MIN HRILH RAWH

Moderator: Becky Rafa Renthlei

Becky Rafa Renthlei
Posts: 268
Joined: October 2nd, 2017, 12:52 pm

MIN HRILH RAWH

Unread post by Becky Rafa Renthlei » June 17th, 2018, 4:40 pm

MIN HRILH RAWH

Becky Rafa Renthlei


Inkhel en turin ka insiam peih ap tawh a, nimin lamah Valpuia nen kan inbe fel diam tawh bawk. Ani hi ka bialpa neih ve hmasak ber niin kei aiin kum riat laiin a upa nghe nghe.

Kum sawmhnih leh pakhat ka pum awrh chauh va, ka pumrua a len uaih vang hian ka kum aiin ka lang upa zawk daih tih ka țhiante'n min hrilh fo țhin.

Inti bialpa nei viau e ti lovin ka zum dûk a. Ka chhungte'n a lo len laia min chhaih fiam te hian tûm vuau chunga pindana ka luhsan chut chang a tam viau. Ani erawh tlangval puitling a ni tawh a, min hrethiamin a dawhthei angreng khawp mai.

Valpuia pa hi a boral tawh avangin a nu nen chiah an awm a, a unau dangte chu nupui/pasal neiin hmun dangah an awm a; a nu hi high school zirtirtu niin, amah hian B.com a zawh hnuah an Taxi-a khalh ve rih a ni.

Kei, ngaihzawng nei țantir ve ta chu ka zei loh mai bakah a chut chi ka lo ni ve bawk nen, ka hmeichhe țhiante mizia ang pu lovin ka nu zêm lem lo.

Thla li lai kan inkawp ve hnuah pawh khawlaia inzui te hi ka zak deuh reuh țhin a, a haw thei viau.

Nimin lamah inkhel enpuiah min sawm ve a, nidanga min hruaichhuah a tumin ka țan deuh țun țhin avangin tun țum chu ka hnial duh ta bik lo a. Tin, inkhel en kha ka lo châk ve sakhai bawk nen ka phur ta phian a. Îhe lo va 'aw' ka pawh chuan mak tiin a mengphar âwk a nih kha!

Valpuia lo thlen hun nghakin kan verandah-ah ka vei sek tawh a. Ani lah chu thehmeh ang maiin a reh vung vung si!

Ka thawmhnaw inbel hi a sawisel loh ngei ka beisei, hun dangah kha chuan kamis țial, taksa rem zaih inbela mawi ka intih viau laiin, ani erawh chuan 'rawlthar intivei i ang' a ti deuh tlat nia.

Ka converse bun lai hrui suih țha tura ka kun hniam lai tak chuan, "Maneih, tu nen nge inchhuah dawn?" Kan țhenawm tlangval Awmpuia'n min lo bia a.

"Inkhel en ka tum a, Valpuia ka nghak," amah en lem lovin ka chhâng liam satliah a.

"I bialpa kha maw?" Nui vur vur chunga a tih chuan lei ka chhuahkhum zauh a. Min chhaih a hrât mai bakah ngeiawm deuh deuh hian min fiam ziah zel.

"Ka rualin kal mai la, inkhel an țan țêp a nia," a tih chuan ka sana bun lai bihin a sawi dik chiah minute nga bak a awm tawh lo. Valpuia pawh nghak tawh chuang lovin Awmpuia bike-ah chuan ka lawn ve ta ringawt a, tifuh intizet hian a nui kur kur lehnghal a..

A hmun kan thlenin inkhel chu an lo țan daih tawh a, țhutna awl a váng angreng phian. Awmpuia'n ka kutah vuanin mipui karah min luhpui ve sawt sawt a; ṭhutna tur kan hmuh takah chuan bet lo zetin ka țhu ve ta nge nge a, ka rilruah Valpuia bak a awm lo.

Min lo sawm leh si a nih chuan a lungawi lo teh ang chu.

First half a zo va, Valpuia zawngin ka hawi kual rûai a, a lokal ve tlata hriatna ka neih chu le. Gate bulah amah ang deuh ka hmu ta rêng a, midang pawh ngaichang lem lovin ka'n au nghek mai a, ka bula țhu te chu an nuih a za vak lo.

"Valpuia ka hmu a, ka'n hruai lawk ange." Awmpuia min chhânna pawh ngaithla tawh chuang lovin gate lam ka pan nghal nal nal a.

Ka hmuhna lai ka thlenthlak chuan ka hmu ta awzawng lo mai! Nichin mai khan ka hmu ve ngei si a, mipui an tam bawk nen ka hmusual zawk em ni? Ka lû thing deuh nawkin ka zawng kual leh chiam a, a tawpah phei chuan ni a sa viau bawk si lungawi lo ru deuhin haw ka tum ta a. Inkhel en pawh ka tui tawh nek lo ve a!

Zanah a lokal a nih vaih chuan 'a châk lo viau ang' tiin ka insawh tau nghawng nghawng a. Awmpuia pawh ngaihsak tawh lovin ka haw zui daih nia.

TV enin kan țhu țhap a. Kei, ka nu leh pa, ka nau chiah Duata nen football kan thlir a; zan danga a lo kal hunah pawh a la rawn lang ta lo fo. Vawiinah ringawt pawh vawi eng emaw zat ka call tawh a, a tlang thei țhak lo a, a tlang ve chhunah lah a pick up thei der lo. Ngaih țhat lohna em em pawh ka nei chuang lo, dar kua a rik takah chuan mu turin ka pindan lam panin ka kal ta a.

Kawngkhar kik ri vak vak ka hriat chuan ka țhu chhuak hlawl a, tun ang hunah tu chu nge mawni le? Ka tho chhuak duh chuang lova, ka nu leh pa an awm tho ka rin vangin ka mu țha leh ngat a, ka inlukhup nghal hmak bawk.

"Maneih," Ka nu aw ring zet ka hriat rualin rang fahranin ka inperh tho a. A râwl a ring ve ropui si, tho duh lo mah ila ka chhuah hma chu min ko leh ngat ngat peih ang chu maw le. Fanu mal ka ni tak nâin min duat khuchûk lo ve khawp mai.

"Lalneihsang, i harh reng tih ka hria," ka ngawih reng avang chuan ka hmingpumin min ko leh a.

"Eng nge?" Vin fêin ka chhâng a. Ka pindan kawngkhar ka hawn rual chuan ka nu hlauthawng hmel nen kan inhmachhawn ta rân a.

"I țhianpa Valpuia a accident a nia, tunah civil hospital-ah nikhaw hre lovin a awm," ani leh ni lo anga thlabar hmel a put ve teh khiah chu!

"Maw!?"

Ka awih lo hmel a hmuh chuan ka bânah vuanin sitting room lamah min kai phei dáwr dáwr a. Zuala, Valpuia țhianpa lo țhu reng ka hmuhin a ngaihna hre vak lo hian ka melh a.

"Insiam la ka rualin lo kal ve nghal mai rawh." A tih chuan che lovin ka ding hle hle ringawt a.

"Ih..I ti tak tak em?"

"Maneih, fiamthuna chi a ni lo tih i hrethiam ve thovin ka ring." Tiin a ding zui nghal a, thil awmzia sawifiah pawh a tum îk lo.

"Insiam la kal ve nghal rawh, tunah dar hnih a ri tawh a, khawvar hunah rawn kal kan tum dawn nia," ka nu'n a ti nghal zung zung a.

Ka thawmhnaw thlâkin Zuala rual chuan damdawi in lamah kan kal ta a.

"Zual?"

"Umn.." A motor khalh lai chauh ngaihtuah niawm fahran hian kawng chu ngun takin a en a, biak a huphurhawm ngawih ngawih.

"Engtia accident nge?" Ka tih chuan min rawn melh zauh a, "Mit a hmutute sawi danin, niminah inkhel en tumin a chhuak a, short cut ațanga bike pakhat chak deuha rawn tlan sut a hlauh lutukna lamah kawng thlangah a tlan liam ta niawm tak a ni."

"Bike khalhtu chu a na em?" Tia ka zawh chuan, "Engmah chu lam chu ka hre lo, a call list-ah i hming a awm tlar dul a, vawi eng emaw zat rawn biak che kan tum a, kan beidawng țhak," lungawi vak lovin a ti leh a.

Ni dawn tak, nizanah ka phone ka switch off daih alawm le. Inthiam lo zetin ka ngawi ta reng a, min be chhunzawm tawh bik lo.

Damdawi in kan thlen chuan Zuala chu ka zui ve dat dat a. Mi ṭawngtam a nih loh bâkah a țhianpa chêtsualna hian a țhâwng viau a nih ka ring, ka biak loh chuan engmah sawi tum hmel a pu lo.

Cabin pana kan kal lai te chuan hlauhthawn ngaihna vak pawh ka hre lo. A chhan pawh ka la awih thei tlat lo va, amah ka hmuh hma loh chuan rin harsa ka ti rih a ni.

Khuma Valpuia mu chu enin sawi tur reng reng ka hre lo va. A biang vûng leh duk chur chuan amah anna pakhatmah a nei lo va, a hmui bawr vel pawh a pem nasa hle a, oxygen an lo pe mek bawk.

Awih loh pawh tum ila awih loh chi ni nghal lo chuan! Khum bula țhutna awlah Zuala nen kan țhu ve ta a. Nu Siami (Valpuia nu) chuan meng sen râm chungin min rawn melh a, a țap nasa hle a ni tih ka lo hrethiam mai. Kei erawh ka țah a chhuak hauh lo thung, 'A la thi êm hleinem' tiin ka inhnem ve ngial a, ka hamhaih a ni zawk mah.

Hospital-an thlen tirhah min hrilh nghal an tum thu leh min biak theih loh vanga Zuala rawntir a nih thu a sawi lai chuan ka lo inthlahrung hle a. Kei ve tehlul min ngaipawimawh hmasa tih ka hriatin ka lawm ru viau lawi si.

An inah hian vawikhat chauh ka la leng a, chuti tehchiamin Valpuia nu hi ka nel lem lo. A sual ka tihna a ni chuang lo va, innel tur êm chuan kan inbe lo ka tihna mai a nia.

"A englai nge a sawh ber le?" Nu Siami ka zawh chuan, "A kawchhung lam a sawh na deuh a, thisen unit thum an pek zawhah Aizawl lamah kan inphur phei ang," a ti a. Valpuia dinhmun chu a țha vak lo a ni tih zawh nawn ngai lovin ka hrethiam ve mai.

Zing lam dar thum bawr velah mutchhuakin min zem chiai chiai a. Valpuia mutna sir awl lai chu bawhin a hmel chiang takin ka en a, hetiang hi a lo thleng dawn a ni tih hre lawk ila chuan min lo sawm turin ka ti miah lo ang maw le. Ka âwm tâwt ru țûn tih reh tumin thâwk ka la ham ham a. Ka phone-ah lai a rik chuan ka phu deuh zawk a, ka kekawr ipte ka zen nghal thuai a.

'Valpuia call maw!?' Eng nge a awmzia? Zuala ka en vat a, maimitchhingin bang a nghenga engmah a khawih der si lo. Zawitê a, "Hello," ka tih chuan a reh vung vunga țawng thawm hriat tur pakhat mah a awm lo. Tu'nge a phone kawlsak ang? Amah lah ka bulah thichhãwngin a awm a, atu chu nge mawni le?

Ka off hnuah pawh ngaih țha tehchiam lovin ka ngaihtuah zui ngut ngut a, midang han zawt dawn ila ka ngam chiah si lo. Rilru nuam vak lo chung chuan ka țhut dan siamremin Valpuia hmel bawk chu ka thlir leh ta a.

"Maneih, pawn lamah kan chhuak harh ve lawk dawn em ni ang?" Zuala'n a tih chuan î he lovin ka tho chhuak nghal a. Helaia țhut reng pawh hi ka tan a nuam lo, tumah an țawng lova, a nu ni se a khât tâwkin a inhru leh zauh zauh țhin bawk nen hmuh a nuam lo riau.

Civil hospital kawtah kan teikual ta a, khua a var ve dawn hnai tawh. Tihtheih ka nei tlêm ropui bawk si, hawsan ngawt dawn ila ka rilru a nuam chuangin ka ring si lo.

Ka rilrua zawhna awm reng kha Zuala hi zawt ta ila, "Zual, Valpuia phone kha tunge kawl?" Ka tih chuan dar san âkin, "Nimin kha chuan a nuin a kawl chiang a, tunah tu'nge kawl ka hre miah lo," tiin a țawng zawm tawh lem lo.

A nuin kawl ta se nichina min lo call-tu kha nu Siami chu a ni lo phawt. Ka bulah a fapa kut vuanin a țhu tlat a, phone a keng lo tih ka hre ve chiang si a.

Chutia kan teikual sek lai chuan cabin lam ațangin țap rawih rawih thawm a lo ri chhuak a. Zuala pawh ngaichang lovin chu lam pan chuan ka tlan chho nghal hlawk hlawk a, ka hnungah Zuala pawh hmanhmawh fêin a rawn kal ve bawk.

Valpuia thâwk dan chu mak tak a ni! A âwm a insêp dawrh dawrh a, harsa tih hmel zetin a thaw hrawp hrawp bawk. Doctor leh nurse-te chuan theihtawp chhuahin an buaipui a, a 'heart rate' leh Bp te an check-sak zung zung hnuah kan hmuh theih loh turin an zar hliah ta daih a.

Ka hlauthawng hmel a hmuh vang nge, Zuala'n ka darah vuanin zawi sup hian, "Intipachang hram hram rawh, Pathianin kan țhatna turin engkim a thawk țhin tih a nih kha," tia min hnem lai chuan ka țah a chhuak tlat a, ka mittui tla tur chu duh lovin ka khap sak sak a.

Nu Siami erawh chu a inhnit leh faih țhin a, a awm tho ve, a fapa kha a ni miau va. A unau dangte tunah kalkawngah an rawn thang mek a, pa an nei tawh bawk si lo. Mahni chanah han indah chhin ila a thlaphan dan tur in hriatthiam mai ka ring.

Chutia an buai laih laih lai chuan kei erawh chesawn thei lovin ka dinna ngaiah ka ding tlawk tlawk a. Cabin kawngkaa țap chunga nu tê lam ngo ving veng, hmel fel zet lo lut chu ka mitsirin ka hmu reng a.

Valpuia mutna lamah pheiin a va țap ta chiam a, hnai zetah kunin a chalah te chuan a fawp a, tunge maw ni reuh le? Kei aiin a upa fê ang, Valpuia nen inrualkhat vel an nih ka ring mah zawk.

Ka mitmeiin Zuala chu tunge a nih ka zawt a, a mitmeng buai deuh nak danah an chhungte a ni lo tawp tih ka rin hriat mai.

Khua a var fel tawh a, eng êm a ti ta lo. A thâwk dan tlema a zia tak deuh avangin coffee in turin kan chhuahsan ta a. Kha nu erawh kha chu Valpuia kut vuanin a la țhu ta reng a, hmuh a nuam viau lo.

Zing dar sarih ațangin thisen an pe țan dawn chauh va, chu pawh petu tur an awm mai loh vang a nia. Hospital blood bank-ah a milpui a lo awm lo kher bawk nen an veng lamah pe thei tur an zawng leh tê tê kha a nia, thisen an pek zawh hian Aizawl lam panin an kal dawn a ni.

Coffee leh biscuit tam tham zet ka ei a, ka ril lo țamzia Zuala'n a hmuh chuan, "Tiang tih hriata a hma khan lo inpui daih tur che a nia, i sawi ve mai lo va," nui suk chunga a tih chuan, "Ka dan ve hrim hrim alawm, ka hmel en ai hian ka ei thei ve fe a nia," fiamthuin ka lo ti ve a.

"A țha, ei theih chuan ei hmiah hmiah mai tur."

"Nichina lokal kha tunge?" Ka zawt ta nge nge a.

"Seni anih kha, kan veng a mi Valpuia ex- a nia," a tih chuan ka rin dan a dik tih ka hria, a awmdan leh a mitmeng ațang khan chhungte kan en dan nen chuan a danglam deuh tih kei takngial pawhin ka lo man thiam ve tlat.

"A nih chu, an ințhenna a rei tawh em?"

"Rei ve tho, in inkawp hma lawk khan an ințhen a," ti a min chhan chuan ka ngawi zui ta vang vang a. Min lo kawp ru reng te hi a ni zawk mai lo maw? Â chu em zawng a nih ka ring lo leh deuh a lo leng ngun tlauh tlauh em mai.

Cabin-a kan luh leh hnuah Seni leh nu Siami chu zawi tê têin an lo phun sep sep a, an thusawi ka hre phâk chiah lo.

Țhutthlengseiah Zuala nen ngawi rengin kan țhu a, Valpuia hnaihah pawh ka va kal ta chuang lo. Mak takin rinhlelhna rilru ka pu ta tlat a, a chhan erawh ka hre lem lo.

Min ngaihzawn țan tirh lai khan ka duh hauh lo va, a chhan pawh ngaihzawng neih kha ka la ngam loh mai bâkah zirlai ka ni a, ka zirna tihbahlah ka hlauh vang a ni pakhat. Zantin a lo len tâk tlut tlutah chuan min duatin ka duhzawng a hrethei ropui si a, rei vak lovah ka rilru a la ta thuai reng a nih kha.

Amah hi mipaah chuan a sâng pawl chu a ni ve ngei ang feet ruk a tling thuak a, chêr lam deuh ngo teh hluak lo a ni a, háng tihtur chu a ni leh si lo. A hmelțha tia sawi tur pawh a ni chuang hauh lo va, ka hmuh tirh phei chuan kei aiin a upa deuh bawk nen 'U Valpui' tiin ka ko a, Michael Ramengmawia tih hmingpu si hian Valpui tia an ko daih hi mak ka tih thu ka hrilh nghe nghe. Sap hming te chu an telh ve khanglang bawk si.

Zantin eitur leh eng ilo fahrah tê tê ka duhzawng hi a lo keng ziah a, kei ei phung ngaina ta chuan a lo ken ang ang chu zah țit țêt va nei suh, ka ei fai vek zel.

Zankhat pawh ka chhungte an mut vek hnuah min fawh ve ngei kha a tum ta alawm, ka lo duh îkhaw lo mai. Theihtawp chhuahin ka țang ta tehreng a nih kha, ka lian ve uaih bawk si a, chuti mai chuan min fawp thei ta bik lo.

"Maneih, eng ati nge i țan țung a?" Nuihza insum zeta a tih chuan, "Ka ten deuh," tiin ka chhang pek a, min thlah rang teh a nia. Ka ten chu thuhran, lo dawnsawn dan tur ka thiam teuh lo mai.

Chumi hnu chuan lungawi fahran lo hian a haw ta a. Zan thum ngawt a rawn lang ta lo, chutia a reh takah chuan nuam ka ti leh si lo va, whatsapp ațangin ka va be dûk dûk a.

"Eng ati nge i lokal duh tawh lo va?"

"I sual êm a nih kha."

"Eng nge ka sualna?"

"Ka fawh pawh i duh lo va, min tentu hmeichhia hnaihte chu a âtthlâk em mai," a rawn ti kher a.

"Ah, lokal rawh ka duh tawh ang," tia ka va chhan leh hnu chuan lungawi takin phone kan dah ta a.

A tuk zanah a rawn kal leh ta ngei a, ka lo tiam tawh angin a vawikhat nan mipa puitling experience nei chinin min fawp ve ta, khami țum kha chu aw, ka zei lo buru ve viau a niang, min zirtir chawpin chipchiar fêin min hrilh ta alawm. Hmui thip hlurin kan inthlah liam tâk kha.

Hmeichhe țhian aia mipa țhian ngaina chi ka ni tlat a, inngaihzawnna lam khan ka rilru a luah tam lo khawp mai; Mahse, Valpuia nen kan inkawp tâk chinah chuan ka boruak hap pawh a sâng ta deuh! 'Hma i sâwn khawp mai' nui vur vur chunga sawi ni mah se ka zak ru viau tho.

Ka mipa țhian kawmte ngaithei lo angin a lang lo nâ a, a lawm tehchiam lo tih erawh ka hria. "Țhian kawm tam lutuk a țha lo a nia," tiin vawihnih chu min hrilh ve a, ka zawm eih lo.

Ka birthday min lawmsak ve ngeiin, Silver țhi min present a, ka duh hleuh hleuh teh a nia. Ka zirlaiah thiam loh ka neih pawhin ka zawt mai zel a, thiam thei lo min ti ve ngang a ni ang, "Lehkha zir lovin ka helper-ah țang rawh," min ti fiamthu țhin a, ka huat tawk a tling ve em em a(h).

Ka bân dinglama sana ka bun tlat hi mak a ti a, "Eng vanga dinglama sana bun tlat nge i nih?" Ka bân melh zawk paha a tih chuan, "Dinglam aia veilam ka hmanthiam vang a nia."

"Daw suh, i dinglam ngawt alawm i hman le," min tih chuan, "A pahnihin ka hmang thiam ve ve," tiin ka chhang a.

"Lalneihsangi tak hi chu aw," tih pahin ka chalah a kuk țawlh a, ka haw ngam miah lo.

Chhiatkhum pahin a tukkhumah ka nem bu lawp a, a nui ve tawp. A bialnu ni ve si hian nau anga min en deuh châng pawh a tam mai.

Ka thinchhe lutuk leh thin tertek ka nei tih a hriat vangin min dawhthei phian a, kei lah hian kutthlâk țulh țulh hi ka ching lehnghal a. Chung hunah chuan țha têin 'Hmeichhia chu hmeichhia anga awm mai tur mipa kawm tam tawh suh,' tiin min hrilh dam thlap zel.

Zankhat chu ka nu leh pa phalnain min hruai chhuak ve a, a Taxi-in kan leng kual ta alawm. Mipa leh hmeichhia a fâla awm dun ta chu min fight ve ta a, Kei lah thih thâin ka lo țang nasa mai si, thlantla hluamin kan inchai ta tehreng a nih kha. A tawpah phei chuan ka thinrim tawh lutuk a, min thlah kha tlawmngai a inti deuh nge ni ka kekawr a pawt hlip a; chu chu duh lovin ka bula lung lian vak lo chharin a bekah ka chhu ta țawlh a, min thlah rang teh a nia.

"I va'n kawlh tak!" A bek tuai vut vut chunga a tih chuan, țap deuh purin ka thova, ka kekawr hâk lai siamțhat paha rum tawka melh chungin, "Kawlh lo ngaizawng mai rawh," tiin ka kal tau sawk sawk a. Mi vengah daih min hruai si, thim zingah ka kal lui ngât ngât a, ka hnungah Taxi-in min rawn zui a.

"Lo chuang rawh," ka chhân duh loh avang chuan horn a hmet ri tuar tuar a.

"Maneih, a zahthlak a nia lo chuang rawh, miin an hmuh che chuan mak an ti lutuk ang che," a rawn ti dam thlup a.

Chutah erawh lungawi chiah lovin ka chuang ve ta nge nge a, min biak pawhin ka chhang ta lo. Tûm bûrin pawnlam ka thlir daih a, min be chhunzawm tawh bik hek lo. Kan in kan thlen hnuah min hruai lut leh thlap a, ka nu leh pa te an lo meng tawh lo hlauh chu a vanneih phah ta a ni. Chuti ni lo se chuan min tihdan kha sawi ka tum ve chiang em mai.

"I thin a la rim em ni?" Ka bulah lo țhuin min kuah a tum vei rawk a.

"Min khawih țhak suh, Michael Ramengmawi."

"Ehe! Ka hmingpumin min ko vel," tiin a thinrim duh miah lo maw le.

"Haw rawh," tih pahin ka țhutna ațang chuan ka tho va, min chelh tumin a bân a phar uk a, rum mangkhenga ka melh tâkah chuan zawimuanga a bân chu dahthla riai riaiin a tho ve ta a.

"Thinawrh, naktukah thinrim tawh miah suh," kawngkhar lam pan pahin a kiai suk a, țawngkam țha pawhin ka thlah ta lo.

Ka thinchhiat bakah khawlaia min kaih ve deuh a tum te hian ka melh rum nghal ringawt zel a, engtinmah min ti bik lo.

Whatsapp khawih hi ka hrat êm avangin a ngaithei bau lova, min khak ve zauh zauh ta mai. Kei paw'n a thuzawmin a hmuh lai chuan phone ka khawih khât ta pharh nia.

Min duattu thuawih hi chu a lo har lo a ni a nge.

Ka nu leh pa hian an ngaina ve viau a, mi thunun theihna riau a nei, kei paw'n ka nungchang țha lo ka sim ve hret hret a, mi pawi sawi zawngin a awm lo bawk a. Tin, hmeithai fa a nih vang nge inthlahrun a tina hle bawk, ka khawngaih țhin. 'I duh vanga hmeithai fa ni i ni hleinem' tia ka hrilh țum phei chuan mit khap miah lo hian min en a, "I thilsawi tawhah chuan a țha ber a la ni hial ang" tia nui sukin min kuaha a nuam ve viau.

Zankhat a lo leng chu ka nuin, "Maneihi chu a tleirawl laiin chakai chhum turin ka tir a, ka chhuahsan ta daih si. Ani lahin tihhlum dan tur hre lovin a lo vaw pherh vek pek a," tih thu a hrilh chuan Valpuia chu insum thei lovin a nui nghek a, kei ka zak ve bawk nen ka room-ah ka luh tauh san ta daih a. Tun thleng hian min fiam nan a la hmang fo țhin.

Chutia kan tâl kual vel mai mai lai chuan thla li kan inzui tling ve ta reng mai, vawikhat mah min fight chhunzawm leh ta lo. Mahse infawh lam a uar thung.

Ka ngaihtuahna kawm a ka lo ngawih reng lai chuan ka phone ah lai chu a lo ri thut a, ka phu dawrh thei nia!

"Mate, kan lo thleng tawh a nia, khawilaiah nge in awm?" Ka nuin a rawn ti lawng lawng a. Kan awmna lai ka hrilh hnuah hmuak turin ka chhuak ta a.

Diktak chuan ka awm dan hi a nuam viau lo. Seni lo thlen hnu ațang khan nu Siami tak ngial paw'n min be tawh lo va, ka phût sang lutuk nge chu ka hre lo va.

Ka nu leh ka nau Duata an lo thlen chuan pawisa min pe ta a. Nizan khan cheng za chiah ka neia dil nachang reng reng ka hre lo, a âtthlak țhin teh e.

"Chanchin rawn sawi ve tal tur a nia," ka nu'n a tih chuan ka inthiam lo viau, nizanah min hrilh ve reng si a, a nachang ka lo hre leh pek lo.

Ka nu leh nu Siami chuan eng emaw an sawi sap sap a, Seni awm ve reng kha ka hmu mawh ru riau, min en leh zuk zuk țhin tih hre tho mah ila ka haider lui ve tlat.

Aizawl panpui tura an sawngbawl lai chuan an bungraw ken tur ka lo khungkhawm ve a. Kei erawh chuan ka zui ve dawn lo va, ka pa'n a remtih loh mai bakah a mawi chiah lo deuh. Chhungkua kan ni lo va a bialnu ka ni tak nâin kan inngaizawng tih hria an tam lo.

Valpuia te veng ațang hian kan veng hi minute sawmpanga tlan vel a ni a, Zuala, Seni leh Valpuia te hi vengkhat an ni thung.

Ambulance-a an hlan lai chuan ka mittui a tling pam a, Seni'n a zui ve dawn tih ka hriat phei chuan ka lo thinrim ve em em ringawt a.

An tum dan aiin an chhuak tlai ta hret bawk nen Aizawl an pan meuh chuan chawhnu dar khat a ri tawh. Keini pawh kan haw ve ta a, rilru a hrehawm vang vang khawp mai, hei aia upa leh chinchang hre ve viau tawh chu ni ila ka zui ngam ve mahna.

In kan thlen chuan ka room-ah lut tlang nghalin khumah ka țhu hnawk a, 'Lalpa dam takin lo hruai haw rawh' tiin ka țawngțai nghe nghe. Thi tur angin ka ngaihtuah phal lo va, ka hmangaih em chu ka hre lo nâin a tel lova awm erawh ka zuam si lo.

Ka chau ve deuh bawk nen ka thawmhnaw pawh thlak tawh lovin khumah ka mu ta daih a, Valpuia hmel mitthla chungin ka chhing ta chial a.

Ka tuihâl huam huam vangin ka mutui lai ka harh hlawl a, ka mumang tehnuai kha, sawithiam loh eng emawni tak hian ka chhungril fanin ka awm a nuam lo ringawt! Ka khum mawnga sana intâr ka en chuan zan dar sawmpakhat a pel tawh. Tuma'n min kai tho lo nge ka harh thei lo zawk?

Khum ațanga thovin khum bul dawhkana ka tui inchhawp chu ka in khawlh khawlh a. Nilengin engmah ka ei lo va ka pum a ri ruk ruk reng mai, ka nu te tehreng pawh hi thil ei tur tal a min kaihthawh ve ka ring asin maw le.

Chokaah lutin eitur ka dap a, ka duhtawka tam ka ei hnu chuan room-ah ka lut leh a. Valpuia chanchin eng emaw tal hriat tur a awm tâkah tiin ka phone mu chungin ka bih leh ta a. Zuala missed call vawi ruk a lo awm a, ani khan a zui ve kha a nia; mahse, min biak a tum hun hi tlai lam vek a ni.

Whatsapp-ah lutin Zuala chu ka be ta a, call hman nan a tlai ka tih deuh tawh vang a nia, min chhang thei țhak lo lehnghal!

Ka mutchhuak a reh vek a, ka ngaihtuahnaah Valpuia bak a awm thei chuang lo, a phone kha tunge kawl ang tih ringawtin ka rilru a luah a, ka call leh hram pek.

"Hello," Hmeichhe âw ka hriat chuan ka thaw huai a. A û Serchhip lama mi kha a kal ve in ka hria a, chu chu a nih ka'n ring deuh ringawt a.

"In thleng tawh em?" Ka zawh dan teh ngawt chu le.

"Tunge aw?" A rawn tih tâkah chuan mak ka ti deuh! Ka number te chu a save ve awm reng si a.

"Maneihi, tunge ni zawk âw?" Tia ka zawh let tâkah chuan, "Seni," ti hmakin phone a off zui daih a. Khanu khan a phone a kawlsak a maw? Eng nge a awmzia, a nu leh a û an kal ve reng a, ani'n a lo kawl ve ngawtna chhan tur ka hre miah lo.

Ka thinrim ru nghal et et a, a bialnu hlui a nih mai piah lamah chanchin hre duha zawt ve na nâ na a, khatia phone a off deuh kher kha ka ngei viau.

Muhil thei lovin ka tal sek a, Valpuia hian min kawp a nih ka ring tulh tulh. Amah zawt dawn ila tihngaihna a awm rih si lo, ka tho chhuak leh ta nge nge a.

Tukverh bulah dingin pawnlam ka thlir vang vang a. Kan in piah lawka Biak in panna step-a mihring țhu niawm tak ka hmuh chuan maktiin ka melh reng a! Tun ang hunah tunge țhu peih ang? Thlasik lai a ni a, pawn lam a vawh tehreng nen!

Streetlight eng chuan chiang takin a țhutna lai chu a chhun ruih a, a hmel erawh ka hmu thei lo, hnuailam a bih tlat a.

Tukverh hawngin en chian tum chuan ka dâk chhuak ta nge nge a. Chutia thawm ka neih tâkah chuan chupa chu ka lam hawiin a rawn dâk a, Lalpa leh!
Michael Ramengmawia a ni chiang lutuk, ka mitvai a nih ringin ka khap sak sak a. Ani paw'n chiang zetin min lo melh a, ka tiril a khur nghal dar dar mai.

Diktak chuan mi dawihzep ka ni lem lo; mahse, Aizawl an panpui tih ka hrechianga ka mit ngeiin ka hmu bawk. Engtin nge helaiah hian a lo țhut theih?

Hmanhmawh zetin tukverh chu ka pawt khar țhuai a, kawrlum ha sawk sawkin pawnlamah ka tlanchhuak ta ringawt a, ka hlau eih lo.

Kan in kawtah reilote ka ding zawk a, a la țhu reng! Min ko lo va, min en reng ringawt. Chak fêin a lam pan chuan ka tlan ta a, "Valpui," min hmu tih hriat zet hian a meng deuh hrâ a, engtia lo țhu ringawt nge tih ngaihtuah zui tawh lovin ka en ve reng ringawt.

A bul ka thleng chiah a, streetlight a thim ve nghal hmak, ka phone lah chu room-ah ka dah daih si.

"Valpui," tia ka koh leh chuan a reh țhiap mai. Kal mai ka la tum hauh lo va, vawihnih dang ka koh leh hnuah pawh min chhâng ta chuang lo. Chutah meuh chuan hrilhhai zetin thim zingah kâwng dawmin ka ding reng a, ka ngaihtuahna vak kual zut zut thunun tumin ka lu ka thing deuh nak a, streetlight a rawn eng ve chiah bawk.

Valpuia awzawng a lo awm tawh lo!

Ka hmusual lo tih ka hre ve chiang bawk. Khawlai dung reh ruihah chuan keimahin ka ding ta reng a, a bo ngawtna chhan tur ka la hre ta chuang lo. Lungawi lo ru zetin in lam ka pan ta hna hna a.

Ka khumah ngawi rengin ka țhu tlawk tlawk a, ka ngaihtuah ngun poh leh mak ka ti tulh tulh! Chutia ka indawm kun reng lai chuan ka phone a ri thut a, ka phu zawk thei nia. Zuala a ni tih ka hriat takah chuan ka chhang ta vat a.

"Biak tlang i va har ve?" A rawn pawr viau.

"Nang pawh, eng nge chanchin?" Ka tih chuan, "Kan rawn let mêk," Zawi raiha tiin hospital an thlen hnu rei vak lovah Valpuia a boral tih leh tunah Aizawl an rawn chhuahsan chiah tih a sawi chuan ka mit sulh a, Valpuia a thi maw?

Zuala țawng zawm mawlh mawlh pawh hre reng mah ila, eng nge a sawi ka hre ta lo, ka â huih ni berin ka hria.

Engtia awm tur nge ka hre lova, ka țah lah a chhuak hek lo. A hlim hmel leh duatna mitmenga min en țhin laite kha ka mitthlaah a rawn lang zut zut a, thi tur êm chuan ka lo dah thleng pha lo, ka ring phal thlawt lo a ni ber mai.

Khumah bawk thlawpin thawk ka la kâwk kâwk a, nichina ka hmuh kha tunge ni ta ang?

A thih hun darkar ka hre lo nâa, amah ani tih ka mit awmna ka hriat chian tluk zetin ka hrechiang a ni.

'Valpuia a thi' tih ringawt chu ka ngaihtuah a, ka chhungte hrilh nachang pawh ka hre lo. Zinglam dar ruk a rik thleng pawh chuan muhil si lovin khumah ka bawk reng a, ka rilru tawt leh ping up chu tihkian dan ka hre miah si lo. Țap chhuak thei tal ila a zia deuh mahna.

"Maneih," ka nu min kohna pawh chhâng lo chuan ka en ngai ka en tlawk tlawk a, Aizawlah tal khan lo zui ve ila țha tur a nia.

"Maneih, Mate..?" Kawngkhar ka va hawna ka nu hmel ka hmuh rual chuan ka țap chhuak ta phawng a.

"Engtizia nge? Nâ i nei em ni?" Ka nu âw a hlauhthawnna leh mak tihna lo ri chhuak chu ka hre rang kher mai. Hlauthawng pawh nise ka dem miah lo, a fanu hi ka țap khât ve êm asin. Ka naupan zual lai tih loh kha chuan ka țap uluk ngai ta meuh lo.

"Valpuia a thi..!" Ka inhnit nghal hlawp hlawp a.

"Engtikah, tu'nge lo hrilh che?" Ka sam chûl hliau hliau paha a tih leh chuan, "Zuala'n min lo hrilh a, an lo hawpui mek."

"Sh..i duh tawk khan țap rawh, kan chunga thilthleng te hi kan duh vang a ni lo fo va, Pathian remruat a ni ti ila kan hahdam ber mai, tute pawhin thihna kan la hmachhawn țheuh dawn a, chumi a lo thlen hma chuan kan inpeih a hun reng a ni." A ti deuh duah a, dik ka ti viau. Engtikah emaw chuan kei ngei pawh hi ka la thi ve dawn alawm.

Ka nu âwm nghenga ka țah fê hnu chuan ka thawl hawk thei nia!

"Inbual la, ruang lo thlen hmain kan phei ve dawn nia," min hrethiam taka a tih takah chuan bathroom lam ka pansan ta a.

Ka inbual chhung zawng pawhin ka rilru hmun dangah ka dah thei lo, ka bialpa leh ka țhian, min tihlimtu ber a ni asin.

Ka inbual zo towel ka ban lai tak chuan ventilation chu a lo inkhar țhuai a, ka țê nghal țhawt! Kan khar phui ngai lova, a sâng viau bawk.

Min bihthla an awm ti ila, dâwt ka sawi tihna a ni mai, chuti maia lawn thlen zung zung theih ni nghal lo chuan, thliin a rawn beng a nih ka ring ta zawk a.

Ka inthlak zo khumah țhuin hmai ka hup vang vang a, vanduai ka inti hle bawk. Ngaihzawng neih lêk loh tur a nia te ka ti thul, hlim taka nun hmang țhin, thawveng leh enghelh nei lo fahran țhin kha Michael Ramengmawia vangin vawilehkhatah ka hrehawm ta vek a nih hi.

Tukțhuan kan eikham hnua Zuala'n min rawn biak leh chuan an lo thlen har a rin tawh loh thu leh Valpuia te in lama lo awm turin min hrilh a. "Intipachang hram hram ang che, i rilru kha ka hriatthiampui che a nia," dam thlapa a tih chuan ka zia huai thei.

Ka nu leh pa erawh kan rualin an lo kal ve dawn lo va, Duata nen kan kalsan ta a.

Valpuia te in kan thlen chuan hmelhriat hmuh tur an vâng pharh mai. An vengah ka kal tam loh mai bakah țhian mumal sawi tur ka nei lo a, Zuala leh amah Valpuia hi anni deuh tlawng a.

Inchhungah pawh kan țhu lut ve ngam lo va, YMA bench pawna an hun tlar dulah chuan kan unauin kan țhu ve ta rân a. Ka hawina lam apiangah a hmel ka hmu a ni ber mai, min en rengtu awm tlata hriatna ka nei leh tlat pek a, nuam ti lo chung chungin ka hawikual ve ngial. Tumah min ngaihven hmel ka hmu lo.

Ruang chu a lo thleng ta. Chhungkhat an ngah bawk a zuitu an tam kher mai, ka țhutna ațangin ka ding chhuak hluai a, va pan hnaih ka tum chuan ka bânah Duata'n a lo chelh vat a, kan pahnihin 'Morgue Van' lam chu kan pan dun ta a.

Țap thawm a ri chuah chuah a, nula leh tlangval lo awm ve te pawh țap lo abar an awm pawh ka hre lo. Keimah ber hi țap lo awmchhun ka ni hial ang. Ka âwm erawh hnawhtu awm ang maiin a tawt leh up up thung.

Kuangah an dah fel thlap tawh a, Zuala meng sen râm ka hmuh chuan ka lainat tak zet. Min hmuh rualin ka lam a rawn pan a, țah chhuak insûm hmel a pu.

Seni ring fê maia a țap ri chuan min khei zar mai a. Nu Siami'n a bânah vuanin a hnar sen tât ațang chuan a țap nasa thawkhat ang tih ka hre ve mai. Min kalpelh lai te chuan rum fahran hian min melh a, a ngaihna ka hre lo viau! A pawi ka sawi awm ka hre hek lo.

'Inchhungah kan țhu lut ve dawn lo em ni?" Zuala'n a tih chuan ka lu ka thing ringawt a. A hmel hmuh chu ka duh, mahse, țap thawm khan min ti chau vek a, ka ni nghulh mai.

Ka lut duh lo tih a hriatin min nawrlui ta bik lo, Duata erawh a țhianpain a rawn ko hlauhva, "Mate, U Zuala a awm thova ka kalsan lawk dawn che a nia, ka nu leh pa an lo thleng țep." a tih chuan, "Rei suh u aw," ka ti liam puat a.

Ka chhungte ai pawhin tun dinhmunah chuan Zuala ka thlamuanpui zawk hial ang. A țawng duah lo nâa ka awm dan hrethiamtu ber a ni.

"Zual, eng ati nge Valpuia phone kha Seni'n a kawl tlat a?" tiin ka zawt ta nge nge a.

"Nu Siami'n a kawltir aniang ka hre bik miah lo, engah mah ngai suh."

"Valpuia puhchhiat ka duh viau lo nâ a, an awmdan hi mak ka ti!" Ka tih leh chuan, "A uchuak khawp a nih hi, nakinah pawh i rilru natna tur i la hmu dawn chauh a, mualpho lo turin inthunun hram i tum dawn nia," a ti deuh hmuk a. A sawi awmzia hre miah lovin ka bu liam ve ngawt a.

Ka nu leh pa rawn thlen laiin pawnah kan la țhu a. Zuala chuan alo chiauau vat a, ka nu pawh a hmel a phelh phung mai, kha leh chen kan ina lo leng ve țhin kha a nia, an ngaina bawk a, țap ve pawh ni se awm ka ti tho; mahse, kan dinhmun hi a laklawh ru riau inngaizawng mai kan ni a, mualpho palh chu hlauhawm tak a ni.

"Inchhung lamah i lut ang u, puana tuam ve te ka duh a," ka nu'n a tih chuan inchhung lam panin kan inzui lut ta a.

Mi mit hi kan chungah a fu țhup mai hian ka hria, chhungkawho-in Valpuia ruang chu thla an lakpui mawlh mawlh a, țhutna min lo kian sap sap hlawm bawk nen ka lâi ru viau; mahse, zah pawh ka sawi thei tawh bik lo, a hunlai a lawm tiin zak lo awm takin ruang bulah ka țhu ve ta hmiah a.

Țhenkhat chu chaw ei turin an haw a, tlailam dar thumah vui tur a ni a, an tlaivarpui ka rin tehlul nen chutia ruahmanna an siam ta daih chu mak ka lo tiru hle a, ka sawichhuak lem lo.

Nu Siami chuan min lo hui zauhin a bula țhu tur chuan min mitmei a, insawn phei pahin Seni țap fap fap chu ka melh zauh, Valpuia bialnu zawk niawm tak hian a kutah te chuan a la hum lehnghal a, ka thinrim ru deuh tlat. Ka tih ve ngam loh, tih ka duh ve ngawih ngawih hi Seni chuan a tingam bik a nia, tluk lo hlein ka inhria.

Nu siami bulah ka țhu ve ta ran a, ka nu leh pa an awm vang nge ka hre lo nâin, thlâ lakpui ve rawh min tih avangin tam fe chu kan la tain ka hria.

Mi an rêm lai deuh a ni bawk a, a thawmhnaw hâk an thlaksak a, coat suit nen an thuam ta zaih mai. Sunday-ah hemi thawmhnaw haa a lo kal țum te kha ka mitthlaah a lo lang uar uar a, ka mittui tla tur chu duh lovin ka khap sak sak a.

"Maneih, a hmel i hmu duh em?" Zuala ka bulah lokalin Valpuia hmai an khuhna chu a hawng ta a.

A chhip sam buk lam lek lek a tihphir țhin kha a bet deuh thlap a, bandage-a tuamin a khabeah an suih zawm bawk. Nimin lama a hmai vûng kha hmuh tur awm tawh lovin a dâng lap a. A hmel nunna nei tawh lo tih hriat fahran ka'n hmuh meuh chuan ka lo insum vena zawng zawng te chu a puak keh ta.

Romola ka hmai hupin chhuak zetin ka inhnit ta hlawp hlawp a.

Kum sawmhnih leh pakhat chu ni ve tawh mah ila rilru a la puitling lo bawk nen, Valpuia lu-ah chuan chelhin, "Tho rawh," tih ringawt khan țap chungin ka ko ta chiam a nih kha.

Hetih lai hun hian ka inthunun vena zawng zawng a keh chhe vek a, awrâwl chhuah meuhvin ka țap ve ta. Ka nu leh nu Siami pawh an rawn țap chhunzawm ve nghal a, a ri leh ta chuah chuah mai.

Ka darah Zuala'n min rawn dawm a, 'Maneih, i chau lutuk ang kan in lamah phei tawh ang u,'' a ti a. Ka pa a tho deuh nalh bawk a, zui ve mai loh chu tih theih ka nei lo, ka mualpho takngial dawnin ka hria a. Chutih laiin Seni lah chuan rum mangkhengin min lo la melh zui a, ka haw teh a nia.

Rilru puitling pu bik hek lo le, meng sen râm chungin ka'n melh let ve nghek kha.

Nu leh pa bulah chuan ka zam bîk teuh lo em mai.

Zuala te in lamah kan inzui phei ta hlawm a, tumah an lo awm lo va, mitthi inah an kal vek a nih hmel. Thingpui hâng an in a, kei erawh ka lo teikual sek thung.

Seni kha ka ngaihtuah chhuaka ka thin a rim ut ut mai! Țawng tlêm viau e ti lo hian ka kawlh ru zêk a, Renthlei thinthawk a chhuak hman țep alawm le, mi chu awm lo se a samah ka kêk duh mai dawn hian ka inhria. Ve lutuk hian a!

Mi lungngaih lai laiin min lo melh rum ve vak vak a, ka haw telh telh. Ka nu leh Zuala an țawng mawlh mawlh a, an thusawi ka hre miah lo.

''Maneih, mi an tam tawh dawn a chhel taka awm i tum dawn nia țap suh ka tih theih chu i ni hauh lo; mahse, ila nula chho dawn chauhva nakina sawi sep sep awm lo turin inveng ru rân turin ka duh che.'' Zuala'n a rawn ti ta a, ka nu leh pa sawitir niawm zawk tak a ni.

"Umn, ka hria lawm," tiin ka nui lui ngial a. Seni chungchang zawh ka duh viau a; mahse, Valpuia țhian țha ber a ni a, a sawi duh kherin ka ring lo. A zawh tur ber heti hi a ni bawk si, ringhlel anga lan nuam ka ti ta chiah lo nen ngawih ka chuh leh ta nge nge a.

Dar thumah vuina hunserh hman tur a ni a, a la hma ve deuh bawk a, ruang bulah ka țhu ang nge țhu lo ang tih chuan ka rilru a luah ber. Chhung leh khat an ngah si inrawlh dan tawk thiam a har ka ti, eng pawh ni se ka nu leh pa leh Zuala kutah dah phawt mai ang.

"Maneih, ka biak mawlh mawlh che chu tikhan ngawi rengin i melh ngai melh reng suh," tih pahin Zuala chuan ka sam a rawn tuai a, ka nu leh pa erawh verandah-ah an lo awm daih a, an chhuah lai pawh ka hre chuang lo.

Ka pa a zahawm khawp mai, nichina a thawh vut khan min hauh ka hlau rilru deuh kha a nia, țawngkam khat mahin min hau ta lo. Ka luhlulzia hriain min hau pawh ni se a sawt tehchiamin ka ring chuang lo.

Mahni bialpa meuh han boral ta chu mumangah pawh ka la mang chhin eih lo a nia! Nupa inthihsan te hi a lo va na dawn êm tih ka ngaihtuah phah hial.

Valpuia te in lam pan chuan kan kal leh ta a, zan lamah kal ka tum loh avangin haw tlai deuh ta mai ila ka nu leh pa chu vui zawhah haw turin ka hrilh a, Zuala'n min thlah phei leh mai aniang chu.

Mi an lo tam tawh kher mai, 'Van hmun ropui hmangaih ram khi, mi thianghlimte in a ni' tih hla an lo sa mek a, rilru hi a va kal thui tak...

Kan hmangaihte țheuh nen hian engtikah emaw chuan kan la ințhen zel dawn chu a ni si a, inchhungah kan lut a, kuang bul kan pan ding nghal nalh a. Tun bâk hi chu engtikah mah a hmel hi ka hmu tawh dawn si lo va. A hun tawpah tal hi chuan a kiangah ka awm ve dawn a ni, mitmei ven tih lam rilruah a lang ta lo.

Țhutna âwlah chuan kan țhu ve a, ruang kîltute chuan min en leh zauh zauh țhin. Hmun hrang hranga an chhungte an thlengkim thawkhat tawh aniang țap ri a chawl meuh lo.

Kei erawh ka kun reng a, Zuala'n nghet takin ka kutah a chelh tlat tih ka hriat chuan chak deuh sawtin ka inhria.

Ka mittui far tur a awm lo va, Valpuia hmel dângbai mai chu mitsirin ka melh leh zauh țhin. Heti maia min kalsan hi hriatthiam a har ka ti lo thei lo a ni; hun a kal chak si pangpar a dawng hnemin puan pawh a dawng nasa khawp mai. A nu mawlh hi a khawngaihthlak, a innghahna ve ber a ni a, mi puitling tih takah a tuarchhel hlein ka hria.

Vuina hunserh an hmang a, chhungkaw âiawha thusawi tur Valpui û a ding mek a, a chanchin tlangpui a sawi pawh chu ka hre fumfe lo. He khawlvelah damchhunga inhmu tawh lo tura kan ințhen hlen tur hi ka ngaithiam lo va, ka ngaihtuah ngun poh leh ka tâwt ting a ni mai, a thi tih ka hriat hlim kha chuan ka la awih mai lo kha a nia. Tunah erawh Van kohna awmawi chhangin a kal ta.

Amah thlahna tur hla an sa a,"Ka phal lo, ka phal thei lo ka fapa, a ang lo em mai a..!" Țap râwih râwih chunga Valpuia nuin a'n tih leh meuh chuan insum a va har si êm! Ka mittui kar ațangin ka en reng a, vawikhat chiah kuah leh ka duh mahse, ka ngam si lo.

"Michael, i tel lovin engtin nge ka awm ang, a la hun lo," ka bula Seni țhu țah hla chham ri ka hriat chuan ka insût hraih a. Ka en tih hria niawm takin min lo en ve chiah bawk, zai ri leh țap thawm karah henu țah hla kher hian min vit zar mai. Valpuia nen eng inzawmna nge an neih, ka zawt lo a nih chuan rilru nuamin ka awm thei dawn lo tih ka inhrechiang nghal, tun hi zawhna hun erawh a ni si lo.

Zai a tawp a, Pastorin thlahna țawngțai a hman lai chuan, zah pawh dawn lovin ka meng ru a, kuang bulah kal hnaiin a tawp nan Valpuia hmel chu ka zuk en ta a. Zawitêa a hmai vawt ngiai mai chu chûlin hmu leh tawh ngai lo turin ka thlah ta. 'Michael Ramengmawi, min lo nghak reng ang che' tia phun sapin ka țhutnaah ka let phei leh ta a.

Țap thawm ri nuai nuai karah kuang an chhin fel a, thlala turin an inbuatsaih a, keini pawh pawnah kan chhuak ve ta a.

Ka ngaihbel nge mi mit kan chungah a fu deuh țhupin ka hre leh tlat pek a nih chu! A rûk thei ang berin ka hawi kual a, tumah min en bik awm ang ka hmu der lo nia. Ngaih erawh a țha viau lo.

Seni leh Valpuia chanchin hi a hmain ka lo hre lo bawk nen ka zak ru ngawih ngawih a, tunah eng nge an inkar boruak pawh ka hre ve si lo. Mualpho inti rilru viau mah ila, awmzia a awm tawh lo, bum ni a ka inhriatna chuan min tina hle a ni.

Thalak zawh hnu chuan thlanmual an panpui ta a. Ka nu leh pa erawh chuan an zui lo, Zuala nen mi karah kan kal ve hnak hnak a, ka kutah chelhin min melh leh zauh țhin, min lainat tih ka hria a, ani pawh ka khawngaih ve tho. A țhianpa a kawmngeih em em a ni a, a tuar hle tih ka hrethiam ve bawk. Hnemtu a mamawh ve ngawih ngawih a, mipa nge nge a insûm thei ngar ngar khawp mai.

Valpuia te in ațang hian an thlanmual hi a hla vak lo va, kan thleng thuai bawk. Kohhran upain țawngțaina tawi a neih zawh hnuah muangchangin thlankhurah kuang chu an thlakthla ta a.

Zuala kut ka hmer ngawt ngawt a, ka bîng mup mai. Ka lu a haiin ka luak a chhuak ut ut bawk. Ka awmdan hriatthiam har zet chu Zuala'n chuan a lo hrethiam thuai a, a âwmah min beitir a, insum zetin ka țap khur ta ngawt ngawt a, tunge min en tih lam ka pawisa zo tawh lo.

Mipui an haw chho a,YMA member puan/pawn dum sinho pawh an inzui chho diah diah a. Keni pahnih erawh kan la ding khawmuang a, "Chho tawh rawh u, kan chhilh tawh dawn a, thlanlaitute tih loh chu a awm theih tawh loh, " rawn titu pavalai khabe hmul zuah buk pa chu enin rum theihtawpin ka'n melh hrâm kha.

Kan haw kawngah pawh kan țawng miah lova, mahni rilru kawmin kan kal dun mawp mawp. Valpuia te ina lut hmasa lovin Zuala te in lam kan pan ta zawk a.

"Thingpui in ang kan lum a nge," tih pahin Zuala chuan choka lam a pan a, kei an sofa-ah ka țhu thung. Ka chau hluah hluah a, damlo mai tur ang hian ka awm tlat. Valpuia mitthla pahin ka maimitchhing ta vang vang a.

Ka lu-ah min sawi nawk nawktu an awm vang chuan ka mengchhuak hlawl a, ka lo muhil chiang mai! Zuala'n maktih hmel takin min en reng a, "I chau tawh a nih kha, kan phei leh dawn lo'm ni, nge, ka thlah haw zawk dawn che?" A tih chuan, "Phei leh phawt ang, rei vak lo kan awm anga min thlah dawn nia zanin chu ka kal lo mai ang," tih pahin ka ding chhuak a, thingpui dai vek tawh chu ka thâwkkhat pawp a pawnlamah kan inzui chhuak leh ta a.

Valpuia te inah pawh min an lo tam vak tawh lo inchhungah kan lut tlang a. Nu Siami bula țhutna awlah chuan kan țhu ve a, "Maneih, Zuala nen khan room-ah min lo zui lawk teh u," Nu Siami'n a tih vang chuan kan zui lut a.

Valpuia puan dawnho chu a lo awm țeuh a, "Induh ber pakhat ve ve thlang rawh u," a tih chuan ka hmuh hmasak ber chu lain, Zuala paw'n a la ve a, "Lo leng fo țhin ang che u, ka fapa tel lo chuan ka khua hi a har dawn em mai," tih pahin a țap leh rih, hnem dan vak thiam hek lo le kan lo ding ngawi ve reng ringawt tawh mai.

Zana ka kal theih loh tur thu ka sawi chuan a hrethiam viau a, "In chau tawh ang a nih tur a ni zo tawh a chawl hahdam rawh u, rilru no zawngin ngaihtuah lo ula, a la dama te hi kan pawimawh zawk, Seni pawh a khawngaihthlak khawp mai," Nu Siami'n atih chuan Zuala nen kan inmelh ralh a, Lalseni sawitel kher kha a va'n țul lo tak.

Thlan ațanga kan haw khan ka nu leh pa ka hmu tawh lo a, ka phone ka switch off daih bawk si, an haw tawh a nih ka ring ve ringawt.

Ka haw dawn chuan tlai lam dar nga a ri țep a, chaw ei nghal turin min sawm nasa viau nâin ka chau lutuk bawk nen, Seni ka hmuh phâkah a awm deuh reng a, ka hmu peih tawh thlâwt lo. A neitu niawm takin a lo țawng zuah zuah lehnghal a, ka ngei êm vangin kan haw lui ta a.

Kan in kan thleng chu a reh ruih hian ka hria, Zuala chaw eiah ka sawm ngial a, a duh țhak lo. Zan lam kal leh chhuanlamin a haw lui a mal ngawih ngawiha inhriatna ka nei lehnghal! Engmah ngaihtuah lo a mut vang vang ka chak ber mai.

Ka nu chiah a lo awm a, ka pa a inkhawm thung. Be lem lovin room-ah ka lut nghal a, khumah chuan ka bawk thlawp a, ka chhing zui ta vang vang a.

Ka muhil nghal a ni ang, ka harh leh meuh chuan puan ka lo sin thlap! Ka nu bak min sintir tur an awm lo, chaw ei loin ka lo mu tlang daih a nih hmel.

Sana ka en chuan dar sawmpakhat a lo ri reng tawh, tho chhuak peih tawh lo in tui ka in nghek a, ka inkhuh zui leh nghal daih a.

Muthilh leh ka tum a, ka harh telh telh, Valpuia bâkin ka rilru a luah thei chuang lo, a nun tawi lutuk hi ka khawngaih a ni. Vanglai hmang tur chauh a ni a, a pawi hi ka ti vawng vawng mai.

Hman zana ka hmuh khan kan inmelh chiang hle khan ka hre bawk si a, a thlâ a hrâng tih ang zâwngin ka ngaihtuah chhina ka ring phal teuh lo.

Dar khat thleng pawh chuan ka muhil thei ta reng reng lo va. Lukhama ka phone dah chu banin whatsapp message ka check zuai zuai a, Zuala'n min thlamuanna thu leh naktukah min lo hruai a tum thu a sawina ka chhiar chuan ka nui a, hepa hi awm lo se chuan a va'n hrehawm dawn tak.

A tawp berah Valpuia nen kan inbiakna ka dah țhat ho ka en kual leh a, eng nge ka hmuh hi? Vawiinah pawh ka en a, he thu hi a awm pawh ka hre lo!

"Valpuia fa ka pai a nia, lo inrawlh tawh suh," tih ka hmuh chuan ka phone ka thlauh tawp! Message thleng thar pawh a ni lo va, a hma ațang daiha lo awm tawh a ni, engtin nge ka hmuh loh theih? Niminah pawh ka check ve reng si a.

Valpuia chungchang vel vang khan ka lo chhiar chiang lo a nih ka ring ta ber a; mahse, chu chuan ka mak tihna a tireh chuang lo.

Zuala ka call ta ringawt a, min chhâng thei țhak lo zuiah!

Thinrim lutukin khum ațang chuan ka tho chhuak a, 'Tenawm dun lutuk mai!' Hei vang chiah hi a ni ang, Lalseni'n min lo melh rum vak vak a, huatna mitmeng nena min lo melh țhin nachhan kha.

Khawvar hunah ka zawt khawp ang, Valpuia tehreng pawh hi a! Â vawiin te khan ka lo va țap ve chiam chiam a, ka zah mai bakah ka thinrim a rim hle bawk.

A tukah chuan Zuala'n min lo sawm ta ngei a, "Nizan i mu țha em?" A car-a ka luh rual rualin min zawt nghal a.

"Mu țha chiah lo, ka lo call che a min chhang thei si lo va."

"Nia, ka chau ve ngang a ni ang ka harh thei lo reng reng," a inthiam lo hmel ka hmuhin ka nui lui ngial a.

"Thil zawh tur che ka nei," ka tih chuan min rawn en zawk a, "Seni naupai chungchang kha a nih chuan engmah ka hriatpui lo a nia." A ti nghal ringawt a, ani paw'n a lo hre tawh tihna a nia!

"Eng tikah nge i hriat?" Ka tih chuan, "Nizanah ka hre ve chauh, Lalseni kan zawt dawn nia," a ti nghat a, engmah ka zawt zui ta lo.

Nilengin Valpuia te inah kan awm a, a room an țhiah tel ve loh avangin chutah chuan Zuala leh Seni nen kan lut ta a.

Ngawi rengin Valpuia khumah ka țhu a, anni pahnih erawh chair-ah an țhu thung.

"Seni, Valpuia fa chu i pai tak tak em ni?" Zuala zawh dan teh tawp pawh chu..

"Umn," tihpahin min rawn melh kher a, dawt a sawi em tih hriat tumin ka lo melh ve kar a.

"Thla engzat nge?" Tih a zawh laia Seni hmel buai nak chu ka hmuh hmaih bik lo. Henu hian dawt a sawi vaih chuan ka nasa lo viau ang.

"Thla thum a la tling lo," tiin Seni chu a ding hluai a, "Nu Siami'n a hria em?" Tia ka sawi zawh rual rualin, "I hriat a țul lo," a ti hmak a, a chhuak zui nghal daih bawk.

Chumi hnu chuan Zuala nen kan inmelh zauh a, sawi tur a vang viau, a hrechiang tur ber a thi tawh miau a, zawh theih ni tawh hek lo le.

"I rilru tih hrehawm nan hmang duh suh, nakin lawkah ala chiang mai ang," Zuala'n a tih laite chuan banga Valpuia thlalak intâr chu ka melh daih a. Hua-in thinrim engang mah ila awmzia a awm der si lo.

Ka lan ve sekna chhan tur pawh ka hre tawh lo, mite hian min en bik riauin ka hre leh ta nghal a. Haw thuai thuai ka duh thu Zuala ka hrilh chuan min hnial lovin min thlah ve mai bawk.

Ka nu leh pa hnenah engmah ka sawi ngam lo va, chubakah thudik tak ka hre bik bawk si lo. Chhung inkhawm kan neih laiin ka pain min zilh malh malh a, Valpuia chungchang a sawi lai chuan Duata'n min melh zuk a, engah mah ngai lo angin ka lang lui ve tlat; Ka țah pawh a chhuak eih lo.

Zanriah eikham veleh ka room-ah ngawi rengin ka lut a, whatsapp group pakhatah ka va nawi tâk chiam kha.

Ngaihzawng neih tumna rilru ka pu tawh lo mai ni lovin ka zirlai ka zawh hma chuan mipa tumah ka hnaih tawh lovang tiin rilru ka siam ve mauh mai. Ka thei êm ang chu, Zuala erawh tiam lovin.

Ka mutui lai chu mak takin ka harh hlawl a, ka mutna bula ka phone dah a rawn eng zauh zauh a. Valpuia number bawk, Lalseni bâk a ni chuang lovang tiin ka off hmak, henu hian min tihbuai a châk zek zek reuh a ni ang. Ka nin chin a thlen chuan insual mai ka duh hial dawn a, chuvangin ka la insum rih a ni.

Muthilh leh ka tum a, a sak țalh tawh, thingpui in tumin choka lam ka pan ta nge nge a.

Zan reiah chuan sitting room light chauh kan ti eng țhin a, a bak chu kan off vek zel. Choka light ka on a, thingpui chhuangin a so hun nghah pahin choka tukverh puanzar chu ka keuva pawnlam pawh streetlight êng chuan a chhun ruih mai.

Ka lung a lêngin a lo len laia a țhutna țhin te chu ka melh kual a, ka lung hi a awi thei mawlh lo. Min bumin hre mah ila, amah ka ngai tho si, Seni zawkin dâwt a sawi ve thei tho bawk tih ka ngaihtuah chuan Seni ka huatna a zual sauh thung.

Țhenawmte ui bauh ri tuar tuar ka hriat chuan darthlalang phen ațangin pawnlam ka bih dâk dâk a. Kan in bula tuizem kan hun bulah chuan mihring niawm tak ka hmu ta, chiang deuh zawka hmuh tumin ka bih țha leh ngat a.

Tun ang hunah tunge helaiah awm ang? Misual ni se light ka on rual khan a tlanchhe daih awm si a, ka rilruah Valpuia bawk a lo lang leh ta!

Ka thingpui chhuan a so a, gas off- in thingpui pawh siam ta lo chuan choka tukverh puanzar bawk chu ka hlîm leh ta nge nge a, a la awm ta fo! Zurui a nih te ka ring deuh rum rum a, atu apawh ni rawh se chian ngei ka tum a ni.

Tunge a nih ka finfiah lo a nih chuan rilru nuamin ka awm dawn chuang lo tih ka hria. TV dahna hnuaia torchlight chu la chhuakin kawngkhar dim thei ang berin ka hawng a, verandah engin a chhun pha deuh rei ruai bawk. Torchlight hmet êngin Tuizem bul chu ka'n chhun thut mai a nih kha.

Ka phu zawk a, hlauhnain ka khat nghal! Ka khur nghal der der mai, min rawn en chiang kher êm a ni.

Mitmeng dul ruih leh hmui chip hmakin ka mitah tak min en a, ka chesawn thei miah lo, tlanchhiat ka tum ûk a, chupawh ka thei chuang lo. Ka lamah a lo pen phei ta a, a nui lova, thinrim hmel a pu hek lo. Ka hmuh hmasak ber zana a thawmhnaw inbel ang chiah kha a inbel bawk!

"Valpui," a ngawih reng avangin ka ko nawn leh a, ka rilruah Seni naupai kha a rawn lang nghal zawk.

"Valpui," ka tih leh rualin current a thim hmuk a. Ka ṭê chhuak ṭhawt a, ka torchlight ken ka thlauh nghal bawk. A hminga ko chungin ka pan phei lui zel a, ka tha khur nasa lutuk tihreh tumin ka thaw chhuak lui hawk hawk a.

"Valpui, Seni naupai saw i fa a ni em?" Hriat ka duh êm avangin a lam hawi chuan ka au ta vak a, a reh vawng vawng.

"Mawh, min hrilh rawh?" Ka aw rí tih mai loh chu hriat tur dang a awm lo.

A thim bawk si, ka torchlight thlauh kha chhar tumin ka inher a, a êng chuan ral lehlam a chhun daih a, Valpuia hmel lah ka hmu mai thei tawh si lo.

"Hei chauh hi min hrilh rawh, i fa a ni em, min lo bum reng tihna em ni?" Zawi sapin ka ti leh hrâm a, a ngai bawk.

Min chhângtu an awm chuang lo.

Hlauhnain ka tirilah manin ka khup a sai hlawk hlawk a, "MIN HRILH RAWH." Zawitêa ka tih leh rual chuan ka khawhmuh a fiah lo riai riai a, eng mah ka hre zui ta lo...

A TAWP TA

©<++++[BeckirafARenthleI]++++>®



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)