SOLOMOS BRIDE BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: SOLOMOS BRIDE BY Becky Rm Renthlei (Completed)

Unread post by Ngaia » January 28th, 2018, 1:35 pm

SOLOMOS BRIDE

by Becky Rafa Renthlei

Chapter-18

Muhil thei lovin ka let kual sek a, Zinglam dar ruk a rik chuan ka tho chhuak ta nge nge a. Ka inbual zawh vek hnuah cotton rawng dal raih hain, breakfast room ka pan ve ta a.

Nitin office kal a, car-a chuan kha min khap a, thil rit leh hna hahthlâk ka thawk a nih lem loh chuan inchhungdúnga tei vel chu a pawina vak ka hre hran lo.

Breakfast dawhkan kilin Rafa a lo țhu run a. Nizan lama a thawmhnaw inbel kha a la ha reng! Dazel chanchin engmah ka hre zawm tawh lova, ka phone ah vawi li lai a lo call a, chupawh pakhatmah ka chhâng lo. Ka switch off hmak tawh.

"Morning, Briena," Rafa a nuih suk chuan a hmel a țha roh hle a. Dazel ang lo takin a tukkhum sam chu a zuah sei angreng hle a! A bek lam erawh a kawlh lam hret. A khabe hmul meh loh țo țan siar siar chuan a ti lang 'Pa' hle a, rangkachak sana hrawl zet a bun bawk. Faulkner Electronics company chairman kha a ni miau va..

"Morning, Rafa..i thawmhnaw thlâkna tur i duh chuan Dazel thawmhnaw a awm reng a nia."

"A lawmawm khawp ang, breakfast hi rawn ei rawh le.." Joanna chuan ngawirengin eitur a rawn chhawp mawlh mawlh a. Tûk dang angin a țawng teh hluah lo ve tlat!

"Engtik thleng nge kan hnenah i awm dawn?" Ka zawhna chu ngai ho lam tak hian, "Min mamawh chhung a ni mai ang chu.." a ti liam puat a. A âw ril ruih leh thûm lam lek lek chu a nalh phian.

"A țhat chu hospital lamah i țhianpa țawiawm tura kal i tum em?"

"Tum lo ve, an inbuaipui thei alawm, enge vawiin lamah kan lo tih ve ang?" Min zawt lêt hlauhva.

"A ngai bawk, movie en, lehkhabu chhiar, mut a ni mai," Alu leh bawngsa țhial țawlh țawlh paha ka tih chuan, "I duh chuan hmun nuam deuh kalna tur ka hria a nia, apartment ațanga hnaitê ah hian.." Chocolate biscuit chu a hmawm zauhva. Dazel chuan chocolate a ei duh miah lo. Ani erawhin tuiti hmel tak hian coffee nen a hmeh a.

"Ah..pawnlam chhuah hi ka la zuam lo deuhva.."

"Nizanah hospital kal pawh i tum tho kha.." a ti sup a. A dik leh ta..vawikhat chhuah mai mai te chu a pawi viau lovang, hetia tawm reng zawng a ninawm emai.

"A hlat loh chuan i ruala kal ka remti e."
"Khati tur mai tur kha a nia lawm, darkar chanve pawh kan tlân tling lo tawp ang," a coffee chu a lem pawp a. A chair nawr tawlhin a tho hluai a, "Ka hák tur min pek theih chuan ka lawm khawp ang," a ti ta a.

"Min lo nghak la..ka rei lovang," Hmanhmawh chuang hauh lo hian ka ei chhunzawm a, "Living room-ah ka lo ngak ang che," tiin a chhuak zui nghal a.

Dazel ka huatna a zual sawt, tunah pawh ala rawn haw lo a nia, Rafa khan chanchin thar engmah a hre lo nge, min hrilh lo ve hrim hrim? Â..ka lo buaina tur pawh a ni lo ve. Serthlum tui ka in leh hnu chuan Joanna lam melh zauhvin, "Tukin chu i va țawng duh lo ve?"

"Brie, chhuak lo la ka duh khawp mai, Dazel ngaihdan pawh a ni lovang."

"Dazel, ngaihdan tur lam ka thlir vak lo, min lo hrethiam la Joanna, Rafa kha kan buaipui ange." Diktak chuan Joanna ka hua a ni lova, mahse, Dazel hming a lam tel leh kher khan ka chapona a kai tho tlat. Ka ngaihdan ngai pawimawh lovin a hmeinu a pan ve tho a lawm le. Breakfast room ka chhuahsan lai thleng chuan ka thinrim ru țeuh a.

Kan pindana ka luhfel chuan tui vawt lain ka inkhawlh khawlh a. Khumah bawk thlawpin naupangchhia ang chauhva khawsak hi ka sim tur a ni. Nu ka ni thuai dawn a, Dazel hi duh mahila chapona tlêm ka la nei ve a lawm, ka inkhungbo reng na chhan tur a awm bik lo.

Teuh lo mai, ka taksa hahdamna ni siin, Dazel do zawng hlira khawsak te chu ka thiam ve êm!

Ka rilru ka siamfel ta, velvet kekawr hain a chungah kamis body fit ka ha a, running shoe ka bun leh tawp. Ka bag-ah ka mamawh tur ka khung zung zung a. Sumdawng mi anga lan ka tum hran lo a, mi naran ang hian lang ila ka him ber.

"Brie, ka nghak reng che a nia," Rafaela'n kawngkhar pawnlam ațanga a tih chuan ka bag chu lain ka chhuak a.

"I thawmhnaw thlák chu i duh em?" Ka rilru a lang hmasa ber ka sawi tawp.

"Ngai lo mai rawh se, ka thlenna hotel-ah luh kawi zawk ka ngai thova chutah chuan ka la mai ang." Ka kutah vuanin inhnuai lamah min chhukpui ta a.

"Brie, kal chu i tum țalh a..?" Joanna chu nuihsakin, "Ka tum chu a nih hi.." Rafaela nelawm tehchiam lova melh chung hian, "I pasal a lawm hauh lo vang." A inher hmak a, choka lamah a lut nghal daih. Engmah hrechiang mang hlei lova Dazel a țan bur avang chuan Joanna ka haw lek lek! In sawifiah erawh ka tum hran lo.

Rafa car Commodore Vx chuan muangchangin apartment chu kan tlan chhuahsan ta a.

Watson Bay..North Sidney 360.

Rafa car khalh dam thlupah chuan hahdam zetin ka țhu a, min be teh hluah lova, kan kalna tur hmun pawh a sawi hran lo. Hotel lian zet kawtah car chu tidingin, "Lo chhuk duh suh, kan mamawh tur kan lam lawk ange," kawngkhar chu hawngin a chhuak nghal a. A mizia ngeng ngulh mah se ngainatawm ru riau si chu ka duhzawng tak a ni. Amah ka duh tihna a ni lova, ka tan chuan Dazel tluk tur an awm chuang lo.

Natalie kha engtin nge a awm tâk zel tih pawh ka ngaihven miah lo va. Ka pasalin a nupui rai lai aiin a hmeinu nau nei tur a buaipui zawk hi ka paidam thei ngang lo. Hmeichhe dangte anga âng chiam mi ka ni lem lova, ka thinrim erawh chuan pawisak ka nei tlêm hle thung.

Hotel ațanga inkhai bawr lûk a, Rafa lo chhuak ka hmuh chuan ka nuih a za hle a. A palian ropui si, a thawmhnaw a la thlak ta chuang lo!

"Kan kalna tur hmun tal chu min hrilh tawh la.." a lam hawia ka tih chuan, "Kan thleng har lovang, lo nghak hram hram rawh," car chu tinungin kan tlan chhuak zui leh mai a. Vawikhat kal lam leh haw lam, car-a chuan hi a pawina vak tur ka hre lo. Mahse, Dazel lâk a ka insawi fihlim nân Carlos zawt ve hrim hrim ila a țhat ka ring. Ka phone phawrhin ka call ta a.

"Mrs.Solomos, puih theihna che ka nei em?" Polite zet hian Carlos doctor-a chuan min rawn chháng a.

"Er..minute sawmpanga lek car-a chuan hi naute tan a pawi lo turah ka ngai a..!"

"Ah..pawi lo ve, amaherawh chu indim la..nangma'n i khalh chuang lo a ni lawm ni?"

"Tehnang..naktuk i lo kal hun a nih kha.." ka nui hak hak a. "Ka hria e, ka hria e, motor chuan ka khap bur a ni lova, nitina chuan leh veivah kha ka khap mai a nia," A nui huk huk a, "I pasal nen kan inbe zo chiah a, nizan lama inthiltihin naute ah effect a neih a hlau deuhva..ka lo hrilhfiah kha," Dazel mai mai chu a zawh tak tak pawh ka ring lo a sin le..!

Carlos nen kan inbiak zawh hnu chuan cat seat nghengin ka chhing vang vang a. Melbourn-ah haw daih ka va'n châk tak.

Rafael Matthew Faulkner Pov*

Nizan Dazel khawsak dan kha chu ka lawm lo khawp mai, ka țhianpa a ni a, ka nu leh pa tih lohvah chuan ka ngainat ber a ni. Roger nen inbe felin Natalie buaipui turin a unaupa a awm reng a. A nupui rai lai kalsan a khanu duhám zet a pan tlat kha ka hrethiam lo.

Briena hi ka hriatna a la rei hauh lova, Dazel nupui hmuh ka châk viau țhin kha a nia, an inneih dan hriatpuitu ka ni bawk. Car seat nghenga Briena muhil chu ka en vang vang a. A mit hmul sei er sang chu a mawi reuh hle a, a hmai a dâng deuh nâin a hmui erawh a sen chek a. A sam sei angreng tak kawi chiat chu a thlah hniang a. Mipa te duhthusam ang chiah hnute a nei bawk. A landan nû deuh hnâp phênah hian a luhlul tih a hriat thung.

Ka hrawk chu thian kharhin ka kai tho ang nge tho lovang tih ka ngaihtuah a. Nizanah a mu țha lo hle tih hretu ka nia a harh hma chu ka nghak mai niang chu. Kan tlân chhung a rei loh tehreng nen a chau hle a niang tui takin a muhil a, ka țhianpa nupui chu ni lo se hma ka la châk viau. A mitmeng paw râm a Dazel a melh dan ka hmuh khan a duh hle tih ka hrethei ve tlat. Kan mimawlpa hian tinge a hriatthiam theih tlat loh le..?

Min la mamawh dawn chauhva hriatna ka nei a, țanpui ka inpeih reng. Dazel ka hua a ni lova, a nupui hi a duh hle tih ka hre bawk. A chapona hnuhhniam a duh lo mai a ni. Natalie ai thlâwt chuan Briena Solomos hi a țha fé..contract a a nupui mah nise nupui tak nen danglamna a awm lo.

Tukinah Dazel nen kan inbia a, ka chhuahpui dawn tih ka hrilh lem lo. A duh duhin lo ngai vel mai mai teh se, a inhriatchhuahna tur hian engthil nge ka tih ang tih zawk hi a ni ka ngaihtuah.

Natalie pawh an zai hlawhtling bawk a, naute hmeichhia a neih kha. Lo inbuaipui ve phawt rawh se, a luhlul ve tho bawk si. Nupui lunglian deuh neih hi a țhat phian dawh hi a..ka nui suk a.

Vawiin nilenga a nupui tih hlim hi ka phur zawng tak a ni. Ka fuihpawrh hial zawk nâng a! A thinrim teh ang chu..Ka țhianpa mizia te zawng ka hrechiang ve êm! Briena hi a hmangaih tlat a, ala inhrechhuak lo mai mai ani, kei hian ka hriatchhuahtir ngei bawk ang.

End of Rafael Pov*

"Brie, kan thleng tawh a nia," Rafa min biakna avang chuan peih lo zetin ka meng chhuak a. Car-ah ka lo la țhu reng! Driver seat-ah Rafa chu a țhu a, pawnlam a lo thlir vung vung a, a tukkhum sam sei ang reng tak chu a common lo riau a, alangsar hle bawk, businessman pawh a ang lo.

"Ka muhil rei hle mai, min kai tho mai lova.." ka tih chuan ka lam hawiin a rawn inher a. "I phone i keng em?" Tehdaih chuan a. "Keng e, mahse, ka switch off leh tawh." Ka tih chuan dashboard chu a hawnga paper themah engemaw ziakin min pe a, "Mamawhna i la neih tâkah ka number a nih kha.." Rafaela biak mamawhna tur ka neih awm ka hre lo nâin ka la ve ta thova.

Car ațanga kan chhuah hnuah min hruaina lai ka hmuh meuh chuan ka nui ta var var a. Watson bay.. hah! Ka kal châkna hmun ber a ni. Engtikah emaw chuan ka la kal ve ang ka lo ti țhin kha a nia. Lawm zetin Rafa chu ka kuah chung a. A nui ve suk suk.

"I duhzawng a ni chu ka lawm e, hei hi la la.." tiin paper bag lian lam deuh min pe a, a chhunga awm pawh ka en nghal lem chuang lo.

Kan piah lawk a lawngchawlhna bula cabin lian zet chu kawkin, "Saw saw kan awmna tur a nih saw, i hahdamna hmun tur," ka bânah kaiin a kut lehlamin hotel ațang a lak ho kha a khai a, cabin lam pan chuan min kalpui ta a.

Cabin chu a nuam reuh hle a, ei siamna tur hmanrua pawh a awm thlap. Rafaela bulah engtin nge hahdam deuh hian ka awm theih tih pawh ka hrethiam bik lo. Dazel theihnghilh țhak khawpa tuiin car ah ka muhil lehnghal a nia. Dazel..!? Ka ngaihtuahna ațanga paih bovin hlim taka awm ka tum ta zawk tur a ni. Ka ti thei ngei bawk ang.

"Eng infiamna nge i ngainat, mipahnih in a an tih theih chi ah.." Rafael an a tih chuan phur zet hian, "Tennis," ka ti vat a.

"Chu zawng thâ a heh emai adang ngaihtuah leh rawh," min fiam pah deuhva a tih chuan chal chuar nang hian ka ngaihtuah leh a.

'Tui inhleuh siak.."

"Huh! Kan pahniha kan tih theih tur maw le.."

"Ka hre mai lo, nangman thlang la.."

"Sangha inkhawhfuh siak ti ta ila..?"

"Hah! Ka ngam teuh lo..chi loh lutuk.." Rafa nui hawk hawk ka hmuh chuan Dazel ka hrechhuak leh nge nge!

"A nih chuan inthlak la, nisaah in pho ang le, kan hahdam ber ang," a ti ta a. Amah lah chu a kal nulh roh a, chulai hmuna in pho chu a nuam khawp ang le, a bag min pek chu ka hai ve ta rak rak a. Bikini senno leh sunglass chu phawrhin ka inbel ve hmiah. Sunscreen bur lian vak lo a awm tel a, ka rin aiin a ngaihtuah kim daih.

Ka inthlak fel vek hnu chuan Rafa zawm turin țiauvut ah chuan ke láwngin ka chhuak phei ve ta a.

Australian beach bed an siam thar in dawh zuiah chuan mi engemawzat an mu tlar dul a, bikini an ha deuh fur a, mipa ho erawh chu kekawrbul nen kawr ha lovin kelawngin an awm thung . Rafa lo mu duai ka hmuh chuan Dazel emaw ka ti thut! Ka lû thing deuh nakin a mutna lam pan chuan ka va zawm ve ta a.

"Cabin-ah inkhung nilen i tum emaw ka tia lawm," coke intur min pe nghal a. Chips leh solstoy engemawzat a in chhawp a, ani chuan beer a in thung. Dazel khan beer a in ngai miah si lova! Whisky chauh a in țhin. Hah! Tinge, Dazel, Dazel..ka tih reng? Theihnghilh ka tum ve mai tur a ni.

"Ka inkhung phal teuh lo," sunscreen chu pe in, "In hnawih ve la.."

"Huh..Solomos ka nih loh hi.." a fiamthu a ni tih ka hriat avangin ka nui ve sâng a. 'Vawikhatmah min la chhuahpui ngai lo' tia hrilh mai ka duh.

Darkar khat vel nisaah kan inpho a, chuti tehchiamin ka inbe hran lo na a, kan boruak erawh a nuam phian. "Le, lunch ei a hun e," Rafa min biakna avang chuan ka phu zawk a.

"Khawiah nge kan ei dawn?"

"Min ring tawp rawh," a mutna ațanga rawn thovin ka lam panin a rawn phei a, a sunglass vuah a lu lama nawr tawlhin chîk zet hian min en ta a, nuam ka ti viau lo. Min rawn fawp dawn emaw ka ti hman tawh a, mahse, chutianga ti ta lo chuan, "Nisaah inpho tam i ngai a nih kha i vun a dâng mah mah!" Ti supin a kut chu ka vawn theih tur hian a rawn phar a. Ka lo vuan vat. Min kai thovin cabin lam pan chuan kan phei ta a.

"Eitur i siam thiam em?"

"Thiam e mahse, a tui lutuk ngai lo," za zet hian a nui a, "Gold son nupui meuhvin eisiam a thiam tura ka rin le..?" Amah leh amah inbia a ang zawk mah. "Tak takin ka thiam ve nual a nia," ka tih chuan awih chiah lo niawm tak hian a dar asan âk a.

"Vawiin chu ka siam i ei dawn nia," Cabin kan thleng tawh a, thukah tui chhuangin, "Ka siam chhungin lo intifai rawh le.." bathroom lam a kawk zauh a. A chevel hmuhnawm zet chu ka kalsan ui tawp. Ka la din reng avang chuan, "Hmanhmawh rawh le, i vun sâ kha chiah dai thuai rawh," bathroom lam pan chuan min nam phei dat dat a. Nui hak hak chungin ka inbual san ta nge nge a.

Ka mamawh tur engkim a awm thlap, tui vawt raihah chuan ka inchiah ta vang vang a. Rafaela chu awm lo se vawiin ni ah hian thinrim țûnin kan room ah ka inkhung tlat emaw a nia nga, lawmthu sawi ka ba nasa hle a ni. Ka chezia hmuh hmaih neih tum lo niawm taka min thlir ru țhin erawh ka hmu fuh zauh zel, mahse, ngaihzawng lama min en nilovin a unaunu ang maiin min en tih ka hria, ka lawm hle bawk. A mitmenga min ngaihsakna leh duatna lo lang țhin kha enge anih erawh ka hre thiam chiah lo thung!

Uluk zeta ka inbual hnuah kal lama ka hâk ngai bawk kha ka inbel leh a, Rafa thilsiam rim chuan ka hnar a verh zar mai.

"I rawn chhuah hun a dik chiah," Dawhkanah eitur a chhawp mawlh mawlh a, soup, arsa leh theirah tharlâm tak takte an ni hlawm a, khawia mi nge tih ka zawt buai peih lo.

"Ka rilțam zia hi ka zêp lo mai teh ang," tiin a ep chiah chair-ah chuan ka țhu a, "I duh tawka tam i ei thei e, Mrs.Solomos," a tih chuan thinrim duh lovin ka melh vei ngial a. "Hlimtak leh hahdam takin awm tum la, i naute chauh kha ngaihtuah ang che." Thutak zet hian a ti ta a. Ka ngaihdan chiah a rawn sawi a ni. Dazel ka huat avanga ka fâ tawrhtir kher hi ka tum bik lo.

"I chungah lawmthu sawi ngaihna ka hre lo, vawiin vang hian ka lawm e." A mitah tak en lêt kalhin ka ti ve sap a.

"Chutiang phût a hruai chhuak che ka ni lo a nia," soup chu a hawp a. "Dazel hi dem lutuk tur a ni bik lo a nia, a dinhmun hi a khirh ve êm a ni," a țhianpa chu țan ve tak a ni.

"Ah..tun atan chuan a hming lam rik ka duh lo ve."

"Ok..ka sawi tawh lovang, naute vang tal khan chance pe ve la ka ti mai a nia," a la ti hrâm a.

"Dazel chuan fâ a nei thuai dawn a lawm, tunah pawh a nei tawh zawk mai thei a ni, he ka pum chhunga mi hi chu ka ta liau liau ani tawh, nizan khan chu chu a tilang chiang tawh bawk a, kei aiin Natalie a thlang a lawm," ka mittui tla tur chu duh lovin ka khap sak sak a. Ka țap tur a ni reng reng lo.

"Hriatthiam tum hrâm rawh, i pasal hian a duhin a hmangaih che, in inneih chhan chu engpawh ni se la, a thlahthlam ngai lovang che." A ti leh a.

"Dazel chungchang sawitura min hruaichhuak i nih loh ngei ka beisei," lungawi chiah lova ka tih chuan, "A țha e, ei chhunzawm rawh, ka țanpuina i mamawh phawt chuan ka pui hreh lo che a nia."

"Ka lawm e," thildang sawi tawh lovin ka plate a eitur chu ka ngaihven san ta daih a, ani pawh a țawng tawh bik lo, ngawi rengin kan ei dun ta zawk a.

Chawhnu lam zawng chuan beach ah zawimuangin min teikual pui a, a nu leh pa chanchin leh a company chungchang te min hrilh ve a, a țawngkam dam thlup leh ril ruih chu ngaihthlak a nuam hle. A sawidan hmangah anu(Hazel Cade) nen kan mizia a inang a tih thu a sawi chuan ka nuih a za hle a. London ka kal hunah min mikhual ngei a duh tih a sawi tel bawk.

Tlailam dar li a rik chuan haw turin car-ah kan țhu tawh a, ka haw peih lo lutuk chu ka ner leh nâng nâng țhin.

"I thinrim pawhin insûm hram ang che, engkim a ahmasa ber tu chu i fâ kha a ni tih hria la ka duh a ni," Rafaela'n a tih leh chuan ka bu nghat nghat a. Kan tlan chhung a rei dawn chuang lova mutthilh san ka tum tawh bik lo.

Apartment kawtah a car chu tidingin, "Ka rawn lut rih lovang, hotel-ah ka thawmhnaw ka dah a ka inthlak ve phawt loh chuan," a nui suk a.

"Hetah rawn insawn law law la.."

"Nia, ka rawn tlai deuh mai thei, rawn riah chu ka tum ang, Dazel a lo la haw lo a nih chuan min lo call dawn nia," Car ațang chuan chhuakin ka țhutna lamah a rawn kual a, kawngkhar min hawnsak leh thlap a. Gentleman ang mai alawm le a chet dan chu..!

"Rafa, ka lawm e, hun nuamtak min hmanpui avangin," dingdihlip âk âkin a biangah ka fawhsak zauhva, "Kei pawh ka lawm e," inherin car-ah chuan a lut a. A tlan liam thlengin ka thlir zui vang vang a. Peih lo zetin apatment ah chuan ka lut ve ta a.

Dim vak lo hian kawngkhar chu ka pawt hawng a, kawngka bulah ka pheikhawk ka hlip leh tê tê a.

"Khawiah nge i kal?" Dazel âw ka hriat chuan muangchangin ka dâk chhuak a. A mitmeng chang zet leh thim khap ațang chuan a lawm lo hle a ni tih ka hre thei. Chhân erawh ka tum miah lo. Amah kal pelin kan room lamah ka chho a. Min zui tih ka hria, mahse, hria angin ka lang duh lo.

Kan room-ah lutin bathroom-ah ka lut tlang nghal a. Hmanhmawh miah lova ka thawmhnaw inbel ka hlih vek hnuah bathtub a ka inchiah ta vang vang a. Min ngaihsak lovin a chhuak a, ka ngaiven viau natur ka hre lo ve. Ve lutuk a!

Reifé ka inchiah hnuah cabinet a bathrobe inthlep chu lain ka ha a, bathroom ka chhuahsan ta chauh.

Pindan chhunga Dazel vei nghut nghut chu ngaipawimawh lo ang thei ber a lang turin drawer ka pawt hawng a.

"Khawiah nge i kal?" Zawhna ngai bawk. Under wear leh bra ka hâk lai chuan ka bulah dingin min en run a. Thawmhnaw ka hâk fel vek hnuah pindan chhuahsan ka tum chuan, "Briena..?" Insum tum hle mah se a thinrim a ni tih a áwka ațang chuan ka hre tho!

"Yes, ka hming chu Briena a ni e," chiang zetin a mitah ka en kalh a.

"Khawnge Rafael..?"

"Rafa, vengtu ka ni lo." ka ti chang ve fak a.

"Țhataka ka zawh lai che hian min chhang rawh," a țawng ring hran miah lova, "Amah zawt la ti nia."

"Inchhuak dun a, apartment chhuahsan lo tur i ni a!?"

"Dazel Solomos, i zawhna chhan hi ka bat a ni lo. Engtin nge i la rawn lêt ngam zawk?"

"Engmaw i sawi? Ka inah hian ka rawn lêt ngam lovang maw!?"

"Kan In, a ni zawk lo maw? Nizana kal lo tura ka tih laia chhuak lui kha kei ni lovin Dazel Solomos a ni, i hmeinu panin i chhuak tawh a ni lawm ni?"

"Ngawi rawh," thinrim sehchilh zeta a tih chuan ka ngawi hmak. Inherin kawngka lam ka pan a, ka chhuak tur chiah chu ka bânah vuanin a lamah min pawt dawrh a.

"Ti ringawt khan kal tum suh inbia ang." A ti hmuk a.

"Sawitur ka nei lo, Natalie bulah kal rawh." Ka vín hran miah lo, engtin nge dam taka ka la sawi theih zawk le?

"Natalie sawi kai angai lo, hriatthiam tum rawh."

"Hah! Ka pasalin hmangaihna min chenpui hnuah a hmeinu damdawiina awm chu zan rei pawh sawi lovin a pan chûk chûk a, chu chu ka hrethiam ang maw!? Tenawm pa, i kut hmawr pawh khan min khawih suh." Min vawnna chu duh lovin ka phih sawk a. 'Ka tipalh' ti zawk tur hian 'hriat thiam tum rawh' min la ti ngam a nia! Zak lo lutuk.

"Brie, khawngaihin..."

"Natalie hnenah kal rawh, i fâ leh a nu chu va ngaihsak ta che," ka pum chu tawk zauhvin, "Solomos rokhawmtu tur chu i duh leh Natalie nena in fâ kha nihtir rawh.." Ka ti phiar phiar a, diktak chuan nizana ngenna mitmenga ka ngen lai khan a haider a nih kha, a ni em em lo. Contract tehhrep hi a...

"I țawngkam hman kha fimkhur rawh!" A ti thum chhak a. Ka rilru natna nen ka pa natna thlengin ka ngaihtuah kai a, ka thinrim hi ka puakkeh thei takngial dawn!

"Nizana i kal luih ațang khan kan inkar a tawp tawh, contract hmanga innei kan nih ang ngeiin chutiang chiaha awm chu ka duh tawh bawk! Dan hmanga kan inneihna pawh i zah zo lo a nia, i fâ pai tu țheuh țheuh i duh i thlang fel tawhah ka ngai e." Ka biang thîp zawk avang chuan reilote chhung chu ka hamhaih hle a.

Dazel min benna sa deuh vang vang chu ka kut dinglam chuan dawmin khumah ka țhu hnawk a. Lalpa..ka awih thei lo! Kum sawmhnih chhunga kut min thlâk hmasa ber tu a ni.

Ka nunah hian a țha lam emaw, a chhe lam pawh nise, a hmasa ber a ni zel chu a nih hi..

"Brie...?" Dazel hmel ka en chuan hrehawmtihna leh inthiam lohna hmel a lang dawt zut a.

"Sawitur ka nei tawh lo..i duh ang angin i awm thei e.." khum ațang chuan thovin ka phone dawhkana awm chu ka la a, ka mittui hnâm sawk chu ka duh lo kher mai! Ka țah vaih chuan ka tlâwm tihna a ni.

He hmunah hian ka awm duh tawh lo, mahse, khawnge ka kal tâk ang? Thui tak motor ka chuang thei lova, tun ang hunah eng thlawhna mah chhuaktur a awm dawn si lo..

Rilru pik zetin kan room chu ka chhuahsan ta a. Dazel chuan min dang hek lo.

Chokaah ka lut hmasa leh tê té a, Inchunglam ațanga thil ri bur ka hriat chuan chesawn thei lovin ka ding ta reng a.

End of Chapter-18

Dated: 9th January 2018

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:35 pm

SOLOMOS BRIDE

by Becky Rafa Renthlei

Chapter-19

Kan nupa room ațanga thil ri bur ka hriat hnu pawh chuan ka la che chang duh chuang lova. Dazel thinur in engemaw tak a ti a ni ngei ang. Study room ațanga Joanna lo chhuak chu en pawh ka en țha peih lo, inchhun pútû lutuk. Joanna ka ngainat ve tehreng nen a engahmah hma a Dazel a țan hlur hi ka haw riau.

"Dinner i ei duh tawh em?" A hmel en turin ka inher ve ta nge nge a. "Ka insiam thei alawm, i thiltih lai chhunzawm rawh," thinrim anga lang duh miah lova ka chhán chuan a meng kal rulh a.

"Ti nge in luhlul dun em em le..? Kan daily food ah hian hetianga awmtir theitu tur che u ka siam tel pawh ka hre nek lo ve," nûr nâng hian a ti a. Hun dang chu ni se ka nui nasa viau ang, ka nuih a za ru tho náin ka heh petin ka insum ta zawk a.

"Luhlul hi a țhatna lai a awm ve a nia," Beef soup chu bowl lian zetah ka suak a, artui leh carrot, sangha nen salad ah cream telhin dawhkanah ka inchhawp a. Dazel paw'n a la ei lo tih ka hre tho va, mahse, nghah ka tum lo. Ka pasal In chu ka in a nia, ka thu ve tho, min ngaithei ta lo viau a nih leh ka hna ka chawl thova Melbourn-ah ka haw daih anga a ni mai. Hah!

Ka thupui chu hahdam, hahdam, naute hrisel tak neih..eitur tuihnai tak tak awm țeuhva insûm tlat te chu a, ka hma a eitur inchhawp ka ei zo lek lek tawh ang tihah chuan, Darthlalang keh ri niawm tak ka hre zawm leh a. Tunțum erawh ka ngaihven ngei a ngai tawh ang.

Hmanhmawh chuang hauh lo hian step-ah ka pen chho chhat chhat a, ka thinlunga hlauhthawnna awm chu thunun tumin thâwk ka la hap. Dazel Solomos hian thlamuangin min awmtir hlawl lo.

Ka hnungah Joanna hmanhmawh zetin a rawn chho hlawk hlawk a. Min pel fua in kan room-ah a lut a. A țé chul ri ka hriat chuan rang fahranin ka pen lut ve ta a. Chhuata carpet dup chi inphah chungah chuan whisky bottle a keh rum a, a vawmna thawkhat tih pawh a hriat theih! Zû rim a nam hum hum bawk. Dazel bang nghenga ding chu melh zawkin a kut ațanga thisen far zaih zaih ka hmuh chuan hlauhthawnnain ka khat a.

"Briena, ding reng lo khan i pasal kut saw va ngaihven rawh," Chhuat a bottle keh chhar fai mawlh mawlh chunga Joanna'n a tih chuan ka che chhuak thei țhak lo. Dazel lah chuan eng hû ah mah ngai lo niawm tak hian min melh run a, a mitmeng sen râm leh thim khap ah chuan enge a ngaihtuahnaah awm ka chhiar thiam lo.

Zawi muang hian first aid box dahna lam chu ka pan a, "Țhu rawh," chang fak a ka tih chuan a la ding reng a. "Dazel, bawiha, țhu ve mai la.." Joanna'n a rawn tih ve tâkah chuan sofa-ah chuan a țhu thla a. Ngawi rengin a kut chu tifaiin ka tuam a, nâ ti hmel a pu lo! A thûk reuh phian a, kan inkâr țhat lai kha chu ni se, hei ai hian ka duatin ka dim ang maw le.

Bandage-a ka tuam vek hnu a ka suih nghet tur chu ka dim vak ta lova, rék deuh takin ka pawt salh a. A țhensak ka hmuh chuan ka lungawi ru ang reng.

"Tikhan lo inbuaipui rawh u," kawngkhar ka pan nghal a. "Brie, la kal rih teh suh." Dazel âw thâm deuh țuak chuan min ti ding leh țhelh a. Ka kal lui ta tho, "I kal lui a nih chuan..." fiah fak, ring hauh si lova a tih leh chuan inherin, "Ka kal lui a nih chuan engtin? Sawi zo ta che," a âwki ang chiah chuan ka ti ve a.

A țhutna ațanga lo thovin ka lam a rawn pan a. "Joanna i lo va chhuak lawk dawn em niang?" A ti sup a.

"A chhuah kher a ngaihna chhan ka hre ve lo, chhuak tur chu ani nilovin keimah ka ni, he room-ah hian riah tumna ka nei lo."

Joanna, awm dan tur hre chiah lo niawm taka ding chu ka melh zauh a. A mitmenga min huatna lang chhuak chu ka hmuh hmaih bik lo. Ve lutuk a! Henu hian enge a hriat ve ni! Dik lo zawk niawm fahrana min melh chu le..?

"Apartment-ah hian awm la, zanin chu keimah ka chhuak ang," Dazel thusawi chu ka hresual emaw ka ti hial. Joanna chuan awm ve rengna chi ah a ngai ta lo deuh nge, a chhuak ve ta a.

"I in a lawm, i pindan hi i hmang zui thei ang, he room ah hian ka awm dawn tawh lo ka ti mai a nia, apartment chhuahsan chungchang erawh ka thu thu a ni."

"Briena, engtinnge ka han hrilhfiah ang che le?" A áw a beidawnna niawm tak lang ka hriat chuan ka nêm leh mai dawn a ka inhriat vangin, "Min hrilhfiah tum lo mai rawh." Ti nghauhvin pindan chu ka chhuahsan ta a. A phun hluk ri ka hre pha a, engnge a sawi ka hre lo thung.

'I siamchawp hremhmunah khan han tâl tak tak teh Dazel Solomos' ka ti sap a. Chuti mai a lungawi tur a tan chuan ka tawrh hi a nâ mah mah.

Inhnuaiah chhuk tawh lovin bed room thar lam ka pan a, pawn lamah a lo inkalh țhap. Chahbi tello chuan ka hawng thei dawn lo tih ka hria a, he room a ka awm hi a phallo lehzel tihna a nia, ka tlân tauhna hmun ber a ni bawk si. Mikhual pindan pahnih a la awm a, pakhat Rafa hman kha a nia, adang leh chu Natalie hman kha a ni thung. Chu mite pahnihah chuan duh ka thlan a ngai a. A nih loh chuan he apartment-ah hian ka tân riahna tur a awm lo.

Hotel-ah ka riak mai dawn em niang? Chu zawng thiltih chi pawh ni nghal lo chuan. Hmanni lawkah Dazel nupui ka ni tih company ah an puangzar chauhva, Sidney angah te hi chuan Solomos hre lo an awm lovang. Keia naupai lehnghal media lamin min hre fuh a nih vaih chuan a him hlawl lo.

Duh lo teh mahila chahbi la tura kan pindan ka pan a ngai leh tho..

Zan dar sarih a pel chiaha zan danga kan dinner ei hun a ni, Dazel dinner ei tura a chhuk ngei ka ring a, chumi lai chu chuhin ka lut thei ngei ang.

Thawmdim thei ang berin step ah ka pen thla țhem țhem a. Ka vanneihna a kal tluang a ni ngei ang! Choka a Joanna leh Dazel inbe thawm ka hriat chuan a aia thawm dim leh zualin kan pindan lamah ka lut ta a.

Chahbi dahna drawer ka hawng hmasa ber a, ka hai chiam hnuah pawh ka hmu miah lo. Minute engzat nge chahbi zawnga hun ka khawhral tawh pawh ka hre lova, hmuh ka duh a ni tawp mai. Dazel wardrobe leh drawer pawh ka hai hnawk nuaih tawh a, khawihah teh hrep nge maw a dah ni!

"Rukru ang maia khatia ka thawmhnaw hai kha a țul lem em ni?" Dazel âw ka hriat chuan ka inher zawk a, engchena rei nge a lo din tawh ka ring thiam lo. "Khawnge chahbi?" Ner nawk chung hian a kekawr ipte zenin ka lam a rawn pan a. Kan room pawh Joann'n a tifai vek tawh a, Dazel pawn a thawmhnaw hâk a lo thlâk vek tawh bawk.

"Eng chahbi maw..? Ka wardrobe ah ka thuhrûk i ring a..?" A landan nelawm tehchiam lo chu haider luiin, "I hre khawp mai, hre lo der duh suh, saw pindan saw nizan hmasa thleng kha chuan a inkalh ngai lo.."

"Tunah a inkalh ta a, ka kalh a ni lo ti ila i awih awm chuang si lova, keima kalh ngei a ni e," tham lo zeta min chhân avang chuan va keh bawrh bawrh ka duh hial mai! Thinrim insum thei ang ber hian, "Chuan i kalh a, chahbi chu i kawl a nih chuan engvanga min pe mai lo nge i nih? Ka zawng tih i hriat chuan..!"

"Saw pindan saw fâ i neih hun a tan chauhva ka siamtir a ni, tunah i la nei lova, a hma paw'n ka sawi tawhin ka hria, tlân tauhna tura ka ruahman a ni lo."

"Min pe dawn nge, kawngkhar kalhna saw ka chhu chhe dawn?"

"Min nawr lui hauh suh, i riahna tur chu he pindan hi a ni," kha fak a a tih chuan ka ngei kher mai.

"Ka riak nguar ang, ka riak a nih chuan Briena Larson ka ni lo tihna a niang," ka ti tuarh a.

"Huh! Briena Larson chu i ni lo reng alawm, Solomos i ni tawh, Briena Solomos, i nihna i theihnghilh palh a ni lo maw?" Ngeiawm zet hian a nui hawk a.

"A țhat chu Solomos, Larson, eng zawk zawk pawh ni ila ka pawisa hrep lo ve, chahbi chu min pe vat mai rawh." Ka thin tertek chhuak tur chu duh lovin ka kut ka hum ruh țang a. Insual peih at in a nia ka awm tawh ni!

"Ka pe dawn si lo che a, tikhan he pindanah hian awm ang che, rawn chhuah tum hlek suh. I mamawh chu kan rawn pe zel ang che, lulul si.." ti hlukin a chhuak nulh a, kawngkhar chu pawn lamah a kalh zui hmak.

Ka thinrim lutuk tihngaihna hre lo chuan kawngkhar chu ka chhuih bur a, ka ke a la na êm êm zui. Tinge maw ka ât em em mai le..? Room-ah min kalh hnan ngam a nia, chu ramhuai pa mai mai chu..(h)

Pindanah chuan ka vei kual sek a, a chang leh kawngkhar ka beng ri vak vak a, awmzia a awm der si lo. Curtain hlimin pawn lam ka thlir a, balcony ațang hian chhuahdan a awm mial lo maw?

Tukverh chu hawngin balcony-ah ka chuang chhuak a. Hnuai lam ka en thlak chuan a sang lutuk lo, mahse, engtin nge ka chhuk ang? Ngaihtuahna sen vak ngaihna pawh ka hre lo, zuangthla ta ila..'No' naute ngaihtuah tel a ngai si. Ka beidawng lutuk chu ka thaw huai.

Chhuatah ka țhu hnawk a, tiang em em hian engtin nge a sual theih le? Inkalh khum te chu naupangchhia nghal loh!

Duh thlan tur ka nei ta ngang lo, Rafaela ka call ta nge nge a, he pindanah hian riah ka tum miau si lova, duh lo teh mahila Rafa lo chu min pui tur an awm lo.

A phone a la pickup lawk lo zui ah..dar kua chauh a nia, ala muhil lo tawp ang, ka beidawn tawh lamah min rawn chhâng ta hrâm a.

"Briena," A âw chu leh..!

"Min lo hruai rawh.." teh tawp a. Dazel awm leh awm loh min rawn zawh chuan ka hriat bik loh thu leh kan awmdan ka sawi zuai zuai a.

"Ka rawn kal nghal ang." A tih chuan ka thaw huai thei nia!

Rafa ka nghah chhung chuan ka thawmhnaw thlakin thawmhnaw lum lam ka inbel a, hotel ni lo kalna tur ka hre miah lova, mahni inkhawngaihna avangin a vawikhatnan ka mittui a rawn far fap. Chutah chhuak zetin ka inhnît ta hlawp hlawp a.

Ka nu leh pa kiangah zalen takin hun ka lo hmang țhin a, ka duh leh mamawh pawh hmaih nei lovin min leisak țhin. Vawikhatmah kut min thlak hek lo. Khang laia ka nundan kha ka ngai vawng vawng a, tunah chuan ka pa leh kan company humhim nan hrehawmna leh rilru natna ka paltlang angai a, enganga luhlul pawh ni ila, kei fanu mal kum sawmhnih mi lek tawrh a tan chuan a lutuk deuh a ni.

Chutah nau ka pai a, mite anga hrisel țha ka la ni lo zui, hrehawmna hi engzat fakauva tam nge ka la paltlang dawn le..?

Room kawngkhar ri rak ka hriat chuan ka mittui hru hulin pangai thei ang bera lan tumin thawk ka la ham ham a. Rafa lo lut chuan min thlêk deuh vung vung a.

"Khawnge, Dazel..?" Ka zawt nghal vat a

"Ka hmu miah lo, inhnuai lamah chuan a awm lo." Khawnge a kal le..? Min kalh khum sauh sauh a, thawveng takin a chhuak tihna a ni maw!

"Chuti nih chuan a lo kir hma ngeiin kan chhuah a ngai a nih chu.."

"Brie, in ngaihtuah chiang la..Dazel nen sawidun leh phawt rawh u," a tih chuan ka sa phat a. "Enteh, Rafa, sawidun a țulna ka hre tawh lo, zanin chauh chu hotel min ngaihtuah sak rawh, a bâk chu ka inngaihtuah thei ang."

"Ka ti tak tak, nupa chu tninrim leh inhau châng a awm tur a nia, engkima i dah hmasak ber tur chu i fâ hi a ni."

"Ka hria e, mahse, inngaihtuah fîm ka mamawh ve a ni. Tunah sawi duah hun pawh a ni lo." A bânah kaiin chhuahpui ka tum a, "A țha e, puih che ka lo intiam tawh ang ngeiin ka pui bawk ang che, amaherawh chu i fâ pa hi Dazel a nia. Engang pawhin tihdanglam tum mah la, a theih dawn loh tih i hriatthiam ka ring, hun in mamawh ve ve mai chauh a ni."

Chhang tawh lovin inhnuai lamah kan inzui thla a, tumah hmuhtur an awm lo, Natalie kiangah a kal te pawh a ni mahna! Natalie leh Dazel hi reh nawk nawk ka châk a nia!

Ka Lexus car ka ken chuan min rawn chhui chhuak rang dawn lutuk a, chu chu duh lovin Rafa Rolls ah ka lut vei thak a.

"Ka thlenna kha spanish hotel a nia, hmundang pan lovin tahchuan awm ve phawt mai rawh." Zawimuanga car khalh chunga a tih chuan, "Dazel hlat thei ang ber a awm ka duh, a ni tawp mai." ka ti sap a.

"Min rawn zawt thovang tih kha ring hmiah rawh, hotel thleng phawt ila chuta țang chuan rem kan ruat leh dawn nia," Rafa hi awm lo ta se, ngaihtuah pawh ka duh lo e a, kan inah ka haw a nih chuan Oliver Solomos nen kan in hmachhawn ngei dawn a, ka pa rilru tihnat ka duh lo bawk. Chuti anih chuan kalna tur hmundang dap a ngai dawn a ni, nge? In ka luah ve mai dawn? Engmah ka hrethiam tawh lo, ngui nghiai hian car seat chu ka ngheng ta riai riai a.

"Apartment luah mai tur i hria em? A man lam chu buai a ngai lovang!" Ka tih chuan, "Chulam chu nakinah kan sawi țha dawn nia." Kawng chu ngun takin a en a, a rilru putdan tur ka hrethiam chiah lo.

Hotel kan thlen chuan muangchang lovin min luhpui vat a, manager nen pawh an inhriat țhat hmel khawp mai! Ka hminga room book tura ka tih chuan, "Chanchinbu ah Solomos nupui hotel ah a riak tih an chhuah i duh a mi?" A ti nghut a. Chulam pawh ka lo ngaihtuah thleng ve leh pek lo.

"Ah..Larson ti la, i room ka țawm ngawt thei lo che.." inthlahrung ru tak hian ka ti ve a. "Chawlh hahdam i mamawh tawh, tunah chuan ka enkawlna hnuaia awm i nia, ka sawi ang a piang zawm hi i tihtur a ni," a nui suk a. Manager chu kal sanin a room lamah min hruai ta a, ka hnial ta bik lo.

Rafa room luah chu hausa lutuk tan lo chuan awm ngam ngaihna a awm lo. Engkim chu a țha chi leh a changkang ber hmanga duan a ni a, khum lian zet pindan lai taka awm chu chiffon cream rawngin a inkhuh dulh a, russian carpet dup a inphah chhuak vek bawk a, tukverh darthlalang ațang chuan Watson bay chiang zetin a lang ruih a.

"Kha, hei hi in rawh," Rafa tui min pek chu ka lem khawlh khawlh a.

"Ka lawm e,"

"Briena, inthlahrunna tur engmah a awm lo, tunge ka nih i hriat kha.." intur dahna lam chu panin martini a inthlit a, "I duh ve em?" Ka inchâk viau a, rilru tih zangkhai nan tal pawh vawikhat in te chu a pawi viau dawn mi le..?

"Umn.." A thlitsa chu min pe a, a ma ta tur a hran thli lehin, "Dazel, ngaihtuah lovin tun hun chauh hi ngaihtuah la, i phurrit a kiang huai ang," a no a intur chu a lem pawp a. A tih ang chiaha ti ve in martini no khat pap chu ka'n thawkkhat teh reng a nih kha..ka khuh zui nghal kharh kharh a, ka hrawk a sa thla nghal ham ham thei nia!

"Intihfai i duh em?"

"Duh lo ve, nangmah zawk kha intifai rawh," ka tih chuan martini ûm nen couch ah chuan a țhu thla a, "Zanin chu Dazel theihnghilh țhakin kan in dawn em niang?" a fiamthu mah ni se, ka pawm zawng tak a ni. Ka taksa a chak lo deuh nge nokhat lek ka in khan ka lu a ti hai chiai chiai mai.

"Pawi tawp nang.." ka nui ve ta sak a. Min ngaihsak teh hluah lova, a țhutna lamah pheiin ka no chu a hmaah ka dawh va a, nui suk chungin min thlitsak ve mai. No hnihna ka inzawh leh meuh chuan ka zâng huai tawh.

"Khumah sawn mu la, hetah hian ka mu ang," Rafa'n a tih pawh chuan ka lo nui vel mai mai a, ka mutchhuak lutuk chu ka meng hlei thei tawh lo.

Apartment plus S.

Dazel Pov*

'Khawiah nge maw a kal reuh le..' a tana țha tur ka ngaihtuah ve pawhin awmzia awm si lo. A luhlul tih ka hre tho nâin hetiang em em a nih hi chu ka ring lo a sin le..Tim Hathaway hnenah chuan a kal lo phawt a. Sidney-ah hian hmelhriat țha a neih ka hre lo. Rafaela ka phone tlang thei lova, a thlenna hotel pawh ka enfiah tawh a, a chhuak a la haw lo tih manager ngeiin min hrilh a, dawt an sawi em lo'ng chu..!

DNA test result a chhuak tawh a, ka test tih hi Natalie ten an hre lo, an hriat pawh a la țul lo, Cullin, private a ka chhawr kaltlangin kan test fel vek tawh a. A result hre tura keimah ngei kal ka duh vangin zanin khan ka chhuak kha a nia. Pawn lamah ka lock vek chungin engtin nge a chhuah theih!?Hruai chhuaktu awm lovin a chhuak dawn lo tih ka hre chiang.

Rafael leh Tim Hathaway bâk rin chhin ngaihna ka hre lo, Joanna nen kan sawidun vek hnu a kalh chauh ka nia. A luhlul êm vangin a tana pawi tur pawh a ngaihtuah hmasa ngai lo. Natalie ka thlang zawk emaw a ti tlat hi ka buaina ber chu a nia.

Ka fâ a ni lo ti ngawt ila kan mudun miau sia, min puh theihna lai a nei ve tlat. Mipa ka nih ang ngeiin ka tisual a nih chuan a mawh ka phur ngam tur a ni. Briena hnenah insawifiah chiam mah ila hmechhe dang ang a ni reuh si lo a, ka inhnuk hniam mai mai tihna ni dawn si.

Mahse, min chhuahsan duhna khawp rilru a pu erawh hi chu nâ ka ti ve ngang a ni. Ka duh reng vanga nei ka ni bik lo va, mahse, tunah erawh a tel lova khawsak ka thiam tawh lo zawk! A inngaihtuah fîm hun ka nghak ve bawk a, awmzia a awm chuang lo.

Zinglam dar hnih a rik pawh chuan ala rawn haw lo, a nu leh pa ka phone mai dawn nge? Chu zawng ka va ti phawklêk mai mai a ni. Hotel-ah a kal ka ring chiah lo, A nihna a thup te a nih ngawt loh chuan mahni inti mualpho duh khawpin a awm ka ring lo.

Ka ngaihtuah zau poh leh ka bo tulh tulh a, hahdam tur a nia sin le..tinge rilru tihah zawng hlir hian a khawsak thiam zawk le..? Chimawm bawk si, kum sawm chuangin kan inthlau a, min hmakhalh zar zar zawk a nia!

Ka phone a rik chuan rang fahranin ka chhang a, Rafa a ni. Tun ang hunah enge sawitur a neih? A inrawlh a nih vaih chuan a châk lo khawp ang.

"Aw, Rafa..?"

"In bia ang, ka lo kal dawn nge ka thlenna ah i rawn kal dawn?" Lawm lo âwka taka a tih chuan a ngaihna ka hre lo deuh!

"Briena, chungchang a nih chuan engmah sawi ka duh lo, a awmna min hrilh dawn te a nih loh chuan.."

"Ah..i nupui chu i ngai leh si elaw? Natalie chuan a lo hnar che mi?" Ngeiawm zeta a rawn tih chuan ka inseh ruh țawlh țawlh a. "Rafael, i țawngkam hman fimkhur rawh," Hepa hian Briena a duh chiang a lawm, a inrawlh ngei ka ring ta tlat bawk.

"Sawi dik loh ka nei em ni?" A la ti țalh a.

"Ka rawn kal dawn."

Spanish hotel ka thlen chuan security khirh zet ka hmachhawn leh tê té a, ka card ka hmuh hnuah inthiam loh hmel takin min tlawn leh sia. Tenawm lutuk!

Spanish Hotel Enchante Room 305
2:15Am

Rafaela room kawngkhar ka kik chuan a la rawn hawng lawk lo lehnghal a. Vawithum ka kik hnuah a rawn hawng hrâm.

Khuma Briena muhil ka hmuh chuan ka thinrim lutuk ka puakkeh a ni ber mai! Mangang taka ka nupui ka zawn laiin tunah min ko chauh a nia! Ka țhian ka lo ti ve a sin le..!

A kawr awmah țhâmin, "A chungah hian enge i tih tenawm pa." Thinrim lutuka ka tih chuan a nui suk nia maw le!

"I nupui hian i lakah hlimna a hmu lova, ka hnen a rawn pan a ni." Engtik laiin nge ka hnek hman ka hre lo! Rafaela chu a pai nawk a. Rawn ding ngilin, "A shock viau lo che maw?"

"Tenawm lutuk, ka nupui a ni tih hre reng chungin i mutpui a maw?" Hnek leh ka tum chuan ka kut chu a lo man chat a. "Enge ka sawi kha? I chungah engtin pawn awm se thiam lohna ka nei lo ka ti a ni lawm ni?"

"Engtin nge hetah a awm theih?" Ka hriat duh ber a ni.

"Mahni nupui pindana kalh khum duh tur khawpa mawlah ka lo ngai lo che a," ngeiawm zetin a ti leh a. Amah hi a nih chiah hi lo hruai chhuak tu.

"I țhianpa nupui chu i lo duh viau a?" Ka tih chuan a nui suk.

"Briena hi i phu hlawl lo."

"Phu lo mahila, ka nupui a ni miau sia," ka ti ve ngat a.

"Contract hmang a i nupui.." Ka hnek leh teuh kher mai, kan thawm kan dim lo hle chungin Briena chu a harh chuang miah lo va, Rafaela hian thil țha lo a tihpui em ni le?

Briena mutna lam pan chuan ka kal ta zawk a, khumah țhuin ngun zet hian ka en ta a. A biang sen deuh țân ka hmuh chuan ka tawk zauh a, a sa deuh ham ham! Kun hnaiin a hmuiah chuan ka fawp zauhva, Rafaela runluih nâna ka tih a ni. Zu rim a nam deuh tlata ka hriat avangin ka hnim țha leh ngat a. Ka hresual lo ve, a in ngei a ni!

"Nau a pai tih hrereng chungin zû in i phalsak a, engang țhian nge maw i nih le..?" Rum zetin ka melh a.

"No hnih bâk a in lo, rilru hahdam taka a mutthilh theih nan ka pui mai a ni."

"A zat lamah ka buai lo, zû in hrim hrim kha a tan a țha lo. Hetiang êm hian a ni maw min lo huat!?" Ka tih chuan a hmel a dur deuh khap a.

"I nupui rilru tina suh ka tih che kha.."

"Rafa, ka tana a harsat zia hi hrethiam tur ber i ni asin."

"Briena tan a harsa lo bik em ni? A hriselna dinhmun i hrechiang a, chuti chung chuan i kalsan thei a nia, engang mipa nge i nih zawk le..?"

"A țha e, ka thiam loh a ni, hlimtakin i siam thei zawk ang, ka kal ange. Kan ințhian țhatna pawh zanin hian tawp rawh se." Briena muhil chu ka melh leh zauh a, khum ațang chuan thovin kawngkhar lam ka pan ta a.

"Dazel Solomos.." Rafaela min koh dan avang chuan ka ding chawt a.

"I nupui hi i hruai haw thei ang, tlawm zawk nih hreh suh, i thiam lohna kha pawm la, i hmangaih thu hrilh bawk ang che. Tun bak hi hun țha i nei tawh lovang tih ka hlau khawp mai!" A tih chuan ka inher leh ta nge nge a.

"Enge i sawi awm zia?"

"Ka sawi awmzia hrethiam lo tur khawpa â i nih loh kha..a kum hi ngaihtuah la, i kum kha ngaihtuah bawk rawh, ani ang rual paltlang atan chuan a tawrh hi a nasa mah mah a ni. Ka țhian țha ber nupui chu ni lo se, a rilru hneh tumin țan ka la ngei ang." A tih chuan, "Rafael.."? a bak sawi tur ka hre lo.

"Engchen nge nangmah kha inbum i tum, i nupuiin a hmangaihna che hi engtianga rei nge i haider dawn? I sum ûm a nei che a ni loh hi..!"

"A pa vanga innei kan ni reng alawm."

"Mawl viau suh, Jimmy Larson fanu a nih hi, duh tak tak se zawng zanin la la hian ka hnena kal lovin Melbourn a pan daih tawh ang, chutianga ti lovin, a pasal țhianpa min la rawn bêl a, i thluak kha hmang rawh, private jet hire thei tur khawp a hausa a nia, chutah a pa duhthusamin a la rai zui! Hmeichhe dangin i fâ a pai tih hrereng chungin i inah a la cheng a nia, harh chhuak rang la a ni mai." Mar pât a a tih chuan ka harh zawk!

Rafaela chu ka nuih suk a, "Ka lawm e, ka hneh thei ta ngang lo a nih chuan, i hnenah ka rawn dah ang," fiamthu titak deuhva ka tih chuan, "Chu hun chu thleng mawlh rawh se," za zetin a nui a, "In luhlulna ve ve phêna hmangaihna hmu thiam tur khawp hian ka fing tâwk, mipa i nihna ang leh upa zawk i nihna angin i țan hmasak a ngai ngei ang," ka bânah a rawn hnek zauh chuan ka nui ve ta nge nge a.

Hepa inla fing vel lutuk hi ka lawm riau.

"DNA test result chu ka hriat ve chi a ni em?" A tih chuan, "Ka fâ a ni lo, a pa diktak kan hrechhuak har tawh lovang, Roger nge Tim Hathaway, ni ang?"

"Kan hriat thuai dawn chu..naktukah ka lo buaipui dawn nia, nang chuan Natalie leh hetiang vel hi buaipui tawh lovin i nupui chauh ngaihsak la, a bâk chu ka kutah dah hmiah rawh."

"Awle, apartment a haw nan chuan a tlai tawh mah mah, intur kan dawm dawn em niang, nge zanin chauh chu i khum min kian dawn?"

"Ka kian che chu a ni ber a lawm, i lo kal hma pawh khan hetah hian a nia ka mut," couch chu a kawk zoh a. Rafael Faulkner nge nge țhianțha a tling e. Ka nupui tereuh vang hian kan ințhian țhatna a chhe hman țep a nia! Amah vang tal pawh hian Briena hi ka kalsan ngai lovang.

Whisky kan dawm dun leh ta a, Watson bay a, Briena a hruai chungchang vel a sawi chuan ka lo thîk leh hman hmawh! Ka nupui tel ve tawhna ah hi chuan ka thikthu a chhe viau tih ka hrechhuak ta bawk.

Zinglam dar li ah kan mu ve ta chauh a, Rafa couch ah a mu a, kei ka nupui bulah, nuam dangdai ve tak a ni. Pindan dang lâk ka tumin a phal ngang si lo va, ka hnial duh ta bik lo.
#
#

Ka harh leh chuan tukverhah nizung a rawn lut raih a, Briena ka hrechhuak hmasa ber. A mutna ruak huai ka hmuh chuan hlauhthawnnain ka khat a. Rafa erawh tui takin ala mu thung!

Bathroom lamah a kal a niang a..? Briena thawm hriat tumin ka beng ka chhi reng a.

Bathroom kawngkhar ri rak rak ka hriat chuan khumah ka țhu chhuak a, a thinrim leh päng päng ang chu! Engtin pawhin min ti se, thinrim loh ka tum ang. Huh! Ka ngaihtuah dan chu leh..

"Hetah ka awm tih engtin nge i hriat?" Ka rin ang chiahin a âw chu a chang fak a. A lu towelin a tuam a, bathrobe lian zet a a ha chung pawhin a nalh tho.

"Nizanah min lo call kha i hre tawh nange?" Kei hi dawt ka'n sawi ngawt chu le..!

"Dazel...!?"

"I rui a, ka hming i lam reng bawk nen, Rafa mangangin min lo call a lawm," ka tih chuan inngaihtuah fê niawm tak hian a chal a chuar nâng a. God, ka dawt sawi hi a hrechhuak a nih vaih chuan...?

"Hah! Rafaela mai mai chu.., tunah chuan ka rui tawh lova, i haw thei tawh e," a ti nghauh a.

"I ruih laia min koh vangin nizan pawh ka muhil lo, i dam lo emaw ka tia, min ti hlauthawng hle a ni, i rui tih a sawi tel si lova.." Nui lo turin ka insum nasat a ngai viau.

"Ah..a pawi ka ti khawp mai, hei i hmuh ang hian ka țha e, apartment-ah lêt leh tawh rawh."

"Keimah chauhva haw ka tum reng reng lo, ka rual a i lo haw dawn a nih loh chuan.."

"Teuh lo..ka haw dawn reng reng lo." A lu tuamna towel chu phelhin min vawm nan a hmang a, thinchhe ve tâk tâk tak a ni. Ka tactic number one chu a fail phawt! Eng style nge amah hruai haw tur hian ka hman ang aw..

Engtikawng zawng pawhin ka hruai haw tur a ni. He hotel chawp hian lei ngai mah se Briena lo haw leh na tur a nih chuan ka lei mai ang...

End of chapter-19

Dated: 10th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:35 pm

SOLOMOS BRIDE

by Becky Rafa Renthlei

Chapter-20

Briena lungawi lo zeta ding tau chu ka en a. Tun ni reilote chhung pawh hian a landan a danglam dawrh alawm le!

"Thawmhnaw i keng em?" Ka zawhna ngai pawimawh lo tak hian a dar a san âk. A sam chu a ro hma hmain a phiar nawk nawk a.

Rafaela mutna lamah pheiin, "Tho rawh le, hnahthawh tur i nei," ka tih chuan peih loh hmel zet hian a meng suar suar a, "In la haw nange?" Hepa tak hi chu (h)

"Haw lo, hei vang hian a lawm tho tura ka tih che," angaihna hriat loh hmel tak hian min en a. "Briena ka hruai haw theih nan min pui rawh," a beng bulah ka ti sup a.

Briena chu khumah țhuin kan thusawi hre hmel a pu lova, a phone-ah hian eng em em nge en tur awm le? Tunlai chu a bih deuh sek a, ka la check sak khawp ang.

"Briena, ka thlah dawn che em?"
Rafa hian eng rilru nge a put? Ani thlah a ngai kher lo.

"Umn..er.. min thlah theih te chuan," Min melh zeuh paha Briena'n a tih chuan ka run khawp mai. Kan țhiandun inkar engmah a hre tawh der si lo va. Huh! Rafa thiltum hre chiah lo mah ila ka chhiatna turin a ti duh lo tawp ang.

"Brienna, ka rualin lo haw rawh," Rafaela bathroom-ah a lut tawh a, a lo chhuah hmain thlêm thlu hman hrâm ila.

"Enteh, Dazel, ka sawi vek tawh kha contract bawhchhe hmasatu zawk nih ka duh loh vanga apartment-a haw tum chauh ka ni. Kan inkar erawh ala ngai reng tih hria ang che." A in her nghauh a, a thinrim hi chu a nasa ve ngawt mai, pawisak a nei mang reuh si lo va, a duh dan hian han awm phawt teh se.

Rafa bathroom ațanga a lo chhuah tak avangin ka chhang tawh lem lo.

"Briena ka rualin kal se, rawn hmanhmawh duh lem suh, hun a mamawh rih a nia," Rafael an a tih chuan pawm chiah lo mah ila, thlantur dang vak ka nei chuang lo.

An hnungah muangchangin ka zui ve ta a. Ka duh aiin car-ah a chuang tam mah mah. A naupai a chhiat leh vaih chuan a pawi tawh viau ang. Hman zana ka chhuahsan ta kha ka inchhir miah lo, a chhan chu Natalie hmu tur khan kal lo ila chuan tuna ka thil hriat hi ka hre hauh lo ang. Briena nen kan chhiat vekna tur ngaihtuahtu hi ka chhuah hauh lovang.

A pasal awm reng laia midang car-a achuang leh tlat hi hundang chu ni se, ka haw ngawtin ka ring. Mahse, kan hun tawngin a zir miau si lo va, Rafa sawi ang khan tlâwm zawk nih ka hreh lo mai aniang chu.

Apartment kan thlen hnuah pawh Briena chuan min pehhêl char char a. Rafa bulah deuh hlir a awm!

"Rafa, dinner lo ei ve la..?" Briena sawmna chu 'áw' tiin a chhang ang tih ka hlau zek zek. Zanin hian thil tamtak sawipui ka duh a, Natalie chungchang pawh hrilhfiah ka tum bawk. Rafaela a awm chuan ka nupui hian tuna a awm ang chiah hian min ngaihsak leh miah lovang, luhlul si, thinchhe bawk si, chuti chung chuan ka la duh viau tho! Keimah zawk hi ka dik lo zo tawh.

"Brie, zanin chu min hrethiam rawh, ka hna chungchangah tihfel tur a awm a, ka hman ka ring lo deuh." Rafaela chhanna chuan min ti lawm viau.

"Ah..club kalna tur țha deuh ka hria a nia, nuam i ti ngawt ang," Briena'n Rafa en kar pahah a tih leh chuan, "Briena chawlh hahdam i mamawh tawh," ka ti nghut a. Rafa mitmei ka hmu nâin awm ve lo ang hmiaha min ngaihna hi ka ngaithei der lo.

Briena'n min chhan hman hmain Rafaela chuan min chhuahsan ta nulh a.

"I țhianpa chungah khan lawm hle tur i ni, Dazel?" Rafaela a chhuak chiah a, a'n sawi zui nghal kher a. Ka huat zawng tura țawngdan a va'n thiam tak.

"Engvangin? Rafaela hrechiang viau anga i lanna kha duhtawk teh."

"Nang ang êmin hrechiang lo mah ila, a mizia ka hriat chhun kha ka duhzawng tak a ni."

"Enteh, Brie, hmanzana ka chhuahsan che kha thiam ka inti lo, ka tihpalh takzet. Bul țan țha leh ang." A dinna lamah ka phei nghal a, a tawlh hnung hrat thung.

"Hah! Bul țan țhat leh tur a awm lo, ka pum chhunga mi hi keima fâ liau liau a ni, i chhuahzan ațang khan a pa nihna i nei tawh lo," thinrim meng de sar chunga a tih chuan chhan mai dan tur ka hre lo leh pek a. Natalie fâ kha ka fâ a ni lo tih hriattir hmasak phawt a ngai dawn a nih hi.

"He khawvelah hian nupui pakhat chauh ka nei a, chu ka nupui chuan ka fâ a pai bawk. Engmahin a thlâk danglam ngai lovang, kawhmawh bawl zawnga i awm dawn a nih chuan kan inneih chhan hi vantlang hmaah tarlan a ni ang. I pa natna hi company lamin an hriat i duh hauh ka ring lo." Inringtawk zeta ka tih chuan a biang a sen awp awp a.

"Dazel Solomos ramhuaipa, ka pa hmanruaah hman tum reng reng suh," a ti vin țhat a.

"Yes, Dazel Solomos chu ka ni ngei e, chutiang bawkin ka nupui i nia, Solomos i chhawm tel bawk." A hma a ațawng dan ang chiah a ka tih chuan thinrim zeta inherin kan room lamah a chho tau nghat nghat a. A landan duhawmzia a inhre der si lo.

Ka zui chho ve nghal a, kawngka dim lo zet hian a hawng țhuai a, a chang hi chuan naupangchhia ang mai hian a che leh țhin. A thinrim laia runluih hi nuam ka ti tlat lawi si.

"Brie...?" Khumah a țhu chawrh a. A mitmeng paw ram de deuh sar chuan inhau a cho zek zek tih a tarlang.

"Brie...?"

"Min ko reng lo khan i tihtur ti mai rawh," a ti hmak a.

Drawer awmna lamah pheiin DNA test result chu ka va phawrh ta nge nge a.

"Ka fâ a ni lo ka tih kha," file ka pêk chuan a la duh țhak lo.

"I fâ a ni emaw ni lo pawh ni se ka buaina tur a swm tawh lo, i thinlung phékah khan contract hmanga innei kan ni tih kha ziakin dah rawh. Min beisei tawh suh." A ti khauh a.

"I thinrimna chhan ber chu Natalie naupai kha ka fâ ni a i ngaih vang a nia, tunah a fiahna nen ka pe che a, i lawm chuang si lo."

"Lawmna chhan tur ka nei lo miauva, kei chuan pasal ka mamawh tawh lo ve, i duhdan angin awm la, ka duhdan angin ka awm ang. Nupa inhmangaih ang taka lan der vel kha bansan la a țha a ni mai."

"Engtia tih chi nge maw i nih le..!?" Beidawng âw zeta ka tih chuan ka mitah chiang takin min en kalh a. "Engtinmah min ti lo mai rawh." Chhum hmaka tiin khum ațanga thawh tumin a ding uai a.

"A țha e, ka laka i thinrimna leh lungawi lohna i neih te kha i dahțhat hun ka lo nghak ange, i chapona zawng zawng a tlâkhniam vek hnuah i tan ka lo awm reng ang." Ka ti ve ta a. Hei bâk sawitur ka hre ngang lo. A luhlul ve êm a ni, a tirah ka lo tidik lo ve bawk nen, min chhuahsan loh phawt chuan a țhaah ngai phawt teh ang.

"Dazel, a tuartu niawm zawk tak khan țawng ve ziah suh." Bathroom a pan a, ka chhanna pawh nghak tawh chuang lovin a lut nghal hmak.

Hmeichhia ka hriat tawh zawng zawng zingah Briena tluka dangdai leh ngaihawm hi an awm pawh ka hre lo. A luhlulin tihmawh viau țhin mah se, a dawhthei phian a, tunah te hian Melbourn-a haw tum tlat se, thiamthu sawitur ka nei miah lo. A kum a naupan rualin a tuar a chhel viau!

Ka lo kawp tawh țhinte anga en ka tum a piangin buaina ka nei ziah, anni nen inanna pakhatmah an neih miau loh vangin enkawl dan tur ka hre lo ziah!

'Briena Solomos, min chawkbuai mah mah a ni' ka ti sup a. A lo chhuah leh hmain inthiarfihlim ila kan inhnial lo a ni mai. File a en tâk loh chu la let lehin ka dahțha a, engtik niah emaw chuan ka thuhnuaiah ala awm ve ngei ang, nghah hi han peih phawt mai ila, min chhuahsan lo tura siam hi tuna atan chuan a tawk rih a ni.
*
*
Ni éng chuan min ti harh hlawl a. Tukverh inhawng ațanga ni eng lo lut chuan pindan chhung chu a chhun raih a. Ka meng nghal kawk kawk mai.

Khumah keimah chauhvin ka lo mu a, nizan ka mut dawn khan pindan chhungah Dazel a awm miah lova, ka ngaihven duh lem lo.

Ka inbeng kang a, Dazel lukham khuar kalh ka hmuh vang chuan ka bulah a mu tho tih ka hre mai. Phakar lutuk! Ka muthilh hnuah a lo mu dawk dawk tihna a nia, a fâ a ni lo tih a sawi lai khan ka chhungril a nui ver ver. Mahse, lungawi anga lan kha ka tum lo mai a ni.

Kan nupa nun khirh ru zet hi ka kham hluah hluah. Rai kher lo ila chuan amah runluih nan boyfriend ka nei daih tur a nia. Nizanah khan min nghah reng tur thu a sawi a, kan la hria ang chu, a awmdan a zir zelin ka insiamrem ve zel ang.

Ka thawmhnaw chu inbelin khum tlangah chuan ka țhu a, tray chawia Joanna lo lut pawh ka en lem lo.

"Morning Brie," a nui sâng tak náin min lawm vak lo tih a mitmeng a țang chuan ka hrethiam ve mai. Nizan hmasa ka riahchhuah chungchang a hria tihna a nia! Joanna hi a hma khan ka ngaina hle a, ka nu ang hiala ngaiin ka harsatna ka hrilh ve țhin kha a nia. Tunah lem ka dinhmun hrethiamtu tur zawkin Dazel a țan hlauh a. A chungah hian ka lawm viau bik lo.

"Morning, i chhuak thei ang." Ka ti ve hmiah. Makti deuh hmel a pu a, Dazel țan hlur tute hnaih hi ka tum tehchiam tawh lo.

"Brie, thinrimna i nei anih chuan sawi lang mai la..?"

"Ka nun hmandan leh ka rilru hrehawmna hre chiangtu i nia, Dazel lam i țang a nih chuan țang tlang che." Ka țawng na mah mah tih ka hria a, mah se ka nau chhiat thleng thleng khan ka phalna la hmasa lovin Dazel a lo hrilh thawt thawt vei a nih kha. Tumah hi ka ring zo nek lo ve.

"A nih chuan i breakfast ei rawh le, engtikniah emaw chuan i la hrethiam ve mahna." Pindan ațang chuan a chhuak zui ta a. Engmah hriatthiam tur a awm lo, harsatnate manganna leh natna thleng pawhin kan chunga a thleng a nih loh chuan mi nuna thleng hi kan sawisak thei ngawt lo. A tuartu natna tawrh dan kan hriatthiampui hek lo.

Ka pa natna hmangin Dazel khan min vau ve khanglang a, a duh chuan sawiin puangzar rawh se. Ka hlau eih lo, engthil hmang mah hian min blackmail tawp lovang. 'I'm Briena' ka nui lui sak a.

He apartment chhungah hian indo a ngai a nih pawhin ka nau neih hma chu ka tuar țang țang mai tur a ni. Tunge ka nih? Ka duh lohnaah hi chuan tumah ka hlau lo ve.

Breakfast ei pahin ka inngaihtuah kual chiam a, chuti maia tlawm tur ka ni bik lo.

"Brie, tikhan inkhung reng i tum em ni?" Dazel rawn lut chu ka lo melh rum nghal ringawt a.

"I lo buai angai lovang."

"Mahni intih hrehawm hi bansan teh." A nui suk a. A nui te hlei hlei hian ka luak a ti chhuak. Insum tum engang mah ila ka pum rawn let but chu ka thunun hman tawh lo, Ka hmui hupin bathroom ah ka tlan phei ta chawn chawn a.

Chau zetin bathroom chhuatah chuan ka țhu hnawk a. Tukin ka awmdan mai mai chu. Ka thil eiah khan Joanna'n thil țha lo a telh em niang? Chu erawh ka ring chiah lo. Hah! Ka rilru hi a dik lo zo vek tawh.

"I țha em?" Bathroom kawngka Dazel an a chum dawt dawt a. Chhunglamah ka inkalh khum hmiah.

"Brie, engtin nge i awm? Carlos ka ko dawn ania." Ka chhang nguar ang, min ti hrehawm lutuk hepa hian!

Chau zet hian ka țhu tawm chal a, ka pum let but but chuan ngai a awh thei meuh lo. Ka thil ei zawng zawng ka luak chhuah vek hnuah pawh luak tur ang maiin ka la uak tuar tuar a. Ka thlan sa phat phat tihreh nan ka hmai ka phih leh tê tê hnuah muangchangin bathroom kawngkhar chu ka hawng ta țawk a. Darkar chanve vel zet ka inkhung hman.

Kawngka bula Dazel lo ding kalpelh ka tum chuan min lo vuan ding vat a.

"Ka ngaihtuah zia che i hria em?" A hmel phelh deuh phung ka hmuh cbuan ka luak leh mai dawn alawm le!

"Min tawk suh."

"Tinge tiang hian i awm tlat le?" Beidawn hmel zet hian a bân a vai thuak a, min melh vang vang hnuah, "Carlos a lo thleng thuai ang," ti supin pindan chu a chhuahsan ta a.

Hetianga ka awm chhan maw! Nupui te aia a hmei a dah chungnun zawk vang maw le.

Khumah muin lehkhabu ka chhiar a, Carlos leh Dazel lo luh lai pawh chuan ka țhu chhuak duh chuang lo.

"Briena, engtin nge i awm?" Carlos nui vur vur chu ka nuih let ve sak a.

"Er..ka luak a chhuak satliah mai a nia.

Min check zung zung a, ka zu in kha a sawi chhuah loh hrâm ka beisei.

"Alcohol lam in lo tur khan ka hrilh che sia," ka hlauhthawn ang ngeiin a rawn sawi chhuak ta.

"Er..no hnih chiah ka in," nuamti vak lo hian Dazel chu ka melh a, a mitmeng thim khap ațang chuan a lawm hauh lo tih ka hria.

"I naupai chhung hi chuan in lo thei la ka ti khawp mai," Carlos an tih chuan ka bu zauh a. Damdawi ei dan leh insum tur thil a sawi hnu chuan, "Motor chuan pawh ka khap leh rih ang che, nupa nun erawh zing lutuk lo chuan in hmang thei ang." A nui huk huk a. Dazel hmel dam ta thluam ka hmuh chuan ka ngei ru ngang mai.

Carlos an min chhuahsan hnuah lai zet hian khumah ka mu leh a, Dazel pawh a rawn lawn kai ve a. "A thusawi kha zawm hram i tum dawn nia," ka kawngah min rawn kuah a.

"Min khawih suh ka tih kha, i duh duha min tihkawi tum suh." A kut ka dahsawn sak nghal hmak a.

"Ka nupui i nia lawm," A ngai ang chiahin min rawn kuah leh a.

"Dazel, ka fiamthu miah lo a nia," ka vin deuh hlar, kan in runluih deuh ngar ngar dawn a nih hmel.

"Ka fiamthu bik hleinem, ka nupui kuah chunga mut hi ka châk ber a ni."

"Hah! Natalie Stone ka nih loh hi aw, min hai deuh nge, whisky i lo in hman?" Ka nui lui hak a.

"Ngeiawm viau teh suh, Brie," ka mitah tak min en a.

"Min chhaihbuai tur ringawtin em ni i rawn mut, Carlos sawi ang khan hahdam ka mamawh a nia,"

"Ok..hahdam tum rawh, hei bâk hi chu ka pel lovang," ka kawngah bawk chuan a rawn kuah leh a. Ka tlawh sawk avang chuan a nui a.

"Nau i pai lo chung pawhin i thinchhe ve a nia, tunah phei chuan..." Sawizawm duh lohvin a'n ngawi lui deuh kher a.

"Ngawi renga i awm thei ngang lo a nih chuan pindan hi chhuahsan mai rawh."

"Duh ta lo ila?"

"Keimah ka chhuak mai ang." Tih pahin ka țhu chhuak nghal a.

"A ti leh tak tak dawn e, engtia enkawl chi nge maw i nih le?" Thutak deuh zawka a tih chuan rum zetin ka melh a.

"Min enkawl lo mai rawh, i chawlh lâk hi cancel la, company ah kal rawh." Ka ti nghauh a.

"Teuh lo, engang pawhin min hnial mah la, i awmna apiangah ka awm zel ang, min fiah tum hauh suh."

Chhang duh tawh lovin ka mu leh a, bang kil lam ka hawi ngât bawk. Min be chhunzawm tawh bik lo.

Thawmdim taka a tho ri pawh ka hrereng náa ka che duh eih lo. Lehkhabu ka bihsan leh ta a, Dazel erawh a reh hmiah thung! Chutah inherin pindan chhung chu ka melhkual a, a chhuah lai ka hre miah lova. Bathroom panin ka tho chhuak a, kawngkhar ka nem hawn rual a ka thil hmuh avang chuan ka ding ta chawt a.

Bathroom chhungah chuan Dazel chu a lo ding reng a, kawr a ha lova, pheikhawk pawh bun lovin a kekawr phelh a lo tum țan mek!

Ka din ngai rengin ka ding reng a, "Kawngka tal i kalh lova!" Nuamti vak lo a tiin a mitah tak pawh en ngam lo hian a âwm pharh hlai hlap chu ka en daih a.

"Nang leh kei chiah kan awm a, ka thawhsan lai che kha chuan khumah i mu a, kalh kher a țulna ka hre lo." A kekawr chu phelh zawm lovin ka lam panin a rawn pen a.

"I lang itawm kher mai, i zak deuh em ni?" Ka inrin hman hma chuan a lamah min pawt hnaiin min pawm bet thlawp a. Uar leh duhthawh zet hian min rawn fawp ta a.

Ka theihtawpa țangin min pawm behna ațang chuan tal chhuah ka tum ve fat fat a. Min thlah duh mai bik lo. Min fawhna erawh chu a dam ta viau, hundang chu ni se phur zetin ka chhang ang chu, ka inti paukhauh a nih loh chuan ka chak lohna ber a zeina hmang hian min thlêmthlu leh mai ang.

Ka lu ka lo chet ve sek avang chuan min fawhna chu a thlah ta nge nge a.

"I luhlul ve thlawt a ni tiraw, Mrs.Solomos?" A nui hawk a. "Nang hnehtur che leh thunun tur che hian enge ka tih theih a, engchen nge ka dawhtheih tih lo en ang che." Min vawnna a thlah rual chuan ka hnute a țhâm tel pah deuh kher a.

Ka che ve nghal phat, a kut a tih pemna bandage a la intuam laiah chuan ka hmer vak a. Min thlah rang teh e. "Kawlhsen nu.." a țhen sak a.

"Chimawm pa," min vawnbeh leh hman hma chuan rang zeta inherin khum lam ka pan nal nal a. "Mrs.Solomos ka la duhtawk ve miah lo a nia," min la rawn au zui hrâm nia. Ve lutuk a!

Chumi hnu chuan khuma țhuin movie ka en ta daih a, towel chauh venga a lo chhuah lai pawh chuan hmuhnawm ti lutuk ber ang hrimin ka hawisawn duh eih lo.

"Min do reng i bansan hunah leh i luhlulna i paihbo țhen hunah nupa hlimtak kan nih ka beisei, i pasal hi tunge a nih i hriat thuai theihnan puih che ka inhuam reng a nia."

Thawmhnaw a inbel mawlh mawlh a, pindan a chhuahsan dawn emaw tiin ka lo nui ru ver ver, chutianga ti ta lo chuan drawer-a chips leh chocolate ka dahțhat chu rawn phawrhin ka bulah a lo keng phei a, țhuthmun rem sauh sauhvin a ei ta a.

Ka eichâk ve reng. Min pêk pawh tum chuang lovin movie chu hmuhnawm ti awm tak hian a en a. Ngeiawm tak a ni!

"Khawi ka ta a nih kha," chocolate a kheh leh laia ka tih chuan, "Ka ta tih tur a ni lo, he inchhunga awm hi chu kan pahnih a ta vek," a hmaa ka tih ang kher khan min chhang a.

"Kan ta a nih chuan ka ei ve thei tihna," a eitur ken lai chu ka phihthlaksak a, ka hmawm hmak.

"Min dil țha ve mai la? I tan te chuan ka ui miah lo," a la ti zawk mah a.

"Dil ngai lovin min pe ve mai ta che.."

"C'mon Brie, tlâwm hi a harsa viau em ni?"

"Harsa náng, a awlsam lutuka ka thiam zawng a ni lo," ka nui ta var var a. "I nui hmel ka hmuh lohna chin pawh ka hre tawh lo." Chutia a tih veleh ka nui tawp riai riai a.

"I thinrim a nih pawhin midang pan mai lovin i pasal hi min hrilh hmasa țhin tawh dawn nia," thutak zeta atih chuan ka ngawi reng a.

"Rafaela a ni emaw, tupawh ni rawh se, kan nupa buainaah midang inrawlhtir ka duh lo. Kan buaina chu kan pahnih bawkin chinfel kan tum mai tur a ni." Eitur ho chu ka malchungah rawn dahin khum ațang chuan a tho ta a.

A mizia inthlâk sek hi ka hrethiam lo nâin Dazel Solomos kha a ni miauva, nula teh duh rawn charm ngah zet kha a la ni reng tho.

Hetianga min hneh tum ran chunga a awm zel a nih phawt chuan kei hi ka țang rei thei tawp lovang! Amah ka duhna nge nasa ka huatna?

End of Chapter-20

Dated: 13th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:36 pm

SOLOMOS BRIDE

by Becky Rafa Renthlei

Chapter-21

Kan room-ah Dazel nen inbe miah lovin kan awm dun a. Lunch ei hun chuan ngawirengin a chhuak nulh a. Min pe ve lo a nih chuan ka eitur ka insiam ve hmak ang.

Darkar chanve zet ka nghah hnu pawhin Joanna emaw Dazel pawh an la rawn lang ta chuang lo. Khum chu thawhsanin inhnuaiah ka chhuk ve ta a, chokaah tumah an awm lo. Dawhkana eitur inchhawp chu ka hawng diat diat a, ka eichâk lo fai vek!

Keimahin ka insiam chawp ta a, bacon leh chhangthawp, fried proscuitto, vanilla whipped cream ka mamawh tur lakhawm zung zungin ka siam a, naktuk zing ațang chuan ka eitur pawh keimah hlirin ka buatsaih tawh ang. Joanna hian eisiam ka thiam loh țhin ém vang khan min runluih nan heng ho hi a lo dah ni berin ka hria. Ve lutuk a! A țul anih chuan dawr a mi pawh ka lei mai ang.

Minute sawmhnih dawn ka buaipui tawh a, ka ril ațam tawh takzet.

"Engthil nge ti a i inhriat a?" Dazel thinur aw ka hriat chuan ka inher a.

Kawngkaah a ding zuah a, a hnungah Joanna a lo dâk ve âr bawk. "Eitur ka siam a nih hi.." zawi fiah takin ka chhang a.

"Helai hmunah hian engmah i tih ve phal a ni lo, i duh chu sawi ta mai che." Dazel an a tih leh chuan Joanna chu rum zetin ka melh phawt a, "Nidangah chuan lunch ah hian ka duhzawng a siam țhin a, tunțum chu ka duhzawng a theihnghilh ta a niang, ka lo inbuaipui ta mai."

"Briena, thinrimna zawng reng suh, Joanna thiam loh a ni lo a nia, ka duhzawng a siam mai a nih kha,"

"A țha e, in pahnih khan ei ula, ka eitur chu ka siam ve thei alawm," plate ah ka thilsiam chu ka suak chhuak a, dawhkanah chhawpin ka ei ta mial mial a.

"Ka thiam loh a ni." Joanna chu ka melh zauh a, tun ataka inthiam loh thar leh vel kha engatan mah ka ti lo, an duh danin awm se, keipawh ka duhdan zelin ka awm ang.

An pahnih chuan ka thil eilai chu min thlir reng a, ka pawisa duh der lo.

Choka ka chhuahsan hnuah pawh chuan engmah sawi lovin ka chezia chu min thlir reng a. He mite pahnih hian enge an hriat tehreng ni!

Ka nu leh pa rei fê ka biak hnuah mittui tling pam chungin phone ka dah ve ta țawk a. Ka pa dinhmun ațha tehchiam lo tih min rawn hrilh a ni. A rang lama Melbourn ka pan vat a ngai dawn a, engtin nge Dazel ka hrilh tâk ang.

Khumah rilru hah zetin ka țhu a, ka chunga harsatna thleng zozai hi engtia chinfel tur nge ka hrethiam tawh lo. Ka rai tih ka hriat khan ka lawm em em a, tunah erawh rilru hahna thlentu mai a ni. Ka pa tellovin ka nu engtin nge a awm ang? Zanin hian ka kal chuk chuk mai dawn em niang? Dazel hrilh turin inhnuaiah ka chhuk thla ta a.

Living room a țawng thawm ka hriat chuan ka ding chat a, inleng kan nei a nih chuan engmah sawichhuah arem dawn lo tihna a nia. Ka inher tur chiah hmeichhe țap hlap hlap ri ka hriat avang chuan living room lam chu ka pan leh ta zawk a.

Sofa-ah Natalie chu naute pawm chung hian a lo țhu ran a, a mitmeng sen râm ațang chuan a țap nasa hle a ni tih a hriat mai. A bulah Dazel chu inkuangkuah hian a ding run a, a hmel rumtak leh ngeng ngulh chu nidanga ka la hmuh ngai loh a ni.

"Brie..?" A mitmenga hrehawm tihna lo lang chu ka hmuh hmaih bik lo. Henu hian enge kan inah tihtur a la neih cheu!

"Briena, mak i va ti awm ve," Natalie chuan mit khap eih lovin min en a, ala zam lo ham ham hle mai. "I lo la kal ngam a?" zawi fiah takin ka zawt a.

"Ngam lohna chhan tur a awm em ni? Ka fâ pa hmu turin ka lo kal mai a nia,"

"Natalie?" Dazel chuan a ti vin țhak a.

"In pahnih khan lo buai rawh u, nangni pahnih buaina tel lo pawh hian buaina ka ngah khawp a nia." thinrim insum zeta ka tih chuan, " Brie, kal rih teh suh," Dazel aw zawi thawp sat ka hriat avangin ka ding deuh dat.

"Natalie, tunah chhuak rawh le.."

"Dazel, engemaw i hriat le? Chhuak tur chu kei ni lovin a ni hi a ni." Natalie chuan rum zetin min melh a.

"He apartment-ah hian vawikhatmah rawn lang tawh suh ang che. I fâ pa kha ka sawichhuah i duh a nih loh chuan," Dazel áw fiak țhak chu Natalie chuan hlau hmel takin a en a. Nichin lawk kha chuan hetiang hmel pu hian a en hauh lo. Dazel hian naute pa a hria a maw? A mak tulh tulh!

"Enteh, Natalie, buaina siam tur ringawt hi chuan lo kal duh tawh suh." Dam thlapa ka tih chuan min en vang vang a, "Tun hi a tawpna a ni lo tih hria ang che." Dazel a melh dan leh kei min melh chu a dang hlak.

"Dazel Solomos, i nupui hi veng țha hle ang rawh." Naute chu pawmin kawngka lam a pan a. "I duh duh chu ti ta che hmachhawn turin ka inpeih e," Dazel hmel dur khup chu ka hawisawn san ta daih a.

Dinner ei tur pawhin ka tho chhuak lova, Joanna'n eitur min rawn pe a. Ka ei hleithei lo, ka pum no nghulh avang chuan engtham mah ei lovin ka dah leh ta ringawt a. Dazel a la rawn chho lo va, diktak chuan ka khawngaih ve tho. Eng rilru nge a put hre phâk lo mah ila, kei min neih hma kha a ngai ve ngawt țhinin ka ring.

Dar sawm a rik pawh chuan a la rawn chho lo fo. Khumah ka let kual sek a, Natalie hian kei min beih a tum a maw? Engtianga lo dawnsawn tur nge ka hre hauh lo. Dazel zawh lah ka duh chuang der si lo. Kil tin ațang hian thluak sawizawina tur a awm reng mai dawn a nih hi.

Ka nu leh pa phalna thlapin Melbourn-ah ka haw vang vang thei tihna ania. Ro khawmtu tur ber ka pumah a awm miau a, a pian hma chuan kan ințhen thei chuang lo a, contract-a a inziah danah kha chuan chendun tur tih kha a nia, ka pa dinhmunin a zir tak ngang loh vangin ka haw tihna a ni mai. Dazel tan pawh sawi buai tur a awm lo.

"Briena i la muhil nange?" Dazel rawn lut chu ka melh zawk a. "Muhil loh chu a nih hi.."

"Natalie chungchang hi sawidun a hun tawhin ka hria."

"Ah..sawitur engmah a awm hleinem i fâ a ni lo tih ka hre tawh alawm," maktih hmel a pu deuh a. A fá ni se vawiinah tiang khan a țawngkhum lovang.

"Kan sawidun ngei a ngai sia lawm," a thawmhnaw phelhin khumah a rawn lawnkai a. A taksa nalh zet chu en loh tumin ka hawisawn ta thuai a. A nui hawk. "I hmuh fo tawh hnu a nia, zak duh mah ta che."

"Ka zak ka tia mi?"

"I hmelah a lang vek alawm," Ka puansin chu rawn keuvin alam hawi tur chuan min kuai her a. "Ka bulah i mu duh a nih chuan mu la, mahse, min khawih kher suh." Insangmar nghal țun chunga ka tih chuan a nui hul hak a.

"Hahdam rawh, ka kuah ringawt ang che," Zawi supa tiin min kuah lui leh ngat. A hnung ruak kungah chuan ka chum zawt a, "Min do reng hi bansan teh Brie, ka ngai takzet che." Eng tactic nge a hman leh dawn? Mi thlêm a thiam ropui si.

"Ka bula i mu reng chung pawh hian ka ngai tho che, i inkharkhip tlatna hi hlip la, a hma ang khan awm leh ang." Dam thlapa a tih chuan 'awle' tia chhan ka chak ut ut. Mahse, amah vang hian natna engzatnge ka tawn leh ang?

"Muhil rawh țawng țawng ko khan," ka ti ta ringawt a.

"Nangpawh muthilh tum rawh le, i chau lutuk ang." Ka kawngah bawk chuan a rawn kuah leh a. Tun hi min kuah tawpna tur pawh a ni maithei.

Naktukah Melbourn-ah ka lêt anga, ka pa awmdan a zirin Dazel nen kan ințhen hlen tawh maithei a ni. Ka ngaihtuah zawng ringawt pawh chuan ka mittui a hnai kuar. Huain alakah thinrim fo mah ila, ka tana a hmasa ber a ni a ka theihnghilh thei dawn lo tih ka hria a ni.

Ka chapona leh amah ka duhna chu nasa takin a insual a Mahse, chapona ka lo nei thuk tawh lutuk a ni, Dazel min tihnatna kha ka theihnghilh mai mai thei dawn si lo.

Muhil thei lovin, che țha ngam chuang si lo hian ka taksa a țang țun a.

"Brie, engtizia nge?" Dazel chu rawn mengin ka mitah tak min en a, a muhil daih tawh emaw tih naklai a!

"I la muhil nange?" Zahzelah khum bula tui bottle chu ka ban ve ringawt a. Ka tuiin a hal tawp si lova.

"Rilru hahna i nei a nih chuan min hrilh la, i pasal ka nia lawm," ka biangah dimtêin a rawn chul a.

"Engmah chutiang a awm lo. Ka mut a chhuak lo satliah mai a nia," ka pa chungchang hrilh tumna ka nei ta miah lo.

"I mut a chhuah theihnan ka pui thei reng che a nia," a kut chu chettir nghalin ka pum a chul riak riak a. "Inthlahdul rawh, engtinmah ka ti dawn hleinem che."

"I kut a chet chhung kha chuan ka muhil thei chuang lovang," ka ti ve hmak a. Thawk la ham hamin, "Ngawi hmasa a țan hi chu i hreh ve maw le..!" Ka inrin hman hmain a hmui lum ham ham chuan min rawn fawp ta a.

Ka lo tâl ve chhen chu ngaithei lo niawmtaka a hmui chu lasawn thutin, "Ka rilru ka thlak leh e, zanin hian hmangaihna ka chenpui dawn khawp mai che." Inringtawk zetin a ti thum chhak a.

"A teuh lo..!?" Ka tal ve nghal phat phat.

"Ka nupui ka thlakhlelh ang tho hian ani pawhin min thlahlel tih hrethiam tur hian experience ka ngah tawk." Ka mutkawr chu dim vak lo hian a phihsawk a. "Zanin chauh chu min hnial lo hrâm rawh, Brie, hetia inhlat taka awm reng hi ka duh lo."

Ka rilru siamin hnial tumna rilru ka pu ta lo. Ka kalsan tawh dawn a, tunbak hi ka pasal kiangah muin hmangaihna kan chendun tawh lo maithei asin.

Ka mutkawr chu keimah ngeiin phelhin, ruak vekin ka awm ta a. Dazel hmela maktihna leh rinhlelhna rawn lang chu ka hmu ve tho. Maktih loh rual a ni lo reng a ni, a hma lawkin ka hnial zuah zuah a, tunah lem a phur zawk niawm hrimin ka thawmhnaw ka phelh a nia!

"Brie, i ti tak tak tiraw?" Haa! Ka chetdan chu a la awih chiah lo a nih hmel.

"Țawng țawng lo khan hmangaihna min chenpui zawk dawn lo em ni?" ka tih sap chuan sawm nawn angai tawh lo chiang kher mai.

A boxer hâk chu phelhin alamah min kuah hnai ruak a, duhthawh leh uar fahranin min fawp ta a. Ka thiam ang anga lo chhâng lêt ve zelin inthlah phal tawh lo niawm fahran hian kan inkuah chial a. A taksa lum ham ham leh a mipatna chuan min do ran, ka thisen rawn lum țan chu thunun ka tum bik der lo.

"I tello chuan engtihnamah ka ni lo," a chungah min pawtkaiin min kherh bet nghal chial a. Ka tihtur ka hai bik țhak lo. A kutin ka taksa a rem lai lai chu a chul lawr dan dan a, a mitmeng tisa châkna avanga de deuh sar chu ka hawisan thei bik lo. Duat leh dim taka kan taksa a inzawm takah chuan khawvel piah lamah kan chengdun ta riai riai a, a rum nghat ri chuan phurna min pe zual sauhva. A chungah theitawpa uara ka'n chet ve meuh chuan a nui hul hak.

"Ropui lutuk, ka awih thei lo zawk," tiin ka hmuiah a fawp leh vang vang a. Ka hlimna erawh a chuai raih raih thung.

"Ka kaltir ngai lovang che," ti supin min kuah hle hle a, ka kalsan hunah tlemtê tala a nat ve ngei ka beisei.

Ngawirengin minute thum vel kan awm ang tihah a chung ațang chuan chhukin bathroom lam pan ka tum a, "Intifai duh suh, ka la duhtawk lo a nia," ti supin a bulah chuan min muttir leh ta a. Ka chak lohna lai a hre chat chat zel, kalsan ka tum apiangin min hnaih thung si.

Chumi hnu chuan min kuah chial reng a, a hmel dam thlup leh nui hmel rawn lang deuh chuan a ti hmelțha zual. Model taksa ang a nei a, a la hmelțha tel cheu bawk. A hausakna tel miah lo pawh hian hmeichhiate duhthusam a ni chiang alawm. Ka chân phal tak tak angem?

Ka taksa in insangmar ru țeuh chu a hahdam țan huai huai a, chutih rual chuan tawrhnain min rawn fan nghal. Min hmangaih thu tal han sawi se chuan lawm takin a kiangah ka cheng mai tur.

Dazel muhil thaw sak sak chu ka thlir reng a. Ka kalsan hlau niawmtak hian a bawp thahrui ngah hmeltak chuan min khan chial a, a thawh hma ngeia kal ka tum avangin dimtein min khanna chu ka dahsawn sakin khum ka thawhsan ta a.

Ka thawmhnaw engmah ken ka tum lova, insiam em em tur ka nei lo. Zinglam dar nga a rik chuan ka driver Owen ka phone a, ani hian airport thleng min thlah dawn a ni.

Dazel tui taka mu chu a hmuiah ka fawh sak zauh a. Kan nupa room atawp nan melhkual leh thuakin ka chhuahsan ta a. Min rawn umzui loh hram ka beisei.

Sidney International Airport 7:00 Am

Ka lexus car-in Owen nen airport kan pan a. Zawhna min zawt hauh lo nâin ngaihțha hmel a pu chuang lo.

Airport kan thlen chuan Larson company thlawhna chuan min lo nghak reng tawh a, Owen chu nui sânga melhin, "Min biakpawh i duh chuan ka number chu i hriat kha," a kut ka vawnsakna chu a melh zauh hnuah, "Madam, inenkawl țha la, naute hrisel taka i neih ngei theihnan duhsakna ka hlan a che." Inherin car lam a pan nghal a, ka car erawh apartment ah min lo dahsak dawn a ni. Owen hi ka ngaina ve riau bawk.

Ka pa secretary Drew ka hmuh chuan hlim zetin a awmna lam pan tumin ka pen a. Chutihlai tak chuan ka bânah kut tha chak takin a rawn hmer ta a.

"Eng nge hetah i tih..? Dazel nen kan inmelh ta ran a, a sam dum chhah țhatak chu tuai puatin, "Min chuahsan i lo tum reng a?" Thinrim insum zet a a tih chuan min vawnna chu phelh ka lo tum ve ngat ngat.

"Kan inkâr a tawp tawh, Melbourn-ah ka lêt leh dawn."

"Briena, chutiangin i ti thei ngawt lovang, contract pawh a la tawp lo."

"Tawp lo ve, kan la innei reng tho alawm, kan chengdun tawh dawn lo tihna a ni zawk." Ka tih chuan min ben mai duh hmel a pu a. Helai hmunah hian ennawm a siam loh hram ka beisei.

"A țha e, kal ta che. Mahse, i pasal tel lo chuan rei i awm hauh lovang Mrs.Solomos," min vawnna chu a thlah a. "Ka tellova i hlim thei a nih chuan kal rawh ka dang lovang che, mahse, nizana khatianga kan awm hnuah min kalsan duhna rilru i la pu tho va, ka fâ pai chung lehnghalin engtin nge i tih theih zawk? I danglam bik niin ka lo hre țhin a, mah se..hmeichhe dang ang tho i ni. I lâkah hian enge ka tih theih lo nghak ang che." A ti hmuk a.

"I duh duh i ti thei alawm, ka pa natna pawh i duh chuan i puangzar thei ang." Ka ti ve sak a. Dazel mitmenga natna niawmtak lo lang chu ka hmu hman zuai a, a rei lo em a ka hmusual zawk pawh a ni maithei.

Drew hmanhmawh hmeltaka kan lam rawn hawi reng chu ban vai khum zauhvin ka pan a. Vawikhat pawh Dazel hmel ka en leh a nih chuan ka nêm leh dawn tih ka hria.

Thlawhnaa ka luh thleng chuan hnunglam ka hawi tawh lova, Dazel an min thlir reng a ni tih ka thinlung hian a hre thung. Ka mittui chu khap per sakin. Ka thei ngei tur a ni tiin rilru ka siam nghet ta sauh a.

End of Chapter-21

Dated: 14th January 2018


©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:36 pm

SOLOMOS BRIDE

by Becky Rafa Renthlei

Chapter-22

Melbourn Australia Nmw 161 Mansion

Melbourn-a kan chhungkaw chenna Mansion ka thlen ațanga darkar khat hnuah ka driver Owen chu ka be chauh a. Dazel lak ațangin zawhna a dawng em tih hriat ka duh vang a ni.

"Owen, garage-ah car i dah luh laiin Dazel a awm em?"

"A thinrim khawp mai, i kal tur thu hi ka hresaah angai deuh a, Madam nangma'n i hrilhfiah theih chuan ka lawm khawp ang, ka hna hi chán ka duh lo va." Inthlahrungtaka a tih chuan ka khawngaih ve deuh, ani thiam loh a ni lo a, ka hnuaia thawk a nih angin ka mamawhnaah ka hmang mai a ni tih hrethiam tur a nia sin le.

"Awle, ka lo hrilhfiah dawn nia, helamah mamawhna che ka nei thut maithei," lehlam ațangin a rawn nui hak hak a. "Mamawh ka nih hunah min lo hriattir dawn nia Madam." Owen nen kan inbiak zawh hnuah ka pindanah lutin ka thawmhnaw hak tur ka phawrh a, shower nei turin bathroom ah ka lut zui ta a.

Sidney a ka awm hlan khan ka pa hi a lo zual zel zawk a ni. Oliver Solomos hian engmah min hrilh hauh lova, Dazel pawn a hriat vek ka ring. Dam rei a inbeisei lo tih a țawngkam a țangin ka hrethiam vek. Ka inbual zawh vek hnuah ka nu pui turin an pindan lam ka pan ve ta chauh a.

Khumah ka pa chu a lo mu a, a taksa cher riak leh a pum lam puar deuh si chuan a landan a ti danglam hlawk a. Ka pa mi chaktak Jimmy Larson kha anna pakhatmah a nei tawh lo.

"Brie, bawihte lo țhu hnai teh." Ka pan phei vat a. Ka nu erawh lunch enfel turin a chhuak thung, kan house keeper te pahnih leh nurse an rawih lai te pawh pindan ațang chuan an chhuak a.

"Pa, i țha em?" A nui suk a, "Dazel, khawnge?" Ka hlauhthawn ang chiahin min zawt ta chat reng a.

"Company lamah a la buai rih a," dawt ka sawi mai loh chuan Dazel nen kan inkar hi ka pa hriat ka duh miah lo.

"Brie, min bum theih i inring reng reng em ni? Dazel chu phone la, hetah rawn kal rawh se.."

"Mahse, ka pa?" Ka chhuahsan tawha engtin nge lokal turin ka sawm ngam tawh ang.

"I ngaihtuah zau ve viau emaw ka tia, i thluak țhatak kha khawnge a awm zawh tâk? Ka awm loh hunah company hi nangmahin i khaiding zo lovang tih ka hriat vanga pasal neihtir che ka nia sin," khum ațang chuan țhutchhuah tumin a inbengkang a, ka lo pui vat.

"Pa, nau ka pai tih i hria tiraw," ka tih chuan a bu nghat a.

"Oliver nen kan sawidun a, naute i neih fel hunah ka awm emaw awm lo pawh ni ila, contract hi nuai bo in inneih pangaiin innei ula ka duh a ni," ka pa chu ka en tlawk tlawk a, tunah harsa takin inneihna phuahchawp hmangin kan chengdun tawh a, chutiang leh zel zawng Dazel pawn a duh awm lo emai.

"Ka hnial hreh viau che a, mah se kan ti hlawhtling thei lo ang tih ka hlau ani, ka tiam thei lo che." Ka ti ve tlat a.

Tuna kan inneihna pawh Dazel chuan a pawm hleithei lo a nia, Natalie a la awm cheu bawk. Eng ruahmanna thar nge an siam leh tâk?

"Brie, vawikhat chauh ka thusawi hi zawm leh hram rawh, i chhiatna tur engmah ka ngaihtuah dawn lo tih i hriat kha, i pa ka nia hlimtaka awm turin ka duh che a ni." A mitmeng paw râm chuan ngun zetin min en a.

"Dazel Solomos i hmangaih tih hi ka hria asin," Zawi supa a tih chuan maktiin ka ang pam a. "Pa..?" Engtia chhan chi nge pawh ka hre lo ve a, a thluak lam a chiang lo tel deuh em niang?

"Brie, i piantirh ațanga enkawltu che kan nih hi, i duhzawng leh duh loh zawng hi ka hrethiam ve asin."

"Ah..Dazel nen kan inrem thei lo a ni ber mai," ka ti nghat a.

"Chutak chu alawm sawi ka tum, i pasal hi mihring ve mai a nia, in inneih dan kha chhuikir la girlfriend te pawh a nei ve thova nupui neih duh miah lo khan apa thu a hnial hreh avang leh company vangin a la hmuh ngai reng reng loh nupuiah a nei ta che a nia, in inneih hunlai kha chhuikir la, i hmel awmdan leh i kum thlengin nupui atana itawm zawk zawk chu i ni bik lo tih ka hria asin, tunah a fâ hial i pai tawh a, nakina a tuartu tur chu ani nilovin nangmah i ni. I fâ tello khan i khawsa thei dawn em ni?" Dam thlap leh zawi fiah taka a tih chuan dik ka ti ru viau.

"Contract a zawh hunah kan ințhen dawn tih a nih kha," ka pa melh kar chunga ka tih chuan, "ka fanu, paper kha i chhiar chiang lo em ni?" Khum bula drawer chu hawngin contract paper chu a la chhuak a ka kutah a rawn hmehbel ta chawt chawt a.

1. Khum khatah mudunin nupa nun in hmang ngei tur a ni.

2. Solomos & Larson company rochun tu tur fapa in neih hma chuan in ințhen tur a ni lo. Ințhen rawt hmasatu zawk chuan company ah chanvo(share) a nei lovang.

3. Kum hnih chhunga fa in nei thei ta lo anih chuan contract hi tihdanglam theih a ni ang.

4.Inremsiamna zah zo lova....

Paper chu khur deuh dar dar hian ka pe let a, atawp bera inziak khan ka rilru a ti hrehawm zual. 'Inremsiamna zah zo lova tâl hrang hmasatu zawk chuan naute an kawl thei lovang' a hma khan hetiang hi a inziah pawh ka hre miah lo. An phuahbelh ti dawn ila ka rai leh rai loh an hriat hma daih kha a ni bawk si. Ka thaw chhuak hliai a.

"He contract hi ka hne lutuk.." Ka pa lam hawia ka tih chuan, "Tunah hian ka natna avanga lo chah che kan nia, diktakin Dazel phalna thlapa lo kal chu ni la, i fâ kha i kawl thei ang. Mahse, chutiang nilovin a rukin i rawn chhuahsan a, i pasal hian contract bawhchhiaah a puh thei che."

"Chutiangin a ti ngawt thei lovang," ka țap lo chauh tawh a.

"Ka ti thei khawp mai, Briena min la hrechiang lo deuh a ni ang e." Pindan chhunga Dazel rawn pen lut chu makti lutuk hian ka en a.

"Nang..ih..hetah..!" Ka sawi zawm thei tawh lo. Kan țawng zawng zawng kha a hriat loh hram ka beisei, ka thlen ațangin darkar hnih em pawh ala ral lova, engtin nge a lo thlen ve ngawt theih?

"Ka nupui awmna chu ka awmna tur a ni tih ka hrilh chiang viau che in ka hria." Ka pa mutna lam panin arawn pen hnai a. "Mr.Larson, i rilru tih hrehawm ka duh lo viau nâin ka nupuiin a ruka min chhuahsan hi enliam mai ka tum lo a nia." A ti leh nghut a.

"Dazel, ka hria alawm, ka fanu thil hrethiam thei lo zet hi i enkawl turin ka dah hmiah a nia." Ka pa țawng duhdan kher kher chu ka haw riau. Thiam lohna tamtak pawh ka neih ve rualin ani pawn kan inneih hnuah Natalie living room-ah a mutpui ve tho! Chutiang thleng thleng ka pa hrilh chu țul ka ti lem lo. Dazel chu melhrum ka'n tum ngial a, a hmelțha tak leh thim deuh khap chuan min aikaih tlat.

"Hetah awm ve i tum a mi?" Ka hriat châk et et vangin ka zawt ta nge nge a.

"Kha maw! I hrethiam mai ang chu Dazel, i nupui awmna chu ka awmna tur i ti zo chiah a, hetah awm ve i tum leh tum loh a la zawt che a nia!" Ka pa chu tifuh inti zetin a nui suk a.

"Tunah chuan enkawl dan thar ka hre tawh alawm, lungngai suh i fanu chu ka kutah dah hmiah rawh." Inringtawk takin ka pa chu a chhang a. Enkawl ngai ka nih tehchiam pawh ka hre lo ve.

"Brie, thawmhnaw ka keng bik miah lo a nia," Dazel chu ât hmel zet hian ka en hau a. A nu leh pa chenna hmunah haw ve mai tur a nia.Nge? Min tihbuai a châk viau zawk?

"Briena room kha hmang mai rawh u, mikhual pindan buatsaih kher a ngai lo." Ka pa in hlim zeta a tih chuan ka ner sak a. Hetianga rang hian min rawn zui dawn tih chu hria ila apartment kha ka chhuahsan hauh lovang.

"Hawh le, Brie, i pasal lo lawmna hun pawh ila nei miah lo a nia." Dazel aw thawpsat a warning ri tel chu ka hre ru kar, ka chhungte hmuh laia kan nupa boruak țha lo tihlan a duh lo tihna a nia. A țha tho e.

Ka pa chalah fawp zauhin kan chhuahsan ta a. Ka pa hian engkimah ka pasal hi a ring fai vek tih ka hria. Hah! Ka pasal tiin ka ngaihtuah ve ngial a nia. Awihawm loh zawk hian a.

Dazel laka ka lungawi lohna tihlan fo pawh a țul kher em ni? Ka pa sawi kha a dik tak tak a nih chuan kei hi hrehawm tuar tur zawk ka nia.

"Mikhual pindanah i duh zawk chuan a riah theih tho a nia." Ka room-ah a ding run a, la hmu ngai lo ang hrimin ka pindan chhung chu a melhkual a.

"Teuh lo, ka nupui khumah ngei a nia mut ka tum ni, nizana kan hun hman ang kha chhunzawm ka duh maithei," chimawm zetin a nui a. "Le, ka thawmhnaw min phelhsak dawn lawm ni wife," a mitmenga nuihzatna lang ka hmuh chuan ka tum hmak a.

"Min tih el kher kha angai lovang."

"Nang thunun tur che hian i pa phalna ka nei thlap tawh, Melbourn-a rawn kal nghal tura min rawn call tu hi ka sawi kher a ngaih loh ka beisei." Khumah ka țhu a, ka hma takah a rawn ding a. Ka nu nge ka pa zawkin ko ka hre ta hauh lo.

"Min blackmail theih i inring leh tihna mi?" Cho zet hian ka melh a.

"Huh! Contract paper kha i hmaah pharh ka hreh miah lo a nia," a kekawr ipte zenin paper chu a rawn phawrh a. Nichin lawk pawh khan ka chhiar zo chiah a nia, ka ennawn peih tawh awzawng lo.

"I duh leh nangmah khan chhiar la ti nia," ka nui lui sak a. "Kei chuan ka hre bel khawp mai, chuvanga helai hmuna awm hi ka ni bawk." a ti nghut a.

"Contract kha engatanmah ka ti tawh lo," ka ti ve tak nâin a chhunga inziak khan ka awm a tinuam lo.

"1. khum khatah mudunin nupa nun in hmang dun ngei tur a ni. 2. Contract bawhchhe..." Dazel an chhiar zawm leh a tum chuan paper chu ka phihthlaksak vat a.

"I ngaithla peih tawh chiah nange? Khum khata muduna nupa nun hmang tur chuan Sidney leh Melbourn chu a inhlat deuh hlek a ni, ka sawi awmzia i hriat ka ring." A nui duh miah lova a tie awrh chu phelh thawlin, "Ka nupui luhlulte, khawvel tawpah pawh awm la, i laka ka duh ka hmuh hma chuan ka zawng zel ang che." A âw khauh deuh far chu hriat loh der chi pawh ni nghal lo chuan..

"I inthlak dawn nge tikhan ka hmaah i ding reng dawn?" Sawi ve tur pawh ka hre tawh lo.

"Min phelhsak hun ka nghak reng a ni." Khum ațang chuan dimtêin min pawt thova, amah si cheta min kuahin, ka hmuiah a rawn fawp thawi thuak a. Chetsawn ka tum chuan min vuan nghet sauh.

A thawmhnaw ka phelh hma chu min kalsan a tum lo a nih hmel. Ka tih hmat leh a inthiarfihlim hma dawn tihna a nia. Zawi muangin a business coat chu ka hlip a, chutiang zelin kamis pawh. A kekawr ka phelh dawn chuan ka tîm ru deuh a, a hrethiam a ni ngei ang nui suk chung hian aman a phelh ta a. Ka lo thaw huai thung.

"I duhnaah hi chuan nupui fel tak angin i awm thei a, i thin tertek chhuak erawh a tawrhhlelhawm ru phian si! Kan fa hian a chhun che chuan nitin zantin titau thlêmin hun ka khawhral a ngai ngei ang," za zet hian a nui a, ka run viau!

"A pa a chhun chuan pakhatah a lungawi dawn si lo a, christmas dawn apiangin a hmeite a la tlawh kual dun dun ang ti nia." A tih ang chiah chuan ka nui lui ve ngial a.

"Huh! Thikthu kan nei țan ta a va ang ve, hma ka sawn loh pawhin a teuh viau ang, Mrs.Solomos, ka tellova awm harsa i tih hun a thleng thuai ang." A tih chuan rum zeta melh pahin, "A thleng lo turah ngai hmiah rawh." Ka ti ve sak a.

Kun hniamin a pheikhawk a phelh a, "Ka inbual chhungin intur min lo siam sak la.."

"Yes boss."

"Tun ațang chuan darling tih emaw, husband tiin min ko tawh ang che, min ko lo a nih chuan hremna tenau i dawng zel tawh ang. I nu leh pa hmuhah tal hi chuan nupa inngeihtak kan ni tih lantir ka tum tlat, an rilru tina zawngin awm hauh suh ang che." Ka chhanna pawh nghak lo chuan bathroom lamah inringtawk zetin a pen ta thauh thauh a, a piannalh zet chu ka thlir zui vawng vawng. Diktak chuan a chhe lo chiang alawm.

Vawiin hian eng style thar nge a rawn hman leh tâk? Inven ka tum apiangin hnar harsa zawng hian a awm ve ziah a, experiene a ngah ropui si. 'Briena i thluak hmang rawh' tia infuih sauh sauhvin Dazel intur la tur chuan țhutkhawmna pindan ka pan ta a.

Apartment plus ah kha chuan kan room ah duh duha in mai theih turin intur chi hrang hrang kan kawl kha a nia, ka room-ah a awm ve si lova Dazel tan a hrehawm deuh maithei a ni.

Țhutkhawmna pindanah whisky bottle khat leh shot glass ka la a, ice cube box ka la tel bawk a. "Brie, engtizia nge?" Ka nu in min lo hmu hman hrâm!

"Ih..Dazel ta tur a nia."

"Entik thleng nge in awm theih ang?" Pangai taka min zawh chuan chhan ngaihna vak hre lo. Keima thu chuan ka sawi ngawt ngam tawh teuh lo.

"Dazel ka biak phawt angai ang, ka hmanhmawh deuhva nakinah kan sawi țha dawn nia," hmanhmawh zetin ka nu chu ka kalsan a, a inbual zawh hmaa luh hman ngei ka duh.

Ka khumah Dazel chu a lo mu zuah a, kekawrte nen chauh a la awm zui! Ka thawm a hriat chuan a rawn hawi vat a.

"I lâk tak tak ka ring miah lo." Makti hmel a pu deuh!

"Min tir miau sia.." A fiamthu a ni tih lo hriat ve awm tak a nia. Kei hi ka thluak a fim thlawt lo.

"Ka lawm e," khum ațanga rawn thovin ka bulah a rawn ding a. Whisky leh no chu min laksak a, ama'n a thli ta a. A chezia chu ngawirengin ka thlir ve tawp. A taksa ruak kung leh a vun uk kharh chu ennin a har ve thlawt. Ka en reng tih hria niawm tak hian a rawn dâk chhuak thut a. Mawi ka lo tih țhin em em ang khan a kiai sak a, lai zetin ka hawisawn thung.

"Min en turin dikna i nei a nia," Whisky chu a tem hlak a.

"Engchen nge kan awm dawn?" Ka zawhna chu ngaipawimawh lo zet hian a dar asan âk a.

"I pa dinhmun a țhat leh țhat loh a ni mai, zaninah hetah kan riak anga, naktukah erawh chuan kan inah kan phei ve thung ang."

"I nu leh pa i hrilh tawh em?" ka ti sap a.

"Brie, vawi engzat nge ka sawi dawn? I nu leh pa ve tho an nia, koh dan tur chu i hriat kha." A ti deuh nghut a. Ka nui ve tawp. Thinchhe ve ngawt mai.

"Solomos ho han thinchhiatzia hi chu.." ka fiam châk deuh thut a.

"Engmaw i sawi?" Dawhkanah a no chu dahin min rawn ban nghal a. Ka lo ding sawn vat.

"Mipa zaidam tak hi chu i ni lo ve chiang alawm!"

"Huh! Thin tertek neih ai chuan ka la duh fê," Khuma ka țhu tur chu min pawt ding chawt a, "Ka nupui ka chhun zo tawh a nih hmel," A sawi zawh rual chiahin a hmui lum ham ham chuan min rawn fawp a, a taksa lumna chuan min ur nghal ham ham thei nia!

"Dazel, midang an lo lut ange." Min fawhna a thlah veleh ka ti nghal vat a.

"Lo lut ang hmiang, ka nupui ka fawp a ni ve mai a," engahmah ngai lo niawm tak hian ka biangah a chul a, "Engtin nge min ko rawh ka tih kha?" Fiamthu titak deuhva a tih chuan ka nui ve ringawt. A duhnaah hi chuan ngaihawm taka awmdan a thiam ve ngawt mai! Hepa zûnah hian ka la uai leh nge nge dawn a nih hi.

"Thawmhnaw inbel tawh la.." ruakkunga ala awm reng vang chuan nuam ka ti chiah lova.

"Hakthlak ka nei lo tih ka sawi kha."

"Engtin nge i ngaihtuah loh theih zawk?"

"I kal liam hnu lawk khan ka private jet-in ka rawn thlawk ve maw le, airport-a kan ințhen danah khan ka lawm viau ring suh." Thinrim thar leh niawm tak hian a ti bung nghut a.

"Thlantur dang ka nei lo tih i hriat kha," ka ti sap a.

"I harsatna chu ka harsatna a ni, buaina i nei em? Tih ka zawh lai che khan min hrilh ni la chuan a hran ve ve a Melbourn kan pan hi a ngai lovang."

"Sorry,"

"Min tih mangan hi i châk zek zek a ni tiraw, ka fâ pai chung lehnghalin a rûk a rálin ka aparment i chhuahsan a."

"Naa, a bul ațanga țan țhat leh zel chu a fair lo," ka tih chuan mitmeng chang zeta min enin, "Ok..ka thu ang zelin awm tum ang che, chuti anih loh chuan i thiltih phu tawk hremna i hmu zel tawh ang." Ti supin whisky chu a inthlit leh zat a.

"I thawmhnaw hâk tur ka va ngaihtuah ange."

"Ka phone tawh a, an rawn dah mai ang, min kalsan hi châk viau suh."

"I ngai kawi a nih kha, i phone tih ka hriat loh vang a nia," țhatê hian ka chhang ve mai a.

"Nang leh naute bâk ka nunah hian pawimawh an awm lo tih i hriat hunah chuan lawm takin min fawp vawng vawng duh ngei ang." Ti supin min en leh vang vang a, a rui deuh nge maw ni le!

"Kan la hria ang chu,"

"Yes, kan la hria ang, i hriatchhuahna tur a nih chuan eng hmanrua pawh ka hmang mai ang, Solomos wife," a ti deuh kher a.

Thlawhnaah intur a rawn dawm hmasa nge? A țawngkauchheh reng reng rinawm leh nghet ta churh chuan ka thluak a tibuai leh vek!

"Sana kha khawnge?" A bun reng țhin kha a nia, tunah a bun miah lo.

"Thinlung taka min pek chauh ka inbel tawh ang."

"A dang pêk tumna che ka neih awm pawh ka hre lo," ka tih chuan a nui suk a. "Min pek duhna rilru pu turin ka siam dawn reng che a ni." Inringtawk zeta tiin min rawn hnaih hret a.

"Lunch ei zawhah kan inneih zungbun tur a thar kan lei ang, min hnial hauh suh ang che. Solomos gold son ka nih angin nang pawh gold daughter i ni tih khawvel hi ka hmuhtir dawn a ni. Mo thuam famkim nen i rilru a inpeih hunah ka hnen i rawn pan ngei ang."

Ka khabe ah vuanin dim vak lo hian min kuai dâk a, "A hmasa ber ka ni a , a hnuhnung ber nih pawh ka tum," tiin ka hmuiah duhthawh zetin a rawn fawp a. Ka chhanglet lo tih a hriat chuan a hma aia uar sauhvin min fawp lui leh ngat a.

"Ka ta i ni, ka ta chauh.." tisupin min nawrsawn deuhva, vawikhat min hmuhna niawm taka min en leh vang vang hnuah khum lam panin a kal ta a.

Vawiin a awmdan zet chu ka ngaihte pawh a tițha lo rum rum alawm le!

Dazel hian min hmangaih a ni thei mai angem? Kei hian ka lo ti lutuk deuh em ni? Ka thinlunga zawhna awm chu a chhanna ka nei der si lo.

A duh ang ngeiin heta kan chen chhung hi chuan a duhdanin awm phawt ila, nakin lawkah engkim hi ka la hrefiah thuaiin ka ring.

Kei aia upa a nihna leh ka pasal a nihna hrim hrim vang pawh hian zah taka entur ka ni ve tho tih ka hria a. Ka thinlung nêm țan hi hmangaihna vang a ni thei tho bawk.

End of chapter-22

Dated: 15th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 28th, 2018, 1:36 pm

SOLOMOS BRIDE

by Becky Rafa Renthlei

Chapter-23

Zanin hian Dazel nu leh pa chennaah kan phei ve tawh dawn a. Oliver Solomos han hmachhawn leh pawh chu ka peih viau lo ná a, ka pa thu hnial ka hreh tawh a ni.

Nizan khan ka khumah inngeih hmel takin kan mu a, min khawih emaw pawh a tum hran lo. Min ngaihsak em em a, țawngkain min duat teh hluah lova, mahse, min thlahthlam a tum lo a ni tih a chetziain a tarlang zawk.

Ka chhangah jam ka tah belh mawlh mawlh a, Dazel a la muttui viau vangin ka thawhsan daih. Hmanhmawh hauh lovin a breakfast tur keimah ngeiin ka siam sak a, nizanah ka nu leh pa room-ah rei vak lo kan awm a, hospital-ah ka pa a awm duh tlat lo hia a buaithlak. Hmasawn aiin hniamlam a pan zel tih kan family doctor-in a sawi khan awih loh chi ni nghal lo chuan.

"Breakfast ei zawhah kan in lam kan pan mai loh chuan," Dazel chuan a țhutna tur chair pawt chhuakin a țhu ve nghal a. "Chawhnu lamah kan kal chauh dawn emaw ka tia." Coffee ka thiltsak chu banin a tem hlak a.

"Brie, i pa i ngaihtuah tih chu ka hre tho a mahse, nizanah kan sawifel vek tawh kha," Chhang chu eiin chanchinbu a bih zui nghal daih a. Ni e, ka nu leh pain nizan khan an sawi chiang tawk viau a ni. Dazel te chhungkaw chenna Villa ah zankhat kan riak anga, chumi hnuah Sidney pan turin min ti a ni.

"Company-ah ka thawk zawm rih dawn chuang lova, hetah ka awm hi phal mai la," tlawn titih a ka sawi chuan rawn dâk chhuakin, "Ka bula khawsak hi engvanga hreh thar ta thut nge i nih tih hriat a châkawm khawp mai." A lawm vak lo a ni tih a țawngdan ațang chuan ka hrethiam ve mai.

"Apartment-a inkhung reng kha ka ning viau a nia, chubakah Joanna hmuh pawh ka peih chuang lo."

"I ngaina viau emaw ka tia, i tana țha tur kan ngaihtuah vek Joanna pawh tiamin," a ti ta a. Sidney kha nuam pawh ka ti hrep lo ve a.

"Ka ngaina țhin reng alawm, tunah erawh ka ngaina tehchiam tawh lo." Ka tih chuan chiang fahran hian min melh kawk a. "I rilru a awm ang ang hi sawi chhuak ringawt zel suh." Coffee no chu ka hmaah rawn nawr pheiin, "Tlem ka lo inbelh leh teh ang." A ti zui zat a.

"Brie, bawihte i pain a ko che." Ka nu lokal lai ka hre miah lo. Ka nu ai chuan ka pa hi ka ngaina zawk țhin reng a, pasal nei tura min tih lai pawh khan ka nu a inrawlh tam tehchiam lo. Ka pa tana ti ka ni tiin ka infuih sauh sauh țhin a nih kha.

Dazel leh ka nu an inbiak bawrh bawrh lai chuan ka pa te room lam panin ka kal ta a.

"Pa, min ko a mi, eng nge ni ta?" Tukverh bulah dingin pawnlam a thlir vauh vauh a. Ka thawm a hriat chuan muangchanga rawn inherin ka mitah tak min en a.

"Ka fanu, chhel takin awm ang che. Oliver an thu tamtak a zawt che a nih chuan thudik tak chauh hrilh la, i hriat chin chiah sawi bawk ang che."

"I sawi awmzia ka hre miah lo a nia," hamhaih deuh hleka ka tih chuan mit khap eih lovin min en ngar a. A mitmenga min khawngaihna rawn lang chhuak chu ka chhiar thiam ve tho. Mahse, engvang nge tih ka hre miah lo thung!

"Kan company hi kum thum kal ta khan ka lo hralh tawh a ni." Zawi supa a tih chuan mak tiin ka meng kawk a.

"Maw? Chu chu engtin nge a nih theih?" Ka awih lo mitmeng a hmuh chuan za vak lo hian a nui a. "Tuna ka natna hi hun reitak ațanga ka lo neih tawh a ni a, inenkawl nan sum engemawzat kan khawhral tawh bawk."

"Dawt sawi suh," A bak sawi tur ka hre miau lo.

"Larson company hi kum nga liamta ațang khan a lo tlachhe tawh a, Oliver Solomos hi ka țhianțha tak a ni tih i hriat kha, aniin a sum hmangin theihtawp chhuahin min pui a. Ngai ka awh theih mai inringin bul ka țan țha leh kha a nia. Mahse, he natna ka neih ațang hian sum tamtak i hriat lohvin inenkawl nan kan lo hmang tawh a ni. Kum i tlin hma chuan hrilh che i nu nen kan tum lo hrim hrim bawk a"

Ka en ngai enin ka ngawi tlawk tlawk a. Sawi tur pakhatmah ka hre lo miau alawm.

"Mipa ka thachhang dawltu tur fapa ka nei lova, chuvangin sumdawnna chungchang pawh nasa taka zirtir che a, khuahkhirh che kan ni reng a. Kum sawmpariat i tlin hun kan nghakhlel em em țhin a, mahse, ka natnain zual lam a pan tâkah chuan Larson wool company hi Oliver Solomos hnenah kan hralh ta a ni." A sawi zawh chuan a thaw deuh hawk a, khur deuh dar dar chungin khum lam chu a pan a. Puih nachang pawh ka hre lo.

"Dazel an hria em?" Ka rilru a awm hmasa ber ka zawt a.

"Ka hre lo le, a pa in a hrilh chu ka ring chiah lo."

"Chuan kan company hmingchhiat lohna tur leh mualpho lohna turin contract hmangin min inneihtir ta a." ti sapin ka nui hul hak a, Dazel a'n a hre lo tihna a ni ngei anga! Hria chu ni se a sawi lang tawh ngei ang.

"Oliver duhdan leh ruahman anga innei in ni. Ka țhianțha ber a nia ka harsatna min hriatpui vangte, ka hmingchhiat leh i hmakhua a ngaih vanga heng hi ti a nia alakah lawmthu sawi i ba nasa hle a ni."

Engtin nge hetianga thil liantham ka lakah an zep theih le? Larson company neitu diktak nilovin Dazel Solomos pasala ka neih vang chauhvin company neitu dinhmun ka lo chang ve tihna a nia!

"Ințhen ka duh.." ka pa hmel chu ngui raihin ka en a, ani pawh a dang chuang lo. "Brie, a nih tur ang a ni vek tawh a, contract hi bawhchhe lul suh. I nu nen inhmakhua ka ngaih vang a ni e, i rilru ka tina ang tih pawh ka hria mahse, ka hmangaih vang che a ni."

"Eng nge tih hmasak ber tur pawh ka hre lo." Ka biang sa ham ham chu ka kuta dawmin thaw ka la hap a. Dazel hian min lo va hmusit dawn tak êm tih ringawt chuan ka rilru a luah.

"Brie, tun chauh i chapona dahțhain i pa vang tal hian i nunkhua tichhe suh. I naupai kha țhataka i nei thei a nih chuan Dazel rilru pawh i hneh thei tih hria la, i hmangaih tih pawh ka hria asin." A tih chuan ka ngawi reng a.

A dik chiah Dazel hi ka hmangaih alawm, ka chapona leh induhtawkna vang chauhva tilang lo mai ka ni.

"I hmalam hun tur thlir la, kei ka awm lo a nih pawhin i nu nen Solomos chhungkua hian an thlahthlam ngai lovang che tih ka hria a ni."

"Dazel an a hriat hunah min haw viau lo'ng maw?"

"A pa in engkim a chingfel turah ngai rawh kha lam kha i buaina tur a ni lova, contract hi țhatakin kaltlang pui la chumi hnuah i hun kal zel tur chu a rawn lang uar mai ang. In inneihna hi bawhchhe hmasatuah țang suh tihna a nih chu." Khum bula tui chu inkhawlhin ka kutah nghet takin a hmer ta vang vang a. Ka ngaihtuahna tawi turh chu tihreh tumin ka lu ka thing deuh nawk a, eng teh chiam phei chu a ang lo.

"Lungngai suh, theihtawp ka chhuah ang, Larson hming tichhetu nih ka duh bik hleinem," zawi sapin ka ti ve ta a.

Duhthlan tur ka nei ngang lo tih ka hre mai.

"Ka lawm e, i thiamna te kha kan company tan i la hmang dawn chauh tih ka hria a sin."

Rilru pik zetin room chu ka chhuahsan ta a. Solomos nen kan inzawmna chhan chiangtaka ka hriat meuh chuan ka chau hnawk mai. An 'mo' ka nih vang chauh a hmingchhe lo mai kan lo ni. Hrehawmna hian engtikah nge min kiansan ang le? Ka innghahna awmchhun chu Dazel chauh a ni ta.

Ka room-ah ngawirengin ka lut a, ka pa enkawl nan sum engzatnge la ngai dawn ka hre hauh lo. Ka ta tihtur pakhatmah ka nei lo a, avaiin company leh keimah thlengin Dazel ta ka lo ni reng a nih chu! Ka mittui tla tur chu dankir tumin ka khap fak fak a.

"Brie, duhtak...?" Dazel chu a lo lut chawpchilh ve nghal a.

"Nâ i nei em ni?" A âw a min ngaihsakna lo lang chuan ka țah a ti chhuak zual sauhva. Khumah chuan rawn țhuin, "Engvanga khatiang hmel kha pu nge i nih?" Ka mitah tak min en ran a. Insum tum teh mah ila ka mittui chu ka dang zo tawh lo. Chhuak zetin ka inhnit ta hlawp hlawp a.

"Shh..țap mahta che, i pa chu a dam leh dawn alawm," alamah min kuah hnaiin ka lu-ah a chûl hliau hliau a. Ka pa natna ai chuan engmah hlutna nei ve tawh lova ka inhriatna chuan natna min thlen zawk. Ka laka an thil zep zozai te hi engtin nge ka hriatthiam theih ang.

"Dazel..?" Inhnit hlap hlap chunga ka tih chuan ka mit chu a hmui lum ham ham chuan rawn fawpin, "Ka nupui i nia lawm, i chungah engpawh thleng se, ka thlahthlam lovang che." Fiah taka a tih chuan ka thla a muang huai huai thei. Ka innghah ngamna tur leh ka rinchhan tur a nih zia ka hrechhuak awn awn mai.

"Le intifai la, ka nu leh pain min nghak reng tawh a kan tlai lutuk ang e." Khum ațang chuan min pawt thovin bathroom lamah min hruai phei a, ka inphihfai chhung erawh chuan pawn lamah min nghak a. Min ngaihsak poh leh inthiam lohna ka nei nasa tulh tulh.

"I hâktur ka thlansak ang che, dinner ei ve tur midang an awm dawn a.." Dazel chuan ka wardrobe chu hawngin ka kawr chu a en lawr dan dan a. "Huh! Hetiang thawmhnaw hi i ha țhin ang tih hi ka la awih thei lo."

Kan inneih hmaa ka thawmhnaw, lian pui pui leh țhing deuh deuh kha an la ni hlawm tak a lawm le. Ka landan ka thlâkdanglam hmaa ka thawmhnaw inbel țhinte kha chu Dazel ngainat zawng a ni lo tih ka hre ve chiang.

"Hei bâk tihtlak ka hmu lo." Silk kawrfual pawl lace nena inchawhpawlh chu a rawn pharh a. Ka birthday hnuhnung bera ka nu min present kha a nia. Ka la hâ tawk angem aw?

Dazel kut ațanga kawr chu lain ka inhlip ve nghal mai a, zahin awmzia a nei lo tih ka hre ve tawh a, a hmuh laiin ka inthlak ve hmiah hmiah tawh.

"No, kha kawr ha khan ka hruai chhuak lo tawp ang che." Ka inthlak zawh rual ruala Dazel an a tih chuan dressing table hmaah ka ding vat a. A țhat lohna em em pawh ka hre ve lo!

"I thlan a nia, ka hâk mai lohvin.."

"Teuh lo.." ka hnung chiaha rawn dingin darthlalanga kan hmel lo lang chu a en a. "I taksa mipa dangin an hmuh hi ka duh miah lo."

Ka kawr hákin ka taksa chu a phuar țang a. Ka pianhmang lang chiang ta viau chu thlék leh vung vungin, "I inbel hmasak kha ha leh rih mai rawh, kal kawngah adang kan en dawn nia."

Ka inrin hma chuan hnuai lam ațanga ka kawr chu rawn hlimin min hlihsak nghal a tum ta mai! "Eng nge maw i tih le?" Ka ti vin ták a. Ka nuih a za ru viau thung! Uluk em emin a thlang ve a, ka ha rei lo mai pawh a.

"Hnute lang thawthânga i lan hi ka remti awzawng lo." A tum deuh hmuk a, a kum zat anga awm loh chang hi a ngah ve țhin tho. Kei kum sawmhnih lek ka nia, company board chairman lai a ni tawh a. Titau rual pawh ni nghal lo chuan.

"Sawi thui tawh lovang, angai ka ha leh dawn e," ka nui ve ta var var a. Ka dinhmun diktak leh ka nihna theihnghilhin Solomos nupui angin ka awm mai tur a ni. Ka nu leh pa duhthusam pawh a ni reng a lawm le.

Villa kan panna kawngah chuan Pollsbritt shopping mall kawtah car chu a tiding ta a.

"Midang hmuh laia inhnial ka duh dawn miah lo a nia." Teh ngawt a. Hnial ka tum loh zia chu hria se mawi ka tih deuh ang khan a nui ang maw le. Ka thil ngaihtuah avang chuan ka nui ta hak hak a.

"Min nuih țhak suh, chuti lo chu mall kawtah hian ka fawp hreh dawn lo che tih i hriat kha." Passenger seat lamah chuan rawn kalin car kawngkhar min hawnsak a. Gentleman țan ta vel a ni, nuam ka ti ru viau bawk.

"I thawmhnaw tur i thlang ve dawn em?" Ka kutah vuanin dawr chhung lam min panpui nghal a.

"Villa-ah thawmhnaw hâksen loh ka nei a lawm."

"Chuti ka thawmhnaw chauh kan en dawn tihna a nia a va fair lo ve."

"Ka nupui i nih chhung chuan tlâkchham i nei ngai hauh lovang min ring hmiah rawh." Ka kut a vawn chu a hmer na deuh salh a.

"Ok... darling," ko tur a min duhna țawngkam a sawi hrereng chunga ka koh chuan mitmeng de sar hian min en a. "Kan awmna hian zir se chuan ka'n duat hlek tur che a nia," ti supin ka chalah a fawp zauh a. Mi vei vakho chuan min en duh riauin ka hria, hundang chu ni se zakin ka sen awp awp ngei ang.

Thawmhnaw dawr pakhatah min hruai lutin evening gown an khai tlar dulna lam chu min panpui a.

"Mr.Solomos, i va rawn lang khat ve?" Nula tê lam deuh chuan min melh tawn zak zak a.

"Ka nupui mamawh tur kan rawn en lawk a ni e." Zawi thawp sata a tih chuan chunu chuan min en ngun kher mai. Ka dar a chen pha lo tawp ang a tê ve lulai êm a ni.

"A hming tal min hrilh dawn lawm ni?" Thawmhnaw inkhaina lam pan paha a tih chuan Dazel chu a nui suk duh chauh.

A hma kha chuan min enpui peih chai lo kha a nia, kan inneih dawn ni a kan bazar ve țum pawh khan a inthiarfihlim daih alawm le. Tunah chuan nuamti ber ang ziazangin hmeichhe tlailam kawrfual a thlek ta duk duk a. Ka nuih te pawh a za deuh!

"Brie, hâk chhinna hun pawh i nei tawh lo." A duh duh chu a la hmiah hmiah a, tlailam kawrfual pali leh pheikhawk pali, cotton kekawr leh kawr â ka en peih tawh lo ve a, țha a tih ang ang pawmpui hi a finthlak ber.

"Inhnuaiah kal leh lawk ang," thawmhnaw dawr kan kalsan hnuah tlereuh zawrhna hmunah min luhpui leh a.

"Engmah ka duh lo..!"

"Shh..min hnial suh ka tih kha, inneih zungbun kan en law law ang." Tih pahin diamond leh gold design hrang hrang tlar tuar chu min enpui ta a.

"I duh thlang rawh le..Mrs.Solomos."

"Er..min thlansak la.."

"Phunnawi lova i bun dawn phawt chuan ka thlang lutuk ang," gold zungbun țhuang thuma inherh chiat common lo zet a thlang ta a. Kal sawn tuma ka pen chiah chu ka bânah vuanin min pawt ding a.

"Theihnghilh i nei lo maw?" Ka mitah tak min enin a hmui a chip hmak a. Engmah theihnghilh ka neih awm ka hre lo! Ka card ka keng bawk lova, engmah ka lei ve bawk si lo. Ka lei lo mai nilovin kan lei tawh sa pawh aman a keng vek a. A ngaihna hre chiah lo hian ka en chho hâ a!

"Brie, ngun deuhvin han ngaihtuah teh." Ka bo tulh tulh. Chutah zungbun min buntirna lam ka kut chu chawikangin a fawp zauh a. Ka hrethiam chiah.

A bun tur ka lo ngaihtuah tel ve reng reng lo. Huizz..Ka va'n tlaw tak!

"Yes, ka hria e," ka tih chuan a nui ve ta var var a. A chimawm lam hret a ni.

Min vawnna a thlah hnu chuan a ta tur chu uluk fahran hian ka thlêk ve ngial a, ka duh ang leh mawi tih ka hmuh tâk loh avang chuan ding ngilin ka melh chho hau a.

"A dangah en leh lawk mai ang." Hawikual zak zak chunga ka tih chuan nuihzat hmel fe in min en a. "Tuma'n Solomos bride i ni tih an hre teuh lo," a ha var rual zet lang chuan a nui ta var var a.

"Solomos bride," nui chungin ka ti nawn ve sap. Ka pa thu min hrilh zawng zawng te nen khan a inrem thlap. Kei hi ka nu leh pa ta ka ni tawh lova, engmah company takngial pawh hmachhuan tur ka lo nei si lo. Solomos ta liau liau ka ni.

"Engahnge i zungbun ang kha ka bun ve mai lohvang?" Dazel an atih chuan ka kut chu ka bih nghal vat a. Mipa bun atan pawh a iai awm hauh lo.

Rangkachak zungbun design inang chiah bunin mall chu kan chhuahsan ta a. Car-a kan țhut hnuah, "I tei ve vak vak sia, naute tan a țha lo em lo'ng chu..?" Hrechhuak thut niawm taka a tih chuan ka pum ka'n khawih ve ringawt a!

"Chuti mai chuan a nu leh pa rilru tihnat a duh bik tawp nang." tia ka chhanna chuan Dazel hmela hlauhthawnna niawm tak lang pawh chu ati reh ta daih a. Naute hi a lo ngaihven ve viau a ni tih ka hriat belh phah. Lungngaihna karah pawh lawmna tur tlem tal a la awm zel alawm.

Villa kan thlen chuan Cheryl (Dazel nu) kan hmu hmasa ber a. A hmel hlimtak țhin kha a dur deuh khap a ka hriat chu le!

In hmalama pangpar lo vul chuk chu uluk zet hian a thlir a, kan inneihni a ka kal bâk kha ka kal nawn ta miah lo.

A Escord car chu Jaguar lo awmsa bulah Dazel chuan a dah ta a. Rolls Royce pakhat lo awm ve chu ka hmuh hnu ang riauva hriata ka nei. Ka hmuhna erawh ka hre ta chiah lo.

Car ațanga kan chhuah chiah chuan kan lam panin Cheryl leh Oliver chu an rawn kal nghal a.

"Ka rin aiin in lo thleng tlai," Oliver aw thum deuh pawh ala ngai reng.

"Nia, mamawh kan lamkhawm zawk a." Dazel an a nu leh pa kuah vang vang paha atih chuan an sirah ka lo ding ve reng a. Ka mitah tak rawn enin 'kuah ve rawh' tih melh hian min rawn melhin ka hria. Phur fahran lo chuan ka kuah ve ta tho va.

"Kan mikhual turte an lo thleng tawh a, nangmahni chiah kan nghak tawh che u," Villa panna step kan zawh chhoh laia Cheryl in a tih chuan ka dar ka san âk a. Mikhual an awm dawn tih hre tho mah ila hetiang anga hmaah an kal ang tih kan hre bik hleinem.

"Lokal rawh le," Dazel chuan ka bânah vuanin inchhungah min luhpui ta a.

Țhutkhawmna pindan sofa-a lo țhu ka hmuh chuan ka nui tawp chat! Tim Hathaway hian eng nge helai hmunah tihtur a neih tih chu ka zawhna hmasa ber a ni.

"Tim..?" Ka ti chhuak sap a.

"Briena mak i va ti awm ve? Mr.Solomos hian ala hrilhfiah lo che a nimaw?" A tih chuan mak ka ti telh telh!

"Tim, tun hi sawina hun a ni rih lo." Dazel an Tim țawng zawm leh tuma ang zuau chu a khap vat a.

"Engmaw min hrilh ang?" Ka ti ram hmak a. Engmah tihsual ka neih ka hre lova, ka pa thu min hrilh kha a nih ngawt loh chuan kei hian engmah Solomos chhungkaw lakah hian zep țhen ka nei hek lo.

"I hrethiam duh lo der nge? Sawi chhuah i duh lo zawk?" Tim âw a lungawi lohna lang chuan min ti hrihhai telh telh.

"Engmah hriatthiam tur ka neih ka hre lo ve," ti nghauhvin pen sawn ka tum a. Tim Hathaway rawn țawng leh chuan ka penlai a ti tawp chawt.

"Ka fâ i pai kha engtik thleng nge zep i tum?"

Tim kawr nghawngah Dazel chuan a phih dawrh a. "Ka nupui hi ngaihdam dil rawh." A ti thum chhak a. A aw a thinrimna lo lang chhuak chu pindan chhunga lo awm te chuan an hai hauhvin ka ring lo.

Kei hian Tim fâ hi ka pai a maw? Hah! Ka mumangah pawh ka la mang chhin eih lo.

"Tim Hathaway, dawta min puh duh tur khawpa lianthiam i chungah eng nge tihsual ka neih?" Thinrim insum tak hian ka ti ve sak a.

"Brie, ka room-ah han chho rawh." Dazel chuan a ti sup a.

Tim a vawnna erawh ala thlah chuang lo. Oliver Solomos leh Cheryl ngawirenga lo ding chu makti zetin ka en a. A bik takin Oliver ngawi ngul chu mak ka ti zual! A mitmenga min huatna lo lang chhuak chu ka hmuh hmaih lo chiang kher mai.

Eng buaina nge ka tawh leh dawn tâk?

End of chapter-23

Dated: 16th January 2018

©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)