ENCHANTE LOVE SORENO BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 18313
Joined: April 30th, 2016, 4:07 pm

Re: ENCHANTE LOVE SORENO BY Becky Rm Renthlei (Completed)

Unread post by Ngaia » March 25th, 2018, 11:45 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-13

Madrid Spain
MJS Villa
Espanóla, Alicante
Master Bedroom
Amelia Lopez(Evans)

Ka taksa ruak kâng Jerome an a fawh lawr dan dan lai chuan thâwk pawh ka thaw țha ngam lo a, he a hmui lum ham ham hian duhthawh takin min fawp tawh tlata hriatna ka nei! Chu lah chu nitheiin ka hre si lo.

Hmanhmawh zetin kan inbual puat puat a, ka lu sûk ka tum chuan, "Tunah chuan ni rih lo ve, a aia hmanhmawhthlâk tihtur kan neih kha," tiin ka kut zungțang pahnih chu a lek káng a, a fawp ta zauh a, chutah ka sam ka hmai hliahtu chu huikiangin,

"I hmelțhat zia hi i inhria em?" Min en vang vang a, vawikhat min hmuhna niawm hrimin a hawisawn mai lo.

"Ka hmelțhat vanga min nei i nih chiah chu," fiamthu a ka chhânna chuan a tinui suk a, a mawngtamah ka țham zui salh bawk.

"Ka neih chhan che i hre dik lo deuh," Ka hnute a rawn tawk zui zat a, min tawhna chuan ka taksa a fan leh raih raih nia, a mitmeng thim raiha tisa châkna lo lang chu hai theih pawh a ni lo, a mitmeng putu in a thup hek lo.

"Min neih chhan chu leibâ kan neih vang," nuamti chiah lo hian ka meng hnuai raih a, "Leibâ tih kha vawikhat mah sawi chhuak tawh suh, kan boruak țhalai i ti khawlo zo dawn," tuilum pep pep chuan min rawn leih a, amah pawh intleuh fai ve nghalin bathroom ațang chuan zo zetin min pawm chhuak ta a.

"Inhnial ka duh miah lo a nia Amel, min neihchhanah ka buai lo va, contract -ah ka buai hek lo." Towel chhah țhazetin min tuam hlân a, ani erawh chuan a veng thung.

"Innei thar te chu an inhnial tur a ni lawmni, nupa inhau ngai lo an vâng ve khawpin ka ring,"

Jerome-a mit chuan ka hmai ațanga en chhukin ka taksa pum chu a en chhuak vek a, ka biangah chûlin ka hmui hnuailam chu a tuai ta heuh heuh a, "Pasal nei i ni ta, tum chuan a inhau loh theih maithei a ni," ati zui sup a.

"Pasal neiah pawh ka lo inngai chiah hleinem, affairs chikhat nimaiin ka hria," ka tih chuan, "Naktuk khua a var leh hma ngeiin pasal neiah i inngai ngei ang tih ka tiam a che," ati thüm ta chhak a. A țawng nghet charh leh fiah fak chuan a ti mai mai lo tih a tilang chiang hle bawk.

Hun ngah tâwka inngai nimai awm hian ka towel chu a thehsawn ta a, a mitmeng de sar chuan ka taksa ruak var hai mai chu a en ta a. Khum tlânga arawn țhut chuan ka lo tîm ru hle lawi si. Mourizo kha ka mipa mutpui hmasa ber a ni a, a pahnihna erawh ka pasal phuahchawp Jerome Evans a ni thung.

"He i taksa tluka mawi hi tu hmeichhia mahin an neih ve ka ring lo, min tiphur hle bawk," thâm deuh țuak hian a ti a. A mitmengin a chhui tawh chu a kut chuan zuiin ka darah chûlin ka hnute ah, ka khel leh mawngbâwr, ka hmeichhiatna thlenga a rawn tawh tâkah chuan phurna nasa tak ka nei nghal a, inthunun ka tum ta bik lo.

Mak takin a mipa rim pa hrâk leh a taksa lum thar thar chuan min hîp bet tlat nia! Khumah min mut țhattir deuh thlap a, amah pawh rawn lâwnin ka âwmbawr a rawn fawp kual dan dan a, a tukkhum ah ka lo vuan ve vat, tisa châkna tuipuiah pil dunin duhthawh leh uar zetin kan infawp zui táwn táwn a.

Țawng ka tum zuau a chu pawh ka tihleithei ta lo, Jerome an alamah min pawt hnai sawt a, ka bula a rawn mut lai te chuan kan inneih chhan kha ka hrechang tawh lo reng reng, amah ka mamawhna chiah hi ka hriatchhun a nimai.

Muangchanga min rawn fawp lehin ka thiam ang angin ka lo chhang lêt ve zel a, a lei leh hmui che vel chuan nasa takin min tiphur a ni, "Min tawk ve rawh Amel," ka hmui bul chêtah a ti sup a.

Zak deuh tak chungin a âwm ațang chuan a dul thep zaih mai leh a khel bawrah te ka chul thla ve ta a, nuam ti a rum hawk chungin min fawp uar zual sauh thung. A taksâ ruh leh khauh țang mai hnaih lehzual tura min duh tih hriattak hian min kuah chial a, a thlamuanthlak hliah hliah.

Ka indaidanna leh Mourizo vanga ka lo inserh ve țâng țângna chu țhiah a ni ta, midang mutpui tur ka ni lova, ka pasal ngei a ni tlat; a dawngtu ni bik lova pe chhuaktu ni zawk thei turin țan ka la ve ta a, hmeichhe zauthau thei tak ka ni tih hi ka lantir a hun ve in ka hria ta; ka khelbâwr leh ka hmeichhiatna arawn tawh leh tâkah chuan ka lo inpeih ve at tawh. A mipatna ruh leh khauh far maia min nêk salh chuan ka lo zawm ve zat a, ka taksa chhunga a rawn luh a pumkhat kan nih lai thleng chu ka mang hriat ruai ruai!

"Ka mamawh nasat tluk zet che hian min mamawh ve a ni tih han sawi teh," thâm deuh sap a atih chuan ka ka nui sak a,"Min hrilh rawh Amel," a ngenin min ngen a ni ber!

Țawng chhuah chu ka tan tih rual a nih loh avangin ka lo rum hak a, a taksâ thlan avanga hnâwng deuh chap chu ka fawhsak ta zawk a, ka la hriat ngai reng reng loh hmuna min hruai thlen tâkah chuan duhthawh lutukin ka lo fawp ve tân tân a, a rum hawk ri chu Villa reh ruihah chuan a ring phian.

Vawi eng emaw zat nawmna vawrtawp thlenpuia hmangaihna min chenpuina chuan ka lo duhthusam ve Vanram kawtchhuah chu a thleng pha hialin ka ring.

Kan taksa insi chial chu pawt țhen phal lo niawm tak hian min kuah tlat a, a âwm nghenga ka muthilh hma lawkin Jerome chuan, "Amelia, ka ta i ni..ka ta chauh," ati sup a.

Ka harh leh ruala ka hriat hmasak ber chu taksa lum ham ham a ni.

Jerome-a mitmeng fiah kalh chuan min lo thlir veng veng a, hmeichhia ni bik hliah hliaha ka inhriat hial chu le!

"Morning, Mrs.Evans," ka hmuiah a fawp zauh a.

"Morning, i hâ va nawt rawh,"

"Engvang ngawtin, zingkârah chimawm chhuah lul suh," a kiai suk a.

"Intifai hmasa lovin i thawh veleh min fawp tawh miah suh ang che," țhu chhuakin ka melh hrâ a, Jerome Evans hi ka hmu zing telh telh a, Mouri nen inang ka ti tulh tulh. Kutchuk a nei lo tih nizan khan ka hre chiang tawh a, Mourizo Soreno theihnghilhin ka pasal Jerome tân hian ka nung mai tur a ni dawn lawm ni. Ka thei angem?

Ka duh emaw duh lo pawh ni ila ka pasal a ni tlat tawh si a, he ka zungbun hi fapa ka neih hma chuan ka phelh thiang lo tih hi ka pawm mai angai a ni.

"Eng nge i ngaihtuah vung vung a, nupui ngaihawm tak chu i nih hmel loh," Khum thawhsanin bathroom a pan a, a taksa lian leh inkhaithli zuih chu nalh tak a ni. 'Estatua'(Milim) te pawh a ang dâwn dâwn alawm.

"Kal vat mai teh," rawn hawi lêtin a nui suk a, "Ka hnunglam ațanga min hisap kha i sim vat a ngai," Ti a fiamthu a thawh chu ka nuihpui ve tho. He Jerome Evans-a hi a duhnaah chuan a ngaihawm thiam dawn riau mai.

Nizana hmangaihna kan chendun laia min mamawhna kha ka hrechhuak lo thei lo, hmeichhia mutpui ngailo ang maiin a khawsa a, ani ang hmelțha leh hausa si te chu duh duh thing thei a ni tih kei aia hrechiang an awm lovang. Ani nena nupa nih chu a zawngchhang thlak riauin ka ring ta, ka duat thiam te chuan min duat ve awm chiang e.

Khum ațanga thovin bathrobe ka ha nghal a, alo chhuah hma ngei hian kan zawm leh zawm loh tur list kha siam ta ila..

Pen leh paper ka zawng a, dressing table bulah a lo awm mial! Hmanhmawh lutukin ka ziak ta a, kan thlir nawn dun dawn tho va, point tam ziah ngaiin ka hre hran lem lo.

Spain-ah kan kal dawn tih ka hre lova, thawmhnaw engmah ka keng lo tih ka hrechhuak hnuhnawh a, engtin nge ka tih tâk ang.

"Amel.." Jerome an min ko ri ka hriat chuan fel ber niawmin ka pan nghal a. Bathtub-ah lo țhu kûk nia, a nawm hmel angreng!

"Engah nge min lo zawm ve mai lohvang," ka luh rual rualin alo ti nghal a, ka rilru chuan a châk reng, mahse, ka zak deuh tlat. Chutia ka ding reng chu ngaithei lo niawm taka rawn ding chhuakin, "I thinlungin titura aduh che kha zawm ve mai rawh," tisupin ka robe hâk suihna chu a pawt phelh a, bathtub-ah chuan min luhpui ta a.

"Pasal i nihna hi hman țangkai tum viau suh," a hmaiah tuiin ka theh țhat a, ani'n ka chhip ațangin min leih thung!

Kan inbual chhung zawng chuan kan inhnial lo ve teh tlat a, scrubber-a ka hnung a nawh hauh hauh lai chuan chimawm zet zetin a kut chu a vahkualtir deuh kher zel, chutih hunah chuan a mipatna ka pawhsak zauh zel a, a haw ngam bik der lo, inhau leh a hlau tepawh a ni mahna.

Bathroom kan chhuahsan rual rualin ka list siam kha ka pe nghal a, chhiar lovin dawhkan chungah a dah phawt a, min en vung vung hnuah, "Ka thawmhnaw hâk tur min lo zawn sak ta che," ati sup a.

"Thawmhnaw i keng em ni? Tihian kan awm ve lâwp lâwp mai ang chu," ka nui nghal var var a.

"Wardrobe-ah khian kan pahnih thawmhnaw tur a awm a lawm," tiin wardrobe lianpui pui pahnih chu min kawhhmuh a, "Nitin pakhat zel pawh ha la helaia kan cham chhung hian i ha zo hman lovang,"

"Ka awih em em kher lo e,"

"En la ti nia.." Towel-in a lu a hru nghal mawlh mawlh a, ka rin aiin hrawn a hrehawm lo dawn a nih hmel.

A sawi ang tak takin thawmhnaw tam tham zet inkhai tlar dul ka hmuh chuan maktiin ka âng pam a, ka hâk duhzawng a hre chat chat hle mai, cotton kekawr thawl hnek hnawk leh tawnzau chu ka inbel nghal a, thuawih takin a hâktur cotton kekawr bul leh tawnzau ka phawrhsak ve ta a, ka chezia ngawirenga min thlir chu ka hmu ru reng!

"I list siam hi ka zawm thei angem aw!?" Ka thil ziahna paper chu a thlêmkvk vung vung a.

"1. A tho tlai zawk zawkin khum siam tur.
2. A tho tlai zawkin breakfast, lunch leh dinner siam tur.
3. Ka remtihna tel lovin khawiahmah kal chhuah loh tur.
4.Ka mimal thil engmah ka phalna la hmasa lova khawih loh tur," Amelia leh! Eng dan mah hi ka zawm peih lova, ka zawm a țulna lah ka hre hek lo. Kan panhnih chauhva kan awm vang em ni khitiang khi i ziah?" Paper chu pawtthlerin dustbin-ah a vawm lut hmak a, ka va'n ngei tak!

"A nih chuan mahni ve ve inbuaipui mai ang," ti nghauhvin inhnuaiah ka chhuk san ta daih a, ka eitur ka siam anga ani paw'n a eitur siam ve mai rawh se. Inngeih hi a har a nih hi, zawm nghal rawh pawh ka ti bik lova, aman asiam ve anga kan endun dawn chauh kha ania, thinrim nghal rikngawt!

Mihausa awmngaihna hrelo a nih hi, housekeeper dah ve mai tur a nia.

Choka chhung nuam leh thengthaw zetah chuan ka hawi valh valh a, pawnlam lan theihna lai darthlalang tukverh bulah chuan kal pheiin kan piah chiaha cottage tereuhtê lo awm chuan ka mit ala kher mai. Helai hmunah hian kan pahnih chauhvin kan awm lo tih pawh hrilh chawp ka ngai lo, tute nge awm ve ta ang!?

Ka siam thiam ve ber coffee chu siam tumin bêl ka chhuang a, a pawlhtur ka hmuh miah lo! Dios! He choka changkang zetah hian eitur pakhatmah zuk awm lova, coffee siamna tur chu sawi loh Fridge leh cupboard zawng zawng pawh ka hawng fai vek tawh a, engmah ei chi hrim hrim a awm miah lo! A ruak vek!

Thinrim lutukin ka ke ka per tân tân a, Jerome Evans, min hrem tum dan chu leh! Ka ngaidan a ni ta hauh lo.

Choka chhuahsanin Villa kawtah ka ding vang vang a, kan awmna hmun lah hi khawi lai nge tih ka hrethiam der lo. Garage-ah car hmuh tur a awm lova engtin mah helai hmun hi ka tan chhuahsan ngaihna a awmhek lo. Nichina cottage ka hmuh lam kha pan mai țhain ka hre ta a, ka pan ta nge nge a.

Cottage kawngkhar vawithum ka kik hnuah pawh min chhângtu an awm lo! Ka pum ri ruk ruk chu ka haw kher mai, hun lo lutuk, ka țah a chhuak hial nia, ka rindan vel chiah hausa si uikawm bawk si.

Thawmhnaw bawmah kum thum daih hâk tur inkhai tlar dul mah se, ka ril a țám a eitur ka neih chuan si loh chuan engtihna mah a ni lo. Cottage ațanga eng thawm mah ka hriat tâk loh avang chuan kawngkhar chu ka pawt chhin a a inhawng ve mai!

Dimtêin ka lut ta țhem țhem a.

"Awm in awm em?" Vawithum lai ka au hnuah pawh min chhangtu an awm chuang hek lo, ka rilțâm lutuk chu ka pum ana riai riai a, tu in pawh ni rawh se, eitur ka dap ve phawt mai ang, Jerome-a biak kikawi leh ai chuan helai hmuna inhnawhpuar hi ka duh fê zawk.

Dawhkana serthlum tui leh eitur inchhin thlap chuan ka mit ala hle a, ka ei mai lo nâkah..

Coconut milk leh candied pecan, badam ațanga siam chhang leh crab cakes te alo ni hlawm a, a tui hmel hlawm kher mai, 'Lalpa min ngaidam rawh a neitu phalna lovin ka ei dawn si a,' tisapin ka hmuh ang ang chu ka ei ta mial mial a, a rûka ei mah ni ila a tui em em tho nia! Hmanhmawh lutuka ei ka ni bawk a, ka puar rang kher mai!

Dawhkana eitur inchhawpho chu ka ei phai duak a, a tawp nâna serthlum tui ka in leh phei chuan ka pum chu hmuh theihin a puar awk mai.

Cottage ka chhuahsan chuan dar sawmpakhat a ri tawh a, Jerome-a chunga ka thinrimna hi engtin nge ka hrikthlâk ang? Thawmhnaw hâktur min pe a, eitur min pe leh si lo. Hah! Ka rilruin ka lo fak ve thawt thawt a, zankhat lek kan mudun a, min duat khuchûk turin ka beisei tur a ni lovang.

Villa-ah pawh ka lêt peih lo e a, a duh leh eitur zawng ve se, ka buaina tur a ni lo ve. Chulai hmun nuam zet fankualna hun ka nei tihna a nimai, thing din khupna lamah chuan ka tei phei ta a, bodyguard hruai lova a awm hi mak ka tiru viau!

"Amelia," Jerome-a aw ka hriat chuan ka biru vat a, min tih hrehawm manah ka inhmuhtir tur a ni lo bur.

"Amel, Amelia.." ring zet zeta min koh avang chuan a aw chu a thangkhâwk rum rum a, a lo hnai zel tih a rik dan ațang chuan ka hre mai. Thingkung phena ding mai ka ni a, min hmu thuai thei dawn tlat! Ka bula thingkung chu ka en chho vang vang a, ka lawn a ring tawp nang..

"Engmah ala ei lo, Villa hnunglam leh pool bul vel kha lo en ngun rawh u," Jerome Evans chu ka lâwnna thinghnuaiah chuan a veikual chhên a, phone a hmang pah bawk. Kha cottage neitu te kha annih vaih chuan ka chhe vek a nimai.

"Amelia, darling.." Min koh leh tâkah chuan nui chhuak lo turin ka hmui ka hup vat a, a hma ang khan la mawl dawn tawh reng reng lo.

Jerome chu kal kiangin hnim kâr leh thingbuk phenah te chuan min zawng ruai a, 'Darling' hah!' A sual man a hmu a nih khu, nupui nei thar inti ve si khuahkhirh tum nghal ngawt țhat loh zia tem ve hlek teh se, zirtirna min prk hmain ka'n hmakhalh zeuh te'ng, ka list siam kha a pawm phah mahna..

Beidawng zeta a țhu hnawk ka hmuh chuan lawm lohvin ka nui var var a, ka sana bun lai chu bihin minute sawmhnih dawn lai min zawng tih ka hre mai a, thingkunga riak tur êm chuan infit lo mahila zankhat na nâ na chu ka thei ve awm chiang em mai.

Jerome a phone chu rawn ri lehin a rik rual chuan rang zet hian a pick a, "Aw ka la hmu lo, a kal hla lo tawp ang, tawhsual a tâwk zâwk pawh a ni maithei ka rawn lêt phawt ang," hmanhmawh taka inherin a mi biakpa nen chuan an la inbe zawm zel a, an țawng erawh ka hre pha tawh lo.

An rinphak bâkin a nia ka chet dawn ni! Ka zun chhuak lutuk chu hun lo ka ti kher mai, thingkung ațang hian ka zung mai dawn nge? Ka chhuk leh phawt ang? Min hmuh ka hlau deuh bawk sia..

MJS Villa
Jerome Evans
3:30 Pm.

Tlailam dar thum a pel tawh a, Amelia lah chu thehmeh ang maiin a reh vung vung si! Kei hian ka lo ti lutuk deuh em ni. Nilo, control ka tum mai a nia..

A list siam kha zawm tlâk pakhat mah awm nghal lo chuan African ran vulhtu nupuite paw'n khatiang kha an ngaihtuah peih lovang, a lu bûra a thluak hi Pathian siam chu a ni ngei bawk si a..!

Chokaah eitur engmah a awm lo tih ka hre lâwk daih tawh, siam turin ka phût lova, cottage-ah kan breakfast hmasa ber tur chu ka naute hovin an siam mai dawn a, ka surprise hma hma in a lo chhuak hmanhmawh lehnghal! Duat pawh tum ila amah hian a thai chhe zel zawng a nih hi..

Sitting room-ah ka vei nghut nghut a, khawi hmunah mah bíkbona hman a awm lo. Tunah Mateo, Joe leh Sam ten an zawng leh mêk a, an hmu lo anih vaih chuan helicopter ka chah mai angai dawn a ni, helai ram hrechiang tu emaw rawih angai bawk anga, ka thluak a buai leh vek tawh.

Felipe Lopez ka phone tawh a, chanchin kimchang erawh ka hrilh lo, a fanu hi engtin nge a enkawl ni! Villa ațanga khaw hnai ber pawh mêl thum vel a ni a, lirthei hmuh tur a awm lo tih ka hrechianga chulam chu a pan ka ring miah lo, khawi lai hmunah emaw lungkham nei miah lovin a thênkual leh mai maia rinna ka nei tlat.

"Jefe, in breakfast tura kan siam ho kha a phai duak mai, i nupuiin a ei a ni ngei ang," Joe chu thlantla hluamin a lo lut a.

"Dar engzat vel nge tih rindan i nei em?"

"Ka hrethiam chiah lova, mahse, chawhma lam chu a nih ka ring, kan awm loh lai kâr tê kha a nih ka ring."

Amelia'n thil a ei tih ka hriatna chuan minti thâwl sawtin ka ngaih ațha deuh, thlawhnaa a thil ei bâk engmah a ei lo va, a rilțam dan tur ka chhut thiam vek bawk, ka ngaihtuah zia te hi a hre hlawl bawk si lo.

"Tunah khawthim hmain Villa chhehvel hi kan zawng leh phawt anga, kan hmuh loh chuan a hranin ro kan rel dawn nia," ka sawizo hman chiah Sam chu a rawn lut ve nghal a, mangan lai lai a lo nuih vur vur chu..!?

"Jefe, i nupui hi i hrechiang meuh maw!?'' Atih chuan ka melh rum nghal ringawt a.

"Ka hrechiang tih ka sawi lai ka hre lo, hriatchian tumin ka bei mêk chu a nih hi.." ka ti hmuk a.

"Khawchhung hnai ber thleng kan kal a, hmel hmuh tur pawh a awm lo, thinghmun saw in en em?" A tih chuan ka bu nghut a, eng nge a sawi tum pawh ka hre mai mai lo.

"Thinghmun lamah i va en leh ang u, ka sawi sual viau anih loh chuan kan ûm țuma atih ang tho kha atih leh ka ring," Sam an Joe a melh zeuh lai ka hmu hman.

"Eng nge atih tur chu.." bangbo zeta ka tih chuan an nui țhâ hlawm a, chu chuan ka thin atirim hlur.

"Thingkung kâkah hmui hupin a țhu ang," Sam bawk chuan ati leh a, ka hrethiam uar. Hmâna ka grape huana a luh rûk țum khan thingkungah a biru tak alawm le, ka ngaihtuah thleng pha miah lo.

"Kal ang u," tiin ka chhuak vut a, min lo zui ve mai.

An sawi ang tak taka alo awm anih vaih chuan ka hremna a nâ khawp ang. Honeymoon kan hmang țan dêk dêk a, buaina a bul a țan hi ka ngaidam dawn miah lo.

Thinghmun kan lut țan chiah tihah, "In thâwm kha dim hle ang che u, a hmu hmasa che u anih chuan a lo inring leh hman vek anga, thingah a lâwn lo anih phei chuan a biru leh duh mai ang," tiin ka hrilh leh ngial a, nui țhû chungin an bu nghat nghat a, Amelia hian ka hnuaia thawkte lakah hian vawi engzat nge min la tihzah dawn le?

Mahse, ka duhin ka thlah phal chuang der si lo.

Thingkung ding țhulh chu kan melhkuala hlawm a, thawm kan dim bawk nen a ninawm ru phian! Amelia hmel awm ang hmuhtur îk pawh a awm lo, khua a tlai ruih tawh a, ka rilru a hmanhmawh tet tet tawh. Amaha kalbo nilo hian midangin an ru anih ka ring rum rum tawh a, chutiang zawnga ka ngaihtuah phei chuan ka hlauthawng dep dep.

"Jefe...!" Mateo kawhna lam ka en chuan ka pên lai ka tawp chawp.

Amelia chu thingkâkah inzepin kekawr ha lo hian alo muhil a, a under wear hâk beitham zet chuan a hmeichhiatna a khuh chang chang! A kekawr chu a kâwngah vêtin thingah chuan a suihzawm a, a tlâk mai loh nana ti anih ngei ka ring. Thluak ve tak a ni.

"Maimitchhing ru," an pathum chuan an nui ta a, ka thin arim hlur! Amelia bawp pahnih chu hnuailamah a rawn uai zar a, kut kuangkuah fel ât in zuk muhil thei a..!

Ka thin atirim zek zek a, minute nga dâwn ka thlir hnuah a lâwnna thinga lâwn ve turin ka inbuatsaih a.

"Jefe, kan meng thei tawh angem, a ninawm riau a nia," Joe chu a phun sup a.

"Meng lovang, inhmuh ve vek kher angai lo," ka ti hmuk a, an nui leh huk. Tun țum chu an boss ka nihna ang paw'n min zah hleithei tawh lo, an nui char char a, ka nupui maksak leh dangdai lutuka che țhin hi an tan pawh a awihawm loh hial zawkin ka ring.

Ka pheikhawk nena lawn ka tum ve ringawt a, a nâl êm avangin ka fail țhak! Amelia khi sandal nen a lâwn mai sia, nêp ka intiru viau a ni. Ka pheikhawk hlipin a bul țangin ka bei țha leh ngat a, ka lawn thei hrâm.

Hnuailam ka zuk melh a, sâng fia fia tak a ni. Ka lu a hai mai dawnin ka hria!

"Amel..."

"Amelia Evans.." Ka vin vak chuan a phu nasa lutuk anga a tla ang tih ka hlau deuh si. Yah! Buaithlak ve.

Zawitê-a ka koh leh chuan a rawn rûm țiah țiah a, peih loh hmel zeta rawn meng chhuakin kan inmelh ta rân a, a mitmeng buang thak a maktihna lo lang ka hmuh chuan ka ner sawk a, "Che miah suh," tiin a kekawr leh thing insuihzawm phelh tur chuan ka insiamrem leh tê tê a.

"Che zawk suh," ati vin țhat nia. Zawk zamah chuan! Min la vin ngam maw le!

"Ngawi hmiah rawh,"

"Chhuk la, min tibuai tawh lo teh,"

"Amelia, ka thinrim lai hmuh kher i duh loh chuan ngawi rawh, i kekawr hi ha nghal bawk la.." tiin a kekawr insuih ka phelh chu ka pe a, "Hetiang hi i hâ thei bik dawn em ni?" Kekawr a thingpharh chiah chu nui lo turin ka insûm nasat a ngai viau.

A kekawr chu a kap zawnah a phel a, engtin nge a țhuina pawh a phelh theih reng reng ni! Hei vang lek a nih hi thing leh ataksa a țawnzawm theihna chhan a thluak hi chu a hmang ve chiang alawm.

"Under wear nen chiah khan chhuk i tum em ni?" Ka tih chuan rum eltiangin min melh a, "Chhuk ka tum reng reng lo Jerome Evans, i Villa-a rilțama thih ai chuan helai hmuna thih hi ka thlang fê zawk," ati hmak hmak a.

"Țawng țawng lo khan chhuk țha hle hle rawh," a bânah vuanin ka pawt deuh a, a țe țhat.

"Min khawih miah suh, ka zuangthla hreh miah lo a nia," tiin min vau lêt kha kha a, ati leh duh tak tak a ka rin vangin ka dawh leh lo thei lo.

"Ka chhuk hmasa anga lo chhuk rawh aw, midangin an nuihzat tur che hi ka duh miah lo a nia," thlêm titiha ka biak chuan a ngawi rân a, tunah kher hi chuan ben lawlh ka châk ber.

"Chhuk la ti nia, i thâ leh zung sênga i lo lâwn ve hrim hrim pawh hi a țha e, exer țha lutuk tak mai a nia. Gym-a insawizawi tluk tluk ai chuan kan honeymoon chhung hian zingtin thingah inlawnsiak ila a țha phian ang," ring zetin a nui zui a, ka huat dan hi pui tak a ni.

A vawikhat nan Amelia Lopez ka lo nei ta hi ka inchhir lek lek!

A nui ri ring zet chu ka bengah a ri nawn tlut tlut a, chhuk turin ka ke ka dahthla tawh kha a nia, a bulah ka han lâwn țha leh ngat, "Min nuihzat tur hian tunge ni a i inhriat a!?" Tihpahin hawi sawk khawpin ka beng ta a, a inring lo a ni ngei ang, thingzar a vawnna chu a thlah a, hnuailamah a tla thla ta a...

Ka chelh hman ta lo..

Mateo, Sam leh Joe chuan an lo dawng chat a, mahse, an tlu tho! Amelia'n an pathum chuan a delh ta rân a, kekawr a ha bawk si lo nen hmuh a nuam viau lo.

"Tho vat r'u," chhuk paha ka tih chuan an tho nge tho lo pawh zuk hmu tawh bik hek suh, hmanhmawh lutukin ka chhuk sawk sawk a, midangho zawng chu thovin Amelia chu a tho duh leh tlat lo, a bawkkhup tlat a, a va'n sual ve ngar ngar tak! A insawh nat ka ring eih lo. A na tur ber chu amah nilovin midang hi anni.

"Joe, kai tho rawh," ka tih chuan a che lawk lova, "Kai tho ta che," a aia ringa ka vin leh chuan hreh zeta kunin Amelia bawkkhup thlar chu a kuai zangthal ta a.

'No' Amelia kâ leh hnar ațanga thi rawn chhuak chu a luang nguai nguai a, mithi ang maiin a mit a chhing tlat bawk...

"Amel..." ka țhingțhi nghal hnawk a. Sam chu harh chhuak hmasaah țangin a kuah tho vat a, chêt mai nachâng ka hre lo..

"Sam, a mar kha han dek teh.." Joe chu rawn țhuhniam ve nghalin, Mateo erawhin phone a hmang thung.

Amelia hmel thisenin a bualkhat tlat chu hmuh a hrehawm kher mai, ka tawnzau hâklai chu hlipin a hmai chu ka hru a, nikhua a hre tawh lo tih hrilh hranpa ka ngai bik lo.

Lalpa! A thi tur a ni lo....

End of Chapter-13

©<++++[BeckirafARenthleI]++++®



Link:
BBcode:
HTML:
Hide post links
Show post links

Ngaia
Site Admin
Posts: 18313
Joined: April 30th, 2016, 4:07 pm

Unread post by Ngaia » March 25th, 2018, 11:49 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-14

San Juan Hospital
Alicante Spain
Jerome Evans.
11:45 Pm

Darkar hnih ngawt Amelia chu a harh tawh lova, khatia thingkung ațanga a tlâk khan a force a nat êm avangin lei chârah a lu sawh lovin ka naute-ho a zuk delhna zâwkah a insawh na mai chauh a nia, a kam chhung hmun li-ah an chilh a, a hnar pawh a thi nasa viau bawk, thildang sawh pawi a nei hran lo.

A awmzia ber chu a tlâkna kha a sâng thawkhat a, shock a ni. Damdawi hmangin an chiu chhunzawm bawk nen darkar nga chhung chu a harh dawn lo tihna a nia, a harh hun tur nghakhlel viau e tilovin ka huphurh ru hle thung.

Mateo-an Ambulance a koh avangin kan awmna ațanga hnai ber San Juan Hospital kan panpui nghal a, kawngtluanin a thi angem? Tih ka ngaihtuah char char a, awmngaihna ka hre meuh lo chu a ni e.

Ka rilru tibuaitu ber chu Amelia'n nau a pai hi a ni. 'Mourizo Soreno' ka nih laia ka fa' ngei kha!

Jerome Evans-a fâ pai ngaihna a awm lova, nizanah a vawikhat nan kan mudun a, engtin nge a rai rêng ang ni!? Kan mutdun hmasak berna Spain kha ka hrechhuak lo thei lo, a thianghlimna ka lâksak zan ngei khan invenna kan hmang lova, arah chhuah chu tunah a lo lang ta tihna a nia.

Amelia ka bum emaw tiin ka lo thlamuang ve viau a, tunah chuan ka thiltih sual rah ka tuar țan mêk a ni. Ani'n min hmangaih lova Mourizo kha a hmangaih si.

Yah! Mourizo angin ka kir thei si lo hi a buaithlâkna lai chu a ni; Jerome Evans hi ka 'real name' anih bâkah amah hmangaihtu kha a miau va...

Doctor Sheila Kuel, Sam, Joe leh Mateo hengho zawng hian Amelia naupai chungchâng kan hria a, ka nauteho hi chuan a awmzia an hrethiam vek a, Mateo phei chu a lawm tih ka hria, a boss hmangaih kha a hre tlat a.

Cabin chhung dai raihah chuan ka nupui kut vuanin ka țhu rân a, a hmel chapo leh induh larh kha hmuh tur awm lovin a chhing chial a, tuna a landan hi chu a kum nen a inmil ve chiah! A dam țha hmel kha chu a chaltlai ve ropui si a, a kum aiin alang upa zawk!

A naupai chungchâng hi engtin nge ka sawichhuah ang, ka sawi anih vaih chuan min țhen a tum anga anih loh pawhin ka nihna hi ka sawilan angai awm si, ka sawi pawhin thinrim lutuk vangin min chhuahsan tho tho ka ring.

Tihdan țha ber ka hrelo a ni e. Tunah chuan kan zêp rih anga, kan innei ve chauhva, tin, ani pawh a rai tih kan hriatna a la rei bik lova, a puar zawt zawt bik nâng.

"Jefe, eng emaw tal ei la, i nupui chu kan lo awmpui ang," eitur khai bawr lûk chunga lo lut Mateo chu ka hmu ve chauhva.

"Coffee leh sandwich kha a tâwk mai, pawnlam kha lo vil țha rawh," Amelia ka vawnna chu thlahin ka ding chhuak a, hetia kan buai hnu ațang hian engmah ka la ei lo, zing ațang tawh zawkin maw le.

"Aw le, i pa kan hrilh duh angem?" Tiin coffee a thli a, chhân mai dan tur ka hre lo, honeymoon hmanglai kan ni a, kan inneih danah hlim taka kan awm dun chu a ring chiahin ka ring lo nâ a, hetiang em em a thleng ang tih a ring pha lo maithei.

"A tlangpui chu hrilh mah la a pawi lem lovang, Felipe te nupa pawh hrilh nghal la, naute chungchâng erawh a tu ve ve mah hrilh tel suh ang che," Coffee leh Sandwich chu eiin tukverh bulah ka ding a, Amelia harh tura an beisei hun kha darkar chanve chauh nghah ngai ani tawh. Engtin nge ka lo hmachhawn tâk ang.

A dinhmuna ding zawk hi ni ta ila a inbuatsaih țha leh hle ang chu, sawi tur a hre thei nasa mai si a, kei hian a thluak bawn zet hi ka pha lo tih ka hria, chimawm lamah chuan..!

Naute chungchang hi a ni, ka riru tibuaitu chu, a dam țhat hma hi chu kan zep theiin ka ring mai a, chumi hnulamah engtin nge kan tih tâk ang? Ka inpuang mai dawn nge?

After 1 hours

"Amel, i khawilai nge na ber?" Amelia a rawn harh tawh a, min en duh miah lo, Mateo chauh a en a, a harh chiang lo ti dawn ila a meng kar bawk si!

"Amelia, duhtak, ka țawng i hria tiraw!?" A hriatna a hloh lo doctor in ati bawk si a, a luhlul ngaiin a luhlul țan leh der tawh em mawni! Kun hniamin a hmuiah ka fawp zauh a, a thle sawn hmak, nikhua chu a hre ve chiang a lawm.

A biang vûng ul ka hmuh chuan ka ben lai kha ka hrechhuak zawk! Thing ațang khan tla lo ta se min sual lêt em em ang. Țawng tum niawm tak hian a kâ a âng a, țhensak chungin a chîp leh hmak.

Ka hrethiam ta. A biang chhunglam an țhui tak alawm le, thil tuiril bâk engmah ei phalsak ani lo bawk.

"Ignacio, pen leh paper rawn la teh," Mateo lam hawia ka tih chuan rang fê in cabin chu a chhuahsan nghal a, Ignacio ti a ka koh chhan chu Amelia'n a hriatchhuah ka hlauh vang a ni. Mateo Ignacio a ni a, a hming hnuhnung zawk ka hmang mai a nia.

Amelia'n a bân a tiche thei nge thei lo enchhin tumin a puansin ka va keuva, rang lutukin ka kut a vai per lawp a, a maimitchhing zui nghal hmak nia! A ti che thei chiang ngei mai! Problem pakhat a kiang ta.

"Doctor lo luh hma chu muhil suh aw," Dimtê-in a kut ka vawn sak a, ka ben avang khan ka inthiam hlawl lo, ben phu viau mah se mipa kutthlâk ching hi ka ngaisang lova, ka duh lo bur țhin kha a nia, chu ka thil duh lo ber chu keima'n ka ti leh lawi si. A biang dâng lep leh a hmui sen siah, dal ta riap ka hmuh hian nuam lo ka ti viau.

"Mr.Evans, i nupui hi duat hle ang che," doctor chu a nui var var a, Amelia mu lai chu enin, "A damdawi khan a hneh rih deuh a nih kha, a biang chhunglam țhuina kha karkhat hnuah phelh tur a ni a, chumi hma chu engmah thilsakhat leh sa lutuk eitir loh tur, țawng tam lo bawk se," tiin Amelia nghawng leh biang vel chu a kut hnunglamin a dek a, doctor fel tak a ni.

"Engtikah nge kan chhuah theih ang?" Ti a ka zawh chuan, "In duh chuan khawvar hunah in chhuak dawn nia, chuan nau...." A sawi zawh hma hmain ka melh vak a, a lo hrethiam ve mai.

"Ok, incheck up lam ngaihthah suh ang che u.." a ti ta ringawt a, ava'n sawi chhuak teuh ve le, a naupai chungchâng hi chu ngun zâwka ngaihtuah angai tlat.

Doctor Sheila'n min chhuahsan hnuah Amelia chu a rawn meng chhuak a, a țawngțha thei dawn lo tih ka hriat chuan ka khawngaih reuh hle mai! A țawngkauchheh ngeiawm zet zet leh min khei zar țhin kha kârkhat chhung vel chu hre lo turah inngai ang, na reng se ka ti hauh lova, mahse, a zal phah deuh mahna.

Paper leh Pen kenga Mateo lo lut chu ka lo hui vat a, engang pawhin be mahila min chhan theih dawn tlat loh avangin ziaka a duh sawitir mai țhain ka hre ta a ni.

"Duhtak, mamawh i nei em?" I neih chuan hetah hian ziak mai ta che," Amelia kutah paper leh Pen chu ka pe a. A lo la ve teh mial. A thil ziah ka chhiar chuan ka nuih a za miah lo!

"Ka zun a chhuak a, toilet-ah min hruai rawh, chumi zawhah hremhmun panin kal la ka lawm viau ang," Țawng lo pawhin ka huat tur tâwk chu a ziak thiam ang tih lo rinthiam awm tak a nia.

Ka zun tir lo tawp mai zawk dawn emawni!?

Ka hruai lo ngam ta chuang lova, a îp thei leh dawn chai si lo, khum ațanga ka kuah thawh lai chuan a sam a tuai puat puat a, Mateo chu melhin, zaizir hian kal sawn turin a hrilh leh phawt a, ani lah chuan a sawi tum a hrethiam lo nge a la țhu ngar a.

"Ignacio, pawnlamah lo awm rih ta che, ka nupui hian kalsawn turin a duh che a nih hmel," ka tih chuan lungawi chiah lo niawm tak hian a chhuak ta a.

Toilet-a ka hruai luh dawn chuan pawm a duh leh tlat lo, dimtê hian a pên a, amah nena inrem lo tawpin a kal chhat chhat a, hmuh a nuam leh reuh si lo.

Ka pawm ta nawlh a, duh leh min haw rawh sek sek, hetia a awm chhan hi engvang pawh nise ka nupui anih ang ngeiin ka duatin ka ngaihsak tur a ni.

Luhlulin tihmawh viau țhin mah se, zaidam leh dawhthei taka ka enkawl a nih phawt chuan a la inthlâk danglam em em ang tih hi ka ring ve tlat..

Ka neih dan a fair bik lova, amah ka duhna ngawt ngaihtuahin a dinhmun tur lam ka lo ngaihtuah lo a ni. A sawi dan takah 'Leiba rulhna ka nih hi,' a tih lang lang lai kha ka hrechhuak a, a nâ ve dawn riauva hriatna ka nei; ama duhthlan pawh nimiah lovin a nu leh pa him nan a min nei kha a nia, hriatthiam chu a ngai ve in ka hria.

A zun zawh hnuah Cabin lamah pawm lut lehin ka muttir thlap a, a lainatawm reuh ka ti. A la rai zui leh ta nghal a, a chhiat ta lo hi Pathian hnenah lawmthu awm rawh se, fapa a nei a nih chuan ințhen a hnai kuar dawn si a, kei hian ka chelh thei meuh angem..

Villa Espanola
Alicante Spain
Amelia Evans(Lopez)
After 3days

Hospital kan chhuahsan ațanga nithumna chiah a ni a, kan honeymoon teh hrep hi! Lokal malêk ila țha tur a nia, Jerome-a min benna kha ka theihnghilh thei thlâwt lo. Kut min thlâk kher lo khan țawngkâ-in min chhâng ve mai se, kha thingkung ațang khan ka tla miah lovang.

Ka biang vûng pawh a ziaawm sâwt viau bawk, an eitur min pek hi ka hnê ngawih ngawih a, ka rilțâm a hnêm eih lo. Englai pawhin Jerome-an min vil reng a, tuiril lam ngawt chuan min tipuar hlawl lo ani.

"Cheese cake tal ka ei ve thei tawh angem?" Joe chu ka melh zauh a.

"Madam, a pawi ka ti khawp mai, vawiin chauh lo nghak leh hram rawh zanin ațang chuan i ei thei tawh ang," ati dam thluam a, Jerome-a kid kumhlunah chuan Joe hi ka ngaina ber, an vaiin ka chungah an fel vek nachungin Joe erawh ka ngaina fâl deuh.

"Cold coffee tal min siam sak thei angem? Ka pum a ruak vek,"

"Aw le, tehreng mai," a tho nghal vut a, ka harh ațang khan Jerome ka la hmu miah lova, magazine chhiar leh phone-a games khelh bâk engmah ka ti lova, zing ațang khan ka țawngchhuak ngam ve chauh; ka țawng zin deuh phei chuan a nâ zel a, a țul fê ah lo chuan ka țawng hek lo.

Hospital kan chhuahsan ațangin zantin kan mu tlâng a, min hlat takah muin 'i tenawm ber' ti niawm hrim hian min hlat dû nia. Zantirah bangkil lam hawiin a mu ngût a, ka harh apiangin min kuah chungin a lo mu leh si! Phakar lutuk!

Coffee leh cream bur kenga Joe a lo luh chuan ka țhut dan siamremin ka lo chhawn vat a, he pa hi a hlim theiin a kianga awm a hahdam ber mai.

"Madam, cream hi fian engzat nge ka telh dawn?"

"Ah, Joe, ka lo inbuaipui ang, khawnge i boss!?"

"Hospital-ah Ignacio nen an kal lawk a, an lo lêt țêp ang," Coffee min rawn chhawp nghal a.

Ka no lek lang zauhvin, "Ka inzawhah cooconut kung awmnaah min hruai la," ka tih chuan a lu a bu nghat a, pindan chhunga tawm reng te chu a ninawm ve e, Villa hnunglama coconut kung din țhupnaah khan ka awm châk tlat!

Joe chuan Villa hnunglamah chuan min hruai ta a, "Lung tam tâwk kha chhar khawm la, coconut rah khi invawm thlâk siak ang hmiang," Joe, angaihna hre vak lo hmel chu ka melh a, "Lung kha lo chharkhawm phawt rawh le, tunge themthiam zawk i han en teh ang," ti a ka cho zui chuan a tlawmngai ta deuh nge, lung chu a chhar ta nghauh nghauh va..

"Madam, indim i ngai a nia, i pasalin a hriat chuan min hau ngei ang," tihpahin lung lian vak lo chu ka țhutna bulah a rawn dah phei zel a.

"Lungngai suh, ka taksâ a dam alawm, ka kâ chauh hi a nia damlo, Jerome-an a hau che a nih chuan ka chhan ang che," tiin ka thlamuan ve ngial a.

"Reilote chauh aw.." ati ve ta nge nge.

Chumi hnu chuan ka țhutna ațanga ding chhuakin coconut rah bâwr țuih chu ka vawm ta a. Ka țhelh chiang kher mai!

"Vawithum ka vawm anga, chumi zawhah vawithum i vawm ve dawn nia," Joe chu a nui ta hawk hawk a, "Madam, nang ai chuan ka vawm tla hmasa ngei ang."

Ka vawithum vawmnaah pakhat chu a hnûnah a fuh ve mial! Kan piah deuhah chuan a tla ri pawp a, Joe makti hmel chuan ka nuih ati zâ..

"I hun a ințan e.." Ka țhutnaah chuan țhu lehin Joe-an uluk lutuka coconut rah atinzâwn chu ka nuih hak hak a, a vawm fuh ka ring hran lo, chuti maia vawm thlâk chi ninghal lo chuan, ka vannei hlauh zâwk a, atla mial a nih kha.

Vawihnih a vawm țhelh ta, a tawp nana a tin leh vang vang lai chuan, "Joe, engthil âtthlak nge maw in lo tih le?" Sam chu kan bulah arawn kal a, ngaihdan nih loh hmel takin Joe chu a melh a, ka hlau lo chiang e, thilpawi engmah kan ti hleinem.

"Sam, lo tel ve rawh, Joe hian coconut rah khi a vawmthlâk theih i ring em?" Ka lo ti vat a, nelawm thei ang berin ka nui sâng bawk.

A chance neih a hmang zo ta Joe'O Hara chuan vawikhat mah zuk vawm fuh lova! A tlawmngai ngang mai.

"I van tlaw ve, madam paw'n pakhat a vawm thla a nia, misual ûm tur pawh hian i tling meuh maw?" Sam-an Joe chu ala nuihzat veleh chhawng nia.

"Han vawm ve chhin la i hre mai ang, i vawm thlâk phawt chuan zaninah whisky bottle khat ka pe ang che," an pahnih chuan ding dunin coconut kung chu an melh chho vang a, Joe lah chuan Sam-a vawm hun chu nghâkhlel fê niawm hian a tûr sek bawk a.

"A țha e, whisky umkhat ka'n hlawh nghal te'ng," lung lian țha fê fê pathum chharin Sam chuan a vawm ve ta a, Jaja! A țhelh fai vek. Tukkhum dawmin a ding a, Joe lah chuan a la nuihzat ve em em a! "Kan vawm leh ange, bodyguard tlaw tak in ni," fiamthu-a ka tih chuan an inmelh zuk a, ka hmu reng.

Ka țhutna ațanga thovin uluk fê-in ka'n vawm leh ta a, ka vawm fuh mahse, a tla lo.

"Dios! Ka ui lutuk.." ka au zawnga ka biang chhung thip vang vang chu sawichhuah kher ka tum lo.

"Nangni kha, tu thu-in nge khalai hmunah khan in kal?" Jerome-a aw fiak țhak ri avang chuan hnunglam kan hawi dial a, a thinrim hmel chu hlauhawm tak a ni.

"Jefe..englo.." bah nawk nawk a, Joe țawng lai chuan ka lo inrawlh ta vat a, "Keima thu-in maw le, darling, inchhunga tawm reng zawng a ninawm êm atin ni.." ka hmelțhat dan ber ni a ka hriatin ka'n nui lui ngei a, ani erawh a meng rum ûl!

"Lut r'u, țhutkhawmna pindanah min lo nghak ang che u," Joe leh Sam melh chunga atih chuan, "Joe, saw saw min chharsak la, atui ka in duh a.." tiin coconut ka vawmthlâk kha ka kâwk vâ a, Jerome nen min melh tawn zak zak hnuah, "Jefe, ka chhar sak lawk ang aw," inthlahrung aw taka atih chuan ka khawngaih deuh!

"Chhar lovang, Villa-ah let rawh u.." ati hmuk a, ava'n sual tak!

"Amelia, MJS Company-a an boss nupui i ni tih i inhria em?" A kâwng dawmin min melh rûn a, ka hlau ve deuh!

"Aw hria e.."

"Ka hnathawkte nena lo inchhaihkual vel kha thilmawi a ni em?" ati leh hmuk a.

"Ka sawi tawh kha, inchhûnga tawm reng a ninawm êm alawm," ka thinrim țha ngam bik vak lo, a han sawi tâkah chuan boss nupui ka ni ve tlat sia, khatia coconut rah lo invawm siak kha a zia viau lo ka ti ve ta deuh.

"I la dam țhat loh mai bâkah țawng tam lutuk te kha a la țha lova, i tâna țha lo tur sawi ka nei ngai em ni? Luhlul leh lutuk mai!" Coconut tla chu chharin a keng a, "Hei hi tu vawmthlâk nge?"

"Keimah.."

"Daw suh, khawiah khan nang hian va vawm suh,"

"I duh leh Joe kha zawt la ti nia, nang khan i vawm tla thiam nguar ang," tihpahin a thil ken lai chu ka chhuhsak a.

"Coconut tui inchâk rual pawh i ni lo, i chhuah châk vang a nih kha," ati leh hrâm a, ka chhang peih tawh lo.

"Chutia ka nupui meuhin khitiang rah i duh te chuan ka lâksak ngei che a ngai a nih chu.." min elsen niawm tak hian a kiai suk a, lung chu chharin a vawm ta a, a rualin pahnih a tla!

"Ah..Jerome.." Ka țawng hrelo ang hmiahin coconut tla chu a chhar a, "I lu bûra i thluak tihfîm nan a tui kha i in dawn nia, Mrs.Evans,"

"Ih..i thusawi kha han sawi nawn leh teh.." ka ti bah nawk nawk a, Mourizo țawngkam chiah chiah!

"A eng ber kha maw?" Min ngaipawimawh awm lo niawm tak hian a ke chuan lung a chhuih lêng lawp a, thinrim a ang zawk mah!

"Engmah.." ka inher nghauhva Villa lam chu muangchângin ka pan ta a. Ka hnungah a rawn kal tih en kher lo pawhin ka hre thei! Jerome-a huhâng hian min zem țan tlat. Mouri nen an inan êm avang hian ka buai leh thut zel! Mahse, nitheiin ka hre si lo.

"Amel..!" Min ko ri ka hre tho nâin ka hawi lêt duh chuang lova, ka dang ro lutuk leh ka rilțâm huam huam chuan ka thin tertek a kaitho țan tlat.

"Amelia, titau ve ziah suh," ka kiangah rawn kalin ka thil ken chu min lâksak a, i chau a nih kha, ka lo pua ang che.

"Aih.. ka kal ve thei.."

"Luhlul chhuah a hun lo, duh aiin i țawngtam mah mah, i ka chhung an țhuina kha a septic vaih chuan kei hian nâ ka ti dawn lo, thil ei thei lo leh nâ ti tur chu nangmah tho i ni," ka bânah rawn vuanin a țhu hniam a, "Le, ka hnungah lawn la, coconut hi chu midang kan lâktir leh mai dawn nia," zaidam taka atih chuan ka hnial duh ta bik lo.

A hnungah chuan pakaiin a kâwngah ka kherh nghal a, a taksa lumna chu ka hre rang kher mai!

"Villa thlen dawnah min nghat rawh aw.." ka ti sap a.

"Kan pindan thleng law law in le, ka nupui ka pua animai a, engmah sual a ni lo, hahdam takin awm rawh," dam thlupa ațawng apiang hian Jerome Evans pangngai angin ka hria a, thinrim leh vin deuha min biakin Mourizo Soreno, induh deuh kha ang ka ti țhin. An blood type a inang talin a nia ka rin.

A hnungzângah chuan ka bei thlar a, engmah ka sawi tawh bik lo, ka pum ri raih raih chu a lo hre ve a ni ngei ang, "I ril a țâm animaw? Chhunah eng nge i in?"

"Cold coffee.."

"Musroom soup ka siam dawn che nia.." Villa kawt kan thlen chuan Ignacio a ko lawng lawng a, ani hian a hote zingah chuan Ignacio hi a ngaina berin ka hre ve thung.

"Eng nge ni ta Jefe?" Ignacio chu a mengphar âwk a, Jerome-a hnunga ka awm chu mak a ti tih hai rual a ni lo!

"Coconut hmunah va kal la, i hrethiam mai ang, chuan adang pali vel i rawn lawh belh dawn nia," eng atan nge atih nghek nghek le..?

"Aw le, Madam i țha em?" Polite takin min zawt a, a nui deuh.

"Umn, țha e.." ka'n lai nghal ringawt a, chimawm viau țhin mahila ho tê-ah hian ka zum leh dûk zel.

Inchhunga min luhpui chuan Sam leh Joe chu an ka hau a, mit ka siai zauh chuan hrethiam ber niawm hian an nui țhû a, "Nangni pahnih kha, nakinah ka be duh che u a nia," Jerome chu a la lungawi chiah lo nge a aw a ram leh hmurh tawh a, nichina min biak dan nen kha chuan inang lo tak a ni.

"Yes, Jefe.." anti rual țhawt a, a nui tawp chat bawk.

"Tikhan lo țhu la, soup chu ka'n siam ange," dining chair-ah min țhuttir vei thlap a, tui thianghlim intur min chhawp nghal bawk! Ka tui in a hâl tih hresa ang mai a nia lawm le.

"Jerome, min nei hi inchhir châng i nei țhin em?" Ka rilrua awm hmasa ber ka zawt pawp a.

"Inchhir tur ka ni em ni? Ka duh a ka neih che i nia lawm," zawi supa atih chuan ka ngawi zui ta rauh rauh a.

Fridge chu hawngin mushroom tam angreng tak leh tomato tihvel a phawrh chhuak a, a siam thiam pawh ka ring chiah lo. Mahse, min siam tumna rilru a pu ve hrim hrim hi ka lawm viau!

Mipa ka hnaih ve apiang ten nâ taka min siam țhin avangin tu mipa mah hi ka ring tawh lova, Jerome Evans hi chu a danglam bik deuh tlat. A lakah ka sualin ka chimawm hle tih ka hria a, chuti chung chuan dawhthei takin min en a, chimawm chhuah tawh loh hrâm ka tum ve tawh ang. Mahse, a sual leh thut a nih chuan ka nundan ka thlâk bik lo turah ka ngai.

Kan chunga țhat chhuahtu na nâ na chu an lakah sual a har ve alawm le..

"In ngaihtuah ngut ngut lo khan soup hi hawp rawh le, cake i duh tel em?" Bowl-ah soup a khat piauvin a suak a, zaidam leh duat taka min biak hian ka țah zuk chhuak tlat pek a!

Ka nu leh pa hian engtik ațangin nge min duatna țawngkam an chhâkchhuah tawh loh!? Chu chu thuhran, ka hriatpui miah loh an leiba rulh nan min hmang a, ka hotel thlengin min hralh sak a nia..

"Ka lawm e," Ka mittui tling pam chu ka duh lo kher mai, ka țap duh teuh lo.

"Amel, cake chu.." min biak leh chuan ka phu zawk a, "Englo, doctor-in ei a phal tawh em ni?"

"Tlemtê te chu a pawi nâng, pum ruak lutuka awm kha a țha lo zawk a nia," Cheese cake lian vak lo min chhawp tel a, ka nui ta var var mai.

"Ka lawm e.."

"Ka lawm e, ti reng lo khan ei rawh vawiin hi i danglam tlat," ka kiangah a rawn ding a, chîk zetin min en vung vung nia! A nuam viau lo.

"Joe, ka dil a, a remti lo a.."

"Chu pa mai mai chu(h..)"

"Ah..zanin ațang chuan i ei thei tawh ang chu a ti thova.." Joe chungah a thinrim ka hlauh vangin a thlavang ka hauhsak ve angai tih ka hria..

"Joe O'Hara pawh chu i va țan ve a!?" A tûm nghal hmuk a.

"Chutiang a ni lo, i ei ve dawn lo em ni?" Tiin thildang ka sawi ta daih a, tun hunah kher hi chuan inhau ka châk hlawl lo.

"Ei phawt rawh, ka la puar rih a, wine ka lo in ang," ati dam leh thluam lawi si!

"Ka duh ve.."

"No," min chhâng tawi tek tawk hle mai, hnial ngam chi pawh a ni lo.

Chumi hnu chuan soup chu hâwpin Cake chu tlemtê tê-in ka keih a, wine in paha min thlir reng chu ka mitsirin ka hmu ru reng. A soup min suah ang ang leh cake chu ka ei fai vek a, a nui huk nia.

"Vawikhatah tam deuh ei lovin a khât mawi tâwkin i ei zel tawh dawn nia Querida(Duhtak)" ka samah a chûl zauh a, a chêtdan dam thlup leh cool ruih chu ka duhzawng a va ni si êm..

Choka ațang pawh chuan keimaha ka kal ala phal ta lo cheuva! Min pawm nawlhin kan pindan lam min panpui ta a, hnial enah ka en bik lo. A nuam ve tlat.

Khuma min nghah hnuah rawn kun hniamin a hmui lum ham ham chuan ka chalah a rawn fawp a, "Hmangaihna ka chenpui châkzia che hi i hria em?" Ati ta sup a.

"Engin nge dal che a," a mitah chiang takin ka en a, "I la dam kawr si a, ka tihnat che ka hlau maw le, nangmahin i inbual thei tawh angem?"

Nihnih chhung kha min bual ziah tak alawm le..

"Min bual leh mai la," nui chunga ka chhân chuan, "Ka insûm thei tawh kherin ka ring lo ania," a nui suk a.

"Ok, keimahin ka inbual poh aniang chu.." titau awkâ deuhvin a hria nge min en vat a, "Tihtauh awih loh ka tih kha, zanin hian inleng kan nei dawn a, nalh taka i lan ka duh a nia, ka nupui hmu châk an awm tlat," wardrobe lam panin a kal a, eng nge a tihtum pawh ka hre chuang lo.

Wardrobe chu hawngin 'evening gown' sen hlar a rawn phawrh chhuak ta a, "Vawiina ka chhuahna chhan chu ka nupui Amelia Evans tan ka bazar maw le," High heel dum nalh zet a rawn phawrh leh phei chuan lawm avangin ka nui lo thei lo.

"Ka lawm e, kan inbual dun ngei angai ta tihna anih kha.." sâwmna âw a ni tih mi â ber tan lo chuan a hriat theih a, ka pasal lah mi â a ni der si lo.

Bathtub chhungah Jerome-an min kapkalak a, ka hnung sahbawn a hnawih pah chuan ka hnute a rawn tawk zauh zel a, huat enah ka en bik lo.

"I vun mâm zia hi i hria em?" ka mal leh khelbâwr vel chu a chûl lawr dan dan a, "Khatia min khawih reng kha chuan kan tâwpna tur i hriat kha.." a mipatna khauh deuh țang chu ka tawk ve zauh a, "Ka nupui hi khawi hmunah pawh hmangaihna ka chenpui thiang a ni." Tihpahin ka hnute-ah bawk a țuan leh a, hnial tumna rilru ka put miah loh bâkah ka chhunglam rawn nung sarh chu ka haider thei bik lo.

"I hmui fawp miah lo pawh hian a tawp kan thleng thei tho a nia," alam hawiin min kuai her a, ka biang leh nghâwng vel a hmui hnawm chapa a rawn nul chuan keimah zawkin ka fawp ta a. Inlahrang vatin, "Duhtak, a țhuina an phelh hma chuan thuawih a țhain ka hria," ati sup a.

"Ka fawp ve duh che a.." zak deuh taka ka tih tâkah chuan nui suk chung hian, I kâ anat hma zawng khan min fawp țha peih lova, a theih loh tih veleh min fawp châk leh tlat si," kun hniamin dimdawih fahranin min rawn fawp ta a, a țawngkam kha hundang chu nise ka haw viau ang. Mahse, tun hun ani tlat a, ka haw phal lo chiang asin.

Bathtub-a duhthawh leh uar taka hmangaihna min chenpui chu ka rinphâk bâka nuam a ni. Kan awmdan a rem chiah lo bawk nen muangchang lovin bathroom chu kan chhuahsan ta a.

Vawihnih lai nawmna vawrtawp ka thleng hman nia maw le!

"Ka tinâ che em?" Sofa-ah țhuin intur a dawm leh rân tawh a, tawnzau dum a hâk phei hi chuan Mouri ka hrechhuak lo thei lo.

Jerome hian vawikhat mah a bek leh hmuihmul, khabe hmul pawh a zuah ka la hmu lo a, a faivang reng mai. Mourizo erawh a inzuah deuh chhap reng kha a nia, an sam rawng leh style a inang miah lo bawk. Chu chu an danglamna langsar zual a ni a, an mitmu rawng pawh a inang lo bawk. A bâk zawng chu inang tak anni! Ka thinlung hian Mourizo Soreno a ni tlata hriatna a nei a, chu chu tihreh thuai dan ka ngaihtuah angai tih ka hria.

"Amel, ka biak che chu.." a vin hauh lova, mahse, warning lam rawng a kai deuh.

"Eng nge i sawi kha!?"

"Yah, ka tinâ che em? Tih ka zawt che maw le, kha aia dim deuh tur che kha ka nia.."

"Engmah chutiang a awm lo, dinner pangngai ka ei ve thei dawn silova, a zahthlak riau lo'ng maw," ka tih chuan, "Ka kiangah i awm dawn alawm, i eitur special tak a awm ang, tumah venthawn an ngai lo ania, ka țhianpa girlfriend pawh British mi a nia, a eitur ka order diam tawh," ati awlsam mai a, tunge anih zawt mahila ka hriat ka rin loh vangin ka zawt lem lo.

"I hmai i chei chhungin Joe leh Sam ka zuk be lawk ange," Whisky chu a in hlek a, a hau vaih chuan a chi miah loh.

"Vawiina min hruaichhuah vanga hau i tum a nih chuan keima sawm zâwk a nia, Joe kha min hruai turin ka ngen tlat a," zawi sap a ka tih chuan a nui suk a.

"Ka hau dawn hleinem, eng emaw hrilh ka tum mai a nia, insiam rawh le.." tiin ka chhânna pawh nghak lo chuan a chhuak ta a.

Hmeichhe vannei ber chu ka ni lo nâ a, hetianga min duat reng chuan kei hian ka la hmangaih ngei ngei ang maw le.

Thingkung ațanga ka tlâk khan Jerome hi a mangang hle tih Joe khan a sawi a, 'Khawngaihin Jefe thinrimna tur hian awm suh, a ngaihsak hle che a nia,' tiin min hrilh a, tuna a awmdan en hian thil nithei a ni tlat. Ka mize țha lo lai siamțhat hi a harsa lo turah ngai ang.

Sana ka en a, tlailam dar nga ari chiah.

Tuna insiam ka peih bik teuh lo, kekawr leh shirt inbel sawk sawkin inhnuaiah ka chhuk ve ta a, ka kâwng na zeuh zeuh leh ka kâ chhung nâ tih loh chu na dang em em ka neih pawh ka hre lova. Vannei lel lawl tak ka ni.

Țhutkhawmna pindanah Jerome leh Sam, Joe, Ignacio an lo țhu țhap a, ka hmel an hmuh rualin an ngawi hmak. An thusawi ka hriat an hlau deuh reuh emawni.

"I la insiam nange?" Jerome-an min lo be vat a.

"Ala hma em alawm, coconut tui kha ka in duh," ka rilrua awm hmasa ber ka sawi leh pawp a.

"Ignacio, va siam sak rawh le," ka sawi zawh rual rualin atîr nghal a, ka nuih aza angreng viau. An vai hian Jerome hi an zah em em a, an rinawm hle bawk.

Ignacio kal liam lai chu ka en zauh a, an zingah chuan a naupang berin ka ring a zuanzâng khawp mai. Insual pawh a thiam viauin ka'n ring ngawt pek a.

"Lokal la lo țhu rawh," Jerome chuan ka bânah vuanin Sofa hnai ber chu min panpui a, min duat hmel hliah hliah.

"Madam, 'straw' i duh tel em?" Glass no-a coconut tui rawn keng chungin Ignacio chu a rawn lut a, a English hman hi a mar nalh ve vak lo in ka hria, Spanish lam a nih ka ring mah zawk.

"Tikhan a pawi lo," ka ti liam puat a, glaas no chu banin ka thâwkkhat nghal pawp a, ka pum a dai raih raih thei nia.

An thusawi lai tibuai deuhva ka inhriat vangin nuam ka ti chiah ta bik lova, "Ka chhohsan ang che u, insiam a hun tlat," Tihpahin ka tho chhuak a, ka pasal hmuiah chuan ka fawp ta zauh a, Sam nui suk chu ka hmu ru reng.

"Ka lo chho ve nghal ang," Jerome chuan ka darah min kuah a, a kid te nui hui chu a hrelo der hmiah, kan inngeih hian anni ho hian nuam an lo ti ber anih hi..

Dressing table hmaah țhu-in ka hmai ka chei malh malh a, ka biang vûng ala reh fel loh avangin ka lungawi chiah lo.

"I sam kha engtia tih nge i tum?" Ka rin loh lam daih min zawh avangin ka melh hau a, "Ka hrechiah lo, duh dan deuh i nei em ni?"

"Khawi ka lo siam ang che," ka hnungah rawn dingin samkhuih chu a ban zawm zat a, uluk zeta a khuih hnuah rang zet zet hian a phiar ta a, hei pawh Mouri tihdan chiah!

"Lawk," ka tih chuan a chawl dat a.

"Ih..Mourizo tih țhian emaw, inchhung hnaivaiah an awm em?" A mitmeng buai nak chu darthlalang ațangin ka hmu hman.

"Aih chutiang ka hre lo," ti hmukin ka sam bawk chu a phiar zawm leh a, ka zawt nawn tawh lo. A phiar zawhah samkhuih chu min rawn pe a, ka mitah chiang taka enin, "Mourizo chu tunge a nih?" A ti thüm ta chhak a.

"Ih..tumah, ka zawt mai mai che," chîk zetin min en a, a hmelah angaihtuahna awm ang ka hrethiam lo.

Kamis dum hain kekawr dum țhui nalh zet a ha bawk a, a kawnghren buckle hrawl lam lek lek chu rangkachaka luan a ni. A inhmeh thlâwt!

"Min en reng lo khan i thawhnaw inbel rawh le, inhnuaiah ka lo nghak ang che, an lo thlen laia awm lan loh kha amawi chiah lo deuh va," ka biangah a fawp a, a rimtui hman rim chuan ka hnar a verh zar mai.

"Bien (Awle)"

"Rei lutuk suh aw," tiin dawhkana a phone dah chu la-in a chhuak zui ta a, a pian dik thlurh hi en reng mai ka duh hial..

A thawmhnaw min leisak chu ka inbel ve ta a, a hma a min leiho ang bawkin ka size leh thlap! Pheikhawk pawh chuti tho chu!

Ka chhuah hmain darthlalangah ngun lutukin ka inthlêk leh ngial a, ka confi leh viau tawh. A țhiante hma a zahpuiawm lova lang turin min duh bawk a, chutiang chiah chuan ka awm tur a ni.

Țhutkhawmna pindan ka thlen chuan mipa ka la hmuh ngai pawh nilo sâng zet hi Jerome nen an lo ding dun a, an inrualkhat hmel viau. Pawnlam hawia ding hmeichhia chu a hmel ka la hmu lova, a pian dik thlarh leh a sam buang thâng ațang chuan a nalh thawkhat hle tih ka hre mai, a hmel pawh a țhat ka ring.

"Darling, kan lo nghak reng tawh che a," Jerome chuan ka kiu-ah a rawn vuan a, a țhianpa chu a mitmei zauh bawk.

"Antonio, hei hi ka nupui Amelia a nih hi," Antonio chu a nui nghal var var a, a hmel nung sarh chu hmuh a hahdam hle..

"I nupui chu a hmelțha hle mai," tukverh bula ding hmeichhia kha a rawn hawi ta a, Dios! Hei chu a ni thei lo!

Hilda Solis mit leh ka mit chu a intâwk chat a, henu hi ka nun tichhe vektu, ka boyfriend Elias Chanchez girlfriend kha a ni!

Ka Hotel Enchante room pakhatah saruak ngalngata an lo awm dun ka phawk lai kha ka mitthlaah a rawn lang uar uar a, ka kut ka hum ruh nghal țang mai.

Amah zawng hian hun tam tak ka khawhral a, zawhna zawh tur tam tak ka neih lai khan ralkhat ațangin min bei a nih kha, a hmel hmuh tur awm silovin phone hmangin min vau chhen a, min nuihsawh bawk.

Chuti maiin ka palzam lovang. Tunah hian remchang chuhin ka hnek thal tawp dawn nge? Sâng takah zuangin a âwmah ka kick bur zawk dawn em ni ang?

www.storyfb.com mizo story thar englai pawhin chhiar tur a awm reng
End of Chapter-14

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 18313
Joined: April 30th, 2016, 4:07 pm

Unread post by Ngaia » March 25th, 2018, 11:50 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-15

MJS Villa
Jerome Evans
7:00 Pm

Antonio leh a girlfriend Hilda Solis lo thlen lai chuan Amelia ala rawn chhukthla ve lo va, Antonio hi Spain-a ka company Manager a ni. Ka ringtawk em em a, chutih rualin a lerh lutuk leh hmeichhe hrang hrang a kawp lâwr hi ka huat zawng tak a nia, ka khak ve zauh zauh tak nâin a sim hleithei lo. Tuna a lo hruai Hilda ngat phei hi ka ngainat zawng a ni miah lo tih ka vawikhat hmuhna ațangin ka hre mai. A mitmeng verther hmel zet a min ítna lo lang kha ka hmuh hmaih miah lo.

Amelia hmel ka hmuh rualin ka nui nghal var var a, a tân thawmhnaw leisual a awm thei tak tak dawn lo a nih hi, ka pêk ang apiang lawm takin a inbel a, a phunnawi ngai hek lo, hei tak hi Amelia, ti Amelia tu a ni rêng bawk.

Kawrfual sen hlar ataksa rem zaiha țhui ka leisak ngei kha ha-in a inhmeh lehpek hle a, taksa langtam chi ha lo tura ka duh deuh avangin a kawr nghâwng pawh a zau uchuak lo, remchângah Diamond țhi ka la present ve ngei ang, a vun nung sarh nen hian a inrem dawn êm asin.

Antonio hnenah chhuang takin ka inhmelhriattir a, ka manager mitmenga Amelia a ngaihsanna lo lang chu ka hmu chiang hle. A nalhin a hmelțha ve thlâwt a ni. A hnute kawh vah leh a kâwng fêk rât te hi mipa tana itawm tak a ni a, ani lah hian chutiang lam a ngaihven eih si lo! Anihna ang ang hian alang chhuak tawp a, mipa hrim hrim hi a hua emaw tih tur zawk a ni. Keia tan erawh a lawmawm phian.

"I nupui chu a hmelțha hle mai," Hilda țawng chhuah ruala Amelia insangmar at chu ka lo hmu reng a, a hmel hmu chiah lo mahila Hilda hi a lawm tehchiam lo a ang riau! Țawng miah lovin a en char char a, a kut a hum ruh țang danah thinrimna eng emaw nei a ang.

"Intur kan dawm phawt dawn em ni ang?" Kan boruak tih zangkhai tum takin intur dahna lam chu ka pan a, housekeeper awm lo mah se zanin hian ka nauteho in an buaipui fel vek tawh a, eng hunah pawh ei mai theih a ni tawh a ni.

"Whisky ka lo duh ang,"Antonio chuan ka nupui chu a melh zauhva Amelia pêk kher a beisei a nih hmel! A khawsak phung ve a nia, tlêma hmelțha leh a nalh tih zawng hi chu a zuan chat zel a, ka nupui erawh a rin ang ani dawn si lova, zanin chu eng emaw ti tiin a nuam phian maithei.

"Duhtak, wine in phalsak i ni e," Amelia chuan ngai a awh ta a ni ngei ang nui sâng hian min melh a, a va'n hmelțha vawr vawr tak! Hilda leh Antonio an țhudun a, keini nupa kan țhu tlâng thung.

"I nupui chuan whisky a ngaina ve meuh nange," Amelia melh kar paha Hilda țawng chu ka en reng a, min bia nimah se Amelia'n a chhân ka ring tlat, ka ring dik chiah bawk.

"Miss Solis, whisky te chu ngaina tehreng e, mahse, ka pasalin wine chauh intura min duh chuan ka in mai tur a ni dawn lawm ni!?" Ati khauh a.

"Pasal i nei țha hlein ka hria, tunlaiah chuan sum hian thil atithei viau a nia," Joe-a whisky rawn sem ban paha tiin a nui sâwng a, a hmui hnawih rawng uk kharh chuan ati lang râpawm lek lek zawk.

"A nih ka ring, Antonio hi a hausa ve tho a ni maw," Wine lem khalh chunga Amelia țawng chuan ka nuih ati za hle a, an inbei tâwk dawn riau mai, hmeichhe inhnialna a lo inrawlh ve hi thilmawi pawh ni nghal lo chuan..

"Hausa tih lemah, i pasal company-a Manager hnathawk lai ka ni e," Amelia melh paha Antonio an atih chuan ka nuih a za tulh tulh a, ka nupui țawngkam khermei leh huat dâwna huat tham nimang si lo, huat loh dâwna ngeiawm deuh tho si ang kha han chhâng ve teh se.

"Anih chu, Enchante Hotel-a ka manager ni țhin Franco saw a fel khawp mai," Wine tlemtê tê-in a lem hlek hlek a, a confi thei lutuk hi a mak ka ti zawk!

"Enchante saw i Hotel a nia maw!?" Antonio chuan mak atih hmel hle a, "Aw ni e, tunah chuan kan hralh tawh a, Spain-ah Hotel ka nei tawh lo." Amelia țawng chhum hmak chu a ngainatawm loh kher mai, engvanga Enchante chu rawn sawi chhuak nge anih ka hre hek lo.

Chutia Antonio leh Amelia inbiak lai chuan Hilda erawh a ngawi reng a, rum zet zeta ka nupui a melh lai chu ka hmu reng, hemite pahnih hi an inhresa chiang a ni!

"Dinner kan ei tawh mai dawn em ni ang," Ka tih chuan min pawmpui tih lantir nan an bu nghat nghat a.

"Mrs.Evans, dinner ei zawhah a fâla biak lawk che ka duh a.." tiin Hilda chuan dining hall a pan a, a fâla inbiakna hun pêk ka tum reng reng lo, henu hi Ramon Salia Ui khawi lai pawh a ni maithei.

"Tehreng mai, Hilda.." Amelia'n dam dapa atih chuan ka thaw huai thei, thin tertek nei nimah se insum hun a hre ve viau tho a nia.

Dinner kan ei chhung zawng chuan Antonio nen hna chungchang sawiin kan țawng a, hmeichhe pahnihte erawh an inmelh relh relh duh chauh a ni.

"Jerome, study room-ah kan inbe lawk dawn em ni ang?" A plate nawrsawnin Antonio chu a ding chhuak a, "Lovely, Mrs.Evans nen lo inkawm lawk rawh u aw," Hilda lam hawiin ati zui zat a, a girlfriend nen hian an mizia a inang thawkhat viauin ka ring.

Ngaihngam chiah lo deuhin Amelia chu ka melh a, kal rawh ti a mitmei min hmuh tâkah chuan kun hniamin a biangah ka fawhsak zauh a, dining hall chu kan chhuahsan ta a..

8:30 Pm
Study Room

Awki sâng taka Hilda țawng lawng lawng ka hriat chuan Antonio ka melh vat a, ani paw'n hre ve tih hriat tak hian a ner sawk a.

"I girlfriend leh ka nupui an inhnial a ang hle mai," ka tisup a.

"I nupui țawngri ka hre miah lo, Hilda rui hi a țawng lawng lawng zel alawm," ati liam puat a, mahse, ka ngaih a țha chuang lo.

"I hre kher lovang, a thinrimin a țawng ve vak ngai lo, rik chawrh a nimai.." ka tih chuan awih lo niawm takin a nui a, "Chutiang hmel pawh va pu suh, eng tactic nge i hmana khatianga nalh leh hmelțha i neih chat theih le.."

"Ka nupuia nei tur hian ka beih fê angai reng a ni."

"Model chu a ni lo tiraw!" Ala țawng lai mêkin a ri bur a, Antonio mengphâwk lutuk ka hmuh chuan,"I kal teh ang.." Tiin ka tlan chhuak nghal a, khawnge ka naute ho hi an awm zawh le, ngawiteh, cottage-ah intur dawm an tum tak alawm le!

Țhutkhawmna pindan chu a hnawk nuai a, center table chungah Hilda chu lo dingin Amelia erawh kilkhatah a ding reng a, chêt tum hmel a pu lo. Ani leh ni lo angin a ding zum zât a, a dam țhalo tih ka hre chawpchilh.

"Hilda.."

"Amel,"

Antonio nen kan țawng rual dun țhawt a, Hilda chuan rum lutuka min rawn melhin, "I nupui hur herh zet hi i thunun deuh angai dawn a nih hi.." a nui zui nia, zak lo lutuk! Țawngkam a duhtui lo hle mai.

"Ka Villa-ah hian buaina i siam ngam a maw!?" Ka sawi zo chiah, Antonio chuan Hilda chu pawmthlâk a tum a, a lo duh îkhaw lo mai.

"Saw nu saw ka that dawn khawp," A kutzungchalin Amelia chu a kâwk a.

"Ngawi rawh," Hilda biang a ri nghal țhuai a, Antonio-an a benna chu khawihin, "Tenawmpa, i boss nupui chu i hlau deuh em ni?" Ala ti zui hrâm nia.

"Amel, i țha em?" Amelia dinna chu engtiklaiin nge ka thlen hman ka hre lo. A hmel a dâng lap a, a mittui a tling pam bawk! Vawikhatmah hetiang hmelpu hian ka la hmu ngai lo a, ka thin a sa zak mai.

Min chhâng lovin a hmui a hup a, a chil lem khalh ri chu a ring kher mai.

"Tui in rawh aw," Sofa hnai berah ka țhutpui a, tui la tura ka din rualin vawilehkhatah a uak tuar a, a luak ta bawrh bawrh mai! Lalpa leh!

"Amel, i țha em?" A hnungzângah ka chul hauh hauh a, Hilda leh Antonio chu melhin, "Antonio, kha nu kha chhuahpui rawh, kut ka thlâk hma hian," ka aw a ring hauh lo, mahse, thupe aw a ni.

"Kan thusawi lai kan la sawi zo reng reng lo, i nupui khan a tider a ni lo maw Mr.Evans, actress nupuiah i lo nei reng a nih kha.." ala țawng zawt zawt nia, kuthlâk êm chu tiin ka insûm a, Antonio hrehawm tihmel ka hmuh chuan ka khawngaih viau, a bialnu rui țhing lutuk hi a tuar dawn anih hmel.

"Jerome pawi ka ti khawp mai," inthiam lo takin ati sup a, Amelia buaipui angai bawk nen ka thinrim hlur mai.

Antonio leh Hilda an inpawh châwt châwt lai chuan Amelia luak pawh a reh fel tawh a, tui in khawlh khawlhin Hilda chu ngun takin a en leh tê tê a, chutah a țhutna ațanga muangchânga dingchhuakin, "Miss Solis, sawizo turin ka inpeih e," a aw chu leh!

"Amel kaltir rawh keiman ka chingfel ang," ka tih chuan tür khai hian min melh a, ''Mipa leh mipa inbuaipui ula hmeichhia chu hmeichhia vêkin le.." tisapin kawngkhar bula ding Hilda Solis chu a pan phei ta a, pheikhawk pawh a bun tawh lo. A kawr kha luak khum lo in chhuatah a luak zawk kha a nia, a hmela thinrimna lo lang kha bengdaih chi rual a ni lo.

"Miss Solis.." Amelia'n a koh leh chuan meng ling hlar chungin a rawn hawi lêt a, Antonio chuan min rawn melh zauhin, "Jerome, i nupui hi..."

"Tikhan sawifel tir rawh, ka nupuiin sawi duh a nei a nih chuan.." Ka ti sup a, Antonio hmela hlauhthawnna lo lang chu ka hmu reng, a hna in a tuar ang tih a hlau te pawh a ni mahna.
Hilda bân a chelhna chu a thlah ta ruai ruai a, ka nupui hi mahni invêng zo lo khawpa nêp a ni lo. A hmeichhiatpui lakah ngat phei chuan..

"Min la rawn pan ngam elaw!" Hilda chu a vin hle a, "I duh chu sawi ta che, min hre ngailo angin i lang der leh zâwk dawn nge.." Amelia sawi zawh hma hmain Hilda chuan, "Tenawmnu," Amelia ben tumin a kut a lek chhuak a, a ni'n a lo man chat thung. Hnung lamah a herh sak ta a, Hilda a țê ring țha khawp mai, ka nui suk.

"Ka Hotel-a Elias Sanchez nen saruaka in mudun lai video kha phawrhsak kher i ngai em ni?" Amelia chuan zawi sapin a ti ta a. Hilda hmela hlauhthawnna lo lang zawk chu ka hmu hman.

"Mrs.Evans, engmaw i sawi?" Antonio makti hmel chu a khawngaihthlak kher mai.

"I girlfriend leh ka ex-boyfriend Elias Sanchez te sex hmang dun lai video ka nei tih ka sawi tumna a nia, tunah pawh an la inthlah chuang lo," tipahin Hilda bân chu a herh leh salh a.

"Ka hmuh phâkah i awm leh emaw, phone call hmanga min rawn tibuai leh a nih chuan he i sakhmel phakar lutuk, mipa bum nâna i hman hi plastic surgery pawha siam țhat theih loh tur khawpin ka sawisa ang," a sawi zawh rualin Hilda bân chu a phih dawrh a, a țé ngam eih tawh lo. Ameng khup zâl zâl nia.

"Antonio, pawi ka tikhawp mai, i bialnu chanchin hi ilo chhui chiang ve deuh dawn nia," ti a inher hmakin vawikhat pawh hnunglam hawi tawh lovin ka lam a rawn pan a, min la nuih sak zui a...

Antonio te pahnih chhuah hnu chuan ngawirengin kan țhu dun a, sawi mai tur ka hre lo.

"I duh leh lo han chho la, hei hi kan tifai lawk ange," A luak kha a kâwk zauh a.

"Angai lo, midang ka'n ko ange.."

"Ka tifai thei reng alawm, anni hlim lai koh leh kher kha a sualthlâk" tiin choka lamah a phei a, intur ka lo dawmsan thung.

Nichina a thusawi awmzia kha ka ngaihtuah vang vang pawhin ka hrethiam thei chuang lo. A ex- boyfriend leh Hilda video chu eng atan nge atih reng reng ni, nge, ani hian ka hriat lovin mipa dang alo nei ru reng zawk! Nei ni ta se, inhmuh ve awm tak! Elias Sanchez tih hming chu ka hre tawh chiang a, khawi ațanga ka hriat nge ka hre lo.

Study room-a kan awmlai khan engtin nge an lo awm tih lah kan hre der si lo, Hilda khan Amelia hi kut a lo thlâk em ni ang? Khati vaka a luak kha ngaihțhat loh rûkna ka nei tlat!

Kan pindana kan chhoh hnuah chau awm zet hian khumah a țhu a, "Jerome, honeymoon hmanga kan kal ta kher kher hi a pawi ka ti," ati sap a.

"Eng ati maw!?"

"Buaina hlirin kan tawng a, zanin boruak te kha ka kham hluah hluah," a kawr hâklai chu hlipin towel-in a intuam hlân a, a cher deuhva ka hriat chu le.

"I ka chhung țhuina an phelh hunah kan haw dawn nia, karkhat a ral țêp a lawm," ka tih chuan dar san âk chungin bathroom-ah min luhsan ta a, amah nen inhau lo mahila Antonio te pahnih vangin kan inkâr boruak pawh a nuam lo zo vek. Tumah inlêng nei tawh lo ila a țha a nimai.

Ka thawmhnaw hlipin khumah ka mu zar a, kiltin ațanga buaina kan tâwk reng hi ka hnê takzet. Los Angeles lama kan kir leh hunah phei chuan ka hna-ah nitin kal angai anga, Amelia hian eng nge alo tih ve ang? A naupai chungchang lah ka la hrilh ngam der si lo. Rilru hah zetin ka thaw hawk a, mipa ka nih angin engpawh hmachhawn ka huam tur a ni.


After 1 month
MJS 4935
LA California
Penthouse.

Spain kan chhuahsanna pawh thlakhat zet a ni tawh a, honeymoon hmang nuam lo berte zinga mi kan ni ngei ang. Jerome nen kan inkâr erawh a hma aiin a țha zawk a, Hilda te rawn kal zan bâk kha buaina kan tâwk tawh lem lo.

Tunah chuan LA-a Jerome-a Penthouse nuam leh changkang zetah ka awm dar dar a, ka nu ka ngai viau nâin vawikhatmah pasal ka neih hnu hian ka la be lo, vawihnih min biakpawh tumin min lo call tawh a, chu pawh ka chhâng ta lo kha a nia.

"Ignacio, tuvawt min lo lâk lawk ta che," Jerome-a ka kianga a awm loh lai chuan Ignacio leh Joe hian min vil reng a ni. Sam erawh chuan Jerome-a a zui a, bodyguard sawmpahnih kan nei a, midang hriat mumal ka nei lo.

"Madam, Jefe in a be duh che," Tui bottle min pek pahin Ignacio chuan ka phone min rawn pe a.

Phone ka pick rualin..

"Umn sawi la.." ka'n ti nghal ringawt a.

"I țha em?" A aw ril ruih leh thûm lam deuh hi hre fo mahila ngaiah ka nei hleithei lo.

"Yes, i rawn haw dawn tawh em?"

"Amel, englo a nia, dinner ei turin min lo nghak lo mai rawh, kan meeting dawn a, ka ei nghalin ka ring." Atih chuan ka ner sak a. Mahni chauhva ei ka ning tih a hre ve reng si a.

"Er..awle, i lo haw tlai loh ngei ka beisei,"

Kan inbiak zawhah phone chu Ignacio ka pe leh a, ka phone mah ni se ka kawl ngai meuh lo. Ka pasal hausakzia ka hria a, bâkah heti zat bodyguard rawih angaih danah buaina hi a awm deuh reng tih ka hrethiam tawh a, min veng uluk hle bawk, fimkhur viau angai tih ka hrethiam ve mai a ni.

Ei ka duh em em a, ka rihna pung hluai lo mah se kan inneih tirh ai kha chuan ka thau hlek tawh a, ka thlatin hunbi ka nei lo tih Jerome ka la hrilh lo. Kan contract kha ka tan theihnghilh chi a ni lova, fâ neih thuai thuai ka duh tih a hriat kher ngai ka ti lo a ni.

Spain kan chhuahsan ațangin zinglamah ka nuam lo thei hle kha a nia, nimin piah lawk ațang khan zuk reh hmiah a, ka awmna boruak inthlâk thut vangah ka puh deuh va, thlathar ka ngaichâng leh anga ka la period loh fo chuan test ka nei tawh ang.

"Madam, inchhungah kan lut dawn em ni ang?" Ignacio chu ka bulah lo dingin ka sam thliin a chhem phêt dar dar chu a en reng a, balcony hi ka chhuah thui ber a nimai. Party leh dinner tih velah kan chhuak ngai lova, inah nitin awmin lehkhabu ka chhiar mai zel.

Housekeeper hran kan la nei ta lo fova, ka sawisel ta lem lo, a kid te hi an fel êm a, midang lâk kha ngai ka ti kher ta bik lo a ni.

Movie enin Sofa-ah ka țhu dar dar a, billionaire nupui diktak ka ni ve ta reng mai, Jerome an min tiam tawh ang ngeiin ka tân hnathawh angai lova, ka duh leh mamawh ka sawi apiang î he lovin min pe zat zat bawk. Mourizo Soreno pawh ka hrechhuak khât ta pharh mai.

Ka pum nuam lo leh luak chhuak hlui reng chu darkar chanve zet ka tuar tawh a, ka luak thei der si lo, hetiang chuan a dik dawn lo tawp mai.

"Joe, phone kha min lo pe lawk teh," Joe' O Hara leh Ignacio chuan checker an khel a, an inhau ngai pawhin ka ring lo hial!

"Madam, tunge i biak dawn tih ka hre thei angem," Phone min pe mai lovin ka bulah a rawn ding a.

"Ka pum a nuam tlat lo, Dr.Esteban biak țhain ka hria," diktakin ka chhâng a. "Jefe kan hrilh hmasa dawn lo em ni?"

"An meeting dawn a, hria pawh ni se, doctor a râwn ve thovang," ka tih chuan a bu nghut nghut a, "Duh leh nangmah khan bia la, kan pindanah ka lo han chho ange," tho chhuakin inchung pan chhohna step chu ka zawh a, ka ding ngil thei miah lo! Ka țan mar deuh apiangin a na zel a, "Min lo pui mai teh," Ignacio chu rem leh rem lovin ka melh a, ka thlanfîm a chhuak țiam țiam mai.

Ignacio puihna-in pindan kan thleng chho hrâm a, khumah min țhuttirin, "Madam a na viau em?" Min zawhna pawh ka chhâng thei lo. Chutah insûm hman lêk lovin ka luak ta bawrh a, Ignacio kekawr leh pheikhawkah ka luak per chhawk mai! Ka pum lah chu a nâ tulh tulh a..!

"Tui..." ka kut hnunglamin ka hmui ka hru a, "Hospital kan pan mai dawn em ni?Jefe hrilh kher lo pawhin kan buaipui thei che alawm," dam thlapa Ignacio țawng chuan min thlamuan viau.

"Joe khan doctor a kovin ka hria alo thleng ve mai ang, i thawmhnaw kha hlip la intifai ta che.."

"Nakinah ka ti mai ang," zak hmel a pu deuh reuh nia, tui bottle chu ka kutah hmehbel chawt chawtin "Joe ka zu ko lawk ange," tiin a chhuak zui ta a, doctor lo thlen hma a ka thi a nih vaih chuan an nuih a za lovang!

Harsa zeta ding chhuakin nachhawkna ka zawng a, ka hmu hrâm. Ei tuma ka ân lai takin Joe-an ka bân chu a chelh ta tlat a, angaihna hre lo lutuka ka en chuan, "Ma'am pawi ka ti khawp mai, doctor hriatpui lohvin eng damdawi mah ei phalsak i ni lova."

"Engmaw, i â em ni? Nachhawkna satliah alawm le,"

"Chupawh nise khawngaihin lo nghâk hram rawh," damdawi chu min chhuhsakin dustbin-ah a paih nghal daih a, ka thin tertek a chhuak ta.

"Joe'O Hara, ka pumnâ hi ipumah khan i sawn dawn em ni ang, ka nâ min tuar chhawk thei em ni?" Na viau e tilo chuan ka vin țhak a, Joe nuamti lo hmel pawh chu ka en peih lo.

Khumah chuan saisirin ka mu ngât a, pumnat tawh nâklai a, min lo dan khanglan chu le!

"Madam tihpalh takzet.."

"Țawng tawh suh chhuak la, Ignacio kha rawn lut rawh se,"

"Madam, a thawmhnaw thlâk turin a chhuak chiah," inthlahrung taka atih chuan ka ngaizam thei thlâwt tawh lo, khum ațang chuan ka thova, ka pum nâ bawk chu ka hre leh hmasa ber!

Joe kawr âwmah țhamin, "Tu thuin nge alo chhuah a, sawi rawh.." A ngawi ta reng a, "Sawi rawh ka tih chu?" A kawra ka țhâmna chu thlahin ka pum ka dawm vat a, ka tilui thei ngang tawh lova, chhuatah ka țhu thla ta hnawk a, chutih ruala ka serh rawn lum pup chu ka hre zui nghal bawk!

"Ma'am..!"

Ka chhang thei tawh lo, ka kekawr hâk hmalamah chuan thisen a val kulh a, ka châwn lamah a luangthla tih pawh ka hre thei.

"Midang ko rawh, Jerome emaw pawh.." zawitê-a ka tih chuan a che hauh lova a hlauthâwng hmel chu a khawngaihthlak zawk! Zo zeta min pawmin khumah chuan min hlâng chhova, "Kalsan chi i nilo, doctor a lo thleng țêp a nia, chak takin awm rawh aw.." ka sama a chûl chuan ka mittui ka khap per sak mai.

Ka thisen zawm pawh nilo leh ka pasal hnathawkte hian an thinlung takin min ngaihtuah vek a ni. Ka nat an hlau ngawih ngawih a, an hna a nih tho rualin min ngaihsak takzet tih ka hriat thar phah bawk!

"I kekawr hi kan hlip mai dawn em ni? Khumah thi a kai vek dawn sia, Ma'am, nangmahin i phelh thei angem?" Zawldawh taka min biak chuan ka bu ta nghat a. Dr.Esteban lo thlen hmaa inthlak chu a țha phian ang.

"Ka maimitchhing leh dawn em?" Joe fiamthu avang chuan harsa zetin ka nui sak a, "Towel kha rawn la la.." rangtakin towel chuan ka kâwng achin hnuailam chu a rawn khuh a, ka ke lam ațangin ka kekawr hâk chu a pawt chhuak ta a.

"Kan nupa room-ah ngei in lo induat ngam a nia," Joe chu a leng lawp a, dawhkan bulah a let hlawm tawp!

Ka pasal hmel țo haw tur ang maia dur khup mai chu hlauhawm tak a ni.

"Joe, ka lo ring sual deuh che a nih hi tiraw!" Chhuata mu Joe chu a phih tho lawp a, hnai set sawtah enin, "Hremhmun i tem châk a nih chuan a kalkawng ka kawhhmuh ang che," tiin a hnek leh chawrh a..

"Jerome eng nge i hriat a!?"

"Nang kha țawng miah suh, thih i duh loh chuan țawng tawh reng reng suh," a mitmeng huatnaa khat chu ka lo en ve kar a, ka nâ lam ka hrechang tawh lo.

"Thil hrechiang hmasa lovin tikhan țawng mai mai suh," ka tih chuan khuma ka mu lai chu min pawt tho dawrh a, ka țe nghal țhawt!

"Jefe..Madam kha a dam.." Joe chu a rawn ding chhuak a.

"Joe'O Hara, ka pindan ațang hian chhuak rawh.." a âw khauh fur leh nghet charh chu hnial chi pawh ni nghal lo chuan..

"Joe..."

"Amelia Lopez, i duh chuan nangpaw'n i zui thei ang," tiin ka mitah min en run a, ka taksa nâ ai chuan Joe ka khawngaihna a nasa zawk, rang lutukin ka kut chu ka vai fua a, Jerome-a hmai a ri chawk mai!

Chupawh ka la duhtawh lo ka thinrimna leh natna inpawlh chuan khua min hmuhtir tawh lova, min rawn man beh leh hma-in chhuata towel tla chu ka veng sawk sawk a, Jerome-a bân rawn phar dû chu ka zuan ta a, a âwmah ka tlawh nghal chawrh, keipawh chhuatah che leh tur awm tawh lovin ka thal der.

Ka serh ațang bawkin thi a rawn chhuak leh a, ka khawhmuh a phe ruai a, Joe min kohna te leh ka pum na ngut ngut chu ka hriattheih hnuhnung ber a ni.

11:10 Pm
Master Bedroom

Ka harh leh chuan kan nupa khumah keimah chauvin ka lo mu a, Sofa-ah Sam leh Ignacio țhu chungin an lo muhil bawk a, ka thi ta lo phawt chu a nia!

Khum ațanga thawh ka tum chuan thâwm ka lo nei deuh nge Sam chu rawn meng chhuakin min rawn en a, thophang hmel pawh a pu chuang lo!

"Madam, che rih suh, doctor-in awm hahdam i mamawh ati," khumah bawk chuan ka mu thla riai riai a, Jerome-a țawngkam kha ka bengah a rawn ri nawn leh a, Joe zui turin min ti a nih kha maw le.

Dar sawmpakhat a pel chiah, tlai chhia ala ni lo.

"Sam, khawnge Joe a awm?"

"A room-ah a nih ka ring, zanin chu a chawl dawn a.."

"Ka hmu thei angem, min kohsak thei em ka tihna.." zawi sapa ka tih chuan Ignacio chu a nghawk zauh a ka hmu reng.

"Madam, tunah chuan a muhil tawh ang, a chau deuh a, naktuk zingah i hmu mai dawn nia," tiin a kun lap a, ka ngawi ta rauh rauh. Jerome-a hmuh tur a awm lova, a thih chu ka ring chiah lo nâin eng emaw lai te chu a na ve mahna..

Khatiang tehhrep khan ka pum na lo se chuan khawvel lehlam daihah Jerome kha ka'n pêt lêng tur a nia, Jaja! Ka thil ngaihtuah mai mai chu leh..!

Engmah hrechiang hlei lova min rawn puh chhe ve ringawt kha chuti maiin ka ngaidam dawn lo. Rawn kal vaih teh se, North America ațangin South America-ah ka lo thawn ange, ka rilruin ka inhrosa vak vak a, awmzia a awm viau lo.

"Madam, muhil leh la.." Ignacio chu a hâm bui bui a. Hei pawh Jerome-a Sazupui phakar!

"I muthilh châk vang a nih chu, Sam muhil la, Ignacio hi meng rawh se, ka muhil dawn miah lo a nia.." tiin khum lu lam ngheng chuan ka tawlh chhova, min en hrek hrek nia.

"Min en reng lo khan, Ignacio, Corn flakes leh bawnghnute lum min lo pe ang che," nelawm lo thei ang berin ka melh a, Joe leh Sam bâk ka duat dawn tawh lo hrim hrim.

"Aw le, ma'am" hmanhmawh takin a chhuak ta a, Sam chu nuam lo tihhmel deuvin a che sek a, ka hre lo der hmiah.

"Khaw'nge i boss?" Sam ka zawh chuan living room-ah a awm tih a sawi a, "Zuk ko ta che, zanin hian engkim i sawifel teh ang ati, i ti dawn nia."

"Madam khawngaihin Jefe rilru hi tina suh, a inthiam lo viau a nia," a chhuah pah chuan Jerome atan ala ngen sak hrâm nia.

Ka sual ve hle a, mahse, ani ang khan thil hrechiang hmasa lovin tumah kut ka thlâk mai mai ngai lo. Joe a tihdan leh min puhna kha ka paidam dawn lo a ni tawp mai.

Ka serh ațanga thi chhuak kha period pangngai a nilo tih ka hre ve chiang a, Dr.Esteban tehreng pawh hi khawiah nge a awm ni? Family doctor ni tlâkah pawh ka ngai mai mai lo. A hunah rawn thleng se buaina tur a awm lova, doctor hran ka ruai tawh anga, Jerome nena doctor ințawm pawh ka duh hek lo.

Ka account-a pawisa pawh ka la hmang bik êm hleinem, ka bike nise hralh mai theihin a awm a, Pablo Salvador khan lei min dil nasat teh kha, ka ziaawm veleh vawikhat chu ka ride ang maw le.

"Kha le.." khum bul dawhkanah corn flakes leh bawnghnute Ignacio an a rawn dah a, a hmel pawh ka en peih lo. A rawn ken chhoh ang ang chu ka hâwp bawrh bawrh a, tu hmai mah ka zah dawn miah lo, fapa ka neih hma chu contract a tawp dawn lo tih ka hre ve chiang.

"Amel, muangchangin ei rawh," Jerome-a rawn lut chu ka mitsirin ka hmu reng tawh.

"Ka ei dan tur chu ka thu a ni."

"Ngaihdam dil tura min duh anih chuan ka dil hreh lo che," Khumah a rawn țhu a, a hmel a phelh deuh phunga ka hriat chu le, ka hnekna kha duk deuh raih se, a hmu apiangin zawhna zawt bawk se, engtin nge a chhan ang le!

"Ngaihdam dil maw! Min dil buai duh suh, ka ngaidam dawn si lo che a," ka tih chuan a kiai suk a.

"Chuvang ania ka dil loh che, Amelia Lopez.."

"I office kal hma leh thla hmasa te kha chuan Evans ka nia, i biang a rik rual khan Lopez ka lo ni ta a ni maw," ka nui lui ngial a, min melh rum khawp mai.

"Midang hmuh laia inhnial ka duh lo a nia, Amelia," Sam te țhiandun chu a melh zuk a, hengho awmlai tak hian a nia inhnial ka duh, hriatpuitu awm lo chuan a ho deuh tlat.

"Ok, ka pindan tur min kawhhmuh la, he i pindanah hian i awm thei ang, Living room-a inla khawngaihthlak kual vel lo khan.."

"Ngawi hmiah rawh, i naupai theihnghilh țhak khawp khan ka che duh mai ang.." atih chuan ka meng kâwk!

"Eng, engmaw i sawi kha..!?"

"Jefe.." Sam pawh a rawn țawng chhuak ve tho, kei hian nau ka pai a maw!?

"Theihnghilh rawh.." tih hmuk pahin a tho chhuak a, teuh lo lutuk thudik ka hriat hma chuan ka zawt dawn tho tho.

"Jerome Evans, ka rai nge rai lo?" Ka Corn flakes ei ruahna bowl chuan ka tin uaih a..

"A țha e," rawn țhu hniamin a kid-te pahnih chu chhuak turin a mitmei zauh a, "Sam, Ignacio, inchhuah kher a ngai lo, in awmnaah khan awm rawh u.." ka ti hmak a, Jerome nen min melh tawn zuk zuk hnuah Ignacio zawk chu a pên lui țalh a, min cho chhuak ta.

Bowl chuan Ignacio chu ka vawm ta a, a lo man chat!

"Madam, coconut rah anga che thei lo ka ni ve lo a nia," a sawi zawh rualin bawnghnute dahna 'thermo flash' chuan ka vawm zui leh a, chu erawh Sam-an a man thung. Ala nui ang vur vur lehnghal a..

"Amelia, ințhen vat i duh chuan kha i pum chhunga ka fa kha veng țha em em la a nimai, kei hian adang siam tumna ka nei tawh lo a nia, chuti a nih loh chuan, kumkhuain min neih a ngai palh ange.."

"South America-ah i kal duh em?" Ka zawhna teh daih chu mak an ti tlâng deuh a niang an hawi hau a..

Chulai hun remchang chu chuhin ka bula țhu Jerome-a chu ka tlawh dawt a, a lo inring lo a ni ngei ang, a phu zawk mai.

"Ignacio, min chhuahsan lawk ta che u," zaidam fahrana atih chuan ka run ngei mai, Sam nen an chhuak ta nge nge a, ka tûm bur.

"I nungchang entawn tlâk loh zet hi ka fa in a chhun ka duh miah lo a nia, ka dawh zel che avang hian min nêk lui suh." Thinrim insûm takin a țawng a.

"Ka intest ve hma loh chuan ka awih i ring a maw?"

Khum thawhsanin ama drawer bik inkalh chu a hawng a, paper a rawn phawrh chhuak ta a, "Kha hei hi en rawh, i chêtdan țhing zet zet kha i la chhawm zel dawn anih chuan nau i chhiat thuai dawn, ka thusawi pawm la, zawm bawk rawh." Kawngka lam panin a kal a, dim lo baksakin a rawn namkhar zui ah..

A paper min pek chu medical pregnancy report a ni a, Dr. Esteban-a signature a chuang kalh bawk. Darkar hnih liamta a mi kha a nia; Ka harh loh chhung khan test an lo nei thlap tihna a ni maw..kei hi ka â leh ber zawng a ni e, Jerome Evans-a fa ka pai chu a ni der si a!

Report hnuailamah chuan ka hriselna dinhmun leh ka blood type te, damdawi hming eng emaw zat a tlar dul bawk a, awih loh chi ni nghal lo chuan...

Vawikhat chauh pawh shock ka tâwk leh a nih chuan emaw, ka indim loh chuan eng hunah pawh nau hi a tla thei reng tawh tih hrilh hranpa ka ngai lo. Nau ka pai tih inhre lêk lovin ka khawsa tih ka inhre bawk.

Ka lawm em em ka hre hran lova, ka lunghnur lem lo bawk. Lehkha chu dawhkanah dahin ka mut dan siam rem nghalin ka inlukhup ta daih a, engmah ka ngaihtuah peih rih lo.

Ka tâi bâwr vel na ut ut chuan min ti harh a, dim light chauh a lo inchhi tawh nghe nghe a, khua erawh ala var chiah lo deuh.

Light pangngai ka 'on' rualin ka bula mu ka hmu ve chiah, Jerome-a, bangkil lam hawiin a lo mu ve reng a, thinrim tâwkin min chhuahsan a, a lo mu leh tho si! A hnungzâng ruak kûng chu a langchiang hle a, a dar veilama vun chuar deuh bik awm chu ka hmuh ngai pawh ka hre lo.

A taksa lumna chuan min ur ham ham a, tihharh hlau zetin thawm ka dim viau. A lakah thinrim țhin mahila ka haw rei thei miah lo hi mak ka inti!

Dimtê-in ka tho țhâm țhâm a, bathroom lam ka pan ta a, pads te ka thlâk fel hnuah khumah bawk ka lâwn leh ta a, a hmel hmu lo mahila a muhil nghet hle a nih ka ring, a che miah lo.

Min hnungchhawn zawngin a mu thova, a taksa hnunglam tal hi kan belchiang ve ange. A hnungzâng leh dar pharh velte chu dimte-in ka chûl a, a fa ka pai tih hi ka la awih thei lo cheu nia!

Nichina ka hmuh tawh a dar veilam vun pilh chu dimtê-in ka tawk a, a thap deuh hrâk! Ani hian ka hriat lovin misual kut a lo tuar ru reng em ni ang?

Țhu chhuakin a dar chu ka enchiang ta a, Dios! A vun pangngai a ni lo! Zawimuangin ka hîk chhin a, a khawk ta iak iak mai! A rawn chêt deuh hrut avang chuan ka chawl leh dat a, a vaia khawh vek tumin ka bei țha leh ngat, a vun pangngai ka hmuh rualin ka lungphu a chawl mai dawnin ka hria!

Cuêl el Significado?(Eng nge a awm zia?)

Jerome Evans dar veilam chu light chuan a chhun phât a, a kutchuk pawh a langchiang khawp mai! Kei hi bum ka ni!

Mourizo Soreno leh Jerome Evans hi mi thuhmun anni....

End of Chapter-15


©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 18313
Joined: April 30th, 2016, 4:07 pm

Unread post by Ngaia » March 25th, 2018, 11:50 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-16

MJS Villa
Alicante Espanóla
8:50Am

"Bengchheng suh, thâwmdim hle rawh," zawitê tê a țawngthawm hriain ka meng dere a, bathroom kawngkhar bula Jerome leh Ignacio ding chu ka hmu ta a!

"Jefe, breakfast eizawhah kan kal mai dawn em ni?" Ignacio chu a phun sa sa a, "Doctor lo be rang la, ka theihnghilh chiang ve êm a ni, ka nupuiin a hmuh hma ngeia kan ti a nih loh chuan ka inveng seng lovang," Jerome-a thusawi chuan ka thin a khei zar mai, eng nge an tih dawn hre ve chiah lo mahila ka hriat an duh lo tihna a nia.

"Tunah kal nghal mai ang, a rawn harh laia ka awm lo anih chuan zawhna chhan sen loh min zâwt leh ngei anga, Sam ko la, vawiin chu Joe kha chawl leh rih rawh se," a sawi zawh rualin bathroom-ah Jerome chu a lut ta nghal a, Ignacio nen hian eng nge zêp rûk an neih!?

"Jefe, Dr.Esteban khan kârthum hnuah Mediplast hi thlâk tur ati kha ania, engtin nge i theihnghilh theih?" Ignacio thusawi chuan ka beng a verh zar mai.

"Min hriatpui turin ka ti rêng che alawm, nizana ka inbualpui khan a khawk tihna a nia, kârthum a ral hnuah tui tihhuh loh tur tih pawh kha ka hrechang tawh lo reng reng, keima thiam loh a ni, nimin tlai kan boruak chu i hriat kha.." Jerome chuan ati sup a. Ka hrethiam ta uar uar, kan inneih hmain a kutchuk thup tur hian doctor ruaiin an lo buaipui fel vek a ni.

Mourizo ani tih ka hriatchhuah lohna turin theihtâwp an chhuah a, ka hre ta tho si!

Joe kha a na viau em mawni le! A boss in dim baksak lovin kut a thlâk a nia, he Jerome Evans ka huatzia hi turu tak a ni. Mourizo Soreno angin min bum phawt a, tunah 'Jerome' intiin a nupuiah min nei leh ngam a nia, bum nuam min ti teh ang chu!

'I duh chuan lemchan chu chhunzawm ta che, kei hian nang aia ka thiam lohna bik tur ka hre lo, i han inbei tak tak teh ang' ka rilru ka siam ta sauh sauh a.

Juan Evans hmuh ngei ka ngai, ka naupai chungchâng te pawh hrilh ve ila, bâkah ka pasala pa a ni a, honeymoon kan hman zawh ațangin vawikhatmah ka la hmu leh lova ngaih loh lamah a ngai êm lo'ng chu..

Khum ațang chuan dimtê-in ka thova, he ka pum chhunga naute hi ka haw reng reng lo, ka thisen ringin a rawn nung ve țan chauhva, tihnat emaw tumna ka nei hek lo. Ka theihtâwpa țhain ka inenkawl ve mai tur a ni.

Bathroom ațangin Jerome-a ala rawn chhuak lova, Ignacio erawh Sam ko turin a chhuak tawh thung! Washroom lamah ka lut phei ve ta a, darthlalanga ka hmel lo lang chuan ka nuih ati za viau lo! Ka mitkhur a thûk dâk a, ka mitmeng dul raih chuan hmeichhe chak lo tak anga min lantir avangin hlim hmel put luih tumin ka'n nui lui ngial a, a har țalh țalh hle mai.

Washroom ațanga ka chhuak leh Jerome-a bathroom rawn chhuahsan ve mêk nen kan intâwk a, en pawh ka en lo.

"I tho chhuak peih elaw!?" Towel-in a hmai a hru thuak thuak a, kawr a ha thlap tawh. A kutchuk kha ka hmuh a hlau ngawt ang, engchen nge a lo thup tawh tih hriat pawh va ni suh. Tenawm lutuk!

"I hmuh ang hi a nimai, zunna ka nei a, hman ve te angai a, bâkah ka hmel hian Australian vawkpui a an mai loh nan ka phihfai a ngai bawk," a hmaa a țawngkam lo hman tawh ang chiah ka hmang lui deuh kher a, zuk hre lo der tlat a! Mitko san âwk chungin min en a.

"Tukkin chu i harh țha tih ka hre mai, i leili pawh a hriam leh zak alawm le, inhnuaiah rawn chhuk duh suh aw, i breakfast tur ka rawn dah tir ang," ati nghal zung zung a, nimin lama a chêtdan kha a thâwi pawhin ati lang duh eih lo. 'Mouri' tiin ko thut ila engtin nge a awm ang aw!?

"Vawiinah i pa lo leng turin i hrilh thei angem?" Ka zawhna chu mak atih hmel viau a, mahse, ngai a awh leh vat. A duh hunah hi chuan inthunun thei tak ani tih ka hre daih tawh.

"Naute chungchâng hrilh i duh em ni?"

"Duh tho e, kan contract chungchângah biak ka duh mah mah zawk," tiin ka sam pheng zet chu ka khuih nawk nawk a, thinchhia min tih hmel zeta min en vang vang hnuah,

"Fapa min pêk hma loh chu contract tihtawp theih a ni lo tih kha hre kar rawh," ti hmukin pheikhawk a bun nghal a, contract kha tihtawi ka tum dawn emaw ati ani ngei ang. Teuh lo mai, pawhsei ka dil zawk dawn em mawni!

"Khawiah nge i kal dawn?" Khawdang hawi lêk lovin ka en a, Mourizo ani tih ka hriat tawh vang nge ka lo en leh veng veng zel.

"Ignacio nen kan chhuak lawk dawn a, ka pa chu ka lo be dawn nia," dressing table chunga a sana chu banin a bun nghal a, Jean kekawr uk leh shirt hringduk a ha tawp a, a inhmeh viau tho nia.

"Ka breakfast tur chu rawn dah rang rawh se," amah pawh en tawh lovin banga sana intâr chu ka melh daih a.

"Ok, kan rei lovang, eng nge ka lo hawn ang che?" Ti a min zawh chuan rang lutukin "Lunch atan chinese food, min lo hawn rawh,"

Ka thinrimna kha ka theihnghilh daih! Ka sawi zo vek tawh si!

"Aw le, hahdam takin lo awm rawh aw.." ka hmuiah dimtê a fawpin min chhuahsan ta a.

Thinrim tâwka hmachhawn ka tum ve a nia, ho thei hle mai. A bul ațangin ka țan țha leh thei tho alawm le.

Sam-an Spanish mix breakfast atana min lo ken chu ka ei hliam hliam a, Sausage leh Espresso(Hmarchapui leh Vawksa kan pawlh) thak țhak chu a tui kher mai.

"Madam, tukkin lam eng nge i an?" Sam chu ka bulah a ding khawng auh a, a hmel te hi ka hmu țha zo vek tawh, kum sawmhnihpali niin feet 6'2 laia sâng a ni a, a pian a dik hle bawk.

"Ka țha lutuk e, Joe kha ka ngaihtuah deuhva eng nge a an?"

"A âwm ruh nâ a tia, Jefe leh Ignacio-an hospital-ah an hruai dawn alawm,"

"Anih chu ka lo hre miah lo va," ka malchunga tray chu a rawn la a, "Tun ațanga darkar chanve hnuah hian Mr.Evans Senior arawn thleng dawn aw," tiin a dar a san âk a, Juan Evans chu a lo kal dawn ta nge nge e.

"Ka lo inbuatsaih dawn nia," ka ti liam puat. Sam chhuah hnu chuan ka phone-ah games ka khel vel mai mai, tih tur dang hre hek lo le, 'Apache fighter' lam bawk a nia ka khelh leh ni..

Darkar chanve chhung engtin nge hun ka khawhral ang, Juan Evans lokal hmain ka za zek zek a, bangkil lamah ka tawlh phei thul! A nuam chuang lo, khum mawngah ka lu lam ka dah thla a, chuti paw'n ka ning zel si.

"Madam, chesek tawh lo teh," Sam nui tut tut chu lei ka chhuahkhum zauh a, ninawm ve êm alawm le, inhnuaiah chhuk an phal bawk si lo.

"Sam, tuna min khuahkhirh ang hian tunhmain Jerome an a ching tawh em?"

"Ah, tumah hmeichhia he inah hian ala hruai lut lo hrim hrim alawm," tiin a phone a bih zauh a.

"Mr.Evans alo thleng a nia, inring rawh, i mutdan kha siamțha nghal la.." tihpahin lukham ka tihdarh nuaih chu a rem sawk sawk a, a boss senior chu a hlau ve awm hle mai!

"Juan Evans nen kan inbiak chhungin pawnah min lo nghak dawn nia," ka tih chuan, "Mahse, Ma'am..."

"Ka sawi ang chuan titawp rawh, engtinmah ka awm lovang, a fâla biak ka duh mai ania,"

Pindan kawngkhar ari zui zat a, Juan Evans lo lut lai chu ka lo en reng a, nelawm tak angin lan ka tum lova, Sam chu mitmei ka hmuh a, a chhuak ve nghal vat bawk.

"Lo țhu rawh, Mr.Evans," Sofa ka kawhhmuhna lam chu pan lovin khumah a rawn țhu a.

"I taksa a thau a, i hmai a cher deuh anih kha.." a nui nghal vur vur a, a aw thüm deuh hi a 'pa' ru tlat.

"Ni ve ang chu pasal neih hi ka lu lamin a ngeih lova, ka nghawng achin hnuailam hian a ngeih te pawh ani mahna.." ka puansin lai thehhlimin ka țhu chhuak a.

"I damlo chu a kawlh tâwk lekin i nâ a nih hmel, ka fapa chan a chau leh dawn mange.." a nui zui suk suk nia.

"I fapa hi e, US President emaw a inti tlat țhina, ilo hrilhfiah thei deuh angem? Kei lah President nupui angin ka awmthiam chai si lo," ka tih chuan a nui chhuak huk a, "Min koh chhan lamah ka lut dawn em ni ang, a hmasa berin ka fa mo i nih angin 'ka pa' tiin bul țan phawt ta la, inbiak tepawh a awlsam deuh ang chu.."

"Anih nangin 'ka fanu' tiin min ko ve dawn em?" rang lutuka ka chhân chuan a hawihai deuhin ka hria, a thaw deuh hawk bawk.

"I duhdan anih chuan ko e a, ka fanu.." awlsam têin a sawi mai a, ani paw'n min ko thei anih chuan engah nge ka koh theih loh bik ang le.

"Ka pa, tun hi tuilêt hnu-a ka naupai ve vawikhatna a nia, sawitur i nei em?" Ka tih chuan a țhutna ațangin a ding hluai a, awih lo hmel a pu bawk.

"Dâwt, dâwt i sawi lo tiraw?" Ati bah nuk a, ka nui sak thung.

"Ka pa ai pawhin i upa zawka hetiang thil hi dâwt inhrilhna chi pawh ni nghal lo chuan.." Ka sawi zawh rualin a nui ta vur vur a, "In che rang hle mai," khumah bawk chuan țhu lehin min en vung vung a, eng nge a ngaihtuahnaah awm ka hriatsak thei bik lo.

"Keimah chauha che bikah min puh deuh tihna em ni?" Ka nui ve ta hak hak a.

"Puh nâng, ka fapa hi ka hrechiang alawm, invenna hmang hman lo lêkin i lo siam tihna a nia," atih chuan ka biang a sa nghal ham ham nia, a sawi tum a lang uar!

"Nupaah inven angai em ni? Ka koh chhan che chu ka naupai chungchâng hrilh tur che leh, nurse min rawihsak turin ka duh che a, ka mi duhzawng chu i hriatthiam ka ring.." ka ti deuh duah a.

"I pasal i hrilh mai lo a nih chu," ati tak nâin ngun taka ngaihtuah a ang zawk mah.

"Ani te chuan a kid te hi a ring êm mai, hmeichhe kawl țul ati lovang," ka tisap a.

''Zaninah ka rawn tir dawn nia, nangmah anga lu zo veh vawh, mahni invengthei leh leili hriam zet i tihna ani ang maw?" A nui leh suk a.

"Nichiah e, chuan Car pakhat tal keima puala neih ve ka duh a.."

"I pasalin hmansen loh a nei alawm țawm ve mai la," tiin intur dahna lam chu a pan a, "I naupai chu thla engzat nge tih ka zawt lo mai ang che, a chiangsa in ka hria," Rondel Wine chu inthlitin ka intur min thlit kêp ve a.

Chutia a sawi takah chuan Mourizo nen kan mutdun hmasak ber kha ka hrechhuak zawk mai, khami ațanga rai pawh ka lo ni maithei asin ka hriatfiah vat angai. Chutiang alo nih chuan ka chance a țha zawk dawn tihna a nia, Jerome leh Mourizo hi mi thuhmun anni tih hre tho mahila ama inpuan hun ka nghâk dawn a ni.

"In ațanga chhuah phalna hi min pe la, incheck up turin ka kal mai dawn alawm," wine min pêk chu ka lem khalh a.

"Khuma awm hahdam tur i ni lawm ni, nge, ka fapa hian a khuahkhirh bur zawk che, diktakin min hrilh rawh.." atih chuan chhan mai dan tur ka bangbo deuh a, ka inngaihtuah rauh rauh hnuah, "Min khuahkhirh chu a ni ber mai, bodyguard tellovin ka awm a rem lova, Penthouse chhuahsan lah a remti hek lo," ka ti ta sap a.

"Insiam la, ka rualin i kal dawn nia, ka fapa hriattir kher angai hran lo a nia, vawiin hian i car tur pawh kan en nghal ang." Dam thlupa atih chuan ka zuang lo chauh, nuam dawn lutuk!

"Ka lawm e, ka indim viau ang," ka'n ti ve ngei a, ha! Indim kha a pawimawh tlat.

Women's Clinic
Saint Anna Medical
LA.CA.USA
1:25Pm

"In enkawl țhat i mamawh khawp mai, tuna alandan chuan thlahnih a pum fel awrh chauhva, indim hle ang che, a theih phei chuan thlathum atlin hma hi chu khumah awm la duhthusam a ni." Doctor thusawi pawh ka hre mumal lo, ka thianghlimna ka hloh zan khan he naute hi a lo insiam a ni. A va hlu hleuh hleuh tak.

"Mr.Juan khan nurse i mamawh ati a, lânga kal tur leh riak nghal tur i mamawh chuan pahnih kan nei a nia," ka pum lang huai chu min khuh țhat sak mawlh mawlh a, pahnih te chu duhthusam a lawm le.

"A țha khawp ang, Mr.Evans chuan ka duhdan a hrilh che em?"

"Hrilh e, engkimah an rintlâk a nia, lunngai suh.." Doctor Anna chuan pâwn thlengin min thlah a, Clinic Lobby-ah Juan pawh ala țhu ve rân alawm.

"Zanin tlai ațangin an rawn kal dawn nia, interview kher i duh pawhin a theih vek," Anna chu a nui var var a, Dr.Esteban ai thlâwt chuan ka ngaina daih zawk. Khatiang țuanmuang lutuk, amah kan nghah chhungin 'Around the world in 3hours' kan ti hman zân ang.

"Amel, i inpeih tawh chuan kan haw dawn em ni ang?" Juan chu ka bulah rawn dingin ka darah min vuan a, ka pa Felipe Lopez aiin ka ngaina zawk, bodyguard hruai a duh loh danah a inringtawk hle tih ka hre mai a, ka ngaihsan zâwng tak a ni bawk.

Ka naupai chungchâng pawh min zâwt tawh bik lova, a sawi angin zawh pawh ka ngai hek lo, chinese restaurant-ah min chawlhpui deuh ngei a, ka duhtâwka tam thil ka ei meuh chuan ka puar âwk mai! Ka thil eilai min enreng tih ka hriatin ka zak ve deuhva!

"Khamkhawp hmu lo ang maiin alawm i ei le ka fanu!" Juan Evans chuan ati ta ngei reng a.

"Ka sawi rêng kha, President nupui te anga tlemtê tê-a ei ang chi ka ni ve lo, i fapa hi a uikawm deuh mah mah a ni." Salad ka țhial nghal țawlh țawlh a, a nui suk.

"I car duhzawng chu sawi la, keimahin ka lo en ange, i chau lutuk ang," atih chuan ka thil țhial lai ka phuh chhuak țep alawm le. Min lei tak tak ka ring lo kha a nia, ka nui ru var var mai.

"Sports Car Volvo Xc 90 Hybrid, a var ka duh," ka tih chuan mitko asan âk a, min lei dawn rau rau te chuan a țha ber ka duh ve miau alawm. A hausa tih ka hrechiang ve em mai.

"Aman zat i lo hre leh diam tawh lo maw?"

"Hrechiang e,$46,900," inthlahrung miah lova ka chhânna chuan ati nui leh nge nge a, "A țha e, kan lei poh a ni ang chu.." a țhutna ațanga tho chhuakin kan ei man pe turin counter lam a pan ta a.

Jerome-a min bum man chu a pa in a tuar dawn ta phawt chu a nia, Juan lah naute a hmuh châk luatah ka duhzawng min tihsak a inhuam ropui si. An grape huan kha Spain-ah ka la sawntir hial maithei a ni.Jaja! Awih awm loh lutuk!

Ka ngaihtuahna hi keimah ngei paw'n ka awih lo. Hah!

4:00 Pm
MJS Penthouse
Jerome Evans.

Hospital-ah darkar thum ngawt hun kan hmang a, Mediplast kha amahin a lo khawk vek tawh tih tukkinah ka hre ve chauh!

Ignacio an hmu lo phei se chuan ka che chhe hle dawn tihna a nia, Joe lah nimina ka pêtna avang khan a âwm ruh a nâ a, țul lo lutukah hun ka khawhral hrep alawm le.

Amelia eitur chinese food kan lei laiin Joe arawn nui chhuak huk a, hepa tluka zaidam hi ka la hre lo, Martial arts a thiam em em a, duh se chuan nimin khan che hman lêk lovin min siam thei tih ka hria. Mahse, a boss ka nihna leh ka tan a rinawm êm vangin a tuar tlawk tlawk a, ka thiam lo let der a ni.

"Eng nge i nuih a.?" Ka zawt sup a.

"Madam chêtdan hi a châng chuan a nuihzatthlak alawm, nitin a kiangah awm ve teh, Vitamin hlang ani ringawt!" Ala nui hui nia.

"Ti chung hian a rai ve chu a ni si a," beidawng zetin ka thaw hawk a, Amelia nungchang ka chhûtin ka beidawng titih tawh, amah ka duh lo tihna nilovin indim nachang a hre lo lutuk leh a rilrua awm ang ang, a chêt chhuahpui zel hi a manganthlák ka ti!

"A zia ve mai ang, i nupui hi mi rilru tluang tak a ni a, Mayla Ansell, tih vel ai thlâwt kha chuan ka duh fê a hmelțha bawk si, a piante paw.."

"Sawi tawh lo teh ang,"Joe țawnglai chu ka dang chat a, Ignacio pawh eitur khai bâwr țeuhvin car-ah arawn lut ta bawk nen Penthouse lam panin kan tlân chhuak leh ta a, lunch atân min chah ve bawk a, tihngaihna a awm ngang ta si lo, a lo thinrim hlurin a nia ka rin ni.

Kan nupa room-ah ka chho tlang nghal a, a lo ruak hiau mai!

Khawnge Amelia!?

Rang lutukin ka tlânchhuak lehnghal a, Sam pawh hmuh tur a awm hek lo, khawiah tehhrep nge an kal ni.

"Joe, Ignacio, ka nupui leh Sam an awm lo," choka lamah ka lut zui nghal a, an awm chuang lo.

"Jefe, khawiah mah an kal lovang a inbual a ni lo maw Madam chu.." Ignacio an atih chuan inchungah ka tlanchho lehnghal a, bathroom kawngkhar inlock thlap ka hmuh rual chuan a awm lo tih hrilh hranpa ka ngai lo.

Kan room-ah a awm lova, coconut hmunah te khan kal a lo ngên leh tlat a nih ka ring deuh! Chulam pan chuan ka tlân chhuak a, inchhungah Joe khan a zawng ve mêk bawk. Ignacio erawhin anmahni chênna hmun a en ve thung.

Coconut hmun leh Pool bul vel pawh a reh țhiap a, mihring hmel hmuh tur pakhatmah an awm lo, Sam call tumin ka phone ka dap a, ka la ak miah lo zui ah..

Ka lungphu dup dup chu tihreh tumin thâwk ka la vang vang a, Sam nen khera awm lo chu ni lo se ngaihdan siam pawh a awl deuh mahna! Ramon Salia hian kan awm lo tih hriain a kid te a tîr em ni ang!?

Hrilhhai zetin In lam ka pan leh ta a, Amelia vang hian lungphu chawlin ka la thi hial ang ka ti!

"Jefe, Sam te chu a awm reng alawm, a inbual mai chauh a nia," kawngkaa ka pen luh rual rualin Ignacio chuan min lo hrilh nghal a, "Amelia awmna i zawt em?" Ka tih chuan, "I pa nen an chhuak, i pa in a hruai chhuak ka tihna a nia,"

"Ka pa in maw! "

"Aw ni e, an lo lêt mêk!"

A chhuah châk vang anih chiah hi ka pa hmuh a lo duh em em, henu tak hi chu! Corn Flakes leh bawnghnute-ah hian thluak tihchakna a tel deuh a ni ang, a heh ropui si! Ka nui chhuak hawk a! Joe leh Ignacio chuan maktih hmel zetin min en thung!

Ka pa kiangah a awm a nih chuan ngaih țhat lohna tur a awm lo.

4:45Pm

Amelia rawn luh ruala a sawi hmasak ber chu, "Joe, eng nge i an?" Min hmu lo der hmakin Joe'O Hara zuk be hmasa a!?

"Madam ka țha e.." Joe chuan a ti sap a.

"Amel, biak che ka duh a nia, min lo zui rawh," ka ti hmuk a. Kei aia ka hnathawkte a ngaihsak hmasa kha ka ngaithei lo bur.

"I hmanhmawh loh chuan tui vawt ka'n in lawk ange," tiin cooler inhûnna lam chu a pan a, silk var kamis ha-in kekawrbul a ha mawl tawp a, hetiang thawmhnaw inbel chung hian ka pa nen an chhuak chu a ni sia, a â deuh em mawni! Ka pa reng reng pawh hi inthlâktir ve awm tak a nia, mawl dun lutuk.

"Ignacio, i thil leisak kha a dai tawh em?"

"Dai lo e, a ei nghal theih reng.." chokaah a lut zui nghal a, Amelia chuan hmanhmawhna nei miah lovin tui a inkhalh khalh a, min runluih niawm hrimin nothum lai a in hman nia maw le.

"Hmanhmawh ve deuh la," Ka tih chuan ka lam rawn hawiin chiangzetin min en a.

"Mouri, oh, Jerome, i hmanhmawh viau chuan min han chhohsan mai la," tiin a pheikhawk a tlawh phelh a, a țawngdan mai mai chuh, ngaituah zui hmel a put loh avangin ngaihțhat lohna ka lem lova; Mourizo nen inang min tih thu kha tunah lo pawh a sawi zauh zauh tawh tlat a, min hrechhuak anih chu ka ring miah lo.

"Amelia.." thinrim nimiah si lo va ka koh chuan nelawm tehchiam lo hian min melh a.

"Jefe, Volvo Car Company lam ațangin an be duh che," Ignacio chuan phone min rawn pe a, teh daih chuan..!

Phone ka pick rualin..

"Jerome Evans," ka ti nghal tâwng a.

"Sir, i nupui car tur kan rawn dah chiah e, i Penthouse kawtah kan awm," lehlam ațanga țawng ri ka hriat chu ka hresual emaw tiin, "Eng maw i sawi?" Ka zâwt țha leh ngat a.

"I nupui car tur chu kan rawn dah e," tiin phone a off zui ta a. Amelia chuan hrethiam awm lo fê-in min melh a, ka tuk țawlh châk. Vawiinah Car leiin an chhuak tih ka hrethiam mai!

"Sawifiah tur i ngah hle mai," ka ti sup a, ani erawhin a pheikhawk chhuata a dah chu lain min kalpel hmak a, inchungah a chho ta a. Ngeiawm lutuk!

Nau a pai dêk dêk a, car thar a ngen ngam nghal a nia, eng hmeichhia nge maw a lo nih le! Ka pa chungah ka lawm lo khawp mai, a duh apiang a pêk nghal zel te chuan pasal nih țangkaina a awm lo. Ka pa nupui niawm taka a khawsak vel chu ni..

"Joe, ka nupui car tur an rawn dah a, a buaipui ngai ang kha i kutah awm rawh se, dinner chu kan room-ah min lo pe mai dawn nia," tiin kan pindan lam ka pan ve ta a.

Khumah kawr pawh ha lo hian Amelia chu a lo mu zangthal a, bra leh under wear bak inbel a nei lo. Min tlawn a tum chiang! Chuti maia lungawi ka tum miah lo thung.

A pasalin car hmansen loh ka nei a, ka phalna la hmasa hauh lova Penthouse a chuahsan chu thuhran, a duh duh dana a awm mai mai tawh lohna turin engtin nge ka tih ang aw!

"Amelia, tho la intifai rawh.." Tiin ka kawr hâklai ka phelh a, a che duh țhak lo.

"Ka sawi chu i hria em?" Ka duh aiin ka la vin lo zâwk.

"Hria ang chu ka beng a ngawng hleinem, ka chau rih a nih hi.." min la vin let zawk zamah a!

"Chau leh tur si eng ati nge i chhuah daw daw.." khumah ka țhuthla a, lehlam a hawi zui hmak.

"I lo hriat ve mai mai atan, i pa nen a nia kan chhuah, nang ang lo takin restaurant nuam lutukah min hruai a, ka duhtawk eitur min pe a nia, tinge i uikawm bik em em le, Mourizo kha lo nei zawk ila țha tur a nia.." atih chuan insûm hman lovin ka ding thut a.

"Mourizo chu tunge?" Hrereng mahila a sawidan hriat ka duh ve miau si a, ka zawt ta nge nge a.

"I hre ve chuang lovang, nangmah ang lo kha a nimai," atih chuan ka nui huk a, Amelia nungchang leh khawsak phung nitina danglam reng hi engtikah mah ka hrethiam thei dawn lo a nih hi..

"Ka hriat mi pawh alo ni maithei asin."

"Jaja! Min bum tum lo mai teh ka zawt vek tawh che a, i hriatzawng a ni lo tih i sawi kha ka la hrereng alawm," tihpahin a lu a beng thak thak a, "I sawi apiang hetah hian ka khungkhawm zel tih i hriat kha Jefe," ati zui salh nia. Chimawm lutuk! Chhan ngaihna ka hre der lo.

"Car khu engzat man nge?" Thildang ka zawt ta daih a, "Lungngai suh, i pa in a pe fel diam tawh, dinner kan eidun hunah bike ka leitir leh ang," ati zat zat a, ka huat tâwk a tling viau.

"Mourizo chu leitir la ti nia," ka ti hmuk a, "Chiah maw! Zaninah ka phone nghal ang," ala ti tak deuh deuh a! Ka thluak a buai vek, kei lo Mourizo dang hriat a nei em ni ang! Yah! Ka awih chiah si lo.

"Phone lovang,'' ka tih chuan a nui ta hak hak a, a nuih a za ngang a niang, a hmui hupin a nui tlarh tlarh a, nuihna tur ka hre ve eih lo.

"Ka biak i hlau a maw! Dinner ka eipui nghal loh, ka naute pa pawh hi a lo ni mial maithei asin, tunge hria?" Meng de sar chunga min en tâkah chuan rum zetin ka melh teh ngawt a, a naupai lai thla zat hi Medical report-ah khan alang miah lova, min sawi țhaih a tum reuh emaw ni! Amelia hian eng maw tak hriat a nei chiang!

Vawiina a kalna zawng zawng ka pa ka zawh ngei angai dawn a ni.

"Ngawi la inbual rawh, dinner ei a hun dawn a nia," ka ti ta ringawt a, "Ka chau, nakinah ka inbual mai ang," tiin a mutdan a siamrem a, a maimitchhing zui hmak nia!

Min ngaipawimawh lo zet zeta a awm a piang hian ka thin a sa phat zel, khumah chuan lawnkaiin a bulah ka mu ve ta a, chupawh a hre lo der leh hmiah a, a kâwnga ka kuah chuan ka kut a vai kian ka ring deuh kha a nia engtinmah min ti lo ve teh tlat!

Ngawirengin kan mu a, a thâwkdan danglam tial tial ațang chuan a muhil ta tih ka hre mai. Mut a duh thar em em a, eitur a dap reng bawk. A naupai vang niin doctor khan a sawi a, tluangtê-a apai puitling anih chuan he a dul thep zaih hi ala puar ve âl anga, engtin tak awm ang maw!

'Fly Kick' tih vel kha atih chi miah dawn loh tih hrilh hriat ran a ngai a ni.

Khawvel hi a ta bik hliah hliah anga angai tlat hi ka nupui țhat ve na a nia, eng pawh a hma a awm chu a hmachhawn ngam zel țhin a. Mahse, a naupai lai remchang chuh hian tawhsual tâwk thut thei reng a ni a, ven uluk lehzual a ngai ta tihna a ni.

"Jefe..." kawngkhar kik karh karh paha Joe min kohna chhângtur chuan khum ațangin ka tho a, ka awm chuan Amelia bulah an awm ngai lo. Thinchhiain kawlh hrâ mah se an ngaina phian a, a kianga awm hi an thlahlel zawk emaw tih mai awl tak a ni.

"Eng nge ni ta?" Kawngkhar ka hawn rualin ka zawt a, dinner ei ala hun chiah lo bawk nen min ko laklawh ka ti viau.

"Nurse pahnih an lokal a, engtin nge kan tih ang, Madam koh an nia," atih chuan khuma ka nupui mu chu ka melh zauh a, engmah lah a sawi mang silova, min țhâwng thut thut reng mai. Nurse rawih ngai khawpa damlo chhia a ni hek lo.

"Ka lo chhuk ang.."

"Aw le.." Joe kal kian hnuah shower ka nei zuai a, eng atan nge nurse a koh reng reng ni! Ka sum min khawhral tir a tum nge? Țhat lohna dang a nei zâwk pawh ka hre lo ve.

Living room-a hmeichhe pahnih țhute chu an lo nui sâng a, nurse hmel pawh an pu lo!

"Mr.Evans, i nupui koh kan ni e," A upa zawk chu lo ding chhuakin a sâng reuh hle a, a mitmeng paw râm ațang chuan English mi a nih duh hmel.

"Jecinta Soamer ka ni e, ka țhiannu hi Christina Bailey a ni a, Christy tiin kan ko mai zel," a kut chu ka vawn theih turin a rawn dah chhuak a, an lo inbiak fel vek tawh te chuan lâk loh chi ninghal lo chuan..

A țhiannu zawk erawh chu a ngawi ran a, ani pawh a sâng fia fia khawp mai. Ka nupui te nen an awmho dawn anih chuan an zahawm khup dawn anih hi, an țha dun phianin ka ring ta.

"Mrs.Evans kan hmu lawk thei angem," Jecinta'n atih chuan, "A muhil rih a, naktuk ațangin in lokal dawn nia, interview tur anga lokal kha a finthlâk zawk maithei," tiin Christy chu ka melh a, Sam nen an lo inmelh veng veng nia!

Kan nauteho nen pawh an inkawp thei anga, nurse nih mai piah lamah bodyguard tura training an inhuam chuan ka chhawr hreh lo. Mipa ina an ven reng ai chuan a hmeichhiatpui bula awm te chu Amel paw'n a duh daih zawkin ka ring.

"Joe, i bike la chhuak la, Miss Soamer hi a chênna thleng i thlah dawn nia, Miss Bailey erawh Sama'n thlah thung se, dinner chu Ignacio hian a lo buaipui dawn nia," ka ti nghal zung zung a, Amelia lo harh hmain haw vat se a țha ang. Chuti lo chu zawhna fahrahtê tê a zawt leh anga a buaithlâk tam mai mai.

Kan pindan ka thlen chuan Amelia chu a mutdan ngaiin alo la muhil sâk sâk a, dinner eiturin ka kai tho dawn nge ka nghâk rih dawn!?

"Mouri.."

Amelia chu a țawngvai nge min ko nge pawh ka hrethiam teh nuaih lo, vawiinah ringawt pawh Mourizo a tireng mai. A chhuahnaah tu emaw a hmu zawk nge, 'Jerome' ti tur zawk hian a nilo alam leh daih zel a, Mourizo anga ka lo awm tlang ta mai lo kha a vawikhat nan pawi ka ti ve ta. Ka nupui lah hian a theihnghilh chatuan dawn si lo!

"Jerome," min ko ri ka hriat chuan rang lutukin a mutna bul ka thleng phei nghal a, phak chapa rawn mengin, "Ka ril ațâm.." ati chhuak sap a.

"Tho la, kan ei dawn nia," ka ti dam thluam a, duat châkawm deuhte hian awm ve se chuan ka'n duat dawn tehreng nen nunphung pangngai kan zawh dawn chiah a, a hel leh tlat țhin hi ka hrethiam lo.

Min duh huam lova, min ngaina teh hûrh hek lo, ka awm ang ang hi a pawmzam mai niin alang! Chu chu ka duh loh ber a ni bawk.

Khum ațanga a tho tur chu ka pui vat a, ka rin loh dan deuhvin a nui var var nia, ka nghâwngah min kuahin alamah min kuai kun a, duhthawh zetin min fawp ta a. Hei zet chu mumang chhawnghnih mang zawmte tiha mawi a ni.

Uar fê-in ka ka fawp lêt ve nghal a, ka kut pawh a awm mai mai lo chiang kher mai. A vun mâm han leh nêl thep te, a hmui thlum dep dep te hi engtikah mah ka hnê theiin ka ring lo.

Thawchham dâwna kan infawh hnuah kan inthlah ta țâwk a, a biang tai hlar leh a mitmenga tisa châkna niawm tak lo lang chu ka hmu reng, a bâk kal duhna rilru ka pu nghal a, mahse, dortor in kârkhat chhung min block tlat! Ka ui kher mai, ama duhthu ngei hian min fawpin min tawk khât ve asin le..

"Inbual zuai la, dinner an rawn dah țêp a nia," tiin ka pawm nawlh a, bathroom ka panpui ta a, min ngai hle niawm takin min kuah chial a, ka thlah phal lo deuh.

"Inbual dun ila.." ati sap a.

"Hey, Mrs.Evans, eng 'tactic' nge i hman leh dawn?" Fiamthu-a ka zawh chuan, "Batroom 'scene' an inzawt chut chut ngai lo," a nui var var reng a, tun ang hian awm reng se ka va'n ti tak. Chu erawh North Pole-a kal tum ang vel a ni. Minute sawm pawh kan inngeih hman meuh lo chu a ni e.

"Chhuak rawh le, ka pian chhuahtirha ka landan ang chiaha awm leh ka tum si a, i hnawk tlat," A sawi awmzia ka hre lo lutuk hmel chu a hmu a ni ngei ang, "Ruakin ka inbual dawn, i chhuak thei tihna," ka hnungah min nam dat dat a, țawngkam mak deuh deuh hman thut a chîng si a, ka bo leh hu zel!

9:30 Pm
Master Bedroom
Amelia Evans

Jerome Evans thluak sûktir te chu a har lo e, lemchan hnehsawh ber chu ka nilo nâin a dawttu ka ni tal ang.

Mourizo Soreno aiawha lemchangtu tur mipa te hi awm nghe nghe se țha tur a nia, amahin min hrilh hma chu ngeiawm takin ka awm chhunzawm zel dawn a ni tawp mai.

"Joe, ka zuk tlawh ve lawk teh ang," dinner kan ei fel tawh a, Jerome chuan khumah Laptop inchhawpin Wine list a check pah mawlh mawlh a, naktuk hian a grape huana a rah hmin zawng zawng lawh tur a ni a, ka kal ve châk viau nâin ka dinhmunin zir hek lo le, ka kal ve thei dawn ta lo chu a nia.

"Tikhan awm mai mai rawh, Joe chu a inbuaipui thei," ati nghut a.

"Keimah vanga kut tuar a nia, biak ve hrim hrim ka duh," ka tih chuan, "Kal rawh, an zingah awm law law rawh," Laptop chu khup thawkin ka bânah a vuan a, min chhuahpui ta a.

Eng nge Joe hmuh ringawt pawh a phal loh le! Penthouse pawnah ka chhuak dawn pawh a ni lova, inhnuai ringawt pawh kal phal loh te chu a sual ve chiang e..

Living room-ah min dinpuiin, "Joe, ka nupuiin a be duh che," ati lawng lawng a, mikhual pindan kawngkhar chu rawn inhawngin Joe O'Hara a lo dâk chhuak ta a, a hmela hlauhthawnna rawn lang ka hmuh chuan nuam ka ti vak lo.

"Ma'am eng nge ni ta!?" Jerome chu en pawh a en țha ngam lo. Ani lah chuan ka bânah a chelh tlat a, a hmel nelawm loh dan chu leh!

"I țha em?" Tihpaha pan ka tum chuan Jerome an min pawt lêt dawrh a, min melh chang angreng khawp mai.

"Ka țha e, nâ ka nei tawh hleinem," tiin a ding zum zât a.

'A pawi ka ti khawp mai, keimah vanga nâ i tuar hi, tuemaw thil hriatsual vang mai mai lehnghalin," ka ti deuh salh a.

"Ah, Ma'am ka țha alawm," lai zeta atih chuan, "Joe, mu tawh rawh," Jerome chu a rawn inrawlh vat a, "Ka nupui hian a ngaihtuah deuh che a ni mahna," ati leh hmuk a, Joe chhânna pawh ngaichâng lovin inchung lamah min chhohpui nghal dawr dawr a, a thinrim leh ringawt nia.

Pindana kan luh rualin min vawnna a thlah a, "Ka hnathawkte hi i ngaihven ve hluak a țul lo ang, ka tâna thawk annih angin an mamawh leh thil țul ka buaipui thei," tiin a vei nghut nghut a.

"I nupui ka nih angin i hnathawkte chu ka hnathawkte anni ve mai lo em ni?" Ka ti ve hmak a.

"Engtik lai ațang khan nge ka nupui anga i lo inpawm ve tâk?" Tilui tih hriat lutukin a nui a, ka run ngei mai.

"Ka inpawm angai em ni? Hei hian ati chiang viauin ka hria," tihpahin kan inneih zungbun chu ka tilang vâ a.

"Khâng te zawng nupui nih chhinchhiah nân a te em emai," elsen zeta tiin a zungbun bun lai chu ngai ho awm fêin a en a, a kiai suk bawk.

"A nih chu, a tê bawk si a, nupui nih chhinchhiahna a tling tâwk lo a nih te chuan ka bun reng a țulna ka hre lo." tihpahin ka phelh ta a, rum lutuka min melhna chu ka hlau deuh nâin hlau anga lan ka tum lo.

"Bun leh nghal rawh," ati thüm chhak a.

"I nupui ka nihna nemnghet tur hian rangkachak gram engzat êm a rit nge ka bun ngai ang?" Tihpahin dustbin-ah ka thlâk ta daih a. Min ben lawlh a châk hmel kher mai.

"Amel i ti lutuk deuh lo maw!?" A aw hriam hrâk leh nghet churh chu a hriat a nuam lo.

"I nupui tak ka nih hunah, kha zungbun aia a lêt eng emaw zâta rit kha ka bun ngei ka beisei.." ka inher nghauh a, min chelh hman hmain pindan chu ka chhuahsan ta a. Kawngkhar erawh dimtê-in ka khar thung.

Zanin ațangin kan mu hrang tawh ang, a țûl tê-ah lo chuan biak pawh ka tum tur a ni lo.

Amelia Evans kha Amelia Lopez ka ni leh mai dawn tihna a nia, thil harsa pawh va ni suh...

End of Chapter-16

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 18313
Joined: April 30th, 2016, 4:07 pm

Unread post by Ngaia » March 25th, 2018, 11:50 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-17

MJS Penthouse
LA.CA
5:00Am
Jerome Evans

Kan room kawngkhar ri dat dat avang chuan loh theih lovin ka tho ta a, nizana ka thawmhnaw inbel ngai thlap nen ka lo muhil daih chu niin!

"Jefe, i harh em?" Ignacio aw ka hriat chuan eng emaw tak thleng a awm ngeiin ka ring, tunah zinglam dar nga chauh a ni a, inkaihthawh hun pawh va ni suh.

Kawngkhar ka hawn rualin, "Eng thil nge," ka ti nghal tawp a.

"Madam khu Living room Sofa-ah a muhil a tunah ka hmu chiah," nuam ti vak lo tih hriat hian ka hmel en lovin ka dar zawn a en ngar!

"Aw le, ka lo hruai dawn nia,"

Ignacio nen inhnuai lamah kan inzui thla ta a, nizana a chhuah tauh hnu khan ka umzui tawh bik lova, a luhlul bawk nen thlêm lovin a duh dana awm turin ka thlah zalen ve a ni. Penthouse a chhuahsan ka ring lova, ka ring dik chiah bawk. Mahse, Living room khera a mut chhan hi ka hre chiah lo, mikhual pindan nuam tak tak a awm a, chulai chu pan ve mai awm tak!

'Ama min tihdan ang deuhvin inlâk khawngaihthlak a tum a ni ngei ang,' chu erawh a mizia nen a inmil ve chiah lo deuh!

Sofa-ah Amelia chu tui takin a lo muhil sâk sâk a, a ke pahnih tawm chialin a sam chhah țha zet chu a inchap darh niai a, tuna alandan hi mipa dangin hmu se an it khawp ang, a kawrfual hâk thui fê-in a inhlim a, a mal mum nalh zet alang haih bawk. Rang zetin a kawr hâk chu ka pawh mar sak a, ka hnathawkte hmuh atan tuna alandan hi ka duh miah lo.

Tih harh hlau takin kan room lamah ka pawm chho ta a, a phone leh a hair clip chu Ignacio an rawn kengin ka hnungah min zui a, heti em em a a fimkhur lo țhin hi a manganthlak lam deuh chu a ni e.

"Jefe, vawiin lamah Madam hi kan hruai ve dawn em?"

"Hruai ang, inah kalsan chi pawh a ni lo, nurse pahnih lokal tur te kha biain ka Estates-a kal ve turin hrilh la, a țul dan ang angin training i pe dawn nia," Amelia puansin țhattir paha ka tih chuan, "Madam te chu a hruai chi dawn em ni, chawl hahdam turin doctor khan ati si a,"

"Cottage-ah a chawl hahdam thei alawm, tunbâk Grape kan lo tawh dawn tawh lo tih i hriat kha, kum thar nghah leh ai chuan hmu ve ngei se ka duh," Ignacio nen pindan chu kan chhuahsan ta a.

Ka bodyguard te a nêlin a be țha thiam ropui si a, ina an awm chuan chhuahna tur a zawng leh phêt anga a buaithlak.

Coffee no dawmin Penthouse kawtah ka chhuak a, Amelia rilru hriat theihna tur hi ka duh ngawt mai, min duh ve anga alan rualin a hnu lawkah a thinrim leh zel si a, game khelh a ngai dawn a ang riau mai.

Tunge hmanruaah ka hman tâk ang!? Mayla Ansell hruai ta ila a țha phianin ka ring a, ani kha Amelia'n a huat teh kha maw!

"Sam, lokal teh," Sam leh Joe chuan garage-ah vawiina kan ken tur Car an check fel a.

"Jefe, Range Rover leh Jaguar kan keng mai dawn em ni ang?" Sam chu ka bulah arawn ding vat a.

"A țha tura i hriat kha a ni mai, ka nupui chuan theihna turin a hnung seat kha tih dûp belh bawk ula, Joe erawhin bike keng mai rawh se," Tiin ka no ruak chu ka pe a, "Madam a kal ve dawn maw?"

"Dawn e, coconut rah chawhnu pum țhak a vawm ai chuan grape hmuna awm kha a tân a hlawk fê, reporter pahnih kan hruai tel ang," inherin inchhungah ka luhsan leh ta a.

Mayla Ansell ka phone chuan a lo phur nasâ! Amelia a kal te ve dawn tih ka hrilh phei chuan a phur tulh tulh a, actress chapo ve tak kha a nia, chuti maiin ka nupui lakah hian a tlâwm duh lo tawp ang, kei hian vawiinah ka'n duat der vel dawn ta a ni.

Amelia tih thinrim ka duh lo viau nâa, a rilru diktak hre tur hian eng hmanrua pawh hman ka hnial lo. Kan inneih zungbun a paih tâk kha ka hrechhuak leh hnuhnawh a, kan pindanah lutin dustbin ka en nghal vat. A la awm ve ngei alawm.

'A tê êma nupui nihna a nemnghet lo ati em ni kha, a lêta rit bun a duh chuan a bun ngei tur a ni.'

Breakfast eitur pawhin ka nghak duh ta bik lova, zawldawh reng hi a țhat rualin a inluling mai maia hriatna ka nei deuh tlat, ngaihsak duh lo der tlat ila a inthlâk danglam ve mahna.

"Joe, hei hi keng la, a lêta ritin i rawn siamtir dawn nia," tiin Amelia zungbun chu Joe ka pe a, he pa hi eng nge a hriat ni a nui suk suk reng ringawt a, ka nupui hi a ngaisâng ve ngawt chuan ka hria.

Vawiinah hmeichheho training pêk pahin game ho tê tê khelh tur ka siam dawn a, ka nupui tel ve theihna ngei tur, kan nurse pahnih te leh Mayla an awm bawk anga kan inkawp kim chiah bawk ang.

Breakfast dawhkan kila ka lo țhut laiin Amelia chu a rawn lut ve ta a, ka kalsan lai khan a mutui hle si a, tunah inchei thlapin a rawn chhuk nia! Min en miah lovin bawnghnute a inthlit a, ka be hmasa dawn reng reng lo.

Ka hmangaihna haider tlattu hmeichhia hi a tlâwm hma loh chuan ka tlâwm bik lovang, chu chu ka ngaihdan nghet tak a ni tawh.

Mourizo Soreno hmangaih turin ka duh lova, keimah Jerome Evans ka nih ang ngei hian min duhin min hmangaih tur a ni dawn lawm ni!? A hnenah pawh 'ka sam ka zuah chatuan dawn lo' tih ka sawi lovem ni!?

"Ignacio, breakfast ka duh ang," Ka nupui țawng bung hmak chu ka hre lo der leh tlat a, hundang chu ni se, keimah ngeiin ka chhawpsak tur a nia.

Ignacio lo lut chu 'pe suh' tih nan mitmei ka hmuh vat a, nuam lo a tih hmel khawp mai.

"Ma'am tukkin chu ka buaipui hman tlat lo che, i insiam mai angai ang," Amelia melh paha atih chuan ka lo nui suk.

"Aw le, a harsa hleinem, hmanraw awmna min hrilh la ka lo inbuaipui ange," ka rin loh dan deuhin a Amel chuan a chhang dam thlap nia!

Ignacio nen thil an inkawhhmuh lai chu ka thlir reng a, a zawiawi riauva ka'n hriat chu le, nizana kan inhnial vang kha chu a nih ka ring miah si lo.

Omlette a siam a, coffee bel a'n chhuang ve ngei bawk a, eitur a siam thiam pawh ka ring hek lo. Newspaper chhiar awm taka langin ka bih ru dêk dêk a, nuamti awm taka a che vel chu ka run ang reng viau lawi si.

Min hmu lo ang hmiaha awmin 'Mesenger' tih hla, Ariana Gonzalez aia ka zai țuma ka sak ngei kha a sa pah rât rât a, a pyjama hâk tlâng chu thlep chhingin a vei ang tauh tauh a, a lawmawm ru phian!

Breakfast dawhkan seipuiah chuan a thilsiam chu a rawn chhawp a, ka ei sak hlau niawm tak hian ka hnaihah pakhatmah a chhawp lo, a thilsiam lah chu a rimtui hrep lehnghal a!

Omlette, Coffee leh Ham Cheese, chocolate milk a inchhawp rap a, ka piaha chair ruak chu pawt chhuakin a țhu vei tharh, ka ei châk ve lo ka tih chuan dâwt ka sawi dâwn tihna a nia. A tui hmel hlawm ropui si, Ham cheese phei hi chu Spain-a ka ei bâk kha ka ei leh awm pawh ka hre lo! Chil ka lem khawlh a, ei châk anga lan ka duh eih lo.

A inchhawp zawng saw ei vek a tum em mawni, em em a! Omlette chu fork-a hawlhin a ei țawlh țawlh a, min awhfik tepawh a ang zawmah! Coffee nokhat bak engmah ei ka ei bik lova, ka dil hreh deuh si.

Sam alo lut a, "Good morning, Ma'am," kan boruak hre ve miah lovin a nui sâng a, "Morning, Sam, breakfast i la ei loh chuan min lo zawm ve thei ang, Madam thilsiam hi han tem chhin ve teh," Sam chu a nuih lêt var var a, ka tüm hmuk.

"A tui hmel khawp mai, ka lawm e, coffee chauh ka in a, i phal chuan ei ve a châkawm alawm," tiin ka nupui bulah chuan țhutmun a rem a, achângin Sam, achang leh Joe, an pahnih hian a tițha em em a, Ignacio hi a ngaithei vak lovin ka hria!

"Jefe, engmah i ei loh kha, madam thilsiam hi a tui khawp mai," tihpahin ka ei châk ber Ham cheese chu a keih thla hmak a, han hauh ngawt chi lah a ni der si lo.

"Ka ei châk lo e," ka țawng bung nghut avang chuan Amelia'n min rawn melh zawk a, ner sak chungin a hawi lêt leh hmak nia.

"Vawiinah i kal ve dawn em? I boss Estates-ah chuan.." Amelia'n Sam a zawt lai chu ngawirengin ka thlir a, an inchhân dan azirin ka inrawlh ve chauh ang.

"Dawn e, kan kal vek dâwn alawm," Sam chuan a ti liam puat a, a plate nawrsawn pahin Amelia chu a ding chhuak a, "Kei chauh tih loh chu in kal vek dawn anih hmel!" Ati sap a.

"Nangpawh i kal dawn alawm.." a sawi thui zel loh nan Sam chu ka mitmeia alo hrethiam ve mai, an thil ei ruahna vel a sengfel ta zâwk a, pakhatmah ei bâng lovin zuk ei zo vek a..!

Amelia chhuak tur chu biak ka tum ûk a, ka țhulh leh ta zawk! Nizana ka țawng dan kha a dik bik lo tih ka hria, ka nupui anih chuan engkim hi a ta angin a en ve tur a ni a, a sawi ang chiah khan ka hnathawkte pawh a hnathawk anni ve vek tho tihna a nia, mahse, kan sawi zo vek tawh a, a bul ațanga țan țhat leh ka duh bik lo.

Pawn lama chhuah ka phal lo hi ka thusawi zinga a zawm țhat ber a ni hial ang! Pindan pawh țul fê ah lo chuan a chhuahsan mai mai lo ve teh tlat. Hotel neitu ve meuh a ni a, rinai takin a pharvar lo tih hi chu ka hriatna a rei tawh. Tumah a be țha huam lova, angkhat vekin a en nimai hian ka hria a, mipa leh hmeichhia a thliar hrang em em lo bawk. A tu ate pawh a be chhe hran lo.

Kan nupa room-a ka luh chuan a thawmhnaw a lo siam mawlh mawlh a, ani hi min chuahsan a tum deuh emawni!?

"Eng thil nge i tih a?" Khumah țhuin a chevel chu ka en reng a.

"I hmuh ang hian thawmhnaw ka khungkhawm a nih hi, i nupui ka nih loh chuan he inah hian tihtur ka nei lo," ati hmak a.

"Ka nupui i nilo tih ka sawi lai ka hre miah lo, i duh chuan i chhuak thei ang, mahse, Penthouse pel lovin.."

"Eng maw i sawi? Jerome Evans, kan inneihna kha i la hrereng a nih chuan min blackmail tu chu nang hi i ni." A meng ling nghal hlar a, inhau kan țan leh dawn e.

"A dik, leibâ min rul ni ula, nupuia ka neih che a ngai bik tawp nâng, i duh chuan pindan hrangah i riak dawn nia, he pindan hi ilo awm hmaa ka ta anih ang ngeiin a lut hnuhnung zawk chu i chhuak mai tur a ni." Ka tih chuan chiang zetin min en phawt a, chutah, "Tehreng mai, i Penthouse chhuahsan tumna ka nei lo ania, i thawmhnaw min pêk hi ka ken i phal ve ang chu maw!" Thinrim miah lo niawm takin a țawng dam thlap!

"Keng lovang, i hâk lai nen khan i kal thei, vawiinah ka grape huanah ka hruai dawn che a, midang aia mungchâng leh nghah ngaiin awm miah suh ang che," ka ti chang fak a, min chhang miah lo.

A thawmhnaw inbel lai chu muangchângin a hlip a, eng thil nge atih dawn pawh ka hre mai mai lo.

Pawisa a nei miah lo nge, ama pualin engthil mah a lei lova, Spain ațanga LA a rawn pan khan thawmhnaw tam a keng hek lo. Kan inneih zui tâk mai avangin a mamawh tur engkim ka ngaihtuah sak a, 'ama tâ bik' ti a sawi tur ka inchhungah hian engmah a awm lo.

Under wear leh bra nen chauh chuan a ding a, a mitmenga min huatna lang chhuak chu ka hmu reng, mahse, achhungril hriat ka duh tlat si a, sual ber anga ka lan angai a ni.

"Engthil nge i hriat a!?" Ka sawi zawh hma hmain a bra hrui chu a darah kuai liamin a hlip leh ta a. Lalpa leh!

"Amelia, i thawmhnaw kha inbel rang rawh," min en kalh chungin a hnuailam inbel beitham zet chu a hlip leh ta a, saruak ngal ngatin ka hmaah zuk ding a!

"A vai hian i sum sênga min leisak a ni a, i ta chu la lêt leh rawh, saruaka ka awmlai hi min zahpui duh suh, a chhan chu leiba rulhna mai ka ni a, ka nu leh pa in an tawrh ai chuan ka tuar mai tur a ni, an tân ka inpe ta sa sa Mr.Evans a tawp thlengin le, he ka pum chhunga naute hi i ta a ni lo tih ka'n sawi lang ange, a neitu diktak Mourizo Soreno, ngeiin enkawl rawh se." A mittui tling pam, a khap per sak lai chu hmu mahila ka che chhuak chuang lo.

Saruaka ka nupui chhuak lai chu lungni lo zetin ka en a, a kal thui ngam ka ring lo kha a nia, he inneihna hi a lo haw takzet a nih dawn hi..!

Harh chhuak thutin Amelia chhuak chu ka umzui nghal a, ka kid te'n an lo hmu anih vaih chuan eng thiamthu mah sawitur ka nei dawn lo.

Living room-ah tumah an awm lova, Choka leh study room pawh a ruak huai! Khawiah mah kalna hman ala awm lo tih ka hriat avangin mikhual pindan pathum Joe te luah loh zawk chu ka hawng phei diat diat a; a tawp ber erawh chhunglamah a inkalh tlat! Amelia a awm ngei a ni tih ka thinlungin a hria a, vawi engzat pawh kik mah ila a hawng dâwn chuang lo tih ka hriat avangin lunghnur zetin ka lêt leh ta a.

Tuman a saruak lai an hmu lo tihna a ni ngei anga, ka thâwl huai mai! Mahse, a bibo reng thei dawn si lo va, tunah pawh Estates pana kan chhuah a hun dâwn tawh a, a tel lova kal chi pawh ni nghal lo chuan, duh aiin ka kal thui hret a ni.

A thawmhnaw hâk lai kha a phelh ka ring pha miah lova, ka pindan ațanga lâk chhuah ka phal lohna chhan pawh, zan tam riah hrantir ka tum reng reng lova, a thawmhnaw sawnkual kha a țul lo ka tihna mai a nia, ka sawichhuah danin a zir lo nge, a nilo zawngin a ngai ta tlat si a, a thawmhnaw a phelh lai a, a rilru na hmel kha ka theihnghilh thei dawn em ni?

A pasal fa ngei kha midang fa a ni tih sawichhuak duh tur khawpin a thinrim a, ka tân danglamna awm lo mah se, ani tan erawh thil hrang daih a ni. Tunah ka thlêm anih chuan buaina a chhuak leh hat dawn a, Joe leh Sam angaina ber a, anni kha thlêmtir ta ila..

Darkar khat dâwn kan room-ah ka vei sek tawh a, Car horn ri tuar tuar ka hriat chuan Penthouse kawt lan theihna tukverh puanzar chu keuvin hnuailam ka en ta a. Ka thil hmuh hi eng nge!?

Amelia țhianpa Pablo Salvador khan percel lian zet zet paruk lai car ațangin a hlângthla a, engtin nge helai hmun hi a lo thlen theih?

Inhnuai panna step ka zawh laiin, "Jefe, Madam bungrua tur a lo thleng a, engtin nge ni dawn? Kan check hmasa dawn em?"

"Țawng zawi deuh rawh, check angai lovang, a rawn kengtu saw inchhungah luhtir lo ula, percel chauh saw la rawh u," Ignacio beng bulah ka ti sup a, a bu nghut nghut.

Pablo alo lut anih vaih chuan Amelia'n hmuh a tum ngei anga, chi loh lutuk, mipa dang daih hmuh ka phal reng reng lo, a țhianpa pawh ni rawh se, ka nupui saruakna hmu tur chu keimah a 'Pasal' chauh hi ka ni.

"Jefe, khawiah nge kan dah dawn, in room-ah kan thiar chho nghal dawn em ni ang? Sam leh Joe chuan Percel pahnih ve ve an rawn keng lut a.

Joe a rawn lêt tel ve nghal anih chuan zungbun kha a lo hawn ngei ka ringa, nakinah inpekna remchang a awm turah ngai ang.

"Joe, helamah hian rawn keng lut rawh u," Mikhual pindan kawngka-ah Amelia chu towel bih țât chungin a rawn dâk a.

Joe te pahnih chuan min melh nghal vat!

"Joe, Mr.Salvador kha lo lut turin hrilh teh," Tihpahin Amelia chu a rawn pên chhuak a, a towel bih tawngchham zet chu ngaipawimawh hmel pawh a pu reuh lo! A hnute leh a hmeichhiatna a khuh țâwk țâwk chauh a, mipa hlang pathum kan awm ve a, zâm hmel a pu duh țhak lo.

"A lêt leh tawh alawm,Ma'am." Sam an a rawn chhân chuan, "Tu thu in nge a lêt a, kan inbiak danah chuan inchhunga inhlan fel tur kan ni," ati chhum hmak a.

"Ignacio khan percel lâk pahin a hrilh a," Joe lo țawng chhuak chu pawi ka ti angreng a sawizo hman vek tawh si.

Amelia thinur hmel ka hmuhin țawng ka la tum lo.

"Ignacio chu hetah rawn kaltir rawh," Joe melh khai paha Amelia țawng chu a ring hran miah lo, mahse, a thinrim hle tih ka hre thei, grape huana kal a hun tawh si, kan awm dan a khaihlak vek dawn a nih hi..

Ignacio chu percel pawm chungin a rawn lut a, kan vaia kan lo ding țhap a hmuhin a ngaihna a hriat loh hmel kher mai!

"Ma'am, min ko em ni?" Dam thlapin Ka nupui a melh a.

"Mr.Salvador kha i lêttir niin ka lo hria a.." Ignacio chu a pan phei ta a, ka in rawlh a hun chiah.

"Amelia, he in hi ka ta anih angin a chhunga lut tur chu ka thu thu a ni." Ka ti hmuk a.

"In pathum khan Estates pan turin insiam ula kan lo zui ang che u," Ignacio chu ka melh leh nghal daih a, Amelia erawh ka en duh lo. Ka mitmeng chhiar thiam turin a fing tâwk tih ka hria.

Ka kid te an kalkian hnuah Amelia nen kan inhmachhawn leh ta rân a, nichina ka thusawi kha hre hmel a pu lo, a en ngai a en tlawk tlawk a, țap mai tur hmel a pu zawk mah.

"A țha e, Jerome.." abâk engmah a sawi lova, inherin a room-ah a lut nghal daih. Min cho lêt ang chu tiin chhân dan tur ka lo ngaituah rauh rauh hman a nia, ka hrilhhai letling zawk.

After 2 hours
MJS Grape Estates
Cottage 201
LA

Sam leh ka nupui tih loh chu kan thleng kim vek tawh a, hnathawk pangngai riahchilh hovin zingkar ațangin grape rah an lo tawh a, Truck pahnih khat thârin an chhûng vûm lûk mai!' He ka ram hi alawm Ramon Salia khan a lo ît em em chu..

Mayla incheidan uchuak zet chu kan kalna hmun nen inrem lo ka ti hle a, kawr bânbul pantê leh a hnuaia kekawr mar lutuk a hâk chu hmuh a hrehawm angreng, a hatu mahin a ngaihpawimawh loh chuan tiin ka en liam ta vel mai mai a.

Jacinta leh Christy erawh an simple dun hle a, Amelia'n a hmuh hunah angaina phianin ka ring bawk.

Grape rah lovin Joe, Ignacio leh nula pahnihte chu an phûl luai a, an inhaw lo tih pawh an awmdanah a hriat mai, ka naute hian nula lam an ngaihsak miah lo hi mak ka lo ti țhin kha a nia tunah erawh hmuh țha an hmu nge, bodyguard tih velin an nunah hmun a chang lo a ni ber mai. Vawiin na nâ na chu hlim leh engthâwl takin hun hmang ve teh se.

Mayla ka bulah a tawlh hrat hrat a, a khât mawi tawkin ka be ve zauh zauh bawk.

"Jerome, i nupui te chu an lo kal tih i chiang maw!?" Mayla chu ka țhutna bulah lokalin ka darah min kuah a, khawlum lai laia perfume rim na lutuk hman te chu âtthlâk ka ti viau.

"An lokal turah ka ngai, ka nupui tân hmuh hrehawm lutukin chimawm i chhuah loh hrâm ka beisei, chuti lo chu a dim dawn miah lo che a nia," sawițhaih ve hrim hrim țhaa ka hriat vangin nui suk chungin ka hrilh a, min ei loh hmel zetin a ner nâng a, "I nupui sâng thlâwn lutuk khan khumah a chawkphur thiam meuh che maw!?"

"Duhthusamin a zei," ka sawi zo hman chiah ka lu bulah grape rah a rawn ving phei fua a, ka thlêk sawn hman avangin Mayla chal ari zui fawk! A țe ring ngei mai.

Grape rah rawn vawmtu chu tudang an ni lo, ka nupui 'kawlhteii' ngei a ni.

"Lo siento,(Tihpalh) Sam nen kan infiama duh aiin ka lo vawm na deuh a ni," pawiti awm fê-in a chal a bêng thâk a, Mayla tan pawh huat chi ni hek suh, tüm hmak bâk tihtheih a nei bik lo.

"In lo thlen lai ka hre miah lo," ka tih chuan Sam chu a nui vur vur a, a Pi tan hian thih pawh a huamin ka ring, a ngaisang vet vet êm!

"Jefe, kan lo thlenna a rei leh deuh tawh, Wine sâwrna khur Madam in hmuh a châk a, kan en hmasa alawm," tiin Mayla chu a țhenkhum sak a, ka nauteho hian Mayla hi an ngeih hlawl lo tih ka hria, hmelhriat loh pawhchawp ai chuan tiin vawiin atan ka pawt chawp mai kha a nia.

"Miss Ansell, i kal ve a...!" Amelia chu kan țhutna bulah kâwng dawm âl-in a ding a, jean kekawr da lam leh kamis sen țial ha-in lukhum a khum a, a boot rawngsâng bun chu khawi ațanga a hmuh nge pawh ka hriatpui lo. 'Bandana' hring a awrh a, Rancher fanu te pawh a ang lek lek a lawm le.

Ka khaikhawmna chu a hun leh hmun a zirin inchei a thiam hle a ni.

"Mrs.Evans, min hmuh ang hian ka kal ve chu a nia lawm," an inchhâng tâwk tiu teu hle mai!

"Mrs.Evans, tih chu a rem teh țeuh lo em mai, Amelia tiin min ko mai rawh, i duh chuan Lopez pawh," a sawi zâwngin min melh kher a, min tihchhan tih ka hria, mahse, ka hre lo der thung.

"Ok, Amelia, vawiin chu i pasal sâwmna hi ka hnar phal ta lo mai," Mayla chuan min ngheng hnai salh a, Amelia hmel erawh a danglam eih lo nia.

"Sâwmna hnar loh hi a finthlâk a nia, tikhan lo awm ula ka kal chhan ve ber grape rah ei hi ka châk riau," tiin Sam chu a mitmei zauh a, min kalsan zui ta nghal a.

Mayla tûm hmak chuan ka nuih ati za angreng.

Ka game khelh tum hian eng a an loh chuan a zawngchhangthlâk loh khawpin ka ring. Amelia thawmhnaw kha khawia mi nge tih zawh ka duh viau a, tlawmthlâk ka ti leh deuh si. Ka pa a dil ti dawn ila dilna hun a awm miah lo. Ka hriat lohvin sum khawlsa a lo nei țân zawk em ni!?

Pablo Salvador khan a rawn ken sak a nih ka ring ta ber a, percel tamtak chhunga awm kha thawmhnaw a ni tih ka hrethiam ta! A che rang kher mai! Min mamawh tura siam ka tumna pakhat chu a hlawhchham ta phawt.

Ducati Bike nei thei ngat ka nupui hian saruaka awm lohna tur sum a nei ang tih lo hrethiam awm tak ka nia..

1:45 Pm.

Lunch kan ei zawh hnuah ka lo ruahman angin chemte invawm siakna hun kan hmang dawn a, Joe leh Sam chuan thing an kham fel vek tawh bawk a, thingah chuan grape bâwr tê deuh ho chu hmun 12 ah an khai phei țhap a, chu chu chemte hmanga vawmthlâk tur a ni.

"Jefe, kan hmeichhia te tân chauh nge, kan vaiin.." Ignacio chuan min hrilhru sup a.

"Hmeichhiate tân le, nangni chu a thiamsa in nia, an lawmmanah $40,00 ani tih hrilh tel rawh aw, vawithum chance i pe dawn nia, ka nupui erawh tel ve lo turin hrilh la," ka tih chuan a bu nghut a, hmeichheho țhutna lam chu a pan ta a.

Amelia'n chemte vawm a thiam ka rin loh bâkah, kan nula chhawr turte thiamthil en nghal ka duh vang a nia ka buatsaihtir, Mayla chuan a thiam ka ring, actress a ni a, thiamthil angah tih ka hria.

Jacinta chu a upa ber a nih angin a vawm hmasa ber tur ani dâwn a, Joe an phur fê-in a hrilh sauh sauhva, Christy leh Ignacio an inhrilh ve thung a, keiin Mayla ka zirtir ve ang, Amelia huat zâwng a ni em tih kan hrethei ang chu.

Sam leh ka nupui țhu dun chu ka melh zauh a, nichin mai ațang khan Sam hian Amelia hi a ngaihsak thar deuh thuta ka hriat chu le, ka mit antih kham viau chuan Sam pawh ka chhawr zui tawh lo mai tur a ni.

"Madam i vawm ve dawn lo em ni?" Christy chuan Amelia a ko lang lang a, ani'n nuisak chungin, "Ti chhin phawt ula a țul chuan ka vawm ve ang," zangkhai takin a chhâng a, a vawm ve leh duh tak takin ania ka rin!

An vawikhat inhmuhna ațangin Amelia chu an ngaina nghal mai reng a, Jacinta leh Amelia an inchen chiah tih ka lo chîk leh hmanhmawh tawh. Christy erawh anni pahnih aiin a hniam hlek a, a kum pawh a nau deuh.

Jacinta'n a vawm hmasa ber a, a fuh lo chiang kher mai! Amah lah chu a nui nasa em em a, Christy vawm lai chu ka en a, a kut lek dan a dik deuh, ani chuan a vawm fuh a, mah se atla lo. Mayla vawm hun a thleng ve ta a, a hnehsawh kher mai, Ramon Salia nupui hlui nge nge a vawmthla chiang khawp mai.

Joe leh Sam chuan nuamti zetin an zirtir leh rih a, Mayla kâwngah kuahin a biangah ka fawp zauh a, ka nupui hawisawn hmak chu ka hmu hman.

An game khelhah chuan Mayla a chak ta ber a, Christy leh Jacinta pawh tlâw lutuk anni lem lo, vawikhat ve ve an vawm fuh ve tho.

"Amelia, vawikhat chu i vawm chhin ve dawn lo'm ni?" Mayla chuan ka rin ang chiahin ka nupui chu a cho ta a.

"A thiam lovang bâkah chawl hahdam rawh se," ti a ka inrawlh ve chuan rum zetin min melh a.

"Madam, i ti ve ngei tur a ni," midangin an tih tâk sap sapah chuan chiang lutukin Amelia'n min melh leh phawt a, "Dollar engzat nge i inhuam?" Tiin min zawt ta a, ka nuih a za ru hle!

A tlâwm hreh lutuk hi ala che chhia ang maw le.

"Jerome, sawi vat la, ka hlawh tawh sa hi ka 'bet' tel e," Mayla'n a tih chuan Amelia chu ka melh a, a bulah kal hnaiin, "A coffin full of dollar' " ka tisup a midangin an hre pha lo.

"Yes, Jerome Evans." tiin Amel chuan elsen zetin min chhâng zui zat nia.

'Ka nupui hi kûang khat pawisa pêk ka inhuam rêng a ni'

A langah erawh chuan, "$10,000" ka ti a, an au dial!

Chumi hnu chuan Amel chu a țhutna ațanga rawn dingchhuakin a kamis hâk chu a phelh a, a kâwngah a suih leh tê tê phawt. Mayla chuan a cho harh harh khawp mai, tun țum chu ka nupui a che chhe dawn tih ka hria a, ka nuih a za lâwk viau. Sâng taka zuan nen inang miau hek lo.

Sam, Joe, Jacinta leh Christy te chuan kut an beng țhap țhap a, rilru thianghlim tak pu-in țan bik an nei lo. Ignacio erawh chu a ngawi reng a, ka nupui chevel chu a en ngun kher mai!

Mayla chuan chemte tle var chu a vawm ta a, a hma ang chiahin a vawn fuh a, grape bâwr chu leiah a tla darh chiai a, vawithum vawmah vawihnih a fuh a, a hmel chapo larh chu a ngeiawm lek lek a ni.

Amelia hun a thleng ve ta.

A chemte ken dan zâwng chu leh! A kut dinglam hmang lovin veilam ala hmang zui ah..! Dinglamin chemte pakhat a keng thung. Ignacio chu ka melh zawk a, a nui suk.

Lehlam ka hawi zawk hlânin a lo vawm hman dêr! A zâwnin a vawm zawt zawt a, a fuh vek a, a tla vek bawk!

"Ka lawmman tur bâkah Miss Ansell hlawh pawh kha ka hui tel theiin ka hria," ti hmakin a kamis chu a ha zui zat a, Ignacio chuan ka nupui chu rawn panin, "Ka ring dik chiah," ati sup, a bâk engmah a sawi lo.

Mayla tih loh zawng an au dar dar a, kei takngial pawh ka hawi lawl lawl mai. Amelia nge nge!

"Mr.Evans, ka lawmman tur kha in kan thlen rualin ka duh nghal ang," nui sak chunga min kalpelh rual chuan silai ri ka hre zawm nghal a, ka bânpuam a thip vang vang, Amelia tlu tur rawn dawm dingtu chu Mateo Ignacio a ni!

Rang lutuka Mayla tlanchhia chu Jacinta chuan a umzui a..

"Jefe, inring rawh," Sam chuan Pistol a rawn vawrh nawlh a, ka lo dawng chat.

Ignacio an Amelia a pawm nawlh a, Cottage lamah a tlânpheipui nawl nawl a, grape phurtu Truck tlânchhuak mêk chu bike-in Joe an a ûm thung!

Thawmhnaw dum veka inthuam miparuk vel grape zâm kâr ațangin an rawn zuang chhuak a, Christy pantu kah tuma ka tin laitak chuan ka hnung lam ațangin min rawn zuan thlu tawp a, ka bek ari nghal chawrh!

Ka khawhmuh a phe ruai a, Cottage kawngkhar inhawng a mipkhat lut chu chiang lo ruaiin ka hmu a, Amelia ka hrechhuak nghal zawk mai. Thawh tumin ka bei ngial a, ka bân na ut ut chu ka hre hmasa ber.

"Mr.Evans, thih i duh loh chuan che tawh suh," chu âw chu ka hriat hnu a ni.

A hmel en tuma ka dâk chhuak chiah chu ka tukkhum ari leh chawrh a, ka luhai lutuk leh ka mit fiah lo ta riai riai chu ka hriat hnuhnung ber a ni ta. ...

End of Chapter-17

©<++++[BeckirafARenthleI]++++®

Link:
BBcode:
HTML:
Hide post links
Show post links

Ngaia
Site Admin
Posts: 18313
Joined: April 30th, 2016, 4:07 pm

Unread post by Ngaia » March 25th, 2018, 11:51 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-18

MJS Grape Estates
LA.CA
Mateo Ignacio.
4:45Pm

Vawiin Estates-a thilthleng hi ka rindan chiah a ni a, Jefe(Jerome) hnenah ka sawi lang duh lo mai pawh a! A chhan chu hlim taka awm hi a phu ve a, Madam(Amelia) tel lova khawsak harsa atihzia hriatpuitu ka ni bawk.

Mayla Ansell ahruai dawn tih ka hriatin buaina eng emaw tak a chhuakin ka ring a, Sam nen a fâla kan inbiak hnuah Jefe râwn lovin Pistol kan pai kha a nia, kan tifuh ta phian! Hetiang êm hi chu a thlen ka ring lova, buaina a chhuah ka rin rualin a chhuak lo thei ve tho bawk, tih kha rin dan pakhat awm thei a nia..

Pistol rawn hmet puaktu khan a hmai a tuam tlat avangin tunge anih ka hre lova, Jefe bânpuamah a fuh thâwi a, Madam erawh a fuh miah lo. Silai puakri khan a țhâwng mai chauh a ni.

A naupai vang ani tih pawh ka hria a, khatia Mayla zawk chak ta lova, Madam-in hnehna a chan tâkah khan Mayla signal pêk, chemtê vawihnih chunglama alek lang ka hmuh vanga Jefe te nupa kianga kal ka ni rêng bawk a, tlêma tlêmah ka tlai țhelh a ni.

Madam kha thidang lo se chuan vawiin hian a chatuan hmun panin a kal ngei ang.

A chhan chu a thidang kha an kâp fuh emaw tiin silai a ri nawn tawh lo! An bitum tak zawk chu ka boss'Jerome Evans a ni' Ramon Salia hian Madam tihnat a duh ngai lovang, a âtchilh tlat a..Grape huan leh a neitu nupui a duhkawp tlat hi a buaithlâkna chu a ni, a ruala neih theih ni nghal bik lo chuan..

Vanneihna chan vek a inbeisei bik em mawni! Ramon Salia, 'Latin Uicho'?

Cottage-ah madam ka pawm lut nghal a, ani a him chuan Jefe a him tihna a nia, a nupui a hmangaihna hi a thûk hle tih kei aia hrechiang an awm lovang. Hetiang khawpa nungchang maksak a pu chung pawh hian a dawhthei ngar ngar viau a, a nupui a lo hmangaih viau chhan hi vawiinah ka hrechhuak chiah!

Amelia Lopez tluka hmeichhia mahni inenkawl thei, nalh leh hmelțha bawk, rilru tluangpurh hi an vâng êm a ni. American hmeichhiate neih ve loh nungchang pu mi a ni tlat a, mipa tân hnar a har viau reng a ni.

Cottage-a pindan pakhatah ka muttir ta a, a harh hun pawh ka nghak hman ta bik lo, rang lutukin ka tlânchhuah san leh nghal a, 'Lalpa venghim hrâm rawh!' tiin ka phun sap.

Grape phur Truck ûmtu Joe kha a ngaihtuahawm êm lo'ng chu..

Â, vawiin kan kal tlêm ni ber kher a, buaina ka tâwk hi a fuh viau lo.

Hnathawktu philî chung te thunun an ngai a, Sam tân pawh a luhaithlâk ve ngawtin ka ring.

Grape huan lai taka 'Jefe' lo dinchilhtu hmaituam pa chu biru chungin ka pân phei țhêm țhêm a, Pistol-in ka kâp thei reng. Mahse, midang engzat nge la awm ka hmu bik si lo va, chemtê ka hman mai angai a dawn a ni, nikhaw hrelova mu reng, ka boss chhanchhuaktu tur hi keimah 'Mateo Ignacio' ka ni.

Ka âwmah bân ka dah kawkalh zauhva, ka chemte pai chu ka phawrh chhuak ta zâl zâl a, pen sawm emaw lekin kan inthlau tawh.

"Mr.Evans, ka țawng i hria em?" Chu pa țawng bul bul pawh chu ka hre pha vek tawh a, ka țanhmun siamremin chupa tukkhumah tak chemte chu ka vawm bur ta chawt a, 'I thi lo a nih chuan keimah ngei hian ka kuttumin ka that ang che' ka ngaihtuahna avang chuan ka țhen nghal sak a.

Ka hnunglam ațanga ri fia ka hriat chu ka bum hman a, Pistol ka phawi hman hmain ka kut chu tu emaw hian a rawn man bet a, chutihlai chuan Jacinta'n Mayla a hnek thlu lai ka va hmu hman!

Min vuantu chuan nghet takin min pawmbet ta a, theihtâwp chhuahin ka tâl phut a, ka tâl chhuak ta. Min khawihtumtu hmaiah tak chuan ka hnek ta țhuai a, ka hnek leh hma chuan adangin min rawn pawmchilh leh hman nia, engzata tam nge annih ka hre der si lo.

Chutihlai tak chuan min chelhtu chu a lêng lawp a, Sam chu sam phe siauvin ka hmaah a rawn ding chat! A hmel thinrimna a khat chu a hlauhawm ngei mai, hetiang êm a Sam-a thinrim hmel hi ka la hmu lo.

"Ignacio, Jefe hi inchhung lamah lo va hruai lut rawh," ka hma a mipakhat hnâr thi sûng chu dim miah lovin a chhuih thlu tawp a, a kut a hûm ruh nghal țang mai.

Hmeichhe țê țhat ri hria-in Sam nen chu lam chu kan hawi nghal a, Jacinta chuan Mayla samah țhâmin thingbung hian a lo hlap er zawk zawk a, a dimlo nasâ! Hundang chu nise ka nui hukin ka ring, a hnungah Christy chuan mipakhat hmaituam hi a lo pêt ve chawrh chawrh bawk a, he mite pahnih hi an ngaihtuahawm dawn hauh lo, kan madam ang maia kawlhrâwng anni.

Amelia Lopez hnuaia thawk awm rêng an lo nih hi.

Vawilehkhatah thâwm ri hriat tur awm miah lovin areh duk a, kan khawih hliam tâk te tih loh chu tû hmel mah a rawn lang ta lo. Jefe mutna bulah kal hnaiin a hmel thisenin a chiahpiah nuai ka hmuh chuan ka chhungril a sa leh zawk mai, a palian si a, Cottage thlenpui a huphurhawm kher mai.

Sam nen harsa fê-in Cottage chu kan thlenpui thei hrâm a, Dr.Esteban phone turin pâwnah ka chhuak leh ta a.

Jacinta leh Christy pawh Mayla Ansell Chhip sama țham chungin Cottage an rawn pan a, an pawr fap a, chuti mai zuam chi anni lo tawp mai le.

Nurse an la ni zui cheu nen, boss te nupa chu an kutah dah rih phawt mai ang.

Ramon Salia kid, kan kalsan tâk te kha buaipui pahin Joe ka ngaihven a ngai dawn a, hnathawkte erawh Sam-an a thunun țha bawk ani ang, an hna an chhunzawm leh mawlh mawlh tawh a, anni te chuan buaina lo thleng aiin sum thawhchhuah kha an thupui ania, an demawm hran lo ve.

Hausak duh țheuh țheuh, he buainaah hian an inrawlh kan duh lo bur, nunna chân te an awm palh phei chuan MJS Company hi a hmingchhe viau dawn a, chu chu kan thil duh loh ber a ni.

Jefe khan reporter hruai tel turin min hrilh a, ngawirengin ka hruai lo kha a nia, ka tifuh hle bawk. Min hau ta anih leh ka ngawi mai ani ang chu.

City Hospital
LA.CA
Amelia Evans

Ka mutna bula thaw ri hawk hawk ka hriat chuan ka harh hlawl a, silai ri kha ka hre tak e, abâk engmah ka hre zui miah lo! Dios! Tunge min kah tumtu kha ni ang. Ka piah chiaha khumah chuan Jerome-a alo mu ve reng nia!

Cuel el significado! (Eng nge a awmzia!) An kap fuh tihna nge!?

A lu chu antuam var lûk a, a bâk hliam dang a neih leh neih loh pawh ka hre lo! A nghâwng achin hnuailam zawng puanin an khuh vek a, a thi a nih vaih chuan ka inthiam thei ngai tawh lovang.

Min beitute hmachhawn turin ka châk tawk lova, vawiina ka pasal chêtdan ngeiawm zet kha hriat nawn fo ka duh hek lo. Ka hmuh lai ngeiin Mayla a duat vel a, ka thik miah lo tih ka sawi chuan dawt a ni, kei hian ka thîk takzet.

Engvanga buaina kha chhuak nge ka hre lo va, ka'n nurse thar te pawh engtin nge an awm ve tâk ka hre hek lo! Ka nun buaichuar ta nuai hi tihfel dan ka hre leh si lo. Buaina hi a ințan dawn chauhva hriatna ka nei lehnghal a, ka naupai hun hi a fuh nge fuh lo pawh ka hrethiam tawh bik lo.

"Ma'am, i harh tawh elaw!?" Sam chu eitur khai bâwr lûkin arawn lut a, a chal inbel var ve hlek ka hmuh chuan pem a nei tih hrilh hranpa ka ngai bik lo.

"Darkar engzat nge helai hmunah hian kan awm tawh!?" Tiin ka țhu chhuak nghal a, Sama'n min lo puih a tum chuan 'angai lo' tih nan ka lu ka lo thing vat a, Jerome-a ka melh zauh hnuah, "Jefe hi a na viau em?" Ti a ka zawh chuan a nui huk nia.

"Jefe, maw!" Nui lek lek chunga tinawn supin min en a, "Ah,er..ka pasal ka tihna.." ka tisap a.

"Madam, diktak chuan Jefe tukkhuma an hlapna hi a hliam thuk riauva, a harh hun tur chu Pathian chauhvin a hria ang chu, a bânpuam leh a khupah hliam a nei bawk," A boss melh vang vang paha atih chuan ka thawchhuak nghal hak a.

"Keimah min chhan nâna hliam hi tuar a ni tiraw?"

"Ma'am, chutiang a ni lo, Ramon hian Jefe grape huan leh nang..." A sawi zawh hmain Ignacio chu a rawn pên lut a, "Sam, Jefe kha ngaihven la, madam hi doctor cabin-ah ka'n hruai lawk ange," Ignacio an tih chuan ka hnial lem lo, tun dinhmunah chuan naute hi a pawimawh hmasa ber rêng a ni.

"Ignacio, kal ila.." ka sawizawh rualin min kuah a, cabin chu kan chhuahsan ta a.

Jerome-a hmel kha ka mitthlaah a châm zui rauh rauh a, eng ang pawhin min tina mah se, ka pum chhunga naute pa a ni tlat si a, Mourizo ani emaw Jerome Evans pawh ni rawh se, ka tân danglamna a awm lo.

A dinhmun ka en khan mak takin ka țah achhuak hauh lova, min kalsan ka ring hek lo.

Hlim taka kan chendun theih lohna tur chhan lah ka hre chuang hek lo.

Doctor in min check lai chuan ka ngaihtuahna a vâkvel ruai a, ka nu leh pa hmangaihna dawng phâkin ka awm hek lova, ka innghahna tur leh hmalam hun nuam taka hman ve ka duh anih chuan Jerome chauh hi beiseina ka neih chhun a ni.

Mourizo lakah lungawi lovin na viau mahila mithar ang maiin ka nunah a rawn lang leh a, kan inrem theihna tura hmâ la hmasa zawktu tur chu keimah ka ni tih ka hria.

Ka naupai pawh a țha pangngai a, a hma ang bawkin damdawi eițhat leh indim kha ka tihtur a ni leh tih min hrilh chuan ka thawhuai thei nia. Ignacio puihnain cabin lamah kan kir leh ta a. Ka pasal erawh ala harh ta lo fo!

A harh hunah engtin nge ka lo hmachhawn ang tih ka hrethiam miah lova, mahse, kawhmawh bâwl zawnga awm chu ka tum tawh lo.

Kan inneih chhan leibâ hi kan tihfel hma loh chuan atân nupui țha ber nih ka tum ve tawh thung tur a ni dawn lo'm ni.

'Contract, contract..' ti a phun sapin ka pasal hmai dâng lap chu ka chûl a, Ignacio leh Sam erawhin ka thusawi hre hmel an pu lo.

Hetiang êma ka pasal natna thlentu hi kei hian ka chhuah tawp lovang.

After 3days
MJS Vill
8:20Am

"Ma'am, lokal chu i duh lo takzet maw?" Joe chu ka mutna bulah rawn dingin min ngaihtuah hmel hle a, vawiin hian Jerome-a hospital ațangin a rawn chhuak dawn a, kal ve turin min beisei tih ka hria, mahse, kal ka tum lo.

"Inah ka lo awm mai ang, i hriat kha, motor-a chuan chhên hi ka taksa in a tlin meuh lo, invaiin kal ula, nulaho te nen inah kan lo awm ange,"

"Ok, ma'am, Jefe chuan a hmu châk ngawt ang che,"

Joe chhuah hnuah ka melh ngai melhin ceiling ka en ngar ngar a, kan nupa pindanah ka la lut leh ta lo. Nâ em em sawi tur ka neih loh avangin hospital-ah zankhat bâk ka riak lova, Jerome-a ka ngaihtuah viau rualin a nauteho an fel a, engmah ka buaipui ve a ngai meuh lo a ni e, hahdam ka mamawh a, nithum ngawt a hmel ka hmu tawh lova, ka ngai hle tih phat buai pawh ka tum lo.

Christy leh Jacinta erawh lângin an rawn kal rih a, kan buaina chungchâng leh Mayla an sawisak dan vel an sawi lai chuan ka lo nui ru var var.

"Kha nu kha keimah ngeiin a ringruh ka la țhuai chhum ang maw le," ti a ka sawi laiin Christy chu a nui tlârh tlârh a, "Ma'am, insum teh i naupai khan 'heart attack' a nei palh hlauh ange," fiamthu titak deuhva atih chuan a nih duh hmel ka ti viau lawi si.

Ka țawngkam hman thlengin fimkhur a ngai dawn ta chu a nia, ka thei êm ang chu!

Jerome-a lo haw tur chu ka nghakhlel tho nâin huphurh riauna ka nei a, pindan hran ka lo luah hman khanglâng nen ka lâi kual vel vek a ni ber mai. Engtin nge bul ka țan ang?

12:40Pm
Penthouse

"Ma'am..."Min kotu aw chu ka mang hriat ruai ruai a, peih loh zeta mengchhuakin ka room kawngka bula Joe lo ding chu ka hmu ta a.

"Ma'am, Jefe-in a ko zing lutuk tawh che," inthlahrun hmel taka tiin ka mutna lam chu a rawn pan a, breakfast ei zawhah khan ka lo muhil leh daih chu niin!

"In lo thlenna a rei tawh em?" Khum ațanga thawh tumin ka inbengkang a, Joe an min lo pui vat. "Darkar hnih chu aliam tawh ang,"

"Ok, ka lo chho dawn nia, ka'n intifai lawk ange.."

Jerome-a lo hmuah ka tum ve nen a zia lo hle mai, a lungawi lo viauvin ka ring a, mahse tihngaihna dang awm hek lo le, ka muhil tlat si a, ka tih luih pawh ninghal lo chuan..

Kan nupa room kawngkhar bulah ka la hmuh ngai miah loh mipa pahnih an duty a, min hmuh veleh bu nghauh chungin, "Ma'am, Jefe in alo beisei reng tawh che a nia," tiin ka luh nan kawngkhar min hawn sak vei thlap a, a chhawr thar anni ngei ang, kum lamah pawh an upat hmel deuh tawh a, venhimna an uluk sâwt hle mai!

Khuma ka pasal mu ka hmuh chuan ka ding chawt. A hmuihmul leh khabe hmul pakhatmah a mêt fai lova, ni li chauh hospital-ah a awm kha a nia, a intifai thei lo chu ni bawk mah se, Jerome-a hmai fai vang kha ni tawh lovin tuna ka hmuh hi chu Mourizo Soreno hmel a ni.

"Amel.." thâm sapa min kohna ri chuan ka chhungril a nghawr dawt!

"I lo thlen laia ka lo awm lo chu pawi ka ti khawp mai," khum bulah chuan kal hnaiin a mitkhur thûk ta dâk leh a hmel dal riap chu ka lainat thar ta riauva, ka pasal intivei leh chapo deuh kha hmuh tur awm lovin a mitmeng a ngui deuh a, ka mitah chiang taka min en in, "Ka ngai lutuk che," a bân na lo lam chu rawn pharin ka kutah a rawn vuan a, rang takin ka lo hûm sak ve vat.

"Mouri..."

"Umn..Amel min ngaidam thei lovang tih hre mahila, khawngaihin ka thusawi tur hi min ngaihthlâk sak hram la ka duh," a aw zawi ruih chu hriat a har lek lek a.

"Haji! Engmah sawifiah a ngai hleinem hahdam tum rawh," tiin a chalsam thur chhapah chuan ka chûl a.

"Amel..."

"Min ko reng dawn nge? Min fawp zâwk dawn?" Kun hniamin a hmuiah ka fawp ta a, makti hmel a pu deuh, mahse a insiamrem leh thuai tho.

Duhthawh zeta kan infawh hnuah hreh zetin ka thlah ve hrâm a..

"Soreno tiin ka ko dawn che nge, Mouri, Jerome.." tiin ka nui hak hak a.

"Mourizo tih hi ka hming hmasa chu a ni ngei a, mahse, North America-ah chuan Jerome ka ni.." a mutna bula mu ve tura min sawm chuan ka hnial lo chiang kher mai.

"Birth Mark thup thiam deuh te kan awm a.." ka nui duh miah lova, a hmela mak tihna lo lang chu ka hmu reng.

"Enteh Amel, tuna ka hmel i hmuh hma hian ka nihna i hre tawh em ni?"

"I hmuihmul leh khabe hmul i zuah emaw i sam a sei emaw, sei lo pawh nise, ka thinlung hian Mouri kha a hria a ni." Ka ti sap a.

"Engtikah nge i hriat?"

"Jaja! I kutchuk thup tumna Mediplast khawktu kha tunge ni a i rin reng reng le?"

"Maw!?" Jerome chu thawh tumin a inbengkang a, ngaihdan ni vak lo hmel pu-in min en a, a thinrim leh ringawt em maw ni!

"Khawvel hnungchhawn ang mai a lehlam hawia i mut ngût țhin kha i la hriat chuan kei hi ka muhil ve hauh lo, ka pasal phuahchawp hnungzânga vun lem khawk thei invuah hmu lo tur khawpa mit fiah lo ka ni em ni? Ka mitin a hmuh ruala ka kut lo che ve hman ziah hian kha i vun kha a khawk châk tlat a nih chu mawle." Ti duahin a kawr hâk chhungah ka kut ka dah lut a, a dar veilam kutchuk awmna lai ngei chu dimtêin ka chûl sak ta a.

"Lopez leh.." tiin a phun sup a.

"Wow, Evans, Soreno, ațangin Lopez-ah min transfer leh dawn em ni?" Ka kut chuan a taksa hmalam chu muangchangin ka chûlthla zel a, a pyjama kâwngah zen lutin a mipatna rawn mar tial tial chu ka tawk ta a. A kiai suk nia.

"I nungchang ang hi dollar engzat man nge ni ang le!?" A kekawr chhunga ka kut dah chu a rawn bawhthuah a, a nuih a za hle tih ka hre mai.

"He nungchang zûna uai hian a ni lawm ni, min neih chung chung.." ka fiam lêt ve zauh a.

"I ngawi dawn nge, thihchilh inhuamin hmangaihna ka chenpui zawk dawn che?"

"Thihchilh lo ve, hmanhmawh suh, i nupui hian eng thiamthil nge ka neih tih i han enchhin ang hmiang," Muangchangin ka thawmhnaw inbel chu ka phelh a, a mitmeng phurna a khat chu ka hawisan bik lo.

"Mahse, naute.." ati thâm sup a.

"Naute maw! Tunah hian a pa diktak hmu châkin a hawi hrek hrekin a nia ka rin ni!"

"Lalpa leh..!" Jerome-a kut chu a awm mai mai ta lo tawp mai, rang fahran hian a lamah min pawthnaiin min fawp nghal nawk nawk a, ka kut hnuailam che sek chu tihtawp tumna ka nei miah lo, a inpeih ta a ka hriat vangin ka insiamrem vat a, a mipatna khauh far mai chu ka taksa in a zawm ta a..

Uar viau theih ni hek lo le, kan naute in a pa a hmu ngei tih hriat tak hian ka chhungril a rawn lum pup a, ka che zawm tawh lo.

"Amel.." Ka pasal hmela lungawina famkim lo lang ka hmuh chuan ka nui chhuak ta var var a.

"Ka pawisa i ba ve thung a nia Jerome," ka tih chuan a ngaihna hre lo zetin min en a, thawmhnaw kan la inbel ta chuang lo fo.

"Engtia bâ in maw!?"

"Kan 'inbet' kha i la hrereng anih chuan 'Kûang khat' pawisa leh Mayla hlawh kha ka chan tur niin ka lo hria a," ka sawi lai chuan ngun lutukin min en a, "A hrana pêk kher che angai dawn em ni?" tiin kan inneih zungbun ka bunna lai ruak ta hiau chu chûlin, "Nupui tak chhinchhiahna i bun leh hunah ka neih engkim hi i ta a ni tawh ang," tiin a kiai zui suk a. A va'n hmelțha tak!

"Jefe..." Kawngkhar inhawn rualin Joe a rawn lut a, kawngkhar kan kalh reng reng lo. Pawn lama duty khan kan thâwm an hriat loh ngei ka beisei.

Ruak deuhthaw a kan awm min hmuh chuan Joe chu a lâi chhe hle a, ka nuih aza kher mai.

"Sorry, Jefe, Ma'am.." a kekawr ipte ațang chuan eng emawni a rawn rawn phawrhchhuak a, Jerome chu a pe ta a.

"Joe, Jacinta leh Christy kha Airport thlengin i thlah dawn nia, lunch ei hunah tih loh chuan tihbuai kan duh lo aw.." Jerome-an atih chuan Joe chu a nui suk suk a, min en lovin tukverh lam a hawi daih bawk! Lai chhe ve tak a ni.

Joe chhuah hnuah Jerome chuan ka kut chu lakângin a fawp zauh a, "Fapa i neih hma chuan i phelh thiang lo a, chumi hnulam erawh chu i thu thu a ni e," mitmeng dam thluam hian min melh a, min hmangaih thu a sawi lova, min duhthu a sawi hek lo. Keipaw'n sawi kher ka tum lova, he contract piahlama thil thleng tur chu Pathian chauhvin a hria ang chu. Tunah erawh hlim taka hun hmang thei turin kan intilâwm tawn mai a ni.

"A rit țha viau tawh ania, i bun hmasak ai khan 'gram' thumin a rit zâwk," tiin a hmaa ka lo bun tawh rangkachak zungbun chu ka kutțangah a rawn thun ta zâl zâl a, ani chuan a zungbun kha ala phelh miah lo ani ngei ang, ala bun reng!

"Ti khan Evans ka ni leh ta chiah e," fiamthua sawi ka ni tak nâin ka thinlung phêkah Evans ka ni tih ka chhinchhiah thung.

"Soreno nih i duh zawk pawhin a theih tho a nia," ka hmui a rawn tawk zauhva a mimeng chuan thutiam tamtak sawi mah se eng nge a nih ka chhiar thiam lo.

"Jacinta leh Christy kha khawiah nge an kal dâwn?"

"Duhtak, i hriat kha i nau neih a la hla thova, an pahnihin training țha zâwk nei tur leh eng emaw zir belh turin Spain-ah ka tîr alawm, Sam pawh a kal tel ve dawn a, i nau neih hmain an rawn lêt hman ang," tiin khum bula tui chu a in khawlh a, a taksa ruak kung chu engahmah ngai ang pawhin a lang lo.

"I grape huana buaina rawn siamtute kha i hrechhuak tawh em?" Ka tih chuan a hmel chu chawplehchilhin alang rum nghal a, "Hre tehreng mai, min kâptu pawh ka hria," ati ta a.

"I bei lêt dawn lo em ni?"

"Amel, min en la, ka hliam pawh ala dam kim lo a nia, ka naute kutah engkim dahin Mafia pawl pawh ka ruai thei, mahse, ka ngawih tlat nachhan chu keimah ngeiin ka kut lâwnga thah ka duh vang ani." Zawi sup leh fiah faka ațawng chu a nghet charh nia.

"Țangkaina ka nei anih chuan ka pui hreh miah lo che a nia," tiin ka ngheng hnai țalh țalh a.

"Ni lo ve, hmeichhia i nih ang leh ka nupui i nih angin ka venghimin ka enkawl tur che a ni a, tunah chuan kha i pum chhunga ka fâ chauh kha ngaihtuah ang che.."


"Ihh..I fa maw!?"

"Aw ni e, Mourizo ka nihna ang leh Jerome Evans ka nihna anga ka fa a nih kha, nichin mai pawh khan a pa hmel a hmuh tawh kha.." tiin a nui suk a, "A pa nilo in hmuh a tum phawt chuan a lo beilêt ngei ang, a chhun tur chu i hria alawm," ka hmai bulah rawn kun hniamin, "Nang hian engtikahmah ka hmelma te i beih ka remti ngai lovang." ati zui leh a.

"Mayla Ansell i duat hlarh hlarh khawp kha maw! Khaw'nge tunah a awm le?"
Jacinta leh Christy ten an khawih hrep hnu khan Ignacio kutah kan hlân chhawng a, a bak hriat zui ka nei tawh lo.

"Mayla chu Ramon hnenah kan dah lêt tawh, i huatna kha dah țha rih la, keiman ka chingfel turah ngai rawh."

"Tinge Ramon hnenah i dah leh țâlh a, Police kutah dah mai tur a lawm."

"Police-a pêk ai chuan a pasal hlui hnena dah kha a finthlak zâwk, a chhan chu kan la mamawh dawn a, amah khawih tute kha nang leh kei nilovin kan nula pahnihte an nia lawm, Ramon hian min la bei dawn chauh a nia, chuvangin ka hna ka zawm tawh rih lovanga ka aiah ka pa a awm ang, anmahni bei tur hian ka inpuahchah a ngai tih ka hrilh lâwk a che." Tiin ka kâwngah a rawn kuah a.

"Heng zawng zawng hi engvanga min hrilh ve ta vek nge i nih!?"

"Ka nupui i nih vang leh, Ramon Salia hian a ngaihzawn che avangin i fimkhur thiam theih nana sawi mai ka ni." Ati leh sup a.

"Awihawm loh lutuk, kei hi Ramon khan min ngaizawng lo tawp ang," ka awih loh êm avangin ka ner nâng a, chu chu a hmuhin Jerome chuan, "Min ring rawh Amel, remchang siam hauh suh ang che.." ka hnute ațanga chûlin ka lâi vel chu a chûl pah dan dan a.

"Min thlêm tum duh suh, ka țâmchhawl lo chauh a nia," ti a thawhsan ka tum chuan, "Shower nei zuai ila, lunch kan ei dawn nia," amah chu tho hmasain dimtê in min pawt tho ve nghal a, tuna kan awmdan vel han nawmzia hi..ka mumang a nih loh hram ka beisei.

After 5 Months
MJS Penthouse
LA.CA.USA
Jerome Evans.

Amelia nena kan nupa nun chuan Vanram tluk mah suh se, Hremhmun chu a nilo chiang alawm! A hmaa a nungchang kawlh hrâ reng kha a bo tial tial a, a naupai chuan a taksa leh rilru thlengin a tidanglam a ni ber mai.

Buaina liantham engmah kan tâwk tawh lova, Ramon Salia pawh kan la chhui reng tak nâin engmah thawm riva a nei hran lo. Ka thlamuang ta huai e tihna a ni lova, eng hunah pawh chêt rawn thawh se, chumi laka invêng tur chuan nitin ruahmanna ka siam belh zel thung a ni.

Amelia dul puar âl chu en loh pawh tum ila ka en lo thei lo, a inhmeh êm a ni. Amah a lianin a sâng țha si a, inthazo taka kut hnungsuih ngeia a vei târh târh ka hmuh hian lawm lohvin ka nui leh nge nge țhin.

Hrilhchawp ngai lovin a taksa a sawizawi ngat ngat a, Mateo Ignacio pawh a ngaina ve țan ta deuh alawm, Sam a awm si lo va, Joe nise Estates lama Wine sâwrna hmunah a awm daih bawk si a, ka chhawr thar ho lah hian an ngaina phian zel a, kei hi ka chuang lek lek fo nia.

"Jerome, ka pa kha i be ta em?" Amelia'n balcony ațangin min rawn au lang lang a, hmangaihna kan chendun apiangin 'Mouri emaw, Soreno' tiin min ko ve ziah, kan nitin hun hmanah erawh 'Jerome' tiin min ko thung a, ka thinrim chuang bik lo. Atan chuan Mourizo Soreno ka ni tlat alawm..

"Be diam tawh, i nauneih hma chu arawn kal dawn lo, Spain-ah a awm daih alawm," Felipe Lopez te nupa pawhin an fanu a rai meuh chuan an rawn ngaihsak leh viau lawi si. Leibâ kan sawi chhuak tawh ngai lova, naute a neih hunah mipa a nih chuan Contract a tawp dawn a, hmeichhia ani vaih chuan siam danglam angai thung ang.

Ka țawngțai ve chhunah chuan 'Lalpa hmeichhia min neihtir rawh..' tih hlirin ka dil țhin, ka hmangaih thu ka hrilh lova, ani paw'n min duh thu emaw pawh a sawi ngai lo. Nupa kan nih angin kan ingaihsaka kan induat tawn mai a ni.

"Zanina hâktur ka nei lo, ka tâwt vek a nia," a wardrobe chhunga thawmhnaw chu a chinglet hneh ngei mai. Chhuatah a țhu thluang diai a, MJS Company neitu nupui a ni tih pawh hriat loh khawp hian zuk awm thiam a..!

"Ka leisak i duh tawh mang si lo a, ka inrawlh dawn lo." Ka ti nghut a.

"Min leisak rawh ka tih loh kha, ka tâwt tih thu ka sawi mai ania, zanin chu ka kal ve lo mai ang," tiin a thawmhnaw vawm darh chu a chharkhawm leh a.

"Kal e a, keimaha kal ka tum miah lo a nia," khum chungah țhuin a chezia chu ka thlir a, a biang thau ta deuh leh a pum kawh lah chuan atilang sexy ru riau nia, englai maha thau duh ngai lo mi kha a nia, tunah erawh chuan a khat țha al al khawp mai, mahse, a infit ru zêk tho.

"Ka car thar kha vawikhatmah ka la khalh lova, tunah hian thawmhnaw lei turin ka kal dawn," a țhutna ațanga rawn tho chhuakin a thawmhnaw chu a vawm lut tawp tawp a, nakin lawkah amah bawkin nilêngin a thlep fel leh vek ang tih ka hria, tûma khawihpui a duh ngai lo.

"Chhuak lo ang i duhzawng sawi la, kan lâk tir dawn nia,"

"Keimah ngeiin en ka duh tlat, min hnial miah suh, ka pawisa i bat kha.." ala ti zawk zamah a! Ka nupui hian engtik thleng nge ala sawi dawn ni, eng emaw hlekah a sawi chhuak ziah a, ka ba tak tak emaw ka ti hial tawh! Game an khelh ni a ka thusawi kha a sawi chhuak ve ziah a, thil a hre rei thei ropui si.

"Yah..insiam rawh kan pahnihin kan kal dawn nia, Joe ka'n hrilh ange.."

"Midang hruai a ngai lo, i uikawm zia an hre tam mai mai," atih chuan ka run teh a nia, a țawngkam ngeiawm deuh deuh kha a la bansan fel hlei thei lo chu a nia.

Amelia insiam chhungin țhutkhawmna pindanah whisky ka lo dawm a, wine takngial pawh a in tawh ngai lova, a insûm thei ngar ngar khawp mai.

"Jefe, ka inpeih e.." Joe chu intur ka thlit sak ve a, bodyguard hruaia chhuah hi ka nupui hian thih hreh tak hian a hreh a, a chhan pawh ka hre lo. Buaina a tâwk hnem tawh hle a, a harhchhuak thei chuang țhak lo.

"A car thar kha lo dahchhuak la, amah i khalhtir dawn nia," Joe chuan ka â emaw ati ni ngei ang. "Jefe..madam te chu car khalh chi a ni tawh dawn em ni?"

"A khalh loh i duh chuan a rilru hmin i tum dawn nia," tiin whisky chu ka lem khalh a.

"Awle.." Joe chhuak ta chu ka thlir zui a, ka hnuaiah kum kua lai a thawk tawh a, vawikhatmah ka tâna rinawm lo zawngin a la che ngai lova, ka nupui vanga kut ka thlâk pawh khan bân a tum der lo! Sam leh Mateo Ignacio pawh chuti tho!

Ka grape phurtu truck lian ru chhuaktu pawh Joe hian a va chingphar nasa hle tih ka hria a, nikhaw hrelo va ka awm lai khan an vaiin ṭhahnem an ngai tlâng vek a, an hlawh pawh ka pun vek ta kha a nia.

"Jerome, ruih hmasak i tum elaw!?" Amelia chu step-ah a rawn chhuk a, a kawr hâk fual hnalh leh a sandal bun chuan ati hmeichhia hliah hliaha ka hriat chu le..!

"Ruih lam nilovin, ka nupui leili hriam ṭha zet hi a mawi tâwka ka chhan thiam theih nan ka in maw le."

"Jaja! Min ngaisang lutuk teh suh, fly kick thiam tak fapa i duh chuan i nupui hi min duat khuchûk la a nimai," tiin ka no ken lai chu min lâksakin dawhkanah a dah a, car chahbi lâk a tum chuan, "Joe an ala chhuak tawh, lokal rawh le," a bânah vuanin Penthouse chu kan chhuahsan ta a, thla nga chhunga kan vawikhat chhuah dunna tur a ni.

Mateo Ignacio chuan min rawn siai suk a, ka nui chhuak huk!

Avenida pinter
Shopping Mall
LA.CA

"Joe, car-ah min lo nghak mai rawh aw," Joe lam hawiin ka ti sup a, ka nupui car khalhah mipa pahnih kan chuang ta chu a nia, ka nuih a za viau lo.

"Yes, Jefe.."

"Amel, kan rei dawn em?" Parking-ah a Volvo Car chu hnehsawh zetin a khalh lut a, engmah thiam loh pawh a nei reuh lo, midang a mamawh lo lutuk hi ka ngei lek lek zel.

"Rei lutuk lo turah inngai rawh, ke a teivah ka tlin pawhin ka ring lo," ṭhatêin min chhang ve mai a, Penthouse chhuahsanin vawikhatmah zuk chhuak ngai lova! Mahse, inchhungah pawh ama hlimna tâwk tur chu tihtur a hre zel tho.

Min luhpuina Mall chu a zau ṭha hek hawk hle a, engkim an zuar emaw tih mai tur a ni.

"Mr.Evans, englam nge in en dawn le?" Dawr nghaktu chuan min hria tih hriat tak hian a nui sâng a, Amelia lam chu melh zauhin, "Sawtiang ho tana inbel chi thawmhnaw saw kan mamawh ang," a beng bulah ka ti sup a.

Amelia chu a en vang vang hnuah thawmhnaw tam tham zet hi a rawn phawrhchhuak ta a. "Mrs Evans, i duhzawng han en teh le.."

Ka nupui raipuar hian amahin thawmhnaw a en dawn chu a ni si a, ka ex-girlfriend te nen chuan an inang lo leh ta phawt a!

Tam deuh a thlang dawn emaw tih laiin pathum chauh a thlang a, mak ka tiru viau..!

"A vai khan i la vek dawn lo em ni?" Ti a ka zawh chuan dar san âk hian, "A ṭul teh ṭeuh lo em mai," ati liam puat a, dawr nghaktu awmna lam panin a card a pe ta a, khawia mi mah pawisa va nei suh. Min dil hun nghakin ka thlir reng a, min dil chu sawi loh mipa thawmhnaw an khai tlar dulna lamah min hruai phei a, "Zanina i hâk tur thlang ve rawh le, aman lamah buai suh.." ala ti tak deuh deuh a..!

A kutah vuanin dressing room-ah ka luhpui vat a, "Khawi ami nge pawisa i neih?" Ka zawt nghal tawng a.

"I hriat ve zel te chuan a chi nang," ti a min kalpelh a tum chuan a bânah vuanin, "Khawia min nge?" Ka ti leh ngat a. Ka vawnna chu tâl pitin, "Chuti êma rethei ka ni bik hleinem, he khawvel pum hi lei thei lo mahila, a zatve leina tur tal hi chu ka nei pawh a ni mahna," a nui zui sak nia!

"I card kha lakir la keiman ka pe ang," ka tih chuan cho zet hian min en a, "Ka chhuahsan duh hunah che ken i phal lo leh emaw a ni anga,chuvangin ka hâk tur chu ka lei ve mai ang," ti nghauhvin dressing room chu a chhuahsan hmak a, ka hrilhhai letling zawk.

Mall kan chhuahsanlai chuan min thlirtu awm tlata hriatna ka nei a, hnunglam hawi erawh ka tum lo. Amel chuan ka kutah vuanin nghet takin a hum a, tih thlabar ka duh thertê lo.

"Duhtak, a chhungah lo ṭhu la, thil eng emaw lei hmaih ka nei tlat," Car kawngkhar chu hawnsakin Amel chu kaṭhut luhtir a, Joe pawh phone bih ngur ngur chungin a lo la ṭhu reng nia, car hûnna piaha mipakhat lo ding reng chu ka hmelhriat ang ka ti hle a, mahse, ka hmuhna hmun ka hre chhuak lo, ka hmu ve tih a hriat hnuah pawh a la hawisawn duh chuang miah lova, a tu chu nge maw ni le!?

Nepnawi dawr pakhatah chuan lutin cigarette ka lei teh ngawt a, min thlirtu dang an la awm chiang tih ka tukkhum za mer mer aṭang chuan ka rin hriat mai!

"Mr.Evans, i ṭha em?" Min rawn betu hmeichhia chu a hmelṭha reuh hle a, ala upa vak lo ang tih alang reng bawk.

"Yah, ṭha e.." henu hi reporter lam emaw pawh a ni maithei tih ka ngaihtuah chhuak thut a, ka inher tur chiah chu ka kâwngah rawn kuah thutin ka hnungah a bei vei thlap nia, camera de chuai chuai chuan ka mit a tivai nghal chum chum a, tu emaw thângah ka awk tih hrilh hranpa ka ngai hauh lo.

Khawi aṭanga lo chhuak nge tih pawh ka hriat loh hian reporter paruk vel lai Camera-a min tin chungin an rawn chhuak a, chu nu nawrsawn ka tum veleh a aia nasain min kuah nghet sauhva, a kut veilam rawn chêtin ka mipatna chu ka kekawr chhanah a rawn hum ta a, eng thil phiangsen nge ti a a inhriat ni!

Kut thlâk lo turin ka insûm nasat a ngai viau.

"I game khelh hi a tawp thleng ngam ang che," tihpahin min kuahtu nu chu ka kut dinglamin ka phih sawk a, a ṭê zui ṭhawt, mahse, rang lutukin min rawn zuan a, ka taksaah a rawn pakai nawlh! Ka nghâwngah ala kuah bet nghek zui ah..!

A hmel tai hlar leh a mitmeng hur hmel fê ka hmuh chuan ka chunga thilthleng hi ruahman sa a ni tih ka man nghal. Rawn kun hniamin ka hmuiah a rawn fawp ta a, Camera pawh a ngai ang chiahin a de leh suh sup bawk.

"Eng movie nge in lo en a..?" Ka nupui raipuar ṭeuh chu kan bulah hmanhmawh miah lo hian a rawn pên phei a, a hnungah Joe O'Hara in a rawn zui bawk.

"Mrs.Evans, i pasal girlfriend thar ber hi i vawikhat hmuhna a ni em? I pasalin khawlaia hmeichhe dang a fawp hi eng nge i ngaihdan!?" Zawhna chi hrang hrang a ri nuk nuk a, Latin ṭawnga zawhna a tam ber! Chunu lah chuan min thlah a la tum mai lo lehnghal a, hmeichhiain a ngam a nih phawt chuan engvangin nge ka tih loh bik ang.

Min kuahna chu ka phihsak dawrh a, a tluk hma chiahin ka dawm ding vat a, reporter lo ding hnai ber chu, "Khai le i duh tawkin i thil awrh lai kha han hmet de ta che," ka tih chuan a nui tawp chat.

"Joe, an camera kha chhuksak la, Amel, car-ah min lo nghak rawh," ka tih chuan min en vang vang a, "A thawmhnaw kha phelhsak la, mipui hmaah nangmah mamawh ngawih ngawih turin siam rawh," min ringtâwk zeta ka nupui ṭawng hniam chhak chu ka rilrem zawng tak a ni.

Social Media hmanga min tih mualpho an tum tih ka hriat ang bawkin ka nupui hian a hrethiam ve tih ka hriat chuan ka thaw huai nia, Amelia duhdan ang ngeiin ka ti ang.

Chu nu chu ka lamah pawt hnaiin a hmui sen hlurah chuan na zetin ka fawp a, a kawr hâk chu hlimin a hnutê dimna nei miah lova ka ṭhamsak tâkah chuan tâl chhuah tumin a ṭang phat phat a, thlah ka tum thertê lo.

"Camera kha in hmang thei ang, in duh zat zat la rawh u," tihpahin Amelia chuan amah hnaih bertu mipa chu a dinchilh a, a Sandal bun lai chuan a lo tin uaih nia maw le, a mitmeng thîp tak chuan a thinrimzia a tarlang chiang hle bawk.

"Joe, an vai khan han thehthal teh le, a ṭul a nih chuan ka pui hreh miah lo bawk che," ala ti tak deuh deuhva..

Reporter min hualtute chu tlânchhiat tumin an che thut a, Joe a cherang ngei mai, pahnih chu a kick thal ta phawt a, Amelia bula ding pawh ka hmuh loh kârin a lo thal der tawh, a camera awrh lai chu Amelia'n a lo hlihsak mawlh mawlh a, 'inrawlh suh' pawh ti ila a duh leh chuang lovang.

Kâr lovah chu mite paruk chu an thal fai vek a, an hmanrua erawh ka nupuiin lei chârah a vaw chhe vek thung.

"Mr.Evans, min ngaidam hrâm rawh," nichina hmeichhia kha hnute lâng huaiin a ding a, a khur zaih zaih bawk.

"Tunge he thil ti tur hian tîr che," ti a ka zawh chuan, "Boss, Ramon.." a sawi zawh hma hmain a tukkhum samah ka phih dawrh a, "Engtin nge helai hmunah hian kan awm tih i hriat?" Ka tih chuan mittui tling pam chungin, "I Penthouse leh a chhehvel zawng zawng hi nitin enthlatu an dah ziah," ati khur dat dat a.

"Joe, Police call la, an vai hian case i siamsak dawn nia," Joe chu a bu nghut a, min thlir ṭhup tute lam hawi chuan, "He nu hi engtin nge kan tih ang, in duh dan sawi rawh u.." Tiin mi eng emawzat lo pungkhawm chu ka melhkual a, an vaiin tunge ka nih an hre hlawm lo. Mahse, ngaihdan an nei vek.

Tlangval pakhat hi a rawn pen chhuak a, "Mr.Evans, in nupa inkâr tihchhiat a tum manah, i nupui hi sawisak tir la, chumi zawhah ka lo pawngsual ve ange," nui var var chunga atih chuan ka nui huk a, midangho pawh an nui sûng hlawm a, 'LA Metron' rawn thlen lai pawhin chu nu bâna ka vawnna chu ka la thlah chuang lo.

"Jefe, zanin party kha intlai palh ang, hengho hi chu ka lo buaipui ange," Joe in atih chuan îhe lovin ka pawmpui hmak. Ka nupui kelâwnga ding chu nuih sukin, "Ka pawm ang che," tihpahin ka pawm kâng nawlh a, ka nghawngah min kuah chial.

Harsatna leh buaina kan tawh châng pawha min vuan tlattu nupui tluka hlu an awm lo. Zaninah Party naah hruai ka tum a, tun bâk hi a nau neih hmain kan chhuak theia ka rin tawh loh vang a ni.

"I girlfiend hmui kha i fawp duhthawh mah mahin ka hria," Amelia min fiamna chu engah mah ka ngai hran lo.

"Min fawh lai khan i lo ip chawihin ka hria," ka tih chuan a nui nghal var var a, "Khalai hmun ualau lutuka, hmeichhe fawp duh tur khawp a, tisa châkna a tuihal i nilo tih ka hria te pawh a ni mahna," a purse chhung a zen rak rak a, a phone chu phawrh chhuakin ka lamah arawn lek lang vâ a, engtik laiin nge a lo lâk hman ni!?

Kha nu in duhthawh zeta min fawp lai kha chiang zetin a lang a, ka luak a chhuak nghal ut ut nia. Steering ka vawn lohna lam ka kut chuan ka hmui ka hru tâwk a, ka ten leh hnuhnawh viau.

"I hmui kha vawi za chuang i sil hmâ chu min fawp miah suh," Penthouse kawt kan thlen ruala Amelia ṭawng chuan ka nuih ati za hle a, a fiamthu mah nise ka pawm zawng tak a ni.

"Le, hmanhmawh ang, zaninah nalh thei ang bera i lan ka duh dawn a nia, Joe leh Ignacio hruai lo in, kan nupa chauhvin kan chhuak dawn tih kha theihnghilh miah suh," a thawmhnaw leiho dahna bag chu khai sakin inchhungah kan lut ta a.

Cacao American
Restaurant
7:00Pm

Party na hmun kan thlen chuan mi an tam tawh hle a, 'Cacao' hmun hi Wine company langsar tak neitu Josh Richard-a ta a ni a, zanin hian kan nupa min sawm ve avanga kal kan ni. Mihausaho fuankhawm tih takah ei leh in tur a hnianghnar hle a, ka nupuiin nuam a tih ngei ka beisei.

Ka bâna min kuahtu ka sira kal, ka nupui tluka nalh hi zanina lo telve hmeichhiaah hian an awm ka ring lo.

Chiffon dum fual hnalh a inbel a, pheikhawk sâng bun lo pawh hian min chen thuak tho. A sam a dar chen leka a cut tâk chu a thlah siau a, a mitmeng lian kelkawla min melh phei hi chuan zâm rawih rawihna tur a ni.

A pum puar lah chu a kawr hâk chuan a thup bo zo tawh meuh lo chu a ni e, mahse, a inhmeh tlat lawi si.

"Min en reng lo khan intur min lâksak ve la," ka nâkah a nghawk zauhva, mipa hovin an en ṭhup te hi a hrelo tak tak nge a haider zawk pawh ka hre lo.

"Eng nge i in ang, wine in phalsak i ni e," ka tih chuan a lu a thing mât mât a, "Serthlum tui emaw Coke pawh a pawi lo," tiin sofa hnai ber a pan a, music ri ruai ruai reng avang chuan ṭawng hriat a har hret a ni.

"Ok, hmundangah kalsawn suh aw," a bianga ka fawh zauh chuan a nui sâng a, a ha var rual ṭhât langa a nuih hian a hmelṭha zual.

Waiter chuan whisky leh Wine lam hlir an sem avangin Amelia ta tur bik la tur chuan intur dahna lam ka pan a.

"I nupui bula ding saw i hriat zawng a ni em?" Ka bengbula ṭawng sup ri ka hriat chuan Amelia ṭhutna lam ka hawi vat a, ka hriat mi pawh a ni lo, a hmel ka hmufiah thei chiah lova, sir lam a hawi deuh bawk nen, bâkah ka nupuiin a en lo hrim hrim bawk a, ngaihṭhat lohna tur a awm hranin ka hre lo.

Serthlum tui leh Coke, tray-a chawi chunga ka lêt leh chuan Amelia'n min nuih var var a, a hmelṭha ve chiang alawm! A bula ding pawh kha ala ding ve renga ka nupui chuan a melh eih lo!

"Lopez ka nih lai kha chuan ka rui chhe ve thei riau asin le," Sethlum tui chu bânin a in khalh a, keiin whisky ka in thung.

"Khatiang lam kha sawi lang tawh reng suh, pawngsual i duh loh chuan," a bulah ka ṭhu thla ve nghal a, lâmpui ka châk tehreng nen a naupai vang hian a hreh deuh ka ring a, ka sawm ta lo mai.

"Amah en angin awm lo la, intur dahna lam sira ding saw, vawiina reporter ka vuak kha niin ka hria, helai hmun hi awm reina chi a ni lo maithei," tiin min hrilh sap a.

A sawi pa ka va en chuan a sawi dik tih ka hria, Ramon-a pawl ten zanina min tibuai anih chuan kan che chhe viau ang, ka phone chu phawrhin Ignacio ka message ta a, Amelia'n nau chu pai lo se ngaihtuah kan ngailo a, mahse, tunhma ang khan a thiamthil hmang turin a rintlâk dawn lo tih ka hria a, venhim him ngai sa ani tlat.

"Amel, i ṭha em?" Mipakhat inzuah buk deuh hi kan ṭhutna bulah a rawn ding a, ka nupui hmelhriat a ni ngei ang.

Chu pa hmel a hmuh ruala ka nupui mitmeng danglam zawk chu ka hmu hman. Huatna mitmeng a ni!

"Min hria em ni?" Amelia'n atih chuan chu pa chu a insehruh ṭalh ṭalh a, eng nge a awmzia ka hre mang miah lo.

"Duhtak, ka tihpalh lutuk!" Ka nupuiin ka kerawr hâka Serthlum tui a tihbuak chuan mak ka ti hle a, tihfai tum niawm tak hian ka lamah a rawn kun hnai a, "Jerome, inring rawh, helai hmunah hian minute nga kan awm tling leh a nih chuan buaina a chhuak dawn a nia," Amelia ṭawng zawi sap ka hriat chuan ka no chu dawhkanah ka dah a.

"Josh bia ila kan haw mai dawn em ni ang?" Ka ṭhutna aṭanga ka din chhuah rualin Amelia ka pawt tho ve nghal a, kan kianga ding pa chuan mit khap miah lovin ka nupui dul kawh lah chu a melh a, ît hmel zeta a chil lem khulh ri chuan ka thin ati sa phat.

"Amelia Lopez, kei hi min theihnghilhin he pa hi i thlang a..." chu pa aw thum bul chu ka hre tawh chiang mai, a mimeng pawh hi ka hmuh hnu a ni.

"Ka nupui khatianga ṭawngkhum ngam tur khan tunge i nih?" Zawi leh fiah faka ka tih chuan, "I nupui hi ka nula anih hi, Mister, tupawh ni la, i nupui ṭawngkhum theitu tur mipa chu keimah chauh ka ni." Zâm map lovin Amelia chu a pan a, chêt a hun tih ka hria. Mahse, hepa hian ṭhuihhruai engzat nge a neih ang?

"Amelia, min hrelo der zel dawn em ni? Eliaz Sanchez, i âtchilh ṭhin ngei kha ka ni e,"

"Chutiang hming ka hre ngailo, ka mipa hriat leh ka âtchilh chu Jerome Evans chauh a ni." Amelia'n atih chuan ka nui ru suk a. Eliaz Sanchez hi ka hrechiang khawp mai, ka nupui ex-boyfriend ngei kha a ni.

"Uicho nu," tihpahin Eliaz kut chu a phe vuai a, Amelia ben a tumna kut chu ka lo man chat thung.

Ka kut leh lamin Amel chu ka hnungah ka dintir a, lehlamin Eliaz Sanchez kut ka vuan bawk a, "Ka nupui khawih i tum hma khan inngaihtuah hlek la a ṭha tur a nia," ka sawi zawh rual chiahin a bân chu ka herh sawk a, arik ṭhawt rualin Eliaz chu a ṭhen chawk chawk a, a aia nâ a ka herh leh chuan a thlan fîm a bawl nghal ṭawk ṭawk thei nia.

"American tenawm khawro pa," a ṭawng zâwng chuan a chil a per chuai a, tenawm lutuk.

"I phutâwk hremna i hmu ang," Eliaz bekah tak chuan ka theitâwpa na-in ka hnek bur a, a pai nawk.

"Lokal rawh le.." Ka nupui bânah vuanin kawngkhar lam ka panpui a, tuna kan inthiarfihlim lo anih chuan zanin hian nungdamin kan chhuak hauh lovang.

Kan car dahna bula mipahnih vei nghauh nghauh ka hmuh chuan min châng leh hman vek tawh tih ka hre mai, "Jerome, pahnih chauh annih khu kan bei mai dawn em ni?" Ka nupui thusawi chu awm ang lo ka tih êm avangin ka kiai suk a.

"An pahnih khu ka buaipui chhungin car-ah lo lut ang che," tiin chu mite pahnih awmna lamah chuan kan chhuk ta a, min hmuh veleh suit nena induang zaih zâwk chu a zuang vak a, ka âwmah pêt a tum tih ka lo hrethiam nghal. Chu pa zuan rual chuan ka nupui kut ka vawnlai chu thlahin ka zuang zawk a, min pet fuh bik lo.

"Amel, Car-ah..." ka sawizo hman lo, ka hnunglam aṭangin pakhatin min kuah bet a, a chak kher mai, ka mitsirin Amelia, car bula a ding chu ka hmu vuai a, car kawngkhar a hawng tur chiah chu a tukkhum samah min pêt tumtupa khan a kêk dâk awrh a, ka thin a sa phat.

Ka thâ neih tâwp sawmkhawmin min kuahtu chu ka bei lêt ta a, abianga ka hnekna avang chuan ka kut a hik chhawk thei nia. Amelia te pahnih inchai buai lai chu puih tumin ka pan a.

Amelia duhlo ṭang vel chu ngaithei lo niawm tak hian chu pa chuan a beng ṭhuai a, ani lah chuan a naupai a theihnghilh a ni ngei ang, amah bengtupa kap bawrah chuan a chum sak chawrh a, a kun nghal ngâwih nia.

Car-a ka nupui a ṭhut luh hnu chuan an pahnihin ka pêt zui nghek a, che leh tur an awm tawh lo. Ignacio leh Joe lo thlen lai chuan tlânchhuak turin car ka tinung mêk a.

"Jefe, in ṭha em?" Joa an atih chuan ka bu nghut a, Amelia hmai dâng lap chu enin, "Joe, anni pahnih leh Eliaz Sanchez tih hmingpu in lo buaipui dawn nia," tiin Steering chu ka tuaivir nghal a, chulai hmun chu kan chhuahsan ta a...

Amelia thaw hrâwk hrâwk ri ka hriatin alam ka hawi vat a, "Amel, i ṭha em?" Ka aw a hlauhthawnna ri chhuak chu thup buai ka tum lo.

"Ka thâw a hah deuhvin ka hria, hospital lamah..." sawi zawm tawh lovin a ngawi daih a, a lungphu ri dawt dawt chu a ring kher mai!

City Hospital lam pana kan tlan lai chuan ka phone a rawn ri a, Mateo Ignacio a ni.

"Mateo, sawi rawh.."

"Jefe, Joe an kâp hliam tlat mai.."

"Eng maw!?"

"Joe, dinhmun a ṭha lo, hospital panin ka tlanpui dawn a.." a sawi zawh hmain line a incut daih a, Amelia hmel ka va en chuan a lo chhing chial tawh a, a thaw rí kha hriat tur a awm tawh miah lo!

"Amel..."

Min chhang lova, a mit a meng hek lo, ka kut lehlamin a mar ka dek a, a phu zawi raih raih hle mai!

Ka speed tisângin hospital lam pan chuan ka ving phei ta fia fia a...

End of Chapter-18

©<++++[BeckirafARenthleI]++++®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)