SOLOMOS BRIDE BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: SOLOMOS BRIDE BY Becky Rm Renthlei (Completed)

Unread post by Ngaia » January 28th, 2018, 1:33 pm

SOLOMOS BRIDE

by Becky Rafa Renthlei

Chapter-12

Hlim leh engthawl fahran hian step-ah ka pên chho thlarh thlarh a. Apartment kawngkhar a in hawn tawh avangin Dazel a haw tawh tih ka hre mai!

Living room sofa-ah chuan lo țhuin ka luh veleh mitmeng thinurna a khatin min melh a. Zawi thâwp sat hian, "I chhuak lui ta thova, nu fel tak hi chu i ni lo chiang ve a lawm." A ti ta a.

Chhâng lova kalpelh mai ka tum deuh kha a nia, "Tunkar chhung ngeiah nupa kan ni tih hi company ah ka puang tawh ang." Chang fek fawk hlauhawm zeta a tih chuan ka ding chawt.

"Chu chu engvanga sawi nge i nih?" Nupa kan ni tih puanzar a la hun lo hrim hrim!

"Âtthlâk taka i chêt fo avang leh i pasal ka nihna anga min zah loh țhin avangin ka dawh reng nachhan tur che ka hre ta lo a ni. I duh emaw, duh lo emaw ka ti dawn khawp mai!"A ti hmuk hmuk a.

"I nu leh pa in an remti chuang lovang, kum khat pawh kan la innei lova, i thusawi kha ka ngaipawimawh lêm lo." Ka ti ve sak a.

"Khawihah nge i kal, tunge rawn thlahtu che kha.." Thildangah a pakai zui zat.

"Dazel, dilchhût viau teh suh. I kalna ka záwt lo che a, nangpaw'n engkim hriat tum vek suh."

"Ka kalna chu min zawt rawh tunah ngei hian.." Pawr fê a atih chuan a lam panin ka phei ta a.

"Tunge, keimah chauhva apartment a min hnutchhiah tumtu kha... ?"

"Huh! Keimah mawle, mahse, ka thu i zawm teh chiam lo chu a nia! Kha i thil pawm hmelchhe zet kha dah la inbe teh ang."

"A hmelchhe lo aw, ka present dawn tawhah chuan ka la duh ber," Tia teddy chu pawm nghet sauh sauhvin Dazel mitah tak chuan ka en a.

"Zû rim bawk i nam leh ta, khawiah nge i kal sawi vat rawh." A ti khur khur a. Min reh hrep châk niawm tak hian min melh run a.

"Dazel, thinrimna tur ringawt zawng suh, min chhuahsan daih vang a nih kha."

"Intifai la, i thawmhnaw hâk kha thlâk bawk ang che, ka pa kan bia ang." Thupe âw taka a tih chuan ka ngei kher mai.

"I duh leh bia la, biakna tur phone pawh ka nei ve reng reng lo."

"I neih loh vang reng chuan alawm ka phone ațanga kan biak dawn, min hnial zuah zuah lo khan ka thusawi hi zawm ve mai rawh."

"Teuh lo, ka lo chhuk dawn tawh lo a nia, kan room-ah mut tumna ka nei miah lo tih kan sawi law law ange.." Ka ti hmak a.

"Âtthlak taka chhuah tum chu sawi angai tawh lovang Briena...pindan hranga mut ka tum miah lo a nia. Nupa kan nih mai piah lamah tisa thil takin min mamawha tunah pawh khan chhuatah, ka duh phawt chuan hmangaihna ka chenpui thei che a ni tih i hriat kha..." tiin ka mitah tak chuan min en a. "Bâkah maw..Briena! Nang ang tho hian i lâkah chuan ka awm ve tho a nia, min mamawh ang chiah hian ka mamawh che," a ti leh a.

"Mipat hmeichhiatna chauh ka lakah hian i duh.." ka ti ve ta a.

"Mipat hmeichhiatna, hmangaihna chen. I duh dan dan chuan a hming lo vuah teh! Mahse, i hriat reng tur chu tunah khan kan fa tur pawh i lo pai reng thei tawh a nia." A ti ta a.

"Ka pai lo..." ka ti chhum hmak a. Ka hrechiang der si lova.

Mak tak hian Dazel chu a nui ta hawk hawk a. A sam dum hlap fai hmel zet chu a tuai chho puat bawk a. "Engmah i hre lo nang tereuh hian, ka thusawi zawmin inchungah i inthlâk dawn nge, keiman ka ti dawn?" Chhan tuma ka ang zuau tawh chu ka lam pana arawn kal avang chuan ka chip leh hmak.

Dazel chuan min pawm nawlhin kan room lamah min pawm chho ta a. Ka tâl ve taknâin awmzia a nei tam lo khawp mai.

Teddy bear chu dim lo zet hian chhuatah a thehthla a bathroom lamah min pawm lut ta a. Shower hnuaiah min nghat ta chauh a. Ka tarmit bun lai chu la thlain ka thawmhnaw inbel chu hlih a tum ta a. Ka duh lo tâl vel chu ngaithei bik hek lo, shower chu a on ta thut a. Kan pahnihin tui chuan min phuh ta a.

"Dazel," Ka țê țhat a.

"Bengchheng lo teh, chuan min ko chhen tawh lo la.." A va'n sual tak!

A thawmhnaw huh ngaipawimawh miah lo hian shower hnuaiah a ding run a. "I thawmhnaw phelh nan minute hnih hun i nei," tiin a kawr chu a hlip a, chutiang zelin a thawmhnaw inbel zawng zawng chu a phelh ta vek a. Ruak veka dingin ala zak țhak lo.

Thinrim țeuhin ka inphelh tau sawk sawk a. Bra leh under wear nen ka ding tau. "A vai khan phelh rawh," Tiin a nui ta hawk hawk a. Nuihzat tur ka hre ve miah lo!

"Eng nge?" Vin hlar a ka tih chuan a nui nasa zual sauhva. Ka ke lam chu a kawk a, ka hre ve chiah! Ka boot bun chhungah chuan tui a tling khat vek a, ka landan tur chu ka hrethiam mai!

"Misualpa, ka pheikhawk a chhe vek dawn ta nih hi..." tia kunin ka pheikhawk chu ka phelh mawlh mawlh a. Ka kun laia ka hnunga shower gel arawn hnawih chuan ka phu zawk.

"Brie, khatiang pheikhawk te zawng bun sawm chuang i lei thei alawm," tiin amah hnaih thei ang ber chuan min pawt hnai a. Ka sam huh hniang hnawk niai chu hui thuak thuakin amah hnungchhawn zawng chuan min kuai her a. Ka sam chu lian pui pui hian a phiar ta a. Amah nen a inrem hlawl lo! A phiar zawh vek hnuah scrubber chuan ka hnung a nâwt leh thlap a, min tawhna chuan ka chhungril thlengin a fan raih raih nia!

"I hun a ni ve tawh e," tiin gel chu min pe a, a hnungah chuan hnawihsakin ka nâwt ve ta a. A hnungzang ruak kung leh tihrawla khat deuhthaw chu a ruh țang mai.

Ka hahchhiau ta țhat țhat a, chu veleh hmanhmawh zet hian shower chu on lehin kan intleuh ta zung zung a. Dim leh duat hmel fahran hian towel hring hlai hlap chuan min tuam hlán a. Amah pawn veng ve nghalin bathroom ațang chuan min pawm chhuak ta a. Ka hnial buai duh teuh lo, hetia min duat hian nuam ka ti veng veng!

Min hruk hul vek hnuah, hair dryer hmangin ka sam a chhem hauh hauh a, kei ai pawn a zei daih! Mutkawr min hâktir leh thlap a, khumah min muttirin damdawi ka ei fel leh vek bawk. Chumi hnuah amah a inbuaipui ta chauh a. A chêtdan cool ruih leh dam ta thlup chu hmuhnawm tizet hian ka thlir ta reng a.

"Le, i kalna hmun sawi tawh rawh le..?" Vin hauh lo dam thluam hian min zawt a. Phakar ve chiang e, min zawh chhuah duh vang a ni maw, min duat vel! Mahse, inhnial reng ai chuan nuam ka ti zawk daih.

"Montero club ah..." ka ti țha ve mai a.

"Maw! Tunge rawn hruai che a?" Mak a tih hmel hle a, diktak chuan company lian leh changtlung taka board director nilai mek kalna atan chuan Montero club chu a hniam mah mah.

"Ke in ka kal maw le, ka car chahbi i thukru daih sia,"

"Dawt sawi awih loh aw, Brie! Ke in i kal lo tawp ang, thudik sawi kha a har viau em ni?" A ti sup a. Chhuata teddy bear let reng chu chharin, a thlêk ngial a.

"Tak tak, Dazel, darkar chanve kal chauh a nia lawm, a hla hleinem!""

"A nih leh he thil hi tu pêk che nge?" A ti deuh hmuk a. Ner nâng chung hian ka neihdan chu țhatakin ka hrilh ve ta vek a, silai kah ka sawi lai phei chuan khumah rawn lawn vein a nui suk suk.

"Lalpa leh..tuman an hriat loh hram che ka beisei, Solomos i ni tih theihnghilh tawh ngai suh, Larson pawh ni la, mi mai mai i ni lova, tuemaw sum duhin i nihna an hriat chuan an kidnap mai ang che." Lukham chu lain a ngheng a, a tûm leh ringawt tawh. Hepa pawh hi a...

"Tuman min hre lo bawk, mahse..?"

"Enge mahse...? Tunge rawn thlahtu che kha..?"

"Ih..Wade Allen, club neitu kha a nia.."

"Vawikhatmah i hriatchian loh mipa zui ngawt tawh suh, nilo, mipa reng reng kei tih loh chu hnaih suh." A ti nghut a.

"Yes boss, Wade te chu a fel viau asin." Ka tih chuan a ner sawk a. "Tumah ring suh i sum leh pai bâk an duh lo, chuvangin kan innei tawh a ni tih hi an hriat hma poh leh a țha a ni mai, i tan leh ka tana ti ka ni bawk." A ti ta a.

Khum bul dawhkana a phone dah chu banin, tuemaw a call nghal a. Ka rin hriat mai! Oliver Solomos âw thum dút dút chu ka hre ve nghal a. A sawi erawh ka hre ziktluak lo thung.

Dazel nen rei fe an inbiak hnuah phone chu min rawn pe ta a.

"Briena, ka fanu, Dazel thusawi kha i duhdan a nih chuan ka remti e, i nu leh pa erawh chu an rawn tel thei lovang tih i hre tho anga, keini nupa kan awm tho dawn a, i rilru ti hrehawm duh suh." A rawn ti mar pât a. Engang pawn duh lo mahila ka tih a ngai tho dawn tih ka hre ve kar. Ka pa dinhmun ngaihtuah phei chuan kan puangzar har viau zawk tih ka hria!

"Aw, ka duh alawm, mahse, inneih țhat tih vel kha ka duh lem lo a nia," ka tih chuan Dazel chuan min nghawk zauhva, ka melh rum ngang mai.

"Chutiang engmah a awm dawn lo, tuesday ah kan rawn kal dawn nia, a bâk chu engkim ka kutah dah ang che u." Inringtawk zeta tiin phone a dah ta a.

"Enge khatia min rawn tih kher?" Lawm lo zeta Dazel melh rám rám chunga ka tih chuan, "Inneih țhat leh ka duh asin kan company siam mokawr ngei kha ha ta la...!"

"Teuh lo..mokawr hâk a țulna ka hre lova, kan inneih hmasak dawn khan i duh lo a nih kha Dazel, tuna taka duh leh vel kha a țul ka ti ve miah lo." Ka ti hmak a.

"Huh! Khalai hun kha sawi ve ziah suh. Khalaia i hmel kha e, ka ngaina teh hrep lo." Tia bân vaiin a nui suk a. Ka va'n haw mai mai tak!

"Enge ka hmel chu..?"

"Huh! Ka sawi peih lo," tia ka lamah lo tawlh pheiin ka pumah a rawn chûl a. Ka lo ip chawih a hmuh chuan, "Hetiang hian ka tih fo dawn avangin ngaiah neih tum ang che," a ti ta a.

"Ka nu leh pa an lo kal dawn a, an mit tikham zawnga awm loh hram kan tum dawn nia, min huatna leh min ngeina kha dahțhain kan hnena an awm chhung tal chu țhat chhuah hrâm turin ka duh che."

"Awle, boss.."

"Brie, ka ti tak tak a nia, inngeihlo taka kan awm hian tumah an hreawm lo ania, a tuartu chu keimahni tho kan ni asin." Ka puma chûl hauh hauh chunga a tih chuan dik ka ti viau lawi si.

Kan mit leh mit chu a intawng chat a, Dazel chuan, "I la naupang hle a, Brie, thil engmah hi i la thlir thiam tak tak lo bawk. Kan kum a inthlau hle a, mahse, hun kal mek hian mihring chu thil min zirtir zel a ni. Chuvangin tunah chuan chhungkua kan ni tawh tih hi pawm la, i hahdam a ni mai." A ti sup a.

Min kuahna ațang chuan tál chhuakin, "Chutianga naupang chu ka ni tawh bik lo e, vawiin pawh khan min chhuahsan lo la chuan ka chhuak bik lovang, ka phal lo chung i chhuak lui a nih kha.." Ka ti vei hmarh hmarh a.

A nui suk a, ka thusawi chu ngaihven hmel a pu ve ta deuh. "A bul ațangin i țan țha leh dawn a nia, le..engmah kan sawi tawh lovang, mutthilh tum rawh le.."A ti ta a.

Bedroom light êng deuh ruai chuan Dazel hmel chu a tilang thim deuh khap a. A laka ka nêm hma zia hi a hre ve angem le?

Min nuihzat hmel tak hian ka áwmbawr chu a rawn chûl leh dan dan a.

"Min thlah teh, muhil turin min duh kha, nangpawh muhil rawh." A nui ta hawk hawk a.

"Nui rawh, nui rawh..i duhtawk khan nui ang che.." Ka ti páng páng a.

"Shh..." tia ka hmui chu hupin, "Thin tertek tihchhuah awih loh, ka nupui taksa hi ka thlahlel reng mai dawn a nih hi..honeymoon hmang turin kan la kal ve dawn nia." A âw thum ril raih chuan ka taksa a fan hneh kher mai!

Ani tluka hmangaihna chen kawnga duhthusam mipa hi an awm ka ring lo. Mipat hmeichhiatna kawnga tawn hriat nei miah lo ka nia, chuti chung chuan a mah thlahlel ngawih ngawihin min siam thei zel a nia!

"Tunah chuan hmangaihna chenpui che ka tum rih lo," Ka hmuiah chuan rawn fawpin ka heh chu a seh nar nar a. Min fawhna chuan ka taksa a ti sa ham ham.

"Mangțha nana fawh che ka tum mai a nia," Ka hmui bul chenah Dazel chuan a ti sap a. "Nupa pangai ang bawkin kan inhau ve ta fova,"tiin ka ir vel chu arawn fawp leh ta a.

"Mi țhenkhatte chuan inhauh hi nuam an ti zawk hle asin, chung zingah chuan i tel ve chiang," ka ti sap a.

"Ka tel ve chiah em? Tih i hrechiang ber ang chu, he khawvela ka nupui awmchhun i nia, min hrechiang tur chu i ni maw le.."

"Hriat chian che hi ka duh chiah em?Pawh ka hre lo." Diktakin ka chhang a, Natalie vanga ka hlauhthawnna te kha a la reh fel chiah lo a ni.

"Maimitchhing la ka rilru ka thlak leh hma hian muhil vat mai rawh le.." tiin min rawn fawp leh tawn tawn a, chutah a mu zangthal a, a kut pakhat chuan khum sira light chu a tithim ta a.

Thim zinga Dazel min kuahna bán lum ham ham chelh rán chung chuan ka ka chhing ta chial a.

Ka hmuia hmui lum thar tharin min rawn fawh chuan nuam ti tak hian ka zi ar ar a.

"Tho tawh rawh le, ka nupui kawlhrawng te," Dazel âw a nuihzatna lang chuan min ti harh deuh kawk a. Kal chhuak turin a inpeih thlap tawh tih a incheidan ațang chuan ka hre mai. Business suit vut buak rawng, kamis dum leh leh necktie dum a awrh bawk a. A inhmeh kher mai!

"Dar engzatnge ri tawh a..? Tiin ka țhu chhuak ve nghal a.

"Breakfast ei a hun tawh, Joanna tih lunghnur i duh ka ring chiah si lova, ka kai tho ta mai che a ni."

"Ka lawm e, office kal hma ka ngai ve thova, tukin chu i rualin ka kal mai dawn em niang?"

"A pawi ka ti khawp mai, Airport ah kal ka ngai a, nang chuan company lam i pan angai ang!"

"Enge airport ah i tih dawn?" Ka zâwt hû a, "Oh, Brie, ka nu leh pa an lo chhuak tawh a, kan pahnihin min beisei tih ka hre tho náin Simon khan biak a duh deuh che a, office lamah i kal tur thu ka hrilhsak diam tawh che." Nui var var hian a ti ta a.

Tunah Oliver Solomos te an lo thlawk chhuak tawh maw, Lalpa leh...Nizana a sawidan te kha chuan tuesday a ti sia, tunah an rawn kal bawk si, engmah ka hrethiam teh nuai lo ve.

"Ka lawm e," Bathroom panin ka kal nghal hlawk hlawk a. Vawiinah kan inneihna hi puanzar an tum êm lovang chu...

Tuesday; Wool worth company Bella Vista 11:00 Am. Conference Hall.

Company staff zawng zawng te chu confrrence hall ah an țhu țhap a, a kim thei ang bera koh khawm an ni. Chung zingah chuan Natalie pawh inchei nalh zetin a țhu ve a, min hmu lo a ni ngei ang! Dazel lam ngawt a melh a. A pum puar lian ve tawh tak chu thup hauh lo hian a ti lang bawk a. A chhuan hmel hle hian ka lo hre pek a.

Oliver Solomos leh a nupui Cheryl Solomos chu Chairman țhutnaah chuan an țhu a, dinglamah Dazel Solomos a țhu run bawk. Kei erawh ruahman sa angin board director leh share holder te țhutnaah ka țhu thung a. Ka langsar teh chiam lo.

Company staff țhenkhat chuan tunge ka nih hre lo an tam viau bawk.

Oliver Solomos chu lo dingchhuakin, "Vawiina ka ko khawm che u hi mak in ti mai thei a," tia bul țanin ka țhutna lam a rawn melh zoh a.

"Kan company hian hma a lo sawn zel theihnan leh kan elpui te laka dinhmun țha zawk kan chan theihna turin vawiin hian ka fapa Dazel Solomos hian ka ai a awh tawh dawn ani. Wool worth company chairman Oliver Solomos ni tawh nilovin, Dazel hi ka fapa ka rokhawmtu tur a ni a, chairman nihna a chelh tawh dawn tih ka puang e." Kut an beng dur dur a.

Dazel chu a țhutna ațanga rawn ding chhuakin mipui lam hawi chuan a kut a phar zauhva, a hma kha chuan chairman fapa a nihna angin company ah chanvo a nei a ni mai a. Official a chairman nihna kha a la nei lo a ni. Oliver control na hnuaia kal vek kan ni bawk. Tunah chuan Dazel kutah engkim a awm tawh tih company hian an hre ta tihna a nia.

Dazel țhut hnuah Oliver chuan a sawi chhunzawm leh ta a, "Kan hriat țheuh angin Larson wool company nen kan inzawm tawh a, vawiin hian ka fate pahnih inneihna puanzar hi hun tawha ka hriat vangin Sidney-ah hian kan rawn kal a ni." A tih chuan mipui lam chu an phun deuh mar mar a. Dazel nupui hmuh châkin an hawi kual ruai hlawm a, ka nuih a za ru viau.

"Briena, ka fanu ka kiangah hian lo ding teh le.." Oliver âw thum zet chuan țawng mur mur thawm chu a tireh chiang kher mai!

Ka țhutna ațanga muangchanga tho chhuakin, Dazel te lo țhutna lam pan chuan ka pén phei ta a. Tumah an țawng tawh lo! A reh tlawk tlawk mai!

"Thlaruk kalta a, ka fapa in nupuia a neih tâk chu Larson company neitu Jimmy Larson fanu Briena hi a ni e," Kut an beng leh dur dur a, țhenkhat chuan maktih hmeltakin min en bawk a, chung zinga makti fâl deuh bik chu Tim Hathaway leh Natalie Stone, ka secretary Lizzy te chu an ni.

Tim hmela rilru natna leh awih theih lohna lo lang ka hmuh chuan ka inthiam lo deuh. Natalie'n huat hmel taka min enna arawh chu engahmah ka ngai lo. Ka hlau lo ve chiang emai!

Oliver chuan company hmasawnna tur engemawzat a sawi belh țeuh a. Chutih chhung zawng chuan ka kawngah Dazel chuan intitatu takin min kuah rán a. Ka thla a muang veng veng. Ka innghahna tur mipa chu a lo ni ngei e...

Staff ho zawng zawng tan Oliver chuan lunch a buatsaih a, kan inneih lawmna angrenga a tih a ni.

Board director leh head assistant ten lawmpuina chibai min hlan sap sap laiin Natalie chuan kan dinna lam a rawn pan a.

Oliver Solomos hmaah tak dingin, "Mr.Solomos, i fapa hian nupui a nei tih chu ka hre ngei a, mahse, a fa ka pum chhunga awm hi engtin nge nita ang le...?" Ring vak lo fiah kalh si hian a ti ta a.

"Engmaw i sawi, miss Stone?" Rawn titu chu Cheryl Solmos a ni ve thung!

Oliver mit takah Natalie chuan a en rán a, zâm hauh lo hian Dazel nen min melh lehin, "Tuna ka pum chhunga naute hi i fapa fa a ni e.." A ti leh a.

Dazel thinrim hmai sen awp awp ka hmuh chuan tihvak ngaihna pawh ka hre lo va. Kutthlak duh mai hmelpu hian Natalie chu a melh rum úl a, Oliver Solomos erawh chuan engmah a sawi lo teh tlat!

Natatalie huangtau lutuk chu mak ka ti zawk! Mahse, dem tur pawh ka ni chuang lo. Dazel fa a nih miau chuan sawichhuah mai chu thil awl tak tur a ni.

A sawi hun hi a fuh chiah lo mai pawh a. A kum ngaihtuah chuan fing ve deuh awm a nia, kei ni ta ila, hetiang hmuna sawi lo hian a rukin Oliver hi ka hrilh ngei ang! Mahse, kan inneihna puanzar hi surprise tura ruahman a ni tlat a. Chance a vâng viau ve bawk a tin ni!

Natalie chungchang ka lo hriat lâwk tawh avangin zak ru viau mahila zak lo anga ka lan a țul a. An mahni hian chingfel ve mai rawh se.

Dazel chuan thinrim insum zet hian Natalie bânah vuanin conference hall chhuahsanin a kal pui ta a. Vawikhat pawh min rawn melh lo. Puakkeh mai tur hmel a pu a, Cheryl zawk chuan a alamah min pawt hnaiin min kuah ta vang vang a.

Ka țah chhuak deuh thut chu ka duh lo kher mai! Mal ngawih ngawih ni a inhriatna ka nei ta a. Dazel tello hi chuan engmah ka ni lo tih ka inhre chhuak chiah!

Dazel Solomos hi ka lo hmangaih hman reng tawh zawk tihna a ni.

End of Chapter-12

Dated: 3rd January 2018

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:33 pm

SOLOMOS BRIDE

by Becky Rafa Renthlei

Chapter-13

Oliver, kei leh Cheryl, Lizzy nen hall chu kan chhuahsan ta a. Vawikhatmah Oliver a țawng ve loh avang chuan ka awm a nuam lo. Kan contract titawpin Dazel leh Natalie a inneihtir mai ang tih ka hlau deuh!

"Briena, heng thil hi i hre sa vek tawh tihna a ni maw?" Dazel office ah Lizzy tel lova kan pathuma kan awm hnuin Oliver an a tih chuan ka bu nghat a. Diktak chuan Dazel khan ka fâ a ni lo ti ringawt mah se, a nu leh pa lu a hai ve duh khawpin ka ring.

"Zanin tlaiah dinner kan kil ho ang, Dear, i fapa leh Natalie kha biakpawh lo tum rawh," Oliver țawng bung hmuk chu ngaihthlâk a nuam fahran lem lo khawp mai.

"Thil țul ber a ni dawn em ni?" Cheryl chu zaidam takin țawng mah se, a ngaihdan a nih hmel vak loh. Kei pawn dinner kil ho ka duh chiah em ka hre bik lo. "Ka awm ve kher a țulna ka hre lo, engemaw sawitur pawimawh in nei ve ngei anga, ka lo hriat ve vek kher a ngai lem em ni?" Oliver lam hawi chuan ka ti ve sap a. An chhungkaw member ni mahila engkim ka hriat ve vek a țulna ka hre lo.

"Briena, i rilru tur ka hrethiam, a hmeichhia berin Dazel fâ a a puh tlat chuan ngaihtuah țhat a ngai a ni. Kan chhungkaw mi i ni tawh a, thil zêp leh thurûk engmah awm lo se ka duh a ni." Oliver thilsawi chu a nupui chuan a pawmpui thlap tih a lu a buk nghat nghat danah ka hre mai.

"Umn..a țha e," ka ti țha ve mai a, pumpelh tum engang mahila Oliver te ang hi chu ka hnial hneh dawn chuang lo. Thuawih takin a sawi ang hi zawm hmiah ila ka buai tam lo a ni mai.

Office kan chhuahsan hnuah Owen nen ka car-in kan haw a, Dazel hmel hmuh tur a awm tawh lo. Khawiah nge an kal ang tih ngawt ka ngaihtuah a, lungawi lo ringawt dawn ila ka pa dinhmun ngaihtuah tel a ngai bawk si, ka dinhmun khirh zet hian min ti hah. car seat ngheng chuang ka mit ka chhing vang vang a, Solomos chhungkua nen kher sumdawnna kawng a kan inzawm hi a vawikhat nan pawi ka ti ve ta.

Apartment ka thlen chuan a la hma hle a, Joanna bulah tal ka insawi thawl a nih loh chuan ka puakkeh thei takngial dawn!

"Brie, i lo haw hma hle mai, intur engemaw ka rawn lâk dawn che em niang?" Joanna nui var var chu ka nuih lêt ve sak a. "Cold coffee leh cheese cake ka duh e," Lunch mumal pawhin ka ei ve ta lo kha a nia! Natalie vang vek a ni. Khawvel hriatah Dazel Solomos a nupui ka ni tawh a, ka khawvel a zîm zual sawt.

"I chauh hmel kher mai! Mu hahdam la.." a tih chuan ka țhutna bula țhu ve turin ka hui zauh a.

"Dazel hi ka pasal a ni tih i hria em?" Ka zawh dan teh tawp pawh chu! Makti hmel a pu lova, a nui suk chauh.

"Hria e," a ti tawi tak a. Keimah zawkin mak ka ti hlauh! "Engtin nge i hriat?"

"Nupa ni lo ula pindan in ințawm lovang, Sidney i rawn thlen hlim khan rindan ka nei daih tawh, Dazel hian he apartment-ah hian hmeichhia a hruai lût khât khawp mai, Natalie kha vawihnih a rawn kal tawh a, a pindanah a hruai lut lo tih ka hre bawk." a ti duah a.

"Pindan ințawm vanga nupa kan nih ring nge i nih? Dazel an a hrilh che? Ringhlel deuh tak hian ka ti hrâm a.

"Brie, Dazel hian engmah min hrilh hleinem! Nula naupangte i ni a, company ah nihna sâng tak i chelh bawk. Chhan leh vang awm lovin mipa room i țawm ngawt lo ang tih ka hrethiam ve a sin." A ti ta a.

Ka nu rual zet a ni tawh a, engmah min zawt ngai hauh lo leh, nau ka chhiat lai pawha a ngawih reng nachhan kha nupa kan ni tih a lo hriat vang a nih chiah hi..nu fing tak a ni.

"A dik alawm, contract hmanga innei kan ni." Tiin a bul ațanga sawiin ka pa chungchang thlengin ka hrilh ve ta vek a. Ka lo beisei ang chiahin ka thâwl huai bawk. Min lainat hmel ka hmuh chuan ka țah a chhuak et et a. Helai hmunah hian hmangaihtu leh min khawngaihtu ka neih ve chhun nimai hian ka hria, ka nu leh pa thlazar hnuaia hahdam leh hlim taka awm țhin kha zankhat thil lekah ka nun a inthlâk hlawk a ni ber mai!

"Dazel hian a duh che tih ka hria alawm, Brie, lungngai mahta che i duh ang zât zet hian a duh ve che tih ka sawi ngam sak."

"A teuh lo! Ani te chuan tisa thil bâkin min pawh lo." Ka ti sap a.

"I hresual a nih chu..hmeichhia i nihna ang leh a nupui i nih vang te..â.. hmeichhe dang a en țhin dan angin a en ve lo che! Natalie pawh tiamin.." a ti leh a. Ka sawi zawm tawh lem lo
Ka dar ti che zauhvin ka nui lui sak a. "Zanin tlaiah mi panga tan dinner siam a ngai dawn a, ka inthlâk anga ka lo pui ang che."

"Mr.Solomos in min hrilh tawh a, min puih angai miah lo, chak taka i awm angaia, tun aia nasain i pasal hi hneh tum mai rawh. I pindanah chawlh hahdam i mamawh zawk.." Joanna țawng mawlh mawlh chu kan pindan lam panin ka kalsan ta a.

Shower neiin reife ka inbual a, ka sam pawh fai takin ka su thlap.

Tlailam dar li a ri chauhva, darkar khat vel mut hahdam nán hun ka nei tihna. He pindana mut ai hi chuan room thar naute khum awmnaah khan ka va mu daih teh ang. Awmhmun kawr hain sandal ka bun sawk sawk a, room thar lam pan chuan ka kal ta a.

Khumah chuan puan pawh sin lem lo hian ka mu ar a. Tim Hathawy hmel kha ngaihtuah chhuakin ka thaw hak! A rilru na hmel hmuh kha a nuam fahran lo. Min duh hle tih ka hria a, pasal ka nei tawh a ni tih a hriat khan a hmel hlim theitak zuai raih raih kha ka hmu reng. Kan inneihna hian loh theih lovin min hnaih tute pahnih rilru a tina ta phawt chu a nia, Tim leh Natalie...

Khumah chuan minute sawm dawn ka let kual sek a, teddy bear kan room-a ka dah kha he pindanah hian dah daih ang. Dazel an min paihsak a châk et et bawk si! Hepa tak hi chu a... ! Teddy bear chu lain naute khumah chuan ka muttir vei ât a. A meng kur bawk nen a ngaina lo tan chuan râpawm rawng a kai deuh.

Bawkkhupa muin reilotê tal mutthilh tumin ka chhing ta vang vang a.
*
*

"Brie," ka samah a rawn chûl a. Inlet thâkin khuma lo țhu Dazel nen chuan kan in melh ta rân a. Mitmeng zaidamna a khat hian min en a. "Dinner ei a hun dawn tawh a, insiam tawh la.."

"Ka nu leh pa khawnge?" Oliver leh Cheryl chu a vawikhat nan 'Ka nu leh pa' tiin ka sawi ve ta. A harsat loh tawp hi a..ka ko ve zel tawh ang.

"Țhutkhawmna pindanah an awm ang. Ka zawng nasa lutuk che a, helaiah i lo mu daih a."

"Nia.." A bâk sawitur ka hre lo. "Lokal rawh insiam ang," Ka bânah vuana min kaihthawh a tum chuan duh lovin, "Keimahin ka kal ve thei," Vawiina conference hall a thil thleng khan ka lung a la ti awi lo, Natalie a be duh a nih pawhin min hrilh ve tal tur a nia, hrilh chu sawi loh en pawh min en lovin min chhuahsan hmak a, awmdan mawi tlachham lutuk mai! Nupa kan ni tih an puang zo chiah a, min ngaihsak eih lo..

"Thinrimna tur zawng lo hram rawh.." Khum thawhsana ding chhuakin min nghak tlat a. "Ka rawn rawn zui ang che," a ruala chhuah kher a țulna ka hre ve miah lo.

"He pindan ka siamtir hi a hunlai khan țha dawn riauva hriatna ka nei kha a nia! Mahse, tlán tauhna'n hman i ching dawn tlat." A kalsawn nghal daih a, naute khuma teddy ka muttir chu thlir vung vungin a rûm nghut a. Engmah phei chu a sawi lo.

"Hmanhmawh ang che, ka nu leh pa innghahtir ka duh miah lo a nia!" A ti sup a. "Natalie i tihna a ni zawk lo maw!?" Ka thik ru ngawih ngawih tawh! naute a pai lehnghal a, "Briena, inhnialna hun kan nei lo," Ti hmukin min chhuahsan nghal daih a. A titau leh tawh. Ka dinhmun angah hian ding ve ta se, a nasa zawk awm daih sia!

Kan pindana ka luh chuan Dazel a awm tawh lova, a rimtui hman rim la nam vang vang ațang chuan a chhuahna a la rei lo a nih hmel!

Dressing table hmaah țhuin make up ka innhnawih a, ka mit pawh nidang aiin ka hnawih dum hlek, mascara inhnawih lehin lipstick sen hlar ka inhnawih bawk a. Ka sam chu ka chhipah vial tawm chhovin a tlâk mai loh nan ka clip vek bawk. Kawrfual ka taksa rem zaih a țhui banbul tai ka ha a. A chungah dinner jacket dum dak hlarh ka ha leh a. Pheikhawk pawh ka kawr rem tur tak ka bun bawk. Zanin chu zahawm leh dik thlarha lan ka tum.

Living room ka thlenthlâk chuan intur dawmin an lo țhu țhap tawh a, "Briena, hetah lo țhu rawh," Ka nu(Cheryl) in a tih chuan alam panin ka pen phei a, Natalie incheidan chu ka mitsirin ka melh zauhva, Dazel si chêtin a țhu a, kawrfual dum tight angreng tak hain pheikhawk sen hlar a bun a, a sam chu ka tih ang chiahin a chhipah a vial tawm bawk. A nalh kher mai! Model nge nge, a hnute têtakte kha a naupai vang chuan a lang lian ve ta deuh a! Hah! Ka enchîk mah mah!

"Sherry em niang?" Dazel an a tih chuan ka lu thingin, "Ka in lâk ve thei reng," Ka ti sap a. A ner sawk. Kan boruak uap leh țang ru zet chuan min ti hah hluah hluah. Ka pa (Oliver) erawh engmah boruak hre ve lo niawm tak hian whisky no dawmin a phone a bih ngur a. Amah a palian roh si a, ka chungah a sual hran lo nâin ka nêl tehchiam lo.

Joanna'n dinner a peih tawh thu a sawi chuan ka ding hmasa ber a, dining room panin midang ngaichang țhak lovin ka kal nghal hmak.

Dinner kan ei lai chuan ka ep chiaha țhu Dazel leh Natalie chu ka melh zauhva, kei erawh ka nu leh pa inkarah ka țhu thung. Dazel bula țhut ka tum deuh kha a nia, aman min sawm loh mai bâkah Natalie'n a chuh deuh tlat a ka hriat vangin ka inrawlh ta lo.

"Miss Stone, engtikah nge naute i neih dawn?" Ka pa in a tih chuan insum hman lovin ka khuh khak a. "Tun ațanga thlahnih leh a chanve hnuah.." Natalie chuan a ti sap. Tlemin ka pa huhâng chuan a ti tîm deuh anih ka ring. A ri phawr phawr lo ve teh tlat!

"Chuti chu he thil hi, Briena heta a chén hnu a thleng a ni maw?" A țawngdan avang chuan Dazel hmel chu a dur deuh khap a. "Umn..nupui a nei tih ka hriat loh mai bâkah affair kan neih lai a nia," Natalie chuan a ti leh zat zat a. Ka nu erawh nuamti chiah lo niawm tak hian a plate-a eitur awm chu a hawlh kual sek a. Dazel a la țawng ve miah lo.

"Tunah nupui a nei tih i hre tawh a, engtia awm nge i tum?" Ka pa chuan Natalie en run chunga atih chuan ka lo ip chawih a. "Ka fa hi pá tel lova seilen tir ka duh hauh lo. Fahrah siam ka duh lo bawk." Tiin min rawn melh deuh kher a. "Natalie, engkim kan sawi vek tawh kha," Dazel an a ti ve ta thung a. Ka fâ a ni lo pawh a ti tawh miah lo. Ka lo ná nghal veng veng.

"Sum engzat nge i mamawh dawn?" Natalie pawh en tawh lovin ka pa chuan a ti leh a, "Enteh, Mr.Solomos, sum ka duh lo, ka fa hian pa a mamawh, chu chauh chu ka duh a ni e," Tiin a țhutna ațang chuan a thova, keipawh ka țhutna ațangin ka tho chhuak ve nghal bawk.

"Briena, Miss Stone, țhu ula..in eitur kha ei rawh u." Thupe âw takin ka pa chuan a ti ta a. Ka nu hmela min lainatna lang chu ka hmuh hmaih hauh lo. Dazel an min en reng a, he mihring hi tunah tak hi chuan ka haw lutuk.

"Ka thusawi tur hi nguntakin ngaithla ang che u, ka sawi nawn tawh dawn lo a nia. Ka fapa hian nupui pakhat bâk a nei dawn lova, chu chu Briena hi a ni. Miss Stone, i inenkawlna senso tur leh a țul ang ang chu kan buaipui vek ang, ka fapa hian a ngaihsak leh ngaihsak lo tur che chu ama duhthlanna a ni e, i fâ kha Solomos thisen kai a nih leh nih loh chu kan hre thuai bawkin ka ring a. Company ah i hna i la zawm thei bawk ang." Tiin a țhutna a țang chuan a thova, ka nu in zui ve in dining room chu an chhuahsan ta a.

Kan pathuma chauvin kan awm ta. Ka hmaa eitur awm chu hawi chhuak miah lovin ka ei lui ngâng ngâng a. Ka thinrim a pianga ka tih țhin dan a ni.

"Brie, duhtawk rawh..." Dazel an a tih chuan ar bawp chu ka la lui leh ngat a. "Darling, a duh zat zat ei se enge pawi?" Natalie a lo inrawlh ka ring leh reng a. Ve lutuk a, "In lo sawi ve a ngai lovang!' Ka duh duh ka eiin ka in thei," tih pahin, "Joanna, juice min lo pêk belh la khawngaihin," ka ti zawm zat a.

Ka hmaa juice no chu banin ka in nghal a. "I ei duhtawk tawh a nih chuan ka thlah haw ang che," Dazel an Natalie a biak chuan hre lo ang hmakin ka awm a, diktak chuan Dazel pawh ka khawngaih tho! Mahse, thikna rilru ka pu lo thei bik silova, mihring ka ni miauva..A nupui ka nia, a hmeinu a rai bawk nen zahthlak ka ti ngawih ngawih!

"Brie, ka va thlah lawk anga, ka rei lovang min lo ngak la.." ka plate nawrsawnin an pahnih chuan ka en ta nge nge a, "Rei lo la, ka mut a chhuak viauna nia, ka mutthilh hmain damdawi min pek angaih dawn kha.." ka nui lui kher a."

An kal chhuak dun chu ka thlir reng a, 'an inhmeh lo' ka tih chuan dawt ka sawi tihna a ni. An inhmeh thlâwt, Natalie pum puar âl leh a mawng er deuh tan chu a inhmeh phian! Dazel fâ ni lo se chuan henu hi a rai duh pawn ka ring mai mai lo.

Țhutkhawmna pindanah ka nu leh pa chu an la awm a, rei vak lo ka va țhu ve ta thova.

"Brie, hriatthiam hram hram tum rawh," a kut lum vang vang a ka kut rawn hum paha ka nu in a tih chuan ka bu nghat. "Dazel a thiam loh vek a ni," a ti leh a.

"Nu..a ho lutuk thil kal tawh a nia, siam țhat theih pawh a nih tawh loh hi.." ka ti sap a. "Khatianga rilru thianghlim i put vang khan alawm ka fapa nupui atana ka thlan nachhan che," ka pa chu a nui vur vur a. "Rilru natna i nei a nih phawt chuan kan hnenah i sawi thei reng a nia," ti lehin ka dârah a beng thak thak a. Mak takin ka hahdam huai thei nia.

"Remchang hmasa berah ruahmanna siam ula, in lo zin dawn nia, i pa pawn a ngai tawh ngawt ang che." Ka pa in a tih chuan lawm zetin ka nui ta var var a. "Naktuk zingah kan chhuak tawh dawn a, rei kan awm thei lo tur chu pawi ka ti khawp mai, company tan i thawhhlâwk hle tih ka hria a nia, in dim deuh la, hna ringawt ngaihtuah lovin intihlim ve rawh." Ti supin ka nu chu a mitmei zauhva, "Mangțha le, ka fanu," tia bân vaiin an pindan lam an pan ta a.

Living room-ah țhuin Dazel lo haw hun ka nghak rân a, TV ka en peih bawk si lo. Phone pawh ka nei hek lo, a va'n khawharthlak tak. Naktukah iphone ka lei chiang viau ang, min vawm chhiat sak a, a thlákna tur min pek ve mai ka ring a nia! Leina nei tho mahila min ngaihsak ka ring ve a sin le..!

Darkar chanve lai ka țhut hnuah pawh a lo kir tâk loh avangin thinrim ru țeuh hian kan pindan lam ka pa ta hna hna a, a tan liau liau zanin khan ka inchei ve a, chupawh awmzia a nei chuang lo. Ka thawmhnaw hlipin mutkawr ka inbel ta a. Muangchang thei ang bera ka che chung pawn a la rawn kir ta lo fo, titau deuh chung hian ka mu ta hmak a.

Dazel thawm ka hriat chuan puanin ka inkhuh ta daih a. Thawmdim zet hian a rawn lût a, chu chuan ka thin a tirim zual! A inthlak thawm pawh ka hre ru kar a, a nui hak ri ka hriat chuan amah en lo turin ka insûm hram hram.

"Brie," ka puan sin chu a rawn keuva, ka lo pawt bet tlat thung. "I muhil lo tih ka hria a nia," a nui leh hawk a.

"Ka muhil dawn chiah,"

"Naupangchhia deuh hian awm tawh teh suh,"

"I duh leh Natalie bulah va riak rawh," Ka puansin chu a pawt hlip pawp a, "Enge maw i tih le?" Tiin ka țhu chhuak nghal hlawl.

"Min en teh," tia ka khabeah dawmin alam hawi turin min kuai dâk a. "Inhnial lo hrâm ang ka chau takzet," a ti ta sup a.

"I lo haw har dawn te chuan 'min lo nghak rawh' tih loh mai tur a lawm," ka la ti hrâm! "Tihpalh, damdawi ei ang aw.." tui bottle nen damdawi chu min pe a, a rualin kan ei ta a. Ka bulah rawn muin min kuah chial a, rilru hah hmel zet hian a thaw hawk.

"Engin nge tibuai che?" Ka zawt lo thei lo. "Muhil rawh, ka chau deuh mai a nia," ka mutkawr chhungah chuan zenin ka pum a chûl hauh hauh a, ngaiah ka nei țan der tawh.

"Melbourn-ah ka haw rih mai dawm em ni?" Ka tih chuan a kut che lai chu a tawp chawt a. "Engvangin?" A âw a lungawi lohna lang chu ka hre ru ran. "Ka nu leh pa kiangah reilote awm ve ka duh a..."

"Brie, min kalsan thei lovang,"

"Kalsan tih lemah ka zin ringawt dawn alawm," ka ti sap a. "Ni lo ve, kan pahnihin kan kal dawn nia, min lo nghak hram rawh." A hmui lum ham ham chuan ka biang a nul ná ná a, min thlakhlel tak tak te pawh a ang ve a lawm!


Kan ngawi dun ta rauh rauh a. A kut chevel tawp ta avang chuan a muhil a nih ka ring! Dimte hian a hmai chu ka chûl kual dan dan a. A biang hmul țo țan siar siar thap hrâk te, a hmui chhah lam lek lek te chuan ati mipa hliah hliah!

A áwmah chuan beiin mutthilh ka tum ve ta a. Hetiang hian kumkhuain awm thei ila ka va'n ti tak!
*
*
Breakfast tur min chhawp mawlh mawlh tu Joanna chu ka melh zauh a, "Tukin chu coffee in tel ta che." a tih chuan ka bu nghat a. "Khawnge Dazel?"

"A pa te a thlah a, i kal ve ka ring deuh a, mahse, kai tho lo tur chein min hrilh a.." ka thlah peih teuh lo, zawhna chhan har deuh deuh ka pain min zawt leh anga, ka chhang thiam leh dawn si lo.

"Brie, țan lâk deuh i ngai a nia, i rihna a tlahniam tlatin ka hria."

"Ka thluak ka hmang rim êm a ni," ka ti țha mai a, a dik chiah bawk. Company lam nen, Natalie leh ka pa lo nibawk; englai pawhin ka thluakah min luh ngut ngut a, ka chêr loh nâkah..!

Dazel nghak lovin company ka pan vang vang a, Tim hmu lo hrâm ila..ka beisei thlawn mai a ni. Ka office bika ka lut fel deuh chiah tihah Tim Hathaway a rawn lut ve nghal a.

"Briena, engtin nge khatianga thil liantham ka lâkah i zêp theih?" Țhu muang eih lo hian min dinchilh run a. A hmela lungawi lohna lang chu thup pawh a tum buai duh lo.

"Pawi ka ti lutuk..."

"God..min va han nuihzat dawn tak...!

"Chutiang a ni lo..Tim, i hrethiam lo a nih kha..!"

"Eng maw ka hriatthiam loh tur chu, Boss nupui i ni a, tun hnai maia innei in ni lo lehnghal," thinrim lutuk hian a ti leh a. Hetiang êm a a thinrim hmel hi ka la hmu lo. Nuam ka ti lo viau.

"Tim, kan inneihna hi contr..." ka hmui ka hup chawt a, ani erawh ka sawi zawm nghakin a ding ngur a. "Sawi zo ta che.." a kut vai thuakin min vai fuh lek lek lehnghal...!

"Er..engmah, min lo chhuahsan rih phawt la, hnathawh tur ka ngah viau a nia."

"Teuh lo, min ti mualpho hle a ni, ka hnaih theih tura inhawngin i awm a, Lalpa leh..apartment-a i chên chhan ka zawh che in dawt muhlum min hrlih thei a nia!"

"Dawt a ni lo." A ner sawk a.

"Dawt vek zawk a ni, nupa in lo ni reng sia, keiin duhsak takin hrehawm i tih ka lo hlau ve em em a, ka lo â takzet a ni, i lo ropui hi le.." a ti tuarh a. Pasal ka nei tih ka sawi lo a ni mai a, enge a lo thinrim ve vak vak! Lutuk a..

"Tikhan mi â ang maiin i áng leh chiam dawn nge, min chhuahsan dawn?" Ka zaidam reng bikna tur ka hrep lo ve.

"Awle a țha alawm, mahse, i lakah ka lungawi lo hle a ni." Dam deuh zawka tiin a chhuak ta a. Lizzy leh staff dang reng reng pawhin mit tharin min en vek tawh a, ka nun a zalen lo zual sawt.

Chumi kâr tluan chuan hnaah kan buai hle a, Dazel nen kan inhmu khât pharh mai! Fashion block nen ka kawp a, mokawr kan hralh chhuahtur buaipuiin Simon nen kan buai char char. New York-a thawnchhuah tur hian min ti buai ber, raipuar hâk chi a tam hle a, Natalie nen pawh kan inhmu sek! Kan mimal thil tilang zawngin kan che lo ve ve a, ka ngaihdan nilo deuhva a chêt pawhin ka enliam lui hram hram țhin. A chhan pawh Oliver Solomos remtihna a thawk zawm leh a nia, inrawlh ka tum lem lo.

"Brie, i haw hman tawh em?" Dazel chu kan fashion block ah rawn lutin a hawikual thuak thuak a. Natalie lo dinna zawnah a mit a tawp chat. "Min hawsan ta mai che, Owen nen kan rawn haw ang," ka tih chuan ngaihdan nih loh hmel zet hian a ner sawk a.

"Darling, i rualin ka lo haw ang, ka hman tawh thova," Natalie lo inrawlh ve ziah hi ka hnê kher mai! Dazel chu ka lama thle zauhvin min melh run a, staff dangte chuan min ngaihven ru reng tih ka hria.

"Hmanhmawh la," Natalie lam hawia Dazel an a tih chuan vuak chawrh ang vel ka ni. A hnial ka ring ve deuh kha a nia! Teuh lo lutuk..hepa ve hi a...

Midang an awm ve tih hre lo ang hmiah hian Natalie chuan Dazel bânah kuahin an chhuak ta a. Ka va'n tlâwm vawng vawng tak! Mahse, ka la haw hman tlat si lova, Dazel tehreng pawh min nghah ve mai tur a nia, cheng chung mai.

Zan dar ruk pel rakin Simon nen Bridal list kan siam ta a, ka phone ri chhen chu ka chháng hman thlawt lo.

"Mrs.Solomos, i phone a ri zing tawh khawp mai!" Simon inthlahrung hmel tak chu nuih sakin ka phone chu ka en a. Dazel a ni, ka switch off zui hmak. Tuesday khan phone ka lei ve ta nge nge a, ka pasal lak ațang hian dawn ka inbeisei tawh mai mai lo. Ka phone neih leh neih loh pawh a hre tawh tawp náng! A thar ka lei tih a hriat hnuah chauh min call zing ber berah a țang leh a!

Company building ka chhuahsan meuh chuan zan dar sarih a ri tawh a, ka rilțâm lutuk chu haider thei pawh ka ni lo. "Owen, restaurant remchang hmasa berah min hruai teh," ka ti ta tawp.

"Awle, Madam," Owen hian Dazel nen nupa kan ni tih a hriat ațang khan Miss Briena tiin min ko tawh ngai lo 'Madam' min ti deuh tlat a, vawithum vel chu ka hrilh tawh. Mahse, Dazel hmai a zah vangin min ko lui ta thova! Madam tia inkoh kher hi chu ka duh viau lo.

Restaurant tê fel rán changkang zet kawtah car chu a park ta a. A duh vak lo chungin ka hruai lut lui a, kan pahnihin dawhkan kan kil ve ngei! A la lai em em zui a! Hah! Kei aiin a upa hlek zawk a. Zakzum ve lehchhawng tak a ni.

Lui lam sa leh champagne kan chah a, Owen phone ri deuh sek chuan ka awm a ti nuam lo, Dazel a nih ka ring tlat. "I phone kha chhang la.."

A țawng ve hman hma chuan ka lamah a phone chu rawn lekin, "Sir," a ti sap a. Ka ring dik chiah. "A la buai lutuk ti rawh," ka tih chuan a dar a san âk a, min hnial hreh deuh si, ka sawi anga a sawi hnu chuan eitur lam ka ngaihven san ta daih a.

"Madam, i pasal kha a thinrim hmel viau a nia.." a ti ta nge nge a.

"Hlauthawng suh, ka sawifiah mai ang, puar tak khan ei rawh aw.."

"Umn..mah se.."

"Owen, ka ril ațâm a, restaurant-ah ka inhnawhpuar a ni mai, a bak engmah a awm lo," ka ti ve ngial a. Hahdam huai hmel a pu..

Apartment kan thlen chuan Owen ka mangțha leh phawt a. "I duh chuan car hi hawn rawh, duh aiin kan tlai ta deuh a.." Lawm tak hian ka Lexus car chu a hawn ta a. A rintlâk tih ka hria!

Thawm dim tehchiam lo hian kawngkhar ka hawng a, living room-a ka thil hmuh hi eng nge..? Dazel nghawngah Natalie chuan kuahin an lo infawp a nih chu..!

Ka thâwm an hria a ni ngei ang, Dazel chu rawn dâk chhuakin a inla hrang vat a. Nuam lo ti hmel a pu bawk! Natalie erawh lungawi hmel fahran hian a kawr hâk a siam țha deuh kher a, tenawm dun lutuk. An mahni kalpelin ngawirengin kan room lam ka pan a, ka rilru a na lo ka tih chuan dawt ka sawi tihna a nia! Min bêng sawk se a na lo zawk daih ang. Step tawp ber ka thlen chhoh chuan, "Brie," Dazel âw thâm țuak ka hriat chuan ka ding deuh chat a.

"Brie, i ngaih ang leh i hmuh ang kha a ni lo a nia, ka sawifiah thei..." ka ngaithla zawm tawh lo, kan room ah chuan lûtin kawngka ka khar bur a, ka pheikhawk tlawh phelhin khumah chuan ka bawk ta thlawp a. Ka țah chhuak țûn chu duh lovin ka mit ka khap faf fak a, ka țap nguar ang! Min hmangaih lo tih ka hrereng alawm le...ka mittui hi an phu miah lo.

Tho thutin bathroom-ah ka lut a, ka thawmhnaw hlip zung zungin, bathtub-ah tuilumin ka inchiah ta vang vang a. Inluah tur ka zawng ve mai dawn em niang? Nge, zanin chu hotel-ah ka riak mai dawn? Á..ka car Owen ka hawntir tlai berkherah va'n zia lo tak! Mahse, ka phone thei tho a..

Darkar chanve tehmeuh ka inchiah chuan ka hahdam sawng sawng a! Ka lo inhnawhpuar hman hlauh chu a tihzia ka ti ngei mai! He pindana khum khata mutdun hi ka tum reng reng lo. Ka mutkawr inbelin ka mamawh tur ka khung sawk sawk a, room thar lamah riak turin ka phei ta daih a.

Dazel khan 'Ka sawifiah thei' a ti maw kha..a hma a an mutdun chungchang kha chu kan sawifel tawh a. Tin, kan inkâr țhat hma a ni bawk. Zanin kher kha chu engmah sawifiah tur a awm lo. A hmeinu nen ka hmuh lai ngeiin kan inchhungah an infawp a, sawitur ka nei ta lo.

Khumah rilru nâ zetin ka mu bâm a, an thâwm hriattur pawh a awm chuang lo. Ka ngaihven lo bawk a. Ka phone a games chu rilru lâk pén nán ka khel ta ngat ngat a. A nuam ka ti ta phian!

Min rawn ngaihven ka ring deuh kha a nia, chutiang engmah a thleng lo. Zankhuain min tibuaitu awm miah lovin ka mu ta a. Chhin khat tê pawh ka chhing lo, khawvar dawn lamah phei chuan ka mit a thîp tâk em vangin ka tho ta daih a. Washroom-ah lutin ka inphih harh a, thawmdim thei ang bera choka panin eitur ka dap ta a.

Joanna rawn thlen lai paw'n breakfast dawhkanah ka lo la țhu reng a, ka thil eiruahna a hmuh chuan za zeta nui chung hian, "Tuktin hetianga tam thil i ei a nih chuan ngai i awh vat mai ang," a ti ta a. Ka thil ei tui ta reng mai hi mak chu ka ti deuh! Hah! Ho emai, Dazel nen kan inneih hma pawhin thil ka ei tam thei êm kha maw! Taksa danglam vek khawpin ei pawh ni ila ka buai eih lo.

"Brie, i tho hma hle mai!" Tomato zai paha a tih chuan, "Rilțâm vang maw le.." ka ti liam puat a. "Zanin ațangin, zing lama i eitur ka siam sak tawh dawn che nia."

"Ah..ka siam thiam tawh teh a nia," uang takin ka lo ti vat a, "A țhat chu mahse, nilengin hna i thawka i eitur lehzel insiam turin ka duh lo che." Joanna nge nge, min hrethiam țhin a nia.

Dazel rawn lut chu hmu lo derin Joanna ka siai zauh a. Min biak pawn ka chhang miah lovang.

"Brie," zawi thawp sat a atih chuan rum zetin ka melh nghek a, choka ka chhuahsan nghal daih.
*
*

Dazel leh Natalie ka hmuhdun zan ațang khan karhnih a liam tawh a, kan nupa inkâr chu hremhmun a ni ringawt! Breakfast, dinner kan eirual ngai tawh lo va; zanah ni se pindan hranga ka riak daih a. Company ah pawh ka pehhel char char. Ka damdawi erawh adang ka lei ve hmak a, mutdawnah ka la ei zawm ve zel thung.

Apartment plus S. Breakfast Room
7:00Am

Dazel pov*

Briena biak ngei tumin hma takah ka tho a, a chhan pawh Natalie'n apartment a min fawp a hmuh vang khan a lung a awi thei ngang lo a ni. A luhlul zia ka hriat chian tawh êm avangin ka thlah zalen tawp a. Mahse, karhnih a liam hnuah pawh engmah danglamna a awm ta chuang lo. Bul ka țan a nih loh chuan engtikah mah kan inkar hi a țha leh tawh lovang tih ka chiang.

Natalie khan ultrasound result min entir a tum ve tlat sia, Briena ka ruala a haw lo rau rau a nih chuan ka remti ta kha a nia! Ka fá a ni emaw, ni lo pawh nise, vawikhat chauh ensak kha a sualna ka hre hran lem lo bawk a. Chuvanga ka apartment a hruai lut ka ni. Briena vawi tamtak ka call a, min chhâng duh țhak lo. A driver nen dinner an la kil dun zui a, ka thinrim a ni tawp mai!

Briena lo haw thawm ka hre miah lo a, Natalie erawh chuan a lo hria ni ngei tur a ni. Rang fahrana min kuahin min fawp ta a! Briena thinrim hmel ka hmu zui zat bawk. Engang pawhin sawifiah tum mahila awmzia a awm leh dawn chuang lo, a chhánna chu ka koh pawh khan engahmah ngai lovin kawngka khar bur kha a ni mai!

Ka dem hran lem lo, mah se, pindan hrangah muin awm ve lo ang hmiahin min ngai a. Ka hmu khât rêng bawk. Tukin chu ka biak ngei a ngai tawh a ni. Insawifiah ka tum lova, a țul a nih chuan ngaihdam dil ka hreh lo thung!

Darkar chanve ka nghah hnuah pawh ala rawn chhuk lo fo. "Briena, hi engtizia nge a la rawn chhuak miah lo!" Joanna ka zawh chuan a dar a san âk a, "Ka hre hauh lo, tunlai chu a tho hma thei viau a sin le..."

"A ei duhzawng kha lo chhawp la ka han en ange.." Briena room lam panin ka chho nghal a. Kawngka chhung lamah a inkalh tlat!

Vawi tamtak ka koh hnuah pawh thawm a reh tlawk tlawk a, ka ngaih a țha thei tawh lo, luhlul viau țhin mah se, hetiang hian vawikhatmah ala awm ngai si lova hlauhthawnna hlirin ka khat tawh!

Kan room a chahbi spare chu lain Joanna ka ko chho nghal bawk a. Kawngkhar chu hawngin room-ah kan lut ta a, khumah pawh a mu chuang lo! Tukverh a inkalh țhap a, curtain ala inzar vek bawk.

"Brie," Joanna'n ko pah reng chungin washroom lam a pan a. Chulam en nachang ka hre miah lo, ka zui ve nghal vat. Joanna au țhat ka hriat rual chuan washroom ah ka lut ve nghal a, Briena chhuata thi nen a inchiah piah nuai ka hmuh chuan ka váwt nghal sung sung.

A hmai a dâng lap a, a hmui a duk deuh tawh bawk. Chhuatah chuan ka țhingțhi thla hnawk a, kan koh mawlh mawlh pawhin min chhang thei lo, a taksa vawt vek tawh chu pawm kangin ka chhuahpui a. "Carlos phone rawh," Joanna țap pur chu thlamuan hman pawh ka ni bik lo.

Owen ka call leh tê tê a, office kal hun a nih tawh avangin aparmtment kawtah a awm thu arawn sawi ta hlauhva, Carlos pawh nghak tawh chuang lovin hospital lam panin Briena chu chak fêin kan tlan pui ta a.

Lalpa chhanhim hram rawh..ka nupui hi a thi tur a ni lo. Briena thi tur anga ka ngaihtuah chuan ka mittui a far fap. Ka hmangaih a ni. Ka nupui Briena Solomos hi ka lo hmangaih reng a ni.

Engtia rei nge khatiang khan a lo awm tawh? Hrehawm ka ti lutuka, a kut vawt ngiai chu ka hûm vang vang a, Joanna thil rawn sawi avang chuan ka meng deuh kâwk!

"Dazel, hlauthawng lutuk suh, nau a chhiat leh a ni ngei ang?" A tih chuan Joanna ka melh kawk a.

'Eng..engmaw i sawi?" Ka ti vin tuarh.

"Nau a chhiat a nih ka ring, ka ti mai a nia," Briena chu a rawn rûm deuh țiah țiah a. A biangah vuanin ka ko pah mawlh mawlh a, reilote rawn meng zawkin a chhing leh ta daih a.

"Nau a pai a mi?"

"Ka hre lo, New York-a i awm lai khan nau a chhiat a lawm.."

"Tunah chu chu min hrilh chauh a maw!?" Ka thinrim lutuk hi ka puakkeh takngial dawn? "Chutiang thu liantham chu ka lâkah in lo zêp a..." Hospital kan thlen tâk avangin engmah kan sawizui tawh lo. Owen an car a park fel hnuah dimtê a pawm kangin hospital chu ka panpui ta a. Ka hnungah Owen leh Joanna'n min zui bawk.

Briena hmel ka en a, ka lainat viau, ka thiam loh vek a ni. Nau a chhiat loh hrám ka beisei takzet! A hmain a lo chhiat tawh tih ka hriat tâkah phei chuan ka hlauthawng zual sawt a, engzata tam thurûk nei ang maw!?

Ka thinrimna chu dahțhain amah chu ka buaipui zawm ta a, ICU-a an nawr luh chuan zui ka tum a. "Mr.Solomos, ngaihtuahawm ani lo ania, a thidang mai chauh a nih kha, taksa chak loh lutuk vang a thilthleng a ni bawk." Doctor in a tih chuan ka thawveng chuang hauh lo.

"A chungah thilțha lo a thleng tur a ni lo, ka nupui a nih kha.." Chiang fek fawk a ka tih chuan bu nghutin a lut ve ta nghal a.

A thidang ringawt maw! Chupawh taksa chak loh vang! Huh!

Thil pakhat hriatchhuah ka nei, Carlos khan thlakhat hnuah ka lokal ang a tia, a lo kal miah lo, amah kan hmuh ațang khan thlakhat a liam daih tawh, Briena nen kan inkâr boruak țha lo avang khan ka lo theihnghilh hmin der a ni!

Lobby-ah Briena chanchin ngaichangin, Joanna leh Owen nen kan țhu a, ka nu leh pa pawh ka hrilh duh ta rih lo. Doctor lo chhuah hma chuan midang hrilh hriat kha țul ka ti lem lo bawk.

Tlem chuan ka hlauhthawnna pawh a kiam ta deuhva, eng êm a ti lo turah ngai ang. Briena tel lova nun hmang tura ka indah chhin ringawt pawn ka â thei takngial dawn alawm!

''Briena Solomos, ka venghim khawp ang che, i chungah engthil mah a thlen ka remti lo.' Ka ti sap a.

End of Chapter-13

Dated: 4th December 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:34 pm

14 SOLOMOS BRIDE

by Becky Rafa Renthlei

Chapter-14

Royal North Shore Private Hospital (RNSH) Sidney.

Ka pang kham lutuk vang chuan țhut chhuah ka tum a, ka bán vûng deuh lák chu ka hmu hmasa ber. RNSH hospital-ah ka awm tih nimin khan ka hre tawh a. Doctor leh Dazel inbe thawm pawh ka hre vek! Ka muhil der tlat thung.

"Brie, i harh em?" Joanna ka lam pana lo kal chu ka nuih var var a. Ka bu nghat. Nizanah Dazel an min riahpui a, cabin thengthaw nuam zetah min awmtir a, washroom-a ka tlûk dan chungchang vel kha zawh ka duh viau nâin ka biak peih miah loh vangin muhil angin ka lang hmiah. Bâkah mutthilhna damdawiin min jection tih ka hre ve mai!

"Vawiin lamah kan chhuak dawn a, Carlos a rawn thleng țepin ka ring." Locker-a thil awm chu a khung pah mawlh mawlh a. "Ngati leh si nge?" Ni thum lai awm tur khan min ti ve sia! Vawiinah kan chhuak leh dawn maw!?

"Dazel an in lamah in enkawl a duh zawk a lawm," a țhen sak a. Ve lutuk a! A duh leh Natalie va enkawl se ti nia!

Carlos a lo thlen chuan min check uluk kher mai. "Briena, indim hle ang che, karkhatah vawithum tal rawn tlawh che ka tum dawn nia. A hmain nau i chhiat tawh tih ka lo hre lo a, mahse, i vannei khawp mai!" Tiin damdawi ziahna list chu Joanna a pe a, Dazel a rawn lang miah lo. Pawi chai hleinem!

Hospital chhuahsanin car-ah ka lut a, Owen lo nui sáng ka hmuh chuan ka nuih let ve a, apartment a luh leh pawh ka châk tawh lo. Ka nu leh pa ka ngai ngawih ngawih.

Dazel Pov*

Office-ah tihtur ka ngah êm avangin Briena hruai chhuak turin hospital ah ka kal ta lo a. Tin, ka hmel hmuh a châk miah lo tih ka hria! ICU ațanga an rawn nawr chhuah khan hlauhthawnnain ka khat a, Carlos lo thlen lai pawhin ka be lawk lo.

"Mr.Solomos, naute chu a him e," Briena enkawltu doctor chu a nui vur vur a. Kuah nawk nawk ka duh hial! "Tun ai hian rawn tlai deuh ula chuan naute hi kan chhan thei lo maithei a ni, i nupui chhul kawngkaah tak hian pangti chawr pahnih a awm a, chu chuan naute țhanglian tur kha a díp thuai dawn a, kan paih ta a ni. A taksa a chak lo deuh tih lovah chuan țhat lohna dang a nei lo." A ti duah a.

A file ken chu keu thuak thuakin, "Thla thum tal chu mu hahdam rawh se," a ti leh a. Ka pawm zawng tak a ni, "Nangmah ngeiin ka nupui chu hrilh ang che, eiturah ngeih loh zawng a nei em?" Doctor chu a nui leh suk a. "Nei hran lo ve, wine leh cocktail bâk adang engmah in lo hrám se, mut tam a mamawh hle a ni."

"Awle, naute chu a țha tak tak maw?" Ka hlauhthawnna ala reh thei lo, "Țha e, i nupui bán vei lam saw a tlûknaah a sawh na deuh a, nithum vel chu a sil deuh maithei," a tih chuan ka ner sawk!

Doctor kal hnu chuan Briena mutna room ah ka lut a, tui tak hian a muhil sâk sâk a. A hmai dâng deuh lap pawh kha a reh ta deuh, a puansin chu dimtêin ka keu sak a, a bân vûng deuh bár chu ka chûl sak hauh hauh a. 'Ka fa ngei i pai ve ta chu a nia, Brie, țhatakin ka enkawl ang che," ka ti sap a. A sam sei tak chu a chhipah an bâwk vek a, a lang fai véng reuh.

Zanin ka riahpui anga, naktuk lam erawh chhuah dil ta ila, engmah treatment hautak a awm lo va, a mamawh ber chu chawlh hahdam a ni. A hna chhunzawm a tum ang tih mawlh ka hlau a. A luhlul êm vang hian kan inhau deuh reng chu a ni e, Natalie lo nibawk. Henu hi engtin nge maw ka tih dawn le..a chanchin ka chhuitir lah chuan hmá an sawn mawh em em khawp a. Engemaw hriat chhuah ka duh avangin ka la be hrâm hrâm a ni.

Tim nen hian engemaw tak inkungkaihna an nei chiang tih ka hria, hmanzana ka apartment-a alo kal zan a rawn call tu kha Tim Hathaway a ni! Ka ringhlel zual sawt!

Bathroom ah ka awm emaw a tih vangin a be bawrh bawrh a. An țawng zawng zawng hre lo mahila Briena hming an lam tel avang khan ka ngaih a țha miah lo! Contract chungchang pawh an sawi lang kha a nia, engemaw inthup chu a awm a ni. Ka la hre thuai ang.

Ka dawhkana paper sign tur inchhawp țeuh chu ka sign zung zung a. Ka hnathawkte zingah Tim hi ka ring ber țhin kha a nia! Tunah erawh kan enthlâk angai ta thung. Briena tan pawh a hlauhawm thei maithei, ani lah hian a ngaina vei phian a!

Apartment plus S.

"Carlos, ka lawm takzet, i damdawi chu ka lo ngeih ber a nih hi.." ka nui hak hak a. Carlos, Joanna leh kei, kan room ah kan awm a. RNSH kan chhuahsanna pawh darkar hnih vel a ni tawh. Carlos chu kan rualin a lo kal ve a, ka hmuh tirha ka ngainat loh tehreng nen a fel roh hle a, ka la ngaina thuaiin ka ring.

"Hahdam i mamawh ber, thlathum chhung tal chu indim hle ang che," tiin coffee chu a in khalh a. "Nau i chhiat lo hlauhva, i vannei hle a ni, ka sawi ang i zawm thlap thlap a nih chuan thlariat hnuah naute hmél kan hmu ngei ang." A nui sun sun a. Nau ka lo pai reng a nia! Tinge ka ât bik em em le?

A hmasa zawkah ka pai tih pawh ka hre lo a, tunah chuti tho bawk..ka lawm rualin ka ni deuh huih! Ka bân na lo lam chuan ka pum ka lo dawm leh reng zel!

Joanna leh Carlos an min chhuahsan hnuah ka phone phawrhin ka nu leh pa ka bia a. Naute chungchang ka hrilh chuan an lawm ngang mai, Oliver leh Cheryl erawh Dazel an hrilh ve mai rawh se, ka be châk rih lo ve.

Ka taksa a la chau ve deuh bawk nen mutthilh tumin ka chhing ta vang vang a.
*
*
"Briena, Briena, engtin nge i awm?" Ka muttui lai laiin Dazel chuan min au mawlh mawlh a. Mut luih chi pawh a ni tawh lo. Bengchheng lutuk.

"Kal teh, ka mut a chhuak a nia," ka ti hlak a. "Damdawi ei a hun tawh alawm, ei lawk la.." Va'n ninawm tak!

"Khawnge Joanna?"

"Inhnuaiah, i eitur a siam a, a lo chho țep, i țhu thei angem?" A âw dam thluam chu ka ngei tlat. "Dawhkanah khan dah rawh, keimahin ka ei thei," ka ti deuh hmak a.

"C'mon, Brie, luhlul lo teh, nangmah chauh inngaihtuah thei i ni tawh lo a nia," dawhthei tak hian ala ti hrâm. Țhut chhuah tumin ka insiamrem a, min lo pui vat. Hnial duh viau mahila ka bân lehlam a nâ tlat sia ka inpuihtir ta nge nge a.

Damdawi ka ei zawh chuan ka bulah Dazel chu a țhu run a, a taksa lum ham ham chuan min ur pha hial!

"Brie, ka chân dawn ta che emaw ka tia!'' A thaw hawk a. "Min chân lo chu a nih hi.."

"Nelawm lo viau teh suh, tunang hunah te chuan hlimtaka awm tur kan nia sin," a ti sup a, ka ner nawk thung.

"Lawm ber ang ziazâng khan awm lo mai teh," ka ti hmak a. Joanna tray chawia alo luh tâk avangin Dazel chuan min chhâng lo.

"Brie, a vai khan ei tum rawh aw.." tiin ka malchungah tray chu rawn dah a tum a, Dazel an a lo ban vat. Inrawlh peih ve sia. Tun dinhmunah kher hi chuan ka hmu peih hlawl lo!

"Briena chu ka lo buaipui mai ang, i duh chuan min hawsan thei tawh e.." Joanna lam hawia a tih chuan ka lo ngei ngang mai. Ani buaipui ai chuan Joanna ka thlâng fê...

"Awle, Dazel, fridge ah eitur siamsa ka dah nual a, engmah buaina tur a awm lo a nia," Tiin ka chalah a rawn fawp zauhva pindan chu a chhuahsan ta a.

"I riahna tur lam i pan thei tawh ang," Dazel chu ka melh râm râm a. Mitmeng dul raiha min en chung hian, "Brie, a harsa zawng hian awm lo hram teh." Ti supin tray a eitur chu inchhin chu a hawng a. "A harsa zawngin ka awm pawh ka hre lo, nang pa hi ka haw lutuk che."

"Ka hria alawm, mahse, ka haw ve hleinem che.." a nui suk a, arsa chu fork hmanga lain ka hmui bulah a rawn lek va a. "Âng rawh le.." ka hmui ka chip hmak a, a kut ațanga laksakin keimahin ka ei lui deuh kher a.

"A țha e, min haw mah la, ka tihtur chu ka ti tho ang. Tikhan lo ei rawh aw, shower kan nei ve zuai ange," tia a thawmhnaw inbel chu hlipin zak map lo hian ruakin a ding a, en rei duh lovin ka plate a eitur chu ka bihsan ta daih a, a nui hawk. Ngeiawm lutuk! Bathroom-ah inhlih ve mai tur ania!

Dazel kal hnu chuan hmanhmawh zetin ka ei sawk sawk a, a lo luh leh hma ngei a ei zawh hman ka tum. Mushroom soup leh arsa chu ka zo vek a, salad erawh ka ei zo thei ta ngang lo. Ei ka duh ve hrim hrim tho nâin zanin tlai chu ka ei hnem lehzual! Naute tana țha lo tur engmah tih loh hram ka tum anga, tun ațanga reilote ah chuan Solomos thar a lo piang tawh dawn a, ka hmu châk takzet. Kan ințhen dawn hnai ta tih ka ngaihtuah tel lo thei lo. Fâ kan nei a nih chuan contract a tawp tawh dawn a, engtin nge ka awm zel dawn tih ka ngaituah thui duh lo.

Dazel pindana arawn luh chuan muhil ang chiahin ka lo awm der leh diam tawh. "Ka nupui chu a țâmchhawl lo chauh a ni maw?" Tray a chawisawn ri ka hre zawm zat a.

"I mit a phu zauh zauh a nia, nâ i nei em ni?" A tih chuan ka nuih a za ru hle a, ka la meng duh chuang lo. Khumah rawn lawnin ka puansin chu a rawn keuva. "Naute, â nu hi a chau viau a niang tui deuhin muhil ru aw.." ka mutkawr chu hlimin ka pum a rawn chûl a. Ka thin phû rang ta sauh chu thunun tumin ka insûm ve ngat ngat!

Chimawm lutuk! Ka thaw chhuak țha ngam tawh lo a, ka muhil der ve laklawh bawk si. Huizz, ka meng ru dêk dêk a, Dazel chuan hnai tawkah min lo en a nih chu..Lalpa leh..

"Enge i hriat a?" Ka ti chhuak ta nge nge a.

"I peih rei ka ti reng a ni." A nui nghal char char a. "Nui suh.." a hmel hi ka haw ngei ngawih ngawih. Tinge tiang hian ka awm tlat le..? A hma pawn ka haw tho tak nâin ka haw rei lem hlei lova, tun țum chu a dan a dang tlat! Ka hmuh hian ka luak te a ti chhuak deuh reuh..!

Ka kut na lo lam chuan a bânah ka chum pawp a. "Hey, tikhan che buan buan zel suh." A thinrim duh țhak lo.

Khum kil lam chu kâwkin, "Sawlamah sawn va mu rawh, min en suh," ka ti hlar a. "Tinge tiang hian i awm tlat le..?" A ti leh sup a.

"Tinge min tihbuai reng zawk le?" Ka ti ve zel a. "Rei tak ka tellovin i mu tawh tih i hria em?" Tih pahin ka biangah a rawn chûl a, ka lo thlesawn thung.

"Zanin pawh hian i bulah mut tumna rilru ka la pu chuang lo." Tiin thawh ka tum a. "Brie, khawngaihin a harsa zawngin awm lo hram rawh, i duh dan a nih chuan ka khawih lovang che, mahse, pindan hi chhuahsan suh." Khum ațang chuan thovin puansin tur a la a, sofa-ah chuan dah leh tê tê in, kawngkhar chu a hawnga a chhuak ta a. Ka thaw chhuak nghal ham ham.

Tunah darkua chauh a nia, apartment a chhuahsan êm lo'ng chu! Keimahin ka awm duh lo tih a hre ve thova. Min kalsan turin ka duh em em a, ka ruak leh huai lawi si!

Khumah ka mu meng kar a, Dazel chhuah ațangin darkar khat dawn a liam tawh. Khawnge a kal daih le..? Khum ațang chuan thovin dimtê hian pindan chu ka chhuahsan ta a. A reh țhuap bawk nen nuam ka ti miah lo, "Dazel," zawitê in ka ko a, min chhang lo. Ko reng chungin inhnuai lamah ka chhukthla a, tumah an awm chuang lo. Hlauthawnna hian ka khat nghal, ka bula mut ka phal loh vang vek a ni! Hrehawm ka ti ru leh hle sia.

Study room, living room, inhnuaia room zawng zawng ka enkim vek tawh, khawiahmah a awm lo. Kawngkhar lam ka pan leh a, chhunglamah a inkalh vek bawk si! A chhuak lo tihna.

Inchungah chho lehin mikhual pindan ka en leh a, a inkalh thlap, beidawng zetin room thar lam chu ka pan ta hna hna a. Kawngkhar dimtêin ka hawng a, khumah Dazel chu bawkkhupin a lo mu a, "Dazel," a lu ah ka sawi chuan a che eih lo. Ka bân lah chuan min tur et et a, nachhawkna ei vat ka ngai tih ka hre mai.

"Dazel," rawn inlet thakin a meng chuang lova, a kut lehlam chuan phone a hûm rân a. En ka châk tlat pek a nih chu..khumah chuan țhuin phone chu ka ensak ta a. A thil en berkher ka hmuh chuan makti zetin ka âng pam. Ka muhil lai thlalâk chu ka en ta reng a. Engtik ami nge tih pawh ka hre lo. Kan khuma ka mu lai chu a ni ngei a! Engtik laiin nge min lo lâksak le..?

Phone chu khum bul dawhkanah dahin khumah chuan ka lawn ve ta a. Puan ka sintir thlap hnuah a mah kuah chialin ka mu ve ta zawk a.

Ka bân nâ avang chuan ka harh hlawl a, sana enin zinglam darthum a pel hlek. Hetah damdawi ka kawl lova, thawh tumin ka puansin chu ka hlim a, "Brie, min kalsan suh.." Dazel chu rawn mengin chiangtak hian min en kalh. Kan in melh ta rán a. "Ka bân a ná.." ka tih chuan rangzeta rawn țhu chhuakin, "Tinge hetah kan awm?" Min zawt lêt hlauhva!

"Hetah i mu a, ka lo insawn ve.." nui sak chung a ka tih chuan a ngaihna a hriat loh hmel viau.

"Hawh le.." Ka inrin hman hmain min pawm nawlh a. Kan room lamah min pheipui ta a.

End of chapter-14
Dated: 5th December 2018.

Zanin chu ka type thui thei ngang lo, ka chau ve ngang a ni e, dam chuan naktuk zan lamah a sei deuh turah ngai ang. Min hrethiam mai niang chu..

©<++++[BeckirafARenthleI]++++>®

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:34 pm

SOLOMOS BRIDE

by Becky Rafa Renthlei

Chapter-15

Apartment Plus S Master Bedroom.

Dazel chuan kan nupa khumah min nghatin khum lu lam nghengin min țhuttir a. Nachhawkna pangai ka ei theih loh avangin ka bân zutna tur doctor min pek chu a la nghal vat a.

"Natukah nurse pakhat emaw tal kan lâkbelh dawn em niang?" Damdawi hnawih paha a tih chuan ka lu ka thing nâ ná a. "Brie, nitin ka awm thei dawn lova, tu emaw tal enkawl bik tur che i mamawh dawn a sin." Ka bân chul hauh hauh chunga a tih zawm leh chuan, "Joanna a awm reng lawm."

"Ka hria e, mahse, a buai theih ve zia hriatpuitu i nih kha, nurse ka lo bia ange.."

"Dazel, ka ti tak tak ka bân tih loh ná dang engmah ka nei lo va, midang lâk buai kha țul ka ti lem lo." Mahni a awm châk ve lai lai a, chimbuaitu dang neih kha ka ngaithei vakin ka ring lo. Bâkah treatment tamtham lâk ngai ka ni lo bawk a. Joanna nen kan inbuaipui theiin ka ring ve tlat.

"Luhlul i chhuah tlat zel hi ka hrethiam lo," a ti sup a. "I tana țhatur ka ngaihtuah mai a nia," tia thovin damdawi a va dah leh tê tê a. Sofa-ah mut a tum deuh emawni? Kan in hau tawh tawp si lova.

"I lo mu dawn lo mi?" A mutna țhin lam chu ka bêng thák thák a. Makti hmel a pu deuh! "Min sáwm tihna mi?" A nui suk a.

"Ah..khalaia mut chu a hrehawm dawn êm a," Hah..kei hi tinge ka danglam tâk zung zung le..? Nichin lawkah mutdun ka duh lova, tunah ka sawm leh lawi sia. "Kan khum ai chuan a nuam lo ngei alawm, Brie, tuna ka rawn mu a nih chuan nidang zelah pawh ka mu char char tawh dawn a nia," Sofa ațanga rawn thovin khumah chuan a rawn lawn ta a.

"I khum alawm i mut lovin.." zahzelah lukham chu ka kut na lo lam chuan ka rem țha sek a. "I khum?" ngaihdan ni vak lo hian a ti nawn sup a, "Kan khum," ka ti ve sap a. "Tikha chuan a zia ta deuh e," ka samah a kut lum thar thar a rawn chûlin, "Muhil ang le, naktukah meeting ka nei dawn a, tlem tal mut ka mamawh.." a kawngah kuah tumin ka ban dá a. Ka țê nghal țhawt! Ka bân nâ ka theihnghilh daih..

"Min kuah thei mang nange?" Za zet hian a nui a, mutchhuak hmel pawh a pu leh tawh lo, "I bân nat loh laiin min kuah duh lo vel a, tunah chuan..." sawi zawm lovin a nui leh hawk. Ka va'n ngei tak!

"Ka kuah lo tawp ang che.." Amah hnungchhawn zawngin ka inlet thak a. "Tiatau thlêm ngai an awm em?" Nuihza áwka zetin a la ti hrâm a, ka ke vei lam chuan hnungzawngin ka'n tlawh hrâm kha!

"Shh..insûm rawh, duhtak, indim i ngai a nia," min rawn kuah ta zawk a. "Mutthilh i duh kha, țawng țawng suh." Ka ti ve hmak. "Ok.." Thuawih ber ang ziaziang chuan a ngawi vei hmak a. Kei erawh min kuahna avang chuan chét pawh che țha ngam lo in ka mu khawng ât a. "Hahdam la..inthlahdul rawh le..," a muhil tawh ang chu tih náklaiin a la rawn țawng! Chhâng tawh lovin ka inthlahdul ta riai riai a. Ka tukkhum záwna a thaw lum ham ham chu ka hre ru kar.
*
*
"Brie, harh teh ka kal dawn a nia," Dazel âw ka hre riai ruai a. Ka mumang kha a nuam a sin le, peih lo zeta mengchhuakin khum bula Dazel lo ding chu ka melh a. "A tlai tawh viau a sin, kai tho lo a kalsan che ka hreh vang ania." A nui var var a. A ha var rual țha zet chu a inhmeh viau! A chhîp sam buk lam lek lek chu a phir deuh a. Business suit thim khap háin, a hnuaiah kamis senduk a ha a, christmas present a ka pek rangkachak sana kha a bun deuh ngei!

"Tho turin min duh deuh tihna mi?"

"Ah..chulam pawh a ni lo," ka hmuiah rawn fawp zauhvin,"Tukin ațang hian hunbi chat chatah breakfast, lunch, dinner i ei tawh ang." A ti ta a.

"Nangin i ei tawh mi?" Ka zawt lêt hlauh, "Ei tawh e, meeting ka nei dawn tih ka hrilh che kha..!" Awi office-ah ka hnâ a laklawh viau a sin le.

"Kan room chhuahsanin khawimah kal ka remti lo a nia, i mamawh tur sawi la, Joanna ka lo dah tir ang." Rawn kun hniamin ka chalah a rawn fawp leh zauhva pindan chu a chhuahsan ta a.

Dazel chhuah hnuah intifaiin ka mutkawr ka thlâk a. Joanna breakfast kengin a rawn lut ta bawk a, a thilsiam tui hmel tak tak ka hmuh chuan ka chil a pût thei hial!

"Good morning, Brie, nizan lam i mu țha em?"

"Umn..țha ve tho mai," tih pah chuan bawnghnute chu ka in khalh a. "Vawiin lamah bazar kal ka tuma mamawh enge i neih?" Tray chu ka malchungah rawn nghat a.

"Chips tam tawk leh pop corn.." Ka ei châk zawng ka ngaituah kual zung zung a. Sawi mai tur ka hre leh lawi si lo, "Â eitur tam tâwk a ni mai.." ka ti ta ringawt a.

"Awle, ka tháng hlanin mamawh i lo nei hman êm lo'ng chu.." tiin min chhuahsan ta a. Toast leh bacon chu ka kham lo kher mai! Ka ei hnem tawh tih ka hre tho nâin a dang ka la châk ta fo.

Joanna lo kir hma loh chuan khumah ka mu ngat ngat a. Phone ah games khelh ka tum ngial a, ka kut lehlam ka chêt țhat ngam loh vangin ka fail țhak. Ka va'n ngei tak. Thlathum chhung hetianga ka awm a nih chuan ka â thei takngial ang!?

Khum ațanga thovin ka laptop chu rem leh rem lo hian khumah dahin movie ka en ta a. Kan room-ah hian TV dah ve tawh ila a țha ang. A hma khan tinge a awm loh le..? Dazel phone ila tihdan ngaihtuah teh se, room chhuahsan a phal bawk si lo.

Thu ka awih ve țan ta riau! Hah! Nau ka chhiat lo a ni tih ka hriattirha ka lawm zia kha. Nupui țhatak, ka fâ tana nu țha nih ngei ka tum ve tlat tawh..ka hma hunah enge thleng dawn ka hre hauh lo nâin theihtawp ka chhuah ve ang.

Ka phone chu lain Dazel ka phone ta a, a vawihnihnaah min chhâng hrâm.

"Brie, nâ i nei em ni?" Teh ngawt a. Phone call in kan inbe khât ve êm bawk a ni. "Ahh..englo..ih.." sawi țan mai dan tur ka hre leh pek lo.Tunlai ka awmdan em em hi a..

"Brie, ka hmanhmawh viau a nia! Meeting na ațangin ka chhuak tawp a nia." A tih chuan ka harh thut. An meeting dawn tak alawm le..!

"Kan room ah TV dah ve ka duh."

"Chu zawng chu em ni? Min ngai chu a ni em lo maw!?" Min fiam tih ka hre tho náin ka lai ringawt. "Teuh lo, a ninawm êm alawm," Ka ti sap a.

"Awle, hahdam deuh khan lo awm la..an rawn dah thuai ang," a ti awlsam mai a. Sawi zawm mai tur ka hriat loh vangin phone ka off teh ngawt. Ka ngaihtuah chian leh deuh hnuah a polite loh thlâk ka ti leh deuh. Meeting chhuahsan meuhvin min be ve a, huizz 'Briena tinge tiang hian i awm tâk' tih sap pahin laptop chu ka khup hmak a. Khumah ka mu leh ta thân a.

Țawng ri deuh nak nak ka hriat chuan peihlo zetin ka meng chhuak a. Lunch ei lovin ka lo mu tlang daih a ni maw! Kan room a TV thar ka hmuh chuan mak ka ti telh telh tumah hmuhtur an awm bawk si lo. Țawng ri ka hre ve ngei sia! Engtik laiin nge an lo dah hman le, an buaipui chhung pawhin ka harh miah lo tihna a nia! Tiang em em a rei ka muhil ang tih ka inring lo reng reng.

Khum chu thawhsanin ka sam ka hui mám thuak thuak a, ka bân vûng pawh a ziaawm ta hle tih ka hmuh chuan ka lawm viau. A nâ erawh a la awm reng thung.

TV chu kan on chhin vel a, naupang thilthar nei ang maiin ka nui leh var var zel. Hausa in sum ngah viau mahila ka hmang ve mai mai ngai lova. Ka duh zawng engemaw ka hmu fuh a nih erawh chuan enganga to pawh nise neih ngei ka tum țhin.

"Lunch i ei lo a..." Dazel rawn luh lai ka hre miah lo. A business suit a thlâk vek tawh a, cotton kekawr thâwl lam deuh leh shirt a ha tawp a, a inhmeh tho.

"Umn..ka lo muhil daih a.." inthiam chiah lo hian ka ti sap a. Tukinah hunbi chat chat a eiturin min hrilh zo chauh a, nikhat pawh a ral hmain ka zawm lo nghal pang, a nuam viau lo.

"Ka lo haw lai pawh hre lo khawpin i mutui a nia, i duhzawng a ni em?" TV thar lam hawia a tih chuan ka bu nghat nghat a. "I khua a lo har tih hre awm tak ka nia, nimin lamah ngaihtuah chhuah nachang ka hre miah lo, room a TV dah hi ka ngaina vak lo țhin kha a nia!" Tiin sofa-ah chuan a țhu thla a.

Chutia a tih phei chuan ka inthiam lo tulh tulh a, nidang chu nise, 'Dah lo ila nimai lawm' ka ti leh hmak tawh ang. Tinge ka ngawih kur le..? "Room tharah khan kan sawn mai dawn mi niang? Chhunah i awm loh hlanin sawtah ka mu anga,'' ka ti ta sap a.

"Teuh lo, saw room saw ka lo siam hma lutuk a ni," a tih chuan ka nui sak.

"Dazel, keimah chauhin room thar saw tlan tauhnan ka hmang lo a nia, nizanah nangpawh i va mut ve tho kha aw.." Sawi fuh inti zetin ka nui rah rah a.

"Nangnu tereuh hi.."

"Ka sawi dik a ni lawm ni?" Cho zet a ka tih chuan a țhutna țanga lo thovin khum lam a pan a, "Lokal teh ka bulah hian.." a ti sup a. Thuawih zetin ka phei ve nghal mai!

A malchungah min țhuttir tê tê a, "Vawiin khan tinge phone kha i off daih a..?" Ka sam chu ka bengah min zehsak a. "A..sawitur a vâng êm alawm!"

"I duhthu renga min biakna hmasa ber a nih kha, i dam lo leh ta emaw ka tia ka hlauhthawn zia chu.." a thaw chhuak hawk a. Dimtêin ka kut khingkhat chuan a biangah chûl in, "Ka tihpalh lutuk..meeting i nei tih ka lo theihnghilh daih a ni.." ka ti sap a.

"A țha vek a, i damloh chhung hian chawlh ka insiam dawn." A ti ta a.

"Maw!" Mak ka tih êm vangin ka áng pam. Kei ka awm loh bawk a, ani a chawlh bawk si chuan a chi miah loh.

"Keimah ngeiin enkawl che ka duh alawm, nurse rawih i duh mang reuh si lo a, company enkawl tur chuan Roger a New York ațangin a rawn kal mêk."

"Roger Solomos maw!?" Mak ka ti telh telh!

"Umn..ni e, ka pa ruahmanna a nia lawm, engkim ka hrilh vek tawh." A ti liam puat a.

Roger Solomos chu Dazel a first cousin a ni. Wool worth company a share nei tam ber dawttu a ni a. Tuna managing director nilai mek a ni bawk. Tv ah leh chanchinbu ah bâk a hmel ka la hmu lova. Mahse, Dazel aiin a upa zawk a, Oliver Solomos a û fâ a ni.

"Roger chuan a lo pawm ve mai tihna mi?" Dilchhût zet a ka tih chuan a nui suk a. "Pawm mai lohvin, chuti anih loh chuan beram vulhna hmun saw ka chhuhsak a ni mai," fiamthu zetin a ti ta a.

Beram vulhna hmun a tih chu tuna Wool worth company an din hma a an chhungkaw sumdawnna a ni a, New York ah daih a awm a ni. Chulai hmun chu Oliver a û in a chang ve thung a, beram hmul tamtak kan company ah hian an supply țhin bawk.

"Roger chu ka hmu ve châk hle mai!"

"Naktuk zingah a rawn thleng ang, ani pawhin a hmu châk che alawm..contract chungchang kha a hre ve lo tih kan sawi tlang law law ange, keini pahnih leh kan nu leh pa, lawyer, chu zawng chu a hretute kan ni." A ti deuh duah a.

"Engtik thleng nge a awm theih ang.."

"Chuzawng nangmahah a inghat ang chu.." tiin dimtê hian chhuatah min nghat a. "Dinner ei a hun dawn a nia, insiam rawh le.."

"Hetah ka ei dawn lo mi," room chhuahsan suh a ti ve sia.

"Ah..i duh te chuan a theih tho a, inhnuailamah i chhuk ve châk ka rin vang a nia.." a ti dam thluam a. "Châk lo ve, hetah ei mai ang." Ka tih chuan a bu nghut a, "Ka zuk la ange.."tiin a chhuak ta nghal a.

Dazel nungchang pawh a danglam dawrh mai alawm. A mitmenga min duatna lo lang ka hmuh khan nuam ka ti veng veng. Ka pum chu chûlin, 'Naute, nangmah vang hian duat ka hlawh teh mai a nia,' ka ti sap a.

Dazel leh Joanna chu inkhai bawrlûk hian pindanah an lo lut a. Eng tehchiam nge maw rawn dah an tum ni!

"I ei tur vek a nih hi Brie," Dazel mel ralh paha Joanna'n a tih chuan ka nui hak hak a. Eitur chi hrang hrang tam zet chu Drawer ah a rem mawlh mawlh a. "Vawk ang maiin i thau ang tih chu ka hlau deuh.." Dazel chuan tray a eitur inchhin hawng dan dan pah a atih chuan léi ka chhuahkhum zauh a.

"Teuh lo mai, doctorin exer lâk a phal veleh chêr kuam khawpin ka la ang." Ka ti ve ngial a, ka tho tlai thei ropui sia, Dazel runluih nâna sawi ve mai ka ni. Ka rin ang chiahin, Dazel chuan, Huh! Breakfast ei zawha exer lâk te chu a.." a ti ta ngei a. Ka nuih a za ngang mai.

Joanna chhuah hnuah Dinner chu muangchangin kan ei ta a, "Brie, tianga tam kha i ei zel chuan vawk angin i thau tak tak ngei ang,'' Ka plate a awm zawng zawng ka ei zawh mai bâkah Dazel plate a mi nen lam ka ei vek a. Awih thei lo hmel a pu!

"Hah..ka sawi tawh kha, Carlos a lo kal veleh exer ka lâk theih hun tur ka lo zawt ang."

"I ti tak tak em?" Min ring lo zeta a tih chuan ka'n melh rum nghal ringawt a.

"Ka ti ang ka tih mawlh mawlh chu.." tih nghauh pahin ka plate chu ka nawr sawn a. "Ka mu dawn.."

"Brie, i thinrim leh ringawt a law..?"

"Aih.."

"Ka fiamthu a nih kha, Carlos chu kan zawt dawn nia.." a ti ta a.

"Umn..thau mahila pawi ka ti miah lo..raipuar cher zet ai chuan vawk ang pawhin thau bial vek mahila enge pawi?" Model pawh ka ni lova enge ka lâk thutak chiam ang.

"Tihtauh awih loh aw.."

"Ka titau awzawng lo.."

"A nih chuan lokal rawh le..shower nei zuai ila movie kan en dawn nia," tia min pawt thovin min pawm nawlh a, bathroom ah min min luhpui ta a.

Dazel hmaah ruakin ka ding tau a, ka zak tawh lem lo. Zak mahila asawt chuang tlat lova. Ani pawn a thawmhnaw a phelh vek a, a mipatna chu en loh tumin ka dâk ha a, a nui hawk. "Ka nupui hmuh atan chauhva in phelh ka nia," fiamthu paha a tih chuan ka biang a sa nghal hat hat. Shower hnuaiah chuan kan ding dun a, ka taksa ah gel chu rawn hnawihin a nuai phuan a. Min tawhna chuan ka chhungril a fan nghal raih raih. Chutah rawn kun hniamin duhthawh leh uar fahran hian a hmui hnawm chap chuan min fawp ta a. Ka chhâng lêt rang kher mai.

Min fawp reng chungin ka taksa chu a chulkual dan dan a, a hnungzáng ruak kungah chuan ka lo zut ve zel a.

"C'mon Brie, ka inthunun theih lai hian i chhuak vat teh ang," tiin shower chu a herh chak deuh a, kan intleuh zawh hnuah bathroom ațang chuan min pawm chhuak leh ta a. A va'n nuam tak naute niawm zawk tak ka ni.

Insi rialin khum lû lam nghengin kan țhu áwn a, kan movie en ber kher chu le..! Turky ho siam 'You are my home,' tih a ni a, Dazel chuan uluk fahran hian a en a, ka kut na lo lam chu a hûm ran bawk a. Hmuhnawm tak a ni.

A tawpah a changtunu a la thi zui, ka mittui luang zawih zawih chu Dazel chuan a kut hnunglama rawn hru in, "Thinlung a tawk zar mai alawm," a ti sup a. Mittui tla chungin ka la nui ve hrâm. Keimahah ka inchan deuh a, Dazel hi thihsan dawn ta ila..Awi ka ngaituah duh teuh lo..

"Brie, hmangaihna chen phalsak ka ni em?" A ti sup a. A hlauthawng ve deuh a ni ngei ang.

"Carlos zawt la.." fiamthu titak deuhva ka tih chuan a phone a ban tak tak nia maw le..va'n ti ang lo tak!

"Hey, engemaw tih i tum le.." ka ti chûl a, "Kan doctor a chu kan call ange.."

"Chi loh lutuk.."

"Khawiahmah a sawi chhuak dawn hleinem.."

"Naa, a lo kal hunah kan zawt dawn nia.." ka tih chuan, "Chupa pawh chu sawi tlang ve nghal mai tur a nia," a ti hluk a.

A áwma bei pahin, "I hmanhmawh a nih kha..hun kan la ngah lutuk tlat.." Ka ti sap a. Nui suk chung hian, "Ka nghak thei angem ka hre lo," tih pahin ka hmuiah a rawn fawp vang vang a. A mipatna tho deuh țalh țalh ka hriat chuan ka kut nâ lo lam chu ka dahthla ta riai riai a.

"Brie, chimawm viau suh.." ka kut chu a man chat a. A thaw deuh hawk. Insum tum tih hriat zet hian a hmui hnuai lam chu a pet ruh deuh fun a. Ka fiam châk tlat!

"Min hnar leh si elaw..Mr.Solomos?" Nuisânga ka ti chuan, "A Teuh lo.." Ka hmuiah rawn fawp leh nghalin a kut chu ka mutkawr chhungah a zen lut nghal a, "Ka ta i ni, ka ta chauh.." ka taksa hmuntin chu a chûl kual ruai a..

"Lalpa leh..Carlos ka phone dawn khawp mai!" A ti ta a.

Nimin maiah hospital ka chhuahsan chauhva, hmangaihna chen duh viau mah se, naute a ngaihtuah tel ve tho sia, ka khawngaih tawp. Kei ngei pawh tisa châkna avangin ka sa ham ham a nia! Ani mipa ah pawh 'Pa' tak kha a ni miauva, insum a harsat dan tur ka hrethiam ve tlat.

"I phone hun ka ngaichang e.." Uang zeta ka tih chuan a nui ve tawp.

"Ka nupui leh ka fâ in natna an tawrh phah dawn ai chuan ka insum thei e.." A ti ta a.

Dazel Solomos nge nge a duhnaah chuan incontrol thei tak a ni. A mutdan siamremin ka kawngah a kuah a, a áwmah ka bei chial thung. Hetiang hi kan kumkhaw hmandan tur ni se a va'n nuam dawn tak...

End of Chapter-15

Dated: 6th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:34 pm

SOLOMOS BRIDE

by Becky Rafa Renthlei

Chapter-16

Bella Vista, Wool worth Company: Meeting Room 8:45Am.

Dazel Pov*

Ka țhanharh chuan a la hma hle a, ka bulah Briena tui takin a mu sák sâk a. Zinglam dar li chauh a la ni. Dar rukah meeting kan nei dawn a, Roger pawh a rawn thlen veleh company ah tlang nghal turin ka hrilh lawk diam tawh a. Tim leh Briena secretary Lizzy erawh ka ko tel lo.

Ka pa ruahman lawk tawh angin Briena hian sumdawnna lam a khawih ve dawn tawh lova a naupai chhung hi chuan venhimna țha ber dawntir ngei pawh ka tum, amah ka hrilh a nih chuan a rilru a nat mai bâkah min haw hle ang tih ka ring thiam mai! Engang pawhin hrilhfiah tum ila a la naupan em vangin a hriatthiam ka ring lo. Carlos khan a taksa a hah deuh apiangin a chhul lamin a tuar hmasa ber a ti a ni.

Briena chhulah hian pangti chawr insiam tur engemaw zat a la awm a, nau a lo pai hman avangin pahnih chauh kha an paih a, tun bâk hi atan nau pai a rem tawh lo mai thei bawk! Nakinah naute a neih zawh lamah hna te chu a la zawm ve ang chu, ka nupui tan hnathawh angai hauh lova. Ani pawh Larson fanu neihchhun a ni a, sum hmansen loh a nei tho nâin kei ang thova hnathawh nuam ti mi a ni. A hna a thiam hle bawk!

A hma te khan ka lo ngai tlaw ve em em a, amahah hian zahawm rukna riau a awm tlat nia! Kum sawmhnih lekah chuan a thluak a țha par par hle a. Hetia a sam leh a thawmhnaw a thlâk danglam hnu phei hi chuan mipa tan hnar mai mai theih loh khawpa duhthusam a ni. Hmanzana club a akal tih ka hriat te khan ka thinrim hlur a. Mipa ho mit la tak turin a nalh zuai reuhva, a mitmeng paw râm a min melh tawh chuan kuah vawng vawng a châkawm hliah hliah. Huh! Ka bula a mu reng chung pawhin ka lo dream leh veng veng zel!

A hmai chu dimtêin ka chûl a, a mâm hán a, a hnute kawh vah a thawk zawng insêp deuh dat dat chu tawk lo turin ka insûm viau, a muhil lai em em lo khawih te chu a, nakin lawka a pum puar ve âl turte ka mitthla a, ka mipatna zuk kaitho thei a maw le.. tenawm zawk hian!

Khum chu thawhsanin ka intifaia, kan meeting tur hi ka hrilh lo, zingkarah meeting kan nei ngai tlat lova, zawhna chhan sen loh min zawt leh ngei anga, tuna hrilh theih engmah ka nei chuang der dawn si lo. Levis Jean paw duk leh shirt body fit ka ha a, a chungah jumper dum ka ha leh tawp! Business suit ka hâ anih chuan zawhna bawk ka dawng leh ang. Ka nupui hmuiah chuan fawp vang vangin hreh zet hian ka chhuak ta a.

Company building ka thlenin Peterson, security guard chuan gate min lo hawn sak a. Briena car Lexus ka keng ve hmiah. A hma țangin ka khalh hi a phal lo reuh emawni? Uikawm leh lutuk!

Meeting room ah Roger, Simon, Rafael Faulkner kan țhu țhap a. Roger chu ka cousin Briena aiawhtu tur a ni, Simon ve thung hi best designer kan company in kan chhawr mek designing block enkawltu a nia. Rafael Faulkner erawh England, London a electronic company neitu a ni a, tuna wool factory lama sum invest tu a ni bawk. Kan inrual chiah a, kan ințhianțha hle bawk. Ka nupui neihdan chanchin ka hrilh awmchhun a nia. Briena a hmu châk hle! Nupui a la nei lo tih kan sawi tel hrâm ange..

"Dazel, i nupui hian a ai ka awh tih a hriat hunah engtin nge i chhan ang le..?" Roger țawng thawmah ka ngaihtuahna ațangin ka harh hlawl.

"Chuvanga chawlh la ka ni reng a, engtin nge ka hrilhfiah ang ka hre lo a ni, a natna chungcháng hi ka hrilh thei bawk si lo." Ka thaw hawk a.

"Thlathum hnuah rawn zawm leh tum ta se?" Rafael a chuan a rawn ti ve bauh a. "Thlathum a ral chuan a rilru pawh ka hmin ve deuh mahna.." inringtawk chiah lo hian ka ti a. "Tuna in bridal list leh mokawr design kha engtik nge in zawh theih ang? Simon ka zawh chuan, "Madam hian in lamah tlemtal chhunzawm thei se chuan kan zo ang." Min chhandan avang chuan ka ner sawk a.

Teuh lo lutuk hna lam hrim hrim khawih ka phal tawh lo, nitin keimahin ka awmpui rih ang. Chumi duh vanga Roger pawh chah hial ka nia. A lang erawh chuan, "Buaipui thei tur midang lo zawng mai rawh," Simon chu a nui vur vur a. Briena a ngaisang lutuk hi ka ngei lek lek zel.

Company kalphung tur leh bridal show a mokawr ha tu tur model kan thlan fel hnu chuan meeting kan ti tawp ta a. Simon a haw hmasa ber a, "Zaninah ka apartment-ah dinner kan kil ho dawn em niang?" Rafael leh Roger lam hawia ka tih chuan, "'Solomos gold son' nupui chu ka hmu châk khawp mai, kan hmuh i phal ve êm ang chu.." Rafaela'n nui tut tut chunga a tih chuan za vak lo hian ka țhen suk a. "Min chuhpui duhna rilru in put dawn lo te chuan.."

"I nupui, thlalâk ka hmuh hnuhnun ber kha chuan a tarmit a lian țha khawp mai." Roger an a tih chuan ka nui lo thei lo. "Briena Tarmitliani," a ti zui leh a. A bânah hnek zauh pahin, "I hmuh hunah inthunun nasa hle ang che." Kan nui ham ham a. An tum angin an hmu dawn si lo a, an hmel awmdan tur ka hre châk!

Apartment Plus S

Phone vibrate ri chur chur ka hriat chuan peih lo zetin ka meng chhuak a. Khum bul dawhkana ka phone dah chu banin, "Yes," ka âw chu leh..

"Brie, i la tho nange?" Dazel âw ka hriat chuan a mutna lam ka en vat, a ruak huai! Tinge min kaihthawh loh le..?

"Umn tho lo..khawnge i awm a?" Chawlh ala ve in ka hre sia!

"Ka chhuak lawk, tunah tho la breakfast ei a hun a nia," thupe aw deuh taka a tih chuan, "Ka lo nghak dawn che em?" Ka ti ve mai a.

"Ka la rei deuh ang min lo nghak duh suh," a tih chuan ka tûm deuh bâr a. Tun angah khawnge maw a kal le?

"Ka dah a nia," Phone ka off zui nghal hmak a. Min kaihthawh ve mai țhin tur a nia, ka ti sap a.

Tukin chu breakfast room ah ka chhuk ve teh ang, ka bân pawh a ziaawm tawh viau a, room a tawm ngawt ngawt chu a ninawm emai!

"Brie, lo chhoh ka tum chiah a," dawhkana eitur chhawp mawlh mawlh paha Joanna'n a tih chuan, "Dazel, khawnge?''

"Tukin chu a chhuah lai ka hre miah lo," makti hmel a pu deuh! A va'n chhuak hma awm em em Joanna rawn thlen hmain a kal tawh tihna a nia, Lalpa leh..Keimahin apartment ah min hnutchhiah a maw? Ka thinrim leh hnuhnuh viau. Ka hmaa eitur inchhawp chu ka ei tawn tawn a.

"Khati khan ei vak țhin suh," Dazel rawn lut chu ka en duh miah lova. Pastries ka hmawm leh tur chiah chu, "A tawk tawh, Briena, tinge thinrimna i nei mi," ka fork ken chu min dahthlak sak nghal a. Ka la eichâk asin le..

''Joanna, ka ei ve rih lo mai ang," tihpahin ka țhutna ațang chuan min pawm tho nawlh a. Living room sofa ah min nghat thla ta chauh a.

"Room ah ka chho duh.." ka tih chuan, "I chho em em ang, thinrimna i neih chuan tunah sawi rawh," a ti thum chhak a. Ka thinrim tih a hre ringawt a mawni le..?

"Chutiang engmah a awm lo,"

"Briena min bum tum teh suh, khatianga thil i ei vak vak tawh chuan lungawi lohna engemaw i nei tihna!" Min hrechiang tawh mah mah a ni, ka kûn tlat a, ka sawi awm lo e, ka thinrimna chhan kha ka ngaihtuah chianga a ho viau ka ti leh lawi si! Ka thawh hmain kal mah se min lo call thova, â ka pangchang zo vek tawh.

"Ka thinrim hleinem," țha tê hian ka ti ta a. "Ka thawhsan vang che kha a ni tiraw?"

"Umn..aih.." nuam ka ti ta viau lo, vawikhat lek min thawhsan dêk dêk a, ka titau nghal a nia! Min nuihzat ngawt ang.

"I mutui êm a ka kai tho duh ta lo che nih kha, Roger leh Rafael te ka va hmu lawk a," a ti awlsam mai a.

"Tunge Rafael chu..?" Ka hriat ngai pawh ka hre lo! "Ka țhianpa mawle, hawh teh inchungah chho teh ang, rei deuh țhut kha i taksa tân a țha lo tih ka lo theihnghilh hman alawm," Zo zetin min pawm leh nawlh a kan pindan lam panin a pên chho páwk páwk a. Hah hmel pawh a pu chuang lo.

Khumah min muttir hnu chuan a jumper phehlin a rawn lawn ve nghal a. "I thawmhnaw i thlâk dawn lo mi?" Dar san âk chung hian, "Dawn nang, ka nupui in min hlihsak ka phût," a nui suk a. "Ka kut a nâ.." lai zetin ka hmui ka seh teh ngawt a.

"A dam tih ka hre ve chiang e, le..ka kekawr ațangin țan ang aw.." a shirt hâk lai chu aman a phelh leh a, ka kut chu lain a kawnghren chu min vawntir ta a. Va'n sual kher kher tak. "I zak deuh a mi? Tun ațang chuan ka lo haw apiangin ka thawmhnaw min phelhsak tawh ang," a la ti tak deuh deuh va.

A kawnghren buckle chu ka phelh a, a kekawr ka hlihthlâk dawn chuan ka maimitchhing daih. A nui hawk a, "Ngaiah i nei thei thlâwt lo a ni tiraw?"

"Ngaia nei tur chuan a la rei lo ve êm a ni," boxer a lo la ha ve tal alawm le..a bawp thahrui ngah hmel tak leh sei thlurh chu hmulin a bawh deuh chiai a. A ketin fai țháh leh var sar chu hmuh a nuam hle.

"Tunah chuan inhriatchianna hun kan ngah tawh bawk a, ka taksa engkim hi hrechiang turin ka duh che," ka kut chu lain a mipatna chu min tawhtir ta a. Ka kut lâk lêt tumin ka țang deuh țun a, a vuan nghet tulh tulh thung!

"Ka nupui zak hmel hmai sen țawn țawn hi ka en ning ngai lovang," a kut lehlam chuan ka biangah a chûl zui zat a, "Dazel, engemaw i hriat le..?" Tukin a awmdan chimawm ru zet hi a chhan ka hre lo.

"Ti hian nitin i kiangah ka mu ve mai dawn a ni," a âwmah min beitirin ka chhip chu a hmuiin a nûl nâ nâ a. "Chawlh chu i la tak tak a mi?" Ka la awih chiah loh avanga zawt nawn leh kher ka nia.

"La chiang e, boss nupa in chawlh an duh chuan an chawl mai tur a ni." A nui suk a. Nuam ti em em niawm tak hian a mitmeng a de sar. Min thlakhlelhna lo lang ka hmuh chuan a khabe ah ka fawp zauh a.

"Company in hniam lam a pan loh hram ka beisei," fiamthu deuhva ka tih chuan, "In lamah ka thawk dawn tho alawm, lungngai suh Brie, engmah buaina tur a awm lo." Nghet charh hian a ti ta a. Ka thla a muang huai huai mai.

"Mutthilh tum ang, tukin ka tho hma lutuka, ka chau," a tih chuan a kalna zawh ka duh deuh ut ut a, mahse, min hrilh lem loh avangin ka zawt ta chuang lo. Rei lotê ah a muhil ta thuai a, a mutthilh laia a hmel landan chu ngun zet hian ka thlir ta a.

A hnarngul sang vah leh a khabe ruh kual nghet charh te, a mithmul buk dum hlap chu a inhmeh hliah hliah a. Hmeichhia duh duh thing thei kha a nia, kum sawmthumpahnih chhung nupui nei lova a awm hnuah a nu leh pa vangin kan innei ta chu a nia, contract a zawh hunah engtin nge kan awm ang le..?

Ani chuan hmeichhe dang nalh leh hausa tak tak a nei leh mai anga, Natalie pawh tiamin, kei erawh chuan tumah ka neihsan theiin ka ring lo. Ka nun a mipa ka tawn hmasak ber leh a tawpna tur a ni bawk tih ka hre sa vek a ni. Amah vang hian ka la na ngawih ngawih dawn tih ka hria, ka fâ vang tal pawh hian kan chêndun chhung tal hi chu hlimtaka awm ka duh a ni.

Dazel nen ințhen tur anga ka ngaihtuah ringawt pawhin ka mittui a hnâm sawk thei. Ka pa, natna in tlâkbuak lo se la chuan he mipa hi engtikahmah ka pasal a ni dawn si lo a, Natalie nau neih a hnai tawh hle a, DNA test tal tih ve tur a nia. Nakinah sawipui ve chhin ila a țha ang.

Rilru vâkkual ruai chungin ka maimitchhing ve ta țâwk a.
*
*
Ka hmuia hmui lum thar tharin min rawn fawh chuan ka che hrat a. Hnai tawkah Dazel an min lo en reng. "Lunch ei hun a ni tawh a nia, inti harh rawh le.." min kai tho nghal a, "Ka va'n chhuk peih loh tak." Ka tih chuan, "Room-ah ei mai ang, ka zuk lâk sak ang che." A tho vut a, a chhuak zui nghal daih a.

Ti hian keimah vangin a chawl a, housekeeper kan nei reng chung pawhin min buaipui ta zak zak chu a nia, ka lawm rualin ka inthlahrung ve deuh. Dazel lo chhoh leh hnu chuan muangchangin lunch kan ei dun ta a.

"Evening gown hâktur i nei em?" min zawhna teh daih chu, ka thil ei ka phuh țep alawm. "Ngatan nge i tih a?"

"Zaninah Roger leh Rafael ten dinner an rawn ei dawn a, nalh taka lang turin ka duh che.." Min zahpui deuh tihna mi le..?

"Ka neih pawh ka hre lo, kawrfual pangai chu ka nei ve chiang a.." han fiam hlak ka châk tlat! Gown te zawng ka nei ve chiang e, Paris ațanga Malina rawn hawn pawh hâk li lai ka nei.

"I srcretary phone la.." a ti sup a. Nge maw ka hâkturah alo buai ve em em a ni. "A ngai lo ang, chutianga inchei chhan tur ka nei lo e.." ka tih chuan, a lawm hmel vak loh.

"Ka țhianțha ber hmuhah nalh thei ang bera lang turin ka duh mai che a nia," tihpahin a plate chu a dah sawn a. Rafaela pawh chu ava ngaipawimawh awm ve maw le..!

"Ka lo tum ang," ka ti sap a.

"Lizzy emaw Malina pawh i la chah thei reng a nia," a ti leh a. "A ngai lo ka tih chu, ka hâktur chu ka nei ve tho." Ka duh aiin ka vin mah mah. Dazel hian vawikhatmah ka thawmhnaw chungchang a la sawi ngai lova, tuna taka a ngaipawimawh ta viau hi ka hrethiam vak lo.

"A nih leh le..țawngkam engemaw a ka țhianpain a fiam che pawhin min dem suh ang che." A ti nghut a. Roger leh Rafael chu engang mi chiah nge maw an nih le? Dazel hian amah an hmuh hniam a duh lo phawt tihna a nia!

"Study room-ah reilote hna kan thawk lawk ange," Min en miah lova a tih chuan ka nuih a za ru hle a, a upat ve tawh tehreng nen hotêah a titau leh ta niang!

"Min chhuahsan pawh chu i va châk awm ve?" Tinge ka cho âr zel mai le? "I ngaihdan dan le," ti hmukin a chhuak zui nghal hmak.

Dazel Solomos lo titau ve phawt mai teh, zanin hian i nupui hi engang chiaha nalh nge a nih i lo en dawn nia. Keimahin ka nui var var a. Thildang tih tur dap a ngai ta lo, uluk zetin ka inbual hmasa ta phawt, ka sam pawh ka su nghal law law a. Bathroom ka chhuahsanin tlailam dar thum a ri tawh a, Dazel inthlâk tura a rawn luh lai chuan ka sam ka lo chhêm ro mêk a.

"Ka intihfai chhungin ka hâk tur lo thlang rawh le," Peih lo zeta sawi niawm zawk tak a ni. "I thawm hnaw hlihsak lam tê.." ka duat ve thiam chiang e mai. "Huh! Min fiam kual ziah suh Briena!" Ka lam panin a rawn kal ta thova. Ka bulah rawn dingin, "Ka inpeih reng," a ti thum ta chhak a.

A thinrim deuh vang khan ka'n runluih deuh kha a nia. Ka chêt tâk lawk lohah chuan, "I ngam ka ring lo reng a ni," a inher vut a, bathroom lamah a kal hmak. I duh chen chen tikhan lo awm phawt teh ka ti rilru a. A wardrobe chu hawngin a hâktur ka zawng țan ta a. A tawpah dinner suit cream rawng chu ka dahchhuah sak ta a.

Bathroom ațanga a rawn chhuah hnu pawh chuan min be lêm lovin whisky a inthlit a. Ka ngaihven duh bik der lo, ka hmai ka chei mawlh mawlh a, ka mit ka hnawih lai chuan, "I thawmhnaw neih zinga a țha ber leh i inhmeh ber ha ang che," A la rawn ti hrâm. Chhang buai duh lovin ka mit ka hnawih chhunzawm mawlh mawlh a.

A thawmhnaw ka thlansak chu a inbel nghal a. A sawisel lem lo.

"Hmanhmawh angai hran lo a, inhnuaiah ka lo nghak an che." A chhuak zui nghal hmak. Hepa tak hi chu.

Living room:

Sofa-ah intur dawmin ka țhu ran a, Briena luhlul lutuk hi a manganthlak ka ti! A tana țha tur ka sawi tam poh leh keimah ka nâ zawk zel.

Zanin pawh ka țhiante hmâa mawi lo taka a lan ka duh loh vangin ka hrilh thlap a. Kei chuan eng thawmhnaw pawh ha se pawi tihna ka nei miah lo va, Briena a nih chhung hi chuan ka duh a ni mai. Mahse, Rafael an contract hmanga ka neih ka nupui hi tham lo takin a țawngkhum ka hlau a ni. Nupui neiturah min ngai ngai lova, amah pawhin a ngaihsak hek lo. Faulkner electronics company neitu a ni a. Kei ang bawk a duh duh hmeichhia thing thei kha a ni miauva..!

Ka nupui hmuh a châk zek zek tih ka hria, mihausa fanu duatsual hmelțha lem lo hausa ringawt ni turah a ngai a, a thlalâk a hmuh khan a nui nghek a nih kha. Briena tarmit nena a mu lai thlalâk ka phone ami a hmu pek a. Min nuihzat hle kha a nia. 'I nupui chu ran doctor a nih duh hmel' a țawngkam kha ka theihnghilh thei lo, Briena'n tarmit a bun lai kha ka hrechhuak ve ziah. Nalh zawk zawk chu a ni bik lo alawm.

"Khawnge i nupui chu?" Rafaela lo lut chuan a ti nghal pang a.

"Ka nupui i hmuh hunah țawngkam mawi lo hmang miah suh." Tiin ka vau lawk hmiah. Chuti nih loh chuan Briena thin tertek a chhuak leh mai ang. Pawisak a nei mang reuh si lo. "Intur enge i duh?" Roger a lo la thlen ve loh avangin Briena koh pawh ka tum lem lo va.

"Whisky ngat le.., i nupui min thlitsak ka nghak lo mai ang," Chimawm zet hian a nui a. A mizia ve reng a nia, ka țhianțha ber chu ni lo se a khawsak phung hi ka ngei ngawtin ka ring.

Intur kan dawm laiin Roger pawh a lo thleng ve ta a. Ka apartment chhunga hawikual thuak thuak pahin, "Khawnge Briena?" A ni pawh chuan ka nupui a lam hmasa ber tho.

"Ka nupui ni lovin, keimah hian a nia dinner eitura sawm che u." Ka tih chuan an nui țhaw a. "Zanin chu kan inang lo leh hle a ni, ka girlfriend ka lo hruai ve lova.." Rafael an a tih chuan kan nui ham ham a. Briena pawh chu ava'n rawn chhuk har ve maw le..?

Roger chuan intur a dawm ve nghal bawk a. Darkar chanve lai kan țhut hnu pawhin Briena a lo la chhuk ta lo fo! Ani hi a nuam lo leh deuh em niang? Vawiin a ka awmkhum dan kha a mawi chiah lo tih ka hre tho a. Mahse, ka thu a zawm hreh lutuk hi ka ngaithei țhin lo. Inhau reng ka duh loh vangin ka dawh ve hram hram a, bâkah rilru hahdam a mamawh bawk si.

"Dazel, ka hmanhmawh riau va," Roger an a tih chuan, "Briena ka han ko ange," Ka țhutna ațanga thawh ka tum chiah chu pen ri ka hriat vangin chu lam chu ka hawi ta a. Rafael leh Roger pawn step lam chu an en chho ve tho va, tumah kan țawng lo!

God..ka nupui landan zet chu! Chil ka lem khalh!

Evening gown hring nghalh a taksa rem zaih a țhui a ha a. A kawrâwm zau lam hret ațanga a hnute rawn lang phir deuh țhaih chu a nalh phian. A kawng fêk nalh zet chu a kawr hnunga suihna awm chuan a ti lang chiang zual a, amah a sâng țhain a nalh zuih bawk si! Make up nasa vak lo in a inhnawih a, a sam buang sei kawi deuh niai chu a dar vei lamah a huiliam a. Hetiang thawmhnaw há hian ka la hmu ngai lo a nalh takzet.

Living room a rawn thlen chuan, "Hi, Roger, Mr.Faulkner, Briena ka nia," Nui sângin an pahnih chuan a en a. Rafael chuan ngun zetin ka nupui chu a en chhuak leh dap, zâm map lo hian Briena pawn a en lêt ve kalh. An intumtawk viau dawn e.

"Ka hmu che chu ka lawm khawp mai, Rafa tiin min ko thei ang." Inla zei zet a a kut phar chhuah chu Briena chuan a lo vuan ve vat a. Roger erawh in engmah a sawi ve lo. Mit khap miah lovin Briena chu a en reng a.

He mite pahnih hi hrechiang hle lo ila chuan ka nupui hi an duh emaw ka ti ngei ang. Tenawm dun lutuk țhutna chang pawh an hre lo.

"Duhtak, cocktail tal ka in ve thei angem?" Ka lam rawn pan paha Briena'n a tih chuan ka nui suk. 'Duhtak' tiin min han ko ngei a! Rafaela lo siai zauh chu ka hmu hman.

Ka nupui ngaihsan hmel taka an en leh zauh țhin ka hmuh chuan ka lo chhuang ve nghal em em ringawt. A bikin Rafael chu a ni leh zual.

"I nupui hian a hrechiang meuh che maw Dazel?" Chimawm zeta rawn titu chu Roger a ni ve thung. A nui duh țhak lo lehnghal a!

Zanin chu a nuam dawn e, hun hlimawm tak kan hman ngei ka beisei.

End of Chapter 16
Dated: 7th January 2018

NOTE
Min lo chhiarchhuahsak hram turin ka ngen a che u.

Ka ziah tirh ber aţanga min lo hlutpui a, min chhiarsak char char ţhintute hi ka tan in va hlu em! Ngaihnawm vak lo pawh ni se, kei chuan ka thuziak te hi ka ngâihlu ve em em. Mite ziak tluk zo lo mah se ka ngaihtuahna zawng zawng senga ka phuah hnuah ka ziah zawh tawh hi uluk takin ka edit leh a, ka hre bel in a thu hi ka chiang em em ţhin.

Ka ngen duh che u chu ka post hmasa ber aţanga tuna ka post tur thlenga ka ţawngkam bungrua te, ka pianpui ţawngkau chheh te hi min chhinchhiah nan lo hmang ula, ka hming lang lo pawha ka ziak a ni tih in lo hriattheih hi ka duh a ni. Țawngkam ka thiam loh a leiah a bung nghut țhin tih ka hria a, hei aia chhiar nuam deuh a nih theih nan theihtawp ka chhuah zel bawk e.

Ka story min chhiarsaktu leh min nghak țang țang țhintute chungah ka thinglung takin lawmthu ka sawi e.

©<++++[BeckirafARenthleI]++++>®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:35 pm

SOLOMOS BRIDE

by Becky Rafa Renthlei

Chapter-17

Apartment plus S. Dining Room

Intur kan dawm zawh hnuah dining room lam panin kan phei ta dial a. Briena ka bulah țhuin Rafael leh Roger kan ep chiahah an țhu thung a. Rafaela mit nghal zet chuan Briena a thlêk leh vung vung lai ka hmuh chuan ka nui suk a.

Diktak chuan hmeichhe lam hi a ngaihsak tehchiam lova, tlém lai deuh khan actress kawp ngheh ve deuh a nei a. Mahse, a hmeichhia khan mipa dang a kawpsan leh avangin an ințhen ta kha a nia. Ani ang mipa chapo lutuk te chuan kawp nih a duh țhak lo.

"Brie, sangha hi ei ve chhin ta che," Briena plate-ah sangha ka suah sak a. "Induat vel viau lo teh u, mit inti kham palh ange," Roger chu a nui vur vur a. "Ei mai mai teh u, naute kan neih hunah God father ah ințang lo tawp mai ang," Rafaela kher ka va melh a. "Briena hi a rai maw?" Briena awm lo ang hmiaha ngaiin Rafaela chuan a ti a, ka chhan hmain Brie zawk chuan, "Umn..ka pai ve țawk chu a nia lawm, nupui neih lam te hi Rafa..?" Rafaela hming a lam dan te chu a dik thlarh.

"Ka la hmanhmawh lo khawp mai, Dazel hian min neih khalh thawt thawt a." Hepa over zia hi contract chungchang ka hrilh kha a sawi chhuak a nih vaih chuan!

Briena chuan a dan ngaitê bawkin a ei hnem leh hle a, an pahnih chuan inmelhin an nuih azat hmel viau, ani lah chuan engahmah ngailo niawmtak hian salad te chu a hmawm tan tan a. "Khatianga tam i ei chunga i la nalh viau kha mak ka ti!" Roger an makti hmel tak tak hian a thil ei lai ngaihsak miah lovin Briena chu a en a.

"Ka fâ, kei leh ka pasal ka ei kêp vek," a biang tai deuh hlar chuan a zak a ni tih a tilang a. Mahse, zak angin a lang duh miah lo thung. Hei tak hi ka nupui țhatna chu a ni. Englai mai pawh hian a confi em em reng mai zel a nia.

"I nupui ang hi ka duh ve," Rafaela thilsawi dan tehtawp chu! Briena chu a nui hak hak a. "Inbula ka țhut ve reng zawngin induh ang pawh insawi thei dawn hleinem, min lo hrethiam ula, ka inthiarfihlim san mai ang che u." Ka țhiante pahnih lamhawia Briena'n a tih chuan ka pawm thlap. Kan bula a awm ve reng zawngin he mite pahnih hian min ngaihsak lo reng reng, ka nupui biak an inchuh a ni ringawt lawm!

"Ni bik lo ve, Brie, i awm ve khan a nuam alawm!" Ka rindan chiah, Roger an Briena kal tur chu a ti ding leh rih a. "Bro, i hriat kha rei tak doctorin țhut a remti lova, chawl hahdam tawh rawh se," Ka tih chuan chimawm zetin an nui a. "I nupui chu i hauh ve hle mai maw? Kan chhuhsak lovang che.." Nui suk chung a Rafaela'n a tih chuan ka nui duh miah lo a.

"Hawh le..ka hruai chho ang che," Briena inrin hma chuan ka pawm nawlh a kan pindan lam ka panpui ta a. Amaha chhohtir tum ka ni reng a, ka țhiante awm laia han duat vel kha ka duh leh deuh tlat. Kei pawh hi a..nitin hian ka danglam zel zawng a nih hi!

"Lo muhil lo la," chhuata dintir paha ka tih chuan min en há a. "Ka hre lo le."

"Mu hahdam la ka rawn zawm ve vat ang che," a hmuia ka fawh vang vang hnu chuan ka chhuahsan leh ta a. Englai pawha a bula awm ka thlahlel reng mai hi mak ka inti! Hmeichhia ka thinlung tawk hmasa ber leh ka nunphung tidanglamtu awm chhun a ni.

Living room ka thlen thlâk chuan Rafaela chauh ka hmu a. "Khawnge Roger..?"

"Thil hmanhmawhthlakah an rawn ko a, a kal ta nih kha." Engthil nge mawni le? Vawiinah a rawn thleng chauh a, min mangțha lova a chhuak ngawt chu mak ka ti deuh.

"Intur kan dawm leh dawm em niang?" Ka tih chuan a bu nghut a. Engemawtak ngaihtuah hmel a pu!

"Kan dinner chu nuam i ti vak nange?" Whisky no ka pe nghal a.

"I nupui kha Briena Larson, contract hmanga i neih kha a ni tak tak em?"

"Rafa, enge sawi i tum chiah?" Inchung lam chu ka melh zauh a. Briena a lo tho êm lo'ng chu. Kan thusawi hi a hria a nih chuan a lawm hauh lovang.

"I nupui kha i hmangaih hle a ni tiraw?"

"Ka hre lo," ka sam ka tuai puat a. "I nupui khan a hmangaih che in ka hria, Dazel, i vannei takzet a ni." A ti sup a.

"Huh!' Nang khan hmangaihna chungchang enge hriat i neih ve?" Rafaela melh ngur chunga ka tih chuan a dar a san awk a. "Hmangaih ka nei lo nâin, nupa inhmangaihte erawh chu ka hmu thiam ve." A ti khauhva. "Briena hi ka duh tih ka pha lo mah se ka nunah hmangaih ka la tawn ngai loh miau avangin, ka hrethiam ve lo ve! Tuna a chunga ka rilru putdan hi hmangaihna a nih chuan ka hmangaih tihna nih chu.." Za vak lo hian ka nui hawk a.

"I nupui hi thlauhthla ngai suh. Khatianga min entu tur hmeichhia tawng ve ngat ila chuan nupui ka nei ngam." A rui țawng mah ni se Briena a ngaihsan zia a âw ațangin ka hre thei tho.

"I rui tawh a nih kha, zanin chu hetah riak ve la.." ka tih chuan, "Pawi hleinem car khalh turin ka rui mah mah." A țhutna ațang chuan nghet vak lovin a rawn ding chhuak a. A no ken lai chu dahthlaksakin mikhual pindan lamah ka hruai ta a. Tiang hian a rui ngai miah lo a nia! Engemawtak tibuaitu a neih ngei ka ring. Naktuk lamah ka la zawt ang chu..

Rafaela ka kalsan hnu chuan kan roomah ka lut ve ta chauh a, Briena chu khum lu ngheng hian a țhu âwn diai a. A phone bihin a lo nui hak hak a, ka pen thawm pawh a hre țhak lo.

"Ka thawmhnaw hi min hlihsak dawn em?" Ka biak thut avang chuan a phu zawk a.

"Ah..i lo luh lai ka hre miah lo.." a phone dahin khum ațang chuan a rawn thova. Mutkawr dum sexy zet a hâk chuan a tilang itawm zual a. Ka dinna bulah chuan rawn dingin, "Lo kal la," ka kutah vuanin khum lamah min kai phei a, a tih ang ang chuan ka awm ve tawp.

Khumah min țhuttir a, kun hniamin ka pheikhawk leh mawza chu a phelh phawt a, chutiang zelin ka thawmhnaw inbel chu a hlip ta vek a. Kekawrte nen chauh ka awm ta, thaw huai chunga rawn ding chhuakin, "Kan naute a len hunah i pheikhawk phelh turin ka kun hniam thei dawn tawh miah lo a nia. Dazel Solomos," a nui hmel han țhat zia chu..!

Insum ka lo tum ve na zawng zawng pawh a bo duak nia, rang zet hian ka lamah pawt hnaiin, "Kan naute," ka ti nawn sup a. Ka malchungah ka țhuttir a, a hmui sen no chekah chuan ka fawp leh ta nge nge a. A taksa mâm han mai chu ka chûl ruai a. Bra pawh a ha lo. Ka kut lawnga a âwmbawr chu khawihin tisa châkna avanga a mitmeng paw râm de deuh sar chuan phurna nasa tak min siam a.

"Dazel...?"

"Khawngaihin min hnial suh," khumah chuan ka muttir a, a chungah ka pakai zui zat a.

"Brie, i nalh takzet," A mutkawr chu hlihsakin under wear nen chauh chuan a mu ta a. A mal sei thlarh chuan min kherh nghal chial a ka nui hawk, a hmuiah bawk chuan fawp lehin uar theihtawpin kan infawp ta a. Ka kut pawh a awm mai mai lo. A taksá rem lai lai chu ka chûl lawr dan dan a, a kut tetakte chuan ka hnungzángah a chûl ve riak riak a, min tawhna ringawt pawh chuan phurna nasa tak min siam thei nia!

Fawp reng chung chuan kan thawmhnaw la inbel awmchhun chu ka hlip pah a. Kan taksa lawng a indeh tâk vanga ka mipatna rawn tho chu thununun theih a ni ta lo. A kapkarah chuan tlazepin ka insiamrem hlek a.

"Dazel, naute..."

"Hrep tak hian..Brie, ka inthunun thei kherin ka ring tawh lo." Diktakin ka chhâng a.

"Mahse..."

"Khawngaihin, ka tina hauh lo ang che," tih sup pahin kan taksa chu a inzawm ta a. Ka nupui mitah tak chuan enin duhthawh leh dim tak siin ka che chhunzawm ta a. Nawmna vawrtawp kan inpek tawn hnu chuan thaw dap dap chung hian kan mu ta hle hle a.

"Naute, tan a pawi loh hrâm ka beisei," A sam hui kiansak paha ka tih chuan a nui hak a. "Pawi pawh nise, i insum zo miau si lova..." mitmeng kal ralha a tih chuan ka run deuh. Huat thám ni mang si lo, chimawm ru zeta țawng hi a thiam zêk a. Ka dang leh nge nge țhin!

"Dazel..?"

"Muhil tawh rawh le..i chau lutuk ang." A kawngah kuahin ka bawp lehlam chuan ka khan chial a, engmah a sawi ta bik lo. Carlos ka biak a ngai takzet tawh a ni, ka nupui hmangaihna chenpui ka duh fo dawn a, naute tân a pawi thei angem tih a rang lama ka hriat ngai a ni.

Briena muhil thaw sâk sâk ri chu ka ngaithla reng a. A duhnaah a chimawm thiam viau rualin lehlamah min duat viau lawi si. Hmangaihna chendun kawngah pawh ka rinphák bákin a thiam chak a, engkim hi a tan chuan thilthar a nia, mahse a tihtura a tlâk chuan țha takin a hlen chhuak zel zawng a ni hi..Rafaela khan a lo sawi dik a ni. Ani tluk tur hmeichhia hi ka tawng leh tawhin ka ring lo.

Rafaela ka ngaihtuah thlen tâkah chuan zanin a ruih dan em em kha! Briena kha a ngaihven hle a nih kha. A lo duh ru reng te hi a ni lo maw! Huh! Ka ngaihtuah dan hi a dik miah lo..Mahse, a țhian hnaite chauhvin a kan kohna țhin 'Rafa' tih kha Briena a hrilh tlat! Ka nupui chu ni lo se, a che chhuak duh maithei a ni. Roger lah kha chhan sawitur mumal awm lovin a chhuak nulh a. Ka unaupa mah ni se a ti ang lo chu ka ti deuh! Min lo nghah chhuah ve tal tur a nia!

Chutia ka inngaihtuah kual chiam hnu engemaw tak hian min mawlh a, ka muhil thei der lo. Bathroom-ah lutin ka intifai a, intur ka dawm leh ta nge nge a.

Dawhkana ka phone dah a rik chuan rang zetin la turin ka kal nghal a. Tunang hunah tunge min rawn biak tum? Sreen-a hming rawn lang ka hmuh chuan a ngaihna ka hre lo deuh. Roger a ni!

"Hello..." Briena tih harh hlau zetin ka chhang a.

"Dazel, RNSH, hospital ah rawn kal rawh, Natalie an zai dawn." Teh tawp a, ka chhan hmain phone a off daih a, zantir lama a haw daih chhan kha hei vang hi a ni maw? Engtin nge ka tih tâk ang? Ka fâ a ni lo ti ngawt mahila, a pa ah min puh tlat sia, naute pa ka nih theihna chance a sang ve tho.

Briena muhil chu ka en leh a, a thinrim dawn tih ka hre lawk vek. Tukverh bulah dingin thawk ka la hawk a. Aparment ah amah chauhva hnutchhiah a duh lo tih kha a sawi ngun viau kha a nia. Enge tih hmasak ber tur pawh ka hre lo.

Ka phone a rik leh tâkah chuan hlauthawng ru zetin ka en a, Natalie a ni tlat!

"Dazel, i rawn thleng dawn tawh em?" A âw chauh hmel tak ka hriat chuan ka kal ngei dawn tih ka hre mai. "Umn..ka rawn chhuak dawn chiah,"

"Khawngaihin lo hmanhmawh rawh aw," tuemaw hian phone chu an lâksak ni ngei tur a ni. A țawng pawh ka hre thei ta lo.

Thawmhnaw ka inbel zung zung a, pheikhawk ka bun lai mekin,"Dazel..?" Briena thophang aw ri ka hriat chuan ka dâk chhuak vat a. Khumah ruak vekin a la mu a, a kawng achin hnuailam puanin a khuh a. Chunglam erawh aruak kâng thung. Ka chezia chu ngawi rengin a en a. "Dazel, khawnge i kal dawn?" A âw a hlauhthawnna lo lang chhuak chu ka man vat.

"Brie, mu leh rawh, chhuah lawk ka ngai a.." Engtin nge Natalie chungchang ka hrilh theih ang.

"Khawnge i kal dawn ka ti reng alawm..!? Ngaihdan ni vak lo chungin a ti leh a.

"Natalie an zai dawn..!"

"Maw!" A vin nghal hlar a. Ka inthiam hlawl lo. Mahse, Sidney ah hian Natalie hian chhungkua sawitur a nei lo tih hretu ka ni a, bâkah an zai chhung tal awm ve hi ka mawhphurhnaah ka ngai ve tlat. A chanchin ka chhui lah hriat mai tur a awm bawk si lo.

"Brie, khawngaihin hriatthiam tum hram rawh ka rei lo ang," ka ti tak nâin ka awm chin tur ka hre miah lo.

"Keimahin he inah hian min kalsan i tum a!?" A vin tawh hauh lova, a mitmeng thim khap ațang chuan a thinrim hle tih ka hria, 'No' engtin nge ka'n hrilhfiah ang le? Ka phone lah chu a ri sek a.

"Ka lo kir vat ang, nangmahin i awm dawn hleinem, mikhual pindanah Rafaela a riak a, engmah hlauhthawn tur a awm lo." Rafaela ka lo riahtir chu ka lawm hnuhnawh ta khawp mai.

"Rafaela chu ka pasal a ni hleinem..!" A ti khauh a. Chhan mai dan tur ka hre leh pek lo.

"Thinrim lo hrâm rawh, nakinah ka la hrilhfiah ang che," kal tum chuan ka ding uaih a. "I fâ a nih si loh chuan i kal kher a ngai a mi?" Ka mitah chiangtakin min en kalh a. A khap eih lo, rilru natna te, awih theih lohna leh maktihna a mitmenga lang zut zut ka hmuh chuan hrehawm ka ti hle a, lehlamah Natalie a ngaihtuahawm bawk si! Briena chu ka nupui a ni a, a kiangah ka chêng reng thei zawk alawm, Natalie erawh an zai chhung chauh tal ka awmpui tur a ni.

Ka jacket ka hâk lai chuan tîm map lo hian ruakin ka lam arawn pan a, hundang chu ni se, maktiin ka nui ngei ang. Mahse, tuna a landanah hi chuan hmeichhe luhlul tak, kan inhriattirh laia Briena Larson chapo leh induhtawk zet hmel kha a pu leh tawh a. Min kal pelin wardrobe a, a thawmhnaw chu lain a inbel mawlh mawlh a.

"Mu leh rawh, a la hma asin," enge a tih dawn tih ka hriat loh vanga sawi ka ni.

"Ni lo ve, i rualin ka lo kal ve dawn.." a ti chang fak a. Eng rilru nge maw a put leh tâk ni!

"Teuh lo, doctor in motor chuan a phal loh kha, ka rei lovang," ka tih chuan a thawmhnaw a ha fel der tawh.

"I fâ chu eng ang hmel nge tih tal hriat ka phû ve a ni, nupui thikthu chhe zet nih ka tum lo a nia." A purse a dap rak rak a.

"I lo kal ka remti lo, min hnial suh, doc.." ka sawi zawh hma hmain kawngkhar chu a hawng a, a chhuak nghal hmak. Henu luhlul dan em em hi chu, dam țha se chuan min zui ka rem ti ngei ang, Carlos khan motor chuantir rih lo turin min chah thlap a. Motor chuan chu sawi loh hmangaihna chendun pawh a tan a țha lo ang tih hlauhthawnna in ka khat kha ania.

Ka hruai ve thei lovang, ka umzui vat a nih loh chuan a car kengin a chhuak leh duh hialin ka ring! Luhlul bawk si!

Hmanhmawh takin pindan chu ka chhuahsan ve ta a. Living room ah min nghakin a lo ding a. Thinrim hmel a pu lova, lawm hmel pawh a pu chuang lo. Kut kuangkuah hian a ding ran a. A bulah ding ve in , "Ka rualin i kal lovang," Zaidam thei ang bera ka tih chuan, "Chuti a nih leh kal hmasa la ka lo zui ang." A la ti hrâm a.

"Briena, luhlul a hun lo a nia," Rafaela room lam pan chuan ka kalsan nghal daih a. Kan pahnih chauh chuan kan inhnial leh hrep a nih loh chuan lungawiin kan inkalsan ka ring lo. Ka kal ngei a ngai bawk si..

Khuma Rafaela lo țhu reng ka hmuh chuan mak ka ti hle a. A rui tawh lo a nih hmel. "I nupuiin kal a phal lo a nih chuan kal lo ta mai che," a ti sup a.

"Chutianga tih theih chu ka duh khawp mai, nang hian i hre lawk vek a ni tiraw Roger haw nachhan pawh i hria tih sawi hlek suh." Thinrim insum takin ka țawng a.

"Ka hria ti ta ila...i buaipui a ngai hauh lo, nang chuan nupui i fâ pai mektu i nei a."

"Rafa, nang tal hi chuan min hrethiam ve la.."

"A țha lawm, kal ta che..i nupui chu ka lo buaipui ang." Khum ațang chuan a rawn tho a, a thawmhnaw hâk ngai a inbel leh ka hmuh chuan, "Kan room-ah i hâktur a awm ang, ka lo lêt hun tur ka hre chiah lova, Briena'n a kawh hmuh thei ang che." Kan pahnihin mikhual pindan chu kan chhuahsan ta a.

Rafaela a hmuh chuan Briena chu a nui lui sak a. "Brie, ka lo lêt leh hma chu ani hian a lo awmpui ang che, tunah darkhat a ri tawh a..." Ka phone a rawn rik leh tâkah chuan, "Roger, sawi rawh," ka ti hmuk a.

"I rawn kal dawn nge dawn lo? Natalie hi a dinhmun a țha vak lo." a rawn tih chu ka hmanhmawh zual sawt a. "Ka lo kal.." Briena chu ka melh leh zauhva rilru nâtnaa khat tih hriat tak hian min melh a, a mittui tling pam ka hmuh chuan hrehawm ka ti takzet.

"Ka kal chu i phal lo tak zet maw?" a ti sap a.

"Tun atan chuan i kal ka remti lo ani, nang lehzel chân che hi ka duh lo, khawngaihin min hrethiam hrám rawh, i tana țha tur ka ngaihtuah vang a ni e." Drawer a car chahbi chu ka la a. Rafaela chu en in 'pawnah min lo zui rawh' tiin ka signal a. Min chhang lem hlei lova.

Briena engmah sawi tawh lova ding reng chu kalpelin kawngka lam ka pan a. "Dazel Solomos, rawn kir tawh suh ang che." Ka pen lai chu ka tawp chawt a. Hnunglam erawh ka hawi lêt tawh lo. Ka chhuak lui ta a. Ka hnungah Rafaela chuan ngawi rengin min zui bawk. Rilru nuam zân lovin garage ațanga Rolls Royce chu la chhuakin ka start a.

"Natalie vanga i nupui i chân a nih chuan min dem suh ang che." Rafaela țawng chu aring hran lo nâ a, a lawm lo hle tih ka hria, zanin hian duhthlan tur ka nei ngang lo a ni. Natalie hi lo thi ta se, ka inthiam thei ngai lovang, a chhan chu a fâ pa a puh tur tingin ka tel ve miauva, tin, kha leh chen kha affairs kan lo nei dun tawh bawk, he contract vang hian kan affair a tawp a. Briena nupuia nei ta ka ni.

"I theihtawp chhuahin lo hrilhfiah i tum dawn nia." A bâk sawitur a vâng em a ni.

"I nupui rilru hneh tum chu ka châk zawng tak a nia lawm," Ngeiawm zet hian a țhen sak a. Hundang chu ni se ka hnek ang maw le..tunah erawh chutiang ngaihven hman pawh ka ni lo. Chak zetin car chu ka khalh chhuak ta a.

Solomos Living Room.

Briena Pov*

Engtin nge min kalsan theih zawk le? Living room-ah ka vei tawn chhen a, 'Ka fá a ni lo, min ring rawh,' Dazel țawngkam chu ka bengah a ri nawn tlut tlut a. Zanin hian Rafa hi awm lo se chuan keimaha min kalsan a tum tihna a nia! Hah! Bum ka awlsam hle mai!

Harh lo phei ila chuan a kalna hre lo in ka lo mu ve char char anga, zingah lo hawin chhuanlam țha tawktak a rawn siam leh ngei ang, nimin zinga a tih ang chiah khan.

Engang pawn inrem tum mahila awmzia a awm lo chu a nih hi..ka pa vang chauhvin he contract hi ka hlen chhuak ang. Ka duhdan tak phei chuan Melbourn-a lêt ka duh a. Mahse, ka naupai hian min ti khaihlak vek! Indim tura tih ka nia, ka luhlulna vanga ka fâ hi chân ka tum lo ve..

Rafa rawn lut ka hmuh chuan ka mit nuai zauhvin ka nui lui sâng a. "Coffee i duh em? Ka siam thei reng a nia,"

Khuh kharh kharh chungin Rafa chuan, "Keiman ka siam zawk ang che Briena.." a ti sup a.

"Ah..ka siam thei reng alawm," ka tih chuan a nui suk a.

"Lo țhu rawh ka'n siam ange," nui deuh chung hian min en a, sofa lam chu a kawk zauhva. A âwka dam thlup chu ngaihthlak a nuam hle bawk.

Dazel nen an danglamna hmuhtumin ngun zet hian a chezia chu ka thlir ta reng a. Sofa ah țhu ta mai lo chuan chokaah ka zui lut ve zel a, engmah phei chu a sawi lo. Coffee bel chu lain tui a chhuang a. Hmanraw dahna hrilh a ngai lo reng reng a hre thlap!

"Mak min va ti awm ve?" Ka en reng tih hria ni awm tak hian a lo hawi thut a.

"I vawikhat lo kalna a ni lo tawp?" Thil chiangsa reng chu ka zawt a.

"Ni lo ve, Sidney ka lo kal apiangin Dazel kiangah ka thleng ziah alawm."

"Chuti i hriat chian hle dawn chu.."

"Hrechiang e, ka țhianțha ber a ni bawk." A tui chhuan a so tâkah chuan chulam chu a ngaihven leh tê té a. A phone ah lai a rik pawh chuan hre lo ang hmiahin a awm a.

"I phone kha chhang phawt la.."

"A pawimawh chuan an rawn call nawn mai ang," Coffee bawk chu a siam chhunzawm lehnghal a.

Hepa pawh hi Dazel ang chiaha luhlul ve tho a nih hmel. Ngawirengin coffee chu kan in a. A kut țang sei thlurh chuan dining table chu a tlir dat dat a. A kut lah chu a hmang thiam zêk lehnghal! Style hrang hrang hian a ti che kual a. Hmuhnawm ti takin ka lo en reng.

"I thiam ve duh chuan ka zirtir thei reng che a nia." A tih chuan phur zetin a țhutna lamah ka insawn phei a, "A har miah lo a nia," tiin ka kut chu min humtir a, "step one, two, three..." coffee lam ngaihsak lêk lovin min zirtir ta tlauh tlauh a.

A phone a rawn rik leh tâkah chuan ka kut vuan reng chungin a kut lehlamin a kekawr ipte chu a zen a. Ka kut laksawn ka tum chuan a vuan nghet sauh.

"Dazel..?" Rawn call tu chu Dazel a ni tih ka hrethiam ve mai a.

"La mu lo..aw.." Rafaela'n atih chuan Dazel țawng ri hriat tumin hnai fê ah ka beng ka dawh ve ngial a.

Phone chu min pe in, "Inbe ru i phone i pick thei lo a ti nih chu." "Inbiak chhan tur kan nei lo ve," ka ti fak a. Phone pawh chu ka la chuang lo.

Rafaela zawk chuan 'A be duh lo che, ka dah a nia,' Phone chu a off zui zat a. Pehhel thiam lo ve angreng! Mahse, a chhan dan kha ka duhdan chiah a ni.

Coffee dai vek tawh chu ka lem pawp a, "Ka mutsan ang che aw, naktukah kan inhmu leh dawn nia, chuan ka thil zir kha chhunzawm leh ka duh bawk." Tia ka țhutna ațanga ka thawh chuan, "Ok..muttui le..mamawh i neih chuan ka awmna i hriat kha," a tho zui ve nghal a. Inbe tawh lem lovin kan pindan ve ve kan pan ta a.

Kan nupa khumah muhil thei lovin ka let tawn chhen a, Natalie vang hian engchen nge ka rilru hi ala nat dawn le..?

Wool worth company rokhawmtu tur fâ pai hi thil namai a ni lo ve..chhel takin ka awm ang. Chumi hnuah nunphung pangai zawhin ka nung ve tawh ang chu....

End of chapter-17
Dated: 8th January 2018


©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)