RAPSAGY BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: RAPSAGY BY Becky Rafa Renthlei (Completed)

Unread post by Ngaia » September 23rd, 2018, 8:38 pm

20.RAPSAGY

Becky Rafa Renthlei

Chapter-20
Remruatfeli

Aizawl ka kal a hun ta dêr mai.

Zinkawng zawh ka huphurh ru hle a, pa Hriata te nupa-in min la rawn be fova eng mah ka rilru natna lam a thâwi pawhin ka sawi ri ngai lo. 'Mama pawh a ṭha e, zû ala in ta miah lova kan thlâ a muang huai huai mai alawm,' tia a chanchin min hrilh pawhin ka chhângliam mai ṭhin.

Ka chhungte hnenah ka râi thu ka la sawi lang ta lo fova, ka ngam rih ngang lo a ni e. An hriat hun hunah hre ta mai se tih ngaih dan ka nei ta deuh hlek a, an hnena ka lêt leh hmâ zawng an hre bîk tawp nâng.

Zirsangliana nen inbiak chu sawi loh a reh hian a reh vawng vawng a, alakah beiseina nei tawh lo mahila vawikhat tal 'I ṭha em?' tia zawhna ka dawn te ka ring ve ṭhin. A teuh lo nasâ!

Ka tel lovin a nun a hlim a, min hrechang tawh lo pawh ni se a duh tak a nei tawh alawm le tiin ngaihtuah ve ṭhin pawh ni ila ka chhungril thûk ber chuan amah tho a zawng ru leh si.

'Ka kiangah awm lo mah la, hetah hian i awm reng ang' a thin zâwn khawih chunga a sawi lai hmêl ka mitthla nawn awn awn a, a lo sawi dik a ni.

A thusawi tawh zawng zawng zingah kha chauh kha thudik awm chhun a ni hial ta ve ang. Ka kiangah awm lo mah se ka thinlungah a châm tlat si atin ni.

Motor khalh ka peih loh avangin driver min lâksak a, ka pa car-kan keng anga, driver hian a hâwn lêt leh dawn a ni. Ka car tur pawh kan book fel vek tawh a, tuna ka phei hian 'down payment' ka tifel anga car thar ka nei dâwn ta.

"Mafel, chaw kan chhum kêp che u a nia, in lo ei chho turah kan ngai," Pukpui ṭawngṭaina hmuna kan chawlh laiin nu Zuali'n min rawn bia a, 'Aih' tia chhân chi ni hek lo. "Kan lo thlen dâwnah ka lo hrilh ang che," ka ti ta zâwk a.

Driver ka'n ti tak nâa tuna motor khalhtu hi Rammawia a ni a, ka pa thawhpui ṭhin pa Zela fapa a ni. Tunah hian Horticulture-ah a thawk ve mêk a, tlangval fel tak a ni nghe nghe.

"Mafel, i pa khân riak nghal la naktukah i lo lêt chauh dâwn nia, ati sia engtin nge ni ang, motor hi ka nî te inah ka keng tlang mai dawn em ni?'' Hnehsawh zetin car-a khalh a, a kuttin, mipa kut tih hriat taka fai sar leh bûl mât chu a nalh angreng.

"Ka inah thleng mai rawh ka lo mikhual ang che, zankhat na nâ na chu.."

"A chiloh lutuk, miin an hmu khaw lo ang che," ati mai a.

"Mî ah ka buai hleinem, i duh leh duh loh a nimai.."

"Duh te chu duh e.." ati lawi si.

Zirsanga te in awmna ka hrilh a, kawngpui bul mai anih vangin Rammawia paw'n a hre ve nghal mai a, "Hotel-a chaw ei ai chuan a nuam daih ang chu.." car tidingin ka ṭhutna lam kawngkhar min hawnsak thlap a, a polite riau!

"Ka chhungte anga ka neih ve an nia, inthlahrung reng reng suh, nula chhe lo deuh an nei." Ka tih chuan a kiai suk duh chauh nia!

Pa Hriata ka hmu hmasabera min chibai pahin, "I chêr deuh em maw ni, i ngaihawm hle mai." Ati sup a.

"Nangni deuh, khaw'nge an awm zawh vek a!?" Ka sawi zawh rualin Arini leh a nu an lo chhuak ve bawk a, Rammawia nen ka inhmelhriattir hnu-ah chaw ei min siam sak ta nghal a, Zirsangliana nen kan inkâr chhe tawh mah se a nu leh pa a unaute hi zawng thlahthlam ka tum awzâwng lo.

An fapa ka hlatsan thei a, anni min ngainatu te erawh ka huat kher a ṭul hran lo ve.

"Fel, puar deuhvin ei rawh aw, kawng lakah thingpui in tawh lo ila kan thleng hma viau ang." Rammawia nen chauh kan ei a, anni chuan min lo eisan tawh a, a tlâi ve tawh deuh atin ni.

"Mutthlûk hisâpin ei ila a ni mai alawm, i lo zak vel ange, ka pa in ni mah suh se, puar deuhva i ei ngamna tur khawp chuan ka tlângnêl a nia.." ka sawi zawh rual a, mipa khuh kharh ri ka hriat chuan ka dâk chhuak thuai a, 'No'..

Zirsangliana ngei mai chuan mikhual room kawngkhar nghengin min lo en reng nia!

Engtin nge hetah a lo awm theih? Chennai-a awm tur a ni lo'm ni? Min en reng a, a chhungte pawh hian eng mah an sawi bawk si lo! Hus! Ka ngaihtuah thui peih lo e a, puar el euhvin ei ila tlânsan daih ang.

"Mafel, Mama pawh nizanah a lo thleng a, barakhaih che kan duh deuh maw le," Pa Hriata nui vur vur chuan ka nuih atiza ve hlek lova; mahse, ka nui lui sak thung.

"A nih chu, khulamah ala awm turah ka'n ngai deuh ngawt a," ka ti liam puat a.

Ka mitsîrin Zirsangliana'n Rammawia a hawisan miah lo tih ka hmuh chuan ka nuih a za ta deuh. A dik lo zâwk chuan midang pawh an hmu dik lo mai zel a ni.

Min be miah lova ka be hek lo. Rammawia leh nu Zuali an titi a, "Mafeli inah ka riak mai ang, hmundang pan a phal lo deuh a.." fiamthu-a sawi ni mah se sawi ṭha tak a ni. Min hnaihtu mipa an awm emaw ti a Zirsangliana a lo awm ve theih nân a ṭha phian.

"A tihzia em mai, amaha inkhalh phei leh ngawt tur chuan a ngaihtuahawm deuh ka ti ṭhin," nu Zuali bawkin ati leh a, kei tak chu min be lêm lo bawka ngawirengin chaw ka ei mial mial mai a ni.

A dinna hmun aṭangin Zirsangliana a rawn pên phei a, min hnai deuh hlekah lo dingin, "I eikhamah biak lawk che ka duh.." ati sup a. Zâm lo mang e, ka chhungrila thlarau sual thawk mêk hi ka thunun loh chuan Fian-a tuk lawlh ka duh mai dâwn!

"Kan hmanhmawh angreng sia, inbiakna hun kan nei kherin ka ring lo." Zawitê bawkin ka chhâng a, min han melh rum ve em em ah..

"I hman theih dan tur ka hria alawm," tiin min pawhthawh mai zuk tum a!

"I kut hmâwr pawha min dek a nih vaih chuan.." ka ṭawng ring ngam ṭha si lo. Buaithlâk ve..

"Nu, Mafeli biak lawk ka duh a, a ṭhianpa kha thingpui hâng lo lum sak la.." Zirsanga'n atih lai ccuan kut ka sil zo ve chiah a.

"Hmanhmawh deuh rawh aw, an chhuak tlâi lutuk ang," a nu chhânna avang chuan eng mah sawi ve ka tum lo. Rammawia pawh nuam lo tihmel angin alang bîk lova, biak loh pawh tum ila a nu leh pa hriat laia a sawi tlat avangin hnial khâ thilmawi ber a ni lem lo.

Ni e, râlkhat aṭang kha chuan ka duh ang pawh ka sawi chhuak thei lova a tâwp nân ka be tur a ni. Ka rawt hmasak ni lovin ama sawi zâwk a nia lawm le.

"Ram, kan inbe zuai ang aw, a rei lo ang," ka tilui ve ngat a. Thil ṭul ber a ni lo tih ka hria; mahse, amah vanga nâ ka ni tih hriattir ka tum lo bur.

Mikhual pindanah kan inzui lût ta a.

"I ṭha em?" Ati sup a.

"Ṭha angin ka lang em?"

"I ṭhat hmel khawp mai, kei chu ka ṭha lo," ati leh a.

"Lo ṭha zel teh khai! Nang ber i ṭhat loh te chuan a ṭha nâng, kei chu ngaihtuah ka ngai lo ka tih tawh khâ, keimah ka nih chhung hi chuan ṭhat zel ka tum." Ka ti deuh hmak hmak a.

"Nautê a ṭha tel em?" Zawhna ngawt min zawh chu le!

"A ṭha lutuk tlat, ngaihtuahawm a ni miah lo, ka tâ chu ka duatin ka vawnghim ṭhin."

"Ka fâ a ni tak tak em?" Tia min zawh chuan angaihna ka hre lo deuh dâwn a, mahse, ka harhchhuak thut.

"Ni teh suh ei, ka fâ liau liau a ni e.."

"Remruatfel, thudik min hrilh rawh, i mipa rawn hruai hi i tân eng nge a nih!?" Thinrim a tum ringawt nia, kei tak hi thinrim zâwk tur ka ni reng si a.

"Rammawia of Mipa, nupui nei lo tlangval fel tak a ni e.."

"Ka fâ khâ ka duh dâwn a nia," ti nghutin min melh rûn a, a hmel thim ta deuh leh a hmai dur khap chu hlauhna chhetê mah ka nei lo.

"I fâ pâitu Nutei hnena sawi chi a va nimai awm ve, thil pawimawh sawi dun tur kan nei lêm lo rêng a ni." Tihpahin kal sawn mai ka tum a, a lo phal îkhaw lo mai!

"Khâ i pum chhunga nautê kha ka taksa pêng pakhat a ni tih hria ang che, pasal i nei a nih chuan ka taksa pêng khâ ka hnenah ka lakîr ang," a ṭawng chang fal leh hniam chhak ri chu ngainatawm loh tak a ni.

"Kan inkawp tirhtêa kan inremsiamna khâ ka la vawng reng tih hria la, 'Ka fa' tiin sawi singsawmkua mah la ṭanfung ṭha i nei chai lo, vengthlanga i fâ zâwk khâ duatin lakîr la ti nia," tia ka chhân chuan min bêng duh mai hmêl a pu.

Ka hnenah insawifiah a tum lo va, a fâ chauh a ni a duh ni.

Tenawm firfiak lutuk.

"Ka tâ la lêt leh tur hian theihtawp ka chhuah ngei ang tih lo hria ang che, tû mipa mahin ka fâ an enkawl ka remti lo." Ati nghut a, a âw-a inrintawkna lo lang chhuak chu tunhmaa ka la hriat ngai loh a ni tlat.

Nutei nen an inbakkaih leh tawh zâwk em ni ang?

"Ngun deuhvin hei hi lo ngaithla rawh. Kan inbiak hmasak ber khân i ṭawngkam tin kha ka lo record vek tih hria la, kan pahniha inremsiamna thlap a ni. Nang ngei pawhin 'aw le' tiin min pawmpui vek tawh kha a nia, court thlen ngai mah se he ka pum chhûnga naute hi zawng, min chuhpuiin pâ dinhmun dik tak i luah thei ngai lovang: A chhan chu mipain 'Ka tibuai lo ang che' tiin thû i tiam tawh alawm." Ka ṭawng a dam raihin a zawi viau nâ a, ka thin erawh a phu dat dat thung si.

Ka phone leh ear phone phawrhin kan inngaihzawn tak tak hmâa naute chungchâng kan sawina, ka lo record diam tawh chu ka ngaihthlâk tir ta a.

"Kha thutiam kha ka tân engtihna mah a ni lo. Ka fâ a nih tak tak chuan ka thlahthlam ngai hek lo ang." Chang khel khawla min chhânna chuan ka thin tertek ati chhuak nghal pang mai. Mahse, thinrima ankhum buan buan chi mipa khâ a nih tlat loh avangin ka insûm leh ta zawk a.

"Ka fâ tia sawi ngam tur i nilo. He khawvel mipa zinga nêp ka tih ber leh thutiam zah zo lo awmchhun chu Zirsangliana a ni. I nihna dik tak hrechhuak hmasa tura Bâwng ek khawro mai mai thluak ka nei lo hi ka va lâwm êm.." Ka sawi zawh rualin ka biang ari ṭhuai a, ka mittui a hnâm nghâl sawk thei nia.

"I nihna dik tak pholang tur hian vawi tam ben ngai mah ila ka tuar duh fê zâwk.." tih pahin a bekah ka bêng lêt ve hmiah. Ka kut a thîp ngei mai.

Kan thâwm a ṭha deuh a ni ngei ang, nu Zuali a rawn lang chawpchilh nghâl a, min entawn sek hnu-ah, "Ngaidamtu thinlung in put ve ve loh chuan in inrem mawh khawp ang," tiin a chhuak zui a, min haw hmêl a pu hran lo tih ka lo hmu hman hrâm.

"Remruatfel, i nasa mah mah.."

"Zirsanglian, i nasa lo mah mah, a ruala sâwnthlâk thei mipa hi engtikah mah ka ring thei ngai tawh lovang, i kâ chîp la, Lalsawmthangi vuan tlang ang che."

"Ka thu thu a ni."

"A pa hming min zawh hunah ka sawi dâwn tlat loh avangin lo insawi mualpho duh suh, thi dâwn mahila ka sawi chatuan lovang," dam taka ṭawng a har ta ngei mai.

Min chhân leh hmâin rang lutuk hian ka tlânchhuak a, min chelh tumin min ban ve tak nâa min man hman ta lo hlauh.

Min kalsan hmasatu a ni a, chelh din leh vau mai maia hnunglam hawi dûk dûk hmeichhia ka ni lo chiang em mai.

Nui sângin pa Hriata te nupa ka be lui kher a, min enchîk tih hre reng mahila hriat loh der mai a finthlâk zâwk.

Rammawia'n min lo be vat a, "Kan kal tawh dâwn em ni ang, a tlai zel a nia," atih chuan ka bu nghauh a, Zirsangliana ala rawn chhuak ta lo.

"Tluang deuvin kal r'u aw, Mafel, ka la rawn be ṭha ang che," nu Zualin ati a, car-a ka ṭhut vek tawh hnu-ah kawngka bula Zirsanga ding ka hmu reng a, en chu sawi loh vawm chawrh a nia ka duh ni.

Khatianga min hnâwl hnu leh zak taka min siam hnu khân ka la be leh peih hi chu lâwm ngawih ngawih tur a ni. A hmel ṭha. Mahse, a thinlung a dum mah mah.

Vawikhat pawh hawikir duh tawh lovin kan tlân liam ta a.

An ina alo awm leh ngawt dan khâ hre chiah lo mahila a hlim lo a ni tih ka hmu thiam ve tlat!

Nautê min chuhpui te chu ala tum ve a, a teuh hian a teuh lo nasâ..

"In boruak a fuh vak lo a ni maw!?" Rei fê kan tlân hnu-ah Rammawia a rawn ṭawng ve chauh a.

"Fuh teh nâng, hlap er a nia ka duh ni.." ka nui sak a.

"Insûm teh khai! Lungphu ṭha lo i nei palh ang e.." a nui suk suk a, ka chhâng tawh lem lo.

Zirsangliana awm vang a nih kha chaw ei chho tura min lo sawm mai mai. An fapa nihna dik tak an hriat hunah an nui tawh miah lo ang.

Zirsangliana ngaihtuah duh tawh lovin muthilh ka tum ta a, ka thei êm ang chu.

Min benna lah hi a sa vut vut lehnghal nen ka thin arim ṭung mai..

Nunphung pangngai ka zawh theih hmâ chu an khuaah kal leh tawh ngai lo turin rilru ka siam ta sauh sauh a.

©<++++[BeckirafARenthleI]++++>®

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:39 pm

21.RAPSAGY

Becky Rafa Renthlei

Chapter-21
Remruatfeli

Ka hna ka ṭanna pawh thlâ aliam ve ta reng mai!

Nitin office-ah kalin theihpatawp takmeuh meuh hian hnâ ka thawk a ni ber mai. Tû mipa mah ka hnaih ngai lova, ṭhian takngial pawh ka kâwm ta lo. Ka pum chhunga mi hian 'Ka ṭhang thei lo' ti bîk hek suh, a zên mi ka lo ni bawk nen a lang hmâ dawn riauvin ka hria a, ka huphurh kher mai.

Nu Zuali leh Pa Hriata'n min lo la call zeuh zeuh a, an lakah thinrim lo mah ila biak teh fo pawh ṭha a ka hriat loh avangin ka phone hmasa khât hle.

Hmeichhe dang anga luangliam mi ni ila chuan status ka up kûr ve nguaiin ka ring.

Zankhat ka mu chu ka muhil thei ngang lova ka phone-a Zirsanga nena kan thlalâk ka en ta alawm. A hmel ṭha tak leh a hmai fang dik zet te, min duh hmêl taka min melh lai te ka en nawn leh meuh chuan lunglenna hrilêngin min man titih nia!

A vawikhat nân 'status up' alang ve tlat.

#Hnunglam hawikîr duh tur khawpa nêp ka ni lo hi ka vanneihna awmchhun a ni hial ang a. Tih chiah ka dah a, lo en hmasatute pahnih chu Nutei leh Zirsanga anni!

Zirsanga hian ka number ala kawl reng tihna a nia! Ani chuan status a ngah thei fia fia khawp mai. Kan inṭhen aṭangin pakhat tê mah ka la en sak miah lova, en ka châk; mahse, amah ngaihven anga lan ka tum lo bur.

A zirlai a zo lek lek tawh tih ka hre ve thova, hmânni a a lo haw ve ngawt dan kha a chhungte'n an la hrechhuak lo. Ngawirengin a haw tawp a ni awm e, Nutei a ngai tawh tepawh a ni mahna.

Aizawla kan phei tûk khan a chhuk lehnghal tih Arini'n min hrilh a, kan chungchâng min zawh chhuah a tum viau nâ a, ka sawi ṭha duh ta bik lo.

#Thil awmzia chhuichhuak hmasa lova ngaih dan siam mai mai mi i lo ni ta elaw? Zirsanga'n whatsapp aṭangin min rawn be hlawl a, mak hle mai!

Ka chhâng duh ta chuang lo. Tleirawl ka ni tawh lova whatsapp-a thu sepsel tê tê hmanga biak reng tur atan hun ka nei lo.

#Remruatfel, i pum chhunga mi khâ ka tâ, ruahsur laia ka siam a nih kha.

Ka nuih aza teuh kher mai, a rûi deuh em maw ni!? Ka en sak zêla ka chhâng duh ṭhak lo.

Min call a tum hran lova ka nun aṭanga a chhuah tawh miau avangin phone ka off san ta daih a.

Zirsangliana
Chennai 11:30 Pm

Ka in luahpui Hruaia nen dinner eiin kan chhuak a, Party-na hmunah min pênsan avangin keimahin ka haw ta kha a nia.

Remruatfeli ngaihtuah loh tum eng ang mah ila ka thluakah leh ka thinlungah hian hmun tam ber a chang zel si.

Ka ruahmanna a kal tluang a nih chuan engtikniah emaw ka hnenah alo lêt leh ngei ka beisei takzet.

Nutei hnena kîr tur anga ka insawi kha ka ti takzet lo tih hrethiam thei turin min ringtâwk se a ṭha tur a nia, a rûka ka insawifiahna whatsapp aṭanga ka thawn lah a hre lo der tlat tawh si!

Ka thluak nu but hian eng mah hre lo khawpa ruih a châk ngawih ngawih a; mahse, zû in tawh lo tura min fuihtu leh ka hmâkhua ngaia ami zilhna khâ ka zah thlâwt a ni. Nutei hnenah lemchan a ngai ta erawh he khawvela ka thil nin ber 'number one' a ni ngei ang.

"Zirsang, ka fanu hian i fâ ngei a pâi tih i haider lui a nih chuan i pa rawngbawlna, kohhran leh khawtlângah mualpho theihtâwpin ka siam ang, tunah innei thei rih lo mah ula hmeichhe dang ngaihven i nei tih kan hre vek a nia," Tia Nutei pa min vauna kha ka thinlungah ari nawn tlut tlut a.

Ka pa, ka ṭhatna duhtu, min zilhtu leh min hmangaihtu hi a fapa Zirsangliana vânga damchhûnga a mualpho tur hi ka ngai ngam lo a ni.

Nutei pa hi tuna kan awmna khuaa VC member a ni a, tunhma chuan Soil-ah a thawk ṭhin. Pa induh tak leh thinthawk thut nei a ni nghe nghe a, ka pa hnâ thleng hian a tuar lo ang tih ka sawi thei tlat lo.

Thingtlâng khua tak tak, motor luh phâk lohna hmun ang ni si lo-ah chuan an rilru hi a zîm mah mah emaw tih mai a awl khawp mai! Khawtlângah mi chanchin sawi an la peih ve hle a ni ber mai. Aizawla kan inpui-a haw ka châk et et tawh. Kan awmhmun nghet a ni lo a, hotê-a hminghliau a awl em em bawk a ni.

Ka nu leh pa hnathawh avanga helai hmuna awm ve mai kan ni a, an transfer ta a nih pawhin pawi kan ti lo. Mahse, a fapa vanga hmingchhe lutuka he khua a chhuahsan tur leh a hming ṭha sa thaichhiata a awm tur hi ka duh lo a ni ber mai.

'Tunah nupuiah nei nghal rawh' min ti pawh a ni chuang lo a, Mafeli hi luhlulin tihmawh viau mah se kan tân kawng a la inhawng ang tih rinna ka nei ve tlat a; 'lemchan' a ni tih hrilh hriat ka duh; mahse, hmanzâna ka biak khan sawi lanna hun a awm ngang lova, a chhan chu a rilru na lutuk khân ka thusawi zawh nghâk hman lovin a duh ang a sawi hnuah phone a off ta a nih kha.

Mipa ka ni a, ka lung pawh a lêng ngei mai; mahse, ka zirlai ka zawh hma leh Nutei ka chinfel hmâ chuan beiseina ka siam duh tingtang ta lo a ni.

Ka thutiamah ka la ding reng a, ka la phatsan bawk hek lo. Lalsawmthangi te chhungkaw mâkpa nih tumna ka nei miah lova, tuna rilru chhe lutuk pu chunga min ṭawngkhum dan a ṭang hian nupuia neih chi ninghal lo chuan. Teuh lo lutuk, ka nei malêk ang. Ani neih ai chuan Ramthim a missionary pawh ka thlâng fê.

 hah! Ka thil ngaihtuah dan mai mai chu, 'Zirsangliana Rampâwn missionary' ka ngaihtuah zâwng ringawt pawhin ka nui suk suk a, ang lo lutuk.

Chennai aṭanga ka haw nachhan ber pawh Lalsawmthangi pa nen inbiak ṭula ka hriat vang a ni. Ka zirlai ka zawh phawt loh chuan khawdang ka hawi thei lo tih thlengin ka sawi tlang vek a, mi mâwl ka ni lo, tlangval awm ṭha duh lo lah ka ni hek lo. Harhfîm kêk kâwkin leh ngaihtuahna zau zâwk put a ngai tih ka hre kar tawh tlat alawm.

Mafeli pawh hmeichhe rilru kâwi a ni lo a, ka dik na nâ na chuan min hriatthiam hun ala nei em emin ka ring tlat nia.

Tunah rih chuan a hlimchhawn a lo ni bawk nen ka hrilh dan teh tawl kha dawnsawn thiam a har ve bawkin ka ring a, ṭawngkam ka thiam loh aleiah ka ngaihtuah loh dan puiin ka sawi chhuak ve bawk atin ni.

Nutei call a rawn lut a, zan lai laiah engvanga min lo call nge a nih! Nitin min rawn be ziah tho taknâin zanrei lamah chuan 'lehkha zir ka duh' ka tih deuh tlat avangin min rawn be ngai miah lo kha a nia.

"Aw sawi rawh.." ka pick ruala ka tih chuan min chhângtu an awm miah lo, ari hruih hruih ringawt nia! Loudspeaker-ah dahin, "I ṭap elaw..!?" Ka ti leh a.

Ṭawng thâwm a rawn ri ta a, mipa aw thûm lam hian, 'Ka la hrechhuak khawp ang' atih ri te pawh ka hre nêl nual a, atir chuan a pa âw emaw ka ti zet a; mahse, Nutei'n insût faih faih chunga, 'I fâ a ni lo, hâw tawh rawh,' atih ri chuan ka beng a verh zar mai.

Rang lutukin call record ka hmet nghâl a, a fiah lo viau nâin a hriat theih chang chang chu a ni ber e.

'Lalsawmthang, mipa ka nih hi tunah dik takin min chhâng rawh, ka fâ a ni nge ni lo?" Chu pa aw chu hre tawh thânin ka inhria a, tunge tih ka ngaihtuah chhuak zo tawh si lo.

'I fâ a ni lo, a ni ngai lo ang..' ari leh ṭawk ṭawk a, eng mah ka hrezui tawh lo. Phone an inchuh nalamah min lo call palh a nih ka ring ta a, tunah zân dâr sawmpahnih a pêl duai tawh a, an inah ngampa takin mipa ala awm tihna a nia! Kei hi min bum hauh lo ang, kei lo mipa dang an awm tih alang uar a, ka hriatchhuah ngei angai.

Zanrei pawh sawi lovin Sangpuia ka call nghal a, a lêng rei thei thova a muthilh ka la ring chiah lo.

Vawithum a 'ring' hnu-ah min rawn chhâng ta hrâm e.

"Mâm, eng nge ni ta?"

"Rang lutukin tunah khân Bike la chhuak la, Nutei te in thlen hmâin ding la tumahin an hmuh loh nân che fimkhur ang che, an in aṭanga mipa lo chhuak hriat tum rawh.." ka tinghal zung zung a.

"Ava tlai tawh ve le..."

"A pawimawh a nia, lokal hrâm rawh, i phone keng la, i hmuh pa thlâ rawn la ang che, ka dah.." ka phûr ngei mai.

Mipa dang an awm a nih chuan ka fâ a ni emaw ni lo pawh ni se, keimah ni lo mutpui a nei tih ka hre kar tawh, mahse, finfiahna ka neih loh chuan awmzia a awm dawn miah lo.

Kei misual dum mai nilo ung firfiak hi vanneihnain min kiansan dâwn lo a nih hmel hle mai. Mahse, Mafeli mipa hruai ve Rammawia khân min tilawm chiah lo.

Kan pianphung a inang viau a, kei aiin a chêr deuh, kum lamah chuan a upa zawkin ka ring a, kan doctor hian mipa dang a ngaihven ka ring chiah lo nâ a; mahse, thil awm thei a ni ve tlat.

Engtin nge min ṭawngkhum khâ, 'A pa i ni tih sawi lan ka tum miau si lova lo insawi mualpho duh suh.' ka chhungril ker nget nget tura ṭawng pawh a lo thiam ngei mai!

Ka nu leh pa hnenah Nutei chungchang ka sawi lang vek tawh a, an thultlûkna chuan min va ti lawm si êm. Ka zir chhuah hmâ eng mah sawi an tum lo va, palâi pawh an tîr dawn rih lo.

'Mama, Mafeli hi engtin nge ni ang a hre ve tawh em?' Ka nu min zawhna kha chhân a har viau a nih kha. 'A hre tawh a, kan inkâr a tâwp hmiah' tia ka chhânna chu ka nu lawmzawng a ni lo khawp mai, 'He khawvelah hian vâk vâk mah la, ani anga duhsaktu leh i ṭhatna tur duhtu an awm tawh lovang a pawi êm mai,' ati a.

Mafeli thu zâwmin ka chhungte hnenah a râi thu ka sawi lang lova, chutiang tho chuan Nutei pa ṭawng dan ka sawi lang chuan hek lo. Kan inzui reizia hretu an ni a, ngaih dan an nei sa tepawh a ni mahna.

Sangpuia'n min lo call chuan zinglam dâr khat ari tawh a, "Mâm, Nutei te ina lêng chu Ramthana a ni e, Veranda thleng a rawn thlah a, an inhnial deuh a ang ka tia an ṭawng ka hre pha chiah lova,' a rawn ti ta a.

"Thlâ chu i la em?"

"La e, a thim bawk sia flash ka on ngam lo bawk nen a fiah lo lutuk,"

"A pawi reng reng lo, min lo thawn rawh aw.."

"Eng atan nge i tih reng reng a?" A tih chuan, "A pawimawh lutuk a ni tawp mai," tiin ka chhâng a.

"Min hrilh ve ngei angai ang.." a nui zui a, mak ati a nih pawhin min zâwt dilchhût lem lo.

"Sangpui, naktuk zan aṭang chuan Nutei leh Ramthana chhui hna lo thawk la, Timberland boot ka lo hawn ang che." Ka ti ta a.

"Engtin nge ka chhui vak anga!?"

"An awm dun lai emaw an ina a lût chhuak lo ngaihven la, inngaihzawnna an nei em? Tih hriat a nimai," chiang kelh kawlha kan inhrilh fê hnu-ah kan inbiakna ka titawp ta a.

Ramthana pu leh Nutei pu hi unau anni a, cousin annih vângin an inkawp em tih hriat chian a ngai takzet. Phone-a mipa aw kha Ramthana aw a ni lo ve thei tlat a, unau inngaihzawn thu awm suh!

Ka mood a off chawpchilh nghal a, ka lo lâwm ve hman tawh tehreng nen a mipa hre fuh ngat ila chuan an tâna sawibuai tur awm miah lovin ka'n ṭhen hmiah mai tur.

Mahse, beiseina tlêm ka la nei a, chu chu 'mipa-in ka fâ a ni em?' tih zawhna a zâwt ngam anih chuan a inrawlh ngei tih a chiang sa reng.

Zirsangliana bum tumtute hi bum lêt dan kawng a awm tur a ni ringawt. Lalsawmthangi hian a unaupa a nih vângin mualpho thup nân min hmang ve thei tho bawk.

Chhin khat tê mah chhing lovin ka tlaivâr ṭhak a, ka nau pic min lo thawn fiah mang lo chu vawi engzât nge ka en hman tawh pawh ka hre lo.

Kan inṭhen aṭangin status za chuang fê ka nei tawh a, kan doctor luhlul hian vawikhat mah zuk en lova! Min thlah hlen a tum ve khawp chuan ka hria.

Amah aia dinhmun sâng zâwka ka awm hma loh chuan ka thunun thei dâwn em ni? Mahse, ka hmangaihna hian a kiansan hlen dawn si lo.

 hah! Tunah khân 'Ka hmangaih' tiin ka suangtuah maw! Kei hian tisa induhna leh in îtna piahlamah ka lo hmangaih reng tihna a nia. 'Lalpa, amah nei lêt leh tur hian Missionary-a kal ngai mah se pawi ka ti lo' tia ṭawngṭai mai tur em ni ang.

Chu em em zawng ka peihna leh ka Kristianna dâl ve tak hian a tlin ka ring si lo. Sâwn pahnih thlâka rawngbâwla chhuah te chu a! A ang lo lutuk!

Ka thil ngaihtuah avang chuan khawvar lamah ka nui chhuak hawk a, miin min hmu se mak anti teh ang chu! Hmeichhe pakhat, vety doctor zûna uai turah ka indah chhin ngai lova tunah chuan amah ka neih lêt theih dan tur kawng tinrenga ka dap a ngai tawh chu a nih ber hi..

After 2 months
Aizawl. Remruatfeli

"Mate, ka awih thei hlawl lo, engtin nge i lo zêp ngar ngar theih le!?" Ka nau Bawiha rilru na hmêl ka hmuh chuan hrehawm tih piahlamah ka hrehawm thlâwt. Ka ngawi reng a.

"Ka nu leh pa'n an hriat hunah an rilru a va na dâwn êm?" Tiin a ṭhutna aṭanga tho chhuakin ka in luah zimtê-ah chuan a tei nghauh nghauh va. Ka nau Remruatpuia, fiamthu duh leh min ngainatu khâ hmuh tur a awm tawh lo.

Ka naupâi a hre chhuak ta hi pawi ka ti a ni lova, a hun hmâa a hria erawh pawi ka ti zawk a ni.

Kan nau Dintea ka awmpui khân a lo va phone a, 'U Mafeli hi a nun a hlim hlawl lo, chaw a a ei tlêm si, hna a thawkrim bawk si a, ka ngaih ati ṭha lo' alo va ti ngawt pek a, min ngaihtuah em emtu Bawiha hian ka nu leh pa hrilhin nizan khân a lo zin a ni.

"Mate, vawikhat chiah ka zâwt leh ang che, tunge a pa..?"

Chhân chu sawi loh hnuailam bihin ka kûn ngar a, ka sawi dâwn lo a ni tawp mai.

"Eng ang pawhin min zâwt mah la ka sawi dâwn lo, khawngaihin min nawr lui tawh suh.." ka ti sap a.

"Luhlul hun a ni tawh lo, sawi rawh, a nei duh lo che a nih pawhin chhungkua i la nei a, hna nghet i nei bawk a, i tân eng mah lungkham tur a awm lo, pa nei lo-in fâ a pâi theih loh tih te chu ka hre ve reng," a tukkhum dawmin a ding leh a, thinrim awki vînin min zâwt hauh lo. Mahse, a thin a rim tih erawh ka hria.

"Ka nu leh pa hnenah sawi la, nau ka neih hmâ lo haw ka tum lo a nia," ka tih chuan lokal hnaiin ka darah a vuan a, "I luhlul tih chu ka hria, hetiang em em a luhlul i ni tih ka lo hre lo a ni," min sâwi deuh nawk a, ka thin asa ve phat; ka râino thinchhe ve bawk nen ka ding uaih a, "Remruatpui, luhaia ka tlûk i duh loh chuan zawhna min zâwt tawh suh, ka tihdik loh man chu ka têl mai ang," ka mittui a hnâi kuar a, ṭap lo turin ka insûm nasâ.

"A ṭha e, i thu thu a ni, ka nu leh pa hnenah chuan 'a pa sawi tur a hre lo' ka lo ti dâwn nia," thinrim lutukin kawngka lam a pan a, kawngkhar a rawn nam khâr bur a, a chhuak zui ta a.

Ka nau pâiin thla thum hmêl a hmu tawh a, min chîktu tan chuan hriat a har lo ngawt ang, ka nghâwng a rêk ngât a, ka mitkhur a tla deuh bawk. A chhan chu ka muhil ṭha lovin taksa ṭhatpui tham eng mah ka ei lo bawk a, Zirsangliana vânga ka rilru natna hi sawi chhuak lo mah ila ngâwi rengin ka tuar ru tlawk tlawk a ni ber mai.

Zirsanga chanchin hriat ka nei lo a, Chennai-ah ala awm nge awm lo pawh ka hre tawh bik lo. Ka ngaihven lo a ni tawp mai.

A nu leh pa a unaute nen kan inbe leh zauh ṭhin a; mahse, a chanchin an sawi ngai lo hrim hrim!

Nutei nen an inkawp leh aṭang hian Nutei pawh a reh hmiah a, ka status en erawh ala ṭhulh chuang lo. A râi lian riau tawhin ka ring a, ka tâna mipa hmasaber a nei dâwn ta chu a nia. Ka na lo ka tih chuan dâwt muhlûm a ni, ka na ru ngawih ngawih a, ka luhlulna leh induh tâwkna hian hmalam min pantîr mai mai zâwk a ni.

Bawiha alo la lêt lova, ka daisual man têl tur hian chak taka ka awm a ngai a ni.

Khumah ka mu meng kar a, Dintea lehkhazir thâwm pawh ka hre reng a, ani hi awm lo phei se chuan ka khua a har ngawt ang, fiamthu a duh bâkah engkim ka tih ve ngai lovin min chhâwk hneh em em a, mipa mah nise a fel thlâwt.

Ka phone a rawn rîk chuan ka phu zawk a, Bawiha khân ka nu leh pa a hrilh tawh anga min lo call nghal a nih ka ring a. Mahse, pa Hriata lek lo niin!

Zirsanga pa hian tun ang hunah eng atan nge min biak a duh tih ka hriat si loh.

"Hello.."

"Mafel, i dam ṭha em?"

"Dam e, nangni zâwk?"

"Kan ṭha e, i mak ka ti, kan fapa nen in inkâr boruak ṭha lo avanga keini thleng thlenga min be duh ta lo hi i nu Zuali ngaih dan a ni lo a, kan fanu ang chiaha kan en i ni a, Zirsangliana tih vel vânga inreh san hmiah chu kan lawm lo viau a nia." Ati ta a.

"Chutiang pawh a ni lo, kan buai ve lutuk a.."

"Inbuai ang tih chu ka hre tho a, kan lo biak loh che chuan min biak hmasak reng reng i tum ta lo a, kan ngaih tehlul che nen.."

"Ka lo la be dâwn chauh che u," tiin ka nui lui ngial a; ni e, ka thiam lo let dêr a ni.

Zirsangliana nen kan inzawm hma pawhin min duatin min ngaihsak em em a, Arini leh Sangpuia te pawh anni vek tho. Ka lo ti lutuk deuh em maw ni?

Ka zin leh theih hun turte min zâwtin thil chi hrang hrang a sawi luam a, a fapa chanchin erawh a sawi lang eih lo. Chennai-ah a awm tawh lovin ka ring a, result a nghâk mêk ang tih erawh an exam hun tur whatsapp-ah min lo hrilh aṭangin ka chhût ve mai.

"Remchângah lo zin ngei ngei ang che," tiin kan inbiakna a titawp ta a.

Ka zin khawp ang, ka dam a nih phawt chuan; mahse, tunah nilovin nautê ka neih hunah a pi leh pu diktak, a nî leh a patea te ka la hmuhtir ngei ang.

After 2 hours

Bawiha a rawn haw lova, a ṭhiante inah a riak dawn tih message-in a rawn sawi a, 'Lo haw rawh' tih ka tum ûk a, a duh dâwn chuang lova ka hriat avangin 'Aw le' tiin ka chhâng ta zawk a.

"U Mafel, kawngka an rawn kik a, ka hawng dâwn em?" Ka room-ah Dintea a rawn dâk a, tunah 11:30 Pm ari tawh a, tunge lokal tur awm? Doctor ka nih vang hian min rawn pan ve zauh zauh ṭhin a, chutiang pawh chu a ni maithei!

"Hawn sak la, a pawimawh viau loh chuan a mu tawh timai rawh aw.."

"Aw le," a pen thlauh chhar paha tiin a chhuak leh mai a.

"Mu tawh mah se ka hmu duh alawm," mipa aw hniam chhak chu ka la hrechiang ngang mai.

Zirsangliana a ni!

Rang lutukin ka thova ka room kawngkhar kalh tuma ka pawt chiah tihin, "Remruatfel, i muhil lo tih ka hrechiang alawm, dâwt i sawi dâwn chuan i whatsapp kha hide online-ah dah rawh aw.." tiin a rawn pên lût ta a.

"Chhuak rawh, i pa in nilovin ka in a nih hi.." ka vîn hauh lo a, ka ṭawng erawh a chang fal fal khawp mai.

"Ka pa in nise chuan kawngka ka kik ṭulh ṭulh lovang," ka bânah vuanin khumah min nem ṭhu a, chîk lutuk tak mai hian min en a, chutah ner sawk chung hian, "Doctor eitur hrisel ngaina ṭhin kha i lo tlahniam hle mai," ati sup a.

"Ngawi hmiah rawh, Zirchhekhâwn.."

"Hming thar neih hi ka inhmeh ve hrim hrim, Zirsanglian rûi nâwi pa, tia inkoh ai chuan a lawmawm dan a dang deuh."

"Chhuak phawt mai teh," min vawnna thingthlain ka ding hluai a, engtin mah min ti bîk miah lo!

"Min haw hlum ṭhakin kut min thlâk mah la ka sawi tur ka sawi hma chuan chhuah ka tum lo." Ati deuh hmuk a.

"Nang nen sawi tur kan nei tawh lo, kan nei lo takzet?"

"A nih leh Bawiha'n min lo call tih sawi ila i ngaih dan a dang deuh lo maw!?" Atih sup tâkah chuan ka hawi phâwk ta hrâ a. Remruatpuia khân Zirsangliana hi ka fâ pa a nih a lo ring tihna a ni maw! Hus! Nau fing zet ka lo nei a nih chiah hi.

"Ka nau in a lo call che chuan inbe mai ula, a ṭhiante inah a riak dawn, nang biak che hi châkna ka nei lo, ka nunah hian i tel tawh lo mai nilovin ka eng mah i ni lo, i ni ngai tawh dawn lo tih ka sawi lovem ni!?" Ka aw a fiak ṭhak ta mai.

"I nunah ka lo tel ve dâwn pawh ka tih siloh.."

"A ṭhat chu, ti mah la i tel dâwn chuang lo.." tiin Dintea ka ko zui nghal a, "Zirsangliana hi tui in tur pe la, kan mu dâwn tawh tih lo hrilh mai rawh.." ka sawi zo hman chiah, "Ran ka nih loh hi, tui pêka lâwm rual lah ka ni hek lo, ran doctor-ho tak hi chu aw.."

"Ran doctor, ran doctor ti sek lo khân chhuak rawh.." a hnungah ka nam dawt dawt a, ka thin tertek chhuah nân minute tam nghah angai tawh hauh lovang.

"I thin ava'n chhe ve le.." tiin a chhuak ve teh tlat nia!

Dintea a be zui nghal bawrh bawrh a, "I u Mafeli eitur pudding lo siam rawh aw, ka inbual chhungin ka bag-ah khân a awm ang." A ṭawng ka hre pha reng a, eng nge maw a hriat ni!

"Engtin nge ka koh ang che?" Polite taka Dintea'n a zawh chuan, "Zirchhekhawn tih ka duh lo phawt a," atih chuan Dintea a nui hawk a, an pahnihin zuk nui chiam a!

"Tak takin, u Zirsang min ti mai rawh, i û min koh dan a nia.." ati deuh kher a, a hmâ a Zirsangliana, ngawi ngul ṭhin khâ anna pakhat mah a nei lo. Damdawi te hi a rûi zâwk nge ni! Zu rim a nam lo phawt mai ah..

"Aw le, u Zirsang, chaw i ei tawh em?" Dintea zawhna chu ṭul lo ka lo ti khawp mai a.

"Ei tawh e, pudding chu lo siam la, ka inbual zo har lovang," ati leh a.

Tih ngaihna vak ka hre bik lo. A duh chuan a fel thei hle a ni tih ka hrechiang tawh tlat a, engvanga lokal ve ngawt nge a nih hre lo mah ila tihtur pawimawh lian tham tak a nei a ni ngei ang. Kha leh chen a ngawi tawh a, nautê min chuhpui a tum ti dawn ila thlathumna tur a ni chauh a, a puar pawh ala puar mang lo ania!

Khumah ngawirengin ka mu a, ka room kawngkhar ka kalh hmiah tawh bawk. Alakah beiseina chhetê mah ka nei tawh lo va, kîr leh duhna rilru ka pu hek lo, Remruatfeli rilru tinatu hi hrem lohvin a chhuak lovang.

Nutei nen an innei ta lo nge an inṭhen ta nge pawh ka hriat si loh.

"Mafel, inthlâkna ka rawn keng lova ka thawmhnaw ka chhuk san tâk khâ ka lo ring nghâl a nia," kawngka bulah a rawn ṭawng lâwng lâwng a, ka ngawi reng thung.

"I lo hawn loh chuan.."

Ka la ngawi ta reng a..

"U Mafel, lo hawng zuai la, pudding hi lo ei rawh.." Dintea'n atih chuan "Ka ei châk lo.." ka ti hmak a.

"I muhil lo tih kan hre ta phawt chu a nia, luhlul hun minute 3 chauh hawn a ni e.." Zirsangliana mai mai chuh..

Ka tho chhuak leh ta nge nge a, ka rilru a pawimawh ber a, ka inthunun tlat chuan a duh duhin awm mah se min nawr lui chuang lovang.

Kawngkhar ka hawn rualin a rawn pên lût nghâl a, ka towel ala veng zui nia maw le!

"Zaninah chuan biak che ka tum lo, pudding saw tlêm tal ei la, ka lo inthlâk ange.." ati sup a. Chhâng lova kalpêlin choka lamah ka chhuak phei ta a.

Mi puitling china ngaih ka ni a, thinrima âng buan buan chi ka nih loh avangin lungawi lo teh mah ila midang hmuh laia tih lan kher ṭulin ka hre ta lo a ni.

Amah ngaihsak miah lo hian ka awm thei alawm, tun aṭang chuan min biak pawhin a rûl tâwk chauhvin ka chhâng tawh ang.

'Mipa rinawm lo tawh chu an rinawm thar thut ngai lo' tih hi ka vawng reng tur a ni.

©<++++[BeckirafARenthleI]++++>®

Nizan post comment zet chu ka nui nasa ngei mai. Kan ṭang tlang mai si a, Rapsagy chhiartu zawng zawngte chungah lawmthu ka sawi nawn leh e.

In comment ka chhiar khân 'I story a dangdai, a common lo, i ṭawngkauchheh ka duh..etc' atam mai.

Khawi hmunah pawh chhiar u la, ka hming lang miah lo pawh ni se ka ziak a ni tih inhriat theih nân ṭawngkauchheh danglam chherchhuah tumin ṭan ka la hle a ni tih min hriatsak theih chuan ka lawm hle ang.

Tin, induh khawp lohna pawh a tamin ka ring a, inzir zel ka ni tih leh Mizo romance ka vawikhat ziahna a ni tih kan sawilang leh ange.

Sâp thawnthu nen a danglamna tihlan ka tum hle a, Mizo chu Mizo, Sâp chu Sâp tia thliar hran theih turin ka zir ve nasa a nia.. Inzavaia chungah lawmthu ka sawi mawlh mawlh e.

Becky Rafa Renthlei (BRR)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:40 pm

22.RAPSAGY

Becky Rafa Renthlei

Chapter-22
Zirsangliana
Aizawl

"Zirsanglian, i inthlâk rei mah mah tawh," room leh lam aṭanga Mafeli rawn ṭawng chuan ngaihno a bei tehchiam lo.

"Ka thawmhnaw i dahna ka hre hleinem min lo zawn sak la.."

"I duh duh kha inbel la ti nia.."

Mafeli room-ah ka la awm ta reng a, a nauvin min lo phone khân chaw ka eikham ve chiah a, ka patea inah kârkhat lai ka awm tawh nâ a; Mafeli hmu turin vawikhat mah ka la kal lo.

Dik tak chuan kal ka châk em em a, min huat êm avang leh whatsapp aṭanga ka biak pawhin min reply duh ṭhak si lo nen a rilru hneh tum eng ang mah ila ka intihah thlâwn mai maia rinna ka nei miau alawm.

Ka ring dik chiah bawk a. Mahse, zanin zet zawng chhuanlam ṭha lutuk ka neih avangin tlânchhiat ka tum lo hrim hrim.

Chennai ka chhuahsanna pawh kârhnih vêl a ni tawh a, kan inah zan thum riakin ka haw zuai a, ka patea dâwr ka kuta awm tâ enkawl hna thawk turin ka phei leh ta kha a nia.

Keima pualin sum khâwlsa eng teh chiam mah ka nei lova, chuvangin ka kê-a ka ding dâwn anih takzet chuan ṭhahnem ngai taka sumdawnna hi ka enkawl a ngai a ni.

Nutei nen kan inkârah pawh buaina em em sawi tur a awm lo, a hmâ ang teh huam khân min ngaihsak tawh lova ka lâwmthu tak a ni si. A pum a puar ve âl tawh a, Ramthana fâ a ni tih finfiahna tur nei chiah lo mah ila Sangpuia sawi danah an inzui ngun thawkhat hle tih ka hria, ka thîk chhin eih lo.

'Mâm, Nutei hi ka ringhlel tulh tulh, kan chhungkua nena inhnamhnawih pawh ka duh miah lo a nia, ṭhen hmiah rawh' Sangpuia'n ati nghe nghe a; mahse, tûn hi a hun ala ni rih lo. Nutei pa zâwk hian inneih a sawi ri ṭan tawh a, 'kohhranah pawh thunun inngai a nia' tiin min tur sek nia!

Lalsawmthangin nena thunun kawp nih ai chuan Remruatfeli nen ka duh fê zawk.

Naktukah kan khuaah ka haw phei phawt anga engkim sawi chhuah vek a ṭûl tawh a, kan mualpho ta a nih leh mualpho sîngsawm mah ila ka chaw ei ka ṭhulh awm lo em mai. Mafeli hnenah erawh chuan eng mah ka sawi rih dâwn lo a, engkim felfai taka ka chinfel hnu-ah chauh amah neih lêt leh dan ka dap mai dawn a ni.

A room aṭanga ka chhuah chuan tûm hmak chung hian ṭhutthlengah a lo ṭhu a, pudding 'ka ei châk lo' ti siin zuk ei fai vek a! Daw peih reuh mang e.

"Thin tertek tihchhuah awih loh aw, sawi buai ngai lovin ṭhutthlengah ka mu dâwn ania.." ka ti nghal a.

"Hetah riah kher a ngai lo, hâw rawh.." ati hmak a.

"Sawi buai ngai ngai lovin ti na nâ na a.."

"Zirsanglian, min run luih lo mai rawh, ka ngaih dan a pêl palh a nge," tih pahin a tho chhuak zui nghal a, a thinrim lai ka hmu khât bawk a, a nuam viau lo.

"Mafel, thinrim na tur a awm lo, ka fâ a ni tih kan hre ve ve a, min haw hle ang tih ka hriat vanga ṭhutthlenga riah tum ka ni bawk. Chuti ni lo se, i kiangah ka mu dâwn lo em ni?" Ka tih chuan min chhâng tawh lovin a room-ah a lut daih nia!

Biak zui emaw chelh tumna ka nei lo, a rilru a len bakah mahni thutiama ding tlat hmeichhia khâ a ni tlat a, nawr lui eng ang mah ila 'inhau ang' tih nen a inang reng dawn a, a dik lo zawk dinhmunah ka ding tlat si nen ngawih ka chuh ta zawk a.

Dintea a mu tawh a, 'Ka khumah mu zâwk rawh' ati ngial nâin ṭhutthlengah ka mu ta zawk a.

Engtin nge bul ka ṭan ang? Ka duat hliau hliau ang nge, a awm ang hian ka titau ve mai dâwn? Â hah! Ka thluak a chawlh hmâ zawng hi chuan amah hneh tum hian ṭan ka lâk fê angai dâwn a ni.

Khawvar dawn hnaihah ka lo chhîng ve sek a ni ngei ang, "U Zirsang, chaw ei ve nghâl rawh aw," tia Dintea'n min lo koh chuan ka harh chiang kher mai.

"Ei lo mai ang, i û in min huphurh deuh tâkah, kan khuaah ka hâw dawn a kalkawngah ka ei mai ang, ka tih chuan "A chi loh lutuk ka chhumkêp ang che." Ati ṭâlh a.

"Ni lo ve in neitunu berin min sawm mang si lova ka chhuak deuh nghal mai ang."

"Zirsanglian, khatiang sawikâwi chhên lo khan chaw ei la, i duh lam lam i pan thei ang," Mafeli'n a rawn ti ve ta a, ka nui ru suk mai.

Hetiang a nih chuan duat hliau hliau lovin a rilru la deuh zâwnga game khelh tur tihna. A va nuam si êm!

"Mafel, ka kal zâwk ange, i nauvin min lo phone vanga lokal ka nia, i sawi ang khân i nunah telve tura min duh loh chuan ka nawrlui ngai lovang che; Mahse, ka fâ in pâ hming sawi tur a nei dawn ta lo erawh ka thiam loh a ni e, thudik i hriat hunah i tân ka lo awm reng ang," amah ngaihsak tawh miah lo hian ṭhutthleng bula ka zin bag chu lain ka ding hluai a, ka hmai pawh ka phih duh tingtang tawh lo.

Ngawireng hian a ding a, min en reng ringawt!

"Dam takin le, i nu leh pa in zawhna min lo zâwt ta a nih chuan thudik ka hrilh dawn a ni tih i lo hre dawn nia, min zâwt ta lo a nih chuan i hnêna ka intiam ang ngei khân ka kâ ka ang lovang," ti supin kawngkhar lam ka pan ta a.

"U Zirsang, ka lo thlah ang che.." Dintea hian min lainat ve deuh a ni mahna, mipa rilru hrethiam tur khawpa fing fel a nih ngei ka ring.

Dintea nen kan inzui chhuah lai pawhin a dinna ngaiah Mafeli ala ding reng a, ṭawngkam khat mah a chhâkchhuak lo.

Luhlul tihpiahlama luhlul a ni.

Ka patea car i20 dum ka keng phei dawn a, Remruatfeli thinlung sak lutuk leh hliam hi tihreh dan dîl tura chawnghei ṭawngṭai neih hial mai ka duh.

"U Zirsang, keiman u Mafeli pa te chu ka lo hrilh dawn nia, heiang ringawta a awm chuan a damlo mai ang," garage bula kan din lai chuan Dintea'n ati ve a.

"Inrawlh duh suh, a luhlul si a, chubâkah keima thiam loh a nia, nakinah ka la hrilh ṭha vek ang che, lo duat la eng emaw a thleng palh a nih chuan min lo call rawh aw.." ka phone number ka pe ta a.

"Engtikah nge nautê a neih ang le..!?"

"Ṭhataka a pâi puitling a nih chuan tun aṭanga thlaruk hnuah a nei ang, ani lo hi nupuia neih tumna rilru ka pu lova ka pu ngai hek lovang." Ka tih chuan min lainat hmel a pu ve deuh.

After 7 hours

Kan khua ka thlenin zan dar sarih ari tawh a, kawng tluanin phone ka switch off ta kha a nia. Lalsawmthangi pa hnena ka ṭawng dan tur ka ngaihtuah phei nasa mai!

Ka rin loh deuhvin ka chhungte an lo awm kim ṭhap a, Arini ṭhiannu Sentei pawh a lo awm ve bawk!

"Mama, i biaktlang theih si lova kan ngaihtuah tehlul che nen," ka nu'n alo ti nghal a.

"Phone ka off daih alawm.."

"I patea lah a biak tlâk mang si lova kan hlauthawng hman alawm, chaw ei la chhungkuaa thil sawi a ngai a nia." Ati zui leh a, Nutei chungchâng a nih ka ring nghal deuh mai. Mafeli a râi tih an la hre lova, ka nu leh pa hian fahrah siam an duh dawn lo tih ka chian êm avangin palâi tirh an tum ta a nih ka ring.

Chaw eikhamah ka nu leh pa pindanah kan awm ṭhap a, mi lût chhuak an awm zeuh zeuh ṭhin avangin sitting room lama awm chi ninghal lo chuan, Arini leh Sentei an awm thung.

"Nutei fâ pâina dik tak kan hre chhuak tawh a, sâwn man kan pêk a ṭul kher tawh lo." Ka pa'n atih chuan ka phu zawk a, Sangpuia chu 'I hrilh em ni' tih melhin ka melh nghal bawk a.

"U Mâm, Ramthana'n Nutei a luhkhung a, tlâiah khân Nutei pa a lokal a.." tia min chhân chuan ka nui teuh kher mai.

"Eng nge a rawn sawi!?" Ka nu leh pa ka zâwt a.

"I laka a ṭawng dan velah ngaih dam min rawn dil a, keini'n eng mah kan lo hre ve si lo nen kan bangbo khawp mai." Atih chuan, min tih dan zawng zawng kha ka sawi chhuak ta a.

"Mama, min hrilh ni la chuan i pa hi ka ngawi hauh lovang. A dik lo zawk an ding chang ngai lo." Tiin ka dârah a bêng thak a.

"Puitlin lam i pan zel tih kan hriat hian i nu nen kan lawm hle a nia; mahse, Mafeli rilru i tinâ erawh pawi kan ti hle a ni." Ani leh ni lo ang takin pawi atih hmel tak tak a.

Ka nu ve thung chu Nutei pa min ṭawngkhum dan ka sawi zawh rual khân thinrim insûm tak hian a thaw chhuak halh a, ân hrep châk hmel a pû.

"Ramthana fa pai chunga kan chhungkua min tih hmingchhiat a tum ṭâlh hi ka lawm miah lo, palâi kan tîr hman lo hlauh hi Pathian min venna liau liau a ni e, tun chinah i nun uluk la, i nupui annih loh chuan hmeichhiat mipat kawngah fimkhur tawh ang che." Ka nu ṭawngkam kha fak avang chuan ka zak ru chem chem thei nia, nakin lawkah Mafeli chungchâng an hre leh awm si a, khua a vâr lo kher mai. Ani lahin min kalsan a tum nghet ropui mai si a.

Thil dang dang sawiin councelling class ka kal a ni ringawt. Mahse, nu leh pa hi 'kan lei Pathian an ni' tih min hrilhtu Mafeli ka hrechhuak rauh rauh mai.

Tunah chuan ka thawpik zualpui a reh tawh a, Nutei ka chinfel a ngai tawh hek lo. Nimahse, a aia khirh zâwk atel lova awm harsa ka tih em em Remruatfeli ala awm tlat si a, ka fâ dik tak pâitu leh ka hmeichhe hmangaih ngei chu.

Ka chauh deuh avangin hmâ takah ka mu a, zu in châkna ka nei khât ta pharh mai. Ka wallpaper-a Mafeli leh ka û fapa Kenedy-a thlalâk chu ka en vang vang a, ka lung a lêng ngawih ngawih.

"Mipa tiha mawi lo khawpin i zuk lunglêng vêl ange" Tia a sawi lai hmêl te kha ka mitthlâah a châm reng nia!

Lalsawmthangi ka ngaihtuah kâi zel a, khati khawpa kan inkawp chung leh ngaihdam min dîl lawm lawm chunga midang fa, ka fâa a puh tlat kha phubâ lâk ka châk et et.

Mafeli nen kan inkâr a chhe vek a, ka siamṭha thei angem? Tih Pathian chauhvin a hria ang chu. Ka fa tân pa nihna dinhmun ka hauh ngai dawn lo tih thlenga ka ngaihtuah phei chuan ka thinrim lutuk hi awm ngaihna ka hre lo dâwn takngialin ka hria.

Rang lutukin khum aṭang chuan ka thova, min hua emaw engtin pawha min tih huamin Remruatfeli pan leh ka tum ta a.

Ka tihdik loh siam ṭha tur leh engkimah a tân rinawmin ka la awm tlat a ni tih hi chêtziaa lantir a hun ta viau a ni.

A ṭûl a nih chuan ka luhkhung ve mai ang. Ramthana mahin Nutei a luhkhung ngam chuan ka hmangaih tân hian mualpho ka hlau bîk reng reng lo.

Pastor fapa ka ni lova, Chief minister fapa ka ni bawk hek lo. Ka duh duh titurin ka zalên a ni.

"Nu, pa, Aizawlah ka phei lehnghal dâwn," ka nu leh pa TV en a lo ṭhu te bulah chuan ka ti sup a.

"Eng maw!?" An makti hmêl ka hmuhin, "Mafeli biak ngei ngei ka ngai, a ṭûl chuan ka lo hruai haw maithei.."

"Zirsanglian ât so chhên teh suh.." Ka nu a vîn ṭhak ṭhak ngei mai.

"Mama, ngun takin thil ngaihtuah hmasa rawh, i duhna tilianin nawr tet tet mah ta che, Mafeli tezawng keini chhungkaw mo-ah a awm duh lo tawp ang, tuna in boruak thlîr phei chuan.." ka pa'n ati ve thung a.

"A awm ang pawh ka ti si loh, ka bei ve chhin reng reng dâwn alawm."

"Mi â ni nghâl lo chuan i duh duh hi i sawi pawp pawp mai a, Mafeli mizia en la, i mizia en leh la, i nghah deuh angai zâwk lo maw.." titu ka pa chu enin, "Nghâk hman ka ni lo, tunah nautê thlathum mi a pâi tawh, ka fâ..englo.." ka inrin hman hmâa ka sawichhuah avang chuan thup leh tumin, "Ih, ka sawi awmzia chu.."

"Zirsanglian, i rawn rûi haw chu a ni êm lo maw, zanin hi i chiangkuang hlawl lo, Mafeli'n a hre palh ang e.." ka nu'n atih chuan ka ngawi ta reng a.

"Mama, thudik i sawi em?" Ka pa a rawn ṭawng ve ta. Chhâng lovin ka la ngawi ta reng a.

"Ka zawh che chu, a thlazât nen lam i sawi danah dâwt i sawi ka ring miah lo," atih zawm leh a.

"A dik alawm, tunah hian a râi mêk a, a nu leh pa'n an la hre lo maithei, a nau Bawiha kha chuan a hre tawh a, a hrilh leh hrilh loh ka hre tawh bik lo." Ka ti sup a.

"Pathian pawi i sawi nasa êm a nih hi.." ka nu âw a chuai raih a, kei erawh ka thâwl huai mai. Ka mualpho dâwn a nih chuan a tâwp rât thlengin le.

"Tunah insiam la, Aizawlah chuan phei nghal ang che, Mafeli rilru damna turin theihtawp chhuah chiah i hmabâk tawh, a nu leh pa pawh a la hrilh loh danah a haw hle che tihna a nia, a pawi hle mai," min melh no tehchiam lo hian ka nu bawk a ṭawng leh a.

Chumi hnu chuan ka thawmhnaw min siampui zung zung a, 'Naktuk zingah kal rawh' min ti bîk hek suh. A zan a zânin Aizawl panin ka tlân chhuak leh ta a.

Mafeli hi sawrkâr hnathawk a nih vang nilovin a mizia engkim an ngaina a, mo atân an duh tih ka hrechiang bal.

Tunah zan dar sawm ari tawh a, khawvar rual vela thlen hman ka inbeisei.

Remruatfeli
11:00 Pm

"Ka nu leh pa ka hrilh tawh a, i fa pâina pawh kan hre tawh bawk." Bawiha nen ka room-ah kan awm a, khatia Zirsanga a chhuah hnu khân Bawiha pawh a rawn haw ve nghal a, a hmêlah lungawi lo hmêl alang tawh lo.

"Hre mah u la engtin nge intih chuan anga.." ka tisap a.

"Zirsanga a rawn phei mêk a, sawi dun ang che u, a hmeichhia zâwk i ni a, inluling tur i ni miah lo a nia, Mate, ngun takin inngaihtuah rawh, Sangpuia'n min lo hrilh lo phei se chuan kei hian Zirsanga a ni tih rin ngaihna ka hre miah lovang." Ati leh a.

"Tunah arawn phei a maw!?" Mak ka tih êm avangin ka zâwt hlawl a, tukinah a haw chauhva Zirsangliana hian eng nge a hriat a..?

"Inpahnihin engkim sawi dun rawh u, ka ti tak tak a nia, inlam lêta ngaihdam a dîl che chuan 'Aw' ti mai rawh," ati leh a.

"Bawiha, eng mah hi i hrethiam pha lo, Pathian zarah fâ pakhat te zawng ka huphurh bik lo."

"I huphurh lo rêng ang chû; mahse, ka nu leh pa, kan chhungkaw zahawmna ngaihtuah la, amahin a duh phawt che chuan tlâwm mai rawh,"

"Ka sawi peih tawh lo, i duh leh lo nghâk chhuak la ka mu dâwn," ka ti nghauhva.

"Ka nu leh pa ka hrilh dawn a nia, i duh ang anga awm thei ila ni lo, nu leh pa kan la nei a, an thutlûkna kha i pawm tur chu a ni mai." Remruatpuia ṭawngkam ni awm lo tak a ni.

"Ṭawng ṭawng tawh suh, eng mah hre zîktluak mang si lo hian.."

"Ka hre vek, ka hre mah mah, Sangpuia'n engkim min hrilh a, Nutei fa pâina pa pawh Zirsanga nilovin Ramthana zâwk a ni, nangmah hian eng mah i hre lo, a ṭhen chhan che pawh i hre lova, zawn chhuah tumna pawh i nei hek lo," ati leh fak fak a.

'Zirsanga fa a ni lo' tih ringawt ka bengah ari nawn tlut tlut nia! Chuti si engvanga "Ka kîr leh dawn' ti nge a nih!


"Duhtawk ang, ka chau.." ka sawi zawh rualin atho chhuak nghal a, "Nang ang hi ka hmangaih tlat ang tih ka hlau," zuk ti hrâm a.

Ka pindan a chhuahsan fel ta maw tihah ka phone phawrhin Arini ka call ta a.

©<++++[BeckirafARenthleI]++++>®

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:40 pm

23.RAPSAGY

Becky Rafa Renthlei

Chapter-23
Remruatfeli
Aizawl

Ka khumah ka mu meng kar a, ka thin a phu dep depin ka hria!

Zirsanga ka ngaihtuah a piangin ka thluak a su dup zel nia! A chhan chu Nutei hnena a kîr leh nachhan hriatfiah tum lova ka lo awm liam mai mai kha mâwl ka inti lutuk a, mipain hmaichhanah ngei, 'Min lo nghâk rawh' tiin a sawi ve a, kei hian ka lo ringzo hlawl lo a ni tih ka hrethiam ve chiah.

Ṭha tê tê-a kan inkawp laiin leh inhauna sawi tur awm miah bawk si lova khatia a rawn ti ringawt kha ani ang mipaah pawh inla 'Pa' lutuk tâna tih chi ninghal lo chuan!

Thu tam tak kan sawidunin kan intiam a, inringtawn tur kan nih laia thâwklehkhata a danglam thut nachhan hrethiam tura upa ka ni tawh asin le.

Tunah min hmu turin arawn kal leh nghal chu a ni si a, ka lo inchhu ngêng tlat dawn nge ni anga ṭha tê tê-in ka dawngsawng zâwk ang?

Lo thleng phawt sela hunin a hril ang chu.

Ka muhil hleithei lo chu a ni ber e.

Zirsanga lo thlen laiin ka tho chhuak lo a, ka nau nen an ṭawng mawlh mawlh a, Bawiha hian a ngaina tih ka hria a, an inkâwm thei phian bawk.

"A muhil tawhin ka ring a, zingah inbe mai rawh u aw.." Ka nau ṭawng pawh ka hre reng a, thawh tumna ka nei lo.

"Ka nu leh pa'n an hre tawh a, amah a pawimawh ber, kei chuan nawrluih tumna ka nei lova, tin, kan inkâr ka tihtawp danah a thiam lo zâwk ka lo ni bawk nen a hlimna tur ka duh ber." Zirsanga aw hniam sat ri chuan ka beng a verh zar mai.

"Ni e, ngun takin ngaihtuah u la, Matei mizia chu i hriat kha, fate tih fahrah ngawt zawng ka rilrem zawng a ni lo, mu phawt la naktukah kan sawi ṭha dawn nia.." thingpui an in nge an ri rawk rawk a, zû an in zawk pawh a ni maithei.

An ṭawng thâwm ka hriat tâk loh avangin ka maimitchhing ve ta a, ani lo mipa dang hnaih tumna rilru ka pu lova amah ka thlang ta e tihna pawh a ni chuang lo. Ka awm mâwl tawp mai dawn a ni.

Ka kâwng kham lutuk inleh tuma ka'n meng chhuak chu min kuah chial chunga Zirsanga lo muhil hmêl ka hmu hmasa ber! Ka lo muhil hlek tihna a nia, a lo mut lai ka hre lo reng reng.

Kaihthawh tumin ka phar deuh ûk a, a hmêl thim ta deuh leh a khabe hmul ṭo siar siarte chu ka en reng a, ka hmuh phâkah, ka kiangah a mu leh ta chu a nia! A chauh hmel kher mai.

Ka thinlungah amah lainatna a rawn awm nghal a, ka bula mu ngam tur pawh a ni lo. Rilru natna ka lo paltlang tawh zawng zawng ka ngaihtuah kîr phei chuan a mu tur a ni lo tawp mai.

"Tho rawh.." a lû-ah ka sâwi nghâl nawk nawk a.

"Fel, khawngaihin, ka chau lutuk.."

"Ṭhutthlengah va mu rawh, kal rawh.." tih pahin ka sâwi lui leh ngat a.

"Remruatfel, ka khawih che pawh a ni lo a, hremhmun panna kawng ka zawhpui che i duh loh chuan ngawirengin mu rawh." Zâwi fiah takin zuk ti a!

"I khum a nilova, ka khum a ni, tho vat mai rawh.."

"A teuh lo mai, dârkâr tam motor ka khalh tih i hriat kha, ka thinrim nghâk lovin muhil rawh, inhnial ka peih lo." Min hnungchhawn zawngin a inlet zui nghâl a, zâm lo ve pah reng.

Ka tlawh chawrh châk kher mai.

"A ṭha e, i thawh duh loh leh ka tho thei alawm.." tiin ka tho nghâl a, ka kianga mu tur hian ka duh eih lo. Kan lo inkawp tawh pawh a ni mahna, khawngaih tho mah ila a hmâ anga awm leh tumna ka nei tawh lo hrim hrim. Kan bul ṭan danin a zir lova ngâiah neih a tum a nih hi..

Sitting room-ah Bawiha a mu bawk si a, Dintea mikhual pindanah a mu bawk nen chhuatah mutna ka siam a. A lo thlen lai khân zinglam dâr li a ri ṭêp a, a tlânchak dan tur chhût chi pawh a ni lo.

Lunglei aṭanga kan zîng chhuah hian dârkâr ruk emaw sarih vel kan tlân tlângpui a, ani hian dârkâr nga pawh a tlân tling lo nia maw le.

Chhuatah mutna ka siam ta a, naktuk office chawlh a ni a, mu âm deuh mah ila a pawi lo ka lo ti kha a nia, ka khuma a rawn mu ringawt hi kalkawngah thisen sâng damdawi a rawn hmawm zeuh a nih ka ring. Zâm lo lutuk mai.

"Mahni khum nuam deuh kalsana chhuata mu peih tlat doctor an lo awm hi thil mak a ni." Khum bul dawhkâna tui ban paha Zirsang ṭawng chu ka haider tlat a.

"A nih loh pawhin Korea-ah pêm dun ila, chhuatah kan mu deuh sek anga a nimai alawm," a tih leh chuan ka nuih aza ru hle a, ka la ngawi ta reng.

Ka mutnaah a rawn insawn leh tâk zel avangin ka ṭhu hluai a, "Min hnaih ngam tur chû i ni lo maw le.." thinrim taka ka tih chuan, "Nangmah ka hnaih lo che, ka fâ bulah mut ve ka châk alawm." Zu ti kher a!

"Zirsanglian.."

"Eih, eng nge?"

"Min tih thinrim kher tum suh.."

"I thinrim sa emaw ka tia, a va ṭha ve chutia i thinrim loh rau rau chuan hahdam deuhvin mu ang le.." ka puansin a rawn keuva nui suk chungin a rawn inthawlh ngam nia!

Ka chhângbuai peih tawh lo.

Ngawireng hian ka mu hle hle a, min khawih tum anga alan tâk loh avangin dimtê hian ka tho va, khumah ka insawn leh ta a. Chutah ngawirenga rawn tho chhuak ve-in a mutna pangngaiah a rawn mu leh hmiah a, a ṭawng tawh miah lo!

A sir tê-ah mu mah se kil theihtawpah ka mu ve thung a, a chimawm dan ala pangngai reng.

"Mafel, tihian haw tawh lovin ka awm ve nghâl dawn a nia, dâwr pawh heta ṭang hian ka kal mai ang." A tih chuan ka ngaihdan a ni lo nasâ!

"Zak ve deuh teh, kan sawi chiang tawh viauin ka hria.."

"Ka la sawi chiang ve hleinem, i voice record ve kha eng atan mah ka ti lo, i duh tâwkin court-ah min khing pawh ni la, ka hlau chhete eih lo a nia, i duh emaw duh lo emaw ka fa tih fahrah ai chuan ka nei mai ang che. Kan innei dâwn tihna a nih chu.." thum chhaka tiin a ṭhu chhuak a.

"A teuh lo lutuk.." a bâk sawi tur ka hre lo.

"Vawiinah ka nu leh pa ka bia anga palâi tîr turin ka hrilh dawn, min hnial eng ang mah la; nang, Remruatfeli hian ka fâ i pâi chhûng chuan ka thlah dawn reng reng lo che,"

"Zirsanglian, i duh duh sawi lo khân tho la, haw vang vang rawh," ka thinrim lutuk tihngaihna hre lo, ṭawng ring ngam bawk si lo chuan a hnungah ka chûm awk a, min enchiang kher mai.

"I râino thinchhia chu ka tawrh theih zêl ka ring, vawi engzât nge min chûm leh dâwn!?" A nui vei suk a. Ka va'n haw tak!

"Kal teh, kal mai teh.." ka nam sek sek a, a che chhuak duh map lo.

"Doctor Remruatfeli an luhkhung, tia sawi i duh loh chuan palai tirin kan innei ang. Min hnial ta a nih leh tihian ka zui zêl ang che, vawiin tlaiah i incheck up dawn tih lo hre bawk la," atih leh chuan rum lutukin ka melh a, lehlam ka hawi tâu zui nghat bawk.


Ngawirengin minute eng emaw zât kan awm tawh a, a muhil bik lo tih ka hria, engtik lai aṭangin nge mahni inringtawk taka ṭawng a lo thiam tih pawh ka hriat siloh! Thla rei lo te chhungin a inthlâk hlawk a ni ber mai.

Khua avâr tawh a, ka phone a rawn rîk chuan ka phu chiang kher mai.

Ka nu a ni.

"Mate, i nau thusawi hi a dik em?" Ka nu aw dam thlap ka hriatin ka thin a phû nghâl dawt dawt thei nia! Remruatpuia chuan a lo hrilh ta nge nge a nih dawn hi.

"Eng chu maw..!?"

"I naupai chungchang a sawi hi a dik em? Nizanah a rawn sawi chauhva puitling rilru fîm taka hmang ṭhin i ni emaw ka lo ti a, i pa rilru a na teh a nia, vawiin chawlh a ni a, rawn haw ang che u." Ati ta mai le.

"Dik e, ka thiam loh a ni, a mawh ka phur vek ang.." ka ṭah a chhuak ru deuh a, ka nu leh pa hmêl ka hmu ngam dawn em maw ni le.

"Mate, i la mu em ni? I nau ka lo be lawk teh ang," dam deuh zawka tiin a ngawi zui vang vang a, "A muhil a, nakinah i be dawn nia.."

"Chhuanlam siam miah lovin inpahnih khân lo haw ngei ngei ang che, i nau pawh hrilh la, tunah eng mah sawi ka tum lo." Phone a off zui hmiah.

Ka nu aimah chuan ka pa ka lainat zâwk a, min chhuangin min chapopui ve ṭhin kha a nia, tunah chuan a zahna tâwp thlentu ka ni ta ngawt mai hi ka inthiam lo takzet, tumah dem tur ka hre lova ka daisual man têl tur hi keimah chauh ka lo ni lo, ka chhungte ka tina tel vek a ni.

Ka phone lukhamah dahin ka mu leh a, Zirsangliana'n min en reng tih ka hria; mahse, ka en duh lo lui tlat a, ka ruahmanna duan lâwk a chhe vek a, 'Ka haw lo ngam chiah si lo.'


"Fel, lungngai lutuk suh, i hmâah ka ding zel ang," min kuah tumin a bân a rawn dah chhuak a, ka lo tawlh hla hrat thung.

"Nutei chungchang kha chu remchângah ka la sawifiah dawn nia, min nei hreh ngawih ngawih tih ka hre ve tho a, hnathawh mumal sawi tur ka la nei lova i nu leh pa tân makpa awhawm tak ka ni hek lo, vawikhat chiah ka mitah enin, 'Inṭhen hlen ka duh' i ti thei a nih chuan i duhthlanna ka zah sak ang che." Ati ta a.

Kei a fa pâitu hian inṭhen hlen ka cho tak tak em? Zankhat mitchhin tâwk ila nu nei lo, pa nei lo a ni dâwn tihna a nia, ka chapona leh induhtawkna hi chuan a ṭhen thei khawp mai; mahse, nautê hi ngaihtuah tel angai tawh bawk si.

Ka thaw chhuak hawk a, Zirsanga min zawhna pawh chhâng lo chuan ka melh ngai ka melh reng ringawt a, ka rilru a buai nuaih a ni ber mai.

"Nang lo chu tû hmeichhia mah nupuia neih ka tum lo, i duh chuan min hua la, mahse, i pum chhunga mi vâng tal khân inngaihtuah ṭha leh ang che." Tiin a tho chhuak nulh a

"Ka thiam lohna leh i rilru ka tihnatna zawng zawngah Pathian hmingin ngaihdam ka dil a che, khatianga ka tihna chhan che i hrechhuak duh a nih chuan ka nau te i zâwt dawn nia, ka tâ lo turah rilru ka lo pe thûk ta deuh a ni." Ti leh ka room a chhuahsan ta a.

Arini ka biak khân engkim min hrilh vek tawh, a sawifiahtu tur ber hian min la hrilh loh avangin ka haider chauh zawk a ni.

Ka fa vang hian ka kîr leh dâwn nge, ka kalsan hlen zâwk ang?

Hmangaihna tel lo sex chauh chuan tawrhna, zahna leh mualphona, natna te min thlen mêk chu a ni si a! Hnunglam hawi erawh ka va hreh si êm!

©<++++[BeckirafARenthleI]++++>®

Rapsagy chhiartu zingah mipa in tam hle tih ka lo hmu a, infel hle mai ka'n ti teh ang, :) inpuala bonus hi dah ka ni tih kan puang zuai a ni e. :|

Thank you.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:40 pm

24.RAPSAGY

Becky Rafa Renthlei

Chapter-24
Remruatfeli

Tukṭhuan kan ei laiin Bawiha leh Zirsanga an ṭawng mawlh mawlh a, kan boruak eng mah an sawi lang lo.

Ka in luahah a rawn awm ve ta ringawt chu a nia, alakah thinrimin ka rilru na viau mah se ka hmâkhua ka ngaihtuah chuan pasal nei lova awm tum rîkngawt pawh thil ṭha tak a ni bik lo a. Tin, amahin min kalsan tumna a neih tlat loh chuan ka inbengdaih ve tepawh a ngai tho si!

'Inhnial châng leh inṭhen châng awm mah se in inṭhen hlen thei tak tak a nih loh chuan tlâwm zâwk an awm te pawh a ngai ve ania' Nutei nen an inṭhen laia ka fuihna khâ ka hrechhuak lo thei lo.

Mihring ve ve kan ni a, tisual thei kan ni, bawhchhe thei kan ni bawk a, kan famkim lohna târlangtu a ni miau si a.

"Mate, ka nu-in lo haw phei rawh u atih kha i hria maw?" Bawiha min biakna chu ṭawngkâ a chhâng lovin ka bu nghat a.

"I car ka khalh anga, Zirsanga nen in inphur dawn nia, ani paw'n eng mah tih tur a nei rih chuang lo, an dâwr nghâktu tlangval te an awm thova invoice leh Challan an lo thawn dâwn tho te chuan kan haw rual vek khâ a ṭha mai." Ti lehin, an pahnih chuan an inmelh zauh a.

"Zirsang, i nu leh pa'n an hre tawh a maw!?" Ka chaw thlêng sengin ka thova inti chângkang ho anga zînga chaw ei lova theitui leh eng emaw tih vela inhnawhpuar hi ka rilrem zawng a ni ve lo.

Doctor ka ni a, eitur ṭha leh chawhmeh hrisel ka ei ve nasa tho a, buh nge nge, tlêm tal ei hi a finthlâk a, kan taksa-in a ngeih ber.

"Hria e, kan inbiak fel angai a nia, keimahni ringawt inngaihtuah thei kan ni lova, kan fa lo la piang tur hmakhua kan thlir tel a ngai bawk, i rilru a nâ tih ka hria; ka dik lohna leh ka fel lohna hmuh kânin bul min ṭanpui leh thei a nih chuan i rilru natna tura awm ka tum tawh lovang," ka nau hriat lai ngeia Zirsanga ṭawng chuan ka thinlung a dek zar mai.

Luhlula inṭhen hlen cho âr tura ṭha famkim ka ni bik lova, amah zilhtu tur leh a nunkawng rahbi remsaktu tur zawk leh khalh ngîltu tur ber hetia awm tlat hi ka ti lutuk deuh ta em maw ni!

"Ni e, ka nu leh pa hnen kan thleng phawt anga, kan sawi ṭha dawn nia," ka ti ve ta sap a.

"Mate, i thutlûkna a pawimawh ber, nang meuhin nau i pâi a nih chuan Zirsanga lakah rilru i pe hlê tihna a nia, eng mah zahthlâk leh tlâwmah la suh, kan hmangaih che a, i tâna ṭha tur kan ngaihtuah vang zawk a nia; Zirsang, nang pawh helaia ṭha taka ka lo dawnsawn na chhan che chu, ka û i hmangaih tih ka hriat vang a ni; ka û i kalsan danah khân thinrimin kut thlâk hial che mah ila ka demawm miah lohva nia; mahse, Sangpuia kaltlanga thudik ka hriat vângin i lam ka ṭang mai a ni e." Puitling taka min zilh duntu Remruatpuia hi ka nuṭâ dik tak a lo ni e.

Chumi hnu chuan an pahnihin chaw eina an sengfel a, kei erawh ka nawmsam chiah loh avang leh thawmhnaw siam ka ngaih avangin min âwl a, inrem angin lang hluai lo mah ila kan boruak a zângkhai ta deuh.

Mahse, a hmâ anga inbe bawrh bawrh ang tur 'policy' kha chuan ka awm ta lo. A be hmasatu nih kha tlâwmah ka la deuh tlat nia!

Lalthanhawla fanu ka ni lo a, a mo lah ka ni hek lo, Remruatfeli vety doctor khâ ka ni ve mai a, kan tum tâwk zel 'Pathianin min pe' tih pawm thiamin leh ka lo daisual tawhna mipa in min kalsan tum lova ka lam a lo hawi leh a nih chuan tlâwm zâwka awm châng tepawh a awm a ṭûl ve bawk a nih hi..

Piangthar hluahin mite anga ṭha vul chûk ni lo mah ila, ataka nunpui theih a awm reng laia pênsan tum ṭâlh hi a Pathian thû lo deuh chuan ka hre ve a ni.

Kan hmangaihte'n min kalsan châng a awm a, min hmangaihtute kan kalsan hun pawh ala awm ang; tunah erawh ka hnêna lo lêt duhna rilru pu-a tlâwm zâwk nih hreh lotu chu kei chang nilovin Zirsangliana pawh a ni ve tho tihna a nia.

"Fel, ka motor-a chuan chû i hreh viau em?" Wardrobe bulah lo dingin ka thawmhnaw thlep lai min lo en ve reng a.

"Hreh lo ve; mahse, i patea hnenah car dah la, kan pathumin kan chuangho mai dawn alawm," ka tih chuan, "Lêt leh nân ka mamawh ka ring deuhva inrualin min phur phei leh dawn nge dâwn lo tih pawh ka hriat si loh." A nui suk a.

"I chhe mai e a.."

"Chhe ve tê mah ni ila ka hmêl ang pu mi he khawvelah hian pakhat tê mah an awm bik miah lo a nia.." tiin ka kiangah a rawn ṭhu a, ka dâra vuan chung hian, "Incheck up hmasa la chumi hnu-ah kan phei chauh dawn em ni ang?" Ati ta a.

"A ngai lovang, ka kalna ala rei lova damdawi ei ṭhat chiah ka hmabâk.."

"A hrehawm leh harsa chin zawng zawng nangmaha i tawrh vek ka phal bik lo tih hria la, 'a nuamah pawh a hrehawmah pawh, hrisel pawhin bawrhsawm pawhin' tih zawng zawng chham tel theihna hmun ngeiah ring lêng lâwnga chham ka châk teh a nia," tiin a nui hawk nia.

"Kal mai teh, i chhe zeh zuah lutuk.."

"Engtikah nge ka hmingpuma min koh leh ang le, min ko khât ta lutuka a zia lo ka ti.."

"Zirsanglian, chimawm viau zel suh.." a sawi zawh rualin ka vîn hlar a, za lutuka nuiin, "Tikhân a fuh ta chiah e.." ala ti zui a..(h)

Chumi hnu chuan ka car thar ngei maiin kan inphur chhuak leh ta. Kan hnungah Bawiha'n min lo chhawm bawk a, a nuam ve pah reng.

"I Bike khâ i hralh ta em?" Min rawn en zauh a.

"Hralh ta lo, tuna ka car-hi ka nu leh pa lei a nia, min present a ni ber ang chu; mahse, ka hlawh hmun thuma ṭhena hmun khat erawh an pualin ka dah hrang zêl thung." Ka tih chuan, "A ṭha reng alawm, a khalh pawh a nuam khawp mai." Ati ve mai a.

"Kan hlawh chhuah a tlêm emaw tam tak pawh nise nu leh pa hnênah pe vek phawt ila kan mamawh dîl chhuah a harsa lo zawk, in ka luah hmâ kha chuan ka tiziah ṭhin a; mahse, tunah chuan ei leh in a lo ngai ve bawk nen 'nangmah intuamhlawm nân hmang rawh' min ti a,"

"Kei chu keima pualin eng mah ka nei lo, ka bike hi a nimai.." inthlahrun hmêl taka atih chuan, "I nei ṭêp tawh alawm, thawh tur te zawng a tam lutuk, tumah nei sa an awm hleinem, i patea dâwr i enkawl tawh a, rilru i neih chuan rethei lutuka awm nachhan tur a awm miah lo. Hausak kan tum nghâl hian a theih mai si lova beidawn a awl teh mai a nia," Ka ti a.

"Nutei chungchâng kha i hre ve tiraw!?" A sawi zâwng ringawt pawhin a lawm lo tih a hriat ngawih ngawih a.

"Hre zîktluak lo ve.."

"I tân ngaihthlâk a nawm loh ka ring tho nâin engkim a hunlaia sawi vek hi a ṭha ka tia," tiin a sawi ta zar zar a, Nutei pa in atih dan vel a sawi lai phei chuan ka lo thinrim ve nasâ!

"Sawi tlang mai la ṭha tur a nia, thil hrethiam lo rual pawh ka ni lova, â mahse, ka thinrim thovang.." ka'n ti leh rih a.

"Ka ruahman dan ka lo hrilh lo che kha ka inchhir rêng a ni, ka status leh whatsapp-a ka lo thawn zawng zawng che kha en ni la chuan i hrethiam ang maw le.."

"Ka en peih teuh lo, ka thinrim zia kha e, thinrim pingling tak ka ni.." duhthawh lutuka ka ṭawng chuan a nui suk suk a.

"I luhlul dan namai lo lutuk khâ ka mangan pui ber mai," a kut lehlam ka malchungah a rawn nghat a, "Eng pawh i chungah thleng se ka phatsan ngai lovang che." Zâwi leh fiah taka tiin kawngpui ngun takin a en a.

'Ka hmangaih che' tiin inhrilh tawn lo mah ila kan rilru erawh a thunhmun ṭan ta.

Thenzâwlah thingpui in turin kan châwl ta a, min ngaihsak teh vût hran lova; ka duhdan hriain midang hmuh lai chuan min be hûrh lem lo.

"Haulawngah bazar ve zawk u lâ, hauh hmabâk i ni si a, chawhmeh lei hâw ṭeuh rawh u.." Zirsanga a nui suk suk a, ka va'n ngei tak.

"Nangpawh an hau ve dâwn tho che, nang phei chu aruala kohhranin an thunun lo che kha lâwm hle teh.."

"Tv.Zirsangliana leh Nl.Remruatfeli chu nulât tlangval kawnga an chêtsual avangin thunun an ni e. Tia an puan dâwn hunah ka rawn inkhawm ang." Ka beng bulah a rawn tisup a, ka zak lâwk chem chem thei nia.

"Zirsanglian, ngawi hmiah rawh.."

"An ti dawn sia lawm; mahse, lungngai reng reng suh an sawi rei peih dâwn chuang lo em mai. Min thunun nawn sek dâwn lah a ni hek lo." ala ti tak deuh deuhva.

Kawng tluanin kan titi phei a, inneih lam erawh kan sawi lang lo, kan chhûngte ve ve in an hriat tawh si chuan eng emaw tak chu kan hmachhawn dâwn chiang alawm.

Zirsanga te khua kan thlenin an inkawtah car- a tiding dat a.

Ka chhuk lo mai dâwn nge, thil tih chi lah a ni si lo, kha zawng zawng ka lo tâl ve-na hmun a ni a, chhuk duh lo mah ila min ko lui dâwn chiang sa.

"Mafel, i chau em?" In chhungah Zirsanga a lût hmasa ber a, kei leh Bawiha'n kan zui lût a, an fapa be hmasa lova kei min be hmasa ringawt pawh hi ka zak titih der nia.

"Chau lo ve, in ṭha maw..!"

"I induh kan ti viau a; mahse..."

"Nu, sawi thui awih loh.." Zirsanga aṭawng nghut avangin nu Zuali a nui var var a, ka va zak si êm!

Arini lah chuan chîk mangkhengin min en a, 'Kurta' ka lo ha hlauh chu ka vanneihna hmahruai a ni mahna. Thawmhnaw mar lam ka hâk chuan ka confi hleithei tawh lova miin min ringhlel ang tih hlau reng rengin ka khawsa ta chu a nia. Ava Remruatfeli lo deuh ta ve le.

"U Mafel, zanin riak ve u lâ.." Arini bulah ka nau a ṭhu a, he mite pahnih hi an nuihzatthlât ngawt mai, inbe em em si lo hian an inhaw miah lo. Mahse, ngaihzawng annei ve ve tho bawk si!

"Riak lo ang, vuak hmabâk a nia.." Zirsangliana ṭawng dan avang chuan an nui vek a, rum taka melh pah hian, "Amah hi hlap er hmasa rawh u.." ka'n ti chiah chu Bawiha za lutukin a nui huk a, ka nuih a za ve reng; mahse, ka insûm thung.

"Arin, i pa ko la, room-ah lo va inthiarfilim ta che.." nu Zuali'n atih chuan, 'Ka lokal ve dâwn,' tiin ka nauvin a zui ve nghal a, kan chungchâng sawi an tum tih hrilh hranpa kan ngai hauh lo.

Pa Hriata a lo chhuak ve bawk a, min chibai hnuah,"Ṭha tê tê-in in inzui emaw tih laia heti hi in ni ta si a, Mafel, engtikah nge palâi kan lo tirh ang?" Dam thlapa tiin min en deuh vang vang a.

"Ka hre rih lo, in kan thlen ve phawt loh chuan.."

"Palâi han tihah inneih lam sawi tumna nilovin i nu leh pa hnenah kan fapa in inpawi a sawi thu-ah ngaihdam dilna ang chi ka tihna zâwk a nia," ati leh a.

"Pa, chutiang eng mah a ni hian a hre ve lo ang, thleng thla phawt se, chanchin min lo hrilh mai dawn alawm, ralkhat aṭanga a nu te paw'n hre ve chauh an nia.." Tiin Zirsanga'n min lo ṭawng khalh vat a.

"A nih chuan nangmahni kutah engkim kan dah dawn a nia, ngun takin inngaihtuah u la, thil ṭha hrethiam rual inni ve ve tawh bawk, keini chuan nautê tih fahrah kan remti dâwn miah lova chutih rual erawh chuan inthutlûkna kan zahsak bawk che u tih inhre dawn nia.."

Chumi hnu chuan thingpui kan in leh tê tê a, nu Zuali lah chuan, "I chêr lutuk reng reng, khatiang tur a ni lo a nia" alo ti ve chhên bawk a. Anni nupa hi chuan innei ngei se min duh tih an chêtzia aṭangin ka man thiam ve mai.

"Mafel, arang lamin chanchin min lo hrilh dâwn nia," Car-a ka luh dâwn thlengin ka kutah a vuan a, a hmâa ka hawsan dâwn lai ang vel kha a ni.

"Nia, ka lo tum ang.."

"An hau che pawhin chhâng reng reng suh ang che, a ṭûl a nih leh ka rawn hruai hreh miah lo che a nia," ati ve fan a. A khawngaihthlâk angreng chu ka ti.

An khua kan chhuahsanin tlailam dâr thum ari chiah a, in thlen hun ka huphurh ngei mai.

Zirsanga sawi vang kher pawh ni chuang lovin Haulawngah kan bazar ve ta a, ka nu leh pa hmêl hmuh ka va'n hreh ngawih ngawih tak.

After 4 hours

"Mate, hau eng ang che mah ila a sâwt tawh chuang lova engtia awm zêl nge in tum?" Ka pa aw dam ruih chuan ka ṭah ati chhuak e a.

"Ka hre lo.." ka ti sap a.

"Puitling, chhia leh ṭha thliarthiam i ni tawh a, hundanga ka lo sawi tawh ṭhin ang khân pasal nei lova awm tum ngawt pawh a fel ber lo a nia.." atih zawm leh chuan chhân ngaihna reng reng ka hre lo.

"Zirsanga pawh misual a ni hran lo va, an chhungkaw boruak engkim hretu ber i ni bawk, amahin inneih a duh reng reng em?"

"Chutiang eng mah kan la sawi lo."

"Tunah thlathum a tling tawh a ni lawm ni?" Ka nu min zawhna chu chhângin, "Aw.." ka ti leh a.

"Eng pawh nise in pahnih in pawimawh ber, in nupui pasal tur chungchângah inrawlh kan tum em em lo, misual tak leh drugs addict anni te a nih ngawt loh chuan.."

An rilru na mah se ṭawngkam khat mahin min hau lova min zilh zing malh malh khawp mai.

Ka pa in, "Kohhranah inreport ran angai dawn a, Pathian hnenah pawh ngaihdam dîlin ṭawngṭai ang che' ati nghe nghe.

Zirsanga'n min lo call-in chanchin min rawn zâwt sek a, ka hrilh vek hnuah, 'tunkâr tawp hian palâi lo tirh kan tum dawn nia, i rilru tihah lo la, i hmâah ka awm zel ang' tia min ṭawng thlamuanna chuan ka hah atidam sawng sawng sawng thei nia!

Zirsangliana
3:00 Pm

Ka nun pik lutuk khâ a kiam duak tawh a, nizanah Mafeli nu leh pa hnenah palâi kan tîr ta kha a nia, amah nen inneih lam kan sawi ri miah lo. Mahse, kan chhungte zâwkin a rang lama inneih ṭha a anhriat avangin an hmanhmawh chûk tawh mai.

Ani pawh nula senior a ni chho mai dâwn a, a râi len hmâ tak tak hian insawifel mai nise tih khâ an duhdan a ni. Amah Mafeli lah chuan eng mah a sawi ve lêm hlei lova keimah hi ka phûr deuh ber mai.

A nu leh pa mi â ni hek lo. Zankhat riak tala zin ve turin min sâwm a, chu erawh ka huphurh deuh. Remruatfeli vang hian 'Salvation camping tenau' ka hmachhawn zing khawp mai.

A nu leh pa an ṭawng tlêm si a, Bawiha ka kawm ve ber lah chu Tukinah Mafeli chawlh dilsak turin Aizawlah a kal daih bawk si.

 hah! Mâkpa interview hmachhawn tur hian 'Vikings hairstyle' put a rem chiah ta lo chuan ka hria, Sangpuia kovin ka sam ka nawr ṭhattîr ta a.

'Mama, in inneihna tur atana sum hman ngai pawh a tam tham dawn a nia, hotê-a tih ngawt kha kan duh dan a ni lova kan fapa upa zâwkin nupui i nei ve dawn ta chu a nia, Pathian tel lova nupaa insiam hian rei a daih dawn lo, chuvangin khawtlângah sual angin lang bûr bûr lo mah ula chhungkaw khaiding tura Pathian i belh tlat angai a ni tih theihnghilh ngai suh ang che.' Tia ka pa min zilhna chuan ka ngaihtuahna ati thui khawp mai.

Hmun danga awm reng reng ka nih vang leh Nutei vâng khan kohhranah ka tel tam lutuk lova tunah chuan kohhran bêl ve tlat tawh turin rilru pawh ka siam ve hret hret chu a nia.

Tun Nilai zanah hian arualin thunun tur kan ni bawk a, chu chu kan nu leh pa te thu pawhchah dan a ni. Kohhran dân khatna kan tlin ta si lova Hall-ah inkutsuih kan tum ta chu a nia.

A hun leh nî tak la ruat fel chiah lo mah se muangchan an tum miah lo! Ka nu leh pa an hmanhmawh dun khawp mai.

Palâi vawihnihna an kal leh hma ngeia Mafeli nu leh pa hmu hman turin ka nu leh pa'n min nawr sek a, an va han phûr si êm!

"An fanu neihchhun a nih bâkah fa û ber a nia, an duatin an hmangaih hlê dâwn tih hre sa bawk la, i zuk ti lunghnur ngawt ang e." Ka nu'n zuk ti ṭâlh a.

"Hey, i lo chhuk dâwn ta em?" Mafelin min rawn be ve tlat a! In rem angin awm tawh mah ila min lo call hmasa ngai tawh lo hrim hrim; ka call erawh chuan ṭha takin min chhâng ve zel tho.

"Dâwn e, zîngah ka rawn chhuak ang, tun ṭum chu min lo hmuaktu an awm ngei ka beisei."

"Hus! Zirsanglian pâwnah ka chhuak duh teuh lo." Zu ti tlat a!

"A ho lutuk, eng mah zahthlâk a awm lo, tunge ka lo hmuah ṭhin khâ? Bawiha chu a ni lo phawt a.." ka tih chuan, "Chhe hlê suh, kan in ang lo lutuk," ati hlar a, a vîn thei mai sia e..

"Ka chhe lo lo.." za lutuka ka nui chu a run ngáng a ni ang, "I chhe lo lo lo.." ani pawh a nui ve tho!

"Min lo hmuak rawh aw, zanah khawiah nge ka mut ang?"

"Zirsangliana eng ati nge i chimawm em em mai le?" A thaw zui halh a,

"A nih leh le, ei châk i nei em?" Tia ka zawh chuan a ngawi rauh rauh a, chutah 'Pudding siam tur khâ lo lei leh la, chuan Chakai a awm chuan lo hâwn rawh aw.."

"Pudding chu ka lei thei mai ang a, Chakai kher zawng a chiloh lutuk, ruahsur laia siam tih vânga inchah kher te chu a..naute chilthli ngah deuh i duh em ni?"

"Awi! I sawi thui thei si..!" Tiin a nui ta hak hak a, kan inṭhen hnu hian za taka a nui ri ka hre ngai mang tawh lo kha a nia. A va nuam si êm!

Nidanga kan inbiak ai chuan a boruak a zangkhai fê zawk!

"Khawi room-ah nge ka mut dawn?"

"I mutna turah buai suh, ka room lehlamah i tân hmun a awm e.." atih zawm leh zat nia!

"Tu emaw pindana luh rûk tezawng ka expert tawh chiang êm mai,"

"A teuh lo nasâ, i mumang chhâwn thumna aṭangin harh rang mai rawh.."

"Yes, Doctor, Vawk no neihna hmunah min hruai tawh loh hrâm ka beisei.."

"Hruai lah lo ve, chimawm i chhuah vaih chuan i 'englo' ka la hreh miah lo, Vawk mah kan lâk sak alawm le.. ih.." a nui ta vak vak a, a sawi tum loh zâwk a sawi chiang!

"Remruatfel leh..!" a thusawi lâi hmêl tur ka ngaihtuah phei chuan ka nuih a za ve hlê tho.

Rei ngial kan inbiak hnuah nui suk suk chungin kan dah ve ta hrâm a, Lalfaka'n 'Vety doctor te chuan sawi hreh vak an nei lo, an frank teh mai a nia' atih khâ ka hrechhuak zawk.

Nupa tur anga ka indah chhin phei chuan keimahin ka nui leh ngawt zel a, 'Zirsangliana of Vety doctor pasal' mumang chhâwngthumna mang ang mai ka ni tak tak alawm le.

'U Mafeli i kherh thlu ve ta chu ania, i tactic a ṭhing ngawt ang' Sangpuia ka room-ah a rawn lût a, Timberland pheikhawk ka hawn sak kha a bun deuh ngei bawk a, a dân pangngai angin a rim pawh a tui leh hlê.

"Tactic vak angai hleinem, ka zei alawm.."

"I tâlbuai ve khawp kha maw! Zanlai lâiah i bialnu hlui te kawmchârah min tîr a nia, khâ voice record keng khân ka zuk lêng dawn em maw ni? Ramthana hmêl khu ka ngei chi.."

"Lalsawmthangi tenawm lutuk kha ka la ngaidam thei lo, Mafeli hi lungawi lo hlen se chuan ka chingphar nasa ngawt ang." Ka ti ta a.

Nutei nen vawikhat mah kan inbe lo mai nilovin kan inhmu ngai lo hrim hrim, mahni cousin mutpui duh khawpa tenawm a ni ang tih rin ngaihna lah ka hre hek lo.

Ngaihdam min dîl ngawih ngawih pawh nise, Pathian ka nih hmâ chuan ka ngaidam duh dâwn em maw ni! Mafeli tân lah ngeiawm tâwpin a che bawk a, anni nupa êl phâk loh khawpa chhungkaw awhawm din ngei hi ka tum ruh tlat a ni.

Kan khuaah na nâ na chuan ka chanchin leh Nutei chanchin an sawi khu chûk reng a, makti tâwk lah bo lo!

Lungleia chhuk tur ka ni bawk nen ka insiam ve zuai zuai a.

Google aṭanga naute pic cute zet ka download chu status-ah hmangin, 'A nu anga confi, mahni thutiama ding fâ nei ngat ila chuan ka nui reng ang' tih ka dah a.

"Tunah khân lo nui lâwk rawh, a chhan chu i nei dâwn lo tlat a, a pa anga zuanglâng tur ka pâi mêk.' Remruatfeli min reply na ka hmuh chuan, 'Kan siam lâi khan rilru ṭawngṭaina ka nei a, ka sawi ang chiah khi a pian ka ring' tiin ka chhâng leh a.

'I rilru ṭawngṭaina dum zet khân i pa Hriata inchung a thleng lo hlauh..'

'Ka hrilh dâwn a nia, pa Hriat te khâ tih ṭulh ṭulh tawh loh tur aw..

Smiley lei chhuah lai lem a rawn dah tlar tuar nia!

Ran Doctor pasal ni tur hian ka tlin êm ang chu, ran lah ka ngaina dêr si lova..

'Ka tih ngai lohte tih a ṭûl si ṭhin' ka'n ti deuh reng mai ang tih chu hlauhawm tak a ni.

Ka nupui pawh a nih hmâ hma-in ka lo suangtuah vêl chiam chu a nia, buaina dang ka hmachhawn tawh loh hrâm ka beisei...

Min rawn mangṭha ve ngial a, kan mengrei phian!

Ka puzawn la nimai turte hian min lo lim hrep lo turah ngai ang..

##
Mafeli te in kawtah Bike ka hûng deuh dat a, tu hmêl mah ka hmu lo chu ka hrilhhai ve angreng!

Ka kal hmasak dan nen a inang lo ta lutuka ka zâm ve hial mai ka ti. Min lo be ṭha duh lo a nih phei chuan sawi tur ka hre tlêm ropui mai si a, a zia lo ngawt ang.

"Zir, hetah ka awm.." Garage kil sîrah Mafeli a lo ding a, sâwn pâi a nih tlat avangin a tân pâwna chhuah a zahthlâk rih ang tih hrethiam tur ka ni asin le..

"Min hmuaktu ka nei ta lo emaw ka tia.."

"Ka nghâk char char che a, helai bâk ka pêl ngam chiah si lo va.." tiin a nui var var a.

"U Mafel, inpa tur chu em ni?" Tlangval naupang deuh a rawn kal phei a, a nui sâng lehnghâl. Engtin nge a chhân tehreng tiin ka ngawi reng a.

"Ka vêl palh ang che.." tiin zuk chhâng a..

Ami biak pa lah chuan nêl deuh hian, "Min hrilh loh chuan i bike ka sil sak tawh miah lo ang che.." ala ti zârh zârh a, "Siltu tur an awm tawh dâwn alawm, hei..." tia Mafelin min lo en chuan chu pa chu a nui nasa zual sauh a.

"Sil sak duh miah suh, a duh uluk si, a lo sawi ve chhên mai ang," tiin min rawn chibai ta a. A fel hmel reuh khawp mai.

An inah kan inzui lût ta a. A nu leh pa an awm lo hlauh!

'Ka pa mit entîr turin an kal a, keimah chiahin ka awm,' atih chuan, 'A nuam daih zâwk' ka lo ti hmanhmawh a.

Chaw ei min siam sak a, a dân pangngaiin a ṭawng tam lo leh khawp mai.

Kurta sen no inbelin slipper pan thlap a bun a, a sam a vial tawm vek bawk a, make-up engmah a hmang lo bawk nen alang fâi sar mai.

"Fel, i inchhîr em?" Tia ka zawh thut chuan min chhâng lawk lova. A hnu fê-ah, 'Inchhir leh mai mai turin rilru ka siam ve ngai hleinem," ati ta sap a.

"A nih leh min hmangaih em?"

"Hmangaih lo che ila inneih ka duh hauh lo ang, a chhan chu nautê tihvel hian min phuar tehchiam lo, pakhat na nâ na chu Pathian zarah ka enkawl thei ngei ang," inringtâwk zeta tiin ka mitah tak min en a.

"Nangmah zawk hian min hmangaih em tih ka hriat tlat loh avangin ka thlâ a muang lo."

"Ka hmangaih vâng che leh i pum chhung ami pawh ka hmangaih tel avangin ka ûmzui zel che tih i hre lo em ni!?"

"I sawi loh chuan hre mai bik lo e,"

"Fel, min ring tawh lo pawh nila ka dem miah lo che; mahse, min rinna tur a nih phawt chuan eng pawh tih ka huam.." ka tih chuan, "Ka ring lo che tih ka sawi si loh.." tiin ka chaw eina vel a seng a, a ṭawngkam hrim hrim hi ngâiah ka neih tawh tlat avangin hmeichhe dang anga thluaithlum chiam turin ka beisei lo hrim hrim.

Thlêng asil fel a, ka inbualna tur min dah sak thlap bawk a, ka room tur min kawhhmuh hnu-ah, a room panin min luhsan ta a.

A nu leh pa lo haw hnu chuan nupa nun leh chhungkaw inrelbawl dan min hrilh hrep a, a pa-in, 'In bul ṭan dan fuh lo deuh mah se Kristian chhungkaw dik tak din tur hian inla tlâi miah lo a nia, kan hmuh phâkah awm lo mah ula englai pawh hmu rengtu che u Pathian nung a awm tlat avangin in nun fimkhur pui hlê ang che u..' ati ta a.

Nupui mawhphurhna leh Pasal mawhphurhna te min hrilh tel bawk a, ka hlâwkpui ngei ka beisei.

'In hrang chang tur in ni a, Matei nise hnathawh nei lai a nia, nangpawh dâwr enkawl i ngai dawn bawk a, inhau châng leh lungawi loh châng inneih pawhin ngaidamtu thinlung put zêl in tum dawn nia' a nu in ati dam thlap bawk.

Inneih hun atan thlathar kan duh mai em tih min zâwt a, a rang lama tih zung zung a ṭha tih thlengin an sawi tel nghe nghe.

"Mate, Zira a riah dawn chuan i nutei te leh i pu Sanga te in tlawhpui ve la.."

"Ka chhuak duh teuh lo, anmahni lo lêng turin sâwm mai rawh," Mafeli'n ati deuh tlat a, ka pawmpui hmiah.

"I va'n ho mai mai tak, innei lo tur pawh nihlei lo.." tia a nu a ṭawng barh barh lai chuan, "Kan inneih hunah kan la lêng ve ang chu," tiin ka lo inrawlh vat a, a sawi zui tawh bik lo.

Nilêng deuh thaw-in room-ah kan tawm a, mitmei vên tehvak a ngai tawh lo bawk nen 'nuam singkhaw' ani mai.

A khât tâwkin kan infâwp zauh zauh a, a bâk eng mah tihpui duhna thlarau sual ka dawng tawh lo.

Zirsangliana ka nih chhûng hi chuan mahni incontrol thei mipa nih ka tum bur tawh.

"Inneih hmâin lo zin ve la.." khumah a ṭhu a, kei ka mu thung.

"Ka zak e a, bâkah tute emaw khân min lo melh leh vak vak palh ang," a'n ti ve ngei a..

"An melh nasa mah mah ang che tih chu ka hlau deuh,"

"Hus! Zirsangliana nupui ka ni dâwn ta chu a nia.." a rawn ti chhuak hluai a.

"Eng nge? Min neih loh hlau a phi chung ai chuan min neih hlau ngawih ngawihtu atel lova ka awm theih miah loh khâ ka tân a hlu fê zawk." Ka tih chuan, "Tunah mahni insawi khawngaih thlâkna hun kan hawng leh ang.." nui sak chungin ati ta a.

Ka Remruatfeli dik tak, fiamthu duh ru riau khâ a rawn lang ṭan ta a.

Ani ka hmangaih hi ka tisual dâwn miah lo.

A rilru tluangpurh leh sak ru riaute hi hmeichhe dang neih ve loh a ni a, chapo thei khawpa hmeichhe zahawm leh mahni invawngfel a ni bawk.

Engtikah mah ka thlah phal dawn lo tih ka thinlung hian a hria a ni.

Kan fa khawvel êng hmuh châka a nu pumchhunga awm ve mêk hian a nu mizia ang pu mawlh teh se...

©<++++[BeckirafARenthleI]++++>®

Zanin chu ka bonus lo ang aw, chuan chuan a tâwp kan khâr ve lek lek tawh a; atâwp thut dâwn lo a nia. Chhiartu tam zâwkin inbox lamah leh call-a min ngenna angin kan dam a, Pathianin rem atih chuan 'SEGUNDO' Mizo story-in chhunzawm kan tum tum dawn nia..

Min chhiarsaktu zawng zawng leh Kawmen turu buru dah hrâm hrâm ṭhin ho kha in fel si. Lawmthu ka sawi nawn leh e.

Becky Rafa Renthlei
(BRR)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 23rd, 2018, 8:40 pm

Ka kut ka ti nâ a, zanin chu ka edit tam lo khawp mai. In mi hriathiamna ka ngen e. Mahse, zan danga ka chapter zât deuh thuak a ni tho aw.(BRR)

25.RAPSAGY

Becky Rafa Renthlei

Chapter-25
Zirsangliana

Zanriah kan ei laiin Mafeli pa, pu Rozuala'n, "Zira, engtin nge ni ang aw, Matei inluah lah saw a zîm nasa mai si a, damtêa in innei tluang thei a nih chuan chhungkuaa chênna tlâk pawh va ni suh.." ati chuar chuar a.

"Nia, kan sawi tawh thova keimahni in pui zawkah kan awm law law ang chu ka ti, ka patea enkawl a ngai tho bawk nen ka tân a awlsam zâwk a, Mafeli te office a hla lutuk hran lo bawk nen." Ka tih chuan, kan doctor in min lo kheuh zauh a.

"A ṭhat chu, palâi lokal leh hunah a nî kan ruat fel anga, khawmuan vakna chi a ni tawh lo a nia, Matei pawh a rit telh telh anga, mihring chin hriat a ni lova inpuahchah ran a ṭha.."

Kan chaw ei chhungin thil pawimawh an sawi zar zar a, nu leh pa hawiher zâu tak Mafeli hian a nei a ni. An fapa ang êmin min en lo mah se la, an fanu tân min iai lutuk lo a ni tih ka hriat phah.

Zanah pawh inlêng an nei neuh neuh a, thingpui lum angaih vângin awm dunna hun kan nei tehchiam lova, a thingpui siamna lehzela zui kual zel chi ninghal lo chuan..

"I duh chuan mu hmâ daih rawh, naktuk chawhnu lamah chauh i haw chho dawn nia," Mafeli ka kiangah lokalin ṭhuthmun a rawn rem ve a, nu leh pa hmuh laia inkuah leh inti bîk riau anga lan te kha thil mawi a ni lem lo tih hriain an titina kârah ka lo inrawlh ve zauh zauh a.

"Mut mai ka duh," tih pahin ka tho chhuak a, mitmei vêng reng chunga ṭhut dun te zawng a nuam lo chiang em mai!

Rei lo te hnu-ah nupa kan ni ve dawn chu a ni sia, ka rin phâk bâkin a thleng rang mah mah. Chu erawh ka lawmthu tak a ni si.

Khawvar dâwn hnaih lamah ka zun chhuakin min tiharh a, dimtêa thovin toilet lam ka pan a, ṭawngthâwm hre thâna ka inhriat chu le!

Ka'n ngaihthlâk ngun deuh tâkah chuan ka hre dik tih ka hre mai.

#I sawi dik a nih chu, tunah inbiak hun pawh a ni lo. Mafeli aw a ni! Tun ang hunah tunge a biak ang?

Zung hmasa ta lo chuan a room lamah ka phei ta a, a sawi zawng zawng hre vek lo mah ila eng emaw zât chu ka hre ta tho.

#Pasal nei turin ka inruahman tawh, Mizoramah i lo lêt tih pawh ka lo hre reng reng lo.

Khawvar hmâa rawn be ngam tur khawp khawp chu a tân mi eng emaw tak a ni ngei ang, ka ring sual viau a nih loh chuan mipa a ni ngei bawk ang.

'Thil hrechiang hmasa lova thinrim ngawt loh tur' ama sawi bawk khâ ka hrechhuak leh a, ka chhungril ti deuh ṭung erawh lan chhuahtîr ka tum lo.

Eng mah hre lo ang hmiaha awmin ka zun zawh hnu-ah ka mu leh ta a, eng lai mahin mipa lakah ka ringhlel ngai lo, amah hrim hrim hneh tur pawh hian ṭan khawh a ngai tawh a nia, mipa dang an lo lang a nih vaih chuan ka nuih a za miah lovang.

Ṭawngṭai inkhawm dâr rîk rualin ka tho chhuak zui ta daih a, a nu leh pa an kal dawn tih ka hre miau alawm.

"I tho hma hlê mai i muhil ṭha meuh nange?" Mafeli nu'n min zawh chuan, "Ka harh laklawh a.."

"Kan inkhawm dâwn a i duh ang ang kha lo ei/in mai rawh.."

An chhuah hnuah thingpui ka inchhuan a, awmpui pakhat tal neih ve awm tak! Upa lam annih bâkah nei lo zawk zawk anni chuang lova Mafeli hi a che taima êm a inchhungkhur pawh alang fai nimaiin ka hria.

"Tho ve tawh la.." Khumah meng reng chung hian a lo mu a, ka thâwm a hre ve reng awm sia zuk mu tlat a!

"Ka peih rih lo.."

"Tho la, exer ka lâkpui ang che.." thlêm titihin a kiangah ka ṭhu thla a.

"Ka peih rih lo, nakin deuhah ka lo tho ang," a vîn hauh lova; mahse, a mood a ṭhat hmel tehchiam loh!

"Tukina lo call tu che kha tunge?" Ka zâwt ta nge nge a, ngawihbo pui mai ka tum îkhaw lo mai.

"Ka ṭhianpa a nih kha.." ati deuh hmak a.

"Tu i ṭhianpa maw!"

"En teh Zir, zingkâr aṭanga zawhna inzawh reng chu a ninawm e," tiin a rawn ṭhu chhuak a, henu hian min hrilh chian tumna a nei miah lo.

"Sawi a har viau em ni, khawvar hma em em a inbiak te chu, i hna thil ti dawn ila thil awihawm ninghal lo chuan.." Ka tho vut a min chhânna tur pawh nghâk lovin ka chhuahsan ta a.

Min hrilh duh loh tlat te chuan zawh zawh thu awm bik suh.

A châng hi chuan a mize ngêng lutuk hi ka ngei lek lek zêl nia, a râino thinchhia chu thuhran, zawh ngawih ngawih pawha min chhân duh miau loh te chuan ka zâwt nawn tawh awm lo em mai.

Tumah biak lumlâm tur awm hek lo, Bike la chhuakin Maengi te vêngah kal ka tum ta a, ka bialnu, ka nupui la nimai tur a ni a, hlim taka awm dun a hun tawh tehreng nen a duh hunah min be ṭha a, ka ngaih dan a ni ta vak lo.

Chanchinṭhazoengi te in ka thlenin an lo tho kim vek tawh nia maw le!

"Zirsanglian, i tho â chu a ni lo maw!?" Inchhung ka luh rualin Maengi'n a lo ti nghal a.

"Ka lokal hmasakah ka theihnghilh tawh che sia, tun ṭum chu ka hrechhuak hrâm che."

"Eng nge i lo tih dâwn? Engtikah nge i lo chhuk a?"

Ka chhuk chhan vel ka sawi chuan, "Nangni pahnih hi inti ve tak tak dawn a maw!?" A khêk râih a.

Bawiha nen an inṭhen tawh tih a sawi chuan mak ka ti hle mai! Mafelin eng mah a sawi lang bawk si lo va, bâkah amah Bawiha pawhin sawi ve awm tak!

"Kan inkawp rem thei tak tak lo a ni ber mai," ati sap a.

"In la inzui reng ang chu ka lo ti mai a.."

"Midang biak a nei a, ka man chhuak alawm," tiin an inṭhen chhan vêl a sawi ta a, "Mafeli bialpa hlui Lalhmingsanga pawh niminah a rawn thlen kha," a thusawi chuan ka beng a verh zar mai.

"Khawi ami nge a?"

"Aw, anmahin veng tho a nia, Vellore-ah a awm reng a, i hre miah nange?"

Lalhmingsanga chanchin leh a hnathawh te Mafeli nen an inkawp dan vel leh zirna avanga inṭhen annih thu thlengin a sawi ta vek a, tukin zinga lo betu kha a nih ka ring nghal hmiah.

Ka ṭhianpa min hrilh kha ka hre chhuak uar uar a, 'ngaihzawng sawi tur a nei lo, a tleirawl laia a neih bâk' atih tak kha maw le.

Chanchinṭhazoengi te in ka chhuahsan meuh chuan zing dâr sarih leh a chanve a pêl tawh a, 'Lalhmingsanga' tih ringawt ka rilruah zuk awm tlat a!

"I kalna tur i sawi si lo va!?" Ka luh rual rualin Mafelin min lo be nghal a.

"Mahnia awm reng ka peih hleinem,"

"I kalna tur tal te chu i sawi thei alawm, phone i keng bawk si lo." Ati leh a.

"I tho peih mang si lo va ka teikual mai mai," Maengi te ina ka kal thu pawh ka sawi lang kher duh lo. A nau nen an inṭhen tawh tih min hrilh bîk chuang lova.

"Nia, ala hmâ êm alawm, i va tho hma reng reng ve!?"

"Ka mutui lo te pawh a ni mahna..." a nu leh pa hmel ka hmuh loh avangin ka chhâng ṭha peih vak lo, helai thleng thleng ka kal ve tawh a, min duat hûrh lo mah se zankhat lek châm tur chauh ka ni a, min ngaihsak ka phût deuh pawh a ni mahna.

"Zir, tihpalh, tukin kha chu ka tho peih ngang lo a nih kha.." inthiam chiah lova tiin ka bulah a rawn kal a, ka thinrim tûk lo nâa ka run ve deuh.

"Biak tur ṭha deuh i nei tepawh a ni thei a, ka hriat ve si loh.."

"Zirsanglian, i sawi duh sawi mai la, titau kual lo khân," ati hmak a.

"Ka titau hleinem, nangmah hmu châkin leh i nu leh pa min sawmna tihlawhtling turin ka rawn chhuk a, i nau a awm lo bawk nen mahni chauhva awm reng ka peih lo alawm," ka ti ṭha ve mai a.

Engtin mah phei chuan min chhang lo, a nu leh pa an lo haw ve ta bawk nen chaw kan ei zui deuh mai a, a pâwng atakin ka va thinrim hlur lo nâ a, a chanchin min hrilh tlêmzia ka ngaihtuah hian ka ngaih te pawh a ṭha chiah lo. Mahse, sawi fak tur ka hre mai si lo a, ngawih ka chuh ta zâwk a.

Inrem angin kan awm tawh a, tin ka fa a pâi mêk bawk. Chutih lai kâra hriat chian mang hleih lova lo thinrim ngawt kha thil fel ber pawh niin ka hre lo.

A hmâa kan inkawp lai ang erawh kan phâk ta chiah lo deuh em maw ni!

Chawhnu dâr khatah kan khaw panin ka haw chho ve ta a.

Palâi vawihnihna an kal leh phawt anga inrem sa ang deuh tho kan nih avangin eng mah buaithlâk a awm lo turah ka ngai ve ngawt.

After 2days
Remruatfeli

Zirsanga haw chhoh hnu-ah ka nu nen incheck up in Town clinic-ah kan kal a, Dr Rammawia bawk pan leh kan duh vang a nia.

Ka naupai chungchangah insawiselna nei lo mah ila thil ei châkna ka nei lo lutuk a, ka nu ngaih ṭha lovin min hruai tlat kha a nia, ka Bp a hniam bâkah ka Hb pawh a lo hniam ve deuh bawk nen damdawi min chawhbelh nual a, Zirsanga pawh ka hrilh ve thlap bawk.

Kan ina a lo awm lai khân ka ngei deuh tlat a nih chu! A hmel ka hmuh lovin ka khua a har a, ka kianga a awm lahin ka ning ru deuh tho bawk sia a chhan ber pawh ka hriat si loh!

Mahse, ka nu'n 'Naupai laite chuan khatianga awm kha an awm ve châwk a nia' atih vangin ka thawveng huai.

Amah lah kha a thinrim ṭeuhin ka hria a; mipa dang anga duh duh sawi phawng phawng mi a nih loh avangin a ngawi rih nimaiin ka hria.

Hmingsanga a lo haw tawh tih ka hriat khân engtin emaw tak awm ka inring deuh kha a nia, amah ka la hmu lo bawk nen a aw ringawt chuan ka lakah effect chuti tehchiamin a nei lo.

Ani nen khân inṭhenna mumal kan nei hauh lova, kan zirna ve ve ngaipawimawhin kan inbe zawm tawh lo mai chauh a nia.

Nilai zan inkhawmnaah min thunun tâk avangin ani paw'n a lo hre ve ni ngei tur a ni, min rawn be ta chûk chûk a, dik takin ka chhâng bawk.

'Fel, ka la awih thei lo, in innei dawn em?' Tia min zawh khân chhan hrehawm chu ka ti ve deuh.

Amah leh Zirsangliana chiah ka nunah mipa an awm a, 'Hmingsanga, Zirsanga' Hus! An hming tawp lam ala in ang zui ah!

Palâi pawh an rawn kal nawn leh tawh a, thlathar ni 24 ah an khua (Tuna an awmna hmun) ah kan inkutsuih ve dawn ta chu a nia, Biak in hawng ngeia neih tum khân Kohhran Hall chauh ka chan tâwk a ni ta.

Ngun taka ka ngaihtuah phei chuan vawikhat pasal neih ve man a Biak in pawh hawng lo leh, ka nuṭa neihchhun Remruatpuia'n min kâi lût thei dawn ta lo hi ka ui ngawih ngawih a, pawi ka ti bawk.

A hun hmâa mipat hmeichhiatna hmang, râi ta lo tam tak dân anga innei an awm fo tih ka hria, keini erawh kan daisual man thup ngaihna awm miah lovin kan nihna angin kan mualpho zui ta chu a nia; duh chuan titla thei ka ni. Mahse, Pathian pawi sawina thuahhnih êm zawng ka ngam ngang lo. A Malsawmna dawn a har dâwn em asin.

Zirsanga'n min kalsan lai khân mahni inkhawngaihna sual ka nei ve tehmeuh mai; mahse, ka tihsual man têl ngam turin rilru ka siam zawk a ni lovem ni?

'Thil sual chu thup tumin bei eng ang mah ila, lan chhuah hun a awm tho tho ṭhin'

An ruahman dan chuan chawlh ka lâk chhung thlakhat vel Zirsanga te inah kan awm phawt anga, chumi hnu-ah Aizawla an in puiah kan insawn dawn a ni. Ka inluah pawh vawi leh khata singsak mai theih a nih loh avangin Dintea a lo awm rih anga, muangmarin kan la inla chhuak dawn niawm tak a ni.

Mi chhungkaw ina han tâl ve tur chuan ka huphurh thlâwt.

Aizawlah thil ṭul neuh neuh, ka puan chhawm tur leh mamawh ka neih ve nual avangin chaw eikham hian kan kal dâwn a, ka nu leh pa'n min hruai a tum zet nâa ka nu-in 'motor chuan ka huphurh êm mai, puitling a ni tawh alawm, Zirsanga nen kal se, thil ṭula amah buaipui turin a nau te ho sâwm mai rawh se,' ati deuh tlat nia.

Zirsanga ka hrilh chuan a phûr khawp mai a, Arini pawh kan ruala kal a tum thu a sawi tâkah chuan Bawiha'n kal a'n tum ve nghal ringawt a, kan unauvin kan tum ta a, Arini leh Zirsanga kan lam chho dawn tihna.

'Eng mah chhawm vak angai lo a nia, in hrang chang deuh nghal mai tur in nih avangin in ken buangbar a buaithlâk' Nu Zualin ati sa diam a, a hming chauh tak takin ka lâwi ve dâwn a nih ber chu.

Hlawh chungchâng erawh Zirsanga bula sawiah ka la khêk rih deuh.

'Mate, inpahnihin a hrangin kal u la, Arini nen kan lo chhawm dâwn che u em ni ang, tihtur neuh neuh a awm nual dawn a, inzui kawi reng a peihawm loh e..' atih chuan, 'Thleng chho phawt ila kan sawi ṭha dawn nia,' tiin ka chhâng a.

Tunah chuan ṭhulh leh mai mai thiang tawh lovin kan inneihna tur sâwmna card pawh an siam tîr mêk a, fa û ber ka nih avang leh fanu mal ka nih vângin sawm zau an tum viau.

Ka thawhpui zawng zawng te tiam miah lo pawhin Lungleia kan chhungte ringawt pawh tam tham tak an ni.

Ṭhian dinpui turah ka buai leh pek a, Lungleiah ka awm tam tâk loh avangin han sâwm mai tur ka hre lova ka thawhpui leh ka kawm tam ber Maneihi, Lalneihsangi ka sâwm ta a, a lo phur nasa mai. A nui tak uar uar a, 'Lo phei vat vat ang che, ka lo buaipui vek dawn che nia' ati nghe nghe.

Zirsanga'n a ṭhianpa Lalfakhlua a lo be diam tawh a, midang a thlan ka ring lo sa hrim hrim bawk.

Bawiha nen kan chhuah meuh chuan zinglam dâr sawm ari tawh a, Mualṭhuam bazarah ka ṭhiannu Zikpuii'n min lo hmuak dawn a, 'Mafel, in lo thlen dâwnah min lo call mai rawh aw, theitui tam tâwk ka lo pai ang che' atih vângin Bawiha ka hrilh lâwk diam tawh.

Thenzawl farm-a thawk ka ṭhiannu Thelma-i pawh phone in ka hrilh ve bawk a, a phur nasâ.

Zirsanga te khua kan thlenin min lo nghâk ṭhap tawh a, a chêr deuh kuama ka'n hriat chu le!

Arini ṭhiante, ka ṭhian te pawh anni ve tho ang chu Ramtei leh Sentei an lo awm bawk a, 'In nautê hming tur kan phuah diam tawh' tiin an lo nui ṭhâw a, min va'n tizak tak!

"Mama, fimkhur takin khalh rawh aw, kawng a chhe bawk nen ngaihtuah in na riau.." Pa Hriata'n ati charh charh a.

An chhungkua hi ka tân mithar ni lo mah se ka râi hnu hian ka zah thar ta riau.

Zirsanga nen an car-in kan tlân chhuak hmasa a, Bawiha leh Arini'n min lo chhawm thung.

After 2 hours

"Zir, Thelma-in min lo châng dawn a ding zuai rawh aw.." Thenzawl Bawngchaw chinna hmun kan thlen dâwn ṭepa ka tih chuan a bu nghut a.

Kan inbe tam lo khawp mai.

"I ṭhiannu chu sâwm nachang te kha i hre lo vêl ang e,'' a nui suk a.

"Ka sâwm diam tawh, a phur khawp mai," ka tih chuan, "Mualṭhuama naute kawr leh theitui petu che kha ka hre deuh tlat,' ati a.

"Zikpuii a nih kha, i pa te school-ah tun hmâin a thawk ve zuai tawh,"

"A nih chu, a fel hmel khawp mai, kan nautê thawmhnaw tur min pe hmasabertu a ni hial lo maw!?"

"Ni e, Aizawlah an phei leh ṭêp tawh a.."

"Dik takin min hrilh teh, kan inneihna turah hian i phur viau nge i hreh ru deuh?" Tia min zawh chuan, "A inzât reng," ka ti sap a.

"Phakar mang e.." a nui zui suk suk a, Thelma-i nen kan inhmu chiah chu kan bengchheng deuh hluai, 'Awi! Mafeli hi engtin nge i duh zâwk a!?" Tiin Zirsanga zuk be nghâl a!

"Min kherh nasa êm a, kan tlu ruai ruai mai a nih hi.." tia chhângtu Zirsangliana chu ka melh rum titih a, a nuih a zat hmel khawp mai. 'In inneih ni chu ka che bawn khawp ang' ala ti hrâm nia.

Thenzawl kan chhuahsan dâwna min tlanpêl tu car driver chu ka hmu hman vuai a, Lalhmingsanga ni thânin ka hria.

Zirsanga a ngawi deuh ngul a, Sialsûka thingpui kan in lai pawhin Arini leh Bawiha deuh hlir an ṭawng a, keini pahnih erawh kan inmelh hrek hrek chauh a ni.

"In sawiselna te i nei em?" Kan tlân chhuah leh hnu-ah min zâwt teh tlat a!

Ka neih loh thu-in ka chhâng a, "Lalhmingsanga'n a lo call leh tawh lo che maw!?" tia min zawh chuan ka phu zawk nia!

"Call lo hlauh, eng nge min zawh kher a?"

"Ka lo zin lai khân a rawn be hmâ fia fia bawk che sia ka zâwt mai mai che," ati mai a.

Engtin nge Hmingsanga chungchâng a lo hriat daih theih le!? Bawiha chuan a sawi ka ring chiah si lo a, kan inbia tih thlengin a hre vek bawk si, hepa hian min chhui chiang!

"Engtin nge Hmingsanga nen kan inbia tih i hriat theih?" Ka zâwt tlang hmiah.

"Ka nupui nimai tur leh ka fâ nu chanchin te chu ka hre tur a ni dâwn lâwm ni, min hrilh tum lo mah la ka hre zêl thovang," ati deuh nghut a.

"Hrilh tur em em che pawh a awm lo.."

"A nih ka ring.." ati leh deuh kher a, khawi aṭanga a hriat nge tih hre lo mahila thinrimpui tur chanchin kan neih awm pawh ka hriat si loh.

Chumi hnu chuan atu mah mah kan ṭawng tawh lo.

Keini pahnih innei tur hi a hnai telh telh a, kan inkhak fek fek nimaiin ka hria!

Aizawl kan thlen pawhin ka inluahah reilote Arini nen an lo lût zawk a, 'Kan in pui lamah kan innghat rih mai ang' ati deuh tlat a, Bawiha'n a sâwm ngial nâa a duh ṭhak lo.

"Mâm, zanin te chu awm ve ila, naktukah kan phei mai dawn nia,"

"I duh chuan riak la, keimahin ka lo va phei ang," dam thlupin a nau hnenah ati leh lawi si a, keimah ber hi min ning tlat a hriatna ka'n neih chu le!

"A chângin ka phal lo chung rawn riah i tum a, tunah kan sawm ngial che a i duh leh bawk si lo, i awmzia hi ka hrethiam mai mai lo e a.." ka ti ve ngat a.

Ngawirenga ka bânah vuanin ka room-ah min luhpui a, "Remruatfel nang hian vawikhat tê pawh min sâwm der eih lo, i nau zâwkin min sâwm a nih kha, ka nupui nimai tur hnen aṭanga sâwmna ka dawn loh chuan engvangin nge ka riah kher ang, Lalhmingsanga nilovin Zirsangliana ka nih hi,' a sawi zawh rual rual a rawn kûn hniamin dîm lo baksak hian min rawn fâwp a, ka thin a rim kher mai.

"Naupangchhia pawh i ni tawh lova sâwm ngâiah ka dah hek lo che, i duh chuan ka thû lo pawhin i rawn riak tho a lawm le," min thlah rualin ka ti nghal a.

"A nih chuan i thu nilovin, keima thu in ka riak ang, hetah, i khumah ngei hian.." ati sup a. Vawiin hi eng nge a hriat ni, thinrimna tur zuk zawng tlat a.

"Arin, zanin chu kan riak dawn nia, naktukah kan vaiin kan inah kan insawn ve thung ang." Hnial chi miah loh hian ati leh a.

Zirsangliana ka hriat ṭhin khâ ni tawh lovin tuna mi hi chu Zirthuduha, Zirthinchhiaa Hus! A mize ngêng thar thut hi ka ngainat zâwng pawh ni nghal lo chuan..

Arini leh Bawiha'n eirawng an bâwl a, Dintea a awm loh avangin kan tâl buai deuh, nidangah chuan a lo peihsa diam kan ei ṭhin kha a nia.

Zirsangliana ka khumah a mu a, a phone-ah games a khêl nge a uluk ngang mai.

"Fel, i kawr khâ han hlîm chhin teh," inbual tura ka luh dâwnin min rawn be thut a.

"Eng atan!?"

"I pum ka en châk,"

"I ho lutuk, engtin mah a awm lo," tia kalpelh mai ka tum a, rang lutuka rawn tho chhuakin ka bânah a chelh vat a, "Thlathum a pum tawh a, engtin emaw tak chuan a awm ngei ang," ka Kurta hâk hlimin a en ta ṭâlh a, ka va'n ngei tak.

Chutah ka puma kuah chung hian, amah hnaih leh zual turin min pawt a, ka chhipah a khabe nghat chungin, '"Ka ta i ni, i reng bawk ang," Ati ta sup a.

Nie, a ta ka ni rêng a ni, chimawmin ngeiawm taka chêt châng nei ṭhin mah se ka Zirsangliana kha a ni tlat alawm...

Nichina min fawh dan opposite hlauh khân lungchim leh uar takin min fâwp ta a. Ka lo chhâng ṭha kher mai.

Kan inneih hmaa nupa nun hmang lo tura intiamtu Zirsangliana âwmah chuan ka bei ta thlap a...


©<++++[BeckirafARenthleI]++++>®

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)