ZAWLAIDI
By
Floria Laldansangi
Chapter < 5 >
RINTEI...POV (Lalrinmawii)
"I peih ngawt mai, i message a reply ngai che pawh ni lo," Chhuana chu ka melh vak. Kan inhre ngai lova min reply loh chu a tij ve tur rêng alawm le.
Bakah, awlsam taka thioneih chu awlsam takin a rilral ṭhin, harsa taka neih erawh kan ti riral mai mai lo. A ni lo'm ni?
"Karkhat chhung a text reng a, a hming pawh a la hre lo a nia," an nui zui hawk hawk.
"A duh lo tihna a ni mai alawm," Lubuara'n a lo ti nghut.
"Lubuar, lawm lohna i nei em ni? I tûm bau reng mai," ka phone dah thlain ka en, Putar hmelṭhaa chanchin ka sawi aṭangin min melh ngur ngur hi a bansan lo reng reng.
"Nei lo," a ti bul nghut, a nei khawp mai.
"I nei a nih kha a," tih leh phone bawk chu ka la leh, "min duh lo a nih pawhin, min duh loh vang talin a buai tur a ni," ka tih zui zat chu an lo chek tlak tlak.
"Vawikhat chiah ila hmu a, tikhawp hian i buaipui a. A englai ber chu nge maw i duh le?" Assignment ti pahin Zohminga'n a rawn ti.
Ka mitthla ah Putartea a rawn lang, lai deuha nui sun sunin, "ka hre lo mah se a taksa ka hre chiang chak," ka nui zui ar ar.
Rindiki'n a lukham pawm laiin mi rawn vaw deuh pawp, "tenawm lutuk suh," tih leh, "scholarship chungchang hi inhre ve em?" A tih zawm a.
"Dawn vat ka duh a nia, Bike lei ka duh," Zohminga'n a rawn ti.
"I pa zawt ta che, education minister a nih kha le," Rindiki'n a lo ti hlak chu ner nung nungin, "chhung inkhawm anneih pawhin ka tel ve ngaiah pawh an dah tawh lo, kan inbiak khat leh hmuhkhat zia chu cheng dun lo ang mai kan ni," za vak lo hian a ṭhen zui sak.
Zohminga leh keini hi chu in anna tamtak kan nei a, zalen deuh siin kan zalen dan hin a pik tlat ang lawi si!
"Keini ho hi chuan dawng lo mah ila a pawi lo maw le, scholarship ring zirlai an tam si a, mamawh ngawih ngawih ho hian dawng se ka lo tia," Freddy-an thutak zetin a rawn ti ve.
"A dil pawh ka dil lo hrim hrim keichu, ka dil miah lohvin kum hmasa kha chuan ka dawng, ka Pa-in min dilsak a niang," ka ti chu an lo nui hawk hlawm.
"Tunah pawh zirlai ṭhenkhat chu an talbuai chu a nih ṭan der hi maw! Inthlan leh hun chu zirlai te kan harh chhuah a sorkar tur ka thlan uluk a ngai viau in ka hria," Freddy-a thusawi chu pawmpui zetin kan lo bu nghat nghat.
"I Pa te an tling dâwn lo a nih chu," Zohminga nen min en in Chhuana'n a rawn ti, za vak lo hian kan lo nui ṭhû ringawt a.
.
.
.
"Scho chungchang hi hriat i nei em?" Chaw ei laiin ka Pa chu ka melh zauh.
"I buai lohna turah buai suh," ka Nu in min lo chhang hlak, ka Pa erawh a ngawi ran.
"Supplementary Demand a nikum scho tur dil belh pass vek tawh kha sum khawiah nge a awm? Kumin zirlai ten scho an dil a, state tum ve tur budget - 20% chauh dah a ni a 80% dang kha khawi aṭanga pek tur nge?" Ka sawi zo hman ṭawk, na lutuk hian dawhkanah chuan a fian a dah ri bur a.
Rum lutuk a min rawn enin, "nang naupang khan eng nge hriat i neih ve, i lehkha chiah ngaihtuah rawh," ring si lo hian a ti chhur chhur.
"Zirlai tamtak mangang saw inhmu lo em ni? An innghahna, an zirlai chhunzawm theihna tur, an hmalam hun a ni tih hi inhmu lo em ni?" U Puia leh ka Pa chu hmai sa hat hatin ka melh tawn hraw hraw.
Tumah mahin chhan mintum lo an ngawi ngal, "Mate i hriat leh hmuh ang ngawt hi a ni lo a nia, H&TE Minister pawhin central lamah theih tawp a chhuah ve bawk tih te hi hria ula," U Puia'n a tih rualin ka nui hul hak.
"Hnar hnuaiah phatna a bo lo" antih kha maw!
"Ruk in ru a, a rukin emaw inlak intia a lang chhuak leh bawk si, mipui inbum emaw in ti a, mipui inbum fin sa ho nangni aiin an lo fing fê tawh si nen, in rilru hi a hah ve thei ngawt lo maw?" U Ruata chu rawn hawi chhuak miah si lo hian a nui zui ruh ruh a.
Ka hnar zawnah eng emaw hi a rawn thlawk fua, ka hnar a thawi in ka hre hial zawk, ka Nu a rak ṭhat, "chhuak rawh..." Ka pa in a ti ṭhawt bawk a.
U Ruata bek chu rang lutukin ka en, a pawng nghal ṭawl chu lian tak a ni.
"Inhau lo leh inhnial lo hian chaw kan ei thei lo em ni?" Ka Nu in a rawn ti ve nghal hlur. Ka thaw dep dep, pangai taka awm ka tum a mah se ka Pa aw khan minla ṭhâm niin ka hria, ka vawikhat hriatna phei chu a ni miah lo mah se ka mit hmuhah kut a thawh ngai miah lo thung.
"Pu Biak, Pi Nunmawi, in awm maw? A khai! Chaw ei lai ka va nangfuh thei ve," Pastor a ni.
Ka Nu leh Pa hmel chu chawp chilh hian a inthlak nghal, an kâ pawh zen ila min seh tawp nang.
"Lo ṭhu rawh, kan kham chu a ni mai," ka Nu-in dam diai a tih leh U Ruata nen a mit hmanga min vau zuiin a tho nghal a.
"Ramhuai pawhin Bible zakzeh chungin Biak In hi a lut thei' antih kha tak tak a nih dâwn hi," ring si lo a U Ruata'n tih leh a tho nulh, ka zui ve nghal.
"Ruata," kan unau chuan kan ding dat a.
"Hei 'Harh tharna' tih thupui hmangin camp chhawng 2-na kan siam leh dâwn a, rawn lut ve ta che," Pastor-in nuisangin a rawn ti. Min biak ve lem loh avangin ka room lamah ka chho zui a.
"Pastor kum thar lamah inla siam chuan ka lut dâwn nia, Û-Á-MÂ dâwnah kan da leh dawn tho tho va, kohhran buhfai a hek mai mai," U Ruata'n a tih chuan keimahin ka nui vur vur.
Ka Nu-in nui awr awr chunga Pathian thu a sawi zui chu ka hre hman, za vak lo chuan ka nui leh ta ringawt a. Kristian ze thup thiam diktak chu kan nih hi!
Lemchan lamah te hian ka ila kan chhungkaw ho hian, OSCAR AWARDS te hi kan dawn hial a nia ka rinni.
.
.
.
<><>~>>
Mc-a..POV
"Apa, Siakmawi'in a lo call che," phone chu ka ṭhutna lamah a rawn keng a.
"Tunge Siakmawii chu ni a?" Ka ṭhianpa in a lo ti sup, a nuih danah a rilru a awm ka hriat nghal avangin ka nui suk.
Chhang lova off zuiin, "naupang maw le," ka tih chuan a awih loh hmel khawp mai.
A engtia he hmeichhe naupang hming pawh hi pangai taka save ve ta mai lo nge maw ka nih le? A message leh call ka chhangin, ka la ngai pawh a ni chuang si lo va.
"Tunlai chu phone hi i bih zing hrim hrim, a chang leh i nui ang vur vur a. Bialnu i nei te hi a ni lo maw?" Mami'in thing hâng rawn chhawp paha min fiam zui ve zauh chuan lo nui sukin, "phone thar ka läwm ve rih a nih hi," ka ti thla ngawt bawk a.
"In awm em?" Kawngkhar aṭangin ka aw hriat ṭhan em emin a rawn ti.
"Indam maw?" A tih zawm zat. Kan ṭhutna lama rawn pen hnai.
"Eng nge i duh? Bawihpuia Inah a awm lo," Mami'in a lo ti zui hlak.
"Bawihpuia ni lovin, a pa zawk hi nia biak ka duh ni," a nui säng. Ka lo en ngur a, ka lawm loh zia a hmu lo der tlat thung!
"Ka phei ve ang e, kannu a lo âng leh nasa lutuk ang," Medal-a chu a tho nulh.
"Thingpui hâng hi in ve phawt la."
"In lo ang, rawn kal a piangin ka ina, ka zawngchhang dâwn tlat, kannu thikthu a chhe si," a nui zui huk huk, ka lo khi ve suk suk a.
"A nih ṭhiana ka ring che a nia," tiin a pensawn zui a.
Nunsiami ṭhut thlengsei a rawn ṭhu thla in, "Khawnge Bawihtea te unau chu?" A hawi kual zui thuak thuak . Mami lah chuan a en ngur bawk a. Nunsiami lah zam bik lo, a nui säng reng.
"I duh sawi mai rawh," ka lo ti bul nghut.
Ṭhu ṭhain ka lam a rawn hawi a, "Bawihpuia te school karlehah an chawl dâwn tih ka lo hria a, khaw lamah ka hawpui zawk thei a ngem?" Min en ran.
"A theih loh," tih chiahin ka chhang, ,"khua a haw thei ni se ka Nu a zui haw ang chu," Mami'in a lo ti zui hlak.
"Rei pawh ka champui dawn chuang lova, keipawh hetah, Aizawlah hna ka zawm mai dâwn a rei pawh kan awm hman dâwn chuang lo tak tak," ngên ngawl deuh hian a ti leh.
"A hma zawng zawng pawha ngaihsak si lova, tuna taka rawn inlak ngaihsak," Mami'in ti niah niah chuan dingin a pensawn zui hmawk hmawk bawk a.
"A landanin a rem dâwn lo niin alang," a ti sep, za lo tih hriat tak hian a nui zui bawk a.
Ka ṭhut ngai a ṭhu in, luhlul zetin hma lam ka la en ngur thung, "min la haw viau em ni?" A ti leh.
"Nupui neih i tum tawh loh pawhin, ngaihzawng te tal neih i tum lo em ni?" A zawhna pakhatmah chhang lova ka ngawih ngul takah chuan beidawng nui ti tih a nuiin, "Bawihpuia khaw lama ka hruai haw theih loh chuan ka rawn tlawh fo a ngai dawn a nih chu, hna ṭan hma chu hun hman tampui ka duh ve si a, zanriah ei a hun tawh dâwn sia ka haw ang e, chaw ei tui u," tiin a tho a, min rawn en leh, kawngkhar lam ka la en ngur thung.
Ka Nu-in a hmuh rem ti lo se zawng, ka thu chuan a fapa hi a hmu lek lo tur!
.
.
.
"Mc, chhun chaw hi rawn ei hmasa rawh," Awmpuia te In kan khawih a, hlawh a ṭha in, hnathawk anchhawr nual bawk nen, a zia khawp mai.
Cement work lam pawh kan thawk chak vut vut viau bawk.
"Naktuk chu Biak In lamah slap chhun antia, hnatlan ve zawk ka duh a, ka rawn tlai deuhin ka ring," ka kut bengfai thawk thawkin ka ṭhu thla nghal
"Awmpuia a rawn kal dâwn alawm, nichin mai khan min rawn bia a," Medal-an a tih chuan bu nghutin pizza inchhawp hnur mai chu ka ban zat.
"Hi...!" Ka thil ei ka hal ṭhelh!
"Putarte, kan in sakna ah hna i thawk tih i sawi lo va. Pizza hi ka lei a nih hi, a tui iti em?" Min rawn din hnaih nghal surh surh.
Midang chuan nui ṭhû hian min en hlawm a.
"Eng nge i duh?" Ka ding chhuak.
"Nangmah?" Ka aw zawih ang chiaha zawiin a rawn ti let.
"Lalrinmawi...." Ring si lo hian ka ti hluk, a ha var leh rual nalh tak mai lang chuan a nui sen sen, a biang no tak lah chu a sen taitêk ang bawk a!
sh*t! Keihi ka dik dâwn lo tawp mai, naupang mai a la nih hi le!
"Ahh...ka hming i lam ve tawh elaw," a nui zui ar ar.
"Ka message leh call...." Rang takin a kâ ka hup, ka thawhpui te lam ka hawi chu nui ṭhû a min lo en in, "kan mit kan chhing a nia," Medal-an a lo ti. Ka tan ni lo he tleirawl tán zawk hian a ṭha hauh lo.
Pathlawi dem a hlawh chuan a hmingchhe thei a ni tih te hi a hre lo em maw ni?
<><><>~>
RINTEI..POV
"Nilengin vai hnathawk i thlir a ni ringawt alawm Lalrinmawi," ka ṭhutna aṭangin kan In sa mek tu te chu ka thlir veng veng, lawm lohin ka nui ver ver reng bawk.
Ka kâ a hup lai te, ka hming alam lai phei kha chuan nikhaw hre lovin ka awm lo chauh zawk alawm le!
"Zakthei lo a ti ngawt ang che, i zar hneh ropui si," Rindiki'n a tih leh zat chuan nui awr awr chung hian, "zahloh theih a ngai zawk alawm. Duh reng duh lo ang a lan chu chânna," ka melh zu zauh, ani ang a mahni duh ngawih ngawih pawh hrilh ngam lo nih ka tum aw kawngka lo!
"A chhiat chu a chhe lo a nih saw. Thingtlang tlangval ka lo suangtuah dan chuan, bâl hnik hnek, vun dum beh ve tak ro bawk si, ha bâl deuh, an kuhva eina sen deuh huam zel turah ka ngai a. Bakah, a phone hman i sawi khan a ṭhin hmel bawk sia. Ka hmu chiah kha a taksa hriatchian i chak saw ka dem ta lo reng reng che," Rindiki bawkin a rawn ti leh a nui zui uar uar bawk.
Inti thei fe hian ka lo hawi vah, tunah chuan ka thusawi an awih tawh ang chu, Lalputara hmelṭhat zia leh taksa nalh zia ka sawi a pianga ka mumang sawi emaw mintih pawh a reh hmak ang chu.
Pathian khi ka lamah a ṭang tih hriat reng reng, kan Inah hnathawk turin a rawn tir a nia, ka pian a hnua malsawmna ka dawn awmchhun a ni hrim hrim ang.
"Tunlai Zohminga awmdan hi a danglam inti ve em?" Chhuana'n a rawn ti. Nizana Zohminga message kha ka hre chhuak, ka ṭhu ngil a.
"Engtin nge a awm a?" Ka ti sap.
"In inhau ve leh khanglang em ni, Gay a kara in inhau ve hi chu in ninawm," Rindiki'n a lo ti bak hlak, a ṭawngkam hi ana ve hrim hrim a, a hmuhsit vang phei chu a ni hauh lo.
"Chutiang lam a ni lo, tunlai hi a mood a inthlak a inthlak mai, Bible te a chhiar a..." A rawn ti sur sur.
"Chhiar ve bawk ang chu, Kristian a läwm kan nih a," Rindiki chu a nui zui kar kar.
Kei erawh ka nui thei lo, a hma pawhin a nunram chauh thu leh a nundan thlak a duh thu a sawi fo tawh ṭhin. Chutiang bawkin nizan a message-ah pawh, "Pathian hi engtin nge ka neih theih ang?"
"Au ila min chhang a ngem?". "Min kaihruaitu tur ka mamawh niin ka hria," Tih te a nih kha.
Puih theih ka duh, ka ṭhian a ni a hetianga mahni anpui kawp reng tur hian ka duh bik miah lo mah se, puih ngaihna ka hre lovin, zilh thei leh pui thei dinhmunah lah ka ding bik tlat si lo.
Keima thlarau ngei pawh hi a tuihal ruk ve em em chang a awm a, kan chhungkau, kan vai mai hian Pathian tak hmuh kan mamawh tih hre mah ila, auh ngaihna leh auh pui ngaihna ka hre thlawt lo a ni.
"Mihring chuan nunchauh ruk em em chang kan nei ṭhin alawm, a reh ve mai ang. Bakah, Zohmingthanga tan chuan an Inchhungkhur ringawt pawh saw mood off reng natham a ni," ka ti hap, ka chhungte ho ka mitthlaah an rawn lang zat, a sawitu pawh hi eng ka ni chuang si lova, hei vang hi a nia tumah Pathian au tura ka hrilh theih loh chhan ni!
"A pianthar san che i hläu a ni maw?" Ka nui hak, Rindiki mawl theih zia hi chu'h!
"Hlau nang aw! Pathianah piantharna a duh tak tak a, a zawng tak tak te a nih chuan 100% in ka support," tih leh, "bialpa dang zawn a har lo êm mai, Mizoramah hian a ruka Gay antam lutuk," a nui zui huk.
"Kan thingtlang tlangvala hming te chu sawi ve la?" Chhuana'n a rawn tih zawm. Nui sen senin, "Lalduhawma, MC. LALDUHAWMA...." Ka ti sep.
Duh loh laiber pawha LALDUHAWMA ni tur a ni tlat!
Kan Inah hna a thawk a ni tih ka hriat tirh leh hmuh tirha ka lawm zia kha a! Ka U hnenah a chanchin a hriat zawng zawng ka zawt a, a hriat zawng erawh a hming leh a chenna, kan In thlang lawk a Pu Chhûma te in hi anrawn luahlut deuh chiah tih zawng a ni!
"A pian saw chu a nalh maw le. Mahse, kan ngaihzawn chi a nih hmel loh e, a ṭawng tam loh hmel sia," Rindiki'n a rawn ti leh, nui var varin, "minduh chuan a tawk," ka lo ti hmak.
Ner vak chuan, "kar hnih deuh thaw phone aṭangin i be tawha a chhang tawh che emaw ni?" A lo ti vat.
"A haw dawn a ang," a tih zawm chuan ka ding zat.
"Eng nge itih dawn?" Ka ṭhiante pahnih lam hawiin, " ka taah ka siam dâwn," tih leh pensawn ka rual.
"A hláu zawk ang che," nui chunga Chhuana rawn tihna chu ka kut ka vai san ringawt.
"Hi...." Kawngpui ka thlen rualin a bulah ka ding dat a.
Min kal pelin a pen ngaiin a pen pawk pawk.
"Mc Lalduhawm..." Min rawn en zawk. A hmelah chuan min nin hmel emaw thinrim hmel pawh a pu lo, ka sawi thiam dan berin boruak ang maiin min ngai a ni ber. Chu chu ka duh ṭhak lo bawk.
"Eng nge i duh?" A zawhna ngai bawk, amah ka duh tih ka sawi tawh sia chhunah khan!
"Nangmah," min zawh peih chhung ka chhang peih thung, min rawn en chhuk zawk, a hawisawn leh a, a pen ngaiin ala pên reng, a pen zau si ka ngei e!
"Love at first sight hi i ring em?" Min chhan a tum leh tawh lo.
"Ka hmuh aṭang chein ka ring," ka rih rualin a ding dawt.
Yessss! Ka zeina hi chu haider chi a ni lo a lawm.
"Kum engzah nge i nih?" Naupang mintih a tum a ni lo maw? Khanglang chuan, a hmel landan zawng zawng nen naupang minti tih a hriat ngawih ngawih.
"Kum 23, bialnu i nei lova in ngaizawng ang?" Khai!! Kha chu ka sawitum a ni rih lo.
Ding dat hian ka lam a rawn hawi a, min en run run. Ka lo nuih sen sen thung.
"Engvangin nge ka ngaihzawn ang che?" A ti zawi sup, a hmel leh mitmeng chhiar ka tum fe pawhin ka hlawh chham ṭhak; Mahse, a mi enna thûk ruih erawh tawrh a har takzet thung, ka lai ve lek lek alawm.
"Ka bialpa ni turin," awlsam et a ka tih chuan a hnar a tum dat a.
Kal leh a tum chu rang tawkin a hmaah ka ding a, kuangkuah atin ka en chho vah.
"Khawvelah hian mipa pathum hmeichhia ten neih kan chak ngawih ngawih an awm," ka en chho vang, 6'ft vela sang, taksa inphiar ṭha tak leh infit tak a nih avangin ka tan chuan dah deuh vah a ngai tlat.
"Chuan..." Tih zawngin min chhang leh.
"Chung mite chu:- (1) Lee Min Ho. (2) Mew Suppasit. (3) Joss Way-Ar. A chhan i hria em?"
Nin hmel lek lek, ning ngam chiah si lo tih hriat tak hian, "ka hriat kher a ṭul em ni?" A rawn ti bul leh sup. Ka rin aiin he putar hi a zaidam daih. Mioa dang chu nise an hmeichhe duh miah lohin an zar reng chuan an vin hrawk hrawk tawhin ka ring.
Ka lu ka lo thing mat mat, "ngai lo, a chhan chu i nihna ang vek annei, manly, attractive, handsome, gentlemen nangmah ah a awm vek. A awmzia chu kan mipa duh zinga pali na i ni," a tawp lam chu keimah ang lo takin, lai zetin ka ti zawi deuh dâi a, hnuai lam melhin hmai sa zui hat hatin, ka ni zui sen sen bawk.
"Umm.. Chuan..." Rang tawk hian ka hawi chho, "chuan??" Ring zetin ka tih nawn khum! Ka ṭhiante lam ka hawi, an lo dir char char, kan thusawi an hriat pawh ka ring hrep si lo a!
A hrethiam miah lo emaw ni le? Ka zah ruk ve na te kha chawpchilhin a bo lehnghal. A at lutuk zarah!
"Umm.." Bu nghut hian a ti leh. Tuna a hmel erawh nuihza hmel a pu lek lek.
A mawl emaw ni le?
"Chuan, ka sawi chu kan mipa duh, kan dream boy pali na ini, i hrethiam em? Ka mipa duh pali na ini," ka ti leh tan tan, ka nutet thinchhiat a chhuak leh tak ngial dâwn.
"Ka lawm e," ti zawi supin min kal pelh a tum a nih chu!
A chut lutuk hi duh lohna tham chu a tling maw le. Mahse, ka duh miau bawk sia.
Heti em em hian hmelhriat loh ka taa siam ka duhna ala lian ngai lo hrim hrim, keimah zawk hi ka â a nih hi!
Rang tawka pawt letin, "ka sawi awmzia i hre lo em ni? Kan mipa duh zingah pali na i ni, ka mipa duh ber te zingah i awm. A awmzia takah phei chuan ka Mizo pui mipa ah ka duhber che," ka kut nen meuha hrilhfiah tumin, ka kut chu ka lek kual ta nawk nawk a.
Thaw deuh hawk hian, a bân ka vawnna dam thluam a dah thla in, "Rinmawi, i mipa sawi te kha tu te nge an nih ka hre lo hrim hrim. A tawk em?" Dam dup si, bul zet hian a ti leh a, mit ko san awk in a thle bak bawk.
Sawi tur hre lo zetin kâ hau hian ka en chho haw, mit ka chhing sawk, ka chal dawm deuh vawng vawng chuan ka melh chho leh, "i hre lo maw? Lee Min Ho pawh i hre lo a?" Beidawng lek lek chuan ka ti chhuak thlawt .
"Hre lo," a ti tawi leh tak.
Thaw chhuak hawkin, "Lee Min Ho, Lee Min Ho, Gu Jun Pyo hi i hre lo amaw?" Ka duh aiin ka aw rawl a ring leh tawh mah mah, engtin nge a hriat loh theih zawk?
"Hre lo." Ka beng chawrh dâwn maw ni le?
"Enteh ka Pu Ramses, Aizawla i awm hma hian khawnge i awm?" Khabe poh vawh leh kawng dawm at hian ka en chho. Heti khawpa lar, kanpa a hre lo hi ka lung a awi lo hrim hrim!
Midang kha chu Thai an nia ka hrethiam, Lee Min Ho em em hriat loh! TV te a en ve ngai lo emaw ni?
"Kan khua ah," tawi zet hian min chhang let leh a nih chu!!!! Ka beng tak tak dawn hepa hi!
Beidawng zet leh thinrim insum thaw kawkin, thinrim meng chuar nungin ka en khur khur a , ka thusawi awmzia hi man a har viau em ni? Engtia ka zawhna pakhatmah hrethiam lo nge maw a nih le?
Planet dang a ṭanga rawn kal a ni hrim hrim ang. A ni loh a leiah a mak khawp ang!
Mihring te hi a lo ni lo zawk nge? In bame thluk chu a har ve khawp ang le!
Min kalsan ka rin laiin, "kum engzah nge ka nih i hria em?" A rawn ti sup, a mit dum fiah tak mai, ti zîmsan chuan min en bawk a.
Ka thinrimna chawpchilhin a reh nghal, ka nui nghal sâng, "30...35...."
"I U Awmpuia ai pawhin ka Upa," a ti leh sup, a aw ring si lova thum deuh dût leh damdup mai chu hriat a nuam takzet! Midang thunun theihna a kengtel hial emaw ni?
"Eng nge pawi, i kum ka ngaizawng hleinem, nangmah alawm ka ngaihzawn ni," thle heu in ka en chho ralh bawk a. Luhlul min tih hmel tawk hian min en deuh run run
Sawi tur nei ni âwm taka a awm laiin a phone a rawn ri, "Mami...." Phone a pickup rualin a ti nghal.
Ahhhh phone thar pawh a nei!
"Phone thar i nei alaw...." A phone hmanlai chuan ka lo ti deuh ṭhat.
Min rawn melh zawk, "um..." Chu zawng chu sawiin a off zui zat a.
"Phone thar i nei tawh alaw?" A rawn kûn hniam thut ka lo eu nghal vak, a awmdan tehthut chuan min ti hamhaih.. Shiaaaa.... Ka lungphu... Ka duh tak tak chu a ni êm lo ang chu maw? Ka lungphu a tirang nia!!! A rang satliah a ni lo tuna ka lungphu hi!!!!!!!
"Ti..tinge...?" Hmeli leh! Ka dang te a awk vel.
"I rualpui ngaihzawn tur zawng rawh," zawi ruih mai hian a ti a, ding ngilin, ka chhipah a kut a rawn nghat a nih chu!!!
Khai!!!! Ka flirt pui dawn emaw ka tia, min flirt pui a tum zawk a ni lo maw? Ka chhip sam chu thai hnawk zauhin, hmui chip chungin mawi lutukin a rawn nui bawk nia maw le!!!!!!
Aw Lalpa!! Kei milerh, rinawm si thinlung hi a nghing nasa mah mah.
Lucifer-a a nih loh chuan vanrama meidil vengtu Angel a ni hrim hrim, min duh loh chuan meidil a tla ang.
A pensawn chu ka uipui tu lian thlir heuh heuh, a kut phah hrawl leh lian tak mai a ka chhip a tawh te khan "min thei sa" tih mai a nia ka duh ni!
"LALPUTAR...." Ka au vak, ti maiin ka kal tir thei bik ṭhak lo.
A ding dat a, a rawn hawi miah lo, "min hnawl a nih chuan Kristian i ni lo a ni mai," ka ti a.
A rawn inher, a veilam a thle deuh bak hian a chal a ti chuar deuh tap chu ka hmu thei.
"Min hnawl a nih chuan ringtu ṭha i ni lo tihna. Ringtu tih atan a mawi lo a ni," keimah pawh chu ka nui ta ringawt. Ka â tawh a nih hi, ka â tak tak tawh.
Mawi lutuk hian a nui ri huk a, a ha var nalh lutuk leh nui ri chuan maw ka thinlung der dep lutuk hi a tâwntlang hneh lutuk mah mah. Lottery ka man hi a ni ringawt alawm le!
A lu thingin, "chaw ei tui le," thum dut a tiin a inher a, a la nui reng tih ka hmu thei, a kut chunglama rawn vai zauhin a pen nghal pawk pawk.
Lalduhawma tih mai pawh ka duh tawk tawh lo, VANLALṬHAFAMKIMA a ni tawh!
"Eng nga, 'ringtu tih atan a mawi lo a'," nui dir char char chuan ka darah Rindiki'n a rawn vuan, ka harh zawk.
"Nge..." Ka ti bak hlak, ka mitthla ah erawh Putara nui hmel ringawt kha a lang thung, ka milar bialpa te zawng zawng chawpchilhin ka bân nghal vek! Lalduhawma chiah ka ngaizawng tawh ang.
Ka ṭhiante pahnih chu ka melh lui ram ram, ka thusawi te kha an lo ngaithla chu niin, "i rualpui ngaihzawn tur zawng rawh," nui hawk hawkin Lalchhuanawma'n a rawn ti. Lalputar ṭawngkamah kha chuan mawihnai takin min hnawl tihna a nia. A ni lo'm ni? A ni tiraw?
"Did i get dumped?" Ka ṭhiante pahnih chu ka en he haw.
Ring lutuk a nui chhuakin an dul dawm meuhin an nui dir tlawk tlawk, kei erawh kawngkawi laia liam thla mek Putara en in, "ka va beidawn san awm lo tak che, ka tum laklawh," luhlul zetin ka ti chhuak leh hrâm, ka ṭhiante ve lah chu mittui thla phungin min la nuih zui hawk hawk a.
"Ahhh...ahhh.. Ka theihnghilh ṭep, i U a rawn haw," Rindiki'n nuih insum tum, sum hleithei lo hian a rawn ti chhuak.
"I Celeb bialpa te hmingnen meuh i bame a nia."
Chhuana enin, "in ninawm," ti hlak chuan, "tu ka U maw?" Ka tih zawm zat.
A nuihna mittui hru hul paha la nui reng chungin, "i U veni," a tih chuan ka meng kawk.
"Au Veni maw?" Ka awih lo lek lek zawk. Kum 6 chuang rawn haw duh loh chu sawi loh, phone tak ngial pawhin tumah a rawn be ngai lo a nia, tunah a rawn haw amaw?
"Umm.. Naupang pahnih nen," a tih zui chuan chak tawkin kan In lam ka pan zui, ka tlân a ni mah zawk.
Thaw deuh hlawp hlawpa inchhung ka tlân lut a, din pawh ka ding fel hman lo, "chhuak rawh, nang ang fanu ka nei lo.." Ka pa aw ṭeng leh khawk rum rum chu ka hre zui.
"U....." Ka hamhaih lutuk, naute kum 2 mi âwm hi a pua a, lehlam ah kum 5 mi âwm mipa naupang a kai bawk. A U zawk hi chu he in a chhuahsan dâwna a pai kha a ni ngei ang.
A hmel pawrfar leh mitko duk deuh te chuan minti hrilhhai leh zual.
Mittui tlingpam hian a rawn hawi a, ka Pa lam chu a en leh.
"Mittui nen he inchhung hi ka chhuahsan a, mittui nen bawk ka rawn let a, tichung hian engmah ila hrethiam lo em ni? Nge ni a i hrethiam duh lo tak tak zawk," mittui tla zawih zawih chuan ka pa chu a au khum. A fate pahnih chuan anhlau tih hriat tak hian an kuahbet ṭai bawk a. Ṭah erawh an ṭap eih lo nia maw le!
Thil awmzia ka hre lo lutuk chu ka en tawn zak zak.
"He inchhung ah hian awmhlen ka tum lova, fanu in a mangan lai leh thlabar lai, belhtur dang a hriat loh avang chauha rawn bel ka ni; Mahse, kan tisual a niang nge. He inchhung hi mittui nen bak ka chhuahsan ngai dâwn lo a ni tih reilote chhung ka lo theihnghilh palh a ni," mittui leh hnap tui nen, a riat chhuak leh nawk nawk, naute paw chunga a kut lehlama a fapa kaiin, lehlamin luggage chhe ve tawh tak chu nghet takin a chelh bawk a.
"I duhthlanna a pasal um leh i mipa hmangaih nei ini, he Inchhung i chhuahsan dâwn a ka thusawi kha hre reng rawh, kha mi rethei fa kha i nei a nih chuan pafa kan nihna a chat kumkhua ang ka tih kha Lalvenhim," a ti leh khur khur.
Kum 6 a liam tawh, kum 6 hnuah pawh a la ngaidam thei lo a nih chu!
Eng ang Pa nge maw a nih hrep le?
"He inchhung, ka Pa inchhung hi ka hnukchat dâwn pawh nise rawn lut miah lo tur ka ni," mittui tla zawih zawiha a tih leh chuan ka Pa lam chu ka hawi.
Ka ṭap ve mai dâwnin ka hre zawk, ka Nu ṭhu ngawi ran chu ka en a, "Nu sawi tur i nei miah lo em ni?" A hrin ni lo mah se a pasal fa a ni a, a thlavang a hauhder thei lo em ni?
"An pafa inkar a nih hi, nangpawh inrawlh suh," minti a nih chu!!!!
Mittui vanga mit hnawm chap chuan ka nui chhuak hawk.
"Lalrinmawi i room-ah chho rawh, i inrawlhna tur a awm lo," ka Pa in a rawn ti zui khur khur.
"Nu Hma, ka U luggage leh a fate hi inchungah hruai chho rawh," Nu Hma-i choka kawngkhar bula ding chu ka melh.
A puak zawk chu a rawn ṭap khek tuar tuar a, a U zawk erawhin a nu mal chu mit chhingin a kuahbet tlat thung. An vawikhat inhau ri leh invîn thawm an hriatna a ni lo tih lah a chiang reng.
"LALRINMAWI....."
"PA....." Ka ti leh ve tuar.
"A tleirawl laiin thil a tisual a, duhthlanna a siam sual a, inchhir leh rilru nâ-in a rawn let tih i hmu lo em ni? Pa i ni a, fate tihsual ngaihdam chu thil harsa a ni em ni? Diktak chuan a chunga thunei tur hian dikna i nei bik lo tih i hriat kha, a naupanlai ata tawh vawikhat pawh a tibuai ngai lo che....." Ka thle zui sawk, ka biang a thîp sawk, sa nghal nghal veng vengin, ka beng a kiu nghal vung vung bawk.
"He inchhung aṭanga chhuah hi i duh ve em ni?" Ka Pa chuan a ti hrawk.
"Engah nge i fanu hur avanga ka fanu chu kut i thlak ngawt ni?" Ka nu a rawn ding, ka Pa chu a vin tuar bawk.
Mittui luang ngiai ngiai chuan ka Pa chu ka melh let khai khai.
"Zilh ta reng che..." Ka Pa chuan a ti leh.
"I fanu ang êmin a mawl lo tal alawm," ka Nu in tiin, ka bulah a rawn ding hnai.
"Kan chhuak ang, lungngai suh u, kan chhuak ang," ka U aw chu ka hre ṭawk ṭawk.
Rang tawkin a luggage chu ka lo phih sak a, "a vawihnihna atan i hnawt chhuak ngam a nih chuan hnawt chhuak rawh, keipawh ka chhuak tel ang," nghet lutukin luggage chu ka chelh.
"LALRINMAWI...." Ka nu in a rawn ti nghal tuar. Ka bula ding a ni bawk nen ka beng bulah a au a ni ringawt alawm le.
"Rinrin...." Ka U-in mittui nen min en. Cho zetin ka Pa chu ka en ngar ngar thung a. Ka U leh a fate hi vahvaih tir ka tum aw zawng lo!!!
Kut khur hlawk hlawka min kawk tawnin, "awmhlen tum hauh suh ang che," ti thla hrawih chuan a kut la let vukin a inher zui vut. Ka thaw chhuak hawk.
Ka Nu chu ka melh zawk, "mawli" tih melh a min melhin ka sira ding U Veni na zeta melh lehin a pensawn ve hlawk hlawk a.
Ka thaw chhuak ham ham, "ka lawm e Rinrin," a lam ka hawi a, "room-ah chho ang u," ka ti zui ta sep. Ka biang lah chu a vûng reuh emaw ni nge ka ngaihbel zawk, a lian riau a ka hriat nghal chu ni.
Nula hmelṭha tak ni ṭhin kha engtia hetia cher a, thû leh khawro em em nge maw a nih chu le!
Ka Pa chungah hian lawm lohna neiin, haw ngawih ngawihin "Pa" ti duh lo pawh nise ka dem miah lo ang. Keini unau thum phei chuan high school ka rah dâwnin ka Pa hiam fa hmasa a nei tih kan hre chauh tak tak a nia, chuti khawp chuan U Veni hi ka Pa lak aṭangin ngaihsak a hlawh lo.
A nu boral lo phei se chuan fa hmasa a nei tih pawh kan hre tawp nang! A Nu boral avanga ka Pa rawn bel ve mai chauh kha a nia!
<>~>~>~>~>
NOTE : Naktuk zan ka chawl ang aw hmelṭha ho