LUIGI SHINODA BY Becky Rafa Renthlei (Completed)

Moderator: Becky Rafa Renthlei

Ngaia
Site Admin
Posts: 25813
Joined: April 30th, 2016, 4:07 pm

Re: LUIGI SHINODA BY Becky Rafa Renthlei (Completed)

Unread post by Ngaia » December 2nd, 2018, 2:58 pm

8.LUIGI SHINODA

Becky Rafa Renthlei

Chapter-8

Palermo Island
Farm House
Shinoda

Arianna, khum kil lam a muhil bâm chu vawihnih vawithum ka en nawn sek a, ka lo ruahman dan leh tun a kan mut dan hi thil inpersan tak a ni. Ka hmai leh ka taksa hmun tin a min hâmna hnu hmâ lang kulh chu thup sên chi ziazâng ni nghâl lo chuan. Em em a na!

Khatia kan inrem leh tâk hnu khân pawisawi lo niawm tak hian ei tur a dap kual a, Arsa kan leh toast, juice no hnih zet zuk in leh a!

Ka phone min vawm bo sak avang khan ka bodyguard tumah biak tlang theih ni bik hek suh, amah lah chuan engah vak a ngai lo nge tui takin a muhil a, kei ve thung chu muhil thei lovin ka tâl kual sek chu a nia a muhil tui lutuk hi ka thîk lek lek zâwk.

Ka Laptop on in ka tho chhuak leh ta nge nge a, Juan Ramirez detective-in thû a lo hnutchhiah ka hmuh chuan mak tih lutuk vângin ka meng deuh kâwk a.

## Mr Shinoda Arianna Grico, i model chhawr lai thlalâk hi eng company mahin an la chhawr ngai lo. A hmel hria pawh an awm lova bum a i awm loh nan lo fimkhur phawt mai teh.

Engtin nge a nih theih? Model tam tak ai pawh a ṭha zawk leh super ni hial a ka rin Arianna hian eng experience mah nei lovin ka hnuaiah a rawn thawk a maw!? Mahse, interview a neih ni khân file a rawn keng miah lo tih ka la hre ve tlat. Ka zawhna leh min chhân dan thlengin ka la hre bawk.

Laptop khupin farm house kawtah ka teichhuak ta a, ka nun a hmeichhe rawn lût hi engtia hmachhawn tur nge ka hre lo mai ni lo vin ka bo hû. Hetiang a danglam leh mahni in control thei hmeichhia hi a leh lamah chuan ka ngaisang ang reng viau lawi si.

"Luigi, helai velah hian tui chênna tur a awm mial lo maw!?" Khua a vâr dêt dêt tawh a, Arianna pawh bathrobe inbel chungin farm house kawtah a rawn chhuak ve a, tun ang hunah tui chên a duh a maw!?

"I tho â chu a ni êm lo maw Arie!?"

"A teuh lo, tuichêng turin min hruai dawn nge ka breakfast tur min siamsak hmasa dâwn?" Nui sak chung hian ka ṭhutna bulah a rawn ding a, a bathrobe-in a khuh phâk loh a châwn nalh zet chu a langsar kher mai.

"Eng maw i sawi?" Luigi hi i breakfast siamsak turin min phût a maw!?" Lungawi lo zetin ka ding chhuak a, inrem lam ai chuan inhnialnain bul kan ṭan leh dawn ava ang ve.

"Min siamsak loh vin tunge min siam ang a, dik tak chuan naupai ka ni a indim hun lai a ni bawk."

"I kâ a lut tur chu nangma'n i buaipui ang." Ti hmukin ka pensawn nghâl a. "Luigi, i ti mah mah lo maw, helai hmunah hian i chhiahhlawh ni tur a min hruai a nih chuan i tisual duai ang, ka ei tur chu ka siam thei a, i eitur siam ve ang che." Ti nghatin farm house lam panin min kal pel a, Juan Ramirez min rawn biakna ka hmuh vâng nge Arie hi ka ngei thar deuh tlat!

Chumi hnu chuan choka lamah eitur a siam ta a, a thil siam rimtui chem chem chuan ka hnar a verh zar thei nia. Ka ṭhut hmun aṭangin a chezia ka thlir reng a, nuam ti hmel deuhva a chevel chu a hmuhnawm ang reng.

"Ka phone min vawm bo sak manah i Laptop ka hmang ve thei," inthlahrunna tel hauh lo hian a breakfast tur a siam malh malh a, ka plate tur a chhawp tel ve loh avangin, "Ka eitur i siam ve nange?"

"Siam lo, i kâ a lut tur chu nangmahin buaipui ve mai rawh," Bacon a ṭhial ṭawlh ṭawlh a, a soup siam khu vat vat te chu tui tih hmel zetin a tep hlak hlak a.

"Ka eitur min siam kêp ve nange!?

"Teh suh ei, pahnih ei tur siam a hautak tehreng nen nang lehzel chu inbuaipui ve rawh," ei tur lam a buaipui zui leh daih a; ka ngawi mai mai hauh lo ang.

Ka ṭhutna aṭang a tho chhuakin breakfast dawhkan ka va kîl ve a, a sawi dik chiah! Engmah a bo a bâng awm lovin a thil siamsa a plate-ah a suak chhuak vek a, min siam kêp lo hrim hrim.

"Khawi, ka ei ve hun a ni tawh," a plate chhuhsak ka tum chuan a kut pahnih hian nghet zetin a vuan bet ṭang a, "I eitur siam thiam lo tur khawp a mipa nêp i nih ka ring lo," min pe phal bîk teuh lo, Bacon dahna plate kan inchuh ta chu a nia ka awih thei lo.

"Ka lei vek a nih kha min pe ṭha mai mai rawh."

"I lei pawh nise i zawrh pawh ni raw sek sek helai hmun a min hruaitu chu nangmah i ni a, rilṭam a awm ka tum reng reng lo." Mitmeng ling hlarin min melh zui kâwk nia!

"A ṭha alawm," tih pahin a soup siam sa leh bacon a la ei zawh loh chu chhuhsak thutin a plate chawp hian tukverhah ka thehchhuahsak ta a, "Luigi Shinoda ti thinur tu chu hrem lohvin a chhuak lovang," ka ti sup a.

"Min huphurh leh tur si chuan engvangin nge helai hmunah hian min hruai?" A ṭhutna aṭang a tho chhuakin pawnlamah a chhuak tau ta a, kalna tur dang a hre dawn chuang lova a rawn kir leh vat beiseiin ka ngaihven duh dêr lo.

After 3 hours
Carli Davino.

Luigi min tih dan mai mai chu ka thin tertek chhuak tur ka insum hrâm a ni. Ka pawngpawrh viau chuan ka phuba lâk tumna a hlawhchham ka hlau si. Helai thliarkârah hian min ti rethei tur ringawtin min hruai a nia.

Thing in sak thar lian vak lo ka hma lawk a lo awm ka hmuh chuan lâwm avangin ka au chhuak ṭhelh a lawm le! Mei an chhem a ni ngei ang meikhu Van lam a chho ngiai ngiai ka hmuhin ka phûr hle a, bathrobe chauh inbel mah ila ka pawisa zo tawh lo.

"Awm in awm em?" Kawngkhar ka kik dat dat a, thâwm eng mah hriat tur a awm loh avangin Thing kawngkhar chu ka pawt hawng ta a, inchhung fel fai thlap leh thuk a mei inchhêm alh hlat hlat ka hmuh chuan luahtu an awm ngei tih hrilh hranpa ka ngai lo.

"In awm em?" Zawi sap a ka ṭawng chu chhângtu an awm lo bawk a, hlauh leh vênthawn nei miah lo hian inchhung chu ka enkual ta a. Atu a pawh chêng rawh se, helai hmun a chên ve ka dîl hmiah ang.

Luigi Shinoda hian min ngaihsak tak tak a nih chuan min rawn zawn ka ring a, min zawng a ngaihdam min dil chuan alakah ka induh sawt ang. Mahse, chutiang ni lova min ngaihsak lo leh eng atân mah a min ngai lo ang mai a alan chuan theihpalingkawh leh a uchuak thei ang berin ka ngaizawng thung ang.

Shinoda tih nat hi ka thiltum ber a ni a, eng mahin a dâl dâwn lo. Ka thianghlimna ka hlauh tâk kha chatuanin ka nei lêt thei dawn tawh lova chumai ni lovin a fa min la hnutchhiah zui nen phuba lâk hi ka tih mâkmawh a ni.

Chulai Thing in nuam leh reh raihah chuan hahdam zet hian ka mu ta dar dar a.

After 3 hours
Luigi Shinoda

"Sam, thing hmun leh Litengsâwl awmna te Coconut hmun zawng zawng te kha zawng vek rawh u," Arienna dârkar thum hnuah pawh a lo la lêt loh avangin ka mangang takzet tawh a, ka hmuh phâk zawng zawng Farm house leh a chhehvel ka enkual vek tawh bawk.

Eng ati nge henu hi a dangdâi em em mai lê!? Ni lo, ka fa pâi ang te khân a insawi bawk si a, kei hian finfiah chiah lo mah ila heti mai chuan ka thlahthlâm thei lovang.

"Sir, i sawina hmun a piang kan en a Arienna hmuh tur a awm lo." Ricco an atih chuan ka thaw chhuak halh a, phone hman mai tur ka nei bawk si lo.

"Ricco, engvangin nge Arienna tia i koh ve rîkngawt a!? Tun bâk kha a hming sawi tawh suh ang che." Ti hmukin Farm house kawtah ka vei nghut nghut a, khawiah nge maw a awm daih le?

"Sorry Sir,"

"Charter company phone la, helicopter rawn tîr rawh se,"

"Yes, Sir.."

Chutia kan buai em em lâi chuan thaw hlawp hlawp chung hian Sam a rawn tlân phei a, "Sir, Thing inah Miss Grico a muhil!"

"Eng a..!?

"Thing inah maw le.." Ka bodyguard pathum te nen an chênna hmun thing in panin hmanhmawh lutuk hian kan tlân ta a, ka rin lohna deuhva a lo awm daih chu niin.

Hremna pêk belh chhah leh ngei tum hian rilru ka siam sauh sauh thung.

"Tumah rawn lût suh u," in chhungah ka lût hmasa ta a, chhuat hnûm hlurh a Arie lo muhil ka hmuh chuan ka sa zak thei nia. Amah ngaihtuahin dârkar tam kan philî a, ani enghelh nei miah lovin a lo mu der der chu a nia!

"Hey, tho vat rawh.." ka sawi nawk nawk a, a meng chhin eih lo!

"Arienna, tho rawh ka tih chu."

"Min hnaih hlek suh," tiin a rawn meng siar siar a, a la che duh chuang ṭhak lo.

"I awm lohna tur hmunah i awm avangin min tibuai hle a ni, hremna i pumpelh hauh lovang."

"Kal mai teh, mi rethei vâk vêl ka ni lova i hmei lah ka ni hek lo, nang mi uikawm..." a sawi zawh hmain a hmui ka hupsak ta a, a awki a sân ve bawk nen ka bodyguard te hriat lai a ṭawngkam mawi lo tak a min biak hi ka duh miah lo.

"I kâ i âng leh a nih chuan helai hmunah hian ka pawngsual ang che." Ka tih chuan meng bial kal chung hian min en a, a mitmeng kawlh leh ta hrâ chu a tawrhhlelhawm leh dâwn mang e.

"Bacon leh Soup bowl khat lek pawh ka tân i ui a nia, min hnaih tur a i ke i rawn pên leh vaih chuan.." a'n sawizawm duh lo ngei a.

"Arienna, min vau reng reng suh," a hmui hupna ka thlah rualin rangzet hian ka bân a la lawk a, ka rin loh ang tak a a chêtna chuan min ṭhâwng hlê a ni.

Ka bân a min sehna val kalh ka en chhûngin, "Tikhân lo inbuaipui rawh helai hmun chhuahsak tluk a châk ka nei lo." A bathrobe suihna ka pawt phelh hman ṭâwk. Under wear leh bra nen chauhva tlân chhuak ta ka 'model kawlhi' chu ûmzui mai nachang ka hre lo.

"Sam, lo man r'u.." ka aw ṭêng chhuai chu a ring mah mah.

Ka bân a min sehna thîp vang vang pawh ngaihsak hman tawh lo vin Thing in chu ka chhuahsan ve ta a.

Eng thil nge ka hmuh leh tâk!?

Ricco-an Arie pumah a lo kuah a, a hnute chung chiahah a kut a nghat tih ka hmuh chuan, "Nang kha, tu thûin nge Arie kha i kuah!?"

"Sir..."

"Thlah nghal rawh, bân i duh loh chuan.."

"Mahse, Sir, man turin min ti bawk sia.."

"Ricco, i kuahna hmun kha a dik lo," a bân a thlah rualin Arienna chak lutuk hian a tlanchhe bawk a, "Ûm leh rawh u." Mipa paliin hmeichhe chimawm pakhat kan buaipui ta chu a nia!

Arie, tlân kan umpha ṭêp tihah Litengsâwl a a dive lût chu mak tizetin kan thlîr ta ṭhap a, hei chu 'a em em deuh lo maw!?'

"Hmelchheho, inngam chuan rawn zuang lût u la.." a rawn au vawn vawn ri ka hriat chuan ka mipa rilru a chawk tho leh ta. Tuchen lah chu a thiam zêk lehnghâl a!

Ka thawmhnaw inbel hlîpin ka dive lût ve ta a, ka bodyguard tepawh a mal malin an rawn zuangthla ve a, hun dang chu nise ka nuih aza ngei ang; mahse, tun ṭûm zet zawng thinrim lutuk avangin ka chhungril zawng zawng a sa chhuak vek thei nia.

"Hey, Luigi, helamah.." a rawn nui sâng a, a hmelṭha vawr hian ka thinrimna a bengdai tur a ni lo.

"Arienna.." a awmna lamah ka va hleuh phei ve a, min tih thinrim dan chu a hre ve khawp mai! Minute thum lek chhung pawh kan inrem hman lo chu a nia; mahse, Arie hian engtizawng emaw tak hian min hîp riau si. A hmelṭhat chu thuhran, a mize dangdai lutuk leh hmeichhe tamtak te neih ve loh a nei tlat hi a ni.

Rei ngial tui a min chhaihkual hnu chuan vawilehkhatah a pil thut a chumi rualin a awmna hmun ka hleuh thleng ve chiah bawk.

Min tih thinrim a tumnaah ngaiin ka ngaihsak duh miah lova; mahse, minute nga dâwn a rawn lan tâk lovah chuan tui chhungah ka lût leh ta a, Arie che miah lo ka hmu hmasa ber! Tu chhungah ngîl ât hian a awm a, a mit a meng miah lo bawk. Rang lutuk a kuahin vaukam lam ka panpui ta a.

"Hey, chimawmawm nu, i thider leh em?" A biangah zawi tê têin ka ben sak a, a meng chuang miah lo.

"Eng ang pawhin min bum tum mah la tun ṭum chu i che fuh tawh lovang." Tisupin a hnâr zawnah ka kûn hniam a, a thaw ri hriat tur a awm miah lo.

Sam leh Ricco an lo thleng bawk a, "Sir, Miss awm dan hi a dik miah lo a nia,"

Chumi hnu chuan theihtawp chhuahin a pumah nemin kan buaipui a, tider mai mai chu a ni ta hauh lo.

"Arie...duhtak...ni lo, i thi thei lo a nia.."

"Sir, a zia mai ang, a taksa tih lum hmasak a ngai a nih hi."

Arie taksa vawtthlar pawm kângin Farm house lam ka panpui ta a.

Ni e, henu hi ka duh chiang alawm, eng hmeichhia pawh nise model a ni emaw ka fa a pai emaw pai lo pawh nise ka thlah hauh lovang.

B<++[BeckyRafaRenthlei]+>RR



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 2:58 pm

9.LUIGI SHINODA

Becky Rafa Renthlei

Chapter-9

Farm House
Palermo Island
Luigi Shinoda
7:00Pm

"Sam, heater on la, Ricco, nang kha ding reng lovin Arie thawmhnaw tur kan ken zing a mi a lum lampang lo va la chhuak rawh. Phone thar pahnih chah ula Helicopter rawn tir rawh se." Khumah Arie ka mut tawh a, a thaw a dik deuh tawh bawk. Mahse, tui tak a muhil ang maiin a la harh chhin eih lo.

Arienna kutah vuanin khum sirah ka ṭhu a, ka bodyguard pathumte te'n min kil ṭhap bawk nen ka ngaihtuah chian chuan ka nuih a za deuh. Muhil pangngai ang chiah a alan tawh avangin ka hlauhthawnna pawh a ziaawm sawt bawk.

"Sir, kha le.." Ricco thawmhnaw rawn lâk chu inbel tir tumin a puansin lai ka keu a, under wear leh bra huh nen ka mut hlâwm tawp kha a nia ka naute hmuh lai a a thawmhnaw thlâk tezawng thil tihchi ninghal lo chuan.

"Lo va chhuak rawh u.."

An pathum a an chhuah hnuah muangchângin a hnuailam thawmhnaw inbel chu ka phelhsak ta a.

"Hey, min pawngsual i tum tak tak elaw!?" Arie aw ka hriat chuan ka phu nasa ngei mai.

"Ni lo, chutiang eng..."

"Luigi, dâwt sawi miah suh," ruak vekin a mu tih a inhre lo nge a ke dinglam rawn lek kângin ka koki-ah min tlawh zawt a, "Arie! Eng nge maw i hriat le?"

Chiang zet hian min rawn melh ta a. Ni lo, a mitmeng paw phât ṭhin kha hmuh tur a awm miah lova tun a min melhtu hmeichhia hi ka hmuh hnu a ni! Khawi hmunah mah he mitmeng hring râm dangdai zet hi ka hai ngai hek lovang.

Ṭawng tumin ka âng zuau a; mahse, ka thinlungin a hriat hi chuti mai a sawichhuah chi a ni lo.

Arienna Grico nilovin Carli Davino a ni!

"Luigi, i insawifiah dawn em? Saruaka ka mutna chhan hi i sawifiah ve ngei chu a ngai ang." Chhâng buai duh lovin a thawmhnaw inbel tur a ka kensak vek tawh chu amah vawm nân ka hmang a, pindan ka chhuahsan ta a.

Ni e, ka hmuh hnu ang a ka hriat tlatna te, a mize dangdai leh kawlh em em si te hi Carli Davino a lo nih reng vâng a nih hi! Bumin ka awm. Luigi Shinoda hi min bum a ni.

Farm house kawtah thinrim ru ṭûnin ka vei nghut nghut a, Arianna Grico ang a lem changin Carli hian min rawn bum tih hrilhfiah ngai lovin ka hrethiam vek. Khâ zan Carli thianghlimna ka laksak zân khân rilru hrehawmin ka awm a nih kha. Tunah ka nunah mihrang ang a lo lûtin ka fa a pai bawk a, a dik chiah. Carli a ni emaw Arienna pawh nise ka fa paitu hi mi thuhmun anni a, nupuiah ka nei ngei tur a ni dâwn lo'm ni!?

Mahse, min bumna man hi a to fer fer khawp ang le.

"Sir, Miss ril a ṭâm." Ricco pawnah rawn chhuakin a tukkhum a tuai vut vut a. Ka ruahman dan angin engmah a kal eih lo hi mak ka ti.

"A ei duhzawng zâwt ula siamsak rawh." Ti hmukin thingkung nghêng hian ka ding a, hmeichhe tleirawl satliah bum theihin ka awm chu a nia!

"Sì Sir," Ricco nui tut tut chu ka run viau nâ a, inhau mood-ah ka chêng tlat lo.

Carli hi ka hrechhuak lo der dâwn nge, a nihna dik tak sawi chhuakin ka nun aṭang hian ka thehchhuak dawn tih hriat va ni suh.

Farm house chhung a ka luh leh chuan dinner dawhkan kilin a lo ṭhu thân tawh a, ka lût lai min melh zauh pah hian, "I uikawm viau nain i hnathawkte talin min ngaihsak a ka ngaidam ang che," zu han ti a!

Whisky inthlit pah hian a hmêl ṭha zet chu ngun takin ka en reng a, ani erawh chuan min ngaihsak leh tawh chuang lo. A thil eilai chauh ngaihvenin a kâah a hnawh lût mawlh mawlh a, Ricco leh Sam-an maktih hmêl zet a an en te chu hreawm pawhin a awm lo.

"Kan Shinoda ropuia chu eng mah i ei ve dâwn nange?"

"Ṭawng ṭawng lo khân ei rawh," ka ti hmuk a.

"I eichâk ve a nih te chuan siamsaktu tur che an awm reng hi."

"Arienna, min hnial buai lovin i thil ei lai kha eizo la inbe teh ang. Sam, invai khân min chhuahsan ula koh innih hmâ loh chuan hetah rawn kal a ngai lovang ka phone tur erawh Ricco khân rawn dah se la."

Arienna nen chauh kan awm hnuah ṭawngkam khat mah ka chhâk chhuak tawh lova whisky no thum zet ka lem tawh bawk.

"Ka fa i pai tak tak em?" A ṭhutna bulah dingin chîk zet hian ka melh a, a sam buang ṭhin dum ta vek te, a mit rawng thlengin min bum nân a thlâk chu a ni si a; Tui hâk a thider Arienna hi Carli Davino a ni tih rin harsa ka la ti cheu.

"I fa chu a ni ngei alawm," a ti tawi tak a.

"A nih chuan naktukah helai hmun chhuahsanin kan innei nghâl ang."

"Eng maw i sawi!? I â chu a ni êm lo maw!?"

"Â zawk chu kei nilovin nangmah khâ i ni."

"Pasala neih che ka tum chhin eih lo." Thinrim zet hian a rawn ding chhuak a, "Arie, i mit rawng kha a pâwl ni khân ka lo hria a, tun minute reilotê chhung a mitmu rawng hring i pu ta daih hi eng lemchan nge ni ngai?" A nihna fak sawi duh chiah lo hian a rilru enchhin hmasa ta ila ka tifuh zawk ang.

"Ka mitmu rawngah lo buai suh, ka piantirh aṭangin a hring char char alawm le ka put," buai map lo hian min chhâng nia!

"A nih chiah kha, tu emaw mitmu rawng hring nei ka hriat nen inanna riau innei; mahse, nang aiin a kawlh lo zâwk." Nui suk chung a ka tih chuan a nui duh ṭhak nâng.

"I hriat ṭhin chu ka hriat ve miau loh avangin ka lo buai ve na tur a awm lo, chuan inneih lam kha chu sawi chhuak duh suh; a chhan chu kei hian pasal neih ka tum lo, i fa ka pai a ni maithei; mahse, hei hian i nupuiah min siam thei tihna a kâwk rêng rêng lo a nia." Intivei zet hian a hawi larh a, Carli mizia dik tak ka hmuh belh niin ka hria.

"Kan la hria ang chu, Biak in thleng rak a hnuh ngai mah la ka hreh miah lo, ka fa chu nu leh pa kârah a seilian tur a ni." Whisky nokhat dang ka tlâk leh pawp a, eng game nge khelh a tum tih hriat hi ka tân a pawimawh hmasa ber. Chuvang chuan Arienna angin ka ngai lui zel rih phawt tur a ni. Carli Davino chanchin erawh chhui a awlsam khawp ang.

"I tum chhin poh a ni ang chu, min lo hriatthiam theih chuan ka mut a chhuak ta." Min kal pelin nichina a mutna lam kha a pan zui hmak a, a nihna dik tak ka hrechhuak a ni tih hi a hriat ve kher a ṭûl hran lo ve.

Dârkar chanve liam ta a tui hâk a thi teuh deuh Arie kha kei chuan ka ngainain ka duh zawk. Carli Davino hmeichhe mâwl leh mahni sa himna tur ngaihtuah thiam lo kha ka tei thei chai lo.

Bedroom-ah ka zui lût ve ta a.

"Luigi, ka rawn mu ve dawn tih sawi tum miah suh," min hmuh rualin a ner sak a.

"Ka khumah ka mut lohvin khawiah nge mu se min tih a, zanin chu ka fa kiangah mut ngei ka tum." Ka thil in avanga ka lu rit chhak chu haiderin khumah ka lawn ve nghâl a.

"A ṭha e, ka kiang a i mu duh a nih chuan intiamkamna felfai tak kan nei tur a ni." A thusawi chu hla tak aṭang a lo ri chhuak nimaiin ka hria. Kei hi ka dik dawn miah lo, ka mit men ka tum pawhin ka tihtheih tâk hlawl loh avang chuan ka chhîng ta riai riai a.

##

Ka harh leh hmasak ber rual a ka thil hmuh chu leh!

Arienna dârthlalang hmaah lo dungin a pum leh a kâwngbâwr uluk zetin a lo enkual a, kawr eng mah a ha lo bawk. Under wear erawh a inbel hrâm a, a pian nalh zaih leh inkhaithli thlarh te, a hnute tê lam deuh kawh vah te chuan ka hnuailam nunna a pe lo chauh nia maw le. A taksa lâwng ka hmuh a piang a danglamna ka lo nei hman ziah hi thil mak a ni!

"Eng ang pawhin i pum khâ teh kualin bih ngun mah la tun dinhmunah chuan a rawn puar thut lovang." Ka nui chhuak hawk a.

Ka lam rawn hawi chung hian a hnute lang hiai chu thup a tum vei ngial a, "Min en reng lo khân i tihtur ti rawh."

"Ni e, ka tihtur ka ti ang." Khum thawhsanin a hnungah ka va ding a, a makti hmêl âng deuh pam chu ka hmuiin ka kharchilh zui hmiah.

"Eng..?" Inlâk hran a tum ngial a, ka vawn ngheh êm avangin chuti mai chuan a thei bik lo.

"Ka ta i ni, ka tâ chu ka vênghimin ka enkawl ṭhin." Ka sawizawh rualin duhthawh zet hian ka fâwp zui ta a, a ka chhung sa hiam te, a lungphu dat dat te chuan mipa ka nihna a rawn tharthawh leh ta.

Uar leh duhthawh takin fâwp tâwn tâwn mah ila min chhân chu sawi loh a hmui chîp tumin ṭan a khawh nasâ! He nu Carli Davino hian min hîp takzet tih phat buai ai chuan a taksa leh a thinlung nei tur hian hmâ ka la mai tur a ni.

"Luigi duhtawk teh.." a biang sen ṭân ṭân chuan experience a neih loh zia leh atân a mipa hmasaber ka nihna min hriat nawn tir lo thei lo.

"Bul kan ṭan dun dâwn alawm, ka ta i nihna tukkin hian nemngheh ka tum bawk." A inrin hman hmain khum lamah ka pawm phei ta a, tharum tel lova thlêm chung zelin a taksa ka chûl lawr dan dan a, milim ang maia a mu khawng ât hi chawkphur thei turin thiamthil ka show ngei ang.

"Arie, min hnial suh aw.." a beng bul a phun supin a hmui ka bawhthuah zui zat a, ṭawngkam khat mah a chhâk chhuak lo.

"Arie, duhtak.." min lo chhâng lêt ve tih ka hriat rualin uar fahran hian ka fâwp a, a taksa mâm han leh lum ham ham te hi ka thlah phal tawh teuh lo.

"Luigi...!?" Tisa châkna avanga a mitmeng buai nak chu a nalh ru phian.

Thiam leh zei taka ka thlêmna chuan hna a thawk ṭan ta. A kuttin zum sâl a hma lawk a min hamna ngei hmang khân ka hnungzâng leh ka dul thuar vel a rín zai zai a, phurna nasa takin min fan chiai chiai thei nia.

"Ka fa lo piang tur tân hian ka tling tâwk." A hmeichhiatna ka deh rualin a phu deuh zak a, a ma duhthu rêngin a vawikhat nân min rawn fâwp ta vang vang a.

Kir leh thei ka nih tawh miau loh avangin ka ta a ni tih nemnghet turin pumkhatah kan insiam ta a, min hnial emaw min dâl emaw a tum chhin miah lo! Phûr hûrh angin a lang lo nâ a, a thin zâwn phu dat dat leh a thaw lum hiam te chuan keimahah lungawina a nei tih ka man thiam tlat.

Tisa thil a ka milpui dik tak ka tawng chiang alawm, hmeichhia eng emaw zât ka lo mutpui tawh te zingah Arienna ang a insûm thei hi pakhat tê mah ka la tawng lo.

"Ka duh che.." ka âwm nghêng a chhîng chial hmeichhia hi thlah tumna ka nei ta rih lo.

After 3 hours

Tisa thil a kan duhthu rêng a kan inzawmna chuan kan boruak nuam lo zet kha a thlâk danglam hlauhva 'kan model phuahchawpi' hian mize engzât fakau nge a neih le!?

"Luigi, lunch kan siam dun thei ang tiraw!?" Nui sâng chung hian choka lamah min hruai phei a, hnial ka tum ûk nâ a, ka ṭhulh leh chiang kher mai.

"Sì, Arie.." a kawngah kuahin ka lamah ka pawt deuh salh a, "Tun aṭang chuan inhnial tawh awih lo aw," ka tih chuan thuawih hmel zet hian a bu vei nghat a, ka nui chhuak teuh kher mai.

A chângin min ti thinrim a, a chângin min ti hlim viau lawi si.

Spanish chaw dik tak kan siam dun a, "Kum engzat nge i nih?" A kum dik tak ka hresa reng. Mahse, game kan khêl tawn ve ve a ni tih sawi lan kher ka tum lém lo.

"Kum 20.." ka mitah tak min en a, ka rin loh deuhvin thudik a sawi mial!

"Ok, kei nen kan kum a inthlau viau nâ a, hnuai lam erawh a inmil si.." nui lek lek chunga ka tih chuan ka lam hawiin fork a rawn lek lang zauh a, "I kiang a ka awm lai hian min duat hlê rawh chuti lo chu i inchhir palh ang e." Eng a sawi tumna nge hre chiah lo mah ila ka ngaih erawh a ṭha chiah lo.

Lunch kan kil dun lai chuan "Inneih ka duh lo ka tih kha ka sút leh e," tiin hnuailam a melh zui daih a, "A ṭhat chu, inṭhenna a awm tur a ni lo tih i hre tel dawn nia," ka ti hmiah.

Ruahmanna felfai tak hnuaiah engkim a dik thlap a tih ngei ka tum a, Carli Davino thil tum ka hriat chhuah hma chuan nupui pathum neih ngai mah se ka nei mai tur a ni.

A vawihnih nân a nunah ka lût leh ta. Carli chunga ka chêt dan mawi lo tak kha Arienna hian min thungrul a tum tih hai theih ninghal lo chuan.

Hmeichhe thuhnuai a kûn ṭhin mipa ka ni lova ka thunun theih ngei tur hmeichhe inluling hian phuba lâk chu han tum poh teh se. Hmangaihna ngaisâng lo tu Luigi Shinoda nun a inrawlh te chuan an phû tâwk an hmu zel ṭhin.

Kiai suk chung hian, "Inhualna hran kan nei dawn lova eng ang mipa nge ka nih tih i hriat duh chuan i ṭhiannu Bianca zâwt ang che."

"Eng..Eng maw i sawi kha!?"

A hmêl dâng ta lâwp lâwp chu uluk zet hian ka en leh phawt a, "Bianca nen ininhria a ni lawm ni? I hre lo a nih chuan keiman ka la inhmel hriattir ang che." Ka ti ta a.

A hlauthawng hmel kha ka hmu hman vek tawh a, rinhlelh rual lohvin Bianca ṭhiannu Euro tam tak ka pêk ngei Carli kha a ni tih ka nemnghetah ka ngai hmiah...

Phuba lâk tumtu hmeichhia hi nupuiah neiin ka inhmangaihtir dâwn em ni ang?

B<++[BeckyRafaRenthlei]+>RR

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 2:59 pm

LUIGI SHINODA
Becky Rafa Renthlei

Chapter-10

Palermo Island
Farm house
Luigi Shinoda

Arienna breakfast tur ka naute ka siamtir a, chawlh hmang tur a kal kan ni tak nâin ka rilru ka thlâk hlauh.

Farm house-ah hian eng mah tih khawmuan tur kan nei tawh lova a rang lam a inneihna buatsaih chûk chûk ka duh avangin Ricco-a phone rawn dah ka hmang kual zung zung a, Arie erawh a la mutui sâk sâk khawp mai.

Min bum tumin hma la teh mah se Luigi Shinoda, khawvela Jet plane ṭha ber ber siam chhuaktu thluak hi a ûmpha ngai lovang. Ka Solicitor biain inneih hun tur leh ka duh dan ka hrilh zung zung a.

"Luigi, ni tlemtê liam taah Stella nen in inṭhen chauhva i company hian a tlâkchhiat phah lâwng maw!? Tia min zawh chuan, "Nupui hual ka nei dawn hleinem, nupui tak tak ka nei dâwn zawk a lawm, nupui fanau ka neih vânga ka company-in a tuar dawn a nih chuan tuar mai rawh se, a aia ṭhain din chhuah ka tum leh mai tur a ni." Tiin ka chhâng hmiah.

Ka rilru diktak a ni bawk. Carli Davino nupuiah ka nei dawn lova Arienna Grico alawm le ka neih dawn. Û huh! Company nge hlu ang a ka fa lo piang tur tih hi ngaihtuah tham fe a ni.

Arienna fa pai lai hi 'Ka fa a ni lo' tia sawi buai tumna pakhat mah ka nei tawh lova a chhan chu ka fa a ni tih confirm kher ngai lovin keima'n ka hre chiang bal.

"Sir, Miss hian kan siamsa eng mah a ei duh lo." Sam-a a rawn vui phei nuah nuah a, Arienna'n sual a chhuah leh pek tih ka hre mai.

"A ei duh ang zâwt la siam sak leh mai rawh." Ka tih chuan lungawi vak lo hian choka lam a pan leh hnu hnu a, Arienna thil tum hrechhuak tur hian inphahhnian char char a ngai dawn a nih hmêl.

"Arie duhtak, eng nge i ei duh a?" Breakfast dawhkan kilin a lo ṭhu tûm bâr a, a kum dik tak hresa lo ila chuan ka nuihzat ngei ang; mahse, ka hriat miau tawh avangin ka lo kawp tawh ṭhinte ang a puitling viau tur a beisei chi a ni lo. Inthup tum eng ang mah se a naupanna a lang leh nge nge zel.

"Eng mah ka ei duh zawng an siam lo." Juice a inkhalh khalh a. "Eng nge i duh sawi la ka lo siamsak ang che," ka tih chuan ka mi chhawrte makti hmel ka hmu hmasa ber.

"Apple Pie leh Coconut Jam.."

"Ok, kan siam dawn nia, shower neiin lo va intifai la ka lo siam ang." Dam thluam a ka tih chuan ka biangah a rawn fâwp zauhva!

Arie kal hnuah rang lutukin Sam leh Ricco, Abella te'n ei tur an siam zui nghâl a, kei hian eng mah siam ka tum tak tak teuh lo. Bumtu bum lêtna mai a ni; mahse, Arie ka duh loh vang a ni chuang lo.

"Sir, bathroom-a zai chu ngaithla teh." Abella a nui vur vur a, Arie inbualna bathroom lam hawiin a beng a chhi hrâ bawk.

"Ngaihven loh tur zawk i ngaihven a nih kha Abel, minute nga chhungin ka nupui eitur siam peih rawh u."

"Eng maw..!? Nupui maw?" An pathumin an ti rual ṭhawt a.

"Aw ni e, Arienna hi ka nupui tur a ni a, vawiin aṭang hian company ah duty tawh lovin ka penthouse-ah in duty tawh ang, a lût leh chhuak engkim hmaih nei miah lovin in hrefai vek tur a ni a; ka fa a pai tih hre tel bawk ula a duh zawng apiang pe ang che u." Thupe ṭhang aw taka ka tih chuan an bu nghat nghat a, Abella za lutuka a rawn nuih chhuah chuan ka nui lo thei bik lo.

Arienna'n ka kekawr leh ka kawr tâwk lo tih hriat lutuka a rawn inbel chhuak ka hmuhin nuih loh na chi ninghal lo chuan!

"Hey, eng thawmhnaw nge ni ngai?" Nui suk chungin ka lo be vat a.

"Company lian lutuk nei ve si ah chuan i uikawm ber! Ka thawmhnaw inbel tur min ngaihtuahsak lo tih sawi nawn kher ka duh lo a nia," a ti hmarh hmarh a.

"Wow! Ka tihpalh, i thawmhnaw hâk tur kan lo dah chhuah theihnghilh a ni e," Ricco ka mitmei zauh a. Rang takin Arie thawmhnaw inbel tur la in a kal ta nghal a, Lal fanu ni mah suh se ka duh ka hriat theih nan leh ka neih theih nan chuan mipa zaidam leh thilphal ber angin ka lang mai tur a ni.

"Khatia ding reng lo khân ka breakfast tur min siamsak rawh u," Sam leh Abella lam hawia tiin a thawmhnaw hâk lian hlup chu a melh zauh a.

"Luigi, min lo zâwm ve la.." ti sapin breakfast dawhkan a kil nghal a, ka ṭhutna tur min pawhchhuahsak vei thlap! A chezia reng reng a dik thlap a, a confi em em bawk.

"Coconut Jam hi ei chhin teh." Ka hmui záwnah a kut a rawn phar dâ a, ka hnuai a thawkte hmuh lai hian min barh a tum deuh em maw ni!

"Arie," a nui sâng a, ka ân hma loh a kut lâksawn a tum tlat si lova ka âng ve ta nge nge a. Ricco a rawn lêt leh tawh bawk a, sofa-ah Arie thawmhnaw tur a rawn chhawp hnawk a, "Miss, i duh duh thlang rawh le."

Breakfast kan ei chhung zawngin an pathumin min vil ṭhap a, hundang chu nise ka kalsawn tir ngei ang, kan model-i hian tirh a châk hmel êm a ka kalsawn tir duh ta bik lo.

Palermo chhuahsan tura kan inbuatsaih lai chuan ka private jet pahnih a rawn thleng tawh a, Ricco leh keini pahnih hmun khatah kan kal ang a, Sam leh Abella a hranin an lokal ve thung dawn a ni.

"Ka nupui i nih hunah chuan i hna thawh zawm phalsak i ni tawh lova, ka chenna hmun bâk khawi mah chhuahsan phalsak i ni lo bawk a nia," Palermo chhuahsanin kan thlâwk chhuak tawh a, ka koki nghêng riala a ṭhu chu thil mak pawh a ni lo. Tukkin zing aṭanga a nungchang rawn inthlâk ta thut hi a chhan hre lo mah ila eng tactic emaw a hmang leh dawn tih ka hrethiam vek.

"A anglo lutuk, ka hna ka bansan dawn miah lo." A ṭhut dan siamremin min en hâ a, a lung nih loh hmel hle bawk.

"Luigi Shinoda nupui tân hnathawh a ngai lo tih hre tur chu i nia lawm; i mamawh engkim pêk i ni ang a, i account-ah pawisa ka thun bawk ang, i tihtur chu nupa nun min hmanpui leh ka fa ṭha taka enkawl kha a ni mai."

"Ni lo, chutiang ka duh lo.."

"Min hnial suh ang che, tunah hian ka company meeting room-ah sawm bik mi eng emaw zât te'n min lo nghâk reng tawh a, inneihna hunserh hman laia i awmdan tur suangtuah mai rawh." A kut vawt thlar humsak ka tum chuan a inlahrang vat a, "Vawiinah kan innei nghal dawn a maw!?"

"Ka sawi ang chiah kha a ni mai, mokawr fual hâk i lo inbeisei deuh em ni?" Elsen lam rawngkai lek lek a ka tih chuan, "Beisei lo ve eng mah beisei ka nei lo." A ti leh lawi si.

Charter Jet
LSJ Company
Main Building
Italy. Arienna Grico

Company Main building chung zâwl a jet a ṭum lai chuan nghet zetin Luigi Shinoda'n ka kutah a vuan a, he pa hi ka hrechiang lo nge min duat thar ta riau hi a chhan pawh ka hriat si loh!

Nizana hmangaihna min chenpui lai khan ka chhungrilah inthiam lohna lian tak a awm rauh rauh a; mahse, ka phuba lâk tumnaah hian tiamchin a awm tlat lo. Ka tân mipa hmasaber a ni a, amah ka tihnat theihna tur ber ni a ka rin a piang leh min rin ngam phawt a ngai tih ka hre ve kar.

Company kawt a mipui tam zet lo ding khawm leh reporter team khat daih zet lo awm te chu ka rin phâk loh leh ka beisei miah loh thil a ni. Ka kutah vuan tlat lo se chuan baklêngin ka tlanchhe duh maiin a nia ka rin.

"Arie, hahdam rawh, i thawmhbaw inbelah buai lo la, keimah rinchhanin ke pên ang che." Awki hniam chhak leh ril ruih a min biakna chu a sexy kher mai.

Ni e, tukkin a ka thawmhnaw inbel kha hlîpin sweater sen duk leh pawnfen dum ka khup chen lek a chhing ka inbel ta kha a nia; mahse, mihring heti zozai hmuh atan chuan a chhuanawm fahran loh.

"Mahse, eng ati nge hetia an punkhawm chiam a!?"

"Vawiinah company mi leh sa hriatpuina leh khawvel ram hrang hrang a ka thawhpuite hriatah ka nupui i ni dawn tih kha i theihnghilh ta em ni? Tun aṭanga darkar chanve a liam chuan Solicitor kaihhruaina hnuaiah inneihna thuchham kan nei dawn." Fiah kêk kâwkin a ti ta a.

Ni lo, khawvel hriatah engtin nge a nupui ka nih ngam ang, ka unaupa Lorenzo beng a thleng a nih vaih chuan ka chhe vek a ni mai.

Carli Davino angin lang lo mah ila ka pianpui, ka thisen zawm hian min hai dawn lo hrim hrim. 'Dios, min pui hrâm teh' rilru ṭawngṭaina ka neih ngei a ngai. Ka mit rawng chungchangah ka chesual tawh a, ka lense vuah kha tui chhunga ka tâlbuai lai khan a bo tih ka hre tlat lo a tin ni!

Arienna Grico ang a khawvel hriatah min nei a nih chuan Carli tân phuba lâkna chance a tam dawn tih ka hria. Mahse, ka unaupa ka bum tel thei dawn em ni?

"Inring rawh le, Camera hmachhawn la, khawvela model ṭha ber i ni tih tarlanna hun remchang a nih hi." Tiin ka kâwngah min rawn kuah a, a thawmhnaw inbel Blue Jeans leh Shirt dum a hâk te chuan ati buai eih lo. A sam thliin a chhêm thur deuh chhap te chu engti maw tak hian a nalh ru riau bawk.

"Mr Shinoda, i nupui hual kalsan a i thlan chu a hming min hrilh thei em? I model chhawr lai a ni chiah em? Khawi hmunah nge in intawn?" Zawhna chhân sên loh a ri nuaih nuaih a, ka thâw a chham mai dâwn alawm le.

"Arienna Grico, kum 24, Shinoda super model.." Luigi ṭawng chu a ring lêng láwng hle a, kei erawh ka zâm ru takzet. Super Model-ah min chhuah tehngawt nia!

Camera de chuai chuai leh Security khauh tak hnuaiah company chhunga min hruai lût tu Luigi Shinoda hi mipa namai a ni lo tih ka hriat phah. US ram hruaitu lawk deuh deuh te pawh ka hmu nual a, Rome khawpui a solicitor ṭha ber ber te hmuh a ka incheina hi duhthu a va'n sám lo tak.

"Miss Grico, i pasal tur hi i hmangaih em? A hausakna ûm a nei nge i nih?" Min zawhna chu ka chhâng lo hrim hrim.

Meeting room-ah mî eng emaw zat an lo ṭhu tawh a, chung zing a langsar ber chu Stella Costa a ni. Mitmeng rum âl chung a min melhna chu dâk vahin ka chhâng lêt a.

"Ka thawmhnaw hi ka thlâk ve dawn lo em ni?" Luigi lam hawi a ka tih chuan a nui suk a, "Dâwn tehreng mai," a sawi zawh rualin a personal asst. Stefania leh hmeichhe dang pahnihin room pakhatah min hruai lût zui ta a.

Inneih hunserh ṭan hun pawh eng mah ka hre lova Luigi ruahmanna siam pakhat tê mah hriatpuina ka nei lo bawk.

Pindan zau hek hawkah ka hmai leh sam an chei zung zung a, ka kawr hâk tur ka hmuh meuh chuan maktiin ka khêk ta râih a! Solomos Bridal studio Italy ami mokawr nalh lutuk a kâwng achin chung lam taksa rem thlap, a hnuailam erawh 'A' cut nalh zet chu ka inbel ang tih mumangah pawh ka la mang chhin lo!

"Arie, i thawmhnaw inbel tur buaipui nân hun ka khawhral hnem khawp mai." Stefania a nui var var a, ka hriat miah lova Luigi Shinoda buai dan tur ka man pha ve chiah. Ani hian nupuiah min duh tak tak chu a nia, eng thil mak nge thleng ta hi!?

"Stefania, Luigi nen engtikah nge in inbiak?" Tia ka zawh chuan a nui ringawt a, mothuam famkim nena kan awm meuh chuan Carli hmeichhe tleirawl anna pakhat mah ka nei tawh lova Arienna Grico, Shinoda super model chiah chiah! Sì, nuam ve le.

Inneih hunserh hmanna hmun a min hruai luh lai chuan Lorenzo Davino, ka unaupa rêng ka hrechang ta lo. Ka hma a mipa ding, nui hmelpu chunga min lo thlirtu Luigi Shinoda hmelṭha vawr chuan ka mit a la hmasa ber.

Italian suit thim lam inbelin 'Necktie grey colour' a rûk a ṭial a awrh bawk a, a hnuaia a kamis hâk vâr sar te chu a inhmeh hliah hliah bawk. Kekawr ipte zen chunga a ding ka hmuh meuh chuan 'phuba' lâk lam a lang ta rih lo. (Cover photo en mai rawh u, Luigi wedding dress hrechiang duh chuan..BRR) Businessman ni lovin Model niawm a mawi a ni.

Ka mitah tak min en chung hian, 'Mi piaci e ho' a ti thûm chhak a.

Hepa zûnah hian ka uai tur a ni lo.

"Arie, i nalh lutuk, i nalh hlê a ni." Ti lehin inneih hunserh hmangtu tur lo dinna lamah min kâi phei ta a. Rilru sual putna chi a ni lo rêng rêng, a hmelṭha tak leh fai vang te Italian mipa hmelṭha thlan zinga lang pha ngat, businessman hlawhtling hi mitkhap kâr lekin ka pasal a ni dawn a nia! Vân lam hawi a 'Grazie' tih hial ka duh maw le.

Thuchham teh duah kan nei hran lo.

'Voglio vendicarmi (Phuba lâk ka duh a ni. BRR)' Tia ka phun sap ri chu Luigi'n a hriat loh hrâm ka beisei.

LSJ Charter Jet Company Chairman Luigi Shinoda nupui ka nihna puan chhuah a nih rual chiahin ka pasalin ka hmuiah a rawn fâwp ta a, minute rei lo te chhung a inneihna ropui chiai buai miah lova buatsaih theitu hi ka bitum dawn chu a nia, huphurhawm ṭan ngei mai.

Camera de chuai chuai kar a, "Carli, eng thil nge i tih hi?" Bianca mitmeng thîp râm nen kan inhmachhawn ta rân mai le! 'Lalpa, min hriatchhuahtir lo hrâm rawh'

"Signora, min lo hrethhiam rawh, inhmuh tawhna kan nei em ni?" Ka nui sâng a, makti hmel taka min enna hawisanin, "Luigi, i hriat zawng a ni em?" Tia ka ṭawng leh chuan, "Sorry, ka ṭhiannu Carli nen ka hriat pawlh che a ni e." Bianca kalsawn rualin Luigi'n ngun zet hian min en chhuk rûn a, a hmelah eng nge a ngaihtuah ka hre mai thei lo.

"Bianca kha i hre lo em ni?" Tih pahin ka kâwngah a rawn kuah a.

"Sì, Bianca ni lovin Stella ka hria." Ka ti hmak a. Kiai suk chung hian "Ka cousin a nih kha, remchângah dinner kan la kilpui dawn nia, i kawm ngeih chi a ni ngei ang." Ti liam puat chung hian Ford car lo dinna lamah min hruai ta a, Cheuffer(Car khalhtu. BRR) pawh pahnih a nei deuh thlap.

Inneih zungbun kan bun hauh lo. Sawi chhuaktu a ṭan ka duh loh avangin ka ngawi hmiah a, ani erawh chuan hreawm hmel pawh a pu lem lo va a tihzia phian.

Zungbunin min phuar lo tih ka hriat hian ka thaw huai thei nia.

"Honeymoon kan hmang dawn lova ka penthouse-ah kan tlang nghâl ang." Cheuffer hnenah kan kalna tur hmun sawiin min au chuah chuah tu reporter ṭawng ngaihsak map lo hian kan tlân chhuak ta a.

Shonoda ropuia nupui ka ni ta. Phuba ka lâk zawh hnuah South America lamah ka tlânbo dawn nge, Lorenzo kiangah ka biru zawk dâwn?

Lû thing nakin ka khap sak sak a, ka kut vuan tlattu kut hi engtikah nge ka tihnat ang a ka kalsan ang tih hi ka topic a ni leh ta...

'Voglio vendicarmi Shonoda' ti rilru chungin kan nupa bul ṭanna tur Penthouse ding ṭo lurh chu ka melh vang vang a..

B<++[BeckyRafaRenthlei]+>RR

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 2:59 pm

11.LUIGI SHINODA

Becky Rafa Renthlei

Chapter-11

Penthouse
Italy Rome
Living room
Luigi Shinoda

Arie hlim hmel ka hmuh hian ka chhungril a hlim ve viau zel nia maw le. Inneihna tak tak ka neihpui ta chu a ni a; ka nupui Arienna Shinoda nge Carli Shinoda ka tih zâwk dawn pawh ka hriat si loh!

A mokawr minute sawmhnih chhung lek a Euro eng emaw zât seng a ka order chu ka rin ang chiah leh ka lo suangtuah ang ngeiin a inhmeh hlê a, midang tân 'ka phal lo' tih tui a a tlâk aṭang khân ka hrethiam chiah bawk.

Penthouse kawta car a din chuan Arie hmêl ka en vat a, phúr hluaina pawh a nei lem lo a ni ngei ang, a kut ka vawnna chu nghet zet hian a rawn hûm lêt a, a kut no sar leh a tin var sar te hi a nalh dangdai reuh hlê. Vawiin tlai dar nga velah kan inneih zungbun tur a rawn thleng dawn chauhva a hunlai a ka buntir lohna chhan chu thil hotê maw lê! Rome khawpui a zungbun man to leh design thar ber ka duh vângin darkar thum nghah a ngai tlat sia, ka nupui ka buntir tur chu zungbun narân a ni tur a ni lo tawp.

"Arie, kan thleng a nia," a dârah vuanin a beng bulah ka phun sup a. Min en hâ chung hian, "Penthouse ropui leh nawm hmel zet a ni nâ a, min lo hmuaktu an awm miah lo." Tiin a'n phunnawi ṭan leh nghal a!

"Lungngai mahta che, ka bodyguard pathum te'n an zâwn luh kher che i duh a nih pawhin ka hrilh thei reng a nia, nge; ka pawm lût zawk dawn che?" Cheuffer-in car kawngkhar a rawn hawn chuan ka chhuak hmasa a, Arie rawn pên chhuak chiah chu pawmin ka chênna hmun hmeichhia vawikhat mah ka la hruai luh ngai lohna hmunah ka nupui thar ka pawm lût ta a.

Ka nupui, Arienna Grico Shinoda.

"Luigi, min dah thla vat rawh," a tâl deuh chat chat a, engah mah ka ngai duh dêr lo. Ka laka a thiltum hi hre chiah lo mah ila min hmangaih theih nân leh ka tel lova awm lo thei lova ka siam hunah meuh chuan eng ang mipa nge ka nih a la hrechhuak mai ang.

"Bengchheng suh, honeymoon hmang turah inngai la, South America-a awmah inngai bawk la, zanin tlai aṭangin i thawmhnaw tur a ṭha ber ber i inbel tawh ang." Inchung panna elevotor kan thlen thlengin ka pawm chho ta a, a duh vâng reng nge ka hre lo nâin ka nghâwng a min kuah tlatna chu a nuam vei phian.

"Sir, helamah aw.." Ricco a nui ṭhû a, kei hian tû hmeichhia mah ka buaipui khu chûk ngai lo tih a hrechiang ve tlat a.

Dinning table zau hek hawk leh sei ṭha zet chungah chuan kan inneih lawmna tur dinner peihsa diamin a lo awm tawh a, Zungbun dahna box lian leh hrawl zet chuan ka mit a la hmasa ber. Khawvel hriat a ka nupui ni ta hian a ṭha ber a bun tur a ni dawn lo'm ni?

"Luigi, ka thawmhnaw a chuar vek tawh a nia," dining chair-a ka ṭhuttir chuan a mokawr hâk a phih nawk nawk a, ava han thinchhe ve tak!

"Lungngai suh, i inbel rei tawh dawn hleinem," Sam ka mitmei zauh a, reporter pathum leh Cameraman pahnih company-in kan chhawr lai mêk an rawn lang bawk a, engvangin nge zungbun ka buntir lai hi ka cover loh lêm ang. Thuchham laia bun kher kha inneih nghehna a ni lova Luigi Shinoda, mipa Romantic tak ka ni tih lantir a hun ta viau a ni.

Chumi hnu chuan ka hnuaia thawk mipa pasarihte hmuh laiin Arienna zungbun ka bun tir ta a, a mitmeng hring râm a mak tihna leh awih theih lohna inpawlh niaih lo lang ka hmuh chuan ka nui ru suk suk nia.

"Hetiang zungbun man tam lutuk ka bun duh teuh lo." Phelh leh tumin a kut zungṭang a tuai nak nak a.

"Bun mai mai rawh, ka nupui tân man to lua a awm lo." Wine thlitsa pêin a mitah tak ka en a, "Arie, ka duh che a, ka fa i pai bawk a, a ṭha ber inbel hi i phû a ni."

"Min duh maw!?" A sam dum kawi chiat a thing deuh nak a.

"Duh lo che ila helai hmunah hian i ṭhu hauh lovang. LSJ Penthouse-ah ka lo lawm a che." Ka ṭhutna aṭanga tho chhuakin a bulah ka va ding a, a biang sen ap apah chuan ka fawhsak ta a. Abella khuhkharh ri ri hre mah ila ka ngai pawimawh eih lo.

"I hnathawkte awm laia min duat der kher kha a ngai lo a nia," tiin wine a in pap pap a, no engzat chiah nge a lem hman ka hre lo.

"Wine i lem hnem deuh nge i biang a sen ṭân a nia, nupui wine heh deuh ka duh lo a nia," nui suk chung a ka tih chuan a ner sak a, "Pasal over deuh ka duh bik lo." A ṭhutna aṭanga tho chhuakin a mokawr hâk a chawi chhîng sauh a, ka lâmah a rawn âwn phei ta a, a rui tak tak em maw ni le.

"Ricco, Madam hian no engzat nge a in?"

"Ka hmuh laiin no thum, ka hmuh loh laiin no hnih.."

"Eng a?"

"Sir, thudik alawm, ka hmuh lai chuan no thum chiah a in a, Sam-a hmuh laiin no hnih a in thung, in room-ah kan dah phei dawn em ni ang?" Dinning table darkar chanve kan kil chhung khan wine no nga a lo in hman a maw!? Amah ka en ve reng si a, a va mak ngai ve le.

Arienna rui chhâ leh ṭawng sehchilh nak chu ka room lamah ka pawm phei ta a, nichin khan rui ang pawhin a lang miah si lova a ṭhutna a thawhsan chiah khan a dân a dang daih.

Khum zaupuia ka nghah thlâk laite chuan a meng davâ diar diar a, chimawm mai siah.

"Luigi Shinoda nupui ka nih hi." A phun sap sap ri chu a ring miah lo.

A thawmhnaw inbel ka phelhsak laite chuan a lo che ve sek a, saruak a muttir tehngawt ka hreh avangin puanin ka khuh a, Juan Ramirez biak ka tum ta a.

"Juan, Arienna Grico chhui a ngai tawh lo a nia, Carli Davino zawk lo chhui ang che. Lorenzo nen eng inkungkaihna nge anneih tih lo hriat tum bawk la." Ka tih chuan, "Yes, Sir, hun rei a ngai tawh hauh lovang."

Kan inbiak zawh hnuah Shower ka nei zuai a, khuma Arie muhil chu ka en ta vang vang a; tunah naute thlakhat leh karhnih mi a pai a, wine ruiin a muhil dêr chu a nia! Ka nunah tum neisa rânin a rawn lût a kei lahin ka chhuah phal miah si lo.

Chutia ka thlir reng lai chuan a rawn irhfiak ak ak a, muangchâng hian a lo meng chhuak ta a.

"Khaw'nge ka awm?"

"Ka inah, i pasal Shinoda khumah i mu mêk."

"Luigi Shinoda, ka pasal khumah maw!?"

"Ni chiang e,"

A rawn ṭhu chhuak hlawl a, a mit hnawih pherh deuh liam leh a sam thur chhap chuan a ti lang sexy viau. A taksa khuhtu awm lova lang var haih te chu zahpui hauh lo hian a bawp sei thlarh chu a rawn kham chhuak a, 'Ka it lo' ka tih chuan dâwt ka sawi tihna.

"Hmangaihna min chênpui dawn nge tikhan inla îtawm zetin i inshow kual zawk dawn?" Ka panhnai ruak a.

"A mamawhtu zawkin min rawn pan loh chuan.." enghelh neih loh hmel zet hian a kuta zungbun chu a tuai vat vat a.

"Sì, ka mamawhna che thup buai tumna ka nei hauh lo," tih pahin khumah ka ṭhu thla ve nghâl a, mak takin min lo kuah hmasa ve mial nia! Ka ṭan hmasak ngai miah lo hian ka hmuiah duhthawh zetin a rawn fâwp ta a. Ka kut pakhat lâin a âwmbâwr zâwnah a nghat vei thlap a, ka hnial loh zawng tak a ni.

"Luigi, ka pasal i ni alawm, thiang lo a awm lo." Min nem mut laite chuan tisa phurna hian min fan chiai chiai a, tleirawl, a thianghlimna ka lâksak Carli nilovin Arienna Model zei tak kha a ni miau a lawm. Ka kekawr kap zawnah a kuta dahin a khawih tur a hai lo chiang kher mai.

Tisa châknain min fan raih raih lai lai chuan, "Ka chêt chhuah hmasak chuan ka eitur i siam zel ang," tiin ka thawmhnaw a phelh ṭan ta a.

Û huh! A eitur siam tur hian engvanga min phût em em nge maw a nih le? Mahse, tun dinhmunah chuan ka hnial dawn teuh lo, a taksa rimtui chem chem hmang hian min dâwi â ṭan chu a ni ber e.

"Lutuk tlat, i duh ang chu a thleng ang." Saruaka ka mu lau min en deuh vang vang a, "Ka pasal nawmna chu ka nawmna a ni." Nui sak chung hian ka chungah a rawn lawn ta a, kei hian ka lo ringsual deuh em ni? Arie mitmenga min duhna rawn lang chhuak hi ka hai lo chiang.

Hmangaihna chêndun a nawmna vawrtawp kan inpêk tawn meuh chuan ka nuna a lo luh chhan ka ngaihtuah tawh lova, eng hmeichhia nge a nih tih lamin hmun an chang ta lo. Ka hmeichhe duh, ka nupui ni mêk leh ka fâ paitu hi ka duh hlum lo chauh a ni.

"Arie...ka mamawh che," ka phun sup a, a hmai sen tâi hlar te chuan phurna min siam belh tulh tulh.

"Ka mamawh ngawih ngawih che, tia i sawi hunah Vanram kawtchhuah ka fanpui ang che," chimawm zet hian a meng kal râlh a, a taksa rihna hmangin min delhbet deuh ngei a, chuti maiin ka che chhuak thei bik lo.

"Ka mamawh che.."

"I la sawi zîktluak lo.." ti leh tlatin ka hnar leh khabe vel a rawn nûl nâ nâ a, a bâk duh belhnain ka khat nghal.

"Arie, ka duh che, ka mamawh che.." Tisa châkna tuipuiin min chîm meuh chuan ka tum loh deuhvin ka sawi chhuak nghal hmiah hmiah a, hmeichhe dangte tih theih loh mî thunun theihna riau a nei tlat hi amah min hnaih zualtirtu a ni.

Kan innneih zan kan hman dan chu duhthusam a ni a, amah duat leh hmangaihna chendun bâk tih tur kan nei lo. Shower hnuaia ding dunin vawitam infâwp mah ila zuk kham thei chuang miah lo a!

"Luigi, Ice cream ka duh.." khum kil lamah a ṭhu thluang diai a, ka phone a khawih mial mial bawk a, phone a la neih ve loh avangin ka sawisel sak lo. Zinglam darthum a Ice cream ngen hmeichhia ka hriat hmasak ber a ni hial ang chu.

"Ricco kan lâktir dawn nia."

"Aih, nangma'n la rawh.." ati leh tlat a, ka nuih aza deuh.

Khum thawhsan a kalsawn ka tum chuan ka kutah min rawn vuan a, "Ka lokal ve ang," ati leh lawi si! Chutah ka inrin hman hma hian ka hnungah a rawn pakâi nawlh a kan tlu ṭhelh nia.

"Hey, Arie, ka la inring hman lo." A mawng dâwm pahin din ngil ka tum a, "Tikhân naute nen min paw kawp tihna," nui hak hak chungin choka lam ka panpui ta a.

Ricco, Sam leh Abella te'n card an lo la deng a, min hmu thut chu an hawihâi teh e!

"Sir, Madam!?"

"Kan pahnih ta tur ice cream rawn chhawp rawh u le."

"Tunah maw!?" A ngaihna hre lo zet a min zawh chuan, "In madam hian ice cream a duh a." Ka ti ta a.

"Madam, tun ang hunah lei tur kan hmu zo dawn em ni?" Ricco-an ati nang nang a.

"Min siamsak mai u la," ka hnungah Arie ala awm reng a, ka rin aiin a zâng daih.

"Sam, 23 street-ah ice cream va zawng la, Abella, nangin coffee lo chhuang thung rawh." Ka tih chuan 'Yes sir' anti rual ṭhap a, Ricco lam hawiin, "Madam in ka ei duh atih chu thuawih takin pe mai rawh u, min zah ang tho hian ka nupui pawh inzah ve tur a ni." Ka ti chang fak a.

"Sorry sir.." Ricco inthiam lo hmel haiderin Arienna Sofa-ah ka nghat a, ka duat poh leh ka lakah a lût thûk dawn tih ka hre tlat alawm.

Darkar chanve hnuah Sam a rawn lêt a, ice cream tam tham zet a lo hawn chu Arienna'n paruk zet a ei zo a, khawvar dawn hnaihah bedroom lamah kan insawn leh ta chauh.

Ka nunphung a ka la tih ngai loh leh ka tihtur ni a ka rin ngai miah loh hmeichhe pakhat buaipuiin hun ka khawhral zar zar chu a nia.

"Luigi, maimitchhing rawh." Naupangchhia zetin ka mit a rawn hup a, ka khum zaupuiah insi rialin kan mu dun a, kum 30 chuang ka ni tawh a nia ka nupui thar vang hian ka ho zo vekin ka inhria. Businessman induh tak kha kan model chimawmi lakah chuan ka inti mitak thei lo a chhâ chu a ni!

Muhil tura ka insiam rem meuh chuan zinglam dar nga a ri tawh a, ka kiang a mu erawh a thaw sâk sâk a, ka pumah a kut nghatin thlamuang takin a muhil siai siai a en loh pawh tum ila ka thei miah lo! A biangah fâwp zeuhvin ka kuah lêt ve ta a.

Shinoda nun dan inthlãk danglam ta thut hi Arienna vâng a ni chiang alawm.

Stella nen kan chungchâng mai bakah ka nupui neihna chuan Newspaper front page a awh khat hneh dawn mang e, mipa nikhua lo leh Italian mipa lerh thlan chhuah zingah ka lan loh hrâm ka beisei.

Ka sumdawnna kum 18 zet ka lo enkawl tawh hmingchhiat huamin nupui ka nei chu a ni a, ka nupui neihna hian engchen thleng nge ka sumdawnna a nghawng dawn hre lo mah ila ka nupui hual kalsan a, ka model chhawr lai ka nei ta ringawt hi sawi hat tham chu a ni rêng a ni.

Stella Costa ka business partner ni bawk hian eng ang takin min dodál ang maw.

B<++[BeckyRafaRenthlei]+>RR

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:00 pm

12.LUIGI SHINODA

Becky Rafa Renthlei

Chapter-12

Presidential Aviation
Stratos Jets Shinoda
Rome-Italy After 1 month

Luigi Shinoda

Nupa nun awmzia la hrethiam chiah lo mah ila ka nunah thil mak ka tawng chho zel chu a ni ber e.

Ka thusawi zâwmin ka nupuiin a hna a zawm tawh lova ka Penthouse-ah nilêngin a awm tih ka hriat ringawt pawh hian ka thla a muang huai thei nia. Ka bodyguard pathumte nen eng nge an lo tih ṭhin hre chiah lo mah ila an kaihhruaina hnuaia awm a nih angin an tihlim turah ka ngai.

Breakfast kan eirual ziah a, office ka thlen rualin ka nupui hnenah ka inreport ziah bawk a, lunch ei dawnah ani'n min lo call thung a, dinner pawh vawikhat mah ka ei chhuahsan bik lo. Ricco leh Abella te'n Cctv record min rawn thawn chu nui suk suk chungin ka en ta a.

Arienna Grico, sofa-a ṭhu chung a lehkhabu a chhiar lai a rawn lang phawt a, a bulah Sam an a vil rûn bawk. Penthouse chhuahsan ka phalsak tlat si lova a hun hman dan ninawm zet ka hmuh chuan ka khawngaih thar ta riau.

A chângin coffee a in a, a chang leh khumah a va mu a, tih tur hre lo leh ning awm takin a vei sek bawk. A kalna a piangah Sam leh Abella'n an zui zel bawk a, khuma a mut chhung chiahin an vil lo. Ka thupek khauh tak chu an zawm ṭha hlawm kher mai.

Thlakhat chhunga a hun hmandan ka hmuh chuan ka lo ninpui ngawih ngawih a, a naupai lai thlahnih a tling ve tawh bawk a, insawiselna eng mah a nei hran lo nâin incheck up tura hruai ka rilrûk ta a.

Ka nupui chezia nuihzatthlâk deuh deuh hmuh châkin nitin Cctv record Abella ka dil ta ziah kha a nia! "Sir, Shopping Mall eng emaw berah tal hruai harh ve ila," tia an rawtna chu ka pawmpui viau.

Sumdawnna lamah ka buai si a, zan hun bâk a kiangah ka awm hman meuh lo. Arienna chimawm deuh ni a ka ngaih kha thâwklehkhatah a mizia a inthlâk thut a ni ber. Office aṭanga ka haw a piangin Penthouse kawtah min lo hmuak ziahin ka kawrchung min hlihsak ziah bawk!

"Vawiin i chau em?" Tih paha min fawh zeuh ṭhinna kha ngaiah ka nei titih der. Alak a ka rilru putdan pawh a dang chho hret hret tih phat buai ka tum lo.

"Luigi, America Jet plane pathum order kan neih kha Stella'n a lo cancel vek a lawm le.!" Office chhuahsan tum a ka kal laiin Stefania'n min ko ding leh rih a.

"Tû thuin nge a lo cancel? Tunah Stella ko nghal rawh." Ka thinrim ru kher mai. Jet pakhat design thar siam tur pawh a thluak hmang ve hlek lovin ka thu lova order a cancel hi pawmzam mai chi ninghal lo chuan.

"Sir, i chenna hmunah a kal daih tawh alawm, dinner in kil dun dawn lo em ni?" Stefania min chhânna avang chuan ka mengphar âwk a, eng ruahmanna nge ni ngai?

"Stefania, ka rualin ka chênna hmunah lokal ve nghal ang che, a tlai viau tawh tho nain Stella te nen sawiho tur kan nei a nih hmêl." Tunah tlai dar ruk a ri dawn tawh a, in lamah Stella'n min thlen khalh a nih vaih chuan ka nupui nen an inbakkaih dawn chiang.

GTA Spano car chhungah Stefania nen kan ṭhu dun rân a, ani hi kum sarih lai ka thawhpui tawh a, a rintlâk hle tih ka hria.

"Sir, Stella tel lo hian company hi a kal thei ang em? Share engzat nge a neih?" File check pah a min zawh chuan ka ner sawk a.

"Hmun thuma ṭhena hmun khat pawh chan a nei lo, chuvangin tuna a thiltih man hi a hmu ngei ang," ka ti hmuk a, Stella Costa nen kan lo inthlunzawm hman hi thil pawi tak a ni. Arienna lo lan hma kha chuan Model ṭha ber a ni a, ka partner a nih mai bâkah ka nupui hual a ni ṭhin bawk. Kan inhualna chhutchah a nih tâk aṭang khan a boruak a dang tih hrilh hriat kher loh pawhin ka man thiam ve vek.

Ka chênna hmun kan thlen chuan min lo hmuak turin ka nupui a rawn chhuak hauh lova ka hrilhhai angreng.

"I nihna dik tak pholan sak i duh loh chuan Luigi hi ṭhen ngam ang che." Stella awki fiak ṭhak ka hre hmasaber a, Stefania pawhin a hre ve tho a ni ang mitmeng danglam deuhvin min en a.

Sam leh Abella'n ka nupui an pawt bet a, Ricco in Stella a chelhbet thung. Living room hnawk nuaih leh dawhkan thal phung te chuan boruak danglam a thleng tih ka hmu thiam nghal vek a, "Stella, ka chênna hmunah eng ti tura kal nge i nih?" Ka ṭawng ring hran miah lo. Mahse, ka thinrim awki hai theih a ni lo.

"I nupui nen thupawimawh sawi dun tur kan nei," Ricco rum deuhvin a melh a. Arienna erawh an chelhbehna hnuaiah a ding khawng ât a, en pawh min en lo.

"Ka nupui hnena sawi lovin ka hnenah sawi ta mai la i tifuh zawk ang, a chhan chu pumkhat kan ni tawh." Ti nghutin, "Sam, chelh duh tawh suh u," ka ti zui zat a.

"Helai hi LSJ Company a ni lova office lah a ni hek lo, sawi dun tur inneih chuan office pan rawh u." Tih pahin Arie bedroom-ah a lût hmak a, ngaihven zui duh viau mah ila Stella biak hmasak ka duh avangin ka ûmzui ta rih lo.

After 1 hours
Arienna Grico
Experinco Hotel

Nidang aia Luigi a lo haw har avangin hmuak turin ka chhuak a, phone hmang a chanchin min rawn hrilh ka ring deuh kha a nia; mahse, Garage aṭanga Stella Costa induhtawk larha a lo chhuak ka hmuh chuan ka ding chat a.

"Eng nge i rawn tih dawn? Luigi a lo la haw lo." Ka tih chuan, "Miss Carli Davino, i inthupna hi ka hre lo emaw i ti elaw, i u company-ah lêt la i tifuh ang." Nui sâng chunga a ṭawng chhuak chu ka hre lo der tlat a.

"Carli nilovin Arienna Shinoda ka ni e."

"Min bum theih i inring reng reng em ni?" Ka bânah vuanin inchhung lam panin min luhpui dâwr dâwr kha a nia, ka ṭang hman ík lo.

Bodyguard pathum te awm lai a, min hmusit hmel tak a, "Luigi Shinoda hnenah i nihna dik tak pholan i duh loh chuan zanin hian he Penthouse hi chhuahsan ang che." Tia min vauna chu ka paidam thei ngang lo. Dawhkan chunga Ashtray banin ka vawm ta kha a nia; mahse, Sam-an a lo dawng hman hlauh.

"Tenawm nu, tun ṭum chu ka chhuah tawh hauh lovang che," min ben tumin a kut a phar dâ a, Abella'n min chhan hman lo se chuan ka nuih aza hauh lovang.

Ṭawngkam bawlhhlawh zet zet a min ankhum chungin Abella bekah a ben sak a, ka tei thei der lo, kan inphêk sual chhung kha minute reilote ni mah se ka pum let but but leh ka luak chhuak hlûi tihkian tumin thâw ka la vang vang a, Luigi leh Stefania lo luh thleng khân ka la pangngai thei lo.

Luigi lakah hian theihtawpin ṭhat ka chhuah a, ka mizia ka thup hmiah bawk. Thlakhat lai kan chêng dun tawh a, vawikhat mah kan la inhau chhin lo bawk. Zanin a Stella thu rawn sawi aṭang khan ka phuba lâk tumna a hlawhtling dawn lo tih hriatna ka nei miau alawm.

Carli Davino ka ni tih Stella'n a hriat tawh chuan Luigi tãn thudik haichhuah a har tawh lo.

Room aṭangin an inhnial thawm ka hre ve vek a, thlasik boruak vawt vurah hian he in chhuahsan hi ka duh rum rum tawh. Luigi'n ka nihna dik tak a hrechhuak a nih chuan hrem lohvin min chhuah ka ring si lo. Khumah ka ṭhu a, eng mah luhpui ka nei hran lova kut ruakin ka chhuak leh dawn tihna a ni mai.

Balcony lamah chhuak pheiin chhuah rûkna tur ka melh kual ruai a, a vâng pharh mai.

Kan room aṭanga chhuahna hnai ber pawh feet thum zeta thui a ni a, ka tân beisei bo a ni. Dinner kan la ei loh avangin ka pum a ri ruk ruk tawh a, zanin hian ka chhuak thei ta lo a nih pawhin naktukah tal chhuak thei tura ruahmanna ka siam a ngai.

"Madam, dinner kan peih tawh a nia," Abella'n min rawn koh chuan chhân enah ka en lo va.

"Madam.."

"Abel, room-ah min rawn pe ta mai che."

"Sì, mahse, boss-in lo hruai chhuak rawh a ti." Nuam lo tih hmel deuhvin hnuailam a bih zui daih a.

"Chuti a nih chuan dinner ka ei lo mai ang," Ti nghauhvin balcony lamah bawk ka chhuak leh ta a.

"Arie, duhtak.." Luigi aw ka hruat chuan ka dinna ngaiah ka la ding reng a, Stella khân ka nihna dik tak a la hrilh lo nge a aw ah eng mah danglamna a awm lo.

"Arienna, lokal la dinner rawn kil rawh le.." dam thluam a min koh leh tâkah chuan muangchangin min lo nghahna lamah ka chhuak phei ve ta a.

Khum bulah dingin a thawmhnaw inbel a lo thlâk mêk a, mitmeng zîmsan a min en chung hian, "A dâwih zâwk ang mai a bîkbo kha i inhmeh lo, tumah an awm tawh hleinem, i pasal hian ka venghim zel ang che." Thutak zeta tiin min rawn pan ta a.

A taksa ruak kûng leh a bân sek uchuak hauh lo zantin a min kuahtu chu ka melh ngar a, a mit Tuifinriat ang maia paw mûk raih chuan min hawisan eih lo. "Arienna, nang leh ka fa hi tumahin an tihnat che ka phal reng reng lo, min ring la i pasal thlazar hnuaia awmdan tur tâwk thiam tumin inzir rawh aw.." duat tih hriat taka min kuahna chuan ka lungphu a thlâk danglam hret.

"Luigi englo..!" Ṭawng tum a ka âng zuau chu a kutin ka hmui a rawn hup a, "Stella chêtdan mawi lo tak avang khân ngaihdam ka dil a che, naktukah hunawl insiamin Mall-ah kan kal dawn nia, i doctor tur ka be fel vek tawh bawk." Ti lehin a âwmah min kuah bei ta a.

Ka chhungril a inthiam lohna nasa tak lo awm chu tihreh tumin thâwk ka la hak a, ka bum tih a hriat hunah chuan tuna min kuah ang hian min kuah tawh hauhvin ka ring lo.

Reingial a âwm nghêng a min kuah hnuah ka inla hrang ve ta ṭâwk a, ka thinlung kil sira phuba lak duhna zawi zawi a reh ṭan mek hi ka thil duh loh ber a ni.

"Dinner chu.." tihpahin pindan ka chhuahsan ta a. Sam leh Ricco lo nui suk suk chu ka ngei kher mai. Stella awm laia ka chêt dan khân an nuih ati za tih ka hre reng.

Dinner kan ei chhung zawngin Luigi a ṭawng miah lova nichina min duatna ang kha a hmêlah hmuh tur pawh a awm hran lo; min haw hmêl a pu chuang bawk lova ngawirengin wine nothum zet a in tawh!

"Luigi..!?"

"Ṭawng lovin i plate ami eizo rawh." Ati nghut a.

"Nangpawh ei zo rawh." Ka tih chuan nui suk chung hian, "Nupui te an puar chuan pasal pawh kan puar a ni mai." Tiin whisky a inthlit zui zat a, minute thum lek chhunga a mize inthlâk ta daih hian ka ngaih a ti ṭha lo. Naktukah a rûkin Ricco ka zâwt tho vang.

A bodyguard inla strick deuh deuhte tlân bosan theih dan a vâng dâwn ê!

Khumah Luigi phone khálin ka mu a, ani'n Laptop khawihin Private Jet list a thliar nghauh nghauhva, "Puih theihna che ka nei em?" Kan ngawih rei êm avangin ka be hmasa ta a.

"Tikhan ngawirengin lo awm la, nakinah i thawh tur ka hrilh ang che," chimawm zet a kiai suk chung hian ka mal lang huai chu a melh pah zuk a, a ngaihtuahna a thilawm ka hre thei mai.

"Zaninah kan off ang." Tih paha puan ka sin ṭhat chuan ka lamah a rawn bawk phei a, "Kan nupa nunah hian 'off' a awm lo, 'On' hlir a ni." Ti supin ka hmuiah a rawn fâwp ta a.

A mipa rim faisar leh a hmui hnâwng chap te hi ka lo thlahlel ru reng tawk zawk a ni.

Duhthawh leh uar tak a kan infawh mawlh mawlh lai chuan Luigi phone ka kenlai chu a rawn ri ta a.

Stella Costa tho!

He mite pahnih hian ka hriat loh vin ruahmanna an nei ru zawk em ni ang? Bum ka tumna lamah hian keimah bumin ka awm zawk tlat a hriatna ka nei.

"Stella, sawi rawh." Luigi ṭawng bung hmuk chu ka ngaithla hrâ a, hriat hmaih neih ka tum miah lo.

"Lorenzo Davino leh i nupui kha unau pianghmun anni, Grico nilovin Davino a ni nupuia i neih kha." Luigi mitmeng a danglam miah lova an ṭawng ka hre pha tih hreawm pawhin a lang lo.

Tunah chuan Transportation motor hman tur zawn a, he in hi ka chhuahsan a ngai tih ka hre tawh. Hremna ka dawn hma a Luigi tlanbosan hi ka tih mâkmawh a ni ta...

B<++[BeckyRafaRenthlei]+>RR

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 2nd, 2018, 3:00 pm

13.LUIGI SHINODA
Becky Rafa Renthlei

Chapter-13

La perla
Italy Rome
Luigi Shinoda

Stella nen kan inhnial hrep hnu khân thinrim mitmeng pâwng zâwrh khawpin min melh kha a ni a! Kei hian kum hnih chhung inhualna ka lo neihpui kha ka â a ni hial ang. Arie nen kan inkawp chhung sawi tham a awm miah lova; mahse, kan nupa nun erawh a nuam dangdai riau!

A naupangchhe zia erawh a paih mai bik lo. Ka lakah inthup tum eng ang mah se a nihna ka hriatsa miau avangin ka haider char char a, dik tak chuan amah nen nun bul ṭan ṭhat a, chhungkaw pangngai din ka hreh miah lo.

Balcony lama a lo ding zum zât ka hmuh khân ka nui chhuak teuh kher mai! Mahse, thin tertek nei a nih vângin ka insûm leh ta zâwk a.

Lorenzo Davino nen an inkungkaihna erawh ka la hre ta lo fo. Juan Ramirez paw'n theihtawp chhuahin hmâ min lâkpui ngei a, hmasawnna hmuh tur a la awm eih lo.

Ka kianga muhil Arienna chu ka thlir deuh sek a, dik tak chuan a naupai chungchângah pawh chuti tehchiamin ka ngaihven lem lo, a pum lah a la thêp zaih mai si a, a puar hunah ka la buaipui ve ang chu.

'Carli Davino leh Arienna hi mi thuhmun anni' tia Stella thusawi kha ka bengah a ri nawn tlut tlut a. Kei lo midang engzat takin hria ang maw!

Khawvar rualin ka harh lehnghal a, ka mit thîl hlur chu tihreh tumin ka khap sak sak a, 'Arie,' kuah tuma ka va inleh chuan a lo mu tawh miah lo! Tuktin keiaiin a tho tlâi ziah a, tukkin hi a nuam lo deuh em ni ang? A la hma bawk nen ka chhing leh ta a.

"Sir, i Ford car hmangin madam a chhuak a nia." Ricco-an min rawn sawi nawk nawk a, ka harh chiang kher mai.

"A chhuak tih inhriat chuan umzui ta che u, tawhsual a tâwk a nih vaih chuan.." thinrim awki vin hlur a ka chhânna chu a hlauh hmel kher mai.

"Rang lutukin umzui rawh u." Tiin ka tho chhuak nghâl a, nizana Stella nen kan inbiakna kha a hria a ni ngei ang. Anihna ka hrechhuak tih hriaiin tlanbo a tum tihna a ni.

Dressing table chunga lehkha inthlep leh pawisa tam tham zet lo awm chu makti zetin ka en ta a.

##
Mr Shinoda, Arienna Grico ka ni hauh lo. Stella sawi ang khân keimah Carli Davino ka ni e, Bianca ṭhiannu dimna tel miah lova sex i hmanpui ngei kha ka ni a, min mutpuina pawisa min pêk pawh hei i kutah ka rawn dah lêt e.

Nupui a i neih tâk Arienna Grico kha ka official name a ni tlat si lova, tikhân nupui nei rei lo ber Award dawng pha chiah lo mah la a dawttu tal i nih ka beisei. Ka pum chhunga i fa erawh a man i pe nghâl kha a nia, a paitu in ka dawn duh miau loh te chuan awmzia a awm lo tihna a ni mai. I pawisa hi eng atan mah ka ti lo a nia, suma lei theih ka ni lova ka ni ngai bawk hek lovang.

I dam chhunga i tihsual lian ber chu kei min mutpui kha a ni. I sumdawnna thleng a nghawng thei tur khawpa pawi liantham i khawih tih inhre bawk la.

Keimah
Carli Davino

Ka chhiarzo chiah chu thinrim lutukin ka thaw chhuak hawk a, pawisa têl chhah ṭha zet Carli hnena ka lo pêk tawh ngei chu chhuatah ka vawm darh chuaih bawk a, ka chhungril a na vawng vawng tih phat buai ka tum lo.

'Dio' Hmeichhe naran a ni lo rêng a ni. Hetiang sum tam tham pawh hmang miah lova dahṭha thlap theitu Carli Davino hi ka duh a ni. Ka chân tur a ni lo bur.

Nupui vawithum neih nawn ngai mah se ani a nih phawt chuan ka nei nawn sek tur a ni ringawt.

Sam leh Abella te'n ka Ford car an umzui tih ka hriat chuan ka thaw huai a, Ricco nen Milan lam kan pan thung. Khalai hmun kha Carli chenna dik tak a ni a, hmun dangah a kal lo tawp ang. A phone ka lo vawmbo hman khanglâng nen a kalna chin chhui tur pawhin tih ngaihna hlawl a awm lo.

"Sir, Milan lamah i car chu kan hmu e,' Sam-an min rawn bia a.

"Umpha u la chhuah hlek suh u."

Ricco-an min melh zauh zauh a, a speed a sâng kher mai! Hun dang chu nise ka vin hrep tawh ang maw le; mahse, Arie ka duhzia hrechiangtu a ni a ka chân a hlau ve deuh a ni mahna.

"Sir, i nupui kha hmeichhe mak tak a ni." Tiin kawng lam ngun tak hian a melh a.

"Engtizawngin?

"I awm laiin eitur leh intur kan siam kher kha a phût ṭhin a! Mahse, nitin office i kal hlânin kan siam eng mah a ei ngai lo, amahin a insiam zel." Ati ta a.

"In siamtir ziah a maw!?"

"Sir, i hriat kha, a luhlul êm a ni," ati sup a. A sawi dik, Arienna hi thunun mai mai theih hmeichhia a ni lo tlat.

Milan 17 street kan tlân thlen laiin traffic jam-ah kan tâng a, Sam-an min rawn be leh chiah bawk.

'Ford car hnutchhiahin Transportation motor-ah a chuang' tih a rawn sawi chuan ka thluak a buai takzet. Tranportation motor-in khawilam nge a pan tih an hrezui bawk si lo a, ka puakkeh lo chauh.

Ricco chu Carli chênna hmunah kal turin ka hrilh ta a, henu hian min bum ni a hriatna ka nei tlat.

After 2 hours
Milan Carli Apartment

Inchhung changkâng leh nuam zetah dârkar hnih dâwn kan ṭhu tawh a, Ricco ning lutuk pawh vawi eng emawzat pawnah a chhuak tawh bawk. Sam leh Abella hnen aṭangin chanchin kan hre tawh lova Transportation motor an la umzui zel a ni maithei.

Kawngkhar kalhna a rawn rîk rak rak chuan Ricco nen kan biru vat a, he Apartment chahbi neitu chu Carli chauh a ni. Keini erawh Ricco thiamna hmangin inchhungah kan lût diam tawh kha a nia, rinhlelh tur pakhat mah a awm lo.

Aparment chhunga rawn lût chu tudang nilovin Carli Davino ngei a ni. Nizana a thawmhnaw inbel ngai chiah kha a la inbel a, a chauh hmel hle bawk. Ka lo rin ang chiahin min bum theih inringin kha motor-ah khân a chuang der tihna a nia. Jet plane neitupa thluak a la pha chiah lo hi ka vanneihna a ni ta.

"Ka nupui chu a chau awm kher mai," Ka bihrukna hmun aṭanga chhuakin kan inhmachhawn ta rân a.

"Nang, nang kha.." a meng bial kal a, mak tih loh rual a ni lo.

"Ni e, keimah Luigi Shinoda.." ka ti thûm chhak a. Ricco pawh a rawn chhuak ve ta bawk a, "Madam, i ṭha maw!?"

"Nangpawh maw!?" Tiin a kiai sak a.

"I awm lohna tur hmun a i awm chuan kei hi min hmu tel zel ang," Ricco an tiin a chhuak zui nghal a.

"Luigi, min rawn hnaih miah suh." Tihpahin hnung lamah a tawlh hrat hrat a, "Nang ka hnaih theihna tur che a nih chuan khawvel pum hi lei ngai mah se ka lei mai ang," ka pan hnaih zel avangin a kut a phar dâ a, posi min lâkkhum lo chauh chu a ni e.

"Carli ka nih hi Arienna ni lovin,"

"A tu a pawh ni la, nupui a ka neih tâk tho kha i ni,"

"Ka nunah rawn inrawlh tum reng reng suh," tih pahin tlânchhiat a'n tum nghâl ringawt a, ka man rang teh e.

"I nunah vawikhat ka lo lût tawh a, tunah a vawihnih nân ka rawn lût leh dâwn ta. Min hnar tumin thiam thil 'show' chiam mah la, kei hian ka chhuah tawh dâwn miah lo che." Awki hniam leh mahni inringtâwk taka ka ṭawng chhuah chuan zâm miah lo hian min en a.

"Vawihnih te chu a tlêm êm mai, chatuan daihin lo lût ta mawlh che.." tiin min nuih zat hmel deuh hian a mit paw phât chu a meng zau deuh kâwk a! Engtik laiin nge lense a lo vuah leh hman ni!

"Ka lut khawp ang vawithum, vawisawm pawh nise ka kiangah ka bulah i awm ang, chu chu i awmna tur dik tak a ni e." Ka ti hmiah a.

"Luigi Shinoda, i duh duh sawi ringawt suh," thinrim meng ling hlar chung a min chhân chuan dâr ka sân âwk a. "Ka duh duh ka sawi lohvin ka bodyguard te duhzawng em ni ka sawi ang! Û huh! Min la hrechiang lo hle mai, kei aia naupang fêin min bum i tum a nia, min bum tur hi chuan ka thluak hmun thum a ṭhen a hmun khat i neih phâk a ngai." Tih pahin a tukkhum samah ka phih deuh dawrh a a ṭhensak chu engah mah ngai lovin a hmuiah nazet hian ka fawp chhunzawm ta a.

Min chhân chu sawi loh a hmui a chîp hmiah.

"Ka nupuia ka neih tâk ka fa pai mêktu hi Transportation motor-a chuang duh tur a ni lo tih ka hria alawm, ka model chimawmtê,''

"Ka Aparment chhuahsan nân minute thum hun i nei," ka vawnna thinthlâk tumin a tâl at at a, ka vuan nghet sauh thung.

"I chênna hmun chu ka chênna a ni a, chutiang zêlin..." a inrin hman hmâa ka pawm thut chuan a ṭê ring ngei mai. Mualpho lah hi a hlau mang reuh si lova ka va ngei mai mai tak.

Reife kan inchai hnuah Sam, Ricco leh Abella an lo lût a, "In pathum khân madam hi ka car-ah zâwn lut rawh u, tâlchhuah a tum emaw bengchheng a siam a nih chuan a kâ inhnawhphui dawn nia," tiin ka hrilh ta a.

An huphurh hmel kher mai..A chhan pawh Carli kawlh zia an lo tem chhin vek tawh miau a.

'Luigi nupui chênna hmun tur a ni lo a, he Aparment hi hralh theih a ni tih târ ang che u." Tia thû ka pêk chuan Carli a meng tâl tap a, eng emaw sawi tum hian a âng zuau va; mahse a ngawi leh daih.

Tihluihna tel miah lova an inchhawm chhuak lai chu ka thlir reng a, kei erawh carli lo chhawr chhuahna dik tak hre turin ka khawmuang lui ta a.

Nupui pakhat chauh neih ka tum tlat si a chu ka nupui chu henu chimawm zet hi a ni si.

Aparment chhung uluk zeta ka chin fê hnuah a nihna dik tak ka hrechhuak chiah bawk. Oil company lian lutuk rochuntu Lorenzo Davino farnu lek lo niin!

A unaupa hriatpuina a thilti nge a nih, an pahnih ṭangkawp a min tihchhiat an tum tih hi ka hriat chhuah ngei a ngai ta.

Tleirawl kum sawmhnih mi lekin ka nunphung a ti khaihlak vek chu a ni a, Lorenzo ka bia ang nge a rûkin ka chhuizui dâwn tih Pathian chauhvin a hria ang chu.

Ka fa paitu mah nise ka nuna a lo luh chhan ka hriat fiah vek hma loh chuan ka chhuah dawn miah lo. Amah ka duh a, ka ît bawk, hmangaihna lam erawh ka tinzawn lo nasâ. A thil pawimawh ni a ka hriat ho zawng zawng ka khungkhawm vek a, Apartment ka chhuahsan ve ta a.

He inah hian vawikhat mah a kir leh tawh loh nân hralh sak hmiah ka tum bawk.

Hetianga min bum kual chung pawh hian kei hian ka la duh cheu nia maw le.

B<++[BeckyRafaRenthlei]+>RR

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)