LALHRIATPUIA

[mawitei bawihtlung]

LALHRIATPUIA








CHAPTER 1


HRIATPUIA PIC👇🏻






“U Tha saw pa sawn min hau ania" ka nau in a rawn tihchuan a kawhna lam ka en a, he khuaah hian ka awmna a la reilova, zirtirtu hna thawk turin ka kal a ni ber. Ka nutei te an lo awm hlauha, in luah ngai lo in an kianga awm mai tur in ka nu leh pa bulah an rawn sawi kha a nia. A remchang phian bawk, ka nutei fanu tleirawlte in a kawhna lam ka en chu ka ner nang mai.










Mipa la upa lo tih hriat tak, sang tha tak leh taksa ria lam chu ka hmu a, amah pawh chuan min lo en ve reng bawk. Basketball an lo khel a ,ka lam chu a en ngar ngar “Kal ang,a ho lutuk" tiin ka nau chu kalpui mai ka tum a “Aaaa u Tha, an sual si mi an tibuai reng a. U Hriatpuia saw a sual lutuk, he khuaah chuan a luck ber ang" a tihchuan ka ner nak mai.







Ni e ralkhat pawhin a hmelthatna chu a hriat viau, mahse ka tan chuan engmah a nilo. Chubakah an la nau mah mah, kal mai kan tum lai chuan “Ehiau Zualtei chu kha mikhual in nei thar a nimaw? Zaninah rawn rim a rem em" a tihchuan ka lo ner nak mai “Remlo, insual si chubakah nang ni ai fe chuan a upa aw, in rim phak a nilo" Zualtei lah chuan a lo tinghal hlar a.








Chu mite thian ho chu an nui leh dar dar mai, an chapo ve tawk hle tih ka hre thei. Ka kal sawn nghal nal nal a “U Tha, kha mite kha i zirtir ka ring tlat. An awm tha duh lo si, kan khua a lian tawha u Hriatpuia phei kha chu apa hi DC a nia, an hlau thei lutuk a sual thiam bawk si. Enkawl i huphurh em?" a tihchuan ka nui sak a.






“Huphurh lo e, an zirtirtu ka nihna ang in min zah ve ang chu.Tirawh le haw tawh ang" tiin in lam chu ka panpui a, thingtlang khua si ah chuan khaw lian tak an ni ngei ang. Khawpuiah an chhiar thei tep tawh hialin ka ring, bialpa nghet ka nei a, a ni chuan min nghah a pawi tilo bawk. A puitlingin a ni chuan kum 30 a kai tawh a, kei erawhin ka kum 26 na ka hmang mek a thung. Aizawl electric vengah kan awm ve ve a, kan chhungte ve ve pawh in min lawmpui bawk .








Inneih thuai duh mahse keimahin hna te thawha sum khawl ka duh ve miau va, nakin hunah inthen emaw a nih loh pawhin buaina ka tawh thut ah pawh midang pun buai ngailo a keimah in tun nun theih kha ka duh ber a ni. In kan thlen rualin nutei chuan chaw ei a lo rawt a, ni e kei a tan pawh ka first day a nih dawn avangin ka tlai thiang lo hrim hrim. Hun hi ka ngai pawimawh a, tlai mai mai hi ka duh ngai hek lo.










Chaw eikham rual chuan thleng sil sawk sawkin ka insiam zui a, ka zawh rualin school lam chu ka pan nghal vat, higher ah ka thawk dawn a. Chuvang chuan ka incheina pawh ka uluk viau, nulat tlangval hre chho tan an niin engkim an hmuh ang an zir hma em em a, chuvang chuan ka theih tawp ka chhuah ngai ngei ang. An luhlul hunlai tak mahni dik intih hun lai ber a ni bawk nen.








Chutia ka kal mawp mawp lai chuan bike hian min rawn su thawi thuak a, au thatin ka tlu nghal hnawk mai. Bike pawh chu a in break ri tuar a “I tha em?" tiin ka bulah chuan a rawn thu thla a, a helmetin a hmel a khuh veka, a mit bak ka hmu theilo. A mitmeng chu a mawiin a cool raih ka timai, ka ke chu a rawn hmet a. Ka ner nghal sak mai, a na zek lehnghal a.









Ka kekawr chu hlimin a hmet a, a kut chu a nemin mi a hmet thiam phian mai. A mitmeng ringawt chu ka lo en leh thin, hetiang khawpa mitmeng nalh tih hi ka la neilo, a helmet chu a rawn phelh a, ka phu nghal zawk mai, kha Lalhriatpuia ngei kha a ni “I tha maw miss" tiin a rawn nui sak a. Ka melh nghal nghek, ka nauin an mizia a sawi dan a tang khan ka haw ve em em hi a ni tawp.









Tho chhuakin ka inbeng fai a “Ka tha" tihlakin ka kal nghal nal nal “Chhelo hle mai" a rawn tihzui chuan ka inseh ruh nghek a, hepa hi ka class ah a awm a nih vaih chuan nuam ka tih pawh ka ring nek lo e.







Office ka lut a, ka thawhpui turte chuan min lo lawm dar dar a, thawhpui nuam tak an nih ka ring nghal ringawt. Mihring hi chu kan hmel lan dan atang hian tam tak chu a hriat theih miau va “I lo thawk thei tur chu a lawmawm hle mai, kan in daih lo bawk sia Nunkimi min ti mai dawn a nia,hei hi sir Rema, Sir Jonathana, Sir Thana, Miss Sangsangi" tiin midang chu min hmelhriat tir zung zunga.










Nui sanga chibai in “Lalthakimi ka nia,Thai emaw Kimkim min ti mai dawn a nia" tiin ka nuih let sang a “Tehreng mai, hei class tan a hun tep, rinai zirlai hi kan ngaha. Enkawl har tawk hi an awm ve thin a, a bikin class 12 section c ho saw enkawl nasat an ngai a nia, an luhlul bawk si. Nang pawh Lalhriatpuia lakah sawn fimkhur ang che, miss te chhaih a ching a nia" Sir Jonathanan a rawn tihchuan ka ner nak.









Kan Lalhriatpuia em em chu eng ang mi chiah nge maw a nih le? Ka awm tirh phat atangin a chanchin tha zawng ka la hrelo hrim hrim. “Ni e ,a thu hi an awih hlawm bawk sia, amah vangin kan zirlaite an sual zo dawn. Hmeichhia ho lah chuti bawk, a pa in thil a ti thei sia an ngaisangin an zah a ni ber. A chhungte pawhin enkawl hahthlak ti a thingtlang lama rawn dah kha an nia" tiin an sawi zawm a.









“Lungngai suh u chutiang mi chuan min mamawh hle a nihchu" fiamthu a ka tihchuan kan nui ho dar dar a, class tan a hun tak avang chuan kan in then darh phak phak a. Section C a ka luh rual chuan min lo wish in an ding dial a ,Lalhriatpuia ding lo ka hmuh chuan ka thinrim nghal phat mai. Pawn lam chu thu chungin a lo thlir hmak nia.








“In thu thei ang, vawiin atang ka lo thawk dawn a, zirtir nuam tak in nih ka beisei, zirlai ti tha panga ka subject bikah lawm man kan pe thin ang. Tin lehkha in zir that viau a ngai dawn a nihchu aw, in chanchin in teachers te hnen atangin ka lo hria a, ka class lak lai chuan thuawih taka in awm ka beisei dawn a nia. In nu leh pa ten rim takin hna an thawk a, nang ni in in puih let theihna chu tha tak leh theihtawpa lehkha in zir hi a ni tih in hre dawn a nia, nel tak in in hriat loh te min zawt thin ula, chutih rualin zahlo lutuka min en kha ka duh dawn lo ania. Le hming lam ang aw" tiin an hming chu ka lam diat diat a.









Lalhriatpuia pawhin rinloh lutukin a lo present ve teh khiah a, a tawng duh dawn lo emaw tih laiin. Tuna a hmel awmdan ah saw chuan rawlthar chimawm tak a nih ka ring, class chu ka la chhunzawm a,rinai thu an zawm tha phian mai. An hriatthiam loh lai min rawn zawh chuan tha tak in ka lo hrilh ve zel a, zirlaiten thu an awih theih nan chuan zirtirtute pawh hi kan zau ve angai tih ka hria.









Englai pawha hmel nelawm loh kan put chuan zirlaiten min pawh an harsat in, thu pawh an awih lo nge nge thin. Ka nu leh pa min zilh tamna ber pawh a ni, class ka lak zawh ve chuan ka fak zauh a, an phu reng bawk. Teachers dangte sawi ang in an awm lo chu a lawmawm hrim hrim “Miss min lo hun zel rawh aw, i fel bik si" an tihchuan ka nuihsak a.









Office ka luh leh chuan chanchin min lo zawt nak nak a, zirlai an fel thu ka sawi chuan mak an tih hmel viau mai. Banah chuan ke in in lam ka pan hnak hnak a, nisa chu a hrehawm ngei mai, ka bialpa Chhana chu ka text pah mawlh mawlh a, company hnuaiah a thawk a. Kan in be tam thei meuh lo.








Chutia phone ka lo en mawlh mawlh lai chuan ka bulah bike a lo dinga, ka en rual chuan Lalhriatpuia a ni tih ka hre nghal “Lo chuang rawh, in in thleng ka thlah ang che" a rawn tihchuan ka en ha mai, hepa hi min rualpui en nge maw ni “A ngailo mai ka lawm e, ke in ka kal thei a lawm" tiin ka nuih sang a.







Min en leh reng tawh, ka school naupang mah nise ka zam lek lek a ni, bike atang chuan rawn chhukin a helmet chu a phelh a “Chuang mai mai teh, kan miss i nia ke a haw tir che a mawi hleinem, khawngaihin" a rawn tihchuan ka bu ve ta nghat a. Ni e ka zirlai a nih bakah a mah hi hriat chian ka duh hrim hrim bawk a.







A bike ah chuan ka thu ve ta vat a, nui sakin a rawn thu ve nghal zat,a sang hle tih ka hre mai. Bike chu start vut vut in a tlanchhuak nghal a “Khawiah nge i awm a Hriatpui" ka tihchuan “In in piah lawkah khan ka awm reng a lawm, i nau khan a hrilh lo che anih ka ring, miss hetah hian engtia rei nge i thawh ang" a tihchuan “Ka hre rih lo le. Nang pawh ka hnuaia i zir chhung chu thu i awih viau ka beisei a nia" tiin a bike darthlalang atang chuan ka en a, a mit chiah lang mahse a nui tih ka hre thei.





Tlangval puitling tawh tak chu ni se mi eng emaw tak a nih ka ring,kan in kawt kan thlen chuan ka chhuk ta vat a “Ka lawm lutuk e" ka tihchuan bu nghatin “I number min pe thei angem" a tihchuan ka mit ka san ak a.







“Thil zawh duh che pawh ka nei mai thei a, ka zirlai ah pawh" a tih takah chuan ka number chu ziak mawlh mawlhin ka pe a “Mangtha le " tiin inchhung ah chuan ka lut zui a.