LUIGI SHINODA BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: LUIGI SHINODA BY Becky Rafa Renthlei (Completed)

Unread post by Ngaia » December 2nd, 2018, 3:03 pm

.LUIGI SHINODA

Becky Rafa Renthlei

Chapter-20

Rome Private charter
Air Hire|Private Fly
Luigi Shinoda

Carli nen kan nupa boruak pawh a ṭha chho viau a, a naupaiin thlasarih hmêl a hmu tawh tak nâin a inzo lauh lauh khawp mai; ka nupui duat taka ka enkawl hian ka hlimin ka lawm ber zawk a lo ni.

Lorenzo pawh sawrkar dan phal loh anga a chêtna; a nu leh pa thurochhiah a rûkin a lawyer nen inberem a an khawih danglam avangin kum ruk chhung Jail tâng tura a chungthu rêl sak a ni a, Carli hnenah ngaihdam dil chiam mah se ka nupui rilru khauh tak leh sut tlang mai mai theih loh hian, 'I tân hunbi te kha han tâng bikim ve phawt la chumi hnuah chuan ngaihdamna i hmu mial mahna' tiin a chhâng ta kha a nia!

Stella Costa pawh hna mumal nei lovin leh midang nunah sual chhuaha a inrawlh avangin Italy a chhuahsanna thlahnih zet a ni tawh.

Carli duh ang ngeiin Angelica erawh chuan Lorenzo fa a pai avangin a sumdawnna a enkawl ta a, Angelica hi mi rilru sual a ni lova khatia ka insawifiah hnu khân ka nupui nen inbiain engkim an sawi dun a, ka company enkawl pawh thil hautak a nih vângin Carli inpeih hma zawng Angelica'n a enkawl rih ang tih kha an thuthlun dan a ni bawk.

"Abel, naktuk aṭang chuan madam hruai angai tawh lovang aw, ka rualin a kal ang a, a haw duh hunah in rawn lam dawn nia'' ka tih chuan angaihna hriat loh hmel tak hian, "Sir, nileng a i office-a tawm reng a peih lo tawp ang," a'n ti sa nghal ringawt a.

"A peih loh hunah in rawn hruai dawn reng alawm, karkhatah vawihnih bâk pool-ah hruai tawh suh ang che u."

"Yes, Sir."

In a tawm reng a nin avangin company-ah nitin a rawn kal ve ziah a, lehkhabu chhiar tur tam tham zet ka lei sakte leh naute tâna ṭha tur inzirna bu ka leisak zawng zawngte pawh thuawih tak hian a chhiar vei thlap thlap a, doctor râwn a ngaih a piangin ka kal tel ziah bawk.

"Luigi, naute hming tur pathum ve ve inphuah siak ila.." Kan mut dun a pianga kan fa hming tur phuah kan inchuh ziah avangin vawiin hian a rawtna chu ka pawmpui ve ta nge nge a.

Naute hming pathum paper-a ka ziahsa chu thlepin box-ah ka khung a, office chhungah awmin ani pawhin a phuahsa a rawn dah tel ve bawk a.

"Tikhân, fa kan neih veleh kan pawt dawn nia, sawi buai theih a ni lovang," A ti ta a.

Puitling angin lang fo mah se kan kum a inthlauh êm avangin eng emaw chenah dawhtheih a ngai viau a, ka rin phâk bâkin ka thu a zawm ṭha bawk!

An company pawh pumbilh thei a nih laia midang kuta a dah ngawt te hian a rilru tluanzia a tilang chiang a, 'Ka hmangaih che' tiin inhrilh tawn lo mah ila kan inkâr erawh a ṭha tih piahlamah a ṭha hlê.

Nithum chhung ka company-ah ka office-ah ngei min rawn awmpui tawh a, a nin deuh chângin Jet showroom lam te a vil ve zauh ṭhin bawk.

Carli ka nun a ka sengluh hnu hian chhungkaw awmzia leh ka tâna a hlutzia ka man thiam ve ṭan bawk.

"Luigi, i dam chhungin company tân i thawk reng mai dawm em ni?" Sofa-ah ṭhuin naute thawmhnaw Stefania leisak a thlep malh malh a.

"Ni lo ve, ka nupui leh ka fate kiangah ka damchhung hun ka hman theih nân, company enkawltu tur traning kan pe mêk," ka ti ta a.

"Tak tak em?"

"Ka sawi ang chiah kha a ni e."

"Ka hmangaih che." A tum loh deuhvin a sawi chhuak hlawl mai le!

"Carli, han sawi nawn leh teh.."

"Englo, ih.. Ka hmangaih che" Office dawhkan hêlin a lam ka pan ta a, a ṭhutna aṭanga kaihthawh pah hian, "Ti amo e ho bisogno di te' (Ka hmangaih che, ka mamawh che. BRR) tiin ka phun sup a.

"Grazie," tih pahin ka kut a la a, a pumah a nghat ta a.

A hmui sen hiam leh no chek a ka fawh rualin duhthawh zet hian min lo chhânglêt var a, Carli Davino tel lo hian ka nun a kim tawh lova ka hausaknain awmzia a nei hek lo.

Stefania rawn lûtin thâwm a neih tâk avangin kan inthlah ta ṭâwk a.

"Vawiin chawhnu a appoinment ka neih zawng zawng cancel ang che." Tia hrilhin ka briefcase la turin ka dawhkan lam ka pan a.

"Sir, US Jet charter nen meeting inneih dawn kha.."

"Cancel rawh, ka nupui aia pawimawh eng mah ka nunah a awm lo, lunch eiin kan chhuak dawn," ka ti nghut a.

"Mahse sir,"

"Stefania, company khâr hial duhna rilru ka put hma hian ka sawi ang chuan tirawh." Ka nupui bânah kaiin Sam leh Abella lo dinna lam ka panpui ta a.

Avero Italian restaurant ṭha berah lunch ka buatsaih sak ngei tur a ni lo'm ni. 'Ka hmagaih ang chiaha min hmangaihtu ka nupui hlimna hi ka hlimna chu a ni mai.

"Diet control a ngai dawn em?" Abella kan kiangah khawng atin a ding a, ani hian Carli a ngaihtuah fâl deuh bîkin ka hria, kan nupa room tih lovah chuan a zui chawt a, an inkâwmngeih hle bawk.

"Abel, tun ṭum chauh wine in min phalsak leh la zanah checker ka khelhpui ang che." Tia ka nupuiin a tlawnna chu a hnial phal ta ngang lo a ni ang e, "No khat chiah aw madam,"

"Ahah davero..." tiin a nui ta hak hak a. Abella laka a lungawi loh deuh hian 'Davero' tiin a ko lui kher zel.

A nunah mipa sawi tur ka hre lova ka hriat chhun chu a tân mipa hmasaber ka ni tih chauh hi a ni.

Veal parmesan, Lasagna leh catfish a chah leh ta, lunch, dinner leh breakfast-a eiin a duhzawng a thlâksek ngai lova a thlâk dawn a nih pawhin a hmâ nikhat kaltaah a sawi lâwk thlap zel bawk.

Ricco nen erawh anla inbe ṭha uchuak lo khawp mai! Ricco, inla pa zet hian ka nupui ze dangdai zet hi a ngaina tehchiam lo tepawh a ni mahna.

"Luigi, ka pualin engtikah nge Jet ka neih ve ang?" Wine tyi tih hmel takin a tep hlak hlak a, "I birthday present atan Stratos, keimah ngeiin ka buatsaih ang."

"Sì, Amore mio.." (Aw le ka hmangaih BRR) dawkhan hnuai aṭangin ka mipatna a rawn tawk zauh a, ka taksa danglam tur thunun tuma wine ka tlâk pap chuan nui var var chung hian, "Ka ta chauh i ni, keima ta chauh," a phun sap ri chuan ka chhungril a tawk che pha tlat alawm.

Lunch kan ei zawh hnuah kan chhungkaw chênna hmunpui Milan lamah kan lêt leh ta a.

Luigi Shinoda nun a chatuana inrawlh tumtu Carli Davino chauh lo chuan ka thinlung an tawk che pha tawh hlawl lo.

"Bianca dinner ei turin kan la sâwm ve ngei a ngai ang." Tun hi a ṭhiannu chungchâng a vawikhat dawi chhuahna a ni a, "I sam rawng dik tak i put leh hunah kan sawm dawn nia."

"Shinoda chimawmpa.."

"Carli mio piccolo gattino(Carli ka zawhte têreuhtê BRR)

A pum rawn che dat dat zût kual chung a ka fawhna chu îhe lovin min chhâng ve nghal mai bawk.

Hmangaihna chendun kawngah pawh ka nupui hi zirlai thiam thei tak a ni a, pe chhuaktu nih a hreh ngai lo.

Shinoda wife dik tak leh mí zagkai ni tur hian ani tluka ṭha an awm lova an awm tawh ngai hek lovang.

B+>[BeckirafARenthleI]<+®®



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:03 pm

LUIGI SHINODA

Becky Rafa Renthlei

Chapter-21

Shinoda Family
Mansion
169 |7

"Carli, i inpeih dawn tawh em?" Ka nupui dressing table hmâa ṭhu tûm bâr chu thlêm tumin ka pan hnai a.

"Ka chhuak dawn lo ka tih chu min en ta che," a pum puar kawh lah a kawr hâkin a khuh ṭhat mang loh chu lungawi lo zetin a en a. Ka nuih ati za ngei mai.

"Tuna i inbel nilo pawh thawmhnaw hâksên loh i nei a ni lawm ni? I kal loh chuan Bianca a lawm hauh lovang," a thawmhnaw dahna wardrobe hawnsakin thawmhnaw inkhai tlar dul chu ka keu lâwr a.

"Kan chênna hmunah dinner buatsaih sak mai tur a nia, hmun dang a chhuah kher."

"Khawngaihin, inhnial ka duh lo a nia, Bianca chu Mansion-a lokal turin ka'n hrilh ṭha leh mai ang e."

Zanin tlai hian Marinella-a Bianca chênna hmunah dinner ei turin ruahmanna ka siam vek tawh a, ka nupuiin tukkin aṭang khân a duh leh tlat tawh lo. A pum puar ve tawh tak chu chhuanlamah hmangin min hnial deuh tlat.

Amah nen kan intawnna hmun a nih vângin Bianca inah kher surprise ka tum deuh khâ a ni a; mahse, a duh miau loh avangin ka nawr lui duh ta lo.

"Hei hi inbel rawh," Silk kawr a khûp khuh chang chang vêl a fual khumah ka thehthla a, "Luigi, ka kal duh lo ka tih chu maw le!" A thinrim leh tak tak dawn e.

"Kan kal dawn hleinem, i thawmhnaw inbel khâ thlâk phawt teh." Min chhân hman hmain a kawr hâklai chu a lu lamah ka pawhchhuahsak ta a, a ṭê ṭhat nâ a ka ngaipawimawh duh eih lo.

"Kan nautê hian a nu a chhun chuan tihtauh a hrât vek mai ang."

"A pa a chhun chuan a lerh khawp ang," tive zatin a hmai a chei mawlh mawlh a, a sam a tih dum chawp ṭhin pawh ka thu zâwmin a rawng pangngai ang a pu leh ta a.

"I tâna rinawm leh hmangaih che hi ka damchhung hna a ni." A biangah ka fawhsak ta a, "Luigi, naute thil vel lei turin Sam leh Abella ka hruaichhuak thei ang em?" Teh daih chuan!

"Bianca pawh i duh chuan i hruai thei ang,"

"Englo, ih..min mutpui hmasakber ṭum khân engvangin nge pawisa min pêk?" Ka hlauh ber thil min zâwt ta. Dâwt a sawi mar ka tum ûk a; mahse, ka duh leh ta lo. Bianca nen kan inbiakna zawng zawng ka hrilh ve ta vek a.

"Chu nu mai mai chu(h)" tia phun sapin a phone a phawrh a, Bianca a call ta a.

"Hey, i lokal ngei tur a ni, ka pasal nen thinrim a kan chhuahchhâl hma che hian darkar chanve chhungin kan chênna hmunah rawn thlen tum ang che." Phone a off zui hmak bawk.

"Engtia tih nge i tum a?" Ngaihṭha vak lova ka zawh chuan nui sak chung hian, "Ka blackmail dawn maw le, lungngai suh amah vânga intawng kan ni a, ngeiawmin ka che hauh lovang," a tih chuan ka hahdam huai huai thei nia.

Carli sawi ang tak takin dârkar chanve hnuah ka cousin Bianca a rawn lût ta a.

"Carli Davino, min lo bum nalh hlê mai," Cupboard hawngin intur a dap nghâl a.

"Madam hming i sawi dik lo, Davino ni lovin Shinoda a ni," Abella a lo inrawlh zat a.

"Nang kha lo ṭawng suh," Abella leh Bianca inhnial lai chuan Carli a nui char char thung.

"Tun thleng thleng a madam hming dik pawh hriat loh!" Abella'n a tih mêk laiin, "Ṭawng suh ka tih khâ," a hmaiah whisky-in a theh ta a.

"Bianca.." Carli'n a ti ṭhat a.

"Carli, amah ka be hleinem, a phû tawk chiah a nih kha."

Abella ka mitmei chuan hrethiam zet hian a bu nghat a, Bianca panin a inrin hma chuan a hmuiah a fawhsak ta a.

"Nang.. nang hi.." a biang sen ṭâwn leh a mitmeng buai nak ka hmuhin ka nui suk a, Carli mahti hmêl âng pam chu, "An la inhmangaih vat ang," tiin a beng bulah ka hrilh sup a.

Abella te pahnih khawsak dan vêl chuan ka nuih anti zâ. Sam leh Ricco-an intur dawhkanah an rawn dah a, ka kid te pawh ka nupui vâng hian ka enhrang lutuk tawh bik lo, an thawh tur engkim ṭha takin an thawk vek a, kan chhungkaw zînga mi ang maiin a nia ka en tawh ni!

Dinner ei chhung zawngin Carli te ṭhian dun an titi char a, ka lo rin dan chuan an inhnialin an inchhuahchhâl turah ka ngai deuh kha a nia a teuh lo! Inngai hlê niâwm tak hian min ngaihsak miah lovin zuk ṭawng a!

"Sir, Miss hi kan thunun deuh loh chuan madam a chau vek ang." Abella a nui sûng a, a mitmeng aṭangin Bianca a duh tih hai theih ninghâl lo chuan..

"Abel, dinner ei zawh veleh Miss hi i thlah dawn nia aw.." ka ti ta a.

"Luigi, hepa thlah hi ka duh rêng rêng lo." A rawn ter leh at a, nui suk chung hian, "Thlahtu i neih lai hian bawhpelh miah suh." Ka ti ta a.

Carli nau neih huna awmpui intiam chungin Bianca pawhin a 'Aw' veleh tho. Ka bodyguard zingah Abella hi a hmeichhe mi deuh ber a, eng emaw lai khân Russian nula nen an inkawp ve zuai tawh bawk. Mahse, Carli'n a sawisel sak reng avangin an inṭhen ta nge nge kha a nia.

Ricco leh Sam ve thung chu an awmhmunah an ila 'pa' em em a chuzawng chu a nimai.

Lorenzo Jail tâng kan ve ka rawt pawhin Carli'n a duh miah lova a thisen zawm leh a pianpui neihchhun heti em ema a hua hi mak ka ti deuh! Mahse, Lorenzo chêtdan tenawm tak kha ngaihdam a harsa viauin ka ring.

"Lokal teh" khumah ka mu tawh a, ani erawh a tih dan pangngaiin dârthlalang hmâah a pum a teh leh nia maw le. A hma chuan zantin a teh ṭhin a, eng emaw lai khân zankhat danah a teh leh ta thung a, a phunchiar zualpui pawh a reh thawkhat chuan ka hria.

"Luigi, hmangaihna chen dun sawi mâwi tawh suh aw," a ti sap a, a pum a len deuh hnu hian a hah hma em em a, doctor thusawi zâwmin nupa nun ka hmanpui ta rih lo.

"Ka kuah ringawt ang che, a bâk eng mah ka ti lovang,"

"Tak tak!"

"Sì, Shinoda'n a thutiam a hlen ziah ṭhin tih i hriat kha." A dulah kuahin a bêngkâwm velah ka nûl nâ nâ a, ka mipatna thunun tur hian tuivawt a inbual ka va'n mamawh zing tak.

A birthday present atân leima duan ngei CDSJ (Carli Davino Shinoda Jet) ka company chhuak ngei ka siamtir mêk a, hun duh rei deuh mah se a birthday-a an peih hman chuan a tâwk viau a ni.

Ka nupui pualin Apartment pakhat nursery room special taka buatsaih sa thlap ka lei tawh bawk a, tûn aṭanga chhiar a thlaruknaah ka hna ka chawlhsan tawh dâwn a, ka thchhang dâwltu, Rory Sullivan ka ruatfel tawh bawk.

Ka nupui fanaute ka thlazar hnuaia thlamuang taka an awm theih nân Luigi Shinoda hian ka hna, ka thâ leh zung sênga kum tamtak ka lo enkawl tawh chu ka thlauhthla dâwn ta a ni.

Ka nunah Carli aia pawimawh pakhat tê mah an awm lova an awm tawh ngai hek lovang.

A muhil hmêl thlir chung leh amah kuah chial chung hian ka chhîng ve ta a.

EPILOGUE
After 6 months

"Luigi, Arianna kha Ricco pawmtir rawh." Ka nupui balcony-ah rawn chhuakin coffee sat hmel zet a rawn châwi chhuak a.

"Ricco a awm lo," Kan fanu Arianna Shinoda, mitmeng hring râma min en kiautu chu ka sâwi hliau hliau a.

"Nupui neih nachang hre si lo, ngaihzawng hmu zo chuang bawk si lo.." a tih mêk laiin Ricco tûm bûrin a rawn lang ve ta a.

"Madam, i sawi ka hre vek a nia," tiin Carli a melh rulh a.

"Nupui i hmuzo lo ta rau rau a nih chuan Arianna hi buaipui berah nei la ti nia," a nui duh miah si lova tiin ka kiangah a rawn ṭhu a, Ricco lungawi lo hmel ka hmuh chuan ka khawngaih ta deuh a, "Duhtak, Ricco tel lo tel te chuan reporter-ho kan hmachhawn ngam nâng." A thlavâng hauhsak anga ka ṭawng rualin kan Ricco pawh a nui leh suk suk tawh alawm.

Kan fanu hming tur lehkhapawh hmanga kan pawh fuh tâk Arianna Shinoda tih lungsi thlapin kan puttir ta kha a nia. Tunah thlalina a hmang ve mêk a, a nu hmêl a chhûn kher mai, a sam rawng erawh a pa hlauh!

Sam leh Ricco chiah kan awmpui tawh a, Abella pawh ka lo tinzâwn sak ngei ka cousin Bianca nen honeymoon hmangin Sidney lamah an liam tawh a, ka bodyguard pathumte zingah tumah duatbik leh tihbik ka nei hran lo. Abella a naupang berin nupui a nei tharh erawh Sam-a ngaih dan a ni lo viau.

Company ka chawlhsan tawh a, Carli nen a nu leh pa thlân tlawhin kârleh hian kal kal tum bawk. Hnaitê mah nise a birthday gift CDS Jet ngat a kal a duh mauh mai si a ka hnial leh ta lo.

Ricco leh Sam pawh bodyguard ni tho siin Shinoda family-ah kan la lut ta a, chhungkua nei tawh lo leh mahnia tâl ṭhang Luigi Shinoda meuh paw'n ka nupui ngenna ka ti hlawhtling leh ta nge nge e.

Kan fanu a rawn ṭê ṭhat ṭhat tâkah chuan ka coffee in lai dahin a nu kutah ka hlân a, "A ṭah apiangin ka chanai pakhat zawk ka ken a ngai si a..." ka tih chuan, "I chantâwk a bo lo turah ngai ang Mr Shinoda." Arianna hnute a pêk laiin Ricco'n lehlam a hawi zuk tih ka hmu reng.

Ni e, ka nupui leh ka fanu ka rila rah ngei hmêl ka hmuh hian sumin hmun a chang tawh lova neih belh tuma thawh duhna rilru ka nei ta lo. A chhan chu kan damchhung leh a piah lam ram thlenga khâwlsa nei tawh businessman Luigi Shinoda ka ni miau alawm.

Italian Homeron newspaper tuktin chhuakah Shinoda family-in front page a luah ziah erawh ka lawm viau lo. Kan chhungkaw chanchin update vântlâng hriata puanzar ziah hi ka rilrem zâwng lah a ni hek lo.

Ka nupui mitmeng hring râma min hmangaihna lo lang chhuak fo ṭhin ka hmuh hian ka thlan sual loh zia ka hrechiang tulh tulh bawk.

'Carli, Mi piaci e ho, Bisogna di te,' tia phun sup chung hian Ricco awm ve pawisa miah lovin ka nupui ka fâwp leh ta a.

THE END

B+>[BeckirafARenthleI]<+®®

Note: Tun ṭum story zet chu ka chawlhsan zing angreng si a ka inthlahrung khawp mai. Dawhthei taka min nghâk a min chhiarsaktute chungah lawmthu ka sawi e.

Story boring deuh leh sei zet zet hi ka thiam zawng a nih loh avangin a tâwp kan khar leh ta dêr mai. In duh khawp lohna tam tak a awmin ka ring a inmi hriatthiamna ka ngen nawn leh bawk e.

Kan damlohna chungchânga min ṭawngṭaipuitute zawng zawng chungah Pathian hmingin lawmthu ka sawi a, Lalpa'n a lêt tam takin malsawm che u rawh se.

Keia thawnthu engteh ual ni lo min chhiarsaka min htutsaktute, like leh comment chhiar manhla tak tak in hnutchhiahte hian min tiphurin hmalam pan duhna rilru min siam fo ṭhin.

Ka lawm e (Grazie)

BRR

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)