LOVE AFTER MARRIAGE By Floria Laldansangi (Completed)

Moderator: Floria

Ngaia
Site Admin
Posts: 25813
Joined: April 30th, 2016, 4:07 pm

Re: LOVE AFTER MARRIAGE By Floria Laldansangi (Completed)

Unread post by Ngaia » June 5th, 2022, 12:54 pm

{ LOVE AFTER MARRIAGE}

By

Floria Laldansangi


Chapter < 25 >

Ramdinsangi...POV


Sana bawk chu ka en leh ṭhin, zinglam dar 3:30am a ri mai dâwn, message emaw call tak ngial pawhin min rawn be si lova, a buai hle zawk em maw ni?



Zan dangah chuan tlai viau mah se dar 3 hi chu a pel ngai miah lo a sin maw le.


Pawnlam motor tlân ri hriat deuh leh ka hawi dawrh dawrh reng ringawt mai.


Rammuanawma pang ti lum, a mi kuahna nghet tak, ka thlamuan pui em em kha ngaiah ka neiin, a tel lova zan mut ka harsat ta hle niin ka inhria.


Call leh message thawn hmasa tu nih lah chu ka tlawm a la ang reng bawk si a. Ka phone chu a khat tawkin ka hmet eng leh ṭhin.


A changin a number ka hmet chhuak a, message ringawt pawh ka type-in ka tireh zing narawh e.

"I lo haw dawn tawh em? / Lo haw i tum lo em ni? / I buai em ni?" Chung zawng zawng chu vawi engzah nge ka type-a ka tihreh leh pawh la hre seng tawh lo.


Mutsan ngial tumin ka'n mu lui a, ka harh tulh tulh mai bakah, ka mutna bul ruak rei lutuk leh vawt rei lutuk chuan mit chhin minti harsat takzet bawk.
.
.
.

"Nizan i mu ṭha lo deuh em ni?" U Hnemi chu, mut kham lo, mit thip ram chungin ka en a.

"A hriat em ni?"


"Hriat lutuk hran loh e, i mitmeng a dul êm a. Vawiin inzin tur i helhhawlh a ni lo maw?" A nui var var bawk.




"Helhhawlh pawh ka hre lo," Nu Mahlimi te nupa anrawn lut ve chiah bawk a.


"I va tho hma êm Dinte. Inpa hi damdawi in kal hmat a tum lo em ni? Han kaitho teh hei dar 7 a ri mai dâwn," a ti zui zat.



"Nizan damdawi inah an buai a nih hmel a rawn haw lo a," pangai taka tiin thingpui chu ka lem zui a.


"Dar 10-ah Bawihtei zai tur tih a hre reng si a, engan nge a duty loh zanah chuan rawn haw tur te pawha itih loh ni?" Nu Mahlimi'n a rawn ti hlak hlak.


"Dam lo antam a niang chu," Pa Bawla'n a lo ti sup.


"Dar 10 maw inzai hun tur?" Ka lo ti heu thung, tlai lam anti emaw tia.


Chuti chu Airport-ah pawh min rawn hmu hman dâwn lo a nih chu, nizan a rawn haw bawk si lo, zin hmain kan inhmu hman dâwn ta lo a va ang ve, ka ngaihtuahna avangin ka hnual nghal ruih thei.


"U..." Ka zawhna anchhan hmain ka nau te anrawn luh avangin tumahin kan sawi zui ta lem lova.


"In va hma ve."


"Hlutea hi mu thei tawh hek lo. Heihi i bag ah dah teh nang, ka Niin kawng lakah kan ril ṭam a hlau a, min kentir a nih kha," chhang ni âwm tak chu minpe a, en pahin, "zing chaw te in ei em ni?" Hlutea nui vur vur chu ka en chhuk..


"Ka ril a ṭam ve lo," a lo ti zui vat bawk a.


Pa Bawla rawn nui huk hukin, "hetah ei ula a ni mai alawm. Hlutea chu i nu i hmu dâwna i phur hle a ni maw? Hetah rawn ṭhu ula thingpui te in hmasa rawh u, chaw ei a la hun si lova," a sira chair chu a pawt chhuak zat.

Nu Mahlimi erawhin a tih ṭhindan ang bawkin, ka nau te chu melh pawh a melh leh lem hlei lova, awm lo ang maiin phone khawih pahin a zing thingpui chu a in kerh kerh bawk.



"Han chhuk pui thei che u ila a ṭhat dâwn nen, inchhuk hun leh Betty-i zai hun a lo in ang kher kher alawm maw le. Naktuk lamah erawh inpa in a rawn zui thla ve ang che u," Pa Bawla bawkin inthiam lo ri tak hian ti leh a.


Chu chu Rammuanawma sawidan pawh a ni, naktuk maiah min rawn zui thla dâwn tih hre tho mah ila, zinchhuah dawna kan inhmu miah lo tur erawh rilru a nuam thei der lo.


Pa Bawla te nupa, zingkarah damdawi in an pan a, keini pawh chhuah hmat tumin chaw kan ei ve mawlh mawlh bawk.

Kan Hlutea ril ṭam lo pawh thingpui no hnih a in hnuah chaw a ei leh ta teuh tho mai. A ei tam ber ang chu maw le.



"Khawnge maw Nunthiangi pawh chu maw le. Chaw ei dawn dawnah a vah leh den den ni? Zovi, i Pi kalna i hria em?" Chokaah Pu Kamlova rawn lutin a rawn ti lut a, ka chhanna a nghak tih hriat tak hian min en zui deuh ngul bawk.



A ngaihna hre lo zetin ka lo en hau a, rei erawh a ni lo, ka insiam ṭha vat, "Pu, keimah Dintei lawm ka nih a," ka nui var var.


Min en vung vungin a ṭawng dâwn emaw tih laiin a inher ruai ruai a, "tual upa committee naah kal ka ngaih tak kha maw le," ti leh churh churh chuan a room lam a pan leh daih.


Ka thaw halh, ka Pu a room a lut chu en zui vawng vawngin, "ka khawngaih ngawt mai," ka ti chhuak hap a.

Tar fing leh fel, invawng tak mai a ni a, hetianga a awm hmuh chuan rilru te pawh a ti na ve vawng vawng alawm.


"Tukkin, thawhhlim aṭangin annu a zawng tawh. Amah enkawl tur nula an la lo a nih chuan, pawnlamah tawhsual te a va tawk ang tih a hlauhawm. Pu Ber lah hian a hriatna a pangai lai hian, 'dam lo chhia pawh ka la ni lova' hi a ti tlat zel a," U Hnemi'n a rawn ti siam siam.


Pu Kamlova duhdan an zawh a, an ngaihchan leh zawm chhung chuan enkawltu tur an la ngai dâwn lo. Putar mahni tawk a 'kei ka ni' ti tlat ṭhin kha a ni tlat a.



Kan chaw ei kham dar 9 velah kan insiam zui nak nak a, 'kan' han ti ila, kei leh U Piana chiah a ni ang chu, ka nau te pahnih chu car-ah an ṭhu vang tawh zawk. Hlutea'n thlawhna nan loh a hläu khawp a, dar 8:30am aṭangin mi a tur sek tawh mai.



"Kha Dinte inkal dawn ta maw?" Pu Kamlova a rawn chhuak a.


Car bupa dingin ka hawi let vat, a harhfim leh a ni ang.

A tiang nena rawn inhawl chhuakin, a passbook bawk chu a rawn phawrh leh a, "insen na tur i la ngah dawn a nia," a ti leh chu ka lu ka lo thing vat vat.


"Pu ka mamawh chuan ka rawn dil mai ang che. Tunah....."


"Engtik nge ka hriat loh leh ang che tih leh engtia rei nge hetiang hian ka ṭhat dawn kan hre hleinem, min dahṭhat sakah inngai mai rawh," ka kutah rawn hmehbel a rual zat.


"Mah...."A inher zui daih a, "Hnemi chaw ei min siam sak hi i tum ve lo em ni?" A ti zui daih bawk.


Inchhung lam a pan chu ka nuih ta ringawt a, a dinhmun a hrechiang lutuk erawh ka lainat tulh tulh thung!


"Dinte, kan chhuak dâwn em ni?"


"Aw ahh...." Car-ah ka lut vat.


Lêngpui Airport lam chu kan pan ta vang vang a. Kawng lakah Hlutea a titi siam siam a. U Piana Toys leh transformer antia maw ni, chutiang chungchang chu ansawi dun ve nak nak bawk a.


A khat tawkin ka phone bawk chu ka hmet eng leh ṭhin. Thui tak kan tlân hnu leh, min vai liam hman lo tih hre reng chungin ka la beisei ru fan chu ka in ngei lek lek tawh. Message leh call tal ka la beisei fan bawk a!


"Inpa call i chang deuh em ni?" U Piana chu ka en vat. Darthlalang aṭangin min rawn melh zawk a, a nui vur vur bawk.


Ka phone dahṭha vatin, "ni chiah chuang lo," ka tihna chu Lalduata chawp chuan an awih vak lo a ni ang, an pahnih chuan an nui dun huk, ka nui ve ta vur vur tho, ka en zing ve bawk êm a ni.


Airport kan thlen hnuah pawh chuan min rawn nan tal ka pa beisei chu ka in ngei takzet tawh.


Departure lam kan pan dâwn thleng chuan ka hawi ru leh ṭhin. Ka hnual ruih hrim hrim pawh chu ben hrep tlak ka ni chiang alawm.


"Nula i passport...." Ka harh zawk.

"Aw ah.." Ka passport chu ka pe a.


"Au...."


"Umm..." Kan seat a kan ṭhut hnuah Hlutea chuan pawnlam en pahin, "engtikah nge chhumah kan chhoh dawn?" A rawn ti chhuak chy nui deuh haka chhan ka tum laiin, "i chho ṭep tawh e. A hmaa nula saw en la, tihdan tur leh ṭhut dan tur a zirtir saw i zawm zawh hunah chhumah i chho tawh ang," nelawm lutukin Air Hostess Nula hian a rawn ti a. Hlutea chu ṭhu ṭha sat satin a kuangkuah zui at bawk. Ka lo nuih sen sen, a phur lutuk chu a hmuhnawm phian zawk.


Kum 10 naupang tunlaia an fin a, an inlak tlangval a, ṭhenkhatin ngaihzawng hial annei tawh laiin, keini nau hi chu kum 6 naupang nen an thluak level hi a inpha vel chauh tak tak a ni.


Thlawhna thlawk chhuak tur, lei aṭanga kâng chuan mawng a ti zâ, Hlute la ka lam rawn hawiin, "ka mawng hi a zà e!" A nui kar kar, Lalduata pawh a rawn nui huk huk, kan pathuma kan vawikhat chuan na ni hek, kan za vek a ni ngei ang.


Rei loah ka muhil nghal nge ni, engtia rei nge kan thlawh pawh hre lo khawpin ka muhil zui.


"U, kan thleng a nia," Duata aw ka hriat chuan ka meng diar diar. Ka beng chhung na ta lutuk chu engti zia nge ni?


"Inbeng a na ve em?" Ka nau te pahnih chu ka en.

"Ka beng hi a na lutuk," Hlutea lah chu rawn ṭah a rual ta mai.


"Hei! Ṭap ngawt zel suh, keini pawh a na ve tho," Lalduata'n a lo ti hluk.


"Ear Plugs inhmang lo a ni maw? A reh ve leh mai ang," Mizo nula pakhat hian a rawn ti a, "a nachang kan lo hre lo a tinni. A reh vat dâwn a tih chu, a zahthlak, bâng tawh rawh," kan bag chu Lalduata'n a la chhuak a, thlawhna kan chhuahsan hnuah erawh mittui tla fep fepin Hlutea pawh a hawi ve leh he he tho mai.



"Apa..." Ka Pa wheelchair chunga ṭhu bân lo vai lap lap lam chu kan pan vat a.


"E khai! I va lian tawh ve?" An inngai hle a nia, Hlutea pawhin a kuah deuh chawih chawih mai.



"Ka lo keng dâwn em ni?" Mizoram aṭanga zuitu home nurse U Pekin a lo ti a, "ka nau khan a keng thei alawm, an luggage chu an mahniin inbuai pui tir rawh. Eng nge i an Pa?" Ka ti zat.



Inbe liam chuan Rammuanawma Car buatsaihsa, ka Pa te rawn hruaitu te dinna lam chu kan pan a.


"Puih...." Lalduata'n a ti hman ṭawk. Ka Pa chu din a tum mai a.

Phawk lutuk hian kan en haw mai, U Peki kut chelh chung chuan a ding ve ṭiah ṭiah tak tak nia maw le.


"Pa...." A rawn nui var var, a thaw zui ham ham bawk a. A chal vêl chu a thlan zui dap bawk.

"A la harsa deuh a ni. Mahse, car a lawn leh khumah insawn te chu ka thei ve tawh lutuk e," a ti zui chu Lalduata lam hawiin mittui hnam zui sawk chuan ka ṭah nuih ta hak a. Ka mittui khap let vat vatin, "ka Nu in a hria em?" Ka aw a lawi zui rut mai.


Thla tam liam loah kha chuan a kezungpui tihchet ringawt pawh kha a harsat em em a ni si a.


"Pathian ka chungah a ṭhain, Inpa leh Doctor, Peki te vang a ni e," kan tlân chhuah hnu chuan ka Pa-in a ti zui sup sup.


Rammuanawma a sawi lan takah chuan ka phone phawrhin ka On vat. Message ka lo beisei ru ve tawh a nia, a la awm chuang miah lo erawhin ka thin a ti rim tawh lo, minti na veng veng tawh thung.


Siamsiami'n, "rai no rilru chhiat a awm a nia," a tih ang deuh khan ka rilruin Florence-i te nufa vangah ka puh nghal ngat ngat ringawt bawk a.


Kan chau tlâng a ni ang, inchhung kan luh rualin kan mu nghal zawn zawn hlawm mai. Lalduata ber pawh sofa ah tlu in a muhil chu a ni nghal dêr. Thlawhna kan rui êm lova kan vannei phian bawk. Hlutea erawh vawikhat a luak ta tho va.



Keipawh ka mu zal ka lo muhil lehnghal a ni ang, ei rawng bawl ri rak rakin minti harh, chhuatah ka lo muhil chu niin, sofa ah ka mu ve emaw ka tia, chhuata ka insawnlai ka hre miah lo.


"I nau te an inbual tawh a, inbual ve nghal ta che," ka Pa in hmarcha hring a lo mal malh malh a. Pekin chawhmeh a kang ri sawr sawr bawk.


"An chhuak em ni?" Ka nau te pahnih hmel ka hmu lo.


"Hlutea'n naktuk a nghak thei lo a nih kha. Damdawi in ah an va kal hmasa," a nui vur vur. Min kaihthawh ve tur a nia, ka kal ve châk tho sia. Ka hmu ve châk tho a sin le.


Shower hnuaia dingin ka dul chu shower gel hnawih phuan hluaha chul pahin, a eng ka hria ni maw ka nui leh ṭhin.


"Ka fapa," tia Rammuanawma thusawi chu ka bengah a rawn ri leh ṭhin a, keimahin laizeta nui vur vurin, "fapa ni ang che aw," ka ti zui sep sep bawk.

.
.
.

"Inpa in min rawn bia a, inthlen thu i la hrilh lo em ni?" Bathroom aṭanga ka chhuah rualin ka Pa in a lo tih chuan en haw in, "a lo call amaw?" Ka bag lam chu ka pan vat. Duh aiin ka hmanhmawh nge ka Pa chu a nui zui huk.


"Ka phone ah maw le," ka pa thusawi chu ka ngaihsak tawh lo, ka phone message ka check zat. Engmah a awm chuang lo, a call-na tak ngial pawh a awm lo chu ka thaw hawk mai. Inseh ruh ṭau chungin, "naktuk chuan rawn chhuk ve a tum em?" Ka aw a lawm lohna chu thup buai pawh ka peih lo, ka Pa bul a ni tho.


"Dam lo na zual a neih thu a sawi a nih kha, a rawn chhuk mai thei lo ang," ka lawm lo tih a hria a ni ngei ang, ka pa chu a nui vur vur a.


"Inhru hul la, chaw ei kan hman a nia. I nau te pawh anrawn let mek," a la nui reng, kei erawh ka nui peih lo, ka Pa be siin, kei a nupui mi biak pawh a tum lo a nia. Engah nge keipawh chuan ka lo nghah ve reng ni? Ka nghak tawh malek ang a a ni mai. A phu pawh a phu lo.


"Rai no huat te i nei tawh em?" Ka chaw ei ka hak ṭhelh, ka khuh nghal kharh kharh a, ka hnungzangah U Peki'n rawn chum dat datin, antui chu ka hawp theih turin ka lamah a rawn nawr hnai zat.


Engtin nge a hriat ni? Ka la sawi tawp si lova.

"Engtin nge i hriat a?"Ka la khuh kharh kharh reng, ka hrawk a thip vût bawk.


"I pasal neih kan awm lo chu thuhran, nau i pai pawh sawi nachang i hre lo a nia," ka zawhna chhang lovin lungawi lo tak hian a rawn ti chhuak a.


U Peki chu ka melh vat, "inpa in hman ni deuh khan zanlaiah a rawn bia a, a hrilh a niang," a lo ti nui var var.


Hrawk la thip deuh tak chungin, "ka Nu in a hria em?" Ka Pa lungawi lo chaw ei chu ka nuih tlawn deuh vur vur bawk a.



"Kan lo let tawh e," kawngkhar lam aṭangin Lalduata aw kan hriat takah chuan ka ngaihsak zui ta lem lo.


"Engah nge min kaih thawh ve loh?" An rawn lut chu ka lo ti zui hlak.


"Awi awi awi... Vawkpui rai mut duh ansawi chu nepte a ni, sofa aṭanga ka sawn che pawh i hre lo a nia," uar deuh tak hian Lalduata'n a tih chuan ka nui chhuak hak.


"Chuvang a nih chu chhuatah ka lo mut ni," an lo nui zui ve khek khek tho. Engti em emin nge maw ka mut ni?



"Au, anu in a hau dâwn che," kut sil pahin Hlutea'n a rawn ti zat.


"Nu leh Pa a nei lo em ni?' A ti che," ka sirah chair pawt chhuakin a rawn ṭhu ve nghal a. Midang an lo nui vur vur hlawm.


"Chutin a sawi loh kha," Duata'n a lo ti chu, "a sawi reng e a, 'pasal neih pawh sawi duh lo, fahrah ang mai. Nau a neih hunah pawh kan awmsak lo ang, duh leh amahin inbuai pui rawh se' a ti bawk aw," ka nu ṭawng dan chu Hlutea'n a zir deuh zat zat a, kan nui hak hak hlawm.


"A thinrim viau em?" Ka la nui reng. A hmel tur ka mitthla thiam.


"Rim vak lo, rim ve tho," ti niah niahin chaw a ei zui a.


"Eng nge awmzia?"


"I â si..." A ti hliai chu ka Pain, "a khaih! U te i â anti ngai em ni?" Ka thlavang hauh takin a lo khak vat.

Ka Nu leh Pa tihdan a nia, kan naupanlai aṭang tawhin ka thlavang hi an hauh nâa hauh ka ngaih leh ka nau te hriat lohvin min zilh leh mai ṭhin.


"A thinrim ve deuh tho alawm, 'makchhiat a tawh pawhin lo inphurlet suh se' a ti," a ti leh chu kan vai nuih leh ta hak hlawm. Ka nu tak hi chu aw! Timak thei bawk si a.



Chaw ei laia titi a nui zui leh dar dar ṭhinin, a khat tawkin Hlutea'n ka Nu min hauhdan a sawi bawk a. Thla tamtak hnuah kan nui ho leh thei chu a lawmawm takzet, chutih rualin ka Nu damdawi in chhuah hun tur leh, damtaka chhungkau a chaw hlui kan kil ho leh theihnan Pathianin mal minsawmin, ka nu chungah zahngai se ka ti takzet bawk.

.
.
.

"I lung a lêng nghal ngawt em ni Dinte?" U Peki enin ka nui sen sen a.


"Chutiang pawh a ni lo," tukverh bulah chair la in a rawn ṭhu ve zat bawk.


"Mizoram nen chuan boruak a dang ve deuh tiraw?"


Pawnlam building lian tak tak êng phe un mai chu ka en vang vang a, "U Pek, pasal i nei tawh em?" A zawhna chhang lovin ka ti ta daih, a ka lam hawi zawk. A lo nui hak a.


"Nei tawh e, fa pawh pathum lai alawm ka neih tawh ni."


"I pasal leh i fate i kalsan tihna em ni? Ka tih awmzia chu ka Pa enkawl turin?"


Nui var varin, "kum 3 liamta khan kanpa in min boral san a, ka fate chawmnan hna ka thawh a ngai si alawm. Bakah, kanpa kha Thin cancer ve tho a ni a, Doctor. Rammuana hian minpui nasa em em a, i pa tana thawk tura min rawn biak pawh khan ka fate ngaihtuah viau mah ila, ka hnial thei lo a ni," a ti zui siam siam, a aw chhuak tinah chuan Rammuanawma laka a lawm zia a lang chhuak bawk.



"Ka tihpalh, a zia lo hle mai. I fate chu tu bulah nge an awm?" Ka dilchhut thei lutuk hi ṭhenkhat tán chuan a ninawm ṭhin ngawt ang.



"Ka Nu leh Pa bulah, kanpa nu leh pa aw," a nui a, "kanpa boral aṭangin an bulah kan la awm char char a," a tih zawm zat a, ka lo bu nghat nghat. Kum 3 hnuah pawh a pasal chhungte bulah a la awm a nia. A fakawm takzet.

Ka dinhmun tur nise ka peih miah lo ang, Nu Mahlimi hrawn tur ngat phei chuan teuh lo nasa ang maw le. Ka ngaihtuahna avangin tlem chuan ka inthiam lo leh deuh.

Ka pa room aṭanga a rawn innawr chhuah takah chuan kan titi chu tawpin U Peki chu a ding zui a, "ka mutsan ang che u. Zanin chu Dintei hian a pui thei ang che tiraw?" A nui var var.


"Mu rawh, mu rawh U Pek, zanin chu ka Pa bulah mut ka duh ve hrim hrim," nui chunga ka tih rulin, "keimah a sin mu dawn," room aṭangin Hlutea'n a rawn ti hlar, kan nui ta hak hak hlawm a.


"Inpa nen in inti thiam lo em ni?" U Peki room-ah a luh hnuah a rawn ti a.


Ka lu lo thing vatin, "chutiang pawh ka hre lo," ka ngawi zui deuh vang vang a, "Pa, ka Nu hi i ring em?" Ka zawhna teh tawl chuan a nuih a ti za tih hriat tak hian a nui huk a, "khawvelah i nu tluka rin ka nei hleinem. Keimahai pawhin ka ring zawk," a ti chu ka lo ner nawng nawng nghal, a fak over vel lutuk.


"Inpa i ring lo em ni?" Nui vur vur chung hian a rawn ti a, za vak lova ṭhen khumin, "a laiah ka ding," ka ti chu a nui leh huk.


"Nupa chu kan inrin tawnna a nasa poh leh kan inhmangaihna a zual ting tihna a ni mai," a ngawi dat a, "ngaihdan leh duhdan sawi chhuah te hi tlawm lâkah neih loh tur a nia," a ti leh zat.


Tlawm lakah ka lâk phei chu ka hre miah lo; Mahse, tlawm lutuk ang a lan chu ka duh miah lo thung.


"Ka ring ngam lo nge ni a, rin ka tum lo zawk tih pawh ka hrethiam lo," ka Pa en chuan ka ti leh sep sep.


Hmel hahdamthlak taka min enin, a nui reng a, "hmangaihna ti famkim tu leh inzawmna bul ṭanna i hria em?" Mit khap fak fakin ka pa chu ka en ran a.


"Rinna leh thudik," nui reng chungin, "i kawppui pawh i rin zawh loh chuan he khawvelah tudang nge i rin chuan ang ni? A ni lo'm ni?"


"Tin, thudika bul ṭanna reng rengin rinna a keng tel tih hriat tur. Mambawih, in inneih dan ka hria a, rinna neih a harsat dan tur erawh ka rawn hrethiam hauh lo mai. Mahse, pasal tena harsatna leh buaina an hrilh ngam loh leh, hrilh theih loh khawpa nupui inkharkhip nih tum reng reng suh ang che. Chuti lo zawng, i pasalin hmeichhe dang lakah inbun ruahna a zawng duh mai ang," dam dup hian a ti dap dap a, ka lo thaw chhuak ham ham thung.


"I nu hian min ring nghalin i hria em?" Kan ngawih deuh vang vang hnuah a rawn ti leh, ka lu ka lo thing vat vat.


Ka la hriat reng chu, ka pa zan rawn haw har avanga ka nu thinrim leh ka Pa tak ang maia hmeichhe dang awmpui tura a rin thu hial a sawi kha.


Chuta ka pa chhan na ka la theihnghilh theih miah loh chu, "ka lakah rinna i neih loh chinah chiah ka rinawm lo ang a, min rin ngamna chin zelah erawh ka rinawm a ni tih i hre thung ang," a tih kha a ni.



"Nupa nih chuan thilte thama kan ngaih pawh inhrilh zel te a ṭul a, 'hei chu sawi lo leh ti lo mah ila a pawi lo ang' tih aiin, 'engtin nge ni ang? Eng nge i ngaihdan?' Tia inrawn derna zelin rinna a tuh ṭhin," a rawn ti zui leh dap dap a.


Ka pasal nena kan inzawmna ka ngaihtuah let a, ka hnuk a rawn ulh nghal ṭau in, ka mittui a rawn hnam sawk bawk.


"Kan inhnaih a, kan induhna a nasat poh leh kan bul ṭandan a ri zing a, a ri ring bawk a, chu chuan muangchangin min pawt hla a, a chang chuan mi hrang, inhre ngai lo awmdun ang maiin minin ngaih tir ṭhin," ka mittui a rawn luang ngiai ngiai, ka Pa bul a nih vang a ni ang, ka mittui pawh dan tumna ka nei chuang lo.


"I harsatna i hre duh em?" Mittui kar aṭangin ka Pa chu ka melh kiau a, nui var varin, "i ngaihtuahna leh ngaihdan i pasal i ṭawm pui lohna kha a nih kha. Kan ngaihdan a dik ber emaw kan tih chhung chuan inremna a awm ngai lo vang," a tih chuan ka mittui hru hulin hrethiam lo tak hian ka en a.


"Mahse, engtin nge ka sawi ang ni? A nupui hlui mai ni lo, fanu hial a neihpui si a," ka pa mitmu chu a che ralh, ka sawi loh tawp tur ka Pa lakah ka sawi tih ka inhre chhuak nghal bawk. Mahse, a tlai tawh lutuk, a insiam rem vat a.


"Tichuan a nunhluiin a tibuai thei tur mipaah i ngai em ni?" Ka lu ka lo thing vat, chutiang mipa chu niin ka hre si lo.


"Ka fanu, inring tawk ta che. A nunhlui a ni tawh a, nang erawh a tun hun," a nui suk a, za vak lova nuiin, "a dik alawm," ka ti ta sep.

Mahse, i mipa duh tak, i pasal nunhlui kha, i hmuh phak, khawih phakah la awm tlat se, "a tun hun ka ni," tih chu harsa inti ve tho vin ka ring.


Ka pa bulah ka inbun ruak a, a thurawn te ka lak hnu chuan tlemin ka zâng ve deuh chuan ka inhria; Mahse, ka chhungril khawi emaw laiah hian, Rammuanawma mize inthlak hun a neih chu ka la ring fan tho mai!
.
.
.

"Pasal neih sawi duh lo leh, nu leh pa hriatpui duh lo te chu kan thih hnuah neih tur che alawm," ka Nu chu chau leh aw tham chalin a la phun ve niah niah.


Zing kan inhmuh aṭangin min la hau tawp thei lo, a chemo khaina lu an ziah kawlh lah chu Hlutea'n , "kawl puithiam i ang," a ti deuh chhen bawk a. Kan nui leh dar dar ṭhin.


Mahse, zai hun tur darkar a hnai tulh tulh a, han nui ve leh ṭhin mah ila, za tak erawhin tu a mah kan nei thei ta der lo. Ka pa pawh a bâng chuang hauh lo, ka Nu lah chu hlauthawng ang pawhin a awm lova, mi hauh a la chhun zawm niah niah bawk.


"Mi kut hmawr vawt vekin kan awm a, dam lo ber lah i âng char char bawk si," Lalduata'n a lo ti sup sup, za lo deuh hian kan lo nui sûng hlawm bawk a.


"Engah nge inhlauh ngawt ni? Pathian ringta che u. I pa pawh chu," ka Pa hmel enin a nui zui ruh ruh a. A vun dang bel te, a biang ki ta em em te, a hmui hil bam te chu ka hmuh tirh aiin ka hmu chhe lehzual.


Ka hnuk a rawn ulh, ka ṭah mai loh nan lehlam chu ka hawisawn a. Ka mit ka khap fawk fawk bawk.


"Pathianin engkim tan hun ruat a siam alawm. Hei leh chen min kai hruai tawh a, läwm tur kan ni zawk alawm kan nih," dam diai hian an a rawn ti a, ka biang a rawn lum thla pup. A hahdam lutuk leh a chungah engpawh thleng dâwnse a pawm vekin, vuina a nei lo tih a ṭawngkam tina lang chhuak chuan min vit ngut ngut mai.


"Pi Thanpui, i hman tawh em le?" Nurse leh Doctor anrawn lut a, "kan innawr chhuak tawh dâwn em niang?" Nurse chu a nuisang tak nâ-in, lo nuihlet chu thil har leh theih loh tawp ang a ni rih.


Ka kawchhung a rawn khur zui dar dar a, ka chhip aṭanga ke hmawr leh kut hmawr thlengin a hit zualin, vura deh ang mai ka ni tawh.



"Kal ila a ni mai alawm," tumahin kan chhang lo, ka Nu bawkin a rawn ti leh.


Ward aṭanga an nawr chhuak chu mit thip ram hian ka zui chhuak a.


"Anu, hetah kan lo nghak dâwn che nia aw," Hlutea'n a tih chuan ka insum zo lo, ka mittui a rawn luang thla leh pup, ka hrawk na lutuk chuan thawk a ti harsa takzet bawk.


An nawr luh dawn meuh chuan ka Nu pawh a mittui a tling pam mai, min rawn en kual a, kei erawhin a mitah ka en ngam lo, lehlam ka hawi tlat thung.


"Matei Pa....." Ka Pa chu a wheelchair-a innawr hnaiin, "hetah kan lo nghak ang che," ka Pa aw pawh zawi tak a ni.


Duata'n ka darah a rawn kuah a, "dam turin alawm le a luh dâwn le," a ti zui tak nâ-in ani pawh a aw a lawi ve rut tho.


"Mitthi vui dan ṭha ber ka sawi kha ila hria em?"


"Chutiang sawi hun pawh a ni lo," ka lo ti bak hlar



"A dama te hlim leh inngeih tlâng taka chen ho a, inhmangaih ho a ni," a ti zui leh sep sep.


"Duata sawi ang khan damtakin i rawn chhuak dâwn alawm."


"Ni e, min nawr lut tawh rawh u khai. Ka chhungte ka tihlau zo dâwn," Nurse te chu a melh chho ralh a. Kan lam rawn hawiin a nui leh var var bawk.

Mi kan hläu a, ka khur chhuak lo chauh a, a hmel hahdam lutuk chu a lawmawm viau rualin thin a ti rim lek lek zawk.



"Au..." Ka Nu an nawr luh rualin Hlutea'n min rawn din hnaih a, min rawn kuah ve nghal chial bawk, ka Pa kan bula rawn innawr hnaiin, kan unau thuma in kuah chu min rawn enin, "a ṭha em em ang, i nu chak zia inhriat kha," ka Pa aw chu a khur ve lek lek tho.


Ni e, a ṭha chhuak em em ang, hei leh chen kan beiin, engkim kan hlan a, Pathian khian chuti maiin min laksak bik nang.


"Tlâng sawn theihna khawp hial rinna," tih kha neih a ṭul tih hre mah ila, kan chhungrilah erawh, a dam theihna leh hlawhtlin theihna chance chu sawmah pahnih chauh a ni tih ka hre kar lawi si. Chu chuan rinna nghet tak aiin hlauhna in min tuam hneh hlawm tih kan hre ṭheuh bawk.
.
.
.
"Bawihi.." Ka nu inzaina room anluh pui aṭanga darkar 2 dâwn hnuah Rammuanawma aw ka hre hlawl mai.


Ka hawi nghal dawrh a, ka lam pana zau taka rawn pên pawk pawkin, min si cheta rawn ding chuan eng emaw sawiin a phun zui hluk a, "dam lo zawk ang mai alawm inih?" A ti zawi hluk.


A laka thinrim viau tur ka ni tih ka inhria. Nizan ka mut dâwn thleng pawhin ka thinrim a, tukkinah pawh min la biak miau loh avangin ka haw ru ngawih ngawih bawk.


Mahse, min si cheta dingin, a rim, ka hriat ṭhan em em leh, min ngaihtuahna mitmeng dur khup chu ka ngaihzia leh thlakhlelh zia, mamawh zia ka hre chhuakin, ka thinrimna aiin, ka mamawhna te chuan chawpchilhin min hneh nghal tlat thung.



Ka dar tawn tawnah a chelh a, a lama min pawt hnai salha nghet taka min kuahin, ka chhip a fawp zui vawng vawngin, "i bulah ka awm tawh," a ti zui sup sup.


Darkar tamfe ka thawk ka lo chelhbeh, duh ang a thaw la ṭha thei lo kha ka thaw chhuak ve ta ham ham mau. Ka taksa lo ṭan zia ka hre chhuakin, ka inseh ruh zia ka hre chhuak nghal uar uar bawk.


Ka taksa chuan hahchawlhna hmun a hmu emaw tih mai turin, Rammuanawma min kuahna chu ka hahdam puiin, sawifiah thiam rual lohin ka thla a muang zui suai suai bawk.


"Pu.... Hmingthan, Hlute...." Ka chhungte awm ve chu a be zui a.

Min la kuahbet reng chungin, "ka rawn tlai deuha min hrethiam teh u. Ka dam lo enkawl a zual deuh alawm le," a aw thum bul bulah chuan a inthiam loh zia a lang. Mahse, ka ring miah lo, niminah pawh ka Pa a be reng a, min biak pawh a tum lo a nia.




"I lo kal kher duh alawm, Pathian zarah kan ṭha ve mai ang, hetah pawh awmla tih theih tak tak a awm chuang si lova," ka Pain a tih laiin ka lo inla hrang hlek a.


Ka ṭahna avanga mit thip rama melh chho ram ramin, "nichiah, tuna rawn lan," ka aw pawh a la lawi rat mai.

Rammuanawma chu thaw ri hulhin, ka kut a rawn chelh a, za vak lova kiai sukin, ka dul zawnah a en thla zui zat.

Ka dul zawn melh zui ngur ngurin, a bek leh khabe ruh a rawn pawng ṭalh ṭalh bawk a, ka hmu sual emaw ka ti dawn hial a, ka hmu sual chuan ka hre si lo.


Harsa tih hmel taka thaw zui ham hamin, ka kut a chelhna chu a hmerna tulh tulh a, a hit nghal mer mer bawk.


Za lo tih hriat takin a ner deuh sawk bawk, tuna a hmel landan zawng zawng hi a ngainatawm loh takzet, ka lungphu a ti rang zualin, min hmerna avangin ka kut ruh te chu a sawm mai dâwn hialin ka hre bawk.



"Rammuan...." Jessica-i aw kan hriat rualin a thaw zui hulh a; Mahse, a mitmeng erawh a thim tulh tulh thung.



"Dinte..." Jessica-i kan bul a rawn thlen rualin min rawn nuih säng a, "i ṭha em?" A ti zui zat.


Bu nghatin, "ka ṭha e, i rawn zui ve tih ka hre lova," Rammuanawma chu ka melh zui zauh.


"Zui chiah lo, tihtur ka neih vang zawk a nia," a ti ve mai bawk a.


Jessica-i ho chuan inzaina room pawnah chuan kan awm zui ta ṭhap a, Rammuanawma chuan min en leh vung vung ṭhin. A chang chuan inthiam lo mitmeng ni âwm tak ka hmu a, a chang leh thinrim hmel. Ka hrethiam lo, ka laka thinrimna ai mahin, min ngaihtuahna erawh hmuh tur leh a ṭawngka chhuakah hriat tur a tam zawk bawk si.



"Duata lu iti hai alawm," Lalduata vai chhen chu ka Pa in ṭhu turin a hrilh a.


"Dikchiah," kan Hlutea ṭhin lah hi, a lo tuihnih hman ve zel bawk a.



"A rei tawh hle mai," keipawh hi ka hmanhmawh tawh.


"Chu chu alawm," Duata'n a lo ti ve sup.


"Doctor-in a sawi tawh kha," Ka pa in a lo ti ve tak nâ-in, ani pawhin inzaina room lam chu a en zing ve ta khawp mai.

.
.
.
.

"Doctor...." Duata che hrut chu ka en nghal dawrh. Doctor rawn chhuak chu ka pan nghal ruak ruak a.


"Eng nge a an?" Darkar 3 a tlin lohnan minutes tam a ngai tawh lo, a hlawhtling ngeiin ka ring bawk.


"Dr. Tracy...."


"Pawi ka ti hle mai Dr. Rammuan, kan theih tawp chu kan chhuah ve a; Mahse, dar 5:45pm khan a hnuk a thlah a ni," Doctor-in aw dam dapa a tih chuan ka kaihza tha a tliak hnawk, Rammuanawma ka nek zui rawk rawk bawk.

Cubic lunga den dawt ang mai hi ka ni. Ka lu ka thing nawk nawk a, "a ni lo, a ni lo ang..." Ka phun chhuak sap sap bawk.


Duata'n Doctor hmeichhe kawr hmaa ṭham nawkin, "eng thu lawi lo nge i sawi?" A ti deuh hrawk.


"Duata..." Ka pain a tih rualin inzaina room kawngkhar rawn inhawngin ka Nu chu an rawn nawr chhhuak a.


Ka âwm chhungna lutuk chu ṭham ngat ngatin, "a theih loh, a ni lo ang," Rammuanawma min kuahbehna tha ring chuan ka ding khur hlawk hlawk.


"Mambawihi Nu..." Ka Pa chuan ka Nu kut chu chelhin a ko sup sup a.


"Anu..." Hlutea a ṭap zui par bawk.


"Bawihi...." Rammuanawma chu mittui kara ṭangin ka melh chho.


"A theih loh, ka neih zawng zawng. Ni lo, ka hmalam hun, ka nun zawng zawng ka hlan hnuah hetiang ngawt hian a kal thei lo," keimah chuan ka riat nawk nawk.


Ka Pa kun a, taksa khur dar dar ka hmuh phei chuan ka â vek ni mai hian ka hria.


Engtin nge a theih zawk? A tan theihtawp ka chhuah a, ka nun zawng zawng, ka hmalam hun engkim ka hlan hnuah min kalsan ang maw?

Aih, a fair lo lutuk, a fair lo êm mai. Ka pawm thei lo...


Ka hrawkna lutuk leh ka hnungzang, ka kawchhung chu boruakin min hnawhbet tlat a. Boruak hip kawk kawk tumin âng vak mah ila, ka kham khawp reng reng ka hip thei lo.


Ka tha leh theihna zawng zawng sawm khawmin ka ding ngil a; Mahse, pensawn nghal turin ka tha a khurin, ka ke chu ka dinna hmunah zung a kaih ta emaw tih mai turin a nghet tlat si.


Engkim mai chu a thim mup a, ka hma zawna ka nu ruang, darkar tam lova min hau a, min zilh malh malhtu ruang vawh hmel tak mai chauh chu a ni ka hmuh hi.


Ka chil chu lem hrawk ka duh laiin, chu ringawt pawh chu ka thei lo..


"Ka nun hrem hmunah i siam hnu hian hlim takin min kalsan thei dâwn em ni? I thei lo tiraw?" Ka phun sep sep.


Ka pawm thei lo, ka thei lo a ni, engtin nge ka theihna zawng zawng chhuah a, ka zahawmna zawng zawng ka hralh vek hnuah min kalsan theih ang ni. A fair lo lutuk, a fair lo êm mai.


Engtinnge awlsam takin ka pawm theih ang ni? A dam theihnan ka theihna piahlam a sin ka hlan ni!!!


Ka dinna ngaiah chuan ka ding ngawt ngawt a, Rammuanawma'n, Jessica-i bulah min awmpui tura a hrilh te leh ka Nu ruang hawndan tur a buaipui tur thu a sawi te chu ka hre vuai vuai chauh a ni.

Ka che sawn thei lova, ka nu ruang chu mittui luang ngiai ngiai leh kawchhung tawt a, na ngut ngut chungin ka en ngawih ngawih. Ka â vek ti ila ka sawi dik ber ang.


Inpuahchah lawkna tal minpe lo chuan min ti nâ-in, ka hua a, ka thu neihna ni miah lo mah se rei lo te tal chu min dampui beiseina in ka Nu lakah chuan ka läwm lo takzet bawk!


Engkim hian hun ruat a nei maw? Hetianga hnawka ka hringnun a siam hma khan Pathian khian a la dâwn a nih rau rau chuan, lo la daih tawh tur a ni a sin.


A vawikhatnan, a vawikhatnan tak meuh meuh ka thinlung chhungril ber aṭangin Pathian lakah zawhna leh vuina ka nei a.


"Eng nga tinge tunah kher?" Tih zawhna chuan min tuam hlup hlup a, ka Nu an nawr sawn leh Hlutea'n, "Anu, tho leh rawh. Anu, naktuk zanah ka bulah i mut tawh dawn kha," tia a ṭahna te chu ka thlir liam ngawt ngawt ringawt, ṭap chhuak turin mittui tam tak ka nei lova, chutiang bawkin mahnia pensawn turin chakna ka nei tawh hek lo!


Ka chhungril hi läwm lohna leh vuina, ka huat ber hre si lovin, huatnain a khat mup mup thung!!!


<><>~>~>~>


NOTE : Naktuk ka chawlh zan aw. Tin, inthlahrung tawkin Sunday zan pawh tunkar chu ka chawl dâwn.🙈min hrethiam rawh u, kum 2 hnuah Mizo biak in ngeiah inkhawm ve ngei ka duha tin ni.😢

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:54 pm

{ LOVE AFTER MARRIAGE}

By

Floria Laldansangi


Chapter < 26 >


Ramdinsangi....POV



"Bawihi...." Ka kawngah dimtêin Rammuanawma'n a rawn kuah a, "car-ah lova awm ve ta che," dam dup hian a ti leh sup. Ka chhipah a fawp zui vang vang bawk a.


Keimaha che sawn turin chakna ka nei lo, ka din ngaiin ka ding khawng ngawt ngawt, engkim mai chu a thleng rang lutuk a, ka thluak hian hna a thawk hman lova, khawilam nge pan tur pawh ka hre hek lo.


Mittui nen chuan ka bul vel chu ka melh kual zui ruai a, tumah reng reng an lo awm tawh lo, ka mittui bawk a rawn luang ṭha leh ngiai ngiai a, "ka Nu kha...." Ka aw chu a chhuak ṭawk ṭawk chauh a ni.



"Engkim a ṭha vek e," Zawi supa rawn tiin, min kuahbet zui a, ka taksa chu zawi tak siin, keimah mai chuan ka che sawn zo lo.


Ka dar tawn tawnah chelhin min nam hla hlek a, a âwm zawnah ka en ngat ngat chu, "ka mitah en rawh Bawihi," ka khabeah rawn chelhin a chawi kâng hlek.


Mitmeng thlamuan thlak taka min enin, "i pa leh i nau te tan i intih chak a ngai. I pumchhung a naute tán pawh, i hrethiam em?" Zawi tak hian a rawn ti sup sup a, mittui kar aṭanga pawhin a mitmengah chuan hrethiam ngei se minti tih ka hmu thei bawk.


"Rammuan..." Jessica-i aw bawk a ni.

"Dinte..." Kan bulah a rawn ding a, "zui che u ka duh nen, hna avanga kal ka ni si a, ka kalsan mai ang che u," a raw ti zui a.


"Ka kal a nia, enkawl ṭha ang che," Rammuana bân a beng taihin, a in her zat bawk.


"Kan chhuak ve dâwn em ni?" Zai dam tak leh ka thû ngâi tak bawka tiin, min kuai her a, ka pasal tha ring leh, nawr kalna ring tak takin ka ke chu ka pênsawn tak meuh meuh chauh a ni.


Car bul kan thlen chuan, "Hlute, heihi ei rawh," Duata'n a nau chu ei tur a lo pe a, "U nangpawh ei la," ka lu ka lo thing mat mat, "ka Pa te nen khan ei rawh," ka ti chhuak sap bawk.


Ka Pa, seat hmaa ṭhu ngawi ran mai, mit khap fak fak chu ka en a, ka mittui bawk a rawn hnai leh, hawisawnin ka mit ka khap zui vat vat bawk a.


"Eng emaw tal ei rawh, pum ruaka awm chi i ni miah lo," ka thil ei duh lo chu a lawm chiah lo a ni ang, ka nau kuta biscuit chu lâ in, "strawberry ka ti si a," ka nau chu a en zawk, juice chu a en lehnghal ngur.


"An nei lova, kha kha rai tán pawh a ṭha tho a tia," Duata chuan a ti sup sup.

Rammuanawma chu bu nghutin, "tlem tal intum rawh," hawngin ka kutah a rawm hmehbel zat. Ka ei chak loh zia chu pui tak a ni. Ka luak te a rawn chhuak ut ut zawk.



"Ni e Mambawih, eng emaw tal ei rawh," ka pa pawhin a rawn ti ve bawk a, a aw pawh a thâm ta chal mai.


Ka nau tui ken zawk chu banin, ka in zauh a.


"Apa, Anu kan hruai tel dâwn lo a mi?" Hlutea'n ka Nu ruang hawn nghal duh tih hriat tak hian a rawn ti chhuak ṭiak chuan ka mittui a rawn ti hnam leh sawk, lehlam hawiin ka inseh ruh mah se ka dang hneh ta chuang lo.


Ka kawchhung rawn inletin, mittui nen chuan ka uak zui ṭhawt a, ka dinna aṭanga pên hnih pawh ka pên hmain ka luak nghal bawrh bawrh.


Rammuanawma rawn ṭhu thla rawk rawkin, ka hnungzang a chul zui a. Ka sam tlâ hui kiangin, ka chal a dawm zat bawk.


Uak tuar tuar a, ka luak hrep hnuah, chau lutuka leia ṭhu thla hnawkin, Rammuanawma'n mitmeng buai nawka min en na chu mittui kar aṭanga en letin, ka ṭhat thu hrilhnan ka khap zak zak a.



Thaw hulhin, "minti mangang mai dâwn alawm, i taksa a chau lutuka tin nih hi," ti sup supin ka sam a rawn hui kiang leh a.


Ka nau tui min peka ka kam ṭhuahin, Rammuanawma phone a rawn ri ve chiah bawk


"Hminga, i U hi lo buai pui lawk ta che," tih leh, "ka rei lo ang," ka chalah fawpin a ding zui vut, a din rualin boruakin min rawn chhem nghal vuk ni hian ka hria. Ka hit nghal sung sung thei.


"Mambawih, i ṭha em?"


Car-ah ka ṭhu lut a, "um ṭha e, i ṭha zawk maw Pa?" A lo thaw ham ham.


Lalduata pawh phone hmangin a buai ve mawp mawp a, Rammuanawma car kawngkhar bula rawn dingin, "amah hi be ta che," tiiin, "Pa Ṭhaa (ka nutei pasal)," ti zui supin a phone min rawn pe zui a, "aw Pate," ka tive sap.


"Dinte, helam chu rawn ngaihtuah suh u aw. Hei, inpain min rawn hrilh khan Y.M.A leh kohhran lam kan hriat tir nghal a, in pawh kan singsa zo thawkhat chu a ni ber," Engtik laiin nge a lo biak kual hman ni.


"Ka lo be ve ang e," ka Nutei aw ṭial ruai, ṭap zo hlim tih hriat tak hian a rawn ti ve a.


"Mate, helam rawn ngaihtuah lovin tluang deuhin rawn haw rawh u aw," a ṭap zui lo chauh.


"Pathian kutah engkim dah ila, i Nu pawh natna a tawrh a remti tawh lo a ni ang," a tawp lam chu ka hre ṭawk ṭawk chauh a ni.


Ka mittui a rawn luang ve ngiai ngiai a, ka hrawk rawn tawtin, a kham leh ṭan et et bawk.


"Ka lo bia ang e, i hnem pawh a nih loh kha," Patea bawkin tiin, "a kal hmasate hi mi vannei chu an ni mai," Ka patean a rawn tih leh chuan ka ṭap chhuak hawk.


Ka âwm chhung na lutuk chu ka phone kenlai chu ka âwmah ka nawrbet a, aw rawl chhuah meuha ṭap chhhuakin, ka âwm chu ka chum dawt dawt bawk.

Rammuanawma car kawngkhar bulah rawn dingin min rawn kuahbet vat. Mahse, zanin zet zawng ka pasal kuahbehna pawhin thlamuana minpezo lovin, ka natna a la sawn pha hauh lo.


Fair lo ka tihna te, ka thinrimna leh natna, tawrhna, vui leh vaina te chuan min vit ngawt ngawt ni hian ka hre ber.


"Au ṭap suh, ṭap suh...."Hlutea'n ṭap chunga a lo ti ve chuan ka âwm chhung hi a ti na zual a, ka thi ve dâwn hialin ka hria.


"Ka nun hi engtin nge ni ve dâwn, engtin nge i theih Nu? Tinge ka chungah hian fair taka i chet ve ngai lo ni? Tinge?" Ka riat chhuak nawk nawk. Ka hnungzangah boruakin min hnawhbet a, ṭap chhuak zawih zawih chung chuan ka hnang ta awng awng.



Ka awmdan Rammuanawma'n hre vatin, ka dar tawn tawnah chelhin min namsawn deuh dawrh a, "Bawihi, Bawihi, harh rawh," min thing nawk nawk.


Mahse, mittui luang a, kawchhung ṭap leh khur zawih zawih chungin ka pasal min kohna leh, ka Pa aw ri te, ka nau Hlutea hläu rak ri te chu a hla tulh tulh a, ka khaw hmuh a thimin, zo tak maia car seat aṭanga min pawm meuh chuan ka khawvel hi a thim mup mupa, engthilmah ka hre zui tawh lo nghal chu a ni ber.
.
.
.
.
Engtia rei chiah nge engmah hre lova ka awm ka hre hauh lo.


Ka mit meng si lova, ka bengin a hriat leh hmasak ber erawh, khuang ri tleng tleng leh zai ri kara ṭap thawm ri chuah chuah chu a ni.

Chu chuan ka men hma hauhin, engthil nge thleng a, khawiah nge ka awm tawh tih chiang taka min hriat tirin, ka thawk lak a ti harsain, a tibuai lehnghal tlat bawk a.


Rammuanawma thaw ri hawk ka hriat rualin, "Bawihi, i harh a ni tiraw?" A aw chau tak mai mah se min ngaihtuahnaa khat chuan a rawn ti chhuak sup sup a. Ka kut chu nghet takin a chelh nghal tlat bawk.



"A harh tawh em ni?" Ka Ni aw a ni.


Ka dang a roin ka hrawk a tawt a, men tawh loh a, engmah hre lo ang a awm kha ka duh leh tak zet si a.


"Mate...." Muangchangin ka meng zui diar diar a, ka mit erawh mittui bawkin a rawn luahkhat lehnghal.


Ka pasal chu thaw ta ham hamin a kut lehlam, ka kut a chelh lohna zawk chuan a hmai tuai puatin, "damdawi ka pe sual che emaw ka ti mai dawn alawm," za lo leh sak tak mai hian a ṭhen nawk bawk a. A mitmeng phi nuk leh, manganna ni âwm tak chy mittui kar aṭang pawhin ka hmu thei.



"Tui hi intir rawn Muana," ka Niin tui a rawn lak chu banin, a kut lehlamin hneh takin min tung tho a, ka taksa chu vuak hrep ang maiin a na sil ṭhûm tih ka ṭhut chhuah rualin ka hre nghal.


"Nâ i nei em?" Rammuanawma chu tuiin pahin ka melh zawk, ka mitmei a ka ṭhat thu sawiin, a thaw chhuak hulh a.



Ka dang ro tak, thlaler hmuna ni tamtak vak ang mai a ro ka ti hnawm chiah chu a thip thla nghal vawng vawng mai.


"Khawnge ka Nu?" Ka aw chu a tham chal a, a tawp lam chu boruakah a thâm ral mah zawk.


"In inlamah, keini pawh kan rawn thlenna a la rei lova," ka Niin rawn tiin, Patea room-ah rawn lut zui chuan, "Dinte, i harh ta maw? Nâ te i nei em?" Ka ṭha tih hriat nan lu ka lo ti che zauh.


"Muana kan inbe lawk dâwn em ni? Thlalak hun hi sawn thlat hret dil a va ngai âwm ve," Kanpa ding run chu a rawn be zui a.


Min rawn en zawkin, ka chhipah a fawp zui vung vung, ka natna fawh chhuah a tum ta rmaw tih mai tur a ni, "ka rei lo ang," thaw zui ham hamin, a ti zui sup a, a inlak hran rualin ka ruak hawk, lumna minpetu ka taksa peng pakhat lakbo daih ang mai hi ka ni.


An chhuah rualin room lah chu a thawl hawk emaw tih turin ka hmu zau nghal em em bawk a.


"Inpa iti mangang alawm, a palian si a, a chiai a phisek phei chu inchhung leh room chhung a ti chep zual," ti niah niaha ka sira raan ṭhu thlain, "Kan chhiat tawk zet chu, inpa awm lo se zawng kan mualpho mai ang chu keini lam chu. Kalna tur motor hire tur pawh kan hmuh loh laiin, Aizawl aṭangin Champhai thleng Helicopter a hired bakah, Champhai aṭangin motor a lo ngaihtuah lawk vek a," a ti zui sep sep a, a tahna a aw lawi rat leh mit bui, hnar sen hlar pawh chiang takin ka hmu thei ta.


A hmelah chuan Rammuanawma a fak zia leh a chunga a lawmzia a lang chhuak chiang viau bawk.



"Engtikin nge kan rawn thlen ve?" Khum aṭangin ka ke ka hlang thla zui a.


"Helicopter tho vin Guwahati aṭangin in khua thleng a rawn hired, a vaiin 4 alawm a hired ni," ka lo thaw ham ham, keimahni avangin a inseng ṭawk dâwn a nih chu!

Aizawl leh Champhai inkar ringawt pawh Helicopter hire man a to tehreng nen.


Ka ding mai dâwna ka ṭhu let hnak, "chawl hahdam rih ta che," ka Niin a lo ti vat a, min rawn chelh a tum chu, "ka ṭha alawm," tiin ka inbeng kâng lui leh, din mar ringawt pawh chu ka taksa chauh lutuk luatah harsa tak a ni.


Ka nutei te nen hian inkawt ân chiaha awm kan ni a, an in aṭang pawhin zai ri leh ṭap ri chu chiang takin a hriat theih.


Kan in chhung chu muangchangin ka pên lut a, ka mittui erawh a hul hak a, ka tawtin, bawm chhunga hnawhbeh ang tlat ka ni thung lawi si.


Ka Pa leh Duata, kan chhungte dang bakah, Pu Kamlova leh Pa Bawla ten ruang chu an lo kil a.

Hlutea pawh khumah ka nu ruang kuah chialin a mu ve bawk.


Ka âwm chhung tawt ta lutuk chu thawk ngaihna ka hre lo, kawngkhar bulah chuan dingin ka chil chu harsa tak hian ka lem hrawk a.


"Inrawn thlen aṭangin tisawn i Nu a la kuah tlat a, engmah lah a ei duh si lova," ka Niin rawn tiin a ṭap zui dar dar.



Ka mittui tla tur a awm tawh lova, ka kawchhung erawh phuarbeh vek ang mai an ni. Engkim mai chu fiah taka hmu siin, keimah hi ka fiah lo ruai a. Ka ngaihtuahna mang vekin, thilthleng leh ka thil hmuh leh hriat te chu mumang ang mai an ni hlawm si.


Engkim mai chu a thleng mup mup a, ka nu ruang, ka hmaa engmah hre lo a mu chu milim ang maia ṭhuin ka en ngawih ngawih, ka mittui farkhat pawh a far leh tawh lo. Ni lo, far tur pawh a awm tawh lo a ni mah zawk.


Ṭap ri te, zai ri te, thusawi ri te chu ka hre vawn vawn chauh a, ka ngaihtuahna a awm zawng chu, ka Nu taksa vawt tak, hmelṭha tak mai, engmah hre lo hmela hahdamna ka hmuh chauh chu a ni.


Ka chhungrilah, "natna awm tawh lohnaah a hahdam tawh a sin," tia min hrilhtu a awm a, "malsawna a ni zawk alawm," titu nen.

Mahse, ka lu um erawhin, "eng ang malsawmna nge ni ngai hi le? Malsawmna a nih chuan, ka dawn duh loh ber te zing a mi leh, malsawmna ka hriat tawh a zawnga malsawmna nunrawng ber a ni ngei ang," tiin min hrilhin, min vit ngut ngut bawk.



Engkim mai chu ka mit hmuh, ka hma zawnah a kal mup mup a, chhungkaw thlalak lai te chuan milem chesawn thei ang chauh hi ka ni tawh, ngaihtuahna ka nei lo a, an thusawi leh, midang min biakna te chu ka lu umah reng reng a lut thei hek lo.


Tlai Dar 2-ah ka Nu chu thlanmual lam kan pan pui a, Pastorin thlahna thu a chhamlai te chuan Rammuanawma tha ringin ka ding ṭawk ṭawk chauh tawh.


Thlahna thu ansawi sap sap a, kei erawhin sawi tur pakhatmah ka hre law.


"Ka hmangaih mangṭha aw! Natna awm tawh lohnaah chuan min lo hmuak dâwn nia," Ka Pain ka nu a thlahna ṭawngkam avangin kan chhungte mai ni lo, awm ve dang ho mittui chu a ko a, an inhnit zui hraih hraih hlawm.


Ni e, heta awm tam zawkte hian, eng angin nge ka Pa hian ka Nu hi a hmangaih a, a duat a, a dimdawih a, a nunhlui rapthlak tak, "anchhia " tia ka Nuin a sawifo ṭhin lak aṭanga a chhan chhuah tih hre chiang em emtu te an ni miau si a. Mittui kar aṭang pawhin ka Pa an lainatna chu hmuh hmaih chi rual a ni law.


Engtiang takin kawppui leh hmangaih, kumkhua atana thlah chu hrehawm leh nâ nge ni ang? An taksa peng, an kawchhung pakhat a ni si a. Ngaihtuah pawh ka ngaihtuah thiam lo.


"Nu, natna awm tawh lohnaah chuan thlamuang takin chawlh ang che. Ka Pa leh ka U, Hlutea chu ka lo enkawl ve tawh dâwn nia, min ring tawp mai rawh," mittui tla lo tura hlim lui taka Duata'n thlah a tumna chu, a tawp lamah erawh a hlawhchham tih aw thawp sup supah chuan a hriat theih.


"Anu, mangṭha aw," Hlutea'n tiin min rawn en chho va, kei erawh ka kâ ka la âng thei ve ta chuang lo, ka lei hi a tawt tlat a, ka hrawt lah kamtu awm ang maiin a khamin, a na ut ut bawk si!


"Lo ngaihtuah suh, ṭha takin ka lo enkawl ang," Rammuanawma zawkin nghet churh hian a rawn ti chhuak a, ka thawk ka lo chelh bet tlat thung!


Kumkhuaa atana ka nu lei chhung, pilril leh thuk tak, vawt tak maia an chhilh hnan lai chuan ka biangah mittui a rawn luang ta ngiai ngiai a, Rammuanawma bân hrawl leh sak tak chu nghet takin ka hmer ngat ngat bawk.


Mit chhing sawk ila, kham khawpa thaw la kawkin, harh chhuakin, engkim mai chu mumang ni se tih beiseina, beiseina hlawhtling ngai lo turin min tuam hlup hlup a, he mangchhia, mang rapthlak tak hi harh chhuahsan ka duh takzet zet a ni!


Thlamual aṭanga kan haw chho, in kawtah car ding a, car aṭanga kan chhuah rual a, ka hmel hmuh hmasak ber erawhin chauh a ti zualin, thawk minti hip let nghal kawk thei.


"Daddy..." Florence-i kan lam pana rawn pên vawh vawh chuan ka thaw a ti chham dâwn.


Rammuanawma ka bulah, min si chetin a rawn ding a, ka kawngah bawk a rawn chelh lehnghal run bawk


A hmelṭha tak hian a hma ai nasain chauhna leh natna minpe zual.


"Ruang rawn nan hrâm kan tum a sin le," min en miah lo, ka bula ding palian tak chu dak vawh hian a melh chho ralh ralh a, a nui sang bawk.


Rammuanawma'n, "eng nge i rawn tih Florence?" Bul zet a a tihna chu haider hmiahin, ka lam a rawn hawi ta chauh a.

"Dinte, pawi ka ti hle mai. Eng nge i an?" Dam diai a rawn tiin, "ka tawrhpui tak zet," a ti leh hnap bawk.


A rimtui hman na tak leh a hmelṭha tak hmuia hnawihsen sen vam hlar mai hian ka kawchhung a ti letin, kawmluah ang maiin, min luah tir mai dâwna ka hriat avangin, "ka ṭha," ṭawngkam pangaia chhan ka tum viau laiin, ka aw chhang nen, duh aiin a bul ta mah mah.

Rammuanawma min kuahna chu phelh sak ka tum a, ka naknema hmer salha thaw ri deuh hulhin, Florence-i kan hmaah a ding ve tih hre lo ang maiin min pawmkang nawlh, ṭanna hun pawh ka nei lo, zau takin min pên pui nghal pawk pawk a.


Ka Nu tlahna lama kalve ho leh naupang ho lah chuan hmuhnawm thlirin min thlir nghal vauh vauh tih lah ka mitsirin ka hmu reng bawk.


"Min dahthla teh," ka aw a chhan êm avangin a hre kher ang em ka hre law.


Thaw deuh hawkin, "che lo la a ni mai," thu minpe zet a ti hlukin, ka Nutei te inah chuan min pawm lut ta daih a, room a min luhpuiin, "che miah suh," khuma min nghah rualin a ti zui nghut.


Mit khap fak faka ka hmaa rawn ṭhu thla chu ka en zui kiau a.


"Florence-i emaw tu vang mahin i rilru i tih hah suh anf che, ka kutah engkim dah la, hetah hian lo hahchawl ang che, i mut a chhuak hle tih ka hria," a ti zui sup sup a.


Hnial ka tum uk chu, "min hnial hauh suh," zirtirtuin a school naupang thu a hrilh a, tih tur a tuk sak ang mai hi a ni.


Ding zui vutin, "mikhual leh inleng ka lo va chhawn ang," ka biang tawn tawnah chelhin ka hmui, ka ṭahna avanga hil ro tak chu a kutzungpuia tuai zauhin, dimtêin min rawn fawp zui vang vang a, a fawhnaah chuan thlamuanna, min hnemna ka hre thei bawk.

A chala ka chal chu siin, thaw ham hamin, "hahdam rawh Bawihi," tun ṭuma a aw chhuak erawh min ngaihtuahna leh ngenna a ri chhuak tel.



Ka thaw dep dep a, ka dang a ro zui leh ta halh bawk.


Pawn lam aṭanga an rawn auh leh takah chuan thaw zui hawkin a inla hrang ta vut a, "lo mu ang che," vawikhat pawh ka ṭawng lo, ka zawm loh hläu ni âwm taka ti lehin a kiai leh suk a, in herin room chu a chhuahsan zui pawk pawk bawk.


Room aṭanga a chhuak chiah chu ka hit nghal sung sung a, ka thaw chhuak ve ta ham ham bawk.


Tin, ka pasalin a sawi angin, engkim a ching felin a enkawl dâwn a ni tih ka beng awmna ka chian tlukin ka chiang hle bawk a ni.



"Ka lo lut thei em?" Florence-i a rawn dak de de. Ka thaw ve dawn chauh a.


"Florence, ka hahchawl hmasa thei ang em?" Ka lo ti hap, diktak chuan tunah rih hi chuan ani emaw a fanu emaw ka thik thei lo, ka nâ, ka kawchhung hi a chauin keimah pawhin ka ding nghet zo si lo va!



"Tihpalh, hahdam rawh," ka awmdanah ka be chak hlawl lo tih a hrethiam ve a ni ngei ang, nui var varin kawngkhar chu a khar ve leh mai bawk a.



Mahse, pawnlama Nu Mahlimi ṭawng ri, "amah chauh lu sun awm ang mai a," a ti ri chu ka hre hman, ka ṭah pawh a chhuak tawh lo, a ṭawngkam lahin minti na tawh hek lo. Kawngkhar chu ka en ngawt ngawt ringawt mai.


A sawidik alawm, keimah chauh hi lu sun ka ni lo tih chu; Mahse, lu ka sun a, ka nu ka chan lohnan ka nun zawng zawng, ka hmalam hun, ka vanglai, ka tleirawl ṭhatlai, tleirawl nun pawh hmang hman lova engkim hlan a, suala beitu ang hi an tam lo khawp ang.


Awm pawh nise kut ṭanga thliah tham leh, keiang bawka hringnun vanduai tak nei an ni ngeiin ka ring!
.
.
.

Ni a ral a, ka Nu kan thlahna pawh ni thum lai a lo ni ve leh ta, khawdang aṭanga kan chhungte rawn kal pawh tukkin zing lamah a ṭhen an haw ve leh ta hlawm a, Florence-i ngei pawh rinai takin ka ti dâwn nge, ka rin loh lam daihin a ṭawng duhin, ka tán hnawksakin a awm ngai lo.


Ni e, a chang chuan, thik ruk tura awm chang chu a awm ve alawm; Mahse, ka pasal hian vawikhat pawh ka rinhlelh leh hmuh hrehawm turin min awmkhum ngai miah lova, mi zawng zawngin mak antih khawpin pasal leh makpa nih a tlin em em thung!

Ka pasal nei mak an tih thu an sawi sap sap a, ka pasal an fak a, Doctor a nihna mai bakah, engkim mai midang chet ngai lova, a che ve vut vut te, ka laina te leh ka Pa a ngaihsakna, zahna leh ka chunga a che damdup zel an fak châng hian, ka lo chhuang ru veng veng zel a.


Kan hun tawnin zir deuh phei se chuan, "ka pasal a nih hi," tia i chhuang taka ka sawi chhuah hial a nia ka inrin tâk ni!


"Dinte, lo lêngkawi teh," ka Nu thlan tui kan pe zo, U Siampuii te leh ka cousin dang te nan ke a kan haw chu, Nu Veni'n an in tukverh aṭangin min lo au deuh lang lang a.

"Chaw ei a hun tawh hi maw le," Pa Tawna'n a lo ti ve zat bawk.


Nuih let sen senin, "U Siampuii lo han chho rawh u, ka'n kawi lawk ang e," khua a thim ṭan deuh tawh avangin Y.M.A lengkawm tur pawh anrawn kal khawm ṭan tawhin ka ring a, rei phei chu ka awm hman law.


Ka Nu anboral chiah chu, ṭhenawm khawveng, kohhran leh khawtlang hruaitu te, Y.M.A te hi kan chungah an lova ṭha tak êm aw tih hi ka hre chhuak.


Nula dang ang lo takin ka nulat lai pawhin, kohhran leh khawtlâng a inhmang ka ni lem lova, Y.M.A hnatlang leh kohhran ṭhalai hnatlang ka kal ve te pawh hi kut ṭang thliah tham lek a niin ka ring.


Inkhawm ve chang pawha, "e khai! Dintei chu i lo inkhawm ve teh miah elo?" An ti khawpa kohhran bel lo ka ni a, ka Nu leh Pa inkhawm taimak dan ngaihtuah phei chuan a awihawmloh lek lek zawk.


Mahse, Mizo nih hi a lo nuamin, Mizo kan ni lo ang tih hi a lo hlauhawm mah mah zawk, ṭhat ni chu dahṭha ila, chhiat tawh chiah hian Mizo nih nawmzia a lang chiang uar uarin, mite hi an lo va ṭha tak êm tih hriat chhuah awl tak a ni ringawt!


"Lo ṭhu teh, lo ṭhu teh," a kut huh a kawra tat ro nawk nawkin, "U Tawn, chawhmeh kha lo kang chhunzawm mai teh aw," a ti zui zat.


"A va mak sawk sawk tak e aw. Dintei te in lamah chhoh te pawh kan duh a ni lo'm ni? Chaw ei i la hman loh ni?"


"Kan hman chu a ni mai a lawm kha. Ṭhu teh," ka bânah pawtin an ṭhut thlengseiah chuan min pawt ṭhu a.


"Inpa nen hian engtikin nge in inngaihzawn ni?" A ti ta su su chu en deuh haw in, "chu ringawt chu maw?" Ka ti chhuak, a pawimawh hmel nasa si a, a zawhna chuan minti nui ta vur vur mai.


"Ni e, sawi teh."


"Ka hre mai tawh lo," ka ti ve mai, inngaihzawnna awm hek lo chu, khawi a mi nge maw ka sawi ang ni.


"I chiang maw? Mi pawmlai i ngaizawng lo tiraw?"

Nu Veni chu ka en deuh kawk, keimah ang bawkin, kan thusawi hrepha Pa Tawna pawh kan lam a rawn hawi a, "Veni.." A rawn khak vat.


"Ka hre chiang duh alawm, chutiang mizia i ni lo tih chu hre tho mah ila," a ti leh.


"Tunge sawi a?" Khawiah emawa a hriat ni lo se min zawt chiang dâwn lo. Nu Veni meuhin mi thusawi min zawh chian chuan a thu hriatna a ṭha tawk tih a hriatin, a beng ngeia a hriat tih ka chiang a ni.


A sira thleng dar, vaihlo leh zial lehkha a dahna chu la in, a mal chunga a dah a, zial chu zial zuiin, "i Nu thlân nghah tlai khan i Nu Sangpuii te nen kan lo titi a. Kan bulah Fawreni inti em maw ni (Florence-i)kha rawn ṭhuin inpa nau tiin kan lo hre si a, i Nu Rami'n, 'nangni unau hi inhmelṭha a nih hi, thlah pawlh te pawh in ang dawn dawn alawm, i U lah nise a palianin a hmelṭha si,' a lo ti luam a. Fawreni chuan, 'Mapuia inhria em ni?' A rawn ti ta daih sia, keini lah inpa kan lo sawi si a, 'Dintei pasal hi i U a ni nange?' Ka lo ti vat maw le," ti siam siamin min rawn en a.


A thusawi chu uluk deuhin ka lo ngaithla ran bawk.


"Ni nang, a nupui hlui ka nia' a ti ve mai a, mak ti vuai mah ila inzawh zawm chi niin ka ngai lem lova, 'pasal hlui nupui te Nu a borala i rawn kal vang vanga i fel hle mai,' ka ti ve leh mai a, 'fate pa te a ni ve a,' a ti tha mai si a. I Nu Rami lahin, 'ka'n Dintei chuan tlangval emaw a neih tih laiin, pathlawi zûnin a lo phuar vang a nih chu a pasal neih kan lo hriat reng reng loh ni,' tiin a rawn fiamthu zui a. Fawreni bawk chuan, 'in nau hi rinaiin a mit a fingin, a themthiam a niang, pawmlai nei pawh a zûnah a uai tir thiam tlat a,' a rawn ti ta mai a, kan bangbo viau khawm mai.


I Nu Sangpuii'n, 'a ni dâwn em ni? Dintein chutiang a ti lo ang,' a tih lah khan, 'rin a har renga sin,' tiin min thawhsan ta daih hlawm a, kan mang a angin mak kan ti alawm. Bakah, i Nu Rami hriat tura a sawi kha pawi ka lo ti lutuk a, a mizia chu i hria a, ni tam ral hmain Zokhawthar kawchhungah a darh leh vek mai ang tih ka hläu maw le," a ti leh siam siam, kei erawh engtia lo awm tur nge la hre lo ang bawkin, engtia hrilh a, insawifiah tur nge ka hre hek lo.



"An fa chu kum engzah nge ni reng reng?" Nu Veni bawkin ka ngawih tak rengah chuan a rawn ti leh a.


A ruka thaw chhuak ham hamin, "kum 1 leh tlem vel a ni ang," ka ti sep chu a zial zial lai tawp meuha min rawn enin, "nanghi, a naupai laiin an pa i ngaizawng tak tak lo tiraw?" A rawn ti chhuak phawng.


"A teuh lo êm mai a," lo ti vatin, "nau a pai tih an hriat hmaa inṭhen alawm annih," inthiam lo deuh taka ti zui leh vatin, "pawmlai nei a ni miah lo a nia," ka ti leh zat, min ring lo ang tih ka hläu lam pawh a ni lo, pawmlai nei kher kher chu ngaihzawn tinah hian ka tin lo ve êma tin ni.


Ka Nu leh Pa diktak aṭanga nunhlui mawitak nei ka nih loh avangin, eng ang taka hrehawm leh nâ nge ka hre chian lutuk vang te pawh a ni mah nâ!!!!


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:54 pm

{ LOVE AFTER MARRIAGE}

By

Floria Laldansangi


Chapter < 27 >


RAMDINSANGI..POV


"A fa chu a rawn kalsan tihna em ni?" Nu Veni bawkin a rawn ti a.



"Damdawi inah a awm a," ti sepin Pa Tawna'n chaw ei a siam rik rak rak tâk avangin ka ding zui ta hluai a.



"Ei ve ta che Dinte?"



"Ka ei tawh alawm, thlân tui pek hmain kan ei tawh," ka nui a.


"In ek a va upa dâwn ve," Pa Tawna chuan min fiam zui.


"I Pa zan a mu thei maw?" Nu Veni'n a rawn ti a.


Ka Pa mitmeng ngui ta duai chu mitthlaah rawn lang zatin, ka lu ka thing mat mat, "ka nu kal aṭangin zan hi a mu meuh lo," ka ti chhuak sep. Ka ti tak tak bawk, ka Nu tel lova mut chu hrehawm a la ti hle si a.



"I Pa khua a har tulh tulh dâwn si a. Nangni unau lah Aizawl lamah in awm a ngai tawh dâwn bawk si, a khawngaihthlak awm hnu hnu dâwn khawp mai," Nu Veni'n a rawn ti leh deuh vawng vawng a, "nangni nupa te hian awmpui ula," a ti leh zat. Ka lo nui liam ta mai a.


Mahse, chu erawh ka duhdan a ni reng, Aizawl lamah in luah sela ka hnaihah tal awmse ka duh takzet.


"Ka haw chho ang e, chaw ei rawh u," tiin kawngkhar lam ka pan a, "chaw ei tui u."


"Kan rawn chho ang keini pawh," Pa Tawna'n a lo ti ve zat bawk.


Nu Veni thusawi chu ka ngaihtuah zui rauh rauh, a sawi takah chuan ka Nu thlân tui kan pe tur kal lamah Nu Dikin, "Dintei chu Pasal man dan i thiam riau antih kha aw," tia min lo fiamna kha ka hre chhuak lo thei lo.


Nu Rami te leh Nu Diki te inkawm ho phei chu, "miin ansawi," tih mai mai pawh an bazaar ṭhutna hmunah an thutak khuk pui vut vut a, ha hîpa sawiin, anrin thunen lam thubelh ṭeuh hi an ching bawk si.


Tunah pawh khawi khawiah emaw chuan pawmlai nei, mi pasal duhtak chhuhsak a, neihsakah ka chhuak fel dêr tawh âwm si a.


"Koh i va hre thei lo êm?" Phu deuh zukin, "min ko em ni?" Ka ti vat.

"Nu Aihnuni te inkawt aṭang khuan maw le ka rawn auh chhoh che le," Mapuia chu a nui huk huk a.

Za vak lovin ka lo ṭhen sak a, "i ṭha maw?" A rawn ti ṭha leh.

Lo bu nghatin Mapuia chu ka melh chho ralh a, "Mapui...." Ka ti zet tawh, ka kâ chip lehin, "eng nge ni?" Tia min rawn en chhukna chu lo melh chho ve leh ralhin, "a ngai leh lo," ka ti ta sep a.


Ani bula ka lungawi loh thu thlen chiam pawh a dik berin ka hre law. A U nena kan inkar a nih bakah, ka thinrim dâwn a nih chuan ka pasal chungah inhri thla tur ka ni zawkin ka inhria.


"Naktuk chu inpain a zui thla dâwn em?"

Naktuk hian Nu Mahlimi te haw thlak an tum tawh a, Rammuanawma hian engmah a la sawi ve hauh lo mai.


"Ka hre miah lo, engmah a la sawi ri lem lova."


"Nangte chu i chhuk lawk nang tiraw?"


"Chhuk mai lo ang, theih phei chuan nau neih dawnah chhuk chauh ila ka duh," ka nui ver ver chu ding meuha min enin, "nau i pai a?" Mak a tih hmel lutuk chu en let zawk heu chuan, "i hre nange?" Ka ti let haw.


A hriat ka rin tehlul, a unaunu hian engmah a hrilh lo nge ni?

"Ka hre hauh lo mai," a ti deuh sup, "in inṭhen leh vat ka lo ring a," za vak lo hian a ṭhensak, kei pawhin ka rindan alawm, tunah pawh kan awmdan tur hi ka sawi lawk ngam chuang miah lo. Ka Nu ber a awm tawh tlat si lova.


Kan in zawn kan thlen chuan lengkawm tur tlem an lo awm tawh a, zai erawh an la zai ṭan lo thung, ka Nuteii te inlam chu kan tlang zui nghal a.


"Dinte, kha Mapuia damlai lu i sun tir ringawt tih kan lo hria a, naktuk chu thingpui rawn in tehse ka dawrah, ralnan che aw Mapui," kan lut tur Nu Diki'n Mapuia nen min rawn au lang lang.


Kawngka bul maia dinga hawi letin, "a reh tawh zawk alawm le Nu Dik le," Mapuia chuan fiam letin a nui zui huk huk. Keipawh chu ka lo nui liam ve mai bawk a.


Mahse, ka hawisawn tur, inchhung a ṭhu, kan lam rawn hawi ngurtu tukverh aṭanga ka hmuh chuan ka ip nghal chawih thei.


Tukverh darthlalang chu a en puak chuai mai ang tih hlauhawm khawpin min rawn en ding a, a mit a tih zim zui sulh phei chuan a ngainatawm loh zual takzet!



Chutiang bawkin, keipawhin a bula ṭhu hmeichhia ka hmuh rualin melh na zeta melh lui chuan, ka hawisawn vawh bawk a. Khati zat ṭhutna awlah a nupui hlui nena inhnaih taka an ṭhu chuan ka thin a ti rim zualin, ka thawk a ti harsa takzet bawk!


"Dinte...." Ka inher zawk, ka pên lut lehnghal a, ka cousin, ka pa nau fapa Lunglei aṭang rawn chho ve, Mahera chuan min rawn zui lut pahin, "naktuk chu, Rihdil chu i kal ve dâwn em?" Ka lu ka lo thing vat, Rammuanawma min enna erawhin ka taksa a ti za mer mer, an ṭhut lohna lam, room lama ka Nutei te sofa hunna lam chu ka pan ta daih bawk a.


Rammuanawma te pawh lengkawm tur nula tlangval ṭhenkhat nen, amah si lek leka ṭhu a nupui hlui Florence-i te ho nen an nui dur dur a, va pawh a ṭulna pawh ka hre law.

Ka kawchhung lah chu thinrimnain min hnawhbet zual ṭun bawk a.


"Kal lo ang, Duata te ho nen chho rawh u," ka ti bul hlak chu, "i thinrim em ni?" Mahera chuan min en deuh hawin, ka chal rawn khawih a tum a, ka lo vai sawn vat, ani aiin kum 1 chauha ka upat avang hian ngam pawh min ngam viau.



"Rim nang. A hrim hrimin engtia kal nge intum? Lalduata'n Bike a nei ve si lova," Rammuanawma min en ngur na avangin ka kawchhung chu a khur ru der dera ka hriat hrep chu ni!


"Pa Tlana'n a Bike hman tir a phal alawm. Pa Mamuana'n a motor pawh a hman theih thu a sawi tho a, minzui ve mai la, intih harhna pakhat a ni ve mai a," a nui vur vur, kei erawh ka hma zawna ṭhu kan khaw tlangval leh nula ṭhenkhatin, "in inngaizawng ṭhin lo'ng maw?" Tia Rammuanawma leh Florence-i an fianna chuan ka ngaihtuahna zawng zawng a luah khat.


Anchhanna tur chu an mahni ngaihsak lo ang a langin, ka ngaithla ran a, "ka fanu Pa alawm," Florence-i awlsam taka a tih rualin an lam ka en vat, Rammuanawma mit leh ka mit a intawng sak bawk a.

Florence-i chuan ka awm ve lo ang mai a nuisangin, "mahse, kawppui hran ve ve kan nei tawh a, a vanduai zawkah ṭang mah ila, Daddy erawhin Dintei, nula fel tak a nei a, kan fanu tán pawh nuhrawn ṭha tak a ni dâwn tih ka chiang, ka lawmpui hle bawk," ka lam a rawn melh ralh bawk a.


Nghet lutukin ka lo inhum ruh, kan inlengte nui hmel pawh chu a zat vang a ni tawh hlawm lo tih ka hre thei, boruak inthlak ta hak an inhre ve vekin ka ring bawk.

Rammuanawma chu tho vutin, ka lam rawn pan pawk pawkin, min si cheta rawn ṭhuin, tawlhsawn vat ka tum chu hnehsawh lutuk hian ka khelah a kut rawlhin a chelh zui a, alama min pawt deuh hrawkin, "ka ngai che," thutak zet hian anti bul nghut. A aw bul zetah chuan min ngai chiah em tih pawh ka hre lo.


Bakah, min ngaih thu a sawi thut chuan chet nachang minti hre lo, a ṭawng hrepha ho an lo nui huk a. Keimah tak pawh chuan mit khap fak fakin ka en chho haw ringawt bawk.


"Dinte, i pasal neih kan hriat khan mak kan ti khawp a, pasal lah chu i nei ṭha bawk si, nupa inhmeh tak inni," U Rinpianga'n a rawn ti zui ta hliai.


Florence-i thusawi avang khan boruak a laih zawh vek bakah, Rammuanawma awmdan teh thut chuan minti hamhaih tlâng a ni ang.


Rammuanawma lahin tuma lam hawi tum tawh lo ni âwm fahranin min en tlat bawk a, bek za mer mera U Rinpianga chu za vak lova nuih letin, "nia maw le," ka ti ta sep, ka lungphu hrep lah chu, a rang lutuka thawk tir ngaihna minti hre lo.


"In inngaizawng rei ve em?" Naom-i, kan khaw nula fel leh hmelṭha ka tih ṭhin em em hian a rawn ti a, a nui sen sen bawk.



Chu zawhna erawh chu chhan ngaihna ka hre lo, inngaizawnga innei kan ni tlat si lo va.


Florence-i a rawn nui ri hak, tuh elna a ang mah zawk, a hmelah erawh alang chuang miah lo, "kei pawhin ka hre chak khawp mai," Rammuanawma a rawn melh ralh a, Rammuanawma erawhin minla en tlat ṭhung, min en ral ṭhak a tum a ni ngei ang.


Mahera thleng chuan hre chak taka min enin, kan lam anrawn hawi tâk ṭhapah chuan minpuih beisei takin Rammuanawma chu ka melh chho ta kiau a.



Ka mitmeng talbuai ta chuan a nuih a ti zâ a ni chek ang chu, rin loh deuha kiai ta suk suk a, midang ṭhutna lam hawiin, min rawn en leh, "school naupang a nihlai aṭang tawhin ka ngaizawng tawh alawm," a ti chu ka meng kawk nghal mai.


"Tak tak em ni?" Midang aiin mak ka tih hmel zawk.


Mak ti taka ka enna âng hau chung chuan midang awm ve ngaihsak lo zeta mawi lutuk a nui ri sukin, min rawn fawp zauh a, ka hnar a piai zauh chuan, "ni e, chutihlai chuan ṭhiante karah pawh lalber ni ṭhin, thu duh tak hmeichhe naupang i la ni," zawi tak, fiah tak si han a ti sup sup a.


Ka za nghal er er thei, ka thinrimna te kha vawmbo daih ang maiin an bo ta daih a, at hmel zetin ka nui chhuak ta var var.


Midang ho lah chuti tho, lo "ehhh" ve dualin, an nui zui hawk hawk hlawm a. Laizeta kan pasal min enna mitmu dum fiah tak, thük tak leh dam thlup chu en chho karin, "i la hria amaw?" Mak ka tihna, ka hlimna te chu ka thup seng ta lo. Engtin nge midangin min en tihlah ka ngaihven hman hek lo.


Ka pasal mitmeng de va va chu hawisawn san phal chi a ni tlat lo.


Ṭawngkaa min chhang ta lo chuan mawi tak hian a nui ta suk ringawt a.

Midangin min lo fiam zui deuh nak nakna lam chu lai ru taka hawiin, Florence-i läwm lo hmel rum leh ṭap lek lek hmel chu ka va hmu fuh leh chiah bawk. Ka pasalin buaina lak ata min chhanhim a, a nuipui hlui hmaa a nupui ka nihna a nemnghet chu ka läwm viau rualin, Florence-i mitmenga natna leh thinrimna chuan ka lawmna ata ka hriatthiam theih loh nuam lo tihnain min tuam zui tlat thung!


"Inhlim dar dar viau nâ chu, lenkhawm zâi i rel dâwn hnai ila, dar 7 a ri mai dâwn," kan khaw Y.M.A president Pa Mathanga'n a rawn tih luh takah chuan tho sap sapin, "ni e, zanin chu Dintei pasal nei kan lo hlimpui a ni, i chhuk ang u," Pekmuana'n a ti ve zat.



Thawh ve mai ka tum a, ka khelhah Rammuanawma'n la chelhbet tlatin, "kan chhuk rual dawn nia," a ti zui sup.

Mahera nui vur vurin, "ka chhuksan dâwn che u," tih leh a ding ve zat a. Ka Pa Hlutea'n a rawn nawr lut ve chiah bawk.

"Muana, naktuk i nu leh pa te haw thlak antum tawh si a, nang eng nge i awmdan tur te hi ni le?" Kan bulah a rawn nawr ding dat.


Ka lo ngaihtuah ve reng a, mut hunah ka zawt ang ka tih rilruk a nia.


Ka khelh a chelhna kut chu la sawnin a ṭhu ṭha a, "tunkar te chu kan awm tluan law law ang chu," ti supin min rawn melh, ka lo en deuh haw thung.


"Mambawihi nen inchhuk rual mai ang chu tiraw?" Ka Pa bawkin a ti leh. Chhuk mai ka la tum hleinem le.


"Thla 2 emaw thla 3 emaw tal ka awm ang chu. Bakah, Aizawl lama awmthlak dan te sawi ho ṭha te i ti lo em ni?" Ka tih laiin Rammuanawma chuan min en leh run tawh tih ka hre thei. Awmrei ka tum a ti deuh nge maw ni?


"Chuti chen chen a ni thei nang, pasal nei tawh i ni tih theihnghilh suh. In pui i nau nen kan lo luahlum ang e. I nu hetah kan phum ta rau rau a, Aizawl lama chhuk pawh ka rilruk ta lem lo," a ti leh churh churh chu ka lo thaw ham ham.


Ka rin lawk a nia, tukkin ka Ni te haw thla tur pawhin, "i Pa kha be deuh teh aw," a tih a tih chhan niin ka hria.


An mahnia awmtur chuan an ngaihtuahawm lutuk. Bakah, ka Pa lungleng hi thlanah te a lo zuk innawr thla reng mai ang tih a hlauhawm.


"Hlutea nen chauh chuan inkhua a har lutuk ang," ka lo ti ve ṭalh chu a nui sun sun ringawt a.


"Kan bulah te rawn awm mai ula. Ka Inah kan awm ho ang a a ni mai alawm," Rammuanawma chu rang lutuk hian ka en, ani erawhin ka Pa a en daih thung.


A fiamthu emaw ka ti dâwna a hmel lah chu a thutak run ang lawi bawk si.



"A khaih! Naupang ho nu hlata ka awm chuan a lungawi lo mai ang," ka Pa chu a nui vur vur. Rammuanawma pawh chu a ṭhen ve suk tho, hrethiam awm ang hrima a awm ni?


"Kei chu Aizawlah min zui thla ula ka la tifan," ka ti ve leh a.

"Bawihi..." Rammuanawma'n a rawn ti sup, a nia lawm, engtin nge an in enkawl ang ni?


"Inhnaih chuan inpuih leh in tlawhpawh te a awlsam a," ka ti leh niah niah. Hlutea nen chauha awm tura ka ngaihtuah chuan ka thla a muang zo lo.


"Pasal neih hnuah nu leh pa an hnaih lutuk ngai lo ve. Nu leh Pa-in ngaina lutuk mo ṭha an awm ngai lo," nui chunga a ti chu ka läwm vak lo, min kan ngaihtuah ve em em a.


Rammuanawma chu a ding vut, a palian si, a chet thut hian a bul vel a mi te a ti mangang ṭhin tih hi a hre lo em maw ni?


"Lêngkhawm ka zu ṭawiawm ang e," tih leh min rawn en zuk, a pênsawn nghal pawk pawk chu a ngaihna hre lo tak hian ka en zui haw ringawt, a mak teh vut êm a ni.


"Inpa chungah lawmthu sawi kan ba nasa hle mai," ka pain a rawn tih tâk supah chuan a lam ka hawi a.


"Nangpawh, in awmdan tur te i sawipui tawh em?" A tih zawm zat.


Ka lu thingin, "sawipui chu a ngai ang," ka ti sep. Contract zo lova awmhran chu a tan a fair lo viau mai thei a ni. Atan engmah tihsak lah ka nei ve bawk si lova.


"I ṭhen thei ang tih i chiang amaw?" Min rin hmel viau loh.


"Engpawh i thuthlukna ni sela, i tan leh i naute tan khan ngaihtuah hmasa ber zel la ka duh. Tin, keini lamin i rilru tih hah tir tawh suh. I nu ber a kal tawh a, i nau te nen te chuan kan in enkawl zo ve lutuk ang," a ti leh dap dap a.


Ṭawng ka tum zuai hnuah midang an rawn luh tak avangin chip leh ta zawkin, inleng dang chu kan lo chhawn ta zawk a.


"Dinte, i thingpui hâng siam in a va chakawm ve," Pa Tutea a rawn au lut ti tih. Lo nuih var varin, "lo ṭhu rawh u," tih leh thawh ka rual, ka lu rawn hai ta thut chu ka ṭhu thla let hnawk


"I ṭha em Mambawih?" Ka lu chu ka dawm vang vang, ka lu hai ta muai muai chu dawm vang vangin, ka luak a rawn chhuak ta ut ut bawk am

"I U Muana zu ko rawh Hlute."

"A ngai lo, ka mu lawk ang a, a reh mai ang," ka ti vat, thawh mai ka tum pawh ka ding zo ta reng reng lo.

U Tutea leh Pa Kawla'n min rawn pui vatin, "i raino lu hai a ni ang. In boruak tawn vel nen," room a min hruai luh pahin, Pa Kawla chuan a ti zui a, a ni ang, zan ka mu mumal si lo nen, ka thisen tlem vang te pawh a nih ka ring ka lu hai ta muai muai reng zel hi.


"Ka ṭha a nia, reilote ka'n mu ang a, ka zia mai ang," khuma ka mut ruala tiin, chet pawh ka che sawn peih tawh lo, ka mut dan ngai ngaiin mit ka chhing zui tlat bawk a, ka men rualin ka luak dâwn zelin ka hre tlat.


Mit chhing tlata ka mu chu, rei loah ka muhil nghal a ni ngei ang, taksa lum vung vungin min rawn kuah zui hlu hlu tih ka hriatin ka harh ruai ruai a. Ka la meng thei chuang law.


"I lu chu a la hai em?" Ka harh tih a hre rang thei lutuk chu a mak zawk, ka chesawn hauh si lova.


A lam hawiin min kuai her a, a âwah min kuahbeiin, ka hnungzang a chul nghal hliau hliau bawk. Thaw ham hamin ka nek zui ve ṭalh ṭalh a. A nui nghawr dat dat, a kut hrawlpui a ka hmai tlâng rawn zut zui riak riakin, "i nu avangin engmah a danglam lo tih i hria ang tiraw?" Hniam ruih hian a rawn ti sup a.


Mit ka la chhing tlat, a âwm khauh tak erawh a hma aiin ka nekna zual thung.


A thaw chhuak leh ham ham a, "rilru dang i pu tih sawi hauh suh," a ti leh sup. Ka khabe a chawi kang zui a, ka men a, a mita ka en ngei a beisei tih lantirnan ka khabe chu hmet salhin, ka hmui a ti kau zui tiar bawk.


Muangchanga meng ve ta nge ngein, ka pasal mitmu dum tle tak mai, thutak nguk chu en let karin, ka thawk ka chelhbet a, "Bawihi, eng emaw tal sawi la," a ti leh.


A aw chhuak leh a mitmengah chuan Rammuanawma ang lo takin ka rilru ka thlak a hläu ve ni awm takin ka hria.


"Mahse, kan inzawmna chu paper pakhat ve mai a ni tih i hria alawm," zawi taka ka ti ta sep chu a phun hluk a, "kha inzawmna kha theihnghilh ang che," ti hlukin, ka hmuiah na tak hian a rawn fawp zui ngawng ngawng, a läwm lohna ka hmuiah a lantir ni maiin ka hria.


Thaw chhuak hrawihin, "hmeichhe dang ka nei ka tih loh chuan ka nun ata hi i thua chhuah tum buai hauh suh, a thleng ngai dâwn lo," nghet churh leh thupe zet hian a ti leh sup sup. A ṭawngkam chu läwm viau tur ka nih laiin, engtiklai pawha thlak theih ka ni tih ka hriatna chuan lawmna famkim min neih tir thei hauh lo. Ka dinhmun a sawifiah viauin ka hre bawk.


Mahse, mahni inring tawk lo ang taka lan erawh ka la duh chuang bik law, ka ngawi zui ta rauh rauh ringawt a.


Ani pawh chuan min kuah ṭha sut sutin, "muhil tawh rawh," a ti leh sup. Eng thu mah pawh ka sawi hman lehpek lo, a chang hi chuan zawhna min zawt nge ni a, a duhdan min hrilh zawk tih pawh hi ka hrethiam lo.


Ka pasal kuahna lum vung vung leh thlamuan thlak tak chuan min zêm lehnghal chiai chiaiin, ka muhil lehnghal mai a ni ngei ang, rei loah engmah ka hre zui lo nghal tlat mai!
.
.
.

Nun pawh a pangin a kal ve leh zel a, Rammuanawma pawh ka tel lova Aizawla haw duh miau hek lo, kar 2 dâwn lai kan cham leh hnuah Aizawl lamah kan haw thla ve leh ta nge nge a.


Ka Pa lah chuan min zui duh ta mang bawk si lo.


Engkim a pangaiin ka hria a; Mahse, nitina Florence-i te nufa hmel ka hmu fo erawh tuma hriat pui loh vin hne chang leh nin chang chu ka nei ve ṭhin.


Pasal te nupui hlui, rawn lut chhuak hmuh reng chu khamawm ve tak a ni. Mahse, a fanu Pa in leh a Ni in a nih miau avangin engmah erawh ka sawi zui lem lo. Bakah, Rammuanawma berin awm ve ang pawhin a ngai miau lova.

Mahse, Rammuanawma mizia erawh a hma angin ka lakah thutakna a nei tawh lo tih ka hrethiam a, ka haider lui ve ta tlat thung. Ka fa pa tur a ni a, ka hun neih chhunga min hmangaih tura siam chu ka tum rilru ve ṭan bawk. Inrin tawkna tam tak nei lo mah ila, min hmangaih ve theih rinna chen erawh ka fa piang tur avangin ka nei ve deuh.


A ni tel mai chuan Rammuanawma chuan min hlat tial tial a, min ngaihsak viau siin, chhungrila min hlat rukna chu ka hre thei.


"I dul hi rin aiin a lian lo," U Hnemi'n a rawn ti nui vur vur.


Ka dul hi lian lo ve tak chu a ni, Pathian zarah thla 8 chu ka ni ve dêr mai a, mi thla 4 leh thla 5 vêl dulnen a inhen tlat lawi sia, mak ka tih thu ka sawi ve lahin, "ṭhenkhat awmdan alawm," min tihsan et zel lehnghal. Bakah, ka pasal Doctor zawk pawhin, "i ṭha," a tih miau chuan sawi theih vak ka nei der lo.


"Nizan inpa a duty em ni?"

"Umm, damdawi inah anbuai leh a nih hmel," ka ti sep. Damdawi inah a awm lo tih chu ka hrereng, khawiah nge a riah ang tih rindan ka thiam rualin, ka ring ngam chiah lo bawk.


A thil tihlai chawl meuh a min rawn en vang vangin, "Dinte, sawi chu ka duh viau lo nâ-in, Florence-i te Delhi chhuk antum tho a, ka sawi mai mai ang. U Rammuana leh Florence-i te nufa hi an hmu dun ta fo a nia, i hriat pui em?" A rawn ti sa sa.


Ka thawk rang takin ka lo chelh nghal vat, ka vawikhat hriatna erawh a ni chuang hauh lo.

Ka chungah a sual lova, min ngaihsak ngaiin min ngaihsak reng bawknen, rinhlelh tur pakhatmah a awm lo chung hian, Florence-i te nufa nen an hmu dun fo tih erawh ka ṭhiante mai ni lo, ka cousin te kâ aṭang pawhin ka hre ta fo bawk.


Bakah, tukkin pawhin Jessica-in nimin Millennium lama Betty-i thawmhnaw tur an endun lai ni ngei tur thlalak min rawn thawn bawk a.


Engkim hi ka hre ve, ka hmu ve bawk. Mahse, ka pasal berin engmah a sawi loh a, ka lakah a kâ a chip tlat miau chuan tih theih ka nei tlat lo, zawt eng ang mah ila, ka zawt chhuak dâwn tlat lo va. Ka mit ka tih del luih a, ka beng chhut ngawn luih bak tih theih ka neiin ka hre tlat lo.


Mipa puitling, fing leh rilru fimtak pu mi a ni a, eng nge dik a, dik lo tih thliar hrang thiam a ni bawk.


Tin, Betty-i a lo ni leh zelnen, a fanu a ni a, enkawl leh an mamawh pek chu a tihtur ah ka ngei ve bawk. Mahse....


Ni e, chhungrilah erawh "'mahse" tih hi a awm lo thei lo, ka pasal a la ni miau a.


"Ka Ni hi a awm em le?" U Hnemi ka chhan hmain Florence-i bawk chu a rawn lut.


"Awm lo, an nupa in an chhuak a nih kha," U Hnemi'n a lo ti vat, kei erawh ka coffee in lai ka tem zui hlek.


A chhuak ve leh mai dâwn emaw tih laiin, "Dinte, i nau neih huna kan awm lo tur chu a zia lo hle mai. Bawihtei nau tur han hmuh hmasak te pawh a lawmawm dâwn nen. Mahse, kan rawn let vat chu ka ring, Bawihtei hi han dam ṭha sela," ka hmaah a rawn ṭhu thla a.


Za vak lova lo nuihin, "nia maw le," ka ti liam puat, ka chungah sual em em lo mah se ka pasal hmeichhe hmangaih tak a nihnaah biak ṭhat chu har tak a ni, biak erawh ka be chhe ngai chuang lo.


"Dinte, inpa hi i ring em?"


Ka melh ta kar a, nui chungin, "ring e, rin loh turin a awm ngai em ni?" Ka ti chu a nui hak.


"Ka rilru i hrilh che ila engtin nge itih ang?"

"Eng thil nge?" Tih melhin ka melh.


"In kum 2 contract tawp hun ka nghak' ti ila engtin nge i ngaih ang?" Florence-i thusawi chu a fiamthu a ni ang tia ngaihsak luiin ka nui liam mai dawn a; Mahse, a mit leh hmel thutak zetah chuan nuih liamsan chu a har hret thung.


"Florence, i mizia a mawi lo êm mai a," U Hnemi'n a lo ti vat, Florence-i erawhin nuisangin min en ran thung.


Ka inhum ruh a, ka nui lui ve dawn ngial a ka thei tlat lo, "eng nge i sawi awmzia?" Ka ti chhuak sep bawk. Nge ni? Rammuanawma hian thutiam a lo neihpui zawk.


"I hria alawm, ka pasal a ni ṭhin tih leh, a nupui diktak, a fa hrinsaktu ka ni tih chu," awlsam deuh hian a sawi chhuak a, kei erawhin a thusawi chu ka la ring ngam chuang miah lo. Pawmlai nei a ni tih a hria a, a fa hmathehin min ṭhen hran a tum tak tak ang maw? Bakah, a duh loh va a kalsan tawh mipa a ni si a.


Nuihluih ka'n tum lui leh ngial nâ-in, ka hlawhchham ṭhak zel.


"Nizan....." Nizan a riahbo na hre chak tak si, hläu ru deuh si a ka tih sep laiin, "ka bulah a awm, rawn hrilh che ka tum a, a chauh thu leh inhauhpui che a duh loh thu a min chhan avangin ka rawn hrilh ta lo che a nih kha," a aw ki chu vawikhat pawh a danglam lo, a dam diai a, mahni inrintawkna in a khat bawk!


"A nih tak chu," thaw chham lek lekin ka ti chhuak sep.

"Kan inhau ngai miah lo," ka ti leh sep. Sawi pawh ka tum lo, ka lei ka veng hman lo a ni mah zawk.

"Ka hria alawm. Hmeichhe rai engtin nge a inhauh pui duh ang ni," a ti liam leh puat.


"Hnemi zanin kha ka Pa te nupa pawh anrawn ei dawn aw," a ding zui a, "Delhi kan awm chhungin i inhmangaih tir thei ang chu," min nuihzatna ni awm tak chu kei hmeichhe raipuar thinchhia hian ka ngai thei ta ṭhak lo.


"Ka pasal nena kan inkar chu kan nupa khum chungah ka sawipui mai ang. Min hmangaih tura ka siam leh siam loh pawh," chang fal hian ka ti let ta sak sak chu za vak lova nui luiin, "dik lo taka chuhpui che ka ang mai dawn alawm," a ti ta daih lehnghal a. Min chuhpui ni duh si lovin, mi pawmlai a beisei reng tho si alawm le.


"Zanriah ei hunah kan inhmu dawn nia," tiin a pen chhuak nghal vawh vawh chu inhum ruh lutukin ka melh ta ngawt ngawt.


"A va han nasa tak aw, angel hmelpu chungin thinlung setana a pai a nih saw. I ṭha em Dinte? Inpa hrim hrim pawh nizan chu ngetia riak chhuak leh nge maw a nih le? A riah chhuah a piang lah hian a Nu hmel hi a hlim surh zel a, Pu ber hrilh rawh, a zia lo êm mai," a rawn ti hlak hlak.


Mit chhing sawka boruak hipin ka thaw chhuak ham ham a, ka dul chu dawm vang vangin, ka rilru te tein, "Chantawka lungawi a har ang bawkin, hrilhfiah theih loh natna hian thinlungah sernung a siam ṭhin' ka nu-in a tih ṭhin kha ka tawngbua niin ka inhria," ka ti zui sep sep bawk.


Ṭap emaw, na ngut ngut tur ka nih laiin, nat ngaihna ka hre tawh lo, ka Nu boral aṭang phei chuan mittui hi ka nei tawh lo ti ila a dik ang, a hul hak tawk zawk.


"Dinte, ka sawi chu i hria em? A rawn kal zing lutuk te hi khao rawh se," a ti leh tan tan.



Za lo zetin ka nui lui a, ka coffee in zo chuan, "a fanu nu a nia, fa annei dun a, a tihtur a ti a nih hi," ka ti zui sap sap.


"I â êm mai, i thikthu te hi alangin tichhe ve rawh hian," a ti leh hliai chu ka nui liam ta ringawt a. Tichhe ringawt ila, engah a lo ngaih si loh khan ka inti mualpho mai mai. Ka duh bik theuh lo.



"U Dinte...." U Hnemi nen chuan kan hawi vat, Ely-i rawn ṭap lut chu mak ti zet hian ka lo en a.


"Eng thil nge ni a?" Min rawn kuah ta chawih mai chu min ṭhawng lutuka chet nachang pawh ka hre lo.


"U Dinte, khawngaihin kanpa hi min biaksak rawh. Inṭhen ka duh lo," a lu a thing nawk nawk.



U Hnemi pawhin Ely-i ka awma ṭap ta mai chu mak a ti a ni ang, a sa chanlai chawlin min en hau mai. Keimah tak chuan mak ka ti lehzual ṭawng nachang pawh ka la hre lo.


An nupa an inhauh a piangin a rawn tlân tau ṭhin. Mahse, vawikhat pawh min be ngai lo thung.


"Inṭhen ka duh lo takzet," a ti leh nawk nawk, thaw chhuak ta hakin, "engthil nge thleng a?" Ka kuah let ta hle hle a.


U Hnemi'n min chhuan hmel deuha min enin a lo nui ta seih, ka namsawn a ring deuh em maw ni?


La ṭap zawih zawih chungin, "ka.. Ka..naute ka chhiat thu ka zep a, nau ka pai leh thu ka hrilh a; Mahse...." A riat nawk nawk, a thusawi te chu hriat a har takzet.

A naute chhiat kha a tirin a hrilh nghal lo chu mak ka ti viau.

"I hrilh nghal emaw tia," ka nu boral lai vel a ni avangin ka lo ngaihsak lutuk lo a.


A lu a thing mat mat, "tunah hian nau i pai lo tihna em ni?" U Hnemi pawhin a rawn ti vat.


Inla hrangin, "inṭhen ka hlauh luata dawt ka sawi alawm. Kan naute ka chhiat si a, min kalsan ka hläu a lawm," a mittui a tla zawih zawih.


Ka kut chu rawn chelh nawk nawkin mittui nen min en a, "minpui rawh U Dinte. Kanpa chuan i thusawi a ngaithla ngei ngei ang," a mittui a luang zawih zawih.


Thilthleng chu a awmzia ka la hrethiam chiah lo, a naupai hmasa a chhiat tih ka hria a. Tin, a pai nawn leh tihnen, a awmzia chu a naupai nawn leh ansawi kha dawt maw?


"U Dinte...." Ka kut a sawi nawk nawk.


"Ka hria e, zaninah chaw kan ei khawm dawna, zanriah ei kham lamah biak ka tum dawn nia, han intifai rawh, i Pu a rawn let ṭep ang, an hriat i duh âwm si lova," ka ti ta nge nge a. Ṭap chunga ka puih ngen na nâ nâ chu hnial a har ka ti.


Bakah, Nunsanga a hmangaih zia ka hre ve tho si a.


"Be ngei ngei rawh aw," min thlah rualin a ti leh ṭuak, nui chungin ka lo bu nghat.


A kalsawn rualin, "timak thei bawk ve maw le. Nau an chhiat tih ansawi khan Nunsanga hmel kha mak ka ti rêng a ni," U Hnemi ṭawng chu ka khap vat.

"An inkar venhim a tum ve a nih saw," ka ti sap ta ringawt a. Mahse, Ely-i pawh dik ka ti chuang lo, vawi hnih ngawt mai a pasal a bum tihna a nia!


"Ely-i em ni? An nupa an inhau leh em ni?" Pa Bawla te nupa rawn lutin, Pa Bawla chuan a ti zui hluk hluk a.


"Thawk a phita an inhauh ni, inṭhen sela a ni mai. Inhauh hleka rawn haw ta reng mai," in chungah chhoh a tum chu Nu Mahlimi'n a pawt let vat.


"I mak bawrh bawrh thei lutuk. An inhau pawh a la tih loh kha. An inhau em ni?" Min rawn.


Nu Mahlimi mitmengah chuan a fanu thlavang hauh leh a duh tih alang reng, ka nui ta sen sen a, "a chau a ni ang, mut a tum a nih kha. Zanriah ei tur a rawn phei hma mai mai," ka lo ti ta sap chu, "enta che, mahni fate pawh ring zo, i mak thei bawrh bawrh lutuk, em em che hian," anpa zawk chu a vin leh ta khar khar a.


U Hnemi ka melh zauh chu a lu a lo thing mat mat. An nupa, room-a inthlak tura an chhoh rualin, "in Nu em em hi chu a la chawh ang maw le," uar zet hian U Hnemi a rawn ti chhuak chu kan nui dun ta hak hak ringawt a!


A fate hi anthiam emaw thiam lo emaw anthlavang a lo huah ṭung zel hi chu ṭha lo chu ka lo ti ve ṭhin. Sawi theihlah hi kan nei lo ve ropui mai bawk si!

Hman ni a rawn tlân pawh, "nupa buaina hi chu nupa room bak pelh tir loh hi a fin thlak a sin," ka ti lo ve zauh kha,"nang angin lemchan kan thiam vek lo," tiin Nu Mahlimi zawk khan mi lo khap ta fawk mai sia, han sawi ve leh chi na ziazang a ni lo reng reng.

Rilru hi chuan, "a fate thlavang a hauh dan hi chu a dik ber lo maw le," tih chang hi chu ka nei ru ve ṭhin.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:55 pm

{ LOVE AFTER MARRIAGE}

By


Floria Laldansangi


Chapter < 28 >


"Nunsang, inbia ang hmiang?" Rammuanawma a rawn la haw ve lo, Nu Mahlimi te ho erawh ṭhut khawmna lamah an ri nak nak a, Ely-i pawh room-ah a la tawm tlat bawk.


"Eng nge ni a?" Inbiak ka sawm hmasa chu mak a ti a ni ang, min en deuh haw mai.


"U Hnem, kan zo thawkhat tho, pawnah boruak kan va hip ang e," Nunsanga zawhna chhang lovin U Hnemi chu ka bia a, choka chu ka chhuahsan zat. Min rawn zui ve mai bawk a.


Pawna ṭhutna awm lam panin, ka ṭhu thla a, "teh mial che chuan," a nui vur vur.


Nuih let sen senin, "a pawimawh ve alawm," ka ti chu a nui ri huk.


"Ely-in hrilh che a nei em ni?" Ka lo nui.


Za vak lo hian a ṭhen suk a, "a ṭul lo hle mai," a ti zui sup, a mitmu chu a sen ve rûm mai.


"Ka sawi theih phei chu a awm miah lo va; Mahse, inṭhen chu thilṭha ber niin ka hre lo a ni, naute inchan chauh a, Ely-in a chan leh che chuan a â thei mai ang, a dinhmunah inchan la, indah la, ngaihtuah ṭha la ka ti," ka hmaa ṭhu mipa, ka bialpa hlui, natna a khat mitmeng nena min entu en chung chuan za lo tih hriat ngawih ngawih hian a rawn ṭhen sak a, a thaw zui huk bawk.


"Dinte, i haw miah lo em ni?" A rawn ti deuh thlawt. Ka lo nui ringawt , "a dinhmun angah ding ila heiai hian ka nasa maithei. Mihring kan in ang lo alawm," ka lo ti vat a.


"Ni lo," a lu a thing mut mut a, thaw leh hulhin, "a mizia ka hria, mi hausa fanu duatsual a ni tih pawh. Mahse, hei erawh ka dawhtheihna piahlam a ni, nau a chhiat a, min hrilh lo mai pawh ni lo, mi â ang maia min chhuah hnuah, naupai awm lehin a awm bawk a nia! Dinte, hmeichhe rilru chhe tak a ni ngai lo tih ka hria; Mahse, luhlul ve tak a ni, tun ṭum erawh min bum let der a, ka dawh theihna piahlam a ni bawk." A ṭawngkam chhuak tinah chuan a beidawn zia a lang hluah hluah.


"Mahse, Nunsang a dinhmunah i indah ve chhin tawh em? Engvanga dawtsawi a, bum nawn che nge a nih tih te pawh han dâwnpui la, a hmangaih vang che leh chân a hlauh vang che a ni tih i hmuhsak ngeiin ka ring," ka thiam ang tawka Ely-i tana ka ṭawng chu a lo nuih hak a, a lu min thin khum leh nak nakin, "hmeichhe mak tak ini, engtin nge ka lo phatsan theih che tih ka ngaihtuah fo ṭhin. Mahse, ka kalsan zan che khan ka inchhir nghal tih erawh ka chiang," a nui huk huk a.


"I chungah rilru ṭha a pu lo tih i hre reng si a, rel hrep mahla a âwm viau a sin," ka lo nui liam mai, "U nih ka tlin zia i hriat kha," ka fiam let zauh, kan nui dun ta khak khak.


"Tak takin a, tun ṭum chu engpawh sawi ula inṭhen ka duh. Zanriah ei kham lamah a nu leh pa pawh ka hrilh hria ang. Mangang lutuka an awm ka duh bij lo va," a tih leh takah chuan engpawh sawi ila, ṭhen ngei a duh tih ka chian tak êm avangin engmah sawi zawm ta lo vin ka ngawi ve ta hle hle zawk a,an nupa inkar a ni a, an buaina chu an mahni tluka hrechiang an awmin ka ring law.


Nunsanga pawh hi mipa dawhtheih tak a nih rualin luhlul ve tak a ni tih ka hria, a nupui pawh hi a hmangaihin, alakah a tlawm zing viau chuan ka hre bawk.


"Engthil nge in lo sawi ni?"


"Lo ṭhu rawh Pu," thawh ka tum a.


Nunsanga zawk tho vutin, "ṭhu rawh, ṭhu rawh," Pu Kamlovan a ti tak nâ-in, "in chhungah ka va pui zawk ang e," ti supin a pensawn nghal zat.


"An inti thiam lo leh tawh em ni?" A nui vur vur.


"Chutiang pawh ka hre lo, nau neih hun tur kan lo sawi zawk a," ka ti chu a awih vak lo tih ka hmu thei.


Tunlai chu a natna a zual nasa in, zan mut duh miah loh chang nei ta fo vin, zankhuaa ṭhu ngawt ngawt a tlaivar chang a ngah bawk a, a taksa pawh a tla ve dawk mai.


"Inpa hi nizan aṭangin a rawn la haw nange?" Min en leh ta kar mai. A rilru a harhfim hi chuan a mitmeng hi a fiah ṭhin alawm.


"Damdawi inah an buai thu a sawi a," a lo thaw hak.



Ngawi deuh vung vungin, "Dinte, ka tupa ka neih tir chhan che hi i hria ang tiraw?" A zawhna teh daih chu.


"Ka Pu nena i thutiam vang a ni ang chu."

A lu thingin, "kei leh i Pa Bawla'n chhungkaw din kan hlawhchham a, Rammuanawma tal hi chuan chhungkaw diktak dinse ka duh vang a ni. Chhungkaw hlutna, inhmangaih tawnna leh inchawimawi tawn ṭhin chhungkua," a ti leh deuh vawng vawng, thim thet thet a nih tawh avangin a mit erawh chiang takin ka hmu thei tawh lo. Mahse, a aw chhuakah erawh inchhirna eng emaw a nei emaw tih mai tur a ni.



"Chutiang chhungkaw din tur chuan, chhungkaw hlutna hria a mamawh hle si che a," a ti leh a, za vak lo hian ka lo nui ringawt, chhan vak ngaihna ka hre law. A sawi ang chhungkaw din tur pawhin inhmangaih tawn a ngai si a tin ni.


"I beidawnna tur engthil atthlak mah ti lo se tih chauh hi a ni ka beisei awmchhun nita ni?" Ti leh churh churhin min rawn en a, "naute hming tur han hual lawk te i nei tawh em?" A ti leh daih chu nui chungin, "i phuah ang chu," ka lo ti var var.


A nui ve sun sun a , "ka lo ngaihtuah ve deuh a, Manasseh tih nge mawi ang a, Ethan tih ni ang?"


"Ethan tih chu a mawi viau mai. Hmeichhia lo nita sela."



A lu a thing a, "mipa i nei ngei ang. Ethan Thlamuanpuia tiin kan ko dawn nia," ati zui leh churh churh, ka nui ta hak hak a. Hmeichhia neih ka tum a piangin, "Mipa a ni ang," hi a lo ti bau zel mai a. Hmeichhia ka hrin hlauh chuan a rilru ka ti na viau maithei a ni.


Inchhung lam aṭanga chaw ei tura min rawn koh takah chuan kan inzui lut ta dat dat a.

Florence-i leh Nunsanga'n, U Hnemi chaw ei siam an lo pui rak rak.


Ely-in mit hnawm chapin beiseina mitmengin min lo en zui bawk a. Nuam ti lo deuh hian ka nui let sak ringawt.


"Bawihi..." Ka inher vat, ka pasal mitmeng chau tih hriat tak chu enin, "i intifai hmasa dâwn em?" A rawn pên lut chu ka lo chhâwn vat.


Min rawn din hnaihin, "zanriah ka ei hmasa ang," a ti ve sup a.


Ka ṭhutna tur chair pawt chhuakin min ṭhut tir a, Rammuanawma ka sira a ṭhut rualin Florence-in a thlengah kaikuang hi a rawn suah sak zat bawk.


Chu ringawt pawh chu ka thin a lo khei, Rammuanawma chu na zet hian ka melh zui a, ngawi ngulin kaikuang chu ka thlengah a rawn dah veleh mai bawk. Kaikuang ei thei lo na nâ nâ chu dawhkan ka dah ta daih a, Florence-i ka melh zawk, a mitmeng thip takah chuan min huatna bak hmuh tur a awm lo.



"I ei duh loh chuan inpa in a duh em em tho si a," Nu Mahlimi'n mi rawn khak zui fak. Ka chetdan chu mawi lo a ti a nih ka ring. A mawi emaw mawi lo emaw, ka ei thei miau lova, a thlenga dahlet aiin paih ka thlang zawk a ni mai.



"Allergy a nei alawm," Nunsanga'n arawn ti sup chu ka hawi vat, Ely-i ka en hmasa ber, a mita natna chu ka hmu chiang viau bawk.


"Dintei chu i hre chiang hle mai. In inngaizawng ṭhin tawh tiraw kha'h?" Florence-i chu ka melh ta ran.



"Florence...." A pain a rawn khak vat chu engah a ngai lem lo khawp mai, "a mak ve a, kei leh Daddy. Nunsanga leh Dintei. Ely..." Ely-i a melh ralh a, "i leng veta lo niin alang," Ely-i tih thinrim a tum tih a
Ka hriat avangin, ka chaw chu barin, "nunhlui nei lo kan awm hleinem. Kan nunhlui erawh kan uaibet tlat lova," ngaihsak lo deuh chuan ka ti ve ta nghat a. Min en nghal ram ram tih lah ka mit sirin ka hmu reng.


"Ka ngaihzawng hlui a nih hmain ka ṭhian a nia, ka hre chiang alawm," Nunsanga pawhin a ṭawngkam ngaithei vak lo tih hriat tak hian a rawn ti chhuak a, "ei theih loh dang ila nei em?" Rammuanawma melh zawkin ka lu ka thing vat.


"Ei duh loh leh ei theih loh i neih chuan min hrilh ang che," a ti leh sup sup.


Ka hrilh hauh lo ang, ka pasal a ni a, hriat a tum ve tur a ni. Kum 1 chuang kan chengdun ve tawh a, inhmangaih taka innei kan ni lo mah se chenpui te duh zawng leh ngainat zawng hriat chu mi pangai chuan kan tum ṭhin a ni lo'm ni? A tih tur, a hriat duh leh duh lohah a innghat ang chu.


"I nupui duh zawng i hre meuh nange?" Florence-i nuhrawnin a rawn ti ta chat reng bawk a.


Rammuanawma erawh a hnar a tum dut duh lek chauh a ni, a zawhna chhan tumna pawh a nei chuang law. Hre lo ang maia awmin, chaw ei lai a ei zawm mawp mawp a, a khat tawkin ka thlengah ei tur a rawn suak ve leh zauh zel bawk.


Kan chaw ei chu a tir aṭangin kan inkhak fak fak a, ka puar meuh em pawh ka hre lo.


"Bawihtei Pa min thlah dawn em?" Ka dawhkan nawt chu ka chawldat. Ka phu zuk ti ila ka sawisual miah lo ang, ka lungphu zawn hi a sa nghal zak mai. A hmaa a kohdan pawh ka ngaimawh ru viau a, tunah "Bawihtei Pa" a ti chuan cubic lunga min vawm dawt ang mai ka ni.


"Piana a awm kha, a thlah ang che u," Rammuanawma, Florence-i laka a nem ta deuha ka hriatna chuan ka chhungril hi a vitin, thikna bawkin min rawn tuam a, ka puanchhe kenlai chu dawhkanah ka nemchilh ngat ngat.


"Bawihtei Pa chu han inkawm deuh te pawh a chakawm nen," Florence-i nuhrawn bawkin a rawn ti ve leh a.


"Hun remchang a la awm mai ang, i haw teh ang u," Florence-i pa chuan ka mitmei a veng tih ka hre thei, kan chaw ei lai aṭang tawhin Florence-i pawh a khak a khak tawh a nia.

"Remchangah chaw te pawh rawn la ei la tiraw?" Florence-i Nuhrawn chu ka en phei ran.


"Ka nupui nen kan rawn la ei ang chu," ti bul supin a pensawn nghal zat. Min sawitel tak nâin pawmna ka nei dêr lo.


"Dinte..... Dinte...." Ka harh zawk.


"I ṭha em?"

"Umm..."


"I puar meuh maw?" Ka chaw ei tam loh zia a lo hmu ve a nih ka ring. "Bar hnih khat bâk i bar hleinem," a ti leh niah niah. Dawhkan chu nawtfai zung zungin, "puar e," ka ti ve leh mai a, ka âwm chhung sa veng veng chuan thawk a ti harsa ve lek lek.



A rukin thaw ka'n la a, ka'n thaw chhuak leh ham ham ṭhin. Rammuanawma'n kan room lam a pan chhoh pawk pawk te chu choka pinhranna darthlalang chhan aṭang chuan ka melh ngat ngat. Ka chhungrilah hian ka rûm ti ila a dik ang, ka ṭap chhuak thei lova mah se ka na a ni.


"U Dinte.." Chokaah rawn lutin, "in inbia em? Ka nu te nen hian an inbe rei tawh lutuk a?" A ṭap leh lo chauh.

"Lo nghak deuh la, anrawn chhuak ve ṭep tawh ang," chaw ei kham aṭangin Nu Mahlimi te nupa leh Nunsanga an inbe hrang tawh, rei chu a rei ve tawh reng.


Rammuanawma pawh a rawn chhuk leh a, a Pu room-ah a lut zui chu ka en zui leh ta reng. Tunlai a che vel engkim hi thil ti ru ang mai hian a chein ka hre deuh tlat.


"A rei e, eng nge kanpa in a hrilh hrim hrim che."


"U Dinte..." Ka harh leh zawk, Rammuanawma kalna lam ngawt ka lo en leh pek.


"Engmah a sawipui theih loh," ka ti ta sep, ṭhen ngei a duh thu a sawi tih ka hrilh chuan tum loh deuha a rilru ka tihnat ka hläu.


"Kha kha ka Pu room-a dah tur em ni?" U Hnemi chu a bu nghat.


"Ka va dah ang e," tih leh a tray ken chu la in, choka chu ka chhuahsan a. Hetiang hian ka awm ngai miah lo, nungchang mawi tak a ni lo tih pawh ka hria. Mahse, Rammuanawma tunang huna Pu Kamlova room-a a lut chu mak ka ti ve êm a ni.


Pu Kamlova room bulah ka chuan ka ding dat a, a reh deuh vung vung, an ṭawng danw ta lo emaw tih hnuah, "thil engkim hian hlut hun kawng 2 anei. Kan neih hma, neih tuma kan beihlai leh kan neih tawh loh hnu, min kalsan hnu te hian. Kan neihlai leh kan bula an awm reng lai chuan a hlutna kan hre lo fo țhin. Tun a inthil neih hi engtik ni ah emaw chuan a hlutna ila hre ngei ang, chuvangin enkawl țha rawh, chuti lo zawng i hriat chhuah hunah erawh a rilru a lo dangin, beiseina pawh a nei ngam tawh lo hlauh ang e." Ti churh churhin a ngawi leh deuh vung vung a, "Hmeichhia te chakna thuruk chu an chak lohna a ni tih theihnghilh suh Muana, pawnlama nêm tak ang a lang hmeichhe thinlung hi cho sual a awl a nia," Pu Kamlova ṭawng ri churh churh chu ka ngaithla ran.

Ni e, ka beiseina tlâng säng aṭang hian ka chhuk ang a, hawilet ngam tawh lo nun ka neih hun thlengin ka pasal hian min haider luiin, a tán ka thinlung ka hawng tih hi a hmu duh lo mai ang tih chu ka hläu ru ve reng.



"Rei a ni lo ang," a ṭawng dawn ta lo emaw ka tih hnuah a rawn ti chhuak sup, a thusawi phei chu ka hrethiam lo.


"I ngaihtuah leh, i thiltum ka hria e. Mahse, hmeichhe thinlungin, 'a tawk' a tih thleng ṭhaka i nawr lui a nih chuan, i thiltih te hian hlutna aiin, chânna a thlen ngei ang che," an thusawi chu ka hrethiam pha tawh lo. Eng chungchang nge maw ansawi zui ni.


"Inṭhen se a ni mai," Nu Mahlimi aw ring ṭha tak ka hriat takah chuan kawngkhar chu ka kik zui kharh kharh a.


Pu Kamlova room ka luh hmain Nunsanga a rawn pên thla pawk pawk.


"Inṭhen hi i cho hmasa tih hria ang che Nunsang. Kan fanu hi a phu pawh i phu rêng em tih in ngaihtuah rawh," Nu Mahlimi'n a rawn au zui lawng lawng.



Nunsanga chuan mit sen rum leh thip ram hian ka lam a rawn hawi a, "he inchhungah hian mihring pangai an awm lo Lala. Ui ang mai anchhuah hma che in chhuak rawh tih thu ka rawn ang che," a ti kha fuk fuk mai a. Mit ka khap fak fak.

"Engthil nge ni?" Rammuanawma ka bulab a rawn ding nghal run.


"Hon, inṭhen ka duh miah lo, ka tihpalh, vawikhat chauh hun minpe leh rawh," Ely-i chu a ṭap zawih zawih. Nunsanga lah chuan Ely-i kut vai thla sawkin a inhersan vut a, Ely-in a umzui chawn chawn bawk.


Nu Mahlimi'n, Ely-i hmingpuma au tuar tuarin a umzui ve bawk a.


A ngaihna leh ka thil tawn ngai loh, kan inchhungkhur a thleng ngai lo a ni a, minti mangang lek lek zawk. Ka awmhmunah ka lo thaw ve kawk kawk ringawt a.


Pa Bawla nuam lo tihnain h hmel taka rawn chhukin, za lo deuh hian min nuih sun sun a, keipawh chu inherin, room-ah lutin ka tui chhawp tur ken luh chu ka dah zat. Engtik laiin nge Rammuanawma room-ah a let ka hre miah lo. A lo ṭhu fel leh run tawh.


"Han mu hahdam tawh rawh u, a tlai tawh. Midang kha chu an buai buai khan buai rawh se.," Pu Kamlova'n a lo ti vat. A tunu te buaina chuan a tibuai pha ve meuh lo niin alang.


Rammuanawma chu eng a hria ni maw, mit zîm sulh hian min en run a, "kan chho dâwn em ni?" A rawn ding vut. Ani pawh chu aw, a farnu te kha umzui ve âwm!


"Muttu le," a Pu chu be supin ka kawngah chelhin min pawt chhuak titih a.

"Ely-i te nupa inṭhen antum tih i hria tiraw?" Ka melh chho ralh.


"Hre nang," ka ti chu a thaw hulh a, "engtik laiin nge a tándawt i lo sawi sak tak ni?" A nuih a zat hmel, keipawh chu ka nui ve ta sen sen tho. Miin mittui nen min ngen miau a, ka zeppui ve ni mai a. Bakah, a naupai thuah dawt a sawi tih a la hre lo a nih hmel. A ruk tak chuan Ely-i pawh huaisen ma ti ru viau bawk. Ka hmangaih tán pawh nise ka tih ngam miah loh tur a ni



Room kan luh rualin a laptop chu a khawih nghal a, kei ka inthlak sat sat.


"Ka Pu nen naute hming kan sawi dun a," ka melh zauh, ka hmaiah night cream ka hnawih pah mawlh mawlh bawk a.


"Ethan Thlamuanpuia tiin a phuah a, hmeichhia a nih chuan a läwm viau lo ang," min rawn melh zawk, a laptop bawk chu en lehin, "mut hmat tum rawh," a ti sup chu ngei deuha melh vakin, "a nalh emaw nalh lo emaw tal i sawi thei lo em ni?" Ka ti zui hlak. Chhe ngel ngul lutuk mai.


A rawn nui huk a, a phone la kâng pahin, "a neitu turin nalh i tih chuan a tawk mai lo em ni?" Ti duh lekin tu emaw hi a call zui zat, ka run lutuk mah mah, "mu tawh rawh," a ti leh sup.


"Mu suh," pawh tise ka mu dawn, lo hrilh loh law law tur a nia. Insawh deuh nghawng nghawnga khuma mu in, a ṭhut lohna lamah kan inher zui daih bawk a, min rawn en zui tih ka tukkhum leh ka hnungzang za mer merah chuan ka hre thei.



Vai ṭawngin a ṭawng sup sup a, eng nge a sawi ka hre vek lo nâ-in, "medical record, a tih leh kum 10," a tih vel te chu ka hre nawk, a ṭawng, aw ki hniam dût leh thum lam pang, hriat nuam tak mai ngaithla pah reng chuan ka lo muhil a ni chek ang chu, kut lum thar tharin ka dul, thla 8 lai ni tawh, dul lian lutuk lo chu a rawn kuah zui da da a.


A taksa si cheta min hnuk hnaiin, ka tukkhumah a hmui lum tak chu a nghat zui vung vung a, a thaw zui ham ham bawk, eng emaw phun sup supin, ka mut kawr chu hai thlain ka dar chu a fawp zauh bawk a, nghet takin min kuah zui leh hlu hlu bawk.



Ka pasal che vel chu mumang lam nen ka nuih ru ver ver a, Rammuanawma min duat hlu hlu ṭhintu kha a ang leh tawh takzet bawk.



"Dinte... Dinte..." Ka meng diar diar.


"U Hnem.." Ka sirlam ka en nghal, Rammuanawma thawh lai reng reng ka hre law.


"Pu ber hi ka hmu zo lo a nia," a mangan hmel lutuk.


Tho chhuakin, "kawmchar lamah pangpar huan velah a awm a ni lo maw?" Sana ka en zat, "ka van mu rei ve," ka ti zat bawk, dar 9 a pel duai tawh alawm le.


"Ka en kual vek tawh, inchhung ka luh chhung chauh a ni," a mangang lutuk chu a phisek tawh.



"Midang awm ve an awm em?" Ka sam ka ṭawn ṭha a.


"Dr. Jessica-i a rawn lêng zawk a. Mahse, U Rammuana a awm loh avangin ka chhuak lehnghal."


"Rammuanawma hna a kal tawh em ni?" Bathroom lam ka pan zui.

"Delhi a chhuk ve dawn tih i hre lo em ni?" Ka ding dawt, U Hnemi lam chu ka hawi vat a. Ka inher rang lutuk chu ka tlu lek lek, U Hnemi'n ka lamah rawn tlân vatin mi rawn chelh a, "fimkhur rawh," a ti ṭhat.


Nute cherang tak ni lo se zawng, ka inkat tlu lo ang tih pawh a sawi theih loh. Thaw chhuak hawkin, "Florence-i te rualin maw?" Ka ti chhuak thlawt, nizanah engmah a sawi miah lo.


"Ni e, a sawi lo em ni?" Ka kawchhung hi a rawn nâ in, a rawn sa nghal pup pup. Ka thawk a harsain, thinrimna in mintuam zui hlup hlup a.


Muangchanga bathroom a lut zuiin, "U Piana'n em ni airport ah thlah?" Ka aw zet chu a chhuak ṭawk ṭawk lehnghal.


"Um ni e, Pu ber chu aw, gate lah ka kalh ṭha vek si a," a ti zui leh vawng vawng.

"Cctv i check tawh em?"


"A chhiat kha."


Nitak, kan la siam lo tak e.


"Kan zawng hmu ve mai ang," tiin ka hmai chu ka phih zui sawk sawk a.


"Inhnuai lam ka lo zu en ṭha leh ang e." Tiin a pensawn zat.

Inthlakin inhnuai lam chu ka pan ve vat.

"Pu.." Ka au deuh lang lang.


"Pu khawnge i awm?" A room chu hawngin ka en kual zung zung a.

"I hmu em?" U Hnemi rawn lutin a lu a thing mat mat.

"Inah lo awm rawh, kawmthlang kawi lamah khuan ka zu zawng kual ang e."


"Inah lo awm zawk la, i raipuar nen," ka nui a, "a hmuh che chuan a zui duh lo leh ang che nga a buaithlak mai mai ang," a nui ve ta hak, "ni tho mai," a ti ve sap bawk a.


A hriatna a hloh nasat chang hian tuma biak leh hruai kual hi a duh lova, ka thusawi chauh hi a ngaihthla ve tlat zel, home Nurse te pawh kan ruai ve, rei an in enkawl thei thlawt lo, tihian rai chungin kan in awm nileng ṭhin chu a ni mai.


Kawngpui thlaah chuan ka zawng thla zel a.

"Dinte, i Pu inzawng leh tawh em ni?" Nu Ma-in an colony chhak deuh aṭangin min rawn au lawng lawng.

"Nia maw le, i lo hmu mial lo maw?"


"Hmu miah lo mai a tukkin chu, khunglai velah khuan a awm ve leh a ni lo'ng maw?" Playground lam chu a kawk a, "ka zu en kual leh ang e," nui chunga chhangin ka pensawn zet tawh, "rai nen, i Pu ila enkawl ve leh chhawng bawk si a," ka hnunglamah a rawn ti zui leh lang lang, hawi letin ka nuih ta sen sen ringawt.


"Kha i fapa lianpui i zawng leh dâwn em ni?"

Ka nui khak khak, "a nih leh hi.." Kan inzawngin, kan in umzui zing deuh a ni ang.


"I fapa-in a thawh khalh che em ni Dinte?" Pa khuma tak hi chu aw. Nui zui huah huahin, "zingah kha chuan khutah naupang ho karah a awm ve hrut hrut kha, zu enrawh a la awm ang," a kawhna lam chu ka pan zui a.


"Inrawn in umthla leh em ni?" Ka nui chhuak ta awr awr, "a nih hi, tukkin chu min lo thawh khalh a," Nu Ma-i te Colony a awm ho leh a thlang deuha awm ho ka ṭawng hrepha chu an lo nui hak hak hlawm. A chang hi chuan a buaithlak a, a hlimawm ve riau tho si, minti buai ṭhin a ni.


Playground ka thlen chuan naupang la awm ho chu ka zawt kual a, an hmuh loh thu vekin min chhang.


"Khawnge maw a kal le?" Ka hawi vual vual laiin ka phone a rawn ri.


"Aw, U Siampuii..." Ka la hawi kual reng.

"Engti zia nge nangni nupa hi phone reng reng inlak theih loh. I Pu hi hetah kan chhar a nia," a rawn ti hlak hlak.


"Khawiah maw?"


"Hunthar pengah. Hei pheikhawk lah inbun tir bawk si lo, khawvawt nen," min hau pah pah.


"Awi! Engtin nge khalam daih daihah a rawn thlen phei? Taxi ka rawn la ang, min lo nghak rawh u," ka ti hluai.


"Khawnge a awm a?" Nu Ma-i bawk a ni.

"Hunthar pengah ka U in a lo hmu a nih chu," taxi rawn tlân chiah chu ka phar ding zui a.


Ka kalna tur sawiin U Siamipuii bawk chu ka call leh.


"Taxi fare ka nei lo a nia," ka ti nghal tawp chu Taxi driver a rawn hawi vat.


Lo nui hakin, "ka U in a pe ang che," phone chu ka melh zauh, a hlauh hmel lutuk chu ka khawngaih letling.


"Min va han tibuai tak, rawn thleng vat rawh," a dah zui daih. Phone chu melhin ka nuih vur vur.


Hunthar peng kan thlen chuan Kawngpui sirah bân a lo vai a, kan lam rawn pana ka Pu rawn kaiin, taxi fare a pe zat.


"Engah nge min lênsan ni?" U Siampuii kawr lum a lo ha bawk a.


"Ka pheikhawk hi a säng bawk sia, leina mai tur a awm si lova," ke hlapin a lo la ding, a vawt a ti a ni ang, a che sek bawk.


"Heihi bun rawh," ka pheikhawk chu ka phelh sawk sawk.


"Khawnge i kal a?" Ka pu chuan minti let heu mai. Pheikhawk bun tirin, "ka thawh hmain i lêng alawm. I kawr hi ila ha dawn em?" U Siampuii chu ka melh zauh.


"Tikhan ha haw rawh se. Taxi em ni inlak leh dâwn?" Ka bu nghat.


Taxi min phar din sakin, "fimkhur teh u, hmu lo phei ila chuan eng nge thleng ang tih pawh hriat loh," U Siampuii bawkin a ti leh. Ka bu nghat. Diktak chuan fimkhur sen hi a har ve êm a ni. Vak dên dên siin a kal chak ve fu bawk si. Rai lian vak lo mah ila, taksa hi a rit ve nulh bawk sia, duh angin kan in umzui hleithei lo chu a ni ber e.


"Lungphunnaah kan kal dâwn lo em ni?" Kan tlan chhuah tawh hnuah a rawn ti ve leh khauh.


Eng lung phun nge a sawi pawh ka hre leh chuang lo.


"Naktuk alawm," ka ti ve leh mai.


"December ni 4 a ni lo em ni?" Ni leh thla chu a hre dik leh ang thlap lawi si.


"Naktuk alawm, i hresual a niang," a bu ve leh ta nghat nghat.


"Piana i nu chu eng nge a an tawh? A zia awm deuh tawh em?" Driver chu a be zui mawlh mawlh.


"A dam ṭha tawh e," driver pawhin nui chungin a rawn chhang vat, ka Pu dinhmun a hrethiam a ni ngei ang.


"Mamawh ineih chuan min hrilh hreh lo la aw," a ti ve leh thlap a. Hetia a rilru a buai ṭhin aṭang hian Pu Kamlova hi pa thilphal leh ṭha tak, mi harsa te pui reng ṭhin mizia a nei tih ka hmu thei, a ṭhat lai deuh phei chuan Pa nelawm leh dawhthei, mi inphal tak a niin ka ring.


"Hetah hian i chhuk teh ang," Nu Ma-i te Colony thlangah chuan chhuk a tum leh mai.


"Kan la thleng hleinem."


"Motor i rui a ni lo'm ni?" Teh daih zawk a.

"Ka rui hleinem ."


"I ruih ziah kha," tih leh taxi tlân lai chu kawngkhar hawn a tum mai a, "ka Pu ding mai teh," taxi pawh chu a ding ve vat.


"Taxi fare pawh ka nei hleinem. Min nghak lawk thei ang em? Khi khilai khi kan in a nia."


"Nghak thei e," a ti ve mai a, "lo nghak lawk aw, ka U ka'n bia ang e. Pu lo kal sawn suh," U Hnemi call ka rual.


"U Hnem, taxi fare tur Nu Ma-i te in bulah khan min rawn pe mai teh a, hei kan lo nghak che,"ka ti nghal zung zung ka Pu lah chu min kalsan leh chhat chhat tawh. A va han chhang chhiat theih tak!


U Hnemi a rawn tlân thla dawr dawr, ka pu lah chuan a tiangin a lo tin ve sisawi bawk a, a rilru a buai zual hian U Hnemi leh Nu Mahlimi hi a haw zual tlat zel a mak tak tak a ni.

Ka nui ta hak hak a, driver pawh chu a rawn nui ve huk huk tho.

"Ka han umzui ang e, lo pe rawh. Kan lawm lutuk a nia ka Pu," ti zung zungin ka um zui nghal a.


"Min nghak turin ka ti che sia," a kutah ka chelh, min lo vuan ve vat.



"Nghah ka thei lo tih i hriat kha," ka nui khek khek, inkai chunga in lam kan pan chho dat dat chu, "DINTE......." U Hnemi a au ṭhawt.


Ka inher rualin ka lam pana 407 truck var chak tak hian min sut ngei tum tih hriat takin min rawn pan ding a, mit khap kar lek tak tak a ni, ka Puin min vawnna a thing thla sawk a, ka darah min nam dawrh, kawngchhak lamah per chho nawkin, leiah ka let tha dup a, lei ka deh ruala ka hriat leh ka mit sir notein a hmuh hman chu boruakah, säng takah ka pu taksa invawrh chho chu a ni.


"Pu Kam...." U Hnemi au tuar.


Ka mit sulh a, ka kap aṭanga thisen chhuak hit nghal mer mer chung chuan, "Pu...." Ka aw a chhuak miah lo.


Ka kap aṭanga thisen leh tui chhuak a rawn tam zual a, ka pum dawm chungin ka Pu leia thisen nena awm nuaih lam hnaih tumin tawlhsawn ka tuma, ka tawlhsawn zo awzawng lo.

"Pu..." Ka pumna lutuk chu 1inch pawhin ka che sawn zo lo.


U Hnemi chu a au tuar tuar a, ṭhenawm khawveng rawn tlân khawmin, min rawn buai pui sawk sawk.



"Ambulance ko rawh u..."


"Fakawm, car la chhuak rawh...." Ka pum dawm chungin ka pu ruang an sawngbawl chu ka melh ngawt ngawt, ka khaw hmuh lah chu a phe zui ruai ruai bawk a.


Ka taksa na lutuk chu ka ruh te chu phel hran a, a sut zawk ang mai ka ni.


"Ka Pu saw..."

"Che suh Dinte, thi a pût nasa lutuk..."


"Nau a hring dawn a ni ang," an inbe nawk nawk.


"Dintei buaipui te u, thisen a chhuak nasa lutuk a nia," Nu Ma-i aw khur chu chiang takin ka hre thei.


"Truck kha a tlân tlang daih a nia."


"Ka Pu hi buaipui teh u," U Hnemi ṭap hawm hawma rak te chu ka hre ruai ruai.


Ka khaw hmuh a thimin, ka thil hriat a hla tual tual a, ka lungphu leh ka thawk lak chu a muang ta hle tih pawh ka hre thei.



Ka rilruin tudangmah ka au lo, ka Nu leh Pa hming pawh ka lam hmasa hek lo, aw rawl chhuah tur nei miah lovin, ka rilru leh thinlung zawng zawngin ka pasal ka au a, ka bulah a awm lo tih ka taksa, thlarau leh rilru zawng zawnga nâ ka tawrh a, ka thi dâwn hiala ka inhriat ang bawkin, ka hre chiang hle a.


Mahse, chungti chung pawhin ka thinlung rûm ri leh, ka hriatna zawng zawngin, "Rammuan, minpui rawh, kan naute, ka Pu leh kei, min pui rawh khawngaihin..." Chu thu chu ka thinlunga lam mawlh mawlh chungin, ka na tawrh ngei pawh chu a reh tial tial niin ka inhre bawk!!!!


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:55 pm

{ LOVE AFTER MARRIAGE}

BY

Floria Laldansangi


Chapter < 29 >


Rammuanawma...POV


Airport kan chhuahsan dâwnin ka phone chu ka on ve ta nge nge. Rimdini engmah ka hrilh lo erawh ka rilru a nuam hauh lo.


Ka phone ka on rualin Enkawla call a rawn lut nghal, "phone i va on har ve," ka pickup rualin message a rawn lut zut zut bawk.



"Engthil nge ni?" Florence-i chu Betty-i car-ah luhpui turin ka ti zui sup bawk.


"I Pu leh Dintei accident an tawk," car kawngkhar chu ka khar let leh dawt a.


"Engthil nge i sawi?"

"Tunah hian Mandy-i leh Dingpuii'n inzaina hmunah an enkawl mek."

"Engtin nge ka nupui chu a awm?" Ka lo tibul hluk a, car chu ka nam zui dut bawk.

Ka rinlawk, rin ngam si loh a thleng nghal ringawt chuan minti thinrim ngut ngut, Ramdinsangi hi a pa te bulah dah tur ka ni.


"Inbengdai rawh..."


"Engtin nge inbengdai se mintih? Ka nupui inzaina room-ah a awmlai leh kei hetah...." Ka sawi zawm thei lo, ka ṭawng ka sehchilh nasa rap rap lutuk, ka hmai ka tuai puat a, "tunah eng nge dinhmun?" Diver rawn chhuak chu, "ka bag la chhuak rawh,
Mizoramah ka let dâwn," ka lo ti zui hluk hluk a.


"I Pu chu a hmunah a boral nghal. Dintei erawh thisen unit 4 an pe tawh a, naute...."


"Sawi chiang rawh..." Ka ti hrawih, a ṭawng muang lutuk chu ka ngai thei lo.


"Fapa i nei, mahse Dintei dinhmun kan la hre thei lo, darkar 2 lai a liam tawh bawk," a ti leh zat zat, na lutuk chuan car ka chum leh dawt, Aizawl kan chhuahsan rual chiahin a thleng a nih hrep chu!


"Ka that khawp ang..." Kha lutuk chuan ka ti chhuak. Ka chungah phuba a la duh a nih chuan la tur a ni, ka nupui leh ka Pu a tina erawh a nuna a thiltihsual lianber a ni tih ka hmuh tir ang.


"Ka rawn let dawn, engpawh thleng dawn se ka nupui nunnaa mawh an phur duh lo a nih chuan chhanhim rawh se," bul zet a ti chhur chhurin ka off zui a.


"Let leh i tum amaw?" Ka pensawn pawk pawk.


"Rammuanawm...." Florence-in mi rawn pawt her chu ka lo vai sawn nawk, a kat deuh khat khat.


"I fanu saw engtin nge ni dawn?" Ka thaw hrawih.


Ka din hnaih a, "a dam a ni lo'm ni?" Ti kha fukin, "he hmunah hian intana kal ka ni lo tih theihnghilh suh," ti zui leh hlukin ka pensawn lehnghal pawk pawk.


"I fanu nen hian min kalsan thei lo. Daddy engtin nge kan awm....." A kut min vawn a tumna chu lo chelh let vatin, ka hmer nat êm avangin a rak ṭhat a, a tawlh hnung rawk rawk bawk.


"He thilah hian i telve a nih chuan ka fanu Nu ini tih theihnghilhin i dinna hmunah ka phum ang che," a mitmu a tal rawk rawk.


"Min thlah teh, minti nâ a nia, i thusawi awmzia ka hre lo."


"Lalbiaksang...." Ka aw ki hniam leh mar ṭha tak, dawhtheihna tlachham zual zet chuan a ti khur nghal der der. A hmui thleng chuan a khur chhuak ta dar dar a.

"I sawi awmzia ka hre lo," a ti khur dar dar.


"Ka ti ngei dâwn tih i hriat kha," a kut chu ka thing thla nawk, inherin airport lam ka pan zui leh pawk pawk .


Thlawk chhuak mai turah seat ka chan tawh loh bakah, Tricket dang pawh la ila, tlai dar 4-ah chauh a thlawh chhuah dâwn avangin private jet chu ka hire a, Mizoram ka pan leh ta nghal vang vang.


Lengpui kan ṭum leh meuh chuan tlai dar 4 a pel fel dêr tawh.


"U Muan..."


"Car chahbi.." Piana car chahbi chu laksakin car chu chak takin ka khalh chhuak nghal a.

"Police-in eng nge ansawi?" Ka khalh chak lutuk chu a hläu deuh nge, a invuan bet ṭau.


"Cctv a chhe bawk si a, a hmuna awm ho lahin motor number an hmu hman si lova."


Car steering ka chum dawt, phun hlukin, "ka Pu..." Ka thaw zui kawk.


"Postmortem zawh chiah a nia, Dintei leh naute pawh ICU-ah dah luh an ni tawh. U Muan, tukkin khan Dr. Jessica-i a rawn kal tih kannu in a sawi a," nghet leh zualin steering chu ka chelhbet, ka thaw kawk kawk bawk.



He thil hi accident a nih loh a, Jessica-i hian a phuba laknaah ka nupui leh ka Pu a hnuk lut a nih chuan ka that hreh hauh lo ang. Ka ti ngei bawk ang.

.
.
.

"Bawiha..."


"Eng nge dinhmun?"

"ICU-ah kan dah lut deuh chiah a, naute erawh a ṭha. Mahse..."


Ding dawtin, Enkawla chu ka en vat, "Dintei dinhmun hi a la ṭha lo hle a ni. Ka sawi tawh kha, thisen a hloh nasat mai bakah, Placenta a keh khan, a taksaah nasa takin nghawng a nei hman si a."


Thaw hrawihin, ICU ka nupui an dahnaah chuan lutin, oxygen an vuah leh, thisen an la khai mêk lam chu ka pan a, ka thaw zui leh hulh.


"Engtia tih nge i tum?"


Ka nupui vun var pup mai, thisen nei miah lo ang maia hil bum chu enin, "ka that ngei ang," kha zetin ka ti chhuak.

"Jessica-i tih chu a ni lo ang tiraw?"


"Hrep a! Enkawl, he thilah hian a inrawlh takzet a nih ngat chuan a chunga kan thiltih theihnghilhin a nungchungin ka phum ngei ang," ka ti ta hraih hriah. Ka ti duh ngei bawk ang. Ka nupui hi a hnuklut dâwn tih ka hria mah se hetiang zawnga a chet erawh kei ngei pawh hian ka ngaihtuahpha lova tinni.


"Pawi ka ti, thudik hrilh mai ila eng nge i ngaihdan. Ka thiltih avanga...." Nurse a rawn luh avangin a tawp chawt. Ka hmai tuai puatin, "Mipa nge hmeichhia..." Ka nupui kut chu ka chelh ran.


Ka pu thusawi kha zawmin, a pa hnenah lo awmtir rih tur ka nia sin, ka luhlul leh venhim ka tum luatah ka tawrh aiin ka nupui leh ka fa, ka pu thlengin antuar a nih hi.


"Mipa, naute hmelṭha tak a ni Doctor. An zai chhuah hlim phei chuan Dr. Mandy-in, 'Rammuanawma lite a nih hi,' a ti nghe nghe alawm," Nurse chuan uar tak hian a rawn sawi a. Ka nupui kut chelha fawp vawng vawng chuan ka nui ta suk, "ka lawm e," ka phun chhuak sap. Hmeichhe chak tak a ni a, he hmunah pawh hian reitak a mu dawn lo tih ka nupui a ni tih ka chian tlukin ka chiang bawk.


"Dr. Sangpui...." Enkawla chu ka en vat.


Nurse chu chhuakin phone chu speaker-ah a dah zui a, "Muana, i sawi kum vel kha ka lo en a, i record hi a awm miah lo mai a. Heta a awm lo a nih chuan, accident intawh hunlai vela board director ni ṭhin Dr. Vivek Sherma hi inbiak a, record hlui inhai let a ngaih hmel. Record siam danglam leh thlak chungchangah phei chuan Dr. Vivek hian a pui hreh hauh lo ang che u," a rawn ti sup sup.


"Sanga, laboratory lam...."

"MLS ah chuan Dr. Bishan a nih ka ring, biak pawh dan ka lo ngaihtuah pui ang che u," a ti leh zat.


"Ka hrethiam e, remchangah keimah ngei rawn chhuk leh ka tum dawn nia," tiin ka Pa rawn lut ve chiah nen kan inbiakna chu kan ti tawp zui a.


"Helam chu ngaihtuah suh, ka lo buaipui dâwn nia," ka darah beng thuk thukin a chhuak zui a.


Ka Pa pawh a hmel a buai nak mai, "i Pu kan postmortem zo chiah a, in lamah min puih a va ngaih hmel rih ve," a rawm ti sup sup.


Tu upa ber leh mipa awmchhun ka ni a, ka tihtur ka hai lo. Ka nupui chu ṭhut hnaihin a kutah ka fawp leh vawng vawng a, "ka fapa ka hmu ve zet ang e," ka ti ta sup!


Eng ang taka fapa duhawm leh ṭha nge min pek hmuh ka duh a ni. Tin, ṭha takin ka Pu ka thlah ngeiang, ka nupui leh ka fapa chhanhimtu a ni leh zel bawk nen.


<><><>~>~>~>


RAMDINSANGI...POV


"Bawihi, a rei tawh êm mai a," ka kut chu tu in nge chelh a, fawp tih chiang takin ka hre thei.


"Rammuan, rawn kal fo lo teh, i Nu ṭawngkam chhe tak tak kha ka hre peih miah lo a nia," U Siampuii'n a ti hlak hlak.


Engthil chiah nge thleng tih ka ngaihtuah let, ka mit thim mupah chuan chiang takin ka Pu, boruaka säng taka invawrh lai leh, leiah a taksa thisenin a chiah nuaih mai kha a rawn lang zut zut a, ka thisen chhuak te chu ka hre chhuak a.


Ka thaw chhuak ta kawk kawk, "Bawihi...Bawihi...." Thaw leh kawkin ka meng chhuak kawk bawk a.


Rammuanawma mit sen rûm mai chu chiang lutukin ka hmu nghal.


"Pathian leh!" A ti chhuak hawk. A mitmeng buai nuk leh mut kham lo ni âwm taka hmel thim rup chu thinphu zawih zawih leh thilthleng mitthlaa lang zut zut chuan ka en a.


Ka kut a chelh lohna lam ka dula dahin, "ka naute...naute..." Ka aw a chhuak thei lo.


"Hahdam rawh, a ṭha, i fapa chu a ṭha...." Fapa ka nei amaw? Fapa ka hring a nih chu!

"Tui hi intir rawh. Duata i Pa te call la, a harh thu hrilh rawh," U Siampuii'n a ti zung zung.


Rammuanawma chuan straw hmangin tui min rawn intir a, "ka Pu...."


"Engmah ngaihtuah rih suh," a ti leh sup, a aw chu nichin ai khan ngaihthlak a nuamin, hahdam ta huai hmel a pui bawk.

U Siampuii hmel chu ka melh zauh. Nichina Rammuanawma bul a thusawi kha eng nge awmzia tih ka ngaihtuah rauh rauh bawk.


"Ka naute chu ka hmu thei em?" Ka aw chu duh angin a la chhuak meuh lo.


"NICU-ah a la awm," Rammuanawma bawkin a ti leh a, Enkawla rawn lutin, "i lo harh ta maw Dinte?" A rawn ti lut. Rammuanawma chu a mitmei zauh bawk a.



"Siampui, lo awmpui rawh. Ka rei lo ang Bawihi," ka chhipah fawpin Enkawla nen chuan an inzui chhuak. Ka pasal kawngkhara chhuak ta chu ka enzui reng a. Engtia rei chiah nge engmah hre lova ka awm ka hre lo, ka pasal hmel leh mitmeng landanah erawh kha chuan, harh chhuak tawh lo tura ngaih harh chhuak ang maiin mi lo lawm a ni tih chiang takin a hmuh theih thung!


"Thlir dauh dauh suh, i pasal nu nasat rapthlak nen," U Siamipuii chu ka en vat.

"Ka Pu a ṭha em? A na viau a ni tiraw?" Nu Mahlimi chanchin ka sawi peih lo.


"A boral alawm."


"Engmaw?" Ka che zauh chu ka dul a thip zak.


"Che suh, che sawn thei pawh i la ni lo, ka hriat danin damdawi in inthlen hmain a boral an tih kha, postmortem a ni nghe nghe," ka thawk ka chelhbet, ka mitthlaah chiang lutukin ka Pu a rawn lang. Kan chetsual dan zawng zawng nen.


"Kan nunna a chhan a," ka mittui a ran hnam ṭiam ṭiam, U Siampuii chu mangang zet leh mahni inthiam lohnaa en chho vin, "keimah a sin a thi tur chu," ka mittui a rawn luang ngiai ngiai.


Ka nau leh Rammuanawma an rawn kut leh chiah, vung zeta min rawn pan ding zuiin, "Engthil...."


"Rammuan, heta ṭang hian minla chhuak rawh, ka Pu thlah ka duh," thawh ka tum chu ka dar tawn tawna chelhin, "min en rawh," ka biangah a kut a rawn sawn chho va.


"Min en rawh Bawihi....."


Mittui kar aṭang chuan ka melh chho ram ram, min bengdaih tum taka min chelhtu ka pasal chu natna leh huatnain ka melh a, "min khawih suh," kha fe hian ka ti chhuak.

A thiam loh a awm lo a ni tih hre mah ila, min zinsan miah lo tur a ni. Awmse chuan, kan bulah khan awmse tumahin mintihnat an tum miah lo tur. Ni lo, ka pasal avang hian tumahin kan chungah kut an lek ngam lo tur.


A kut chu vai sawn sakin, ka chet zawnga ka dul thip zak zak haider lui chuan ka pasal chu ka melh ngat ngat a.



"Engvanga rawn let leh nge inih? Kei leh ka pumchhunga naute, i fanu leh i hmeichhe hmangaih vanga i kalsan tak lakah hian engvanga rawn let leh nge inih?" Ka au tak tawn tawnah chuan ka dul na lutuk chu ka dawm zui ta ngawt ngawt a.


Eng emaw sawi hian a phun hluk a, "hahdam rawh, tun hi inbiakna hun a ni lo," a tho zui vut.


Mittui nen ka melh chho, "inṭhen ang, ni lo, min chhuah zalen rawh," ka sawi tum pawh a ni lo.



"RAMDINSANG...." A aw chu a ring lo, mar tak a ni mar tak.


A lu chu a tuai puat a, a hmai tuai zui lehin, a hrawk bawk che rawlh chuan a chil a lem khawlh, a che vel ngeng ngulh ringawt pawh chuan ka nâ chu min belh chhah.


"In bengdai rawh u. Dinte, nangpawh i hliam a la dam lova, hahdam hmasa rawh," U Siampuii'n a rawn ti sap sap.

"Ni e U, in enkawl hmasa zet rawh," Duata'n a rawn ti ve zat a.


"Dinte.."

"Mambawih..." Ka pa te leh ka ni te ho an rawn lut takah chuan mittui nen ka hawi sawn a, Rammuanawma thaw ri hrawih leh hmel chang rut a min rawn en zawkna kha ka hmuin ka hre hman.


"Ka lo va chhuak ang e," a aw pawh a la changin, inthunun a tum nasa tih ka hre thei.


"Mambawih, eng nge i an?" Ka pa aw ah chuan min ngaihtuahna bak hriat tur a awm lo, Rammuanawma chhuah rualin ka mittui a rawn luang ngiai ngiai a.


Ka Pa lam hawi chuan, mittui nen, "haw ka duh Pa, kan In ah, kan khuaah min hruai haw rawh u," ka mittui a tla zawih zawih. Ka dang buai peih tawh lo, kha leh chen kha na thei lo leh mitdel, beng ngawng ang maiin ka awm tawh alawm le.


A wheelchair nena min rawn ṭhut hnaihin, "chutia i harh dek deka haw i sawi ngawt ni? I pasal mangan zia te i hre lo vem ni? Keini aiin a mangang a sin," ka kut a rawn chelh a, ka ṭah vang leh ka taksa la nat vang nge ka hre lo, ka Pa kut chu nidang aiin a vuaiin ka hre tlat bawk.



"Harsatna te chu a lo thleng zel alawm, vanduaina pawh a hlawm a hlawmin a thleng a, tlân chhiatsan aiin, hma chhawn ila, vanduaina leh harsatna te chuan min hläu zawk ṭhin. Fapa duhawm tak, a pa ang em em mai i hring a, engtin nge i pasal chu i hawsan theih ang ni.?" Ṭah chhuah hawm hawm ka duh.


Mahse, ka taksaa natna awm hian min ṭah chhuah tir thei si lo.


"Ramdinsang...." Nu Mahlimi a rawn tlân lut titih, vung taka ka lam rawn pan chu ka nau a hmaah a lo ding zat a. A cheh ding chawt bawk.

"Anchhia inih kha. Kan chhungkaw vawdarhtu, tualthattu inih kha," a au in a au. A thusawi awmzia ka hre lo lutuk leh a rawn lang thut chuan keimah chauh ni lo, ka chhungte pawh chuan mak anti tih a hriat reng.


Ka Pa phei chu a âng hau lo chuah tak tak a ni.


"Engthil phiangsen nge itih?" Rammuanawma aw chu ṭeng tak a ni. Mit chhing sawkin ka lo ip chawih mai.


"Chhuak rawh....." A nu chu ka nauin a dawm behna a ṭangin a phih nawk a, a kat deuh nawk nawk bawk.


"Hetah rawn kal tawh lo turin ka ti che a ni lo'm ni?" A aw chu a ring leh tawh lo, mahse hnial ngam leh nek luih ngam a ni lo hrim hrim.



"Kei i nu, a hringtu che nge i thlan saw hmeichhia, i Pu thattu saw?" A thusawi leh zawhna chu ka awih lo lutuk zawk.


"E khai aw! Hlimpui i ti mah mah lo maw?" Ka Ni in a lo ti vat.


"I rapthlak mange, nikhaw hre lova a awm chung pawhin ânchhia i lawh tawn tawn a, i tupa hringtu a nih hi," U Siampuii'n a lo ti ve hlak hlak, ka Pa leh ka Nau chu anla ngawi ran.


"Duh min thlan tir suh ka Nu. Iti sual ang e," a aw chu a dam ta dup a, nek luih chi erawh a ni miah lo. Mak tak chu Rammuanawma hi a thinrim poh leh a aw ki a hniam tulh tulh zel hi a ni.



"I nu, he khawvel eng hmuh tir tu che ka ni, he hmeichhia hi ka inchhungah a lut tawh tur a ni lo," Nu Mahlimi chu aw rawl tawp tawpin a au ni berin ka hria.


Jessica-i a rawn lut a, "Nu Mahlim, duhtawk rawh, damdawi in te a ni si a, kan mualpho zo ang e," bengdaih tum taka rawn tiin a rawn chelh zui zat a.


Kei erawh ka harh chhuak chauha ka thil hriat leh tawn te hian thawk ngaihna minti hre lo. Mit khap ngaihna pawh ka hre lo zawk.


Ka zak a, ka Pa hmaah ngei chutianga hmusita min chhal chuan zahna leh thinrimnain mintuam hlup hlup.


"Mualpho leh tur dang kan awm em ni?" Nu Mahlimi'n a ti leh hlar.


"Chhuak ru," ka aw chu a chhuak ṭawk ṭawk. "Min chhuahsan rawh u," ka dul na lutuk chuan ka lu a ti hai chum chum thei.

"Mâk ini, a chiang em Ramdin, kan mâ che ka ti a nih chu," Nu Mahlimi'n a tih leh rualin, "ramri pel suh ka nu," Rammuanawma'n a lo ti hluk.

"I nu ka nihna ang a i tán a ti ka ni."


"Ka Nu ini, mahse pasal leh Pa ka ni bawk," kha zet hian a ti chhuak hrawih a, "ka nupui i ngaithei lo dâwn lo a nih a, i pawm dâwn lo a nih chuan duhthlan tur dang min siam sak lo, ka nupui nena chhuahsan che u lo chu," a aw ki a hniam a, a nghet churh bawk. A ti ngei dâwn tih leh, a nu leh pa aia min thlan zia a ti lang chiang viau bawk.


"RAMMUANAWM...." Nu Mahlimi chu a rak ṭhat. A mittui a parawl nghal piau bawk a.

"Rammuan, iti mah mah lo maw? Engkim i hre vek si a?" Jessica-in a lo ti ve hlak. Ni e, tunah khan ka pasalin a pianna nu aiin kei mihrang, sum avanga neitu hi min thlang tlat a tin ni.


"Heti em em hian a ni maw kan vahnu hi in lo hmuhsit ni, inṭhen rawh se, keini pawhin in fapa rangkachak hi kan awt hluah hluah bik hleinem," ka Ni in a rawn ti ta tan tan.

"Ka fanu nau hrin pangai pawh a hring lo, a harh chhuahna pawh darkar tam la ni lo hi i rawn mâ a maw?" Ka Pa chuan a rawn ti ve ta churh churh.


"Pa....."


"Ka zawhna che minhan chhan teh, sum innei a, ka nupui dam theihnan leh a boral thlenga theihtawp min chhuah puinaah kan lawm takzet. Mahse, ka fanu ka hmaa rawn ma ngam tur hian engthil nge inchhungkaw chungah hian a tihsual ni?" Ka Pa aw chhuak tinah chuan natna bak hriat tur a awm lo.


Ka Ni chu a mittui a hru zui zauh zauh, keimah pawh ka mittui a rawn luang leh ngiai ngiai bawk. Ka Pa tlawm lutuk leh keimah avanga rilru na lutuk chuan min vit ngut ngut.


Rammuanawma mitmengah pawh chuan a vawikhatnan zahna ka hmu thei. Mittui kar aṭangin melh mah ila, ka hmu sual lo tih ka chiang.


"Pawi ka ti hle mai ka Pu," ti supin a Nu bânah chelhin a pawt chhuak zui nawk nawk a.


"A va han rapthlak tak! Khatiang reng kha em ni Ramdin?" U Siampuii'n a rawn ti hlak hlak.


Ka hrawk na lutukah ka ṭawng chhuak thei lo, ka Pa kawngkhar lam melh ngar chu mittui nen ka en ngawih ngawih a, "Pa...". Mittui a hru zauh chu ka hmu hman.

"Anpa chuan a thlavang a hauh viau kha maw. Pu Kamlova anchân a, a rilru pik leh mangang a nih dâwn kha," tumah hi ka Pa hian an hnunglamah a sawi chhe zui ngai miah lo. Tunah pawh Nu Mahlimi tan chhuanlam a siamsak leh daih tak hi.


"Hahdam tawh rawh, karkhat dâwn lai mai engmah hre lovin i awm a, i taksa te pawh a chak lo a nih kha, zan pawh a rei tawh hrim hrim," ka Pa bawkin a ti leh churh churh, engmah sawi thei zia zang ka nih tawh miau loh avangin ka bu ta nghat nghat a.


Midang pawh chu tumah an ṭawng ta lo, ka Ni erawh a insut leh feih feih ṭhin. Nu Mahlimi ṭawngkamin a rilru a tihnat zia ka hre reng, ka Ni chang ni lo, ka Pa pawh a aw ri leh mitmengah chuan a tlawmin, keimah avangin a na takzet tih ka hre bawk. Chu chuan ka âwm chhung hi a hnawh bet up up a, chemte hriam taka zai ang mai ka ni.



Ka taksa nâ leh chauh luatah mittui tla chung chuan ka muhil zui a ni ngei ang, "ka lo awmpui ang e zanin chu," Duata aw chu ka hre ruai ruai chauh.

.
.
.

"I naute i hmu tawh em?" Nizan Rammuanawma a rawn let miah loh bakah, vawiin nilengin ka la hmu leh miah lo, U Siampuii'n ka Pu thlan anzut ṭha dâwn a ti kha a nia.


"Aw, reilote ka hmu," U Damtei chu nui kur kurin, "awi e Dinte, pa siar pa siar hi a ni ringawt mai tiraw, naute pianghlimin sawti em ema a Pa a chhun mai chu, a awihawmloh zawk alawm le," a nui zui kur kur.


"A chi a chak khawp a nih saw," Siamsiami'n a rawn ti zat, a nui zui awr awr bawk a.

"Sek êm alawm, amah a hrawl si, a chi pawh a hrawl ang," an thusawi chu an mahni chuan an nuihpui ang uar uar a.

"Awi, chi sawi takah chuan hman niah ka bialpain min fight ve khanglang a," Siamsiami'n uar zetin, nui uar aur chungin a rawn ti a.


"A hlawhtling em?" U Damtei lah chuan a lo ti vat.

"Teuh nang, vawi 4 ngawt min fight tawha hlawhtlin a tum ve nasa ṭhin sia," a nui leh uar uar, ka kuta lo zapin, "i nui ring lutuk," ka lo ti vat, henu hi chu a mak uar uar thei a nia.


"An zang zawi vek khawpa min fight hi chuan han dawh leh hnuhnawh pawh ni ila min ti peih tawh bik teuh lo," ti zuiin an nui tak uar uar a, keipawh chu ka dul inzaina dawm chung chuan ka dir ve char char tho, a la thip ang zek zek bawk si.


"Takin a, Florence-i Delhi a chhuk iti emaw ka tia," U Damtei'n nui reng chunga rawn tiin min rawn melh.


"Chhuk e," ka lo ti sep.

"Nichin lawk khan ka hmu alawm, a rawn let lehnghal tihna em ni?"


Ka lu lo thingin, "ka hre miah lo," ti sepin ka ngawi deuh vang vang a, "U Damte, pasal tel lova naupawm hi a harsa em?" Ka zawhna chu mak anti a niang, min en haw mai.


"Inṭhen intum em ni?" Siamsiami'n a rawn ti vat.


Za vak lova nuiin, "tum pawh ka hre lo, mahse hetianga nun hman hi ka kham," ka ti chhuak sep sep.

An ngawi vang vang, min chhan mai ngaihna an hre lo a ni ang, thaw chhuak ham hamin, "ka theih tawp chu ka chhuah veiin ka inhria," ka chawl dat, ka mittui rawn hnâm sawk chu khap let sak sakin, "Inzawmna chu mipahnih inhmangaihte tán a ni a; Mahse, keini erawh kan tam lutuk mah mah, mipathum tán chuan he thinlung hi a tê êm a ni," ka ti chhuak leh sep sep.


Ka ṭhiante pahnih chu mittui tla lek lekin ka en a, min khawngaihna mitmeng chu ka hmuh hmaih lo bawk.

"Mahse, Dinte eng nge i hlauh ni?" Min en deuh vang vang a, "i pasal alawm a nih, i ta, thuneihna pumhlum neitu i ni a, mualpho khawpa sual let a ngai lo, i pasal a ni tawh a, sual let a beihlet chhan tur i nei lo; Mahse, in inkar humhim tur erawhin dikna tluantling i nei, i hrethiam em?" U Damtei thusawi lai chu ṭah chhuak ṭeu chuan ka en a, za vak lo hian ka nuih sen sen bawk.

A hresual a ni, ka pasal a ni a, mahse kan inkar hum turin eng dikna mah ka nei lo, a chhanchu a tir aṭangin ka ta a ni ngai lo ang bawkin, inneihna LEM, thinlung tel lova bul ṭanpui ka ni tlat a ni.


Siamsiami'n, "keichu engpawh thuthlukna siamla ilam ka ṭang a nia. Chutih rualin, i hmalam emaw i tán emaw chauh engkim i ngaihtuah thei tawh lo tih i inhriat a ngai, fapa innei tawh a, i fapa hian Pa a la mamawh dawn, chu chu nangmah ngei pawhin i sawi kha," a rawn ti ve sep sep, ka mittui ka dang zo lo, a rawn lum thla pup a, rang taka hru hul tawkin, ka nui chhuak ta hak, a zat vang erawh a ni chai lo, ka âwm chhung tawt lutuk awm ngaihna hre lo hi ka ni mah zawk.


Ka ṭhiante pahnih haw let hnu pawhin ka ngaihtuah zui rauh ruah a, ka rilruah eng dangmah a awm thei lo.



'Tuar leh ila, Pu Kamlova pawhin a tupa ka kalsan hi a hläu em em si a, ka tán ni lo, ka fapa leh ka Pu tán,' tiin ka ngaihtuah leh ṭhin. Mahse, a tawpna erawh, 'Florence-i leh a fanu lakah min letsan ta sela?' Tih zawhna bawkin a tawp ta zel bawk a.


Rammuanawma nena kan awmdan tur ngaihtuah rauh rauh chungin ka lo muhil diar diar a ni ngei ang, ka mutna damdawi in khum chep tak rawn hniam ta sur leh, taksa hrawl tak rawn inrawlh sat sat chu tunge a nih ka hre chiang lutuk mah mah.


Min tihnat hläu tak siin min rawn kuah da da a, "Rammuan..." Min chhang lo, "Rammuanawm, ka inzaina i ti nâ a nia," pawh let dawr ang mai, chhuatah chuan a tla ta khut khut em maw ni? A ri zui khut khut mai.


"Ka ti nâ che em?" Min rawn khawih nghal. Ka lo nui hak chu thaw hulhin, "min bum elo?" A thaw zui ham ham, a hlauthawng lutuk chu ka nuih a za.


Nui chunga inben kân ka tum chu min lo pui vatin, "ka ti harh zo vek che a ni maw?" A inthiam lo tih ka hmu thei.


Ka lu ka thing a, "inbiak kan ngaiin ka hria a," ka ti sep chu a thaw hraih, "ka Nu vang a nih chuan theihnghilh rawh," a ti hluk, ka bulah a rawn ṭhu thla zat a.


"Ani lam a ni lo," min rawn melh ta rûn, ka lungphu a rang lehnghal ngawt tawh, a ṭha miah lo mai.


"Kan pahnih nun hi i ngaihtuah ve ngai em?" A lo thaw hulh a, "ngaihtuah tur a awm em ni?" A ti sup. Ka thusawi chu a hrethiam lo lui niin ka hria.

"A tlai tawh, mut tum rawh," thaw a tum vut chu, ka oawt let vat a, "kan pahnih nun chu Mumang, mangchhia, thui tak, rei leh sei tak, hmuhnawn emaw hriat nawn emaw kan duh tawh loh, hringnun ṭihbaiawm tak angah i ngai dun ang. Chutiang chu a ni rêng si a... A ni lo'm ni?" Min rawn en leh ta rûn, ka hnuk lah chu a ulh ṭau bawk.


"Eng nge sawi i tum?" A aw chu hriat a nuam leh tawh lo nasa.


"I hria alawm, engtik niah emaw...."


"Mu rawh, min sawinawn tir tawh suh Ramdin. Thu ngai sawinawn ka nin zia i hria kha," a tho vut a, bathroom lam a pan zui pawk pawk.


Kan pahnih hringnun ka tehkhin dan chuan a ti lungawi lo hle tih a mitmeng leh che vel, ṭawng bul nghut nghutah khan chiang takin a lang.


Mahse, dawt ka sawi em ni? Sawi nang, he mangchhia aṭanga harh chhuah hi ka duh takzet mai chuah a ni. Chu chu sual niin ka hre law.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:55 pm

{ LOVE AFTER MARRIAGE}

BY

Floria Laldansangi

Chapter < 30 >


Ramdinsangi...POV



"Naktukah maw in chhuah dâwn ni Dinte," Jessica-i rawn lutin nuisangin a rawn ti a, ka fapa, Siamsiami'n a pawmna lam chu a melh zui zat.


"Umm, kan tum dan chu a nia," ka lo ti ve vat a, ka harh aṭangin kar 2 dâwn teh meuh damdawi inah ka awm a, chhuah vat vat ka nghakhlel lutuk, Christmas damdawi inah ka hmang peih lo ti tlat lo ila chuan Rammuanawma ngel ngul hian ka chhuah a la phal tawp nang.


"Ethan-a thlasik naute a ni bawk si a, a sual lo maw?"


"A sual reuh lutuk a hei zing zingah pawh kan in awih leh derh derh tawh hi," Siamsiami'n ka fapa awi chunga a tih chuan ka lo nui vur vur.


Zan lamah ka Ni emaw U Siampuii awm loh chuan zan ka mu thei lo hrim hrim. U Hnemi ka tán a ṭangkai em em bawk.


Nu Mahlimi te nufa erawh tumah an rawn lang leh lo, Pa Bawla erawh a rawn lang fo thung a. Rammuanawma a hah ṭhin viauin ka ring bawk, chhun lamah hna a thawh a ngaih bakah, zan a shift a nih phei chuan, a changin a fapa a rawn pawm ve leh ṭhin bawk nen.



"Ka lo pawm ve chhin dawn em ni? Ka la pawm ve miah lo va."



"Duh loh a hre reuh a nia aw, a mak reuh lutuk," Siamsiami'n nau a pawmtir pah chuan a ti sap sap. Ka lo nui deuh hak, ka fapa khirh reuh lutuk hi Siamsiami leh ka ṭhiante dang ho hian an ngei thei a nia. An duat tho bawk si.


"Dar engzah maw in sumo a chhuah dawn?" Khuaah Christmas hmang tura a haw dawn avangin tukkin chu a rawn hma zak zak lutuk.

Nimin, ka Pa te haw rual te khan haw ve mai mai tur a nia, sumo fare a chawi lek lo tur.


"Dar 5."


"A pa a chhun vak lo a nih hi. Dinte, kan Rammuana fa a ni tak tak amaw?" A rawn fiamthu emaw ti dâwn ila a mitmeng lah chu a thufak fu bawk si a.


Mak ti deuh hian Jessica-i chu en chho haw mai, a pa a chhun lutuka ka ngei zawk lek lek ṭhin a nia.



A pianhlim kha chuan min an na tlem a nei ka tia, a rei tulh tulha a pa a chhun tulh tulh a, a la sual reuh em em zui nen.


"Khati khawpa a Pa chhun le, Doctor inih kha i mit entir rawh," Siamsiami zawkin uar fahran hian a rawn ti chhuak a, "khatibaka a an belh chuan a chal dawn lutuk," a ti zui zat. Ka lo nui khak khak.



"A tir khan ang ka tia, engti zawng emaw tak hian Gospel-a te pawh a ang lek lek alawm," min rawn melh ralh, U Gos-a teh daih a an na ka hmu miah lo, sawi lo phei se chuan ka hre tawp nang.



"Ward ka va fang ang e," ka fapa muhil der der chu min rawn pe a, ka lo ban ve vat. Zanah a sual si, zing dar 9 vel aṭang hian a muhil ang der der zel thung a.


"In Doctor Jessica-i ṭawngkam neih dan hi min khei riau zel," Jessica-i a chhuak chiah Siamsiami'n a ti zui hlak. Khap zui vatin, "a fiamthu a ni ang," ka ti ve tak nâ-in, hman zana U Gos-a min rawn kan ṭum pawhin kan la inzui em tih min zawt nulh tawh. Rammuanawma hmel kha a hmuhnawm miah loh bawk.


"Fiamthu âwm leh âwm lo te hi a awm ve, a ṭawngkam velah hi chuan Rammuanawma fa ni lo se a ti niin ka hria," a ti leh hlak hlak chu ka nuih ta vur vur ringawt a. Amah hian a duhtawk a ngah nghal em em zel.

Ani tih leh tih loh vin awmzia a nei hranpa lo êm mai. Ka fapa hi tu fapa nge a nih tih a hmelah hian alang reng alawm le. Ka ngaihtuahna chuan minti nui ta ver ver.


Siamsiami'n, Jessica-i a mil loh thu a sawi zui niah niah laiin, kan awmna ward kawngkhar a rawn ri rak a, Nurse a nih ringin, ka fapa tuamna puan rawn huh nia ka hriat en chiang pahin, "damdawi hi chu keimah niin kan inbuaipui thei tawh a sin," ka lo ti vat.


"Keimah zawk," ka hawi rang lutuk, Florence-i hmel nuisang leh a fanu rawn kai lut chu mit khap fak fakin ka lo en nghal ran.


Damdawi in ka awm aṭangin vawikhatmah a hmel ka la hmu lo, Delhi aṭang khan a rawn let ve lehnghal mai ni khan ansawi si a, rinai tak chuan a rawn lawr har.


"Bawihte, i nau a nih saw," min rawn pan hnai a, a fanu lah chu kum 1 bawr vel lekah chuan a meng fiah kelh kawlhin, a chakvak hmel em em lehnghal a.


"Damdawi in chhuah intum tawh tih ka lo hria a."


"Nia, eng nge Betty chu a an tawh zawk a?" Pangai takin ka lo chhawn ve vat. Betty-i lah chuan Ethan-a chu a rawn ban zui ve nek nek bawk.


"Kan lo pawm ve chhin dâwn em ni?" A rawn ban zui a.


"Bawihtei aiin a Pa a chhun lo zawk a nih hi. Bawihtei kha a pianhlim phei kha chuan Daddy a chhun khawp a," a nui zui ar ar. Siamsiami'n a hmel a lo ti sawi nasa mai.



"A ang kan lo ti viau a sin," ka ti ve vat. Heti bak hi chuan a ang thei tawh meuh pawhin ka ring law.


"Tak takin a, vawiin kan rawn kal chhan chu Bawihtei birthday kan lawm hman si lova, naktuk zan hian lawm ila kan tia, Ethan-a pawh rawn hruai ve la. Daddy pawh khan rem a tih hmel viau tho a," a ti no leh hnap a.


A ṭawngkama Rammuanawma a sawitel fo chuan ka kawchhung a ti sa vet vet mai. An inbe fo a nih tih hai rual lah a ni lo.


"Khawimah kal chhuak chi pawh kan la nihleinem, rawn telpui che u chak viau mah ila kan theih hmel loh," Ethan-a ka kutah a rawn dah leh chu Betty-i a rak zui tuar tuar, a la en kham lo nge ni?


"I nau iti hläu dawn, i pa ang mai duh loh hi i pe na lutuk," Betty-i chu a pawm zui nalh chu, a ke a leng ve nasa khawo.


"Awi, Rebecca, i Pa ang mai i sual thei lutuk. Dinte, rawn telpui hram tum rawh aw," a fanu ṭap chu kawngkhar lam a panpui leh hlawk hlawk.


"Ei thlawt lo, kâ ân hleka inpa hming lam tel ta reng hlawm mai. Awi Lala, i pasal vuah leh vang te ho nasa lutuk leh zaktheilo hlawm lutuk hi chu maw ka lo ralkhat ngei hluah hluah hlawm. Zahna aiin thla 7 vel hian an chal fuk hlawm mai a," uar zeta rawn ti chhuakin Ethan-a ran ṭap chhuak ve zui chu, "awi heipawh hian a hmel chang ni lo, sual leh zahtheihloh ah te hian a chhun ang tih a hlauhawm," a ti zui leh tan tan.


Ka fapa ṭap hnute pe zuiin, ka inzaina la dam lo min pawt leh zauh ṭhin nen chuan harsa ti zetin ka nui ta hak hak.


Rammuanawma sawi takah Florence-i te rawn let leh pawh sawi a tum chuang miah lo niin alang, a chang hi chuan ka bei hi a dawng ru ve ṭhin. Engtikah tak a fanu a ni tih te hi pangai taka min hrilh tum ni maw?

.
.
.

"Dinte, Rammuanawma kha a rawn tlang nghal lo em ni? Florence-i te in aṭangin kan rawn chhuak tlâng reng sia," Jessica-i kan lam rawn pan chu lu ka lo thin khum mat mat.


"Betty-i khan a ngen leh nge maw ni? A pa hi a atchilh lutuk a," a nui zui khak khak.



Ka âwm chhung thip sa nghal veng veng chu thunun tumin, a rukin thaw ka lain ka thaw chhuak ham ham a.


"Inpa a rawn la thleng lo em ni?" U Siampuii kan bulah a rawn ding ve chiah, ka kâ ka âng mai thei lo, ka kawchhung tawt tak tihlan nan ka thawk chhuah kawk ka hlaua ni.


"A rawn thleng ṭep ang, Betty-i birthday lawmna tur vel an enkawi pawh a ni maithei. Ethan-a pa hi a indaih lo a nih hi," ka fapa muhil chu a rawn fiam zui zauh, a fiamthu chu ka tán chuan nuihpui ngaihna a awm bau lo. A tilui emaw tih hial natham a lawm.

Jessica-i pensawn chu, "eng nge a sawi kha?" U Siampuii'n a rawn ti zat.


Ka thaw chhuak zui ta ham ham a, "ka hre lo," ka âwm chhung tawt lutuk leh sa ta veng veng, tlawm bawk si, hmeichhia ka nih ve na leh nupui ka nihna ang aia hniama rahbeh leh palzut nia ka in ngaihna chuan min chhun ngut ngut niin ka ka hria.



"Dinte.." U Hnemi leh U Piana car aṭangin an rawn chhuak. Thaw leh hawkin ka chil ka lem zui khalh bawk a.

"Piana te anrawn kal tho, dawrah ka phei san dâwn che a sin. I pa biak theihnghilh lo la," U Siampuii'n a ti zui zat zat.


Bu nghatin, "min ngaihtuah suh," ka ti sap. Ka ni te nupa leh Romuana te, kan khaw lamah Christmas hmang turin ka Pa te anzui chho ve bawk a, U Siampuiin keini nufa avangin a zui ve lo thung.


"Dinte, awi khawimaw kan naute chu ka lo pawm ang e," U Hnemi'n a rawn pawm vat.


"Zing lamah hi chuan zan lamah a sual tih pawh hi a awihawmloh zawk," ka fapa muhil sek sek en chunga a tih chuan kan nui hak.

A awihawmloh tak tak zawk ṭhin. Zan lamah erawh dar 11 vel aṭang hian sual rawng hi a bawl ṭan a, pangtilum lah chu a hre lutuk mah mah a buaithlak lam zawk.


"U Muana chu hna tlem a nei a, a rawn kal hman lo a," U Piana'n a ti nghal chu ka bengkhawn duh lo lui.


"Ka Pu thlãnah kal hmasa ang u hmiang," ka tihsan daih.


"Christmas hma deuhah kal zawk ila, nangmah i la chak vak bîk si lova, thlân anchei mêk bawk nen," Car kawngkhar chu ka hawn sak a, Ethan-a pawm lutin, "i Nu Mahlimi te an insawn chhuak a nia," a nui sen sen.


Kei erawhin phawk fe hian ka en thung a.


Ṭhu lut ve in, "eng nge awmzia?" Keimah vang chu a ni tak tak lo'ng chu maw? A nih vaih chuan a zia lo viau ang.


"I Pa Bawla thinthawkin, Ethan-a i pawm lo a nih leh keimah ni zawk kan chhuak ang a, Rammuanawma te nupain inpui luah rawh se' a tia, ni 2 vêl a ni tawh an insawn chhuahna, U Rammuana pawhin engmah a sawi lo, dan lah a dang chuang bawk si lo," ti zui niah niahin, "Pi Mahlimi em em hi chu, a fanu te aṭang hian a la tuar ang maw le, a mo chungah a rilru a chhe êm mai, Pu Ber damlai pawh khan a sawi ziah, 'mi nu leh pa pawhin an fanu te hi an hmangaih ve a, nangpawh mo ve tho, hmeichhia, fanu 2 nei inih kha hre ta che' a ti ziah. Tunah Ely-i te nupa an inṭhen a, Ely-i a rui reng a, a chawh te hi ka ti lek lek ṭhin," a ti zui leh hmiar hmiar chu sawi ve tur reng reng ka hre lo.

Chutiang thil te a thleng tih lah Rammuanawma berin engmah sawi hek lo, damdawi inah pawh rawn lang ve tur anni lo reng a nih chu, tunah phei chuan Nu Mahlimi chuan min haw zual sauh dawn a ni tih ka beng awmna ka chian tlukin ka chiang lutuk mah mah.


"I mak hlak hlak thei lutuk Hnemi," U Piana'n an nu a lo khak vat. U Piana pawh hi Rammuanawma a ang tawh lutuk a, a ṭawng tlem zual viauin ka hre bawk.


"A nia lawm, tunah U Zoi pasalin ngaihzawng a nei ve leh bawk a, a sualman hi a la hmu zel ang, 'nu leh pa in theithur an ei a, fate hâ a ṭim' antia mi, a la hre dâwn alawn. Nitin zantin mai Pu Kamlova sûn ber ang maiin, ha hîpin Dintei a puh a, a inti ma vel thul," a ti zui leh hlak hlak.


Ka Pu ka mitthlaah a rawn lang nghal zat. Ṭhenkhatah chuan keimah vang ka ti lo thei bik lo.


Kha truck khan chiang taka a tum chu keimah ka ni tih ka chiang em em si a, a bulah dingin, a kut kha chelh lo ni ila, tunah hian a la dam ve ngeiin ka ring.


Ka ngaihtuahna avangin ka mittui a rawn hnam sawk, khap zui zek zekin ka thaw zui kawk kawk bawk.

Thilthleng te hi a awihawmloh lutuk a, engtia han hmachhawn tur nge tih pawh ka hrethiam ṭhin law.


A chang hi chuan mumang te hi a ang rum rum ṭhin zawk. Heng ka nun chhuk chho lutuk te hi chu thawnthuah tu emawin thiam takin ziak sela, ngaihnawm taka kan chhiar tur ni âwm tak hi a ni zawk mah. A taka thleng atan chuan sawi pawh ni ila tumahin an awih loh tur niin ka hria.
.
.
.


In chhung kan luh chuan Rammuanawma a lo ṭhu run a, "zing chaw i ei tawh U Rammuan?" Kei phei chuan ka be lo hrim hrim.


"U Hnem, Bawihtea chu ka lo pawm dâwn em ni?"


"Chaw ei ka'n siam ang e, ei hmasa la, i ei hnuah ka ei dâwn nia," Ethan-a min pek pahin U Hnemin a ti zat. Ka bu ve nghat a.


Ka ril a ṭam tawh lutuk mah mah, zingkarah min rawn hruai dâwn emaw ka ti zawk a, tlai hnuhnawhah a fanu leh Florence-i vangin a rawn kal thei lo tih a hriat reng, U Piana te a rawn tirh danah.


Rammuanawma chuan min en vung vung reng a, vawikhat pawh a la ṭawng lo, chokaa ka lut zui chu min enzui reng tih ka hria. Thinrimna a nei zawk em maw ni?


Ka ṭhut rual deuh thawin ka hmaah a rawn ṭhu thla ve zat, engtik laiin nge min rawn zui luh.


"Bawihtea chu ka lo pawm ang e," Ethan-a a rawn la zat, U Hnemi chu a hre ve ni âwm takin a kâ a âng ve nasa mai.


"I zahpui awm êm mai a Thlamuanpui, zanah i sual leh dâwn si," Choka aṭangin a chhuahpui a.


Ngawi rengin ka pasal chu melh pawh melh duh lohvin ka chaw chu ka bar zui mawlh mawlh.


Ka thil ei lah a tui em pawh ka hre chuang lo, Jessica-i thusawi ka bengah rawn ri leh ṭhin chuan ka thawk a ti harsa leh tlat ṭhin bawk.

"Sawi tur i nei em ni?" A lo thaw hulh.


"Engpawh sawi rawh, ka tán thu thinṭhawng engmah a awm tawh lo," ka ti ve nghat, kan nufa aia a nupui hlui leh a fanu a dah pawimawh zawk tih ka chian tak êm avangin ka insum peih ta bik law. Insum chhan tur lah ka hre hek lo.

Nizan thleng kha chuan, " ka Pu leh ka fapa vang chauhin engkim hi ka tuar chhuak ang," tia ngaihtuahin, ka thinlung ka tar hriam ve sauh sauh a. Mahse, tuna ka pasal hmel erawhin ka thiltum ve leh beiseina neih ve te kha min ṭhiah darh sak zo leh ta vek a, beisei tur a awm lo tih min hmuh tir niin ka hre ber.


"Florence...a lo let tawh a," zawi leh muangban supa ti tu chu ka melh zauh, ka chaw thleng rang takin ka melh thla lehnghal bawk, chu thu erawh thu thar ni lo mah se min ṭhawng lutuk mah mah.


A kâ aṭanga Florence-i hming ri chhuak chu nichin minutes tam liam loah pawh khan hriat ka la inbeisei a. Mahse, ka hre ta chiah erawh, ka tum aiin dawnsawn ka harsat, ka âwm chhung sa lutuk leh na ta vung vung chuan ka hrawk a rawn ti na ut ut bawk.


Kan thutiam leh inremna, thleng tur a ni tih ka hriat leh rinlawk mah nise, ka pasal kâ aṭanga zawi leh ril sup maia a hmeichhe hmangaih hming chhuak chuan, ka âwm chhunga phu det det mai hi, chemte hmawrzum leh hriam taka vihsawk ang maiin, a thip sawk a, a na veng veng ta mai.


"Ka hrethiam e..." Ka aw chhuak chu a hriat pawh ka ring law.

Keimah ngei pawhin ka hre ṭawk ṭawk a nia!

Ka chil ka lemkhalh a, "Bawihi...." Ka thaw chhuak kawk.


A aw rilruih leh inthiam lo tih hriat tak maia, "Bawihi" a tih ri hriat chu a vawikhatna ni lo mahse dawnsawn dan a dang ta daih mai.


Za vak lo hian ka nui a, "ka hrethiam ka tih kha..." A lam ka hawi a, nuilui sen sen chung leh mittui khap let fak fak chungin, "lungngai suh, inremna ka neih pui che a, ka tihtur pawh ka hria alawm; Mahse Rammuan...."


"I ngaihtuah ka hria, ka thusawi hi ngaithla hmasa ṭhin la...." Ka ṭawng laiin a rawn ti leh sup sup. A hmela a thusawi ngaihthla se mintihna te chuan minti na zual.


Ka lu lo thing mat matin, ka fianken chu dawhkanah ka dahthla a, ka kut chu dawhkan hnuai ka mal chungah nghet taka suihzawmin, "Ethan.. Ethan-a erawh ka hnenah awm rawh se. Fanu i nei a, nang chuan...." Muang banchapa tih leh ka mittui rawn lum thla pup chu ka hru zui vat.

Ka taksa chhung chu a na ngut ngut a, a fanu neih thu ka sawi chhuak ta mai te chuan min vit hlum mai dâwnin ka hria.


"A tel lo chuan ka nung zo dâwn lo tih i hriat kha....." Ka chil ka lemkhalh, "ka ngên che a nih chu," nuihluih leh ngial ka tuma, ka hlawhchham ṭhak thung. Tui chhunga thawk tum ang vêl a ni, a harsa mah mah!

Mipa ang a a chapona hian ka fapa hi min chuhpui mai ka hläu a tin ni. A chhan chu kan inremnaah khan fa neih a tel tlat si lo va.



"Dinte..." Ṭawng a tum mêk laiin U Hnemi'n Ethan-a ṭap a rawn pawm luh takah chuan a chip leh ta zawk a.


"I duhdan inle," din a rual, a fapa kalpel vukin chak takin pawnlam a pan zuia, rei loah a car engine riin a zui zat.


Mit ka chhing zui vawng vawnga, thaw ka la zui kawk kawk bawk.


Khang hun chhung tawiteah khan a rilru ka hneh theih ka ring a.

Ni lo, ka hneh ve ṭan emaw ka inti a. Ni e, nizan kan nufa awmna ward sofa-a muhil thaw suk suk mai, kan thlamuanpui em em ka pasal khan min ngaipawimawhin, a thinlungah hmun kan chang ve ta emaw ka ti a nih kha.

Mahse, ka hersual chhiava a ni. Kan inremna ang a chhuahsan ka tum a ni tih a hriat ruala, a hmeichhe hmangaih a pan nghal danah; engtiklai mahin a thinlungah hna ka lo thawk ve ngai reng reng lo a ni tih ka hrefiah uar uar a, a thinlung ka hneh ve emaw ka intih ṭhinna khan zahna kawnah min dintirin, mahni innuihsawhna avangin ka thlanfimin a bawl chhuak lo chauh zawk a nih hi!

"Dinte..." U Hnemi min khawngaihna leh lainat avanga mittui lo parawl ve kuang chu ka ṭah nuih let hak hak a. Ka ṭah chhuah hawk lohnan ka insum nasa teh e.


Ni e, ka fapa ka neih chuan eng nge ka hlauh ang ni, ka pasal, ka mipa hmangaih fa a ni a, ka mipa hmangaih nei thei lo mah ila, a fa tal ka nei alawm le. Ni e, kan nufa pawhin kan hlimin, Pa tel ve lohna khawvelah pawh bul kan ṭan thei em em ang.


"Kan thei ang, kan thei em em ang," ka phun chhuak sep sep.


"Hmangaih" tunah khan hmangaih tih thumal ka sawi nia!


Ka ngaihtuahna avangin ka ṭah nuih leh hak, ka fapa ṭap pawma hnute pe zuiin, "U Hnem, kanpa hi ka hmangaihin i hria em?" Ka zawhna avangin a rawn nui ve ta hak. Ka zawhna atthlak zia ka hria. Mahse, engtia in nge min hmuh tih ka hre duh a ni.


"I hmangaih chauh a ni lo, ani pawhin a hmangaih che, in lei a tawt dun êma chuvang a nih kha," chaw khawrhin a ei ve nghal malh malh.


Ni e, kei hian ka pasal, inṭhen mai thei dinhmuna ka dinpui mêk hi ka hmangaih a ni. Mahse, ani in min hmangaih ve a ni tih a sawi chu ka ring hauh lo thung!

Kei chu a duhthlanna ka ni a, a duhthlannaah pawh a pahnihna ka ni zel dâwn tih nen.



RAMMUANAWMA....POV

<><>~>~>~>

"Hey...hey...hey... In muang rawh, in muang rawh, vawiin chu ka buaipui hman miah lo che a nia," ka nui hul hak. Buaipui ngai reng te pawh ka ang alawm maw le.


Ka no-ah zu thlit belh lehin, "ka rui thei lo chu a nih hi," ka tlak lehnghal pap.


"A hrethiam a nih chu...." Hreptak hian a! Engchu maw a hriat thiam a, engvang phiangsena ka thusawi hi ngaithla ve ngai lo nge a nih? Engvanga a rilrua awm leh ngaihtuah hi dik ber ang a ngaireng teh hrep nge maw a nih le?


"Hmeichhe mawl lutuk mai!" Ka ti chhuak hrawih....

"Innu nen nge in inhauha, i hmei nen," ka nui huk, "hmei ka nei em ni?" Ka ṭhianpa chu ka melh a, zu no bawk chu ka en leh, nui vur vura a no la kang ve in, "hmei' tihsak che i duh loh leh i hmangaih kalta, rawn letleh," nui huk huka a tih leh chuan ka lo rûm nghut.


"Kalta' a ni, a rawn let leh ngei; Mahse, ka nunah ni lovin. Florence-i nen inzawmna kan la neiah a ngaih tlatna chu ka duh hauh lo.


Sawifiah emaw han sawi chhuah mai dan tur lah chu kei mipa ṭawng tlem lutuk hian ka vàn em em bawk si.

"Ka fanu Nu a ni a, ka duh loh pawhin ka fanu vanga ka biak a ngai," ti ila a rilru ka tihnat ka hläu ve leh khanglang bawk si. Ka ngaihtuahna avangin ka thaw chhuak hawk.

Engtin nge mipa dang hian an nupui te an uire san theih tih ka ngaihtuah, hmeichhe pakhat thunun leh ka thusawi ngaihthlak tir pawh a harsa êm êm si a.


"I nupuiin he thu a sawi hun hi ka lo nghak reng a, ka rin aiin a sawi har daih."


"Ti khan min en suh Rammuanawm," ka en rum deuh a ni ang, Malika bialnu a sumdawnnaa a partner rinawm Febby-in mi vin hlar.


Nui sukin, "inṭhen a duh thu a sawi chu i pawm pui hle tihna em ni?" Ka lo ti sup.

"Pawmpui e," min melh rawm rawm.


"I harh chhuah a hun tawh ka ti. I thiltih te, i awmdan te hi a lutuk mah mah ve bawk alawm, i nu engtiklai maha mo atana pawm ngai lo nitin a hmachhawn a ngai a, i farnu leh nang in lo ni zel nen. I nunhluiah thil tam tak i pal tlang tih ka hria, na taka hliam i niin, hmangaih neih leh i hläu tihnen, i tan pawh hmeichhe dang hmangaih leh a awlsam lo tih thlengin.

Mahse, innu hi ka khawngaih a ni, hmeichhia ka nihna ang a ka hmuh dan chuan i phu lo takzet zawk. Tin, kalsan che a duh a, ṭhen che a duh a nih chuan, chutiang sawi a ti thei turin dikna famkim a nei bawk," Febby-in a tih tan tana min melh zui ngheka kal sawnin, Malika chu a rawn nui huk huk.



"Insawifiah dan ila hre meuh na nge?" A rawn ti zui a.

Ka hnar ka lo tum dat, "ka hlauthawng zawk a ni bawiha," ka ti sup chu ka ṭhiante pahnihin min en haw.


"Ka hresual em ni? Rammuanawma hian hlauh a nei amaw?" Annui zui huk huk.


Nei e, a vawikhatnan ka nunah hlauh ka neihna hmasa ber a ni ngei ang. Hei vang hi alawm, engmah hrilh lova, thimah awm tirin, ka venghim emaw ka intih ni.


Tin, Insawifiah thei dinhmunah ka ding lo tih inhre chungin, insawifiah ka duh a, ka duh ang zat chiahin ka insawifiahna ngeiin ka tihnat leh ka hläu a, ka chelh lo a nih chuan kumkhuaa ka chân hlen ka hläu bawk si a tin ni.

Ka ngaihtuahna avangin ka thaw chhuak hulh, engtiklai aṭang khan nge hlauh te hi ka lo ngah tâk em em ni?

Engtia rei nge ka nupuiin inṭhen a duh tih minsawi pui a tumna hi ka tlân chhiat san dawn? Ka nunah a vawikhatnan, hmeichhe lakah lehnghal ka tlân chhia a nia!

"Bawiha..." Malika'n ka dara rawn beng thuk pahin, "chelh i duh a nih chuan sawi rawh, i hmangaih a nih chuan hrilh rawh, i rilru a awm leh duhdan i sawi loh chuan engtin nge a hriat ang ni? I ngaihtuahna i sawi avangin i thi lo ang," thutak zet a tiin, "ni e, hmangaihnaah hi chuan inlâk pâ vak a ngawihbo aiin, pâ deuha kan hmangaihte chelh hian hlimna minpe zawk a nia," Enkawla'n rawn tih zawm chuan nui nghawr datin, "Inrui em ni?" Ka ti chu nui huk hukin fiamthu anthawh zui hawk hawk a.


"Tak takin a Bawiha, innu i kal tir a nih chuan damchhunga inchhir leh nat bâk i hlawh dâwn lo a nia. A hunlaia kan sawi lo a, hma kan la lo a nih chuan eng ang pawhin hmangaih mah ila, hmangaihna awmze nei lo mai a ni," ka lo thaw ham ham.


Tunah ka Pu su tu leh Ramdini tihnat tumtu driver pawh ka la man lo va, a awmna chin tal hria ni ila, hmalak dan tur chu ka hriat mai ka inring.


"Thudik hrilh mai la," ka lu ka lo thing mut mut.


"Hmeichhe luhlul tak a ni a, a luhlul luatah ka thusawi aiin a ngaihdan a dahlian leh dâwn. Ka bula awm a thlang ang a, chu chu a atan a him loh zia i hriat kha," ka ti leh sup sup.


"Ka tihpalh.." Enkawla chu Malika nen kan en a, za vak lo hian a rawn nui suk.


"Jessica-i zawk hi engkim hrilh ta ula," Malika chu enin, "engthil nge thlenga i rin?" ka lo ti bul hluk. A thil duh leh tum hre mah ila, hetianga thui erawh a kal ka ringpha bik hauh lo.


"Ka license ka chan dâwn emaw, jail ka tán ngai pawh nise i nupui leh i fapa in anrawn tawrh ai chuan thudik sawi pawi tihna ka nei lo a nia Bawiha, ka tán thil iti tam tawk tawh alawm le. Mipa ka nihna angin ka hmachhawn te pawh a ngai a," Enkawla'n a rawn ti sup sup. Ka lo ngawi rûn thung.


Kha accident thlennaah khan Enkawla'n, Jerry-a a ngaihtuah lutuk nalamah, accident thlenna hmunah khan zai tumin enkawl nghal lo sela, emaw medical team rawn thlen hun nghak nise chuan buaina hi a awm miah lo tur.


Medical team rawn thleng hmain harh mah ila, ka harh meuh chuan Jerry-a erawh a lo awm tawh lo thung!


Ka thil ngaihtuah avangin ka thaw chhuak hawk. Ka lu tuai puatin, "i nupui fanau?" Ka let ti sup a.


Enkawla'n a zu no chawikang a tlak zui pupin, "nang le, Dintei, i hmangaih i nupui leh i fapa hi i chan dâwn em ni? Florence-in, Dintei ṭhen tur che a ti chein, i Pu su tu driver awmna a hrilh tur thu che a tiam si che a," ka lo nui huk.



"Dintei hi hmeichhe fing tak a ni a, hrilh ta zawk ula, inbuaina pawh hi kawng tamtakin a kian phah zawk lo'ng maw?" Malika thusawi avangin ka lu ka lo thing leh mut mut.


A fing lutuk, a fing lutuk mah mahin, a luhlul mah mah a, ka thusawi aiin a ngaihdan leh duhdan a dahlian hmasa zawk dâwn tih ka hriatna hian hre lo se tih duhna min neih len tir zawk.


"Ka lak aṭanga inthiar fihlim aiin, ka kiangah dingin, min hmachhawn pui a tum ang a, chu chu ka duh hauh lo. Jessica-in a kutah eng card nge a neih a, tute a thuhnuaiah a dah ka hre si lo, remchang awm a piang a hmang ṭangkai vei nen, a tán leh ka fapa a hlauhawm lutuk," ka ti sup sup.


Ka bul hnaia awmtir ka duh luatah, he phuba lâkna ramriah hian an nunna ka ti derthawng thei tawh lo.


"Engtia hmalak nge i tum?" Ka lo thaw hulh. Thildang aiin ka fapa leh ka nupui himna ka ngaihtuah hmasak a ngai tih ka hria. Chutiang bawkin Jessica-i leh Florence-i hi pakhat an ni em tih chian nan ka fapa hi ka haider a ngai a ni tih ka hre bawk a.

Chu erawhin ka nupui thinlung hmun tamtakah a pawt darh dâwn tih leh, a khawvel ka tichimin, ka laka a beiseina tlâng säng aṭangin ka nawr liam dâwn a ni tih chiang takin ka hre bawk si!


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)