CHAPTER - 12
by Amy Cck ( Dream Girl)
" Min thlah teh fiamthu moodah ka awm lo a nia! " Ti hlak in ka kut chu thin thlak mai ka tum a, ka thing thla thei aw kawngka lo mai. A hma ai mah in a rawn hmer nghet emaw tih tur in a awm zawk. Ka hmai zawn ah rawn kun hniam in ka mit tak a hnai set sawt a min melh tlat bawk si avang chuan han hawi sawn vak ngaihna a awm bawk si lo chu ka thinrim hlur tawh!
" I tha miah lo! " Rawn ti chhuak leh sup in a kut, ka kut a vawn loh na lam chu a rawn che hrut a, ka biang a rawn khawih rual in ka mit ka khap nghal fak a. Ka tum loh zet in ka mittui a rawn dir thla nghal zawih zawih. Tunah tak chuan ka U emaw Thatei bul a awm ka duh tak zet.
Rei tak hnuah Muanawma nen kan in bia a, a aw ka hriat khan ka ngai lutuk leh ka phone call zo zai a chhan ngai loh avang in ka lungawi lo a mahse engkim a rawn sawi fel a ka ngaih a ngam dawn chiah tih a kha hmeichhia kha tunge chu ka hre lo mahse ka thik. Ka hmangaih leh ka ngaih ngawih ngawih ka biak chak em em bulah a awm a. A thik thu chhiat thlak viau chu ti mah i la kha hmeichhia khan kan in biak lak lawh lai in kha tiang khan a rawn ti a, kan in hriat tawh a chinah Muanawma hian Tu hmeichhia mah kei leh Thatei tih loh a hnaih ngai ka hriat loh avang in ka rilru a lo na ringawt bawk.
" Ka tha ka tih chu i hrethiam lo a mi? Ka tha lo a nih pawn ka buaina a nia , lo ngaihven duh suh, ka chingfel ve thei! I buaina chiah ngaihtuah rawh! " A kut lum vung vung ka biang a khawihna chu beng sawn nghal nawlh in ka ti hlar. Tum lo zet in ka mittui a rawn tla ringawt a he pa hian min la hmu zui. Ka zak a hreawm ka ti. A hna thawk ka ni a, ka mi mal buaina tun ang a ka lan chhuah tir a vang in ka in haw bawk!
" Ok..! " Ti chhuak sup in a ding mar nghal vut a, a kut ka ben sawn na lam khan a kekawr ipte a zen lut nghal thun bawk. A din mar tak ah chuan kei pawh ka thaw chhuai ve nghal hliai. Kan in awm hnaih chhung khan ka duhkhawp boruak ka hip lut ngam tlat lo a. Tah chhuak in sum nen a hreawm dan chu rap thlak tak a ni tawp.
" I sawi ang in i buaina a ni a. Ka sawi tum zawk chu i tha a ni chuan thu hran i tha lo a nih pawn ka fapa hmaah chuan kha tiang hmel kha put loh tum hram tur in ka duh che! I hriat kha Reuben hian a chik che in a ngainat zia che pawh! Kha tiang hmel nen chuan i ti hrilh hai lutuk ang! " A rawn ti chhuak nghal sup a. A thu sawi teh duah a vang chuan dak vah in ka en chho ta nge nge.
A mit meng ti zim sun in min melh ngur a, a ka reh mawi zet chu a chip hmuk bawk. Min ngaihtuah vang ni lo in a fapa vang zawk a ni tih a sawi a nih chu. Chuan a ti dik vek bawk. Tunah rih chuan ka mi mal harsatna chu ka dah bo a ngai a, mahse a harsa ka ti! Ka ngaihtuahnaah tunge phone a hmeichhia kha? Muanawma nen khan enge an tih? Engtin nge an in close em em thei? Zawhna tam tak chhan sen loh a rawn in hnawh nghal tup tup a.
Min bum ka ring phal lo a. Chutiang lam chu ka ngaihtuah duh lo bur a ni tawp. Mahse ka rilruah a rawn lang zel thung. Mipa aw rawn thian khurhah chuan ka phu nghal zawk a. Hriat thiam loh hmel deuh a min lo en ngur tu chu lu ka buk khum nghat! Kal sawn mai ka tum chu ka kut a lo la vuan bet reng. Melh zawk in ka mit meng in min thlah tur in ka ti nghal zat a. Rawn thaw chhuak suai suaiin a rawn thlah ve nghal mai a. Ka hma a mipa lian zet chu kal pel in Reubena awmna lam ka pan san ta nghal daih bawk.
Ka ngaihtuahna a fim hlei thei lo chu a chang in hma lam ka lo melh leh vang vang thin. Reubena min biak leh thil tih pawh ka ngaihven hlei thei lo. Hmeichhe dang ang in ngaihzawng then a nei leh zung zung thin chu ni i la tiang hian ka awm kher lo ang mahse ka tan Muanawma hi a hmasa ber a ni a midang tu mah a chhin tak ngial pawn ka la ngaihtuah ngai lo. Ka khawvel hi zim hle mahse a chhungah hian ka duh leh mamawh a kim vek thin miau a. Tun tum hi a vawi khat nan Muanawma lakah ka hlauh thawn na hmasa ber a ni bawk.
Vawi khat chu nurse ka training lai khan, damdawiinah ka la thawk lo tihna a nih chu. A thawhpui nurse pakhat nen khan an in hnaih tih thawm ka lo hre ve a, chhun chawlh laiin han surprise tum in ka va tlawh ve ngei, ka tum loh deuh in a roomah khan nurse kha a lo awm a, Muamawna erawh a awm lo thung. Cabin chhung a ka nghah lai in tawngkam mei nei deuh deuh leh hriat hreawm zet in min tawng khum reng a, kei tleirawl at lai la ni bawk nen ka in sum zo lo in ka kek nawk a. Vanneih thlak tak in Muanawman min rawn nang ching hma hlauh a, kha tih lai khan kar khat chhung ka tih tauh khum nghe nghe!
Mahse min thlem char char a ka U thleng in an mangang hman. Kha nurse nu min tawng khum dan kha Thatei chiah ka hrilh a, Muanawma a lo hrilh chhawng leh a ni chek ang chu Muanawman a hau ve ngei bawk. Chuan zan tin hma tawkah rawn leng in tlai tawkah a haw zel a. Ka be duh lo a room a ka tawm tlat pawn a len hun a ngai reng thung thin. A tawpah chuan kan in ngeih leh nge nge bawk. Kha thil bak kha sawi tur a awm lo tih theih khawp a ni. Chuan tunah khan hmeichhe dang vang in phone min dah san a nih chu!
" Hman leh tun a in ang thei lo! " Kei mah chuan ka phun chhuak sap.
" Amaa engmaw? " Reubenan a rawn ti ha. Nui lui sak in Reubena chu ka melh a min lo melh chho ve kiau bawk.
" Amaa hi khawvel a hmeichhe luhlul ber ka nih ka ti a nih chu. Chhan tha tak a awm a nih ngawt loh chuan ka thlah dawn lo! " Nui var var in a sam nem thepah chuan ka chul sak nghal zat. Ka nuih avang chuan ka thu sawi pawh hrethiam chuang lo chuan a rawn kher ve ralh a. In chung lam panna step ah pen thawm avang chuan Reubena nen kan hawi chho ve nghal vat .
" Kan kal thei e! " Kan bul ah Nunsanga chu rawn ding in a rawn ti nghal sup a. A coat hak kha thlak in tshirt nghawng V tawp a rawn in bel a. Hetiang a ha hi ka vawi khat hmuhna a nia ka en duh viau bawk. Tlem chuan coat nen khup ai chuan a nel awm zawk bawk. A naupan hmel sawt ka tihna a nih chu! Reubena lah chu a lo phur ngang mai. Kei erawh ka hawi a hu thung.
" Kan leng chhuak dawn! " Ka hmel chi ai deuh chu hrethiam in a rawn ti nghal sup.
" Ee.... A... A nih chuan vawin chu ka haw hma thei tihna maw? " Melh chho ha in ka ti leh sap. Nui suk in lu a thing ngut a. Ka hrethiam lo deuh deuh thung. Reubena ka enkawl ber a lenpui dawn a enge kei mah in ka lo tih ang!
" I lo kal ve dawn! Min hnial suh Reubena ka promise vek tawh! A dik em my boy? " Hnial tum a ka ang zauh tawh chu a rawn ti leh nghal sup a. Reubena lah chuan a lo pawm pui ngang mai. Phur lo zet chuan an hnungah ka zui ve hna hna a. Nunsangan Reubena pawm in ka hma lamah a pen pui pawk pawk a. Ka hna ni lo mahse thu ka lo tiam ve khang lang a, an pafa in hnaih theih nan ka theih tawp chhuah pui tur in. Chuan ka thu tiam tawh hi chu hlen ngei duh chi ka ni bawk!
Ka luhna tur in in kawt a motor kawngka chu a pawt hawng a, ka thil tawn boruak nen phur lo tak hi ka ni. Chubakah pawn han chhuah a han len kual vel hi ka nuam ti zawng a ni lem lo a. Chu ai chuan weekend ah chuan inah movie en a mahni a sapa tal hi ka thlang zawk fo bawk.
" Min hrethiam lawk? " Ka phone ri bawk avang chuan motor ka lut tur chu ka ding leh dat a. Screen a Muanawma hming rawn lang chu ka melh ngawt ngawt tawp. A hma a a rawn call ka lawm nen tun tum erawh chu lak ka chak miah lo. Hmeichhe dang bul a a awm tih ka hriat vang pawh a ni mai thei!
Tlem a kal hla deuh in phone call chu ka chhang ta ngei , Muanawma chuan thu pha a rawn sawi luam a, nidang ang in ka bia in ka tawng ve chiam thei lo. Mahse a aw ringawt ngaihthlak pawh hi nuam ka ti in ka hlim pui em em tho. Ka bialpa chauh a ni lo a, ka Unaupa leh ka chhungkua, ka in nghahna hial a ni a. Ka U mipa tawng duh zawk zawk a nih loh avang hian Muanawma lakah hian ka in nghat nasa in ka pangchang leh zual bawk thin.
Thu zep tit tet ka thiam lo miau a nichin a hmeichhia lo tawng ve kha ka zawt ta phawng. Ka zawt lo a nih chuan ka hriat hma chu ka ngaihtuah leh ngut ngut dawn a. Ka eng tih mah ka phur leh dawn lo tih ka hria a, chu ai chuan bialnu thik thu chhe deuh ang pawn min ngai zawk mai rawh se! Ka zawh takah chuan rawn nui hawk in a training pui Zirtei a tih kha a nih thu a sawi a. Ka bo deuh hui nang in hman a a rawn haw khan a sawi zuai tawh tih ka hre ve leh mai a. Ka ngaih chu la ngam zan lo mahse zep lo a min hrilh avang chuan ka hahdam deuh huai in ka thawl deuh hawk bawk.
" Kan mood chu a va in thlak rang leh si ve! " Ti suptu chu ka melh vat a, motor front glass atang min lo en reng tih ka hria. Mahse a sawi dik lo hran lo. Muanawma nen kan in biak hma leh kan in biak hnu a ka awm dan hahdam ta huai hi ka hmelah a lo lang chhuak a ni mai thei. Chhang lem lo chuan ka nui sak ringawt. Ka zah zelah ka bul a Reubena thu, game khel malh malh chu a game khelh ka en pui ve ngawt bawk!
Ka rin ai chuan a nuam phian. Vei leh rilru kam deuh tung tu ka nei tawh hran lo a. Park ah kal in eng emaw chen kan awm a, Reubena lah chuan nuam a ti lutuk chu haw lam reng a ngaihtuah lo. Kei pawn nuam ka ti tiang hmunah hian kei ma thu chuan kal chak na em em ka nei hran lo mahse han kal takah chuan a nuam ve reng.
Kan haw lamah Museumah kan lut kawi a. Reubena nen chuan hmuh nawm ti zet in kan en kual vel dan dan a. Kan thil hriat loh leh mak pui pui chu Nunsanga kan zawt ve zel a. Nula uai tawh in Aizawla awm reng pawh ni i la ka kal zen zen ngai lo miau a. Ka ngaihven zawng a ni hran loh vang pawh ni tho mahse hun ka nei lo ve bawk nen nuam ka ti viau!
Thil kan zawh a piang Nunsanga lah chuan fiah tak leh hriatthiam awlsam deuh chuan a sawi fiah zel a. Hmanlai kan mizo nundan a sawi kai leh zauh phei chuan ngaihnawm ka lo ti ve em em tawp! Floor tin deuh thaw a thil awm chu Reubena zawhna ngah zet in kan phul pui hlut deuh vek. Reubena lah chuan Nunsanga thu sawi vel chu hmuh nawm ti zet in a thli dauh dauh a, a pa in a zawhna a chhang zel avang chuan a nuam a ti tih a hmelah a lang chhuak vek bawk.
" Zanriah chu haw lo in kan ei chhuak dawn a nia, a hran a in atang a kal chhuah kha a buaithlak ka ti deuh! " Motor khalh pah chuan front glass atang min rawn melh in a ti sup a. Ka melh nghal haw, ti nge thil mak pui pui ka la hriat ve loh hi a sawi ziah le tih ka ngaihtuah hman hmawh bawk.
" Enge kan la tih dawn? " Ka ti haw. Ka bulah Reubena mi si chet a thu in a muhil bam a. A tablet ken pawh a ngai ngai in a vuan ve tai bawk. Nunsanga chu ka zawhna avang nge mak ka ti ka hmel hrilh hai zet vang zawk pawh ka hre lo a rawn nui chhuak suk a. Kei erawh in ka zawhna min chhan hun nghak in ka melh ngar thung.
" Zanah Reubenan mela a kal a ngen a, hun rem chang awm lai hian kal pui ka ti deuh! " A rawn ti sup a. ' Mela' tih a sawi rik chuan ka lung a ti leng rum rum. Ka nu leh pa te damlai khan kan kal ve thin mahse rei tak a ni tawh.
" Ka hrilh lawk lo che a sorry! " A rawn ti dam deuh ruih a, ka nui lui sak.
" Mahse tunah te chuan a la hma deuh sia! " Ka ti ve mai a. Zanah a ti a, tunah tlai chauh a la ni bawk nen thil pawh lo ei dawn I la, a lak lawh mai bakah Reubena a la muhil tui lutuk tlat.
" Hotelah meeting ka nei lawk a ngai a, chu mi chhung chuan room kan buck mai ang chu! In lam I ngaihtuah a nih chuan i U ka biak sak thei che! " A rawn tih chuan a ngai lo tih ka hrilh vat. Ka U a awm lo a, ka free lai tak a nih bakah inah mahni a awm ai chuan nuam ka ti tih ka zep lo.
Hotel roomah chuan Reubena nen kan awm a. A ni a muhil sak sak a. A thawk lak dan atang ringawt pawn a ngaih a ngam in a thla a muang tih a hriat ngawih ngawih! A sam nem buk deuh hlekah chuan ka chul sak hliah hliau a. Nurse niin ka duty na hi naupang lam ni mahse hetiang a a bik tak a ngainat leh han pawh em em bik hi ka nei hran lo. Mahse Reubena hi chu nauoang special bik tak a ni. Eng tia hetia lo in hnaih a lo in zawm ta viau nge kan ni ka sawi thei tawh der lo. He naupang vang in pasal nei a fa nei ve vat vat ka chak phah bawk.
" Pasal! " Ka phun chhuak sap. Ka kut a zungbun chu ka melh nghal vang vang a. He thil ka bun ni a ka hlim zia leh kha tiang bak a surprise lian tham ka ka nunah ka la tawng ngai lo bawk a, ka hmeichhiat pui te chuan ka rilru tur chu in hriat thiam mai ka ring. Mahse tunah hian Muanawma nen kan in kar hla ta duai ang mai hian ka ngaihtuah tlat a.
Kan in hmuh reng theih tawh loh vang pawh a ni mai thei. A ni a training naah a ngaihtuahna a seng nasa in a buai em em a. Kei lah tiang hian ka awm ve thut nen. Mihring hian kan hma hun a thil lo thleng tur kan hriat lawk loh zia ka nunah a chiang uar maiin ka hria! Rilru hah leh hreawm in ka awm khat bawk a tun ang boruak hi ka zo lo tak zet bawk.
" A va lo let leh hma ve! " Room kawngka rawn in kik dawt dawtah chuan ka phun chhuak sap. Khum atang tho in Reuben chu puan ka sin that tir a, kawngka lam ka pan nghal zat. A rawn kik deuh dawt dawt avang chu mak ka ti deuh hial. Kan muhil emaw tiin a kik a ni mai thei bawk.
" Kha ti vak a rawh tih....! " Ka tawng lai ka tawp chawt. Nunsanga hmel reng reng ka hmu lo. Ka hma a hmeichhe chhelo leh thinrim tih hriat zet a mit meng ling hlar a min melhtu tu chu kei pawh chuan ka hmuh thut avang in ka ham hai ve vek tho.
" Nang maw? " Nui hak in ti mahse a mit meng chu rum tak hi a ni ringawt. Chhan pawh chhang lo chuan Nu Hmingmawii chu ka melh tlawk tlawk. Meng kual ralh in a rawn thaw chhuak hak a. Kawngka ka vawnna chu a rawn nem hawng nghal dawr bawk!
" Khaw nge a awm a? " Sofa a thu thla dat in a rawn ti nghal zat a. Hriatthiam loh hmel zet in ka melh deuh haw. Engtin nge a lo lan nawlh theih zawk pawh hian min thawng a, a zawhna pawh kha a awmzia ka hre chuang der lo.
" Ihh.... Enge i lo tih dawn? " Mak ka tih zia ka, thup thei lo chuan ka ti chhuak pawng. Min en chuan a rawn nui chhuak hak a. A aw chu a tliang ral a, hmeichhe in vawng leh khawsak sang a nih zia a chezia, a hmel leh a engkimah a lang chhuak vek bawk.
"Ohh.... Ka fapa awm tu thar kha i ni tiraw! Khawnge Nunsanga chu. Hetah Reubena kal san in hmeichhe dang a hmuh san cheu chu a ni em lo maw? " Meng kual ralh in a rawn ti vah. A tawng chu a vin in thinrim hmel a pu lem lo mahse khakna riau a nei tih erawh mi mawl ka ni lo a ka hrethiam ve. Mahse engmah hre chiang hmasa lo a midang a ngai dik lo chu ka lo ngei deuh.
" Ka hmuh hmasak ber che khan ka fapa in a ngaina viau che tih ka hria. Nunsangan i kutah dah tawp in a ngaihsak loh pawh ka rin dan a ni. A ni te chuan hna chhuah lam in hmeichhe dang a buaipui hman reng tho a! " Min bia nge A ngaihdan A sawi pawh ka hre thiam lo.
" Ahh.... Meeting a nei zawk! " Ka ti vat. Tawng duah ka chak ve viau mahse ka in rawlh loh na turah ka tel ang tih ka hlauh avang in ka in sum leh ta zawk. Chuan Nunsanga chanchin a ngaihdan kha a dik lo tih chu kei hian ka hria. A chhungte leh a fapa a care dan chu an inchhung ngeiah ka awm chilh a ka mit ngeiin ka hmu ve bawk. Mipa tawng tam hluai chi a ni lo a, mahse a chezia in a ti lang thin. Ka U nen ka tehlhin deuh ber zel!
" Meeting! Meeting chu chhuan lam a nih loh hram ka beisei. Reubena ka lo hruai dawn a, a duh leh a meeting zawhah chuan a rawn lam theih thu I lo hrilh dawn nia! " Tih leh din a rual a room lam a pam nghal zat a nih chu. A rawn chet dan teh thut avang chu mak ka ti bawk si chu han awm mai dan pawh ka hre lo.
" Aa.... Ka... Ka pi a muhil a! " A hmaah tak ka va ding nghal chawt. A sang in a pian a nalh bawk a. Chutah pheikhawk hill sang zet nen a la ni cheu. A lakah chuan ka hniam rawi rawi ni maiin ka hria!
" Reuben chu a muhil a! " Pangai zawk chuan ka ti leh ngat. A nu mah ni se an in kar boruak ka hriat ve nel nual avang in chuti ngawt chuan Nunsanga phalna lo in ka lak tir ngawt thei lo.
" A kaih thawh theih! A ni lawm ni? " Min melh chhuk in A rawn ti leh nghal zat. Ka rileu hah zia chu.
" I hruai ringawt thei lo. Roomah i lut a nih chuan Security ka ko dawn a nia! " Zah pawh dawn lo chuan ka ti ta vak. A hmel ka en chiah chu ka in chhir nghal rawi rawi! Min huat zia chu a hmeltha viau mahse a lang chiang ngang mai. Min ben sawk chak hmel a pu hial in ka hria!
" Ka fapa ka hmuh leh hmuh lohah nang hian thu neih i tum a maw? " A aw chu a ri fiak that a, Reubena a rawn harh mai ka hlau lutuk chu thawk pawh ka thaw tha ngam lo hial.
" Chutiang a ni lo. Ihhh..... I hmu duh a nih chu Nunsanga... "
" Hahh.... Ka awi thei lo. Engtin nge i hna thawh sakna pa chu khatiang khan a hming a I koh ngam zawk? Nge..... Nang te reuh hi hna thawk a Reubena awm ang deuh a lang hian Nunsanga nen hian in lo in pawh ru viau zawk? " Nui hak in ti mahse a hmel hlauhawm zia chu kei mah chauh hian ka hriat ka ring!
" Maw? " Ka ti haw. Engtin nge kha tiang ngaihtuahna kha a out thei zawk. A ngaihdan kawi zet avang chuan tawng ve ngaihna pawh ka hre lo hial zawk. Mi mah rilru hah ve nak a lai a, Nunsanga chhaih kual ang a min ngai chu ka ngai thei der lo.
" A ring dik ngei e! Engtin nge tunlai hmeichhia ho hian zahna in tlak chham em em le. I hmel en in i kum a la upa lo tih a hriat. I kum mil tur mipa zawng zawk la i ti fuh zawk ang! " Ngeiawm zet a nui chhuak hak in a rawn ti leh kher chu ka thin a kei zak mai.
" I ngaihtuah ang ang kha a dik emaw i tih vang a nih kha! Enteh ka pi nang leh Nunsanga... Oh... Pu Nunsanga in kar chu ka hre lo chutiang bawk in kei nen phei chuan i ngaih ang in zawmna ka nei hauh lo. Mahse i ngai kawi lui tlat a nih chuan i thu a nia, i rilru ka rawn control thei si lo a.
A thu hrim in ka koh dan chu ka thu a nia i lo sawi theih a awm lo. Chutiang bawk in i pasal... Oh.... Pasal hlui a ni tawh a hmeichhe dang nen lo in kawp pawh nise I in rawlh lohna tur a ni in ka hria! " Ka aw chhuak pangai chuan ka ti khum ve sak. Midang ang in ka aw hi a tliang ve ralh lo mahse fel fai tak in thu ka sawi chhuak thin thung. Chuan eng ang pawh a khawsa thei emaw hausa in nei nung pawh ni se elsen tak leh hnuai chhiah tak a min tawng khum hi ka ngai thei bau lo bawk.
" Nang zaktheilonu!! " Ka ban a rawn man dawr in a kut leh lam chuan kut min thlak tum in a rawn lek chhuak nghal uai tawh! Kei pawh chu enge ka hriat ni min ben in peih at in mit te ka lo chhing lawk a nih chu. Mahse kawngka rawn in nem hawng rawp leh mipa aw khauh leh thinrim tih hriat ngawih ngawih a rawn vin thawt avang chuan kan pahnih chuan kan hawi nghal dawr bawk!
Kan lam pan a mipa lian leh hrawl zet, mit meng dur thim khup rawn pen phei pawk pawk chu ka hma a hmeichhia nen chuan kan melh nghal vat a. A mit meng zawng zawng leh tun a a in thuam dan zawng zawng nen saw chuan en mai pawn a lang hlauhawm hluah hluah a ni mai. Ka thu sawi avang khan ka lakah a lawm lo zawk nge pawh ka hriat bik loh avang chuan chil lem dawk in ka melh ve haw ringawt!
" Thlah rawh! " Kan bul a rawn ding in a rawn ti nghal hrawk. A aw chu a ring in a vin hran lo mahse a hlauhawmna a nep phah chuang miah lo thung. Ka ban vuantu chuan min thlah ve ta hram. A kut tin a sei bawk a ka ban a hmerna chu a thip deuh hlar leh nghal!
" I tha em? " Min rawn melh chhuk run in a ri nghal sup. A aw ti rawn danglam hlawk avang chuan ka hawi chhuak nghal dawr bawk. Ka chung a a thinrim hmel ka hmuh loh avang chuan ka thaw nghal hliai a. Min ngaihtuah hmel zet a min en tu chu ka lu ka buk khum nghal nghat bawk.
" Reuben a harh tep ka ring! " Rawn ti leh sup in room lam chu a melh nghal vut a. In thiar fihlim tur in min duh tih ka hriat avang chuan lu buk khum nghat in ka pen sawn nghal zat bawk. Room ka luh dawn chuan hmeichhe vin thawt ri ka hria mahse ngaihven zui duh lo in kawngka ka pawh hawn chu ka khar nghal vat!
" Amaa.... Motorah ka muhil bawk sia! " Khum chungah Reubena lo ding in puan ka sin tir kha a lo pawm khawm teu a. Motor a muhil a harh a khum a a lo awm daih chu a hmelah mak a tih zia leh a hrilh hai zia a lang chhuak chiang hle bawk.
Nui lui sak in a lam chu ka pan vat a. A hriat ngai loh room a ni bawk nen chuan a hawi kual nghal ruai bawk chu kum bul a ding in ka ban ka phar nghal hliai a, ka lam a rawn kal in min rawn ban ve mai chu ka lo pawn nghal vat bawk.
" I ril a tam tawh em? " Pawm chung chuan ka awi deuh ti tih a. A nghawngah min kuah bet in tho phang tih hriat zet in ka darah a bei tha ve than a. Ka dar a lu nghat reng chung chuan a rawn bu nghal nghat nghat.
" Daddy hman ve leh kan ei dawn nia aw! " Ka ti sap. Ka ngaihtuahnaah Nunsanga te kha an rawn lang nghal zat. Reubena hi ka lainat tak zet. Nu leh pa vawi khat lek an in hau an fa ten kan hriat pawn hreawm kan lo ti ve em em a. A ni chu tun atang a nu leh pa te hetiang an nia, a len hun a a rawn hriat thiam hunah chuan hreawm a ti dawn tih a lang chiang bawk a, naupang than chhauh na atan an awm dan hi ka duh pui lo tak zet bawk.
Kawngka ri khupah chuan ka hawi vat a. Nunsanga lo pen lut nghal vut ka hmuh chuan ka thaw nghal hliai. A mit meng chu a dul deuh ruih a. Ka melh reng a hmuh takah chuan nui suk in kan lamah a bawp lei leh hrawl zet chuan a rawn pen phei nghal pawk pawk a. Reubena ka pawm dan chu siam tha in ka sep kang deuh ak a.
" A muhil a mi? " Min melh vung vung takah chuan ka ti sap. Dik tak chuan nu lian zawk zawk ka ni lo a, Reubena lah naupang chum lam a lo ni bawk nen a ruk chuan rit ka ti ve reng. Nui suk in lu a thing ngut a, ka pawmna atang chuan a rawn ban nghal vut bawk.
" Reuben Amaa ban a kham a. " Reubenan a duh tak lohah chuan a ti leh sup. Chutia a tih takah chuan a pa lak chu a duh ve ta hram! Reubena chu kuah hlun in a hnunhzangah a beng thuk thuk a. Nichin a a hmel rum zet kha ka zawng ngial a ka hmu leh tawh thak lo.
______________________________________________
*RAMNUNSANGA POV*
" A ti na che em? " Hotel room atang a kan in zui chhuak chu ka bul a kal hmeichhia melh chhuk zawk in ka ti chhuak sup. Lu thing mat mat in a that thu a sawi chuan ka thaw chhuak huai. Eng mah pawh sawi chhun zawm lem lo chuan lift ah kan luh thleng chuan kan ngawi dun reng a. Hmingmawiin Reubena hmuh a tun dang erawh ka lawm viau!
Hotelah thil kan ei nghal a. Ka hma a Kimkimi leh Reubena thil ei a thu, thawng dun barh barh chu ka lo melh leh vung vung thin. Reubena hlim hmel ka hmuh hian pa ka nih zia leh hlimna tak tak chu ka hre fiah ve chiah mai hian ka hria a ka fapa hi ka dam chhan a ni ta ber in ka hre bawk!
" Pu. Nunsanga chu i vang hle mai! " Meeting zo room kan chhuah san chu Mr. Jeromea nen kan in tawk hlauh. He hotel hi a ta mah nise a vang in hmuh mai mai a har zia chu an hre fur. Kei nen erawh an hotel hi meeting koh leh neih nan ber ka hman avang in kan in hmelhriat tha ve viau.
" Mr. Jerome hmuh i nuam e. Helamah awm hmun i beng bel nghet dawn tih thu thang te ka lo hria a! " Ti sup in kan in chibai a. Kan in biak kawi laiin a nau Christan Hmingmawii VVIP room lamah a hmuh thu leh kan kal rual a maw a tih thu a rawn sawi chuan hman hmawh zet in Kimkimi leh Reubena room lam ka pan nghal vut a nih kha.
Hmingmawii mizia ka hria a, Kimkimi lakah mawi lo zet a a chet ka hlauh zia chu pui tak. Mahse vanneih thlak tak in eng pawi mah a thleng lo hlauh. Mahse khatiang a ngampa tak a Hmingmawii a rawn chet tawh loh nan eng emaw chu ka ti ngei ang!
" Amaa bye aw! Naktukah hma tawkah lo kal rawh aw. " Kimkimi re in kawtah motor ka ti ding a. Lammualah mela an siam a kan kal kawi avang in a hma tawh hauh lo. Reubena nen an in biak mawlh mawlh lai chuan an in lam in ka mit a la daih thung.
" Muttui aw. Oh.... Sorry Mangnuam i ti tak ti raw! " Nui hak in min rawn melh zawk a. Ka lo nuih suk thung. A chhuak tur motor kawngka a nem hawng tawh chu a ban rekah ka man nghal chawt a mak tih hmel zet a rawn hawiin zawhna mit meng in min rawn melh nghal vat.
" I U hi..! " Ka ti sup. An in a la thim vek miau a. Chuan zan rei lam a ni tawh bawk.
" Aa..... Ka U maw, a zin daih a lawm! Muttui aw Reuben good night! " Ti nawn leh sap in a chhuak zui nghal thak a. An in gate a hawng rak rak lai chu ka fapa nen kan melh ta reng. Gate chhungah lut in a rawn khar leh lamah a rawn hawi zeuh a, kan lo la tlan chhuah loh avang chuan kut a rawn vai zauh a. In her in a kal leh nghal zat.
" Daddy Amaa chu a hlau a nge. Kan inah kan lo hruai daih lo a! " Reubena rawn tawng avang chuan ka nui chhuak hawk. Reuben hian a ngaina sa tliah mai pawh ni lo in a atchilh ni maiin ka hmu ta ber. Ka fapa vang hian kei pawh hian ka tum loh deuh in ka lo ngaihtuah leh vung vung thin.
In chhung a lut tak ah chuan motor ti nungin ka tlan chhuak ve nghal a. Reubena erawh passenger seat a thu in lapaw chini a maw ni chu a chip malh malh a. Kimkimi khan lei a ti miau a. A naupan chhiat thlak tak zet. Ka chhung a thleng a , a ral nghal vek maiin ka hria.
" Daddy Amaa hi nitin Reuben bulah a lo kal zel dawn mi? " Min melh ha in ka fapa chuan a rawn ti sap.
" Reuben dam chian hma! Ti nge? " Melh let vut in ka ti sup.
" A nih chuan Reuben dam hunah chuan a lo kal tawh dawn lo ti na maw? " Hma lam hawiin a kun nghal daih a. Chhan dan thiam a har. Tunah pawh hian Reuben hi enkawl ngai a ni tawh hran lo mahse Kimkimi bulah a awm tih ka hriat avang in ngaih ngam tak in hna ka buai pui thei a. Kei pawn Reubena ang bawk in a hna a zawh hun tur ka huphut ngawih ngawih.
In kan thleng a ka nu pawh a lo la meng. Reubenan vahiin Report a han sawi tak tak chu zan rei lam ngaihtuah lo in kan nui chhuak hawk hawk. Lammual kan thlen a mipui tam bawk nen motor park na mai tur a awm loh avang in kan tang khang deuh a.
" Kan lo chhuk rih a nga i park zawh hunah min lo zawm ve mai la! " Kimkimi leh Reubena chhuak chak tawh in an ti deuh sek a. Sual chhuah in motor ka lock tlat thung. Ngaihtuah chian leh chuan ka chet dan kha a atthlak tak zet.
*
*
" Zan in chu zanriah kan ei dun dawn a mi? " Ka office a hna ka en mawlh mawlh lai chuan Dinpuiin a rawn ti sap. Ka melh zawk a beisei nei zet in min melh tih ka hria. Tunlai chu hna lam tih lohah chuan kan in hnim hnai lem lo khawp.
" Tih tur dang ka nei a! " Ti sup in ka hna ka khawih san leh nghal mawlh mawlh bawk. Reubena damloh chinah khan kei pawh ka in thlak danglam hneh ve em em. Hna ka zawh chuan thil dang ti khawi lo in in lamah ka let nghal a. Ka ram zim ta hle mahse ka nun a hlimna ka nei thung miau.
" Reubena damloh atang hian i danglam vek tih hi i hria em? Ni lo.... I nupui then hnu chuan thil a danglam ka ring a..! " Ka melh nghal ngur avang chuan a tawp nghal dat.mittui tling pam in min lo melh kiau tu chu en in ka thaw chhuak hawk.
" I ti dik, danglam chu a awm ngei a lawm. Chuan nupui then ka ni a fapa enkawl tur ka nei bawk. I hrethiam ti raw! A hma ang khan ka khawsa thei tawh lo. Ka fapa hian pa amah uap tu leh hmangaih tak a en kawl tu a mamawh zia ka hre thar bawk! A bak engmah dang lam a awm lo! " Ti chhuak sup in ka thutna atang chuan ka ding chhuak nghal ruai ruai a. Zawl dawh tak a ka biak chhan pawh hmeichhe fel tak chu ni chiah lo mahse a rilru ka tih nat sak tih ka hre ve miau.
Chuan kei mah vang a rilru na leh mittui tla a a awm ka duh lo. Mittui, ka mitthlaah Kimkimi mittui tling pam a ka hma a ding. Mahse ka hmuh hlau a in seh ruh teuh kha a rawn lang nghal zat. Nui suk in lu ka thing nghal ngut. Dinpuii ka hmaah a awm reng laiin Kimkimi ka ngaihtuah daih chu ka in thiam lo leh deuh.
" Olee.... Ka hre thiam e. Ka nghak thei che ka tih kha! " Nui var var in rawn ti mahse a mittui tling pam leh awm danah chuan a na tih a hriat lutuk tho.
" Dinpui min nghak suh! " Ka hma a hmeichhe nui lui sang a min tu chu ka tih khum ngut. Ka rilru pe thei i la chuan kha ti leh chen chhung khan a hneh em em ang. Mahse chutiang a ni tlat lo a. Vawikhat ka ti sual tawh a, tunah chuan hmangaih miah loh nen a in zawmna siam ai chuan damchhung a kawppui neih loh pawh ka thlang tawh zawk miau.
" Aii.... Tunah chuan i rilru a la buai mai mai a nih kha! Reubena a len hun thleng pawn ka nghak thei che. I hre ve lo mai thei college lan kal lai atang khan ka duh tawh che mahse nupui i nei a, ka beidawng viau a mahse i hmangaih lo tih ka hriat a ka lawm zia kha i hre kher lo ang!
Chuan tunah i nupui nen in in then tawh a, hun min pe ve tur in ka duh che. Tun tum chu phal lo mah la i thu ka zawm dawn lo! " Ti sap a nui lui hak in min rawn melh vah a. In her in min chhuah san nghal zat bawk. Mahse a sawt dawn lo tih hre tu ka ni a, a la beidawng dawn tih pawh ka chiang lutuk tlat bawk. Thaw chhuak hawk in ka ban ka phar hluai ringawt!
" I awm loh hunah engtin nge ka tih tak ang! " Reubena room a lut in khum a hmeichhe mu kawm ngel leh ka fapa muhil thaw sak sak chu ka melh run a.
Zaninah Hmingmawii te in a ka kal kawi avang in ka haw hma Reubena min lo em sak tur in ka phone buai ringawt a. Ka nu lah Thenzawl lamah ka nutei re tlawh in a zin bawk nen. Ka coat hak chu phelh vut in khum lam chu ka pan nghal vut a. Nileng a ka ngaihtuahna luah Tu te chu melh vung vung in khumah chuan ka thu hniam nghal sulh.
Hmingmawii nu leh pa pawn an fanu khawsak dan chu an hre be ta ngei a. A pa pawh a zak in a Fanu chu a hau nasa viau. Kei thleng in ngaihdam min dil bang lo. Mahse ka thiam vek bik loh avang in Reubena chung changah pawh kan sawi fel ta zawk a. Tunah chuan ka phalna loh chuan a fapa pawh lo ni raw sek sek. A hmu thiang lo bur.
" Ehh.... I... I lo haw tawh a law! " Tih vak in a rawn thu chhuak vat a. Ka lo bih hnai lutuk nge a mu a rawn thut chhuah rual in a chal leh ka chal a in tauh ri nghal bawp. A rak nghal that a, hte chhuak thut in Reubena mutna a en a mahse a harh lo hlauh!
" Ka va thlah ang che! " Ka ti chhuak silup. Khum atang a chhuk in a che buai chuk chuk in ka thu sawi avang chuan a rawn hawi vat a. Lu thing mat mat in a mah a a haw theih thu sawiin khum mawng lam a a bag chu a ban nghal zat a. A chhe hman hmawh lutuk chu a bag a la thlauh zui!
" Oii... Ka... Ka tih palh muttui! " Tih leh a bag chhung a thil awm tla darh chu a chhar thuak thuak a, room a chhuah san nghal zat. A chet dan hman hmawh leh phili chuk chuk chu mak tiin ka thlir ngur ringawt!
" Naupang chhia lutuk! " Tukverh atang chuan hmeichhe Scooty a kan in gate lam pan a tlan chhuak chu ka thlir vung vung a. Dar 9 a ri tawh, tawh sual a tawh loh beisei phawt ang.
" Hmangaihkimi chu(h)! " Khum mawng a chahbi chu la kang nghal vut in ka ti chhuak sup. An in chahbi tel lo chuan a lut thei hauh lo ang! Motor chahbi chu ban vut in inhnuai lam pan in ka pen chhuk nghal hmawk hmawk a. Kan nula pakhat bulah Reubena lo en zawk tur a hrilh in ka in khalh chhuak nghal zat.
Zan dar 9 a ri tawh a, in a a luh theih loh chuan a mangang viau dawn tih chiang sa bawk nen kawlai reh lam tawhah chuan chak zet in ka tlan chhuak a. Chahbi pakhat vang a hetiang khawp a han hman hmawh chu awm lo tiin ka ner nghal sawk. Mahse ka ti ve tawh tho.
"Hrep chuan! " Ti chhuak jrawk in motor atang chuan chhuak vut in Hmangaihkimi te in gate ah chuan ka pen lut nghal vut a. A reh thiap a, in chu a la thim vek bawk. An thenawm in vel ah a awm A nih ring in ka kekawr ip chu zen rawk rawk in ka phone chu ka la chhuak nghal vut a, Hmangaihkimi no chu ka call nghal zat. Ka bul mai a phone ri avang chuan ka hawi nghal vut a. Ka piah deuh sintex phen ang reng deuh a hmeichhe lo thu tawm chal chu melh in ka rum chhuak hrawk!
Ka awm tih a hre lo a ni mai thei. A tap nge a muhil tih ka hre mai thei lo. Thu tawm vek in a khup chunah a chal nghat in a kun deuh tlat a. Eng sawi set set lo in a awmna lam chu ka pan nghal vut. In a a lut thei lo a nih pawn a rawn tlan let leh thei reng. A nih loh pawn min call thei bawk. In nei lo ang mai a naupang chhia zet a a awm chu ka lawm hauh lo.
" Hei... I muhil a mi? " A hma zawn a thu hniam run in a darah ka sawi dat. Chutia ka tih takah chuan a rawn hawi chhuak ve hram. A hmel ka hmu chiah chu keimahah hian che dawt a awm. A muhil ni lo in a tap zawk tih hriat zet in a mit a sen ram a, a hnar pawh chu ti bawk. Min hmu chu mak a ti tih hai rual a ni lo. Mahse he a mak ti hmel hi chu ngaiah ka neih tawh. Chu ai chuan a tah chuan hian ka rilru a luah nghal daih thung.
Min melh ngawt ngawt hnu chuan ka rin loh zet in a rawn tap chhuak nghal hawk a. A kut pahnih chuan a mit a hup nghal thak bawk. Mahse tun tum chu a tap a bang miah lo. Chhuak em em chuan a tap hawm hawm a. A tap uar reuh bawk nen zan rei tawh lam nen mahse a aw te hi a ring lo viau hlauh a.
Ka tih ngaihna hre lo chu a darah ka ben sak ringawt. Hmeichhe tap hi ka thlem ngai miau lo. Hmeichhia chu sawi lo Reubena tap takngial pawh ka thlem ngai lo. A hlauh vang a tap a nih ka ring deuh tawp.
IMG_20191021_211535.jpg
IMG_20191021_211535.jpg (93.83 KiB) Viewed 10028 times
" Hei... A hlauhawm loh ka awm hi! " Ka ti chhuak sup a ka ngaihtuahna a lang ang chuan ka taksaah ka kuah bet nghal thlawp bawk! A tal lo a, a tang bawk hek lo. Ka kuah ang ang chuan A tap khur dar dar a. A tap ri te chuan eng tin emaw tak in min fan viau bawk. A tap a reh theih mai loh avang in chuan ka kuahna chu sawn in a biang a tahna avang a sen hlar leh lum veng vengah chuan ka kut chuan ka khuap nghal hlun a. Tah in sum zet in a in sut hleuh hleuh a, a hmui khur der derah chuan ka hmuiin ka nawr sak nghal hmiah!
Ka tum ang chiah in a tap chu a ngawi hmak. A che lo a, min nam sawn emaw kut min thlak tum in a che chuang lo. Kei mah zawk hi ka in hrethiam ta hauh lo. A tap a ban nan a ti chauh ka ni mahse a hmui a tang ka hmui ka la sawn thei ta hauh lo! Lak sawn chu sawi loh ka hmui chu chet in a hmui lum hiam leh chhah deuh tap chu nawr kau deuh in ka hmui ka chet ta zawk.
Ka hmui ka chet takah chuan harh chhuak zawk ang mai hian a rawn tal ta phat a, mahse a biang tawn tawn a ka vawnna chu ka ti nghet zual sauh a, duh thaw zet chuan ka fawp nghal nghawng nghawng a. Tal ve laih laih mahse a awm dan tan rem lo zet nen chuan a tal chhuak mai mai thei dawn hauh lo tih ka hre chiang.
" Kawlh reuh lutuk! " Ti sup in ka thlah ve hram. Ka ka chhung rawn al lut papah chuan ka hmui a seh thi tih ka hre bawk! Ka hma a hmeichhe mit sen ram rum lutuk a min melhtu chu ka nuih nghal suk. Ka thiam loh a ni tlat lo. He nu ka hmuh hi chuan ka chhia leh tha hriatna hian min thlawh bo san vek thin miau! Tunah erawh zawhte kawlh zet ka hmachhawn dawn a nih hmel!
Dah loh ka in thlahrung bawk sia, tlai atang ka type beuh beuh a. Ti hian lehkha zir ka la ngai a nia aw
ka va han duat si cheu em
lekha ka zir hmasak chuan ka muthlu chiang dawn ropui sia
chubakah min kam leh run dawn bawk nen thui tawkk mahse ngaihnawm vak lo ka lo dah. Chuan COMMENT lamah in ngaihdan leh a story kal dan tur a in rin te lo sawi ve u la, in chhiar zawh a in reh hmak chuan tawi te te in kan ti tawh ang
han ti vel i la. Tak tak in cmt theihnghilh awi loh aw
by Amy Cck ( Dream Girl)
