ITZHAK Season 2 BY Hlutei Jocund Pachuau (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: ITZHAK Season 2 BY Hlutei Jocund Pachuau (Completed)

Unread post by Ngaia » October 25th, 2020, 4:33 pm

In ka thleng chu Dini nên kan inbia a, ka bunk thû ka sawi nghâl, mahse tlânbo pui ka neih thû erawh ka sawi lêm lo.



"Din, mipakhat i thian tha tak pawh ni chuang lo kha hmeichhe pakhat tihpui ta la, mahse an awm dûn lai hmuh hrehawm ti leh em em ta la, ka sawi awmzia chu aaa...ka sawi thiam lo, i tihpuia hlim leh chuang miah lo ta la engtin nge i tih ang?"



Ka han ti kual nawk nawk a, a rawn nui hawk.



"Duhna leh thîkna a nih ka ring, tiang chu i tawng ami?"


"Teuh lo, ka dah dawn"



Tihpahin ka phone ka off nghâl, anih chuan a awm zia chu Isak Lalrinpuia hi ka duh tihna maw?....ni lo, a ni thei lo, ni lûl lo e, ka period vângin ka mood a dik lo mai mai ni, naktûkah chuan ka mood a dik leh vek mai ang.


Ehe!...naktûk hi ka birthday a ni tak.





NEXT MORNING





Laldini chu a tih dân ngai bawkin a ti ti leh mawlh mawlh tawh, a dam lo kha kawm a nuam tâwk chiah henu hi chu, Kei erawh ka ngaihtuah na a kal thui viau, tinge ka thil hlu tak chân anga ka in ngaih tlat le? Ka hrethiâm lo takzet a ni.



School kan thleng chu Isaka pawh alo thleng ve chiah, min hmulo a niang class room lam pan in a kal nul nul mai, a hnunglam atang chuan ka thlîr reng a, zan in hian U Jeneti nên ka sâwm ve ngêi a ngai dawn si a, khatiâng khân ka awm tawh loh hrâm ka beisei, a hrehawm emai.



"Fel, Keichu U Jeneti leh Isaka hi an in hmeh ka ti lo"



Laldini hmêl chu ka en zawk, ka ngaihtuahna a hria mawni le ka ti hial a ni.


"An in hmeh alawm"


Ka lo ti chuai raih ringawt, alo ner deuh sak.


"Inhmeh ka ti lo, zêp lo chuan U Jeneti chu a lêrh e, A zei bawk si, Isaka rilrû hi a tihnat sak loh hrâm ka beisei"



Class room pan pah chuan kan ti ti phei mial mial a, nimin atang tawh khân ka awmdân hi a dik thei lo,Ka tâwt up up reng mai, tah vak vak ka châk ber, mahse han tah viau nachhan tûr lah chu ka hre dêr bawk si lo.




Class room ka lût chu Isaka chuan chiang zet hian min lo en a, enge a chhan ka hre lo, ka en rei ngam miah lo nia.



"Hey....Lazar..."



Ka sîr lam ka hawi, Ropuia a ni, engemaw bâwm keng chung hian min rawn pan a, ka lo en tawp.



"Happy birthday"


Tihpahin chocolate min pe a nih chu, mak ka ti bawk si chêtna châng pawh hre lo chuan ka en tlawk tlawk ringawt.


"La ta che"


Tihpahin Laldini chuan ka hnunglam atang hian min rawn nam zauh a, rang tak chuan ka la nghâl vat.



"Ka lawm e"



Ka ti zui sap a.


"Min sawm ve dawn em?"


Laldini chu ka va en zauh, âw ti tûr chuan min signal zauh a,


"Tehrêng mai, in vaiin in lo kal dawn nia"




Ka'n ti khawmawi ve a, lawm êm êm pawh ka tum hran lo asin le, mahse ka lawm ngêi chu a ngai dawn ta nih hi.



Ka thutna ah chuan ngâwi rengin ka thu a, Ropuia min pêk Chocolate chu ka bag ah ka khung ve mai, engvânga min pe nge a nih pawh ka hre nek lo e a, ka hnunglam atang chuan tu emaw hian ka samah arawn pawt zauh, a thîp zek mai, then sak pahin ka hnunglam chu thinrim zet hian ka hawi a, Isak Lalrinpuia chuan min lo en reng.



"Engtin nge chhuanlam kan siam ang?"



Thutak deuh rûn hian alo ti, a awmdân chuan ka nuih ati za lek lek nia.



"Min lo present sak vek mai ang"



Tha tak chuan ka'n ti a, a ngawi leh mai, min koh ve mai âwm, chaw hma kal chawhnu lam kal si lo an awm hian kan in present sak tawp zêl a, kan inthurual ve na lam tak a ni, teacher ten an hre ngai miah lo, ka ngaihtuah lai tak chuan min rawn pawt leh tawh, tun tum phei chu ka dâk âwrh thei nia.


"Anâ nia enge?"


Tih nang nang pah chuan ka hawi phei a, dawhkâna a lehkhabu lo chhawp chu a pen chuan a khâwng ri kauh kauh mai, ka rei lehh...Maths home work ka thiam loh kha a nih hi.


"Ka copy dawn maw?"


Thu tak deuh rûn chuan alo bu nghauh, a lehkhabu chu lâk sakin phûr zet chuan ka copy nghâl mawlh mawlh a, hepa pui rauh hi a thiâm thei ngawt ang.



"Ehe!...kha kha keipawn ka ti lo, ka thiam lo a"



Laldini pawh chuan alo ti ve sar sar a, phûr zet chuan kan copy nghâl mawlh mawlh ringawt.




______________




Lunch break a ni leh ta, Ka sam ah bawk chuan arawn pawt leh tawh, thinrim zet chuan ka hawi phei a, thil eipui tûrin min sâwm a tum tih ka hre mai.


Ânkhum hrep tuma ka ân zuau lai chuan class 11 hmeichhe ho chuan luh an lo dîl sap sap hlawm a, ka ngâwi leh tawp, Isak Lalrinpuia chu hmeichhe pathum (3) hian zah hmêl zet hian an lo pan a, a bul an rawn thlen chuan engemaw hi an rawn phawrh sap sap mai.


"Khawngaihin lo kal ve ngei ngei rawh aw"



Alai ami chuan tihpahin lehkha them hi a pe a, a ban hmâ chuan ka lo ban khalh vat, kei aia junior zâwk te lakah hian that ka chhuah lutuk ngai lêm lo.




Zan ah birthday party a an sawmna card hi a lo ni.


"Zan in hi tu birthday nge?"


Tihpahin an pathum chuan ka en a,


"Keimah a nia"


Alai ami chuan zah hmêl zet hian arawn ti sap.


"Zan in a birthday party na ah an sawm che nih hi"



Isaka enkar chuan ka han ti a, a hmêl chu a tak leh rûn tawh, lehkha chu arawn en vang vang a, chû mi techu a en leh.


"Tih tûr dang ka lo nei a"



An mahni en reng chuan a ti a, class room chhûnga lo awm ve dang ho chu an lo nui hak,



"Nakinah ni dangah in rawn sâwm leh mai dawn nia, kha kha enge?"



Tihpahin vei lam ami thil ken bâwm tereuhtê chu ka kâwk a, alo thukru tât tât mai, mahse ka lâksak lui ta tho a, midang ho te nen chuan kan enthap.


"Eheu!"


Kan hawng chu chocolate love sign hi a lo ni,


"Thinlung maw?....a romantic e"


Tihpahin kan nui ho dar dar a, Isak Lalrinpuia chuan min rawn lâksak vat, kan ngâwi chiang asin, mak ti zet chuan kan en thap a.



"Ka ta tûr ami?"



Tihpahin a vei lam ami chu a enkar a, zah hmêl zet hian alo bu nghauh.


"Ka lawm e"


Tihpahin chocolate chu a kheh a, a ei nghâl, an hlim hmêl em em lehnghâl, ka hmûi ka lo tipawrh vak ringawt.


"Khawngaihin vawikhat chiah min lo wish ve thei angem?"



Alai mi bawk chuan arawn ti leh, ka lo nui hak, an va han ngam pa hlawm reuh tak e âw, ka bêng nek zawk dâwn mawni le.


"Tunge i hming?"



"Ruthi i a nia"



Ali ani bawk chuan alo ti vat,


"Happy birthday Ruthi"



A nuih sak a, lungâwi zet chuan an chhuak leh nghâl mai, a awmdân vêl chu ka huat tâwk a tling leh em em tawh.



"Canteen ah kan kal dawn em?"



A hmêl chu a tak leh rûn tawh nia, in la zei fel vêl, ka rilru chuan ka ti zêk ringawt.



"Kal dawn kal dawn, chutiang in zawh pawh a ngai mi?"



Tihpah chuan ka tho thut a, ka kal nghâl nal nal.


"Ngati nge a?"


Isak Lalrinpuia'n a ti sup ri chu ka hre pha reng.


"A period vâng a nih saw, a period lai chuan Têkhmuami a nia"



Laldini chuan alo ti ve sar sar a, an in rin loh lai chuan ka hnunglam ka hawi thut, an lo phu zawk nghe nghe.


"Ka hre pha vek"


Vîn zet chuan ka ti a, Mak deuh maiin Lalrinpuia chu a nui ve nia, ka duh thei lo, ka lungphû hi, a rawn su leh dup dup tawh mai, ka hmâi te hi asa hup hup thei nia, ka awm dân hi ka duh lo, a hrehawm emai.



____________





Tlai bânah chuan kan test paper chu kan pathum chuan kan in hmuh sap sap hlawm a, Gate pâwnah chuan kan ding thap.



Isaka'n a hmu hnem ber a, ka hmu chhe ber, mahse ka pass tho a engah vak ka ngai lo.


"Ivan thiam thei em em, ilo in zêp thei khawp mai"



Laldini chuan a ti nuah nuah a, Isaka pawh ngâwi rengin a nui ve suk suk mai.


"Zan in ah in pahnih hian enge min pek dawn?"



Min en deuh hau mai, mî chhân mai pawh an tum lo.


"Samkir enge i duh a?"



Isaka chuan thutak zet hian a ti ve sup a,


"Bialpa tûr pe rawh"


Laldini chuan alo ti vat, kan pathum chuan kan nui ho dar dar ringawt.




"Isak"


Rawn ti lâng lâng tu âw kan hriat chuan kan nui tâwp hmak, U Jeneti class bâng chu arawn kal phei a, a nui ver ver, a hmeltha takzet a ni, kan bul arawn thlen chuan Isaka bulah arawn ding chat, a bân chu a vuan nghâl chat a, ka awmdân a dik lo leh tawh, a bân a vawnna chu ka en a, ka thin zâwn hi arawn na leh veng veng mai.



"Hawh kal ila"


Isaka chu a en zauh a, Min lo en reng nia, harsa ti zet chuan ka nuih luih sak a, avan hrehawm tak, thin zâwna min rawn hnawh tu hi bun ruah hawk ka châk.



"Felfel, kan kal mai aw, Zanah chuan thil tha deuh ka pe ang che"



Nui var var a tihpahin inkai rial chuan Isaka bike dahna lam chu an pan dûn a, ka tâwt lutuk, ka mittui te arawn tling vêl nia, thâwk la hawk pah chuan ka khap lêt fak fak a.



"Kan boruak arawn ti chhe vek alawm Hmêli chu"


Laldini chuan inseh chilh rap hian a ti a, ka lo nui sak ringawt.



_____________



Laldini chuan kan in chu min tih fai pui a, kan inchung zâwl ah chuan ka pa in, light leh thutna tûr vel a siam a, a ti êng chiah chu a nalh reuh phiân, Dini nên chuan kan hlim ngang mai, Ka pa pawn min phûr pui, kum 18 ka nih na tûr chu pui taka ka lawm min phal sak ve tlat, keini ai mahin a phûr zâwk amaw tih tûr a ni.



Tlâi ah chuan Isaka te chhûngkua Pa Muana thlengin chaw hlui kan kîl ho a, Isaka pawh a tel ve, chhûngkua a lâwm kan ni rih bawk a a huau huau vak lo, hun serh te kan hman zawhin chaw kan ei ho a, Laldini nêna kan bâwl vek a ni, naupang tê mah ni ila kum 7 ka nih lai daih tawh khân chaw chhum thil dang awlsam chî siam vel hi ka thiam vek tawh a, ka eisiam pawh a tui lo thei lo.



Kan pathumin common rooma centre table ah chuan kan inchawi a, ka ei thei vak lo, Isaka a awm ve vâng pawh ni lo in ka period hi chuan raino an sawi ang chiah a ka awm thin vâng a ni.


"Isak u Jeneti ka sâwm theihnghilh daih a"


Inthlahrung zet chuan ka han ti a, chaw ei tûr chu a ni ve sin mawle aw.


"A pawi lo"


Tih zawngin min chhâng, Laldini nen chuan kan in en hrek hrek ringawt, Chaw eikham chuan ka pa leh Pa Muana te ho chuan thil pêk min pe liam liam a, Nu Sangtei chuan ka nu in a nulât laia a duh em em thin ang chiah kawr min pe a, ka ha nghâl, Addidas tih inziak kawrlum bântluan simple tak rawng pink hi a ni a, Nu Sangtei sawi dân chuan rawng senno hi a ngaina ber a, keichu ka ni ve lêm lo, Ka nu nêna an nulât lai thlalâk min pe tel bawk.



Mak deuh maiin ka nu nulât lai thlalâk ka hmu chu ka lung a chhe tlat, ka mittui rawn far fap chu nui hak pah chuan ka hru zauh a, Nu Sângtei chuan duat zet hian ka samah arawn chûl nghâl.



"Tûnah te hian la dam ve se chu a hlim ngawt ang, fanu hmeltha leh duhawm zet a nei si che a"


Dam thlap hian a ti a, ka lung a chhe zual sauh, harsa ti zet chuan ka tap chhuak hak a, Laldini chuan min lo kuah nghâl.

Ka pa hmêlah pawh hrehawm tihna lunglên rûkna a nei ve tih ka hria, ka nu chu ka ngai takzet a ni, nû nei te ai hian nu nei lo te hian nû pawimawh na leh hlutna hi an hria ang, ka thiante hian an nu te hi zah lo leh tawngkam chhe tak tak in engtin nge an tawngkhum theih zâwk le ka ti, Ka dinhmun ah hian ding ve se chu hetiang hian an awm bîk miah lo ang, mihring hi chu kan thil tawn a zir zêla in zir chho kan ni a, ka hrethiam tho mai.




Ka phone rîk vâng chuan ka room lamah ka inthiar fihlîm a, Ka en chu U Jeneti alo ni, Ka mittui hru mawlh mawlh pah chuan ka chhâng vat.


"Hello"


"Fel"


A tap âw deuh,


"I tap ami?"


Ka'n ti nghâl deuh chûl a, Laldini pawh arawn lût ve chiah.


"Isaka hi"


Tap âw tiau hian arawn ti,


"Tinge in inhau ami?"


Laldini nen chuan kan in enkar, Loud speaker ah ka dah a, a inhnît feih feih mai.


"Kan ni thei lo ang, a pawi ka ti khawp mai arawn ti ringawt a"



Laldini nen chuan kan in en hê hâw ringawt, han hnem dân vak ka thiam bawk si lo.


"Engpawh ni se rawn kal rawh, hetah a awm alawm, enge maw lungâwi lohna a nei a niang"



Laldini chuan alo ti vat a, U Jeneti pawh chuan aring nghâl mai a niang, a rawn kal tûr thu sawiin kan in biakna chu kan ti tâwp ve mai a.




ISAK LALRINPUIA





Kan classmates ho an lo thleng sap sap hlawm a, ka nu leh pa tepawh an haw, mahni in inchungah beer tlâk pap pap pah chuan ka thu reng a, Laldini leh Samkiri Cake lam tûrin an kal daih bawk si, ka Meizial zûk lai chu dahin ka iptê atang chuan silver thî Samkiri tâ tûra ka tih chu ka en vang vang a, a inhmeh viau ang, ka nu leh ka nau tih loh ah chuan hmeichhe thil tur ka vawikhat leina a ni a, a duh angem phei chu ka hre lo, a to ber ka la risk ve pawp kha nia.



"Hetah ilo awm daih alaw?"



Ka hnunglam chu rang takin ka hawiphei vat, Ka mi hmuh vâng chuan thâwk ka la hawk, nui var varin ka bulah chuan arawn thu thlâ a, a chhelo leh tawh hlê, a kawngah chuan ka lo kuah a, a nui ver ver mai.


"Nichin i thusawi kha enge awmzia? Ka tap tawp alawm"



Ka âwma rawn bei sat sat pah hian a ti niah niah a, ka duh lo chu ka ti dawt phallo na a, mahse ka hre lo, bialnu ka neih huna ka lo suangtuahna ang rilru kha ka pu thei lo, hetiang lam hi ka ngaihtuah ve fo thin a, Bialnu ka neih hun chuan ka rilru thinlung zawng zawng ka pe anga rinawm takin ka awm ang tiin, mahse Jeneti hi chu ka rilru chanve chauh ka pe in ka hria, ka hre lo, Ka duhna ai mah chuan ka mamawhna hian min pawt zâwk tlat, duh lo viau mahila mipa ka ni a, Angel ka ni lo bawk,hei hi chu keimah ka in hriat chian tluk zetin ka hrechiâng, rawn hawi chho in a mit meng de sar sar hian min en a, a hmûi nêm thepah chuan ka fâwp, a zei khawp mai, mahse ka duh loh deuh pakhat ka rilru ah arawn lût leh ta, Ka farnu ang chiaha en ka tum, ka ruih vánga ka fawh nû bawk kha ka bialnu ka fawh apiang hian ka hre chhuak thin, a hmûi nêm thep thlum sek kha tem leh ka chák takzet a ni.




"Mama?"



Ka thlah rang ngang mai, Pa Zuala (Felfeli pa) a ni,


"Aw enge?"


Ka lo ti vat, Jeneti pawh a insiam tha sat sat mai.


"I naute hi an va rei ve, kal na tûr ka nei si a lo ngaihven mai ta che"


Dam thlup hian arawn ti a, ka lo bu nghauh, lungâwi zet chuan a chhuk thla leh mai a, ni dawn tak, an rei tawh riau, ka phone chu la in ka call a, a chhâng thei lo.



Vawi li(4) lai ka call hnû chuan zâng vah hian min rawn chhâng a.


"I va rei ve?"


Ka lo ti nghâl,


"Kan rawn thleng chiah, Ropuia te an in tûr ka lam pui lawk a"


Ka off nghâl hmak, ka sa zak mai, khâ pa tei vet lah kha, an in tûr a lam pui vêl amaw? Kan mi mawl nu chuh.



Jeneti pawh ngaihsak tawh lo in inhnuai lamah chuan ka chhuk a, rin aiin an lo tam tawh phiân.



Jeneti nên min hmu chu min en hrek hrek hlawm mai.


"I bialnu em ni?"


Min lo ti sup sup a, ka âw ve mai, hmeltha an tih thû an sawi ve liam liam hlawm a, chuti em em a athat bîk pawh ka hre lo e a.



"Hei hi khum vek tûr"



Tihpahin birthday a an khum thin lukhum zum ang chu an khum sap sap hlawm a, naupang chhia ka tih êm vângin ka khum ve duh lo.


"Khum rawh"




Tihpahin Samkiri chuan min rawn pe a, ka khum loh dân tûr chu pui tak a ni, Jeneti pawn khum tûrin min lo ti ve bawk, ka lû ka thing, ka duh teuh lo mai.



"I khum loh chuan cake hi ka zei dawn lo"


A ti ta hmak mai,


"Anih, a tha e"


Tihpahin tui lo zet chuan ka khum ve mai a, nui tûrin min hrilh leh, hê nû tak hi chuh, nui lui tih hriat zetin ka hâ zawng zawng lang chuan ka then khuma, phâwk zeta min en kâwk pah hian a hawisawn daih.



Cake chu a zei a, kan hlim dar dar khawp mai.



____________



Inchungah chuan hlâ te play in an lâm a, kei erawh chuan Zu pângngai in pahin ka lo thu mai mai thung, Jeneti pawn min nghêng deuh chiâl mai, in ve tûra ka tih pawn a duh miah lo, mahse Beer erawh a in tho.



A khât tâwk chuan ka kiss deuh chhêna midang pawh an ruih tawh hlawm vângin min hmu mahse eng hû ah vak an ngai lêm lo.




"Lazar in ve rawh"



Tihpahin Ropuia chuan Beer chu a pe a, Samkiri pawn alo ban ve mai, a ruih a awm dân ka hriat chiâng êm vângin ka tho a, beer chu ka va lâk sak nghâl.




Hrilh hai zeta min en hä tu chu ka kâi hrang lawp a.

"Enge a? Ka in ve duh tho alawm"


Thinrim hmêl zet hian a ti a, a chal a chuar deuh nâng mai.


"A tûllo, ka bulah lo chuan midang bula in a ngai lo"



Ka inrin hmâ chuan ka beer ken lai chu min rawn chhuhsak lawp a.


"Ka unaupa anga awm tum vêl lo mai teh"


Ti hlak pah chuan Ropuia te awmna lam chu a pan nghâl, ka zui leh ngat a.



A in tûr chu va lâk sakin ka tlâk zawh sak nghâl vek, a bûr chu chhuatah chuan ka paih ri pawp a, midang ho pawn an thil tih lai châwl meuh chuan min rawn en ta thap mai.



Jeneti pawn ka bânah alo vuan leh hman dêr tawh.



"Enge i hriat a?"




Zah hmêl zet hian ati deuh nâng nâng a,


"In a ngai lo ka ti ni lawm ni?"


In seh chilh rapa ka tih chuan a nui hak.


"Thiana, ka pêk a nia, iti âwm lo khawp mai"



Ropuia pawn alo ti, ka nui hak.


"Lo in rawlh suh"


Ka'n ti deuh hrâwk a, an thian ho chuan min rawn pan hnâi nghâl tual tual mai, ka lo rûi ve deuh tawh bawk nên ka thinrim lutuk chu ka sa pup pup thei nia, Sawisak hrep ka châk leh zek zek tawh, mahse kut thawh hmasa tu nih erawh ka tum hran lo.

"Ujeneti pawn a in tho a, enge kei ka nih vânga ka in loh bîk na tûr?"


"Nang techu a danglam"


Min chhân leh tuma a ân zuau lai chuan,


"Hetah chuan in tih buai ka duh lo, mahse enge Felfeli hi i thu hnuaia dah i tum tlat a, i tân i enge a nih?"



Chhân dân tûr ka hre lo, ni e, ka tân enge anih ka hre lo, engvânga ngaihvena, a beer in kha duh lo em em nge ka nih pawh ka hre lo.


"I hriat ve kher a ngai lo"



Ka'n ti leh tawp a,


"Lazar, in tih buai ka duh lo, zan in chu ka tlâwm mai ange, hawh sawtah sâwn va in kâwm ang"



Tih zawt zawt pah chuan Samkiri dârah chuan a vuan a, ka sa leh zak tawh,


"Khawih hlek suh"


Tihpahin Samkiri chu ka kâi hrang nghâl lawp a.



"Isak enge i hriat a?"



A rawn ti sa sa mai,


"Hêpa hnaih ah hian awm suh"



Ka han ti tawp a, keipawn achhan ka hre lo.


"Enge a pawi na?"



Ropuia chuan alo ti,


"Hepa hi hnaih suh Samkir, A hnaiha i awm hi ka duh lo"


Ka'n ti deuh tawp a, ka awmdân hi hrilh chawp ngai lo in ka hrethiâm tawh, kei hian Samkiri hi ka duh in ka hria.


"Engvângin maw? I rui a nih kha, haw tawh rawh"


A hmêlah chuan a ti mai mai lo tih ka hria, a kalsawn ta hmak a.



Thinrim zetin dawhkân a zu ûm chu ka lâ a ka tlâk pawp, ka kawchhûng chu a rawn sa thla pup pup thei nia, chhuatah chuan a bûr chu ka paih keh chuaih a, An lo tê that, Jeneti chuan ka bânah vuan in.


"Duhtâwk rawh"


Tap âw tiau hian arawn ti, min vawnna chu thing thlâ in Lalruatfeli inhnuai lama chhuk tûr chu ka ûm a, a bânah chuan vuan in ka pawt lêt sawk.


Ka kawchhûng atanga thinrimna rawn awm chuan min nawr nat êm vângin pawisak pawh min neih tîr thei tawh lo.


"A chhan min zâwta tiraw, ka hrilh ang che, hetianga ka awm chhan hi maw....kei hian ka duh che, Lalruatfel, i hria em? Kei hian maw...sâw pâ saw ka thîk lutuk"




Aw ki sâng zeta ka tih chuan che miah lo hian min en ta reng a, ka lû rawn hai deuh muai muai vâng chuan din pawh ka ding ngîl thei lo, thâwm reh duk chu insût ri hraih hraih chuan arawn thlâk a, Jeneti a ni tih ka hria, ka inthiam lo in ka zak takzet a ni.




"U Jenet, ih ka"


Tihpahin Lalruatfeli chuan ava pan hnâi a, kei erawh ka lo ngâwi tawp, a thleng tûr ang chu a thleng vek tawh tho.


"Min khawih hlek suh, Felfel ka nau ang tak takin ka en che sin, i lo tenawm khawp mai"



Tihpahin tap chung chuan a rawn phei hlawk hlawk a, ka bul a rawn thlen chuan mit meng ling hlara min en chung hian min bêng hawi sawk, ka rûi pawh ka harh kâwk in ka hria.



"Ka rilru in tihnat man chu in la hmu ve khawp ang"



Tihpahin step ah chuan a tlân thla ta nal nal a, boruak chu a rit tawh khawp mai, midang ho pawh chu Lalruatfeli mangtha sap sap pah chuan an haw ta diah diah hlawm a.




LALRUATFELI





Thutthlèng ah chuan thu in ka tap tawp, ka zak bawk si, mi zawng zawng hmâ ah lehnghâl, Laldini chu Ujeneti thlêm tûrin ka ti a, kan misualpa nên chauh kan awm tawh, ngâwi rengin inhnuai lamah chuan ka chhuk thlâ a, min rawn zui ve mai, a âw leh hmêl chu ruih hmêl viau mahse a kal erawh pai eih lo.



Inchhûngah a rawn lût ve chiah tih in alam ka hawi thut a,


"Haw rawh"


Ka ti ringawt, ngâwi reng hian min en reng a, ka zâm leh dêr tawh, nichin thil thleng kha lâwm tûr nge thinrim tûr pawh ka hre lo.


Hmalam hawiin ka in her a, ka room lam pan tuma ka pên chiah tih chuan ka hnunglam atangin hnehsawh zeta min pawt lêt dáwrhin a taksa lian zet chuan ka hnunglam atang hian min kuah hlup mai.



Ka tâl aih aih a, mahse awmzia awm lo, ka nghâwngah chuan a hmâi arawn phûm, aza lutuk chu ka lo îp châwih thei, ka mûr chem chem thei nia.



"Che miah suh"


Aw ki hniâm zet hian arawn ti a,


"Mahse....u Jeneti"




Ka sawi chhunzawm duh lo, ka ngâwi leh daih, ani pawh a ngâwi hmak, alam hawi chuan muangchâng hian min kuai her a, ka mitah tak chuan min en kur mai.



A rawn hnái tial tial a, ka lo maimitchhîng, min rawn fâwp ta, zu rim anam hak hak mai, ka thiâm ang ang chuan ka lo chhânglêt ve a, ka hnar thei ngang lo a ni, hepâ zûn hi pipu nuam tak ang mai a ni, ka uai delh delh mai, mî duh nán hun rei hi alo ngai lo a ni tih ka hre ve chiah, kan duhthâw sâwt ta khawp mai.



Hnehsawh zet hian min pawm kâng nawlh a.


"I â mi? Min dahthla rawh"



Ka ti vîn nghâl thawt, a nui suk duh lek chauh nia,


"Ka pâwngsual dawn che"


Nui chung hian a ti deuh sup a, ka lo tâl aih aih mai, thâwk leh khatah a phone a rawn ri thut, ka phu chiang ngang mai, a iptê a a phone dah chuan min phawrh tîr a, ka en chu Nu Sangtei alo ni, enge a chhan ka hre lo, inthiam lohna hlîr hian ka khat nia, a beng zâwnah chuan ka dah a, Loud speaker ka on nghâl bawk.


"Bawiha, i nau"



A rawn tap nia, mak tih hmêl zetin kan in enkar a, a hmêl chu arawn fîm kâwk in ka hria, rang tak chuan min dah thlâ a, a kut chuan a phone chu a dawm zui nghâl.



"Tinge ka nau chu?"


Kan ngaih chu a tha tawh chiah lo, a tap nasa bawk si.


"Bawiha lo hâw phawt teh, I nau hi tûn mai khân pawngsuala thah a ni"



Pa Muana âw a ni, a ni thei lo, ka mit sulh mai, ka hresual a nih tepawh ka ring hiâl a ni, Isaka chuan a hmâi tuai puatin thâwk ala hawk a.


"Kal phawt teh ang, lo chho ve mai rawh"


Tihpahin min kâi chhuak a, rang takin kan inphur chho nghâl.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 4:33 pm

An in kan thleng chu mî an lo tam khawp mai, mipui kârah chuan kan inhnawh lût ve tawp tawp a, Police motor leh Ambulance pawh alo awm, inchhûng kan lût têp tih chuan tap rî ka hre zui nghâl bawk, Inchhûng kan lût chu Nu Sangtei chu lungchhe zet hian alo tap râwih râwih a, tih hmasak mai tûr pawh ka hre lo, ka hamhaih lutuk a ka buai vek.



Nu Sangtei chuan Isaka chu rawn kuah a tah khum, a hnungah chuan ngâwi rengin ka lo ding tawp, Pu Joseph a (Isaka Putea) pawh police form nên a induang zar mai, An rilru anat hmêlin tûmah rêng an in be lo, an awm hmun theuh ah chuan an in dawm kun tlawk tlawk a ni ber mai.



"Felfel hetah hian lo kal lawk teh"



Pu Joseph-a chuan awki hniam ruih hian a ti a, Isaka arawn hawi vat, ngâwi rengin inchung lamah chuan ka zui chho ve ta tawp a, Balcony lama a phei pawh chu ka zui zêl, thil thlen dân min hrilh a tum pawh a ni maithei a ni.



Tap rî lah chu ka hre chhunzawm zêl a, Tap rî chu a tam tial tial ni mai hian ka hria, an chhûngte dang an lo thlen belh a ni maithei ni.



Pu Joseph-a bul ka thlen chuan alo in dawm deuh vang vang a, a tunu boral chu a tuar viau tepawh a niang, a âwm lo hran lo, Abi i khân a ngaina in an in duat bawk a,


"Bawihtei chu postmortem tûrin an lâ a"



Pángngai tak chuan arawn ti ve mai a, a âw a thian zui khurh,sawi tûr avâng duh kher mai.



"Felfel ka sawitûr hian a ti na dâwn che a, mahse i hriat ve ngêi a ngai"



Hrehawm tih hmêl zet hian ahan ti a, a hmêl atang chuan a sawi hreh takzet tih ka hre thei, ka bo hû mai.


"Han sawi la"


Ka chil ka lem khalh, zâm viau mahila ka hre châk êm a ni, chuti fako a ka natna tûr chu eng chiah nge a nih?



"Bawihtei pawngsual tu kha thu zawh fiah tura hruai a ni tawh a, mahse tlangvâl hawk lak thinrim in kut an lo thlâk nual hman a ni âwm e, En teh hethu sawitu nih pawh hi a hrehawm ka ti khawp mai, mahse ipa hi pawngsuala thattû a puh a ni a"




"Engtin maw?"


Ka tum loh deuh chuan ka ti ringawt, ni e, ka hria, a thusawi kha, ka hresual chu ni si lo, ka pa maw? Âwih awm loh lutuk, thil theih a ni lo,


"Tak tak ami? An puh mai mai tiraw?"



Ka âwih theih ngang loh vâng a niang mak ka ti lo a, ka thinrim in ka rilru pawh ana thei lo.



"Chu chu ka hre lo na in, I pa kha a hmu hnuhnung bertu a ni tlat si a"



Pu Joseph-a hmêl chu ka en reng a, hrehawm a ti tih ka hre reng, engtin nge a nih theih?


"Pa Muana ten an hre tawh em?"




"An mahni report zâwk hi a nia"



Ka nghîng dawt thei, sawi tûr rêng ka hre tawh lo, thudik a ni lo tih erawh ka beng tih tlukin ka hrechiâng.


"Ka pa chu hmuh ve ka duh"



Tap âw lek leka ka tih chuan min khawngaih hmêl zet hian min en vang vang a,


"Khua lo vâr phawt se tih dân kan ngaihtuah dawn nia"



Dam thlup hian a ti a, anih chuan Pa Muana te hian min haw ngei anga, heta awm ve reng nachi pawh a ni tawh lo, Isaka pawn a hre tawh ngêi anga, min hua angem? Ka pa mawlh chu, ka va han ngaihtuah tak, ka khawngaih bawk si.


"Felfel fin fiahna tam tak kan hmu a phat rual a nih ka ring lo"




"Aih, a ni lo, Ka pa tih a ni lo, a ni thei lo hrim hrim, dâwtin an puh a niang, khawngaihin ka pa chu min hmuh tîr rawh"



Ka ti nghâl mawlh mawlh a, ka mittui arawn tla nghál zawih zawih mai, ka dang thei ngang lo a ni, min khawngaih hmêl zet hian min en reng a, tah ka tum lo, mahse, ka pa hmêl ka mitthlâ ah alo lang a, ka khawngaih êm a ni.




"Hawh ka thlah haw phawt ang che, naktûkah i pa chu kan hmu dawn nia"




Dam thlup hian arawn ti a, ka chhâng lo, ka hnungah chuan rawn bêng thak thakin muangchâng chuan min chhuk pui a, ka pa tih a ni lo tih hre reng mahila tûmah ka en ngam lo, ka kal na tûr chiah en chuan ka kal thla zâl zâl ringawt, step a ka chhuk techu ka mittuiin ka thil hmuh a tih fiah loh vângin ka hmu chiang thei si lo, ka pal thla khat khat mai.





Common room ah chuan an lo awm nual tawh a, ka hawi chhuak ngam lo, Pu Joseph-a chuan hmanhmawh zet hian min hruai chhuak nghâl hlawk hlawk a, mipui lah chu an lo tam bawk si.


"Hei hi a fanu chu ni lawm ni? Khawih ve ila ni mai lawm"


An rawn tih chuan ka ding dat, ka hlau lutuk chu ka khûr ngawt ngawt thei, Pu Joseph-a kawr chu ka hmer tang tang a, thil thleng chu a pawi zia ka hrethiam telh telh ni hian ka hria.


Mipakhat hian ka bânah chuan arawn hmer chawt a, ka hriat ngai pawh a ni lo.

"Nang hi maw a fanu chu, ka khawih ve law law dawn che mawni le"


Hmusit zet hian min rawn ti anih chu, ka en tlawk tlawk ringawt, chutah Isaka chu inchhûng atangin arawn tlân chhuak a, a mit meng sen râm leh thinrim hmêl dur khup chu ka hmuh hmaih lo chiang kher mai.



"I khawih ang maw?... i ngam chuan han ti ta che"


Vîn thawta tihpahin chûpa chu a hnek thal nghâl thuai mai, midang lo awm ve ho chu an lo pâwr nghâl hlut bawk, Enge tih ber tur ka hre lo, ka mittui kâr atang chuan an in sual buai luai luai chu ka hmu fiah lo ruai ruai a, a then in thla min lo lâksak thûl, Isaka chu apa in inchhûng lamah a hruai lût a, Keipawh Pu Joseph-a chuan hmanhmawh deuhin kan in lam pawh min pan pui lo in ka pi ( Ka nu nu) te in lam min pan pui a, ka bîng mup mup reng mai, thil thlen dân hi a rang teh thut êm a tin ni.





Ka pi chuan min hmuh vêleh min lo kuah a, tap ri ngam chiah si lo in ka inhnît hlawp hlawp ringawt, ka pi âwmah chuan ka bei a, thu chiang tak pawh sawi thei lo in ka theih ang ang chuan thil thlen dân chu ka sawi ve nawk nawk a, ka thin zâwnah hian arawn inhnawh chho ut ut mai.




Pu Joseph-a haw hnu chuan ka pi leh ka pu techuan min tawngtai a, ka tawt lutuk pawh tlêmin a zia deuh,


Ka pi leh pu room a khum âwlah chuan ka mu ve mai a, tui taka mutthilh a har khawp mai, a khât tâwkin ka phone chu ka en a, Abi i pawngsual a nih thû leh thah a anih thû mai pawh ni lo in ka pa tih ngei angin an post chuah chuah mai, thuchiang engmah a awm si lo, ka rilru na lutuk chuan ka phone chu ka switch off ta ringawt a.



Ka muttui tlâkna ka beksam te thlengin a huh vek thei nia.


Khumah chuan ka tâl ka tâl reng a, ka mut a chhuak thei bawk si lo, a khât tâwkin thâwk ka la leh halh thin, Sana in khâwng ri tlak tlak leh fridge in on ri vung vung bâk hriat tûr a awm tawh lo, Sana ka en a, zîng dar 2 alo pêl hret tawh, tlaivâr law law chu ka tum ta ringawt a.




Khua arawn vâr tan thet thet tawh, âr khuang rî pawh ka la hre fiah khawp mai, school kal pawh ka peih lo, Mahse khawvâr hnu a ka pu thawh tuam tuam hnû chuan mut chhuakin min rawn zêm chiai chiai mai, ka khap ban tial tial a, ka muhîl ve nghâl.




____________



"Bawihte, harh teh i thianpa lo kal a nia"



Ka taksa chu arawn che dat dat a, ka meng kâwk, ka mit chu a bui ngang a niang men a hrehawm lutuk,ka lû techu arawn na ngut ngut mai, harsa tizet chuan ka tho a, ka taksa techu a châu in a zawi ngawih ngawih thei nia.




Phak chualin Common room lam ka pan a, thutthlèng sei a mipakhat lo thu ngâwi reng ka hmuh chuan ka phu deuh zawk, min rawn en a, a meng sen râm mai, sawi tûr mai pawh hre lo chuan ka ding ta reng a.


"Tikhân lo inkawm r'u, Bawiha te in lamah chuan ka han lang ve lawk ange"




Tihpahin ka pi chu a chhuak nghâl a, sana ka en chu dar 6 alo pêl âwrh chauh, darkar 2 pawh ka mu tling lo a ni maw,



"Thingpui i in duh em? Ka'n lum ange"


Tihpahin min chhân hma chuan gas ah thingpui ka chhuang a, ka hmai ka phih a, ka hâ ka nâwt nghâl, a ngawi reng a, min biak pawh a tum lo, ka hmai ka phih zo a, in hrûk mawlh mawlh pahin thingpui chu ka thlit sak a, a hmeh nên ka pe nghâl, ngawi reng chuan a lo la ve mai a.



Sawi tûr avâng khawp mai, pângngai thei ang bera ka awm theih nan ka in control nasa hlê bawk.



"I tha em?"

Ka en zawk, hmêl dul ruih hian min lo en reng a.


"Nang?"


Ka lo ti sap,


"Aih"

Min en reng chuan arawn ti,

"Keipawh"


Ka ti sap, ka tap leh mai dâwn in ka hria, kan boruak rit lutuk chuan thâwk ngaihna pawh min hriattîr thei lo, boruak tla chham ang mai hian ka awm.


Ka mittui rawn tla mai tûr chu a hmuh hlau in ka tho thut a, choka lamah ka phei ringawt, min hmuh hlau zetin dawhkán bawh chuan thâwk la kâwk kâwk a, ka ril a tâmin ka taksa lo chau bawk nen ka lû te chu a hai mup mup mai, ka mittui tei vet lah hi.


"Tap suh"



Zâwi supa rawn ti tu lam chu rang zetin ka hawi a, a mit meng a dul raih mai, rang zet chuan ka mittui ka hrû a, ka inrin hmâ in nghet zet hian min rawn kuah nghâl, a kawngah chuan lo kuah lêtin a âwmah chuan ka hmâi ka phûm a, ka inhnît nghâl hlawp hlawp ringawt.



"Ka pa tih a ni lo"



Tap chung chuan ka ti mawlh mawlh a,

"Ka hria, tap tawh suh le"


Dam thlup hian a ti a, mahse ka lung ati chhe zual sauh amaw tih tûr a ni,


Min kuahna chu thlahin ka biang tawn tawnah chuan a vuan a, chiang zet hian min en kar mai.

"Kal tawh rawh"



Ka lo ti sap, harsa ti zet hian thàwk ala hawk a, min kuah leh rih thin, kan hma hun chu a duhawmin a romantic dawn lo tih kan hre ve ve, Inzawmna siam si lo in kan in kalsan hlei thei lo ang tih mawlh chu ka hlau a ni.



Min kuahna chu thlahin duhthâw zet hian min rawn fâwp a, ka lo chhânglêt rang ngang mai, min fawhna chu a thlah leh a, kan chal leh chal chu intih sîk tîrin thâwk ala leh ham ham a, a awm dán atang chuan a tuar ve hlê tih ka hre thei.



"Ka kal ange, in enkawl tha la, lo tap tawh suh aw"



Ka lo bu nghauh nghauh a, a kal chiah chu ka ruak huai in ka hria.





Laldini'n min rawn bia a, school ka kal loh tûr thu ka lo hrilh nghâl, ka pi te inah chuan ka awm ta reng a, páwn chhuah chu a hlauhin ka hlau, thingtlâng a ni si a, in sawi neuh neuh kan la peih ve bawk si nen, tih tûr pawh ka nei lo, ka mu tawp, ka pa lah hmuh an phal bawk si lo, ka hma hun thim zia chu ngaihtuah duh lo viau mahila ka ngaihtuah lo thei si lo, mittui tla zawih zawihin ka awm zêl dan tûr ka ngaihtuah a, khawvêl tak tak ka hmachhawn ve a hun tawh tih ka hria, mahse keimah mai chuan ka hlau takzet a ni, ka pa tello in engtin nge ka hmachhawn theih ang? Ka hlau a ni, keimah mai chuan ka ngam hlawl lo.




___________



Tlai lamah chuan Pu Joseph-a'n Isaka te ina kal ve tûrin min rawn hruai a, hreh viau mahila ka pi leh ka pu ten kal tûra min tih deuh tlat vângin ka kal ve ta nge nge a.


An inchhûng ka lût chu a ni deuh ruih mai, a hmâ a in nuam tak, hmangaihna leh hlimna a khat kha lungngaihna in thâwk leh khata arawn thlâk tâkah chuan an in chhûng bungrua leh a mi chêng techu an hlui rup vek mai in ka hria, rawng chi hran hran mawi taka chei in kha tûnah chuan amawina hmuh tûr pawh a awm ta lo, pangpâr mawi tak tak chitin rêngin a hual in kha tûnah chuan khâng pangpâr tekha a chuaiin a vuai zo a, mawina rêng a nei ta lo.



Tûmân min be hran lo a, Nu Sângtei in hnît feih feih bulah chuan inthlahrung zetin ka thu ve kâk a, Hlimna a khat in ni thin kha khawhar In ti a thlâk alo ngai ta chuan kei pawh min tina takzet a ni, Abi i sulhnu tam tak la awm techu ka enkual a, naupang hmeltha hlim tak kha khawngaihna leh lainatna nei miah lo a sâwngbâwl a ni chu Nû tân chuan ava na dâwn êm, fa la nei lo mahila fanu ka nihna angin ka hriatthiam pui a ni, fanu ka nihna angin Ka pa pawi khawih tu a puh chu ka vênhima alam ka tan ve tho a ngai si, tui lai rapin ka awm a, khawi ah zâwk nge ka kal ang ka hre lo, ka mittui rawn sûr zung zung chu hrûk sên pawh a ni tawh lo.



Ka rin loh deuh maiin Nu Sangtei chuan min rawn kuah a, a tap hawm hawm mai, keipawh ka tap ve bawk,a thusawi chu hriat pawh ka hre mûmal thei lo.




___________


Rei fê kan tah hnû chuan inchunga balcony ah chuan ka thu vang vang a, ka pa chu hmuh a hmaichhan ngêi a biak ka duh a ni, zawh tûr ka ngah lutuk.



"Enge tah khân itih reng a? Lo kal teh"


Ka hnunglam ka hawi a, Isaka lek alo ni, rang tak chuan tho in ka zui lût vat a, a room lamah min luh pui nghâl, tlai lam anih tawh vângin zai tûr an awm lutuk tawh lo a, a reh tawh khawp mai.




A room ka lût chu a lamah chuan min pawt dâwrh pah hian ka chalah chuan a fâwp zauh a, nghet zet hian min kuah zui nghâl, ka natna zawng zawng tekha ka hrechang leh ta lo.



Ka hmûi ah chuan a rawn fâwp a, ka lo fâwp lêt ve nghâl.


Kawngkhâr a rawn ri rak, ka rei !!....Nu Sangtei chu mit meng sen râm chuan phâwk fê a min en chung hian alo ding reng a nih chu, ka la in lâk hran loh vângin rang tak chuan ka in la hrang vat a.



Ngâwi reng chuan rawn lûtin a fapa chu a pan ding chat,


"Ka thil hmuh kha enge?"


A âw chu a khûr dar dar a, a awka ring lo mahse a lawm teh chiâm lo tih ka hria, keichu ngâwi rengin ka kun tlawk tlawk reng a.



"Lalrinpui enge ka hmuh kha?"


A âwki chu a rin tan tawh khawp mai, Isaka Pitei arawn lang ve nghâl a,

"I hmuh ang kha ni mai"



Inthiam loh hmêl zet hian alo ti, a in seh ruh nasa hlê tih ka hre thei,


"I nau vângin nâ kan tuar a, nang hetah i nau thattû fanu chu hmangaih biahthû ilo in hlan pui vêl amaw? Nang hi ka fapa ini tak tak em?"



Awki ring zet chuan a ti tuar a, rilru nat hmêl zet hian a atap ta tlawk tlawk mai, a hmêlah chuan a chau takzet tih ka hria, puih duh viau mahila ka ngam bawk si lo, ka kut chu nghet zeta hûm chungin ka hmûi hnuailam ka lo pet fan fan a.



"Kei hi i nu ka ni em? Engtin nge i theih zawk?"


Isaka chu a ngâwi reng a, a nu chu vawikhat pawh a chhâng lo, mahse a hmêl erawh luhlul na in a khat thung, Pa Muana alo tlân chho a, thinrim hmâi sen tûn in a fapa kawr âwmah chuan arawn thâm zui a, chu zet chu ka hmu thei tawh lo.


A hmâ ah chuan va dingin Isaka chu ka kuah ta tawp a.


"Keima thiâm loh vek a ni, khawngaihin ngaidam rawh u"



Tap chung chung chuan ka ti mawlh mawlh a, chhuatah chuan thing thî in ka bawk thlawp,


"Tho rawh"


Isaka chuan a rawn ti tuar a, ka mittui kâr atang chuan Nu Sangtei chu beiseina a khat chungin ka en reng.


"Felfel, i pa kha ka haw lutuk, mahse nang chuan thiam lohna i nei lo tih ka hriat chiân êm vângin heta awm rih tûrin ka duh che a, Bawihtei ang chiaha en che ka duh a sin, mahse i thil tih hi chu a pawi khawp mai, in inkawm ngaih vang mai mai amaw ka lo tia, min lo bum nasa takzet a ni, engtin nge ka chungah hetiang hi itih theih zawk?"



Harsa tih hmêl zet hian arawn ti khûr hlak hlak a, ka chhâng thei lo, thingthi kun lap chung chuan ka tap tlawk tlawk ringawt.



"Hetah hian tumân an lâwm lo che, mahse ka fanu ang chiah a en che i nu hnênah ka lo tiam tawh avângin thlah thlam che ka tum lo, mahse ka fapa nên in inzawm duh dân hi chu ka pawm thei lo a ni"


Ka dem lo, ni e, an thlîrna atang chuan thil dik lo tak a ni, mahse tinge ka thinlung hi ana ngawih ngawih mai.



"Keima thiam loh zâwk alawm Pa, Nu, Felfeli hi keimân ka duh, ani chuan min lo pawm ve mai mai chauh zawk alawm"


Isaka chuan nghet deuh charh hian arawn ti,


"In kal thui hma in tâwp rawh u, tleirâwl mai in la nih kha, hmangaihna awmzia pawh in la hre lo"



Bak deuh hlar hian a pitei pawh chuan alo ti a,


"Lalrinpui, Ka fapa inih chuan i pitei thusawi kha zâwm ang che"

Pa Muana pawn arawn ti ve ta, zâwi thei ang ber chuan ka lo inhnît feih feih ringawt.



"Ka hrethiam lo a eng ber chu nge in pawm theih loh chu?"


Isaka pawh a awki arawn sâng sâwt khawp mai, a pi leh a pu pawh an rawn lang ve nghâl a.


"Inthen nghâl rawh u chu chu ka thu tâwp a ni"


Apa chuan nghet charh hian a ti ta, an sawi âwm rêng a ni.


"Ka thei lo"


Isaka chuan rang zet hian a lo ti,

"Lalrinpui ka"


Tihpahin a fapa chu a tin deuh uaih a, rang takin ka tho vat.


"A tawk tawh, Tleirawl mai an la nih kha, khatia in tih techuan an nghet sauh mai tur a sin"



A pu chuan alo ti ve a, ka mittui chu ka lo hru ve mial mial bawk, Isaka chuan ka kut chu rawn la in nghet zet hian a hûm zui a, tâl thlâk ka tum pawn a hûm nghet zual sauh nia.


Nu Sangtei chuan chu chu lo hmu in pawi tih hmel zet hian a tap ri leh hak a, A pitei techuan an kuah chhuak ta daih a, a pi leh a pu chauh an awm tawh.



"Felfel, zu haw phawt la, hei Bawihtei vanduaina vangin rilru fîm pawh kan la hmang thei lo a, Bawiha zu thlah haw leh phawt la, Tha te te in kan la sawi dawn nia"



A pu chuan dam thlap hian a ti a, an chhuak zui nghál mai, ngawi reng chuan in kâi chungin kan ding dûn vang vang a,ka kut chu nghet zet hian a hmer ngar ngar reng ringawt.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 4:33 pm

Boruak reh duk kâra hrehawm tih hmel zeta thaw chhuak hak hak rî chu ka ngaithla kar reng a,


"Ka thlah ang che aw"



Dam thlupa rawn ti tu hmêl chu ka mittui tlingpam kâr atang chuan a fiah lo ruai mai, bûk nghauh nghauh pahin ka maimitchhîng a ka mittui arawn far lehnghâl, muangchâng chuan min kâi chhuak a.



Step a kan chhuk lai techuan tûmah pawh ka en ngam leh ta lo, kun ngal chungin kan chhuak ta zâl zâl a,



Bike ah chuan muangchâng in kan in phur, thlasik anih tawh vâng nge a vawt deuh sûk tawh mai.


"Khawi ah emaw kal lawk ang"




Tihpahin a in her kual thut a, ka chhâng lo, ngâwi rengin min phurh dân ang ang chuan ka lo awm tawp.


"Min vuan nghet rawh"


Tihpahin ka kut chu arawn la a, a kâwngah a suih zawm, a hnungah chuan ka lo bei hlê hlê tawp.




Kan khaw chhak tlâng lama awm building hlui tawh lam ruak deuh ah chuan min hruai a, current pawh alo awm ve ngêi, a êng lutuk lêm lo, thlâ a êng dul raih a, a romantic ru riau, lungphun pahnih lo awmna lam chu ka kuta vuan reng chung chuan min pui a, lungphun nghêng chuan min thutpui nghal, ngâwi rengin a kekawr iptê atang chuan cigarette a rawn phawrh a, a pak khu nghâl hlat hlat mai.



"Enge hetah hian tinge kan kal? A pi ten min lo ngaihtuah ange?"



A jacket a pawh pah chuan ka ti deuh nâng nâng a, min ngaihtuah ka rin lutuk vâng pawh a ni lo, ka hlau deuh tlat, a hrân duh hmêl si, light lah chu thli thâw in a chhêm chêt tih hriat zet hian a in thên lauh lauh lehnghâl.



"Pawl 12 ka pass chuan Doctor zir tûrin Kolkata ah ka kal a ngai dawn a"




A mit meng dul raih chu ka en vang vang a,


"Engtia rei?"


"Kum 5 "


Tih zawngin min chhâng, thlakhat pawh rei ka lo ti rilru a, kum 5 em em techu kan in theihnghilh hman daih ang.


"Hetah i zir mai thei lo mi?"


"Ka pa in a rem ti lo ang, Psychiatrist lam a ni sia"



"A rei e"


Ka han ti leh ringawt a, kan thû lo dûn ropui mai sia, kum 5 a nih chuan kan intheih nghilh hman ang, a zu zirna ah hmeichhe hmeltha tak tak leh fing tak tak an tam dawn si a, hmangaihna vânga in zawm kan ni si lo, kan rinawm reng thei dawn lo tih ka hria.


"Tlânbo daih ang hmiang"



Ka nui hak, keipawn chu chu ka duh ve rum rum mai, mahse tlânbo ta ila ka pa engtin nge a awm ang? A duhthusâm ber nurse ka ni thei dawn lo, Ani tan pawh, tlânbo chu thil âtthlâk tak a ni tih ka hria.


"Ihmaw....Kan pahnih hian inzawmna siam lo law law mai ang, tichuan tûmân buaina kan nei lo anga, chu chu a tha ber"



Nui lui sakin a hmêl chu ka en a, min en leh vung vung tawh,


"I duh dân maw?"


Min chhâng dawn lo maw ka tih hnû ah arawn ti chhuak ve hlawl mai.


"Ka hre lo, mahse thil tha ber a nih ka ring"



Ka lo ti chuai raih, dik tak chuan ka ui, ani ang mipa hi ka tawn leh tawh pawh ka in ring lo, mahse kan tân a thil tha ber tûr ka ngaihtuah ve a ngai tlat, naupang chhia ka ni tawh lo a, chutiang bawkin ani pawh, thil chhia leh tha hre rual ve ve tawh kan ni a, kan duh dân chauhin kan awm thei bîk lo.



"Kan inthen dawn tihna mi?"


Ka lo bu nghauh, van lam hawi chuan ka maimitchhîng vang vang a, a tho sut sut rî ka hriat vâng chuan ka meng zawk, a hmêlah chuan a thinrim tih ka hria, engmah ka zawt duh lo.


Mipa rual tawng thâwm ka hriat rual chuan ka hawi kual nghâl hrak hrak a, Building chhûng atang chuan tlangvâl 3 vel hi an rawn pai chhuak nawk nawk mai, an rûih zia chu hai rual a ni lo.


"Ehe kha tah khân enge in tih a?"


Pakhat chuan rawn ti hû a, din pawh a ding ngîl thei lo, Chhân en ah pawh kan en loh vâng chuan kan ngawi ta reng a.


"Haw rawh u, hetah hian awm phal a ni hleinem, in inngai zawng a ni maw"



Pâwr zeta tihpahin an pathum chuan min rawn pan a, ka hlau deuh, an sual hmêl hlawm si.



"Hawh, kal mai ang"



Tihpahin ka ban ah chuan arawn vuan a, kal mai ka tum chu ka ban leh lamah hian tu emaw hian arawn vuan chut, ka hnunglam ka hawi a, zurûi pa khân chiang zet hian min lo en.


"Ehe!...hei chu pawngsualtu fanu kha nih hi"


Min kawh hû pah chuan ati bûi bûi a, ka zak lutuk chu ka lo kun nghâl vat,Isaka Jacket ah chuan min kaih lohna lamin ka vuan tang tang ringawt.


"Enge hetah itih? I pa i chhûn a mipa te itawm pui vel a ni maw?"



Isaka chuan min rawn pawt hrang dâwrh a, a hnungah chuan ka tawm kâk mai.


"Buaina kan duh lo khawngaihin min kal tîr rawh u"


Tihpah chuan a bike awmna lam chu min pan pui nghâl dâwr dâwr a.


"Hey thiana, Nangpawn dîm vak suh, a pa pawh tiangkhân a che a, Dim vak a ngai lo"



An la rawn ti lûng lûng mai, a ding dat, ka kut chu thlahin thinrim hmêl zet hian a lêt leh a, a laia lo ding chu ava hnek thal nghal thuai mai, ka rin sa rêng a ni, an khawih rawn nghâl a, an ruih tawh vâng aniang an che thei lo, An pathum chuan a thing phar vel ni mai hian ka hria, a khawihna dâwn riau a ka hriat vângin ka va tlân phei ve nghâl.



"A tawk kal ang"




A dâra vawn pah chuan ka ti a, tâwp chat, min rawn en vut, a rawn tho a, a kal pah chuan ala pêt hrâm nia, tikha chuan mî min hmuh dân pawh ka hrethiam ta uar uar mai, theihnghilh vek ka duh na a, an thusawi tekha ka bengah hian ari nawn awn awn mai, ka mittui rawn tling pam chu a rûkin ka khap lêt fak fak a, ngâwi rengin bike chu a ti nung a, min en reng tih ka hriat vângin ka kun ngal thung.



"I tap ami?"



Awki hniam ruih hian arawn ti, ka lû ka lo thing vat, ka hmûi ka pen fan fan a, ka tawng chhuah chuan ka baw hawk dâwn tih ka hria,


"Lo chuang rawh"



Ati leh tawp a, ngâwi reng chuan ka chuang, a kut chang hnunglam chu alo thî ser ser mai, ka ngai mawh riau, ana viau ang.




___________




Kan in lamah chuan min hruai a, enge a chhan ka hre lo, mahni pawn ka riak ngam tho a, pawi tihna ka nei lêm lo, ka pa hi zan lamah a duty fo thin a, mahni a riah chu ngai ah ka nei tawh, bâkah tunah tak phei hi chuan mahni awm ka duh rih, min rawn zui lût ve in kawngka a kalh ri rak, mahse ka hre lo der tlat thung.


"Feli"




Ka mittui ka hru sawk sawk a, ka hnunglam ka hawi,


"Kan inthen dawn tak tak ami?"


Vawt deuh raih hian arawn ti a, a hmêl vawt raih chu ka en reng.


"Ka hre lo"


Ka ti leh tawp, min rawn pan hnâi hret hret a, min chhuk en ta rûn mai, ka lo en tha ve ngam miah lo thung.


Ka chal ah chuan arawn fâwp zauh a, ka lo mûr seng seng mai, thâwk la hawk pahin min rawn kuah a, ka kuah lêt ve lêm lo.


Min kuah nghet tial tial mai, keipawh ka insûm thei tawh lo, a kâwngah chuan ka lo kuah ve a, ka tap lo, mahse ka mittui erawh a luang ngiai ngiai tho.


"Ka ngai ngawt ang che"



Arawn ti sup, ka tap chhuak teuh asin, ka insûm nasa lutuk chu ka thâw a chham têp hian ka hria.


Ka biang tawn tawnah chuan vuan in duhthâw zet hian min rawn fâwp a, ka chhânglêt thei lo, ka tap tawp, a tih ngaihna hre lo chuan min thlah a ka chalah techuan a fâwp leh vang vang thin.



"Kal tawh rawh"


In sût hraih hraih pah chuan ka han ti a, ka rin loh lutukin min pawm nawlh, choka a dawhkânah chuan min nghat a, rawn kûn hniamin min rawn fâwp leh, muangchâng hian min rawn fâwp a, a dîm kher mai, mahse ka tân erawh a ril raih thung, hei zet chu tawrh har ka ti, ka insûm thei ta bîk lo, muangchâng chuan ka lo chhânglêt ve nghâl a.



Ka kut chu a dârah chuan ka lo suih zawm nghâl, ka nghâwngah techuan a fâwp thla dan dan a, a duhthâw tial tial mai, ka kawrlum hák chu a kut vawt zet hian zen chho in ka âwm bâwr chu a kut lâwng hian arawn hup chat, ka lo îp châwih thei, nuam tihna leh rilru natna in pawlh chuan pawisak pawh min neih tîr thei tawh meuh lo, ka kawr chu hneh sawh zet hian hlîm chho in a ka lum thar thar chuan ka âwm bâwr laia amî tak, lian vak lêm lo tak chu arawn fâwp a, ka hmûi hnuailam ka lo pet fan fan thung.


Ka kawrlum hâk chu hlîm thla leh in ka kawr chhûngah chuan a lû chu a thun ta daih a, hrehawm ti deuh siin awm mahila ka hnar phal bawk si lo, hetiang êm a thlêmna nasa hi ka la tâwk lo a, do zawh ngaihna rêng ka hre lo pawh a ni mahna, rilru a hlauthâwng ru et et siin ka taksa chuan nuam a ti tho bawk si.



Min rawn fâwp leh a, ka lo chhânglêt uar vei tân tân khawp mai, min pawm kâng leh nawlh a, ka room lamah min pawm phei, kan in fâwp pah reng bawk.




A jacket a phelh a, a t shirt a phelh zui nghâl, ka lo hnungchhawn vat a, zah chî ni lo mahse ka zak ru tho, ka hnunglam atang chuan ka sam hnawk niai chu ka dâr lehlamah hûi pheiin ka beng bulah chuan arawn thaw lum hak hak a, ka lo mûr leh sung sung tawh.



Ka kawrlum chu muangchâng hian a hlîm chho a, keipawh ka lo inhawng khawp mai, ka kawrlum chu awlsam takin kan phelh dûn a, ka hnunglam atang chuan alamah min pawt hnâi deuh sawk, kan taksa ruak lai a insîk chiah chuan engtin emaw hian ka awm, a pangti lum chuan min ur deuh ham ham thei nia, ka nghâwng vêlah chuan a hmûi chu a nawr dêt det a, ka bra chhanah chuan ka âwm bâwr chu a thâm pah tâwn tâwn bawk.



"Hei hi a dik lo, duhtâwk ang"


Aw khûr dar dar a tihpah chuan ka in la hrang nghâl vat, ka rin aiin a taksa chu a lian tha daih, ngâwirengin ka bânah chuan a vuan a, alamah min pawt hnâi dâwrh mai, hnehsawh zetin ka bawp pahnih chu a chawikâng a, a taksa ah chuan ka lo khawkherh vat.


Bangah chuan min nawr betin hnai zeta min en reng chung chuan a nui suk a, min rawn fâwp zui nghâl.


"Min ring rawh, ka tina dawn lo che"



"Aih, a dik lo, in ngaizâwng fumfê pawh kan la ni lo a, bâkah kan inthen dâwn"



Ka tih mawlh mawlh lai chuan min rawn fâwp leh, a dâr ah chuan ka bêng taih taih a.


"Kan inthen dawn lo, ngawi mai mai rawh"



Tih hluk pahin ka khumah chuan min mut a, min bawhbet nghâl ûl mai,



"Aih, kan la thianghlim ve ve, hei chu a dik lo"



Tâl aih aih pah hian ka ti a, a nui sak mai, avan hmeltha chiang tak.


"Ka vawikhat na a ni tawh lo"


Tih nghut pahin ka nghâwngah chuan a hmâi arawn phûm a, a thaw chhuak ham ham mai.


"Enge awmzia?"


Ka lo ti hû, bialnu a neih ngai ka hre si lo, U Jeneti nen khân an lo ti hman a mawni le?


"Ka ruih laiin ka che sual tawh a, vawi hnih lai"


Ka sa deuh zak, tinge chu chu ka hriat ve miah loh? Ti ila min hrilh nachhan tûr a nei ngai lo hrim hrim bawk a.


"Engpawh ni se tho teh"



A tho duh chuang lo, ka bra chu hnehsawh zet hian a phelh a, a chêt dân chu ka haw tlat, ka lo in hup tât tât a, mahse awmzia awm lo.



Khumah chuan kan inbuan ta thian thian mai, a mipa zâwk na na na chu hneh tû zâwkah a tang ta, hetiang hi ka la tawng ngai lo, ka taksa leh rilru atanga châkna rawn awm vâng chuan ka inphal zau sâwt khawp mai.


A mit meng de sar sar chuan min en a, a nui leh sak sak thin, nui mahse a chhûngrilah erawh hliam na tak a tuar ve tih ka hria, mipa a ni a, hmeichhia te angin a tapin a natna te a sawi lo mai zâwk a, mahse a awm dân tûr hi ka hrethiam tlat a ni, ka khawngaih ve leh chhâwng zawk.


Ka taksa a hliam na nasa tak chuan ka mittui a ko chhuak a, ka hmûi petin ka tap feih feih mai, Pasal ka neih hmâ chu ka thianghlimna hi ka vawnghim reng ang ti a Pathian hma a ka lo intiam thinna khum ngêi ah chuan ka thianghlimna ka hlauh ta, inchhîr in awmzia a nei lo tih ka hria, ka rilru in a duh ang ang chu tih tawp mai ka duh a, ka ti rêng bawk a, nakin hun tûr engmah ngaihtuah ka duh lo, ka ngaihtuah phal lo a ni zâwk mah.



Chauh hmêl zetin ka sîr lamah chuan arawn bawk thlawp a, a thlan tuiin a bual huh hlap mai, a ha vâr sar mai lang vek chuan arawn nui a, ka lo kiai ve sak, ka châu lutuk, ka na bawk.


"Ka tina che em?"




Min kuah hlê hlê pah hian a ti sup.

"Mmm.."

Ka lo ti chuai raih a, ka chalah a rawn fâwp zauh, a biangah chuan ka han fâwp ve zauh a, kan in nuih var var ringawt.


"Inthen lo ang aw"





Thutak zeta arawn tih chuan ka lo bu nghauh nghauh a, a âwm lum thur thur nghêng chuan ka muhîl nghâl hmak.




ISAK LALRINPUIA




Bungbêl ri rak rak chuan min ti harh zawk a, Feli khumah ka lo la mu reng chu niin, a room a bathroom ah chuan a zualpui chu ka inti fai zawk zawk a, hmanhmawh taka in ka in ha a, ka chhuak ve nghâl.



"Haw tawh rawh, an lo ngaihtuah ang che"



Min rawn en a, a nui sak, a lâi deuhin ka hria, a biang tâi deuh têkah chuan ka chuk zauh a.


"Anih ka kal mai ang aw, vawiin school i kal dawn em?"


"Mmm...nang?"


"Aw"


Kan in nuih sak a,


"Anih ka rawn lam ang che"


Tihpahin ka chhuak a, kan in lam pan chuan a thlawh in ka thlâwk haw nghâl.





In ka thleng chu chaw ei an lo peih dêr tawh,


"Nizanah tinge i rawn haw loh?"



Ka nu chuan min enkar hian alo ti a, nimina an chêt dân vângin ka la lungâwi chiah lo nên chhâng lêm lo in ka room ah ka lût a, ka inbual nghâl.




Shower a ka in phuh lai chuan nizâna thil thleng techu ngaihtuahin ka nui leh suk suk thin, nuam ka tiin Felfeli chauh ka rilru leh ka thinlung zawng zawngah hian a awm tawh.


Ka inbual zo chu ka uni form ka in bel mawlh mawlh a, ka nu arawn lût, melh pawh ka melh lo.



"Chaw i ei dawn lo mi?"



Arawn ti chuai raih a,


"Mmm..."


Tih zawngin ka chhâng.


"Nimin khân ka thinrim deuh thut a, Felfeli chu a tap nasa viau em?"



Ka nu hmêl chu ka en a, a ngaihtuah hlê tih ka hre thei.

"Tap nasa, mahse a kiangah ka awm reng, amah hnêm tûrin"


A mita en reng chung chuan ka ti a, a inthiâmlo hmêl chu ka hmuh hmaih hauh lo, a mit atang chuan mittui bawk ka hmu leh tawh.


"Bawihte, ka tihpalh takzet a ni"


A tap chhuak hak a, min rawn pan in nghet zet hian min rawn kuah, ka kuah lêt ve lo thung, he hmeichhe pahnih te hi tinge ka bulah hian an tah ziah le? Ka nu mittui hian ka rilru a ti nêm in mahni inthiam lohna nasa tak min neih tîr a, Khâ hmeichhe mittui kha chuan min tina a, amah khawngaihna in ka khat thin, an mittui tla ka hmuh duh ngai loh, englai pawha nui reng se ka tih thin hmeichhe pahnih te hi ka hmuh laiin an tap fo reng a, ka rilru an ti hah in ngaihtuahna fîm pawh min hman tîr thei lo.



Ka nu chu in la hrangin a in hru fap fap a, muangchâng chuan a chhuak leh mai, ka nu chhuak chu ka en zui vawng vawng ringawt.





________



Feli te in ka thleng chu alo in kalh bam mai,


"Ehe alo kal tawh alaw?"



A thiannu Laldini nên pawh an kal dun lo,


Ka phone message tone chu arawn ri tlang tlang a, rang takin ka en, Feli number atangin a ni.



"Mahni a in ngaihtuah pah ka duh sia ka kalsan mai che u, Dini nen khan lo kal dûn mai r'u aw, School ah ka lo nghak ang che u"



Tih hi alo ni, Laldini chu ka hmuh a, kan pahnih chuan school lam pan in kan in phur chhuak ve nghâl a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 4:33 pm

School kan thleng chu Feli thutna alo la ruak hiai mai, Laldini nên chuan mak kan ti dûn viau.


"School compound velah ala tei hawi aniang"



Awlsam zeta tihpahin a thutna lam chu a pan a, ngaih tha zân lo chuan keipawn ka pan ve nghâl, ka bag ka dah a, pawn lamah ka chhuak daih, Basketball an khêl en pah chuan ka zawngkual ru deuh a, hmuh tûr rêng a awm lo.



Gate pâwna car lo ding chu ka en vang vang a, ka pa car ni tlata hriatna ka nei, mak deuh maiin chu car atang chuan Feli arawn chhuak a, ka pa pawh arawn chhuak, engemaw sawi hian an in be mial a, hlauhthâwn rûkna in ka khat nghâl.




Gate phênah chuan dingin an thusawi hriat tum chuan ka beng chu ka chhi kar a.


"In inkawp reng thei dawn chuang lo a, tûna i tih tâwp hi a tha zawk, ipa chu a chhuah theih nân hmâ ka lo la dawn nia"



Ka pa chuan a ti dap dap a, an thusawi awmzia chu ka man nghâl kuar kuar mai.



"Ka kal tawh ange"




"Awle, tha deuh khân lehkha zir la, i zirlai ah rilru chauh pe la, Bawiha pawh i theihnghilh thei em em ang"



Ka thinrim na so sâng lutuk chu ka inhûm ruh nasa ngang mai, ka pa motor kawngkhâr inkhâr ri khap ka hria a, a tlân chhuak zui nghâl vung vung mai.



Feli pawh rawn luh tum chuan kun ngal hian arawn kal phei hnak hnai a, a kalna tûrah chuan ka lo ding chat, ka âwm chu na vak lo hian arawn tauh dat a, mit meng ling hlar hian arawn hawi chhuak, a mittui alo tling pam mai, min hmu chiah chu a hmêl a danglam deuh.


"Ka pa khan enge a sawi?"


A mita enkar chuan ka han ti a, thâwk ala hawk.


"A pawimawh lo, Isak apawi ka ti khawp mai, kan inkâr chu ti hian a tâwp ni mai rawh se"




A âw chu a ring lo, mahse ka bengah chuan a khâwk rum rum mai, hmanhmawh zet chuan classroom lam a pan a, ka kut hûm ruhin ka ding khawng reng ringawt.


Khawpui arawn ri dur dur reng a, khua a dul nghâl ruih mai, a tawngkam khat lek khân engtiang chiahin nge min nghawng nat a hre lo a ni ngêi ang, nghet zeta in hûm ruhin class room lam ka pan dâwr dâwr a, Ka pa khân a rilru thlâk danglam sak hmakna turin sawi a nei anih ngêi ka ring, hetianga a awm ringawt na hian chhan tha tak a neih ngêi ka ring tlat bawk.



Class Room a Lalruatfeli min hnungchhawn zawnga lo ding chu ka lo thinrim sa tawh nên na zetin ka kuai her lawp a, midang lo awm ve tepawh ka zah zo tawh lo.



"Engvâng nge? Sawi rawh engvâng nge?"


Ka awrâwl tâwpa ka tih chuan class room chu a khâwk rum rum mai, an reh diak a, min en thap, mittui tling pam a min en tû chu thinrim zetin ka melh reng a, a mit meng fîm kâk chuan engemaw sawi châk deuh neiin ka hre tlat.



"Sawi ta che, Ka duh lo, ka pawm ve thei lo"


A dâr tawn tawna vawn pah chuan ka ti tâwn tâwn a,ka thing deuh nawk, ka thinrim ka kawchhûng sa hut hut chuan ka thâwk ati chham mai dawn in ka hria,


"A tawk thian a, a tâwk tawh e"


Tihpahin midang ho chuan min lo dang sap sap hlawm a, Lalruatfeli erawh chuan a bianga mittui luang ngiai ngiai chung hian min en rum deuh âl mai.


"Ka sawi ang kha ni mai, a tâwk tawh, khawngaihin duhtawk rawh"



Aw khûr dar dar hian arawn ti chang fak a, mahse ka la duhtâwk ve thei tlat lo, A ban rêk ah chuan vuan in ka chhuah pui nghâl hlawk hlawk a, a tang eih lo, ka kaih kual ang ang chuan alo awm tawp.




Bike ka ti nung a, a kun lap reng mai.



"Chuang rawh"



Ka bike steering chu ka hriat loh laiin ka lo hûm nghet kher mai, muangchâng chuan arawn chuang taih taih a.



Chak zetin ka tlân chhuah pui nghâl, enge a chhan ka hre lo, ka kawchhûng a thinrimna leh natna rawn in tuam chho hlup hlup chuan pawisak pawh min neih tîr thei lo, a thlawhin kan thlâwk ni maiin ka hria.




Reiêk tlâng lamah ka tlânpui a, a hlâu a niang ka uni form coat chu nghet zet hian a hûm ngat ngat reng mai, kawng a tha bawk a, kan thleng titih nghâl.





Ngâwirengin tlâng lamah chuan kan chho dûn a, sawi tûr avâng ve êm a ni,



Khua a dur bawk a tu vak mah an lo awm lo, tlâng chhîpah chuan dingin kawl kila chhum duk zet kâra nî in a rawn chhun êng phêt phêt chu ka thlîr reng a, Ka thinrim na leh rilru natna te min hriatpui ni âwm fahran in khawpui techu a ri dur dur reng a, ruah erawh ala sûr êm lo.


"Engvâng nge?"


Kâwlkil êng phût mai en reng chuan ka ti sup, a chhânna tûr chuan min ti na dâwn tih ka hriat vângin ka chil ka lem khalh.


"Ka lo ngaihtuah chiang lo a tin ni, Isak keimah chauh in ngaihtuah thei ka ni lo"



Min rawn en a, a tap tawh lo, a mit meng fîm kâk pawisawi lo zet chu ka en tlawk tlawk ringawt, a thusawi awmzia pawh ka hria, ka hrethiâm vetho, a mipa zâwk ka ni a, ka thei lo zâwk chu keipawn hrehawm ka ti, mahse ka thei lo, ka thei lo a ni tawp, ngaihtuah pawh ka duh lo.



"Ti suh, a harsa ang tih ka hria, mahse ti suh, ka thei lo"



A mit meng pawisawi lo zet atang chuan mittui a rawn tling leh pam tawh.


"Ka tihpalh a ni, a hrehawm emai"



Tah insûm zeta a tih chuan ka insûm thei lo, nghet zetin ka kuah nghâl a, rang zet hian min nam sawn nghâl lawp mai.


"A tâwk, ka peih tawh lo, buaina neih reng hi ka peih ve lo, rilru na renga awm ai chuan Ka dam chhûnga mal taka awm pawh ka thlang zawk, I nu nen pawh kan inzawm na a chhe vek tawh, nangmah vâng hian, nangmah vâng vek"


Aw khûr hlak hlak hian a ti a, a mittui a hru nghâl fap fap mai, kuah leh ka tum a, min lo sual lêt, ka kuah lui ta tho a, mahse ka âwm vêlah techuan a chûm taih taih mai.


Min nam deuh sawk sawk a, ka tawlh hnung ve dâwrh dâwrh thei, lungthîl lo awm chu ka rap pial palh hlauh mai, ka hnunglam phûlah chuan ka hnung tlûk thlawp, ka la kuah reng vângin amah pawn min bawhthlu ve nghâl rawk rawk mai.



Ruah mal a rawn tla nghâl fap fap a, ruah mal chu a tla lian telh telh, a rawn tla tam tial tial a, a rawn sûr zui nghâl.


Ka âwm zâwna tap khûr dar dar chu ka kuah a, kan huh vek tawh, Ruah sûr chu remchângah lâ in van lam ka hawi a, ka mit atangin mittui arawn luang, ni e, ka na, ka takzet a ni, heti êm a ka tuarna hi keipawn mak ka ti zawk.


Maimitchhîngin ka âwm zawna in hnît hlap hlap chu nghet zetin ka kuah a, phûl chungah chuan kan mu ta reng, ruah lah chu a tla tam tial tial mai si, kan huh tawh sa sa, thawh tum na ka nei tawh lo.




"Lalruatfel"


Zâwi zet chuan ka ti sap, arawn tap chhuak hak a, ava han hrehawm tak êm, hei hi em ni Hmangaihna ti a an sawi thin chu? Tu emaw, hlim se kan duh a, chân hlâu ngawih ngawiha awm hi Hmangaihna a nih ngâi chuan, Keipawn Lalruatfeli hi ka hmangaih, ka hmangaih takzet a ni.



Mahse ka hmangaih che ka la ti ngam chuang lo, keimah leh keimah pawh hi ka in ring zo tawh lo a ni ber.



LALRUATFELI





Ka theih tâwpa ka inbun ruah hnû chuan ka thâwl hawk mai, mahse ka chhûngrilah erawh tû hriat si loh in hliam na tak ka tuar a, Thinlung nâ lo hrehawm zia hi âw, kan damloh chuan damdawi te eiin kan in ti dam leh mai a, mahse ka thinlung hliam damna tûr erawh ka bulah awmin ka ban phâk mai amî ni mahse chu damdawi chu lá in ka ei ve thei tlat si lo.



Ka uni form huh hlap chu bike a khalh chak lutuk zârah thlî in a chhêm ro thuak mai, engpawh thleng se ka rilru sawh sawm ka tum lo a, ka thinlungin a duh pawh tih danglam ka tum hran lo, thup erawh ka ngai nasa viau ang.



Ka inbual lai techuan Pa Muana thusawi chu ka ngaihtuah lêt vang vang a, Isaka hi ka thlah anih chuan ka pa chhuah zalen a in tiam a, Abi i tawh sual tawhna kha chhui tha leh tûrin ngen a tum bawk, A thusawi chu ka pawmpui thlap, ka pa jail atanga a chhuah theihna a nih dawn phawt chuan Vawi sang tam tak pawh kalsan ka in huam, mahse ka thei angem ka hre lo.



Ka chhûngril natna techu hun in a liampui mai ang tih chu ka in hnemna neih chhun a ni, Tleirâwl mai kan la ni a, mahnî a thuthlûkna siam tûr êm chuan ka la ngam loh mai bâkah ka duh lo bur.




Ka inbual zo chu ka phone ka en a, Isaka message alo tlar dul mai, ka seen lo, ka clear pawp a, a number ka block nghâl, hun a rei anga ka la theihnghilh ve mai ka ring, Ka inhnemna chu a derthâwng viau na a, mahse ka tum chhin tûr a ni dâwn lawm ni?.



Ka thianghlimna hial ka hlan tawh chu ka theihnghilh mai mai tawh dawn lo, ka hria, hei hi ka hre bawk, ka thinlung zawng zawng amah ah khân ka pe a, Kan thawnthû tâwpna chu a tâwpah hlim takin an awm a, tih aiin hlim taka awm tûrin an in kalsan ta tih hi a ni, ka ngaihtuah zâwng pawn ka na vawng vawng mai, khumah chuan ka mu thlawp a, muttui in ka bek vel chu a rawn luan huh nghâl, ka chau a ni, ka khawi lâi pawh hi a na vêl vek.


Khum laizâwla huaisen tak kha harsatna paltlang a ngaih meuh chuan ka huaisen zo ta si lo, ka tlâwm chiang kher mai, rilru mumal pawh pu thei lo in a mut na hnû ka khum kil lama bang ruak chu ka melh reng a, engtin nge a awm ang? Keimah vângin sual lam kawng a zawh loh hrâm ka beisei, rizai chuan ka hmui chu hupin zâwi thei ang ber chuan ka inhnît hlap hlap a, ni e....ka na a ni, Hlim se ka duh em em kha ka tello a ahlim tûr ka ngaihtuah ringawt pawh hian ka â thei mai dawn in ka hria, Hei hi Hmangaihna a nih ngai chuan, keichu hmangaihna a tluanglo ber pâwl ka ni ta ve ang.


"Hlim reng ang che"


Ti a ka thlah liam lai khân ka chhûngril erawh a nâ in a rûm vawng vawng a nih kha.


Hlim taka kan awm lai techu ka ngaihtuah lêt a, ka suangtuahna ringawt pawh hian min ti hlim thei nia.

Kan khawvêl kha amawi thin a sin, Hun rei ni lo mahse rawng chi hran hran a chei mawi khawpui kha ka tân chuan a hlu takzet a ni, Mahse kan khawvêl kha tunah chuan Chinghnia leh sihal te chên na ah a chang zo tawh, hei hi kan tâwpna tûr a ni tih ka hria a, insûm tumna ka nei lo, ka tap chhuak hawm hawm a, ka lo tap muhîl daih chu niin.

??Ads la click lo tan a hnuaia milem khu in lo click ve ngei ngei dawn nia aw ??

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 4:34 pm

Zîng ka harh chu ka mit a bui lûk mai, ka hmâi ka phih a, Chaw ka ei thei loh vângin Noodles techu ka ei mai mai a, ka kâ a lût hi a tui leh tui loh phei chu ka hre lo,engmah ka lem thei lo, ka hrawkah hian a tâng vek, Chhel taka awm tûrin ka in fuih a, ka thei em em ang, ka thei tûr a ni.



Ka inbual fai a, School kal tûrin ka insiam nghâl, ka taksa a chauh vâng nge ka chê a muang ruih mai, ka room atanga ka chhuak chu Common room a mî pakhat lo thu reng ka hmuh chuan ka ding dat.

Min hmu chu arawn tho a, min enkar mai, a mit meng a sen râm a, a hmêlah chuan inthiâm lohna nasa tak ka hmu thei.


"Ngati nge chaw pangngai i ei loh?"



Ka chhâng thei lo, ka ngaihtuahna mai mai anih ringin ka mit ka nuai a, mahse a ni lo, Nu Sangtei chuan min en reng, a mittui a hru pah zauh zauh bawk.



"I hmêl chu ava dâng ve? I mit te kha"


Min rawn pan a, uluk takin min thlêk, ka lo en ve ngam hauh lo thung, ka chhe bim bem ngawt ang.


"Felfel"


Tah insûm zet hian a ti sap, ka hawi chhuak a, a mittui a lo luang zawih zawih mai, tah loh ka tum ve nasa lutuk, ka hmûi hnuailam ka pet fan fan a, ka insûm nasa lutuk chu ka khûr der der thei nia.


"Ka tina che tiraw?"


Ka la chhâng chuang lo, ka tâwt lutuk chu boruak ka hîp lût kâwk a, ka mittui atlâk mai loh nân ka khap zui fak fak bawk.


"Ka tihpalh takzet a ni, min ngaidam thei dawn lo tih pawh ka hria, mahse en teh, ka fapa i duh hi dem na che ka nei lo, mahse maw...i pa fanu i ni tlat si a, ka sawi awm zia chu i hrethiam tiraw?"


Ka lo bu nghauh nghauh a,


"I pa tihsual vânga nang leh zêlin i tawrh hi hrehawm ka ti lutuk, mahse, Abi i thlarau tal chu kan zah sak tûr a ni dawn lawm ni? I pa lakah hian ka thinrim a, ngaihdam ka tum hek lo, mahse phuba lâk erawh ka tum lo, keichuan ka fanu tak tak ang chiahin ka en che a, mahse maw, ka fapa pawisawi lo, tûna ka tihnat mêk hi ka ngaihtuah tello thei lo a ni, ila naupang a, i fel a, i nulât tak tak hunah chuan Bawiha aia tha hi ila tawng dawn tih ka hria, tûnah chuan a hrehawm ang, hun a rei anga, a zia ve mai ang, in la intheihnghilh thei em em ang"



Dam thlap hian a ti dap dap a, mak tak maiin ka lungchhiatna chu thinrimna in a rawn thlâk hlawk, mahse ka thinrim vânga tawngkam mei nei tak chhâk chhuah erawh ka tum lo, tûl ka ti hran lo bawk.


"Ka lo hre reng dawn nia"



Ka ti hul hak, ka kutah chuan a vuan vang vang a, biak tawng ka har vâng nge a chhuak zui leh mai.



Laldini arawn lût zui nghâl,


"Enge a sawi? A hau che mi?"


A ti nghâl mawlh mawlh a.


"Hau lo e, kal ang khi kan tlâi dawn"



Tihpahin ka kâi chhuak zui ta daih a.




School kan thleng a, class room kan lût chu min lo en thap a, an in hrilh ru zui sap sap hlawm mai, mi zawng zawng hian min en thup vek maiin ka hria.



"Felfel i tha em?"



Ropuia a ni, nui lui sak pahin ka lo bu nghauh nghauh a, kan inbiak lai tak chuan Isaka arawn lût, ka hmu thut chu ka phu deuh zawk nghe nghe, ka zâm titih dêr mai, ka lungphû a rang dut dut a, ka tiril a khûr nghâl, a hmêl chu biak huphurh awm tak a ni, a rum ûl reng mai.



Ngâwi rengin ka hnungah chuan arawn thu a, ka hnung aza mer mer mai.



Ropuia chu ka biak that duh vak loh vângin a thutna lam a pan a, dawhkân bawhin ka mu thlawp.


"Han in en teh, i chauh hmêl lutuk a nia, nikhat tal chu châwl mai rawh, i dam lo mai ang"



Laldini chuan a ti bawrh bawrh a, a sawi chu dik viau, ka rilru na lutuk hian ka taksa thlengin a nghawng ni maiin ka hria,


"Ka tha lawm min ngaihtuah suh"



Ka lo ti ve mai a, mahse a rûk tak chuan ka tha lo, ka tha lo takzet, Isaka chu rawn tho thutin a bag nên a chhuak zui vut a, ngâwirengin kan en thap ringawt, a rawn lêt leh pawh ka ring tawh lo.


"Pawi khawih tu chu i pa kha a ni tak tak em?"



Lalnuna leh bawk, hêpa hi chuan min haw ve ngang a nih ka ring,

"A ni lo, i ngâwi ve mai mai thei lo mi?"


Laldini chuan alo ti zêk a, ka lo maimitchhîng daih,


"Enge? A nih tak tak phei chuan kan school hming pawh hi a chhe tel ve thei asin"



"Engtik lai khán nge kan school chu ilo ngaih pawimawh tâk em em a?"



Laldini chuan a ti leh, hetiang hi ka la tawng dâwn chauh si a, mahse dâwih zep taka pumpelh ka tum lo bur.


"Pawngsualtu fanu classmate nih techu tunge duh anga?"


Ala ti hrâm a, ka insûm thei tawh lo, ka tho thut a.


"A tâwk, khawngaihin i ngawi thei tawh angem?"



Ram hmaka ka tih chuan ngei awm zet hian min melh a, hepa hian ngati nge hmeichhe rilru tûra ka ngaih hi aput daih thin le? A hmeichhia zâwk pawh an ngâwi mai mai a, mipa ber a tawng thei ber a atang thin hi ka haw so bawrh bawrh.


"Celeb in ni ringawt alawm ipa nen chuan, Facebook leh IG lamah pawh in lâr khawp mai"


Ka thinrim lutuk chu ka inhûm ruh nasa khawp mai, ka zak bawk si, midangin min enthup lehnghâl.


"Duhtâwk rawh, khawngaihin sawi tawh lo teh"



Aw khûr dar dar a ka tih chuan

"Ni e, i tawng tam khawp mai"


Ropuia chuan alo ti ve hlak a, Ropuia ber a tawng tâkah chuan a ngâwi ve mai, ngâwi reng chuan rum zet hian min en a, keipawn ka melh rum khawp mai.



_______



Isaka arawn kal leh tawh miah lo, ka ngaihven lo ang ka tih pawn ka ngaihven ru reng tho, vawiin chu min en hrek hrek tu leh an thu khel nuam ber ni tûra school ka kal chu ka inchhîr takzet, Ka classmates te an felin rilru pangngai tak pu an lo ni hlauh a, ni lo phei se chu hawi ngaihna pawh ka hre lo ang, Vawiin chu keimah vângin Laldini pawn in hauh pui angah phah khawp mai.



Mahni in kan inkawng lam pan chuan ka haw bek bek a, engvâng nge ka hre lo, ni e, ka tap leh ta, lungphun lo awm chungah chuan ka thu a, min zui reng tu an awm tlata ka hriat vângin ka hawikual leh hrak hrak thin, tûmah phei chu ka hmu lo, mahse min thlîr reng tu awm tlat a hriatna ka nei.



Ka ngaihbel mai mai a nih ringin lungpui chunga thu chung chuan ka tap ru kerh kerh a, ka âw ka chhuah ngam bawk si lo, ka hmûi ka hup a, ka kawchhûng atang rawn buak chhuak hawk châka min rawn nawr tu chu hup bet chung chuan ka tap a, muangchângin ka luan chhuah tîr ta zawk a ni.


"Eheu...hetah hian ilo awm a ni maw?"



Tih ri ah chuan rang takin ka hawi chhuak a, Lalnuna leh a thian te phnih hi an lo ni, ka mittui hru in kal mai ka tum chu Lalnuna chuan min pawt lêt sawk a.


"Min thlah rawh"


Vîn hlar a tihpahin ka lo tâl aih aih mai.


"Vawi tam tak nang hian ka classmates te hma ah min tlâwm a, phuba ka la dawn, i pa tih ang kha i chungah hian ti ve ta ila a tha viau ang a"



Nui suk suk chunga tihpahin a thian te nen chuan min nuih dar dar hlawm a,ka thinrim insûm zo ngang lo chuan a hmâi ah ka bêng hawi sawk, ka kut arawn thîp nghâl vâwt vâwt mai.


"Ka pa khân tihsual a nei lo, min tibuai tawh suh"



Ka awrâwl neih zawng zawng chuan ka ti tuar a,


"Iva huaisen reuh ve a?"



Inseh chilh rapa tihpahin ka sam tâwn laiah chuan arawn vuan a, min kêk dâk âwrh mai, mahse ka rin loh lutukin Lalnuna hmâi chu tu emaw hian arawn hnek ri no chawk mai, a thal nghâl thuai a.


Kei pawh ka kat dâwrh thei, chutah a thian techu rawn che chhuakin chupa chu an rawn khawih rawn ta mai, jumper dum lukhum awm a ha a, a lukhum chu a khum tlat, mahse tunge a ni tih ka hre chiang,


"Duhtâwk ru, min pui ru"


Ring zet chuan ka ti tuar tuar a, vânneih thlâk takin kan veng YMA hruai tu zînga pakhat a thianpa nên anrawn kal phei hlauh mai.


"Hey tu te nge in nih?"



Pâwr zeta an rawn tih tâkah chuan Lalnuna te thian ho chu rang zeta in sa sengin reilote ah an in khalh chhuak zui sap sap hlawm a.



Isaka chu ngâwi rengin ka kâi tho a, zu rim a nam, a ruih hmêl lutuk ringawt, a biang leh kamsîr techu alo pilh pheng phung mai, mit meng sen râm hian min en reng a, na dang a neih ringin rang tak chuan ka thlêk kual a, a in hâk phui vâng nge engmah phei chu ka hmu thei lo.



"Ana viau em? Tu te nge a?"


"Ka hre bik lo, min rawn tibuai ringawt a, Damdawiin lamah keiman ka han hruai ange"


Ka lo pha nghâl zar zar a, min kalsan ve mai, Isaka chu kan in a hnaih tawh vângin ka kâi phei a, a ngâwi ngal mai, kal pawh a kal ngîl thei lo, inchhûngah ka luh pui a, rang takin damdawi ka la a, a pem ah techuan damdawi ka hnawih sak nghâl.



A hmai duk kalh leh a kamsîr pilh deuh nung mai ka hmuh chuan ka thinlung hi ana vawng vawng mai, ka sawi fiah thiam phâk bâkin ana,ka mittui arawn luang thla nia, hei hi nia ka duh loh chu.



Rang takin ka kûn a, ka hru nghâl,


"Lalruatfel, hei hi maw i duh chu?"



Awki hniâm zet hian arawn ti, ka hawi chhuak a, min lo en ngur mai.


"Khatia tah reng kha maw i duh chu?"


Ati leh nghut, a lukhum a hlîp thlâ a, a sam chu a tuai chho puat mai, zat loh hmêl zet hian arawn nui hul hak a.


Ka chhâng thei lo, thâwk ka la hawk.


"Min zui rû tiraw?"



Rum deuh ûl hian min en reng a,


"Aw"

Tih zawngin min chhâng, ka lo chhîng sawk thei.


"Chîng tawh suh, hetianga i awm reng chuan ka tân a harsa mai mai dawn asin"


Ka ti nghâl hmarh hmarh a, ka tah pawh a chhuak leh tawh lo, ka thin a rim tlat, ka tho thut a, kal leh mai ka tum chu ka kut ah chuan nghet zet hian arawn man a, rang zeta rawn din chhuah pahin ka hnunglam atang chuan min rawn kuah, ka lo tâl nghâl aih aih a, mahse min kuah ngheh êm vângin awmzia a nei tam lo kher mai.



"Che suh, ka kal ang, ka kal dawn, mahse reilotê chiah, reilotê chiah hetiang hian awm lawk ang"



Harsa tih hmêl zet hian arawn tih tâkah chuan ka ngâwi ta vang vang a, thâwk la hawkin ka tukhum samah chuan arawn fâwp vang vang mai, a hmûi lum thar thar chu ka feel thei, ka lû aza mer mer mai.



"Lalruatfel"


Zâwi tak hian a rawn ti leh su su a, ka tawng thei tawh lo, ka lo tang deuh tung mai.


"Khatiang khân nangmah chauhin lo tap tawh suh ang che"


A rawn ti deuh nghut, ka tum loh lutukin ka tap chhuak hawk a, tah reng mai hi ka ning ve tawh, mahse ka thinlung hi ana êm a, tap lo thei lo in ka awm leh thin, hetiang êm a nâ hi ka tawrh leh tawh pawh ka in ring lo hial a ni.


Na viau mahila a hlimna tûra ka kalsan hi ka inchhuang lutuk ringawt, thil ropui tak chu a ni hran lo, mahse tûma min hriat pui loh ka hmangaihna nêna ka thlah liam tûr hi ka inchhîr lo a, ka inchhîr ngai bawk hek lo ang.



Muangchângin min kuai her a, ka hmûi ah arawn tawk zauh.


"He hmui te, i hming, i mitmeng, i sam te, a dang pawh, heng zawng zawng hi ka theihnghilh theih i ring a nih chuan mi â tak ini"



Chiang fek fawk hian arawn ti a, ka samah chuan zûtin ka mittui luang ngiai ngiai chu a rawn hru zauh,


"Kal tawh rawh"


Tap tiau a tihpahin a âwmah chuan ka lo nem dat a,mahse ala ding reng, ka koki ah a kut dahin arawn kûn hniam a, a chal leh ka chal chu a rawn in sîk tîr.


"Lalruatfel nang hian min duhna pakhatmah i nei tawh lo tiraw?"



"Misualpa, haw rawh, vawikhat mah rawn kal tawh suh"


Tih mawlh mawlh pahin a âwmah chuan ka bêng ri thlawp thlawp a.


"Ka kal ang, ka kal dawn, mahse ka...."



A ngâwi leh daih, harsa tih hmêl zet hian arawn thaw deuh hrâwk mai.


"Hetianga i rawn kal reng chuan ka tân a harsa zêl a nia, tûn chinah chuan min hre ngai lo angin awm tawh ang che"



Ka mittui hru mawlh mawlh pah chuan ka ti a, min en reng.

"Chu chu i duh dan a ni chiah maw?"



Chauh hmêl zet hian arawn ti, a hmêl ka en ngam lo.


"Aw, ka hmuh phâk loh ah awm daih la ka hlim ang"



Ka thin zâwn hi a rawn na zawk thei.


"Awle, a nih mangtha le"



Zâwi sup hian a ti a, ka lo chhîng sawk thei, kawngkhâr a thlen chuan a chhuak mai dawn maw ka tih laiin a rawn lêt vut a.


A taksa si chêt khawpin ka kâwngah chuan arawn man a, duhthâw zet hian min rawn fâwp tâwn tâwn a, mahse rei a ni lo, min thlah leh vat a, thâwk la hawk pahin a hmai a tuai puat, a chhuak ta nghâl vang vang a.




Ka awm dân hi ka hrethiam lo, ka taksa pêng pakhat ka chân ta ni mai hian ka hria, ni e, ka chân alawm, khâ ka neih chhun ka rauh em em ka thinlung kha a kal pui ta daih si a, thlarau nei lo ang mai hian ka ruak huai mai.



Dam chauh hi ka duh a ni bîk lo a sin, hlim ka duh ve tho, engtikah emaw chuan hun hi ka tân damdawi tha ber a nih ka beisei tlat a ni.



Ka mittui techu hru hulin ka inti fai zui a, thâ a tho lo kher mai, mahse in ti chak hrâm hrâm tûr ka ni, tap leh tûr chuang pawh ka awm tawh lo, mittui hi a luang zo tawh aniang, thinlung na reng chung si in ka tap thei tawh tlat lo.




Chaw pawh ei lo in noodles bawk chu ka ei leh a, naktûk chu class kal lo in ka pa tlawh ngêi ka duh tawh, Enge a chanchin pawh engmah ka hre si lo, ngati nge a tih a nih loh thû a sawi miah loh le? Engmah hi ka hrethiam tawh lo e a.



Laldini arawn riak a, Lehkha techu kan zir dûn a, min en leh vang vang thin, sawi duh nei a ang ka ti.


"Sawi duh i nei ami?"


Ka note copy lai châwl meuh chuan ka en a,


"Isaka chu engtin nge nita?"



Inthlahrun hmêl zet hian arawn ti sap, ka nui lui sak a, ka thinlung erawh ana vawng vawng mai.


"A kal tawh"


Ka han ti ringawt a, ka chil ka lem zui khalh.


"A lan dân chuan nangpawh hian i duh ve tih ka hre mai"


Min enkar a, têt tê atanga inkâwm na na na chu kan in man in kan in hrechiang dûn tawh khawp mai.


"A dik alawm, mahse i hriat kha, sawi tawh lo ang"



Tihpahin ka note copy lai chu ka chhunzawm mawlh mawlh a, thâwk ala hak mai.


"I duh nih techuan na taka siam kher a ngai hleinem, nge ni a ilo hmangaih hman dêr tawh zawk?"



Chiang tak hian min rawn enkar a, hetiang êm hian min lo hrechiang ang tih ngaihna rêng ka hre lo.



"Aw...ka hmangaih alawm, ka hmangaih vângin ka kal tîr"



Min khawngaih hmêl zet hian min en vang vang a, rem leh rem lo pawh sawi lo in min rawn kuah vang vang a, ka tap lo, muttui ka nei tawh lo tak tak a niang, ka hnungah chuan a bêng thlap thlap a, hetianga min thlamuan tû tûr hi ka mamawh lai tak alo ni bawk nên, ka dam deuh huaiin ka hria.


"Lungngai lo la, i tân ka awm reng a nia"



Laldini sawi âwma mawi pawh a ni lo, nui var varin a hnungah chuan ka beng ve thak thak a.




_____________



Zîngah chuan zah pawh dâwn lo in Pu Joseph-a ka call a, mi fel tak a a ni, min kal pui alo rem ti ve mai, tha tho lo zetin ka insiam a, dârthlalanga ka in en chu keimah pawh ka ang tawh lo, ka chêr a, ka thû thalh mai, Thinlung na hian taksa thlengin alo nghawng thei tih ka hre ve chiah.



Isaka pawn Kolkata lam a pan tih Laldini'n min rawn hrilh a, ka rilru chu na viau mahse Pathian in min awmpui a, rin aiin ka tuar thiâm khawp mai.



Bazaar ah pu Joseph-a'n min lo hruai a, Central jail lam kan pan dûn nghâl.




"I pa tih a nih hi keipawn rin harsa ka ti, mahse a thiamthû a sawi duh tlat lo hi a pawi ber ta chu nia, mahse Ka u te hian tih dân an hriat mai ka ring"




Motor khalh pah chuan a ti mawlh mawlh a, a thusawi chu ka ngaithla reng na a, ka chhâng chuang lo, ka ngaithla tih a hriat nan harsa ti zetin ka lo nui lui sak sak ringawt.




"Nangmah hi i tha hrim hrim em?"


A motor khalh pah chuan min rawn en zawk a,


"Ka tha e"


Tih zawngin ka lo chhâng, a mit meng atang chuan min ngaihtuah ve hlê tih ka hre thei, Pu Joseph a ka ti mai thin na a, kum 31 chauh ala ni a, tlangvâl ala ni bawk, Ka star theih zia kha aw, a vai hmêl lek lek na a amizo hmêl a paih eih chuang lo, ngaizâwng tu pawh a hmu tha thei viau a, mahse ngaihzâwng a neih âwm ka hre miah lo.



Ka pa mamawh tûr anga ka rin kekawrte, leh eng engemaw ei tûr ka lei sak nual a, ka pu pawh lo kal ve duh viau mahse a hna a cháwl thei bawk si lo a, A inthiam lo hlê nghe nghe.




Jail kan thleng a, Pu Joseph a chu arsi pahnih bel alo ni hlauh a engtin tin emaw awlsam tak hian kan lût tlang thei mai zel.



Ka pa nghâk chuan ka lo thu rân reng a, arawn kal har ta khawp mai, Nghâk hlel taka ka nghah hnu chuan a rawn kal ve thei ta hrâm alawm, a hmêl pawr chhap chuan min tina vawng vawng mai, ka lo nuih var var a, sawi hmasak ber tûr pawh ka hre lo.


"School thulhin ilo kal kher a"

A han ti nghâl ngawt a, mahse ka chhâng lo, ka thil leisak techu ka pe a, lâwm hmêl pawh a pu tawh lo, ka tah arawn chhuak tlat, mahse ka tap duh bîk lo, thudik tak hriat ve ngêi ka duh tlat.



"Pa Itih chu a ni lo tak tak tiraw?"

Ka mittui rawn hnâm chu dan rual lohin a tla zui a, ka pa hmêl vawt raih, mipui thinrimin kut an thlâkna a hmâi duk kelh kulh hmuh nuam lo zet chu beisei nei zet hian ka enkar a, Chhânna ka dawng dawn lo tih hre mahila ka beiseina hi ala mit lo ve tlat.

"Pa khawngaihin min chhâng teh, Nang hian Bawihtei chu i pawngsual tak tak lo tiraw?"

Ka âw chu a chhuak chê chê chauh, mahse ka pa chuan a hriat tho ka ring, jail chhûnga lo awm ve dang tepawn min en tawp, an hmêl atanga min khawngaihna lo lang chu ka hmuh hmaih hauh lo.

Ka thâ a khûr a, ka taksâ a zâwiin ka thin záwn a rawn hnawh chho ut ut tu chu tih reh tumin ka chil ka lem khalh, ni e, a hrehawm tih piah lam a ni, a hrehawm takzet, he khawvêla ka neihchhun ka pa ka hmangaih em em, keimah ka in rin ai nasa a ka rin kha pawngsuala that zui tû a puh a ni, tu fanu in nge pawm thei bîk ang?

Ka ring thei lo, mahse ka pa berin engmah a sawi duh si lo, engtin nge kei kum 18 mi mai hian a tello in he khawvêl sualna a khat hi ka hmachhawn tâk ang? Ka khawvêl chu thâwk leh khata tih chhiat in a awm a, mi zawng zawngin min hua a, min thin hrik a, ka chunga tha der tam tak awm mahse a tam zâwk chu hnunglama min sawisel zui tu leh min ngei ngawih ngawih tu te an ni, ka hai lo, hremhmun nen a danglamna ka hre hek lo.

Chutah ka pa chu a rawn nui sak a,

"Ka fanu hmeltha te, hei hi hria la ka duh a ni, pumpelh lo la, hmachhawn tawp mai rawh, midang sawi ah in nghat lo la, tha itih ang ang khân ti tawp rawh"

Ka nui chhuak hawk, ka in hûm ruh a, ka tap leh thin.

"Chu chauh chu maw?"

Ka aw zâwi lutuk chu keipawn ka hre thei lo lek lek zawk, min chhâng zui tawh lo, khûr ngawt ngawt chungin ka hmûi hnuai ka pet ngar ngar a, in kan hun a zo tih min rawn hrilh, ngâwi rengin ka kal chhuak a, ka hmâ ah chuan enge awm ka hre lo, ka hma zâwn ah chuan ka kal mawp mawp tawp mai ni.



Ka kalna tûra lung lo awm chu chhuih in ka kat nawk, ka hnunglama mipakhat min rawn vuan tu chu ka en hâ a, Pu Joseph a a ni.


"Ka hruai haw ang che"



Arawn ti sup, ngâwi rengin min hruaina lamah chuan ka kal mawp mawp a, motora min hruai luh lai techuan ka â deuh chhulh hian ka hria, a seat nghêngin ka maimitchhîng vang vang a, ka mittui arawn luang chhunzawm nghâl.



Car kawngkhâr inkhár khap rî ka hriat rual chuan ka mittui ka hru hul a, thâwk la hawk.


"Insûm duh suh, i insûm pauh leh a hrehawm ting a ni mai"


Pu Joseph-a'n a tih chuan ka tum lo deuhin ka tap chhuak hawk, tap tawh ngai lo tûr ang maiin ka tap chhuak nghâl hawk hawk a, ka tah chhûng zawng chuan a car steering vuan in ka bulah alo awm ve char char a, tlân pawh a atlân chhuak bîk lo, Ngâwi rengin alo awm ve char char tawp.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 25th, 2020, 4:34 pm

Nî a ral zêl a, Isaka nên kan inbiak loh atangin thla thum lai a liam ta, ka pa pawh awlsam takin arawn chhuak a, a hnâ pawh ala chhunzawm reng tho.


Keipawh first ah ka pass ve hlauh mai a, ka tum ang ngeiin MCON Mizoram college of nursing ah ka lût ve ta, Tha taka pass a, nurse tha tak nih hi ka tum ber ala nih rih.


Nu Sangtei te nen chuan kan in tlawh pawh lutuk tawh lo a, vêngkhat satliah ang bâkin kan awm tawh lo, Ka phone ka en a, Isaka number pawh ka la unblock lo, ka ngai takzet a ni.



Hun a rei anga, ka theihnghilh ve mai ka ring thin, mahse a ni lo, a ni têlin ka ngaihna a zual telh telh a, a rûka tah keuh keuh pawh ka la ti leh zauh thin.


Mahse ngai viau mahila biak ka tum hran chuang lo,keipawn mak ka in ti, engtin nge ka theih zawk le? Mahse nitin Pathian hnênah ka tawrh thiam theih nan min pui tûrin ka ngên thin, zân mut hmunah amah nên kan nunhlui ngaihtuah in mittui nên ka muhîl fo a, Zîng ka thang harh chiah a, ka ngaihtuah hmasak ber pawh amah tho kha a ni, Hrehawm tihna in min rawn tuam ut ut thin a, Pathian hnên ah ka tawngtai leh tawp zêl, Ni e, Pathianah lo chuan ka dam zo lo ti tawp mai ang, Ka natna thupin midang hmâ ah ka nui lui fo a, ka tân sawichhuah a rem si lo, midang kâra ka natna te thup nân ngawih reng hi ka tân a tâwk viau in ka hria.

Ngaihzawng ka la nei leh miah lo a, neih tumna pawh ka nei lo, tu emaw kha ka rilru chuan nghah tum lo mahse ka thinlung hian ala nghâk tlat, Ni lo, chutiang pawh a ni lo, Kei hian thinlung pawh ka nei tawh lo a ni zawk mah, a bulah khân a awm daih alawm, Khâ ka thinlung nei tu ngêi khân a liam pui ta daih si a.


Kan khua mahnise Hostel a awm loh an phalloh vângin Hostelah ka awm a, an strict viau leh nghâl, roommate Fel deuh ka nei a, Laldini nen erawh chhûn zân zawmin kan la in be thung.


Ka roommate chu a felin a tawng duh em em a, a bulah chuan ka nui ka nui ve thin, a hming chu Mafaki a ni a, nulian zet mai hi a ni, a thau a, kan in len hleih viau, a fel a, a bula awm nuam ka tiin ka vitamin chi khat a ni mai hian ka hria.




Lehkha ka zir malh malh lai chuan Mafaki phone arawn ri, amah lah chu a inbual daih si a,


"Mafak, i phone a ri nia"


Ka han ti lâng lâng a,


"Ka u a niang, lo la lawk mai rawh"


A tih tâkah chuan ka lo chhâng ve mai a.


"Hello?"


"E khawnge Mafaki?"


"A inbual lawk a"


Ka lo ti mai a,

"A inbual zawh veleh ka thlalâk lo thawn kha lo en rawh se aw, a nih ka dah a nia"



Tihpahin a dah zui daih a, keipawn ka lehkha ka zir chhunzawm lehnghâl mai.



Mafaki inbual chu a rawn chhuak a, a inthlâk zui mial mial mai.



"Kolkata ah Doctor zirin a awm a, a bialpa thar thlalâk min rawn hmuh a tum a niang"



Inthlâk sut sut pah chuan a ti mawlh mawlh a, Tah chuan Isaka pawh khân a zir ve tak asin ,


"I u chu 2nd year nge 1st year?"


"1st year"


Nui var var hian a ti a, a inthlâk zo chu a phone chu ala a, a khawih zui mial mial mai, Isaka pawh kha 1st year a ni ngêi âwm sia, a û chuvka thîk ru lek lek.


"Awi a hmeltha reuh lutuk, hei hi nia a bialpa chu"



Tihpahin a phone a mipa thlalâk chu min rawn hmuh a, a ni thei lo....ka hmusual em ni? Ka mit ka nuai a, mahse amah ngêi kha a ni, jumper lukhum awm a khum a, a selfie na chauh a ni,


"Hei hi maw a bialpa chu?"


Ka âw chu a khûr in ka hria,

"Aw"


Tihpahin ala leh mai a, ka thin zâwn hi a rawn na zawk zawk mai, ka hmuhsual ni se ka ti, a ni bawk si lo, ka taksa arawn khûr a, ka tlu mai dawn in ka in hria, ka luak tehi arawn chhuak ut ut mai.


Ka kawchhûng atanga min rawn nawr chho ut ut tu chuan in control harsa khawpin min siam in ka hria, tháwk ka la kâwk kâwk a, ka thinlung mai ni lo, ka khawi lai pawh hi ana leh vek tawh.


"I tha em?"


Mafaki chuan min rawn buaipui a, ka insûm thei tawh lo, dawhkân bawh chuan ka tap chhuak hawk ringawt.



5 Years Later




ISAK LALRINPUIA




"Ka rawn thleng têp"




Kum 5 lai a liam ta, Ngaizêl atang chuan kan khua chu ka thlîr vang vang a, Alo rei ve ta hlê mai, engtin nge an awm zel ang le aw? Ka car ah chuan lût in ka in khalh chhuak zui leh mai a.



Ka pa duhthusâm ang ngeiin Orthopaedic doctor hna thawk turin kan khaw hlui lam ka pan a, a kawlkawng techuan rilru a ti thar zut zut mai, Doctor mah ni ila meizial zûk leh zu in ka la bânsan thei chuang lo.



Karleh lama thawk tan tûr ni mahila ka pute a'n thlaleh lama nupui neih a tum vângin ka haw ta chûk chûk kha nia.



Ka tlân zêl a, kan khaw luh dâwnah chuan ka rilru ah mipakhat a rawn lût, a dam tha angem le? Enge a tih ve tâk ang aw? Khatia Mizoram ka chhuahsawn atang khân vawi tam tak biak ka tum thin, Mahse ka number a block tlat bawk si, a thiante number ka nei bawk si lo, mi â ang maiin min rawn biak hun ka nghâk thin kha nia.



Hun rei tak chhûng chu lehkha pawh zir thei lo in ka awm a, ka rilru kha a mûmal lo reng a nih kha, kha tih lai khân tleirâwl mai kha lo ni lo ta ila ka hmangaih nei tûr khân ka theih tâwp ka chhuah ang, mahse ka la naupang êm a, ka duh dâna che ngam tûr khân ka la huaisen tâwk tlat lo a nih kha.



Nunhlui te chhui kîr chung zêl in ka tlân zêl a, kan in ka lo thleng dêr tawh, kan in kawtah chuan ka nu leh pa in min lo nghâk thap a,


"A û"


Rawn ti lâng lâng rî ka hriat chuan ka lû ana zawk, hetiang hian ka awmna a rei tawh, ni e, Doctor ka ni a, natna engemaw tak chu ka nei alawm, mahse ka hre duh lo, Hre lo law law ila ka duh zawk.


Ka chhuak a, hlim hmêl put a ngai tih ka hria, ka nu chuan mittui nên min lo kuah nghâl a,ka pa hlim hmêl pawh hmuh a nuam tawh khawp mai.



Ka nu leh ka pa duhthusâm ka ti Hlawhtling tawh a, tûnah chuan keima duh dân ngei a ka awm ve a hun ta, khâ hmeichhia kha, ka zawng chhuak ang a, Ka tâ ah siam ngêi ka tum bur tawh.



Doctor ka zirlai khân hmeichhe pakhat kawp chu ka nei ve thin, mahse ka rilru ka pe ngai lo, ani vethung chuan min duh takzet tih ka hria, mahse kei vethung chuan ka mamawh phuhrûk nan chauh ka hmang ti ila ka sawi sual lo ang.



Mipa sual tak ka ni, mahni inthiamlohna hlîra ka khah vângin ka kalsan ta tawp kha nia, ka khawngaih viau, mahse enge pawi? Ka hmeichhe hmangaih nei tûr hian dikna ka nei ve tlat alawm.



Ka thleng hma tho bawk a, thawhna tûr hospital lam pan tûrin ka kal nghâl, han fang hmasak ve reng reng ka duh.


LALRUATFELI




"Thlaleh mai a pasal nei tawh tûr chu iva phûr hmêl si loh ve"



Mafaki chuan nui var var hian arawn ti a, ka lo nui lui sak, Ni e, thlaleh mai ah khian pasal ka nei dawn, hlim tûr ka ni, mahse tinge ka hlim miah loh le? Engvâng nge ka hre lo, ka thinlung taka nuih har ka ti ngawih ngawih.



Nurse hnâ ka thawhna kum khat lai chu a ni ve tawh, Pa Muana zârah engtin tin emaw a nghetin kan khua a hospital ah ngei ka thawk ve hlauh mai a, Ka nunhlui kha la theihnghilh lo mahila min tibuai ber tu a ni tawh lo chu ka nun a harh phah a, a nuam ka ti ve tawh takzet.



Ani chu midang neiin hlim takin a awm tawh âwm si a, keipawn ka nghah reng nachhan tûr ka hre bîk lo tiin Pu Joseph-a min sâwmna pawh lo pawm ka ni.


In ngaizawng hranpa kan ni lo a, ka tan chuan ani kha ka bialpa hmasa ber leh hnuhnung ber ala ni reng tho, ka la ngaihtuah ve reng thin na a, a hmâ ang khan rilru na in ka awm reng tawh bîk lo.


Pu Joseph-a hian min ngaihsak a, hreh tak chunga inneih tûra min sawmna kha keipawn ka lo pawm ve tawp a nih kha, bâkah ani aia min hrechiang tu leh min hrethiâm tu hi ka tawn leh mai mai ka in ring tawh lo, ka pa thlengin a ngaihsak a, ka tân chuan Angel ang mai a ni, vânnei ka in ti a, min thîk tu pawh an awm nual mai, min duat a, han inzui chhuak ve fo thin mahila ka kuta a kaih hi a thlen thui ber chu a ni mai.


"I tha takzet amaw?"



Ka bulah chuan rawn thu ve in Mafaki chuan chîk zet hian min enkar a, mipa hmangaih deuh, la theihnghilh theih loh ka nei tih a hria a, mahse tunge a ni tih erawh ka hrilh thei lo, a chhan chu a unaunu bialpa duh em em kha a ni tlat si a.



An chanchin hi a sawi leh zauh zel a, thinlung na vawng vawng a ka ngaihthlâk châng a tam mai, mahse ka tihlan a rem si lo, ni e, pasal ka neih duh chhan pawh hi khâ nun ka nin tawh êm vâng pawh kha ni ta berin ka hria.



"Vawiin ah Orthopaedic Doctor thar tûr khan kan damdawiin arawn fang dawn nia, i duty na a ni lehnghâl, khatin lungngaiin lo in khâp mai mai suh"



A tih tâkah chuan ka nui hak a, ka coffee in lai chu paihin rang takin inchhûng lam kan pan nghâl.



Kan inthlâk hun alo ni dêr tawh, Nurse Vuli pawh alo thleng dêr tawh a nih saw.



"Marem, Doctor office tûr kha lo ti fai mai ta che"



4th grade pakhat chu ka tîr a, alo balh viau chuan kan damdawiin mualpho na zêl a ni si a.



"I duh chuan haw nghâl mai la, nghâk tu i nei chhelo si"



Vuli chuan Nui sak hian alo ti siam siam a, U Joseph-a chu min lo call mai tur a nia, rang takin ka inthlâk a, ka bag nen ka chhuak nghâl.


Pawnah U Joseph-a chu Police form nen alo ding vung vung mai, min rawn hmu chu alo nui suk a, thâwk la hawkin ka pan ve nghâl, kan hmangaih miah loh te neih hi thil sual tak a nih loh râm ka beisei.



"I chau em?"



"Chau lo e, tinge min lo call loh a?"



"In buai hmel bawk sia, hawh lo chuang phawt teh, khawi ah emaw ka hruai ang che"



A bike chu a ti nung nghâl vut vut a, engmah sawi tawh lo chuan keipawh ka chuang ve nghâl mai.



Khawi ah tak chuan min hruai ang maw, Nu Sangtei te in lam min pan pui nia, Zêp lo chuan ka zak ve lek lek thin, Ka nu ang maia ka en kha ka unaunu a ni mai tur chu, bâkah, Isaka vâng pawn kal zen zen hi ka duh lo.




Ka pa kha awlsam tak khân an la chhuak mai a,mahse pawi khawih tu chu tunge tih tun thlengin an la hre lo, ka pa kha pawikhawih tu a nih loh zia U Joseph a hian a fin fiah ngat bawk, rei pawh ala ni lo, Nikum hmasa mai kha ni ta in ka hria,khata tang khân amah a rilru pêk duhna thinlung ka put phah ta a ni.



"Enge hetah kan kal a?"


A bike atanga chhuk thlâk pah chuan ka ti deuh hâ a, min hrilh lâwk ve tûr a nia.


"Chaw ei ah min sawm a, tinge? I lawm vak lo mi?"


Chîk zeta min rawn en chung hian a ti a,

"I sawi lâwk bawk si lo a, Mahse a pawi tawh lo"


Ka lo ti liam puat a, sawina hun ala nei lo a nih ka ring, A bike atang chuan ka chhuk a, mahni chauh a luh ka hreh deuh vângin vanranda ah chuan ka lo nghâk rân mai, A bike a dah fel hnu chuan min rawn pan a, ka kutah chuan arawn vuan nghal.


"Kal ang hmiang"


Min rawn en zauh, ka lo nuih sak a, Nui var varin kan lût nghâl.




______


Nu Sangtei chu alo ti ti mial mial a, an nula te an awm tho vângin engmah tih tûr phei chu a awm lo, ka tawng tam lo kher mai, he lai hmuna kal ziah hi nuam ka ti lo êm a ni, Nu Sangtei leh Pa Muana te koh dân turah hian ka buai tlat zel, bâkah tum loh deuhin nunhlui ka lo chhui kîr leh veng veng zel.



"Bawiha pawh arawn lêt tawh a, I nupui neihna tûr chu a phûr ve khawp kha"



Nu Sangtei chuan a han ti zauh a, ka beng ka lo tun nghâl hrâ mai.


"Eng engmaw?"


Ka in rin hmâ chuan ka lo ti sap, ka lungphû arawn rang dut dut mai, ka awm dân hi ka duh lo lutuk ringawt.


U Joseph-a chuan ka kut arawn vuan vat, a hmêl ka en a, chîk zet hian min lo en thung, ka awm dân teh hlut kha, ani tân pawh a ngaih that thlâk loh viau ang.



"Ani pawn nupui nei vat se tha ang"


A han tih zui phei chuan ka hik chhuak vekin ka hria, ka tho thut a, blacony lamah boruak thianghlim hîp tûrin ka chhuak nghâl.



Bolcony ah chuan thâwk ka la kâwk kâwk a, ka ti thei ang, ka thei tur a ni, in beng daih ka ngai, ka âwm dawm chuan maimitchhîng vang vangin boruak ka hîp lût vang vang a, muangchâng chuan ka thaw chhuak leh riai riai mai, engkim a tha vek e.



"Feli, i tha em?"


Ka dar a min rawn vuan tu lam chu ka hawi a, min ngaihtuah hmêl zet hian min lo en, enge ka hriat pawh ka hre lo, a kawngah chuan ka kuah thlawp a, a hamhaih deuh a niang min kuah lêt ve lawk lo, a hnu deuh ah chuan ka hnungah hian arawn bêng ta thak thak a.


"Ka awmdân vâng khân ka tihpalh aw"


Ka han ti ringawt a, min kuahna chu thlahin ka biang tawn tawnah chuan a vuan a, rawn kûn hniamin hnâi zetah hian min rawn en.


"Ka hria lawm, engkim ka hria, hmeichhe chak tak ini a, i rilru a nghet bawk, chuvângin ka ring che"



Min en reng chung hian arawn ti sup a, ka lo bu nghauh nghauh mai, ka chak leh sawt hian ka hria.



_________
Thim thet thet ah chuan chaw hlui kan kîl ho thap a, Isaka erawh ala rawn tel ve lo, kawngkhâr a rîk a piangin ka lungphu a rang dawt dawt zêl a, amah an ni lo tih ka hriat veleh ka thaw huai zel, min hmuh hunah engtiang chiahin nge a awm ang le? Ni lo, ka awm chhûng hi chuan lo haw lo hrâm se ka ti takzet a ni.


Mahse rei tak ka pumpelh thei âwm si lo a.




"Engtin nge kan awmna i hriat? Lo kal lo tûrin ka ti che ni lawm ni?"



Ti hrâwk tu chu amah ngêi a ni, ka fian ken lai ka thlauh dat a, tunge a nih ka hre chiang, min enthap ni mai hian ka hria, U Joseph-a chuan ka fian thlauh chu min chhar sakin ka kutah chuan arawn hnawn a, ka lo khûr der der mai.



Kawr dum vek hâ hian arawn lût vut a, a hmêl chu a rum ûl mai, a hma ai chuan tlêmin a hmêl chu a puitling deuh tawh, a tleirâwl hmel kha a paih tawh, mahse a tha zual ting ni maiin ka hria.



Min hmu chu a ding dat, a hnungah chuan hmeichhe pakhat hian arawn zui a, tunge a nih ka hria, Mafaki unaunu ngêi kha a ni, khawdang hawi lêk lo hian min en reng nia.



Ka mittui a tla leh mai dawn, avan hrehawm tak, ka in thunun tûr a ni, rang takin ka hawisawn nghâl vat a.


"Bawiha tunge a?"



Nu Sangtei chuan alo ti hâ mai.


"Tûmah, haw nghâl ang che, i hmêl hi ka hmu peih lo"


Chu nu en chung chuan a ti deuh hrâwk a, a mittui a far fap mai, ka khawngaih letling zawk.



"Engpawh ni se, Hei, Felfeli hi i putea nupui tur chu a nia"



Nu Sângtei'n a tih chuan ka lo îp zawk thei,

"Lawkin, tumaw?"


Mengdur khâih hian a nu chu a en a,

"Isak, Ruatfeli hi ka nupui tur chu a nia, chuan i thiannu kha, tunge?"



U Joseph a chuan inring tâwk tak hian a han ti a,



A hmêl chu hmuh hrehawm khawp hian arawn dur khup mai, min rawn en a, min thah châk ngawih ngawih hmêl apu in ka hria.


"Pasal neih ilo tum amaw?"


A nui lui zui hak, ka thin zâwn hi ana zawk thei.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)