My TREASURE By Floria laldansangi (Completed)

Moderator: Floria

Ngaia
Site Admin
Posts: 17219
Joined: April 30th, 2016, 4:07 pm

Re: My TREASURE By Floria laldansangi (Completed)

Unread post by Ngaia » December 31st, 2020, 5:07 pm

MY TREASURE
By
Floria Laldansangi


Chapter < 37 >


MAYA....POV



"Kha..!" Tih leh a prickly pear cactus rawn ken chu ka kuta hmehbel pahin a ti deuh nghat a


Opa en deuh hâ in, "in inhau em ni?" Ka sira staff rawn kal chu, ka cactus kenlai pek pahin, "ka cake siamthar kha rawn la ta che," Ti zui sapin, Jamie-i hma ah chuan ka ṭhu thla ve nghal zat a




"Ka chungah a rimlo, nimin ah a rawn lêng in mutsan em ni?" Op-an nui tuh tuh paha a tih chuan ka nui ve sun sun a



"Inleng awmlai a Inti tura room a min chhohsan daih kha a lawmawm loh alawm," A rawn tih leh nghat chuan nui vur vur pahin, "kha hei hi ei rawh," Tih leh cake a rawn dah chiah chu a lamah ka nawr hnai a



"insiam lai khan a len vak ka rinloh nen, a lian ṭha hem hem hle mai, chunglam khi inngaizawng tan iti bik em ni?" Chunglam melh chho paha Op-an a rawn tih chuan, "Chutiang pawh a ni hran em ni? Ka design duhdan a nia," Ka tih zawh rualin, "Korean leh Thai ho thlalak tarna tur a nih khi bang khi," Jamie-in a rawn ti zui zat bawk a, kan nui nghal hawk hawk



"Khawnge Nathan-a hi? Chhâl deuh ka duh a sin," A hawi kual nghal thuak thuak a

"Min ko em ni?" A kamiz haklai var zet mai chu a bân a pawt chho a, a kut a thisen zâm lang ṭhuah mai leh Rolex sana silver rawng lawk zet mai bun chu a inhmeh takzet




Chair bân a rawn ṭhu in, "Lalramnghaki hi i phun reng mai," Nathan-an a rawn tih chuan kan lo nui hak a




"I chhe e a Lalhriatpui, i hur ching cheng si, in hur ngaihtuah hian nau inla pailo te hi a mak zawk alawm le," Cake ei tuam tuam paha Jamie-in a tih chuan Nathan-a ka en chho vat a, a nui tawi deuh tak leh a hmel diklo chu ka hrethiam nghal



"Hna i nei a ni lawm ni?" Ka ti nghal vat a, bu nghatin, "zanin chu zanriah ei minlo nghak duh suh aw, ka rawn tlai ang," Tih leh ka bekah fawp zauh a ding ngilin, "ka kal ange, Op, lo awmpui rawh u," Tih leh inher in a pensawn nghal a



"Staff i ngah nghal hle mai," Jamie-in a rawn tih chuan hnathawk ho enkual pahin, "naktuk aṭangin 24/7 hawn kan duh nghal a," Ka tih chuan a bu nghat nghat a




"Staff 6 chu an tamlo em ni?" Jamie-i chu ka melh zawk, ka hnathawk ho en lehin, "school naupang te an nia, pahnih saw zanlam a thawk tur, pahnih dang saw chhunlam ah, a dang pahnih saw coffee siam an thiam a, pakhatin cake leh bread siam nuam a ti bawka, ka ruai vek ta mai ; Bakah, staff indaihlo a ka chet ve vak Nathan-a hian a hlau lutuk a," Ka ti zui sep a




Jamie-i chu lo ner nawngin, "inpa hi chu over ngawt mai," Ka nui kur kur ringawt



"Mamma...." Naupang ho rawn lut chu an lam hawi vatin, "inva bang hma ve?" An bag lo lak sak paha ka tih chuan, "nia, chawhnu an chawl a," U Muani'n a rawn ti sap a, ka lo bu nghat



Staff ho in Bryan-a te unau an rawn chhaih vel chu naupang pawhin nuam anti ngang a niang, U Muani haw tur pawh an zui haw duh ta lo, dawrah nilengin an awm ve ta reng mai


Ni a kal a, thla a liam a, Jamie-i pawhin naute mipa duhawm leh lian ṭha zetmai a hring tawh bawk, a hma angin hmuh pawh kan in hmu tam thei ta lo, keilah naupang nen, cafe lamah ka lo in sawrbing ve bawk nen, a nau neih hnu ah vawikhat chiah kanla in hmu, in hmuh pawh



September thla tir lam a ni tawh a, kum dang aiin a vawt dawn emaw ni? Tlailam ah hi chuan vawt ka ti ser ser ta mai



"Mu ve tawh ila," Ka cake recipes thar tur ngaihtuah a laptop ka en ngur laiin ka hnunglam aṭangin min rawn kuah a



A inbual zo rim ka hip kawk chu ka kua a let nghal rawk rawk thei, ka dul a khawihna kut chu beng taihin, "eng nge i inkah a, i rimchhe lutuk," Ti hlura a kut ka dah sawn chuan, "engmah....! A mak e....! ka inbual zo chiah alawm," Mak tih hmel fê in a rawn ti chhuak a



Tunlai hi a inbual zo rim hi ka ngaithei ṭhaklo, kua a ti let, ka uak teuh thei lutuk


Laptop khup thak paha side-table a dah in alam ka hawi a, ner nawng nawng pahin, "i rimchhia a lawm, va intleuh leh teh," Tih leh khum aṭanga a nawr nawr thla chuan mak ti zeta min en ha ha in bathroom ah chuan a lut ve leh mai bawk a




"Intleuh fai viau angche," Tih leh mut ṭha sat sat a puansin chuan ka mit ka chhin rualin ka muhil chu a ni lehnghal der mai



Tunlai mut ka duh lutuk hi a mak hial zawk, taksa na leh chau hluah hluah tia sawitur phei chu ka nei law

Ka mut hi a chhuak em em reng a, ka zawi nguai nguai reng mai bawk nen



"Alo muhil leh ta ringawt e," Nathan-an a ti thûm bul bul chu ka hre ruai ruai, ka lu chawi kânga a bân min khamtir a, min kuah nghal hlu hlu chuan ka kuahlet ve sat sat a, a sahbawn hman a niang tunlai chu rimchhia ka tih reng hi, thlaksak a ngai a ni



"Bawihi dawr kal i tumlo em ni?" Ka biangah a rawn fawp a


"Dar engzah nge?" Kala meng peih chuanglo


"Dar 10 a ri dawn," Ka meng kawk, ka ṭhu tung nghal awt bawk a, ka sam tuai puat puat in, "dar 10 ah ka coffee chah a rawn thleng dawn a sin," Tih leh sana ka en a, ka thleng hman dawnlo nasa lutuk



Ka phone ban rawk rawkin, "Hello Siampui, dar 10 ah coffee a rawn thleng ang, bag 10 tur a nia, ilo enpui mai dawn em ni?" Phone a pickup rual chuan ka ti nghal zung zung a, tihdan tur vel ka sawi zawh a, phone ka dah meuh chuan Nathan-a chu hna kal turin alo in peih at tawh



Nui ṭhû a, kekawr ipte zen ap a ding a min entu chu melh chho ralhin, "min kaih thawh hmat tur a nia," Ka ti nang nang chu Nui ri sukin, ka hnar a rawn piai cma, "i harh theilo a tin ni. Inti fai rawh, breakfast kala ei lo a nia," Tih leh khum aṭang chuan zo zetin min hlâng thla nawlh a


Ka hmuia fawp zauhin, "inhnuai ah ka lo nghak angche," Ti supin Bathroom lamah min nawr kal dat dat bawk



Ka intih fai a, ka insiam zawh meuh chuan dar 10:30 a pel thuak tawh



"Natukah ka rawn chhuk ang," Choka ka luh rualin phone a dah zui zat a

"Tunge ni a?" A sira ṭhu thla paha ka tih chuan, "naktuk hian Mumbai ka chhuk a ngai dawn a, karkhat vel ka cham angai ang," Ka bu nghata


Thaw deuh hakin, "min zui ve duhlo em ni?" Dawhkan a ka kut dah a rawn vawn chuan lo beng taihin, "naupang leh ka dawr engtin nge?" Ka tih chuan hnar tum a tum dat ringawt a, a ej tu chu a ei nghal hmawk hmawk bawk



U Muani'n ka hma ah French toast a rawn dah rualin ka lo uak tuar a, "i ṭha em?" Nathan-an a rawn tih vat chuan, thaw deuh hak a bu nghata ban leh mai ka tum chu ka kawchhung a in let nghal buan buan mai, uak tuar tuar a, ka kâ hupbet chung chuan choka toilet ah tlan lut rawk rawkin, toilet-bowl vuan chunga uak tuar tuar chuan Nathan-an ka sam rawn hui kiang pahin, ka hnungzang chulin ka chal ah a dawm bawk a



"Muani doctor call rawh, Doctor Reubena number a awm ang," Nathan-a chuan a ti nghal zat a



"Bawihi, i ṭha em?" Ka lu ka thing ringawt, ka luak chhuak lutuk leh luak chhuah tur awm silo chuan ka dul vun a tina urh mai



10mins dawnlai ka uak hrep hnua ah, dul vun na urh leh mittui nen a ṭhu thla hnawk chuan, U Muani'n tui no min rawn pek chu Nathan-an ban vatin min intir nghal a, ka lem rualin ka uak lehnghal ṭhawt...!



Ka hnungzang veng dat dat pahin, "na i nei em? Doctor chu engtik ah nge a rawn thlen dawn?" A aw pawh a zaidam ta lo viau mai


Thaw kawk kawkin, "ka ṭha, na ka neilo, ka pumpui chaklo a nih ka ring," Mittui nen a tih leh tui chu ka lem leh a, thaw haka Nathan-an hlauthawng tih hriat zeta min en na chu en letin, "ka ṭha tak tak," Ka ti sep na in, a awih hnel viauloh



"Ding phawt teh, Doctor Reuben-a a rawn thleng ṭep ang," Tih leh min kuah tho in ṭhut khawmna lamah chuan kuah chhuak a


"Ka ṭha alawm, i hna kal tawh rawh, i tlai ang," Ka ti sep na in min kalsan a tumlo tih hriat zeta a kawr bân thlep chho sauh sauh chuan, "vawiin chu ka kal lo mai ang," Ti supin phone chu hmet engin tu emaw a phone zui zat a


"Thana vawiin chu hna ka rawn kal thei dawnlo a, karkhat bawr vel ka rawn kal lo ang, buaina a awm chuan min rawn hrilh mai dawn nia," Tih leh a off zui zat bawk

ka bula rawn ṭhu thla a, min si chet a rawn ṭhu hnaiin chiang zeta min en chuan, "i ṭha tak tak maw?" Ka nui ringawt, "ṭha" ti leh pawh ni ila a awih dawn chuanglo a, ka chhang buai peihlo



"I englai nge nâ a?" Kan hawi vat a, Doctor Reuben-a rawn nui lut ṭhu chu Nathan-an, "a uak nasa khawp mai a, tunlai chu mut te hi a duh reng reng, amah anglo takin a zawi nguai nguai mai a, han en teh," A lo tih zat zat chuan Reuben-an min en deuh vang vanga nui sukin, "i rai a nih kha," A tih sup chuan ka meng kawk



Keiai mahin Nathan-a chuan mak a ti zawk mah, "eng maw....?" Thawp sapa a tih chhuah chuan ka marphu rawn dekin, a ngaithla deuh vang vang a, "a rai a nih hi, hlauh tur a awmlo, damdawiin pan ula a chiang deuh ang," A tih leh chuan ka nui hak a, mak ti lutuk nui a ni mah zawk



Nathan-a ka melh chho a, min rawn en ve vat a, awihlo leh ring phal chiahlo tih hriat zet a nui suk sukin, "Bawihi...." Ka lo ṭah nuih ve sun sun tho



"Damdawiin pan ang, a chian zawk nan," Tih leh ka ṭhutna aṭanga min pawm kâng lawpin, "Reuben, Doctor ka lawm e, a rai a nih chuan chaw ei ka sawm angche," Tih leh chak zet a pawnlam a min pen chuah pui pawk pawk chuan nui ṭhû in ka en reng ringawt a, a hmel chu hlimna leh hlauhna a in pawlh nuaih mai



A hlim zat chiahin, a hlauthawng a ni tih ka hmu thei




Durtlang damdawiin a min tlanluh puiin, car aṭanga ka chhuak tur pawh rang zetin min pawm chhuak leh nawlha, "Nathan, damdawiin a nih tawh hi min dahthla rih rawh," Min en duh hlawm em em khawp a




"Ho mai mai," Ti hluka min luhpui chuan, counter bula min nghatin, "ultrasound tih kan duh a," Nurse leh hnathawk dang ho chuan anlo ngaihsak khawp mai, rei pawh kan nghaklo, nurse pakhat min, "helam ah minlo zui rawh u," A rawn ti vat a

Doctor office a min luhpui in, "sawtah sawn lova mu rawh," Doctor chuan alo ti vat a


Khuma Nathan-an min mut tirin doctor ka bula rawn ding ve nghal chuan, "in fa pakhatna tur em ni?" Doctor chu ka melh zawk, a nuisang mai, ka nu te aiin tlêmin a naupang deuh ang, nu nelawm tak a ni ngei ang



"Aw, ni e," Ka chhan hma in Nathan-an a rawn ti vat a, doctor chu nui var var in, Gel (Ultrasound and ECG transmission Gel) ka dula rawn hnawih a, a chul chuan ka lo ip chawih, a hit mah mah a ni



"Innu iti mangang a nge," Nui vur gur chunga a tih leh chuan Nathan-a ka melh zawk a, ultrasound lam rawn pan hnai a, uluk zeta bih chungin, "Doctor, a rai em?" Doctor pawh chu a nui chhuak hak mai



"Thla 2 leh tlêm vel a nih hmel, in in entir hmasa lo em ni?" Min melh a,"Ultrasound a rawn chian kan duh hmasa maw le, a rai tak tak maw?" Nathan-a bawk a ni



"Heihi, i hmu em? Te reuhte hi, naute tur a nih hi, thisen chauh a la ni a, thla 2 leh karhnih a nih dawn hi, i thi neih tawpber i hre thei em," Ka dul rawn hrufai paha a tih chuan ka ngaihtuah deuh vang vang a




"Thla 2 chu a chuang tawh tak ang a, ka thi neihdan hi kumin chu a mumal lo riau a, in rinhlelhna chang pawh ka hrelo reng reng," Ṭhu chhuak paha ka tih chuan doctor chu a bu nghat a



"Engmah i sawi ngailo a," Nathan-an lawm hmel vakloh a rawn tih nghut chuan doctor-in nui pahin, "hmeichhe thil a lawm tiraw? I taksa a chak ṭha a, harsat dang i neihloh chuan hlauh thawn tur pawh a awmlo a nia, thla 2-4 inkar hi chu fimkhur tluk erawh a awmlo, nauchhiat awlsam hunlai a nia, i fimkhur dawn nia," Tih leh a ṭhutna a ṭanga tho in a dawhkan lam a pan a



"Thlakhat ah vawikhat in checkup nei ṭhin la, in veng subcenter-ah vaccine lak ṭhulh miah suh angche, naupai ṭhenkhat hian vaccine lak hi an ngai pawimawh ṭhinlo a, nau tan leh nu tán a ṭhat tehlul nen," Tih leh eng emaw hi a ziak nghal mawlh mawlh a



"In sawiselna dang ineih chuan in rawn kal leh dawn nia," Tih leh lehkha chu Nathan-a a pe a, "inthlahdul rawh, inthlah dul rawh, thu lawmawm a nih kha," Doctor chuan Nathan-a hmel la buai lutuk chu a hrethiam a ni ngei ang, nui var var in a fiam zui zauh a, a kiai suk thei a ni


Doctor room kan chhuahsan rualin, "hna kal tawhlo la a ṭha ang," A rawn ti sup a, ka kawnga rawn chelh nghal zatin, "ka zin tur pawh ka ṭhulh mai ang," A tih zawm zat chuan en chho hau in, "Nathan, nadang ka nei hleinem, nau ka pai mai chauh alawm," A penlai a tawp dat a


Thaw haka ka dar tawn tawn a chelha alam hawia min kuai her chuan, "Bawihi, tuna ka rilru hi i hrethiamlo ang," Kiai leh sukin a thle zauh a, "ka hlim lutuk a, chutiang bawkin ka hläuthawng a ni, chuvangin ka thuawih la, hna kal tawh rihlo mai rawh," Min thlem ti tih a a tih leh hap chian nui ver ver a, alam a pen hnai hretin a kawngah ka kut ka rawlh a, dimtê a a awm a bei chuan ka kuah vawng vawng a


Ka hrethiam a ni, Jamie-in nau a hrinlai a a hmel leh Op-an a fapa a pawmlai a Nathan-a mitmeng lawmpui na phena, natna kha ka hmu in kala hrechiang mah mah zawk a ni



"A nih chuan dawr kan tlawh kawi lawk dawn em ni? Hrilh hriat ve te pawh an ngai a," Inla hrang paha ka tih chuan ka biang tawn tawna rawn vuanin mawi lutuk a rawn nuiin min fawp zauh a, ka nui ve sen sen tho



Car a min ṭhut luh tirin, a car khalh te chu a khalh chak ngamlo leh fimkhur lutuk chu ka khawngaih lek lek zawk, min rawn en leh ṭhin, min vil nghal chawt ni maiin ka hria



Dawr kan luh rualin, "in in ah rawn kal ka tum chiah a," Jamie-i hmel ka hmuh chuan alam pan a tlân mai ka tuma, Nathan-an minlo dawmbet vatin, "fimkhur rawh," A tih deuh sup chuan ka ṭhen khum vak ringawt



"Tinge? I damlo em ni?" A bula ka ṭhut ruala alo tih chuan a sira stroller-a a fapa muhil biang a khawih zeuhin, "dam e, thil hrilh tur che ka nei," Ka nui ver ver a


Nathan-a melh zawkin, "ka rai, thla 2 leh kar 2," Ka tih chuan meng kawkin, "tak tak em ni, Lalpa leh...! Nathan tak tak em ni?" Jamie-in min lawmpui zia chu a ṭap lo chauh, "tak tak ni e," Tih leh ultrasound thlalak chu a hmuh zat a


La kâng a en in, "OMG....! Tak tak nia maw le...! Ka lawmpui lutuk che Maya, Nathan nangpawh," Ka lo ṭah nuih ve hak tho



"Phone ka'n hmang lawk ange," Tih leh Nathan-a chu thawh a rual nghal a



"A lawm ngawtlo maw? A fa pakhatna tur ang a ni sia, Bryan te unau chu dahṭha rih ila," A rawn tih nghal sar sar chuan bu nghatin, "naktuk aṭangin hna kal tawhlo turin min duha," Ka tih chuan nui uar uar in, "a over leh ngawt ang inpa hi chu, ka lawmpui viau che na in, inpa che over leh vel tur hi ka lo ngeisa," A tih chuan ka nui sun sun ringawt



Jamie-i nen kan ti ti fe hnu ah Nathan-a rawn lutin, "cake ka rawn la ang, ka ril a ṭam," Tih leh thawh ka tum chu Nathan-an min ṭhut let tir vatin, "keiman ka rawn la mai ang, engmah lo ti suh," Tih leh pensawn a rual a



Jamie-i lo chek tlak tlak pahin, "over vel e, tar neih hi kawng lehlam ah chuan a nawm dawn hi," A tih chuan ka melh vak


"A nia lawm," Tih leh, "thla 2 lai tawh si, rai no i haw lemlo em ni?" A tih zat chuan ka hmui hnuailam ti pawrh deuh tarh a, Nathan-a cake rawn lak ei vat chuan, "ka hrelo, nei lemlo, mut ka duh em ema a ni mai," Ka ti awlsam et chu bu nghatin, "i vannei a nih chu, kei thla 2 bawr vel lai kha chuan Op-a U mipa kha ka ngei tlat a, kan inneih lai vel pawhin ka sawi kha, ka ngei zia thu, a fel viau na in, a hmel kha ka ngei tawp," Nui uar uar a tih leh, "sawhthing hi ka ei duh ṭhaklo bawk a, tunthleng hian sawhthing phei chu ka ngainat loh phah," A tih takah chuan Nathan-a ka melh nghal zawk a



"Nathan-a inbual zo rim hi ka hua," Ka ti chuan Nathan-an min en haw in, "ava buaithlak dawn ve...!" A tih deuh vung vung chuan Jamie-i rawn nui chhuak hakin, "ka haw dawn, kanpa a rawn thleng ṭep, nau hi vah chhuah pui ala phal vaklo a, thla 3 dawnlai kan inhmu tawh silo a, rawn lên intum silo nen ka rawn chhuak luia, a lawmlo viau maithei a ni," Tih leh din a rual a



"A hring chhuak tawh zawk inih kha rawn lêng zawk rawh u, indim hunlai a nia, a chhuak dawnlo reng reng," Nathan-an alo tih sa chuan Jamie-in ner khum sawng sawngin, "i khungbet dawn tih hi chu ka hre sa alawm, kan kal ange, saw a rawn thleng," Tih leh a fapa muhil nawr sawn a rual nghal a


An tlân liam thleng chu en in, "i nu te kan hrilh ve dawn em ni? Nge ni a, naktuk rinni a ni tho a, chaw ei turin sawm ila, kan hrilh zawk dawn," Nathan-an min rawn kuah paha a tih chuan bu nghatin, "naktuk lamah kan hrilh dawn nia, ka Nî te ho pawh phone kual ila a ṭha hrim hrim," Ka tih chuan alam hawi tura min kuai herin, min en vang vang a



"Ka lawm e Bawihi, ka tán chuan malsawmna rohlu ini ringawt alawm," Rilruih maia a rawn tih chuan nuih let ver ver in, "keipawh ka lawm e," Ka ti sep a, dingdi hlip ak ak leh kuai kûn pah chuan a hmui ah ka fawp zauh chu, rawn nui nghawr data min fawp let chuan hmangaihna a khatin min fawp vawng vawng a, kan dinna hi kawngpui sir a ni emaw mipui vaivak an awm em tihlam kan ngaihtuah pha tawhlo, engkim maichu a reh duk a, kan pahnih khawvelah kan leng delh delh in ka hria



<><><><>


NOTE : Naktuk zanah chuan last chapter a ni tawh tak tak ang🤭ka story dang aiin ka hlim rei tir viau mai🙈



Link:
BBcode:
HTML:
Hide post links
Show post links

Ngaia
Site Admin
Posts: 17219
Joined: April 30th, 2016, 4:07 pm

Unread post by Ngaia » December 31st, 2020, 5:07 pm

MY TREASURE
By
Floria Laldansangi




Last_Chapter < 38 >




~ MAYA...POV ~



"Tak tak em ni?" Ka nu in a mak ti hmel leh awihlo hmel chu a th hman thlawtlo



Ka bu nghata, ka test kit chu dawhkana dah chhuakin ka nuih ver ver bawk, niminah, cafe aṭanga kan haw dawnah test kit alo va lei tih ka hrelo reng reng, zan mut dawnah min pe in, min test nawn tir leh kher kha a nia


La kângin, "a ni tak tak a nia, Eunice enteh," Ka nu chuan a mittui a hru zui nghal zauh a



"Ṭahna chi pawh ni em ni? Kum khat êm pawh kanla in neilo a," Nui ṭhû a ka tih chuan Nathan-a kalam a rawn tawlh hnaiin ka kawngah a rawn chelh zui zat a



"Ni e, in awmdan ngaihtuah hi chuan naupai mai tur hmel i pu a, i pai mai silo kha kan rilru a hahru hman alawm le; Mahse, Pathian zarah a hun takah Pathian in a pe che u nih hi, " Ṭah aw ṭeua tih leh, "i pa khan hmu ve se ava lawm dâwn êm aw....!" Mittui tla chunga a tih leh vawng vawng chuan ka ṭap ve mai dawn, tunang hlim hunah te ṭah ka duh ṭhaklo a nia...!



"Ka Nu ṭhin hi a...! Ṭah hun pawh a nia mawni? Nathan ka lawmpui lutuk che u a nia," Eunice-in a rawn tih chuan Nathan-a chu nui sukin, "nangpawh i lênrei tak tak hma in pasal lam hi ngaihsak vat rawh, i vahte i awm, i awm mai ang aw..!" Nathan-an a fiam zauh chu ka nu rawn ṭah nuih haka dawhkana ultrasound thlalak chu la kâng pahin, "a chut lutuk a, tunlai ah mipa chuan tlema huaisar leh vengva ve deuh hi an duh zel tawh si a, Eunice-i te zawngin pasal a hmu mai mailo ang, lehkha hi thiamlo pheise chuan amah pawhin ṭhian 1 pawh a siam thei nang," Ka nu in a rawn tih chuan kan nupa in kanlo nui hak hak a



"Ka chut vak emaw ni? Ka hma ka sial rih zawk a nih hi. Bakah, min indan pui thei nghal tur ka duh ve alawm," Eunice-in alo tih let ve vat chuan ka nu in a darah a beng zui taih a



"Pasal neih hma hawt hawta indan sawi te chu i zak na nge? Indan nghal tluk a awmlo; Mahse, indan cho viau tur pawh a ni chuanglo, i pasal neih tur a zirin i pasal chhungte hrawn turah indah tawp rawh, i â lutuk mai," Ka nu in a hau zui mawlh mawlh chu nui vur vur in ka lu ka lo thing mat mat ringawt a



"Mamma.." Tih leh Brayden-an min rawn bawh dawta, ka malchunga lawn a tum nghal zat chu Nathan-an lo pawt sawnin alam ah a pawt hnai a



Bryson-a leh Bryan-a rawn lut ve chiah pawh chu, "hetah lo kal teh u," A lama ko chuan a hma ah a din tir a, "tun aṭang chuan i Nu hi bawh in emaw in pawmtir tawh suh angche u aw," Nathan-an naupang ho en a a tih chuan hrethiamlo zeta an unau thuma in en kual chuan, "ti maw...? Kan Mamma lawm," Bryson-an a rawn ti chhuak kauh chu kanlo nui ri hak a



Ka dul rawn khawih pahin, "hetah hian naute a awm tawh a, in Mamma hian a pawm kawi thei tawhlo che u, in tlangval tawh, nau in neitawh dawn bawka, Mamma hi duat tur aw...!" A tih zawh rualin, "awiii....! Nathan, i over e a...! Thla 2 awrh chauh a nih kha, naupai hua lah a ni bawk silo, indim vak angailo, hnate thawk sela, rit te chawi ve turh turh rawhse, nau hrin an awlsam zawk, i duat leh lutuk anga, nau a harsat zawk tur a nia..." Uar zet leh nui ṭhû chunga Eunice-in a rawn tih zat chuan Nathan-a chu ka melh zawk a




"I lungdamna tur khan enkawl tawp rawh Nathan," Ka nu in a rawn tih ve nghal zat chu a bu nghata, Eunice-i nen in en in tih ngaihna vak hre lovin kan nui dun hak ringawt a


"Chaw ei kan hman a nia Maya..." Pi Siami'n choka aṭangin min rawn ko lang lang a


"Kut silfai ula, chaw ei ang u," Tih leh naupang ho chu kutsil turin ka tir nghal zat a



Ka tho tur Nathan-an min rawn dawm a tum chu lo bengsawn vatin, "ka kal thei, i mak ching cheng," Ka lo ti hlar chu a nui ve suk tho, doctor-in, "nauchhiat awlsam hunlai," A tih kha a hrefuh laileng lutuk a a buaithlak lek lek zawk


Ka nu leh Eunice-i nuihza lutuk chu an lo nui kiah kiah bawk a, a hahthlak chho dawn khawp mai, tirenga min veng a nih chuan kan in bauh leh nasa dawn tih ka chiang lutuk tlat



Ni a kal a, thla a liam ve leh zel, rinlawk leh sawilawk angchiah in Nathan-a pawh hna in aṭangin a thawk a, ṭulfe ah Construction site kal ngai a nih leh a kal tihloh chu ka bulah a thu nileng zak zak peih, a awihawmloh hial zawk ṭhin



"Nathan, ka ke hi minlo hmeh teh a," Thlathar maia nau hring tawh tura tih ka ni ve tawh, ka dul lah chu rin aiin a lian in a kawh a, Jamie-i naupai lian ka tih chu nep te a ni, phir a nih kan ring nasa viau na in ultrasound ah erawh vawitam en pawhin pakhat chauh a ni bawk si, "tui i pai tam a niang," Minti ta vel mai mai



Ka ke vung luk chu a malchungah ka rawlh sat sat a, ka mawnglam ah ṭhu in laptop a hmet mawlh mawlh bawk



"Bawihi ka zo ṭep," Ti supin ka ke chu a kut pakhatin a hmer salh a, a thiltih lai bawk chu a tih zawm leh nghal mawlh mawlh bawk


ka thin chhiat a chhuk thut nge maw ni? "Ti tawp suh," Tih leh inben kân mai ka tum chu ka in zo lo nasa mai, a dul puar, a puarchuan sofa aṭangin ka let thla lo chauh



Ka in hai buai lek lek chu Nathan-an rang lutuka min rawn dawmin a thaw ri zui hawk a, "minti hläu alawm, nangmah in engmah tih tum suh ka tih kha," A thinrim lek lek tih a aw a ṭangin ka hre thei, ka tlak a hläuh lutuk vang a ni zawk mah


Ka hmui ti pawrh tarh in, "ka ke kha hmet rawh a nih," Ka tih chuan thaw haka nui zui sukin a lu a thing mat mat ringawt a



"I inzo silo, engmah nangmah in tih tum ve tawh reng reng suh," Ka ke hmet paha a rawn tih leh chuan ka lo nuih sen sen a, pasal a zawnga pasal ṭhaber a ni ka ti ngam, ka rai tirh aṭangin Mumbai kal ngai nise, kal lohdan zawngin zing dar 2/3 thleng thleng ka sirah ṭhu in hna a thawk a


Zanlai ah ei chak nei ila, î, hê lovin a tho nalh zel bawk, ka taksa na in mu theilo ila, min hmet zankhua ṭhak ṭhak peih bawk a, hetiang mipa hi antam lo viau ang, kan Mizo mipa ah ngat phei chuan kutzungṭang thliah tham lek an awm angchu le...!


"Daddy, Mamma a muhil tawh ami?" Bryson-a aw chu ka hre ruai ruai, Jamie-i U fate birthday lawmna ah an kal a, an rawn haw tawh a ni ngei ang, men ka tum ngiala ka mut chhuak lutuk chu ka meng thei thlawtlo



"A muhil deuh chiah, Muani naupang ho tifai la i mut tir mai dawn nia, in tifai ula mu tawh rawh u, a tlai tawh," Nathan-a chuan a ti sur sur a


"Naaa.... Hrilh tur ka ngah a sin le...!" Bryson-an ti vawng vawngin, "Bryan ka car lem ka ah tir che kha khawi," A ti zui zat bawk


"I fate ai pawhin mut hi i awlsam zawk," Nathan-an a ti ri chu ka hre zui vuai vuai ta chauh a ni


Ka pum rawn na deuh ruai ruai chu thaw hakin ka mutdan ka siam rem a, "na i nei em ni?" Nathan-a aw ka hriat chuan men pawh meng chuang lovin, "ka pum a nuamlo deuh," Ka ti chhuak sap a


Ka mutkawr pan zet mai chu rawn hlimin a rawn chul hliau hliau a, ka thaw leh hak ṭhin, "a zia deuh em? Hmarcha i eilo tiraw?" A rawn tih leh chuan, "ummm," Thatchhe zet chuan ka chhang a


A reh mai dawn emaw ka ti laiin ana tulh tulh lehnghal, darkar 1 dawn a nat ruai ruai hnuah tawrh theih tawhloh khawp a na in min rawn tur a



"Nau ka hring dawn," Pumna vial ngawih ngawih chunga Nathan-a kut chelh a ka tih chuan, "tunah.....tunah maw....?" Ka melh nghal vak

Ka pum lah chu second tin maiin a na tulh tulh emaw tih mai tur a ni



"I nu, I nu ka zu ko ange....!" Tih leh ka vawnna phelhin a tlan chhuak nghal vut a, keimah a thawh ngial ka tum a, ana lutuk chu khum a bungbu ut ut chuan hmui ka pet in, bedsheet chu ka ṭham ngar ngar ringawt




Ka nu leh Nathan-a, Pi Siami, U Muani te ho rawn tlân lut chuan min rawn buaipui nghal sawk sawk


"Thlathar tur a ni si a, a hrin ala hun silo a, diklohna a nei em ni," Nathan-an hlauthawng zeta alo ti chu, "Damdawiin kan panpui a ngai a nih hi, a hring hnai tlat, Muani naupang lo awmpui mai rawh," Ka nu in a tih rualin Nathan-an zo zeta min pawm kâng lawp chuan min pensawn pui nghal pawk pawk a




Hmer tur leh dawm tur dang awm heklo, Nathan-a sam ah chuan theih tawpa ṭham in, boruak ka hip kawk kawk a, boruak hip mai mai pawh chu a harsa takzet, nau vei hi a hrehawm in, ana an sawi chu ka hre zing mah mah, Jamie-i nau neilai pawh ka hmu in ka hre ve reng; Mahse, heti em em hian ana ang tih rin ngaihna ka hrelo hrim hrim


NATHAN-A....POV


Zinglam dar 2 velah Malsawmi nau rawn vei thut chuan minti chiai, doctor khan thlathara hring tur ah khan mindah si a, a thla ala kimlo hrim hrim bawk nen, ka rin aiin ka hlauthawng thei daih mai


"Nathan-a a ai chakin i tlan thei em? Car ah nau a vei chuan a chau hman mai ang," Damdap maia Malsawmi Nu in a rawn tih chuan ka melh zawk, engtin nge chiai maihlo a a awm thei zawk ni?



ka nupui thlan tla zawih zawiha hmui petbet tlat a, car seat ṭham ngawr ngawr maia natuar chu en hreawm ka ti takzet, hmeichhe ho tawrhchhel zia leh huaisen zia a lang chiang em em in ka hria



"A tui bawm a keh tlat mai," Malsawmi nu in a rawn tih chuan ka meng kawk, Pi Siami leh ka Pizawn chu chiai hmel pawh anla pu ve lemlo chu an fakawm ka ti dawn nge ke ngei lek lek zawk


Durtlang damdawiin kan thlen ruala car ti ding dawtin ka zuang chhuak nghal a, Malsawmi pawm chhuak nawlhin ka pen luh pui nghal pawk pawk bawk



"Hetah hian mut rawh," Nurse in a tih ruala mutin an nawr sawn nghal a, nau vei na hmuna an luhpui dawn chuan, "ka zui lut ve ang," Ka ti vat a


"Pawnah lo nghak zawk rawh," Doctor Reuben-an a tih chuan ka chhip sam ka tuai puat a, "nangmah em ni neihtir tur?" A lut tur chu pawt ding dawtin ka ti hrawih a



Rawn nui chhuak hakin, "lungngai suh, Doctor Martha hian a en dawn," A tih chuan za lo zetin ka kiai ve suk



Nau veina room kawt ah chuan ka vaitawn seka, Malsawmi na tuar ri chu chiang takin ka hre thei bawk, chu chuan minti awm mai mai theilo a ni ber


"Ala hringlo em ni?" Eunice-i leh Henry-a an rawn thleng ve chiah chu ka melh zawk



Pathian hi ka ringlo ni lovin, Ka ṭawngṭai ngailo a, ka rilru pawhin, vawikhat pawh ka ṭawngṭai hi kala hre hauhlo, ka nupui nau vei, na tuar ri ka hriat meuh chuan ka rilru in Pathian ka au mawlh mawlh mai alawm


"Hahdam rawh Bawiha, a ṭha em em ang," Henry-an ka darah a rawn beng thak thak a, chhete mahin min hnem chuanglo


"Ala vei mek em ni?" Jamie-i te nupa leh Simon-a an rawn thleng ve chiah bawk



"A nih hi, nau tu in nge awmpui, in rawn kal ve kher duh a," Eunice-in alo ti vat a, kei erawh ka rilru ah engmah a awm theilo, nau veina room lam chu ka panin ka en leh sek ṭhin, 1min pawh rei ka ti lutuk tlat


"Ka nu te an awm alawm," Jamie-in a tih rualin, kawngkhar a rawn inhawng raka, rang lutuk a pan in, "eng..." Nurse -in naute a rawn pawm chhuah ka hmuh chuan ka khawng nghal at thei


"Nau hrisel leh hmelṭha tak a ni. Nau pianghlim ka hmuh tawhah chuan ala hmelṭhaber âwm e, a hmui a sen lutuk a, thisen emaw kan ti ṭep zawk alawm, mipa hmelṭha tak ala ni ngei ang," Doctor Martha-in ka kut a rawn dah paha a tih chuan nuih pawh ka nui theilo, ka fapa, ka kuta awm chu ka en tlawk tlawk tawp


MAYA...POV


Nau veina room aṭanga min nawr chhuah rualin, "eng nge i an? Na i nei em?" Nathan-an min rawn din chilh vat a, a mitmeng phelh phang chu ala rehlo in, a hlauhthawn na leh min ngaihtuahna nasa tak pawh ka hmu thei, lo nuih seihin, "ka ṭha, kan fapa saw a hmelṭha iti ve em?" Ka nu ten an pawmna lam chu ka melh a, nui suka ka lam rawn hawiin, "ka lawm e, ka lawm e Bawihi," Tih leh min rawn fawp vawng vawnga inla hrang hlekin, "ka hmangaih che," Ti supin ka chalah a fawp leh zat bawk, beka mittui luang ngiai ngiai in ka nuih ve sen sen bawk a



Nau neih in hliamna leh na dang ka neihloh avangin karkhat hnu ah damdawiin kan chhuahsan a, chu pawh Nathan-an a remti chiahlo na in damdawiin ka hne turu lutuk chu ka damlo zawk dawna ka hriat vangin haw luih ka dil kha a nia



Kan fapa thar lah chu a hmelṭha kan ti, kan ti tak na in zan reng reng min mut tir theilo, a sual lutuk te hi a hming ka Nu in a phuah "Ivan Lalbiaksanga" a tih te hi "vanlalsuala" tia thlak leh hial a nia ka duh rum rum ni, zan reng reng minti mu theilo, pangti lumlah chu a hre em em khawp a, chhun ah a mu thlawrh thlawrh a, zanlamah a ṭap emaw a meng leh ker thung a

A ngeiawm bawk si, Nathan-a leh ka nu, U Muani te ho min chhawktu neilo phei ila chuan ka tlinlo nasa lutuk dawn, Bryan-a te unau 3 a ruala enkawl kha a awlsam zawk mah mahin ka hria...!


Nge ni a, ala sên lutuk vang zawk pawh ka hrelo tawh neklo e



Thla 3 lai a ni veleh tawh, Ivan-a rawn ṭap leh ruah ruah chu Nathan-a sawi pahin, "tho leh maiteh, i fapa Lalbiaksanga sual dan em em saw, minti chau," Men pawh ka meng peih tawhlo, Nathan-a chu engmah sawi lovin a tho ve ṭuah ṭuah a


Zanlai a pel tawh, kanla in awi a nia, tih ngaihna a awmlo, 'fa ka hrin belh tawhlo ang,' Tih rum rum a awl khawp mai


Zankhua deuh thaw a kan in awih hnu ah dar 5 velah a muhil ve ta sek sek mai alawm



"Bawihi, hnute pe lawk teh, a ril a ṭam a niang," Nathan-an min sawi dat dat a


A muhil chauh emaw tia, a harh leh emaw ni..?



Ka meng diar diar a, thaw hakin, "ka mu ve dawn chauha, i ril a ṭam leh a, ben lawl tham ni tawhla ka ti ngawt mai, i ṭahna ah i hmel pawh hi ka hmu chhe zo," Phun nuah nuaha ka ṭhu chhuak chu Nathan-an ka kut a rawn dah pahin, "kan beng phal nang, ala hmelṭhat êm kha," Tih leh a phone rawn ri chu a la zui zat bawk, a fapa sual lellawl tehreng nen, sawisel lah hian ala ṭan ve ziah lehnghal



"I chiang maw Doctor, a in mil takzet maw...?" Nathan-a phone hmang chu mit phak zetin ka en a


"Ka hrethiam e, a rang thei angber in kan rawn chhuk dawn nia," Tih leh phone off in min rawn en a



"Eng nge" tih melha ka lo melh chu, "Bryson-a Lung thlakna tur an hmu tawh a nih chu, tunkar hian Mumbai panturin minduh a, thla tawp lama zai thei turin," Nathan-a pawh chu a lawm hle tih ka hmu thei, kei phei chu ka mittui a rawn hnâm sawk zawk



Nau hnute pe pah chuan, "tak tak em ni? A in mil tak tak amaw?" Nathan-a chu a bu nghat a, "lungngai suh, Doctor Stewart a ni a, a rintlak khawp ang, tihsual a nei dawnlo," Ka hmuiah a rawn fawp a, kalo ṭah nuih hak hak thung, Bryson-a Lung kan thlàk thei a nih ngat chuan engmah rilru hah na tur dang ka nei tawhlo ang



Ani pawh naupang pangai angin a hun a hmang ve thei tawh dawn tihna a nia...!

.
.

"A lawmawm hle mai, Pathian hi zawng a ṭha teh e...!" Ka nu in Ivan-a pua chunga awi durh durh paha a tih chuan, "tunge le Lung pe tu tur chu ni ang?" Nathan-a ka melh zawk


Laptop hmet mawlh mawlhin, "ka zawt ngiala, engmah an sawi theilo, naktuk tlai dár 4 ah flight ka book a nia," A tih zawm zat a



"Maya..." Ka hawi vat

Ṭhut khawmna lam rawn pan mek hmeichhe dul puar kawh luah mai ka hmuh chuan ka meng deuh kawk a, Nathan-a ngheng ar ar a ka ṭhu pawh, ka ṭhu ngil nghal awt bawk, chutiang bawkin ka nu pawh a nau awi lai a ding ve dat tho


"Indam em U Maya..?" Faki en hau chuan, ka bu nghat a, Nathan-a pawh rawn hawiin min rawn en nghal vat



Pi Siami mit sen râm leh hnawm chap ah chuan a ṭap tih hai rual a nilo


"Kan dam ṭha e, lo ṭhu rawh u," Ṭhutna ka kawh hmuh vat a


Kan hma sofa a ṭhu thla in, "pasal i nei em ni?" Muang ban chapa ka tih chuan a kûn ngal


Pi Siami rawn in hnit feih feih a mittui zu zauh zauhin, "Nathan, Maya...." A ngawi leh deuh vang vanga, engmah sawilo mahse thil awmzia kan hrethiam nghal vat, Nathan-a ka melh zawk a


"Faki, I naupai na hi pawmlai nei em ni?" A bu deuh nghat a, kalo thaw chhuak hak thung

Pi Siami rawn ṭap chhuak nghal hawm hawm in, "ka thiamloh vek a ni, nangmah a chhuah tirlo tur che ka nia sin maw le," A in hnit hlawp hlawp a, ka chhungril tak chuan ka in thiamlo ve nghal rawih rawih mai



"Nau ka pai hnu ah pawmlai nei a ni tih ka hre chauh a ni," Mittui tla fep fep chunga a rawn tih chuan ka lo tawt ve up up mai, ka inthiamlohna leh ka demna a in zat chiah bawk



"Chuan engtia awmnge i tum?" Nathan-an a rawn ti nghut a, rawn melh zawkin, "ka hrelo..." A ti thawp sap chu Nathan-a chu a lo kiai suk, ṭawng leh tuma a kâ a ang zuai hman chu a kutah vuan vatin, ka hmer salh a, "thla engzah nge inih ve tawh?" Nathan-a chu ka mitmei ka khap zat bawk, a hmelah chuan Faki a hmu leh chu a lawm viaulo tih ka hria; Mahse, Pi Siami vang tal pawhin kan pet chhuak leh ngawt thei chuanglo



"Thla 7," A rawn ti sap a, "inluah tur zawng ila, ka ti deuha, chumi hma erawh hetah kan awm rih thei angem tih zawh che u ka duh a," Pi Siami'n a mittui hru hul tawk tawk paha a rawn tih chuan Nathan-an a laptop khup thak pahin, "Bawihi, ka Pi nen khan thuthlukna siam rawh u, Ivan-a chu ka han mut ange," Tih leh tho nulhin ka Nu puak lai Ivan-a chu a ban nghal zat bawk a


Nathan-a pensawn hnu ah ka nu ka sira rawn ṭhu in, "il naupang si a, a pawi ngawt mai, tuna thil thleng hi a pawi zia ila hre dawn chauh a nia, dam chhunga nghawng thei thil a ni lehnghal, a sârhû laia lo hauh che hi ka tum a ni lemlo a; Mahse, i Pi hi ka lainat êm a tin ni," Ka nu in a rawn tih dam dap chuan Faki chuan a mittui a hru zauh zauh a


Rawn ṭah nuih sen sen pahin, "i sawidik chiah alawm, ka thiamloh a ni a, ka Pi emaw U Maya-i thusawi kha lo ngaithla ni ila tun dinhmun hi ka tawng hauhlo ang, he in a minla lut theilo a nih pawhin ka demlo che u a nia, pawisa khawlsa tlem ka nei a, inluah tur chu kan hmu chawp chilh ve mai," Tih leh a dul dawm chunga thawh a tum chu, "i nau hrin hma chu hetah awm rawh u, nau kha piang sela, kanla ngaihtuah ho dawn nia, i Pi a chak tawhlo a, nanglah nau hring maithei in i awm a, khawimah in kal thei dawnlo, mu tawh rawh u, a tlai tawh," Ka lo ti vat chuan mittui tling pamin Pi Siami nen min rawn en in, "Maya..." Pi Siami'n a rawn ti chhuak ṭuak a, a ṭah chhuak lutuk chu ṭawng pawh a ṭawng theilo tih ka hria



"Mu tawh rawh u, naktukah Mumbai lam kan pan dawn a, keini pawh kan han mu ange," Tih leh thawh ka rul a, ka nu in min rawn zui ve vat bawk



Room ka luh rualin khuma Nathan-a lo mu than tawh chu inthlak sawk sawka mut lut ve in alam ah ka tawlh hnai nghal sat sat a, ka lam hawia min rawn kuah ve nghal hlu hlu chuan, "nuamlo iti em ni?". A rawn ti dût a, boruak hip vang vang a, thaw chhuak leh ham ham chuan, "ka thiamloh pawh a tel ve deuh alawm, lo chhuah tir miahlo tur ka ni a," Ka ti chhuah sap chuan ka chhipa fawp vang vangin, "a thil tihrah a seng zawk alawm, inthiamloh chhan tur a awmlo, i chhuah tir a nilo a, ka chhuahtir zawk a nih kha," Min hnem tum zeta, rilruih mai a tih leh ka khabe a rawn chawi kângin ka hmuiah dimtê in min fawp a, nui sen sen in ka fawp let ve vawng vawng bawk

.
.
.
.

~ MUMBAI ~

"Tunge donate tu kan hre theilo amaw?" Doctor chu kan zawt nawn leh ngat a


Damlo, Bryson-a Lung petu chanchin hi kan hre ṭeuh tawh; Mahse, tunge a nih a, eng ang mi nhe a nih erawh knla hrr hau silo, naktuk mai hi in zai hun a ni tawh bawk nen


"Pawi ka ti Mr. Nathan, sawi a duhlo a ni," Mizoram aṭang tawhin tu in nge Bryson-a Lung pe tih kan zawt tawh, an thup tlat chu a buaithlak ka ti, lawmthu sawi te a duhawm tehlul nen



"Chhungte a neilo a, a Lung hi in fapa pek a duh thu a sawi a, in fapa hming a sawi kha mak ka ti viau mai a, kan damlo te chanchin hi kan sawi chhuak theilo na in, in hmel hriat alo nih takin," A ngawih vang vang hnu ah a rawn tih chuan medical report chu ban in Nathan-a nen chuan kan en vat a




"Maria..." Ka phun sap


"Inhriat zawng a ni em ni? In fapa a rawn thlang nalh kha mak ka ti deuh a," Doctor-in a rawn tih chuan Nathan-a ka en haw ringawt, Nathan-a pawhin Maria-i a nih a ring pha biklo tih a hmeah a lang reng



"Kan hmu thei angem?" Ka ti sep a, doctor chu ngawi deuh vang vangin, nurse ko chuan, "ICU 301 ah khan i hruai dawn em niang?" Tih leh, "a biak tlak angem ka hrelo a ni," A tih zawm zat bawk a



Ka tho tawh chu Nathan-a la ṭhu reng chu en in, min rawn en chho a, "lo va kal rawh Bawihi, doctor hi ka'n be lawk ange," A tih sup chuan ka bu nghat ringawt, Maria-i hmuh a duhlo emaw a hmu hreh a ni ngei ang


Nurse hnung chu ka zui hnak hnak a, "Mamma," Ka hawi vat


Thu hniam rawk rawkin, "engah nge in rawn chhuah, Bryan i nau hi a ward ah awmpui rawh u ka tih kha," An unau thuma ka hma a ding chu ka hau ti tih a


Bryson-a chu ner nawng nawngin, "ka kawr hak te hi ka ning tawh e, damdawiin hi ka ning," A ti nang nang chuan, "keipawh," Bryan leh Brayden-an anlo ti ve vat bawk


Thaw hakin, "thu i awih chuan naupang dang angin i tlân in, i infiam ve thei tawh dawn alawm," Tih leh a sam a tuai zauhi, ICU lam chu ka hawi a, Maria-i chu naupang ho hmuh tir ve ka rilah a rawn lang zawk


Naupang ho kai pahin ICU ah chuan ka kai kut a


Ka hmuhdan chuan min deng dawtin ka hria, hmeichhe hmelṭha tak leh tisa nalh tak nei kha, a ruh chiah a awm emaw tih turin a chera, a hmai tlâng hriam hrak leh vun ro leh dang bel te chu a rapawm lek lek




"Maria..." Khum bulah chuan ka ding a, oxygen an vuah bawk nen, amah a ni tih pawh hriat har khawpin a danglam


A rawn meng diar diar a, naupang ho lah chuan hmuhnawm thlir in anlo thlir hau bawk a


"Bryan..." A rawn phun sap chu Bryan-a ka phen a tawlh lut nghal rawk rawk chuan a hmai a phum zui kak a


Maria-i mit a mittui hnâm ṭiam ṭiam leh tling nghal pam chu ka hmu thei


Theihtawp a nuih luih tumin min rawn melh ṭawk ṭawk a, "Nu tiin minkoh tir thei angem...? Khaw... Khawngaihin,," Ka mittui a hnâm nghal sawk thei


Hmeichhe lu zo leh mahni indah säng em em, tuma hnemah khawngaihna dil ve ngailo tur a ka dah ṭhin khan khawngaih min dil a nia



Ka mittui khap let sak sakin, ka nuih let seih a



Bryson-a leh Brayden-a, ka sira min kuabet ṭau chunga, ka mal a hmai phum tlat Bryan-a melh leh ṭawk ṭawkin, a mittui a luang ngiai ngiai bawk




"Bryan, lo kal teh," Maria-i entir ka tum chu a ṭang nasa mai


"Mamma, tunge a nih a?" Brayden-a min rawn en chho kiau a a tih chuan, mittui khap let sak sak a Maria-i en chuan, "Brayden, Bryson, Mummy tiin in ko thei angem?" Ka tawo dat a

"Ka U a nih hi," An hringtu a ni tih sawi ka duh alawm; Mahse, ka lei hian a sawi chhuak thei tlatlo a ni


An bu nghata, "Mummy, lo dam vat vat rawh," Antih chuan Maria-i chu a rawn ṭap chhuak hak a, a khuh zui nghal bawrh bawrh bawk


"Keipawh ka damlo ve a; Mahse, naktukah chuan ka dam tawh dawn, Mummy nangpawh dam vat vat rawh, tiraw Mamma," Ṭah chhuak zet chuan ka nuih sen sen a, Bryan erawhin minla kuah ngar thung


Ṭhu hniam in Bryan-a darah dawm chuan, "Bryan..." A kun ngar, "Mummy Maria hian ngaihdam dil che a duh a, vawikhat chauh i en dawn em niang?" Lehlam a hawi zui deuh hmak


"Bryan..." Maria-i aw chu hriat a har takzet tawh


"Ka tihpalh ka fapa, ka tihpalh a ni," Thei leh theilo a a tih leh a mittui a luang zawih zawih a


"Maya, ka lawm e," Ka lo nuih seih a, "ka lawm e, a vawihnih nan ka fapa nunna i pek leh dawn avangin," Ka ti chhuak ve sap bawk


Bryson-a pawh tluang takin a Lung an thlak a, Maria-i ruang erawh tuam thlawmtu an awm miauloh avangin, kan tuamhlawm in a thlan pawh nalh takin ka chei bawk


Naupang ho pawhin a ṭha zawngin an nu an hre ve reng tawh tur chu ka thinlung zawng zawngin ka lawm a, ka rilru kam rengtu Bryan hian a nu a huat hlen ka hlauh rukna pawh tunah chuan nawhreh a ni tawh bawk nen, engmah dang rilru hahna tur ka nei ta lo.....!




< 10 YEARS LATER >


"Alice, mipa khawih chi a nih hi, hmeichhe khawih chu i leh chiloh hi hre ve rawh aw," Ivan-an a nau a hau leh tan tan chu chair a ṭhu chungin ka thlir reng a, ka sirah News paper chhiar chungin Nathan-a a ṭhu a, ka veilam Bryan-a laptop hmet mawlh mawlh in a thu ve bawk


Kan hma zawn ah Bryson-a leh Brayden-a, kan bulah Bryson-a leh Brayden-a chees ngawi rengin an khelh dun bawk a



Alice-i uar zeta ṭap chunga kan lam rawn pana, a u Bryan-a mal inkar a in rawlh pahin, ṭap pur chung chuan Ivan-a a hek zat zat chu lu thing mat mat in, "i u i cho ve awr awr zela, hmeichhia inih kha," Ka lo tih chuan Bryan-an a mal chunga pawm kâng nawlhin, "Ivan i nau hi hau ziah suh, U zawk inih kha," Bryan-an a tih chuan Ivan chu ner nawngin, "in chjan bik ziah, a sual phah vek tawh," A ti zui nang nang a



Hmeichhe awmchhun a ni tih hi a in hre lutuk leh a U te ho hian an chhan tih a hre leh lutuk hi a buaithlak zawk, kum 8 a ni ve tawh, a kawlhsen rapthlak bawk si



"I nu a chhun a nih kha, ṭap pur chung pawhin a sual let ṭauh ṭauh zel," Nathan-an nui huk chunga a rawn tih chuan ka lo melh deuh vak a


An unau 5 a lo nui hawk hawk in, "Pa i hlauh theih zia kha kanla hria a nia aw," Brayden-an a rawn ti sup a, kan nui dar dar hlawm a



"Aaaa... U Bryan-a bialnu saw..!" A kawhna lam chu kan hawi vat, kan in gate a rawn pen lut mek hmeichhe tleirawl chu kanlo en ṭhap a



"A ni ngawtlo Ivan," Bryan chu a lai reuh emaw ni..?


"Hi Bryan..."

"Hi..." Kanlo en hau hlawm


"Pi Mal, Bryan unau hi ka birthday party ah sawm ka duh a," A rawn nui sen sen a



Brayden-a leh Bryson-a, a naute ho chuan mit hmul anlo kân khum ak ak chu lu thin khum mat mat a Nathan-a melh raihin, "kum 18 an ni ve tawh alawm, an kal duh a thu a ni mai angchu," Ka tih chuan Bryan chu a rawn nui vur vur a



"Sawn thlam lo ula, ruilo ula a ni mai," Nathan-an a rawn tih ve sup chuan an lo ner nawr hlawm a


"Tete, keichu ka rawn tel theilo ang, ka bialnu pass lawmna ah ka kal angai a, sorry aw, i piancham ka lawmpui bawk che," Bryson-an a rawn ti ve sup bawk


"Bakah, zanin hi Nu i birthday läwm kan tum ve lo em ni? Engmah inla sawilo a," Bryson-a a tih zawm zat chuan Nathan-a nen in melh ralhin, "i nu nen dinner a chhuah kan tum alawm," Nathan-an a tih chuan rawn nui vur vurin, "kan tel lova hman inlo tum vang a nih chu," Brayden-an tih leh kanlam rawn panin, ka biang a rawn fawpin, "happy birthday Mom,". Ati sup



A unau dangte pawhin ka biang a rawn fawp sap sap chuan birthday wish min hkan sap sap bawk a, hetiang reng reng hian nun hi a famkim thei dâwn em ni..? Mahse, ka fam hian a famkim miau si a


Kan fate ho Nathan-a nen ṭhu chunga thlirin ka lama rawn tawlh hnai hrut hrut chuan, "Malsawmna kan dawn te," Ka ti sap a, ka kut a rawn dawm vang vanga, a lam a ka hawi chu ka hmui ah rawn fawp vawng vawngin, "happy birthday MY TREASURE," Rilruih maia a tih sup chuan fawp let zauh pahin, "ka lawm e," Ka ti let sap bawk a



"Naaaaa...an in fawp leh ta," Alice-in uar fe a a rawn tih chuan kan nui dur dur hlawm a....


Heihi a ni ka chhungkua, kan pahnih a kan din chu, nu leh pa, chhungkua ni tur hian thisen a inzawm khet a ngailo a, thinlung a in hmangaih leh inzawmna hi a pawimawh zawk a ni, kei leh Nathan-a, triplets te nen a kan inzawmna hian a sawifiah in ka hria....!



* THE END *








Note : My TREASURE chu alo tawp leh ta reng, khang hun chhunga min hrethiam tak leh zaidawh taka min nghaka, ka story chhiar tu te zawng zawng chungah thinlung takin lawmthu ka sawi a, min support na zawng zawng ah pawh ka lawm em em a ni❤️💚Christmas damtak leh chhungkaw hlim tlâng taka in hman ṭheuh theih nan duhsakna säng tak ka hlan vek a che u❤️❤️virus lakah lo him ula, inlo fimkhur in, inlo dam zel dawn nia😍😍😍


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)