Present Perfect By Floria Laldansangi (Completed)

Moderator: Floria

Ngaia
Site Admin
Posts: 25813
Joined: April 30th, 2016, 4:07 pm

Re: Present Perfect By Floria Laldansangi (Completed)

Unread post by Ngaia » May 16th, 2021, 4:20 pm

PRESENT PERFECT
By
Floria Laldansangi


< 7 >


ZONUNA.....POV



"Khawnge kal i tum, i umzui chuan ilak ah a in lu ling tulh tulh ang tih hre rawh," Ka nu chuan a ti ṭhat a


Mampuii mittui nen a tlân chhuak en vawng vawng chuan, "ka ṭhen thei lo tih i hriat kha," Ka ti chuak sup


Ka ti na dâwn a ni tih ka hria a läwm; Mahse, ka nupui mit a natna lang chhuak kha ka vawikhat hmuhna a ni a, a mit aṭanga mittui chhuak khan ti tak hian minti na ang tih ka ring pha ngai lo


"ka hmangaih" tih ka sawifo ṭhin. Mahse, vawiin ni thleng hian ka nupui ka hmangaih zia keimah ngei pawhin ka lo chiang ngailo zawk a ni


Ka hmangaih a nih chuan tihnat ka hlau in, chân ka hlau hle tur a ni tih ka hre chhuak a, ka nupui hmangaihna dawn leh ka hmangaih thu hrilh ṭhin te kha ngai ah ka lo nei mai chauh a lo ni


A mittui tla ka hmuh khan ka nâ a, ka hmangaih takzet a ni tih ka hriat chhuah meuh erawh chuan, a mit ah natna tamtak alang a, kei hian ka hmangaih a ni ti siin chem lo vin ka nupui Lu ka lo la reng si a


"Ka hria, ti khan hun pe rawh, khawiah nge kal bo san che se i tih chuang ni, i nupui mizia en la a ṭhen ngam che i ring emaw ni?" Ka nu chuan ti leh hlarin naupang ho rawn tho chhuak chu, "kan in ah tukin chu ei mai rawh u, inti fai ula rawn chho angche u, in school uniform rawn ha sa ula," Tih leh ring tung vah a pen chhuak chu naupang ho en in ka thaw chhuak kawk a


"Khawnge ka mawza," Bryan-an a tih rualin, "keipawh ka kawr ka hmu lo a nia," A rawn ti zui ve lang lang chu Mampuii call tumin phone ka hmet mawlh mawlh lai chawl datin, "Bryan a awmna i hre lo em ni?" An room a lut chuan ka zawnpui ve nghal a


"Anu khawnge, anu in a hria lawm," Ivan chuan min rawn en kar a, en let in ka thaw zui hak bawk


Naupang ka insiam pui chhung ringawt pawh chu rei tak a ni



"I nupui chu umzui rawh," Ka pa te inchhung ka luh rual rualin ka pa in alo tih khur khur chuan ka bu nghat a, "Tete naupang ho hi school-ah lo han thlah mai rawh," Tih leh ka inher zui zat, ka hnunglam ah ka Nu in zawn a ṭul loh thu a sawi hmiar hmiar chu ka hre hman tho


<>~>~><>~>


MAMPUII...POV



Rinpuii te in ah chuan ka riak a, U Zoa haw duh tlat hek lo le, chair-ah zankhua ṭhak in a ṭhu, keipawh chu muhil si lo vin, chhaklam bang hawi chuan ka sai sir zankhua ṭhak tho



Kan inbe lo va, vawikhat pawh a thiam thu sawi a tum tawh rih lo. Nge ni a, thiam thu sawi leh insawifiah thei a nihloh zia a hre tawh zawk?


Ka taksa pang khing chu ana kham ut ut a; Mahse, chu ai mah chuan ka pasal chau tih hriat ngawih ngawih mai, chair hnung ngheng a, dak deuh awrh chung leh kuangkuah chunga muhil thaw ri sawk sawk chuan minti na zawk daih



Engtin nge zankhat thilthu ah ti tak maia kan inkar hi a zau theih ni? Mit khap kar lekin mihrang ang mai leh hriat ngailoh ang maiin kan awm a, in hre chiang em em siin, kan in hre chiang chuang miah si lo



Dimtêa ka ke hlang thla in, U Zoa harh hlau zet chuan khum aṭang chuan ka tho ṭham ṭham a, pên dên dên chuan ka pangkhig na lutuk ner zui deuh nawng nawng bawk


"Rinpuii" choka ah Rinpuii zing thingpui lum lai chu ka ko sep a


"Lo ṭhu rawh," Tih leh ka hma ah ORS hi a rawn dah zui zat, "in rawh, nimin aṭangin engmah ila ei si lo va, i chau chhe mai dawn," Engmah min zawt lo chu mit bui luk a en in, ka nui seih bawk, min zawt pawh nise tunah rih chuan thil kimchang hrilh turin chakna ka nei lo hrim hrim


"Mam," Min rawn melh zawk, a thaw leh hak a, sawi a hreh hmel takzet, ka hrethiam, ka pasal nena kan inkar min zawt duh si, ngam si lo a ni tih, "tu in nge hetah min rawn hruai a?" Thildang ka lo sawi vat a


Ka hriat theih chin chu, kan in mittui nena ka chhuahsan kha a ni, ohhh, Ryan ka hmuh tak kha maw le


"Ramnghaka, damdawiin a hruai lo che kha ka lo hau hman a, Zoa pawh call lo turin min tia, a rawn zawng hmu ta tho che a nih hi," Rinpui'in a tih zawh rualin, "Bawihi," U Zoa aw thâwp sup mai ka hriat rualin ka khawng nghal at, ka kawchhung hi a rawn na nghal veng veng thei, a mak a sin, mit khap kar lekin ka thlakhleh em em ṭhin ka pasal aw hian min chhun na vawng vawng thei a nia



"Thingpui chu a in theih tawh em? Zingkarah i Nu te vawkin chu zu siam sak lawk ila a ṭha ang," U Zual a rawn ṭawng lut lung lung bawk a


"Umm theih tawh e," Rinpui'in a lo chhang vat, kei erawh ka ṭhut ngaiin ka la ṭhu renga U Zoa pawh ka hnung ah ala ding reng tih leh min en reng a ni tih ka hre bawk


"Lo in rawh, Mam inbe lawk ang," Tih leh ka kutah a rawn chelh a, phawk fe a ka lo en chu, min pawt tho in an nupa room lamah chuan min pawt lut dat dat bawk


"Rin, tunah ni lo, ka chau rih lutuk," Room-a min pawt lut chu a hnunglam aṭangin ka ti chau raih a


"Chutiang lam a ni lo," Tih leh room kawngkhar kalh rak rakin, an khum bula pawhdawh hawng chuan, "i zun va test teh," A thutak em em lehnghal a




Ka kut a test kit a rawn dah chu en haw in, Rinpuii ka en leh a, "kal phawt rawh, nakinah ka hrilh angche," Tih leh bathroom lamah min nawr kal dat dat bawk



A ngaihna ka hriatloh chu thu hran, zun test na chu kei hian eng nga tan nge ka tih ang, nau ka pai thei lo tih chu hrechiang ber tu zing a mi a ni si a


Bathroom a lutin test-kit chu ka thlêk vang vang a, "ti tawp rawh Mam," Pawnlam aṭangin Rinpuii a rawn au dut dut




Kar hmasa lawkah ka in entir a, ka doctor ngei pawhin ka rai tih a sawi loh mai bakah, nimin piah lawkah U Zoa nen pawh doctor kan pan a, ka rai thu an sawi lo reng reng, tuna Rinpuii thil mintih tir tum chu ka mood nen a in remlo takzet



"Nimin zinga doctor kan koh khan i rai thu a sawi a," Test mai lo va bathroom chhunga ka ding reng chu pawnlam aṭangin Rinpui'in a rawn ti leh sep a


Ka nui chhuak thut, keihi ka rai ang maw? A awihawmloh lutuk chu nuih lam ah a kal ta zawkin ka hria, ka ṭah a rawn chhuak, 'rai thei ve tak tak ni ila tun dinhmunah hian ka ding kher angam? Ka pasal, ka hmangaih em em hian min uire san kher angem?' Ka lu ûm-ah zawhna a rawn lut zut zut, ka kutah mittui a rawn far zui kauh kauh bawk



"Ti chhin reng reng rawh, a nihloh leh ngaiawh a ni mai a," Kawngkhar a rawn ti ri dat dat bawk a



Ka mittui hru deuh tawka chil lem khalh in thaw ka la hak bawk a. 'Ni e maw le, chan tur leh na tur dang ka nei pawh a ni tawh chuang lo va, ka rai lo a nih pawhin tunge pawiti tawh chuang ang ni' tih rilru pu chung chuan test kit hawng chuan toilet-boil ah chuan ka ṭhu zui zat a


Ka rai ka ringlo mai pawh a ni lo, thil theihloh a ka dah avangin ka zun ka test pawh beiseina nen pawh ka en tawh lo



Ka kuta test kit chu khur zawih zawihin ka en a, "a sen, rin sen pahnih a a awm," Ka aw chu a chhuak ṭawk ṭawk, ka mittui bawk chu a rawn hnai leh, "a ni lo ang, a ni lo ang," Ka kut a test kit en chung leh mittui far kauh kauh chung chuan ka riat nawk nawk a, a chhan chu, rin sen pahnih in rîn ka hmuh chu ka ring phal miau lo a tin ni



Muangchangin ka inher a, bathroom kawngkhar dimtê a hawngin, nghakhlel zeta min lo en tu Rinpuii chu mittui nen ka en a, "tinge?" Tih leh ka kuta test kit rawn en a ban nghalin, âng hau chuan, "Lalpa... Mampui i rai....." Rang lutuk in a kâ ka hup zui vat, hlauthawng zeta kawngkhar lam melhin, "Doctor pan ka duh," Ka phun sap


Bu nghatin, min en vang vang chuan, "engtia tih nge i tum?" Ka lu ka thing a, "ka hre lo," Ka phun sap


Ka hre lo tak tak bawk, ka rai rêng em tih pawh ka la chian ngamloh laiin, engtia awm tur nge tih phei ka ngaihtuah pha rih lo hrim hrim; Mahse, chiang taka ka hriat erawh ka pasal hriat tir ka duh rih lo tih hi a ni



Rinpui'in ka kut rawn hum vang vanga ṭawng a tum chu kawngkhar a rawn in kik kharh kharh a, "insiam ka ngai a nia," U Zuala aw a ni, "kan lo chhuak," Tih leh min rawn en in, "inpa i hma chhawn thei ang maw?" Min ngaihtuah hmel takzet, ka bu nghat a



"U Zual kan vengah min thlah ve nghal thei angem?" Kawngkhar hawn ruala ka tih chuan, "Bawihi," U Zoa a kal hnai nghal zat


Melh khat pawh in ka lo melh lo chu thaw hakin, "a ṭha e, ka hrethiam, in ah kan inbe dawn nia," Tih leh in hera pen chhuah a rual nghal, kawngkhar a chhuah rualin ka thaw chhuak hawk, ka bul hnaia a awm ringawt pawh khan ka in hum ruh lutuk a, ka taksa ana nghal ṭhüm thei



"Ka tihpalh tak tak a ni Mampuii, engtin nge i rai tih ka hriatloh theih, test kit ah lah a lang bawk si lo," Ka doctor, Dr. Remi in thlahrung lutuk chu ngaihdam min dil mawlh mawlh a


Ultrasound chu en in, "a tê hle bawk a nih hi, hman ni, ti ila nimin piah a niang chu, ultrasound te khan kan en ve sia, ka hmuh miahlo, pawi ka lo van khawih teuh ve," A ti zui leh nung nung a



Kei erawh nau ka pai a ni tih ka hriatna leh ka chian na chuan natna minpe a, ka lawma, lawm avanga mittui hial a tlak ka rin tehlul nen, ka läwm a kim zo ta hauh lo, kimlo lai ka nei tlat tawh


Engtin nge hmalam ka pan tak ang, engtin nge he ka pumchhung a naute nen hian ke kan pen dun tak ang?

Kum 10 chhung teh meuh mai ka awh leh, theihtawp chhuah a neih ka tum kha, tunah ka thisen ringin a rawn insiam ṭan ta chënga; Mahse, maw ka naute, i rawn lan hun hi a fuhlo ka ti dâwn em ni? Natna leh harsatna mi thlen tu i ni angem? Ka kawng pik lutuk chuan ka thawk lak a ti harsat


Ṭhu chhuakin ka dul chu dimtê in ka chula, "i naupai hi a chaklo hle a ni tih ka sawi duh Mampui, chuvang a nih kha ka hriat mailoh ni, i taksa a chau in i rilru ah vei i ngah tih a lang chiang em em bawk, khatiang a nih reng chuan i naupai khan a tuar dâwn a nia, thisen var pawh i tlachham hle tih hre tel bawk la," Doctor-in a kut tifai mawlh mawlh paha a rawn tih chuan ka lo bu nghat a


Doctor room rawn in hawng ri rak ka hriat rualin U Zoa hmel a rawn lang hlawl bawk, phawk lutuk a en in, "engtin...."


"A rai iti em ni? Ka nupui hi a rai amaw?" Hnai lutuk ah Doctor chu a rawn en a, doctor lah chuan nui var var in, "a dik alawm, thla 2 leh karkhat a ni tawh e, ka lawmpui lutuk che u, a taksa chakloh a leiah, a rai no inṭan vel pawh kan lo hre hleinem, IVF effect emaw keipawh khan ka ti tak meuh meuh a ni, ka hna chân theihna thil pawi ka khawih teuh hle a," Dam dap mai a rawn tih chuan U Zoa lawm lutuk chu ka lam a rawn hawi a, mittui nen ka lo en thung



"A tawp a tawp ah chuan Pa ka ni ve tak tak dawn ta, ka lawm e, ka lawm e Bawihi," Kei erawh ka lawm a famkim thei tawhlo, ka lu ûm-ah hian engmah dang a awm thei, ka ngaihtuah na lah ka hmang thei hek lo, engkim mai chu a chawl dup a, a thim khup mai hian ka hria



Mittui tla tur khap let sak sak a lawmthu sawi chung chuan doctor chu kan chhuahsan a, nui ṭhû chungin U Zoa'n min zui ve zel bawk, Rinpuii te in aṭang khan a haw daih emaw ka ti tawh zawk a, damdawiin thleng min rawn zui ka ring pha lo hrim hrim


"Lut rawh," Ala nui reng, taxi chang turin ka chau in, ka ni nghulh mai bawk si, lung si zân lo va car a ṭhu lutin chuan tukverh lam ka hawi nghal hmak a

"Bawihi," A rawn ṭhut luh rualin a ti sup, mit ka lo chhing zui hmak thung chu thaw deuh haka car ti nungin a tlan chhuak nghal a



Kan haw kawng tluan chuan a tu mah mah kan ṭawng lo, a reh dûk mai a ni, damdawiin leh kan in inkar pawh chu chatuana tlân angai ta emaw tih mai turin a thui ka ti takzet bawk



Car ti ding datin, "kan inbe tawh dawn em ni?" Kawngkhar ka hawng rak rak a, min biakna pawh chu chhang lo vin ka chhuak zui hmak, beidawn hmel zeta a thaw ri chu ka hre hman hrâm



"Mampui," Inchhung ka luh rualin ka nu leh pa hmel ka hmu nghal zat



An hmel ka hmuh chuan ka in rin hma in ka mittui a rawn lum thla puo mai, ka Pa, ani chiah hi he chhungkua ah hian mi pangai leh mi dik, dikna ngaina mi ni in ka ngaia, ka zah a, ka pian na Pa tlukin ka ngai bawk; Mahse, ani lehzel in a engmah ka laka a sawi lo leh a fapa uire na fa enkawl tir ve mintum a ni tih ka ngaihtuah chhuahna chuan min chhun vawng vawng mai



"Mampui eng nge i an tawh a?" Ka Pa ṭawngkam nen damdap mai chu ngaihthlak a hreawm ka ti


"Pa, Mampuii hi a rai, fa kan nei dawn," Ṭawngkam khat pawh ka ṭawng chhuah hma a U Zoa rawn chhuak chu an meng kawk a



Phawk zeta min rawn en in, "tak tak em ni?" An rawn ding nghal at, choka lama glass keh ri chuai ka hriat ruala ka hmel hmuh erawhin cubic lunga den dawt ang mai ka nghing dawt thei


Kan choka luh dawn a Lucy-i ding khawng at ka hmuh chuan mitmu pawng chhuak lo chauh in ka en a, "eng nge hetah itih?" U Zoa zawkin a rawn ti vin ṭhat



Kei erawh lu hai in ka tlu mai dawn, ka thawk lak a harsa in boruak hip tur ka nei lo va, ka âwm dawm chuan ka thaw ṭawk ṭawk


"Ka ko a nih kha, engtik ah nge Mampuii a rawn let dawn tih pawh hriatloh, naupang ho enkawl pui turin ka ko a nih kha, nu berin fate tlanbo san hek maw le," Ka Nu chu en in mittui luang ngiai ngiai chuan ka ṭah nuih hak hak


"Chhuak rawh u, min chhuahsan rawh u," Aw rawl tawpa au ka duh laiin a ri chhuak chang chang chauh. Rin taka au ka duh a chutiang tur pawhin tha ka nei tawh lo hrim hrim, din pawh hi ka ding ṭawk ṭawk chauh a ni



"Chhuak r'u, ka nupui sawi chu i hre lo em ni Lalhriatpui," U Zoa chuan a ti ṭeng chuai a, kan nupa room pan tur pawhin ka in ham kal ṭawk ṭawk, ka in chhuih lut khut khut a ni zawk mah, engtin nge khum ka thlen theih zawk pawh ka hre lo


"Nau a pai chuan Lucy-i naupai saw engtia tih nge i tum?" Ka nu in U Zoa chu a zawt a, khuma mu kawm ngiai chuan, ka duh emaw duhlo emaw ka ngaihthlak a ngai miau si a


"Chutiang sawi hun pawh a ni em ni? Engvang phiangsen a Lucy-i ko nge inih, min in ṭhen tir hi i tum tak tak em ni?" U Zoa chuan a ṭawng a seh chilh deuh nawk nawk



"Inṭhen rawh u, Mampuii tan a ṭhaber a ni, a pa te bia ila, rawn hruai rawh se, kan thiamloh a ni a, kan thlah ngam tur a ni," Ka Pa in ti tawp hluk chuan a pensawn ri in a zui nghal a


"Teuhlo lutuk, ka ṭhen dawn lo, chu chu hre rawh u, vawikhat pawh Lucy-i hming ilam a, Mampuii tina thei tur ṭawngkam i ti chhuak a nih chuan he in hi ka chhuahsanpui ang," Chiang fek fawka U Zoa'n a tih chuan ka Nu ngaihdan a ni lo nasa tih hriat taki, "ZONUNMAWI," a ti ṭhat a, "hmeichhe pakhat thu hnuaiah awm in min vau khanglang suh, tunah nau a pai a, i pa hian a inṭhen tir che u emaw, i nupui hian ṭhen che in, an khua Burma dep, thingtlang ah a letsan che ring suh, i lu a thluak kha hmang rawh," Ka nu chuan kei min ngaihtuahna nei lêk lo leh ka ngaihthla ve a ni tih hre reng chung chuan a ti phiar phiar a


Ka kâ hupbet chuan chhuak lutuk in ka ṭap khur zawih zawih, ka pasal chhungte thinlung ah chuan chutiang hmeichhia chu ka ni, pasal ṭhen hlau tak. Ni e, pasal hi damchhung atan a din keichuan ka nei ni

Min ngaihdan leh sawi ṭhin dan te chu ka hriat ngailoh a ni lo ; Mahse, beng ngeia hriat chu a nat dan a dang daih, lungtuma den chawrh chawrh ang mai hi ka ni



"Ka naute hi engtin nge ni ve dawn?" Lucy-i aw a ni, ka beng chu lukham nen ka hum bet a, blanket sehbet chung chuan ka ṭap zawih zawih, ka thi mai dawn in ka hre hial bawk


Room, plywood nen a pin hran ah ka awm a, min zahna chhete pawh anti langlo chuan minti na zual, au chhuak a, au khum chiam mai ka duh laiin, ṭhenawm khawveng mitmei ven a, ka mualpho rualin ka pasal leh a chhungkua ka ti mualpho ve mai dawn si a, a hma ang bawkin ka in sehbet leh ngar ngar dawn em ni?



"Ngawi reng khan chhuak rawh."


"Hetiang hian minti thei lo, i fa a nih hi U Zo," Lucy-i chu a ṭah aw ṭuau tawh


"Min rawn zui phawt rawh," Ka nu in a tih takah chuan a pawt chhuak nge an ri zui khut khut a, reilo te ah room kawngkhar a rawn in hawng ri riai riai a


Ka mit chhing tlat chuan, dimtê a ka beng hupan lukham rawn la kâng in, "Bawihi," Ka mit ka la chhing tlat



"Lucy-i a rawn kal tih ka hre lo tak tak a nia, lungngai suh, engkim a hma ang khan ka siam leh ang,". A insawifiah na hi ka ngaithla tam tawk tawh lo em ni? Eng hi nge ka la beisei ni?


Khum aṭanga tho thut chuan ka pasal hmel hmu lo leh a insawifiah na ri hre lo a awmna tur ka duh a, room ka chhuahsan rualin choka luh dawn a no keh darh nuaih mai ka hmuh chuan ding data ṭhu hniam in ka chhar khawm zui mawlh mawlh bawk



Mittui nen a tifai na nâ na chu ka kut a rawn thîp zawk, thisen a rawn far zui thluah thluah chu en ngawih ngawihin, "Bawihi, a nâ em? Eng nga tinge ilo khawih a, lo kal teh hetah," Ka kut a rawn chelh a, mittui nen ka pasal min ngaihtuahna hmel buai nuaih mai en ngawih ngawih chuan, "min tihnat ang êm chuan na lo ve," Mittui luang ngiai ngiai chuan natna a khat a ti chhuak sap inka kut la let a


"U Zo, eng chen hi nge nangmah ka hriat ṭhin tak tak kha ni a, engchen hi nge ka hriatloh U Zoa ni ka thliar thiam tawh lo a ni," Ka mittui a rawn luang zawih zawih



"Bawihi khawngaih in ṭap tawh teh suh," Min rawn pan hnai chu ka lo tawlh sawn hret a



Ka lu thing in, "eng chen hi nge thudik ni a, engchen hi nge dawt ni? Tu hi nge rin a rinloh tur tih leh, min hmangaih takzet em tih thleng hian rin leh rin loh tur ka hre tawh lo," Ka nâ a ni, ka na takzet, ka aw chhuak tin ah chuan mintih nat zia a hre ngei ang



Ka hawi na lam a piang chu a thim a, a pik tulh tulh maiin ka hre bawk si


In hnit hlawp hlawp a mittui hru hul tawk tawkin, "inṭhen mai ang," Ka sawi zawh rual deuh thaw in, "teuhlo lutuk," A rawn ti chhuak ṭhat



Ka en a, ka mit ah tak min rawn en in, "ka ṭhen dawn lo che, ka fa i pai tawh alawm Bawihi, kan pahnih fa, kan pahnih chauh," Min rawn khawih bawk chu a tum leh ṭhin; Mahse, min deh sawiloh a bul hnaia awm ringawt pawh hian ka thawk lak a ti harsa tlat tawh


"Ka ṭhen dawn lo che a ni tawp, tum buai duh suh," A tih leh nghut a, ka thin a sa ve phat


"A dik, i fa a ni; Mahse, ṭun aṭang chuan ka fa chauh a ni tawh ang," Ka au chhuak ṭhawt, ka dul a rawn thîp zui zawk bawk a, dawm deuh vang vanga thaw chhuak ham ham in, "tun aṭang chuan ka fa a ni, i fa ni ve tawh lo vin," Ka phun chhuak leh sap sap



U Zoa chu a lu thing nawk nawkin, "a theihloh, ka thlen tir thei lo, kan fa a ni. Bawihte, min ngaidam tur hian eng nge ka tih ang? Vawi engzât atam nge ngaihdam ka dil angche nga, tihpalh tih ka sawi dâwn?" U Zoa mit chu a sen râm, a hnawm chap bawk



Ka lainat lo a ni lo, ka mipa hmangaih mittui tla lai ka vawikhat hmuhna a ni a, engtin nge ka natloh theih tehlul ang ni. Mahse maw..... uire-na leh phatsan na hi ngaihdam dilna hian a tuam dam zo si lo a tin ni



"Ka ngaihdam vàng che a i hliam min pek te hi dam thei ni sela, ka ngaihdam na i mamawh lo tur," Ti chhuak ngawih ngawih chuan, "kan in hmangaih tawn na te leh kan hun hman dun tawh te zah ni la ngaihdam min dil hi a ngai miahlo tur a nia U Zo," Ka mittui a luang zawih zawih a, ka na lutuk leh ka pasal hmel, ka en nin theihloh mahse tunah erawh natna tam tam minpe tu ka hmuh ringawt pawh hian min hmeh ngut ngut a tu chu natna a khatin ka en vawng vawng a



"I tel lovin ka nung zo lul lo ang ka hmangaih, Bawihte bul ṭan ṭha ang, vawikhat....vawikhat chauh hun minpe leh rawh, engkim ka siam ṭha ang," Min ngên ngawih ngawih a, mit hnawm chap leh natna a khat a min en in, "min la hmangaih a, ka tel lovin i hlim bik dâwn lo a ni lawm ni?" Ka hrawkna lutuk leh hnungzang na lutuk chuan chil lem ringawt pawh chu a ti harsa



"Ka hlim hauh lo ang, ni 2 chhung lek pawh hi ka tan chuan hremhmun ang a ni, kan inkar a khi zau tak awm in min hmeh hlum dâwna ka hriat na hian thawk ngaihna minti hre lo va, i awm ve lohna khawvel ah chuan hlimna a awm ka ring hauh lo chung pawhin, ka rin ang che leh ka hmangaih angche khan ka hmangaih thei tawh dawn tlat lo che a tin ni," Mittui hru hul paha harsa ti zet a chil lem khawlh in, "in hmangaihna leh inzah tawn na tlêm te kan la neih laia inṭhen hi, huatna in a thlak huna inṭhen aiin a ṭha zawk läwm ni?" Ka ti chuai raih raih bawk, a tawp lam chu a ri chang chang chauh



"Ka pawm lo, ka pawm ngai dawn lo," Ka lamah kut a rawn lek zuai, la let lehin, "hun ka pe angche, intih harh i ngai a nih kha," Tih leh in her vutin pawn lam a pan zui pawk pawk a, a kut hum ruh ngar leh thinrim insum thisen zâm pawng ṭawl ṭawl te kha ka hmuh hmaih lo nasa mai


Chhuata ṭhu thla hnawk chuan ka ṭap khur zawih zawih a, ka thuthlukna chu a dik em ka hre hauh lo.

Ka pumchhung a ka fa lo piang tur pawh hian pa a la mamawh dâwn, keimah ang maia fahrah, chhungkaw khingbai lutuk a seilian turin ka duh hauh lo


Mahse, duhthlan tur dang nei lo vin min siam miau si a, eng kawng nge ka zawh chuan ang ni, kei chauh ni lo, Lucy-i pawhin ka pasal fa a pai a, ani chuan nupui nei lai a ni tih hre chuangin a hmangaih thei a, kei erawh in hmeichhe dang a nei tih hre chungin ka ngaidam ve thei si lo a ni



Mittui nen a ka phone ah chu phawrh rawk rawkin, kut khut dar dar chuan ka Pa number chu ka hmet chhuak a


"Pa...." Ka mittui a rawn luang zawih zawih, ka Pa in, "Hello MamBawih," A ti ri chuan maw dan zawh rual lohvin ka mittui a ko chhuak a, ka Pa ka ngaih zia ka hre chhuak uar uar bawk


"Pa... Min rawn hruai rawh, ka haw duh a ni, heta ṭanga hla taka bo ka duh," A bak engmah ka sawi thei lo, ka ṭap chhuak hawm hawm a, ka Pa chu ṭawngkam khat pawhin a ṭawng lo, ka ṭap chu ngawi rengin a ngaithla a, chhuak zeta kei a fanu ṭap hi, ka duh tawk ka ngah thleng rat ngaithla in, engvang a haw duh a ṭap rawih rawih nge ka nih tih leh engthil nge thleng vawikhat pawh min zawt lo


"I rawn haw duh takzet a maw?" Ka Pa, Mizo Pa fing tak mai chuan, kei a fanu hian hun harsa tak ka paltlang in, ka beidawng hle a ni tih a hai mawlh lo tih ka hria


Ka chhang lo va, ka in hnit hlawp hlawp thung, "ka hria e, naktukah i nau te leh i patea te hovin Aizawl kan rawn chhuk dawn nia, lo hlauthawng reng reng suh, Pa ila neih hi, nuṭa i nei bawk a ni tih hria la, hlau reng reng suh angche MamBawih," Ka Pa aw nghet charh mai chuan min chhun ngut ngut a, ka thla a muan em em rualin ka Pa rilru nat dan tur zia ka hriatna chuan min rek bet ngawt ngawt bawk


Ka phone off chuan chhuak lutuk leh a ahnu leh tur awmlo lek in ka ṭap chhuak ruah ruah a, inchunglam dakin, "tunah, tunah tak engvang a fa hi minpe nge inih? Tu pawi nge ka sawi a, engthil chiah nge ka tihsual a ka chungah hetiang hremna hi min pek mai ni?" Ka au chhuak rawih rawih bawk


Tunge ka thusawi hre phak a, tu in nge ngaithla tihlam ka ngaihven thei tawhlo, kan nupa mualpho na tur lah ka dâwn pha hek lo

A vawikhatnan, a vawikhatnan tak meuh meuh kan Pathian, min siamtu leh engkim chunga rorel tu chungah khian ka vui tak meuh meuh a ni


Ka âwm ṭham tawk tawkin, "heiai hma hian fa hi minpe ni la, ka pasal hi a uire lo tur. Ni lo, heiai hma hian minpe ni la keimah ang maiin fahrah nun a hman a ngai lo tur, fahrah ni tur in maw min pek a?" Aw rawl tawp tawp in ka au a, ka âwm ka chum dawt dawt bawk



Ka nâ lutuk hi ka kawchhung leh ka lungphu hi maw kut lawnga zen ang mai a ni, thi si lo vin, duh lai lai chem hriam tak hmangin ka tasa hi an chansan sawm a ni ber



<~>~£~>~>~>~>~>



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 4:22 pm

PRESENT PERFECT
By
Floria Laldansangi



Chapter < 8 >


RYAN....POV


"U Mampuii a ni lawm ni ṭap chu?" Kawmchhak lam hawi vauh vauh paha Kimkimi'n a tih chuan ka hawi ve vat a



Chhuah mai tuma ka che hrut chu, "han chho suh aw Ramnghak, vawi engzah nge ka sawi dawn Mampuii lak aṭanga inthiar fihlim tur che in," Ka nu in a rawn ti khauh leh ṭhak chu en zawkin ka thaw hak a



Kimkimi'n ṭhen vak chunga min rawn en in, "a ho e Anu chu, an in ngaizawng pawh ni lo va. Bakah, U Zoa'n kut thlak ta se, chhan...."


"Inbuaina tur a awmlo, nupa inkar a nih khi, i Nu Êngi te pawh an awm, hnai suh ka tih tawh kha," Min rawn en leh kher, hnaih ka tum hleinem; Mahse, hlat pawh ka tum chuang law


"A ṭawng chu ngaithla teh u," Ka nu ṭawng mawlh mawlh laia Kimkimi bawkin a rawn tih chuan, ka nu pawh chu a tawp chat a



"Ka khawngaih e, engtin nge U Zoa hian a uire san theih le? Heti khawp hian an chhungkaw tan a ṭha a nia, a mak...." Ka hre phak tawh lo, inchhung aṭang chuan ka tlan chhuak vut a


"Lalramnghak rawn let rawh," Ka nu in a ti tuar chu ka hre vuai hman bawk


Muanpui te in kawngkhar ka thlen lai ka hre lo hrim hrim, kawngkhar bula a fate pahnih mittui tling pam chunga Muanpui ṭap lo en kiau mai ka hmuh rualin, "inchungah chho rawh u, khawnge i Pu te?" Inchung lam chu ka thlêk deuh a


"Anu te hi an inṭhen tak tak dâwn ami?" A U zawkin ṭah aw ṭuau a a rawn tih Muanpui chhuata ṭhu sawp nuaih chung leh mit bui luk leh hmai sen vek mai rawn hawi in, kan lo en tih a hriat rualin a in a mittui chu hruk hul a tum ve nawk nawk tak nâ in a hul hleitheilo a niber

In her chuan hnunglam min chhawn zui vat ringawt a



<><><><>~>



MAMPUII...POV


Ka mittui chu hruk hula, ka fate hma a mittui tih tlak loh tum ngial mahila a tawp thei tlat bawk si lo


"Anu.." Ivan-an ṭah aw ṭuau a rawn tih leh ka lam rawn panin ka nghawngah min rawn kuah a, Bryan pawh upa zawk e tilo chuan min rawn kuah ve bawk, ka fate pahnih kalsan tur tak taka ka indah ringawt pawh chuan ka na lutuk chu ka thawk kawk kawk thei


He in ka chhuahsan a nih chuan heng naupang pahnih te hi fahrah diktak an ni dawn si a, engtin nge nita ang? Ka hruai tel ve chu sawiloh, lo inṭhen ta ni ila ka hmuh hi an phal leh kher angem? An fahrah tawh nak alaiin keihian fahrah taktak turin ka kalsan dawn tihna em ni?



Ka na lutuk chu ka fate pahnih kuah chuan chhuak vàn kâi in ka ṭap chhuak ṭha leh hawm hawm a, nuber ṭap uah uah na nâ na chhuak zetin an rawn ṭap ve bawk


Duhtawk maia kan ṭah hnu chuan kan chau ta ngang a nih ka ring, keimaha ding tur pawhin tha ka nei tawh lo, naupang ka din tir ruala in bengkân ve mai ka tum chu ka in zo lo nasa mai


Ka bânah kut chakzetin min rawn chelh vat a, ka ṭah na avanga mit vai ruaia hawi chhuakin Ryan-a hmel chang rut mai ka hmuh chuan ka thaw chhuak hak


Couch-a min ṭhut tirin ngawi rengin a pensawn leh a, eng nge a tih dawn pawh ka zawt peih lo, ka fapa te pahnih mit hnawm chap mai chu en in ka mittui bawk rawn hnai leh chu ka khap let fak fak a


"In rawh u," Ti nghut chuan tui min rawn pek chu ka lo ban ve mai bawk


Naupang ho pawh tui in tirin, "i zia deuh tawh em?" Mit thip zeta min en ngur tu Ryan chu melh chho in ka thaw chhuak ham ham ringawt a, ṭawng chhuak tur pawhin aw rawl nei tawh miau hek lo ile


Bang a sana kan tar chu ka melh chho zawk, dar 12 a ri thuak tawh, naupang ho school an kal lo tih ka hre chhuak chiah bawk


"School in kal nange?" Bryan chu ka en a

"Kan form a bal a, chuan chaw kan ei tlai a," Ivan-a zawkin min lo chhang vat, engtin nge school an ṭhulh tir mai mai theih le, Christmas chawlh a hnai tawh si, kumthar ruala exam tur an ni bawk nen


"Naupang ngaihtuah lo khan nangmah kha in tifai rawh," Ryan-an a lo ti nghut, ka sirah a la ding reng


"U, Anu in lo haw rawh a ti," Kimkimi inthlahrung deuha rawn dak dek dek lam chu ka hawi a, Ryan chu melh leh in chetsawn a tum lo tih hriat zeta nghet charh a ala ding chu tui lem leh khalhin, "chhuk tawh rawh, kan ṭha tawh lutuk," Ṭial ruaia ka tih takah chuan mit zîmsan a min en in rum nghutin a pensawn nghal pawk pawk a


Ka ngaihbel nge ka hre lo, min en zui reng emaw tih mai turin puitu ka mamawh ngawih ngawih lai hian a rawn lang zat zel hian ka hria



"Ka ril a ṭam e," Ivan-a chu ka en vat a


"Keipawh," Bryan pawh chuan a rawn ti ve zat

Nui chhuakin, "zing chaw in ei em?" An bu nghat a


"Mahse, api in, 'inu, inu," atia ka kham daih," Naupang zawk tih takah zep lem pawh a nei lo, za lo zeta nui in, "eng nge in ei duh?" An rawn nui var var a, an nui hmel en chuan ka nui ve sen sen bawk, naupang rilru thianghlim tih takah nichin mai a lungchhe taka an ṭah pawh kha an theihnghilh lehnghal mai a, theihnghilh ve mai thei ni ila ka vahan ti tehlul êm....!



"Keichu KFC ka ei duh e," Inthlahrung deuha Bryan-an a rawn tih chuan nui pahin, "kan order dawn em niang," Ring lutuk in an unau in, "yes, coke pawh ka duh tel tho Nu," An hlim lutuk chu nui zui ve kar kar chuan ka phone chu ka dap a, KFC tih ang reng, McDonald's te pawh hi ka ei tir ngai lem lo, a chang zeuh tak taka an ei bak ka rem tihloh avang hian an sawi mai ngam ṭhin lo a, vawiin na nâ na chu ei ve mawlh rawh se


"Mampui," Ka Pa a rawn dak duk duk chu en in, naupang ho en leh chuan, "in hmai phih fai ula, lo va intifai rawh u," Ka tih chuan phur zetin bathroom lam an pan zui nghal a


Ka Pa hmel inthlahrung lutuk chu en a hreawm letling; Mahse, a lakah ka läwm ta e tihna phei chu a ni law


"Mampui, eng nge i an deuh tawh?" Nichin maia ka ṭap thawm kha a hria ni ngei tur a ni


"Ka ṭha tawh lutuk e," Ka pasal Pa, ka Pa a la nih miau avangin, a lakah lungawilo viau mahila ka be lo in, ka lo thinrim khum ngawt thei lo, chu chu ka Pa min zirtir dan pawh a ni hek lo



"Engtia awm nge i duh? Zonunmawia ṭhen i duh pawhin ilam ka ṭang tlat a nia," A ngawih leh deuh vang vang hnuah a rawn tih leh chuan ka Pa chu ka en vang vang a


"Engtik khan nge i hriat?" Ka Pa zawhna chu chhang lovin, zawhna dang, ka hriat chak em em, Pa ṭha tak mai dawt sawi tir theitu a fapa uire-na chu engtia rei chiah nge a lo hriat tawh ka hre duh a ni



"Surrogate ka tih duh leh duhloh min zawh ni khan i hria a ni tiraw?" Ka ti zui leh sap a, ka Pa hmel chu zahna in a khat, tihzah erawh ka thil tum a ni hauh lo


Ka Pa a ni a, ka zah em em bawk, min hringtu tluka ka zah a ni vang zawka alak a lawmlo zakzet leh ka läwm lohna tilang ngam chauh ka ni zawk


Min chhanglo, a ngawi ngar chu ka mit rawn hnâm ṭiam ṭiam in, "Pa, ka zah che a, ka pian na Pa tlukin ka zah takzet che; Mahse, engtin...engtin nge hetiang hian ka chungah itih theih? Ka pasal uire-na i sawibo a, a uire-na fa chu kei hi min chawi seilen tir i tum bawk a, vawikhat tal min ngaihtuah ve em? I fapa nupui, i fanu ve tho ka nih hi," Ka mittui bawk chu a rawn luang leh tawh


Ka pa hmel mangang lutuk chu mittui nen ka en a, "khang kum 10 chhung khan intan eng nge ka nih tih ka hre chhuak har êm a ni," A dik a ni, tunge ka dem theih chuan ni, thisen chu thinsen a ni miau a



"Tunge i dem a i ṭah khum a? Muanpui i tan a ti kan ni tih hi engvanga hrethiam duh miahlo nge inih? Fa i hrin theih miau loh chuan in nupa hminga fa koh tur kan ruat sakah che i ngai thei zawklo em ni? Nu leh Pa kan ni, kan rilru tur hi dâwn ve zawk ta che," Kawngkhar lam aṭangin ka nu in a rawn ti leh tawn tawn, ka thusawi te kha a lo ngaithla vek tih hai rual a ni lo



"Êngi lo ngawi rawh," Ka Pa chuan a ti hluk a, kei phei chu sawi tur ka hre lo hrim hrim, mittui tling pam chuan ka en hau ringawt, dawt lian tham lutuk, a chunga thleng nise, damchhung sawiloh thih hnu piahlam ah pawha a ngaihdam ngailoh tur thu lian a ni tih a hre duh miahlo chuan minti na zual


"Nau i pai dek deka huaita viau ah i in ngai ange," Ta deuh deuh chuan, tu nupui leh Nu tehlul in nge fate fahrah phal ang ni, fate fahrah turin pasal te chhuahsan duh ang ni


"Nu..." A bak sawi tur pawh ka hre lo, 'heti em em hian a ni maw minlo huat a' tih rum rumna tham a ni


"Ramengmawi..." Ka pa chu a ding zawt, naupang an rawn tlan chhuak ve nghal zat a


"U Zai.." Ka nu in ti let tuarin, "i tû tur, Zonunmawia fa hmasaber tur a pai mek tih theihnghilh suh," A ti zui leh ṭhat bawk



Ka na lutuk leh sawitur hre lo lutuk chu ka nui chhuak hak, ka ṭah nuih a ni mah zawk


Ka nu leh Pa chu an in hnial bap bap a, ka rilru ah engdang mah a awm theilo, ka nu thusawi, "a duh a nih chuan nau hring sela, duh leh a mahin chhuak rawh se, ka fapa fa a ni a, lehkha thiamlo chhungkua ah seilen tir ka tum aw zawnglo," A tih chuan min vit ngut ngut


Ka Pa thin thawk tih hriat takin a kut a lek kâng zuai, ka Nu lah chuan hlau lo nasa, a hmai alo dawh vah a, na zeta a kut la let sawk chuan, kut khur dar dar a ka nu kawk in, "nangmah hrim hrim pawh hi an inṭhen chhan tur chu ini," Ka Pa chuan a ti kha hrawih a


Ka Nu chuan a duh biklo nasa, "ZAISIAMTHANG..." Ka pa chu a hawisawn hmak


Mittui khap per sak sakin, muangchanga ding chhuak chuan, "Nu i tan hian eng ang mi chiah nge ka nih?" Ka nu chu thlêk ngawih ngawih in ka zawt tlawng, a mo en a min en lo a nih pawhin, mihring pangai en tal hian min en ve em tih ka hre chak hrim hrim a ni


Ka Pa nen a min rawn en deuh hâ in, "tu ang ah nge ngaiche se mintih, ka fapa nupui maw le," Mittui rawn lum thla pup chu hru tawkin ka nui chhuak lui hak a


Ka mittui pawh hi an phu hian ka hre ta meuh lo


"Ni e, i fapa nupui ka ni, vawikhat tal i mo angin min en ve tawh em?" Min chhang lo, vawikhat mah zahlo tak leh ka thinrim mitmeng hi ka la hmuh ngailo, tuna ka mitmeng erawh alaka ka beidawn zia leh natzia bak a hmu in ka ring lo


An sawi ṭhin, Bible pawhin a sawi hial, "sual chu ṭhatna in hneh rawh," Tih a ni, ka pasal neih hma aṭang tawhin ka Pa min zirtir ṭhin a ni bawk, theihtawp chhuaha an chunga ṭhat ka tum a, ka hrin, ka fa ni lo, a fapa fa te thleng a enkawl tu ka ni a, tlemtê tala ka laka läwmna a tihlan ve ka beiseina chuan beidawn na ah bak min hnuk lut lo va, ṭhatna pawhin a hneh zawhloh a ni tih vawiin ni hian ka hmu chiang ta hle ah ka in ngai


Min chhanglo a min en reng tu chu en let in, "vawikhat pawh min en ngai lo; Mahse, ka vui ngai chuang lo. A ni lawm ni? Tû ka pek theihloh vang che u in pawi ka ti, ka thiamlo tih ka hria; Mahse, vawikhat tal mihring pangai ang in, rilru na thei leh ṭap thei, kehchhe thei ka ni tih hi i hre ve thei angem?" Ka mittui a rawn luang zawih zawih a


Mittui tih tlak chu duhlo teh mahila, ka duhdan a thunun theih ni hek lo


"Mihring ve tho ka nih hi," Ka in hnit hruih a, "U Dinpuia te nupa an boral a, Bryan-a ka kut ah dahin, 'fa inla nei chuang lova' tiin, läwm takin ka pawm a, vawikhat pawh ka hnial lo che. Chutiang bawkin Tetea'n fa a rawn nei a, ka kutah bawk i dah leh a, ka hnial chuanglo che, a chhan chu heng naupang pahnih te hi ka thinlung zawng zawngin ka hmangaih a tin ni. Ivan-a kum 1 pawh a tlin hma in ka Pa hrawk cancer zai ngai ah kan buai a, khatah khan tunge minpui tu ila hria em? Ka Pa, lehkha thiamlo tia i hmuhsit em em ram hralhna hmang in a nih kha kan enkawl ni. Mahse, vawikhat pawh i hre chhuak duhlo, hre chhuak fo rawh ka ti hauhlo. Mahse maw Nu!!! I hmuhsih em em kei lehkha thiamlo leh thingtlang mi, i Mo hian a sin, i tû te kal zirtir a, khawvel nundan mawi zirtir a, an damloha tlaivar leh an zun ek zawng zawng thian a, hmangaihna nen a enkawl ni," Mittui tla zawih zawih a ka sawi chhuak chu ka thaw zui kawk kawk thei




Ka Pa chu a mittui a tla ve emaw ni, phe ruai in ka en a, ka hmu sual pawh a ni mahna


"Anu," Ivan-an ka malah min rawn kuah a, ka Nu ding ngawi run mai en chung chuan ka ṭah nuih haka, "i lungawi na thlen tur chuan mo i mamawh lo, chhiahhlawh a ni i mamawh ni," Ka thusawi chu a ring lo na in fiah tak a ni


Ka ṭawngkam mei nei tak chuan a thin a khei a ni ngei ang, "khanglang che chuan Lalmuanpui," Ti ṭhat a min rawn pan hnaih a tum chu ka pa ka hma ah a rawn ding zui zat a


"Thudik chiah a sawi, i tû te hma ah hian nangmah leh nangmah i inti zak mai mai a ni, chhuak rawh," Tih leh a kut h pawt her sawkin a pawt chhuak nawk nawk a


Bryan-an ka kut nghet lutuk in a rawn chelh chu melh zawkin, "KFC a lo thleng ṭep tawh ang, kan ei dawn nia," Ka mittui chu ka hru hul sawk sawk bawk


Ka fate pahnih pawh hlim hmel an pu thei tawh lo, an mit leh ka mit a intawh fuh a pianga an mitmeng a hlauhthawn na ka hriat thiam siloh chuan minti nâ veng veng mai



KFC kan order kan ei zo, tihtur awm silo chu naupang ho ṭap chau, mut chhuak nen, room lama awmpui in kan tal, kan tal na lamah ka thil tawn mêk te theihnghilh ṭhak in kan lo muhil ta diak a ni ngei ang, ka harh leh meuh chuan khua a thim khup tawp, kan vawk ngûk ri ring lutuk ka hriat rualin ka thaw hak a


Ka bula Bryan te unau muhil thaw sek sek en chuan an beka fawp ve ve in dimtê in ka tho a, zanriah pawh ka la buatsaih hauhlo, engtin nge kan boruak tawn rit lutuk karah engmah hrelo a ka lo mut theih ni?


Room aṭang hmanhmawh zeta chhuakin, vawkchaw chhumna lam ka pan rawk rawk a, vawkchaw suak chhuak chuan ka siam nghal sawk sawk bawk



A ṭam ngang a niang, a lo hap nghal hlawih hlawih mai, ka sam hma rawn tla chu ka hui kiang a, kan thlang lama Ryan-a rawn hawi chho deuh vauh vauh mai en chuan ka nui seih bawk, a thim ṭan tawh avangin a hmel phei chu chiang takin ka hmu thei lo


"Anu ka ril a ṭam," Ka vawk chaw pe zo Ivan-a mit nuai chat chatin a rawn chhuak a, rawngbawl miau lo chuan engmah ei tur kan la nei hauh lo


"Bawihte, chaw ka'n kang lawk ange, lo nghak lawk rawh," Tih leh ka kut silfai nawk nawk chuan, choka ah chuan ka lut a


"U Mampui," Ka hawi chhuak, ka nu te nula Thangtei rawn lutin, "chawhmeh ka rawn suah che u, ka Pu in min rawn tir a," A nui ver ver


Nui tawi deuh sakin, "tah khan lo dah rawh," Tih leh chaw ṭhing tih lum tur chu ka la chhuak a, "ka nu a awm em?" A lu a thing mat mat



"Tlai a chhuak a rawn la haw lo," A ti zui sap a, bu nghat in a bel rawn ken thlaksak in, "sil a ngailo, ka sil mai ang," A tih takah chuan ka pe ve mai bawk a


Chaw ṭhing ti lum ta velin, ka Pa chawhmeh rawn dah tir te nen chuan kan nufa thum chuan kan ei ve mawp mawp a


"In va ei tlai ve," Ryan-a bawk a ni, kan boruak hian a zir viau si lo va, ka duh ai hian a rawn lawr zing mah mah ka ti


Ka chhang lo va, naupang ei vat tur a tih leh lehkha zir tur a hrilhin ka tho zui zat, Ryan-a lo nui ri suk chu ka hre thei


"Bawihi..." U Zoa aw a ni, a rui leh tih hriat takin a rawn ri lut khut khut bawk a, tui dehna aṭangin hawi letin, choka kawngka bula Ryan lo ding chu mit sen râma en in, "Lalramnghak ka nupui hi i duh em ni?" Ka mit ka lo chhing sawk


Naupang ho chaw ei pawh rawn tho vatin ka lam a rawn pan hnai hrut hrut a, U Zoa rui chhe ngai hek lo, an hlau a ni ngei ang


"In kut sil ula i Pu te in ah lo han chho rawh u," An kut sil tir sawk sawk chuan ka tlân chhuah tir a


"Hepa vang hian maw inṭhen i duh a?" Ding bu lawp lawp in min rawn en a


Ryan-a en in, "min chhhuahsan phawt teh," Ka ti sep chu la kawi lehin, "he mihring rawn lan aṭang hian i danglam, mi ngaihdam na i tlachham," A rawn ti leh ṭhat, ka lu thin san mat mat a kan chaw ei na seng fel ka tum chu dawhkan na lutuk a rawn chum ri burin, "sawiteh, i pum chhunga naute kha tu fa nge?" Rapthlak ti lutuk chuan ka en a


Ka en dan chu a nuih a za nge maw ni? Rawn nui hukin, "kum 10 kan innei a, vawi tamtak kan bei tawh; Mahse, i rai thei lo va, tunah he mihring rawn lan veleh a i rai nghal hi ka fa a nih ka rinchhan tur min han hrilh teh," Ka pasal mah nise ben
sawk ka chak zia chu pui tak a ni


"Muanpui hnek tur in min duh em?" Ryan-a bek pawng ṭawl mai leh kut hum ruh zet mai chu ka melh zawk a


"Ohhhh, inlo in ko duat tawh tih ka hre lo va, Ryan tiin a ko che em ni kha'h," U Zoa ṭawngkam ngeiawm zia chu pui tak a ni


Mit chhing sawkin, "min chhuahsan rawh, kan nupa buaina a ni," Ti sep in, "chuan min U tawh angche, ka pasal emaw midang pawhin kan inkar an ngaihdikloh ka duhlo," A mitah tak en chunga ka tih chuan a ner sawk sawk a, chiang lutuk a min en chuan, "ka thu a ni," Ti kha hrawih chuan ka pasal ding bu lawp lawp mai, nui suk suk chu melh hrawkin, a khabe ruh ti che ralh ralh chuan a pen zui pawk pawk a


Thle bar bar chunga min rawn en tu U Zoa cu hawisan hmakin thleng chu rang lutuk in ka seng fel mawlh mawlh nghal a


"Ka fa a ni em?" Chu ringawt pawh chu min zawt zing tak a ni


Ka thleng sil zo ka chhuak tur chu min pawt her nawkin, "sawi rawh tu fa nge?" Ka hmai bul chet ah chuan a ti hrawk, mit ka lo chhing sawk


Na zeta min hmerma paih thlak sak pahin, "ka fa, ka fa chauh a ni, a chiang em?" Rum lutuk in ka melh zui ngar ngar bawk a


U Zoa chuan min rawn pan hnai chhat chhat a, ka lo tawlh hnung ve zel bawk, min ban leh thut a, min thing nawk nawk ka hlau ru ta ber zawk


"Mampui," Rinpuii aw ka hriat rualin ka thaw zui hawk, rang lutuk a in herin Rinpuii leh Hruaii rawn lang ka lawm lutuk chu ka mit a rawn hnâm sawk thei


U Zoa thaw ri hrawih hrawih mai melh zawkin, "lo ṭhu r'u," Ka pan hnai nghal ruak a

Hruaii leh Rinpuii mitmeng a U Zoa awmdan mak an tihna chu ka hmuh hmaih hauh lo bawk


U Zoa chu ngawi renga chhuak vutin, khawilam nge a pan dâwn pawh ka hre lo, ka en liam satliah ringawt


"U Zoa chu aw.! Ka ngaih ang alo ni hauh lo, engtia ti nge i tum tak reng reng Mampui?" Rinpuii chu ka en a


"A ṭhen angchu, uire-na te 'engtia tih nge i tum' intih chi em ni? Uire chu uire a ni mai, a bak a awmlo, Mampui lakah a kham khawp a hmu lo va, hmeichhe dang a zawng a ni mai, sawifiah emaw ngaihtuah tur a awm lo," Hruaii chuan a rawn ti hlak hlak a


"Chutianga tih ngawt chi pawh a ni lo, nupa a insiam hlim pawh an ni lo va; Bakah, tunah phei chuan Mampui a lo rai ve leh nen, a buai vek a nih hi. Hmingsanga te unau lo ni ve bawk, thil hi sawi ang ngawt a ni lo alawm. Chutih rualin, i ngaidam thei angem? Ngaidam la a hma angin in hlim i ring em? Uluk takin in ngaihtuah rawh," Rinpui'in a rawn ti leh dap dap a


"Uire leh chembal/bil chu hman dâwn a pianga hriat chhuah an ni' antih kha," A tih zawm leh zat a


Ka lu ka thing mat mat a, ka ngaidam theilo a ni lo, ka rinna ka hloh a, ka thinlung zawng zawnga ka hmangaih ṭhin ang khan ka hmangaih tawh dâwn lo tih leh, rinhlelh na in ka khat dâwn a ni tih ka chian na chuan 'inṭhen' tih ah pawh tawpna min neih tir ṭhin



Zankhua in chhin khat pawh ka chhing lo, Rinpuii thusawi kha ka ngaihtuah a, a dik ang, tunah pawh U Zoa hmel ka hmuh a piangin ka lakah a rinawm lo a ni tih ngaihtuah pawh ka duhloh kha, a hmelin a keng tel tlat si a, ka thlakhlelh em em ka pasal kha ka natpui tlat tawh si



Ka hawina lam a piang mai chu a thim a, a tawpna chu INṬHEN bawkin tawpna ka siam leh nge nge ṭhin




"Anu, anu Putea te anlo zin," Ka fapa in min rawm sawi dat dat chu ka lo rum ṭiah ṭiah a


Zing khawvar hnu ah ka lo chhing ve sek a ni ngei ang


"MamBawih," Ka pa aw ka hriat rualin ka meng kawk


"Pa," Ka inperh tho a ni mah zawk


Rang lutuk in, naupang ang mai chuan ka tlan chhuak a, ka Pa leh ka Nau Rza (cousin), ka Putea te ka hmu chu ka hnuk a rawn ulh nghal ṭeu thei


"vawiinah in rawn chhuak dâwn chauh emaw ka tia," Ṭah chhuak insum zet a tih leh ka Pa chu ka kuah thlawp a, ka Pa ka kuahloh na chin pawh hi ka hre tawh lo, ka kuah vawng vawng a, ka mittui a rawn hnâm ṭiam ṭiam bawk


Ka hnungzang ah ka nau in rawn beng thak thakin, "thil awmdan kan rawn hre chho tawh a, U Rinpuii nen kan rawn inbe tawh a, i thawmhnaw siam la, kan chhuak dawn nia. Pa Ropuia te in ah kan rawn in nghat a," Ka nau in a rawn tih chuan ka mittui hru hul paha in la hrang in ka Pa chu ka en a



"Chutiang rum rum a ni thei dawn em ni? Tluanga, Mampuii kan ko enkawl danah kan thiamlo takzet tih ka pha hauh lo; Mahse, hetia in lak chhuah rum rum chu a fuh dawn em ni? An nupa kâ te pawh chhawn ve phawt ta ula, a fuh lo'ng maw?" Ka pa (Zoa pa) in a rawn tih chuan ka Pa chu a bu nghat a


A bula ṭhutna a min ṭhut tirin, "ka fanu kâ aṭang hian eng nge thleng a, engthil nge a paltlang tih ka hre hauh lo; Mahse, ka fanu in ṭap chunga hruai haw tura min ngên a nih chuan ngaihdam theihloh sual Zoa hian a khawih tihna a ni mai a," Ka pa in a tih ban chap chap laiin, "hrilh lo che u nise in rawn kal dawn em ni? An inti thiamlo dek dek a, a lo zualko hmanhmawh bawk a," Ka nu bawk a ni


U Zoa nen an rawn in zui lut zat, khawnge nizan a riah ka hre hauh lo, Lucy-i in ah a riak pawh a ni mahna


"Mama, ka room-ah lo va lut la ka luggage lo va siam rawh," Ka nau chu ka en zauh, ka Nu kan hnial a nih chuan in hauhna bak kan chawk chhuak dawn lo tih leh kan hnial hneh ngai dawnlo tih ka chiang êm a ni


Ka nau chu a bu nghat a, ka zui lut ve zat bawk


"A khaih khaih!!!! Êngi i ṭawng sual ange. Ka fanu a nih vang ni lovin vawikhat pawh in chhungkaw chanchin hi Mampuii hian ala sawi ngaih hauh lo ve. Mahse, tunah ka mita ka hmuh chin leh ka benga ka hriat chin ah hian eng ang a hun khirh nge a tawh tih ka hrethiam thung," Ka pa chuan zaidam zet chuan a ti leh dap a


Ka nau nen chuan ka thawmhnaw chu kan vawm lut nawk nawk, Ivan-a leh Bryan an rawn lut, "anu," Ka chawl dat, ka hawi let a, ka fapa te pahnih hmel hamhaih lutuk chu en hreawm ka ti; Mahse, he inchhung hi ka Pa ruala ngeia chhuahsan ka duh a ni, ka ngaihtuah leh ka hmangaih loh vang erawh a ni hauh lo, duhthlan tur ka nei miau lo a tin ni


"Thawmhnaw tlem ken kha a tawk, keiman remchang ah ka la leh mai ang," Ka nau in tih leh luggage chu a nawr chhuak a


Ka fate pahnih chu ṭhu hniama kuah vawng vawngin, mittui khap let sak sak a ka hmui petbet tlat chuan, inla hrangin, an biang tawn tawn a dawm in, "Bryan i nau hi enkawl ṭha angche, U zawk ini a, zaidawh la, kut tel lo vin, thil a tihsual pawhin i hau dawn nia. Ivan nangpawh i U zahla, upa zawk a ni a, a thuawih angche. Ka thusawi in hrethiam tiraw?" Mittui tur khap let sak sak leh hrawkna kham ut ut chuan ka sawi chhuak a



"Anu khawnge i kal dawn?" Ivan-a chu a rawn men puau puau, Bryan erawh kum 11 a tling ve tawh dawn. Mahse, a mittui a tling ve pam tho mai


Ka fapa te hmaa ka ṭah loh nan inchung lam ka melh ngar ngar a, "fel deuh in awm ula, i Pi leh Pu thu awih angche u," Ka ṭah chhuak lutuk chu ka sawi tur ang pawh ka sawi chhuak theilo, an pahnih a pawt hnai chuan ka kuah thlawp a, ka ṭap khur zui dar dar bawk



Engtin nge an tel lovin hringnun ka hman ve tak ang le? Ka tel lovin engtin mge an awm ang?

"Mam..." Rang lutuk in ka mittui hru hul chuan ka inla hranga, ka fate kai chhuak chuan, ka pa in, ""Zonun, ka fanu nupui atana min dil laia i thusawi kha ila hria em?" Damdap mai leh zaidawh tih hriat taka a tih chuan, U Zoa chuan ka Pa mit chu en pawh a en ngamlo, hnuailam en ngur chuan a bu nghat a


"Ka nunna nen ka venghim ang a; A tan Nu leh Pa ka ni bawk ang. A pawimawh ber chu, ka dam chhungin hmeichhe dang ka thinlungah ka la lutin, Lalmuanpuii bak hmeichhe hmangaih ka nei lo ang tih chhe chham in ka tiam ngam a ni ka Pu," U Zoa'n ka Pa bula a sawi angchiah chiah chuan ka Pa chuan a rawn sawi chhuak a, ka mittui tlak loh nan chunglam ka lo melh ngar ngar thung, chu thu a intiamlai chu nimin ang maiin ka mitthla ah a rawn lang

"Kha thu ngei kha a ni i sawi ni. Mahse, vawiin ni hian ka fanu, enkawl tura i intiam, i enkawl zawh siloh hi kei i kut a hlan tu ngei che hian ka la let leh dâwn a ni," U Zoa a rawn dak chhuak vat



"Ka Pu khawngaih in, ka ṭhen thei lo, engtin nge ka theih ang, fa kan nei dawn a, kum tamtak kan beih hnu ah fa kan nei ve dawn a sin," U Zoa chu rawn ding chhuakin ka lam a rawn pan hnai nghal ruak ruak a


Ka pa leh ka nau ka sirah a rawn ding ve vat


"Bawihi hun minpe leh rawh, kan fa lo piangtur vang talin," A mitmeng dul zet mai leh mutkham loh vanga val dum kalh mai chu ka en a


"Kan fa" A tih chuan min chhun zak, a fa a ni ve lo tih hi a hre tawh lo em ni?



"I fa a ni lo tih i hriat kha," A mit ah ka en kalh a, ka mittui erawh farkhat chu sawi loh ka mit ti hnawm tûr pawh a awm thawh rih lo

Awihlo leh za lo zeta nui hul hakin, a bân chunglam ah a vai thuak bawk a, a tukkhum sam tuai puat chuan, "kum 10, kum 10 dâwn teh meuh ka hmeichhe chênpui hi hre lo turah min ngai em ni? Chutiang hmeichhia i ni lo tih ka hria, kan hria a ni lawm ni?" Ti bul bul in a chawl dat a. A aw a thunun zia leh thinrim lo a mi biak a tum zia lah hai rual a ni law.

Chil lem deuh khalh chuan ka lama rawn pen hnai hretin min rawn dawm a tum chu, rang lutuk a ka Pa lama ka lo tawlh sawn dawrh chu min phun khum zui hluk bawk, tih ngaihna hre lo tih hriat zetin, " Ka tihpalh, ka tihpalh ka tih tawh kha," A ti hul leh hak bawk a, nuihpui tur nge a nih a, ṭah tur pawh ka hrethiam tawh nek lo ve. Mahse, he in chhuahsan erawh ka tum bur thung


Nizan maiah a da a nih pawh a rinloh kha, tunah "kan fa" a ti leh a nia


"Ni e, chutiang hmeichhia chu ka ni ngai lo. Mahse, chutiang ni tur chuan min nawrlui a ni U Zo," A lu a thing nawk nawk a


"Hetiang hian ka chungah iti thei lo, ka fa nen ka kalbo tir lul lo angche u, kei leh naupang ho hi min kalsan in, i kalbo thei lo," Naupang ho chu ka en a, ka nâ a lawm, tu in nge mahni fate kalbo san thei ang ni


"A tawk, hetiang a kalsan hläu tur si chuan ka U tihnat loh tur che a nia, ka U vang chauha kut thlak lo che ka ni tih hre tel bawk rawh U Zo, mip nep tak ini, nep tak, kal ang U Pute, he inchhung ah hian mipangai an lo awmlo a nih hi, kum 10 chhung khan engang hreawm nge a tawrh tih hmu lo mahila vawiin ni hian a hriat vek alawm, ka U hi in phu lo," Tih leh ka nau chuan ka bânreka chelhin min pawt chhuak dawr dawr a


"Anu ka lo kal ve duh, min hruai ve rawh, anu..." Ivan-a leh Bryan chu an ṭap zui tuar tuar



Ka hawi let ṭawk ṭawk, step chho a ka nau in min pawt chho dawt dawt chung chuan ka fapa te pahnih en let ṭawk ṭawk in, "Bryan reilo te ah ka rawn hmu leh angche u, ka tiam che u," Ka mittui a rawn tla zawih zawih



Ka nau in car a min ṭhut luh tir dawn chuan Ivan leh Bryan an rawn tlan chho ka hmuh rualin ka ding dawt, "anu min hruai ve rawh," Min rawn kuah thlawp a


"I bulah kan awm duh Nu, min hruai ve rawh," Ka fate kuahbet chuan ka ṭap chhuak zawih zawih, ka nghawng ah Ivan-an a kuahbet a, ka bân ah Bryan-an theih tawpa nghetin a kuah bawk


"Bryan, Ivan, i nu hi reilo te kan hruai lawk dawn, kan rawn let leh ang," Ka nau in a rawn tih pawh chuan an lu an thing nawk nawk chauh


"Ka duhlo, ka kal ve duh," An rak tuar tuar

"Lalhmingsang, Malsawmhlu rawn kal rawh u," Ka nu in aw ṭeng zeta tih leh a rawn pawt nghal a, keilah in ka lo kuahbet ve, kan rak chel chul chu ṭhenawm khawveng zawng zawngin min en ṭhup in ka ring


Tetea'n Bryan rawn la hrang pahin, "i nu rawn let vat induh chuan thuawih rawh u," Tih leh, "kal rawh u," Tetea'n a rawn tih takah chuan ka fate ṭap tal nawk nawk en ṭawk ṭawk chuan car ah ka ṭhu lut a


"Tlân chhuak vat rawh," Ka nau in Driver chu a hrilh vat


Kan tlân chhuah rualin kan hnunga Bryan leh Ivan-a min rawn umzui a, mittui tla zawih zawih a hawi letin, "in tlu nâ ang, tlan suh u," Hnaptui nen chuan ka au let ṭawk ṭawk


Ka hmuh theih chhung zawng chu ka thlir let ṭawk ṭawk a, ka hmuh theihloh chin ah chuan ka kawchhung hi lak chhuah daih ang mai hi a ni, ka ruak a, ka nâ ngut ngut bawk


Kum 10 chhung Nu leh nupui ka lo nih ve tawhna chu tawpna rapthlak ber hmangin a tawp ta chu a ni si a, ka nau in ka dara rawn kuahin, "Ṭap rawh," A rawn ti sup, khur zawih zawiha ṭap chhuakin, "engtin nge ka tel lovin an awm tak ang?" Ka ti chhuak ruah ruah bawk, tuna ka thinlung natdan hi maw engthu mah hian a sawifiah thei lo, ka nâ, ka puak kehlo chauh bawk



<>~>~£~>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 4:23 pm

PRESENT PERFECT
By
Floria Laldansangi



Chapter < 9 >

ZONUNA....POV


"Heihi eng nge awmzia Tluanga?" Dawhkan a pawisa chu ka en a


"Zoa mizia ka hre chianga, nakin maia ka fanu man a pek ala sawi chhuak in, a nupui a la nih thu a rawn sawi tawhloh nan heihi ka tih angai a ni," Ka Pu zawn chu ka en ngawt ngawt


Ka nupui a kalbo tir tawh hnu ah sum min chhuah a nih chu..!


"I sawi awmzia chu ka fapa hi sum i chhuah a maw?" Ka nu chu ling tak a ni, naupang rak ri leh Mampuii bula an kal duh ṭap thawm nen, ka danglam chuanglo keipawh hian ka nupui kha ka duh let leh a ni, ka duh let takzet



"A ṭha e, inṭhen tur ta sa sa, a naupai kha engtia tih nge i tum? Kan tû tur a ni a, thingtlang ah seilen tir i tum êm lo angchu tiraw?" Ka Nu in a tih zawh rualin, "a naupai kha chu kan chuhpui lo angche u, Mampuii fa a ni a, chuhpui turin dikna kan nei lo," Ka Pa in a rawn ti vat chu ka nu chu ṭek tak a ni, “U Zai,” A ti zui ṭhat bawk a



Kei erawh ka lu ûm-ah hian eng dang mah a awm theilo, ka duh zawng chu ka nupui hi rawn let lehse tih a ni



"Zoa i Pa ngaihdan chu i ṭawmpui em?" Patling pui chu ka mit a hnawm chap a, ka pu zawn mit a en in, "ka duh zawng chu ka nupui a ni," Ka ti thawp sup


"Zonunmawi harh chhuak rawh, i nupui in a duh tawhlo che, i fa chang tur erawhin dikna i nei," Ka nu ka en a, "Mampuii tel lo in engtin nge fa ka neih theih chuan ang ni," Tih leh, "ka Pu hun minpe rawh, Mampuii hi ka la let leh ngei ang, ka tiam angche, ka hmangaih a, min hmangaih bawk," Nghet charh a ka tih chuan ka Pu Zawn chu a nui a



Pa zaidam tak mai, engkim mai uluk taka ngaihtuah a, ṭawng fimkhur tak mi, Mampuii mizia ang chiah chiah nekluih harsa tak mai chu a ṭhutna aṭanga dingin, "chu erawh ka fanu thuthlukna ah a in nghat tawh e; Mahse, uire-na ngaidam tur khawpin ka fanu hi thinlung thianghlim ni in ka hre lo," Ti ban charh chuan, "sum leh pai insem te, heng an ran vulh lai in sem te hi Zaia i sawi ri tak nâ in, keini lam erawhin kan mamawh hauh lo, i rilru erawh ka hrethiam, ka fanu laka i ṭhatna ah ka lawm a. Mahse, sum leh pai, neih in zah sem erawh ṭul ka ti lem lo ve, ka duh zawng chu ka fanu leh a pumchhunga ka tû lo piangtur hlimna a ni," Nghet charh mai, hnial tur awm miahlo a a rawn tih chuan tukkhum dawm vawng vawngin, "duhâm luat ah, lungte ka chhar laiin, ka lunghlu neihsa ka hloh ta a ni," Ka ri rilru zui vawng vawng a

Mahse, beidawn erawh ka tum hauhlo, ka lunghlu a ni a, ka ta a ni bawk


<><><><>~>~>


MAMPUII....POV



"Anu harh tawh rawh school kan tlai dawn a nia," Ka fapa te pahnih aw chu ka hre ruai ruai


"Reilo te min mut tir rih teh u," Ka rum ṭiah ṭiah a, "nu, nu khawnge ka bag pakhat zawk kha." Bryan-a aw a ni


"MamBawih, i harh em?" Mittui nen ka meng diar diar a, ka mumang mai a ni tih ka hriat chawpchilh na chuan min vit nghal ngut ngut mai



"Damdawi hi ei tir rawh Pa," Rinpuii aw ka hre zui zat


Khawiah nge ka awm, mit phe ruai chuan ka thle bak a, "khawnge ka awm?" Mittui vanga khaw hmuh fiahlo zet chuan, Ka pa leh Rinpuii, Hruaii te hmel chu ka hmu phe ruai bawk


"Damdawiin ah maw le," Hruaii'n nui sun sun a alo tih chuan chet mai ka tum a ka taksa na lutuk chu ka che mai thei lo, Rinpuii leh Ka pa in min lo pui vat



Ka Pa hmel phak chuap mai chu ka en a, keimah vangin zan a mu thei lovin, a rilru a hah a nih chian hi!!!

"Pa," Ka ṭah bawk chu a chhuak leh ta tlat tawh, nutling pui e tilo hian ka Pa bulah hi chuan ka no riau ṭhin


"Heihi ei phawt rawh," Ka pa in damdawi min pek chu ka hmawm zauh a


"Engmah dang ngaihtuah lo la, tunkar chu damdawiin kan awm hmel nen, karleh lam ah kan khawlam ah kan haw chho mai dawn nia," Ka Pa bawkin a rawn ti leh a, ka chhanglo ka bu nghat


Mahse, ka lungphu zawn hi a sa veng veng mai, he khawpui hi ka chhuahsan hreh a ni lo, ka fate lak aṭanga hla taka ka awm tur chuan minti na veng veng mai



"Awm hahdam la, kumthar lamah ka dawrah min rawnpui angche, dawr dang hawn leh ka tum bawk si, i dul len hma tal min rawn pui angche," Hruaii chu ka en a, mit hmul a lo kân ak ak, an hmelah chuan min khawngaihna leh lainat na ka hmu thei; Mahse, ka boruak tawn chu sawilan loh tum in, mintih nuih antum tih pawh ka hre tel bawk



"Engtin nge damdawiin ka luh a?" Ka hriat chin zawng chu car-a kan tlan chhuah kha a ni


Ka mitthla ah ka fate pahnih an rawn lang zui zat, ka mit a rawn hnâm sak chu ka khap let zui sak sak bawk a


"I nau in damdawiin ah a hruai tlang che maw le, in enkawl ṭha hle rawh, minti mangang ṭhin lutuk, i naupai a chak si lo, i in enkawl ṭhat loh chuan i naupai khan a tuar tak tak dawn a nia," Rinpui'in a rawn ti hlak hlak a


"Pa lo zu haw rawh, Hruaii nen kan lo awmpui ang, nizan zankhua in i mu tawh si lo," Ka pa en chuan a tih zawm zat bawk a


"A khaih! Naupang school kal tur inei a ni lawm ni, hna ka nei hleinem, in hna ah kal zawk rawh u," Ka pa in a tih chuan ka Pa en chungin, "ni e, zu hahdam rawh, vawikhat dawr khar mai mai", Hruaii chu ka en a, nui ṭhû in, "dikchiah, i fanu hian min rul leh dawn alawm," An nui zui dar dar, ka nui ve sun sun tho



"Ilo nui thei tawh a ni maw?" Kawngkhar lam chu kan hawi vat a, doctor säng ṭha zet mai, palian lutuk rawn lut chu mit khap fak fakin ka lo en kar a


"Damlo tawh reng reng suh, i pa a mangang lutuk alawm," Min rawn melh zuk, a aw thum dup chu Ryan aw nen in an na lai a nei deuh lehnghal




"Doctor eng nge a an?" Ka pa in a lo tih vat chuan, a ha var rual ṭha zet mai lang rual ṭhiau a nuiin, "a taksa chakloh vang a nia, thildang ah buaina tur a awmlo e," Min rawn en a, "naupai lai chuan ṭah tam lutuk hi a hrisel lo bawk a nia," A kiai zui suk, ka lo ner nung thung



Ka Pa leh doctor in zui chhuak en zui pahin, "Doctor thar em ni, chhelo em em ve," Hruaii chu Rinpuii nen kan en a, ka nui ringawt bawk a


"Chhelo i hriat theih ang hian pasal tur te hi hre thei la ṭha tur," Rinpui'in a fiam zui zauh chu nui uar uar in, "awii enteh ka laklawh chho vel vek tawh, keiai naupang in min duh se, 'an naupang emai' ka tia, keiai upa an nih leh, 'an senior' ka ti ve leh khanglang zel bawk sia, tumloh deuhin lênrei hi awl deuh mai a nia aw," Nui uar uar chunga a tih chuan Rinpuii nen chuan kan nui pui ve kur kur a


Thil ni thei deuh deuh hi a sawi a, a nui ang uar uar a


“Mampui kumthar lam chu tak takan min rawnpui tak tak la, sam siam lam i tui tho a, i dul len hma tal,” Thutak zawka Hruaii’n a rawn tih chuan ka thaw hak a


Engtia awmtur nge pawh ka la hre lo, Aizawl hlat takah erawh ka awm reng thei dawnlo tih ka hria, ka fate ka ngaih changa ka hmu thei lo a nih pawhin, an hlat lutuka awm erawh ka duh hauh lo, chutih rualin U Zoa hmuh phakloh a awm erawh ka mamawh hle tih ka hre bawk si


“In khua ah haw phawtla, chungchu muangchang a la ngaihtuah chi a nih chu, thildang ngaihtuah vak rih suh, i naute chiah kha ngaihtuah rawh, in khua i thlen hun ah te lunglen vang te khan chaw ei loh leh mahni in hrek te kha i ching ange. Nangma tan nilo i fa tan khan intih chak i mamawh a nia,” Rinpuii’n a rawn ti hlak hlak a


Nui sun sun in, “min ngaihtuah lutuk a nih kha, ka ṭha em em ang,” An bu nghat a, “Zonuna talbuai tur vel ka hmu hak e, chawh tak rawh se,” Hruaii’n duhthawh zet mai a rawn tih chuan ka nui hmel chawpchilhin a reh nghal, U Zoa ka mitthla ah a rawn lang nghal zat bawk a


Rinpuii’n nghawk zauhin, “nunhlui chu nunhlui, an nundan tur pawh ngaihtuah zawm duhloh tur, chu chu hmalam pandan ṭhaber a ni,” A rawn ti vat chu za lo zetin ka lo ṭhensak ringawt a


Keimah vanga a talbuai erawh ka ring hauhlo, a chhanchu keilo hmeichhe dang a nei miau a. Mahse, ka pum chhunga ka fa erawh a rawn buaipui maithei, chupawh ka chiang ngam tawh chuanglo, Lucy-in fa anei dawn tlat a, reilo te ah min theihnghilh chu ka rindan lianber a ni



Ka Pa in damdawiin chhuah a rem tih miau loh avangin damdawiin pawh ni 3 ngawt ka awm tawh, nitin Hruaii’n min rawntlawh a, ka nau in min awmpui reng bawk


“Zawnhmuh i har hle mai,” Ka hawi vat a, ka lam pana Ryan kekawr ipte zen at a rawn pen chu en hâ in, “eng nge i rawn tih dawn,” Ka phone bawk chu ka bih leh, ka fate ka ngai lutuk chu an thlalak en in ka mittui ka hru leh feih feih ṭhin


Ka pai leh ka hrin ni lo mahse, an pianna Nu te aia ka hmangaihloh bikna ka hre hauh lo, miin engpawh sawise ka fate an ni a, an ni kumkhua bawk ang


“Nuthlawi rîm ka tum,” Ka lo ner sawk

Nui ri hukin, “ka puihna i mamawh takin ka ti deuh,” A tih leh chuan ka phone off pahin, “Ryan..” Ka sirah, ka bul chet a rawn ṭhu chu thutak zetin ka lo en kiau a


Rinpuii khan a sawi zawk tawh, Nu Zarpuii’n Ryan a hauhdan kha, ka pasal... ohhhh ka pasal hlui a ni tawh angchu, U Zoa chauhlo pawhin Ryan nen kan inkar ah eng emaw awm a ngai ammn awm tih ka hrethiam tawh bawk


“Sawi duh i nei em ni?” Ka lamah a rawn âwn hnai a, lo âwn dawrhin, “ṭhu ṭha rawh,” Ka lo ti vin hluk chu nui sukin, “ka puihna i mamawh em?” Melh ram ram pahin


“Engvang ngawtin nge i puihna chu ka mamawh ang ni?” A kiai suka, “i mamawhlo a nih chuan....” A mithmul a ti che zauh a


Uluk deuha en in ka lo ngaihla kar thung, “I’m gonna hitting on you,” Rilru hah nen a thusawi ningzet chuan, “mihring ṭawngin sawi rawh,” Ka lo ti hluk chu a nui chhuak huk a


“Ok, Mihring ṭawng leh fiah takin, tun aṭang chuan ka hnaih tawh dawn che, hnai takin,” A rawn tawlh hnai a, ka ṭhutna aṭanga ding zat chuan, “Lalramnghak khatiang thu lawilo i sawi dâwn a nih chuan chhuak rawh,” Ka thin a sa phat


Ka thusawi ngai pawimawhlo tih hriat tak a ner nawk a thle bakin, “i phalna lak ka tum chuang hleinem ; Mahse, ka duh chu neih ngei ka duh ṭhin,” Tih leh ka lam a rawn pen hnai chhat chhatin, “a bik takin nangmah, nangmah Lalmuanpuii hi,” Mit zimsân in min en a, ding ngil thut chuan, “Mahse, i rilru natlai leh buailaia ka taa siam che ka tum lo, thinlung takin ka in pawm tir dawn che. Ok,” Tih leh mit min rawn siai zauh a, in her vut chuan a pen chhuak lehnghal pawk pawk bawk


A che zia mak tizet a en haw ringawt chuan, tun maia a thusawi te kha eng nge maw sawi a tum le? A ti tak tak êm lo angchu maw? Ka ti rilru zui nuah nuah ringawt a


"Eng nge ilo ngaihtuah a?"

"Pa, Mama rawn tir mai la," Ka Pa rawn lut chu ka lo ti vat a


"I Pa Ropuia te ram lamah a zui ve maw le, an hnathawk zingah inhliam an awm a ni âwm e," Ti chuar chuar in, "tunge rawn chhuak chiah kha?" A ti zui zat a


A chaw rawn ken en chuan, "Nu Zarpuii fapa a nih kha," Tih leh zawhna dang min zawh duhlo tih hriat zet chuan a chaw min rawn ken chu ka ei nghal sawk sawk a


"Tetea nen kan inbia a," Ka thil ei lai ka tawp dat

"Naupang...." Ka tih rualin, "ngaihtuah suh, Bryan pawh a nutei'n nizan khan an inlam ah riak turin a hruai a ni âwm a, Ivan-a pawh chuti tho, a nu te in lamah an hruai phei a tih kha," Ka Pa in a rawn tih chuan ka lungphu hi chem hriam leh zum tak maia vih sawk ang a ni


An pianna leh an thisen zawmpui te in lama an kal chu läwm viau tur ka nih laiin ka na vawng vawng a, ka kawchhung a sa thla vawng vawng bawk. Ka eng hi nge maw diklo hrep le?


Ka mu chu ka let sek a, Bryan leh Ivan ka rilru ah an rawn lan phei chuan ka thaw leh hak ṭhin


Ka phone chu phawrhin Tetea no ka hmet chhuak zet tawh, ka call mai dawn a, ni thei ngangin ka hre bawk si lo


Ka phone chu en ngawt ngawtin, "ka te lo pawhin in hlim tho ang tiraw?" Ka wallpaper chu en in ka mittui a rawn far fep fep a



An senlai te chu nimin ang maiin ka la hre chiang a, ka mitthla ah ala cham reng bawk, fa nei lo mahila ka fate pahnih leh pasal, mi zawng zawng awh ṭhin kha ka nei ṭhin a sin maw le!!


Engtin nge hetiang hian kan chhungkua, ka chhungkaw neih chhun leh ka khawvel a lo kehdarh tâk ni?


Mit ka chhing sawk a, khun aṭanga tho in tukverh lam chu ka pan a, zan boruak vawt deuh vur mai, thiangkak mai chu tukverh aṭanga hip vang vangin, ka thaw chhuak leh ham ham bawk


Kawngkhar rawn ri rak ka hriat chuan hawi mai nachang ka hre lo, ka tum lo zawk, nurse emaw doctor an nih ka rin vang a ni


"Bawihi," Rang lutuk in ka inher a, ka meng zui kawk bawk


U Zoa mitmeng pelh phang mai leh khabe hmul ṭo siar siar mai, mit hnuai val kalh maia ka lam rawn pan chhat chhat chu mitmu pawng chhuak lo chauh in ka en a


“Eng nge hetah i rawn tih dâwn?” Ka awmna hi VIP room a ni a, chuti maia a rawn lut tlang chu mak ka ti takzet


A nui suk a, “ka nupui ward lut theilo tur khawpa mawl ka ni hleinem,” Ka lung a rawn phu zui dawt dawt


A harhfim lo tih lah chu a chiang reng mai bawk si


“Let rawh.”


“Teuh lo lutuk, ka nupui raipuar damdawiin ah a awm a, kei in-ah ka awm ang maw?” Ti nghut nghutin, “a teuh lo,” A ti zui leh hluk a


“Nupa kan ni tawh lo,” Chu thu ka sawi zawh rual chuan keimah zawk ka na vawng vawng mai


Kum tamtak chhung ka hmangaih, ka pasal hma ah nupa kan nih tawhloh thu sawi chu thil awl ai a ni hauh lo mai, ka hriat chhuah a piangin ka nâ a, ka ta a ni tawhlo tih hriat reng ka duh laiin, ka hriat chhuah a piangin ka na a, min vit ngut ngut bawk si chu ka haw takzet


“Bawihte...” Ka mittui bawk a rawn hnâm ṭiam ṭiam tawh


“Engvangin nge hetiang hian mintih?” Ka ṭah chhuak lutuk chu ka aw pawh a ṭial ruai mai, nupa kan ni tawhlo a, rilru damtak hian min thlah liam mai theilo em ni?


Ka hma ah rawn dingin thaw ala hak a, mit meng pelhphang maia min en chuan, “chu chu ka zawhna zawk tur a ni Mampui, engtin nge ka chungah hetiang hian itih theih? Ka hmangaih che a, ka nupui ini a, kumkhua a ka ta ni tur,” Ka kut a rawn ban de de a


Ka awmsawn lo va, k din ngaiin ka ding khawng ngar thung, kumkhua a awmdun a duh a, a kumkhaw sawi chu amah pawhin ring ngam lo vin hmeichhe dang a mamawh leh si a, mit ka chhing sawk, ka hkiamah min vit nawn tur a a rawn inlan fo a ngai lo a sin



"vawikhat chiah i in ngaihtuah leh theilo em ni? Min hmangaih reng chung leh ka hmangaih reng che a ni tih hre chunga thlah liam che hi ka theih lo a ni,” Ka kut chu a hmer vang vang a


A mit a natna thuk tak awm chu ka hmuh hmaih hleinem, min hmangaih thu a sawi pawh chu rinhlelh na pakhat mah ka nei lo; Mahse, a hmangaihna sawi ang, rinawmna tel si lo leh, phatsan na, uire-na khawvela hmangaihna chen aiin hmangaih tak chunga thlah liam ka thlang zawk a ni


“U Zo,” Ka phun chhuak sep a, mittui luang ngiai ngiai a en in, a hming ka lam ruala a mitmeng a beiseina rawn de sawr sawr chu chiang takin ka hmu bawk


Min vawn na kut chu muangchanga phelhsak in, “kan tawp tawh, kan pahnih in hmangaihna kha a tawp tawh a ni,” Harsa ti zeta ka tih chhuah chuan, a lu thing nawk nawkin, “ni lo, ni lo Bawihte,” Min rawn vawn a tum leh chu ka lo tawlh hnung hret a

“Kan inkar tawp tak taka tura i duh a, Ka lakah i beidawng a nih chuan, min hmangaih tawhlo tih sawi ta che; Mahse min hmangaih tlat a ni lawm ni?” A mit a sen ram


“Bawihi kan in hmangaih a, min ngaidam in, vawikhat chauh chu hun min pe ve dawn lawm ni?” A rawn ti leh

Ka mittui avangin ka khaw hmuh a phe ruai a, beidawng lutuk a en in, “Ka ngaidam che alawm U Zo; Mahse, i laka let leh a, bul ṭan ṭha leh a chhungkaw pangai tak kan neih ṭhin dinpui leh tur che erawhin ka huaisen tawk tawh lo a ni. Ka in ring tawk tawh lo va, chuai mahin, nangmaha ka rin na kha a awm tawhlo. Chuvangin huatna tel lo inthlah liamna, hriat reng tlak kan neih te, kan hriat reng theih turin kan tawp a ngai a ni,” Thaw zui hakin Mit sen râm a min en tu chu mittui hru hul tawkin ka in hersan a


Ka hnunglam aṭanga min rawn kuahbet thut chuan, “ka theilo, vawi engzah nge ka hmangaih thu che hi ka hrilh dawn che,” Min kuahbet na chu phelhsak ka tum a, ka phelh mai thei lo lehnghal


“Minthlah rawh, hetiang hian awm suh, ka tán hian a awlsam i ring em ni?” Ka tal laih laih

“A nih chuan engvangin nge kan siam ṭhat mai loh ang ni,” Ka tal lai chu ka tawp dat a, ka ṭah nuih hak bawk, “uire na leh duhthlan na a in phatsan hi siamṭhat chi a ni lo U Zo. Siamṭhat tumin bei nasa viau mahla, mi pahnih inkar ah rinna a awm tawhloh chuan engtikah mah a ṭha thei tawh lo,” Tih leh min kuahna phelh sak ka tum leh a, "mi pahnih, in hmangaih te inkar a pawimawh ber, inrin tawn na tel lo hmangaihna chu maw, artui chhungmu neilo ang mai hi a ni," Ka ti chhuak leh ṭuak bawk a


Zu rui mah nise, mipa tha na nâ na chu ka hneh lo nasa mai


Ka tal laih laih laiin kawngkhar a rawn ri rak, ka hawi chhuah rualin Ryan chu thli pui ang maiin a rawn lut a, ka hnunglam a min kuahbet tu U Zoa phih lawpin a hnek zui sawk chu ka lo rak ṭhat a

U Zoa kat nawk nawkin, “Lalramnghak,” A rawn ti chhuak ṭhawt bawk


A kamsir thi ser se chu tuai zauh a, a chil chhuat a chhak thlawrh chuan, “eng nge hetah i rawh tih, ka nupui ward ah hian eng nge i tih?” Ti hrawk a rawn hnek a tum ve chu ruilo hailo zawk na nâ na chu ani aiin a lo che rang zawk fê, a hnekna ngaiah bawk Ryan chuan a hnek leh sawk a


ka kawchhung a rawn khur nghal dar dar, “Ryan, Ryan, duhtawk rawh,” Pan hnaih a tum chu ka lo uaihbet vat


ka lam rawn hawi a thaw ri hrawih hrawihin, “i ṭha em? A ti na che em?” A mitmeng chu rapawm tak a ni, U Zoa chu thah pawh a hreh hauhlo ang tih turin a durin, mei alh a chhuak lo chauh


“Ka nupui kha i kut hmawr pawh in khawih suh,” U Zoa’n a rawn ti ṭhat chu in her vutin, a kut zungchala kawk va chui nupui a ni phiangsen tawhlo tih ka hrilh nawn che phût suh, a hma khan khawihlet tur che in dikna ka nei lo va, tunah erawh khawihlet tur che leh ka hmeichhe duh venghim turin dikna ka nei tih hria angche,” Ti hriam hrakin ka lam a rawn hawi a


mitmeng buai lutuk leh Ryan-a thusawi mak ti lutuk a mittui khap per sawk sawk a en chho hau chuan ka thaw dep dep bawk a, “i pum chhunga naute hi venghim la, keiin ka venghim ve thung angche,” Nghet charh mai a tih leh kiai zui suk bawk a


ka â mai dawn in ka hria, eng thilsual neg ka tih a, tu pawi nge ka sawi ni, hetiang buaina a ka in hnuhluh tak mai le!


“Chhuak r’u, in pahnihin chhuak rawh u,” Nurse rawn tlan lut chu en in, “hruai chhuak rawh u,” Ka thaw a chham mai dawn, U Zoa mah tih nak alaiin, Ryan lo ni leh zel chuan thawk ngaihna minti hre lo, Pathian hremna ka tawng bua a nih hi ka ti rilru ta rum rum mai


<><>~>~>~>~>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 4:23 pm

PRESENT PERFECT
By
Floria Laldansangi



Chapter < 10 >


RYAN...POV



"Ramnghak, tho teh, tho teh, nizanah tu nen nge in in tihbuai," Ka la meng ta chuang lo


Ka khêl ah a rawn beng thlawrh thlawrh a, "Zonuna nen engvanga intibuai nge in nih? Tho teh!!!" Ka nu ning zet chuan ka ṭhu chhuak a, ka lu tuai nawk nawkin, "Chutiang engmah a awmlo," Ti nghuta tho in bathroom pan ka tum chu, "Lalramnghak ṭhu rawh," A rawn ti zui ṭhat


Thaw haka tukkhum sam tuai puata a sira ṭhu thla hnakin, ka melh zawk a, "nizanah Mampuii i han hmu a ni maw?" Ka chhang chuang lo, a hriat tawh a hnu, min zawh leh chuan a ngai em maw ni?


"Tukinah i pa nen kan inbia a, thlathar ah let tur che in a tih che kha," A zawhna ka chhan mailoh avanga thinrim seh chilh deuh bap bap a a rawn tih chuan ka en vat, "hetah college ka zawm dawn," Ka ti bul nghut a, Australia-a let te chu teuhlo lutuk


"I remtihna kan zawtlo che," Ka nu chuan a ti thla hmiah a, hnial a duhlo hle tih pawh a hmel ah a lang ve bawk


Ka Pa in, "Like mother like Son," Mintih khum ṭhin kha ka hre chhuak zawk, ka nu pawh hi nu nelawm tak e tilo hian a luhlul ve ngar ngar tih tuna a hmel lanah hian a chiang viau mai


"Mampuii hi i duh tak tak lo ang tiraw?" Kan ngawih dun fe tawh hnuah a rawn tih ṭhat leh chuan chhân ngaiah ka dah lem lo, ka awmdan ah ka chhanna a hria tih hriat taka beidawn hmel zeta thaw hak chuan min rawn thlêk vang vang a


"Pasal neilai a ni tih i hria a ni lawm ni?" Ka ner sawk, nuthlawi a lawm a nih tawh


"An inṭhen na karkhat êm pawh ala ral lo va, buaina i han siam nghal a, zahte hi i zak miah lo em ni? Nangmah chauh i mualpho emaw tiin, Mampuii i venghim ah i in ngai ange, Mampuii a nia mualpho nasa ber tur zawk," Ti zui leh hmiar hmiar in, "hmeichhe dinhmun leh mipa dinhmun hi a in anglo a nia, in ngaihtuah chiang rawh, kan Mizo society-ah ngat phei chuan in kum inthlau lutuk pawh hi sawi zui hat hat tham a ni ang," Ka nu in thu tâk zet maia tih zawm leh in, "i rualpui, phu tawk tur che melh thiam rawh," Tih leh din rualin kawngkhar a pan zui nghal a



A chhuak chu za lo zetin ka nui suk, Mizo society hian nuthlawi in mahni ai a naupang ngaihzawng an neih hian engtiang takin nge an sawi zui ka hre hauh lo nâ in, Lalmuanpuii erawh tu sawi leh ngaihdan vang mah a bansan ka tum hauh lo



~><><>~>~>~


MAMPUII...POV



"Inthlen veleh group ah rawn sawi angche," Rinpuii leh Hruaii chuan min kuah vawng vawng a


"Raldo na hmuna kal tur pawh a ni hleinem, in sawi zing mawlh mawlh, hmeichhe ho tak hi chu," U Zuala'n nui ṭhû a a lo tih chuan annu chuan a melh zui ram ram a


Tu emaw hian min enzui renga ka hriatna chu a reh thei hauh lo, damdawiin kan chhuah aṭangin minzui tu an awm anga ka hriatna chuan ka ngaih a ti ṭha lo ka hawi kual leh ṭhin


Nge ni a, ka fate hmuh ka in beisei zawk pawh ka hre lo


"Nghah ila nei em ni?" Hruaii chu ka en vat a, ka lo dak nasa deuh a ni ngei ang, minlo en ṭhap chu ni in


"Nei lo e, kan kal a nia," Tih leh ka kut vai zauhin car ah chuan ka ṭhu lut a


Kan in vai liam rualin ka lung a leng nghal vawng vawng mai, a vawikhatnan ka pasal leh ka fate te lovin ka zin dawn a nia. Ni lo, kumkhua atan ka kal zawk dawn maw le



Ka mittui a rawn hnâm ṭiam ṭiam, "i ṭha meuh maw?" Ka nau in car khalh paha min rawn mwlh zauh chuan ka Pa pawh chuan min rawn en vat a, ka lu thing mat mat a ka pa lama tawlh hnai hret hret chuan a bân ah kuahin a darah ka lu nghat chuan mit ka chhing zui vang vang bawk a



Seling dâi kan thlen dâwn te chuan hawi let loh tum eng ang mahila, Aizawl kan tlân pelh hnu chu hawi let vawng vawngin mittui ka khap per sak sakin ka en let vawng vawng a


Ka lungphu zawn hi sa hat hat in, thîp vawng vawngin, ka kawchhung chu a ruak takzet bawk, ka mitthla ah ka fate an rawn lang a, engtikah nge ka hmuh leh theih ang? Ka kalsan avangin min hua a ngem? Minla hre duh angem? Ka lu ûm-ah chuan zawhna tamtak a rawn lut a, ka thaw leh kawk kawk ṭhin



Ka phone bawk chu en leh ṭhin in, "i dam anga, hunte liam se phone aṭang te pawhin ila bia angchu MamBawih," Ka Pa in ka rilru hria tih hriat taka a rawn tih chuan ka ṭah nuih sen sen a, ka ruak a, keimah hi ka kimlo ngawih ngawih, zep rual loh in ka pasal leh ka fate ka ngai nghal em em a ni


Mizoram tawp, Burma ramri a awm na nâ na chu Aizawl aṭangin a hla vang vang khawp mai, zankhua a kan tlân chung pawhin zinglam dar 5 pelh hret ah kan khua kan lut ṭawk a ni


Kawng a chhia in, a thui bawk si, chauh chu a na duh vet vet khawp mai


Kan khua, Zokhawthar, Myanmar border, ka nu (Zoa nu) in a hmuhsit em em leh ngainep em ema a sawi a pianga "thingtlang" tia a sawi ṭhin, kan khua, ka pian, ka seilen na thingtlang ngei mai chu en in, tukverh a dak chhuak chuan boruak chu ka hîp vang vang a



Mahni khua na nâ na chu boruak a dang zar mai alawm


Mite hriat ah chuan ruihtheihthil tamna, khaw ṭhing leh sawi hlawh tak mah nise, ka pian ka seilen na a ni a, ruihtheihthil chu a tam tak meuh mai, râl lehlam lawk Myanmar a ni miau a; Mahse, kan khua hi ruihhlo tam viau e ti lo hian, a khaw mi ruibuai leh in tibuai hriat tur hi an awm ngai meuh lo, khaw dang aṭanga rawn kal leh Rih dil rawn tlawh ho bawk hi buaina siam leh buaipui ngai an ni fo ṭhin


Kan khua sawi takah chuan Y.M.A thil tih tamtak, a bik takin kan khaw paltlang tur mitthi ruang anlo buaipui dan hi sawi hmaih a har ka ti, kuang nen, puan nen anlo tuam hlawm a, Myanmar lama ruang kal tur a nih in ṭiau râl thleng an dah thlap zel bawk, kan khaw hming, khawdang in an hriat dan anglo takin, a chhunga chen hian an ngaihdan an thlak phah fo bawk




Ni chhuak tur eng mawi em em, tle ser ser lam chu hawiin, "chhum a zinga, khua a dur a, thlipui a tleh in ruahpui vàn awn a sur a ; Mahse, chung zawng zawng phên ah chuan ni êng mawi tak a awm ṭhin," Ka phun chhuak sep sep a


Ni e, ka hringnun chu vawi lehkhat ah thim in min rawn tuam a, thli chhia na takin a rawn tleh lut bawk a, ka tlu in, ka hawi na lam a piang chu thim in, pên ngaihna hre lo mah ila, chung zawng zawng phênah chuan ni êng mawi tak a awm a ni, a ni lawm ni? Ka hringnun ah pawh ni êng hian rawn chhuah hun a nei leh ngei ang



Thli leh ruah hnu ah, chhimbâl pawhin a mawina chhuahin a rawn zâm chhuak ṭhin ang khian, eng nge ka hlauh ang a; Engvangin nge ka in dawm kun bik ang ni, ka pum chhungah ka thawk ruala thaw, ka thisen hmanga insiam ka fa, ka awh em em leh neih ngei tuma theihtawp ka chhuah ṭhin kha a rawn ṭhang lian mêk a, Nu chak tak a nei a ni tih engvangin nge ka hmuh tir loh ang ni?



"A danglam tawh i ti em?" Ka harh chhuak zawk, ka nau chu ka en a, mittui khao let dak sak a nui pahin, "khaw chhung kawng a ṭha tawh hle mai; Bakah, in a tam tawh ni in alang, a hma chuan henglai champhai road velah hian in ala tam si lo va," Ka nau chu bu nghat in, "In zâwng phei chuan, In 900 bawr vel chu kan ni tawh lo'ng maw? Chu ai pawh chuan a tam maithei a ni, kawngpui te pawh venghnuai thlengin an siam vek tawh alawm, kawchhung na nâ na chu ni100 in hlawhna aṭang kawng kan nei ṭha ṭan tawh khawp mai," Ka lo bu nghat nghat a


Zing dar 6 pelh deuh hret ah, ka ngaih ṭhin em em kan In kan thlen chuan chhuak vatin, "Â nî," Ka nau fa U zawkin min rawn pan vat


Lo pawm vatin, "minla hria elaw Johnny," Ka nau nupui a fanu pawma rawn chhuak nuih var var paha tih leh, "Biakte indam ṭha a?" Ka chibai vat bawk


Ka Pa pawh car aṭanga rawn chhuakin Judy-in alo ban ve nghal chung bawk a


"E khai!! Hei chu Mampui lah ni reng in, in lo zin elaw?" Inchhung kan lut tur Pa Hlua aw ka hriat chuan ka ding leh lailawk a


"Aw a nih ve hi, in dam tlâng maw Pa Hlu?" Ka chibai zat


"Dam chu a ni mai e, nangmah chauh em ni? Inpa leh i fate hi?" A en kual deuh a, za lo zeta nui lui chuan, "keimah chauh ka ni rih, lo lêng lut la," Ka chhungril erawh a nui thei hauhlo, engtin nge ṭhenawm khawveng te ka chhan zel tak ang? Zawhna tamtak ka la dawng dâwn si a



Nuthlawi tih hming ka pu ve ta reng mai chu a nia!!! Hmalam hun hi kan vahan hre lo tak êm!!!!


"Chhun lamah ni rawh se, bazaar lamah tih tur ka nei a, ka rawn leng dâwn nia chhunah," Tih leh Johnny-a biang rawn piai zauhin, "Lal Johnny te unau chu Nî an nei tawh bik a," Tih leh nui sun sun chuan a pensawn nghal a


Inchhung ah chuan kan ri zui nak nak hlawm, chauh pawh a sawi theihloh, la thingtlang deuh tih takah an rawn lut khawm a, naupang an rawn tlan lutin ei tur an lo duh, kan ri nak nak pawh a ni tawh lo, kan ri chuah chuah a ni mah zawk


"U mu hahdam la, inbual harh i duh pawhin tui ka lum sak thei che a nia," Ka lu na leh mitmu kham lutuk chhing duar duar a ka lo in hmeh lai chuan Biaktei'n a rawn ti sap a


"Ka mu hmasa ang, room ah chhuata phah tur puanfai vaklo minpe mai rawh, ka bal si, khum a mu chi pawh ka ni lo," Meng mang hleilo chuan ka lo ti ṭuak a


Ka luak lah chu a rawn chhuak ut ut bawk


"MamBawih mu hah rawh," Ka pa in a tih rualin, "takan a i damdawi ei tur kha," Ka nau in a lo ti ve vat bawk a, "kha ei la mu hahdam rawh," Ka meng diar diar, ka mitmu kham na lutuk chu chhin veng veng ka duh


Ka mu hahdam chu ka mu tlang a ni ngei ang, "Zing chaw ei lo vin a mu sia, kaih thawh pawh a pawilo ang a, naupai lai phei chuan pum ruaka awm chi pawh a nilo, Mam, kai tho rawh U Mampuii chu," Biaktei ṭawng chu ka hre ruai ruai, men ka duh viau na in ka chau lutuk chuan minti meng thei lo, ka ril erawh a ṭam viau tih ka hre thung


"Ilo harh ta maw? Chaw ei kan peih ṭep tawh a, i inbual hmasa dawn em ni?" Room aṭanga ka chhuak chu Biaktei'n nuisang in a lo ti vat a, "ummm, ka mu rei hle mai," Tih leh a sira Judy-i ṭhu biang berh zet mai chu ka piai zauh a

"Ka'n inbual fai anga ka rawn pui ve dawn nia," Tih leh, "tui lum tel lo hian ka inbual ngam êm angchu tiraw?" Biaktei chu a rawn nui vur vur a



Kan khua hi a vawh leh a vawt tûk a, a lum leh lum uchuak lutuk bawk a, December chho leh January chho phei hi chuan vur tlak chang te a nei zeuh ṭhin, kan in awmna phei hi chu, ni lah kan hmu har, ni lah tla hma bawk, tunah pawh a vawt ka ti ru riau lehnghal


"Tui kha lum rawh U, rinai hian a lo vawt zel a nia," Tui lumna a kawh pah chuan a nui vur vur a, tui vawta inbual ka ngam dawnloh a ka hriat avangin ka ban ve vat ta tho mai, huai viau chi ni in ka hre lo



"Mampui ilo zin tih kan hria a, chhun lamah kan rawn dak a, ilo muhil bawk sia," Nu Tlani leh a fapa an rawn dak a


"Lo lut rawh Nu Tlan, in dam tlâng maw. Hei chu a teber kha em ni?" Keiai pawhin a sang daih tawh


"A nih ve hi, inpa te an rawn tel na nge?" Za lo zet bawka nuih luih leh a ngai ta, "nia maw le," Ka ti sep a


Ka inbual dâwn meuh chuan a vawt vur tawh, Nu Tlani biak hi chuan kan ṭawng siam siam a a lo tlai ruih zel


"Naktuk chu sunday a ni tho a, Rih dil han lêng ila," Bathroom aṭanga ka chhuah ruala ka nau in a lo tih chuan nuih pahin, "nidang ah kan kal dawn nia, motor chuan vak ka ngam rih lo emai, zin kawng thui lutuk pawh kha ka rilru a hah ru viau a," Ka tih chuan, "a dik chiah, thla 3 an tlin hma hi chu fimkhur tluk a awm lo a nia," Chaw ei siam mawlh mawlh a Biaktei'n a lo tih ve chuan ka lo bu nghat


Doctor pawh khan motor chuang tamlo tur leh in dim tur khan minchah zing narawh, Aizawl chhuahsan hreh ru viau chung khan, chhuahsan ngei kha ka duh bawk si a, Aizawl a Christmas hmang ta lo kha ka ni hrim hrim a


Kan chaw ei kham ṭhenawm khawveng an lut diah diah a, kan han ti ti ho tak tak leh mahni in a nih vang nge lunglen em em pawh ka hre hran lo


Mahse, ka fate rual an rawn luh erawhin ka hre chhuak lo thei lo thung, ni e, zep rual loh in ka ngai a ni




"I muhil thei na nge?" Thlang lam varanda ah, khawvawt hnuai a ka ṭhu chu ka hnunglam aṭangin ka pa aw in a rawn ti dut dut a


"Chhun ka mu hnem êm alawm. I mut tawh ka ring a," Ka lo ti ve vat


"Kan upa tawh a nih hi," A rawn nui vur vur, ka pa en a nui chungin, "nu hrawn ka nei dawn antih ka hria a nia aw," Ka fiam zauh, za zet a rawn nui hawk hawk in, "i nau fiamthu mai mai a nih kha," A la nui huah huah tho


"MamBawih, khua ah hian i in benbel theih tak tak i ring em?" Thu tak zawka a rawn tih takah chuan ka ngawi vang vang a


"Kumthar hian Ramsiami college a lut ve tawh dawn a, Aizawl lama awm i duh zawk chuan i awmpui thei dawn a, rai puar chunga mahni a awm tur chuan ka ngaih a ngam zan lo tlat," Ka ngawih vung vung takah chuan a rawn tih zawm leh a


Aizawl-a let leh ngei chu ka duh alawm, ka fate hlat taka hian awm ka duh hauh lo. Mahse, U Zoa.... U Zoa mawlh nen hian buaina neih ka peih tawh si lo va


"Pa, muangchangin kanla ngaihtuah dawn nia, min ngaihtuah lutuk duh suh, kum te han thar se, ka awmdan tur chu a chiang mai ang," Ka Pa chu ka en a, bu nghat nghat in, "ni e, Pathian zarah engkim a ṭha chho vek mai ang," A ti dam leh dap a, a aw ah chuan min ngaihtuah zia ka hre thei, a fa neih chhun ka ni a, hetiang a naupai chunga nuthlawi ni tura ka haw let hi, ka hmalam hun a ngaihtuah in a rilru a hah viau in ka ring bawk



Ni a ral a, kan khua ka awmna pawh karkhat a tling ve mai dawn, zantin erawh mittui a tla ti ila ka sawi sual hauh lo vang, ka fate ka ngai a, chutiang bawkin ka pasal, duat taka min kuah ṭhin tu ka ngai em em bawk


Tamtak chuan, "uire san tu engvang a ngai nge a nih?" Minti an awm ngeiin ka ring; Mahse, kum 10 teh meuh hmangaih taka ka chenpui leh ka dam chhung hun, ka thawk tawp thlenga ka hmangaih tur emaw ka tih kha a ni miau a



"Tu nge rawn lêng a?" Room aṭanga ka chhuak chu ka Pa, ka nau te an lo ding run chu an hawi na lam en in ka meng zui kawk a


"Eng...."



"Anu..." Bryan leh Ivan-a ka lam pana a rawn tlân in min rawn kuah thlawp, mak ka ti lutuk chu chet mai nachang pawh ka hre lo


Kawngkhar bula U Zoa ding chu phawk fe in ka en a, "Nu," Bryan-an a rawn tih leh takah chuan ka harh zawk, ṭhu hniam rawk rawkin, "engtin nge in rawn kal? Engtik in nge?" Ka fate kuah pah chuan ka zawt nghal mawlh mawlh



Ka ngai hle tih ka kuah rualin ka hre thei, ka mittui rawn hnâm ṭiam ṭiam chu ka khap let sak sak a, "apa in minlo hruai a, zíng hma tawkah kan lo kal," Ivan-an inla hrang paha uar zeta a tih chuan ka ṭah nuih hak a, engtiang a chakin nge maw a rawn tlânpui ang le? Tunah zan dar 10 ala ri lo deuh a, zinga rawn chhuak tuna rawn thlen chu!


Ka fate hmel en chiangin, "ka ngai lutuk che u," Ka ṭah aw ṭuau, nui ver ver in, "kan ngai che a kan lo kal alawm," Ka ṭah nuih hak


"MamBawih naupang kha lo va tifai hmasa rawh, Zonun inhnuai ah min rawn zui rawh," Ka Pa chu ka en zawk, bu nghat in, "in tifai ang u," Ka tih chuan nui var var in min zui a


Naupang hmu in hlim viau mahil ka rilru erawh a nuam hauh lo, U zoa Nu awmdan tur leh ṭawngkam tur ka bengah a rawn ri in ka mitthla thei, a awm mai mai hauh lo ang tih leh ka hlauhber zawk chu naupang ngaihtuah chang lek lo va chet a rawn lak a ni ka hlauh ni


"Bryan in rawn kal tur i pi ten an hria em?" An hriat ka ring hauh chuang lo chung in ka zawt ta tho a, "api te thawh hma in kan lo kal," A tih chuan en vatin, "thawmhnaw in rawn keng em?"


"Kan theihnghilh daih a, tiraw U," Nui vur vur a Ivan-an a rawn tih chuan ka thaw hak, eng rilru pu in nge maw ni naupang a rawn hruai reng reng ni? Bakah, a nu te an lawm hauh lo ang




"Biakte naupang thawmhnaw hak tawk tur hi a awm em le? Thawmhnaw hak tur an nei dawn lo tlat," Bathroom aṭanga chuan ka au lang lang a



"Ka rawn zawng khawm a nge," A rawn ti ve vat bawk


Naupang ka bual zo chu U Zoa sofa ah a lo ṭhu run, ka pa erawh ka hmu tawh lo, "Khawnge ka pa?" U Zoa chuan mut khamlo tih hriat zet in minlo en ngur a, melh erawh ka melh duh lo


"Pi Nguri a zual antia, a han chho ve a nih kha, heta hi naupang thawmhnaw chu aw, a tkai tawh emai Judy-i te unau ka zu ti mu ve ange," Tih leh Biaktei'n U zoa en in, "i ril a ṭam chuan i ei thei a nia," A tih zawm zat, U Zoa erawh in min la en ngur tih ka hre thei


"Nangni in ril a ṭam em?" Thawmhnaw ka hak tir lai chuan ka zawt sep a


"Ka mut a chhuak keichu, apu te khuan hi a hla e! Apa khan a hla lo a ti ve sia," A pa a melh zui ram ram chu en in ka nui chhuak a


"Hla deuh mai a sin a nih, engah nge i Pa thusawi te in awih tehreng ni," U Zoa a lo rum nghut thung


"Hairdryer darthlalang hma pawhdawh ah ka dah kha in sam va ti ro ula, in mu dawn nia," Ivan-a biang a fawp zauh a tih leh room lam ka pan tir a


An luh ruala towel ho seng fel sawk sawkin, "min rawn zui rawh," U Zoa en miah lo chuan ka ti zui sap bawk



Thlanglam varanda a chhuakin tukverh chu ka kharh nghal sawk sawk a, naupang in kan in hnial ri emaw hau ri emaw hi hre tawh lo hrâm se ka duh



"Kawngka kha kalh nghal rawh," Kuangkuah at in hma lam ka en zui ngjal ngar



"Bawihi," A aw ah chuan a in thiamloh hmel takzet mahse in thiamlohna nei miah lo tih ka hria


"U Zo engtin nge naupang helai hmun thleng thlenga i rawn hruai theih, kan pahnih inkara thil thleng kha i hre tawh miah lo em ni?" An khum hrep ka duh laiin naupang in an hria ang tih ka hlau luatah ka seh chilh deuh nawk nawk a


Thaw hak a ka bul cheta a rawn ding chu ka lo tawlh hla vat, a hnar a tum ri zui dat bawk


"Zan an mu thei lo va, chaw lah an ei ṭha duh bawk si lo. A bikin Ivan-a, zanah ṭap in i hming a lam fo a, engtin nge ka tih chuan ang ni? Duh thlan tur ka nei hleinem?" Rum lutuk in ka melh nghal vak


Ka hrethiam, ka hrethiam lutuk ; Mahse.... Naupang, school kal lai an ni tih a hrelo em maw ni? Ka ngaihtuah chian poh leh ka thin a rim tulh tulh lehnghal



"School kal lai an nih hi, thla a thar anga, an exam mai dawn," Ka ti leh nghat a, rawn nui ri sukin, "karkhat bak an kal tawh dâwn chuang hleinem, Christmas chawlhin a zui dawn alawm," Ti awlsam et a a nui zui sun sun chu rum lutuk in ka melh leh ram ram a



"Bawihi, kan ngai che, a bikin naupang ho in an ngai em em che a, i ngai ve lo em ni?" Ka lo thaw hak, "ka ngai takzet che," A ti zui leh sup chu hawi sawn hmak in, "hetiang a i awm hian ka tan mai ni lo, ka chhungte, i chhung te leh Lucy-i, mi zawng zawng tan harsatna i siam tih i in hriat kha," Lucy-i hming ka sawi rualin, ka inrin hma hauh in ka mit a rawn hnâm sawk, ka tlawm zia ka hre chhuak zui nghal vawng vawng bawk



"Lucy-i hming kha sawi tel ziah suh," A rawn ti hluk chu a lam hawi in, "thudik a lawm ka sawi ni, Lucy-in a mamawh che U zo, i fa a pai tih i hriat kha, naktukah let angche," Tih leh pensawn ka tum chu ka hma ah a rawn ding zat a


"Nangpawh in ka fa i pai alawm, ka nupui leh ka fa pawh in min mamawh a ni lawm ni? Ka nupui ini a, ka nupui ka ngaihsak zawkna ah chuan tihsual ka neih ka hre lo," Luhlul zeta a rawn tih leh chuan mittui hnâm ṭiam ṭiam chung chuan ka melh ngawt ngawt a



"Mahse, ka mamawh tawh hleinem che," Ka aw ah chuan ka natna a lang chhuak ngeiin ka ring, in thunun viau tum mahila, ka natna hi thup zawh sen a ni miau lo a tin ni


"Ka mamawh che, keiman ka mamawh che, kei, Bryan, Ivan, kan pathum hian kan mamawh che, min mamawh tawhlo mahla keinin kan mamawh che a ni," Min rawn ban a tum chu kut chunglam ah ka lo vai khum zauh a


"Hetiang hian awm suh," Ka mittui tla tur ka khap per sak sak bawk


"Min mamawh tawklo a ni tih hre tur i ni U Zo, min mamawh in min hmangaih ni la ti tak hian minti na hauh lo ang," Ka chawl dat a


"Ka ngaihtuah a, vawi tam ka ngaihtuah a, sawi chhuah loh leh zawhloh che ka duh, a chhan chu thudik ka hria a nih chuan ka nat zual ka hlau a mahse....." A tawp lam chu a thâwp ral raih, ka hrawk a rawn na ut ut a, ka mittui a rawn luang ngiai ngiai bawk


"Vawi tam min hmangaih thu sawi chung khan engtin nge i uire theih?" Ka thinlung chhunga zawhna lianber, ka zawh ngam si loh, thudik ka hriat a nat ka hlauh vanga ka up bet chu mittui luang ngiai ngiai in ka zawt a


Ka hnungzang a rawn na khamin, ka hrawk a rawn kham up up bwk


"Bawihi," A rawn ti thâwp sup a

Mittui nena la lu thing nak nak in, "Mahse, tuna ka hriat chhuah tak chu, min hmangaih ngailo tih hi a ni."


"Ka hmangaih che, ka hmangaih che a ni tih fiahnan hian eng chiah nge ka tih ngai dawn," Ti vat chuan min rawn pan hnai leh a


Tawlh hnung hretin, "hmangaihna a ni lo U Zo, hmangaihna hi a sawi a sawi leh hrilhfiah chi a ni hleinem, min hmangaih ni la heti tak hian minti na lo ang a; Min hmangaih ni la hmeichhe dang khum i ṭawmpui hma khan ka nat hlau in emaw, mintih nat i hlauh vangin hmeichhe dang i mamawh lo tur, kan hmangaih te chu chân kan hlau a, tih nat kan hläu ṭhin; Mahse, nang chuan i thei ve lo, hmeichhe dang khum i ṭawmpui hma khan vawikhat tal min ngaihtuah chhuak em? Min ngaihtuah ngei ang tih ka ring. Chuti chung pawh chuan uire na ata a tawp tir zo lo che a, hmangaihna ila ti fo dawn em ni?" Ka na lutuk chu ka âwm hi ṭham tawk tawk mai ka duh


Ka ṭap khur dar dar a, "chuvangin U Zo, min thlah rawh, khang kum tamtak kan lo hman dun tawh te, kan lo in hmangaih tawhna te kha tlêm tala zahna leh min khawngaih na i nei a nih chuan min kal tir rawh," A dilin ka dil ngawih ngawih tawh



A lu a thing nawk nawk a, "ka theih lo tih i hriat kha; Mahse, Ngaihdam dil che ka tum tawh lo, ka ngaihdam dilna hian a tuam dam zo lo che tih ka hria. Mahse, ka hmangaihna erawh fiah a, hmuh tir ngei che ka duh thung," Luhlul zet a la ti nghet charh chuan, "min hmangaih tawh lo a nih chuan min hmangaih turin ka siam leh angche, vawikhat ka in hmangaih tir theih
che a nih chuan, engvang in nge a vawihnih nan ka in hmangaih tir theihloh tehlul angche ni?" A aw chhuak nghet charh mai leh beidawng duhlo tih hriat tak, luhlul zet mai chu mittui nen a en in ka ṭah nuih hak a



“Cheimawi chawp sakhmel a vul rei theilo ang bawk hian ; kehchhe tawh thinlung pawh, remkhawm ṭhin mah la, a mawi rei theilo. Rinna awmlo leh thup ṭhen nei in zawmna pawh a par vul rei ngailo U Zo,” Natna a khat tih hriat tak chuan ka ti chhuak leh a, ka ṭah chhuah mailoh nan nghet lutuk a ka kut hum ruhin, ka in sehruh nghal ngar ngar bawk


Ka mittui hi ti tlakfo ka duh tawh lo; Mahse, naupai vang nge ka ṭah hi a belh riau hian ka hre tlat lehnghal


“Cheimawi chawp a ni dawn hleinem, min hmangaih ṭhin tu thinlungah min la hmangaih a ni tih hriat nawn tir ka tum mai chauh a ni,” A luhlul zia chu pui tak a ni


Beidawng lutuk huan ka en tlawk tlawk a, sawi in, hrilfiah eng ang mah ila kan in hrilhfing dawn a ka hriatloh vangin ngawi renga inchhung lam pan san chuan, room aṭanga puanthuah la chhuakin, “i duh duhna ah i mu dawn nia, ka Pa rawn haw hma in mut tum angche,” Mit phak chuak a tih leh room ah chuan ka lut zui lehnghal a


Ka mittui rawn luang zui zawih zawih chu in hnit hlawp hlawpin ka hru hul tawk tawk bawk


“Nu, i ṭap leh ami?” Rang lutuk a ka mittui hru hul chuan, “Ṭap lo e,” Ka aw hrep chu!! A ṭial ruai mai



Khum aṭanga rawn ṭhu chhuakin, “Nu i bulah kan awm hlen ve thei lo em ni?” Bryan chu ka en a, chunglam melhin ka mittui ka khap per sak sak bawk


“Api in, apa leh hmeichhe pakhat an innei dawn a tia, Ivan nen kan duhloh thu kan sawi a. Mahse, api in fa an neih tur thu a sawi a, chuvang a nia apa bulah i bulah kal kan duh kan tih,” Ka rin lawk mah nise ka fapa in rilru na tih hriat taka a rawn sawi chhuah takah chuan minla deng na dawt dawt khawp mai


“Lo kal teh,” Tih leh ṭhu hniamin ka lamah ka pawt a, kuah vawng vawng chuan, “engkim a tha vek mai ang,” Mittui tla zawih zawih chuan ka sawi chhuak ṭawk ṭawk, ka ṭah chhuah loh nan thudang sawi erawh ka tum tawhlo, chuti a nihloh chuan insum thei lek lo va ka ṭah chhuah ka hlau a ni


nupa inkar chhiat vangin naupang hian engtiang takin tuar ang maw? ka fate pahnih ka en a, an mitmeng mangang lutuk, an mit a hlauhthawn na te chuan, “an mahni vang tal khan ka lo tuar lo a ni,” Tih duhna min neih tir rum rum dawn hian ka hre bawk


Mahse, uire-na, min hmangaihtu leh ka hmangaih ka tih uire-na ngaidam tur khawpin ka famkim bawk si lo



<><>~>~>~>

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 4:23 pm

PRESENT PERFECT
By
Floria Laldansangi



Chapter < 11 >


MAMPUII...POV


"Naaa, Hmingsang eng nge zun i cheh leh a," Bryan-an thinrim tih hriat zet leh aw ki sang zet maiin a tih ri ka hriat chuan ka chawhmeh chanlai chu ka chawl dat a, room lamka thlêk deuh vang vang bawk, "zun cheh" a tih chu ka hre sualah ka ngaih avangin ka thil tihlai chu tih zawm leh mai ka tum a



Thinrim ṭap teuh lutuk a Bryan rawn chhuak chu en leh in, "eng nge ni a?" Room lam melh rawm rawm in, "Ivan-a hi zun a cheh leh alawm, a hîng ropui si," A ṭap lo chauh, a nau zun chu a ten hmel em em in a ner nung nung bawk a


"Bathroom-ah lo va in tifai rawh," Tih leh ka kut tat fai nawk nawkin room lam chu ka pan a


"Ivan," Mittui tling piau in min lo en, a inthlahrun hmel takzet bawk


"Tho la, i hritlang ang," Thawh tir pah chuan blanket ho chu ka la chhuak nghal a


Zun a cheh tawhloh na a rei tawh hle si a, a mut ngailoh naa a mut vang nge maw ni?



"Nu a vawt lutuk, tui lum ka duh," Bryan a rawn au lang lang, Biaktei bazaar kal a rawn la haw si lo nen, minva tibuai tak êm!!!


"Lo nghak lawk rawh," Tih leh Ivan-a kai chhuakin, kawngkhar pui aṭangin U Zoa a rawn lut ve chiah bawk a, zing kan thawh hma in a tho a, khawnge a kal pawh ka hre lo



"Enga tinge kha? Zun a cheh leh em ni?" Ka chhanglo bathroom-a luh tlang tir chuan electric kettle-ah chuan tui ka lum zui zat bawk a


"Nge zun i chah ziah a?" bathroom chhungah chuan Bryan-an a nau a hau ri ka hriat chuan ngawi rengin ka ngaithla a


Ivan erawh inthiamlo tih hriat tak a ding zum zut chuan mittui nen a khap fak fak bawk


"Bryan i nau kha hau tawh suh," Tih leh U Zoa chu ka melh zawk


Room lam melh duk duka min rawn en in, "mutbu saw i pho chhuak dawn em? Ka lo va pho dawn em ni?" Hawi sawn pahin,"a ṭul lo, chaw ei khamah ṭiau luiah ka su mai ang," Tih leh ka tui lum chhuan rawn so chu ka off zui zat a


Naute zun hing satliah a ni tawh lo va, pho ro mai mai chi pawh a ni tawh lo


"Tinge zun i cheh ziah a Ivan, kan in ah pawh vawi 2 lai i cheh," Thawmhnaw ha mawlh mawlh paha Bryan-an lungawi thei thlawt lo tih hriat taka, a rawn tih leh chuan Ivan chu ka en zawk a, min rawn en ve zawka hnuailam bihin, "ka mumangah anu ka hmu a ka um-na ah zun ka cheh tawp zel alawm," Sawifiah tum ve zet leh in thiamlo tih hriat taka a rawn tih chuan min deng dawt thei, a sawitum chu ka beng awmna ka hriat tlukin ka chiang



A awmzia chu in ka chhuahsan khan nghawng a nei hle a ni


"Ûm tawhlo mai ta che," Bryan lah chuan hrethiam lo zeta a lo tih chuan ṭah nuih hakin, "chhunah ṭiau luiah kan inbual dawn nia ; Mahse, fimkhur tur aw," Ka tih chhuah sap chuan uar zetin, "yes!! Anu tui kan cheng thei tiraw?" Ivan-a pawh a rawn nui ta var var mai alawm


"Dût-no chhang ka rawn lei a nia, Sangte in ei duh em?" Biaktei aw ka hriat chuan room aṭangin kan chhuak ve nghal a

"Eng nge dût-no chhang chu?" An unau a min rawn en chho ha in ka lo nui ringawt a, keipawh in engtia sawifiah tur nge ka hre biklo, cake nen a in ang reng läwm ni ka ti mai a



"A tui em?" Ka chawhmeh chanlai chhunzawm pah chuan naupang thil ei chu ka en a


"Cake nen in ang rengin ka hria." Bryan-an a tih laiin

"Keichu tui ka ti," Ivan-an a lo ti ve zat


U zoa ṭhu ngawi ve kur chu en in, "i ril a ṭam ve lo em ni?" Zingkar thingpui in loh kha ala na thei viau sia


"Chaw ei in peih hma leh dawn emai, ei lo law law ang," A lo ti sup


Ni ve tho mai, Aizawl angin breakfast vel kan ei ve ngailo a, zing chaw erawh dar 8 a rik hi chuan kan peih at zel tawh, ka Pa ram kal a duh phei chuan chu aia hma a ei te a ngai ṭhin zawk maw le



"In tlu ange, fimkhur ula. Khawnge ka Pa hi a kal a, zingkar aṭangin ka la hmu lo reng reng," Naupang ho tlan chhuak au zui pah chuan ka tih zawm zat


"U Tawia te in lamah ka rawn hmu kha," Biaktei'n a tih zawh rualin, "nu thar inei dawn ka tih mawlh mawlh kha," Ka nau a rawn nui lut vur vur a, ka lo nui ve kar kar tho


Ṭhenawm khawveng thleng hian ka Pa an fiam tak nak nak hlawma tunlai chu, ri ve ret ret hi a awm tak tak emaw ni?
.
..
..

"Chaw ei kham chu ṭiau luiah zu in suk kan tum a, khawmawi lamah naupang inthlak na tur en pahin," Ka pa chu ka melh zawk


Bu nghat in, "zu fimkhur ula, keipawh i Nu Nguri te in lamah ka chho ve leh ang, palh thut thei dinhmun ah kan ding tawh si a, han lan veleh kha a ṭha," Ka bu nghat nghat


U Zoa chu alo ngawi kar, a rilru tur ka hrethiam, ka Pa lah chuan awm lo ang maiin a en bawk si. Eng rilru pu in nge maw a rawn kal reng reng ni? Keimah tak pawh hi awmdan minti thiam lo vin, ka chhungte lakah min inti thlahrung zual takzet!


Kan chaw ei kham chu ṭiau lui pan tumin kan ri nawk nawk hlawm a, Judy-i ber lah a lo ṭap khek ve bawk, naupang anlo in um ve bawk nen, a chhangchhiat theih khawp mai


Motor dang hman tur awm mai heklo, U zoa car bawkin venghnuai lam kan pan leh ta nge nge a


"E heu! Hei chu Mampuii lah ni reng in. Engtik nge in rawn zin a? Christmas hmang turin em ni?" Car kan hung fel zo chiah Pa Zaua a rawn lang hlawl a


"Karkhat a ni ṭep tawh. I duty em ni?" U Zoa'n blanket suk tur a rawn pawm chhuak ve bawk


"Aw a nih hi, heihi inpa kha em ni?" Ka melh zawk

"A hming kha ka hre mai tawh lo," A tih zawmzat a


"Zonuna, Zoa minti mai rawh, kan inneih ni a kan inhmuh bak kha in hmuh leh a awmlo êm a ni," A rawn chibai nghal zat a


"Ni e maw le, in châmlai chuh ila chaw ei a koh tur che u in nih hi," Ta deuh deuh chuan, U Zoa lah chu a nui ang sun sun a


"Pa Zau, kan tibuai palh angche, insuk tur kan nei lian si, nidangah rawn len ka rawn tum ang," Tih leh U Zoa chu ka melh ralh, engtia tih chi nge pawh ka hre tawh lo, rei erawh kan khua ah a awmloh hrâm dan ngaihtuah a ngai, inṭhen mualpho tawh hnu a hetiang a awm leh vêl pawh hi thil ṭha leh mawi pawh a ni lo hrim hrim



Naktuk lamah haw angche U Zo," Ka thusawi chu hre lo ang hmakin blanket chu a rawn rap sawk sawk a



"Fimkhur rawh u aw, hla kal suh u," Naupang ho tuia infiam chu a ti zui zat


Rum lutuk a melhin, "zah te pawh hi i zak ve lo em maw ni?" Ka beidawng lutuk leh luhlul ka ti lutuk chu au khum chiam mai ka duh


"Ka sawi tawh kha, ṭhen tumna che ka nei lo," A rawn ti sup a, rum lutuk a melhin, "i tum emaw tum lo emaw kan inṭhen tawh. Theihnghilh suh," Ṭawng rin hlau si chuan ka seh chilh deuh nawk nawk bawk a


Min hmu tu ringawt tan chuan nupa in lungrual tak, pasal, nupui te pui thiam tak te pawh kan ang viau ta ve v in nia ka rin hrep ni!


"Vawiin ni chauh chu in hau lo vin kan awm theilo em ni?" Naupang ho lamah a thle zauh a, mit chhing sawka thaw la kawka thaw chhuak ham ham in, "ka fiamthu lo a nia, ka Pa hmai tal minzah sak angche," Tih leh ka in su zui nghal mawlh mawlh bawk

Ka ti tak tak, ka pa ka hmaizah lutuk hi en pawh ka en ṭha ngalo a niber, kei a fanu neih chhun uire san ka nih nak alaiin, ka pasal min uire san tu hmel hmuh reng hi atan hreawm in, a awlsam dâwnlo lulai lutuk a tin ni



Kan in su zo chu khawmawi lamah naupang thawmhnaw en in kan kal a, nuam anti ngang mai, kawngsir a ei tur an siam lah chu ei duh an ngah narawh, "heihi eng nge?" A ni deuh vek mai bawk a




"Mampui," Ka hawi vat a, Eni hmel ka hmu hlawl chu nui chhuakin, "awii Christmas hmang turin in rawn haw tihna em ni?" Yangon lamah pasal a neih hnu khan tun hi kan in hmuh lehna a ni mai, ka hai dawn lek lek zawk alawm


"Aw, nangni pawh hman in tum em ni? Awii i ngaihawm e," Min rawn kuah deuh nawk nawk bawk a, a aw rawl rin ngaiin ala ring reng bawk a nih hi


"A nih ve hi, hei i fapa em ni?" Naupang kum 5 bawr vel, Ivan-a nen in rual tawk lek tur a kaih chu ka en a


"A nih hi, Bawihpuia kan tia, heihi i fate em ni? Ngawihteh inpa chu College kan luh tirha ngaizawng tu che kha a va ang ve," U Zoa chu a thlêk deuh ha ha a

"Ka nia lawm, ka hre teuh hle mai che, Zoa ka nia," Ka ṭawng hma hian amah leh amah hi alo in sawi zung zung a, ka pasal anga hmel hriat tir pawh ka tum chiah lo a sin maw le


"Khawi ka lo chibai angche, atchilh in, i tibuai nasa bawka, i nei ta nge nge alawm, 1st yrs nih kum phei kha chuan kan zah kha ala zum ve sia, kan lo ngei ru thei khawp mai che a," Nui zui kur kur chunga a tih chuan ka lo nui ve kur kur tho, nunhlui sawi takah chuan U zoa min ngaihzawn tirh vel mitthla ah a rawn lang uar uar mai alawm maw le


"Ung -sanpiau ei kan tum a, rawn ei ve ula," Naupang ho en chuan, "kan ei thei tawh lo ang, thil ei kan ngah emai," Ka tih laiin, "nu eng nge ung-sanpiau chu?" An unau in minlo en leh kar tawh


"Keipawhin ka hre miah lo," U Zoa pawh chuan a rawn ti sup a


Eni nui bawk bawkin, "sawhchiar ang deuh, coconut leh chithlum te nen a chhum, lo kal rawh u, ka treat angche u," Tih leh Ivan-a chu a kai zui zat a, thil ei kan ngah lutuk a zanriah kan ei thei hauh lo ang le!



Ka rin ai takin an ei thei, Bryan phei chuan plate hnih ngawt a ei zo ṭhak, U Zoa leh Ivan-a pawhin plate 1 leh tlem ve ve an ei bawk a


Eni nui kiah kiah in, "ka hruai lo angche u tih a va hlauhawm ve, i nu hian ei tur tuina a hre lo a niang a?" Ala nui khur char char tho, an ei thei a ti ve ngang a niang, keipawh chu ka nui zui ve kur kur tho a


Ka phone rawn ri ral ral chu la chhuak in ka en a, phone screen-a hming rawn lang ka hmuh rualin U Zoa ka melh zawk


"Tunge?" Tih melha min rawn melh chu hawisawn in, "En, naupang hi lo enzui lawk rawh aw, phone hi ka'n chhang lawk ange," Tih leh din ka rual, "toilet hi khawnge a awm le?" Ka ti zui zat bawk a



"In hnunglam, vawk in bulah khan a awm ang, tui hmun lam aṭang sawn a kal theih," Nula (waitress) in a lo tih chuan ka bu nghat a, ka pensawn nghal vat bawk


Vawkin bula ding ren rawn chuan ka phone ri ral ral chu en in thaw ka'n la deuh hap a, thaw chhuak ham ham a muangchanga pickup in, "Hello," Ka ti zawi sap bawk


"Lalmuanpui, Zonunmawia leh naupang ho kha rawn haw tir nghal rawh," Ka nu aw ṭeng zet mai ka hriat rualin mit ka chhing zui sawk, min ân khum chu ka rin lawksa mah nise, ṭha taka min biak ve phawt ka lo beisei deuh a nia!



"I duhlo a i kalsan tawh a, i chhuak tawh a, engvanga in khua, thingtlang thleng thlenga hruai tel nge inih?" A rawn ti zawm phiar phiar chu thaw lo lak khum hakin, "ka hruai hauh lo," Ka lo ti hap


Rawn nui hul hakin, "theihnghilh suh, he in i awmlai chuan i fate an ni a, i chhuahsan a, kalsan tu ini a, an Nu nihna i nei tawh lo, a rang, a rangin rawn thawn haw angche," A thusawi chuan min deng dawt dawt mai, kha leh chen kha ka enkawl a, U Zoa ka ṭhen vang ringawt in ka fate an nihna a bo chuang miah lo, engtin nge a sawi theih zawk?


"Kan inṭhen ngei alawm. Mahse, theihnghilh bik suh, enkawl seilian tu ka ni a, ka hnena hruai turin dikna leh chanvo ka nei ve bawk, an nu ka ni, chu chu nang ngei pawhin i ti danglam thei bik lo," Ṭawng ring si lo, seh chilh zeta ka tih zawh rualin ka hnunglam aṭangin ka phone tu emaw in a rawn phih thla sawk a


Rang zeta in herin, "Mampuii sawi kha a dik , a fate an ni a, enkawl turin dikna a nei bawk, theihnghilh suh Nu, a kuta naupang ho hlan tu inih kha, kan rawn haw leh haw loh tur pawh kan thu a ni," Ti ram hmak hmak chuan phone off in min rawn en a, mittui tla tur khap let sak sak in rum lutuk in ka lo en ve ran bawk



"A rawn call leh che pawhin chhang tawh suh angche," Ti bul leh nghuta ka phone pawh minpe let lo chuan a pensawn nghal thauh thauh bawk, ka biang rawn lum thla pup chu duhlo zeta hru tawkin, thaw ka lo zui kawk kawk a



Kan ṭhutna ka let hnu chuan U zoa nen chuan kan ngawi ran, kan haw kawng ah pawh ṭawng theilo ang maiin kan ngawi kur a


U Zoa erawhin min rawn melh leh zawk ṭhin tih ka hria, car chhung boruak chu rit tak a ni, kan kal lam mah boruak rih sa nak alaiin, haw lam phei chu thawk a harsa mah mah tawh alawm


"Tlai chaw in ei thei lo ang a," Naupang lam hawia ka tih chuan nui vur vur in, "keichu ung-sanpiau kha ka ei dawn," Ivan-an a lo ti vat, "keipawh chaw ka ei dawn lo," Bryan-an a lo tih zawm zat bawk a


Nui lui zet chuan, "in hne lo em ni, in ei hnem rapthlak sia," Ka ti sep a


"A tui e, Aizawl ah an zuar ve lo a niang tiraw nu, kan haw hunah min siamsak ve rawh aw?" U Zoa ka en vat, ani pawhin minlo em ve chiah chu rang lutukin ka hawisawn a, U Zoa erawh a nui ri suk thung


“In school banah in rawn kal anga, in rawn ei dawn nia,” Ka tih chuan a hnar a tum ri zui dat bawk a, ka mit sirin ka melh ralh, let leh ka tumlo tih ka ṭawngkam ah a hriat vanga lungawi zân lo, lungawiloh na tilang ngam silo chuan a thawk zui hak bawk a, haw let ka tum tawh lo êm a tin ni!


Kum 10 chhung khan tlân zawk pawh ka nei ngai lo, intih thiamloh chang chu kan nei ve ṭhin ngei alawm; Mahse, nupa in hauh hleka riahbo tih vel ka nei lem lo, in ka chhuhsan na hmasaber a ni a, let leh turin ka chhuahsan hek lo. A chhanchu maw... uire-na hi keichuan ka pawm in, ka ngaidam theilo a ni


Mahse, ka pasal a nihna ah erawh ka ngaidam a, ka fa lo piang mai tur Pa a nihna angin ka ngaidam tel bawk. Amah erawh chu vang ringawt chuan ka lët thei chuanglo, rinna ka nei tawh lo ang bawkin ka hmangaih ṭhin ang khan ka hmangaih thei tawh dawn lo tih ka hming ka chian tluk hian ka chiang tlat a tin ni



<><><><><>


RYAN...POV


"Mampuii te khua i hria em?" Ka sira muangchang a kal chu ka melh zawk a


"Champhai lam chu a nia, a hming ka hre tawhlo. Zotlang emaw eng Zo emaw chu a ni!!" Ti deuh vang vangin


"Aw!!! Zokhawthar maw le, a hla lutuk, Myanmar ramri a nia," A rawn tih leh chuan ka bu nghat


"I duh tak tak tiraw?" Ka kiai suk


Rawn nui var var in, "i duh pawhin hman hmawh lutuk suh, U Zoa nen an in hruai leh chuan i rilru ana mai mai. Bakah, pasal ṭhen hlim ngaihzawng neih a mawilo a, U Mampuii ngat phei chu tur hmanhmawh chi a ni lo," Experience nei ṭha tawh ang zia zanga a ṭawng vel ni

Mahse, dikna chen a awm tho mai. Chutih rualin hmeichhe pakhat vang erawhin nat ka tum buai lo viau bawk



Thim thet thet, unau hmel hai hunlai a ni, ka hmaa mipa rawn ding chu ding dawt a en in, ka mit ka ti zim nghal sän bawk a, ka kut ruh lutuk a hum in, "Joel," Ka phun chuak sup bawk



A nui ri suk a, "Hi Ryan," Thle bakin ka sira ka nau Kimkimi ding chu melh ralhin, "Hello beautiful," A ti zui sup chu rang lutuk a ka nau bâna vuanin ka hnunglamah ka pawt lut a



Ner sawk sawkin, "I boss-in Mizoram thleng a rawn tir che em ni?" Thim ṭan tawh mahse kan hmel chang rut mai chu chiang takin kan in hmu thei ve ve


A bek pawng ṭawlh ṭawlh a, khabe ruh ti che ralh ralh chuan, "i unaunu hmelṭha zet mai hmaa thih i duhloh chuan haw turin hrilh rawh," A ti chang rat chu Kimkimi ka kawr vuan ran a ding chu ka en chhuk zawk a



"Kimkim lo zu haw rawh." Joel-a chu ka melh ran bawk


"U..."


"Engmah zu sawi suh angche," Tih leh min vawnna phelh sakin ka inher tir a, "kal rawh," Tih leh ka nam kal zui dat bawk



Kut hum ruh chunga inher in, "Mizoram thlenga min rawn zui chhan chu ngaithla ila," Ka sawi zawh rualin min rawn hnek sawk, rang lutuk a silai phawrh a min tin zui nghal chuan, "engvang a rawn zui che nge ka nih i rin Ryan?" Kha zeta ti chhuakin ka lam a rawn pen hnai a


Nui hul haka min hnekna khabe ruh ti che ralh ralha ding ngil in, "i silai kha dah thla rawh, Australia ni lovin, Mizoram a nih hi. Police aiin mipui an hlauhawm zawk," Ka nui hul hak bawk


"I kâ kha chip hmak rawh Ryan, Mizoram-ah i tlân chhiat ka ring lo va, tualthattu i ni tih a hria em?" A thle bak a, "i Nu a nia ka tih," Ngeiawm zet a a tih zawm zat chuan Ka kut ka hum ve nghal ṭalh ṭalh



"JOEL..." Chang rat mai a ti chhuak hrawih a pen hnaiin, "i kut hmawr pawh a i tawk a nih chuan ka that ngei angche," Kha zet a ti chhuakin a rawn nui hul hak a, "ka unaunu kha thatlo la ṭha tur Ryan," Hreptak a!!! Vawi engzah nge ka thah a ni lo tih ka sawi phiangsen dawn ni. Police pawhin evidence nen an pe thlap a, minla ringhlel a nia!! Hrep hian!!!


"Ka thah a ni phiangsen lo."


"I ka kha chip hmak rawh," Ti hrawka silai load ri khap in ka chal ah tak chuan min tin vah a, ka en run thung, thih hi ka hlau viau emaw a ti ange???



"Mizoram thlenga ka rawn zui chhan che ti hian i hre tawh em?" A ner sawk sawk bawk


Ka chhang lo, kan hnunglam aṭanga ṭawng ri rawn ri thla nak nak a hriat chuan melh zawkin, "ka chhuah che ring suh angche," Tih leh silai dah thla in, "ohhh Mr. Mrac-an message a nei bawk a," Ka lam a rawn pen hnai leh a ka bengbula rawn awn hnaiin, "i hlim theih chhung khan lo hlim angche," A ding ngil a, kiai suka, a dar sän zui ak in, "khawiah mah tlân chhiatna a awm lo Ryan," Nui vur vur a inher in ka dinna thlang lama polo vivo car dum nalh zet lam chu a pan a


Rawn hawi lehin, “ohhh Ryan, hmeichhia, a pasal hlui fa pai lakah i mit i lên tih ka lo hria a, i inthlak dawnlo a nih hi, pawmlai nei kawp hi i sim a hun tawh viau a ni," Ngeiawm zeta a rawn tih leh, "see you later," Tih zawm zatin car-ah a lut nghal zat bawk


Ruh lutuk in ka in hum ngawt ngawt, tlân lawka hnek sawk mai ka duh laiin helai hmuna buaina ka siam a nih chuan ka Nu te an rawn lawr rang dawn tih ka hriat avangin inseh ruh ngat ngat chuan ka thlir liam ngawt ngawt ringawt a



Mizoram ka kal hi ka ti fuh rêng em? Phiangsen hian!!! Khami zan khan lo chhuak lo tawp tur ka ni a sin maw le!!!!

"Hreptak hian!!!" Ti chhuak hrawihin Ka sira thingkung ding chu ka hnek zui ṭhuai bawk a, thaw la kawk kawkin, "Joel," Ka ti chhuak hraih bawk



~><>~>~>~>

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2021, 4:23 pm

PRESENT PERFECT
By
Floria Laldansangi




Chapter < 12 >



MAMPUII....POV


"Naupang ho hi khawnge maw an kal le. Johnny i U te kalna i hria em?" Hmai berh niâh maia min rawn panin a hmai ka lo tuai fai sak nawk nawk a

"Hre lo, Â nî kawrmawi min lei ve dawn lo ami?" Ka nui chhuak thut, nimin lama a U te pahnih kawr ka leisak khân lei ve nachang reng reng ka lo hre lo a tin ni!

"Christmas dawnah kan bazaar angchu, a ai nalh ka lei sak angche," Tih leh pawm ka tum rualin ka lam pana Vantea rawn tlân chu ka lo en a



"Anu Mampui, Ivan-a Barel-ah a tla," Johnny-a ka vawnna thlahin Ka ding zawt, ka phu nasa lutuk leh ka lungphu rawn rang lutuk chu ka che mai thei lo lehnghal!!

"Ânû!!!..." Ivan-a huh hnuang a ṭap uah uah a ka lam a rawn pan chu rang lutuk in ka pan rawk rawk a


Ka lungphu zawn nat lutuk leh phut ran lutuk vangin ka thaw ṭha theilo, ka fapa hmui duk chur leh khur hlawk hlawk mai, hmai dâng bel mai chu pan ruak ruak a, ṭhu hniam rawk rawkin ka kuah nghal rawk rawk bawk a, boruak ka duh angin ka hîp thei dêrlo lehnghal!!!!


Ka hlauh lutuk vangin ṭawng lah ka ṭawng thei thei heklo, Ivan-a kuahbet chuan thawk lak ka tum a, ka hnungzang chu ka hriat ṭhan em em kut in rawn zût in, "muangchangin thaw rawh, in bengdai la," U Zoa'n dam dap maia a rawn tih chuan, Ivan-a kuah chungin mit ka chhing vang vang a, boruak muangchanga hîp in ka thaw chhuak leh ham ham bawk


Ka lungphu rang lutuk erawh ala reh thei hauhlo, ka âwma beia khur dar dar a ṭap pur mai chu, a hnungzang chul pahin, hlauhthawn luat avanga mittui tla ṭeu chung chuan, "a ṭha vek e, a ṭha vek e," Ka kuah vawng vawng, ka aw te chu a khur lo chauh a ni


A hlauh zia chu a taksa khur dar dar ah hian ka hre thei, a bula Bryan-a ding ve pawh chu a dang chuanglo, a dâng bel mai


"Bryan hian Barel kha nam tlu lo se chuan a thi hrim hrim ang," Vantea'n a rawn tih zui niah niah phei chuan ka lungphu a rawn rang zual, a mangan tur zia leh hlauhthawn zia tur ka mitthla nghal chuai chuai bawk


Mittui tla ṭeu a en in, "na i nei? I inti na em?" Ka ṭap chhuak lo chauh, ka hlauh lah chu a reh mai dawnlo nge, ka lungphu zawn hi ala na vawng vawng mai


Ṭap hliam hliam chungin a lu a thing mat mat a

"Inchhung lam ah hruai lut phawt ang u," Ka nau aw ka hriat chuan ka bu nghat, Ivan-a pawm lawp mai ka tum chu ka tha lo khur ve nasa lutuk ah ka zo dêr lo, U Zoa'n a rawn pawm vat a, a kut lehlam a min chelh zui zat chuan, "kal rawh u, Bryan i nau pheikhawk kha rawn keng la," Tih leh pensawn a rual nghal zat


Inchhung kan luh hnu pawhin ka thawk lak ala harsa in, ka la hlau lutuk mah mah,keimah ka inthiam lo vin, ka veng uluk taaklo tih ka rilru in ka in hrilh mawlh mawlh bawk


Naupang ninhlei rual an ni a, ka hmuh phak loha an awm chuan zawng nghal vat vat tur ka ni a sin maw le!!!


Ka nau in Bryan-a thil thlen dan a zawh chuan, "Api Tlani te huan bulah kâwl sunhlu tla kan chhar a. Barel, tui a chanve vêl awm chhung ami chhar a tuma a bin lut a, chuan a tâng a, Barel ka namtlu tawp a," Bryan-an a thiam ang anga a sawi lai chuan ka thin a lo phu dawt dawt, ṭang lutuk in thaw ka lo la kawk kawk bawk a


Bryan awm hnai lo phei se chuan eng nge thleng ang, ngaihtuah pawh ka ngaihtuah ngam lo zawk


Ka awmdan a hrethiam a ni ngei ang, ka darah U Zoa'n rawn chul hliau hliau pahin, "hahdam rawh," A rawn ti sup a. A mitmeng ah chuan hahdam turin minti takzwt tih ka hmu thei


Zep rual lohvin min khawihna vanga ka hlauhthawn na tlêm tial tial chu ka in hre chiang lutuk mah mah; Mahse, a kut chu dahsawn sak in, "ka ṭha," Ka ti tak na in ka aw chu a chhuak ṭawk a ni, za lo leh awihlo tih hriat zetin alo nui ri suk thung


"Tui awmna reng reng chu pawngpaw ngamloh tur, a bikin ṭiau luiah te khuan kan hriat loh in inlo zu kal ange," U Zoa'n a rawn ti chhuak sup a, pawmpui tih hriat zetin ka lo bu nghat a, kan veng naupang phei chu an nghal ve ang reng hlawm si a

A bikin Bryan leh Ivan te ang rual, kum 5-6 leh 10-11 chho vel an tam si, ṭiau lui kan hnaihin, tlailam a nih dek dek tawh hi chuan inbual tura an tlân thlakna ber a ni bawk nen, anlo zu tâl ve mai ang tih hlauhawm tak a ni

.
.
.

Kan chaw ei kham ka Pa pawh Nu Nguri te inlam bawk a pan leh a, tunlai chu a chhûn, a zân in Nu Nguri te inlam ah a tal chawt, keipawh hian ka hman chuan han kan ve tur chu ka ni maw le


Naupang chu tlailam an tal chau bawk a niang, dar 8 rik dawn chuan an muhil sek sek mai alawm


Naupang puansin siam ṭhat sakin ka thlir vawng vawng a, thaw la kawkin, nui zui sen sen bawk a, an chal a fawp ve ve chuan, "vawiin ang khan minti hläu tawh reng reng suh," Ka ti zui sep bawk a

Guitar ri ka hriat chuan ka hawi vat, tunge perh tih hmuh kher ka ngai lo bawk


"Is it too much that I'm asking for?
Can we start over? Can we end this war?
I've been taking your love, I've been wasting your time
But if there's still a chance, let me change in your mind
Before you go walking out the door


you know I'm not perfect
If you leave, i deserve it
But baby all I'm asking you is please be patient with me"

Varanda lama U Zoa guitar nen a a zai ri rat rat mai ka hriat chuan muangchanga pan in, kawngkhar biang ngheng chuan ka en kar a


Ka mitthla ah kan in ngaihzawn lai te, kan inneih tirh te a rawn lang zut zut bawk, ka mittui rawn hnâm ṭiam ṭiam chu thaw lak hakin ka khap let fak fak a


Ka ṭah nuih zui ringawt bawk, khang kan nunhlui te kha nimin ang maiin ka la chiangin, ka la hmufiah thei


“Khatia min en reng chuan ka zai lâi zo vek ang,” Min rawn en chuanglo, ka lo phu deuh zuk zawk


U Zoa thlanglam en chunga la zai ri rat rat chu ka en leh a, ka lam rawn hawia mawi ka tih ṭhin dan ber maia rawn vei nuih suk chuan, "i ṭha tawh em?" A mitmeng a min ngaihtuah na lang chhuak chuan a hma ang bawkin minla hneh ngawih ngawih mai!!! Ka chhang lo va, kiai leh suka thla deuh bak chuan, "i hla ka sak sak leh dawn che em ni?" A nui ri zui suk bawk



A nui hmel hi hmuh nuam ka tih ngai in ka la ti reng a ni tih zep rual lohvin ka lungphu randan ah hian ka hria a ni. Ka hlauhthawn vang leh mangan vang a rang a ni lo tihlah ka hre chiang em em bawk


Ka pasal, ka mipa ka hmangaih kha a la ni reng tih ka hria a ; Mahse, kei erawh a hmeichhe hmangaih ṭhin, a lungphu tirang si a, ka laka hahdamna hmu ṭhin mipa kha a ni em ka hre tawh tlat lo thung


A rawn vei nuih leh suk a, "When i look at you," A Mit hmul kân ak a tih leh hmalam bawk hawi lehin, Miley Cyrus hla ka duh em em mai, ka zai pui rat rat ṭhin chu rawn sa chhuakin


"When your world falling apart
When there's no light to break up the dark
That's when you can look at me," A hla thu a mah a siam danglam chuan ka lam a rawn hawi leh a, mawi lutukin a rawn vei nuih sak bawk


Mittui tling pamin ka lo en thung, ka tan a rinawm lai te, a thinlunga keimah chiah ka awmlai ang mai khan a hmel a la ṭha a, a khabe ruh kual lian tak mai leh keimah chauh ah fûk tir se ka duh; Mahse, reitak en erawh ka dawl siloh, mitmeng thûk leh rilruih maite chuan, ka pasal, ka hmangaih, ka thlakhlelh ṭhin em em kha ala ni reng tih a ti chiang em em bawk!


"Bawihi..." Ka phu nasa lutuk, ka thlarau a thlawk chhuak lo chauh, mit khap lêk lo va min en tu U Zoa chu ka en vat a, ka biang a rawn lum thla pup bawk, rang zeta hru tawkin, "naktukah lam chu haw tum tak tak rawh aw," Ka hrawkna lutuk ah chuan ka aw a chhuak ṭawk ṭawk, ka lungphu zawn hi a thîp in a sa veng veng bawk


Ka thusawi chu a bengah alut em ka hre law. Mit zîmsan a min en in, "ka tina hle che a ni tiraw?" Aw rilruih mai chu a ring lo va, a chiang em em thung

A guitar awrhna hrui chu la chhuakin a sira dah chuan thaw a la zui hak bawk a


Ka chhang lo va, ngawi renga a bula kal hnaiin a sir a chair-a ṭhu thla chuan, thlanglam ka hawi vang vang a, mit khap lek lo va min en tu U Zoa melh zawkin, ṭah chhuak insum zet a nui lui säng chuan, ṭawng ka tum ngial a; Mahse, ka hlawhchham ṭhak thung

Ka lei chu phuarbeh ang tlat a ni, ka hrawk a tawtin a kham a, ka lei hi ka ti che a nih chuan ka mittui a tla ngei dawn tih ka hriat avangin, âng deuh zuaia ka hmu chip leh chuan hma lam ka hawi zui ta vat zawk a



Ka mit khap zawk zawka thaw la kawk a, thaw chhuak ham ham in ngawi reng chuan kan ṭhu dun a


Ka bula ṭhu, khawdang hawi lek lo va ka pasal min thlirna chuan ka taksa hi a ti za mer mer mai, kum 10 chuang ka lo tawn tawh, ngaia ka neih theih miahloh, ka lungphu la ti rang em em reng zel leh; Minti zâm em em ṭhin tu min en na mitmeng chu ka en ngam lo, ka en let a nih chuan thlahlel taka ka kuah mai ka hlau a ni, nghet lutukin ka kut ka lo hum ruh ngar ngar thung



Guitar bawk chu la kângin a perh leh a, zai leh rat ratin, ka biangah ka mittui a rawn luang ngiai ngiai , ka hma ah kan nunhlui a rawn lang zut zut a, hmangaih tak leh duat taka min kuah ṭhin tu, ka nat hlau em em ṭhin, engtiklai mai pawha a thinlunga hmun pawimawhber luah tu ka nih zia tilang fo ṭhin tu kha ala ni renga; Mahse, ka khawih phak maia awm si in, ka en ngam tawh lo, ka mit ah engtiang a nasa in nge ka hmangaih tihlah ka tilang ngam tawh hek lo


Ivan-a vanga ka hlauhthawn na la rehloh vang nge, ka ṭah lah chu a chhuat et et reng mai lehnghal!!!


U Zoa zai chu mittui luang ngiai ngiai chuan ka ngaithla a, ka taksa leh ka bek za mer merah chuan minla thlir reng tihla ka hre reng mai bawk si


Mittui nen a hmui petbet in U Zoa awmloh na lam chu muangchangin ka hawisawn riai riai a, ka ṭap chhuaklo tur ka in hum ruh zia chu pui tak a ni!!

A zai lai tawp datin, a thaw ri hak a, a tho ri ah chuan ka lo ip chawih, engtiang takin ka pasal huhâng leh a mi uap na hian keimah ah a nghawng tih ka sawi ngai lo; Mahse, he ka pasal huhâng hi ngaiah ka nei thei lo va, a mi uap na hian minla ti zâm fo a ni



“Mu hma rawh, hahdam i mamawh a nia,” Ti zawi supin a pensawn nghal a, a pensawn rual chuan ka thaw chhuak hawk, ka ṭang hle a ni ang ka taksa a kham nghal ut ut thei


Kawngkhar pui lam a pan chu mittui vanga mitmeng phe ruai a en vawng vawngin, ka in hnit nghal hlawp hlawp bawk a


Engvanga ṭah chhuak em em zel nge ka nih ka hre lo; Mahse, ka chhungril hi a ruak a, ka na vawng vawng a ni


Ka pasal kha ka ngai a, ka hriat ṭhin leh ka rin leh ka in nghahna mipa kha ka ngai tak zet zet a ni


Chutiang bawkin, tuna ka rilru leh ka awmdan avang pawhin ka in haw ru ngawih ngawih bawk, nat tawhloh hrâm ka duh a, hmalam ka pan maithei lo a nih pawhin ka din na ngaiah din reng erawh ka tum chuang lo.

Mahse maw!!! Ka pasal hmel ka hmuh a, a mitmeng a min thlakhlelh na leh min ngaihsakna, min hmangaihna mitmeng hian minti na leh ṭhin a tin ni

.
.
.

Ka tih ṭhin dan ang bawkin, U Zoa chhuak chu 'ka nghak lo ang' ka tih rilruk nen ka nghak ru leh ta tho mai, kum 10 chhung ka lo tih ṭhan a ni a, sim mai chu har tak a ni


Engtik laiin nge ka mutthilh ka hre lo, phun ri sup ka hriat chuan men mai ka tum a. Mahse, tunge min thlir reng tih men kher ngai lo va ka hriat avangin, meng ta lo chuan ka chhin ngai chuan ka chhing ta zawk a


"I mut a chhuah chuan lo mut mai tur a nia," A zu rim nam deuh chiai chiai leh a rimtui hman in pawlh chuan ka hnar leh kawchhung a verh thla rawih rawih mai, a rim pa hrâk mai pawh kha ala ngâi reng!!!


Zo zeta a min pawm kâng nawlh chuan, room lam chu min panpui a, ka lungphu rang lutuk chu a hriatloh hrâm ka beisei bawk, a ruka in sehruh ran chuan, 'ka lo harh mai mai lo va' ka rilru in ka ti zui mawlh mawlh bawk


Dimtê a khuma min mut tirin puan min sin tir thlap bawk a


A chhuak mai dawn emaw tih laia ka sira rawn ṭhu hniamin, dimtê bawkin ka sam, ka hmai zar tu hui kiang chuan ka hmai tlâng zût riak riakin, ka hmui chu a kutzungpui in dimtê bawkin a tuai a


Ka thaw em pawh ka hre tawh lo, ka thaw lo a ni ngei ang ka thaw a chham mai a dâwn!

Min rawn hnaih lehzual tih ka hmul thî ding sur sur ah chuan ka chiang lutuk mah mah, ka chalah chuan dimtê in a fawp a, chutiang bawkin ka mit leh ka hnar chu, mintih harh hläu zetin fawp dan dan bawk


Ka lungphu rang lutuk, thûm dup dup chu keimah pawhin ka hre thei hial nia maw le!! A hriat ve loh hrâm ka beisei bawk


Blanket hnuaiah chuan nghet lutuk in ka inhum ruh a, boruak tam tham lutuk hîp kawk kawk mai ka chak zia chu pui tak a ni

"Ka tihpalh, ka tihpalh Bawihte," A aw zet chu natna in a khat, thawk lehkhat ah engkim mai chu a chawl dûk ni mai hian ka hria, chutiang a natna a khat, mahni indem na nasa tak kar a, vawikhat mah in hmu leh tawhlo tur ang maia ri rawn chhuak chuan min vit nghal ngar ngar bawk


Ka hmui chu tuai lehin dimtê bawkin a rawn fawp vang vang a, a chal leh ka chal in sik tir chuan, "ka tina tawh lo angche," Natna a khat a ti chhuak lehin a chawl dat a, ka hmai tlâng bawk chu chul leh riak riak a, a tawpna tur ti ni âwm taka ka chala fawp vawng vawngin, "engtik ah mah," A mittui a tla nge ka hre lo, ka biang ah eng emaw a rawn far kauh erawh chiang takin ka hre thung


Chutiang taka U Zoa kâ aṭanga natna chhuak ri chu ka la hre ngai lo, a in hnit ri hruih ka hriat ruala dingin a pensawn ri in a zui nghal zat bawk a


A chhuak fel tih ka hriat ruala meng riai riai in thaw ka la zui kawk kawk bawk, ka bianga eng emaw far ka tih chu tawk zauhin, hai rual lohvin U Zoa mittui a ni tih ka hre nghal bawk


Kawngkhar lam en vang vang chuan mit ka chhing sawk a, ka nat angchiah hian a na ve a ni tih ka hria. Mahse, kan dinhmun ngai a let leh tur erawhin a theih tawhloh tih kan chiang ve ve tawh a tin ni..!



Ka ngaihtuahna vak kual ruai chungin ka lo muhil veleh mai a ni ngei ang, Judy-i aw sîn tliang zet mai rak ri ka hriat chuan ka zi mar ṭalh ṭalh a


Kan Judy-i hi chu amah ang tiat lek mai, aw sîn leh fiah tliang zet mai hi a nei a, a ṭah teh lah hian a kiu tel tlat zel lehnghal, a ṭah ve tawh hi chuan a mut luih theihloh reng reng, tihluih na hmanga in kaih thawh nen danglam na a awm lo hrim hrim


Ka rinai takin ka mu tui phian lehnghal a, ka thawh chhuah meuh chuan, Biaktei'n tûk ṭhuan ei a lo peih fe dêr tawh lehnghal!!


"Vawiin chu Champhai ah naupang thawmhnaw tur ka'n han bazaar angchu kan tia," Bathroom lam pana ka kal chu Biaktei'n a lo ti var var a


En pahin, "aw han kal rawh u, Johnny chu ka lo awmpui ang," Ka hawi kual ngjal thuak thuak, U Zoa hmel ka hmu mai lo, zingkarah hian khawnge maw a kal ziah le?


Biaktei'n ka awmdan a hrethiam tihnhriat takin, "zing dar 5 rik hma vel khan Aizawl lam panin a chhuak tawh," A rawn ti sep a

Min deng dawt mai, ka na nghal veng veng bawk, a haw chu ka duhdan a nih rualin engvanga na ru em em nge ka nih? A awm tawhlo tih ka hriatna chuan minti hnual rawih rawih a, min vih ngut ngut bawk


Ni e, awmlo se, ka hmuh phakah pawh rawn inlan tawh lo se la, engkim a ṭha vek mai ang, hma lam ka pan awlsam sawt ngei ang ; Mahse...



Mahse, engvang a na em em nge ka nih le??


<>~><><<<

ZONUNA...POV


Ka nupui, mittui luang ngiai ngiai ka hmuh chuan, amah ai pawhin ka nâ emaw tih mai tur a ni


Hetiang tak hian hmeichhe mittui luang ka hmuh vangin ka nâ ang tih ka ring pha ngailo


Ri si lo va a ṭahna chuan min chun sawk sawk a ni mah zawk


A dár khawih chu tumin ka kut ka lek chhuak zawk a. Mahse, la let leh a dingin, hahdam tur a tih leh chak zeta pen chhuah ka rual nghal bawk, a bianga mittui luang khan ka thaw a ti chham dâwn tlat a ka hriat hrep ni!!!



"Rz no dawm dun i duh em?" Tüal a ka ding, boruak hip kawk kaw a a ka hawi chhuah chuan Rza hmel hmu in zu in pui ka sàwm nghal zat a



Min en run run chuan, "kal rawh," A rawn ti nghut, a duh pawh ka ring chuanglo a nia

Zokhawthar ka thlen sawiloh, an in a ka awm chhungin a vawikhat min biakna a ni, chutiang bawkin ka Pu Zawn pawhin kan thlen ni a, min biak bak kha awmlo ang maiin min ngai bawk

Mahse, ka dem hauh lo, ka phu ve êm a ni!




Rza nen khawmawi (Myanmar) Local dawm dun chuan ka ṭhu dun ran a


"Ka ti na hle a ni," No 3 vel ka tlak deuh pap pap hnu chuan ka ti chhuak hraih a


Rza rawn rum nghutin, "Ka u i sawi a nih chuan sawilo zawk rawh, i awm hmun ah hian ka that duh mai angche," Za lo setin ka lo kiai suk, ni e, min that dawn mahse ka phu em em zel tho


"Ri lo a a mittui luang khan engtiang chiahin nge ka tihnat tih min hriat tir a ni," Ka mitthla ah ka nupui hmel a rawn lang zui zat bawk a


"Ka hmangaih alawm; Mahse, a tel lovin ka nung theilo a ni tih ka hriat chhuah meuh chuan a tlai tawh lutuk a, ka kut ngeiin ka lo pawtsawm vek tawh a ni," Ka aw chhuak chu a chang in a hriam takzet, ka inhua a, chutiang bawkin nat chu ka phu ka inti em em bawk


"Lungngai suh u, ka tina tawh lo ang," No chu la kângin ka tlak zui leh pap a


"Eng nge i sawi awmzia?" Rza chuan min en run chunga a tih chuan mit hnawm chapa nui lui a, thaw ri hrawih hrawihin, "a hlimna in duh ang hian ka duh ve tho tih hria la. Ka sawi kha, ka hmangaih tih," Tih leh zu bawk chu ka lem leh khalh a


Ka kalsan a, ka tel lova a hlim dâwn a nih chuan, ka tuhrah sengin ka bo mai tur a ni


Luhlul chhuaha ka ta asiam leh ka tumna kha, kha a mittui khan ka tisual a ni tih min hriat tir a, a sawi angchiah in, thinlung kehchhe tawh chu cheimawi sak leh pawh ni ila, a cheimawi tu leh a tina tu thuhmun an nih si chuan, a mawi tur angin a mawi zo lo a ni a nge!!!


Ka tel ve lohna leh ka hming a hriatlohna hmuna a hlim a nih chuan hlatak a ṭangin, ka hmangaih nui hmel chu ka venghim mai a niang chu!!


Mahse, mipa ka ni nâ in, ka âwm chhung hi zep rual lohin a nâ a, nâ sawi thei leh, sawi theihna dan ka nei lo tih hre reng chung siin ka nupui nat zatve ang chuan ka nâ a ni


Ka nupui thinlung erawh engtia chiahin nge ka tihnat tih ngaihtuah pawh ka ngaihtuah ngam ta lo!!


Mipa nep tak chu ka lo ni ngei e!! Mampui min ngaidam hauh suh angche


"Engtik ah mah," Harsa zet chuan ka phun chhuak zui sup bawk a


~><>~>~>~£~£

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)