HERE WE GO AGAIN (Full version) Hlutei Jocund Pachuau

Moderator: writers

Hluhlutei
Posts: 430
Joined: January 12th, 2017, 8:44 pm

HERE WE GO AGAIN (Full version) Hlutei Jocund Pachuau

Unread post by Hluhlutei » January 30th, 2020, 6:56 pm

HERE WE GO AGAIN


BY


HLUTEI JOCUND PACHUAU



(Teenager story lam ve thung aw)


IMG_20200130_185339.jpg
IMG_20200130_185339.jpg (96.3 KiB) Viewed 28930 times





Motor tlân ri leh horn bengchheng lutuk chuan ka thil ei pawh a ti tui lo zo vek, Lalnundiki lah hi lo thleng har tawh sia, Subway hi chu an thil siam tui viau thin mahse chhûn ah chuan a bengchheng mah mah thin.


Ka hming chu Maria Lalhlimpuii ka ni a, Maria tiin min ko deuh ber thin,kum 20 ka tling ve chiah a, Tûnah chuan College ka kal ve thei tawh, thingtlâng khua ni mahila Aizâwlah ka u nèn in kan luah dûn a, Chhûngkaw harsa zawk zawk kan ni lèm lo bawk, hmeichhe tawng duh tak ka ni lèm lo a, thian pawh ka ngaina em em lo, huau huau tih vèl aiin hmun reh hi ka ngaina a, ka hobby chu music ngaihthlâk leh Mut leh ei a ni deuh tawp mai, ei duh viau e tilo chuan ka thau thei chuâng miah lo, ka pumrua hi a lian lèm lo a, ft 5'2 ka tling vè tawk tawk chauh, tèt nâk alaiin ka la chèr chhe em em zui a, mipa tân chuan ka vun ngo tih loh hi chu han duhawmna vak ka nei lèm lo.




Beep.....Beep.....


Ka phone chu ka en vat a, Laknundiki ngèi a ni, henû lah hi tlâi reng mai, Hrângbâna College ah chuan BA Second semester ka zir ve dâwn chauh a, Aizawl College ah First chu ka zir ná a, mahse Nundiki a insawn vângin ka insawn vângin ka insawn ve ringawt, Kârkhat lai chu kan lût ve tawh a, mahse Nundiki tih loh chu thian pawh ka la nei chuang lo,ka mizia hian a zir lo èm bawk a ni, ani hi chu 12 ka nih lai a ka chhar chawp a ni, kan mizia leh duhzawng a in ang phian a , kan subject lâk pawh a in ang vek bawk, mahse a tuan muang thei lutuk hi ka ning lek lek zèl.



"I rei e...ka ning tawh a nia"




Ka'n lo ti nghâl tâwng a,

"Aw...hei ka rawn kal mèk, lo ei teuh rawh"



A tih zawh rual chuan a off hmak nia, pawi tawp hleinèm, tihpahin ka hma a ei tûr chu ka ei nghâl hmak a.



Pawn lam ka dah vauh vauh lâi chuan kawngkhâr atanga mipa hnih lo lût chu ka melh zawk a, awii!!! Pakhat zawk chuan min ti phu chiang lutuk, a hmèl chu phâwk hrâ hian ka en reng a, ani pawh chuti tho, amah ngèi kha ni, ka chiâng, mahse a sam saw duh aiin a buk mah mah, a sei lek lek tawh, amah a ni, ka hai lo, ni e, ka hai theilo hrim hrim,ka tâwt nghâl up up a, ka khûr ru leh deuh dar dar tawh,mahse a bula ding hmeichhia sawn duh aiin a vuan duhâm mah mah, a bialnu a ni ngèi ang, a ho emai a, ka lo buaina tûr a ni hleinèm, mahse tinge ka awm zâwn hi anat veng veng le? Ka thil ei pawh ka lem tha thei lo, pângâi takin ka awm tûr a ni, Kum 2 lâi a liam tawh alawm, thâwk chu la hakin tui chu ka in nghâl khalh a, ka rei!....ka thutna lam chu an rawn la pan ta ang deuh deuh a.


Ka bul an rawn thlen chuan nui sak hian ka lo chhoh melh rân a,


"Kan in hmuh lohna rei tawh hlè mai, min lo zawm ve ta che u"



Amah en kar chuan in la ngeiawm zet hian ka ti a,min kal pèl tûr chu an ding chat mai, tûmah ka be hmasa ngâi lo nângin ka ngeiawm châk tlat, min hriat loh der a tum ve khanglâng anih kha, abialnu chu a sâng tha in a hmeltha phiân leh nghâl, A bialpa duhtak hi ka Ex tih a hre dèr si lo a.


"Awi in inhria maw? Hawh thu ve ila Duat"


A bialnu chuan no zet hian a ti a, ka rin âi daihin a no, ka ngei chi, thâwk la hak pahin ka meng kual ralh a, Niko a'n rum zeta min lo melh reng chu ka hre lo der hmak, a bialnu thû chu âwih zet hian an rawn thu ve mai bawk a.


"Engtin nge in in hriat a Niko nèn hian?"


"Ka first love leh ka first kiss anih hi, engtin nge ka theihnghilh theih ang"


Ka lo ti vat a, a bialnu hrilh hai hmèl chuan ka nuih ati za tlat anih chu, Niko in hûm ruh lâi chu hmuhnuam ka ti riau mai, a hmèl that ngâiin ala hmeltha reng a, a mithmul sei zet leh mit meng lian zet, tawrh har ka tih thin em em pawh kha ala danglam lo e, a mit meng val deuh riai mai Rûi mitmeng kan tih ang lek lek a min melh kar tawh hi chuan engmah sawi lo mahse ka zâm thei hlè a nih kha.


"Ani maw!"....



A bialnu chuan ban deuh chat a tihpah chuan Niko chu a melh zak zak a, ka insûm thei tawh lo ka nui chhuak ta hak a,


"Ka uang anih kha, Niko nen hian khaw khat kan ni thin a, chuan kan schoolah a rawn lût ve thin alawm, mahse keichu class 9 chauh ka nih laiin Niko te hi chu 10 an nia, kan in kawm ve thin alawm, mahse Niko te hi 12 a pass khân Aizawl lamah an rawn pèm ta daih a"



Ka tih chuan A bialnu chu a bu ta nghauh nghauh a, Niko chuan thil dang ka sawi leh beisei hmèl zet hian a mit hmul dinglam chu a rawn ti sâng zauh a, mahse ka en tha duh miah lo thung, a hmelthatna hian min tina leh ang tih ka hlâu a ni, kan chanchin sawi vek chu ka tum lo, han chhaih kawlh zauh kha ka tum ber chu ni mai.


"Avan duhawm reuh inkhua chu ka kal ve châk khawp mai, e...chuan, Melody ka nia"



Tihpahin nuisâng hian a kut chu arawn phar chhuak a, ka lo chibai ve nghâl mai bawk.


"Maria min ti mai rawh"


Ka lo ti ve vat a, Niko chu ala ngâwi reng mai, tinge a danglam chak tâk èm èm le? A mizia hi mak ka ti zawk.



Ka phone rawn ri ral ral ka en chuan Landiki message a ni,


*Bus stand ah lo phei rawh ka nghâk che*




A rawn ti tâkah chuan ka phone chu ka dah leh vat a.


"Anih ka kalsan mai ang che u, ka hmanhmawh sia"




Tihpahin ka tlân chhuahsan ta nghâl a, awii...ka van haihawt tak, ka helmet ka theihnghilh daih, ka tlân lût leh nghâl vat, Niko Bialnu chu alo tawng zat zat a, Niko erawh chuan ngawi rengin a melh ngâi alo melh ngur ngur thung, an bulah chuan kal lehin ka helmet chu ka la a, A bialnu pawh chu ka be hman tawh lo, ka nuih sak ringawt, a rang thei ang ber chuan ka tlân chhuak leh ta nghâl a.





Niko kha tinge a ngawihchawih tâk em em le? Kan pahnih a kan in ngaihzawn lai kha chuan fiamthu a duh thei hlè a, min tih hlim dân ringawt a ngaihtuah thin anih kha, khatih lak khân kan la naupang dûn hle a, mahse kan in ngaihsak tawn èm èm a, tleirawl in ngaizâwng ni si in hauh pawh kan inhau ngâi lo anih kha, Niko kha ka duh takzet thin, ani pawn min duh ve, ka hre chiâng hlè bawk, ka tân ui a nei lo a, chutiang bawkin keipawn ka ui ngai lo, mahse sex erawh kan hmang ngai lo, thianghlim takin kan in ngaizâwng anih kha, Niko kha ka tân chuan a hmasa ber a ni a, ama tân pawh ka ni ve tho, kan inkiss hmasak bera kan zei loh dun zia te kha âw, ruihtheih thil a ti ngai si lo a, a hmeltha bawk si, ka tân chuan a tha hliah hliah hi ni tawp, ka âtchilh deuh bur rèng bawk a, mahse Aizawla an pem atang khân amizia arawn danglam chho a, loh theih loh vângin ka then ta kha nia, An pèm tirh chuan engtik lai pawn kan in tex a, a lunglèn thû leh ka bula awm a châk thû bâk a sawi ngai lo, mahse thla khat a liam meuh chuan a danglam chak khawp mai, keipawn then kha ka duh ber lo, mahse kan inhmu thei si lo a, kan inhau deuh reng tawh bawk nèn kan awm dân kha a nuam tawh lo èm a ni.




Kan inthenna kum khat lai liam tawh mahse ka la theihnghilh lo a, ngaizâwng dang pawh ka la nei hek lo, mahse ani chuan min lo theihnghilh dèr tawh anih dâwn kha, a pawi love, keipawn a tûl hunah chuan ka nei ve mai ang.




Ka scooty chuan A ngâi te ang bawkin Landiki nen bawk chuan kan in phur leh ta, College kan thleng chu kawtah kan thu mai mai a, chawhnu lamah chauh class kan neih dâwn vâng a ni, hmeichhe dang ho te nèn kan thu ho dal a, tute nge an nih pawh kan hre lo, mahse kan zirlai chungchâng sawi chuan an ti ti tui hlawm khawp mai, mahse anni chu Second year an lo ni vek thung, keichuan ngâwi rengin an thusawi techu ka lo ngâithlâ a, an thusawi kâr lakah ka lo tawng ve zauh zauh ringawt.



"Saw saw saw...en teh u, Ka van thîk tak e aw a bialnu saw"



An zînga ami pakhat chuan arawn ti deuh chûl a, ka hnunglam ka hawi chu Niko lek lo niin, KTM Rc chuan an lo in phur vei hlarh hlarh anih chu, ka hmûi ka'n ti pawrh vak a, ka thîk lo ka tih chuan dâwt chiang lutuk ka sawi ngèi ang.


"Niko anih saw...Maria, 12 kan nih lai a i bialpa rawn vedio call ziah tu che kha"




Landiki chuan arawn ti chhuak ta, Ka bialpa hlui ani tih hi sawi chhuah fo ka duh lo sin le.


"I bialpa hlui maw!"



An rawn ti deuh hû a, thaw halh pahin ka lû chu ka lo thing vat a, an hriat ve kher hi tûl ka ti lo, bakah a tlâwm thlâk ka tiin ka zak deuh tlat,Landiki chu ka melh râwm ringawt, ani lah chuan sawi suál inti zet hian a lei alo chhuah tut ringawt,


"Niko techu kan college ah hian a lâr asin, kan section ala in ang zui, a luck lutuk ringawt, mahse a bialnu vâng sawn mî hian an ning deuh thin a, a zar peih lutuk hi ka lo nin pui thin, ihmaw...a bialnu saw maw Niko pawh hian a ning ru ve tho in ka hria, a care vak hmèl bawk sî loh, Niko hian duh tak tak pawh an ring lo"



A ti deuh sar sar a, a thusawi chu thu dik nge dawt pawh ka hre lo, mahse ka lo hlimpui ve em em tho nia, ka awmdân hi ka duh thlâwt lo, keimân ka then a, la duh tho mahila la duh reng angin ka lang dâwn lo hrim hrim.



"Tinge in inthen rèng rèng a? Melody vâng saw mi?"




An zînga hmeichhe pakhat chuan alo ti leh a, Niko te awmna lam chu ngei hmèl zet hian a melh rum âl bawk,



"Ni lo e, High school ngaihzâwng mai mai lawm, lâk thu tak vak chî pawh ni lo"




Ka lo ti liâm puat a, Niko te awmna lam ka va hawi phei chuan kun deuh sî hian min lo en reng a nih chu ka hawisawn rang teh asin, ka va mit sîr leh zauh pawn min lo la en reng tho, hepâ hi engemaw a hriat rauh le?



"En teh saw arawn hawi phei reng a nia"



Landiki'n a tih chuan ka va nghawk zauh a, ka kalsan pui ta daih, an bula kan awm ve reng chuan kan in ngaizâwng thin tih hi a darh leh vek mai ang, an tawngtheih hmèl hlawm si, henû lah hian a ká hi a vèng zo thlâwt thin bawk si lo.



Peih lo chung chungin class chu kan zo ve thei hrâm a, scooty ka khalh lai techuan Niko bawk ka rilru ah a awm leh tawh, a sam te bep bup kha tinge khatia a atih le? A khabe hmul a zuah deuh bawk si, a hmèl kha a ro ngawih ngawih, ruih theihthil te hi alo ti thin a ni lo mawni le, min lo ngai ve thin angem le?



"A mak e..ka biak che chu"




Ka hnung atangin Landiki chuan min rawn sawi deuh nawk nawk a, ka ngaihtuahna ka lo kâwm leh char char tawh, Niko hi ka ngaihtuahna atangin ka paih chhuah vat a ngai a ni.


"En chiang teh, kan in kawng pawh a nih loh hi Mawli"


A thin a rim ve tân tân khawp mai, nui vur vur in ka inturn leh a, Tuikhuahtlânga haw tûr kan nia, Bazaar lam ka lo pan daih chu niin ava hahthlâk tak e aw.


"Sorry....kan in kawng ka hai alawm"


Nui vur vur chuan ka ti ringawt,


"I â tawh nih hi, nakinah chuan nangmah pawh hi ila intheihnghilh ang ka ring"



A ti zui hlak hlak a, a ni ve tho mai, Niko vâng vek.






FLASHBACK





Naktuk mai hi Teachers day a ni tawh a, Teacher ten Class 9 hmeichhe ho chu kan program tûr lo ruat fel tûrin min ti a, midang ho chuan program kan hmanna tûr hall chu an ti fai a, thutthlèng tepawh an chawi thla sap sap hlawm mai, Kan school hi Higher nèn a in kawp mahse naupang kan tam lèm lo a, thingtlâng alo ni bawk nèn, Class 9 ho phei chu mi 28 vel chauh kan ni, midang ho chuan an an zai dawn thû te chu sawiin an tè teng tung reng a, a bengchheng ngèi mai, a ziak tû ah min hmang a,min din hual vek bawk si, ka beng te hi ana zo tawh, in sawi chhâwk tal thin tûr a nia, ka thiante ho vek ni mahse nin châng ka ngah thei khawp mai, pragram tûr an sawi ang ang chu ka lo ziak thla zèl a, Kan room piah chiah ah hian class 10 mipa thenkhat an awm bawk sia, hemi te ho star zâwng deuh tepawh an lo awm a ni chèk ang chu an za cheng hlawm mai.




Chutia kan lo awm nawk nawk lai chuan Class 10 ami Ruatmawia chu nui sûng hian a rawn lût a, ka hmâ ah chuan arawn ding chat mai, midang chuan an lo en thap hlawm bawk a, Ruatmawia hi a hmèltha in a fel em em a, a luck hlè bawk, Ka thiante ho pawh hian an haw hran lo hlawm khawp mai.


"Maria, Niko a'n min lo biak rawh a ti, a star lutuk che a"



Ka âwih lo lutuk chu ka hmûi ka lo ti pawrh vak a, Niko techu a hmeltha a, a luck bawk, Sâp leh Vai thlahpawlh ang an ti thin, keipawn tha ka ti tho, mahse midang ang em em in ka vei lo a ka sawi ngâi lo bawk, hepa thusawi ka âwih thlâwt lo ve.


"Niko a class 10 CR kha maw?"


Muantei chuan arawn ti a,


"Mmm...."


Awlsam zet chuan a ti a,


"Ka awih lo emai a, dâwt sawi sawi lo teh min ti buai a nia"


Ka lo ti hlak a,


"I awih loh chuan min rawn zui la"



Ala ti ta deuh deuh chu niin,


"Va kal rawh, awii nuam awm bîk e, duh ngei ngei rawh aw Bike pawh a neih kha"



Thari chuan alo ti ve nghâl vat bawk a, keipawh chuan ka awih loh èm vâng chuan ka zui ve nghâl mai a, thil âtthlâk deuh an lo tih vaih chuan an châk lo hlawm ngawt ang.



Niko chu kan khua ah pawh ngaizâwng tu angah khawp mai tûn kum kum tîr khân a pa hnâ vângin kan khua ah an rawn pèm a, an hausa in a fel bawk a, biak ina kan inkhâwm te hian hmeltha ka ti thei lutuk hi ka lo en leh vung vung zel, Niko nu leh keima nu hi an in kâwm ve thin a, Niko nu pawh hi a hmeltha in a hleitling khawp mai, ka nu sawi dân chuan Model a ni thin a ti.


Class 10 room kan thleng chiah chu Niko thian te mi pa 5 vèl chuan min lo chhaih nghâl luai luai a, Niko chu Teacher banch ah chuan lo thu in uluk zet hian min lo en a, ka zak lutuk, Niko pawh a lâi ve tih hai ruâl a ni lo, ka tlân chhuak leh nal nal ringawt,



"Enge alo sawi a dik em?"



Kan class room ka thleng chiah chu An lo ti nghâl sap sap a,


"Engmah a sawi lo, dawt a niang"



Ka ti leh mai a, ka lungphu lah chu a rang nasa èm èm leh nghâl.


"Awihaa...bialpa i nei ve tawh dâwn a nia, kei nin pathum te kan kawp tawh a, a hun ve tawh rèng a ni"



Siamsiami chuan nui uarh uarh pah hian arawn ti a, keipawh ka nui ve suk suk ringawt.





Naktuk Teachers day anih dâwn vâng a niang, dar 2 vèlah chuan kan bâng a, Thari leh kei, Muantei chu kan awm khawtlâi deuh a, a chhan chu program kha kan la duan fel zawh loh vâng a ni.


"Sir tepawh hi a, kan kutah an dah kher a, 12,11,10 ho pawh an awm reng sia"


Muantei chuan a ti nâng nâng a,A ni ngawt mai, a pâwl hniam ber ko ah min dah a, mahse kum dangah pawh an kutah alo awm fo tawh a, an in la âwl ve duh pawh a ni mahna.


"A pawi lo, Sir te mak tihna tûr khawpin kan surprise dâwn nia, Midang chu Board exam tûr te an ni sia, in buatsaih te a ngâi ve ang chu"


Tiin ka'n fuih ve ngèi a,


"Maria, en teh, an item tur an rawn theh luh ah hian lâm a tel miah lo, hawh u kan thian ho hian lâm ang u"



Thari chuan arawn ti a, Thari hi chuan lâm hi a tui bawk a, a lâm thiam hlè bawk.


"Awi!...Maria i hi a lâm ve anga?"


Muantei chuan nuihza insûm zet hian arawn ti a, keipawh ka nuih azâ ka pian tirh atâ ka kut ka ben bâk hi ka la lâm ngâi miah lo.


"Tûmah thiamsa an awm hleinèm, Maria, ka zirtîr ang che, step awl te te in kan ti dâwn nia"




A tih chuan ka bu ve nghauh nghauh a, Muantei chu alo nui char char ringawt, kan tih tûr kan zawh chuan dar 3 alo pèl reng tawh, hâw tûr chuan class room atangin kan chhuk thla ta sap sap a.



School tual zâwlah chuan Niko leh a thiante pa 2 vèl chu an lo awm reng chu niin, ka ding dat a, Min rawn hmu chiah chu a thian te chuan ka lamah chuan an nam deuh châih châih a, ka lo en tawp ringawt,


"Zak tît tèt suh, pângâi deuh khân awm la, Be bawrh bawrh rawh, a zahthlâk loh a nia"



Muantei chuan ka beng bulah chuan arawn ti sar sar a, Niko chuan min rawn pan ta, awi ka lungphu hi ka thâ te hi a khûr ru deuh der der in ka hria.


"Ka be lawk duh che a, saw ti lai ah sawn ilo kal thei angem?"



Ka mita en kar chuan ati a, a âw chu ka vawikhat hriatna, rin âi daihin a âw chu a pâ reuh, a rûk chuan duh tho mahila ngaihzâwng ka la neih ngâi loh vângin engtin nge an awm ka hre lo a, ka zei dâwn lo si, ka ngam a ngem ka hre lo, chû lo ah A nu ten an hriat chuan min hau nasa dâwn lutuk.


"Thei e, a thei alawm, lo va kal rawh"



Thari chuan alo ti vat a, Niko chuan School building hnunglam chu a pan ta lauh lauh mai,


"Enge khatia ilo tih vè ngawt a,? Ka kal duh bawk lo, haw ka duh"



Tiin tha pui meuh chuan ka lo tang tung a, Thari leh Muantei chuan min nam deuh chawt chawt mai.


"Mawli, Sawi tûr a nei anih kha, engmah i sawi ve a ngâi lo, ngâwi rengin ngaihthlâk sak tawp la, ilo lèt leh dâwn nia, an bulah sawn kan lo nghâk ang che"



Muantei chuan a ti a, duh lo viau mahila min tih luih tlat vâng chuan hreh zetin Niko a awmna lam chu ka pan vè zâl zâl a.




Niko a awmna ka va thlen chuan that chhe zet hian alo thu dar dar a, min hmu chiah chu a tho rang ngèi mai.


A lu thak loh hmèl pui chu chhuan lamah a hiât ringawt, a awm dân chuan ka nuih a tih zat èm vâng chuan ka nuih sak sak ringawt,



"Ilo kal duh tak tak pawh ka ring lo a"



Bah deuh nuai hian a ti a, a lâi tih ka hre nghâl mai, keipawh chuti tho.


"Muantei'n kal rawh min ti sia"


Ka ti sap a, ka âw techu a khûr lek lekin ka hria,


"I thiannu vâng chauh in maw ilo kal?"


A rawn ti deuh hû a,


"Ni deuh tho"


Ka ti ta ringawt,


"Ka thianpa kha ka rawn tirh pawh a ni lo nia, truth or dare kan tia chuan, a hmâ chuan kan schoola hmeichhia hmeltha kan tih theuh kan sawi a, chuan dare ka tia, hrilh tûr che in min tia chuan ka sawi ngam si lova"


A nui deuh hak a, a thâw nghâl huai mai, engtin nge ka chhân ang? Sawi tûr ka hre lo,


"Engtin nge min chhân ang?"



A rawn tih chuan ka khuh deuh kharh kharh a, ka chil ka'n hâk tut anih chu, ka van che khir reuh tak,


"Ka lo in ngaihtuah dâwn nia"


Ka tih chuan nui var var hian min rawn en a, kei chuan ka en tha ngam thlâwt lo, ka lâi tlat.


"Chuan i number min pe la"



A rawn ti leh a, keipawh chuan ka number chu a kutah chuan ka ziah sak a, a kut ka vawn lâi te chuan ka tèk deuh chhuai in ka hria.




Ka thiante awmna lam chu kan pan dûn a, ani chu a kal hmasa a, keichu a hnungah muangchângin ka kal vè chhat chhat ringawt.




____________



Tlâi ka haw chu home work kan neih loh vângin naktuk tûk leh lama kan test tûr chu ka en thuak thuak a, ka phone ri chuan min ti phu zawk mai.


Ka en chu Thari lek alo ni.


"Rawn lèng rawh a nu te an zin a, rawn riak nghâl la, midang pawh ka sawm tawh, lâm chu kan zir char char dâwn nia"



A tih chuan ka lo aw ve mai a, ka chhûng tepawn an lo phal hlauh,




Thari te inah chuan lâm chu ka zir ve a, ka zei lo lutuk chu min nuih tawp zèl, mahse ka tel ve tawh ta sa sa, zei lo deuh nih ka duh bîk loh vâng chuan ka zir ngawrh hlè a, tlâi chaw pawh kan thian ho chuan kan ei khâwm veka,kan thian ho hi, pa nga (5) kan ni a, Thari, keimah, Siamsiami, Muantei, Faith i nen, hian class 9 hmeichhia ah chuan kan in kâwmngaih fâl bîk thin.




Tlai chaw kan ei lâi techuan an bialpa te chanchin sawiin an ti ti zat zat reng a, kei erawh chuan a ngâi te ang bawkin sawi tûr ka hre leh lo.



Chaw ei kham chuan Thari te in chungah chuan kan thu ho mai mai a, keichuan kil khatah ka phone a games chu ka khèl mai mai a, ka nin deuh hnû ah vedio techu ka en a, chutia ka en lai chuan ka number hriat ngâi loh hian min rawn tex tlat, ka seen nghâl vat a.


"Keimah Niko ka nia, Ruatmawia nèn kan lo kal ve in phal angem?"



Arawn ti a, Niko lek chu lo niin, midang chu ka hrilh nghâl vat a,anni lah chu an lo phûr si, Aw chu ka pawh ve ta ringawt a.




An rawn thlen chuan keichu thlang lamah ka thu daih a, Arsi chu hmuhnawm ti zetin ka thlîr daih thung, Niko nèn chuan kan inbe vak lo a, A t shirt dum leh Jogger pants dum rawn hâk inhmeh zia mawlh kha ka lo mitthlâ mai mai anih chu, ka chhak lawkah an thu reng tho sia.




"Lo thu chho vela"



Ka phu chiang lutuk, Niko chu ka bulah alo thu ve reng tawh chu niin, Midang ho chu inhnuai lamah an lo chhuk thla sap sap hlawm a, hemi te ho lah hi, mî thlah fâl dan ringawt hi an ngaihtuah a,


"He lâi hi nuam ka ti zâwk a"



"Mahni a awm nuam iti in ka hria, ka hmuh a piang che hian nangmahin ilo awm keuh keuh zèl, thian fel tak tak inei tho sia"



"Min lo enthla thin a ni maw?"



Ka tih chuan tawngsual inti zet hian a âw chu arawn thiân kharh a, ka nui chhuak hak mai.


"Ka fiam che nih kha"



Ka lo tih tâkah chuan a nui ve suk a,


"I chimawm dâwn reuh khawp mai"


A ti zui sap bawk, kan ngâwi leh ta vang vang a, ka kut ka sîr a ka dah thla tûr chu Niko kut ka tawk fu palh hlauh mai, rang tak chuan ka la sawn vat a, ka duh aiin ka lo phar zau anih dâwn hi, ka lungphu lah chu a inthûm rawn leh tluk tluk tawh, Niko chuan ka kut chu a rawn hup thak a, Ka phu deuh zawk mai, amah ka en chu hrelo ang mai hian van lam chu alo en dauh dauh a, mak deuh maiin ka kut a vuan chu nuam ka ti, ka haw lo chiang kher mai.



"Hei i number i ziah kha ka la ti reh phallo a"



Tiin a vawiin tlai a a kuta ka number ka ziah kha min rawn hmuh a, ka nui sak ringawt, ka lai leh em em tawh.


"Zan in hian min chhâng tawh la ka ti è"



Arawn ti deuh nâng nâng a, ka zak lutuk hi ka sa hum hum thei.



"Lo duh lo ta che ila engtin nge i awm ang?"



Rang zet chuan min rawn en zawk a,


"Midang ka zawng leh mai ang"


Awlsam zet hian arawn ti nih chu, ka thin a rim nghâl tûn mai, ka kut a vawnna chu ka la daih a, mahse ka thinrim tih erawh hrelo se ka duh.



"Ka uang nih kha, ti khân min duh leh duh loh chu ka hre chiah e"


Tihpahin ka kut chu arawn la leh a, awi ka laih si zia chu maw, ka dâr ah chuan a lû chu a rawn nghat deuh ar ar a, ka lo tang tung mai.



"Zak thei lo min ti suh aw, hmeichhia hi ka vawi khat bèmna ve tho a nia, chuan ngaihzâwng pawh ka la nei lo, hmeichhe dangin min rawn bèm pawn nangmah ka duh thû che ka lo hrilh thin a, ngaihzâwng dang ka neih san miah lo ang che, chuan nangpawn"




A rawn ti ve nuah nuah a, a rinawm phián ang ka ring, mahse a lû hi a rit mah mah deuh chu ni.

"I in tiam ngam angem?"


Ka'n ti ve ngei a,


"Tehrèng mai"


Tichuan rinawm reng tûr chuan kan intiam ta a.




Teachers day pawh chuan zak chung chungin ka lâm ve a, thiante hnungah ka lo su thle ve mai mai chauh, Niko thiante lo au nasa thei lutuk chuan min ti lâi thei khawp mai.




School bân chuan Niko te nèn kan lèng ho a, thlâ te kan lâ a, kan phone camera pawh a fiah vak lo, mahse kan lungâwi ve èm èm zèl tho, Niko nèn nitla tûr kan thlîr lai chu Thari chuan a camera phone camera ni lo chuan arawn hmet de chuaih a,



"A nalh tawp, Print tîr ngei ngei ru aw"



Nui sâng a tih pah chuan a kal san leh daih a, Niko nèn chuan kan in en a kan nui sak ringawt.



"Maria i ngâwi châwi ka ti, engemaw sawi ve thin la, hmeichhe thil ang hi, ka bulah chuan tûpawh rèl mahla pawi lo"



A rawn tih chuan ka inthlahrung leh èm èm tawh, ka bula awm hi tûmân nuam an ti ngai lo rèng a ni.


"Tûmah ka rèl ngai lo a, ka bula awm hi a nuam lo viau ami?"



"Teuh lo mai, a nuam lutuk, theih chu nise awm char char pawh ka duh"



Arawn tih chuan ka lâi lutuk chu ka sa ap ap a,


"I zak hmèl hi iduhawm ka ti ber"


Arawn tih chuan ka kun reng a, hawi pawh ka hawi chhuak ngam lo.


"Maria nitla tûrin a èn che hian i hmeltha zual"


Ka hawi chhuak chu ka hmâi zâwn chètah alo awm tawh, amah chu ka en ve kar a, khawvèl mipa mit meng ka hmuh tawh ah chuan Niko mit meng hi nalh ka la ti ber ang, ka duh alawm, ka duh takzet, mahse ka ti lang chhuak ngam lo a, lan chhuah tîr dân pawh ka thiam lo.


"Maria ihh...ka...kiss dâwn che"



A rawn tih chuan ka phu zawk a, ka chil ka lem khalh ringawt, muângchângin ka hmui ah chuan a hmui chu arawn ti si a, arawn fâwp ve mawlh mawlh a, a zei leh zei loh pawh ka hre lo, ka lo dawh mâwlh tawp ringawt.



END OF FLASHBACK







In ka thleng chu ka zawi hnawk mai, ka u duty pawh alo la haw lo, ui te reuhte chum deuh hi kan nei ve a, mizoram ami anih loh vângin enkawl a buaithlâk thei khawp mai, a duh tui reuh si,min lo lâwm nasa leh hlè tawh, ka tih thin dân angin khumah chuan kan mut pui kâk a, Ui tawng pawh tawng theilo min chhâng dawn lo tih hre reng chung chuan ka be mawlh mawlh reng a,ka û hi Doctor a ni a, hmeichhia ni se a tum ruh bawk a Doctor nih hi a chák ber thin a, a zir taimâk zârah a ni ta ngèi bawk a, mahse ala junior khawp mai, keichu Doctor tih vèl nih hi ka tum lo bur, nih tum em em ka neih pawh ka hre lo, Journalist nih kha ka châk thin a, mahse chu pawh chu ka châk leh tawh lo, ka tih dân ngâi bawkin Lord Huron- the night we met tih hlâ chu ka play leh a, hla cool lam hi ngaithlâk nuam ka ti a, ring zet hian ka play thin, ka phone chu ka'n sik neuh neuh a, Social media lam hi ka ngaina vak lova, FB, IG tih vèl pawh ka khawih ngâi lo, tûn ang lâiah chuan naupang te te pawn an khawih a, a khawih lo nih chu thil zahthlâk ah an ngâi tawh, mahse keichuan nuam han tihna chhan tûr em em ka nei lo, WhatsApp hi chu loh theih loh vângin ka khawih ve mai mai thung, WhatsApp ka lût chu Landiki Message alo awm leh dèr tawh.


*Zan in kha ka u birthday anih kha aw, rawn hmanhmawh vela*


Thu pe deuh hian arawn ti a, a ve zâwk zamah chuan, a muan theih theih nèn.





___________




Landiki nèn hian kan inrual chiah a, a u chiah mipa nèn hian kum záwn in an piang bawk, Landiki te chhûngkua hi chu an thau hlawm khawp a, thau lo pawh an awm mang lo, a u Give tûr T shirt ka lei chu ka pack vè ngèi a, ka la tuâm nalh lo èm èm zui, ka u alo la haw loh vângin ka chhuah tûr thu message in ka hrilh tawp a, a buai laia ka va phone chuan a thinchhe sia min lo vîn leh hlur ang tih ka hlâu, min hau èm lo ang chu maw, Khua a vawh deuh vângin half-neck dum ka hâ a, a chungah kawrlum lian lam ka ha leh tawp bawk, Mom jeans chu ha in ka kawrlum chu ka bilh lût tawp a, boot zum lam tlèma sâng deuh chu ka bun leh tawp, make-up pawh ka thiâm ang tâwkin ka inbel ve a, ka hman chu ni dèr mai.

Ka chhuak tûr chu hria ni âwm fahran hian ka uite Pathaua chuan min zui det det reng mai.


"Fel deuhin lo awm rawh aw Bawihte, i nu lo haw tèp a nia"

Tih leh chhuah chu ka ruâl nghâl a, keichuan ui hi ka ngaina em em lo a, mahse ka u hian namèn lo a a duat vângin Pathaua pawh ka hau tha ngam lo, Pathaua tih hi keima phuah a nia, kan ko hlen ta ringawt.


Hmanhmawh zetin Landiki te in lam pan chuan ka inkhalh chhuak a.




______________





Ka thleng chu an lo tam tawh khawp mai,inchungah hian an unau room a awm a, an unau room kawt zawlah chuan an lâm luih luih mai, keichu tiang hi nuam ka ti ve vak lo, ka mizia hi chu cool em em lo mahse ka hir hâ vak ngai lo a, mipui tamna a kal phei chu ka peih lo.


Landiki room ah chuan kan thu mai mai a, ani lah a lâm châk si, min ngaihtuah ve tho bawk sia,

"Va lâm ve rawh min ngaihtuah duh suh"



Inla fel fahran chuan ka lo ti a,



"Rawn chhuak ve tal rawh"



Min pawt deuh tung a, keipawh chu ka chhuak ve ta nge nge a, thutna lo awm ka hmuh hmasak berah ka thu deuh hmak bawk.



Midang chu an lâm suau suau a, beer nèn, zu nen, an then lo in kiss tâwk lah an awm,hnè awm hian, inkuang kuah thân a ka thut reng lai chuan ka mi hmuh te vâng chuan ka phu deuh zawk mai.



Niko leh a bialnu Melody pawh chu an rawn kal ve a, enge maw an rawn kal ve ngawt le? Mahse Landiki û leh Niko chu an inbiak dân atang saw chuan an in kawm ngaih hmèl khawp mai, chutiang bawkin Melody pawh, ka ning, hmuh peih loh nâk alai a, mahse Niko ka hmuh tawh hi chuan khawdang ka hawi thei lo, a lukhum lum chi rawng dum hi a khum a, Denim jacket lum hmèl zet chu hâ in a hnuai lam chu a rawng ngainat ber a dum vekin a inbel thung, chhelo sèt sâwt tak a ni.



Kan department ami Puia kan tih thin chu ka bulah chuan arawn thu thla ve a,


"Keini pahnih hi chuan nawmchen dân hi kan thiam ve hlawl lo tiraw?"



Nui deuh vur vur hian arawn ti a,

"Ti hian nuam ka chèn alawm"


Ka lo ti ve mai a, Puia te hi mi awmthei tak chhûngkua ami an nia, a hmeltha hlè bawk, mi hausa fapa mah ni se a chapo lova, biak a nuamin a nui sâng reng thei, ani pawh hi keimah ang tho, mahni a awm keuh keuh nuam ti mî ve tho a ni a, helai hmuna arawn tel ve peih chu mak ka ti zâwk.
IMG_20200130_151725.jpg
IMG_20200130_151725.jpg (73.7 KiB) Viewed 28930 times
(Hei hi Puia ka thianpa a nia, ama phalna thlapa hmang ka ni aw, amah hi chu hria in awm nual ka ring)


A dress lah chu inhmeh phiân mai, leather jacket dum a hâ a, a hnuai ah hoodie vâr aha bawk, kekawr dum nèn, timberland boot dum a bun bawk, mahse pa lian lutuk a ni lo, ft 5'7 vèl a niang.



"Beer ka in ve a, a lum ka ti zo vek, ka jacket hi iha duh em?"


A rawn ti a, mak ka ti lutuk, Beer te a in ve ngèi nia,


"Duh tho e, a vawt ka tih zia chu a"


Tihpahin a jacket rit zet chu ka lo ban sak a, Niko te chu ka thutna zâwn chiah ah an thut ve vângin kan in hmu chiâng khawp mai, khawdang hawi lèk lo chuan min en leh reng tawh, cigarette a zu a, a kut leh lamah beer a keng bawk, that chhe zeta thut pah chuan mit meng ruih hmèl deuh val deuh riai hian min en reng tih ka hria, mahse ka hre lo der tlat thung, Min en reng tih ka hriat vâng chuan Puia chu ka'n thut hnaih deuh sawt a, a thîk ka ring tlat a nih chu, ka beisei bawk, thîk se ka ti, ka rilru hi ka hrethiám bîk lo.



"Ngati nge beer te i in ve reng reng a, i in ngâi ka hre si lo a"


"Nia min ti lui tlat alawm"


A ti ve mai a, a thusawi ho te te chu Niko a'n a thîk beiseiin ka nuih lui deuh har har reng a,


"Ka rin ai daihin kawm i nuam, college ah hi chuan i tûm bûr reng a, i tawng mawh bawk si, biak pawh ka be ngam ngai lo che"



A ti ve sup sup a, a ni viau ang, ka nèl awm loh bawk èm a ni, hei tak hi lawm ka pa pawn min hauh thinna, nui tam a tawng tam ve tûrin min ti thin, mi hîpna an ngah duh a ti thin a, mahse ka thei lo.


"A dik alawm, ka hmèl en aiin ka fel daih a nia"



Fiamthû chuan ka lo ti a, rin aidaihin kan inkâwm thei phiân, Puia chu ka nèl nghâl em em tawh, kan ti ti duh zâwng a in ang thei bawk si.




"Eheu....an in kawm ngaih hmèl tawh ve a?"



Landiki chuan nui thâw hian arawn ti a,


"Nia a hmèl en aiin alo fel daih a"


Puia chuan fiamthu ti tak deuh hian alo ti a, keipawh ka nui tawp,

"Ka sawi rèng kha, Maria i hi chu nui khâtin tawng tlèm viau mahse a sual lo a nia"



Landiki chuan alo ti vèleh a, Beer cane khat chu min rawn pe pah zauh bawk,

"i in dâwn mi?"




Puia chuan mak tih hmèl zet hian min rawn en a, beer bûr chu ka en vang vang a, ka pian a hnulama ka vawi khatna tûr a ni, Niko chu ka va melh zauh a, min lo la en reng chu niin, Niko khân hmeichhe beer in te ruih theihthil ti thin hrim hrim hi a ngaina lo tak e, ka runluih leh châk tlat pek a, ka in ang ange in lo ang?


Maimitchhîng chung chuan ka'n in vei pawp a, awii....a tui lo ber âwm e, ka kawchhûngah chuan asa thla up up mai, ka uak deuh that that a.


"In tawh suh"


Puia chuan min rawn lâk sak a, Mahse Niko leh Melody ka hmuh hian ka na takzet a ni, engmah hre lo a awm ka duh,Puia chu chhuhsak lehin beer cane khat chu ka'n tlâk pap a, ka uâk leh tawh.


"Awi ivan in thei ve, I rui ange aw ka buaipui peih miah lo che nia"



Landiki chuan arawn ti a, ka lu a hai nghâl deuh chhap chhap tawh.



"Pui, min lâm pui duh em?"



Mak tih hmèl deuh chuan min rawn en phawk dûn hrâ a,

"Tinge zan in hi izia avan dang ve"



Landiki chu ngaihthat loh hmèl zet hian arawn ti a, ka nuih sak ringawt,


"Ka nun a avawikhat na atan nun chen ve ka duh, a pawi ami?".


Ka lo ti a, Landiki chuan a hmûi chu min tih pawrh khum vak ringawt, Puia thu mai mai lai chu ka pawt tho deuh lawp a, lâmna lamah chuan ka kâi phei dâwr dâwr bawk, Puia hrilh hai hmèl lutuk chuan ka nuih ati zawk.


Ka kawrlum chu ka'n phelh a, ka half neck hâk nen lam chuan ka phelh vek, a hnuai ah kawr bah dum lace hi ka ha bawk si, Puia chu a mengbial deuh kâwk kâwk a, ka theih anga sexy leh zei chuan ka'n in sawi vèla.



Niko lam ka va hawi phei chuan hmel dur khap hian a beer ken chu alo tlâk pap pap a, a kha be chu a ti che ralh ralh a, a ha hmâi pahnih hlâi deuh tlèma sei deuh bîk rawn lang hian a ti lang sexy ka ti thei a nia, ngah mah ngai lo ang chuan ka'n awm der vèla, a rûk chuan ka hlim lutuk ringawt.




Kan lâm kan lâm hnû chuan Niko lam ka va hawi leh chu ka thil hmuh chuan min tina chiâng ngèi mai,Melody leh Niko chu an lo in kiss anih chu, ka in control thei dawn lo, enge ka tih ang? Puia hi ka kiss ve mai dâwn emni? Ni lo, rui tho mahila âwm leh mâwi chu ka la hre ve, mahse ka hmu thei tawh lo,lamna hmun atang chuan tlân chhuakin Landiki room lamah chuan ka tlân lût a, Puia'n min koh zui lawm lawm pawh ka hre duh lo, ka mittui rawn tling pam chu thâwk la deuh kâwk kâwk pah chuan ka khap lèt fak fak ringawt.

Kum 2 lai liam tawh mahse ka thinlunga hmunlian ber chang tu kha ala ni reng a, engtin nge ka nat loh teh lûl ang, ni lo, ka na tûr a ni lo, mahse ka insûm thei lo, ka mittui chu arawn hnâm ta tiâm tiâm a, hlim taka kan awm dun lai techu ka ngaihtuah lèt a, kan khawvèl kha a mawi thin asin, tûman min ti buai lo a, min pawt then thei lo bawk, mahse tinge Niko kha a danglam tâk? zawhna tam tak nei chungin ka then a, ka zâwt lo a, min duh tawh lo anih ringin ka kalsan ta kha nia, mahse keimah zâwk ka na leh tho si, avan hrehawm tak.



Ka lû chu a rawn hai riai riai a, ka kawrlum awmna pawh ka hre tawh lo, Landiki Khumah chuan ka mu ta thlawp a.


_________



"I hruai haw thei tûr chu ka van lawm tak"


Tih ri chu ka hre ruai ruai a, Landiki'n car a min kuah lût lai pawh ka hria, mahse ka meng tha thei lo, ka lû hi a rit bûr mai.



Car chu a tlân ta vung vung a, ka muhîl leh dâwn chiah tih ah chuan mipa pahnih inbe thâwm hian min ti harh leh tawh.



"Keimân ka lo thlah zâwk ange"


Tih rî chu chiâng tak chuan ka hria a, mahse Niko aw ang ka ti, Car glass atang chuan ka va bih a, mahse ka hmu fiah thei lo, ka hmu vâi vek, Puia hnunglam chu ka va hmu ruai ruai a, chiang lo mahse Puia ani tih a kawr hâk atang chuan ka hre thei,


Ka lu na lutuk chuan min ti muhîl leh a, bân tha chak zetin min pawm kâng nawlh techu ka mang hriat ruai ruai mai.



Khumah chuan min mut thlawp a,


"Ka lawm e aw Pui haw tawh mai rawh"



Meng mang lo chuan ka ti a, puan chu min rawn sin that tîr tih pawh ka hre thei,


"Ilo la danglam miah lo anih hi"



Ti sup rî chu ka hria a, ka muhîl chu ni nghâl mai.




Tuipui kam ah hian ka lo thu reng a, kawr fual vâr thianghlim zet ka lo ha bawk, Niko chu thawmhnaw vâr ha chung hian ka bulah arawn thu ve a,


"Niko, ka mumang a ni tiraw?"


"Mmm..i mumang anih hi"

Tihpah chuan a nui sak mai, khawthiang tak leh thlifîm thaw heuh heuh chuan a hmelthatna a ti zual, Niko hi a nui hmelthat teh lûl nèn tinge a nuih khât èm èm le? A mithmul sei leh dum kâk mai te, a eyebrow (mithmul) buk chhap mai techu ka thlîr vawng vawng a, a sam tlèma kir buk techuan ati lang pâ zual ngawih ngawih.


"Ka ngai thei lutuk che sin"



Thâwp sat hian arawn ti a,


"Niko hei hi ka mumang ni lo se ka ti, ka ngai che sin, i bula hlim taka awm leh kha ka châk lutuk"


Ka'n ti nghâl mawlh mawlh a, ka mittui pawh a rawn luang leh tawh,


"Tap suh, Ka ngaih theih zia che hi i hre lo zâwk ang"



Tihpahin ka bianga ka mittui luang chu min rawn hrûk sak a, ka mumang nisi tinge a tak a an em em le?


"Hei hi ka mumang anih chuan, Niko, harh chhuah leh ka duh tawh lo, ka mumangah hian châm hlen daih ka duh"



Ka mitah tak chuan rawn en in ka chalah chuan arawn fâwp a, mahse min fâwp zo chu mak tak maiin Niko chu a ral ta daih a, ka âu a, ka zawng a, tuipui lian zetah chuan 'Niko' ka ti tuarh tuarh a, mahse min chhâng lo,



"Niko"


Tihpah chuan ka thu chhuâk deuh hlawl a, Ka mumang kha mang nawn leh ka duh tawh lo, Sana ka en chu dar 2 alo pèl hret tawh, Niko hi ka theihnghilh a ngai, keiman engkim ka ti tâwp a, a awm thei lo zawk nih ka duh lo, Ani pawn Bialnu a nei tawh a, kei techu min theihnghilh daih tawh, ka rilru chuan ka infuih mawlh mawlh a.



Ka mu leh tûr chiah, ka khum bula ka lehkha zirna dawhkânah chuan lukhum hi alo awm a, ka ta ni si lo a, ka u pawn a nei lo, Niko ta ni thei ngem, nizân khân hetiang lukhum hi arawn khum, Ni lo.....ka ngaihtuahna mai mai chuh.



Khum atang chuan tho in, Lukhum chu ka hnîm a, a dik a ni, ka mumang a ni lo, Niko kha hetah arawn kal chiang lutuk, lukhum keng chung chuan ka tlân chhuak nghál dâwr dâwr a, Pâwn ka thlen chuan alo thim ruih a, a reh bawk si, a vawt hlè bawk,


"Niko nangmah ini tih ka hria, rawn in lan rawh, zawhna tam tak ka nei asin, zawh duh che ka ngah lutuk, lo in lan rawh, Niko"




Tap pâr chung chuan ka ti a, manse tûmân min chhâng lo, lung si lo zetin inchhûng lam chu ka pan leh hnak hnak a, ka mittui erawh ala tla reng tho, Niko ka hmuh reng chuan ti hian ka awm leh reng dawn, College dangah insawn daih ka duh, a hrehawm emai.
Inchhûng ka lût chu ka u chuan mak tih hmèl zet hian min lo en â a,


"I tap ami Mate?"



Aw dam diai a, arawn tih chuan ka mittui chu a tlâk loh nân ka hmui chu ka pet fan fan reng a,


"Mam, Niko ka hmu a"


Tah insûm tak chuan ka ti a, ka âw pawh a khûr dar dar mai.


"Khawi ah tûna i biak kha maw!"


A rawn ti deuh chûl a, ka tap chhuak ta hawk mai, Tinge? Ka tâ chauh a nih theih loh? Tinge ani kha ka natna tûr mai mai atân ka lo tawn, ka rilru chuan ka ti mawlh mawlh a, ka na a ni, ni e, kum hnih (2) chhûng khân Niko ka hmuh loh vâng nge? Ka natna techu thup bo in ka tuar a, pângâi takin ka awm hrâm hrâm thin anih kha, mahse a hmèl ka hmuh khân ka natna tekha arawn lang chhuak leh a, tûnah chuan tah hawm hawm ka châk a ni, kum hnih (2) chhûng ka lo insûm tawhna tekha âu chhuah puia inbun ruah vek ka duh, midang chuan tleirâwl ngaihzâwng mai mai ah an ngâi maithei, mahse ka tân chuan Niko kha ka engkim a ni thin a sin.



Ka u chuan min rawn kuah vat a,


"Tap tawh suh le, Niko chuan a be duh tawh lo che mi? Ka hmu ve duh a sin"



Dam diai chuan ati a, ka u zawhna pawh chu chhân ngaihna ka hre lo, bialnu a nei tih pawh ka sawi lang duh lo.



Ka room a ka lèt leh hnû chuan Niko lukhum ni a ka hriat chu ka hûm rân a, khumah chuan thu in ka tûn hma techu ka chhui kîr a, Niko hi ka lo hmangaih tawh thin pawh a ni maithei ni, ka ngaihzâwng hmasa ber anih vângin ka theihnghilh thei lo tûrah ka ngai a, mahse tûnah hi chuan hliâm na tak tuar ang mai hian ka na vawng vawng mai a ni, an in kiss lai ka mitthla a arawn lan zâwng techuan ka chhîng sawk a, ka âwmah hian min hnawh tû an awm, ka âwm chu dawmin thâwk techu ka'n la deuh kâwk thin, mahse ka âwm a min hnawh tu chuan ka mittui bawk a ko chhuak leh tawh, tiânga ka tah lohna pawh hi a rei ta, ni e, hmangaihna vâng kan ti thei ang chu, kei hian Niko hi ka hmangaih takzet thin a, thin mai pawh ni lo in ka la hmangaih reng a ni.


Mut that leh chu ka'n tum âk âk a, a har kher mai, huihaa...tum eng ang mahila Niko hi chu ka theihnghilh mai mai dawn lo tih ka in hria, mahse ka tum tûr a ni, nunhlui chu nunhlui a ni a, hmangaih eng ang mahila midang ta ani tawh tih hi ka in hriat nawn tîr fo ngai lo in Niko ka ngaihtuah apiangin Melody ka ngaihtuah tel lo thei tawh lo tlat, naktûk atang chuan ka mizia zawng zawng hi ka thlâk vek tawh anga, Maria i tawng duh leh hlim thei tak nih ka tum tawh zâwk dâwn a ni.


____________


Vawiin ka Class kal chu ka phûr ngang mai, Landiki nèn kan in phurh lai techuan a hmâ a ngawi reng thin kha, Niko nen kan nunhlui sawi chuan ka ti ti zat zat reng a, ka thiannu lah chu tawng na hun pawh ka siam sak lo,




School canteen ah chuan thil ei tûrin kan chawl a,


"Maria, ka ngaihdân chuan Niko hi i hmangaih in ka hria, i awm dân hi, amah i hmuh nî atang khân a dang vek a nia, Maria tawng tlèm leh nui khât thinchhe bawk si kha ini tawh miah lo"




Ka nui vur vur a, hetianga min thlâk tu chu hmangaihna chauh a ni, ka hmangaihna hi a tha lama min kaihruai tu atân ka hmang anga, Niko chu ka hmangaih reng anga, mahse ka lèt leh tawh lovang.




Puia ka hmuh vèleh chuan ring lèng lâwng in ka âu vak a, a rawn hawi chu mak atih hmèl ngei mai, Department in ang ni mahila kan inbe em em ngai lo,tûkin ka be hmasa ve khanglâng hi chu mak ti pawh ni se a âwm tho mai,


"Ve teh mial che chuan"




Canteen ah chuan arawn nui lût var var a, Puia hi chu, A hairstyle hi Zayn Malik rawn lâr chhuah lai vèla a sam tan ang khân a tan a, a hmèltha in a duhawm hlè bawk,


"Nizân min thlah haw vâng khân ka lawm lutuk a nia aw, chuan hei i lukhum i theihnghilh daih a"



Tihpahin Niko lukhum anga ka lo ngaih, ama tâ ni si chu ka pe a, mahse a hmèl atang chuan mak a tih hmèl, la mai lo chuan a en deuh vang vang a.


"Awle"


A ti ban deuh chat a, enge maw zèp nei hmèl a pu ka ti tlat, keipawh hi a, mî rilru hre thei ang hrim a, ka chîk èm èm chu le.


"A nih i lâwm viau chuan ei tûr min treat la"



A tih chuan nui var var in ka lo bu nghauh a, a thian te kal sanin kan bulah chuan arawn thu thla vè nghâl a, a thian te awm lai reng a lo koh pèn daih chu a inthlahrunawm duh zèk leh nghâl.


"Pui, nizân ka chèt dân vâng khân ka inthiâm lo takzet a nia"


Ka'n ti nghâl tâwng a, ka chèt mawi loh zia chu rûi tho mahila ka la hre chiâng khawp mai, mahse ka ruih deuh vâng khân ka rilru a a thawhdân ang angin ka awm chhuak tawp anih kha, zahna châng pawh ka hre lo, vawi khat mah thil ruihtheih lam chî chu ka ti tawh miah lo ang.


"A pawi lo, kawm i nuam daih zâwk ka lo ti sin, Mahse tûk ina i awm dân pawh hi a hmâ ai kha chuan a zia khawp mai"



Ka nui var var ringawt.


"Nangni pahnih hi ka awm ve tih in theihnghilh a ni maw"



Landiki chuan arawn ti a, kan pathum chuan kan nui leh dar dar thin,



Tûnah chuan Thian thar ka nei leh ta,a vawikhat nân mipa thian ti a koh tûr ka nei ve ta, a felin kawm a nuam em em a, a bulah hian ka ngam nghâl em em ringawt, min ngaihsakin ka lawm zâwng sawi a thiâm hle lehnghâl, Niko pawh ka hmu vak tawh ngâi lo a, kar khat lai chu ka hmu leh tawh lo, ka hmu lo ve hrim hrim ni lo in, Hmuh tam loh hi ka duh ber a, ka peh hèl a ni zâwk mah,mi hlim thei tak nih ka tum chuan Niko leh a bialnu ka hmuh tlèm a ngai, tichuan zawi zawiin ka inthlâk thei tawh ang.






Vawiin chu Landiki school alo kal loh vângin ka mal ngawih ngawih, Puia lah ka la hmu mai bawk si lo, College chung ber kawt zâwlah chuan ka thu reng a, tûmah an awm lo a, thli vawt tak rawn thâw chu engemaw kawng zâwng tak hian a nuam phián mai.



Van pawl raih leh chhûm var thianghlim zet muangchânga a kal delh delh chu ka thlîr reng a, ka thutna bul chiah a rawn thu ve ka hriat chuan ama lam chu ka hawi vat a, ka phu chiâng ngang mai, Niko maw!...tinge ka bulah kher a rawn thut le? Thutna dang atam tho sia, Second hnih chhûng lek khân chu chu ka ngaihtuah nghâl vek nia.


"Min en chaw hmâ thak rawh i duh chuan"



A rawn ti chhuak fuk a, râl leh lama in chhawng sâng intlar tiar chu a en pah vang vang bawk,a âw lah chuan hmân ami ang khân min la fan raih tho mai.


Mahse chû ai mah chuan, a lukhum khum hi, hmân zâna Puia'n kan in a a theihnghilh ang chiah chiah kha a ni, ka la hrechiang lutuk tlat, A in ang an lo nei pawh a ni maithei ni.



"Ngâwi renga min en reng i tum tak tak ami?"



Tihpah chuan nui sak hian min rawn en a, hmundang ka lo melh nghâl daih, ka lungphû chu hmâna a phut thin ang chiah khân arawn phu leh tawh.


"Khawnge innu kha, Magnet ang maiin i bulah a bei chawt reng amaw ka tia"



Ngei awm zeta ka tih chuan a rûm deuh nghut a, a mit meng chu a val deuh riai a, rûi hmèl ang hi a pu deuh rengin ka hria, mahse chu chuan a ti lang pâ lawi bawk si.


"Puia nèn khân in inkârah enge awm a? In in ngâizawng ami?"



A hmèl chu ka en vat a, min lo en leh kur tawh, ka hawisawn leh nghâl daih a.


"Kan inngâizawng ti ta ila, engtin nge i tih ang?"


Ka'n ti a, nui sak pah chuan a lû chu a thing deuh nawk a.


"Ila chimawm reng anih hi"


A rawn ti leh sup a, a nuihzâwng chuan a ha hmâi sei deuh hlâi lek lek chu a rawn lang vâ mai, a taksa khawi emaw lai ho deuh nisi hi ka tân chuan a special ngawih ngawih bîk thin,a mitmeng nalh leh tawrh har zet te, a hnar ngul sâng vah zum zet mai te, a hmûi tâwk lek a sexy te, a khabe ruh kual (jawline) sexy zet mai te, a sam buk kir lek lek te, a taksa pian lian leh nalh zet te, midang bulah phei chuan sawi ila ka âtchilh lutuk ah an ngai vek ang, keipawh chu ka nui ve sak mai, ka chimawmna tak hi min duh zual na chhan kha a ti thin a, anih chuan amah ah hian engtin emaw ka lo la thawk ve reng thin anih dâwn hi.


"Ka thian anih kha, ka bialpa a ni vat lo ang tih pawh ka sawi thei lo"


Ka tawng mawlh mawlh lai chuan meizial chu alo pak khu leh hlat hlat tawh, meizial rim hi chu ka ngai thei ve hrim hrim a, mahse a hmâ khân a zui ngai si lova, zûk pawh a duh lo anih kha, manse tûna a zûk tâkah hi chuan ka ngei phah deuh tlat in ka hria.


"Duh suh, mi thâ a ni lo a nia"


A tih chuan ka hmûi chu ka theih tâwp hian ka lo ti pawrh vak a,


"I hre chiang ngawt ami? A lan dânah chuan sual hmèl pawh alo ni maithei a, mahse mi hi an lan dân atanga teh ngawt loh tûr ania"



"Ka sawi âwm zâwk tak anih chu"


A ti fak a, tinge vawiin hi a lungngaih hmèl tlata ka hriat le? Ka ngaih bel nge? Ka hre dik zawk?



"I bialnu kha thu thâ va hrilh zâwk rawh, keichu ka ngai ve vak lo nia"


Ngei awm tak si, mahse nui sâng chuan ka ti a,

"Melody nen chuan kan inkâr a tawp vek tawh"



"A ni maw!....tinge?"



"Ka hrilh kher che a ngâi ami?"


Ni dâwn tak e, enge maw hriat vè phèt ka lo tum le?


"Hetiang deuh hian kan awm tawh in ka hria, tûna kan thut ang hian, mahse zânah aniin ka hria"



A rawn tih chuan Thari te inchunga kan thut dûn lai kha ka hre chhuak zawk mai, tah khân rinawm reng tûrin kan intiam anih kha, mahse a bawhchhe hmasa tû zâwk chu amah a ni.


"Hria e, a rei tawh lutuk a, Lanmawia nèn Thari te inchunga kan awm laiin in rawn kal ve anih kha"


A bâk chu ka sawi zawm tawh lo,


"Khami zân kha ka nuna ka hlim ber tum a niang"



A hmèl ka en chu râl leh lama in tlar tiar chu alo en leh vung vung a, Khami zân kha a ngaihtuah lèt a ni ngèi ang, keipawn ka la mitthlâ uai uai mai, ka ngawi ta reng a, keipawn Niko a melhna lam chu ka melh ve tawp a, sawi tûr ka hre tawh lo, ka ham haih vek.


"Niko"

"Maria"


Kan in koh rual èm vâng chuan kan nui dûn hak a, kan ngâwi leh tawp ringawt.


"Maria, Tah khân ilo awm reng alaw ka zawng nasa lutuk che"



Puia chuan arawn ti lûng lûng a, a rawn tlân phei ve nghâl vat a, Niko lam ka hawi chu a hmèl a dang daih tawh, a hmèl chu a dur deuh khup mai, Puia hi a thîk a niang a, awihawm loh, thîkna chhan tûr a nei lo hrim hrim.



"Tinge ka rawn call nasat tehrèng che nèn"


Puia chuan thaw deuh hluam hluam a tihpah chuan Niko chu a melh zak zak a, Niko nèn min hmu dûn chu mak ti mahse a âwm tho mai.


"E...Pui, Niko nèn hian High school khatah kan lût thin a"



Ka'n tih chuan Puia chu nui lui deuh suk hian a bu nghauh a,


"A dang pawh kha sawi law law la"



A rawn tih chuan Niko chu rum zet hian ka melh kâwk a, Puia hian ka bialpa hlui a ni tih hi hre ve kher lo se ka duh vâng a ni.


"Maria enge a dang chu?".



Puia chuan arawn ti a,



"Kan khua in ang thin a, hawh canteen ah kal ang, ka ril a tâm"




Tihpahin Puia chu Step awmna lamah chuan ka nem phei dâwr dâwr a,


"Niko, kan kal mai aw, nakinah kan inhmu leh dawn nia"



Tiin Niko chu pângâi thei ang ber chuan ka thlah ve bawk a, mahse en pawh min en lo, Hmalam pan renge ti lo chuan Niko chu ka en zui vawng vawng ringawt.






Canteen kan chawlh lai techuan Puia chuan ka ei duh zâwng tak mai Noodle soup chu min lei sak a, mahse ka ei thei lo,Enge maw min kam reng tu hi ka nei tlat a, Niko tawng kam kha ti dâwn ila thil ei theih lohna tûr khawpin ka ngaihtuah chu ka ring phal bawk si lo,



"Maria, vawiin hi Nidang iva ang lo ve, Niko khân thil sawi a nei ami?"



Min ngaihtuah hmèl tak chuan alo ti a, nui lui sak pah chuan ka lû ka thing ringawt, min en deuh vung vung a, vawiin ka class ka zawh tawh tho vángin Puia pawh nghâk lo chuan ka haw ta daih a, ka nuam lo a ni, ka awm dân hi.




In a ka hâw chu U Rema pawh alo awm a, uRema hi ka u bialpa a nia, an in ngaizâwng nghet hlè bawk, ka u day off anih vâng a niang a lo lèn.



"Maria, ei tûr ka lo siam che sin, i ei tawh em?"



URema chuan nui sâng hian alo ti a,


"Canteen ah ka lo ei tawh a, ka mu hahdam lawk ange, ka châu deuh a"




Tihpahin Ka room lamah chuan ka kalsan daih a, Ngaih that loh hmèl zet hian min en zui tih pawh ka hre reng, mahse ka haider lui tlat thung.




Ka û tè deuh tuar tuar thâwm ka hriat chuan ka harh zawk a, thil dik lo chu awm chiâng a ni, ka room atang chuan ka tlân chhuak a, ka u tap rî chu pawn lam atangin a ni, hmanhmawh zetin pawn lamah chuan ka tlân chhuak a.





Ka duh thei lo !.....U Rema chu thî hnuangin kawngah chuan alo let reng a, Niko pawh a bike nèn alo ding reng bawk, enge awmzia hi? Ka u chu alo tap hlap hlap a.



"Enge thleng a? u i tha em?"



Tihpahin ka u chu ka va ngaihven nghâl a,


"Damdawiin ah kal ang, Niko i thil tih pawi zia hi i hria em?"



Ka u chuan Niko chu a hâu bawrh bawrh a, a awmzia chu Niko hian Urema hi a tina maw!


"Niko engtin nge i tih a?"


Ka tih chuan Niko chuan hmèl dur khap hian min en reng a, engmah a sawi lo, ka u chuan a car chahbî chu Niko chu a pe a.


"Damdawiin thleng min hruai rawh, ka nau hian car a khalh thiam lo"


A tih chuan Niko chuan ngâwirengin ka u car awmna lam chu a pan nghâl a, a tih nun hlat hlat hnû chuan uRema chu arawn pawm kâng nawlh a, Ka u chuan uRema chu a seat hnungah chuan a thutpui a, kei chu Niko kiangah A seat hmâ ah chuan ka thu thung, ka u chu a tap char char a, tûmah rèng kan inbe lo, Engtin nge Niko hian a tih nat ka hre lo, Engvângin nge a tih nat pawh ka hre chuang lo, Niko chu ka ngei deuu tlat,uRema hian a pawi a sawi ka ring thei lo a ni.



Niko hi hmâna ka bialpa fel leh zaidam mî pawisawi hláu tak, Pathian thu âwih thei tak kha a niin ka hre tawh lo, tûnah chuan misual deuh pawh alo ni tawh maithei a, ni lo, ka rin thû hi ka zèl din leh vak vak zèl a.




Hospital kan thlen chuan min lo buaipui nghâl sap sap a,





Rei fè kan awm pawn Niko chu kan bulah chuan ngâwi rengin alo thu ve reng a, a inthiâm loh vânga rawn thu ve nge ni anga a thiam chan nana min pui zâwk ni ang? Engemaw tal sawi se ka ti, tu ve ve mah hian engmah an sawi duh bawk si lo.



Doctor alo thlen chuan a han check nghâl mawlh mawlh a, Vánduai thlâk takin URema chu a kal thei tawh dâwn lo, chû thu ka u in a hriat chuan a thinrimin a na takzet tih ka hria, Niko hmâi ah chuan a bènga, a ân khum a, a kawr âwmah chuan thâmin a tap khum zawih zawih a, Niko lah chu a ngawi reng a, Robot ang maiin a ding tawp ringawt.



Ka u in Niko hmèl a hmuh duh loh vâng leh U Rema chhûngte lo thlen tawh vângin Niko nèn kan in lamah kan hâwng leh a.



URema ka khawngaih èm vângin keipawh ka mittui chu a tla ve bawk a, Niko chu ka haw ngawih ngawih tawh, a chhan chu uRema hi ka hriat chiân èm vâng a ni.




"I tihpalh nge ni a iti lui?"



Tiin car a kan tlân lai chuan Niko chu ka'n zawt a, min chhâng lo mengdur khap chungin hmalam chu a en kar reng a, a inseh ruh tih hriat zet hian a bek vèl chu a rawn pâwng talh talh mai.


"Niko ka biak che hi enge maw tal sawi teh"



Vîn deuh that a ka tih vèleh chuan chak zet hian car chu a khalh ta vak mai a, a tlân chak lutuk, kan vèng kan tlân pèl a, ngâizèl lamah a tlang daih a nih chu, a tlân chak èm vâng chuan ka lo in vuan ngat ngat reng a, ka thaw te hi a tâwp mai dâwn in ka hria, khua a thim thet thet tawh vângin khawi lâi nge kan awmna pawh ka hre lo, field ni âwm tak zau zet mai reh ruih ah hian car chu a ti ding chawt a, ka thaw huai thei.



"Niko"



Ka ti zui sap a, tûna a awm dân hian min ti hlâu takzet a ni, a mit meng thîp zeta min rawn en lâi techuan ka lo khûr ru der der a.


"Ka tih a ni lo Maria, ani kha tih nat na chhan tûr ka nei lo"



Inseh ruh deuh tûn hian arawn ti a, ka mit khap fak fak chung chuan ka lo chhoh en kar ringawt.


"Tinge engmah i sawi sî loh? I tih anih loh techuan sawi ta che, tinge kan in ah pawh khân i lo kal?"



"Tih tûr pawimawh deuh ka neih vângin ka rawn kal"


A ti bûl deuh hmuk a,


"Eng enge i tih tûr pawimawh chu?"



"Hmuh che ka duh, ka ngai che a"


A rawn tih tâkah chuan ka ngâwi ta hmak a, ka mittui rawn tling kiau chuan ka thil hmuh a ti fiah lo zo vek, thaw hakin pawn lam chu ka hawi ta daih a, chutah a leather jacket hâk lai lian zet chu min rawn sin tîr a, a hmèl ka en chu a tak deuh rûn mai.


"Ka ring lo che"


Aw khûr deuh dar dar chuan ka'n ti leh a, a mitah tak chuan ka en ve kar tawh.


"Min ring turin ka ti reng reng che mi? "



A tawngkam chuan ka thin a khei zak mai.

"Ka hua che, Niko, i bulah hian minute 1 pawh awm ka duh tawh lo, min hruai haw rawh,"


"Ka hria lawm, min huat vâng alawm a hma pawh khân min then, keichuan vawi khat pawh ka then thû che ka sawi ngâi lo"



Ka nui hak a, a sawi thei rèng nâng, ka thenna thû ka sawi a tang khân ka number ka thlâk hmak alawm.


"Min then lo a mahse Melody nèn in in ngâizawng tho a"




Nui hak pah chuan ngeiawm zet hian ka ti a, ka mittui rawn luang thla zâl zâl chu thinrim zetin ka hru deuh sawk a.


"Melody kha maw?"


A rawn tih chuan a nui deuh suk a,


"Tun ang laiah chuan bialnu te ni miah lo pawh tiang khân rei lote chhûng atan kan kawp fo alawm"


A sawi zawh chuan min rawn en a, ka thinlung hi ana vawng vawng mai, Kan inkâr hi a hming phuah tûr ka hre lo, min rawn fawh tum ni awm tak hian arawn kûn hnâi deuh a, ka lo hawisawn nghâl daih.



"Tinge min kalsan? Ka ngai thei lutuk che Maria"



Zâwi sap hian a rawn ti sa sa a, mahse ka tân chuan a ring mah mah a ni,





"Niko, ka tân ilo changkâng mah mah tawh a ni,Ka kalsan chhan che kha i hre lo tak tak nge i hre lo der?"



Ka sawi zawh rual chuan ka hmui ah chuan arawn nawr deuh tâwn tâwn a, a âwmah chuan ka lo nam lèt ve chat chat mai, mahse ka kut chu a khing hnih chuan min man beh sak ta daih a, ka lu chungah chuan a nem bet hmak mai.




Min thlah hnû chuan rum zet hian ka melh tlawk tlawk a, Melody a fawp zo chiah âwm sia, ka ten lutuk, ka ten ngawih ngawih.



"Maria, ka hlatah awm tawh suh, khawngaihin, lo lèt leh rawh, i hre tawh lo mi? Ka kal bo dâwn a ka sawi kha"



A tih chuan a kal dâwn a kan in thlah zân kha ka hre chhuak zawk a,


"Eng anga hun harsa leh hrehawm pawh ni se, ka kal tîr ngai lo ang che, Maria, nang hi Niko Lalruatdika tân chauh a piang ini tih hi hre reng rawh aw"



A tih chu ka ngaihtuah chhuak zawk a, ka lo theihnghilh hman tèp asin, alo la hrereng a ni maw.


"Ka theihnghilh tawh Niko, kan nunhlui te kha chiang pawn ka hre tawh lo"



Dâwt chu ka'n sawi ve tak na a, a hmèl atang chuan a awih lo tih hai ruâl a ni lo.


"I hre lo a nih kha, kei hian"

A ngawi leh dat a, a phone chu a rawn ri zui nghâl bawk, alâk lai techuan tunge a nih hriat tumin a hmèl chu chîk zet hian ka lo en reng a, a hmèl dur khap leh a chal chuar deuh nâng atang chuan thu lawmawm lam a ni lo tih ka hrethiam nghâl mai.




"Haw ang, Police station ah ka kal a ngai"



Phâwk hrâ chuan ka en a, uRema chunga thil thleng vâng kha ni tih ka hre nghâl mai a, Niko hu ka haw tho nâ in an man mai ang tih chu ka hlâu khawp mai.



Rawng ka bawl mawlh mawlh lai chuan ka u pawh a rawn haw ve thei hrâm a,



"U i ril atam em? "



"Aih, "



Aw khûr dar dar chuan a ti a, ka en reng ringawt, mi hnem hi ka thiam vak lo a, ka u rilru na hnemna tûrin tawngkam thlum tak han chhahchhuah tûr eih pawh ka hre lo.


"Ka khawngaih èm a ni Mate"



A rawn tap ta hlap hlap a, thutthlèng a a thu chu ka thutpui ve vat a, a kut chu vuanin ka u lungchhe taka a tap chu ka en tlawk tlawk ringawt, unaunu lâk tlâk loh tak chu ka ni ve chiâng alawm.



"Niko kha ka haw lutuk, A bike khân a su lawm"



Tap chung chuan a ti a,


"A tihpalh pawh ni maithei sin U"


"Ka hre bîk lo chu chu, ka va thlen chuan Rema chu a lo let reng tawh a, Niko chu a bike ah alo la chuang a, a kal thei tawh dâwn lo, ka khawngaih e mai"



A tap leh ta ,engemaw tal ka tih a ngâi.


"Niko chuan a tih a nih loh thû a sawi a,"


"Ring reng reng suh, Niko chu a danglam tawh, a hma kha chuan keipawn ka ngaina lawm, Mahse maw Mate, Niko hmân ami kha a ni tawh lo"



A tih chuan dik ti zet in ka lo bu nghauh nghauh a.





Ka u nèn chuan chaw pawh kan ei lo, ka u chu roomah a tawm tlat a, keipawh chuti tho, Niko khân a tih a ni lo ati tlat bawk si, chuan ka u pawn a su lai a hmu lo bawk, a tih a lo ni lo tak tak pawh ni maithei ni, ni leh lo, tûnah hi chuan ka u lamah ka tang zâwk tûr a ni, engpawh thleng se, Niko hnènah chuan ka kîr tawh lo ang.




Vawiin chu class kal loh ka duh viau na a ka u in kal tûra min tih luih tlat vâng chuan ka kal leh ta tho a, Landiki leh kei, Puia te nèn chuan kan in kawm ho leh dial dial a, Niko chu ka zawng ru deuh thin, mahse ka hmu lo, Police station ah ala awm pawh a ni maithei ni, tinge ka ngaihtuah em em reng le? Ka inthunun zo lo ang tih chu ka hlâu khawp mai,uRema alo harh chhuah tawh vângin ka u pawh a hlim khawp mai.




Puia leh Landiki pawh chu ka hrilh ve nghâl a, Landiki chu lo kal ve duh viau mahse a hman loh vângin Puia nèn chauh chuan kan kal a,


Damdawiin kan thleng chu uRema pawh alo tha chak khawp mai, Puia chu a ngâwi tlat a, a awm dân hi ka hrethiám lo, a tawng duh theih teh lûl nen.



Puia chuan in thleng chu min thlah a, lèng kawi tûra ka sawm vâng chuan a rawn lèng lût ve nghâl a.



"Maria, sawi tûr pawimawh deuh ka nei a, "



Min en kar hian a ti a, vawiin a mî zia chu a dang khawp mai, thingpui pèk pahin a bulah chuan ka thu thla ve nghâl a.


"Han sawi la"



"Maria, ka thusawi tûr vâng hian min haw lo la, kei hian ka thian ni lo in ka bialnu ni tûrin ka duh che a"



A tih chuan ka nui tâwp chiang ngèi mai, fiamthû hmèl apu hauh si lo,


"Pui...ihhh....kaa...."


Ka rih rual chuan door bell chu a rawn ri ral ral a, kawngkhâr ka hawng chiah ka mi hmuh vâng chuan ka phu chiâng ngèi mai.


"Enge ilo tih dâwn Niko, lèt leh rawh hetah tih tûr i nei lo"



Ka lo ti nghâl vat a,



"Ka nei, a pawimawh lutuk"



Tihpahin a rawn lût nghâl vat a, Puia hmèl a hmuh chuan a ding dat mai,



"In inkârah hian enge awm Maria?"



A hmèl chu a dur khup a, min ti hlâu takzet a ni.


"Ka sawi tawh kha keini chu"



"Kan in kawp tawh Niko"




Puia chuan min lo chhân khalh vat a, Puia ka en chu a lungawi vak lo tih ka hre thei.


"A dik em chu chu?"



Niko chuan min rawn en leh a, chhân ngaihna ka hre lo, ka dang a âwk vek.


"Ihhh...ka...eng lo"



"Ka bialnu hi tibuai tawh suh Niko"



Tihpahin Puia chuan min rawn kai hrâng vat a, Niko chu ka en reng a, Puia'n min kaihna kan kut chu en in a in hûm ruh nasa hlè tih ka hria.



Rum zet hian min rawn en a, ka lungphû chu a inthum rawn tluk tluk thei, thinrim zet chuan a chhuak ta hlawk hlawk a.


"Niko"



Auh pah a ûm zui mai ka tum chu Puia chuan min lo vuan ding vat a.


"Kal suh Maria"



A ti zawi sap bawk, Ka kal lui talo,Niko thinrim taka a chhuahna kawngkhâr chu ka enzui tlawk tlawk ringawt.



Karkhat lai a liam leh ta, Niko nèn chuan kan in be ngai lo a, college ah pawh hmuh tûr pawn a awm tawh ngâi hek lo, ka zawng deuh thin a, Melody nèn chuan an inthen tawh tak tak pawh a ni maithei a ni, Melody chu mipa dang nen ka hmu dûn leh zauh zauh tawh, hmânni thil thleng atang khân Puia chuan a bialnu ang chiahin min treat thin a, ka duh lo hlè nâ a, ka u in min duh pui vâng chuan engmah ka sawi ngai lo, ka duh leh duh loh thû pawh ka la sawi lo, Puia chuan min ngaihsak in min duat thiâm èm èm a, ka haw hran lo nâ a, mahse ka thinlungah hian mipa pakhat alo awm tawh vâng a ni, amah chu ka ngai a, biak ka châk a, ka ngaih thû hi hrilh ka duh a, mahse hrilhna tûrin a number ka nei lo, lo nei pawh ni tehrèng ila ka tân biak a rem si lo, ka u pasal tûr kal thei lo a siam tû a ni tlat, mahse Niko hi a nih ka rin leh rin loh pawh ka hre chuang lo, Ka hriat chinah Niko hian dâwt min la hrilh ngai lo, mahse amah ka duh lutuk na lamah a chhiatna lai ka hmuh hmaih lui mai mai pawh a ni mahna.




A ngâi te ang bawkin Puia nèn chuan class bânah uRema hmu tûr chuan kan kal leh a, ani pawh alo tha chak tawh khawp mai, mahse wheel chair a a thu ka hmuh apiang hian Niko chu ka hre chhuak lo thei thin lo chu chuan ka huatna ati zual a, ka thinlung hi ana vawng vawng zèl.




Vawiin tlai chu tlâi dang ang lo takin uRema te in chu a reh ruih a, amah chauhin alo awm leh nghâl, hetianga hliâm tuar kal pawh kal tha thei lo a chhûng ten an kal bo san vek chu ka thin alo rim pui ve em em ringawt, Puia nen chuan theih ang angin kan pui a, a ei châk zawng techu kan ken sak teuh bawk.




Mahse vawiin tlai chu uRema hi a mizia a danglam riau in ka hria, a tawng ve reng tho nâ in ka hre lo a awm dân hian ka ngaih ati tha thei lo.




"Puia i bike saw engzat man nge ka awt ve ngawt mai"



A rawn ti chhuak hlawl a, Puia chuan mak tih hmèl deuha a en hâw reng chu ka va nghawk zauh a.


"A..nia....a to vak lo, i dam that vèleh ila lei ve dawn nia"



Bah deuh nuai chuan a ti a, uRema hmèl hi a dik lo riau, Puia hi a ngei hmèl tlatin ka hria.


Kan ngawih kar reng lai chuan Urema chhûng tepawh an rawn thleng chawpchilh ve nghâl mai a, mahse a hnunga rawn zui tu te vâng chuan ka phu deuh zawk mai, Police an tel ve tlat nia, ka u pawh, Puia nen chuan kan tho nghâl zawt a.



"Tunge saw bike nei tûr ber saw?"


Police zînga palian pui hmai hlei phek phuk hlauhawm hmèl zet chuan arawn thûm deuh khur khur a.


"Amah hi a nia"



Tiin uRema chuan Puia chu a kâwk a, enge awmzia? Engmah ka hrethiám lo, ka bo map map hle mai.



"Min rawn zui ta che tlangvâl, Lalremmawia i sut dân kha i sawi fiah a ngai tlat mai"



Police paliana bawk chuan Puia dar a khawih pah chuan a ti a, Puia ka en chu inthiâm loh hmèl zet hian alo kun deuh lap a, anih chuan Niko tih ni lo in Puia tih zawk hi alo ni maw.


"Maria ka tihpalh takzet a ni, khami tlâi khân i note bu i theihnghilh vângin rawn pèk che ka tum a, chuan ka tum loh deuhin uRema hi ka su palh a, ka hlâuhthâwn mai bâkah ka hnunga bike chuan min rawn nang chîng ve nghâl dawn tih ka hria, engmah ngaihtuah chiang hmasa lo vin ka tlânchhe ta nih kha, Ka tihpalh Maria, vawi tam tak i hnèna in puan ka tum thin a, mahse ka duh zia che pawh i hriat kha, Niko khân a tawrh phah alo ngai ta a, chuan maw? Landiki U birthday zâna thlah tu che pawh kha keimah ni lo in Niko tho a nih kha, a awmzia chu lukhum pawh kha ka ta a ni lo"



Ka mittui chu arawn hnâm tiâm tiâm a, a awmzia chu engkim kha, ka mumang amaw ka tih tekha a tak vek maw lo ni a,



"Nangmah vângin Niko kha tawngkam bawlhhlawh tak takin ka ânkhum asin"



Ka u chuan alo ti ve pâng pâng a, keichuan engmah ka sawi thui thei tawh lo, Sofa ah chuan ka kut khing hnih a ka hmai hup chungin Niko ka ânkhum lai techu a rawn lang chuai chuai a, Police motor ri vung vung atang chuan Puia chu an hruai tawh tih ka hrethiam nghâl mai,


"U he thil hi i hre vek tawh tho sia, tinge engmah min hrilh ve loh?"



Ka u chu ka'n chhuah châl a.


"Mate police ho hnèn atanga ka thu pèk dawn a nia, i u Rema hian Puia bike kha alo hmu hman tlat alawm, a tîr chuan a ring ngam chiah lova, mahse kan inah vawi tam tak a rawn kal thin tih a hriat atang khân a ring nghet nghâl hmiah a, a tawi zâwngin sawi mai ila, tichuan hei kan man chu nia"




URema nen chuan in en chungin an in nuih var var a,



"Niko bulah ka kal dawn"



Tihpahin ka tho vut a,


"Awle, ngaihdam pawh ka dîl fel diâm tawh a nia"




Varanda ka thlen chuan ka u chuan arawn ti lâng lâng a, nui var varin taxi rawn tlân chu ka phar vat a, college lam chu ka pan leh vat a.



A chhanchu Melody te an la bâng lo tlat alawm, Landiki chu call in chanchin techu ka hrilh a, ani pawn Puia kha chu min duh pui lo rèng a ni.




College kawtah chuan Melody chu ka lo nghâk reng a, rei fè ka nghah hnû chuan an rawn bâng ve thei ta hrâm alawm, amah ka hmuh chiah chuan ka pan ding nghâl chat a.



"Khawnge Niko?"



Ka'n ti nghâl tawp a, ngeiawm zeta min nuih pah chuan kal mai a tum chu ka pawt lèt deuh sawk a, a râk that mai, in ti no dei duai sia, ka kuai phar vak zâwk dâwn mawni le.


"I hriat loh pawn a number tal min pe rawh"



Awki sâng zet chuan ka'n ti a, midang class lo bâng ve ho chuan min en hrek hrek mai, Melody chuan nin hmèl zeta men kual ralh pah chuan a phone chu phawrhin a number chu min pe a.



"Nangni hi enge maw in nih chiah le? Niko hian i chanchin chu sawi vak lo mahse a laptop ah sawn in thlalâk hlui ala tam lutuk, chuan maw, in pahnih a ni tla tûr in thlîr lai thlalâk pawh a târ nghe nghe sin, khatiang mipa bialnu nei reng chung si a a high school bialnu mai mai thlalâk pawh la hlut em em tu kha tû hmeichhe mâwlin nge duh reng anga, ihmaw...Niko hian ala duh reng che in ka hria, i rawn lan atang khân kan inhauh phah ziah"



A ti ta phawng phawng mai a, ni e, Melody chuan a hrethiám lo ang, a hrethiám ngâi hek lo ang.


"Kan inzawmna hi keipawn ka hre lo, hmangaihna an tih hi niin ka hria, ni e, ka hmangaih, Niko hi ka hmangaih takzet a ni"



"In hmangaih mawlh teh u, saw kan pa in min nghâk a nia ka kal dawn"




"An in awmna leh vèng pawh ka hre lo nia"



Tihpahin ka pawt lèt leh a,


"I ninawm reuh mange"



A tih pawh chu ka beng khawn tawh lo, ka za cheng tawh, Niko te awmna min hrilh chuan ka nui var var a, Kulikawn ah an lo awm reng a, Melody ka huatna pawh a bo zo tawh, kuah thlawp mai te nia ka duh ni, kan lo in hlat lo hlè nih tak hi mawle.



Hmanhmawh takin Taxi chu ka phar leh a, Tûnah chuan ka hmangaih thû hrilh chauh chu ka tih tûrah ka ngai hmiah tawh, engtin nge min lo ngaih anga, engtin nge min lo chhân ang? Engmah ka pawisa lo, ka rilru put hmang hi ka sawi chhuah loh chuan ka â thei mai ang.






Kulikawn ka thlen chuan khua alo thim deuh khûih khûih tawh a, Niko te in kawtah chuan Nui var var in ka ding reng tawh, a number Melody in min pekah chuan ka call vat a, ka zâm lutuk,a vawt ka tih vâng nge ka zah lutuk vâng pawh ka hre lo, ka khûr deuh der der mai.



"Hello"



Aw thâm tuâka rawn ti tû chu Tû dang ni lo in Niko ngei a ni tih ka hre nghâl mai a.


"Niko keimah ka nia"



Ka ngawi leh daih a, ka hming ka sawi ngam leh tawh tlat lo.


"Tûnge keimah chu?"



"Englo a nia...aaa..ihhh.. ka...a nih phawt"



Ka ti bah nawk nawk a, ka off nghâl daih, ni e, hmeichhia zawk in a mipa te in kawta va kal a hmangaih biah thu hlan chu a mawi chiah lo alawm, mâwi lo tak a ni, nakinah pângâi deuhin ka sawi zâwk mai ang.



An in chhawng thum lai mai ka en vang vang hnû chuan haw tûrin ka lèt leh chhat chhat a.


"Maria"




Ka ding nghâl chawt a, Niko a ni tih hrilh chawp ngâi lo in ka hre nghâl mai,ka hawi lèt chu min lo enkur a, Cigarette alo pak khu hlat hlat mai, a hmèl atang chuan a rûi tih ka hria, a mit meng chu a dul raih a, a hlim vak lo tih pawh ka hre thei, T shirt dum leh Nike Pants sum bawk a ha a, amah chu a ti lang fresh ngawih ngawih.


"Hei hi in in alaw? Helai hnâi ah hian ka kal a"



Nui lui hak chuan ka ti a, a cigarette zûk chu pak khu hlat hlat pahin a kekawr ipte leh lam chu a zen leh tè tè a, ka dâwt sawi chu a âwih viau lo a ni mahna, call tû kha keimah ka ni tih a hriat ka ring nghâl hmak bawk.



"Min biak duhna i nei ami?"




Ka chhâng lo, ka en reng a, ka chhâng thei tlat lo.


"Ka zawhna chu min chhân duh loh pawn lo lût ve tal la, midang tûmah an awm lo, zah kher a ngai lo nia"




Vawt tî a ka khûr deuh beuh beuh chu inthup nasat ka tum vei nèn, mahse alo hre ru reng tho a nih dâwn hi, luh loh tum mahila min nghah tlat sî vâng chuan ka zui lût vè ta hnak hnak a,
pâwn boruak vawt var chu rawn inthlâkin chu an in chhûng chu arawn lum ap ap a, an bungrua leh bang rawng techu a changkângin a nalh bawk si,a zâu hlè bawk, unau dang a nei lo a, khawi ah nge a nu leh pa tehi an kal ang le aw.


"Coffee nge i duh ang thingpui?"



"Engmah a ngai lo"




Ka tih chuan a mithmul vei lam chu a ti sâng zauh a,


"Kan in a rawn kalna tûr khawpa pawimawh sawi tûr i nei a niang maw, han sawi la"




"Nei lo, heilai hnâi ah hian ka kal lawk alawm"



Ka tih chuan a mithmul leh lum chu âwih loh hmèl zet hian ati sâng leh tawh,


"Maria"


Thaw hrâwk pah hian ngèn ngâwl zet chuan a ti a, thâwk chu ka'n la deuh hak a.


"Landiki te in atanga min thlah tu kha nangmah ini tih ka hria"


Ka ngâwi leh vang vang a, ka hlâu tûr a ni lo, Tûna engkim ka thu pâi zawng zawng hi ka sawi chhuah vek loh chuan Niko hi ka chân leh mai ang tih ka hlâu.

"Chuan hei hi ka hre duh bawk, Hmâna kan inzawmna leh tûna kan inzawmna hming hi ka hre duh a ni"


Ka tih chuan a ngâwi vang vang a,


"Ka room ah chho ang, AC a awm"



Ka rin loh lam daiha min chhân vâng chuan ka en tlawk tlawk a, min la chhohsan nul nul zui,ngawi rengin ka zui chho ve mai a,mahse ka zawhna kha min la chhâng lo.



A room kan thlen chuan alo nuam phiân mai, a zau in AC a on phei chuan mut siai siai mai ka châk, A khum bula dawhkán ah chuan thlalâk te reuhtè hi alo in târ a, ka hmu chiah chu ka phu deuh zawk mai, Niko nèn ni tla tûr kan thlîr lai kha nih hi, ka nui deuh sak a, Melody khân a sawi dik a nih dâwn hi, Niko hian ka hmangaih ang hian min lo hmangaih ve reng pawh a ni thei , ka beisei bawk.


A khumah chuan that chhe zet a thu chung hian min en deuh rûn reng a, ka zawhna min la chhân tlat sî loh vângin sawi mai tûr pawh ka hre lo,


"Engkim i hria a chuan ngaihdam min rawn dîl dâwn mi?"


A tih chuan ka en reng a, ka kal chhan chu thildang vâng zâwk a ni reng sia,


"Chu chu ka chhânna hriat duh ala ni lo"



"Maria i thusawi awmzia kha ka hre lo"



Dawt, dawt a sawi chiâng lutuk, ani pawh hian min la duh tih ka chiâng,


"Ka lakah i lungâwi lo tih ka hria lawm Niko, mahse ka...."




Ka ngâwi leh ta daih a, ka tâl buai zo vek tawh, eng ber nge ka sawi tûr pawh hi ka hre tawh lo.


"Enge Mahse?"




Khum atang chuan rawn tho in ka bul chèt ah chuan arawn ding a, min chhuk en rûn tawh mai.


"Ihh...eng lo...."


A mita en reng chung chuan ka ti bah niai a, ka hmûi ah chuan arawn chuk zauh mai, nui suk pah chuan a room tukverh lamah chuan a kal phei a, nui var var hian min rawn en a, a nuih zâwnga a ha hmâi pahnih langsâr deuh leh aha ui ngho vampire hâ ang mai a sei deuh bîk riau techuan ati lang sexy riau, chu zawng aia tawrh har chu a mit meng mawlh mai hi ni.


"Hmâna Maria Lalhlimpuii leh Niko Lalruatdika inzawmna hming kha, hetah ngèi hian ka'n sawi ange aw"


A tih chuan ka nui sak a, amah pawh a nui tho, ka sawi awmzia kha a hria tih ka hre rèng ah, ngeiawm lutuk mai.


"Chuan?"


Ka'n ti leh a,


"An inzawmna chu, naupang in ngâizawng ni lo in, First love an tih ang kha a nia, Love tih khân thil tam tak a sawi a, hmangaihna mai ni lo in rinawmna te, dawhtheihna te, chhelna te, chuan, chûng zawng zawng chu nangmah vâng hian ka nei a, nangmah hian i vawng dik a, nangmah ah hian a takin ka hmu bawk a ni, Maria, lèt leh ang, khami hun laia kan hlimna ah khân lèt leh a, Khami hun laia hmangaihna ah khân lèt leh ka duh a ni, Maria, ka hmangaih che"




Ka mittui rawn hnâm chu ka nuih zâwng chuan a luangthla zâl zâl a, Niko chuan min rawn kuah nghâl vat a, keipawn ka lo kuah lèt ve vat bawk, a taksa chu a lian in a lum bawk si.


"Keipawn ka hmangaih che Niko"



Tap âw tiau chuan ka ti a, ka hlim bawk si ka tah a chhuak bawk si, Niko ka hmangaihna khân min rinawm tîr a, dawhtheihna min pe a, chumi ka neih vâng chuan ka lawm a, ka hlim takzet a ni, hetiâng mî hi ka nih ka inring phâk lo, mahse hmangaihna hian ka nun a hruai tha zâwk in ka hria.



"Maria, ka phatsan lo che, ka phatsan ngâi lo che, i hria em? Khatia kan awm bo hnû atang khân ka nu in ka pa a phatsan a, kei ngei pawn a ngaihzawng pa nen an awmdûn lai ka man tawh, ka pa pawn a man chhuah tâkah khân a hnawt chhuak a, ka rilru a na in ka thil tih engmah a tui lova, ka nu kha ka haw ngawih ngawih tawp mai ni, nangmah ngei pawh ka be tha thei lo che nih kha, khatih lai khân ka la naupang a, nangpawh a châng chuan ka ring hlel rum rum thin che a, min phatsan ve tlata hriatna te ka nei a, min then phei kha chuan maw zû te ka in a, Maria a hmâ ang kha ka ni tawh lo, ka sual tawh lutuk"




Inthiâm lo taka a ti lâi chu ka lo en kar a, a biângah chuan dawmin ka nuih lui sak a.



"A pawi lo, ka hrethiám che lawm, khatih lai khân kan la naupang èm a ni, mahse hei tûnah kan awm dun leh tawh hi"



Ka tih chuan arawn nui hak a, ka hmûi ah chuan arawn fâwp ta vang vang a, keipawn ka thiâm ang ang chuan ka lo chhâng lèt ve nghâl vat bawk, a kut in ka âwmbâwr a hûm na chu ka man beh sak vat a,



"Heti bâk hi chu thleng lo ang, Kum 21 pawh ila pum loh kha aw"



Ka tih chuan arawn nui hak a, keipawh ka nui tho, kan inkuah leh ta vang vang a.






Niko nèn kan inkawp that leh atangin Kum 3 ngawt alo tling vèleh ta, Niko pawn hnâ a nei ve tawh a, ZMC ah Physiology Department ah Assistant professor hnâ a hmu ve hlauh a, Keichuan ka châk vâng em em pawh ni chuang lovin Bengalore lamah Law ka zir leh a, Tûnah chuan Master of Law( LL.M) degree ka nei ve tawh,


Niko nèn kan inneihna thla thum na ah chuan hmâna kan khua a kan kal thinna High school ah chuan kan kal leh a, thla hnih leka upa nau ka pâi ve mèk bawk, Niko nèn hian dân khatna in ka inneih a, Nau ka pai tih a hriat zâna a phûr zia kha âw, ka dul khawih chungin a muhîl a nih kha, min duat in min ngaihsak èm èm reng a, a hna bâng a rawn hâw a piang hian ka ei châk zâwng min rawn lei sak ziah thin, ka dul pawh ala lang lo a ka u lah chuan a ka râi puar hun a ka hâk tûr ringawt a buaipui a, uRema erawh thil mak a thlen hun nghâkin a hun a hmang thin, mahse ka u nen chuan an in nei lui tho a, an in hmangaihna pawh ala pângâi reng tho.




Kan school kalna hlui ah chuan keimahni hming kan lo ziah ho tak tak techu alo la awm nual mai, tah chuan thlâ te kan la dûn a.




"Ka hun lo hman thin tawh zawng zawngah High school kan kal ho lai kha nuam ka ti ber, chuan helai hmun hi ka ngainat ber a niang"


Ka hnung lama min kuah hlûn chung chuan a ti a,


"Kan in ang chiah nih chu"


Ka lo ti ve vat a, School building chungah chuan hmâna kan lo tih thin dân ang bawkin nitla tûr chu kan thlîr liam dûn leh a, Ni tla tûrin a èn vâng chuan Niko chu a chhîng deuh suar suar mai, ka lo nuih tiah tiah ringawt.


"Ka hmangaih che u Maria"




Min en vung vung chung chuan thu tak deuh hian arawn ti a,


"Che u, enge awmzia?"



Ka lo ti deuh hû a.


"I van á tak, pakhat ni lo in pahnih in nih tawh kha"


A tih chuan ka naupâi lai a sawina tih hrethiám in ka lo nuih har har a.

"Anih keini pawn kan hmangaih lutuk che Niko Daddy"

Ka tih chuan kan in nuih dûn hak a.







A TAWP TA
IMG_20200130_151725.jpg
IMG_20200130_151725.jpg (73.7 KiB) Viewed 28930 times



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)