ENCHANTE LOVE SORENO BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

ENCHANTE LOVE SORENO BY Becky Rafa Renthlei (Completed)

Unread post by Ngaia » March 25th, 2018, 11:27 am

ENCHANTE LOVE SORENO
(Quieres Casarte Conmigo?)

Becky Rafa Renthlei

PROLOGUE.

MJS. Grape Estates
Los Angeles USA

Ka lawnna thingkung hnuaia mi pahnih vei thauh thauh chu ka en reng a, ka lawnna a san deuh avang chuan ka lu a hai muai muai thei hial nia.

An kal liam hun nghakin a kâkah chuan thâwk pawh thaw țha ngam lovin ka țhu a, an kal bo phawt a nih loh chuan ka tan chhuk chi ziazâng a ni lo. Thingzâr chu nghet fê-in ka vuan rân bawk a.

"Kha nu kha helai hmunah hian a awm lo tawp ang," an țawng chu ka hre pha ve vek a. "A bike pawh kan ram chhungah hian a thukru ngei alawm," a țhianpa'n a chhan chuan a hawina lam chu ka en ve nghal a. Hah! Ka bike tanky, grape zâm kara nî-in a chhun tlet sar lo lang chu ka hmu ve ta a, ka rilru a țawngțaiin, 'Lalpa min man tir lul suh,' tiin ka phun sep sep a.

"Kan hmu zo lo a nih chuan Jefe (hotupa. BRR) in min that hreh miah lovang, kha nu kha a hmangaih viau asin," a sâng zawkin a tih leh chuan mak tih lutuk vangin ka nui chhuak ta hak a, "In tifiam a ni lo maw?" Insûm hman lova ka țawng chhuah tâkah chuan ka awmna thingkung chu an rawn hawi chho rual țhawt a, min hmu ve nghal chiah bawk.

Mawl ka inti tak zet, engvanga lo ngawi mai mai lo nge maw ka nih le? Min man dawn ta nge nge e, ka theihtawpin ka sual lêt ve ang nge, tihian thingkungah ka țhu reng zawk dawn?

MJS Company neitu hian kei min hmangaih a maw!? Jaja! A â a nih ngei dawn chu...


A story tak hi khawiahmah copy phal a ni lo a, in group ah in post ve duh anih chuan a link hi share ula, a story erawh chu hetah chhiar tir rawh u whatsapp ah copy daih lo a, a link atanga an chhiar hian a story ziak tu ten hlawh an nei zel thin a, in copy chuan a ziaktute hlawh ru tihna in ni. A link share hi chu phal vek a ni e.
A link share dan: https://storyfb.com/viewtopic.php?f=2&t=917
A share dan tur nen lam kan inkawhhmuh chung pawh a, a story full a whatsapp lama la copy/paste lui in awm anih chuan Police-ah FIR kan thehlut anih pawhin nangmahni chochhuah liau liau a ni ang...
Copyright ©
All rights reserved
www.storyfb.com


Chapter-1

SPAIN, Madrid
Beni-beach.

Țiauvutah towel phah a muin nisa-ah ka inpho ar ar a, towel dang chuan ka kawng a chin hnuailam ka khuh thung a, fimkhur tluk a awm lo tih hi ka ngaihdan nghet tak a ni bawk, nisa a ruaka inpho chu nuam dangdai ve tak a ni.

Engmah dang ngaihtuah duh lovin ka maimitchhing ta diar diar a. Ka taksa nî-in a em lum thar thar tâkah chuan duhtawk mai tumin ka țhu chhuak hlawl a, thlifim lo thaw heuh heuh chuan tuipui rim a rawn ti nam chem chem a ka hriat hial chu le. Tuifawn inhlap ri hlup hlup tih loh chu thawm dang hriat tur pawh a awm lem lo.

Ka nun dan ninawm leh hahthlak zet hi engtia tihreh chi nge maw ni dawn ni? Intih thawven tumin beach-ah ka kal ve tak nâin awmzia a awm lo kher mai.

Elias Sanchez vanga ka natna te hi engtikah tak reh ang maw? He pa ka huat zia hi turu tak a ni. Ka theihna zawng zawng hmanga beih let ka tum ve avangin thil tam tak ka zir belh bawk.

Kei hi Amelia Lopez ka ni a, kum sawmhnihpali a upa ka ni. Feet 5'9 laia sâng niin, ka nu leh pa fa neihchhun ka ni tak nâin min duat khuchûk lem lo khawp mai. Santa Monica (USA) lama kan hotel pakhat zawk țhut chilh a ngaih vangin kar hmasa mai khan chumi lam pan chuan an kal a, kan chhungkaw chenna Apartmentos Beni beach-ah kan driver leh housekeeper te nen kan awmho ve naw naw rih a ni.

Vawiin hian South Side Madrid festival Carnegie hall-ah neih mek a ni a, band lar tak tak leh Spanish zaithiam mi eng emaw zat an fuan khawm a, zan lam thlenga hun hman tur niin kei erawh ka kal peih ve ta lo a, hetiang boruaka inchiah hi ka hnê rih tlat.

Madrid-a kan hotel erawh chu ka thachhang dawltuin a lo enkawl rih a, ka awmna ațang hian mêl khat vel bak a ni lo tawp ang, tunah dar hnih a ri chauh bawka hun thawl ka la nei tihna a nih chu.

Ka eitur pai ve te chu eiin coke ka inpah zauh zauh bawk a, kum thum kal ta khan boyfriend ka nei ve a, inneih hial kan tum hnuah kan hotel-a lo thleng ve British mi Hilda Solis nen room pakhata sex-an hmang dun lai kha hmu lo ila chuan tun thleng hian bumin ka la awm ngei ang.

Ka hotel chhung ngeia thil thleng a nih vangin theihnghilh a har țalh țalh hle bawk. Hilda kha Elias-a girlfriend kumhlun a lo ni reng alawm le! Kum thum chhung min lo bum char char tihna a ni chu..

Elias ka mitthlaah a lo lang nghal a, a sam dum chhah țha zet leh a mitmeng paw raih kha ka âtchilh thei hle a, ka nun a mipa ka tawn hmasak ber niin ka engkim a ni bawk; commerce lamah pawh min pui nasa hle a, tuna kan hotel lian tak tak pahnih buai map lova ka enkawl theihna chhan chu Elias ka neih vang a ni.

Ani khan engkimah min fuih nasa țhin hle a, nupa kan nih hunah pawh kan enkawl dun ang tiin min tiam vei thlap bawk a, kum naupang têin khawvela hotel langsar leh liantham neitu ka nih phah ve tlat a ni.

Ka nunhluiin min awp bet reng a, chu chu ka duh tawh hauh lo, amah vanga ka natna te kha theihnghilh ka tum mai tur a ni a, ka nunah mipa hian hmun an chang tawh lova, mahni inven dan thlengin ka zir tel ta a, ka inchhir ta lo khawp mai. A hun laiin na viau mah ila tunah chuan nula vawt raih leh mahni inring tawk tak ka nih phah ta a nih hi..

Chutia ka inngaihtuah ngut ngut lai chuan, "Hey," rawn ti ri ka hre thut a, chesawn duh chuang lovin ka țhut dan ngai rengin ka țhu a. Heng lai hmunah te hi chuan mipa awm țha duh lo, kawhmawh bawl hrât fe fe an awm ang tih lo hriat awm tak a ni a, min tihbuai tam hmaa inthiarfihlim hi a finthlak ber a ni.

Ka țhutna ațanga ding chhuakin tunge a nih en tuma ka dah chhuah rual chuan, "Mujeres (Nula. BRR)" tiin mipakhat hian ka kawngah rawn kuahin pakhat dangin ka darah min lo kuah zui nghal zat a. Tu chu nge maw ni le? Spanish țawng te chu a la hmang ve leh nghal a.

"Mahni chauhva teikual vak vak hi a him miah lo a nia," tih pahin a nui vur vur a, a ha bal zet chu a tenawm kher mai. Kei ai chuan an upa ngei ang tih an hmel bumro leh pawisak neih loh hmel zet ka hmuh rual chuan ka hre ve mai.

"El Sénor, (Pu-a) tupawh chu ni ula keimaha awm ka duh tih in hriatthiam ka ring," hlau lo anga lan ka tum viau laiin ka aw erawh a dik chiah lo.

"Kan lo awmpui ve dawn che alawm, muy lonly chica,(I khawhar hmel)" tih pahin ka hnute a rawn țham thut a, ka haw lutuk!

"Khawhar hmel te min ti ve khanglang a, in va'n zak thei lo ve a?" Tih țhawt pahin ka hnute khawihtu zawk pumah chuan ka kiuvin ka nghawk sawk a, min thlah ve tho.

Spanish țawngkam bawlhhlawh zet zet a chhak chhuah hnuah min chelh beh leh tumin a bân a rawn phar dû a, khabe hmul buk zawk chu enin, "Eres muy feo (I hmelchhe lutuk)" tihpahin chak fê-in ka tlanchhe ta chiam a, ka hnunglamah an ni'n min um ve bawk.

Ka thawmhnaw dahna bag leh towel vel pawh la hman lo chuan ka bike dahna lam panin ka tlan ta nal nal a, an țe chul ri ka hriat chuan ka thin a phu nghal zawih zawih mai, chutia hlau lutuka ka tlan avang chuan ka hma a mipakhat lo tlan ve pawh chu ka lo hmu miah lo niin!

Kan insu ta bur a, kan thal chiang dun kher mai!

Thinrim meng dur khup chunga min en chuan ka țim nghal sung sung thei nia, a taksa erawh a nalh a ni. A bân sei thlurh chu a sek uchuak hauh lova, a hah hle a ni ang, a thaw huam huam bawk. Hetiang êm a mipa pian thiam leh nalh hi ka hmuh awm pawh ka la hre lo ve a, inthazo zeta ding chhuakin min pawt tho ve ta nghal a.

"Lo siento, (Tihpalh)" ti a kalsan mai ka tum lai chuan ka bânah manin min phih dawrh a, "I kalna tur kawng en ta che, Miss," American awphawi zeta a tih chuan ka melh kâwk a.

Chutah a rawn inher rem a, a mitmeng nelawm loh zet chuan chiang takin min melh ta a.

Ka hnunglama min umtute pawh an rawn thleng ve ta, chu pa bulah chuan thaw huam huamin an rawn ding a, hmelchhia ka tih pa khan rum lutuka min melhin ka biangah min beng ta țhuai a; hlau lutuka țe nghal țhawt chungin ka pai nghal nawk a, ka tlu tur min lo dawm dingtu chu nichina ka sut pa kha a ni!

Chu pa chuan a hnungah min dintirin min bengtu zawk chu a kut veilamin a hnek nghal țhuai a, a țhianpa rawn che ve tur chu bum zauh pahin a pumah a pet sak nghal chawrh bawk a, a thal chiang kher mai! A chetdan 'Pa' zet chu mit khap miah lovin ka lo en thung.

Min um tute pahnih kawr âwmah chuan țhamin a pawt tho nghal lawp a, "Helaiah hian buaina insiam leh a nih chuan ka chhuah hauh lovang che u," a aw thum chhak chu hlauhawm tak a ni, thihna rim a nam tel tlat!

Min umtute pahnih a buaipui lai chuan hmanhmawh lutukin ka lo tlanchhe ve thung a, ka bike dahna ka thlen chuan thâwk ka'n la leh tê tê a, min tibuaitute pahnih kal liam lai chu bike chunga țhuin ka en deuh vang vang hnuah tlan chhuah tuma bike ka tinung chiah chu kha pa bawk khan, "Hey, nang kha khaw'nge kal i tum?" Ti a rawn au vin ka dinna lam pan chuan a lo tlan phei a.

He pa pawh hi ka ring ngam chuang lo, chak fê-in ka chenna hmun lam panin ka tlan chhuah san ta a, ka speed han sanzia chu turu tak a ni.

Tukkhum dawma min thlir zui vung vung chu side glass ațangin ka hmu reng tho, a bula va din a, lawmthu sawi pawh ka duh ve reng; mahse, ka hlau ru deuh miau va.

Tlema tlemah min khawih na hman țep alawm le, kha pa kha awm lo se chuan min pawngsual duh mai hmelpuin a nia min melh ni.

Ka ngaihtuah zawng ringawt pawhin ka la khur der der thei nia, pakhat chauh kha chu ni se thih thâin ka sual let ve mai thei a, pahnih erawh ka cho eih lo.

Keima inven vena tawk tur chu ka thiam teh meuh mai, thawmhnaw mumal ka inbel lova, bikini nen chauh chuan thil tih chi pawh ni nghal lo chuan..

Ka chenna hmun ka thlen hnuah pawh ka la pangai thei chiah chuang lo. Shower hnuaia ka din laite chuan kha pa mitmeng nelawm loh zet kha ka mitthlaah a rawn lang zel a, chi loh lutuk, misual tang rang vak vel pawh a lo ni ve thei tho bawk.

Bathroom ațanga chhuakin ka taksa chu darthlalangah ka thlek vang vang a, ka biang sen hlar ka hmuh chuan ka lungawi lo kher mai, ka hmuh leh hunah an châk lo khawp ang, hei aia nasa hian mahni inven dan pawh ka zir belh a ngai dawn a nih hi.

Naktuk ațangin ka taksa sawizawi lehin mix martial arts pawh ka zir belh leh bawk ang a, body guard hruai duah ka duh der si lo. Chuti a nih chuan hotel-a ka hna chhunzawm lovin chawlh hmang zui ta ila, hotel-a rim taka thawh hi ka tan a ngai tawh hauh lo, sum hman sen loh nei mah ila ka him chuan si loh chuan awmzia a awm tam lo khawp ang.

Dinner ei hmaa hotel tlawh lawk tumin ka insiam mawlh mawlh a. Kan manager phone hmasa ta ila an buai lem lo a nih chuan zan lamah concert en ve daih teh ang, huau huau ngaina mi tak ka ni lo nâa, vawiina ka thil tawn avang khan intih thawven ka mamawh zual sawt tih ka hre mai.

Khaw'nge ka phone? Rei ngial ka zawn hnuah pawh ka hmu zo lo reng reng! Ka room kiltin ka dap hnuah ka beidawng țhak tawh a, Ni lo! Beach-ah khan ka tlan san a ni chiang mai, Lalpa leh! Engtin nge ka tih tâk ang.

Living room-ah hmanhmawh lutukin ka tlan thla a, "Roshima, i phone ka lo hmang lawk," kan housekeeper ka ko ta ringawt a.

"Amel, engtizia nge?" Roshima hlauthawng hmel ka hmuh chuan ka nuih sak a. Ani hi Indian a ni a, ka naupan lai ațanga kan chhungkaw zinga cheng tawh a ni a, ka ngaina hle bawk.

"Ka phone ka tibo daih a, a awmna chin tal ka hriat theih nan i phone ka lo hawh lawk dawn em ni ang?" Ka tih chuan a Apron hâk ipte chu zen rak rakin phone chu min pe ta a.

Ka number dial-in vawithum ngawt a 'ring' zo tawh a, tumahin an chhar lo a ni ngei ang, a tawp nana vawikhat chauh ka call leh chuan mipa aw thum lam deuh hian min lo chhang ta a, American awphawi a ang deuh chuan ka hria.

"Hello, kha mi phone neitu kha ka nia, khawngaihin i awmna sawi la, ka lo lam ang," ka ti nghal zung zung a.

"Ka chharna hmun, Beni beach-ah min hmu turin zanin dar sawmah i lo kal dawn nia," tiin a off zui nghal daih a, ka thinrim kher mai. A tu a pawh chu ni se a chharna hmun ngeia min hmuh han tum kher chu a sual thlâk mah mah ka ti. Misual tak a nih loh pawhin mi tikher kher tak chu a ni ngei ang.

Roshima phone ka pek let leh hnuah ka room-ah ka chho tlang nghal daih a, dik tak chuan phone kha ka ui a ni hran lo va, ka nu leh pa te nena kan thlalâk hnuhnung ber kha ala awm a, chuvangin misual leh sum duh tak kuta a lo awm hlauh a nih chuan tunge ka nih tih leh kidnap hial pawh ka tawk mai thei asin.

Dar sawmah daih kha pa kha hmuh tur a nih chuan Carnegie hall-ah concert reilotê en ve zawk ka tum ta a, dinner pawh ei ta chuang lovin darthlalang hmaah ka insiam mawlh mawlh a; Jean jacket dum leh a chhungah t-shirt dum body fit ka ha a, jean kekawr dum bawk ha lehin lucky boot, lawk lam deuh ka bun deuh ap bawk, eng emaw buaina ka tawk leh thut thei tih hriain ka inring lawk a ni.

"Amel, dinner tlem tal ei rawh," Roshima'n atih chuan, "Ka hman tawh lo Rosh, ka ril ațâm ta a nih leh ka lo let leh hunah ka ei mai ang," tiin min biak zui leh hma chuan Apartment chu ka chhuahsan ta a.

Ka phone lam a ngai bawk nen tlanchhiat thut te pawh ka duh leh tâk mialah car keng lovin bike bawk ka hawl chhuak leh ta a.

MADRID
Carnegie Concert hall.

Parking area khat phei dul ka hmuh chuan ka bike hunna tur remchang zawngin hun ka khawhral leh fê a, hall ațanga thawm bengchheng zet lo ri chhuak ka hriat vangin sana ka bih zauh a, ka tlai bik em lo ve.

Mipui zi nuai nuai leh au bengchheng tak karah chuan inhnawh lutin ka ticket number ka en zuai a, ka țhutna tur lam panin ka phei ve ta a.

Zaithiam lar tak tak an zai lai pawh chuan ka phone kawltu kha tunge ni ang tih ringawtin ka rilru a luah a, misual ni lo hrâm se ka va'n ti tak. Vawiina ka thil tawn ngaihtuah phei chuan mahni chauhva kal chu thil țha tak a nih ka ring ta hauh lo, Manuel Elcano ka driver tal lo hruai tel ila țha tur a nia, ã ka inti hnuhnawh viau.

"Tunah chuan Los Angeles lam ațanga lokal, band lar tak kan sawm dawn ang a, an 'Front man' Ariana Gonzalo chu tun mai khan problem lian tham tak a neih avangin a rawn tel thei dawn lova, a aiah a țhianpa a rawn zai thung dawn a ni." Mipui thawm bengchheng zet chuan ka lu a tina ut ut thei hial nia.

An thupuan pawh ngaihsak lem lo chuan stage lam chu ka thlir liam satliah ve ringawt a, engmah hmuh tak tak pawh ka nei chuang lo.

Stage ațanga aw thâm mawi zet rawn ri chhuak chuan ka beng a verh zar mai. Tunge tih en tumin ka dâk chhuak vat a, a hmel ka hmu țha thei der lo.

Linkin Park hla 'Messenger' tih chu runthlâk zetin a rawn sa ta a, a aw ri chuan ka chhungril a fan ngâih maw le! Mak tak maiin mipui thawm pawh a reh ta duk a, a tawp lam a sak lai phei chuan ka lo țang ve nasa mai, a hla sak a sâng bawk nen ka âwmah kut dahin ngun lutukin ka ngaithla a, American ni siin english a thiam nâl hle bawk!

Ka țhutna ațangin a hmel a lang chiang thei lo a, lukhum phiar a khum daih bawk si, a palianin a sang hle ang tih chu ralkhat ațanga ka hmuh theih chin a ni mai.

Ka phone keng ila chuan a thlâ ka la chiang viau ang, chu pa zai zawh hnuah chuan mipuiin kut an bêng dur dur a, a hming lah an puang bawk si lo! Ariana Gonzalo țhianpa tih chu ka hriat dan a ni tawp, ka va'n ngei mai mai tak.

Kha pa zai ringawtah khan ka rilru ka lo pe nasa lutuk a, Beni beach-a ka kal a hun der, ka phone lâk lêt leh ka duh a nih chuan muangchang hman ka ni tawh miah lo. Dar sawm a pel hret a, hmanhmawh deuh hlek a tlan angai thung ang, ka țhutna ațang chuan thovin hall chu ka chhuahsan ta a.

Thla lah chu a eng ruih a, ka bike chak zeta khalhin ka mi hmuh tur awmna lam pan chuan ka tlan ta a, tawh sual tawh palh erawh ka hlau ru hle a ni.

Beach ka thlen chuan bike head light ka tithim duh ta lova, tunge ka hmachhawn tur ka hriat miau loh avangin ka fimkhur ru hle bawk.

Vawiin lama ka mutna hmunah khan ka ding ran a, nula leh tlangval zan danga teikual țhin kha hmuh tur pakhat mah an awm lo; a chhan pawh concert en naah an kal vek a nih hmel a, minute sawm dawn ka din hnuah tuipui lam ațanga thawm rawn chhuak ka hre ta a, ka phu nasa kher mai!

Chu lam hawi chuan ka bike head chu kuai herin tuipui cham pût chu a chhun ta ruih a, ka lam pana mipakhat sâng zet leh inkhaithli thlarh mai lo pen thauh thauh chu mit khap miah lovin ka en ta a.

A taksa ațang chuan tui a far tluah tluah a, kekawr bul a hâk bâk thawmhnaw inbel a nei lova, kelawngin a awm bawk. Ka bul a lo thlen thleng chuan chêtsawn nachang ka hre miah lo, min aikaih a ni ber ang chu..

A vun chu nisa em țhan tih hriat tak hian a uk deuh kharh a, a bân sek lam deuh leh a mal thahrui ngah hmel zeta phiar fat ka hmuh chuan 'Mafia' pawl a mi niawm tak a ni.

Țiauvut chu a rawn rap thaih thaih a, min hnaih taka a lo din thlengin hawi sawn nachang ka hre eih lo. Head light engin chiang taka a hmel a chhun tâkah chuan vawiina min țanpuitu kha a ni tih ka hre ve chiah, mak tiin ka âng ta pam a!

"Quién eres tú? (tunge i nih?)" Ka tih chuan ka mitah tak min en chungin english mar nalh zet hian, "Spanish țawng hmang lovin english hmang rawh," a ti hmuk a.

"Ka phone khawiah nge i dah?" Peh hêl kual lovin ka zawt nghal a, a taksaah phone han dah țhatna tur ka hmuh loh vanga zawt ka ni.

"Hmanhmawh lovin le," tihpahin a inher zui daih a, kan piah deuha bag awmna lam chu a pan ta a, ka bag ka chuh hman tâk loh pawh kha ka hmu tel a, nichin khan ka hmu miah lo, engtin nge ka hmuh loh theih zawk chu le!?

Chutia min hnungchhawn zawnga a din chuan a hnunglam chiang takin ka hmu thei ta chauhva, a dar veilamah kutchuk niawm tak dum raih lian vak lo a awm a, vawiin khan a sam meh dan lam reng reng ka lo en miah lo bawk. Ka hlauh lutuk vang a ni ngei ang.

A bek sam chu a kâwng mah mah a nih hi tihtur ang vel a ni a, a tukkhum sam erawh a sei angreng viau! A huh vang nge a nghawngah a bet deuh thlar a, mipa danglam tak chu a ni ve reng rengin ka hria, a kum zat tur awm ang ka ring thiam miah lova, a lo berah kum sawmthum a chuang tawh ngei ang.

"Mr. ka phone chu?" Min chhang duh țhak lo, towel-in a taksa a hru mawlh mawlh a, awm ve lo ang maiin min haider hmiah a, chu chu ka huat tawk a tling viau.

A bula ka va kal hnaih chuan a kut hnung lam rawn vai thuakin ka jacket nghawngah a rawn țham a, "Pen khat pawhin min rawn hnaih tawh suh," a aw pa zet chu nalh ka lo tiru kher mai. Jaja!(haha) ka thil ngaihtuah mai mai chu le(h).

"Engvangin?" Tih pahin ka hnaih lui ve ngat a, mak tak maiin ka hlau ta miah lo! A chhan erawh ka hre bik chiah lo va, ka jacket nghawnga la vuan reng chung chuan ka lam hawiin a rawn inher ta a, a mitmeng uk kharha chiang zeta min melhna chu ka hawi san duh bik țhak lo.

"I phone ka lo keng lo," kiai suk chunga atih chuan ka mengphâwk hrâ a.

"Eng maw i sawi a!?" A mitah ka en kalh a.

"I phone ka keng lo ka ti a nih chu." Mit khap miah lova min en na chu zam rawih rawihna tham a ni.

"Min lo bum vel a maw?" Tih pahin ka jacket nghawng a vawnna kut chu ka vai kiang lawp a, rum theihtawpin ka melh ve ta thung. Engvanga ring ringawt nge maw ka nih reng reng le? Ka phone a rawn ken si loh chuan helai hmunah hian ka kal thlawn tihna a nia, ka nuih a za viau lo.

"Vaya al infierno (hrem hmunah kal rawh)" tih pahin ka boot chuan a ke chungah ka rah sak ta chawrh a, rang lutukin ka insaseng nghal bawk a, a thinrim inhrosa ri chu ka hre pha reng.

"Tenawm nu, ka that khawp ang che," tih tuarh pahin min rawn um zui nghal a, ka bike chungah ka țhu fel hman awrh tihah min nangchingin ka tukkhum samah a vuan bet ta tlat a, ka hawi sawn thei der lo. Min vawn ngheh êm avangin chet ngaihna hlawl ka hre lova, ka ke ding lam chuan rem leh rem lo hian ka tlawh ve chawrh chawrh a, a che eih lo nia!

"Min thlah rawh," țhen sak chunga ka tih chuan tlêmin min vawnna chu a thlah dul ta deuh a, chu chu remchangah ka lo hmang ve vat a, ka ke bawk chu lek lehin ka theihtawpa nâin ka tlawh ta a.

Ka chet dan chuan a țhawng deuh nge, min vawnna chu thlahin a balance a hloh ta a, ka lamah rawn âwnin min delh a; ka lo inring bik lo nen bike chawp chuan kan tlu ta rup a. Ka kheimit na vang vang chu ka hre rang kher mai.

"Mawl lutuk," tihpahin intha zo takin a inperh tho at a, zo zet hian bike chu tungin min pawt tho ve nghal bawk a, ka țe nghal țhawt! Ka ke veilam nat dan em em chu ka rap țha ngam der lo.

"Bengchheng viau lo teh," tih leh min pawm a rual a, "Min thlah rawh," ka sawi zo hman chiah. Min vawnna chu thlahin țiauvutah mawng sawh dawtin ka tla ta a, ka mittui a tla sawk mai.

"Tikhan inbuaipui ve tawh mai rawh, i phone erawh ka lo kawl rih ange," tiin huat hmel zet hian min melh a, keimah chauhva min hnutchhiah a tum em mawni le?

Ka boot bun chu dimtêin ka phelh a, ka ke ná ut ut chuan zual lam a pan tih ka hre mai, nâ tiin ka țhen sak sak a. Ka bula ding erawhin min buaipui a tum thertê lo, 'sual hlawm lian' a ni ringawt alawm le.

"Ka phone chu min pe phawt mai teh, ka chhungte tal ka biak loh chuan," pangngai taka tiin a hmel dur deuh khup chu ka melh chho hâ a, thla eng chuan a hmel ati lang thim deuh khap a, ka hmuh hnu ang riauva ka hriat tlat chu le! Vawiin tih lohah kan inhmuhna awm ka hre miah si lo.

"I phone tel lo khan lo awm phawt mai teh, nang buaipui tur che hian hun ka nei lo ve," tih pahin a banrek chu a melh zauh a, a bân ațanga thisen far zaih zaih ka hmuh chuan ka inthiam lo ru ta riau a, engtia a tihnat nge ka hre lo nâin keimah vanga nâ angin ka ngai lo thei lo.

"Sénor, i bân kha?" Ka țhutna ațanga thawh ka tum chuan ka ke nâ bawk chu ka hre hmasa leh ber a, hetiang chuan khawiah mah ka kal thei lo tawp ang! He pa țanpuina lah hi beisei ngam chi ni nghal lo chuan, huatna mitmeng bâkin min melh lo bawk. Hmeichhia chu nilo ila chuan min thin hrep châk hmel a pu in ka hria.

"Kei ni lovin nangmah kha inbuaipui hmasa zawk rawh," a âwki chu ngaihthlak a nuam fahran lo. Mahse, min la kalsan lo tal a, a zia tho tho e.

"I bân kha ka en theih turin lo țhu hniam la," tiin țiauvut chu ka melh zauh a.

"Doctor i ni tihna em ni?" A âw ngaihno bei lo zet chu ka haider lui hram hram a ni.

"Ka ni lo tih i hriat reng kha," ka chhâng rang mah mah!

"Ka hria em ni?" Tihpahin a rawn țhu hniam ve ta thova, kawr ha lovin a awm bawk nen a taksa nalh zet chu hmuh hmaih a har kher mai.

A banrek chu a hliam thûk phian a, bike khan a delh ve lo nâa, a khawi emaw lai berah a tauh a ni ngei ang. Ka 'bandana' pai chuan ka thiam ang angin ka tuam sak ve ta a, thil dang hman mai tur awm hek lo le, ani paw'n ngawirengin a dawh țha ve mai a, ka tuamsak zawh hnuah ka ke lam chu a rawn en ve ta thung a.

Dim vak lova a hmeh chuan ka lo rak leh țhat a, a nâ ve bawk êm a ni.

"A ruh lam a ni maithei, doctor entir angai dawn a nih kha," a tih chuan ka lo ner sawk a.

"Nangmah vang a nih hi," ka thinrim thar leh thut a, helai hmuna min koh chhan ang khan ka phone min pe mai se chuan hetiang hian ka awm tawp lovang.

"Mawl deuhvin khawsa lo la chuan hetianga nâ hi i tuar awm chai silova," tihpahin a ding hluai a, "Bike nen chuan i haw thei dawn lo chiang sa a," min deusawh hmel zetin a la ti zuiah..

"Chuvangin midangin min lo hruai theih nan ka phone kha ka mamawh reng a ni."

"A țul ber lo ve, helai hmunah hian riak mai rawh." A ti hmuk a.

"Eng, eng maw i sawi?" Vin fê a ka tih chuan, "Ka phone hman ka phal lova, i phone pawh ka pe dawn hek lo che, tikhan awm la, țanpuitu tur che i hmuh hun hunah i haw dawn nia," tiin a kal nghal nulh a, ka awih thei lo min kalsan tak tak a tum chiang!

A kal liam hnu chuan ngawirengin ka țhu tlawk tlawk a, chetsawn nachang pawh ka hre lo, ka ke lah chu a na tulh tulh bawk si, kha mihring han sual dan em em kha, kei lahin duat ber ni awm fahranin a bân te chu ka la tuamsak leh nghal a, ka mawlzia ka tarlang a ni ringawt alawm le.

Theihtawp a insangmarin dinchhuah ka tum a, ka thei ve mai bawk. Mahse, engtin nge Apartment ka thlen tâk ang? Ka bike hunna thleng chu ka bai phei ta auh auh a, tuipui inhlap ri te chu ka haw hlur tawh.

Bike ka tinung chiah tihah ka hnunglam ațanga ka hmui rawn hup tu an awm avangin ka meng nghal kâwk a, zu rim a nam nghal huk bawk. Tunge tih hriat tuma inher ka tum rual chuan min chelhtu chuan min phih dawrh a, țiauvutah chuan min bawhthlu ta a. A hmel chu leh! Vawiina min tibuaitu hmuihmul buk zet kha lo niin!

Zanin hian ka thi a nih loh pawhin pawngsual ka tawk ngei dawn a ni tih ka hre nghal mai, a mitmeng hur hmel uchuak lutuk chu ka ten êm avangin ka pum a let nghal but but thei nia.

Chêt lâk dan tur ka ngaihtuah rauh rauh lai chuan ka kawr hâk chhanah ka hnute a țham salh a, chu chu duh lovin theitawp takmeuhvin ka tal ve bat bat a. Min bawhbettu hi a chak êm a, ka che hleithei lo, ka ke a na ut ut bawk si.

A thâw lah chu a rimchhe em em lehnghal a, hetiang ringawt hian ka tlâwm dawn tihna em ni? Teuh lo mai, pawngsual hnu dam leh nih ai chuan ka lo thi ta a nih pawhin ka tan a țha zawk mahna. Ka kut pahnih a chelh bet tlat a, ka ke dinglam ka hmang thei bawk si lo, ka tâl nasat êm avangin a duh angin a min khawih țha thei bik chuang lo va.

Ka chet ve rengna chuan a thin a tirim zual sauh a ni ngei ang, min vawnna chu thlahin ka biangah a hnek țhuai a, ka hnar lum pap chu ka ka hre zui nghal bawk, ka lu a hai nghal chum chum a, chuti chung chuan ka la țang ve fat fat tho. Ka hmaiah bawk min hnek leh tâkah chuan țang tur ka awm ta lo, ka khawhmuh a phe ruai a, ka thâ a zawi nghal raih raih bawk!

Chutia che lova ka mut hnu chuan ka jean kekawr hâk chu a phih thla sawk a, under wear nen chauh ka awm ta, ka thluak chuan engkim a hria a, mahse, ka ke na ut ut leh rit lûk chuan min tur ut ut a, 'Latin' țawngkam hur zet zet a chhak chhuah pawh ka la hre ve vek.

"Quién ares tú? Me dejan un significado, (Tunge i nih? Min kalsan rawh)" zawitêa ka tih chuan ring zetin a nui khâwk rum rum a.

"No hacer ruido,(țawng tawh miah suh," tih pahin ka hmeichhiatna chu a kutlawngin a chûl thuak thuak a, ka ten mai bâkah thinrimna sawifiah hleih theih loh khawpin ka kawchhung a so bulh bulh a, ka che thei chuang der si lo.

A tawp nan tak meuh ka tha neih zawng zawng sawm khawmin ka ke veilam leh ka bân ka chêt leh a, Spanish pa hmaiah tak chuan theihtawpa nâin ka hnek ta bur a, ka kut țang a ri tuarh thei nia, a țe țhawt rualin a chemte pai chu a rawn vai tle zauh a, ka bân puam thîp nghal vang vang chu ka hre hmasa ber.

"Por favor me ayudan(Khawngaihin min țanpui rawh u)" ka aw neih tawpa ka au leh chuan ka hmuiah hupin a kut leh lamin chemte a keng bawk a, thih ka duh a nih ngawt loh chuan chêtna chi a ni tawh lo. Tin, che tur pawhin ka chau takzet a ni e, ka chunga thil thleng tur chu ngaihtuah zui ngam lovin ka maimitchhing ta a.

A kekawr phelh ri niawm tak te chu ka la hre riai ruai a, mahse, ka meng ngam tawh lo. A hmel râpawm zet kha ka hmu nawn duh tawh lo a ni zawk mah.

Vawilehkhatah Spanish pa chu a rak tuar a, ka meng nghal zawk! A chemte a thlauh zui bawk a.

A chemte thlauh rawn chhartu chu tudang nilovin min kalsantu American pa tho kha a ni! Ka lawm dan chu sawiin a siak lo. Pathian rawn tirh a ni ngei ang.

American pa chuan Spanish pa âwmah tak chuan a kick bur a, a pumah țhut bet zuiin duh tawk chin nei thei lo ang mai hian a hnek ta mial mial a, thla engin a hmel rum tak chu a chhun ruih a, a lang hlauhawm hle bawk. Mafia pawl a nih ngei ka ring nghet bur tawh a. Mahse, min chhan chhuaktu a nih vang ringawt pawhin ka lawm tawk em em a ni.

Thei leh thei lovin ka țhu chhuak a, American pa chu ka bulah lokalin, "Tihpalh,"a ti sup. Ka chhang peih ta lo.

Amah rinchhana min dintirin ka taksa chu a en kual thuak thuak a, ka bân puam thi zawih zawih a hmuh chuan lungawi lo tih hriat tak hian a phun sup a, eng nge a sawi pawh ka hre thei lo, ka kekawr chu min siam țhat sakin țiauvutah chuan min țhuttir leh ta a.

Kan piah a ka bag chu a dap rawk rawk a, towel pahnih la chhuakin eng atan nge a hman dawn tih pawh ka zawt buai peih lo, ka hnar ațanga thisen lo chhuak chu ka kawr hma lam chuan ka hru tâwk a, hetia thisen a chhuah reng chuan ka thidang thuaiin ka ring.

A mamawh tur a la zo tawh a ni ngei ang, min pawm nawlhin bike-ah chuan min hlâng ta a, amah pawh chuang ve nghalin towel pahnih chu a suih zawm a, ka kawngah rawn vêtin a taksaah chuan nghet takin a suih zawm leh bawk a. Țawngkam khat mah a chhak chhuak lo, Spanish pa chu rum fahrana a melh leh tê tê hnuah beach chhuahsanin min tlanpui ta a.

Khawi lam nge min panpui a tum tih pawh ka zawt peih ngang tawh lova, a hnung zângah zawi zetin ka bet ta hle hle a...

Ka thluak vir mup mup leh ka khawhmuh fiah lo tial tial avang chuan intih harh tumin ka meng lui hrâm hrâm a, thlithawin min chhem reng bawk nen ka taksa khur dat dat chu thunun ka tum pawhin ka thei lo a chhá chu a ni e.

Ka hnarkua thikharin a hnawh deuh nge ka thaw țha thei miah lo lehnghal a, ka kâ a thâwk ka tum lahin ka dang a ro hulh bawk si, khawi lam nge min panpui tih en tur pawhin ka meng peih ta lo.

Ka mit vun chhah lûk leh ka taksa na ut ut bak hriat ka nei lova, min phurtupa hi Mafia boss a lo ni a nih pawhin ka pawisa zo tawh hek lo, chawlh hahdam hmasak phawt a ni ka mamawh ni, a hnung nghengin ka chhing ta vang vang a....

End of chapter-1

Note: Spanish țawng ka hman zeuh zeuh avangin bracket chhungah alehlinna ka dah zel aw..😂

He story hi theihtawp chhuaha ka buatsaih a ni a, hun a duh rei phian. Țawngkau chheh erawh elh deuh a awm thung aw, keimah ka ni miau va. MLC (Mizo Language committee) thar ber mila ka ziah a ni a, duhthusam lo lai erawh a awm nualin ka ring a, inzir belh zel ka tum a ni tih min hriatsak dawn nia.

BRR👈 Ti a ka dah hi 'Becky Rafa Renthlei'tihna a ni e😘

©<++++[BeckirafARenthleI]++++>®


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:27 am

ENCHANTE LOVE SORENO
(Quieres Casarte Conmigo?)

Becky Rafa Renthlei

Chapter-2

SPAIN. Madrid
Apartment BA 181
Malaga.

Ka taksa na sup sup avang chuan loh theih lohvin ka meng chhuak riai riai a, ceiling hring dal raih ka hmu hmasa ber bawk. Ka pindan a ni lo tih ka hre ve nghal mai a, ka lu rit lûk chu herin pindan chhung chu uluk fahranin ka melh kual ta a.

Ka mutna bul chair-a nu thau lam deuh lo muhil bawrh bawrh chu ka la hmuh ngai pawh ka hre lo. Nizan khan ka bike-ah American pa in min phur tak alawm le! Min hruaina hmun hi ka hre thei tlat lova, khum ațanga thawh tumin ka inbengkang a, ka thei der lo.

Ka ke chu a khawng tlat a, ka bân puam pawh bandage-in a intuam thlap bawk a, ka ti che țha thei hek lo. Hun lungchhiatthlak tak mai paltlang hrep tawh ang hian ka taksa a tâwt țûn a, ka nu leh pa leh kan in ka ngaihtuah chhuah chuan an mangang ngawt ang. Kan hotel pawh tiamin maw le!

Thâwm ka lo nei deuh nge ka bula nu thauvi chu a rawn che țual țual a, ka harh tih a hria ni ngei tur a ni, min rawn en nghal chat a.

"I lo harh tawh elaw?" Nui vur vur chunga a tih chuan ka țhen sak a.

"Tunge i nih?" Nelawm lo thei ang bera tiin ka nui duh miah lova. He nu pawh hi misual rual zinga mi a ni lo ang tih tunge hria?

"Salome, nangmah enkawltu tur che ka ni e, i muhil rei hle mai," a la nui reng maw le!

"Ka awmna hi khawi lai hmun nge? Engtia rei nge ka muthilh?" Ti a ka zawh chuan a mengphar âwk a, makti hmel a pu bawk!

"Mr.Soreno Apartment a nih hi, Malaga ah i awm mek a, nizan ațangin i la harh leh miah lova tunah zan darkua a ri chiah," tia a sana chu bihin a tho chhuak nghal a.

Dios!(Lalpa!) Roshima leh Manuela te an mangang ngawt ang, ka nu leh pa pawh tiamin, an hrilh hre tawh ngei anga, zankhat lek pawh ka hna thil a nih loh chuan sawi lâwk lovin ka riak chhuak ngai lo hrim hrim. Engtin nge ka tih tâk ang?

"Ka haw duh," bung nghata ka tih chuan a nui sûng a. "Jefe(Boss) phalna lo chuan khawiah mah kal phalsak i ni lo a, bâkah kal thei pawh i ni rih lo, i kheimit ruh kha a auh deuh a nia.''

"Por que, (Eng maw!) Khaw'nge i boss chu?"

"Tunah chuan a chhuak rih lawk a, cena (dinner) tlem tal ei la, a lo haw hunah in sawi dun dawn nia," hnial theih hauh loh tur hian a ti ta a, min chhuahsan zui nghal hmak bawk.

American pa a sawina kha a ni ngei a nga, kha mihring kha a maksak ve ngawt mai! Min kalsan daih tawh emaw ka tih laiin min chhan turin a rawn kal leh lawi si, ka hrethiam teh nuaih lo ve a. Phone hman tur a awm bawk si lo, hmelhriat loh ina han chen ngawt chu a zia viau lo.

Salome-i tray chawi chunga a lo luh leh lai chuan țhut chhuah tumin ka lo bei ve ngar ngar a, chutia insehruh țeuha ka lo țangmar a hmuh chuan a tray chawi lai dawhkana dahin min pui ta vat a.

"I tuar a chhel hle mai, miss, hmeichhe dang chu ni se an țap pur ang chu maw le, spanish hmeichhia hi chu kan dang zar a nia," nui chunga a tih chuan ka nui ve ta nge nge a. He nu pui roh hi a ngainatawm ru dawn riau.

Spaghetti, meatballs leh vegetable lasagna, spanish mix a siamho chu tlemtêin ka ei ve a, dam țha ila chuan ka tuitih zawng tur hlir a ni. Ka biang mar pung chuan thil țhial a ti harsa hle a, a vûng a nih ngei pawh ka ring!

Duhthawh zeta soup ka hawplai chuan Salome chu pindan chhungah a vei ngauh ngauh a, Soreno atih pa kha a hlau hle nge, min vil uluk ru riauvin ka hria. Mafia pawlah ka inbarh lut a ni êm lo'ng chu..

A eitur rawn dah chu ka theih anga tam ka ei hnuah ka mu leh ta thân a, min jection-na tur a siam mawlh mawlh a, damdawi eng emaw zat khum bul dawhkanah chuan a inchhawp bawk a. Doctor an lo râwn thlap tih ka hrethiam ve mai.

Damdawi ei ngai min eitir hnuah leh min jection zawh hnu chuan Salome chu tray chawiin a chhuak leh daih a, țawngkam khat mahin min be tawh lo.

Engtin nge ka chhungte lam ka biakpawh theih ang tih ringawt chuan ka rilru a luah a, police lamah te hian an lo report palh riau riau ang tih ania ka hlauh ni, Media lamah ka hming tarlan ka duh miah lo.

Intihfai châk eng ang mah ila, ka kal thei miau si lova a hrilhhai thlak angreng. Nula invawngfel leh chîmlîm zet ka nihna hi chhawm zel pawh ka tum a ni; thawmhnaw mumal ka inbel hauh lo tih ka hrechhuak leh hnuhnawh a, mutkawr fual chhingtê, chu pawh a bân bul lehnghal ka ha a, a hnuaiah bra leh under wear takngial pawh ka inbel lo! Zia lo tak a ni!

Tu'nge ka thawmhaw kha min hlihsak ta ang? Kha pa kha a nih vaih chuan ka chhe vek a ni mai, ka ngaihtuah zawng pawhin ka zak ru chem chem thei nia.

Khumah ka ngaihtuahna kawmin ka chhing vang vang a, kawngkhar dimtê a inhawng ri ka hriat pawh chuan ka meng chhuak duh lem lova, Salome kha a nih leh tho ka rin vang a nia.

Ka mutna bulah pen ri chu a tawp chaih a, a rimtui hman rim chu ka hriat hnu a ni, Salome a ni hauh lo tih pawh hrilh chawp ka ngai lo chiang kher mai, ka meng chhuak ta riai riai a, mitmeng uk kharh leh nelawm fahran lo hian chiangtakin min melh a, American pa ngei kha a ni.

A incheidan leh a lu meh dan te reng reng hi a dangdai (No es común) ve chiang alawm, ngun taka min en reng avang chuan zâm hauh lovin ka en lêt ve kalh a, dik tak chuan ka hlau ru ve reng, min pawngsual mai ang tih pawh ka hlau hlel lo ve. A lianin a sâng ropui si!

"Miss Lopez, eng nge i lo an le?" A tih chuan maktiin ka mengphar âk a, ka hming a lo hre hmanhmawh nia maw le!

"Ka haw duh, ka chhungte'n min ngaihtuah lutuk ang." Min zawhna ka chhan loh avang chuan a kiai suk a, nui hmel erawh a pu hran lo.

"I duh phawt chuan tikhan i haw thei reng alawm, chelh tumna che ka nei lo a nia."

"Eng maw i sawi? Ka kal thei lo tih i hre renga engtin nge chutiang chuan i sawi theih?" Ka meng ling nghal hlar a.

"I kal thei lo a nih chuan tikhan awm mai la ti nia, enkawltu tur che an awm reng alawm," ti hmukin a sam hnunglam sei angreng tak chu a hui thuak a. Inneih zungbun a bun lo tih a kut a phar zauh rual khan ka hmu hrâm, a thukru te pawh a ni mahna.

Red Indianho sam ang pu mah se a inhmeh viau lawi si. Ka hmuh tirhtê ațangin thawmhnaw pangngai a inbel hauh lova, tunah pawh Radilo tawnzau dum hâin jeans da lam a ha leh tawp a, a boot bun lawk zet chuan min chhuih chawrh ang tih pawh a hlauhawm alawm le, Mafia ho incheidan tihna em ni le?

"Ka phone kha min lo pe phawt la, inlam ka be zawk ang nge," ka tih leh chuan a rum nghut a, min pe chuang lem hlei lova.

"Muhil rawh, naktukah i ziaawm deuh a nih leh keiman ka hruai haw ang che, chuti lutuka dam har tur chu i ni lo." Tiin ka chhanna pawh nghak lo chuan a chhuak zui daih a, hrilhhai angreng takin ka khap sak sak a, a va'n țawngtam lo ve tak, a duh chin a sawi tawp a, thildang engmah zawh belh hman pawh a ni lo. Chapo nge intivei ti a sawi zawk tur pawh ka hre mai mai lo.

Ka taksa na ut ut pawh tlêm chuan a zia awm ve ta deuhin ka hria, ka ke erawh hun eng emawti chhung chu ka rap ngam dawn lo tih ka hrethiam ve mai a, ka nun hi eng ati nge a buaichuar nuai zel le! Ka nu leh pa awm loh lai khera ka thil tawn hi mak chu ka ti deuh viau!

Ka lo muhil leh a ni ngei ang ka harh leh chuan zinglam dar nga a lo ri tawh a, ka zun chhuak lutuk chu îp ngaihna a awm lo, ka cheh dawn takngialin ka hria a, khum ațang chuan thei leh thei lovin ka țhu chhuak ve a, ka bân nâ pawh a zia awm thawkhat e.

Ka ke an tuam khawng ût chu chhuatah dahthlain din ka tum a, ka rah zawng chuan ka thâ khurin ka inchelh hman ta lo, mawng sawh dawtin ka țhu thla ta hnawk a, a nat dan chu namai lo tak a ni; thawh tumin ka'n bei țhin tâk nâa awmzia a awm lem lo, ka zun lah a chhuak tawh ropui si, engtin nge ka tih tâk ang?

Ka awmna pindan lah chu a reh ruai a, Salome kha khawiah nge a awm ang le? Zun cheh nih ka duh teuh lo mai, thinrim ru țûnin chhuat hit thlar-ah chuan ka țhu a, under wear ka ha si lo nen ka mawngin chhuat lawng a si rân a, chumi siam țha tur ringawt pawh chuan ka beih fe a ngai nia; Ka taksa chak loh dan em em hi kha mihring kha ka ringhlel ru ta riau, damdawi eng emaw a hmang a ni thei mai angem?

Thildang tih theih awm hek lo le, ka țhut hmunah chuan ring theihtawpin ka au ta chiam a.

"Alguien ayuda?(Tu emaw in awm em?" A reh țhup avang chuan a aia ringin, "Mr.Soreno, Salome.." ti a vawithum ka au leh hnuah kawngkhar chu a rawn intheh hawng țhuai a, kha pa bawk kha a lo pen lut leh ta a.

"Eng buaina nge i neih? Chiam chiam che chuan!" Ka bulah lo dingin chhuata ka țhu chu min en run a, a mu ve miah lo em mawni tih turin thophang hmel a pu miah lo, ka hmuh hnuhnun bera a thawmhnaw inbel ngai bawk kha ala inbel a, boot erawh a bun tawh lova, kelawngin a'n awm tehmial chu le!

"Si! Ka zun a chhuak," bah deuh naka ka tih chuan a ner sawk a, nêp min tih hmel viau, a banrek na lai kha a la tuam ve a, ka bandana ala hmang reng nia, thlâk ve em em tawh awm tak!

"Lokal rawh," tih pahin min pawm nawlh a, ka hnial hman hmain toilet-ah min pawm lut ta a, a taksa rim fai sar chuan ka hnar a verh zar mai a, ka zun laia awm ve a tum tihna em mawni le?

"Alejarse de mí, desaparece,(Min chhuahsan rawh, kal rawh,)" ka tih chuan dim lo zetin min nghat thla a, ka țhen sak sak tih a hmuh rualin, "English chauhvin min be tawh rawh, i luhlul em mai," a ti nghut a, chhuah tum hmel a pu lo.

Min en reng avang chuan nuam ti lo zetin ka țhu a, "Min chhuahsan phawt la," ka tih leh chuan khi suk chungin, "Ka hmuh hnu vek a nih kha, zung zo thuai thuai la a nih chu.." tiin lehlam a hawi vei hmuk a, a chetdan chuan ka nuih a ti za ru tlat pek, eng nge maw chhuah pawh chu a hreh em em ni!

Ka intihfel zawh hnuah ngawi rengin min pawm chhuak leh ta a, a bân sa ham ham in ka taksa lâwng a deh chuan engtin emaw tak ka awm a, ka sawi fiah thiam chiah lo.

"Muhil leh rawh le, ka lo veng ang che," ka rin loh dan deuhvin a awkâ a dam ta thluam a, nui hmel a pu deuh!

"Ka lawm e, Mr.Soreno," ka ti ve ta sap a.

"Mourizo Soreno," tihpahin a kut dinglam chu ka vawn theih turin a rawn phar chhuak a, î he lovin ka lo vuan ve vat, "Amelia Lopez," nui sak chunga ka tih chuan bu nghutin min vawnna chu a thlah ta a.

Khum bula single sofa inhûngah chuan țhuin a maimitchhing zui daih a, min ngaihven hmel a pu tawh chuang lo. A âw pangngai kha hriat a nuam fê si a, eng ati nge nelawm loh zet zeta min biak kher le? A hming lah chu a nalh phian a, 'Mourizo' zawitê-in ka ti nawn sap a.

Spanish țawng a thiam lem lo a nih ka ring ve ringawt a, American mipa leh Mafia pawl te chuan țawng tamtak an thiam tlangpui a, ani hi a dan a dang leh pek a ni ang!

A hmel chu ngun takin ka en ta a, a mithmul buk lam deuh chu a dum hlap a, a hnar ngul pawh a sang țha vah vah khawp mai. 'Hmelțha' tia sawi tur a ni hauh lo nâin a 'Pa' thlâwt. Hei ai hian nelawm deuh phei se chuan mipa duhawm tak a ni ngei ang. A bek hmul sintê-in a zuah thla raih a, mipaah pawh 'Pa' tak a ni tih a hai theih loh.

"Min en reng lo khan muhil leh rawh Miss Lopez," Mourizo aw ka hriat chuan ka'n maimitchhing ve nghal ngawt a, Jaja! Âtthlâk lutuk, engtin mah ka en tih a hriat theihna dan tur a awm lo hrim hrim, a meng dere a nih ngawt loh chuan..!

"Ka en peih che chu lawm hle teh Mr.Soreno," zahzelah ka nui chhuak ta hak a.

"Muhil rawh, i taksa a chau leh a nih chuan ka enkawl tawh dawn miah lo che a nia," tiin a tûm hmuk a, ka țawng zawm tawh lo.

Muthilh leh tum eng ang mah ila a harsa lam hret a ni, ka ke tih loh chu nâ em em ka neih pawh ka hre tawh lo va, ka bân pawh a hliam thûk vak lo a nih ka ring, he hmunah hian awm reng thei ka ni lova, vawiin lamah haw ngei ka tum ruh tlat bawk. Mourizo Soreno hi eng ang mipa nge a nih ka hre hek lo, a hmel rum tak leh nui hmel pu lo zet te hian min ti hlau leh thut zel a, hlauhawm a hnai tih min hriattir tlat!

Salome-in, de sayuno (breakfast) a lo chawi luh lai pawh chuan khum lu nghengin ka țhu âwn diai a, Mourizo erawh muhil ang maiin a chhing chial thung.

"Miss, i bân kha kan dressing zawhah breakfast i ei dawn nia," tih pahin Salome chuan hmanrua vel a chhawp mawlh mawlh a, housekeeper an nei lo nge, amah hian a kawp vek pawh ka hre lo ve a!

"Umn, ka ril a țâm vak lo," ti a ka chhan chuan lawm vak lo hmelpuin min en a, "I taksa ti chak ang che, helai hmunah hi chuan derdêp taka awm a rem lo a nia," a ti nghauh a.

"Bien, (awle)" ka ti ta zawk a, an lalna hmunah ka awm a, ka pa in a ni hek lo, chuvangin min duhsakna hi chu hnial lovin zawm mai ila ka tân a zia zawkin ka ring.

Salome-in duhtawka ka hliam vel a sawisa lai chu Mourizo chuan a lo thlir ve reng a, engmah phei chu a sawi lem hlei lova. Ka ke erawh phelh a la hun loh avangin engtin mah a khawih ta lo, keimah min khawih zawh hnuah Mourizo banrek chu a tihfai sak ve leh nghal a, ka bandana kha hmang tawh lovin bandage-in a tuam sak ta a. a hliam a thûk tehreng nen nâ ti awm ang pawhin a lang duh eih lo.

Spanish desayuno(breakfast) kan ei dawn emaw ka tia, tukin chu American breakfast lam min rawn chhawp teh daih a, coffee, sandwich, bacon te leh orange juice an ni hlawm a, a tuihmel phian.

Ka rin aiin ka ei tam daih! Mourizo chuan ka thil ei lai chu min melh zauh zauh țhin a, nuam ka ti viau lo, ani erawhin coffee chauh a in thung.

"Vawiinah i chenna hmunah ka dah dawn che nia," Salome-in min chhuahsan hnuah Mourizo chu a țawng ta chauh a, "Ka lawm e," a bâk chhan mai dan tur ka hriat mai loh chu le.

"Lawmthu sawi nan chuan ala hma deuh lo maw, ka enkawlna che leh ka chhanhimna che hi a man a sâng viau a nia," tiin coffee a in pah khalh a, a hmel ka en nghal vat, engtia min tih nge maw a tum ni? Lo hre thiam tur ka nih vei nen blackmail chi khat chu a ni tho tho.

"Min blackmail i tum deuh tihna em ni?" Ka'n melh rum lehnghal ngawt pek a!

"Blackmail lam ni lovin a thlawna ka puih ngawt nachhan tur che ka hre lo."

"Tenawm pa leh," ka tih chuan a nui suk duh chauhva, "Ka tenawm nge tenawm lo fiah turin min duh deuh em ni miss Lopez?"

"Thlawk bo la a nih chu.." thinrim lutuka ka chhan chuan ka mutkawr hâk chhana ka hnute chu melh zauhin, "Kha pa tih tâk loh kha ka chhunzawm thei reng a nia," tihpahin ka hnute chu a rawn tawk kher a, rum âl a melh chungin, "Mr.Soreno i tenawm kher mai, i huangchin hre rawh," tiin thei leh thei lo hian khum ațang chuan chhuk tumin ka ke ka hlang thla ta a.

Ka ke ka rap ngam lo tih ka hre tho nâin he pa bulah hian rei ka him bik chuangin ka ring lo, ka ke rinchhana ka din rual chuan a na zawk zawk a. Mahse, helai hmunah hian awm tumna ka nei tawh lo, bai salh salh chunga kawngkhar lam ka pan chu mak tih hmel deuhvin min en a, ka kal lui ngamin a ring lo deuh a ni ang, min dan pawh a tum chhin lo.

Kawngkhar ka hawn rual chuan ka bul a rawn thleng phei ve nghal zat a, a țuan ran dan hi Keitê te pawh a ang dawn dawn alawm le, dim lo baksakin min pawt lêt dawrh a, ka balance ka hloh titih der! Amah chu ka ngheng nghal rawk rawk a, nghet zetin min lo vuan thung.

"Ka thlah ang che tih ka sawi lovem ni?" Thinrim hmel dur khupa min enna chu ka melh let ve rân a.

"I duh duh a ka taksa khawih tur hian tunge i nih?" Ka tih chuan min vawnna chu chawp leh chilhin a thlah nghal a, ka lo inring lo bawk nen chhuatah bawkkhup zawngin ka tlu ta thlawrh a, ka khabe ka sawh dawt zui.

Ka tluk pahin ka kawr hâk a inhlim a ni ngei ang, ka mawngtamah a kut lum thur thur chuan a rawm țhâm deuh salh a, ka phu zawk thei nia!

"I taksa hi maw miss Lopez, tihluihna tel lovin ka 'ta' ah ka siam thei tih theihnghilh miah suh," inringtawk taka tiin min pawm tho nawlh a, ka hmeichhiatna lang chu khuh tumin ka kawr ka pawt ve țâwk țâwk a, hetianga ka saruakna min hmu hi tlâwm ka inti hle bawk, ani erawhin a hre lo der hmiah thung.

A hmel tak ngul leh 'țo' haw tur ang maia dur khup chu zawi zawia rehin mitmeng dam deuh zawkin min en ta a, khumah min muttir fel thlap lawi si! Ka bulah chuan rawn țhu hniamin, "Hmeichhe lumna nei lo leh kawlh zet hi ka mamawh tam lo a nia," a ti sup a. Chhan ngaihna ka hre der lo.

"Kawhmawh bawl zawngin awm tum lo la, i bike hi ka kawl rih a nga, i phone erawh chu i chênna hmun kan thlen hunah ka pe ang che." Khumah ala țhu reng a, min en chiang ngei mai!

"Ka bike tel lovin engtin nge ka awm a nga, awih awm loh lutuk!" Thinrim insûm taka ka tih chuan a dar a san âwk a, "Bike i khalh theih ve meuh chuan ka mamawh tawh lovang," a țhutna ațanga ding chhuakin min en vung vung a, "I dam deuh hunah inremsiamna kan nei a nga, tlanbo emaw min pehhel pawh tum duh ting suh ang che." Ti duahin pindan chu a chhuahsan leh ta daih a.

Eng atan nge ka bike te a tih reng reng ni! Ka leina a la rei lova chuti maia hmelhriat loh kawltir tur khawpa â ka ni bawk lo. Mahse, tunah chuan tihtheih ka nei tlem êm a ni, keimah pawhin ka insaseng țha thei lo a nia.

Ka nu leh pa'n ka chanchin hi an hre tawh em ka hre lova, an hria a nih chuan min lo ngaihven ve awm tak!? Nge, zawn ngaihna min hre lo zawk em ni ang? Ka chenpui te'n min hmuh hunah zawhna chhan sen loh ka dawng ngei bawkin ka ring a, engtin nge ka sawifiah tâk ang le.

Khumah chuan rilru bet lo zetin ka mu rân a, darkar khat dawn che lova ka awm hnuah pawh Mourizo hmel reng reng a la rawn lang ta lo, min hruai haw tur thu kha a sawi ve ngei si a!

Ka bianga kut vawt thlarhin min khawihna chu ka mang hriat riai ruai a, peih lo zeta meng chhuakin hnai lutuka min entu, mitmeng uk kharh chu ka hmu hmasa ber a, rang takin ka chhing lehnghal vat. Mourizo lek niin!

"Hey, Lopez, tho rawh le," khum sirah dingin a thawmhnaw a lo thlak diam tawh a, tawnzau var sar leh sky blue jeans hâin, Loriy boot a bun a, a chhip sam phir zet chu a khawng hmel áh áh khawp mai, a sam hnunglam erawh hraw hraihin a phiar vek thung. A landan 'Pa' zet ka hmuh chuan mit lâksawn nachang pawh ka hre lo leh pek a, 'Estatua'(Milim ker) te pawh a ang deuh!

"Ka hmelțha tih sawi tum i nih chuan ka hriatsa vek a nia, sawi duh lo mai rawh," nui lek lek chunga atih chuan rang zetin ka hawisawn a.

"I mumang a nih chu, i Vestido(dress) zawk kha a nia ka lo en," tih pahin ka țhu chhuak a. Mengphar âwk chunga inherin a chhuak leh nghal vut a, a mize mak deuh hi hriatthiam a har thlâwt!

Dressing table thleng ka bai phei auh auh a. Ningún Dios (Nilo, Lalpa leh..) darthlalanga ka hmel lo lang ka hmuh rual chuan ka ner nasa mai, ka landan mai mai chu(h). A lungawi thlak mawlh lo!

Ka mitmeng buang thak țhin kha a sen vek a, veilamah phei chuan thi a tling kalh lehnghal! Ka biang veilam pawh a duk deuh ruih a, ka sam lah chu a pheng nasa mai si, ka landan râpawm zet chuan Amelia Lopez, nula confi zet kha anna rêng a nei lo.

"I landanah buai suh, engtin nge hetiang buaina tâwk tawh lo tur hian ka inven ang tih kha ngaihtuah zawk rawh." Mourizo Soreno lo luh lai ka hre miah lova, ka hnungah dingin darthlalanga ka hmel lo lang chu a en vang vang a, "Hmelțhat viau hi âtna chikhat a lo nih dawn hi.." ti supin ka sam hnawk nuaih chu a chul ta zauh a, chu chu duh lovin ka thlesawn daih thung. Hmelțha min ti tihna em ni? Awihawm loh lutuk!

"Lo inthlâk la, i inpeih hunah kan chhuak dawn nia," tiin dawhkanah percel pahnih rawn dah a, amah lah chu khumah a va țhu vei thurh a, a mitmeng nêm fahran lo chuan khawdang hawi miah lovin min en reng a, ka awm a tinuam lo ru nghal vek.

"I hmuh laia inthlâk tumna ka nei lo, Mr.Soreno," zawi sapa ka tih chuan a ner sawk a, "Ka hmuh hnu vek a nih kha, puih i ngaih mial tâkah tiin ka lo nghak che," ti-el âw a ni tih ka hriat vangin ka run viau.

Chhan tuma ka âng zuau chu a kut rawn pharin, "Inthlâk phawt teh, hun ka nei tam lo a nia, muang sur sur zel suh," Khumah chuan a zangthalin a mu nghal a, ama inah chuan a intithu ngei mai, min rawn en ta lo hlauhva, chulai hun chu chuhin percel chu ka hawng ta a.

Kan inhmuh zana ka thawmhnaw hâk ang chiah kha a thar diai a lo awm a, boot erawh a tel ta lo, ka bun thei dawn chuang lova ka lawm viau tho ve. Percel tê zawk ka hawn leh chuan under wear leh bra a lo awm bawk a, ka rin ai chuan a ngaihtuah kim angreng phian, 'a sexy deuh e' tih mai loh chu sawiselna tur ka hre hran lo, ka nui ta var var a.

Ka inthlâk chhung chuan sir zawngin ka melh ru zeuh zeuh a, min en lo teh khiah!

Hmeichhe mamawh huam chu a ni lo tawp ang, a hmel rum deuh ûl leh pa hrâk chuan engtin emaw tak ka chhungril a fan tlat nia! Jaja! Mafia pawl nen inzawm ka duh teuh lo. Mahse, mipa ka thinlung dek zartu awm chhun a ni ngei ang; ka duh tihna a ni lova, min chhanchhuaktu a nih vang hian ka ngaisang mai chauh a ni.

Ka kekawr ka hâk dawn chuan ka kheimit an tuam khawngna chuan a dál ta tlat a, ka pawt chho thei der lo! Mourizo lam ka hawi a, hmui chip hmukin ka chevel chu a lo thlir reng tawh a, "Miss Lopez, ka puih i duh chuan min sawm thei reng a nia." Ngeiawm lam lek lek a atih vang chuan a bul ațangin ka bei țha leh ngat a, awmzia a awm chuang lo.

"Ah, Mr.Soreno, min puih theih chuan.." amah en hâ chungin hreh zetin ka sawm ta nge nge a. Ka sawi zawh rual rual a rawn ding chhuakin ka țhutna bul a lo thleng nghal thuai a, ka kekawr ken lai chu lain a hmawr lam zuih chin lai zawng bakchehin a cut ta hmawk a.

Dios! A nachâng ka hre miah lo, nui tut tut chunga min hâktir tâkah chuan ka nui lo thei ta bik lo, thluak kan inhman tam hleih leh hlek a ni e.

Ka thawmhnaw ka inbel zawhah pawh ka bulah ala ding ngur a, ka sâng ve hle a, a mit en turin ka dingdihlip ala ngai hial ang chu le! Sâng fia fia tak a ni.

"I inpeih chuan kal ang le," ka bânah a rawn vuan a, ka zui ve mai bawk.

Kawngkhar thleng chu bai salh salh chungin ka zui a, mahse, ka ke chuan min zawh hlawl loh avangin rei ka pên thei lo; amah nghengin ka kal ve țâwk țâwk a, kawngkhar bula a din tâk thutah chuan ka ngheng nghal rawk rawk a, ka mitah tak enin, "Ka pua ang che, min hnial hmingchhe buai duh suh," ti a ka bân pahnih chu lain min paw ta nawlh a, ka hnial chhin eih lo.

Mourizo hnungah chuan ka bet ta thlar a, ka kut pahnihin a nghawngah nghet fê-in ka kuah ve ta a.

"Min rekhlum a nge!?" Living room kan thlen thlâk ruala a tih chuan ka lo kuah nghet lutuk tih ka hre ve chiah, a zia viau lo.

Min kal chakpui lutuka Apartment chhung chei dan pawh ka en mumal hman lova. Mahse, a changkangin mi hausaho chenna hmun a ni ang tih ka rin hriat ve mai.

Aparment kawtah chuan Lamborghini hring tak hlarh (Tracking super car, metallic, neon green) a lo inhûng fel thlap tawp a, Mourizo hi a hausa viau em ni ang? Ah, Mafia pawlte chu hausa tur an nia lawm a awm tho e. Car kawngkhar dimtê-a hawngin min țhuttir deuh thlap a, a chezia dam ta thlup chu mak ka ti hle nâin engmah ka sawi bik lo.

Driver seat-ah a rawn țhu ve nghal a, "Seatbelt hreng rawh le," a bâk engmah a sawi zawm lova, ngawirengin a thu ka zawm ve hmiah.

Hnehsawh zeta a car khalh lai chu hmuhnawm titakin ka lo thlir veng veng a, a hmel rum ûl kha alang dam deuh thluam a, a sam dum hlap hraw zet zeta a phiar chu hmuh hmaih a har kher mai, mipa sam zuah ka ngaisang miah lova, he pa erawh hi chuan a inhmeh thlâwt!

"Miss Lopez, kum engzat nge i nih ve tawh?" Min en chuang miah lova, kawng chu nguntakin a en thung, "Sawmhnihpali," ka chhang tawi a ti deuh nge min melh zawk pahin, "I chênna hmunah pawh fimkhur hle ang che, khangho khan kut thlawn an tuar duh dawn miah lo a nia," a ti nghut a.

"Engtin nge ka tih chuan ang, body guard nei rawh i tihna em ni?" Ka nui lui ngial a, "A țul chuan i nei mai tur a ni, i zahawmna humhim turin," a sawi zawh rual vëk chuan a speed tisang thutin a hma aia chakin kan tlan leh ta a, a chhan zawh tuma ka âng zuau chu, "Țawng lovin kun hniam rawh," a aw chher chhuai chu hlauhawm tak a ni, kun mai nachang ka la hre chuang lo!

"Cuál el significado? (Eng nge i sawi awmzia? Ka tih chuan rum zetin min rawn melh kâwk a, a chêt dan teh thut chuan minti hrilhhai hle mai, ka zawhna pawh min chhang duh miah lo.

Kan tlanchak êm avangin motor dang veivak pawh kan su lo chauh zel a, ka thin tertek a chhuak ve tlat!

"Lo que paso, por favor díme?(Engvanga hetia awm nge kan nih min hrilh rawh?)" Vin fê a ka tih chuan a kut khingkhat chauhva car steering chu vuanin dinglamin ka lu a nem bu lawp a, car dashboard hnuaiah min nem kun ta ngar ngar a, țawng zawm chi ziazâng ni nghal lo chuan..

Minute sawm dawn kan tlan hnuah car chu a khalh muang ta chauhva, ka chênna Aparment kan lo thleng der tawh! Engtin nge ka chênna hmun a lo hriat theih le? Zawhna hlirin ka khat..!

Car ațanga chhuk ka tum chuan ka banrekah nghet zetin a rawn vuan a, "English chauh hmang rawh tih hi vawi engzat nge ka hrilh dawn che?" a ti hmuk a.

"Jaja! Spain-ah i awm a nih chuan Spanish țawng hmang ve mai rawh," ka ti deuh salh a.

"Luhlulnu, i duh ang chuan min runluih ta che, i phutawk zel hremna i dawng ang," tiin dimlo baksak hian car kawngkhar a hawng a, a chhuak zui nghal hmak bawk.

Kei erawh ka țhutna ngaiah ka la țhu reng a, chêt mai nachang ka hre lo. Engvanga thinrim em em nge maw a nih le? Hah! Misual pawl niawm reng a ni, a thinchhe ropui si!

"Lo chhuak rawh, i mawl deuh tak tak a nih ka ring, nilengin hun ka nei lo a nia," car darthlang chu a rawn beng dawt dawt a, a tih ang chiaha dim lovin kawngkhar ka hawng ve țhuaia a lo ding hnai bawk nen a petek deuh dawrh a, ka nuih a za ru kher mai.

"Keimahin ka kal thei lo tih i hriat kha, min paw leh dawn lo'm ni?" Pawisawi lo niawm taka ka țawng chu ei loh hmel zetin a tûm hmuk a, "Ka puak nuam i tih vang nge min hnaih i duh hrim hrim?" Atih chuan rum theihtawpin ka'n melh ve ngawt a, engah mah a ngai chuang der lo.

A hnungah bawk chuan pakai lehin Apartment panna step chu min zawh chhoh pui ta a, rit tiawm hmel pawh a pu chuang lo.

A sam phiar hmawr lamin ka hmai a zar chhên vang chuan hmalamah ka dah thlâksak a, "Ka thu lovin ka engmah kha khawih suh, ka sam leh lek phei chu," chang faka tiin min dinpui deuh dat a, hnunglam ațangin ka mengkalh lui ngial a, a sawt viau lem hlei lova..

Inchhunga kan luh rual chuan Roshima leh Manuela'n chîk angreng takin min lo en a, angaihna ka hre viau lo! Hlauthawng hmel an pu der bawk si lova, chu chuan min ti hamhaih letling zawk a, zawhna min zawh chiam ka ring kha a nia, chupawh engmah min zawt ta chuang lo thil mak a thleng tihna em ni?

"Mr.Soreno, i chungah kan lawm viau a nia, a pindanah hruai chhoh nghal a duhin ka ring," Roshima'n atih phei chuan ka hawi â hu mai! Soreno hming pawh an lo hre ve a maw!?

"Awle, a phunnawi leh hmain ka'n chhohpui nghal law law ange, Manuel, i remchan chuan ka car saw min lo check sak lawk dawn em ni ang," Mourizo aw pangngai thlup chu mak ka ti viau, a car check a țulna ka hre ve hek lo. Chak mangkhengin min tlanpui zo chiah a, he pa hian thil tum eng emaw tak a nei zawk a ni ang.

Awm ve lo ang hmiahin Roshima nen an țawng char char a, ka bulah lém a tûm bur zel kha a nia. Zahpuiawm lutuk! Inhmel hriatsa ang maia an inbia chu mak ka ti lo thei lo.

Ka khumah min muttir hnu chuan ka ngawi ngal a, ka thin a rim tlat, ka chenpuite nen lam an lo inhre vek a, keiin rilru hah lutukin min ngaihtuah hlau reng rengin hun ka lo hmang thung si, ani hian min tih hlauhthawn a tum ve hrim hrim a ni, ka lung a awi miah lo.

"I lei an phuar ta mai elaw?" Roshima kal liam hnuah Mourizo chuan min be ve chauhva, chhan ka tum reng reng lo.

"I housekeeper leh driver ka hre sa kha mak iti viau a nimaw? Thil har a ni hleinem, i phone ațang khan ka be mai mawle, i tawhsual tawh dan kimchang an hriat i duh te a nih ngawt loh chuan," tiin khumah a rawn țhu thla a, ka mitah min en runin nui hmel a pu lek lek bawk. Min nuih ve khanglang em maw ni.

"Favor vaya, (Kal mai teh)" Amah pawh en duh lovin lehlam ka hawisan nghal daih a, "Kan pahnih chauhva kan awm laiin eng țawng nge hman tur ka tih kha, zirtirna pek hlek che i ngai dawn tak tak a nih hi, i luhlul em mai," tihpahin ka biangah a rawn vuan a, amah en tur chuan min kuaiher zui zat ah..

Chutah rawn kun hniamin ka inrin hman hma chuan ka hmuiah na zetin a fawp ta a, ka hmui ka chîp tlat avang chuan a aia nâ-in ka heh chu a pet deuh salh a, min fawp lui ngawng ngawng bawk; a hmui lum ham ham chu hnar har tak tur a ni. Mahse, chuti maia tlawm ka tum awzawng lo, a sam phiar rawn uaithlaah tak chuan nazetin ka phih ta a, min thlah chiang teh e.

"Sلعنت(Chimawm. BRR)" Ti a min nem sawkin a ding chhuak nghal a, a țawng hman kha ka hriat ngai pawh a ni lo. Misual țawngkam a ni mahna, ka hrethiam lova, hriat țâlh ka tum hek lo.

A hmui nuai zauh chungin rum zetin min rawn melh reng a, "Hremna i hmu khawp ang, ka lak ațang hian khawiah mah i bibo thei hek lovang Amelia Lopez," thüm chhaka tiin ka țawng ve hma chuan vawikhat pawh rawn hawi lét tawh lovin pindan chu a chhuahsan ta a.

American a ni lo nge, Red Indian lam ti dawn ila a vun rawng kha nichiahin ka hre silo, â ka ngaihtuah peih mai mai lo ve a, Mourizo Soreno a ni tawp mai!

A sam lah kha ala ui ve em em a, a chhiat chhiat nen, ka khumah ka insawh tau nghawng nghawng a, Roshima emaw, Manuel pawh nise, ka zawh chian deuh chu angai dawn a ni.

Kei aiin an lo hre tam deuh mahna, a zûna uai natak tur khawpa pianthiam leh nalh a ni...



End of Chapter-2

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:28 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-3

Apartmentos Beni-beach
Armada Espanola,
Alicante Spain.Madrid
9:00 Am

Ni li ngawt ka room chhuahsan miah lovin ka awm tawh a, ka nu leh pa-in ka chungchang engmah an hre lo pawh mak ka ti ta lo. Roshima'n thiam takin chhuanlam a lo siam diam a, chupawh Mourizo tihtir vek ala ni zui! Ngaihtuah kim tak a ni.

Ka ke pawh a hma ai chuan ka rap ngam ve deuh tawh a, hetia ka room-a tawm ngawt ngawt hi a țulna ka hre hrep lo ve a, pawnlam panna darthlalang kawngkhar awmna thleng chu wheelchair hmangin ka tawlh phei ve ta a. Tiang hman ai chuan wheelchair han hman mai hi a awlsam daih zawk.

Kan Apartment ațang hian Beni-beach chiang takin alang thei a, sea view ațhat bakah Tennis court leh Solarium thlengin a hmuh theih vek a, chulai hmun thlira țhut chu ka châk teh tlat a, Roshima puihnain Apartment hnung lam huan chu ka thleng ve ta hrâm a, tuman min rawn tibuai thei lovang.

Huanah wheelchair nen ka țhu ve ta rân a, nisa lutuk laka inven nan lukhum parh dârh ka khum ve ngial, ka taksa a hnawih tur lotion leh sun block pawh ka inchhawp deuh thlap bawk a; kan hotel-a wine supplier list ka keu dan dan lai chuan tu emaw hian ka lukhum khum lai chu a rawn phelh ta a.

"Zalen taka helai hmuna țhu tur hi i ni hauh lo." A aw chu ka hriat hnu a ni, amah hmachhawn zawnga ka lu chu herin mitmeng uk kharh a min entu nen chuan kan inmelh ta rân a, Mourizo Soreno bawk! Ka chênna hmunah engti tura lokal nge a nih ka hriat hauh loh chu le.

Zam ru zet hian ka kut thlan dap chu ka nuai nawk nawk a, zam tur ka ni miah lo nâa hepa ka hmuh apianga ka danglam hman ve ziah hi ka duh lo kher mai.

"Mr.Soreno, helaia hmuh che ka lo inbeisei lova," ka nui lui dawn ngial a, a mitmeng rum angreng tak ka hmuh vang chuan ka ti hleithei lo chu a ni e.

"I pindana awm tur i ni asin, buaina tawh leh i châk viau em ni?" A aw ril ruih leh hriam hraih chu hriat a nuam viau lo.

"Enteh, Mr.Soreno..!" Ka sawi zawh hma hma chuan ka tukkhum samah vuanin, "Mr.Soreno, Mr. Soreno, i ti chhen dawn nge Mourizo tiin min ko dawn, Morry emaw, Mouri pawh mawle," Vín fahrana atih chuan mit khap fak fakin ka en chho hau a, a hming hmasa a koh a duh a maw!? Jaja! Chutiang tur khawpin ka nêl lo ve a..

"Ka koh dan turah che lo buai suh, min chhanhimtu chu i ni ngei mai mahse, i thu thu-a awm tur ka ni lo a nia, Mr.Soreno," zawi sapa ka tih chuan min tuk țawlh duh mai dawn emaw ka ti hman tawh a, chutia ti ta lo chuan a nui ta suk a.

Ka khabe-ah tuaiin, "Dam fel phawt la, hmanna tur che țha tak ka nei a nia," tiin coconut kung chu a melh chho vang vang a, eng nge tih a tum pawh ka hriat hman hma chuan ka bula lung lian deuh pakhat chu chharin a vawm ta a, coconut hnûnah tak a fuh ni ngei tur a ni, kan piah lawkah a rawn tla nawlh a, "Va chhar rawh le, eng anga harsa leh khirh pawh nise ka duh chu ka nei zel țhin tih theihnghilh miah suh, Amelia Lopez," tihpahin ka biangah a piai zauh a, naupangchhia emaw min ti em maw ni le?

"Eres muy orgullosa-mente? (I chapo mah mah lo maw?) Zawitêa ka tih chu a hre pha lo emaw ka ti a, a pen lai tawp chawtin, "Han sawi țha leh teh, engmaw i sawi kha?" Tiin min hnaihchilh nghal ruak a, Spanish țawng a thiam lo khan ka hre si a, â.. a hriatthiam vang pawh nilovin ka thusawi hrim hrim zawk kha hriat a duh a ni ang, ka sawi nawn tawh awm lo em mai.

"Nada, (Engmah)" tia ka chhan leh chuan ka wheelchair chu a rawn tuai vir mawp a, "Hei hi i cho chhuah liau liau a ni," ka hmai bulah rawn kun hniamin na zetin min fawp ta a, ka hmui a thip nghal hlur mai.

Che lovin ka dawh mawl tawp a, a kut chu ka kawr âwmah rawn zen lutin ka âwmbawr a khawih tâkah chuan ka phu dawrh thei nia, min fawh dan pawh a thlâk zui zat a, dam thlap leh zawimuangin a hmui ati che a, ka lo insûm rûk vena pawh zawi zawia țhiatin ka thaw chhuak hraih a, avawikhatna a ni lo tih a hriat kher mai! Zei tak a ni.

"Mouri..!" Ka aw chu leh! Min fawhna a thlah rual chuan chiang takin ka mitah min en a, "Inveng țha la, tu mipa mah hnaih suh ang che, rin ngam an tam lo a nia Amelia," ti a inher vutin coconut tla chu a va chhar a, ka malchunga dahin, "A tui hi in la, i thluak lo tifîm ang che," min hmusit hmel ka hmuh chuan tlawh zui awrh ka châk teh a nia!

Eng mah sawi tawh lovin a pen pâwk pâwk a, thingkung bula ka bike ding chu a pan ding nalh a, engtin nge ka hmuh loh theih le? Duh tawka min hmusit hnuah ka bike ala hmang ngam a nia, zak lo lutuk. Nithum lai a kawl tawh lehnghal! A châk lo chiang ang chu..

Zak țhak lova ka bike-a alâwn chu ka en reng a, helmet a khum hma chiaha ka lam a rawn hawi chuan ka hawisawn duh bik der lo. A kut dinglam chu rawn pharin min siai zauh a, ka run tawk a tling viau, chutah helmet khumin a tlan chhuak ta a, a sam thliin a chhem len siau siau chu a nalh phian! Dios! Eng mipa nge maw ka nuna lo tel ta hi..!

Chumi kar tluan chuan pawnah ka chhuak leh ta lo. Ka bân pawh adam fel tawh a, ka ke erawh duh angin ka rap țha ngam chuang lova, an tuam khawngna phei hi chu kârleh lamah daih phelh tur a ni nghe nghe a, hotel lam ngaihtuah viau mah ila tih ngaihna a awm der lo. Ka manager Franco kutah ka dah tawp a, buaina em em a awm hran lo bawk nen hahdam takin ka inah ka awm der der ta mai chu a nia.

"Amel, dinner-ah eng nge i ei duh dawn?" Roshima chu study room-ah lo lutin ka bulah a rawn ding a.

"Cat fish, mushroom, chicken fried steak, snacks tlem azawng nen, Sangria wine lo chhawp tel la," ka tih chuan nui var var chungin min chhuahsan leh ta a. Ka ke a nat hnu hian ka room-ah engkim min rawn pe vek a, doctor râwn angaih ni-ah Manuela'n min hruai mai zel a ni.

Mourizo Soreno tluka mipa thluak țha hi an vâng viau ang, khatia tawhsual ka tawh zan khan Roshima leh Manuel te engkim a lo hrilh vek a, ka awmna chin leh a Apartment awmna pawh a hrilh thlap a, ka intihnat chungchangah 'venhim ka mamawh rih a ni' tiin a lo hrilh diam bawk. Ka nu leh pa pawh amahin alo be fel thlap a, ka țhian a nih thu hrilhin a lo hmin fel der a ni.

Los Angeles lama kan hotel-in buaina a tawh chungchangah ka nu leh pa an la tâlbuai hle tih ka hriatin ka mangang ru deuh a, MJS Wine Company lamin Celeste (Wine hming) min supply țhin kha chhan leh vang awm lovin an titawp thut a, wine tui ber leh hralh kal ber a ni a, kan customer-te lam tam ber a ni nghe nghe.

Anni lo hian company dangin an siam chhuak der si lova, chu chu buaina pakhat a ni a, American ho thluakah hian eng nge maw awm ni? Indawrna kaltluang lai tih khaihlak reng reng hi thil âtthlak chu a ni ve hrim hrim a, ka huat zawng tak a ni bawk. Ka dam veleh an la chingfel lo fo a nih chuan keimah ngei tifel turin ka kal angai ngeiin ka ring bawk a ni.

Dinner ka ei zawh hnuah tihtur hre lovin ka laptop hmaah ka țhu ran a, Mafia pawl ka chhui dawn em ni ang! Chu zawng bul țanna tur ka hre der si lo. Mourizo hnen ațangin tlem tal hriat chhuah ka tum tur a ni, kha pa intivei zet kha engtia lo dawn sawn tur nge pawh ka hre hrep lo e.

Sana ka en a ala hma ropui si, whisky ka in nghek zawk dawn em ni ang! Laptop pawh ka bih rei peih chuang lo, khumah ka mu leh ta nge nge a, hun eng emaw chen ațang khan boyfriend ka nei tawh lova mipa laka ka inkharkhip nachhan ber Elias Sanchez hi thah hial a nia ka duh ni! Amah lah chu hmuh tur a vâng em em lehnghal a, Hilda nen an innei zui ta nge pawh ka hre chuang lo.

"Amelia," min koh ri ka hriat rualin ka room kawngkhar a rawn inhawng zui zat a, thawmhnaw mumal ka inbel si lo, rang takin ka tho chhuak ve tak nâin awmzia a awm eih lo, Elias Sanchez chu a rawn lut chawpchilh nghal a. He mihring ka nun tichhe vektu hian ka pindanah eng nge tihtur a neih Pathian chauhvin a hria ang chu..!

"Amel,Querida (Duhtak)" Elias chu ka khum bul sofa-ah chuan inti tlangnêl takin a țhu vei chut a, a hmel ala pangngai reng.

"Salir de mi casa y mi habitación (Ka pindan leh ka in ațang hian chhuak rawh)." Zawi fiah taka ka tih chuan engah mah ngailo niawm tak hian a țhut ngaiin ala țhu reng a.

"Spanish emaw min la ti fo elaw, Amelia darling!" A nui hmel chu tuk țawlh ka châk kher mai. "Chhuak rang rawh," thinrim insûm zeta ka tih leh tâkah chuan a țhutna ațanga ding chhuakin a nui vur vur a.

"I hmangaih Elias kha ka la ni reng a nia," tihpahin min rawn hnaih hrut a, zu rim a nam nghal huk bawk. Engtin nge ka pindanah a lo luh theih zawk?Roshima chungah ka lawm ta lo khawp mai.

"Tenawm khawro pa, pen khat pawha min hnaih leh a nih chuan..." ka sawi zawh hmâin min hnaih lui leh kher a, a ve lutuk a! Hmana Amelia nu zêm kha ka ni tawh lo tih ka hmuhtir ngei angai dawn a nih hi..

Khum bula ka glass no inchhawp chu rang taka banin ka tin nghal uaih a, a mengphar âwk ka hmuh rual chuan, "Mr.Sanchez, chhuak rawh," ka țawng ring hran lo nâin a nelawm vakin ka ring lo, hetianga ka țawng chhuak thei hi keipaw'n mak ka ti!

"I lo danglam ta kher mai," tihpahin khum chu penkhatin a rawn hnaih hret a, chutah zawng ka thinin a tuar ta lo, "Mr.Sanchez, engmah tih hreh ka nei miah lo a nia," ka no ken chuan ka vawm ta a, a lo thle sawn khanglâng nen ka vawm fuh ta lo.

Mitmeng rum ûl leh vervêk tih hriat lutuk hian min rawn melh a, "Tun hma a ka lo hlawhchhamna kha zanin ngei hian ka hmu ang," thinrim aw khur dut duta atih chuan inring takin ka lo hmachhawn ve a, khum ațanga thawh erawh ka tum lo. A chhan pawh ka ke ka hmang țha thei lo tih a hriat chuan min zuam sawt dawn a, chu chu ka duh loh ber a ni.

Chhuata no tla keh ri pawh Roshima leh Manuel te chuan an hre lo nge an rawn lang miah lova, ka ngaih a țha lo tulh tulh! Zanin hian eng buaina nge ka tawh leh dawn? 'Dios!(Lalpa) Min pui hram teh' ka ti rilru a.

Elias mitmeng tenawm zet chuan ka taksa a enkual dun dun a, ka ten lutuk! Tun hma khan engtin nge ka lo duh theih le? Pasalah hial neih ka lo tum ve kha a nia, Pathian hnenah lawmthu awm rawh se, ka nei lo hi ka vannei hle a ni.

A ban sei zet chuan min rawn ban dû a, ka lo vai per lawp thung. Ka țanhmun hi a rem chiah lo nâa ani zurui mai mai hi chu theitawp ka chhuah chuan ka hneh ve maiin ka ring.

"Amelia, tun hma ațang tawhin ka khawih che hi i châk zek zek a ni lawm ni, țang der vel lo mai teh." a rui țawngkam mah nise ngeiawm tak a ni.

"Chhuak rawh," ka ti vin țhat a, a phur tulh tulh emaw tih mai tur hian a nui sûng a, min ngaihnêp hmel khawp mai.

Khuma rawn lawn a tum rual chuan rang lutukin ka ke na lo lamin ka tlawh pawp a, chhuatah a let thla nghal tawl! Mahse, rang taka rawn ding chhuakin thinrim hmai sen awp awp chung hian a kut a hum ruh a, min hnek tum niawm takin a rawn vai fua a, ka lo bum ve zauh thung.

"Eng nge i hriat phiangsen le?" Tihpahin a pheikhawk bun pawh hlîp lovin ka khumah a lo lawn ngam a nih chu! Min rawn vai fua fua a, eng emaw chen chu ka lo indang ve zel a, chutia kan inchai lai chuan a tihdan thlâkin ka ke-ah a pawt ta thut a, ka râk nghal țhawt!

Chutia thawm ka neih tâkah chuan ka ke lam chu a en nghal vat a, a nâ tih a hrethiam teh chêk aniang chu tifuh intizet hian min bawh ta thut a, ka ke a khawih dawn emaw tiin chu lam ven dan tur ngawt ka lo ngaihtuaha ka rin loh dana che a ni bawk a, ka bet nghal rawk rawk mai! Ka mutkawr hâk chu thui fê inhliin ka under wear tlâng alang a, a melh zuk tih ka hmu hman tho bawk, ka luak a ti chhuak ut ut thei nia.

Theihtawpin ka sual let ve bat bat a, ka hnute dimna nei miah lova a rawn țhâm takah chuan rem leh rem lovin a hmaiah ka ham hrâwk a, a samah ka kêk thul, a thaw huam huam ri chu ka bengah a ring khawp mai.

"Elias, tho vat rawh," chuti maia tlawm ka tum awzawng lo, ka hun liam tawh a natna min pek zawng zawng kha tun hunah hian ka thungrul ngei tur a ni. Ka kut a chelh loh zawk chu la chhuakin ka hûm ruh a, a mipatnaah tak ka chum sak ta a, a meng tâl tap mai.

"I hur chhunzawm thei tawh lo maithei a ni," tih pahin a hnarah ka hnek sak leh ta a, rui kher lo se chuan ani ang pa hleitling lutuk te chu ka tan hneh chi rual a ni lo, Pathianin min țanpui ngei a nih dawn hi..!

Khum ațang chuan ka tlawh thla a, ka ke na ut ut chu haider theih pawh a ni tawh bik lo. He pa vang hian alawm mipa ka hnaih duh ngai lohva mahni inven dan ka zir hial ni.

Chhuata Elias Sanchez mu hlawm reng chu ka melh ngawt ngawt a, min bumna leh hrehawm tam tak min paltlangtir kha tuna a natna ai hian a na fê zawk; ka inngaihtuah nawn leh ngial pawhin thih hi a phu a ni.

"Vaya al infierno (Hremhmunah kal rawh)" tihpahin ka ke na lo lam chuan ka tlawh chawrh chawrh a, thah duh hialna rilru ka pu a, a chatthla tâ nge, a che miah lo!

"Amelia duh tawk rawh," Mipa aw fiak țhak ka hriat rual chuan khumah ka țhu hnawk a, tunlai ka thil tawn em em hi a mak zozai ka ti!

"Engtin nge he mihring hi a lo luh theih? I ko chu a ni em lo maw?" Mourizo aw ka hriat chuan ka dâk chhuak vat a, sawisak atan ka ko anga maw? Jaja! He pa pawh hi a â tawh a nih hi..

"I duh duh rawn phuh chhuak ve ringawt suh Mr.Soreno!" Rum fahranin ka melh a, "Mipa duk dak lo zet zet i lo khâwi khawm țhin em ni zawk?" A tih leh chuan ka thin a thawk leh ta phat mai! Chhuata ka pheikhawk chu chharin ka vawm leh ta a, a lu-ah tak a fuh zui ah..

"Chhuak rawh, chhuak rang vat mai rawh," tiin khumah chuan ka ke ka hlângkang a, thinrim duh miah lovin kut hnungsuih ât-in min rawn pan ta a, lehlam ka hawisan hmak.

Ani pawh hi engti tiha rawn lut nge a nih pawh ka hre hrep lo e a! Body guard chu ka mamawh dawn ngei e, Roshima leh Manuel te pawh warning pek an ngai bawk ang, ka phalna la hmasa lova ka pindana rawn lut apiang chu an nuamsa hauh lovang. Ve lutuk hian a, Amelia Lopez ka nia lawm le.

Harsa taka ka lo fight ve kha chuti maia thamraltir ka tum awzawng lo, hmeichhia ka nih vanga min zuamtu chuan min zuam sual viau ang.

"Amelia, he pa hi engtin nge i tih dawn?" Chhuata Elias let reng chu a en zuk a, engtia tihtur nge ka lo ngaihtuah miah lo.

"Ka hrelo le, a harh hunah achhuak ve mai ang chu," tihpahin ka thaw huai a. Ngaihdan nih loh hmel takin, "I â tawh tak tak a ni ngei ang, chuti em em a, nâ a ni lo, a rui chatthla vel mai mai anih hi."

"Eng maw i sawi?" Tiin ka melh tür khai a, "I kut thlâk kha atan engtham a ni lovang, a rui arawn harh anga eng buaina nge a siam sak dawn che i hre ngawt a mi?" Min ti lêt erh a. A dik angreng viau bawk si.

Elias nen pindan khata awm dun ka duh awzawng lo, Mourizo chu ka melh ta hâ a, "Engtin nge ka tih tâk ang?" Zawi sapa ka zawh chuan a mitko san âwkin "Khati tur kha a ni reng a ni, i thluakah khan eng nge awm ka hria alawm, mawl lutuk..!"

Elias chhuata mu chu dim lo baksak hian a hnûk chhuak a, khawiah nge a kalpui dawn ka hre teuh lo, zui ve pawh ka tum chuang lova, a tih tihin ti mai mai teh se, ka chau tawh.

Bathroom-ah lutin ka intifai thuak thuak a, ka ke hi dam var se ka ti ber mai. Ka nunphung a khaihlak vek tawh a, bâkah buaina ka tawk reng bawk si! Roshima leh Manuel bawk chu ka rilru-ah an lo lang leh a, Elias ka huatzia hrereng chungin engtin nge an rawn luh tir theih zawk le? An chungah thil țha lo a thleng chu a ni êm lo'ng chu..!

Ka pindanah under wear nen ka ding tau a, ka mutkawr dang dah chhuahsa ka neih loh vangin drawer ka hawng lawr dan dan a, ka la hmu mai lo zui!

"I taksa a hmelhem hman lo chu a lawmawm lamah ngai ang aw," Mourizo ka room kawngkhar nghenga lo ding chu ka hmu ve chauhva. Thâwm nei miah lo hian min țhâwng thut thut zel a, polite lo lutuk mai.

"Min en kur lo khan Roshima leh Manuela te inhnuai lamah an awm em tih min lo en sak lawk teh," tihpahin mutkawr dum ka khup chen leka fual chu ka inthawlh sawk sawk a.

"I țhianpa hian chhuanlam siamin atîr chhuak daih alawm, i hre miah na nge?"

"Manuel te an awm lo maw?" Eng trick nge Elias hian a hman chu ka hre lo nâa kei min râwn hauh lova an chhuah danah chhuanlam țha tâwk tak chu a siam ngei ang. Tlêma tlêmah vanduaina dangin min tlâkbuak lo chauh alawm le! Khawi hmunah mah ka him lo a nih hi.

"Intur kan dawm dawn em ni ang? I thluak nù sa kha tih nut belh leh ila.." Mourizo țawng ngeiawm tak chu ka haider hmiah a.

"Khaw'nge Elias?" Ka tih chuan, "Ngaihtuah duh suh, mikhual pindanah ka kalh khum," tiin pindan chhungah a rawn lut ta chauh a, he pa hian kawr pangngai a ha ngai lo nge? Tawnzau hâk reng ngai chi hnam a ni zawk! Chu erawh kei pawn ka awih lo. 'Estupido!' (Mawl lutuk).

"Intur dawm ai chuan i chenna hmunah haw la, ka nunah rawn inlan tawh suh." Khumah ka țhu chawrh a, no lo zeta ka melhna chu engah mah a ngai lo a ni ngei ang, ka lam panin a rawn pen lui leh ngat a, a hmel chang fak leh hmui chîp hmak te chuan ati lang 'pa' ru riauva, a bân ala tuam danah ala dam fel bik lo tih ka hre mai.

Min rawn hnaih luih zel avang chuan ka kut pharin, "Penkhat pawhin min hnaih tawh suh, chuti a nih loh chuan.."

"Min vau ve lo mai teh, tuna i khuma i țhut theihna chhan kha keimah, Mourizo Soreno vang a ni tih theihnghilh tawh suh." A ti nghut a. A thiltih țhat chu a chhuang ve larh larh khawp mai.

"Min chhanhim manah chuan engzat nge pawisa i phût a?"

"Pawisa lam a ni lo, affairs neih ka duh a ni." Thutak zeta a tih chuan za zetin ka nui ta chiam a, ka nuih a za tak tak bawk. He pa nen hian Asuntos(affairs) kan nei anga maw! Jaja! Mumang chhawngthumnaah pawh ka la mang chhin eih lo.

"Nuihzat tur a awm lo a nia, Amelia! Naktuk zanah ka partner angin ka hruaichhuak dawn che, lo inring lâwk ang che," a la ti tak deuh deuh va. Hnai lo mai!

"Khawiah mah ka chhuak thei lo tih i hriat ve reng kha, i mawl em ni?" Ka nui lui deuh kher a.

"I chhuak thei tih ka sawi lo, naktuk zan dar sarihah ka lo lam ang che, min hnial tumna rilru i pu a nih chuan theihnghilh hmiah rawh, eng chhuanlam mah lo siam suh ang che." A sawi zawh rual chuan ka room-a cupboard inhûng chu a pan ding nghal nulh a, a pa in emaw ati a ni ngei ang! Tlangnel tak hian whisky umkhat a phawrh zui zat a, a chezia chu ngawi rengin ka en tawp.

"Ka pindan hi chhuahsan phawt mai teh," tûm bûrin khumah ka țhu a, ani lah chuan no-ah intur thliin a thâwk khat pawp a, a ner nghal sawk bawk.

"I boyfriend kha a lo kal leh tâk hlauhvin chhantu i mamawh tawh ngei ang, a rui tawh dawn der silova," whisky inthlit leh paha a tih chuan ka run ngei mai, mikhual pindana khung lovin pawnah emaw police hnenah pek ve mai tur a nia, sual leh lutuk.

"Ah..Englo, vodka min lo thlit ve teh," he pa hnial reng hian sâwtna a neih pawh ka hre hrep lo ve a, ka muhil leh thei dawn chuang lova intur dawm dun pawh a sualna a awm em em hleinem.

Min hnial miah lovin Vodka chu shot glass khat piauvin min thlit a, ka kutah hmehbelin, "I rilru pik a chhâwk mahna," tiin khumah chuan a rawn țhu ve a, a kut lehlamah intur a keng a, lemlamin whisky bottle a hum bawk.

"A țha e, in ila a nimai lawm, rui khawp erawh chuan i in loh ka beisei," ka ti ve ta nge nge a, mahni chauhva awm ai chuan he pa bula awm hi a ziaawm deuh zawk mahna..

Chutia intur kan lo dawm lai chuan ka room kawngkhar a rawn ri dat dat a, "Amelia i țha em?" Roshima aw a ni, ka hau hrep dawn em ni ang?

"Eng nge?" Ka aw lah chu a'n vin em em khawp a, Mouri chuan min melh zawk a.

"Sii..ka mutsan mai dawn che, mamawh ila nei dawn em?" Roshima'n atih leh chuan, "Mu rawh, naktukah ka be duh ang che," ka sawi zawh rualin pen thawmin a zui nghal a, a kal ta.

Ka pindanah Mourizo a awm ve tih a hriat ka duh miah lova, mak takin ani lah hian thâwm a lo nei lo ve teh tlat a, chimawm chhuaha min tihbuai ka rin tehlul nen! A thil inlai chauhva rilru pe niawm fahranin a no a en ngur a, a landan chu leh! Apache fighter niawm tak a ni.

"Zankhuain ka pindanah hian awm i tum em ni?" Vodka lem khalh paha ka tih chuan min rawn en ve ta chauhva, a hmel tûm hmuk chu ngainatawm loh ve tak a ni.

"Ka thu thu, i duh chuan mu rawh ka lo veng ang che," a ti ta roh a, min venghim zo meuh dawn em mawni le? Alakah hian inven angai zawkin a nia ka rin ni.

"A nih chuan i mut achhuah hunah sofa-ah sawn i mu mai dawn nia," khum piaha sofa inhûng chu ka kâwk pah zauhva, ka thil in khan hna a thawk țan a ni ngei ang, ka mut a chhuak titih der!

"Țawng țawng lo khan muhil la ti nia," ti hmukin whisky chu a lem leh zat a, zû a va'n heh hmel tak! Rui hmel erawh a pu miah lo thung. A sawi anga awm mai loh chu tihtheih ka nei lo viauva, a che theilo zawk ka la nizui leh ta nghal!

Amah pawh ngaihsak tawh lem lo chuan khumah ka inthawlh ta kâk a, ka lu hai chem chem leh vai riai chungin ka chhing ta chial a.

Ka harh leh chuan ka hrawk a thip hlur a, ka dang ro huam huam chu ka hre hmasa ber. Khum bula tui bottle dap tumin ka inlet thak a, tunge ka sira mu ve hi?

Mourizo chu kekawrte nen chiah min khan chialin a lo mu a, puan pawh kan sin awzawng lo, ka mut dawnah khan ka sin ve reng si a! Chu pa mai mai chu..(h)

Ka kaitho ang nge kaitho lovang? Tih ka ngaihtuah mêk laiin a rawn meng chhuak hlawl a, mitmeng buai eih lo hian min en nghal nia maw le. Misual rual zinga tâl țhang a ni bawk a, a harvãng viau a nih dawn hi, a chhan pawh thawm ka la nei miah lo. Tui intur takngial pawhin ka la che chhuak lo a nia!

"Eng nge?" Min la zawt zawmah lehnghal a, ka zawh tum tak!

"Engvanga rawn mu ve ngawt nge i nih?"

"Yeah, ka mu ve duh a nimai alawm," ati tawi tuk a! Min la melh kur zui ah!

"Vawi engzat nge ka hrilh dawn che, i pa in a nih loh hi, keimah, Amelia Lopez chenna zawk aw," Tui bottle ban paha ka tih chuan a nui huk a. Nuihza tak tak pawh a ang ve alawm le.

"Ka pa in chu nise maw? Nangmah zawk hi i awm tel lovang, leili hriam nu," min runluih niawm takin a bawp lehlam chuan ka mal a rawn si lui kher a.

Tui no thum zet ka in chuan ka harh kâwk mai, zinglam dar thum chauh ala ni a, thawh nan ala hma mah mah. Mahse, he pa nena khum khata mut em em te chu a, engtin min ti chu a ni chuang lova mah se a mi uap a nâin kan boruak a țang ru tlat! Chu chu ka duh loh ber a ni.

"Eng maw i sawi, kal mai teh," a âwmah ka nam a, ka kut alo vuan vat thung, "Ka kal hmain eng emaw tal hnutchhiah che ka duh," a sawi zawh rualin a rawn kun hniam nghal a, invên ngaihna ka hriat miah loh chu le! He pa hian mak takin min aikaih leh thut zel! Hah! Nêp ka intiru viauva ka dang chuang țhak nang.

A hmui lum ham hamin ka hmui a rawn sîk pawh chuan ât hmel zetin ka meng bial kal a, chutah dam thlap leh phût lêt nei niawm fahran hian uar zawkin min fawp ta vawng vawng a, ka la țhut miau avangin zawitêa min nem mut pawh chuan ka țang chhin eih lo! Min fawhna hi nuam ka tiru tlat!

A kut lum thar thara ka mal a chûl laite chuan ka taksaah eng emawni tak hian a thawk a, Elias hnuah mipa ka intawhtir hmasak ber leh min fawp hmasa bertu a ni. Haja! Elias tehhrep chu!

"Amelia, i nalh takzet!" Mourizo aw thâm chhalh chu a nalh ru phian, a sexy bawk.

"Min fawp let ve rawh," atih rual chuan ka harh chhuak zawk a, nuam ka ti tih ka pha lo mai ang. Mahse, chuti maia inhnehtir te chu a, hnai lo mai, min zuam lutuk anga sin; ka mipa duh chi leh min chawk phur theitu a ni tlat! 'Inven tluk a awm lo' tih bawk chu ka rilrua lang hmasa a ni leh tlat si.

"Tho teh," min fawh kâr lakah chuan ka ti sap a. Ka aw rik chhuah dan mai mai chu (h).

"Min hnial suh, hei aia thlen thui tumna rilru ka pu lo," ti supin ka mutkawr chu a hlîm deuh kher a!

"Chu pawh nise ka duh chuang lo." Ti a thawh ka tum chuan a inlahrang thut a, amah zawk țhu chhuakin a sam phiar hmalama uaithla chu a hui kiang zauh bawk a, chu tê ringawt pawh chu hawisawn san a har alawm le! A chevel dik thlup hi mipa tamtak neih ve loh thil a ni miau va.

"Tuna ka fawh ang che khan tu mipa mah infawhtir suh ang che, kei anga inthununna nei țha anni kher lovang," khum ațanga thovin a tawnzau chu a inthawlh sawk sawk a, chutiang zelin kekawr pawh inbelin bathroom apan ta daih a, min nawrluih ka rin tehreng nen ka hrilhhai zawk mah alawm le.

Misual tak chu a ni lo phawt ang, Mafia Jefe(boss) a ni emaw, atu a pawh chu nise, mipa insûm thei tak chu a ni tho tho. A lo chhuah leh hmain ka lo mu fel ât a, khawvar hma chuan min chhuahsan êm lovang chu..

Bathroom ațanga alo chhuah leh meuh chuan ka lo muhil hman lek lek tawh a, "Amelia, i țhianpa khu engtia tih nge i duh?" Pheikhawk bun mawlh mawlh paha atih chuan chhan mai dan tur ka'n hriat miah loh chu!

"Police kuta kan dah chuan i hming alang tel dawn a nia."

"I chhuah rual khan hruaichhuak tel ve mai rawh, a hmel hmuh kha ka duh tawh lo a nimai," ka ti hmak a.

"Chu tak chu a buaithlak reng a ni, nakinah buaina i la tawk leh lovang tih tunge sawi thei?"

"Ka hre lo," ka ti chuai ta raih a, chuti maia tlâwm chi a ni lo Elias Sanchez hi, eng emaw tak kan tih chu a ngai dawn tih ka hrethiam mai.

''Ka hruai chhuak phawt anga, kan naute kutah ka lo dah dawn nia, nang erawh ka hmuh phâkah hlir awm ang che." Ti a ding chhuakin kawngkhar lam a pan a, "I kal nghal dawn em ni?" Ka tih chuan, "Ka kal mai loh te'n ka pa in a ni silova," a kiai zui suk a, leh kher kher chuan a țawngtam duah lo nâin a chhakchhuah ve chhun chu a ngeiawm ru ve tlat!

"Kal phawt mai teh," a bâk sawi mai tur ka hre tawh lo.

"Zanin dar sarihah ka lo lam ang che, nghah ngaiin awm lo la.." dimtêin kawngkhar a hawng a, a chhuak zui ta a.

Elias kha engtin nge a tih zui tâk tih hriat ka châk êm avangin tukverh bulah ka va bai phei auh auh a, curtain hlimin Apartment kawt lan theihna zawnah ka ding ta a, reiloteah an rawn lang ta ngei a, Mourizo a'n Lamborghini hnunga Elias a nawr lut lai chu ka thlir veng veng a, lainatna chhete mah ka nei lo chu mak ka inti viau! Ka boyfriend kumhlun kha a ni ve țhin asin le! Ka lo danglam takzet ta anih dawn hi.

Chumi hnu chuan khumah mu lehin Elias emaw Mourizo pawh ngaihtuah duh tawh lovin ka inlukhup thak a, muthilh tumin ka chhing ta vang vang a.

APARTMENTOS
Armada, Espanóla
Friday 2:00 Pm

Ka țhanharh ruala ka lu na fuk fuk chu ka hriat hmasak ber a ni. Ka lo muhil rei leh hle a ni ang sana in chawhnu dar hnih a kawk vuh tawh a, Roshima leh Manuel te hau hmasak phawt ka ngai. Khum chu muangchanga thawhsanin bathroom-ah ka intifai hmasa tê tê a, khatianga bum kual lek rual pawh anni tawh lo tih hrilh hriat hi ka tih ngei tur a ni.

Ka room chhuahsanin inhnuaiah ka chhuk a, ka ke pawh rin ai takin ka rap ngam tawh, vawiinah a tuamna phelh tur a ni tak alawm le. Tlailam dar li daihah clinic an hawng dawn chauhva hmanhmawh vak a țul hran lo bawk.

"Rosh," Chokaa ka luh rualin housekeeper ka au lawng lawng a, nizana thilthleng ang kha vawikhatmah thlen nawntir tawh loh ka duh.

"Bien, (Aw) Amel, eng nge ni ta?" Roshima rawn lut chu nelawm vak loh hian ka lo en a.

"Khawiah nge Manuel?"

"I bike a silfai a, ka ko dawn em ni ang?" Ți deuh dâka atih chuan ka bu nghat a, an pahnih hian ka hau zen zen ngai lo. Mahse, ka hmel ațangin ka lungawi lo tih a hrethiam a ni ngei ang.

An pahnih chuan dining chair-ah țhu turin ka hrilh a, "Engvanga Elias Chanchez thu zawm nge in nih, min râwn hmasa miah lova Apartment chhuahsan tur khan eng nge a hrilh che u." Ka thinrim hian ka âng ve buan buan ngai lova, mahse, ka âw a khauh far thung.

"Englo, Amel, nangma'n i ko niin a sawi a, ngaihdam dil che a tum thu a sawi bawk a," Roshima'n atih chuan ka țhen sak a.

"Chu chu in lo awih a maw?"

"Awih mai e, Elias vanga i natna te kha kan theihnghilh lova, i ko a nih si chuan tihbuai che u kan hlau alawm," tiin Manuel chuan a kut a nuai nawk nawk a, a zâm deuh apianga atih țhin dan a ni.

"Tun chinah ka phalna la hmasa lovin, tumah ka pindanah emaw, ka inchhungah an rawn lut tawh tur a ni lo. A chiang em?"

"Awle, Ma'am" anti rual țhawt a. Nasa deuhva hau tum kha ka nia, an inthiam lo hmel ka hmuhin ka țhulh leh ta zawk a.

"Tun bâk hi ka sawi tawh lovang, Aparment leh a chhehvelah hmelhriat loh emaw in hmu anih chuan min hrilh hmasa zel tawh ang che u." An bu ta nghat nghat a.

"Manuel, darli-ah ka ke tuamna phelh tur a ni a, BMW 325 kha lo buatsaih ang che, min hruai angai dawn bawk a, chumi hnuah hotel kan pan nghal ang, tunah i hna țan rawh le." Ka tih chuan bu nghauhvin car chahbi dahna lam a pan ta a, nelawm leh lutuk pawh hi a țhat lohna a awm fo zawk.

Roshima erawh ngawi rengin a lo țhu a, ka lungawi lo tih a hriat vang nge a hmel a hlim vak bik lo.

"Meriend(chawhnu lama ei chi, snacks chikhat) kha min lo chhawp sak la, Cena(dinner) eiin ka rawn haw lovang, hotel-ah ka tlang dawn," tiin ka ding hliai a, thupe țhang ka nih vang nge kan customer țhenkhatte hi chuan 'boss niawm reng i ni' min ti fo țhin.

Shower nei turin common bathroom-ah ka lut ta a, inhnuai leh inchung kar tawn chhen ka peih loh vang a nia, engkim ka mamawh tur a awm ve vek tho bawk.

Mourizo khan zanin dar sarihah min rawn lam a tum tih ka hria a, a ruala kal tumna ka nei lo, tunah ka insiam phawt anga Ricardo Clinic ka pan hmasak hnuah Aparment-ah kir tawh lovin hotel ka pan nghal daih dawn a ni, ka phone ken tumna ka nei der silova, a thinrim leh pek ang chu. Pawi eih nâng! Mafia lam nena inkungkaih te chu mumang chu sawi loh suangtuahnaah pawh ka dah chhin duh lo e a. Amah hrim hrim kha chu mipaah pawh 'Pa' tak a ni.

Mariend eia ka inhnawhpuar lai chuan Roshima ka bulah a ding ve reng a, hundangah pawh ka thil eilai min vil reng hi a chîng a, ka ngaithei vak lo.

"Hotel-ah i riak nghal dawn em?" tiin Salami pizza tuihnai zet min lo chhawp a, Cava wine, no khat pamin a rawn thli bawk a, ka duhzawng hi chu a hre hneh ve a nia Roshima nge nge.

"Riak maithei, ka phone ka keng dawn lova, hotel ațangin ka rawn hriattir ang che, Mr.Soreno min lo lam tura alo kal hlauh a nih chuan ka kalna chin i hrilh loh ngei ka beisei," wine chu ka tem zui hlak a, MJS Wine company siam chhuah ngat kan in deuh kher zel a, hotel leh Aparment-ah pawh stock eng emaw zat kan kan nei a ni.

"Amelia, Mr.Soreno hian venhim țul ati viau che a nia, i nu leh pa an awm silova bodyguard rawih i duh bawk silo, fimkhur hle ang che," Roshima sawi hi a dik reng. Mahse, zalen lo taka venhimna hnuaia awm hi ka duh loh zawng a ni tlat si a, a buaithlak a nih ber hi..

"Min ngaihtuah suh, hotel chhuahsanin khawiah mah kal ka tum lo a nia," ka ti liam puat a, thawhuai chungin a ngawi zui ve ta hrâm alawm!

Ka insiam peih meuh chuan darli a hnaikuar tawh a, Manuela'n Car (BMW 325 Mattle black) a peihfel tawh êm ang chu.

Toledo City
Dr.Ricardo Orego Clinic

"Miss Lopez, i ke chu rinai takin a dam chak," doctor nui var var chu ka nuih lét ve a, "Vawi engzat nge incheck up la ngai ang," tia ka zawh chuan ka ke chu a melh zauh a.

"Damdawi ka chawh che hi i ei zawh hnuah i rawn kal dawn nia, i dim deuh chu angai anga, zan mut dawn apiangin he damdawi hi hnawihin i tuam lum țhin ang," tiin cream bur lian angreng tak min pe a, a rimtui hmel phian.

"Ka lawm e, eng emaw a awm ta a nih leh, ka rawn be mai dawn che nia."

Dr.Ricardo nen coffee kan in leh tê tê a, min duhsak mai bâkah ka pa țhian țhatak a lo ni ve zel bawk nen chhuahsan mai kha a har ve tlat a. Sawitur a hre phian lehnghal nen ka naupanlai chanchin a sawilai phei chuan a nui huk huk a, ka lo nui ve tawp.

Damdawi eng emaw zat nen dar nga pelh hretah clinic chu ka chhuahsan ve thei țâwk a, Ka ke pawh rinai taka a dam chak avangin ka lawm viau, dam fel hmak lo mah se tuam khawng a ngai tawh lo hrim hrim pawh hi ka lawm tawk a ni. Nâ ka neih kha chuan ka chêt a khawr vek a, awmdan ka thiam lo.

Enchante Hotel
La Perla Luxury
Madrid 7:00Pm

"Perder Lopez( Miss Lopez) dar riatah chiah țan thei turin engkim ruahman a ni tawh." Ka secretary Olivia chuan paper min pe a.

"Awle, Franco ruahman anih te chuan a țha vek ang, chawlh ka la rei ta deuh nen zanin chu ka rawn inrawlh lo law law ange." Tiin, Olivia kal liam hnuah a paper min pek chu ka en zui zat a.

Zanin hian Carnegie hall-a zai ve American band te kha kan Enchante Hotel-ah hian an rawn zai dawn a ni. An front man Ariena Gonzalo ai kha chuan a țhianpa zai kha ka ngaithla châk fê zawk!

A hmel kha chiangkuangin ka hmu lo nâa, a âw thâm mawizet kha theihnghilh leh mai mai chi ni nghal lo chuan..

Hotel medium hall-ah concert tênau kan nei dawn chu a nia, a nuam ngawt ang, mimal zai leh beat box tih vel kan sawm ve țhin tho a, a band ang zawng a rawn zai hi chu an tam lem lo khawp mai.

Dawhkan pakhat kilin ka manager Franco nen kan țhu ve rân a, customer kan ngah vanglai a ni a, Enchante hotel chuan a lâr phah leh sawt ang maw le.

American Band tih tehtawp chu a ho ka ti viau! Mahse, ka ngaithla châk tho si. Franco chu remhria inti deuh tak hian a hawikual a, he pa tluka thluak țha hi an vang viauin ka ring a ni, kei tih lohvah chuan an zah ber bawk.

Thawm ri deuh niaih niaih a reh tâk dukah chuan dawhsan lam chu ka thlir ve ta a, kan țhutna ațang hi chuan a hmuhchian theih ta khawp mai le. Ka phone keng lo mahila cctv-ah alang vek dawn thova, hman zana a hmel ka hmuh loh pa kha chiang taka hmuh ka tum ruh ve êm..

Zai mai inpeih atin an ding tlar țhap a, panga anni. Ariena Gonzalo ala tel ta chuang lo fo a, a aia zai tur chu hman zana mi tho kha a ni tih ka hre mai; a hmel chiang takin ka la hmu thei lova, a chhan pawh a kun deuh tlat a, midang pawh anla rawn dâk chhuak chuang bik lo.

A pianphungah khi chuan tuemaw chu a ang chiang alawm! Mahse, ani chu a ni lovang!

Music arik rual chiahin an rawn hawi chhuak nghal țhap a. Dios! (Lalpa!) Ni lo, khi chu Mourizo Soreno a ni, khawi hmunah mah ka hai lovang! Eng nge a awmzia ni ta?

A sam sei angreng tak kha phiar tawh lovin a tukkhum lamah a khuih pial vek a, a bek sam kâwng pawh a langsar khawp mai. Tawnzau dum hâin Torn jeans dum dak hlarh a inbel bawk a, a boot bun leh a banrek scarf-a a tuam tlat danah khian amah a ni.

Khawvela hotel langsar leh lian zinga mi Enchante Hotel khera an lo zai hi mak ka ti reng a ni. Chawlh ka lâk lai khan eng appoinmet mah kan pe lo a, karhnih chiah ka chawlh chhungin engthil danglam nge thleng? Min hresa ang maiin Mourizo Soreno kha ka nunah alo lang a nih kha..

Eng nge thil awmzia hi nita? Mafia leh he band hian inzawmna an nei tihna em ni ang? Ka nu leh pa awm loh hlana buaina ka tawh zozai te kha..?

Soreno hi tu chiah nge maw anih le?

End of Chapter-3


©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:28 am

ENCHANTE LOVE SORENO
(Queires Casarte Conmigo)

Becky Rafa Renthlei

Chapter-4

ENCHANTE HOTEL
La Perla luxury
Spain.Madrid

Stage-a Mourizo zai lai chu ka thlir reng a, min rawn hmu ve ngei pawhin ka hria.

'Shadow of the life' tih hla asak laite chuan ka ngaithla tawh mang lo reng reng, Mourizo Soreno hi tuchiah nge a nih? Tih ringawt ka ngaihtuah a.

Kan hotel Enchante hi tihchhiat an tum a ni thei angem? Mafia boss a ni nge ni lo hriatchian a ngai dawn a ni. An zai pawh ngaihsak tawh lovin wine chu ka in sek a, Franco mitmei pawh ka veng hek lo.

Hall chhunga hlim thawm pawh chu ka bengkhawn eih lo. Nizanah khan chhuahpuiah min sawm a, tunah ka hotel ngeiah a rawn zai leh si. Ariena Gonzalo țhianpa chu a lo nirêng em? Â, ngaihtuah dan ber pawh ka hre lo, Mafia lam ala awm tel cheu nen ka thluak a buai vek!

"Miss Lopez, i in hnem deuh tawh lo maw?" Thawm bengchheng kha a lo reh duak tawh a, ka bula rawn ding chu tunge a nih ka hria. Mahse, biak châkna ka nei lo.

"Mr.Soreno, ka hmuh theiah rawn inlan tawh suh," ka âw chu a zawi hle a, ka wine in kha a thawk țan der a ni ang, ka ti deuh chiai alawm le! Jaja! Ruichhia ka ni hauh lova, rui anga lan der hi a pawimawh tlat.

"Sénor, Miss Lopez nen hian in inhria tih sawi miah suh," Franco makti aw chu ka hre ve thova, chhan tuma ka ân zuau lai chuan, "Kan inhria mai nilovin ka girlfriend a nia lawm, i hre har ber zawk a nih hmel," Maurizo thilsawi awihawm loh lutuk ka hriat chuan ka meng phâwk hrâ a.

"Lokal rawh le, darling.." a hmel en tuma ka dâk chhuak chiah chu ka hmuiah a rawn fawp ta a, a va'n zak lo tak! Engtin nge a ngam zawk le? Ka rui chhe viauah a ngai em maw ni? Ka tider tih hria se min fawp miah lovang.

"Alejarse de mi desaparece,( Min kalsan phawt mai teh,)" min fawhna athlah ruala ka țawng chhuah chuan a rüm nghut a, Franco hmela mak tihna lang ka hmuh chuan inthunun tumin ka thaw kâwk a. Awmzia a awm lem lo!

"Darling, miin min thlir țhup a nia," A sam hui zauh paha Mourizo țawng chu ka hre lo der hmiah a, dawhkan hnuai ațangin a malpuiah ka sik ta vak a, engtinmah zu awm duh lova, ngêng ve ngulh ngulh tak a ni.

"Ruih der kha i inhmeh lo a nia, Amelia, helaia mipaho mit lâk chiam hi a țulna a awm lo, pawngsual i duh te a nih ngawt loh chuan.." ka beng bulah a rawn ti sup a, ka hawikual nghal vat, tumahin min en pawh ka hre lo. Amah Mourizo hi nula hovin an thlir țhup zawk alawm le, Hah!

"Franco, ka pindanah ka kalsan phawt mai ang che." Tiin ka ding chhuak a, mit ka siai zauh chuan alo hrethiam ve mai.

"Awle, miss Lopez," ati thluam a, Mourizo chu kal pelin ka cabin lam panin confi zetin ka kal ta a.

"Darling, ka rawn zui ve nghal lo mai ang che, intur tlêm azawng kan lem ve hlek ange aw," tiin min la rawn au zui hrâm a, eng lemchan nge maw ni le? Jaja! Lemchan ka thiam ve chiang e, ani ai mahin ka thiam ang chu maw le.

Mourizo Soreno nihna dik tak hrechhuak tur hian detective ka mamawh lova, keimah ngeiin ka zawng chhuak tur a ni dawn lawm ni?

Mafia, Businessman, Detective lam nge misual vakvel satliah? A enga pawh chu lo nise ka mipa duh chi a la ni ve fan nia!

Ka cabin bika ka luh hnuah engthawl ber niawm fahran hian ka zai rât rât a, Mourizo ngaihzawn der dan tur ka ngaihtuah kual ta rauh rauh a.

Sangria whisky tak tâwkin ka inthlit deuh ngei a, ka in tak tak hmain Roshima, hotel-a ka riah tur thu ka hrilh hmasa leh tê tê a, ka nu leh pa nen nimina kan inbiak khan hotel-a buaina an la chingfel thei rih lo tih an la sawi fo mai a, Los Angeles-ah ka kal ngei a ngai dawn a nih hmel.

Medium hall lam ațanga thawm ri bengchheng zet ka hriat avang chuan ka mengphâwk hrâ a, nichin mai khan an sahâwk hlawm riau si a. En chian tumin ka va chhuak leh ta nge nge a.

Dawhkan chungah nula chhelo lutuk pakhat hi a lo lâm a, Mourizo leh a țhiante chuan an lo kil țaih hlawm a, helai hmun hi club nilovin ka hotel a ni. Mai mai chuan!

Mourizo tih loh chu an ruih hmel hlawm hle a, ring zet zetin an nui leh ta nghal a, manner hre lo lutuk! American ho hi an mizia ka hrethiam nek lo ve.

"Hey, darling, i lo chhuak leh si elaw!?" Ka lam pana Mourizo rawn kal chu rum eltiangin ka lo melh a.

"Tikhan min ko chai suh, Soreno," ka bula alo din rual chuan ka ti hlur a.

"Thinawrh, zanin chu hun nuam tak kan hman ngei angai ang, i nunna leh i zahawmna humhimtu hi min tihlawm i ba ve a nia," ka hmuiah a rawn tawk zauh va, a țawngkam hman hian thin a khei zar zel. Mahse, ka haider lui tlat a, a chhan pawh tunge a nih chiah ka hre duh miau va.

"Lokal la, pindan hauhsa i nei em? Nge, ka cabin min țâwm dawn?" Ka aw ti nêm luiin ka meng deuh sap a, actress ni mah suh ila, nula 'inno' deuh anga lan te chu ka thiam ve chiang em mai.

"Affairs neih chu i duh tihna em ni?" Mak ati tih hai rual a ni lo, rei ka bum thei angem chu ka hre lo ah..

"Tehreng mai, i sawi dan takah min chhanchhuah vang tal pawha i laka ka bat ve a ni," ka nui sâng a, a bu deuh nghut a, min rin loh hmel tawp!Chutiang teh thuta ka rilru ka thlâk chu makti pawh nise a awm ka ti tho mai.

"A țha e, zanin ațangin kan țan nghal thei a nih chu," a țhiante lam hawiin bân a phar zauhva, eng a sawi tumna nge tih hrethiam ve lo mahila anni chuan an hrethiam teh chêk ani ang chu dawhkana nula lâm chu an zinga pakhat chuan a pawmthla nawlh a, hotel an chhuahsan ta diak a, kan customer țhenkhat erawh intur dawmin an la țhu far a, Franco leh waiter eng emaw zat an awm bawk nen ka inrawlh ta lo.

"Hawh le, Amelia, i sawi angin i han țan dawn ang hmiang," ka inrin hmain min pawm nawlh a, a pindanah min pawm lut ta a, hnial ka tum chhin eih lo. Ka game khelh lai hi a pawimawh fia fia êm!

Hotel Enchante
Room 325

Kan hotel-a room changkang berah a lo innghat reng a maw! Apartment a nei reng si a, eng nge a awmzia ni leh ta pek?

Pangngai taka lan tumin khumah chuan ka țhu fel ât a, a thawmhnaw inbel a hlip lai chu en loh ka tum viau nâa a pian nalh tak chu hmuh kân a har ngei mai.

"Mouri, American i ni em?" Ngawih reng ka hreh avang chuan ka zawt ta ringawt a.

"I va hrethei ve, nang ang lo takin American ka ni e," min en chuang lem hlei lova, min chhandan kher kher hi a ngeiawm ve thei ngawt mai.

"Madrid-ah hian eng ti tura lokal nge i nih? Nge, i chêng ve reng zawk?"

"Ka chenna hmun chu a ni lo a lawm, kha i mitmeng mawi zet leh hnute nalh deuh khan min hip tlat a, Malaga-ah pawh ka lêt loh phah țhak a nia," tiin phone a ban nghal zat a, tunge a biak dawn tih pawh ka hre ve chuang lo; zâm ru zetin ka țhu hle hle a, ka nih loh dana lan hi ka thiam êm ang chu.

"Intur dawm dun phawt ang, ala hma a nia," tihpahin ka hnute zâwn a melh kher a, nuam lo ve tak a ni.

"Bien(Awle)"

"Ka hriat reng danah chuan maw, hnute bial nalh zet, kawhlah leh a hmur senno chek..."

"Thildang kan sawi thei angem le?" A sawi zawh hma hmaa ka lo țawng chuan a nui suk a.

"Tehreng mai, affairs awmzia hre tur khawpa puitling i ni tawh a, nawr hmanhmawh che erawh ka tum lo, infawh ațangin bul kan țan deuh kher dawn em ni?"

Chhan ngaihna pawh ka hre lo ve a, zep țhen hni hne chu a tum lo ve khawp mai!

"Wine ka chahsak che a nia," hotel tirhkah a lo lan rualin Mouri chuan a tihzawm zat a, ka tân ruih a thiang lo, tun dinhmunah hi chuan amah zawk hi rui viau se thil a awlsam ting a nimai.

Hotel tirhkah ka ti ngawta, ama mimal tirhchhiah zawk a ni ngei ang, hotel-a kan chhawr lai a ni lo. Chu pa chuan min melh tawn zak zak hnuah Mourizo chu thü zawkah angai tih hriat reng hian a bu ta nghat nghat a. A wine rawn dah chu Celeste tho a ni! (Celeste wine hi North America huam chhunga wine changkang ber pawl a ni)

"I duhzâwng a nih ve ngei ka beisei," Mouri aw thawp sat ka hriat chuan tirhkah pa chu ka hawisawn san ve chauhva, Mafia boss a nih ka ring nghet tulh tulh.

Misual rual intelkhawm laka inhnamhnawih hi ka tihtur a ni chiah em? Țhuih hruai angah hmel nasa si a, ka kawp phak chi pawh a ni lo, min ching darh vek ang tih pawh ka hlau hlel lo ve.

"Amelia, i thluak tetaktê-ah khan thil nilo lo ngaihtuah suh, misual hmuhin min hmu reng reng em ni?" Intur min pek paha atih chuan ka hawi buai nak a, ka ngaihtuahna thlengin zuk hre thei a!

"Que? (Maw?)"

"Ka sam ka zuah vang hian misual ka ni tihna a ni lova, ka zuah reng dawn tihna lah a ni hek lo, wine kha in la keimah chauh min ngaihtuah rawh." A boot bun a hlip mawlh mawlh a, a ke țhiah fai zet rawn lang chu zahzelah ka en teh ngawt a, ka lai ru deuh em mawni!?

"I sam kha i zuahna a rei tawh em?"

"I tân țangkaina a awm lo em mai, thu ho tê tê min zawt lo khan wine kha in rawh." A ti hmuk a.

"A nih leh Mafia pawlah i tel tihna em ni?" Ka sawi zawh rual rualin rum lutuk hian min rawn melh a, "Enteh, zawhna min zawh reng hian awmzia a nei lo a nia, kan affairs hian mimal nun inhai sak tih vel kha a huam lo." Whisky a tlâk pawp a, luhlul chhuaha zawhzui zel chi pawh ni nghal lo chuan a hlauhawm em mai!

"Ka zawt malêk ang che," ti hmakin wine chu ka lem khalh a, "Whisky kha ka lo in zawk teh ang," khum ațanga tho chhuakin a bulah ka va ding a, whisky min thlitsak theih nan ka no chu ka dawh dâ a, min ei loh hmel zeta a sam chu tuai puatin, "I tih a tam ngei mai, i ke kha na leh se i tan a țha zawk dawn a nih hi."

"Rilru chhe lutuk put hi a hrisel lo a nia," tiin whisky bottle chu ka inlâk a, glass no khat piauva thliin amah ka melh deuh kher a, a ner nûng danah țúl a ti vak lo a ni ngei ang. Mahse, min hnial miah lo thung.

"Mipat hmeichhiatna hman dawn a ruih kher hi a nêp thlâk i ti ve deuh lo maw?" Sofa-ah țhu-in a bawp lehlam a khup chungah a hlâng deuh lah a, a landan hrim hrimah pawh hian a sual hmel ka ti lo thei lo.

"Jaja! Zanin vut vutah min mutpui i tum em ni?"

"Tum chiang e.."

"Cuál él significado?(Eng nge i sawi awmzia?" Spanish țawng a thiam nge thiam lo tih hriat ka duh vangin ka zawt lui kher a.

"Sorry, english-a i sawi loh chuan ka man meuh lo." Inngaihtuah mûk hmel zeta atih chuan ka chhungril a hlim veng veng, amah vanga eng emaw harsatna ka lo tawk thut a nih pawhin țawng dangin midang țanpuina ka dil thei dawn a, a zia viau dawn e. Ka la ring ngam lo bur.

"Zanin chuan kan mudun thei lovang, Mouri.."

"Engvangin i rilru i sawhsawn leh tihna em ni?" Dam thluama min chhan chuan ka lu ka thing nâ nâ a, "Ka thlatin hunbi neih lai a nih vang mawle." Ka ti zawi sap a.

"Yeah, a țha vek e, hundang ala tam alawm lungngai suh, lokal la mu hahdam ang le, i ke a dam tawh bawk a, naktukah Madrid hi min fanpui la ka duh a nia," a țhutna ațanga tho chhuakin min duat hle niawm tak hian min rawn kuah a, ka hnial bik lo, zanin chu ka him turah ngai ang.

Chumi hnu chuan zak miah lo niawm takin a bulah ka inthawlh ve ta kâk a, min khawih emaw pawh a tum chuang lo.

"Buenas noches, (Good night)" tiin ka inlet thak a, min chhang duh lo nge ka sawi a hrethiam lo zawk? A ngawi ngul nia!

A bân sei thlurh chuan ka kawngah a rawn kuah a, ka țang ru nghal țeuh thung! Min hriatchhuah hlau lutukin ka thaw țha ngam lo vel. A chhan chu ka 'Period' lo miau a, min tilui tlat ang tih ka hlauh nâk laia! Ka whisky in kha a thawk țan deuh a ni ang ka lu vir miai miai chuan ka mut ati chhuak ta deuh tlat a, Mourizo min kuahna pawh ngai pawimawh duh lovin ka maimitchhing ta a.

"Amelia," min ko ri chu hla tak ațanga lo chhuak nimai awm hian ka hre vuai vuai a, phelh phanga meng chhuakin ka awmna hmun chu ka hre lo dâwn dâwn a, chutah Mourizo, insiam peih ap a lo ding ka hmuh chuan rang lutukin ka țhu chhuak nghal vat a; a sahbawn hman rim niawm tak chu ka hîp lut vang vang mai.

"A ngaihna hi chu i awm lo ve mawle, vawi eng zat nge ka koh che pawh ka chhiar seng lo, muthilhna damdawi i ei chu a ni êm lo maw!?" A velvet kekawr hâk ipte a zen thûn a, a landan chu leh..! A khabe hmul leh a bek thla vel mumal zeta a zuah chu a langsar hle a, zaithiam hmel pawh a pu lo.

"Thawh veleh a min lecture nghal thei turin kan blood group (Grupo sanguíneo) a inmil em ni?" Tiin ka boxer tlâng chu ka pawt mar a.

"A inmil turah ngai rawh, tho la insiam rang mai teh, khatianga rei i mu a nih chuan i taksa kha e, Australian vawkpui ang maia thau ala ni thuai ang."

Tawnzau hringduk ha-in velvet kekawr dum a ha a, a pheikhawk bun chu moccasin( Red Indianho pheikhawk) te pawh a ang dawn dawn alawm! A inchei duhdan hi khawi country in nge uar le! Haji!

"Ka chênnaah ka haw ve phawt ang chu, ka thawmhnaw thlâk ve te pawh ka duh a.."

"Chulamah buai angai lo, i hâktur peihfel a ni tawh a, bathroom-ah lutin i taksa whisky rim nam huam kha va tlengfai rawh." Tiin min pawt tho zui zat a, ka'n melh rum ngial pawhin a sawt lo. Ka hmel a en tlat lova.

Chumi hnu chuan bathroom lam panin min nawr lut a ni hrim mai! Dawhtheihna atlachham viau anih hmel! Ka'n bum leh hlek teh ang.

"Hey, Pads pawh ka nei lo a nia, rawn ngaihtuah law law rawh," tiin ka au lang lang a.

"I under ware kha hnawh mai rawh," tiin a nui ta chiam a, bathroom kawngkhar bulah alo ding reng niin! Min vil deuh reuh em mawni!

"Eres muy feó (I hmelchhia a nih chu)" Tihpahin shower ka on nghal a, ka hotel a ni a, ka ta a ni tih a hre lo a ni ngei ang, hre lo daih rawh se.

Min chhânna ka hre zui tawh lova, muang lutuk tak maiin ka inbual ta tehreng a nih kha, a run tawk a tling leh pek ang chu. Mourizo kid ten pads an lei tur anga ka mitthla chuan ka nui ta hak hak a, an inla 'Pa' hlawm ropui si, an Jefe(boss) hi e, ka zûnah a uai țan tih ka'n hmuhtir ange..

Pindana ka luh leh chuan amah hmuhtur alo awm tawh lo teh khiah a, Pads leitir turin han kal hlauh mai se, ka nui nasa ang chu ani erawh a nuih a za lo viau ang.

Dawhkan chunga thawmhnaw inpack thlap ka hmuh chuan rang fe-in ka hawng nghal a, maktiin ka meng phawk hra mai! Mourizo an nichina a inbel ang chiah thawmhnaw kha hmeichhe hâk alo awm thlap nia mawle! Tawnzau hring duk chu ka pharh nghal a, ka size thlap. Chutiang zelin velvet kekawr dum, kawnghen leh moccasin niawm tak pawh kha a hring tho alo awm tel a, bikers ho thawmhnaw te pawh a ang rum rum mai.

Phur lutukin ka inbel nghal a, ka taksa rem vek a ni, mak takin kei aia inhmeh hi an awm ka ring bik lo. Kawr bânbul mah nise ka duh ta riau, hetiang thawmhnaw hi ka la inbel ngai miah lova, kamis dum leh a hringa țial body fit han ha ngei i la..

"I nuih khan i hmel landan a zia viau a nia, chin tam chi.." Mourizo chu rawn pen lutin ngunthlûk fahran hian ka chhip ațanga ka keler thlengin a en chhuak dap a. A kiai suk suk nia!

"Por que?(Eng maw?)" Tihpahin pheikhawk chu ka inthawlh nghal mawlh mawlh a, "I thawmhnaw hâk tur kha kan buaipui rei ta deuh a ni, chuan kha le.." Tiin khumah pads dozen khat lai a rawn theh thla a.

"Tu lei nge?"

"Vanduaihlak takin keiman ka lei lo hlauh! Pathian hnenah lawmthu awm rawh se." Ti a khumah țhuin a khabe a tuai zui nauh nauh a.

"Ka lawm e, min ngaihsakna avangin, chuan ka sam chungchangah sawi duh te i nei em? I tih ang khan ka phiar ve kher dawn em ni?" Ka nui sâng a, min kaih hruai a tum dan hi a nuam ru dawn riau! Ka'n inla Mafia țan ve nghal ringawt a...

"Hetah samkhuih nen khan lokal teh.." Khumah ala țhu renga khawdang hawi lêk lovin min en reng bawk. Mahse, nuam ka ti ta phian a, ka confi sawt!

Samkhuih nen a bula ka va kal chuan carpet dup zet chungah chuan min nem țhuin min kapkalak nghal a, engtia min tih nge a tum ka zawt hran lova ka dawh mawl ve tawp.

"Min ngaisangtute zingah i tel ve chiah em?" A nui ri chu ngaihthlak a nuam angreng.

"Ka tel ve chiah em ka hrelo nâa, tel ve erawh ka châk.." no farana ka tih chuan ka hair clip chu phelhin ka sam sei angreng tak chu a khuih ta a, chutah rang zet zet hian phiar zui nghalin kâr lo-ah a phiar zo nghal vek! Hnehsawh tak a ni.

"I bike kan hmang dawn nge car ken i duh?" Min care tâk riau chhan hi hrethiam chiah lo mahila ka duhzawng tak a va ni si êm!

"Bike keng ila a nuam zawkin ka ring," ka ti țha ve mai a, a bûk nghut rualin min kaitho ve nghal a, a mamawh tur a lâkkhawm zawh chuan thawmhnaw inang, sam inang pu-in hotel room chu kan chhuahsan ta a, ka hnathawkten engtin tak minti ang maw!?

Hotel lobby-ah ka ding rân a, kan hnathawk te an la rawn kal kim chiah lo bawk nen ka vannei ta phian! Min hmu tur awm ang chu counter nghaktu a ni mai, chu lah chuan makti zetin min thlir hau a, ka mitmeiin min hre lo der turin kan siai zauh a, a hrethiam ve êm ang chu, min kaihthawh lai khan a tlai viau tawh emaw ka tia. Teuh lo, zing darkua chauh a la ni.

Mourizo, Lamborghini hring hotel garage ațanga rawn tawlh chhuak chu ka thlir dauh dauh a, a faiin chuan a châkawm hliah hliah. A neitupa ang maia fit hmel khawpa tharlâm a ni bawk.

"C'mon, Amelia, i kâah rannung a lo thlawh luh hmain i tlanchhuak teh ang," Mourizo chuan ka bânah kaiin a car awmna lam min panpui a, a driver pawh chu rawn chhuakin zah takin chibai min bûk vat, a boss girlfriend-ah min ngai deuh nge a nui tak ang vur vur a, hetiang nun han temchhin ve pawh hi a châkawm alawm..

Ka bialpa kumhlunah ka pawm ta tihna phei chu a ni lo. Mahse, amahah hian ka duhthusam mipa zia a kim thlup. A sam hi han mêt kawng ta ang se, hah! ka ngaihtuah thui duh lo ve a.

Ka chênna Apartmentos lam panin car chu a khalh par par a, vawiin hian khawi hmunah nge min hruai dawn tih pawh ka la zawt ta chuang lo. Thuawih ber ang hrimin a thusawi apiang ka zawm duan duan a,'Amelia țang nasa rawh' tiin ka infuih ru sauh sauh bawk. A nihna diktak hrechhuak tur hian engchen nge kal ka inhuam tih chu hunin ala hril ang chu, ka khi var var reng mai.

"Lawm lohva nui chu mi â tihna an tia mi kha?" Kawng lam en ngur chunga min biak chuan ka nui tawp chat a.

"Mi â te âtchilh leh chhawngtu i ni tihna a ni mai alawm," amah melh zawk paha ka tih chuan a nui suk suk a, "I hnar hnuaia kha i hmui sexy zet kha i hmang thiam mah mah lo maw Amel!?"

"Hmangthiam ve bawk ang chu, nangpaw'n i hmang thiam alawm," ka ti ve nghal zat a, "Mipaah piang la i inrem zawkin ka ring, i nungchang hi khawi ațanga i zir chhuah nge ni ang aw..!" A ti leh sup a.

"Ka pa in ațang lovin khawi ațangin nge nise i tih, min iai leh deuh tihna em ni?" Pawisawi hlau ber niawm takin ka'n țawng vel a. A man lo nasa..

"I chanchin tlem han sawi teh, eng nge i thawh țhin?" Ti a min zawh chuan ka rin loh lam daih anih vangin ka ngawi ta rauh rauh a. Ka chanchin a hriat vek a ngaihna ka hre lo ve a.

"Chhungte i nei em? An zaithiam ve vek em ni?" Ka tih chuan za lutukin a nui ta a, "Yeah..ha! Zaithiam ka ni tih ka lo intheihnghilh chu le.." a sawi zawng pawh chuan ala nui reng a, a hmel landan a dang vek.

"Eng nge nuih tur awm?"

"Mafia ka ni lova, zaia eizawng ka ni hek lo, tlangval awmțha duh lo te anga sam zuah satliah ka ni bawk lova, keimah Mourizo ka ni. I chenna hmun, in ram hi lei ngai ta thut se, chutiang lei thei tur khawpa hausa chu ka ni bawk." A tih rual chuan a thle deuh buk a, chapo vanga sawi nilovin thil nihphung sawi lang satliah a ang mah zawk.

"Chuti maw! A ropui hle mai," tihbâk sawi belh tur ka'n hriat miah lo chu le! Eng ang mi nge i nih? Ti a zawh nghal rum rum ka duh rualin hre châk deuh anga lan ka duh chiah silova ka ngawi ta zawk a.

Ka chênna hmun kan thlen chuan inchhungah amah pawh nghak lovin ka lut tlang nghal a, min zui tum awm pawhin a lang lo, vawiin chauh atan hun hman ka tum vangin hotel-a ka hna chu ka kalsan leh rih phawt mai ang.

"Listó ya desayuno? (Breakfast i ei tawh em?" Roshima'n min lo zawh chuan lu thingpahin, "Nó estoy hambriento( Ka ril ațam lova)" tiin ka pindan ka pan nghal nal nal a, ka inthuam dan kha makti hmel a pu!

Ka mamawh tur ka lakhawm zung zung a, ka card pawh ka keng tel thlap a, bazarah min hruai tak mialin a sum rinpui ka duh der lo.

Living room ka thlen thlâkin Mourizo chuan kan chhungkaw thlalâk intâr chu a lo thlir vung vung a, ka thawm hriaa rawn hawi chhuakin, "Tlem tal thil ei rawh ka lo nghak ang che," a ti sup a.

"Ka ril ațam lo alawm, kan kalna tur hmunah eitur a awm ve dawn lawm ni?"

"Awm ang mahse, tunah ei rawh ka ti a nih chu," khauh far leh hnial chi miah lova tiin choka lam a melh zauh a, hnial ka tum ûk a, ka țhulh leh ta zawk a, chocolate milk leh crab cakes ka hmawm tawn tawn a, Roshima'n zawhna khirh deuh deuh min zawh hmaa kal thuai ka duh vangin ka ei hmanhmawh viau a ni.

"Lopez, țhu la hmanhmawh lovin ei rawh." Maurizo aw chu(h)! Min lo zui zel chu niin! Ka ka khat veka ka hmuam avangin ka țawng lawk thei lova ka helh áwl áwl mai.

"I kum ang zatin awm la, hmanhmawh rûaina chhan tur a awm lo, muangchangin ei la, khak reng ngai bawk suh," ati nghut nghut a, a kid emaw minti emawni, ve lutuk a!

"Min khak lo la a nimai alawm, i farnu pawh ka ni lo." Ka thil ei ka lem rual rualin ka chhang vat a.

"Ka farnu chu ni la, dar riat khan breakfast ka rualin i ei tawh ang, țawng țawng lo khan ei la itân a țha a ni mai."

"Orgullosamente(Chapo leh lutuk)" ka ti sap a.

"In țawng kha ka bulah han hmang leh vaih teh, eng nge i chunga thleng tur i hre mai ang," ati chhar chhar a, ka ngawi zui hmak. Chuti maiin ka sawi lo thei bik hleinem kan țawng a ni miau alawm, sual lutuk! Misual hmelțha, hah!

"Helmet engzat nge i neih?" A thil min zawh teh daih chu!

"Pakhat bak ka mamawh lova, pakhat chauh ka nei," ka tih chuan a tûm nghal hmuk.

"I ei zawh tawh chuan chahbi la la, kal ang, ka car hi hetah lo awm mai rawh se," ti a tho vutin choka chu a chhuahsan ta nulh a.

Minute nga hnuah ka bike(Ducati panigale 1199) chuan kan inphur chhuak ve ta a, a khalh thiam dan chu turu tak a ni. Bikers dik tak a ni mai! Min tluk ve țêp, car aia bike ngaina kha ka ni tlat a, college ka kal lai pawhin racing-ah lawmman pakhatna ka dawng ve ngial tawh.

"I ke veilam kha hmang țangkai la, kawngsir veilam zelah khan tlan rawh a him bik," a hnung ațang chuan ka lo ti zawt zawt a, min chhang chuang lem hlei lova.

A speed a tihsan apiang chuan ka lo țang ve em em zel a, "Inti khalh thiam ve siah!" Tihpaha a mal ka hmer zauh chuan, "Nang ai chuan ka thiam tih ka hria alawm," a rawn ti nghut a, ka nui hak! Chona hnar harsa titak mipa a nih ngei hi..

"Kan la intlansiak dawn em ni ang?"

"Min hneh ngai lovang," tiin Shopping mall lianzet kawtah chuan a ding ta dat a, bike chu hûng țhain kan chhuk ta a.


Madrid Xanada
Shopping Mall
Calle Puerto dé

"Helai hmunah hian eng nge kan tih dawn?" Tiin dawr lam chu ka melh a.

"Thil eng emaw lei ka duh deuh a,"

"Eng?"

Mourizo chuan min en reng a, chutah ka bânah kaiin Mall chhungah chuan min luhpui ta a.

Dawr nghaktu kan hmuh hmasak ber chuan kan vestido(dress) chu a en uluk kher mai. Kan sâng dun si a, mipa leh hmeichhia kan ni hi kan danglamna chu a ni mai. Makti awm rêng pawh a ni.

Kamis zawrhna dawr bikah chuan min luhpuiin, "I duh duh thlang rawh le, kha i thluak bura awm kha ka hria a nia," Kamis inkhai tlar dul chu a en zui nghal daih a, ama ta tur a thlang te pawh a ni mahna!

Kamis hring duk a duma țial ngei mai ka hmuh chuan ka thlang ta chat a, ka thil ken chu Mouri chuan rawn melh zukin, "Ha nghal mai rawh nî a sa angreng viau a nia," ati liam puat a, ama hâk tur pawh ka thlansak ve ta law law kha a nia.

Chulai bazar vel fan chu atih deuh tlat avangin inkai rialin kan kal dun zel a. Pawna eitur leh intur zawrhna dawr kan thlen chuan intur min chah sak ve a; intur nghâka kan țhut lai chuan kan inbe lem lo, Mouri hmel thim mák chu a pa hluah hluah a kan hriat leh pek chu! Ka hmu zing tulh tulh a, țha ka ti tawlh tawlh! Kei hian a der mai nilovin ka lo duh a ni thei mai angem!?

Chawhnu pum chu kan ti ti dunin kan infiam a, poker khelhnaah te min hruaiin min zirtir pah zel bawk. Engkim a thiam emaw tih mai tur a ni a. Tisa thil takin kan inhîp tawn țan der tihna em ni le!? Kan țawngkam leh mitmengah kan inhaisak lo ve ve bawk.

Air Pistol kah zirna hmun ațang chuan inkai rial leh hahdam zetin kan insi ral ral a, mi mit kan chunga fu deuh țhup chu engah mah kan ngai lo. Mafia pawl tih leh zaithiam tih vel chuan ka nunah hmun a chang ta hauh lo, amah Mourizo Soreno a nihna chauh hi vawiina ka hriat chhun chu a nimai, a nihna hriatchhuah tum lam ai chuan amah hi rintlak mipa angin a khawsa zawk a ni. Chu chuan min hneh ru riau!

A landan ang ngawt hi a lo nilo te pawh a ni mahna, mahse, hriatchian tluk a awm lo ve.

Chutah Mourizo taksa chu a danglam ta thut a, a ruh țalh țalhin a hmel pawh chu a phiar ta nghal țeuh mai a, ka kut a hûmna pawh a țang mar nghal at bawk! Țawngkam chhe fahran, ka la hriat ngai pawh ni lo chu a phuh chhuak sup a, Rang zeta inherin kei pawh min kuai her tel nawk a; engvanga chutia awm ta thut chu nge a nih ka hre bik lo.

Ami hmuh pa chu lian zet American lam mi niawm tak hi a ni a, a khabe hmul pawh a zuah sei khawp mai. Chupa nghawngah chuan eng emawni hi a uaithla zuar a, kan dinna a hlat deuh avangin eng nge a nih erawh ka hre chiah lo, Spanish inchei chuan a inchei miah lo thung!

"Tlán ang," tihpahin Mouri chuan ka bânah a man lawk a, min tlanpui ta chiam a, kawngkual zet lam panin kawtthler chu kan kan tan tlang zel a, kan bike hûnna lam kan pan pawhin ka hre tawh lo.

"Mouri, engthilnge..!"

"Helai hmun ațang hian kalbo thuai thuai teh ang," a lo ti bung nghat mai a.

Kan bike dahna kan thlen chuan helmet chu a khum nghal chawt chawt a, "Le, rangtakin aw.." tiin min tur ut ut mai! Keilah angaihna hre lovin ka lo hawi hau thung.

Chutihlai tak chuan kha pa kha a țhiante nen an rawn thleng chawpchilh ve nghal a, "Mr.Evans, zawn hmuh i har hle mai," a rawn ti ta a.

Eng nge an sawi awmzia hi!? Evans chu tunge?

"Êl Sênor (Pu-a) min hai a ni ang, hetah Mr.Evans an awm lo," tiin ka lo inrawlh vat a.

"Nangkha tunge i nih, hmeichhia, i lo inrawlh ve angai lo ang," a ti chhur chhur a. Mourizo erawh helmet full face a khum diam tawh a, a sam phiar bâk a lang tawh lo.

"Min hai a ni ngei ang, lokal rawh le duhtak, kan tlai lutuk ange," tiin ka darah a rawn kuah a, chu pa hmela thinrimna rawn lang chu ka hmuh hmaih bik lo.

"Mr.Evans, ka chhuah dawn miah lo che," tihpahin chu pa chuan ka ke lamah a thai zauhva ka lo inring lo nen Mourizo ka ngheng nghal rawk rawk a, min lo dawm ding vat thung.

"Evans nilovin Soreno ka ni," a aw chu hruihrual hlap ri ang maiin a fiak țhak a, a hnungah dingin ka lo bih ve dâk dâk a, buaina liantham kan hmachhawn leh ngei dawn e..

"Soreno..!" Tih nawn sup pahin chu pa chu a nui uar uar a, a mit lehlam chu a țhalo deuh nge a chhing suk bawk.

"Nula, i bialpa hi kan khawih sil hunah chuan i duh tawh hauhvin ka ring lo, inthiarfihlim rang rawh." Ti a a kut chu vai fuain Mouri chu a bu lawp a, Dios! Ka duh thei lo, ka chet chhuah ve ngei a ngai dawn a nih hi. Mipa pathumin, pahnih min beihrawn dawn tihna a nia..! 'Lalpa min pui hrâm rawh' tiin ka phun sap a.

"Amel, bike-ah lawn la tlanchhuak rawh," Mourizo aw thâm țuak chu a zawi hle mai. Mahse, ala che chhuak chuang miah lo!

"Teuh lo, nangmahin ka hnutchhiah dawn lo che," ka ti ve tlat a, thih angai a nih pawhin kan thi dun mai a ni ang chu..

"Quén ares tú?(Tute nge in nih?)" Chu pa lam hawia ka tih chuan min chhang lovin a meng rum ûl a, a hmel te reng reng hi 'world tobacco center' a thawk niawm a ni. A ve lutuk a!

An zinga a tê ber chu rawn che chhuakin Mourizo chu a rawn bitum ta a, ani pawhin tlansan chi anni lo tih a hrethiam ani chêk ang, a helmet khum chu hlipin chu pa chu a vawm ta a, a thle sawk thei nia!

Chulai remchang chu chuhin," Amel, bike-ah lawn rawh," ati tuarh a, î he lovin ka lawn ve ta nghal vat, an boss ber chuan Mouri beka hnek tumin a rawn vai leh fua a, alo bum zauh thung. Mourizo zuang zawk ka hmuh rualin chu pa chu a let tawp a, a va'n kick nalh ve le!

Chumi hnuah bike-ah rawn lawnin, "Tlan rawh le, hnunglam hawi suh," a tih rual chuan ka tlanchhuak ve ta chiah a, chumiteho thinrim hmel chu side glass ațangin ka en hrâm. Kan lan theih chhung chu min thlir a ni hrim mai! Soreno, Evans! Eng nge thil awmzia ka hre hrep lo ve. Kan ni hman ve dan chu leh..

Restaurant pakhat kawta kan tlan lai chuan, "Ding lawk teh, inhnawh puar ve lawk ila.." a rawn ti teh daih a, ka ding ve mai bawk.

'Taberna Él sur' (Restaurant) chhunga mite chuan min en duh leh pek hle a, a bik takin Mourizo chu nula hovin an en uluk zual, dawhkan pakhat inhmatawnin kan kil ve ta rân a, nichina kan thil tawn kha ka zawt ngei tur a ni.

"Engvanga khatianga tlanchhia nge kan nih ka hre duh a nia," zawi sapa ka zawh chuan a sam phiar chu hnunglamah a hui puat a, a biang duk deuh raih chu ka hmu ve chauh, an lo hnek hman hram a nih ka ring.

"I hriat mi an ni lova, ka hriat zawng lah anni hek lo." A ti nghat a.

"Tu laka tlanchhia nge i nih, tumah an nilo tih sawi chu tum duh ting tang lovang che."

"Thinurin âng bawrh bawrh rawh, a awm reng," a kiai zui suk a.

"Thinrim tur ka ni em ni?"

"I thinrim khan i hmelțha ve thung alawm, min chhan i inhuam hlein ka hria nichin kha chuan.." za zetin a nui ta a, ka ngei angreng!

"Tlêma tlemah kebáiah ka chhuak leh țep a nih kha," tiin ka nui ve ta sak a.

"I nui khât ve hle mai, he khawvel hi i tan a nuam thlawt lo em ni? I inkharkhip tlat nachhan hi.."

"Eng mah chutiang a awm lo," a sawi zawh hma hmain ka lo chhan khalh zung zung a.

Kan eitur chah a lo thlen tâkah chuan ngawirengin kan eidun mial mial a, a nungchang mak deuh hi ka ngaina țan dawn tlat! Mahse, ka pawiti chuang lo, affairs pawh nei ila, ka tân eng nge pawi? Ka hmangaih kher dawn tihna a ni chuang lova, ani pawh hian min duh tih ka hria, a mitmengin thil tam tak a sawi ve tho a ni.

Buaina kan tawh zeuh pawh kha theihnghilh zuiin hlim takin ka chênna hmun panin kan tlan chhuak leh ta a, Mourizo chuan bike pawh khalh a tum tawh chuang lo, keiman ka khalh tluan ta parh a, ka hnungah lungawi awm zetin a țhu ve mai.

"I helmet kan hawn ta silova a thar ka leisak dawn che nia," Apartment kawtah kan ding a, "A ngai kher chuang lova, remchangah ka lei ve thei alawm," tiin garage-a bike a nawrlut lai chu ka thlir a, a pianzia hrim hrim hi hmeichhe duh zawng chi a ni.

"Ka rawn lut tawh lo mai ang, zanin dar sarihah ka rawn lam ang che, lo inpeih la club-ah ka hruai dawn che nia, thawmhnaw sexy zet inbel tur i neih chuan.." tihpahin ka hmui a rawn tawk zauhva. A nui duh miah lo.

"Zaninah kan affairs kha a tak ram thlen ngei ka tum tih i lo hre lâwk dawn nia," inringtawk zeta tiin a bân a vai thuak a.

"Mahse, ka thei rih lo tih i hriat ve tho kha. ..!"

"Amelia Lopez, min bum theih i inring em ni? I thlatin hunbi i nei hauh lo, nizana tuitaka i muhilh bawrh bawrh lai khan ka lo hre diam tawh, i mut laiin i mangchhe viau a nia!" Ti-el aw taka tiin min nuihzat hmel hle lehnghal!

"Dâwt i sawi?"

"Eng dâwt mah ka sawi lo, tunah a finfiahna i duh kher em?" Tihpaha alamah min hnuk hnaiin ka hmuiah a fawp ta vang vang a, a kut veilamin ka hmeichhiatna chu a rawn chûl thuak a, min fawhna a thlah hmak bawk.

"Tikha chuan ka sawi awmzia i hriat ka ring," ti a inherin a kiai leh suk a, a car pana a kal lai chuan vawikhat rawn hawi lêtin, "Zaninah tuna mi bâk zawng kha ka chhunzawm ang," Lamborghini chhungah chuan țhu lutin vawikhat pawh min rawn en tawh lovin a tlan chhuak zui ta a.

Ka bum tumna pakhat chu a hrechhuak ta, eng chhuanlam nge ka siam leh tâk ang.

A sawi ang chiah khan zanin hian ka taksá neih ngei a tum dawn a, ka lo inveng thei angem?

Ka bum emaw ti a ka lo hlim ve tehreng nen keimah zawk min bum let der a ni. Mourizo mutpui turin ka rilru hi a inpeih chiah em ka hre lo, ka mipa duh tân hian ka taksa ka hlân mai dawn em ni!

A hun lo thleng phawt teh se....

End of Chapter-4

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:28 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-5

APARTMENT, BA181
Malaga Madrid
Mourizo Jm Evans

Ka boot bun lai ka hlih mawlh mawlh lai chuan ka driver Mateo Ignacio chu ka pindanah a rawn dâk a.

"Jefe(Boss) kha hmeichhia kha i tân a hlauhawm mai thei, mix martial arts a thiam a, Enchante hotel neitu saw a ni bawk." Mateo țawng zawi sup chuan ka thluak a tivir zawk a.

"Eng maw? Amelia Lopez hi Enchante hotel neitu a ni a maw!?"

Thil mak tawp a ni. "Chuti a nih chuan ka ruahman ang khan lokal zui rawh u, keiman Amelia chu ka lo buaipui ang." Mateo chu pindan chhungah rawn lutin a vei thauh thauh a. Los Angeles ațanga helai thleng thleng ka kalna chhan ber hi Amelia Lopez lo ni reng in!

"Mateo, zanin dar sarihah mipahnih tan dawhkan lo hauh ang che chuan min chhuahsan thei ang," tiin bathroom lam panin ka kalsan zui ta a.

Enchante Hotel ropui leh hmingthang hi he hmeichhe tâ hi maw lo ni! Chuti anih chuan hmanni a tawhsual a tawh chungchânga ka va biak kha Felipe Lopez, kan company-a wine man eng emaw zat leibâ neitu kha lo ni rengin, fanu a nei tih pawh a sawi lang ngai lova, nge? Ka lakah a thup zawk.

Kei hi Mourizo Jerome Evans ka ni a, MJS Wine company neitu ka ni. Ka pa Juan Evans hi American niin ka nu erawh Spanish a ni thung a. California-ah chuan Jerome Evans ti a hriat lar ka ni a, Spain-a ka company en fiah tura lokal ka ni.

Ka hming leh nihna dik tak an hriat chuan tute nge ka Estates-a grape rah leh factory lo suasam țhintu hi ka hrechhuak thei dawn lova chuvangin ka Spanish hming Mourizo Soreno hi ka hmang mai a ni.

Ka hmel erawh Los Angeles, Time chanchinbu-ah alan fo avangin kâr lovah min hrechhuak thuai dawn a, chu chu duh lovin ka sam ka zuah angai a, ka khabe leh bek hmul pawh misual rual zinga tâl ang mai a ka zuah a ngai ta a nih hi. Ka thawmhnaw inbel thleng pawhin maw le!

Businessman kha Mafia boss anga ka lan a țul a, Ariena Gonzalo aia ka zai erawh kha chu tihpalh thil takmeuh meuh a ni e, ka țhianpa problem kha a khirh êm a, a mi ngenna ka tihhlawhtlin sak mai a nia.

Mourizo Jerome Evans Soreno teh duah mai a, Soreno hi ka nu hming hnuhnung a ni a, kum sawmpahnih ka nih lai khan a boral tawh a, ka pa, Juan Evans duhdanin ka mamawh hun apiangah ka nu hming ka hmang mai zel. Ka birth name erawh Mourizo Jm Evans a ni thung.

Kha nu Amelia Lopez kha hmeichhe dangdai tak a va'n nichiang tak! A kawlhrawng ru reuh zêk lehnghal a, mahni tana țha tur pawh dawngsawng thiam lo khawpa luhlul a ni. A hmelțha chungchuang hle bawk.

A hmaifang tung lam deuh chuan Spanish a nihzia a tarlang a, a hnar ngul sâng váh leh a hmui fawh chakawm tak maia sen hlar te kha, en tawh pawha en nawn leh ngai chi hmeichhia a ni. A sâng țha hle bawk. High heel a bun a nih ngat chuan min chen thuak ang, feet 6'2 ka ni ve a nia!

A pian a nalh viau bawk a, a mawng chhing láh te leh a hnute kawh vah khan ka mit ala hmasa ber a nih kha, tu mipa tan pawh itawm khawpa nalh a ni. Mahse, a nungchang hi a hmeichhia hlawl lo tih ka vawikhat hmuhna ațangin ka hre mai; A bula ka awm apiangin nuihna tur ka hmu fova, mipa a ngaihsak lo viau a ni ang hmanzana a room-a mipa lo awm pawh a sual lêt ngam a nia!

Kha pa kha kut ka thlâk ta lo kha a nia, tenawm lutuk Amelia kha han khawih vaih se chuan ka that chiang khawp ang. Uicho ang mai alawm.

Zanin hian ka 'ta' ah ka siam ngei tur a ni, kei hian ka duh tih ka pha lo, min la tihderh ve khanglang a, ka nuih a za ru viau nâin ka hrelo der ta zawk a nih kha.

Amelia hi blackmail hmangin ka nei thei chiang alawm a pa in ka company sum a ba hnem êm! Mahse, neih luih kher ngai lovin fair taka kan inzawm theih ka ring tlat a, a mitmenga min duhna lo lang kha ka hmuh hmaih bik lo chiang alawm.

Bathroom ațanga ka chhuah chuan dawhkan chunga ka phone dah alo ri ve chiah a, rang zetin ka ban a, Felipe Lopez maw!?

"Mr Evans, pawisa pawh kan pe thei țep che a nia, Spain-a kan hotel pakhat zawk Enchante kha hralh ka tum a, chu chuan ka leibâ chu ka rul thei ang, khawngaihin Los Angeles lama kan hotel hi Celeste rawn supply leh hrâm rawh," a rawn tih chuan ka nui huk a.

"Spain-a in hotel chu engzatin nge in hralh dawn?"

"Ka la hre lo, ka fanu kutah ka dah a, ka la hrilh hre lo tih ka'n sawi tlang nghal law law ang e."

"Naktuk zingah ka rawn thlâwk nghal ang, hmaichhana kan inbiak angai a nih chu," ti a ka sawi chu a bengkhawn viau a ni ang, "A țha khawp ang i lo kal thei a nih chuan,"

Kan inbiak zawh hnu chuan wine list ka check leh tê tê a, ka grape hmun lo suasam țhintu chu tudang an ni lo, Ramon Salia, Mafia boss a ni. Nimina min rawn tibuaitu ngei kha! Ani hi ka company min chuhbuai tum reng reng a hmanhlel a ni a, ka chhuah tawp lovang.

Felipe Lopez-a hotel hi a leiba aiah ka laksak mai angai dawn a nih hmel viau, Amelia hian min hrechhuak rih lo mah se pawi ka ti lem lo khawp mai. A thinchhiain a luhlul bawk si, min beih let emaw kha a tum anga, chu chu ka duh miah lo. Hmeichhe nungchang nu zêm a pu mang reuh silova a bike khalh dan te reng reng kha a...!

Great Cocktails
Restaurant Tapas
6:40 Pm

"Ka hrelo ka tih chu Sir, ka.."

"Helaia ka rawn inziah luh dawn khan ka hming hi tuma hnena hrilh lo tur khan ka ti che u a, ka hminga phone lokal pawh a rawn betu lo hre zel turin ka ti che u a ni lawm ni? Ka thu in bawhchhia a ni." Restaurant nghaktu chu rum lutukin ka melh a, Amelia a rawn thleng țep tawh a, a hun hmaa min hriatchhuah hi ka duh miah lo.

"A pawi ka ti hle tih bak sawi tur ka hre lo, Mr.Soreno. Mahse, helaia thawk zawng zawng te hnenah hian i duhdan kha ka hriattir vek si a. Pawnlam mi hnen ațanga an hriat a nih ka ring mah zawk!" Ngaihdam dil hmel zeta a tih chuan, "Ani mahna," ka ti hmuk a.

Nimina min min rawn zuitu Ramon khan he restaurant ațang hian ka awmna chin a lo hre vek zel tih ka hrechhuak tawh a ka lawm viau lo. Ka Apartment-ah kârkhat chuang ka haw tawh lova, ka thil chhui lai avang hian Tapas-ah ka inhnawhpuar mai țhin a ni. Enchante hotel-ah ka riak thung a.

Ramon tel tawhna anih chuan thil engpawh a thleng thei a ni. "Helaiah hian ka awm a ni tih puanzar ka duh lo tih ka hrilh nawn leh a che." Tiin manager chu ka melh a.

"Awle Sir, tih theih kan neih chuan.."

"Zanin chu tihbuai ka duh lovang, chu chu i lo hre dawn nia."

"Yes, sir."

Manager ka kalsan hnu chuan dawhkan ka hauhsa kilin ka țhu a, Martini ka in pah bawk. Amelia ka phone khan hruai a duh loh thu a sawi mauh mai a, ka nawrlui ta bik lo. Min hnial leh zuah zuah dawn tho a, bâkah a chénna hmunah ka kal fo tih midangin an lo hriat chuan amah tereuh hi an tina duh maiin a nia ka rin ni.

Dar sarih minute khatin ala ri lo tihah restaurant kawngkaah ka mi nghah chu a rawn pen lut ve chiah a, henu hian eng nge a hriat le? A inchei dan mai mai chu!

Amelia chu ka bulah rawn dingin a nui sâng a, ka nuih pawh a za lo.

Bikers suit a rawn ha nia maw le! Mawl lutuk! Ka kalsan dawn khan a thawmhnaw inbel tur ka hrilh chiang hle khan ka hre si a, nge, min runluih zawk. Hundang chu nise inhmeh ka ti viau anga zanin kher zawng a țul lo tih piahlam a ni, a hun hek lo.

"Hi, Mouri..!" Ala nui var var leh ta nghal a.

"Eng thawmhnaw nge i rawn inbel hi!?" Ka duh aiin ka la vin lo zawk mah.

"I hmuh ang hi a nimai," tiin chair awl chu a pawt chhuak a, confi zetin ala țhu zui.

"Amelia, min runluih hi nuam i ti viau em ni? Zaninah khatiang thawmhnaw inbel chung khan dinner min kilpui i tum a nia, i â a ni ngei ang."

"Misual tute emawin min tihbuai leh hlauh chuan tlanchhiat ka tum tawh lo, bike ka rawn keng a, thih ka la duh miah lo a nia," Martini chu thliin a in pah khalh a, a chezia inringtâwk lutuk leh min thamlo niawm taka a nui chu ka ngei viau.

"Helai hmun hi i chhuahsan teh ang, i â emaw an tih tak tak hma che hian," tiin a no ken lai chu ka chhuhsak a, ala țang țung lehnghal a!

"Mouri, eng nge maw i hriat le? Ka vestido(dress) hian kan dinner atihbuai awm ka hre ve miah lo." Ti a min en chuan ka thaw hawk a, a luhlul bawk si. Restaurant chhunga awm te chuan min thlir deuh țhup a, helai hmuna hetiang thawmhnaw ha a lo lut chu mak tih loh rual a ni lo.

"Tho vat mai rawh, ka thinrim hma hian," tihpahin a bânah ka vuan a, chutah muangchanga rawn dingchhuakin ka mitah tak min en kalh a, "Min zahpui anih chuan engvangin nge dinner kan kil dun kher ang?" Ti hmakin a inher zui daih a, min ngaichang hlek lo hian restaurant chu a chhuahsan ta a.

Rei vaklo chhung chu ka meng buai hman! Henu em em hi chu sáwi zal deuh angai dawn a nih hi, ka nuam tih zawng tak a nia lawm..

Amelia chu ka zui ve ta vat a, a bike bulah lo dingin phone a lo hmang mek a, tu nge a lo biak hmanhmawh ni.

"Tunah i thawmhnaw kha thlâkin min zui dawn nge, helai hmunah hian ka phelh ruak dawn che." A bike chahbi ka phawi sak zui nghal a, min en duh țhak lo.

A phone hmanlai chu ak țhain ka hma zawnah a kut arawn pharh a, "Khawi chahbi kha.." a ti sap a, thinrim hmel a pu hran lo.

"Ka sawi chu zawm mai rawh, i thawmhnaw thlâkna tur kha ngaihtuah rang la a nimai, zanin kan hun hman tur i chawkbuai vek."

"Ka thlak lovang.."

"Min hnial suh Amelia, i thawmhnaw kha tun anga hak chhuah chi a ni lo, zanin hi special taka hman ka duh."

"Ka thawmhnaw-ah buai lo mai ta che, thawmhnaw sexy zet nen ka rawn kal chu i ring tak tak em ni? Jaja! Teuh lo mai," ka inrin hmain ka chahbi ken chu a rawn phih thut a, ka âwmah na zeta rawn namin ka petek dawrh a. Rang lutukin amah chu bike chungah pakai nawlhin chahbi a vuah nghal a, a jacket hnungah vuanin pawhthlak phet ka tum pawhin chuti maiin ka tithei bik lo. Bakah ka tihnat ka hlau ve bawk si.

Chutah min pawisa țhak lo hian atlan chhuak ta a, a phit chhuak a ni ringawt! Chelh beh chu khawilamah, chaktakin 32 street-ah a tlan par par a, ka hmu zui ta lo. Beidawng zetin tukkhum vuanin ka ding ta ngawt a, ka thinrim hlur mai.

Ka uzui ngei tur a ni khawi hmunah mah a kal lovang, a hotel-ah a nih loh chuan a chênna hmun bak a pan chuangin ka ring lo.

Apartmentos
Beni-beach

Ka ruahman lawk ang chiahin thil a thleng e, Mourizo mutpui kha ka ngam ngang lo, chhuanlam siama tlanchhiat lah chu tlawmthlâk ka ti bawk si. A beisei loh dan anga ka va lanna khan a țhawng hle a, a thinrimna kha awm ka tihpui viau, kan inthlah danah hnialna thu engmah ka chhakchhuak lem silova, a hrilhhai ngawt ang.

Ka room-ah nui țhâ chungin wine ka lem khalh khalh a, min umzui duh ka ring chiah lo bawk nen engthawl takin ka țhu dar dar a, ka dawhkana Roshima eitur min chhawp lah duhthusama tuihmel anni hlawm bawk. Veal permesan ( Arsa leh Beram sa mix) chu a tuihmel lehzual.

Zanin chu tumah tibuaitu awm lovin rui hle ila a nimai alawm.

Martini nokhat Tapas restaurant-ah ka in tawh a, tunah red wine no thum lai ka inzo leh tawh bawk. Engtik lai ațangin nge zû hi ka lo duh tâk viau pawh ka hre lo, Elias Sanchez laka ka rilru natna min chhawktu ber kha zû a ni tlat a, khata țang khan a ni mahna.

Ka bikers dress ka thlak vek tawh a, tawnzau dum leh cotton kekawr thawl hnekhnawk hain tray-a eitur awm chu ka ei mial mial a, a khât tâwkin wine ka lem leh zauh bawk.

Chutia ka lo awm dawr dawr lai chuan ka room kawngkhar arawn intheh hawng țhuai a, Mourizo chu kawr pawh ha lovin a rawn lut ta chher chher mai le! Jeans half pen a ha a, nichina a thawmhnaw inbel kha a thlak vek tawh.

"Lopez, min tizak hle mai," a ti thüm chhak a.

"Min tizak fê zawk!" Ka lo ti hlar a, ka rui deuh bawk nen ka hlau eih lo.

"I la țawng ngam a nia, hmeichhe dawihzep tak i ni," tihpahin pindan chhung chu a melhkual ruai a, ama thil pawh a awm chai si lo.

"Ka țawng ve bawk ang chu min bia alawm," ka ti hmak a.

"Tun ațanga minute sawm hnuah tuna min chhan ang khan min la chhang leh dawn nia." Ka malchunga tray chu lain dawhkanah anghat chawrh a. Ka wine in báng a zatve la awm chu eng sawi set set lo hian a in pawp a, a chetdan maksak zet chu ka lo en hau mai.

Chutah rang zet hian rawn che-in ka inrin hman hmain a koki-ah min paw nawlh a, sawi tur reng reng ka hre lo. A țawng tawh miah lova, ka tâl ve chiam nâin engmah awmzia a awm hek lo.

A bawp sei zet chu hmang țangkaiin ka pindan ațang chuan min pu chhuak ta nawl nawl a, lungawi hmel a pu deuh emawni!

"Engtia min tih nge i tum, Mouri?" A hnungah ka chum pawp pawp a, a ngawi ngul nia, min vuan nghet sauh thung.

Awle, ațha e min kalsan tur leh ka awm awma min awmtir turin ngen ka tum bik lo, ngen mahila a sawt chuang dawn lo tih ka hre ve tlat.

Min hruaina hmun tur hrelo mah ila nakinah țawngkam pangngaiin haw ka duh thu ka hrilh mai a ni ang chu, luhlul leh luhlul innêk kan ni bawk a, ka hlauthawng tih hriattir ka tum miah lo.

Mipa ka lo hriat tawh te reng reng hetianga hmeichhia an chênna ațanga pu chhuak duh tur hi hmelhriat pawh ka nei mai mai lo. Tun ang hunah phei chuan a chetdan hi a lutuk lam hrat a ni.

Mahse, Mouri awm dan eng emaw lai hi a romantic ru riau lawi si, pianpui ațanga a chhawm ni a lanna a nei tlat bawk. Chu thil chuan pa luhlul, huaisen, rilru lian tak leh mi hipna ngah niin alantir tlat bawk si. A zei dan te lah hi a.. inven ngai nasa tur chi, taksa pengtin a fan vek thei alawm.

"Chuang nghal rawh," tiin car dinna bulah min nghat thla a, car kawngkhar a hawn lai te chuan hah hmel reng reng lah chu a pu hauh lo. Roshima khan nui vur vur chungin min thlir liam ta kha a nia. An inpawh hmel zêk lehnghal!

Thuawih ber niawm takin Lamborghini-ah chuan ka țhu lut thak a, ka thawmhnaw inbel beitham tak chu hmu awm pawhin alang lo. Nichin ang khan han sawisel leh vaih se chuan ka țeu nasa ang chu.

Ngawi rengin driver seat-ah a rawn țhu a, țawngkamkhat mah a chhakchhuak lo. Biak lah ka tum hek lo, kawng chu ngun takin a en a, a thinrim nge rim lo tih pawh hriat va ni suh!

La Baracca Villa
Madrid.

"Kan thleng tawh e, muangchang lovin chhuk rawh," min en chuang miah lovin ati hmuk a, a hmel erawh tlemin alang dam ta deuh.

Villa tunlai zet leh tê fel rân kawtah car chu hûng țhain a chhuak zui nghal a, î he lovin ka zui ve nghal tho, ka rui deuh chiai kha areh duak tawh a, ka hrawk a ro halh thung.

"Pawm leh kher i phût tawh em lo maw!?" Tiin a rawn leh hawi zauh a, ka lo melh hrep avang chuan a nui suk.

"Min pawm leh i châk zawk a ni lo maw?"

"Khalam chu nakinah le, ka duhtawkin ka pawmin ka kuah dawn che alawm," kawngkhar kalhna chu a hawng rawk rawk a, min kai lut ta a.

Inchhung landan a danglam hle mai a, țhutthleng vel chu pindan kil lamah rem fel thlap a ni a, pindan lai takah chuan khum lian zet mut hahdamna atana siam niawm tak a awm bawk. A mawi danglam hle mai! Ama Villa anih ngat chuan a sawi angin a hausa hle tihna a nia. Hetiang hmun nuam lutuk nei tur chuan Billionaire nih angai.

Khum khuhna Satin pawl dak hlarh a inkhuh dulh a, thosilen pante a inzar bawk a, Silver bucket chhungah wine leh ice cube a inchhawp bawk, nawm hmel tak a ni. Pindan chhung lah chu a rimtui em em a, min hruaitupa rim te pawh a nam deuh hiala ka hriat chu le.

Engmah sawitur hrelo chuan ka âng pham ringawt mai, makti takin inchhung chu ka melhkual ruai a, Mourizo ding luah chu a langsar lurh lurh hle a, tuna alandan chu Apache chiah chiah! 'Man' tak a ni.

A bawp sei zet chu kâk deuh tak hian a chhep a, a sam ni se fai hmel lutukin a tle sar bawk. Kawr a ha der si lo! Min bawh thut ang tih pawh ka hlau hlel lo ve. A awm pharh hlai zet leh sek lam lek lek chu a hnûm hlarh a, ka thin phu dawt dawt chu thunun ka tum ve țâng țâng. 'En tawh suh Mouri hi..' tiin ka infuih ru sauh sauh.

"Ka nghak reng che a nia," zawi supa atih chuan ka melh kâwk a.

"Eng maw i nghah?" Ka hawisawn duh bik lo.

"I rilru i thlâk nachhan leh ka duh loh dana i rawn inchei lui kher kha a chhan ka zawt che," tiin a lu chu ka lam hawiin a thle zauh a.

Zâm zetin ka heh ro halh chu ka liak a, eng chhuanlam nge ka siam ang aw..

"Misual tute emawin min tihbuai leh tâk hlauhvah thi lova ruanga kan awm kha ka duh lova chuvangin ka rawn in ruahman sa a nih kha." Awih lo tih hriat zetin a lo ner sawk a, "Dawt min hrilh tawh ngai suh, ka zawt nawn leh ang che, engvanga i rilru thlâk leh nge i nih, kan affairs țanna tur tih ka sawi chiang tâwk a ni lawm ni?"

"Ka sawi ang kha a nimai,"

Ka mutpui ngam leh lo che tih sawi chi ni nghal lo chuan.

Min thin hrep duh hmelpuin ka darah a rawn vuan a, "Dâwt ila sawi cheu mai," tihpahin ka nghawngah a chul ta riak riak a, "Min duh lo tih sawi chu tum duh ting suh, kha i mitmeng mawi tak kha ka chhiar thiam ve a nia," a kiai zui suk a.

"Enteh..ih..englo..keimah zawk hi thil âtthlak ti ang maiin ka inhre leh hnuhnawh a, ka zak alawm, hetiang affairs tih vel hi ka tih țhan a ni ve lova," ka ti nawk nawk a.

Reife a ngawih vang vang hnuah dam duai hian, "Chutiang te chu a hrethiam tur zawk ka ni lovem ni?" tiin ka sam pawr fap chu a chul mâm ta thuak thuak a, a kut dam thlap avang chuan a mitah ka en ve ta chauh!

"Kei hian ka duh che, min ring rawh, tu hmeichhia mah ka ûmzui duan duan ngai lo, min kalsantu leh lek phei chu.." dim takin ka biangah a chûl heuh heuh a, hetianga duatna hi tu lakah mah ka la dawng ngai lo.

"Cuál él significado?( Eng nge i sawi awmzia!)" ka tih chuan, "Warning kan inpe tawhin ka hria, khatiang țawng hmang lo tur khan," tihpahin dim leh duat angreng tak si, duhthawh zet si hian min fawp ta vang vang a. Ka la chhang ngam ta chuang lo.

A hmui a laksawn chuan ka lo thaw huai a, phurrit lâk kian huai ni a ka inhriat chu le.

"Wine in ang aw?" Tiin ka samah min chulsak leh dalh dalh a. Min care thar ta riau!

"Pawi hleinem,"

Mouri chuan wine chu no hnih a thli a, nokhat chu min pein, "I hmui a fawh kha wine zawng zawng aiin a thlum tui zawk daih," ati zawi sup a. Min rawn fawp zui leh zat.

"I chanchin tlem tal min hrilh la," ka tih chuan, "Hmanhmawh suh ila hre dawn chauh i rin ang kha ka ni lo a nia."

"Eng ka rin ang..." ka țawng laklawh lai chuan min rawn fawp leh thut a, reife min fawh hnuah, "Next-ah chuan chhanlêt ka phut a nia Amel," wine chu a tem zui zauh a. A tih ang chuan ka'n ti ve ngei a, a nui tut tut nia!

Chumi hnu chuan eitur chi hrang hrang tui hmel tak tak chu kan eidun a, mak takin a thu awiha awm hi nuam ka ti riau! Ka thinlunga rinhlelhna awm kha zawi zawiin a reh tial tial!

Kan eitur kan eizawh hnuah min rawn hnaih ruak a, ka lo dang ta bik lo. Min duh a, keipawhin ka duh tawh takzet! Ka kut chuan a sam sei angreng tak chu ka zut a, khum lam min panpui lai pawh chuan ka țang duh ta lo, amahah ka innghat tawp.

Khuma min nghah hnu a duhthawh zeta min rawn fawh leh nawk nawk tâkah chuan uar takin ka lo fawp let ve a, ka tawnzau hak chu hlimin ka hnute alang phir țhaih, dimtê-a a tawh chuan ka insangmar ru țeuh thung! Ka thu chhuak nghak hlawl mai.

"What?" A aw thâm țuak chu a nalh phian.

"Eng lo, wine in leh mai ang," tiin wine bottle chu ka ban a, "Yeah..i zâm takzet a ni maw?"

"Umn"

"Ok..zantluan hun kan nei alawm," tiin amah zawk chuan wine chu min thlit sak a, "Rui khawp erawh chuan in ka phal lo ania," a tizui sup a.

"Rui lah lo ve, hlauthawng duh suh," ka ti ve ngial a, ruih erawh ka châk et et, ka zâm ve thlâwt a ni.

Zanin hian ka thianghlimna ka hlan dawn ta chu a nia, ka tisual mai lovang maw?

End of Chapter-5

©<++++[BeckirafARenthleI]++++®

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 11:29 am

ENCHANTE LOVE SORENO
(Quieres Casarte Conmigo?

Becky Rafa Renthlei

Chapter-6

La Baracca Villa 4515
Spain.Madrid
MJS & Amelia
11:00 Pm

Villa reh ruih leh nuam fahranah chuan Mouri nen chiah kan awm chu a nia, a hlauhawm zawnga ngaihtuah chuan ka țimru er er nia. Amah hriatchian tumin ka intât lût ve bawk a, awmzia a awm lo kher mai! A zûnah ka uai țan der zawk a nia!

Wine no hnih ka in zawh hnuah Mouri chuan alamah min kuah hnai sauhvin ka darah a vuan a, "I duh lo chung nawr luih che ka tum miah lo, i duhthlanna ngei nise ka duh a ni." Zawi fiah takin ati sup a. Ka sawichhuah hun a nghak a ni, ka duh thu sawi lova ka hnar anih chuan min kalsan daih maithei asin. Kei hian thlah ka duh rêng em?

"Bien (Awle) ka duh alawm," ka ti zawi sap a, a mitmeng de nghal sar chu ka hmuh hmaih bik lo.

Ka tawnzau hâk chu awlsam zetin min hlihsaka, ka taksa chûl lawrin ka kâwng ațanga ka mawngbawr thlengin. Chutah ka kekawr hâk thémhlém tak chu chhuatah a theh thla hnak a, under wear pantê tih chauh lo chu engmah inbel ka nei ta lo.

Ka âwmbawr kawh láh a hmuh ruala a thaw hawk ri chu ka bengah a ring kher mai, ka dara ka sam rawn uaithla chu dimtêin hnunglamah a hui liam a, a kut dam thlup leh lum thar thara min tawhna chuan ka chhungril a fan raih raih thei nia.

Zak ru viau mahila 'Aw' ka pawh tawh miau avangin tlanchhiat erawh ka tum duh ting lo, Mouri mitmenga lungawina lo lang chuan ka taksa chu zahpui a hnekin ka inchhuang ru ta riau pek a, hmeichhe nalh chungchuang tak angah ka inhriat phah tlat nia! A kutin ka âwmbawr chu a chul riak riak a, a hmuiin a chhuizawm zat zel, a che hmanhmawh chuang miah lo.

Mouri hmui lum thar thar leh hnâwng chap chuan phurna nasa min neih tirin duhthawh lutukin ka lo fawp ve ruai a, a tana thil hlu ber ang maia min tawhna leh min fawhna chuan 'bik' riau min nihtir thei nia.

"Mouri," ka ti zawi raih a.

"Amelia," A hmui chevelah chuan dawi âtin ka awm a ni ber, a tak ram thleng miah lo pawhin amahah chuan famkim riau a awm tlat! Mipa danglam tak a ni.

Ka la inbel chhun tlêmtê chu ka kâwngbâwr ațanga tuai thlain a thehsawn dawrh a, ka lo nui hak.

A mitmeng uk kharh de sar chuan ka saruakna chu a thlir vawng vawng a, a kekawr hâk chhana a mipatna rawn tho chu ka hmuh kân bik lo. Lungawi hmelpu zeta min kuah lehin min chul țan leh ta a, chutiang êma mipa châkna nei tura tih phurin ka awm ngai reng reng lo, Mouri lah a dawhthei ropui si.

Reife kan infawh a, min chúl pawh chuan Mouri zawk chu ala dawhthei hle a, kei erawh ka lo phusa sek thung! Ka lo hmanhmawh et et a, ani lah chuan min chawhphur a tum nasa telh telh emaw tih mai turin ka taksa a duhlai lai a dap lawr a, î he lovin ka lo dawngsawng țha phian. A taksa sa ham ham leh ruh mâm thal si, tisa châkna avanga khauh țang lawi si chu ka hnaih ve sauh sauh zel a.

Khum chungah chuan min nem muin min fawp zui vang vang a, a duhthawh tulh tulh a, a thaw nise a bul hak hak tawh mai, ka bawp a nawr kau rual chuan ka lo insiamrem ve zel a; a mipatna ruh țang chu hai der chi pawh ni nghal lo chuan min do rân mai!

Chutah muangchang leh dim fahran hian a nihna hmun tur lam panin pumkhatah kan insiam ta a, ka phut zawk rualin a ni pawh a che tawp chat a, makti lutuk tih hriat renga ameng buai nak chu ka hmu hman!

"Lalpa leh.." ati thâm țuak a, kei erawh ka chhungril na vang vang chu theihnghil tumin ka heh ka pet fan fan thung. A na ve êm a ni.

"Ka duh lutuk che, Amel darling, a hmasa ber ka ni ang tih ka ring phâk lo," tiin a inbeng kang a, ka lo kuah let țawk țawk a, ka zak tih piahlam a ni.

"I zak em ni? Reilote kan chawl zawk dawn nia," insum harsa a tih hmel hle a, mahse, amah Soreno kha a ni tlat a, a inthunun hneh viau tho si.

Minute nga dawn kan chawlh hnuah ka lo inpeih sa tawh bawk nen zawi muang raihin kan hmabak chu a chhunzawm leh ta a, a chet pah chuan ka la hriat ngai loh țawng hmangin eng emaw a sawi sap a, kan taksa inrem thlap chu thil mak a ni!

Nawmna sawifiah thiam bâk aia ril inpe tawna lungrual taka kan chêtna chuan ka la tem chhin ve ngai miah loh nawmna vawrtawp min thlen ta nge nge e!

Chutah lungawi fahran, chau hnep leh inkuah chialin kan thaw dun ta hle hle a, a hnungzâng thlan deuh dapah chuan ka kut chu a la bei ve rân a, ka phelh phal ngang lo, ka him hliah hliaha inhriatna ka nei zui bawk.

Ka țhanharh chuan hâm bai bai chungin ka zi mar ar ar a, Villa chhung chu melhkualin nizana kan awmdan kha!

Ni eng chuan ka mutna chu a rawn chhun at a, mumang chhawnghnihna ang ruai ni a ka hriat chu le, duhthusam khawvelah ka cheng a ni ngawt alawm.

Ruak vekin ka lo la mu chu niin! Ka ke lamah puan pantê hi a lo awm a, nizanah Mouri in min sintir a ni ngei ang, a rim pawh ala nam vang vang hiala ka hriat chu le! Ani khan ka taksa mai ni lo ka thlarau thlengin min khawih sak em mawni?

Zankhat thilthu maiah ka thianghlimna ka hlauh ta! Mahse, ka inchhir tur a ni lo. Ka duha inpe ka ni a, a nghawng a lo thui deuh ta anih pawhin ka tuar mai tur a ni dawn lawm ni.

Lungawi zeta nui var var chungin ka tho chhuak a, tukverh lam ka pan zui nghal a, Mouri chu pool-ah chengin a hleuh kual vel pap pap a, a va'n hmelțha hluah hluah tak! Kei hian a der mai nilovin ka duh takzet tawh.

Tui ațang chuan lo chhuakin a bawp sei zet, zankhuaa min kherh bet chial tu hmang ngei chuan Villa chu a rawn pan ta thauh thauh a.

Saruak vekin tui a lo cheng chu niin!

Ka nui ta sak a, a saruakna zahpui miah lova a awmthei chu mak ka ti lo thei lo, mipa taksa ruak, hetianga chiang hian ka la hmu ngai lova, a taksaah sawisel tur a vâng ve bawk êm a ni. A sâng țhain a nalh thlurh a, â adik vel vek ani mai.

Nizan khan hmeichhia leh mipa inkâra tisa nawmna chen awmzia min hriattir a, ka la hriat ngai loh leh ka nei tih pawh ka hriat tel loh mipa duhna nasa tak min neihtir thei tlat a ni. Zalen taka ka chen ve theih nun hlimna min zirtir bawk a, thu mak tak tak leh tisa châkna tiphur thei țawngkam a hmang thiam hle a, zak miah lovin a duh ang anga nawmna inpektawn dan min zirtir ta kha a nia.

Ka hmai sa hat hat chu ka'n hup teh ngawt a, hmeichhe phur thei zet ka lo nireng alawm le! Ka inkharkhipna țhiah a nih meuh chuan hmeichhe diktak ka nihzia arawn lang ta, chumi tur chuan hmeichhia bik hliah hliahin min sawngbawl tlat a!

Kawngkhar kikri ka hriat chuan rang lutukin thawmhnaw ka inbel zung zung a, tawnzau leh cotton kekawr kha a ni maia ka zo thuai. Mouri chu a ni lo tawp, pool bulah ala tawi khawmuang tlat a ni.

"Eng nge ni?" Nem fahran lova ka tih chuan, "Hnathawk kan nia, miss,"

Kawngkhar ka hawn rual chuan Mouri kid te anni ngei ang, mipa pathum ka hmu nghal a. Eitur rawn kengin an chetzia reng reng chu a fel thlarh mai. Min zah hmel hle lehnghal a, inchhungah chuan an tihtur ang ang an ti mawlh mawlh a, hrilh hranpa an ngai hauh lo; zan lama kan chêtna hnu hma te chu an tifel zung zung a, khum hnawk nuai te pawh an siam mar zung zung bawk, ka lo zak ru chem chem thei nia!

An chhuah dawn lai tak chuan Mouri chu Villa hnung kawngka ațang chuan a rawn lut a, a kawngah towel a bih țât a, ka lo thaw huai. A nauteho lam hawi chuan a bu nghatin,

"Mateo, kha lo hrilh ula, chawhnu dar hnih atan ka 'private Jet' lo buatsaih rawh se," ati sup a.

"Yes, Jefe (boss)" tiin chungho chuan min chhuahsan ta a.

Kawngka a inkhar leh rual chuan ka lam panin Mouri chu a rawn phei a, meng de sar chunga min en in, "I thawhna a rei tawh em?" A ti a.

"Rei vak lo," ka ti tawi tak a.

"Nangmah chauhvin i lo mu sia i hrilhhai lo maw?" tihpahin a towel bih chu a titla lui deuh kher a, a sam huh hlap chu a nghawngah a bet deuh thlar a, en ngawih ngawih mai a nia ka duh! Haji! Hetiang êm a mipa samsei inhmeh hi an vang viau ang, ka âtchilh thawthâng a ni ber mai.

"Ka ril ațam e a," tiin eitur an rawn dah thar chu ka melh pah a.

"Ka ril i ti țâm fê zawk," min hnaihchilh nghal ruak a, duhthawh fahranin min fawp leh ta ngawng ngawng mai. A kut chuan ka tawnzau chu a hlim leh nghal ruai a, "Engmah khawmuanna chhan tur kan nei lo," nui sânga tiin min hnaih zual sauh sauh nia.

Khum lam min pan pui chu a ni leh ta der mai a, Mouri tisa chakna sosang tak chu lo dan a hnêkin ka lo inpeih ve var nia maw le. Awihawm loh hian!

"Thil ei phawt ila," ka'n ti ve ngial a, ka âwmbawra a hmai a rawn phum tâkah chuan ka ngawi hmiah. Ka hrawk a ro nghal halh mai.

"Kan tih zawhah kan ei ang," rawn dah chhuah pahin ati sup a.

"Chuan.."

"Angai ang bawkin kan ti leh zel ang," a kiai zui suk suk nia.

Chumi hnu chuan hmangaihna chendunin kan inbual dun a, hun reilote chhunga ka nun inthlâk danglam tial tial chu hlimna namen lo a ni.

Thil kan ei laiin Mouri chu a titi ve bawrh bawrh a, a hmel nung sarh chu hmuh a nuam viau, ka hawisan phal meuh lo chu a ni e, chutia ka lo en reng lai chuan, "Eng nge i ngaihtuah a!?" Grape hmin duk chu a hmawm pah thaih a.

"A chang hi chuan i danglam riau țhina hriatna ka nei tlat zel, mi pangngai an lohna riau i nei țhin," ka ti sap a.

"Chu chuan a ti lungawi lo che nge a ti lawm che?" Tiin a nui suk a.

"A chang chuan American mize diktak i pu a.."

"Ka ni reng alawm, ka nu erawh Spanish,"

"Nie, mahse...mahse, achang hi chuan misual deuh i ang, i danglamna hi ka sawifiah thiam chiah lo."

"Tute emaw tan misual chu ka lo ni te pawh a niang, țhenkhat tan erawh an eizawnna siam saktu, pa țha tak ka lo ni ve maithei asin. Mi zawng zawng hi an landanah thlir suh, ngaihdan i siam sual palh thei a nia," atih chuan dik ka tiru viau.

"Chutiang zawngin i lakah ngaihdan ka siam hran lo, kan intawn dan khan a zir lo êm a, martial arts i thiam em ni?" Ka tih chuan a fork ken lai dahthla meuhin za lutukin a nui a, "American mipaah chuan a thiam ber ka ni ang chu," Fiamthu tih hriat zet hian ati ta a.

"Nui suh,"

"Eng nge, i zawhna hi a naupangchhia ve thei chhá chhá êm alawm," tiin a la nui reng a, ka ngei ang reng.

"Ka sawidan i hrethiam reng, Mafia pawl ami chu i nilo takzet maw? I hausak hmel ropui si, drugs tawlhrûk lamte pawh..."

"I thluak kha sawinghing vak suh, Amel, chutiang lamah inhnamhnawihna ka nei thertê lo," a ti leh mai a, dawhkan chunga ka kut dah chu rawn hûmin a hmer deuh vang vang phawt a, "Ka hruai haw dawn tawh ang che, dar hnihah hian Los Angeles-ah ka kal angai dawn a, khawvar hmain rawn let hman ka tum dawn nia," ati dam thlap a.

"Eng nge i tih dawn?" Min kalsan tur anga ka hriat chuan ka ni deuh nghulh thei nia.

"Hna thilah ania, rei awm ka tum lo," tiin a țhutna hnunglam chu nghengin a wine no chu a chul kual zai zai a. A awmdanah a zinna chungchang zawhzawm a duh lo tih a hriat mai, ka zawt lui ta bik chuang lova.

"Hmeichhia engzat nge i mutpui tawh?" Ka ti sap a, a zei dan em emah khan hriat ka chak deuh tlat.

A wine no chu dawhkanah dah thla leh tê têin ka kut a rawn vuan a, "Tam tak mawle, Amelia," tiin ka mitah chiang takin a en kalh a, "Mahse, nang ka mutpui ang tluk che a hlimna hi ka lang tawng ngai reng reng lo. Englai mahin," a ti zui charh charh a, a ti tak tak a ni tih hriat tak hian a mûk ru riau bawk.

"Ka rindan vel a ni, hun liam tawhah sawi theih ka nei lova, mahse, tun ațang chuan midang an awm tur a ni lo," fiah faka tiin ka nui sak a. Engkimah a ber nithei lo mahila, a dawttu tal nih ka duh tih hi hriattir ka duh ve hrim hrim.

"Engmah ka tiam thei lo che, mahse, hei erawh ka hria, I'm Mourizo Soreno, ka duh hle che a ni." Ril ruih a tiin a thutak hle bawk, chu chuan ka chhungril a fan ngâih mai.

Ka Apartment lam pana kan tlan laite chuan ka ngui nghal ringawt a, ka hmalam hun hre mah suh ila, Mourizo tello chuan a ho zo vek dawnin ka hria, mahse, 'ka rawn let leh nghal ang' a tih vang chuan tlêmin ka awm a nuam ta deuh. He mipa hi min venghimtu leh ka nun tihlimtu a ni chiang alawm.

Apartment kan thlen chuan min kalsan hreh hmel a pu ve deuh roh a, ka kutah nghet taka vuanin, "Zankhat lek mah nise tu mipa mah lo hnimhnai suh ang che," ti supin ka hmuiah a fawp leh vang vang phawt a, a chezia reng reng a dam thlup a, hmeichhia ka ni tih ka inhre chiang ta kher mai. Elias vang khan ka lo inla 'Man' hman țhelh alawm le.

"Tehreng mai chanchin min rawn hrilh ka phut ve a nia," a nghawngah kuahin a mitah ka en kalh a, min duatna leh min ngaihsaka hmel ka hmuh hian nuam ka tiru veng veng.

"Ka kal ange, hahdam takin lo awm la, pawnlamah chhuak suh ang che." Thupe aw taka atih chuan ka nui ve tawp.

"Yes, Jefe," ka tilui kher a, ka chhukna turin car kawngkhar min hawnsak thlap hnuah ngun takin ka hmel a en leh phawt a, chutiang zelin ka taksa dang pawh a en thla dan dan a, inringtawk tak hmel a pu bawk. A chhip sam âwn dial chu a nalh angreng phian a, a sam hi mêtin a hmuihmul leh bek hmul vel met ta bawk se a chhelo zual ngawt ang. Mahse, samsei hi a inhmeh ka ti tho bawk si.

Hreh hle niawm tak hian car-ah chuan lutin muangchangin a tlanchhuak ta a, a liam thleng rak ka'n thlir zui chu le..ka ruak nghal huaiin ka hria.

Nizanah nula thianghlim niin kan in ka chhuahsana, tunah erawh, mipa sulhnu kaiin ka lut dawn ta ni. Ka nu leh pa'n an hriat chuan an nuih a za viau lovang.

Apartmentos
Beni-beach
9:00Pm.

Dinner ka eikham hnuah pawh Mourizo chuan min la rawn be miah lova, a thleng daih tawh awm si a! Mahse, hna thila kal a nih vangin a buai deuh a nih ka ring ve ringawt a, biak hmasak erawh ka tum rih lo.

Ka khumah muin nizan kan hun hman dan vel kha ka ngaihtuah kual chiam a, ka nui leh var var zel. Mipa danglam tak chu a va'n nichiang tak! Invenna kan hmang hauh lova, chutiang ngaihtuah nachang lah ka hre hek lo.

Lukhama ka phone dah a rawn rik chuan Mouri a nih ngei ka ring nghet hmiah a, phur lutuka ka en chuan ka pa lek lo niin!

"Um..pa.."

"Amel, duhtak, i dam țha em?" A aw ri hniam churh chu nidang ang lo riauva ka hriat chu le.

"Aw dam e, nangni in țha em? Min rawn be khât hle mai!"

"Țha a ni mai ang chu, englo a nia, thu pawimawh sawitur ka nei," tiin a aw a thian kharh a. Kan hotel buaina chu an la chingfel lo tihna em mawni dawn le?

"Aw sawi la..."

"I hminga kan dah Enchante hotel, Spain a mi zawk kha ka tiral ta a ni." Ati chuai raih a.

"Cuél êl significado?(Eng nge i sawi awmzia?"

"Lo siento(Tihpalh)" Ati leh ringawt a. Engvanga min râwn miah lova tiral nge annih ka hriat ngei angai.

"Sawi chiang ta che maw le," ka ti vin țhat a, a hralh duh anih pawhin ka hnial dawn loh tehlul nen engtin nge a tih theih zawk, ka thin arim hlur mai.

"MJS Wine Company sum eng emaw zat kan bâ a, chumi rulh nan chuan ka hralh ta a ni. Chuan nang pawh pasal nei turin lo inbuatsaih la, kan leibâ avang hian i nu leh pa jail-a kan tan i duhin ka ring bik lo, nihnih hnuah Los Angeles rawn pan ang che." Nichina a aw zuai ruih kha rehin a hmaa ka hriat țhin ka pa dik tak Felipe Lopez-a áw a ni leh tawh.

"Teuh lo," ka ti tuarh a.

"Min hnial ang tih ka ring sa alawm, mahse, kawng dang a awm ngang lo a nia, zanhnih inngaihtuahna hun i nei a nia, i nu leh pain jail bang kan zût i duh chuan pasal i nei lo thei tho a nia, hotel pakhat man ringawt khan kan bâ a daih lo, i thu thu a ni ta e.."

"Engzat nge kan bat? Tunge company chairman chu?"

"Beach club hotel kan leina zât zet kha mawle, an company chairman chu Jerome Evans a ni e."

"Maw?"

"Jerome Evans, MJS Company hi a ta a ni, ka hman tawh lo, i nu a lokal a, arang lamin i chhanna ka hre duh a nia," tiin phone a off zui daih.

'Evans' he hming hi ka hre tawh chiang! Ngun zawka ka ngaihtuah pawhin ka hrechhuak thei chuang lo. Mahse, ka thinlung hian hre tawh ang thânin a hre si!

Ka khumah ka let kual sek a, Mourizo hnenah ka inpe zo chiah a, pasal ka nei ang maw! Hnai lo mai! Pakhat tâna rinawm hi a tawk viau a ni. Ani lah chuan tun thleng pawhin min la be miah lo, eng ati em em nge niang?

Zinglam dar hnih arik pawh chuan ka la muhil thei ta chuang lo, leibâ kan nei tih ka hrelo hi mak ka ti! Hei vang chiah hi a nimaw Celeste wine kan lâk țhin kha alo tawp tâk! Jerome Evans hi tu chiah nge a nih?

Rang lutukin ka inperh tho at a, cupboard-a beer chu lachhuakin 'Can' khat ka in zo vek a, ka irhfiak nghal awk awk mai.

'Pasal nei turin lo inbuatsaih rawh' tih chu ka bengah a ri nawn tlut tlut a, beer ûm chu bangah ka vawm nghal bur a, ka mize kawlh zawk a chhuak țan tlat! Mourizo ka biak ngei angai.

Vawithum ngawt ka dial tawh a, a 'ring' ral țhak țhak nia, he pa hi min bum chiang mai. Em em a! Tun chiah ka call leh anga a pick theih loh chuan vawikhatmah ka be hmasa tawh lovang.

A tawp nana vawikhat ka call leh chuan hmeichhe âw tliang ral hian min lo chhang a, ka ner sawk.

"Yah,"

"Mourizo ka be duh," ka ti mawl tawp a.

"I tisual a nilo maw? Chutiang Mourizo ka hre lo," ati hmak a.

"Mourizo Soreno mawle, i mâwl em ni?" Ka tih chuan "I mâwl zawk a nih chu," tihpahin a off hmak a, ka sa zak mai.

A number a ni tih ka hrechiang e.., ka phone number a nei ngei tih pawh ka chiang, Los Angeles(LA) a thlen hnuah a paih te a nih ngawt loh chuan..

Thinrim lutukin cupboard chu ka hawng leh țhuai a, tute pawh hian min bum an châk zek zek a niang. Darkar tlêmte hnuah a sawi angin a awm lo zui nghal a, ka ngaihdan a pél hrat.

Whisky ka in belh ta nge nge a, ka thluak hahdam lo zet tireh tur hian ka mamawh te pawh a ni mahna. Tun hmaa ka natna lo paltlang tawh kha beih țhat leh ka duh tawh teuh lo mai.

Thle bâk bâk chungin khumah ka let tawp a, ka thawmhnaw pawh ka thlak peih tawh lo, ka lu hai chiai chiai chu haiderin ka chhing ta chial a.

11:00 Am
Amelia Lopez
Luxury Room

Ka bân mu churh churh tihreh tum chuan ka vai vak a, Mouri min tawhna chu ka taksa chuan a lo dawngsawng țha kher mai, ka pumah a chûl kual ruai a, a taksa lum ham ham nghenga mut hi alawm ka thlâkhlelh em em! Pasal ka nei dawn a nih chuan ani tluk an awm lo, a hair style-ah ka buai lova, a nihna ang ang hian ka pawm hmiah.

Ka dang ro huam huam leh ka hnar pik țup chu tihreh tumin thawk ka la hraih a, ka mumang chhâwng a zo ta. Ka harh chiang ta kâk mai.

Țhut chhuah tuma ka puansin ka keu chu ka râk nghal țhat a, ka bula mu hi! Dios! Mouri muhil chu a lo thaw sâk sâk a, nimin chawhnuah LA apan chauh si a, engtin nge helaiah a lo mut theih!?

A la mutui em em zui ah, a bân sei tak chuan ka kâwngah a kuah rân a, a hmel dam thlup chu a ngaihawm ru phian, a landan hrim hrim hi ka duh hluah hluah a ni tawp mai. Nizan khan alakah ka thinrim ve em em a, tunah chuan vawm bo ang duakin ka zâng haih mai.

Khum bula ka tui inchhawp chu ka in khalh khalh a, tihharh ka hlauh êm avangin thâwm ka dim teh a nia. Jaja! Ka nui leh ta var var alawm. Ani hian ka pasal neih tur chungchang a hriat hunah engtin nge min tih ang aw..

Tho chhuakin bathroom-ah ka intifai zung zung a, eng emaw tal ka ei anih loh chuan ka țâmchhawl takngial dawn alawm le, whisky leh beer ka inpawlh vang khan ka lu a na fuk fuk a, Aspirin mum khat ka hmawm hnuah inhnuai panin ka chhuk ta a.

Dar sawmpakhat a pel duai tawh, murei tak ka ni.

"Amel, eng nge i ei dawn?" Roshima pangpar khawi țha mawlh mawlh chu ka nuih var var a.

"I thiltih lai kha chhunzawm rawh, ka lo inbuaipui mai ang," tiin dining room-ah ka lut zui nghal a, dining table-a eitur lo inkhuh țha thlap chu hawng dan danin Morir sonanzo ( Apple ațanga siam chhang thlum) leh toast lain, bawnghnute, thermo flash ami chu ka inthlit nghal bawk a, chair pawt chhuakin ka'n ei ta tehreng a nih kha, ka puar awk mai.

"I thil ei dan ațang kha chuan thau tur chu i ni mawle," Mouri rawn lut chu ka lo nuih var var a. Ka hlim uchuak ang tih ania ka hlauh ni.

"Eng nge i ei ve dawn le?" Ka lo ti vat a.

"Coffee leh toast a nimai, coffee chu i siam ngei ka duh a nia," a'n tizui zat a.

Thuawih ber ang hrimin ka tho țaih țaih a, ka va siam ve mai, ka pa inah hi chuan coffee takngial pawh ka lum khât asin le, tu emaw kha a ni tlat a, ka hnial duh teuh lo.

"Dar engzatah nge i lo thlen?" Coffee no dawhkana dah pahin ka zawt a.

"Dar kua khan Airport ka rawn thleng chauh," tiin toast chu a ei a.

"Chanchin min hrilh hun nghakin ka lo ngaichâng reng che a," lungawi chiah lo a ka tih chuan inthiam lo hmel pu chuang miah lovin, "Hun ka nei ngang lo a ni," ati liam puat a, ka run angreng.

"I phone khawiah nge i dah?" Nizana min lo chhângtu khan Mourizo a hriat loh thu a sawi miau a, hriatchian ka duh tlat.

"Kan chhuah hnuhnun ber khan ka phone ka tibo daih alawm, ka zawng chhunzawm lo." Ati hmuk a.

"Ka awih miah lo,"

"I awih loh chuan call chhin la ti nia."

"Nizanah ka call diam tawh a, hmeichhiain min lo chhang,"

"Kha kha a nimai, ka number dang ka pe lo che tih ka hrechhuak tlai lutuka, mahse, lokir leh vat ka tum vangin pawi ka ti duh ta lo a nih kha," fel âtin min chhang a, ka ngaih thutak ang hian min lo ngai ve chiah lo em ni ang! Ka na zawk mai.

"A nih chu.."

"Thinrim lovin aw, ka chau teh a nia, vawiin chu i room-ah kan tawm nileng dawn em niang," ngaihsam hmel zeta atih chuan ka bu nghat nghat a, nizana ka pa nen kan inbiakna kha hrilh ngei ka tum ruh tlat a ni.

Dinning room kan chhuahsan hnuah ka room panin kan kal chho nghal a, a kianga awm reng theih ka châk hluah hluah. Chuzawng, ani chatuan dawn silo! Ka nu leh pa chhanhim hi ka tihtur dik tak a ni.

"Ka lo lêt leh chu i hlim hmel chiah lo, nimin ka kalsan lai che kha chuan i biang kha a sen țân a, i mitmeng lah a de deuh sar reng a, tuna i landan hi chu nizan lama thin hrep hmel i pu!" A tawnzau hâk hlipin khumah a bawkkhup thlawrh a, a dar veilama kutchuk chu ka hmu chiang ngei mai. A dum val kalh.

"Englo..Mouri, thil sawitur ka nei," inthlahrung dâkin khumah chuan ka țhu thla a, engtin nge ka sawi țan ang.

"Sawi la.." tiin arawn țhu chhuak a.

"Ih..Ka pain pasal nei turin min tia.." ka ti sap a.

"Chu chu engtin nge a nih theih? I pasal tur chu i duh thlan a ni dawn lo em ni?" Bung nghata atih chuan ka meng khup lap a.

"Hmanzana in rawn zaina Enchante Hotel kha ka ta a nia," ka'n ti hmasa phawt a.

"Chuan sawizawm rawh.."

"Ka pain kha hotel kha a leiba rulh nan a hralh tawh a, chuti chung pawh chuan a bâ chu ala tlâk lo fo va, a leibatna pa, MJS Company Chairman chu pasala nei turin min ti a ni." ka ti zuai ta raih a.

"Neih kher eng nge a țulna! Kawng dang a awm ngang lo em ni?" Bul hmuka min zawh chuan a hmel pawh ka en ngam tawh lo.

"Ka nu leh pain jail bang an zût tur hi ka ngaingam lova, inngaihtuah nân zanhnih hun min pe a ni."

"I inngaihtuah tawh em? Ngaihtuah ngai lovin neih chu i tum tihna nge?"

"Aih thutlûkna ka la siam lo, min pui thei angem?" Zah pawh dawn lovin ka ngen ta tawp a. A hausak hmel viau khan ka hria a, sum lamah min pui theilo mah se eng emaw tak tihdan tur a hriat ka beisei a ni. A nih loh paw'n min nei ta mai se...Hah! Eng nge ka ngaihtuah tâk..!

"Engtia ka puih che nge i duh a..!?" Mak atih hmel hle a, vawikhat mutdun vang maia ka ngen ngam chu mak ati pawh ani mahna.

"Ka hre chiah lo, leibâ kan rulh theih chuan pasal neih ka ngai dawn lova, i kiangah ka la awm thei dawn tihna a ni."

"Rulhsak tur chein min ngen deuh tihna a nia.." awih chiah lo niawm tak hian a lu a thing deuh nawk a. Hrehawm ka va'n ti tak.

"Ih..min nei mai rawh, pasal ka lo nei tawh a nih chuan tihdan kawng dang an zawng ngei ang,"

"Engmaw! Inneih lam ka lo ngaihtuah thleng pha miah lo," tiin khum ațang chuan a tho vut a.

"Affairs chauh a ni tak e, kan pahnih inkâr chu, ka tihpalh lutuk," tiin ka insût hraih a, ka rilru a nâ hle bawk. Ka mipa mutpui hmasak ve berin min nei hreh tihna!

"Chutiangin ka sawi loh kha, innei ringawt ila in buaina a fel dawn chuang em ni?" Ti a min zawh lêt chuan chhan ngaihna ka hre miah lo.

"Tu emaw ka nuna lo lut tur chuan ka nundan min pawmpui angai, chumi thei lo tan chuan a hahthlak mai thei a ni, tuna ka landan ang ringawt pawh i rilrem loh a tam zawk a nia," a ti sup a.

"Chutiang a awm pawh ka hre lo," tiin ka chhang vat a, a nui huk, a sam chu tuai zauhvin, "Entirnan, ka sam te, ka nunphung hrim hrim hi i palzam thei dawn em ni?"

"Ka hre lo le, tuna ka duh chu i kianga awm chauh hi a ni," zak chung chungin ka sawi chhuak ta a.

"I thianghlimna lâksaktu ka nih vang nge, rinngam mipa a min ngaih vang?" Engvanga zawhna min zawt reng nge maw a nih le, ka tân sawi a awlsam bik riauvin a hria nge? Min hmusit zawk pawh ka hre lo e a!

"A pahnih hnihin," ti a ka chhan chuan a kiai suk a.

"A pawi ka ti khawp mai, Amelia, min hmangaih lo tu tih hriat lutuk hi nupuiah ka nei thei lovang," ati ta a.

A hmel chu chiangtakin ka en a, kei hian ka hmangaih em ka hre lo, hmangaihna hi a awm tak tak anih chuan tuna ka tawn mêk hi hmangaihna chu a ni thei mai angem?

"Min neih chu i duh lova, ka taksa chauh a nimaw i lo duh?" Thinrim miah lova ka la sawi thei chu mak ka inti viau!

"Nichiah lo ve," ati leh lawi si a.

"I rilru chu ka hrethiam e, tunah chuan min chhuahsan thei tawh ang," zawi sapa ka tih chuan, "Ka duh hunah ka chhuak ve mai ang, lo buai suh," ati leh nghut a. Ka chhâng tawh lo.

Reife kan ngawih hnuah, "I neih tura an tih mipa chu tunge?" arawn ti bauh a. Chhan loh ka tum nâa ka țhulh leh ta zawk.

"MJS Company chairman, Jerome Evans," ka ti bung nghat a.

"Ok, Chu ngei chu nei la i tan a țha ang," tiin khuma a tawnzau chu banin a ha sawk sawk a, vawikhat pawh min en tawh lovin ka pindan chu a chhuahsan ta a. Chelh ka tum chhin eih lo.

Ka melh ngai melhin khumah reifê ka țhu a, ka nun buaichuar zet hi tlanchhiatsan ngaihna ka hre lo.

Zankhat thilthu leka ka hlauh tâk ka thianghlimna latu mipain min nei duh lo hi a na ka ti. Mahse, a nghawng tuar lêt ngam lo tur khawp a nêp ka ni lo.

Ka nu leh pa te thu ang ngei leh kan chhungkaw hmasawnna a nih dawn chuan Jerome Evans chu ka nei mai ang. Engmah chân leh tur chuang ka nei tawh hek lo.

Mourizo Soreno erawhin ka pindan a chhuahsan rual khan ka thinlung a chhuahpui tel ta a ni. Engtikah mah ka theihnghilh theiin ka ring lova.

'Asuntos, Asuntos(Affairs)' tiin ka phun sep sep a.

A vawikhat nan beidawn lutuk vangin ka mittui a tla ve ta....

End of Chapter-6

©<++++[BeckirafARenthleI]++++®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)