REMEMBER ME by Amy Cck CHAPTER - 1

Moderator: writers

Amy
Posts: 374
Joined: May 15th, 2019, 8:49 pm

REMEMBER ME by Amy Cck CHAPTER - 1

Unread post by Amy » November 4th, 2020, 7:21 pm

☄ REMEMBER ME ☄



CHAPTER - 1



Ziaktu : Amy Chhakchhuak



" Duati tap tawh lo la, anu hi in siam ve ka ngai a nia! Bang tawh rawh le.. " Ka fanu chu pawm kang in ka awi hliau hliau a, ka awm zawnah bei kak in a mit a mittui tling pam chuan min en a, kei erawh in a tap leh ang tih mawlh ka hlau thung.







A walker ah ka dah chuan a tap zel bawk si, khum a ka mut lah in a ngai reng bawk si chu ka fanu pawm chung chuan thawmhnaw dahna lam chu ka pan a, ka thawmhnaw hak tur ka thlang tel mawlh mawlh bawk.







Buai zet a ka chet kual vel lai chuan room kawngka lamah mipa aw thian khurh ri ka hria a, thaw hap in ka in her nghal vat. Kawngka bul a mipa lo ding in min lo nuih suk rual in kei erawh ka ner nghal nang thung.







" Ngati nge i lo thlen har em em a? " Ka ti nghal hlar a, nui suk in ka pasal chuan kan nufa dinna lam chu a rawn pan nghal zat.







" Ka vantirhkohte chu anu i lo ti buai hneh leh viau a ni maw? Papa bulah lo kal tawh rawh le;" Ti sup in kan fanu chu ka pawmna ata a rawn ban vut a. A fanu a lak rual chuan sang lo te hian a han sep nghal zat a , kan fanu kum 1 mi chuan a pa in a fiam tih hre thiam zet in a khek nghal ralh a , thaw halh a lu thing nak in kei erawh ka in siam chhun zawm nghal thung.







" Kan nula te lo in puih tir mai tur che a nia;" Ka thawmhnaw ka thlak mawlh mawlh lai chuan ka pasal chuan a rawn ti chhuak sup a. A lam ka hawi nghal vat.







" Ka tum a lawm... Mahse Duati khan midang a duh tlat si lo a. I lo thleng har lutuk a ka thin a rin hlur hman a lawm. Birthday Party cancel leh mai ka rilruk rum rum a sin! " Ka ti let ve halh chu a khi suk duh chauh. A fanu lah chuan a kut te tak te in apa hmai leh hmui vel a lo khawih sak vel bawk.







" Chutiang te chu a chi nang ti rawh Duati! Inhnuaiah midang pawh an rawn thleng ve nual tawh a. Sorry... Ka pi leh pu te ka rawn lam kawi a, duh aiin ka rawn rei a ni! " Nui suk a tiin a fanu a pawm loh na lam chuan a beng a pawt nghal zeuh a, a tawpah chuan ka nui leh ta nge nge.







" Hahdam deuh khan lo in siam la, inhnuai lamah midang kan lo zu ngaihven ang! Duati nen hian! " A fanu chu dam dup a en in a ti sup a, lu ka bu nghat.







" E... Lawk in... Hei hi party tan hma lo awrh rih rawh se, a kawr a ti huh leh vek dawn chiang sa! " Ti leh drower a ka fanu chil thli dawmna chu lak ka rual a, an pafa dinna lam chu ka pan nghal vat bawk. Sawi ang tak tak in tunah pawh uar zet in a hmui te tak te in a chil a ham phuan leh berh berh tawh.







" Rawn hman hmawh duh suh aw Mama.. " Ti sup in an kal sawn hma chuan ka hmuiah a rawn fawp zeuh a, an pafa chuan in hnuai lamah an in pawm thla a, an chhuah tak ah chuan kei pawh hahdam tak in ka in siam ve thei ta hram.







Vawin hian kan fanu kum 1 tlinna pian cham kan lawm dawn a, ka pasal in a sawi ang khan mamawh lam a a chhuak ka nu leh pa a rawn nghah avangin a tlai a, ka pasal ber a awm loh chuan kei pawh ka che buai nghal vek. Kan fa pakhatna a nih ang in, a zei lo chi ka lo ni ve bawk nen nau nen chuan ka che thiam lo a ni ber.







Ka in siam zawh ve tak ah chuan room ka chhuah san ve a. In hnuai lam pawh an thawm a lo ri ve nak nak tawh. Kan fanu piancham lawmna hi Duati pi leh pu ( ka pasal nu leh pa ) in an buatsaih vek a ni a. Ka rin phakbak in an ruahman na a pui daih bawk.







" Heiii... Anun.. I va rei ve.... Ka lo zawngkual ru deuh che a! " Ka pasal leh ka fanu melh kual a ka hawi vel chu ka thiannu Tluangtluangi chuan a rawn ti a, nui sang in ka be chhun zawm nghal vat a.







" Kan pa te i lo hmu em? Ka la hmu miah lo a? " Thei tui dawm pan chuan Tluangtluangi bulah chuan ka ti sap a. Mi an tam ve tawh bawk nen an hmel a vang riau leh nghal.







" Nichin khan kawt lamah an in pawm chhuak in ka hria! Thanpuia hi chu a fel ve chiang a ni. " A tih chuan ka nui sak,pawn lamah an awm a tih avang chuan Duati lak chhawk tum chuan kawt zawl lam chu ka pan a. Kan mi sawm then khat te chuan min lo be ve luam a. Ka nu leh pa hmel pawh ka hmu ve bawk.







Kawt ka chhuak chu ka pasal te pafa zawng chuan ka mit ka len nghal ruai a, kan in kawt thing buk hnuai a ka thil hmuh avang chuan ka taksa a khawng nghal at.







" Eng thil nge a rawn tih hrep! " Ti ram hmak in mipa pakhat leh ka fanu in pawm na lam chu ka pan zui hlak hlak a. An mahni ka hnaih tulh tulh a, ka fanu pawm tu pa hlim nui hmel te chuan ka thinrim a ti zual tulh tulh bawk.







" Ka fanu khatiang a lo pawm tur khan tu nge i ni? " A hnung a ka din rual in ka ti chang fak a. Muangchang in ka hma a mipa ding chu a rawn in her ruai ruai a, ka fanu lah chuan mi hrang a duh ngai loh nen duh lo hmel pawh a pu lo, tah pawh a tap miah lo a nih chu.







" Anun.. " A aw pa leh ka lo luan liam ve na thin ngei chuan a rawn ti sup a, in hum ruh nghek in ngei zet chuan ka melh nghal rawm a. Duh lo eng ang mah i la ka mittui chu a rawn tling nghal pam bawk.







" Min hre ngai ang khan awm duh suh! Kawi... Duati kha" Tih leh a kut a Duati engmah hre thiam ve lo chu lak sak ka rual a. In her in kal ka tum chu a thu sawi vang chuan ka ding dat.







" I rilru ti na tur a rawn kal ka ni lo a nia, Duati pian cham lawmpuina rawn pek ka duh mai a nia! " A ti sup chu za lo zet in ka nui ro hak. Muangchang a a lam hawiin a mit meng dul ruihah chuan ka melh nghal nghek bawk.







" I thil pek engmah kan mamawh lo. Ka fanu hian nu min nei a, pa a mah duat a hmangaih em em tu a nei bawk a. Engvang in nge i thil pek chu a duh ang? " Ka ti ram hmak. Ka tawng zawng chuan ka tang lutuk leh thinrim bawk si chu ka aw thleng in a khur thei hial.







" Min hua tih chu ka hria mahse.... " A rawn tih leh rual chuan a tawng ka lo pawt chat hmak.







" Hua maw.... Kei hian ka haw mai che ni lo in ka ten ngawih ngawih che. Engtin nge nang ang mihring hi ka lo hmangaih thei che pawh ka in hre nek lo. " Ka ti ram hmak a, vin zet a tawng khum chiam duh mah i la Duati ka pawm miau a ka thei lo.







" Engtin pawn sawi la ka pawi ti lo mahse i pawm mek naupang khan ka fanu ve tho a ni a sin! " Lawm vak lo hian a rawn ti bul hmuk a,a thu sawi vang chuan ka fanu ka pawmna chu ka ti nghet nghal vak, a tawng kam a tang chuan a lawm loh hmel viau zawk leh nghal.







" Chutiang sawi tur chuan eng dikna mah i nei lo. " Seh chilh zet in ka ti let a. Mahse a sawi sual lo! A chhan chu ka hma a mipa ding Zorinsanga hi ka fanu Duati pa dik tak a ni miau. Hun rei tak ka lo hmangaih ve thin, ka engkim ka hlan leh ka rin em em mipa a ni thin a, mahse ka chung a a thil tih chu rapthlak tak a ni.







" Ka nei tih i hriat chian kha! " A rawn ti hmuk chu in sum lek lo a, a hmai a ben sawk ka chak ut ut hial.







" Ti nge? Kei leh Duati min kal san hnuah i nupui in a chhuah san leh tak che ah chuan i inchhir ta deuh em ni? " Ngeiawm rawng kai lam zet chuan ka ti kha fak. Hahthlak min tih hmel zet in a rawn thaw chhuak hawk a. Eng emaw sawi duh hmel a pu a mahse sawi erawh a tum hauh si lo.







Ni e.... A hma chuan Zorinsanga, kei leh ka pasal Thanpuia hi thian in kawm ngeih tak kan ni thin. Kan tet te atang in kan sei lian ho a, school kan kal chho a, higher kan nih atangin kei leh Zorina hi kan in kawp chho tan a. Min duat in ka tan engkim a ni bawk.







College pawh kal ho zel in Thanpuia erawh college zawh hma in thil dang a training ta thung a. Kei leh Zorinsanga erawh kan in kawp chho char char thung. BA kan zo a MA pawh kan kal dun a, kan thil tihah kan in zui in kan in kawp chawt a ni ber. Ka ring em em a, a tan chuan ka neih engkim ka phal vek bawk. Ka thianghlimna thleng in a mah ka hmangaih leh ka rin vang in ka hlan a, mahse mipa rinawm lo leh tenawm zet an sawi thin dang ang tho in min lo bum reng a.







A pu damlo chhuan lam in a pu te khuaah min zin san a. Rei tak a cham nghe nghe. Kha tih lai khan a fa ka pai vang in min thlah thlam ang tih reng ka ngaihtuah pha lo. A pu hriselna a that hnuah ka bulah a rawn let dawn tih min hrilh pawn tha tak in kan la in bia a. Kan in hmangaih dun in, in neih hial pawh kan duh ve ve ni a ka hriat avang in ka rai chung chang pawh chu hrilh ka huphur bik lo. Mahse phone a tang a hrilh ngawt erawh ka ngam bik loh avang in hmaichhan ngei a hrilh ka tum ve fan a. Hlau thawng leh phur ru deuh tak in ka lo nghak ve ta ngawt a.







Mahse a rin ang in engmah a thleng lo. A pu te bul atang a a rawn let leh hnu chuan a mizia a dang lam tan a. A hma a kei mah chiah min ngaih sak a, kei lo hmeichhe dang melh pawh melh duh ngai lo khan hmeichhe pakhat a buaipui ta tlat a. Rei fe chu nau ka pai tih pawh ka zep phah hial a.







Mahse ka din hmun in a zir tak loh avang leh, engmah ka ti lo a nih chuan ka chhungten min hre chhuak mai dawn a ka hriat avang in tlawm leh zah pawh dawn lo in Zorinsanga hmaah tap chung in a fa ka pai thu leh min nei tur in ka ngen ta ngawt a. Mahse kha tih lai a min chhanna erawh ka dam chhung in ka theihmghilh thei tawh in ka ring lo.







" Nang neih che hi ka la ngaihtuah chhin ngai lo. I pum chhung a naute pawh kha ka fa a nih ka ring hrep lo! " Min tih khum zawk a nih chu. Kha tihlai a ka rilru hreawm zia leh nat zia kha tun thleng hian ka theihnghilh thei tawh lo.







Chaw ka ei thei lo a, zan ka mu thei hek lo. Chu mai ni lo in a fa ka pai tih ka hrilh atang a, kar khat naah nupui min ruk san a nih chu. Dam chak lo hial in min siam a. Ka chhungte bulah nau ka pai thu ka sawi ngam si lo. Ka pa kohhran upa a ni a, a mualpho dawn tih ka hre ve vek bawk si. Ka fa paina pa lah in nupui dang a ru tih an hriat phei chuan ka ngaihtuah zui ngam lo a ni ber.







Ka rilru hah leh pik lutuk in kei leh ka naute nunna lak tum in ka room ah inawh hlum hial ka tum a. Ka ngaihtuahnaah engmah a leng tawh lo. Kha tih lai khan Thanpuia hi rawn lang lo se chuan tunah hian kei leh Duati hi kan dam ve tawh kher lo ang.







A training chawlh rawn hmang min hmuh a rawn tum ni a lo ni kher a, kei leh ka naute tan chuan kan vantirhkoh a ni ringawt. Tap chung leh rilru na tak in ka thil tawn chu ka hrilh a. Hmeichhe tenawm tak a min ngaih ka rin nen mahse chutiang chuan ka chung chang engmah a ngaihtuah lo.





Chutiang a min ngaih lam ai chuan thil thleng engkimah mawhphurhna a lak tur thu min hrilh zawk in min thlamuan zawk a nih chu. Kha thu a sawi lai a ka ngaihtuah chu engvang in nge Zorinsanga ni lo in Thanpuia zawk hi ka lo hmangaih loh tih a ni. Ka rai miau avang in Thanpuian ka pum chhung a naute chu a fa ang a sawiin, palai an rawn tir nghal vut vut a.







Kei erawh in thiam lo tak chung in engmah ka sawi ngam lo. Thanpuia chu ka rinchhan tawp mai a ni. Training chawlh rawn hmang mai a nih avang in kan in nei zui nghal mai a. Thanpuia duh ang in a training na lamah min hruai ve nghal a. Dik tak chuan ka na ngawih ngawih a. Zorinsanga ka ngaihtuah chhuah a piang ka natna kha a la ngai reng thin.







Thanpuia erawh in engmah nuam lo ka tih na tur in thu a sawt ngai lo a. Min duat em em a, ka mamawh ka sawi mai ni lo in ka naupang lai atang a in kawm kan nih vang nge ka ngainat zawng engkim min pek loh a nei ngai lo. Duati rawn piang thleng in engmah dang lam awm ang in a lang ngai lo a.







A fa ang chiah in a en a, kei mah zawk in a tir chuan ka fanu hmel a Zorinsanga ka hmu thin chuan min ti na zawk fo a. Thanpuia lakah pawh in thiam loh na ka nei nasa viau thin. Mahse He mipa tenawm zet vang a ka fanu ka hlat chhan tur a awm lo tiin ka in hnem fo a. Tunah hma lam kan pan ve tan chiah a, hetiang a kan hmaah a rawn in lan leh bak ah ngampa tak a Duati ka fanu a rawn ti ngam chu ka haw tak zet.







Chu mai ni lo a ka fanu pa ang mai a a in sawi bak ah midang mit mei veng hmel a pu lo te hian min ti na leh zual. Kei leh Zorinsanga leh Thanpuia bak in thu dik kan hre si lo a. Engkim a ti chhe vek thei tih ka hriat avang in ka hlau thawng tel mah a ni zawk. Thanpuia nu leh pa in an hriat phei chuan thil thleng tur chu ka ngaihtuah ngam lo.







" Eng thil nge in tih? " Thanpuia aw ka hriat rual in a lam ka hawi nghal vat. Duatin a pa aw hria chu a khek nghal ralh bawk! Kan bulah Thanpuia chu a rawn ding a. Ka fanu ka pawm mek chu a rawn ban nghal zat bawk.



Link:
BBcode:
HTML:
Hide post links
Show post links

Ngaia
Site Admin
Posts: 18876
Joined: April 30th, 2016, 4:07 pm

Unread post by Ngaia » May 2nd, 2021, 11:09 pm

☄ REMEMBER ME ☄



LAST CHAPTER - 2



Ziaktu : Amy Chhakchhuak





A mit meng thim khup leh tak run atang chuan zawhna mit meng hlir a rawn lang chhuak a, mahse engtia han sawi tur nge tih erawh ka hre mai lo thung. Mahse engmah ka sawi hma in Thanpuia awm dan chuan min thawng tak zet.







" Zorina chu i rawn tel thei a ka lawm hle mai! " Zorinsanga lam hawi chuan nui suk in a ti a nih chu. Ka pasal Thanpuia leh Zorinsanga in be vel chu in seh ruh vak in ka melh ngar a. Tunah tak chuan Zorinsanga ai mahin Thanpuia ka huatna chuan min luah khat mup mup tawh.







" Bawihi ... Zorina hi kei ma sawm a nia, chuvang chuan a chungah hian that chhuah tur in ka duh che! " Thanpuian arawn tih phei chuan ka mumang emaw ka ti hial. Mahse ka kut ka hum ruh ngat ngat danah leh ka thin zawn thip hlur hian ka mumang a ni lo tih an rawn ti chiang bawk si.







" Engtin nge i tih theih? " Tah in sum zet leh aw khur dar dar a tiin mit ka chhing sawk a. Ka biang a rawn lum thla pap bawk. Thawk la hak in ka kut chuan ka mittui chu ka tuai nghal hlak a. Ka hma a mipa ding te pahnih chu en pawh en tawh lo in ka in her a In lam pan chuan ka kal zui hlak hlak.







Ka ke pen te chu an khur ru dar dar a. Ka hnung lamah Thanpuia min ko ri pawh ka hria mahse hawi let emaw tumna ka nei lo. Ka ding a ka hawi let a nih chuan ka keh chhe vek lai hi ka thup thei dawn si lo.







" Ka rawn zawng dawn chiah cheu a... I nu leh pa in hun serh hman a hun dawn tawh a kal hla vak su an ti! " In chhung ka luh rual in Tluangtluangi chuan a lo ti vat a. Ka ban a min lo pawh din a vang in ka hmel dik lo chu a hrethim nghal thuai bawk.







" Anun... Nga ti nge a? Dik lo a awm a mi? " A rawn ti zui vat. A aw atang pawh chuan mak a ti tih ka hria. Ni e... A mak duh viau ang. Nichin lawkah ka pasal leh ka fanu zawng in hmel hlim sang in pawn lam ka pan san a. Tunah pawn lam atang tap tih hriat fahran in min hmu leh chu a nia.







" Tluangtluang engmah min zawt rih lo teh! " Ka ti chhuak halh a. Ka tah chhuah mai ka hlauh avang chuan ka hmui ka pet nghal vak bawk. Hnung lamah Thanpuian min rawn zui tih ka hriat avang chuan ding khawmuang loin in chung panna stepah chuan ka chho nghal a. Tluangtluangi pawh a hrilh hai ve vek ang tih ka ring. Mahse thil han htilhfiah tur in tunah tak chuan engmah ka ni bik si lo.







Kan room ka luh rual in kawngka ka khar nghal hmak a, chhuat lai a ding chuan ka hmai hup thak in ka tap khur nghal dar dar. Dik tak chuan kha tiang thil thlen a tang khan hun pawh a la liam tam lo. Duati pawh kum 1 chauh a la ni bawk. Mahse engtin nge engkim hre vek chung in leh ka tawrh dan zawng zawng hre chung in Thanpuia khan kha mihring kha a sawm theih.







Room kawngka rawn in herh ri khap ka hriat rual chuan in beng daih tum zet in thawk ka la vang vang a. A mah hnung chhawn zawng a ka din avang in min rawn hmuh hma in ka mittui chu tih bo hman vek ka duh. Mahse ka hru seng lo chu a ni ber.







Duati ka pai lai a ka mal zia te, ka rilru natna leh ka chhungten an hria ang tih ka hlauh na te zawng zawng kha tunah hian a ngai ang ang khan ka ngaihtuah let leh thei vek. Kum tam tak pawh Liam se khang thil kha chu ka theihnghilh theih tawh pawh ka ring hek lo. Ka thinlung chhung kil khatah ka kalh khum ve hram ni in ka in ngai a mahse chung ka nat na zawng zawng chu ka pasal, engkim in hriat pui ve vek tu hian a rawn phawrh chhuak vek a nih chu.







" Hei... Ka tihpalh, ka hrilh lawk lo che a! " Ka hnung lam atang min rawn kuah in a rawn ti sup a. Ka dar zawnah rawn kun hniam in ka nghawng zawnah a rawn thaw lum nghal ham ham a. Kei erawh tah chhuah hlau zet in ka hmui ka pet fan fan a, ka taksa te chu a tang nghal vek. Thinrim a, an khum chiam chu ka duh tak zet. Mahse ka chung a a thil tih zo zai, kei leh Duati min enkawl vang te, mualpho ngawih ngawihna tur a a mah vang a tun thleng a za awm tak a ka hun hmang chho ka nih ve na te chuan engmah min sawi tir thei lo.







" Engtin nge ka chungah hetiang hi i tih theih! " Ka ti chhuak tiau. Chubak chu sawi tur ka hre lo. Dem vak ka tum pawn hetiang buaina nei hmasa zawk ka ni si a, Thanpuia rilru thatna ka hriat chian vang pawh a ni mai thei. Thanpuia chungah ka in thiam lohna a zual sauh zawk. Kei mah vang in a thianpa a kal san ve hmak a nia.







" A chhan chu nakinah hreawm i tih ka duh loh vang in. Kei hian nang leh Duati hi ka hmangaih tak zet cheu a, i pasal ka nih ang in kan fanu Duati pa chanvo chelh zel pawh hi ka duh a sin. " A rawn ti dam dup a. A thu sawi vang chuan min kuah na atang chuan ka tal hrang nghal vat a. A lam hawi chuan ka in her nghal zat.







" A nih chuan..... A nih chuan engvang in nge kha tiang khan i tih. Kha pa kha helai hmun a a lo kal pawh a kal bo tir zawk tur i ni a. Mahse kal bo tir chu sawi loh, he hmun a lo kal tur hian i sawm zawk a nia. Engmah hre lo ni la chuan chu pawh chu ka la hre thiam che. Mahse a tir atang in engkim i hre ve vek a.







Ka.... Ka tawrh nasat dan te pawh i hre vek a. Hetiang a awm leh tur si chu engvang in nge ka nunna lak ka tum lai khan min lo dan? I lak a ka in nghah theih thu kha min lo hrilh loh tur che a nia. Duati pa nih ka duh I ti maw? I sawi ve mai mai a ni... A pa dik tak ah nang hi i lo in ngai ngai miah lo tih tunah khan ka hre chiang zawk a sin. " Ka ti chhuak tan tan.







Room pawn lamah sawn piancham lawmpuina tur a kan mi sawm tam tak an awm tih ka hria. Kan nu leh pa te ngei pawh. Mahse chutiang ka ngaihtuah pha tawh lo. Hman ang bawk in Zorinsanga ka hmuh chuan ka buai vek thin ang mai khan ka phili in ka rilru a fim lo vel vek. Mahse a danglamna chu tunah chuan Zorinsanga ka duh lutuk vang leh hmuh ka chak lutuk vang a phili buai ni lo in ka huat vang zawk a hetiang a awm ka ni thung.







" Hahdam teh... Kan vaiin kan tuar ve vek a sin. Ni e. I tawrhna chu a nasa tih ka hriat thiam pui che. Mahse Zorina pawh hian a tuar nep chuang hauh lo! " A rawn ti chhuak nghut chu ka in hum ruh nghal nghek.







" Ka awi thei lo. Hetiang rilru hi i lo pu reng a maw? Khang hun chhung zawng khan.... I thu sawi leh i thu thlukna siam hnial kalh che emaw sawi sel ka nei ngai lo tih i hria. Ka chung a I thil tih zo zai vang hrim hrim pawh hian kei hian ka zah che in i thlazar hnuai a awm hi a hahdam thlak ka ti lutuk mahse he thil kher hi chu ka pawm pui thei lo che.







Kei hian Zorinsanga hnaih tu chu tu pawh ni se hnaih ka duh lo. Heta tang hian kan chhuak ang! " Thanpuia melh reng chung chuan ka ti a. Engtin nge kha thu kha ka sawi chhuah mai ka hre lo. Mahse tunah tak chuan Thanpuia bul a awm chakna hi ka nei tawh lo. Zorinsanga a lam tang ang a ka ngaih vang pawh a ni mai thei.







" Chu thil chu a thleng ngai lo ang. " In her a kal ka tum chu ka ban rekah a rawn vuan bet chawt a, a ti nghal hmuk a nih chu.







" Tun din hmun kan thlen theih chhan hi Zorina vang chiah a sin. Tun a I ngaih danah chuan nang leh Duati enkawl a venghim tu chu kei mah emaw i tih a mahse Zorina vek zawk a sin bul tan tu chu. " Ka mit a min en chung in a rawn ti sup a. A tawng dan chu ka ril rem zawng a ni hauh lo. Mahse Thanpuia mit meng erawh a tak ngur thung.







" Chutiang a I ngaih theihna tur chuan kha pa khan enge a hrilh che! " Ka ti kha ve fak chu hahthlak min tih hmel zet a thaw chhuak hawk in a ban chu a lek chhuak vut a, a ban a sana a melh tih ka hria. Ni e.... Function kha tan a hun tel tawh tak. Ni lo... Tan a hun tawh hial mai thei zawk.







" Thawnthu sei tak a nia, nakinah kan sawi zawm thei a ngem? In hnuai lamah min lo nghak thup tawh ang. " A rawn ti ta daih chu ka ner khum nang.







" Ti teh Bawihi.... Nakinah engkim chu ka hrilh ang che. Tunah chuan tih tur dang in min nghak tih i hriat kha! " A rawn ti nawn leh sup a.







" I tiam em? " Ka ti hram chu nui suk in lu a bu nghut.







" In then chung chang kha sawi leh tawh suh ang che. Tun kha a hmasa ber leh a tawpna ni rawh se. Eng thil pawh thleng se nang leh Duati hi then cheu emaw kal san cheu ka tum lo. Thu dik chu enge i hriat hunah pawh tun ang hian ka bul ah in awm reng tur a ni. " Room kan chhuah san hma chuan a rawn ti sup a. A hmel en tur a ka hawi chho chu a hmel chu a thu tak viau leh nghal.







Inhnuaiah kan chhuk a, Tluangtluangin Duati a lo pawm a. Zorinsanga hmel ka hmu tawh lo. Mahse kei mahah hlauh thawnna a awm miau avang in Duati chu ka kal hlat san thei meuh lo. Midang in min lak chhawk ve deuh pawn ka mit meng erawh in ka melh zui reng a. Tunah tak chuan Thanpuia pawh ka ring tawk lo chu a ni ber.







" Heiii.... Ngati nge michin kha? " Tual zawl a naupang ho in fiam ka en lai chuan Tluangtluangin a rawn ti a. Kan hma lam a, Thanpuian Duati naupang dang bul a a awmpui lai thlir reng chung chuan thawk ka la halh.







" Engmah a ni lo. " Ka ti sap ringawt. Sawi pui chu ka chak lutuk mahse engber atang in nge ka tan ang ka hre lo.







" Tak a.... Zorina kha ka hmu ve khan ka hria a. A mak ka ti tawp. Sangsangi nen khan an in then leh hma ropui sia. An in neih rei chu ka ring lo sa hrim hrim a mahse kum khat em pawh a daih lo a nia. Nang a then che kha chu a in chhir ve chuan ka ring! " A rawn ti leh mai a. Chhang lem lo chuan ka nui sak ringawt.









" A in chhir mai thei. Chhir lo mai thei bawk! " Ka tih chu ka darah min rawn beng hlak.







" Engtik nge in chhuk leh dawn? Nge ni a hetah in awm hlen tawh dawn? " Tluangtluangin a rawn tih chuan kar lehah kan kal leh tur thu ka sawi ve mai a. Thanpuia hi company lian ve tak hmuaiah computer technician lam hna a chelh ve a, a hna a lak lawh bakah helam a awm hi ka chak lem lo.







In leng neuh neuh an haw meuh chuan a tlai ve kuar tawh. Thanpuian Duati a tih mut chhung in kei in vawin kan chetna vel ka tih fel pui a. Ka nu leh pa chuan kan nula te tih tir tur in min ti ve tak na a mahse hetah kan awm ngai si lo a, a theihna chenah chuan chet tam ve ka duh avang in ka ti lui ta tho.







Thanpuian Duati a mut hnu in a rawn chhuk a, ka pa te ho nen vawin a kan chet tlatna leh thlalak thenkhat chu computer ah dah in kan en kual leh te te a. Ka nu leh pa pawh in Duati hi thanpuia fanu a ni lo tih an hre lo bawk a. An duat viau, thu dik hre ta se chuan tun ang hian an awm kher lo mai thei. Kei erawh in engmah chu ka tui pui hlei thei tawh lo. Thanpuia thu min hrilh tur mawlh khan ka rilru a luah bawk nen. Mu tur a kan room lam a kan kal hun mawlh ka nghak hlel a ni chu.







Room a kan awm hnu chuan bathroom ah Thanpuia lut chu ka lo nghak ran a. Khumah Duati a muhil bawk. Bathroom atang a Thanpuia rawn chhuak ka hmuh rual in engkim min hrilh fiah tur in ka lo ti nghal tawl chu lo nghak lawk tur a min hrilh in kan room a sofa pakhatah chuan min kai phei in min nem thu dat a. A hmel leh mit meng thuk tak lutuk ringawt pawh hian min uap nghal churh thei hial.







" Ka sawi hma in he thil vang hian in dem in emaw hma lam I panna kawngah hian hreawm i tih phah ka duh lo tih hria la ka duh! " Ka bul a tawn thu in a ti sup a. A thu sawi chu ka man lo tak zet.







" Zorina hian a duh vang reng in a kal san lo che a sin. Kei ai daih in a hmangaih zia che chu i hre chiang bawk. " A rawn tih sup a. Hnial ka tum deuh ut ut a mahse ngawih ka chuh leh ta zawk. Ka tum dan chuan tun chiah hi kan nun hlui lam emaw Zorinsanga hming kan sawi tawp nan a hman ka duh miau.







" I ngaihdan chuan a zinnaah hmeichhe dang a tawng a, nang a kal san ang che in i hria a nih kha. Ni e... Hmeichhe dang chu a tawng ngei a , mahse Sangsangi hi a hmangaih chu a ni hlei nen. Nang hi a hmangaih leh venhim a duh chu i ni a sin.







Zorina hi a damlo a, nasa tak in a damlo a. Nang leh i pum chhung a naute hi enkawl chu a chak lutuk mahse in bul a awm theih loh chhan lian tak a nei a a sin. " A rawn ti chhuak leh sup a. A thu sawi dan thu khuh zet avang chuan ka la bo hu tho.







" A vai vai a sawi chu ka tan a rem lo a! ' ti in a khi suk a. Eng emaw sawi chhuah harsa tih hmel zet in a thaw chhuak leh nghal hawk bawk.







" A positive vang a hlat che a ni a sin! " A rawn ti chhuak hawk. Thanpuia thu sawi chuan ka thinphu a ti rang nghal dawt dawt. Enge a sawi kha, ka hre sual a nih te ka ring ta rum rum.







" Hahhh.... I fiamthu a ni ti raw? Chutiang engtin nge a nih theih? " Ka ti ro halh.







" Bawihi.... Ka sawi ngaithla rawh! Accident vang liau liau a ni. Thil thleng vang khan ka thin a rim a, i mittui tla ka hmu bakah i nunna hial lak i duh tih ka hriat phei kha chuan khatiang a siamtu che kha na tak a khawih ka chak ut ut a. Chu thil ti tur chuan Zorina ka pan bawk mahse ka thu hriat khan min thawng a sin.







Zorina chuan engmah a sawi lo, Sangsangi hneh atang in ka hre hmasa ta a, Zorina ka be nawn leh ngat bawk. Chuvang a kan in neih zawh ve leh a ka bul a hruai ta daih che ka ni bawk. Chuvang chuan Zorina hi haw lutuk tawh suh. I tan chuan engpawh a huam a sin.







A zawng zawng sawi chu duh viau mah i la a mah ngei hmu a sawi dun tur in ka duh cheu a. Chu thil chu i ti ang ti raw? " Thanpuia aw dam dup chu engmah ka bengah a lut tawh lo. Zawhna tam tak ka nei a. Mahse ka zawh duh erawh Zorinsanga daih a ni thung. Ka thut ngai chu ka thu mawl tawp a. Ka a chhuih ni maiin ka hria.







" Lo kal teh! " Ti sup in a taksaah chuan min kuah bet a, a tih ang chuan ka awm liam ve tawp a. Kan nupa chuan engmah kan sawi tawh lo. Vawi khat chian Zorina positive thu a sawi a mahse ka bengah chuan vawi tam tak a ti nawn tluk tluk thung.





*





" I haw duh hunah min rawn phone rawh aw! " Motor ti ding dat in Thanpuia chuan a rawn ti a. Lu ka bu nghat. Motor atang chuan chhuak in Thanpuia tlan liam thleng chu ka thlir a. Ka hma a in lam pan chuan ka kal zui nghal a. Kawngka bul ka thleng chu kik ta mai lo chuan ka ding vang vang a. Zorinsanga ka hmuh hun ah engtin nge ka sawi tan ang tih mawlh ka ngaihtuah.







A tawpah chuan tha khur ru der der in doorbell chu ka hmet a, rei lo te ah kawngka chu a rawn in hawng a. Kawngka rawn hawng tu ka hmuh rual in tawi te in ka nui sak.







" Ehee... Nunpuii ve teh hlawl chu! " Zorinsanga nu in min hmuh rual chuan a rawn ti chhuak nghal hliai. Sawi ve mai tur hre lo zet chuan ka ding ngawi ran thung.







" Nu Zamte... In lo dam maw? " A tawpah chuan ka ti chhuak ve thei ta hram. A hma chuan ka nel in an in pawh ka leng lut ve nasa a mahse kan boruak kha tiang a nih takah chuan tun hi ka kal leh hmasak ber na a nia ka awm dan a dik tawh tlat lo.







" Dam ve tawk tawk e... Enge i lo tih ve teh mial a. Lo lut rawh! " A ti nghal vat a. A hma ang reng khan a la nel awm in a la ngaihnat awm reng chuan min ti hahdam ve ta huai bawk. In chhung lamah chuan kan in zui lut a. Zorina hmel ka zawng ru deuh a mahse hmuh tur a awm hauh lo.







" Englo a nia.... Zorina hi a awm lo a mi? " Zah pawh dawn lo chuan ka ti ta sap a. A chhuah lawk thu leh a rawn let tep tawh thu in min chhang a. Zorina nghak pah chuan kan ti ti mai mai a. Ka rilru tak chuan Zorinsanga ka hmuh hun a ka sawi tur ringawt ka ngaihtuah thung a nih chu.







" Chu a lo haw a niang! " Kawngka lam ri kan hriat rual in nu Zamtei chuan a ti leh mai a. Comon room lamah rawn in zui lut te ka hmuh rual erawh in sawi mai tur ka hre lo. Zorinsanga chu a helmet khai in a rawn pen lut thauh thauh a, a hnungah sangsangin a rawn zui bawk.







" Bawiha hei Nunpuiin biak che a duh a. " Nu Zamtei chuan a ti vat a. Midang ang lo tak in nu Zamtei hi chuan Nunpui min ti bik kher thin. Zorinsanga sual zia chu melh pawh min melh duh thak lo a nih chu. Sangsangi chu zawi sup a bia in an pahnih chuan room lamah an in zui lut daih a nih chu.









" Engthil nge a hriat a, hepa luhlul sawt zia hi chuh! " Nu Zamtein min veng thawng zet in a rawn ti halh a. Mit ka chhing sawk thung.







" Lo la thu rawh ka va hau a nge. A upa tulh tulh a, a mizia a danglam tulh tulh mai. In in kawp tawh loh a chin phei hi chu a chhungte pawh hi min hlat sawt in ka hria ! " A ti leh tan tan a. A ruk tak chuan ka hlim a ni, a hma ang reng in Zorina nu pawn min lo la ngaina hi.







" Kei man ka va be lawk mai ang. Ka rei dawn chuang lo a! " Tih leh din ka rual a. nu Zamtei pawh chuan min hnial ta bik lo. Zorinsanga room lam pan chuan ka lut phei a. A room ka lut chu a lo reh thiap. Room ah an lut leh lo emaw ka ti hman hial a. Mahse coridor lam atang in Sangsangi a rawn lang ve hlawl a. Ka lut dik tih ka hre chiah.







" Khawnge Zorinsanga kha? " Ka ti nghal tawng. Mahse ka sawi zawh rual in bathroom lam atang in a rawn chhuak ve nghal a. Sangsangi ka biak na atang chuan ka hawi sawn nghal vat bawk.





" Enge i lo tih dawn? " A rawn ti hmuk a. A tawpah chuan min be ve hram a lawm.







" Thil sawi pui duh che ka nei a. A fal in! " Sangsangi melh zeuh chuan ka ti a. Sangsangi chuan min hrethiam zet in pawn lamah a lo va chhuah tur thu a saai nghal mai a. Room chhung a kan pahnih chiah a kan awm takah chuan a reh leh tlawk tlawk thung.









" In in then tawh a ni lawm ni? Ti nge i room ah i la hruai luh a? " Ka tih chuan nui suk in min en duh chauh a nih chu.







" Enge i sawi duh chu. I hmuh ang khan thian ka nei a nia! " A rawn ti sup a, that chhe zet in a sir a bang chu a ngheng nghal run bawk. A hmel a pian, a lan dan engkimah sawn damlo hmel a pu miah lo mahse Thanpuia khan min hrilh ngei bawk si. Han sawi emaw zawhna han zawh tan mai dan tur pawh ka hre lo.







" Tun chiah hun ka pe ang che, i fanu la rawn hmuh thin i duh chuan thu dik min hrilh rawh. Engvang in nge kha tiang khan min kal san! " Ka ti chuan a hmel chu a rawn in thlak ruai ruai a. A mit meng chu rawn dur khup in eng emaw natna a rawn lang chhuak tih ka hmu thei.







" Nimin lawkah ka fanu a nih loh thu leh ka hmuh i phal tawh lo thu i sawi a tunah hetah rawn kal in ka fanu a nih thu i rawn sawi leh chu a nia. I pasal hian mipa dang hmu tur a I chhuak hi a hriat pawh ka ring lo! " Ngeiawm lam lek lek hian a rawn ti a, ka in hum ruh nghal vak.







Mipa tawngkam tha leh nelawm tak kha a ni ngai lo hrim hrim a, mahse tunah chuan a hma ai zawng khan a sual hmel leh zual tawh.







" Ka pasal chu vanneih thlak tak in tu emaw ang a thikthu chhia a ni ve lo tlat. Chuan tu emaw angin mahni ngaihdan kal pui ching pawh a ni hek lo. Ka thu sawi a ngaithla a, chu mi hmang chuan ngaihdan a siam thin! Chuan ka zawhna chhanna chu! " Ka ti ve ngat a. Then suk in a mithmul a san uk a. A dinna atang chuan rawn kal hnai in ka hmaah tak a rawn ding nghal run a.







A hma ang bawk in mipa chhelo tak a la ni reng. A hmel pa zet leh rum lam mah hian zun a ngah phian a. Chu mai piah lamah a mize ngeng zet hian mi a hip leh zual bawk. A hmangaih leh duat ni nawm zia chu sawi thiam phak a ni. Tleirawl te ni chung khan khawvel ah mamawh nei tawh lo tur ang maiin min duat thim bawk. Mahse a mi ngainat loh erawh a pe na viau thung. Tun a ka hma a mi hi chu damlo hmel reng a pu lo.







" I pasal chuan a hmangaih tawk lo che a ni zawk lo maw? " Then suk a a rawn tih rual in a hmaiah ka beng nghal chawrh.







" He ta ka lo kal chhan chu kan in kar khi siam tha tur in a ni. Mahse nang chuan i lo duh vak lo a nih hmel. Ka kal phawt a nge, kan chhungkua, ka sawi awm zia chu kei, ka pasal leh kan fanu Duati te nen helai hi kan chhuah san leh vat dawn a. Chu tih hunah chuan kei emaw Duati rawn biak a rawn hmuh i tum loh hram ka beisei! " Ti hlar in in her a kal ka tum a mahse ka ban rekah min rawn vuan bet nghal chawt.







" I rilru i thlak a mi? " A lam hawiin mit ka san ak a, ka ti sap chu a rawn thaw chhuak hawk.







" I nghal thiam ve hle mai! " A rawn ti sup chu ka nui sak.







" Engthil nge i hriat duh chu! " Ka kut la vuan reng chuan a ti sup a. Ti kha chuan ka hriat thin Zorinsanga kha a ang ve ta deuh.







" Engkim! " Ka ti tawi tak chu a nui chhuak hawk a. Ka en zui nghal haw.







" I sawi loh chuan ka kal dawn! " Tih leh ka kut thin thlak ka rual a, " Ole... Ole... Ka hrilh lo ang che pawh ka tih loh kha! Thu la! " Ka hma zawn a rawn ding in nuih in sum zet hian a rawn ti a. Thaw halh in kan piah lam a sofa in hung lam chu ka pan ve nghal mai bawk.







" Eng atang nge ka sawi ang aw! Lalnunpuii school kal peih lo damloh der lai atang khan a mi niang! " Nui suk a rawn ti a. " Zorinsang! " Ka ti vin nghal hlar.







" A nih leh min zawt la, i hriat duh chu. Sawi tanna tur ka hre bik si lo a! " Ka bul sofa a thatchhe zet a thu thluang duai in a ti leh sup a. Kei pawn engtin nge ka zawh ang tih ka hre lo chu a nia.







" Thanpuian i damlo tih min hrilh a! " Ka ti ta sap.







" I hmuh ang hian ka dam tha viau si a! " A rawn ti bul hmuk chu ka thin in a tuar leh tawh lo. Ter at in la ding nghal vat a. Kal mai ka tum chu ka bag hruiah rawn pawt vak in a lamah a taksa chu ka bawh nghal rawk rawk a. Thawh ka tum chu min pawm bet nghal tlat a nih chu.







" Min thlah teh. Engmah pawh sawi pui tur in ka rawn pan tawh lo ang che. " Ka ti vin hlar. Ka rilru tawt deuh tun nen ka tah a chhuak nghal ut ut bawk.







" Tah belhnu ka ngai lutuk che! " Ka nghawng zawn a a hmai phum vang vang in a ti thawp sup a. Ka che ngham lo. Ka taksa chu a khawng nghal vek.







" Suala! " Ka ti hlar chu a rawn nui suk.







" Engkim hre sa in i rawn kal tih ka hria, enge sawi belh leh tur a min la duh cheu a. Kei hian i ngaihtuahna ti buai zawng a I rilru hruai kawi ka duh lo. I tan pawh min ngaihsak lo leh min haw chung a hun i hman kha a nuam zawk ang. " A rawn ti chhuak leh sup a. Ka dulzawnah a ban lian zet chu a kham nghal rum bawk.









" Engkim kha min hrilh la a tha mai tur! " Ka ti ve fan.







" Ka tum ve a lawm, " Ti sup in min nui suk a. Tunah chuan kan in ngaihzawn lai ang mai khan a hmelah min ngaihsak na leh min duatna chiah hmuh tur a awm.







" Ka rawn let ve leh engkim hrilh che ka tum a, chutiang chuan ka rilru ka siam fel bawk. Mahse engkim ka sawi hma in nau I pai thu I sawi hmasa ta si a. Kha tiang hnu a, kei hi i tan ka tling lo, mi hlauhawm ka ni. Ka tih theih i ring a mi. Lo ti pawh ni la, nang ang hmeichhe luh lul zet hian min kal san ka ring si lo a. Min lo kal san ta a nih pawn kum tam tak liam hnu feah a nih ka ring. Chuvang in rang tak a min kal san dan awlsam ber tur in nupui ka ru ta a nih kha! " Ti sup in min kuahna a thlah a. Ka thutna ngaiah chuan ka thu zui nghal zat.







" Ka tan a harsa a sin, ka hmeichhe hmangaih ber leh ka thian tha ber in nei lai thlir liam kha. Mahse i tan ka tling ve tawh si lo a. Ka taksa chhungah hian HIV hri hlauhawm tak in bu a khuar mek a, nang leh kan naute bul a awm a, in din hmun der thawng a dah ka duh lo che u. Ka thik thu chu chhe viau mah se in nat na tur chu thlen tir ka phal bik lo.







Thanpuia hnenah nang leh ka fa lo piang tur min en kawl sak tur in ka ngen ta tawp a. Nang nen a kan hma lam hun ka suang tuah ve zawng zawng kha engmah ka thlen tir ve thei tawh lo. Nang ka be pawp thei tawh lo che a, mahse i pasal hnen atang in in chanchin erawh ka hre ve reng a. Naute i neih dawn thu min rawn hrilh a ka awm hmun a ka lo phur ve zia te kha i hre ve kher lo ang.







Ka tan chuan ka bulah awm ve lo mah u la ka khawvel in ni reng tawh a, ka duh ber chu in hlimna kha a ni a. Chuan Thanpuia hian a hmangaih che tih ka hria a! " A tih chuan mittui tling pam chung in ka nui hak. Kan bul tanna chuan thian a ni tih kei erawh in ka chiang lutuk tlat.







" Ka tihpalh aw... Engmah ka lo hre lo a. Engmah hre lo in ka lo haw ve em em che a! " Ka ti chhuak hap.







" Min haw dawn tih ka hria a lawm. A chhan chu khawvel a I mipa huat ber mizia ang in ka awm miau a. Mahse kei chu I chungah hian ka lawm a sin, ka kal san hnuah che pawh kan naute i la enkawl duh a. " A rawn ti leh sup.







" I hria kha, natna dang ang a a dam hun nghah ve mai thei a ni lo tih. Heti hian kei chu ka tawp tawp a ni mai a. Nang leh ka fanu erawh hma hun siam sak cheu ka la duh ngawih ngawih a. Kei tih lohah chuan Thanpuia hian a hmangaih ber che a nia. I hriat kha kan in kawm thin lai pawn ka thik ber thin tih! Mahse chu ti chung pawh chuan phu lo viau mah i la min theihnghilh bik mai tur in ka phal lo che, in thinlungah hmun tlem ta ka tan dah in NANGMAH HMANGAIHTU LEH I THIAN THA TAK ANG A MIN HRE VE RENG TUR IN KA DUH TAK ZET CHE. " Nui suk a a rawn tih chuan tah chhuak zet in ka ip ru chawi thung.







A sawi dik miau a. School kan kal ho lai pawn Thanpuia a rawn leng tih a hriat chuan kan thianpa mah ni se hman hmawh tawk in kan inah a rawn kal nghal thin a. Thanpuia haw hma chu a awm ve ngat ngat zel. Khang hunlai kha ka ngai tak zet. Sawi mai aiin a thikthu ka lakah chuan a pe chhia in, min at chilh thin kha a nia.







Rei tak chhung kan ti ti a, kan nui a, mahse a ruk a ka tah chang a tam zawk thung. A nin ka a khua ngai zet a thil a lo buaipui laiin kei chuan kei mah chiah a tuar tu emaw in ti in ka lo haw em em thin kha a nia. Thanpuian kawt ah a din thu phone in min rawn hrilh a, kei pawh chu sawi duh leh sawi chak tam tak nei chung in haw tur chuan ka chhuah san a.









" Pawn a ka chhuak tawh chu in chungah Sangsangi kha lo awm in min hmuh rual in a rawn chhuk a, nui sang in min rawn bia a. Kei pawh in huatna ka nei tawh lo. Ni e.... Zorinan sangsangi accident a buaipui na lamah HIV a kai phah tih chu ka hria mahse Zorina pawh in hriatthiamna zau tak a nei tawh a kei a lo thinrim khum hi a tul tawh hauh lo . Zorinan an in karah in thian thatna bak a awm lo tih a sawi a. Khang hun chhung zawng a Zorinsanga lo hnem a lo buaipui tu a nih avang hian a chungah ka lawm tak zet zawk.







" I hahdam tawh em? " Motor a kan in lam kan pan chu Thanpuian a rawn ti sup a. Nui sak a a lam hawiin lu ka bu nghat.







" Thil ka zawt ang che aw! " Seat nghen chhan ngheng chung chuan a lam ka hawi a. Min rawn melh nghal zawk.







" Kei hi min hmangaih em? " Ka ti sap chu a rawn nui suk.







" I hriat kha! " A rawn ti mai a. Ka ner nghal nang.







" Ka hmangaih che tih i hriat kha! " Ka en reng takah chuan a rawn ti sup a ka nui sak.







" Engtik atang in! " Ka ti leh chu eng emaw ngaihtuah ang deuh hian a awm a. Kei erawh in ka melh zui reng thung.







" Kan naupan lai atang khan ni tawh in ka hria! " A rawn ti sup a nih chu.







" Dik tak chuan Zorina ai pawn ka duh hmasa zawk che mahse a ni chu a zak thei lo deuh a, in lo in kawp takah chuan ka duhna che kha ka thup ve tang tang thin. Ti khan i lawm tawh em? " A rawn tih chuan chhang lo mah i la ka rilru a hahdam veng veng. A chhan chu min khawngaih a min lainat vang chiah a min nei a ni lo tih ka hre thar miau a. Zorinsanga chu ka hmangaih hmasa ber a ni a, Duati vang leh ka chungah a hmangaihna a lan tir dan atang ringawt pawh hian engtikah mah ka thinlungah a thi tawh dawn lo.







Chutiang bawk in Thanpuia erawh ka thian tha tak, ka pasal ni bawk a ni a. Mipa zawng zawng a hmangaihna ngah berah kei chuan ka sawi ngam sak. Engtikah emaw chuan nasa tak a ka hmangaih let ve ka ring tlat bawk.



A TAWP TA


Short story ka vawi khat ziahna a nia 😂 a ngaihnawm loh in ti em 😁 in ngaihdan cmt ah rawn hnut chhiah ve u la. 😘😘

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)