KA LALNU BY Hlutei Jocund Pachuau (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: KA LALNU BY Hlutei Jocund Pachuau (Completed)

Unread post by Ngaia » August 30th, 2020, 9:53 pm

LALDUHKIMI





Uruata alo thlen hnu chuan ka nu pawh a haw ve nghâl mai a, Ka nu in min riahpui se ka ti sin le, mahse han inchawi rup rup vêl a ngaih khân ka nu in a thei dawn si lo, a hrim hrim in tinge ka kê vêl hi a â chhû hian ka hria, ka ti che thei bawk si lo, ka khawilai emaw ka sawhna deuh chu ni ngêi anga, mahse engmah an sawi duh bawk sî lo, thil liantham lutuk anih erawh ka ring lo, LalDuati lah hi min rawn tlawh pawh a tum lo reng reng, ka call pawh a chhâng duh lo.



Cabin ah ka awm vângin Sofa dûp nuam tak pakhat leh dawhkân vêl a awm a, gas pawh a awm thlap, Uruata chu sofa chungah chuan țhu in engemaw hi a chhût mial mial a, dâwr lam a nih ka ring.




Amah ka en reng lai chuan mutchhuak hian min rawn zêm chiai chiai a, ka chhîng nghâl riai riai mai.



_____________



Ka tui in hâl lutuk chuan min ti harh zawk, current chu alo in off țhen tawh nghe nghe, ka piah dawhkânah tui a awm daih bawk si, Uruata lah a muhîl tui bawk si, tihbuai chu ka hreh takzet, thâwk la hawk pahin ka in beng kâng a, ka kal theih mai ka ring, a hnai tho, ka kê chu lei a dah thlâk mai ka tum, Mahse ka thei lo, tinge? Ka kê chu tih chêt ka'n tum a, a theih loh, mak ka ti lutuk ka kê chu ka'n zût chhin a, khawih pawh ka hre thei lo, a â mup mai, Enge awmzia? Ka chungah hian enge thleng le? Ka kê chu dîm lo zet hian ka chûm vak a.



"Ana lutuk"


Ka ti chhuak tuar, khum ațang chuan ka tla thla tawp thei nia, ka kê chu ka sawih fiah thiâm phâk bâk hian ana nih chu, ka mittui ka dang zo lo, bawkkhup zâwnga ka tlu chu ka in let thawk a, ka kê chu ana lutuk.

"Kiki i țha em? "


Uruata pawh ka thâwmah arawn harh, ka țap lo mahse ka mittui atla tho, ana êm a ni, ka sawi fiah thiam lo, ruhseh na techu nêp tê,


"Ka ke hi ana lutuk"


Țap âw lek lek chuan ka ti a, chek tlak tlak pahin min pawm tho nawlh, khumah chuan dîm zet hian min mut a, ka chunga thil thlen dân chu ka ngaihtuah chiân pauh leh han rin dân tûr ber pawh ka hre lo.


"Kha damdawi hi ei rawh"



Tihpahin tui leh damdawi mûm var lian vak lo hi min rawn pe a, la in ka lo ei ve mai.


"Ngati nge khatia ilo awm a? "


A hmêl ațang chuan a lungâwi vak lo tih ka hria.


"Ka tuiin a hâl lutuk a"



"Iva mâwl ve, i tuiin a hâl techuan min kaih thawh mai tur che lawm, Mâwl lutuk, engtin emaw ilo awm palh thei sin, hetah ka mu reng a, in kaihthawh a harsa lo, khatiang khân vawikhat mah awm tawh suh, min hlauthâwng hman alawm"



Ati ta hluk hluk a, ka nui sak, ka ke nâ pawh ka hre chang tawh lo, Uruata chuan mak tih hmêl zet hian min en a,


"Enge? Fiamthû ka thawh ami? "


A rawn ti leh hluk.


"Ni lo e, Uruat ngati nge min hauh hian nuam ka tih tlat țhin le? Ka pa ang mai ini"



Amah en chuan ka nui var var a, min en rûn mai, mahse ka nui rei lo, ka pa ka mitthlâ ah a rawn lang a, ka mittui a rawn tling nghâl pam mai, ka hru zauh a, mahse ka la nui var var reng tho.


"Mu tawh rawh khi 12 a ri țêp ania"


Aw ki hniâm zet hian arawn ti leh a, a mutna lam chu a pan ve nghâl vat.


"Uruat nang hian min duh chiâng alawm, i in hre lo mai mai nih kha"


Nui chung chuan ka ti a,


"Mu mai mai teh"
A rawn ti hluk, ka nui chhuak hak ringawt, min ngaihtuah dân em em hi min duh ve chiâng alawm, ka hre chiang lutuk, a sawi ngam lo mai mai a ni.



LALREMRUATA




Kiki i chuan a kê chu na ati tial tial mai, ka mang ang lutuk tih ngaihna hre lo chu Nurse duty lai chu ka ko ta tawp a, Doctor an lo awm hlauh nên Kiki i chu a check nghâl zung zung a.


"Tûna kan tih theih chu anat chânga natchhawkna pêk hi a ni rih mai"



Doctor hmêl ațang chuan beisei tûr a awm lo tih ka hrethiam, Kiki i a awm ve reng vâng chuan engmah pawh ka zâwt thui duh ta lo.




Reilo te ah a muhîl nghâl vat a, keipawh ka mu ve nghâl, ka harh lak lawh vâng nge ka hîl thei tlat lo, Mut hmunah chuan ka in ngaihtuah vang vang reng a, He hmeichhia hi ka lainat takzet a ni, engmah lah chu a hre dêr si lo, ana lai ka hmuh apiang hian ka lo hrehawm ve ngawih ngawih a, a kal leh theihna nih dâwn chuan engpawh tih ka huam, engvâng nge ka hre lo, mahse hetia hrehawm a tuar reng lai hmuh hi hrehawm ka ti êm a ni.





NEXT MORNING




"Uruat"


Zawi te te a ti thâwm chuan min ti harh zawk a, Kiki i lam ka en vat, a hmêl alo dik tawh ngei mai, a ke na kha a awm tawh lo anih ka ring nghâl hmiah, khua pawh avâr tawh a, thâwm a awm leh chuah chuah tawh mai.


"Aw enge ni ta?"



"Duati arawn kal dawn a, Gate bulah ilo hmuak thei angem?"



Ka tho vat a, ka hmai ka tuai puat,


"Tehrêng"



Ka tho vut a, ka ha nawtin ka hmai techu ka phih nghâl sawk sawk a, ka puan sin techu ka thlep tha nghâl vat, ka che vêl chu min thlîr reng reuh lehnghâl a.


"Aw Duati, Uruata a rawn chhuk dawn"


A phone ațang chuan a ti lâng lâng a,


"Kal tawh rawh"


Ngên ngâwl zet hian arawn ti, nuih suk pahin ka chhuak nghâl vat a.




_____________


Gate ka thleng chu Duati pawh ka hmu nghâl, min hmu chu arawn nui sak a, a mittui a hru zauh lai chu ka hmu hman hrâm,


"In mu țha thei maw? "



Aw khûr lek lek hian a ti a, a țah a chhuak hlê tih a hmêl ațang hian ka hrethiam mai, Kiki i chanchin a hre tawh ngei a nih hi, Chaw leh ei tur eng engemaw a rawn keng țeuh bawk.



"Aw... I țha em? "



Min chhâng lo chuan thâwk ala hawk a, a mittui arawn luangthla ngiai ngiai mai, a insûm thei ngang lo aniang, a țap chhuak ta hak a, min kal pêl tu te lah chuan min en zui hû hû lehnghâl.


"Pathian in tih theih loh a nei hleinem, engkim a țha leh em em ang"




"Chu chu ka ring alawm, Mahse ka khawngaih êm a ni, a hmêl ka hmuh chuan ka țap mai ang tih ka hlau"


A muttui hru mawlh mawlh pah chuan arawn ti țiau a,


"In ti pachang hram hram rawh"


Ka lo ti ve vat, rei fê kan inthlêm hnu ah Cabin chu kan thleng ve thei hrâm.




Kan lût chiah chu Kiki i chuan nui var var hian a țhiannu chu alo ban nghâl a, Duati țap châk lutuk insûm hmêl chu ka khawngaih zawk.


"Ana viau em? A hrehawm lo tiraw?"


Duati chuan țap âw lek lek hian a ti nia,ava insûm thei lo reuh tak e âw.


"Awiha... Țah i tum alaw? Iva han țhing tak"


Kiki i chuan alo ti nghâl nâng nâng a, kil khatah chuan ka lo khi ve suk suk ringawt, Duati chu a țap ta nge nge e.


"Enge ka ngaihtuah che lawm Hmêli"


Duati chuan tap țiau hian a ti a,


"Engtin mah ka awm dawn lo, Lalduhkimi ka nih hi Lalduhkimi, i hre lo mi? "




"Ka va han lainat tak che"



"Awi Uruat he nu hi tih ngaihna pawh ka hre lo"



Awki sâng zet hian a ti a, Kan nui tawp.



_____________



LALDUHKIMI




Duati chaw rawn ken chu Uruata nen chuan kan ei a, a nu chawhmeh siam hi tui ka ti thei tawp, ka thil ei a tui thei sia ka mu reng bawk si ka thau zo vek dawn nih hi, ka duh huna ka vei na tûr wheel chair techu ka nu in min rawn ken sak a, achubga chuan a nuam reuh em em lehnghal, Uruata min nawr phei chu nuam ka ti zual.




Ka nu lah hi min ngaihsak hman lo in a buai char char reng a, enge a hriat ni, a fanu dam lo pawh a ngaihsak lo reng reng.





Uruata chuan Duati chu a thlah a, Ka nu erawh engemaw buaipui a ngaih thû sawiin a chhuak leh tawh, Tukverh ah chuan dâk in Aizawl khawpui ri mup mup reng lam chu ka hawi thlâ a, Uruata lah chuan lo chesawn miah lo tûrin min ti lehnghâl, Chêt sawn ka châk tlat, Mizoramah pawh la hmuh zen zen lo tûr wheel chair ah ka chuang a, a break na tepawh a awm thlap, a ke chu kuai herin ka'n ti lîr chhin a, Chuang rei dawn lo mahila nuam ka ti, Ka room ah chuan keimahin ka in ti lîr kual chhin mai mai a, Ka chhuak châk tlat anih chu, kawngkhâr chu ka'n hawng dê dê a, Uruata leh Doctor pakhat lo inbe mawlh mawlh lai chu ka hmu, ka lût leh rang ngang mai.



Enge an sawi le? Ka chanchin an sawi tlata hriatna ka neih vângin kawngkhâr chu tlêm ka'n hawng a, ka hre thei ta.



"Nu Mahruaii chuan Doctor chu a zawng mêk a, a kal leh thei mai ang tih ka chiang"


Uruata chuan a ti a,


"Tlangvâl, a hmuh ka ring lo, Doctor Mahruaii chuan Beidawn san tawh mai se țhâ ka ti, A fanu hi a damchhûngin akal thei tawh dâwn lo tih hi a pawm a ngai, Thiamna sâng tak nei Doctor te pawh ina kan râwn ber țhin Pathian a awm a, ani chauh lo chu beiseina tûr a awm lo, ka chiang a ni"



Ka nghîng dawt thei, ka thâwm dang hriat chu a rawn reh duk hian ka hria, Doctor thusawi chu Tubauh lian tak ni mai hian ka hria, min deng na lutuk tlat, chêt mai pawh ka tum lo, ka beng chhe rî chu a ni si lo, kei hi ka damchhûngin ka kal thei dâwn lo maw? Duati, ka nu, Uruata, an vaiin engmah min hrilh duh lo, an awm dân ațang pawh khân rinhlelh chî a ni lo.



Ka âwm zawn chu arawn tâwt chho ut ut mai, ka dawm vawng vawng ringawt, ka mittui a rawn luangthla nghâl ngiai ngiai a, kawngkhâr chu tu emaw hian arawn hawng thut, ka hawi chhuak chu Uruata a ni tih ka hre nghâl.



"I țha em? "


Min ngaihtuah hmêl zet hian rawn țhu hniamin min enkar a, ka hmel a dik lo tih a hria ni ngei ang, he mit meng hi duhna amaw ka lo tih kha khawngaihna lek alo ni sia, țah chhuak ai mah chuan ka thin a rim, mi â ang maiin min lo bum kual a, an vai hian dâwt vek min hrilh a ni.



A bân chu ka lo bêng thla chawrh a, Khum lam pan chuan ka in nawr kal nghâl, kei hi ka kal thei lo maw? An hre sual a ni, ka kal thei, ka chiang lutuk tlat, in seh ruh in ka theih tâwp chuan ka in beng kâng a, Wheel chair ațang chuan in beng kâng in din mai ka tum chu ka kê a rawn na lutuk, ka thlan tuiin min bual a, Ka thei tûr a ni tiin ka la infuih ve țang t ang tho, mahse chiâng takin ka hlawh chham, chhuatah chuan ka tlu bawk thlawp a.



"I na em?"


Uruata chuan min rawn khawih a tum chu ka lo țeu hlar mai, min khawngaih hmêl taka min en hi ka duh lo.


"Min khawih suh"


Ka lo ti vîn tuar a, ka âwm ah hian min hnawh ut ut tu a awm tlat, ka mittui chu namên lo hian arawn luang nghâl,


Ka in let thawk a, ka mu zangthal chu ni nghâl dêr mai, ka ke nâ ai chuan ka thinlung na hian min ti hrehawm zawk.


"Kiki a tâwk tawh, hawh ka pawm ang che"


Dam thlup hian a rawn ti a,


"Kei hi engtikah mah ka kal thei tawh dawn lo, tiraw"


Inchung enkar chuan ka ti a,


"Thei e, hawh ka pawm ang che"


"Dâwt, dâwt khawngaihin, kei hi ka â viau em ni? Min bum reng theih in in ring a maw?"


Ka ti vîn ta tuar a, Uruata chuan min en tawp, țah tlawk tlawk mai duh, mahse ka thei tlat lo, ka nu pawh a rawn lût ve chiah.


"Awi Boihte i tha em? "



"Kal bo rawh, kal bo vek rawh u"


Vawikhat tâp leh ngai tawh lo tur ang mai chuan Ka țap chhuak hawk a, Ka nu pawh a ngawi ta hmak mai, ka bek sam techu a huh zawr vek tawh, keimah chuan ka inbeng kâng leh ngat a, kei hi ka kal thei, ka thei lutuk, tûmah ka mamawh reng reng lo.




Ka nu chuan min rawn puih a tum na a, Uruata chuan alo dang tih ka va hmu nghâl vat, ka in beng kâng a, mahse tinge ka ke hi a chêt ve theih miah loh? Ana lutuk, chhuatah chuan ka tlu leh țhuai a,


"Nu ana lutuk, ka ke hi ka hmang leh duh"



Ka țap a, ka nu pawh a țap bawk, hetianga dam chhuah ai chuan lo thi law law ila țha zawk tur, Uruata chuan ngawi reng hian min rawn pawm kâng nawlh a,


"Kei hi ka kal thei tawh dawn lo tak tak em ni? "



Ka ringhlel chu ka ti phallo, mahse pawm harsa ka ti êm a ni, nun nuam tak chên a, zalên taka nun hmang țhin kha, tûnah chuan Rualban lo ka ni ta, tu mihring in nge pawm thei bîk ang,


"I kal leh thei em em ang, i tân kan awm reng alawm, kei ka awm a, i nu a awm a, Engkim ti thei Pathian a awm alawm, Pathian in a hun a tih hunah i kal leh thei em em ang"



Uruata chuan a ti dap dap a, ka ring lo, Rualban lo tura piang pawh ka lo ni maithei a sin, hei hi ka tâna ruat chu a nih ngei ka ring, mahse ka pawm thei lo.


"Ni e Bawihte, Theih tâwp kan chhuah anga, i kal leh thei em em ang"



Ka nu chuan ka samah duat zet hian min rawn chûl a, ni e ka na a ni, in thup ka tum lo, ka țap chhuak hawk a, Ka kawchhûnga min hnawh ut ut tu te kha an rawn baw hawk hawk hian ka hria, ka nu chuan min rawn kuah vat.



"Nu ka kal leh duh, khawngaihin tih dân a awm lo a mi? Min tidam tu tûr pakhat tal an awm lo mi? "


Țap hlap hlap chuan ka ti a, min chhâng lo, a hmel ațang chuan a chhânna tûr ka hre mai.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2020, 9:53 pm

LALREMRUATA





Dâwr lamah ka kal leh tawh, ka rilru erawh Damdawiin lamah a awm veng veng mai, a châng chuan UZuala min biak na techu ka lo hre lo țhin, mahse thinrim mai lo in min hrethiam a, a dawhthei phiân mai.



Lalduhkimi ringawt ka rilru ah a awm reng mai, tûnah hian enge a tih ang le? A lo țap leh reng te hi ni lo maw le, Nu Mahruaii lah Lalduhkimi enkawl dam thei tûr Doctor zawngin a buai reng bawk si a, ka rilru an ti buai takzet a ni.



_____________



Rilru bet lo zetin dawr chu ka nghâk nilêng ve țhak a, Kiki i scooty work shop a kan dah chu an siam țhat theih tawh an in rin loh vângin hralh mai turin min rawn ti a, Kiki i thu lo a chhânna lo pêk ngawt chu ka duh si lo, Hospital lam chu ka pan leh ta nge nge a.



__________


A room kawngkhârah chuan ka ding vang vang, lût tura kawngkhâr vawnna ka vuan chiah tih chuan țap ri ka hre tlat, ka'n ngaithla chiang deuh a, Kiki i âw ngêi a ni, Nu Mahruaii a awm lo amawni le?


Țap ri chu hrehawm ti zetin ka ngaithla ta reng a, luh pawh ka châk lo, Ka kawchhûng hi alo na ve vawng vawng mai, enge achhan ka hre lo, he hmeichhe țap hi hriat hrehawm ka ti a, tih hlim ka châk et et reng mai, Engvânga lo na ve em em nge ka nih pawh ka in hre lo e a.



Engkim huamin tiin kawngkhâr chu ka hawng top a, a țap chu hre lo ang hmakin ka awm, min rawn en zawk a, wheel chair ah hian tukverh lam hawi zâwngin alo țhu chu niin, a rûk a amittui a hru ru zauh lai pawh ka hmu reng, mahse ka hre lo der tawp.


"Enge ilo tih dawn? "



A țawngkam ațang chuan min lâwm vak lo tih ka hria, a che zia reng reng chu a hmâ anga confi tak leh harh vâng tak kha a ni tawh lo, a ngui raih a, a zia a zâwiin a ngawi châwi em em bawk.



"I scooty kha ansiam thei lo a, thil dang țha ala awm aniang lei min rawn dil a? "




Min en vang vang mai , a mit meng ațanga natna rawn lang chu ka hmuh hmaih hauh lo, Ka ngaihbel nge a dâng bel a, a hmâ aiin a chêr belhin ka hria.


"Awle, ka khalh thei tawh dâwn chuang hleinêm"



A rawn ti chuai raih a, hmuh hrehawm ka van ti tak êm, tih theih ka nei dêr bawk si lo.



"Damdawi in hnunglamah hian pangpâr huan nalh deuh a awm sin, i kal duh em? "



Min rawn en a, a ner sak.


"Pangpâr ka ngai na lo"


A rawn ti sap a,


"A boruak a nuam lutuk, hawh ka hruai ang che"


Tihpahin ka pan hnai a, a hnunglam ațang chuan ka nawr nghâl.


"Khawi ah mah ka kal peih lo asin"



A ti niah niah a, mahse ka ngai pawimawh tawh lo, phûr tak chuan ka nawr chhuak lui ta tho a.





Pangpâr huan zâwl zetah chuan ka nawr mai mai a, nuam a tih ve hmêl chuan ka hria, thing buk lian tak hnuaia țhutna an siam bulah chuan ka dah a, țhutna ah chuan ka thu ve vat, Aizawl khawpui in lang tuar chu mit meng zîm sar hian a thlîr veng veng a, thil thui tak ngaihtuah hmêl a pu.



"I va ngaihtuah mûk âwm ve? "



Fiamthû chuan ka'n ti zauh a, a rawn nui lui sak, a hmêl erawh ala țha reng tho mai, a hmui dang bel ka en chuan fawh ka châk zek zek a nih chu, enge ka chungah thleng hi ka hrethiam lo.


"Enge min en reng a? "


Laih hmêl zet hian arawn ti a, hmundang ka hawi nghâl vat,

"Uruat nang hian Mami kha i ngai țhin em? "



Râl leh lam thlîr vang vang chuan a'n ti a, Ka mitthlâ ah Mami nui var var lai arawn lang nghâl.


"Ngai ve țhin khawp mai"



Tih ringawt chuan ka chhâng a, a chanchin sawi vak hi ka duh lo nge ka hre lo, sawi hi ka châk vak lo.


"A hmelțha sia, ani pawn a ngai thei ngawt ang che, ka hmu ve châk ngawt mai"


"I hmuh tawh kha"


Ka lo ti vat a.


"Ni lo, a takah mawle, Vânramah, i chanchin te ka hrilh anga, kan inkawm ngaih viau in ka ring"


A nui hak a, ka ngaihtuahna ah thil dang arawn lut nghâl, a thil sawi tum hi ka man thiâm mai.


"Chutiang an sawi an sawi ngai lo"



Min rawn en a, kan mitmeng a in tawn chiah chuan a mit meng hi ka chhiar thiam țhin ni mai in ka hria, a ngaihtuah na âwm tûr hi ka hre thei tlat zel.


"Ka nu phurrit ka ni tawh lo anga, nangpawh ka tibuai tawh lo ang che, ka pa pawh ka ngai tawh"


A thusawi chuan ka thin a ti rim lek lek zawk.


"Chutiang sawi tawh suh ka tih kha, a êng zâwnga thil thlîr tur, I kal leh thei em em ang, ka chiâng a ni"



"Ni lo, i chiâng Uruat , Khawngaihin dâwt min hrilh tum tawh suh"




A âw chu a rawn khûr lek lek, rang takin a hmêl chu ka en a, a mittui alo tling kiau mai, a mal chunga a kut dah vawtthler chu ka hûm sak vang vang a, min rawn en zawk, mak ti hmêl a pu deuh, ka lo nuih a, a kut chu lâk sawn tumin a tâl deuh aih mai, mahse ka vuan nghet sauh thung, tûmah mamawh lo angin a in ngai a, mahse min mamawh zia ka hria, ka chiâng a ni.


Ka vawn ngheh tâk êm vâng chuan a tâl duh ta bîk lo, a mit meng fiah leh fîm kâk hian min rawn enkiau a, zawhna a ngah tih ka hria, a ruh lang râwta min zawh hunah chuah ka hrilh ang.


Ni e, Kei hian Lalduhkimi hi ka duh a ni, ka duh takzet tawh.






LALDUHKIMI POV





Ka Kal thei lo tih ka hriat ațangin nithum lai damdawiina ka awm hnu ah, kan in, ka khum ngei ah ka mu leh ta, ka lo ngaihdân chuan hlim takin, ka ke ngeiin ka pen lût leh ang ka lo ti țhin a, mahse ka suangtuahna techu a letling thawk in ka hria, Nu Tei'n min awmpui a, ka nu pawh ka doctor tur zawngin a chhuak leh tawh,Uruata hnâ a akal angai bawk si, ka khua ahar takzet a ni.



Whatsapp ah ka lût a, Țhianten min lo be nak nak mai, mi zawng zawng khawngaih ka hlawh a, midang chunga ka lo sual theih zia kha ka hrechhuak uai uai mai, Kan department a Zuali kan tih mai hâng lampang hmelțha vak lo pawn min rawn bia, ka tih duh dah theih țhin zia techu ka ngaihtuah chhuak a ka zak ngawih ngawih, Ka lo sual theih zia kha,


*Online Reng suh*


Uruata message a ni, ka nui sak a, a dp ah chuan amah pawh a in hmang lo, Naruto Anime thlalâk zu hmanga mawle, a hmelțhat teh lûl nen, hepa hi chu a che BC ka ti dawn nge a naupang chhia ka ti dawn pawh ka hre lo e a.

*Ka khua a har deuh a, iva hman ve*



*Hman khawp mai, Nula chhelo deuh deuh kan thlîr vel mai mai*


Ka hmûi ka ti pawrh zauh, Vawiin chu kan in tex nilêng țhak nia, Ka tibuai palh ang che ka tih pawn min reply lo vang vang a, minute 5 hnu ah te min rawn reply hram hram reng, Alo haw hun ka nghâk hlel ang reng khawp mai, Ka awm dân hi thup ka tum hran lo, Mahse, engemaw hi a awm tlat, ka hlauthâwng a ni, chhaih kual mai mai atân chuan ka phallo, mahse han in ngaizawng tak tak dawn ila a phurrit mai ka ni dâwn si.



________________






Uruata chu dar 4 velin a rawn haw nia, Ka nu ala buai vângin lo va haw hma tûrin alo ti ani âwm e.



"Ka inbual châk e"



Ka ti chhuak sap a,


"Ka lo bual dawn che mi? "


Ka chil ka lem khalh, ka taksa a hmu vek dawn sia, mahse ka rimchhe tawh si, inbual loh na chi pawh a ni tawh lo.


"Tak takah inu lo haw hunah i inbual dawn nia"



Dam thlup hian a ti a, vawiin nilêngin ka țhu ngawt ngawt reng a, ka zâng a kham lutuk.


"Uruat, khumah hian min muttîr la"



"Awle"

Tihpahin A țhutna ațang chuan rawn tho in zo zet hian min pawm tho nawlh a, a nghâwngah chuan ka lo kuah ve vat, min rawn en a, a mithmul sei leh er sang mai hi ka awt ngei mai, ka lo nuih sak, khuma min mut mai lo chuan a ding vung vung a, min la en reng nia.


"Enge? Min mut ta che"


Ka lo ti vat, a nui suk a, ka chalah chuan arawn fâwp zauh, ka țêk deuh chhuai hian ka hria, ka la lâi zui, a hmêl pawh en ngam lo in hnuailam ka melh ngat ngat ringawt.


Muangchâng chuan min mut riai riai a, ka lungphu rawn inthûm rawn tluk tluk chu a hria ang tih mawlh ka hlau.



"Ka lo mu ve dawn"


Min dîl pawh ni lo in min hrilh a ni mah zâwk, sasîr zâwng hian arawn mu ve a, a chêt dân chuan min barakhaih takzet a ni.


"Tinge khatia min en hû hû zêl a? "



A rawn ti nuah nuah a, a lungâwi vak hmêlloh.


"Engvângin nge i rawn mut ve, tho vat rawh"



Alam chu hawiin a âwmah chuan ka nem vak a, ka kutah chuan lo man in hnai zêtah hian min rawn en nia, min thâwk khum ham ham a, a rim chu pâ ka van ti tak.


"Min dang suh, hetia awm hi ka duh"


Awki hniâm zet thûm deuh chhar hian arawn ti a,


"Aih... Tho vat rawh"


Ka lo ti hlar ringawt, a rûk chuan mu ve se ka ti ru tho.


"Teuh lo, ka âwm nghêngin ka mutthilh tîr dawn che"


A ti bûl hmuk a, a awm dân chu ka ngei lek lek.


"A nu in min hmu nge"


"Min hmu mahse enge pawi? Engtin mah kan awm chuan loh hi"


A ti duh lek chauh, ka beidawng, leh lam chu ka hawisawn hmak a, ka hnung lam ațangin ka kâwngah chuan min rawn kuah hrâm nia, ka la phu dâwrh zui.


"Awm hlê hlê rawh, ka seh dawn lo che"


A rawn ti nghut a, a rûk chuan ka nui sak ringawt, ama lam chu ka hawi thut a, duh aiin a rawn hnâi, ka tawlh hnung leh tûr chu hnâi zet hian min pawt dâwrh a, kan hmui leh hmui chu a in si thuak thuak mai, ka lo maimitchhîng tawp, chutah hmûilum thar thar hian ka hmui chu arawn dek ta, vânram nuam tak fang ang mai hi ka ni, mipa ka fawh tawh zawng zawngah chuan ala zei ber ang, a rawn duhthâw tial tial a, ka zang thal tawh, ani erawh a kawng achin chunglam chuan min bawh ûl tawh mai, ka in ngaihtuah harh thut,hetiang chu a dik lo, kan in ngaizâwng pawh a ni lo a, ka in rin hmâ chuan ka nam sawk, hrilh hai hmêl zet hian min en hû mai.


"A tawk"


Thaw halh pah chuan ka ti a, nui suk pahin ka chalah chuan arawn fâwp leh zauh.



Kan in ngaizâwng lo, mahse kan in ngaizawng lo chuang lo, Ka sîr ah chuan rûm țuah țuah pah hian a let thla tawp a,



"Mami khân ka fa a pai laiin min boral san a"


A hmêl chu ka enkâwk ringawt, khap miah lo hian inchung lam alo melh ngar ngar mai,


"Chuan naute chu a thi ve tihna maw? "


"Mmm.... Mi â ang maiin ka awm a, thih ve daih kha ka châk ber, mahse ka tawn dâwn vâng che niang ka la dam chu nia"


A tih zawh rual chuan rawn hawiin a nui suk a,


"A nih chuan a awmzia chu kei hi"


Ka sawi zo hman lo.

"Aw... Kei hian Ka duh che, Enkawl che hi ka duh a ni, Kiki i kal theih loh vâng khân insit lo la, keichuan ka pawm thlap che tih hre tawp rawh"



Mipa taka a thusawi chuan min tih lâwm rual rualin ka na ru ngawih ngawih, keipawn ka duhtakzet alawm, mahse chu chu a famkim lo, keichu buaipui ngai ka ni a, engmah hi a dik thei lo.



"Ni lo Uruat, keichu ngaihzâwng nei thei pawh ka nih loh hi, ka kal thei lo chu sawih loh, ka kâwng a chin hnuailam hian engmah a hre thei lo, chu chu i hriatthiam a ngai, hmeichhe hrisel țha tak hmelțha bawk si nangmah duh em em tu tûr che nei zawk rawh"




Ka thusawi tâwp lam chu ari chang chang chauh, ka mittui rawn luang ngiai ngiai chu Duat zet hian min rawn hrûk fai sak a, a mit meng ațang ringawt pawn min duh zia ka hai lo, mahse chu chuan min tina hlê tho bawk si.



_______



Reilo tê ah ka nu pawh a rawn hâw ve mai a, ka mizia inthlâk nasa lutuk hian ka nu hi ati mang ang lek lek țhin in ka hria, ka nu chuan min bual a, Uruata chanchin hi hrilh ka châk takzet a ni.



"Sawi duh nei i ang ka ti"



Ka kê a sahbawn hnawih mawlh mawlh pah chuan arawn ti chhuak hlawl a, ka awm dân ațangin alo man thiam ni ngei tur a ni, thâwk ka la halh.


"Nu, kei hian ngaihzâwng ka nei thei tawh lo ang tiraw? "


A thil tih lai chu tâwp chat hian min rawn en a,


"Thei tehrêng e, ka fanu hmelțha zet hi a luck zia ka hria lawm"


Kan nui dûn hak a,


"Tak takah ka'n uang deuh hluai a, nangmah hmangaih tu i mamawh a ni, ngaihzawng ni lo in, i nihna ang anga hmangaih tu tûr che i mamawh ber"



Ka nui sak a, Uruata chu ka ngaihtuah vang vang ringawt, ani khân ka nihna ang anga min pawm theih thû a sawi a, ka ring thei angem ka hre lo, mahse ka tum chhin tûr a ni dâwn lawm ni? Ka nui ta var var mai.




___________



Zânah chuan 12 velah ka nu chu mut turin a chhuk thlâ a, Uruata pawh arûkin a rawn lût ru leh dê dê tawh, ka bulah chuan a rawn mu veleh thurh, ka lo nuih var var ringawt.


"In tûr irawn keng nange? "


"Nang hi"


A rawn ti hluk a, ka lo nui hak.

"Ni lo, engemaw in tûr mawle, fanta emaw Maaza tih te"



A chek tlak tlak a,


"Ka zu lâ a nge"


Tih leh thawh a rual nghâl, mahse ka phallo, a kutah chuan ka lo vawn sak vat a.


"A ngai lo, mutthilh ka duh zâwk"


A nui suk mai, a mu zangthal a, a âwm nghêng chuan ka mu thung, a âwm khauh taka ka mu chu ka him bîk riau hian ka hria, bible te chu min chhiar sak nuap nuap a, nuam hi ka van ti tak, ka pa boral hnu a ka hlim ber țum ala nih ka ring.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2020, 9:53 pm

Zîng ka harh chuan Uruata chu alo mu sâk sâk mai, a hmêl chu uluk takin ka en a, a mit hmul buk chhap te, a hnâr zum vât te, a hmui hnuailam lian lek lek leh a hrâwk bâwk te thleng chuan nalh ka ti vek mai, ka nui hak, ka nui ring deuh nge arawn rûm țuah țuah mai, hâm bûi bûi pahin a mit chu a nuai nauh nauh a, dar 5 bâk ala ri lo, a rawn meng ta suar suar a, ka lo nui var var a hmuh chuan mut kham lo tih hriat zet hian arawn nui ve suk mai.



"Morning"


Nui var var pah hian ka ti sap a,


"Morning le"



A rawn ti țial ruak mai, ka nui hak, ka hmui a rawn fawh a tum chu ka lo dang rang ngang mai.


"Enge? "


"Ka ha ka la nâwt lo"


Nui suk pahin min kuah a, nûpa tepawh kan ang e a, zîng tin hetiang hian awm thei ila ka ti ngawt mai.


"Dar engzat nge? "


Tihpahin sana chu a en vut a, ala hmâ ati deuh nge ngaih țhat hmêl zet hian min rawn kuah leh hlû hlû mai,


"I rim tui e"


Ka'n ti sap a,


"I rim tui daih zawk"


Meng miah lo hian arawn ti ve nia, ka la en char char vâng chuan rawn meng thutin ka in rin hmâ chuan min rawn fâwp thut a, ka phu chiâng ngêi mai, ka âwm bâwr chu dîm ang reng tak hian a rawn khawih zui dê dê a, dan em em ka tum hran lo, a kut lum thur thur chuan arawn hup thuk a, ka zak deuh tlat, hmeichhe dang anga han chhuan viau tura lian a ni bawk si lo nên.


"Zak duh suh hei ai tê pawh hi ka khawih ngun mai"


Awlsam zet hian arawn ti nih chu,a dârah chuan ka bêng chawrh a, a rawn nui hak.

"Ka uang anih kha"


Nui hak hak pah hian a rawn ti a,

"Sual lutuk mai"


Ka lo ti hlak ringawt,ka hmûi ah bawk chuan arawn fâwp leh a, kan hlim dûn ngei mai, Khumah chuan kan in chhaih nui har har reng ringawt.



______________



"Remruat, Vawiin chu dâwr kal lo mai la, Bawihtei hi khawngaihin lo awmpui mai ta che, Nu tê i a dam bawk si lo a, Kei lah Doctor meeting tur ka ni bawk si, nilênga ka awm bo a ngai dawn a"


Chaw ei lai chuan ka nu in a ti mawlh mawlh a, Uruata chu ka va en zauh, alo nui sak mai, keipawh ka lâwm ru ang reng hlê.


"Awle, a pawi hleinem"




Uruata chuan alo ti ve mai a, Ka nu in min chhuahsan tûr chu a hreh kher mai, mahse ka nu awmpui ai chuan Uruata awmpui chu ka thlahlel zâwk tlat.



Ka nu a chhuah hnu chuan Uruata nen ka room ah Kan awm mai mai a, Netflix ah lah chuan hmuhnawm a vâng si, a en duh zawng chu in do tih te, Insual buan buan te a ni a, keilah in Kdrama daih te ka en duh thung, kan en ta lo ve ve tawp.



A dârah chuan ka lû nghati ka chhîng siar siar a, tûn ang rênga hahdam hi ka la nei ngai lo, ka room tukverh ațanga thli fîm rawn thaw lût heuh heuh reng techuan min ti hahdam sawng sawng mai.



Ka thâw chu arawn sa hat hat a, ka taksa techu anâ in ka tui in techu a rawn hâl huam huam mai.


"I van sa ve"

Tih suppahin ka chal chu a rawn khawih a,


"I khua a sik anih hi"



Ka mit khap zâwng techuan alum hap hap thei, peih lo zet chuan ka nui lui sak a.


"Damdawi ka'n la ange"



Tihpahin dîm zet chuan min mut a, ka damdawi bawm chu ahai ri ruk ruk mai, Rei lo te ah Natchhâwkna leh Tui chu min rawn pe a, ka lo ei nghâl vat.



Hetiang ka ni chung pawha ngaihsak tu leh englai pawha min duat em em tu ka nei hi vânnei ka inti a, Ka pa boral hnû ațang khan Vântirh koh hi an awm ka ring ngai lo, a chhan chu ka pa kha ka tân vântirhkoh a ni miau a, mahse tûnah hei atak ngeiin ka tawng a ni, Ni e, Uruata hi ka tân vântirhkoh a ni a, Ka ringhlel lo, Pathian hi ka tân a țha takzet a, a thil mak tih ropui tak te kha ka ringhlel țhin, mahse tûnah chuan ka ringhlel tawh lo, Ka chungah ngêi pawh hian a thlen ka ring tlat a ni, engtikah emaw chuan, Ka kê ngei hian ka la kal leh em em ang.




Uruata chu ka bulah arawn inthawlh thla ve sut sut a, nghet zet hian min kuah nghâl bawk, ka chal ah chuan a fâwp zauh a.



"Hlauthâwng suh aw, i tân ka awm reng tih hria la"


A ti sup mai, ka nui sak a, thu thlum tak chu a ni lo alawm, mahse a thusawi mâwl mang tak tak hian min ti thlamuang ve tlat, a chhan chu mipa takin a taka a lan tîr țhin vâng a ni.


"Engtik ah emaw chuan ka kal leh thei ang tiraw? "



In la pangchang zet chuan ka ti sap a,


"Mmm... Beiseina lian tak kha nei phawt la, keipawn ka theih tâwp ka chhuah ang"


Ka nui leh var var tawh, a piang ve lo ang tih ka van hlâu tak.


________________




Ka lo muhîl rei deuh nge ka harh leh chuan alo tlâi ruih tawh, ka thlan tuiin min lo bual huh hlap a, Uruata pawh alo awm tawh lo.



Ngaihțha lo zeta ka hawi kual hrek hrek lai chuan ka nu leh Uruata chu an rawn in zui lût hlawl a, ka nu chuan hlauhthâwn hmêl zet hian min rawn pan in ka chal techu a rawn khawih a, a țap leh tawh aniang a meng sen râm mai.



"Thil țhalo thleng a awm ami?"


Hlauthâwng ru zet chuan ka'n ti a, ka nu chuan a thil tih lai chu tawp chat hian min rawn en in ka kut chuan arawn vuan a, harsa tih hmêl zet hian thâwk ala hak.


"Min pui thei tûr Doctor ka hmu zo lo a, Mahse engkim ti thei Pathian kan nei a, amah ah chauh chuan in nghat tawh mai ang aw"



Min rawn en a, ka nu mit ațang chuan mittui arawn tling pam mai, Ka nu chu ka nuih sak a.


"Nu a pawi hleinem, Pathian hi ka ring a, min kal tîr leh dawn tih ka hria"



Ka nu insûm thei lo chu a țap chhuak hak, a beidawng takzet tih ka hria, kei erawh ka la beidawng ve lo, ka mittui far khat pawh atla lo, Uruata chu nui sak hian ka han melh a, Khawdang hawi miah lo hian min rawn melh ngur ngur mai, a hmêl awm dân chu ka hrethiam chiah lo.


"Ka thiamloh vek a ni, khâ pa kha lo hruai lût lo ila tiang khân i awm miah lo tûr a nia"



Ka nu chuan a ti leh tawh, thâwk ka la hawk a.


"Uruat ka nu hi hrilh ve teh, mahni indem vak vak hian awmzia a nei lo"



Uruata chu a nui suk a.


"Ni e Nu Mahruai, Vânduaina techu tû chungah pawh a thleng thei alawm, Pathian remruatna hi tûmâ dan theih a ni si lo a"



Uruata pawh chuan alo ti ve a, ka nu țap pawh a in hru ve mial mial mai.




___________



Ka khua arawn sik ringawt vâng khân ka nu chu a ngaih ațha thei ngang lo , In check-up tûrin Dar 4 vel chuan Hospital lam chu kan pan leh ta, in pawm kual sek a ngaih vângin Uruata pawn min zui ve nghe nghe.



Uruata chu ka nu chuan lâwmthû a hrilh châm chî reng a, an khaw lam ațangin a chhûng te lah in chawhmeh min rawn thawn ve reng bawk nên, Uruata nu leh ka nu pawh an in be zing malh malh khawp mai, Chhûngkaw in hrechiang sa kan nih vângin Uruata nen chuan kan inkâr hi sawi mahila rokhawlhna a awm dâwn lo tih kan hria, Uruata chuan sawi mai a duh țhin tih pawh ka hria, mahse ka la phal tlat lo, hlauh thâwn rûk na ka nei tlat.





Doctor room pawn lamah chuan Ka nu leh Doctor chu ka lo nghâk rân a, Uruata chu enge maw in tûr lam in a chhuak zawk bawk.




"Ehe....!!! nangmah alaw?"


Ka hawi chhuak chu khâ nû kha a ni, Ka damdawiin awm laia Nurse Uruata bialnu hlui hre tu nu kha, nurse form nen a induang zaih chu a inhmeh reuh, mahse kei ai chuan a tê tih ka hre mai.



Ka bula țhutthlêng sei ah chuan arawn țhu thla ve nghâl a, ka be peih vak lo asin le aw.


"Khawnge Remruata hi arawn tel ve em? "



"Aw tel ve e, dawr ah a kal lawk a"


Țha tak chuan ka lo ti ve mai a, ka chhîp ațanga ka ke lêr thleng chuan uluk zet hian min en nia, engemaw a hriat reuh le?



"In innei dawn ami? "



A mit meng lian zeta min enkawl pah hian arawn ti nih chu, leh ngawt țhin a.


"Nei ang"


Ka lo ti ve hmak.


"Ka lo hriat dân chuan i kawng achin hnuailam khân engmah a hre thei âwm si lo a, lo innei ta pawh ni ula ava ho âwm, Nupa ti nghet tu chu sex hi a ni a, i hmang thei âwm si lo a, Remruata hian a peih rei dâwn a mawni le? "



A thusawi vâng chuan ka entlawk tlawk ringawt, ka thinrim lutuk chu ka inhûm ruh nasa kher mai, hetianga in hmuhstina hi ka pian a hnu lamah ka la tuar ngai lo, hetianga min ti tûr hian a pawi ka sawi âwm ka hre bawk si lo, a thusawi chuan min dêng dawt dawt ni mai hian ka hria, mahse chak lo taka lan duh miah lo ka ni a, ka thinrim na leh natna techu ka ka thup nasa kher mai, mahse a rûka ka tha khûr erawh a reh hauh lo, Uruata hi alo duh ru reng a nih ka ring.




Na taka chhânlêt ve fak duh mahila chhân dân tûr rêng ka hre lo, henu lakah hian ka tlâwm chiang kher mai, a thusawi tekha thudik lo pakhat mah a awm lo bawk a ni.


"Keichu i awm dân hi hmangaihna ai mah chuan mahni hmasialna a ang ka ti, Remruata hi i duh takzet a nih chuan i thlah zalên tûrah ka lo ngai ve tawp a"


A rawn ti leh sak a, chu zawng ka pai dam thei bîk lo.


"I pawi sawi ka nei em ni? Hetianga min ti tûr hian tunge i nih a? "



Aw khûr lek lek chuan ka ti ve a, ka aw kâ ah chuan dâwihzepna a tel tlat.


"Ni lo e, Ka ngaihdân ka sawi mai mai, ngâi thu tak vak duh suh"


A rawn ti leh a, a sawi zo tih chuan Uruata pawh a rawn thleng chawp chilh ve mai, a hah vâng aniang a thaw halh halh a, a thlan dap dap bawk, Lion vawt deuh raih hi min rawn pe a.


"I lo dam maw? "


Nurse zaktheilo i bawk chuan alo ti leh var tawh, keichu ka lo ngâwi ngal thung.


"Dam alawm, i dam zawk em?"


Mi â lo na na na chuan alo be țha ve khawp mai, ka thîk hran lo, Uruata mizia hi ka hre chiâng êm a ni.



"I number min lo pe la, Kiki i dinhmun te hriat ve reng ka duh sia"




Nurse chu ka enkâwk a, a hmêlah chuan zâmna eih ka hmu lo, zak theilo hi ka van ti tak.


"Awle, tehrêng mai"



Tihpahin An number techu an in pe tawn a.



___________



Car ah chuan ka nu leh Uruata chu an in be char char a, kei erawh ka ngâwi reng, ka nu nen seat hnungah kan chuang dûn a, Uruata chuan a khalh thung, Dârthlalang ațang chuan min rawn melh zawk zawk țhin tih ka hria, mahse ka hmu lo der hmak.




Nurse nu thusawi ringawt chu ka ngaihtuah lêt a, thil thui tak ka thlîr pawn a thusawi chu a dik zia ka chiang telh telh mai, thil mak alo thlen hun chauh chu kan in nghahna a ni a, Kan in nghahna chhiat zia leh derthâwn zia chu paper pan tak ang vêl hi a ni, mi â ka ni lo a, ka hrechiâng a ni, ka dam țhat lai khân thil țha tih sawi tûr ka nei ngai lo a, hetiang ka ni chung pawha ka hmâ ka sial zêl chuan Pathian hian ka lakah thil mak a ti duh lo mai ang tih ka hlau a ni, Uruata hi hlim tak leh nun pângngai tak a neih theih nân ka kalsan ngêi chu a ngai dâwn a nih hi, chu chu ka dam chhûng zawnga ka thil țha ber ala nih ka ring.





____________




In a kan thlen pawh chuan ka la ngawi ngal reng a, a châng chuan Pathian hi ka dem lek lek țhin, mahse ka'n dem dâwn viau pawh hian a tana thil țha tih ka nei ngai lo tih ka hriat chiân êm vâng hian vui pawh ka vui ngam lo, mahse hei tal hi chu ka duh ve a ni.


Uruata hi ka hmangaih tawh in ka hria, a nupui nih a chhûngkaw din pui hi ka duh ve a ni, mahse chu pawh a thleng dawn lo tih ka hre chiâng hle bawk si.




11 vêl ah ka nu chu mu turin a room lamah a chhuk thlâ a, a chhuk fel hnu deuh lawkah Uruata chu a rawn lût leh țhem țhem tawh.



"Tinge haw lam pang kha iva ngâwi ta ve?"



Ka khuma rawn țhutthlâk pah chuan a ti a, a awkî pawh a hniam ruih mai,


"Engmah a ni lo, ka chau deuh a"



Ka lo ti ve mai a, min la en ngur ngur zui, kei erawh chuan hmundang ka melh daih thung.



"Nurse nu vâng khân i thinrim tiraw?"



A hmêl chu ka en zawk a, mit meng val deuh riai hian min lo en ngur ngur mai, avan pâ chiang tak.


"Ni lo e, ka chau ka tih chu"


Thinrim âw lek lek hian ka ti a, mahse min la en reng tho.


"Dâwt i sawi, i duh lo viau chuan hei lo en rawh"



Tihpahin a phone chu a kekawr ipte ațang chuan rawn phawrhin a hmet nuap nuap a, a phone chu ka hma zâwnah rawn dahin ka hmuh lai ngei chuan Nurse nu number chu a delete a nih chu, hei hi ka thinrimna ber a ni lo asin le.



Enge ka hriat pawh ka hre lo, ka mittui chu arawn hnâm țiam țiam a, insût hraih pah chuan ka hru zauh, chu velah ka bulah chuan a rawn in thawlh ta sut sut a.


"I roomah va kal rawh"



Țap âw țiau a tihpahin a âwmah chuan ka lo nem ve ngat ngat a, kei a thâ ve mai chu nga tân mah a ngai lo, ka kut tawn tawnah chuan hmerin a âwmah chuan nghet zet hian min bei tîr ta hle hle anih chu, a âwmah chuan ka chûm a, ka tâwt lutuk insum thei tawh lo chu ka țap ri hak.


"A tâwk tawh e"


Dam thlup a tihpahin a aia nghet chuan min kuah sauh sauh a, keipawh ka in thlah dul ve ta, a luhlul êm a ni, a âwmah chuan ka hmai phûm kâkin ka țap hlap hlap ringawt.






LALREMRUATA





Ka âwm zâwna țap hlap hlap chu a rawn reh tial tial a, ka in thlah dul vêleh chuan rang zet in a mittui chu a hru nghâl mawlh mawlh mai, hetianga a awm hian a nia ka lo nat țhin, a tawrh ai tawrh hi ka duh hial in ka ring.



A mit sen râm chuan min rawn enkiau a, a hmui sen chekah chuan ka fâwp zauh, ka la duhtâwk thei mai lo, a aia uar leh thûk zâwk chuan ka fâwp leh a, min lo chhânglêt uar ve tân tân khawp mai, ka duhthâw tial tial a, a nghâwngah techuan ka fâwp thla zêl a, a âwm bawr thleng chuan ka fâwp kim vek, kan thaw dûn halh halh a, ani pawh a dik lo tih ka hria, chu chuan min ti phûr khawp mai.



"Kiki"


"Huh? "


"Ka khawih chhin dawn"


A rawn meng zau deuh kâwk a, a insiam țha vat, muangchâng chuan a bu ta nghauh nghauh a.


A malpui techu ka hmeh sak a, a hmelah chuan danglamna a awm lo tih ka hria, a chawn leh a hmeichhiatna thleng chuan inthlahrung zetin ka si dêt dêt a, danglamna ala awm lo.


"Uruat, ka malpui kha han sik vak chhin teh"


"Aww... Awle"


Bah nuai chuan ka ti a, a malpui chu ka'n sik vak a, engtin mah ala awm lo, ka theih tâwpa nâ chuan ka'n sik leh tâwk a, a rawn țe ta that.


"Ana lutuk, i va han mâwl tak"


Ner nâng hian a rawn ti a, thil hre chhuak thut ni âwm tak hian min rawn en kâwk, nâ ati nia.


"Uruat"


A thaw hak a, a hmêlah chuan a hlim takzet tih ka hmu thiam nghâl mai, keipawh ka hlim, nghet zet chuan kan in kuah ta vang vang a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2020, 9:54 pm

NEXT MORNING






Zîng ka harh chu Ka dam vek hian ka hria, lu nâ ut ut reng leh taksa châu nguai nghulh ang kha a awm tawh lo a,zîng dang ang lo takin ka harh țha phiân mai, Uruata erawh a châu deuh nge alo la mu reng nia.



Sana ka'n en a, dar 7 alo ri tawh, ka duh thei lo, ka nu arawn chho țêp tawh,


"Uruat, tho vat rawh"



Tihpahin ka sâwi nawk nawk a, a rawn rûm țuah țuah mai, khuh khurh pah hian arawn meng kâwk a,

"Dar 7 a ri tawh ania, ka nu alo chho țêp"



Tihpah chuan khum ațangin ka nem thla țhuai a, a râk țhawt, ani thophang la harh chiang lo nên, ti kha chuan a harh țha tawh khawp ang, a mawng tuai vawng vawng pah hian arawn ner chhuak nûng a, ka nuih aza ang reng.



"Boihte i tho tawh ami? "



Inhnuai ațangin ka nu chuan arawn ti lâng lâng mai.


"Chhuak vat rawh"



Inseh chilh ti tih chuan ka ti sawk sawk a, muangchâng chuan kawngkhâr lam a pan phei ve chhut chhut mai, a chhuak dawn maw tih nâk alaiin rang zet hian arawn lût leh a,


"Enge? "


Ka lo ti vat.


"I nu a rawn kal mêk, engtin nge niang? "



Ka rei leh, engtin nge niang?


"Almirah ah khân lût rawh"



"Ka leng dawn ami? "


A rawn la ti hû mai,


"Thih i duh ami? Lut vat rawh"


Ka vîn tuar a, a pa lian ve ang reng sia, A lût ve mai bawk a, kawngkhar a in khâr hnan chiah tih chuan ka âwm dawmin thâwk ka la hawk, ka nu pawh arawn lût ve chiah a.


"Tunge ilo biak kha? "



Ka nu chuan arawn ti hâ a, ka meng kâwk, ka chil ka lem khalh ringawt,


"Ih.. Ka.... Duati... Duati ania"


Ka ti bah nawk ringawt, ka nu chu a nui sak a, khum ațang chuan min kuah thlâ in wheelchair ah chuan min țhuttîr nghâl bawk,



"I u Ruata hi ala tho miah lo amawni le? Ka va kâitho lawk a ange"



"Ni lo nu"



Ka ti tuarh, room a a kal chuan Uruata a awm lo tih a hre ngei dawn sia,


"Enge? "


A rawn ti hû a,


"In tih fai phawt ka duh, a tho ve mai ang, bathroom ah min hruai rawh"


Tihpahin bathroom lamah chuan ka in nawr phei a, ka nu pawn min rawn zui ve mai, awi ka lungphu hi, ka thâw a ti chham thei mai dâwn lawm le..






_______________



Ka nu bulah na ka hre thei deuh tih hi la sawi lo turin Uruata chu ka hrilh a, a âtthlâk ti viau mahse ka thû chu a hnial duh ta bîk lo.



Ni e, ka tum chhin tur a ni, ka beih hmâ hauh in kei hi ka zâm chhe nghâl ania, ka bei anga, beisei tur neilo khawpa chan chhia pawh ka la nih loh hi, ka inhûm ruh a, ka room a ka lehkha zir na tûr atana kan dah dawhkân tlâng chu nghet zetin ka vuan a, ka hmûi ka pet fan fan bawk, din ka tum ta, ka kê chu arawn na ta ut ut mai, mahse ka tuar, ka thlan tuiin min bual a, din ka tum nasat pauh leh ka kê chu namên lo hian arawn na, nâ tih hian a sawi fiah zo lo, ana êm a ni, ka thei tûr a ni tiin ka rilru chuan ka in fuih mawlh mawlh reng a,mahse ka taksa techu a rawn khûr hlawk hlawk a, chhuatah chuan ka tlu ta țhuai mai.





Ana lutuk, ka thâwmah Nu Tei chu arawn tlân chho vat a.



"Awi ...KimKim ana em? "



A rawn ti chêl chûl mai, ka chhâng thei lo, ka kê hi tuboh lian taka chhut sawk sawk ang mai a ni, min tur ut ut a, ka lungphu techu ka bengah hian an su dup dup ni mai hian ka hria.



LALREMRUATA



Tlai ka haw chu Kiki i roomah ka lût nghâl a, Nu Mahruaii lo awm lo hlauh nên, khumah chuan alo mu bêm mai, min lo nuih ver ver tâkah chuan ka hah pawh a zia hawk in ka hria, engmah pawh sawi lêm lo in a hmui lum thar thar mai nêm thepah chuan ka fâwp vang vang a.




"Vawiin enge ilo an? "




A chalah chuan ka fâwp leh a,


"Ka țha e, nang i chau em? "


Ka biangah chuan arawn khawih, khua alum sia thlan rim ka nam vekin ka ring.


"I hmel ka hmu a, ka hahna zawng zawng a bo vek, ka rimchhia em? "




Nui sen sen hian alû a thing a, ka âwih lo nasa, a bulah chuan ka mu thla ve vat,


Sawi tûr em em pawh hre lo chuan ka fâwp leh vawng vawng ringawt, a lâi hmêl sen ap ap țhin hian ati duhawm zual, ka dârah chuan a lû a nghat a, hahdam hmêl zet hian a thaw hak mai, ka phone ah message arawn thleng leh tawh aniang ka ipte zâwn chu arawn nghawr der der mai, khâ nurse bawk kha anih ka ring, ni e, min rawn be țhin,ka reply veleh zauh țhin bawk, min beisei tih pawh ka hria, mahse ka hre lo der hmak, sawi chiah si lo hriatthiam theih si loha rawn țawng zauh hi a chîng țhin, mahse ka lâk thu tak sak duh lo tlat thung, ka hmeichhe ngainat zâwng a ni lo, hmeichhe țhian kawm leh zauh zauh ti ka chîng țhin a, mahse he nurse nu hi chu țhian ang pawn biak harsa ka ti, ka hlauh zâwng tak a ni.




"Uruat"


"Huh? "



"Ka tuiin a hâl e"



Rang takin ka tho a, tui chu ka lâk sak vat, vawiin tlâi hi a hmêl a dik lo riau in ka hria, a chauh hmêl ngawih ngawih.


"Thil thleng a awm ami? Nâ i nei te hi ni lo maw? "



Min rawn en in a nui sak.


"Nei lo e, ka ngai lutuk che a, chuvâng mai mai"



Ka âwih chiah lo na a ka lakah engmah han zêp hran tûr a nei chuang lo, ka chhâng zui tawh lo.




_________________





LALDUHKIMI





A vawi khatna chu ka hlawhchham chiâng kher mai, mahse beidawn ka tum lo, Uruata chu ka bulah a muhîl sâk sâk a, tuna ka thil tum hi ka hlawhchham anih chuan ka thlah zalên anga, ka hlawhtling anih chuan ka theih tâwpin ka hmangaihna ka lantîr ang, chu chu ka tum dân a ni.


A taksa hlai țha zet lum thur thur chu ka kuah hle hle a, avan rim tui tak, he rim tui tak leh taksa lian țha zet hi ka chân mai ang tih ka hlau takzet.






1 WEEK LATER




Vawiin hi a last na ni ta, ka ke na ngut ngut reng țhin pawh tûma bulah ka la sawi lo, natchhawkna te eiin ka tuar tawp zêl, ka tih tîrh ațang khân vawiin hi a ni 7 na chiah a ni a, nitin tiang hian din tumin ka bei țhin, ka hlawhchham ziah, mahse ka beidawng ngai lo, Vawiin chu Uruata a inkhawm a, ka nu pawh, Nu Te i chiah a awm, sana ka en chu 11am a ni, an rawn bân hmâ hian ti vat ang.



Ka taksa techu in sang marin Wheel chair bân ațang chuan ka'n in vuan leh țang țang a, ka khûr nasa lutuk chu ka sâi hlawk hlawk thei, ka thlan tui arawn luang leh țiâm țiâm tawh.




Mahse chûng zawng zawng chu ka ngai pawimawh duh tawh bîk lo, ka theihna zawng zawng hmangin ka in beng kâng a, ka ke nâ in min rawn tur ut ut pawh chu nâ tih piah lam a ni, dawhkân ring chuan ka'n ding ta lawp a, ka âwih thei lo.... LalPa.!!!... Ka ding a nia...




Mar lo zet hian ka ding thei ta, ka mittui arawn hnâm a, ka țap chhuak hak, mahse ....a rei lo kher mai, lei ah chuan ka tlu bawk khup leh ta țhuai mai, ka kê mawlh chu ka sawi fiah thiâm phâk bâk hian arawn na ta, ana lutuk.



"Ana lûtuk, Nu Te"




Ka ti tuar tuar a, ka taksa khûr nasa lutuk chu ka thunun thei lo, ka thlan tuiin min bual huh vek bawk, ka mit deuh sulh a, ka khaw hmuh te hi a thim vek hian ka hria.



"Awi ka duh thei lo, Bawihte i țha em? "




Ka nu âw a ni, kawngkhâr ațanga ka nu leh Uruata thlaphân hmêl zeta rawn tlân lût chu chiang lo ruai hian ka hmu thei, ka țap nasa hlê bawk, ni e, ana êm a ni, ka pian a hnu lama nâ ka la tawrh tawh ah chuan ala na ber ang.



"Ruat, damdawiin ah hruai ang"


Ka nu âw pawh chu a hla vek, ka taksa chu bân tha chakzet hian a pawm tho nawlh a, Uruata thlaphâng hmêl chu ka hmu phê ruai mai.



______________



Motorah chuan Min phur vûk vûk hian ka hria, ka natna phêna beiseina sâng zawk ka neihna chuan na tuar reng siin min ti hlim veng veng a, ka kê chu na hlê mahse a pawi lo, minute 1 vêl tal chu ka ding thei alawm, iti țha e, Lalduhkim iti țha lutuk.





____________


Ka'n harh chian leh deuh chuan damdawiin khumah ngêi mai ka lo mu leh tawh, ka ke na pawh alo zia huai tawh e, ka hawi chhuak a, Uruata chuan min lo enkur mai, ka nuih sak a, min rawn pan vat.



"Ala na viau em? "



Damthlup hian arawn ti a, chhân tuma ka ân zuau lai chuan ka nu leh ka Doctor râwn ber țhin pa kha an rawn in be lût mawlh mawlh mai, chuan, nurse polite lo zeti pawh kha a tel ve nghe nghe, Uruata chu alo inthiâr fihlim nghâl vat a.




Doctor chuan ka ke chu a hmet neuh neuh mai, mahse engmah ka hre leh thei tawh lo,




"En teh Mahruai, i țhian ka ni a, kan inkârah chuan engmah zêp awm lo se ka duh, I fanu hi a tum ruh hlê tih ka hria, mahse a kal leh theih hi ka beisei tawh lo a ni, pawi ka ti khawp mai"



Doctor chuan a tarmit siamțha zauh zauh pah hian a ti a, Doctor ngeiin a ruh lang râwta asawi chu ami nghawng dân ana bîk, ka beiseina zawng zawng kha a chhe leh vek tawh, ka rilru a ka lo hlim rûk ve na techu engmah lo mai a ni leh ta.



"Mahse Makim, kan tum chhin thei lo ami? Treatment te la se la"


"Ni lo, i fanu hi chutianga treatment la chi a ni ve lo, a taksa hian a tuar phah zêl mai ang, tum chhin hlek suh u, anâ hi a chhuah ngun pauh leh atân a țha lo zêl mai ang, hriatthiam tum rawh, nangpawh Doctor tho ini a, ka sawi awmzia hi i hriatthiam ngei angai"




Ka mittui rawn hnâm țiam țiam chu ka khap lêt fak fak a, ka nu erawh a țap thung,



"Nu khawngaihin min lo va chhuahsan lawk ta che u, Doctor hi a fâlin ka be thei angem? "




Min rawn en țhap hlawm a, mahse engmah min zâwt lêm lo, Ka nu leh Uruata chu an in zui chhuak ve mai a, Uruata pawn min en zui vung vung mai, ka lo nuih lui sak ringawt, Nurse pawh chu a chhuak ve mai a.




"Doctor vawiin khân ka ke ngêi hian ka ding asin"



Min rawn en zawk a,


"Ni lo, Kimkim, tum chhin tawh suh, i hria anga, i taksa ala chak lo hlê a, alo berah khatianga in sawizawi tur kha chuan kum 5 hnu velah bul țan chauh la tichuan anâ pawh kha a awm tawh lo anga itân a țhat zawk ka ring, in enkawl vak ngaihna ka hre lo a ni, i natna ang hi avâng em a, inchhuak leh thei nghâl ang aw, ka admit dawn lo che nia"



Ka kun lap mai, a sawi chu dik viau, ka hmanhmawh mah mah em ni ang? Muangchângin lo ti zâwk ila țha tûr, ka chil ka lem khalh a, ka rilru ah thil pakhat arawn lang nghâl,ka doctor a nia ka zâwt ngei tur a ni, a âwm lohna ka hre lo.


"Anih sex hmang ta ila a pawina a awm angem?"



A tarmit kar ațang chuan min rawn en vung vung a, ka nuih tepawh aza lek lek mai, ka lo enkiau thung.


"Thei e, mahse i hria anga, i kawng achin hnuailam kha chuan engmah a hre dawn lo a nia, ka tih awmzia chu, a nawmna i hre lo ang"



Ka lo bu nghauh nghauh a,


"Awle, ka lawm e, ka hmang dawn tihna ni lo nia"



Nui suk pah chuan a chhuak daih.





Thâwk ka la hawk a, Ka thlah zalen ngêi chu a ngai ta, ka nun a avawikhat nân midang lakah ka tlâwm dawn ta anih hi, inchung lam chu melhin ka mittui rawn hnâm țiam țiam chu ka khap lêt fak fak a, ka thin zâwnah hian thil lian tak hian min hnawh deuh ut ut mai, khâ nurse nu lakah khân ka tlâwm dawn ta chu nia, mahse apawi lo, ka dinhmun hi a chhe vê êm a ni.



Ka nu te rawn lût thâwmah chuan ka mittui chu ka hru nghâl mawlh mawlh a, Uruata chuan min en duh ngei mai, mahse en pawh ka en ngam lo.




"Remruat, zan in chu KȚP in program kan neih kha aw"



Nurse nu chuan arawn ti zauh a, kan veng a in ang a ni maw, leh zêl chuan.


"Ka kal lo mai ang, nuam deuh in va hmang ru"



Uruata chuan alo ti ve mai a, ka nu nen chuan kan in en hrek hrek ringawt.


"Engvângin maw? Hla rem tûr zingah i tel ve kha"


"In tam tho a, hei Kiki i hi a țha lo rih emai, zan dangah ni mai rawh se"




Lungâwi loh hmêl zet chuan a chhuak ta daih a, min la melh râwm râwm lehnghâl, kal thei ila chu ka kêk bu lâwp lâwp tawh ang, Uruata program pawimawh a kal theih loh nachhan ka ni ta phawt a, nakînah lo kal thei pawh ni tehrêng ila a phurrit ka la ni dâwn chauh tih ka hia, țhen dawn pawh ni ila khâ nu kher kha chu ngaizawng lo se ka ti, ni leh lo, min duat anga hmeichhe dang a duat tûr ka ngaihtuah ringawt pawn ka na vawng vawng mai.



"Rema, A pawimawh hmêl sia Bawihtei chu kan buaipui thei mai ang"


Ka nu inthlahrung chuan alo ti ve vat a, ka sawi tum ve tho a ni.



"A ho lutuk, ka châk vak lo hrim hrim a, hmelhriat an la awm vak bawk si lo nen"



Alo ti ve vat a,


"Nurse kha ka hria asin, Pu Chhînga fanu anih kha, a felin kohhranah a in hmang bawk sia, a hmelțha bawk si, an ngaizâwng deuh che in ka hria"



Ka nu chuan chhaih ti tih hian a ti nih chu, ka puan sin lai chu ngawi rengin ka lo hmer ngawt ngawt ringawt.



"Nia a fel hmel khawp mai"



Uruata chuan a tih vêleh, ka va melh kâwk a, nui suk chung hian min lo en kur ringawt, ka țhen dawn tho a, hei aia nasa pawh hi ka la tawrh a ngai dawn, ka tawrh hrâm hrâm a ngai a ni, hetianga lo thinrim vak tur pawh hi ka ni lo.




_____________



In a kan haw hnû chuan ka nu in min țawngțai a, mu tûr in a chhuak thla ve nghâl mai bawk, zan in chu ka bula rawn riah a tum tlat, mahse engemaw thil tih tûr ka neih vângin ka duh tlat lo kha nia.




11 rîk dawn dawnah make-up techu ka'n in bel leh ang mawlh mawlh a, ka in hnawih lohna a rei tawh bawk a ka khâwr țût mai.



Kawngkhâr ri rak lam chu ka hawi vat a, Uruata chu alo hawi phâwk hrû mai,


"Enge? Tinge i inchei a? Hmmm?..."



A rawn ti lût nghâl mawlh mawlh a, ka lo nui hak, mahse ka chhûngril erawh ana vawng vawng mai, wheel chair a ka la țhut vângin min pawm kâng nawlh a, khum lamah chuan min mut vat.



Min rawn fâwp nghâl mawlh mawlh a, ka lo chhânglêt țha hiam hiam kher mai, Zan in hian Uruata hi ka thianghlimna hlan ka duh a ni, ni e, midang chuan a âtthlâk an ti mai thei, mahse ani ang mipa hi ka tawn leh ka in ring tawh lo a ni, engtikah mah ka ta a ni thei dawn lo tih ka hria, chuan tu mipa mah hi hmangaih leh ka tum tawh lo bawk, Ka bawrhsâwm lai zawnga min hrethiama min țanpui reng tu anih vâng leh ka mipa hmangaih hmasak ber anih vâng hian ka hriat reng na tûr engemaw tih dun ka duh a ni, hmeichhe dang anga fa te hrin saka nuamsa taka siam ka thei dawn si lo a, chu ai chuan zan khat chauh ka thianghlimna hmanga a hmangaihna leh ngilneihna chhân lêt hi ka tih tûr dik takah ka ngai.




Ka nghâwngah techuan a fâwp thla zêl a, ka âwm bâwr ah ațuan ta,


"Uruat"


"Huh?"


"Ti ang"


Ka'n ti ringawt a,


"Engchu maw?"


A rawn ti hû mai,


"Ka thianghlimna hi hlan che ka duh a ni"



Min en vung vung a, thâwk ala halh mai.


"I kal theih hunah le, tunah rih chuan engmah i hre si lo a, i kal thei anga, kan inneih anga, tichuan Sex ni lo in nûpa nun kan hmang zawk dawn nia"



A hmêl dam thlup leh a thil sawi zawnga amah ti lang pâ em em tu a hrawk bâwk che ralh ralh țhin chu uluk tak chuan ka thlîr reng a, zan dang zawng aiin a hmel techu țha thar riau hian ka hria, ka kut chu la in a fâwp zauh a, min rawn en in ka chalah chuan a fawp zui leh zat bawk, mipa diktak an lo sawi țhin chu amah ngei hi alo nih dâwn hi.


"Kan khua chanchin ka hrilh ang che i ngaithla duh em? "


Ka lo bu nghauh nghauh a, duat zetin a dârah chuan min bei tîr a, ka lo suangtuah dân zawng zawng chu engmah lo mai a ni leh ta, mahse ka kalsan ngei chu a ngai tho sia, ka va han huphurh tak êm, ani anga mipa țha pasala nei tu chu khawvela hmeichhe vânnei ber anih ka ring hial.



"Kan khua chu thingtlâng khaw tak tê a nia, in pawh a tam lêm lo, in 100 kan tling âwrh chauh ang, Ka nu hian huan a nei a, tah chuan vaimim te, maian te, pardi, a tam mai, a chîng țeuh a, a nuam țhin asin âw, A û te chhûngkua nen nipui lai rem chân lai hian chaw te kan eikhâwm țhin"



Ka nui chhuak hak a,


"Engtin maw? A û a? "



Nuih za insum zet chuan ka ti a, a inhmeh lo hi ka ti thlâwt, a tukhum chu a hiat nauh nauh a.


"Ka naupan lai ațanga ka koh dân a ni sia, enge? Midang pawn an ti ve tho alawm"



"Nia a țha vek mai e"



Tihpahin a biangah chuan ka han piai zauh a, alo nui ve suk suk mai.


Ka hlim ber lai pawn ka chhungrila hlauhthâwnna bawk chu ka hrechhuak leh ta, hreh hlê mahila ka lo tum lâwk tawh anih vângin Uruata chu uluk zet hian ka en vang vang a.



"Uruat, vawiinah doctor khân ka kal leh theih tawh ngai loh tûr thu a sawi a"



Ka sawi zo chu ka chil ka lem khalh, arawn meng dur deuhin ka hria.


"Ka hria, chutiang mai mai sawi angai lo"



Arawn ti hmuk a,


"Kan pahniha inkawp reng hi a țha lo, kan kal thui hma hian tâwp vat zâwk mai ang hmiang"



Dam thlap hian ka ti a, ka âw techu a khûr lek lek mai.


"Kiki"


Thâwk ala hrâwk mai, a thinrim insûm anih ka ring.


"Sawi tawh suh"


A rawn ti hmuk a, ka insum zo lo chu ka mittui arawn luang nghâl ngiai ngiai mai,



"Tâwp ang, i hre lo ami? Kei hian fa ka hrin sak thei dawn lo che, ilo suangtuah ang țhin chhûngkaw hlim tak kha ka dinpui ve thei dawn lo che, hriatthiâm tum rawh"



Țap chungin ngên ti tih chuan ka ti a,


"A tâwk, chu chu mamawh ni ila bul ka țanpui che i ring ami? Mi â ka ni lo, engkim ka hre ve vek, mahse i na lai hmêl hmuh reng hi ka thei lo, i bulah awm a, vênhim che hi ka duh, i bula ka awm chuan mipa diktak niin ka in hre țhin, Kiki ka tân hian i pawimawh zia i inhrethiam pha lo ang"



Khum ațang chuan tho in a hmai a tuai puat a, A thinrim mit meng rawn sen deuh rûm chu ka vawikhat hmuhna a nih vâng nge ka hlau lek lek, a awkî a sâng țêp bawk, kan thâwm chu kan dîm sêng ta lo aniang ka nu chu ka room kawngkhârah chuan lo dingin mak tih hmel zet hian min en tawn zak zak mai.



"Uruat khawngaihin, Kei chu ni lo, mipa fel tak ini a hmeichhe pangai tak hi i phû a ni, ka duh na leh ka hmangaihna vâng ringawt che hian ka chelh bet reng thei lo che, zalenna pêk che hi ka duh a ni, ka hmangaih vâng che in"



Ka awkî pawh a sâng ve tawh khawp mai, ka țap bawk, ka nu erawh chuan chelo in min en tawp.


"Kiki kei hi i chelh beh reng angah min lo ngai ami? Kei hian i chunga ka thil tih te hi hmangaihna vâng a ni tih hmu thiam la ka ti"


A aw ațang chuan natna thûk tak atel tih ka hre thei.


"Chu chu ka sawi tum a ni lo"

Țap chung chuan ka lo ti a,


"Hriatthiam tum rawh, Kei hian ka duh avânga i kianga awm thlang ka ni, ni e, mihring ka ni a, chhûngkaw pangai tak din chu ka duh ve tho, mahse chu chu ka tâna pawimawh ber a ni lo, ka tân chuan nangmah, nangmah kha i pawimawh hmasa ber zawk, i dam leh hi ka beisei tlat a ni Kiki, vawikhat tal chu kal leh turin bei la ka ti khawp mai"



Ka hma ah chuan a ding reng a, min en reng bawk.


"Tum chhin lo in ka beidawn i ring em ni? Ka tum nasat lutuk vânga hetianga awm hi lawm ka nih"



Țap hlap hlap chung chuan ka lo ti ve a, second 5 vel liam ta mai kha chuan kan la nui dun asin le.


"Muangchângin le, Pathian chu a hun takah a che țhin"


Ka bianga rawn dawm atum chu ka lo hawisawn vat,


"Nu Mahruai, hrilh fiah ve tawh teh"


Tih hrâwk pahin Uruata chu a chhuak ta daih a, Ka țap chhuak hak, Ka nu chuan min rawn kuah vat a, ka nu âwmah chuan beiin ka țap tlawk tlawk ringawt, Pathian hi ka ring lo a ni reng reng lo, Mahse hei hi ka tana Pathian ruat ngei chu a ni lo ang tih tunge sawi thei? Pathianah chuan ka rinna ka nghat alawm, hei hi ka thih pui tur anih ringin pawm thiâm dân ka zir mai zawk a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2020, 9:54 pm

COMMENTS TE HIAN MIN TI PHÛR VE THEI TEH MAI NIA, CLICK KHA UAR SAUH SAUH BAWK ILA, SILENT READER HI IN TAM THEI LUTUK A. 😷😷😷



Ka keypad a dik tawh lo a, Tri pawh ka rawn tri thei tawh dawn lo aw, Viewers an tam dan azirin naktuk chhun ah chapter 12 ka rawn dah ang...

Click hi a tlêm sâwt sia ka titau ve dawn




Ka nu in min mutpui a, min kuah chungin a muhîl sâk sâk mai, kei erawh ka muhil ve thei hauh lo thung, ka thinlung hi ana vawng vawng mai, tah erawh ka tap tawh êm lo, ka phone message tone ri tlang tlang reng chu ka en a, Uruata alo ni.


*I mu thei em?*


*i nu kha a chhuak tawh ami?*


*Nichin kha ka thinrim deuh hlek a ka tihpalh aw Boihi*

*Min chhâng vela😑*


*I mu tawh a ni maw?*



A message chu ka chhiar thla zêl a, ka mittui arawn tling pam mai,ka chhiar mêk lai pawn arawn type leh ta mawlh mawlh mai, dar 1 ari têp tawh, mut chu a hun tawh khawp mai.


*I seen reng techuan min reply vela*


Ka mittui kâr atang chuan ka phone screen chu a phê ruai mai, thâwk ka la hawk a, tûna hetianga ka tih loh chuan hun a rei anga hrehawm ka la ti telh telh zawk ang, bâkah, hetianga kan awm reng chuan innei thei tak tak si lo in Uruata tân khua a tlâi mai mai dawn tih ka hria.



*Muttui le*


Tih chu ka va thawn hrâm a, ka phone chu dahin ka puan sin chuan ka in lukhûp hmak, ka mut erawh chhuak lo tak a ni.





NEXT MORNING



Thâwm ri rak rak ah chuan ka harh zawk, ka pum lah chu ana deuh riai riai reng lehnghâl, ka men chuan ka nu chuan min jection na tûr alo siam mawlh mawlh mai, ka harh a hmuh chuan min lo nuih sak a, ka mut kekawr chu phelhin ka khêl ah chuan min vit a, engmah erawh ka hrethei lêm lo.


"Nu ka pum vêl hi ana deuh riai riai mai"


"Hmarcha ei insûm deuh rawh, nangchu thil thak te hi i ngaina sia, pumpui ulcer te hi ilo nei ve ange"




Min vih pah chuan a ti mawlh mawlh a, ka ngâwi zui leh mai, damdawi mum dawlh nuam tak a kâwr plastic deuh reuh ang hi min pe a, ka ei nghâl.



"Pumpui damdawi anih kha, zing tin ei tawh la tha ang"




Khum atang chuan min kâi tho a, wheel chair ah chuan min thuttîr in ka hmai techu min phih sak a, hetianga buaipui reng hi ka ngai âwm si a, ka nu hi a hah thei viau ang, ka khawngaih takzet a ni, ka inthlahrung bawk.



Ka inti fai zo chu bathroom atangin min nawr chhuak a,



"Nu, i hnâ i châwl rei tawh sia, Min enkawl tu tûr nurse te hi ruai mai ila"



Uluk tak hian min en vang vang a,


"A tha khawp ang, Mimi-i hi kan be chhin dawn mi niang? "



"Tunge Mimi-i chu? "


Ka lo ti vat a,


"Khâ.... I Uruata ngaihzawn hmel thei deuh hnû kha"



Ka ngâwi hmak, ani ber kher chu ka duh lo nasa, zak thei lo, nasa bawk si, ka taksa chu dam takin enkawl thei mahse ka rilru ati na dâwn tih ka hria.


"Ani kher chu ka duh lo"



Ka lo ti hmak, ka nu chu arawn nui hak a.


"Tinge i thîk deuh a ni maw? "


Ka nu chuan nui chung hian arawn ti a, nizân khân thil thleng engkim hmu mahse ka nu hian engmah min la zawt lo a, Hria ang pawn a awm lo, mahse Uruata nen kan inkâr hi a hre vek tho tih ka hria.


"Nu"


Ka lo ti vîn that,


"Tak takah, Engtia rei nge ni tawh a? "



Uluk zet hian min rawn en a, a zawhna chu sawifiah vak ngai lo a ka hriatthiam vangin ka zak ve têp, ngaihzâwng ka neihin ka nu hriatpuina in ka nei ngai lo a, mipa chanchin lah ka sawi ngai hek lo.


"Ala rei lo"


Hnuailam ka melh nghâl daih.


"Puitling ini ve tawh a, i duhthlanna chu engpawh nise ka pawmpui vek che,mahse i tawrhna tûr i insiam loh ngei ka beisei"



Thutak deuh tak hian arawn ti a, za lo zet chuan ka nui lui hak.



"Ka hlim alawm, alo lan hmâ pawh khân ka hlim a, mipa pakhat vâng mai mai in ka hlim loh phah dawn lo"



Ka sawi zâwng ringawt pawn ka na vawng vawng mai,


"I nu hi mi â ka ni lo nia, nangmah leh nangmah kha in bum suh"


"Nu, khawngaihin, tuna ka thuthlûkna hi vawi lehkhata siam ka ni lo, thil thui tak ka thlîr ve tho, phurrit nih reng ka duh bîk lo, hetia ka tih hian ka rilru a nuam a, ka hlim zawk"



Ka âw techu a khûr lek lek, ni e, ka rilru chu a nuam zâwk alawm, mahse ka hlim hlawl lo, ka na takzet a ni, ka nu chuan thâwk ala hak a.


"A tha e, ka chhuang lutuk che"



Tih sappahin ka lû ah chuan arawn fâwp zauh, inhnuai lamah chuan min nawr thla nghâl vat, Uruata hmuh ka hreh viau rualin in khata chêng kan ni si a, hmuh loh theih hek loh.




___________

Chaw techu kan kîl ho leh ang lawi bawk sia, mahse engmah a sawi lo, min enkur kur reng tih loh chu, ka lu te lah chu ana ut ut reng lehnghâl, enge ka awm dân pawh hi ka hrethiam lo e a.



Ka nu leh Uruata pawh an inbe tam lo khawp mai, nî dangah techuan an ti ti leh mial mial âwm sia, ka nu in dâwr lam chanchin a zawt a, tha takin alo chhâng tih loh chu thudang an sawi vak tawh lêm lo.



"Ehe....!.... Kiki Boihte"



Nutêi chuan ka hnunglam atang hian arawn ti thut a, Nutê i chu kan en thap,


"Enge ni a? "


Ka nu chuan alo ti vat a,



"Kiki i hi... Hei thisen"



Ka phuzawk thei, ka nu leh Uruata chu an rawn tho vat a, ka wheel chair mawnglam ka nu in a en chu a chek tlak tlak mai, Uruata erawh chuan mak ti hmêl apu thung, enge awmzia ka hre ve hauh lo.

"Nu enge? "


Ka lo ti hâ a,


"Ngaihthat lohna tûr a awm lo, I Period a"


Ka rei!..... Uruata khân a hmu ve sia, ka zak lutuk, ka hawi chhuak ngam tawh lo, engtin nge ka hriat loh theih zawk, ka period dawn vâng anih ngei hi ka awm anawm theih miah lo, ka zak lutuk awm ngaihna hre lo chu ka kun tlawk tlawk a, ka mittui arawn tling nghâl pam mai, Uruata hmêl pawh ka en ngam tawh lo.



"Awi Pad kawl sa ka lo nei miah lo"


Ka nu chuan ala ti zui.


"Boihte i nei em nang? "



Nei lo tih nan ka lu ka lo thing a, Nu tê i lah a thî a hul daih tawh bawk si.


"Keimân ka va lei ange, dawr a hla chuang hleinem"



Uruata chuan a lo tih vêleh chuan ka nghîng dawt, ka wheelchair bân chu ka hmer tlawk tlawk ringawt, Uruata tlân chhuak lai chu a hnunglam atang chuan ka thlîr zui vawng vawng a, ka mittui kâr atang chuan a phê ruai mai.


"A tha vek Boihte, zak duh reng reng suh"


Ka nu chuan ka sam a chûl hliau hliau pah hian alo ti a, ka tah a chhuak zual sauh.


"Keima thiâm loh vek a ni, i thlatin bi neih hun techu ka hre reng sia, vawiin nî takin ka lo theihnghilh a ni"



Nu Tê i pawh chuan inthiamloh hmêl zet hian alo ti ve bawk a.

____________



Uruata alo thlen hnû chuan ka nu in ka pad techu min hrên tîrin khumah chuan min muttîr a, hna atan vat dâwn vângin min enkawl tu tur nurse a zawn vat tur thû min hrilh in a chhuak zui ta kha nia,



Nichina thil thleng techu ka ngaihtuah zui a, Chaw ei lai berkhera thleng anih vâng khân ka zak zual, mipa tân phei chuan a tenawm dâwn si, ka ngaihtuahna vâng chuan inthing nawk nawk pahin ka puansin lai chu ka hmer ngawt ngawt ringawt, a châng leh ka tap leh rih thin.




Ka room kawngka in kik karh karh thâwm ah chuan ka mittui ka hru sawk sawk a, Nu Tê i anih ka ring,


"Lo lût rawh"



Ka tih ruala ka room kawngkhâra rawn lût ka hmuh chuan ka lungphû hi a su nghâl dup dup mai, Uruata maw!... A kal daih tawh amaw ka tia, ka awmdân lâi lutuk chu a hrehawm zâwk, thu tak deuh rûn hian min la enkur zui.



"I tha em? "


Vawt deuh ruih a arawn tih tâkah chuan ka awm dân chu ka insiam tha nghâl vat, mahse tinge a hmêl ka hmuh ka hian ka tah a chhuah tlat le? Nizân vâng tepawh kha a ni mahna le, kan inkâr chu a khi chat zau ang reng khawp mai, mahse a tha zawk.



"Ka tha e"



A rûl tâwk lek chuan ka lo chhâng a, thâwk la hrâwk pah hian a hmâi a tuai puat mai, chutah hmel rum ûl hian min rawn en a.


"Ka englai hi nge i duh loh ber ni a? Ka hausa lo ka hria, thingtlâng khaw te tak tê atanga rawn kal ve mai ka ni, Ni e, min duh lo mahla a âwm lutuk tho, Mahse Kiki vawikhat chiah chance min pe la"




A awm dân chu ka haw lutuk, kei wheelchair a thu kal pawh kal thei lo hi ka hma a tlangval hmeltha leh fing tak, fel bawk si hian chance pe leh tûrin min ngên a nia,



"Tiang hian awm suh"



Ka lo ti thâm tiâk a, ka chil ka lem zui khalh, ka mittui arawn tling leh tawh.


"Tûk ina i awm dân ka hmuh khân i nat tluk zetin ka na ve asin, i zak hmêl hrehawm ti lutuk khân awm ngaihna hre lo khawpin min siam, Kiki kei hian i na lai hmêl hmuh hi ka thei lo"



A awkî asâng lem lo, ka bengah erawh a ring hlê thung, dâwt a sawi loh zia a hmêl atangin ka hrechiang hlê bawk, ka mittui rawn luang ngiai ngiai chu ka hru zauh a, thâwk ka la hawk.



"Ka rilru ka thlâk dawn lo, ka duh lohna chhan che i hre duh maw? Nang ang mipa class hniam lutuk hi ka duh ve lo, chu chu ni mai"



Ka thin zâwn hi a rawn na zawk zawk thei, ngâwi reng chuan min en ta vang vang a, a hmêla natna rawn lang chu en reng pawh thei lo in hmundang ka en sawn daih.



"A tha e,"



Ka nghîng dawt thei, kawngkhâr inkhâr ri thuai chuan min ti phu dâwr thei nia, ka puansin lai chu ka thâm tlawk tlawk a, ka tap chhuak nghâl hawk ringawt.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 30th, 2020, 9:54 pm

CHAPTER-12



LALREMRUATA




Rilru bet lo zetin vawiin nilêng chuan dawr lamah ka awm a, Nui hmêl pawh ka pu peih lo, Kiki i tawngkam na tak khân ka rilru a luah veng veng mai.



Khatiâng kha chu ka vawikhat hriatna pawh a ni tawh lêm lo, ka hria, mahse vawiin chu a mi nghawng dân a dang kher mai, ngati nge maw henu hi ka duh êm êm le? Ka hre lo, tinge a mittui tla ka hmuh apiang hian nâ ka lo tih ve em em le? Ni e, ka bialnu ania, harsatna a tawh chuan ka tanpui ngei tur a ni, mahse ka awm dân erawh apângâi zân lo, tûk in atang khân atân ka lo inpêk zia ka in hre chiang sauh.




Mami khân vawi tam tak Pad an tih ang hi min lei tîr a tum fo thin a, a châng chuan a fiamthû tel thin bawk, ka ten tlat a, bâkah mipa tân chutiang lei chu a Thâi bâwih thlâk ka ti ve tlat, Ka tha nat na lam tak a ni, fiamthu a min lei tir a tum pawn ka thinrim hlur zêl anih kha, mahni chuan ka nui hak a, ka â tawh a nih ngêi dâwn hi.



Engtin nge a awm ang aw.... Nâ te kha a nei leh angem le...He nû hi chu, kal tekha alo tum leh vaih chuan, ka hrechhuak thut chu ka phone ka phawrh nghâl thuai a, a number ka hmet chhuak, call mai ka tum chu ka in ngaihtuah harh thut, tikhawpa min duh lo tu chu engvângin nge ka va biak hmasak kher ang? Mipa zâwk ka ni a, hmeichhia zawk pawn a tuar thei anih chuan ka tuar thei tûr a ni, tiin ka in fuih a, ka phone chu ka dah leh hmak.



Mahse ka ngai, a chanchin ka hre châk takzet, a aw ngaihnobei zet kha hriat leh ka châk ngawih ngawih, mahse ka call duh ta bîk lo, ka phone chu ka ak tha leh hmak a.




Ka awmdân chu Uzuala pawn alo hrethiam aniang, ngawi rengin ka dârah arawn bêng thlup thlup a, za lo zet chuan ka lo nui lui suk ringawt.



"Mipa chu kan heti châwk thin rêng ania, mipa zawk e ti lo chuan a awm thei lo lo ah hian kan tang zâwk zel, khati khawpa i rilru luah khat tû chu i hmangaih hlê anih dawn kha, inthen a sawi pawn then duh miah suh, mipa dang anei te nih loh chuan"




Uzuala chu nupui nei tawh a ni a, kei ai pawn tawn hriat a ngah zawk bawk, a thurâwn erawh chuan ka tân awmzia a nei thui vakin ka ring lo, min be duh tlat bawk si lo a.


"Chance min pe leh turin ka ngên a, mahse awmzia awm lo, a ho lutuk"



In la pâ zet chuan ka lo ti a, mahse ka thinlung erawh ana vawng vawng mai,


"Hmeichhia hi chu nawr vak chî an ni lo, an rilru hneh a ngai zawk, i nawr nasat pauh leh a induh khum tial tial mai ang che, chu ai chuan a rilru hneh tum zawk rawh"



Ka lo bu nghauh nghauh a, a tha khawp ang chu chu.



________________



Tlâi ka haw chu Nu Mahruaii common roomah chuan in ngaihtuah mûk hmêl zet hian alo thu ngâwi kar a, ka lût thâwmah chuan min rawn en vat.



"I va in khâr har ve, i chau lutuk ange aw"



"Chau lo e, Vawiin enge a an?"



A nui sak a,


"A tha a ni mai, amah enkawl tu tûr nurse ka ruai a, han hmelhriat ve reng reng la"




"Nurse maw?"


Ka lo ti hû a,


"Aw, ka chawlh lâk azo tawh sia"


"E anih chu"



Tihpahin inchung lamah chuan ka chho a, Kiki i room chu alo in hawng hiau mai, ka kal pelh ngei chu a ngai sia, muangchâng chuan ka kal phei a, a room atanga rawn chhuak nurse ka hmuh chuan ka ding dat, Nurse Mimi i maw? Tinge henu ber kher hi an rawih le? Min hmuh vêleh chuan mak ti hmêl a pu deuh, a chhan chu Kiki i khân ka bialnu anih thû a sawi tawh tak e.




"Ehe!...tûn angah te irawn tlawh dawn alaw?"




"Hetah hian ka awm alawm"



Ka lo ti hmuk, min zawh thui hma in ka kal sawn ta daih a, engmah ngaihtuah lo chuan Kiki i room lam ka pan vat, Khumah chuan lo thu in tukverh lam chu alo melh kar a.



"Tinge khânû kha in rawih?"


Ka'n ti thâwr a, min rawn en in meng kual ralh pah hian thâwk ala hak.


"Ka nurse rawih tûrah nang hi ka râwn kher che a ngai ami?"




Chiang fek fawk hian arawn ti a, a tawngkam chu ngei awm viau mahse ka ngâi pawimawh lo lui ve tlat.



"Nia, a dik, anih, Muttui le"


Ka chhuak nghâl nal nal, engemaw ka va zawh kher kher le?


_____________




Ka in tih fai zawh hnû chuan Vawiin lama kan phone hralh zât leh a hming techu record bû ah chuan ka record mial mial a, ka rilru pêk erawh ahar khawp mai, ngaihtuahna fîm pawh ka hmang thei lo, Kiki i ringawt ka rilru ah a awm reng mai.


Ka hmâi chu ka tuai puat a, dawhkâna ka phone dah chu arawn ri zui nghâl, ka en chu ka nu alo a ni.


"Aw nu enge a? "



"Bawiha, ipa hi alu hai a reh thei lo a, a chau vek bawk si a, Aizawl civil hospital lam kan rawn pan pui mêk"



Ka thutna atang chuan ka ding chhuak hluai a.


"Ani maw?!... Khawilai nge in rawn thlen tawh? "



"Phunchawng kan rawn thleng tawh"



Motor a achuan vâng nge atawng hriat ahar tâk êm avâng chuan ka dah ta top a, Damdawiin lama lo nghah ka duh zâwk vângin ka insiam nghâl chûk chûk mai.


Ka insiam zo room atanga ka chhuak tûr leh Nu Mahruaiin Kiki i room lama a lût tûr nen chuan kan intâwk hlawl mai,


"Ehe... Remruat tûn angah khawnge kal i tum a? "


Nu Mahruaii chuan alo ti hû a, Kiki i ka va melh chu khuma thu reng chung chuan min lo en ve kiau mai.


"Nia, ka pa a chau deuh thut a, he lamah an rawn phur mêk a, Civil rawn pan pui an tum a, lo va thlen hmasak ka duh a"




"Awi âw... Anih chuan kal vat rawh, car kha hmang la i thleng hmâ zawk ang, ka rawn kal ve thei mang bawk si lo a"


Inthiam lo hmêl zet hian alo ti a, ka nui lui hak.


"A ngai lo, eng êm ati lo tûrah ngai ang"



Ka lo ti liam ve mai a, ka chhuak zui nghâl vat.




_____________



LALDUHKIMI




"Bawihte, i u Remruata pa chu a boral ta mai anih chu"



Ka meng kâwk thei, sawi mai tûr pawh ka hre lo,


"Ava rang teh thut ve?"


Ka lo ti vat a.

"Bp sâng leh zunthlum alo nei nasa aniang"



Ka nu chuan thâwk ala halh a, kan inbe tawh lo, Uruata ringawt ka rilru ah a awm, a tuar viau angem le? A tuar ngawt ang, a sawi dân atangin a pa hian aduat hmêl si, ka van khawngaih tak.



"Hetiang ngawt chuan a dik lo, ka va kal ve ange , Nurse Mimi i haw tawh mahse Nu Tê i a awm tho a, i hreh em?"


"Hreh lo e"



Ka lo ti ve mai.


________


Ka nu chuan inhnuai lamah min paw thlâ a, common room a lo nghah zâwk ka duh vâng a ni, ka muhîl thei bik teuh lo mai.




____________



Dârkâr khat dâwn ka nghah hnu ah kan in kawtah chuan motor thâwm a awm ta, Nu Tê i nen chuan kawngkhâr lam chu pan in pawn lam chu kan lo thlîr dâk dâk a.



Motor atang chuan Uruata leh ka nu chuan nu upa tawh lam ngo lam pang lian vak lo hi an rawn kuah chhuak a, a tap feih feih bawk, Uruata nu anih ka ring nghâl mai.




Inchhûngah chuan rawn hruai lût in sofa ah chuan an thuttîr a, Ka nu chuan min rawn pan in

"I u Ruata nu anih hi"


Ka beng bulah chuan A rawn ti sar sar a, ka lo bu nghauh, chutah mipakhat pa valai ve tak hi hmanhmawh hmêl zet hian arawn lût ve hlawl mai.


"Khu lamah min lo nghâk tawh a, a rang lamin in phur chho mai ila tha ang, Mama insiam la, i chho nghâl mai ang u"


A rawn ti vut vut a, ka nu chuan Uruata nu chu alo hnêm ve mawlh mawlh reng bawk, Uruata inchung lamah chuan achho nghâl a, a rawn kal leh angem le tih ringawt chu ka rilru ah a awm, Ngâwi rengin kil khatah mikhual rawn lût tawn sek leh vei chhên chu ka lo en ve hrek hrek a, a changleh ka nu leh ka pa hre tu techuan min chibai leh ang lâwp lâwp a.



Reilotê ah Uruata pawh a luggage nên a rawn in châwi thlâ a, a hmêl chu a dul raih a, tah erawh a tap lêm lo, mahse a mizia erawh adang khawp mai, Choka lamah chuan ka lo inthiar fihlîm ta daih a, bâkah ka tuiin alo hâl ve bawk nen.



Fridge tui ka ban tûr chu ka la ban pha lo zui, chutah tu emaw hian ka hnung lam atangin ka tui bottle lâk tum chu a rawn la chhuak nawlh a, fridge chu a khâr nghâl daih bawk, mak ti takin ka hnunglam chu ka hawi lêt vat a, Uruata chuan hmêl vawt deuh ruih hian min lo en reng chu niin, ngâwi rengin tui bottle chu min pe a, ka lo ban ve vat.



"I tha em? "



Inthlahrung ru ang reng tak chuan ka lo ti sap a, thâwk la halh pahin ka hma zâwnah chuan rawn thu hniamin min en vang vang a.



"Lo in enkawl tha ang che , ka rawn kal leh hun tur ka hre si lo a"




Ka nghîng dawt thei, then ka tum mêk kha ni sia, a kal bo dâwn meuh chuan ka ngâi ngam leh bawk si lo, rawn lêt a tum tawh lo tihna em ni ang?



"I rawn lêt tawh dâwn lo maw? "



Ka lo ti deuh hâ a, thâwk ala hawk.


"Ka hre lo le, hun in ala hril ang chu"



A awkî pawh a hniam ruih ruih khawp mai, a awm dân hian min lo tina ve ngawih ngawih nia, ka khawngaih takzet a ni, pa neih loh hrehawm zia hrechiang tu ka lo ni ve leh zêl bawk nen.


"A pawi ka ti khawp mai"



Tih zawng hi ka sawi theih a ni si a, han hnem ngaihna vak pawh ka hre lo,


"Mama, kan kal a hun dawn"



Mipa âw chuan arawn ti ta lûng lûng mai, engvâng nge ka hre lo, ka lungphû te hi an su dup dup thei nia, Uruata chu ka enkiau a, ka mittui atla mai dawn in ka hria, ka tah mai loh nân ka insûm nasa hlê bawk, ka lo tah ve vaih chuan a zahthlâk dawn lutuk.


"Anih ka kal ange, lo in enkawl tha la, ka lo bia ang che"


Tih suppahin ka hmûi ah chuan arawn fâwp zauh a, a kal ta.




Ka mittui tling pam kâr atang chuan Uruata kal chhuak vut lai chu ka thlîr zui vawng vawng a, ka dan theih ni si lo a le, ka biangah chuan arawn luangthla ta ngiai ngiai mai, choka lam pana ka nu rawn kal thâwm ka hriat chuan ka mittui chu ka hru sawk sawk a,



"Rawn thlah ve la"



"Awle"



Tihpahin ka in nawr chhuak a, pâwna ka dâk chhuak chu Uruata car a alût tûr chiah ka va hmu hman, en pawh ka en rei ngam lo, hmun dang ka hawi daih, ka nu leh midang ho chu an in bye bye ta lauh lauh a, ka thil neih hlut tâk chân angah ka in ngai.





_____________




Khumah chuan ka mu zawi hnak a, ka phone ah Duati nên kan in tex mial mial reng bawk, chanchin techu ka hrilh ve a, mak alo ti ve nasa mai, min khawngaih vâng leh min tlawh tam theih loh vângin ngaihdam min dîl châm chî bawk.





WhatsApp ah chuan ka online ta reng a, Uruata min rawn biak ka beisei deuh bawk, mahse min rawn be miah lo, kan inbiak na hnû techu ka chhiar ta vêl mai mai a.



Status pakhat chu a update ve ngei, ka hnung lam atanga ka thlalâk a ni, ka sam pawh alang sei khawp mai, dârthlalang hma a ka inchei lai kha anih hi, a caption ah chuan 🥰 emoji pakhat hi a dah ve a, ka nui sak, ka lo en har deuh nge a update na a rei tawh leh nghâl.






___________



Ka phone ri ral ral chuan min ti harh zawk a, meng diar diar chung chuan ka en a, Uruata alo ni, inthing harh in ka chhâng vat a.


"I mu tawh ami? "



"Aw... Mahse a pawi lo"



Ka lo ti sap a,


"Kan thleng tawh a, anih ka dah leh mai dawn aw, khaw en hunah kan inbe dawn nia"



Ka chhân hmâ chuan a off leh nghâl hmak a, ka phone screen chu ka melh tlawk tlawk ringawt.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)