ZAWLAIDI By Floria Laldansangi (Completed)

Moderator: Floria

Ngaia
Site Admin
Posts: 21333
Joined: April 30th, 2016, 4:07 pm

Re: ZAWLAIDI By Floria Laldansangi (Completed)

Unread post by Ngaia » December 19th, 2021, 1:04 pm

ZAWLAIDI

BY

Floria Laldansangi


Chapter < 31 >

RINTEI...POV



"Eng nge a an?" Ka nu te bul kan thlen rualin ka ti nghal sawk sawk.


"Zai turin an nawr lut a nih kha," Zela'n a lo ti sup a.



Ka Nu hlauthawng khur deuh dar dar bulah chuan ka ṭhu thla a. A kut chu ka chelh vang vang, a vawt thler mai nia maw le!


"Engthil nge maw thleng teh neih nuaih hi ka hre thiam lo a ni," a aw pawh chu a khur lek lek.


"Chetsual palh te a nei em?" Zela'n a rawn ti. Ka pasal erawh ipte zenin a ding kak ngur ringawt a.



"Neih pawh ka hre lo, kar liamta khan Chhungi te huanah a zu inhlawh in ka hria, ka tlu chu a tia, hliam erawh a neih ka hre law," ka nu chuan a ti leh sep sep.


Ka Pa te an man aṭangin Bank Account a pawisa zawng zawng lak theih lohin an siam a, an harsat zia ka hria. Mami tan pawh hnathawh tur awm awm thawh bak duhthlan tur a awm bawk si lo.


"Bawiha..." Doctor Ben-a a rawn lang.



"I nau inrawn luhpui tih ka lo hria a," a rawn ti zui zat.


Putara chu bu nghatin, "nia maw le. I nupui neih ka lawmpui lutuk che," a tih zawm sup a, ka sirah a rawn ṭhu thla zat.


"Inrawn kal lo a ka lawm viau lo a nia. Nunpari chu ngaihtuah lutuk suh u. Dr. Reubena hi a rintlak a nia," a ti leh.


Nui hmel hmuh luih ngial ka tum a, ka Nu rilru hah taksa chhung khur ru der der ka hriatna chuan minti nui lui thei lo.


"Ka thlah haw hmasa ang che," Putara chuan a rawn ti leh ṭhin, ka Nu leh Zela pawhin an lo ti ve bawk; Mahse, haw pawh ni ila engmah ka ti thei dâwn chuang lo a ka hnial lui ve tlat.


Ka Nu kut vawt tak chu ka la chelhbet reng bawk a!


Darkar 1 zenzawn kan nghah hnuah OP room kawngkhar a rawn i hawng ri rak. Ka hawi dawrh, ka chelhna ata ka Nu chu a tho vat a, "eng nge a an?" Aw zawi tak in a ti zui dar dar.


A hnungah Mami anrawn nawr chhuak a, chutiang bawkin naute anrawn nawr chhuah chu mitmu pawt chhuak lo chauhin ka en kawk.


"Naute kha...." Ka tho tur Putara'n min rawn pui a, naute ka pan hnai chu sawi tur pawh ka hre lo, thinphu dawt dawt chungin Doctor chu ka en a.



"Naute hi eng nge awmzia? An pahnih hian an ṭha em?" Ka Nu-in aw khur deuh dar dar hian a rawn ti chhuak leh.


"Ka nau hi a ṭha em?" A tawp a tawpah Putara'n a lo ti ve sup.


Kei erawhin naute pianghlim, chhip duk vek mai chu kut khur ru dar darin ka ban a, a Lu mai ni lo, a hmai phel lehlam thlenga duk ruih mai chu mak ti lutuk leh mangang ru zetin doctor bawk chu ka en leh ṭhin.



"A Nu hi chu a ṭha e; Mahse, naute erawh a Nu pumchhung aṭangin a awm tawh lo a ni," Doctor-in ngaihthlak nuam tur bera a sawi zawh rualin ka pasal chu ka nek nghal rawk rawk.


Mami, hnimhlum avanga muhil thaw sek sek chu thaw dep depin ka en leh, keimah mah heti khawpa min ṭhawng a nih chuan engtiangin nge a rawn awm ve ang le?

A pasal kum 7 chhung Jail tâng turin a thlah zo chiah a, tunah a nghahhlelh, a fa, a nuṭa leh midang zawng zawng hawisawn a, mahni zahawmna theihnghilh ṭhak khawpa a hmangaih, chhungkaw kim pek a tum chhan ngei mai a dam zo lo tih a hriat chuan a khawvel a va tawp vawng vawng dâwn tak êm!

.
.
.
.
"Bawihi....." Ka lo muhil sek a ni ngei ang, mit phak zetin ka meng chhuak a.


"Ka thlah haw dâwn che em ni?" Min ngaihtuahna aw ri ka hre tel.


Mami mutna lam chu melhin, "a la harh lo em ni? Dar engzah nge ni tawh?" Kan pa chu ka melh chho ralh.


Ka biang tawk zeuhin, "dar 7. A harh ṭep tawh ang," ti supin, "eintur ka zu lei ang a, i ei zawhah ka thlah haw dawn che nia," a ti leh, ei tur a sawi takah chuan ka ril a ṭam tih ka hre chhuak chiah.


Bu nghatin, "thil thak deuh ka ei chak," ngên pah deuh chuan ka ti sep a .


Ka hnar a tuk zauhin, "ei lo ang, i pum a nuam lo leh ang," a hmaa theihai ka lo ei thak lutuk avanga ka pum nuam lo sawi kha a theihnghilh duh lo reng reng.


"Pi, ei tur ka lei dâwn a sin, ei chak i nei em?" Ka Nu rawn lut ve chiah chu a lo zawt a.


"Nei hran lo a, ka ril erawh a ṭam viau mai."

A ṭam khawp ang, court kan chhuahsan sawi loh, Mami fapa anphum a, an buaipui vel na ringawt pawh chauhna tham a nia, tui ringawt pawh kham khawp a in ka ring lo hrim hrim.


"Ka zu lei ang e," ka chalah fawpin a pensawn nghal pawk pawk, damdawi In vawh vang nge ni, ka pasal pensawn rualin vawt ka ti nghal sung sung mai nia.


"A rawn harh hunah engtin nge maw kan hrilh dawn ni?" Ka Nu in Mami khawngaih tih hriat taka en chungin a rawn ti sep.


Ka bula blanket awm chu khawi a mi nge pawh ka hre lo, pawt hnaia ka ke khuh ṭha sauh sauh chuan, "Nu, Doctor khan engvanga chhiat nge a nih a sawi kha eng nge?" Ka nu chu ka en zui kar.


Naute hmel ringawt kha ka lo en a, minti hläu ve lek lek nen Doctor thusawi kha ka lo hre mumal.


"A nu hrisel loh vang a ti mai a. Ka rin danin Mami hian a hnathawhnaah insawh palh em ni aw ka ti deuh. Chhungi te huana a va inhlawh ṭum khan a tluk deuh thu a sawi a, a khûp a sawh a nih ka ring ber."


"Khúp sawh chu a ṭha lo em ni?"


"Naupai laia an khúp ansawh hian nau chhiat a awl bakah, an chhip hi a duk tlat zel alawm," a tih siam siam takah chuan Mami naute kha ka mitthla ah a rawn lang. A ni ngeiin ka ring hmiah bawk.


A chhip sawi loh a hmai veilam te kha a duk thla ruak tak tak alawm. Ka dul kawh ve tawh tak chu ka khawih zauh, "nangpawh kha fimkhur ang che, fa pakhatna si, i dul len dan em em kha tui i pai tam tih a hriat," a rawn ti zui.


Anti zel mai, rai dul pangai a ni lo'm ni ka ti mai a. Midang erawhin "a lian lutuk" mintih sak zel lehnghal!


"Mami... I harh em?" Ka nu te lam chu ka en vat.


"Ka naute...." A aw chu ka ṭhutna aṭangin ka hre ṭawk ṭawk.


"Doctor ka'n ko ang e," Tih leh ka nu thawh a tum chu a bânah a chelhbet a, "ka naute..." A hrawk a ro a ni ang, a aw chu a chhuak ṭawk ṭawk chauh.


"Mami, Doctor in entir hmasa rawh," tih leh thawh ka tum.

"Khawnge ka naute...." A rak ṭhawt, thil awmzia a hre nghal tih a mit aṭanga mittui rawn hnai kuarah chuan a lang chiang em em. A

inzai na a nâ a ni ngei ang a ṭhen nghal tlawk tlawk bawk a.


Ka ṭhutna aṭangin nurse chu ka au tuar tuar a, "a pum saaw a nâ a ti niin ka hria," Doctor leh nurse rawn tlân luh rualin ka ti nghal sawk sawk.



"Ka naute... Ka naute awmna min hrilh rawh u," ṭap chungin a riat nawk nawk.

Nurse pahnihin, a bân ve veah an chelh beta, an hneh lo lam deuh chu a ni, a chak mah mah.


A in zaina te saw nâ ti âwm pawhin a awm tawh lo. Nge ni a, a naute vangin a theihnghilh hmiah zawk?


Mi â ang maia Mami au tuar tuar chu tihber tur hre lo leh tih theih nei lo inti zetin, ka bula folding table nghet taka chelhin ka lo ding khawng ve ngawr ngawr ringawt a.

"Putar...." Ka pasal rawn lut chu mitmeng chiai lutuk a en in, "eng emaw ti teh," ka lo ti nghal ṭuau bawk.


A thil lei ho dawhkan a dah rawk rawkin a nau lam chu a pan vut a.


"Mami, min en rawh, min en rawh, " a dar tawn tawna chelhin a nau chu a thing deuh nawk.



"Min en rawh..." A nau lu thing leh awmze nei lova rak tuar tuar chu hnai lutukah a en a, "tunah hian nangmah chawpin ka vui lo chauh che tih i hria em?" A ti hrawih. A ring lo nâ-in a khauhin mar ṭha tak a ni. A aw ah chuan a farnu fa a chan chu a na ve a ni tih ka hre thei bawk!


Mittui tla pur leh mitmeng â vek chuan a U chu dak vah hain a en a, "U.... Ka naute, ka naute khawnge a awm?" A mittui a bekah a luang ngiai ngiai.


Nurse-in a banah damdawi a lo chiu lut ve vat, nurse dang pakhatpeh doctor pawh anthaw chhuak zui ham ham.


"U!!!!" A U chu ṭap chungin a ngên leh ngawih ngawih, ka mittui a lo hnâm ve ṭiam ṭiam!


En hreawm ka ti, ka dul chu ka khawih lo thei lo, ka nau pai hi ka la hring ve lo nâ chu, Nu ni mai tur ka nihna angin thinlung zawng zawngin ka pawh pha, chu chuan hlauhna leh natna in min tuam ve hlup hlup.



"Engtin nge maw kan tih dâwn le? Pathian khian engtia rei nge maw hrem min tum ni?" Ka Nu-in ṭap ṭuau chungin a rawn ti chhuak dar dar.


Ka biang rawn lum thla pup chu ka hru zui tawk. Ka nu (Putara Nu) thusawi ka hre chhuak zui zawk, "Pathian khian amah ṭihtu te chu he lei kan damlai ngei ngei pawha malsawm a sawm ṭhin chuan, amah hawisan tu, hre reng chunga tisual tu te pawh engvangin nge a hrem loh tehlul ang ni," tiin a sawi a nih kha. Heng mualpho na leh chânna te hi kan chhungkaw cho chhuah leh zawh chhuah a ni a, hetiang hian min hrem tihna em ni tih rilru ah a lang rum rum mai.


Ka hmaa ka pasalin tihngaihna hre lo tih hriat tak mai, a farnu natna ṭawmpui a, hmu vektu, tih theih nei lo tih inhre tak si a a kuah ngawih ngawih chu mittui tla ṭeu leh hrawkna kham ut ut chuan ka en ngawih ngawih.



U Puia rilru tur ka dâwn a, hreawm atih dan tur ka ngaihtuah leh, ka Nu mittui nena ding a inthiam lo hmel te chuan minti na ve vawng vawng thei!



"U engtin nge ka awm tak ang? Engtin nge ka nun ang, ka nunna chauh ni lo, U Ruata, mi zawng zawng ka hnungchhawn chhan kha a awm tawh si lova, engtin nge ka dam ang?" Chutiang taka Mami lungchhe hmel leh na hmel chu ka la hmu ngai lo.


Vawitam a U thinlung dehnan a mittui a ti tla ṭhin tih ka hria; Mahse, tun ṭum erawh a mittui hman emaw a natna hman ṭangkai a tum lova, a bo in, a tawp a thleng takzet zet a ni tih ka hmu thei!


"Ka tihnat chhan che khan min kalsan leh si a, engtin nge ka hmachhawn ang che?" A U kuahna aṭang chuan a ṭap zawih zawih. Ka mittui a lo tla ve pur bawk.

"Mc, an zaina a la dam si lo, mut tir rawh khai, thisen chhuak te kha nurse khan tifai rawh se," ka Nu in aw lai ruta a tih takah chuan Putara chu a inla hrang a.


Ngawi renga ka lam a rawn hawi chu, mittui kar aṭangin ka pasal mit sen râm leh hnawm chap chu ka lo en ve kiau bawk!


Ṭawngkam khat pawhin a nau kha a hnem miah lo; Mahse, a kuah a, nghet taka kuahin, a na neih te chu a farnu aia tawrh tumin, a taksaah sawn a tum emaw tih mai turin a kuahbet thung!


Ka bula a rawn ṭhu thla chu, mittui nen ka lo nuih sen sen, ka ṭhut hnaih nghal sat sat bawk. A tán pawh hian thawk ngaihna hi a vang tih ka hria a ni. Hmeichhia ang a ngaihtuahna te, rilru hahna te sawi a, tilang chi a ni lo mai pawh a!


"A hmel a ṭha em? A rit em?" A hliam a tihfai hnu chuan a rawn ti leh sep. A mittui erawh a hul hleithei meuh lo.


"Ṭha e, naute pianghlim ka hmuh tawhah chuan a la hmelṭha ber ang," ka Nu in a lo ti vat, a nui var var bawk a.


Men puau puau in, "engtin nge ka hringnun ka hman ve tak ang le?" Ti vawng vawng chuan a âwm chu a ṭham ngawt ngawt a, a mit a chhing zui tlat bawk.


"Kan nufa in kan awm ang a, bul kan ṭan ṭha dawn alawm. Nang emaw kei ngei pawh bul ṭan mamawh tak kan ni ve ve si a," ka Nu in a lo ti sep sep.



"Tualthattu ang hialin min haw si a, i fapa thattu chu engtin nge bul i ṭan pui ang ni?" Ka Nu chu a melh.


Putara ṭawng tum ang taka a che hrut chu a bânah ka chelhbet vat.


Min rawn en, ka lo nuih seih a, "an mahni sawn inbiak tir rawh. In pawh taka awm tur chuan, Nufa ang a an inbiak a ngai alawm. An lawm lohna te, an rilru a awmte an inhriat tawn sak loh chuan engtin nge anchen dun zel ang ni?" Ka pasal mita en chung chuan ka ti sa sa.


A rawn ding kiai ve suk a, ka khabe a chelhin, a chawi kâng hret, ka hmuiah rawn fawp vawng vawngin, inla hranga fawp leh chawk chuan a nau te lam chu a hawi a, "hlimna a zawng a, 'chhungkua ah hlimna i hmuh loh chuan hmundang ah pawh zawng zawng mah la i hmu chuang lo ang; chhungkua a hlim chuan khawi hmun pawh hlimnaah a chang ṭhin' tih hi a hrethiam si lo," Putara'n a rawn ti sup sup.


Ka pasal thusawi chu dik ka ti lutuk mah mah.


Ni e, kei leh ka chhungte pawhin khawvelah hlimna, ropuina leh hausakna kan zawng a, pawnlamah kan chhungkaw buaina tlansanin kan zawng reng a, mah se tumahin hlimna emaw hausakna, ropuina diktak kan hmu miah lo. Chhungkua ah chungte chu kan hmuh hmasak miau loh vang a ni ngei e!



Ka pasal en chuan ka nui leh ta var var, a ṭawng tam lova, thusawi duah a, inla ril tak mi a ni hek lo; Mahse, a ṭawng chhuah a, a rilru a thu awm a sawi ve tawh erawhin, inhmuh chhuah rum rum natham tawifel tak hian a chhak chhuak ziah thung!
.
..
.
.
"Rinte, i Nu leh Mami chu Khatla ah tiraw an awm tâk kha? Mami lah a naute a chhiat ta daih si a, ka lainat khawp mai, i U lah a awm bawk si lo nen," Pu Chhuma'n a rawn ti dap dap.


"Nia maw le, ka Nu amah chauha awm ai pawhin a ṭha hrim hrim an inzui kha," ka ti ve vat.


Ka Nu in, 'Puia chhuah i nghak thei lova, pasal dang i duh a nih pawhin, ka hnen aṭangin i nei dâwn nia,' tiin a hruai lui ta kha a nia, kawng lehlam takah chuan a lawmawm viau mai.


Rin aiin Mami pawh a puitlingin, a awm awm a thawk a, ka Nu a zahthiamin, an inngeih phianin ka hria.



Naupang têa 'nuthlawi' an tih loh leh 'a pasal jail a tâng' anti ri hriat leh zeuh zeuh ṭhin erawh a nau chhiat vel nen ka khawngaih ru viau thung!


"Rinte, engtik maw i san chhuah dâwn a?" Nu Rengpuii'n a rawn ti.


An sûzi siam ei tuam tuam pah chuan, "Doctor sawidan kha chuan karhnih hnuah kha a tia," ka ti ve mai.

"Thla 10-na em ni kha'h?" A rawn ti leh, ka lo bu nghat.


"June thlatir a nia, hring maithei chu i nih ve tawh chu," Nu Rengpuii chu a nui zui vur vur.



U Ngaihi, Pu Chhuma te fanu u ber chy rawn nui awr awr pahin, "inpa khan naktukah damdawiin inluh tur thu a sawi tak kha," a rawn ti, a nuih danah kan Pa over a ti thei lutuk a nuih a za tih ka hria.



Nuih let ve vur vur chungin, "nia, a dâwna buai kha a hläu a," ka la nui ve reng.


Kanpa rawn lut ve chiah bawk nen ka kut ka lo beng fai thak thak, "ka Nu te anrawn thleng ṭep tawh ang, kan chhuk dâwn em ni?" A rawn ti sup sup. Ka lo bu nghat, ka Nu te a chah thla ṭalh chu läwm viau mah ila, khuaah Lo an enkawl ve nen, kan tibuai hma lutuk mah mahin ka hria.


Ka Nu -in, "Mualchin Pawi hi chu, damdup hian an luhlul ngalh mai a, anthû tê lo hi chuan engmah hi anti duh lo. 'Mai thu te te lo ziang' tih hi thu puiah annei a," a tih ang deuhin ka pasal Mualchina hi chu a tum tawh hi chu a rum ngar mai a, sawi sawi hian awmzia a nei lo reng reng.


"Awi!! LalMC i over e! Innu chauh hi khawvela hmeichhe rai thei a awm a ni lo," ka chapal bun tur ka hmaah rawn daha min bun tir chu U Ngaihi a rawn au hluai, a nui zui awr awr bawk a.

"Keini pawh kan rai a, fa 3 kan hring tawh, nang ang em emin kan pasal te an over lo. A hrim hrimin Zotlangval senior over laileng ansawi ang mai a, innu rawn lêng chho hlek i rawn koh zung zung zêl a," a ti leh hlak hlak. Ka lo nui vur vur.


Mami'in nau a chhiat aṭang phei kha chuan a fimkhur leh lutuk te hi zanah mahni a toilet kal pawh zuhan phal lo a maw le. A hlauhthawnna chu hriatthiam pui tho mah ila, a hahthlak lam deuh ṭhin chu a ni.


Kanpa lah chuan a ngaihsak lo a rum nghut a, "inpa te nen kan danglam alawm," a ti zawi sup chu ka nui chhuak hak. Ka nuihza chu a läwm vak lo nge a hnar a tum dat a.

"Ka pawm haw nghal lohah che," ti zuiin ka hnar a rawn tuk zauh, a nui zui ve ta suk suk tho.


"In insawn chhuak ṭep tawh si a, kan khua a van har dâwn ve aw!" Pu Chhuma'n a rawn ti nui vur vur.


"Rintei pasal hi zawng, ram zau lutuk a lei a, sangha dil lianpui leh Grape huan nen, Concrete In chhawng dinglai anlei leh nghal bawk a, hausak bak hmabak innei tawh lo. Taima leh Pathian ṭih na nâ nâ hi chu kan thlarau kalna tur chuah ni lo, leiah pawh hian hmuh theihin mal a sawm a nih hi," Nu Rengpuii'n a rawn ti zui dap dap.


Ka bula ding ka pasal chu melh chho ralhin, chhuang lutuk hian ka nuih var var bawk a, a thawhrim zia ka hria a, heng malsawmna te hi a phu em em bawk!


"Anu..." Gabrielle-i a rawn tlân lut.


"Kan rawn haw dâwn a sin..." Ka bula rawn ding chu a sam hnawk lutuk ka lo tuai mam vat.


"Au in pangoar a ru leh a," a ti zui zet zet.


Mathew-a rawn lut chu kan lo en ṭhap, lai zet hian a rawn lut a, "kha..." Ka hmaah a tihdan ṭhin angtê bawkin pangpar vuai zet hi a rawn lek chhuak leh.



Putara'n a fate bulah "Nu" tih tur atih khan Gabrielle-i hi chuan min ko zui mai a, Mathew-a erawh a ngeng ngalh mai.


"U Rinrin" pawh a ti chuang law.

Min mawl biak hmiah hmiah a, kei pawhin chuti tho, "hey" kan inti tawn hi Putara hi a lo ngur leh chher chher ṭhin; Mahse, a fapa hian hun a mamawh tih ka sawi fo avangin a hau lem lo.


Mathew-a pawhin min Nu lo mah se a hma ang erawhin sual a chhuah tawh lem lo. A bik takin, mamawh engpawh neise emaw, school ah buaina te nei sela a pa dil a, hrilh hmasa lova mawlmang taka min dil leh hrilh hmasa ṭhin erawh ka lawm tawk ta viau thung!


Tin, khawia pangpar hi nge maw tunlai chu a rawn hawn ṭhin a, min mawl pek tawp tawp ni tih laiin, a lo ru lek a ni maw?


"Thew-a, 'Nu' ti ten ko ve tawh mai la, a rei tawh e. Kha tunlai chu pangpar i rawn hawn ziah lehnghal a," U Ngaihi'n a lo fiam.


Min rawn melh chho ralh, "ka hawn lo, ka nau alawm ka hawn," a ti ve nghat. Ka lo nui var var thung.


"I hawn reng kha, pangpar neitu pawhin a hau che a, 'anu leh ka nau tan' itih kha. Dawtsawi suh aw Au," Gabrielle-in a lo ti zat zat chu a lai nge maw ni a hmai leh a beng a sen nghal tan tan.



"Kha...." Tih leh ka dulah a rawn nawr bet a, "Anu...." Ti zuiin a tlân chhuak nal nal chu midang an nui zui dar dar, kei erawh ka nui thei mai lo.


Ka pasal lam chu ka hawi â heu a, mit ka kap fak fak, tunah khan Nu minti tak tak nia maw le!


"Nu minti," ât hmel lutukin ka ti chhuak, Putara pawh nui reng chungin ka bekah rawn fawpin, "i phu alawm," a ti zui sup.


Ka ṭah nuih ta hak hak, ka mittui te rawn tlak a tum chu a!


"Nu' atana a pawmna che hi chu a rei tawh alawm. Hmanni an unau inhnial pawh, Gabrielle-i zawkin 'apa bulah ka sawi dawn che a tia' a U in, 'apa aiin anu a thufe zawk' a ti ve nasa, a zak mai mai," Nu Rengpuii'n a rawn ti ve var var bawk.


Anchhungkuaa min lawmpui na nui hmel leh mitmeng chu ka hmuh hmaih lo nasa lutuk mah mah. Chutiang bawkin ka pasal mita min chhuanna chu hmuh hmiah har tak a ni bawk!



Ka hlim lutuk chu ka mittui a rawn hnâm zui ṭiam ṭiam, engtik niah emaw min ko dâwn a ni tih ka hria, ka hre lutuk; Mahse, hetiang tak hian ka hlim ang tih leh, hlimna avangin mittui hial a keng tel ang tih ngaihna ka hre lo hrim hrim. Ka hre lo takzet a ni !!!


Tuna ka hlimna hian van a tawng loh chuan a teuh viau ta ve ang. Damtak leh hrisel taka nau ka hrin hun phei chuan "Pathian malsawmna chhiarsen loh" ka nu in a tih ṭhin kha a va ni lehzual dâwn êm!!!!!


<>~>~>~>

{ a taw deuh tup chuan inchhiar hmasak nalam mood a off vek ka hläu si a, a la tawp hleithei lo 🤣🤣}



Link:
BBcode:
HTML:
Hide post links
Show post links

Ngaia
Site Admin
Posts: 21333
Joined: April 30th, 2016, 4:07 pm

Unread post by Ngaia » December 19th, 2021, 1:05 pm

ZAWLAIDI

BY

Floria Laldansangi


Chapter < 32 >

MC-A....POV


"I nuam lo em ni?" Ka nupui inlet duh, inlet thei si lo, che leh ṭhin chu en in ka ṭhu chhuak a, khum sira light chu On in a sam chu ka ṭawn ṭhat sak te te.


"Ka hre lo," a ti sep.


Nuih sukin, a dul lian tak, hring lek lek tawh chu chul sakin, "i nuam deuh em?"


Thaw a la leh ham ham ṭhin, "min tung tho teh," min rawn ban.


Ka ṭhut tir a, thaw ham hamin, "din ka duh," a ti leh.

Khum aṭanga chhukin a slipper chu a bun theih tura dahin, ka chelh zui a.

"Ka hrin a la hnaisi lo va, zanin chu engtia nuam lo reng maw ka nih le?" Ding kak tau chuan a ti zui halh.


Nuih sukin, "kan vak chhuak chhin dâwn em niang?" Ka ti sup. A rai ai hian ai thei ila ka ti ngawih ngawih, zanin bik tak phei chu, zantir aṭang tawhin a thaw hleithei meuh lo.


"In mu thei nange," room aṭanga kan inkai chhuak chu ka Nu in Bible a lo la chhiar.


"A nih hi, inrawn thlen hma deuh aṭang tawh khan a nuam lo deuh a."


"Nang nihi invei dâwn te ani lo'ng maw?" Ka nupui chu ka en vat.



"A ni dâwn em ni?" A lo ti sep.


"Naktuk damdawiin kan lut tawh dâwn tho tho a, zanin a vei thu awm lo ang," a ti leh sep sep.


"Zaninah kan lut mai dâwn em ni?" Ka lo ti sup.


"Han nghak deuh ula, dar 10 hnuah pawh i la zia loh chuan damdawiin kan kal dâwn nia, i be sa vek tawh a ni lo'm ni?" Ka Nu chuan a rawn ti leh a. Ka lo bu nghut, zanin lama luh rum rum mai pawh pawi ka ti ta dêr lo!



"Lalhriatkima pawh chu thlen zan zanah a bialnu a va rim em ni? Kan khua angin nula an rim ṭut ṭut tawh si lova, hepa hi chu a ṭhing thei a nia," ka Nu in a ti zui hlak hlak, kan nu a lo nui sun sun a.


"A nâ em ni?" Ka bân a hmer ta ngat ngat, thaw la kawkin, "ka vei... Ke vei dâwnin ka hria..." A ti zo hman meuh lo, a kap aṭangin tui a rawn baw ta hawk.



"Ka rei! A va rang teh thut ve? A tuibawm a keh a nih kha," ka Nu in a rawn ti deuh tuar tuar, ka pian a hnu lamah ka chiai ka la hre hauh lo, eng pawh tawk ila, ka chiai ka ring ngai lo hrim hrim ; Mahse, ka Nupuiin nau anvei meuh chuan ka Nu che vel chu ka nupui dawm chungin ka en kual vel a ni ber.


"LALDUHAWM...." Siakmawii'n min vin hrawk.


"Pawm la motor la chhuak ta che maw. A na ti ṭawng pawh a ṭawng theih loh kha," kan room aṭanga rawn tlân chhuakin ka Nu in min hau zui hlawk hlawk.


Ka hrah chhuak, ka nupui na tuar hmuipet fan fan chu ka pawm nawlh a, kawngkhar lam ka panpui pawk pawk.


"Khawnge.... Nau a vei elaw?" Hriata chu a inher leh vut, motor(sumo)kawngkhar chu hawngin, driver seat ah a ṭhu lut zui a.


"Bawihi...." A thaw leh kawk kawk ṭhin, a na a ti mah mah tih hriat takin ka bân chu a hmer ngawt ngawt bawk.


"Khawnge ka Nu pawh chu...." Ka ti hluk, Siakmawii chuan engmah a sawi tawh lo hrim hrim, a hmuipet betin, min vawn lohna lam a kut chuan seat hmalam chu a chelh ngat ngat bawk a.

"Veni te kan chanchin ka han hrilh alawm maw le. Naupang lo en turin ka ti," tih leh, "san pe miah suh aw Rinte," a rawnti zui zat.



Kan In leh Durtlang Synod Hospital inkar a hlat ber ṭum leh rei ka tih bwr ṭum a ni hial ang. Ka nupui na tuar inseh ruh, thlanfim tla bawrh bawrh mai, thaw leh halh ṭhin, duh ang pawha thawk lak ngam loh chang nei khawpa a na tuar hmel hmuh chuan, "ka lo ti palh palh," tih ruk vawng vawng natham a tling hialin ka hria!


"Hei ai hian a tlân chak theih loh em ni?" Hriata chu ka vin leh hluk ṭhin.


"Ka thleng zo dâwn lo in ka hria...." A rawn tih chhuah phei chuan patling thin hi a vahan tawi theih rêng ve maw le!


Damdawiin kawta motor a din rualin, ka zuang chhuak vut a, ka Nupui chu ka pawm chhuak nawlh, "Doctor kan mamawh, tunah..." Damdawiin kawt aṭang chuan ti zui!


Doctor leh nurse-in min lo pui vat a, "nau veina room-ah...." Doctor-in a tih leh chak takin an nawr zui a!

Nau veina room-a zui luh ve mai ka tum chu, "a mamawh che a nih leh kan rawn ko ang che," tiin kawngkhar min khar khum zui chu!!!! Na zetin ka chum zui dawt.


Ka nupui natuar rum pawh rum chhuak thei lo, ha pui sehbet ngawr ngawr, thaw pawh la ṭha ngam lo khawpa a awm laia pawna lo ding tur a minti chu ka thin a thawk vut a, ka pup pup mai.



Nurse pakhat rawn chhuak chu, "luh ka duh," ka lo tih khum hluk.


"Hetah nghak mai mai rawh, tih theih i nei chuang lo. Pathian zarah dam takin a nei em em ang," ka Nu in a rawn ti siam siam.


Chiai sawi loh hlauh ve eihna pawh annei lo chuan ka thin a ti rim zual, "Lalhriatkim, tunge tun hunah i biak?" Ka Nu damdup mai ti ngam si lo chuan ka nau phone hmang chu ka vin hluk hluk a!


Hriata lah rawn nui vur vurin, "Mami te ka hrilh ve maw le. Sakeibaknei hâhum i va ang chher chher ve." A nui zui huk huk chu hnek sawk mai a nia ka nap ni!


Ka Nu lah chu ti th, min nuih ang ṭhu hlawm a!!!


"Ṭhu mai mai teh, lu iti hai," ka Nu in a rawn ti leh hlak, ka melh zawk, ka vai kul ngai bawkin ka vai kual leh chhen bawk a.


Hetiang em em hian patling hi a lo zâmin, rilru a hahin, a chiai theih ang tih ka hre ngai hauh lova, a awm pawh ka ring pha lo hrim hrim zawk.


Mahse, tuna ka awmdan hi chu Pathian hmaa ding tur ang maiin ka zâmin, ka rilru a hah alawm maw le!

<>~>~>~>

RINTEI....POV



Zankhua deuh thawa ka vei hnuah pawh ka nau chu chhuah reng reng a tum lo, keimah lah ka chau tawh nasa mai si a.


"A rei tawh lutuk, zai mai rawh u," ka pasal aw thum leh thinrim aw in a ti chher chher chu ka hre ruai ruai.



"Damdawi in danga hruai hi pawi ka ti hauh lo a nia, ka Nupui san inpek tir chhungin a chau chhe mai dâwn," a ti leh khur khur.


Ka dang ro lutuk chu, ka kâ chhung a chil zawng zawng chu ka lem ban chap a.


"Inpa sawn awm ngaihna a hre lo a ni ber. Hlauthawng suh, zankhua khuaa nau vei hi an awm chawk a nia," Nurse senior ve lampang tawh chuan nui chungin a rawn ti. Kei erawhin min zai maise pawi tihna ka nei tawh lo hrim hrim. A na lutuk a "ka peih tawh lo" tia tlânbo daih mai te ka nâp ta rum rum mai!


Putara a rawn lut, ka lam rawn pan pawk pawk chu thlan nen, mittui nen a hmel chang ṭha tak mai chu ka hmu phe ruai ruai.



"Bawihi...." Ka kut thlan dap mai chu nghet takin a rawn chelh zui zat a, a aw chu rin aiin a dam leh viau tho mai!

Ka sam, ka hmai zartu chu hui kiangin, "i bulah ka awm tawh e," a aw chu a khur lek lek nia maw le!


Ka pasal hi vawikhatmah a chiai ka la hmu ngai lo. Accident kan tawh ṭum kha thil hlauhawm, nunna hial chân thei dinhmun a kan dinlai leh, khati khawpa naute chân hlau si kha vawikhat sawi loh 1sec lek pawh a chiai mitmeng kha ka hmu lo hrim hrim.


Ngaihtuahna fimtak leh damdup a che ṭhin kha, nau ka'n vei chiah chu, amah a ni ta lo emaw tih mai turin a hawi â in, tih mai tur hre lo in a awm hial a, a thin a butut em em bawk. A vawikhatna tak tak a ni ka pasal mize inthlak ka hmuh hi!


"Vawikhat dang leh aw, muhil lo la," Nurse in a rawn tih leh chuan ka pasal kut chelhin, ka tha neih zawng zawng sàwm khawm tak meuh meuh chuan ka'n sang ṭha leh a, nau nei tur pum nâ, ka'n vei tak tak leh san ka han pe tak tak chu, "ka sim" tih mawlh mawlh natham a tling chiang khawp mai!


“A lu a rawn lang e,” Doctor in a tih chuan ka thah ka thlah ṭhelh, "i tuar chhuak ṭep e ka hmangaih..." Tia ka pasalin ka kut fawp vang vanga, ka thlan luang huh dup mai min hrukfai sak chuan, a tawp thlenga beih duhna min neih tir ni maiin ka hria, san ka'n pe zui leh ngar ngar bawk a.

Ka na lutuk chu sawi thiam dan berin ka taksa ruh inzawmna hi a thlawng zo in, a bal hlawk hlawk ni berin ka hria. Kâ hian a natzia a sawifiah zo lo a ni ber.



"A chhuak e, a chhuak e....." Doctor thusawi chu ka hre ṭawk ṭawk, ka taksa na lutukin ka beng thleng chuan a ti ngawng vek thei!


Ka taksa aṭanga naute chhuak chu chiang lutuk hian ka hria, ka thaw kawk a, ka tha chawpchilhin a ṭhum nghal vek, ka thaw kawk kawk, ka lungphu a invuak rawn dup dup bawk a!


"I ti thei e.. Bawihi, i tuar chhuak e," ka pasal aw a lawmna leh min chhuanna aw chu chiang takin ka hre thei.


"I ti ṭha lutuk, ka chhuang lutuk che..." Ka hmuiah a rawn fawp zui vang vang.



Thaw ham ham leh chau mitmeng chhing diar diarin ka lo nuih sen sen, a hlim zia leh lawmzia, min chhuan zia mitmeng de sawr sawr chu, ka taksa chau meng ṭawk ṭawk kar aṭang pawhin chiang takin ka hmu thei.


"Hmeichhia a nih hi," Nurse-in kan naute thar chu a rawn pawm hnai a, "naute hmelṭha tak a ni," a rawn nui var var.



Ka pasalin min vawnna thlahin kan fanu chu pawmin, mi â ang mai chuan a nui chhuak huk huk a, min rawn en, a nui leh huk huk ṭhin.



Ka hmusual nge ka hre lo, ka pasal mit chu a hnawm ve chapa ka hriat bakah, a hlimna chu thup a tum lo tih hriat taka nui hawk hawkin ka bekah a rawn fawp leh vang vang a, "ka hmangaih che, ka hmangaih che u," a aw te chu zawi tak siin hlimna a khatin, a thâm ve ṭiak bawk!



Ka pasal hlim aw leh nui ri ringawt pawhin ka mittui a ko chhuak hial mai, nichin maia ka na tawrh, zankhua maia "ka sim lutuk" tih ringawt rilru a awm ngar ngar mai kha chu thli chhem bo ang vang vang a ni! Fa tamtak hrinsak minti chak leh ta daih zawk nia maw le!

.
.
.
.

"Khawimaw kan naute thar chu ka'n lo pawm ve tawh ang e," Hriata a rawn lut.

Ka Nu te pahnihin an lo inpawm chhawk bawk a, a la sen si, an pawm kawi reng mai a, Nurse ho pawhin pawm reng kha an phal lo emaw tih laiin, a tumah lah chuan thusawi an ngaithla lo. Putara thleng thleng hian an ban reng mai!!


"Nâ ila nei em?" Ni 2 lai a ni ve tawh, ka pasal ngaih hi ala ṭha thei lo reng reng, nâ la tuar viau turah hian min ngai a, zanah lah a muhil thei meuh lo emaw ni, a ven tak tê-in min veng bawk.



"Ka ṭha tawh ka tih kha, nau hrin te chuan natuar te chu a dan alawm," ka nui var var. A hnar a tum dat a, "siam rih loh dan tur ngaihtuah a ngai a ni," a nui chhuak huk. Ka nui zui ve awr awr.



"Nangmah kha insum la ti nia," nui chunga ka tih chuan ka hnar a tuk zauhin, "teuh lo lutuk," a ti leh ang lawi bawk si!



"Aw! I rawn nula ang a, khawi emaw kawng sirah tu fapa emaw chuan, a la eng lo a la eng lo ve dâwn che sia," Hriata'n kan fanu Vanlalruati, U Ruata hming angchiah ka pasalin phuah a rawt, ka Nu te pahnihin lungawi taka an pawm tlan chu a chhaih a.



"LALHRIATKIM...."


Awi!!! ka phu nasa ropui lutuk! Ka thlarau a thlawk chhuak lo chauh alawm le!


Ka nu te pawh an phu zuk tih hriat takin kan lam anrawn hawi dawrh. Putara'n a a nau Hriata lam hawia thinrim thaw ri chhur chhur chunga a en chu ka nui chhuak ta hak.


Ka Nu te pahnih pawh rawn nui chhuak hawk hawkin, "awi Rinte, inpa thikthu chhe tur lutuk hi Ruatruati tan hian a la hreawm dâwn êm mai," ka Nu (Putara Nu) in a rawn ti.


"Ka fiamthu a nih kha," Hriata chuan a ti nui vur vur.

"Naute a nih kha..." Bul zet hian a ti leh hluk, a fanu a Patea'n a chhaihdan a duh loh zia chu pui tak a ni, a hmel chu ṭo ruah haw tur ang mai alawm a nih le!


Keipawh ka la nui rêng nâ chu U Ruata ka hre chhuak lo thei lo, ani pawhin Hriata ang deuh hian naupang lawm kha a ching a. Awm ve sela, ka fanu a läwm lai te hi kanpa hian hre ve sela ka duh tehlul nen, ka U ka ngaih leh ka mamawhna hi a la nasa dâwn chauh tih ka hre chiang tulh tulh bawk si!


"Rawn lian se Matei rawn chhun lo sela a dik vek a ni mai," ka Nu zawkin a rawn ti. Ka lo ner nawng nawng.


"Mc-a pawh eng a ni law. Ngawi ngal, luhlul lutuk mai a nia, Mualchin pawi sual thisen a ni bawk nen a rawn luhlul chho ngar ngar mai ang," ka Nu chu a nui zui hak hak.

"Pawi ti kher zel suh u," Putara'n a lo ti leh hluk, a fanu "pawi, pawi, pawi" anti chu a lawm vak lo a ni ang.


"Khiangte thisen a kai alawm le, rawn kawlh ve hlar mai rawh se," ka Nu zawk pawh chu aw!!! Naute mizia tur an sawi vak vak a, ka pasal ang a zaidam, keimah ang a hmasial nise ka duh ber!


Kanpa hi chu duh aiin a chut tlat, mahni hmasial nachang a hre lova, midang tana a nun zatve tawp ang a hmang te hi ka tha a natpui, ka fanu hi chu thianghlim takin a hma rawn sial viau rawh se.


"Kan lo lut...." Medal-a leh Ben-a anrawn inzui lut, an hnungah U Veni leh naupang anrawn lut ve bawk a.



"Naute ka pawm duh, naute ka pawm duh," a hmeichhia ber Gabrielle-i rak ring leh ta ber e!


"Rak vak vak suh, iti hläu ang," an lo khap vat.


Mathew-a ka lamah a rawn pan, kun ngar hian a kutah sappui par vuai tawh lam chu a hum ran bawk a.


"Pe ta che, i dil ve ngat a nih kha," U Veni'n nui chungin a lo ti.


Ka khum bulah a rawn ding a, min rawn en zawk, a kûn leh, "kha...." Ka hmaah a rawn lek.


La ta mai lovin, "tunge i biak Theo?" Ka ti kher chu min rawn melh ram ram. Ka lo nui duh miah lo va.

"Nangmah..." A ngawi dat, "anu...." Zawi tak hian a tih zawm leh, nui ta var var chuan pangpar chu la in, "tu tihdan nge i zir a pangpar minpek fo ni?"


"Kan Miss in 'hmeichhia chuan pangpar an duh' a tia," a rawn ti. Ka pasal lo khi ve suk suk chu melh ralhin, "i fapa lak aṭang hian i zir angai a nih hi," ka ti chu a hnar a lo tum dat.


"Ni ngawt mai, eng nge i an a Rinte," U Medal-an a rawn ti zui.



"Ka ṭha lutuk tawh, chhuah mai ka duh tawh zawk a. Sum a hek mai mai, heta awm reng pawh," ka lo ti vat. Engtiklai aṭang khan nge ti em em a ka inthlak tak ni?


Engkim ah thilman chhut neuh neuh te hi ka ching ta lutuk a, sum hlut zia ka hre tulh tulh ni maiin ka hria. Ka nulat laia thil man ngaihtuah ngai lo, duh zawng chu engzah pawh nise la tawp zel kha, tunah chuan dah let sawk sawk chang ka ngah ta lutuk te hi a mak zawk. Zohminga'n min hmu ve se chuan, "khawvel a letling zawngin a vir ta em ni?" Mintih khum hialin ka ring.


"Inpa a hausa alawm le. Ram a lei aiin In te lei hmasa se ka lo ti rilru a, thla 2 velah In lian lutuk mai anlei lehnghal a nia. Lalhausaa hi a ni ringawt. Kum tawp lamah phei chuan Car nalh lutukin min tlân pelh vuk vuk a nia ka rinni," U Medal-an nui huah huahin a rawn fiam.



"Loan kan rul pah alawm," kanPa ka lo chhan vat.



"Nangpawh hi in Pa hi inei rei tulh tulh ang a, inren lutukin naupang ho te hi ril ṭamin indah ang e," Ben-an a rawn tive zat. KanPa hi chu hemi te pahnih hian anih hi lo ngam ber a. An rauh na thei ang reng bawk si. KanPa lah za vak lo hian a lo khi suk suk ringawt a!

.
.
.
.

Dam chuan ni a liamin thla a liam leh ta duak duak mai, Christmas hmang turin Zokhawthar lamah chhoh kan tum a, naupang ho lah chu an phur narawh, "ṭiau luiah inbual ka chak, Rih ah ka kal dawn," anti ṭan sek ta mai.


Kan naute Vanlalruati, a pa in a atchilh em em pawh Pathian zarah thla 6-na a hmang ve mêk bawk a, a Pa hian a at hian a atchilh a, an inpawm in an in awi durh durh reng mai a ni.

Kawng leh lam takah chuan ka awl phian a, All India-ah naupawm awl ber ka ni hial ang!


"Anu, enga tinge Nuhrawn leh Nu a in an loh?" Gabrielle-i zawhna avangin chawhmeh chan pahin an lam ka en deuh haw.


Mathew-a nen min en kar a, "a danglam hleinem, Nu ve ve alawm," ka ti sep. Eng nge maw an hriat ni?


"Mahse, ka ṭhiannu in a dang a tia," a ti niah niah chu, "kawm tawh suh," a U in a lo ti zui vat.



Ka nui chhuak hak a, "a tih leh chuan 'a in ang, nu ve ve an nia, a spelling pawh a in ang thlap, N...U..NU' iti tawh dâwn nia," ka tih chuan lungawi hmel zetin a bu ta nghat nghat a.



"I ṭhiannu chu a ṭha lo a nih chu, tiraw Nu?" Min rawn en, Mathew-a nuih var varin, "anla naupang êm alawm Theo, i nau a harh em va en teh u," room lam ka melh zui.


Gabrielle-i a U thawh hma in a tlan zui vat a, "inchungah ka saihmul ka han hrual zo teh ang," Mathew-a pawh a tho nal nal. Inchung zawlah hian a Pa ho in saihlum an hrual a, anpho dul zel mai a, eng atan ti ni maw? Zokhawtharah ken chhoh antum lehnghal a, a rih rih nen.



Ka sira phone chu on in YouTube ah ka lut, kanpa hian CFL-a hi a ngaisang khawp mai a, a hla hi a ngaithla reng zel, ka ngaina ta riau mai kei pawhin.


Nulat laia hla ti hut hut lâm pui a, che hawt hawt ṭhin kha, pasal neih a, fa neih meuh chuan lâm chu sawi loh hla chham zawt zawt te pawhin beng a ti kham ta tlat mai a, mihring hi mize letling thawk hian a lo inthlak theih a ni tih hi ka chiang ta lutuk tlat.


"Ngaihlai vulmawite,
Min dâwn ve che maw?
Lenna tlâng a dang;
Tawn loh ni a rei ta,
Mahse, keichuan e, ka bâng lo nang ngaih.
A zualzel ṭhin e,
Ka suihlunglen hi," tia CFL-a hla chawhmeh sil paha ka zai pui hlarh hlarh laiin ka hnunglam aṭangin ka pasalin ka kawngah a rawn kuah a, ka dar lang lai chu fawpin, ka nghawngah fawp zui dan danin, a hmui lum thar thar chuan a nul zui thuak tuak a, ka lo thaw chhuak hak.


Hun lo thei a nia aw! Ka pasal min tawh velna hi engtikah tak ngaiah nei ang i maw?


Ka taksa danglam vat chu a hria tih hriat takin a nui ri suk a, ka lo nui ve ta nui sen sen, a inbualfai rim pa hrak mai leh shampoo, shower gel rim inchawih tawk lutuk chuan ka thluak a verh lehnghal zar bawk.


Music rik ruala min insawipui chuan ka nui chhuak hak a, "chawhmeh hi siam ka ngai a nia," nui var varin a lam hawiin ka inher a. A nghawngah ka kut huh hruk pawh ka hruk hul loh chu ka suih zawm zat.


Mawi lutuka ding kiai suk hian ka hmuiah a fawp zauh a, ka hla play chu sak puiin, music rem chuan min insawi phi dal dal bawk a.

"I sakhmel a'n maw, Zawlaidi cham e; Ṭang laiah min zêm, min fan kim ngei e. Ânka biak loh te'n, i cham lairilah, i sakhmel mawi hi, ka thlir ning thei lo (in lenna vangkhua ka tlir ning thei lo /original)" ka pasal zai chu, hmangaihna a khat liam leh nui var varin ka en chho a.


"In lenna vangkhua" tih aia, "sakhmel mawite," a tih zawh ruala ka kawng aṭanga min chawi nawlhin, "hmangaihna Zawlaidi i sakhmelah hian dar ang a zâm em," a ma thua hla thu thlak kual chuan min insawi puo zel a.


Nui chhuak ar ar chuan a kawngah ka bawpin ka kherhbet ve ṭau bawk a, ka darah a fawp leh vang vang, thaw chhuak ham hamin, ka hnarah a rawn fawp zauh, "nangnen chuan hringnun hi a hlu zual ṭhin ka hmangaih," Rilruih hian a rawn ti chhuak sup sup.




Thle hâ in ka pasal mitmeng, min hmangaihnaa khat chu hmangaih takin ka en let vawng vawng a, ani hian a sin ka hringnun, hlutna nei lo, chhungkaw awmzia pawh hre lo kha hlutna a neih tir a, chhungkua ka awh leh ka neih ngai loh tur, suangtuahna ramah pawh ka neih phak loh minpe tu a ni si a.


Ka pasal hmui pan lam lek lek, pan chhia ni si lo, ka taksa pum hian a fawhna, ngaia a neih theih miah loh khawpa zûn nei, Zawlaidi a keng tel tlat tih hriat taka a ngawl ka vei em em mai chu dimtê in ka fawp da da a, a duh khawp lo tih hriat tak hian thaw chhuak hawkin min fawp let nghal bawrh bawrh.



A towel ven chhan aṭanga ka mawng, a mipatna in a rawn do zui at chu chiang lutukin ka hre thei, chu chuan ka thâ a ti ṭhum leh ta vek mai, ka thaw zui halh. Putara lah ka awmdan danglam man chak lutukin, mitmeng awmze nei lutuk hian a rawn nui suk.


Min inherpui a, room lam pan a tum chu, thaw chhuak ham hamin "rawng ka la bawl zo lo a nia," nui seihin ka ti sep.


Mitmeng ti zîmsan leh phelh deuh phanga min en in, ka hmuiah a rawn fawp leh vang vang a, "kan ei tlai mai ang," zawi leh awmze nei zet hian a ti chhuak sup. Ka nui chhuak hak, "i fate an ril a ṭam dâwn," nui awr awr chuan ka ti leh.


"Pa ber ka puar hmasak a ngai alawm," tih leh room lama min panpui a rual, ka nui zui awr awr.



Khumah chuan min nghat dat a, ka lo tawlh ṭha sat sat.


Towel chauh veng, taksa inphiar ṭha tak mai, nisa em ngun tih takah, a vun eng uk, mar kharh mai chu melh de nghal sawr sawrin ka kut tereuh te chuan ka lo ban ve nghal ṭawng ṭawng a.


Lungphu dup dup leh ka pasal mitmeng hur lutuk a mwlh ralh ralh chungin, a âwm sek tak leh dul, thau chhia in a tihbuai ve ngai loh ngei mai chu ka zût thla riak riak.



A rum hawk, läwm tih hriat taka nui ri sukin min rawn fawp a, a kut lehlam chu ka kawrah zen lutin ka hnute a hum zui chat bawk.


Thiam loh nei lo ka pasal, kan nupa khum laizawlah phei chuan tenawm khawpa zei mah mah chuan min zût kual nghal ruai ruai a, taksa za mer mer leh ka kawchhung za ta chuai chaui avangin ka lo rum der der bawk!


Ka kawrbah hak pan tak mai chu a hlip zui pawk a, ka hnute, nau ka pawm hnua lian zual tak, tisa chakna avanga kawh leh zual chu hmum zui pawkin, a lei hman zei lutuk chuan a liakin, a fawp kual bawk a, ka thaw chhuak dar dar.


Ka hmeichhiatna rawn mar ta ṭalh ṭalh leh tui chhuak zui ṭiam ṭiam ah chuan ka pasal ka mamawh zia hrilhnawn ka ngai lo nasa.


"Putar...." Ka ti chhuak dar dar a.



Thaw la ve kawk kawk chuan a towel venlai chu pawt thla sawkin chhuatah a theh thla zat. A fanu a rawn ṭap zui zat bawk a.



A tawp dat. Min rawn en chhuk, ka mitmeng leh thawk ala pangai lo nasa lutuk, ka pasal tisa chakna avanga hmai mar ṭha ṭang mai pawh chu ka hmu phe ruai ruai chauh a ni.



Ruatruati rawn ṭap ta tuar tuarah chuan ka sirah a rawn let thawk, thaw la kawk kawkin, "a va hun lo ve Bawihte...." A aw chhuak pawh a dik bik lo nasa, a sehchilh deuh bap bap, a nui zui dawt a. Ka lam hnaiha rawn tawlh hnaiin min kuah deuh vang vang.


"Ánu, Ruatruati a tho..." Mathew-an a rawn ti lang lang, ka pasal min kuah chunga ka nghawnga hmai phum tlat leh thaw la deuh kawk kawk chu beng thakin, "i fanu chu titlei hmasa teh," keimah pawh ka nui ta vur vur.


A rum nghut a, ka nghawngah na zet a rawn fawpin ka lo rak ṭhat, a bân bulah chuan ka beng zui thlawrh bawk, a duk leh dawn a nih hi!

Taksa lang laia duk a siam ṭhin ka duh loh zia a hre reng si a, he Putar hi chu!

Ka melh ram ram chu nui hawk hawkin "ka fanu chu ka'n pawm leh hmasa a niang chu...." Ka biangah a fawp leh kher a'h!

He mihring Putar Lalduhawma, duh loh lai ber pawha Lalduhawma mize duhawm lutuk hi ngaiah ka nei thei mawlh dâwn lo chu a nih hi!!!


Towel a theh thlak ngei chu chharin a veng ṭha leh, kawr ha lo bawk chuan a chhuak a, keipawh intuai mam thuak thuakin ka bra leh kawr hak pawt mar chuan thaw ka'n la leh deuh vang vang, ka pasal hmel, tisa chakna leh a fanu ṭap hun lo ti lutuk hmel chu ka mitthla ah a rawn lang, nui chhuak ta hakin ka tho chhuak a. Nui vur vur chuan room aṭangin ka chhuak ve vat.


"Hnute a chak a nih hi," min rawn pe.


"Inhrai puar rawh u, chawhmeh chu ka lo siam ang," a ti zui sup.

Bu nghatin, "bawkbawn bak saw kan a ngai tawh lo ang, a ṭhing tihlum a ni mai," choka ah chuan kan inzui lut nghal. Choka hi kan siam tir a, kan la zo chiah lo nen kawngkhar pawh a la nei lo.



"Keipawh rawng ka bawl ve dâwn," Gabrielle-in a rawn tiin, Mathew-an, "Ruatruati hnute hnek zawhah ka pawm dâwn," ka chair tur Mathew-an pawt chhuak pahin kan bulah chuan a ṭhu ve nghal a.



Rinai takin mipa zawk hian a nau hi a dimdawih, Gabby-i hi zawng, a nau hi a au khum leh vak vak ṭhin. Mathew-a erawh a hmel en aiin dimtê tea chetdan a thiam riau thung.


Ka pasal rawngbawl, kawr pawh ha lo, towel chauh veng chunga a che vel chu nui ver ver leh kan fanu hnute pe chung chuan ka thlir vawng vawng. Hlimna leh lawmna in min tuam vêl a ni ber.



Ka pasal leh fanau te chu ka en kual a, ka pasal thusawi kha a dik ka ti tulh tulh bawk, hlimna bul ṭanna chu chhungkua a nih loh chuan khawiah pawh kalin zawng ila, kan hmu dâwn lo a ni tih hi.



Chhungkaw kehdarh ni si lovin, kehchhe ve tak, hmangaihna awmze hre lo, mahni tal tala tal ve tawp, chhungkaw awmzia leh hlutna hre lo aṭanga seilian leh chhuak ka ni a; Mahse, ka pasal hian eng nge chhungkua chu ni a, eng nge hmangaihna dik tih min hmuh tir bawk a.



Ṭawngṭai dan mai ni lo, Pathian hnathawh nghahdan leh, rindan nei thei turin, ṭawngkam ni si lo, hmangaih taka ka laka a chet danin min zirtir fo bawk!


Mahse, chung hrethiam a, chelh ngam tur erawhin thil tamtak ka paltlang thung. Ni e, rahbi diktak rap tur chuan a dik lo lai lai kan paih a, kan kalsan hmasak a ngai rêng a ni.

"Chaw ei kan hman a nia," ka pasal aw ka hriat chuan ka harh zawk.


Hnai set sawtah min loen chu ni in, meng kawka ka en chu a hnar min tum khum datin, "tunge i ngaihtuah?" A ti bul nghut. A thikthu hi a ti chhe thei si, keia naupawm ṭawm hnawk lakah a thikthu a ti chhe lutuk te hian min hmangaih zual tir a ni ber e!!!


Nui chungin, "Theo-a bialnu thar kha," ka fapa chu ka melh zauh. Lo ner nung nungin, "ka bialnu a ni lo, min ngaizawng alawm Lalanu," uar fahran hian a rawn ti.



"A nih reng kha, lalAu dawt sawi ziah suh aw. Anu in thil leina tur a pek che pawh sweet i leisak reng," Gabby-in a rawn ti zat zat. Kan nupaa in en chuan kan nui chhuak ta hawk hawk a.


Mathew-a zak lah chu a biang leh beng sen tan tanin, "min ngaizawng hmasa alawm," a ti zawi sep sep chu kan nuih a za zual tulh tulh, Ruatruati thleng chuan kan ri ta chuah chuah a!!!!!!!!!

Heihi a ni ka hringnun, buai chuar tak, zak thei lo taka bul ka ṭan, mittui leh chânna in a zui, hmasial taka ka sual chhuah leh chelhbeh, hlimna tamtak ka phu loh thlenga ka dawn chhungkua chu!


< A TAWP TA >

Note : Ti hian ZAWLAIDI chu Pathian zarah thiam lo tak chungin kan lo zo ta a, duhsak taka min chhiarsak ṭhintu te chungah thinlung takin lawmthu ka sawi mawlh mawlh a; Tin, duhsaknaa ka tihdik loh, Mizo ṭawng dik lo min hrilh/hrilhfiah ṭhintute inva hlu tehreng êm 🙏 lawmthu sawisen loh inlakah ka bâ e. Inzir mêk, thiam loh ngah tak leh mi pawlawh ve tak ka ni bawk nen, dik lo lai leh hriat loh ngah tak hi duhsak takin min lo zirtirtu ṭhin a, ka lawm em em a ni♥️Pathian zarah Christmas kan hnai ta hle a, mitin te hlim leh läwm takin Christmas kan hmanchhan hre rengin, chhungkima LAL piancham inhman ṭheuh theihnan Kristmas leh Kumthar chibai lawk vek u le💚Pathian zara dam chuan, kumthar lama hei aia Mizo ṭawng leh hawrawp lam pawh improve zawka thawnthu thar neih beiseiin, dam takin kan inhmu leh ṭheuh dâwn nia♥️♥️ka lawm em em vek e♥️♥️


*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)