THE_WALLFLOWER_REVENGE BY Rodingliani Vanchhawng (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: THE_WALLFLOWER_REVENGE BY Rodingliani Vanchhawng (Completed)

Unread post by Ngaia » January 10th, 2021, 11:31 am

CHAPTER-19

LUCCA CAVELLI’S POV

Marco hotel sawi kan thleng chiah. Paolo an Tatiana a hruaina hmun niin a sawi. Darkhat chhung leka Paolo awmna a hre chat thei hi amak ka ti.

Thurualpui a nei tha aniang ka ti ta ringawt. Ngaihtuah buaina hun ka neilo. A lakah ka lawm hle rih. Hotel chankang tak chhawng chung berah chuan ka theih anga chakin ka tlan a.

Ka thin hi a phu rang tawh lutuk. Kha Paolo mi tlaktlailo khan Tatiana emaw kan naute a khawih anih vaih chuan ka kutah ngei ah thi khawp ang.

Marco room number sawi ka thleng thei hram. Ani leh Francesca erawhin Police koh a ngaih thu an sawi tlat avangin min kalsan ta anihkha. Ka ngaipawimawh lemlo. Tatiana chhanchhuah a Paolo thah, chuzawng chu ka tihtur ani.

Dik taka kan tih angai an tih tlat avangin ka hnial buai peih talo, ka kalsan tawp. An inthurual vawi khatna a ni hial ang.

Marco leh Francesca hi an inhmuh tirh phat atang an inngaina hlawllo. Mihring mizia a an huat tak ve ve an inhmuh tawn sak ani maithei. Francesca hian mipa awm herh, mize inthup rân leh engmah pawisak neilo hi a haw hle. Marco mizia sawifiahna diktak ani. Chuan Marco, college kan kallai atanga ka hriat tawh hian hmeichhe thutak run leh dan zawm thlap thlap ho hi a haw hle bawk. Francesca mizia ani veleh chiah..amah Marco ngei pawhin a pha lemlo.

Thlawhna kan luhtirh atang khan an inthah duh nghal rum rum ka ring ania..ka ringsual deuh. Mahse an inhnial buai char char tho. Ka vin hrep hnuah an tawp ve chauh anihkha.

An pahnihin ka kalsan sia..thil thalo a thlen palh ka hlau deuh..anlo intibuai leh emlo ang chu..duhtawk turin an intiam tak kha.

Ka hmaa mipa pahnih ding rûn chu ka melh ran. Kawngkhar an veng tlat..Renaldi ui khawite an ni ngei ang maw.

“Awm sawn rawh u.” Ka ti nghet charh..engahmah an ngailo.

“Awm sawn rawh u ka tihchu.” Anla chesawn chuang eihlo.

A tawk viau e. Pangngai taka awm reng a tulna ka hrelo. Ka khawhmuh rawn sen vekin ka thisen a so bulh bulh..min hnaih zawk mipa chu a kawr awmah ka tham sawk a..a pumah ka pet nghal pawp...thal tawpin a kun nghal tlawk tlawk..chechang tur a awm tawhlo. Pakhat zawk chuan min rawn khawih a tum...mahse ani ai ka che rang zawk tlat..a ban a hnung lamah herh sakin a hmai chu bang nen ka nawrchilh sawk.

“Ka sawilawk kha.” Ka tihkhum sak.

“Paolo Renaldi laka in rinawmna chu a ropui e..mahse a huang chin a pel ani..a thiltih rah chu—”

Ka nupui au thawm ka hriat chuan ka thilsawi la ka tawp chut. Ka insumtheihna a puakkeh tak tak tawh. Ka hming a lam ani.

“Lucca..” ka tanpuina a ngen ani. Dinhmun hlauhawmah a ding ani ngei ang. A chungah engpawh a thleng anihchuan ka tuarzo lo ang. Ka hmangaih ka nupui tan hian engpawh tih ka inhuam.

Hmangaih maw? Tinge a hma khan kalo ngaihtuah chhuah ngai miahloh. Aw, Tatiana hi ka nunna ai pawn ka hmangaih. Ka thinlung hi a ta ani. “Lucca..min tanpui rawh. Lucca..”

Uicho pahnhihna lu chu bangah ka toh tirleh chawrh a..nikhaw hreloin a thal nghal tawp. Ka nupui chu ka zawng nghal ruai...bedroom a ka thil hmuh vang chuan ka ding chawt.

Zawng Paolo Renaldi, keimah ngeiin hremhmunah ka thawn dawn khawp. Ka nupui khawih luih a tum amaw? Zau tawk tawkin ka pen phei nghal pawk pawk.. Tatiana lak atang pawt sawn lawpin leiah ka theh thla thuai.

Ka Tatiana landan chu a khawngaih thlak takzet. A mit mawitak te chu a senvek .. A mittui a luang ngiai ngiai bawk. A sam a thur chhap a..a kawr pawh tuemaw in tihluihna in a pawtchhia tih hriat takin a thler pheng phung mai.

Muangchangin a rawn tho chhuak a..Ka tana hlu ber anihhi—a tak ka nih a ring chiahlo nge zawitein, “Lucca..?” a rawn tisup.

“I tha em Tatiana mia?” ngaihtha vakloin kalo zawt vat.

A kut te takte chuan a hmui hupin a tap nghal hlawp hlawp. Ka thinlung hi hmersawk ang mai ani..a taplai hmuh hi hrehawm ka ti takzet.

Renaldi rawn rum ri tuah tuah chuan a awm tih min hriatchhuahtir leh chiah. Ka nupui en zeuhin chhuata ui let reng lam ka pan nghal.

Awle, in rulhlet a hun e.

“Oh..nang uicho..” Renaldi chuan Italian in theileh theiloin a ti anihchu. Ding thuta min rawn hnek chuan kalo inring hmanlo..ka kat dawrh. Ka hmui na zawk chu ka khawih zeuh. Tatiana lo thaw hrawk ri chu ka hria. “Engtin nge min zawnhmuh theih?”

Khawih let tura insiamremin ka nuih sak, “Ka zawn hmuh theihlohna tur che bihruk theihna i neilo.”

“Oh ..Animaw?”

“Aw” pan hnaiin veilama ka hnek tur chu alo thle sawn hman.. Mahse dinglamin ka hnek chawrh tho... A thal nghal tawp.

A dinchhuah leh pawh ka nghaklo, a hmaiah tak chiang mangkhengin ka hnek leh chawrh..thinrimna in minbual â tawh aniber...a hnar atang thisen a chhuah zawih zawih pawn kala duhtawklo. A thin zawn ah ka hnek leh hrep...na tiin a te tuar tuar..a kawm ngawt ngawt tawh.

“Tho rawh hmela!” A naka nataka ka pet leh chuan a ruh pahnih vel tal a tliah ka ring. “Engmah titheilo a awmchu eng nge a an?”

“Ugh..nang mihur fapa, duke ve mai mai.” Tiin tûr zetin min melh. “Tatiana hian kan laka a phuba lak duhvang nilo se nanghi a nei tawplo ang che. A mipa hmangaih awmchhun ka nihhi, nang niloin.”

Tactic thar maw? Kan inneihna hmanga min tihthaih a tum vel a maw? A hlawhchham chiang hle ang. Ka nuih leh suk.. “Ah.. Mahse min nei, nilawm ni? A chhan chu engpawh nise dan ang taka a pasal ka ni. Ka damchhung chuan i nei thei chuanglo.”

“Anihchuan, ka thah che angai anihchu.” A rawn tho tuah tuah. “I thlarau chauh min pawh then tumtu a nih theih nan i thih angai anihchu.”

“Kan en ang chu.” Ka tilet ve sak. Min rawn hnek leh a tum chu a muang mah mah..lo tawlhhnungin a hmaiah bawk ka hnek leh siah. Tuikhawhthla ang maiin a ka atang thisen a luang zawih zawih tawh. Hmuhnawm lutuk.

“Khawi atangin nge maw hetia insual hi i thiam phiangsen ni?” Thisen a khat hnuang a ka chu a tuai thuak. “Underground boxer ang mai alawm inih.”
(Underground boxer= dan phalloh a..pawisa inchawia insual thin..pawisak anneilo.)

Ka nuih zeuh. “Duke ni mah ila, mipa tho ka nihhi. Mipa chuan a ta a venghim tur ani.”

“Tatiana hi i ta anilo!!”

Ka mit ka san ak, “Oh..a ni.”

“Anilo!!..” min khawih tumin a rawn cheleh..mahse room chhunga rawn lutte avang chuan a ding chut.


“Oh..kutlawnga insual lai hmuhnawm ka tihzia hi..” Marco chuan a rawn ti lut ham ham. A hnungah Francesca hlauhthawn hmel tak leh Las Vegas police pahnihin an rawn zui. “A tir atanga ka en theihnan min lo nghah law law tur che ania.”

“Signore..” Francesca’n a khak hlak..

“Eng nge?” a ti let ha. Kan dinhmun hi nuam ati mah mahin ka hria.

“Mr. Renaldi.” Officer pakhat zawk chuan tiin, “Tatiana Cavelli, Caprielle duchess i kidnap avangin man ini e.”

“I a ta em ni?” awihloh hmel zetin a au nghek. “Kei niloin hepa hi alawm in man tur.” Min kawk va mai. “Ka chunga a tih hi en ta che.”

“Oh, oh, a sawidik ve tho mai.” Marco bawk. “Duke hi ka hriat tawh ah chuan insual ala thiam ber.”

“Engvang in maw?” Paolo chuan alo tileh hlak.

Marco chuan Paolo hmel a hmu chu a lungawi hmel hliah hliah. “A chhan chu Special Force ah a thawk thin mawle..Mawla. Bodyguard a neih ngailoh chhan pawh amah a invenhim theih vang ani.”

Engmah sawi leh set set tawh loin officer pahnih chuan Paolo Renaldi chu an hruaichhuak a...min tihmualpho tur thu ten minla vau ve pawng pawng.

“Min ring tawp mai rawh thiana.” Marco chuan ti ro halhin, “Lucca kuta awm aiin Jail a awm itan a him zawk.”

Marco leh Francesca chuan an zawhna vel chhang turin an zuichhuak ve nghal a..ka nupui nen chiah kan awm ta.

A tawp a tawpah..

Paolo nen kan insualbuai chhung khan a ngawi char char a..a tha em le? Ka nunna aia ka hmangaih hmeichhia hi. “I ding thei em Tatiana?” a thatleh thatloh pawh zawt loin chu chu ka zawt anihchu!! Ka va mawl tak.

“Aw..” a rawn ti tial deuh ruai. Ka kai tho a. “Lucca..”

“Shh..” a tawng tur chu ka lo dang a. “I rai tih ka hria alawm..kan naute nen hian in tha em, ka hmangaih?”

Kan naute.

Chau zetin a nuisuk, “Aw..kan tha ve ve..ka hrilh vat lo che a..tihpalh Lucca.”

“A pawilo.” Ka tileh sup. “Kal ang.”

A hriatthiam hmel chiahloh. “Khawiah maw?”

“Inah”

.......................................

TATIANA ROSTOVA’S POV

Kidnap thil vel thlen atang karkhat a liam leh tawh. Paolo chu damdawinah enkawl mek ani a..mahse a chhuah hunah jail a tan ngei theihnan Lucca’n hmalak a tumruh hle.

Ka thaw hak. Tun kar reilote chhung khan ka chungah thil avan thleng hnem hman tak..ka beisei ngaimiahlohin ka rai a, Paolo leh Sabrina te laka phuba lak ka bansan a, ka chunga an thiltih ah ka ngaidam a..chuan..kidnap ka ni bawk.


Las Vegas atang kan let leh hnuin Lucca hian a hmuh phakloh a ka awm a remti lo bur. Minute tin mai hian a hmuh phakah ka awm reng a ngai. Penthouse ka chhuahsan changa min veng turin bodyguard pahnih aruai bawk. Inbum naah ka tlu lut tawhlo ang tih ka hrilh pawn a ngaithla lo bur. Ka unauhrawn alo awm ve bawk si...a pasalhual chunga kan thiltih vang hian eng nge a tih dawn ka hre silo.

Chuvang chuan a thu awih hi a tha mai.

“Tatiana?” Chu...a rawn au leh chul tawh. “Tatiana? Khawnge i awm?”

Ka thaw hak. Huiham. A mit a men ruala a banphak a ka awmloh chuan min zawn nghal ruai kha ka ring reng a. A bula ka awmloh hi chuan dinhmun hlauhawm ah ka ding emaw a ti ringawt zel.


“Hreptak hian! Khawnge i awm Tatiana?”

“Hetah ka awm.” Living room atang ka chhang ta vat...min kamkhat leh hlak palh ang.


“Tinge min chhan har em em?” a rawn la tinghek zui.

Ngaihsak lemloin ka thinpui inlai ka in chhunzawm mawlh mawlh. “Ka hre hleinem.”

Min melh rum em em lehnghal.. chhangro chauh tukthuan ah ka ei tih a rawn hmuh phei chuan den tak ani...a meng alh pawp in ka hria.

“Engvangin nge chhang ro chiah i ei?” nin hmel zetin a rawn ti. “Thil i eive deuhhlek angai. I pum chhungah khan nunna nei dang a awm ve tih hre ta che. Ngaihtuah ve rawh Tatiana.”

Nimin aiin a phun hma hret. Min zilh hrep zel. Ka ngai thutak lo tih erawh lantir kher ka tumlo. Kan fa a pawm mai hi chu mak ka tive deuh..mahse a inchhir hmel ka hmu ngam chuanglo.

“Zing lamah hian ka awm ala nuamlo thin alawm Lucca.” Pangngai deuhin ka tive mai. “Hei chauh hi eitheih ka nei. I duh ve em?”


“Aih. Ka lawm e.” Thaw la vang vangin min nuih suk. “Lo kal rawh. Tukthuan pangngai deuhhlek va ei ang.”

Ka thil eilai chu dahin ka pasal kutah chuan ka vuan a...dining room lam min panpui ta a.

Mrs. Rhodes chuan waffles...a chunga thei tharlam tak tak dah alo siam mek—ka duhber chi.

Engmah ka sawi hmain Lucca’n thutna tur min pawhchhuah sak pahin, “In enkawltu hnenah hian i waffles ngainat ber siam turin ka tia.”

“Mahse—”

A lu a thing hmak. “Khang chhangro ei kha a tawk tawh. Tukthuan pangngai tak zingtin i ei tawh ang.”

Huizz..kan duke thuduh-a ngei anihhi. “Mahse Lucca engthil dang mah ka ei thei hleinem. Ka pum lamin alo hnial zel alawm.”

“Engtia rei nge ni tawh? Kar sawm vel tiraw i rai tawh? I ei thei tawh em em ang.”

Ka melh nghek. “Eng nge naupai chungchang i hriat ve a,Lucca?”

“Aw...zantin pregnancy lehkhabu ka chhiar ziah alawm.”

Ka en ha ringawt. Tak takin? Chutiang chu a chhiar thin amaw? Anihchuan naute kannei tur hi a hlim ve tak tak tihna, ni em?

Ka awmdan rawn enin a hmai a sen tawn tawn anihchu. Kan duke mi rorum hi a zak vel amaw.

“Eng nge?” a rawn ti hluai.

Ka dar ka chhinkhum ak. Nuilo turin ka insum tang tang...a har bawk si. “Engmah. Pu zahawm. Engmah anilo.”

“Min nuih.” A mitmeng silver rawng mawi tak chuan min melh ngur.

Kei lahin ka nuih a za tih lantir loh hram ka tum. “Aih, sir.”

Rinloh deuhin a rawn nui hawk hawk. “Dawt sawi iva han thiamlo tak Tatiana.”

In enkawltuin thingpui a thlit sak laiin ka waffle tur pahnih ka thlengah a rawn dah a..a chungah blueberry a dah mawlh mawlh bawk. Italy atang a rawn let leh hnuin coffee rim ka tithei lo tih a hria a..zingtin thingpui a in ve ta ziah.

Kan eitan hmain ..sawilawk pawh awm lemloin inleng kan nei thut.

Marco Orsini mi ropui-a.

A ropui ka tihna tak tak pawh anilo. Francesca khan a chanchin hi chu min hrilh teuh tawh. Italian billionaire kawplawr ve tak. Mahse ka pasalhual hlui lak atanga min chhanchhuah nan nasa takin Lucca a tanpui tih ka hria..chuvang chuan lawmthu hrilh kala ba.

“Marco” Lucca chuan lo chhawn vatin, “Tun ang zing zingah i rawn lan teh hlawl. Tukthuan hi rawn kil ve ta che.”

“Ka rawn kal chhan tak zawk chu. Paolo Renaldi chu nimin khan damdawiin atang a chhuak a..jail ah an thawn nghal.”


“Oh animaw?” hlim hmel zetin Lucca’n a zawtlet nghal. Thil nuihzatthlak tak hria te pawh a ang lek lek.

“Aw” Marco an eiloh hmel zetin alo ti hmuk. “Hnar ruh tliak, nakruh pahnih tliak leh ban ruh pelh. A chunga i thil tih ngaihtuahin a tuarchhel zek. A na lutuk lo a.”

“Waffles,Marco?” Ka awmve tih an hriat nan kalo ti ve a.

Ngainatawm zetin a rawn nui. Hmeichhia te thawmhnaw ang maia a thehthang thin chung pawha an duh em em pawh hi a awmlo hranlo. “Aih. Ka lawm e. Mahse coffee kalo duh ang duchess.”

“Coffee chu menu ah a awmlo tlat sir” chimawm zetin ka nuih suk.

Ka thilsawi vang chuan mak ti zetin a hawi â huih mai. “Tinge? Timaw?”

“Coffee rim a hua a.” Lucca zawkin lo chhangin, “Chuvang alawm zingtin thingpui ka in tlauh tlauh.”

Za lutuk in Marco a nui hawk hawk. “Anihchu..nihleh hmundang ah coffee chu ka in mai ang e.”

A chhuah hnuah tukthuan ka eitan thei chauh. “Chuan...?” Lucca’n a rawn ti tan a.

Melh chho in, “Eng nge?”

A hrawk a thian kharh kharh, “I scan hmasa ber nei turin appoinment kalo siam a.”

“Ka scan hmasa ber maw?”

“Aw”

“Engtikah?”

“Tukin zing. Dar 10 ah.”

Tukin zing hian scan hmasa ber ka nei dawn...
.....
Dar 10:05 ah chiah chiah scan tihna tur khumah ka mu ran tawh. Sonographer chuan gel vawt raih mai ka dul la thep thlerah a rawn hnawih a. Ka zam lutuk..ka thinphu pawh a rang narawh e.

“I hlau em ni?” ka mipa hriat tawha hmeltha ber mai chuan khum bula thutthlenga thu chungin minlo zawt a.

“Hlau mah mah..” ka thaw te hi a chham lek lekin ka hria.

“A tha em em ang.” Min ngaihtuah tih hriat takin ka kut vawtthler chu a hum vang vang a.

Sonographer chuan a khawl kenlai chu ka dulah ka thaikual tan ta a. Screen ah chuan eng eng emaw a rawn lang..ka hrethiam ve lo...mahse doctor in scan a en tak vung vung chuan ka ngaih a tha chiahlo.

“Zing lamah i awm ala nuamlo thin em ka pi?”

Harsa takin chil ka lem khawlh. Diklo a awm em ni? “Aw”

“I chau deuh reng bawk anga?”

“Aw”

Oh..thil diklo a awm ani ngei ang.. Khawngaih takin kan naute hi tha hram rawh se.

Ka hlauthawng hmel hmuin Lucca chuan ka kut a rawn vuan leh a. “Eng nge ni? Engnge i hmuh? Engkim a tha vek em?”

Sonographer hmel thutak run chu nuihmelin a rawn thlak thut. “Ka lawmpui a che ka pu. I nupui hian phir a pai mek ani.”

..........................

TATIANA ROSTOVA’S POV

Phir.. Phir.. Phir..

Chu ringawt chu tukin zing ka thawh tirh atang ka rilru ah a awm. Naute pakhat mai niloin pahnih maw ka neih dawn?

Nimin scan khan a tichiang ani. Chuvang chu ania anih dan tur aia ka chauh zual em em thin. Ka dul thep thlerah chuan ka kut ka nghat a..vawilehkhata han dawnsawn mai dan chu ka thiamlo takzet..mahse ka naute phir te tan hian nu tha ber nih ka tum dawn ani.

“Tukthuan ei a hun e Tatiana.” Tudang niloin kan commander ngei ani. Office kal turin alo inpeih at tawh.

“Min zawm dawnlo maw?”

Inthiamloh hmel zetin a lu a thing a. “Tihpalh amore, board meeting pawimawh tak ka nei a..ka tlai tep tawh.”

Ka sofa thutna ah chuan ka thu tum bur ringawt. Hna pawimawh a nei tihchu ka hria mahse tukthuan min kilpui turin ka duh. Zingtin mahni chauha thil eiziah hi ka ning...amah nena eidun ka duh alawm.

A sumdawnna tibuai lo turin keimah leh keimah ka inhlau hlak. Ka rai vang hi ani pakhat. New York a a rawn let atang a ngaihsak hi ka phut ngawih ngawih reng mai ani.


Ka lungngai hmel chu hmuin min rawn nuih suk a. “Lungngai suh Tatiana. Ih..zaninah restaurant ah zanriah kan kil dun dawn em ni ang? Engnge a an?”

Ka hlim leh nghal. “Tak tak maw? Zaninah min hruaichhuak dawn maw?”

“Aw cara mia..ka tiam a che.” Ka kaih turin a kut a rawn pharchhuak a..”Le..tukthuan ei tawh rawh le.”

A kut chu vuanin, “I tlai tep thu i sawi kha...keimahin kalo inbuaipui mai ang..Lucca.”

Min ti tuiral zawih zawih turin a rawn nui suk. “Duhtak, sumdawng mi ni mah ila..i pasal tho ka niihi. Pasal chuan a nupui a ngaihven hmasa ber tur ania lawm.”


Ka awm zawn a na nghal zawk. Tinge tiang kha a rawn sawi kher? Kan inneihna kha a tak anilo tih kan hre ve ve si a. Ka phuba lak naa min tanpui tur chuan kan innei ngei alawm mahse..ka phuba lak ka bansan vek tawh. Awmzia chu kan inneihna hi...

“Tatiana? Tatiana? I tha em?” kalo ding vung vung chu niin, “I awm a nuamlo ami? Doctor ko turin min duh em?”

Za vakloin ka nuih zeuh, “Ka tha, â lian.”

Lucca chu a ngaih a that hmel zanloh. A chair min pawhchhuah sakah chuan ka thu fel than a. “Ka tha tak tak..min ngaihtuah suh.”

“I chiang maw?” dawt ka sawileh sawiloh hriatnan ka hmel a enchiang hle.

“Kal rawh Lucca.” Ha lang meuhin ka nuih sen sen. “Zaninah kan inhmu dawnnia.”

Thaw hakin ka chalah a fawp vawng vawng. “Aw anih..thil thleng a awm chuan minlo call vat ang che, chiang em?”

Engmah a thlenglo ang ti a hnial ka tum mahse a hmel ka hmu chu ka sawingam lehlo.

“A chiang em Tatiana?”

“Aw.. Aw..ka pu zahawm ber.”

Lucca chuan a lu thing nak nakin a nui leh suk. “I chhanna kha – i thilsawi hi engahmah ka ngailo Lucca — itihna a ang mah zawk.”

Ava bawn tak.

“Zanah kan inhmu dawnnia, mi amore.” Hawilet lehtawhlo in a chhuak nghal nal nal..a kalliam hnuah ka tukthuan ka ei tan chiah.

Tui ti zeta pancake leh thei tharlam ka ei lai chuan in enkawltu rawn lang hlawlin min hmuh duhtu an awm tih a rawn sawi a.

“Tunge?”

A chil a lem khawlh ri chu ka hrepha..”ani chu—”

“Keimah Tatiana.”

Ka fork hman lai dahthla in min rawn tlawhtu chu ka en tawp. Khang thil zawng zawng a thlen hnu khan min hmu tura alo kal ka ring phalo reng reng. “Sabrina..”

“Kan inbe lawk thei angem?”

Chhanna chang pawh ka hrelo. Ka en tlawk tlawk ringawt. A dul pawh a puar ve tan tawh.

“Tehreng” ka chhanna a nghak reng tih ka hriat chuan ka tawngchhuak ve hram. Kan boruak hi a rit hle ani. “Thu la.”

“A falin kan inbe thei angem?” Kan in enkawltu chu a melh zeuh a.

Kan pahnih chauha awm ka ngam dawn em ni? Mrs. Rhodes chu min kalsan turin ka hrilh ta tho a..

“Eng thli chhia in nge rawn chhemlut che Sabrina?” Ka ti nghal hmuk.

“Biak che ka duh a.” Dam dupa tiin ka hmaa chairah chuan zawimuangin a thu a. A chauh hmel takzet.

“Paolo chungchang em ni?” tilehin, “A thiltih ah khan ngaidam turin min duh ani tiraw?”

“Aih! Aw.” A mitmeng â ruai chu thinrimna in a inthlak a..mahse a phena lungngaihna thuk tak chu ka hmu ani. “Ka sawitum chu—Paolo chanchin ani ngei a..mahse jail atanga bail chhuah lampang anilo.”

“Ka ngaithla e.” Ka ring nghal ngawt theilo. Min bum tawh a..tihnawn tirleh ka tumlo.

A zam tih hriat takin a kut a khawih neuh neuh a...inhualna zungbun a bun tawh miahlo..an inhualna an ti tawp tihna emni?

“Sabrina?”

“Kar hmasa khan Paolo ka tlawh a.” Tiin, “Thilthleng kha nang leh i pasal ruahmanna vek anih thu a sawi a.”

“Dawt anihchu!” kalo ti vat. “Chutiang—”

“Ka hria alawm Tatiana.” Tilehin, “Ka kan tum chuan bail chhuak turin min tia...hethil hi kan nuihliampui mai tur thu a sawi a...mahse ka hnial ani..ka kham tawh takzet. Kan inzawmna zawng zawng ka ch$ chat vek.”

Sawitur pawh ka hrelo. Paolo jaila a tan chhan kanni tih sawiin min rawn mawhpuh chiam ka ring ania.

“Wow..sawitur ka hrelo.”

“Nia. Ka awmdan chiah ani. Chuvang ania karkhat chhung zet nang hmu tur hian kalo kal ang nge kallo ang tiin ka rilru a insualbuai. Minlo biak duh ka ringlo takzet. Mahse ka tih ngei a ngai sia.”

“Sabrina..”

“Kum 21 liamta khan ka nu nen Manhattan a Lalin ang maia ropui mansion ah kan lut a..chutah chuan Lalpa leh a fanu anlo cheng a..Rostovs an ni. Reilote hnuah ka nu nen chuan an zarah nun nuam tak leh mi hausa nun dan angin kan nung ve tan ta a..mahse hmeichhia a thisen a Lal thisen luang miahlo chu mi hausa te zingah chuan a leng ve tak tak ngailo...”

“Sabrina eng nge maw i sawi le?” hrethiamlo zetin ka zawt a. “Awmze neiin engmah i sawilo ania.”

“Min sawi zawh tir rawh Tatiana.” Tilehin, “Chuan..Rostova lalfanu chu ka thik ta em em a.. .ka huat phah ta hial a. Ka theih ang angin mipui ngaihven nih ka tum thin. A neih zawng zawng kha neih ka duh. Amah kha nih ka duh ani. Italian sumdawng chhelo zet alo lang ta a..cinderella tana lalfapa thaber tur ani ngei ang. Mahse chu lalfapa chuan tum sang tak anei tlat. Cinderella naran mai mai a duhlo..lalfanu hausa tak a duh ani.”

Ka mittui in ka khawhmuh a rawn ti phe ruai ruai. A thilsawi hi in nghawng tirtur pawh ka nilo. Ka rai vang tileh phawt mai ang.

“Tichuan kan Russian lalfanu chu mipui mithmuh ah ngei a chhai tan ta a. Mi zawng zawng chuan thik hle mahse..cinderella ber erawhin mipui hmuhloh a awm kha a duh tlat.” Chawl datin harsa tih hmel zetin a thaw hak. “Kan thiltih dan kha ka kham takzet. Inthen in mipa dang ka zawng dawn tiin ka vau a. Kha zan khan in inhualna a tihtawp tur thu min tiam ani. Mahse i lu kha a na ta thut sia.” A mittui a rawn luang ngiai ngiai a. “Thah che kha kan tumlo tak tak. Accident anihkha. In inhualna a tihtawp hnuah Italy a a seilenna ah cheng dun turin kan intiam asin.”

Sabrina sawi zawng chuan kha zan kha ka hrechhuak ruai ruai.

“Thi tura kalsan che kha tihtur dik emaw ka ti tlat a. Kan nun atang khan i bo tawh dawn ani. Ani ka hmangaihna khan ka mit a tidel vek..ka hmangaih zia hi i hrethiamlo zawk ang Tatiana. Mahse min hmangaih let ve lo.”

“Sabrina..”

“Min ngaidam turin ka tilo che Tatiana.” Tho vutin a mittui a hru tawk. “A awlsam lo tih ka hria. Mahse engkim vang khan ka inchhir takzet. Tuna ka duh zawng chu ka naute nen nun thar tan ani..mangtha Tatiana..i hun minpek avangin ka lawm e.”

“Sabrina lawk..” tho ve vatin ka nun puma sawi ka inrin ngailoh thu chu ka sawi ta a. “Ka ngaidam che.”

Thawveng huai ang maia thaw hakin a mittui a rawn luang leh zawih zawih. “Ka lawm e Tatiana. Ka lawm takzet. Kha thu kha ka tan a hlutzia hi i hrelo zawk ang. Tihpalh, ka tihpalh lutuk Tatiana. I pasal nen nun nuam tak in hman ka beisei. Mipa tha tak ani a..nang leh naute hi a enkawl tha em em ang che u tih ka ring.”

“Naute te.” Intithei zetin ka unaunu chu ka hrilh a. “Phir ka nei dawn Sabrina.”

“Ka lawmpui lutuk che. Duke chu pasal tha ber ani ngei ang.”

“Ka hria alawm.” Ka nuih suk.

“Mangtha Tatiana.”

“Mangtha .” ka unaunu kalliam lai chu ka thlir vawng vawng. Sabrina nen kan inkar a fel tak siah chuan ka nun dan tur ngaihtuah a hun ve ta. Lucca nen kan inneihna chungchang sawidun a hun ta hle ani.

Ni e. Zaninah Lucca nen kan inneihna chungchang leh eng nge kan tih leh zel tur kan sawi ang. Inthenna lehkha leh kan fate lo piang tur chungchang.

Zanin..zaninah kan inneihna hma hun tur kan hria ang.

...................... ....


Rodingliani



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 10th, 2021, 11:32 am

LAST CHAPTER
CHAPTER-20

LUCCA CAVELLI’S POV

Kan zanriah kilna tur restaurant ah ka nupui ka nghak mek a. In a keiman ka va lam mai tur thu ka hrilh pawn amahin a rawn kaltheih thu a sawi tlat. Kan inbe zo deuh chiah na chungin ka sana ka en sek tawh...a lo thlen tep thu a sawi.

A rawn thleng ve vat mai ang chu. Tatiana in phir a pai mek tihhi awih harsa ka ti. Dio! Pa ka ni ve tak tak dawn. Ka nu in a hriat hun chuan a lawm teh ang chu.

Mahse ka nu chu hrilh ala hun rihlo. Tatiana nen thil sawifel hmasak tur kan nei tlat. Chuan, zanriah kil pah hian kan sawi theih ka beisei...hun tihkhawtlai zel hi a tha berin ka hrelo.

Restaurant rawn lut chiah hmeichhe chhelo em em mai chuan ka mit ala nghal chat. A kawr dum simple zet chu a inhmeh hle..midang pawh chuan ka nupui lam chu an en deuh sap sap hlawm a. A rawn phei zawng te chuan khawvel hi a chawl ta emaw tih mai tur ani..a reh thiap mai.

Ka nupui.
Ka duchess.
Ka ta anihhi.

Alo hnaih deuh takah chuan ka ding vat. “Good evening duchess.” A hmui sen sar ah fawp zeuhin a thutna tur ka lakchhuah sak ve nghal..helai hmuna mipate hian ka hmeichhia ani tihhi hre rawh se.

A biang a rawn tai tek a. “Good evening pu zahawm.” Lai zetin a ti sup.

Intithei setin ka then suk. Waiter rawn kalin kan order a la a. Tatiana hnena ka sawitum ka sawi hmain a kalsawn hun ka nghak phawt.

Kan inneihna chungchang.

“I ni hman eng nge a an duhtak?”

“A tha Lucca.”

Diklo a awm tih ka hre nghal. Ka ngaih a tha miahlo. “Eng nge ni Tatiana? Min hrilh rawh. Vawiin ah thil thleng a awm ani tiraw. Ka hrethei ani.”

“Oh ..engmah anilo Lucca.” Sawibelh a duhlo tih hriat zetin a ban a vei hluai.

“Tatiana.. “ ka tileh hmuk.

Thaw hakin rum deuhin min melh ringawt. “Aw ..a tha e..Zingah khan Sabrina alo kal a.”

“Chuan..eng nge thleng?”

“Engvakmah” a dar a chhin ak. “Ngaihdam min dil a..chuan ka ngaidam.”

“Eng a?” awihlo zetin ka zawt ha.

“Sabrina ka ngaidam ka ti.”

“Hetiang thu lelo ka hria hi ka awih theilo. Khang hrehawmna a thlen zawng zawng hnuah che awlsam takin...i ngaidam a maw?”

Thaw ala leh vang vang, a lungawi hmelbik chiahloh. “Ngaihdam kha thil awlsam ani reng renglo. Mahse hmalam kan pan a hun tawhin ka hria. Wallflower phuba lakna chu a tawp tawh.”

“I unaunu awlsam taka i kaltir mak chu rin harsa kala ti tho, mia moglie. I pasalhual hlui nen khan jail a tang dun tur zawk an ni.”

“Ka vahnu emaw vahpa hi jail a a pian ka duh hleinem Lucca.”

Hmeichhe rilru tha tak ani tih ka hria. Amah phatsantu, thah tumtu leh a neih zawng zawng laksak tumtu a ngaidam thei ania.

“An naute lo piang tur hian engmah tihsual a neilo.” Tatiana chuan a rawn tileh.

“Ka hria.” Kan thilsawi lai chu eitur rawn thlengin minti tawp a.

“Mahse Sabrina min rawn tlawh chungchnag zanin hian sawi ka duhlo Lucca.” Zam hmel deuh taka min enin, “Thil sawipui duh che ka nei ani.”

“Aw” lo ti ve in eitur chu ka enkual vel a. “Keipawh, kan inneihna chungchang sawidun ka duh.”

Ka hmusual nge pawh ka hrelo..a hmai a dang nghal lawp lawp.



“Aw” A chil lem ri khawlhin, “Inthenna lehkha leh naute kan enkawl dan tur vel sawifel a hun tawh viauin ka hria”



Engmaw a sawi kha? Ka thinphu nasa lutuk chu a na ngawt ngawt thei. Tatiana hian inthen a duhthu a sawizo chiah maw?



“Eng..engmaw i sawi?” Ka tawngchhuah dan chu keimah pawh ka anglo.



A thawleh hak..a mitmengah a ngaihtuahna lanchhuahtir miahlloin min en kar. “Ka sawi chu..phuba lak ka bansan ta bawk a. Kan inzawmna pawh tihtawp a huntawh in ka hria.”



“Engthu lelo ngei maw i sawi le!” ka ti nghek..ka au rin deuh vangin kan lam lo hawi sap sap tawk pawh an awm nual. Mahse ka pawisa lo.. Ka hmaa hmeichhia hi thin nawk nawk mai ania ka duh.



“Lucca” rawn ti hlakin min melh nghek. “I awki san suh.”



A tawk viau e. He thil hi ina sawi chhunzawm a tha ber ang. Tihi chuan naktuk chanchinthar ah kan inti mualpho tak ngial dawn.



“I hria em cara mia.” Tiin ka wallet atang kan eiman tur pawisa ka la chhuak a..dawhkan ah dahin ka tho vut. “Inah sawidun ila a that zawk ka ring.”



Min chhanna ka nghak buailo, ka pawt tho lawk a..ka chhuah pui nghal dawr dawr.



Ka rin ang chiah..ka tihluihna chu duhlo zetin a tang tang tang.. “Lucca!! Eng nge itih hi? Lucca!! Lucca Domenico Cavelli!.”



Ka Ferrari bul kan thlenin ka thlah ve chauh. “Nang hmeichhia.” Tih khum nghekin, “Eng nge i rilru ah khan awm?...engvangin nge thu awmze neilo hlir i sawi?”



“Thu awmze neilo anilo.” Tilehin, “Kan tihtur diktak ani.”



“Engvangin?”



“Engvangin a?” min melh rum anihchu..ka tihtur awm zawk tak ani. “Kan inremsiamnaah kha chuan ka tihtur ka tihzawh ah kan kawng ve ve kan zawh ang tih anih kha.”



Kha inremsiamna tlaktlailo zet kha.



“Mahse thil a danglam tawh .. Ni lawm ni?” tiin ka melh run.



“Aw” a thaw hak..min en let kar bawk..”Nau ka pai vang hian thil chu a danglam ngei alawm. Mahse ka rai vang maiin hmangaihna tello inneihna hi kan chhunzawm reng thei ngawt lo. Inthen pawh ni ila..kanla enkawl dun thei tho alawm.”



“Hmangaihna tello inneihna a?” ka au leh nghek. Ka thil hriat hi ka awihlo zawk. “Chutiang chu maw kan nih a Tatiana? Hmangaihna tello inneihna maw?”



“Maithei” ka rinloh deuhin a ti dam dup. “Keimah chauh hmangaihna a tlu lut ka nih chuan inneihna tak tak ani ngawt thei hleinem Lucca.”



“Engmaw i sawi?”



“Ka sawi chu.” Harsa tihhmel zetin thaw a la vang vang...”Ka hmangaih che Lucca. Hun reive tak atang khan ka hmangaih tawh che. Mahse Italian mipa zuna uai leh kha ka inzuam tawhlo mai chauh a ni.”



“I pasalhual hlui ang ka nilo Tatiana.” A mittui rawn luang ngiai ngiai chu ka hrukhul sak a.



“Ka hria alawm.” Tileh supin, “Mipa fel tak ini. Chuvang chuan hmeichhe tha tak i nun puma i hmangaih tur i phu ani. Ka rai vang ngawt hian he inneihna ah hian ka tan tir theilo che. Ka thlah zalen dawn che Lucca.”



“Eng ang vanduaina nge maw ka tawh bik a...nang ang hmeichhe mi ti thinur thiam em em, rilru chhah leh mawl muk lutuk hi ka tawn ni!!”



“Tinge i thinrim chiam chiam kher a?”



“Min thlah zalen dawn tihvel chu engthu awmze neilo nge ni ngai?” ka thinrim so leh bulh bulh tawh. “Ka hmangaih che..i hrelo lo em ni? Engvangin nge ka hmeichhe hmangaih ka bula a awm reng laiin midang ka zawn ang? I rai vang chauha awmpui tum che ka ni angah i ngai a maw Tatiana?”



“Ka hrethiamlo.” Hrilhhai hmek zetin a rawn tileh a. “A hma khan kan chhungkaw hotel i duh vang chauha min nei angin i insawi sia.”



“Ka ta a ka siam theihna tur che anihchuan engthil pawh ka sawi thei alawm.” Dam deuh zawkin ka ti leh.





“Lucca..”



“Ka hmangaih thu che hi ngaithla turin ila inringlo tih ka hriat avangin ka hrilh lawk lo che anihkha.”



“Tak tak maw?”



A hmeltha tak chu ka nuih suk. “Si, Te amo, mi amore.”



“Keipawn ka hmangaih che Lucca Cavelli.”



“Ka hria lawm.” Tiin zanin a a vawikhatnan ka fawp vawng vawng. “Tuipuia ka chhar ni che atang khan ka thinlung hi i ta ani tawh duhtak.”





“Tak tak maw?” hmangaihna a khat mitmeng de sawt sawt in min en a. “Min chhanchhuah dan pawh minla hrilh miahlo ania.”



“Engtik ni ah emaw kala hrilh ang che Tatiana mia.” Tiin a kut ka fawp leh zeuh. “I phuba lak i bansan takah chuan Italy ah let tawh ang hmiang. Kan fate hi Italy a piang turin ka duh ani. Ropui takin kan innei dawn nia. Mahse tunah rih chuan haw phawt teh ang..ka hmangaih zia che ka hmuhtir ang che.”



. ...................................



TATIANA ROSTOVA’S POV



Ka harh rualin ka mutna bul ka dap nghal dun dun..Lucca a awm miahlo. Ruak vekin ka awm tih hrechanglo lekin ka thochhuak vut.



Khawnge Lucca?



Min hmangaih thu a sawi kha awih harsa kala ti. Italy rama mipa thiltithei berin min hmangaih ani.





Nizan a hmangaihna kan chendun zawh in ka rai hi a beiseiloh thil anihloh thu a sawi a. Ka kalsan theihloh nan a ruahman lawk vek ani awm e.



Nisi khawnge tunah a awm?



Khumbul dawhkan a ka hriat than tak lehkha inthlep ka hmuh chuan ka nuisuk..thu inziak chu ka chhiar a..



Duchess duhtak,



Zing chibai, ka hmangaih. Nizana ka tiam ang che khan Italy rama inneihna ropui ber ka buatsaih sak dawn che ani. Mahse game khel phawt ila...i inpeih em, ka nupui duhtak?



-Lucca.



Ka te chul mai. Kawr ha nghal mawlh mawlhin phur zetin ka chhuak a.

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°



ROME, ITALY.

THLA SARIH HNUAH........



FRANCESCA MARCOLINI’S POV



“Boungiorno!” thawveng zetin private hospital a room pakhat ah chuan ka ti lut a.



“Francesca” nu leh pa ni thar chiah te chuan anlo tirual hluai..ka nuilut sen sen.



“Eng nge i an?” An mutna bulah ka phei a..an fa phir te anlo thlir dauh dauh.



“Ka hlim lutuk.” Tatiana chuan alo ti vat. Darkar 14 chhung nau veina room ah a awm tih a hmelah a langchhuaklo hrim hrim. An room chhung chu pangpar chi hrang hrang leh thilpek in a khat nuk mai.



“Francesca” a naute pawmlai chu inchhuang zeta rawn pawm hnaiin, “Kan naute te hi ila hmu lo ang tiraw, Makis leh Mariya an nih hi.”





Naute mipa zawk chu ka enchiang hmasa a..a hmai a tai tek a..a sam tlem te chu a dum hlap bawk. “Oh” kan Makis tereuhte-a chu a rawn meng thut..a pa ang chiahin mitmu silver rawng a nei. Cavelli thlah mitmeng diktak. Tatiana naute pawm zawk ka va enleh chu a lo harh kar tawh....Ani pawh mitmu silver rawng neiin a nu alo melh kiau. “Fing reuh lutuk” ka ti sap. “Mariya tiin a hming in phuah a.”





“Mariya tih hming hi kan tan a hlu lutuk.” Lucca chuan tiin a nupui chu duat takin a melh vawng vawng..a chalah a fawp leh zeuh. “Ka nupui hian nun thar a hman tantirh khan a hmang ani.”





Induat leh hmangaih taka an awmdun ka hmuh hian ka thik takzet. Hetiang hi neih ve theih ka chak takzet ani.



Ka nuam tichiahlo hmel Tatiana chuan a hmu ani ngei ang. “Nangmah chauhin em ni ilo kal Francesca? Khawnge Mar—”



“Aih aih.” Kalo ti vat. “Keimahin kalo kal.”



Lucca chuan, “A tiduh dah leh che em ni? Ani tiraw?” a rawn ti hmuk.



“Aih ..teuhlo” engvangin nge maw dawt ka sawi sak ngawt ni. Kha mihring mi lawmzawng sawina chang pawh hrelo kha. “Kan tha.”



“In inhau em ni?” Tatiana chuan a rawn tileh.



Hemi te nupa hian tinge maw zawhna min zawh chiam chiam mai ni. Thudik ka sawiphah takngial dawn!!.



Zalo zetin ka nui hak hak ringawt. “Aih..kan inhau lo tak tak..kan inzawmna chu sumdawnna thil chauh alawm.”





“Chu chu ka awih chiahlo.” Lucca chuan tiin, “Tunhnai hian in inzui chawt tih ka hria ania. Thuthang ka lo hriat dan phei chuan in inkar—”



Ka awm anuamlo tun tawh. “Eng thuthang maw?”



Hriatthiam hmel zetin an la inmelh ralh ralh zui.



“Eng thuthang?” ka ti leh.



“Nang leh –” Tatiana in a ti tan chiah tu emaw a lo lut hlawl.



“Boungiorno!!” ka aw hriat than zetin a rawn tihchuan awihlo zetin ka thaw hak. Hunlo lutuk.



“Marco..” Lucca chuan alo chhawn nghal vat.



Pangpar bawm a rawn khai lut a..a thianpa chu a melh no vaklo. “Tinge i aw chu? Min hmu chu i lawm vak na nge mia amico?”



“Hello Marco.” Tatiana zawkin alo ti dam dup. “Pangpar kha ka ta tur em ni? Ka lawm e.”



Marco chuan room chhung chu en kual thuakin. “Dahna tur hmun pawh a awm hmel loh.”



Minla hmuve miahlo. Ka awm tihhi hreve reng reng rawh se. “Khawi..hetah hian kalo dah ang.”



Min hmu chu mak tih hmel takin min en ha...mahse a inthlak leh nghal..kalo awm ve chu alawm hmel viauloh. “Francesca”



Ngawi rengin kan in en vang vang..midang an awmve tih pawh ka hre chang tawhlo. Kan boruak reh thap chu Tatiana in a rawn titawp a. “Ka room hi pangpar dawr ang mai ani ..inti ve em?”



“Aw” Marco chuan a chhang..mahse minla en reng.



Min melh dan hi ka duhlo..a tawngchhuah leh rualin ka tuiral dawn tih ka chiang. .chu chu ka duhlo. Ka chhuah a ngai.



“Lucca, Tatiana.” Tiin ka bag ka la vut. “Ka kal angai..kalo kan leh ang che u.”



Hawilet tawhloin chak thei ang berin ka kal nghal hlawk hlawk. Elevator ka thleng tep tih ah a aw ka hre leh. “Francesca ..lo ding teh.”



Ka ding awmlo e mai. “Min lo zui suh. Lut rawh.”



“Lawk..” ka banah a rawn vuan a. “Inbiak kan ngai.”



“Aih. Kan ngailo.”



“Aw..kan ngai.” Nurse ho in anlo thlir dauh dauh pawh chu a hrelo der vek. “Thil thleng kha kan sawidun a ngai. Kumkhuain kan pehhel reng theilo.”



“Engmah thil thleng a awmlo.” Ka awm zawn rawn na ngut ngut chu ka haider a...



“A awm.” Min pawt hnai sawk. Ka beng bul set ah, “Khum min tawmpui takah chuan thil thleng zel tur kan sawidun a ngai..”



................................................ ...



THE END😊


Rodingliani


*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)