RAPSAGY BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: RAPSAGY BY Becky Rafa Renthlei (Completed)

Unread post by Ngaia » September 23rd, 2018, 8:33 pm

7.RAPSAGY

Becky Rafa Renthlei

Chapter-7

Zirsangliana
4:00Am
Zirtawpni

Ka dang ro huam huamin min tiharh hlawl a, ka mutna hmun ka hai ṭhelh alawm le!

Kâr lovah ka hrechhuak leh uar uar a, nizan kan awm dan zawng zawng kha engtikah mah theihnghilh theiin ka inring lo.

Ka kianga tui taka muhil doctor hmêl pawisawi lo zet chu ka en vang vang a, a hming te a nihna te leh a pianphung a engkim a hmêl nen lam hian hriat bel loh ka hlau kher mai.

Hmeichhe Virgin ka vawikhat mutpuina a ni hauh lova, pakhat phei kha chu a ṭap deuh pur lehnghal! A nâ viau ang tih ka hre ve tho a, kan Remruatfeli nge nge, a nalai hmêl min hmuhtîr a hreh ngar ngar hle mai. A mittui tling pap kha ka hmuh loh a ring em mawni!?

A muhil thaw sâk sâk chu ka thlir reng a, ka fâ pâi tumtu leh a thusawia dinngheh atumzia ka hriat hian ka ngaisâng lo thei lo.

Ka phone vibrate chur chur reng chu off tumin ka ban a, ka ṭhianpa, Mafeli chanchin lo chhui tura ka tih hnen aṭanga msg tam zet lo lût lek niin!

#Remruatfeli i tih kha chhuah hlek suh, ṭhianpa, Pathian thilthlâwn pêk i dawn a nih kha..smiley a tlar dul a, chupa mai mai chu(h)

A kum zât leh an veng hmingte a nu leh pa hnathawh, a nau hming chipchiar zetin a rawn type thla dul a, a tâwp bera a rawn dah chuan ka mit ala viau.

#Ngaihzawng a neih ngai an hre lova, a college kal laia a neih bâk sawitur hria an awm lo. Pasal a neih duh ring aiin ring lo an tam zâwk.

Dâwt pakhat tê mah min hrilh lo tih ka hriatna chuan ka chhungril ati hlim veng veng thei nia. Tunah khua avâr ṭêp tawh a, ngun lutuka ka inngaihtuah apiang hian 'Mafeli hi ka tân a ṭha' tihah zuk tâwp zel a.

Nutei ka hrechhuak zantin a, vawitam kan chesual chung khân a râi hauh lo. Invenna kan hmang ngai lo tih ka hrechiang a, nupuia neih ka hnial loh êm avangin ka pawisa lem lo ṭhin kha a nia.

Nizanah invenna kan hmang lo. A duh ang ngeia nau a pâi a nih chuan min hlatsan tak tak ka ring miah lo a nih chu..

A chan chhe zâwk tur leh mualphona tawng baw tam zâwk tur a ni tih hrethiam tura puitling a ni a.

Tuna kan ruahmansaah hi chuan kan in a a lo chên chhung chauh inkawp tur kan ni. Chuvangin 'zawng zawng' pêk tumna ka nei lo mai nilovin Nutei laka ka tlân tauhnaah ka ngai deuh ber. Amah ka duh lo tihna ni lovin amah zâwk hian thu delhkilh a nei sa tlat a, thlâk danglamtîr kher ka tum lo a ni.

A rûm ṭiah ṭiah a, ruah mal rawn tla phiar phiar chuan thil min hriatchhuahtîr zawk.

Vawilehkhatah ruah tam fê a rawn sûr ta a, a Rizai sinlai keuvin amah kuah tlat chung hian ka mu ṭha leh ta a.

"Misual dum ber ṭawngṭaina chhânin a awm ta." Fel fai takin a rawn ṭawng khauh a. A muhil emaw tih lai lai a, a lo men kiau chu le!

"Ṭawngṭai chiah lo e, ka rilru min hriatsaktu chunglam hian a hunah hna a thawk a nih hi.." Thawhphan nei miah lovin a ṭhu chhuak a, a âwmbâwr kawh lah chuan ka mit ala kher mai.

"Min en reng lo khân tui intur min lo lâk la.."

"Vawikhat min fâwp la ka lo lâk ang che."

"Vawikhat chauh maw! Duh tlêm ve.." ka nghâwngah kuahin alamah min kuai hnâi a, dam leh ngaihawm zet hian min fâwp ta a. A bâk pelh ka tum veleh, "Vawikhat chu vawikhat a ni dâwn lawm ni," a hmui lasawnin a nghâwng thleng rak hian Rizai a pawt chho a, thawmhnaw engmah kan la inbel lo.

A sawi ang chiaha a awm zel hi ngeiawm lamah a kal lek lek. A inringtâwk leh lutuk deuh a ni. A nâ lai hmêl engtin tak awm ve ang maw?

Tui a inzawh chuan a mu leh thân a, ruah lah chu a sûr tam telh telh bawk nen duhthusama chêt leh mai ka duh rum rum.

"Zirsang, ka bag-ah khân Khawizû a awm a, khawngaihin tuilum nen min lo siam.."

"Tunah maw.."

"Aw, khawizû thirfian khat i telh anga chawk rawk rawk la atawk mai tuiso kher pawh a ngailo ang, filter tui khâ chhuang lum pep pep lâ, thawh ka tum ngial nâa ka taksa a na vek.." ati a, ka hrethiam lutuk tlat.

"Umn..lo muhil suh aw.." tiin a bag-a khawizû chu ka lachhuak a, a sawi anga siam turin choka lam ka pan ta a. Boxer ka inbel hman ṭâwk a ni.

Nula chengvawng tak a ni tih ka hre tawh a, ka kianga a awm lai na nâ na hi chuan ka thiam ang tâwka duat ka duh a ni deuh ber.

Bâkah a ṭawngkam hman hrim hrim a felfai thlarh a, hnial chi nimiah si lo dam thlapa a ṭawng zel thei hi ka duhzawng tak a ni. Hmeichhe âng buan buan chi a ni lo tawp ang.

After 2 hours
7:00 Am

"Mâm, u Mafeli a la tho nange?" Arini a tho hmasaber a, ka nu leh pa pawh an la tho lo ve teh tlat!

"Aw, niminah bike a rawn khalh chhova a chau deuh a ni ang."

"Nizanah a bulah i riak chiang!?"

"Arin, i duh duh sawi ringawt lo khân eirawngbâwl rawh." Ka ti hmuk a.

"U Mafeli bulah ka awm reng châk," naupang chhe ṭawng ang maia a ṭawng chu ka ngaithei leh pek lo. "Lalrinpui, a bula awmna chhan tur i nei lo nasa êm mai, bâkah chîmbuai reng suh, a lo thlen tirha i nuihzat nen i rin ang a lo ni leh si lova, tiraw..?"

"Nang pawhin i biak ṭhat duh bik loh kha.." atih chuan ka dang dêr.

A lokal tirh khân ka be tehchiam lo a nih tak kha maw le.

"Sawi tawh lovang, eirawngbâwl rawh ka mu leh dâwn," tih pahin room-ah ka luhsan daih a, ruah ala sûr cherh cherh a, Mafeli room-a ka va luh leh chuan nichina ka thilsiam sak khâ a lo inzo diam tawh a, saisîra a mut vangin a hmêl ka hmu thei lo.

"I muhil em?"

"Aih.." min chhâng rang ngei mai.

"Lo mu tawh rih suh aw, min hrechhuak ang tih ka hlau a nia," tiin a rawn inlet thak a.

"I phal loh tlat te chuan,"

"Tihtauh a ngai kher lo a nia, mipa ve si tihtauh hrât deuh chu ka ngaina lo,"

"Ka titau hleinem, ka hrethiam alawm, i duh chen chen mu la ka lo phat mar sak ang che." Ka tih chuan, "Ka tho ṭêp, chuan bedsheet hi kan thlâk lawk dâwn em ni ang? En la.." tih pahin a mutna zâwna thisen val kalh chu min kawhhmuh a.

"Tho phawt la, kan hlîp dawn nia.." a mutkawr a lo inbel diam tawh a, chesual lo turin engkimah a fimkhurin a ngaihtuah kim ka ti lo thei lo.

Khum kan siam zawhah ka room lam panin ka pheisan ta a. Min ngai ang pawhin alang duh dêr lo nia! Kei erawh chu a bula mut leh châkin ka phî sek a kan inang lo teh e.

Ka thawhchhuah leh meuh chuan zinglam dâr sawm a pêl tawh a, tumah inah an awm lo!

Mafeli pawh a awm chuang lo, chaw ka ei peih loh avangin pâwnah ka chhuak a, ruah a sûr tawh lova khua erawh a hnîm ruih thung.

Khawiah nge an awm vek le! Mafeli bike a awm lo bawk a, ani hian min lo hawsan daih em mawni! Rang zetin inchhungah ka tlânlut a, a pindana a bag ka hmuh chuan ka thawhuai mai. Arini nen an teichhuak a nih ka ring ta a.

"Zirsang, engmah i ti nange, engtik nge i chhuk leh dâwn?" Pa Zara'n min lo biak chuan ka chhuk leh hun tur ka hrilh a, ka nu leh pa an awm loh avangin a chhuak zui daih bawk nen tihtur ka hriat loh êm avangin ka phone-ah games ka khêl ta vel mai mai a.

Mafeli hi kei aiin kumkhat chauhvin zuk upa a, doctor hna a hmuhna pawh ala rei lo hle a, a chêtzia a puitlin êm avang leh doctor a nih vang nge upa riau turah ka lo ngai a, Nuteii aiin a naupang daih!

Lehkha thiamthei tak a ni tih alang reng a, ka ṭhianpa sawi danah phei chuan doctor a zir lai pawhin a tiṭha ber zel a ti tak alawm le. Kei hian ka phû miah lo.
Amah vang hian mahni kê a din theih ka châk thar ta riau mai.

"I tho har lutuka kan lensan che," Mafeli a lo nui lût var var a.

"Arini nen em ni?"

"Aw, ani chu alo la haw ve lo a, ka rawn hawsan," ka bula a lo ṭhut mai ringin ka tawlhsawn deuh a.

"Hey, inngaizawng kan nih loh kha, ṭhut tlan kher a ngai lo, zanah chiah, kan tihtur leh ka lokal chhan kan tih chuan a tawk.." ati hmak a.

"Khatianga kan awm tawh chung khân inngaizawng kan ni lo a maw!?" Mak ka tih êm avangin ka zâwt nawn ngat a.

"Ni mai mai lo, kan inbiakrem dan thlâk phêt tum suh." Ati erh a.

"A ṭha alawm, inngaizawng lovin tikhan kan awmzel dawn a nih te chuan.."

"A hunah chauh tih ka sawi lovem ni?" Tiin a rawn ṭhu ta tho a. Min en hâ chung hian, "Nutei hnenah engtikniah emaw i la lêt ka ring tlat. Rei tak kan lo kawp tawh hi chu kalsan hlen a har riau a nia."

"Ka lêt dawn tawh lo. Nangman min duh tak tak phawt chuan khawiah mah ka pênsan lo ang che." Ka ti a.

"Zirsang, inngaihtuah ṭha leh rawh, a hmasa zawk nge nge chuan i rilru aluah ang tih ka hria a nia, kei chuan fâ ka neih hlauh phei chuan pasal neih ka tum lo. I kâ i ang lo a nih phawt chuan engmah ka sawichhuak lovang. Ka duh loh vang che nilovin i hmakhua ka ngaih vang a nia." Ati duah a, a mizia hi engtikah mah ka hrethiam dawn lo a nih hi.

"Nangmah ka duh zâwk che alawm," ka la ti ve ṭâng ṭâng a.

"Ka hria, Nutei i be tawh miah dawn lo a nih chuan emaw a lo biak leh che paw'n i chhâng dawn lo a nih chuan ka insiamrem thei." dam thlap hian ati a.

"Ka be lo ang, ka ti tak tak Mafel, min ring rawh.." ka rilru dik tak ka sawi rêng a ni.

"Kan la hria ang chu, kan awmna hmun a hrang leh dâwn a, zû tih vel khan i nunah thû an nei tur a ni lo." Chiang takin min en a, "Ka tân mipa hmasaber i ni a, i ni reng dawn bawk. Mahse, mi inkâra tlazep duh tur khawpa rilru chhia leh nêp ka ni lo a nia," ati leh ta a.

"Zanah kan sawi ṭha ang, vawiin chu kan lengkual dawn em ni?" Tiin thildang ka sawipui ta daih a.

"Khua a nuam lo e, ruah hian sur a tum leh hmel," tho chhuakin pawnlam a thlir vang vang a, a pian invuah fuh ru riau hi en hmaih har tak a ni.

A sawi ang tak takin ruah a sûr leh ta a, Arini a tawmbo daih bawk nen a room-ah kan inkhung ngar ngar a, a naupan lai chanchin te sawiin a titi char char a, ka rin aiin a ṭawng duh daih! Thil nuihzatthlak deuh deuh sawi tur a hre hnemin ka nui suk suk reng mai.

Chawhnu lamah eitur kan siam dun a, a duh ulukin a che peih angreng si a, ka zui kual ka zui kual ringawt nia!

"Kan teichhuak ve mai mai dawn em ni ang? I bike keng la, ka keng ve bawk anga bazarah kal ila.." pheikhawk a bun pah mawlh mawlh a.

"A hran ve ve a kal a ngai hleinem, inphur ila a nimai alawm," ka tih chuan, "Kan inkawp hi vantlângin an hriat kher ka duh lo." ati hmak a.

Min zahpui deuh em maw ni!?

"Ok, i bike la chhuak rawh le.." ka ti ta zâwk a.

"T-shirt dum ha la, keiin a sen, kekawr dum ve ve aw.." tiin a inbel lai a hlîp a, shirt sen a ha ta a. Keipawh inthlâk turin ka room-ah ka phei ve ta bawk a.

A chang chuan a che naupangchhia leh riau lawi si.

Bazar lam pana kan tlân lai chuan kan mi tawh reng reng te'n an enduh hle a, helmet kan khum lova, a sam sei tak thlîin a chhêm siau siau chu a nalh reuh riau nia. A hunah a nû hnâp a, tunah lêm kei aimahin bike a khalh chakin a confi leh bawk sia ka ngaisang lo thei lo.

Nutei te in kan tlanpelh laiin amah ka hmu vuai a, chîk zeta min enzui pawh side glass aṭangin ka hmu reng. Mafeli erawh chuan engmah a hre ve lo bawk a, chak fê hian ka hmaah a tlan zar zar a, kan khua angah te hi chuan thil a darh chak si a, Mafeli chungchâng pawh an hre leh vek tawhin ka ring.

"I duh duh thlang rawh le," thawmhnaw dawra kan luh hnuah jeans inkhai dul chu a en vang vang a.

"Hmeichhe hnen aṭanga thilpêk dawn ka sim hlauh."

"Hus! Ani nen min tehkhin reng reng suh, ka pêk tawh la lêt leh tur khawpa rethei ka ni bik lo." ati deuh hmak a.

"Thawmhnaw leisak ka ngai lo, i duh chuan nangma hâk tur lei rawh," ka ti ve tlat a.

"Zirsang, kha kha mi innu thar chu..?" Lalrama a rawn lut ve a, Mafeli nen min entawn chhên hnuah, "Nei chhelo thei riau mai.." ati leh a.

"Ka ṭhiannu a nih hi, a lo zin ve zawk a.." tiin thawmhnaw lam ka melh san daih a. Mafeli chuan Lalrama en pahin, "I ṭhianpa ṭhiannu ka nih hi.." nui var var chunga atih chuan nui chhuak lo tura ka insûm nasat angai viau.

Nula fing tak a ni. A hming a hrilh duh lo a ni tih ka man vat thung.

'Ka duh lo' ka tih tlat avangin engmah min leisak ta lova, titau hmêl pawh a pu chuang lem lo.

Chawhmeh leh zana eitur eng emaw a lei nual a, dâwr kan chhuahsan chiah tihah Nutei leh ka la hmuh ngai loh mipa pakhat an rawn lut ve a.

"Mâm, innu chu min hmel hriattîr i tum nange!?" Ngeiawm lam lek leka rawn tiin Mafeli a en chîk hle a.

"Annu ka ni tu'nge ti? Duh duh sawi ngawt loh tur.." Ka chhân hmain Mafeli'n min lo chhân khalh a. A dik dawn lo.

Mafeli dam thlup mah se Nutei a nasa ru phian sia mualpho palh a hlauhawm ṭan tlat.

"Kal ang.." tiin Mafeli bânah ka vuan a ka chhuahpui ta a.

"Innu chu ka biak thui i hlau hle mai," zuk ti zui ṭâlh a!

Nutei leh Mafeli an inhmu kher chu pawi ka ti hle mai.

A thinrim loh hrâm ka beisei. Puitling viau e tilo hian kan doctor pawh hi a duh loh naah chuan a nasa phianin ka ring.

"Nutei chu ka hmu ve ta e.." zawi sap a Remruatfeli ṭawng chu ka hre pha reng.

©<++++[BeckirafARenthleI]++++>®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:33 pm

8.RAPSAGY

Becky Rafa Renthlei

Chapter-8

Remruatfeli
7:00Pm

Bazar aṭanga kan chhuah chhoh hnuah Zirsanga a tlân hmasa a, a hnungah ka ûm a. Inah kan haw tlang dawn emaw ka tih laia a tlân zel si avangin ka zui ve lo thei lo.

Vengchhak lamah a tlân chho a, kawngsirah lo dingin, "Mafel, u Siamtei te inah kal lawk ang aw, kan rei lo ang." ati a.

Siamtei hi a û chiah niin pasal a nei tawh a, hmanni deuh khân naute thar an nei niawm tak a ni.

"Kan rei dâwn loh te chuan inbual ka duh a nia.."

"Rei lovang, Kenedy-a ka hmu zuai anga a tawk mai."

Siamtei te in kan thlen chuan an nupain an lo awm a, fâ pakhat chauh an la nei nghe nghe. Zirsanga'n naute a pawm a, a duat hmel kher mai. Kei erawh nautê lâwm viau e ti lo hian ka chhawnchhaih thiam lo angreng a, ngawirenga pawm tawp emaw puak tawp kha a ni mai.

"Ava'n hmelṭha ve.." Zirsanga tupa biangah ka piai zauh a, "Hei aia hmelṭha leh ngo hi i pumah ka dah dâwn.." ka bengbulah a lo ti sup a. Ka nui ve tawp.

"Ka tâ tur liau liau a nia uluk angai viau ang, tih lai apiangin a sam, a kut, a ke...ti zel ila.." ka chhânna avang chuan a nui huk a, "I va'n zâm lo reuh tak.."

"I lo sawichhuak hmasa a nih kha.." ka thusawi an hre pha ve nge ve lo ka en leh tê tê a, Siamtei a lo nuih var var danah a hre pha chiang! An pa chuan a hre ve lo pâwnah a lo chhuak daih a, Zirsanga nui hmêl ka hmuhin ka zak ve ṭêp.

Ka frank lutuk leh fiamthu ka thawh leh hluai zel hi sim vat a ngai. Ka mize hlui ṭhin khâ a nia, ka sim mawh teh e.

"Fel, pawm ve chhin teh.." Kenedy-a ka mal chungah a rawn dah a, a phone phawrh chhuakin thlâ min lâksak zui a(h)! 'Thingpui in rawh u' min tih deuh tlat avangin kan in ta a, Siamtei pawh a hmel ṭha tho. A vun a nalh hle a, Zosangpuii leh Siamtei hi an hmel ṭhat dan a inang a, Arini erawh a dang deuh. An unau rau rauah chuan Zirsanga a ṭha fâl nalh a; mahse, kawhmawh bawl a hrât ber thung.

Sangpuia pawh a chhe chuang lo nâin a hmâi a hlâi deuh.

Kenedy-an min zunkhum hlauh mai le. Ka kap zâwn a huh dup a, diaper an lo hrêntîr lo chu niin.

"Siamte, diaper inhrentir lo a, Mafeli a huh pûr ania," Zirsanga a nui suk suk a, nautê-in min zunkhum vânga nuih kher. A kap an ṭâwnphui a nih loh te chuan a zung ve bawk ang chu maw le.

"Kan teichhuah loh chuan ka hrentir vak ngai lo. Awi! A zia lo e.." inthlahrun hmel takin ati a.

"Ho lutuk ka la inbual chuang lova, kan chhuk hunah ka inthlâk mai dawn alawm," ka tih chuan Zirsanga'n hâwn a rawt ta vat a.

'Lo lêng leh ngei ngei r'u aw Mafel, thil nuihzatthlâk deuh ka hrilh ang che..' a nau melh zauh paha Siamtei'n atih chuan Zirsanga a nui duh ṭhak lo.

Eng tak ni ang maw!

Mi teivâk hmuh tur an awm vak tawh lo bawk a, huh deuh pûrin bike ka khalh thla ta a. Kan thil leiho aniin a phur thung a, in lam panin kan chhuk ta a.

Zanin chiah ka riak thei ta. Naktuk lama hâw ka tum thu ka la sawi chhuak lova chaw ei laiin sawi ka tum deuh a ni.

"Inbual nghal rawh aw," kan thil lei vel a dah fel zung zung a, nu Zuali'n eirawng a bâwl a, Arini leh Sangpuia'n tanky an tifai a, an lo buai nak nak hle mai.

"In va thangrei phian ve.." nu Zuali'n atih chuan Siamtei te in a kan kal thu ka hrilh zung zung a, Kenedy-a ka fak luam bawk.

"Mafel, fâ nei ve la i duat âwm.."

"Duat ngawt ang, tumahin an pawm dawn lo reng reng.." Zirsanga a nui a, thil a inti hrethiam ve râp. Nizanah kan ṭan dêk dêk a, râi turah min ngai deuh ngawt em maw ni!

"Kan Zirsangliana hian engtikah tak nei ve ang maw, hmeichhe fâ ai chuan fapa te fâ nge nge hmuh a châkawm ve alawm," tiin a thil chhuan lai a chawk mawlh mawlh a.

"Nu, i hmanhmawh a nih kha, i hau hrep hrep tur ninhlei zet an la awm lovang tih pawh a sawi theih loh," min rawn en deuh kher a, ka nuih aza ve tho.

Kan kawppui te azir hian ho deuh deuh a awm a lo awl ber a nih hi.

An nufa a an inhnial fiam laiin inbual turin ka luhsan ta a.

An chhungkua ka fak ve na em em chu, sum an nei viau ang tih hriatsa a ni a, Aizawla an in pawh a turu riau an tih kha maw le. An nupain sawrkar hna an thawh bakah pa Hriata nau zu heh deuh khân dâwr a enkawl mumal theih loh avangin an kutah a awm tawp a, Hardware dawr leh Glass house an nei a, Seling-ah Sethlum huan puitling sa vek an nei bawk a, kum tawpah vai hovin a kung chawpin an khâr ṭhin a ni.

Chhungkaw member panga chauh anni a, Sangpuia hlawh hi chu an chuhpui lo, amah intuamhlawm nân a hmang a. Zirsangliana leh Arini hi an zirna ala hautak deuh.

An che fel thlap thlap hle a, awmpui pawh annei bîk chuang lo. Arini leh Sangpuia hi chuan inchhûng chêt an peih a, Zirsangliana erawh inti 'Pa' chi a ni deuh, a ṭûl tâwpah lo chuan thleng seng leh eirawngbawl ati ve ngai meuh lo. 'Ka thiamsa vek' zuk ti tlat a!

Tunah thlathar kan kâi ṭep tawh a, a nu leh pa inneih anniversary hman zawhah Zirsanga Chennai-ah a chhuk tawh dâwn a, keiin ka hnaah chawlh ka nei ve chiah thung dâwn a ni.

"Mafel, i phone hi ka lo chhâng mai dâwn em ni?" Zirsanga'n min rawn au a.

"Tunge?"

"I nu a nia.."

"Aih, keima'n ka call back mai ang."

A reh zui vang vang a, ka nu'n thil a sawi duah anga, ani khân sawi loh tur tur te a lo sawi palh ang tih ka hlau deuh.

Chaw ei chhung zawngin Zirsangliana a ṭawng miah lova, ka nu pawh ka la be ta chuang lo. "Naktuk zingah chhukthlâk ka tum deuhva.."

"Maw! Eng ati nge?" Arini a rawn ṭawng leh hmasaber.

"Ka châm rei thei lo a, chawlh lâk ka duh vangin eng eng emaw tihfel ngai ka la nei nual a, naktûk tûklehah Aizawl ka pan a ngai dawn a," ka ti a.

"Awm ve rih la kan tih nen, nangzawng i pawimawh êm a, kan inneih anniversary erawh i rawn hman ngei ka beisei," titu nu Zuali chu en pahin, "Ka lo tum dawn nia.." ka ti sap a.

"I nu leh pa te paw'n an ngai ve ang che, doctor buai theihzia te chu kan hria alawm, vety lam hi tlêmin inzia deuh lo maw?" Pa Hriata'n ati ve thung a.

"Zia tehreng e, free clinic a awm lem loh chuan office-ah ka ṭhu deuh ber. Directorate-ah a nia ka awm.."

"Aizawlah maw!?" Tia min zawh chuan ka bu nghat a.

"Kum thar lamah min sawn chhuak ve-in ka ring. Tanhrilah emaw, Lunglei pawh a ni maithei.." ka ṭawng mawlh mawlh laiin Zirsangliana a tho nulh a, a titau leh ringawt em maw ni! Duh hun hunah a nui suk suk a, a chhan leh vang awm lo-in a ngawi leh hmuk a. Hus! Puitlin loh thlâk lutuk.

Arini nen hmun kan thian fel a, nu Zuali kan awl ve a, Zirsanga leh Sangpuia room-ah an inkhung daih bawk a, ruah a sûr deuh cherh cherh reng bawk nen pa Hriata te nupa pawh an teichhuak lo. TV enin an ṭhu a, ka nu biak ka duh avangin ka room-ah ka lût ta a.

Ka nu chuan ka haw hun tur te min zâwt a, a dân pangngai têin fimkhur turin min chah leh mawlh mawlh nia, 'Nula i ni a, mi inah intivei deuhva awm loh tur, a ṭûl ang apiangah puih zêl tur' tih vel tho a ni.

Ka nu leh pa hian tuna ka awm dan hi hria se, min hlap er zawk zawk duhin a nia ka rin. Mahse, duh ka thlang fel tawh a, ka lo râi ta a nih leh a pa hming ka sawi lo tawp anga a ni mai.

Ka nu ka biak zawh hnuah whatsapp ka check zuai zuai a, ka thawhpui nawi zet zet te msg chhiarin ka nui var var a, phone-hi ka khawih tam lutuk lova mi biak nân chauh ka hmang a ni deuh ber.

"Naktukah i chhuk dâwn tih engvanga min hrilh lo nge i nih?" Zirsangliana ka pindanah a rawn lut a, a lungawi loh hmel kher mai.

"Zanhnih riakin ka lokal ang ka tih khâ.."

"Chhuk rih lo mai rawh," ati sup a.

"Ka sawi vek tawh si a, inhnial ka peih lo a nia, a rêng rêngah tûm bûr zel lo hian i ngaih dan sawi chhuak ve mai ṭhin ta che.."

"Min duh thlâwt lo tiraw!?" Tiin khumah a rawn ṭhu a.

"Duh e, chupawh kan sawi vek tawh. Kan inkârah tumah an awm tlat loh te chuan engmah buaina tur a awm hleinem; ngaihzawng ka nei lova, nangni pawh in inṭhen tawh a, i rinawm chuan ka rinawm a ni mai, naupangchhia deuhva induat hliau hliau kher tur a ni hleinem, ka ngaihsak theihna apiangah ka ngaihsak ang che. Min ring la, ka ring bawk ang che." Fiah faka ka ṭawng chu a ngaithla uluk viau.

"Min ring rêng rawh, inngaihzawnna tel lova sex hmang hmasa kan ni a, zanin aṭang erawh chuan chutiang a ni tawh lovang. Min kalsana midang i pan ta anih loh chuan ka pan bîk lovang," tiin ka kâwngah min kuah a, "Mafel, vawilehkhatah rilru ka pe vek thei lo che tih i hriat angai a nia, hmangaihna chungchâng sawi dun tûr chuan ala hma mah mah ka ti," ati leh a.

"Keipawh chu chu ka ngaihdan chiah a ni. Tuna kan awm dan hi chu a nihna takah chuan induhna leh tisa in îttawnna mai a ni a, rilru nghet kan pu a nih erawh chuan kan hma hun thui tak a hril tel tih kan hriat ve ve angai bawk, zû in tawh lo la, keima'n bul ka ṭanpui ang che." Ka ti ve hmiah a.

"Ka lawm e, ka zir chhûng zawng min lo nghâk reng rawh aw.."

"Lutuk tlat, he inchhungkhura i mawhphurhna, fa û i nihna te hi hlenchhuah tum ang la, mi in an nuihzat lohna tur che u leh i nu leh pa awm loh hun thlenga i unaute tuamhlawmtu leh khaidingtu tur i ni tih theihnghilh ngai suh ang che." A biangah ka chûl dan dan a, "I hmel ṭhat teh lul nen sual rawng i bâwl leh tlat zêl.."

"Remruatfel, zû ka in zeuh zeuh avang hian sual rawng ka bâwl tihna a ni kher lo.." ka kutah vuanin a hmui bulah a chelh kawp a. "Thinrim engphiarin min hau ang tih ka hlau, ṭawngkam bungrua i ngah si, 'Lalpa, Mafeli hi Setana nen inremtîr lul suh' tih deuh chhên ngai suh se aw.." atih chuan za lutukin ka nui ta a.

"Bengchheng vak mah ta che, min hriatchhuah i hlau a ni lawm ni? Chuan min hawsan rih suh aw," ngenngâwl taka atih chuan châm leh ka châk zek zek nia.

"Tun ṭum chu min hrethiam hrâm rawh, ka châm chuan a laklawh vek dâwn si a, kârlehah lo kal ka tum zâwk ang, i nu leh pa sawmna khâ ka ngaihpawimawhawm angreng si a," tiin a hmui leh hnâr vel ka dap kual dan dan a.

"A nih leh ka thlah ang che, zankhat ka lo riak ve anga, kan inhriatchian tawn angai alawm.." ati leh tlat!

Ka ngawi ta rauh rauh a, kan inah mipa vawikhat mah ka la hruai lût ngai si lova ka hreh ru ang reng.

"I phal lo anih chuan ka nawrlui lo ang che, i nu ka biak pawh i phal lo a nia," ati nghut a.

"Ka nu biak kher a ngai hleinem, mipain ka phone i lo pick khân zawhna chhân tur ka ngah mai mai, bâkah mipa chhân sak ngai khawpa hmanhmawhthlâk engmah a awm lo tih ka hria alawm," tiin ka sawi mar parh a.

"Min zahpui tlata hriatna ka nei.." ala ti ṭalh a.

"A ṭha e, kan inring tawn a ni tih chêtziaa lantir angai a nih hi, naktuk chaw eikhamah ka chhuk anga min thlah dâwn nia, bike keng lovin kan inphur thla anga, duh leh in khaw Sumo service-ah i haw chho mai dawn nia.." ka tih leh tâkah chuan awih chiah lo niawm tak hian min en deuh vang vang a.

"Ka thlah che chu i duh tak tak maw!?"

"Duh e, i nu leh pa pawh kan pahnihin kan hrilh dawn nia, puitling taka engkim sawi thlap hi chîn tam tur, lokal rawh le.." tiin khuma a ṭhu lai chu ka pawt tho ve a, lungawi hmêl a pu leh ta.

Hun reilote chauh kan nei a, chutihlai kâra inhau leh rih te zawng a âtthlâk em mai.

Kan tum dan a nu leh pa bula a sawi chuan an lo phal nasâ. "Fimkhur la, mi sawi kâi turin awm reng reng suh ang che, Mafeli mualpho theihna tur ang zâwnga chêt tum lo bawk la," tiin a nu in a lo zilh erh a, a haw bîk teuh lo.

Dârkâr khat dâwn sitting room-ah kan titiho a, a naupan lai chanchin leh a patea a enkawl dan te an sawi kâia rin aiin kan meng rei ta phian.

"Mafel, i duh chuan mu hahdam daih rawh, ruah a sûr reng nen keini pawh kan mu ṭêp," Nu Zuali'n ati leh a. Mahse, Zirsangliana zâwkin, "Ka room-ah thil tihtir lawk tur ka nei, ala mu hman lo," Dâwt zuk sawi ringawt a..

"Anih chuan tunah va tihtir la, bike-a inchhuk dâwn phei chuan in taksâ hahdam tir rawh u.." tiin thingpui hâng siam turin min thawhsan ta a.

Zirsangliana'n min signal zauh chu ka hmu reng.

A room lamah kan inzui lût ta a.

"Awlsam deuh deuhvin dâwt sawi tawh suh," a khumah ka ṭhu a, mipa room tih pawh hriat loh hian a fel fai thlap nia!

"Dâwt pawi lo chi, Meidil tlâkpui tham loh a nih kha.." tiin chair pakhat inhûngah chuan a ṭhu a, "Zaninah ka room-a riah nge i duh i room-ah?" Tia min zâwt zui lehin min en reng a.

"Ka room-ah riak zawk ang, Arini room nen a inhnaih si a, ṭawng pawh kan ṭawng ṭha ngam lovang."

"I tih ka ring rêng a, lo va mu hmasa la, nakin deuhah ka lo phei ang aw, suahsual chhuaha kawngkhar i lo kal vaih chuan kei hian ka tichhe tho dawn tih i hre dâwn nia," tiin zuk intlawh khalh chiam a!

"Ka kalh nghal loh.." chimawm takin ka tilui ngat a. Ka hnunga nam dat dat chung hian, "Chuti a nih leh a rualin kan mu anga, mother India-in min manchhuak anga ti nia.."

"Eng nge i la tih dâwn!?" Ka thawmhnaw ka rem ṭha mawlh mawlh a.

"Thingpui hâng in pahin thlaleha ka submit tur ka ziak lawk ang."

"Tihpui i ngai lo em ni?"

"I kianga awm châk viau mah ila ka nu leh pa men chhung tal men ve kha a mawi ka ti deuh a.." atih chuan dik ka ti viau lawi si.

"Ok, bengchheng lovin i lo mu dawn nia.."

Zirsangliana kal hnuah ka thawmhnaw ka thlâk sawk sawk a, mi tenawm ber ang maiin nupa ni hawt si lova riah dun ringawt chu ka rilru a nuam chiah lo. Mahse, chuti maiin ka rilru ka thlâk zung zung thei bîk si lo nen nizanah kan lo mudun tawh bawk si a, rilru a hrehawm ru angreng viau.

Tuna kan awmdan sawhkhâwk a lo lan hunah tuar angai a nih pawhin ka tuar mai a ni ang chu.

After 1 hours.
Zirsangliana

Ka duh aia ka inpeih har tâk avangin ka mu lawk hman lova, ka inpeih meuh chuan zan dâr sawmpakhat a pêl tawh.

Ruah a sûr buan buan a, hetia a sûr reng chuan naktukah kan chhuk thlâk theih loh hmel hle mai.

Mahse, zanin atan erawh duhthusama tam sûr se ka ti lawi si.

Mafeli room-a thim ṭhiap tawh a, a muhil tawh hial maithei a ni. Ka chhungte an mu phiar tawh a, Mafeli hi an ring ṭha lutuk nge min ringhlel ang pawhin an lang chhin eih lo.

Ka pa phei chuan 'Ani ang hi mo-ah nei ila, kan fapate pawhin rilru puitling an pu zung zung mai ang' tiin a sawi nghe nghe.

Ka room-ah ka lût leh tê tê a, chhuanlam neih khâ angai ve tlat sia.

Minute sawm dâwn ka awm hnuah thâwmdím fahran hian Mafeli mutna lam ka pan ta a. Êngin a chhun raih a vangin puansin lovin a mu tih ka hre mai.

"I harh em?" Ruah ala sûr reng avangin a beng bulah ka kûn hniam a, a muhil chiang!

Tihharh hlau zetin a kiangah amah kuah tlat chungin ka mu ta a, a muthilh theih phawt chuan muhil teh se, a chau dawn em asin, a âwmbâwr kawh lah chu dimtê hian ka khawih niap niap a, a harh chuang ṭhak lo. Hmeichhe muhil lai mutpui te chu a chi hian a chî loh nasâ.

Mut chhuakin min zem chiai chiai a, a kâwnga kuah chungin ka chhing ta vang vang a.

"Zirsang.."

Min ko ri ka hriatin ka meng hlawl a, a thim deuh bawk nen Mafeli mutna lam ka dap chuan saisir hian a lo mu a.

"Min ko em?"

"Ko chiang e, i hnâr ring lutuka ka sâwi harh zo lo che.." ka lam hawiin a rawn inlet thak a.

"Awihawm loh lutuk, ka hnâr ngai lo e a."

"Tak tak alawm, khatiang te chuan ka bulah i mû tih an hre vek dawn asin." Ti lehin a chek tlak tlak a.

"Zanin chu, a kê leh a kut siam zân a ni maw..! ka tih chuan ka bânah sikin, "Tenawm suh.." ati sap a.

"Nizanah a lû leh a nghâwng kan siam tawhah ngai ila, zaninah chuan a bâk zawng," min chhân hmâin a hmuiah ka fâwp zui hmiah a, min chhâng ṭha kher mai. Duhthawh leh uar taka fâwp chung zelin a taksâ a rem lai laj ka chûl lawr dan dan a, a lungphu inthûm rawn tlat tlat chu a ring kher mai.

"I thawmhnaw ka phelhsak dawn che nge nangmahin.." ati sap a. Nizan ai chuan kan boruak a ṭha dawn e.

"Nangma'n le.." inbengkangin amah ka pawt tho ve nghal a, thâwm dim ngai ta lo chu a va nuam si êm.

Ka thawmhnaw inbel muangchânga min phelhsakin saruakin ka awm ta a. Ka mipatna nung at chu a tawk zauh a, khawih nawntîr leh ka tum chuan nui hak chung hian a kawr hâk lai a phelh ve sawk sawk a, zanin a chêt dan chu a dang zar mai.

Kan pian chhuah tirh ang vêl kan ni ta.

A hmui nêl thepa min fawh tâkah chuan maktiin ka meng deuh kâwk a, a ṭan hmasatu a ni ve teh tlat!

Chutiang zelin ka taksa hmuntin chu fâwp kualin a thaw ham ham a, kâr lovah ka inpeih dêr. Mipa chhâwk zangkhai thei tur khawpa confi hmeichhia hi ka duh rêng a ni.

A vawikhatna a ni tawh lo bawk a, ka dîm lutuk ta lo. Ka bawp a kherhbet chial a, a vun mâm hanin min nêkna chu a sa ṭha ham ham khawp mai. Pumkhatah kan insiam chiah tihin kâwl a rawn phe zuai a, a hmêl nung sarh chu ka hmu hman vuai nia.

Hmeichhe phûr thei tak a ni tih ka hriat phah ta bawk a. Nawmna kan inpêk tawn hnuah inkuah chialin kan mu a, atu amah kan ṭawng lo.

Rei fê kan ngawih hnuah, "I phone-ah chhinchhiah la, i period loh chuan arang thei ang berin min hriattîr ang che." Ka ti a.

"Nangpawhin chhinchhiah ve tho rawh aw..." min kuahna a thlah a, lukhama a phone dah chu phawrhchhuakin eng emawni a type niap niap a, a chhinchhiah a nih ka ring ve ringawt. Ziakin dah lo mahila kei hian ka theihnghilh ngai lovang.

"Nau i pâi chuan kan innei dâwn nia," ka tih chuan a ngawireng a.

"Mafel...!"

"Umnn.."

"Ka nei duh che ka tih chu.."

"Tunah chutiang sawi rih suh, kan innei lovang tihna nilovin engmah sawi lâwk lo ila hunin a hril mai ang." Ati deuh tlat a. A rilru tur ka hriatthiampui pha ve in ka hria. Engmah hnathawh mumal ka la nei lo a, ka zirlai ka la zo chiah lo bawk nen ani doctor tân chuan rilru siam a har tepawh a ni mahna..

"Min lo nghâk reng rawh aw, nangmahah ka innghat a nia.." a pumah ka chûl riak riak a, ka kut vuan chat chung hian, "Ka nghâk thei che alawm, taima takin keimah min ngaihtuah rân chungin i zirlai chhunzawm la, i dam chhunga i inchhir lehna tur thil eng mah ti suh ang che."

"Tehreng mai, ka tân hmeichhe pakhat a tâwk. Chu chu nangmah i ni.." ka tih chuan a thaw chhuak hliai a.

"Engkimah ka ring tawh che a, ka rinna che hi tichhe suh aw, chuti a nih loh chuan ka ring leh ngai tawh dâwn si lo che a.." ati sap a.

Ni e, ani ang hmeichhia, rilru nghet pu tlat tâna rinawm hi ka tân a harsa miah lo. Min hriatthiama min nghâk thei a nih ngat chuan a tân mipa ṭha ber nih ka tum dâwn lovem ni?

Nutei, min ringhlel rengtu tân pawh ka rinawm thei a nih chuan engkima min ringtu leh min hrethiamtu Remruatfeli tân hian ka rinawm thei khawp mai..

Ka thei ngei ang..


©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:34 pm

RAPSAGY

Becky Rafa Renthlei

Chapter-9&10

Remruatfeli

Khawvar dâwn hnaihah pawh Zirsangliana âwm nghêngin ka la nui hak hak a, ani leh ni lo angin a titi ve luam a, 'Bialnu neih tihvel hi chuan min tibuai lo, inṭhen leh kher a ngai ṭhin zâwk hian min tibuai' atih chuan ka nui lo thei lo.

"Fâ nei ta la, eng nge a hming i phuah ang?" Tia ka zawh chuan a ngawi vang vang a, chutah ''Remruatsangi emaw Remruatsanga ka ti ang" tiin ka pumah bawk a rawn chûl leh a, a kut phah lum vang vang te hi ka thlamuanpui thar ta riau!

"Chuti hmeichhia a nih chuan sâp hming ka phuah ang," ka lo ti ve ringawt a, a nui nasa ngang mai.

"Muhil tawh lo law law ang aw, vawiina i thil lei, chips-ho kha ala awm ṭeuhva horlicks leh bawnghnute chawk ila kan in dawn nia.." tiin a tho a, "I duh chuan lo tho ve la, kan pahniha siam dun a nuam alawm," atih deuh tlat avang chuan peih lo zetin ka tho chhuak ve ta a.

Min duat hûrh hran lo. Mahse, min ngaichâng thiamin min dah pawimawh hmasazel tih ka hre ve tlat.

Sitting room-ah eitur nen kan inchawi phei a, boxer leh tawnzau a inbel a, keiin ka mutkawr ka ha thlap tawh bawk.

Fel hmel fahran hian kan ṭhu hrang deuh ngei bawk a.

"Midangah buai suh, mahse, midang sawi sep sep kâi lo turin fimkhur thung ang." Amah en chunga ka tih chuan, "A ṭha alawm, ka tâ i ni tih midangin a hriat sup sup kher angai hleinem, a hre tur dik tak hian hria ila a tâwk chiah." Thûm chhaka tiin eitur a hmawm zauh a.

"Ka ngai ngawt ang che.." ka ti chhuak hlawl a, a dik chiah bawk a. Kum tam tak hnu-a mipa ka pawh lehna hmasaber a ni a, ka tâna a hlutzia hi a inhrethiam tawp nâng.

"Kei deuh, ka hawina lam apiangah i hlimthlâ alang zel mai dawn si a ka huphurh lâwk.." ati ṭha ve mai a.

"Chennai-a i chhuk hunah pawh min lo call ṭhin la, i zirna tibahlahtu a tân min hmang suh ang che. Inbiak theih loh châng te pawh a awm ang; mahse, thinrim phah nâna hmang lovin kan inbiak theih hun nghah mai khâ a finthlâk tih i hrereng dawn nia, i tân ka awm zêl dawn tih theihnghilh lo la, min duh tak tak a nih chuan kawng thar, rahbi thar kan chuangkai zel dawn alawm," tiin ka fuih ve a.

A lâwm hmel ka hmuhin atâna rinawm hi ka bat liau liau a ni tih ka hrechiang tulh tulh nia.

"I puitlingin i thusawi hrim hrim a dik thlap zel thei hi ka chhuang ngawt mai che, doctor niawm rêng i ni.." a no ken lai dawhkanah a dah a, ka bulah a rawn insawn phei ta a.

Min fawh tuma a kûn hniam chu lo dangin, "A hun leh a hmun a awm ka tih tawh kha.." ka tih chuan a ṭhu ṭha ve leh mai a, "A hmunah kan insawn angai anih chu, a hun erawh a dik chiah a nia," nui chunga tiin min pawt thova ka mutna room lamah bawk kan insawn phei leh ta a.

Hmangaihna ala tel miah lo. Inhriatthiam tawnna leh inzah derna hian kawngro a su hle a ni.

"Mafel, Nutei khâ i thîk em?" Khumah kan mu leh tawh a.

"Thîk love, i hun liam tawh ka chhuisak che chuan lungawina tur ka hmu tlêm dâwn si a, kan inkawp aṭang chiah hian amah i kalsan hlen dâwn tih inhria la, ka thîk turin engmah ti suh ang che. A hnena kîr leh duhna rilru i lo pû a nih chuan tlang takin min hrilh la, ka lawm zâwk ang.." ka ti duah a.

"Kîr leh tumna ka nei tawh lo. Ka tân i tâwk.." ati sup a.

"A ṭha e, i thîk turin mipa ka hnaih hauh lovang.." ka tih chuan a nui suk a, "Ka ring tâwk che, tun thlenga nula thianghlim ila nih theihna hian mipa i hnaih lo tih a sawifiah vek alawm.." dam thlup leh nghet charha a ṭawng chu ka tân ngaihthlâk a nuam hle mai.

Zirsangliana kalsan hmasatu nih ka tum ta ta lo bur. Amahin min kalsan a nih erawh chuan ka thutiamah ka ding nghet thung ang.

A khât tâwkin kan infâwp reng a, thildang erawh kan tih belh ta lo. A hunah a insûm thei riau te hi amah ka duhna tizualtu a lo nireng si.

"Zû in leh châkna thlarau sual i dawn loh hrâm ka beisei.." tiin a hnungzâng sei thlurh ka chûl hauh hauh a.

"Châk ve tho. Mahse, ka inthunun thei.."

"Kan inkawp laia i nghei hmak thei a nih chuan innei ta pawh ni ila i nghei hmiah thei ang. Ka siam ṭhat theih loh tur mipa ka ngaisâng ve ngai lo." Thutak zeta ka ṭawnglai chu min lo dang chat a.

"Min siam ṭhat tumtute zingah a hlawhtling awmchhun nih tum ang che." Zuk ti daih a..!

"Nakin zelah pawh i nungchang miin an enin an thlîr anga nangmahah danglamna an hmuh chuan 'Mafeli nen an inkawp vang anih hi' an tih ai chuan, nangmah Zirsangliana i nihna hrim hrim hi lansarh tîr hmasazel ang che."

"Hmeichhiain an siam ṭhat chawp mipa nih tum ngai lo la, mipa i nihna khân siam ṭha zâwk che rawh se."

"A va ṭha dap dap ve le, ka vawng reng ang," tiin min rawn fâwp nghal zat a.

A tâwpna tur ni hauh lo. Bul ṭan dun turin hmangaihna kan chêndun leh ta a. Min hruai a tumna ram ngeiah chuan a vawikhat nân kan lut rual ta.

Thâwm bengchheng siam chi ziazâng a nih loh avangin ka hmui hnuailam ka pet fan fan a, Remruatsanga emaw atu apawh ni rawh se. Ka pum chhunga awm tir tumin a uar hlê mai. A hnung thlan avanga hnâwng chap chuan a thawhhah man hmuh ngei a tum tih ka hrethiam ve lutuk tlat.

Thaw hawk chunga inbengkângin, "I thleng tawh tiraw?" Ati sup a.

"Umn..i ruala kal zel ka duh alawm," tiin ka lo chhânga, "I danglam takzet.." tih pahin ka sîrah a rawn mu thla ta a.

"Ka danglamna hrefiah turin, ṭang nasa rawh.." fiamthu-a ka chhân vang chuan a nui hawk nia! A lum ta lutuka kan rizai sin lai chu asirah dahsawnin min kuahna a thlah dul bawk a, chau ang pawhin alang eih lo!

Rei vak lo hnuah inbual turin ka luhsan ta a. Thawmhnaw engtham mah ka ken loh avangin insiam lutuk tur ka nei lova, Arini min lo lâksak veho khâ a man ka pe vek tawh bawk a. Châw ei tawp a ni tawh mai.

He inchhungkhur ami te hian min ngaina ve riau tih ka hria a, eng mah ni lo mah ila kei tehlul min ngaihsaka min duat hi ka lawm hle a ni.

Zirsangliana chungchâng bîkah chuan amah ka ring thlap a, a hnêna ka sawi ang deuh tak tak khân a hunliam tawh ka en sak chuan lungawina ka hmu dâwn si lo.

Zû in zauh zauh chîng ṭhin mi a ni a, mipa dangte anga heh lutuk ni lo mah se a ruihna leh a nihna ang ang hi kan inkawpnaah hian a tel vek a, ka nei tel tih tihna a ni chu. Mahse, amah thlâk danglam theitu nih ka tum tlat thung.

Mihring tumah ṭha famkim kan awm lova, keipawh ka bâng bik chuang lo. Chutih rual erawh chuan amah nena kan inremna tur a nih phawt chuan leh thil ṭha lam zâwng min kawhhmuh a, ka kawhhmuh theih bawka kan indawh tawn hian engtikah mah 'Inṭhenna' a awm theiin ka ring lo bawk a ni.

Fai leh uluk taka ka inbual zawh meuh chuan Sangpuia tih loh zawng an lo tho kim tawh a.

"I va inbual hmâ ve, hmanhmawh lutuk lo mai u la, khua te ngaichâng pahin.." Pa Hriata'n min lo bia a, nizan leh tukin thlenga ruah a sûr reng avangin min ngaihtuah tih ka hria.

"Ni e, Bike phei chuan a peihawm loh angreng khawp mai," sam ka hru mawlh mawlh a, Zirsanga leh Arini'n vengchhakah pheikhawk an en lawk tih nu Hriati'n a lo sawi ve bawk a.

"Mafel, in chhuk hunah pawh zu in te kha a tum leh ngawt ang e, a tum tawh chu kan ṭhulhtîr leh thei dawn si lova.."

"A in lo turah ngai ang, nangni paw'n ṭan han la deuh u la, ka awm loh hnuah pawh a chanchin ṭha lo lam a awm a nih phawt chuan zêp ṭhen awm lovin min lo hrilh ve zêl dâwn nia.." ka ti tlang hmiah a.

"Tehreng mai, a zirlai hi zo se Aizawlah Arini nen an awm tawh ang; mahse, zu in a sim loh chuan an unau ringawta awm chi an ni lova a patea a lo ni ve bawk nen an ngaihtuahawm dawn lutuk tlat, kan ṭawngṭai chhânna hi engtikah tak thleng ang maw.." Nu Zuali ṭawng bawrh bawrh lai chuan Sangpuia a lo tho ve ta a, engtin mah ka chhâng ta lo.

Pâwnah Bike ka hru hliau hliau a, min kalpêl apiangin, "I uluk lutuk a nih kha, a berh leh vek thovang" an rawn ti liam liam a.

Ka rilru tê tê in 'A berh dâwn tih hrereng chunga hrufai ka nia lawm le, lirthei reng reng kan khalh chhuah te chuan a bâl ve bawk ang chu..' an sawi peih ve hlawm angreng sia.

Damtêin han awm ila tlêma ka kawl rei deuh hnuah hralha car lâk ve ka rilrûk deuh a, kan upa tulh tulh a, bike khalh a peihawm loh tulh tulh tawh chû a nih hi.

"I va inpeih tawh awm ap ap ve.." Arini leh Zirsanga ka bulah an rawn ding a.

"Ka châk tehchiam lo khawp mai, kawng a chhe leh dawn mai sia.."

"Inpahnihin in chhuk dawn bik a, Mama hi veng ṭha viau rawh a pharvar san mai ang che," Arini a nui var var a.

"Teuh lo mai, ka thlung bet tlat ang," ka ti ve bawk a.

"In ṭawngthei dun lutuk, chaw ei ang u, Mafel, dah rih rawh.." Zirsanga inchhungah a lut nghal daih a, midang hriat laia induat hliau hliau loh tur tih chu a zawm ṭhat hmel khawp mai.

"U Nutei'n nizanah min lo call a.." Zawitêin min hrilh sap a.

"Eng nge a sawi a!?"

"I u Mama leh in mikhual nu kha an ni ve tak tak em ni!Tih vel mawle."

"Engtin nge i chhân a!?" Ka tih chuan, "Eng mah ka hre lo" tih bâkin ka chhâng lo a ti ta a.

Nutei hi ka haw hran lo ka tih tawh kha. Mahse, hetia a lo inrawlh sek dâwn anih chuan ka duai lo viau ang. Ama'n a ṭhen hmasa tê tê a, hetia rawn inrawlh phêt tum mai! "Arin, a number min lo pe la, eng emawah ka la mamawh dawn tlatin ka hria,"

"Lutuk, a nasa ve riau a nia, in lo insual vêl ange.." nui vak vak chung hian ala ti zui a, ka nui ve tawp. Henu hi ê, ala â ve phuang phuang mai si a!

Zirsanga'n min koh tâk chhên avangin inchhungah kan lut ta a.

Chaw ei an lo peih ṭhap tawh a. Pa Hriata'n ṭawngṭaina hun a hmang a, tluang taka kan thlen theih nân a dil thlap bawk.

Chaw eilaiin awmdan mawi an hrilh leh hrep a, a chhâng ve lêm hlei lova. A nu leh pa hian thu ṭha tinreng an hrilh chamchî ṭhin tih pawh alang reng a, a zâwm vak lo a nih hmel.

"Mama, naktuk Sunday a ni si a, engtin nge ni ang, engin nge i lo chhoh dâwn, Monday lam a ngai daih a nih zawk chu?" A pa-in Zirsanga a zâwt a, "Ka hre lo le, kan chhuk phawt anga chanchin ka lo hrilh dâwn che u nia," min melh zauh pahin ati ta a.

Ni tak, Sunday-a haw chhoh te chu thil tihchi a ni lo hrim hrim, tawhsual tawh te pawh a hlauhawm alawm. Mahse, Zirsanga sawi ang deuh khân thlengthla phawt ila kan ngaihtuah ṭha leh turah ngai ang.

Arini lah chuan kal ve a châk thu a sawi sek a, fanu awmchhun a ni tawh bawk a, râkin nui vak vak mah se an hau lem lo. Amah a sualin a lerh hran bawk si lo a, an enliam vel a ni deuh ber. Sangpuia inah a awm tlêm hlê a, School a kal tih lohah chuan chaw ei lai leh mut hun hi ina a awm chhung a ni mai.

"Mafel, i inpeih chuan khawṭhat lai hian chhuk daih ila.." Zirsanga ka room-ah a rawn lut a. Kei pawh ka inpeih chu a ni deuh thaw tawh.

"Eng nge i hâk ang..?" Tia ka lo zawh chuan mak atih hmel viau!

"Eng nge inbel tura min duh deuh?"

"T-Shirt dum ve ve ha ila, Blue Jeans i nei em?"

"Nei e, i va'n ho reuh tak," ati sup a.

"A nuam ve alawm, ka bialpa thar nen kan inah kan haw dâwn a nia," ka nui var var a.

"I bialpaah min pawm meuh maw, in ṭhenawmte tih vel an lo meng shaala ang tih chu a hlauhawm," a'n ti deuh ngei a. Ka nuih aza zâwk e a. Kan ṭhenawm tlangval Israela, min ngaizawng ve ṭhintu ka hrechhuak zawk.

"Inthlâk ang le, kan tlai dâwn, i thawmhnaw sawi ang chu inbel kan tum poh ang e, Lalkhirhte," nui suk chung hian min chhuahsan ta a.

Nge, a nuam ve alawm, a hmel ṭha ropui si a, min han phur tur ka mitthla vel hian nuam ka ti.

Ka tleirawl ṭha leh a ni ber alawm le.

T-Shirt dum dak hlak leh blue Jeans mar ṭang ka inbel a, kal lama ka boot bun bawk kha bun lehin ka hmai ka chei thuak thuak bawk a, ka sam pawh 'Vikings' hmeichhiate phiar danin ka phiar vek a. A chhan chu Zirsangliana'n Vikings mipa hairstyle ang a pu tlat alawm.

Vety doctor tih vanga in lâk 'uganda' vel kha ka type ninghal lo chuan.

Ka mipa duhzawng street boy an ni ṭhin kha a nia, tunah erawh mipa cool ruih leh hmelṭha, hleitling bawk si-ah ka inham buai ṭan chu a ni ta der mai. Kan awm dun ngun telh telh a, ka duh tulh tulh thung si.

Hmeichhe ṭhenkhat tâna duh ngawih ngawih chi mipa a ni miau alawm.

Ani pawh arawn inpeih thlap tawh a, kan dress a inang thlap. Timberland dum lawk lam deuh a bun a, inhmeh fia fia tak a ni. A chhe lo thlâwt! Keimah chuan awm ila ka khêk râih ang chu maw le.

"Jacket kan hâk loh chuan a vawt maithei a nia.." khuma leather jacket ka dah a melh zawk a.

"A dum tho ha ang che," ka lo ti hmanhmawh a.

"Remruatfel, Lunglei chhuk dawn vanga inchei viau angaihna ka hre lo a nia," ati tak nâin a kut hnung lama a ken Jacket chu ka hmu reng.

"Inthlâkna pahnih khat i keng ve ang chu tiraw, Sunday châm angai dâwn sia.." ka tih chuan, "Ka keng alawm, ka châmrei viau dâwn anih leh kan bazar ve tawh mai ang chu.." ati liam puat a.

A nu leh pa, Arini nen an pathumin min thlah a, 'U Mafel, i bike khalh lai ka hmuchâk nangma'n khalh chhin teh' atih tlat avangin Zirsanga ka melh a, "Khalh mah la a pawi hleinem, nakinah ka chhâwk ang che." Ati ve mai a.

Kum li chhung bike ka lo khalh ve tawh a, tun ṭum zet chu ka confi lo teuh hle mai. Min thlirtute hian min enchîk nasa mai si a! 'Mipa fâ tur hmeichhiaah i lo piang a nih hi' min ti palh ang tih chu hlauhawm tak ani.

Zirsangliana nu leh pa leh a farnu hmuh laiin ka kâr chho pâwk a, Helmet erawh Zirsanga ka kentîr a, ani pawh rawn ṭhu kái ve-in ka tlânchhuahpui ta a.

A nu leh pa hmuh lai chuan ka tlanchak vak lo. Kan liam ta maw tihah ka phit chhuak a ni hrim mai.

"I pumah khân eng emaw a lo awm palh a nih chuan a invaivir nasa ngawt ang." Ka hnunglam aṭangin a rawn ṭawng lâwng lâwng a, za lutuka nui chungin, "Tun aṭanga paukhauh azir ṭan angai tihna anih chu," ka tlânmuang duh der lo.

Nutei te in zâwnah mi pathum vel an lo ding ṭaih a, kei misual tharlâm hian sual ka chhuah châk tlat pek a nih chu. Nizana Arini kan chungchâng a lo zawh vang hrim hrim pawh khân vawikhat horn ka pe tuar a, amah Nutei ngei mai nen kan inmelh chiang kher asin.

Nui sak chung hian kawng lam ka ensan leh hmak a, ka hnunga ṭhu erawh ngaih dan nih loh hmêl tak hian a hawi tau hmuk thung.

Zan hnih ka riah chhung khân vawikhat mah an inbe lo a, Nutei paw'n a lo call lova, Zirsanga paw'n a call hek lo.

Dârkâr khat dâwn inbe lovin kan awm tawh a, ruahsur hmaa thlen hman kan duh vangin kan hmanhmawh angreng viau.

Vâi Truck lian kawngsira lo ding bulah Zirsanga'n din a rawt tlat pek a!

"Eng nge kan tih dâwn?" Amah lah chu rang fê hian a chhuk a.

"Hmai phih ve lawk ang, boruak a uap em mai," tiin kawngchhaka tui lo khawhthla lamah a chho a, a hmai leh sam a tihuh nghal bawrh bawrh nia!

Vâiho lah chuan min en duh hrep lehnghal a!

"Mafel, pheikhawk phelh ila tui hi dai ang, a nuam lutuk, ala hma tho alawm," a pheikhawk phelh tura a kûn hniam lai chu ka en reng a; a mit, thlíthâw-in a chhêm vanga sen râm te, a sam huh hlap te chuan ava tilang ṭha si êm..

Amah alianin a sâng ṭha si a, en reng mai ka duh. Kei hian ka thinlung takin amah ka duh hliah hliah tih ka pawm ta thlap e.

"Remruatfel, min en reng lo khan i kutkawr phelh la, va inphih harh rawh," ka kiangah a lo ding tawh a, Vâi pakhat chu huiin, a be zui mawlh mawlh a, an sawi pawh ka hriat ve si loh!

Lakhuih vel sa diam, tam fê hi vâipa chuan a rawn keng a, Zirsangliana kutah a pe ta a.

"Ei rawh, Lakhipur Lakhuih a nih hi, hmun hrang hrangah an sem ṭhin a, a thlum teh a nia," tiin lian ṭha zet min pe ve a, amah lah chuan tuitih hmêl takin ala ei zui a. Ka ten deuh! Mahse, arim tui êm avangin ka ei ve ta thova, a thlum ngei mai. Kawngsirah ṭhuin Lakhuih thei chu kan ei ta mial mial a. Ka puar awk thei alawm le.

Vâiho lah chuan nuam an tih hmel khawp a, 'a dang inla duh em?' Tia min zawh chuan kan duh tawh loh thuin a chhâng a, reifê chulai hmuna kan chawlh khawmuan hnuah kan tlânchhuak leh ta a.

Ama'n a khalh ve thung a, tukin zinga ka lo suangtuah khâ a thleng dik ta chiah e. Helmet full face a khum thlap a, a hnungah amah si chêtin ka bet thlap bawk a, mipa khalh na nâ na chu a chuan a hahdam deuh e. Bike khalh ṭhang a ni bawk a, ka hlau bik teuh lo.

Lunglei kan luh meuh chuan ala hmâ hle a, dârkâr tam pawh kan tlânin ka hre lo.

After 2 hours
Zirsangliana

Mafeli te in kan thlenna pawh a rei leh deuh tawh a, mikhual room-a khumah ṭhuin ka nu leh pa kan thlen tawh thu ka hrilh zo ve chiah a, councelling class min neihtîr leh hmain phone ka off daih.

A nu leh pa pawh ka rin aiin an la ṭhalai daih a, a nau Bawiha nen kan innêl ve nghal mai.

Amah Mafeli tak chu a inbual rih avangin a nu leh pa bulah ka ṭhu phei ve ta a, an ina awm hmeichhia erawh a cousin a nih thu a sawi a, thâu lam deuh tawitê a ni a, Mafeli nen an pianzia a inpersan hlauh thung.

"Zirsanga maw i nih?" Mafeli pa, pu Rozuala'n min zawt a.

"Aw ni e," ka chanchin min zawt chipchiarin ka zirna leh kan chhungkaw chanchin min zâwt chiam a, a nupui erawh a ngawi reng thung.

An in pawh a nuam hle a, Mafeli'n nakinah ka fanpui ang che atih avangin ka la teikual bik lo. Aizawla kan in tepawh min ti hrechhuak e a.

"I duh ang ang khân lo awm ve tawp mai rawh, keini zawng mikhual kan nei khât a, kan ṭawngtlêm nupa bawk nen min hrethiam mai a ni ang chu." Mafeli nu in a ti ve a.

Bawiha'n, "Guiter i perh thiam em?" Tia min zawh chuan, "Thiam e, i nei em ni?"

"Pahnih ka nei, lokal rawh Matei inpeih hmâin ka hlaphuah kan sa dâwn nia," tiin a pindan lamah kan inzui lût ta a.

Bawiha hi a hming tak chu Remruatpuia a ni a, Mafeli nen an hming a inzûl viau!

Kan inchen vel viauvin ka ring a, Gym-a kal ṭhang niawm tak hian a pian pawh a inphut nalh khawp mai. A hlaphuah kan han zir chu kei takngial pawh ka nuih azâ a, a thlûk a mak bawk si! A hla thû nen lam common lo rem rem tak a ni.

Mafeli hrechang lo lêkin kan zâi dun ta kha a nia.

"Zirsang, i lo va zaithiam ve!" Mafeli lo luh lai pawh chuan kan la zâi uluk hlê a, Bawiha ber hian ka nuih a tizâ zual, mahni hlaphuah thlûk te a theihnghilh thûl ka nui nasa lutuka zâi pawh ka zâi ṭha thei lo. Ka'n siamrem sak lâwp lâwp a.

"Lo phei tawh u la, ka nu leh pa mitthi inah an kal dâwn a, Muantei a awm bawk si lo." Mafeli'n atih chuan kan thiltih lai dahin kan zui chhuak ta a.

Zaninah Remruatfeli kiangah mut ka tum tawh hauh lova, a mualpho theihna tur ang chi hrim hrima awm ka tum tawh lo bur. Amah ka thlahlel lo tihna nilovin insiam ṭhat ka tum takzet a nih chuan insûmtheihna ka mamawh hmasa ber a ni.

A nu leh pa chaw eiah kan nghâk ta lova, Bawiha mitthi inah a kal tawh bawk a, an section ami a nih vangin thingpui lum a ngai tiin a kal hma deuh.

Muantei a lo lût ve chiah a, phone khawihin sofa-ah a ṭhu nghal a, a ṭawng tam lo khawp mai. Ka thlentirha min biak bâk kha min be tawh pawhin ka hre lo.

"Zanin aṭang chuan kan mu tlâng tawh rih lovang," Mafeli room-ah kan awm a, ani'n Laptop-ah thil a type a, a Album ka lo en thung.

"Min hnê deuh tihna em ni?" Laptop a khup thak a.

"Chutiang lam a ni lo. Bul kan ṭan dawn tak tak a nih chuan zanhnih kha tawk rawh se, i tâ ka ni a, ka tâ i ni bawk. I sawi dan takah misual dum ber nih reng zawng ka duh bik chiah lo," tiin ka lamah ka kuai hnai a, a hmela lawmna lang chhuak chuan ati hmel ṭha zual sawtin ka hria.

Dimtêa a hmui fawhsakin a sam hnâwng deuh chap chu hnung lamah ka dahkian sak a, a hmai make up tel miah lova fai sar te hi ka ngaihsan zawng tak a ni.

Hmeichhe ṭhenkhat chu nise, an inchei leh hliau tawh anga kan Remruatfeli zawng a hun leh a hmun thliar thiam hmeichhia a ni tlat a, ani ka neih chhung hi chuan ka thlâ a muang ngeiin ka ring.

A hnathawh leh a hausakna lam ka en lova, chutiang chiah chuan ani pawhin min en ve bawk. Engmah ka thawk lo chung pawh hian Zirsangliana ka nihna hrim hrim leh zu in ṭhin ka nihna te pawh a pawm thlap a, ka tâna ṭha tur chauh sawi ṭhin a nihna hian amah ka duhna a tipung sawt zawk.

Ka hmangaih leh hmangaih loh ka hre lo. Mahse, ka duh hlê a ni.

Nutei'n vawikhat mah min rawn be tawh ngai lova min lo hmangaih ngai reng reng lo em mawni ka ti hial tawh.

Ka hmangaih ṭhin teh lul nen min ringhlel peihin kan inhau reng ṭhin kha a nia. Tuna kan boruak dam raih nen hi chuan inang lo tak a ni.

'Lei leh Van' tia sawi chi ni lo mah se hmeichhia ṭheuh ṭheuh an lo inang lo ngei mai.

"Hey, eng nge i ngaihtuah vung vung a," Mafeli'n ka hnungah min bêng thak a. Ka phu zawk thei nia!

"Kan in chu nuam iti meuh nange?" Tiin min nghêng ar ar a, ka lo kuah lêt vat thung.

"Ti e, mahse, teichhuah ve mai mai a châkawm, dâwrah tal kal ve ila.."

"Hmm, hmel thar hmuh i châk deuh a ni maw, lokal rawh Lalawmi te inah kan lêng dâwn nia," ati ta a.

"Tunge Lalawmi chu..?"

"Kan monu a nia, ka cousin nupui, Lungleia ka awm chuan amah nen hlir kan inkawm ṭhin, i ngaina ngawt ang." Tih pahin a tho chhuak a, Lalawmi te ina kal tur chuan kan inzui chhuak ta a.

Nula rîm tih vel ka bansanna a rei tawh khawp mai. Nutei te inah ka lêng a nih loh chuan ka chhuak khât hle a, zû ka in leh tawp zel ṭhin.

Lalawmi chu a fel hle taka! Min lo be nghal sawt sawtin Mafeli an dem fiam nghal ringawt a!

"I lo inzêp thei hle mai, Patea ka hrilh dâwn," tiin a nui tak uar uar a.

"Lalawmpui, i kâ âng hlek suh ang che, tuma hriat kan duh lo a nia," Mafeli'n atih chuan min mitmei zauh pah hian, "Zirsang, a rûkin a lerh phian a nia a phone check sak ngei ngei rawh," ala ti tak deuh deuh a.

"Ka ring vêl a ni. Vety lam Lawmsanga tih vel te kha an tlar thla dul emaw a ni anga.." Tia ka lo ṭawng ve chuan, "Hus! Nangni pahnih hi awmtlâng chi inni dâwn lo tawp mai," ati nang nang a.

"Mafel, ka puan fâi vek châk che, Zirsânga hi i phû lo ka ti.." Tih pahin thingpui lum turin min thawhsan a, ala valâi bawk a, a ho reuh phian.

Thingpui hâng ka in a, Mafeli'n a duh lo leh tlat! Model pian ang êma nalh ni lo mah se ei leh inah a insûm thei hlê tih ka hre tawh a, zan mut dâwnah leh zing thawh veleh khawizû leh tuilum inpawlh a in ṭhin tih pawh ka hre bel ve hman.

A phone a rawn ri ta a.

#"Aw, Lalawmi te inah kan lêng a, tuisâ lo nei u la kan lo kal dâwn nia," tunge a biak hre chiah lo mahila a pawimawh hmel chu ka ti.

"Pu Sangvêla te Vawkpuiin note a nei a, a chhûl a tâng a, a chau vek tawh an ti anih chu, an mangangin min lo phone tawp a.." hrilh bîk pawh nei chuang lovin ati a.

"I kal dâwn em ni?" Lalawmi zâwkin min zawh khalh a.

"Kal ang, Zirsang, i duh chuan hetah lo awm lâ.."

"Ka lo kal ve zâwk ang e, a hlâ em?" ka ti a. Zui ve chi a ni em tih pawh ka hre chiah lova; mahse, an inah tu vak mah an awm si lova, mí ina lo nghah teh ngawt ka duh chiah lo a ni.

"Hla ve e, car-in kal angai ang, an hmanhmawh hmêl em mai," a tho nghal a, keipawh tho chhuak ve-in, "I pa'n car a keng lo em ni, bike in tlân zuai ila.."

"Bike chu Bawiha'n a keng daih a, ka pa te hi engin nge an kal ka hre miah lo, hâw phei phawt ang." Ati nghal tu tu a.

Lalawmi'n 'Hetah nghâk ve mai la, kanpa a awm bawk si lo' ati tak nâin kan kal chhuak ta thova.

An inah a hman mamawh tur ala khâwm zung zung a, a pa'n car a lo keng lo hlauh chu a tihzia ngei mai.

"Ka lo khalh dâwn em ni ang?" Ka tih chuan, "Lawk aw, Muantei khâ kan kalna tur ka va hrilh leh lawk," tiin chahbi min pe a, inchhungah a tlân lût leh ta rih a.

A chê rêng rêng a hmanhmawh khu chûk lo nâ in a muang chuang hauh lova, zanah lehzel inkoh chhuah chu ka ngaih dan a ni lo ve lek lek. Mahse, ran doctor a ni tlat si a, a hnâ ni miau hek le! Keia lo phunchiar ve vakna chi ninghal lo chuan..

A lo chhuah leh lai pawhin car ka lo tinung vat vat tawh a, a hmâah rawn ṭhu-in, "Hmanhmawh deuh ang aw, Vawk chhûl tâng chu a buaithlâk riau a nia," ati a.

"Tihian an ko chhuak fo che mi?" Tia ka zawh chuan, "Min ngamtlâk deuh chuan ko ve fo e, mahse, zîngah a ni deuh ber."

An in awmna lai sawi zui nghalin kan tlânchhuak ta a.

Doctor pasal ni ta ila ka phunchiar riauvin a nia ka rin! Â hah! Ka thil ngaihtuah avang chuan ka nui hawk a.

"Ka hriat ve chi a ni em?" Ka lam hawiin ati a.

Chhân mai dan tur ka'n hriat loh chu le!

"Mahni-a nui huk huk rual chu i ni tawh lo maw le," atih chuan ka nuih aza telh telh nia.

"Tihian, i driver-ah min chhawr ta mai che, ka hnehsawh viau ang" thildang ka sawipui daih a, ka ngaihtuahna khâ sawi chhuah chi a ni teuh lo.

"Ka duh lo e a, driver chuan zu in an tum zêl a,"

"Sawi ve ziah suh," ka tih chuan, "Driver nilovin ka eng emaw tur i lo ni maithei asin," ati zauh a.

"Eng maw i sawi!?" Ka phûr sarh a.

"Eng mah," sawi sual inti niawm tak hian tukverh lamah a dâk chhuak daih a. A sawi tum ka man ve chiang e, ani têreuh hian min duh tak tak a ni.

Pu Sangvêla te in kawtah kan ding ta a, car-a nghah ka tum bîk teuh lo. A thiltih engkim hriatpui vek ka duh tlat.

An lo dawngsawng ṭha hle a, 'Tunge' tia Mafeli an zawh chuan, "Ka ṭhianpa a nia, min lo hruai a nih hi" tiin a chhâng a, ka hming a hrilh lo.

Vawk in lama an chhuk chu ka zui ve zel a, light an lo fit vek bawk nen a êng uar mai.

Bucket-ah tuilum an lo chhawp sa diam a, ka bialnu Vawk inah a lût dawn chu a ni sia, intih no na chi a va ni si lo êm! A kekawr thlep chhîngin a sam a ṭâwn ṭha sauh sauh a, Vawk note râk nawk nawk zingah chuan Vawkpui chu a va pan ta a.

"Zir, box-ah khân glove a awm a, min lo pe lawk mai ta che," ka bula box chu hawngin glove ka phawrh a, ka nuih aza tawh lo. A chhan pawh Vawk note 12 zet a pui hnute hnêk tuma tlân kual sek leh a pui chau lutuk chilphuan tla bawrh bawrh chu ka lo khawngaih ve viau atin ni.

A chhan thei lo ang tih mawlh ka lo hlau a, Vawk inah ka kal ve ang tih hi ka la ring pha miah lo. Nilo, Vawk kan vulh ngai lo hrim hrim a ni zâwk.

A chhûl tâng uluk leh dîm taka a zen sak lai chuan ka lo ṭang ve nasâ!

"Artui inneih chuan a kâah lo chhûng lut u la, a harh phah deuh mai thei," Mafeli'n a sawi zawh rualin pu Sangvêla a che vat a, puitu tur tehchiam awm hek lo. Vawk inah ka lût ve ta a, a neitupa in a kâ-ah a lo keu laiin Artui ka lo tulh ve thung a.

Thawk ṭha tak ka ni.

Minute15 dâwn a buaipui hnu-ah a chhûl a tla ta hlawl mai le. Mafeli leh pu Sangvêla te aiin ka lo lawm zawmah nia.

"Kan lawm lutuk, ka mangang tawh bawk si a, zah pawh sawi lovin ka lo be ringawt che a nih kha," Pu Sangvêla lawm thu sawina chu nui var var chungin a chhâng a, "Vawiinah ka lo haw chauh a, in vannei hle mai, naktukah Artui leh Âṭa tuiril deuhvin pawlh u la in lo pe dâwn nia," tiin Vawk vitamin bûr hnih a pe ta a.

"Pi Mafel, hei tal hi min lâksak rawh," tiin pu Sangvela chuan pawisa pêk a tum a, ani'n a duh si lo. "In vawk talh hunah chaw ka lo ei dâwn nia," zuk ti deuh tlat a.

"Anih nang talin lâksak rawh," tih pahin ka kekawr iptê-ah a rawn hnawh lut a, "Angai lo atih mawlh mawlh kha," tih bâkin hnial thiam hek lo.

Min pe lui ta nge nge a.

'Thingpui in rawh u' tia min sâwmna chu chhuanlam siamin kan hnar ta a.

"I berh vek lo maw!?" Car-a kan chuan leh hnuah min zâwt khauh a.

"Tehnâng, nangmah zâwk khâ?"

"Berh ve tho, zanin chu kei aiin i lo ṭang deuh zâwkin ka hria," a nui var var a.

"A note khâ an khawngaihthlâk êm alawm," ka ti sup a.

"I rilru aṭha tihna a nih chu, thlen veleh i inbual dawn nia," atih chuan, "Misual rilru ṭha ka ni tihna a ni maw!?" Ka lo ti a.

"Hus! Ka sawi awmzia i hre reng, VFA lam i lo ti ve daih lo a ni," ala ti tak deuh deuh a!

"Ran doctor nupui ka nei dawn alawm," nui duh miah lovin ka ti ta a. Ka mala tawk zauh pah hian, "Sumdawng hausa neih ka tum ve thung." A nui zui hak hak a. A hmêla hlimna leh mahni inrintâwkna rawn lang hian min ti lâwm ru veng veng.

An in kan thlen leh chuan dâr sawm a hnai tawh a, a nu leh pa an la awm lo fo!

A room-ah bathroom a awm tho avangin a inbual nghal a, kei pawh common bathroom lamah ka intleuh ve zuai zuai a, insil ringawt tum ka nia. 'Inbual law law rawh' min tih deuh tlat avangin ka inbual ta nge nge a.

Ka ngaihtuah thui tulh tulh a, Mafeli hi ka tâna Pathian min pêk a ni thei mai angem? Â chutiang ngaihtuah nân ala hma deuh. Keimahin ka nui leh suk zel a. Mipa, 'mahni inchawmzo nih ka tum ngei tur a ni' Tih hi rilru ka siam thar dan chu a ni ta.

A room-ah kan awm leh tawh a, mitmei vên tur awm ta lo na nâ na chu kan infâwp sek a, ka phone riin min tihbuai tâk avangin kan inthlah ta chauh a.

Nutei'n min lo call lek niin!

Mafeli pawhin a hmu ve reng a, 'Kan nu' tia a number ka save chu ka lo la delete awzâwng lo.

"Innu call a nih kha chhâng rawh." Ati hmak mai le!

"Ka be dâwn tawh lo tih ka sawi lovem ni?"

"Anih chuan engvanga 'Kan nu' tih la awm kuau nge a nih si?" Tiin a ṭhu sawn daih a.

"Ka lo delete theihnghilh daih a alawm, tihpalh lutuk," dam thlapa ka chhânna chuan a rilru hneh hrâm se ka va'n ti tak.

"Ok, tihpalh chu a awm thei alawm, a number delete kher rawh ka ti lo ania, thlalâk dun te pawh innei nualin ka ring a; kum kha leh chen inzui ve ta chu, engmah paih duh suh aw, engtikah mah i nei leh dawn tawh lo tih hria la, chuti em em a rilru tê ka ni bîk lo a nia." Min chhânna avang chuan ka hamhaih zawk mah!

"I rilru a na ve îk lo em ni?" Ka ti ta ringawt a.

"Na mah se hun liam tawh ami a nia, tunah pawh i be chuang lo a, ka tân huat tur a awm hleinem," zu ti dam thlap a!

"Ka duh che, Remruatfel,"

"Engzâtin?" A kutṭang a tikâk a, nui lo turin ka insûm nasâ.

"Tiang tiat hian," tia ka kut ka khâwr pum a hmuh chuan a nui ta hak hak a, a ho zo leh vek.

A kiangah hian nuihna tur ka hmu fo a, a thinrim hun erawh Sakeibaknei ang vel a nih ka ring. Ka ngaihtuahna avang chuan ka nui nasa zual sauh a.

"Zirsanglian, min nuih elaw..!?" Khuma ka ṭhulai chu ka chalah a rawn nam a, a kâwngah kuahin a nghâwng leh khabe-velah ka lo fâwp lâwr dan dan a, a hmuiah ka fâwp ṭan chiah tihin Bawiha'n min lo ko ta a.

Hun lo ve le, hmeichhe ṭawng thâwm ka hre tel bawk a, tunge a lo hruai ka hre ve der lo.

"Zir, awm ṭha rawh le, Bawiha'n a bialnu Maengi a lo hruai a nih chu.." Tiin a ṭhu ṭha nghal sawk sawk a.

Remruatpuia bialnu aw chu ka hriat hnu a ang hle mai. Mahse, a hmel ka hmuh tlat loh avangin 'tunge' tih ka sawi thei mai lo.

An thâwm hre lo ila chuan Setana pâwlah kan tel leh teuh ngei mai..

Mipa leh hmeichhia, inngaizawnglai awm dun tam na nâ na chuan thil ṭha lo tih mai duhna sual a lo awm tlat zel nia!


©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:35 pm

RAPSAGY

Becky Rafa Renthlei

Chapter-11

Zirsangliana

Mafeli room aṭanga kan chhuah chuan sofa-ah Bawiha leh a bialnu an lo ṭhu a.

A aw ringawt ka hriat khân tunge tih ka hre thei lo khâ a nia, Zoengi lek lo niin!

"Hey, Chanchinṭhazoeng!" Tia kan ko chiah chu a mengphâwk nasa mai. Chutah rawn ding chhuakin, "Zirsanglian zuheh," min ti zui ve zat a.

"Nangni pahnih hi in inhria elaw!" Bawiha makti hmêl ka hmuh chuan, "Chanchinṭhazoengi hi i bialnu maw! Â hah! Ka kid hlui a nih hi.." tiin ka nui a, Maengi lah chuan Mafeli nen min entawn chhên hnuah, "Mafel, engtin nge Zir zuheha nen hian in lo inhriat a!" ati ve bawk a. Kan nui vek.

Maengi hi kan hnuai chiah a ni ṭhin a, kan khuaa ka pa te school-ah a lut ve ṭhin. High school kan kal lai a nia, hmân deuh khân kan inbe ve zauh zauh zel a. Kawm a nuamin a fel hle nghe nghe a, DC-a a thawh hnu hian kan inbe ngai ta lo mai pawh a, ka ṭhiannu ti a ka chhâl ngam a ni.

"Zirsanglian, kan inah thleng lovin midang inah i thleng kual vel a.." a nui duh miah tawh lova, kei lah ka nuih aza tulh tulh si.

"In pahniha in inhriat dan sawi ve phawt ula maw le." Tih pahin Bawiha'n Maengi darah a vuan a, "Zirsanga hi ka ṭhianpa alawm, a a nawi thei teh mai a nia," tiin a hrilh fiah ta a. Mafeli a ngawi reng thung. Makti hmel a pu deuh!

Ka kal chhan min zâwt nasa bawk a, ka hrilh vek hnuah, "Naktuk tlaiah chaw lo ei rawh u, Mafeli nen," tia min sawm chuan Bawiha a lunghnur hmel khawp mai.

"Nia, va ei rawh u, kei chu min sawm ve lo," ati deuh hmak a.

"Remruatpui, i tih tauhna a ho em mai, Zirsanga bialnu hlui pawh a titau reng zel," zuk ti ngawt pek a!

Mafeli nuih azat hmel hle a, "In va in hrechiang deuh ve, chû, Zirsanga bialnu chu tunge a hming?" Maengi a zawt ta a. Ani lah chuan 'Nutei' tiin a lo sawi hmanhmawh a, ka va ngei mai mai mai tak.

"Maeng, kan hriat a inang chiah e, naktuk tlaiah kan inah chaw lo ei zâwk la, thawhṭan lamah Zira a chho leh nghal dâwn a, thlah pahin kan leng khawthawng anga, tiraw Bawiha..!?' A nau a râwn pah a.

"An inah chuan va ei rawh u," titau der tih hriat taka Bawiha ṭhen suk lai ka hmu reng. Maengi hi a chhe lo reuh hlê a, Bawiha nen an inhmeh ka ti viau.

"Hmundanga chaw ei lam alang tlat lo, Chanchinṭhazoengi te inah ngat phei chuan.."

"Zirsanglian zuheh pa, i châk lo nasâ ang," Ka hnungah min chûm awk a, a ho ngaiin ala ho reng. Keini ai chuan a nau zâwk a, Shillong-ah kum khat a zuk awm ve rên râwn a, a pa an transfer tâk avangin kan inhmu zui ngai ta mang lo.

"Tlaivâr ve u la, kan kal rual anga.." ati leh a.

"A ṭha khawp mai, mahse, kan kal lo mai ang.." tia ka chhân chuan, "I chhe êm mai.." tiin Bawiha ṭhutna lamah a insawn phei a, an inkawpna a rei deuh tawh bawk a, an inpawh hmel khawp mai.

Kan rîk hluai lai khân Mafeli nu leh pa an lo haw tawh a, thingpui hâng an in hnu-ah an mu nghal daih a, anmahni sawi dan takah an ṭawng tlêm dun hle a ni.

An fanu an ringtâwk viau ani ang, ka mutna tur chungchâng vawikhat tê pawh an sawi lang lo.

Mitthi inah kan kal dâwn loh avangin Bawiha te ṭhian dun rualin Muantei a kal ve a, mut chiah kan hmabâk ta.

Kei, mi ṭha famkim ni hauh lo leh tlangval fit ve pangngai tân chuan ka bialnu bula mut a thlâkhlelh awm ngawih ngawih nia! Mahse, an inah kher hi chuan a zahawmmna tihchhiatsak kher ka tum lo a ni.

Innghéng rialin sofa-ah kan ṭhu a, TV kan chhuah ve tak nâ a, en chu khawilamah! Bawiha te inngaihzawn vel chungchâng a sawi char char a. Maengi fel a tih zia leh a nau a kaihruai ṭha tih thlengin a sawi kâi a, 'an innei ṭêp tawhin ka ring' atih chuan, "Innei hmasa zâwk ila.." ka lo ti hmanhmawh a.

"Thlaleha i zo mai tawh dâwn a, kan la inhrechiang lo mai nilovin i nun sawhnghet phawt rawh, ka nghâk thei che ka tih kha." Ati leh ta a.

"Chennai-a ka awm chhungin Lungleiah i awm dâwn sia, Aizawl thleng min thlah ve la.."

"Kan ngaihtuah dâwn nia, Nilaini hian Aizawlah ka kal a ngai dâwn a, Inrinni kha i nu leh pa inneih anniversary a ni bawk si nen ka rawn hmang hman angem aw.." Rilru buai hmel deuhvin ati a.

"Zirtawpah chawhnu-a lo haw tum la, Lungleia tlang lovin lo pêng haw la a awlsam daih zâwk ang chu, a tihchi loh em ni!?"

"A theih tho mai, ka chhungte bulah ka sawi thâwi tawh a, Sunday ka rawn hman chuan min inkhâwmpui ngei angai ang."

"Tehreng mai, ka châk zek zek." Tia ka chhânna avang chuan a nui var var a.

"Eng kohhran nge in nih khâ?" Tiin min zâwt a.

"Lei rochun tur tlansâte kohhran.."

"Zirsanglian uang lo mai teh, Sunday ka lo hmanga kan inkhawm thei a nih chuan i lo chhunzawm zel dawn nia.." thutak zeta tiin ka kut a hmer deuh vang vang a. "Nang pawh i awmna hmun apiangah inkhâwm tum zel ang che." Ka lama kuah hnâi pahin ka ti ve a.

"Inkhawm inkhawm hi Vanram kâina a ni lova Vanram kâi tumte erawh chu inkhawm a ṭûl tho si," ngaihtuah mûk hmel takin ati sap a. Dik ka ti hlê.

Mi fel leh ṭha chauh inkhâwm tur nise kei hi ka piantirh aṭanga tûn thlengin inkhâwm tlâk ka ni eih lo. Mahse, zu in chîng viau ṭhin mah ila ka nu leh pa hmâi ka zah vang hian ka inkhâwm ngun khawp mai. Tunah arah chhuah hmu rih lo mah ila nakinah emaw, engtikni-ah emaw chuan ka la chhawr ṭangkaiin ka ring ve tlat nia! Kei misual ngaih dan a nih chu.

Dâr 12 a pelh tawh avangin mu turin kan kal ta a. Nizan mai kha chuan kan la inkuah dun rial rial khâ a nia. Zaninah zawng a fel ber leh mite tih ang tive ngai miah lo angin kan mu dawn ta. Ka room kawngka bulah duhthawh zetin kan infâwp a, a bâk duh belh zêlna, Hremhmun hmahruai a lo lan hmâ ngeiin a inthiarfihlim ta a.

Ka khumah ka mu meng reng a, ka pum a nuam lo deuh ṭeuh ṭeuh reng bawk nen ka thaw chhuak leh hluai zel a.

Nutei ka ngaihtuahnaah a lo lut a, Arini hnenah 'Midang ka nei tawh' tiin a lo hrilh a. Ka na lo ka tih chuan dâwt ka sawi tihna a ni dâwn a, ka na ve det.

A hmai bial lam leh a sam kâwi chiat te, a mitmeng te kha theihnghilh thei rih lo mah ila mipa ka nih ang ngeiin theihnghilh hmak ka tum tûm tur a ni.

Remruatfeli nen an mizia a inpersan hle a, Nutei a no viau laiin Mafeli erawh a ni miah lo! A 'pa' ta viau e tihna lam nilovin han inlâk 'inno' vel khâ a mizia a ni ve lo. Nutei âw a thâm chhalh a, kan doctor aw erawh a fiah fel fak thung. An in 'confi' hleih nasa mai si a. Nutei hi chu awlsam tê a ṭah mai a chîng a, a châng phei chuan ka ngei deuh hlek ṭhin.

Mahse, in anna riau annei ve a chu chu an duh lohnaah an nasa ve ve-ang tih hi a ni.

Pianphungah chuan Mafeli a dawk nalh zâwk a, a inkhaithli tharh a, pakhat ve thung chu a chêr mah mah! Mahse, a hriselna a pan ve êm a, a awm ve reng. Mafeli a sâng zâwk bawk; ka beng a thleng deuh thuak a, Nutei hi a tê chhe hran chuang hauh lova a ngo veng bawk.

Û huh! Ka'n khaikhin chiam chu le!

Mut chhuakin min zem chiai chiai a, muthilh tumin ka chhîng ta vang vang a.

5:00Am
Remruatfeli

"Mate, Mate..." ka nu min ko ri chu ka mang hriat rêi rûai a.

"Mate, tho teh, i ṭhianpa saw a rûm nasa lutuk a nia..." Ka meng deuh kâwk a.

Rang lutuka tho chhuakin Zirsangliana pindan lamah ka tlân phei nghal a. Ka nu in min zui ve bawk.

Khumah a lo vial ngawlh ngawlh a, a thlan a tla nasa bawk nen ka hamhaih ṭêp alawm le.

"Zir! Zirsang..!" A rawn rûm chhuak dat a.

"Nâ i nei em ni?" Tih pahin a chal leh nghâwng vêl ka khawih thuak thuak a.

A dâi dap bawk si.

Ka nu tui la turin ka tîr a, ṭawngṭai inkhâwmnaah ka nu leh pa an kal ṭhin avangin an tho hma thei hle a. Tukin erawh mitthi an awm vang khân an kal lo a; mahse, an harh tho avangin a tho chhuak niawm tak a ni.

"Mate, ko harh phawt la, chumi hnuah tui khâ inpawp pawp rawh se, a khua asik pawhin ka hre lo." ka nu'n a lo ko ve bawk a.

A rawn meng ve ta hrâm e.

"I harh em? i eng nge nâ?" Ka zawh chuan muangchâng hian a rawn ṭhu chhuak a, "Ka pum a na deuh tlat nachhawkna kawl i nei em!" Ati a.

"Pum ruah laia ei chu a chi miah loh thil eitur ka lo siam che anga chumi zawhah i ei dawn nia," ka ti a.

"A ziaawm deuh leh eirawngbawl a ngai chuang lova lo inbuaipui r'u aw mitthi in lamah kan han dâk chho ve leh ang e, Bawiha leh Muantei an tlaivar a, an lo haw hunah i lo ngaihven deuh dawn nia." Ka nu chhuah veleh khumah ka ṭhu a, Zirsanga erawh lehlam hawiin a mu a, a thaw chhuak leh hawk zel.

"Min lo phone tur che alawm, a anglo lutuk em mai. Eitur kan siam ange," tia thawhsan ka tum chuan rawn inlet thakin ka kutah a vuan a, "Kal teh rih suh," ati sup nia!

"Ka rei lo ang, thil tlem tal ei la, damdawi i ei phawt angai alawm lokal rawh, ka room lamah insawn ang helai chu a uap ve bawk êm a nih hi." A mu lai chu pawh thawh mai ka tum a, a ṭhen sak tih ka hmuhin, "I tho thei ang em!?" Ka ti leh rih a.

Engvanga a pum na ta thut nge tih ka hre lova nizana kan chawhmeh ti dawn ila ei leh in lam na nâ na chu kan uluk ve viau ṭhin asin le.

Choka a eitur ka siam laiin ka kiangah a lo ding a.

"Zankhat lek i kianga ka mut loh pawhin ka pum a na nghal chu a ni sia..! A fiamthu mah nise ka ngai thutak riau.

"I pum lam chian lohna hi a rei tawh em?" Tiin ka zâwt daih a.

"Rei ve tawh e, ka insawisêl zauh zauh ṭhin a, zû ka in vang tih ka hria a; mahse, sim thut a har ve êm alawm," Ka thilsiam pêk pahin, "Vawikhat mah in tawh reng reng suh ang che."

"A bul aṭangin a ṭan leh dawn e.."

"Le, mu hahdam la, damdawi chu ei phawt teh.." a thil inna noruak dawhkanah ka dah sak a, ka room lamah ka nawr phei ta a.

A dam ta e tihna nilovin nâ anga lan a duh lo tih ka hrethiam ve vek tho.

Ka khuma a mut leh hnuah a chhing deuh vang vang a, pum damdawi ka eitîr tawh bawk a, "Reilote muthilh tum leh la.." puan sintir paha ka tih chuan, "Reilote lo mu ve phawt rawh, kawngkhar kalh bawk la.."

"Mutna hman a awm tawh lo. Bawiha te an lo thleng ṭêp tawh ang,"

"Reilote chauh maw le.." atih deuh tlat avangin ka mu ve ta nge nge a, a taksa lum ham ham leh a thawrang ta sauh chu hre mah ila ka haider lui ve tlat a.

"Ka ngai ngawt ang che," tiin ka biangah a chûl a, "Kei pawh.."

"Mafel, vawikhat chiah ka sawi leh ang, min kalsan hmasatu i nih loh chuan ka kalsan ngai lovang che," a sawi zawh rualin dimtê hian ka hmuiah min fawp ta a.

Rei ngial kan infawh hnuah Bawiha thâwm ka hriat tâk avangin ka inlahrang ta a. Tisa nawmchen tumna kan nei tawh lo a, rilru zawng zawng pe vek lo mah ila ka thinlung luahtu a ni ber tawh si.

"Tikhân lo mu hahdam rih la, i pum a nat leh chuan min lo au vak dâwn nia," tiin ka thawhsan ta a.

Sunday ni mah se mitthi an awm miau a inkhawm tur a ni lo hlauhva, nilêngin a kiangah ka awm thei tihna.

Ka nu leh pa lo haw laiin Zirsanga ala muhila chaw eikham lamah kal leh an tum bawk nen chaw kan eisan ta a. Bawiha leh Muantei an mu hmak a, ka room-ah vawithum ngawt ka lût tawh a, ala mutui fia fia ngei mai.

Zirsanga phone a ri chhên a, a mah a muhil tlat a, ka lo pick sak ta a.

Number lâwng ringawt a ni.

"Hello..."

"Mama a awm nange..?"

"A muhil a, tunge aw..!?"

"Nutei.."

"A nih chû, a muhil rih a, a lo harh hunah ka lo hrilh dawn nia.." zawi sap leh dam thlapin ka chhâng a.

"Aw le.." ati ve mai.

Nizan kha chuan 'Kan nu' tihin Nutei number a save a, a lo delete vek a nih dawn hi!

Eng atan nge biak a duh tih pawh ka zâwt bik chuang lo a, a aw thâm chhalh khâ a ngainatawm reuh. Thinrimin min be lova ka be bik hek lo, kei aia upa zawk a ni a, rilru putling pu pha chin turah ka ngai ve deuh a ni.

Zirsangliana hian min hîpin duh ve tho mah ila, ka chhûngril tak takah hian kim lo awm tlatin ka hria a. Mahse, eng nge a nih ka hrechhuak zo si lo.

Dâr 10 pelh hretah a rawn harh ve ta chauh a. Na nei hmel a pu tawh lo.

"Chaw kan eisan ringawt che," inthiam chiah lo hian ka ti a.

"A pawi lo, nizan ka mu tlêm lutuka damdawiin min chhâwk bawk nen ka harh thei hlawl lo." Rawn tho chhuakin khumah a ṭhu a, a sam thur deuh chhap leh a taksa, tisa chuangtlai hmuh tur awm miah lo te chu a nalh kher mai.

"Inbual ta che.."

"Ka peih rih lo e a, ka ril a ṭâm viau.."

"Ok, Bawiha leh Muantei ka kai tho anga in ei rual dawn nia,"

An chaw ei chhung zawngin Zirsanga leh Bawiha an titi char char a, "Muante, tlailamah Maengi'n chaw a lo ei dâwn a nia," tiin ka hrilh a.

"Sâwm lo mai rawh, Maengi te inah ka ei dawn.." Bawiha'n atih chuan ka nui a, "I lo insawi lût daih a ni maw, a pawi chuang lo, tiraw Zirsang,"

"Maengi hi chhuah miah suh, i inchhir lovang," Zirsanga'n tiin an pahnihin an nui kur kur a. An inkâwm thei phian hi a lawmawm viau.

After 3 hours

Ka room-ah kan awm char char a, Nutei'n a lo phone tih ka hrilh chuan a ngawi reng a.

"I duh chuan call back rawh, thil pawimawh te pawh a ni ve thei a," dam thlapin ka ti a.

"Ka be dawn tawh lo ka tih kha, eng nge nang pawh chuan i lo chhân kher!"

"Amah tih ka hre hleinem.."

"Eng nge insawi?" A vin hauh lova mahse, a lungawi lo tih ka hre reng.

"Eng mah kan sawi lo," tiin kan inbiak dan vel ka hrilh a, "Nidangah chuan ka phone ri i hria a nih pawhin min zawt hmasa lovin chhâng tawh suh ang che." Ati hmuk a.

"Tehreng mai, ka tihpalh lutuk.." tihpahin ka ding hluai a, en pawh min en lo hian a phone a khawih char char a, ka run angreng viau.

Ka lo hrilh ta kher kher a ni.

Ka room-ah a awm tlat avangin leh a ngawih tâk reng vang chuan ka chhuahsan ta a. Ka thinrim hran lo; Mahse, a mizia inthlâk thut hi ka la hmu ngai si lova ka ngainat zâwng a ni lo.

Midang tumah an awm lo bawk nen inchhung ka tihfai san ta daih a, common bathroom tifaiin chhuat ka nâwt leh vek a, Zirsangliana erawh ka room-ah a inkhung char char a, eng nge atih pawh ka hriat si loh.

A rawn chhuak hmasa a nih loh chuan va pawh ka tum duh ta bik lova, Nutei vanga intih thiam loh tezawng ka duh dêr lo.

Tlailam dar li arîk pawhin a rawn chhuak duh chuang miah lova, dimtê hian ka room lam panin ka phei ta a.

#Arini hnenah ngaihzawng ka nei i tia nilawm ni?

#Kei pawhin ka nei a ni mai alawm.

#Min ṭhen hmasatu i nia, i duhthlan a ni.

Nutei nen an inbia tih hrilh hranpa ka ngai hauh lo. "Ka be tawh dawn lo de dei dei" titu Zirsangliana ve chu le(h).

Ka chhungrila huatna leh ngeina rawn chhuak tur chu duh lovin ka room-ah ka lût lui ngat a, an la inbe reng tho. Min en zawk a, phone lam bawk a ngaihven leh ta a.

Ka inthlâkna tur leh bathrobe la-in ka chhuahsan leh ta a. An duh chen chen inbia ang hmiang, a tel lovin hei leh chen ka lo nung tawh a, chuti maia nat ka tum reng reng lo.

A chhungte'n min duat êm vang te, puitlin lam pan se chhungkaw tâna ṭangkai tak a nih theihna turin ka duhsak viau. Ruihtheih thil tel lova Nutei nen bul ṭan ṭhat a duh a nih chuan ka insiamrem zel thei alawm.

Mihring induhna leh in îtna te chuan rei daih hek lo le. A daih rei lo mah mah a ni.

Ka chhungril dik taka amah ka duhna leh thlâkhlelhna hi tih lan ka tum tawh reng reng lova, hmalam pan a duh anih chuan ka pui hreh hek lo. Keimah remruatfeli ka nih chhung hi chuan tuma'n min tina tur a ni lo bur.

Ka inbual zawh hnuah Lalawmi te inah ka pheisan ta daih a. Muantei'n chaw a lo chhum dawn tho va, ka nu leh pa an lo hâw tawh bawk.

Bawiha'n, "Mate, lo haw phei tawh rawh, i ti ang lo ṭhin em mai, Zirsanga i lên san daih a..!" Tiin min rawn ko a.

Ka chhâng buai peih lo. Lalawmi hnenah, 'Ka va haw ang e, lo lêng phei rawh aw.." tiin ka chhuah san ta a.

TV hûnna lamah an lo ṭhu ṭhap a, Zirsanga bulah Bawiha a ṭhu a, asîr berah ka va ṭhu ve ta a.

Zû rim nam tlat a ka'n hriat chu le!

Ka pa'n chhûng inkhawm hun a hmang a, hei hi chu kan tihdan pangngai a ni ve hrim hrim a, keimah awm lo pawh ni ila an hmang zel ṭhin.

Chaw ei laiin Zirsangliana nen kan ṭhu dûn a, amah hi a nih hi zu rim nam kha! Khawiah mah a chhuak lova a pâi lo tih ka hrechiang bawk. Mahse, khawi a mi nge a lo in si!?

Bawiha a ṭawng luam a, châw nise nidang zawng aiin a ei hnem a, Maengi te ina eitur anga insawi si khân hetah a ei leh daih bawk sia ka hrethiam ta uar mai.

Zirsangliana leh ka nau hian zû an in dun chiang.

"Mate, inkhâwm in tum em? Ka pa'n atih chuan, "Tum pawh ka hre lo, Bawiha leh Zira hi duh leh inkhawm se.." ka ti deuh ngat a.

"Eng mah thawmhnaw ka keng lova.." Zirsangliana'n alo ti ve bawk a.

"Inkhâwm u la, in kan lo nghâk ang, Mate, Aizawlah i ruala kal ka tum a nia," ka nau chu ka melh deuh kâwk a, zû a in awm ka hre ngai si lova mak ka ti viau. Kan awmtlâng tam lo hrim hrim a, a rûkin a lo in ṭhin pawh a ni mahna!

Ka pa'n Bawiha nen min zilh a, inkhawm ngaihsak tur leh 'khawvelah hian Pathian tel lo chuan eng hlimna mah a awm tak tak lo' tih a sawi a. Ka nu in a lo tuihnih ve bawk nen chaw ei chhûng a rei duh khawp mai.

Muantei a kham hmasaber a, min melh zauh chung hian, "Thlêng sil mai rawh aw, inkhâwm ka duh a," ati a.

"Insiam rawh ka lo tifel ang." Tiin ka kham zui ve bawk a, ka nu leh pa pawh an kham tawh a, Zirsanga leh ka nau an ṭawng luam a, an la eikham ve lo.

He mite pahnih hian ka thin ati ur lek lek a ni. Mahse, âng buan buan chi ka nih lem loh avangin ka ngawireng a, Zirsangliana nen phei chuan kan inbe tawh lo hrim hrim.

Ka awm ve tih hreawm pawhin a lang hek lo.

A thu sawi eng mahah a ding lova, min namnûl ka ti lo thei lo. Chuvangin ka ngaihsak hûrh nachhan tur awm nghal lo chuan.. A ve lutuk a!

Inkhawm turin ka chhungte an chhuak duak tawh a, Bawiha pawh a kalna tur sawi lovin a chhuak leh daih bawk a. Ka thlêng sil laiin Zirsangliana a rawn kal hnai a, "Titau ve suh, i inhmeh lo." Ati sup a.

"Khawia mi nge zû i in!?"

"Ka sawi chu, titau tawh suh," ka zawhna pawh min chhâng lovin ati leh a.

"Tukinah i pum a nâ a, tlai lamah i in leh thei nghal a nia i mak ka ti!?"

"Tihpalh.."

"Zirsang, i duh zât zât in rawh, ka lo sawi tur a awm ve hleinem, ka pum a na ve dawn pawh nihlei lo, kan ṭhenawmte pum pawh ala na chuangin ka ring lo."

"Chuti khera han tih.."

"A dik lo em ni!? I duh chuan inbelh rawh, Remruatpuia'n a lâkna a hriat kha, pawisa ka pe ang che u.." ka ti dam thlap a.

"Ka tihpalh ka tih chu, thinrim tawh suh," ka kâwngah min lo kuah a, engtin mah ka ti lo. Ka ding mar at a.

"Thinrim lo ve, ka sawi chiang tâwk tawhin ka hria, i duhthlanna zel a ni a, i hlimna tur leh i lungawina hi ka duh ber.." Ka thil sil lai ka zawh tawh avangin kal sawn ka tum a. Ka bânah vuanin, "Mafel, tûn chauh min hrethiam rawh,"

"Ka hre lo le, i nat a na tel ve tur hmeichhia ka ni pha lo te pawh a ni mahna.."

"Mawh..tun chiah," ka kalsawn tur min dâl zel a, ka nuih aza lo khawp mai.

"Puitling takin thil kan sawi dun tawh a, Nutei i la duh a nih chuan alakah tlâwmin ngaihdam dil mai ta che. In inrem lohna ṭhin kha sim tum lâ.."

"Nutei lo sawi suh, vawikhat chiah chance min pe leh la, zû ka in emaw midang ka bia i hriat chuan i duh dan ang thlap ka pawmpui ang che," ka bânah a vuan deuh ṭung a. Zu rim a nam ham ham bawk nen ka chhâng thui duh ta lo.

Ka room-ah kan luta khumah zuk mu thla hmak a!

"Zirsang, i room-ah va mu rawh.."

"Reilote ka muhil lawk dawn," tiin a inkhuh daih a, biak tlâk loh ve asin! Eng zât fakauva tam nge a in pawh hre nghal lo chuan a..

"Muhil rawh, ka lênsan dawn che."

"Remruatfel, sual viau zel suh, ka duh che tih i hriat vang hian induh phah nân i hmang.." A rui ṭawngah ngaihsakin, "Zû i duh zâwk lo maw! Zirbawih.." ka ti ve ngat a.

A lo muhil hman a nih chu!

Tenawm hian a..Hetiang a lo nih ṭhin vang hi a ni ang Nutei paw'n a ṭhen..

A ruihin a kianga awm te eng atan mah ti lo ang mai hian a khawsa a, biak zui tur awm hek lo. Laptop ka khawih san ta a.

A pum han na leh vaih teh se, no thum ka in belhtîr ang maw le.

5:30
Monday
Remruatfeli

Nizanah engtik laiin nge Zirsanga a insawn ka hre lo va, ka mut dawnah kaihthawh rual a nih loh avangin ka khumah a mu ta kha a nia.

Kei, ṭhutthlengah TV enin ka mu thung a, ka lo muhil tlang daih niin! Mahse, tuna ka mutna hi chu ka khum tho a ni. Amah bâk min sawn tur an awm lo.

Ka nu te pawhin min kai tho bik chuang lem lo a ni ngei ang. Mipa ka ngaihsak loh êm avangin rinhlelhna rilru an put ka ring lo.

"Mafel, counter thleng min thlah la," ka room-kawngkaah Zirsangliana arawn dâk a.

"Dâr engzatah nge Sumo a chhuah dawn?"

Inngaizawng ang pawhin kan inbe lova, ṭhian satliah kan ang zâwk mah.

"Dâr rukah a nia, chawhnu lam chhuak chu a tlâi em mai," room-ah rawn lutin dârthlalangah a in en a, nizana a rûi hmel ang kha pu tawh lovin Zirsangliana dik tak a ni leh ta.

"Ok, ka thlah dawn che nia," ka tho chhuak ve nghal a, "Mafel, nizan khâ pawi ka ti lutuk, i nauvin a hrilhfiah thei ang che." Ti supin ka chalah a rawn fâwp a.

"Tihpalh chu tihpalh a ni."

"Vawikhat chauh chance min pe rawh, ka tellovin i awm thei tih ka hria, mahse, kan awm dun tawh dan kha ngaihtuah la, vawikhat chauh aw.." atih leh chuan ka ngawi rauh rauh a.

"Bawiha lo zâwt la, ka sawi ai chuan i ring zâwk ang, ka thlah thei lo che.." Tiin min kuah ta vang vang a.

Nie, vawikhat chauh alawm min dîl, kei hi induh thei ka ni bik lo a, mipa, inngaihzawnna tel lova sex ka hmanpui hian min thlah a duh loh chuan engvangin nge ka thlah bik ang.

"Aw le, ka sawi tawh zawng zawng kha sawi nawn vek ka tum tawh lova, i nun uluk ang che. Nutei i be leh a nih chuan kei nen inzawmna a awm tawh lo ang. Zû in bawk, hmeichhe dang inrawlh bawk nunah tel ka tum lo; inhambuai loh law law ka thlang tih theihnghilh hauh suh ang che." Fiah faka ka ṭawng lai chuan ngun takin min en reng nia!

"Ka lawm e, i tihtur engkim min hrilh ve vek ka phût a nia, call i hman loh pawhin msg ka lo beisei ang. Kei pawhin ka lo hrilh zel ang che. Nangma sawi ngei, 'min rinna chin apiangah ka rinawmna i hmu ang','' a sawi zawh ruala rawn kûn hniamin min fâwp ta vawng vawng a.

A duhthawh kher mai. 'Chatuan daih' a min fawh tum ang maiin zuk uar thiam a!

Thaw hak hak chunga kan inthlah meuh chuan dâr ruk ari hnai tawh a, khawmuanna chi a nih tawh loh avangin amah thlah tur chuan ka insiam ve ta a.

Kan awmna hmun a inang thei rih si lova, min thlah châng a awm anga, ka thlah châng pawh a awm zêl dawn zawng a nih hi.

Bike-a kal kan tum ûk a, chhûm a tam bawk nen car-in kan kal ta a. "Maengi number kha min lo save sak lawk," tiin a phone min pe a. Ama'n car-a khalh vang a nia.

"I phone khawih tumna ka nei lo, whatsapp-ah ka lo thawn mai ang che."

"Mafel, nimin thil sawichhuah awih tawh loh," steering a kut khingkhatin a vuan a, lehlamin ka kut a chelh thung a.

"I sawi dik alawm, ka phone pawh i khawih tur a ni lova i phone pawh ka khawih hek lovang." Ka ti deuh tlat a.

"Remruatfeli luhlul reuh dan hi chu aw.."

"Nge, duh duha kan inkhawihsak te chuan phone neih hran a ṭangkai lo e.." ka ti ve zel a.

"I awm loh chuan ṭawngkam kha fek fek a min hautu ka nei tawh dawn si lova," tiin a nui suk a.

Ka zilhna ṭawngkam hi ka hau angah a lo ngai zel tihna a ni ngei ang.

"Hâu leh zilh awmzia i mother India lo zâwt rawh aw," tiin ka nui ve ta nge nge a.

"Inla puitling viau zel suh, kan inrual reng."

"Kei aiin i naupang zawk aw.."

"Û huh! U Mafel.." min runluih pahin a nui suk suk a, ka va ngei mai mai tak.

"Zirsangliana nen kan inrual a, kei aiin a nawi zawk!" Ka la ti hrâm a.

"Vawk Til i la hnem lutuka i thluak a su ṭan a nia, an koh che pawhin kal duh tawh miah suh," za lutukin a nui a, a thusawi inpersan lutuk chuan ka nuih atiza ve thung.

Thil sawi ve ṭâlh a duh si. Sawi mai tur a hre lo ṭhin hi a khawngaihthlâk ka ti.

Counter kan thlenin Sumo pawh a lo ding vâng tawh a, a huphurh hmêl ka hmuh chuan ka lainat deuh.

"Hetia inkalsan ngai leh ṭhin hi alawm ka nin em em chu.." ati chhuak hlawl a.

"Hus! Kalsan zing tawh awm ve.."

"Tikhan ngai kâwi zel lo la, Aizawl i kal dawnah min lo hrilh rawh aw, ka lo châng ang che." Tiin car kawngkhar a hawng a, a chhuak zui ta a.

Nu Zuali ka phone a, Zirsanga counter-ah ka thlah mêk tih ka hrilh chuan 'An tlânliam hma chuan nghâk reng rawh aw, zu intur te kha a rawn hawn leh ngawt ange' ati a.

'Aw le' ka ti ṭha ve mai bawk.

An fapa zu in hi chu an ngaimawh ve khawp mai. A ngaimawhawm rêng bawk atin ni.

"Ka thlen veleh ka lo call ang che aw, i phone dah hla suh ang che, chuan ka tâ kha lo duat la, a hun leh a hmunah keimah chauhvin ka hmang thei tih hre bawk la," ka beng bulah ati sup a.

"Nang pawh lo enkawl ṭha ang che, hmaikâwr vuaha i lo hmang ṭâlh a nih chuan ka hre leh tho dâwn a nia.." ka tih chuan ka chalah min pen fawk nia.

"Zir, ka thusawi kha zawm hrâm i tum dawn nia," ka ti zui hrâm a. "Indim la, rim takin hná thawk suh aw, eng lo kha.." a sawi thui hmain ka melh deuh kâwk a, sawi zawm tawh lo hian a ding nuih suk a, a ṭha thlâwt.

Zirsangliana te tlânliam hnu pawh chuan ka dinna ngaiah ka la ding reng a, 'ka ngailo' ka tih chuan dâwt muhlûm ṭhak a ni. Kei hian ka ngai takzet. Mahse, chumi avanga mahni intih hrehawm ka tum hauh si lo.

Muangchângin car-ah ka lut a, a 'bandana' a lo la theihnghilh zui ah..

Zirsangliana vanga ka nunphung inthlâk ta dâwrh hi tumah hriattîr ka tum lova, nau ka lo pâi a nih hlauh chuan kan inkâr pawh tun aia a ngheh ngei ka beisei.

Kei hmun hranah ka awm a, Nutei a hmun ṭhû a awm thung si. Engtin tak awm zel ang maw.

Amah ka rin phawt angai a ni. Tih bâk beisei tur ka nei lo.

Zirsangliana tân innghahna tlâk leh rinngam hmeichhia nih zel hi ka tih mâkmawh a ni...


©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:36 pm

12.RAPSAGY

Becky Rafa Renthlei

Chapter-12

Remruatfeli

Aizawla ka kal hun a lo thleng ta dêr mai. Ka pa inah hahdam taka awm ka châk zual sauhva, ka hna-ah chawlh ka la fel tawh a, naktuk hian report theh lût pahin, Kolkata aṭanga Âr note lo thleng en dik tur a ni a, chuvanga kal tum chauh ka ni.

Ka nu in, 'Mate, i inluaha mahni chauhva khawsak saw ṭha ka ti mang miah lo a nia' atih vangin tleirawl/rawlthar school kal lai awmpui tur ka dap a, Champhai khua Dintea a lo remchâng hlauhva ka awm pui dâwn a ni. Ka nî tupa a ni a, pâwl sawmpahnih a zir ve mêk.

Zirsangliana nen kan inkâr pawh a nuamin a hahdam hlê a, ka rin phâk bâkin min ngaihsakna a lantîr avangin sawisêlna tur ka hre meuh lo.

"I lo chhuah veleh min lo hrilh la, ka lo nghâk ang che" tukina kan inbiak pawhin ala ti ve a. Min hmuh a châk tawh thu a sawi sek bawk.

Bike nena zin ka huphurh deuh avangin Sumo ticket ka cut a, ka pa'n a car a hmang duh ve reng bawk nen a awlsam zâwk ka ti ta deuh a ni.

"Khawi lai nge in lo thlen tawh," Zirsanga'n min rawn call a. Kan thlen chin ka hrilh chuan, "Ka û te insaknaah min phût deuh tlat sia ka kal dâwn; mahse, ka lo nghâk chhuak phawt ang che,"

"In inah ka lo pêng zuai ang, i bandana theihnghilh khâ ka lo dah dawn a kawtah min lo nghâk tlat ang che."

"Yes, lutuk," tia min chhân chuan min hmuh hun nghâkhlel ve tak tak a ang ka ti.

Dâr sawm pelhah Zirsanga te in kan thleng a, kawtah tumah hmuh tur an awm lo!

"Reilote kan pêng lawk ang e, thil dah zawk angai a," driver bulah ka ti a, a ding ve mai bawk.

"Sangpui, khawnge an awm zawh vek a?" Sangpuia chauh a lo awm a, a nu leh pa an hnaah an kal ka ring a, Arini leh Zirsangliana ka hmuh loh vanga zâwt ka ni.

"Mama'n a nghah reng che kha, Arini chu inhnuaiah a awm." Tiin Zirsanga a ko a, mahse, a reh ṭhiap.

Motor-in min nghah reng avangin awm reina chi ni hek lo le, "I û lo pe mai rawh," tiin bandana chu Sangpuia ka pe ta a.

Ka lungawi chiah lo. Nichin lawka kan inbiak pawhin kan lo thleng dâwn tawh tih ka hrilh reng a, min hmu châk lo tawp a nia nge tiin ka chhuak leh ta a.

Ka lunghnûr ru viau nâ a, engmah sâwtna a awm chuang hlei lova.

Dârkâr chanve dawn kan tlân leh hnuah, Zirsanga'n min rawn call leh a.

"In lova thleng har si ve, ka û te'n min lo phone sek tawh a nia," arawn ti chhek mai le.

"Ka lo pênga i awm si loh..!"

"Eng a..! Mafel, ka nghâk reng che u alawm le," a vîn mah mah.

An ina ka pên thu leh Sangpuia hnenah 'bandana' ka dah tih ka hrilh chuan, "I phone khâ eng atan nge i tih a, min hmuh loh chuan min lo call mai ta che.." pâwr lutuka tiin phone a off zui hmak a. Ka call leh pawhin zuk la duh ṭhak lova!

Rilru nuam lo zetin ka awm ta reng a, 'Hmuifâng kan thlen hunah ka call leh thovang,' ka ti rilru a.

Inhmuh kan tum tehreng nen ka thinrim ṭung a, kan inpelhsawlh ve chiang êm a ni. Tû thiam loh zawk nge tih pawh ka hriat bik si loh!

After 3 hours.

Aizawl kan luh hnuah ka call tlang thei ta chauhva.

"Kan thleng tawh aw.."

"Aw le, kan hnathawk kan la bâng lova in ka thlen hunah chanchin ka lo hrilh ang che," dam thluamin ati leh lawi si a. Ka thâwl huai thei nia!

Ka inluahah ka awm tawh a, châmrei ka tum loh avangin chawhmeh pawh eng mah ka lei lova restaurant-a inhnawhpuar mai ka tum ta zawk a.

Kan chhungte an awm nual nâin mi ina 'ei rawh, in rawh' tih nghâka zalên lo deuhva awm ka peih loh vanga in luah ka nia, ka awlsam angreng viau.

Zan dar riat a rik hnuah pawh Zirsangliana'n min la rawn phone miah lo maw le! Call ka tum deuh thut thut a, an hna a la laklawh a nih ringin ka ngaichâng leh rih ta a.

Eng mah thawh hreh a nei lo hi Zirsanga ṭhat ve na a nia.

Dâr kua ari tawh a, ka khumah mû-in phone ka khâl char char a, min lo call ve ta hrâm alawm le!

"Mate, kan haw tlâi lutuka ka inbual zo ve chiah," ka chhûngte'n 'Mate' tia min koh vek avangin eng emaw lai aṭang khân min ko ve ta zauh zauh a, ka pawiti hran lo.

"E he! Eng ati em em nge a!?"

"Kitchen Cabinet fit tur an lokal.a, zanina zawh hman hrâm an duh maw le, Sangpuia pawh chawhnu lamah a rawn chhuk ve a, kan inhmu lo hi ka thin ala rim hlur a nia," ati nghut a.

"Eng nge i lo chhuah dâwk dâwk, ka hrilh reng che a, min hmu peih lo a ni ang chu.."

"In lo thlen dawnah min lo call ni la buaina awm lovin kan inhmu ngei ang," ati ve leh a.

Kan sawichhuah chhên chuan kan inhnial leh takngial dawna ka hriat avangin, "Kan inhmu lo zo tawh a, sawi tawh lovang, haw lamah dam chuan lo pên ka tum a nia, eng nge ka lo hawn ang che..?"

"Eng mah a ngai lo. Ka sawi tawh kha, thilpêk dawn lam ka bânsan tawh." Atih chuan, "Nangmah tiam lovin midangho zawng ka hawn anga a nimai alawm." Ka tilui ve tlat a. Hawn ngei pawh ka tum.

Mahse, anmahni zâwt hmasa lova in hawn tawp chu a tunlai tawh lo ka tih vangin Zirsanga hnenah, "I nu min lo biaktír ve lawk teh ka ti ta a.."

A nu a au thawm leh ka biak duh thu a hrilh lai pawh ka hrereng.

Zirsanga phone aṭangin nu Zuali nen kan inbe ta a.

"Mafel, vawiinah i lo pên laiin kan lo awm mumal si lova, Mama'n haw lamah a rawn riak dawn ati che a," ati nghal bawrh bawrh a.

"Nia, a hranpa a lokal a buaithlâk tawh ka ring a, Anniversary lo hman ve ngei chu ka tum dan a nia, eng nge ka lo hawn ang che?"

"Eng mah a ngai lo, nangmah i lokal theih chuan a tawk."

"Sawi ve hrim hrim rawh, eng emaw tak lo hawn che ka tum tho a nia, i sawi loh chuan ka duh duh a ni mai." Ka tih tlat si avangin "Pheikhawk" ati ta nge nge a, a mal mala biak vek a buaithlâk deuh bawk nen "midang chu i duh duh rawn hawn sak rawh, Sangpuia kawrlum lo ensak la hetah a man kan lo pe ang che." Tiiin kan inbiakna kan titawp ta a.

Zirsangliana nen kan inbiak leh chuan, "Eng mah ngaihtuah buai vak duh suh, thawmhnaw tezawng hâk sên loh annei." Ati hmuk a.

"Nangte chu ka hawn ve dâwn hleinem che,"

"Ka lawmthu tak a ni." Ati deuh hmak a. Hepa tak hi chu âw..

"Indim hle ang che, doctor ni mah la nâ i neih pawhin nangma thuin damdawi ei ngawt suh ang che, i awh em em khâ kan chân mai ang," a rawn ti ve ngial a.

"Hey, i chhûngte hriat phâkah khatiang sawi reng reng tawh suh," ka tih chuan, "Ka room-ah ka awm leh daih tawh, an hre pha awm lo em mai.." zuk ti awlsam em em a!

"Chu pawh nise.."

"Mate, mi â i nilo ang chiah khân ka chhûngte hi an â bik lo ania, kan awm danah an hrethiam vek. An sawi lo mai mai anih hi.."

"I kâ âng tam lo la a nimai, i sawi kher a ngai lo a nia, naute chungchang ngat phei chu.." ka ti hmak a. Ka thinrim ṭêp a ni. Thil a ngai awlsam thei lutuk leh a nu leh pa hriata ṭawng tawp tawp a chîng a, an lo duat ve bawk nen a sawi apiang îhe lovin a awih mai si a, tunah ka râi pawh nihlei lo. Lo sawi a zêldin vak vak kha ka ngaihdan a ni chiah lo deuh a ni.

"Eng nge ka thilsawiah huat tur awm? An hre pha lo tih tih pawh a.." ati hluk a.

"A ṭha anih chu, an hriat loh chuan, nidangah khatiang lam i sawi leh dâwn a nih pawhin kalsawn zêl ang che." Ka ti ṭâlh a, a ngaih dan a ni lo deuh nge a ngawih vung vung hnuah, "Midangin kan inkawp tih an hriat i hlauh dan em em hi engvang nge?" Ati ta a.

"An hriat vek angai lo tih kan sawi tawh reng kha.." tiin ka ṭang ve tlat a.

"A ṭha e, i duh dan a nih chuan.." tiin phone zuk dah hmuk a!

Ka call nawn duh bik der lo. Mipa ve si dawhtheihna tlachham lutuk mai.

Ka khumah ka let kual sek a, ka motor chuanna ka taksa a sil ṭhûm nen muthilh ka harsat kher mai.

Sawmpahnih pelh hnuah pawh ka la meng kar a, Zirsangliana a reh hmak a, whatsapp-ah takngial pawh min rawn be lo. A status up ka hmu a, mahse, ka en tih a hriat ka duh loh avangin 'Hide view status' ah ka'n dah leh tê tê phawt a.

#Hmeichhe zûna uai tur hian thiamthil neih kher a ngai em ni?

Hus! A awmzia pawh ka hriat si loh. Hnâ ala neih loh vang hian ka lakah a inthlahrung tih ka hria a, keiin engah vak kan ngaih loh nen.

Dik tak chuan pasal neih lam ka la tinzâwn ta lo fo! Zirsangliana a ni emaw atu apawh ni rawh se, damchhûnga 'tiam tlat e' han tih vel khâ ka rilrem zawng ni nghal lo chuan..

Ka mut theih ngang loh avangain atawp atawpah ka call leh ta nge nge a, zuk 'busy'a..!

Tunah dâr khat a ri deuh thaw tawh a, tunge a biak ang!? Vawithum ngawt ka call chung pawhin a busy char char a, ka ngaih dan a ni lo nasâ.

A hnu fê-ah min rawn call ve ta a, chhân loh ka tum deuh ûk a; mahse, eng mah sawifiah lova tihtauh hi ka mizia a ni lo. Tin, ka titau emaw ka thinrim pawhin hre ve ngei se ka duh a ni.

"Eng nge?" Phone ka pick rual rualin ka ti vîn ṭhak a.

"Min lo call em ni?"

"Zirsanglian, i phone-a i biak kha a pawimawh viau a nih ka ring, min bum tum tawh suh, tûn ang hunah tû fâ mah hian thil pawimawh an sawipui che ka ring lo." Thinrim insûm zetin ka ti ve ta a.

"Nia, Nutei alawm maw le, a dam ṭha lo a, a hmâ a damdawi min chah ka leisak khâ a dawr awmna min rawn zawt a.." awki hniam ruiha atih chuan ka thin tertek a chhuak ve ta.

"Inbe leh rawh u, ani hi i kalsan phal tak tak lo a lo nih dawn hi," Ka ti ta a.

"Mafel, ngaihzawng chungchangah kan inbe lo, thinrim ringawt suh." Ati dam thluam a, "Engzawng pawhin inbia ula ka tân a danglam chuang lo. 'Ka be tawh lovang' tia sawi zuah zuahtu khâ tunge? Sangpuia leh kei chu kan ni lo phawt a.."

"I ngaih dan a mak em mai, damdawi dawr inzawh ringawt a thinrim tur atan chuan i upa tawh deuh lo maw!?"

"Upa lam hian i rilru an la deuh a ni ang e, nang nena inbiak zui zel a ṭulna ka hre tawh lo. I lum chuan lum la, i vawh chuan vawt rawh. Nutei i thlang a nih pawhin a tâwp thlengin thlang ang che." Ka ti zui ve tâwn tâwn a, mipa nêp ber anga a khawsa hi ka tei thei hlawl lo.

Ka awkâ a dam bik hauh lo. Kan boruak a ṭha ve dawn chauhva hetia tih zel mai. Ve lutuk a..

"Remruatfel, hrethiam rual chu i nia sin, ka biak danah engmah huat tur a awm lo. Nangpawh ni la ka tihdan ang tho hian i ti ve ang."

"Ka ti lovang, nang anga nêp leh hnunglam hawikîr chhên mihring ka ni lo, induhtâwk khân inbe rawh u, ka lo inthiarfihlim ang e; nang kalsan che hi ka thei lo emaw i ti em ni. Zan hnih kan mutdun vang khân i duh duh a min tihkâwi i tum ngawt a nge, a teuh lo mai.." ka ṭawng thui mah mah tih ka hria a, ka insûm thei thlâwt bik lo

"I mak hle mai, min ring lo em ni?" Tih chauh a sawi a.

"Rin turin awm hek lo che! Zanlaiah i bialnu hlui nen in inbia a, ani pawhin engvangin nge tun ang hunah kher khân damdawi dawr a lo zawh che? I chanah dah la i lungawi bik lovang."

"Thinrim lovin sawi ṭha ang." Dawhthei vak lo aw hian ati leh a.

"Sawi ṭhat tur a awm lo, inbia u la induh ang khân awm rawh u. Min lo phone tawh hlek suh." Tiin ka off khum ve ta hmak a.

Zirsangliana vang hian rilru mumal pawh ka pu thei tawh lo. Nutei lah hi ahma zawnga be duh si lo. Hetia kan inkawp ni a a hriat tâk avanga alo be sek hi ka ngaih dan a ni lo hle a ni.

Duh lovin a ṭhen tawh a, midang a neih tâk avanga inrawlh a tum leh hian hmeichhe rilru ṭha tak a nih ka ring thei tawh hek lo. Ka thinrimna a chawk tho tak tak a nih chuan a nuih aza hauh lovang.

Zirsangliana'n min rawn call nawn sek a, vawi 32 ngawt min phone peih nia! Luhlul lutuk!

# Kan inring tawn tawh emaw ka lo ti a. Whatsapp aṭanga min rawn biakna chu chhân pawh ka chhâng peih lo.

#Ka lo call leh dawn ania sawi ṭha ang.

A rawn call leh ta nge nge e.

"Sawi rawh," ka ti hmak a.

"Nutei laka kir tumna ka nei lo, ka biak chhan pawh ka sawi tawhin ka hria, i duh chuan i awihin i awih lo thei alawm," ati kher a.

"In inbiak hun ngaihtuah chuan i thusawi hi ka awih lo tlat. Kan inbiak tawpna ni rawh se, i nu leh pa bula ka lo tiam tawh erawh tih hlawhtlin ka tum ang, ka nunah rawn inlan tawh suh ang che, hmeichhe pahnih rilru tihnat ai chuan pakhat a nat hi a tawk viauin ka hria, a chhan chu nangmah vang hian nat ka tum lo." Ka ti duah a.

"A va mak tehthlawt ve le, Remruatfel, nau pâi tal la engtia tih nge i tum?"

"Nau ka pâi ka ti ang, ka duatin ka ngaihsak bawk anga, i tel lo hian Pathian zarah kan awm thei lutuk ang, tunah phei chuan ka pâi leh pâi loh ka hre der si lova keimah chauh ka la ni rih bawk si a, i tel lova awm theih ka tum."

"A ṭha e, min ring lotu biak reng ka tum bik lo. Inenkawl ṭha ang che."

"Nangpawh ruihtheih thilah inhambuai lo la, i pum a nat khân ka pum a na ve lo tih i lo hrereng dawn nia," tiin phone ka dah san ta a.

Mipa pakhat vanga ka nunphung tih khaihlak ka tum awzâwng lo. Amah ka duh tawh lo tihna nilovin hmeichhe dang inrawlh ve sek hian ka chapona a kaitho mai chauh a ni.

Thinrim ru ṭûnin kan hun hman tawh reilote chhung kha ka ngaihtuah vang vang a, lungawina tur a tlêm hlein ka hria, hetiang mipa a ni chung hian Zirsangliana tân ngaihzawng neih turah buaina tur a awm lo.

Tlangval luck lutuk a ni tlat. Kei, pakhata rinawm tum bur mi tân hian a rem lo a ni e.

Ka tlaivar ta ṭhak a, a chhungte erawh kalsan ka tum lova, an hnena ka lo sawi tawh ang ngei khân Anniversary hmang tur chuan ka kal ngei ang.

After 2 days
Zirsangliana

Mafeli lo haw ni a ni a, khatia a thinrim aṭang khân vawikhat tê pawh min rawn be tawh lo a, ka be tlang thei hek lo.

Whatsapp-ah min block zui hmiah a, a luhlul tih ka hre tak nâ a, a thinrim erawh ka la hmu miah lo. Hmân zanah pawh khân min vîn duai duai lova aw dam thlap ni lo mah se a ṭawngkam pangngai nen a danglam tehchiam lo.

Hmaichhanah kan sawi dun thei tho dâwn a ka hriat avangin ka nawr lui duh ta lo kha a nia.

Anniversary hmangin a lokal ngei dawn tih ka thinlung hian a hre tlat nia! Nutei athîk lo emaw ka tih kha a lo thîk hle a ni tih ka hriatchhuahna hian min ti nui suk suk reng mai.

Kei misual dum ber mai hian a thîk nge thîk lo hriatchhuah a ngai tlat a. Mahni lu zo veh vawh a ni bawk a, a inthup thei ngar ngar khawp mai.

Motor rawn tlân apiangah ka beng ka chhi deuh hrâ reng a, an lo thleng ṭep tawhin ka ring.

Min be lo mah se biak luih ṭâlh ka tum dawn sia, eng ang chiahin nge min duh ve tih ka hriat tluka pawimawh a awm lo. A chhan chu Nutei'n a hnena kîr leh tura min sawm vang a ni.

Remruatfeli nunziaah hian min duh hluah hluahna hmuh tur a tlêm hle a, zu nghei tura min duh vel vang mai mai a min kawp tepawh ang ka ti.

Kan kawta motor lo ding thâwm ka hriatin ka pindanah ka lût daih a, engtin nge a awm tih hriat ka châk vang pakhat a nia. Doctor bialnu neih zawng a khirh phian a nih hi.

"U Mafel, i lo thleng tawh elaw!" Arini a ṭawng lâng lâng a, va pawh mai lo tura ka insûm nasat a ngai viau.

"Arin, ka bag dumah khân in thil tur a awm," an ṭawng thâwm ka hre vek a, ka va chhuak ve ta a. Min biak loh chuan ka be rih lo ang.

Sofa-ah ṭhuin a pawr fap reuh a, a sam a hnawk deuh niaih bawk. An in a ka hmuh bâk kha ka hmu tawh lo va a biang a chêr deuh chuan ka hria. Vawikhat tê mah min melh chhin eih lo.

Arini tân Jump suit senno raih leh Sangpuia kawrlum nalh zet a hawn a, ka nu pheikhawk flat a hawn bawk a, ka pa Sana a hawn thung. Keimah chiah min pe lo.

"Mama eng mah i hawn nange?" Arini'n ati ta rêng a, hrehawm ka lo tiru viau, Mafeli hi a ngaina takzet tih pawh ka hria a, ka lo inthlahrung viau zel, zawh awm leh awm loh a ngaihtuah vak lêm si lova.

"Hawn e, a hnuailamah khân a awm, hawnsak a phû lo nâin khawngaih mark-in ka lo telh ve a nih kha.." a nui sak a. Midang tâna hriatthiam theih tur hian a awm duh reuh si lo a ngeiawm thiam tak a ni.

Boxer, kâwnghren dum nalh zet leh Levis shirt min rawn hawn tih ka hmuh chuan ka chhûngril a nui suk alawm le.

Kan inbiak hnuhnun ber ngaihtuah phei chuan engmah min hawn ka beisei lo hrim hrim..

Chutia kan phûl hlut lai chuan Nutei nau Rindika a rawn lût hlawl a, "U Mâm, ka û khulaiah khuan luhaiin a tlu a, nupuii te-inah kan zâwn lût a, ka lo ko tawp che," a rawn ti heu mai le.

Mafeli hmêl ka en vat a, engmah a hriat theih loh. Nilo, min en lo hrim hrim, Rindika ngawt a melh a, ka kal loh chuan zia lo ka ti deuh si.

Ka awm dan a lâi zo vek.

Tûn hi Nutei ka buaipui tâwpna ni rawh se, Mafeli melh zawk chung chuan ka chhuak ta a.

Kan boruak ala fuh chiah lo bawk nen nuam lo ka ti viau a ni.

Nutei kalsan hlenin Remruatfeli-ah ka zawng zawng pêk duhna ka nei tawh miau a, 'Min hrethiam hrâm rawh..tun chauh a ni ang.' ka ti rilru a...

©<++++[BeckirafARenthleI]++++>®

Note: Ka zin avangin ka edit thui hman ngang lo. Zân âwl neih loh ka tum ve ṭâng ṭâng a, amah erawh chu tûnkâr chho hi chuan ka rawn dah hma thei lo ang aw..
Damlohna vang ani tih min hriatsak theih chuan ka lawm viau ang..


Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:36 pm

13.RAPSAGY

Becky Rafa Renthlei

Chapter-13
Zirsangliana

Ka rin ang chiahin ka kal tur pawh Mafeli'n min en duh miah lo a, Nutei an zâwn luhna, Nupuii te ina ka luh chuan a chalah puanin an lo hrêng bâr a, a hrisel lo tih ka hriatsa avangin chuti tehchiamin min ṭhâwng tawh lo.

"I ṭha em?" A bulah ka ṭhu thla ve nghal a.

"Ṭha e, engtin nge i lo hriat theih zawk a..? Min ti zâwk mah a.

A nauvin min lo ko tih ka sawi chuan nuam lo tihmêl a pu ve deuh.

"Ka ngaihtuahawm loh han chho rawh," ati ngial a, a hmel ka hmuh hian lainatna chu ka nei ngei mai. Mahse, Mafeli thinrim bengdaih leh khâ huphurh taktêin ka huphurh tawh a, "A nih i zia deuh chuan ka chho mai ang, naktuk anniversary lawmna tur thil ruahman a ngai a." Ka ti a.

"Min sawm ve dâwn nange?"

"Ka nu leh pa'n an sawm leh sawm loh che a ni mai, an inneih cham a nia, inrawlh ve vak ka tum lo."

"Mâm, kan inah min zuk dah zuai la, scooty ka keng a, i chho leh nghal dawn nia," tiin a rawn ṭhu chhuak a.

"Lokal rawh, ka hmanhmawh deuh tak tak a nia.." ka bânah a rawn vuan a, pawnah kan inzui chhuak ta a.

Kan in lam ka hawi phei chuan kan in kawtah Mafeli'n towel a lo zâr mêk a, min hmuin ka hria, "A rawn thlen chilh leh tawh che elaw! Doctor hman tak a nih hmêl.." Nutei ṭawngkam mei nei zet chu hriat loh der a har kher mai.

"Min rawn thlen chilh nilovin a hna chungchângah a zin a, ka nu leh pa sâwmna a ngai pawimawha hman lo chungin a rawn pêng alawm," ka ti deuh kher a.

"A nih chu, hlawh nei nge nge chuan duhsak a hlawh deuh ava ang ve.." ti sapin ka bâna a vawnna chu a thlah ta a. Ka chhâng thui duh lem lo. Ka nu leh pa'n chutiang zawngin an thlir lo tih ka hre ve kar a. Mahse, hrilhfiah hi ka bat ni nghal lo chuan..

Scooty-a kan inphurhthlâk hnuah kan ṭawng tawh lo ve ve a, luhaia tlu si engtin vak a awm pawh ka hriat si loh.

"Mâm, lokir leh rawh nun bul ṭan ṭha leh ang," Nutei min sawmna chu kâr hmasa lam te kha nise chuan 'Aw' tiin ka chhâng mahna. Mahse, ka nunah hmeichhe dang ka sêng lût tawh a, min kalsan hmasatu zâwk lehnghal hi ngaihdam duhna thinlung ka nei miah lo.

"I duh thû rênga min kalsan i ni a, inṭhen ka duh loh zia pawh i hria, chuti chung chuan min kalsan lui a, tunah inzui leh pawh ni ila rei kan daih chuang lovang." Ka tih chuan a ṭah a chhuah hmel hle a.

"Ka thiam loh a ni, i tel lovin engtin nge ka awm theih ang, min ngaidam la bul ṭan ṭhat leh ka duh.."

"Chutiang lam sawi tura lokal ka ni lo." Ti nghutin ka chhuak zui ta a. Dik tak chuan Nutei mizia ka hrechiang ve thawkhat tawh a, nidanga min ṭhen pawhin keimah zawk hian ka be lui tlut tlut a, tlâwm zâwk chan ka chang zel ṭhin a nih kha.

Mahse, tuna min ṭhen hian ka nunah Mafeli a awm tâk avangin Nutei vawikhat mah ka be zawm tawh lo khâ a nia. A hma anga alaka tlâwm turin min lo ngai leh a ni maithei.

Remruatfeli hian min duh tak tak a nih chuan nupuia neih mai pawh ka hnial lo hrim hrim. Keia tân ani tluka ṭha an awm lo tih ka chiang ve tlat.

Ka rilru tibuaitu ber chu hmeichhe pahnihte hian ka nunah hmun an chang ve ve a, Mafeli'n rilru tak tak min pe lo a nih chuan Nutei ka chân laklawh si ang tih ka hlau ve tho. A chhan chu athar hlaka ngaihzawng dang neih ka peih tawh lo.

In ka thlen chuan chaw ei an lo siam mêk a, Mafeli leh Arini'n chawhmeh an suak a, ka nu'n châw a khawrh thung. Ka pa leh Sangpuia ka hmu lova tuma'n min be miah lo chu mak ka ti deuh!

"Arin, khaw'nge ka pa te?"

"Pu Ruata te inah Âr man a pe lawk a, a lo chho ṭêp ang." Ati liam puat a. "Zaninah bungraw hawh angai dawn a, Sangpuia nen YMA property chairman han be r'u aw, zingah bazar kan duh anga hun a awm dawn miah lo a nia.." atih zawm leh a.

"Sawm zau in va tum awm ve.." ka nu lam hawia ka tih chuan, "A lo berah mi 130 vel anni ang, kan thawhpuite ve ve te leh kohhran hruaitu, VC member leh hênglaia ṭhenrual ṭha te a kim thei ang berin sawm kan rilrûk a, fatu tur pawh Sangpuia kutah kan dah a, makpa ho chêt hun alawm," ati duah a.

Chaw kan ei chhûngin naktuk programme tur an sawi zar zar a, zingah kei leh Mafeli, Arini nen kan pathuma bazar turin min ti a, ka va phur si êm.

"U Mafel, kan âwl thei bîk si lo che a.." Arini'n atih chuan, "Âr puah lam chu ka kutah dah hmiah rawh u," tiin a nui var var a. A fiamthu thawh ve dan chu leh..

"Â hah! Mipaho chan alawm, Sentei leh Ramtei'n min rawn pui dawn a, ka ṭhiante an nia i ngaina ngawt ang." Ati leh siam siam a.

Ramtei hian nau apâi mêk a, nu mah nise Arini nen an inkawmngeihin kan inah a lo chuangkai ve fo ṭhin. Sentei ve thung chu ram dang-ah a awm reng a, thla hmasa khân a lo haw chiah a, Arini best friend a ni a, Sangpuia tân kan hual ru deuh.

Chaw eikhamah pawh Mafeli biakna hun ka nei lo reng reng a, bungraw hawh angai bawk si nen inbe lêm lovin kan inpêl deuh sek ringawt.

"Mama, i ṭhiante pahnih khat sâwm ve la.." ka pa'n atih chuan thingpui hâng in a kan ṭhut lai a ni a, Lalfaka leh Lianzuala an awm ve bawk.

"Nutei i sawm la.." Lalfaka'n a lo ti hmanhmawh a.

"A ṭhian a ni hleinem a eng lo a nia," nui ruh ruh chunga Lianzuala a lo ṭawng ve leh phei chuan ka nuih pawh a za lo.

Mafeli a awm lo hlauh zawk a!

Dâr sawmpakhatah a zualpui kan inhawh kim tawh a, tlailam dâr thuma hunserh hman tur a ni a, ka nu leh pa thlalâk târ chhuah tur atana kan 'print' tîr pawh a rawn thleng fel diam tawh bawk a. Kan inpeih chu a ni mai.

Mafeli leh Arini an mu tawh a, ka ṭhiante an la haw loh avangin ka la meng thung. Vawikhat tê pawh Remruatfeli'n min ngaihsak îk lo hi mak ka ti lo thei lo. Chaw ei lai te khan kan ṭhu dun ve reng a, ka awm leh awm loh hre hmêl pawh zuk pu lova!

Lalfaka te haw hnuah mu turin ka lût ve ta chauh a. Sangpuia tih loh an mu fai vek tawh.

Mafeli hlir ka rilru-ah a awm vangin a pindan lam ka pan ta a, a kianga mut ka tum tihna nilovin a muhil nge muhil lo en ve hrim hrim ka duh vang a ni pakhat.

Kawngkhar nem hawn ka tum chuan chhunglamah a lo kalh tlat nia!

"Mafel.." zawitê-in vawithum ka kova thâwm bengchheng siam ka hlau ve bawk nen ka ko ring ngam si lo. Û huh! Kawngka a kalh ang tihte chu lo hriat ve awm a nia. Luhlul si, beidawng zetin ka room lamah ka lêt leh ta a.

'Ka call anga ka tiharh thovang' tiin ka'n call ngial a, a la switch off zui a(h)..

Hmeichhia si hetiang em em a han induh thiam hi mak ka ti! Hundang chu nise ka be lo chiang ang chu; mahse, be ngai tawh lo tura ka inngaihtuah apiang hian ka theih ka ring si lo.

Khawvar dawnah ka lo chhing sek a, Arini'n bazar tura min kaihthawh tâk avangin mit thip hlurin ka tho leh ta a.

"Ka nu te remti lo chung u Mafeli'n bazarna tur chu ka lo tum ang ati tlat a, ka nu pawisa min pek pawh ala duh lo.." a lo ti nang nang a

Ka ngaihdan a pêl leh ta.

"I pawisa hman angai lo a nia, lo inrawlh ve duh suh," motor-a kan chuan hnu-ah Mafeli hnenah ka ti a.

"Lo inrawlh lo zâwk mai teh," ti sapin pâwnlam a hawi zui daih a, inhnial ve hrim hrim pawh a châkawm alawm le, chuti anih loh chuan min biak a tum der mai si lova!

Arini a front seat-ah a ṭhu a, Mafeli a hnungah a ṭhu daih nia! Min hnaih leh a tum miah lo tih a chêtzia aṭangin ka man thiam vek. Mahse, chuti maia tlâwm ka tum bik îkhaw lo.

"I tân engmah insenso nachhan tur a awm lo, kan sâwm che i ni a, pawisa thawh rawh kan ti lo che," nelawm loh thei ang berin ka ti leh a.

"Miin thawh rawh, ti rawh, min tih vanga ti ka ni lova, ka duh ve rêng vang a ni. In inneih anniversary ni lovin i nu leh pa pual a nia, i thawhchhuah an hmang dawn hek lo," ati hmak hmak a. Chhân dan tur ka'n hriat miah loh chu le, Arini lah a lo nui char char a, ka va ngei mai mai tak.

"Anih chuan i duhdan angin han awm ta poh che.." abâk sawi tur ka hre tawh meuh lo chu a ni e.

Bazara an teikualnaah ka zui ve zel a, an thil leisa min ahtîr vek avangin arit chak khawp mai.

Kan doctor 'induhi' lah chuan lei tur a hria-in thil hrisel lam a thlang deuh ngar ngar a, tomato leh zikhlum, pârbâwr, dhania, ka hre sêng tawh lo ve a.

"Thingpui in ang u," ka nau rilṭâm hmêl ka hmuhin ka ti vat a.

"U Mafel, i in duh ve tho tiraw!?" Lalrinpuii lah hian a pianpui unau emaw zuk ti tlat a.

"Duh ve mai ang, inlâk model dâwn loh chuan zînglam thil ei insûm hi ka ti lem lo," tiin a nui sak a. Arini lah chuan," Model zeta rilṭâm ai chuan puar lênglâwnga model tho nih ka duh," ati a, an nui tak uar uar a.

"Bengchheng lo khan lokal r'u" tiin Siamkima te thingpui dawrah kan luhsan daih a, kan khuaah Restaurant changkâng tak awm bik hek lo, paratha leh zochhang, châna tihvel an siamna hmun kha a nimai a, doctor nu hian eng tak ei ve ang maw!

Tute emaw anga a duh changkâng viau a nih chuan a zia lo viau ang.

Arini nen ka ep chiahah an rawn ṭhu a, min biak chu khawilamah!

Thingpui leh Paratha pahnih a ei a, a chevel hrim hrim hi a hmuhnawm ka ti thar riau, Arini'n a beng bulah a hrilhru sap a, eng nge a sawi pawh ka hre pha lo. An pahnihin eng emaw tihrûk an tum ani ngei ang.

"U Mafel, i insêng hnem sia a inthlahrunawm e," Zochhang ṭhial ṭâwlh ṭâwlh chunga ka nau ṭawng chu ka ngaimawh hle a, Mafeli ve thung chuan ngawi hmak leh hmui chîp hmânin a ṭhial a. Hah! Ka en chîk leh lutuk a ni.

"Ka lo kal zen zen thei dawn si lova ka tih theih tâwk a nih kha, chawlh ka lâk hi a zawh chuan kum tâwpah bâk Lunglei ka rawn hawin ka ring lo."

"Ka lo zin hunah min mikhual loh vaih.." an pahnih inbiakna chu ka ngaithla reng a, thingpui dawr kan chhuahsanin zinglam dar kua a ri dêr tawh.

Kan haw kawng tluan pawhin an titi a, a hnungah an pahnih in an ṭhu dun a, ka rin phâk bâka an inkawm ngeih chu le!

After 3 hours

Fatu ho zingah ka awm deuh reng a, Arini, Sentei, Ramtei leh Mafeli'n salad an siam a, kan makpa pathumte bâkah Lalfaka leh Zuala an awm bawk a, kan upa ber pasal lah chu zîng aṭangin a nam deuh that that reng bawk nen zû in ve ka châk kher mai. Mahse, kan doctor hian councelling class min pe leh nek ang tih chu ka hlau deuh.

Kan mi sâwm lokal apiangte'n Mafeli chu an en duh hle a, amah lah chuan eng teh chiamah angai lo nge, a awm dan zuk danglam îk lo va..!Hmechhe ṭhenkhat chu nise, an inla eng emaw leh viauvin a nia ka rin!

Hunserh an hman laiin, "Zira, ûmkhat lek te chu show ve la.." Lalfaka'n min rawn hrilh ru sup a.

"In duh chuan ti u la, pawisa ka pe ang che u..." a rûk bawkin pawisa ka pe a, kei chuan tih ka tum lo.

Hunserh hman hmâ khân Arini leh Mafeli an bo daih a, an tîr anih ringin ka ûksâk lem lo kha a nia.

Ka pa'n thusawi tâwi neiin, "Min zâwt zing tawh bawk a, thildang tlêm kan zep tel ang e, kan mikhual ti mai ila Dr.Remruatfeli hian vawiina kan anniversary hmang tura kan sawmnate min tihhlawhtlinsak bâkah kan ei leh in tur eng emaw zât a tum bawk a, a chungah kan lawm hle a ni. Ṭhenkhat chuan inhriat tawh tho ka ring a, hmânni a 'free clinic' rawn nei khâ a nia; kan chhungkaw member ni chiah lo mah se keini chuan kan chhûng zinga mi ang chiahin kan en a, a lokal châng pawha kan in a thleng turin kan beisei tlat a ni." Tiin a sawi teh daih nia.

Ka pa meuhvin hetia a sawi chuan a ngaina hle tihna a ni ngei ang. Ni e, doctor a ni a, mi puitling chin leh mî zahkâi a ni bawk a, ka nu leh pa a ngainâin kan chhungkaw mila awm a thiam bawk nen ka chhungril a lo hlim ve em em ringawt nia.

Remruatfeli vâng liau liauvin zû far khat tê mah ka'n in loh chu le!

Inleng neuh neuh an la awm a, Arini a ṭawng duh barh barh hle mai!

Nidang aia a danglamna em em hre lo mahila zanin tlâi hian eng emaw dik lo a awm deuh tlat a hriatna ka nei a, Sangpuia leh Sentei'n inlêng thingpui an lum a, Ramtei erawh in lamah an buai deuh avangin thlêng sil zawh khân a haw tawh bawk a, Mafeli chaw eikham aṭangin ka la hmu lo.


A room-ah a awm ngei ka rin avangin ka lût phei ve ta a.

Light on lovin khumah a lo mu kawm ngal a, a muhil nge hil lo pawh ka hre thei lo.

"Mafel.."

"Umn.."

"I nuam lo deuh em ni?" Tia ka zawh chuan min chhâng lova a che eih lo.

Khumah ṭhu thlain, "I che ve vak vak a, i taksa in a tlin ve lo anih kha," tiin a chal ka khawih sak a, "Min rawn hnaih reng reng suh, damlo buaipui tur i nei a ni lawm ni!?

Nutei a sawina ani tih ka hrereng.

"Thinrim tawh suh aw, ka kalsan lovang che tih ka sawi lovem ni," kûn hniamin a chalah ka fawh sak ta a.

Zû rim a nam! Ka hresual a nih ringin ka kûn ṭha leh ngat a, a puansin ka pawhhlîm sak hlek bawk a, chu chu duh lovin a lo pawt vei ṭung a, keiin ka pawt ve bawk nen vîn zet hian, "Zirsanglian, eng nge i hriat a!?" a lo ti hlar a!

A rawn ṭawng chhuah tâkah chuan ka hresual love, Zû leh beer inpawlh rim a nam ham ham a, ka thin a úr kher mai.

"Remruatfel, tunen nge zû in lo in hman a!?"

Min chhân chu sawi loh ka thusawi eng atan mah ti lo niawm tak hian lehlam a hawi hmak a, ka run êm avangin min en turin ka kuaiher lui ve ngat.

"Sawi rawh, tunen nge in in, Lalfaka te'n an pe che em ni?" A koki-ah vuanin ka sawi nawk a.

"I hriat a ngai lo, Nutei ka ni lo, keimah ka nih hi keimah.." a rui deuh reuh em maw ni!?

"Ṭhu teh.." tih pahin ka pawt tho nghal a, min hnaih deuha a awm tâkah phei chuan zu rim hlîr ka hre tawh.

"Remruatfel, Lalfaka te bula zû i lo in ve a nih vaih chuan in pahnihin in châk lo viau ang," ka ti nghut a.

"Ka duh duhin ka awm thei alawm le, i inrawlhna tur a awm lo. I eng mah ka ni lo ka ni ngai bawk lovang," tiin ka âwmah a chûm dawt nia. A thinrim zawkah te chuan ala ṭang a, Henu tak hi chu aw...!

"Ka tâ i ni tih i theihnghilh ta elaw, i lo theihnghilh a nih chuan kei hian ka hriat nawn tir hreh hauh lo che.." A inrin hman hmâin a hmuiah na zet hian ka fâwp ta a.

A duh lo ṭang vel chuan ka thin ati rim tulh tulh a, amah ka vênthâwn vângin farkhat tê pawh ka in lo a, a hmeichhia zawkin min lo inkhalh daih hi ka ngaihdan a pêl mah mah.

Khumah ka lawnkai ve ta a, a kut pahnih chelhbeh sakin, "Thutiam chu thutiam a ni, i tâna mipa hmasaber ka ni tih ka inhai reng reng lo a nia, a ṭûl a nih chuan hâw tawh miah lo turin ka siam ang che." Tia ka vauna chuan hna a thawk ṭha ta deuh, ngawireng hian min en kal a, ṭap mai tur hmel a pu tlatin ka hria.

Chutah, "Zirsanglian tenawmpa, pakhatah lungawi la, i tân a ṭha anga leiah i dam rei bawk ang." Atih chuan ka nui teuh hle mai. A thinrim poh leh chhaihkawlh a nuam telh telh. A thim bawk nen light ka on thut chuan a meng sî sap nia!

Ruih nei tih hriat fahrana a meng phi chiai hi a sexy ka'n tih tlat pek chu.

Kuah tuma ka ban chiah tihah, "Min hnaih tawh suh, ka ṭê vak mai tur a nia.." min melh râm râm a, "I duh phawt chuan âu vak vak rawh, a lokal apiangin zu rim an hria anga; zanin tlaiah ka in lo tih an hre vek bawk si nen a mualpho tur chu i hria alawm.."

"I chhe zeh zuah e a.." tukverh lam a hawi nghâl daih a, Lalfaka nen an in a nih loh chuan tunen nge an in tâk ang, zawh chhuah ngei ka tum tur a ni.

"Mafel, dik takin min chhâng rawh tunen nge in in!?" Dam thluamin ka zâwt ta a.

"I hriat a ngai lo ka tih chu.." ala ti ve ṭâng ṭâng a, "Vawikhat chiah ka zâwt leh ang che thudik i sawi lo a nih chuan Lalfaka ka zawt dawn a nia, a ṭûl anih chuan kan makpa, zanin tlaia in te pawh ka zâwt chhuak vek ang." Ka ti leh a.

"Arini nen.." Zawi sapa min chhânna chu mak ka ti kher mai. Hei vang chiah hi a nih hi Lalrinpuii khâ a lo dak duah nachhan..!

"Khawi ami nge in in?"

Min chhâng duh ta miah lo a, "Remruatfel, i sawi dâwn khawp mai," A kut pahnih ka chelhbet leh a, ka dinglamin a biangah ka vuan bawk a, ka'n fâwp lui tehreng a nih kha. A hmui chîp tlat chu nawr kau tumin ka fâwp ngar ngar a, a ṭang rei thei phian a!

Reifê duhthawh leh uar fahrana ka fawh tâkah chuan a inthlahdul ta deuh.

"Ka mut a chhuak a nia, kal sawn tawh rawh,"Tiin a ṭang ṭha leh dâwn a, a insiamrem hlek chhung chuan khumah nembetin ka delh bet ta a. a thaw chhuak ham nia.

"Mipa in ṭha taka zawhna ka zâwt che a nih chuan min chhâng ziah tawh ang che, vawikhat pawh i in leh ka hria a nih chuan i nuih aza tawh hauh lovang. Lalrinpuii pawh ka hau dawn tih hria ang che.."

"Arini hau kher a ngai lo, keimah min hau zawk rawh.." zuk ti a!

"Ka nau a nia, ka hau khawp ang, nang pawh ka ngaihzawng i ni a, ka hau tel tho dâwn che, zak lo dun lutuk mai.."

"Kal tawh teh, ka muhil duh a nia," tiin ka malpuiah a sik a,

"I duh tâwkin kut min thlâk mah la, zanin hian i kiangah ka mu dawn khawp mai. Thâwm ka dim hek lovang, a duh duhin hria se ka pawiti nek lo ve." Tiin ka khuh lui kher a, min nghawk sawk pahin, "Nutei ka ngam lo, tho rawh le.." ati dam thliam a, min elsenna a ni tih ka hrereng.

"Nutei lo sawi suh, keimah chauh min ngaihtuah la, ka fâ pâi thut thei i ni tih inhre bawk la, zanin hian kan chhunzawm bawk ang." Ka ti leh sup a. A thinrim hmêl kher mai.

"A ṭha e, i duh ang chuan che mawlh rawh," fiah faka tiin min melh ta vang vang a.

Ni e, a damchhunga a theihnghilh theih tawh lo tur chhinchhiahna ka siam dâwn khawp mai.

A mutkawr chhûngah zen lûtin a hmeichhiatna ka tawh sak ta a.

Zan hnih khâ a la tawk lo a nih chuan zan hnih dang a kiangah ka mu leh ngei ang.

Min hlatsan theih tawh miah lohna turin ka siam dawn a ni..

©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)