RAPSAGY BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: RAPSAGY BY Becky Rafa Renthlei (Completed)

Unread post by Ngaia » September 23rd, 2018, 8:40 pm

26.RAPSAGY

Becky Rafa Renthlei

Chapter-26

Remruatfeli
Aizawl

Inneihni a ka thawmhnaw inbel turah Zirsanga nen kan inhnial leh hrep a, keiin kawrfual hâk ka duh laiin ani erawh chuan a lo duh lo nasa mai.

Kan inti thinrim dâwn takngial a, a duh thlanna angin Puanchei ka bih dawn ta chu a nia, ka kawr hâktur erawh 'cream rawng' niin Maneihin a lo order nghal thlap a, lunghnur ru teh mahila 'I lang zahawm sawt zâwk ang, kawrfual nalh tak tak leh manto uchuak inbel kher khân kan inkâr atih ṭhat phah lova bâkah insenso hau tak zâwnga chêt kher tum tur ani lo a nia' atih chuan dik ka ti angreng lawi si.

'Pasal ka neih hunah chuan' tia ka lo dream ve zawng zawng khâ eng teh ual a lo ni lo a nih hi! Zungbun erawh a thlang uluk leh riau si a, kan pahniha bun tur kan hming chhuttîr thlap chu a man pawh a to far far khawp mai.

"Keima'n ka lo tum ṭhen ve ang," tia ka nawr ngat ngat pawhin, "Chatuan daih pe thei che ila chuan thuhran; mahse, a theih dâwn si lohva, kan bun tur na nâ na leina tezawng ka nei ve alawm, khawvela kan awm chhung zawnga phelh leh thiang tawh lo tur a nia, tlo leh ṭha tak pêk che hi ka tih tur dik tak a ni." Ati mauh mai si a, ka hnial ta lo.

A zualpui kan tihfel hnu-ah Zirsangliana kawm ṭhin Elty te dâwrah dinner ei turin Bon Apetite-ah kan kal ta a, Elty nen hian Aizawla a awm lai chuan an inkawm nasa hlê tih a sawi a, ka vawikhat hmuhna tur a ni.

"Falkland kal tura inchei chiam a ngai lo a nia," Zirsanga ka bulah rawn dingin ka mit ka lo hnawih hlarh hlarh lai chu ngun fê hian min thlêk a.

"Hâk tur ka nei lo, a hma ang te kha chu nise âw, Kekawr dum mar ṭang leh.."

"Fel, eng pawh inbel la ka mitah chuan i nalh ber, Bike-a kal tur kan ni chuang lova i duh leh kawrfual ha rawh," ka sawi zawh hma hma-in a lo ti hmanhmawh a.

"A teuh lo, ka duh lo.." tia ka lo vîn hlar tâkah chuan, "Eng nge i inbel chuan anga, thawmhnaw mar deuh deuh chu a chi tawh miah loh a nia.."

"Chutianga langsar a ni chuang hlei nem," tiin ka wardrobe a ṭangin kawr dum lian lam deuh ka la chhuak a, a ni paw'n shirt dum inbelin Jeans a ha leh tawp a, a inhmeh em em tho nia!

Arini leh Bawiha erawh Chanmari kâwnah an kal a, he mite pahnih hi inngaizawng anga lang si lo hian an in kâwm thei phian! Khawi kipah pawh an inzui a ni ber mai. Kan nau te ve ve annih vâng nge Zirsanga paw'n a khak lêm hlei lova keipawh hian ka enliam mai mai a ni deuh ber.

Maneihi lam kâwi angaih vangin leh Lalfaka kan nghah rih avangin muangchâng hian ka insiam a, nizanah Lalfaka pawh Delhi aṭangin a rawn thleng chiah a, an khuaa ka awm ve lai khâ a lo haw zawk lai lo niin.

Delhi-ah lehkha a zir a, a chhuah hnu-ah company hnuaiah training a nei zui niawm tak a ni.

Elty dawrah mi an lo tam hle a.

"Hey, Zirsanglian zu heh.." tiin min hmuh veleh a nui sâng a, a ṭhiante tupawh mai hian 'Zirsanglian zu heh' tia an ko fiam ziah hi ka huat zâwng tak a ni. A mawi hlawl lo.

"Ka bânsanna a rei lutuk tawh," Elty nen an inbiak lai chuan Maneihi kovin an dawr hnunglama Sangha awmna dîl lam panin kan phei ta a, kha nu khâ a ngainatawm hnûp hnûp ka ti riau.

Dinner kan ei chhung zawngin Maneihi leh Zirsanga an ṭawng char char a, thlâ an la sek bawk. Lalfaka nen erawh kan ṭawng tam ve tehchiam lo.

"Inneihni-ah tuma'n zu in loh tur.." Maneihi'n atih chuan kan mipa te an inmelh zauh a, han in vaih teh se, ka nasa viau ang.

Lalfakhlua hi a hma khân ka lo en chîk ngai lova a sâng ṭha hle a, Zirsanga aiin inches hnih velin ala sâng maw le! A hmelṭha tia sawi tur nimiah lo mah se a 'pa' ru riau a, a pa hnathawhna avanga Zirsanga te khuaa awm ve tho anni a, thlahnih hnuah a pa an transfer dâwn lehnghal nen Aizawl lamah kan inhmu zawm zel turah ka ngai. Ani pawh zu in zeuh zeuh chîng ve tho a ni.

Fapa mal a ni a, an duat hlê ang tih pawh thil chiangsa a ni.

Maneihi nen hian sawirem ve dawn ta ila! Hus! Maneihi tezawng a lerh lo lutuka phuahrem fê an ngaiin ka ring.

##

"Nang Zirsangliana hian Remruatfeli hi i nupui tak tak ni turin i duh em?" Pastor zawhna chu ring leh fiah ṭha takin a chhâng a.

Kei erawhin ka chham ring fahran lo va, ka zak tih piah lamah ka zak. A chhan chu kan lo pûk lâwk tawh avangin mitin hian ka pum an en deuh ṭhupin ka hria a, ka confi hleithei lo chu a ni ber e.

Lungleia man hlannaah kan chhung leh khatte mai piahlamah ka thawhpui leh khawtlanga ṭhenrual ṭhate an kim viau a, kan inneih hunserh min hmanpuitute pawh tam tham tak an ni.

Biak inah invuan lo mahila he khuaa inneihna pui bera chhâl ngam chu a ni ngeiin ka ring.

A kal tur chiangsa a kan ngaihte bâkah kan nu leh pa te ve ve mi pangngai anni a, miin an ngaipawimawh angreng viau! Present phei chu kan dawng tam mah mah!

Thu chham tur kan zawh hnu-a zungbun ka kuta awm ve ta rân ka hmuh chuan pasal nei tak tak ka ni tih a tarlang chiang hlein ka hria, zungbun inbuntîr hi inneih nghehna ni lo mah se ka pasalin Pathian leh mihring hmaa tihtakzeta min buntîr a nih vângin ka ngai hlu hle bawk.

"Fel, i chau tawh em?" Thalâk tâwp berna hun kan hman laia min zawh chuan ka bu nghat a, ka ke te hi a vûng deuhvin ka hria.

Zirsanga ṭhian phawk tak tak an tam si a, ho deuh deuha lo ṭawngin kan nui reng chu a ni ber e.

Tunah chuan ka nu leh pa kalsanin inchhungkhur hranah ka lâwi ve dawn ta chu a nia, ka nu mittui far fap ka hmuh chuan ka hnuk a ulh ve deuh, ṭap chiam mi ka ni lo hlauhva ka hnâr erawh a sen deuh hlarin ka ring; ṭap chhuak lova ka insûm apianga awm ve ziah ṭhin kha a ni tlat a.

Pa Hriata te in aṭanga hla lo tê pa Zuimawia te in chu innghah nân ka hmang a, ka pazawn atâna ka hman a ni. Ramtei mo-na in kha a nia, inthlahrung lutuk lovin ka awm theih phah bawk.

Duh aia hma a kan inneihna chuan an khuaah sawi ati tam leh ngawt chuan ka ring.

"Mafel, hawi chhuak kher lo la, rum deuhva melhtu i nei a nia..!" Zirsanga te in kawta kan din laiin ka beng bulah Maneihi'n min hrilhru sap a.

"Eng ang hmêl nge?"

"A chhe vak lo, sam kir deuh.." atih chuan Nutei a nih ka ring nghal mai. Kan inneihnaah a lokal ve tihna em ni ang!?

"Khawi aṭangin nge min lo en a?"

"Nu Lianpuii kha i hria em? Nizana puan rawn petu che kha, khami te tukverh aṭang khân.." ati ta a.

Ka la hrechiang khawp mai, hmâna Nutei luhaia a tlûk ṭuma an zâwn luhna in kha a ni a, chuta ṭang chuan min lo thlîr ve te pawh a ni mahna..

"Zirsanga X a nih chu.."

"Awi! Nuam e, inpa hi kuah deuh hnâp la.." zuk ti pek a!

"A naupanchhiatthlâk em mai," ka ti sap a. Inchhunga kan luh a hun tâk avangin Lâwichalin Zirsanga te Verandah-ah min dinpui a, ka lo mikhual hrep tawhna hmun leh ka in ang thawthânga ka lo ngaih ve na hmunah chuan fa-mo niturin ka pên lût ta a.

Zirsanga room pangngai khâ Arini room nen a inhnaih deuh avangin Sangpuia nen room an inthleng a, inhnuai lamah kan awm rih dâwn ta a ni.

An fapa upa zâwk nupui neih nî a lo ni bawk nen pa Hriata te chhungkua chuan Bâwng leh Vawk pakhat an talh a, chaw ei pawh an tam khawp mai.

"Kan vety doctor chuan Zirsangliana a nei ang tih ka lo ring pha miah lo asin le; mahse, nupa inhmeh tak chu an lo ni e.." titu, pa upa lam deuh chu ka nuih lêt var var a. Ni e, he khuaah hian kal lo ila chuan Zirsanga nen kan intawng dawn si lo va doctor ka ni hi ka hmang ṭangkai hlê a ni. Ka nuna mipa ka hmangaih ber ka neih phah ta chu a nia.

Rim taka ka lo zirna leh nu leh pa thuawiha ka lo tih ve ṭâng ṭângna chuan rah duhawm tak a chhuah ta niberin ka hria. Ka damchhunga ka kawppui tur ka tawn phah hial a nia.

"Fel, mu hahdam tawh rawh, i chau lutuk ang," inlêng an haw rêm titih tawh a, kan ṭhian hovin present kan hawng zo chiah a, Hmingsanga paw'n thil ṭha tak min lo pe ve reng nia!Zêp miah loh chuan ka chau ve pangngai reng, Maneihi leh Lalfaka an ve hâw ve chiah bawk a, mut chiah kan hma bâk ta.

Kan lo tih hnu vek nimah se chhungkaw hriatpuina a nih vang nge ka lâi deuh ṭût a, mut hmâ vut ka hreh deuh.

"Nia, mut hahdam hun min pêk theih dâwn phawt te chuan.." kan room tur in hnuai lam kan pan ta a, ka nu leh pa pawh an la châm ve dâwn thova, ka pazawn te inah an riak dawn khâ a nia, ka unaupa erawh Arini'n hmun danga thlen a phal miau loh avangin ka lo mut fo tawhna ṭhin mikhual room-ah a awm ve thung.

"Muthilh tih vel ka sawi tel lo a nia, châwl hahdam phawt la, ruahsur nghah ngai tawh lovin kan che chhuak ang chu le.." tiin a nui suk suk nia!

"Teuh lo, kan off ang.."

"Off lo ve a, ka nupui kianga 'up down' tur khawpin ka inla fit tawh," a fiamthu mah ni se ka zak ve reng.

"I zah loh chu a.." ka'n ti ngawt a.

"Remruatfel, he hun ka nghâh vang hian ka tlangvalna ka sûn tih hre ta che.."

"Hus! Ka nulâtna ka sûn ve tho.."

"Khâ zungbun i kuta awm khân khawi hmunah pawh ka tâ i ni tih hriat chhuahtîr che rawh se.." tiin ka kut veilama Rangkachak kual chhah lam deuh ka bun chu a rawn tuai hauh hauh a.

"Ah..Bâwng mawng zennaah pawh maw..!?" Za lutukin ka nui a.

"Nang nu hi chu aw, ka fiamthu lo a nia," ati ve tak nâa a nui suk suk tho nia!

"Thutak sawi laiin lo fiamthu tawh suh." ati leh a.

"Ani rêng alawm, ka la zen leh dâwn chiang mai sia e.." insûm hleithei lova ka nuih leh tâkah chuan, "I thinchhiat a chhuah loh hi chuan i hlim thei teh e.."

"I chimawm a chhuah loh chuan thu belhchiantlâk deuh sawi chhuahna châng te i hre ve a.."

"I sawi thui leh hmâin inbual rawh le, nge a rualin.." Min pawt tho zui nghâl a.

"A ruala inbual kha chu theihnghilh hmiah rawh, chi loh lutuk.."

"Zanin chu nangmahin inbual phawt la, a lehpekah kan pahnihin a ni tawh ang aw.." Bathroom lam panin min nawr phei dat dat a, ka hnial ta lo.

Sangpuia bathroom hi common bathroom aiin a zau daih zâwk a, kan pahnihin inbual duh pawh ni ila a chêp lem lo. Aizawla an inpui a nawm viau laiin helam erawh duh aiin a chêp deuh. Mahse, thlakhat bâk kan awm dâwn chuang lova a tihzia phian.

Ka inbual zo ka chhuah leh chuan Zirsanga a lo mu diam tawh a, a phone-a games bawk a lo buaipui leh tawh nia!

"Vawiinah Nutei'n min melh no lo khawp mai," tih pahin dressing table hmâah ka ṭhu a.

"A lokal ve dâwn tih ka hria alawm, kha heihi en teh.." tiin a phone a rawn lek lang zauh a.

# I nupui neih ni-ah tal chuan râlkhat aṭangin ka lo thlîr ve ang che. Min ngaidam thei lo mah la ka dem miah lo che a nia, hlim taka awm i phû a ni. Mafeli erawh ka thîk khawp mai.

Whatsapp aṭanga Nutei rawn biakna chu nizan lam ami a ni tawh a, ala rawn be ngam ringawt pawh hi a zak lo ka ti ve khawp mai.

"I reply em?" Tia ka zawh chuan, "A teuh lo lutuk, ani biak leh ai chuan i Vawk chhûl lâkna bula lo awm leh ka thlang fê," atih chuan ka nui hak a.

"Zir, Nutei fâ hi i fa ni tak tak ta se nupuiah i nei angem?"

"Nang tawng lo che ila chuan ka nei mahna.." ati sup a.

"Kei chu ka nunah mipa pahnih an awm, nang leh Hmingsanga khâ a ni a, ani erawh chu ka thinlung taka ka kawp nilovin ka tleirawl lai ngaihzâwng a ni a, chuti tehchiamin ka la thutak lo."

"Hmanni zingah pawh a lo biak reng che kha," tiin a thaw chhuak hawk a, "Fel, mipa dang lakah rinhlelh awmin i awm ngai lo tih ka hria, Hmingsanga nen inchanchin leh zirna avanga inṭhen in ni tih ka hriat khân a hnênah i kîr leh mai ka hlau deuhva.." rawn ṭhu chhuakin khum lu lam a nghêng a, ngun taka thil ngaihtuah hmêl a pû.

"A teuh lo, ani neih ai chuan Zir zu heha khâ ka la thlan ve fan.." Ka sawi zawh rualin ka tukkhumah a rawn nam det a, "Zir zu heh, min han ti leh teh..a lêt leh i tawrh ngam dâwn chuan.."

"I ṭhiante pawhin an koh ve tho che kha,"

"Ka ṭhian i ni lovin ka nupui, ka engkim i ni asin, â ka ṭhian pawh i tel tho.." ati leh lawi sia..

Mu tura kan inruahman vek tawh hnuah ṭawngṭai tura ka tih chuan a hreh ngang mai. "Fel, min hrethiam ve mai la.." tiin pehhêlna ngawt a zawng a.

"Hmeichhe lû chu mipa, mipa lû chu Krista, kan bul ṭanna turah hian a mipa zâwkin hmâ i hruai phawt chuan ka zui zêl ang che." Thutak zeta ka tih chuan, "Ka ṭawngṭai khât ve e.." Zuk ti a!

"Ti phawt mai teh.." tiin ka'n nawr deuh dâwn a, "Kan awm tawh dân te ka chhûtin ṭawngṭai ngam tur pawh ka ni lo." Ati leh a.

"Tuna ka thusawi hi ngun takin lo ngaihthla rawh aw.." Ka tih chuan a bu nghat a. "Nupa nun tak tak kan ṭan dâwn a nih chuan kan pahnihin kan pawimawh ve ve, kan hun liam tawh siamṭhat theih si loh va intih hrehawm reng ai chuan kan pahnihin bul kan ṭan dûn thei tawh alawm; Pathian hian min mamawh reng reng lo, keimahniin kan mamawh êm vâng zâwk hian kan ṭawngṭai tur a ni dawn lawm ni, i thei lo chung nawrluih che ka tum lova; mahse, 'Pa' dinhmun dik tak luah tur hian i pawimawh hlê a ni." Ka ti duah a.

"A ṭha e, min nuih miah suh," a'n ti hmasa leh tê tê a, chutah muang ban charh hian a ṭawngṭai ta a.

"Lalpa, zanina i hmâa lo kûn te hian i pawi nasa tak kan khawihin i duh loh zâwng kan ti fo ṭhin, nimahsela kan tâna ṭha turin engkim i thawh ṭhin avangin lawmthu kan hrilh a che, Kristian chhungkua dik tak, nangmah aṭanga chhuak kan neih ngei theih nan i awmpuina kan dil a, i laka kan tih dik loh zawng zawng te leh i pawi kan sawinaah ngaihdam kan dil a che. Nupa hlim leh inngeih tak ni thei turin i ṭanpuia kan Lalpa Isua Krista hmingin kan rawn dîl e."

"Amen.." a ṭawngṭai thui lem lo khawp mai; mahse, kut invuan rân chunga ka pasal ṭawngṭaina hian ka thinlungah thû a sawi si.

"Ka lawm e, ka ngenna che min tih hlawhtlin sak avangin.." a nghâwngah kuahin a biang leh ka biang ka insîktîr vang vang a, a mipa rim fai leh pa hrâk chuan ka hnar a verh zar mai.

"Mut dâwn apiangin kan inṭawngṭai chhâwk dâwn nia," ati vei thlap a, kan thei êm ang chu.

Chu mi hnu chuan ruahsur tura ṭawngṭai ngai tawh hauh lovin leh nu leh pa hriatpuina thlapa hmangaihna kan chêndun meuh zawng, Hremhmun lam rim nam ni tawh lovin Mumang rama kan la hmuh phâk ngai loh ramah kan chuang kai ṭan ta.

"I thlen dâwnah min hrilh rawh aw.." ka beng bulah ti supin a hmâa ka ṭawngkam ngei khâ a rawn hmang a, Zirsangliana tâna ka lo inpe hi ka tisual hauh lo.

"Tehreng mai, i ruala thleng ve ngei turin aw.." a hmui lum ham ham leh hnâwng chap a min fawhna chu duhthawh takin ka lo chhâng lêt a, hmangaihna leh induhna kan chhungril aṭanga chhuak chuan nawmna inpêk tawn duhna rilru min puttîr a ni teh chêk ang chu, kan thlan dap thei nia!

"Ka inpeih e," thaw halh chunga ka tih chuan rawn kûn hniamin ka nghâwng zâwnah hmâi a phûm vat a; lungawina famkim nen kan tum ram kan thlen laia a rûm nghat ri chuan chhungril a fan raih raih thei alawm le.

"Kan nautê hmêlah ka bonus a nih kha, a ngo phah deuh tâkin.." Zirsanga thil sawi avang chuan ka nuih aza ngei mai.

"Bonus deuh fo la chuan a hmâi a hlâi khawpin ka ring.." amah kuah chial chunga ka chhânna avang chuan mawi ka tih deuh ang (ding zâwng) ngêi khân a'n nui kher ah..!

Tenawm ṭha ve asin.

"Ka hmangaih che, Remruatfel.." ka pum zût hauh hauh chunga tiin ka mitah tak min en a.

"Min hmangaihna aia thûk zâwkin ka hmangaih che ti ila i awih chiah ka ring si lova, min hmangaih tluk zetin ka hmangaih che.."

"Zîngah tho hmâ duh suh aw, an hrethiam lutuk ang che," ti daihin a tho chhuak a, eng nge a tih dâwn pawh ka hriat si loh!

"Nutei'n Arini a lo pe a," tiin box lian angreng tak pakhat a va la ta a, eng nge a nih rin chhin ngaihna ka hre lo.

'Hawng chhin teh' atih chuan ka hawng ve mai bawk.

"Ngaihdam dîl ngam tur che u ka ni lo a; mahse, ka chapona zawng zawng dah ṭhain in mi ngaihdamna ka ngen e, nupa hlim tak ni tura duhsakna hlân chung che u in he ka thilpêk hi min pawmsak hrâm ka beisei.." Naute Blanket sen no raih teddy bear-awm khat vek hi a lo dah tel a, mak ka ti hlê mai.

"Fel, i duh loh chuan kan kawl kher a ngai lo a nia.." nuam lo tih hmel taka Zirsanga ṭawng chu haiderin, "Ngaidamtu thinglung put hi thil finthlâk tak a ni, keini paw'n kan tihsual tawhna zawng zawngte Pathian hnenah ngaihdam kan dil zo chauh a ni lovem ni? Damtéa nautê kan neih chuan a sin ve ngei ang." Ka ti ta a.

"I rilru ṭhatna leh tluangpurh hi ka hmangaih chhan che a ni rêng a ni." Ti supin ka biang a chûl zauh a, ngaidam lo mahila engtin tih theih ninghal lo chuan a..!

Zanrei tak thleng thu ho mai mai sawiin kan titi reng a, muhil tura kan inruahman meuh chuan zân dâr 12 a pêl thuak tawh nia!

Ka pasal âwm nghêng chiala mut hi alo va nuam dangdai si êm..

Zirsangliana
5:30 Am

Ka nupui hmêl pawisawi lo leh dam raih ka hmuh hian ka tihsual lohzia ka hrechiang tulh tulh. Nutei nena tehkhin râlah phei chuan 'Lei leh Van' hlauh a ni si! Amah châwmna tur mumal ka la nei hauh lo, a hmâ khân lo inkhâwl nachang hria ila chuan a zia deuh tur a nia; mahse, hetiang dinhmunah hian kan ding dâwn a ni tih hriatsa ninghal lo chuan.

Tui takin a mu sâk sâk a, a lum ati deuh nge puan pawh a ke lamah a hnâwl tawm vek a, a dul puar ve âk tawh chu langsar tak ala ni lo. Englai pawha inkhaithli thlarh a nih vâng zâwkin alang hmâ chi a ni ngei ang!

Kan in chhunga lo lâwi lût tur êm chuan ka lo suangtuah pha ngai lova, vety doctor anihna chu thuhran, mipa tamtak tana itawm hmeichhe inringtâwk tak kha a nia, ka phû lo hret.

A chau deuhva ka rin vângin ka kaitho duh lêm lova, inchungah dimtê-in ka chhoh san ta a. Ka nu leh pa, Arini an lo tho tawh a, tihfel ngai ala tam êm bawk atin ni.

'In mu ṭha em, a chau ngawt lo maw?" Ka nu min zawhna chhângin, "Chau ve e, a duh hun hunah lo tho ve mai rawh se, thâwm dim deuh ila.." ka tisup a.

"Duat ṭan deuh ve.." Arini'n alo tih chuan, "Nangkha i lo fiam leh ngawt ange, a zak ve thei tih hria la.." ka nu'n a lo ti vat a. A nuih azat hmel kher mai.

'A lo harha min hmuh loh chuan a hrilhhai ang' tiin khawizu leh tuilum inpawlh no hnih ka siamsa kengin inhnuaiah ka chhuk leh ta a.

Kan intawntirha 'in ve ṭhin rawh' min tih aṭang khân regular takin ka in ve ta khâ a nia.

Ka chhuk leh pawhin ala mutui hle a, ka mutna zâwnah bân a phar diai a, min kuah a tum a ni ngei ang, "Hey, doctor, harh ve tawh la.." a lû-ah ka sawi dat dat a, 'Morning up down' alang miau alawm, mipa hrisel khawizu in ṭhin ka ni tlat a!

"Mu teh..." a inlet thak a, ala meng chuang lo.

"Ka nu te'n an ko che a nia.." ka sawi zo chiah arawn meng nghal nia!

"Min kohna arei tawh em?" Tihpahin rang lutuk hian a ṭhu hlawl a, ka nuih aza ngei mai. Tuilum ka siamsak chu pê-in, "In phawt rawh le.."ka ti a.

"Zir, i thawhna a rei tawh viau alaw! An tho kim tawh em?" Tuilum a innghal khawlh khawlh a, "Sangpuia leh i nau an la tho lo.."

"Awi! Min kaitho ta che, Zirsanglian.."

Ka tifiam tih ka hrilh loh chuan a tho chhuak tak tak dâwnin ka hria a, ka hrilh ta nge nge a.

"I chhe hlê a ni, Zir zu..."

"Remruatfel han sawizo vaih teh.." tih pahin khumah ka kuah mu nghâl a, a nui duh ṭhak lo.

"Min tihder man i hmu dâwn khawp mai," ati nâa a che chuang miah lo.

"Zingkarah bonus leh zuai ila.."

"Hus! Tho mai teh.."

"A teuh lo êm mai," tih pahin a hmuiah ka bûr nghâl chat a, thinrim nimiah si lo va a ṭang der vel chuan phûrna min siam tulh tulh.

Chutah hmanhmawhna nei hauh lo hian 'bonus' hun min hawnsak leh ta a; ka bawhpelh lo chiang teh e.

##

Kan inneih aṭangin ni thum a liam tawh a, Maneihi leh Lalfaka pawh nimin lamah Aizawl panin an chhuak tawh a, Mafeli nu leh pa, Bawiha telin tukinah an haw ve bawk a, a chhungte'n an liamsam dâwn meuh chuan ka kut a hmer nghet khawp mai! A nu mawlh kha ka lainat a, a mittui tla kan hmuh hlau zeta a hru zauh lai ka hmu hman tlat alawm.

An fa hmasaber leh an fanu neihchhun a ni miau a, a hlawh ringawt pawh hi anni tân chuan thlâkhlelhawm ve deuh tur a nia, rethei lo mah se pawisa duh lo tumah kan awm hleinem maw le, karlehah Aizawlah ka pheisan dawn a, kan dawr bungrua a lo thleng dâwn si a, ka awm ngei ngei a ngaih vang a ni.

'Mafeli hruai lo mai rawh' ka chhungte'n an tih deuh tlat avangin hruai tel loh ka'n tum phawt chu a nia, ka rilru ka thlâk leh thut mai thei bawk.

A car pawh a nu leh pa'n 'In la mawmawh ang' an tih deuh tlat avangin kan nupa kutah an dah hmiah a, A bike erawh Bawiha'n a nei thung dâwn niawm tak a ni.

Ka bike pawh ka keng dawn a, keima puala ka lei a nih vângin midang kutah dah ka tum lo, Sangpuia tân car a la awm thova ka pa hminga awm nimah se a kuta awm tur tho a ni bawk.

Tulṭhuan kan ei laiin pu Siama alo lut a, Mafeli ka nei hi alâwm ber emaw tih tur a ni, "Zira, in nu ka mamawh hlê a nia.." a rawn nui lût ṭhû a.

"Eng atan maw..?" Ṭhu tura hrilh pahin ka nu'n a lo dawngsawng vat a.

"Kan vawk note 'Til' lâk a ngai a, mothar neih manah ka rawn inbengvar ve hmiah." Atih chuan Mafeli ka mitmei vat a.

"Chaw eikhamah kan lokal dawn nia," tia Mafeli'n a chhân chuan kal lo tura hrilh ka duh deuh rum rum nia! A naupai tân a lo ṭhat loh tâkah..

Pu Siama haw hnu-ah, "I ti thei tawh dâwn em ni?" Tiin ka zâwt ta a.

"Thei ang, eng mah harsa a awm hleinem, min hruai hman te chuan.." ati sam êt a.

"I inhuam te chuan.."

Pu Siama te Vawk Til alâk chhungin a bulah ka lo ding ve reng a, hnehsawh tak a ni! Ka vawikhat hmuhna a ni bawk a, hmuhnawm ka ti ta phian nia!

Minute reilote chhungin pawisa a hlawh chhuak der a nia, ka va'n chhuang ṭhin tak êm!

A tel lo hian ka nun a famkim tawh lova, nitin zantin inzui ta na nâ na chu amah ka duhna a pung deuh deuh si!

Remruatfeli tâna pasal ṭha tak ni tur leh ka fa lo piang tur tân pa ṭha ber nih tumin ka rilru ka siam ta sauh sauh a.

"Rapsagy" Tia ka phun sup ri chu a lo hre ve a ni ngei ang, "Ṭawng hriat loh i dawng elaw!?" Tiin min nuih var var a.

"Kan pahnih chauhva kan awm hunah a awmzia ka hrilh ang che, ṭawng hriat loh a nih pawh ka hriat si loh.." ka tih chuan, "(Rapsagy) ka theihnghilh dawn miah lo a nia, awmze nei lo leh thu dukdak lo a nih loh ngei ka beisei.."

Ni e, ka hrilhfiah khawp ang.

Kan nupa hian hma hun hlimawm tak thlir tur kan la nei chiang alawm; mahse, ama sawi dan takah 'Pathian tel lo chuan eng hlimna mah a awm thei tak tak lo' tih khâ vawn reng erawh a ṭûl hlê a ni.

Ka nupui zet zawng ka nihna zawng zawng leh zu in ṭhin mi ka nih lai pawha min vuan tlattu leh min pawm thlaptu a ni a, a lungawina leh a hlimna thlen tur hian theihtawp ka chhuah ngei ang....

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:41 pm

27.RAPSAGY

Becky Rafa Renthlei

Chapter-27

Zirsangliana
Aizawl

Kan inpui pawh thlathum dâwn kan luah ve ta, Mafeli in luah ṭhin khâ kan tiruak vek tawh a, Dintea kan hnenah a rawn insawn phei bawk a, ka patea nise buaipui angai deuh reng bawk nen niminah Bethany Hospital-ah kan admit a; a zu in nasa lutuk a tuar lo a ni ber mai.

Arini'n kan chah phei ta ringawt kha a nia.

Mafeli pawh rinai takin a hrisel phian a, kâwng nâ leh tâi nâ tih neuh neuh a nei zauh zauh tih loh chu insawiselna em em a nei hran lo. Nitin office-ah ka hruai tlauh tlauh a, dâwr nghah ka ngaih ṭhin avangin ka va dah zawk a, tlâi lamah ka lam leh mai ṭhin.

Ka patea dinhmun a ṭhat vak loh avangin vawiin pawh ka hâw hmâ a, ka nu leh pa chanchin ka hrilh chuan lo phei an tum thu-in min chhâng a.

"Fel, Taxi rawn hmang haw ta mai che, patea a ṭha vak lo a.." tia ka va phone chuan 'Rawn kal ve angai em? Kan bâng a ni deuh thaw tawh a," ati a.

In lama haw tlang tura ka hrilh chuan min hnial deuh dâwn a; mahse, a naupaiin thlasarihna a hmang mêk a, a dul pawh a puar ve viau tawh bawk nen tihtheih vak a awm si lova lokal lo turin ka hmin thei hrâm.

Kan inneih hnu-a hlawh a lâk hmasak ber khân ka nu leh pa hnena kan awm lai a ni a, an kutah chêngkhat mah bâng lovin zuk pe fai vek a!

"Eng ati nge i pêk vek a!" Tiin ka zâwt nghe nghe a.

"Nu leh pa kianga kan awm a nih chuan kan thawhchhuah ang ang kan pe mai tur a ni, mamawh kan neih leh kan dil mai dawn nia.." ati awlsam êt a, ka nu mi â ni hek lo lê, 'Min pêk duhna rilru i pu hrim hrim khâ kan lawm viau a nia; in mamawh lei nân hei hi hmang rawh u," tiin a zât ve a pekîr leh ta a.

Remruatfeli puitlinzia leh taimâkzia ka hre thar zel a ni ber mai.

Kan inkhâwm dun hmasak ber ṭum chuan a zak ve hlê a, "In khua hi chu âw mi en an nghal mah mah a ni," tiin a phun ve nang nang a, a ni reng tak a! Kan kalpelh apiang te'n min enzui zel ṭhin khâ a nia, thil nuam zawk zawk chu a ni lo ve alawm.

Kan dâwr pahnih ka enkawl kawp avangin leh nitin office kala a chhuah ve bawk si avangin duh aiin kan awm dun tlêm mah mah chu ka ti deuh.

"Fel, engtik thleng nge office i kal ang?"

"Ka neih dâwn tak tak chauhah ka châwl ang chu, a lo berah thlaruk vel tal chawlh lâk law law ka duh si a, ka duhâm ve deuh a ni." Ati ta a, sum leh pâiah harsa lutuk lo mahila ṭhahnem ngaih a na duh viau.

Nupuite thlazar hnuaia awm ka tum miah loh avangin ṭhahnem ka ngai hle a, kan dâwr pahnih hi ka kuta awm a nih ang ngeiin ka hlawhtlin hma zawng ka bei ṭâlh ṭâlh ang chu, Sawrkâr hnathawk nih kher hi ka tum a ni lova; mahni ke-a dinchhuah ngei ka tum nghet bur.

'Mama, patea awm dan hi a dik miah lo a nia' Arini hlauthawng lutuk âw chuan ka inngaihtuah ngut ngut lai min tiharh zawk nia!

Doctor leh nurse te'n theihtawp tak meuhva an buaipui chung pawhin hmâ a sâwn hleithei ta tlat lova, internal bleeding a neih nasat bâkah a kal (Kidney) a chhe vek tawh bawk a, zanin a daih kher pawhin ka ring tawh lo.

Nikhua a hre tawh lo hrim hrim a, a mar chauh kan en tih Mafeli ka hrilh chuan 'Ka lo phei ve nghal ang' ati a, ka hnial ta lo.

Ka nu leh pa an awm lo bawk nen a thlaphân thlâk kher mai. Aizawla kan chhung hnaivai te a theih ang ang phone-in ka hrilh kual zung zung a, Arini lah a ṭap deuh fap fap reng bawk a, kan boruak a rit kher mai.

Khawvar dâwn hnaihah khawvela inhmu leh ngai tawh lo turin ka patea chuan min kalsan ta a! Arini leh Mafelin an dawmhlum a ni ber ang chu.

A chahthlâk lai hian ka awm ve chiah lova ka pa in min rawn biak avangin pâwnah ka lo awm daih a, ka va hmu ve hman ta lo khâ a nia!

Zu in mi a nihna leh a hun kal tawha rilru natna tamtak a lo tuar tawhte ngaihtuah chuan hetia a boral ta hi a tân a hahdam thlâk ngei ang.

Mafeli pawh a theih ang tâwkin a buai ve hle a, Arini lah a ṭap ngat ngat bawk si! Nu leh pa tel lova thihna han dawnsawng meuh tur chuan ka pachang thei lo a chhâ chu a ni e, a enkawl tam bertu ka nih vang leh a kianga hun hmang tam ber ka nih vang hian intih pachan a har zual.

"Zir, i rilru

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:41 pm

Nizana chhiar zo ve thei lo tan 27 ka dah hmasa aw, a hnuaiah chapter tharin a zawm bawk e.
RAPSAGY

Becky Rafa Renthlei

Chapter-27

Zirsangliana
Aizawl

Kan inpui pawh thlathum dâwn kan luah ve ta, Mafeli in luah ṭhin khâ kan tiruak vek tawh a, Dintea kan hnenah a rawn insawn phei bawk a, ka patea nise buaipui angai deuh reng bawk nen niminah Bethany Hospital-ah kan admit a; a zu in nasa lutuk a tuar lo a ni ber mai.

Arini'n kan chah phei ta ringawt kha a nia.

Mafeli pawh rinai takin a hrisel phian a, kâwng nâ leh tâi nâ tih neuh neuh a nei zauh zauh tih loh chu insawiselna em em a nei hran lo. Nitin office-ah ka hruai tlauh tlauh a, dâwr nghah ka ngaih ṭhin avangin ka va dah zawk a, tlâi lamah ka lam leh mai ṭhin.

Ka patea dinhmun a ṭhat vak loh avangin vawiin pawh ka hâw hmâ a, ka nu leh pa chanchin ka hrilh chuan lo phei an tum thu-in min chhâng a.

"Fel, Taxi rawn hmang haw ta mai che, patea a ṭha vak lo a.." tia ka va phone chuan 'Rawn kal ve angai em? Kan bâng a ni deuh thaw tawh a," ati a.

In lama haw tlang tura ka hrilh chuan min hnial deuh dâwn a; mahse, a naupaiin thlasarihna a hmang mêk a, a dul pawh a puar ve viau tawh bawk nen tihtheih vak a awm si lova lokal lo turin ka hmin thei hrâm.

Kan inneih hnu-a hlawh a lâk hmasak ber khân ka nu leh pa hnena kan awm lai a ni a, an kutah chêngkhat mah bâng lovin zuk pe fai vek a!

"Eng ati nge i pêk vek a!" Tiin ka zâwt nghe nghe a.

"Nu leh pa kianga kan awm a nih chuan kan thawhchhuah ang ang kan pe mai tur a ni, mamawh kan neih leh kan dil mai dawn nia.." ati awlsam êt a, ka nu mi â ni hek lo lê, 'Min pêk duhna rilru i pu hrim hrim khâ kan lawm viau a nia; in mamawh lei nân hei hi hmang rawh u," tiin a zât ve a pekîr leh ta a.

Remruatfeli puitlinzia leh taimâkzia ka hre thar zel a ni ber mai.

Kan inkhâwm dun hmasak ber ṭum chuan a zak ve hlê a, "In khua hi chu âw mi en an nghal mah mah a ni," tiin a phun ve nang nang a, a ni reng tak a! Kan kalpelh apiang te'n min enzui zel ṭhin khâ a nia, thil nuam zawk zawk chu a ni lo ve alawm.

Kan dâwr pahnih ka enkawl kawp avangin leh nitin office kala a chhuah ve bawk si avangin duh aiin kan awm dun tlêm mah mah chu ka ti deuh.

"Fel, engtik thleng nge office i kal ang?"

"Ka neih dâwn tak tak chauhah ka châwl ang chu, a lo berah thlaruk vel tal chawlh lâk law law ka duh si a, ka duhâm ve deuh a ni." Ati ta a, sum leh pâiah harsa lutuk lo mahila ṭhahnem ngaih a na duh viau.

Nupuite thlazar hnuaia awm ka tum miah loh avangin ṭhahnem ka ngai hle a, kan dâwr pahnih hi ka kuta awm a nih ang ngeiin ka hlawhtlin hma zawng ka bei ṭâlh ṭâlh ang chu, Sawrkâr hnathawk nih kher hi ka tum a ni lova; mahni ke-a dinchhuah ngei ka tum nghet bur.

'Mama, patea awm dan hi a dik miah lo a nia' Arini hlauthawng lutuk âw chuan ka inngaihtuah ngut ngut lai min tiharh zawk nia!

Doctor leh nurse te'n theihtawp tak meuhva an buaipui chung pawhin hmâ a sâwn hleithei ta tlat lova, internal bleeding a neih nasat bâkah a kal (Kidney) a chhe vek tawh bawk a, zanin a daih kher pawhin ka ring tawh lo.

Nikhua a hre tawh lo hrim hrim a, a mar chauh kan en tih Mafeli ka hrilh chuan 'Ka lo phei ve nghal ang' ati a, ka hnial ta lo.

Ka nu leh pa an awm lo bawk nen a thlaphân thlâk kher mai. Aizawla kan chhung hnaivai te a theih ang ang phone-in ka hrilh kual zung zung a, Arini lah a ṭap deuh fap fap reng bawk a, kan boruak a rit kher mai.

Khawvar dâwn hnaihah khawvela inhmu leh ngai tawh lo turin ka patea chuan min kalsan ta a! Arini leh Mafelin an dawmhlum a ni ber ang chu.

A chahthlâk lai hian ka awm ve chiah lova ka pa in min rawn biak avangin pâwnah ka lo awm daih a, ka va hmu ve hman ta lo khâ a nia!

Zu in mi a nihna leh a hun kal tawha rilru natna tamtak a lo tuar tawhte ngaihtuah chuan hetia a boral ta hi a tân a hahdam thlâk ngei ang.

Mafeli pawh a theih ang tâwkin a buai ve hle a, Arini lah a ṭap ngat ngat bawk si! Nu leh pa tel lova thihna han dawnsawng meuh tur chuan ka pachang thei lo a chhâ chu a ni e, a enkawl tam bertu ka nih vang leh a kianga hun hmang tam ber ka nih vang hian intih pachan a har zual.

"Zir, i rilru tur ka ngaihtuah thiam phâk vek a nia, ka nu te lo thlen hunah i châwl hahdam ve lawk dawn nia." Ka nupui ka kiangah lokalin ka kut min vawn sak a, ṭhalai leh nu leh pa lokal khâwm te pawh amah vekin a dawngsawng a, ka va chhuang si êm!

"Nangmah kha châwl hahdam zawk rawh i chau lutuk ang" ka tih chuan, "Ka pum a nuam lo deuh a, rilṭâma ka awm vang nge pawh ka hre lo.." tiin a pum puar ve liah tawh chu a tawk zauh a.

Ka nî te leh ka putea teho an lo thlen tâk avangin kan nupa room-ah Mafeli ka luhpui ta a. Chawlh hahdam a mamawh takzet tih ka hriat vanga hruai lût ka ni bawk.

"Zir, ka pum nâ hi a zing sâwt riau mai," a thlanfim a rawn bawl ṭak ṭak a, ka ngaih a ṭha ta miah lo, ani hian nau a vei a ni chiang mai.

'Tikhan lo awm lawk rawh..' tihpahin ka tlânchhuak zui nghâl a, kan boruak tawn nen ava inrem lo tak.

Ka nî hnenah thil awmzia ka hrilh zuai zuai a, Durtlâng Hospital lam panin kan inphur chhuak ta a.

Durtlang Hospital kan thlenin zinglam dâr ruk chiah a ni.

Mafeli hmel an hmuhin doctor te'n ngaih dan an lo nei sa ni hmiang, 'Nau a vei ṭan ringawt a nih hi, eng mah hlauhthawn tur a awm lo, mipa awmpui kan phal chuang lo a, pawnlamah i lo nghâk dâwn nia' nurse thusawi chu ka ngaihthla liam vel mai mai niberin ka hria.

Kan in lam ka ngaihtuah bawk si, ka nupui ngaihtuah ngai bawk! Awm dan tur pawh ka hriat si loh.

Naute puan vêl eng mah kan lo keng awzâwng lo, Mafeli nu in min rawn thawn ho leh amahin a lei ve te kha kan inah ala awm vek tih ka hrechhuak chawpchilh a, hâw tho tho a ngaih hmel.

"Reilote ka lo be zawk thei angem?" Tia nurse ka dil chuan a lo phal ve mai a, Mafeli natuar hmêl awm ngaihna hre lo ka hmuh meuh chuan hrehawm ka va ti si êm!

Zai ngai lo tura an ngaih avangin nau neihna ward-ah ala awm a, khumah achângin a bungbu thûl, hetiang tehhrep hian a tuar ang tih ka ring pha lo hrim hrim.

"Fel, chhel takin aw.." ka aw a hriat rualin a rawn dâk chhuak a, "Naute puan eng mah kan keng reng reng hleinem, la turin ka kal zuai ang aw.." ka tih chuan ṭawngkâ a min chhâng lovin a lû a bu zauh a.

Patea boral laia kan nautê in pian chhuah phêt a tum hi ka rilrem zawng pawh ninghal lo chuan a..

Kan in lamah hmanhmawh fê hian ka tlân lêt leh ta a.

##

Ka nu ṭap râwih râwih chu ko hrangin thil awmzia ka hrilh nghal a, a ṭap bâng hmiah nia maw le! Ka pa hrilhru-in kan nupa room lamah kan inzui phei ta a. Ṭhalai leh nu leh pa lokal khawmte chu ka nî in a lo hrilhfiah diam tawh niawm tak a ni.

Kan mamawh tur anga ka hriat ho bag-ah ka thun mawlh mawlh a, ka nu nen Hospital kan pan dun ta a.

Hospital kan thlen chuan nau nei turin Mafeli an lo dah lût hman tawh a, kan nang lo chiah chiah.

"Mama, ngaihtuahawm a ni hleinem, thlasariha nau piang an tam lutuk.." ka awm dan hrehawm zet min hriat thiam puiin ka nu'n min ṭawng thlamuan a.

Ka patea vuinaah pawh a awm thei dawn lo tihna a nia, ka rilru a dam lo kher mai. Kei erawh in lama awm ngei ngei tur zâwk ka ni a, "Zuk hâw thla phawt la, innu chu ka lo awmpui ange, i patea thlahliam hmana i hâw khâ a ṭha zawk, chanchin ka rawn hrilh rang dâwn che u nia' atih deuh tlat avangin hreh ru zetin ka hâw ta a.

Chhungkaw aiawha ka pa thusawi laiin ka nu'n min rawn call ta a, mipui an tam bawk nen chhuahna tur kawng îk zuk awm lo a..!

Nautê hmeichhia kan nei tih leh Mafeli pawh a ṭhat thû a rawn sawi a, ka nupui kiangah awm thei lo mah ila ka thinlungah a awm reng tlat alawm.

Thlalâknaah pawh Mafeli a lang ve dawn ta lo chu a nia, ka thinrim angreng; mahse, kan thu ni miau hek lo le.

Naute thar neih leh kan boruak tawn a pik êm avangin awm dan thiam a har a, lehlamah ṭahna, a lehlamah hlimna, buaithlâk tak a ni.

Tunah chuan pa dik tak ka ni ta, kan nupa nuna rawn tel ve kan naute thar hi ka hmangaih a, eng ang hmêl nge a put tih hriat ka châk kher mai.

Nun bul kan ṭan chho tak tak dawn ta chu a nia, kei Zirsangliana hian ka nupui fanaute hi enkawl zawh loh ka tum reng reng lo.

Thihna kan chunga a lo thlen lai pawhin lâwmna tur min la hnutchhiah fo tu Pathian kan nei hi ka lawmna tizualtu a ni.

Mafeli nen rei vak lo kan inbia a, ka fâ hmêl ka hmuh meuh chuan ka rilru zawng zawngin a nu leh nautê ka hmangaih ve ve a ni tih ka chiang lehzual, thihna chauh lo chuan min pawt ṭhen lul suh se.

"Zir, a tê reuh tiraw..?" An nufa-in cabin-ah an awm tawh a, ka rin aiin atê daih nia! 2kg leh 300gram chauh a ni a, a hmêlṭhat leh ṭhat loh pawh ka hrethiam lo, a ngo hlê a, kei min chhûn lovin a nu a chhûn tih ka hre mai.

"Lungngai mah ta che, a tê rei tawp nang, kan zângkhai ting ting a ni mai alawm.." tiin ka fanu biang chu dimtêin ka chûl a, hnute tui a neih lo hi kan buaina a ni ta. Nestogen siamsak angai a, ka nu nen kan in chhâwk zak zak mai a ni.

Kan in lamah nise YMA zan a la zo bawk si lova, amah Mafeli ṭha viau mah se inlam boruak a nuam rih si lova bâkah inlêng an awm deuh reng nen cabin-ah kan insawn ta kha a nia.

"A pu Lunglei amiin a hming a rawn phuah dawn a," tia a sawi lai chuan Lalfaka leh Maneihi an lo lang ve hlawl a, he mite pahnih hi an inzui ta nge, an rawn inthurual ve teh tlat chu le!

"Hey, eng ati nge i lo neih thawt thawt a?" Maneihi'n Mafeli a fiam a.

"Ṭhianpa, Delhi lamah chhuk leh ka tum a, lokal ve la, kârkhat vel kan châm anga.." Lalfaka'n min sawm chuan Mafeli ka melh zauh a, "Naute pahnih enkawl tur neih chuan chhuah a har mah mah a ni."

"Tak takin nakinah kan la kal dun leh dawn nia, nupui nei leh nei lo chu kan inkawp thei tak tak tawh lo a ni ber e," Tiin a nui ṭhû a, "Nei ve rawh, Maneihi nen hian ti ve hmiah u la.." Tia ka chhân chuan a nui ṭha duh miah lo.

Mafeli leh Maneihi inmelh ralh chu ka hmu hman reng.

Dârkâr khat dâwn an awm hnuah min hawsan ta a, kan fanu tân thawmhnaw eng emaw zât an rawn keng a, Lalfaka phei chuan ₹1000 min la pe zui bawk. 'In siam hah man ti ila i lâwm dawn si lova, naute thar enna a nih kha.." tia min pe kha a nia.

Remruatfeli
Aizawl

Damdawi in kan chhuahsanna pawh kâr khat vel a ni tawh a, Zirsanga a buai thei cher cher khawp mai. Dintea a haw chhoh lai a ni a, inlêng kan la nei zeuh zeuh bawk nen dâwr pawh a nghâk mumal hman bik lo.

"Fel, Arini hi kan awmpui law law mai dawn em ni?" Tia min zawh chuan, "A duh te chuan awm se, in khaw lamah nula fel deuh an awm lo maw, awmpui tur," tiin ka zâwt lêt hlauhva.

"Ka hre lo le, ka nu te kan ngaihven tîr dawn nia," ati mai a.

Zirsanga nu leh pa niminah an haw tawh a, Sangpuia erawh chu in lam an ngaihtuah deuh avangin Patea vui tûk khân a haw tawh thung. Arini leh Remruatpuia an la awm a, anni pahnih hian ka mit an tikham lek lek ṭhin! Nau te mah nise an awm dan hi ṭha ka ti vak lo a; mahse, Zirsanga'n eng mah a sawi loh avangin ka ngawi mai chauh a ni.

Bawiha pawh vawihnih lâi ka khak phah tawh.

Zan lamah Zirsanga a muhil hmasa ziah a, Duati'n Nestogen a hnêk tlat avang hian zanrei lamah a pa a tho ve thung a, kan in mut chhâwk tihna a nih ber chu.

A pu (Ka pa) in a hmingah Lalruatsangi a phuah a, kan nupa hming chawia a phuah tih kan hrethiam ve mai. Mahse, a koh dân turah buaithlâk kan tih deuh avangin Zirsanga pa phuah zawk kan ring ta kha a nia.

Zirsangliana nun inthlâk ta hlauh hi amah hre sa tân chuan thil awihawm pawh va ni suh.

Zû a in tawh ngai lova, kan boruak tawnin a zir loh avangin inkhawm lam chu kan la tithei meuh lo, mut dâwnah kan la ṭawngṭai zawm ta zel a, damdawi inah kha chuan patea boral lai vel a nih vangin a rawn kal tam lutuk lova, a nu in min awmpui deuh chawt khâ a nia. Nu Zuali pawh ka lakah a ṭha khawp mai, sawiselna tur em em ka hre lo.

Ka hlawh ringawt pawh kan ei sêng lo a, inluah man chawi a ngaih loh avangin a zia phian! Glass house lamah Zirsanga a ṭhu tam zawk a, Hardware lamah ve thung chuan a hmâa an chhawr tawh sa a ṭhu thung a, sum lamah chuan nei ṭên ṭûn lo mahila kan ziaawm angreng.

'Fel, Duati ka lo awmpui ang intifai ve tawh rawh le.." Zirsanga room-ah a rawn lut a, a chauh hmel kher mai! A tih dan ṭhin pangngaiin Duati a chhaih leh tê tê phawt a, a lo haw laia inbual lova ka lo la awm hian zuk ngaithei ṭhak lova!

"Inbual hmasa rawh, ka hmanhmawh lo.."

"A rualin ti dawn ila, a chi mang si lohva nula pakhat hi chu kan mamawh maw le," hei pawh a sawi ngai bawk.

Arini'n eirawng a bâwl a, kan lo innêl tawh sa nen a nuam khawp mai, Bawiha erawh ala rawn haw lova, naktuk hian Lungleiah a phei tawh dawn a, khua ati har lâwk ve riau. Mipa fa mah nise Duati pawh a lâwmin a chhawnchhaih peih riauva, tihian min awmpui reng se ka ti.

Zirsanga inbual hlânin ka fanu thawmhnaw ka thlâk a, nilênga Duati awmpui khâ ka hna a ni mai a, ka zei lo lutuk hi Zirsanga paw'n min nuih tawp zel.

Ani zawng nautê a ngaina bawk a, ama fâ ngei a ni zui bawk nen a awm chuan ka chang hman meuh lo.

A inbual zo a rawn chhuah tâk avangin bathroom-ah ka luhsan ve ta a, a fanu a be mawlh mawlh ri pawh ka hre pha reng.

'Duat duat, â nu angin Bike te ila khalh ve anga; mahse, vety doctor erawh i nih ka phal miah lo a nia..' Atih chuan ka nuih aza hle a, Vawk chhûl lâk, tihvel ah an khua a mite khan min ko zing ṭhin si a, a ning thei khawp mai. Min sawisel hreh tih ka hria a, ka hna a ni miau bawk si.

Bathroom aṭanga ka chhuah leh lai chuan Zirsanga a lo awm lo a, Duati a muhil thung.

'Arin, naktukah i haw phei ang, hetianga awm mai mai tur hian kan chah phei lo che' Arini room-aṭanga Zirsanga aw lo chhuak chu a chang ṭha khawp mai. Engvanga Arini hau ta vak nge a nih ka hriat loh avangin an awmna lam panin ka phei ve ta a.

Khumah Arini a ṭhû a, tukverh bulah Zirsanga a ding thung. Ka thâwm an hre lo nge atu mah mah chuan min ngaihsak miah lo nia!

'Bawiha nen hian ka la ringhlel chhin ngai lo che u, hetiang rilru i pu dâwn a nih chuan ka ngawi hauh lovang,' Zirsanga bawkin ati leh a, "Mama, iti mah mah a ni, ka duha ani paw'n min duh bawk."

"Ngawi hmiah rawh, tunah chuan chhungkhat kan ni tawh tih i hria a, a mawi miah lo, miin min dem dan turte chhût ve ta che, in induh tak tak a nih chuan khatianga awm lo khân min hrilh thei reng alawm," Thu kal lam leh hâw lam ka hriat ve loh avangin âw ka thian kharh a, min rawn hmu ve ve tih ka hriat chuan..

"Zir, eng nge thil awmzia?" Ka ti sap a.

"I nau Remruatpuia lo kamkhat ve ang che, nimin tlâiah motor-a an awm dun lai ka ṭhiante'n an lo hmu a ni awm e.." ati hmuk a.

"A dik em Arin?" Tih pahin khumah ka ṭhu thla ve a. Min chhâng lo hrim hrim! En pawh min en lo.

"Tenawm dun lutuk, ka car-ah kher kher lehnghal!" Zirsanga bawkin ati leh a, zawh nawn ngai lovin i20 a patea tâ kan rochun tâk a sawina khâ a ni tih ka hre mai.

"Mafel, i nau pawh hrilh ang che, hetiang mai mai a, a awm dâwn a nih chuan ka lawm miah lo a nia, puitling a ni tawh.." Tiin Arini room aṭang chuan a chhuak nulh a, engvanga kei min haw tel ve ngawt nge a nih pawh ka hre lo.

Rang lutukin ka umzui nghal a, ka hmuh hman miah loh chu le! Verandah-ah chhuakin a car tlânliam tur ka hmu hman ṭâwk a ni.

Bawiha leh Arini an lo mudun tihna nge, chupawh nise ka lakah thinrim kher a ngai em maw ni?

Chaw ei tur pawhin a rawn haw lova, a phone nise a switch off hmiah a, Arini pawh room-ah a tawmbo tlat a, vawithum lai ka koh pawhin min chhâng duh ṭhak lo!

A ṭap rî ka hriat tâkah chuan ka ngaihven duh ta lo va, Remruatpuia pawh alo la haw lo, vawi eng emaw zât ka call hnu pawhin a 'ring' ral ṭhak ṭhak a, Duati ka hma lamah ka awrh a, a zei lo mi ka lo ni bawk nen a rem teh ṭeuh lo khawp mai..Ding chungin chaw ka ei ta a.

Ka thiam loh a awm âwm pawh ka hre si lova Zirsangliana awm dan teh thut chuan min tihrilhhai ngei mai.

Zan dâr kua a rîk chuan Duati mutpui pahin khumah ka mu ve a, car thâwm ka hre nâ a, ka tho chhuak ta lo.

Zirsanga ngawirenga lo lût chu ka lo be vat a.

"Khawiah nge i kal a?" Dam thlapa ka zawh chuan min chhâng lovin a ngawi ngul nia!

"Zir, i thinrim anih pawhin ka chungah ṭuan kher lo la.."

"I nau chu i be tawh em? Ka nau laka a awm danah hian ka lâwm miah lo a nia, hrilh ang che.." Ati leh hmuk a.

"Ka phone a, a pick thei lo alawm," ka tih chuan nelawm lo zet hian min rawn melh tê tê phawt a, chutah, "An inzui tirh khân khak ni la, hetiang hi kan tawng hauh lovang," tiin min demna âwka a chhakchhuak ta a. Ka sa zak mai.

"An inzui tih ka hre hleinem, an inkawp tih ka hre lova; mahse, Bawiha pawh ka khak hial a, ṭhian angin an inen ni hmiang ka ti,"

"Dâwt sawi duh suh, Remruatpuia'n Matei pawhin Arini nen kan chungchâng a hre vek ati che a, a hre lo awm chhun chu i pasal chauh hi ka nih hmel, i nau chu mipa a nia, a mualpho dân a nêp deuh ang, ka farnu erawh a mualpho kumkhua tawh ang." Tiin a vei nghut nghut a, a hmêl thinrim avanga thim khap chu a nelawm tehchiam loh.

"Eng mah ka hre lo reng reng, an inbiak vel dan leh an khawsak danah ka mit a kham deuh avangin ka khak tawh a, hetiangin an awm ang tih ka hre bik hleinem.." ka ti tlat a, a dik rêng bawk. Chesual turah ka dah phal lo hrim hrim a, nula leh tlangval anni a mi hmuha mawi lo khawpin awm loh tur tih ka sawi ve ngei alawm.

"An pahnih hian hâw phei rawh se, a ruala haw kher pawh angai lo, Arini chu keima'n ka dah phei anga, i nau erawh i kutah awm rawh se,"

"I awm lovin engtin nge kan lo awm anga, Duati nen chauh te chuan a buaithlâk dawn asin," ka tih chuan, "Mi nupuite pawh an pasal te'n an awmpui reng hleinem pakhat chauh buaipui theih loh tur a awm dâwn em ni?" Ati leh kher a. Ka thin tertek a chhuak ve ta.

"Enteh, i thinrimna chhan chu eng pawh nise ka lakah tihlan kher a ṭûl em ni? I duh phawt chuan i nau chu va dah mawlh rawh.." ka ti hmak a.

"Mahni mâkpa nau mutpui duh mipa ka vawikhat hriatna.." Ati sup a.

"Mahni monu-nau mutpui duh ka vawikhat hriatna," ka ti ve ngat a.

"Arini ala puitlin loh zia hrechiangtu i nia, i nau hi atîr aṭangin zilh nila chuan eng zahna mah kan tâwk lovang,"

"Inhnial buai ka peih tawh lo, i duh dan dan khân awm rawh, keini nufa chauh min kalsana i nau i hruai duh a nih pawhin kal rawh, kan awm thei ang," tiin Duati hnute hnêk tur ka siam san ta daih a, min chhâng tawh chuang lo hian room aṭang chuan a chhuak leh ta a.

Duati kârhnih êm pawh ala tling lova naupawm chungchângah ka thiam loh zia hretu a ni bawk a, khati khera min ṭawng khum kha ka ngaithei bik lo. Keini nufa aia a nau a ngai pawimawh a nih chuan a thû a ni mai.

Tih tak êmah chuan Sumo service a tam lutuk ringawt, inthuruala an haw tlân a hlau a nih pawhiin counter-ah an chhuah hmâ a nghâk thei alawm, ati lutuk ve deuh a ni.

Zankhuain Zirsanga a lo lêt tawh lova, Duati a tlei lutuk lo bawk nen ka thinrim ṭûn mai.

Nestogen ka siam chhunga a lo ṭah nasat phei chuan ka mangang titih a, zan dangah chuan pakhatin hnute a lo siam a, a rilṭâm ṭap vel atu emaw zâwkin kan lo âwi ṭhin kha a nia.

Zinglam dâr khat pelh hretah muhil turin ka inruahman ve thei chauh nia!

Remruatpuia leh Arini chungchâng ka ngaihtuah phei chuan ka thinrim hlur a, tute nge an awmdun lai va hmu tih pawh ka hre îkhaw lo mai.

Khawvar hmâin Duati a ṭap leh a, mit kham ûrh a ṭhu chhuakin ka'n pawm leh tê tê a, Zirsangliana ka ngei ru takzet. Khaw'nge a awm pawh ka hre lo.

A nau leh ka nau awm dan avanga keini nufa chunga thinrim ve rîkngawt! Min ngaihven malêk rawh se.

After 3 hours

"Kan kal dawn a nia, ka rawn lêt leh nghâl ang." Zirsanga lo lût lai chu en pawh ka en duh lova.

"I duh phawt chuan châm char char rawh, kan ngaihtuahawm loh."

"Ka châm kher lovang, i nau khâ lo buaipui la a tâwk " ti hmukin a thawmhnaw a thlâk sawk sawk a, "I nau, i nau, tireng mai, i nau zâwk kha zilh ta che, hmeichhia a nia car-a mipa tawmpui mai mai lo turin hrilh rawh.." Nizan ka mu ṭha lo thinrim bawk nen ka ṭawng na hrat.

"Remruatfel, tuna i sawi zawh chiah kha han sawi nawn leh teh?" Khuma ka ṭhu lai chu ka dârah a rawn vuan a, min sawi deuh nawk nimaiin ka hria.

"Ka sawi zawh chiah ang kha a ni mai."

"Arini chungchâng vawikhat mah khatiangin sawi leh tawh suh.." tiin en pawh min en lo hian a chhuak tau leh ta a.

Nie, Remruatpuia ka nuṭa a ni a, Arini a farnu a ni bawk.

Ṭha tê tê-a sawi theih reng laia a thinrim zâwnga chêt tlat mai, ka ngaih dan a ni bîk lo.

An chhuak thawm pawh ka hrereng a, 'Ṭîk' pawh ka ti duh ta lo.

Kan in zaupuiah Duati nen kan awm ve ta rak rak a, hun dang chu nise thinrim avangin ka be tawh hauh lovang; mahse, ka pasal a ni a, a nupui ka ni bawk. A rawn lêt leh hunah tûn anga ala awm fo chuan ka ngawi mai mai hauh lovang.

Kan nupa inhauhna pangngai chu nise ka hrethiam. Mahse, kan nau te ve ve anni a, a zilh duh a nih pawhin an pahniha zilh dun mai tur, Bawiha ka ṭan hlur dâwn pawh a ni chuang lova ati ve lutuk deuh a ni.

Zirsanglian zawng a thinrim ve mai mai lo a, a thinrim chhunah eng mah pawisak a nei lo tih ka hre tawh tlat alawm.

Duati thleng thlenga a lâwm duh lo erawh ka thâ a na ve deuh.

Remruatpuia rawn luh lai chuan rum deuhvin ka lo melh a, zu rim a rawn nam huk bawk nen ka sa kher mai. Anmahni vanga inti lungawi lo kan ni a, chuti chung chuan zû nam chungin a lo la lût a nia, ka thinrim takzet.

"Mate, khaw'nge an awm vek a?"

"Lungleiah an kal, i thitih pawizia hi i hria em? Zirsanga a lâwm lo teh a nia, kan inhau phah bawk," ka tih chuan a ngawi reng a.

"Arini dahin a kal a, kan nupa inkâr bâkah chhungkua thlengin a nghawng thei tih hrethiam tur chuan i upa tâwk tawh. Zahpuiawm lutuk!"

Min chhâng lovin a chhuak daih a, ka hau ve a pianga atih ṭhin dan a ni bawk.

Ka hauh ber a chhuah tâk daih si avangin rilru pik zetin ka awm reng a, Ziranga'n an thlen chin eng mah min la hrilh lo bawk.

Bul kan ṭan dâwn chauhva buainain min tlâkbuak nghal pang chu a nia.

Luhlul ṭheuh ṭheuh kan indâwr ṭha thei ngût ange maw chu..

C<++++[BeckirafARenthleI]++++>R

28. RAPSAGY

Becky Rafa Renthlei

Chapter-28
Remruatfeli

Duati nen khumah kan mu mai mai a, inlêng em em kan nei lo bawk nen a khawhar thlâk ve reng. Bawiha pawh inthlahrung dûkin TV a en a, zinglamah eirawng a bâwl teh mial! Min biak pawhin a rûl tawk lek lek bâkin ka chhâng duh miah lova.

"Mate, Zirsanga chu a thinrim viau em ni?" Kan room-ah a rawn lut a.

"Thinrim e, i nau khâ lo zilh ṭha rawh, ati deuh chhên bawk, ṭha tê tê-in in inkawm emaw tih laia, car chhunga lo tawm kha a mualpho thlâk lutuk, a patea car a ni lehnghal a, a thihna pawh a la rei loh tehlul nen a rilru tur ngaihtuah ve la, i hrethiam mai ang," tiin ka pasal thlavâng ka hauh tlat a.

"Amah Arini'n min rawn be hmasa zêl a, Maengi nen kan inṭhen chhan pawh Arini vang a nia, whatsapp-a min biakna Maengi'n a hmu a, a tîrah pawh ṭhian ang bâkin ka kawm lo." Rilru hah hmêl takin a sam a tuai puat a, ka khawngaih angreng.

"Tun chinah fimkhur takin awm ang che, nupui neih i duh pawhin kan hnial lo che a, i û hi entawn tlâk ka awm lo pawh a ni thei, nang tal chuan ka nu leh pa zahawmna tichhe suh, fâ pahnih chauh min nei a, rilru nei takin awm la ka duh a ni." Dam thlapa ka zilhna chu ngawirengin a ngaithla a, "Zirsanga rilru tur ngaihtuah la, a lo hau ta che a nih pawhin ngaihdam dil ang che, a farnu a hmangaihzia i hriat kha.."

"Arini nen hian kan inzuina ala rei lo hlê a; mahse, kan inmil khawp mai, Maengi nen in anna pakhat mah an nei lo." Ati ta a.

"Nupui atân i duh em ni?" Tia ka zawh chuan a ngawi ta vang vang a, chutah, "In phal te chuan duh e, a nu leh pa hian an phal angem tih lam zawk a ni, ala naupang si a." Ati sup a.

Rei fê kan titi a, Maengi nen kum tamtak an inzui tawh hnuah nupuia Arini a duh leh tlat lawi si hi ka hrethiam pha lo. Â keini pawh Nutei nen tikhawp khân an inzuia min nei ve tho bawk si a, ka hrethiam pha tawh bik lo! Mipa rilru hi hriatthiam a lo har a ni ang e!

Chhûnah thingpui in lovin Theitui kan in a, Bawiha pawn a theih ang angin min pui ve a, Duati a lo awmpui chhûngin naupuan ka su thung a, a pa awm leh awm loh a hriat bik teuh lo. Nilengin vawikhat tê mah min lo call lova, a lo lêt phei ta nge pawh ka hriat si loh.

Nupui pasala insiam hi tih namai a ni dawn hauh lo tih ka hriat chian phah bawk a, nupa chungchâng kher lovah pawh unau kârah leh nu leh pa aṭang te pawhin innghirnghona tur a lo awm zeuh zeuh dâwn a ni hmel.

Zirsanga thinrim chhan ka ngaihtuah khân dik ka ti viau a, mipa leh hmeichhia chu kan mualpho dan a inang lova chuvangin a farnu a ṭanna kawngah pawh dik ka ti ve tho.

Mahse, eng mah sawi chiang hmasa lova min thinrim khum ringawt erawh ka lâwm bik lo a ni.
Bawiha leh Arini innei ta ang se kan monu tihna a ni dâwn a, a nuam dangdai phian maithei bawk.

Lungawi lo ru tho mah ila a chanchin engmah hriat loh tehtawp chu tiin Zirsanga ka call ta a, a 'ring' ral ṭhak nia maw le!

Zan dâr 12 thleng ka nghâk a, Duati hnutê ka pêk laiin a rawn lût ve ta hlawl a, a pawr fap mai.

"Ka lo call che a.." ka ti sap a.

"Motor ka khalh laklawh alawm," ati nghut a, nidangah pawh motor a khalh laiin min rawn be ṭhin thova tun a taka chhuanlama han hman leh si! Mahse, ka sawilang kher lem lo.

"Chaw i ei tawh em?"

"Ei tawh e, khaw'nge Remruatpuia?" Khum bulah a rawn ding a, Duati hnute hne lai a en vang vang hnu-ah, "Ka va'n ngai reuh tak.." kûn hniamin a chalah a fawp zeuh a, zu rim nam thâna ka hriat chu le!

"Rawn kûn leh teh," ka tih chuan a nui suk a, nichina a hmêl rum zet kha a bo duak tawh a, "Hey, ka kûn kher nachhan tur pakhat tal sawi la.." ati sup a.

"Wine shop rim i nam tiraw?"

"A ang lo lutuk, min puhchhiat i tum.." tiin kal sawn a'n tum nghal ringawt a.

"A nih chuan lokal teh, ka hnîm chhin dawn che," Duati khumah ka mut a, puan ka sintir thlap hnu-ah ka tho chhuak ta a.

"A mak thei, eng mah thil ṭha lo tih ka nei lo, tukina ka chhuah dawn khân ka lungawi lo ngei mai; mahse, thil ṭha lo tih duhna khawpa thinrim erawh ka ni lo.." tiin ka hmai bul chêtah a rawn kûn a, "Min ring chiah lo a nih chuan," a sawi zawh rualin ka hmuiah a rawn fâwp ta a, zu rim a nam miah lo! Nichin khan ka hresual tihna a nih dawn hi..!

"Ka nu leh pa hnenah Arini te chungchâng ka sawilang lo a mia, i nau pawh keima'n ka la bia ang," a hmui lasawnin ka darah a vuan a, "Nizana ka awm danah thupha ka chawi e, ka ṭhiante'n hmu anga ka sawi kha thudik a ni lo a nia, keimah ngeiin ka phâwk alawm," rilru nat hmel takin ati ta a.

Ka hmui hupin ka meng deuh kâwk a, ka lo zak hluah hluah. A nau leh a nupui nau chesual a hmu chu a nia, a rilru tur ka hrethiam lehzual!

"Awi!" A bâk sawi tur ka hre mai lo.

"Ka inbual phawt anga kan sawi ṭha dawn nia," atih chuan ka bu nghat a, thinrim viau pawh nise a âwm ka ti hliah hliah! Kei ni ila ka sa khawp ang.

A thinrim pawha ri buan buan leh kutthlâk ching mi nise chuan Arini khâ a bêng duh maiin ka ring; mahse, ṭawngkamin ala hau thei zawk a nia, Bawiha pawh kutthlâk hial mah se ka dem miah lo. Kan garage-ah ama car chhungah lehnghal mahni naute va phâwk tur anga ka mitthla hian ka lo hrehawm ve ngawih ngawih.

A inbual zo a lo chuan a hmel a dam deuh thlap tawh a, a sam hnâwng chap leh thur deuh chhap chuan ati lang 'pa' riau.

"Min en reng chuan Duati theihnghilh ṭhak khawpin ka che mai tur a nia.." a nui zui suk a, nau ka neih hnu hian vawikhat mah nupa nun kan la hmang lova a insûm thei angreng.

"Insûm insûm.."

"Ka insûm rei thawkhat chuan ka hria, chaw bêl bula rilṭâma awm ang vel ka ni." Khumah a rawn lâwn a, Duati kiangah a mu ta a, "Lo mu ve rawh le, sâp ho anga honeymoon hman tihvel ai chuan mahni in ngeiah, kan khumah ngei hian a nuam fê, ruahsur laia siam chu hmeichhia an ni duh tihna a niang," a nui hawk a.

"I ho em emai aw, tlangval lai anga ṭawng puat puat loh tur,"

"Khirhte," tih pahin ka mutna tur a bêng thak thak a, ka va'n ngei tak.

Duati a laiah muttir lovin ama mutna lamah a sawn a, asír berah kei, chumi zawhah amah, Duati a kilah a mu a, kan khum hi feet ruk square a nih vangin kan la thâwl angreng.

"Nizan ang khân thinrim ringawt tawh suh aw, a hrehawm a nia," a kâwnga kuah pahin ka phun sap a.

"Fel, min hrethiam rawh, ka thinrim mai piahlamah ka zak ngawih ngawih a, kei lo midangin an hmu angem tih ringawt ka rilruah a awm a, nang lah eng mah hre lovin i lo hlim phian bawk si!" Inthiam loh hmel taka atih tâkah chuan ka rilru a dam huai.

"Nidang zelah pawh lungawi lohna i neih chuan ṭha taka sawi hmasak zel tur, naktuk zing chaw ei laiin Bawiha pawh kan zilh dawn nia, keimah ringawta zilh ai chuan kan nupaa ṭangtlângin thu ṭha kan hrilh mai dawn a ni." Ka ti dam thlap a.

"Tehreng mai, a hma chuan chhungkuaa pakhat lekin ka thin an tihrim pawhin an vâia chungah ka ṭuan ṭhin a, ka la thlah hleithei lo chu a ni e." Ka tukkhum sam a chûl hauh hauh a.

"Chu tak chu i insiamrem a ngai, pakhat lek chunga kan thinrim a nih pawhin zavaia tawrhtir kher loh tur, tin, inlêng an awm lai phei chuan kan lungawi lohna tihlan loh hi a finthlâk ber.."

"A har ve êm alawm.." ati sup a, chutah, "Nang ka tawng che hi chu vannei ka inti, nizan chungchangah ngaihdam ka dil nawn a che..."

"Hus! Ngaihdam min la dil awzawng lo e a, daw reng reng suh.." a malpuiah ka ṭhâm sak a, a phu zawk nia maw le.

"Ngaihdam dîl tih lemah, min ngaidam tawh sa tho tiraw!?" Zuk ti zaih a. Phakar lutuk.

"Zaninah Duati vil char char la kan inrem a ni mai, vawiin nilênga i awm loh man leh nizana i riahsawn san avangin zanin chu charge ka hlan ang che.." ka nui duh miah lova.

"Â hah! Fa pakhat lek kan nei dêk dêk a, kan inphût em em chu a ni sia, Duat Duat, â nu hi e, kan la ngam lo ang tih ka hlau," a fanu muhil lai a melh zauh a, a mitmenga hmangaihna lo lang chhuak hian min tilawm ṭhin.

Nupa chu inhau châng leh intih thiamloh châng a awm tur a ni; mahse, a tâwp thlen duhna rilru put loh leh a dawhtu zâwka ṭan hian inremna a siam mai ṭhin a ni. Kan tuar thei ngang dawn lo a nih erawh chuan kír leh ngai tawh lo tura rilru siam hmak mai tur tih hi ka ngaih dan a ni deuh.

"Zanin chu kan 'up down' dâwn lo em ni?" Ka beng bulah a rawn phun sap a.

"Teuh lo lutuk, damdawi in kan chhuahsanna ala rei loh êm hi, bâkah ka..."

"Ok, ok..ka hrethiam e, ka la nghâk thei a nia.." a hmui lum ham ham leh hnâwng chapa min rawn fâwp zui zatin ka lo chhâng ṭha kher mai, ka âwmbawr vel khâl niap niap pah hian, "Nestogen hnêk tir lo ila chuan ka chang pha dawn si lova," zuk ti lehpek a.

"I chantawk a bo lo turah ngai ang aw, Zirbawihte.."

"Remruatfel, tikhan min ko ziah suh.."

'Zirsang' tiin emaw a hmingpuma ka koh loh hian zu ngaithiam miah lo a! Ani pawn min ko duat tehhluâk hran lo, 'Mate' tia min koh ve zauh a chîng a, a bâk zawngah 'Fel, Mafel' tih khâ a ni leh mai.

Nizan lam ka muhil ṭha lo bawk nen mut chhuakin min zem chiai chiai a, a âwm nghêngin ka chhing ta riai riai a.

3:40 Pm

Ka zun chhuakin min tiharh hlawl a, zinglam dâr thum a pêl tawh. Room chhung êng uar ah chuan mit ka khap sak sak a, Duati te pafa an lo la in awi hliau hliau nia maw le!

"Zir, a mu duh nange?"

"A ṭah nasat tehreng i hre miah lo a nia," makti hmel taka atih chuan nuam lo ka ti ve reng.

"Ka lo mutui lutuk a.."

"Tak takah ka ko duh lo che a nih kha, tuemaw vangin nimin leh zan hmasa i mu ṭha tawh bawk si lo va.."

"I sawi dik, ka mit hi a kham urh mai, ka zung phawt anga ka lo chhâwk ang che," ka tih chuan, "Eng emaw ei tur min sak zâwk la.."

Omlette ka siam sak tuiti deuhva a eilai chu ka en reng a, tlangval hawklak leh nun ho ve tak ṭhin hetia chhugkaw pa ber chan a chang ta hi a lehlamah chuan ka lainat deuh! Engkimah hmâ a sâwn a, eng emaw chânga han tih leh hluk erawh a sim thei lo a chhâ chu a ni e.

Khawvar dâwn hnaihah Duati a muhil chauhva ka pawm ve pawh phal lovin min âwl zankhua a ni ber e, a duh hi chuan a fel thei hnûp hnûp asin.

Zinglamah eirawng ka bawl a, Bawiha'n min pui bawk a, nula pakhat ka nu te'n min lo hmuhsak tawh bawk a, kan buai a ziaawm ve turah ka ngai deuh.

"Fel, vawiinah dâwr ka nghâk dawn lo a nia.." Zirsanga'n Duati a rawn pawm phei a, ka sawi zin tehreng nen engah mah a ngai lêm hlei lova, choka lama pawm phei leh a ṭûl tâwpah lo chuan pawm chhên a ṭha lo tih ka hrilh ngun khawp mai. Mahse, a pa a nia, ka tâ vek ni bik hek lo, a zâwm em em lo.

"Bawiha hi thil tihdan vel zirtir la, kan buai zual lai chuan a nghah chhâwk ve che anga a pawi viau dawn em ni?" Ka tih chuan, "A ṭha tak ang, nakinah tih dan tur ka hrilh dawn nia," ati ṭha mai a, Bawiha lakah pawh thinrim angin alang tawh lo; mahse, ala zilh thovin ka ring.

Nilêngin kan chhungkuain kan awm ve rak rak a, Zirsanga lah thu ho deuh deuh sawi a chîng si a, ka nui deuh reng mai.

"Ramthana leh Nutei an innei ve dâwn a.." a rawn sawi chhuak teh tlat a.

"Engtikah..?"

"Ka hre bik lo, an chhungte'n rem an ti lo chung an nawrlui deuh ani awm e, Ramthana ber a haw duh miau si lova."

"Innei rawh se, kârah fa a awm tawh a, hmeichhia tho tiraw anneih ve?" Tia ka zawh chuan, "Ka hre miah lo" ati liam puat a, Nutei chungchâng kan sawilang khât ve khawp mai.

Duati ka bual zawh vek hnuah ka inbual ve nghal daih a, an pafa-a an in awm hi chuan ka ngaih a ṭha hliah hliah.

Ka nu leh pa'n a khât mawi tâwkin chanchin min zâwt reng a, Zirsanga nu leh pa te pawh chuti tho. Sangpuia leh Sentei an inkawp ve deuh tak tak tih min hrilh chuan ka lo lâwm ve ringawt a, innei pawh nise Sentei a fel a, an ngaihtuahawmin ka ring lo.

"Mafel, Duati a luak a nia.." Zirsanga aw ka hriat chuan rang lutukin ka intleuh pawp pawp a, bathrobe inbelin ka tlânchhuak ta a.

Duati hmâiah a hnute hnêk a kai luam a, ka nuih aza ngei mai.

"Khawiah maw a luak chu?"

"A hmai leh nghâwng velah a kâi ṭeuhva ka tifai tawh," atih chuan, "A luak hleinem, hnutê i pe hnem lutuka a irh a nih kha.." ka tih chuan maktih hmêl fê-in min en a, "A luak lo maw!?" Zuk ti a.

"Nestogen pêk hnem lutuk chuan an pum a puar a, an irh vak ṭhin alawm, khatianga a awm leh chuan i koki nghêngin pawm kâng la a hnungah zawi tê tê-in i bêng dawn nia.."

"Ka hlauhthawnzia chu a.." tiin a thaw hawk a; ni e, ani tân chuan hriat kim vek a har khawp ang, Duati lah a ngawi hlê hlê a, a hmai ka hrûksak thuak thuak a, bathroom-ah ka luhsan leh ta a.

Zanriah kan ei laiin Zirsanga'n Bawiha a kamkhat ta nge nge a, eng mah ka sawi ve lo, thinrima hau a ni lo tih ka hriat avangin ka lo ngawi tlat a.

"Nula tlangval inni a, Arini pawh ka hau tho, keimahni anga in awm ve kan duh loh vang ania, tun chinah fimkhur hlê tawh ang che u, ka nau te ve ve in ni, ka en hrang miah lo che u a, a puitling zâwk leh a upa zawk i nih avangin in mualpho tam hmâin in inkâr chingfel turin ka duh che." Ati a.

"Nupuiah ka duh reng alawm," Tia Bawiha'n a chhân chuan, "Ka nu leh pa ka lo sawipui dâwn nia, ala naupang tih i hriat kha, ngun takin inngaihtuah la, mite pawh unau leh unau innei an tam hlê, kha lam kha ka hlauhthawn a ni lova, hmun fianriala mutdun tih te inneih hmâa hmeichhiat mipat hman hi thil ṭha a ni lo, keini pawh a hun hmâa kan chêtsual avangin nu leh pa duhthusam inneihna kan tlin lo a nih ber hi, fapa mal i ni a, an rilru tihnat sak suh.. " Dam thluamin ati leh ta a.

Zirsangliana ṭawngkam chhuak atan chuan puitling tak a ni.

"Min lo sawisak ve ula inpahnih khân,"

Kan nupa-in kan inmelh zauh a, kan nui tawp.

An induha an inhmangaih phawt chuan innei mah se pawi ka ti teuh lo. Chhungkua kan inrem ting ting a ni mai.

After 4 weeks
Zirsangliana

Vawiin hi Duati kan hlan ni tur a ni a, Mafeli pawh a dam ṭha viau tawh a, Pathianni inkhâwmah nau hlan programme an siam a, kan fanu kan hlân ve dawn a ni.

"Fel, car-in kal mai ang aw.." a nulât laia a chêt awlsam nen inkhawm dâwn apianga a insiam nghah angai ziah ta hi ka hau zing ve khawp mai. Office a kal dâwn chuan a inpeih thuai a, puanbih lamah hmâ a sâwn mawh khawp mai.

"Ka inpeih aw, car la chhuak la kan lo kal.." a rawn ti ve hrâm.

Biak in kan thlenin mi an lo awm ṭeuh tawh a, kan ṭhutna tur usher-in min kawhhmuhna lamah kan nupa-in kan inzui phei ve ta a, Mafelin Duati a hma lamah a pua a, a vawikhat nân ka hmangaih te pahnih ka inkhawmpui ve ta. Kan inneih hlim khân pûklâwk kan nih avangin inkhawm kan zak ṭhin a, kan khuaah vawihnih chu kan inkhawm ve tain ka hria.

Tûn hi ka nupui leh ka fanu ka inkhawmpuina hmasa ber a nih vângin ka ṭhianpa Lalfakhlua thlâ min lo lâksak turin ka be diam a, Duati an hlân lai thlalâk neih loh ka hlau teh asin.

"Lalhmangaihzuali, Zirsangliana leh Remruatfeli te fanu.." tia Pastorin kan hming alam chuan kan ṭhuthmun aṭangin kan dingchhuak a, Mafeli a zak hlê tih ka hre mai.

"Ka nau duhtak, Pathian leh a kohhran te zînga i lo tel ve tâk avang leh..." Pastor-in kan fanu lu chungah kut nghatin a ṭawngṭai a, kan fanu pawh a ngâwi vei kar nia. Lalfaka'n camera a rawn lek deuh chhên a, 'Pa' ni hliah hliah bîka ka'n inhriat chu le.

Inkhawm banah min chibai sap sap hlawm a, ka patea boral lai leh Duati pian a inrual avang khân kan fanu hian entu a ngah hlê..

"A hmelṭha si, a ngo bawk si.." min fak tak takna a ni nge ni lo hre chiah lo mah ila dawnsawn a nuam takzet.

"Zir, Duati hi Lungleiah kan zinpui ve dâwn em ni ang." Khumah kan chhungkuain kan mu a, inkhawm ban khân Lalfaka te inah thingpui kan inkâwi a, chumi hnuah kan haw tlang ta kha a nia.

"Tehreng mai, remchang hmasa berah kan tum dawn nia, Duati min pêk avang hian ka lawm hlê a ni." Tiin a pum ka chûl sak a.

"Min pê zawk alawm, in pahnih hian ka hmangaih che u." Tih pahin ka lam a rawn hawi a, a mitmeng fiah kâk a min hmangaihna lo lang chhuak chu ka hmuh hmaih bik lo.

"Kei pawhin ka hmangaih che u, ka hmangaihna leh ka duhna che hi tilang thiam chûk lo mah ila ka thinlungah nang leh ka fanu bâkin hmun an chang lo." Ka ti a.

"Ka lawm e, ka hmangaih che.." Ka hmuiah duhthawh zetin min rawn fâwp ta a, ama duhthû ngeia a chêt chhuah hi chuan uar ve tân tân tak a ni.

A huna zak lo thei, a hmun leh hun hrethiam Remruatfeli ka nupui khâ a ni tlat a.

Hmangaihna chendun kawngah pawh a hmahruaitu nih a hreh ngai lova, vawi engzat nge ka lungawina min thlensak tawh pawh ka chhiar seng lo! Ka nupui hlimna leh lâwmna tur a nih phawt chuan theihtâwp chhuah ka inpeih reng.

Ka boxer hâk min phelhsak lai chuan ka nui suk a, a hmanhmawh duh ṭhak lo lehnghal a!

"Duati hriat phâk lohna hmunah insawn ang ti dâwn ila a rem chiah si lova.." tiin a nui hak a. Ka hnuailam inpeih at tawh chu tawk leh zauhvin, "Ka inpeih e.." a mah bawkin bul a ṭan ta a, nupa te chauh inkâra thleng tur nupa nun hmang turin kan hunawl kan hnawhkhat ta a.

"RAPSAGY" ka sawi chhuah rualin ka mitah tak min rawn en ta a.

"I ṭawng hriat loh dawn chu a awmzia ka hriat a hun ve tawhin ka hria," ka biangah, ka hnar leh ka hmui a zût kual dan dan a.

"Yes, RAPSAGY(Ka phatsan ngai lovang che)" Zawi sup leh fiah faka ka ṭawng chhuah tâkah chuan a kut che lai tâwp chatin min en a, "Ka lawm e, Zirsanglian zu..." a sawi zawh hmâin a hmui ka hup sak ta a.

A sawi tum ka hrechiang alawm, min chhaih nân tak hman phêt atum ṭhin tih ka hria, huat enah pawh ka en tawh bik lo.

Phatsan ngai lo tura rilru siamfel vek tu keimah Zirsangliana khâ ka ni tlat atin ni. Ka tân hmeichhe dang an awm lo mai nilovin an awm leh ngai tawh lovang.

Ka nihna ang anga min pawmtu Remruatfeli hi KA PHATSAN NGAI LOVANG.

A vawihhnihna a nupa nun kan hman leh meuh chuan mipa ka nih ang ngeiin a lungawi zânna ka pê leh ta a, ka âwm nghênga muhil, min kuah chialtu tâna nun hman hi ka damchhung hna a ni.

Duati rawn ṭê ṭhat ṭhat ngaihven a ngaih tâk avangin Mafeli min kuahna bân chû dimtê-in ka dahsawn sak a, ka fanu ka ngaihven san ta a...

A nu hmêl ang maia ngaihawm fanu ka nei hi ka hlimna tifamkimtu a ni.

C<++++[BeckirafARenthleI]++++>R

NOTE: Naktuk zanah buaina leh harsatna a awm loh chuan a tâwp kan khâwr pum ang aw.. Min chhiarsaktute chungah lawmthu ka sawi nawn leh a Kawmen uar tak tak, dam thluam te kha chhiar a nuam teh a nia, keimahin ka nui suk zel..

Ka lawm e.
BRR

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:41 pm

29. RAPSAGY

Becky Rafa Renthlei

Chapter-29
Remruatfeli
Aizawl

Zirsangliana nen kan inneihna pawh thlaruk lâi a ni tawh a, 'Nupa awhawm ber tia chhâl tur ni lo mah ila chûng zinga chhiar tel tlâk kan ni ngei ang' ka ti ngam ve tlat.

Kan thû inhmuh loh châng tepawh a awm fova inhnialin inti thiam lo ve ṭhin mah ila a dawhtu zâwk ka nih châng a awm a, min dawh hrâm hrâm châng a awm ve tho bawk; chhungkaw diktak kalphung a ni miau a!

Duati Vaccine lâk ni-ah kan inhnial deuh reuh a, a malpuia an jection-na in a khua ati sik ve a, a ṭap tlaivâr zak bawk nen kan buai nupa hlê a, ka âwi tlei hleithei lo mangangin a pa kutah ka dah a, a bâng duh chuang si lova, "Eng ati nge maw ni le, a nu zâwkin i tih tlei theih miah lo chu le?" Tia min vin deuh chuan ka sa zak nia!

'A nu ka nih vanga a ṭah apianga titlei thei tur ka ni bik hleinem, kan pawimawh dan a inang reng' tiin ka lo chhâng pek a lawm le, min melh no lem lo khawp mai, Duati ka pawmlai chu min rawn chhuhsak a, choka lamah a pheipui ta daih a, engtin tin emaw biain an va inti muhil hrâm! Kan room-ah a rawn lêtpui ta mai si lo va ka va pawh leh ta nge nge a.

"Zir, lo mu phei tawh u la.." inthlahrung ru deuhvin ka va sâwm a, min chhâng duh leh tlat lo.

Thingpui ka insiam rak rak a, 'I duh vem em?' tia ka zawh pawhin ala ngawi ngul tho nia!

A fanu pawmin TV a en a, ngun taka thil ngaihtuah hmêl a pu mah zawk!

A kiangah ka ṭhu ve a, "Duati khâ ka lo mut dawn em ni ang?" Ka tih chuan min pe ve mai a, a rit ve tawh riau a, bâkah awm thawlênpui vak chi a ni lo, thlakim lova piang a nih vang hian dímdâwih a ngai viau bawk.

Kan nufa a kan mut fel hnu-ah a lo insawn phei ve ta chauh a, lungawi lo angin alang chhunzawm lo nâ a, min be tuitam lo khawp mai.

Zingah erawh nunphung pangngai kan zawh veleh mai a, ka hna ṭan nî hmasaberah an pafa-in kan office thleng min thlah a, kan nula kutah Duati kan dah dawn chu a nia, ka ngaih angam lutuk lo! Nestogen ring a nih vang hian a luhlul deuh em maw ni!?

'Â nu bye bye rawh le.." Zirsanga'n Duati pawm chunga office a chhuahsan dâwn chuan a nuam bîk miah lo, 'Min lo nghâk r'u car dahna thleng ka lo thlah ang che u' tiin ka zui ve leh ta a. Kan pa nuih aza hlê.

Kan inneih hlim ang bawk khân
midang hmuh laiin kan la in 'chu e kha' tehchiam chuang lova mí hmuh laia induat hliau hliau hi kan nupa rilrem zawng a ni lo tepawh a ni mahna.

Parking area kan thlen thlâk chuan, "Mate, ngaihtuah lutuk duh suh, a tlei ta lo a nih leh ka lo ngaihven dawn nia," Duati min pawmtir leh tê tê a, chutah nui suk chung hian,'A ṭûl a nih chuan dâwr nghak lovin kan fanu ka lo awm dawn nia, i hna dah pawihmawh hmasa rawh le, eng mah rilru hahna tur a awm lo, a pa kiangah chuan a him ang tih ring hmiah rawh." Ati ta a.

Nie, a fanu a hmangaihzia ka hrechiang a, nitin leh zantin a kuah deuh chawt alawm le, awm lo mah ila engkim a lo ngaihtuah fel ang tih ka ring thlap.

Ka thawhpui pa nena kum tâwp training kan neih tur erawh Zirsanga'n a remti ngang lova ka aiawh tur midang an ruat ta a, directorate lamah ka chance neih a ṭhat tehlul nen ka ui ru ang reng viau.

"Training khâ a ṭha lo tihna nilovin Duati nen chauhva awm tur anga ka inngaihtuah hian ka zuam lo, pawisa te chu duhtawk chin tak tak a awm hleinem, director ni lo mah la pawi ka ti tehchiam lo a nia, i luck lutuk palh ang.." Zuk ti tlat a!

Zirsanga nu leh pa'n Duati an rawn tlawh ve a, an tunu tâna an inhuam thuizia ka hriatin ka lawm hlê, car control theih steering nei thlap, sîng chuang man an leisak a, 'A ṭûl lo, ala nau em mai' tia kan hnial pawhin an bengkhawn duh eih lo. A pu phei chuan ka 'pension ṭêp tawha helamah kan awmho dâwn nia, Duati hian min ngaina lo palh ang' a'n ti ve ngei a, awmtlâng tak tak dâwn lo mah ila a dawnsawn a nuam hle mai.

High school teacher lâk a ni dâwn a, Zirsanga interview tura ka nawr deuh chuan a lo duh îkhaw lo mai! 'Sawrkâr hnathawk lo pawhin ka châwm thei che u alawm, nupaa hna nghet neih chu fa te an ngaihtuahawm' ati deuh tlat khâ a nia, ka tîr fail ṭhak.

A tum ruhzia leh taimâkzia ka hre chiang tulh tulh a, kan dâwr pawh lûn tak a ni. A bike a hralh tawh a, i20 patea ta kan rochun tâk leh ka car kan la kawl a, dâwr bungraw phurh nân 'Pick up' loan-in kan la ve ta bawk a, kan khawsak a ziaawm angreng viau.

Sangpuia'n nupui neih lam a âwn tehchiam lo hi a nu leh pa buaina a ni ta. Zirsanga ngaihtuahawm a ni tawh lo a, engkimah 'Mama, Mama te nupa' tih kan hlawh fo ta mai.

Arini leh Bawiha pawh anla inzui tluang zêl a, chhungkaw hriatpuinaa inkawp anni ta bawk nen ngaih angam ta sarh mai. "Arini leh Bawiha khâ i dâwp ta em?" Zirsanga'n nui suk chunga min zawh chuan ka nuih aza hlê a, car-a an tawm dun a hmuh ṭum khân an 'up down' lai kher a hmu lo niawm tak a ni! Thawmhnaw mumal inbel lovin an lo infâwp vel khâ a nia, an chesual ngeia arin vangin min dâwptîr nia maw le! A zâwttu tân pawh thil zawh nuam ninghal lo chuan..

"Mate, a teuh lo lutuk, vawikhat tê mah sex kan la hmang lo, min ring chhe em mai!" Ka nau a ṭang na ngang mai a, "Dâwt i sawi miah lo maw? Min bum thei pawh a ni ang; mahse, Pathian in bum thei dâwn lo a nia, dâwt hmanga dân anga in inneih chuan in tluang dâwn miah lo a nia." ka tih pawhin a ṭang na ngam khawp mai.

Arini pawh chuti tho. Nu leh pa timualpho lo hrâm tura thu ṭha nena fuih chungin an inneih hun kan thlîr ve ta chu a nia, B.A- a chhuah veleh inneih an tum niawm tak a ni.

Duati pawh a hrisel ṭha phian a, kei ai mahin a pa a duh zâwk emaw tih mai tur a ni.

"Duat Duat, i pu Lungleia mi khân eng nge a lo thawn dâwn che khâ?" Zirsanga'n khumah a fanu a awmpui a, keiin thawmhnaw ka thlep thung.

Ṭawng thei rih lo mah se a be sawm peih viau a, ka pa in a a tunu hmasaber birthday lawm sak a tum ruh hlê a, tun aṭangin a mamawh min rawn zâwt ṭan nia maw le! Naktukah a toys tur an lo thawn dâwn a, eng lam nge tih ka zawh lah chuan an sawi duh dêr lo nia!

Ka nu leh pa, Bawiha pawh tiamin Duati an ngai hlê a, kârhmasa khân zanthum riakin an lokal tawh nghe nghe a, a pu-in, 'Duati chu a len deuh hunah kan hnenah awm rawh se, nangni te chu in dam anga a dang inla nei leh turah ngai ang," ati deuh sek.

Zirsanga lah hian an run tur tâwka chhan dan a thiam si a, an inhnial bap bap fo mai.

"U Mafel, ka û in i thawmhnaw tur a lo thawn khâ aw, Mama khân lo ngaihven mai rawh se, Amosa counter-a dah turin kan hrilh vek tawh."

Whatsapp aṭanga Arini min lo biakna ka hmuh chuan Zirsanga ka hrilh ve nghal a, Zosangpuiin ka thawmhnaw tur min lo thawn tih ka hriat chuan ka lawm hle mai. In be sek thei lo mah ila min duhsakna a theih ang angin ati lang ve ṭhin.

Zosangpuii nau chiah Siamtei nen pawh kan inbe fova Kenedy-a thlalâk min lo thawn ho kan delete phal meuh lo, Zirsanga tupa duat lai kha a ni tlat a..

Ka thawmhnaw lam tura ka tirh chuan a nui suk suk a, "Ka farnute hian an tlawn deuh che in ka hria!" A'n ti vei ngial a!

"Awihawm loh lutuk, chêngho chiah ila chuan tûna kan boruak ang hi kan nei pha lo maithei a ni. Kâr a hlat tham deuh hian inngeih te pawh a lo awl zâwk a nih dâwn hi." Tia ka chhânna chu a ngaihtuah zui nge a ngawi vung vung a, chutah, "A dik ang, inchhungkhur khatah awmho chiah ula chuan 'de de dei' tih thawm ari rengin ka ring," za takin ala nui zui ah..

Kan nula eirawng kan bawltîr a, Duati hruaiin Amosa counter panin kan chhuak ta a, amaha kal chhuah ai chuan kan telve a duh deuh tlat zel nia!

"Min nei hi i inchhir em?" Zirsanga zawhna chuan min ti phu zawk a.

"Inchhir leh mai mai ka tum lo tih ka sawi lovem ni?" Ka chhânna chang deuh fuk chu hreawm pawhin alang chuang lova, "Ka nupui i ni lo ang tih hî ka hlau, Hmingsanga nupui te khâ i lo ni hman ang tih chu hlauhawm deuh a ni," atih chuan,"Nutei lakah ka chân teuh fia fia bawk che a, ka lo fel êm a min chang ta hlauh a ni." Ka sawi zawh rualin a nui suk a, "Nutei fâ khân min chhûn ve angem le?" Zuk ti a!

"A chhûn che a nih vaih chuan vawikhat tal ka kuk keuh ang."

"Â hah! Remruatfel, i thilsawi leh i hmêl inrem loh zia kha.." A nui kur kur a, ka inthiam lo leh deuh.

Zahzelah Duati sam ka chûl a, "Nutei vawikhat tal ka lo hau hrep lo kha chu pawi ka ti hnuhnawh.." ka ti lui leh ngat a, "Kan zin veleh phubâ i la dawn nia," a nuih azat hmel kher mai!

"Phubâ rêng rêng la suh u, tih ziak ang khân," te chu ka'n ti ve bawk a, Pathian thu hre tam ber ang ziazânga kan ṭawng chu le!

Zirsanga û thawmhnaw min rawn thawnho pawh ka ha tâwk deuh vek a, Bangkok ami a chah ṭhin khâ a nia, phone-a bia-in lawmthu ka sawi ve nêl nual, 'Pawisa tlêm tal kan lo thawn ang' ka tih pawhin zuk duh ṭhak lova!

"Fel, inbual rual ila,"

'Ati leh ta' tia ka phun sap ri chu a lo hria ni ngei tur a ni, ka bulah lokalin, "Inbual dun i hreh lutuk hi eng nge maw a awmzia le?" Ati a.

"Tunge Duati lo awm anga?"

"Kan nula a awm reng alawm, a tlanbo pui kher bîk nâng.." tih pahin a ko nghâl lâwng lâwng a, ka hnial lui bik ta lo.

Ka hnungah sahbawn hnawihin a nâwt hauh hauh a, "Nupa kan ni ta mai hi ka mumang emaw ka tih châng a awm fo nia maw le!" A rawn tichhuak phawng a.

"Ningawt mai, Zirsangliana nupui ka'n ni ve ta ringawt chu a nia, a hunlai kha chuan inneih lam ka tinzâwn der si lova.."

"Ka zei lutuka min hnâwl phal lo a ni lâwm ni," zak map lova a thusawi vâng chuan tuivawtin ka'n leih pawp a nih kha, ani leh ni lo angin phun hluk chung hian ka kâwngah rawn vuanin,"Min kalsan theih lohna chhan pakhat chu hetiang vâng hi alawm," a sawizawh rualin min rawn fâwp zui nghal a, nupa nun hmang fo mah ila amah ka thlâkhlelhna a kiam chuang dêr lo.

Nidanga kan lo tih fo ṭhin angin bathroom-ah ngei hmangaihna kan chêndun leh ta a, ding chung mah ni se a dangdai thlâwt, hundangah chuan invênna kan hmang ziah ṭhin tih ka hrechhuak chawpchilh a; mahse, ka hrechhuak tlâi hret! Anih tur ang a ni zo hman vek tawh a, ka sawichhuak ta lem lo.

Bathroom kan chhuahsan hnu pawhin kan inkâra phûrna awm a la reh thei lo nia maw le.

"Fel, chhunzawm leh ila.." Towel a bih ṭât a, ka hmuh hmasak ber ni khâ ka hrechhuak nghâl zawk.

"Pa zâwkin i tih chuan 'Aw' kan ti zêl mai a ni ang chu.." ka'n ti ve ngei ah..

##

Duati kumkhat tlin lawmna a pû Lungleia miin lawmsak a tum tlat avangin kan chhûngin ka zin ta a, dâwr pawh kan khâr hmiah a, kârkhat bâk chawlh ka lâk theih loh avangin kan châmrei thei dâwn ta lo a ni.

Kan nula lah chu a'n phûr mai mai khawp a, "U Mafel, kan khuaah zankhat tal riak ve rawh u aw, Duati ka ngai dâwn em mai," ati chhên a, ani hi Zirsanga te khua ami a ni a, ka nu (Nu Zuali) min zawn hmuhsak khâ a nia, a fel reuh khawp mai.

"Riak ang, a nî tepaw'n an hmu châk a, zanah i lo chhuk ve dawn nia," ka tih chuan a nui var var a.

Kan tum dan chuan Zirsanga te inah zankhat kan riak anga, chumi zawhah Lunglei kan pan chauh ang tih khâ ka pasal rawtna a nia, kan hâw pahin kan riak chho leh dâwn niawm tak a ni.

Kawng tluanin Duati a râk phei tih theih dawh thâw a ni, a pa nen car-kan inkhalh chhâwk zak zak a, a chhan pawh min ngên tawn sek a, a tih theih hlawl loh.

Tachhipah Fu tui in a ngên leh pek a, ka remti vak lo chung a pa in zuk pe leh tlat a!

'Naupang tân a pawina a awm lo, a hrisel alawm' ati mai mai a, a fanu a nia! A tâna ṭha lo tur a pe duh lo tawp ang tih ka ring thiam ve mai.

"Mama, khaw'nge Duati?" Inchhung kan luh hma hmâin Sangpuia'n a lo ti nghal a.

A patea zawng a hmu khât deuhva a nêl tehchiam lo. Mahse, thil leipuiah sâwmin an inthlêm chhuak ta nge nge a, Duati hi 'hmelṭha' tia sawi tur chiah chu a ni lo deuhvin ka hria, a ngo em em a, thlakim lova piang tih takah a tê reuh khawp mai, a fel khar a, lawm a hlawh viau.

A pi leh pu te'n chhungkaw chaw eikhawm an lo buatsaih a, Zirsanga farnute bâkah ṭhenrual ṭha pahnih khat an sawm bawk a, kan ri chêl chûl a khua a vâr lo deuh chu a ni e.

Kan inneih hlima kan room khâ min lo dah fel sak thlap a, a ngai tê bawkin kan luah ve leh ta chu a nia.

Arini'n Duati a chuh zing malh malh khawp mai.

"U Mafel" min ko deuh sek hlawm a, Zirsanga a chuang titih deuh, 'Mama' tia kotu pawh a nei ta vak lo, Duati nen kan luahlan fai vek a ni deuh ber mai.

"Tunah chuan chhungkaw pangngai in din tawh a, in awm nghehna tur in tepawh din rilrûk ve tawh ula a ṭha lo maw?" Zirsanga hnenah ka pa-in ati a. Aizawla an inpui hi chu kan chan tur a ni lo tih kan hriatsa avangin inhmun lei tur kan zawng ru ve deuh reng tawh a, ka pa pension hunah an la awm duh dâwn a, kan buai chûk loh nan kan lo invêng lawk titih tawh.

"Nia, in hmun leitur ṭha inhriat chuan min lo hrilh dawn nia," tiin an inchhâng ta kha a nia.

Kan nupa room-a kan mut hnuah Arini'n min lo call a, Duati a riahpui avângin an mu thei lo a nih ka ring deuh ngawt a, "U Mafel, Ramthana'n Nutei a chhuahsana, vengthlang zu zuar a luhkhung," tia min lo hrilh chuan kan pa ka hrilh chhâwng ve leh a.

"Pathianin ka ṭawng min ngaidam se, ka laka a pa chêt dan te, ka fâ ni lo puia min puh tlat te khâ a lêt a tuar a nih chu." Ati hmiah.

Nutei lakah hian a rilru a kír chiang tih ka hre bawk a, sawi zui vak ngaihna ka hre lo. Arini'n min lo hrilh kher nachhan pawh, a hun laia ka rilru natna hretu a nih ve tlat vang a ni.

Lunglei kan thlenin ka nu leh pa'n Venglaiah min lo hmuak a, keini nupa ai chuan Duati bawk an chuh leh ta. Pi leh pu na na nâ chu a duh ve mai bawk a, an car-ah an phur hmak nia.

Bawiha te chungchâng sawipui kan duh bawk nen inlêng an awm deuh reng si a, hun thâwl kan neih meuh lo chu a ni e.

Ka pa'n Duati birthday-ah Vawk a talh a, Zirsanga nu leh pa bâkah Sangpuia leh Arini, Kenedy-a an lo hrual tel ve bawk a, kan hlim tlâng khawp mai.

"Hey, Pi Mafel, fanu i va nei hmelṭha ve," Israela kan ṭhenawn pa pawh a rawn nui lut ṭhâw a, tun hmâa min ngaizawng ve ṭhintu khâ a nia, nupui ala nei lo fo.

"Chutia mi, nangpawh nupui nei tawh rawh," tia ka fiam chuan, "Nangmah an nih loh chuan tû hmeichhia mah ka duh lo.." ka beng bulah min rawn hrilh sup a.

Zirsanga a meng rum titih ringawt! Kan thusawi hre lo mah se Israela khawsazia khâ a ngaithei lo te pawh a ni mahna, ka hriat bik si loh!

"Kha pa kha tunge?" Mut hmunah min zâwt ta chat a, Duati a pi te bulah a mu daih bawk si a, kan nupa chiahin kan mu tlawng a, a khawhar thlâk angreng.

"Israela, kan ṭhenawm ami a nih kha.."

"Eng nge a sawi kha?" Ṭhatê-in ka hrilh ve mai bawk a, a lungawi ve mai. Mahse,'Khatiang mipa khâ ka ngaina lo' zuk ti hrâm a!

Lungleia kan awm chhûngin Bawiha te chungchâng pawh kan sawikhâwm a, palâi hran kal lovin Zirsanga nu leh pa an awm tho bawk nen kan naute ve ve inneih hun kan sawifel ta rup mai le!

A hun leh nî tur nen lam an ruatfel nghâl vek a, tûn aṭanga thlahnih hnuah an innei ve dâwn ta chu a nia, ka chhûngril a hlim veng veng.

Zirsanga nau Arini kan famo a ni anga, ka nau khâ Zirsanga te mâkpa a ni ve thung dâwn ta. Khawtlângah an sawi neuh neuhvin ka ring, a bîkin Zirsanga te khua-in an sawi peih lehzual ang.

Kan haw dawn meuh chuan ka nu leh pa an ngui nghiai a, 'Duati pawh a tlângnêl ve ṭan chauhva min hawsan leh daih te chuan kan khua a har awm em mai' tiin kan tlânliam thleng min thlîr zui vang vang ta kha a nia.

Ka nu leh pa kalsana Zirsangliana ka nei ta hi inchhirna tur pakhat mah ka la nei lo chu a nia, 'Rapsagy' tia thû min tiamtu tâna rinawm tlat hi ka vanneihna tur leh ka nihlawhna tur a lo ni maithei asin.

Eng ang mî pawh nise hmangaihna dik leh rinawmna, inrintawnna kan neih phawt chuan nupa inkârah harsatna a awm ngai lovang, Pathian tel lova nun bul kan ṭan a nih pawhin a tâwp kan khârna turah tal min dintu leh min siamtu, kan hmangaih te min hmangaihpuitu vawn tlat hi a lo him ber mai.

'Lalpa, Zirsangliana pasal atana min pe hi ka lawm e, i rilru tina fo ṭhin mah ila Kristian chhungkaw dik tak kan din theih nân i malsawmna a tharin ka dil a che.' Tiin ka ṭawngṭai ve thei ta.

Rahbi dik lo zawh hmasa mah ila kan nupa nun kawng erawhin Pathian min hnaihtîr lawi si!

NOTE: A NGHAK DUH TAN LAST CHAPTER-IN KA RAWN ZAWM DAWN E.

B<++++[BeckirafARenthleI]++++>RR

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:41 pm

30. RAPSAGY (Last)

Becky Rafa Renthlei

Last Chapter: 30

TLIPNA
Zirsangliana
After 3 Years

"Duati, â nu ko rawh le.." ka fanu inbual zo chuan min rawn pan ding nghâl a, a nu ala inbual leh pek lo, ka sawi zing tawh hlê chung hian tlâi lama inbual a peih dêr lo nia! Zanah, chupawh mut chhuah tawh lama inbual ati deuh kher hi ka ngaimawh hlê.

"Mate, i hman dâwn tawh em?" A kotu ber Duati pawh a nu bulah a tâng lehnghal daih a, an inchhûn nufa ve asin.

Duati paw'n kum thum hmêl a hmu tawh a, a fel that that reuh khawp mai, hmêlah a nu a chhun lo nasâ! A naupan zual lai kha chuan a nu nen an inang ve viau ṭhin khâ a nia, tunah chuan ka farnu Arini têt lâi nen danglamna a awm lo tih theih a ni.

Duati chhang tur a nu-in a pai leh mêk a, tun ṭum chu a in zo lo lehzual a, thlariatna a hmang ve mêk bawk a, kan buai a zual ngei mai.

Kan dâwr kha hmunkhatah kan siam tawh a, a hran hrana in dah ai chuan a awlsam zâwk kan ti ta deuh a ni. Aizawla kan inpuiah kan la awm ta reng a, ka pa'n in hmun min pêk tur a neih loh avangin hmun lâilí deuh leitur kan zawng pah reng a, a vâng khawp mai.

Ka pa Khawdungseiah an transfer lehnghal nen kan inhmu khât hlê a, Arini leh Bawiha te pawh an innei fel tawh bawk a, Sangpuia ala tlangval ta fo, Sentei pawh Singapore-ah a lêt leh rih a, a rawn chhuk leh veleh innei mai thei dinhmunah an ding.

"Zir, ka pa nen in inbe tawh em?"

"Be nâng, eng ati nge?" Shower hnuaiah ka ding a, ani a in bual zo tawh thung.

"Lungleia kan in hmun pakhat zâwk khâ ka hmingin a dah a, kan duh chuan in kan sa thei, â nangmah nen inbe rawh u, inpa ka lo la bia ange ati deuh tlat a.."

"Nakinah ka be dawn nia, va inthlâk phawt mai teh." Ka tih chuan "A Zirsangliana thlâk e a," ati hlak a, a thin a chhe tâk tâk ṭhin khawp mai; an hna lamah a buai bawk nen a rit tawh si a, ka khawngaih viau, bâng mai rawh ti ngawt ila he hnâ thawk tura azir hahzia a sawi ve tlat zel si a, ka nawr na ngam lo.

Mafeli pa nen kan inbiak chuan, "Fâ pahnih chauh ka nei a, Bawiha'n inpui chang se, Mateiin pakhat zâwk chang ve thung rawh se, tiin a nu nen kan sawi dun a, revenue lamah hming kan thlâk fel tawh a nia, in duh hun hunah in inrawn sa dawn nia, in hmun pass ka lo thawn ang che u.." atih chuan ka lâwm rualin inthlahrun a na duh khawp mai. Mahse, Mafeli hminga awm tho a nia, a zia deuh.

Arini'n nau ala pâi miah lova vawi thum lai incheck up-in an rawn kal tak nâa awmzia teh vak a nei lo anih hmêl! An pahnih hnihin an ṭha vek tih chiah a result ka hriat chhun a nia, an khawngaihthlâk nupa viau! An inneihna pawh kum hnih a pum ve tawh a, 'Duati kan lo awmpui rih mai ang' anti thûl, kan phal mang si lo va, Mafeli phei chuan, 'Duati tel lova awm ka duh lo' ati bur.

Kan nupa inkârah buaina kan nei lem lo, ngaihzâwng chungchângah phei chuan atu mah mah rinhlelhawmin kan awm lo bawk a, a thinchhe thar ta lutuk leh a insawisêl neuh neuh reng hi kan buaina ber a ni. A châng phei chuan ka ngawihsan tawp zêl a, nau a neih hunah azia chho turah ngai ang.

"Hey, tho teh.." Duati Pre school-ah a kal ve lauh lauh tawh a, ka hruaiin ka nghâk leh thlap zel a, ka chau ve bawk nen ka lo muhil chu niin.

Peih lo zeta ka men chhuah ruala ka hmuh hmasak ber chu ka nupui hlim hmel a ni. Â hah! Tunlai hian a nui khât ve êm alawm le.

"Eng nge?" Tih paha ka ṭhu chhuak chu envelope ka hmâah a rawn thehthla a, eng nge a nih rindan pawh ka nei îk lo. Amah lah chuan ka hawn hun a nghâk rân a, eng mah phei chu a sawi lo.

Envelope chhunga awm ka hmuh meuh chuan ka nui chhuak hawk a, Vety doctor-aṭang chuan ala bâng dâwn lo tawp mai. Tanhril Broiler Chick Farm-a General Manager appointment lek niin! Ka nupui nge nge hmasâwnna ropui tak a ni.

"Tu emaw chuan lawm a phût leh ngei ang chu?" Ka ti sup a.

"Damtêa nau ka neih theih chuan ka tlânbosan daih ang che u.." a nui sâng a, min fiamna ani tih hre mah ila hetia a ṭawng hi chuan nuam lo ka lo tinghal ringawt zel.

"Tûnah, insawitheihna hun minute nga kan lo hawng ang." Ka sawi zo hman chiah, ka hnungah min rawn bêng thâwr a, "I chimawm leh vaih chuan Duati hruaiin Tanhril lamah ka liamsan ang che, quarter nuam deuh a awm lehnghâl.." a'n ti ngei ah..

"Ka zui zêl ang che, Korea-ah pawh kal la, chakma ram pawh nise ka tel lovin i kal hauh lovang," ka tih chuan ka malchungah a rawn ṭhu tharh a, arit ve tawh bawk nen ka thaw hawk thei nia!

"A lo nih tak chu, General manager zawhah Director, Hus! Ka va han hnaih fia fia tawh ve le.." nui var var chunga tiin min melh hau a.

A mitmenga hlimna leh lawmna ka hmuh hian nuam ka ti, ka taksa pêng pakhat a ni miau a, Remruatfeli hmâna ka hmangaih kha, tunah pawh ka la hmangaih reng a; a hlimna chu ka hlimna a ni a, a lâwmna leh lungngaihna ṭâwmpui phatu a pasal hian engtikah mah phatsan ka tum lo.

'General Manager' a ni ve dâwn ta chu a nia, a pasal tân pawh zahpuiawm loh tak a ni.

Taima taka a thawhna rah mai piah lamah a pasal fanau, ka chhungte a en dan thlêngin sawiselna tur ka hre tam lo khawp mai, Duati chhang a pâi har deuh tih thû-ah ka nu nen an inhnial ve deuh a, a bâk chu sawitur em em ka hre miah lo. Indanna khâ a ei regular angreng a, ka nu'n a tur sek khâ a ngaihthei dêr lo.

"A pâitu ka nia, Duati leikâng deuh phawt rawh se" ati deuh tlat. Ka inrawlh tam lo khawp mai.

##

"Zir, Zirsanglian.." Mafeli aw ka mang hriat ruai ruai a, ka meng thei hlawl lo.

"I va'n mak tak tho teh, ka pum a nâ a nia.." engin nge min vuak ka hre lo a thîp zawkin ka hria, ka har kâwk a, a pumnâ a lo vial ngawlh ngawlh chu niin!

"Mate, i ṭha em?" Kuah ka tumna ka bân a vaisawn lawp a, "Car la chhuak rawh, i tlâi ang e..." a thlanfîm a tla barh barh a, ka hamhaih lutuk ta bik lo.

Kan nula kai thovin ken tur kan siamsa vek chu min khai chhuahpui turin ka hrilh a, a hmanhmawh ve ngang mai, Duati pawh awmpuitu tur an awm chuang si lova kan kai tho ve ta ringawt a, a ṭap bîk lem hlei lova.

Durtlang Hospital-ah bawk kan inphur chho leh ta a, kawng lakah a neih hman loh nân ka ṭawngṭai ru hial nia!

Kan nula pawh kan hruai tel ve a, rinaiin a nâ a zing ta viau mai, kan inring hman lo a chhâ chu a ni e, kârleha lût tur chauh kan ni a, kan naute thar tur a hmanhmawh deuh a ni ange.

Bawiha te ka va phone-a, an nupa-in naktuk zingah an rawn phei dawn a, ka nu leh pa erawh ka hrilh ta rih lo, Khawzawlah daih an awm si a, zanlaia kaihthawh chi ninghal lo chuan..

Zînglam dâr thumah fapa ka nei ve ta, ka lawmna hian Vân a tawng pha lo a nih pawhin a teuh thiak thiak khawpin ka ring.

Mafeli erawh a chau angreng a, an la rawn nawr chhuah hmâin ka fapa min rawn hmuhtîra a lian ṭha roh hlê lehnghal!

"Â pa, ka en ve duh," Duati'n a lo ti ve chhên a, Nurse pakhat chuan a entir ve zuai a, ka nui suk suk reng ringawt tawh mai.

Cabin-ah bawk kan insuan lût leh a, tûn ṭum chu keimah ngawtin ka buaipui ta a, hnutetui pawh a nei ṭha ve ta khawp mai! Duati khâ kan buaipui hah lutuka, mipa fâ nge nge ka thinlung a dek zar mai.

Ka pa-in a hming phuah a hauh a; mahse, a patea'n a chuh tlat a, an kian ta in ka hria.

Kan chhungkaw member thar chuan hlimna famkim min rawn siam a ni ringawt a! A rawn en apiang lah chuan, 'A pa hlauh' tih zel khâ an sawi dan a nia, ka va inchhuang si êm..

"2nd Zirsangliana" Ka nupui a nui var var a, a lâwm hmêl hian minti lâwm lehzual.

"2nd Remruatfeli tur 'warm up' neih a ngai dâwn a nih hi.. ka tih chuan, "Ka peih tawh teuh lo, ka inla young ṭan tawh dâwn, eng emaw hna thar ka nei ta bawk si a," tiin min nuih rah rah a, chhân vak dan tur ka' hriat miah loh chu le!

"Zir, i fapa hian a chhûn mah mah che," ati sap a.

"Ka fapa-in min chhun lohvin ṭhenawmte nauvin min chhûn se i ti a mi?"

"Chhê hlê suh," tih pahin naute puan pakhatin min rawn vawm a, ka lo dawng chat. "Ka fa ni na nâ na a ṭhenawmte fâ antîr tum tlat!" Ka tih leh chuan, "Awi! I chhe zêp zuap lutuk.." tia rawn thawh a tum ve ngawt a, a ṭê deuh ṭhat!

"Hey, che phut phut mah ta che, ka tâ khâ ka la duh a nia," a tûm hmak a, "I fapa hming tâwp lamah 'Zuheh' tih ka phuah belh nghâl loh' tiin lehlam a hawi tau nghat a, hetia a awm tawh hi chuan be sek mah ila min chhâng leh duh tawp nâng.

A patea pawh naute hming phuah turin a rawn kal vang vang a, "Rafael Remruattluanga" zuk ti duah a!

'Sâp hming kan duh lo' tia kan hnial fê hnu-ah, ''A birth certificate-ah dah tel lo u la, kan kohna atân 'Rafael, Rafa' tih tala koh ka duh" atih deuh bur avangin kan hnial ta lo.

'Rafael Remruattluanga' a inrem phian chu ka ti lawi si.

Arini leh Bawiha'n an chuh tehngawt a, ang lo lutuk mai!

Duati paw'n a nau thîk châng a ngah ṭan khawp mai a, kan in thlêm deuh reng chu a ni e.

Kan chhungkaw bila kan awm tâk chinah phei chuan kan ri ve chûl reng a, Mafeli pawh a hah zual ngei mai, Duati'n Nestogen a hnêk lai kha chuan ka âwl thei mai a, Rafaela erawh hnutetui pangngai a ring si a, a ṭah apiangin a nu pêk zêl a ngai ta. Ka âwl thâwng zawmah tawh.

"Ka tâna i hlutzia ka hre zual deuh deuh.." Khumah kan mu tlar ṭhap a, ka nupui bul chêtah mu-in ka kuah vang vang a.

"Kei deuh, i tel lo chuan eng mah ka ni lo ania, min phatsan dâwn lo tih ka hriat avang ringawt pawh hian ka lâwm a ni," ka lam hawiin arawn inlet thak a, ka hmuiah a rawn fâwp ta a, nupa nun la hmang thei lo mah ila kan inthlâkhlelhna erawh kan tilang fo ṭhin.

"Miin Rafa rui nâwi pa, tia an koh fiam miah lohna turin, i fapa hi enkawlna ṭha, Pathian ṭih mi ni turin i chher chhuah ngei ka beisei.." Ati ta a.

"Kan ṭang dûn tlat ang chu le, i fapa tia sawi lovin kan fapa tih zawk tur aw, Doctor.."

Chutah nui var var chung hian 'Kan fapa' ati sap a, kan fate pahnih muhil hmêl chu rei ngial kan thlir hnu-ah, an tân a ri-in kan ṭawngṭaisak dun ta a.

Kei, Zirsangliana hian ka nupui fanaute phatsan ngai lo turin thutlûkna ka siam leh ta.

'RAPSAGY' Tia phun chhuak supin ka hmangaih pathum te kiangah chuan ka mu ve ta a..

Ka nun hman tawh ṭhin dan kalsana hmeichhe fing fel Remruatfeli ka tawn meuh chuan thlâkthleng nun ka neih phah a, pâ dinhmun dik tak luah thei tura min dawha min zilhtu, kan ingaihzawn lai zawng zawng pawha min fuih ṭhintu Remruatfeli leh ka fate tâna damchhung hun hman hi ka duhthusam leh ka tih mâkmawh a ni...

'Min rinna chin apiangah ka rinawmna i hmu zêl ang' tih hî kan nupa thuvawn nghet tak a ni.

A TAWP TA
*****
NOTE: Rapsagy min chhiarsaktute inzavaia chungah lawmthu ka sawi a, Sâp thawnthu ziak ṭhin khân a vawikhat nân Mizo thawnthu ka ziak ve ta râwih chu a nia, ṭawngkam felhlel leh ṭawngkauchheh mar ṭha lo tepawh atamin ka ring a, inmi hriatthiamna ka ngen nawn leh e.

Chapter-30 zet mai ka post ta chu a nia, min nghâktute tih beidawn hi ka thil hlauh ber a nih vângin ka ṭang mar hlê tih min hriatsak theih chuan ka lawm hle ang, a kârah zan hnih ka off a, internet problem zankhat leh chhungkaw lam vangin zankhat, a bâk zawng ka tlang parh a, ka chau ve ta deuh a ni e; famkim lo kan nih angin mistake pawh a awm nualin ka ring a, hei aia mâm nalh deuha ziah ka la tum ve fan a nia.

Min chhiarsaktu, like leh comment tamtaka min lo ṭantute leh min fuihtute chungah lawmthu ka sawi mawlh mawlh a, inmi fuihna te kha hriatreng tlâka ṭha a ni bawk.

Kan dam a Pathianin rem atih chuan story thar nen rawn lêt leh ka tum dawn nia..

He story hi true story a nilova kan mizo nunphunga thil awmthei ka rawn tinzâwn a ni e.

RAPSAGY hi Arabic ṭawng leh Spanish kaihkawp ṭawng 'slang' kan tih zinga mi khâ a ni a, British lam chuan ṭawngkam mawi lo, sexy uchuak (luxurious) atân hmang ve ṭhin. Mizo ṭawnga a thawnthu hming dah dâwnin a sei teh duah êm a, tihian ka rawn vuah ta mai a ni.


Ka lawm e.
Becky Rafa Renthlei (BRR)

B<++++[BeckirafARenthleI]++++>RR

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)