A dinna lam zawimuanga pan pheiin, "Engtin nge nangang mi tenawm hi ka țhianah ka lo ngaih theih che le?" Tih pahin ka theihtawpa náin a bianga ka beng ta țhuai a, a rin loh dan a che ka ni bawk a, a meng kawk mai!

"Briena, ka fapa kut i thlak ngam a maw? Chupawh a fa i pai vang lehnghalin?" Oliver aw chher chhuai ka hriat chuan ka pen tawp chat a. Keimah ang thovin Dazel pawh a ding khawng nghal luh mai!

"Ka pa eng nge maw i sawi le?" Dazel an a tih chuan Tim chu a țhen sawk a.

"Oliver Solomos fapa ve tho ka ni. Dazel, i û ka ni tihna a nih chu!" Chutia Tim a'n a tih veleh Oliver leh Cheryl lam ka hawi nghal a. An hmela nuam tih lohna lo lang ka hmuh chuan Tim Hathaway thusawi hi dawt a ni lo tih ka hrethiam mai. Dazel erawh maktih luat vanga ngawi rengin a nu leh pa a en tlawk tlawk thung.

"Ka pa i sawifiah dawn nge? Keima'n Hathaway ka zawt nawn leh dawn?" Hetiang em em a Dazel thinrim hi vawikhatmah ka la hmu lo.

"A dik e, Tim hi ka fapa a ni, thawnthu seitak a nia, insawifiah ka tum lo bawk. I nupui hian engtin nge a fa alo pai theih tih chu i zawn chhuahtur a ni e." A ti nghut a. Oliver hian Tim lakah nau ka pai a ring a maw? Ka hrethiam teh nuai lo!

"A țha e, insawifiah i tum lo a nih chuan sawitur ka nei bik lo, ka nupui lamah ka țang tlat ang." Dazel a'n ka thlavang a hauh vang chuan maktiin ka mengbial kal a. A thinrim ka ring kha a nia! Ka ring sual leh ta.

"Ka fa humhim hi ka tihtur a ni a, Tim Hathaway fa ni lovin keimah Dazel Solomos a fa ni." Cho zet hian Tim lam a hawi a. Kutthlak leh duh mai hmel a pu bawk.

"I nupui khan a ti â zo tawh che a nih kha! Jimmy Larson fanu zet chu a lo ropui e, ka fapa te pahnih a bum nalh hle mai!" Olivera chu makti zet hian ka en a. Min hmusit em emtu hi ka pa khan 'ka țhianțha ber' a ti a nia.

"Ka pa i țawngkam fimkhur rawh, i fapa ngei pawh min bum duh a nia. I company ka hminga i lo dah hman hlauh chu a tihzia hle mai."

"Dazel, i pa ngaihdam dil nghal rawh. Khatianga țawngkhum ngam tur kha i ni lo." Cheryl chuan a ti țhat a. Tim ngeiawm zeta lo nui vur vur chu rum mangkheng hian ka melh a.

"Pawi ka ti ngawt mai ka nu! Helaia awm reng hi a țulna ka hre hrep lo ve." A aw chu a la chang țha hle a. "Brie, hawh le..he Villa hi kan tan a chep lutuk tlat!" Ka hnial hman hmain ka bânah min kai a, kawngkhar lam min panpui ta a.

"Dazel..?" Oliver leh Cheryl chuan an ti rual țhawt a.

"Khanu vang khan min kalsan thei lovang." Țap lek lek a Cheryl in a tih chuan ka ding deuh dat a.

Dazel chu hawiletin, "Mr.Hathaway engtiklai mahin ka unaupa i ni ngai lovang. Ka nupui hi i kut hmawr pawha tihnat i tum anih chuan keimah min hmachhawn a ngai tih i lo hre dawn nia." "Kal ang le.." tizui zatin min chhuahpui a. Oliver Sofa-a țhu thla ruai ruai chu melh leh hrâmin Dazel chu ka zui ta a.

"Khaw'nge kan kal dawn?" Dazel pen pâwk pâwk chu ka um ve dat dat a.

"Sidney kan pan nghal ang," a ti hmuk a. A hmel țo haw tur ang mai a dur khup chu hlauhawmtak a ni.

"Car-ah hian lo țhu la, phone kan hmang lawk ange." Ka luhna turin kawngkhar chu min hawnsak a, a kekawr ipte ațanga phone a phawrh chhuah hnuah kalsawn deuhin an inbe ta a. Tunge a biak ka hre lo thung!

Keimah vanga a nu leh pa a kalsan hi ka la awih thei lo! Tim min puhna kha chu dâwt hulhual a nih vangin eng hu-ah mah ka ngai lova. Mahse, Oliver min țawngkhumna erawh ka pai dam thei lo. Dazel lakah inthlahrung viau mah ila ka pa vang tal pawh hian Solomos ka nih a la ngai.

Car chhunga a rawn țhut luh hnuah ngawirengin min en vang vang a. A mitmengah chuan thutiam tamtak ka hmu a ni. Engmah sawi lo mah se min kalsan dawn lo tih ka chiang ngam chiah.

"I pa ka be lawk anga, airport kan pan dawn nia," car chu tlantirin kan chhungkaw chenna hmun kan pan ta a. A hmel dur khup pawh a reh tial tial a, Dazel diktak kha a ni leh țan ta.

"I pa ka biak chhungin kentur i neih chuan i lo siamfel dawn nia, ka rei lovang." Ka hmuiah fawp zauhvin ka pa hmu tur chuan a lut ta nghal a.

Tim Hathaway thusawi ringawt khan ka rilru a luah a. Engtin nge hei leh chen a lo inthup theih zawk le? Wool worth company hi Dazel chuhpui atum tihna a ni thei mai angem?

Rokhawmtu tur nau ka pai tih a hriat khan a inthupna hai țhiatin a rawn puak chhuak tihna a nia. Tenawm lutuk! A fâ paiah te chuan min la puh zui a, engtikahmah kha mihring fa kha ka pai lul lovang.

Ka ngaihtuah zawng ringawt pawhin ka luak a chhuak.

After 2 Months Apartment plus S

Melbourn kan chhuahsan ațangin thlahnih a liam tawh a, buaina em em kan tawk lo. Joanna nen erawh a hma ang khan kan inpawh thei tawh lova. Ani ai chuan Carlos pawh ka ngaina fê zawk.

"Wife, nangmahin i awm hreh lo tak tak maw? Lizzy ka rawn tir thei tho a nia." A tie ka suihsak mawlh mawlh laia Dazel an a tih chuan nui sangin ka melh chho a. Vawiin hian company anniversary lawm tur chungchangah meeting an nei dawn a. Dinner a ei nghal dawn vang a ni.

"Lehkhabu chhiarin emaw movie en chung pawhin ka tlingtla thei lutuk tlat min ngaihtuah suh."

"I khua ahar viau dawn a nih chuan rawn biak hman hram dan che ka lo ngaihtuah ang." Ka hmuiah a fawp zui vang vang a.

"Ok..mahse ka phut lui lo che a nia."

Dazel chhuah hnu chuan ka dinna ngaiah ka la ding reng a. Dawhkana ka phone dah a rik vangin ka ban vat a. Dazel a ni! A chhuak chiah si a!

"Mrs.Solomos, tukverh kha hawng la lo hawithla teh." A sawi ang chuan tukverh bulah kalin ka va hawng thuai a. A Commodore car bulah Dazel chu thatchhe zet hian lo dingin a rawn nui chho ta var var a. A beng bulah phone a keng bawk.

"Ni hman nuam le wife." A nui leh suk a.

"Nangpawh le husband." Car chhunga a țhut luh thleng chuan ka thlir reng a. Phone a dah hnuah a bân rawn vai zauhvin a tlan chhuak zui ta a.

Ka dul puar ve âk tawh chu chûlin 'I pa tel lo hi chuan engmah ka lo ni lo a nih hi' ka ti chhuak ta sap a.

Melbourn kan chhuahsan ațanga kar hnihnaah Dazel chuan office a kal leh kha a nia. A nu leh pa hnen ațangin eng buaina mah kan tawk zui lo, Tim pawh a reh hmiah a, company lam pawh a kal pangaiin a kal reng tho.

Min duat em em a, indim ka ngaih em vangin Joanna tih pawh duh lovin min buaipui fai deuh vek! A zaidam em em a, zinglam luak chhuak ka nei leh zauh țhin tih loh chu insawiselna em em ka nei hran lo. Ka pasal leh Carlos enkawlna hnuaiah hahdam takin ka awm a. Joanna hi ban mai ka duh rum rum.

Dazel hmai ka zah vangin ka la insum hram hram a,Henu hian Oliver Solomos a la țan em em zui.

Engtikah emaw chuan buaina kan la tawk leh ngeiin ka ring a. Natalie leh Tim pawh an reh hlen ka ring hauh chuang lo. Dazel kutah engkim ka dah a, ka ring fai vek bawk.

Kan nupa nun hahdamthlak tak vang chuan ka taksa pawh a hrisel sawt em em a, ka pa in zialam a pan thei lo erawh ka rilru a nuam viau lo. Ka nau neih hma chu zin thei dinhmuna kan din loh vangin ngai viau mah ila ka tuar hram hram a ni.

Khumah a nuamthei ang berin ka mu a, turky movie ka en leh pek tawh. Tunlai chu hetiang lam hian ka rilru a luah deuh tlat! Pop corn leh chips tamtawk ka inchhawp a chimbuaitu nei lova engthawl taka awm hi a lo nuam ber a ni e.

Kan room kawngkhar kikri ka hriat chuan ka phu zawk a. Inleng tur ka neih awm ka hre lo. Apartment chhung rawn kaltlanga kan room rawn pan nalh thei chu kan hnaivai tak a ni ang. Kawngkhar hawng tur chuan ka tho ta țalh țalh a.

Kawngkhar pawn lama lo dingte ka hmuh chuan ka nui nghal var var a. Rafa leh nula lian lam chhelo zet chuan min lo nuih sâng a. Model a nih loh vek pawhin actress a ni tal ang.

"Lut tutin min sawm dawn nange?" Rafaela'n a tih chuan an lo luh theihnan kawng ka kian vat a.

"Dazel nupui i ni a...?" Chunu hmela maktihna niawmtak lo lang ka hmuh chuan a ngaihna ka hre viau lo.

"Yes, Briena ka ni e," ka kut ka pek chuan a lo vuan vat a. "Callie ka nia," ti ve sap in sofa-ah chuan a țhu tharh a.

"In hmel hmuh ka inbeisei miah lo." Rafa en chunga ka tih chuan a nui suk a. "Dazel kan ngam lo chu a nih hi.." Callie pawh a nui ve hak hak a.

Nilengin an țhiandun chuan an awm ve ta a. Lunch pawh an pahnihin min siamsak deuh kher a, Joanna awm ve chu engahmah ngai lo niawm takin an haider hmiah.

Tlailam dar thum a rik chuan min chhuahsan ve ta chauh a. Callie kha ka ngainat zawng tak a ni. Rafa girlfriend thar ber a ni bawk! A thlang thiam fu roh lehnghal a!

"Solomos nih chu a nuam viau aniang maw?" Joanna chu ka'n melh rum nghal ringawt a. "Rafael hian hmeichhia angin a en che tih ka hre reng a nia" a ti leh kher a.

"Hmeichhia anga min en lohvin mipa angin min en dawn a mi?"

"Ka sawidan hrethiam lo tur khawp a mawl chu i nilo a.."

"Mipa hmuhin min hmu zawk em ni?" ka tih chuan ngeiawm zetin a nui sawng a. A mize mak ta lutuk hian ka thin tertek ala kaitho leh dawn khawp mai.

"Briena, min bum tum duh suh, Dazel laka i rilru puthmang hi ka hai miah lo. A sum chauh i duh.."

"Joanna..?" Ka ti țhat a.

"Sawi dik loh ka nei em ni?" Min cho zet hian a lo ti let a. Ka nu rual mah ni se ka hlau eih lo. Ve lutuk a!

A kianga awm reng hi a sawtna ka hre lo ve, inhnial mood ah ka cheng lo. Ka thinrim tak tak anih chuan pawisak ka nei dawn si lo a. Kan naute tana pawi tur thil ka ti palh hlauh ang tih ka hlau.

Thinrim țunin kan room lam ka pansan ta daih a. Dazel hian nu ang maia a en avang leh a duat vang hian a inluling mah mah.

Shower ka neih zawh hnuah khumah muin ka chhing ta vang vang a.

Ka puma kut vawt ngiaiin a rawn tawh chuan peih lo zetin ka meng chhuak a.

Dazel chuan ka kawr hlimin ka dul puar âk chu a lo chul riak riak a. "Hi.." ka nui nghal ringawt.

"Tih harh che ka tum lo a sin le..!"

"Dar emgzat nge?" Ka tih chuan a rangkachak sana bun chu bih zauhin, "Dar kua," a ti sup a.

Ka va'n mu rei em em ve le! Dinner pawh ka la ei miah lo. Khum bul dawhkana eitur ka hmuh chuan ka nui ta sak a. Dazel nge nge a ngaihtuah kim teh e.

"Ei rawh le..hmanhmawh lo la.." min kuah tho nghal a. "Ka duat khawlo ang che tih chu ka hlau deuh." tiin ka malchungah tray a rawn nghat ta a.

"Hah!"

"Nui suh," Dazel lai hmel ka hmuh vawikhatna!

Hmanhmawh hauh lovin ka ei mial mial a, hmuhnawm tizeta min thlir rengtu ka pasal chu siai zauhvin, "I ei ve duh em?" Ka ti leh hnuhnawh a.

"Eitur i hmuh chuan min hrechang țhin lo chu a nih hi.." a nui deuh suk a. Thinrim der ka tum ngial a. Ka nuih a za ve tho. Ei ka duh ve êm bawk a ni.

Ka eifel vek hnuah a thawmhnaw inbel chu ka lo tihțhan tawh angin ka hlihsak leh thlap a. Bathroom-a a luh hlanin tray dah turin inhnuai ka pan ve ta thung.

Joanna hmel hmuhtur awm lo ringawt pawh hi hahdamna chikhat a ni.

Kan room ka thlen chuan Dazel chu towel chauh vengin dressing table hmaah a lo ding a. A pian nalh zet ka hmuh apiang hian ka thâwk a danglam ve hman ziah bawk. A huhang na zet leh a rim faisar hian min hîp nawn fo țhin.

"Lokal teh.." Min kuah inpeih at hian a bân seipui chu ka lamah a rawn phar duai a. Ka pan ve nghal vat.

"Vawiin lam kan lo țha em?" A awm ruak kungah chuan ka bei chial a.

"Rafa leh Callie an lo kal a.."

"Ah..Rafaela mai mai chu..(h)" A ti sup a.

"Eng nge?"

"Engmah ni lo ve..vawiin nilenga ka rilru a awm reng hi ka tih phawt loh chuan.." tih pahin a hmui lum ham ham chuan min fawp a, ka chhâng let rang kher mai.

Ka pumah chûlin, "Naute zanin chu i pa hian insum a tum miah lo a nia," a hmui laksawn paha a tih chuan ka nui chhuak hak!

"Insum tumna rilru i lo pu deuh elaw?" Ka fiam ve hlak a.

"Teuh lo.." ti nghutin min pawm nawlh a khumah min nghat ta a.

"Thawmhnaw inbel buai tumna ka nei rih lo" a mipatna min tawhtir a tum chuan ka hawisawn nghal thuai a.

"Engtikah nge ngaiah i neih dawn le?" Ti supin a towel ven chu chhuatah a theh thla a. A hmanhmawh changa a tihdan a ni tih ka lo man ve vat.

A beisei loh dan deuhin a hmuiah ka fawp thut a. "Relax..wife.." a ti tak nâin ka thawhnaw chu a phelh zui nghal mawlh mawlh a.

A mitmeng tisa châkna leh phurna inpawlh chiai chu a sexy ru riau. Ka pasal tan theihtawp ka chhuah leh dawn tih inhre ru karin min tawhna chu phur zetin ka lo dawngsawng ve ta a.

End of chapter-24

Dated: 17th January 2018

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:37 pm

SOLOMOS BRIDE

by Becky Rafa Renthlei

Chapter-25

Briena tuitaka muhil sâk sâk chu ka en reng a, a hmithmul sei er sang leh a hnar ngul sâng rát tê fel ran chu a nalh reuh hle. A naupai hnu hian alang itawm zual a, a hnute a naupai vanga lian ta sawt leh a pum puar ve âk chuan ati hmeichhia bik hliah hliah hian ka hria a. Ka lo duhthusam țhin ang ngeiin keimahah rinna a nghat ngam tial tial a ni tih ka hriat hian ka chhungril a hlim ru veng veng.

Rilru a helhkam ka neih țun vangin ka muhil thei ve meuh lo. Khum thawhsana intur ka inthlit lai chuan ka phone a lo ri thut a! Tunge tun ang hunah min be tur awm? Zinglam dar thum chauh a nia. Phone chu lakangin, "Yes," lehlama mi țawng ka hriat chuan ka inseh ruh țalh țalh a. Tim Hathaway a ni.

"I lakah ka lungawi lo hle tih i hriat ka ring." Hathaway chuan atibbul deuh nghut a. "I sawi tur sawi vat mai rawh." A awki ang chiaha ka chhan vang chuan a lawm hauh lo tih ka hre mai.

"Larson wool company hi Oliver a'n a lei daih tawh tih i hre lehpek lo ang chu. I nupui pawh khan a hre vek tih ka sawi tlang law law mai ang."

"Engtin nge i hriat?" Mak ka tih rualin ka rindan a dik chiah tih ka hriat phah.

"Ka hriatna lam chu sawi kher ka tum lo, Briena khan nangmah ni lovin wool worth company hi ania aduh zawk chu, a pa damlohna remchangah hmangin lem a chang mai mai a nih kha. In ngaihtuah fim la khanu kha kalsan rawh." Chhan leh ka tum lai takin a off zui ta hmak a.

Huh! Ka hriat hnu vek a ni. Melbourn kan chhuahsan hma chiah khan Jimmy Larson hnen ațangin ka hre vek tawh. Briena'n a hriat ve chauh thu leh a țhawng hle a ni tihte thlengin min hrilh fai vek a. Ka puzawn hian ka pa ai pawhin min ring zawk tihtheih hial a ni.

Briena hian kei lo chu engmah neih a nei tawh lova, chuvanga a laka țhat chhuah ka ni reng bawk. Hmeichhe dang ang a ni lova, a khawsak a sâng uchuak hek lo. A luhlul viau vangte pawh hi a ni ang danglam bik riaua ka hriat nachhan!

A hmel hahdam thlap chu ka va en leh rih a, kan inneihtirh lai ngaihtuah chuan puitling tawh tak a ni. Eng dinhmunah pawh ding se ka nupui a ni tawh tlat a, ama'n min kalsan a nih loh chuan thlahthlam ka tum tawh miah lo. Harsatna leh natna ka siamsak zawng zawng thawidam tur hian engpawh atan tih ka huam. Chu chu ka thutlukna a ni.

Ka pa erawh chuti mai chuan ka ngaidam thei dawn lo tih ka hria. A fapa laka a thil zep hi a turu lam hret a ni e. Company chungchangah a rawn inrawlh tawh ngai lo va, harsatna min siam hek lo. Briena a țawngkhum dan kha paidam harsa ka ti ru tlat! Ka nupui bulah engmah ka sawi chhuak lo nâin khatia ka pain a țawngkhuma nâ a tihzia kha hmutu ka ni bawk.

Ka nupui natna chu ka natna a ni.

Ka nu leh pa anni emaw, kei chuan a dik zawk lam ka țang ang tiin rilru ka siam diam tawh a. Ka siam sual lo tih pawh ka hre thuai reng a, kei ni lo mipa pakhat tê pawh ala mutpui hauh lo. Chu chu ka beng awmna ka hriatchian tluk zetin ka hrechiang bawk.

Whisky no hnih ka in hnuah khumah bawk ka lawnkai leh a, amah hnaih renga awm hi ka duhthusam a ni reng fo dawn a ni.

Amah vangin wool worh company hi chân ngai mah se ka pawiti lo. Mipa ka ni a, ka nupui chawmna tur thawkchhuak zo lo khawpa nêp ka ni hek lo. A biang lum ther therah chuan dim têin ka fawhsak a, a rimtui hmanrim nám chêk chuan ka hnar a verh zar mai!

Kan inneih dawn laia a tarmit lian zet phena a mitmeng paw râm ka hmuh țhin kha nitin hmuhnawn fo ka duh. Mipa thluak sawi danglam vek thei tura piannalh a ni bawk.

Tim Hathaway ve mai mai khan a fâ paiah te ala puh ngam a nia. Villa-ah khan thah duhna rilru ka pu hial a nih kha.

Naktuk hian Ney York ah ka kal angai dawn a, Briena hruai ka tum thut thut kha a nia thil tihchi-ah ka ngai leh ta lo deuh a ni. Zankhat lek riah bo san pawh ka hreh ta khawp mai! Muthilh tumin ka bei ngial a ka hlawhchham țhak! A tawpah phei chuan mu lui thei tawh lovin ka thawhsan ta nge nge a.

Chokaah breakfast tur ka siam ta daih a. Joanna nen an inmil ta hlawl lo hi a chhan ka hre ru reng. Ka pa spy kha a ni miau va, chuvangin ngaihmawh viau mahila ka haider rih mai a ni. Nimin lama Rafa te țhiandun lokal pawh kha ka pa'n a lo hre leh diam tawh. Ka duh anga engkim ka thunun vek hunah Joanna hi ka mamawh tawh lovang. Ka nupui nun tihrehawmtu te hi a mal tê têin ka thianfai zel dawn a ni. I'm Dazel Solomos.

English ho breakfast ka siamsak chu tray-ah dahin kan room lam ka panpui a.

Dimtê a kawngkhar hawngin Briena a harh tawh leh tawh lo ka'n thlêk hmasa tê tê a. Ka thil hmuh chuan ka nuih a tihzat êm vangin nui chhuak lo turin ka insûm nasat a ngai viau.

Meng mang lo hian ka mutna chu a lo dap dan dan a, min zawng tih ka hria. Ka mutna lam hawi chuan a inlet thak a, a bân chu min kuah tum niawm takin a vai ve ngial a, 'Dazel..?' ala meng chuang țhak lo.

Dawhkanah tray chu nghatin a bulah chuan ka va inthawlh ta ringawt a. Ka thawh hmasak apiangin min lo zawng țhin a ni ngei ang. Mut a duh ropui si! Min thawh khalh ngai mang lo.

"Hey.." A hmui hnawng chap chu ka tawk zauhva.

"Umnn.." rawn che țalh țalhin ka âwmah a lu a rawn nghat dat a, a chhing zui leh daih; a landan cute zet chu a inhre chuang der lo.

"Intiharh dawn rawh le, i brakfast tur a dai vek ang." Kaihthawh tumin ka sawi dat dat a. A mumang a nuam deuh nge a rawn nui sak, "Dar engzatnge ri tawh."

"Dar sarih a pel tawh ania," A meng thei thlawt lo tih ka hmuh chuan, "Brie, ka titak tak a nia, ka kal a hun țêp tho rawh le." Hreh zetin a rawn meng ve ta țawk a.

A thophang hmel pawh a țha tho.

"I ei tawh em ni?" Dawhkana eitur inchhawp melh zauh paha atih chuan, "Kan eirual ang chu." Ka ti liam puat a.

Dinner eidun loh zeuh zeuh kan neih țhin vangin zinglam tal hi chu a rual a, ei ka duh. A bulah ka sawi kher lo mai pawh a.

A intihfai chhungin ka thawmhnaw inbel ka lo thlak ve thung a. Țhulh leh mai ka duh rum rum, mahse, chu êm zawng nichiahin ka hre leh lo deuh. Tim leh Natalie chungchang kan chhuina pawh a finfiahna kan nei nual tawh a. New York ațanga ka kir leh meuh chuan an nuih a za lo khawp ang. Ka pa hi chu 'Ka pa' a ni tlat a, tun dinhmunah ngaidam thei rih lo mahila ka huat reng loh hrâm ka beisei.

"Ka inpeih e," Bathroom ațangin kelawngin a rawn chhuak a, ka sawi zin tehreng nen a sim hleithei lo. A naupanchhiatna hi a lang leh nge nge zel.

"Khaw'nge i sandal?" A ke melh paha ka tih chuan, "Enteh, duhtak, room-ah ka tawm reng thova hetia kelawnga awm hi nuam ka ti zawk." Min tlawn dawna atih țhin angin a nui sak a. Ka nawrlui tawh bik lo nuam a ti zawk tlat si a.

"Ka ngaidam leh mai ang che, New York-a chuan i lo kal ve châk em?" A duh dawn lo tih hre tho mahila han tihkual vel hi a nuam riau.

"Hah! Ka châk tih i hriat vang a nih chu, mahse ka kal thei lo tih i hriat kha, i tellovin khumah ka lo mu ngat ngat anga a ni mai." A malchungah tray chu dahin apple a keih deuh hmak a

"Ka tel lovin i awm thei tak tak ang maw?"

"Ka hre lo le.." a ti leh lawi a.

"Nichinah pawh khumah min zawn daw daw kha.." ka tih chuan ring zetin a nuichhuak a. Dawt ka sawi emaw a ti reuh emawni le?

"Dawt sawi i va'n thiam lo ve tak." A la ti zui a(h).

"Dawt ka sawi reng reng lo, i tuktin tihdan a ni tih ka hria."

"Engtin nge ka tih a?"

"Dazel..?" Tiin ka'n nui hmasa phawt a, a tihdan chu ka zir ta a.

"Ka awih miah lo." A zak leh ringawt tawh.

"Ok..nih leh i ti lo nimai teh se, ka thawhsan a piang che a, khatianga min zawng dawn a nih chuan i hrilhhai tuktin dawn a nih kha, i tho tlai thei ropui si."

"Misualpa.." tûm deuh barin grape rah chu a hmawm zui mawlh mawlh a. A tihtauh apianga a chin țhin dan a nia ngaiah ka nei titih tawh. A titau rei lem hlei lova.

"Apartment hi lo chhuahsan hauh suh ang che, i nu leh pa Lizzy leh kei kan nih loh chuan tuma call chhang bawk suh ang che." Ka tih chuan angaihna hriat hmel vak lo hian min en hau a.

"Enga ti maw?"

"Solomos i nih hi, tun thlenga news paper-a i hmel ala lan lohna chhan hi min zawt dawn lo em ni?" Ka tih chuan hrethiam hmel a pu ta deuh.

Briena hi media lamin an veh ru reng a, Rafa leh Simon puihnain kan la veng zel chu a nia. A naupai tihchhiat tum leh kidnap thleng paw'n a chungah a thleng thei tlat. Ka lo ngaihtuah ngai miah loh kha Rafa thurawn angin ka kal a, a lo țha phian mai. Tim leh Natalie hian an tina lovang tih tunge sawi thei.

Company lama a body guard te khan englai pawhin apartment chhehvelah an veng reng tih a inhre der si lova. Ka nupui venhim hi ka tih tur a ni bur.

Breakfast kan eikham hnuah ka kuah leh tê tê a, min ngai lutuk anga lan hi a hreh thei tawp. A awm ve tho Briena kha a ni tlat a, chuti maiin a chapona leh induhna hi a reh mai chu ka ring bik hauh lo. Fanu mal company liantak neitu kha a ni țhin tlat a, zawi zawia a rilru hmin hi ka hna hmasa ber tur a ni.

Ka briefcase khaia inhnuaia min zuithlak a tum chuan, "Lo chhuk duh lo mai rawh, first fligh ticket ka la a, Simon a tel ve dawn bawk nen, inhnuaiah min nghak tawhin ka ring."

"Private Jet i hmang dawn lo a maw?" Mak a ti deuh tih ka hria.

"Aw, a awlsam dan a inang reng a, ka sawi kha i hrereng dawn nia,tunah tukverh bulah va ding rawh le.."

"Zan riah kher chu a ngai tihna mi?" A ti leh hrâm a, tukin chu zawhna tawitê tê min zawt deuh reng mai.

"Zankhat chauh a niang. Tiger lakah lo sual lutuk suh aw.." tia ka fiam chuan a nui ta var var a. Joanna hi Tiger a ti mai țhin.

"Lizzy riak turin ka sawm thei angem?"

"Ka lo hrilh ange, ka mutnaa a mut dawn loh phawt chuan thei tehreng mai."

"Ok.." kun hniamin a dulah ka fawp zauh. "Son, ânu nen lo awm r'u aw.."

"Tikhan ti ve ziah suh mi eng ang nge a nih pawh kan hre lo." A ti deuh hlar a. Ka nui tawp.

Ngai rilru viau mahila kal loh theih ni hek lo le, pindan chu ka chhuahsan ta nge nge a.

Simon paw'n min lo nghak ran tawh a, airport thleng Owen a'n min hruai dawn vangin Escord car a lo peihsa diam tawh. Kan room balcony a Briena lo ding vang chu bân vai khum zauhin car-ah chuan ka țhu lut ta a. Apartment lan theih chhung chu hnunglam ka hawilet țâwk țâwk a. Ani paw'n min la thlir zui vang vang tih ka hmu.

Ka nupui vang hian ka mizia engzatnge la danglam leh ang le?

"Briena hian engtikah nge a hna a rawn zawm theih ang?" Simon nui vur vur chu ka melh zauh a.

"A nau neih zawh lamah ani ang chu, ka chiang chiah lo, ama thu thu a nimai."

"Jimmy hian a fanu hi a enkawl țha awm hle mai."

"Chu chu engin nge rintir che?" Ka tih chuan, "A kum zat ngaihtuah chuan engmah thiamna hman a la awm hleinem, hnathiam tak a ni tih i hriat ve tho kha, ani ang rual kum atan chuan mi special tak nih angai." A ti deuh duah a. A dik tih ka hre tho nâin sawipui ka tum hran lo.

"Ka nupui chungchang chu duhtawk teh ang, Mokawr chu engtikah nge i peih dawn." Tiin thudangah ka pakai ta daih a.

Dar san âkin, "Embroidary lam an inpeih chuan ka inpeih a nimai." Simon hian enge a hriat a, a nuih vur vur reng le?

"Ka mamawh hun ala hla deuh mai pawh a, a hun hmaa enchian ka duh ngei dawn a nia."

"Yes, Sir."

Airport kan thlen chuan Owen chu ko fâlin Briena lo ngaichang ru deuh turin ka chah thlap a. Owen hi Briena driver ni mah se a rintlak em em tih ka hre ve tawh a. A pi hi a zah hle bawk! Inrual khat lek an nia, 'Madam' tia ko tlatin a ngaina hle tih ka hria a ni.

New York Brooklyn Roof Top Hotel.

Ka penthouse-a Simon nen dinner kan neih hnuah Briena ka call zuai a, a phone a pick up thei țhak lo. A muhil leh tawh aniang! Missed call a hmuh hunah min rawn be ve êm ang chu. Joanna pawh apartment-a riak ve mai turin ka hrilh sa diam tawh.

Kan company fashion designer Malina puihnain Natalie share hralh rûk pawh kan hrechhuak tawh a. Roger hian inhnamhnawihna a neih ka ring a mahse, vanneihthlak takin a lo nei lo hlauh. Natalie leh Tim Hathaway hian hnunglamah min beiin Wool worth company hi neih an lo tum reng tih ka hriat hian ka ngaihdam theih ka ring lo.

Ka pa leh Tim inlaichinna pawh ka hrechiang tawh a, ka pa fa chu a lo ni ngei e. Mahse, anu hming a lo chhawm mai mai a ni. Sum hmanga ka pain a kâ a hup miau avangin kan hrechhuak har ta reng a. Tunah erawh duham luat vangin kan chhuichhuak ta nge nge a ni. New York-a kan company share a hralh zawng kan la let leh vek dawn a ni.

Simona phone a rik chuan rang zet hian a chhang a. "Umn..ka bulah a awm ka lo hrilh dawn nia." Simon hmel chu a dur deuh khap a.

"Engthil nge?" Ka tih chuan, "Natalie leh Tim chuan Sidney an chhuahsan chiah. Anmahni car hmang lovin an hire a, an pan tur hmun an hriat chian hnuah min rawn hrilh dawn a nih chu." A tih chuan ka ding hluai a. Kan hrechhuak tawh tih an hria tihna a nia!

"Shitt...an bo hlen lo tawp ang." Ka ti sup a.

"Bronx Bank lam ka lo bia anga, an sum dahho kha khawih an nei tawh em? Tih hriatchian ka lo tum a nge."

Simon phone hmang tura a kalsawn hlan chuan intur ka lo dawm ve thung a. Hathaway leh Natalie vang hian buaina ka tawk deuh reng chu a nia. Briena hrilh erawh țhaa ka hriat loh vangin keimaha chinfel ka tum mai a ni.

Tun thleng pawh hian min la rawn call lo cheu. Ka phone chu phawrhin Briena ka call leh ta a.

"Yes," Ka nupui aw thâm deuh țiak ka hriat chuan engtin emaw ka awm leh tawh.

"Dazel..?" Ka chhan loh avanga min rawn koh nawn leh chuan ka nui hak a.

"Dinner i ei tawh em?" Sawitur ka ngah tehreng nen tun ataka ka haihchham chu le!

"Lizzy nen kan eidiam tawh, nang zawk?"

"Kan ei tawh e, min lo ngai em?"

"Er..umn.." A lai hmel tur ka mitthlaah a lo lang nghal a ka nui suk.

"Gold son, a țha maw..?"

"Dazel..? Chimawm lo teh aw.." A ti țhat a, a duh loh dan zawnga han fiam hi chuan a ter ât zel.

"Naktuk chawhnu lamah rawn haw hman ka tum ang, ka lo thlen huna ka tih hmasak ber tur chu i hriat kha.." A nui hak hak a. Hmun leh hmuna awm ang maiah ka inngai.

Thil ho tê tê a rawn sawi țeuh a, kan inbiak tawp lamah phei chuan Lizzy in a rawn fiam a ka hriat phâk ve vek avangin ka nui ve suk suk.

Briena țhat ve em emna pakhat chu tute pawh hmel hlim sarh hian a be thei a, a thinchhiat reuh nen hian ka rin loh dan deuh hian a awm leh tlat zel! Ka hrechiang viau emaw ka tih pawhin a mize thar hmuhtur a awm zel țhin.

"Dazel, Rafa kha biak han tum teh." Simon hmela manganna ka hmuh chuan ngaihțhat lohna ka nei nghal a.

"Engtizia nge i hmel chu..?"

"Tim Hathaway te chuanna car a accident a, a hmunah a boral nghal a, Natalie leh naute erawh an na lo thung." A tih chuan ka insehruh nghal țawlh țawlh a.

"Sidney police lamin an be tlang thei lo che a," a ti leh a.

Huh! Engtia lo dawnsawn tur nge ka hre lo.

Ka phone ri sek chu ka chhang vat a.

"Dazel, news i en em?" Briena hlauthawng aw ka hriat chuan TV on turin Simon ka mitmei nghal a.

"Brie, i țha em?" Ka ngaihtuah takzet. TV en lah hi a peih leh lutuka, thu thințhawng dawngsawng tur chuan ala chak tawk lo.

"Umn..aw ka țha e.." a ti bah nawk nawk a. Engemaw chenah Tim hi a lainat rûk ka ring tho. Kha leh chen inkawm anni tlat a, ani ang rilru tluangpurh chuan lainatna thinlung a pu ngei ang. Ka lainat lo tihna a ni lova. Ka pa ka hrechhuak nghal vat. A hre ve tawh ngeiin ka ring a.

Ka duhdan leh rindan lo ang taka thil rawn thleng chuan minti hamhaih ve deuh.

"TV off la, Lizzy nen mudun leh mai si rawh u, ka rawn haw ang." Ka ti tawp a. A hlauthawng ngawtin ka ring.


Ka company a thawklai a nih mai bakah ka unaupa ani ve thova pawm lo viau mahila a thih tawh ber si chuan buaipuitur tamtak ka nei bawk. New York ațang chuan engmah chinfel ngaihna a awm lo.

Ka buaina pakhat a fel ta. Mahse thihna hmang khera chinfel a ni erawh pawi ka ti viau. Kan thu a awm der si lo.

Simon kutah engkim ka dah a, Sidney panin ka thlawk haw ta vang vang a.

After 5 Months Solomos Apartment.

Briena khum ațanga tho țalh țalh chu ka en reng a, ka muhil emaw tiin min tihharh hlau takin thawm a dim hle a. A dul puar lah chuan ati lang lian hle a, ka rin aiin a inzo phian!

A nauneih thla a ni tawh a, insawiselna em em a nei hran tawh lo. A ke a vûng nasa țhin viau a, chu erawh Carlos chuan hlauhthawn tur a awm lo a tih vangin ka ngaimawh ta lem lo mai pawh a.

Tim Hathaway thihna avang khan Briena hian inthiamlohna a nei lian hle a.
'Ka lo beng ta kher kher a ni' A ti thul, va'n buaithlak țhintak. A inthiamlohna chhan pawh ka pa vang bawk a ni.

Tim ruang kha ka pa in kan chhungkaw thlanmualah vui a tih tlat avangin pawm lo rilru chungin ka aw ve hram a. Enganga rilru chhia pawh nise ka pa fa a ni tlat a, chutih rualin thisen inzawm kan nia, rilru kawi put reng kha țul ka ti ta bik lo.

Natalie pawh a fanu nen an rawn kal a ve a, a boyfriend leh a thurualpui ber han awm lo ta chu a tuar thiam lo hle bawk. Hetianga rilru chhia leh duham lutuk hi engtin nge ka lo kawp theih ka inti rilru hial!

Vuini bâk kha ka nu leh pa ka hmu tawh lova, Briena tana ngaihthlak nuam lo tak takin ka pa a țawng fuk fuk a. Chuvangin rei awmna chi ah ngai lovin Sidney kan pan leh nghal daih.

Jimmy Larson pawh theihtawpin ka ngaihsak reng a, hmasawnna hmuhtur a vang khawp mai. A fanu a ngai viau tih ka hria a, kan va tlawh ve nghe nghe bawk. Tunlai hian a zia ve deuh hret a. A tû tal hmu hman turin dam hram se ti takzet.

"Brie..?" A awmdan maksak zet ka hmuh chuan ka muhil der duh ta bik lo. Phuzawk chungin ka lam a rawn hawi a. Carpet chungah a mutkawr hâk lai nen chauh chuan a țhu thluang diai a, a chawn leh mal vel chu a chûm deuh taih taih a.

"Ka ti harh che mi?" Inthlahrung dâka a tih chuan naupang thil eiru man te pawh a ang dawn dawn alawm.

"Aih, i taksa a nuam lo mi?" Khum chu thawhsanin ka pan vat a.

"Englo..ka chawn vel hi a kham ut ut."

"Min kaihthawh mai tur che alawm," Ka pawm nawlh a, khumah ka nghat ta a. Chhuata țhut reng te chu â leh lutuk.

"Naa, muhil leh rawh." khumah chuan a mu nghal ar ar a. Min tir hreh a ni chiang mai.

"Ka nupuiin min tlanbosan dawn emaw ka lo ti hman a..hmânah chutiang deuh chuan tu emaw chu a awm tawh a." A ke massage paha ka tih chuan a ke chu rawn chet thutin min tlawh zuizat a.

"A hma, hmânah, tih reng loh tur muhil rawh." A ti deuh hmak a. Fiam ka châk tulh tulh.

"Hmân awm lo se, vawiin a awm náng."

"Zanlai laiah inhnial ka peih lo."

"Eng nge i peih?"

"Dazel Solomos ka ke khawih tawh lovin muhil rawh," țeu hlar chunga a tih tâkah chuan thlêm a hun tih ka hria, a nunphung pangaiah pawh a thinchhiat tawh tehreng nen nimin lawk ațang khan a zual kai leh deuh. inhremna chikhat a ni ringawt alawm.

"Titau thlêm ngai an awm em?" Nui suk chunga ka tih chuan, "Awm chiang e, black coffee min siam thei tihna." a ti zuizat a.

Zanlaia a harh apiangin black coffee a tih loh leh serthlumtui a ti ve ziah. A tih a tam em em a, sawisel erawh ka tum lo. A naupai vangah ka puh deuh ngawt!

Min hmangaih thu min la hrilh hauh lova, kei pawn ka hrilh ta chuang lo. Inhau lo leh inngeihtakin kan awm thung.

Naute kan neih zawhah kan company design ngei mokawr hâin inneih țhat ka duh a. Ka nu leh pain an remti emaw, min pawmpui lo pawh ni se ka rilru sawhsawn ka tum lo bur.

Briena tello chuan ka nun hian awmzia a nei lo tih ka hre chiang tawh êm a ni.

End of chapter-25

Dated: 18th January 2018

©<++++[BeckirafARenthleI]++++>®

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:37 pm

SOLOMOS BRIDE

by Becky Rafa Renthlei

Chapter-26

Bella Vista Wool worth company.

"Tracy, Owen kha lo bia la, ka nupui lo va lam rawh se, lunch eiturin ka lo nghak ang." Ka assistant Tracy chu nui var var chung hian a bu nghat nghat a. Briena ka hrilh lawk lem lo. In a tawm ngat ngat a ning ve êm a, vawiin chu French restaurant fianrial raihah hruai ka tum a ni.

A nau neihnan karhnih vel chiah a awm tawh a, ka thusawi zawmin a indim ve viau chuan ka hria.

Ka rilru ti hrehawmtu ber chu a chhula pangti chawr awm kha a țhanglian ve zel a, Carlos sawi dan tak phei chuan zai a ngai ngei ngei dawn a ni. Tunah hian ultrasound a alandan chuan phir a pai lehnghal a, an lian lo hle bawk! Briena kan la hrilh lo, a dawngsawng thiam leh lovang tih ka hlau deuh a tin ni.

Ka office chhunga Tracy leh Briena an lo luh chuan ka inpeih thlap tawh a.

"I lo thleng thei maw?" Siai zauh chunga ka tih chuan, "Umn.." a ti ringawt a. Lungawi lo hmel a pu chuang lo nâin eng emaw tak chuan a tibuai a ni chiang!

"Kha aia thui deuh khan min chhan dan tur i hre nange?" nui chunga ka tih chuan, "Ah..min hrilh lawk lo a, hmanhmawh deuhva insiam a ngaih phah." Ka rindan vel chiah a ni.

Phunnawi lova a awm ka ring lo hrim hrim. A phun peih tihna ni lovin tunlai chu a mizia a inthlak deuh reng a ni tih ka hriat vang zawk a ni.

French Restaurant panin car-in kan kal ta a. Staff-ho in min thlir zui vang vang ka hmuh chuan ka nui suk. Ka nupui hi enliam mai mai atan chuan a uiawm tlat. Wine rawng jacket a ha a, a hnuaiah cotton kawr var a khup thlenga fual a ha bawk. Sandal kaih wine rawng a bun deuh thlap bawk a. A sam a thlah kawi chiat a, a nalh thlawt. Ka lo chhuang ru veng veng.

A pum puar liah tawh chu a langsar viau tawh a, ka fawp châk zek zek! Hetiang hmun ualau-ah hian fawh a duh leh dawn lo tih ka hria, min thlakhlelh loh vang ni lovin news paper sub head a awm a duh lo mai a ni.

"Khawi hmunah nge min hruai dawn?" Min en ha chunga a tih chuan, "Kan thleng țep reilote chauh lo nghak la," ka tih chuan a nui ta hak hak a.

"Gentleman lo deuh ve!" Ti sapin ka mal a rawn hmer deuh kher a. Ama duhthu ngei hi chuan min va'n khawih khât ve tak. Hmangaina kan chendun lai leh a dâwn vel erawh chuan a phur thei ve riau tawh a. Ka duhzawng takin a che thiam viau bawk, Briena kha a ni miauva.

"Gentleman anga awm turin min duh deuh tihna mi?"

"Teuh lo, i nihna ang chiah kha ka duh chu a ni e," a'n ti ngei a(h). Â thluak hman hun hi a hria a sin.

Restaurant kan thlen chuan ka dawhkan hauhsa lam panin waiter-in min hruai nghal a. Kan inneih chhung hian ka hruaichhuak ngai mang lo tih ka hria, ka inthiam lo ru hle bawk.

Menu chu enin pakhat zawk min pe ve a, "I duhzawng chah ve mai rawh." Glass no ah tui thliin a in khalh a.

"I duh apiang chah rawh, i duhzawng chu ei theih ka tum ve mai dawn alawm," ka nui hmel a hmuh chuan nui chung bawk hian, "Chiah maw?" min cho âr a tiin order a siam ta nghal a. Eng nge a chah pawh ka hre chuang lem lo. Ka nupui ei duhzawng ei ve tur hian insiamrem ka tum mai tur a ni.

"Chawhnu lam ka chawl a, incheck up la ka duh deuh a, Carlos pawh ka be sa tawh," ka tih chuan a ngaihna hriat hmel vak lohvin min en a.

"Ah..Naktuk alawm ka kal hun.."

"A dik, mahse, a inkar a hla chuang lova ka hruai hman lai che hian kal ka ti mai a nia, keimah ngeiin kalpui che ka duh vang a nia."

"Ok..i tih dan dan."

Eitur a rawn thlen tákah chuan engmah sawizawm lovin kan ei ta a.

"Wine ka in ve thei angem?" Makti deuhin ka en a. Nidangah pawh a inchâk ngai tawp si lo a.

"Brie..Wine kher chu in lo e, naute tan a țha lo tih i hriat kha."

"Er..awle, ka lo hre tawh lova," a ti țha ve mai.

"Nakinah duhtawka in hun i la nei dawn alawm, i hriatthiam ngei ka ring. Wine ni lo thildang i duh sawi la kan chah belh dawn nia."

"Dessert ka chah tel lova, chuan englo.." sawi zawm lovin a ngawi ta daih a.

"Sawi chhunzawm law law rawh.."

"A ngai lo e," a ti leh lawi a. Inthlahrung hmel a pu deuh!

French fried chu tui tih hmel takin a ei tiam tiam a. Thau lawih natham hi chu a ei ve chiang alawm, mahse, a thau chuang der lo!

"Naute a lo che leh tawh." A mengphar ak a. Zantin a lo chet apiang hian min hrilh ziah a, restaurant ah a awm tih a theihnghilh thut nge ni, a țawng ring angreng bawk sia; kan piaha dawhkan kil ve te chu an lo hawi țhap. A zak hmel sen deuh țawn țawn ka hmuh chuan a kutah ka vuan vat a.

"Zak mahta che, nupa kan ni alawm," ka tih chuan tháwk la hapin a nui ve ta a. Midang mitmei veng leh tawh chuang lo chuan eitur lam a ngaihven leh daih. Harsatna tawk lovin naute hi nei hrâm se ka ti takzet.

Restaurant chhuahsanin Carlos clinic kan pan nghal a.

Khâwl hmanga Briena pum a en chhung chuan an bulah ka lo ding ve reng a. Naute pakhat zawk chu chiangtakin a lang a, a lungphu dap dap te pawh a hmuhtheih vek. Briena duhdan angin mi enge anih kan zawt lo. A lo pian hunah kan hre mai dawn alawm ati deuh tlat!

Hre châk viau mahila ka nawrlui lem lo. Phir a pai tih a hre lo pawh hi a awm ve tho. A chhan chu a lang tham ve tlat lova, bâwk satliah angin alang mai a, a tê hle bawk. Kan vannei fê a nih loh chuan kan chang lo mai thei tih Carlos an a sawi vangin kan hrilh duh ta lo a ni. Chutah zai ala ngai dawn zui a, huphurhawm tak a ni.

Briena, a check fel zawh hnuah Carlos chuan a mitmeiin min biak a duh thu min hrilh a, ka lo man vat. Ka nupui chhuahtir leh rih chu mawi ka tih chiah loh vangin hundangah biak mai ka tum ta zawk a.

Nau neihna tura kan mamawh tur pawh kan nei kim vek tawh a. Pa ka ni thuai dawn tih ka hriatna hian awmdan tur min ti hre lo leh thut zel. Jimmy Larson hian a hmu hman lo ang tih mawlh ka hlau. A fanu hi a chhuang ve ém asin, a chhuang sual lo viau bawk.

Apartment kan thlen chuan a chauh hmel hle a, a mitmeng dul hnak chu hmuh a nuam viau lo. Sofa-ah a țhu thla hnak a, kunin a ke chu a nuai ta nawk nawk a. A lo vung nasa hle mai! Engtin nge ka lo ngaihthah theih le?

"Wife..I țha em?" Chhuatah țhingțhi ve nghalin a sandal bun chu ka hlihsak ta vat a.

"Țha e, ka chau satliah mai mai alawm," a tih chuan pawm kang nawlhin kan room-ah ka chhohpui ta a.

Khumah nghatin a thawmhnaw inbel chu ka hlihsak a, "Intifai rih lo mai rawh," tihpahin khum lu lamah lukham ka remsak a chumi ngheng chuan ka țhut muttir ta a.

"Dazel..?"

"Yes,"

"Ka kawng a na hle mai," a ti sap a. Vawiin ka hruaichhuak chu ka tifuh lo deuh em mawni le?

"Carlos ka'n phone ange.."

"A ngai lo ang, pawnlam boruak ka zo lo deuh a ni maithei," a ham zui bai bai a.

"Muthilh tum ta che, ka inthlak anga ka lo mu ve dawn nia."

"Umn.."

Hmanhmawh takin ka inthlak ta sawk a, a harh theih tehlul nen a nun zuai raih chu a inhmeh hlawl lo. Ka inthiam lo zual sawt a, nau a nei țep tawh tih hrereng chungin ka chhuahpui a, nilenga ka hmuh loh hian ka ngai ve êm a ni. Min hnial tawh lo leh thuawih taka a awm phei hi chuan ka thlahlel ngawih ngawih tih ka zep lo. Ani ang hi he khawvelah hian tumah ka la tawng lova, ka tawng leh tawh pawhin ka ring lo.

A bula ka mut pawh chuan nidang angin min kuah hauh lova, a maimitchhing tlat! "Brie.." zawitêin a biangah ka chûl a. A lo muhil daih chu niin..!

A kawngnâ chu a zia deuh em mawni le? Khum ațang chuan tho chhuak lehin Carlos ka phone ta a. Briena awmdan ka sawi zung zung a, zanin ngaichang tur leh anâ a chhuak leh anih chuan a rang lama hospital pan turin min rawn hrilh a. A pum na hmasa lova a kawng nâ a ti daih chu thil nihdan tur a ni lo tih a sawi bawk. Hlauhthawnnain ka khat a.

Kan inbiak zawh hnu thleng chuan ka dinna ngaiah ka la ding reng a. Ngatinge a chungah hian thil țhalo thleng tur anga ka ngaih tlat le?

Tun ang hunah tak hian ka nu leh pa ka hrechhuak vang vang. Puitling ni tawh mahila hetiang lam hi ka hre tlem hle a, thurawn min petu leh sawipui tur ka duh takzet.

Tim Hathaway vuini bâk kha kan inbe leh tawh lova, min rawn ngaihven miah lo bawk! Kei pawhin biak tumna ka nei bik lo. An duh angin contract hmangin ka nei a, tunah lem dawt vang a ka nupui an pawm duh ta lo hian minti lawm lo hle a ni. Engang nu leh pa chiah nge maw ka lo neih ni? Tehhrep a!

Kan nurse rawih lai pahnih chu inring turin ka hrilh a, Joanna pawh kan la chenpui reng tho. Briena hian a ngaithei hlawl lo bawk nen tunhma ang khan kan inpawhbta lova, pawi tihna erawh ka nei chuang lo.

Khuma ka nupui mu chu ka en a, a biang sen deuh țân ka hmuh chuan mak tiin ka pan hnai ruak a. A chalsam chu huikiansakin ka dek vang vang a, a sa vur mai! Khawsik a nei reuh emawni!

A nghawng vel pawh a sa ham ham a, harh lo mah se a awmdan hian ka ngaih a ti țha lo. Ka ngaihbel vang nge ka hre chiah lo thung.

A harh miau loh vangin ka kaitho duh ta lova, tlailam darli chauh a nia, ka phili chung tur a ni lo tih ka hria, asawi ang khan a chau satliah a ni ve thei tho bawk.

A bulah chuan inthawlhin ka kuah ta vang vang a.

Ka harh leh chuan zan dar riat a ni tawh. Ka lo muhil tlang daih a ni maw! Briena mutna ruak huai ka hmuh chuan ka inperh tho nghal a.

Bathroom -ah a lut anih ka rin vangin reivak lo ka ngaichang a, thawm a reh țhiap avang chuan ngaihțhat lohna bawkin ka khat leh!

"Brie..?" Bathroom kawngkhar chu a inkalh miah lo, dimtê hian ka hawng ta riai riai a. Ka thil hmuh vang chuan ka ding khawng at.

Briena chu a hmaa a tluk ang deuh khan chhuatah a lo mu a, a kut chuan bathtub tlâng vawn tum niawmtak hian a phar diai bawk! Nikhua hre lo tih hriat zetin a hmel chu a dâng bâm a. Second hnih khat chu che lovin ka ding hman.

Harh chhuak thutin ka țhingțhi thla hnawk a, ko pahin ka sawi nawk nawk a, awmzia a awm lo. Thi chhuak hmuhtur a awm loh vang chuan tlêmin ka hlauhthawnna a kiang deuh a, 'Lalpa lehh..'Kei hian ka venghim ang' tiin ka tiamna sin!

Pawm nawlhin khum lam ka panpui a, ka muttir hnuah nurse leh Joanna ko turin ka chhuak nghal a.

Dinner an lo kil mek a, ka hmel an hmuh chuan engmah min zawt lo an hrethiam ve nghal mai. Kan room lamah kan tlan chho leh ta nghal a.

Joanna chu Owen be turin ka hrilh a, keiin Carlos ka be ve thung. A pulse leh bp nurse in a check nghal a,

"A thidang a nih hi, hospital arang lamin panpui angai a nia, Mr.Solomos."

Chiai miah lo turin ka inthunun nasa hle a, minute sawm hnuah Owen chu rawn thlengin hospital kan pan ta a. Joanna erawh kan hruai tel ta lo. Kal ve a tum viau nâa, ka phal loh vangin lungawi lo zetin a tûm bur a. Henu hi rei ka awmpui tawh lo tawp ang.

RNSH ah bawk kan lut leh ta a, emergency room- ah an nawrlut nghal a. Luh ve ka tum chuan min lo dang vat.

"Mr.Solomos, theihtawp kan chhuah dawn alawm, pawnlamah lo nghak zawk rawh." Doctor pakhat chuan a ti dam thlap a. Carlos a lut daih tawh, Briena hi engtizawng pawhin a thi tur a ni lo bur.

Tinge ka ât em em le, a bula muhil lo khan hospital lo pan daih ila hetiang hian a awm dawn si lova. Ka thiam loh vek a ni.

Lobby-a țhutthlengah chuan ka țhu ta riai riai a. Ka thluak hman tumin ka lu ka thing deuh nak bawk.

Emergency room ațanga Carlos lo chhuak ka hmuhin, ka pan vat a.

"Dazel, kan zai nghal a ngai dawn a nia, internel bleeding a nei tel tlat a, a chhula pangti chawr kha naute hian a nêk na mah mah a, chuta țang chuan thi a lo put a, a hun hmaa zai angaih phah ta a ni."

"Briena a harh tawh em?" Ka ti vat a.

"Harh lo e, rawn harh pawh nise a harh rual rualin epidural anesthesia kan pe nghal dawn thova, harh loh nen a inang reng. Hlauthawnawm lutuk a ni lo a nia, zai chhung erawh a rei deuh ang." Ka darah a beng thak thak a. Min thlamuan tum tak hian a nui lui ngial a, ka thawveng chuang der lo.

"Ka nupui leh ka fâ hi chân ka tum miah lo a nia," ka ti nghut a. A lu bu nghauh nghauhin min luhsan leh ta a.

Minute sawm panga a ral hnuah inzaina pindan lam pan turin an rawn nawr chhuak a. Lo tihdin ka tum chuan an phal teuh lo, an khuh vek avang chuan a hmel takngial pawh ka hmu thei lo chuan ka thin a tirim hlur a.

Mitthi ang maia khatia khuh kher!

Beidawng zetin țhutthlengah bawk chuan ka țhu leh hnawk a. Ka mittui hnâm sawk chu ka khap per chhak.

"Mr.Solomos, Coffee tal hi in rawh, dinner i la ei bawk si lo." Ka nurse chhawr pakhat chuan coffee la khu vat vat min rawn pe a. Thil ei te chu khawilamah chutiang ngaihtuah hman ka ni lo. Coffee erawh ka la ta hram a.

Ka chhungte ka phone dawn thut thut țhin a, nitheiin ka hre ngang lo. Min ngaihsak lo tute leh ka nupui min pawmsak lo tu hi ka mamawh reng reng lo. Briena nu leh pa erawh chanchin hrilh hi ka tih tur a ni. Ka phone phawrin ka call ta a.

"Dazel..ințha em?" Gene Larson aw chu a zangkhai vah a. Briena chanchin tawikim taka ka hrilh hnu chuan, "Engtin nge niang? Jimmy ka kalsan thei si lo." A rawn tih chuan ka khawngaih angreng.

"Ka awm alawm, Jimmy kha lo hrilh la, chanchin ka lo hrilh zel ang che u, eng êm a ti lovang," Tiin ka thlamuan ve leh chhawng a.

Kan inbiak tawp lamah phei chuan a țap titih tawh! A awm ve reng, a fanu neihchhun kha a ni tlat a. An tan lo kal ngaihna a awm ngang lo a ni.

An makpa hian an fanu tan engkim ka huam tih hi ring hmiah se an hahdam a nimai.

Darkar thum kan nghak tawh a, nurse pahnih ka bula țhute chuan min hnem an tum ve ngial nâa awmzia a awm tam lo. Anni pawh luh phalsak anni lova, RNSH a thawk an nih lohvang a ni pakhat.

Tunah zanlai a ni tawh a, boruak uap churh chu ka hne takzet. Briena tello te chuan ka khawvel hi engmah lo mai a ni dawn asin. Fa neih kher kha contract-ah inziak lo se hetiang hi a thleng lo tawp ang. Rai lo se chuan pangai takin a chhul enkawl a ni anga, a bul ber chu ka pa vek a nia. Ka huatdan chu namai lo tak a ni.

Briena leh naute ka chân a nih chuan a nuamsa lo tawp ang. Ka ngaihtuah thui poh leh ka thin a rim telh telh.

Chutia kan lo țhut tlawk tlawk lai chuan Carlos leh Doctor dang pahnih an rawn inzui chhuak ta a. An lam panin ka pen phei nghal pâwk pâwk a.

"Carlos, eng nge chanchin?" An bul ka thlen phei rual chuan ka zawt nghal chawt a.

"Pathian hnenah lawmthu awm rawh se," a'n ti hmasa tê tê a. Ka hriat duh tak ala sawi lo, ka hmanhmawh tawh tehreng nen! Hnek bur a châkawm mai dawn alawm le!

"Ka nupui chu..." Ka ti nghut a.

"Kan zai hlawhtling e, mahse.."

"Eng nge mah se..?" Ka lo ti hmanhmawh.

"Naute pawh an pahnihin an țha a, i nupui erawh a dinhmun ka la sawichiang thei lo. Chhungkua inrawn khawm a ngai dawn a, a chhul hi kan paih angai mai thei a ni. A kum ala naupang si a. Tunah tih nghal theih a ni lo bswk nen."

"Ka hmu thei angem?"

"A pawi ka ti khawp mai, ala hmuh theih tlat loh, a harh mai lovang."

"Shitt..naute chu mi eng nge?"

"Mipa ve ve anni e, apiang hmasa zawk hi 2kg leh 300g a nia, a hnuhnung zawk erawh 1kg leh 700g a tê khawp mai kan up nghal bawk." A tih chuan ka thaw huai a, an pahniha an dam ringawt pawh chu ka lawm em em a ni. A pawimawh ber ka nupui ala harh lo thung.

"Engtikah nge ka hmuh theih ang?" Ka zawt leh hrâm a.

"A rei lutuk tawhin ka ring lo, a harh veleh kan rawn hriattir ang che, a chhul paihtur chungchang chu kan hriat ran angai a, lo inrawn ang che u."

Tumah rawn tur awm lo. Gene Larson engtin nge ka hrilh theih ang? Ka nu leh pa chu rawn ka tum bau lo.

"I nupui dinhmun hi a țha tehchiam lova, mahse, beidawnna tur pawh a awm chuang lo, kan theihtawp kan chhuah anga abâk chu Pathian thu thu a ni." Tia min hrilh tlang chuan ka hmai tuai puatin ka thaw hawk a. Ka chhang tawh lo.

Carlos leh doctor dang an kal liam hnu chuan ka țhutna ngaiah ka țhu reng a. Hospital-ah mi veivak an tam lutuk tawh lo bawk a, Zinglam darkhat a ri chiah.

Briena an rawn nawr chhuah hma chu tlaivar țhakin ka țhu mai ang.

Corridor-a pen ri khauh khauh ka hriain ka dâkchhuak vat a.

Ka nu leh pa hmanhmawh zeta ka lam pana lokal hlawk hlawk ka hmuh chuan maktiin ka mengphar awk a.

Joanna hnen ațangin an hria a ni ngei ang. An hmel ka hmuh avang chuan ka lawm chuang eih lo.

Huh! Rum zetin ka melh ta zawk a.

End of Chapter-26

Dated: 19th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:38 pm

SOLOMOS BRIDE

by Becky Rafa Renthlei

Last Chapter-27

RNSH Sdney Australia Lobby

Ka nu leh pa hmanhmawh zeta ka lam pana lo pen hlawk hlawk chu rum fahranin ka lo melh a. Ka nu hmela manganna lo lang chhuak leh ka pa hmel tla deuh kuam chuan ka rilru a ti danglam eih lo.

Helai hmunah hian tihtur an neih ka hre lova, ka nupui leh ka fate pahnih harsatna siamsak tuma lokal an nih chuan an hlawhchham sa a nimai. Thlasarih chhung tehmeuh min hre lo ang hmiahin an awm a, an fapa hi min theihnghilh hmin der bawk. Tuna taka ka lo lawm huam a țulna ka hre lo ve.

"Dazel, ka fapa?" Ka nuin min rawn kuah chuan ka lo rum nghut a. Kuah let tumna ka nei lo.

"Briena a țha em? Engemawtal han sawi teh," Ka chhan loh avang chuan a tihzawm leh a, ka pa erawh ngawi ngulin kan bulah a ding a. Tuna alandan ang hi tunhma kha chuan ka hlau țhin hle a nih kha! Tunah erawh a mize ngeng ngulh leh ngainatawm tehchiam lo hmanga vau zam mai mai theih ka ni tawh lo. Kum sawmthum pathum ka tling țhelh tawh a, fapa duatsual lah ka ni hek lo.

"Helai hmunah hian ka mamawh hauh lo che u." Ka âw a lungawi lohna lang chhuak chu an hai bik kher lo ang.

"I nu leh pa chanchin hrilh duh lo tur khawpin em ni min lo huat a!?" Ka pa hmela natna lo lang chu ka hmusual emaw ka ti hial! Lemchan a tum leh zawk nge?

"Briena chu a țha em? A la harh lo em ni?" Ka nu thlaphang hmel haiderin ka ding uaih a. "Melbourn-ah let leh zawk rawh u, ka nupui chu keiman ka buaipui thei e."

"Dazel, tun hi inhnial hun a ni lo a nia, i lungawi lohna dahțhain i nupui chungchang hi kan sawiho a țul a nia." Ka pa âw chu a zawi hle a, nidang ang lo takin a hlauhthawnna a langtel bawk!

Ka chhang zui tawh lo, ngawirengin minute sawm zet kan țhu tawh ang tihah chuan nurse pakhat lokalin, Briena harh tawh thu a rawn sawi a,

"Mr.Solomos, i nupui chu minute nga hnuah cabin lamah kan rawn dah ang, a bak chu doctor in a hrilhfiah ang che u." Nelawmtak hian a nui sang a. Ka nu leh pa hmela lawmna lo lang chhuak chu ka hmu reng! An lo lawm ve viauna tur pawh ka hre lo. An haw viau țhin a nih kha.

Cabin lian ber ka hauhsa diam tawh a. Chulam pan chuan ka kal ta a. Ka nu leh pain min lo zui tih ka hria a, ngaihsak ka tum hran lo. Nurse pahnih chuan coffee leh sandwich kengin min um dat dat a, inhnawhpuar ve mahila a pawi hauhvin ka ring lo.

Briena an rawn nawrluh lai chuan ka dinna ngai cabin tukverh bulah ka la ding a. Khuma an mut feltir hnuah ka pan ve ta chauh.

"Wife...?" Harsa tih hmelzet hian a rawn meng diar diar a. A hmel dâng lap maia nui hmel lo lang ka hmuh chuan lawm zeta kunhniamin dimtê hian a hmuiah ka fawp a. "Solomos pahnih lai i nei ania," ka tih chuan a mengphar âk a, ala hre lo a nih hmel!

"Ka hmu thei angem?" Thâm chalin a ti sap a. "Reilote hnuah pakhat zawk chu i hmu thei ang, keipawhin ka la hmu bik lo a nia," nui suk chunga ka tih chuan a ngaihna hrelo hmel takin min en a. Ka hrilhfiah vat loh chuan a chiai mai ang.

"Phir mipa i nei alawm, a nu leh pa chhun lo zetin an tê lutuk a, an la up rih a."

"Maw! Tak tak em? Kei hian phir ka nei a maw?"

"Shhh.." a hmuiah ka kut zungchal dahin, "Hahdam la, nakin lawkah i hmu thei ang."

Muangchangin cabin chu a melhkual a, ka nu leh pa sofa-a lo țhu a hmuh chuan a maimitchhing ta daih a. Ka hriatthiampui lutuk tlat! Hundanga rawn ngaihsak mang si lo, tuna an lo lan thutna hian a țhawng viauin ka ring.

"Brie, ka fanu..? Ka nu chu a țhutna ațang chuan lo thovin khum lam a rawn pan a. Briena chhing tlat ka hmuh chuan ka lo lawm ve ringawt! A luhlulzia ka hria a, chuti mai chuan a lungawi hauh lovang. Ka nupui rilru hneh hi thil awlsam a ni miah lo, kei ngei pawhin ka beirei ve êm.

Ka bulah ka nu chu lo țhuin Briena kut chu a hmer vang vang a, engmah phei chu a sawi ta lo. Ka pa pawh a ngawi ngul tho! An duh duh hian lo awm ve mai mai teh se. Tehhrep a!

Carlos leh nurse pathum an lo luh chuan Briena chu a mengchhuak ve chauh a.

"Ka lawmpui lutuk che, Briena, Dazel minute nga hnuah ka room-ah min lo hmu dawn nia," Nui vur vur chunga atih chuan ka bu nghauh a.

"Carlos, naute engtikah nge ka hmuh theih ang?" Doctor mitah tak a en kal a, "A rei tawh lovang, a upa zawk saw nihnih khat chu tihlum a la ngai a, phakhat erawh karthum vel up a ngai ang. Hlauhthawn tur engmah a awm lo a nia, hetiang hi chu thilthleng ve fo a nia lawm," Dam thlapa a tih chuan Briena chu hahdam huai hmel a pu.

"Tû pahnih ka nei amaw?" Ka pa'n a tih chuan alam kan hawi țhap a. A hmela maktihna leh lawm hmel lo lang chhuak chu haider theih pawh a ni lo.

"Oliver tupa pahnih i nei a ni. I monu hi duat hle ang che." Carlos chuan a lo chhang vat a.

Chumi hnuah ka nu leh pa te nen Carlos room-ah kan inzui phei ta a, Briena pawh muthilhna damdawia an jection lek tâk vangin nurse pahnihin an vil reng thova kan chhuahsan ta a.

"I nupui chhul hi kan paih ngei angai dawn a, chuti anih loh chuan nakinah harsatna ala tawk tho ang; pangti chawr satliah ani tawh lova, ațhang zel a ni." Calos chuan a ti chuar chuar a.

"Kawng dang a awm ngang lo tihna a mi?" Ka hmai tuaipâwk chunga ka tih chuan, "Paih mai loh chu tihdan kawngdang a awm tawh lo." A ti leh a.

"A nu leh pa tal kan hriattir angai dawn a nih chu, amah pawh alo harh veleh kan hrilh anga.." Ka nuin a ti sap a.

"Jimmy te nupa chu ka kutah dah rawh u," Ka pa chuan a rawn ti ve ta thung a. Ka hnial tawh lo, keimah maia thutlukna siam kha ka tum a, mahse, thil tihchi ni nghal lo chuan.

Chumi hnu chuan ka duhdan sawiin Briena nu leh pa ka be thlap a, thlantur dang awm chuang hek lo le..An fanu ka hmangaih thu leh engtikahmah ka phatsan ngai lovang tia ka hrilh chuan an rillru a hneh ta ani ange, ka thutlukna chu min pawmpui ta thlap a. Amah ka nupui chauh hmin angai ta.

Ka nu leh pa apartment-ah an duh lo chung ka tir haw lui a, Briena'n rem a tih chuan zinglam dar kuaah zai chhunzawm leh nghal tur a ni. Carlos sawidan khan a hlimchhawna thilti kan nih loh chuan a harsa telh telh ang a tia, ka pawm zawng tak a ni bawk.

RNSH Cabin 7:00Am

"Wife...?" Peih loh hmel zet hian a arawn meng chhuak a.

"Naute i hmu thei dawn a nia, intichak rawh le.."

Nurse pahnih rawn inzuilut chu ka melh zauh a. Ka fapa te hi ka la en bik hauh lo. Hmuchâk ve tho mahila ka nupui harh hun ka nghak ve țang țang kha a nia.

Briena mutna bulah Solomos naupang zawk chu an mut a. A upa zawk erawh min pawmtir thung.

An hmel inang lutuk chu mak ka ti lo thei lo. A upa zawk sam chu ka sam ang maiin a dum hlap a, a tê zawk sam a buang thung, Briena sam ang chiah chiah! Lawm avangin ka mittui a hnâm sawk! Pa diktak ka ni ta.

Two gold son diktak te an ni. Briena chuan a fate pahnih chu a melh tawn chhen a, a nui leh ringawt zel. Venflon a kut lehlam lehlamah an la vuah vangin a pawm ve thei lo va. Ka khawngaih reuh kher mai.

Minute sawm chauh hmuh an phal vangin la ui tak chung chuan nurse te kutah kan hlanchhawng leh ta a.

"Dazel, ka lawm e.." Briena mittui tling pam ka hmuh chuan ka hrethiam hle. Kum sawmhnihah fa pahnih a nei der a nia! A dam țhat hunah ka la fiam ang chu.

"Lawmthu sawi chu nakinah," tihpahin a chalah ka fawp zauh a.

A dam thei ang berin a chhul paih angaih thu leh paih a nih loh chuan nakin zelah ama tan a țha dawn lo a ni tih ka hrilh lai chuan a mittui a far fap a.

"Tihdan dang a awm thlawt lo em ni? Kan naute te hian engemaw lo tawk palh ta se, fâ dang ka nei thei dawn tawh lo asin."

A ni leh ni lo angin a țap ta hlap hlap a. Vawikhatmah lungchhe taka ațap lai hi ka la hmu lo! Țawngkam thiam taka hnem ka châk kher mai, chu erawh ka thiam zawng a ni hlawl lo, Rafaela ka lo sawm hmasa lo chu pawi ka ti leh hnuhnuh viau! Ani khan a hnehsawh leh viau pek ang.

"Hussh...țap tawh suh le, nang leh ka fate hi ka venghim tlat dawn che u alawm tuma'n an tihnat che u ka phal ngai lovang..Brie, KA HMANGAIH CHE." Ka sawi chhuak ve ta hlawl mai.

"Eng..engmaw i sawi?" A mit paw râma awih lohna lo lang ka hmuh chuan, "Ka hmangaih che, nang leh ka fate tel lo hi chuan engmah ka ni lo, i harsatna chu ka harsatna a ni a, i natna pawh ka natna a ni, ka hmangaih che a ni tih i hriat nawn fo theihnan min han fiah ta che." Nghet charh leh fiah faka ka tih chuan a mittui kar ațang chuan nui var varin min rawn melh a.

"Kei paw'n ka hmangaih che, Dazel Solomos." A sawi zawh rual rualin alamah ka kun hnai ruak a. A hmuiah duhthawh zetin ka fawp ta vang vang a. Thawchham dawn khawpa kan infawh hnuah hreh zetin ka thlah ta nge nge a.

"I fit viau lo emaw tih a i daih rei phian chu le..!?" Fiamthu a ka tih chuan, "Ka pasal tilawm tur tawk hi chuan ka fit ve chiang êm.." nui var varin min chhang a, sawitur engemawtal hi chu a thluakah hian a lo awm ve hman ziah.

Ka fate pahnih nunkawng dika kaihruai tur leh enkawl tur hian ka nupui tluka thluak țha leh rintlak an awm bik lo.

Operation room-a an nawrluh dawn chuan ka kut a thlah phal meuh lo. Carlos biak a, zui luh ve mai ka duh rum rum a. Chu erawh phal loh a ni tih ka hre tho a, a fate hmel vawikhat en leh a dil a, an phal lo tih ka hriat chuan ka inrawlh vat.

"Carlos, reilote chauh hmuhtir rawh, atana a fate hlutzia hi tuma'n in hrethiam phak lo." Hnial chi miah loha ka tih tâkah chuan an entir leh ta nge nge a.

Thlamuang taka inzai a hmachhawn theihnan leh chaktak leh chhel taka awm a, hmabak tamtam ala nei a ni tih a inhriat theihnan kei leh a fate hi kan pawimawh reng a ni.

Ka nupui an zai chhung zawng chuan corridor-ah vawi engzatnge ka vei hman pawh ka hre lo. 'Lalpa..atel lo in ka awm thei lo tih i hriat kha..' ka rilruin ka țawngțai ve ta hial! An khawih rei hrep lehnghal a!

"Sir, breakfast i nuin a lo thawn che," Lizzy chu ka bulah a lo ding a, elevator ațanga Rafa leh Roger lo chhuak chu ka en reng a. Chanchin ka hrilh miah lova, tunge lo hrilh ta ang? Ka pa a nih ngei ka ring!

Lizzy tiffin box khai lai chu ka ban a, Briena nen an inkawmngeih phiana, unau ang hialin an inen bawk. Lizzy hi Briena secretary kha a nia, Brien'n a hna a chawlhsan hnuah Roger an a chhawr zui ve leh mai a. Kan inpawh viau, ka nupui kawmngeih zawng chu ka țawmpui ve mai tur a ni. Ani pawhin Rafa ka țhianțhaber a ni tih hriain a kawm ngeih thei alawm le.

Darkar hnih leh a chanve zet an khawih hnuah Briena chu an rawn nawr chhuak ta hram a. Ka thawhuai thei nia!

"Mimawl pa, chanchin min hrilh hi i hreh ta ngawih ngawih em ni?" Rafa thinrim hmel chu ka hre lo der tlat a. Chimawm a chhuah loh hram ka beisei.

"Callie bulah nuam i tawl rih ang chu ka ti deuh, actress zûnah i uai tlat a, engmah hrilh ngam pawh i ni lo." Ei loh hmelzet hian min melh run a, Roger lo nui suk suk chu ka mitmei zauh a.

"Lizzy leh Roger hi engtikah nge an inneih ve ang le?" Fiamthu titak deuha ka tih chuan Lizzy hmai a sen țawn țawn a.

"Contract hmanga inneih chu an duh ve lo phawt anga.." Rafael nui suk chu a ngeiawm lam hret!

Mi kheiru zeta țawngdan lah hi a thiam fu roh a, Briena nen an inanna tak pawh a ni.

"Ngawi mai mai teh, ka nupui țhen hun châng ru dûk dûk tu i nih kha.."

"Duhtawk r'u," Roger chu a nui vur vur a, khuma Briena muhil chu melh leh zauhin, "A hmel țha hle mai," a ti fahran a, hundanga sawi duh mang si lo, tun ataka sawi te chu a!

"Ka nupui damlo muhil pawh i hmu țha em em tawh mai a nia, nupui nei vat rawh, Roger," ka tih chuan Lizzy a va melh deuh kher a, he mite pahnih hi an inzui ve tak tak em mawni le?

Engemaw chen min awmpui hnuah lunch ei hun hma deuhvin min chhuahsan ta a. Kei leh nurse pahnih chauh cabin-ah kan awm tawh. Briena chu ala muhil bawrh bawrh a, darkar li lai a muhil tawh! Damdawiin a hneh deuh vangin ala harh mai dawn lo tih doctor-in min hrilh a, hlauhthawnawm erawh a ni lo.

An zai hlawhtling hle bawk. Major operation ve ve anih avangin indim a ngai dawn hle a, naute up chhung karthum chu ngei ngeiin hospital kan chhuahsan thei dawn lo tih pawh min hrilh sa vek.

After 2 days Apartment plus S.

"Dazel, vawiin chu hospital lamah i nu nen kan kal ve tawh dawn nia." Ka pa in a tih chuan ka ner sawk a.

"A teuh lo, ka tel lovin Briena hmuh tum duh suh u."

"Ka tûte pahnih pawh kan hmu châk ve tawh alawm, min dal tum hauh suh." Khauh deuh fur hian a ti leh a.

"I tûte pawh anni ve chiah em ni?" Ngeiawm zeta ka chhan chuan rilru na hmel a pu roh a.

"Ka fapa eng ang êma nasa in nge i rilru kan lo tihnat le..?" Dul ruiha atih chuan, "Ka rilru intina a ni mai lova, ka nupui rilru pawh natakin in hliam a, in fate hi hmanruaah min hmang nasa hle a ni."

"Kan thiamloh a ni, khawngaihin min ngaidam hram ang che." Ka pa meuhvin ngaihdam min dil a nia. Keiin ngaidam engang mahila ka hmangaih ber ka nupuiin a ngaihdam theih miau loh chuan inrem a harsa tawh ang.

Chhungkaw hran kan din tawh a, an duha min thlauhthla an ni bawk a, ka hmangaihna erawh ka nu leh pa min hringtu annih vangin a reh lovang. Hunin ala hril ang chu.

"Naute inhmu duh a nih chuan ka hruai ang che u, a bâk engmah tih tum suh u." Ka ti nghut a. Ka ring chhe mah mah em tih pawh ka hre tawh bik lo.

Joanna'n kal ve a tum chuan ka lo dang vat a. "Tun dinhmun atan phei chuan ka nupui hian a hmu châk hauh lo ang che."

"Dazel..?" Ka nu âw ah chuan hrehawm tihna alang a. Joanna pawh inthlahrun hmel zetin a ding zum reng a.

"Briena rai chhung zawng khan hrehawmna tamtak a thlen a ni." An pahnihin ngaihnobei fahran lo hian ka melh a. Min chhang zui tawh lo.

Hospital kan thlenin Briena chuan naute a lo be mawlh mawlh a, vawiin ațang hian a upa zawk kha a bulah a mu ve thei tawh a, a nau zawk erawh an la up rih a ni.

Nurse pahnihin an vil renga buaipui ngai a ni hran lo. Hnute erawh an hne thei dawn lova, damdawi ei chhunzawm tur leh injection tamtak la lai a ni a, a chhul an paih ni khan doctor in min hrilh thlap tawh.

Ka nu leh pa hmel a hmuh chuan lawmlo angin a awm duh țhak lo a, eng tactic nge hman a tum leh tâk?

"Mr.Solomos, i tupa hi i en duh ve lo'm ni?" A nui sâng a. 'Ka pa' tiin a ko duh der lo.

"Ah..Brie, i țha em?" Ka pa lai hmel chu ka vawikhat hmuhna a ni hial ang. Ani te zawng induh leh chapo larh țhin kha a nia. Briena sira naute mu chu a bih ta dûk dûk a. "Hei chu Dazel a tetlai ang mai alawm le..!?" A nui suk a. Khawr zet hian naute chu a pawm ve ta roh a. Mak takin ka hlim riau nia maw le!

Ka nu nen an inpawm chhawk ta zak zak a. Briena duatna hun pawh ka nei lo, a nau zawk en tura an kal hlanin hunthawl kan nei ve ta hrâm a.

"I nu leh pa chuan naute hmel an hmuh meuh chuan min huatna rilru pawh an pu tawh lo a nih kha." Khum lu lam nghengin a țhu mu a.

"I rilru tur ka hrethiam ania, ka nawrlui hauh lovang che, ka nu leh pa mah ni se ka țan bur chuang lo."

"A..chutiang tur a ni hleinem, mihringte chu tisual thei vek kan ni a, he khawvelah hian anni lo kha nu leh pa i nei lo, chutiang bawkin keipawh a ni tho. Kan thinrimnate leh an laka kan lungawi lohnate dahțhain hlimtakin kan awm thei reng a nia." Ka rin loh dan deuhin a rawn ti a.

"I nu leh pa i hmangaiha, keipawhin ka hmangaihpui ve mai tur che a ni. Hun kal tawh siamțhat theih loh avanga inti hrehawm tawh lovin kan hma hun thlirin Solomos chhungkua khaidingtu kan ni ngei tur a ni. 'Gold son' i nih kha hrereng la.." ti lehin min siai zui zauh a.

Tuna min melh dan kher kha hmangaihna kan chendun hnuhnungbera min thawhsan dawna atih ang chiah kha a ni. Thinlung taka ti a ni bawk.

"Ka lawm e, ka nu leh pa chance i pek leh vang hian," a hmuiah ka fawp ta vang vang a.

"Lawmthu sawi lam chu nakinah aw..tunah tak hian solstoy ka eichâk lutuk.." Teh daih a!

"Pek nghal i ni ang."

Nurse pakhat zawk chu solstoy lei turin ka tir nghal a, ka nupui duhzawng leh châkzawng pe thei tur hian rimtakin hna ka thawk reng a ni. Wool worth company chairman nupuiin solstoy lei a ngen a nia, Huh!

Briena an zai ațangin thlakhat a tling lek lek tawh a, hospital kan la chhuahsan lo fo. Zankhat riakin Briena nu a lo kal zuai a, ka nu leh pa in naute hming phuah turin an nawr deuh a, a upa zawk hi Briena pa (Jimmy Larson) in Drew Solomos tiin a phuah a. A nau zawk hi ka pa (Oliver Solomos) in
Rory Solomos tiin a phuah ve thung a ni.

Company leh RNSH ka kartawn zak zak a. Cabin-ah zanlam chu ka riak mai zel, ka nupui ka hlatsan thei lo lutuk hi min fiamnan an hmang fo va, pawi ka ti miah lo. Vawiin hian hospital kan chhuahsan tawh dawn a, kan hlim ve khawp mai.

Kan apartment-a room thar kan siamah khan naute khum pakhat chauh kan dah si a, nimin lamah Rory mutna tur kan order leh ta chûk chûk a. Pahnih chauh ni țhin kha pahnih dangin min rawn belh leh tâk vangin Sidney-a Solomos ram neih țhat berah ka pain Villa sa turin min ti a. Ranrual vulhna nen a inhnaih mai bakah naupang țhanlen nana duhthusam a ni bawk. Tuna kan aparment luah lai pawh hi kan la luah tel zel tho dawn a ni.

Hospital chhuahsan tura kan inpeih meuh chuan Rafa, Roger leh Lizzy, pawh min hruai chhuah loh hlauvin an rawn thleng hma hle a. Rolls Royce pahnih leh Commodore car-in kan inzui ta thliah thliah a.

Keini nupa leh naute chu Rafaela'n min phurh a chuh deuh tlat a. Roger leh Lizzy an inphur thung. Ka car-in Nurse pahnih leh bungrua tlem azawng Owen an arawn phur bawk a. Nuam dangdai ve tlat.

Apartment kan thlena min lo hmuaktute chu ka rin loh lam daih an ni. A thawi pawhin an lo kal dawn tih an sawi miah lova, mak ka ti lo thei lo.

Jimmy Larson leh a nupui Gene, ka nu leh pa te chuan apartment kawtah min lo nghak țhap a. Jimmy pawh rin ai daihin ka hmu țha!

Briena lawm hmel ka hmuh chuan ka lo hlim ve veng veng, a nu leh pa a ngai viauvin ka ring a, hospital-a a awm chhung zawng pawh khan a sawi ri hauh lo va. A tuarchhel hlein ka hre bawk, ani ang rualte chu pangchang ngher ngher rual an la nia;ka nupui nge nge a danglam tluang zel a nih hi!

"Ka tupa te pahnih hmuh châk hian ka la dam ve hrâm hrâm a ni.." Jimmy an atih chuan Gene mittui atla lek lekin ka hria.

"Pi leh pu pahnih an nei bik a nia, vannei tak an ni." Joanna'n a rawn ti ve leh kher a, ka'n melh rum nghal ringawt a. Briena'n min nghawksawk a, "I thinrim pawhin tilang eih suh.." a ti sap a. Henu tereuh hi engemaw a hriat reuh le? Thu nei âwka deuha țawngdan lah hi a thiam zek a!

"Tiger laka inven reng hi ka peih zawng a ni lo." Ka ti hmuk a.

"Yes, tiger is not good but..." sawizawm duh lova a tawp deuh chat avang chuan a melhna lam ka va melh a. Joanna rilru nat hmelzeta lo hawi phei chu ka hmu ve ta a. Kan țawng a hriat phâk chu ka ring chiah lo nâa, mahse, a nuam viau lo.

Chutah Briena chu a nui ta hak hak a. "Keimahni vanga lungawilo emaw ka tia, naute an pawmtir ve loh vang a nih saw!" A ti ta hliai a.

"Duhtawk turin hrilh rawh, kan room-ah chhoh a hun tawh e," a tih leh chuan pawmpui takin ka khap ta hlawm a.

Rafaela'n dinner show a tum deuh tlat bawk sia, kan hnial thei ta lo. A girlfriend Callie pawh a rawn nalh zuai zuai khawp mai. Chumi zan chuan chinese restaurant a mi dinner kan order a hlimtakin kan kil ho ta a.

Jimmy Larson te nupa pawh rei châm thei annih loh vangin ka private jet-in Melbourn-ah an haw tawh a. Ka nu leh pa erawh naktuk hian an haw ve thung ang, Briena pawh a hma ang chiahin an duat a, an zah thiam viau bawk. Min hringtu nu leh pa nge nge huat reng a lo har a ni ange!

Ka pa haw hreh hmel mawlh kha ka mitthlaah ala cham reng. Villa kan luah ve hunah kan hnenah an la cheng ve ang chu. A tupa te hlatsan hi har a ti țan riau.

Kan nupa room kha mutnan kan hmang tawh lova, room tharah kan insawn hmak. Briena, duh anga ala chet țhat theih loh vangin nurse pahnih bâkah house keeper kan lak belh a.

Joanna pawh kan zingah ala cheng ve ta reng bawk. Briena nen chuti teh luain an inbe tam ta chuang lo. Kei tak pawh hian ngaihtheih loh chang ka ngah fo va, mahse, he apartment ka luah tirh ațanga ka chhawr ania, khawngaihna rilru ka pu ve deuh tho. A harsa ta viau anih leh a la chhuak mai ang chu.

"Husband, Rory hi a tê bik e..!" Kan fapa naupang zawk a en apiang hian a sawi ve ziah.

"A la țhanglian dawn chauh alawm, Drew aiin alian zawk maithei asin." Ka sawi țhin dan ang thova ka tih leh chuan, "Min hnem dan dang i thiam hlawl lo em ni? Kha thu hlir kha i sawi a!?" A tih chuan ka nui suk.

"Min zawhna ang chiah khi ka zawt ve che a nga, min lo hnem la," fiamthu a ka tih chuan a nui nasa mai.

"Board meeting-ah enge i sawi țhin tih hriat a châkawm khawp mai. Heti em em a țawngkam i thiam lo hi ka awih thei hlawl lo."

"Meeting nen inang hek lo, sawi duah ai chuan chêtzia a lantir ka thiam zawk." A hmui bul chêna ka tih chuan a nui sak a.

"Ralthuam pawimawh vilik hun ala ni miah lo." A tih chuan za zetin ka nui a, "Invenna lam i lo nei țha ang chu ka ti maw le,"

"Teuh lo, ka nui ngam chang chang a nih hi, Carlos an nuih min khap tel lo hi chu; Pathian hnenah lawmthu awm rawh se, he doctor hian engkim min khap niberin ka hria."

"I tan te, naute leh keima tante a ni vek alawm," ka tih chuan, "Hah! Office ka kal theih hunah Drew leh Rory hi ka hruai țhin ang." Naupangchhia zeta a tih chuan ka nui mai a, puitlinna lai a neih tho rualin mawlmang deuha thilsawi pawh a ching ve tho țhin.

Kan famkim lohna tilang chiangtu-ah ngaiin ka sawisel bik lo. Briena ti Briena tu kha a ni miau va.

After 6th Months Bella Vista Wool worth Company Main building.

Vawiin hi kan company anniversary anih rualin Briena nen kan inneih țhatni tur a ni bawk.

New York, Melbourn leh ram hrang hrang ațanga company neitu te an kim thawkhat hle a. Main building-a top floor chu wedding hall atan ka buatsaihtir vek a, vawiin hian company mai ni lo khawvel hriatah Solomos Bride anihna hi ka pholang dawn a ni. Media lam pawh an inralring nasa mai.

Kan nupa room pangai zawkah ka insiam mawlh mawlh a. Briena erawh dressing room kan siam tharah Lizzy leh Malina in an chei a, a kawr hâk tur thlaruk aia tam kan lo buaipui tawh wool worth bridal studio in a kan siamchhuah hmasak ber Simon leh Malina design chu ka nupui hian a ha hmasa ber dawn a ni.

Ka'n surprise hle teh ang. Drew leh Rory chu nanny leh a pi te pahnihin an buaipui thung a.

Tuxedo dum an tan liau liau ka order bawk, thlaruk chhunga an intiat ta deuh thuak hi thilmak a ni. Ka nupui hian Drew a kuah tam zawk a, keiin Rory ka buaipui thung. An mitmeng paw raih hian Australian annih zia a tichiang viau va, mitmeng inang an nei kher hi nakinah anla buaipui viauin ka ring bawk. An sam rawng erawh duhthusam a ni.

Company-ah vawikhat kan chhungkuain kan kal a, lawm an hlawh viau, Drew ai chuan Rory hian lawm a hlawh zual, a tet deuh bik vang hian khawngaih a hlawh te pawh a ni mahna. Ka mitah chuan ka fate tluk an awm lo ve.

Wedding Hall cheina tura sum kan sen ringawt pawh hi turu tak a ni. Ka nupui hian harsatna tamtak a paltlang hnuah hlim taka awm hi a phu a, a hlimna tur a nih phawt chuan ka neih zawng zawng sen ka phal a, khawvel pum hi lei ngai pawh ni se ka bei mai tur a ni.

Kan inneihna contract paper chu ka pa leh Jimmy Larson duhdanin ka Solicitor chuan a'n chhiarchhuak leh tê tê a. Mipui nui ri leh Briena zak hmel sen țân țân ka hmuh chuan ka nui ve suk.

"Contract chu nuai bo a ni tawh a, tunah chuan christiante inneihdan angin thu an tiam dawn a ni." Pastorin a tih chuan mipui an thum leh hak a.

"Kei Dazel Solomos hian ka nupui tak ni turin..." Thum chhaka ka sawi zawh hnuah Briena hun a thleng a, zawi fiah tak si hian a chham ve leh ta a. A hmelah zâmna alang eih lo!

A mokawr hâk inhmehzia hi! A sam buang seitak chu a tukkhumah felthlapin hair clip hmanga kilh betin Russian pearl a in phum sep sep a. A bek sirtawn ve ve ah sam tlem a uaithla bawk, a dar ruak kâng chu alang var haih a, ka hawisawn hleithei lo chu a ni e.

Zungbun pawh Sapphire design inang chiah kan bun a. Inneih hunserh a zo a, Rory leh Drew mutchhuak hám bai bai ka hmuh chuan kan dinna lama kalpui turin ka nu ka hrilh a. Thlalak chhung zawngin hlimzetin an nui ve hak hak a. A tawp tawpah kan zo ve hrám.

"Solomos bride, I love you.." Briena bengbulah ka phun sap a.

"Me too, husband.." Dingdihlip âk âkin ka hmuiah arawn fawp zauh a. Ka duhtawk awzawng lo, a kawngah kuahin ka lamah ka pawt hnai ruak a, duhthawh zetin ka fawp ta a.

Kut beng dur dur riin a zui a, karleh hian Melbourn-ah kan kal phawt anga kan fate pahnih a pi leh pu te kiangah hnutchhiahin Athens-ah honeymoon kan hmang chauh dawn a ni. Chumi hnuah Roger leh Lizzy inneihna buaipui angai chhunzawm dawn a, Rafa erawh nupui neih ala tum lo fo.

Wedding programme a zawh chuan lunch special tak ka pain a buatsaih chu an kil leh vek a, company anniversary anih tho avangin chawhnu lamah staff pual ni pah siin a duh duh tel theihin party siam a ni a, keini nupa erawh hunserh chhung chauh kan awm a. Ka pa leh Roger kutah kan dah ta a ni.

Apartment plus S. Master bedroom.

"Dazel, ka kawr hi min phelhpui loh te chuan," Dressing table hmaa ka nupui ding chu ka en vang vang a. A biang sen deuh țan leh hlimna vanga a mitmeng de sar chu fawh hlan ka nghakhlel hle.

"A bik liau liaua kan siam a nia, i ha rei lo mah mah." A inhmeh êm a, ha rih deuh mah se pawi ka ti lo a sin le..

"Chuti romantic scene i hmanhmawh vak lo a ni maw?" A nui sak a. Chimawm leh țan dawn e, Briena kawlh hra hmel kha ka va'n hmu khat tak, chhaih thinrimna mai tur ka hre der si lo.

"Romantic lam ai chuan englo..."

"Eng...?"

"I rai laia i châk em em i ngen fo kha ti hmasa ila.." ka tih chuan chal chuar nângin min en a.

"Chutiang ka hre lo ve.." A sam kilhna phelh a tum chuan ka lo pui vat a.

"I hre tawh lo maw? Min dil tlut tlut țhin a nih kha.."

"Dazel, sawi țha ve mai mai teh chutiang ka hre lo ve.."

"Sawi lo phawt mai ang," tih pahin arun deuh țhin ang ngei khan ka siai sak a.

"A țha e, sawi lo tawp rawh." A kawr hak chu phelhin chhuatah a tla thla hnak a. Under wear leh bra nena a ding chu mit khap miah lo hian ka en a, chutah insum thei lovin ka ban ta nge nge a.

Ka thawmghnaw inbel chu dim vak lo hian a phelh deuh sawk sawk a, ka lo nui hawk. Zak map lo hian ka kekawrte nen lama hlip vekin ahmaah ruakin ka ding run a. A lamah min pawt hnai salhin lungchim tak hian min fawp ta a, a heh hnawng chap thlum dek dek chuan ka mipatna a khai tho țalh țalh!

A aia duhthawh zawka chêt ka tum veleh, "Tunțum chu i ti rih lo phawt mai ang, romantic scene i hmanhmawh loh kha.." chimawm zeta nui ar ar chung hian inlahrangin bathroom-ah a tlan lut ta daih a. Ka nui ve tawp! Kha ngei kha Briena mizia a ni, ka țawngkhum dan kha engtin emaw tak min rulh lêt ka ring reng a!

"Mrs.Solomos hremna ka pe ngei ang che" tisupin bathroom lam ka pan ve ta a. Chhunglamah ala kalh daih zui ah..

Bathroom dangah lut vatin alo chhuah hma ngeia inpeih tumin shower ka nei ve ta zawk a.

A lo chhuah laiin khumah ka bawk thlar a. Muhil der ila nimai!

"Hey..." tih pahin ka hnungzangah a rawn chul dan dan a, ka che duh miah lo.

"Husband..." ka la che ta lo fo.

"Dazel Solomos," ka kawngah rawn țhuin ka sam chu dim vak lo hian a rawn țhâm a. "1,2..." a sawizawm leh hma chiaha inlet thutin ka bawhbet ta ran a. Engmah inbel a nei hauh tawh lo, ka hrawk a ro nghal hulh thei nia!

"Ka hmangaih che.." a mit paw râma min thlakhlehna lo lang chuan phurna nasa min siam a. Duhthawh zetin ka fawp nghal tawn tawn a, min chhang let rang kher mai.

A taksa mâm han chu chul lawr dan danin a pum an zaina ser raihah chuan ka kut chevel chu ka titawp chat a, ka hmui lasawnin, "Hei hi tihreh i duh em?" Tia ka zawh chuan, "Solomos chhinchhiahna a nih kha, tih reh tumna ka nei lo." A ti sap a. A thilsawi chuan min hneh kher mai!

Tunlaiah hmeichhiain ser nung an pai duh tawh hauh lo tih hretu ka ni a. Ka nupui erawhin Solomos ani tih a hriatnawn fo theihnan tihreh a duh hauh lo. Ka chhuang sawt!

''Mrs. Solomos, ka tireh bik miah lovang," tiin kan fate lo chhuahna ser chu ka hmuiin ka nul nâ nâ a, a nui hmel hi chuan min hîp ve chiang alawm.

"Ka damchhunga i kianga ka chen reng theihnan enge ka tih leh ang le?" Nui sânga atih chuan, "Solomos bride ni reng rawh." Ka ti ve ta thlawt a.

Ka tan chuan Bride (n. monu) a ni reng a ni.

A hmui nel thepin ka taksa a fawp dan dan a, a kut tetaktê chuan khawih tur lai a hre chat chat kher mai.

Thawhawk chungin a hmuiah ka fawp a, a âwmbawr nalh zet chu tawkin kan taksa a inzawm theihnan kan insiamrem pah zel a. Nupa diktak kan nihna nem nghet turin uar taka che in hmangaihna tuipuiah kan pil dun ta vang vang.


EPILOGUE

"Drew, i mama ko rawh le," Rory chu sakawr chungchuan thawmhnaw inbel thlapin ka pawm a.

Vawiin hian wool kan lâkna hmunpui ber beram vulhna hmunah ka nupui leh fate hruai ka tum a ni.

Briena chu sakawr chungchuan thawmhnaw dum hlang hlak inbelin a rawn chhuak a. A hâk ang chiah inbelin Drew a bulah a ding bawk a. Kei leh Rory chuan a buang kan ha thung.

Kum li kan inneihna a ni ve tawh a, fa dang beisei leh tur a awm tawh lo bawk a, Drew leh Rory Solomos hi kan duat hleuh hleuh êm.

"Papa, mama hian bike a lei dawn a," Drew chuan a nu chhuangzeta a chhoh melh chuan ka nui hawk a. Thla hmasaah bike khalh ka zirtir dêk dêk a, lei a tum ringawt a niang. Kum sawmhnih pali a tling awrh a, a awm ve tho ve.

"Rory nen kan ta tur lei ve angai a nih chu.." ka tih chuan Briena chu a ner sak a. A run leh ang chu aw..

"Min cho viau s'u, hei hi a nimai," tia a ke chu lek kâng vâin a boot bun sira spur(Sakawr khenna) chu a tilang zauh a.

"Papa, ka duh ve.." Rory chu Briena lamah a tlan phei a, a nu malah vuanin, "Mama i bulah ka awm duh." A nu hi chu an ngaisang ve a nia.

Company-ah pawh Briena hi țangkai vet vet tak a ni. Kei tih lohah chuan a ber nihna a hauh char char! Roger meuh pawhin a tluk lo a nia. Ka pa ngei paw'n Solomos monu hi ka thlang sual lo ve a ti kha a nia. Melbourn-ah weekend kan hmang ziah bawk.

Jimmy Larson pawh a thi mai dawn emaw tih khawpin nikum lam khan a lung țhalo a chhuak leh a. US-a doctor thiamtak kan pan hnuah tlemin a zia leh deuh. Mahse, rei erawh min dampui dawn tawh lo tih kan hre ru vek a, kháwl hmanga nung ve chauh a ni tawh. Chuvangin a khât tâwkin kan tlawh reng a ni.

Roger leh Lizzy pawh an innei fel tawh a, fa hmeichhia pahnih chhang zingzetin an nei tawh bawk.

Rafaela leh Callie inneih an la tum lo cheuva, an inhual ringawta an duhtawk ve em em a. Hepa hi chu a senior ral țhak dawn aniang.

"Husband..? I fapa te hian an thlauhthla țan deuh tlat che in ka hria, țang nasa rawh." Corral (Sakawr dahna In) a lut pahin min rawn melh zauh a. Drew leh Rory chu a kut lehlam lehlamin a kai a, an inhmeh nufa chiang alawm.

"Kan fate kha ngaihven em em la, keiin ka nupui ka lo duat viau thung ang." Ka tih chuan a nui sak a.

"Nang chu duat i ngai lo tihna a nia, a va'n lawmawm tak!" Sakawr buang chu a kai chhuak a, Inthazo zeta sakawr chungah chuan lawnin, "Gold son te kha rawn hlâng rawh le, Mr.Solomos," a'n ti kher a.

"Pakhat ve ve in kan chuanpui dawn lo em ni?"

"I fapate hi han sawm chhin la?" Min cho leh âr tawh. Hetia a țawng tawh hi chuan a sawidik țhin viau. Ka fate hi tun dinhmunah chuan ka la hrang thei lo tawp ang.

Sakawr dumah chuan ka lawnkai ve a, "Hey, Drew, Rory, mama bulah in kal dawn chuan motor cycle ka leisak lovang che u."

"Mama in min lei dawn, chu lo pawh uncle Rafa kan leitir mai ang," Drew chuan min rawn chhang zarh zarh a, Rory pawh a ri ve hluai tho. Car-in ka kalpui daih dawn a mi le..?

"Wife, ka fate lâkhran tumna rilru i put apiangin zan lamah i rim deuh dawn tihna a nimai." Ka nui suk a.

"Chu zawng ka phur zawng tak a ni, style thar chhawpchhuah tur nen ka inpeih e.." a dang duh țhak lo.

Spur chuan sakawr ke ah kheng zauhvin an tlan ta a. Rei vak lo ka thlir hnuah ka umzui ve ta a. Hlataka ka nupui nui ar ar ri leh ka fate pahnih hlim thawm awmna pan chuan ka sakawr chu chak zetin ka tlantir ve ta a.

Ka chhungkua ka hmangaih em em te hi an hlimna tur a nih phawt chuan ka neih zawng zawng leh abâk thleng pawhin pek zel ka duh a ni.

'Ka hmangaih che u,' ka ti chhuak sup a.

www.storyfb.com mizo story thar englai pawhin chhiar tur a awm reng
THE END

Dated: 21st January 2018

NOTE: Ka story min chhiarsaktu leh ngaihlutute inzavaia chungah ka thinlung takin lawmthu ka sawi e.

Typing mistake leh punctuation rem dik loh inhmu nualin ka ring a, theihtawp chhuahin ka lo inzir ve zel a nia.

Ka lawm e.

©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)