My TREASURE S1 By Floria laldansangi (Completed)

Moderator: Floria

Ngaia
Site Admin
Posts: 25813
Joined: April 30th, 2016, 4:07 pm

Re: My TREASURE By Floria laldansangi (Completed)

Unread post by Ngaia » December 31st, 2020, 5:06 pm

MY TREASURE
By
Floria Laldansangi


Chapter < 31 >


MAYA....POV



Ka hmai ni zûngin rawn chhun ser serin ka zi mar ṭiah ṭiah a, ṭawng ri dut dut ka hriat ruai ruai rualin ka meng diar diar bawk


Min hnung chhaw zawnga ding, towel veng a, kawr pawh ha lo, dar pharh hlai ṭha zet mai, in sawizawi ṭha tih hriat taka in phiar fat mai chu ka en in ka nui seih a, inbual zo hlim tih hriat taka a sam la hnawm deuh chap leh ni zûngin a chhun tle sar sar mai te, a taksa a la huh deuh te chu hnunglam aṭang pawhin a sexy mah mah a ni



Nui sun sun a, zi mar ar ar in ka mu z*ng thla a, engtik laiin nge Nathan-a ka bul a rawn thlen ka hrelo, hnai lutuk ah, ka hmai tawk lo chauha a rawn kûn hniam chu phu deuh zuk, "minti phu a....." Ka tih rualin a benga phone la chuktuah reng chung chuan mawi lutuk a kiai sukin ka ṭawnglai chu a rawn ti tawp chat a



Duhthawh zeta min fawpin, a lei hrawl leh thap ṭha zet mai chu ka kâ chhunga hawl kual chuan ka lo chhanglet ve tan tan a, kan lei chu a in buan let tap tap a, ka hmui hnuailam fawp dek dekin, "ka ṭawng ila ngaithla em...?" Phone aṭangin hmeichhe aw ni awm tak a rawn au lang lang chuan tawp datin ka thle sawn a


Kan pahnih a thaw dun kawk kawk a mitmeng si sap mai a min rawn en a nui sukin, "Maya-i a rawn harh alawm, i be duh em?" A ti sup chuan phone chu min rawn pe a


"Tunge?" Tih melhin ka lo melh thung


"Angela," A tih chuan ner deuh vakin muangchangin ka ban a, a eng amah hma in ka lai ringawt lehnghal



Ṭhu tungin, "Hello..." Ka tih rualin, "awiii... Maya, ka van lawm tak e aw...! Ka mumang emaw kala ti dawn zawk, engtin nge ka U kha i in hmangaih tir theih a, nupui a neih duh tawhloh ka lo hlau ru ve em em a, ka lawm e, nangmah kher ila ni zui nen, ka lawm zia hi," A lawm zia chu a aw chhuak z*ng vah mai leh a tawplam a hlimna vanga ṭah aw lek lek tel ah chuan ka hre thei



Ka nui sun sun ringawt a, Nathan-a towel a a lu hru hul mawlh mawlh leh ka lam rawn pan a ka hmui a fawp leh zauh chu ka en kar a, Angela-i ṭawng mawlh mawlh chu ka ngaithla ran bawk


"Ka lo be tawh dawn em ni? Inti fai ve la," Nathan-an a rawn tih chuan bu nghatin, "Angela, nakin ah i zawhna zawng zawng te kha muangchangin kala chhang dawn che nia," Ka tih chuan rawn nui deuh ar ar in, "ka hre chak lutuk," A rawn tih leh chuan Nathan-a phone pe in khum aṭanga chhuk mai ka tum chu saruak vek in kala awm tih la hre chhuak chiah bawk


Nathan-an Angela be mawlh mawlha min nuihzat hmel zeta min en na chu en chho in, "bathrobes saw min rawn lak teh," Blanket ka pawt khawm ngar bawk


A mitko min san khum ak a, ka beng bula rawn kûn hniam chuan phone chu dah hla deuhin, "ka hmuh hnu vek tho alawm," Ti supin ka nghawng ah a fawp zui zauh bawk a, ka danglam lehnghal ringawt tawh, hahthlak hian....!



Thaw haka melh ram ram in, ṭawng ka tum leh ruala hawisawn chuan, "lo thli thlai tura ka tih che kha eng nge a an?" Ti supin bathrobes chu min rawn pe a, lo ban vatin ka ha nghal sawk sawk bawk


Khum aṭanga ka chhuk rualin, ka kawng ah rang zeta rawn kuaha a taksa si chet a min pawt hnai chuan, "Angel, zanin ah kan inbe leh dawn nia," Tih leh phone chu dahin, ka nghawng chu a hmui in a rawn nul thuak thuak a



"Nathan, inbual ka ngai ve takzet tawh a nia," Ka ti tak na in nizan zankhua in chhin khat pawh ka chhing lo ang a ni, kan taksa in zawm reng chung pawhin he a mi khawihna hi ka thlahlel em em zel hi a mak takzet



"Ummm," Khamloh hmel zeta ti chhuakin, ka hnunglam a a mitpat na rawn che ṭalh ṭalh chu ka feel thei, a thaw chhuak hak a, "inbual vat teh, he room hi ka chhuahsan pui theilo mai dâwn che," Ti hluk chuan ka chhipa fawp zauhin min thlah nghal a, Nathan-an min thla hlel ve a ni tihbhriat chuan ka chhungril hi a hlim lutuk a a zuang lo chauhin ka hria



Nui vur vur a bathroom a lutin, bathtub a tuilum lo awmsa chu en in ka nui chhuak hak a, Nathan-an ka inbualna tur alo ti khat sa tih ka hre nghal zat bawk



Bathtub a inchiah vang vangin ka taksa sil deuh ṭhûm pawh a zia nghal sawng sawng thei


10mins vel ka inchiah hnu a in bual sawk sawk chuan ka chhuak a, Nathan-a erawh sofa ah hna alo thawk mawlh thung, nizan kan chhuah khan thawmhnaw inthlakna tur pakhat mah ka la hman miahlo tih ka hre chhuak nghal zat bawk


"Hetah hian i inthlak na tur a awm," Min rawn en a, mak ti zeta lo en letin, "engtik in nge i lei hman a?" Dawhkan a paper bag chu la in ka ti sap a


"Henry-a rawn keng turin ka ti a nih kha," Nui suka tih leh hna a thawk leh nghal mawlh mawlh a, Henry-a zingkarah Hotel-ah a rawn kal emaw ni...?



Kawrfual ka khup khuh tawk lek, a kawnglam tlem a arh deuh, a bân bul chu ka inbel a, kan thawmhnaw in ah ava lak tir a ni ngei ang


A hnathawk mawlh mawlh chu en in, "ka ril a ṭam tawh a nia, hna ila thawk dawn em ni?" Min rawn en vat a, a kiai suk bawk, ka nghak tih a hrelo tih hriat takin laptop chu khup thakin, "dawnlo e," Tih leh laptop chu khung in, "kal angle," Ti sup in ka bula rawn ding chuan ka kut ṭangah a kut ṭang rawlhin a rawn nui suk a, ka lo nuih let ve var var bawk



Room kan chhuahsan a, min kalpel tu hnathawk ṭhenkhat leh Hotel a thleng ve ṭhenkhat te chuan min en zui vawng vawngin, kan in san hleih lutuk chu mak anti nge? Nathan-a chu ka phulo anti zawk pawh ka hrelo e...!



Hotel restaurant a min luhpui a tum chu, "Nathan, inlam ah kan ei mai lo a," Ka pawt ding dat bawk a


"Hetah hian ei pui che ka duh alawm," Tih leh alam a min pawt hnai salhin, min vawnna thlah chuan ka kawng ah inti neitu taka chelh chungin min penluh pui a,


ka ṭhutna tur Nathan-an pawt chhuaka min ṭhut tirin ka hma ah a ṭhu ve nghal zat bawk a, kan awmdan romantic ta lutuk chu ka drama en ṭhin te ka hre chhuak rum rum mai, Jamie-i hrilh ila a rak leh nasa dawn lutuk



Ei tur kan nghah laiin, "Bawihi," Nathan-an a rawn tih sup chuan ka en vat a, a hmel chu a thutak takzet, ka rin danin custody chungchang a nih ka ring ringawt a



Thaw la deuh hak chuan, a hmui hnuailam pet zauhin min en leh ang ren rawn a, Nathan-a anglo takin zâmna mitmeng ka hmu tel lehnghal.....!


"Bryan te unau hi..." A tawp dat a, thaw leh haka nui lui zeta ka mit a min rawn en in, "ka fate an nilo a ni," A aw chhuak ah chuan sawi chhuah harsa a tih hmel takzet



"I thinrim...." A tih leh rualin, "ka hria alawm," Ka lo tih khalh vat chuan mit zîmsan in min en a, "engtik aṭangin nge i hriat?" A aw chhuak ah chuan mak a ti tih tilang duh lemlo mahse a lang tho mai



"Ka duh hma che in," Nui paha tih leh, "i fate an ni emaw nilo emaw an pathum hian kan fate an ni tawh alawm, chuvangin Nathan, Bryan-a pawh i nu..." Ka tawp dat, i nupui hlui ka ti leh hman teuh ther ther khawp mai



"Maria-in lak a tum pawh hi, ka remti lo bur tih hriala ka duh, Bryan tello leh an unau tel lo chuan ka awm theih hauhlo ang," Ka sawi zawng leh Maria-i mizia pawisak neilo lutuk ka mitthla ah a rawn lan chuan ka hlauthawng zual, a hringtu diktak a ni a, kan tan hnehna chance chu chhe tak a ni bawk si



"Hlauthawng suh, engti kawng mahin ka lâk tir dawnlo," Ti supin, uluk zeta min en chuan, "I thinrimlo em ni? Ka fa pawh nilo ka enkawl tir si che a?" Ei tur rawn thleng ve chiah nen ei tur en pah chuan, "rim nang, a thlawn in ka enkawl chuang hleinem, pawisa ka nei a, fa ka nei bawk a, tunah nangmah chawpin ka nei bawk che a nia," Ka tih chuan a nui chhuak huk a, sawitur hre tawhlo tih hriat tak a alu thing nak nakin, "ei rawh," Tih leh a ni pawh chuan a ei ve nghal zat bawk a


Kan ei zawh chuan in lam kan pan a, car chhungah pawh steering a chelhloh na lamin ka kut a hum ran reng mai, ka taksa dailo in a awmlo ti ila ka sawi dik ber ang



"Mamma..." Car aṭanga kan chhuah rualin Brayden-an kan lam a rawn pan zat a, ṭhu hniam a lo pawm kâng pahin, ka Nî te ho rawn in zui chhuak diah diah chu, "khawnge kal intum a?" Ka lo ti vat a



"Tlailam ah kan let leh mai dawn sia, i putea chu kan va tlawh ve dawn em ni kan ti hei, Zoa lah annu te chhung an zu tlawha, Hruaia leh i nau lah an ṭhian te tlawhin an chhuak ve ta daih sia, car kan in daih ta silo a, Mapuia hi hruai kanlo tum a," Ka Nî in a rawn tih chuan, ka chhan hma in, "hruai rawh u, hruai rawh u, keini pawh remchang ah la kan ve tur a ni," Nathan-an a lo ti vat a



Ka putea hi thin cancer a ni a, an in enkawl rei ve tawh viau mai, zia lam emaw hniam lam emaw a pan hran bawk silo, Mizoram kan let aṭangin ka nu hian enkawl in hna ah a nei a niber



Ka Nî te ho kal liam rualin, "Bawihi, keipawh hna ka nei a, ka lut lo mai ang," Nathan-an a rawn tih chuan bu nghatin, "ka Nî te i hmu hman tawhlo ang a," Ka tih chuan, "hman turin rawn haw ka tum dawn nia," Ti supin ka chala fawp zauh chuan car-ah a lut nghal a



"Daddy chu Mamma chuah a fawp a," Brayden-a alo tih niap niap chuan nui pahin, "keiman ka fawp mai angche," Tih leh a biang a fawp zauhin inchhung lam kan pan nghal a



Jamie-i choka a theihai lo ei ṭawn ṭawn ka hmuh chuan, minlo en pahin, "nizan report rawn pe zar zar teh, a vawikhat na chu engtin nge i awm? I sil ṭhumlo maw? Zan i mu lo tih ka hre mai. A zei em?" Ka ngei thei a nia henu hi chu



Pi Siami te ho an lo nui dar dar a, Jamie-i zawhna chhanglo chuan, "khawnge Bryan leh Bryson-a?" An hmel kala hmulo reng reng



"Aww.. An room ah an unau in an awm a niang a, chin kha chuan an awm reng kha," U Muani'n a rawn ti a, Brayden-a chhuk tir pahin, "i U te bulah han awm ve rawh," Tih leh Jamie-in mit ko san ak ak a minlo en na chu men kalh khum ralh chuan, "i tawn hnu vek a nia, hriatbelh tur pawh inei chuang em ni?" Ka ti let chu za zeta rawn nui in, "a zei ang tih ka ring, a taksa a nalh sia, abs te pawh kha zût ve chhin a chakawm alawm le, a sak em?" A tih leh chuan tih ngaihna hrelo zet a nuiin ka lu ka thin khum ringawt a



Inkawm tur diktak kan ni, in kawm tur diktak, heti tiat kan ni tawh chung pawh hian kan hriat chak zawng te hi a atthlak thei ang reng bawk si a....!



Ka Nî te haw hnu aṭangin Jamie-i te man hlan nen kan buai mawp mawp khawp mai, rinai takin ni pawh a kal chak, November thla chu buai nak nak chhungin kan hmang ral leh der mai

December thla kan chuangkai a, rilru lah chu a hlauthawng tulh tulh bawk, "Nathan, Court hian Bryan hi pe turin minti ta se engtin nge kan tih ang?" Min kuah hlu hlu tu Nathan-a melh chho ralh chunga ka tih chuan a rawn thaw chhuak hak a


"I rilru iti hah a nih kha, chuti maiin a awlsam lo ang, Bryan te unau Pa diktak kan zawn hmuh phei chuan Maria-in hi a chang hauhlo ang," A tih thûm dut chuan tlema inla hrang deuh in, "tunge a nih i hria amaw?" Ka ti deuh hâ bawk a



Min rawn melh chhuk zawka min kuah nghet sat sat pahin, "ka chiang ngamlo na in, rin erawh ka nei alawm, muhil tawh rawh," Ti supin ka chhipa fawp vang vang chuan ka hnungzang ruak kâng mai chu a chul hliau hliau bawk a...!



"Mamma, tinge kan zui ve theihloh che u, Bryan-a pawh in hruai dawn tho sia," Brayden-a chuan lungawilo leh mittui tling pam in min zawt a


Bryson-a, U Muani'n a pawma, ani pawh ala in hnit feih feih tho, Bryan lah engmah hrelo alo inti theih khum ham ham bawk a


"Karleh ah school in chawl tawh dawn alawm, kan rawn let vat dawn bawk a, in fel tawh kha, ṭap tawhlo ula," Keimah ber pawh chu ka ṭap ve mai dawn, ka enkawl aṭangin ka hmuh phakloh a anla awm ngailo reng reng


Zankhat lek ka riahbo pawh kha kha ti khawp khan hreawm ka ti a nia....! Eng chen nge kan thang dawnlah kan hre der bawk silo a




"Pi Siam lut tawh rawh u, keini pawh kan kal ange," Tih leh,"Bawihi lut tawh rawh, kan tlai mai dawn," A tih zawm sup a


Car a kan lut tur chu Brayden te unau an rawn khek nghal tuar tuar a, kalsan hreawm ka tih zia chu pui tak a ni, ka mittui a tla ve lo chauh tak tak, ka hrawk ana ut ut mai



kan tlan chhuak chu Brayden-an min rawn um zui dat dat a, Bryson-a erawh U Muani a kuahbet tlat thung, ka mittui ka khap let hmanlo a rawn lum thla pup chu hru vatin Nathan-an ka kut a rawn hum nghal vang vang a



A nau te ṭap a hmuh chuan Bryan pawhin nuam a tilo a niang, "Daddy kan hruai ve theilo em ni?" A rawn tih chuan mittui tla lek lekin alam ka hawi a, "school chawlh hunah an rawn kal ve dawn alawm," Nathan-an alo ti vat chu hnunglam hawi let deuh vang vangin, "zan an muhil thei miahlo ang, tiraw Mamma?" A rawn tih chhuah sep phei chuan ka ṭah a chhuak zual, letleh a hruai tel ve mai ka nap rum rum......!



Xx MARIA Xx


"Miss Maria, engvang tehthut a press conference ko nge inih i sawi thei a ngem?" Camera a de chuai chuai a


Maria chu hawi vah in, "vawiin ni hian Mr. Amex Patel, Patel Industry neitu nupui angin in hma ah ka dinglo a, Nu ka nihna angin ni ka din ni," A tih chuan camera chu a ai nasa in a phe a, zawhna a ri nuaih nuaih bawk



A fapa neih letnan leh Nathan-a laka hnehna a chan theihna kawng ṭhaber chu khawvel hma a a fapa chanchin sawi chhuah leh mipui a lam a ṭan tir ni in a ngaih vang a ni



"Kum 9 lai liamta khan pasal ka nei a, chu chu nangni pawhin in hre ṭheuhin ka ring, thla tam pawh ral lova ka pasal Amex kutthlak tu, B-Large company neitu Mr. Nathan-a a ni, kum 3 dawn kan inneih hnuah nau ka pai a, vanneih thlak takin triplets an ni a; Mahse, kum 2 an tlin hma deuhin, ka pasal hlui Nathan-a chu tualthattu a Puhin jail-ah dah luh a ni a," A mittui ti tla in a in hnit zui feih feih bawk



Mittui hru hul chuan, "jail a tán hnuah ka fate pathum nen 330sq awmlek a zauah kan awm a, alo chhuah hun nghakin nitin hun kan hmang ṭawk ṭawk ṭhin. Mahse,a unaunu leh a pasal hual rawn kalin ka fate chu min chhuhsak a, khami ni aṭang khan vawikhat pawh ka hmuh leh an remti tawhlo, eng nge ka tihsual a, ka fate laksak ka nih hi....? An unau vaia laksak ka beisei lo, ani pawh Pa a ni be tho tih ka hriat vang a ni. Tunah hian ka fapa upaber laka full custody ka chan theihnan media mite leh mipui min thlir tu te zawng zawng support na ka rawn dil a ni," Mittui tla zawih zawih chunga a sawi chuan, "Engvanga tuna sawi chhuak chauh nge inih, fa ineih tawh thu hi i pasal thar Mr. Patel hian a hre reng reng em?" Zawhna tam tak a dawn chu hahdam zeta chhangin, "tehreng mai, chuan he ka thuthlukna ah hian min support viau bawk," Tih leh, "nangni pawhin min support ṭheuh ka beisei in ka rawn dil che u a ni," Ti chuan conference room chu a chhuahsan a


Room a chhuahsan ruala thaw hakin, "zawng tura ka tih che kha i zawng hmu tawh em?" A body guard chu melh zawkin a ti zui zat a, a kawr hak chhing leh mar ṭha zet chu siam rem pahin, a body guard in, "hmu rihlo," Tia a chhan na chu lungawilo tih hriat zeta beng thle sawkin, "a rang thei angber in zawng hmu rawh ka tih che kha," Ti tuarin a melh zui ram ram bawk a, "Nathan-an engkim a hriat hma in zawng chhuak angche," Ti hriam leh hrakin a pensawn zui vah vah bawk




MAYA....POV


Pune, Maharastra Family Court hma ah car chu a ding dat a, car aṭanga kan chhuah rualin reporters tam lutukin min rawn bawh huk chu rang zeta Bryan-a kuah bet chuan Nathan-an min rawn kuah ve zat bawk a


Angela leh a pasal, Henry-a kan lam pan a rawn tlân vatin reporters ho chu an rawn nawr sawn ngial na in an tam mah mah a ni


"Mr. Nathan, i nupui hlui Mrs. Patel thusawi hi a dik rêng em? In fate hi hmuh tir i phal lo em ni? Tual chu i that tak tak em?" Nathan-a khabe hnuai aṭang chuan ka melh chho vat a, a khabe ruh pawng ṭawlh ṭawlh leh min kuahna nghet ta tulh tulh chu hlauhawm tak a ni



"Court in thudik a hailang dâwn alawm," Angela-i chuan alo ti vak a, security rawn tlan khawm ve zat bawk nen, an venhimna hnuai ah Court kan lut thei hrâm chauh a ni, min chil hlum lo chauh alawm


"Engthil nge thleng kha Henry?" Nathan-a hmel chu a changin dur khup khup tak a ni


"Maria-in press releases a siam a nih hi," Henry-an a tih rualin Henry-a IPad chu a pawt thla sawk a, phun hlukin, ânchhia a phuh chhuak zui hrawih bawk



"Eng rilru nge maw a put le? Mihring pawh a nilo," Angela-in a rawn ti zui tan tan bawk a, ka rilru chiah a ni, hetia a tih hian a fate tan thil a ti harsa tel tih a hrelo emaw ni...?


Court kan ṭan dawn chuan, "naupang hi chu a lut ve theilo ang, he lamah min rawn zui rawhse," Security in a tih chuan kan ding dat a, "Maya i awmpui a ngai in ka ring," Henry-an a rawn tih ve chuan ka bu nghata, Nathan-a en chuan, "kanlo nghak angche u," Ka ti zui sep bawk a, court rorelna chhunga ka awm ve chuan ka thin tertek lutuk hian Maria-i ka ban duh mai ang tih ka hlau hrim hrim



Security in min hruaina lam kan pan laiin, "Bryan...." Maria-i kan lam a rawn pen ka hmuh rualin Bryan chu ka hnunglam ah ka pawtlut zui zat a


Min ner khum sawkin, "Nathan-a hian eng ang naupang nge maw ka fate enkawl tu atan a lak che hi le..." Min thamlo zeta tih leh, "Bryan, keimah, i nu, minlo enteh le," Kûn hniama a koh chuan Bryan chu ka hnung ah tawlh lut zual hrut hrutin, "i nilo," atih leh ka mal hnunglam ah a hmai a phum zui kak bawk



Maria-i chu ner sawk sawk in, "zawng uicho Nathan engthil teh hrep nge i fate i hrilh?" Kha zeta tih leh, "engti kawng pawhin ka hnenah i awm angai, a hringtu che ka nih hi," Ti leh ngat chuan min rawn melh ram ram a, rum lutuk a lo melh letin, "mihring pawh i nilo," Kha zet a tih leh ṭhu hniam a Bryan-a pawm kâng in ka pensawn zui zat bawk a, Maria-i ke per ri tarh tarh chu ka hre thei


Darkar 1 chuang Nathan-a te kan nghak tawh, eng nge result ni ang tih ngaihtuahin ṭhut pawh ka ṭhu mai mai thei tawhlo, ka vei tawn sek a


Kawngkhar rawn in hawng ri rak ah chuan rang lutuk a hawiin, "Nathan, Nathan, eng nge thuthlukna?" Nathan-a lam ka pan vat a. Nathan-a te ho rawn luh rualin Maria-i rawn pen luh vawh vawh ka hmuh chuan Nathan-a ka vawnna chu ka thlah riai riai a



Rawn nui hakin, "ka awih theilo che Nathan, he hmeichhe naupang hi inei amaw? Tenawm lutuk, i fate rual a nih hi," Ti chang rat a ner nawkin, "Bryan, mummy bulah rawn kal rawh le, haw ang le," Tih leh a kut a phar chhuak duai chu meng pawng hraw in Nathan-a ka melh chho a, a hmel chang zetah chuan engmah zawh nawn ka ngailo



Henry-a, Angela-i te ho chu ka en kual a, ka lu thingin, "a theihloh, ka kal tir theilo," Tih chhuak sapin Bryan-a lam pan chuan ka kuahbet nghal vat a


"Engthu neihna nge ineih, ka fapa a ni a, ka ta a ni bawk, nuhrawn ahhhh Nathan-a fate an nilo tih i hre tawhin ka ring, eng dan hmang mahin ka fapa khawih theihna i neilo," Ti hrawka Bryan-a rawn pawh ṭhen a tum chu kuahbet ngar ngar in, "i duhlo a i kalsan tawh a nih hi, Maria i fa hi i hmangaih a nih chuan kalsan rawh," A au in ka au khum


Mittui tla lek lek a Nathan-a lam hawiin, "Nathan eng emaw tal sawita che u," Ka mangan zia chu an hmu chiang viau in ka ring. Bryan-a lah chu min kuahbet in a ṭap hawm hawm bawk a


"Ka duhlo, ka duhlo che, ka Mamma i nilo, Mamma min kaltir suh," Bryan chu a rak tuar tuar, ka mittui a rawn luang ve zung zung bawk a



"Min rawn zui rawh, keimah, keimah hi a hringtu che ka ni," Maria-i lah chuan a pawt ve tlat bawk



Mangang lutuk a Nathan-a lam ka hawi chu ka lam a rawn pan hnaiin, "kaltir rawh Bawihi, kar 2 chauh alawm ni dawn, kar 2 hnuah thuthlukna tak tak kan hria ang," Seh chilh zeta rawn tih leh Bryan ka kuahna kut chu a rawn phelh a



Ka lu ka thing nawk nawk a, "a theihloh, henu bulah hian ka kaltir theilo, Nathan eng emaw tal ti rawh," Nathan-a chuan min kuahbet a, tal chhuah a Bryan kuahbeh leh tumin ka tal nawk nawk bawk


Bryan-a ṭap hawm hawm leh Maria-in thung nawk nawkin, "rawn pawm ta che," Ti hrawk chuan a a sir a ding chu a vin tuar a. Maria-i body guard ni ngei tur palian zetin pawm nawlh a, kawngkhar lam a panpui pawk pawk chu min rawn melh ṭawk ṭawk in, "Mamma, Mamma ka duhlo, ka haw duh Mamma," Min au lawm lawm hmuh chu ka thinlung hi hmun sâng tamtak a pawh ṭhen ang mai a ni, ana in a thîp ngut ngut mai


amin auhna ah a aw te pawh a thâm ruak tawh tih ka hre thei


Nathan-a âwm chu ka chum dawt dawt a, Bryan-a ko in, an kal liamna en ṭawk ṭawk chuan ṭap hawm hawmin, "hruai let rawh, hruai let rawh, hruai let rawh tunah," Ka theih tawp ana leh ringin Nathan-a chu chumin ka au khum a



Ka hnungzang ah boruak in min hnawhin, ka hrawk an a, ka thawk sak zui ṭalh ṭalh bawk, "kan hneh dawn itih kha, Bryan rawn hruai let rawh Nathan," Ti rawih rawih chuan ka kaihza tha zawi hnawkin, Nathan-a ka bawh rawk rawk a


Nathan-a leh Angela te hovin ka hming an lam mawlh mawlh chu a hla tial tial a, "Bryan, Mamma bulah lo kal rawh, hruai let rawh u," Ka phun chhuak sep sep a, vawi lehkhat ah ka khawvel chu thim mupin, ka awm zawna lungphu chu kut lawnga phawrh chuah ang maiin ana a, ka taksa vawt zet mai leh natna a tuambeh chu khuar khurum mawng neilo, thim mup mai a tla vawng vawng ang maiin a reh nghal vung vung bawk....!



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 31st, 2020, 5:06 pm

MY TREASURE
By
Floria Laldansangi



Chapter < 32 >


~ MAYA....POV ~



"Ka lo mawl zia ka hre chhuak uar uar mai, ka U amah vanga jail táng a ni tih hre chungin beihnan a hmanga, chu chu dahṭha pawh ni ila, engtin nge a kut ziak ngei kha, 'ka ziah a nilo' a tih ngam zawk le, Court chhungah pawh hniak phawi lek lovin dawt a sawi ngam a nia," Angela-in thinrim zeta a ti tawn tawn chu chiang takin ka hre thei



Mahse, meng chhuak turin ka mit mu hi a na kham ut ut mai, ka taksa lah chuti tho, vuak hrep ang mai ka ni, ka bek leh mitko te chu a kham ut ut bawk a


Nathan-an ka kut a hum ran tih ka hre thei, ka ti hlauthawng ngawtin ka ring, a chang leh ka kut chu a fawp leh vang vang ṭhin a, a thawk leh hak ṭhin bawk


Henry-a chu nui hukin, "khatiang khan ama kut ziak ngei a pawm lehlo ang tih kan ring phalo a tin ni. Bakah, kha lehkha ah khan a kut ziak alo ti danglam tih kan hre har bawk a," A aw chhuak ah chuan Maria-i nasa a tih zia leh awlsam taka Court vawikhat na a chaklo chu a tlawm ala hle tih a hriat bawk


Nathan-a chu thaw ri leh hakin, "Angela, Maria-i kut ziak lan na dang ila kawl em? A dairy emaw thildang hrim hri?" A tih sup chuan eng nge tih a tum tih ka ngaihtuah, Maria-i berin "ka nilo" a tih tlat chuan tih theih a nei dawn emaw ni? Prove na a awm bawk silo a




"Awm e...! Eng nga tán nge itih? Lehkha a hnutchhiah che leh ka neih chu a in ang dawn chuang hleinem, a kut ziak a tih danglam kha," Angela-i pawh chuan mak a ti a ni ngei ang


"Handwriting Analysis," Henry-an alo ti sup a


Ni e, handwriting analysis, engtin nge ka ngaihtuah chhuahloh theih ni??Muangchangin ka meng ve nghal riai riai bawk a


"Bawihi," Nathan-an hnai lutuk a min rawn en kawlhin, "i ṭha em? Na i nei em?" A hmel chu ka khawngaih letling zawk


Thaw hakin ka mit ka chhing deuh sak a, ṭawng chhuak turin ka dang a ro mah mah, "tui," Ka tih sep chuan rang lutuk a khum sira tui chu thli rawk rawkin straw nen a min rawn pe in min tung tho zui zat bawk a


"I ṭha tawh tak tak maw?" A tih nawn leh chuan, "Bawiha, in hliam a nihloh kha, stress nasa lutuk a tih kha doctor in," Nui vur vur a Henry-an a rawn tih chuan ka tui zûhlai chu nam sawnin, "ka ṭha, Bryan chanchin in hria em? In be thei?" Nathan-a chu mit kham leh thîp zetin ka en kar a


"Maya, ngaihtuah lutuk suh, Bryan-a te chu a finga, kar 2 lek chu Maria-i enkawlna hnuai ah pawh a manage thei mai ang," Angela-in a rawn tih chuan ka lu ka lo thing mat mat thung



Ni e, a fingin a luhlul lutuk mah mah a ni, keimah ang chiah a luhlul a nih vanga ngaihtuah zual ka ni bawk. A duhloh zawng chu tihluih a, nawrluih theih ṭhakloh, a tum tawh pawh engti kawng pawha hlawhtlin tum tlat ṭhin mipa naupang a nih vangin Maria-i thin a ti rim palh anga, a tina mai ang tih ka hlau a ni


Maria-i mitmeng en kha chuan Bryan a thu hnuaia a dah theihna tur a nih phawt chuan engmah pawisak a neilo tih lah alang chiang em em mai bawk si


"Chuvang alawm ka ngaihtuah zual ni," Ka phun chhuak sep a, Nathan-a chuan lainat hmel lutuk in min en in, "Bawihi kar 2 chauh a ni ang, weekend ah i hmu thei bawk dawn alawm," A inthiamlo hmel chu hmuh hreawm ka ti leh ang lawi si, a hmel ah chuan ama thiamloh ah a ngai tih ka hre thei


Ka kut a humna chu ka kut lehlam a vuan letin, "ka ṭha a lawm, ka ring che a ni," Ka ti sepa, keipawh in Nathan-a case hlui hmanga a beih kha ka ring pha hauhlo hrim hrim a tin ni


"Ni 3 chhung vel chu Mumbai hi ka chhuahsan dawn a, Angel hian alo awmpui angche, mamawh eng pawh ineih chuan Angela emaw Farah emaw bulah hian i sawi mai dawn nia," Nathan-an a tih leh chuan phawk fe a en in, "tunang hunah khawnge kal i tum?" Ka ti chhuak haw a


Thaw haka kiai suka min en in, "Franky, Bryan te Pa diktak hmu turin," A tih sup chuan ka ṭhu ngil nghal awt a, "i zawng hmu tawh amaw? Ka rawn zui ve angche," Ka tih nghal zung zung chuan ka dar a dimtê a dawmin, "Bawihi, hahdam rawh, doctor in awm hahdam turin a ti che a ni, court leh hma a i dam fel a ngai a nia," A thusawi chu zawmse minti tih hriat takin min en a


Mahse, zui ve ṭalh chu kala duh fan tho, "Mahse...." Ka tih leh rualin, "thu awih rawh," Alo ti sup a, ka thaw hak a, lungawi vaklo a bu nghatin, "engtik nge in kal dawn?" Ka melh ralh



"Kan tlai ṭep tawh zawk, i rawn harh chhuah huna kal a tia, inpa khan," Henry-an alo tih vat chuan bu nghauhin, "kal rawh u, ngaihtuah tur ka awmlo, rawn hruai thlen ngei in tum dawn nia," Ka tih chuan Nathan-a chu a kiai suka, a ṭhutna aṭanga dingin ka kut chu a hmer leh salh a


Rawn kûn hniama ka chipa fawp deuh vang vangin, "Angela i kutah ka dah rih a nia," Ti leh, "ka rawn bia angche," Rilruih mai a tih leh, Henry-a, kawngkhar bula a din na lam a in her chuan a phone rawn ri zui zat phawrhin a pen chhuak zui pawk pawk bawk a



Nathan-an min kalsan rualin ka ruak leh zualin ka hria, Bryan a awmlo tih ka hriat a ka ruahsa nak alaiin, ka ruak leh zualin ka mal zual ta riau a ka hriat tlat ni...!


"Ngaihtuah lutuk suh Maya, nikhaw hrelo a i awmlai khan ka U a mangang lutuk a, a khawngaih thlak zawk. Henry-a khan nizan ah Churachanpur pan a beisei zawka, ka U hmel hmuh hreawm lutuk kha a hrilh ngamlo mai pawha," Nui sun sun pah a tih chuan za lo zetin ka lo ṭhen ve sak a


Bryan hmel ka mitthla ah a rawn lan chuan ka mittui a rawn hnâm zui sawk bawk, theih leh theilo a min melh ṭawk ṭawkna te, min auh ṭawk ṭawkna te chu ka mitthla ah a rawn langin ka bengah a rawn khawk rum rum a, thaw kawkin, "Angela, Bryan hi phone pawhin kan be theilo em ni?" Ka mittui tla tur chu ka khap let sak sak bawk


Angela-in min khawngaih tih hriat zeta min en in, "pawi ka ti Maya ; Mahse, lungngai suh, weekend ah i hmu thei dawn alawm, court in a phal kha," A tih chuan rei ka ti lutuk mah mah, engtiang a hlauthawng nge a nih ang, min zawng angem? Tih te leh, Nizan pawh a mu thei miahlo ang tih te chu ka ngaihtuahna ah an rawn lang zut zut a, ka thawk a sakin ka âwm ah leh hnungzangah boruakin min hnawhbet leh tlat tawh.....!



NATHAN-A....POV


Maya ward ka chhuahsan rualin ka phone chu ka pickup a, "Sir, Ranaut chu Tadiwala Road Slum Area ah a awm e? A landan in loan shark-in anla umzui a nih hmel," Rohan-an a rawn tih chuan, "chhuah hauh suh angche, ka rawn thleng ve nghal ang," Ti supin phone off chuan, "Bawiha, flight cancel la, naktuk chhuak hmasaber tur i book mai dawn nia, Franky kan hmuh hma in, hmuh tur dang kan nei tlat," Ti chang ratin ner sawk chuan Hospital car park na hmun chu ka pan zui pawk pawk bawk a



Chak taka tlanin, kan awmna aṭanga darkar 1 dawn kan tlan hnu ah Tadiwala Road kan thlen rualin Ranaut-a, Maria-i bialpa hlui zawng tura ka tirh Rohan-a chu call in, "Sir, GPS hmangin ka awmna ka rawn hrilh angche," A pickup ruala a tih chuan phone chu ka dah nghal a



GPS ka on ve nghal zat bawk, Henry-a chu melh zawkin, "kan awmna aṭang hian a hla lo," Tih leh pensawn ka rual nghal bawk


Ka hmuh rualin, "Sir, sawta saw a awm e," A kawhna lam chu ka en a


Ka phone ka ipte a ak in Ranaut-a zu in na lam chu ka pan zui zat a, "Mr. Ranaut," Ka lam a rawn hawi vat, min hmuh ruala ding nghal zawtin a tlan chhe nghal vut bawk a


Chak zeta um ve nghal chuan Henry leh Rohan-a pawh an rawn tlân ve zat bawk



A hnunga ka um zel chuan ka um pha mai dawnlo a ka hriat avangin kawngpeng a tlan lutin, short cut theih dan dan chuan ka tlan zui pawp pawp a


Ka rindan chiahin a hma zawnah ka tlat chhuak zat bawk, a speed ti tawp dawta inher leh a tum chu a hnunglam ah Henry leh Rohan-a an rawn ding zui va zat bawk nen, a lu tuai puatin, "Fu**k, engthil nge i duh?" Thaw hlawp hlawpa a tih chuan ka thaw chhuak ve hak hak a


Kiai sukin, "deals siampui che ka duh," A rawn nui chhuak hak a, thle ngal chunga min en in, "nang hian maw...? Ahhh, news ka lo en ve a, i nupui hlui, ka bialnu hlui ni bawk, kha Gorkhali uicho nen khan fa in inchuh tih ka lo hria a," Kawi sawi zet a ti chuan thaw hak hak in lei ah chuan a thu zui hnawk bawk a


Nui hakin, "a nih chuan deals kan nei thei tihna a ni lawm ni?" Ka thle zui bak bawk


Rawn nui ve hakin, "no, no, no, Mr. CEO, kha uicho nu kalh zawng khan chet ka tumlo, in hnam hnawih ka duhlo tihna a nih chu," Tih leh ding leh hluai in, "helai hmun hi ka ngaina takzet a sin le, ka awmna ka sawn leh a ngai dawn a nih hi," Zi mar lui ar ar chunga ka lam rawn pan hnai a min kal pel chu, "loan shark lakah i biru mek tih ka lo hria a," Tih leh ka in her a

Nui hak hak a muangchanga ka lam rawn hawiin, "Prathat, a dik em?" Ka tih chuan a la thle ha tho, kawi sawi zeta dingin a ke veilam a ti sai dar dar bawk a


"Chuan.." A rawn tih chuan en ran in, "ka rulh sak angche," Ka tih ruala in herin, "ka mamawh lo e," A tih leh chuan, "i nupui leh fanau te awmna a hre tawh tih i hria em?" A penlai a ding dawt, rang lutuk in ka lam a rawn hawi let a



Lo kiai sukin, "tunah hian biak pawhna tur che a zawng mek zawkin ka ring, ka tih awmzia chu Prathat-an a kawl tawh ka tihna a ni," Ka thle zui leh bak a



Ka lam a rawn pen hnai pawk pawka ka kawr âwm ah a rawn ṭham nawk chuan Rohan-a lo che hrut chu ka kutin ka lo dang vat a


"Engtin nge Prathat i hriat? Deal i neihpui ve tih i sawi a nih chuan helai hmunah hian ka that ngei angche," A tih hrawk chuan a kut chu vai thla sawkin, ka kawr nghawng chu ka siam ṭha a, "Prathat-a mizia i hria alawm, rei tak i nupui fanau te damin a awm tir hauhlo ang," Ka melh zawk


A mit sen râm nen a min en run run chuan hlauthawng zetin a chhip sam a tuai leh puat a, ânchhia min lawh hraihin, "min rawn zui rawh," Tih leh inher in a pensawn nghal pawk pawk bawk, nui suka ka sira rawn ding Henry-a melh zawk chuan a nui suk bawk


"Eng Deal nge min neihpui i duh," Kan hma sofa chhe zet ah chuan a ṭhu thla a, ka sira ṭhutna a ṭhu ve chuan, "Court ah rawn in lan rawh," Ka tih rualin ṭhu ngil nghal at in, "sakei kâ-ah ka lu rawlh se minti em ni?" Kalo kiai suk thung



"A let atan, i loan leh apartment ka pe angche," Ka tih rualin a rawn nui chhuak hak a


"I hausa tawh tih ka hria alawm Mr. Nathan; Mahse, engtin nge niang, court a inlan erawh ka tum silo a," A meng kalh ralh a

Ka mitko san ak in, "ok, a nih chuan i nupui leh i fate an thih a ngai a nih chu," Tih leh ka phone ka phawrh a



"Zawng uicho leh...!" Ti hrawiha rang lutuk a ka phone rawn beng per sawkin, "Prathat nen deal in nei phiangsen amaw?" A ti chhuak hrawk chu nui nghawr dat pahin, "mi â ah min ngai em ni Ranaut? Kum 4 liamta khan i aiawh in nang leh i BOSS, Maria-i ten tán in ah min khung tih theihnghilh suh, Deal siampui tur che in backup tel lova ka rawn kal i ring tak tak lo angchu tiraw?" Ka ner zui sawk a



Ruh zet leh min hnek mai duh mitmeng a min en pahin, "eng nge i duh?" Kha zeta a rawn tih chuan sofa hnung ngheng datin ka bawp ka khawkher a, "kum 4 liamta a thilthleng kha sawi chhuak turin ka duh che."

"Thil theihloh a nih chu, ka chungah engthil nge thleng dawn i hria alawm," Alo ti nghal hrawih a


Bu nghatin, "i tán chhungin i nupui leh fanau te ho kanlo enkawl ang tih ka tiam angche," Ka tih leh chuan a lu a thing mat mat a, "teuhlo, tunah ka sawi chhuak a nih chuan ka case a säng dawn lutuk mah mah, dam chhunga in khungbeh tir ka tum hauhlo," A tih zat zat chuan ka nui ri suk a



"Tu in nge nangmah chauhin i tâng dawn ti? Nang leh Maria, i boss phatsan tu che pawh tiamin maw le. Ka tiam angche i hremna ai let Maria-i leh i boss hian hremna an hmu angtih," Ka tih leh chuan min ring ngam chiahlo mitmeng a min en ralh ralh chuan, "engtin nge ka rin angche," A ti chhuak ta sup a, a aw ki in thlakah chuan deals kan nei ah ka ngai nghal thei tih ka hre nghal bawk


"Ka lawyer a awm ve hi," Henry-a chu ka melh zauh a, "ka fapa ka neihna tur a ni a, dawt ka sawi ring suh, chuan tunah hian i loan ka rulh sak nghal thei bawk ; Mahse, thil pakhat, Court leh hma chu Rohan-a venhim na hnuai ah i awm tur a ni," Ka tih zawm zat chuan a ner sawk a


"Ven ka mamawh hauhlo."


"Ka hria alawm. Mahse, sum ka pek hnuah che i tlanbo lo ang tih ka sawi thei hleinem, a ni lawm ni?" Ka thle bak a, za lo tih hriat zeta nui hakin ka lama rawn awn hnai chuan ka mitah min en kalh a, "Ok, Deal..."

Kiai sukin, "Deal.." Ka ti ve sup bawk


"Maria ka thinrim cho chhuaklo tur che in ka hrilh che kha, Bryan ka laklet rualin tán in a ṭawih ral turin ka dah dawn che a ni," Ka rilru in ka ti zui hrawih bawk....!



Xx MARIA xX


"Ngawi tawh rawh, ngawi tawh rawh," Bryan-a ṭap tuar tuar chu Maria-in a au khum ve tuar tuar bawk a


"Lalrinsang, ni 3, ni 3 chhung i ṭap tawh, thih i duh em ni?" A dar tawn tawn a ṭham chuan a thing leh nawk nawk a


Bryan-a chu tal nawk nawkin, "Mamma bulah ka haw duh, min haw tir rawh," A aw pawh chhuak tur a awm ta manglo, a thâm ṭuak a, zan a mutloh vanga mit hnuai dum val kalhin, a bui luk bawk


"Keimah hi i Nu ka ni, keimah hi... Ka hring che a, nang leh i nau te pawh tiam in, vawi engzah nge ka sawi ngai dawn?" Tih leh khumah chuan pawt ding sawkin a beng zui pawp pawp a


"Kha zawngi i koh dan khan min ko rawh, kei hi i Nu diktak chu ka ni, Mummy minti rawh, tirawh," A beng pawp pawp a


Bryan-a chu a chauva a ril ṭam vang a ni ngei ang, a kaihza tha zawi hnawkin mit a chhing zui hmiah bawk a, Maria-i chuan hlauthawng zeta sawi dawt dawtin, "Bryan, harh teh Bryan, Lalrinsang..." A harh theilo


An awmpui nula chu au tuar tuar in, "tunah doctor ko rawh, doctor ko rawh," A vin zui tuar tuar bawk a, Bryan lo chu phun chhuak sap sapin, "Mamma, Mamma," A ti chhuah sep sep chuan Maria-i ṭhin a ti rim lehnghal zawk, "kha uicho kha i Nu a ni phiangsen lo," Bryan-a mit chhing, che theilo leh ṭawng pawh ṭawng hlei thei tawhlo thing leh nawk chuan a ti leh hrawk bawk a


20mins hnu velah doctor thlenga, Bryan-a en dik chuan, "zan mut a khamlo a, a taksa mamawh tawk ei tur a eiloh vang anih hi, hlauhthawn tur a awmlo e," A tih chuan Maria-i chu thaw hakin, "ka lawm e doctor," Nui sänga tih leh Bryan-a room kawngkhar bulah Amex, a pasal thar ding a hmuh chuan nuisang a pan hnai in, "ilo haw tawh maw Dear?" A kuah zui zat bawk a


"Eng nge i fapa chu a an, ni 3 lai a ni tawh si a?" Kuahlet paha a tih chuan Maria chu in hnit zui feih feih in, "engtin nge a nu ka ni tih hi ka hrilhfiah ang Amex, Nathan-a leh a nupui tharin ka chanchin chhe tak tak an hrilh in a vawng tlat tawh si a," A ṭap zui hlawp hlawp a


A pasal chuan duat lutuk a kuahbeta, chuk hliau hliau in, "naupang a ni a, hun ala mamawh a nih hi, Maria, min ring rawh karkhat hnuah chuan "Nu" tiin a ko ngei angche," A nupui, a âwma bei hnap khabe a chawi kâng chuan a mittui fawh hulsakin a hmui ah a fawp zui vawng vawng bawk a


Zan dar 11 a pel thuak tawh, a vawikhat nan, a vawikhat nan tak meuh meuh Bryan-a chuan sleeping walk a nei a, muhil chung chuan a khum aṭang a tho in, a room kawngkhar a hawnga, kawngkhar pui lam pan chhat chhat chuan, kawngkhar hawn tum in kawngkhar ah chuan in tauh ri ṭawlh in chhuatah a ṭhu thla hnawk a


Harh kawkin, thim tham ah chuan a hawi kual a, hlauhna in man in, "Mamma, Mamma.." Maya-i ko in, a ṭap zui nghal pur pur bawk a, "Mamma, ka hläu, minlo hruai rawh, ka haw duh tawh Mamma, Daddy, Brayden, Bryson, ka ngai tawh che u," A ṭap zawih zawih bawk


Amex-an naupang ṭap ri inhnuai lam aṭang a a hriat chuan meng diar diar pahin, "Dear, Dear, Bryan a ṭap in ka hria," Maria-i a sawi harh dat dat chuan phun sap pahin, "ka zu en ange," Tih leh khum aṭanga hâm bai bai a chhukin in hnuailam chu a pan a


Light On a, Kawngkhar bula Bryan-a mu kawm ngal leh ṭap khur dat dat mai a hmuh ruala pan hnai in thung tho nawlh chuan, "tlânbo i tum amaw? I tum amaw?" Tih leh thing leh nawk nawk a nam dawrh chuan kawngkhar ah Bryan-an a lu sawh ri dawtin a rak ring zui ṭhawt bawk a


Maria-in pawt leh hrawka thing leh nawk chuan, "min en rawh, min en rawh," Tih leh a khabe a chawi kânga na zeta hmer chungin, "keihi i nu ka ni, kha i Mamma khan a duh tawhlo che a ka hneh ah a dah tawh che, nat i duh tawhloh chuan i kâ hi chip hmak angche, i hrethiam em?" Ti kha leh hraih chuan alam ah pawt hnai in a tukkhum a sawhna chu a khawihsak a


A kutah thisen kai a hmuh chuan phun sepin, "min rawn zui rawh," Tih leh ding chhuak a pawh kal a tum chu, Bryan-a lo ṭang ve ṭau in ṭah leh a tum ruai ruai a, "i kâ kha chip hmak rawh ka tih che kha, hei ai na hian hremdan che ka hria a nia," Mitmeng ling hlar mai a en hrawk hrawkin Bryan-a room lamah chuan a hnuk kal nghal dawt dawt a


Bryan-a pawh chuan hläu zeta ngawi zui ta hmak chuan, Maria-in a khawih ang ang a dawhin, a ṭawngthei ta lo emaw tih mai turin Maria-in a vau zàn aṭang chuan Maria-i leh tuma hma ah mah thumal pakhat pawh a chhak chhuak leh tawh ngailo



"Bryan, naupang fel an ṭap ngailo, tlangval inih tawh kha."


"Mamma, engtik ah nge Brayden-a leh Bryson-a ka hmuh theih ang? Ka ngai tawh e,"


"Bryan, kan haw ṭep tawh alawm, school pawh i kal thei ṭep tawh e, Mamma biangah fawp phawt la," Bryan-a chuan Hmeichhe naupang lem, amah ang chen a sâng chu in hmachhawn zawnga ṭhut tirin amah leh amah chu a in be mawlh mawlh a


"Bryan-an tunah Mamma a fawp ang," Nui var var a tih leh Naute lem biang ah a fawh chuan Maria-in room kawngkhar hawng ri rawkin a naute lem chu a phih thlak sak sawk a


Bryan-a chu phu zawkin, "ka Mamma a nih kha, minpe let rawh, min pe let rawh," A ṭap zui leh nghal tuar tuar bawk


"Heihi maw? Milem a nih hi, keimah hi i Nu ka ni ka ti a ni lawm ni?" Ti hrawkin Bryan-a naute lem chu pawt nawk nawkin a sam te chu a pawh ṭilh sak a, room aṭanga chhuakin, bakcheh zawng chuan naute lem chu chep chhe nawk nawk a chhuatah paih sawkin a rap hrual zui sawk sawk chu Bryan-an lo ban ve in, "ka Mamma rap suh, ka Mamma a nih hi," A ṭap zawih zawih bawk


Maria-in mit sen hlar mai a en hrawka ṭhu hniama tung tho nawlhin a biangah chuan a beng thle sawk a, "min en rawh, tunge ka nih?" A tih hrawk chuan Bryan-a chu a ṭap tawp hmakin, hlauhna a khat mitmeng a Maria-i en chuan, "Mum....mum...mummy," Ṭah chak si, ṭap ngam silo chuan a hmai Maria-in a benna thîp leh sen hlar mai, vung nghal pur dawm chuan, "Mummy," A ti nawn leh ṭuak bawk a


Maria-i chu thaw hakin Bryan-a alama pawt hnaia kuahbet chuan, "a dik, kei hi i nu ka ni, ka fapa ini a, he in leh Patel company rochun tu tur ini bawk, theihnghilh tawh suh angche," Nui zui ar ar chuan a ti chhuak zui zat a, Bryan-a erawh ngawi rengin a mittui a luang zung zung thung






<>~>~>~>~>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 31st, 2020, 5:06 pm

MY TREASURE
By
Floria Laldansangi




Chapter < 33 >


MAYA...POV


"Mamma, engtik ah nge inlo haw dawn, Bryan ala awmlo ami?" Brayden-a leh Bryson-a ṭawng chu ka ngaithla kar a, ka mittui bawk a rawn hnai leh tawh, thaw la kawk a thaw hakin, inchunglam ka melh deuh vang vang a, "kanlo haw ṭep tawh alawm," Ka ti sep bawk


Nathan-a bathroom aṭanga rawn chhuak ri ka hriat rualin ka lam rawn pan hnai in ka chhip ah a rawn fawp vang vang a, "duhtawk tawh rawh u, a tlai tawh," Ti supin khumah a lawn kai zui zat a


"Brayden, Bryson, i Pi thu lo awih angche u, U Muani leh Pi Siami thusawi pawh hnial loh tur, damdawi a hunah tak lo ei bawk la aw Bryson," Ka tih leh chuan, "ka ei ziah," A rawn ti lang lang a, ṭah nuih hakin, "mu tawh rawh u, a tlai tawh, muttui u aw..." Ka tih zawh rualin, "Mamma, naktukah Bryan-a kan be ve thei tawh ang tiraw?" Bryson-an a rawn tih chuan Nathan-a mu chu ka melh chhuk zawk a


Thaw hakin, "umm, thei tawh ang, mu tawh rawh u," Ka ti chhuak sap a, "yes, kan be thei dawn a ti," A ti ri chu ka hre thei, chhan pawh min chhang letleh ta lemlo chuan a off ri zui tut tut bawk a



Phone chu side-table a dah hnakin, "naktuk chu dár rengzah nge kan hmuh theih ang?" A hranpa a hmu tur pawh kan ni chuang law.

Nathan-a chu ka lam ah rawn tawlh sat sat a a bula min pawt mu pahin, "tlai dar 2 ah, lungngai lutuk tehsuh Bawihi, Bryan chu a ṭha alawm," Ti sup a kut ka kawra zenlut nghal zatin, ka hnute a ṭham zui zat a



En chho hâ in, "engtin nge a ṭha tih i hriat? Nathan, ka lakah hian zep inei tiraw?" Tih leh a kut dah sawn ka tum chu hum na salhin a thaw chhuak hak a



"En zui turin mi ka tir alawm," Min rawn melh zawka a tih leh sup chuan ka melh rum nghal ram ram a, rilru hah, thawpik leh Bryan ngaihtuah reng rengin ni 4 lai mai ka awm tawh a, min hrilh ve tur a nia


Lungawilo zeta hawisawn ka tum ka che chu min kuahbet vatin, "ok, sorry, ka hlat ah mu suh, ni 3 chhung kha chaw a eiin, a mu theilo a ni âwm e; Mahse, tunah chuan doctor in a enkawl a, a ṭha tawh, lungngai suh," A tawp lam chu a ri chhuak sup tak tak chauh a ni, thup ṭhen ala nei tih hre tho mahila, ka zawt lui ta duh biklo, ni 4 chhung khan a buaiin, Bryan case mai piahlam ah, Maria-in Media ho bula a thusawi vang khan a company pawhin a tuar hle tih ka hria, zan a mu tamlo a, hna nen Bryan nen, a hah ka hmuh vang a ni


A kawng a kuahlet sat satin, "Nathan, Bryan hian min huat i ring em?" A âwm ah ka khabe nghatin ka melh chho ralh a



"Ka hrelo le," Nathan-a pawh chuan ka rilru a awm ang tho hi a ngaihtuah ve tih ka hria, Maria-i mizia kan hria a, engtiang takin nge kan chungchang Bryan a hrilh anga, eng thu hmangin nge a thlem ang tih lah rin thiam harsa a ni bawk silo




Ka hmui a rawn fawp zauhin, "muhil tawh rawh, naktukah engkim kan hre dawn alawm," Ti supin min kuahzui hlu hlu bawk a


Ni e, Bryan ka ngaihtuahna lamah zan ka muhil theilo a, zanin erawh ka mut a ngai a ni, naktuk maiah Bryan ka hmu dawn si a


"Nathan..."


A muhil tawh em tih en tum in ka dak chho a, a mit chhingin a thaw ri suk suk mai, "ummm," Ka mut ṭhat leh ruala a rawn tih chuan, "Franky chuan ala rawn call letlo che em ni?" A thaw chhuak hak a


Min kuah nghet sat sat pahin, "ummm," A taksa a chau tih ka hria, zan tam keimah ang maiin a mu tawhlo a, hna a thawk bawk si, a chau ngang a nih ka ring, kuah ṭha pahin keipawh chu mit ka chhing zui ve nghal vang vang a



"Ka hria e, a vaiin a pasal Amex-a thawn angche, a vaiin," Nathan-a aw thum dut dut chu ka hre ruai ruai, meng mang hleilo a ka mutna bul dap rak rak a, a ruak hiau tih ka hriat in ka in her thak a, ka meng zui diar diar bawk


"A ngailo kha chu, kha chuan eng case mah a keng tel dawnlo, financial embazzlement kha chuan kum 3/4 leh pawisa chawi a ni dawn alawm," Nathan-a chu ka en ran a, laptop a hmeh mawlh mawlh a vangin ka harh tih a hre hauhlo tih ka hria



A hnathawk chu khum aṭangin ka en kar a, tun karkhat dawn chhung hian ka lo en chiang ngai reng renglo a, a hmai tla duk chu ka hmu ve chauh a ni




"Suraz-a thihna ah a inhnam hnawih avangin a lober ah kum 5/6, financial embazzle vangin kum 3, a dang te nen kum 10 tal jail ah kan tán tir dawn lawm ni?" Henry-a aw a ni, speaker a a dah avangin ṭawng chu ka hre ve thei


"Bryan..." Nathan-an a tih leh rualin, ka ṭhu tung nghal vat a, Nathan-an min rawn en vat in, "i harh amaw?" A mitmeng chu a buai zawkna in rei erawh a nilo, ka hmu sual a nih ka ring


Ka bu nghat a, "Maria-i chungchang em ni?" Ka tho chhuak a, "ummm, Bawiha chawhnu ah kan in hmu dâwn nia," Tih leh phone chu a off zui zat a



"Bawihi hna tlem kala nei a, breakfast nangmah in ei mai ta che, Angel a rawn thleng ṭep ang," En pawh min en lo



Ka kâ a tuilo in eng eimah ka chak bikloh avangin fridge a yogurt chu la chhuakin Nathan-a lam panin dawhkanah chuan ka dah a, "heihi kan ei mai dawn nia," Tih leh ka nui seih a, rawn nui ve suk a mit zîmsan a min en chuan, "ka tel lovin i ei theilo tih i sawi tumna em ni?" Thawp sapa a rawn tih chuan ner nawkin, "ka ril a ṭamloh vang zawk," Tih leh yogurt chu ka hawp zui nghal pawk bawk a, a nui zui hawk hawk thung




"Bryan hmel ka hmu ngam a ngem le," Seat hnung atanga Angel-in a rawm tih deuh vawng vawng chuan ka thaw chhuak leh hak a, Hotel room kan chhuah aṭangin ka ke hmawr leh ka kut hmawr hi a hit vawng vawnga, ka zâm em em ringawt chu ka hrethiamlo



Nathan-a ka lam rawn hawi zawkin steering a chelhloh na lam chuan ka mal chunga ka kut chu a rawn hum vang vang a, hma lam en ran chungin, "hahdam rawh," A tih sup chuan kalo bu nghauh nghauh ringawt



Car ding dat ah chuan hawi chhuakin, thaw ka'n la leh ham ham phawt a, Nathan-a te car aṭanga an chhuah hnu pawhin kala ṭhu ran thung, kawngkhar Nathan-an rawn hawngin, "tirawh le Bawihi, khatiang hmel kha i fapa i hmuh tir theilo a nia," Nathan-an a rawn tih dut chuan, "fapa" a tih ri chuan ka lungphu a ti rang nghal dawt dawt thei, ka mittui a rawn hnâm zui sawk bawk a


Khaplet zek zeka ṭah nuih sen sen chuan, "ni e, ka intih chak angai, ka fapa lak let nan," Ti rilru sap sap chuan ka pen chhuak a, kan sirah car a rawn ding zui ve zat bawk



Bryan-a rawn chhuak ka hmuh rualin, "Bryan," Min rawn en vat, ka ngaihbel nge ka hrelo, a cher riau in ka hre bawk



Maria-in kaibet chuan, "kal rawh," Tih leh step ah chuan a kai chho dawt dawt a, Bryan-a chuan min rawn en ṭawk ṭawk bawk, ka ṭah chhuak lutuk chu ka na in ka tawt up up thei


"Kal ang u," Henry-an a rawn tih chuan ka âwm tawt lutuk leh thawk harsa lutuk chu tihreh tumin thaw ka'n la vang vang a, "kal ang," Nathan-a, min dawm reng tu chu melh zawkin ka ti chhuak sep a


Room chhung kan luh chuan Child Services Worker hma ah Bryan chu alo ṭhu ran tawh


Kan luh rualin Maria-in minlo melh ram ram na pawh chu ka melh let hmanlo, Bryan-a lam chu ka en ding ngar ngar a, Nathan-an sofa a min ṭhut tir te chuan mi â ang maiin Bryan bak ka en lo


"Bryan, hei hi i ziah a ni tih ka lo hria a? Tu te nge an nih?" Zaidam zet a hmeichhia in a zawh chuan Bryan-a chu a ngawi ngal a


"Bryan..." A ko nawm leh sap



"Mummy Maria leh Uncle Amex," A ṭawng ringlo na in hre chiang tak ka ni, hre chiang tak


Ka kut pahnih chu suih zawmin ṭang zet chuan ka ṭhu khawng ngawt ngawt a


"A nih chuan tuna i awmna mummy Maria bul chu nuam iti em? I daddy bulah let leh i duh em?" Ka thaw em pawh ka hre tawhlo, ka thaw tawhlo hrim hrim zawk


A chhang dawnlo emaw tih hnu fe ah, a lu a rawn thing mat mat a, "Mummy Maria bulah awm chhunzawm i duh itih na em ni?" A tih nawn leh chuan muangchangin a bu nghat nghat a, ka zawi hnawk, ka lu thing mat mat in, "a nilo, a nilo, Bryan, min en rawh, Mamma en chung hian sawi rawh," Bryan ṭhutna lamah chuan ka tlan phei nghal ruak ruak a


Ṭhu hniam rawk rawkin, Bryan-a ka lam a pawr her chuan, "min en rawh Bryan, keimah Mamma," Mittui tling pamin, mitmei a thlem phah chuan ka en a, a mit a khap zuk zuk a, Maria-i lam chu a melh zawk zawk bawk, ṭawng a duh niin ka hria; Mahse, engvanga engmah sawilo nge a nih...?



"Mrs. Lal, hetiang hian iti theilo," Tih leh Bryan ka dawmna CSW-in a rawn phelh chuan chhuat ah ṭhu thla hnawkin Bryan-a chu mittui nen ka melh chho a, a sira nui sawnga rawn ding Maria-i melh hrawkin, "Madam, Bryan hian dawt a sawi a ni, enrawh a kut hi, hlauh a nei a ni, ka chiang a ni," Ka hawi kuala, Nathan-a ka bula rawn ṭhu thla in, "Bryan, Brayden leh Bryson-a i ngai em?" A tih sup chuan Bryan-a mit ah chuan mittui a rawn parawl ṭuam ṭuam chu mittui kar aṭangin ka hmu thei


"En rawh, ka sawi dik a ni, Bryan hian dawt a sawi thiamlo, dawt a sawi a nih chuan a kutzungpui hi a sik tlat ṭhin a ni," Ṭah aw ṭuau a ka tih leh Maria-in Bryan-a pawtsawn vatin, "engthu lawilo nge in sawi ka hrelo, helai hi Court a nilo a, in duh leh rin thu mai mai sawina hmun lah a ni heklo," Ti hriam hrakin, Bryan-a a pensawn pui chu ding chhuakin pawh let ka tum a


Maria-i body guard-in ka kut a rawn man chat chu ka en hrawk, Nathan-an na zeta a kut lo phih thlaksak ve chuan Bryan chu ka en leha, "Bryan," ka au deuh vak


Ka lam a rawn hawi a, mita min ngaihna leh hlauhna in pawlh chu chiang takin ka hmu thei, ka mittui chu ka theih tawpin ka damg ve bawk, "reilo te Mamma hi lo nghak rawh aw, min ring tiraw? Min ring rawh, kei leh Daddy, Brayden leh Bryson te nen kanlo hruai angche, kan haw anga, helai hi kan hawsan ang, minlo nghak rawh, reilo te, reilo te chiah a ni ang. 1, 2, 3 hi 1000 thleng vawi 10, vawi 10 i chhiar chhuah hunah ka rawn hruai angche," Maria-in a pawt chhuak dawr dawr tawh chu mittui tla zawih zawih in ka au a, a kal lianpui meuh chuan ma zawi hnawk thei



Angela-in mittui nen a min rawn kuah ve chuan, ka ṭap khur nghal der der a, Nathan-an ka hnungzang a rawn chul hliau hliau phei chuan ka ṭah a chhuak zual takzet, ṭah chhuah hawm hawm mai ka duh, vawikhat chauh kuah ka chak a sin maw le...!



"Bawiha, doctor kha kan hre tawh a," Henry-an a rawn tih sup chuan Angela-i inla hrangin mittui hru hul thuak thuakin Henry-a chu kan en a, "ka hria e," Tih leh Nathan-a chuan min rawn en zawk a


"Bawihi, Angela leh Henry-a rual hian i let thei angem?" Min kalsan a hre tih ka hria; Mahse, a mi hmuh tur chu a pawimawh hmel viau bawk si


"Kalrawh, ka ṭha a lawm," Ka aw chhuak pawh ala diklo, alam hawi a min kuai herin min kuah vang vanga, ka chhipa fawp zui vawng vawngin, "nang leh Bryan-an in tawrh ai a let tamtak in ka rul let ang, min ring rawh," Seh chilh zeta a rawn tih chhuah hrawih chuan kuahlet pahin, "ka ring che alawm," Ti supin ka inla hrang nghal a



Harsa tih hmelzet a nuiin, "ka rawn let harlo ang," Ti sup chuan Angel en zawkin a pen chhuak nghal pawk pawk bawk, eng doctor nge a hmuh dâwn ka hrelo ; Mahse, tunlaia a thil tih zawng zawng leh mi hmuh zawng zawng hi Maria-i nen inzawmna an nei vek tih erawh ka hre thung



Zan dar 7 rik dâwn ṭep ah Nathan-a rawn lut ri ka hriat chuan ka mu lai la ṭhu chhuak vat a, a mit ko kak duai mai leh kut ṭang pilh phung mai ka hmuh rualin alam a pan hnai nghal rawk rawkin, "Nathan, engthil nge i chungah thleng?" Ka en kual nghal thuak thuak a



Nui ri hukin, "ka ṭha," A tih chuan ka nur nasa mai, a ṭhalo tih ka hmu reng a


"I ṭhalo tawp a nih hi," Tih leh sofa lama pawtin, ka ṭhut tira, ka sir a phone chu ban in, "room 345 ah first-aid kit min rawn pe thei angem?"



"yes, Ma'am."


Nathan-a chu ka melh lehnghal a, "tuivawt ka rawn la ang," Tih leh tho in fridge ka hawng nghal a, ice cube chu la chhuakin face towel ban in ka tuam a, Nathan-a lam ka pan leh chuan ka che vel chu ngawi rengin minlo en ran thung


"Engmah i sawi dawnlo em ni?" A mit ko ka deh rualin ka ner zui sawk, thaw hakin, "Maria-in, Bryan doctor dahbo a tum khanglang alawm maw le," A tih nghut chuan en kawkin, "dahbo duh chhan tur a nei em ni? Bryan-an dikloh na a nei em ni?" A kiai suk a, kei erawh hlauhna in min tuam nghal


Kawngkhar a rawn rik tak avangin tho vatin kawngkhar hawng chuan room service in first-aid kit min pek chu la in lawmthu ka sawi nghal sep bawk a


A kut pem chu damdawi hnawih pahin, "Nathan, ka zawhna chu," Ka melh zawk bawk

"Naktukah kan hria angchu," A ti sup chuan thaw hakin, "Doctor chu a him tiraw?" A bu nghat a za lo zetin a kiai zui sawk bawk, a rapawm lek lek zawk



Nathan-a a in tihfai a, mut tur a inthlak kan tum mêk laiin Nathan-a phone a rawn ri ral ral a, "Hello," A tih sup chuan inthlak ta mailo chuan kalo en ve kar a



"Ka hria e, zawn chhunzawm angche," Tih nghuta phone dah chuan, min rawn en a, "Bryan a bo," A tih chuan ka thaw ka hip let nghal kawk



"Maw...?"



Nathan-a chuan jacket phawrhin ka kawr bân tlawn chu la in min hak tir sawk sawka, "kawng lakah ka hrilh dawn che nia," Tih leh min kai chhuak nghal dawr dawr bawk



Car kan ṭhut luh rualin, "engtia bo nge? Tun ang zan dar 10 dawnah khawnge a awm anga?" Ka hlau lutuk chu ka khur chhuak lo chauh




"Maria-i vengtur a ka tih kalsawn chhung in a ni awm e," Tih leh phone la kângin a pickup nghal a



"Khawi ah maw?" Nathan-a chu thin phu dep dep in ka lo en ran thung


"Ka hria e, ka rawn thleng nghal," Tih leh phone dahin chak lutuk in a tlan chhuak nghal a


Ka ke te chu a khur hlawk hlawkin nia ka hriat ni...! Bryan chungah engthil nge thleng ang? Thil ṭhalo a thleng angem? Tih ka ngaihtuah phei chun thawk pawh ka thaw theilo


car tih din tuar rualin Nathan-a chu a zuang chhuak a ni hrim, keipawh chu ti tho


"Boss, helai bawr CCTV ka en kual tawh a he restaurant ah hian Maria-i nen lutin Maria-i chauh rawn chhuak hmuh a ni, i fapa chhuahlai hmuh tur a awmlo," Vai ṭawnga alo tih zat zat chuan ka kaihza tha a ṭhum leh mai dâwn in ka hria



"I sawi awmzia chu a chhung ah sawn ka fapa a awm itihna em ni?" Nathan-a chuan a ti hrawk a



"Restaurant neitu ka call tawh a, a rawn thleng ṭep tawh ang," Nathan-a mitirh bawk chuan a ti leh a, ka kut suih zawmin, "Bryan, Bryan...." Ka phun sap sap, ka mittui tla tur ka khap let sawk sawk bawk



20mins dawn hnu ah car a rawn din rualin vai palian ve deuh hi a rawn chhuak a, "min rawn zui rawh u," Tih leh restaurant lam a pan chuan ka pensawn mai theilo, ka kurh nasat lutuk vangin ka ke ka ti che hleitheilo a niber


Nathan-an min rawn kuah a min pensawn pui a, vaipa chuan restaurant kawngkhar chu a hawng rak rak a, light a On zui iar chuan ka hawi kual nghal vut vut a, "kan khar dawnin kan check veka, naupang kan hmulo a ni," A neitu pa in a tih rualin



In hnit feih feih ri ka hre zui zat a, chhuat a ṭhu hniam sawt sawtin, "Bryan, ka ṭawng i hre thei em, Bryan, keimah Mamma.." Ka au zui lang lang



"Mamma..." Bryan-an aw khur der der mai a min auhna lam hawi vatin biang lum thla pup chuan ka bawkvak phei ruak ruak a, restaurant chhung kil zet ah, dawhkan hnuaiah mittui nen a lo ṭhu tawm chu ni in


A bul ka thlen ruala chhuata ṭhu sawp hnawkin ka lamah ka pawt a, ka kuahbet nghal vawng vawng bawk



In hnit hlawp hlawpin, "engtin nge hetah i awm theih, tinge puitu tur che i auhlo a," Kuah reng chung leh ṭap pur chung chuan ka ti chhuak a


"Mamma, min duhlo kha," Ṭap chunga a rawn tih chuan namsawn vatin, "engmaw i sawi?"


Mittui nem min en ve bawk a, "min duh tawhlo a, mi hnenah minpe tih a sawi alawm, min hmangaih tawhlo tih a sawi alawm," A ṭap chuak nghal uah uah bawk a


Mittui tla zawih zawih a kuahbetin, "a nilo, ka duh che lawm, ka duh che, ka hmangaih che Bryan, ka hmangaih che," Ka lungphu zawn chu vih sawk sawk ang mai a ni, ka hlauh ang ngei ngeiin thu alo hrilh vang a nih chiah hi


"Eng nhe hetah i tih a Bryan?" La kuahbet chung chuan ka ti chhuak leh a, min kuahlet ve ṭau chuan, "Brayden-a te bulah haw ka duh alawm, helai ah hian ka awm duh tawhlo a lawm," A ṭap kbur dar dar bawk, ka na lutuk chu engmah dangin minti na thei tawhlo ang tih tur a ni



"Bang tawh rawh le," Keimah pawh kala bâng hleitheilo a ni



Bryan-a ka pawmlai Nathan-a rawn la in min kai tho nghal a, kawngkhar lam aṭangin, "Bryan..." Maria-i rawn tlan lut chu en hrawka Nathan-a min vawnna phih sawkin pan hnai set set chuan, ka theih tawpa na a beng thle sawkin, "eng ang Nu nge inih a? Engtin nge i theihnghilh thei?" Ka au khum tuar



Hmai dawm vawng vawng a min rawn melh let hrawka, "nang, zawng uicho nu," Ti tuara min ben let a tum chu Nathan-an lo man in a thehsawn lawp a, a kat zui nawk nawk bawk


"Bryan kha minpe rawh," A rawn au chhuak tuar


Bryan lah chuan hläu tih hriat lutuk in Nathan-a nghawng ah a kuahbet tlat a, a taksa khur zawih zawih chu dailo mahila mit in a hmuh thei, Nathan-a bân ah tui a rawn luang a, chhuat ah a far zui thlerh thlerh bawk

Bryan ka en vat, Maria-i a hläu lutuk a zun a cheh ni in ka hria, Nathan-a pawhin min rawn en ve vat tho



"Zanin aṭangin kan hnenah a awm ang," Nathan-an bul zet leh thu tawp a ni tih hriat zet a a ti hrawih chuan Maria-i chu za lo zet in, ka ben na hmai sen hlar leh vung luk mai, mit sen râm a rawn en hrawk hrawkin a nui zui uar uar a, "Court thu chhuak kha i theihnghilh em ni Nathan?" Kha lutuk a a rawn tih chuan Nathan-a bek chu a pawng nghal ṭawlh ṭawlh, a kut a hum ruh ngar ngar bawk



A bân a thisen zâm rawn puar chhuak te chu a keh mai ang tih a hlauhawm mah mah zawk



"Court emaw dan leh hrai ka ngaih pawimawh ring suh Maria, penkhat pawh a Bryan lam i rawn pen leh a nih chuan i thiamloh tih hria angche," Seh chilh rap rapa tih leh hrawihin, ka bânreka rawn hmer a min pensawn pui chu, Maria-in minlo pawt ding dawt a


Nathan-an na lutuk a Maria-i lut lo phihsawk a, restaurant bâng lamah nawr kal dawt dawt chuan, a nawr bet a, Maria-i chu a che thei tawhlo, a mitmeng a hlauhna pawh chiang takin ka hmu thei


Maria-i body guard rawn tlan lut chu Nathan-a mitirh khan alo dangbet ve vat bawk, restaurant neitu vai chuan kan awmdan chu a hlauh hmel takzet, a tawlh hnung nghal hrut hrut mai


A rek bet leh mai rawn a ka hriat vang leh, a rek leh tak tak a nih chuan a rek hlum ngei tawh dawn tih Nathan-a hmelah ka hmuh avangin ka pan hnai vat a


"Nathan, Nathan, duhtawk rawh, Bryan hi letpui vat zawk ang," Maria-i chu a mittui a luang ngiai ngiai a, a inseh ruh ngar ngar tho mai...!



Nathan-a chu a thaw ri hrawih hrawih a, "daddy..." Bryan-an ṭah aw ṭuau alo tih ve chuan chawpchilhin a inthlah dul ve nghal riai riai bawk


Thaw leh hrawihin Zanin hian ka thatlo che a nih chuan ka nupui leh ka fapa vang chauh a ni tih hria angche," Ti hrawih a chhuat a theh vial thla nawk chuan ka bân ah rawn chelhin min pawt chhuak nghal dawr dawr a


Car a min ṭhut tir chuan ka mal chungah Bryan a rawn dah a, "Maria-i zui chhunzawm angche, zanin bak i zui angai tawhlo ang," Tih leh car kal hual chuan a rawn ṭhu lut ve zat nghal


Bryan khur nasa lutuk chu ka kuahbet a, "Bryan," Ka âwm ah a hmai a phum bet tlat

"hlauh tur a awm tawhlo, kan haw tawh dawn alawm," A chhipah ka fawp a, Nathan-a erawh a thinrim ala inbeng dai chiahlo tih hriat takin a bek leh steering chelhna bân chu ala pawng khalh ṭang mai




Hotel kan thlen rualin Nathan-an kawngkhar a rawn hawng a, "ka lo pawm dawn em ni?" Ka lu ka thing ringawt



Kan room lam kan panlai chuan, Bryan tukkhum lam ka khawih fuh palh chuan lift hma ah ka ding dat, "heihi eng nge?" Bryan tukkhum chu ka en a


Nathan-a lam ka hawileh, "Doctor chuan kawngkhar ah a tauh thu a sawi a," A ringlo tih hriat takin a ner zui sawk bawk



Ka thawk a sak leh nghal ṭalh tawh, "Maria-i tih chu a nilo ang tiraw?" Lift ah min luhpui a


"Nilo se doctor dah ṭhat a tum chhan tur a awm hleinem Bawihi," Min rawn melh zawk, Bryan a sam ah a tuai zui zauh bawk


Sawi tur pawh ka hrelo, a fapa a ni, thla 9 chhung a pum chhunga a pai, thihsual a a hrin hi, a hmangaihlo a nih pawhin, a mihring pui leh naupang mai ala nih vang hrim hrim pawhin khawngaihna a lantir lo chu mak ka ti pawh a ni tawhlo, kei ngei pawh hi minti hläu pha in, ramhuai ah ka ngaiber tawh....!




"Bryan, inbual lawk ang hmiang," Room kan luh hnuah pawh ala awm hrang duhlo, minla kuahbet tlat



"A kekawr thlak sak la, hrufai mai rawh, vawikhat inbual loh vangin kan thilo ang," Nathan-a en chuan ka nui ringawt a, amah pawh hian inbual a peihloh a piangin, "hnuk a hlat emai tih leh kan thi lo ang," Tih hi a ching a



Bryan-a, Nathan-a nen kan tihfai hnu ah khumah kan pahnih chuan kan mu a, Bryan chuan engmah ala sawi lehlo reng reng, ka taksa si lo in a awm duh heklo


Nathan-a erawh phone in tu tu emaw ala be kual char char, naktukah court theihnan request a siam ni in ka hria


Bryan sam chu ka chul hliau hliau a, dar 1 a ri thuak tawh, ka lo chhing ve sek a ni ngei ang, "ka tihpalh, ka tihpalh mummy, Mamma ka ngai tawhlo ang," Bryan chu rawn khur dawt dawtin a rawn ṭap chhuak hlawp hlawp bawk, ṭhu tung hlawlin, "Bryan, Bryan harh rawh le bawihte," Pawm tho in ka kuahbet a


Nathan-a ka bulaha rawn ṭhu ve nghal zat, ka mittui bawk chu, engtia tunlai chu mittui ngah em em nge maw ka nih hrep ni? Hetiang hi ka ni ngai silo a


"Eng chiah nge maw i chungah a tih le?" Ṭah aw ṭuau chuan ka ti chhuak a, Nathan-a pawhin Bryan ka kuahna kut a rawn hum ve vat bawk



"Mamma," Ṭap ṭuau a a rawn tih chuan khuma ṭhut tirin, mittui vanga hmai berh niaha min rawn en chho in, "ka Mamma ini tawhlo ami?" Ka mittui khap let sak sak a, Bryan mittui hruk hul sak pahn, "ni e, i Mamma ka nia, Brayden leh Bryson-a Mamma pawh, Daddy pawh in daddy ala ni reng alawm," Nui lui sänga ka tih chuan a mittui bawk a rawn luang ngiai ngiai leh a, hetiang tak hian Bryan hi ala lungchhe ngailo, naupang luhlul tak, mittui ti tla duh mai mai ngailo a ni si a


Men puau puau in, "Mamma haw ka duh tawh, Brayden te bulah ka haw duh tawh," A ṭap chhuak nghal uah uah bawk, ka lam a pawt hna in, "kan haw dawn alawm, kan haw ṭep tawh Bryan," Mittui tla ṭeu leh hrawk na ṭeu chuan ka sawi chhuak a



Nathan-an phone a message rawn lut ri chu en vatin min rawn en leha, "thawhṭan ah court vawihnih na sawn a ni," A rawn tih chuan ka ṭah nuih hak, ka läwm lutuk chu ka biang a rawn lum thla pup bawk a


Bryan kuah nghet sauhin, "kan haw dawn bawihte," Ka ti chhuak ṭuak bawk, Nathan-an min rawn kuah a ka chala fawp ve pah chuan, "thawhṭan chuan engkim a fel vek tawh ang, ka tiam a che u," Nghet charh maia a tih chuan mittui nen uar zetin kalo bu nghauh nghauh thung

Nathan-a mitmeng ah erawh huatna leh Maria-i na thei angbera rulh let a duhna bak hmuh tur a awmlo


Engthil sual zo zai nge Maria-i hian a tih ka hrelo na in, Nathan-a hian awlsam tak erawhin a chhuah mai mai dawnlo tih a hmelah hian ka hmu thei




<><>~><>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 31st, 2020, 5:06 pm

MY TREASURE
By
Floria Laldansangi




Chapter < 34 >


MAYA...POV


Zinglam dar 3 pelh ah pawh Nathan-a nen chuan kanla mengkar mai, mu turin kan inti ve ve tak na in, a tu ve ve mah mut kan muhil theilo, Bryan-a rawn phu leh zuk zuk ṭhin leh a khat tawka khur leh hlawk hlawk ṭhin chuan minti mu theilo a niber



Zinglam dar 5 rik dawnah ka chhing ve sek a ni ngei ang, Bryan-a nui ri ar ar leh, "Brayden, Bryson kalo haw ṭep tawh, nichin ah daddy in min hrilh a, Saturday a nih leh hunah kan haw ang a ti" Lawm tih hriat zeta a ti ri ka hriat chuan meng hleilo chuan ka nui sen sen a


Nathan-an min rawn kuah sat sat chu ka lo kuahlet ve vat, a ni pawh a chau a niang, ala tho biklo, "chawhnu ah doctor kan hmuh a ngai a nia aw Bawihi," Kala meng chuanglo



"Daddy, ka ril a ṭam tawh e," Bryan-a chu khumah rawn lawn kaiin kan in karah a rawn inzep ṭalh ṭalh a

mut khamlo, mit thîp zeta mengin, ka khap deuh chap chap bawk


"Ei tur an rawn dah ṭep ang," Nathan-a lam chu ka melh zawk, a mit ala chhing reng



Ka harh hma in Bryan alo tifai in, a nau te alo biak tir tih hriat takin Bryan-a hmai pawh a fai veng mai


"Mamma, Bryson-a te school an chawl tawh sia anlo kal ve theilo ami?" Ka sam chu a khawih niap niap a


Mit chhing leh a kuahbet a, mu ṭha sat sat in, "kan haw dawn a ni lawm ni? Kan haw chuan anlo kal a ngai hleinem," Ka tih chhuah sap chuan rawn nui deuh ar ar in, "a nih chuan Patel Palace ah ka let tawh dawnlo tak tak tiraw Mamma?" Hlim tih hriatzet a a rawn tih chuan muangchangin ka meng a


Nathan-a pawh a rawn meng ve zui zat bawk, Bryan chu en in, "Patel Palace a ni tih i hriat amaw?" A bu nghauh a


"Maria-in i ta vek tur minti alawm ; Mahse, ka duhlo ka ti tlat Mamma," A tih chuan nuih sen sen a a sam a chulin, "umm, mahni ta lo chu neih tum tur a ni ngailo. Mahse, Maria-i te i tia...?" Ka tih chuan ner nung nungin, "Mummy ka ti duhlo alawm," Zawi sap a hnuailam melh paha a tih chuan Nathan-an, "Maria-i alawm, a hminga a koh loh in," Ti hluk in a tho zui nalh a


Kawngkhar a rawn ri ve chiah nen kawr pawh ha lemlo chuan kawngkhar lam a pan zui zat bawk a, Bryan-an ka khabe hnuai aṭanga min rawn melh chho kiau in, "Mamma, ka Mamma ini ve tiraw?" Mit khap fak fak a a tih chuan en a nui pahin, "ka sawi tawh kha, Bryan, Brayden leh Bryson-a te Nu chauh ka ni ka tih kha, i theihnghilh tawh em ni?" Ka tih chuan a lu a thing nawk nawk a



"Mahse maw Mamma, Maria-in maw ka pum chhungah in pathumin in awm a tia, i pum chhungah ka awm ve em?" Chhan ngaihna ka hre tawhlo, kumthar June thla ah kum 7 an tling dâwna, a bikin Bryan-a phei chu a fing rapthlak si, a zawhna leh ṭawngkam felfai thlàp maite hian min dang leh der ṭhin


"I Mamma pum chhungah thla 10 i awm, breakfast rawn ei rawh u," Nathan-an nui vur vura a rawn tih chuan lawm zet a in perh tho at in a zuang thla nghal a, keipawh muangchangin ka tho ve bawk


Engtik ni ah emaw an hringtu nu diktak hi anla hre chuak a nga, engtin tak awm hlawm ang maw? Tuna thil thleng nen phei hi chuan Bryan-a tan chuan a Nu hi a haw hlenlo ang tih pawh a sawi theih siloh a, engpawh lo ti in, eng ang sual pawh nise heng triplets hringtu a nihna a bo chuang bawk silo...!



"Naupang thusawi te anla thutak ngai em ni? Kha ei rawh," Tih leh sandwich chu ka kutah a rawn dah a, lo nui seihin, ka thlek deuh vang vanga, "thla 10 nau an pai ngai em ni?" Ka tih chuan nui chhuak hukin, "thla 10 a ni lawm ni?" A tih chuan ka nui ve hak a


"Ka ha pawh kala nawhloh hi," Tih leh sandwich chu pe letin ka tho zui zat bawk a, Bryan chu a ril a ṭam ngang a nih ka ring, a ṭawng tawhlo reng reng, mushroom omelet chu a ei hmawk hmawk mai



Ka intih fai zawh meuh chuan an pafa in anlo in ha fel diam tawh, breakfast pawh kala ei ve lo a nia



"Mamma, Daddy nen kan chhuak dawn," Phur zeta Bryan-an alo tih chuan Nathan-a ka en vat a



"Hotel hi ka'n fan pui ange ka ti, breakfast lo ei rawh, kan rawn let harlo ang," Ka hmuiah a rawn fawp zauh a, ka bu nghat ringawt thung



An chhuahfel rualin ka breakfast tur anlo khuh ṭhat thlap chu hawnga ka nui zui sen sen in ka ei zui zat bawk



Breakfast ka ei mawlh mawlh laiin kawngkhar a rawn ri dawt dawt a, hawi vatin, Nathan-a te pafa rawn uang emaw ka tih avangin lu thing mat mat pah chuan, "rawn lut mai mai teh u," Tih leh ka thil ei bawk chu ka chhunzawm lehnghal



"Lalhriatpui, kawngkhar hi hawng rawh," Maria-i aw a ni, kawngkhar a chhah ṭha viau na in ka hre thei tho mai


Ka ṭhu ngil nghal at a, ka phone ban mai ka tum chu ka kut la let lehin ka thaw chuak hak, Bryan-an Maria-i hmel a hmu a nih chuan a hlau lehin a chiai leh dawna ka hriat avangin Nathan-a hrilh duh ta lemlo chuan kawngkhar lam chu ka pan a



Kawngkhar ri dawt dawt hma ah chuan ding a thaw la leh kawkin, ka hawng zui zat bawk



Ka hawn ruala na zeta rawn nam sawkin ka kat deuh dawrh thei, rawn pen lut pahin, "khawnge ka fapa i dah, khawnge Bryan?" A zawng kuala, tumah a hmuh mailoh avangin rum lutuk a ka lam rawn hawiin, "khawnge a awm? Khawnge ka fapa i dah?" Ti tuar a min rawn ban mai a ṭum chu lo tawlh sawn vatin a sofa ah chuan a bawk lo chauh



Ka nuilui hak a, "fapa i nei em ni? Engvanga i fapa chu heta rawn zawng nge inih a? Ahhhh.... Restaurant-ah i theihnghilh leh a nilo maw?" Elhsen zeta tih ka tum vei nen a tawplam chu ka seh chilh deuh rap rap mai


Mit sen râm a min rawn melh hrawkin, "nang hmeichhe naupang mai mai hian min cho hauh suh angche," Ti tuarin dawhkan a ka ei tur awm chu a hai thla rum rum a, thaw hlawp hlawpa rawn ding chhuak a min rawn pan hnaih leh chhat chhat chu cho lutuk in ka en chho ve vah bawk



Hmeichhe säng tak a ni a, a pheikhawk sâng bun nen phei chuan 5'9ft a pel thuak angchu, ka tan chuan dak vah a en angai, ka hlauh phah eih chuanglo



"I tihkeh man saw Hotel i chhuahsan rualin i pe nghal dawn nia, i fapa i zawn zawh tawh chuan chhuak tawh rawh," Tih leh pensawn ka tum chu ka in rin hma in ka tukkhum sam aṭangin min rawn phih dak awrh chu ka rak ve ṭhat a


A kut hniha min kehbeh chuan a bânrek a vuana in her in ka phih sawk a, pheikhawk sâng bun zawk nâ na na chu a din dan nghet heklo, ka sam pawt ṭil ṭhawtin a kat nghal nawk nawk bawk


thaw kawka a lam a pen hnai chuan na lutuk a beng thle sawkin, "kut thlawn hi ka ba ngailo, ka pasal kut thlawn mah ka batloh chuan nang ramhuai pitar mai mai ka rulh letloh chhan tur che ka hrelo," Ti kha hrawihin min rawn bet let a tum chu ka vai thla sawk a



A rinloh lutuka biang lehlam a beng thle leh sawk chu a rawn hawi chhuak hraw mai, "kha kha Bryan kut i thlak vag a nih kha," Ka thinrim lutuk chu keimah pawh ka khur lek lek, Maria-i phei chu mittui nen a khur hlawk hlawk thei, hmui khur dar dar chung leh mittui nen a min melh chuan, "ka that ngei angche, ka that dawn che," Ti tuar tuar a ka lam a kut a rawn lek chhuah chuan tu emaw inna lutuk in a rawn pawt her sawk a



Chhuatah a vial thla tawp bawk, phawk zeta ka hawi chhuah rualin Nathan-a ka bulah a rawn ding zui zat bawk a, "i ṭha em?" A rawn phun sup, Bryan-a pawm chung chuan min en zui thuak thuak a



Ka lu lo thing pahin, "ka ṭha," Ti sep chuan Bryan ka melh zui zat, a pa âwm ah a hmai a phum tlat a, Maria-i lam chu vawikhat pawh a hawi eihlo, a theih tawpin a pa chu a kuahbet ṭai bawk a



Chutiang tak maia mahni fa hrin ngei maiin a a hläu thei chu a awihawmloh hial zawk, "nufa" tiin sawi ila, tuman an awih heklo ang tih tur a ni, Bryan zun a rawn cheh lehnghal thlawrh thlawrh bawk




Maria-i rawn ding chhuak chu, "theh chhuak rawh u, engtin nge kan phal na lova kan room number te inpek theih, complain ka thehlut bawk ang," Nathan-an ti chhuak hrawihin Maria-in rum lutuk a alo en na chu a en let hrawk a


"Ka fapa kha minpe rawh," Ti leh khar khar chuan rawn ban a tum a. A luhlul zia chu rapthlak tak a ni, ka luhlul ve hle emaw ka tia, Maria-i lakah chuan nep te ka ni, nep te


"I fapa a ni phiangsen lo," A kut a lo vai thla sawk, Nathan-a vawikhat tawh hlek ah pawh a leng dawrh dawrhlo chauh a nia, chuti chung chuan a mitmeng ling hlar mai leh luhlul tih hriat zet chuan ala melh ve ram ram tho



"Eng nge intih, theh chhuak rawh u," Nathan-a aw ṭeng zet mai chu ka phu zawk thei, Bryan paah chu ti tho, rang lutuk in Bryan chu ka lo ban a


Min kuahbet nghal chawih chawih bawk, Maria-i security pahnih in an rawn dawmbeh a, an pawh chhuah chuan ṭang ve nasa teh mahse a hnehlo deuh a ni




"Nathan ka fapa minpe let rawh, ka hrin a nih kha," A au tuar tuar, an chhuah pui rualin Nathan-an, "eng ang Hotel nge ni ngai? Ka nupui chungah thilthleng awmse mawh in phur dawn em ni?" Nathan-a thinrim zia chu pui tak a ni



Hotel manager ni ngei tur a rawn tlan lut zui zat, "kan tihpalh a ni Mr. Nathan, Mrs. Patel...." A tih lai mekin, a kut alo vai thuak a

"He Hotel director hi ka hmu duh," Chang rat mai leh nekluih theih miahloha a tih chuan manager leh staff pahnih ding te chu in melh kualin, "Sir, helam ah min rawn zui rawh," Manager ber chuan a ti chhuak ta sap a


Nathan-an min rawn melh zawkin, "Bawihi, in ṭha ang tiraw?" Bryan nen chuan min ngaihtuah hmel takzet, ka bu nghata, "ka lo buaipui ang," Ka tih chuan thaw hakin manager chu en hrawkin a pensawn nghal zat bawk



Nathan-a te chhuah rualin Bryan chu sofa ah ka ṭhutpui vat a, "Bryan," A hmai ala phum tlat, "Bryan," Ka koh nawn leh pawhin inlak hran emaw ala che duh tlat lo



A taksa pawh ala khur der der mai, "Bryan i kekawr kan thlak a ngai a, i rim chhe mai ang," A sam chul paha ka tih chuan muangchangin a rawn che a, rawn dak chhuakin a mit a hnawm chap bawk


Khawngaih zeta a biang tawn tawn a dawmin, "hlauh tur a awm tawhlo, i him tawh alawm," Ka hrawk a rawn na kham ut ut mai, ka mittui ka khap let sak sak bawk a



Mittui tling pama min en in, "Mamma, ka bulah i awm char char tawh dawn tiraw?" A ṭap zui nghal ṭuau bawk, ṭah chhuak zeta bu nghatin, "tehreng mai," A ai tam thumal ka chhah chhuah chuan ka ṭap chhuak mai dawn in ka hria



Darkar 2 ṭep a thang hnu ah Nathan-a a rawn let leh a; Mahse, a mah chauhin a rawn letlo, doctor a nih ngei ka ring, a rawn hruai luh chu kan lo en hâ a



"Bawihi heihi Dr. Thanat, Psychiatrist a nih hi. Doctor, heihi ka nupui leh ka fapa ka sawi kha an nia," A tih chuan ka ṭhutna aṭanga tho vatin nuisang chuan ka chibai a, Nathan-a en zawkin Room a a rawn hruai lut chu ka hrethiamlo viau mai




"I fapa chu ka be fal fal thei ang tiraw?" Bryan chu a rawn dak a, a phone khawihlai chu, "Bryan, Doctor nen hian in inbe thei ang tiraw? Tlangval ini tawh a, miin an biak duh che chuan i be let tur a ni lawm ni?" Thlem paha ka tih chuan phone chu minpe in a bu nghat a



Nathan-a rawn nui sukin, "ka ring angche," Ti sup chuan alam ah min pawt hnai in, khum lam panin khumah chuan min ṭhut thlak pui a, doctor-in Bryan zawhna a zawh vel chu ṭang ṭûngin kanlo en kar vawk





Patel in a a awmlai a sawi dawn chuan hlauhna in a khat nghal zel bakah, a rilru a awm tak tak a sawi chhuak hleitheilo ni in ka hria, nge ka hresual zawk nge...?



Darkar chanve zet a biak hnu ah doctor chu kan lam a rawn hawi a, a hmel chu a dik hauhlo bawk, "Mr. Nathan," Nathan-a nen chuan kan lo en hau a


"A landan in infapa hi psychological trauma, enuresis, separation anxiety leh reactive attachment disorder, somnambulisim te avangin a rilru a awm leh duh zawng pawh a sawi chhuak theilo a ni, a taksa ah erawh harsatna a neilo a, tun aṭanga treatment a laka, a bul vela awm ten in zir chuan thla 2/3 hnuah ngai a awh leh mai ang; Mahse, physical abuse leh emotional violence a nih angin, chuti mai pawhin ngai a awh ang tih ka chiang biklo a ni," A rawn tih dap dap chuan ka thaw em pawh ka hrelo





Ka thawlo hrim hrim zawk, chu zawng zawng chu khang karkhat lek chhung khan Maria-in a thlen tir a nia, ka in rinhma in ka biang a rawn lum thla pup a


"Mamma, i ṭap ami?" Rang lutuk a hru hul vatin, "Ṭap lo e, ṭap lo e," Ka ti tak na in ka mittui bawk a rawn luang lehnghal zung zung, Nathan-a lam hawi chuan ka ṭap khur zui dar dar a



Nathan-an duat zeta minlo kuah pahin, "Mamma hi a nuamsam vaklo a Bryan, hrethiam rawh aw," A ti thûm dup a



"Doctor kan läwm lutuk a nia, min rawn pan thei a," Nathan-an a tih chuan inla hrang vata in hru hul sawk sawkin, "kan lawm lutuk," Ka ti chhuak ve sap bawk



Nui var varin, "ka hna alawm, in fapa hi naupang chak tak a ni, reilo ah a ṭha em em ang," Tih leh, "ka kal ange," A tih zawmzat a, Nathan-a pawh tho ve zatin doctor chu a zui chhuak a



Bryan-a phone a video a en chu mittui tling pam a en in, "engtin nge khawngaihna nei miahloh a hetianga a siam theih che ni?" Ka phun chhuak sap sap, ka mittui bawk chu a rawn hnai leh ta kuar kuar mai



Sunday zan pawh kan mu lehlo ti ila ka sawi dik ber ang, Bryan lu ana a, nachhawkna nen, damdawi dang nen kan in chhawp rem rum mai, a muhil pawh a pangai chuanglo




"Bawihi, dar 9 a ri dawn, Angela te pawh an chhuak tawh a nia," Nathan-an min rawm sawi dat dat chu meng kawkin ka ṭhu chhuak nghal hlawl a, hawi kual vut vut chuan, "Bryan...." Mit khap fak fak in minlo en kar chu thaw chhuak hakin, "ka reilo ang," Tih leh bathroom lam pan chuan ka inti fai sawk sawk a, breakfast ei sawk sawk chuan, "min kai tho hma lo a," Nathan-a phone khawih mawlh mawlh chu ka melh zawk



Nui suka min rawn melh vang vang chuan, "reilo te tal mu rei turin ka duh che alawm," Rilruih mai a a rawn tih chuan ka thil ei ka haklo chauh, rilruih na hun pawh a nilo, a mahlah chu ala nui zui ang hawk hawk lehnghal a



Hotel aṭang kan chhuah chuan dar 9:30 a ri thuak tawh, dar 10 ah Court ṭan a ni si a, engtin nge maw chung chen chen ka mut theih ni?



Family Court kan thlen chuan Bryan lam ka hawi a, aootkun ngal, "Bryan," A rawn dak chhuaklo hrim hrim


"Ka chhuak duhlo," A rawn tih chuan Nathan-a nen in en in, " Bryan tunbak helai hmun hi i kal a ngai tawh dawn hleinem," Ala kun ngal a



Thaw hakin Nathan-a en chuan, "Bryan, Daddy hian vawiinah misual a man dawna, minlo nghak theilo em ni?" Nathan-a a tih rualin muangchanga rawn hawi chhuak chuan, a bu zauh a, lawm zeta nui pahin, "tirawh le," Tih leh car a ṭanga chhuakin kawngkhar hawnsak chuan ka pawm hma in Nathan-an a rawn pawm chhuak nawlh a, a kut lehlam a ka kut rawn chelhin min pensawn pui nghal zat bawk



"Bryan.." Angela-i leh Henry-a kan lam rawn panin, Angela chuan Bryan chu a pawm zui vawng vawng a, ani pawh a mittui a tla lo chauh



"Lut ang u, Angela, Bryan kha i awmpui dawn nge Maya-i zawkin?" Henry-an a rawn tih chuan Angela-in, "ka lo awmpui ang, Maya lut ve tawh rawh," A lo ti vata, bu nghatin, "a nih, ka ring angche, Bryan i Ní tel lovin khawiah mah kal suh aw," Tih leh Henry-a hnung chu kan zui ve vat a


Court chhunga kan ṭhut rualin Maria-i mitmeng thîp zet mai chu kan lam ah a rawn bur nghal va maiin ka hria


Judge rawn luh ruala dingin, ṭhu tura min tih chuan kan ṭhu a, Nathan-an ka kut a hum zui nghal ran bawk



Maria-i lawyer rawn dingin, "your honour kar 2 hnuah court a inlan leh tur tih thu i chhuah hnu ah, karkhat a liam ṭawk chauh a ni a, chumai a nilo ka client hian a fapa nen hun an hmang dâwn chauha, thu chhuak awm lovin an chhuhsak hi thil theihloh a ni a, dan hmang a hremna oe turin ka ngên bawk," Kan lam a rawn kawk va a



"Objection your Honour," Henry-an alo ti vat na in, judge-in, "plaintiff chhun zawm rawh," A tih chuan a ṭhu thla leh a




Maria-i chu alo ner sawk, "karkhat chhung lek pawhin ka client leh a fapa inkar ṭhat chak zia chu Child Services Worker report ah hian a lang chiang viau bawk," Tih leh report chu a submit a


"Chumai a nilo, ni 3 chung eiin leh mut a duhloh vangin Patel family Doctor-in a enkawl a, nikhat lekah a ṭha in ka client ngei pawh Nu tiin a ko thei nghal a ni, he video ah hian chiang takin alang bawk, naupang hian he a pa, convict lo ni tawh bulah hian awm a duhlo tih leh full custody nei tur hian a tling tawklo tih ka sawi duh bawk, tualthah case a neih mai bakah, kut thlak a awlsam tih he thlalak kan en chuan kan hre theiin ka ring, heihi evidence atan thehluh ka duh bawk, Your Honour naupang hian Nu hmangaihna a mamawh a ni, tualthattu Pa ni lovin, a thinrim changin a fapa pawh hi a that maihlo ang tih ka sawi theilo a ni, naupang him nan a Nu bulah awm ngeise ka ti a ni, your honour ," Ti duah chuan a ṭhu let a




Nathan-a chuan ka kut a hmer ngawt ngawt, ana lek lek zawk, Henry-a a ṭhutna aṭanga tho in, "your honour, plaintiff hi zawhna zawh ka duh a ni," Judge lam chu a hawi a


Judge in thu a pek hnu ah, "plaintiff zawhna pakhat chiah ka zawt angche, he lehkha hi i ziah a ni em?" Maria-i chu hawi vahin, "ka ziah a nilo ka tih tawh kha," Vawikhat pawh thaw la lova dawt a dawi chu le...!



"I chiang amaw?" Maria-i chuan Henry-a chu melh hrawkin, "he lehkha ziak lem hmang hian ka fapa min laksak i tum leh em ni?" A ti let khar khar zawk chu Henry-a nui hakin, "tumlo e, heihi Mrs. Maria Patel kutziak ngei a ni, hetah hian Handwriting analysis report a awm bawk, handwriting analysis hi India ram chhunga a thiamber zinga mi a ni tih ka sawi tel hram ange, heihi evidence ah thehluh ka duh," Tih leh a pe zui zat a



"Dawt a nih chu, ka ziah a nilo," Maria-i a rawn au tuar, kan lam a rawn melh hawk hrawk bawk, Nathan-a erawh alo ner sawk thung



"Plaintiff, i ṭhutna ah ṭhu rawh," Judge in tih leh Henry-a chhunzawm tura a tih chuan Henry chu bu nghatin, "heihi Bryan-a medical report a ni a, psychological trauma, enuresis, separation anxiety leh reactive attachment disorder, somnambulisim te avangin a rilru a awm leh duh zawng pawh a sawi chhuak theilo a ni, a awmzia chu CSW report kha pawm theih a nilo, heihi Parents Domestic Violence anih vangin Family Law hnuai a Article 347 hmanga kum 4 chhung jail tán theihna a ni, heipawh hi evidence a tan ka theh lut bawk e." Tih leh a thehlut zat a



Maria-in, "a nilo, engmah a neilo, report lem a nih kha," Ben vial nawk a chakawm mah mah tawh zawk


Henry-an, "ni e, engtin nhe i hriat ang ni, i hmah a mittui a tlakin i benga, a Nu Maya-i leh a unau te a ngaih thu a saaiin a ai na in i hrem bawk, hetah hian Bryan-a hliam tawrhna hnu hma thlalak a awm a, heihi evidence a ni," Ti hriam hrakin a theh lut leh a



"Dawt a nih chu....!" Maria-i nasat zia chu pui tak a ni


Nathan-a chu ka melh zawka, ka hrethiamlo, thildang pawh la thleng zel tur a hria emaw tih mai tur leh Khawngaihna neilo hmel a pu, kum 4 chhung khan vawikhat hetiang hmel hi a put kala hre ngailo



Judge in Maria-i bawk ṭhu turin a ti leh a, Henry chuan chhunzawm lehin, "heihi plaintiff lamin ka client tualthattu a an puhna case a ni a, hei vang hian a fapa enkawl turin a tlinglo anti bawk a nih kha; Mahse, hehi dawt a ni," An phun zui uk hlawm, Nathan-a erawh milim ang maiin ala ṭhu khawng at thung



"He case nen hian inzawmna neilo thil a ni your honour," Maria-i lawyer-in a rawn ti ṭhat a

Henry chu nui leh hakin, "nei tehreng e, he case hi investigation tih leh theihna nichin mai khan hriat tirna ka dawng a, chuvangin helai hmunah hian thu hretu koh chhuah ka duh a ni," Henry chuan a ti ṭhak bawk a


Judge in phalna a pek hnuah vai pakhat rawn lut chu kan lo en ṭhap a, Maria-i mitmu chu a tal rawk rawk mai, hmuh thianglo hmu ang mai a ni, a dang zui lawp lawpin ka hria


Thu hretu chuan thutiam a chham zawh ah, a hming a sawi a, Henry-an, "Mr. Ranaut, kum 4 kalta a thil thleng kha i sawi thei angem? Mr. Nathan hi tualthattu diktak a ni em?" Ranaut-a chuan Maria-i lam a en vang vang a, rapawm zeta kiai sukin, "Mrs. Maria Patel saw a ni tualthattu chu," Ti ban chapin, "khami ni khan kan boss nen zu an in duna, kei nen a sex kan hman hnu ah," Ti leh fak fak chuan ten hmel zetin a ner sawk bawk


"kan boss nen kha waiters kha an that a ni. A ni lawm ni Mrs. Patel?" Maria-i en kar chunga ban chap mai a sawi chuan Maria-i chuan a lu a thing nawk nawk a




"Ka nilo, nangmah a nih kha, ka nilo, dawt a ni," A au tuar tuar, Nathan-a ka melh chuan a lo kiai suk suk thung, mak tizetin ka en a, "Nathan," Min rawn en a, "i sawi tir a ni tiraw?" Ka phun sap, nui nghawr datin, ka kut chu a hmer salh a, "in tawrh ai let ka tawrh tir dawn ka tih kha," Nghet charh a a tih chuan mit pawh khap nachang ka hrelo, ka en tlawk tlawk tawp



Judge in Maria-i ṭhu tur a tih leh hnu ah, Henry-an, "khami ni khan engtin nge Mr. Nathan-a hi puh a nih i sawi thei angem?" Nathan-a lam chu a melh zawka, a hmelah chuan zâmna pakhat mah hmuh tur a awmlo



"Thei e, khami ni khan Mrs. Patel hian a pasal call in ṭanpui na a ngêna, Nathan-an room a thlen kha chuan waiters a thifel tawh, police pawh tumah call ni lovin Mrs. Patel koh hi an ni, cctv leh an vihna chem thlenga nuaibo tu pawh saw hmeichhia tho saw a ni," A tih leh dap dap chuan thawk pawh ka lo thaw lo, an puhna zawng zawng nen chuan engtin nge a tal chhuah tak ang tih zaak ka lo ngaihtuah, engpawh tise naupang, "ka fate" tia ka koh hringtu a ni miau si a. Nathan-a hian ti zawng hian trick a hmangang tih ngaihna ka hrelo hrim hrim



Maria-i chu a rawn au tuar tuar a, "nang zawng uicho, thudik sawi rawh," A au nasa lutuk chu judge in, "dar 2 ah chhun zawm leh a ni ang," Tih rualin Maria-i chu a ṭhutna a ṭangin kan lam a rawn pan hlawk hlawk a


Nathan-a kawr âwm a rawn ṭham nawk nawkin, "itih a ni tiraw? Dawt in minpuh a ni, nang ramhuai pa," Au tuar tuar a a tih chuan Nathan-an vai sawn lawpin a kat zui nawk nawk a



A kawr âwm siam ṭha paha ka lam rawn hawiin a nui suka, tuna Nathan-a hmel hi ka ngaina hauhlo, Drama vela misualpa ang mai a ni



"Lalhriatpui..." Ti leh tuara rawn ban leh a tum chu Nathan-a ding zawta a hrawka rek bet chawt chuan, ka ding ve zat bawk, tihtur ber ka hrelo, he mite pahnih hian minti â zo dawn....!




"Kum 4 liamta khan nang leh Ranaut-a a nih kha tualthattu ni," Ti kha hrawih a theh sawn lawpin a kut chu a tuaifai a, chhuata ṭhu sawp, mittui nen a rawn en tu chu ner khum sawkin, "Ranaut-a chiah ka chhanhim duh tihna a ni mai Maria, that tur che hian ka kut ka hman kher a ngailo tih i hre tawh angchu maw?" A thle baka, he Nathan-a hi mi hran daih a ni, tun a mi hi chuan khawngaihna chhetë mah a neilo hrim hrim




"Hetiang hian min vit theilo, Lalhriatpui thudik sawi tir rawh," A ti leh tuar tuar a, Nathan-a chu nui nghawr datin, "Thudik a? Ka buaina a nihloh chu Mrs. Patel," Tih leh ka bân a rawn chelhin min pensawn pui nghal pawk pawk a


"Min dahbo theih ring suh Lalhriatpui, i tum rualpui theih mai mai ka nilo," Maria-i rawn auh zui tuar tuarna chu hrelo ang hmakin a pen pawk pawk a, kei erawhin Nathan-a hmel dang ta lutuk chu hmuhnawm ti leh hlau zetin ka haw haw thung




~><£<£~£~£~>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 31st, 2020, 5:06 pm

MY TREASURE
By
Floria Laldansangi



Chapter < 35 >


Xx MARIA xX




Maria-i chu thinrimna leh hlauhthawnna in a tuama, a ṭhu te chu che sekin, "ngaihtuah rawh, engtin nge he case hi kan hneh ang tih ngaihtuah rawh," A lawyer chu vin tuar tuarin, a lu thing nawk nawk chuan, "nilo, ti mai mai hian ka tlawm theilo, tun dinhmun thleng tur hian ka bei nasa lutuk mah mah," Phun chhuak mawlh mawlh chuan a lawyer chu a en a



"Ka fapa a ni," Ti chhuak sap chuan a nui zui hak bawk a, "ni e, a thisen a nilo a, chu chu kan sawi chhuah a ngai a ni, chubak kawngdang a awm tawhlo," Mi â ang maia a ṭawng laiin, "kan ti theilo Mrs. Patel, i case hi a serious tawh hle a ni tih i hria em? Tunah hian chhui tur che in thupek chhuah a ni tawh tih, i pasal hlui lawyer sawi kha i hrethiamlo em ni?" Lawyer-in a tih rualin Maria-i chuan dawhkan chu a beng ṭhuai a



"I hna chu hnehna chan leh ka fapa ka hneha rawn hruai thlen a ni, 'ti rawh' ka tih che chuan ngawi rengin i zawm mai tur a ni," Ti leh khar kharin, "thisen inzawm an nilo tih sawi chhuahbak kawngdang a awmlo, eng dân mahin a pe theilo, kei a Nu, a hringtu ka dam chhung chuan," Mit sen râm leh dawhkana a kut hum ruh ngawt ngawt a a tih chuan a lawyer chu a lo thaw hak ringawt a


Maria-i phone ri zui ral ral ah chuan mit chhing sawkin, a phone la kânga a chhân rualin, "Madam, tunah Franky-a Mumbai a rawn thleng tawh a ni," A bodyguard in a tih chuan ding ngil awt in, "maw...? Tunah khawnge a awm?" Khur aw lek leka a tih leh chuan, a bodyguard chu ngawi deuh vang vangin, "i pasal hlui ten an hruai chuak tawh," A tih zawih ruih chuan Maria-i chu a rak zui tuar a




"Laktlakloh, engtin nge i hloh theih? Enzui turin ka ti che a ni lawm ni? Tunah dang angche, engpawh tih ngaise he hmun hi a rawn rap theilo, a theilo...!" Vin tuar tuara tih leh a off zui hmak a, thaw zui kawk kawkin, "a rawn thleng theilo, a theilo," Amah leh amah chu a inbe zui mawlh mawlh bawk




MAYA...POV

Lunch kan ei lai chuan Nathan-a chu ka melh leh ṭhin, engmah thlenglo ang mai leh rilru hahdam hmel zeta ei tur a ei mawp mawp chu mak ka ti takzet



"Bawihi, khatiang a min en reng a nih chuan ka ei tel daih duh mai angche," Min rawn melh zawka, midang anlo nui zui hak thung



Kei erawh thaw deuh hakin, "Nathan..." Ka tawp dat a, Bryan a awm ve laia a Maria-i chanchin zawh kha nithei a ka hriat lehloh avangin, "ei rawh," Ti sap chuan keipawh chuan ka ei zui ve nghal mawlh mawlh a, ka zawh duh chu eng nge a nih a hre chiang viau in ka hria, ka mitmeng leh zawhna te a hêl mai a ni



Tu emaw, Nathan-a hnuaia thawk ni ngei tur suit dum vek ha rawn tlan lutin Nathan-a chu a rawn hrilh ru sur sura, "ka hria e," Tih leh min rawn melh zawkin Henry-a chu a melh leha, "Bawiha ka tel lova courtroom in luh a ngaih hmel," A tih sup chuan kan en nghal kawk, "eng nge i tih dawn?" A fapa case buaipui laia khawnge maw kal a tum le



"U, eng nge maw i sawi le?" Angela-i pawhin lungawiloh hmel zeta a rawn tih chuan din chhuah a rual nghal a



"Kalrawh, helai chu ka lo thunun ang, damin rawn let la," Henry-a lah chuan en pawh en hleilo a thil ei mawlh mawlh chunga a tih chuan Angela-i nen in en in Nathan-a leh Henry-a awmdan chu ka melh tawn zak zak bawk



"Ka reilo ang," Ti supa a Armani suit hak chu a hma a kilh zui zat a, min rawn en a vei kiai sukin, "min ngaihtuah suh," Tih leh a bawpsei zen chu a pensawn nghal pawk pawk bawk, a ngaihna hrelo lutuk chuan a kal liam chu ka en haw ringawt a



Henry-a chu Angela-i nen kan en nghal ran, kan mit a min en duh miahlo chuan, "ahhhhh, a tui hle mai, dar 2 a ri dawn Court lam i pan ang u," Tih leh sana bih zawkin a tho zui nulha, Angela-i nen in en in kan thaw zui hak ringawt



Engthil chiah nge maw tih leh antum hrep ni..?



Courtroom kan luh dawn pawh chuan Nathan-a hmel reng reng hmuh tur ala awmlo, ka hawi kual leh ṭhin, Henry-a lah chu a lut daih tawh bawk si



"Maya..." Ka sira Angela-i rawn ṭhu chu en deuh hâ in, "tinge Bryan," A nui a, "child services workers leh psychiatry ten an awmpui a, an bula awmlo turin mintia, ka rawn lut," Atih chuan ka bu nghat a




Judge an rawn luh chuan dingin, kan ṭhu leh a, Henry-a chu dingin, "Good afternoon Your Honor, chawhma lama zawhna kha chhunzawm ka duh a ni," A tih chuan judge chuan phalna a pe a



Kha Ranaut-a bawk kha rawn lut lehin, thu a tiam zawh hnu ah, "Mr. Ranaut, Mrs. Patel nen a in inzawmna hi chiang takin i sawi thei angem?"


Ranaut-a chu a bu nghata, "ka bialnu hlui a ni, ka boss a hmuh hma kha chuan a pasal aiin min hmangaih ṭhin," Nersawk a a tih chuan Maria-i chu a ṭhutna aṭanga ding zawtin, "dawt a nih chu, ka hre ngailo, he mihring hi ka hre ngailo," A tir aṭang phat in a rak leh vak vak tak saw....!



"Zah a hriatloh zia saw aw...! Courtroom tih a theihnghilh emaw ni?" Angela-in ngei tih hriat fe a a rawn tih chuan ka lo nui tawi tuk ringawt a



"Plaintiff i ṭhutna ah let rawh, buaina i siam leh anih chuan courtroom hi i chhuahsan tawh ang," Judge-in a rawn tih ṭhak chuan, ka rilru in, "chawh lutuk," Ka lo ti hman zat bawk....!



"I sawi awmzia chu pasal neilai a ni tih hre chungin i kawp tihna em ni Mr. Ranaut?" Henry chuan a ti leh a



"Pawmlai nei ve ve kan ni. Ani in ka pawisa a duha, keiin a taksa, a ni lawm ni Maria?" Maria chu in hum ruh ngar ngar tak a ni, a mit chu a sen veki, mei alh chhuak tur ang mai in a ling hlar mai, a taksa te chu a khur hial in nia ka hriat ni...!




Henry chu nui sukin, "zawhna tawpber atan, Mrs. Patel hian kha waiters kha a that ngei a ni tih i chiang em?" Maria-i lam chu a melh zawk a



"Ka hming ka chian tlukin ka chiang," Muang ban chap maia a tih rualin Maria-i chu a ding zawt, au chuah leh a chak zia chu a khawngaih thlak letling ta zawk, kut hum khur dar dar chuan thinrim zetin a ṭhu thla leh chawrh a



"Your Honor i hriat angin, ka client hian tumah a thatlo a, tualthattu a puh ni in Maharastra Central Prison-ah kum 1 leh thla 2 ngawt a tán hnu ah, Plaintiff Mrs. Patel ngei hian tualthattu a nihloh thu leh fiahna thehlut in chhuah zalen a ni, Mrs. Patel chiang taka ila hriat ka ring," Tih leh, "Chuvangin he custody hi ka client hian a chanloh chhan tur ka hre tawhlo a ni Your Honor. Kha ti zawng kha a ni e," Tih leh a ṭhutna ah letin a ṭhut rualin, Maria-i lawyer a rawn ding ve zat a



"Good afternoon Your Honor, kum 4 liamta a a case chu diklo taka puh lo ni tehreng pawh nise, Defendant lam hian naupang hi chan theihna dan anla neilo cheu mai," Ti fak fakin, "a chhan chu naupang hi Mr. Nathan Lalhriatpuia fapa a nilo a ni," Chiangzet mai a rawn tih chuan ka khawng nghal at thei, ka hriat hnu mah nise, heng buaina te avanga sawi chhuah a nihna chuan min ṭhawng niber in ka hria


Angela-in ka kut a rawn hmer zui vak bawk a, "Maya," Mitmu pawng chhuak lek lekin ka lam a rawn hawi a, "Maya, tuna a thusawi kha i hria em? Ka hre dik em? A diklo tiraw?" A awihlo lutuk chu a nui hul zui hak bawk a, min vawnna chu ka lo beng thak thak ringawt leh ka mit a thudik a ni tia ka chhan na chuan a ti zawi hnawk, a thaw theilo emaw ti mai turin mit a khap fak fak ringawt bawk



"Heihi a fiahna a ni, DNA test result. Mr. Nathan leh naupang hian thisen inzawmna an neilo a ni," Tih leh DNA result chu a submit zui zat bawk a



"Family Lawl leh Juvenile Justice ( Care and protection childrens) Act, 2015 Chapter VI dân ang in Mrs. Patel hian full custody a chang thei tih chiang takin alang bawk," Ti leh fak fakin, "naupang hian eng buaina leh natna mah a neilo a ni tih fiah turin Patel family doctor thuzawh fiah ka ka duh bawk a ni Your Honor," Maria-i lawyer-in a tih zawm leh chuan phalna pek a ni lehnghal a



Putar pakhat rawn lut chu kan lo en kar, thu a tiam zawh hnu ah, "a hmasa in Mr. Suraz engtia rei nge Patel family doctor hi inih tawh?"


"Kum 15 dawn chu a ni ve tawh ang," A phun sep a


"A nih chuan an chungkua pawh i hriat chian viau dawn chu, Mrs. Patel hi i hria anga, a fapa i enkawl khan eng nge i hmuh chuah, natna a nei em?" Lawyer-in a tih leh chuan a ngawi deuh vang vang a



Thinphu dep dep leh ṭang zeta ṭhu ngil ṭau chuan ka en a, "awmlo," A tih chhuah rualin lawyer chu kut phar duaiin, "khati zawng kha a ni Your Honor, sawi belh tur ka nei tawhlo," Tih leh a ṭhutna lamah Maria-i melh chuan a let zui zat a


Henry-a rawn dingin, "Doctor hi zawhna zawh ve ka duh a ni Your Honor," A tih chuan, "phal a ni," Judge chuan a ti leh vat a


"Doctor, naupang kha i enkawl chhan i sawi thei angem?"



"A vawikhat na kha chu engmah a ei duhloh vang leh mu duhlo mangang in min rawn bia a chu chu a ni mai," A tih chuan Henry-a chu bu nghatin, "a nih leh a vawihnih na chu eng nge ni?" A en kar a, Henry-a kan hriat ṭhin valsenior lerh ve tak kha a anglo hrim hrim




"A lu kawngkhara a tauh vangin," Henry-a chu a lo bu leh nghata



"A nih chuan i enkawl laiin thildang engmah diklo i hmulo amaw?" Doctor chu a thaw dep dep in ka hria



"Nge ni a, i report i thlak zawk doctor," Henry-a chuan tih zawm supin, "Doctor, hippocratic oat hi ila hria em?" Doctor chu bu nghatin, "Medical professionals tan chuan ethic code a ni," A ti sup a



"I will perform my medical duties with conscience and dignity. My medical knowledge will not be used contrary to the law of humanity" ka sawi dik em Mr. Suraz?" Henry-an chiang fek feka a sawi chhuah chuan a bu nghat nghata




"A nih chuan eng nge thudik, i report ah hian diklo a awm em?" A ti nawn leh a



Doctor chu thaw la hakin, "awmlo, ka report pek kha a diktak a ni, Doctor ka ni a, damlo enkawl chu ka hna a ni bawk," Confi zeta a rawn tih chhuah chuan Henry-a chu bu nghatin, "anih chuan eng nge i ziah, i report ah chuan engthu nge i ziah a, naupang khan dikloh na a nei em?" A lo ti vat a



"Psychiatry ka niloh avangin a taksa ah natna ka hmuh miauloh avangin 'natna a nei' ka ti theilo a ni; Mahse, kha mipa naupang kha ka vawikhat hmuhna aṭangin emotional violence a ni tih ka hre nghal a, ka report ah khan a awm ang, Psychiatry panpui a ngaihtuah ka ziak tel a ni," A tih zawh rualin Maria-i a rawn ding chhuak zawka, "dawt a nih chu, engmah a awmlo," A au chhuak tuar a



"Plaintiff, courtroom chhuahsan i duhloh chuan ṭhu rawh," Judge in a tih leh ṭhak chuan Henry-a melh rawm rawm a kan lam rawn en hrawkin a ṭhu tau nghuta



"Doctor hian a sawidik a ni Your Honor, naupang hi emotional violence leh physical abuse a nih vangin rilru lamah nasa takin a tuar a ni, chuvang a hringtu a Nu mah nise naupang enkawl theihna dan a neilo, a tlinglo a ni. Family Law Article 31 hnuai ah jail tâng thei a ni," A tih leh rualin, "Objection your Honor, naupang nen hian Mr. Nathan-a hi inzawmna an nei hauhlo a ni tih ka sawi nawn leh duh," Maria-i lawyer-in a rawn ti let leh ṭhaka

Henry-an a phone melh zawkin kiai suk chuan, "a dik, ka client leh naupang hian inzawmna an neilo; Mahse, a piantirh aṭanga tunthleng a naupang Pa chu ka client hi a ni a, family register leh a pian laia guardian signature sign tu pawh naupang Pa anga sign tu a ni bawk; Mahse, tunah hian naupang Pa diktak koh ka duh a ni Your Honor," Henry-an hawivah a a tih chuan Ka meng kawk


Angela-i phei chu Bryan-a te unau a U fa an nilo tih a hriat aṭang khan milim ang mai a ni tawh


Judge-in phalna a pek hnuah kawngkhar in hawng ri ka hriat ruala hawi vatin Nathan-a a rawn pen luta a hnungah mipa pahnih in an rawn zui ve zat bawk



Nathan-a chu ka sir chiaha rawn ṭhu in a kiai suka, a kut pem chuan ka mit ala nghal zat bawk, khawi emaw ah ava insual leh a ni ngei ang, a hliam pawh a dam fel hma in, hliam dang a neih belh leh a nia....!



"Nathan..." A kut chu ka la kânga, nui pahin, "ka ṭha Bawihi," Ti supa Angela a melh chu Angela-in rum lutuk in a lo melh leh khai khai thung a


Maria-i lam ka melh zawka, ding khawng at in, mitthi tho leh hmu ang maiin a dang sawp sawp mai, nikhaw hrelo in a tlu mai ang tih a hlauhawm zawk



Nathan-a mi rawn hruaiin a hming sawia thu a tiam hnu ah, "Mr. Franky, a hmasa in eng nge Mrs. Patel nen hian inzawmna inneih min hrih thei a ngem?" Henry chuan zawhna a zawt nghal zat a



"Ka bialnu hlui a ni," A ti sup a, Maria-i a en dan ah chuan a huat hmel takzet bawk



"A nih chuan a mizia i hrechiang viau angchu."


Za lo zeta nuiin, "ka chian tluk hian tumah in an chianglo ang," Nersawkin a ti chhuak a


"A nih i fa a pai tih i hria em?"


"Hria e," Ka meng kawk, a hriat ka rinloh nen


"Hre siin engvanga a hma a rawn inlan lo nge inih? Chuan kum 7 liamta a thilthleng kha i sawi chiang thei angem?"


A bu nghata, Maria-i en reng chung chuan, "Nathan-a nen an inneih khan Assam-ah letin hna ka thawk a, kum 3 dawnlai hnu ah niin ka hria Mumbai ah ka hna avanga ka kal kha, engtin nge ka awmna hotel a hriata, ka room number thlenga a hriat ka hrelo, zandar 10 dâwnah ka room rawn kik in a rawn luta, mittui nen a rawn lut nâ na na chu lo hnar ka duh bikloh avangin ka lo la lut mai a ni, keipawh nupui nei tawh ka ni a, chutiang a bialnu hlui te hotel room a lakluh chu a diklo tih hre tho mahila ka let tir thei biklo a ni. Khami zana chiangtak a a sawi ka hriat chu, a pasal hian tu hmeichhia mah a raitir thei ngai dawnlo a ni tih hi a ni, tichuan wine dawm dunin kan chesual ta a ni," A tih dap dap chuan Nathan-an ka kut a rawn hmer salh a


Melh vatin, a bek pawng chhuak ṭalh ṭalh leh khabe ruh pawh ruh ṭawl mai chu a rapawm lek lek zawk



"Engtikin nge nau a pai tih i hriat?" Henry chuan alo ti leh a



"Thla 6 a nih hnu ah, ka hna vang bawkin Mumbai, ka nupui raipuar nen kan rawn pana, a nawm samloh avangin in checkup tura kan kalna ah ka hmu a ni; Mahse, ka fa an nih ngai dawnloh thu leh an dam chhunga Nathan-a fa an nih tur thu te, a hma ah leh a fate hma a inlan ngailo turin min hrilh bawk, ka hmangaih tawhloh hmeichhia a ni a, a pum chhunga naute pawh tihpalh thilthu a nih vangin ka tan pawh fa a pawm theih a nih bik miauloh avangin a sawi ang chuan inremna siamin, ka dam chhunga a fate tan pa ka nih ngailoh tur thu leh ka sawi chhuahloh tur thu ka tiam a, chutiang bawkin Maria-i pawhin, Maria-i ka hriat chian êm avangin thutiam dang ka neih tir nghe nghe," A tih chuan



Henry-an, "engthu nge?" A lo ti vat a



"Hmeichhia, mahni chauh in hmangaih, sum a neihna tur leh a hlawkna tur a nih chuan engpawh ti hrehlo a nih avangin engpawh a chungah leh a fate chungah pawh thlengse chengkhat pawh ka lak aṭanga alak loh tur thu," Tih leh phone hi a rawn phawrh chhuak a, "tah hian engkim record in a awm," Tih leh a hmet eng zui zat a



Henry-an phone chu la in, "hei evidence atan ka submit bawk e, your Honor plaintiff hian Nu nih a phulo a, a fa a hrin ngei mai a hnutchhiah mai bakah pawmlai nei chungin mipa dang fa a paia, a pasal fa anga sawiin a hrin bawk avangin dan hian ana thei angber in hrem rawhse tih ka ngên duh a ni, ka läwm e," Tih leh a ṭhutna ah a let a



Judge in, "plaintiff sawitur i nei em?" Maria-i chu a kut a hum ruh ngawt ngawt, franky chu a en ngar ngar bawk



"Engmah sawitur ka neilo your Honor," A lawyer-in a rawn tih chuan ka thaw chhuak hak a, result a hriat viau tawhin ka hria



"Ka rawn luh hma in naupang chu ka rawn hmu a, Psychiatry hnen aṭangin report ka kutah hian a awm bawk, rilru lamah harsatna nasa tak a nei tih ka hria, 'engvanga CSW in zawhna an zawh khan engmah sawilo a, ngawi tlat nge a nih a, Mrs. Patel zui nge a nih tih ka zawh chuan a kut a sana chu min hmuh tirin, 'Mamma in min rawn hruai hun ka nghak' tiin a sawi a, sana kha i leisak a nih ka ring," Min rawn en a, mittui nen uar lutuk in ka lo bu nghauh nghauh thung




"He case hi ngaihtuah ngai a awm tawhlo a, Mr. Nathan Lalhriatpuia hian full custody a chang a ni tih ka puang a, Mrs. Patel erawh a fa hnutchhiah a, a pian dan chungchang ah dawt a sawi vang leh naupang chunga physical abuse and emotional violence a hman avangin kum 5 chhung jail tâng tur a tih a ni, tualthah case erawh investigation kalpui a nih angin thuthlukna siam leh tura dah a ni bawk," A tih dap dap chuan ka zawi hnawk thei, ka ṭan zia ka hre chhuak, ka taksa ana kham nghal ut ut thei



Maria-i, police in dawmbeh an tum chu a tal nawk nawk a, "min khawih hlek suh u," Ti tuarin, "i thiamloh vek a ni, Lalhriatpui henghi i thiamloh vek a ni, nang uicho mahni thutiam pawh a ding theilo, fa minpe thei ni la heng te hi a thlenglo ang," A rawn au tuar tuar a, police pahnih in an dawm chung pawhin an pensawn pui hleithei meuhlo chu a ni



"Thi rawh u, thi rawh, engvangin nge ka tán ang, tihsual ka neilo, min thlah rawh u," A au tuar tuar chu an pawt chhuak a, ka rap lek lek zawk



An pawh chhuah rualin, "chhuak phawt teh ang u," Nathan-an a rawn tih bulh hluk chuan ka lo bu nghat a, Nathan-a hmel dur zet mai chu en a hreawm takzet



Courtroom kan chhuah rualin ka lam panin Maria-i a rawn tlan dawr dawr chu Nathan-an minlo kuahbet vat a, Henry-a leh Franky-an lo pawtbet vatin police in an rawn chelh leh vat a


"Ka fa minpe let rawh," A au tuar tuar



"I pasal kha chi hût a nih kha, fa a pe theilo che, kei ang bawkin mipa dang kutah i tlu lut dawn tih hria angche," Min rawn au zui tuar tuar chu Nathan-a min kuahna a ti nghet zui salh chu ka melh chho a, a kut ka dahsawn sak chu phawk fe a min rawn en in ka lo nuih seih thung


Maria-i lama in herin ka pan hnai a, zahna emaw inthiamloh na a hmel a zawn tum chu awmlo zawn ang vel a ni, min melh ram ram a, a nghawng a ti sang vah bawk


"Fa a ps ngai dawnlo che, keimah ang bawkin i uire san bawk ang," Kha zet leh hmusit tih hriatzeta a rawn tih chhuah chuan nuilui hakin, "fa ka mamwh hleinem, a hunah Pathian khian minpe mai ang. Bakah, fapa pathum ka nei tawh alawm, ahhhhh.... Fapa min hrinsak avangin ka lawm e, na hi ka tuar theilo a, na tawrh ngailo a i hrin avangin ka lawm takzet," Ngeiawm zeta ka tih chuan Franky chuan mak tih hmel fê in minlo en a, Henry-a erawhin ka mizia a hriat avangin alo nui sun sun thung


"Ka fate an ni, i fate ni lovin," A rawn ti tuar a, hnuhsawm an tum chu a kut a ti dingin, "i fate maw? An hre velo che a nih hmel," Ti leh sakin ka pen hnaia, a mit ah tak melh chho chuan, "theihnghilh suh Mrs. Patel, i fate hian NU tia an koh theihnan che ka khawngaihna ila dil ang," Ring silo fiah zeta tih leh ka tawlh hnung leh a, ka nui khum sak bawk



Thinrim hmaisen ṭawn ṭawnin, "heti maia ka tawp ring suh, ka ta an ni a, a dawt leh ah chuan pakhat chauh kala dawnlo tih hria angche u," An hnuhsawn hnu pawhin a rawn la au tuar tuar tho, nasa ti zet chuan kan lu kan thinsan nak nak ringawt a



"Maria-i hlaulo hmeichhe awm chhun ini hial ang a, Nathan nupui inei ṭha hle mai," A tih chuan Nathan-a ka sira rawn dinga ka kawnga rawn chelhin alam ah min pawt zui salh a, "ka hria alawm," Ti supa min rawn en chuan an nui zui huk hlawma, kei erawh ka lo lai ringawt thung



Angela lam kan hawi chuan ngawi rengin a U ala melh ngar reng, Nathan-a chu a thaw haka, "Bawihi, Bryan lova hruai ula, Angela hi ka'n be lawk ange," A tih chuan Franky leh Henry-a chu a melh zui zat bawk a



Bu nghatin, "Franky, i hmu duhlo em ni?" Ka tih chuan za lo zet leh laih hmel zeta ṭhensakin, "in remti em ni?" Nathan-a nen chuan in en in kan nui a, kan bu nghat bawk



"Mamma," Bryan kanlam a rawn tlan chu ṭhu hniam rawk rawkin lo kuah vatin a biangah ka fawp zui mawlh mawlh bwk a, "engkim a ṭha vek tawh e, engkim," Ka ti zui sap sap bawk



"Mamma ka thaw theilo, Mamma, Brayden-a leh Bryson-an car thar an neia, ka duh ve e," Inla hrang paha a tih chuan ṭah nuih pahin, "i Pa i dil dawn lawm ni?" A ner zui nang nang mai


"Hello Bryan," Franky chu a rawn ṭhu hniam a, "Bryan heihi i Pa ṭhianpa Pate Franky a nih hi," A en deuh vang vanga, ka sawi tawhin ka hria, Bryan-a hi chu a nau te anglo takin mithar hi a ngaina mai ngailo tih


"Bryan..." An melh ve ram ram bawk a


Franky chu nui hakin, "misual ka nilo a nia, car thar chu ka lei dawn che em ni? i duh em?" A tih chuan min rawn en in, "Mamma ka duh thei angem?" A tih chuan nui chhuak pahin, "tehreng mai," Kalo ti vat a



Lawm zeta nui nghal var varin, "a nih chuan transformer car minlei sak rawh aw," Phur fahran chuan a ti nghal zata kanlo nui zui hak hak thung


Enchian chuan pafa tihtak ah, an nuih zawng hian in an na an nei reuh lehnghal


"Kan haw dawn em niang, naktuk zanah Mizoram ah kan haw tawh ang," Nathan-a lam chu kan hawi a, "Yes, mahse daddy Saturday ah iti sia," Bryan-an pa lam pan paha a tih chuan pawm kâng nawlh in, "kan haw hma thei tihna," A tih chuan Bryan chu a khek nghal riah riah a


Angela chu ka melh a, ngawi rengin Bryan chu a en tlawk tlawk, pawm ala harsat a ni tih ka hre thei, ka hrethiam lutuk bawk


"Kanpa in min nghak tawh a, Maya, U Henry ka kalsan angche u, U Franky vawiin i rawn kal avangin kan lawm lutuk bawk a nia," Tih leh Bryan-a lam chu a hawi a, ṭawng a tum zetna in chip leh chuan, "ka kal ange," Ti chhuak sepin a pensawn chu a mit a mittui kha ka hmu hman



"Keipawh Mumbai rawn thlen tawh tawh chuan ka Pa te kava tlawh ange, Bryan nakin ah, in thlenna hotel ah car chu ka rawn pe angche aw," Tih leh a sam a tuai sak zeuhin, "Nathan, ka lawm e," Ti supin min rawn en a, "in pahnih tluka an tan nu leh pa tling an awmlo, vawiin a ka hriat chhuah chu, Pa nih ka phulo a ni tih hi a ni, in pahnih chungah ka lawm takzet," Henry te nen min enkual a tih leh, "ka kal ange, kan in hmu leh dawn nia," Tih leh chuan pensawn nghal a, a tlanchhia a ang mah zawk, a tan Bryan-a hmuh reng chu a hreawm a nih ka ring


"Keipawh inpa hian hna min siam leh si a, ka kalsan angche u, Bawiha ka rawn hmu angche," Tih leh pensawn a rual nghal zat a, Nathan-a en haw in, "eng nge?" Tih melh a ka melh chu, ka kut a rawn chelh pahin, "case kan tinung leh tih i hriat kha," Ti sup chuan, "zanin chu kan pathum in 7star-ah dinner kan ei ang," Ring lêng lawnga tih leh min pensawn pui chuan Bryan-an khek tuar pahin, "lobster lian tawk ka ei dawn aw Daddy?" Tih leh a ei duh dang a sawi nghal zet zet bawk a, ka nui ve ta sun sun tho

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 31st, 2020, 5:07 pm

MY TREASURE
By
Floria Laldansangi



Chapter < 36 >



NATHAN-A.....POV




"Hnehna ropui i nupui bulah lawm i duh ka ring a nia, no dawmpui ah te min koh chhuah a," Ka sira rawn ṭhu paha Henry-an a tih chuan alam ah no nawr hnaiin, "hnehna roptak i chang alawm, kan lawm dun angchu," Whisky thli paha ka tih chuan a rawn nui huk a


No la kâng pahin, "kei nena lawm i duh tak tak amaw? Nge ni a, Maria-i thusawi khan a tibuai zawk che?" Ka no chu ti che ralh ralhin ka kiai suka, lem hlek pahin, "lo sawi dik tase...."


A ai zâa rawn nui in, "C'mon Man, engtin nge Maria-i te ang thusawi te i intihbuai tir duh ni," A rawn tih leh chuan za lo zeta nui ri sukin, whisky tak ṭha ngek ngawk mai chu ka tlak deuh pap a, ka hrawk aṭanga sa thla ham ham in ka pumpui ah a sa thla pup mai



"Kum 3 dawn tehmeuh naupai theilo in a awm a, heng buaina te hi keimah vanga bul ṭan ni tak tak ta sela...?" Maria-i thusawi ka benga khawk rum rum chuan mahni in rintawkna min neih tir hlei theilo


kum 3 dawnlai mai fa nei turin kan beia ; Mahse, awmzia a awmlo, vawikhat, vawikhat chauh chetsual palh vangin nau a pai leh mai bawksi a, mipa in mahni in rintawkna awlsam taka kan hloh theihna awmchhun chu kan hmangaih te hlimna kan pe famkim thei dawnlo a kan hriatna hi a ni ngei ang...!




"Bawiha, chi inmil lo hi awm ve ania, Maria-i lakah fa i neihloh avang ngawtin Maya-i lakah i nei dawnlo tihna a ni hleinem," Ka dar rawn beng thak thaka a tih leh chuan ka lo nui leh suk ringawt a, sawi vak dawn pawh ni ila ka sawi thiamlo a, a hrethiam dawn heklo bawk, whisky bawk chu tlak leh papin, "Amex chuan thu a nei tawh em?" Ka melh zawk a



A no la kâng pahin, "neilo; Mahse, hun remchang a zawng ni in ka hria, i hria a lawm Patel chhungkua sawn chuti maiin an chhuah dawnlo, vaibelchhe 10 zet ru chhuaktu chu a chhuah mai mai i ring em ni?" A sawi zawh rualin nui ri hakin, "heihi evidence atan thehlut angche," Tih leh kum 4 liamta a Maria-in Waiters a vihna chem a paihlai cctv footage chu alam ah ka nawr hnai a



"Khai a...! Nathan ṭhiana leh...! A hma te khan heng neite chuan engvanga ngawi reng nge maw inih le?" Ban paha a tih chuan whisky chu ka no a thli leh karh karh pahin, "venhimtur ka nei hleinem," Ka phun sup a


Dawt a ni tih leh kha waiters thattu ah khan a in hnam hnawih ve a ni tih chu kum 4 liamta khan ka hre tawh alawm, fiahna pawh ka nei ; Mahse, kha tihlai kha chuan ka fate nu ala ni a. Bakah, hmeichhe hmangaih emaw venhim tur ka neilo a tin ni, tunah erawh ka nupui, ka hmangaih hi tumah in, "tualthattu nupui" tia an sawi zui ka duhlo...!

Ka hmeichhe hmangaih a ni a, tumah in an zahloh na leh namnul na tur engthil mah awmtir ka duhlo, a rilru tih natna tur thil ngat phei chu, hmangaihna leh hlimna ka pek theih aia tam pek ka duh a, chu chu a phu hle bawk


Ka ngaihtuahna avangin ka nui leh suka, heti tak hian kei hian he hmeichhe naupang, ka nupui hi ka hmangaih ang tih ka mumang lamah pawh ka mang pha ngailo


Nui ri hukin, Henry-a melh zawk chuan whisky chu ka tlak deuh pap bawk


"Eng nge" tih melh a min melhna chu haider in whisky chu ka thlit belh lehnghal zat bawk




MAYA....POV



"I ṭha tak tak maw Angela?"



A rawn nui a, "ṭha tawh e. Min ṭhawng deuha tin ni. Nangzawk eng nge i an, Maria-i thusawi vang khan i rilru te ilo tihah ange aw Maya?" Min ngaihtuah tih hriat zeta a rawn tih chuan Bryan muhil thaw sek sek lam en pahin, "ka ṭha a alawm," Ka ti sap a




Diktak chuan keimah ah chuan min nghawng em em ka hre hranlo, ka sawi tawh angin, hmalam hun ka hrelo na in Pathian kutah ka dah mai, hmeichhia, kohhran mitak leh inkhawm zak zak ṭhin ka ni lemlo na in, ka chunga thil thlengah erawh vui leh vaina ka nei ngai lemlo, Pathian demna ka nei ngai heklo, kan tan a rorel dan ah leh kan rin, kan Pathian ah khian ka chiang êm a ni...!




Mahse, Nathan-a erawh a nghawng tih phat rual lohin ka hre thei, zanriah kan kil ho lai aṭang tawhin a nui hmelah khan diklo a awm tih ka hre tawh a ni




Angela-i nen kan inbiak zawh chuan Nathan-a nghakin sofa ah kala ṭhu ngar a, Henry-a nen no dawm tura chhuak satliah an nih avangin a rawn let ve mai ka rin nen, dar 11 a pel thuak tawh, a message pakhat pawh hmuh tur ala awmlo



Ka lo chhing sek a ni ngei ang, bân tha chak zet maiin a min pawm kâng deuh lawp chu ka hriat rualin meng mang hleilo chuan kuah let sat satin, a âwm ah ka bei nghal chial bawk. Rawn nui nghawr datin, "khumah lo mut tur che a nia," Thum dul maia a tih chuan la meng chuang miahlo in, "ka psal zu in ka lo nghak che alawm," Ka ti chhuah sap chuan za zeta nui nghawr dat dat in khumah min nghat a


muangchangin ka meng ve nghal diar diar bawk, ka hma a ṭhu hniam in, ka sam chu ka beng kawma zepin, ka hmai chu a kut phah lianzetin a chul riak riak a


A whisky rim leh a rimtui hman rim inchawih tawk lutuk chuan hnar leh lu um a verhin, a rim a ti zual, mit chhing sawkin ka hip deuh kawk bawk a


Mit zîmsan a min en a, vei kiai suk chuan rawn kûn hniam in dimtê in ka hmui ah a fawp a, a chal, ka chala sik tirin, thaw chhuak deuh ham ham chuan, "ka hmangaih che Bawihi," Thawp sap leh rilruih a a tih chuan melh chho ralhin, a biang tawn tawna dawm in ka nuih sen sen a, "keipawh in ka hmangaih che, Nathan, Maria-i thusawi avang khan kan nupa inkar ah nghawng a neih ka duhlo a nia," Ka ti chhuak sap bawk a, ka ti tak tak bawk, kha a thusawi vanga nupa inkar hlim lohna a thlen ka hlau takzet a ni




A kutzungpui chuan dimtê bawkin ka hmui chu a tuai a, "ka pek theih zawng zawng che pek che ka duh Bawihi, hlimna zawng zawng hi i phu a ni," Rilruih mai a a rawn tih chuan ka hnuk a ulh lek lek, pasal te kâ aṭanga chutiang thu dawn nawm zia leh kan hlutzia min hriat tirna ropui zia ka tem ve ṭan in ka hria




Nui sen sen chuan, "ka kiangah awmla, min venghim la, i kiangah dingin hmalam ka panpui ve angche," Ka tih sap chuan rawn nui ri sukin, ka hmuiah a rawn fawp vawng vawng a, a nghawnga kut suih zawmin kanlo fawp let tan tan chu a nui ri leh haka, min chhang letzui nghal bawrh bawrh bawk



A lei hrawl leh thap ṭha zet maichu ka kâ chhunga hawl kualin, ka lei chu a zuk dek dek a, min kuai zangthal a, ka chunga rawn lawn kaiin, duhthawh zetin, kan sir a mu hil thaw sek sek mai tih harh hlau zet chuan kan in fawp zui nghal buan buan bawk



"Daddy hi a rimchhe e, zu rim a nam," A pa bula, khuma ṭhu chunga Bryan-an a tih nung nung chuan thawmhnaw khung fel pah mawlh mawlh chungin ka melh zawk a, ka nuih sun sun bawk



"Daddy, tho tawh rawh, kan haw tawh dawn kha, inbual fai vat vat rawh, i rimchhe lutuk," A sawi dat dat a





Ka phone rawn ri ral ral chu en in, nui zui seih chuan, "Brayden," Ka lak rualin ka ti nghal zat



"Mamma, engtik ah nge inlo haw dawn?" Bryson-a zawk a ni


"Kanlo haw ṭep tawh, damdawi i ei tawh em Bawihte," Speaker-a dahin ka tihlai ka tih zawm zat bawk a



Bryan-a khum aṭanga rawn zuang thla chuan, "Bryson, Transformer Car ka nei, chuan nangni pawhin innei ve dawn, Pa Franky-an nizan ah khan min lei a, tiraw Mamma?" Ka lo bu nghat a



Ka phone chu la kângin, "Bryson, zanah kanlo haw dawn, lo muhil miah suh aw, ka hmuh tir angche," A tih zawm leh lang lang a, Nathan-a chu rawn ṭhu chhuak luai luai in, kan lam a rawn hawi chu, Bryan-an en kar pahin, "Bryson, Daddy hmai hi maw a khem nasa rap," A tih leh chuan za zeta nui chhuakin, "Chutiang te an sawi ngai em ni?" Ka lo ti ve tak na in ka nui erawh a za viau thung




Nathan-a erawh a rum ri nghut a, a sir a kekawrbul ka dah chu ban a ha sawk sawkin, "breakfast in ei tawh em?" Bryan-a lu a tawk zeuha a tih chuan ka lu thing pahin, "Airport-ah kan ei mai angchu, bakah Airport ah mamawhlei kual pah te ka duh a, in tifai rawh, kan tlai ange," Ka tih zawm zat chuan tho nulhin bathroom lam chu a pan nulh nulh a

.
.
.
.

Airport kan thlen chuan dar 10 a ri thuak tawh breakfast eiin, Airport chungah chuan thawmhnaw leh naupang mamawh eng eng emaw ka lei kuala, Nathan-a leh Bryan-an min zui ve det det bawk a, Nathan-a a lian si, Bryan-a kai chunga ka hnunga an kal chuan min en zui druh haw haw hlawm in nia ka hriat ni....!




Shopping mall pangai aiin to mahse hun kan neih tawh miauloh avang leh naktuk mai hi Christmas a nih tawh avangin naupang ho in thawmhnaw thar an nei tawh em pawh ka hre silo a, a awm awm leh a man lam pawh ngaihtuah ta lem lovin ka lei hmiah hmiah ta mai



"Hnehna chan i lawm em ni?" Ka thil lei zawng zawng ka khai tir chu en in a rawn ti sup a, kan chuanna tur thlawhna, GATE D lam pan chuan Bryan-a kaiin pen deuh hlawk hlawk chuan ka nui a, Nathan-a melh zawkin, "ka pasal hausa zet sum ka khawhral," Ka tih chuan rawn nui hukin, "khawhral ta rau rau, heiai tam lei tur che a nia," Ka lo ner nung thung, sum lama ka uikawm zia a hriat vangin min fiam nan a hmang tih ka hria



Zinglam dar 1 ah Lengpui Airport kan thlenga, in kan thlen meuh chuan dar 3 a pel thuak tawh, Bryan erawh a chau ngang a niang, lengpui kan chhuahsan aṭangin a muhil nghal bawrh bawrh mai



"A nau te ho bulah mut duh suh, zan a harhin min hmuhloh chuan a buai ang," Nathan-an, naupang ho room a luhpui a tum chu kalo ti sar sar a



"Dar 3 a pelh tawh hi, bakah a chau lutuk, a harlo ang," Tih leh kawngkhar dimtê a hawngin a pen luta, ka ngaih a ṭha chuanglo, Bryan-a dinhmun nen a nau te ho bula la mu tur chuan kala ringlo a ni



"Zanin aṭangin a ṭhat tak tak hma chu ka mutpui mai ang," Ka tih chuan a, rawn ding chhuakin, "a nih kei," A ti deuh hmuk a. En hâ in, "eng maw?" Ka tih hû chuan hnar tum datin, "a maha mut a zir a ngai alawm," Ti leh hmuk chuan ka bânrek a chelhin min pawt chhuak dat dat a




Ka chau ve bawk nen ka ṭang buai peih ta lo law law, ṭang buai pawh ni ila kan in pawhna ah naupang kan ti harh mai mai



Kan room a min pawh luh rualin, "mu ang, keini pawh mut kan mamawh, naktuk Christmas a ni lehnghal," Tih leh inthlak pawh inthlak lemlo a min pawt mu in, min kuah nghal hlu hlu a, nui sun sun chuan ka kuahlet ve nghal chial bawk


Rawn kûn hniama ka khabe a rawn chawi kângin dimtê a min fawp vawng vawng chuan, "merry Christmas ka hmangaih," Ril thuk ruih maia a tih chuan ka nui sen sen a, fawp let zeuhin, "merry Christmas," Ti let sapin, pasal in a nupui hmangaih leh thlahlel a a fawp vawng vawng ang mai chuan min fawp zui leh vawng vawng bawk a, engkim mai chu a famkim in, kan pahnih chauha awmna khawvelah sex tel miah silo in min hruai delh delh ni maiin ka hria...!



Nupa ang a ur lawk zan leh Christmas tûk kan hman hmasak na ber tur mah nise a chhe lemlo e, Bryan-a tel lova Christmas hman kha ka hlauhber a nia




"Mamma i bulah ka mu duh," Bryson-a aw a ni, ka harh peih hlawl lo


"Keipawh ka mu duh ve tho alawm," Brayden-a nen, Nathan-a nen kan inkar ah an rawn in thawlh lut ang nawk nawk a




In siam rem paha meng hleilo chuan, "Bryan, in hnuaiah i Pi bulah kan luggage kha hawng a, kan thil lei ho kha sem turin ti rawh, an hming ka ziah vek kha," Ka phun chhuak niah niah, ka taksa ana kham rih lutuk mah mah




"Daddy, Mamma, Christmas kawr kan nei a nia," Ka lu ah an sawi dat dat a, "umm, Bawihte nakinah ka en dawn nia, damdawi ei la, breakfast nen inkhawm turin zu in siam rawh u," Ka chau mut khamlo lutuk chu ka meng thei hlawl lo, ka mit chu a in charbet emaw tih mai tur a ni



"Mamma, Min ngailo e..." Ka meng nghal diar diar, a ni viau mai, ka ngaihloh hmel takzet


Bryson-an minlo nuih sen sen chu, inthiam chiahlo in ka nuih ve sen sen a, thaw haka mit phak chuapa inbeng kangin, "inlo fel em?" Brayden-a nen chuan an bu nghat nghat a



"Mahse, zanah Bryson-a a ṭap ziah," Brayden-an a tih rualin, "vawi 3 chauh a sin," Rang lutukin alo ti let ve vat a, nuih hakin, Nathan-a ka melh zawk, ala mu duh tih ka hriat avangin ṭhu tungin, "inhnuai ah lo zu chhuk ula, ka inbual fai anga ka rawn chhuk dawn nia," An biang a fawp ve ve in, "merry Christmas," Ka ti sep a, ka biang chu ka dawh ve nghal zat bawk



Ka bianga rawn fawpin, "Mamma, Merry Christmas," Tih leh Nathan-a muhil biangah fawp ve ve in, "daddy nangpawh merry Christmas," An tih chuan Nathan-a miko tlêma la vung deuh chu en vang vangin, "Daddy chu a insual chiang mai," Brayden-an atih chuan nui pahin, "kal tawh rawh u le, i Pi te Christmas chibai zu buk ula," Tih leh khum aṭang chuan ka chhuk tir a, room aṭanga an chhuah rualin ka thaw hak, ka mut ala chhuak viau na in ka nu te leh midang Christmas chibai ka zu buk ve leh angai miau si a




Bathroom aṭanga ka chhuah hnu ah pawh Nathan-a chu ala thaw sek sek mai, a mutna lam panin a puansin siamṭhat sak chuan kawngkhar lam ka pan zui zat bawk a




Inhnuai lam ka pan chuan anlo ri luih luih tawh, rinloh zetin Jamie-i te nupa hmel ka hmu hlawl bawk a



"Christmas chibai," Tih leh kan han inchibai kual ang lawp lawp phawt a



“Christmas hma a in rawn hawloh ka lo hlau rilru khawp mai a,” Ka nu in a rawn tih chuan, “chu chu a nia, a tir a i rawn sawidan phei kha chuan kar hnih lai kha Maria-i bulah a awm dawn kha iti sia, ka rilru alo hah khawp a,” Jamie-in a rawn tih zawm ve zat bawk a



“Nia, Pathian remruat te pawh a nia nge...! Sunday zan khan Henry-a leh Nathan-an court hun sawn an dila, chu bakah, Judge kha Angela pasal Nitin-a chhungte anlo nibawk nen, min dilpui a, zan zanah thu thlukna an siam a ni awm e. Monday khan court hun an sawn hnai a, kan rawn haw nghal a nih hi,” Ka tih chuan an bu nghat nghat a


“News ah kan lo hmu a, tukin Maharastra Times i en tawh em?” Tih leh Eunice-in a phone a rawn phawrh chuan ka hma ah a rawn dah a, “a pasal hian Financial Embazzlement chungchang ah case a file ve a nih hmel, thudik a nih phei chuan an ni ang company lian lutuk ang ah phei chuan case a säng viau ang....! Ka hriat danin heng company sum hman ruk ah hian Section 403 leh 406 hnuai ah alo hremna kum 5/6 jail tan leh pawisa chawi niin ka hria, ka hriatsual loh chuan.

Leverage-a financial dept. a ka thawhlai khan kan manager kha fund embazzle vangin a táng tawh tlat a ni," Eunice-in a tih leh zut chuan ka lo thaw hak a




"Inpa case hlui kha chhui leh anti bawk a ni lawm ni, thiamloh a chan leh phei chuan kum 20 bawr vel chu jail-ah hun a hmang thei hrâm mai ang a," Op-an a rawn ti ve sup bawk a, ka lo bu nghat ringawt



"Hmeichhe pakhat ve mai thiltih atan chuan a rapthlakin, a awihawmloh zawk mah mah alawm le, keini huaisen leh huaibak inti te chu a lakah chuan nep te kan ni...! Iti ve lo maw Maya?" Jamie-i chu a nui zui kur kur a, kan nui ve huk tho


Ka mitthla ah Maria-i an manlai a rawn lang zui zat bawk a, "NASA" Mizo in kan tih te chu e, ala nasa lo mah mah hi a ni tawp mai...! A hmel leh mitmeng ah khan in thlahrun na leh Bryan-a lakah tak ngiao pawh inthiamlohna a neilo leh hmuh tur awmlo kha mak kala ti tawp theilo


"Christmas tuk tukah chutiang sawi reng suh u," ka nu choka aṭanga rawn chhuakin a tih chuan kan lo nui vur vur hlawm a


"Nathan-a chu a inkhawm peihlo ang a, nang Mamte inkhawm i tum em?" A rawn tih zawm zat a



"Peihlo ang," Ka tih awlsam et chuan Jamie-i rawn nui tut tut pahin, "ani a inkhawm in Isua lo kal a hnai tih a hriat lutuk dâwn a sin," Tih leh anpa mala beng taihin, "kan haw dawn em ni? Hei ka thiltur ka la tawh bawk a," Tih leh a shawl awh em em mai ka leisak chu a lek zauh bawk a


"Ni e, chaw ei a hun dawn, Christmas tukah kan vakbo rei lutuk," Op-an ti ve sup chuan din an rual a, "zanlam ah in inkhawm loh chuan rawn leng leh ula, ar te kan kâng ve angchu, zanin chu hmang ho ve hrim hrim ila," Kawngkhar lam a thlah pah chuan ka ti deuh nang nang a



"Sawi ka tum chiaha, nangni mihausa zawkah lo in phuahchah ṭha tam deuh ula," Jamie-i en chuan ka lu ka thing mat mat ringawt



An haw hnu ah ka nu in chhung inkhawm min hmanpui a, Nathan-a erawh kan kai tho duhlo ta law law, karkhat chhung khan a hah zia ka hria a, a mut theih chhung chu mu rih se ka duh



"Pi Siam, Faki chanchin hi ka zawt leh tawh miahlo che," Chaw ei lai chuan ka ti sep a


Ka thlenga chaw rawn khawrh belh pahin, "Delhi lamah a chhuk a nih hmel, Mumbai inchhuka reilo ah khan Delhi a chhuk ve tih ka hria a, min rawn la be leh miahlo," Pangai tak chuan a ti ve mai bawk



"A zirlai a chawl tihna em ni?" U Muani'n alo ti ve vat bawk, a lu thing pahin, "a niang a...! Ka chiang biklo, 'hna ka hmu e' a tia, engmah ka zawt zui ta duhlo mai. Ti hian a peih chen chen han tâl sela, mahnin a kan tawn a, kan hriatloh chuan nundan leh thilṭha, thu ṭha inzirtir leh hrilh pawhin an awih tak tak chuanglo, a tawm a, a hriat a ngai a ni mai," A tih zawm leh hmiar hmiar a


Diktak chuan Pi Siami hi ka lainat takzet, keipawh hi ka tleirawl chhuah, ti ve khanglang ila, ka nu leh pa tan khan rilru ka ti hah ṭhin âwm mange ka ti ta rum rum mai, khawvelah tlan ve lemlo mahila, hmalam hun kha ka neilo tawp a nia, ka drama en leh Korean mipa atchilh khan ka hun ka khawhral kha a ni ringawt a, tunah naupang tê in pasal ka nei leh a...! "Ka pasal nei ka inchhir e," Ka tihna phei chu a ni law...!



"Chaw minlo ei san elaw...?" Nathan-a choka a rawn lut chu kan lo en ṭhap a


Naupang ho in anlo ko nghal chul bawk


"Ka Pi, Eunice, Pi Siam, Muani Christmas chibai vek ule, nangni triplets te pawh," Tih leh naupang ho biang a tawk zauh bawk a



"Rawn ṭhu rawh, innu hian kaih thawh che a phal lova. 'I chau' ati deuh tlat a," Ka nu in tih leh ka sir rawn ṭhu in U Muani'n chaw a rawn pek chu lo bân in, "Christmas tuk te chuan chau mahila chhungkaw kima ei tur alawm," Min rawn melh zawk, ka hmui hnuailam ka lo ti pawrh tarh ringawt a, a nui ri suk thung



Op-a te nupa in, Op-a U fate panga ngawt an rawn hruai a, kan fate nen ka nu in Putea tu te 2 a rawn hruai tel bawka, Christmas zan chu kan ri ve luih luih mai


Chhangchhe zetin Christmas leh kumthar pawh kan hmang zo ve leh mai bawk a ; Mahse, chhungkaw kimtak a kan hmang thei hi a ropui tawh hrim hrim



"Naktuk em ni i dawr chu i hawn dawn kha'h?" Ka melh zawk a, a dul pawh a lian tawh khawp mai, thla 7 a pum ve tawh a, a kawh luah mai alawm



"Umm, i rawn kal thei ang tiraw?" A bread ei chak ka siam sak chu Oven ah ka dah lut a


"Dawn e le...!" Uar zet a tih leh, "Maya, nau hi pai ila duhlo em ni, Nathan-a nen in awmdan en hi chuan rai tawh awm chu ini? Nge ni a, nang hi indan na ilo ei te hi a nilo maw...?" Ka melh nghal vak



"Inpa in a thlah theihloh zia che leh a thlakhlelh zia che ngaihtuah hian nau ila pai lo hi a awihawmloh êm alawm...!" A tih zawm leh zet zet a


Nui pahin, "naupai tur chuan ala hma emai, damdawi phei chu ka ei law ; Mahse, naupai tur erawhin kala inring tawklo a niber. Bakah, dawr te hi han hawngin, han phuisuih phawt sela, kanla ngaihtuah angchu, a hmanhmawh thlakloh ," Ka ti sep a



Jamie-i chu rawn ner nawng nawngin, "inpa kum hi a naupang zawk zawk tawhlo a nia, nangmah chauh inngaihtuah suh. Bakah, fa enkawl tur phei chuan kei aiin i rintlak zawkin i puitling zawk daih lawm, nu tamtak hian an tluklo che, Bryan-a te unau en hian a hriat a lawm le, ngaihtuah chiang rawh," A tih leh nung nung chuan ka nui ringawt a



"Maria-i thusawi kha dikta se?" Tih ka ngaihtuahna a rawn lang zawk chu duhlo zeta lu thing nawk nawkin Oven rawn ri tut tut ah chuan inherin ka hawng zui vat a



"A sat lai khan tah hian rawn dah rawh, awii a rimtui zia hi," Ka nui chhuak ringawt



Eiin hi a duh in, a thei ve ta hrim hrim nita in ka hria, a naupai thil ei chak te kha chu reh a hun tawh lutuk, engkim mai hi a rawp emaw tih mai tur a ni



"Bawihi," Nathan-a choka a rawn nui lut deuh suk suk chu ka en a, a hmel hlim zia chu a mak zawk hial, tun hnaia hmel hlim tak tak a put vawikhat na a ni hial ang


"Eng nge ni a?" Jamie-i lah chuan a ngaihsaklo nasa, a ei tur chu chhêm hlat hlatin a ei tuam tuam mai



"Min rawn zui teh," Tih leh ka lam rawn pana ka bânrek a chelha min pensawn puiin inchunglam min panpui a



"Eng nge nita thut thut a?" Min pawt kal deuh dawt dawt, ka tlan dat dat a ni mah zawk



Room kawngkhar hawngin min pawt lut chuan min kuah thuta, min kuah vawng vawnga thaw chhuak ham hamin, "reilo te," A aw chhuak ah chuan a nui tih ka hre thei



A chhan pawh hre lemlo a kuahlet pahin, "engthil ṭha nge maw i tawn le?" Ka ti chhuak sap a


Min kuahna phelh thuta, ka dar tawn tawn a vuana min namsawn deuh chuan, mitmeng de sawr sawra min en vang vang in, "ka in checkup a," Ka en kawk, kan pahnih a doctor râwn ka tih khan a duhlo nasa si a


A nui suk a, thaw hakin, "Doctor-in dikloh na engmah ka neihloh thu leh fa ka neih theih tur thu min hrilh a," Ka meng zau tulh tulh, diktak chuan kan inneih na thla 5 a tling ve tawh. Jamie-in nichin maia a thusawi kha keipawh in ka lo ngaihtuah ve tawh. Maria-i thulo sawi hrep nen Nathan-a ka hmangaihlo tihna nilo in, a hriselna lamah rinhlelhna ka lo nei hman lek lek a, chuvang in entir dun pawh sàwm ka nia...! Mahse, a ṭha hlauh chu a lawmawm e...!



"Tak tak em ni?" Naupan in an thil duh an hmu ang maiin a bu nghat nghat e a, ka hmui a rawn fawp chawkin, "tak tak e, thu ṭhalo min hrilh leh hriat ka hlauh vanga doctor hmuh duhlo kha ka nia ; Mahse, ka ṭha vek, diklohna ka neilo," Chutiang taka Nathan-a lawm hmel chu ka hmu ngailo



Bryan-a chungchang a hnehna kan chanlai aiin a hlim fe zawk, ka nuih let sen sen a, ka hmui a rawn fawp vawng vawngin ka chal, a chala nghat datin, "kan pahnih fa nei turin ka theih tawp piahlam ka chhuah dawn a ni, chuvangin tun aṭang chuan naupang leh i dawr thar tur ringawt i rilru ah dah tawh suh angche," Thikna aw a lang tel lek lek chuan ka nuih a ti za



Nui pahin ka melh chho ralh a, "mintih läwmdan a zir a niang chu," Ka tih chuan nui nghawr datin, "chungte chu ka thiam zawngtak alawm," Tih leh ka inrin hma in min pawm kâng lawp a


Meng kawka, tlak hläu zeta a nghawnga kuahbet nghal ṭau chuan, "Nathan, naupang rawn haw a hun dâwn. Bakah, Jamie-i ala awm," Ka nui zui awr awr bawk



"Awm mai mai sela, raipuar si vah a che lutuk hrim hrim," Tih leh khuma min theh thla in min rawn bawh zui zat bawk, nui ar ar a lo insia rem sat sat chuan, "Kawngkhar kalh phawt rawh," Ka tih takah chuan lawm zeta nuiin min fawp leh vawng vawngin khum aṭanga a zuang thla zui zat chu nui var var in ka kawr haklai ka lo hlip sawk sawk bawk a.....!

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)