SOLOMOS BRIDE BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: SOLOMOS BRIDE BY Becky Rm Renthlei (Completed)

Unread post by Ngaia » January 28th, 2018, 1:31 pm

SOLOMOS BRIDE

by Becky Rafa Renthlei

Chapter-6

Briena Pov*

Ka harh chuan pindan chhung chu nizungin a chhun éng raih tawh a. A hma vak tawh lo a nih ka ring. Khum mawnga sana intar ka en chuan chawhma dar sawmpakhat a ri der tawh, ka țhu chhuak hlawl a. Dazel mutna hnu khuar kalh ka hmuh chuan nizana a chêtdan kha min hriat chhuahtir nghal a. Min duh lo tih ka hria a, min hmangaih hek lo. Tisa châkna hrikthlak na'n bak kei hi min hmang lo.

Duhthawh zeta ka taksa a khawihna te khan min la fan hneh lutuk a, ka pum a no nghulh mai. Ka rilruin ka țawngțai ngial a, nau ka pai vat theihnan. Ka chunga khatianga a chêt hnu kha chuan huat taktêin ka haw tawh a, ka kawchhung tâwt lutuk tihreh nan zû ka in chiam ta kha a nia. Engtin nge khumah hian ka lo mut daih theih le..? Min sawntu tur pakhat chiah a awm Dazel a ni.

Khum chu thawhsanin bathroom ka pan ta a, ka intihfai vek hnuah inhnuai panin ka chhuk ve ta chauh. Choka a zai rât rât ri ka hriat chu hmeichhe áw a ni. Tunge kan inah thlamuang taka zai ngam tur hmeichhia ni ang? Dimtein ka pân țhém țhém a, choka a eitur siam malh malh tu chu ka en ta reng a.

Nu lian lam vun sen suah niin a hnelțha roh hle a, Dazel a housekeeper ani ngei ang? Ka âw thian kharhin choka chhungah ka lut ta a.

'Good morning, Miss." Nui sun sun chunga a tih chuan ka lo nuih lêt ve var var a.

"Joanna ka nia, he aparment enkawltu hi ka ni e, kan la inhmu lo a nih ka ring!" A ti leh zung zung a.

"Umn..ka lo thlen laiin i awm tlat lova, karkhat pum tawp ka cheng ve tawh a sin." Ka tih chuan makti hmel a pu lem lo.

"Eng nge i ei ang, Joanna breakfast special hi han ei teh le, i chêr lutuk mah mah!"

Dazel awmna zawh ka duh viau náin ka zawt duh ta lo a. Khawiah nge maw a kal ni?

"Um..bawnghnute leh toast a awm chuan ka duhtawk mai."

"Chutiang ringawt te zawng a ho emai, i taksa tihchakna tham pawh a nih loh chu.." tiin dawhkanah chuan eitur tuihnai tak tak min rawn chhawp a, ka lu ná fek fek chuan thil ei pawh min ti châk lo.

Joanna tih lunghnur ka duh loh vangin ka ei ve ta hrâm, tam pawh ka ei ta chuang lo.

"Miss, vawiin lam enge i tih ang? Naktuk ațangin i hna i zawm dawn tih ka lo hria a, i ngainat zawng leh i ei duh zawng hre thei ila ka lawm khawp ang."

"Engpawh i siam ang apiang kha ka ei thei vek, breakfast bikah chuan serthlum tui leh toast, omlette leh bawnghute, corn flakes a bâk ka ei ngai vak lo..Cheese cake ka ngaina hle bawk."

"Ok.. daily in ka lo kal țhin a, mahse, Dazel khan a awm loh chhung chu lo riak tawh turin min hrilh a, enge i ngaihdan?" Ka eina sengfel paha a tih chuan a ngaihna ka hre lo hle a.

"Khawnge, Dazel?" Ka zawt ta nge nge.

"Tukinah New york panin a thláwk chhuak tawh. I hre nange?" Min zawt lét hlauhva.

Engtin nge engmah sawi lovin min kalsan theih zawk le! Dazel mai mai chu..

"A kal dawn tih chu ka hria a, mahse, a hun a sawi lo a tin ni." Diktakin ka chháng a. Nupa kan ni tih a hre lo tih a ni chiang mai! Ka va'n lawm tak. Miss tia min koh khan ka buai hman deuh kha a nia. Ka tan insawi fihlimna kawng a awlsam sawt dawn tihna a ni.

"Joanna, tiin ka ko mai dawn che. Ka nu rual zet tur i ni tih ka hria a," tîm deuh dai hian ka zawt a.

"Oh..Miss Briena i duh dan danin min ko thei a nia, Joanna tih chu pawi ka ti miah lo." Nelawm tak hian a nui var var reng a.

"Ka inthlâk anga, pawn lama pangpar pot saw kan hûng sawn dawn em niang?"

"Keimahin ka ti thei lutuk a lawm, lo ti duh suh." A ti leh mai a.

"Ni lo e, ka châk zawng tak a ni. Ka kal," tiin inchung panna step chu ka zawh chho zai zai a. Kan nupa khum ka hmuh chuan ka ner deuh sak. Joanna luh hmain khum chu ka siam ta zung zung a, Dazel room ațanga ka insawn chhuak a nih loh chuan engkim a hrethiam vat dawn...

Dazel room-a ka awm ve ngawt nachhan hi engtin nge ka sawifiah tâk ang? Ka thawmhnaw thiar chhuak ringawt mahila, puitu ka neih loh chuan keimahin ka ti thei dawn der si lo. Hmnn...chhuanlam dang zawng chawp mai ang.

Khum bul dawhkana paper thliin a chhem phêt hlap hlap ka hmuh chuan ka ban vat a. Ka thawh hlim khan ka hmu miah lo! Tui bottle chu dah sawnin ka pawtpharha ka chhiar ta a.

"Briena țha takin inenkawl la, company ah inrawlh i tum tlat hi ka hrethiam thei lo. Mahse, dan che ka tum lova, engtikah emaw chuan keimah ngeiin ka la enkawl dawn a ni tih i hriat ka duh bawk. Tim Hathaway kutah engkim ka dah a, ka nupui i ni tih a hre lo. Engkimah in thawkdun theiin ka ring.

Nau i pai a nih chuan a rang lamin min rawn hriattir dawn nia. Ka room kha lo luahlum reng ang che..Ka nupui kawlh sen te.."

A hming a ziak a, a phone number pahnih a dah bawk.

Dazel Solomos khawsak phung dangdai zet hi engtikah mah ka hrethiam thei dawn lo a nih hi. New york Trade lama awm a duh tlat hi mak ka ti lo thei lo. Sidney main company a awm reng a, kan thilsiam hralh chhuahna lam daih daihah engemaw tih a tum reng reng ni. Thluak a nei hlawl lo zawk nge? Chu erawh Chairman ve meuh a nia, ka ring chiah lo.

Nilengin Joanna nen pangpar kan sawisa a, ka chau ve hle mai. Zanriah pawh kan pahnihin kan kil dun a, ka nu kianga awm angah ka inchan deuh a, a nuam phian.

Dazel room pawh chhuahsan lovin ka luah ve ta zawk a, amah ber a awm chuang lova venthawn tur awm hek lo.

Khumah chuan muhil thei lovin ka let kual sek a, nizana nupa nun kan hman laia Dazel mitmenga min thlakhlelhna niawmtak lang kha ka theihnghilh thei lo. A zei hle a, mahse, a lâka inthup ka tum êm vangin ka duhna pawh ka tilang ve ngam lo a. Nêp ka inti viau!

Min la rawn phone miah lo, phone ka tum bik lo a. Hmaichhanah pawh engmah sawi duh lovin lehkha a hnutchhiah vel a, nep lutuk!


After 1 Month. Bella Vista Sidney: Wool worth company main building.

"Miss Larson, Fashion designer lam an inpeih tawh a, kan nghak reng che." Ka secretary Lizzy chuan file pawimawh pawm țân chunga min koh chuan ka bu nghat.

Christmas leh New year boruak a zo a, company-ah hna ka țan ve nghal kha a nia. Thlakhat zet a lo ral ta reng mai! Solomos angin tuman min hre lova, Company-a share ngah ber dawttu ka nih avangin ka nu leh pa, Dazel nu leh pa te remruatna angin board director ah ka direct tawp a. Tuman Dazel nupui ka ni tih an hre lo. Company venhim tumna a ni tih ka hriat rualin ka mimal nun atan pawh a țha tih ka hria.

Ka landan naupan hmel zet leh pawnláng tak chu thlâk danglam tumin vawiin hian fashion designer leh Make up artist kan company in a kan chhawrte hmangin ka pawnlam landan kan thlâk hlawk dawn a ni.

Lift-ah chuan chuangin ka sirah ka body guard pahnihin min karcheh bawk a. Guard neih hi țúl ka ti miah lo náin Oliver Solomos a duhdan a ni. Hmeichhia vengtu awm lova, tei mai mai kha a ngaihdan a ni hauh lo. Tin, director ka nih miau avangin min ertu leh min tihnat tumtu an awm thei a ti bawk. Solomos company director nula naupang tak hi min zuam a hlau deuh a ni mahna! A țha vek e.

Min cheina tur room-ah chuan an lo awm nual tawh a, computer a ka hmel lo lang chu enin ka sam rawng ațanga țan an tum a ni.

Ka sam buang seitak chu an khawih danglam lutuk lova, ka secretary Lizzy phei chuan angai anga pu mai turin min ti nghe nghe a, mahse, chu ém chu ka duh lo. An ui ve ngang a nih ka ring! Ka sâm ngil tak țhin kawi ta deuh chuan tlémin min ti lang zahawm ve ta deuh.

Ka hmai leh taksa, duhtawka an khawih hnu chuan ka hné tawh hle a, ka ning hmel an hmuh chuan vawiin bâk hetianga rei angaih tawh lo thu an sawi vat a.

"Miss, i nalh takzet..." Lizzy nui hak hak ka hmuh chuan ka nuih let ve sak a. "I kuttin kan hnawih chu i duh ngang lo chu a nia!" A ti leh a. Ka kuttin kher hi chu engmah hnawih țul ka ti lo, remchangah ka la transparent ve ang chu..

"Lunch ei a kan chawlh chhungin, sign tur pawimawh zual kha min lo pe ta che." Tim Hathaway lo lut mek chu ka melh zauh a. Ani hi ka hnuai chiah asst director a ni a, ka ngaina hle bawk. Dazel nen an inbe fo tih ka hria a, kei erawh vawikhat tê mah min rawn be lo.

Tim hi a sáng hle a, feet ruk a tling velin ka ring. A hmel pawh a țha vei riau a, a sam uk kharh chu a buk lek lek bawk. A hna a tlin hle a, vawihnih dinner eiin kan chhuak dun tawh bawk. Mipa hrim hrim hian ka thinlungah hmun an chang lova, Dazel anga mi híp theihna riau a nei ve lo. Dazel erawh ka pasal a nih mai bâkah ka tana mipa hmasa ber a ni. Ka thinlungah hmun a chang sang ber bawk. Amah ka duhna hi kan contract tehhrep vang leh ka chapona vang hian ka tilang lo mai a ni.

"Briena, tarmit i bun tawh lo tur hi ka la awih thei chiah lo deuh!" Tim nui suk ka hmuh chuan ka lei ka chhuah khum zauh a. "Khatiang kha chíngtam tawh suh, meeting laia i ti a nih vaih chuan Mr.Solomos senior, beng a thleng vat mai ang." Min fiam paha a tih chuan ka sam thar chu ka thing lui deuh ngei a.

Room-a awm ho chu an nui nasa ngang mai! Kei aia upa fe fe hlir an ni a, ka hnuaia thawk anni chung pawh hian min ngaina in min zah der hle a ni.

Company-a ka ni hmasa ber ngaihtuah chuan vawiin nen inthlau tak a ni ringawt! Meeting vawi engemawzatah ka chungchang an sawi ho a, an khel ber chu ka naupang lutuk an ti țheuh a ni. Mahse, Oliver Solomos dal ngam awm hek lo le..Atawpah lungsi zân lovin board director nihna min pawmpui ta hrâm kha a nia.

An rin aia ka thiam avang leh Branch hrang hrang langtheia hmasawnna an hmuh avang chuan min pawm ve telh telh a. Tuna ka landan thar pawh hi secretariat ho ngaihtuah chhuah a ni. Kan elpui company te lâka puitling taka ka lan theihna tura an tih a ni a. Mun thlawp țha hle bawk.

"I favourite colour kan hre thei angem?" Fashion lama an hotu India ațanga lokal Manila chuan a rawn ti a. Manila pasal hi kan company wool siamna factory a manager hna chelh mek a ni a. African a ni bawk, fa pahnih an nei tawh.

"A dum," Tih pahin black coffee ka tem zauh a. "Chuti nih chuan i thawmhnaw tur i aparment-ah kan lo dahtir mai dawn em niang?"

"Yes, mahse...!" Engtin nge Dazel aparment hming ka sawi theih ang. Tim chiah hian a hria a, staff dang hian an hre hauh lo. Tim pawh hian engvanga Dazel apartment-a chéng tlat nge ka nih min zawt fo va. Ka la pha mar ve hram hram chu a nia.

Tunah hian ka sawi mai a ngai tawh ang. A chhan chu ka zêp hlen thei dawn chuang lova, nupa kan ni tih an hriat loh chuan a tawk mai...!

"Aparment plus Solomos.." Ka ti ta nge nge a.

"Maw! Big boss aparment-ah i chéng a maw?" Mak an tih hmel hle a, min en hâ hlawm!

"Aw, Melbourn lam daihah ka awm avangin Solomos apartment hi ka tan a remchang zawk a, ka cheng rih a ni. Amah a awm dawn chuang lova.." ka ti nghal zung zung a. An awih chiah em? Tih pawh ka hre lo.

"Naktuk holiday a ni tho a, kan rawn dah tir mai dawn nia." Malina bawk chuan ti lehin ka sam an curl chu a phelh pah mawlh mawlh a, ka káwng thleng zet zawt a sei zuah ka ni bawk a, a nalh hle tih ka pha lo.

Chawhnu lam dar thum ațanga dar nga thleng pheikhawk thlan nan hun kan hmang leh a, ka luak a chhuak hlui tawh. An duhthusama min chei zawh meuh chuan kut an beng ta dar dar a. Darthlalang taksa pum lan theihna ka hmaa an chhawpah chuan ka inthlêk veilm ngial a. Ka landan thar chuan mahni inrintawkna min pe lehzual sawt!

Kan zavaia tan dinner ka order a hlimtaka kan ei hnu chuan apartment lam panin ka hawsan ta hlawm a. Briena kum sawmhnih mi hmel hmuhtur a awm ta lo. Nula puitling mahni lu zo veh vawh leh sexy zetah min chhuah ta der a nia! Ka nu leh pa in min hmuh hunah an hmel engtin tak awm ang maw!?

Aparment ka thlen chuan Joanna makti hmel ka hmu hmasa ber a, kar hmasa ațang khan driver thar Owen ka la bawk a. Ka Lexus car office-ah ka keng tlangpui a, driver mamawhna ka neih thut țhin avangin Owen hi ka chhawr ta a ni. A la upa vak lova, nupui ala nei lo bawk.

"Briena, ka hai teuh hle mai che." Nui var var a atih chuan ka nui ve hak hak a. Kan pahnih chauha khawsa nimahila nufa ang maiin kan ingaina tawh a ni.

"Joanna shower ka nei zuai anga intur dawm turin ka lo chhuk leh ang." Ka tih chuan a lu a bu nghauhva.

Dazel awm lo hian inchhung a ti ruak huai tih ka pha lo. Christmas tree ka sengfel ni te khan ka lung a leng hle a, mahse, min ngaihsak miah lo leh vawikhat chauh tal pawh min biak a tum hek lo.

Shower ka neih zawh hnuah bathrobe nen khumah ka țhu a, kan room zau zetah chuan ka hawikual ruai a, ka nu nen kan inbe zauh zauh tho náin ka lung aleng reng tho. Company lamah țhahnem ngai tak leh rim taka thlakhat chhung han thawh meuh chu taksain a tuar lo thei lo.

Contact lens ka order zinga pakhat zan lama vuah chi chu ka mitah vuah in Lorna min pék tarmit chu ka khungbo ta a. Dazel vang liau liau a ka ngainat ber tarmit hi bun ta lo ka ni. Midangin min sawisel fo tak náin ka lo ngai thutak ngai lova, engtin nge Dazel khan a tih kha, 'Khawngaihin i tarmit lian hi bun tawh lo hram teh' a tih kha ka zawm ta chu a nia! Kawrlum phiar leh kekawr tlawn hain inhnuaiah ka chhuk thla ta a. Room-a tawm reng zawng ngaihtuahna a vâk thui mai mai!

Living room ah Joanna nen checker kan khel a, zû lam chi ka in khát ta khawp mai. Coke kan inchhawp ve rána, ka pum ná riai riai chu ngaipawimawh duh lovin kan thil khelh laiah rilru pek hram hram ka tum a.

Ka pum a nat tâk telh telhah chuan, "Joanna ka pum..." tia dinchhuah tumin sofa bân chu ka chelh a.

"Briena, engtin nge i awm?" hlauthawng âw taka a tih chuan ka chhang thei tawh lo. "Owen ko rawh..."

"Maw! Owen maw?" Ka serh ațanga thil lum deuh pup lo chhuak ka hriat chuan sofa ah ka țhu leh hnak a, ka thlanfím rawn chhuak chu hrûk tumin ka kut ka phar chhuak a, ka pum nât dan em em chu le...ka khawhmuh fiah lo ruai avang chuan ka mit ka chhing ta a.
*
*
Ka harh leh chuan ka mutna lai ka hrechhuak thei mai lova. Ka bân mu churh churh leh kham ut ut chu ka hriat chhun a ni mai, ka che deuh dat a. Ka tháwmah Joanna khum bawh a țhu chu a rawn harh nghal vat.

"Brie, engtin nge i awm? Nâ i nei em?" A ti vat a.

"Khawiah nge kan awm...?"

"City hospital ah.."

"Haw ka duh," ka tih chuan a mengphar âk a, "I lo harh tawh tih doctor kan hrilh lawk ange, lo chesawn suh aw.." tiin a tho ta nghal a.

Engtin chiah nge maw ka awm le..ka pum ná lutuk kha ka hriat hnuhnun ber a nia. Tunge helai hmunah hian min hruai? Joanna khan car a khalh lo tawp anga, nge Owen zawk? A hmel hmuhtur a awm mang si lova.

Doctor leh Joanna lo inzui lût ka hmuh chuan ka thaw hâk a. Nâ engmah ka neih awm pawh ka hre lo.

"Miss Larson, i lo harh ta maw? Nâ i la nei em?" A nui var var a.

"Nei lo ve, doctor tinge damdawiinah hian ka awm a!?" Ât hmel fe hian ka zawt a.

"Eng lo..Miss Larson, nau i chhiat a ni." A ti ta a.

"Engmaw!?" Ka awih thlâwt lo. Nau ka pai tih pawh ka hre reng reng lo.

"Dâwt a nih chu..kei hian nau ka pai reng reng lo."

"Brie, doctor sawi hi a dik alawm naute thlakhat leh a chanve a upa i chhiat a ni." Joanna chuan ka samah a chûl hliau hliau a.

"Miss, Indim deuh tur i nia sin, mahse, tunah chuan engkim a nih tur a ni zo vek tawh a, damdawi ka chawh che anga in chhuak thei ang. A lehpekah chuan nau i pai laiin rim takin hna thawk tawh suh ang che." A ti ta a.

Ka chhang ta lo. Dimte hian khum ațang chuan ka chhuk a. Kawngkhar lam ka pan ta a. Kan bill leh tihfel ngai pawh Joanna chuan a ti vek a. Ka ngaihtuahna tawi turh chu tihreh tumin ka lu ka thing deuh nak bawk. Nau ka pai leh pai loh hre lo khawpin hna ka thawk chu a ni sia, Dazel khan nau i pai theihnan țawngțai rawh min ti kha a nia!

Ka pum chhungah ka fa a awm tih hria ila chuan ka indim deuh tur...Lalpa, engtin nge Dazel ka hrilh ták ang?

Ka thlatin hunbi, ka neih leh neih loh pawh ka lo ngaihsak lova, naute kan neih chuan kan ințhen thei dawn a sin le...

Kan nupa khumah ka mu ât a, hospital kan chhuahsan ațangin nihnih a liam tawh. Room-ah ka tawm char char a, Joanna'n eitur min pêin min ngaihsak hle bawk. Zawhna engmah min zawt hek lo. Min duat em em a ni tawp mai.

Chunglam melhin ka en ngai ka en ngar a, weekend lai a ni hlauh chu a zia hle mai. Ka chungchang hi tuma hriat ka duh lova, Dazel pawh ka la hrilh ta chuang lo. Ka chhungte pawh engmah ka hrilh bawk lova, keimahin ka tuar tlawk tlawk mai a ni.

Ka fa pawh ka humhim zo lo a, contract chungchang kha chu engpawh ni rawh se. Ka fa, ka pum chhungah a awm tih pawh ka hriat hmaa ka chân hi nâ ka ti a ni. Tumah dem tur an awm lo a, keima thiam loh vek a ni.

After 6th Month.
New york Broolyn one 57.

Briena nena kan awm hranna pawh thlaruk lai a ni tawh a. Kum tamtak ral tawh ang maia hriatna ka neih tlat chu le..?

Vawikhatmah min rawn biak a tum lova, ka be hek lo. Nau a pai ta lo a ni ngei anga! Chuti ni lo se min hrilh hre ngei ang. Rei lote kan chendun chhung khan min ngaina hlawl lo tih pawh ka hre vek a. Ani nen kan mutdun hnuhnun ber ațang khan tu hmeichhia mah ka mutpui leh ta lo. Ka kalsan dawn zana ka chêtdan tenawm tak leh zahpuiawm tak vang pawh khan min be lo pawh ni se ka dem miah lo. Mahse, a tel lo hian ka hlim thei lo chu a ni e!

Natie a rai tih ka hriatna hian minti mangang hle bawk. 'I fa a ni' tiin min la puh zui a, huh! Thla tamtak ral hnuah min hrilh chauhva, ka awih thertê lo. Mahse, thlaruk a ni ve tlat lawi si! Ka mutpui ațanga chhûtin a dik thlap a, eng buaina nge ka chungah hian thleng ta. Ka nupui a rai lova, ka hmeinu arai daih si..! Ka chal hnawm chap chu ka tuai pawk a. Ka â thei takngial dawn!

Sidney-a ka company in hlâwkna leh hmasawnna tamtak a neih chu ka lawm rualin ka rilru hahna a chhâwk lo kher mai! Tim Hathaway lah chuan Briena hna thiam zia leh rintlâk zia min hrilh kûr dup a. Ka awih lo ti ngawt dawn ila, Briena awm hnu ațanga sum an hai luh hnemzia chu mak tak a ni!

Henu hi a la mak tluang zel zawng a nih hi..!

Naktuk hian New york chhuahsanin Australia ka pan dawn a. Chupawh ka pa in min rawn biak vang a ni.

Australia-ah ka awm lo tih hi kâr kalta khan a hre ve chauhva. Briena nen kan awm dun loh chhan min zawhna chu ka pha hul thei hrâm.

A thu min hrilh avang hian Sidney ka pan phah dawn chu a ni sia, Natalie enthlâk a ngai reng reng bawk. A pum puar ve âk tawh ka hmuh khan Briena ni zawk se ka lo ti rilru pek a. Chu zawng ka mumangah pawh ala thleng chhin lo chu a nia!

"Ka fapa, i nupui hian mipa dang vanga a țhen hmasak che i duh loh chuan New york kha chhuahsan ang che." A ti a nih kha. Briena hian mipa kawp a nei a maw?

Whisky chu inthlitin ka tlâk nghal pawp a. A mipa kawp lah chu he khawvela ka mi rin berte zinga mi,Tim Hathaway a la ti zui a. No, Tim chu a ni thei lovang!?

Tim hmel ka mitthlaah a rawn lang nghal a. Kan mize a inang miah lo, nula lamah a tla ná phian bawk. Hna thiam tak a ni a, Briena nen nitin an awmdun anga ka hriatna ringawt pawh chuan ka thin a tirim hlur thei.

Natalie leh Briena ka khaikhin lo thei lova. Natie tlukin Briena hi a nalh miah lo, mahse, a nungchang tlang tak leh luhlul ngeng ngalh, zahawm ru riau ang kha Natie hian a nei lo thung. Ka fa a lo ni takzet a nih chuan ka mawhphurhna ka hlen ve thung ang. Dawt min hrilha min bum a nih erawh chuan kei aia sual thiam an awm kher lo bawk ang.

Sidney Airport-ah min lo hmuak turin Briena hrilh ta ila...

Ka phone chu phawrhin Briena ka call ta a. A ring ral țhak. Vawithum lai ka tihnawn hnuah a pick ve ta hrám a.

"Hello,"

"Brie, keimah," Tehtawp a.

"Dazel, Briena chu a muhil tawh a, ka kai tho dawn em niang!?" Joanna âw pawh ka hai țhelh tawh a nia!

"A phone i kawl tihna mi?" Ka tih hmuk a.

"Kawl lo ve, zanin chu pawnlamah dinner eiin a chhuak a, a inhnem deuh a ni maithei! Living room-ah a muhil rih a..." Hrep tak hian ka haw ngei ngei a ngai tih ka hre ta.

"Kai tho lo mai rawh, naktukah ka rawn haw dawn a, Airport-ah min lo hmuak turin i hrilh dawn nia." Ka ti ta a. A rui a nih phawt chuan engang paw'n ko mahila a harh leh chuang lovang..

Joanna nen kan inbiak zawh chuan whisky bawk chu ka inthlit leh ta a. Ka mitthlaah Briena muhil lai hmel hlir ka la hmui zui! Tehhrep a! A doctor tarmit phen ațanga min melh leh hun pawh a nghahhlelhawm ve a lawm le..

Australia Sidney International Airport. 12:30 Pm.

Sidney International Airport-ah ka awm leh ta reng mai! Ka nupui phuahchawp zet kha ka zawng ruai a. Hetiang em em hian ka hmu châk ang tih ka lo ngaihtuah pha miah lo.

A tarmit vuah lianpui phen ațanga min melh leh zuk zuk tur ka mitthlaah alang uar uar a. Ka nui hawk! Briena hmel hmuh tur a awm lo! Joanna khan a hrilh ngei chu ka ring sia.

Airport main gate ațanga hmeichhe pakhat inkhaithli thlarh mai leh confi hmel zet; dák váh a lo phei ka hmuh chuan ka mit láksawn nachang reng reng ka hre lo.

Ka dinna bul arawn thleng a, a mitmeng pawl phát chuan chiang zet hian min en a. "Dazel, ka rawn tlai lo tih ka hre mai!" Àw thám deuh sapa a tih chuan ka meng buai deuh nak.

Ka nupui thlaruk kalta a ka neih áw ngei kha a ni! Engtin nge hetianga nalh leh mi híp tur hian alo inthlák danglam ták?

Lalpa leh! Ka nupui zeilo leh chincháng hre lo zet kha hetiang hian a inthlák danglam thei ang tih ka ngaihtuah ngai lo! Tuna ka hmaa ding hi chu model tamtak aia nalh a ni a, a sam buang kawi leh sei hnâp chu a inhmeh hle a. A mit hnawih dum lam lek lek chuan a mitmeng a tifiah lehzual, a hmui no chekah chuan lipstick hnuhmá hmuh tur a awm lo bawk. Min hîp zar mai.

Ka nupui Briena Larson Solomos kha a ni ngei si!

"Brie," Thaw hawk chunga ka tih chuan, a nui sak a, tlemin a kum aiin a lang upa ta deuh!

Cotton kekawr senduk mar țang a ha a, a chungah velvet jacket buang thak, chhing lam lek lek a hâk chu a inhmeh hle a, high heel buang kharh a bun chuan a ti lang sâng zual a. A nalh thlâwt!

Main gate bula parking-ah chuan ka car Commodore orange colour chu a lo inhûng a, a chhunga țhu ka hmuh veleh chuan ka insehruh nghal țawlh țawlh thei nia.

Tim Hathaway driver seat-a lo țhu chu Briena chuan bân a vai khum zauh a. Tim chuan lo vai lêtin a nui var var a. Ka hnek châk kher mai!

Ka pa khan a lo sawi dik a nih hmel! He mite pahnih hi an inkawp lul lovang! Kei hian ka dang ngei tur a ni.

Briena Solomos, ka nupui i nihna hi thup a țul ta lo a niange...

End of Chapter-6

28th December 2017

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:31 pm

SOLOMOS BRIDE

by Becky Rafa Renthlei

Chapter-7

Car húnna kan thlen chuan front seat-ah Briena țhut a tum nghal ngawt a, ka remti awzawng lo. Tim Hathaway lam hawiin, "I khalh tlang dawn nge keiman ka khalh dawn?" Ka tih chuan pangai tak hian, "I lo thleng ve chauhva, keiman kan khalh rih ange; Briena, a hnungah khan boss nen țhu mai rawh u." A ti ta hlauh va.

"A ngai kher chuang lova," Briena'n a tih chuan, "A sawi ang chuan ti mai rawh," tiin a hnung kawngkhar chu ka hawn sak a, ka nawr lût titih ta a. Min hnial ta bik lo.

"Brie, Dazel a lo kir leh tawh sia, apartment-ah i la chêng ve reng dawn em ni?" Tim zawhna chu chhân ka châk viau rualin Briena'n engtin nge a tih hriat ka duh vangin ka ngawi reng a.

"Um..nia, ngaihtuah țhat deuh chu a ngai ang." A ti liam puat a. Eng nge a sawi awmzia hi! Insawn a tum deuh reuh tihna mi le?

"Flat lian țha ve deuh luah mai tur chu ka hria a.." Tim chuan a ti leh a.

"Hmundangah a insawn lovang, lo buaipui duh suh Tim!" Ka ti nghut a. Hepa hian enge a hriat a, inrawlh phét a tum?

"Mahse..." A la ti țalh a.

"Keimahin ka in buaipui thei alawm Tim, i hriat kha, Dazel kianga chén hi ka nu leh pa remtihna a nia." Briena thilsawi chuan min ti hahdam huai huai thei nia. A thluak vawrh dan vel mai mai chu..pasal pawmlai nei a ni tih hriatnawn tir kher a ngaih loh hrám ka beisei.

Tumah kan țawng zawm tawh lova, Tim hian Briena hi a duh tih ka hria, a mitmeng ațangin ka chhiar thiam vek. Mipa in hmeichhia an duhna mitmeng puin a ni a en! New york-ah kal kher lo ila chuan hetiang boruak hi a thleng awm chai si lo va. Keima thiam loh a ni.

A reng rengah Briena hetiang hian a inthlâk danglam ang tih pawh ka hre bik lova. Mahni inthiam chawp zet hian ka ti rilru a.

Ka apartment kan thlen hnuin lunch ei turin Tim ala sawm zui tak deuh deuh a. Kan pahnih chauhva ei ka duh asin le.

"Tim, intur kha lo buatsaih la, ka'n inthlâk ve lawk ange," Briena inchung pana chho chu ka zui ve nghal a.

"Brie, rei suh aw, lunch ei zawhah tihtur kan neih kha." Briena kal tawh chu ala rawn au hrám nia. Awm ve lo ang hmiah anga min ngaihna chuan ka thin a tirim țun a. He mite pahnih hian enge an hriat tehhrep ni!

Kan pindan kan thlen chuan Briena chu bathroom-ah a lut tlang nghal a. Ka thawmhnaw thlâkin sofa-ah țhuin a lo chhuah hun ka nghak a.

Bathroom kawngkhar inhawng thawm ka hriat rualin ka hawi phei vat. Briena bathrobe ha a lo chhuak ka hmuh chuan ka hawisawn lawk thei lo.

"Dazel, engnge i hriat a? Min en reng suh."

"Ka nupui hun reitak ka hmuh tawh loh hi ka lo ngai viau a ni mahna." Ka tih chuan min melh nghek a. "Tim kha lo zuk kawm rawh, ka inthlâk dawn ka rei lo ang." Tiin thudangah a pakai ta daih a.

"Tim Hathaway hi i tán enge a nih? I hnathawk nge i boyfriend? Mrs.Solomos." Ka ti nghut a. Ka insûm peih vel lo, thu zep leh pehhél neih hi ka thiam zawng lah a ni hek lo.

"Enteh, Dazel, inhnuai lamah min nghaktu an awm reng lai a inhnial a hun khawhral hi ka duh miah lo a nia."

"Ka zawhna che kha min chhang phawt rawh."

"I lo hriat tur a awm lo. Nangmah ngeiin i sawi kha, mipa dang kawp min phalsak kha i la hriat reng ka ring. Nang paw'n Natalie i nei reng alawm." A ti ta a.

"Chuti Tim hi i boyfriend a ni tihna a ni maw?"

"I sawi tawh lo zawk teh ang." Tiin wardrobe-a hawng țhuai a, min ngaihsak leh tawh țhak lo.

"Ka la duhtawk lo a nia, zaninah dinner eiin kan chhuak ang. Midang hruai a rem lo bawk." Min hnial hman hma chuan room chu ka chhuahsan ta a.

Kan lunch boruak uap churh chu ka hné hle a, Briena leh Tim chu hna chungchang sawiin an titi bawrh bawrh a. Ka awm ve tih hre hmel an pu lo. A tawpah phei chuan thawhsanin study room-ah ka luhsan ta daih a. Kei hi ka dik lo vel vek tawh. An thusawi kha mimal thil engmah a awm lova, mahse, an țhudun ka hmuh ringawt pawh khan Tim Hathaway kha reh nawk nawk a nia ka duh ni. Huh! Ka nupui bulah zalen takin mipa an awm a, kei lah engmah ti thei lovin awmhmunah ka lo insawh nghek nghek a. A sáwt viau lo.

Darkar khat dawn lai ka țhut hnu chuan ka chhuak ve ta chauh. Apartment kawta pangpar vul chûk ka hmuh chuan Briena thawhrimzia ka hre mai! A thiltih apiangah hlawhtlinna a chang chho mek zel chu a nia!

"Dazel, office lamah ka kal leh dawn a nia," Tim, a thlah hnuah ka dinna lam panin a rawn phei a.

"Tunang hunah eng hna nge thawh tur i neih hriat a chákawm khawp mai." Tiel zeta ka tih chuan a bân a vai zauhva.

"Nangmah hmuak turin min ti lo la chuan office-ah hna tamtak ka khawih țeuh tawh ang chu.."

"Nichin mai kha chuan office kal tum lo ang mai khan i awm a, chutia tu emaw kal tâk vanga chhuahna zawn ve ruai kha ka hrethiam lo emaw i ti a nge!" Ka ti nghut a.

"I țawngkam hman kha fimkhur ve la.." A nui lui sak .

"I landan thlâk danglam duh tur khawpa mipa pawimawh i nunah an awm ta chu a nia. I pasal hian hriat ve ka phú lo maw?"

"Dazel Solomos, nangang ka ni lo a nia," ti hmakin a inher nghauh a, inchhunglam a pan ta a. Ka ûmzui rang teh e..Titau hrât ropui si!

"Brie, lo ding teh,"

"Hremhmunah kal rawh, i lo haw hun ka lo nghakhlel viau kha ka tisual a ni."

"Engmaw, i sawi?" Briena thusawi chuan min țhawng hle a. Ka haw hun a lo nghakhlel ve a maw!

"Engmah, min zui tawh suh." a vin thei hlar hlar a nia. A mizia langtlang lutuk hi ka lo theihnghilh hman a lawm le.

"Zui zel ta che ila, engtin nge min tih ang."

"Oh..i tih theih hlawl loh," ti sapin chokaah chuan a lut ta a.

Joanna'n kan inzui lut a hmuh chuan mak a tih hmel hle a. "Mamawh in nei em mi, Dazel?" ati vat a.

"Zaninah dinner kan ei lovang, Briena nen pawn lamah kan ei dawn a..."

"Ka kal chhuak dawn reng reng lo." Briena'n fridge hawng paha a tih chuan ka ner sawk a. Tihdan ka hria!

"Sawi chiang ula mawle, khatia inzui kawi reng lo khan..." Joanna chuan Briena nen min entawk sek a.

Briena bânah chuan chelhin a beng bulah, "Min hnial luih zel chuan ka nupui i ni tih house keeper hi ka hrilh ang." Ka ti ta a.

"Engmaw i sawi nang, nang..." sawi zawm lovin choka ațang chuan min kai chhuak ta dawr dawr a. Joanna za zeta nui awr awr chu kan chhuahsan ta a.

Living room chhuatah chuan min dinpuiin kut kuangkuah ât hian min en kalh a. "Engmaw, Joanna chu i hrilh ang?" A ti țha leh ngat.

"Ka thu anga i awm loh chuan Joanna mai ni lo. Company ah ka nupui i ni tih hi ka puang ang."

"Tenawm khawro pa, i ti dawn lo i ti miah lo ang," a ti mial mial a.

"Min fiah i tum deuh tihna mi? Enchhinna ka han hmuhtir ang che," tiin choka lam pan chuan ka kai phei ve leh ta a, "Ka hrilh hmasak ber tur chu Joanna a ni, nupui thuawih lo zetah angai ngei bawk ang che."

"No, Dazel," a ti ta chûl a. Nui lo turin insum nasat ka ngai viau.

"Ka thu awihin dinner chu min kilpui dawn em?"

"Umn.."

"A țha, tun ațang chuan ka sawi ang apiang zawm ang che, kei chuan ka nu leh pa puanzar hun nghah kher hi ka tum lo."

"Tenawm lutuk..! a ti sap a.

"Sawi sual ka nei em ni? Fa kan neih hma chuan nupa kan ni reng dawn, vawihnih kan mutdunna khan rahchhuah a nei ta lo phawt chu a nia! Chuti ni lo se, i dul thêp zaih kha a puar tawh ngei ang!" Ka sawi zawh ruala Briena hmel dáng lâwp láwp ka hmuh chuan,"I țha em, Brie? Engtizia nge?"

"Ka țha e,"

"I țha miah lo, i dáng vek alawm! I thawkrim lutuk a ni ngei ang." Ka tih chuan za lo zet hian a nui sak a.

"Ka țha e, kan chhuah dawn chuan insiam a hun tawh a nia." A ti daih a. A awmdan inthlak thut hian min ti hrilhhai deuh.

Kan room lam panin a chho ta a, engvanga khatia awm thut kha nge maw a nih reuh le..Tim Hathaway nen hian mudunin nau a pai te hi a ni lo maw? Chu zawng ka ring phal lo.

Kei nen a nih loh chuan tu fa mah a pai ka phal lo bur. Kei hian ka duh tih ka pha lo. Amah hian min ngaihven hlawl lo a, ka kianga awm aiin khapa bula awm kha a duh zawk a nia!

Hotel roof top Sidney 311 Park Avenue

Dinner eiin kan chhuak ve ta a. Rimawi ri ruai ruai karah kan dawhkan lam pan chuan waiter-in min hruai a.

Briena chuan kawrfual khup chen lek sen hlar a ha a, a kawráwm zau lam lek lek ațang chuan a âwmbawr a lang phir deuh țhaih a, rangkachak bengbeh kual lian lam a beh tih loh chu tlereuh dang a inbel lo. A lang tharlám sar mai a, a nalh reuh em em reng a ni. Chulaia mipa awm ve hovin hmuhchian tuma an thlék zui deuh vang vang ka hmuh phei chuan ka lo chhuang takzet.

Wine no phen ațang chuan ka thlir veng veng mai!

"Khawnge i tarmit? I bun dawn lo mi?" Ka tih chuan a hawi buai deuh nak. Tarmit a bun khan mipa mit a la lo deuh ang chu..

"Ka bun dawn tawh hleinem. I ngainat loh kha.." min fiam tih ka hria.

"Bun leh zawk ta la a țha lo maw?"

"A chang hi chuan i danglam riau țhina hriatna ka nei tlat zel! A hmain min rah chhiatsak tawh a, mi pangai an lohna riau i nei țhin. Tunah 'bun leh zawk la' i ti leh lawi si!" A ti deuh hliai a.

"Chu chuan a ti lunghnur lo che nge a tilawm che," tiin ka nui suk.

"A chang hi chuan Australian mize diktak i pu a, a changin..." A'n sawi zawm duh lo lui leh ngei a, chimawm thiam ve sin.

"Australian diktak ka ni e, nang ang bawkin.." ka tih chuan a hmui a pet zauhva, "Mipui zingah awm lo ila chuan kha i thawmhnaw inbel kha ka hlip fai vek tawh ang maw le,"

"Engvang ngawtin?"

"Ka nupui i nih avangin, Tim Hathaway phiansen kha lo hruai tel ve lo la chuan airport ah khan ka fawp ngei ang che." Ka ti ta a. Ka duhna hi zép reng ka tum tawh lo, a thinlung hneh tur hian theihtawp ka chhuah dawn. Ka hmangaih em? Chu erawh ka sawi thei lo. Mahse, ka duhin ka thlahlel hle tih erawh ka hria a ni.

Ka thusawi chu hria an awm nge awm lo tiin a hawikual ruai a, hre phák an awm a hlau hle mai. Ka lo nui hawk thung. A naupanna hi a lang leh zeuh țhin.

"Pawnlamah i nupui ka ni tih midangin an hriattheih turin awm miah suh." A ti sap a. "Chu zawng nangmahah a innghat ang chu.."

A țhutna hnunglam chu nghéngin wine no chu a chul kual dan dan a. "Blackmail hmanga indawr hi a fuh viau lo." A ti leh a.

"Blackmail ngai lovin ka nupui chuan ka thu a zawm mai tur a ni. New york ka pan hma zanah khan ka nupui i ni tih ka nemnghet tawhin ka hria," Nui suk chunga ka tih chuan a biang a sen deuh țán țán a, zak hmel a pu deuh!

Eitur a rawn thlen tâkah chuan min chhang tawh lovin a ei mawlh mawlh a, englai mai pawhin tui tihhmel tak hian a hmaa eitur inchhawp a ei thei zel hi hmeichhe dang nena an danglamna a la ni fo. A thil ei lai chu hmuhnawm ti zetin ka thlir reng a, nalh loh hlauva ei insum tih vel chu a ngaihtuah lo ve khawp mai!

A fork ken chu dah thlain wine a lem hlek a, ka pa in innei tura min tih lai khan lo hnial lui tlat ila chuan tuna ka hmaa țhu ka nupui ni ta hi kumkhua pawhin ka hnaih ka ring lo. Kei hian nu leh pa thu zawmin ka nei a, maktakin ka nun kim lo riauva ka lo hriat țhin kha tunah hian a awm tawh hauh lo. Briena vang a ni tih ka hria!

"Lâm ang hmiang, Brie," ka ti ta nge nge a, kuah ka châk zek zek! Chance ka zawng ngar ta chu a nia!

Min hnial hran lem lovin a rawn ding chhuak a, lamtual lam panin ka kai phei ta a. Inkuah chiala lamdun chu a nuam dangdai hle. A taksa lum ham ham chu ka feel veng veng thei nia!

Kei hian ințhen ka duh ngai dawn lo a ni tih zanin hian ka hrechhuak ta ni. Natalie naupai kha ka chinfel vat a ngai a, Briena'n a hriat chuan kan inkâr a chhe vek dawn tih pawh ka hmu tlang sa vek.

A hnu minute sawmpanga chhung chu lamtualah hun kan hmang a, ka âwma bei chial chungin music rem chuan kan lâm a, hmeichhia ka lámpui tawh zingah lámtuala ka awm rei pui ber a ni hial ang. Ka thlah phal thláwt lo.

"Zanin chu a hlimawmin a nuam hle mai Dazel," Car chhungah țhudunin aparment lam kan pan leh tawh a.

"I hlim chuan a țhat chu..keipawh nuam ka ti takzet, ka lo haw zana min welcome tu nupui ka nei hi a nuam lehzual." Ka rilru diktak a ni.

"Naktuk ațang chuan hna kan thawh angai leh tawh anga, ka office bul chiah kha i room a nih kha, i lo thleihnghilh tawh tâkin," a nui zui hak hak a.

"Ka rualin i kalin i haw ziah tawh ang, Mrs.Solomos."

"Driver thar ka nei a nia, i ruala kal chu a finthlák viau lo. Board memberte'n zawhna an ngah hlein ka ring."

"An duh duh min záwtin sawi se, ka pawiti eih lo, ka company, ni lo, kan company a nia, board memberte kan inthununtir tur a ni lo, theihnghilh ngai suh." Ka ti ta a.

"Ok..Mahse..i rawn lan thutna hian chhan a nei ngei anga, ka hriat ve chi a ni em?" Dam thlap hian min zawt a.

"Thlaruk awmbo hi a tawk ka ti ve ta a ni. Ka nupui hna thiam leh thiam loh pawh keimah ngeiin en dik ka duh ta pawh a ni mahna."

"I lungawina tur i hmuh ngei ka beisei," tiin ka mal a rawn tawk zauhva, kawngsir rem laiah car chu tidingin, "Tlai hun chhung zawng khan hetia tih che hi ka châk tawh." Ka fawp zui ta a.

Rilțám zetin ka fawp ta vawng vawng a, Briena hmui lo chip tlat chu áng turin ka thlém a ni hrim mai! Ka kut chuan a ir no vel chu chul sakin ka tawhna chin chu a hriat hle zel a.

Min hnar tumin țan a khawh ka ring deuh kha a nia, chutia ti ta lo chuan duh thawh takin min chháng lêt ta zawk a. Chu chuan phurna nasa tak min siam bawk.

"C'mon Brie, helai hi zawng hmangaihna chéndun nan a zim mah mah," Tiin hreh zetin ka thlah ta hrám a.

Insum theihna ka la neih lai hian aparment thlen vat a ngai. Rei vak lo kan tlán leh hnu chuan kan thleng ta hrám a.

A chhuahna turin car kawngkhar ka hawn sak a, min hnial hman hma chuan zo zet hian inchhung lam panin ka pawm chho ta a. "Dazel, min dahthla vat rawh, Joanna'n min hmu ange!" țawng ring ngam chiah lo a atih chuan ka nui suk.

"Ka nupa chénna ngeiah pawh midang mitmei ven a ngai a nia! Naktuk ațang chuan lángin rawn kal tawh rawh se, ka lo haw tawh bawk a."

"Chutiang a ni ngawt lo, min dahthla phawt la..."

Dimte hian verandah ah chuan nghat thlain kawngkhar chu ka pawt hawng ta a.

"Intur dawm i duh em?" Briena min zawhna pawh chhang lo chuan kan room lam pan chuan ka kai chho a, Joanna'n makti hmel taka min thlir chu ka mitsirin ka hmu reng.

"Living room-a intur dawm ai chuan kan room thlen thuai hi ka duh zawk."

A thawmhnaw chu hlipin under wear leh bra nen a ding tau a, a vun no paw phât ka hmuh chuan chil ka lem khalh! Tun hma aiin a khal nalh tawh zawk a, tisa chuangtlai hmuh tur awm chuang hauh si lovin, a taksa a nalh thlarh a, a itawm hliah hliah.

Insum thei lovin ka pan hnai ta ruak a, hnunglam ațanga ka kuah chuan a țé țhat. A sam buang fai zet chu ka hním ta vang vang a. A sei țhain awmze neizet hian a kawi thla chiat a, a káwng thleng deuhthaw a sei a ni. A shampoo hman rimtui zet chuan ka hnar a verh zar nia!

A ngháwng lum ham ham ka fawhsak chuan a insangmar țálh țálh a, ka lam hawiin a rawn inher ta a. A pheikhawk bun a la phelh lova, a mitmeng paw râm mawi ka tih em em chuan ka mitah tak min en a, "Dazel, fa ka duh, a ti ta sap a."

A thusawi chu ka hresual emaw ka ti hial a, "Eng maw!?"

"Fa ka duh," a ti leh sap a. Engvanga fa chu duh ta viau nge a nih ang? Contract ah khan fa kan neih hma loh chuan ințhen a theih lova, kum hnih hnu a kan la nei lo fo a nih chuan contract tihdanglam tur a ni tih kha a nia. Tunah fa a duh a nih chuan ințhen thuai a duh tihna a ni thei mai em?

Ka thisen lum lai váwt nghal rawih rawih chu dan ka tum viau náin a har lam hret a ni. Ka taksa danglamna chu a lo man thuai a, "Dazel," tiin a hmui lum ham ham chuan min rawn fawp ta a. A hma kha chuan fa neih thuai ka duh țhin kha a nia. Tunah lém kan ințhen phahna tur a nih chuan fá nei lo mahila pawi ka ti miah lo.

Mahse...Briena hlimna tur a nih chuan engpawh tih ka huam. Kum sawmhnih chauh ala ni a, a tan pasala min pawm hi a har viauin ka ring ve tho a ni.

Ka thil ngaihtuah lai chu chawlhsanin min fawhna chu ka chháng lêt ve ta zawk a.

Duhthawh taka kan in fawh tawn tawn lai chuan ka phone ah lai a rawn ri ta thut a. Tu phiangsen nge maw ni le! Hun lo lutuk! Briena inlâkhran tum chu phal lovin ka kuah tlat a. Ka phone ri a tawp tâk mai loh avang chuan ka inla hrang ta nge nge a.

"Ka rei lovang, lo muhil suh aw, kan hmabâk kha chhunzawm leh ka duh dawn a nia.." Ka tih chuan thuawih hmel deuh hian a bu nghat a. Tun țum Briena mizia hi a dang deuh tlat! A chhan sawi fak tur ka hre lawi si lo.

Briena khuma mu chu melh zauvin ka phone chu ka pick ta hrâm a, ka pa a ni tih ka hriatna chuan min ti hahdam sawng sawng. Company chungchang rei fê kan sawi dun a, Briena tan a ninawm ka rin vangin pindan chu ka chhuahsan ta a. A ngai haw ém lo'ng chu maw! Engvanga vengthawng em em nge ka nih pawh pawh ka hrethiam tawh bik lo!

Ka pa nen rei tak kan inbiak hnuah ka nu nen kan inbe leh hrep a, a thilsawi pakhat chuan ka rilru a tinuam lo deuh. Jimmy Larson (Briena Pa) chuan țhat lam pan aiin a hniam thla zel tih a rawn sawi a.

"Ka fapa, Fa neih lam hi in hmanhmawh thei deuh angem? Nawr luih che u hi ka hreh viauva, mahse, i puzawn dinhmun en hian kum tam a daih tawh lovang! Tú hmel hmu ve se kan tih vang a nia, a chanchin hi a fanu pawh kha an hrilh lo. Damdawi hmang pawhin inenkawl mai rawh u, Jimmy hian fa pakhat chauh a nei tih i hriat kha, chu chu i nupui kha a ni." Țap deuh țiau hian a ti a.

Hei vang hi em niang Briena khan fa ka duh a tihna chhan kha. Mahse, a pa chungchang engmah a hre lo ka nu khan a ti bawk si...Ka thluak a buai vek. Natalie lah chuan min call sek a! Henu em em pawh hi a, ka fa a pai hi ka la ring thei chuang lo. Fiahna lah ka nei der bawk si lo a, ka sum bák a duh lo tih ka hre ve thova. Eng buaina nge ka la hmachhawn tih Pathian chauhvin a hria ang chu.

A hmasa berah Briena hi ka dah zel tho ang. Naktukah chawhma office kal ila, tlai lamah incheck up turin ka hruai dawn a ni. Ani paw'n ka fa a pai duh thova, a enkawlna tur lungaihthlak pawh ni hlei lo, theihtawp ka chhuahpui ang.

Briena'n ka fa a pai tur anga ka mitthla chuan ka nui suk thei nia!

Room-a ka luh leh meuh chuan a tlai duai tawh a. Min nghak chhuak zo ta ngang lo a nih dawn hi..ka rei ve êm bawk a ni.

A bulah muin a hmuiah ka fawhsak zauhva, ka áwmah a lu chu dahsakin amah kuah chial chuan ka maimitchhing ve ta a.

Apartment plus Solomos bedroom. 6:00 Am

"Briena, duhtak,"

Ka bianga hmui lum thar tharin min rawn náwkna chu ka mang hriat ruai ruai a, mutthilh ka la chák ngawih ngawih.

"Hey, baby, thawh a hun dawn a nia, office kal kan ngaih kha.." ka beng bula rawn thaw lum ham ham chu haider ka tum a. "Brie?"

"Hmnn?"

"I harh chiang em?"

"Hmm.."

Nui ri hawk hi ka hre zawm leh a, chutah bán tha chak zet hian min rawn kuah ta a. Men tumin ka bei ngial a, ka mitko chu a rit lûk mai. Min kuahtu chu ringin ka kuah lêt ve a.

A rim faisar leh rimtui zet chuan min tiharh deuh káwk! Dazel a ni tih pawh ka hre chawpchilh nghal vat. Ka kawchhung ațanga amah ani tih hriattheihna maktak lo awm hi kei paw'n ka hrethiam bik chiah lo.

Dazel chuan ka biangah duat zet hian a rawn chûl hauh hauhva, "I tho peih ngang lo a nimaw?" Zawite hian a ti a. Ka chalah a rawn fawp zauhva, ka la meng peih ta chuang lo.

****

Dazel Pov*

Briena chu a muhil chhunzawm a ni leh ta mai a. Mut a duh ve lutuk hi a la naupanzia tilang tu a ni. Kei kum sawmthum pahnih ka ni tawh a, ani erawh tleirawl ang chauh a la ni.

Dimte in a thawmhnaw hák chu ka phelhsak ta a, a taksa no leh mâm hán lo lang chu en loh hram hram ka duh. A mutkawr ka hlihsakna chhan pawh nichin ațang tawh khan a pawt deuh reng a, bâkah a mar deuh mah mah, hâk a nuam vak lo a nih ka ring ve ringawt a, chuvanga hlihsak chu ka ni.

A sam hnawk niai leh hahdam hmel taka a mu chu a nalh tawk em em a, a tháwk zawnga a hnute insép pawng dat dat te, a under wear hák in a, a khuh phâk loh a khêl báwr lo lang te chu a mawiin a hmeichhia hnâp tlat a ni. Ka en ning thei thlawt lo. Engtin nge thlaruk chhung ka awm bo san phal zawk le.. Ka mipatna chu rawn thovin, ka thisen lum pap pap mai chu thunun ka tum ve țang țang a.

He hmeichhia hi..ka hmeichhe lo hriat tawh țhinte ang a ni reuh tlat lova, makti leh hrilhhaiin min siam fova, min ti thinurin min tiphur leh fo bawk. Ka tán ninawm khawpin min zar chung lova, Huh! Min zar lo mah mah zawk!

Hmeichhe dang angin ka sum a it hek lo. Min thlahlelawm angin alang duh țhak lo lehnghal a, mahni inringtawk leh zahawm ru riauva khawsak dan tawk a thiam. A thinchhe ve hle a, a duh lohna ah leh a dikna ah chuan a țang na ve pàng pàng thei hle bawk. Ka tana ninawmin vawikhatmah ala awm chhin eih lo bawk. Ei siam a thiam tlat lo erawh mak ka ti!

A khél báwr ațang chuan dimtein ka zût thla a. A ke hmawr thlengin a mámin a vun nélthêp hian min hîp zar. Hei ai hian a kum upa deuh phei se chuan mipa âtchilh rawn khawp tura taksa nalh nei a ni. A naupanna leh chincháng a hriat lohna hian a la venghim mai pawh a...

New york ka pan hma khan duhtawkin a taksa ka lo chûl tawh bawk a. Tim Hathaway khan a mutpui a nih vaih chuan ka that hreh hauh lovang.

"Dazel?"

Ka hming chu a rawn lam ri sap a. A âw lah hi a thâm mawi phian lehnghal! A la harh chuang lo tih a lang reng a.

"Enge ni baby?" Tiin ka hnaih zual sauhva.

Briena chu a zi mar țiah țiah a, a ke thluangin a muhil chu a ni leh ta mai a. Thawh a hun tawh asin le...Mahse, Boss nupuiin mut a duh rih miau chuan a mu mai tur a ni.

A thin phu dat dat chu ka thlir reng a, a hnute kawh váh leh chhîng deuh láh chuan ka thisen a ti lum pawp thei nia! Ka taksain a tih duh chu ka thluakin ti lo turin min duh si. A bula mi â ang maia țhu lo hian kalsan daih awm tak ka nia, ka chesawn thei der lo! Min aikaih deuh reuh emawni? Mipat hmeichhiatna kawnga insúm harsa ka tih vawikhatna a ni hial ang!

Hetiang êma mutpui châk hmeichhia hi ka la tawng ngai lova, Natalie ka hmu hniam raih raih mai. Engtin nge ani kha ka lo mutpui theih zawk le..?

Briena chuan a kut chu khumah pharhin ka mutna lam chu arawn dap dan dan a. Ka khêl záwn a dap thlen tâkah chuan a thaw halh, ka hming a lam leh sap a.

Ka khumah ka hming lam chunga a harh fo hi ka duh réng a ni. "Brie, i nalh lutuk, i lang nalh takzet," tiin ka fawp zui ta nghal a. Dim leh duat takin ka fawp a, 'Lalpa..min hnartir lul suh' ka ti hial..Briena thaw ham ham ri chuan phurna min siam belh sauh a. Ka khéla a kut dah chu lasawnin ka nghawngah min kuah a, alamah min hnuk hnai ruak.

A harh chiang lo nángin min hnar hauh lo. A hnute chu dimtein ka tawk a, a ruh țang a, a hmur pawh a ruh țalh mai! Ka tawh rual chuan a lo rum nghal hak a.

"Brie, min hnial suh aw, nangpawhin naute i duh kha," tiin ka thlém ta hauh hauh a.

Ka dák chhuak a, a harh chian ka rin tawh tehlul nen a la meng chuang miah lo. Ka nui ta hawk a.

Ka taksá thunun ngai khawpin a awm tlat bawk si. Hahthlák tih piah lam a ni. A harh chiang lo chung chung mutpui lah chu 'ém a' ka ti ve deuh.

Ka nupui a ni a, a khum a ni a, a in a ni bawk. A duh chen chen mu teh se..

Ka thawmhnaw chu ka phelh leh vek a, saruakin tukverh lam chu ka pan a. Thlifím chuan ka taksa lum huam huam chu a rawm chhem dai sawng sawng mai.

Dar sarih a ri tawh a, office kal lovin mu nileng ve ila nimai. Khuma ka mut ve chuan Briena chuan min lo hnaih deuh sauhva, ka taksa lumna chu a hria pawh a ni maithei! A ke tawmin min khan ta chial a.

Ka hrehawmna ngai bawk chu a lo thawk leh ta, ka mipatna rawn tho leh chu haider a har țalh țalh khawp mai.

Muhil lovin ka meng reng a, kan room kawngka kik ri ka hriat chuan ka tho leh nghal vat a. Joanna a ni tawh ngei ang. Breakfast ei hun a ni tawh tlat a tin ni.

Thawmhnaw inbel zung zungin kawngkhar chu dimtein ka hawng ta a. Pawn lama lo ding ka hmuh chuan ka thinrimna ka thup hman lo.

Natalie nen kan inhmachhawn ta rán a. Rawn luh a tum leh ta nghal!

"Eng nge hetah hian i rawn tih dawn, chhuk rawh, inhnuaiah.." Ka âw a ring miah lo. Mahse, a hlauhawm a ni tih hrethiam turin min hrechiang tawk, Briena tih harh ka duh reng reng lo.

"Darling, i rawn haw tih i sawi lo va.." Pangchang áw taka a tih chuan ka luak a ti chhuak!

"Kan pindan hi i duh duh a i rawn luhna tur a ni lo."

"Kan pindan..." tinawn ve sapin, ka dan hman hma chuan kawngkhar chu
a nam hawng ta țhuai a.

Pindan chhungah chuan a lut zui hmak bawk. Briena ka khuma lo mu chu a melh ta reng a....

Kawrfual a taksa phuar lam deuh a ha a, a dul puar pawh a lang chiang hle mai.

"Henu hi i lo mutpui a..." khur dar dar a a tih chuan, "I hmuh ang khan a mutui khawp mai. I ti harh a nih vaih chuan i tán a pawi zawk ang."

"Henu hian i khumah enge a tih?" A áu hi a ni ber tawh. Mi â ang maiin a ke a per tawn tawn a.

"Chhuak rawh, buaina ka duh miah lo a nia," tiin a bánah chuan ka pawt deuh nawk a, a lo țang ve khanglang bawk nen dawhkana tui bottle inhûng chu a vai thla ta a, a ring țha duh khawp mai.

Kan thawmah Briena pawh a rawn harh ta nge nge a, thawmhnaw mumal a inbel lo tih ka hre ru ve kar sia, Natalie chu pawm nawlhin chhuahpui ka tum ta a, "Dazel Solomos, min khawih hlek suh. Tenawm pa! Henu hi kan that law law ange," tiin a tál chiam a, han ti deuh viau dawn pawh ni ila, nau a pai a, ka ti ná ang tih ka hlau ve deuh bawk sia! Va'n buaithlak tak!

"Dazel, Miss Stone hian kan room-ah eng thil pawimawh nge tih tur a neih?" Briena chuan rawn țhu chhuak pahin a ti chang fak a.

"In room maw? Khanglang che chuan..Dazel fa ka pai a ni tih i lo hre pek nange?" Natalie țawngkam hman kher kher chu a va'n țul lo tak.

"Miss Stone, i lo ngawi lawk dawn em niang? Nang ni lovin ani hi a nia ka biak?" Tiin a kut chuan min rawn kawk zauhva. Zám hmel emaw pawh a pu chuang lova.

"Brie, nakinah kan sawidun dawn nia, Natalie hi kan hruai chhuak lawk ange." Ka sawi zo hman țawk. Natalie chuan "Ka chhuak dawn miah lo, Dazel, i duh chuan min theh chhuah han tum chhin la," a ti tuarh a.

Briena thinin a tuar ta lo a ni ngei ang. Under wear leh bra nen khum ațang chuan rawn thovin, Natalie nen min kal pel nghauh va, thawmhnaw hákthlák lain bathroom-ah a lut ta a.

Briena awm loh lai chuhin Natalie chhuahtir tum chuan ka bei a, a tawpah kan pindan chu a chhuahsan ve ta hrám, Țhutkhawmna pindan sofa-ah chuan țhu hmakin Briena chu kan lo nghak ta a.

"Khanu kha ka biak hma loh chuan he in hi ka chhuahsan dawn lo." A ti bur. Ka lo kawp ta kher kher hi ka tihsual lian ber a ni. Zahna a tlachham bawk si! Ka fâ nu a tan phei chuan ka duh lo hulhual, engtizawng mahin ka nei nguar ang.

"Tun ațang hian kan inzawmna zawng zawng ka chhu chat vek e, thlaruk liamta khan kan titawp tawh tih i hre tho anga, i naupai kha ka fa a nilo tih ka thinlungin a hriat ang bawkin nangpawhin i hria, min tibuai zawm tawh suh ang che, a lêt leh i tuar ngam a nih loh chuan." Ka ti ta hmuk a.

"Dazel, chutin i ti ngawt thei lovang?" A țap țiauva, a hmelțha tak țhin pawh kha tenawmah ka ngai zo vek tawh! Ka haw hlur mai.

Briena chu thawmhnaw inbel thlap hian a rawn pen lut ta a. "Nang mi tenawm nu kha, penkhat pawhin Dazel hi rawn hnaih tawh suh," Briena káwk sawk sawk chung hian Natalie chuan a ti ta a.

"Natalie Stone.." Ka âw chang fak leh chhum hmuk vang chuan hmeichhe pahnihte chuan ka lam an rawn hawi vat a.

"Dazel, henu vang hian kan inkár titawp lul suh," a inhnit deuh hlap hlap a, lemchan pawh a lo thiam lehzel a nih hi...

"Miss Stone, i duh phawt chuan Dazel hi i hneh thei alawm, dál tumna che ka nei hauh lo. Mahse.." Briena thilsawi tum chu ka rin hriat theih ruau avangin, "Brie," tiin ka lo dang chat vat a.

"In pahnih buaina a ni e, ka lo inrawlh ve a țulna a awm lo. Ti khan lo sawi fel rawh u. Miss Stone, Mr.Solomos, office ka tlai dawn tlat!" Tiin, awihawm loh khawpa mawi hian a nui sak a. Min chhuahsan ta a.

A confi dan em em hi khawi ațanga a neih bik nge mawni le..ka duh zual sawt..

'Briena thinrim suh aw, ka chingfel thuai ang' Ka ti rilru a...

Natalie lam hawiin, " I fa chu lo piang se, a pa diktak kan hre thuai ang." Ka ti ta hmak a.

"Dazel, Darling, khanu khan a duh hauh lo che, i sum bâk a duh lo harh chhuak teh." A la ti zui ah...Zak thei lo lutuk mai!

"Briena chungchang hi, kha i ká bawlhhlawh tak khan sawi sawi ve tawh suh ang che, tunah ka in hi i chhuahsan dawn nge? Keiman ka thehchhuak dawn che."

"Ka chhuak anga, mahse, ka thawmhnaw nen ka lo kir leh ang," Tihpahin a chhuak tau nghawng nghawng a.

'Rawn kir ta che, ka nupui neih i hriat hunah meuh chuan tuna i thusawi kha i la inchhir ang' ka ti sup a.

29th December 2017

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:32 pm

SOLOMOS BRIDE

by Becky Rafa Renthlei

Chapter-8

Bella Vista Wool Worth Company Sidney.


Rilru táwt țûn a apartment ka chhuahsan hnuah Owen nen company kan pan ding nghal a. Natalie Stone khan Dazel fá a pai tih ka hriatna chuan min țhawng takzet. Engtin nge ka tih tâk ang? Ka nu leh pa sawipui dawn ila contract kan sign fel vek tawh a, min pawmpui theih ka ring si lo.

Engpawh nise Dazel fa hi ka pai ngei ngei tur a ni tawp. Contract zah zo lova ințhen ai chuan kan company rochun tu tur fa neih a, ințhen kha ka tan a țha zawk.

Office ah pawh hna ka thawk țha thei lo. Ruahmanna chi hrang hrang ka duang chhin a, a țha ber tur ka hre bawk si lo. Huizz..!

Thil pakhat ka ngaihtuahna a rawn lut zawk avang chuan ka nui ta var var a. Ka secretary Lizzy ka ko vat a.

"Tlai lamah incheck up ka duh dawn a, Sidney-ah hian private doctor ka nei hauh lo. Mr. Dazel Solomos lo bia la, an chhungkaw doctor ka mamawh tih lo sawi ta che." Ka ti ta a.

"Miss Briena, nâ i nei em ni?" Min ngaihtuah hmel taka a tih chuan ka nui sak a. "Nei hran lo ve, incheck up satliah maw le..i hriat angin helai hmunah hmel hriat mumal ka nei lova, a in a chéng ka nih angin a doctor ka țáwm mai ang. Keimah ngeiin biak ka duh rualin mimal thilah harsatna ka nei deuh a." Tiin tlang takin ka sawi a.

"Awle, Miss," Lyzzy kal hnu chuan computer hmaah țhuin ka hna ka thawk zui leh ta a. Fa nei tur hian ka inpeih chiah em ka hre lo. Mahse, ka pa duhthusam leh ngenna hi tihhlawhtlin ngei ka tum tlat a ni.

Lunch eitura chhuah pawh ka châk loh ém avang chuan cofee leh burger ka ei ta vel mai mai a.

Tlailam dar thum a rik chuan ka office ah Dazel a rawn lut hlawl. Office-ah a rawn kal lo tih chawhma lam khan ka hre daih tawh. Ka thuchah kha a lo hre tawh a ni ngei mai.

"Brie, Lizzy khan min hrilh a..." Ka țhutna lam pana rawn phei paha atih chuan ka bu nghat a.

"Nia, incheck up ka duh deuh alawm le.."

"Ka hnenah pawh i sawi thei reng a, midang chah kual leh vel kha a țul ber lo." A ti hmuk a.

"Doctor chu min hmuhpui dawn nge? Keimahin ka kal dawn?" Thinrim duh miah lova ka chhân chuan a dar ti che zauhvin a nui suk a.

"Tukin kha pawi ka ti khawp mai Brie,"

"Ka sawi vek tawh kha ka buaina tur a ni lo. Kei chuan contract-a inziak ang khan fá ka duh mai a ni." Ka ti liam puat a.

"Tunah i la duh tho a maw!?" Mak a tih hmel hle a, ka ruahmanna hi a hriat ka duh lo tawp.

"Duh ang chu, nang leh kei kan inzawmna chhan a nia lawm, Wool worth company rokhawmtu tur a pian theihna tura innei kan nih kha, i theihnghilh ta em ni?" Ka ti ta a.

"Theihnghilh lo ve, ka phûr tawh khawp mai." A ti hmuk a. A phur hmel chai si lova..

"Kha i hmeinu nena in fá kha company rochuntir i tum deuh zawk em ni?" Ka ti hmak a. Ka duh aiin ka sawithui țep!

"Briena," A ti tuarh a.

"Ka tihpalh, kan kal dawn em niang?"

"Dr. Shinoda hnenah ka nupui tiin sawi ta che ila, pawi i ti viau angem?" Min zawh ka ring deuh reng a.

"Pawi lo e, puanzar kan duh rih lo tih erawh chu i hrilh tel dawn nia." Ka ti sap a.

Chumi hnu chuan ka office chhuahsanin Dazel nen company chu kan chhuahsan ta a. Staff țhenkhatin min en duh hle tih ka hriat chuan nuam ka ti vak bik lo.

Ka Lexus car chu Owen ka khalh hawtir a, Dazel car in Shinoda clinic kan pan ta a.

Kawngtluanin kan inbe țhak lo. Kan rilru ve ve kan kawm a ni deuh ber mai.

Clinic-ah chuan mi an tam hle a, lobby-a țhutthleng an dah pawh a khat vek! Nghah rei a ngaih loh hram ka beisei takzet.

"Brie, Carlos ka be sa tawh a, kan lut nghal mai dawn em ni?"

"Mahse..i hmuh ang hian mi an tam hle a, kan aia hma vek an nia," ka tih chuan, "A dik, kan chhungkaw doctor a nih angin kan mamawh hunah chuan kan pawimawh ber." A ti nghut a. Ka bânah chelhin min luhpui ta nghal a.

"Hi, Dazel," Dr.Shinoda tih ka hre ve mai, a hmelțha veh vawh hle a, Australian a ni lo tawp ang tih ka ring thiam mai, a sam sen uk deuh kharh chu a fai hmel hle a, a tarmit phén ațang chuan chîk zetin min en bawk.

"Carlos, hei hi ka nupui Briena Solomos a nih hi." Dazel sawi dan teh tawp chu le..

"Wow, i nupui neih ka hre ve lo chu a mak hle mai." Lawm lo hmel taka a tih chuan Dazel chu a rum nghut a.

"Tunah pawh hian a țulna avanga hrilh chauh che ka ni. Puanzar kan duh lo tih i hriatthiam ka ring." A ti leh hmuk a.

"Awle, in harstna chu han sawi ula, ka rindan chuan naute chungchang a ni ngei anga," fing taka Carlos chuan tiin min melh zauhva, "A la naupan hmel hle mai, i nupui chu.." ti zawm zatin a tarmit phelh meuhvin min thlêk leh ngial a.

"Nia, Thlaruk kan innei tawh a, tun thlengin ka nupui hian nau a la pai lo."

"Oh..Țhu phawt teh u," Carlos chuan țhutna tur min kawhhmuh a. Solomos family doctor hi ka ngainat zawng a ni lo tawp.

"Nupa nun karkhatah vawi engzat nge in hman țhin?" Doctor min zawh ber kher chu ka chháng nguar ang.

"Carlos, engemaw i hriat le, i zawhna kha kan chhan a țulna ka hre hrep lo." Dazel chuan a ti hlur a.

"A țul khawp mai, sex inhman dan azirin naupai chungchang chu kan sawi chauh ang. In inneih hnuah vawi engzat nge in hman? A tlangpui tal." A ti leh hrâm a.

"Huh! Ka sawi kher a angaiin ka hre lo, Brie, kal teh ang." Thinrim zet hian Dazel chuan a ti hmuk a.

"Vawihnih khat sex hmanga naupai mai an awm laiin, țhenkhat chuan an pai mai lo ve tho bawk. Indanna in hmang a nih loh chuan. Tuna in nupa awmdan ka hmuh khan in harsatna chu ka hrethiam mai e. Ka sawi ang hian lo ti ula, thlakhat hnuah ka rawn kal ang." Carlos chuan a ti ta zung zung a. A sawitum ka man thiam mai. Dazel paw'n a hrethiam ve thovin ka ring a.

"A nih chuan sex hmang tam rawh u, i tihna a nimaw?" Dazel chuan a ti chang fak a. "A nih tho rualin i nupui hi a rai thei nge thei lo tuna lo test kha țul ka ti ber lo, tin, nangpawh test i țul kher lo bawk. He damdawi hi in pahnih khan thlakhat chhung lo ei ang che u." A ti ta duah a. A damdawi rawn phawrh chu Dazel chuan a lo ban vat a.

"Carlos, kan doctor i nih angin kan ring thlap che a nia, a thawi pawhin nupa kan ni tih hi a ri chhuaktur a ni lo." Dazel âw ngaihnobei fahran lo chu Carlos chuan hre awm pawhin a lang lo.

"A ei dan tur ka ziah ang hian zan mut dawnah in ei dawn nia." Tiin a ding uaih a, "Thlakhat hnuah a result chu kan hria ang." A ti ta a.

Eng damdawi nge tih pawh ka en ve lem lova, Dazel chuan damdawi chu ka bag-ah rawn thunin, "Kal ang le.." tiin min pawt tho zui nghal a. Carlos pawh be leh tawh chuang lo chuan Clinic ațang chuan min chhuahpui ta dawr dawr a. Ka chungah a thinrim ringawt nia!

"I kal chak lutuk.." ka ti hlak hlak a. Chutia ka tih pawh chuan a pén muang chuang eih lo, ka bánah a chelh tlat avangin a rual chuan ka pen ve dat dat a.

"Doctor ve si hawihhawm lo lutuk." A ti sup a. "Enteh, Carlos chungah i lungawi lo a nih pawhin ka chunga lantir kher a ngai lo a nia." Ka ti ve ta hmak a.

"Ngawi hmak rawh." A ti hlur. A englai kha nge maw a huat em em ni! Ka inkalpuitir ta kher kher a..

Car chhunga kan țhut hnu pawh chuan a la tûm bur a. Car seat hnung chu nghengin ka maimitchhing ta daih a.

Ka lo hmuhil a ni ngei ang ka harh leh chuan kan khumah ka lo mu fel diam tawh a. Thawmhnaw inbel mumal ka nei hauh lo.

Bathroom lama thawm awm avang chuan ka inkhuh țha sauh sauhva. Bathroom kawngkhar chu a rawn inhawng ta a. Dazel chu boxer chauh ha hian a lo pên chhuak ta a.

A hmel nung sar leh fai hmel zet ka hmuh chuan chil ka lem khalh a. A sang țha in a pa hliah hliah mai a, a taksa chu a nalh kher mai! A inbualna avang chuan a taksa chu a la huh deuh hliam a, a vun buang kharh leh hrisel hmel tak te chu hmuhnawm ti zet hian ka thlir ta reng a.

"Dazel," Ka ti sap a.

"Min thlém duhna rilru i pu em ni?" A nui pah suk a. Ka lai nghal ringawt!

"I zak alaw, Brie, naupangchhia lutuk, tunah khatiang lam ai kha chuan in hnawhpuar ka duh rih." A ti leh a.

"Haa, dar engzat nge? Ka muhil rei viau a ni maw?"

"Nang ang ém a mut duh leh muhil awlsam hi an awm pawh ka ring lo."

Dazel thusawi chu a dik tih ka hria, ka nu min hau tamna ber kha a ni tlat a, ka tho hma ngai lo a, ka mut a chhuah tawh chuan khawi hmunah pawh awlsam té in ka muhil mai țhin.

"I tidik ang," tih pahin ka tho chhuak ve nghal a. Bed sheet chu ka veng ve ngial a.

"Khatia intuam țhat leh vel kha a ngai lo e, ka hmuh hnu vek a nih kha, i mut bawrh bawrh lai khan, kha i taksa nalh zet kha duhtawkin ka lo en tawh."

"I sual kher mai!"

"Ka nupui taksa chu ka en thei lo em ni? Shower ah lo va inbual la, dinner ei turin ka lo nghak ang che. A ti ta a.

Minute sawm hnuah chuan inbual zovin, thawmhnaw ka inbel sawk sawk a, Dazel min lo nghahna lam pan chuan inhnuaiah ka chhuk ve ta a.

Living room sofa ah chuan thatchhe zet hian a lo țhu thluang duai a, a sam dum hlap mai chu a buai deuh niai a, mah se a inhmeh em em tho. A hmelțha thlâwt, min hip hliah hliah a ni tawp mai!

"Min thlir reng dawn nge, intur kan dawm dawn?" Dazel chu rawn hawi chhuakin min thlêk vang vang a.

"White wine ka in dawn a, nang enge i duh?" ka tih chuan, "Whisky ni rawh se,"

Cupboard lam pan chuan ka kal ta a, intur chawi chunga a bula ka va lêt leh chuan lawm hmel tak hian min nuih suk a.

"Nupui nih i tlin dawn e," Whisky lem khalh paha a tih chuan ka ner sak.

"Pasal nih i tlin ve hun tur ka nghakhlel." Ka fiam lêt ve zauhva.

A lo nui hawk, sir zawnga inherin ka hnute chu a bân chuan a nâwk lui kher a, chimawm ve tlat!

Thâwk ka lâk leh hman hma chuan Dazel chu a rawn kun hniam thut a, ka âwm lo lang laiah chuan a fawp ta a. Min fawhna chuan ka taksa a fan nghal raih raih mai! Ka tawlhsawn hlau niawm tak hian min chelh bet tlat a, a kut leh lamin whisky no a keng bawk nen, kan awmdan chu a rem teh țeuh lo.

"Dazel..."

"I rim a tui lutuk," a hmui chuan ka nghawng vel chu a fawp kual ruai a. Ka hmui a fawh thlen meuh chuan ka chiang lo riai tawh. Zei zet leh duhthawh em em hian min fawp vawng vawng a, "I ril a țam tawh em?" Ka hmui si chèn chuan a ti sap a.

"Hmnn.."

"Hawh le.." tia min pawt thovin dining room min panpui ta a. Dazel fawhna ka thlahlel thar ta riau chu mak ka inti kher mai!

Joanna chuan a haw hmain dinner siam peihsa thlapin a dah a, Dazel lo haw ațang hian zan a riak dawn tawh lo a ni.

Bawngsa kanro leh thlai chi hrang hrang te, thei tharlám tak tak te an ni hlawm a, a tui kher mai. Kan inkâr boruak nuam ta riau chu kan hai lo ve ve.

Dining room kan chhuahsan hnu chuan sofa ah țhu dunin movie kan en a, ka thil en pawh chu ka ngaihtuah tak tak thei lo, Natalie chungchang sawichhuah ka châk viau a, mahse, kan inkar boruak a tihchhiat ka hlauh a vangin ngawih ka chuh leh ta zawk a.

Dazel chuan a lamah min pawt hnaiin, uar zetin min fawp leh ta a. Mipa a nia, mipa rim a namin a taksa a lum thar thar a. Ka duhna chuan min tur ut ut thei nia! Hetiang hian mipa ka la mamawhin ka thlahlel ngai lo.

A thawk lâk zawnga kan taksa insi ringawt pawh chuan phurna nasa tak min thlen thei tlat a ni. Ka hmui ka tihchêt zawng chuan Dazel chu a rûm hawk a. Min fawp uar zual sauh bawk.

Ka kut chuan a tukkhum sam chu ka lo zût neuh neuhva, a lamah min kuah hnai leh sawt, a mipatna chuan min do ran bawk a.

"Ka duh che, Brie, ka duh takzet che," tiin ka kut chu a la a, a mipatna chu min tawhtir ta a. Ka tawh rual chuan a thaw hawk a, kei erawh chuan nuamti chiah lo hian ka kut chu ka lasawn vat a.

"Khawngaihin Brie, min tawk ve rawh," a ti sap sap a.

Tím dai hian ka kut chu a malpui lamah ka dahthla leh ta riai riai a. Chumi rual chuan duhthawh zet hian min fawp leh tawn tawn a. Tisa châkna chuan min tuam dun hlawp hlawp a, Dazel ka mamawh ang chiah hian a ni paw'n min mamawh ve tih ka hria!

"Briena, duhtak," tia ka kawr chu hlim chhovin ka taksa lâwng a chul kual dan dan a, ka hmeichhiatna a tawh thlen takah chuan ka inlahrang ta thut a. Ka sam hnawk niai chu hui mâm thuak thuakin, "Helai hmunah hi chuan ka duh lo," Ka ti ta a. Hman zana Natalie nen an lo awm dunna sofa-ah hian hmangaihna chenpui ka tum lo. Ka mitthlaah arawn lang uar uar a.

"Engvangin," Dazel angaihna hre lo hmel tak a awm chu kai thovin kan pindan lamah ka chhohpui ta dawr dawr a.

"Natalie nen in mutdunnaah khan kei chuan mut ve tumna ka nei hauh lo." Ka ti hmak a.

Chutah hrethiam ta niawm tak hian a nui vei suk a.

Kan nupa khumah chuan insi chêt hian kan țhu dun a. "Natalie lam reng reng ka lo ngaihtuah tawh hleinem!" Tiin min pawm bet chial a.

Chutah khumah chuan min bawhbet zui ta nghal a, țawng tuma ka âng chiah chu a hmuiin a rawn khar chilh hmiah, duhthawh leh uar fahranin min fawp zui ta a. Hmanhmawh hauh lovin ka taksa péng tin chu a chul kual dan dan a, a kutin a tawhna chu muangchangin a hmui chuan a chhui zui zel bawk a. Ka bra kilhna chu hmet phelhin a thehsawn nghal hmak bawk.

Ka âwmbâwr lo lang ta huai chu dimte hian fawp ta a. Duat takin min chûl pah zel bawk a, a kut lum ham hamin min tawhna chu ka feel veng veng thei nia! Ka thiam ang ang chuan a taksa chu ka chul kual ve ta dan dan a, a thaw hawk ri ka hriat chuan nuam ka ti ru riau.

Dazel kutin ka hmeichhiatna a tawh thlen takah chuan ka heh ka lo pet ve fan fan a, ka taksa tisa châkna avanga khur ta deuh dar dar chu thup pawh ka tum ta bik lo.

A kekawr zipper leh kawnghren chu ka dap fuh ta chat a, ka tawh nawn leh chuan kan inkarah daltu a awm ta lova, muangchang leh hmanhmawh hauh lo hian kan taksa chu a inzawm ta a, "Brie," Dazel âw thâm țúak chuan min fan raih raih mai.

***

Duhthawh taka hmangaihna kan chen dun hnu chuan thlanin min bual huh hlap a, Dazel hnungzáng ruak kung chu thlan a vangin a hnawm chap. Kan la inkuah chial bawk a.

"I țha em? Ka tiná che em?"Duat taka ka sam chul paha a tih chuan nui var var chung hian ka siai zauh a.

"Țha mah mah,"

"Ka hmanhmawh lutuk a..." A nui suk.

"Keipawh maw le..''

"Ka nghak thei tawh thláwt lo a ni Brie,"

"Nangmah chauh i ni bik hleinem, keipawh ka ni tho alawm.." ka ti sap a.

"Huh! I pheikhawk ka phelh miah lo.." Dazel chu a nui ta hawk hawk a.

"I pheikhawk ka phelh bik hleinem!"

Za zet hian kan nui dun ta kar kar a. Pindan éng dul raihah saruakin kan inngheng chial a, bruak a țang leh țan der tawh!

Reife hnuah chuan bathroom lam kan pan dun ta a, bathtub-ah tuilum phuana inchiahin kan hlim dun hle a, duhtawk chin nei thei lo ang mai hian a thawh dan ang ang chuan kan che dun zui ta zel a.

Chau zetin khumah kan mudun thlar a, "Kan doctor min chawh damdawi kha kan ei dawn em niang?" Tia thovin Dazel chuan damdawi a la ta a, tui bottle nen khumah chuan rawn lawnin kan ei ta a.

"A thawk turah ngai ang aw, Mrs.Solomos," A nui hmel țhat dan em em hi, ka tuiral mai ang tih pawh a hlauhawm alawm le..!

"A thawk ta lo a nih leh kawngdang kan dap tawh mai niang chu..." tiin a biangah ka tawk zauhva, "Muhil dawn ang le..naktuk zingah ka chhunzawm leh duh dawn a nia." Tiin min mut țhattir vei thlap a. A âwmah min kuah bei ta a. A duhnaah chuan ka tan a inpe zo hle tih ka hriat phah ta bawk.

He khawvela mipa ka hmuh tawh zawng zawng zingah ka pasal tluk tur an awm lo. Hmangaih har lo tak tura hmelțha leh nalh a nih mai bakah, hmeichiate duhthusama 'Pa' a ni bawk.

Natalie emaw hmeichhe dang reng reng pawhin ka lal ațang hian an la hrang hauh lovang. Amahin min kalsan a nih loh chuan...

30th December 2017

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:32 pm

SOLOMOS BRIDE

by Becky Rafa Renthlei

Chapter-9

Dazel nen kan nun hmandan thar chu a nuam kher mai, nitin office-ah kan kal rual a, staff dang hmuhlai erawh chuan țhian satliah angin kan lang thung. Min chim buaitu an awm loh veleh duhthawh leh uar takin kan infawp leh mai a, a bâk kan pel chuang lo.

Kan damdawi pawh ni li lai ka ei ve tawh a, Dazel khan zan mutdawnah min pe mai zel a, ka theihnghilh a hlau ve țhin khawp mai! Natalie pawh a reh hmiah a, a chungchang ngaihtuah ka peih lo a, tunah reh mah se a lo lang leh vatin ka ring tho.

Vawiin hi tunkara office kan kal tawpna ber a ni a. Tunah tlailam dar hnih a pel tawh a, Meeting a teltur ka nih laiin Dazel a awm tho dawn tiin ka kal ve ta lo kha a nia. Kan nupa nunah hmangaihna a tel em chu ka hre lo. A tlachawp bawk a hman leh a ngaih hmel! Haa, Joanna leh Owen, Tim Hathaway hengho zawng hi Dazel tih lova, ka mimal nuna ka seng luh an ni. Party leh dinner eiin ka chhuak khât khawp mai! Body guard neih erawh Dazel chuan țha riauva hriatna a neih vangin hna chungchanga ka tei chhuak dawn a nih chuan ka hruai tel zel thung.

"Brie, lunch theihghilh țhak khawpin engemaw i tih bik le.." Tim Hathaway rawn luh lai ka hre miah lo. A dan pangaiin a nelawm leh hle a, a nui hmel ngaihawm tak hmuh hi chu a nuam ve ngawt mai.

"Lunch ei tur takngial pawn ka chhuak hman lo." Ka ti țha ve mai a.

"Keipawh ka la ei bik hleinem, kan ei dun thei tihna a nimai alawm." Thawveng zet hian a ti ham ham a.

"A nih chuan ka indah fel chhung min lo nghak la..." Computer chu off in dawhkana paper darh nuai chu ka rem fel zung zung a. Dazel call ka tum zet náa meeting an neih laklawh ka rin avangin ka țhulh leh ta zawk a.

Tim nen office canteen panin kan inzui chhuak ta a. Mi an tam kher mai, dawhkan awl ka hmu mai lova, Tim chuan counter nghaktu a biak chhungin dawhkan awl melhin ka hawikual ruai a. Canteen-ah hian ka chawlh ve vak ngai loh vangin ka mikhual riau.

Tim rawn lêt leh hnuah canteen kil thim deuh laia dawhkan awl chu kan țhutchilh ve ta ran a.

"Briena, insawn chhuah chu i duh lo takzet a mi?" Menu keu thuak thuak paha, Tim rawn țawng chu chhán mai dan tur ka hre lo.

"Dazel nena inkhata chendun hi a țha ber lo maithei a nia, ka boss a ni a, sawisel ka duh loh viau rualin a mizia chu i hriat kha.." A ti leh a.

"Eng a mizia maw?"

"Hre lo der duh suh, hmeichhe chenpui a nei tih Natalie'n a hriat chuan a en liam mai mai lo tawp ang. Tuna a naupai saw Dazel fá tih i hria ang chu maw! I mualpho theihna tur chance a tam teh a nia." A ti leh a.

"Ka lo buai ve na tur a awm hleinem, ka nu leh pa remruatna a ni a, kumkhuain ka cheng reng bik nang." Ngaipawimawh lo ang taka lang chung hian ka ti a.

"I duh chuan ka inah pawh i cheng thei reng a nia." A la ti țalh a.

"Enteh, Tim, min duhsakna a ni tih ka hrethiam alawm. Mahse, Dazel chhuahsana mipa dang in a chén kha a danglam chuang lo. Melbourn ah ka lêt leh thuai dawn." Ka tih chuan a țhen sak a.

"Ok..i luhlul ve reuh ngawt mai, a țha ber tur anga ka hriat ka sawi ve mai a nia."

Kan eitur chah a lo thlen tâkah chuan engmah kan sawi tawh lo.

Natalie naupaina pa Dazel a ni tih an hre fur tawh tihna a nia, chuti chung chuan ka la ring phal ve chuang lo. Tim hian â min tih hmel viau bawk.

"Office ah i lêt leh dawn em?"

Tim zawhna chhang tura ka án lai tak chuan Canteen chhunga lo lut te avang chuan ka hmui ka chip leh hmak a. Dazel leh nula sam tawi mát tê lam deuh hi an rawn nui lut var var a. Min hmu ve lem lo tih ka hre mai, ka enna lam Tim chuan a en ve vat a, tifuh inti zet hian a meng kal ralh.

"I ei duhtawk tawh a nihchuan ka thlah ang che." Tiin a ding chhuak nghal a. "Thlah ka ngai lo ang, Owen a awm reng a lawm," ka tih chuan, "Min hnial reng lo la, i car khera chuan hi thlahlel viau suh," tiin a nui țhá a. Ka țhutna lamah chuan rawn kalin min pawt tho ve ta nghal a.

Dazel țhutna lam melh loh hram hram tum chuan kan chhuak ta a. Min hmu nge hmu lo pawh ka hre tawh bik lo.

Tim Hathaway hnial hi chu a sawt vak lo. Company garage ah chuan min kaltlangpuiin Owen chu engemaw hi a hrilh sup a. Owen lah chu a nui vur vur lehnghal! Engtak chu hrilh ang maw?

Dazel apartment lam panin kan tlan miah lo.

"Khawiah nge kan kal dawn?" Tim car khalh lai melh zauhva ka tih chuan, "Thuruk a ni rih," ati awlsam mai a.

"Inah ka haw vat loh chuan Dazel a lo thleng hman ang."

"Oh..Briena, Dazel te zawng vengthawng duh suh, a haw hma lo tawp ang, bar-ah intur rei vak lo kan dawm dun lawk ang chu.."

"Zû lam hi ka ngaina tehchiam lo va,"

"Ho lutuk coke tal i in ve dawn nia, hetia inkharkhip reng tur atan chuan i la naupang lutuk. Hlimtaka awm hi i phu ve alawm, rimtakin hna i thawk a, i thawhchhuah ang zat tal hi chuan nun chén ve rawh." Tim thil sawi avang chuan za zetin ka nui ta a.

"Nuihzatthlak ka sawi lo a nia," A nui ve ta tho va.

"Bar-a intur dawmin nun ka chen ang maw!?"

"Chutiang deuh chu.."

"A nih chuan rui hnâp khawpin kan in ange.."

"I theih phawt chuan, ka buaipui vek ang che..."

"Hah, min kalsan lovang tih tunge hria!" Fiam pah deuhva ka tih chuan lungawi lo deuh tak hian a ner sawk a.

"Engang pawn awm la, ka kalsan ngai lovang che." Thutak zet hian a ti ta a.

"Tim..."

"Ka fiamthu lo ania, ka ti takzet, ka duhna che hi engtia rei nge haider i tum dawn Briena."

"Maw!" Tim thilsawi hi ka hresual a ni lo maw! Ani hian min duh tihna maw?

"Brie, ka duh che, khawngaihin hun min pe rawh."

"Ni lo, ka thei lo..." Ka ti sap a.

"Tunah kher ka ti lo, hun min pe la..ka kiangah hlim takin awm la ka duh mai chauh a ni. I nun khawhar hmel tak leh ngui raih țhin kha ka hmuh hmaih lova, i hna ringawt ngaihtuah lovin kei hi min min ngaihsak ve thei mai lovem ni?" Zawi fiah taka a tih chuan chhán mai dan tur pawh ka hre lo. Dawhkana whisky no khat pap mai chu ngaihtuah chiang mang lovin ka in ta pawp a, ka pum a sa nghal ham ham thei nia.

"Engthil nge maw i tih le...khatianga in tur a ni hleinem!" Tim chuan min ngaihtuah hmel tak hian a ti a.

Tim Hathaway hian min duh a maw? A ni thei lo...

"Min hruai haw rawh." Tim lam hawia ka tih chuan mitko chuar náng hian min en a. "Thla nga chuang kan thawk dun tawh a, Briena, theihnghilh tuma ka beih a piangin ka mitthlaah i awm zel, ka thusawi kha khawngaihin lo ngaihtuah zui rawh aw.." A ti țáwk țáwk a. Pasal ka nei tawh tih sawi chhuah ka duh ut ut a, Tim tán beisei chi ka ni lo.

"Khawngaihin hetiang lam hi sawi tawh lovang, boyfriend neih tumna rilru ka pu lo a ni." Ka ti ta ringawt a. Tim rilru tihnat ka duh lo.

"Ok...Mahse, nunphung pangai zawha ngaihzawng neih duhna rilru i pu a nih chuan min hrilh vat ang che." Tiin whisky chu a in hlek a, a mitmeng chuan min kalsan eih lo. Thinrim leh lunghnur hmel a pu lova. A nui reng zawk, hei tak hi amah ka ngainatna chhan pawh a ni reng a ni.

Bar kan chhuahsan chuan a tlai tawh hle a, rui khawpin ka in lo. Tim pawh a rui chuang lo, a awm pangai angin a awm leh mai a. Min ngaihsak em em bawk. Ngaihzawng angin ka en thei dawn lo tih ka hria a, ka țhian țhatak ni turin ka duh zawk a ni.

Apartment kawtah car chu tidingin ka malchunga ka kut dah chu a rawn hum deuh vang vang. A awmdan cool raih chu a inhmeh lo kher mai! Chutah nui sakin kawngkhar chu a hawng a, a chhuak ta a. Ka țhutna lam kawngkhar min hawnsak leh thlap bawk. Gentleman chêtdan tur niawm tak hian a che vel e, ka nuih a za deuh.

"Goodnight Brie," ka hmuiah a fawp zauhva, ka chhan hman hma chuan rang zetin car-ah a lut ta daih a. Ka nui hak!

Aparment ka luh chuan a reh ruih a, Joanna thawm takngial pawh hriattur a awm lo. Dar ruk chauh a la ni a, Dazel a la haw lo tihna mi le..?

Choka ah ka lut a, engmah eitur siam sa a awm miah lo. Mak ka ti viau. Ka ril a țâm tawh sin le..Ka ei khawp chauh ka siam mai ang.

Spanish Omlette siamna tur chi chu ka melh vat a, ka thawmhnaw thlák hmasa lovin siam hmasak ka tum ta a.

Bowl ah artui ka vawkeh a, Spanish mix ka telh a, ka siam zawh chuan a tui hmel reuh khawp mai.

Inthlak turin kan room lamah ka chho ta a. Room a ka thil hmuh avang chuan ka ding chawt mai! Dazel chu inbual zo hlim niawm tak hian khumah ruak ngal ngatin a lo bawk a, "Dazel..?" Min chhan loh avang chuan a muhil a ni tih ka hre chauh.

Ka ding ran a, ka thil hmuh chuan ka dáng a ti ro halh mai, Dazel taksa chu ka thlir ta veng veng a. Ka tán chuan mipa danglam, hmelhriat leh ngaihzawng satliah a ni ngai dawn lo. Ka tâna mipa awmchhun leh ka pasal a ni. Tim Hathaway tih vel ai thlawt chuan ka duh fé...

Dimtein bathroom ah lutin ka taksa ka tleuh zuai a, ka inthlák zawh vek hnuah pawh a la harh chuang lo. Tunlai kan boruak leh hun hmandan avang hian a chau ve hle a nih ka ring. Chau awm réng pawh a ni e..Zantin hmangaihna min chenpui ziah a, chutah zingkarah pawh duhthawh takin a che leh ziah a, kaihthawh chi niin ka hre lo. A duh chen chen muhil phawt teh se...

Ka phone rawn ri thut a vang chuan ka phu zawk a. Rang zetin ka chháng a, Tim maw! A haw chauh sia!

"Hello," Dazel harh ka hlauh vangin ka țawng ring ngam lo.

"Brie, i țha em? Dazel chuan a hau ém lo che maw?"

"Aih..chutiang engmah awm lo, ka țha."

"Dinner i ei tawh em?"

"Ei lo e, ka ei țêp, ka..min rawn bia a ka lawm e, min ngaihtuah suh ka țha tak tak a nia," ka ti zung zung a.

"Mahse, ka ngaihtuah tho che sia..." A rawn nui hak hak a.

"Umn..ka lawm e," Chhan dan tur ka hre thlawt lo.

"Brie, ka nawr lovang che, weekend ah ka rawn be thei che ang em..?" Engemaw a hriat le? Nichin khan sawi ve mai awm tak!

"Tehreng mai." Ka ti ta thova.

"Good night Bie,"

Phone ka dah hnuah Dazel che vel thawm ka la hriat loh avangin ala muhil anih ka ring deuh ngawt a. A harh nge harh lo en tumin khum bulah chuan ka va ding a. Chiang em em hian min lo melh ding ta chat mai a. A lo harh reng tawh!

"Oh..! I harh tawh a ni maw..? Ka thusawi chu keimah ngei pawh chuan țullo ka ti kher mai.

"Rawn be tu che khan enge a duh a..? a áw chu a zawi hle nain a fiah fak a.

"Tu..tu..er.." Phone ah mi ka bia tih a hre vek a ni maw!

"Hre lo der reng reng suh, Briena. Rawn be tu che kha Tim a ni tih ka hria a nia, tlai hun chhung a kianga awm chu a nuam bawk maw!?" A ti nghut a.

"Ka țha em tih rawn chian a duh a nih kha," A zawhna pehhél thei ang berin ka chhang a.

"Rawn kal a duh a ni maw, a ni ti raw?" A ti nghut a.

"Aih..chutiang engmah a sawi lo.."

"Tlaiah khan khawiah nge in kal?" A âw nelawm loh tak chu ka hresual emaw ka ti hial!

"Hetia inzawh chiam hi a țul em ni? Bar-ah intur kan dawm dun ringawt a lawm."

"Engmaw i sawi? Bar-ah in kal a maw!?"

"Umn..mahse.."

"Mahse..tih a ngai lo, nula i nih loh hi..ka nupui i ni, hetiang boruak kan neih lai hian mipa dang intur dawmpuiin i chhuahpui a nia! Chupawh meeting náa kal lo lehnghalin," Dazel chu a in beng káng a, thinrim insum zet hian a tháw hawk bawk. Inthiam lo zet hian, "Ka tihpalh.." ka ti sap a.

"Tun țum chauh hi ka ngaidam ang che, a lehpek a awm tawh tur a ni lo. Mipa dang bula zû i in leh ka hriat chuan kei aia tawrhhlelhawm an awm lovang." A ti nghut a.

"Ka.. tihpalh..artui ka siam a, i duh ve em? Joanna'n engmah a siam lova," thildang sawipui țalh ka tum a.

"Ka hawtir a nih kha, vawi engzat nge ka call che? I phone kha engatan nge i tih?" Min call lai ka hre miah lo. Mahse, insawi thiam ka tum lova, zanin tlai hian ka dik lo zawk a ni.

"Dazel, ka tihpalh ka tih chu..ka ril ațam viau a nia. Ka rualin i ei ve dawn em?"

"Engmah ka duh lo, lokal teh.." A ti hmuk a.

"Intur takngial pawh i duh lo maw? Dinner i ei tawh zawk em ni?"

"Thildang sawi tawh suh. Ka sawi chu i hria em? Lokal teh hetah hian.." nghet charh hian a ti leh ta a.

"Ka ril a țâm tawh ka kal dawn.."

"Min hlau ta mai e law, Mrs.Solomos! I rilțamna chu ka lo ti reh ange." Ti nghutin khum ațang chuan a rawn thova, kawngkhar lam panin hmanhmawh zet hian ka tlán ve thung a.

Min manbeh hman hma chuan pindan ka chhuahsan hman hram. A nui hawk ri ka hre pha tho.

Chokaah ka lut a, ka thilsiam dai vek tawh chu phur fahran lovin ka ei ta a. Ka rilțam tehreng nen engtham mah ka ei lo. Tim kha bar-ah lo kalpui lêk lo ila țha tur a nia. Dazel lah khan a thik deuh reuh emawni! A tan thik a ngai hauh lo asin le..Mawl leh lutuk..Spanish omlette ka siam ve pawh chu ei zo peih lovin ka paih ta daih a.

"I rilțâm ve chu le..(h)" Dazel lo luh lai ka hre miah lo.

"Ka ei țeuh tawh alawm..." Dawt sawi lah hi ka awlsam telh telh.

"Huh! Fork-in i hawlh darh vek zawk a nih kha, engmah i ei hauh lo." Tiin chokaah chuan a rawn pen lut a. Half pen dum leh tawnzau dum a ha leh tawp a, a inhmeh em em zel tho.

"Serthlum tui tal ka in ve loh chuan..." tiin a inthlit nghal zat a. "Thil entir tur che ka nei a," a ti dam thluam a.

"Engthil?"

"A hmanhmawhthlâk lem loh," a ti leh lawi a. Engthil nge mawni le..ka en châk nghal zek zek.

"I sawi ve ting tang a, min entir vat la.."

"A nih chuan min lo zui la ti nia." Serthlum tui chu vawikhatah a in zo nghal vek a, inchung lam pan chuan a chho ta nulh a. A hnungah phur fê in ka zui ve hmiah.

Dazel chuan kan pindan kal pelin a kal zel a, pindan pakhat inkalh țhap chu hawngin a lut ta a, helai pindan hi ka la lut ngai miah lo. A inkalh reng a vangin luh enah pawh ka en lo. Pindan chhungah Dazel chu a ding run a, chu pindan ka hmuh chuan insum hman lovin ka khêk ta raih a.

A zau țhain a fai sur a, pindan lai takah chuan khum lianpui mai a inhûng a, a piah chiahah naute mutna tur khum tê fel rán a awm tel bawk. Khum pahnih te design chu a inang chiah a, chu pindanah chuan bungrua tihtham a awm lo. Wardrobe lianpui pui pahnih nalhzet leh dressing table a ni leh tawp a, a vai chuan a rawng a inang vek.

Khum khuhna var sar chuan mi a hîp hle a, thosilen senno nalhzet a in zar dulh bawk.

"Naute kan neih hunah he pindan hi kan hmang tawh ang. I duhzawng a ni em?" A ti sup a.

"Tehreng mai. Mahse..naute pawh ka la pai si lova..." ngui raiha ka tih chuan a nui suk a. "Lungngai suh kan la nei em em ang. Nimin leh vawiin khan he pindan hi ka buatsaihtir a ni."

"Meeting naah i kal lo em ni..?"

"Kal e, ka hnathawkte ka viltir a lawm, i hmuh hun nghakhlel em em in ka haw hma ve a, nang lah chu Tim Hathaway nen zû in lo in mai mai lehnghal," a âw ah chuan lungawi lohna a lang chiang hle a. Ka inthiam lo ru ngawih ngawih.

"A pawi ka ti lutuk, Dazel..."

"Ok..tun țum chu ka ngaidam che ka tih kha..kan inkâra inhîp tawnna awm hi chuti maia reh chi a ni lova, tin, kan nu leh pa te duhthusam tihpuitlin ngei hi ka duh a ni. I pa rilru kan tinâ thei lovang." A ti ta a.

"Ka lawm e,"

"Ka lawm e, tih chauh maw ka hlawh dawn? I mipa mutpui hmasa ber ka ni a, a tawp ber nih ka tum bawk." A ti thum chhak a.

"Mahse..Natalie..!?"

"Please, Briena, vawikhat chauh min ring rawh, Natalie chu ka mutpui ngei alawm ka pha lo. Mahse, ka thinlung hian naute saw ka fa a ni lo tih a hre tlat. Ani chu ka chingfel ang. Aw..." ngenngawl taka a tih chuan rin theih ka duh takzet.

Tukverh lam chu panin pawnlam chu ka thlir vang vang a. Hmangaihna tel lo contract vanga innei kan ni a. Kan company chhanhimna tura pasal nei ka ni. Dazel chu ka duh ngei alawm..mahse, Natalie naupai saw a fâ a nih tak tak chuan fahrah siam ka duh hauh dawn lo tih ka hria. Chutih rualin nau ka pai a nih chuan fahrah ka siam ve thei tho bawk. Ka thluak a buai vek.

Vawikhat chauh min ring rawh a ti em ni kha? Ka tum poh a niang chu. Ka pasal a ni miauva, ka nu leh pa tan ka in pe ta sa sa; a tawp ka thleng ngam tur a ni. Dazel rin hmiah hi a țha ber. Ka tisual ta a nih leh a mawh ka phur mai niang chu...

Dazel lam hawiin, "Hmeichhe dang an inrawlh tawh tur a ni lo. Natalie chungchang erawh chu a nau neih hunah kan fiah thei chauh dawn a, hun kal tawh ami a nih angin ka hre zui tawh lovang." Ka ti ve ta a.

"Brie, ka lawm e, ka duh reng fovang che." Tia ka lam pana rawn pen pheiin min kuah ta chial a. "Nun bul kan țan chho dawn chiah e, darling.." A ti sap a.

"Hmeichhe dang lo kawpin ka hrechhuak leh si a nih chuan a pawi viau ang." Tiin ka vau lâwk a. A nui suk.

"Nangpawh mipa dang i kawp tih ka hriat chuan a pawi khawp ang. Tim pawh tiamin," ka âwka ang chiah chuan a ti ve a.

"Umn..engmah ka tiam thei lo che a, mahse, nupui țhatak nih tumin ka bei ang. Chutiang bawkin pasal țhatak i nih ngei ka beisei." Ka ti ta a.

"Ti hian kan ding reng dawn nge? Kan pindanah kan lêt dawn?" A ti leh a.

"Oh..Zanin chauh chu he pindanah hian kan riak thei mai lovem ni?"

"Thei lutuk tlat, i ta ka ni e..darling..! Zanin chu a bul i țan ve ngei ka phût tlat," tih pahin min kuahna chu a phelh a, a thawmhnaw inbel chu hlipin, saruak ngal ngat hian a ding ta. Zak hauh lovin khum lam chu a pan thauh thauh a, a pian nalh fahran chu a zahpuiawm loh reng a ni. Khumah a va mu ta thân a. A mutna bul ruak lai béng thák thák chung hian, "Min nghahtir suh aw..kan țan mar deuh loh chuan saw khum saw a ruak reng mai ang." Tiin naute khum lam chu a kawk a, nalh ka tih țhin ang ngei khan a nui pah suk bawk.

Dazel mit takah chuan ka va en a, a mitmeng de sawr sawrah chuan fiamthuna piaha tisa phurna a khat chu ka va hmu thiam mai. 'Hepa zei dan em em hi chu..' ka ti rilru a. A tan hian engtia hlu nge ka nih kan entir ange. Zirlai thiam thei tak ka ni tih ka hriattir bawk ang.

Ka thawmhnaw inbel chu ka phelh nghal pawp a, saruak veka ding lah chung hian, "Khawi ațangin nge kan țan ang..duhtak? Hnuailam ațangin nge chunglam ațangin.." no thei ang ber chuan ka ti ta a.

Dazel za zeta lo nui chu melhin, "Min ring rawh vawikhat chiah," nichina a țawngdan ang chiah chuan ti ve in min chhanna pawh nghak lo chuan ka zuk bawh thuah ta a. A hmela lawmna leh awih theih lohna niawm tak lo lang chu en duh tawh lovin ka fawp ta a.

Zaidam taka chêt ka tum hauh lo. Hmeichhe puitling, nupui tlâk ka ni tih lantir ka tum a ni. Nupui ka nih ang ngeiin khum laizawla ka pasal tih lawm hi ka zir tur hmasa ber a ni bawk.

A hmui hnuailam chu ka seh sak nar nar a. A nghawngah te chuan fawp thla zelin, ka zahna zawng zawngte chu thunun ka tum ve țâng țâng a. Chutia ka chêt chuan Dazel chu a rûm hak. Ka kawngah rawn kuahin a lo insiamrem ve zel bawk a. A awmbawr vel te chu ka fawp lawr dan dan a, a ke ka kherhbet chial bawk. Dazel tisa châkna lo chhuak chu ka hre thei ve vek! Ka lawm rilru kher mai.

"Uar deuh zawka hmangaihna chen i duh a ni maw, Brie..? A ti sup a.

Ka tho kang a, a mit châkna in a tih thim deuh raih chu ka melh lêt rân a, "Engang fahrana uar in nge ka duh tih i hrethiam lo hial zawk ang..." ka ti sap a. Dazel chu rawn tho kangin ka hnute a rawn fawp ta chat a.A samah chûlin ka kuai dâk deuh a, a hmuiah chuan duhthawh zetin ka fawp leh ta a, min chhâng țha kher mai.

Dazel lakah chuan ka hmin thlap tawh a, kan taksa láwng insi chial chuan phurna nasa tak min pe a ni. Kan in mamawhna tawnna chu zak hauh lova lantirin pumkhatah kan insiam ta a. Khumah chuan nawmna pe tu zawk nih inchuhin theihtawp a uarin kan chen dun ta a.

Duhthawh taka kan chêtna chuan nawmna vawrtawp chu min thlen ta nge nge a. Dazel rúm nghat ri chuan a lungawi zia min hriattir bawk.

A hnu a zawi fahran leh thlan dap chunga ka bula a rawn mutthlak chuan tuna hmangaihna kan chendun hi a hma zawng aia nuam a ni tih ka hria. Ka nui ta hak a.

Dazel chu a rawn che țuah țuah a, intineitu fahran hian min kuah a, "Kei chiah hi mipa i mutpui awmchhun ka ni tih hre lo ila chuan zanin i chetdan dangdai tak avang khan ka ringhlel maithei che a ni." A ti ta a. A thinphu pawh a pangai leh deuh tawh a, "Tim Hathaway lákah inveng fimkhur ang che." A ti zui hrâm a.

Ka lo melh ralh ralh a, "Kan damdawi ei hun a ni tawh a nia," ka tih chuan a lo chek hluk a. Khum ațanga thovin min pawm kâng nawlh a, kan pindan lam panin min pawm phei ta a.

Khumah dimte a min nghatin, damdawi chu zandanga a tih ang chiahin min pe leh thlap a. Ka ei zawh hnuah ani pawn a ei ve ta a.

"Ka pa bia ila, nupa kan ni tih hi puangzar tawh mai ang." A ti ta thut a.

"Engvangin..?"

"Inthup reng hi ka ning tawh a ni." A ti ta thlâwt a.

"Tuna kan puanzar chuan company hian buaina a tawk thei tlat a ni." Ka tih chuan a bu nghut a. Keini'n puanzar duh ngawt mahila Oliver Solomos hian a remti hauh lo ang. Kan inbiak hnuhnun ber khan a sawi lang zauh a ni. Dazel ngei pawhin a pa thu hnial chu a duh hauhvin ka ring lo.

"Thawmhnaw inbel ila eitur siam teh ang," a ti ta daih a. Dinner ei duh lovin a titau vel a, a ril a țam leh tho sia..Naupangchhia lutuk.

Shower a kan intleuh zuai hnuah inkai rialin, choka lam kan pan dun ta a.

Eitur kan buatsaih lai chuan doorbell a rawn ri ta tuar tuar a. A hmettu lah chuan min runluih emaw tih turin a'n hmet uar lailéng khawp a. Dazel chu kawngkhar hawng tur chuan a kal ta a. Tun ang hunah tunge min lo tlawh tur awm? Zan dar sawm pakhat a ri dawn tawh a nia!

Dazel a rei tâk êm avangin ka salad siam lai dahfelin tunge lokal tih hriat tum chuan living room lam ka pan ve ta a.

Sofa-a lo țhu ka hmuh chuan ka ding khawng lah a. Ka lungawi lohna thup tumin tháwk ka la ham ham phawt.

Natalie chu sofa-ah lo țhuin a bulah suitcase a awm bawk a. Dazel inah chén ve a tum tih ka hre thiam mai.

"Miss Stone, eng thil nge ni ta?" Natalie en kalh chung chuan ka ti chang fak a. Dazel erawh thinrim tih hriattak hian a sen awp awp a, Natalie chu kutthâk lo turin a insûm nasa hle tih ka hre mai.

"He apartment-ah hian ka rawn cheng ve dawn maw le.." zâm map lova tiin a nui sawng a.

"I duh phawt chuan i chéng dawn nia, kei chuan ka dâl hauh lo ang che." Ka ti ta a.

"Brie, engemaw i sawi le..?" Dazel âw fiak țhak chu haiderin, zaidam tak hian, "Duhtak, i fâ a ti miau sia, kan hnéna chén ve a duh te chuan ka hnial hleinem. Mikhual pindan saw hmang mai rawh se.." ka tih chuan Natalie hmél chu a dur khap khap a.

"Miss Larson, he inchhungah kei ni lovin nang zawk hi a ni mikhual pindana mu tur chu.." thinrim khur dat dat hian a ti ta a.

"Natalie, ka inah hian i chêng dawn lo a ni tawp mai. Ka thehchhuah hma che hian chhuak rawh." thinrim sehchilh nawk nawk a Dazel țawng chu ka mitmeiin ka khap vat a. Hriatthiam loh hmel takin min en a.

"Miss Stone, mikhual pindan chu kan buatsaih dawn nge? Kan hnena chen chu i duh leh ta lo zawk?" Nui lui chunga ka tih chuan min melh rum ngang mai.

"Nangnu hi ka that hreh miah lo che, kan pathumin chéng tlang dial dial ila a ni mai, ka pawiti miah lo." A ti ta a.

"A țhat chu, duhtak, a mutna tur kan kawhhmuh loh te chuan ka ril a țâm lutuk tawh, kan thilsiam kha chhunzawm vat ang." Ka ti liam puat a. Dazel ka mimeiin ka hrilhfiah bawk. A ngaihna a hre lo hle tih ka hre tho náin țawngka a hrilh hun a ni rih si lova. Ka plan ang hian ka kalpui mai niang chu..

Natalie hi chuti maiin a beidawng dawn lova, game khelh a ngai a ni. A hlimawm khawp ang...

Nakinah ka pasal chu ka hrilhfiah tawh mai ang chu..A hrethiam ve turah ngai ang.

End of Chapter-9

31st December 2017

# Ka story min chhiarsaktu zawng zawng te kumthar chibai vek ule...

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:32 pm

SOLOMOS BRIDE

by Becky Rafa Renthlei

Chapter-10

Apartment Plus S.

Natalie awm ve hi ka duh hauh lo. Mahse, thil tamtak ngaihtuah a ngai a, vantláng hmaah Dazel nen nupa kan nihna tarlan a ni tlat si lova. Natalie tan pawh Dazel a hmeichhe chenpui satliah ka ang riau dawn a, min ngainêp viau pawh hi a awm tho. A fa paina hi Dazel a nih tak tak phei chuan tenawm zawk chu Natalie ni lovin Dazel a ni.

Ka pasal a ni a, Natalie room tur ka kawhhmuh hnuah Dazel nen kan room panin kan chho ta chauh a. A rilru buai hmel ka hmuh chuan ka khawngaih ve reng. A fá a nih aring ngang bawk si lova, lehlamah a nupui ka lo awm ve bawk nen! Contract hmanga a neih mai mai ni mahila a mawhphurhna hlen duh mi a ni a. Engtinnge nichinah te khan kutthlâk lova a la insum theih zawk, a inthunun theih dan em em hi mak tak a ni!

Wool worth company fashion model chhuanvawr ber chu Natalie Stone hi a ni. A naupai tirhtê khan chawlh a la a. Company ah vawikhatmah kan la inhmu fuh lo zawk a, Simon Getwin, Company fashion designer-in tun season a tana thawmthaw thar a duan chhuah wedding dress ha tura a thlan chu Natalie hi a ni.

Monday ațangin hna a rawn zawm dawn tih ka secretary in min hrilh a. Inlamah nen company-ah nen Natalie ka hmu sek dawn a nih hmel. Raipuar ho hâk chi zawk advertised tu tur a ni a, diktak chuan a pian a nalh mai bâkah a hmelțha hle bawk. Feet 5'6 laia sáng a ni. Kei ai chuan ala hniam ta fo a, ka sâng lutuk hi college ka kal laia min fiam tamna ber a ni a, a hunlai khan ka zak viau țhin kha a nia. Tunah chuan pawi ka ti ta lo khawp mai.

A bân lukhamin khumah Dazel chu a mu duai a, engemaw vei nei rûn niawm tak hian a chal a ti chuar leh náng țhin a. A puansin chuan a kawng thleng chauh a khuh a, a áwmbawr nalh zet leh hlai hlap tihrawla phiar deuh țang chu a nalh hle a, a hnar ngul sáng rât leh a khabe ruh kual invuah nghet charh chuan a ti lang pa hle bawk.

"Min en reng dawn nge? Khalaiah khan i ding tlaivar dawn?" Min en chuang miah lo hian a ti sup a. Ka en reng tih engtin nge a hriat theih le..?

"I rilru a hah viau em ni?" Ka zawt ta nge nge a.

"Ka nupui thluakah hian enge awm tih hriat ka châk khawp mai. Eng rilru pu in nge Natalie hi kan kianga chên ve i remtih chhan hriat tumin ka bei mek a ni."

"Oh..kei aia hrechiang tur i nia lawm, a luhlul ve hle a, chuti maiin i hnar thei hauh lo ang. A duh chen chen awm ve rawh se, a lungawina tur tâwk tal han khawsa ve phawt se, a bâk chu hunin ala hril ang chu.."

"Chutiang ngawt a ni thei lo alawm, ka hriat lovin tihnat che pawh a lo tum thei a.." ban deuh charh hian a ti a.

"Ka inngaihtuah thei ang, i inven theih phawt chuan kei chu ka ngaihtuahawm loh." A nui suk a, "A nih chuan hnialna ka nei lo ve." Lung dam zán lo niawm tak hian a thaw hak a. A bula ka mut ve tâkah chuan min kuah vat a, "I nat hi ka duh miah lo a nia, muhil ang le, tlêm tal kan muhil lo a nih chuan naktuk tho leh tur kan awm lo palh ange," tia ka hmuiah fawp zauhvin a maimitchhing ta a.

A mut ngheh thleng pawhin ka la muhil ve thei lo, ka let kual sek a. Ka thiltih hi a țha ber em? Tih pawh ka hrethiam chuang lo. Hunin a la hril ang chu..

Ka mutthilh theih ngang loh avang chuan ka tho ta nge nge a, mikhual pindan thim țhap avang chuan Natalie a muhil tawh a nih ka ring ve ngawt a. Henu hi chuan a tirté ațang khan hatsatna bâk min thlen lo. Ka haw takzet, a naupai chhuanlamah a hmang tlat bawk si a..

Chokaah lutin coffee ka chhuang ta a, a so ka nghah chhung chuan ka phone a games chu ka khêl ta vel mai mai a. Breakfast dawhkan chungah țhuin ka ke ka thên lauh lauh a. Coffee tui ti taka ka in laia hmeichhe nui ri ka hriat chuan ka khawng nghal lah mai!

Ka no chu dawhkan chungah nghat chawrhin kan pindan lam panin ka tlan chho ta hlawk hlawk a.

Kan room kawngkhar a inhawng huau a, thla éng chuan room chhung chu èn ruih mai bawk a. Natalie chu Dazel kiangah muin a biangah a chul sak hliau hliau a, chêt pawh che sawn thei lo hian ka ding char char! Hetiang éma huangtau hi a nih ka ring pha lo a sin le..ka thinlung hi a kehsawm a ni hial mai! Engtia rei nge ka din pawh ka hre lo.

Natalie chuan Dazel puansin chu thehhlimin ruak ngal ngat hian a chungah chuan a lawn ta a. Ka tuar thei thlâwt tawh lo, ka thinur thin thawk thut chuan light chu ka ti éng ta uar a

Natalie țé deuh țhat ah chuan Dazel pawh a rawn meng chhuak nghal a, kan pahniha min entawn sek hnuah Natalie chu khum sirlamah nam kiangin a țhu chhuak nghal zawt mai.

"Natie...?" Engthil hrep nge maw....? A ti vin tuarh a. Ka hming lam hmasa lova Natalie hming alam chuan ka chhungril a vit zawk mai! Chunu nui hmel chu ben sawk ka châk a nia.

Thinur lutuk hian kawng dawm meuhvin an pahnih chuan ka melh rum ál a. Dazel hmel thinrimnaa khat chu ka melh leh nghek a.

"Engtin nge a rawn luh theih a ...?" Min la zawt zawk mah a.

"A mah kha zawt la ti nia!" Ka ti chang fak a. Dressing table lam chu panin, "Tikhan mu tlang law law rawh u, pindan lehlam hi ka hmang a nge," ka ti ta hmiah a.

Dazel chu khum ațangin rang fahran hian a rawn chhuk a, ka darah rawn vuanin, "Á viau teh suh Brie, engmah ka hrethiam miah lo a nia!" A ti hmuk a.

"Ka hrethiam thung alawm, thawmhnaw va inbel teh khatianga hmeichhe pahnih hmaa din chu a mawi viau lo." Tiin kekawrte nen chauhva Dazel ding chu ka melh rán a. Natalie țawng ve miah lo chu mak ka ti ru deuh!

Chutianga ka han tih tâkah chuan bathrobe chu a ban ta vat a, a ha nghal bawk. Room chhuahsan tuma ka pen chiah chu ka bânah rang zet hian a chelh a, "Engvangin nge i lo dan loh, ka bula mut i hreh viau a nih chuan sawi țha mai ta che, eng game nge i khelh ka hrethiam nek lo ve," tiin min thing deuh nawk a.

"Eng game mah ka khel lo ve," ti hmakin min vawnna chu tal chhuah phêt ka tum a. Min vawn ngheh ém avangin ka tihdan chu thlâkin ka nghawk ta sawk a. Reilote chhung min thlah zawk a, ka kal hman hma chuan ka banrekah min vawn sak leh nghal hmiah.

"A tawk e, Briena," Dazel chuan a ti hrawk a, a lam hawi tur chuan min kuai her ta a. A mitah tak ka en lêt ve kalh, a mit thim raih chu thinurna hian a khat a. "Khawi hmunah hrep nge kal i tum le...? a ti leh a.

"Pathum mut nán kan khum kha a zîm ka ti deuh a, kan tam deuh a nih hmel! Naute chhiar tel phei chuan pali lai kan ni tihna a nih chu," thinur lutuk hian ka ti a, "Pindan dang a tam alawm, keimaha mut ka hreh ve hauh lo." Ka ti leh hmiah a.

Hmui chip hmak chunga min melh ren rawn hnuah, "Khawihahmah i kal dawn reng reng lo, he infiamna hi a tawp kan thleng ang chu le..mipa dang i kawp duh vanga Natie pawh heta chentir duh hi i ni lawm ni," A hmel ruh țalh țalh ațang chuan a thinrim hle tih a hriat mai, min puhna țawngkam chuan min khei zar nia.

"Darling, a kal duh a nih chuan kaltir mai la, a lo lan hma pawhin kan hlim êm kha.." Natalie chuan a rawn ti ve ta a.

Natatalie chu kan en rual dun țhawt a.

"Natalie, i thawmhnaw kha inbel la chhuak nghal rawh, kan inkâr a tawp tawh tih vawi engzat nge ka sawi dawn?" Khauh farin Dazel chuan a ti leh a.

"Mahse, Naute hi...! chuti mai chuan ka bánsan thei lo che." Ngen hmelpu zet hian a lo ti a, "Keimah chauhvin engtin nge naute ka enkawl theih ang. Briena nen enge kan danglamna? I hmei, i ina i chenpui ve tho a nia lawm, chupawh engmah thiam neilo leh vâk rawlai satliah, i sum bak a duh chuang lo." a ti zui leh tawn tawn a.

"Chhuak rawh, Briena hi ka hmei nilovin ka nupui a ni." Dazel chuan chhuat a Natalie thawmhnaw chu chharin amah vawm nan chuan a hmang ta a.

"Dawt, i nupui a ni lo, khatiang zawnga dawtsawi kha a țul lovang."

A nupui ka nih thu a sawi pawhin a awih thei lo chu a nia, mi mak ve tak chu ani!

"Dawt ka sawi lo, ka nupui a ni e, chuvangin min chhuahsan thei tawh ang." Ti hmukin cupboard lam chu a pan a, whisky inthlitin a tháwkkhat pawp a. Natalie chuan ka lam rawn hawiin, "A dik em, Miss Larson? Dazel nen nupa in ni tih hi thudik nge dâwt?" țap lek lek hian a ti ta a.

"Umn..a dik e, Miss Larson nilovin, Mrs.Briena Solomos ka ni e," ka ti ve ta a. Zêp kher a țul hran tawh lo. Dazel khan a sawi vek tawh a.

"In pahnih hian ka haw lutuk che u, hremhmunah kal rawh u," a ti tuarh a.

Dazel chuan, "Natalie, ngawi la, chhuak nghal rawh." Natalie chu melhin vawt raih hian a ti ta a.

Natalie nge Dazel chapo leh induh fahran chu ka huat zawk tih pawh ka hre lo e a. Natalie chu ka khawngaih letling zawk hle a, Dazel hi a hmangaih hmelin a tan chuan engkim a huam vek tih a hriat mai! Dazel lah hian engahmah a ngaih hmel lohvin a tan chuan mamawh huna khuma mutpui tur hmeichhia ang mai chauhvin a en a ang hle a. Tenawm lutuk!

Natalie chu țap deuh pur chungin pindan ațang chuan a chhuak ta a. A chhuah pahin rum mangkhengin min la melh zui.

Dazel chuan whisky dang inthlit lehin a tlâk leh té tê a. "Zanin a thlithleng chu a mangan thlák a ni." A ti sup a.

A hmel chu ka en kal a, a manganthlak a ti duh chauh a nia! Dazel tan hian eng nge ka nih ve tak? Natalie engmaha a ngai lo ang chiahin kei pawh hi engahmah min ngai tak tak chuang lovang. A fâ pai tu anga inchhâl leh a mutpui tawh ngei pawh inthiam lohna leh hrehawm tihna pakhat mah nei lovin tikhan a ti duh a nia! Keipawh mutpui atan bâk min duh chuang lovang.

Mahse, chhel taka ka awm a ngai tih ka hria, ka pa vang tal pawhin ka beih țâng țâng a ngai a ni.

Eng mihring nge pasala ka neih hi ka lo ngaihtuah chiang lo a ni. Chuzawng ka thiam lohna pawh a ni tawh lo a, ka lo ring ve hman kha a nia. Ka lo â hle mai! Contract a zawh hma chuan ka bei zel ang, Lalpa...nau min paitir lul rawh. Tia ka rilru a țawngțai chungin pindan chu ka chhuahsan ve ta a. Min dan pawh a tum ta bik lo.

Zantir lama kan mutdunna pindan lam pan chuan ka kal ta a. Hlim taka hmangaihna kan lo chendunna khumah chuan keimah chauhvin ka mu ta a. Engvanga a nupui ka ni tih te kha hrilh ngawt nge maw a nih le..Engkim hi a buai zo vek tawh. Company lamah alo sawi darh a nih vaih chuan Oliver Solomos a thinrim viau ang. Chhungkaw thurûk puanzara a awm a nih chuan Dazel nen mawh kan phur leh ngei dawn tihna a nia.

"Briena, kawngkhar hi hawng teh," Dazel âw in zan rehtaka a rawn tih tâkah chuan a ring țha kher mai. Ka hawng awm lo emai, fîm takin ka inngaihtuah phawt tur a ni.

Ka béng hnawhin ka maimitchhing ta daih a, a kalsawn ve êm ang chu...

"Briena, chuti maiin ka lungawi dawn lo." Dazel chuan ka beng hnawhna chu a rawn paih daih a. Kawngkhar tichhiain a lo lut a. Khum bulah a ding run a, a hmel țo haw tur ang maia dur khup ka hmuh chuan ka hlau ru viau.

"Engmah sawitur ka nei rih lo, hunthawl ka mamawh mai a nia." Dam thlapin ka chhâng a.

"Fel ber ang ziazang khan lan tum duh suh. I ruahmanna tenawm zet kha ka hriat loh i ring vel a maw!?" A ti hmuk a.

"Chutiang engmah a awm lo, a țha ber tur anga ka hriatin ka che mai a ni."

"Tim Hathaway kawp i duh vangin Natalie hmanruaah i hmang mai a ni. Tenawm lutuk!"

"Ka rilru ang lo pui min puttir tum teh suh."

"Briena," tiin ka darah chuan a vuan a, khumah rawn țhu thlain alamah min pawt hnai dawrh a. "Min khawih suh, hmeichhia i mupui tê tê a, chutah i nun a țangin i thehchhuak leh a. Kei chu ka ni ve hauh lo. Theh chhuah ngai lovin keimah ka chhuak mai ang." thawchham lek lek hian ka țawng a.

"I ti hauh lovang, fâ i duh a ni lawm ni, Tim Hathaway fâ ni lovin keimah, i pasal, Dazel Solomos fâ ngei hi i pai ang."

Min thâm loh hmeltak hian a nui hawk a, tielna mitmeng hian min en bawk. Ka thin tertek a chhuak ve ta. Dazel âwmah leh aremna lai laiah chuan ka chûm pawp pawp a. "A teuh lo mai, nangai thlâwt chuan Tim pawh a țha zawk." Ka ti țhawt a, hetia ka tih mai loh chuan ka tâna mipa hmasa ber a ni tih a inhre rún a, min hmusit phah tlat.

"Briena, i la naupan tehreng nen i nasa phian mai, ka la zirtir tam tawk lo che a ni mahna.." tih pahin ka kut pahnih chu a vuan bet a, dim baksak lo hian ka hmuiah a rawn fawp ta a.

Ka duh lo țang vel chu engahmah ngai lovin min fawp lui ngawng ngawng a, a hmui hnuai lamah chuan ka seh sak ta a. Min thlah rang kher mai.

"Kawlh si, inbengdai la, sawidun teh ang," tiin thinrim tawh lo ang hmiah hian min thlêm leh a. Mahse, engahmah ka ngai duh ta bik lova.

"Engmah sawitur kan nei lo. Thilthleng zawng zawng hi i thiam loh a ni. Hmei i nei reng a, chunu chuan nau a pai bawk. Hetia ka bula tâlkual vel lo hian va ngaihsak la ti nia," Thinrim insum tak hian ka ti hmak a.

"I ti tak tak lovang, Natalie kianga ka awm i duh hauh lo. C'mon Brie ka hriatchian tawh êm che hi maw," inringtawk zeta a tih chian ka haw hlur tawh.

"I duhdanin hun hmang la, ka duhdanin ka hmang ve bawk ang, a țha em?"

"Țha lo." Bung hmuk hian min chhang a.

"A țha ka ti tlat si a,"

"Natalie lo kal leh khuma a rawn mu kha thiam lohna ka neih pawh ka hre lo." A ti ram hmak a.

"Ka thiam loh tihna a mi? I hmeinu khan i fâ a pai vanga apartment hi rawn pan a ni. 'I fâ a ni' tia puh theih turin i awm tihna a nia. Chuti chung chuan i thiam lohna a ni lo amaw?"

"Insawi thiam ka tum lo, chhuanlam engmah siam ka tum bawk lo."

"Chhuanlam siam tur a awm lo reng a ni."

Dazel chu reife a ngawi rauh rauh a, mit zim san chunga min enin, "Zantir lama i thusawi kha i lo tider a ni maw?" A ti ta a.

"Engber kha..?"

"I thilsawi ngei pawh i hre tawh lo ania, min bum nalh hle mai!"

"Ka bum lo che,"

"Khumah khan mu ve reng ta la, khatiang thil kha a thleng hauh lovang. I sawifiah a ngai a ni, engvanga khum a awm lo nge i nih?" Min zawt lêt khauh a.

"Ka insawifiah bik lovang.." pawr fahran hian ka chhang a.

"A țha e, zanin atan chuan heng thil hi ka duhtawk ta mah mah a ni," a ti ram hmak a.

"I bialnu lah chuan in affair tawp kha a pawm thei ngang si lova, kan pahnih inkâr hi chu chutiangin kan la thutak lo ve ve, i experience ka lo tem ve ah ngai mai rawh," ka ti hmak. Ka rilru puthmang diktak hi ka hrilh hriat kher a țulna ka hre hrep lo e.

"Zanin kha chuan i duhthawh viau kha le..?" Min nuihsawh zet hian a ti a.

"Duhthawh ang chu, fair taka ka lo inzir ve naah ngai hmiah rawh, tlangval dang lâka intheh dere ai chuan ka pasal zirtirna hnuaia chêt kha a țha daih zawk. Engahmah ka ngai lo a nia!"

"Engahmah i ngai lo tak chu a ni thil a buaithlâkna, vanduaithlâk takin ka lo ngai thutak tlat sia, ka nupui zirtir chu ka peih zawng leh châk ber a ni."

"Hahh..naktuk zan ațang chuan damdawi pawh kha ei angai tawh lovang, ka zirtur ang ang chu ka thiam tawhin ka hria," tiin ka nui lui sak a.

"I ei khawp ang, min hnial hauh suh ang che. Ka nupui i ni a, chuan nang ka tawn ațang che hian tu hmeichhia mah ka kawp lo, New york-ah pawh khan ka kawp chuang lo tih hi ring mai rawh," a ti ta a.

"I ti tak tak em, Dazel?"

"Ti tak tak e, dawt ka sawi hauh lo"

"Kan hria ang chu," ka ti hmak a. Min kuah tuma a bân rawn lek kang ka hmuh chuan ka tawlh hnung dawrh a. A mit ațanga tawrhna niawm tak lo lang zuai chu ka hmu hman, mahse, a thup leh vat a.

"Zanin a han sawi zui leh chiam turin ka chau tawh. Nakina kan inchhirna tur thu kan sawi palh mai ang tih pawh a hlauhawm a lawm," Dazel chuan pangai tak hian a ti a. A thinurna pawh a thup hmiah, a hmui ka sehna avang thi ser ser chu tuai zauhvin a inpet ruh țeuh a. A in thunun nasa hle tih ka hmu mai!

"Ka lo nei ta che hi ka inchhir țan der tawh." Ka ti hmiah.

"Ngawi hmak rawh, ka duh loh thleng thleng ka sawi palh ange, a tâwk ka tih hunah chauh kan inneihna hi a tawp ang." Deusawh fahran hian a ti salh a. Ka pa ka hrechhuak lo thei lo, dam vat vat se ka va'n duhtak. A nih loh tal pawn naupai vat ila..

"Nie, a tâwk i tih hun chu ka lo nghak dawn nia Mr.Solomos." Ka tlawm lutuk chu ka țah a chhuak țûn a, ka tana țha tura ka nu leh pa ruahmanna hi țha pawh ka ti hrep tawh lo.

"Nang hnial reng che hi ka peih tawh lo, zanin chu hetah riak tlang la, naktuk lamah kan la sawi dun leh dawn nia. Chumi hunah chuan kha i thin tertek kha a lo reh tawh anga, puitling angin thu a sawi theih tawh ang." Tiin kawngka lam chu a pan a, a hawng nghal a.

"Kan thilsawi tur chu kan sawi zo tawh. Natuk zan ațangin pindan hrang kan hmang tawh ang. Khanu hnena kan innei tih i sawi kha a țul tam lo khawp mai, i pa ngaihdan a ni hauh dawn lo a nia."

Dazel chu ding chatin a rawn hawi lêt a, engemaw tak a ngaihtuah ni hian a lang a.

"I pa ti suh, ka pa ti tawh ang che. Naktuk zanah a ni emaw, nidang reng rengah pawh kan room ațangin i insawn chhuak lovang, i hria em? Ka mutna chu i mutna tur a ni." A ti ta a. Ka chhân hman hma chuan kawngkhar chu a khar ta daih a.

Thinur tihngaihna hre lo zet hian ka ding ngil ât a. Dazel chhuah hnu chuan khumah ka let thla tawp a, lukhamah hmai phumin ka thaw chhuak ham ham a. Ka tleirawl lai ațanga ka lo zir tawh, ka rilru chhungril ngaihtuahna tihlan loh țhin chu ka chhawr țangkai viau e. Dazel lakah pawh ka tlâwm chian zia kha ka ti lang hauh lo. A duh reng vanga min nei a ni bik lova. Company venhim duhna avang chauhva min nei a ni ve tho.

Ka la tuar chhuak mawlh ang. Kum sawmhnih chauh ka ni a, ka duh ang leh zalen tak pawhin ka nun ka hmang ve thei ta lo chu a nia, sum tamtak neih hi engemaw a țangkaina le..? Mahni inkhawngaihna avangin chhuak zet hian ka țap ta hlawp hlawp a.

Duhtawka ka țah hnu chuan ka hrawk a thip hlur a. Ka nu leh pa bulah engmah ka sawi ngam si lo. Ka pa dinhmun a hniam zel a, kei tal chhel taka ka awm a nih loh chuan engtikahmah kan chhungkua hi kan ding chhuak leh tawh ngai lovang.

Ka țhanharh leh chuan a tlai tawh hle a, intifaiin ka chhuak vat a. Breakfast dawhkan kilin Dazel chu a lo țhu run a. Hmu lo derin Joanna thilsiam ka ei duh tur ho chu tray-ah ka rem zung zung a. A kiangah breakfast ei ka tum reng reng lo.

"I tlanchhe țan deuh mai elaw?" Dazel âw thawp sat chu ka hre lo der hmak.

"Breakfast eiturin ka lo nghak che a, khatia mahni chauhva inchawi hran kha a fair lo, Joanna ngaihdan pawh a ni lovang." A ti leh a. Ka damlo a nih loh chuan Joanna hian hmundanga thil ei hi a remti vak lo. Breakfast dawhkan kil hi a zahawm ber tiin a sawi țhin a.

"Nang...nang.." min tih thinrim châk zek zek hmelpua min en chuan vawm chawrh lo turin ka insum nasa viau.

"Hmun dangah eiin ka thin i tihrim belh dawn nge?" Ngeiawm tak hian a nui a, "Mahse, nizan lama hmangaihna kan chen dan ang kha i duh leh chuan kan la ti thei tho a..."Tia nui hawkin, ka țhutna turin chair a pawt chhuak nghal a. A khawsa zia chimawm thar ta thut chu ka ngaina viau lo.

Dazel thusawi avang chuan ka biang a sa ham ham a. "I duh ang angin thu min pek chu tum duh suh..." ka ti hmak a.

"Ka duh duh angin thil ka ti ang, company ah chairman ka ni a, in lamah ka nupui i ni bawk. Chu chu hrereng ang che, dawhtheihna ka ngah vak tawh lo a nia." A ti nghut a.

"Tenawm khawro pa.." a bâka țawngkam ngeiawm han chhâkchhuah mai tur ka hre tlat lo.

"Nizan chungchangah kha chuan ka ngaihdan ang hian han ngaihtuah ve chhin teh, Briena..! Nizan khan ka nupui kuah chungin ka muhil a. Zanah a lo tho chhuak a, hmeichhe dang kan nupa khumah mut lo tumin i pasal chu hmangaihna chenpui a lo tum mêk a, keia muhil khan engtin nge ka hriat ang!? A hmu hmasatu zawkin i khap der si lo. Ka nupui nen hmangaihna chenin hun hlimawm tak kan hmang zo chiah a, hmeichhe dang lo mutpui duh tur khawpa â ah min ngai deuh em ni?" A ti deuh duah a.

A mit thim raih chuan chiang lutuk takin min melh a.

"Chutiang zawngin ka thlir lo," tiin chhangthawpah chuan butter ka tât mawlh mawlh a. A sawidanah hi chuan a dik thlup lawi si, chhan dan tur ka hre mai lo.

"Kan inneihna puanzar rem miah lo pawh Natalie hnar nan ka sawichhuak tawh a, min rin theihna tur hian thildang enge ka tih leh dawn?" Chhhangthawp butter tah sa chu lo banin a ei țawlh țawlh a.

"Duhtawk teh ang khalam kha chu.." Ka ti ta ringawt a. Diktak chuan Natalie chen ve remti tu kha Dazel ni lovin keimah ka nia, ka inthiam chiah tawh lo.

"Atthlâk takin mut hran kha sawi tawh suh ang che. A chhan chi thil sawt lo a nih vangin,"

"Țawng țawng lo khan i breakfast kha ei rawh."

"Huh! I dang ta mai elaw, min hnialna tur țawngkam ngaihtuah lawk chiam tawh ang che. I pasal hi kum sawmhnih lek nilovin, kum sawmthum pahnih ka ni tawh. Min khing tur chuan i inpuahchah lâwk fé angai tawh ang, Mrs.Solomos." A ti ta a.

Chumi hnu chuan ngawirengin breakfast chu kan ei mial mial a. Ka eichâk loh ang aiin ka eihnem phian bawk! Sunday a nia Joanna pawh breakfast a siam zawh hnuah a haw leh tawh a nih ka ring. Lunch tur erawh chu keiman ka siam a ngai dawn a nih hmel. Dazel New york-a a awm lai kha chuan sunday ah Joanna'n eisiam min zirtir țhin kha a nia.

"Vawiin chu library-ah kan awm dawn nia, thildang tihtur i hria te a nih loh chuan.." Dazel chuan a ti sup a.

"Movie ka en dawn.."

"Thildang i sawi ka ring rengah.." A nui suk a.

"Ka duh duh ka sawi ve ang chu.."

"Library a awm chu nuam i tih ka ring tlat," tia min kai thovin library room lam pan chuan min kai phei ta a. Vawihnih chiah ka la lut a, ka duhzawng lehkhabu ka hmu lo. Chuvangin ka phur tehchiam lo ve.

Ka phone a rik chuan rangzetin ka pick a, Tim Hathaway a ni.

"Hi, Tim,"

"Ka inah lunch rawn ei ta che.."

"Ka thei lovang tih ka hlau khawp mai, mahse.." Ka sawi zawh hmain Dazel chuan ka phone chu min chhuhsakin a off hmak a.

"Tim Hathaway hnaih suh ka tih kha.." Tiin ka phone keng chuan library room ah a lut nghal hmak a. Dim lo zet hian kawngkhar chu a khar zui bur.

Thinchhe lutuk..thikthu chhe bawk si..ka phone min chhuhsak aiah Tim kiangah lunch ka ei ang.

Library ah pawh lût duh lovin kan room-ah ka chhova, bathroom ah lutin reife ka inbual hnuah ka chhuak ta chauh a. Bathrobe nen dressing table hmaah chuan ka țhu a ka hmai ka chei ta malh malh a.

"Khawnge i kal dawn..?" Dazel kawngka biang nghenga kawisawi zeta ding chu ka melh zauhva. Ka chhang awm lo emai.

"Khawiah nge i kal dawn?" A aia ringin a ti leh a. Ka la chhang chuang lo.

"A țha e, ka zawt nawn tawh lovang che, i duh dan danin awm ang che." Tihpahin ka phone chu bangah a vawm țhuai a, a darh chuai!

"Dazel Solomos, engthil nge i tih a..?"

"Tim Hathaway chu pan ang che, kan contract chungchang sawipui turin ka pa ka lo bia ang." Tiin a chhuak ta vut a.

Va'n sual tak! Duh leh bia se, 'Ințhen ka duh' ka ti pawh a ni lova. A duh ang ang chuan ti teh se..ka pawiti hrep lo ve.

Midang nen inbiak laia phone in off sak kha thil mawi pawh ni nghal lo chuan..polite lo lutuk..

Insiam peih vekin inhnuaiah chuan ka chhuk a. Living room sofa-ah Dazel chu a lo țhu a, whisky no a dawm ran a. Drawer-a ka car chahbi dah a awm lo. Garage chahbi pawh a awm chuang lo. Dazel hian a thukru chiang!

"Khawiah nge ka car chahbi i dah?"

"Ka khawih lo.."

"Kan pahnih chauhvin kan awm a, nang bak khawihtur an awm lo."

"Ke in kal mai rawh," Ngeiawm zet hian a nui lui suk a.

"Dazel, min pe vat rawh.." ka thinrim tawh lutuk chuan a tawpnan drawer chu ka hai leh rawk rawk a. Awmzia a awm tam lo khawp mai.

"Zawng buai duh suh, ka rilru ka thlak leh thut a, i kal ka remti lo," A ti hmuk a.

Chupa mai mai chu..engtin nge maw ka tih dawn le..? Thinrim zet hian a țhutna lam pan chuan ka phei a, a whisky bottle inchhawp chu la thutin min dan hman hma chuan ka theihtawpa tam tui pawlh lo chuan ka in ta a.

"Briena, engemaw i tih le..? I pum a na mai anga sin!"

"Tunge pawiti?" Ka inbelh leh ngat a. Min chhuhsak tumin a țhutna ațang chuan a rawn thova, kalsawnin chokaah ka luhpui a, whisky um chanve zet chu ka in phai duak! Ka pum sa lutuk leh ka lei chhah mup tihreh tum chuan tui ka in nghal a. Ka luhai chuai chuai chuan min din nghehtir thei ta lo! chhuatah chuan ka țhingțhi hnawk a, Dazel phun hluk ri ka hriat chuan ka inthing deuh nawk a.

"Nang anga luhlul leh chimawm hi hmeichhe dang an awm ve angem le..?" Tia min pawm káng lawpin choka ațang chuan min pawm chhuak ta a.

Ka pum rawn let but but chu thunun ka tum viau nâin ka thei ta ngang lo, a âwmah tak chuan ka luakkhum ta bawrh a.

"Huh... mawl lutuk..Mrs.Solomos, Engtikah nge i puitlin ve ang le...?" A ti ta a.

End of Chapter-10

Dated:1st January 2018


©<++++[BeckirafARenthleI]++++>®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:32 pm

SOLOMOS BRIDE

by Becky Rafa Renthlei

Chapter-11

Duhtawka ka luak hnuah ka pum pawh a zia awm ta viau, kan khumah lukham nghengin ka țhu a, serthlum tui vawt raih ka in a, ka harh sawng sawng mai. Dazel shower-a inbual thawm ka hriat chuan ka nui sak.

Ka luakkhum vang khan a thinrim viau ka ring a. Chutianga ti ta lovin min buaipui char char a, tunah inbual turin bathroom-ah a lut ve chiah. Lunch ei hun a pel daih tawh a, khatia ka awm vang khan a tu mah mahin engmah kan ei lo.

Ka phone a vawm darh tak kha chharin remkhawm ka tum ngial a, awmzia a awm lem lo. A thinthawk thut kha ka vawikhat hmuhna a nia ka ngaina viau lo! Ințhen lam chu thil tihchi ah pawh ka ngai lova, kei hian ka lo ti lutuk deuh a ni. Dazel thu zawm zawk tur ka ni reng sia!

Bathroom ațanga a lo chhuah chuan min en lovin a inthlâk mawlh mawlh a. Min hua angin a lang lo náa, lungawi viau hmel a pu hran lo.

"Dazel..?"

"Umn.."

"Nichin kha ka tihpalh,"

"Umnn.." Min chhâng țha duh țhak lo.

"Dazel, ka ti tak tak, i thinrim hian nuam ka ti miah lo." Ka ti sap a. Ka awmdan kha keipawhin ka inhrethiam bik tawh lo. Dazel hi thinchhia ka ti em em a, keipawh eng vak ka ni tawp si lova.

A sam chu uluk zet hian a siam a, kal chhuak tur te pawh a ang alawm le!

"Min tih thinrim hi i châk zek zek alawm, Briena, i la naupan êm vang a dawh chauh che ka ni." A ti nghut a.

"Ka hria alawm, i phone ka lo hmang lawk thei angem?" Ka ti zui zat a. Nelawm vak lova ka lam rawn hawiin, "Tim Hathaway biak i tum a nih chuan ka phal lo sa a."

"Hah! Ka pa biak ka tum mai chauh alawm," ka tih chuan a ner sawk.

"I pa chu a țha e, an rilru tihah zawngin awm lo hram teh. Puitlin lam pan a hun tawh viau a nia, i pa dinhmun ngaihtuah chuan..." A ti ta a.

"Eng nge i sawi awmzia?"

"I pa hian țhat lam aiin a hniamthla lam zel a ni. A hlimna tur i duh takzet a nih chuan puitling takin awm la, a duhthusam ang chiah tú hmel hmuhtir tum ang che. Khatia zû in kawi mai mai lo khan.." A ti ram hmuk a. A thinrim lo khan ka hre ve sia!

"Ka pa chanchin engnge hriat i neih?"

"Oh..Briena, â viau teh suh! I pa chanchin tharlâm a piang ka pa in min hrilh zel tih hre tur chu i ni maw le.."

"Tunah ka be duh.." ka ti leh sap a.

"A hun lo, naktukah i be dawn nia, tun a tan chuan ka hman tlat tawh lo."

"Eng nge i tih dawn?"

"Ka kalna lehzel ka hrilh thlap nachhan tur che ka hre lo ve, i duh dan danin i awm thei ang, pâwn lamah erawh i chhuak tur a ni lo." A ti nghut a.

"Engmaw i sawi? Ka chhuah i phal lova, nang erawh chhuah i tum thung a!" Ka mutna ațang chuan thovin Dazel lam pan chuan ka phei a. Engahmah min ngai lo tih hriat fahran hian a pheikhawk a bun mawlh mawlh a.

"Dazel, i chhuak thei lovang, keimah chauhva min awmtir i tum tihna mi?" Ka ti leh tuarh a.

"Tum chiang e, dinner pawh hmundangah ka ei ang. I chunga țhat chhuah reng hian awmzia a nei hrep lo ve," Tiin kawngkhar lam chu a pan a. "I chhuak thei bik lo," Tia kawngka lamah chuan tlan khalhin a hmaah tak bân pharin ka ding ta a.

"Min dang duh suh, ka chhuak dawn ka tih chu."

"A nih leh min hruai ve rawh," naupangchhia zeta ka tih chuan a tûm hmuk a. "Ka bulah i awm peih hleinem, Briena, khatianga min ui der kher kha a țul lovang,"

"Keimahin ka awm duh lo ka tih chu.."

"I awm ngei chu a ngaih hmel a ni." Tia min namsawnin kawngka chu a hawng ta a. Ka kaltir awm lo e, ka chhuah a phal lova, amah kal chhuah a tum lawi sia a fair viau lo.

Dazel pen chhuak chiah chu ûmin a hnungah ka pakai ta nawlh a. A nghawngah ka kuah bet ta tlat a.

"Briena, engemaw i hriat teh hrep le?" Ka kuahna phelh tum chuan a ding a. Ka lo kuah nghet sauh thung.

"I kal thei bik lovang, he apartmentah hian keimah chauhva awm ka tum reng reng lo, Joanna a awm bawk si lo."

"Nangmahin awm la, kha i thluak luhlul zet kha lo káwm rawh." Ti nghutin chhuatah chuan min nghat chawrh a. Chelh leh tum chuan ka ban ûk tak náin a mitmeng vawt ruih leh a hmui chip hmak ka hmuh chuan ka bán chu ka la thla ta riai a.

Dazel chhuak tur chuan step-a ka țhu chu min melh zauhva, hawi lêt map lo hian a chhuak ta a.

Ka dik tâwk loh vang a ni tih ka hria! Ka phone kha min chhuhsakin off kher lo se chuan ka runluih bik miah lo anga, inhau reng tunge duh? Sunday-ah khawimah kalna tur a nei bik hauh lo. Keimaha awm ka duh lo tih a hriat vang a min chhuahsan lui mai mai a ni. Natalie inah a kal chu ka ring chiah lo deuh! Nge? A kal zawk dawn?

Lunch pawh ka ei ta lo law law a, apartment kawngka chu kharphuiin ka laptop nen study room ah ka lut ta a. Ka lens vuah lai hlipin ka tarmit chu ka vuah leh ta rán a. Ka email dawn ho ka check zuai zuai hnuah, laptop chu khup thákin study room chu ka chhuahsan leh ta a. Tihtur ka hre mai bawk si lo, Dazel teh hrep hi a..Ka car chahbi a thukru daih bawk si! Ka thâw a ipik hluah hluah.

Ngaihdan thar ka nei ta thut a. Club ah kal ve daih ila a ni mai lawm! Aparment ațanga hnaitê ah a awm reng a, sunday-ah pawh an khar ngai hleinem. Mahse, chuta kal te inchei dan uchuak deuh deuh țhin kha ka ngainat loh avangin; kal tumna rilru ka nei ngai lova, hetia mahni chauhva awm reng ai chuan a zia phian ang.

Room-ah ka tlan chho vat a. Ka wardrobe chu hawngin club a hâktur zawngin reifê ka thawmhnaw chu ka hai a. A tawpah jean kekawr bul chhing fahran leh kamis hring dâl raih chu ka thlang ta a. Hetiang thawmhnaw deuh hlir hi kha club a kal te kha chuan an ha țhin! Pawnfen leh kawr tawngchham zet zet ai chuan tuna ka thlan hi chu a la zia deuh.

Thawmhnaw ka inbel zawh hnuah boot dum ka khup thleng deuhthaw bun lehin ka tarmit vuah rá chung chuan bag ka darah ka bât a. Ka sam ka thlah vek bawk, confi zetin apartment chu ka chhuahsan ta a.

Darkar chanve dawn ka kal tawh a, a hnai viau khan ka hre ve sia, ka rin aiin ka thleng har!

Montero club tih signboard lianpuia intâr kulh ka hmuh chuan ka thaw huai a, ka sam chûl mâm thuak thuak pah chuan ka lut ve ta a. Ka inhnawh puar hmasa a nih loh chuan ka țâmchhawl mai ang.

Club chhunga restaurant tê fel ran lo awm chu ka pan hmasa ta a, mi an tam khawp mai! Ruih hmel fê fê pawh an awm nual. Arsa hemhmin ka chah ve ta ringawt a, an menu ah ka duhzawng eitur a vâng viau! Red wine ka chah tel bawk a, music thawm chuan ka beng a ti ngawng lo chauh. Mi chetla vel chu ka enkual sek a. Ka hmelhriat hmuhtur an váng pharh mai.

Wine chu ka in hlek hlek a, arsa pawh a eitlâk phian. Mi hausa fuan khawmna hmun a ni lem lo bawk a, tleirawl té tê anni tlangpui bawk. Ka rualpui awmtur vel mipa sang zet hian ka țhutna lam chu a rawn pan a. A lo thlen hmain chiang fé hian ka lo en a.

A sam vut buak rawng fai hmel zet chu a sei angreng hle a, English ho vun rawng a pu bawk. A hmel țha tia sawi tur chu a ni hauh lova, a biangsum lang kalh chu a inhmeh reuh phian ka țhutna bula arawn din chuan, "Miss, i bulah ka lo țhu ve thei angem?" A nui sáng a.

"Umnn..er.." Aih han tih ngawt ka hreh ve deuh sia.

"I remti chiah mang nange..? Tiin za zet hian a nui ta a. Ka nui ve ringawt.

Chair âwl pawtchhuakin a țhu ve ta thova, eitur chah lovin ka in ang chiah red wine kher chu a'n chah ve ngei a!

"I mal êm a, Montero club angah hi chuan hmeichhia mahni chauhva țhut hi a him lo tih i hre lo a ni ngei ang. Mithar i nimaw? I hmel ka vawikhat hmuhna," a ti ta a.

"Er..aw..ka vawikhat kalna a nia." Ka ti țha ve mai a.

'Hun hlimawm tak hmang turin duhsakna ka hlán a che. He club hi ka ta a ni e, Wade Allen ka nia," tiin ka no chu a rawn khak zauh a.

"Briena Solomos." Ka nui ve ta sak a. Larson tih ka duh ta bik lo a ni.

"Chu hming chu ka hre tawh tlat! Khawiah nge ka hriat le.." ngaihtuah zui niawm tak hian a chal a chuar nâng a.

Ka lo hlauthawng hman khawp mai, Dazel Solomos a hria a nih vaih chuan...Lalpa leh, Larson ka lo inti leh ta mai lova.

"Melbourn lamah daih ka awm a, hna thilah sidney hi ka rawn tlawh zauh a ni." Ka ti zung zung a.

"Ok..mahse, Solomos tih tak kha hre tawh thánin ka inhria a," a ti nang nang a. Ka lo îp chawih. A hrechhuak lo chu a ni phawt a. Wine engemaw zat kan in dûn a, a felin kawm a nuam phian bawk.

"Briena, tiin ka ko thei ang che ngem?"

"Yes, Wade tiin ka ko ve ang che aw," Ka wine in chuan min fan chiai chiai a, rui khawpa in erawh ka tum lo.

"Briena, lâm i duh em? club ah hian intihhlimna chi rang hrang a awm nual a nia."

"Lám lam chu ka peih lo phawt a," ka tih chuan nui var var chung hian, "Cowboy ho hun laia an silai inkah siak ang kha i ti ve chhin duh em?" A ti ta a.

"A chákawm viau ang, lawk aw.." tia ka no chu thli khatin ka in vei pap a. Ka tih ang chiah chuan ti ve in intur chu a inthlit ve nghal zat.

Silai inkah siakna lamah chuan kan inzui phei dun ta a. Kan tawh a piangte chu min hmelhriattir zel a, an hming pawh ka hre séng hlawm lo. Music ri a bengchheng bawk nen țawng láwng láwng a ngai a. Wade hmel hlim sar chu enin Dazel laka ka lungawi lohna pawh ka hre zawm ta bik lo.

Vawi riat lai ka kah chhin hnuah, target chu ka fuh ve hram a, "Briena, in el puitur ka zawn sak ang che i ngam em?" Wade chuan a hmeichhe țhian țhetkhat te chu a hui a, Wade chu an ngaihsan hmel hlawm hle mai.

"Lawmman lam te a țhat chuan ka pawti miah lo." Fiamthu zetin ka chhang a.

"Chulam chu vengthawng suh, hmeiche tan chuan Teddy liantak kan pe a, mipa i tumpui a an chak zawk anih chuan Air pistol an hlawh thung ang." Tiin lawmman tur an dahna lam chu min kawhhmuh a, ka lâk ka ring chuang lova, intihhlimna chikhat a nia ka bei ve chhing reng reng ang chu..

Hmeichhe panga te nen chuan kan ding tlar țhap a. Vawithum țheuh chance kan nei dawn a kan hming pangaia in ko lovin number 1,2,...6 tiin min ko mai dawn a ni. Paruknaah ka la awm zui a..

1st round ah ka țhelh phawt, an thiam hlawm kher mai! kei tih loh chuan an kâp fuh vek a, ka lian bera ka sâng ber bawk. Mahse ka tláw ber..Huh! Ka zak duh bik der lo. Ka rualpui awm vel an ni vek a, an fel hlawm phian.

Vawithum naah ka fuh ve hrâm a, nuam ka tih zawng tak a ni. Wade chuan beer can khat min pe a, "Nidangah chuan pakhatna i ni tawh hrim hrim," tiin ka bânah a hnek zauh a. "I teddy khi ka awt viau asin le.." ka ti nang nang a.

Wade chu teddy awmna lamah chuan kalin pakhat chu a la thla ta a. Ka awmna lama rawn phei lehin, "Ka pe ang che, i vawikhatna ni si ah chuan i ti țha e," tiin min pe ta a. Ka la lo phal teuh lo.

"Ka lawm e, ka tlawmngai dawn miah lo a nia," ka nui var var reng a. Ka chhuak fuh khawp mai!

"Nidangah i hmel hmuh ka lo inbeisei leh ang, hmundangah ka hruai leh ang che." Tia ka kutah vuanin club chu min fankual pui ta a. A changtlung kher mai, room hrang hrangah chuan mi an khat deuh zel a, lâmna hmun te, poker khelhna te, a tam mai! Tumah intibuai leh rui chhia an awm hauh lo. An incheidan erawh a uchuak hlawm viau a, hmeichhia ngat phei chu thawmhnaw zahawm inbel hmuhtur an awm mang lo.

Ka thawmhnaw hâk hi a ziaawm pawl a ni.

"Engin nge i rawn kal?" Bar counter bawhin beer kan indun a.

"Ke in.." ka chhâng bung mah mah.

"Wow, dangdai ve! Helai hmun ke a kal thleng tur chuan i awmna a hlat dawn loh chu."

"Hla lo ve, darkar chanve kal vel a ni ang." ka ti liam puat a. Sawi thui vak ka duh loh avangin haw ka tum ta a. Sana ka en chuan zan dar riat a pel tawh! Dazel a lo haw tawh angem aw?

"Pawi i tih loh chuan ka haw tawh mai ang chu.." Wade lam hawia ka tih chuan, "A la hma alawm, thildang tih duh te i la nei em?" A ti a.

"Zanin atan chuan ka duhtawk mai ang, weekend lehpekah lokal ka tum dawn nia." Ka ti sap a. Teddy bear chu pawmin ka thil eina vel bill pek fel tum chuan ka bag ka zen rak rak a.

"Briena, zanin chu ka free ang che, i chénna hmun sawi la, ka thlah dawn che nia."

"Ka lawm e, a thlâwnin ka eiin ka in ngawt thei hleinem, bâkah min buaipui char char a, ka inthiam vak lo." Ka tih chuan za zet hian a nui a.

"I ngai serious a nih kha, a neitu ka nih angin ka ti mai a nia, lokal rawh ka thlah ang che. Zanin angah hmeichhia ké a kal a him tawh lo a nia," Tiin ka hnial hman hma chuan min kai ta dawr dawr a. Counter nghaktu chu engemaw a hrilh zauh hnuah pawnlam panin min chhuahpui ta a.

Ka hnial nasa viau náin min thlah a tum tlat si a, ka pawm ve ta nge nge a. Car-in min thlah dawn emaw ka tia, chutiang ni ta lo chuan garage ațangin bike a rawn nawr chhuak ta zawk a.

Dazel ka hrechhuak zawk mai, vawikhat min phurh ve țum khan ka hlau viau kha a nia. Tunah a vawihnihna atan ka chuang leh dawn ta! A hlimawm phian dawn e, beer rim ka nam rum rum a, ka tarmit chu ka lu lamah nawr chhovin bike ah chuan ka lawn ve ta a.

Zan boruak dai zet chuan min ti harh sawt sawt nia.

Wade chuan hnehsawh zetin bike chu a khalh a. A taksa lum ham ham nghengin tlâk hlau zet hian ka kuah rán a. "Khawi hmunah nge i chên?"

"Apartment plus S, 113 Avenue," Ka tih chuan bike a ti ding ta chawt a. A helmet khum chu phelhin, "Mr.Solomos chénna maw!?" A ti ta a.

Ka va'n â tak! Kei hi ka mawl takzet! Engtin nge ka tih tâk ang? Ka sawi zo vek tawh si.

"Umn..aw ni e," ka ti kual ta vel a.

"Wool worth company neitu Solomos hi i ni tihna a nimaw!?" Mak a tih hmel hle a. Țawngká a chhang lovin ka bu nghat. Chutah engmah sawi chhunzawm tawh lovin helmet a khum a, kan tlân zui leh ta a.

Dazel inah lo awm lo hrâm se..Tunlai chu ka thluak a buai tlat! Briena Larson diktak kha hmuhtur a tlem ta hle mai. Dazel Solomos vang vek!

Apartment Plus S. 8:30pm

Dazel Pov*

Briena ka chhuahsan hnu khan pawnah ka nui nghek nghek a. A chêtdan naupangchhia lutuk khan min ti nui hlum lo chauh.

Luhlul ve ngáng ngáng tak a ni. Amahin apartment-ah awm a hreh viau tih Joanna'n min hrilh avangin hrem hlek ka tum mai chauh a ni.

Ka chhuahsan a hlau lutuk kha ka hnungah a rawn lawn ta kha a nia, a chetdan engpawh mai hian min ti phu reng mai a nih hi.. Pawnlamah chhuah ka tum tak tak teuh lo. A partment hnung lamah ka teikual vel mai mai a, darkar khat vel bâk ka awm bo lo.

Inchhunga luh ka tum chuan a lo inkalh fel diam tawh a. Khawiah tehhrep nge maw a kal hman ni! Verandah-ah darkar chanve zet ka nghak a. A reh hmiah, car chahbi ka thuhruk sak miauva ke in khawiahmah a kal thui peih lo tawp ang.

Ka ring sual leh ta! Dinner ei hunah pawh a lo la kir ta lo fova, hlauthawnna ka nei țan deuh. Taxi hman tur a hmu mai lovang tih ka hrechiang sa a. Chuti nih chuan khawiah nge a kal tâk ang?

Tim Hathaway a pan tak tak em niang? Chuzawng ka ring miah lo. Tim chenna te zawng a hla emai, ke a kal phâkna mai a ni lo. A phone lah ka vawm chhiatsak daih sia, a biak theih der si lo. Rilru nuam lo zet hian living room-ah ka vei tawn chhen a..

A kawlhrawng ru phian a, khawilai hmunah emaw tak chuan a kal ngei chu a nia, a kal duhna tur awm ang ka ngaihtuah kual chiam a, ka hre thei der si lo.

Darkua thleng ka nghak anga, alo la haw lo fo a nih chuan zawng turin ka chhuak ang.

Chimawm lutuk, hrem ka tum ve bawk a, min hrem zawk a ni hrim mai. Apartment kawta bike ding thawm ka hriat chuan tukverh lam ka pan vat a. Curtain chu zimté a keuvin pawnlam chu ka bih ta a.

Bike dum ațanga Briena lo chhuk ka hmuh chuan tunge rawn thlahtu tih hmuh chian tum chuan ngun fê in ka en a, chupa chuan helmet full face a khum tlat avangin a hmel ka hmu chiang thei der lo.

Bike a tlanliam hnuah Briena chuan in lam a rawn pan ta a. A hlim hmel ka hmuh chuan ka ner sawk. Teddy bear niawm tak lianpui hi a kuah rân a.

Khawiha mi nge maw ni reng reng le..sunday-ah khutiang zawrhna dawr inhawng a vâng viau ang. Chunu mai mai chuh..

Step-ah arawn pen ri khauh khauh a, thawm a dim lo em em lehnghal!

Chhuak suh tihin awmzia a nei lova, a duhnaa chuan engmah pawisak a nei mang reuh si lo. Ka thluak a tibuai vek!

A incheidan te lah chu..engtin nge maw ka tih dawn le..? Kan inneihna puanzar chiah ka hmabâk tawh.

Chu thil chu ka nu leh pa in an remti emaw, ti lo pawh ni se ka ti ngei ang. Briena Solomos thunun tur hian eng hmanrua pawh hman ngai se ka ti zel tawh ang.

End of Chapter-11
Dated: 2nd January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)