KA THLAH LO'NG CHE BY Becky Rafa Renthlei (Completed)
Posted: January 6th, 2019, 2:28 pm
Becky Rafa Renthlei
KAMKEUNA
A hmêl ṭha uchuak hauh si lo; mahse, 'Pa' ru riau si chuan ka mit a la kher mai. Vawi tam whatsapp leh call hmangin inbe ṭhin mah ila a takah ka la hmuh miau loh avangin ka lái deuh hû a!
"Hey.." Sawi tur ka'n haihchham tlat pek chu (h)!
"Ka hming i hriat kha." Tiin a nui nghâl suk a, lehlam hawisan daih atân chuan ka ui deuh.
"Kan inbiak ṭhin lai khân sawi tur i hriat tehreng nen min hmuh rualin an thlâwkbo zo ta em ni?" A nui zui leh suk a.
Ni e, ani nen hian kum khat dâwn kan lo inbe ve tawh a, sakhmel erawh inhmuh ni a awm thei lo khâ a ni a; mahse, tunah zawng a tak ram dai thleng turin kan inhmu ve ta hlawl mai le!
Paradise panna kawng kan zawh dun dâwn nge, mumang chhâwngthumna mang ang mai ka ni zawk ang tih tu nge hria!?
Episode-1
Thlanmual panin muangchâng hian scooty ka khalh phei a, kawngchhak aṭanga leiṭhîl rawn tla huk chu ka rin loh lam daih a nih vângin Scooty ka control hman ta lo! A ke hnunglam a inpaih dâwrh rualin ka tlu ta a.
Ka hriat leh hmasak ber pawh ka khûp na lutuk leh ka kheimit bâwr vêl na ut ut te, ka biang veilam sa hut hut chu a ni mai! Thawh tumin ka'n meng chhuak a; mahse, a teuh lo! Scooty-in min delh bâkah ka ke chu tihchêt chi ninghal lo chuan!
"U Sp, a na em? Ka lo pui ang che aw." Thlanmual bul mai a awm Ruatsaka'n min rawn ngaihven nghâl a, "I ṭha em?" Tia min zawhna chu chhân pawh ka chhâng thei lo! Scooty a hûn ṭhat hnuah min pawm thawh tum hian a rawn kûn hniam a, ka zak hnuai ve veah dâwmin min kaihthawh mai a tum a, ka ṭê chhuak ṭhat.
Ka ke pahnih ka rap ngam dêr lo nia maw le!
"Ruata, min pawm zo ang em?"
"Zo tehreng mai," tihpahin min pawm nawlh a, an inah min luhpui ta a.
"I hmai pawh a vûng a nih kha! Ê, i mitah thi a tling lehnghal damdawi inah kal ang." Hlauhthawn hmêl takin a ti a.
"Lawk aw.." ka phone dapin ka phawrh chhuak nghâl a, "Ka chhungte min biaksak la min lo hruai turin hrilh rawh aw." Ka hlauthâwng aw chu a ri chhuak chang chang chauh a ni.
Ka ke pahnih chu rah ngam miah lovin a na ut ut a, pem langsar eng mah ka nei lêm lo! ka hmai vûng chuan ka mit a rawn thleng chho tawh tih hriat tak hian ka khawhmuh dân a fiah ta vak lo bawk!
Ruatsaka'n ka chhungte a call lai chuan ka kâwng a chin chunglamah nâ ka neih leh neih loh ka indap that that a, ka ke leh ka hmai tih loh eng mah nâ a awmin ka hre lo.
"U Sp, an lokal nghâl dawn i pa leh i nau," phone min pe lêt nghâl a, "Ka lawm lutuk aw, Ruata, awm lo la chuan ka tâlbuai viau ang," tiin ka ke veilam ka en pah zauh a.
Kei hi ka insanmar viau loh chuan ka dik dâwn miah lo. Ka kap bâwr vel lum deuh pap ka hre zui zat a, ka'n en nâk chuan zun ka lo cheh reng nia! "Lalpa, ka duh thei lo!" Tihpah a ka chêt rualin ka ke a rawn na leh zawk zawk a, nikhua ka hre lo dâwn titih dêr mai! Ka lu rit lûk leh ka hriatna tlêm telh telh te chu ka mang hriat rêi ruai chauh tawh a..
#Dârkâr 6 hnuah
"Hospital in chhuahsan hun tur ka sawi thei lo, rinaiin a insawh na riau a, a Kal (Kidney) hi a sawh deuh bawk a, a Khûp ruh leh a Kheimit ruh auh hi chu thlahnih khat hnuah a zia ve mai turah ka ngai a, Pathian thu thu a ni." Doctor aw fiah fak ka hriat chuan ka accident dân khâ ka hrechhuak chawpchilh nghâl a; tunah damdawi inah ka awm tih pawh hrilh hranpa ka ngai hek lo.
"Aizawl lamah min refer mai dawn em ni ang?" Ka pa aw a ni.
"Ka pu, engpawh nise Aizawl panpui tur chuan a ngaihtuahawm deuh ka ti, thisen unit hnih kan pe tawh chung pawhin a harh ṭha mang lo a nia, motor-a phurh chi a ni rih lo."
An inbe thâwm chuan ka chhungril a luh ngut ngut thei alawm le.
Ka nu thlân a kal tumin ka chhuak kha a ni a, hetiang hian tawhsual ka tâwk ang tih ka hresa dêr si lo. Inchhirin awmzia a nei lova ka taksa natna leh ka rilru natna a inchen thuak awm mang e.
Ka pa leh doctor inbiakna zawng zawng tepawh hre awmin ka awm duh lova nachhawkna a min rawn jection lai pawh chuan ka meng chhuak duh eih lo.
"Mate, i harh em?" Ka pa'n ka samah a rawn chûl hliau hliau a, ka mittui a hnai kuar thei nia. Zawimuanga meng chhuak chung hian, "Pa, ka tihpalh aw.." ka ti sap a.
"I thiam loh a ni hleinem, lungngai reng reng suh i dam leh vat mai ang."
Ka zun siak tur a nurse a lokal tâk avangin ka pa a inthiarfihlim a, ka zun chhuak ka hre ta miah lo hi mak ka ti a ka hlauthawng bawk! Nurse-in min buaipui lai pawh chuan ka zah êm avangin ka meng chhuak lo hrim hrim, min zâr hliah ve bawk mah se ward-ah kan awm si a, min lo hmu palh an awm ang tih ka hlau ru tlat.
"Sp, hahdam tum rawh aw, i ke a dam hunah i pangngai leh vek mai ang," tiin min ṭawng thlamuan a, ka beisei takzet. Ka Khûp ruh leh Kheimit ruh a auh tih ka hre tawh a, ka Kal(Kidney) pawh 'a chiang lo' tiin an sawi tel tak alawm le.
'Lalpa, min dam tir hrâm rawh' tiin rilru ṭawngṭaina ka nei mial mial a, ka thluak a fîm vek a, ka harh kur tho si.
Kei hi Rinsangpuii ka ni a, unau pianpui mipa pakhat neiin ka nu hian kum li liamta khân min boralsan tawh a, ka pa Lalbiakdika hovin kan khawsa a, a hmingin hlawh chhetê ka nei ve a, ka nau Ramdinsanga erawh chuan MA a zir mêk.
Ka pa hi Hindi teacher a ni a, a pension ve lek lek tawh bawk. Revenue lamah ka thawk a, mite ang a hausa khu chûk ni lo mah ila Pathian zarah khawsak harsa kan ni lêm lo.
Kum thum chhung teh meuh ngaihzawng nghet ka nei a, inhau châng leh intih thinrim a vawihnih khat inṭhen zauh kan nei tih loh chu Lalvenpuia nen hian tun thlengin kan la inzui ve chu a ni a; inneih lam a âwn deuh tawh avângin palâi hmêl hmuh kan beisei lai a ni; ka chanchin a hriat hunah eng tin tak min ti leh ang maw?
"Mate, chaw eiin ka haw zawk ang a, nangmahin i lo awm hreh em?" Ka pa'n a tih chuan ka hreh loh thu leh Venpuia ka chanchin lo hrilh turin ka chah nghâl a.
"Ka hrilh tawh a, a lokal mai ang." Tiin min chhuahsan ta a.
Serkawn hospital-ah ka mu ve rân a, min enthuak tân chuan na nei hmêl pawh ka pu hran lo ; mahse, tû hriatpui si loh hian ka taksa a na ut ut a, nachhawknain min chhâwk tluantling thei meuh lo chu a ni e.
Motor-a phurh ngam loh khawp a hliam nasa ka neih awm ka hre si lova ka ngaihtuahna a kal thui angreng. Ka hmai a vûng tih ka hre leh tawp a, ka mit veilam phei chu a meng mang lo a chhâ a ni e. Dârthlalang a in en ka châk viau rualin thâ a lawi pawh ka neih si loh.
Ka pa rilru hah turzia ka chhût phei chuan hrehawm ka ti hluah hluah bawk. A fanu a duat leh a hmangaih em em kha ka ni a, doctor lah khân tlang takin ka dinhmun a la sawi khum zui lehnghal a ka haw deuh reuh.
Khumah che miah lovin ka mu a, ka ke pahnih an tuam khawng ût bawk nen chêt chhuah a harsa ve hrim hrim a ni e.
"Mate, i harh em?" Ka bialpa Vena aw ka hriat chuan ka meng chhuak a, a rimtui hman rim ka hriat ṭhan zet chuan ka hnar a verh zar.
"I lo thleng tawh elaw!?"
"Ka tlai mah mah, ka thusawi zâwm ṭhin nila hetiang hian i awm lovang maw le." Tihpahin ka kut a rawn vuan a.
"Min hau hmasak ka ring leh rêng a," ka kut a vawnna ka hûm lêt sak a.
"I nu thlanah kal sek tawh suh ka ti a, i hlawhchhuah chu hei hi a ni ta rêng a ni." A lawm lo tih a ṭawng dan aṭangin ka man thiam ve mai.
"Ka nu a ni a, ani lo nû ka nei hleinem,"
"Ka hria ka hria; mahse, thlâna i kal chhên vang khân a lo tho leh dâwn hleinem,"
"Venpui, khatiang zâwnga ka nu chungchâng sawi kher a ngai lo ang aw, i nu i la chân ve lova i hrethiam pha lo a ni kha." Min vawnna pawt phelhin lehlam ka hawisan daih a, min duat hliau hliau beisei lo mah ila ngeiawm taka min ṭawngkhum kher hi ka ngaithei bîk lo.
"Mate, ka tihpalh, ei châk i nei em? E he! I hmêl lan dan a nuihzat thlâk hlê mai." Za lutuk hian a nui zui a, a mizia ka hriat chian avangin ka ngai haw lem lo.
"Min nuihzat kher suh aw.."
"Zaninah ka riahpui dâwn che nia, darkâr khat hnuah cabin a âwl dâwn a kan insawn dawn nia." Ṭha têin a ti ve leh mai a, ward-a awm pawh ka hreh chuang lo nain ka pa ruahmanna a ni a, ka sawinawi ta lêm lo.
Venpuia hi Horticulture-ah a thawk a, farnu pahnih leh û mipa inhrang chang tawh a nei a, a pa hi 1st class contractor a ni. An chhungte nen pawh kan inpawh thawkhat a, an inah vawihnih chaw ka ei ve tawh nghe nghe.
"Mate, i dam vat loh chuan palâi tirh kan tlai vek ang e." Cabin-ah kan insawn tawh a, ka pa leh ka nau Mama an rawn thleng tawh bawk nen ka thawveng huai. Venpuia pawh ka chhâng duh tingtang tawh lo va.
Mama'n min en vang vang hnuah, "Mate, ka riahpui thei tho che a nia." A ti ta a.
Venpuia nen ringawt a awm ai chuan ka nau riak mah se pawi ka ti lo daih zâwk, unau nge nge eng emaw a lo thlen palh pawhin a inthlarunawm lo deuh ang.
Venpuia duh lo chung kan tîr haw lui ta a, kan hawtîr fuh viau bawk. Zan laiah ka ke leh ka tâi bâwr vel a rawn nâ a, thî ka nei zui leh bawk nen kan tlaivar ṭhak a ni mai. Ka period hun a ni lova ka chhunglamah hian eng emaw fel lo chu a awm a ni.
Ka nauvin a ṭûl ṭûl min buaipui vek a, dik tak chuan mipa leh hmeichhia kan ni a, ka zak ru viau nain tihngaihna awm hek lo le.
Kârhnih dâwn hospital-ah ka awm tawh a, ka ṭhiante leh ka thawhpuite'n min rawn kan âwl lo a; ka lu lam a harh kur a, a bâk che thei a lawi zuk awm lova 'I zia chho zel mai ang' tia min kan tute'n ṭawngkam ṭha a min thlah pawhin ka nuih a za vak tawh lo, ka hna pawh chawlh lâk pangngaiin ka la zawm ta bawk a, Venpuia pawh office bân a piangin a rawn lawr sek a, min ngaihven vut vut viau.
Inrinni chawhnu a ni a, cabin-a ka khumah mu in whatsapp aṭanga min lo betu ka ṭhiante ka reply a, Venpuia leh hmeichhe pakhat lo lût ka hmuh chuan ka meng phar nasâ! Nidangah chuan a lokal tur thu a sawi lâwk thlap ṭhin kha a nia, min surprise chiang kher mai!
"Mate, i ṭha em?" Tih pahin a rawn nui lût var var a, a kianga ding hmeichhiain a kuta a vawnna chu ka hmuh hmaih miah lo!
"Ṭha e, ka ṭha reng, i lokal dawn tih i sawi lova!?"
"Nia, Apuii nen hian kan rawn tum chawp chûk chûk alawm le; Apui, hei hi ka ṭhiannu Sp-i a nih hi,"
"Ka hria alawm," chu nu chu a naupan hmel viau emaw ka tia; mahse, chuti lutuka naupangchhia a nih loh hmel.
"Apui, lo ṭhu rawh u, inva fel ve." Ṭha takin ka be sawt sawt a, chîk zetin min en tih hre mah ila ka ûksâk lêm lo.
Venpuia'n 'Apuii' atih hi a sawi lan ngai ka la hre miah lova a ṭhiante leh an chhungkhat te hi chu ka hriatsak ve nual tawh bawk.
"I ṭhiannu chu khawia mi nge ka va hmu ngai lo ve?" Ka ti ve deuh ngat a.
Min melh deuh kâwk chung hian, "Hnahthial ami a nih hi, a lo zin zuai a."
"A nih chu," a bâk eng mah ka sawi zui tawh lo, Apuii pawh a ngawireng a, nidanga Venpuia lokal ṭum leh tûna kan boruak hi a dân a dang daih! Sawi fak tur hre lo mah ila ngaihṭhat loh rûkna riau ka nei tlat pek nia!
"Mate, kan chhuk mai ang, zanah ka lo be dawn che nia," a ti ta vat rêng a, mi hmuh laiin intitatû takin a lang ṭhin khâ a nia, vawiin zet chu 'a ṭhian ve mai mai' ang lekah min chhuahin ka hria.
Hospital chaw vek ka ei a buaipui lutuk ka ngai hran lo; Ka pa office kal a ngaih vângin Mama nen kan awm tlangpui. Zanah dârkua thleng pawh a Venpuia'n min rawn biak tâk silohah chuan lungawi chiah lo hian ka call ta a.
Vawihnih zet a 'ring' ral hnuah 'Tun chiah ka call tawh ang' ti rilru chungin ka call nawn leh ta a, min rawn chhângtu chu ka rin loh lam daih! Hmeichhe aw a ni.
"Khaw'nge Vena?"
"A inbual lawk a, lukham hnuaiah phone a dah daih a ka lo hre lo a ni." Ti a min lo chhân chuan ka sa ve zak.
"Tu nge ka biak?"
"Apuii.."
"A ni maw! Apui, keimah Sp-i ka nia, Vena te inah eng nge i tih a?"
"An inah nilovin ka thlennaah a lokal alawm, Elite hotel-ah," a nui ri hak chu ka run kher mai.
"Min rawn be turin lo hrilh ta che," ṭha tak a tiin phone ka dah ta a, ka ngaihtuahna a kal thui angreng. Vawikhat mah Venpuia hian midang min la kawpsan ngai lova kan inhau châng pawhin midang vang nilovin ka thinchhe lutuk min zilh vang a ni tlangpui. Eng mah thuchiang hre hmasa hawt lova thinrim ka duh lo bawk nen whatsapp lam aṭang pawhin ka be zui hran lo.
Mahse, hotel-a inbual ngai khawp khawp chu ngaihtuah tham tak a ni. Mi â ber tân lo chuan a lang sa ruâk. Mi â lah ka ni dêr si lo.
Zankhua a min lo biak loh mai bâkah a tûk Pathianni nilêng pawhin min rawn be ta chuang lova ka thinlung a rinhlelhna rawn lian tulh tulh chu thunun a harsa ṭalh tawh.
#Nithum hnuah
Ka ke an cherna phelh a nih hma loh chuan treatment dang tehvak lâk tur a awm lo a; tin, ka kal (Kidney) lam pawh injection la tawh lovin a mûm ka ei ta bawk nen hospital-a awm reng kha thil ṭûl ber ni a ka hriat loh avangin ka accident aṭanga a kâr thumnaah chiah hospital kan chhuahsan ta a, ka zun erawh an la siak reng thova ka ke ka hmang thei rih chuang lo bawk nen a zia phian.
Hospital kan chhuahsan zanah pawh in lêng neuh neuh kan nei tak nain Venpuia a rawn lang miah lo va! Hmanni a biak ka tum bâk kha vawikhat mah ka be tawh lova min be bik hek lo! A na zawk leh ngaihsak ngai zawk ka ni chung pawh a min ngaihven lo a nih chuan sawi tur ka nei bik hleinem.
Ka hna zawm thei ka ni lo a, ka room-ah ka tawm tlawk tlawk a ni deuh ber. Harsatna leh natna kan chunga a lo thlen hian min hmangaih tak taktute an hriat chauh dâwn a nih hmel.
Kan veradah ah thingpui in in ka ṭhu a, ka duhna hmun a piangah ka kal theih tâk lovah chuan ka nauin min pawmchhuak a, nula tê chhe zawk zawk ka ni hauh lo, 5'6 ka tling ṭhelh a, 'thâu' ti a sawi tur ka ni lo a 'chêr' chhia pawh ka ni chuang lo keima tâwkah ka inphut ve viau.
Tlailam dâr thum a ri tawh a, kan inkawt a Venpuia Bike RS 200 rawn inhûng dat chu en pawh ka en peih lo. Hmeichhia phur lo se chuan ka be ve mahna.
"Mate, ka rawn lang thei lawk lova.." a nui sâng a, inthiam lo hmêl a pu bawk.
"Nia, i buai a nih kha, khaw'nge in kal dâwn?
"Hei, Apuii hi a chhungte'n thil an lo thawn a ka va lam pui lawk ka lo pêng haw ang." Ka biangah a rawn tawk zauhva min nuihtlawnna chu eng tehchiamah ka ngai hek lo.
"Tak tak, kan rawn pêng ang," tinawn lehin an tlân chhuak zui nghâl a, khanu nen khân ka ringhlel tulh tulh.
Zanriah ei hunah ka room kawngkhar a rawn inhawng a, Helmet khum chunga Venpuia leh Apuii lo inzui lût chu ka khum aṭangin ka melh hrâ a, dârkar hnih aia rei an thang tih ka lo chhinchhiah khiau.
"Te, kan rei deuhva.." khum bul chair-ah rawn ṭhuin Apuii a ding thung a.
"I helmet kha hlîp teh.." ka ti sap a.
"A tlai tawh em mai, rei kan awm dawn chuang lova phelh kher a ngai lêm em ni?" A che duh chuang map lo. Apuii hmêl ka en a, ruih nei tih hriat taka a meng sen râm leh phelh phang chu ka hai lo nasâ.
"Lalvenpui, i helmet phelh la min lo thâwkkhum teh." Nelawm hauh lova ka tih tâkah chuan muangchâng leh hreh hmel takin a phelh ta a.
"Lo kûn la, min lo thâwk khum rawh."
"Sp, eng nge maw i hriat le?" Apuii a lo inrawlh ve a, "Lo ṭawng reng reng suh, Vena lawm ka biak."
Lalvenpuia rawn kûn hniam chu uluk zetin ka lo hnîm ta a, Zu rim a nam ham ham!
"Zu i in a ni maw? In pahnihin in in em ni? Tia zawh kher che ka tum lo a nia," ka puansin lai pawt chhovin, "I mize inthlâk thut hi ka hriatthiam beisei hlek suh." Tih pahin Apuii ka melh a, "I chhungte chuan Zû an lo thawn che tihna em ni, an thil rawn thawn che in va lam chu in rawn in dûn ta a."
"Sp, i rin dan sawi vak vak ringawt lo la," Vena lo ṭawng chu rum taka melh chung hian, "Sawi sual ka nei em ni? Ka thinlung hian a hria alawm, min chhuahsan tawh rawh u." Ka ti hmiah.
"Thinrim kher a ṭul lovang." Tih nghut pahin Apuii bânah a vuan a, "Vena, i duh dan dan a min palzût tum rêng rêng suh,"
"I duh duh dânin min puh bîk suh." Dîm vak lo hian kawngka a rawn nam khar a, min chhuahsan ta a.
Vawikhat mah zû a in ka la hre ngai lova kan inkâr a ṭhat loh deuh pawhin ruih theih thil lam a ti ngai hek lo. Tuna a nungchang ka hmuh khâ ka lawmzawng a ni lo mai nilovin ka ngaina hek lo.
Palâi hial rawn tirh tum siin hmeichhe dang Hotel-ah a va hmu a, 'engtin nge an awm' tih hre sî sê lo mah ila ka ngawih bopui dâwn hauh lo.
Inṭhen ka duh lova; mahse, hetiang dinhmun a ka din lai a hmeichhe dang a rawn hruai ringawt pawh hi lâwm lohna tham a ni tawh.
Zân dar sawmpakhat thlengin phone ka khâl kual a, number pakhat aṭang a ka pic dawn chuan ka chhungril a khawih che dat mai le!
Venpuia leh Apuii thlalâk a ni a, vawiina an thawmhnaw inbel chiah kha inbelin room pakhata an infâwp lâi thlalâk a ni!
Min rawn thawntu number chu ka hriat ngai a ni lo a, ka reply bawk hek lo. Ni e, inneih tum ut ut tawh mah ila min phatsan a hmeichhe dang pantu mipa hi ka thlah ngei a ṭûl dâwn anih hmel.
Ka chhungkua leh ka dinhmun ka enin ka zak hliah hliah a, mipa ka rin leh ka innghahna ka engkimin min phatsan hi 'Ka na lo' ka tih chuan dâwt ka sawi tihna. Ka na ngawih ngawih a dam ṭha pangngai ni ila chuan ka tuar dan pawh a zia deuh tur; mahse, mî min hmusitna tizual tur leh kha leh chen kan lo inzui tawhna zawng zawng thaichhiata a awm tur hi ka ngai ngam hlawl lo a ni.
Muhil thei lovin ka let kual sek a, ka taksa na ut ut te ai chuan ka chhungril natna hi a thûk fê zâwk.
Kan inhualna zungbun Silver kual simple zet chu ka tuai hauh hauh a, a insawifiahna ngaithla miah lovin ka ngawihsan ang nge, inṭhenna a sawi hun ka nghâk zâwk dâwn?
Lalvenpuia te ang mihausa fapa 'nungchang ṭha si' ti a an fak viau ṭhin leh ka lo chhuan rûk ve em em mipa hi mitkhap kâr lekin a inthlâk ta dâwrh chu a ni a, ka nat hma te khân lo hre hmasa ila ṭha tur a ni a; mahse, tunah chuan engtikah nge ka dam dâwn tih pawh a hriat si loh.
Mittui far fap chung hian blanket-in ka inkhuh vek a, chhuak zet hian ka ṭap ta hlawp hlawp a, kei hi mipa vângin ka ṭap ta chu a nia, ka nu boral a ka ṭah bâk kha vawikhat mah ka ṭap nawn tawh lo, reingial ka ṭah hnuah insût faih faih chung hian ka puansin lai ka hlim a; sana ka en chuan zinglam dâr hnih a ri tawh.
'Lalvenpui, i thutiamah i ding dâwn lo maw?' tiin ka phun sap a...
B+>[BeckirafARenthleI]<+®®