ENCHANTE LOVE SORENO BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: ENCHANTE LOVE SORENO BY Becky Rm Renthlei (Completed)

Unread post by Ngaia » March 25th, 2018, 11:35 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-7

Calle de Moratin Bar
Spain Madrid
3:00Pm

Mouri a'n min chhuahsan hnuah khumah reife ka țap a, Amelia hmeichhe chak tak ni țhin kha ka țap ta a nia, tun hnai maia ka chunga thil thleng hi ruahmansa a ang ka tih rualin chutiang tura mi pawi ka sawi erawh ka hre silo.

Lunghnur si, engmah tithei chuang lova ka awm hi hrehawm ka ti zual a, pasal nei tur chuan inbuatsaih hmasa phawt ila, ka dai chin apiang hi hlau lovin hmachhawn ngam ta ila ka nun khua a nuam berin ka ring.

Jerome Evans pawh misual tak alo ni lo ve maithei a, mahse, putar kum sawmruk chuang vel anih ka ring tawh a, chuti em em a nupui mamawh chu a hur thawkhat ang, ka ngaithuah zawng ringawt pawhin ka luak a chhuak ut ut.

Hetia ka tawm sen reng hian eng hlâwkna mah min neihtir lova, Enchante Hotel lah ka ta a ni tawh hek lo. Ka account-ah pawisa chu a tam tham ve viau tho a, mahse, ka pa leiba rulhna daih tur erawh a nih hmel si loh.

Bathtub-ah tuilumin ka inchiah vang vang a, ka taksa nâ leh ka rilru natna hi engtin nge ka thawidam theih ang, bar-ah kalin zû ka va in nghek zawk dawn nge? Â, chu chu a țha ber ka â thei takngial dawn!

Jeans kekawr bul hain shirt sen hlar, mar țeng țawng ka ha bawk a, running shoe dum ka bun leh thlap hnuah ka sam chu sâng takah ka țawn vauh a, khuain a zir bawk nen tei chhuah ka tum ta nge nge a ni.

Ka Ducati bike sen chungah chuan lawnin ka hawikual thuak thuak a, min zui rengtu awm ang maia ka hriat tlat chu le. Tumah phei chu ka hmu lem hlei lova!

Moratin Bar lam panin chak fê-in ka tlan chhuak ta a, Mouri nen kan inphurh chhuahlai vel kha ka hrechhuak ram ram mai. Mahse, chu erawh ngaihtuah thui zui duh lovin kawng lam chu ngun takin ka en a, ka hnunga Range Rover dum lo tlan ve zel chu side glass ațangin ka hmu reng, ngaihpawimawh thamah ka ngai lem lo.

Bar chhung mihringa khat dul maiah chuan țhutna mai tur pawh a awm tawh lova, bartender chuan min lo hui zauhvin, "Perder(Miss) țhutna tur awl pakhat ala awm," tiin stool sâng zet tukverh kil thim lai deuh chu min kawhhmuh vat a.

"Gracias(Ka lawm e)" tihpahin chulam chu ka pan ve ta nghal a, bar chhung bengchheng zet chuan ka beng a luh ngut ngut thei nia. A ri nuaih nuaih a ni ber mai!

"Eng nge i in ve ang le," tray-a intur chawi chungin bartender kha ka bulah a lo ding a, whisky nokhat ka lo ban ve nghal vat, "Minute thum dan zelah i lo kal dawn nia, bawngsa hemhmin min lo chhawp tel la.." tiin ka nui lui sâng a, a bu ve nghut nghut.

Chumi hnu chuan engthawl ber niawm fahranin whisky chu in in, bawngsa hemhmin chu ka hmeh deuh ngei a, no hnih ka in hnuah pawh entinmah ka la awm thei lo. Nidangah chuan ka lu a hai chhalh zel tawh a nia mak deuh ve.

"Hey, i va mal ve?" Spanish tlangval la naupan hmel zet hi ka bulah a lo ding a.

"I sawi dik, keimah chauh hi ka ni e," ka ti bul hmak a.

"Intur dawm dun ila, mahni chauhte chuan a khawhar thlak alawm, bakah mipain an zuam lutuk ang che," tiin bar dawhkan seipui hnuaia stool pakhat chu a va la chhuak ve ngawt a.

"Khawhar huamin ania ka țhut ni, chung mipa, min zuamtute zingah chuan i tel ve mial lo maw," nelawm lo angreng tak hian ka melh a, engah mah ngai lovin a nui var var nia maw le!

"Kei chu i lamțang ka ni sa, Gimeno ka ni e," ka vawn theih turin a kut a rawn phar a, vawn loh ka tum ûk a, mahse, a sualthlak ka tih leh deuh vangin ka vawnsak ta zawk a.

"Amelia ka ni e," ka nui ve ta sak a.

"Ka hria alawm, Enchante Hotel neitu kha i ni tlat a," a no a intur awm chu a tlâk vei pap a, a hmelțha vût lo nâa chhia erawh a nilo, a vun sen uk deuh kharh chuan Mouri min hriatchhuahtir zawk nia. Hah! Mourizo mai mai!

"Kan hotel-ah i lokal ve tawh em ni?"

"Kal ve zauh zauh, mahse, keini ang luh ve na phâk a ni hleinem," a nui var var reng a, a ngainatawm phian.

"I lût phâka i luh reng chu, zanin tlaia i intur man kha ka lo tum sak ang che, i duhtawkin in rawh," ka tih chuan a nui nasa zual sauhva, "I intur man pek ka lo inhuam ve viau asin, nohnih chiah i la in a nia," bawngsati chu a țhial țawlh țawlh a, kum sawmhnihpahnih vel a nih ka'n ring ve ngawt a.

"A nih leh kan in insiak dawn em niang?" Cho taka ka tih chuan a nui ta hawk hawk a, "I luaka buaipui i ngaih dawn loh chuan ka inpeih e," bartender chu a hui zauh a, a kutzung țangin whisky kan duhzat a hrilh ngei a, a chêt dan chuan ka nuih ati za ru tlat.

Chumi hnu chuan ka rilru hahna leh natna theihnghilh țhakin Gimeno kiangah zû chu ka in ta a, no nga ka in hnu chuan ka irhfiak awk awk mai, ka meng phi chiai a, 'khawvel hi ka ta emaw ka ti leh țan tawh.' 'Jaja!' Nuam ve chhalh chhalh em asin.

Ka țhiana chu a țawng bawrh bawrh a, a rui țawngkam te hlei hlei chu a lawmawm. Midang hrechang lo lêkin kan nui tak uar uar a, khawthim dawn a ruaiah bar chu inkuah lâwp lâwp chungin kan chhuahsan ve ta a. Ka intiam tawh ang ngeiin kan in man pawh ka pe ve ngial, ka ruih dan hi a la uchuak hauh lo tihna.

Ka bike bulah meng phelh phangin ka ding a.

"I inkhalh thleng thei tak tak ang maw!?" Gimeno chuan min ngaihtuah hmel hle a, ani pawh a rui tih a hriat ngawih ngawih, a thle bâk bâk a.

"Lutuk, racer nilo mahila, ka bike na nâ na hi chu ka hnehsawh ve êm," uang pah titih hian ka bike tanky chu ka chûl a.

"A țha a nih chu, ka flat thlengin min thlah thei tihna,"

"Bien, bien( Awle)" ka ti liam puat a.

Bike-a ka lawn tur te chu ka pai deuh nak nak nia, mahse, chuan ka la tum ve țâng țâng.

"Nangni pahnih kha rui chungin tlanchhuah intum elaw!?" Mipakhat thau zet hi kan bulah a rawn ding a, a va'n hmelchhe ve le.

"Kan thu thu," Gimeno chuan a lo chhang vat a.

"Khanglâng che u chuan, naupang si i va nghal ve," Chu pa chu a meng rum nghal ngawt pek a, ka huatzawng tak.

"Naupang hmuhin min hmu em ni, i mit a țha chiah maw!?" ka ti a. Ka lam rawn hawiin, "Nang nu pawh chu zahna i tlachham hle mai, kha i sakhmel țhazet kha ka ti hmelhem palh ange aw.." tiin min rawn hnaihchilh ruak a. Chu chu Gimeno chuan a ngaitheilo teh chêk a niang chu, rem leh remlo hian lokal thar pa chu pawhsawn a lo tum ve a.

"E he! Min khawih ngam vel elaw," Gimeno hmai chu a ri sawk a, a pai khawt khawt nia! A hnek a na awm hle mai.

"Ka țhianpa i khawih ngam amaw?" tiin chupa kawrâwmah chuan ka țham a, a thau nâin kei ai chuan a hniam daih.

"Vawithum ka chhiar hmaa min thlah lo a nih chuan eng nge ka tihtheih i lo en dawn nia," ati chhur chhur a.

"Vawithum chu chhiar ta che, chhiar rawh," tihpahin a bekah ka theihtawpa nâ-in ka hnek ta a, ka kut bâwr a hit chum chum!

"Gimeno, tho la, helai hmun hi chhuahsan teh ang," a bânah pawtin kaihthawh ka tum a, ala tho mai thei lo zui ah..

"Ka chhuah dawn miah lo che u," tiin pa thaua chuan min rawn pan ta chher mai mai le, ka lo rui khanglâng nen ka hmu phir lo chauhva, ka thluak erawh a fîm angreng viau thung si.

Gimeno rawn tho chhuak tur chu Thauva chuan a tlawh pawp a, a chhir zui bawk. Rui mahila ka țhianpa tan hian ka bei ve khawp ang.

Gimeno let reng chu ngaihsak tawh lovin chupa hnungah chuan ka pêt chawrh a, engtinmah a awm lo! Rum lutuka min melhin, "Mihurnu, i dam chhunga nui leh tawh ngai lo turin ka han siam teh ang che," tia rawn vai fuain ka biang dinglam chu a ri chawk a, ka thal chiang ngei mai.

Thawh tuma ka inbengkang chiah tihah ka nâkah arawn chhir leh zawt a, ka mize kawlh a chhuak ta tak tak e, "Thi dun ila a nimai alawm, dam hi ka châk vak bik lo," Tih pahin ka tho a, kawisawi zetin ka pan ve ta ngat a, min hlauh loh hmel ropui! A nui vur vur duh chauh, chu erawh chuan ka huat thu a sawi a ni.

Pa Thauva hnek tumin ka vai phei ve bawka, a lo thlesawn hman. Chutih rual chuan ka âwmah tak min lo hnek ta siah a, ka thâw a sak nghal țalh mai, Gimeno lah che leh tur awm lo ang mai hian a let dêr a, a va beidawnthlak ve le.

Ka kawr nghâwnga min lo țham thawh leh chuan min hnek leh dawn emaw tiin ka lo inring ve ngial a, mahse, chutia ti ta lo chuan ka hmuiah na zetin arawn fawp ta a, ka sam țawnna chu phihthlain a paih sawn daih a, min chelh ngheh êm avangin ka chesawn țha thei lo. Chutih lai tak chuan Thauva chu a petek dawrh a, leiah alêt hlawm nghal tawp.

A rawn khawihtu lam pawh en lovin ka hmui ngawt chu ka lo tuai a, min fawhna kha ka ten êm avangin ka chil ka chhak sek bawk. Ka luak lo chauh.

Min rawn chhantu ka hmuh meuh chuan maktiin ka meng kâwk mai. Mouri driver Mateo Ignacio lek lo niin!

"Miss Lopez, i chênna hmunah ka hruai haw ang che," ati zawi sup a.

"Engtin nge min rawn hmuh theih a?" Lawmthu pawh sawi lovin ka zawt let khauh a.

"Bar-ah sawn ka lokal ve alawm," tiin bar lam chu a melh zauh a.

"Ka haw ve thei e, min puihnaah lawmthu ka sawi a, ka țhianpa hi khawngaihin a chênna hmunah min dah sak thei angem," ka tih chuan a bu nghat nghat a, ka tlanliam thleng chuan min thlir tih ka hria.

Apartment ka thlen chuan ka rui areh vek tawh a, ka luak lah chu a chhuak em em bawk a, ka luak thei der lo, ka thawmhnaw nise a bal em em bawk si, zanin tlai ka chhuak chu ka tifuh lo chiang kher mai.

Dinner ka ei lai te chuan buaina ka tawh zozai te kha ka chhui lêt a, Roshima'n thil min zawh sek pawh chhan enah ka en lo. Spain hi ka tan a him hlawl tawh lo a nih hi! Naktukah ngei hian Los Angeles ka pan nghal rum rum mai dawn a ni. Hotel enkawl tur ka nei pawh a ni tawh chuang hek lo.

Nichin khan Mateo kha lo lang lo phei se chuan ka sil áwng leh der dawn a nia, ka lawm dan hi sawiin a siak lo. Mourizo driver ni kher lo se chuan dinner eipui hial a nia ka duh ni. Mahse, ani kid te lo chiauau chúl kha ka duh lo mai pawh a..

Los Angeles
Santa Monica
USA

International Airport ațanga min hruaitu tur car alo thlen laite chuan ka hawikual ruai a, helai hmunah pawh hian buaina ka tâwk lovang tih tunge sawi thei.

Ka nu leh pa chênna Mansion pana kan tlan laite chuan ka chau nghulh a, nizan ka mut hmun thlengin Mourizo ka la vei bur, theihnghilh theih ka va'n duh tak. Elias Sanchez an min bum lai ai pawh khan tuna ka natna hi a nasa fê zawk.

Driver in ka thawmhnaw a khai luh lai chuan ka rilru a tâwt ut ut a, inchhung lo ruak huai chu mak ka ti kher mai. Ka nu leh pa hmel hmuh tur a awm chuang bawk lova, min hmuak lo kha chu ka ngaithiam thei mai a, an chênna hmunah lehzel hi chuan an lo awm ka ring ve viau asin le.

Sofa-ah țhu hahdamin tui vawt raih ka in a, housekeeper takngial pawh hmuh tur zuk awm lova.

Kawngkhar kik ri bur bur avang chuan ka tui in chu ka phuh chhuak țhawt nia. A tu chu nge maw ni vak vak le?

Dawhkana sana chu ka en a, chawhnu dar hnih a ri chiah, kei pawh ka lut ve chauh a nia!

Ka zuang tho zawk a, ka kekawr hâk chu bengfai thawk thawkin kawngkhar hawng tur chuan ka kal ta a.

"Tunge ni?" Fiah faka ka tih chuan, "Miss Lopez, min rawn zui nghal rawh," min rawn chhangtu âw chu a pawimawh hmel hle mai.

An fiamthu a ni ngei ang, ka nu leh pa bakin LA ka pan tih hi an hre lo tawp anga, tu chu nge mawni reng reng le!

Kawngka âwngah chuan ka bih dâk dâk a, pâwn a mipahnih lo ding chu ka hmelhriat an nih pawh ka hre lo, anmahni beih dan tur ka rilruah a rawn lang nghal zut zut a, ka chau rih asin le, hetiang hmachhawn tur hi chuan..

Kawngkhar chu dimtêin ka hawng ta riai riai a, ka inring ru rân bawk.

"Miss Amelia Lopez i ni em?"

"Aw, ni e,"

"MJS Company ațangin a nia, tunah hian i nu leh pa te pawh boss chênna hmunah an awm a, rawn hruai nghal tur che a thupek hmu kan ni."

"Maw! Khawiah, ka nu leh pa an awm ve maw?" ka ti ruai a.

"Awm e, min lo zui rawh," a ti nghat a.

"Engtin nge ka rin ngawt theih ang che u, misual tak pawh in lo ni thei a!"

"Miss Lopez, zaizira hrilh kher che a ngai em ni, minute sawm chiah hun i nei, boss thuchhuak angin a rang lama amah hmu turin a duh che." Nin hmel zet hian a ti leh a.

Țhutna awm hnai berah chuan ka țhu hnawk a, angaihna ka hre hlawl lo, ka lu chu thing deuh nawkin, "Ka inbual phawt duh asin," ka ti sap a.

"Muangchang lo mai rawh, boss tih thinrim kan duh lo," tihpahin ka bânah a rawn vuan ngawt a, ka lo duh awzawng lo, ka kiuvin a pumah ka nghawk sawk a, "I kut hmawr pawha min tawk leh vaih a nih chuan," tiin ka vo ve kha kha a, an nui tawp.

Chumi hnu chuan, "Kal ang u," tihpahin ka ding hliai a, an bu ta nghat a, min man dawn pawh nihlei lo, ka hlauh viau nachhan tur ka hre lo ve a.

Ka thluak a buai mup mup a, ka nu leh pa meuh an awm chuan a pawimawh thawkhat ang tih ka rin hriat ve mai. Min hruaina hmun tur ka zawt hran lova, anni paw'n min hrilh hek lo, ka hresa-ah an ngai te pawh a ni mahna.

MJS 4935 Avenue Suite 8
LA. California
USA

Min hruaitute pahnih zuiin ka kal ve hnak hnak a, building lian zetah lutin, elevator-a kan chuan lai pawh chuan tumah kan țawng lo. Â, car-a kan chuan chhung zawng pawh khan kan inbe lo hrim hrim!

Corridor thui fê kan zawh leh hnuah pindan zau zetah kan lut ta hlawl a, chu pindan han zau zia chu turu tak a ni.

Dawhkan lian tak kilin ka nu leh pa chu an lo țhu a, mipakhat ka hmuh hnu ang zet hi a lo awm tel ve bawk a, tunge anih tih erawh ka hre lo.

"Amel, i lo thleng thei maw?" Ka nu chu a țap deuh pur a, kan inhmuh loh chhungin a tar deuh bawih-a ka hriat chu le.

"Nu," tihpahin ka kuah vang vang a.

"Mr. Evans, hei hi ka fanu chu a ni e," ka pa chuan chupa țhutna lam hawi chuan a ti ve thung a. Hepa hi maw ka pasal tur chu! Dios! A va'n tar ve le! Kum sawmruk a pel tawh ngei ang. Ka mumang nise ka ti ngawih ngawih.

"Amelia, maw?" Tiin chu putar chu a nui vur vur a, a hmel chu a ngainatawm phian! Mahse, ka ngei laklawh tlat.

"Ka ni ngei e, chuan ka pasal tur chu i ni a..!" ngaihno bei lo zeta ka tih chuan, "Amel," ka pain a rawn ti vin nghal țhawt a.

"Ka sawi sual em ni, ka pa," cho hle niawm hian ka dâk vah a. Hetiang putar hian min neih a duh amaw! A fanu rual lek alawm le ka nih le, tenawm lutuk!

Mr.Evans-a mitmeng fing leh fiah zet chuan min en vang vang a, a țhuihhruai zinga pakhat chuan a beng bulah eng emawni a hrilh a. Ani chuan a kut lo vai zauh in ka mitah tak min en run bawk. A hawisawn duh der lo. Zám map lovin ka lo en lêt ve kalh a.

Khawvela pa hausa ber zinga mi nen pindan khatah inep chiahin kan țhu dun a nia, engvanga min neih tum kher nge a nih le..? A hur ngawt ang! Hah! Ka thil ngaihtuah mai mai chu.

"Mr.Lopez, i fanu chuan leili hriam zet a nei a nih hmel hle mai," tiin a nui suk a. A tlangval lai chuan a hmelțha riau maithei a ni. A nuih zawng chuan a hmel alang dam thlup nia!

"A..Mr.Evans, Amelia hi kan fa neihchhun a ni tih i hriat kha, nungchang mawi pawh zirtir a ngai deuh maithei," ka pa'n atih chuan rum lutukin ka va melh a, ka nu erawh a ngawi rân thung.

"Nupui i mamawh viau te chuan, i kum rualpui nei ve mai la, i hausa tho bawk si.." Mr.Evans lam hawia tiin ka nui lui sâng a. A nuih azat hmel hle, ka thusawi chu engvakah a ngai lo a nih hmel.

"Mr.Lopez, in nupa khan min lo chhuahsan mai dawn em ni ang, in fanu hi belhchian ka duh tlat," ala ti tak deuh deuh a. Ka duh awzawng lo mai.

"Chutiang angai lo, ka pa alawm pawisa batu, kei nilovin," ka ti hmak a.

"Amelia, i țawngkam hman fimkhur deuh rawh," ka pa chuan ka nu țhu ngui bâr chu a kaitho ve nghal a.

"Hetianga upa te chu engtin nge pasalah ka neih theih ang, ka pu emaw an ti mai tur asin," ka la ti țalh a, Mr.Evans chu za lutukin a nui ta a, angaihna ka hre lo viau, nuihna chhan tur lah ka hre hek lo.

Ka nu leh pa'n min chhuahsan hnu chuan ka ngawi rauh rauh a, sawi tur a vâng ve êm a ni.

"Amelia, kum engzat nge i nih?" Mr.Evans chu ka lamah a rawn kun hnai a, a hmel hian tu emaw a ang tlat!

"Sawmhnihpali ka pum țep.."

"Boyfriend i nei em?"

"Nei deuh reuh," ka tilui kher a.

"Dâwt sawi i thiam lo em mai," tiin a nui leh suk a. Ka pasal tur chu a ni ve si a, engtin nge nupa nun pawh ka hmanpui theih ang ni! A fit awm lo ropui si, Mouri ka hrechhuak lo thei lo, ani kha zawng putar chu sawi loh tu mipa mah hian an tluk lovang.

Ka hnung lama pen thâwm avang chuan ka lu chu her kualin pindan chhunga lo lut ve mek chu ka hmu zuai a. A hmel pawh ka en hran lo, Mr.Evans lam chu rang zetin ka hawi leh hmak a, ani lah chu hmuh țha a hmu bik nge a nui vur vur reng a, pasal nui reng mi neih chu eng nge maw a an ang le.

"Mr. Evans, nui reng lo khan kan pahnih chungchanga i sawi duh chu sawi vat mai teh, kawrfual var hâk tih vel kha ka tuipui miah lo a nia," ka ti salh a.

"Chu, kawr dum em ni hâk i tum deuh a.." a la nui fo nia.

"Business suit dum taksa rem zaih ka ha ang," ka tih chuan, "Ni rawh se, i thu ber dawn alawm, i thawmhnaw chungchang bikah chuan," tiin lokal thar pa chu a melh zauh a, a hmel en tura ka dah chhuah rual chuan mitmeng dum fiah tak ka hmu hmasa ber!

Chu pa chuan suit țhui nalh zet ha-in a hnuaia kamis var a hâk chu a langsar hle a, a suit rawng tho, tie a awrh thlap bawk a. American mipa te hair style dik tak a pu bawk, a khabe hmul tlêm tih loh chu a bek leh hmui bul velah hmul țo pakhat tê mah hmu tur a awm lo.

"Min en reng lo khan inthu sawi lai chhunzawm rawh u," ati sup a.

"Ih..nang, nang hi.." ka sawi chhunzawm thei tawh lo, he pa hi Mourizo a ni chiang lutuk! Engtin nge a nih theih?

"Eng nge kei chu? Min la hmuh awm pawh ka hre silova," a âw chu a thüm lam deuh a ni, Mouri âw chu a thâm lam kha a ni si a.

"Enteh min bum tum duh suh, Mr.Soreno," thinrim insûm taka ka tih chuan nelawmna tel miah lo hian a nui a, a nui hmel chu ka ngainat zawng a ni miah lo.

"Miss Lopez, i hresual a ni lo maw, thil i hresual thei riau dawn mai," ti a rawn țawng ve chu Mr.Evans a ni.

"Engmah hriat sual ka nei lo ve, he mihring hi hmuh châkna ka nei lo," ka țhutna ațang chuan ka ding hluai a, rum mangkhengin chu pa chu ka'n melh nghek phawt a.

"Kan inneihna tur chungchang chu remchangah kan sawi țha dawi nia," Mr. Evans lam hawia ka tih chuan a ngaihna a hriat loh hmel hle a. Helai hmuna awm ve reng hi a țulna ka hre tawh lo, chhuak phawt ila van lam hawia thâwk lâk ka duh hial mai. Ka tâwt up up.

Ka chair nawr tawlhin kawngka lam ka pan nalh a, lokal thar pa chuan rum takin min melh reng, Mouri chu a ang lo leh deuh.

"Miss Lopez, i hresual duai a nia, kei hi i pasal tur nilovin, i pasala pa tur Juan Evans ka ni e," ka pên lai tawp chawtin Mr.Evans lam hawi chuan ka inher a, Lalpa leh! 'Juan Evans' ka tinawn sap a, ka pasal turte kha chu Jerome Evans alawm maw le! Jaja! Ka thluak hi kha Mourizo khan a keng tel a ni ngei ang.

Pindan chhung chu a reh ta țhap a, kei pawh chhuak lui lovin dawhkan lam pan chuan ka lêt phei leh ta nge nge a.

"Eng nge i sawi awmzia, Mr.Evans?" Ka ti zawi sap a.

"Mr.Soreno ti a i koh hi ka fa neihchhun leh ka engkim, MJS Company chairman Jerome Evans a ni e," ati thüm dut a. A nui tawh miah lo.

Makti lutukin ka phu zawk a, mak takin ka thinphû a rang nghal sauh nia! Ka thâw a tawp mai dawn emaw ka ti hial.

"Ka pa," Jerome Evans âw chu a thük ril ruih a, a hmel nelawm lo leh chang rût chu chiang zawka hmuh tumin ka en chho hâ a, a dik a ni, Mouri mitmeng chu a buang uk kharh a ni a, hepa mit erawh a dum a ni. Mahse, an san zawng leh an taksa pianphung chu a inang phian.

"Miss Lopez, ka pa hi i pasal atan i duh reng reng em ni?" Jerome Evans an min biak chuan ka phu leh zuk a.

"Ka duh tih ka sawi em ni?" Chutia kan inbiak lai chuan Juan Evans zawk chu rawn ding chhuakin, "Ka chhuahsan ang che u, engkim sawifel nghal ula.., ka fapa, a leili a hriam ru zêk a nia, bâkah Spanish hmeichhia a nih kha, insual cho âr hmelpu-a min en phei chuan tlanchhiat mai a awl dawn khawp mai." Tiin a nui vei suk a, chhan enah pawh ka en mai mai lo. Kei min bia a ni lo bawk a, en pawh ka en peih lo.

Juan Soreno chhuah hnu chuan ka ngawi rauh rauh a, hepa hi ka pasal tur chu a ni si a maw! Sakeibaknei ang maia hlauhawm a nia lawm, a sam rawng lah chu a dum chiah pawh a ni lo! Ka sawi thiam teh nuai lo e a.

Mouri emaw tih thut a awl viau ang, samsei dum hlap leh bek lam kawlh deuh kha a ni ka duh zâwk chu, hepa sam hi chu a bek a kâwng ve tho tak nâin a chhip lam a buk a, a tukkhum lam a tawi thung.

"Țhu la inbe vat teh ang," chu âw, chhum hmuk leh fiah ru riau si chu pindan chhungah chuan a ring ang reng hle a, ka hrefiah ngei mai.

"Ka thu thu a ni, thu min pék kual tum nghal chai suh."

"Min neih remtiin helai thleng thleng i rawn kal a, min hnial eih zawk suh," A ti nghut a.

"A ve lutuk a che," ka ti țhat a.

"Ve lutuk zawk a che, leiba rulhna i nih kha, țawngthei deuh hi ka ngaina miah lo ania, Miss Lopez."

"I pawisa ka bat awm ka hrelo, ka pa bâ zawk a nia," tiin dawhkan chu ka kutin ka tlir ri dat dat a.

"Chuti anih chuan i pa chu jail-ah ka dah anga, nang paw'n min neih angai lo tihna anih chu, ka thunun theih loh tur nupui ka mamawh lo," atih chuan ka sa zak mai.

"I mamawh a niang chu kei thleng thlenga min kankai tâk, ka pa-in 'ka leiba aiah ka fanu hi nei mai rawh,' ati kher lovang," ka ti ve tlat a.

"Ti chuang lo ve," ati leh lawi si. A hmel thutak zet chu ka lo en reng a, Mouri nen in ang tak anni! Mahse, ani kha chuan tawnzau ngawt a ha a, a dar veilamah kut chuk a nei tak alawm. Hepa dar hi ka ensak dawn em maw ni le. Ani khan martial arts a thiam hle a, Jerome Evans hian athiam ve meuh emaw chu..

"I sawi duh chu sawi la, ka haw duh a nia."

"Haw la, ka dang reng reng lo che."

"Eres muy feo(I hmelchhe lutuk)" ka tih chuan a hmai sen awp awp a.

"Ka hmelchhia tih sawi tur hian tunge i nih bik vak a!?" Ati hlur a.

Dios! Jerome Evans chuan Spanish țawng a thiam tlat! Mourizo Soreno nen an danglamna pakhat phawt, engtin nge ka'n chhaihkawlh leh ang aw..

"Ka nihna chu Amelia Lopez mawle, tu vak nge nise min tih a, i mit a fiah țha meuh maw?" Ka tih chuan min thin hrep duh hmel a pu alawm.

"Hmeichhia leh! Engtin nge maw ka han tih dawn che le.."

"I nupuia min neih hunah min duat khuchûk dawn nia," nuihsawh awkâ zeta ka tih chuan a țhutna ațanga lo tho thutin, "I châk dawn lo mawle," ati ram hmuk a. Ka lo ding chhuak ve vat.

Ka inrin hman hmain ka tukkhum samah vuanin min kêk darh âwrh a, rang lutuka rawn kun hniamin nghalin na lutuk leh hrem tum tih hriat zet hian ka hmuiah min fawp ta nawk nawk a. Lo dan ka tum miah lo.

Ka ke chu dah kâk deuhin ka kut ka hûm ruh țang a, chutia min fawh ngawr ngawr lai chuan a mipatnaah tak ka hnek ta a, min thlah rang teh e!

"Tenawmnu," ati sup a, a chalah thlan fîm a bawl nghal țawk țawk mai. A kap bâwr chu a kut khinghniha hupin a hmel a dâng lâwp lâwp a, chhuata a țhingțhi thla hnawk chu makti lutkin ka en tawp!

Nâ ati ngang ani ang, a heh a pet fun a, a mittui niawm tak a tling deuh emawni. Ka ngaih a țha leh silo, rang lutukin ka zuk țhu hniam a, "I țha em?" Ka ti ta sap a. Min chhang lovin chhuatah chuan a let ta tawp mai, eng pawi nge ka khawih tâk!?

"Mr.Evans," vawithum ngawt ka koh hnuah pawh min chhang lo a, a bân chu lakangin a mar ka dek ngial a, ala thi lo. Chuti em em a ka hnek nat pawh ka hre silova! Țanpuitu ka ko mai dawn nge, â chuzawng Jail-ah min tântir palh ang.

Dimtê hian ka kuai zangthal a, ka hnekna lai, a mipatna tak chu en sak ka tum ta a, engtia nâ nge a nih ka hriat miau loh te chuan a chi nâng.

A kekawr kâwnga a kamis bengluh chu dimtê bawkin ka phawrh chhuak a, midang koh mualpho hmasak ai chuan ka lo check fel hi a țha hrim hrim, a harh phah ve thei tlat a..

A kekawr kâwng kilhna ka phelh a, chutah a zipper, a kekawrte hâk pawh ka hmu ta alawm, tîm dai leh hreh ru zet hian a mipatna en tumin ka kut ka dah lût ta a.

Kut tha chak tak hian ka kut chu rawn chelhin, "Kha aia thui kha han khawih vaih teh, helai hmunah hian ka pswngsual ang che," a rawn ti ta chheu chheu mai le! Thinrim awki vin a ni hauh lova, mahse, hlauhawm tak a ni.

Ka kut pawh la chhuak ta mai lo chuan chiang zeta min lo entu, mitmeng dum fiah kalh chu ka melh ta rân a....

End of chapter-7

©<++++[BeckirafARenthleI]++++®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:35 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-8


MJS 4935 Avenue Suite 8
LA. California
USA

Chhuata Jerome Evans mu chu rawn thovin ka kut a chelhna erawh a vuan nghet viau thung. Nichin mai khan na lutuk leh thidang thawhthângin alang a, a thlanfím tla leh a hmai dâng lap te ațang khan a tider miah lo tih ka hre ve tho si a, tunah lêm na nei lo ang hmiahin chu pindan chhungah chuan min kai chungin a vei nghut nghut a.

Ka bânah a chelh tlat avangin a vei rual chuan asirah ka kal ve zel lo thei silo. Ka din deuh apiangin min melh vak zel a, vawi sawmpahnih zet, chu pindan chhunga min teikual pui hnuah chuan a thinrimna bengdai ta niawm tak hian thâwk ala hraih a, amah khinga han che leh ngam tur pawh ka ni lo, a mitmeng dur khup chu a hlauhawm ve êm a ni.

"Eng hmeichhia nge i nih? I nungchang huatthlalaawm zet hi paidam a harsa viau dawn a ni." A kekawr kâwng ala chilh duh chuang hauh lova, mahse, a zipper erawh engtik laiin a zip hman ka hre lo.

"I nungchang zawk hi alawm ngeiawm, leiba rulhna tur hun thawl țha min pe la chuan kan inhmuh angai tawp lovang," tihpahin dawhkan seipui chungah chuan ka țhu ât a, ka chêtzia chu hmaih tum miah lo ang maia ulukin min en bawk.

"Hetiang tak hian mipa i mamawh ang tih ka lo ring pha miah lo." Atih chuan a hmel chang rût chu ka en thuai a, "Engvanga chu chu ring ringawt nge i nih, Mr.Evans?"

"Ka taksa pêng zinga pawimawh ber pakhat, mipa ka nihna tichiangtu i rawn bitum chat hnuah duhtawk lo niawm takin ka chêt theih loh lai chuh vatin min khawihsak i tum a nia!"

"Ih..englo, khate chu a nâ tak..." ka sawi zawh hma hmain, "Khatiang khan em ni mipate i lo tih țhin a? I tactic a țhing hle mai," ati erh a. A fiamthu a nih ringin a hmelah tak ka en țha leh ngat a, a lo thutak ropui si!

"Ka en ve bawk ang chu, ka pasal tur i nih te chuan ka la hmu dawn thova, nge? Min hmuhtir i tum lo hrim hrim!?" Tiin ka ke ka then lauh lauh a.

"Ka nupui i nih vangin ka engkimah thu i nei dawn tihna a ni lo."

"Jaja! Thu ka nei ang pawh ka tih chiah loh kha, mahse, ka hmuh hlau reng reng a, i mipatna i thup a nih chuan ka ngaihdan a ni vak lovang," pawisawi lo niawm takin ka nui vei hak hak.

"Hmeichhe dangdai tak i ni!"

"Mipa zakzum tak i ni thung, taka, Mr.Evans, nichin khan i thidang deuh em ni?"

"I hriat angai lo, țawng reng suh."

"Vanram kawtchhuah i fang hman êm lo'ng chu, nge? Hremhmun kawngah i kal vangin a sa lutuka i rawn lêt leh zawk?"

"Țawng tawh suh." Thinrim lutukin a insehruh țauh a. A hmel dur khap chu nelawm loh fia fia tak a ni.

Ka ngawi ta vang vang a, thlawhna chhungah khan engmah ka ei thei lova, ka ril ațâm viau tawh asin le, ka pum ri rak rak chu a ring kher mai.

Chutia minute sawm dâwn kan ngawih hnu chuan Jerome Evans chu ka lam panin a rawn kal a, "Chuti fakauva min enchiang châk a nih chuan tunah i hun a ințan e.." tiin ka hma zawnah tak a rawn ding a.

"Maw! Eng nge i sawi awmzia?" Ka mengphâwk nghal hrâ a.

"Nichina i en hman tâk loh kha en rawh ka tia nih chu, ka ui hran hleinem," a ti nghat a.

"Ala nâ em ni?"

"Nâ e, i kut tetaktê khan i tidam thiam phian mahna," a nui zui suk a.

"I zak lo.."

"I zak bik em ni?"

"Zak chuang nang," tiin a kekawr kâwng chu ka ban ta dâ dâ a, chutia ka tih chu a lo beisei chiah lo deuh nge, a tawlh hnung nghal hrat a.

"Mr.Evans, a hlauhawm hleinem," tihpahin ka țhutnna dawhkan ațang chuan chhukin ka pan hnai hret a, a mitmenga mak tihna lo lang chu ka hmu hman! En tura min duhte chuan ka tlanchhe awm lo e, nichin maiah pawh en ka tum tho a, a danglamna tur vak a awm lo.

"Ding rawh," ka lam hawiin a kut a phar chhuak a, keilahin runluih tumin ka hnaih hret hret si.

"Amelia Lopez, duhtawk rawh," a sawi zawh rualin a kekawr chu chhuatah atla ta hnak a, kekawrte nen chauh a ding ta. Nui chhuak lo turin ka insûm nasat angai viau.

"I va'n nghal ve maw le," a kekawr pawhchhoh tum ta lem lo chuan min rawn kuah ta thut a, "En rawh, en ta che, engtia nâ nge i hre duh a ni lawmni?" ka kut pahnih chu man betin a mipatna chu min tawhtir ta a. Ka ner sawk mai.

A kekawrte hâk lai chu a kut veilamin a tuai thla a, "Amelia Lopez, i pasal tur belhchianna hun țha ber a nih hi," amah lah chuan ka taksa a en lawr dan dan a, helai hmun hi hetianga awmna tur hmun a ni lo. Kan mualpho mai dawn asin.

"Englo, a nat tawp loh hi," tiin ka'n pawt deuh salh a, a phu zawk! Rang taka ka kut vawnna chu tâl pitin ka tlan chhuak nghal nal nal a, thinrim vin fê-a min kohna pawh ka la hre pa tho. Mahse, ka chhâng duh der lo.

Kha kha a nimai! Jerome Evans lakah hian tlawm ka tum reng reng lo. Na lo pui nâ anga alan tlatna kha ka ngei tawk a tling viau.

MJS Building ka chhuahsan hnuah haw mai na tur ka nei lo tih ka hrechhuak chawpchilh a, a kid te ruala kal ka nih vang khan min dah lêt mai turah ka ngaih laiin kan boruakin zir ta hek lo le, taxi emaw ka chan mai a ngaih phah ta a ni.

"Amelia," Tunge min ko leh ta pek! Hnunglam ka hawi lêt vat a.

Jerome chu hmanhmawh zetin ka lam panin arawn tlan thla a, engtin nge ka tih tâk ang. Taxi phar mai tur lah chu a vâng phian! Min rawn nangching a nih teh chuan min sawisa hrepin a nia ka rin ni.

Ka bul a lo thlen hma ngeia inthiarfihlim hi a finthlâk ngawt ang. Tlanchhiat inpeih atin ka ding a, ka sandal bun lai chu hlipin kelawngin ka tlan ta a, hnunglam pawh ka hawi duh lo.

"Hey, lo ding rawh.." kiltin ațang chuan tute nge an nih pawh ka hriat loh hi an rawn chhuak a, thawmhnaw inang vek an la ha zui, 'Dios!' Engtin nge ka tih dawn? Ka la tlan lui ve țâng țâng a, vanneihthlak lutukin taxi ruak a lo tlan ta hlauh mai le, ka lo phar vat a, min ûmtute lo thlen hma chuan ka lût hman ta hrâm, lawmawm lutuk.

Driver chu ka address ka hrilh hnuah Dicky glass(Hnunglam darthlalang) chu ka bih zauh zauh a, hla deuh taka bike pahnihin vung zeta rawn tlan ka hmuh chuan min ûm tih ka rin hriat mai. Chuti maiin Jerome Evans hi a tlâwm mai mai dawn lo tih ka hriat phah bawk.

Mansion-a ka kir leh anih chuan min rawn nangchingin min rêk chhuak rang dawn si. Engtin nge ka tih tâk ang.

"Ka pu, bike hawh theih chi awmna i hre mial em?" Taxi driver ka zawh chuan a nui sun sun a, "Hria e a, i kal duh deuh em ni?"

"Aw, khawngaihin chulai hmunah chuan min hruai phawt mai teh." Ka ti ta tawp a.

"Yes, lutuk tlat." Tiin a nui leh a, ngaih te pawh ati țha lo rum rum alawm le.

Dawr lianzet kawta min dinpui chuan bike, man chawia hawhna hmun a ni tih ka hre mai. Ka chuan man ka pêk fel hnuah dawr chhungah chuan ka lût ve ta rawih a. Ka bike ang Ducati 1199 kher ka zawn vangin ka bihkual tam hman hle a, a tawp a tawpah ka hmu ve ta e.

Nithum atan bike chu ka hawh ta a, min ûm tute pawh an rawn thleng ve chiah, bike ka la lachhuak hman si lo, ka biru dûk dûk a, anni lah chuan min man ngei tum tih hriat lutukin an hawikual hneh nasa mai si. Chuti maia inmantir ka tum bik awzawng lo, Amelia Lopez intichak la fimkhur rawh.

7 street-ah chak fêin ka tlan par par a, kawngpui sira MJS Estates tih intar kulhna lamah ka bike chu her kawiin ka tlan lut ta a, helai hmun hi Jerome Evans-a grape huan a ni tih ka hria, min ûmtute khan ka tlan luh an ring pha miah lovin ka ring.

Mahse chuzawng ka ring sual ta deuh a ni e, grape zâm dul karah ka bike ka thukru hman țâwk, min ûmtute thawm ka hre chawpchilh nghal a, khawiah nge ka bihruk tâk ang? Min man a nih vaih chuan vawi sawmsarih aia tam min hlap er duhin a nia ka rin! Ka tibuai hneh em mai.

Ka dinna bula thingkung sâng tak chu ka melh chho a, khita ka lâwn anih phawt chuan min hmu miah lovang, min nangchin hma deuh chiahin sâng takah ka awm hman tawh a, vannei fia fia tak ka ni. Min zawng thawm pawh ka hre pha ta!

MJS. Grape Estates
Los Angeles USA

Ka lawnna thingkung hnuaia mi pahnih vei thauh thauh chu ka en reng a, ka lawnna a san deuh avang chuan ka lu a hai muai muai thei hial nia.

An kal liam hun nghakin a kâkah chuan thâwk pawh thaw țha ngam lovin ka țhu a, an kal bo phawt a nih loh chuan ka tan chhuk chi ziazâng a ni lo. Thingzâr chu nghet fê-in ka vuan rân bawk a.

"Kha nu kha helai hmunah hian a awm lo tawp ang," an țawng chu ka hre pha ve vek a. "A bike pawh kan ram chhungah hian a thukru ngei alawm," a țhianpa'n a chhan chuan a hawina lam chu ka en ve nghal a. Hah! Ka bike tanky, grape zâm kara nî-in a chhun tlet sar lo lang chu ka hmu ve ta a, ka rilrua țawngțaiin, 'Lalpa min man tir lul suh,' tiin ka phun sap sap a.

"Kan hmu zo lo a nih chuan Jefe (hotupa. BRR) in min that hreh miah lovang, kha nu kha a hmangaih viau asin," a sâng zawkin a tih leh chuan mak tih lutuk vangin ka nui chhuak ta hak a, "In tifiam a ni lo maw?" Insûm hman lova ka țawng chhuah tâkah chuan ka awmna thingkung chu an rawn hawi chho rual țhawt a, min hmu ve nghal chiah bawk.

Mawl ka inti tak zet, engvanga lo ngawi mai mai lo nge maw ka nih le? Min man dawn ta nge nge e, ka theihtawpin ka sual lêt ve ang nge, tihian thingkungah ka țhu reng zawk dawn?

MJS Company neitu hian kei min hmangaih a maw!? Jaja! A â a nih ngei dawn chu...

"Rawn chhuk rawh miss," a sâng zawk chu ka lawnna thingkung lam hawiin a rawn dâk vauh vauh a.

"Teuh lo, min man dawn asin,"

"Man lovang i bike hmang khan i haw dawn nia,"

"Ka bike hmangin ka haw dawn tih engtin nge ka hriat ang," ka tih chuan an inmelh zawk a, engmah phei chu an sawi lo.

"Rawn chhuk phawt mai rawh," zaidam vak lova min rawn tih chuan ka ter at mai. Ka chhuk awm lo chiang e.

"Ka chhuk dawn lo, tikhan awm ula, kei tihian ka awm bawk anga, kan hahdam tlang a nimai,"

"Nangnu hi eng nge i hriat a.., kha thingkungah khan i awm reng thei lo tih i inhre ve ang chu.." a tawi zawkin atih lai chuan bike tlan thawm a rawn awm a, ka hawi phâwk hra mai.

Spain-a ka bike ang chiah mai Ducati a rawn lang ta a, a khalhtu chuan helmet full face a khum tlat avangin tunge anih ka hre thei rih lo, ka hnuaia mipahnihte chu an phun sup a, an hawi â ho mai! Tu tak ni ang maw?

Kan awmna zawn a rawn thlen chuan a ding dat a, a helmet khum chu phelhin a hawikual ngial a, Jerome Evans lek niin! Chutah mipahnih lo ding chu a en ta chauh a.

"Khaw'nge Amelia?" Ti a zawtin ka bike thuhrûk chu a en vung vung a.

"Khita khi a awm e, Jefe." An hlauh hmel kher, ka awmna lam rawn hawi chhovin Jerome chu a kiai suk a, ka lo insiamchhiat khum hrâm a, a ner sawk mai.

"Lo chhuk la.." ati hmuk a.

"Engtin nge min tih dawn i sawi phawt loh chuan ka chhuk dawn lo,"

"Luhlul chhuah lo khan lo chhuk phawt mai teh," tiin engtin nge ka lawn theih ti niawm fahran hian ka lawnna thing chu a thlêk vung vung a, a mengphar âwk nia!

"Intiamkamna felfai tak kan neih loh chuan ka lo chhuk dawn lo, chuan i nauteho kha an awm ve reng a țulna lah ka hre hek lo." Ka ti vei hmarh hmarh a.

"Ok, Joe, Sam, farm house-ah lova phei rawh u," tiin a kid pahnih chu thupe țhang tih hriat tak hian a hrilh a, an bu nghut nghut mai! An Jefe chu an hlau awm rem rem hle mai!

Chumite pahnih kal kian hnuah chuan chhuk ka la tum ta chuang lo fova, "Mr.Evans, ka lo chhuk i duh viau chuan thu delhkilh țha deuhte han chhakchhuak ve la.." ngeiawm lam lek leka tiin ka nui lui sâng a, a rûm dut ri ka hre pha reng.

"Tiang em em a hmeichhe â leh luhlul hi ka nupui turin ka lo thlang a nia!" Awih theilo niawm tak hian a ner sawk a, a sam a tuai puat bawk.

"Jaja! Min thlang fuh hi ka ti, leiba rulhnan chuan kei hi ka tihtlâk riau alo nih hi..bâkah min hmangaih kha.." Nichina a kid-te sawi ri ka hriat vang khan ka ti-el deuh kher a, ka thusawi vanga a nuih suk chuan a hmelțhat phian chu le..!

"Hmangaih maw! I mumang a nih chu," tiin ka lawnnaah chuan inthazo zet hian a rawn lawn a, ka nuih a za viau lo, min namthla duh tur khawpa rilru chhia a pu anih vaih chuan a châk dawn miah lo.

"Le, ka ruala chhuk i duh nge, i chhuk hmasa anga ka lo veng dawn che," min thlêm titiha atih chuan ka nêm țan der, hepa pui roh hi mi hneh theihna riau a nei a ni chiang mai.

"Chhuk hmasa la ka lo zui ang che," ka tih chuan min hnial miah lovin a chhuk ve mai nia, a hnungah hmanhmawh fê-in ka chhuk ve a, a tawp kan thlen hma chuan ka rahchhan a pelh ta hlauh mai le, Jerome-a hnungah ka zuk nêk a, kan pahnihin lei charah kan thüm țhla țawk!

"Mawli..."

"Mawla.." min kaihthawh a tum chuan lo duh bik lovin keimahin ka tho lui kher a, min melh no lo khawp mai.

"I nu leh pa in an ngaihtuahzia che i hria em?" ati hrawk a.

"Ngaihtuah ve ang chu, an fanu neihchhun ka nia lawm," ka kekawr mawng ka bengfai thak thak a, ani paw'n ka tih ang chuan tivein a tûm bur a.

"I țawngtheih dan em em hi a satliah lo khawp mai Amelia, tin Mr.Evans tiin min ko tawh suh ang che."

"Tihian kan ding reng dawn nge kan haw dawn Jefe(Boss)"

"A tlai tawh angreng si a, ka farm house-ah dinner ei law law ang, chumi hnuah ka thlah haw dawn che nia," dam thlapa min chhan chuan ka melh chho hau a, min en ve reng emaw tih laiin grape zâm kâra ka bike thuhruk chu alo thlir daih niin!

"Ka nu leh pa'n min ngaihtuah tih i sawi zawi chauh a ni lawm ni?"

"Ka lo be dawn nia, i pasal tur kiangah i awm dawn alawm, an ngaihtuah lutuk chein ka ring tawh lo," tiin a bike chu a hûng țha a, ka bânah kaiin a awm tih pawh ka hriat loh farm hause lam pan chuan min hruai ta a, chawhma lama a kap ka hnek sakna khan effect a nei lo a ni ngei ang.

MJS Estates
Farm House
Los Angeles
California.

"Sam, Amelia inbualna tur lo siam rawh le," Nichina a sâng zawk kha a ni tih ka hre mai. Î he lovin chupa chuan ka inbualna tur atana ka mamawh tur a lakhawm zung zung a. Pakhat zawk Joe atih emawni khan eitur a lo siam bawk a, farm house changtlung tak a ni.

"Thawmhnaw hâkthlâk ka nei silova," Jerome-a melh paha ka tih chuan eng hu-ah ngai lo tih hriat takin a dar a san âk a, "A awm mai ang, hmeichhe thawmhnaw ha lo khan mipa thawmhnaw inbel zawk la, i tan a țhain ka ring." Min nuihsawh deuh tlata ka hriat chu le.

"Nui suh,"

"Ka nui ve ang chu, va inbual rawh le, Spain ram rim i la nam tlat, ka hnar hi a fing tehchiam lo a nia, i rim erawh a tak mah mah," kiai suk chunga atih chuan Mouri nen an inang tawp.

A kutchuk kha ka hrechhuak lo thei lo, engtin nge ka ensak theih ang aw, "Inbual rual ang," tia ka sawm chuan makti lutukin min en a, ka hrelo der hmiah.

"Engvanga chu chu sawi ngawt i nih, hmeichhia leh mipa kan inbual rual a nih chuan a hun hmain naute alo chhuak mai ang." Min hnial ka ring lo kha a nia ka ringsual leh ta.

"I englo kha vawnghim țha la.."

"Eng, ka englo maw..?" A nuih azat hmel hle a, mahse ka nui duh miah lo, thlemthlûk dan tur ka la zawng ve fan a.

"I lu tal kha su ve rawh, mahni chauha bathroom-a awm te chu helai hmun reh lutukah hian a hlauhawm,"

"No, Amelia i thluaka thilawm kha ka hre lo emaw i ti ange, nang hian engthil maksak nge i tih leh dawn ka hria alawm, inbual tur chuan kal rang mai teh," ka hnial leh hlau niawm tak hian bathroom lamah min nawr phei dawt dawt a, a kut sa ham hamin ka dara avawn chuan engtin emaw tak ka awm, he a rim 'pa' hrâk hi ka hre tawh chiang a ni.

A hmel en tur chuan ka hawi lêt a, a mitmenga eng emawni ka hriatfiah thiam siloh hi arawn lang zuai a, min duhna mitmeng ni thâna ka hriat chu le..!

"Jerome.."

"Umn.."

"Tun lo hi inhmuhna kan nei tawh em? Ih..Spain-ah emaw i lo kal mial em?" Ka tih chuan min en deuh vang vang phawt a, chutah bu nghat chung hian, "Kal tawh chiang e, De La Fontano- a Wine Company saw ka ta alawm," a ti ta a.

De La Fontano atih chu Spain-a Wine company lian ber awmna hmun a ni a, Alicante, kan Aparment ațanga mêl thum vela hlaah a awm a ni. Chuti anih chuan ka hmuh hnu niawma ka lo ngai tlat pawh kha a awm tho ve.

A kutchuk chu ka en a rem lo leh ta phawt chu a nia, remchang a awm turah ngai ang, Mouri a ang tulh tulha, ani lah hian min hre hmel a pu der silo.

Ka inbual chhung zawng chuan ka rilruah a awm reng a, an pianphung mai piah lamah an hawiher hrim hrim hi a inang em a ni. Min bum ka ring chiah silo, Mouri nen kan ințhen dan lah kha ka pasal neih tur a hriat vang kha a nia. Aman min nei duh pawh a ni chai si lo.

Thil ri bur ka hriat chuan ka phu zawk a, bathtub-ah ka lo muhil chu niin! Ka chau ve ngang a niang, ka hmaa Jerome hmel chang fak chu ka hmachhawn hmasa ber a, "In chiah hlum i tum em ni," zawi sup hlauhawm ru zeta atih chuan ka ding chhuak hlawl a, hah! Ruak vekin alawm ka awm le, eng ati nge ka mawl tâk tlat ni!?

Rang lutukin ka țhu thla lehnghal a, mahse, min hmu hman vek tawh tih ka hre tho.

"Min en suh," ka hnute ka hup chawih a, a hmel chang tak kha alo dam deuh thlup tawh nia!

"Ka en lo thei hleinem che, ka hmazawnah i awm miau a," tiin ka lam panin a rawn kal a.

"Min en chîk duh suh Jerome, model ka nih loh hi.."

"Nang paw'n min chîk khawp kha maw, kan inrul chiah a ni mai," tiin bucket a tui awm chu a ban a, eng atan nge atih ka ngaihtuah lai takin ka chhip ațanga a rawn leih thut chuan râk chiam chungin ka ding leh hlawl a, vawt tak a ni.

Ka saruakna pawh ngaihtuah hman tawh lovin Jerome-a chu a ka pawt dawrh a, lo inring bik hek suh! Bathtub-ah a rawn tlu lût rawk rawk mai, inchelh a tumna lamah min la pawt vak zuia, kan pahnihin kan tlu ta a, a ni pawh tuiin a per huh mai bâkah a kekawr a huh deuh vek a, thinrim hmel a pu miah lo nia!

Ka hnute lum vat vat ka hriat chuan ka en vat a, Dios! Jerome chuan alo hûm reng nia, inchelh atumna lamah ati palh niin ka ring tho nâa, ka ter at thung.

"I kut hi dahsawn rawh," ka tih chuan a aia nâin a hmer salh a. Ka mitah chiangtakin min en kalh bawk.

Chutah rawn kun hniamin makti a ka âng pam lai chu a rawn fawp ta hmiah a...!

End of Chapter-8

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:35 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-9

MJS ESTATES
Farm House
LA California

Jerome-a min fawhna chuan min shock êm avangin chet mai nachang ka hre lova, dik tak chuan Mouri kha ka hrechhuak lo thei lo, min fawh dan dam deuh thlup erawh ka beisei aia nuam a ni, ruaka awm ka ni bawka ka taksa a danglamna lo awm țan chu haider chi ni nghal lo chuan..

"Me dejan un solítario(Min kalsan rawh)" Min fawhna athlah rualin zawitê-in ka ti sap a. Ani erawh ka thusawi hre lo ang hmak hian a awm a, "Ka nupui nimai tur i nia lawm Amelia, hlauthawng duh suh," ati sup a.

"Min neih chu i duh takzet em ni?"

"Duh e, mahse, thununna hnuaiah i awm dawn tih inhria la, i duh tawk aia tam sum hman tur i nei anga chuan ka thu thu-in i awm angai thung." Tiin min pawm nawlh a, bathroom ațang chuan min chhuahpui ta a. A kid ten min hmuh vaih chuan ka chhe vek a nimai.

"Hey, khawiah nge min kalpui dawn?" A darah ka chum tlauh tlauh a.

"Room-ah mawle, midangin an hmuh che i duh em ni?" Tiin pindan pakhatah min luhpui ta a, "I hmuh pawh ka duh chuang lo," ti a ka tâl leh chuan min nghat thla ve teh mial. Ka rinai takin ka thusawi a ngai pawimawh riau. Boss zawk ni ta ila; chu zawng Vana rah ang a ni si. Hah!

"Thuawih deuhva i awm chuan i rin phâk bakin ka duat ang che," towel chhahpui min pe a ka taksa pawh a en tawh chuang lo, a kekawr huh a phelh ve mawlh mawlh a, hundang chu nise ka zak ngawt ang. Mak takin chutia nupa niawm fahrana ka bula a tlangnêl chu nuam ka ti tlat! Bâkah Mourizo angah ka chan deuh nia mawle.

"Thuawih i tih chin lai tak chu hriat a chakawm khawp mai," tiin towel ka veng sawk sawk a, hâk tur lah ka nei chuang pawh a ni der silo.

"I hre chhawm ve mai ang hmanhmawh lo la.." ati duh chauh va, khum piaha 'Wardrobe' chu hawngin kawrfual pâr chiai a senno hi a rawn theh phei a, "Kha kha ha rawh, ka cousin ta a nia, helaia kan kal țuma a theihnghilh anih kha," jean kekawr inthawlh sawk sawk paha atih chuan ka lo bu ve mai.

Chu kawrfual chu ka ha tawk chiaha mahse a hnuaiah engmah inbel tur ka nei ta lo chu hrehawm ka ti.

"Keimah bâkin an hre dawn chuang hleinem zak duh suh," ka ngaihtuahna hria ang maiin a kiai suk a, tun hma ațanga min hre tawh ang maia a awm hi achhan ka hre lo ve a, nge? A nupui angin min cheibawl titih nghal pawh ka hre mai mai lo.

"Ka ni huih mai," tiin ka kawrfual tlâng chu ka pawt mar a.

"Chutia nuam lo itih viau chuan ka boxer hi ha ta che," mitmeng dam thlupin min en a, min duat hmel leh viau lawi si.

"A pawi lo viau ang, mahse, eng nge i hâk si anga?"

"E..ka ha lo mai ang,nangmah bakin i hre dawn bik hleinem," tiin a nui ta a, ka lo en hau ringawt!

A boxer a rawn theh phei chuan ka lo inthawlh ve sawk sawk a, khua athim lek lek tawh. Hepa bula ka awm hian ka nu leh pa te, ka lungngaihna te kha ka lo theihnghilh hmin der nia.

"Grape hmun hi dinner ei hmain ka fanpui zuai ang che," a boot bun paha atih chuan, "A tlai tawh ê.., thosi a awm ang,"

"Amelia, 'Awle' ti a min chhan hi a har viau em ni?"

"Awle, awle," tiin ka nui sak a, a nui duh țhak lo.

"Chimawm reng renga i nulât chhung hi hmanral tum mahta che, lokal rawh le.." a ding chhuak vut a, ka chhip ațanga ka keler thlengin min en chhuak dap. Chutah lungawi awm fahran hian a bu nghut a, pindan chu kan chhuahsan ta a.

A grape huan chu a zau viau a, grape bâwr țha tak tak te chu thlalak pui ka chak mang e, ka phone ka keng lo chu pawi ka ti hnuhnawh viau mai. Bakah ka chhuah dawn khan ka hman hmawh ve lutuka engmah ka ngaihtuah kim hman tawh lo kha a nia.

"Khaw'nge wine sawrna khur a awm?" Tiin grape bâwr țuih zinga pakhat chu ka lo a, ka hmawm nghal hmak.

"I thil ei kha chhâk leh rawh.." tiin Jerome chuan min hnaihchilh ruak a.

"Eng maw, tinge?" Ka țhial sawma ka lo lem hmanhmawh tawh.

"Țhing lutuk, henglai hmuna mi hi engmah silfai lo a ei mai mai loh tur," ati nghut a.

"Sil loh pawn a tui tho," a dang pahnih chu ka lo leh a, pakhat zawk ka hmawm luih leh chuan a meng rum nasa mai, amah hian ei ve nghe nghe sela ațha ang.

Grape mal khat ka la ken chu ka hnunglamah thukru-in, "Ka mitah eng emawni a lut," Jerome-a chu mit siai chungin ka melh a.

"Fimkhur tur a nia," ka hmai záwnah a rawn kun hniam a, chutih veleh ka grape ken chu a inrin loh lai takin a kâ-ah ka hnawh luh sak ta thut. "Eng!?" A sawi thui hmain ka tawlh hnung hrat a, a chhâkchhuah lai chuan ka lo nui var var thung. Lem kher lo mah se a bâl a nih chuan a kâah a châmbang ve em em ang.

"Nangnu hi.." min rawn man hma chuan ka tlanchhe ta a, 'ka grape huan pawh ni hlei lo' ti rilru chungin ka ban phâk apiang chu tlanpahin ka lo a, ka lawhsa pawh ka paih zui zel bawk, a thinrim teh ang chu..

"Amelia ding rawh," min ûmphâk titih tawh a, "Lo tlan ve zel rawh, exer lâk i mamawh kha.." tiin ka au lauh lauh a, a thinrim hmel ka hmu lo hlauh.

"I châk lo khawp ang," atih chuan ka ding ta a, "A nih ka lo nghak che," tiin kâwng dawmin ka lo ding rân a, a lo thleng chawpchilh ve mai.

"I va'n fit lo em em ve le, fiam tlâk pawh i ni lo," ka ti ve zaih a, dinner kan la eidun dawn miau a, tih thinrim chi ninghal lo chuan..

"Ngawi hmak rawh," a thaw nghal huam huam nia, kan inûm rei loh nen, hepa hian a taksa chhung lamah natna a nei em mawni le!? Mouri te chu a fit viau kha a nia, tinge ka lo tehkhin ve hman ziah ni.

"Tun chiah ka ngaidam tawh ang che, a bâk chu ngaihdamna a awm tawh lovang," la thinrim tih hriat zetin ka bânah a vuan a, min thing hrep pawh nise a awm tho. Mahse, engtin min ti ta bik lo.

"Ngaihdamna chhan tur ka awm em mawni le?" Pawisawi lo thei ang ber hmelpuin ka melh sawr sawr a, en pawh min en țha duh lo.

"Pasal zaidam deuh neih hi ka lo châk țhin hle asin," ka tih leh chuan, "Ngawi hmiah rawh, țawngkam khat pawh i chhâkchhuak leh a nih chuan.." ati fiak țhak a. Ka chhang lo chiang asin. Ngawih hun kha ni tlat hek! Â, bâkah sawitur ka hre tawh tehchiam lo.

Farm House kan pan laite chuan a ngawi ngul a, biak pawh ka tum bik lo, ka țawng dawn tawh lo hrim hrim a ni tawp mai.

"Jefe, dinner peih a ni tawh a," Sam, ti a akoh khan farm house kan luh rual rualin alo ti nghal a. "Buatsaih ula, wine kan duh tel ang aw," chutia an inbiak lai chuan ngawirengin ka kalsawn ta daih a. Nichina pindan kha ka pan nal nal a, he inah hian thil a awm chikim angreng phian! Bedroom pakhat chauh a awm tih mai loh chu in pangngai nen a inang thlap alawm le.

Room chhung chu ka melh kual ruai a, duhthusamin zau lo mah se a nuam reuh hle mai. Khumah chuan ka mu vei dar dar a, pasal hausa lutuk ka nei dawn chu a ni si a, chupawh businessman ngat lehnghal a nia, leiba rulhna atana nei tur ni mahila ala zia tal alawm.

"Amelia, dinner a ei theih a nia," Jerome-a aw chu hla tak ațanga lo ri chhuak ang mai a ni. Ka mutchhuah dan em em chu le, vawiin ka thiltawn zozai ngaihtuah chuan a awm ve reng.

"Amel," min lo koh chhen avang chuan thawh loh theih va ni suh, tho duh lo pawh ni ila min phih tho duh dawn tih ka rin hriat uar mai, peih lo zetin ka tho chhuak ta nge nge a. Mahse, țawng ka la tum chuang lo.

Kawngkhar chu ka va hawng ta a, min rawn pawh mai duh bik lo a ni ang, bang nghengin Jerome chu alo ding reng a, min en vung vung a, lungawi lo hmel a pu hran tawh lem lo.

Joe-a dinner siam chu a tuihmel hlawm hle a, American chaw vek a ni. Mahse, ka duhzawng chi hlir an siam chu mak ka lo tiru hle a, an hresa awm tawp silova, wine pawh Celeste tho a ni, Jerome chu ka melh zauh a, min lo la en char char nia!

"Wine in hmasa lovin thildang kha ei phawt rawh," Wine ka ban laia Jerome an atih chuan ngawirengin salad chu ka ei a, cat fish pawh ka ká khat vekin ka hnawhlut bawk a, ho em mai duh leh mak min ti mai mai rawh se.

"Enchante Hotel neitu ve meuh si manner i hre lo hle mai," ka la țawng ta chuang lo, ka duh tâwka tam ka ei hnu chuan wine chu ka in leh a, "Amelia, ruih te kha i lo tum ngawt ange, nokhat bâk insuh ang che."

Ka țawng duh miau silova a thin a thawk ta deuh nge a ding hluai a, "Nangnu hi engtia tih chi nge i nih le?" Rum mangkhenga ka melh hnuah wine nokhat chu ka tlâk pawp a, a tui ngei mai. Midang mitmei veng miah lova in nghek ka va'n châk tak.

"Amelia, hetiang hmeichhia hi i ni reng țhin em ni?'' Beidawng âw zeta atih chuan ka melh zauh a, ka sual der rei deuh em mawni le, min ning hmel a pu tawh zawk mah.

"I titau tihna mi?" Ka koki-ah arawn vuan a, ka bu nghat.

"Titau rual chu i ni tawh lo asin le," zaidam thluamin ati leh a, a mizia hi ka hrethiam nek lo e a.

"Haw ang," ka tih chuan a țhutnaah țhu lehin a hma a eitur inchhawp chu a ei zawm a, min chhang miah lo!

"Dinner ei zawhah haw ang aw.." wine lem khalh paha ka zawh leh pawh chuan a ngawi ta reng a, ani hi ka tihdan a zir chiang, ani anga zaidam ka nih loh avangin ka dawh rei ve vak lovang.

"Jerome Evans, i beng a țha em?"

"Min chhang tawp suh," ti lehin wine bottle chu ka la a, ka'n in ta pawp a nih kha, duhthusamin a tui.

A zatve dawn ka inhnuah min rawn chhuhsak ta a, a hmel chu țo haw tur ang maia dur khupin a meng rum ûl a, a thin ka tirim takzet a nih ka ring.

"Awm chintawk i va hre lo ve," ka bânah min pawt dawrh a, nichina khum awmna pindan lamah khan min pawt lut ta dawr dawr a, ka lo tâl ve tak nâ-in min vawn ngheh êm vangin awmzia a awm lo. Ka pum a puar ûl a, ka thil in khan hna thawk țanin ka lu a hai chem chem nia.

"Ka hnuaia thawkte awm laiin nungchangmawi hmang tawh rawh, ka nupui tur i nih kha hre ta che," ati vin hlur a.

"Engtikah nge kan inneih dawn?" Ka meng chiai a, ka rui țan der.

"Engtikah nge i duh a, tunah pawh kan thei reng a nia," ati hmuk a.

"Tunah ka duh e, khawi ka zungbun tur min lo pe la, mahse, buntir tur che ka nei ve miah lo," ka ti deuh ham ham a, min en run runin, "I rui a nih kha, i chêtdan hi ka awih thei lo rum rum!"

"Awihin awih lo mahla keimah ka ni miau alawm, misualpa."

"Mu phawt teh," ati ta ringawt a, ka meng țha thei der lo.

A mitmeng dum fiah kalh țhin kha ka hmu dere vek! Mourizo Soreno anga ka hmuh tlat chu le?

"Mouri..." ka tih ri leh khuma min muttir lai chu ka hre ruai ruai.


MJS Wine Company Chairman
Mourizo Jerome Evans|Soreno

Khuma Amelia rui chatthla chu ka melh vang vang a, kei hian a mizia ka lo hrechiang lo nge? Hetiang mizia hi a lo nei reng zawk pawh ka hre thiam tawh lo.

A muthilh dawn khan ka Spanish hming kha ala lam ve fan a nia, engtikah nge min hriatchhuah ang? Ka inthup thei chatuan dawn hek lo.

Atan chuan Jerome Evans ka ni tlat si. Engvang lo bum kher kher nge maw ka nih le? A pawi ka tih rualin Felipe-an fanu a nei tih ka hre tlai ve êm a ni.

A fanu neihchhun lah hi hmeichhe satliah a ni reuh mang silova, tuipuikama ka hmuh tirh ațang khan ka duh nghal kha a nia, mipa tamtak thiam loh mix martial arts a thiam tlat te kha mak ve tak a ni. A lu a zo vah vah hle bawk.

Super Model tamtak aia nalh ala ni zui cheu bawk a. A nungchang hrim hrim hi sim thei se chuan ka duh maw le, a luhlul ngâng ngâng em a ni. Min la theihnghilh bik lo chu a nia, Mourizo emaw min ti leh thut țhin hi hrehawm ka ti, a chhan chu ka official name a ni silova, ka nupui atana ka nei tawp anih loh chuan Jerome Evans angin min pawm ngai lovang. A thinlung luahtu chu Mourizo Sereno kha a ni.

A la thianghlim tih ka hriat khan nuam ka tiru veng veng a, chuvanga nupui atana duh nghal ka ni tel bawk. Ka ex-girlfriend Mayla Ansell hnar nan a țha phian dawn bawk a, mahse, tunah chuan amah hi ka duh takzet tawh a, a zûnah ka uai titih der! A khawsak phung dangdai lutuk hi enliam a harsa mai pawh a..

A hnâr sâk sâk a, a hmai tung lam deuh leh a hnar ngul sâng vah te hi American hmeichhiate'n ah pu ve bawk mah se ani anga inhmeh hi an tam lo, Mayla kha hmelțha ka lo ti viau țhin a, Amelia Lopez ațha fê zawk.

A rang lama inneihna buatsaih hi ka tih tur a ni, chutilo chu alo tlanbo duhin ania ka rin ni.

"Mouri.." Amelia chu a rawn che țalh țalh a, a thinlungah Mourizo hian hmun aluah thûk hle tih ka hre mai. 'Min nei mai rawh,' ti a min ngen lai khan ka lo pawm ta mai lo a, kan inneih hnuah Jerome Evans ka nihna hi hrechhuak ta se a zia deuh angem?

Ka kawr ha lo lai a hmuh fuh vaih chuan min hrechhuak ani nghal mai, chu chu ka duh rih silo, min haw dawn êm a, sawi chi pawh ni nghal lo chuan..

Zaninah hi chuan kan haw thei dawn ta lo anih hi, a nu leh pa kha ka hrilh thawi thuak nâ-a an ngaihtuah dan tur ka hrethiam mai a,'a ruia kan lo haw lo mai ang' tih lah thil tihchi a ni der si lo.

Felipe Lopez chu ka phone ta nge nge a.

"Mr.Evans khawlai nge in lo thlen tawh?" Ka rin dan chiahin a âw a hlauhthawnna rawn ri chhuak chu ka hre hmasa ber. Kan haw theih loh chhan chhuanlam sawitur lah chu a vâng phian bawk si.

"Kan rawn haw thei dawn lo a ang khawp mai," ka tih chuan a thaw hawk a.

"Amelia kha ka lo be ve lawk dawn em ni ang."

"A pawi ka ti khawp mai, a muhil rih a.."

"Eng maw? Tunah mut a hun em ni?"

"Thlawhnaah a chuang thui deuh bawk nen a chau deuh a, dinner eizawh khan a muhil daih alawm," ka tih chuan a awih ve ta nge? "Mr.Evans, khawngaihin ka fanu kha tihrehawm suh ang che." ati chuai ruih a. Ka lainat angreng, in fanu hi ka duh viau asin tih mai a nia ka duh.

"Awle, Felipe, him dam takin ka rawn dah dawn nia, inneihna pawh arang lama buatsaih nghal ka duh dawn a nia," Kan inbiak zawk hnuah chuan ka mut a chhuak ve viau tih ka hre chiah.

Khum dang han mut mai na tur awm hek lo, a bulah ka mut mai angai dawn a ni.

Ka kamis hak lai chu hlipin ka inthawlh ve ta tawp a, ka boxer min hâksak daih bawk si! Jean kekawr ka mutpui dawn ta chu a nia, ka shirt hâklai pawh ka hlip duh ta lo law law a, kei aia alo harh hmasa anih vaih chuan min lo enfiah kha a tum ngei anga. A mitmenga min rinhlelhna kha ka hmuh hmaih bik lo.

Mourizo ka nihna anga vawikhat chauh fawh leh ka châk asin le, Jerome ang chuan ka fawp ngei a vawiin khan mahse, chhanna ka dawng țha lo viau. A hmui senno chekah chuan dimtêin ka fawh sak ta zeuh a, a bâk chu ka pel duh lo. Hmeichhe rui chatthla lai khawih duh tur khawpa nep ka ni lo ve.

A kâwngah kuahin thlamuang takin ka chhing ta siai siai a.

Ka taksa mu churh churh chuan minti harh a, ka san bun lai ka enin zinglam dar thum chauh a ni. Bathroom lama uak tuar tuar ri ka hriat chuan Amelia mutna ka en vat a, a lo mu tawh lo. Nizanah Celeste wine țha chi leh cat fish tam lutuk a ei a, a pumin a zawh ka ring lo reng a ni.

Rang takin khum ațang chuan ka tho nghal a, bathroom lam ka pan vat. Kawngkhar inhawng ațang chuan amah ka va hmu nghal mai a, a pawr phang mai. A kawrfual kha a lo hlip tawh a, boxer nen chauh bathroom chhuatah chuan a lo țhu a, vawt pawh ati lo nge? A hnute a lang vek bawk si, chu lah chu ngaipawimawh hmel lah a pu mang der lo, a dâng deuh lap bawk.

"Hey.." ka aw a hriat chuan a rawn dâk chhuak a, a meng phi chiai a ka hriat chu le! Ala rui deuh em maw ni!

"Min lo kai tho lawk teh," a aw chu a țial rian a, ka ngaih a țha ta hauh lo. Rang lutukin ka pan nghal a, a taksa ka deh rual chuan a khua asik tih ka hre mai.

"Nâ i nei em?" Ka ti vat a, min chhang lo, ka pawm thawh lai pawhin a zawi nghiai a, a taksa ruak pawh a hrechang meuh lo, hundang chu nise chhuak turin min hrilh ngei ka ring.

Khumah muttirin puan ka sintir thlap a, ka tih ang ang chuan a awm vel mai mai ni berin ka hria. Hetiang chuan a dik dawn lo tawp mai!

"Amel," Min chhang lovin a rawn meng diar diar a, min hmu awmin a la awm ta lo fo.

Joe leh Sam chu ka ko nghal vat a, ka doctor phone tura ka hrilh hnuah Amelia bawk chu ka ngaihven san leh ta a, hawpui dawn pawh ni ila a ngaihna a awm lo hrim hrim bike a phurh chi ziazâng a ni lo. Ka Estates-ah hian grape phurtu tur Truck pali bâk lirthei kan dah miah lo a, a buaithlak lehzel hle mai.

"Sam, tuilum lo siam rang la, min rawn pe dawn nia,"

"Yes, Jefe,"

A hmai dâng hi chu a luak vangah ka puh deuh ngawt a, a khawsik tel ringawt hi a chhan tur awm ang ka ring thiam lo.

Sam-an tuilum alo dah luh hnu chuan min chhuahsan turin ka hrilh nghal a, a chhan pawh Amelia'n thawmhnaw mumal a inbel tlat lova an hmuh ve kher ka duh lo, ama thawmhnaw hâk pangngai kha ala huh bawk si.

A taksa lang lai leh a chal te chu ka thiam ang angin tui sâ-in ka dep ve a, a rawn meng siar siar ka hmuh chuan, "Amel, i țha em!?" Ka be nghal vat a.

"Tui ka in duh Mouri.." Tui intur la turin ka thawhsan leh tê tê a, Mourizo hmuha min hmuh tlat danah ala harh chiang lo a nih ka ring, tui intur kenga ka va luh leh chuan a lo meng fiah ta deuh a, "Âng rawh le," tlemtê bak a in lo, chau ngawih ngawih hmel a pu zâwk! Vawikhatmah zû lam chi reng reng intir ve tawh loh tur a ni.

"Jerome, ka haw duh.." Zawtê bawkin ati leh sap a.

"Kan haw dawn alawm, bike-a chuang chi i nih loh hi, doctor alo thleng țepin ka ring," a samah ka chûl hliau hliau a, tuna alandan leh vawiin te kha chu dang tak a ni. Tunah chuan tihnat awl lutuk hmeichhe dik tak angin alang ve hial alawm!

Chimawmin min runluih țhin engang mah se, a bula awm hi a hlimawm mai bâkah a hahdamthlak ka ti!

A mutna ațang chuan rawn țhu chhuakin a rawn nui var var a, a hmel ngainatawm zia lah a inhre der mai si lo, fawh nawk nawk a châkawm!

"I zia deuh em ni?" Ka hnaih nghal vat a, "Engmah nâ ka nei reng reng lo," tiin nichina chauh hmel ngawih ngawih si kha a rawn tho chhuak a, henu hi min tihder chiang mai! A khua asik ni ngei khan ka hre ve si a.

"I nupui ka nih hunah damlo thut ila min ngaihtuah phian dawn kha," ala ti tak deuh deuh a, khum bula tui bottle chu banin a inkhawlh khawlh a, tenawm lutuk! Nichinah in theilo niawm fahran khan tlêmtê tê-in a in vel a..

"Sam, Joe, doctor kha phone la, lokal angai leh lo ang tih hrilh rawh u," thinrim lutuka ka tih chuan angaihna hrelo tih hriat zetin an hawi hau a, chu chu min tithinrim tulh tulh.

"Ka sawi chu inhre lo em ni?" An la chêt lawk loh vangin ka ti leh tuarh a, "Yes, Jefe," Joe zawk chu harhchhuak hmasaah țangin doctor phone turin a chhuak ta a. Ka thinrim lutuk hi ka puakkeh thei dawnin ka hria.

"Dam lohna hi intihderna chi a ni em ni?" Amelia darah vuanin ka thing deuh nawk a, ben țawlh tlâk a ni.

"Ka damlo tih ka sawi bik em ni?"

"Sawi lo mahla damlo angin i lang a nih kha.."

"Jaja! I ngaihtuahna mai mai anih chu, damlo hman ka ni lio ania Jerome Evans," a hnute lang huai chu puanin a khuh a, chu chuan ka thin a tirim sauh.

"Enteh, Amelia, lungphu chawla min thihtir i tum em ni? Lung pakhat chauh ka nei tih i hre ve ang chu tiraw?"

"Hre lem nâng! I hausa a pahnih tal i nei ang chu ka lo tia.." ala nui reng nia.

"A țha e, mintih zah man leh țul lo puia ka hun min khawhraltir vangin ngaihdamna a awm tawh lovang.." a puansin lai chu ka phihthlâk sak a, a țê nghal țhat.

"Eng chiah nge tih i tum a Jerome?"

"Lo en la ti nia.." khumah lawnkaiin a tukkhum samah ka vuan a, hetiang em em a chimawm hian engtin nge a awm thiam pawh ka hre hrep lo.

"Min thlah rawh, vawithum ka chhiara min la thlah loh fo chuan.." min vau leh kha kha a, ka țawng chhûng hi chuan min hnialthlâkna tur țawngkam a hmaih ngai hek lo, dim lo baksakin a hmuiah ka fawp ta a. A chip tlat!

A hmui nawrkau tumin ka lei chu ka hmang țangkai a, mahse, awmzia a awm lo, a chîp nghet mah mah! A thiam pawh a thiam zawk ka ti! Ka beidawng titih der, min sual lêt chuang lova, engahmah min ngailo a ni ber zâwk!

"Hmeichhia ila fawp ngai nange?" Ka hmui ka lâksawn rual rualin a țawng leh zat a.

"I hriat angai lo.." chhan pawh ka chhâng țha peih lo.

"Ka rin hriat mai, i zei loh dan em emah khan," tiin khum lu lama a kawrfual dah chu a inthawlh sawk sawk a.

"Engmaw i sawi? Nang hi.." Man beh leh ka tum chuan khum bul dawhkana mi eng emawni hi a ban zauh a, eng nge a nih ka hmu hman bik lo.

"I zei loh thu ka sawi a nih chu, ka pasal nitur chuan i tling tâwk meuh pawhin ka hre lo ve a," min tham lo zeta atih chuan mipa ka nihna arawn lang ve ta, dawh ka tum ve țâng țâng kha a nia, awmzia a awm hlawl lo a nih hi..!

"Enchhin ila ka zei nge zei lo chu i hre thuai mai ang," a ding uaih tawh chu khumah ka pawt țhu nghal hnawk a, min en kalh lehnghal, nichina alemchan kha a va'n hnehsawh tak! Tunah pawh hian eng emaw tak chu tih a tum leh tho ang.

"En ila a nimai alawm," tiin amah zawk chu ka malchungah a rawn țhu kai a, fawh châkawm zet hian a hmui aliak kual zeuh lehnghal! Engtin tak rawn che leh ang maw.

A kut veilam chu hnunglamah dahin a dinglamin ka nghawngah arawn kuah a, a hmai bul chêtah min kuai hnaiin ka hmuiah tak a rawn fawp ta a. Hei chu ka rin loh dan a ni.

A hmui sa ham ham chuan thiam leh zei zetin min rawn thlêm titiha, ka mipatna tho tur chu duh lovin ka lo insûm ve nasa mai.

A kawrfual hâk hnuaia a âwmbawr kawh vah chuan min nêk rân a, haider harsa tak a ni, kan mutdun hmasak ber țum khan hmeichhe thianghlim a ni a, tuna a khawsak dan phung hi ahma khan lo hresa lo phei ila mihur awmțha duh lo emaw ka ti ngei ang. Khumah a vâng tan zawngin min nem mu a, ka chungah a la țhu váng bawk.

"Engtia zei nge i nih han en ang hmiang," min fawh kâr lakah ati ham ham a, min mutpui hreh hmel apu miah reuh lo! Amelia Lopez em em hi, nikhat chiah Jerome Evans anga min hriatna a ni a, hetia a han phur hluai hi mak chu ka ti deuh! Mahse, ka hnar phal miah lo thung.

"I thawmhnaw phelh rawh le," ala ti sauh sauh lehnghal a! Ka phelh chuan ka kutchuk a hmu dawn tih ka rilruah alo lang hmasa ber, tlâwm zawk nih erawh ka duh silo, a thluak hi a va han vawrh peih tak!

Ka mipatna ka kekawr chhana a rawn hum chuan ka țim deuh sawk, achhan pawh atih ngam loh tura ka ngaih hi a lo ti ngam leh zel si a, tisa châkna chawhthawh dan lah training chhuak ang maiin a thiam phian! Haji! Thluak tibuaii ani ringawt!

"Nupa kan ni dawn tih avanga zat chung kher loh tur," ka kekawr hlip paha ka tih chuan a nui sâng a, "Mipa i nih angin za khuchûk zawk ta che," tiin ka mal ala rawn chûl zui, mipa thisen lum tak tan chuan rik phatna chi a ni tawh.

"I thawmhnaw kha nangmahin i hlip dawn nge ka hlihsak che i phût?" Ka tih chuan, "Nangmah kha inbuaipui la, keipawh chutiang tho chuan," tiin a tho chhuak tharh a.

Tunah kher hi chuan Min hrechhuak mah se pawitihna ka nei miah lo, Amelia ka duhna leh mutpui leh ka châkna hian min tur ut ut hial nia.

Ka thawmhnaw hlipin amah hmachhawn zawngin ka ding a, ani paw'n a sam țawnna ațanga phelh țanin a sam bu chhah leh nalh zet chu a darah a invaw siau a, a fai hmel kher mai. Ruakin a hmaah ka ding a, zâm map lovin min en kalh bawk.

"Ka kawr hnung zipper hi lo phelh lawk teh," tiin min rawn din hnaih a, ka phur zawng tak alawm le, a kawr hnung zip-na ka khawih chiah chuan rang lutukin a rawn inher a, "Jaja! Jerome, ka mutpui nghal duh che i lo ring tak tak elaw?" Tihpahin ka mawngah a țhâm tâwka, a kut veilama a thil thuhruk kha ka hmu ve chiah bawk.

A bike chahbi a ni, engtin nge ka lo hriat loh theih le!?

Amelia hmanhmawh zeta atlân chhuak lai chu ngawi rengin ka thlir tawp! Thawmhnaw inbel mai nachang pawh ka hre lova, Sam leh Joe pawh kohna châng lah ka hre hek lo.

Bike rûm ham ham ri leh a tlânchhuak thawm chu ka awmna ațang chuan a ring kher mai, ûm tur pawhin ka che chhuak peih lo. Min bumna tur dang a hre leh thovin a nia ka rin ni.

Joe leh Sam kha an muhil hman ani ngei ang, ka pindana an lo luh loh danah, Amelia te zawng bike khalh thiam tak a ni a, buaina tawk lovin a chenna hmun a thleng thei em em ang. Ka thluak a tibuai vek tawh.

Khua avar țep tawh a, tha tharin a chungchâng hi chu ka ngaihtuah țhat mai angai dawn a ni.

Henu thunun tur hian eng hmanrua nge ka hman dawn ni, ka chân phal der si lo, a duhdan anga mokawr dum hâk a duh țâlh anih pawhin a ha mai a ni ang chu.

'Amelia Lopez, lo nghâk rawh Jerome Evans ka nihna ang ngei hian min la âtchilh ang' tiin ka phun sap a.

Beidawng leh hrilhhai zetin khumah ka țhu thla ta hnawk a, ka saruakna pawh hliahkhuh tumna ka nei lo, min ti chau vel vek...

End of chapter-9

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:36 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-10

Santa Monica
Los Angeles
Lopez Mansion 127

Khawvar tirhtê-ah kan chênna hmun ka thleng ve ta hrâm a, kawrfual nena bike khalh chu a zawngchhangthlak loh khawp mai; Jerome Evans thinrim hmel hmachhawn lo mahila a awmdan tur ka mitthla thiam vek a, ka tlân chhuahsan laia a hmel kha engtikahmah ka theihnghilhin ka ring lo, saruakin awm lo se chuan min hlap er duh hialin a nia ka rin!

Ka nu leh pa mutui lai tihharh kher ka duh loh vangin inhnunglam ațangin ka lut ru țhem țhem a, tunhma ațang tawha kan tihdan a nia, rikrum thila tlânchhuah maina tura kan siam a ni bawk.

Los Angeles-ah hian ka mikhual hauh lova, college kalin kum eng emaw zat ka lo awm tawh a ni, Spain kha nuam ka tih zawk vangin ka graduate velehah châm zui duh lovin ka haw ta kha a nia, kan Hotel hmingthang zawk awmna hmun anih tlat avangin ka zin fo thung.

Enchante Beach Club Hotel neitupa fanu ka la ni tho tho, ka puala ka Hotel neih ve erawh tuin nge lei pawh ka hre hrep lo ve, Jerome nge midang tih pawh ka ngaihven peih lo.

Ka pindanah lutin khumah ka țhu hnawk a, LA ka thlen ațangin buai phili reng rengin hun ka khawhral ta chu a nia, ho thei hle mai! Ka thawmhnaw pawh kan housekeeper-in a lo rem diam tawh a, tihtham ka keng lo hrim hrim bawk.

Chau zetin khumah chuan ka thawhnaw inbel pawh phelh lovin ka mu ta a, Jerome-a hmalâk dan tur hre lo mahila khawvar hnu chuan a rawn inlan leh em em ang tih hi ka beng awmna ka hriat bel tlukin ka chiang sak, ka pasal atan chuan Mourizo bâk ka la duh ta lo fo.

Ka harh rualin thâwm bengchheng lutuk ka hre nghal a, zinglam darkua a ni der tawh, a tu chu nge ka pindan kawngkhar chum ri reng le!? Bengchheng ri ka hriat pawh kha ka room kawngkhar chum ri a ni. Rawn lut vaih teh se a châk lo ang chu..

Kawngkhar pawh hawng ta chuang lo chuan bathroom-ah ka lut hmasa tê tê a, an duhtâwkin lo bengchheng teh se, chimbuai ka ngaihtheih loh zia hrechiangtu chu ka nu leh pa te an ni. Ka haw tih an hriatna chhan tur ala awm miah lova, Jerome-an a hrilh a ni ngei ang chuvangin luhlul chhuah leh rih phawt hi ka tihtur diktak a ni.

Muangmarin shower hnuaiah ka ding a, tui vawtin ka taksa a phuh chuan ka harh sawng sawng nia, nizan kha chu actress hmingthang lutuk ho ai pawhin ka che nalh zawk, a nuam ve pah reng; Mourizo theihnghilh ka tum apiangin kha Jerome Evans khan amah min hriatchhuahtir leh zel a, amah hi ka duh mai ang tih pawh ka hlau hlel lo ve.

Bathroom-ka chhuahsan ruala ka pindana lo awm ka hmuh chuan ka ding dat!

Jerome-a hmel thutak zet chuan min lo en ve chiah a, a hmelah chuan thildang engmah hriat belh tur leh a ngaihtuah awm ka ring thiam lo, nizan chungchanga thinrim hmel kha a pu chuang bawk lova, ngun lutukin min en tawp!

"Ka pindanah hian eng ti tura lo lut nge i nih?" Ka nui lui ngiala ka hlawhchham titih der.

"Ka nupui nimai tur bedroom hi ka tan kal a rem lohna ka hre ve lo." Ka awkí ang chiaha ram hmak chuan min chhâng a, a mit pawh a khap eih lo nia.

Chutia min lo chhan vang chuan hrilhhai lutuk hian ka nui hak a, nuih der mai loh te chu tihdan dang ka'n hriat miah loh chu le! Min thlir reng a, mitko san âwk hian, "I piannalh tak leh kha, i taksa kumkâr lang reng kha chu ka nupui i nih hunah chiang zawkin ka la belchiang ang, tunah chuan thawmhnaw pangngai inbel phawt la ațha lo maw?"

Ka harh nghal zawk! Kei hian thawmhnaw chu sawi loh under wear bâk inbel ka nei awzawng lo. Dios! Ka â tulh tulhin a nia ka hriat ni.

"Min chhuahsan phawt mai teh," ka ti ta ringawt a, a bâk sawi mai tur tun dinhmunah chuan ka hre miau lo va, nimin lam anga chimawm chhuah châkna pawh ka nei lem lo, a awmdan thutak ruih hi ka ngainat zawng pawh a ni hek lo.

"Chhuak lah lo ve, kan inhriatchian poh leh a nuam ting a nimai, eng tactic nge i hman leh dawn pawh ka hre hleinem, ka body guard te paw'n an veng hneh lo che a nia, keimah ngei hian ka ven mai che angai a ni." ati hmuk hmuk a, a thinrim țan ringawt em mawni!?

"A țha e, chutia i lo awm ve dawn anih rau rau chuan ka thawmhnaw hâk tur te min lo thlansak la," ka nui sak a.

"Engmaw i sawi? Kei hian i thawmhnaw inbel tur ka thlang anga maw!?" Zak theilo min tih hmel kher mai!

"Inhriatchian i duh emaw ka tia, ka thawmhnaw kher lo adang pawh ka duhzawng leh ngainat zawng te i hre vek tur a ni dawn lo'm ni Jerome," elsen aw lek leka ka țawng chuan a dar a san âwk a.

"Anih a hnu inthlâk la, vawiin hian kan chhuak dun ang, nithum hnuah kan innei dawn tih lo hre bawk la, sawitur pawimawh riau i nei mial em?" Ati zung zung a.

Nithum hnuah kan innei dawn amaw! Chûk chûk mai a!

"I va hmanhmawh tut tut ve, ka ngaihdan pawh la hmasa miah lovin in lo inberem vel a maw," thinrim lutukin chhuat chu ka ke-in ka per tân tân a, thinchhe lutuk zia ani tih ka hria, mahse, ka insûm hman hlawl lo.

"Insum rawh my dear, kha, i âwmbawr pawhin awm ngaihna an hriat loh kha," tiin ka dinna lam a rawn pan a, ka taksa ruak kâng chu a thlir zui reng bawk. Tinge maw ka ât em em reng ni! Drawer chu hawngin brazier ka phawrh zui nghal a, a mitmenga min îtna chu hmuh hmaih chi ni nghal lo chuan.. tenawm mang e.

"Ngawi reng la, min lo hnaih țhak suh, tichuan pa țha i ni tihna a nimai," ka ti hmak a. Rem leh rem lo chuan bra chu ka ha ve mawlh mawlh a, ka la kilh fuh țha thei der lo lehnghal.

"Khawi ka lo kilh sak ang che," ati sup a.

"Kal mai teh."

"Enteh Amelia, min hnial zuah zuah lo hian inpeih vat la a țha ani mai, breakfast ei lovin rei deuh i awm tawh a, nilengin hun ka nei hek lo, hmanhmawh mai teh," ka bulah chuan rawn dingin ka bra chu min kilh sak nghal a, a kut a lâksawn rualin ka hnute a țhâm lui salh a, ka huat tâwk a tling viau. Inher thutin a ngalah tak ka chhuih sak ta a, ka ke a na nghal vawng vawng.

"Chimawm lutuk," tihpahin min kuaiher sawk a, ka inrin hman hmain ka hmui a rawn bawhthuah nghal zat! Chutah duhthawh leh min hrem tum tih hriat lutuk hian min fawp ta ngawr ngawr a, a hmui lum ham ham chuan ka chhungril a fan raih raih mai. Nizana min fawhna ai kha chuan a nuam daih! Chhânglêt lo turin ka insûm ve fan fan.

"Hmeichhe lumna nei lo chu i ni bik lo ve," min thlah ruala tisupin ka wardrobe lam chu a pan nulh a, eng hu-ah mah min ngai lo tih hriatzet hian ka thawmhnaw inkhai tlar dal chu a keu lawr ta dan dan a, a chêtdan chu ka rin loh lam tho a ni.

"Lumna i tia law? Ka lum mah mah tih ila hre thuai dawn alawm American kawlhrawng pa," ka tih chuan a kiai suk duh chauh!

A incheina lam ka lo en miah lova, kamis bânbul hâ-in a chungah vest dum a ha a, a kekawr dum hâk chuan a mal thahrui ngah hmel tak chu a khuh thla zuih a, a sam pawh duhthusama nalh a ni. Businessman anih zia alang ngawih ngawih.

"Kha hei hi inbel rang rawh, minute nga hun i nei a nia, chu chu i bawhpelh chuan i hâk chin ang ang kha i chhuahpui tur a ni mai," ka chhânna pawh nghak lo chuan kawngkhar lam a pan nulh a, a chhuak zui daih.

A thawmhnaw min pêk chu Silk kamis hring dal raih a ni a, ka ngainat zia hria niawm ang hrima a thlan vei tlat chu le!

A sawi anga ka tilo anih chuan tun țum chu min enliam mai maiin ka ring tawh lova, nizana amah ka tihdan ngaihtuah phei chuan min la dim mah mah ka ti zawk. Rang theihpatawpin ka inthlâk a, luhlul ka chhuah a ring leh ngei pek ang chu, a rin loh dan hlir hian a nia ka chêt dawn ni.

Min hruaina hmun tur ka hriat tlat loh vangin kekawr dum ka taksa rem zaih ka ha a, flat shoe ka bun leh tawp bawk. Jerome-a te ang kianga kal pha chin nih chu hmeichhe tamtak châk ngawih ngawih a ni tih ka hreru ve kar. Chuvangin keipawh zahpuiawm lo tâwka ka inchei ve ngei a ngai dawn lawm ni, ka ti deuh.

"Amel eng nge i ei dawn," ka nu-in min lo koh chuan ka inpeih tawh a, minute tam insiam nan hun ka hmang lo.

"Corn flakes leh bawnghnute, ramen tlem azawng nen," tiin ka chhang ve lang lang a, breakfast eina hun pawh ka nei tawh lo zawk maithei a ni.

Țhutkhawmna pindan ka thlen chuan ka rin loh deuh deuh ka hmu ta mai! Jerome-a pa, Juan Evans leh a body guard pali, ka nu leh pa te an lo țhu țhap a, engtizia a rawn kal ve ngawt nge maw an nih le? Nimin chungchang kha an sawichhuak anih vaih chuan ka nuih a za hauh lovang.

"I muangchâng hle mai Amel," ka pa chu ka melh vat a, kan inhmuh loh chhung reilote kârin a hmel a tla dâk mai.

"Ah..min nghaktu an awm tih ka hre bik hleinem, bâkah an lokal dawn tih ka hre miah silova," tiin nelawm vaklo hian Juan chu ka melh a, min lo en ve reng tho. Ka pa aia upa zawk daih a ni a, mahse, tunlaiah tumahin sawi lâwk lohvin mi inah an kal chut chut tawh ngai lo tih ka hre ve chiang e, American ho hian style hran an neih hranpa ka hre hek lo.

"Naktipah ka fapa nen in innei dawn tih i hria ang chu maw?" Juan Evans chuan ati chuar chuar a, a nui hmel chu a fapa anglo takin a ngaihawm fu roh. Jerome erawh a ngawi ngul thung.

"Minute reilote kal ta khan hrilh hriat ka ni tawh e, min lo hriatthiam theih chuan ka pumpui hnawhpuar ka duh deuhva," Jerome ka melh deuh kher a, a lo nur nûng thung! He pa hi chuan min ei vak lo chu anih hmel e. Pawi chai lo.

"Vawiinah inthawmhnaw tur va order ula, engmah buaina in insiam tawn loh hram ka beisei," Juan Evans in atih chuan choka kawngka ka thleng fel der tawh, an duh dan an dah lal hmel pap pap khawp mai.

Kan housekeeper Sara chuan eitur alo chhawp diam tawh a, henu hi ka rualpui awm vel lek a nia a fel phian, a nu leh pa in an boral san vanga kan hnena awm a nia; a hma chuan kan Hotel tirhkah a ni țhin a, Mansion lamah kan chhawr zui ta daih kha a nia.

"Miss, pasal i nei dawn tih ka lo hria a.." nui var var chunga atih chuan ka nui ve mai, "I pasal tur lah hi hmeichhiate duh rawn luai luai ala ni zui a, i vannei ka ti takzet," ati siam siam a.

"Jerome Evans i tihna anih chuan a chapo mah mah ka ti," bawnghnute inthlitin ka in a.

"Ka chapona i hriat kawng thum tal i han sawi chhin dawn em ni ang?" Amah Jerome chu chokaah lo lutin a hnunglamah a kut a suih deuh ngei a, nui hmel a pu miah lo bawk.

"Kan inbiaknaah i tel ve awm ka hre lo, nge? He in hi Juan Evans ta emaw i ti leh ringawt zawk? I lo hriat ve mai mai atan helai hmun hi chu maw, MJS hmunpui nilovin Lopez chênna hmun zawk a nia," ka nui sak a. A mit de deuh sar ațang chuan a thinrim tih ka hre mai.

"He in chawp hian ka lei lovang tih tunge sawi thei," ati chhar chhar nia. Zam lo deuh ve!

"Han tum chhin la ti nia," ka thil ei pawh a tui tawh mai mai lo, Sara lah chu nuam tih loh hmel zetin a che sek a, Jerome-huhâng hi a zo meuh lo te pawh a ni ange.

Sara tân chuan bilionaire hmelțha leh pa lutuk kha ani tlat a, Tupawh hian an ngaisang ve em em chu a nia. Ka théngthâwngah pawh a kal lo ve.

"I ei dawn tawh lo anih chuan kal vat teh ang, i bike hawh kha Joe ka dah lêt tir tawh ania," thupe aw taka Jerome-a țawng chu ka ngaithei bau lo.

"Tu thu in nge i lo dah lêt tir ve ngawt a?" Ka țhutna ațanga thovin a hmaah tak ka va ding a, insual peih at-in a nia ka awm leh tawh.

"Tu thu mah ni lo ve, keimah Jerome Evans i pasal tur thuin.." rawn ding chhuakin min melh rûn a, nizan ang mai mai kha chuan ka palzût thei dawn tawh miah lo tih ka hre thiam mai.

"A nih chu, kal ila animai alawm," ka ti sam êt thung.

Țhutkhawmna pindan lama kual tawh lovin kan chhuak zui nghal a, kan in kawta Porsche (9112 Turbo ) car lo ding ka hmuh chuan a hausak dan tur ka lo chhut hmanhmawh.

Hetiang car te chu thla hmasa lawka an tihchhuah a ni a, a lei tur tan pawh ngam huai a ngai viau tih ka hria, a rawn in show vel te pawh ani mahna.

"Hey, Amelia," min lo kotu an awm avang chuan ka ding leh rih a, ka colege kalpui țhin Pablo Salvador chu a rawn lang ve hlawl mai! LA-ah ka awm tih a hriat chu ka ring bik miah lo.

"Hi, Pablo.." ka bân ka vai khum zauhva.

"Nimin lamah i pa in i rawn kal tih thu a sawi a.." nui var var chunga atih chuan ka lo nui ve sâng a, Pablo awmna lamah va tlânpheiin a biangah ka fawhsak ta a, ani paw'n min ngai ve hle a ni ang, min kuah hlu hlu mai.

"I țhianpa hi min hmelhriattir ve dawn lawm ni duhtak?" Jerome-a lo thlen phei lai reng reng ka hre lo, kan bulah a lo ding reng tawh a.

"Pablo..,Pablo Salvador a nih hi, chuan Pablo a ni hi Jerome Evans a ni e," ka ti țha ve mai a.

"Amelia pasal tur Jerome Evans ka ni e," arawn ti leh kher nia.

Pablo lah chuan nuam lo tih hmelzeta min entawn chhen hnuah, "Amel, ka lawmpui a che, remchangah kan inbe leh dawn nia," inthiam lo hmel taka atih chuan, "Awle, tehreng mai," ka bânah Jerome an min pawt dawrhin, "Mr.Salvador, kan hmanhmawh deuha kan kal mai ang," tiin Pablo ka biak leh hlau niawm fahran hian car hûnna lamah min kai phei ta dawr dawr a, ka va ngei tak!

"Pablo, min rawn be pawp dawn nia, ka number chu.." Ka sawi zawh hma hmain car kawngkhar chu a hawng sawk a, min nam lut nghal rawk rawk a, kawngka chu a khar hmiah. Amah pawh driver seat-ah țhu ve nghalin chiang zetin min en run a.

"Kha pa kha tunge a nih a..?" Nelawm loh fia fia tak a ni.

"Pablo ti na nâ na a.."

"I eng nge a nih? LA- a i bialpa maw?" Jerome chu a thinur hmel hle a, a chhan tur awm ka hre ve der lo.

"Eng nge i sawi awmzia chu?" Ka ti nghat a.

"Ka sawi awmzia hrethiam lo tur khawpa mawl i ni lo."

A awm dan inthlâk thut chu mak ka tiru deuh a, a mitmeng rum ûl leh a taksâ insangmar ta viau te, a hmui chip hmak te chuan minti hlau deuh!

"Sawi rawh, i eng nge a nih Amelia," Vin zeta atih leh chuan ka phu dawrh a! Ve vak vak ringawt a!

"Ka țhianpa anih kha, ka college kalpui țhin a nia," ka ti dam thlap a, "A țhat chu," a aw a intih thu-na lo lang chu ka ngei angreng, a thik chu a ni em lo'ng chu..

Chumi hnu chuan ngawirengin car chu a khalh a, mûk taka ngaihtuah niawm fahran hian kawng lam chauh a en a, min ngaihsak leh tawh chuang lo.

Kan hnunga Limousine car pahnih min lo zuitu chu a body guard te annih ka ring ve ringawt. Hetianga inven reng hi alawm ka lo nin em em țhin kha.

2113, Stockton
Shopping Mall
Los Angeles

"Mokawr chu eng ang nge i thlan dawn le?" Jerome chuan ka bânah kaiin elevator-ah min luhpui a.

"Khawi hmunah nge kan inneih dawn a, engmah min hrilh mumal bawk si lo."

"Enchante Hotel top floor-ah, sawm bik mi tlemtê chauh nen a ni ang," ati sup a.

"Chutiang ka duh lo,"

"Enteh a harsa zawng ringawt hian awm tum teh suh a hahthlâk em mai, inneih buatsaih chungchangah hi chuan ka inrawlh ve miah lo, i nu leh pa remruatna zawk a ania," dam thlupa atih chuan ka ngawi ta rauh rauh a, ka pa hian eng rilru nge a put pawh ka hre hrep lo. A fanu neihchhun pasal min neihtir tum dan hi a lungawithlak hlawl loh.

"A țhat chu, hlim taka ka awm i beisei thei bik lo ang," min vawnna chu ka thingthla sawk a, tu mitmei mah ven tumna ka nei lo, Amelia Lopez tan hian hlimna a awm ve lo a ni berin ka hria.

Min luhpuina dawrah chuan tlereuh nalh leh manto zet zet a tlar dul mai.

"I duh ber kha thlang rawh le, ka ta i ni tih chhinchhiahna tur zungbun i bun ve ngei angai tih i hria ang chu tiraw," atih chuan ka ngawi reng a, thlan tumna rilru ka pu lo hrim hrim.

"Amel, khawngaihin dawr chhunga mite hian an en țhup che a nia," ka beng bulah a rawn tisap a. Chuti chung pawh chuan ka la che duh chuang lo.

Chutah a thinin a tuar ta lo deuh nge dawr nghaktu hnenah chuan, "A kut zungțang hi en la, a bun tâwk awm anga i rin ho zawng kha a vaiin pack vek rawh," ati ta hmiah a. Jerome chu ka en hau mai.

"Chutiangin i ti hauh lovang," ka ti leh lawi si.

"Anih chuan thlang ta che," ati hmuk a.

Lunghlu tih vel hian ka mit an la lem lova, tlereuh hrim hrim ka ngaina lo mai nilovin ka inbel ngai meuh lo, ka bân dinglama rangkachak sana ka bun hi ka inbel chhun chu a nimai.

Rei-fê ka enkual hnuah rangkachak simple zet, inherh chiat chu ka thlang ta a, gram ruk laia rit a ni ve khanglâng! Chu chuan ka mit ala ta ber reng a; dawr nghaktu pa chuan min en vung vungin tam tak hralh tura a inngaih lai a pakhat chauh ka thlang ta chu a ui hmel khawp mai.

Jerome pawh chuan ka thlan ang tho chu a thlang ve kher a.

"A inang bun ka duh lo," A hmel ruh nghal țawlh țawlh chu ka hmu reng.

"Keiin ka duh si alawm," tiin kan piaha Joe O'Hara ding chu chu a hui zauh a, "Lo buaipui zui mai rawh u," tiin ka kutah nghet takin a vuanin dawr ațang chuan min chhuahpui ta a, thuawih ber awm hrimin ka la zui ang duan duan a!

"Khawiah nge kan kal leh dawn?" A kal chak êm avangin ka zui dawt dawt a, kan sâng dun bawk nen kan pelh apiang te chuan min enzui vawng vawng zel a, nuam ka ti miah lo, ani erawh chuan engahmah ngai lovin induh larhin a kal ngauh ngauh thung.

"I kawr hâk tur kan en ang chu mawle, zanin hian party naah ka hruai dawn che tih lo hre hmasa phawt la."

"Teuh lo lutuk, khawiahmah i rual hian kal ka tum tawh lo," ka vin êm avang chuan kan bula ding te chu an lo hawi țhap a, Jerome Evans chu an hria tih hriat zetin an bu nghauh nghauh hlawm, ve lutuk a. Lalber emaw an ti emawni le.

"Min hnial reng dawn a nih chuan.." ka mitah chiang takin min en a.

"Chuan engtin.." ka sawi zo hman ta lo, chu lai mipui vei suau suau kârah chuan alamah min pawt hnai thutin ka hmuiah fawp ta a, a hmui hnawm chap leh a rim pa hrâk chu ka hre hmasa ber.

Duhthawh leh uar taka min fawhna chuan Mourizo min hriatchhuah tirin ka fawp let ve ta a, ka kâwnga a kuahna nghet deuh salh chu a phur ru riau ani tih min hriattirnaah ka ngai.

Thawchham dâwna kan infawh hnuah min thlah ta hrâm a, a mitmeng de sar ka hmuh chuan ka lai titih der!

"Khawngaihin helam in lo hawi thei angem, Mr.Evans," âw lo chhuahna lam chu kan hawi rual țhawt a, camera de sup sup chuan ka mit a tivai chum chum nia.

Media lamin min hmu fuh ta tih ka hrethiam mai. Hetiang te chuan news paper 'front page' kan awhkhat nghal vek dawn asin, chi loh lutuk.

"Tlân ang Jerome!" Tih leh a bâna vawn ka rual a, chu Mall zau leh mipui insulpel zut zut kârah chuan ka'n tlanpui ta tehreng a nih kha!

Reporter nghal uchuak ho chuan "Mr.Evans, Miss, vawikhat leh chiah," tiin kan hnung lamah min rawn ûm a. Vawm țawlh ania ka châk hlawm ni, kha leh chen ka lo invawng ûp ve a, Jerome Evans vang bawk.

Ground floor kan tlân thlen tâkah chuan Jerome-a guard ten min rawn chhanhim hman hlauh. Hmanhmawh baklêngin car-ah kan lut a, Jerome an rum zeta min melh tâkah chuan a ngaihna ka hre viau lo.

"Eng nge khatia min melh vak a," tiin ka nûr nâng a.

"Engvanga min tlânpui chiam zawk nge i nih, i chêt dan țhing thei lutuk hi khawi ațanga i zir chhuah nge tih ka zawt tawh che em kha..?"

"Nang chuan lâr i duh a ni maithei, kei erawhin Media lam hrim hrim hi ka ngaina lo tih i lo hre tawh dawn nia," ti nghauhvin pawnlam ka thlir vauh vauh a, naktuk ațang chuan chanchinbu phêkah ka hmel alang chuai chuai tawh ang chu..

"Ka lar tâwk tawh viau zawk a nia, meinei deuh hian țawng ching suh." Car chu a her pawp a, khawilam nge min panpui dawn pawh ka zawt peih lo.

"Khatiang mipui tamna vantlâng hmuna infawh kha âtthlak iti ve miah lo em ni?" A hmel chang rût chu ka melh a, a tûm bûr nia. Eng nge a huat ber pawh ka hre tawh lo.

"Awmdan phung pangngaiin awm nila fawh i ngai miah lovang, tun chinah khawi hmunah pawh ka kianga i awm a nih chuan ka zahna turin țawngkam chhâkchhuak tawh suh ang che." Tiin Bridal show room kawta parking-ah chuan a tlân lut ta a. Ka mokawr tur chu kan en dawn ngei a nih hmel!

"Mokawr dum ngei ka hâk theih chuan ka hlim deuh mahna," zawitê-a ka tih chu alo hre pha reng.

"I ti tak tak lo tiraw Amel!?"

"Ti tak tak e, leiba rulhna tura innei kan nia, engah nge i lâk thutak viau!"

"Ngawi chîp cham rawh, vawikhat pawh leiba rulhna tih kha i sawi leh a nih phawt chuan, a ruala phir pai nghal tura nasa-in inneih zanah ka che ang."

"Jaja! ka duh rêng vanga pasal hi nei tur ka ni lo tih i hriat kha, thlânkhur-a lut tur ang maia inngaihna ka nei tlat." Chutia ka chhan vang chu nge dawr chhung luhnaah bulah chuan min dinpui leh phawt a.

"Ka mualpho theihna tur ang zawng leh, țawngkam ngeiawm zet zet i phuh chhuak leh anih chuan ka chêtdan tur chu i rin phâk bâk a ni tawh ang," ti a min vau lâwkin dawr chhungah chuan min hruai lut ta a.

Min vau sângsawm mah se ka sawitur chin chu ka sawi tho tho ang tiin ka infuih ru sauh sauh thung. A țul anih leh kan insual mai aniang chu..

Dawr nghaktu sa țha nelh nawlh chuan min lo chiauau vat a, Jerome nen chuan an inhre țha ang tih ka rin hriat mai!

"Darling, helai hmunah te kan inhmuh ve nawlh chu le..!" American tih hriat lutuk nula chhelo zet hi 'evening gown' khai chungin a rawn pen chhuak thlarh thlarh a, a kâwng fêk rât leh a mawngbâwr vawng laih chu a inhmeh kher mai, tlangnêl takin Jerome-a hmuiah chuan a fawp thuak a, engtin emaw tak ka chhungril a sa phat mai.

"Hi, Mayla.." Jerome chuan a biangah a fawh lêt sak zauh a, henu hi ka hria, Mayla Ansell actress kha a nichiang.

"Affairs neihpui tur khawpa hmelțha i la chhar leh lo a nih ka ring," nui har har pahin min rawn melh a, ka run viau.

"Nupui neih lam zawk maw le, ka nupui tur hi hmelhriat ve ta che, Amelia Lopez a nih hi," tiin Jerome chuan a hrilh a, chunu mitmeng thîp ta râm chu ka hai lo chiang kher mai.

"Yap..i mit i meng meuh maw! Jerome?" Mayla țawngkam chu ka huat zawng tak a ni. Lopez chhungril a tawk che pha tlat.

"Amel, hei hi actress Mayla Ansell a nih hi, ka țhian țha tak," Jerome chuan ati awlsam mai a. Țhianțha ti a asawi chu a duh vak lo nge Mayla chuan ka lam rawn panin chîk fê hian min en a.

"Spanish lam mi maw! A sâng hle mai, abâk chu chhuan tur tehchiam a nei bik lo a nih hi.." tham lo taka min țawngkhum na chu ka ngaithei der lo.

"I kâ kha i chip dawn nge helai hmunah hian movie hmuhnawm lutuk kan show dawn?" Ka ti chang fak a.

"Wow, Spanish chu i nih ngei dawn hi, Jerome-a sum leh pai âtchilh tute zinga mi i ni ngei ang," ala ti zui țalh a, ka thinin a tuar ta lo.

"Vaya al infiernó (Hremhmunah kal rawh)" tihpahin a inher tur chu ka ke veilamin ka kalh zauh a, chhuata bawkkhup nghal thlawrhin a țê chhuak țhawt a, Jerome an rum lutuka min melhna chu ka haider hmiah.

Kut kuangkuahin ka ding rân a, chunu tlu a kaitho lai chu ka thlir reng, zahpuiawm lutuk.

Mayla rawn ding chhuak leh chuan a sam chu chûlmâmin min melh rum âl a, ka hlau lo nasâ..

"I châk lo khawp ang, Spanish uicho nu.." tihpahin ka ke-ah a rawn pêt zawt a, ka lo inring chiah lo nen ka pai nawk mai. Jerome chuan min rawn vuan vat a, henu hi actress tlawktlaw tak a ni.

"Lo inrawlh suh.." min vawnna chu thingthla-in chunu bekah tak chuan ka hnek nghal chawrh a, ka kut țang a ri tuarh mai.

"Amelia, eng thil nge maw ti a i inhriat le?" Jerome-a thinrim hmel chu en kânin Mayla Ansell chu ka melh ngar a.

"Chhunzawm duhna i neih chuan ka inpeih e, Miss Ansell.." tiin ka pan lui leh ngat. Chunu hmela zâmna lo lang ka hmuh rual chuan ka insût hraih a, ani erawhin, "Henu hi maw i neih dawn duhtak.." țap țiau a tiin Jerome-a âwmah a hmai chu a thukru a, a țap ta hlap hlap a.

Ka pasal tur âwm nghengin ala țap ngam ania, ka'n khawih zui leh hlek dawn em mawni le?

"Amelia, Mayla hi ngaihdam dil rawh.." Jerome a thusawi chu ka hresual emaw ka ti hial! Mahse, thinrim tih hriat lutuk leh huatna mitmenga min en tâkah chuan ka hresual lo tih ka hre mai.

"Amah kha ani lawmni ngaihdam min dil zawk tur chu.." ka ti chang fak a.

"Dil rawh ka tih chu.."

"Jaja! Inpahnih khan hremhmunah kal rawh u, a sa ta viau anih pawhin lokir duh chuang suh u.." ti a inherin vawikhat pawh hnunglam hawi lêt tawh eih lo hian bridal show room chu ka chhuahsan ta a...

End of Chapter-10

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:44 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-11

Santa Monica
Los Angeles
Oceana Beach

Bridal showroom ațanga ka chhuah chuan pan mai tur lam pawh ka hre lova, dawr kawt a Jerome-a body guard zinga ka hmelhriat ve ber Sam chuan min lo chelh ding vat a.

"Miss, khawiah nge i kal dawn?" A mitmenga min ngaihtuahna niawm tak lo lang ka hmuh chuan tlêmin ka inthlahdul ve ta deuh a, Jerome khan min umzui ka ring deuh kha a nia, a teuh lo lutuk. Ûm chu sawi loh min en zui eih pawh ka ring leh silo, khanu kha a ex girllfriend emaw, tuna a kawp lai pawh a ni mahna. Tuman va hre kilh kelh suh.

"Ka kal duhna hmunah min va hruai dawn em ni ang," zawi sapa tiin ka melh ralh a, a hma a buaina ka thlen zozai te kha ala hre ve reng nge chuti vakin ka lakah a huangtau bik lo.

"Jefe phalna lo chuan kan hruai ngawt thei lo che tih i hria alawm, amah nena kal rual in ni a," inthlahrun hmel takin a ke chuan lei a thai zauh zauh a.

"Ok, min hruai dawn lo a nih si chuan ka kalsan ang che u," tiin taxi lo tlan chu ka phar nghal hmiah a, ka bodyguard pawh anni ve hleinem, min lo buaipui ve chung pawh ațulna ka hre lo ve.

"Mahse, Miss..." atih leh chuan Taxi hnungah ka țhu lut diam tawh, min han ûm leh vaih teh se, khawvel tawp thlengin ka in ûmtir tawh ang maw le.

Ka vanneihna a kaltluang nge khangho kha an vannei zawk pawh ka hre lo. Min ûm lo ve teh khiah!

Tuma chimbuai phâk lova kal ka duh ngawih ngawih a, khanu Mayla Ansell kha e, ka haw hlum lo chauh nia, kei chauh hian țawng chaltlai ka hmang bik lo tih ka hre ta phawt chu a nia. Jerome-a paw'n a hre ve tho bawk; 'Spanish Uicho' ka ni nge nilo ka la hmuhtir leh dawn khawp mai. Inla actress ve viau si, țahbelh lutuk.

Haji! Jerome-a âwmnghengin ala țap ngam a nia, zak lo tih piah lama zak lo a ni. Ka pasal atân Jerome hi ka pawm chiah em ka hre lo nâ a, mahse, hmeichhe dang bula a awm lai ka hmu thei miah lo tih erawh ka hrechhuak ve chauh, thîkna nge îtsikna zawk?

"Miss, khawi hmunah nge kan kal dawn?" Driver-in min zawh chuan ka lo inngaihtuah mûk hle tih ka hre chawpchilh chauh va.

"Oceana beach club-ah aw.."

"Yes, miss,"

Chulam pan chuan kan tlân ta a, chawhnu dar thum a ri tawh a, ka'n mokawr en ve chu leh! Eng mokawr fual mah hâk tumna ka nei lova, vawiin pawh khan ka zui kikawi kual duh mai mai ani; business suit dum hlak nen 'Tiam tlat e' tih kha a duh te chuan ka hnial bik nâng. Chu erawh ati dawn chai silo.

Jerome Evans aimahin ka nu leh pa, Juan Evans pawh tiamin ka hmaizah fê zawk a, khawvela wine company langsar berte zinga mi MJS, neitu fapa hi ka zûnah ka uaitir tlat zawk nâng a..

Mourizo biak pawh mai ka duh rum rum a, tlawmthlâk ka ti ve deuh si! Khawilai hmun mah hi ka tan hahchawlhna leh nawmna hmun pawh a awm tawh lo. Vanram ka hlat a, hremhmun pawh ka hnaih chuang hek lo! A awmzia ber chu a inkârah ka theuleu vel niberin ka hria. Mafia pâwl ka zawm daih dawn em mawni le!?

Mourizo Soreno chanchin hriattheih dan tur ka ngaihtuah ran a ngai a ni. Mafia boss pawh ni rawh sek sek ka pawisa tawh lova, min nei duh emaw duhlo pawh nise ka bei chhin ve reng reng ang chu ka ti deuh.

Oceana beach club kan thlen chuan ka chuan man ka pe fel deuh awrh tihah ka hminga min ko ri ka hre zui zat a.

"Amel, lokal teh.." Min lo kotu chu ka hmuh hnu tih ka hria a, mahse, ka hmuhna hmun ka hre tawh lo. Apalian hle mai!

"Hey, kan inhmu tawh tihna em ni?" Ka nui nghal var var a, ka hminga min ko chat theitu helai hmuna hmuh hi ka inbeisei lo viau, chupa hmela mak tihna lo lang chhuak chu ka hmu hman.

"Hmu chiang e, lokal teh," ati tak nâ-in amah zawk chuan min rawn pan a, a sâng angreng viau bawk, kum sawmthum a chuang tawh ngei anga, a hmaiah eng hmul mah hmuhtur awm lovin a fai vang mai! A chhe viau lo.

Oceana beach club hi ka pa Felipe Lopez-a ta a ni tih ka'n sawitel hrâm a nge.

"I pa phalna la-a lokal i nih ka'n ring ve ringawt a," ka bulah rawn dingin nelawm tak hian a nui a, rilru pik țûna ka awmlai chu nilo se a bula awm hi a nuam viauin ka ring.

"A rûkin ka lokal a, chuan hetah i thawk ve tihna em ni?"

"Thawk chiah lo ve, in hotel-ah hian kârhnih lai ka awm tawh."

"Wow, a pawimawh awm hle mai," ka tisap a. Ka pum ri rak rak chu thup tumin teh mahila chupa chuan alo hre tho anih hmel.

"Ramon Salia ka ni e, in hnathawkte hmuh loh turin eitur ka lo hlui dawn che nia, min lo zui la," Hotel panna step chu a zawh chhova, a hmel dam thluam kha rin ngam chi a ni em ang chu. Ka ril ațam ve tawh bawk nen Ramon Salia intipa chu ka zui ve ta a.

Hetiang hmun ualau-ah hi chuan misual tak pawh lo nise a che chhuak duh tawp nâng.

Ramon-a min hruaina pindan chu a nuam hle a, luxurious room ani tih hrilh hranpa ka ngai bik lo. Enchante Hotel-a kan room neih special ber ang vel kha niin ka hria.

"Hahdam takin țhu la, eitur eng emaw kan chah dawn nia," a nui suk a, shirt dum ha-in jean kekawrbul a ha tawp a, a landan fel thlup ațang chuan pa țhatak anih hmel viau. Mahse, fimkhur erawh ka tum ru ve tho.

"Pasal i nei dawn tih thawm te ka lo hria a," sofa nghenchhan chu nghengin min en uluk hle a, a mit paw râm chu a nalh ru phian.

"Nia, khawi ațanga i hriat nge tih ka zawt lo law law mai ang che," tiin ka țhutdan ka siamrem sek a. Hepa hian engtin nge a lo hriat hmanhmawh ni le!

"Hriat loh theih ninghal lo chuan i pa hnen ațanga hria ka nia, tunah hian i pa chuan a ngaihtuah khawp ang che," ala ti tak deuh deuh va.

"Maw!?" A hmel chu ngun takin ka en a, khawiah emaw chuan ka hmu tawh mawle, ngun taka ka ngaihtuah pawhin ka hre thei mai lo, phone hmanga eitur a chah lai chuan ka lo inngaihtuah ve nasa mai a, ka pasal neih tur chungchang hi mi engzat takin hria ang maw!?

"Amelia, zaninah he i pa club pindan chung zawkah hian i pasal tur Jerome Evans khan party a buatsaih dawn a, ka hruai thei che angem?"

"Englo, ih.." sawi mai tur pawh ka hre tawh lo, Jerome pawh a hria anih chuan hepa hi ka pa țhian a nih loh tal pawhin Jerome-a hmelma anih ka ring bur. Businessman a nih ngei pawh ka ring nghet hmiah bawk.

"Mak i va ti awm ve, i pa hnen ațanga ka hriat vek alawm, Jerome Evans i neih ngei angai tih pawh ka hria a nia," a țhutna ațanga rawn ding chuakin ka lam a rawn pan a, amah a palian ropui si a, engtin emaw min ti anih vaih chuan ka chan a chhe viau ang tih ka ring thiam mai. Ka bulah a lo țhu dawn emaw tiin ka lo insangmar at a, min kalpelin intur dahna lam a pan ta zawk a.

"Ka pa țhian nge i nih a hmelma!?"

"Ka ni lo ve ve, amaherawh chu he hotel-ah hian ka thleng ngun viau a, i pa nen pawh kan inhmelhriat țha khawp mai," whisky umkhat a rawn phawrh chhuak a, shot glass pahnihah thliin pakhat zawk chu min pe ve ta a, ka lo ban ve mai.

Chutihlai tak chuan room service, eitur tamtham zet nawr chungin alo lut ta a, Ramon Salia hian kawngkhar a kalh loh danah eng pawi mah tih a tum lo tih ka lo rin hriat ve mai.

"Whisky i in hma khan eng emaw tal ei phawt la a țha lo maw!" A țawngkam hman chuan Jerome-a min ti hrechhuak zawk mai. Ka awmna chin an hre dawn der silova, min lo zawng leh tawh hial maithei a ni.

"Bridal Showroom ațang khan engvanga thinrim engphiara rawn chhuak nge i nih?" Ramon-a hmel thutak ta rûn chu ka en vat a, ka chanchin leh ka thiltih engkim hria ang maia ațawng chu mak ka tiru viau!

"Chu chu engtin nge i hriat?"

"Chulam chu a pawimawh ber lo, tunah hian i awmna chin an hriat loh avangin i pasal tur chu a buai hle tih hre hmasa phawt la i hlim deuh mahna," Room service chuan dawhkanah eitur a chhawp mawlh mawlh a, kan țawng hre ve hmel pawh a pu lo.

Eitur rim ka hriat chuan ka ril țam zia ka hrechhuak a, a vaia ei zo vek thei tur khawpin ka pumpui a thâwla ka'n hriat hial chu le.

"Jerome Evans chuan min zawng a maw!?" Ti a ka zawh chuan a bu nghut a, eitur lam chu melhin, "Eirawh le, nakinah kan sawizawm dawn nia," tisupin whisky chu a lem khalh a, nelawm lutuk angin alang hauh lova, mahse ahlauhawm tihna pawh a ni chuang lo.

Sandwich leh veal parmesan chu ka ei nghal țâwn țâwn a, tukinah engmah tihtham ka ei lo bawk nen zah țit țet va nei suh, min chhawp ho chu ka ei duak duak a, whisky ka in deuh chhen bawk. Ruih erawh ka tum lo bur.

"I thil eidan enin Mayla Ansell tezawngin a khing pha hauh lo ang che," Ramon-a za zeta a nuih chuan ka nui ve tawp. Mayla ka hnek pawh a lo hre vek a nih chuan kha dawr nghaktu nen khan inhmelhriat țha anni tihna ani ngei ang, khalai hmunah khan chuti tehchiama min hmu tur an awm pawh ka hre lo.

"Min tlawh hmasa khanglânga," Rondel wine in paha ka tih chuan a nui suk suk.

"Amelia, tunah hnathawh lai i nei lo tih ka lo hria a i duh phawt chuan ka hnuaiah thawh tur a awm a nia," Pizza chu rawn banin a ei ve a, a kutțangah zungbun hrawl zet pakhat a bun deuh ngei!

"Pasal hausa deuh ka nei dawn alawm, hnathawh angai nâng.." elsen aw lek leka ka țawng chu a lo man rang ngei mai. A nui tawp chat a.

"Jerome Evans tluka hausa an tam lo viau ang," ka no ah wine a rawn thlikhat leh a, ka lu a hai țan tlata ka hriat chu le, inzawm ka tum ta lo.

"Hausa uikawm an tih ang chi hi alo nita anih chuan ka vanduai deuh dawn tihna ani mai," za zetin ka nui ve ta hak hak a.

"I chênna hmunah i haw duh anih chuan ka hruai thei reng che a nia,"

"Ah..zanin party naah min hruai i tum emaw tih a.." ka lo fiam lêtna chu a ngai thutak ta deuh nge, mit zim san hian min melh a, "I duh phawt chuan ka hruai ang che, i awmna chin i pa pawh ka hrilh hre thei thova, in hotel a ni tho alawm le.."

"Ka awmna an hriat rualin Jerome khan a hre ve nghal dawn tihna a nia, chuvangin hrilh lo law law mai ang," ka ti ta zawk a, zanin hian ka'n chawkkawi leh tak tak ange.

"A țha e, ka room-ah hian lo chawl hahdam la, midang hmuhah inlan vak rih lo la ka duh, eng thawmhnaw nge zaninah i hâk ang?" Ati zung zung a, chulam chu ka lo ngaihtuah miah lo.

"Ka hâk tur ngaihven turin ka va chhuak lawk dawn em ni ang," ka tih chuan, "I duh ang sawi la, keiman ka lo ngaihtuah dawn nia, pheikhawk pawh angai dawn a, i size sawi la.."

Ka kawr duhzawng leh pheikhawk, zanina ka mamawh tur ang zawng zawng chu ka sawi pawp pawp a, Ramon chuan lo chhinchhiah zelin, "Lo inbual fai la, i hmai cheitu tur ka rawn luhtir ang," atih chuan ka nui lo thei lo, a ngaihtuah chikim mah mah!

"Ok, nakinah a bill chu kan inpe fel dawn nia," ka tisap a.

"Chutiang angai lo, zaninah ka tân theihtawpa nalhin inchei la a tawk mai, i pasal tur han țhâwng thut teh le.." nui sukin a chhuak zui ta a, kei erawh ka awmhmunah mi â ang maiin ka nui leh var var zel. Ramon Salia sawi ang chiah khan ka inchei lai Jerome Evans hian a la hmu hauh lova, zanin chu hremhmun tenau ka'n temtir leh hlek a nge.

Ramon hi ka ngaina ta viau tihna a ni lova, hmanrua a min hman a tum ang chiah hian ka hmang lêt ve mai dawn a ni.

Ka no-a intur la bâng zawng chu thâwkkhat pawpin room chhung chu ka melhkual ngial a, ka pa thluak hi chu a țha maw le, leibâ pawh hi a nei tak takin ka la ring thei lo cheu! A fanu hi hmanruaah min hmang a ni zawk mai lo maw!? Mahse, ka hminga awm Enchante Hotel a hralh ringawt bawk si a, engmah hi ka hrethiam teh nuaih tawh lo e a. A tlachawpin nung leh phawt mai teh ang.

MJS Penthouse
CA 90068
Los Angeles
Jerome Evans

"Joe, Sam nen khan tunah Amelia chênna hmunah va kal nghal rawh u, Felipe Lopez paw'n dawt min hrilh ve thei tho a nia,"

"Yes, Jefe, thilpakhat leh lawk, Miss khan ama chênna hmun a pan lo tih ka sawi kha ka ti takzet," Sam chuan min hlauh hmel hle a, nichin maiah pawh vawihnih ngawt Felipe ka phone tawh a, he mite pafa hian buaina hlir min thlen. Khawiah nge maw alo kal hmanhmawh ni.

"Engpawh nise an Mansion kha va check vek ula a nimai, sawi buai an nei anih chuan arang lamin min rawn call dawn nia," Sam te pahnihin min chhuahsan rual chuan ka thinrim lutuk hrikthlâkna tur ka melhkual nghal ruai a; tunah tak hian Amelia hi hmu ngat ila chuan a letlingin ka khai duh hialin ania ka rin ni!

Engtin nge khatiang dawr lian lutukah te khatia a chêt ngam zawk ni? Engmah pawisak a nei hek lo. Mayla pawh ka țan hran lova, Amelia tluka hmeichhe luhlul leh tihmawh hi he khawvelah an awm pawh ka ring lo! Em em lutuk a..

Spain-a ka hriat țhin Amelia kha amahah hmuh tur pakhatmah zuk awm lova, tuna mi hi chu mihran hlak a ni. Hmelțhain nalh viau mah se a kawlh fahran lutuka engtia enkawl tur nge tih hi a zira zir tham hial a ni.

Mayla țawng dan kha a ngeiawm tih pawh ka hria a, ahma lawkin Amelia kha ka warning zo chauh a, 'ka zahna tur engthil mah ti suh' tiin ka hrilh ve țâwk țâwk a, awmzia a nei chuang der lo, Uțawk hnena sawi nen a danglam chuang hek lo.

Tunah tlailam dar ruk a ri tawh a, zanin hian ka nupui tur anih angin apualin party ka buatsaih dawn a, sâwmna pawh thawnchhuah vek a ni tawh si a, last minute-a țhulh hi ka zia leh ka nihphung a ni lo. Amah a awm emaw, awm lo pawh nise ka kaltlangpui tho tho angai dawn tih ka hria; 'Amelia thluakthâwli, chimawmi,' â ani leh lo, Amelia kawlhrâwngi ni teh se. A inhmeh ber.

Ka rilru a hmanhmawh tut tut tawh a, Bridal showroom ațanga a chhuah khan ûmzui chu ka tum ve ngei, mahse, a mizia chhûtin kan mualpho tam mai mai dawna ka hriat vanga umzui ta lo kha ka nia. Bâkah a biru leh kher ang tih rin ngaihna ka hre miah bik lo; an chênna hmunah vawihnih ka naute'n an en tawh a, ala haw lo hrim hrim! Los Angeles alo thlen tirh ațangin buaina hlir min thlen a nih hi..

Hmeichhe dang chu nise ka thlah vang vang tawhin ka ring a, hetia luhlul a chhuah apiang hian amah neih ka duhna a pung sauh thung. Thununna hnuaiah engtin tak awm ang maw?

Ka phone ri chur chur chuan ka ngaihtuahna ram ațangin min kai harh zawk a, Joe O'hara a ni.

"Joe, sawi rawh," ka ti nghal tawp a.

"Jefe, an inah pawh a awm chuang lo, Felipe paw'n a ngaihna a hre bik ngang lo a ni ang, a indawm kun tlawk tlawk mai," beidawng aw zeta atih chuan ka sam ka tuai puat a.

"Santa Monica-a hotel langsar zual leh restaurant zawng zawng kha midang te nen insem darhin zawng leh rawh u."

"Yes, Jefe.."

Phone ka off nghal hmak a, an hmuh zawh ka ring chuang lo, thluak a nei tlat a, min tih thinrim a tum ve hrim hrim tih ka hria a, a mokawr hâk tur pawh ama tel lovin ka lei tawp, a size te zawng kei aia hrechiang an awm lo chiang êm, khawi hmunah mah mokawr dum lei tur a awm îkhaw lo mai. Henu hian ka thluak a ti chawmawlh vek.

Ka phone bawk a rawn rik leh tâkah chuan thinrim zetin ka'n chhang nghal ringawt a, number ringawt a ni.

"Sawi rawh.."

"Mr.Evans, zaninah surprise-na tur che ka nei ania, i party siamah chuan i rawn tlai loh ngei ka beisei." Chu aw chu ka hriat hnu a ni.

"Tunge?" ti a ka zawh chuan lehlam ațangin a rawn nui huk huk a, "A hunah le, Mr.Evans," ka chhânna pawh nghak tawh chuang lovin phone chu a off zui ta a. Tunge ni ang tih rin mai tur ka hre lo, zaninah a chiang ang chu.

Amelia bawk chuan ka thluak a luh leh ngut ngut tawh a, kan mutdun hmasak ber ațangin thla a liam dawn tawh a, nau a pai nge pai lo tih ngawt hian ka rilru a luah a, a lo pai a nih vaih chuan ka tan a buaithlak vek dawn tih thil chiangsa a ni.

Naute ka duh lo tihna a nilova, Soreno angin engtikahmah ka awm theih dawn loh vang zawk a ni. Ka ngaihtuahna ang hi a lu bûrah a khung ve lo nge, engthawl takin a la awm zel chu a nia.

Ka housekeeper-in dinner ei tura min rawn koh meuh chuan zan dar sarih a hnai kuar tawh a, Amelia chanchin thar hriat tur lah a awm hek lo. Kan nauteho pawh an beidawng titih tawh a, naktuk hma chuan kan zawng hmu dawn lo a nih hmel e, vawiina ka fawp lai kha newspaper-ah alang ngei anga chumi hunah chauh chuan kan hmu theiin ka ring tawh.

Ka hma a eitur inchhawp chu ka thaikual vel mai mai a, zanin party chu a ho zo vek dawn ta a ni. Ka pa bia ila Amelia kan hmuh veleh inneih chûk chûk mai țhain ka hre tawh a, leiba rulhna atana neih tum nimahila ka phur khawp mai, amah kha ka duh tlat a, ka hmangaih chu ka tilo mahse, ka duh ani tawp mai. Tu mipa mahin ka hnen ațanga an lâksawn ka phal lo bur.

Vawiina thilthleng kha chu ka rinphâk aiin a turu! Mayla a hnek lai kha ka hmu chiang bawk a, a kut a rang hle a ni. Tuipui kamah pawh khan pawngsual nih ai chuan ala bei lêt ve țâng țâng kha a nia! Bazara ka hruai țum pawh khan min chhán nan thih pawh a pawisa lo kha a nia, hei tak hi Amelia Lopez ka duh chhan a ni. Ka ngaisang ru viau bawk.

Mipakhat tana rinawm bur hi American hmeichhiaah an vang êm a ni. Spanish nula-ah pawh Amelia ang hi an tam chuang hek lo.

'Amelia Lopez' ti a phun supin ka pindan lamah insiam turin ka lut ta a..

Beach Club Hotel
Roof Top Luxury
Santa Monica

Party na hmun ka thlen chuan ka mi sâwmte an lo zi nuai nuai tawh a. Ka body guard leh ka personal asst. ni bawk Mateo Ignacio nen pindan chhunga kan pen luh rual chuan thawm bengchheng a reh nghal duk a.

"In duh ang ang khan awm ula min vengthâwng duh suh u," ti a ban vai zauhvin waiter tray chawi chunga lo veikual chu ka lo pawt ding chat a, zanin hian ruih hle ka tum a ni. Amelia vanga ka thinrimna te kha he party-ah hian hrikthlâk ka mamawh takzet.

"Darling.." Mayla Ansell chuan nui var var chungin min rawn pan a, vawiin lama a lungawi lo hmel kha hmuh tur pakhatmah a awm leh tawh lo! Actress tih takah a rawn nalh leh pek hle a, chiffon kawrfual paw raih ha-in a kawrâwm zau tak a țang chuan a hnute a lang zo lo chauh a, tunhma kha chu nise keuh thlûk mai chi mawle! Amah hi feet 5'6 laia sâng a ni a, Amelia ala chen lo fê tihna anih chu..

"I biang chu eng nge a an le..?" Nui suk chunga ka zawh chuan a ner nâng a, a sam huikianga a biang min hmuhtir tâkah chuan a la duk raih mai! Make-up hmangin khuhbo tum engang mah se a hnektu khan a dimlo bawk a, a awm ve reng.

"Khanu kha neih i tum tak tak lo tiraw, zanin hian a hmel hmuh ka peih miah lo a nia," tiin min ngheng hnai țalh țalh a, a perfume hman rim chuan ka pum tilet but nia!

"Nei dawn e, theih phei se chuan tunah hian ka nei nghal ang mawle," ka tih chuan a meng phawk hrâ a. Englai maha nupui ngaihsak ngailo kha ka ni tlat a, mak ati ngei ang.

"Ka pêk aia tam che hlimna leh nawmna a pe bik che tihna em ni?" A aw ațang pawh chuan Amelia a huatzia alang reng a, engahmah ka ngai lem lo, an inthlau ve em mai.

"Min pe turah ka ngai, ani tluka hmeichhe dangdai leh chhelo kha ka la tawng lo," ka ti deuh kher a, a nui tawp hmak.

"A lo nih vel chu, a tawpah min rawn pan leh thovang tih ka chiang alawm, Jerome," dingdihlip âk âkin ka hmuiah a rawn fawp a, a zu in rim chuan ka luak ati chhuak. A darah vuanin ka nemsawn ta a, a hmel thip râm chu melhin, "Nang hi engtikah mah ka pan lovang che," tiin ka pensawn ta a.

"Jerome!?" Mayla țawng zawi sap leh thâwm ri bengchheng zet reh ta hmiah avang chuan ka dâk chhuak vat a, ka mi sawmte zawng zawng deuhthaw chuan kawngkhar lam an hawi țhap a, min din hliahtu chu namkiangin tute nge lo lut tih en tum chuan kawngka lam chu ka thlir ve ta a.

"Dear God...!" Amelia leh Ramon Salia rawn inzui lut lai chu ka hmu chiah!

Ramon Salia bânah Amelia chuan a kuah hnâp a, Ramon-a mit leh ka mit chu a intawng chat mai! Amelia erawhin min la hmu ve lo, inhmeh tak anni. Engtin nge anih theih!?

Phun mar mar riin a zui zat a, kei aia makti lehchhawng chu Mayla Ansell a ni. A pasal hlui Ramon Salia leh Amelia chu a entawn chhên a, a hmel a dâng lap bawk.

Ka dinna lam a rawn panpui lai chuan whisky nokhat ka tlâk pawp a, thinrimna sawifiah hleihtheih loh hian min tuam hlup hlup nia. Ka naute ho-in thâ leh zung sênga an zawn hrep hnuah engmah hre lo ang maiin Amelia hi alo awm a nia, tenawm lutuk! A nghâwnga reh nawk nawk a nia ka duh ni.

"Mr.Evans, kan lo tlai deuh a min hrethiam dawn nia," Ramon chuan ati dam thlup a. Amelia hawi sâng vah chu ka lo run kher mai.

"Tlai lo ve, party pawh kan la țan mumal lo," thinrim insûm taka tiin Amelia chu ka melh reng a. A thawmhnaw hâk te hi khawi hmuna mi nge ni ngai!? Zanlama chawzawng ho hâk awm lek a ni.

Silk kawrfual a khup khuh chang chang ha-in a kawrâwm zauzet ațang chuan a hnute a lang phir țhaih a, a taksa rem zaiha țhui niin a pian nalh zet chu alang chiang hle bawk. A kawr hâk sir lam chu a mal tâwp thleng lovin ala kak zui a!

A sam bu chhah țha zet ka lo phiar sak tawh ngei kha a chhipah a vial tawm vek a, rangkachak bengbeh kual lian tak a beh bawk. A pheikhawk bun te chu leh! High heel dum bunin a chawn mâm hân chu alang chiang ngei mai. Min chen thuak nia.

"Amelia, inbiak kan ngai a nia," a chhip ațanga a keler thleng ka en chhuah dap hnuah a beng bulah ka hrilh sap a, ka biakna hre hmel pawh a pu lo, a mitmeng buang thak lian kelkawl chuan Mayla chu a melh ngar a, 'ka cho che' ti niawm fahran hian khawdang a hawi eih lo. Mayla meng khup lap ka hmuh chuan ka lo lainat deuhva. Amelia lakah hi chuan engmah lo mai a ni reng a ni.

"Hi, Jerome," Amelia'n pawisawi lo hmel taka min melh sawr sawr ka hmuh rualin ka pan hnai hret a, "Zanin hian ka nupui tur i ni tih ka puangzar dawn, chuti a nih loh chuan i pa leibâ kha ka sawi chhuak ang " Tiin a beng bulah ka hrilh leh a, ka blackmail ta ringawt. A mengphar âk a, Ramon chu melhin, "Ramon, hei hi ka pasal tur atana ka pa min thlansak chu a nih hi.." ala ti zui ah..!

"Mr.Evans, Amel hian min lo hrilh thâwi tawh a, ka lawmpui a che," music ri a ring bawk nen Ramon-a thusawi chu ka hrechiang hleithei lo.

"Eng maw!?"

"I nupui hual nen hian vawiin tlaiah dinner kan kil dun a, a nuam khawp mai, inbiakremna chu nilo se ka chhuhsak hreh miah lo che," tiin a nui suk a, hnek chawrh lo turin ka insum nasat angai viau.

"I nupui hlui chuan ka nupui hual chu a ngam lo deuh chu a ni e," ka ti ve sak a. A nui tawp chat mai.

Chumi hnu chuan kan mimal inhuatna te dah țhain hun kan hmang ta a, Amelia chu ka kiangah a awm duh miah lo, American hmel a put ve loh vang nge mipa ho chuan an enzui vawng vawng zel a, tu mipa mah han hnimhnaih fâl lah a nei hek lo. A rawn kalpui ber Ramon Salia pawh a ngaihsak zui tawh chuang lova, a khawsak phung hi a mak ve hrim hrim!

Intur leh eitur a hnianghnar bawk a, mi zahnih rual vel chu mahni phûrna lam lamah an phe suau suau mai! Amelia hmu phâk zelin ka awm a, ani lah chuan min ngaihsak duh der lo nia! Sual thiam lutuk.

"Jefe, pawnlamah sawn tu body guard nge tih hriat loh an inhawr khâwm tup tup mai, pakhat tal hriat i neih tâk mialin i rawn en lawk dawn em ni ang," Joe chuan min hrilhru sup a, buaina a chhuak palh ang tih a hlau deuh pawh a ni mahna.

Joe O' Hara chu zuiin balcony lamah kan chhuak ta a, Limousine pali leh Jaguar car pahnih bula mipa lo ding khup ka hmuh chuan Ramon Salia kid anni tih ka hre mai. Engtin nge Amelia khan a hriat loh theih le!?

Spain-a kan bazar țuma min tibuaitu leh min ûmtute kha Ramon Salia leh a hote hi an ni a, a hmuihmul leh a bek hmul a mêt fai vek a, Amelia hian a hrechhuak lo a nih ka ring ta zawk a; Ramon erawhin Amelia hi a hrechiang hle tihna a ni, zanin hian kan fimkhur hle anih loh chuan buaina a chhuak ngei ang. Tunah pawh hian Amelia hlata awm miah lo tur ka ni a, an lo pawt hrang hman tawh maithei a ni.

Rang lutukin inchhung lamah ka lut leh ta nghal a, Amelia țhutna ruak huai ka hmuh chuan ngaih țhat lohna ka nei nghal. Lâm ho zingah alo awm tâk mialin tiin an lam mup mupna kârah chuan ka inzep tâwlh tâwlh a, a hmel hmuh tur reng reng a awm chuang lo. Khawiah nge maw a lo bikbo hman ni!

Minute thum lek chhungin chu pindan chu ka melhkual ngial a, khawi hmunah mah a awm chuang lo. Ramon Salia ka hmuh tâkah chuan ka thaw huai a, ani hian a awmna chin a hre ngei tur a ni. Ka grape huan neih a duh vanga min beihna hi ka ngaizam dawn tawh hauh lo bawk.

"Khaw'nge Amelia," Ramon-a ka zawh chuan angaihna hriat loh hmel takin min en a, hre lo tak tak a ang bawk.

"Ka lo ngaihven miah lo, i hriat kha.. Amelia hi chuti mai hnehchhuh chi a ni lo," whisky a inzui khalh a, a sawi dik viau.

"Yaah, i kut hmawr pawha i lo tawk a nih vaih chuan hremhmun lamah ka tirliam ang che," ti hmukin ka kalsan ta a, helai hmunah hi chuan a awm lo. Inchung panna ka zawh chhoh laia hmeichhe țe țhat ri ka hriat chuan rang lutukin ka tlan chho nghal zawt zawt a, Amelia a nih leh nih loh pawh ka hre bik chuang lo!

Inchung zawl kil thim laia hmeichhia leh mipa, lo inrêk nawk nawk ka hmuhna lam panin ka tlanphei nghal a, ka thil hmuh chu leh! An țawng pawh ka hre pha ta..

"Sawi rawh, tunah min hrilh dawn nge!? Amelia chuan mipakhat hi lo dinchilhin a pheikhawk sâng chuan a lo tin uaih a, chupa hmel chu ka la hmu thei lo.

"Miss, duhtawk teh ka hre lo tak tak!"

"He khawvelah hian i la awm ve châk anih chuan țha takin thudik min hrilh rawh, tun chiah ka zawt nawn leh ang che, khaw'nge Mourizo Soreno a awm?" Amelia âw thinrim avanga khur deuh titih chu a ring hran miah lova, mahse, engmah tih hreh a nei lovang tih kei aia hrechiang an awm lo.

"Miss, khawngaihin ka thusawi hi..." ka bodyguard leh ka engkim ni bawk, Mateo Ignacio hmel chu ka hmu ta a.

Thil awmzia zawh nawn ngai lovin ka hrethiam nghal vek.

Amelia Lopez hian Mateo hi alo la hria ani, engtin nge mihring khati zozai zingah alo la hriat nalh theih zawk le!

"A țha e, i sawi duh lo anih leh i thlarau talin min la hrilh ang chu, bumhmang hi ka hua," a pheikhawk ken lai chuan Mateo chhipah a vaw chawrh a, Mateo țhingțhi hnawk chu a kawr nghâwngah țhâmin, "Nangni putu khan ka pawi insawi ania, khawiah nge Mourizo a awm?"

Inrawlh a hun tih hriain Amelia chu ka nam sawn dawrh a, a pai nawk mai, a tlûk nat ka hlau leh lawi si a, a ke ah ka va chelh a, a tlu ta tho tho nia!

Mateo hian Amelia te chu a hneh lutuk ang tih ka hrereng mahse, a tina duh lo zawk mai a ni, a pu nupui tur kha a ni tlat a, Mourizo leh Jerome hi mi thuhmun a ni tih hretute zinga mi a ni bawk.

"Mateo, i țha em?"

"Umn, a kutthlâk a na kher mai," tiin a nui ta a, chuti lutuk chuan a na lo anih hmel.

"Chuti anih chuan tho la inthiarfihlim rawh, a hun hmain engmah a hre tur a ni lo ania," Mateo chu a bu nghat nghat a, Amelia melh zauhvin, "A rui lungpuam anih saw, rui chhia erawh anilo a nia, invêng ru rân ang che," tiin a kal kiang ta a.

Amelia ka en chuan Van lam hawiin alo dâk vauh vauh a, a insâwi deuh lap lap bawk a, engzat fakauva tam nge a lo in lehpek ni!

"Amel.." ka kohna pawh hrelo ang hmiahin a awm a, a bula ka va din ve tâkah chuan a mitsira min rawn melhin, "Kal mai teh," ati zawi raih a.

"Ka kal lovang," ka sawi zo hman chiah a kut chu rang lutuka rawn pharin min nam dawrh a, ka tawlhsawn chiang ngei mai!

"Mourizo Soreno, Soreno.." tiin vawithum ngawt a au a, ka thinlung a na zawk mai. Kei hian Mouri ka nihna ang khan Amelia thinlung ka hliam a ni.

'No, Amelia hi ka lo hmangaih reng a ni.'

Ka hmeichhe hmangaih ka tinâ tih ka hrethiam chiah..!

"Amel.." a kianga ka va kal hnaih chuan mitmeng phelh deuh phang hian min melh a, a rui tih hai rual a ni lo; țawng tum niawm tak hian a âng a, țawng ta lo chuan vawilehkhatah a luak ta puat a, ka rin loh lam daih a ni. A harh huai ang chu..

Leia a țhu tur chu vuan dingin ka âwmah ka kuah bet ta zawk a, beer leh whisky rim a nam nghal huam bawk, henu em em hi chu âw...!

Midang hmuh lohva hruaithlâk dan tur ka ngaihtuah ngial pawhin ka hre lova, ka phone phawrhin Joe ka call ta ringawt, chutih lai tak chuan ka hnung lama min rawn tlawhtu chu tunge anih ka hmuh hman hmain Amelia nen chuan kan tlu ta a, ka phone ken lai ka thlauh nghal daih bawk; thawh tuma ka che leh chiah chu ka bek ari nghal chawrh bawk. Ka lu a hai chhalh mai.

"Hmeichhia kha hruai ula, ani erawh kha chu chintawk nei lovin sawisa rawh u," Mipa aw thum lam deuh chu ka hre ruai ruai a, ka rilru ala harh chiang khawp mai. Amelia an hruai ai chuan helai hmunah hian kan thi dun zawk mai ang tih hi ka ngaihdan a ni.

Amelia ka kuahna bân chu ka tinghet sauh a, a thâwkdan ațang chuan a harh tih ka hre mai, a thâw a rang tlat! Keimah min ngaichâng zawk mai mai niin ka hria a, nichin pawh khan a in thunun thei viau anih kha mawle, henu hian eng emaw tak idea anei leh ngeiin ka ring bawk.

Kan piaha mipathum ding chu ka hmu chiang thei ta a, min khawih an la tum lo anih hmel, thu petu ber kha a awm tawh lo a ni ngei ang, an inberu sup sup a, an thusawi erawh ka hre phâk chiah lo.

"Jerome inring rawh," Amelia chuan zawitê-in arawn tisap a, ka rindan vel chiah, a rui ala reh fel chiah lo nâin chutianga rui chhia a nilo tih ka hriatna chuan minti hlim ru viau thung. Ka bek nâ ngut ngut chu haider theih ka duh kher mai.

"Hmeichhia saw ka lâk hran rualin Evans hi in lo buaipui dawn nia," suit dum inbel chu a rawn kal hnai a, ka la che duh chuang lo, Amelia ka vawnna erawh ka thlahdul ta deuh a, chêt alâk theih nâna ti ka ni.

Chupa chuan Amel chu a rawn phih tho ta ngei a, ani lah chu rui ber niawm fahran hian a thle bâk bâk a, a meng dere tih kei hian ka hrechiang khawp mai, mipahnihin ka bâna min pawh rual chuan ka che ta phat a, ka hnaih zawk a ding chu ka theihtâwpa nâin ka tlawh ta a, chumi rual chiah chuan Amelia pawh a che ve nghal tih ka hria.

Pakhat zawk âwma ka kick chuan che leh tur a awm ta lo. An rui deuh zawk emaw ni, Amelia te pawh an lo la inchai ngat ngat nia, amah chelhtupa chuan chuti maiin a thunun thei lo tih ka hriat chuan ka ngaih a ngam ta deuh.

Suit dum ha, pakhat zawkin min hnek tuma a bân alo vai chuan ka lo bum zauh a, a bekah ka hnek zui ta chawrh a, a pai chawn chawn mai.

"Eres muy feo(I hmelchhe lutuk)" Amelia țawng ri ka hriat rual chuan amah chelhtupa chu a leng lawp! Engtin nge atih ka hmu hman bik lo.

Ka hnek pa zawk kha rang lutukin a tlanchhia a, ûm pawh ka tum peih lo, ka bân a na ut ut a, ka ûmphâkin ka ring hek lo.

Amelia khawih zawk kha muangchangin a rawn ding chhuak a, an inmelh rum dun khawp mai, va chhan pawh ka duh viau a mah se engtin nge atih hmuh ka châk êm avangin ka dinna ngaiah ka ding reng a, chupa in Amelia pêt a tum rual chiaha Amelia zuang zawk chu nalh tak a ni, amal a lang var haih nia..

A pheikhawk sang kha a bun tawh lova, chupa âwmah tak chuan kelawngin a tlawh ta a, amah pawh mawng sawh dawtin leiah a tla nghal bawk. A inring hman tawh bik lo anih ka ring,

Amelia chu kai thovin ka kuah ta a, nui hmel a pu deuh tlata ka hriat chu le, a tlawh pa erawh tho leh tur a awm tawh lo chiang kher mai.

"Ejecuter (Tlân ang)" tihpahin Amelia chuan a pheikhawk chu a chhar a, a awm tih pawh ka hriat ve miah loh corridor lamah min tlânpui ta a, Amelia nge nge ka chhuang fuh zel e..

Ka nupui tur niawm reng a ni, a duh apiang ka pêk theih nan khawvel pum hi lei ngai mah se ka lei mai dawn lo'm ni!

Ka hmangaih zual sawtin ka hria, engtikah nge a hmangaihna ka dawn ve ang tih Pathian chauhvin a hria ang chu...

End of Chapter-11

©<++++[BeckirafARenthleI]++++®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:45 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-12

Santa Monica
Los Angeles
Enchante Hotel
Suite 437

Corridor thui tak kan zawh hnuah pindan pakhatah Amelia chuan min luhpui ta a, chu pindan chu a zau țha hek hawk hle mai! A pa hotel ani tih chu ka hre thova kei aiin chinchâng a hre daih ang tih pawh ka rin hriat mai.

Pindan lai tâka khum lian leh zaupui inhûngah chuan a bawkkhup nghal thlawrh a, a chau ngang a nih ka ring, min be lova ka be bik hek lo. Khumah dimtein ka țhu thla a, a thawmhnaw hak phuailuai ta fup chu ka hmu ve chiah.

Party na hmuna a rawn luh lai nen kha chuan inthlau tak a ni, nichin lawka a thawmhnaw hâk kha a uchuak hle a, tuna alandan phei hi chu mipa dang hmuh atan ka duh miah lo, a kawrfual sir ve ve chu thui tak hian a țet duai a, a mal tawp thleng bâkah a under wear tlâng pawh a lang pha hial.

A mal mum var haih-ah chuan kuttin a hamna niawm tak a inrin chho raih a, a thi deuh nghe nghe em mawni! Amah lah chuan engthama ngailo niawm fahran hian a ngaihsak der lova, a taksa lang huai pawh chu a ngaipawimawh chuang hlek lo.

Englai mai pawha insual inpeih at renga a awm hi a fakawm thlâwt! Zanin angah te kha chuan hmeichhe dang chu nise hlauhlawpin an țe chûl anga, an țap hliam hliamin ania ka rin, he ka nupui hual luhlul leh tihmawh zet hi hmeichhe tamtak aiin a hlu fê zawk! Amah inveng thei tura khawpa inringtâwk leh thluak țha a ni bawk tih hi tun maia ka thil hriatchhuah thar a ni.

Kelâwngin ala awm ta reng a, a kephah han balh reuh zia chu nula ke niawm lo khawpin a bal nia! Mahse, ka dem chuang lo, a pheikhawk kha a hlip tlat a, inlâk no lam chu alang lo ve khawp mai, insûm hman lovin ka nui chhuak ta hawk a.

"Eng nge, min nuihzat elaw?" A hmel rum âl chu nui chungin ka en reng a, a mit hnawih a pherh deuh liam bawk a, kawlh hmel hrâ hrâ tak tak a ni. Mahse, a hmelțha tho.

"I ke kha en teh," rawn țhu chhuakin a kephah chu a en ve ta a, kei aia nasain a nui chhuak ta a, "Dios! Eng model ke nge ni ngai!" Ring zetin a nui leh a, amah ka hriat ațanga tihtakzeta a nui lai ka hmuh vawikhatna a ni. A ha var rual țhap chu alang țhât a, a nalh hle lehnghal!

"Model niin i inhria amaw..!?" A kawrfualin a taksa akhuh tlêm angreng si a, saruaka awm nen danglamna a tam lo kher mai.

"Inhre lem nâng, ka sawi ve mai mai anih kha.." a kephah chu en lehin a ner nâng a, áwm ang lo atih hmel tawp.

"Engtin nge Ramon Salia nen khan in inhmuh theih a?" Ka zawt lo thei lo.

"I girlfriend i lo duat hliau hliau lai khan kan lo intawng maw le, lungngai suh min tawk eih lo ania," khum chu thawhsanin bathroom lam a pan ta a, a chezia hrim hrim hi a hmuhnawm tawp, a kawlh dan em em leh insual a thiamdanah movie-a a changtunu niawm tak zawk a ni.

Mayla kha ka girlfriend-ah angai deuh tihna animaw! 'Khanu ai khan ka duh fê zawk che' ka tichhuak sap a, a hre pha tawh chuang lo.

Amelia awm loh lai chuhin ka thawmhnaw inbel ka hlip zung zung a, ka taksâ khawilai emawah hian pem nei tlatin ka inhria a, ka coat hâk ka phelh lai chuan Amelia'n min la rawn ko zui!

"Jerome, lokal teh.." a vin em em lehnghal a. Bathroom kawngkhar chu alo inhawng sa a, bra leh under wear nen alo ding tau a, a pian nalh zet hi engtikah nge ka 'ta' ah ka siam leh ang tih ka lo ngaihtuah hmanhmawh!

"Eng nge ni vak vak?" Vin viau ka tum a, a landan ka hmuhin ka awkí ka thlâk hlauh nia.

"Tunge min khawihtu kha hriatchhuah lo tum teh," min koh chhan chu leh! Ka rin loh lam daih a ni, keipaw'n hriat te chu ka duh lutuk alawm ka hre ngei bawk ang.

"Lungngai suh, kan hrethuaiin ka ring,"

"Tunah alawm ka hriat duh, en ta che ka mal hi.." nichina ka hmuh bâkah khan a mal sir ve ve chu a inrin ruak a, a vun ngo zetah chuan alangsar hle bawk. Tunlai hmeichhiate chuan ser neih an hlauhzia ka hre chiang ve ropui si a, amah khawihtupa kha hre ngat se chuan ala khing leh țâlhin ania ka rin!

"Ka naute'n an lo ngaihven tawh ngei ang, intifai la mu hahdam rawh le," ka tih chuan a ner sak a, ahma ang em em kha chuan min zah țût tawh lem lo, chumi ka hriat ringawt pawh chuan ka lawm ve viau, a thinlung Mourizo tan hlan mah se a taksa ka la chang dawn tal a, ka nihna hi ka thup chatuan dawn hek lo.

Amelia ka chhuahsan hnu chuan ka inphelh duh tingtang tawh lova, engtik hunah pawh lo lut thut thei a nia, min hrechhuak a nih chuan amah hi ka chân dawn chiang sa.

Pindan chhung chu melhkualin dawhkana Amelia phone chu ka hmu ta a, Joe leh Sam tal ka biak loh chuan ka party siam a nisi a, tawmbo reng kha thil mawi pawh ni nghal lo chuan..

Joe O'Hara chu ka be ta a, rei-fê a 'ring' hnuah a rawn pick chauh.

"Yes,"

"Joe, keimah, party boruak eng nge a an?"

"Jefe, engmah buai a awm lo, Miss Amelia erawh ka hmu miah lo a nia.." hlauthawng aw taka atih chuan ka nui huk a, Joe leh Sam hi Amelia vengtu bik atana ka ruat a ni.

"Ngaihtuah suh ka kiangah a awm e, Ramon Salia kha i lo thlithlai dawn nia,"

"Yes, Jefe,"

Ka phone ka thlauhna laite hrilhin kan buaina tawh chungchang ka hrilh thuak thuak a, ka pa erawh engmah hrilh loh turin ka chah ta thung a, kan inbiak tawp hnuah Amelia'n ngun zeta min lo thlir reng chu ka hmu ta a.

"Tunge i lo biak a?" A aw chang fak chuan ngaihno a bei vak lo.

"Joe mawle, party na hmunah kan lêt dawn tawh lo tih leh lo buaipui zui turin ka hrilh a nih kha.." țha takin ka chhang ve mai a, dar san âk a min melh hnuah, "Khaw'nge i phone awm," min rinhlelh hmel taka atih chuan, "Kan intihbuaina lamah khan ka thlauh a,"

"I fimkhur lo hle mai," cupboard lam panin intur a dap leh ta rak rak a, nichin maiah a luak chiam tawh a, a hnê ve em em lo em mawni le!?

"Zû in leh i tum elaw!?"

"Dawn lawm ni, party kha ka chhim rei ve ta mang silova helai hmunah hian kan lo party ve ang chu," Tequila umkhat chu phawrhin a inthlit zui zat a, "I duh ve em?" Ti a min zawh chuan ka bu nghut ringawt.

Thawmhnaw thlâkna tur a neih loh vangin bathrobe a ha tawp a, a hnuaiah eng thawmhnaw mah a inbel ka ring lo. Henu hian min thlêm a tum a ni êm lo'ng chu..

Ka coat hâk lai chu hlipin ka pheikhawk ka tlawh phelh ve nghal a, khumah inhmatawnin kan țhu rân a, a intur ken lam chauh chu ngaihsak niawm hrimin a melh ngar a, a khawsazia hrim hrim hi a ngêng ngalh mai a ni. Tuna alandanah hi chuan amah hrechiang fê tan lo chuan hnimhnaih ngam hmel pawh a pu lo.

"Amel..!?"

"Yes"

"Naktukah innei mai ang," min en vat a, a mitmeng lian kelkawla mak tihna rawn lang chu ka hmuh hmaih bik lo.

"Inneih hi eng ati nge i hmanhmawh chûk kher le, ka nulat hun chhung min tihtawp sak i tum hma e.."

"Kum sawmhnihpathum chuang khawvel i hmang tawh a, chu bâk bâk, fâ te kan nei vat anga i tân hnathawh angai dawn miah lo ania," thlêm deuh paha ka tih chuan a nui tawp chat a.

"Fa kan nei ang maw, nang nen hian!?"

"Nupa kan nih te chuan kan nei ve dawn lo em ni?"

"Jaja! Raipuar tur anga ka indah chhin hian a ni thei lo," ati sap a, ka nuih aza ru hle! Keipaw'n ka lo ngaihtuah fo țhin tlat a, a nun dan holam zet te avang te hian naupai ve ta se engtin nge a buaipui ka hmu châk khawp mai. A inhmeh em em ang tih erawh ka ring nghet thlap.

"Ka pa ka lo bia anga, naktuk chawhnu-ah register office-ah innei ta mai ila.."

"Register office-ah maw!?"

"Aw ni e, media lam kaihhnawih kha i duh lo niin ka lo hria a.." Tequila chu ka inzauh a, min hnial ang tih ka hlau ru et et.

"A țha e, a vawikhat nan pasal hausa deuh ka nei dawn che a nia, ka nu leh pa, i chhungte bâkah mi sawm aia tam i sâwm tur a ni lo." Min pawmpui ve ta mai chu thilmak a ni!

"Amel, after party te chu kan nei ve dawn lo em ni?" Dam thluamin ka ti a, a rilru ka hneh hma hi chu zaidam ka zir mai angai tih ka hre kar.

"Nei lovang, honeymoon hmang tura kal lah a țul hek lo, bâ rulhna ka nih hi, ba rulhna.." lungawi lo lutuk tih hriat takin intur chu a tlâk pap a. A thinlung sak lutuk, tui anga tinêm thei tur hian eng hmanraw manto nge ka hman dawn ni! Buaithlâk lutuk.

"A țha e, i thawmhnaw tur pawh ka thlang fel diam tawh a, Mansion ah ka dahtir tawh kha.." dawhkanah ka no ruak chu dahin khum kil lamah ka lâwn nghal a, a mit chuan khawdang hawi miah lovin min en reng chu le, a rui leh țan der tawh zawk emawni!

"Bien(Awle) i thlan apiang chu ka ha mai aniang chu," nungchang țha ber niawm tak hian a robe hâklai chu hlipin a thehsawn dawrh a, ruakin a awm êm bik love, a hnuailam thawmhnaw inbel ngai kha alo la inbel ve țât a, ka sirah chuan rawn muin, "Min si hlek suh ang che," ala ti zui ah!

"Chu zawng hlauthawng suh, a hun hma a chêt chhuah hi ka tihdan a ni lo ve," bangkil lam hawiin ka inlet zui thak a, ani paw'n a phone a khal zui bawk a kan inbe tawh lo, zinglam darkhat a pel fel chiah bawk.

Amelia taksa lumna chuan min ur ham ham a, mipa ka nihna leh ka hmangaih anih vangin amah kuah lova mut chu hrehawm ka ti hle a, thawmhnaw hâ a mut hi ka tihțhan dan a nih loh avangin ka muhil mai thei lo. Ani lah chu a rui deuh nen a muhil sâk sâk a, khum khata mutduna khawih theih chuan siloh hi, inhremna hautak zet a lo nih hi.

Darkar chanve aliam leh hnu phei chuan ka insûm thei ta ngang lova, Amelia kâwngah chuan ka va kuah ta nge nge a, naktuk ațangin ka nupui a ni tawh dawn tih ka ngaihtuah rauh rauh a, engtin nge ka kutchuk hi ka thup tâk ang, ka lo ngaihtuah kim lo deuh a ni.

Rang lutukin ka tho va, Amelia phone khum bul dawhkana min chu banin hotel lobby lam ka panpui ta a, inneih ka hmanhmawh lutukna lamah min hriatchhuah theihna tur lam reng reng ka lo ngaihtuah thleng pha tawh lo.

Mateo Ignacio ka phone ta a.

"Hello," a mu tawh a ni ngei ang a aw a zawi ruih a, a lu a Amelia'n a vuakna kha engtin nge a awm tih pawh ka hre zui tawh bik lo.

"Mateo, keimah Jerome.." ka tih chuan a thaw hawk a, a hlauhthawn hmel kher mai.

"Eng nge ni ta, buaina a chhuak em ni?"

"Ka dara kutchuk hi engtin nge ka thup tâk ang, arang lama khawih a ngai dawn a nia, naktuk chawhnu-ah kan innei dawn.."ka tih chuan a ngawi ta vang vang a.

"Jefe, a hma a ka ruahman ang kha țha ka la ti tho mai, darkar chanve bâk an khawih dawn lova,"

"Ok, zinglam dar riatah ka doctor clinic-ah kan inhmu dawn nia,"

"Yes, Jefe, Miss Amelia kha ngaihven țha hle rawh, Ramon Salia hian a ngaizawng a nia," tiin a thaw hak a, ani hian Amelia ka duhzia a hrechiang bawka min venthawnpui tih ka hria, chuti nilo se nizan khan Mourizo ka ni tih a hrilh daih tawh ang. Mateo tluka ka tâna rinawm an awm lo.

"Ok, tunah chuan a muhil rih a, a hmuh theih turin inlan lo hram hram ang che, i sam leh hmuihmul kha tunah chuan mehfai a hun ta tihna a nih kha, Spanish țawng hmang lo turin i fimkhur bawk dawn nia," kan inbiak zawh hnu chuan Amelia mutna pindan lamah ka let leh ta a, kei han thil ka ti buai khawlo zo tawh ni berin ka hria.

Khuma Amelia mu chu ka melh vang vang a, tinge hetiang hian a nun a hman tâk tlat mai le, Spain-a a nungchang kha chu a pangngai viau a, tunah erawh 'Keite' ang maiin a mah ti thinrimtu apiang a zuan chat chat zel mai a nia, heti renga a awm anih chuan a nunna pawh hian a tuar lovang tih tunge sawi thei!?

Sofa-ah chuan chau zetin ka mu ta a, a kianga ka mu leh a nih chuan ka inthunun thei tawhin ka ring lo. He hneichhia hian ka nun min chawkbuai vek a, businessman hlawhtling leh mite zah kai ka nihna hi a hrethiam ve lo nge, min cho âr reng bawk si.

7:00 Am
Enchante
Luxury

Ka harh leh chuan ka nghawng kham ut ut chu ka hre hmasa ber a, nî a lang ut tawh nia! Amelia mutna ruak huai leh dawhkan chunga paper, vase-a indelhbet chuan ka mit ala rang kher mai. A rûkin min chhuahsan tih pawh hrilh nawn ngai hran lovin ka hrethiam nghal bawk.

Paper chu kuaipharhin ka chhiar ta a, ka rindan a dik chiah.

"I mutui angreng si a, ka kaitho ta lo mai che, thawmhnaw inbel tur mumal ka neih loh vangin robe ha chunga ka chhuah mai angai dawn tih i hrethiamin ka ring, bâkah kha pindanah khan kan awm tih tlangzarh kher a țul hek lo. I bodyguard 'Joe' kha i thupek angin ka call a, ka chênna hmun kan pan e, chawhnu lamah register office-ah kan inhmu dawn nia," a bul ațangin Amelia kutziak fel thlap chu ka chhiar nawn leh ngat a, englaimahin ka chet khalh hman lo chu a nih dawn hi.

Ka kekawr ipte-ah lehkha chu ak țhain bathroom ka pan ta a.

Joe O'Hara biak nachang a hria te kha thilmak a ni. Achang hi chuan kei aiin thil a ngaihtuah kim daih a, a hotel Enchante pawh kha ka hmingin ka la dah lo hrim hrim, ka nupui anih dawn tlat avangin thlak kher a țulna lah ka hre hek lo.

Shower hnuaiah dingin tuivawt chuan ka inphuhtir sang sang a, vawiin chawhnu ațang chuan nupui nei ka ni ve dawn ta a, nimin lama shopping mall-a kan infawp lai kha newspaper-ah alang tawh ngei anga, khawvelin ka nupui ani tih an hre bawk ang. Kan inneihnaah mi sawm tam kha a hlau hle a, vantlang hriatah ka nupui anga lan a duhlo pawh ani mahna!

Ka Birthmark thup chungchanga ka doctor hmu tur ka nih vangin muangchang hman ka ni lo tak e.

Doctor Esteban Ridley
Clinic 7th Avenue
7:50 Am LA

"Jerome engtia tih nge i duh reng reng?" Doctor-in ka dar veilam chu ngun tak hian a en a, he ka birthmark(Kutchuk) hi tihreh hmak chu ka phal bik lo.

"Hun eng emawti chhung chauh thup ka duh a, chumi atana i hmanraw neih țhat ber kha a nimai," ka sawi zawh ruala Mateo, thil inti hrezeta lo nui vur vur chu kiai suk chungin ka melh a.

"Mediplast, aia țha tur a awm lo, he kutchuk awmna lai zawng hi i vunrawng mil-in kan plaster mai dawn nia," tiin dawhkan chunga plaster bawm lian angreng tak chu min kawhhmuh a.

"Engtia rei nge a hman theih?" Mateo zawkin alo zawt ve vat.

"Tuna kan plaster-na tur hi plastic sergery ang nilo mah se, kâr thum a daih a, chumi hma chuan engtin pawh ti ula a khawk lovang, amaherawh chu kârthum a tlin tawh hnuah chuan tuia in tihuh anih ngat phei chuan awlsam tê-in a khawk thung ang." Ati deuh duah a.

"Chuti anih chuan kârthum aral chiahin kan rawn incheck up zel mai dawn nia," ka tih chuan, "Chu chu ațha ber ang, eng emaw problem i neih chuan arang lamin min hrilh dawn nia," ka dara kutchuk chu Dr.Esteban chuan a khawih țan ta a, engmah nâ a awm hran lo.

"Mateo, min hriatpui angai dawn ania, Amelia'n a hriatchhuah tawh loh natur chein fimkhur ang che," tiin ka la chah hrâm a, ani têreuh kha a fing ru phian tih ka hria, chuvangin keini pawh kan fimkhur sauh sauh angai thung.

Tuna min hrechhuak anih chuan engtikahmah Amelia Lopez hian min ngaidam duhin ka ring lova, amah bumtu leh tina tu kha ka ni tawh tlat a..

Doctor-in ka dar a khawih zawh meuh chuan zinglam dar kua a pel duai tawh a, kan inneihna tur hi ka helhhawlh deuh nge ka lungphu a su dup dup a ka hriat hial chu le. Spain-ah honeymoon hmanpui ka rilruk deuh kha a nia, anih lah chuan honeymoon hman a duh eih lo; hemi chungchangah hian vawikhat chu kan la inhnial leh dawn chiang mai.

Ka chênna Penthouse kan panlai te chuan Amelia, mokawr inbel tur angin ka mitthla chhin a, ka nui leh suk zel. Ka thlansak kha a ha ve êm ang chu, mokawr fual a duh der silo a, bakah kan inneihna hmunin a zir dâwn lo bawk nen thlan thiam a har ve êm a ni.

Penthouse MJS
Master Dressing Room

Ka inbual zo der tawh a, dressing table hmaah dingin ka sam uluk fahranin ka siam phawt a, engvanga lan nalh loh hlau em em reng nge ka nih pawh ka inhre hrep lo.

Armani suit, vutbuak rawng hâ-in a hnuaiah kamis dum ka inbel a, necktie pawh vutbuang rawng leh a duma țial ka awrh thlap bawk. Vawiin hi ka tân chuan ni chhinchhiahtlak tak a ni a, Jerome Evans ka nihna angin nupui vawikhat ka nei anga a tawpna pawh a nih ngei ka beisei. Ka nupui tur erawhin inneihna ropui leh langsar a duh tlat si lova, ka tum loh danin ka awm ve dawn ta.

Amelia Lopez hlimna chu ka hlimna nitur leh a lungngaihna pawh țawmpui thei turin vawiin hian ka tlangvalna ka hloh dawn ta a nia, ka inchhir loh ngei ka beisei bawk. Brides maid tih vela buai ve lo, mothuam dum ngat inbel tum leh khawvel hausakna ngaisang tehchiam lo nupui ka nei dawn ta chu a nia!

Ka sum leh pai vanga min nei a ni lova, a pa tlâkchhiatna a fanu in a tuar dawn ta hi ka chhungril chuan fair a tilova, mahse, ka pa Juan Evans duhdan a ni tlat si.

Los Angeles International Airport-ah ka private Jet a awm vâng tawh tih report ka dawng diam tawh a, Airport ațanga thlawh chhuah ka duh kher nachhan chu mipui hmuh a ka nupui tarlan ka duh vang a ni.

Kan inneih zungbun tur ama duhthlan ngei kha ka coat ipte ah ka ak ran tawh a, thawmhnaw leh tlereuhah a buai lova, chutih anih laiin amah erawh buaipui ngai leh ven reng ngai khawpa chimawm leh nghal a ni thung.

Zanin hian insual hmasa lovin hmangaihna ka chenpui thei angem tih pawh hriat va ni suh! Amah ka hlau tihna a nilova, tihnat erawh ka hlau bur thung. Tuma'n an tihnat pawh ka phal hek lo.

"Jefe, inneih țan a hun țep, Miss hruaitu tura i tirhte pawh an lo lêt mek a nia," Sam chu ka pindanah lo lutin report kimchang a rawn pe thlap a. Amelia hruai turin Rolls royce ka tir kha a nia, Joe-an khalhin Limousin car pahnihin an zui bawk a ni.

"Awle, ka inpeih e, Opel Corsa (mattle white) car kha ka hmang dawn a, Ramon Salia țhuihhruaite in thlithlai nghal dawn nia, buaina a chhuak tur a ni lo, a țul tawpah lo chuan silai hmet puak suh ang che u." Sam chu a bu nghut nghut a, Ramon Salia hian Amelia a ngaizawng anih ngat chuan buaina hi ala ințan dawn chauh tihna a ni.

Ka ex-girlfriend Mayla Ansell pasal hlui Ramon Salia hian Amelia a tinâ a nih chuan he khawvela alo piang ve hi a inchhir ngawih ngawih theihna turin hma ka la ang.

Muangchang nihauh silo, hmanhmawh khuchûk ni bawk silovin kan inneihna hmun tur chu kan pan ta a.

County of Los Angeles
Registrar Recorder
NSO Marriange
Santa Monica
2:00Pm

Register Office zau hek hawk leh fai zetah chuan Amelia Lopez lo luh hun nghâkin kan țhu țhap a, huntiam ala ri chiah lo deuh a, a tlai loh ngei ka beisei.

Felipe Lopez leh a nupui Miranda Lopez, ka pa Juan Evans leh kan solicitor pahnih ve ve tih loh chu Evans bodyguard pali chiah an awm a, hei pawh Amelia duhdan tho a ni.

Mateo thaw hak ri ka hriat chuan ka dâk chhuak vat a, Lalpa leh!

Amelia chuan business suit dum dak hlarh a inbel a, pheikhawk dum sâng zet a bun ap bawk, a châwn pawh stocking dum thoin a khuh vek bawk a, engvanga ka thlansak kha ha lo ngam nge maw a nih le!?

Mitthi vuinaa kal tur te pawh a ang zawk mah. Nilo chupawh ala ni lo, tu emaw bodyguard niawm tak zawk a ni. A pawnfen chu a chhing angreng hle a, hundangah hetiang thawmhnaw hi inbel se a lang zahawm ka ti viauin ka ring! Mahse, monu ber a dum suit-a inthuam tlat chu thilmawi pawh va ni suh! Ka thinrim kher mai!

Confi zeta alo luh lai chuan midang pawhin a inthuamdan chu mak an ti tih hai rual a ni lo, an en deuh țhap a, ka pa phei chuan a enchîk khawp mai, ka hmaizah ngawih ngawih nia.

Ka bula țhutna âwlah chuan rawn țhuin a hawi sâng vah a, ben lawlh ka châk zia chu.. min runluih tih midang hian an hre ve angem!?

"Min en reng lo khan thuchham lam chu țan vat ila," ka beng bulah a rawn tisap a, ka tûm hmuk. Ka lo phur ve nate kha a chuai rawih rawih ni berin ka hria.

"Ngawi hmiah rawh," ka tih chuan a nui lui leh sâng a, tun hunah kher hi chuan ka ngei takzet a ni.

"Le, kan țan mai loh chuan hun a kal zel a nia," ka solicitor chu rawn ding chhuakin kan lam a rawn hawi a, Miranda Lopez kun ngal ka hmuhin a rilru a nâ tih ka hrethiam mai, a fanu neihchhunin an leiba rulh nan a pasal a nei tur hi a ngaithiam lo te pawh a ni mahna.

"Țan rawh," Mr.Hahn melh paha ka tih chuan Amelia chu a rawn ding chhuak a, "He inneihna hian engchen nge a huam dawn?" A rawn ti mauh mai le.

"Amel, tun hi chutiang sawi hun a ni lo," Felipe chuan alo khap vat a.

"Sawi hun chiah zawk a ni, kei hian leiba rulh nan ka damchhungin pasal neih ka tum lo," tiin pindan chhunga țhute chu a melhkual a, ka pa chu en kalhin, "Mr.Evans, nang tal chuan a hun chhung i sawi thei ang chu tiraw," ati deuh salh a, eng nge maw a hriat tehreng ni. A hmain engmah a sawilang bawk silova!

"A dik e, Amelia sawi ang khan he inneihna hi contract angin kal rawh se," ka pa thusawi chu ka hresual emaw ka ti a, chutiang bawkin Felipe leh Miranda pawh maktiin an ka hau a, midang erawhin makti hmel an pu lo.

"Ka pa, eng nge i sawi awmzia," ka tih chuan a mimeiin min khap zauh a, "Miss Amelia Lopez, tupa min pek hunah he contract hi tihtawp a ni ang, chu chu i duh leh duh lo a nimai," Ka pa țawngkam dam thlup chu mak ka ti hle thung. Eng ruahmanna nge ni ngai!?

"Mr.Evans, i hausa pawh a ni maithei mahse, kei hian nau ka pai thei nge thei lo tih khata țhu chung khan i hriat ka ring miah lo, i hria em ni? I thusawi âtthlâk lutuk kha lakir leh rawh." A ti hmak a.

"Hriat angai hleinem nupa nun inhmang anih chuan a rahchhuah a lo lang mai ang chu, a bâk chu i thu thu a ni e, Felipe jail- a khung tur hian hun a ngai rei miah lo a nia," ka pa chhânna avang chuan ka lo nui ru var var a, kei nena inbia chu ni ila kan insual lo chauh tawh ang.

"A țha e, contract puitling leh rintlâk insiam dawn lo anih chuan inneihna a awm lovang, in duh a hnu, ka pa chu Jail bang inzût tir mai dawn nia," ti nghauhvin a cluch sofa-a adah chu banin chhuah a tum ta mai! Heti chuan a dik dawn lo tawp.

"Amel, lo ngaithla teh," Miranda aw țial rian chu a zawi raih a, a fanu, ngenna mitmeng pu-a a en chuan ka lo lainat ru ve viau, țhulh mai ka duh rum rum tawh, mahse, Amelia ka chân phal si lo.

"Ka nu, damchhunga he pa kianga chêng tur hian min ngen thei lovang, leibâ inneih thu lah min hrilh hek lo, infanu hi min lo hmangaih ngai miah lo em ni zâwk?" Ati ta phiar phiar a, a dik viau bawk si.

"Vawiin ațanga chhiar țanin kumkhat chhunga fa inla nei lo anih chuan contract hi kan siam danglam dawn nia," ka pa zawkin a rawn ti ta a, Felipe erawhin a fanu chu rum takin a melh a, engmah a sawi lo.

"A țha e, Mr.Evans, i chungah ka lawm khawp mai, i sawi ang chuan ni rawh se," Amelia chu thinrim awm angin alang leh tawh miah lova, kei zawk hi ka lo thinrim hlur mai.

Ka pa hmela Amelia ngaihsanna niawmtak lo lang zawk chu ka hmu vuai!

Chumi hnuah chuan kan solicitor ve ve te kaltlangin nupa kan ni tih puan a ni ta a, certificate pawh min hlan nghal thlap bawk. Inneih zungbun ka buntir lai chuan a hmel a ngui viau a, a kuțțang te thleng chuan nail polish dum zuk hnawih a!

A kut vawt ngiai a rangkachak zunbun min buntir lai chuan min en duh miah lova, min buntir zo chiah tihah chiang kêk kâwkin min en a, zâm map lo hian, "Un ataúd lleno de dinero(Kuang khat pawisa ka duh)" ati sap a, midang chuan an hre kher lovang, min elsenna ani tih hre tho mahila ka huat tâwk a tling viau.

"I duh ang chu pêk i ni ang," tiin ka lamah ka hnûk hnai dawrh a, midang mitmei veng lêk lo leh dimlo zetin ka'n fawp tehreng a nih kha! A mengbial kal mai.

Kut béng thawmin a zui nghal a, thinrim vanga fawp ka ni taknâ-in ka zawngchhang tho nia.

Hunserh angreng kan hman zawh hnu-ah sign ngai zawng zawng kan sign dun leh vek a, țawngkamkhat mah a chhakchhuak tawh lova, 'khawvelah ka hausa ber' ti niawm fahran hian a hawi tau hmak hmak a, ngeiawm ve tak a ni.

Chulaia awmho tân chauhva kan order Salami Pizza leh Cava wine an rawn chawi luh chuan midang pawh ngaichang lovin a lo ban vat a, wine pawh no thum ngawt a in nia, inkhak hun a nilova, ka pa erawhin Amelia khawsakzia chu hmuhnawm ti niawm tak hian a nuih suk suk a, kei ka lo zak thung.

A nu leh pa lam hawiin, "In fanu hi min ngaihtuah reng reng suh u, khawvel pum lei thei khawpa hausa pasalah ka nei alawm," tiin a țawng láng láng a, a rui leh pek tawh ani ngei ang.

"Tikhan inbuaipui zui mai rawh u, airport kan pan nghal mai ang," tumah hrilh bik pawh ka nei hran chuang lova, henu hian min tihzah tam hmain ka chhuahpui vat angai, pawnlamah Reporter an awm lo tih ka hriatna chuan minti engthawl sawt. Chuti nilo se, kei hian mualphona nasa tak ka tâwk ngei ang.

"Lokal rawh kan chuanna tur car-in min nghak reng a nia," Amelia bânah ka vuan a, ala țang țung zui ah, ka dawh theihnain tlin bik hek suh, amah chu chawi lawpin ka koki-ah ka pu ta a. Felipe Lopez pawh a nui tawp.

A fanu duatsual hi kei hian ka'n sawi zál vek ange, thlali a liam meuh chuan Amelia nungchangțha-i tih a ni tawh ang.

Sam chuan nui vur vur chungin car kawngkhar a hawng a, dimlo baksaka car seat-ah nghat thlain a țe chul pawh chu ka ngaihsak zui duh tawh chuang lo.

"Jerome, Amelia enkawl tur hian ka ringtâwk che a nia, tun dinhmunah hi chuan ka thusawi a pawm dawn chuang lova, ka fanu nun tichhetu nih hi ka duh lo, a rilru kan tina hle tih ka hria a, engkim a pangngaia akal leh theih nan theihtawp min chhuahpui turin ka ngen a che." Miranda mittui tling pam chu ka tuaisak zauh a.

"Awle, Mrs.Lopez, i fanu nen in inkâr hi a la fel thuai ang," tiin ka kuah vang vang a, an fanu hi ka hmangaih tlat avangin eng thunun na pawh hman ngai se ka hmang mai ang tih hrilh theih ka châk kher mai. Chu lah chu a hun chiahin ka hre si lo.

Car-a ka țhut luh hnu leh kan liam hma zawng chuan ka pa leh Felipe Lopez te nupa chuan min thlir reng a, Amelia erawhin vawikhat pawh hnunglam a hawi eih lo, luhlul tihpiah lamah a luhlul! A nu leh pa a ngai hle tih kei aia hrechiangtu an awm lo.

Airport kan panna kawngah pawh chuan a ngawi ngal a, a pheikhawk chu hlipin car seat-ah a ke a hlang chhova, driver nena kan inkar ka lo kharphui hlauh chu atihzia ngei mai! Chuti nilo se ka nupui duhdah zeta a țhulai ka hnathawkte'n an hmuh ka duh lo.

"Engvangin nge ka kawr thlansak che kha i hâk mai loh?" Ka zawt ta nge nge a.

"Ha ngei ngei rawh tih thupek ka hmu lova, Jefe..!" a nui lui sak a.

"Jefe tiin min ko leh vaih teh ka sawi ang khan phir pai nghal tur khawpa nasain ka che ang,"

"Jefe, Jerome, duh leh Obama ti pawhin ko che ila i huatna chhan tur ka hre lo."

"Amelia..!" Ka vin nghal țhawt a.

"Yes, Jerome, min mamawhna i nei em ni? Hmun leh hmuna inkoh chiam chiam te chu a.." a ke hlangthlain ka malchungah a rawn hlangkai zui zat a.

"I ke hi lasawn rawh."

"Teuhlo, kha lai inneihna phuahchawp lutukah khan pheikhawk sang nen ka din rei zia i hmuh ve reng kha, ka châwn a kham ve alawm," a ke dinglam pawh a rawn hlâng leh a..

"I rui tak tak nge nizan ang khan i rui der leh zawk?" A ke dah thlâksak ka tum chuan ka kutah a vuan chat a.

"Ka pasal malchunga ke dah hi khawi ram rorelna-in nge khap a, American ho hian ka hriat ve loh style in lo neiru zawk nge?" Ka kut vuan reng chungin min en kal a, ama duhthu ngeia min tawhna hmasa ber a ni. Chu chuan keimahah danglamna eng emaw tak a thlen nghal rêng bawk a.

"Ka hnathawkte hmuh laiin che nawmnah țhak suh ang che, tuna i awmdan te hi thilmawi a ni miah lo ania, min hnaih a min hrechiang duh anih chuan kan pahnih chauhva kan awmlai ni rawh se." A ke ka dah thlaksak tâkah chuan min țhut hnaih sauhva.

"Nichina min fawhdan kha a romantic lo em mai, zainah khatianga i che a nih chuan Vanram kawtchhuah pawh kan fang pha dawn miah lo a nia," ka hmai bulah a rawn thaw sâk sâk a, Cava wine rim leh a rimtui hman inpawlh chuan thâwk ati sak țalh nia. Mi hip theihna riau a neih hi a hmang thiam mah mah dawn tlat!

"Tun hi khatianga inthlêm hun kha a ni lo ania Amel, fimkhur rawh, car chhungah hian hmangaihna ka chenpui che chuan i nuih a za lovang," ka ti hmuk a.

"Ok..Jefe, min hruaina hmun tur hre lo mahila US President chênna tluk thawthânga nuamah min hruai ka beisei ve tawp!" Ti a tawlhsawnin pawnlam a thlir ta vauh vauh a.

US President chênna, Yah! A țawngkam maltin hian thin a khei zar zel zawng a nih hi, zan ni thuai se, duhtâwka chinphar ania ka chak tawh ni.

Airport gate-a kan tlan luh lai chuan ka ruahman lâwk ang ngeiin Media lam an phu suau suau a, Ramon Salia deusawh nana ti ka ni. Newspaper 'front page' awhkhat vekin kan chanchin ziak mah se pawi ka ti thertê lo. Amelia ka nupui ani tih hi khawvel mite hriata pholan ka châk ber a ni tawp mai.

Țawngkama inhnial vak hi ka thiam ve lova, chimawm taka khawsak pawh ka thiam hek lo.

Car ațanga kan chhuak chiah chu Camera a de chuai chuai a, Amelia'n thinrim lutuka min melhna chu ka hrelo der hmiah, a huat ber chu reporter ho kha anni tlat a, chimawm taka a awm lui zel anih chuan zawhna chhân sen loh chhâng turin an hmaah ka va dinpui mai ang.

Venhimna hnuaiah ka nupui kuta vuanin ka private Jet kan pan ta a.

"Mr.Evans, i nupui nge i girlfriend? Tunge a hming? American a ni em?" Zawhna ari nuai nuai a, Amelia chuan ka kut nghet taka hûmin a insangmar at a, ka rilru tak chuan ka khawngaih deuh! Mahse, hetiang ațanga bul ka țanpui anih loh chuan kei hian engtikah mah ka thunun thei ngai lovang tih hi ka hrechiang a ni.

Sam leh Joe ka mitmei zauh hnuah reporter lam hawiin bân ka vai zauh a, thâwm a reh ta țhup mai.

"Inzawhna te a indawtin ka chhâng anga, minute thum hun ka pe ang che u," thâwp sata ka tih chuan an ri leh luau luai a. Sam an alo khap dai vat.

"Tuna ka bula ding hi ka girlgriend nilovin, ka nupui Amelia Evans a ni e, Spanish a ni," Reporter nghal fâl deuh chuan Amelia hmel hmuhchian tumin an rawn hnaih a, "Vawikhat dâk chhuak lawk la, kan kal dawn nia," a beng bulah ka hrilhru sup a, thuawih takin camera lam chu a hawi a, mawi theihtâwpin a nui ta a, he a nui hmel hi ka vawikhat hmuhna a ni bawk. Min hîp zar mai!

"Joe, Sam, anni kha lo buaipui zui rawh u," Amelia bânah vuanin ka kalpui ta a.

"Mrs. Evans, vawikhat chiah lo hawi leh teh.." Reporter samkir chûatin Amelia bân lehlama alo pawh chuan alo ngaithei ta awzawng lo, chupa ngal châr-ah tak chuan a chhuih ta zawt a, ka nui huk.

"Hmanhmawh rawh, Jerome," min phih sawk a, Jet-ah chuan min luhpui nghal rawk rawk nia.

Kha pa a chhuih lai kha an lo hmet hman êm lovang chu!

Thlawhna a thlawh chhuah rualin Amelia chu a maimitchhing ta daih a, a mitmeng kawlh hrâ pawh ka hmuzui ta lo.

Ramon Salia hmel hmuh tur awm lo mah se kan hnaivaiah a awm tlata hriatna ka nei a, ka awm a nuam chiah lo. Spain thleng thleng min umzui anih chuan kei hian engmah pawisak ka nei tawh lovang.

Last Warning...RAMON SALIA

Madrid Spain
MJS Villa
Espanóla, Alicante

Darkar sawmpathum leh minute sawmthum panga zet thlawhna-a kan chuan hnuah MJS Villa nuam leh reh ruih chu zan dar sarih velah kan thleng a, he Villa hi kâr hmasa maia ka lei a ni. Honeymoon hman kha a hreh ru viau kha a nia, tunah engmah a sawi nawi lo ve teh tlat!

"I ril a țâm em?" Inchhunga kan luh rualin ka zawt a, thlawhnaah khan a ei nual tawh a, Jet-ah ala chuan ngai loh vang nge a tîm dai a, kan thlawh chhung zawng deuhthaw khan ka dar nghengin a muhil nia!

Ei eh in turin kaihthawh chawp zel angai a, mahse min rinchhana a awm khan nuam ka ti viau lawi si.

"Țâm nâng, ka la puar ûl mai," țhatê hian min chhang a. Reporter chungchângah khan min khak ka ring deuh kha a nia, ala ngawi ve teh mial!

"Anih chuan kârkhat chauh helai hmunah hian kan cham dawn a, housekeeper kan nei dawn lova, eisiamtu tur chu i hriatthiam mai ka ring." Tiin choka lam ka kawh hmuh nghal a.

"A va fair lo deuh ve, i hausa tho sia, kan order zel mai dawn nia," ati sam êt nia.

"Teuh lo, nupui tihtur chin chu i ti ve ngei tur a ni, a lo thlâwna sum sénralna tur zawng suh," a hnungah ka nem dat a, kan pindan tur lam panin ka nawr kal ta a, a lo duh î khaw lo mai.

"Chhiahhlawh number one angah min ngai deuh em ni, Jerome Evans?" Ka nâkah a nghawk zui salh a, ka nui lo chiang kher mai.

"Chhiahhlawh lam a ni lo, nupui chuan a mawhphurhna a hlen ngei angai,"

"Pasal i nihna anga i mawhphurhna ka'n sawi ve dawn em ni ang," cho lutuk hian min rawn en a, "Zaninah i zawm tura ka duh note ka ziak anga, chutiang chiah chuan ka zawm tura i duh i ziak ve dawn nia," khum zaupuiah chuan țhuin a hawi valh valh a, thlawhna-ah kan chuan rei nen a phunnawi lo ve tlat.

"Ziak ila mahse, kan endun leh phawt ang, inbual rual i duh em darling" ti-el lam lek leka ka tih chuan, "Jefe, min bual la," a meng kal deuh ralh a, engtin emaw tak min chhân ka ring leh rêng ah..

"Inneihna hmuna i thu phuhchhuah kha a țul kher lo e," tiin ka kawr hâk lai chu ka hlip a, ka 'birthmark' min hriatchhuah theihna tur ber tih danglam ani tawh a, ka thâwl hawk.

"Enteh Jerome, pasal nei tur atan chuan ka la naupang tih i hria alawm kan kum inthlauhzia te hi.."

"Ka kum zat i hria em ni?"

"Sawmthumpahnih vel i ni ang," a nui ta var var a, a nuih chhan lah ka hre ve der silo.

"Nuih tur eng nge awm?" Min nuihsawh anga ka hriat apiang hian ka thin a khei zar zel.

"Jaja! I pa, Juan Evans kha ka pasal tur emaw ka ti ta kha a nia, Dios! Putar nei turin ka inphal teuh lo," ala nui var var reng a, ka nui lo thei bik lo.

"Ka pa kha neih i lo tum a..!?"

"Tum lo, tum lo, putar ka duh lo," ati nghal chûl a, "Le, inbual dawn ila, tu emaw ang khan vawiinah ka muhil ve mang silova," ka tih chuan dar san âk hian, "Tunah mu la, nakinah ka kaitho ang che,"

"Kan inbual rual ang, kha i thawmhnaw 'choak' ang maia dum zuar kha ka hmu hnê teh a nia,"

"Mokawr special a nih hi, sawi reng reng suh," tiin a coat dum hâk chu a hlip a, a hnuaiah silk dum pan tak ala ha tel cheu bawk a, a âwmbawr kawh lah chuan a kawr hak chu a tâwn mar țang a, itawm tak a ni. A ruangam ringawt pawhin ka mipatna a kaitho lo chauh.

"Min en reng suh," a inher nghal hmak a, ka nui suk. Hundangah lêm zaklo ber niawmin a inhlip a, nizan lawkah pawh under wear leh bra nen ka bulah a mu tho sia, tun ataka huat țhat leh vel! Naupangchhia lutuk.

A inrin hman hmain bathroom lamah ka pawm phei ta a, a thawmhnaw inbel chu dimlo baksakin ka hlihsak a, chutih rual chuan ka kekawr kâwng kilhna a lo phelh hmanhmawh!

"He i thawmhnaw hi vawikhat pawh i inbel ka hmu leh a nih chuan saruakin nihnih i awm ang," tiin ka vau lâwk ta chhar chhar a, a tûm hmak.

A thawmhnaw inbel zawng zawng ka hlip fai vek a, a zak viau dawn emaw ka tih laiin engtin mah zuk awm duh lova, ka hrilhhai letling zawk!

"Thawmhnaw inbel vek chung khan inbual i tum em ni?" Pawisawi lo leh mitmeng de sar a min enna chuan ka lo insûm ve țâng țângna a tichhe ta! Dimtê-a ka lamah pawt hnaiin a hmui hnawm chap leh sen siahah chuan ka fawp ta vawng vawng a, min chhâng lêt țha kher mai.

A tukkhum samah vuanin duhthawh zetin ka fawp mial mial a, a kutțang zen thlarh a ka mipatna a rawn tawh chuan tisa châknain min tuam hlup hlup nia!

Ka kut âwl lam chuan a taksa ruak kâng chu ka chûl lawr dan dan a, rîk phut mai a châkawm tawh zawk. Mahse, theihtâwpa inthunun tumin thâwk ka la a, zanin hian ka nupui a nihna ka nemnghet ngei dawn a ni tih erawh ka chiang thung.

Second reilotê chhunga min tiphur theitu chu he ka nupui Amelia Evans chauh hi a ni.

Bathroom-a hmangaihna chenpui ai chuan kan nupa khumah ngeiah, a duhthusam Vanram kawtchhuah tal chu ka fanpui dawn a ni...

Complete tawh leh website link ho hi nakinah zawn leh zung zung a awlsam nan story fb (website link dahkhawmna) dah vek a ni a, in lo hmang tangkai dawn nia, story fb group link : https://www.facebook.com/groups/991354610918230/

End of chapter-12

©<++++[BeckirafARenthleI]++++®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)