LOVE AFTER MARRIAGE By Floria Laldansangi (Completed)

Moderator: Floria

Ngaia
Site Admin
Posts: 25813
Joined: April 30th, 2016, 4:07 pm

Re: LOVE AFTER MARRIAGE By Floria Laldansangi (Completed)

Unread post by Ngaia » June 5th, 2022, 12:55 pm

{ LOVE AFTER MARRIAGE}

BY

Floria Laldansangi


Chapter < 31 >


"U Hnem, reilote ka han mu lawk ang aw," ka fapa zan a sual leh dâwn si a, a tlei lai tal ka chuh loh chuan.


"Han mu rawh, han mu rawh. Zan i men leh a ngai âwm si," ka hnute pe zo chu Ethan-a a rawn la a, "awi a! Gate ka kalh theihnghilh daih U Piana a chhuak tawh dawn chuang si lo va," a ti leh hluai.


"Ka va kalh ang, tu ui nge rawn lut saw," tih leh kan pensawn nghal. Han tai deuh chuan ka dul chu ala na ve zek zek reng.


An ui thlun rawn lut ni ngei tur a ni, a nghawngah a thlunna pawh a la awm.


A thlunna aṭanga gate pawnah pawt chhuakin, ka chhuah ve leh mai a.


Ka Pu nena kan accident-na hmun lam chu, chawhnu nisa ver vawr hnuaiah chuan ka thlir deuh vang vang, ka mitthlaah ka Pu a rawn lang zut zut a, ka âwm chhung na lutuk leh tawt lutuk chu ka thaw ṭha thei lo, ka lungphu zawn ka ṭham zui deuh vawng vawng a.



Boruak tamtak hip tuma ka kun laiin, "RAMDINSANG, THIH I DUH EM NI?" Ka pasal Rammuanawma aw ki säng leh vin zet mai ka hriat rualin her nawkin , ka bawh nghal rawk rawk, harh zui kawk chuan ka mittui a per chhawk bawk.

Tlem a tlemah min su lo chauh alawm! Ka lung phu nghal zawih zawih chuan ka thawk laka a tibuai, ka thaw a chham lek lek zawk hial!


"Thih i duhem ni?" Ka dár tawn tawna chelhin min thing zui nawk nawk a. Thih duh chhan tur ka nei miah lo, nung tur leh dam turin ka bei ṭauh ṭauh a, ka zahawmna leh taksa hial ka hralh chu a nih si hi!


Mi â ang maia en let hau vin, thinrim thaw ri hraih hraih a min en tu, ka pasal, tlai dar 2 vela zu rim nam ham ham chu melh chho he haw-in, "no dawm dun i duh em?" Ṭah chhuak, ṭap thei si lo chuan ka ti chhak sep a, min hmerna hit mer mer kha a dul riai riai bawk. Ka bân bul chu a vawt zui ser ser thei.


"Eng maw?"

"Zu....zu indun ang ka ti a nih chu," min vawnna aṭangin ka talsawn zat, minthlah ve mai bawk a.


Min en deuh ngur ngur, a thinrim mitmeng kha hmuh tur a awm tawh lo, mâk tihna ka hmu zawk nâ-in a rei lo lulai êm a, ka hmu sual a nih ka ring mah ta zawk.

"Zu in theih dinhmunah i ding lo, i hliam..." A tih nghut nghut laiin, "no chu dawm dun i duh lo em ni? Thu tamtak sawi tur ka nei si a," dam diai hian ka lo tih khalh vat chu min en leh ta vung vung a.


Engmah sawi lovin ka banrekah rawn chelh chuan Gate lamah min kai lut dawt dawt. Ngawi rengin ka zui ve dat dat, ka tlân a ni mah zawk!

Ka Pu room-ah chuan min kai lut nawk nawk a.


"Ṭhu rawh," a aw nelawm loh tak mai, ka hriat ṭhan em em, bul zet mai a tiin, ka hmaa cupboard lam chu panin a hawng a, zu, eng zu nge a nih phei chu ka hre law; Mahse, zu man tlawm tak erawh a ni lo tih ka chiang lutuk tlat, um nalh tak mai hi no nalh tak, manto tih hriat tak nena rawn phawrhin ka hma dawhkanah chuan a rawn chhawp zui a, ngawi rengin a che vêl chu ka en kar bawk!


Ka hmaah no rawn nawr hnaiin, "In rawh," a ti leh nghut a, ngawi renga banin ka tem zui hlak, ka ner zui sawk chu lo nui ri sukin a no lakang chuan chair pawt chhuakin a ṭhu zui nghal a, "i hliam.."

"Naupang ka ni lo Rammuan.." Ka inzaina ngaipawimawh ber ang maia a awm chu ka lo khak fak. A mitko a san ak duh lek lehnghal.


"Keimah ang maiin, pawnlam mawi ang aiin a tui lo," tichung siin ka tem ve leh zel a, tihluihna hmanga ruih ka tum rilru a ni ber.


"Eng nge sawi i tum?" A aw pangai ta dup chuan minti ngampa ta deuh.


Nui chungin, "ṭhian ngaina tak ka ni tih i hria ang tiraw?" A hmel en miah lo mah ila, ka pasal mi uapna tak leh mit thil tithei tak chu ka chungah a fu ran a ni tih ka taksa hian a hre lutuk mah mah.


Ka no chawi kangin, eng rawn luhna zawna lek kâng chuan, no fim mawi tak mai, êngin a chhun tlet ral ral chu nuih sen sen chungin, ka pasal mitmeng dum fiah tak, zûn ngah tak leh mi thunun theihna nei, ka chetdan avanga chîk lehzual a min en tu chu en let in, "khang hun chhung khan thil pakhat chiah tum leh duh ka nei," ka tawp dat a, ka no ka hmaa dah ri khapa en vang vang chuan, "keimah Ramdinsangi ang a nun a ni; Mahse, i hria em? Nikhat lek pawh keimah angin ka nung ngai lo. Engtik laiin nge, eng hunah nge hetiang tak hian ka inthlak a, nun lem lutuka nun dan ka lo thiam ni. Za miah lo chunga nuihmel put dan ka thiam a, ka rilru a awm leh duhdan ni miah lo ang a ka ṭawngkam leh chezia ka tihlan a, sawi chhuah theih tâk ni," ka nui zui hak.


Ka zu chu tem leh hlek in ka ner zui leh nawng nawng bawk a.


"Ngaihthlak ka nih lohna hmunah chuan, an ngawih rengnain min hmetbet a, mitmei vên reng ngaia ka awmna hmunah, khungbeh ni si lo vin saltang pakhat ka ni ṭhin,' chu chu i ring em?" Min chhan a tum ta lo emaw ka ti hial hman.


"I sawi tumah lut rawh," bul zet hian a rawn ti nghut, a no ah zu bawk a thli leh a.


Ka nui hak, "vawiin chauh chu dawhthei takin lo awm rawh," dam diai a tiin ka melh ralh a, ka nuih zui sen sen, ka in tlem veinen, ka lu a ti hai dêr lehnghal!


Ninhmel deuh hian a thaw ri hawk a, ka lu hai deuh mit chhing deuh sak sak chuan a nuih a ti zà leh si a ni ngei ang, a nui ri suk chuan a zui zat.


"Lemchan lamah kal rawh' 'mintih kha i la hria em?"


"Ka sawi...." A ti hman ṭawk, "lemchan ka thiam zia kei pawhin ka inhre chhuak chiah a ni; Mahse, vawiin, tun ṭum erawh Ramdinsangi tak tak ang a thusawi ka duh a ni."


A mit ti zim salhin, a nui leh suk a, hahdam hmel taka ṭhu in, "sawi rawh, ka ngaihthla" ti ni âwma tak hian min en nghal ran bawk!


Ka zu no chu ka kut hnih a nghet taka chelhin, zawitê-in boruak ka hip vang vang a, thaw chhuak ham ham chuan, "khang hun chhung khân MO, Tunu, Nupui ka nihna angin ka theih tawp ka chhuah ve chuan ka hre bawk," ka zu bawk chu ka lem leh hlek a, ka hrawk a tawt tâk tlat vang nge a tui lohna em em ka hre ta lo.


"Ka nihna hlen tuma theih tawp ka chhuah laiin, ka pasal, nangnena kan inzawmna pawh paper pakhat mai a ni tih ka lo mangnghilh leh ṭhin. Zan i riahbo in, i bo chhan hre reng chungin, ni 2, ni 3 i bo chuan ka mangang rü a, 'ka pasal chungah eng nge thleng a, damdawi inah em ni a awm? ' Nupuiin a pasal a hmangaih tak angaihtuah ang maiin ka ngaihtuah ṭhin che." Ka ṭawng laiin a kâ a lo ang zuai chu, "ka hria ngaihtuahawm i ni lo tih," ka lo tih khalh vat chu min rûm khum nghutin a zu chu a tlak zui pap bawk.


"Khawnge i awm tih leh tunge i awmpui tih thleng a ka hre chung pawhin ka ngaihtuah em em che a, ka thiam loh a ni."


"I rui a nih kha," ka no rawn lâk a tum chu lo dahsawmin, "hmeichhe tawrhchhel tak, fingfel takah a ṭhenin min ngai a, a ṭhenin min khawngaih a, a ṭhenin ka tawrh chhuah theih tur thu min hrilh bawk a; Mahse, an vaiin an ringsual a ni. An mihmuh dan leh ngaihdan angin ka chak lova, he hmeichhe thinlung hi a rum ve a, a nihna diktak ang a lan ve a duh mai chauh a ni," ka mittui rawn luang thla pup chu hru tawka insût ri hraihin, ka nui zui sen sen bawk, ka kawchhung erawh a na kham ngut ngut thung.


"Keimah leh keimah ka inhrilh a, 'Ramdinsang, eng nge maw harsa itih em em le? I pasal tán, i chhungkaw venhimnan alawm i beng i tihngawng a, i mit i chhin luih ni, nangmah chauh hi hrehawm tuar emaw i inti ang e, hmeichhe tam takin chhungkua vang chauhin an thawk tawp thlengin a sin uire pasal zantin an mutpui ni, i tuar nasa bik lo ve, hmeichhe dang tawrh ang i tuar ve mai chauh a ni' tiin. Mahse, ka mit ka men a, ka beng hupna ka laksawn hnuah ka thil tih leh awmdan hi a dik lo a ni tih ka hre chhuak a, ' hetiang tur hi a ni lo, chhungkaw hlimna chu inchhung leh nupa inhmangaihna aṭanga din a nih chauhin a ni hlimna diktak a awm ni. Tawrh hram hram emaw haider lam ni lovin' tiin."



Ka sawi zo thaw la vang vangin, ka zu chu ka tlak zo vei pap a, ka khuh zui khawrh chu a kut ka lama rawn lek kang chu lo dang vatin, "ka thei tawh lo a ni, hmeichhe chaktak ang a lan te, beng ngawng leh mitdel ang mai a awm te, na ve thei lo ang leh mi khawngaih ngai a awm te, hengte hi ka tawrh theih piahlam anni tawh. 'Engtik ni ah emaw chuan' tia ilak a ka beiseina neih te kha vawiin ni hian ka thlah a, 'ka fapa Pa alawm' ka tihna che kha ka bansan a, 'a fapa leh a Pu min khawngaihna avâng tal pawhin' tih kha theihnghilhin kawngkhar thar ka hawng duh a ni.


Ka tán pasal ṭha tak i ni ngai lova; Mahse, kan ka chhungkaw tán erawh makpa ṭhaber i ni, khawvela makpa ṭhaber, ka läwm e. Hetiang hun leh hmuna inṭhenna thu ka sawi hi pawi ka ti, mahse zalenna diktak pe tur che leh, keimah ngei inchhuah zalen turin ka harh chhuah hun a ni tlat si a," ka pasal chu mitmeng banchap chuan ka melh ralh ralh a, za miah si lo, ka thiam leh awlsam taka ka natna khuhbo ṭhintu ka nuihmel nelawm tak chu ka chhuah var var a, ka sawi chhung zawng khan chemte hmawr zuk taka vih ngut ngut ang mai ka ni.



Ka thusawi, nawi leh bah taka ka sawi zawh hnu a ka pasal mitmeng leh hmel landan chu ka hre thiam leh ta chuang lo, kan ngawi dun vang vang a, kan ṭhutna room zau reh duak mai chu a zim tulh tulhin, boruak hip tur a tlem tial tialin ka hre bawk!



Ka thawk lak harsa ta lutuk chuan min hnawh hlum dâwn hialin ka hria.

Ka ṭhutna aṭanga ka din rualin a phone a ranw ri ral ral a, message a dawng nge ni a phone call zawk ni ka hre lo, a phone hian ring tone a neih ngai ka hre tlat lo. Zanin hi a fanu piancham lawm antum zan a ni tak e. Theihnghilh a hläu te pawh a ni mah nâ!


Eng emaw sawi hian a ânchhia a phuh chhuak hluk a. A phone chu hmet zauhin

Min rawn melh chho zawk, a mitmeng chu ka ruih deuh vang nge a buai nuaihin ka hria. Ka hmusual a niang, ka rui ve deuh si a.


Ka pensawn tur pawh chu ka lu hai ve muai muai avangin ka nghet viau lo.

"Ramdin...." A aw chhuak chu a sak ve ṭalh.

Ding chung chuan ka en ran a, a kut dawhkanah nghatin, nghet takin a kut pahnih chu a hmer khawm tih a bâna thisen zâm lang ṭhuah ah chuan a hriat viau bawk.


Ka mitah min rawn en chho a, "Ethan-a hi tu fapa nge a ni?" A thu min zawh chu ka hre sual emaw ka ti, "engmaw?" A thusawi chu ka hresual emaw ka ti tak tak. Ka nat ruk lutukna leh ka kâi ve deuhna lamah ka hresual a ni ngei ang.


"Engmaw i sawi kha?" Hriat sual inring tak leh hriat sual a nih loh hläu tak siin ka zawt nawn leh sep bawk a.


Ka lam rawn hawi chho in, "i fapa...." A hming pawh a lam ta lo, 'i fapa' a ti ri chuan min chhun nghal zek, a thusawi zawm hun chu thinphu dep dep leh kawchhung khur lek lek hian ka nghak kar bawk.


"I fapa hi tu fa ber nge a nih?" Fiah tak hian a rawn ti chhuak fuk a, ka âwm, ka lungphu zawn hi cheh sawk ang mai hi a ni.



"Engmaw....?" Ka awih thei lo. Ni lo, a zawhna hi awih tur a ni em ka hre lo zawk. 'Tu fa nge?' Pawh ni mai lovin, 'tu fa ber nge?' A ti a nih chu'h!



"Ka fapa a ni lo tih ka sawi kher i nghak lo ang chu tiraw?" Hahdam hmel zet hian a ṭhutna hnung nghengin a ṭhu dat a, a hmel chu a ti sawi nawr bawk. Mahse, hahdam hmel erawh a pu bîk miah lo thung!


Ka thinrim lutuk leh ka thinlung leh kawchhung na lutuk chu ka lei a tawt a, thlunbeh tlat ang maiin ka ti che thei tlat lo.

Mit ka chhing sawk a, thawk chhuah kawk ka duh tehlul nen, ka thinrim lutuk na lamah ka duh ang pawhin ka thaw ka thunun thei lo, harsa tak chuan ka chil ka lem hrawk a, "zawhna min zawt nge ni a i ngaihdan i sawi zawk?" Ka mit ka khap fak fak, ka thusawi chu ka lei hmawrah a thâwp ral lo chauh bawk.



"I kâ ngei aṭangin thudik ka hre duh mai a ni," ka thaw chhuak kawk, boruak hip leh kawk ka duh laiin ka thei leh ta chuang lo, ka lungphu hi ṭham beh tlat ang mai a ni tawh.


Ka lu chu ka thin khum mat mat a, "i ngaihdan nemnghet turin min duh a ni zawk lo maw?" Ka aw chu a ring tawh lo takzet.


A ner nawk a, ka lu ûm chhungah hian zawhna tam tak a awm a, zawh ka duh bawk. Mahse, ka tán thawk lak leh chhuah ringawt pawh chu a harsat lutuk mah mah.

"Khang hun chhung zawng khan Ethan-a hi i faah i ngai lo amaw? I fapa a ni lo tih i lo pawm a, i ring a?" Tam tak zawh ka duh mah se ka lei hi a che thei tlat lo.


"Ramhuai inih hi Rammuanawm. A dik, Ethan-a hi ka fapa a ni, ka fapa chauh," au khum vak ka duh a, a phu viau bawk mah se ka thei lo. Ka khur dar dar a, "vawikhat pawh ka fapa nena kan mit hmuhah rawn inlan tawh ngai suh ang che. Vawiina i thusawi leh zawhna hi i damchhungin hre reng la, engtik ni ah emaw ngaihdam min dil tur pawhin rawn inlan suh, ngaidam tur khawp che in ka hmangaih lo che," ka thaw chhuak kawk kawk.

A mitmu dum fiah tak, tuipui thûk tak ang a thim mup maiah chuan inchhirna emaw inthiam lohna emaw engmah hmuh tur a awm lo, chu chuan ka thawk a ti harsa zual a, inher san vat a, a mitmeng thim dum mup saw tlân chhiatsan vawn vawn ka duh laiin ka ke reng reng a che thei si lo. Ka dinna hmunah hian zung a kaih ta emaw tih mai tur ang hialin a nghet tlat a, nichina ka zu tem ve te kha chuan minti rui pha tawh teuh lo, duh aiin ka harhfim ta mah mah zawk!



"Nangang ramhuai hi lo hmangaih miah lo tur che ka ni?" Ka sawi chhuah rualin ka lungphu hi kut lawnga phawrh ang mai a ni. A na lutuk a, thawk ngaihna ka hre lo. A hmel chang rut leh ngeng ngulh mai chu tlân chhiat san vawn vawn ka duh, ka duh takzet!



Room aṭanga ka pên chhuak chu ka lu hai ka tlu lo chauh, zu in miah lo tur kha ka nia, ka inzaina lah chu a za thip nghal veng veng a.


"Dinte...."


"Bawihtea khawnge?" Ka mittui tla tur ka khap let fak fak. Ka mittui ai mahin ka kawchhung tawt lutuk chuan min hnawh hlum mai dâwn.


"U Piana'n a pawm..." A tih zawh rualin kat deuh nawk nawk chuan ka pensawn a.


"Ka lo pawm ang e," ka fapa chu ka pawm zui.



"Dinte, room-ah lo han mu hahdam zawk rawh."


Ka lu ka thing vat vat a, ka iptea phone chu phawrhin, U Gos-a call ka tum zet chu ṭhulh lehin, gate lam chu ka theih tawka chakin ka pan zui dawr dawr.


Rammuanawma'n min en zui nge ka hre lo, ka tukkhum chu a za mer mer thung. Ka mittui a tlak lohnan ka thawk ka chelh tlat bawk a.


Pawn boruak dawng a, khaw eng hmu ngai lo nuam ti ni âwm takin, a âng ve hliai hliai lehnghal a, ka fapa hmel ringawt pawhin ka hnuk a ti ulh ṭau tawh.


"Dinte, rawn chuang rawh u."


U Piana min auhna chu hre lo ang hmakin ka awm, ka pên hmawk hmawk.



"Ni a la sa si a, Ethan-a kha a dam lo mai ang," a tih leh takah chuan ding datin, Ethan-a chu ka en a, a hmai a lo tai ṭan hlar tawh tak tak. Car kawngkhar chu hawng vatin ka ṭhu lut ve vat.


A tlân chhuan rualin chak tak maiin Rammuanawma bike hian min rawn tlân pela, ka lo thaw chhuak hawk. Engkim chu a tawp chiang lutuk a, engmah ka ngaihtuah chhunzawm thei tawh lo, ka hawina lam a piang chu a pik em em rih a ni ber.


"I U Siampuii te in ah em ni?"


"Aih....." Ka kalna lam tur ka ngaihtuah pawhin ka hre mai lo, kawngbo ang mai ka ni.


"Siamsiami in luahnaah," ti ta sepin a awmna lam chu ka sawi nghal a.


"Dinte, U Muana hi i ngaih ang a ni lo a nia," min rawn melh zawk, "engkim hrilh che hi ka chak keipawhin. Mahse, zanin hian engkim a fel thawkhat turah ngai ila," a ti leh sup sup.


A thusawi chu pakhatmah ka hrethiam lo ang bawkin, ka ngaih ang a nih lohna lah ka hre hek lo.



"Ka lawm e," car aṭangin ka chhuak vat, Siamsiami bulah awm pawh ka tum chuang miah lo, niminah kan khaw lamah a haw daih tawh bawk.


U Piana tlân chhuah thleng chuan ka nghak a, Kawngpui lam panin taxi ka chang ṭha leh vat.


"U Damte, in ah i awm em?" Taxi ka luh rualin ka call nghal.


"Aw awm e, i aw chu'h! I dam lo em ni?"


"Taxi ka rawn la a, taxi fare min lo pek," ka ṭah nuih hak.


"Tehreng mai, rawn phei rawh u, kan nufa chauhin lawm kan awm leh tawh," nui zui khek khekin kan dah zui a.


U Damtei te in kawt ka thlen chuan a lo ding vang tawh, kan lam rawn pan vatin taxi fare chu min peksak a.


"Khawimaw Thlamuana chu ka lo pawm ang e."


"Engthil nge thleng teh thut a? Damdawi in aṭangin inchhuak chiah a ni lo'm ni?" In chhung lam kan pan zui nghal a.


Ka kawchhung tawt tlatah chuan mittui hul hak siin ka lei hi a la che hleithei lo.


Sofa-a ka ṭhut thlak rualin ka inzaina na tawh lutuk leh luhai luak chhuak bawk si chu ka let nghal tawp bawk.


"Dinte..." Ka ṭap thei lo va, au chiam duh mah ila, ka au chhuak thei bawk si lo.


Mu zawi ngiai chuan ka melh ngai melh ngat ngatin, "U Damte.."


"Inpa nen in inhau em ni? Nge ni a, inṭhen i rilruk tak tak zawk?"


Mittui hul hak siin ka kawchhung hi a ṭap hawm hawm a, min hnawh hlum mai dâwnin ka hria.


Mit chhing deuh vang vangin, muangchangin Rammuanawma nena kan inbiak dan leh Ethan-a pawh a fa a nih a rin loh thu hial a sawi chu ka sawi chuak sep sep a.



A tawp lam chu ka lei hmawrah a ral zo.


"A va han laktlak loh em em ve Rammuanawma chu. Engtin nge a fapa em em te a rinhlelh theih zawk? Mihring pangai tih chi pawh a ni em ni?" U Damtei ang hlawk hlawk chuan ka thaw a ti chham tak tak dâwn, ka mu pawh chu ka tawt lutuk a, ka thaw thei chuang lo.


Ṭhu chhuakin, boruak ka'n hip vak dâwn a, chupawh ka thei chuang der lo.


"I phone kha a ri a nia."


Kan ngawih dun vang vang hnuah U Damtei'n a rawn tih chuan ka harh zawk, ka lungphu zawn chauh ni lo, ka thin dîp thleng hian a na thip vawng vawng thei nia maw le.


"Dinte, U Rammuanan a zawng che a nia," phone ka pickup rualin U Hnemin a rawn ti zung zung. Pawnah Rammuanawma car ri ka hre zui zat chu ding zawtin, U Damtein Ethan-a a pawmlai chu phih ti tih hian ka phih a.


"Engmah sawi suh," tih leh inchung lama tlân chhoh ka rual, room awm hmasa bera ka tlân luh rual deuh tawhin Rammuanawma inchhungah a rawn pên lut zui a.

"Khawiah nge a awm?" Ka dinna aṭang chuan khawng atin ka bih dek dek. Ka thaw dep dep bawk.


"RAMDINSANG, i awm tih ka hria. Rawn chhuak rawh, inbia ang," inchhungah chuan a tlan kual a, nghet takin ka inhum ruh. Nuate lem ka ni lo, duh duha a thunun tur ka ni bik law.



"Ramdinsang, ka sawi chu i hre lo em ni? Rawn chhuak rawh!! TUNAH!!!!" A ti leh hrawk, inchhung chu khawk duh rûm rûm tak a ni!

Inchung lama rawn tlân chhoh a tum chu U Damtei'n a lo pawt leh vak a, "tunge i nih a Ramdini zawng tur hian?" U Damtei'n a ti ṭhat.

"Min hmuh tir rawh, ko chhuak rawh," Rammuanawma aw chu thinrim leh rilru nâ insum, sehchilh bap bap ri a ni.


"Engtin nge itih theih? Bawlhhlawh... Ni lo, bungraw hman duh tawh loh ang maiin engtin nge i thehchhuah thei? Mualphona i thlen hnu leh a fapa hial i rinhlelh sak hnuah engtin nge paper pakhat pawh thlak ang maiin i nun aṭanga i theh chhuah theih zawk?" U Damtei chu a thaw chhuak hawk a, ka inrin hma-in ka biang a rawn lum thla pup, mittui kar aṭangin inhnuai a ding ka mipa hmangaih, ka pawmlai mêk ka fapa pa ngei mai, ding khawng run leh kut hum ruh ngar mai chu ka en ngawt ngawt a, ka awm chhung na lutuk chuan ka thaw a ti chham lek lek bawk!


"Ethan-a Nu...." Sak tih hriat taka a tih leh rualin, "tinge? Natna pek belh turin hmuh i duh em ni?"


"Teuh lo lutuk..." A lo ti bul hluk. Ka dinna kawngkhar tlâng chu nghet lutukin ka chelhbet zual sauh, a aw a zawih a, a fiah leh hniam poh leh a mi fan a na tulh tulh mai bawk si!


"Rammuanawm, i tán chuan thlî, man leh chelh theih loh a ni tawh, i chelhbeh theih loh chu man buai tum suh, ka In aṭang hian chhuak rawh," U Damtei aw chu a hma ang lo takin a dam dap a, amah Damtei mize zawi awi tak. hlauhawm tak si khan a ni thu a pek ni.


"In ngaih ang kha a ni lo," tih leh hlukin, "a awm tih ka hria, ka nupui leh ka fapa ka hmuh hma chuan 1inch khat pawhin ka tawlhsawn ring suh," luhlul zet leh tawlh sawn tum lo lutuk hian a ti nghet leh churh churh a.


Inchhung lam rawn hawi chho vin, "Bawihi, ka thusawi i ngaithla tih ka hria. Ka tlawm e, ka tlawm ni rawh se. Rawn chhuak la, ka thusawi reilote tal ngaithla rawh," a aw chhuak chu a dam hlup a, a ngeng ngulh thung.


Ka fapa ṭah tum che ve ṭalh ṭalh chu awi zuiin, ka pasal ding kak run lam chu ka melh thla leh ṭhin, "ka hmeichhe hmangaih, ka hmangaih thu pawh ka hrilh theih loh che chuan engtin nge ka venhim zawh ang che ni. A ni lo'm ni?" Za lo tih hriat tak hian a kiai zui sawk.


Tunah khan a ṭawng ka hresual em ni? Min hmangaih thu a sawi a nih chu! A hma daih khan sawi tur a ni si a. Nge ni a, min bum a tumna ni leh zawk?


Ka chhuak lo a nih chuan a che sawn dâwn lo tih ka hming ka chian tluka ka chian êm avangin thaw la kawkin, ka fapa pawm ṭha chuan kawngkhar chu ka hawng riai riai a.


Vung takin ka dinna a rawn pan chho nghal pawk pawk, U Damtei rawn tlân chho ve nghal vatin, kan bulah a rawn ding zui a.


Ethan-a rawn ṭap chu, "U Damte, a ril a ṭam a nih ka ring, bawnghnute inneih chuan khawngaihin min lo peksak," Ethan-a ngaihtuah chang lek lovin zu ka lo tem ve hlek a, hnute ka pe ngam lo.


"I ṭha ang maw?"


"Min ngaihtuah suh," Rammuanawma ka melh zauh chu a hnar a lo tum dut. Hmelma ang maia ka en chuan a lung a ti awi chiah lo a ni ang.


"Eng nge ila duh Rammuanawm?" U Damtei pensawn rualin ka ti nghat.


Min en run chungin a chhip chu a tuai puat a, eng emaw sawiin, "vawikhat chauh chu min ring thei lo em ni Bawihi? Thil hi a landan ang a ni lo," a aw ah chuan ring ngei se minti tih a hriat theih. A hmel tak nguk mai chuan min hmet chau, ka ṭah te a rawn chhuak et et bawk.


"Min ring ngai miah lo tu rin hi ka bat a ni lo," ṭah chhuak insum ṭau chung chuan ka ti chhuak a, nin hmel zet hian a lo thaw hrawih.


A hmai chu puatin, "chutiang chuan ka sawi miah lo," ti bul nghut nghutin, "engthil nge ti se min duh?" A ti leh nghut.


Ngei na deuha melh ngawt ngawt chungin, "engmah. Engmah ti suh Rammuanawm," kha zet chuan ka ti chhuak, ka mittui ka dan na mai ni lo, ka aw chhuak lawi rut tur dan na lamah ka ṭawng chhuak thei lo lek lek zawk hial.


A thaw ri hrawih a, ka kut rawn chelh a tum chu ka hnunglamah ka lo dahsawn vat.


"Ka sawi kha i hre tawh lo em ni? Ngaihdam min dil tur pawhin ka hmaah inlan lo tur che in," a lo kiai suk, a zat hmel viau loh.


Mit sen rum hian min en run a, "a nih chuan min ngaidam ngai suh ang che," ka thaw ka lo hip let kawk. Ka hriat tum loh lutuk a nih vang a ni mah nâ!


"Thil ka tihsual nawn leh dâwn avangin," tih leh rang tak maia ka kut ka hnunglama ka suih chu, pawt phelhin, zo lutuk hian min pawm nawlh a, ka rak ṭhat.


"Rammuanawm...." Ka dul na lutuk chu ka ṭhen sawk bawk.


Thaw chhuak hulhin, "che suh," thu pw zetin a ti sup.



Ngei lutuk a melh chungin, "min dahthla rawh," ka au dâwn a ka dul nat lutuk na lamah ka aw a chhuak ṭha thei lo.


"Teuh lo, ka ru dawn che," tih leh inhnuai lamah min pan pui nghal pawk pawk.


Mangang lutukin ka hawi kual a, U Damtei pawh Ethan-a pawmin choka aṭangin a rawn tlân chhuak vat.


"Kan inṭhen tawh Rammuanawm. Min dahthla rawh, police ka call dawn a nia," kawngkhar bulah chuan a ding dut a, thaw hawkin, "ka ṭhen ve hleinem che, ka nupui ka ruk chu sual a nih leh damchhung pawhin ka táng mai ang chu," a tawp lam chu a nui zui suk suk bawk.



A âwmah ka chum dawt dawt a, ka ṭan nat poh leh keimah chu ka na tulh tulh bawk si.


"Rammuan engthil..."


A ding leh dut, ka lo thaw zui kawk kawk, "ka fapa kha chu, Febby-i te nupa an rawn thleng ṭep ang," a ti sup chu ka thin a thawk zual, "i fapa a ni lo," ka ti chhuak ta nghek chu a lo rum nghut a.


"Ka chi hlawm a nih saw," awlsam deuh leh inti neitu tak, mahni inrin tawkna a khata rawn ti letin car kawngkhar chu hnehsawh tak hian a hawng a, "che suh," tal chhuah ka tum tih hria ni âwm tak hian a ti hluk.


"I fapa a ni em tih pawh i hriat loh, tu fapa nge pawh i hriat loh saw, kha i ka bawlhhlawh lutuk aṭang khan 'ka fapa' ti ve tawh suh. Awm sawn rawh, police ka koh tir tak tak hmain," ti tan tan chunga tlawh ka tum chu a lo awm sawn hrut a, a nui zui huk bawk.


Ka huat tawk a tling lutuk mah mah, ka taksa leh thinlung, ka thlarau chhuak tur ang hiala min tih nat hnuah " ka chi" te chu a la ti sapvei a, a chi pawh a ni lo. Ka chi hlawm zawk a nih saw.


"Rammuanawm..."


"Shittt!!!!" Car kawngkhar chu chelhin a rawn kûn hnai a, ka lo eu sawn vat. A zu rim leh a rimtui hman pa hrak chuan min zem lehnghal tawh.



"Thu i awih ṭhin loh vang alawm engmah ka sawipui theih ṭhin loh che ni," dam dup hian a rawn ti sup sup a. A hmelṭha tak mai hi ben sawk ka chak zia chu pui tak a ni.


A ding ngil vut a, ka chhuah theih lohnana ka hmaa ding zuiin, "Chhandam, Febby-i te rawn thlen hma chu lo awmpui ang che," a sana a bih zauh, namsawn a, tlawh sawn ka tum nasa poh leh keimah zawk ka na tulh tulhin ka chau tulh tulh bawk si, "minutes tam a ni tawh lo ang," ti zuiin ka lam a rawn hawi a, a thaw hulh, "kawlh lutuk mai," tih leh hnehsawh zeta ka kut pahnih chu hmer betin, seat belt min hren tir tura a rawn kûn chu ka lo tauh vak, a lu a ri dup mai. Ka lu a hai nghal chum chum thei.

"Ramdinsang..." A ti hluk, a na chu a ti ve tho a niang chu.

"Pangai taka inbiak kan ngai. Chumi hma chuan kawiah emaw hruaina tur che ka nei, ka sawi chhuah thiam loh ka hmuh tir thung ang che," a ti zui sup sup a.

Seat belt min hren tirin, uluk taka min en zui vubg vunga kiai sukin, "Bawihi, thusawifiah thiam tak ka ni lo tih i hria, chuvangin tun ṭum chauh chu min ring la, engthil nge ka tih, a hmuhin ka hmuh tir ang che," nghet charh hian a ti dam leh dup.


Thinphu dat datin ka melh chho ta kiau a, ṭawng mai tumna pawh ka nei lo. Ṭawng tur pawhin ka dul leh ka kawchhung a na lutuk mah mah rih.


Car pakhat rawn thleng ve chiah lam chu hawiin, "Fabby...."


"Ka lo enkawl ang. Kal ru," Febby a tih chu ka vawikhat hmuhna a ni, min rawm thlek zauha nuisangin, "i fapa chu ngaihtuah suh, sïngkhat hlawhna tur a nih hi, ka duat nasa ang," tih leh U Damtei mitmeng buai zet lam chu a pan zat a.


Rammuanawma car-a rawn ṭhu lut vein, ka lam a rawn hawi a, ka fapa lam ka hawi vung vung chu min en ve tih ka hria, ka kut ka mal chunga awm rawn chekh a tum chu ka lo phih sawn vat. A hnar tum dutin, "min rawn en teh.." Ka en âwm lo.


"Bawihi, inhauh pui tumna che ka nei lo a nia, ka tihsual ka hria, siamṭha turin i mit ngeia hmuh tir che ka duh mai chauh a ni," a rawn ti leh sup sup, lehlam ka la hawi tlat thung. A hmel pawh ka hmu peih lo, ka zui chhan pawh tihluihna a hman vang chauh a ni tih inhre zawk rawh se.


Mahse, sual let tumna ka nei tawh bik chuang lo, ka sual let nasat poh leh ka na tulh tulh bawk si. Tunah pawh ka dul thip sa lutuk hi ka thaw ṭawk ṭawk tawh a nia!


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:55 pm

{ LOVE AFTER MARRIAGE}

By

Floria Laldansangi


Chapter < 32 >

Ramdinsangi....POV


"Khawnge min hruai i tum?" Kan tlân chhuah rualin lehlam la hawi tlat chungin ka ti nghat, ka aw chhuak pawh a la nêm chuang miah law.


"Ka ru dâwn che ka tih tawh kha."

"Rammuanawm...." Ti hlakin alam ka hawi chu min rawn en ve chiah, mawi lutukin a kiai suk bawk a.


Ka lo thaw kawk thung, hawisawn ka tumna lamah a kut pem thi ser ser chu ka hmu ve chiah, tlai kan inbiak lai khan pem a nei miah lo, darkar tam a ral hek lo, khawiah nge a va inhliam ni? A kut châng vel thi ser ser chu hria ang pawhin a awm chuang lo va!


Ngaihsak lo lui ve ngat chunga hawisawnin, "hun tam tak i nei a, tuna insawifiah tum. Kan inṭhen tawh," ka ti leh ngat. Diktak chuan hetianga min rawn zawng leh vat pawh hi ka chhungril tak chuan ka lawm ru ve reng.


In ka chhuahsan laia ka hlauh ruk zia leh mangan ruk zia te, ka hma lam thim zia leh kawng ka bo te zia te kha a rawn lang zut zut bawk a.



Harsa ti taka thaw la kawkin pawnlam chu ka hawi leh vang vang. Ka mal chunga kut chu a rawn ban rualin ka lo la sawn leh vat.

"Min khawih hlek suh," ka lo ti hlar bawk a, a hmel thutak ta rûn leh hrawk bawk che ralha a chil lem chu ka mit sirin ka hmu ru reng bawk.



"Eng nge i inah kan tih dawn?" A ma in bik lam kan pan a ni tih ka hriatin a lam ka hawi a. Min chhan tum lo tih hriat takin hmalam a en ngur thung. Kuangkuah fel at chuan ka ṭhu ngil ve ta sat sat.



Car chhung boruak rit tak chuan thaw a ti pik zual, car chhung loah pawh a mi uap a nat sa nen, car chhungah phei hi chuan a na zual emaw tih tur hi a ni ziah. Boruak hip deuh kawkin, ka thaw leh kawk ṭhin. Ka awmdan a hrethiam a ni ngei ang min rawn melh zawkin, "hahdam rawh Bawihi," a kiai zui suk.


"Ka hahdam," ka lo ti leh nghat chu a awih ngang lo a ni ang, ri chhuak meuhin a nui huk a. Ka ngei tawk a lo tling lutuk mah mah.


"Ka chungah ila thinrim em ni?" Ka chhang buai peih lo. Ka thinrim ni lovin ka ngei.


"Bawihi..."

"Thlan loh nih nat zia hi i hrethiam ve tawh em?" Ka zawhna avangin a thaw ri hrawih.


"Thlan loh i ni ngai lo," a ti bul nghut, hnehsawh takin car steering chu a her kual zat a, a kuta thisen zâm rawn pawng ta ṭulh ṭulh pawh chu chiang takin ka hmu bawk.


"Rammuan, i chau ve lo em ni? Keichu ka chau tawh ka tih kha. Kalsan nih leh, thlauh thlak, thlan loh nih hläu reng renga nun kha ka peih tawh lo. Chuvangin he hremhmun ata hi min kal tir rawh," ka mittui a rawn luang ngiai ngiai a. Ka ngen ti tih a ni mah tawh zawk.


Mit hnawm chapa alam hawiin, ka pasal steering nghet taka chelh tu, bek leh khabe ruh rawn pawng zual sauh chu a hmuhnawm fahran miah loh. A hmel chang ta rut leh thim khup chu ka haider lui a, thaw lain ka thaw chhuak ham ham, "duh loh ang a inngaihna hmuna kir leh turin ka inring tawk tawh lo a ni," harsa tak chuan ka ti chhuak leh sap sap. Ka aw chhuak chu ka lei hmawrah an ral a ni ber. Keimah pawhin ka hre ṭawk ṭawk chauh a ni si a.


Car chu a ti ding dut a, ka hawi chhuah rualin a in kawt kan thleng tih leh, a ṭhiante ho car pawh a inhung a ni tih ka hmu nghal bawk.


"Duhthlan turah ka dah ngai lo che a, i ni ngai dâwn hek lo," bul zeta ti hlukin kawngkhar chu hawngin a chhuak zui vut.


Ka awmna lam kawngkhar pawt hawng rawkin, mittui nena ka lo en kiau chu a hmai a tuai puat a, "ka hmangaih lohnan che ka inveng a ni tih hi i hrethiam lo em ni?" A ti bul hluk, a thusawi awmzia ka hre lo, a hmel chang rutah lah chuan engmah hmuh tur a awm bawk si lo.



Harsa tih hmel taka ṭhen sawkin a thle zui baka, "mahse, ka invenna bang chu nangtereuh hian i tawn tlang chu a nih si hi," zawi supa ti leh nghutin ka kawngah a rawn chelh zat a, ka tal hman lo hrim hrim. Naute lem ang maia zângah min ngai em maw ni? Min chawi chhuak nawlh a, leiah min nghat dat bawk.

"Bawihi, mi tu pawhin min nuih tir thei; Mahse, nang ang erawhin tumahin hlimna minpe lo. Ka tiam ang che, zanin bak hi hre inhringnun hremhmunah hian i awm tawh lo vang. I zalen tawh dâwn," nghet churh leh rinhlelh duh teh mah ila, rinhlelh tur pakhatmah awm lo vin a ti leh sup sup a.


Ka kut rawn chelh nghal a tum chu, ka hnunglamah ka lo dah ve vat.. A thusawi erawhin ka lung a ti phu dep dep a, ka inrin ai nasain ka ring a ni tih ka hre chiang lutuk mah mah bawk.

Mahse, ka kut chu a chelh lui ta tho mai, a thâ thlem a hman deuh hi chuan min chelhbet nghal zung zung mai hi, ka ngei ṭhin ru ṭhin.


Ka bân chelhna chu phelh ka tum ve tak nâ-in min ngaihsak lo chung pawhin min chelh nghet lutuk mah mah.

A bâna sana lawk zet mai chu a bih zauh a, "anrawn thleng hnai ang," min bia pawh niin ka hre law.


Min rawn en zawk, khua a thim tawh avang leh kan dinna hi pawn light-in a en na chin a ni chiah lo bawk nen, a hmel chiang takin ka hmu thei tawh lo.

"Lut ila," min pawt kal nghal ti tih, in kan hnaih rualin ṭawng ri ka hre zui bawk a.


"Min thlah rawh Rammuanawm, keimahin..." Kawngkhar kan thlen rualin ka ding dawt.


"RAMMUANAWM...." Min vawnna chu theih tawpa thing thlain ka inher zui a. Mahse, min pawt let rang lutuk mah mah. Ka kat nawk nawk.


"Min thlah rawh," ka tum loh lutukin ka mittui a rawn baw hawk bawk.


A fanu piancham lawmna turah min hruai a nih chu! Rapthlak hian!

"Min thlah rawh..." A au in ka au chhuak.


Engmah sawi lo va thaw hawlhin alamah min pawtbet chuan, a âwm khauh takah min kuah bet a, ka tukkhumah chelhbet nghalin a chetin ka che thei tawh lo hrim hrim.


A hnungzang chu ka sik a, a âwm, a lungphu zawn chu na taka sehin a lo rum nghut, a taksa ṭang ṭung chu ka hre chiang viau bawk.


"Min thlah rawh Rammuanawm..." Ṭap chung chuan ka ti leh ṭuak a. Au turin aw rawl pawh ka nei tawh lo.


A thaw ri huk a, a taksa ṭang ve ṭung chu thlah dul deuhin, "inchung chei lo turin ka ti che u a ni lo'm ni?" A ti zui hraih.


"Engthil nge awmzia? Engvanga Ramdini hi rawn hruai nge inih? A chhuahsan che a ni lo'm ni?" Florence-i aw a ni.


Chutiang thleng chuan a hrilh amaw?


"Engthil nge ni Rammuan, Betty-i piancham lawm a hun dâwn hnai si a. Kan misawm ho pawh anrawn thleng ṭan ang chu," Jessica-in a rawn ti zat. Kei erawh min la kuahbet tlat thung.


Ni e, he hmunah awm ve miah lo tur hi ka ni, he ramhuai hian a chhungkaw thar nawmzia min hmuh tir a, min tihnat a tum a nih chuan a hlawhtling chiang viau bawk e.


"Eng piancham lawmna mah a awm dâwn lo. Hnemi, Betty-i kha chhuahpui rawh," thupe zet hian a ti zui hluk a.


Min kuahna thlah dulin, ka dar tawn tawnah a chelh zui zat.



"Eng nge i sawi awmzia Daddy?" Florence-i zawhna chu hria ang pawhin a awm lo.


"Ka sawi chu i hria em? Eng lawmna mah a awm dâwn lo," min en reng chung leh dam dupa tiin, "min ring rawh ka tih che kha," a ti leh sup.


Mittui nen ka lu ka thing nawk nawk, "ka ring lo," ka ti chhuak deuh vak a. Ka ring lo tak tak bawk. Rinchhan tur lah ka nei hek law.

He hmun, a fanu, hmeichhe dang laka a fa lehnghal piancham an lawmna hmun tur, a ma in ngeiah hian engvanga min hruai lut nge a nih tih hi ka hrethiam thei lo a ni.



"Chhuahsan tawhtu che hmeichhia hi engvanga rawn hruai let nge i nih ka hre hauh lo; Mahse, Rammuan, zanin hi i fanu..."


"Jessica, ka nupui a ni ka biak ni," chang fal maia tih leh a ding ngil a, "zanin hian kan vaiin kan tuhrah kan seng dawn," Rammuanawma chuan ding ngil zuiin a ti ta fuk fuk mai. A thusawi awmzia chu ka hrethiam lo va, keimah ang bawkin Florence-i leh Jessica-i pawhin an hrethiam lo tih alang.


"Eng nge sawi i tum?"


"Bawiha...." Ka hawi vat. Kunga, a ṭhianpa police officer kha a ni.

A rawn lut a, mit hnawm chapin thilthleng awmzia ka hriat si loh chu ka en haw haw ringawt mai.


"Engthil nge awmzia hi?" Florence-in a rawn ti ṭhat.


"Police te hian eng nge anrawn tih ni?" Nu Mahlimi te nupa an rawn lut ve bawk a, anni pawhin mak an ti a nih hmel, chuai mahin, Nu Mahlimin ka hmel a hmu leh, a fapain ka banrekah nghet taka a chelh a hmuh chu hmuh a nuam miah lo.


"Jessica, Florence, Thana-ah thu zawhfiah turin min zui dâwn em niang?" Tu pawh mai chu kan meng zui kawk hlawm.


Rammuanawma lah chu luhlul hmel tak hian a ding ngur a, engmah sawi tum tawh lo tih a hriat reng reng bawk.


"Engvangin nge ka zui ngawt ang che? Engthil sual nge kan tih?" Florence-in a rawn ti hlak hlak.


"Thil awmzia te han sawi phawt la maw le Kunga?" Pa Bawla'n a rawn ti ta sup.



"Pu Kamlova thah thubuaiah zawhna zawh kan duh a ni," a tih chuan ka nghing dawt thei. Ka meng phar awn awn bawk.


"Eng maw?" Nu Mahlimi zawkin a rawn ti chhuak ṭhat. Keimah ang bawkin a meng phar ve awn awn bawk a.


"Truck driver kha tunah Myanmar lam, Tamu-ah man a ni tawh a. Manipur aṭanga rawn hruai let mek a ni bawk," a ti zawm leh zat.



Ka thawk ka chelhbeh lai ka hre lo, Rammuanawma chu ka en chho heu a, a bek pawng leh khabe ruh lian tak mai chuan hmul thi a ti ding sung sungin, ka banrek a chelhna a hit zui mer mer bawk.


"I thusawi awmzia hi ka la man meuh lo," Pa Bawla pawhin hriat thiam har a ti a ni ngei ang.


"Engkim i hria amaw?" Jessica-i lam chu ka hawi vat.


Ani erawhin Rammuanawma ngeng ngulh maia ding khawng run chu a en ding ngar a.

"Engkim hre chungin lem i chang amaw?" A aw chu a khur dar dar. Hlauhna vang erawh niin ka hre lo, thinrimna niin ka hria.

"Lem ka chang hauhlo Jessica," Rammuanawma'n bul zet hian a lo ti nghut a.



"Engthil nge thleng hi?" Ka ti chhuak ta nge nge.


"I pasal kha zawt rawh. Tualthattu a nih kha," kha lutuk hian Jessica-in a rawn ti chhuak a.



"Zanin hian min bum a ni," a ti leh tuar.


A aw chhuak chu Dr. Jessica-i kha a ang tawh lo hrim hrim.

Kan dinna lam rawn pan a tum chu U Piana leh police Kunga khan an lo chelh bet vat, chil a rawn chhak zui thlawrh tho.

"Lemchangin min bum a ni," a ti leh tuar.


"Lem ka chang lo ka tih tawh kha. I thil duh leh tum ka hria, ka tihsual hriain ka haider mai zawk che a ni," Rammuanawma'n ti nghut nghutin, "ka nupui leh ka Pu tawk lo la ni tur," a tih zawm nghut nghut. A ṭawng tawp lam chu a sehchilh deuh rap rap bawk a.


"Ramhuai inih kha Rammuanawm..." Ka lo ip chawih chawih mai.


"A nih ka pumchhunga ka fa ve kha le? Ka pasal ni mai tur i thah hnuah, ka fa ka chan ve kha le? Hmeichhe hmangaih nei a, fa leh chhungkua hial i dinpui ang maw? Nang tualthattu hian maw?" A chil phuan bawrh bawrhin a au chhuak tuar tuar. A kawchhungah ramhuai anlut ta emaw tih mai tur a ni.


Chutiang tak chuan mihringin a mihringpui a haw thei ngai dâwn em ni? Jessica-i mitmeng chu huatna leh tualthah duhna in a khat ti ila ka sawi sual miah lo ang.


"Hruai rawh u," Kunga chuan tiin constable chu a ko lut a, Jessica-i chu a tal laih laih, hmeichhia mah nise pahnihin dawm loh chuan an dawm hneh meuh lo chu a ni.

"Keini lovin Rammuanawma, tualthattu saw man ta che u," ka mit ka lo chhing sawk a, Rammuanawma bân chu chelhin ka hmer ngat ngat bawk.


Ka lungphu zawih zawih chuan ka thawk a ti harsa tih Rammuanawma a hria a ni ang, min rawm din hnaih zual a, ka darah chelhin a lamah, a taksa ka rinchhan theihna min pawt hnai salh bawk.


"Engthil mah hi ka hrethiam lo," Florence-in a rawn ti chu za lo tih hriat tak hian Rammuanawma a lo nek nawk a, a nui deuh dat bawk, "i lemchan kha duhtawk rawh Biaksang, ka nupui ka in aṭanga a chhuak tih i hriat rualin tina turin mi i tir nghal a ni lo'm ni?" A ti ta chhur chhur mai.


"Ka hre lo ka tih chu," a lo ti vak, ka thawk chelh betin an thusawi chu mi â ang maiin ka ngaithla a, ka en hrek hrek hlawm ringawt. Engkim mai chu van aṭanga rawn baw hawk ang maiin a thleng rang lutuk a, ka hrethiam hlawm meuh lo.


"Jessica-i nen pakhat inni."


"Aih, ka hre lo engmah hi ka hre lo," Florence-in a ti tawn tawn.


"Police station ah insawi dawn nia, hruai rawh u," Kunga bawkin a ti leh.


Thil thleng mek chuan ka thaw a ti chham dâwn. A awmzia lah ka chu ka rin ngam loh a ni lawi bawk si.



Engvangin nge Jessica-i chuan ka Pu chu a thah ang ni? Keimah pawh maw? Engthil sualmah kan tih ka hre hauh si lo va.


Florence-i chet lakdan erawh chhan tamtak zawn a ngai lo tih ka thluak nu bulh bulh mai, buai nuaih nuaih hian a thliar thiam a, Jessica-i thiltih chhan erawh ka hrethiam pha lo takzet!



"Engthil nge thleng tehnuaih hi ni ngai?" Nu Mahlimi hmel mangang ve nuaih chu thaw chhuak hawkin ka en hau ringawt a.


"Bawiha, nang pawhin min rawn zui a ngai ang," Kunga'n rawn tiin a handcuff chu a phawrh ta mai a.



Min vawnna hmer salha a kut a la sawn chu, meng phar awnin rang lutukin ka lo vai sawn sak.


Min rawn en vat, kei pawhin ka chet lai ka hre bik lo.


"Engthil nge awmzia hi? Engvanga man tum ve che nge innih?" Ka aw chhuak chu a khur dar dar. A nem viau lo bawk.


An ngawi tak dük avangin, "thil awmzia sawita che u maw le?" Ka ti leh ṭhat.


"Bawihi...."


"Tikhan min ko suh Rammuanawm. Ka lakah hian engthil dang fakau nge ila zep? I nupui hluiin min tihnat a tum a, i zep a, Jessica-in min thah a tum hial a, i zep a, tunah an man chhan che pawh hi zep i tum tihna em ni?" A tawp lam chu ka riat nawk nawk. Ka hrawk tawt lutuk leh âwm chhung na lutuk chu ka thaw ṭha thei hek lo.


Min thlek deuh vung vunga kiai ta sukin, "min ngaihtuah a nih kha."


"Ka ngaihtuah hauh lo che. Ka pasal hlui ini tawh a, ngaihtuah chhan tur che ka nei lo," rang lutuk hian ka lo ti let leh tuar, a nui nghawr dawt a, kei pawhin "pasal hlui," ka tih chu ka sawi tum pawh a ni bik chuang lo.

Ka lama rawn pên hnai hruta tawlh sawn ka tum chu kei aiin a che rang daih, ka dar tawn tawna chelhin, a rawn kûn hniam a, ka hmai si cheta mi enin, a kut ka biangah sawn chho vin, ka mittui a kutzungpui a hru hrul chuan, "kum 10 liamta khan ka ṭhianṭha ber thih dan diktak ka zep a, chu chuan a hmeichhe hmangaih naupai mêk a chhiat tir avangin vawiin ni hi kan thleng a ni." A thusawi chu harsa a tih hmel takzet nâ-in a dam dup thung.


Nu Mahlimi a lo ṭap chhuak hawk, "i thah pawh a nih loh kha. Damdawi in thleng pawh ni ula a thi dawn tho tho," ṭap pur chungin a rawn ti chhuak ṭuak.


Kei erawh ka pasal hmel hahdam tak kara mitmeng sen rûm leh, thawk lak sak tak chu, kawchhung khur ru dar dar leh, chhip aṭanga ke ler thlenga hit mer mer chungin ka en kiau thung.


"Ka lawyer ka be tawh a, kum 6 aṭanga kum 12 thleng jail tán theihna chance ka neih thu a sawi a," a ṭhen sak.


A hrawk bawk che rawlha chil lemin, a thaw zui ham ham a, a mitmu thim khup chu a hnawm chapin, hahdam tak siin, harsatna nei ang maiin min en run a, chu chuan ka thaw a ti chham lo chauh.



"Zanin aṭangin i zalen tawh ang. Ka tiam tawh che ang khan, he hringnun hremhmun ata hi ka chhuah zalen ang che," a ti thawp sup a, thaw chhuak leh hawkin, "Jail ka táng a, engkim ka hloh a nih chuan kan inzawmna thuthlun kha a la nung a ni tih hria la, ka nun ata kalbo ang che. I hrethiam em?" A aw sak leh zawi sup, fiah tak si chuan min chhun ngut ngut.



Ka mittui vangin ka khaw hmuh a fiah lo tial tial a, ka pasalin min vawnna thlah a, a kut pahnih Kunga lama phawrhin, handcuff a bun tir theihnan a dawh chu mittui luang ngiai ngiaiin milim ang maiin ka en ngawih ngawih.


Ka mittui a rawng luang ngiai ngiai a, ka pasal chuan khi suka min rawn enin, "haw tawh rawh. Piana'n a thlah ang che, helai thleng chauh hi ka ru thei si che a," a aw dam dup chu ka ngei hluah hluah.


"Kan kal dâwn em ni?" A bu nghut. A tawpna ni tur ang maiin min en vawng vawng te chuan min rek bet tlat niin ka hria.

Nui leh sukin a pensawn zui a, ka kaihza tha hi a tliak hnawk.


Ka tlu tur chu tunge min dawm ka hre lo, Rammuanawma pên chhuak tawh chu, "kum engzah nge i tán dâwn ka pawisa lo, i lo let dâwn tih min tiam la, ka ngaidam ang che. Ka sawi chu i hria em Rammuanawm? Ka ngaidam ang che ka ti a nih chu..." A ding dat a, pên leh mai a tum chu ka aw rawl tawpa au vun, "Min hmangaih thu i sawi kha..." A tawp lam chu a ri chhuak ṭawk, ka lei hnawrah a ral sep sep.

"Kei leh Ethan-a, kan nufa hian kan mamawh che, i hrethiam em Rammuanawm?" Ka hrawk na zual ta lutuk chu a pilh hialin ka ring.


Ka hnar a piangin, ka hrawk a tawt a, ka hnungzang a kham ngut ngut bawk.


Ka lam rawn hawi tum ni âwm takin a che dut a, a nui a ni ngei ang, a biang tlem chauh hmu phei ruai mah ila ka hmu sual lo tih ka hria.


Engmah sawi lova ka pasal pensawn ta chu mittui nena en in ka ṭhu sawp hnawk, a hma aiin ka nun ram chu a hnawkin, a sa zual a, ka chungah hian engthil nge thleng tehnuaih ka hrethiam lo zual takzet.


"Engthil nge ni zozai hi?" Nu Mahlimi pawh chhuatah a ṭhu ve niah tho.

Ni e, keiin ka pasal ka thlir liam tawp ang tho khan a fapa, a hrin a thlir mawl ve tawp thoa tin ni!


"Dinte, Ethan-a hi hnute a châk a ni ang, milk pangai kan pea a in duh miah lo," Febby-i antih kha a rawn lut zui a.


U Hnemin Betty-i a rawn pawm lut ve bawk.


"Dinte, i ṭhutna hi a vawt si a, sofa-ah sawn insawn phei teh, i dam lo ang e," U Piana aw a ni, min chelhtu kha a ni tih ka hre chiah bawk.


Keimaha ding turin tha ka neih miau lo va, U Piana puihnaa ding khur dar darin, sofa lam chu ka pan a, ka fapa ṭap ngâk ngâk mai ka pawm rualin ka mittui bawk a rawn baw leh.


Chunglam melh ngat ngatin ka hnute ka phawrh a, U Hnemi'n rang takin a shawl bah laiin ka âwm a rawn khuh vat.


Ka fapa hnute hne khuh ṭha pahin, "U Muana an man chhan kha ka eng nge ni ve a?" U Hnemi'n engmah hrethiam lo tih hriat zetin a rawn ti chhuak heu a, an pain a lo khak vat.


Diktak chuan keipawh hian engmah hi ka la man thiam lo a ni. Engkim mai hi a thleng pawp pawp a, thawk lehkhatah ka lu zawnah hian ruah baw hawk ang mai niin ka inhria.



"Dinte, inpa hian engmah a hrilh loh che avangin dem lutuk suh ang che. A tan chuan a ṭhiante, a pianpui unau tluk zet an ni vek a, Jerry-a thihna emaw Enkawla thiltih emaw pawh nise atan sawi chhuah mai dan tur a awm bik lo a tin ni," Febby-i chuan a rawn ti zat zat.


A thusawi awmzia hre lo taka mittui tlakna avangin mit hnawm chapa en chho vin, "Enkawla?" Ka lo ti chhuak hap.


"Jerry-a lung chhuntu thir lak chhuah tuma a taksa zaitu kha Enkawla a ni a, in pa harh ve meuh chuan Jerry-an a hnuk a lo thlah fe der tawh. Chuvanga ngawihpui leh Enkawla, a la dam zawk hum a ni," min en deuh vang vangin, "Jessica-i thiltih pawh a hre lo a ni lo, a tihsual a hriat chian êm avangin, a haider a, Florence-i uire chungchangah pawh, a pasal thar kut thlak ang a sawi a, a hna aṭanga suspend thlenga titu chu Jessica-i thiltih vek hi a ni. Mahse, engmah a sawi lo, a nunah i rawn lan aṭang chiahin a ni a chiai a, Jessica-i lak aṭanga venhim che a tum a, a hlat che ni," ka pasal a ṭan zia chu a ṭawngkam chhuak tinah chuan a hriatin, Rammuanawma awmdan te kha hrethiam se, a thiltih ka hriatthiam loh ṭhin te kha hrethiam se minti tih a hriat ngawih ngawih bawk.


Mahse, tunah rih chuan ka thluak hi a chawl dük a, ka hriat leh ngaihtuah theih awm chhun chu ka pasal khan eng hremna nge a dawn ang a, engtia rei nge kei leh a fapa, thlà pawh la tling lo hian kan la nghah ngai dâwn tih chauh chu a ni ka ngaihtuah tâka, ka lungphut zawnga sa veng veng chuan min hriat nawn tir tluk tluk chu ni!


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:56 pm

{LOVE AFTER MARRIAGE}

BY

Floria Laldansangi

Chapter < 33 >

A tu mai pawh chu kan rilru a buai nuaih in, kan ngaihtuahna a tawi tuk ni berin ka hria.

Mahni chauh pawha thawk ka harsat laiin, "Ramdinsang, i thiam loh vek a nih hi. Ka fapa, pasalah neiin, a fa hial pai lo ni la ka Pa pawh a thi lo ang a, ka fapa pawh hetiang dinhmunah hian a ding lo ang, kan chhungkaw tán hian ânchhia diktak inih hi," a au in Nu Mahlimi'n mi rawn au khum tawn tawn a.




"Hlimpui...." Pa Bawla'n a lo ti hrawk.


"Ka sawi sual em ni? Febby-i thusawi kha i hre lo em ni? Kan inchhungah rawn pên lut lo sela, i fapa hian tun hun hi a thleng lo ang. Zanin hian ka ma dawn che," a ti leh tuar tuar. Rawn dinga ka lam rawn a tum chu pa Bawla'n a pawt let dawrh a, a kat nawk nawk.


Ka thaw pik leh ngaihtuahna tawi bawk si, thin thawkve thutin, "nangmah ang chiah ka ni, nupui leh nu. Ka fapa pa tualthattu ang maia an man lai ka thlir liam ve tho a ni tih i hmu lo em ni? Vawi 10 emaw a aia tam emaw pawh min ma rawh, 1inch pawhin ka tawlhsawn tawh dawn lo. A chhanchu i fapa a ni he hmunah min hruai let tu chu. I fapa in min ma a nih ngawt loh chuan nanga min mâk theih nachhan a awm lo," mit la hnawm chap chuan ka ti ve ta tán tán a.


Ka mumang lamah pawh ka pasal nu hi ka chhanglet ang a, ka inhauhpui ang tih hi ka mangpha ngai lo. Mi hnenah sawiin, hria awmse zawng, pasal nu zah lo leh hmeichhe nasa tak ka ni ngeiin ka ring. Tunlai tumah mo sual awm duh tawh hek lo le.


Mahse, kei ngei pawh, ka pasal chunga thilthleng hian min ṭhawngin, min nghawng hle si a.


Hmeichhe fel leh nula fel zawk zawk tia sawi tur ka lo ni bîk lo nen, ka chhanglet chu inthiam lohna pawh ka nei bîk chuang law.


"Dintei thiam loh a awm loh chu, engmah hre si lova tuar bertu zawk alawm a nih," Febby-in a lo ti zui hlak. Ka thaw chhuak ham ham, ka ṭan lutuk naleiah ka dul chu a thi ser serin nia ka hriat ni.



"Engtia hmalak chi nge maw ni dâwn le?"


"Engtin nge ni ang? Enkawla kan biak a ngai ang chu, ama thiam loh a lawm," Pa Bawla'n a ti dek dek chu Nu Mahlimi'n a lo vin let leh hlar. Min rawn melh zui ram ram bawk.


Ni e, Enkawla ka biak a ngai a ni.


"Rammuana thu ngâi hmasa zet ula a ṭha viau in ka ring. Kum 10 tal tawp a lo thupsak tawh a, chutia Enkawla inva nawr chiam pawh a duh lo mai thei a sin." Febby-in a rawn ti ve zat.


Ka rilru buai nuaih nuaih kara Betty-i rawn ṭap ring ta lutuk chuan thluak a tibuai zual. Thin a tirim hlur bawk.


Hmeichhe rilru ṭha tak leh zaidam tak ka ni lo va, ka pasal fa mah nise zanin atan kher kher chuan ka hmu peih miah lo. Naupang pawisai lo a ni tih hre mah ila, a nu ka ngaihtuah chhuak lo thei ṭhin si lo.



"Eng pawh nise khua te han var phawt se la, police lam pawhin an kawl reiin ka ring lo," Pa Bawla'n rawn ti leh churh churhin, Betty-i ṭap ve sek chu a pawm nawlh a, "Hlimi i haw hmasa teh ang, Betty-i te hi engtia awmtir nge i tum?" A ti zui zat.



Ṭhenkhatah chuan ka khawngaih ru ve reng, a nu a tán tak tak phei chuan.... A ka ngaihtuah duh lo, ani lo khawngaih hman pawh ka ni lo hrim hrim.


"Keipawh ka hawsan dawn che u a sin. Dinte min mamawhna i neih chuan min rawn be hreh suh aw. Piana sawn ka number a neih kha," Febby-i chuan a ti zung zung. Ka lo bu nghat ringawt, ka fapa a lo buaipui avang pawha lawmthu sawi chu ka ba ve a nia.



Mahse, tunah rih chuan lawmthu han sawi luam turin ka thluak hi ka la hmang thei lo, ka lei thleng hian a la ruakin a tawt rih mah mah.



Pa Bawla te nupa leh Febby-i chhuah fel rual deuh thaw in, "khawnge ka vahnu birthday lawmna tur chu. Party a zo elo?" Ely-i rui kamnam tih hriat tak hian a rawn lut a.


"Ohhh! U Dinte.." Min rawn pan hnai khut khut, a zu rim chu duh aiin a na mah mah. Ka kaw ruak nen ka luak mai dâwn.


"U Dinte, kanpa, ka pasal, i bialpa hlui nen kan inṭhen tih i hre tawh ang tiraw?" Min rawn ṭhut hnaih zual surh surh bawk a.


"Umm, ka lo hria alawm," min rawn thlek ha in, "i ṭap ve elo? Ka U in a hau che em ni? Nge ka Nu?" A ṭawng pawh ruih vangin a sehchilh nak nak.


"Ṭap lo ve," rilru hah nen lung a zing zual takzet!


"U Dinte, ka nu leh midangin an hauh che a i lam ka ṭan ṭhin kha ila hria em? Ka ti der lo a nia aw," a nui vur vur. Ka thaw pik lutuk chu ṭah leh vak mai ta ka duh rum rum.


"Nunsanga lunglên theih turin awmta che Ely. Tiang te chuan lunglen lam aiin neih leh i hlauhawm alawm le," U Hnemi'n a lo ti zui hlak hlak.


Nui uar uarin, "ka theih tawp pawh chhuah leh mah ila min nei duh tawh lo. Kan inṭhen dâwna a thusawi inhre lo em ni? 'Ka nuna thuthlukna ka siam tawh a zawngah ka tihsual lian ber ini' a tia lawm. Keichu a tihsual lian ber ka ni a, U Dintei erawh a kaltir avanga tihsual lian ber a ni thung." A mittui a luang zui ngiai ngiai.


Ṭawng tur leh hnem tur pawh ka awm lo, ka lung zing lutuk leh thaw pik bawk si, Ely-i rui min chimbuai nen ka thaw a chham lek lek tawh.


"A nu leh pa hian ka hmaichhanah vawikhat pawh min la hau lo. Mahse, an fapa an hauh a pianga ansawi inhre duh em, 'Dintei kha chu nei la chuan, Dintei kha retheih zawk mah se, Dintei kha nupui tlak zawk,' tiin ka hnunglamah an fapa hauhnan min khaikhin ṭhin. Chutiang inchhungah chuan engtin nge ka lawi leh theih ang ni," a ṭap pur tawh.

Mit chhing sawkin ka lo thaw chhuak ham ham a, "U Dinte, ka pasal hi i hmangaih tawh lo tih ka hria. Tunge i hmangaih tih pawh ka hria mah se ka pasal hian a la hmangaih che avangin ka ṭhen a ni. Mahse, ka haw lo che a nia aw, ka Nu avanga i tawrhna te hi ka hrethiam tlat a chuvangin ka haw thei lo che," ṭap chung chuan a nui leh vur vur ang lawi a.

"Ely.."

"Umm..."


"Zan dangah kan titi dâwn em ni, zanin chu ka chau lutuk a," a bu nghut.



"Ka haw leh mai ang party a zo tawh tho, ka vahpa chu maw ka Nu hriat loh vin ka rawn la en ang," a ding kat nak nak a, U Hnemi'n chelh a tum chu a lo vai sawn ve vat.


"Ṭhianpa ka nei, pawnah min nghak," a inher luai luai, ka ngaihsak zui peih ta lo, ka thluak na lutukah hian thil tamtak ka lu-ah ka khung thei tlat lo.



A chhuah rualin, "i ril a ṭam em Dinte? U Rammuana khan an chhuah hmain engmah ila ei loh thu a sawi a," U Hnemi'n a rawn ti zui sep sep.


Ka thil ei leh ei loh thlengin a ngaihtuah a, ka laka thil zep ṭeuh a, ka hriat chhuah huna ka ngaihdan tur rêng a ngaihtuah leh der si lo.


"Ka ei châk lo êm mai U Hnem. U Pian, engkim i hre vek tiraw? Keichu thil hi ka la hrethiam lo. Engvanga Rammuanawma hian tuar ngawt nge a nih le? An accident dan te pawh hi sawi chiang teh, keichu minti â vek, ka thluak hi a nâ," hnar ping leh lei la tawt tak chung chuan ka ti zui sep sep. Enkawla hum a tum hre tho mah ila, chiang takin thil awmdan tehnuaih hi ka la man pha ve lo chu a ni.


U Piana'n min rawn melh zawka pensawnin, dawhkan a ei tur an dahna lam chu a pan a, "kum 10 liamta khan Delhi-ah accident antawk a, Jerry-a piancham an lawmzan niin ka hria, an haw lamah zu rui truck khalh nen in tawkin, construction site ah tlân lutin, chutah chuan thir tlawn an su a ni âwm a. Jerry-a awmna lam kha thir an dahna lam niin, chu chuan a lung a chhun tlang a tin ni. Rawn ei rawh u, zanin chuan tih theih kan nei tak tak lo, khua var sela, U Enkawla te pawh kan be thei ang," a rawn tih zawm.



Ka fapa hnute pek chu a lo muhil zui daih chu niin, a zun te pawh hi a zung tawh reng reng em ni?


"An pathuma chuang anni tihna a ni maw?" U Hnemi'n a lo ti ve vat.

"U Enkawla khalh a nia car kha, U Muana erawh a hnungah a chuang thung. U Muana harh hmain U Enkawla'n a ṭhianpa a lo sawngbawl a, a lung chhuntu thir kha lak chhuah tumin a hmunah emergency surgery a kalpui mai ni âwm a ni. Bakah, U Enkawla te chu Doctor license la nei lo a ni a, Jerry-a a lo khawih ngawt kha a pawi lutuk alawm," a ti zawm leh zut zut.


Ka âwm chhung a lo tawt nasa lutuk mah mah.

Tunah zet zawng ka hrefiah ta mah mah bawk. A awmzia chu khatihlai khan Enkawla khan Doctor license a la neih loh avangin a hremna nat lutuk hlauhpuiin a zep tihna a nia. Ka thaw chhuak kawk.


"U Enkawla khan khawih lo mah se a thi tho ang, a chhuntu thir kha a luh thük mai bakah, a lian êm mai, a la chhuak vat emaw vat lo emaw, a lung a chhun tlang tawh avangin a thi dâwn hrim hrim a. Pawita ber ta chu, license nei si lova a lo sawngbawl ve kha a ni," ti zui lehin a ṭhu zui a, a ei zui mawlh mawlh.


"Dinte, va ei ve ta che, zanriah pawh i ei âwm si lova," ka lu ka thing vat, ka fapa zun rawn cheh zui nen, "inthlakna kan keng miah lo a sin," ka shawl sin chu dah thla in ka tuamna chu ka phelh zui.



"Shawl khan tuam mai rawh, kan haw dâwn hnai ang chu," U Hnemi'n a rawn ti leh vat.

"Hnute a puar tawh tho va, Enkawla te inah kal ka duh êm mai," an nupa in min rawn en vat.


"Kal duh suh Dinte, U Enkawla Aizawlah a awm rih lo, zanin khan Champhai a chho va, thil awmdan chu message-in ka thawn tawh a, a nupui Nu boralah message a la hmuh lo a nih ka ring," U Piana bawkin a rawn tih leh takah chuan rilru nuam lo deuhin ka ngawi ta rauh rauh a.


Rammuanawma in aṭangin kan chhuahsan chiah Pu Kamlova In ah bawk chuan kan let leh ta vang vang. Ka pasal hlui a ni rei lo lulai lutuk chu nuih te pawh a za lek lek zawk dâwn alawm le.



"Betty-i hi engtin nge a awm ang le?" In kan thlen dawn tawhah U Hnemi'n a rawn ti chhuak sap.


Ka ngawi ran, Betty-i ka mitthlaah a rawn lang a, boruak ka hip kawk. A nu vang hian ngainat har ka ti. Ka sual nge ka hre lo, tufa nge a nih ka chian lutukna hian duh ang pawhin min khawngaih tir thei lo.


"A pute bulah Siaha lamah a awm ve ang chu," U Piana chuan min rawn melh zawkin, "zanin i ṭhiannu Inah mi a tir tih i hria em?" A rawn ti zui chu ka lo en haw a, ka lu ka thing vat bawk.


"In i chhuah khan umzui tur che in mintia, enzui bawk tur che in, taxi laa Damtei te inlam i pan pawh kha ka hmu reng alawm. U Muana rin lawk ang chiahin, i ṭhiannu in luaha mipa luh a tum a, U Muana'n kut a thlak hnuah police in an la zui a nih kha," a tih takah chuan a kut pem kha ka mitthlaah a rawn lang zat.


"Engtin nge Florence-in a hriat a Nunsiami inah a kal dâwn tih?" U Hnemi'n a lo ti vat.


"Ka hre bik lo. Mahse, in i chhuahsan tih a hriat danah Nunsiami in i pan a ring a nih loh pawhin, zui ru tu i nei a ni mai," a ti leh takah chuan ka hmul thi a ding sur sur thei.


Ka hriat miah lo vah ka nunna lo derthawn zia ka ngaihtuah chhuah chuan ka thaw zui kawk kawk. An hmel a ṭhat a, an ṭawngkam a zàn tehlul nen, an nunrawng lutuk chuan minti ṭim ur ur mai alawm.


"An hmel en ringawt chuan chutiang ti duh hmel pawh an pu lo maw le. Ka ngaihtuah ka ngaihtuah a, Pu ber pawh kha gate ka kalhin ka hre sia, Dr. Jessica-i a awm ve nen, a hruai chhuah a nia ka rintak ni," U Hnemi'n a rawn ti hlak hlak.


"U Muana'n a bul vela Cctv awm ang ang a la khawm alawm, a hriat mai ang," U Piana'n a rawn tih leh takah chuan Rammuanawma pawhin rinhlelhna a lo nei tawh hrim hrim a ni tih a lang reng.


"Dinte, thil ka sawi ang a, ngaih loh lamah la suh aw," U Hnemi chu ka melh ralh.

"Inpa hi chuan a theih tawp hi chuan a venghim che alawm. Florence-i vangin han thinrim pui ve ṭhin che mah ila, ṭhenkhatah hi chuan i thiam bik lo a nia. Nupa chu inrin tawn a ngai a, rinna in kan inzawmna kan tuh nghet sauh sauh ṭhin. Mahse, nangchu inpa hi i ring miah lova, a chang chuan kan ngaihdan kan dah len lutuk te hian thil kan tisualin, kan kawppui te nihna kan hmuh kân phah ṭhin," ti siam siamin,"he inchhungah hi chuan U Rammuana leh Pu ber bak hi mi pangai an awm lo tih i hriat kha, an rilru ṭha lutuk leh tluangtlam lutuk te hi a pawina tam tak a awm bawk," a rawn tih leh dap dap chuan ka lo thaw chhuak ham ham. A sawidik loh ka hre miah lo.


Rammuanawma dinhmun ka ngaihtuah zui rauh rauh a, a rilru hah ṭhin dan tur leh a tan hun harsa tak a nih dan tur te, a dinhmun khirh zia leh chêp zia ka ngaihtuah chhuak a, ka inthiam lo ru lek lek zawk.


Lehlamah a ṭhiante vek an ni a, a tihsual hriain Jessica-i thil tih ang ang a pawm tawp mai a nia. Kawng lehlamin â ti viau mah ila, lehlam tak chuan ka khawngaih bawk si.

Ka lakah engkim a zep a, a rilru leh ngaihtuah min hrilh ngai loh avangin thinrimin haw viau mah ila, a dinhmuna inchan chuan ani aiin duhthlan tur ka vàn zawk mai thei bawk.


Ka Pa in, "pasal tena harsatna leh rilru hahna an hrilh theih loh nupui nih tum suh," a tih te kha ka hre chhuak ta rum rum mai.


Keihian ka pasal hi ka lo ring ngai miah lo a ni tih leh, a ngaihtuahna sawi chhuah tir tur khawpin ka pasal lakah hian ka inhawng lo a ni tih ka hre chhuak a. Ka hnaih ngam lovin, rinna ka tlachham a, eng nge a ngaihtuah a, eng ang nge a nunhlui tih leh, eng nge a duhzawng ni a, harsatna a nei em? Tih pawh hriat ka lo tum ngai bik miah lo tih ka hre chhuak uar uar.


Kan pahnih inkara min daidangtu ni a ka hriat, "in remna" chu chhuanlamah hmangin, kan inkarah bang ka din tir tlat tih ka hre bawk.


Ka tán a awm a, a hmel tak nguk leh ṭawngkam bul tak, mize hriatthiam har tak phen aṭanga min venhimna kha hriat ka tumin, hmuhsak ka lo tum ngai miah lo va, ka thikthu leh a laka ka beiseina chiah ka lo dah len zia ka hre chhuak uar uar bawk.


"Nupa chu titi dun te, inkawmna hun pangai te insiam a pawimawh a nia," tia U Damtei'n a sawi kha a dik ta riau in ka hria!
.

.

Kan nupa room chu zan dang ai zawngin a zau vin a reh zualin ka hria, Rammuanawma a awm chuan ka inhauh puiin, ka tihtauh khum a, ka vin let hlak hlak te khan room reh duk tur a awm lo kha a nia.




Zankhuain chhin khat pawh ka chhing lo, Ethan-a sual veinen, ka taksa aiin ka thluak hi a chau ngut ngut.



"Dinte...." Inhnuai lam mit phak zeta ka pan thla chu Enkawla hmel ka hmu hlawl mai.


Ka pan hnai nghal vat a, "engtikin nge i lo thlen. Enkawl, i kutah kan innghat a nia aw," ka ti nghal sawk sawk.


A thaw ham ham a, "Police station-ah tlang nghal ka tum a. Mahse, ka rawn tlawh kawi che u. Rilru lo ti hah duh suh..."


"Ka zui ve ang che.." Ka lo ti vat, min rawn en deuh vung vung, "a ṭha dâwn em ni?"


"Kal ka tum hrim hrim alawm," ka ti leh vat.


U Hnemi thingpui rawn keng chhuak chu, "U Hnem, Bawihtea i lo awm dâwn em niang? Rammuanawma ka va hmu ang e," ka lo ti vat a.


Bu nghatin, "ngaihtuah suh, ka lo awmpui ang," a ti ve vat.


Nimin chhun aṭangin engmah ka ei lo bawk a, thingpui leh chhang puar taka ka ei hnuah Enkawla nen Bawngkawn police station lam chu kan pan zui a.


"Min hua em?" Enkawla chu ka melh vat.


"Ka haw lo che, kanpa lakah erawh ka lungawi vak lo. Mahse, a dinhmun aṭanga ka thlirin hriatthiamna chin erawh ka nei," ka ngaihdan diktak ka sawi mai.


"Rammuanawma te nen in accident chhan hi Florence-i Pa te vang a ni lo em ni?"


A rawn nui suk a, "ni lo e, kha chu Rammuanawma chauh, kan accident hnufe a thleng a ni," min rawn en zawk


"Khatih hunlai khan ka dinhmun kha a chhe lutuk a. Ka Pa boral hlim, ka zirlai chawl lai lawknen ka ṭhiante aiin ka hnufual a, anni an graduate a, internship an zawh vek hnuah internship ka ṭan ve leh chauh a, ka dinhmun khan a zir loh lutuk nalamah inpa in min khawngaih zawka tin ni. Bakah, ka ṭhianpa chhan ka tum luata ka ngaihtuah a lo tawi êm a," a tih zui leh sup sup, a aw chhuak leh a hmelah chuan a inthiam loh zia ka hmu thei.


"Jessica-i thiltum hi i hre ve em? A thiltih hi i hria em?"


"Hre mai bik hauh lo. Inpa in fa a neih theih loh thu a sawi khan ka ringhlel ngam chiah lova, mahse i bag an ruk sak ṭum che leh, i call-na inpa phone aṭanga a lo delete vel aṭang khan ka hre chho ṭan," a tih chuan mak ti fe hian ka lo en. Khami ṭum khan diktak chuan Rammuanawma khan ka call kha a la duh lo luiah ka ngai hmiah tak tak.


"A nih rukru kha?" Ka aw chu a khur lek lek nia maw le. Ka rin loh lam daih a thil a kal kual mai bakah, nasa ka ti mah mah.


"A tirh tho a nih kha, tuna Pu Kamlova su tu kha amah alawm," ka lo thaw chhuak kawk. Ka khawngaih a, pawisa hial ka pe kha a nia.

Rammuanawma'n, "i inchhir lo ang maw?" A tih te kha ka hre chhuak rum rum, ka mawl zia ka ngaihtuah chhuah chuah ka inhaw lek lek zawk.



"Dinte, lungngai lutuk suh, inpa chuan engmah a tisual lo va, ka tihsual a nia, engmah hi a thup hlen tak tak theih loh va, kum 10 chhung tehmeuh ka tawrh ai a tuar a, huat a hlawh tawh alawm, nang leh i fapa lehzel chuan intuar lo ang," Enkawla'n min hnem tum tak hian a rawn ti leh sup sup.



Za vak lo hian ka lo ṭhen ve sen sen ringawt a. A hmelah chuan a huphurh ve hle tih erawh alang.


Nupui fanau nei ve tho a ni a, huphurh pawh nise a âwm viau tho mai.


Police station kan thlen a, kan luh rualin Enkawla handcuff an lo bun tir nghal zat. Diktak chuan handcuff an buntir lai vel hi hmuh hrehawm ka ti ṭhin.


"Kunga, kanpa ka hmu thei ang em?" Enkawla chu an hruai hrang a.



"Kan va ko ang e," tiin constable pakhat chu a tir a, rei pawh a awm lo, ka dinna lam rawn panin, "tumah a hmuh duh loh thu a sawi a," a rawn tih chuan Kunga'n min rawn melh chho.


"A lawyer nen an inbe zo deuh chiah a, ngaihtuahawm a ni lo a nia. Enkawla thu te ngaichang ila, a rawn chhuak ve mai ang," a rawn tih takah chuan nawrlui mah ila, tuna a dinhmun angah hi chuan min hmu duh dâwn lo tih ka hriat chian êm avangin police station pawh chu ka chhuahsan ve ta vat a.


Taxi laa haw let lehin, in ka luh rualin Nu Mahlimi hmel ka hmu zat. Betty-i pawh maw le.

"Min rawn ân khum leh dâwn a nih hi," tih rilruk chungin ka pan hnai a.

"Nu Mahlim...." Ka ti sep.


"Inpa i va hmu tih ka lo hria a, eng nge a an?" Ka rin loh dan daiha pangai taka min biak chuan minti hamhaih lek lek zawk.


"Min hmuh a duh lo va. Mahse, Enkawla a inpe lut tawh tho va, rei an kawl tawh lo ang," a lo bu nghat nghat. Ṭawngkam chhe deuh deuha minti lo chu mak ka tiin awmdan minla ti thiam lo.


Betty-i rawn ṭap leh chu a en zui a, thaw hawkin, "nizan pawh kan mu lo a Nu a ngai a ni ang," a pawm zui a, "eng nge Ethan-a a an ve?" Ka lo meng zau zauh, rei erawh a ni lo, ka insiam ṭha vat thung. Ethan-a chanchin a vawikhat min zawhna a ni.


"A ṭha e," chhan mai dan tur pawh minti hre lo. Amah a ni lo ta emaw ka ti mai dâwn alawm.


"Pi Mahlim, Betty-i chu ka lo la dawn em ni?" U Hnemi'n a rawn tih rualin, "Ethan-a chu a muhil deuh chiah," a ti zui zat.


U Hnemi leh Betty-i kalsawn rualin, "nizan ka ṭawngkam kha..." Ka en zawk.


Thaw la a, thaw chhuak ham hama mitmeng buai nak leh rilru hah tih hriat taka min en in, "min hrethiam dâwn nia," a nui sak a, "diktak chuan ka duh lo che alawm, nangpawhin ka duh loh chhan che chu i inhria ang. Naupangtein i hma i sial em em a, khawi emaw aṭanga rawn chhuakin sum vangin ka fapa i rawn luhkhung chu a ni mai a, tu nu mahin an pawm ka ring lo. I nu avanga khatianga awm kha ini tih hre mah ila, pawm kha i harsa êm a ni. Tunah pawh ka la pawm hleithei lo che. Mahse, ka ngaihtuah a, a bikin Ely-in pasal an neia, Nunsanga chhungten an tihdan ka'n hriat hnu khan, ka harh chhuak ve a ni mah nâ," a ti ta sep sep.


Sawi tur ka hre lo, "ka hrethiam che alawm," ti tur pawhin tunah chuan a awmdan hi ka hrethiam tlat lo.


"Pathian zarah inpa pawh rawn chhuak sela, in nupa inkarah chuan inrawlh ka tum tawh lo ang, a hrethiamtu zawkah i ṭang ṭhin a, min hrethiam a ni ang chu," a thusawi pehhel kual a tum lo leh a nihna ang ang a, min duh loh thu a sawitlang tawp te chu kawng lehlam takah chuan a lawmawm viau thung.


Ka chungah a chetziain a inthiam loh thu tilang ta thut sela a makin, ka ringhlel zawk daihin ka ring bawk!!


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:56 pm

{LOVE AFTER MARRIAGE}

By


Floria Laldansangi


Chapter < 34 >



"Dinte, vawiin chu Christmas te a ni sia, tumah station-ah pawh an awm lo ang. A hmuh pawh a hmu duh leh lo ang che," ka chhuak tur U Hnemi'n a lo ti vat a.


Ka nuih liam mai, ka fapa a pawm chu a biang a fawp zauhin, "ka rawn let har lo ang," tiin U Piana min lo nghahna lam chu ka pan zui nghal a.


Nimin zing leh tlai ka kal thlawn tawh, Rammuanawma ngel ngul hian eng nge a hriat hrep ni, min hmuh duh miah lo ni? Kei chang ni lo, a chhungte tumah a hmu duh lo, a lawyer tih loh chu.



"Eng nge maw a hriat le hepa hi le?" Ka ti hlak, U Piana a lo nui huk huk a.


"Nimin U Kunga sawidan kha chuan engkim a fel hnai tawh a tih kha, kumthar lamah Jessica-i te erawh court lamah chinfel an nih tur thu nen," ka lo thaw ham ham.


Jessica-i leh Florence-i pawh Central jail lamah an dah thla niin ka hre bawk. Rammuanawma leh Enkawla erawh station ah an la kawl a, thu an la zawh reng bakah, Rammuanawma'n statement felfai a pe duh lo niin ka hria.


Ka thin te hi a rim hlur tawh, engtia rei hi nge maw a ṭhianpa hi hum a tum reng reng ni.



Police station kan luh chuan constable ho pawhin min lo hre tawh a ni ang, "a lawyer nen an inbe mek a," an lo nui vur vur.


Rammuanawma awmna room lam chu pan dingin, kawngkhar ka kik dat dat.

"Rammuanawm, vawiin ni hian min hmu lo a nih chuan ka hawsan dawn che. Kan khuaah ka haw dawn, Ethan-a nen kan rawn let tawh lo ang," kawngkhar bulah chuan ka au nghal nghek ringawt a. Amah vanga police station ka thlen zin zia hi a hre lo em maw ni? Ti ila nimin leh vawiin chauh a la ni. A zing hrim hrim.


Reiloah a lawyer rawn nui chhuak vur vurin, "Dinte, hawsan phawt mai rawh, naktuk lam chuan a rawn haw thei tawh ang. Engmah buaina nei lovin," a ti nur vur vur a. Chuti tur tho tho si engvanga min hmuh duh lo tlat nge maw a nih le? Ka hmu malek ang a ni mai alawm. Hmu chak zawk zawk pawh ka ni bik tawp lo.


"Rammuanawm, zaninah Vanneiha haw a tum a, kan zui haw dâwn a nia, chumi hrilh tur che a lo kal ka ni, min hmu duh chuang lo va awmzia a awm lo. I hria em?" A tawp lam chu ka vin leh vak. Vanneiha te chu Tahan-ah Christmas hmangin a awm daih, dawt ka sawi zuah zuah ringawt.


A rilru a nawm loh phah ve êm ang chu maw, keini amah ngaihtuah reng rengin kan awm a, ani lahin mi hmuh a tum der si lo ka ngei lutuk.


"Darkar 48 chuang an hreng tawh a, eng em em nge an zawh a? Enkawla pawh an kawl tho si a," a lawyer chu thaw deuh hulhin, "naktuk hian Jerry-a nu leh pa anrawn thleng dâwn a, engkim a fel turah ngai ang," a ti churh.

"Case an tinung ṭha dâwn tihna em ni?" Rammuanawma berlah hian engmah min hrilh hi a tum bawk si lo. Rilru ah dah loh tum nasa poh leh a lian tulh tulh bawk si.


"Rawn thleng phawt sela a hriat ang chu," tiin min pensawn san a. Rammuanawma awmna room lam chu melh leh vakin ka pensawn ve leh ta nghat. Engvanga min hmu duh lo ngawt nge a nih hi ka hre thiam lo takzet a ni.



Kapa te pawh engmah chanchin ka la hrilh lo. Nizan kha chuan kan inbe ngei a, U Siampuii pawhin a hrilh bik lo a ni ang, ansawi lan loh danah.


"Dinte, zanin U Siampuii chaw rawn ei a tum tiraw kha'h?" Ka luh rualin U Hnemi'n a lo ti vat. Ka bu nghat a, "i hmu thei chuang nange?" A nui vur vur. Rammuanawma ka ngei zia chu pui tak a ni.


"Pu Bawla te anrawn kal a, an haw deuh chiah."


"Eng nge anrawn tih a?"


"Ka hre lo, Pu ber room aṭangin eng eng emaw an la chhuak a," ka fapa a rawn ṭap zui nen, ṭhut khawmna lam chu ka pan san a. Rawn insawn luh hi antum tawh lo tak tak nge maw ni le.


"Tihian an awm hrang tak tak dawn tihna em ni?" U Hnemi chuan choka aṭangin min rawn en a, a kut hru hul nawk nawka ka lam rawn panin, "a ṭha zawk alawm. Inhrang aṭang hian inhmangaih te pawh a awl zawk. Tunlaiah mo tumahin anhrawn peih tak tak tawh lo," a nui vur vur.


Nih chu a ni viau a, mahse pasal nu te um chhuak ka ang riau a ka inhriatna chu ka duh der lo.
.
.
.

"Khawimaw kan nuthlawi reilo-i fapa chu ka lo pawm ang e," kher kher chuan. A hre chik dâwn tlat.


"Thlamuana nu hi maw a nuthlawi rei lo ang reng bawk si a," ka fapa läwm pah chuan amah chu a nui zui kur kur.



"Siamthan, sual viau suh aw," thawmhnaw ro thlep pah chuan ka ti hlak, nui zui awr awrin, "thlawi rei lo ve êm alawm," a nuihza thei lutuk chu ka ngei lek lek.


"Inpa chanchin hi eng nge?"

"Naktukah Jerry-a Nu te anrawn thleng dawn a nih hmel a. An thu a zirin case a awlsam deuh ang chu."



"Mumbai ah daih an awmsia. Bakah, Christmas boruak nen inhun tawn hi a buaithlak ve êm a ni," ka lo bu nghat.



"I pa te rawn chhuk hmaa inpa chu a chhuah ngei a ngai ang, kumtharah i Pa a rawn chhuk dawn si a, a rilru a hah leh dâwn lutuk," a ti zui leh. Chaw ei a hun bawk nen U Hnemi min rawn kohna lamah chuan kan phei zui ve nghal a.


"Naktuk ruai ṭhehnaah rawn tel ve a ta che u," ka lo nui ringawt.

"Inkhawm pawh inkhawm ngai lo, rawn tel ngawt te chu a. U Piana te nupa hi an peih leh tel se la," an lo ner ve nasa.

Inkhawm sawi takah chuan keini ho hi inkhawm khat ve tak chu kan ni hlawm chuan ka hria.


Kan tih nek nek chhungin dar 9 a ri dâwn der, Ethan-a pawh zantir lamah chuan a muhil leh sek sek tawh, zinglam dar 1 vel aṭangin sual a rawn chhuah leh ṭan ang a, kan mu leh meuh ang em maw ni?


"Mut ila tum nange? A vawt ropui si a."


"U Hnemi choka aṭanga rawn chhuak lam chu hawiin, ka hmaa Pu Kamlova thlalak liantaka intar chu ka thlek leh deuh vang vang a, "Pu Kamlova leh Rammuanawma hi an lo in ang a nih hi," ka ti chhuak chu U Hnemi a rawn nui hak.


"I hre ve chuah em ni? An hmel chang ni lo, an rilru te hi a in ang a nia, an ṭha leh lutuk te hi buaina a ni fo ka tih kha," a rawn ti duah.


A tir khan ka Pu ka ngainat loh zia kha, a fin phakar hmel kha ka ti khawp a. Mahni hlawkna chauh ngaihtuah leh duhah ka ngai hmiah kha a nia.


Ani pawh khan ka endan chu a hrethiam tho vin ka ring.


"Bawihi...." Ka hawi rang lutuk.


Rammuanawma khi suka kawngkhar bula lo ding ka hmuh chuan ka lungphu zawn hi a rawn sa pup nia maw le.


A kiai leh suk a, ka lama rawn pan hnai mêk mipa, chau tih hriat tak, a hmaia hmul ṭo siar siar mai, palian thelh thulh tak chu kawng awt leh thawk chelhbet ranin ka en haw ringawt a.


Ka bul a rawn thlen ruala thaw hawkin, ka bân rekah chelh chuan alamah min pawt hnai salh a, nghet taka min kuahin a thaw zui ham ham.


Kei erawh chet nachang ka la hre lo, ka nghawngah a hmui chu nghatin ka rim chu hip vang vangin a thaw chhuak leh ham ham a.


"Engtin nge i rawn chhuah?" Rei tawk fang min kuah hnu chuan ka ti chhuak sap.


Min la kuahbet reng chungin, "Jerry-a Pa ten an lawyer anrawn tir a," a inla hrang hlek, ka dar tawn tawna chelhin, a mitmu dum fiah tak mah se chauh avanga dul hnuk chuan min enin, "heta ka hmuh che inbeisei hauh lo," a ti zawi sup. A hmelah chuan dawt a sawi lo tih a hmuh theih.

Zinglama ka thusawi kha a awih tak tak maw ni le?


"Ka hawsan ṭep che a ni. Nge min hmuh duh loh," ka ti hlak chu U Hnemi a lo nui hak. A la awmve tih ka hre chiah bawk, ka hawi vat a.


Nui var varin, "chaw i ei dawn em U Muan?" Rammuanawma chu ka melh ralh, min la en reng chungin, "ka ei tawh," min en rei lutuk a ka lai lek lek, min en hnai nasa mai bawk si.


"A nih ka mutsan dawn che u," tiin U Hnemi chu a pensawn vat a.

"Haw i tum a ni lo'm ni?"


"Haw turin min duh em ni? Ka haw ang a a ni mai alawm," a lo thaw hulh.


"Chutiang a ni lo," tih leh min kuah lehin, "i beidawng emaw ka ti a," a nui nghawr dat.


"Beidawng e. Tih theih ka nei chuang em ni?" Ti hlarin, "eng nge chanchin? Enkawla leh midang engtin nge?" Ka inla hrang a.


A hmai tuai puatin, "Jessica-i leh Florence-i chu thlatharah feb lamah court-in thuthlukna a siam sak ang chu. Enkawla erawh naktuk hian a rawn chhuak ang. Jerry-a Pa ten case tih nun an duh tawh lo a ni âwm e," a ti sup sup. Ka lo thaw chhuak hawk.



"A nupui tan a va thlamuan thlak dâwn ve. Han inbual rawh," ka ti zui a. Nimin police station kan pan pawh khan a rilru hah ve zia a hmelah khan ka hmu thei, ka lawmpui takzet bawk. Tin, Jerry-a nu leh pa te an fakawm, chutiang thuthlukna antan siam a harsat dawn zia ka hriatthiam pui lutuk bawk.


"I rimchhia a nia," min la en rengtu chu ka melh chho ralh a, nui hukin, "ka fapa a muhil tawh em ni?" Min thlah mai dâwn emaw tih laiin inchung lamah min pên pui zat.


"Fapa i nei ve em ni?" Ka ti chu a ding dut.


Ka melh duh miah lo, "fapa chu ka nei a, fanu i neih bak ka hre lo ve a," ka ti leh ngat chu a rum nghut a, "Ramdinsang..." A ti zui hluk.


Ka melh chho ta ran, mit zîm salha min en tu chu nuih duh miah lovin, "a nia lawm, tufa nge a nih pawh i hriat loh kha," a hnar tum data pensawnin pahin, "Florence-i bum chhuahnan a sawi ka nih kha, ka chi chhuak hre lo tur khawpin ka mawl lo," ti bul hluk hlukin room kawngkhar chu a hawng zui rawk. A fapa ni ve lo ang maia ka sawi chu a läwm hmel viau loh.



A fapa mutna lam pan chuan en vung vung a kiai sukin fawh a tum chu ka lo pawt vat.


"I bal, va inbual hmasa rawh," ka lo ti hlar, a la nui hawk hawk zui a.

"Nupui thuneihna card i hmang thiam ṭan a ni maw?" A nui zui leh huk.


"I bal reng alawm, i thawmhnaw ka lo la ang, va inbual teh."


"Kan inbual dun dâwn em niang?" A mitko a san ak.


"Teuh lo, a vawt si," rang zeta ka lo ti vat chu nui ri hawkin bathroom lam chu a panzui ta ve nul nul a.


"Awi i inbual fai hman em...." Hnunglam aṭangin ka kawngah a rawn kuah zui.

"I inbual fai hman em ni?" A awihawmloh e, 10mins pawh a ral dâwn em ni?


"Fai..." Ti supin ka nghawng a fawp zui a, ka mawng a mipatna in a do ran chuan min thawk tir hawk.



"In hru hul rawh, i hritlang...." Ka sawi zo hman lo, a lam hawiin min kuai her nawk a, ka hmui awmna hai lo lutukin a hmuiin a rawn vuak thuah zat.


Kum tamtak infawp tawh lo ang maia min fawp zui ngawng ngawng chuan, ka kut a a thawmhnaw hak tur ka ken chu a phih thla nawk a. Min chawi kâng nawlh bawk.


A nghawngah ka kut suih zawmin, ka bawp sei lo ve tak chuan ka kherh zui zat bawk a. Ka inzaina in min pawt zak chu ka thaw chhuak kawk. Min fawp reng chunga khumlam min pan puiin, dimtein min nghat dat bawk.


Thaw hlawp hlawpa ka chunga rawn bawh a tum chu a phun zui hluk a, "i inzaina ka theihnghilh leh ṭhin," sak taka tiin, ka sirah let thla tawp chuan a hmai tuai puatin, alamah min pawt a, nghet taka min kuahbetin a thaw zui kawk kawk.


A taksa ṭang leh sak ṭalhah chuan insum a tum zia a hriatin, a theih tawp a chhuah tih a hriat bawk.


Kan thawk lak a la pangai lo dunin, kan lungphu pawh a ri dup dup a. Ka dang pawh a ro halh ve hman.



Ka pasal taksa mar ṭha tak, tisa chakna avanga danglam ta, sak tak chunga bawk hle hle chuan, "engtikah nge Betty-i chanchin hi pangai taka min hrilh i tum?" Ka ti chhuak sep. Zawh kher loh chuan sawi a tum pawhin ka hre lo.


A thaw ri hawk a, ka chhipah fawp zauhin, "Bawihi, kei pawhin pawm har ka la ti lutuk a tin ni," a aw chhuak chu a sak ṭalh mai.


In nem kâng deuhin a khabe hnuai aṭang chuan ka melh chho kiau a, a khabe hmul chu khawih zui niap niapin, "mahse, min hrilh i tum chuang hleinem," ka aw ah chuan läwm lohna a lang chhuak. Ka la läwm miah lo bawk.


Boruak hip leh a, thaw chhuak ham hamin, "vawi 2 ngawt DNA test ka nei tih i hria em?" Ka en chho haw mai.


A pawmin, a hmangaih hlein ka hre si a.


"I duat viau a ni lo'm ni?" Ka lo ti zui hlak, ka lei ka veng hman loh bakah ka fapa a tihdan nen a in ang lo lutuk tih ka ngaihtuah chhuak rang mah mah.


A nui huk a, ka khabe a chawi kâng salhin min rawn fawp vawng vawng chuan, "vawikhat pawh ka la tawk hauh lo mai," a ti sup chu melh hraw hraw chungin, "i daw a," ka lo ti leh hlak chu a nui nghawr dawt dawt.


Ka hnar piai zauhin, "thudik a nih chu," nui chunga tiin, a ngawi deuh vung vung a, "ka thisen chu a ni ngei si a," ngaihtuah ngah tih hriat tak hian a ti leh sup .


Ka pasal chu ka melh chho kiau ringawt, han sawipui vak ngaihna ka hre lo. Bakah, a fanu chungchangah hian inrawlh tumna ka la nei miah lo, ka ngaihtuah chhuah a, tufa nge a nih tih ka hriat chhuah a piangin ka la na veng veng zel.


"Ka lakah engmah zep tawh suh aw," ka ti chhuak sap a. Min rawn en thla, mawi lutuka vei kiai sukin, "a thleng tawh hauh lo tih ka tiam a che," nghet churha tiin, ka bengah ka sam a zep zui a.


"I inzaina pawh a dam hman meuh lo ang a," min ngaihtuahnaa khatin a tih zawm zat.



"An man zan che khan a thi deuh a, tunah erawh a zia viau," a lo thaw hawk,"tun aṭang chuan engmah a thleng tawh lo ang," ka kut chu la kangin a fawp vawng vawng bawk a.


Ka pasal thusawi chu rinhlelhna pakhatmah ka nei lo, a mitmu dum fiah tak leh a aw nghet churh chuan a nem nghet tih ka hria a ni.


Pathian zarah engkim a pangai chho vin, Rammuanawma nena kan inkar pawh a hma zawng aiin a ṭha a, Nu Mahlimi leh Pa Bawla te pawh an rawn lang tam viau lo thung.


"Eng nge nita a?" Ka Pa (Pa Bawla) te nupa leh U Zovi hial, a zan zan sawi loh, kumhlui thlah zanah lehnghal an rawn kal chu thil pawimawh tak a nih ka ring ringawt a.


Rammuanawma bula ṭhu thla in, "Betty-i awmdan tur kan lo sawi a," a ti sup.


"Engtia awmdan tur maw?"


"Ni 3 khian i putea (Florence-i Pa) te rawn zin an tum a, Betty-i hi khawi nge a awm ang tih kan lo sawi ho a, kan duhdan chuan hetah awmse tih kan lo rilruk deuh va. I hriat angin i Putea nupa khawsak pawh a awlsam bik si lova, an tan naupang han enkawl kha a buaithlak dâwn nen. Tin, i enkawlna hnuaiah seilian se tih ka duh dan a ni bawk si a," Pa Bawla'n a rawn ti churh churh.


Sawi tur ka hre ta hauh lo, ka ngawi ta ran ringawt a.



"Bawihi," ka pasal mitmeng a inthlahrunna chu chiang takin ka hmu thei, nidang ang lo takin ka Nu (Nu Mahlimi) leh U Zovi pawhin ka thuthlukna an nghak emaw tih mai turin an ngawi ran mai.


"Dinte i pasal fâ bîk a nihna zawnah harsa iti a nih leh awmpui kher pawh a ṭul ber lova, kan bulah awmse itih leh kan awmpui thei tho a. Sawtia a Nu ber jail a luh tâk si ah chuan kan han ngaihtuah deuh mai chauh a nia," ka Pa-in ka thu ngâi tak maiin a rawn tih leh charh charh.

Thaw chhuak ta ham hamin, "reilotê in ngaihtuahna hun minpe rawh u," ka ti chhuak ta sep.


Rilru chhia emaw khawngaihna emaw nei lo minti a ni mai thei; Mahse, ka pasal hmeichhe hmangaih ṭhin, fa a nihna zawnah kei hmeichhe rilru ṭha em em lo thinlung hian, "aw le, ka pasal fa alawm a nih," tiin awlsam takin ka pawm mai thei lo a ni. Ni lo, ka pawm mai ngam lo zawk maw le. Ka fapa, ka ril arah ang a ka hmangaih theih loh ka hläu niin ka inhria.


"Ni e, Dinte in ngaihtuah rawh, kan nawr lui lo che a nia," U Zovi'n a rawn ti ve vat chu ka lo nuih sen sen, he In-a mo ang a ka luh hnuah ka lam ṭanga a vawikhat ṭawng chhuah na a ni. Ka ngaihthu ang a ngaihtuah ve a ni mahnâ a rawn nui ve sun sun tho.

.
.
.
.

"Tihpalh, rilru hahna tur dang ka siam leh che a," ka Pasal aw thâwp sûtah chuan inthiam lohna bâk hriat tur a awm lo.


Ngawi rengin khumah chuan ka lawn a, ka chhan mai loh avangin, ka bula rawn mu ve sat sat chuan, "i thinrim em ni?" Min rawn kuahin ka nghawngah a fawp zui zat.


Lo thawk khum hak chuan ka ngawi vang vang a, "Bawihi...." Inbengkang meuhin mitmeng zim sât hian min rawn en.



"In ngaihtuahna hun ka mamawh ka tih kha," a mit a enin ka lo ti sap.


Min en deuh vang vangin ka chalah a rawn fawp vang vang a, min kuah ṭha sat sat chunga a awma min bei tirin, "ka nawrlui lo che a nia, thuthlukna engpawh siam turin dikna i nei," nghet charh hian a ti leh sup sup.


Hahdam zeta thaw ham hamin ka nek zui ve ṭalh ṭalh a, mit ka chhing zui siai siai bawk!


Ka hria alawm, mi tamtak chuan mindemin, "khawngaihna nei lo," tih emaw, "a pasal a hmangaih tawk lo," ti emaw pawh an awm ngeiin ka ring.


Mahse, hmeichhe pakhat ve mai ka ni a, hun rei tak chhung ka pasal hmangaihna nghaktu, thinlung nâ leh khawharna pawh tilang ngam lo tu hmeichhia ve mai ka ni a, engtin nge ka pasal hmeichhe hmangaih ṭhin, amah nih ka chak hial ṭhin hmeichhe fa, a piandan engkim ka hriat chu awlsam takin ka pawm theih ang ni.


Ni e, hmeichhe fel leh famkim ka ni lo alawm! Hmeichhe pangai ve mai ka ni tlat si a.


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:56 pm

{ LOVE AFTER MARRIAGE}

By

Floria Laldansangi


Chapter < 35 >


"Kumthar chibai ka hmangaih..." Aw rilruih leh fiah kaka ti a, ka hmuia fawp zui vawng vawngtu chu, ka mit meng miah lo mah ila, tunge a nih ka va chiang si êm!


"Kumthar chibai le," harh chiang lo, aw ṭial ṭuaka tiin, a lamah ka tawlh hnai zui sat sat bawk a.


Nui hawk hawk chunga a lama min pawt hnaiin min kuah zui hlu hlu, ka pasal taksa lianpui mai, invuah dik thlarh, sak tak mah se thlamuanna ka neihna leh hmuhna hmun chu kuahlet chialin ka nui zui sen sen bawk.

Hetiang tak hian kumthar zingkar nuam ka la ti ngai lo, engkim chu a famkim nghal hliah hliah a ni ber.


"Ka phone em ni?" Phone rawn ri chu meng mang hlei lovin ka ti ṭiak a.


A che deuh hrut, "i pa a nih hi..." Min rawn pe, thatchhe deuha la in, a taksa lum nuam tak chu kalsawn san hlau zetin ka la nek ṭalh reng bawk.


"Kumthar chibai u le Mambawih..."


"Kumthar chibai u le, nizan lam te in hmang nuam em?"

"Hmang nuam tehreng e. Christmas boruak bik in lamah kan tal tam lutuk a, ka rawn be tam hman lo che u. I nau pawh hei nuam a ti khawp mai kumin chu, inpa Bike rawn thawn chhoh kha a chhuahpui reng mai a," a tih duah chuan ka harh kawk, ka inla hrang vat. Rammuanawma lahin mi lo en haw bawk.


"Khawnge i Bike?" Ka ti zui zat, zan hmasa khan 'Malika te inah ka hnutchhiah' tiin a sawi a, a thawn tak tak lo'ng chu maw.


"Rammuanawm..." A nui suk, "thawn tur remchang an awm êm a," ti supa min kuah leh a tum chu ka lo beng zui thlawrh, a âwm, kawr pawh a hak loh chu ka beng zui leh. A nui hawk hawk lehnghal.


"A hrilh nache nge?" Ka Pa pawh a rawn nui.


Ka pasal melh ram ramin, "hrilh nang, Bike neih tih vel hi a la ṭul rih loh a sin maw le. Bike a neih chuan a chhuak tam dâwn lutuk," ka ti zui hlak hlak. Ka pasal lo khi leh suk ṭhin chu ben leh pawp a nia ka duh ni.


Hmang ṭangkai dâwn viau mah se ṭhenrual kawm tam nan a hmang ang a, a chhuah tam phah ang tih ka hläu tlat. Anni ho ang rual phei chu inthlan siak tih ang reng vel hi nuam an ti bawk si, tunah phei chuan Romuana nen an inzui chhuak nasa zual dawn tih hriat reng reng.


"Chuvang a nih chu Mate, nizan pawhin, "ka U in a hre lo a ni hrim hrim," a tih nung nung ni," ka niin a rawn ti lang lang, ka Pa a lo nui huk huk a.


"Ka thawhsan dâwn che a sin," ka bekah a fawp zauh, ka lo melh vak, a la nui vur vur zui a.


"Vawiin lam te inkhawm intum em?"


"Tum ve ang ka ring," ka pasal bathroom a lut chu ka en zui zel, a taksa inkhai fithla zarh leh dâr pharh hlai tak mai, tihrawl inphiar fat hmuh hi chuan enzui loh hi a har ṭhin êm a sin.


"Tum ve ang chu' te ila tih ni, kumthar ni hi chu inkhawm ngei ngei tur. Nizan i U Siampuii'n min rawn bia a," a aw tawp lamah chuan Betty-i chungchang ka hrilh kha a hrilh chhawng ve leh a ni tih ka hre thei.


Ka thaw chhuak ham ham a, Rammuanawma bathroom aṭang rawn chhuan melh zauhin, Ethan-a thawh chak lo ṭap ve chiah nen, "inbe rawh u," ti supin, a fapa mutna lam pana pawmin, room aṭang chuan a chhuah pui a.


"Ka hrethiam lo a ni Pa. Bakah, enkawl loh theih chuan enkawl loh ka duh. Ka hmangaih theih pawh ka inring lo," ka ṭhu ṭha zui sat sat a.



"Engah nge i hmangaih theih loh ang ni. Mihringah chuan naupang hi alawm hmangaiha ngainat awl ber ni."


"Chutiang a ni lo Pa. Nuhrawn nih ka tlin ka ring lo, ka thisen ni lo enkawla hmangaih tur chuan ka tling tawk pawhin ka inhre lo. Bakah, a hmel ka hmuh a piangin a nu ka hre chhuak lo thei si lo....." Ka ngawi deuh vang vang a, "ka chhungkaw zinga lak luh hi ka duh lo, ka sual a niang tiraw Pa?" ka ti chhuak sep sep.


Ka Pa chu a rawn nui a, "sual lah lo ve, mihring ve tho alawm inih Mambawih. Mahse, chhungkua hi thisen kher a ni lo tih i hria ang tiraw?" Ka ngawi ran a. Betty-i enkawl tura ka indah chhin ringawt pawh chuan ka thawk a pik mup mup thei.


"Ka fanu i ni em Mambawih?"

"Ni ang chu," rang tawkin ka lo chhang.


A nui huk a, "ni e, ka fanu i ni, ka thisen erawh i ni miah lo, mahse ka hmangaih em em che tih i hria. Ka chhungkua ini bawk, chhungkua ni tur hian thisen a inzawm kher a ngai lo tih hre chiang ber tu ini alawm, hmangaihna hi a tawk em em a ni. Nangmah kha inzawt la, naupang pawisawi lo kha engvanga hmangaih thei lo nge inih?" A ti dap dap. Ka hnuk te a rawn ulh lek lek.



"Pa ka dinhmun hi maw a khirh ka ti êm mai," ka ti takzet, ka pasal fa a nihnaah ka pasal hian a mawhphurhna hlense ka duh a, ka pasal mawhphurhna chu ka mawhphurhna a ni tih ka hre bawk.


"Ngun takin ngaihtuah rawh, i pasal fa chu hmun dangah thawn la, i rilru a nuam meuh ang em? I fapa thisen zawm, a farnu a ni si a." A chawl dat a.


"Mahse, i hmangaih thei thlawt dâwn lo va i inhriat chuan enkawl suh, naupang thinlung thianghlimah huatna i tuh palh hlauh ang e. Fate hi nu leh pa mawhphurhna, Pathian malsawmna in ni a, nu leh pa te hi damchhung zirtirtu kan ni. Fa enkawl te hi thiam ngai tak, thiam theih miah si loh a ni bawknen," a ti leh dap dap.


Thawk kawk kawk ka chak, mahse ka thei tlat lo, ka Pa aw ka hriat leh a thusawi chuan mittui a ko ruai ruai leh ta nghal a.


"Pa engtia rei nge i rilru ang leh i thinlung ang nei tur hian ka mamawh ang le?"


"I thinlung zawt rawh Mambawih, a chhan na i hmu dâwn tih ka ring tlat a ni. Ka fanu, angel tluk zet alawm inih le?" A aw chhuak tina min rinna lang chhuak chu ka hre thei.


"Angel pawh hian thla dum an nei a nih dâwn chu," ṭah chhuk ṭeu a tiin, "ka mawhphurhna ni a ka hriatna aiin, a nu ka huatna a la lenzawk vang a ni ber," ka ti leh sep sep.


"A nu i en chhung chuan naupang pawisawi lo hmel i hmu ngai lo vang. I enna tlâng han her danglam hret la, tichuan i duhdan tak leh i zawhna chhan na pawh i hmu ngeiin ka ring."


Ni e, her danglam ka duh mah se harsa ka ti a ni. Ka zep lo, ka dinna hmun hi ka pasal nihna leh ka thinlung inkarah a ni ka din ni. A nihna nena pawma hmangaih mai tur chuan harsa ka ti takzet.

Nuhrawn nih awlsam loh zia ansawi ka hriat ṭhin chu, "hmangaihna nen i hau a, i zilh a nih pawhin, midang mithmulah chuan, 'a fa a ni ve lo va' tih a ni zel ang a. I duat a, i ngaihsak leh, 'a pasal a tlawnna a nih saw, mahni hrinte aia a hmangaih leh ngaihsak chhan tur a awm lo' an ti leh ṭhin bawk ang," an tih ṭhin hi.

Bakah, ka pasal hmeichhe hmangaih ṭhin, hmangaihna hlutna pawh a theihnghilh chhan hmeichhe fâ tana Nuhrawn ni tur chuan ka thinlung hi a zau ve tawk rih lo tlat a ni.


Kumthar tuka ka Pa bula ka inbun ruak leh a thurawn ka lak chuan ngaihtuahna a luahkhat.


"Bawihi..."

"Huh..." Ka hawi chhuak heu mai, a mit a lo ti zim sulh a, "ka thusawi chu i ngaithla miah nange?" A lawm hmel viau loh bawk.


Nuih tlawn pahin, "eng maw?" A hnar a tum ri dat. Ka nuih ver ver a.


"Emergency ka nei a, damdawi in ka kal a ngai."


"Tunah maw? Kumthar tuk te a ni sia," tun tut tutah te chuan, "chaw pawh i la ei si lo va," ka ti leh.

"Doctor ka nih hi 24/7 ka dam lo tan ka awm a ngai alawm," ka hmuiah a rawn fawp a, hnute ka pek mek a fapa chhipa fawp lehin, "ka rawn haw hun tur ka hre lo aw," tih leh a car chahbi la in tlân chhuah a rual.


"Accident a tam chho leh khawp ang, tleirawl tha zà insual nen," U Hnemi'n rawn ti chhuakin, "chaw ei kan hman a sin, ei mai ila," ka bu nghat.


"Anu-in chaw ka'n ei ve ang e, i puar tawh bawk a," ka fapa chu ka läwm zui zat. Thla pawh la tling si lo hi lawm te hi a hre reuh em maw ni, a kâ hi a âng ve nasa thei a nia.
.
.
.
Pa Bawla sawi ang chiahin Florence-i Pa te pawh kumthar ṭiakah Aizawl anrawn phei a, Rammuanawma lah damdawi inah hun a hmang tam zawk bawk.

Lalnunsiami'n fiamthuin, "Doctor kawppui neih chuan kawppui nei zeuh zeuhah in ngaih tur, hun an nei lo," tia a sawi kha tak tak niin ka hre ta.


"Awi! Thlamuanpui, em em che hian a, mut te hi min mut tir ve teh, i ṭap hmelchhe vek tawh," ka muhil dâwn chauha ka fapa rawn ṭap leh chu ṭhu chhuakin ka âng zui ta hrep.


Zan hi kan la mu meuh lo chu a ni. Rammuanawma ka ngai rum rum mai, zan 2 ngawt a rawn haw tawh lo, message min thawn hman ṭawk ṭhin, dam lo an tamin, kumthar ṭiak nen thingtlang lam aṭanga school chawlh laia in entir an tam bawk si, lunglen pawh ka hrilh ngam lo. Bakah, a awm lo a hriat lutuk zan min thawh khalhtu awm lo chu ka ngai ve tak tak.


"Ka chi hlawm hmelchhia ti hmasabertu ini," kawngkhar lam ka hawi vat.



Ka tum loh deuhin ka nui zui hak bawk, nui vur vura rawn lutin, a fapa ṭap chu a pawm zui a.


Khuma rawn ṭhu thlain ka hmuiah a fawp zui vang vang, ka pasal chu ka ngai ve takzet a ni ang, ka lo fawp let rang khawp mai.


"Intihfai i mamawh hmasa lo em ni?" A fapa ṭap chu a bâng hmak, ka ngei reuh lutuk. A chang hi chuan penfawk hi ka châk ṭhin.


"Ka fapa hi kan ti mu hmasa ang e," a ti zawi sup. A taksa lianpui nen hian a inhmeh lo lutuk chu a inhmeh phian zawk.


"A bâng leh daih a. Awi! Tu hi nge maw i chhun le?" Rammuanawma a nui hawk hawk.


"A chhun che a nih hi, i pa-in i ṭahbelh ṭhin zia a sawi alawm," ka hmui ka lo ti pawh vak.


Ka nu hian ka Pa hi kan tetlai chanchin a hrilh nasa in, ka Pa hian a zawt peih bawk a, a hre khawp ang.


Mahse, Thlamuanpuia ang em em hi chu ka nih ka ring lo, a sual dan hi a lawr lak mai a ni. Pangtilum a hre rapthlak bawk si.

Damdawi in awmlai aṭangin U Siampuii leh ka Ni khan anti zawngchhang niin ka hria.


"Muhil rawh, ka lo menpui ang e."


Ka pasal chauh hmel pawh pu ve lo chu enin, "i chau lo em ni?" Ka ti thlawt. An buai zia ka hre ve vek si a.


Mawi lutuk hian a nui a, a fapa a dawm lohna lama ka tukkhumah rawn dawmin, duhthawh tak a min fawpin, a lei ka kâ chhunga rawn hawlin, min fawp zui dawk dawk, ka lungphu chu a rangin, ka kawchhung inlet rang lutuk chu ka duh der lo.

Thaw chhuak ham hamin a inla hrang a, "tikhan ka incharge full chiah e," a hmui hnawm chap hnuailam chu pet zauha min fawp leh chawkin, ka hmui a kutzungpuiin a tuai zui zauh a, thaw zui hawkin, "ka enkawl dam vat che a ngai a nih hi," a ti hul hak.



A thusawi awmzia ka hriat chian êm avangin ka nui chhuak zui ve ar ar a, a nui ve suk suk tho.



Ka pasal a awm hian lawm hranpa ngai miah lovin ka hlimin, ka nui reng mai zawng chu a nih hi.

Rammuanawma, a fapa tihmut tuma awi ve hlu hlu, za vak lo va nui leh suk ṭhin, chu ka melh leh ralh ṭhin, damdawi in ka chhuah aṭangin nupa nun kan la hmang miah lo. Min dimdawih em em a.


A insum nasat zia ka hre chiang viau bawk, a chang chuan ka khawngaih piah lamah, keimah pawh hi insum zawh loh chang ka nei lek lek ṭhin.


"Chaw bel bulah ka ril a ṭam zantin rih a nih hi," bul zet hian a ti leh sup zel bawk a.
.
.
.
"Eng nge ngaihdan te i siam fel tawh em?"


"Dinte, midang mitmei i ven a ngai lo a nia," Pa Bawla'n a rawn tih zui chuan ka lo thaw hawk mai.


Min nawr ni miah si lovin dinhmun khirh takah mindah niin ka inhria. Nge ni a, ka ngaihtuah tam lutuk mah mah zawk.

"Ka Nu te bulah awm phawt rawh se," ka ṭawng hmain Rammuanawma'n a rawn ti sup, a lam ka hawi vat a, ka mal chunga kut chu rawn hum zui vung vungin, "ka nupui chauh ni lo, keimah pawh hi ka la inpeih lo a ni. Mipa, pasal leh Pa ang pawhin Betty-i hmachhawn tur hian ka la inpeih lo. Kum 2 vel ka Nu te hulah awm sela, kan inpeih ve tawh ang," a rawn ti nghet a ta churh.


Diktak chuan mipa, mahni mawhphurhna hre tak a ni a, a mawhphurhna lak chu a duh ngeiin ka ring, mahse ka tán chungthu te chu a sawi a ni tih ka beng awmna ka chian tlukin ka chiang a ni.


"Chutiang pawh chuan a ṭha lutuk alawm. Ni e, kan fanu thiltih ngaihtuah pawhin Dintei emaw nang emaw tán pawh thuthlukna siam a awl dawn lo tih ka hrethiam," Florence-i Pa in rawn tiin, "khawiah pawh awm sela i fanu a ni reng dawn a," a tih zawm leh zat.


"Kanpa sawi ang khan, hun kan mamawh a ni. Rilru dam miah lova ka la lut a nih chuan nangmah ni chauh ni lo, Betty-i thinlungah huatna, duh loh ni a inhriatna, hmangaih tawk lo ni a inhriatna ka tuh sak ka hläu a ni," an ngawih deuh dük hnuah ka ti chhuak ta sep sep.


Ka ngaihdan diktak a ni bawk. Nu leh Pa nih hi a ropui a, chuvangin atan nu nih ka tlin leh si lo ang tih ka hläu takzet. Keihian mahni hringtu, Nu emaw Pa emaw huat hrehawm zia ka hre chiang viau si a.


"A nih chuan, kan bulah awm mai sela, harsatna pawh kan nei bik chuang lo a ni lo'm ni?" Nu Mahlimi chu ka en vat.



"In tih ang ang chu a ni mai. Dintei tán pawh naupang, naute pahnih enkawl chu a harsa hrim hrim dâwn a," Nu Mahlimi pawhin a lo ti ve zat.


A hmel ka hmuh hian ka la zâm ru ṭhin, min ân khum emaw, min ṭawng khum fek fek ang kha hriat ka la tum deuh rûn niin ka hria.


Mahse, rinai tak chuan ka chunga ṭha ta chiam ni si lovin, a mizia erawh a dang ve ta viau mai.
.
.
.
.
"Bawihi..." Kan nupa room kan luh rualin ka kawngah a rawn kuah zui a.


"Betty-i awmpui loh chu i ngaihdan a ni ve tak tak maw?" Diktak chuan keimah vangin a fanu hi a hnar ang tih ka hläu ve reng. An pafa inkar a din leh, an pafa inkara hnawk nih hi ka duh miah lo. Duhthlan tir ka duh lo takzet.


A thaw chhuak hawk a, inla hrangin, ka dar tawn tawna chelh chuan alam hawiin min kuai her a.


Ngun taka min en chungin, "inthiam lohna emaw, nangmah vanga in ngaihna emaw kha paihbo hmak ang che," a ti bul sup sup.


Thaw ham hamin, "i mawhphurhna a ni tih ka hriatpui che a, ka dinpui ngam rih si lo che a ni," ka ti chhuak leh thlawt. Thudik tak a ni bawk, an beisei ang nu hmangaihna ang khân ka hmangaih zawh loh ka hläu êm a ni.


"Bawihi, ka sawi kha, keimah pawh ka la inpeih lo, chu chu thudik a ni. Hun kan mamawh," uluk taka sawiin, a kiai zui suk a, "chumi hma chuan," min vawnna thlahin a kekawr ipte chu a zen a.


A thil rawn phawrh avangin ka meng kawk, "Rammuan...." Sawi tur ka hre lo.


Ka hmaa a hawn bawm, a chhunga White Gold nalh lutuk mai en hau chung leh ka hmaa mipa ding, lâi ve ni âwm taka kiai leh suk ṭhin chu ka en hau ringawt. Kâ in ka chhawn thei lo a ni ber.


Ka tleirawl chhuaha ka suangtuah ṭhin chu, "lunghlu zungbun aiin, rangkachak var, a chhunga ka pasal hming leh ka hming in kerna, tle sep sep, simple tak ka pasal lak aṭanga dawn ka duh ngei ang," tiin pasal neih hun ka suangtuah ve a piangin, ka ṭhiante bulah ka sawi ṭhin.


Chutianga ka lo suangtuah ṭhin ang chiah mai ka hmaa mipa in a kuta a ken chu awihawmlohna nen ka en a. Thawk pawh ka thaw chhuak ngam tawh lo zawk.


Thaw chhuak ham hamin, a zâm emaw tih mai turin min en a, "ka nuna thilthleng tawhah chuan i hlu ber a ni tih ka hmangaih che tih ka chian tluk zetin ka chiang a. Ka Pu in ka tana thil a tih tawh a zawnga ropui ber i ni tih ka chiang bawk," min thlek deuh vang vang a.


"Thinlung vawt taka hmangaihna chi nung tuh tu leh hringnun hlut zia min hriat tirtu, chhungkua ka dinpui duh hmeichhia i ni. I nui hmel phen a mi pakhat, i hmela nui hmel awmtirtu leh, i mittui a tlak changa hruhultu mipa, i rinchhan leh i in ka nih theihnan, a vawihnih nan min nei nawn leh ta che?" A thusawi chu a muangban chap a, a nghet charh bawk.

Kiai suk a, thle zui bakin, "a vawithum nan zawk," a nui ri suk. Kher kher chuan!


Läwmna leh awih lohna avanga ṭah nuih ve hakin, mittui luang ngiai ngiai chungin, "iti tak tak em?" Ka ti chhuak ṭiak. Ka pasal kâ aṭanga chutiang thu thlum ka hriat chu ka inring ngai lo hrim hrim.


Ni lo, suangtuah pawh ka suangtuah thiam loh a ni zawk.


"Ka nei ang che. Mahse.." A mitko a lo ti kân awk a. A thle bak bawk.


"Inneihna hunserh hman ka peih tawh lo," a nui huk, ka ṭah nuih ve hak hak, ṭah lohna chi a ni miah lo, ka khawvel hi a mawiin, ka hmaa ding mipa hian ka suangtuah ang. Ni lo, hmeichhia tawh phawtin kan suangtuah ṭhin kha a din mêk a ni tih hmuhin, ka thinlungah hlimna nasa tak a thlen tlat a ni.

Ka kuta zungbun ka bunlai, rangkachak kual chu la chhuakin, a zungbun kenlai chu a rawlh lut a, la kânga fawp vawng vawngin, "i chhiah hlawh ka ni tel dâwn a nih chu. I sawi ang zelin le," a ṭawngkam chuan minti lai zual, a kiai zui ve suk tho.


Ka biang tawn tawna chelhin, ka hmui chu a kutzungpuiin a tuai zauh a, dimtêin min fawp vawng vawng a.


Beka hlimna mittui luang ngiai ngiaiin, ka pasal fawhna thlum dek dek chu ka lo chhang let ve vat bawk.

Ka Nu in, "mipa, i thlamuan pui, i taksa leh thlarau thlenga hahdamna, himna i hmuhna hmun mipa chu i lei vanram diktak a ni," tia min hrilh ṭhin kha ka pasalah hian ka hmu fai vek a ni tih min fawhna thük leh ril tak, tisa chakna tel miah lo, hmangaihna leh pasal, Pa a nihna ang a intiam kamna, ṭawngkaa sawi lova, a nem nghehna chuan a tifiah em em bawk!


Thaw ham hama inla hrangin, ka chal leh a chal insik tirin, kan thaw dun ham ham a, "ka hmangaih che Bawihtea Nu," zawi leh thawp sup, rilruih mai, rinhlelh tur pakhatmah awm lo va a rawn tih chuan mit ka lo chhing sawk, lawmna leh hlimna avangin kawchhung hi a khur der der thei ang tih rin ngaihna ka hre ngai lo.


Mahse, tunah hian ka pasal thusawi zawng zawngte hian minti hlim a, ka tha hial an ti khur dar dar nia maw le!!!!


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 5th, 2022, 12:56 pm

{ LOVE AFTER MARRIAGE}

BY

Floria Laldansangi


Chapter < 36 >


Min kuah hlu hlutu âwma bei chial chungin, "Rammuanawm..." Ka ti sep.


A lo thaw hawk a, "Rammuanawm, itih fawk hi a ngai kher ṭhin em ni?" A ti bul sup chu, za takin ka nui chhuak awr awr, taksa lian ṭha nelh nulh mai, aw zawi leh thawp sup nena läwm lo leh titau aw deuh rawn chhuak chuan ka nuih a ti za takzet.


"Nui suh," ka khabe ah a rawn chelh a, chawi kang salh a, mit ti zîm sûta min enin, "min koh dan i thlak hi chu a ṭul a ni," a kiai zui suk.

Nuih let var varin, "engtia koh nge i duh?" A khabe chu ka khawih zui ve niap niap.


Mitko veilam ti che zauhin, "Bawihtea Pa," ka inrin hma in ka nui chhuak leh.

A lo rum leh nghut thung a, za taka nui chungin a âwm ah chuan ka bawk ṭha sat sat, "Muante..." A hnar a lo tum dut.

Nui reng chungin, "Ramte..." Ka nui ar ar, a khabe ka khawihna kut chu chelhbetin, "Ramdinsang...." A ti hluk chuan ka la nui ar ar reng, tihluih hi a nuam ve a nia.


"Hmanah khan ka school kal lai a ṭanga min hriat thu kha i sawi tawh," a hmui hnuailam a pet zauh a, "chuan..." A lo ti sup. Ka bân bulah chelhin lu lamah min pawt chho zui zat a.


"Min hresa mi?" Naupang thil hriat châk zawt ang maiin ka en kiau bawk.

A mitko ti sang awkin, "hmeichhe tleirawl nui mawi tak, an teacher tena 'kan school-a lehkha thiam thei ber an tih kha," ka hnar a kutin a tuk zauh a, "ka hrereng che. Mahse, ka hmuh leh che erawh ka inring tawh lo thung. Siampuii dawra ka hmuh che khan ka hre chhuak che," a ti zui sup sup chu ka lo ner nawng a.


"Min hresa in i inti hlauhawm a ni maw?"


A nui hawk, a nuih zawngin ka che ve dawt dawt bawk a.


"Ka inti hlauhawm hauh lo mai Bawihi. Bialpa nei ang a insawi tu ini a ni lo'm ni?"


"Rammuanawm..." A âwmah ka beng zui taih, "i va sual ve, nanga min ngaihzawn ruk avanga khati vak vaka ka chunga i sual ni?" Ti ta nghek chu a nui tak hawk hawk a.


"Confi sawt ve," a ti sup, ka nui ve leh ta vur vur tho. Min ngaizawng ru reng alawm, dawt sawi hek lo i le!


Ka beksam tawn tawna a kut hlai leh lianpui mai chu rawlhin a hmai lamah min pawt hnai leh a, ka hmui a fawp vang vangin, "mipa dang hmeichhe lakah ṭhat chhuah vak a ngai em ni?" Zawi taka tiin, "ṭha tih zawng an nih phei chuan," ka hmui zawnah a phun sup sup, a khabe aṭangin hnar ah ka liak chho duai chu, "Ummmhh!" A lo ti nghut.


Ka nui khek khek, ka tum pawh a ni lo. Kan inhmuh tirha a sual viau man a ni mai, min hre ru rengin ka phone te kha hla tawkah ka va lam phah a. Phakar lutuk mai.


"I phu tawk," a taksa chunga bawk reng chunga ka tih zat chuan, nui sukin, "i chiang maw?" Ka biang tawn tawnah chelhin ka hmui, ka hnar, khabe leh biang a fawp lawr nawk nawk chu ka nui chhuak ar ar.


"Ka hmai a rimchhe vek dâwn," a nui ve huk huk tho.

A taksaah lah hian ka leng nasa mai bawk si, keilah hian khum pangaia mut aiin a awma bei hle hle hi nuam ka ti viau tawh lehnghal. Thlamuanpuia ang deuhin a ngawl hi ka vei ang tih a nia ka hlauh ṭhin ni.




"Dinte..." Kan nupa infiam nuih ar ar laiin kan room kawngkhar a rawn inkik a, a fapa ṭap riin a zui zat.


"I chi rangkachak ṭap thei a ṭah leh tawh chu," nui chungin a chung aṭangin ka let zui tap a. "Chi rangkachak" tih sak chu a duh vak lo a ni ang. Ka hnarah rawn piai zui vakin, "kan fapa hi sawisa reng suh," a ti zui sup, a nui zui huk leh tho.


A fapa hi ka la rauh sak nasa dâwn alawm, a chhan ve em em a, ṭahngai ang mai, ṭap reng ringawt mai a.

"Hnute a châk a ni lo'ng maw Bawihi," khumah a rawn pawm a.


"Châk dâwn em ni?" Ṭhu ṭha in ka lo ban vat.


Ka rintawk chiah, hnute pek ka tuma a zuk duh ṭhak lo. He naute hi chu a, ben fawk hi ka chak ṭhin.


"Dar 10 a pel tawh, mut te hi tum ve teh, i hmelchhe hrihre si."


"A mak teh zek ṭhin," a laptop la chhuakin a hmet nghal mawlh mawlh a.


"A nia lawm, i tetlai hian i sual a niang, tiang em em hi ka ni si lo va, thlakim lova piang ka hriat tawha a la sual ber," uar deuha Rammuanawma tilui pah deuha ka tih chuan khum mawng sofa-a ṭhu chunga a laptop khawih chawl meuhin min rawn melh chho.


Ka lo nuih vur vur a, "ka thisen alawm a nih," ti nghutin a thiltih a tizui leh mawlh mawlh, ri si lovin ka nui dir char char, a fapa hauh tina lutuk chu tihluih minti chak zual ve hrim hrim.


Ka rilruah Betty-i a rawn lang zat, Betty-i lakah ka inthiam lo ringawt a. An pafaa ka ṭhen hrang ang a ka in ngaihna chu ka duh lo takzet.


Ka rilru-in, "Betty, hun minpe rawh aw, rei a ni lo ang," ngaihdam ka dil ru nghal mawlh mawlh bawk.

Diktak chuan nuam ka ti miah lo, Ethan-a vangin han hlim ṭhin dawn viau mah ila, Betty-i lakah inthiam lohna in min chim nghal zel dâwnin ka hre bawk!!

.
.
.


Ni a ral a, thla hial a ral leh duak duak ta, dam hi chuan ni hi a lo rei lo vin, a lo kal chak hle a nih hi.


"U Hnem, vawiin chu min zui ve dâwn lo'm ni?" U Hnemi zai rat rat chu ka melh zauh.


"Zui lo ang che u. Bakah, vawikhat U Rammuana ka zui a, court chhung vel kha hrehawm ka ti, keini ang tán thawk a harsa," a nui zui awr awr. Vawiin hi court-in Florence-i leh Jessica-i te tán thutawp a siam ni tur a ni a, Jessica-i hmuha thuzawh ve hrim hrim ka duh avangin kal ka tum.


A hma erawhin Rammuanawma chiah a kal thung a, zui tumna ka nei ngai law. Hmuh hrehawm ka ti dâwn tih ka inhriat avangin ka kal duh lo hrim hrim.


U Hnemi'n, Lalnunsanga hla "D'hlui" tih a play chu ka zawm ve rat rat a.


"Ka kal dâwn a sin," ka melh zauh, bu nghatin ka la zai reng. A thaw ri hawk a, dawhkana phone, zai kan play chu off-in, "zai tawh suh," a ti bul sup.

Ngei deuha melh vakin, "ka kâ a nia, ka zai ve bawk ang chu," ka lo ti hlar.


Min en run run chungin, "khatiang hla lo sak tur a tam," tih leh ka chalah fawpin a pensawn nghal pawk pawk.


Ngei lutuk a en zui vakin, "Niraw-a ang mai, 'zai tawh suh te a ti,' eng nge anni unau hi an hriat ṭhin a?" Ka hmel tisawi lui vaka ti zui nghekin U Hnemi lam chu ka hawi a.


Ani a lo nui dir tlawk tlawk, "awi a thikthu a ti chhe ve a ni ang," a nui tlawrh tlawrh.


Insawh deuh nghawng nghawng a dawhkan nawhna dahṭha in, "thik tur pawh a awm lo, rilru tet thlak," ka ti hlak hlak tak nâ-in, Lalnunsanga hla D'hlui kher hi chu, a hma ang nise Rammuanawma kâ aṭanga chhuak hre ve ngat ila, rilru nâ in ka ṭap ru mai thei a ni.



A hla thu hi thük tak ni si lo hian, a ril êm a, cool ruih mai a, "Nunhlui leh nang ngaih, a ruk hlira ka lo tuar dai tawh tur hi; ka dâwn khawl changin lei hringnun hi kei zawng a sei ka ti," anti ngawih ngawih mai hi chu, a sawi famkimin nunhlui kalsan thei lo, lanchhuah tir rem tawh si lo tán hian a na dawn hian ka hre ṭhin.


Mahse, kawppui tena ulul tak leh lungchim tak maia an zaipui erawhin, a lawmawmin ka ring miah lo bawk. Thik tur awm miah loh pawhin thikthu tih chhiat a awl viau ta ve ang.


"In inhmangaihin, pasal i inti nei viau emaw tia, eng nge in inhauh leh tak," Lalnunsiami rawn nui lut kur kur chu ka lo melh vak.


"Kan inhau lo," an nui nasa mai.


"U Hnem, tinge?"


"Lalnunsanga hla 'D'hlui' tih kha kan thik a nih hmel."


"Awi! Tenawm dun e! Pakhat lahin a kâ âng hlek se 'ka pasal, ka pasal' a ti reng bawk a," U Damtei te ho chuan an nui zui uar uar. Ka tih pawh ka hre lo ve a. Ka nui ve ta vur vur tho a.


"Inva rawn hma si ve," an ṭhutna lam panin Cynthia chu ka piai zauh.

"Kan hman hma a nih hi, khawnge Thlamuana?"


"U Piana'n..." Ka tih mek laiin an rawn inkai lut a.


"A chak vak zia hi aw! Hmu in hre lo phei ila chuan thla 7-ah a kal tawh tih hi ka awih miah lo ang," U Damtei'n a ti zui hliai.


U Piana'n a kaihna thlahin ka lamah a rawn tlan ter ter a, "i tlu...." Remruati'n a ti hman ṭawk chu a bawk leh thlawp. A pa chu awmse dawm ka tum loh avangin min melh leh nasa ang chu.

"Awi! Thlamuanpui, i chal bawk pawh a la reh loh kha, tlân ve tawh suh, i speed a säng thei si," nui uar uarin Nunsiami'n a lo ti zat.


A tlân hi a thunun zo leh ṭhin si lo va, bawk thlawp loh leh a let tual zel. A hmai te hi a nawr pilh leh ṭhin nen, Rammuanawma hian, "i veng hneh lo," tih leh sup sup hi a ching, naute a nia, inhliam ve nek nek tehse ka ti mai.


Bakah. Ethan-a hi chu thlakim lo va piang e ti lo hian, a chak vak lutuk a, pawm leh vawnbeh te hi a duh bik tawh si lo, a buaithlak ṭhin lutuk.


"A ṭap miah lo lehnghal. Cynthia, i nau saw va awm rawh," U Piana'n kan bula a rawn chawi phei chu Cynthia-in lo kuah a tum ve bawk a, Thlamuana duh lo chu a rak nasa ngang mai, kan nui ta dar dar hlawm. Pawm leh kuahbeh hi a duh lo. A senlaia pangtilum a hriat a, pawm vel nuam a tih veinen, tunah te chuan Rammuanawma bak hian an pawm rei thei lo hrim hrim. Keimah tak pawh hian rei ka pawm thei lo, a tâlpit nghal zel.


"Rak vak vak zel suh. Mipa si hi i aw sin nen hian i rak nasa thei lutuk."


Kan lo nui leh dar dar, a hrethiam ve tih hriat takin a chip ve mai bawk a.

"Hnute hrem hi ila tum lo em ni?" Hnute a ban zui rak rak chu nui chungin, "kum 1-ah a tia lawm a Pa-in," ka lo ti sap.


"A thu ve bawk sia inpa hi chu. Tak takin Lala a hma nena khaikhin chuan i hlim hmel hmuh hi a nuam ka ti," Remruati'n a rawn ti a, ka fapa hnute hrâi pahin, "rilru hahna tur a awm tawh loh chuan hmelah pawh hian a lo lang chhuak a ni ang," ka ti sep.


"Rammuanawma nen kan inneih aṭangin diktak chuan thlamuang khan ka awm ngai lo. Engkim mai kha harsa ka tiin a thim mup mai khan ka hria a, thawk ngaihna kha ka hre ṭhin law. Ka sawifiah thiamdan ber chuan ka âwm ah hian thil rit takin min delhbet tlat ang mai kha ka ni ṭhin, ka ngaihtuahna ringawt pawhin thaw chham lek leka min siam châng kha a awm fo a. Tunah chuan bawmtawt aṭanga pawh chhuah ang mai ka ni. Rilru a hahdam chuan taksa thlengin kan hriselin ka hria. Tuna ka rilru tihah tu ber erawh Betty-i hi a nia, ka inthiam ṭhin lo," ka ti siam siam a.



"Kanpa ngaihzawng neihlaia ka awmdan a nih kha. Thaw a pikin, ngaihtuahna a tawi tuk a, lungphu ṭha lo nei ang maiin kan thaw leh deuh kawk kawk ṭhin, hlauh kan ngah bawk si, rilru a hahdam leh kan nunphung engkim, thawklak leh lungphu thleng hian kan lo hrisel zawk," a rawn ti ve zat.

Depression emaw mental problems lam te hi ka hre ve fo ṭhin, chutin ka lo ngai thutak ngai lova, tunhnu hian ka hrethiamin, rilru hrisel pawimawh zia ka hre chhuak.


"Betty-i sawi takah chuan hman ni ti ila a rei ta deuh, nikum Christmas hma deuh kha niin ka hria, ka Nu te Inah a lo awm a, kan haw tur kha thlah chho nghal rawh u minti nen kan hruai chho ve mai a. Pa Bawla te in kan luh dâwn khan Rammuanawma nau hmeichhia kha a lo au nasa khawp mai a. 'I fanu te pahnih kan pasal tena min hmangaih theih loh chhan chu nangma min enkawlna dik loh vang a nih hi. Nundan dik min zirtir nachang i hre lo va, kan kawchhunga sual vulh liantu i nih hi. Mi fanu chungah i rilru a chhia in, i sual lutuk a, ka pasal chhungten i mo chunga i tih ang chiah ka chungah an tih ve chhan ini' a lo ti nasa khawp mai a, a au ring in a ṭap nasa bawk si, inchhung pawh ka lut ngam lo, Betty-i kawngkhar bula hnut chhiahin, kawngka kikin ka inhersan ta ngawt a," a ti zui siam siam.


A sawi takah chuan, "Ely-i chunga thil thleng," Nu Mahlimi'n a tih kha a ni mai lo'ng maw aw? Tih ka ngaihtuah chhuak rum rum.


"A sawidik reng alawm, nu leh pa te hi an pawimawh êm êm rualin, hmeichhe fâ chuan Nu te kan en ber an ni a, chutin mipa fâ-in an pa te, fate thlavang hauh chin tawk te, hauhdan tawk te hi thiam a ngai rêng a sin.


A zawnga zàa hauh tuk tur pawh a ni lo. Bakah, Rammuanawma Pa ṭhat dan pawh hi a dik lo, an fanu zilh hunah chuan a nupui hnung dawlin, a lo zilh hau ve tur a ni a, a ṭhat dan hi a chut tlat.

Tunah pawh an fanu upa zawk pasal khan vairamah nupui a nei an ti a ni lo'm ni? Lala-i pasal Nu mizia en ila pasal leh pasala Pa te zahpahna a nei vak si lo va, a fanu ten a tihdan an enber a nia, tu mipa mahin an tuar thei tawp nang, kan pasal chu eng ang mizia pawh ni sela, mipa an nihna ang hian zah ila, kan pasal te chauh ni lo, keimahni hmel pawh hi kan ti zahawm em em mai a ni," Nunsiami'n a rawn ti ve duah chu, "pasal nei tawh ang mai a," Remruati'n a lo fiam zui chu kan lo nui hak.


A sawidik viau, ka pa in, "nu leh pa hi damchhung zirtirtu," a tih kha a dik viau in ka hre bawk.



"Dar engzah nge kan chhuah dawn?"


"Ka han insiam ang a, kan chhuak dâwn nia. U Piana'n min thlah hlawm ang chu," choka lam hawiin ka nui var var. A lo bu nghat nghat.
.
.
.
.
< court room >


"He tualthahnaah huan eng inhnam hnawihna mah ka nei lo tih vawi engzah nge ka sawi ngai dâwn?"


"Tunchiah ka zawt leh ang che, Pu Kamlova thihnaah hian i tel ve em?" Ukil chuan fiah kekawkin a ti leh a.


"Ka tel lo, ka tel lo," Florence-i chu a au tuar tuar.



"Heihi evidence hnuhnung ber a ni a, your honor ka play min phal sak rawh."


"Phal a ni." A play zui a.


"Ti na hauh suh ang che. Raipuar a ni a, nau a chhiat thei lo. Mahse, hläu takin siam ang che. A hmaa a bag i ruk sak ang kha," Jessica-i aw a ni. Thawk hip let kawkin ka sira ṭhu Remruati kut chu ka hmer zui vak.


"That law law rawh se. Buaina a fel a ni mai. That rawh, Jessica-i pek ang zat che hi ka pe ang che," Florence-i aw fiah tak mai, tualthah hreh lo leh eng atán maha ngai lo. Thosi benhlum ang leka ngaia thu a pek chu a chiang lutuk mah mah.


"Lalpa maw!" U Damtei'n a lo ti chhuak hap. Ka kawchhung a khur lek lek, ka ṭang ṭung bawk. Engtin nge an mihring pui, an hmeichhe pui chungah chutiang rilru chu an put theih.


"Ti kha a ni e. Ka lawm e," Ukil chu a ṭhu a.


Florence-i chu a lu thing nawk nawkin, "ka ni lo, keimah ka ni lo. Jessica-i thupek a nih kha," a au tuar tuar.


Jessica-i lah ngawi runin a lo nui leh sawk sawk ṭhin. Jessica-i mizia tak pawh chuan min rap lek lek tawh zawk.


"Dr. Jessica, engvanga that nge inih sawi i tum em?" Judge zawhna chu a nuih khum sawk a.


"Chhan ka nei lo, thah lah ka tum hek lo," ka lam a rawn hawi a, "ka tum loh zawk a ni," a ti leh zat. Ka lo thaw chhuak kawk thei.


Judge-in an tán hun tur a sawi zo te chu keimah zawk hian hrehawm ka lo ti ngut ngut mai. Hetiang hian court thuchhuak ngaithlak a hrehawmin, a hahthlak ang tih ngaihna reng reng ka hre lo, lungphu hrisel leh taksa chak tak neih a ngai alawm maw le.


"Florence-i kum 14 a tán a, Jessica-i kum 12 atan bawk chuan...." Siamsiami chu ka en a, "Jessica-i zawk saw ka khawngaih letling," a ti zui zat.


Florence-i rak tuar tuar chu dawhkanah an nawrbet a, "Jessica, minbum vang a nih hi. Engtin nge Rammuanawma lakah beiseina min siam tir theih?" Jessica-i zawk chu a au khum leh tuar tuar.



"Engvanga engmah sawi lo nge inih? Jerry-a chanchin i sawi lang thei reng si a," ka bula an rawn dinpui chu thaw dep dep hian ka lo zawt. Ukilin a zawh nawn a, judge-in a zawh pawhin, "chhan ka nei lo," a ti ngar ngar kha mak ka ti. Tual hial thah an tum phahna a zep tlat ang lawi.


"Ka ngaidam ta emaw an lo inti ang e. Pu Kamlova leh i chunga ka thiltih avanga ngawi ka ni. Mahse, i pasal leh Enkawla erawh tualthattu annihna a reh phah chuang lo," ka mitah min en kalh, inthiam lohna emaw, inchhirna emaw a nei lo hrim hrim, chhete mahin a lang lo.


"Tihnat che kha ka tum ngai lo," a ti leh chuan ka lo bu nghat, ka ring, min tihnat a tum ngai lo tih ka hria a ni.


"Ka hria alawm," ka ti sep, Florence-i kan lam an rawn panpui takah chuan Florence-i melh zawkin a pensawn zui a.


"Ramdinsang...."

"Rammuanawma khan a hmangaih che emaw iti em ni? Ka hmangaih hmasa ber a nih ang chiahin a tán pawh ka ni," mittui nen chuan min au khum.


"Ka hria alawm, nang erawh a nunhlui, kei erawh a tun hun leh hmalam hun," fiah taka ka tih rualin, "Ramdinsang...." A ti ṭhat.


"Nangmah avanga he dinhmuna ding ka ni. Ka fanu fahraha siamtu ini."



"I fanu hmeichhe dang 'Nu' tia ko tura siamtu ini, nangmah ngei kha alawm. Engtin nge i hmeichiatpui, rai puar lehnghal that tura thu i pek theih? Mihring pawh i inti vw ngam dawn em ni?" U Damtei'n a rawn tih rualin a rak tuar tuar. A kawchhungah ramhuai an lut tak tak emaw ni ka ti ve mai dâwn alawm.


Constable pahnihin an pawt chhuak chung pawhin a rak tuar tuar a. Kawng lehlam takah chuan a lainatawm zawk tak tak.

Jessica-in, Rammuanawma medical result lem kha a hmuh tur ngeiin dah lo sela, Rammuanawma lakah beisei a rawn neih loh tur thu leh, Jessica-i bulṭan a nih thu a sawi te chu ka awih reng. A naupai leh Rammuanawma fa a ni tih pawh a rawn sawi mai bîk loh danah beisei a nei tawh lo va, Jessica-in beiseina a siam sak zauh kha a chhiatpui niin ka hria.


"Betty-i hian a rawn la hre chhuak vek dâwn si a. A lainatawm zawk alawm le. A nu hi a rawn zahpui mai ang tih a hlauhawm zawk," Remruati'n a rawn ti sep sep.


"Tualthattu fanu' an la ti ve fo âwm si a," Siamsiami'n a rawn tih zawm zat.


Betty-i ngaihtuah chhuakin, ka mitthlaah a rawn lang zat. A mitmu dum fiah kiau mai, hmel pawisawilo tak kha ka khawngaih thar riau bawk. A thiam loh ni miah lohah a rilru a la nâ-in a la zak ru ve reng dawn si a!


"Nu leh pa in theithur an ei a, fate hâ a ṭim' kan pi leh pu ten an lo tih kha a lo dik takzet a ni. Chhia leh ṭha a rawn hria ang a, a nu vang hian a rawn la zak dâwn chauh si a," court room kan chhuahsan pah chuan anti zui siam siam bawk a, Betty-i ka khawngaih tulh tulh a, sawi tur ka vàn tulh tulh bawk!!.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)