PANGPARHNIMA by Ahmangaihi violette khiangte (Completed)

Moderator: writers

Ngaia
Site Admin
Posts: 19502
Joined: April 30th, 2016, 4:07 pm

Re: PANGPARHNIMA by Ahmangaihi violette khiangte (Completed)

Unread post by Ngaia » October 24th, 2021, 3:53 pm

CHAPTER -25




Nunui nui ri chu Phone aṭang pawhin a ring khawp mai, thawm a rawn ri zui sawt sawt a; reilo teah thawm chu a reh ta duk a, ka Phone ka en leh nak chuan Lalnunpuiin a lo hmet tawp daih chu niin, Call ṭhat leh tak ka nap a; em a ka ti ve deuh bawk si, engtin nge an inbiak zui zel ang tih mawlh chu ka ngaihtuah a, Class ka nei zui ta bawk nen Avisa pawh ka be leh ta rih lo, zirlai ah chuan ka rilru a bet lo hle a; ka ngaihtuahna chu ka awmna aṭanga mel tam tak a hla ah daih a ni a awm ni.




Ka Phone chu ka bih sek sek renga, Nunui emaw Avisa call emaw ka beisei ru reng bawk, tlai ban thleng chuan a tu ve ve mah chuan min lo Call ta chuang lo, Gate lampana Siambawihi nen kan inzui laiin Avisa zawk chu biak ka tuma, ka Phone ka lek chhuak chiah tih a Nunui zawk chuan min lo Call a, "I bang tawh em? Lam kan zir leh lo a, i bialpa chungchang kha sawidun teh ang" a tawn ti nghal thawr a, ṭawng na hun ka chang leh mang dawn lo in ka hria.



"A va han ṭawngthei em em, a zak lo reuh bawk si" a rawn tih chuan ka lo nui hak a.



"Phone i hmet tawp daih a, eng nge in sawi dun?" ka tih laiin "Diaper min leipui rawh a tia min pawt nghal dawr dawr a lawm, puitling Diaper kan zawng kual hrep a, Ice cream te ka in leitir kha" a nui zui kar kar a, chutia an lo inbe tlangnel nghal mai chu ka lawm khawp mai, min tuipui lo tlat ang tih kha ka hlau ve deuh a, ṭhian ten kan ngaihzawng an lawmloh hi chuan a nuam lo ve riau ṭhin.




"Tluanga ai chuan ṭha tak a ni, biak a nuam si, ka sawi ang tak tak khan rei deuh hresa tawh ang mai ka ni tak tak a lawm; Mahse..." a ti deuh hluai a.



"Eng nge mahse...?"



"A Frank mah mah a ni, a ngeiawm deuh bawk, mi zingah 'Thulphênthang' tih hlirin min ko a, a zahthlak thei lutuk" Avisan mi hming dik takin a ko ṭha duh ngai lo tih ka la hrilh lo tak.




"Miriami chu lo hruai ve tur a nia ka ngai tawh a sin le ka tia, 'Awi, a ngai lo' a ti tlat a, thil ka zawh lahin 'I thluak Brain rawh' te min tia, a nui duh miah si lo a, ka dang lawl lawl zel, in mizia a in an loh hmel ka ti, a hmelchu a ṭha, a pian pawh a nalh lutuk mahse, a mizia kha a mak reuh emai" thutak deuh hian a ti zui a, ka khi ṭha reng ringawt tawh, ka hriat tirh kha chuan a mizia khan keipawh min lemlo hle anih kha.




"I hmuh leh hunah chuan 'Pangparhnim' tiin i ko ve dawn nia, a haw thei lutuk" nui chungin ka lo ti a, "Man-a min ti rawh a tia lawm, Man-a ti hlirin a sin ka lo koh" ka ṭhen ṭha a, "Engtin maw a koh che?" ka tih leh laichuan thawk a la hluai a "Thulphênthangi, pawih hming a ang ti raw, kha lama mi ang vak lo hming te hi a lo ni hial lo maw?" a rawn ti let haw a, kei ka lo nui kar kar thung.




"Chawlh veleh ah lo zin rawh aw, khua te ka fan pui ang che, lenna tur tlang nuam deuh deuh a tam a nia" ka ti ta daih a, a phur nghal khawp mai, External Exam zawh veleh a lo zin a tum a, Christmas hmanga haw ka tum em tih min zawh chuan ka chhang mai thei lo, haw chu ka chak fahran lo chu a ni e.




Siambawihi nen kan inzui reng a vangin Phone chu ka ti tawp thuai a, Nutei dawr kan thlen hnuah Avis-an min lo Call veleh chiah a, "Kan ṭhian te chu an rawn chhuak chiah e, zan reiah an lo thleng hman ang" zângkhai deuh hian a lo ti a, Zorema chanchin ka lo zawt ve thuai bawk, kan inbiak laia Nutein min lo thlek leh ṭhin vang chuan ka pi te in lamah ka lut phei ta ringawt a, Avisa ka bia tih chu a hriat tho ka ring.




Zorema chu a harh tawh a, a hliam chu na a ti deuh viau a, nachhawkna in an Jection deuh reng tih loh ah chuan a taksa pawh a chet thei a, kan hlauhthawn ang em em chu a thleng ta lo anih hmel e.




"Engtin nge in khawsak dawn?" ti a ka zawh chuan a cham rih tur thu a sawi a, "Betea leh Nuihiaua an lo haw rual ang" a ti mai a, engtia rei nge a cham tur pawh a sawi fumfe thei meuh lo.




In a kan haw hnua kan inbiak leh chuan Damdawiinah Zorema riahpui turin a kal a, Chhanchhuaha chu Henry a te inlamah a riak thunga, Zorema thlalak te pawh min lo hmuh a, a taksa a vung nasain a lang dang khawp mai. "Thisen a hloh hnem deuh a, a chau zuala mahse, a dam leh vat dawn" a rawn tih chuan keimah niloin amah a inhrilh nimah zawk in ka hria.




"Aizawl lam chu a vawt surh tawh lo maw, i inthuam lum em?" ka tih laiin "A chi nang, Nurse Duty an chhelo riau a, Sleeveless ka ha tung mai" nui lek lek hian a ti zui a, ka nuih a za ve vak lo.



"Lerh i tum a ni maw?" ka ti kha kha a.



"Tum lo e, i ṭhiannu Thûli khan min vau nasa emai ka ngam lo ang" a nui kur kur a, Nunui chuan engtin tak lo vau ang maw?



Ka ngaihtuah laimekin "I bialpa hlui chungchang a sawi a" a rawn ti zawi sup a, "Engtin nge a sawi a, thil in lo va sawi hnem hman awm ve?" ka lo ti let thuai a.




"Ka sawi chak lo" a ti deuh hmuk a, zawh zel chi pawh a ni lo. "Lo haw har suh, Class i ṭhulh hnem lutuk ang" tiin ka chah hram a, Exam thei lo a Attendance ah a tlak ka hlau ru khawp mai, Final year a ni tawh si a, Zorema chhungte an awm tho bawk nen Henry a te rualin lo haw thei sela ka ti tak zet.




Kan ṭhian dang te lo haw chu kawngah an tluang vak lo aniang khawvar dawnah an lo thleng thei chauh a ni awm e, tuman Class an rawn kal lo a, Zobuaii nen ka tlai bang dawr kawnah kan inhmu zawk a, Rinpuii pa a zual thu min lo hrilh a, Nutein zan chhuah a phal tawh loh vangin lenpui tura min sawmna chu ka ne ne ta ringawt a, ka inthlahrung ru khawp mai.




Kartawpah Henry leh Betea Sumo-ah an lo chuang haw a, Avisan T-shirt senduk nalh deuh min lo thawn a, a hnen aṭanga thilpek ka dawn hmasak ber a ni, a hmasir vei lamah chuan 'Smile Squad' tih tereuh te in a in ziak a, ka ha chhin a ka inhmeh em em lehnghal a, a nazawng chuan ka ha chhuak phal hauh lo ang.




Inrinni tlaiah Henry nen kawtah kan titi dun a, Zorema chungchang ngawt chu kan sawidun a, sum lamah harsatna an lo nei tih reng ka lo hre ve lo, inenkawl na senso a tam vangin an lo phang ru hle tih te ka hre lehzel a.




"Rinpuii pa kan na tura kan khawl kha kan pe vek a, Pa Muana chu beisei a bo tawh bawk si a, Zorema hian a mamawh zawkin kan hria a, Rinpuii lakah a inthlahrunawm khawp mai" Henry chuan a ti ve luam a, pawisa lam buaina ah chuan tih theih ka nei ve in ka hria, ka chet chhuah ve hun tak pawh a ni ang.




Chumi zan chuan ka inngaihtuah buai viau mai, dar sawm velah ka pa muhil tawh chu ka zuk Phone ta nge nge a, "Aizawl Hospital ah ka ṭhianpa a awm a lo va kan rawh aw, naktukah kal ngei ngei la, i theih anga tam pawisa lo pe mai teh" ka ti ta ngawt a, min lo zawt chik ngang mai bawk.




"I bialpa em ni a?" a ti hmasa zet a, anih loh thu leh ka ṭhianṭha tak anih thu ka hrilh a, pawisa lama an harsatna te pawh ka hrilh ve luam a, Pathianni a kal ngei ngei turin ka chah bawk.




A lo va kal ta ngei bawk a, Avisa awm loh lai anih vangin Zorema chhung te chu an lo bo viauin ka ring, "An hre mang lo che a, engtia i hmelhriat maw ni a, kha cheng singkhat lai ka pe a?" a rawn tih chuan "I va pe tlem ve" tih zawngin ka lo chhang a, pawisa hmanna tur a neih loh tehlul nen.




"A tlem em ni, kan hmelhriat ṭha an ni bawk si lo" a ti niah niah a, " Ka hmelhriat ṭha an nia lawm, Rammuani tan i inseng phal viau tho sia, i uikawm emai" ka lo ti kha kha a, a rawn sawi zawm leh hmain Phone chu ka dah hmiah bawk. Ka thinrim lo a, a pawisa pek ah pawh ka lawm viau tho; Mahse....tih kha a awm tlat a, ka lawm duh lo lui a ni zawk mah ang chu.




Avisa chu kar hnih zet a cham tawh, Zorema pawh a zia ve zel bawk a, Rinpuii pa erawh a hniam hret hret thung, Henry pawh tlaivar pui turin a chhuk awl lo a, keipawh Class banah ka peng kawi ve ṭhin a, inleng pawh an ngah thin khawp mai.




Pathianni zana ka mu chu ka Phone ri in min ṭhawng harh hlawl a, Henry-a a ni, dar 12 a pel tawh a tun ang huna ani meuhin min lo Phone anih chuan a pawimawh hle anih ka ring thiam nghal a.




Rin ang ngeiin Rinpuii pa boral thu chu min lo hrilh a, kan inbiak laimekin Avisa Call a lo lut ve chiah bawk, ka chhan rualin "Zaninah ka lo haw ang" a rawn ti tawl a, a insiam mek anih hmel.




"Muang changin lo tlan rawh aw, tih theih a awm tawh lo a, hmanhmawh a ngai lo ania" tiin ka chah ve mawlh mawlh a, a tlan muan phah chu ring lo tak ka ni. Kan inbiak zawh hnu chuan khumah ka ṭhu reng a, kal ve chu ka duh viau laiin ka chhungte an muhil tawh bawk si a, midangin min lo hruai anih tawp loh chuan ka tan tih ngaihna chai a awm lo.




Sitting room ah chhuak pheiin ka va ṭhu ren rawn a, ka Phone chu ka tuai let sek reng bawk. Henry chu ka Call leh a, a chhang thei tawh hauh lo, an buai rih a nih ka ring. Zobuaii Message ka thawn a, Rinpuii pawh tawrhpuina thu te ka thawn a, ka tihtheih tlem bik lutuk chuan min ti hrehawm ve em em ringawt mai a ni.




Khawvar dawnah ka muhil leh chauh a, ka harh meuh chuan ni a lo tlangsang viau tawh, tho sawk sawkin ka inphihfaia Nutei bulah thil awmzia sawiin ka insiam nghal zung zung a, tukṭhuan pawh eiloin vengthlang lam chu ka pan a, mahni tea va lan chu ka hreh bawk nen dawr kawnah Henry-a ka Phone leh rih a, an ni thlan laihna lamah an lo awm daih vangin Zobuaii bawk chu ka be leh a.




"Kawtah ka lo chang ang che, lo tlan phei rawh" a lo ti takah chuan hmanhmawh deuhin ka inkhalh phei a, Rinpuii te inkawt thlenga tlan chi pawh a ni lo, an ṭhenawmte kawt thlengin mi an lo ṭhu khat vek a, hla deuhah ka Scooty chu hungin kein ka phei a, Zobuaii ka va hmu chu ṭap nasa tih hriat lutukin a lo bui lak mai.




Inchhungah kan inzuilut a, ruang ka va kil ve ta chu a nia, an ṭap nasa si a, thawk a zing mup a ni ber, ka hnuk a ulh ve ṭeuh a, ṭap chhuak ngam siloin ka inhru ve zauh zauh reng bawk.




Vui zawh a thla la tura kawta an inzawn chhuah laichuan chhaklam ko bula Avisa leh hmeichhe pakhat lo ding chu ka han hmu a, engtik laiin nge a lo thlen reng ka hre lo, ka va hawi laichuan min lo hmu ve zat bawk a, chutah ka lampana a lo kal chu hmeichhia chuan a lo zui ve zel a, chu nu chu ka hmuh tawh hnu niin ka hria.




"Engtikah nge i lo thlen a?" ka lo ti hap a.



"Zing lamah khan, pawnah hian ka ṭhu a" a ti mai a, inchhung a khah tawh vangin a lo lut lo anih hmel e. Rinpuii lo chhuak chu a va pan vat a; a darah va kuahin zawite tein an inbia a, an inhnem niin ka hria.




Chutih laichuan Avisa hmeichhe lo hruai kha ka bul chetah a lo dinga, Avisa Helmet a ken lai chu ka lo en vung vung thung, a hmel chu ka hmu tawh chianga, ka hmuh tawhna ka hrechhuak mai thei lo.




"I lo kal ve a ni maw?" Zobuaiin a lo tih chuan nula chu a lo bu nghat a, ka lam lo hawiin chik fahranin min en bawk.



Thla an lak chhung zawng chuan Avisa leh Rinpuii chu an ding dun renga, Rinpuii ṭap hlawp hlawp chu nghet deuha kuahin a ding khawng lah a, ka lam a lo hawi leh zauh ṭhin tih loh chu kan la in be leh ta lo.



Nula kha an bulah va dingin a va be sar sar a, Avisa Helmet a keng mawlh chu a ni ka hriatthiam loh chu ni!



"Saw nu saw tunge a?" ka bula ding Zobuaii chu ka zawt tawl a.



"Rdi saw maw, a hma pawn i hmuh tawh kha" a tih chuan ka bangbo hle.



"Ka hmuh hnu a ang ka lo tia mahse, ka hrechhuak mai thei lo" ka tih leh chuan min rawn hnaihin ka beng bulah a rawn thle hnai a, "Rdi kha, hmanah Avisa leng kan nghah tawh kha" a tih chuan ka hrechhuak zawk a, chuti anih chuan a bialnu hlui anih hmel e. Engtia lo inzui nge maw an nih reuh chu le.



Tum barin Avisa chu ka va en a, Rinpuii a be sup sup a, ka lam lo hawi lo mahse, ka melh rum lo chauh tawh. A bula nula pakhat zawk lah chuan a dinhnaih ve hle a, an hmuhloh lamah ka lo inhumruh hle ringawt mai a ni.




"Eng nge an awmzia ni a, nichinah pawh an lo ding dun tawh" ka tih leh chuan ka ṭhiannu chuan a ngaihna a hriat bik hmelloh khawp mai.




"Engmah a awm lo ang, Avisan 'Ka ṭhen tawh' a tia, an inzui leh awm ka hre miah lo" Avisa te dinna lam hawi chuan a ti ve sap sap a, chuzawng ka ring vak lo, Avisa Helmet lah chu chhuhsak hlau niawm takin a pawm ṭung a, engemaw awm lo sela a ken tir kher nang, ka ngaihtuahna chu thil pakhatah ngawt a insawr bing tawh.




"Engahmah ngai duh suh, Avisa chu ka lo hau ang, bialnu hlui te biak ṭhat hi a ngai lo, Lalawmpuii vang khan hetiang rilru hi a la pu tlat a, a zialo tak tak.." a ṭawnglai chu tawp chawtin min lo en a, a ṭawngsual nge maw ni?



"Lalawmpuii vang a?" ka lo ti ve chiah bawk.



"Engmah a ni lo" a nui tawi tuk a, ka la hre miah lo emaw a ti ni ngei tur a ni.



"SDO fanu chungchang kha chu ka hre tawh a lawm; mahse, engnge i sawi chu a awmzia?" ka ti nawn leh a, a chhanna ngaichanga ka en kar takah chuan Avisa chu a va en leh zauh a, a sawi hreh deuh emaw ni?




"Awmpuii kha Avisa nena an inṭhen vanga intihlum a nia.." ka lo bu nghat a, "Engtin nge i hriat?" a ti leh hluai a.



"Ka hre vek, amah pawn min hrilh alawm" ka tih takah chuan thaw huai hmel a pu.



"Khata ṭang khan hmeichhia amah ngaizawngtu a piang hi anihpui zel a lawm, an rilru tihnat hi a hlau a, amah a inthiamloh vang a ni ber, khatiang thil kha a thlen nawn leh a hlau a, an hmelchhia emaw ṭha emaw nuthlawi pawh ni se..." ka lo meng nur viau aniang za lo deuh hian a ṭhen sak a.




"Mahse, in inngaihzawn aṭang khan hmeichhe dang a be tawh ngai lo a sin, aman min hrilh a, khatianga awm kha nuam a tih vang a ni bik lo ania, mi thihna a mawhphurtu nih hi a hlau a ni ber, a nu boral pawh kha amah vangah a ngai a" a ti sap sap a.




"A nu kha chu lungphuchawla boral anih kha.." hamhaih deuha ka tih laiin "Nih chu ni e; mahse Chhuansanga hi a awm ve reng a lawm, a nu awmdan kha hrethiam nisela a chhan theih a inring tlat a, a tihsualah a ngai a lawm" a tih takah chuan hman zana a nu boral dan min hrilh kha ka hrechhuak uar uar mai.




Avisa chu ka va thlek vang vang a, engtiang chiaha phurrit nge maw a inphurhtir ang le? Tun thlengin a rilru hi ka la hrethiam thei tak tak lo chu a nih hi.




Thla an lak zawh hnuah thlanmual lampanin kan inzui a, Rinpuii pawh a nu kianga a kal tak vangin Avisa ho chuan a hnunglamah kan kal a, Rdi nen chuan ka mit an ti kham lek lek ṭhin chu a ni. Kawng tluanin an inbe mawlh mawlh a, Zorema chungchang an sawi tak nain midang min hrechang lo leka an inbe mai chu ka ngaihdan a ni lo hle tawh.




"Zanin chu inrualin ka kal ve ang, i kaldawnah min lo Phone rawh aw" Rdi-in a tih laichuan ka va en deuh kher a, Lalchhuansanga lo hawi nen chuan kan mit a intawng chiang hle.




"I lo kal thei ang tiraw, ka rawn haw chho kher lo maithei a ni, kawnah ka lo nghak mai dawn che u nia" a rawn ti lehta nghal a.




"Ka hre lo, kalpui tur ka neih leh neih loh" ka ti bul hmuk a, "Nuihiaua nen in lo kal rual thei a lawm" a tih chuan melh pawh ka melh peih tawh lo.




"Kan inah chaw lo ei la, kan kal rual dawn nia" Zobuaiin a tih pawh chu ka chhang duh lo a, Lalchhuansanga chu ka kal hlat hret hret bawk.




Ka kalmuan rual chuan Zobuaii pawh a kalmuang ve nghal a, ka awmdan chu a hrethiam a ni chek ang min thlek leh zuk zuk ṭhin. Kan hma a Lalchhuansanga leh Rdi kaldun chu an la inbe pah renga, an ṭawng rin loh vangin eng nge an sawi ka hre fumfe thei meuh lo, chu ringawt pawh chuan min ti lawm lo takzet a ni.




A tukkhum lam chu lawm lo leh tum bar chunga ka en vung vung laichuan rawn lehhawi thutin a kut a rawn phar a, min rawn kaih a tum niin ka hria, "Kal mai mai rawh" ka lo ti hlak a, a meng buai ve deuh chuan ka hria a mahse, ka en rei duh lo.




Ka kal muang sawt hle a, kan hma a kal te pahnih nen chuan kan in kal hlat viau tawh bawk, a khat tawkin a rawn lehhawi leh ṭhin a, hmun dang ka lo hawi hmak ṭhin chuan a awm a tinuam ta bik chiah lo aniang kawng sirah dingin min lo nghak a, an bul kan thlen rual chuan ka darah a rawn kuah thawr a, Rdi chuan min en phawk hle tih ka va hmu nghal thuai bawk.




"Zanah chuan ka lo lam ang che aw" zawi supa ka beng bula a rawn tih chuan ka ngawi ngal a, "Mate.." a rawn tih leh chuan a lam ka hawi ta chauh a, a hmel chu a lang Cool ruih mai.




Tawi te hian min nuih a, chutah ka beng bulah lo thle hnai lehin "Ka ngai lutuk che a nia" a rawn ti leh a, nichin lawkah Henry a ruala kaltura min tih laikha chuan min thlahlel vak lo chu anih kha maw, 'A lum" tih pahin a kut chu ka paihthla sawk a, ka dara rawn vawn leh mai a tum chu rum zeta ka lo melh vang chuan a tawp chiang hle.




Zawhna mitmeng hian min en zui a, "Nutein zan chhuah a phal tawh lo a, ka lo kal theih ka ring lo" chiang fek fawk hian ka ti a, min lo kalhnaih hrut rual chuan Zobuaii lamah ka tawlh hla zui a, kal pah chuan min thlek vung vung reng a, Rdi-in a biak changa a chhang tih loh chu a ṭawng leh miah lo bawk.




Thlan muala ṭawngṭaina hun kan hman lai te pawh chuan kan piah deuhah thlanlung nghengin Rdi nen an ding dun a, an bula awm ka duh loh vanga kal hrang ka ni, Zobuaii lahin min zui ve zel a, ka lawmloh na chu a lo thlawp ve nihmiang ka ti mai.




A lo thleng tawh tih pawh ka hriat loh laiin pawnah a bialnu hlui nen an lo awmdun a, inpawh lutuka an titi ser ser laiin min ngaihthah bawk anih kha, ngaihthah nih hi ka duh lo, na ka ti, ka pain min ngaihthah a,Tluanga min ngaihthah tawh bawk a, a lakah hian beiseina sang tak ka neih laiin min ti hnual hle chu a nih hi.




Thlan aṭanga kan let dawn chuan Zobuaii chu Rinpuii ngaihven turin a kalsawn a, "Min lo nghak rawh" a ti tak nain hmanhmawh deuhin mi karah ka inzep a, kawngchhak aṭanga ka hawithlak chuan Lalchhuansanga hawi kual thuak thuak chu ka zuk hmu thei a, min zawng niin ka hria.




Min hmuh hman hlau lutukin ka kalchak sauh sauh thung, thlanmual a kal ve dang ho lo thlen hmain Rinpuii te inbul ka thlenga, ka Scooty dahna lam pan nal nal in ka inkhalh chhuak nghal bawk. Chutih laiin ka Bag a ka Phone ah chu a ri cher cher reng a, amah Lalchhuansanga bak anih ka ring lo, a bialnu hlui bulah kei min ngaihtuah em em siin a awm ang maw? Huhhh...min ngaihthah tlang zawk law law teh se.




Nutei dawrah reilo te ka peng a, Umawitei lo awm chuan "Thil i ei tawh em, kan inah Noodles zuk chhum ila" a lo ti var a, ka hnial lem lo, tunah tak chuan len bo daihna tur ka duh a ni.




Umawitei te inlamah kan inzui thla a, tumah an awm lo bawk a, ka puan bih lai phelh sawk sawkin Sofa ah chuan ka mu thluang zar a, khawlum vang ni hauh silo in ka sa pup pup mai, ka Phone ri ka hriat leh lek phei chuan ka thin a rim hlur tawh.




"A va ninawm sek e" tih pahin Switch off tum a Phone ka phawrh chuan Sir Boon a a lo ni a, "Vawiin ah i tinge i lo kalloh a" a lo tih chuan Assignment Submit ni a ni tih ka hre ve leh chiah a, a zia lo tak tak a ni.




"Ka ṭhiannu pa a boral a" ka tih chuan "E, kha kha i ṭhiannu a nia law, Professor te pawh an lo kal kha" a rawn ti ve luam a, Assignment pawh a tuka Submit mai turin min hrilh a, nidangah chuan a hun taka Submit lo chu a laksak duh lo ṭhin a, chutia min phal sak chu ka lawm viau bawk.




Dah mai ka tum laia a lo ṭawng leh vang chuan ka tawp chawt a "Zanah ka lo leng ang aw" a rawn ti khauh mai, chhan lawk ngaihna pawh ka hre lo.




"I phal em?" a rawn ti nawn leh a, "Aa..phal lo...hran lo" ka ti nawi niai a, nuam chu ka ti lem lo khawp mai.




"Khawi laiah nge in In a awm khah?" a tih leh chuan kan han inhrilh leh rih a, kan inbiak zawh hnu te chuan ka tawt up up ringawt tawh.




"Miriam, zanin chu khawhar in ve ila" Umawitein a tih chuan ka rilru a buai nak a, chutia Sir Boon-a lo len a tum si chuan khawhar in pawh chu ka va kal thei awm lo ve maw le, tinge maw Sir bulah khan khawhar in kal ka ngai tih ka lo sawi mai loh ni. A pawi lo, ka Phone anga khawhar in kal ka ngaih thu chu ka hrilh leh thei tho a lawm ka ti rilru a.




Dar 3 velah Umawitei te in aṭangin kan dawr lamah ka chho leh a, kawngpui langthei chin ka thlen laichuan Lalchhanchhuaha Bike lo tlan tlang fua hi ka han hmu a, ka en zui vung vung laiin hnunglam aṭangin Bike dang a rawn tlan leh a; Henry a a ni. Ka awmna lai a la thlang deuh bawka min hmu ve lem lo, pen chhoh leh mai ka tum laichuan Avisa Bike a rawn tlan a, Rdi nen khan an rawn inphur phei vawk vawk a, ka hmuh ruala ka thinphu rang zaih zaih chu ka hlauhthawn vang a ni lo tih ka chiang hle.




An tlan liam thleng chuan ka en zui a, kawngpui a ka pen chhoh hnu pawh chuan an tlan liamna kawng lam chu ka thlir zui vawng vawng bawk, ka awm chhung chu a hit chhah mup ni berin ka hria, nichin khan ka thinrim hle a mahse, tunah zet chuan thinrim lam chu engmah ka hre lo, ka rilru a na hle tih zawng ka hria.




Ka mittui rawn hnam ringawt chu ka khap let sak sak a, ka thinphu rang lutuk chu tih ziaawm tumin thawk ka la chiam bawk a, awmzia a awm tehchiam lo thung. Nutei dawr lampanin ka pen phei hlawk hlawk a, ka va luh chuan Udawngi a lo awm a, "Pite, khawnge Nutei?" tih pahin ka hawi kual ruai a, ka aw te chu a lawi lek lekin ka hria.




"Wholesale ah a kal lawka, a lo let ṭep ang" tuibur hmuam pahin a ti a, a bulah zawi zeta va ṭhu vein dawhkanah chuan ka bawk ringawt a, tunah tak hian mahni chauha awma au chiam chiam ka chak a ni, haw vang vanga Tower sanga boruak fim han dawn te a ni ka rilru ah awm.




"I nuamsam lo a mi a?" a rawn tih chuan "Nuam e" tih zawngin ka chhang a, ka aw chu a zawi hle a a hre pha lo a niang ka pang a rawn dek a, "I va nguai ve, rilru hahna te i nei a mi?" a rawn ti leh a.




"Pite, ka rilru a na veng veng" ka sawi zawng pawh chuan ka thaw a hah et et tawh, Lalchhuansanga hi ka lo duh hneh hle tih te pawh ka hrechhiang zual a, chu vanga hrehawm ti em em pawh ka ni.




"Enga tinge?" rawn kun hnaiin chiang fahran hian min lo bih a, ka nui lui tak nain ka ti hleithei meuh lo.




"Tunah khan ka bialpain a bialnu hlui Bike a a phur lai ka hmu zo chiah a" ka ti zuai raih a.




"Aw chutiang te, rilru hahna tham a tlin loh chu, bialpa tih mai mai chu buai phah nan hman duh miah loh tur" tuibur hmuam pahin a ti sam mai a, min thanat pui ka rin ve tehlul nen.




"Nang ni la i rilru a na dawn lo a mi, in nih ṭhat lai renga i bialpa in nula dang a phurh chuan nat loh theih a ni dawn a mi?" ka ṭawng danah chuan ka lawm vak lo tih a hriat theih ang chu.




"Tunlai hmeichhe ho hi in rilru hi a te sawt lutuk anih hi, tlangval an nia lawm, in pasal em pawh la ni lo lakah thikthu pek hlur tur a ni hleinem, an duh duh an chhai ang chu, nangmah ah duhtawk nei lo a midang chhai tu chu nang pawn midang hawisan mai la, zawng lai ṭheuh ṭheuh te chu" a ti suam suam a, a thu lak dan chu ka rilrem loh zawng tak a ni ve tlat.




"Kan inngaihzawn chuan kan inhauh tawh tihna a nia, inkawp kan nih angin kan rinawm tur a lawm, ka pasal ni lo mahse, ka bialpa a nihna angin a rinawm turah ka ngai" ka ti ve kher a.




"A...i rilru a te anih chu, rilru zau deuh put tur a ni ngai.." ka ṭhu ngil hluai a, "Ka rilru a te a lawm, rilru zau i tih ang chu put ka duh ve reng reng lo, Pathian pawh khian rilru zau lutuk put a phal lo" tih leh thawh ka rual a, pawn ka thlen hnuah "Nutei bulah ka haw tawh tih lo hrilh mai rawh" tih leh kal ka rual a, ka thinrim bawk a niang ka kal chak angreng khawp mai.




In la thlen chuan Pa Ruatan ei a lo rel peih diam tawh a, vawiin chu a lo haw hma ve tlat mai, "Scooty i keng na nge, i va hah hmel ve?" a lo ti thuai a.




"Nutei lo haw nan dawrah ka lo kalsan a" tih pahin Room lam ka pan a, ka va inthlaka ka ṭhut hahdam hnu pawhin ka la tawt up up in ka hria, "Exer ka la dawn" tih leh chhuah ka rual a, ṭhenawm te kawta Dawngzela lo bawk ka hmuh chuan ka ṭah a ti chhuak ut ut lehnghal.




Ka va kal hnaih laichuan min bauh miah loin chiang deuh hian min lo en a, "Dawngzel, tlangah leng ang" ka ti tham ṭiak a, a che chang lo reng reng.




"Tho rawh le" ka tih takah chuan rang deuhin a rawn tho a, ka kal chu min lo zui ve nghal mai bawk. Tower kawng lamah kan inzui chho a, thlifim thaw heuh heuh leh tlai boruak dai chuan ka thaw sa pup pup pawh chu a ti ziaawm ta deuh chuan ka hria a, ka rilru na erawh chhete mahin a ti kiam pha lo.




"Dawngzel i pu hi ka haw khawp mai, ka ṭhen daih dawn ania" ka thilsawi hrethiam ve niawm takin min en kiau a, ṭhuhniamin ka chul leh rih a, a ui zawk chu ka ṭah khum chiam dawn emaw ni le.




"Tlangah chho ang aw, ngun deuhin kan han inngaihtuah phawt dawn nia" ka tih chuan 'aw le' a tihna aniang a chik ve nghar nghar a, ka hmaah a tlan zui thauh thauh bawk, chutih laia ka Phone lo ri chu Lalchhuansanga Call a ni.




Ka chhang lo, ka Ring ral tir ṭhak a, a rawn Call nawn leh pawhin chhang loin ka Ringtone chu ka ngaithla kar reng ringawt, ka awm a nawm phah lo a, min ti hah zual sawt zawkin ka hria. A bialnu hlui nen pang insi chiala an inphur ka ngaihtuah let leh lek phei chuan ka sa pup pup thei!




Tlang kan thlen chhoh rual chuan Dawngzela chu leiah a bawk tharh a, Uthlenga inkhaina lai ka va en chuan mak deuh maiin hlauhna ka nei tawh miah lo, thinur lai hian mihring hi kan lo huaisen sawt ṭhin anih dawn hi.




Tower ah chuan muang changin ka lawn a, hnuailam ka zuk en chuan Dawngzela pawh a lo la bawk ve reng a, min lo nghak te pawh a ang zawk lek lek, a pu aichuan a laktlak daih zawk anih hi, min ngaihthah ve lo tal a lawm.




Ahma a kan ṭhutna aia sang thlengin ka lawn a, vengthlang lam chu a lang ut mai a, thli a tamin boruak a nuam kher mai, mit chhingin thawk ka la vang vang a, vawitam chutiang chuan ka ti nawn a, mah se, engtin ka danglam chuang pawhin ka hre lo.




Ka awmna reh zet leh boruak vawtin min fan rual chuan ka khua a har vawng vawng a, mal ka inti bawk, chu chuan min ti lungawi lo a ni, rilru in dem tur a zawnga, a hmasa berah ka pa, ani khan helai hmunah hian min dah a, min dah lo nisela Lalchhuansanga vanga rilru natna hi ka hre ngai reng reng lo ang, amah vang vek a ni.




Vawi leh khatah ring lutukin ka au nghek a, min chhawntu reng an awm lo, tuma bengkhawn lohin ka au thawm chu boruakah a thamral a, ka thinlung rum ri pawhin tu hnen mah a thleng hek lo ang, a chhan chu ngaihthah ka ni tlat a, ka lampan tu awm chhun pawh thlifim chauh.




A vawihnih nan ka theihtawka ringin ka au leh chiam a, ka mit chhinga thaw lak ka tum rual chuan min chhawntu an awm tlatin ka hria! Rang lutukin ka hawl kual a, ka thinphu lah chu a rawn rang nghal em em mai bawk.




Ka Phone a rawn ri leh chiah bawk nen hmanhmawh deuhin Phone chu ka phawrh a, a ngai bawk. Ka Jacket-a ah leh mai ka tum lai chuan hnuailam aṭangin min rawn ko lauh mai!




Phawk lutukin ka zuk hawi thla a, Dawngzel tho tharh leh Lalchhuansanga rawn lang zui zat chu ka zuk hmu bawk a, engtin nge hetah ka awm tih a hriat chu le? Ka lo haw dawn lo a ti ve sia!




"Chhingi" a ti leh lauh a, hnuailamah chuan min zawng kual a nih hmel e, Tower lam a lo hawi lo bawk a, chhan pawh ka chhang buai peih lo.




Ka Phone chu a rawn ri leh a, hnuailama Phone ngaithla chunga a tei kual thuak thuak chu ka en reng a, ngaw chhung te chu a bih vel emaw ni. Ka au ri kha a hria anga, a hlauthawng zawk nge?




"Bawiha, lo kal rawh le" tiin Dawngzela chu a ko a, kal mai a tum niin ka hria, kal pah chuan a Phone a hmet mawlh mawlh a, ka Phone ken lai chu a ri ve reng bawk, "Kal vat mai teh" ka lo tih rilruk laimekin ka awmna lam lo hawiin Dawngzela a rawn bauh ta mai a, Lalchhuansanga chu a rawn hawi chho rang khawp mai.




Kawngdawm meuh hian a rawn hawi chho a, en rei duh loin ral lam hawi chuan ka inher ṭha ve nghat a, "Eng nge khatah khan i tih?" a rawn tih ri pawh chu hrereng mahila ka chhang duh lo, ka haider a ni ber ang chu.



"LALROCHHING" hmmmp.



"Chhingi, lo chhuk rawh" vengthlang lam hawi chuan mit ka chhing tlat a, a awm laichuan ka chhuk hauh lo ang.



"Ka lo lawn dawn a nia" a rawn tih chuan ka hawithla vat a, "Rawn lawn hlek suh" ka vin ṭhat a, eng he hu ah a ngai lo nge ni Tower lam chu a rawn pan phei a, rawn lawn chu a tum hmel khawp mai.




"I rawn lawn chuan ka zuangthla ang" thirkham hnuai ber a rawn rap chiah chu a tawp chiang hle!




A rawn hawi chho vut a, "Lo chhuk rawh" hlauhthawn hmel deuh hian a rawn ti a, a sahuat lai ka dek fuh niin ka hria!



A ṭha e, phuba ka ti ve ang chu.



"Vawiinah i bialnu hlui nena in Ride kha ka hmu che u" ka ṭawng a hre pha mang lo a niang a ngawi vung vung a, a Phone a bih leh hnu ah ka ken lai chu a rawn ri ve zat bawk. Engmah sawi loin Call chu ka chhang a, a rawn hawi chho vung vung reng.




"Hei, lo chhuk rawh, i chesual palh anga sin" dam ruih hian a lo ti a, a aw ah chuan a hlauthawng tih ka hre thei.




"Zuangthla turin a lawm ka lawn, chetsual chu ka hlauh i ring a mi?" ka ti sam et a, Tower a pan vut rual chuan "Tuna ka zuan thlak nghal i duh loh chuan rawn lawn suh" ka ti leh sak a, a tilui ngam bik miah lo.




"Mate, khatiangin ti suh" Lalchhuansanga aw danglam hneh lutuk chuan engemaw zawng takin nuam min tih tir a nih chu.



"Tlaia i bialnu hlui nen in Ride kha ka hmu che u" zawi te hian ka ti a, thawk a la hawk ri ka hre zawm zat bawk.




"Chutiang lam a ni lo, kan Ride lo, a haw na lam tura kan kal vangin ka phur ringawt a lawm, kan inkarah engmah a awm tawh lo" a thutak khawp mai. Mahse, ka awih tlat lo.




"Ka ring lo che, vawiin ah pawh i lo thlen lai ka hriat miah loh laiin in lo awmdun reng anih kha, mi kawp ching chuan an sim thei tak tak lo, min lo kawp reng ti raw" ṭap chhuak aw ṭeuhin ka ti a, ka ti lui tak nain a laka ka lawmloh na erawh a ngai reng tho.




"Ka kawp lo che, ka neih chhun i nia lawm, min ring rawh.." a tih laimeka ka rah chhan siamrem turah ka che chu "Enteh...!" a rawn ti hluai a, ka zuk hawithlak chuan "Ka intiam aw, nang lo tumah ka nei dawn lo, zuang thla miah suh, ka hmangaih che ania, i telloin ka awm thei lo ang" a ti sawk sawk a, ka nui chhuak ṭep a ni, min hmangaih lo tih ka chiang ve em a.




"Hetiang tur tih hre lawk ila, lo inngaizawng miah lo ila ṭha tur a nia, nangmah duhtu che apiang i hnar ngai lo tih ka hria, chutiang vanga min kawp ve mai mai chu i nia, ka hrethiam che a lawm, ka tel lo hian i nun a nuam daih zawk ang, kei chu i tan ka hnawksak mai mai a ni..chuvang...." ka sawilai meka a rawn ṭawng vang chuan ka tawp chawt a, engthil nge maw a rawn sawi chu le?




"In nei ang aw, i duh anih phawt chuan palai ka rawn tir nghal ang" a ti a nih chu! Phone dah hla in ka nui hak a, "Ka uang lo ania, ka duh tak tak che a lawm, chuvang chuan lo chhuk rawh" a rawn ti nawn leh a.




"Nang ang pasal rinawm lo neih aichuan Tower aṭanga zuan thlak hi ka duh daih zawk" ka tih chuan a lu a tuai vut mai, thawk a la hluai ri ka hre zui bawk a, "Mate, ka tihpalh, tihsual ka nei anih chuan ka tihpalh, min ngaidam rawh" a rawn ti nghal mawlh mawlh a, ka tifuh ta vak lo in ka hria!




"Khatiang kha ti suh, khawngaihin lo chhuk rawh aw, tun aṭang chuan i rilru ka ti na tawh miah lo ang, ka tiam ang che" a hlauthawng lutuk chuan ka awm a ti nuam meuh tawh lo.




Ka dinna ka siam rem leh rualin "Lawk" a rawn ti leh hluai a, "Ka lo lawn dawn, i ti anih chuan kan pahnihin kan ti dun ang" a rawn ti ta mai, Phone chu dahin a rawn lawn chho hmiah hmiah a, keimah zawk chu min ti mangang lehlawi sia, engtia lo hmachhawn tur nge pawh ka hre tawh lo, intihhluma vau tu nih te chu ka duh tak tak hauh hleinem, chutianga min hriat reng pawh chu ka duh lo, thinrim ve nak alaiin ngah nge maw thil ṭul lo lo ka lo tih le...hahthlak lutuk, kei hi thluak Brain ka lo ngai tak tak anih hi.




"Let rawh ka lo chhuk dawn" tih leh chhuk ka rual a, a chanve vel zet chu a lo lawn hman der tawh.



"Ka kawng i dal chhuk rawh" ka ti leh lang lang a, "Fimkhur rawh" a rawn tih chuan ka chhang tawh lo.



Muangchangin ka chhuk a, Tower bula a lo din reng vang chuan lei zuk thlen chu ka chak fahran lo khawp mai, "I rah tur kha en chiang rawh" a rawn tih phei chuan ka ṭah a chhuak tet tet ringawt mai a ni.




Lei a ka ṭum thla chiah chu min pawt her lawp a, a awmah min kuah bet thlawp bawk. "Ka tihpalh" nghet lutukin min kuah a, ka thaw ṭha thei lo hial zawk.




"Khatiang kha vawi khat mah ti tawh suh, i hria em, ka duhzia che hi hria la chuan hetiang thil atthlak lutuk hi i ti lo ang" ka biangah dawmin ka chal, hmui leh khabe ah te min fawp mawlh mawlh a, engmah pawh ka sawi ve hman lo.




Hawi chhuaka a hmel ka en chuan a awmdan tur chu ka hrethiam ta chiah, Avisa chu a thlan a bawl ṭak ṭak a, a mitmeng a buai hle bawk, rilru na lutuk hmel a pu a, a thinphu rang lutuk te nen lam chuan ka thiltih atthlak zia min hriat nawn tir awn awn a, inthlahrunawm zawk tak a ni.




'Ka tifiam a nih kha' tih chi ni tawh mang si lo, ka ti tak tak anga a ngaih chu ka duh loh zawng tak a ni bawk si, chutianga a ngai a nih vaih chuan min ṭhen a duh hunah pawh ka intihhlum a hlauh vangin min ṭhen ngam hauh nang, vauna hmanga kan inkar chelhtu nih chu ka duh loh tawp thil a ni.




"Inṭhen ang" ka ti ta tawl mai, tih ngaihna dang hre tawh hek lo.






(END OF CHAPTER - 25)

Ads click theuh tur aw



Link:
BBcode:
HTML:
Hide post links
Show post links

Ngaia
Site Admin
Posts: 19502
Joined: April 30th, 2016, 4:07 pm

Unread post by Ngaia » October 24th, 2021, 3:53 pm

CHAPTER - 26





Min en run run a, ka ti hamhaih viau a nih hmel e, chutah tawi te hian min rawn nuih a, min zawt zui dawn emaw ka tih laiin "Haw ang le" tih leh ka dara min rawn kuah a rual a, enga tinge min zawh zui miah loh le, a van han ngaipawimawh awm lo em em ve maw le!




"Hei...Tower aṭang khan zuanthlak ka tum emaw i lo ti tak tak a ni maw, ka tum teuh lo mai, chu aichuan inṭhen pawh ka duh daih zawk" insawifiah tum tak chuan ka ti thla mawlh mawlh a, kan hma a Dawngzela kal ngawt chu enin min kuahthla zel a, kei chu min ngaihsak loh hmel viau a ni.




"I ngaipawimawh lo ve hle mai maw, vawiin aṭang hian kan inṭhen nghal ang, i duh leh ngaihzawng dang chu lungmuang deuhin i nei thei tawh ang" ka ti ta hlak a, a rawn hawi rang ta khawp mai.




"Engthil nge maw i sawi ve niah niah chu le?" khabe dawh vah chung hian min chhuk en a, nichina a hlauthawng hmel kha zuk bo vek hman chuan, a lawmloh hmel hle ringawt tawh!




"Nangpawn inṭhen te chu i duh zawk a ni lawm ni?" ka ti leh sak a, kan inṭhen ngei ngei a ngai, hmeichhe dang vang leh thil dang dang vang chu ni bawk mah se, nichin lawka ka thil tih zawh chiah vang khan inṭhen kan ngai hle in ka hre tawh.




"Awi, a ngai lo" tih zawng chuan min chhang lehta nghal a, hahthlak hian!




"Min duh tak tak chuang lo" ka awki a sang ta viau a, hnai deuhah rum deuhin kan inmelh ran bawk a, a ṭawng hun ka nghah laiin zuk ngawi leh tlat chuan.




"Inṭhen ang, ka peih tawh lo" awki pangngai deuh zawk chuan ka ti leh a, min kuahna lakthlak ka tum laichuan nghet fahran hian min lo kuah a "Zanah chuan lo inpeih hma rawh aw" a ti ta daih a, he pa hi a tih ngaihna tak pawh ka hre tawh lo.




"Ka kal dawn lo, zanah ka chhuak tawh ngai lo" ka tih pawh chu min chhang tawh loin Dawngzela chu a au lung lung a, inṭhen a duh lo tih chu a awm danah chuan ka hrethiam teh meuh mai, a chhan pawh ka rindan ang hi a ni ngei bawk ang. Keima thiam loh zawk tak pawh a ni, ka lo vau khanglang a.




Khiang lianpui awmna kan thlen chuan "Chaw lo zuk eihma rawh Dawngzela hian inthiar a duh anih dawn hi" min kuahna phelhin ka hma ah chuan a kal vut a, chutih laiin Dawngzela chu Quarter hlui lamah a pen thla thauh thauh a, ka thilsawi a ngaipawimawh lo lutuk chuan ka thin a ti rim khawp mai, thupuifun deuha sawifel pui law law ka duh a ni.




"Lalchhuansang" thingkung bul aṭang chuan a rawn lehhawi vut a, "Hmanhmawh la, i insiam rei leh awm si" tum bur chung hian min rawn tur a, ka che chang duh mai bik lo.




"Ka kal dawn lo ka tih kha, tihtur dang ka nei a lawm" ka tih laiin "Nula i nih kha, khawhar in kal lo a awm no mai mai loh tur, khawpui nula ho hi inbuaithlak tlat" tih leh penthlak a rual a, min ti dang lel a lawm maw le!




Kan kawt aṭanga Nutei lo hawi chho ka zuk hmuh tak avang chuan tawi khawmuan leh chi ni tawh hek lo; hmanhmawh deuhin ka pen thla hlawk hlawk a, kawt ka thlen rualin "Chaw ei dawn a ruaiah engnge khilamah i tih a?" a lo ti kha kha a, Lalchhuansanga nena kan lo ding dun kha min rawn hmu vei bawk nen a lawm loh hmel hle a, ka inthlahrung ru angreng.




"Ka Walk lawk a" ka ti ṭha ve mai a, min melh ralh ralh vang chuan en rei duh loin ka luhsan thuai a, chawei ka siam lai pawh chuan min en zui reng niin ka hria.




"Miriam, khawhar inah i kal dawn em?" zanriah eilaiin Pa Ruatan a lo ti khauh a, "In pafa in kaldun rawh aw, midang ruala kal chu zan lamah chuan a ṭha lo ang" Nutein a lo ti ve sap sap a, "Ka kal lo mai ang" ka tih chuan ka lam an lo hawi rual zawt a, "Sir a lo kal dawn a, ina awm ka ngai" ka ti nawn leh a.




"College a in Sir maw?" Nutei a ni.



"Aw.." ka ṭawng ring lo, Nutei chuan zawhna a ngah hmel hle bawk.




"Teh daih chuan, a lo rim dawn che tihna nge ni a?" chu kher chu chhan dan tur ka van khawp mai. "Ka hre bik lo, ka lo leng dawn a tia" ka tih ta ngawt a, min lo rim bak chu lo lan chhan tur dang a nei lo tih lah chu ka hre reng lawi a, chuti lam hawi khera lo leng tur ni lo sela ka duh ru khawp mai. Min zawt zui ta lo a, an nupa chuan Pa Ruata hnathawhna lam chanchin sawiin an ti ti dun luam a, ka chawei a tui loh em vangin tam ka ei lo, ṭamhnem tak tak chauh ka ei awm e.




Thleng ka sengfel laichuan Pa Ruata pawh khawhar in kal turin a inpeih diam tawh a "Anih ka kal mai dawn a sin" min rawn deuh hian a lo ti a, "Kal mai rawh, duh leh naktuk thlan nghah ni ania lawm, thingpui lum te pawn a kal ve leh zawk anga, kan veng a hla bawka zan lam chu midang pawn an hrethiam lutuk ang" Nutein a lo ti thuai thuai a, ka chhang ve tawh lem lo.




"Ṭhenawm tlangval te pawh kal an tum chuan ka ring" ṭhutthlengah ṭhuin a pheikhawk hrui a suih ṭha mawlh mawlh a, a sawi zo awrh ang tih ah Henry leh Lalchhuansanga an rawn lut hlawl a, Apron nena tuikhawihna bula ka lo ding chu phawk lek lek hian min lo en bawk.




"I la hman na nge?" lo ti tu chu Henry-a zawk a ni.



"E, kan chhuk rual dawn nia u" Pa Ruatan a lo ti var a, Lalchhuansanga nen chuan kan in en leh ran tawh a, ka kal loh tur thu kha ka hrilh reng sia!




"Ti vat vat la, kan lo nghak ang che" Henry an a ti leh a, "Ka kal dawn lo" tih zawngin ka chhang a, "Zanlam chu chhuak ve lo mai rawh se, naktuk lamah.." Nutein a tih laimekin "Khawhar in kal te chu chhuak a ni lo" Lalchhuansangan a lo ti hluk a, Nutei pawh a ṭawng tawp hmak mai.




"Kha, i U Ruata ho khan zuk kal tawh u" ṭha deuh chuan a ti leh a, ka va hawi leh chuan Lalchhuansanga ber bur chuan rum deuh hian min lo melh a, engmah phei chu a sawi lo.




"Ka sam kan hnawih leh lawk ange" tiin Pa Ruata chu pindan lamah a pen lut hlawk hlawk a, chutih laiin an ni pahnih chu dawhkan bulah dingin zawi te te hian an phun ri bul bul a, "In in hau a mi a?" tiin Henry chuan a zawt in ka hria.




"Lo zuk kal hmasa rawh, Wallet hi keng la" tih pahin Lalchhuansanga chuan a Wallet a pe zauh a, an lo hawi hmain ka hawi let leh thuai bawk.




Henry-a chhuah hnu chuan Lalchhuansanga zawk chu Nutei bula a va ṭhu phei a, "Tunlai hi vengthlang lamah i tap chawt a mi, i va vang ve?" Nutein a tih vang chuan ka va hawi let leh a, in hmatawnin an ṭhu tih ka va hmuh rual chuan ka lo zam ru hle tawh.




"Ka zin a lawm, tukinah ka lo thleng chiah" pakhat zawk chuan a ti ṭha ve mai a, "E, i ṭhianpa kha i awmpui tak e, eng nge a an a?" Nutein a ti leh zel a.




"A ṭha ve zel e, an lo haw ve thei ṭep ang" Lalchhuansanga chu a inthlahrung ve nge ni a ṭawng zawi sawt hle a, an in be fuh lo ang tih mawlh ka lo hlau bawk nen ka lo ṭang ru ṭeuh reng.




"Nun fimkhur a pawimawh zia chu kha kha a nia, rawlthar chauh in la nih lai aṭang hian in nun uluk rawh u, in damchhunga in inchhir na tur thil te hi in ti hlauh ange, vawikhat tih sual zeuh hian nun pum a nghawng thei tih hi hria ula, hlimhlawp leh eng ilo vela tal ai chuan in zirlai ah te, infiamna lamah te hian in rilru pe zawk ula, nang phei chu Badminton te pawh i thiam em kha, tunlai hi i khel ngai ta miah loin ka hria, Henry-a Exer la hi ka hmu ziah a, nang chu ka hmu tawh ngai lo reng reng che" Nutei chuan a ti barh barh a.




"Naktuk aṭangin Exer ka la dawn" pakhat zawk chuan a ti tawi tuk a, ka lo ner nang ringawt.




"Exer lak te chu a ṭha a lawm, ruihtheih thil lam khawih tawh lo la, Sport leh ruihhlo hi chu kal kawp thei a ni miah lo a nia, Sportsman tam tak tlakchhiatna chu ruihhlo a nia, ruihhlo i in bawih tir chuan engtikah mah i hlawhtling ngai lo ang" Nutei chu a ṭawng na ang tih ka hlau angreng.




"Nang chu Exer lak pawh i ngai ve lo anih kha, i ban pawh a sek ṭha sa hle mai a" Lalchhuansangan a tih chuan ka hawilet leh rang khawp mai, Nutei chuan a ban bul a bih vut vut a, "A awihawm loh emai a" a ti niah niah a, "Engtin nge khatiang khan i ban i tih sek theih bik a, ka ban aipawn a lian daih a lawm" Lalchhuansanga chuan a la ti tak deuh deuh a, Nutei chuan a melh rum khai khai tawh.




Pa Ruata lo chhuah phei rual chiah chuan kawngkhar kik thawm a lo ri a, Nutein a lo chhawn thuai bawk. ka thleng sil zo chu ka kut ka hru thuak thuak a, Apron ka hlih mawlh mawlh laiin Sir Boon-a a rawn lang ta hlawl a "Miriami te in a ni em?" nuisanga a rawn tih chuan chhan mai nachang pawh ka lo hre lo.




"Aw ni e, lo leng rawh" Nutei zawkin a lo ti thuai a, ban phena ding ka nih vangin min rawn hmu mai bik lo anih hmel e.




"I lo zawng buai em, engtin nge i lo hriat chat theih a?" ding chhuak vatin ka lo ti ve sawk sawk a, "Buai lo e, Forest Quarter kan luah i ti sia, zawn vak pawh a ngai lo" zangkhai vaha tiin Sitting room lam chu a lo pan a, ka va lehhawi chiah chu Lalchhuansanga lo ding hluai nen chuan kan mit a intawng ve chiah a, a hmel landan chu ka chhiar thiam hauh lo!




Nuihza lek lek hmel a pu nain a mitmeng chuan min vau ni ber hian ka hria, "Kal dawn ila" Pa Ruatan a lo ti ve mek bawk a, choka lampana a rawn pen phei chuan min melh no lem lo hle ringawt tawh a, engthil emaw sawi tur nei hmel a pu bawk.




Ka bul a lo thlen rual chuan a ṭhen deuh suk a, engmah phei chu a sawi lo, kawngkhar lampanin a pen phei vut a, a thinur viau anih loh chuan a hmanhmawh viau a ni ngei ang.




An tlan chhuak thawm chu ka hre pha reng a, ka tan pawh a nuam bik vak lo, kawng lehlam zawng tak chuan a ṭha zawk maithei, vawiin lam thil thleng vang khan inṭhen chu kan tih makmawh ah ka ngai tawh a, rualrem lo deuha nghawngkawl bat an sawi ang mai hi kan ni tawh tlat a ni.




Nutei a ṭawng duhin a hawihhawm ṭhin bawk a Sir Boon-a pawh a be lumlam peih viau mai, kei erawh min biak changa ka chhang ve tih loh ah chuan ka ṭawng tuitam meuh lo. Eng engemaw sawiin an titi dun barh barh a, zirlai ka thiam theih thu te leh min beisei san zia te Sir Boon-a chuan a sawi sap sap a, Nutei lawm zawng tak a ni bawk.




"Naktuk Assignment thehluh ngai i nei sia buaipui te i ngai ang ka haw tawh mai a nge" a tih takah chuan mawi hawiha 'A la hma a lawm' ka han ti ve sasawi a, sana chuan dar 9 a lo kawk leh der tawh a, khawhar in kal pawh an ṭin tawh velin ka ring a ni.




"Sir Zonuna a kal dawn lo a, First Period ka lo la ang, ti hma la meng rei lutuk lo zawk rawh" nuisang hian a ti leh a, "Chu ti tur maw, anih zan dangah lo leng leh rawh aw" tiin nelawm takin Nutein a lo thlah ve bawk a, a haw tur chu kawtkai thlengin ka zui chhuak ve nghe nghe.




Bike-a a ṭhutrem zet tawh hnuah tlan chhuak mai loin a ding leh ren rawn a, "Nichina mipa lo awm ve kha kan College a zirlai a ni tiraw?" a lo ti khauh a. "Aw, Senior student a nih kha" ka tih chuan a bu nghat nghat a.




"I bialpa a ni em?" a tih leh chuan lu ka thing ringawt a, thaw huai hmel a pu tlata ka hriat vang chuan ka sawi sual deuh tlatin ka hre leh hnuhnawh a, mah se, inṭhen thu ka sawi tawh tho a tiin ka inthiam chawp a, ngaihtuahna dang daih a lo neih phei chu ka hlau lek lek mai.




"Anih ka kal ang e aw, naktukah kan inhmu dawn nia, ṭha deuh khan i Assignment lo ti la, Mark ṭha deuh ka lo pe dawn che nia" nuisanga a tih leh hnuah a tlan zui a, a liam tak hnu chuan ka pik churh mai hian ka hria. College ka zawm tirh aṭang rengin Sir Boon-a hian min duhsak thei hle a, Exam kan neih lai te hian zirtur pawimawh min hrilh ruk loh leh Exam hall ah Mark tesep pu chi min hrilh zauh zauh te a chinga, Siambawihi phei hi chuan min chhaih leh zauh zauh ṭhin.




Inchhunga ka luh leh hnu chuan Nutein min lo zawt nghal panga "In Sir chuan a ngaizawng che a nih dawn kha..?" a lo ti deuh ha a, "Ngaizawng lo ang, zirlai a tlawh kual ve a niang" ka ti tak nain a awih vak loh hmel khawp mai.




"A hmel ṭha phian lehnghal a, biak lah chu a nuam em em a, ka duhzawng tak a ni, Chhuansanga te ngawt zawng aichuan a tihtlak deuh ang chu" a tih leh chuan thawk ka la hluai a, nichin pawh khan a be ṭha ka ti reng a ni.




"Vai anih kha, a nu chu mizo a nia.." ka ti hap a, min en rang kher mai. "Vai a ang ka ti deuh reng a, a va zia lo e" a ti niah niah a, ka sawi zui tawh lem lo.



"Chhuansanga aichuan ṭha ka la ti tho mai" a tih leh pawh chuan ka chhang tawh lo.




Room-ah ka luhsan a, rei vak lo chu Nunui nen kan inbia a, Avisa nena kan chungchangah a thurawn ka la a ni ber ang chu, "Inṭhen a ngai anih chu, mahse, ṭhen hlen lo la, a rilru dik tak hriat nana ṭhen phawt a ṭha" a lo ti mauh mai a, ṭhen hlen tum lo a inṭhen rawt chu thil tih chi a ni dawn em maw ni?




"A rilru te chu a lang vek tawh lo a mi, engmah hi a la thutak ve bawk si lo a, a rilru a zau mah mah a lawm, ka insiamrem ve thei lo a ni ber, ka rilru a zau ve si lo a" ka tih leh ṭhin a, Nunui nen kan ngaihdan a in ang miah lo mai.




"A duh che tih chu keiman ka chiang a lawm, a tihlan kawngah duhthu a sam lo mai a nih kha, i sawidanah a hun paltlang tawh thil ṭhenkhat vangin a Sensitive ve deuh niin ka hria, intihhluma i lo vau kher kha nakin zelah a pawi theih takin ṭhen rih la ka tia, in inṭhen vanga mahni nunna la duh mai tur anga a ngaih che kha a fello ang ka tih vang zawk a nia, in pahnih inkar siamrem na ang chauhin ngai rawh" a ti leh sap sap a, ngaihdan pawh ka nei thiam tawh meuh lo.




"Nunu, nang chu ni la, a nungchang vang hian i ṭhen tawh zawk in ka ring, hmeichhe dang Care a ngah lutuk a, nakin lawkah chhe deuhin kan la inṭhen leh thoin a nia ka rin ni" ka ti leh hap a.




"Ka hrethiam a lawm, chu vang pawh chuan ṭhen hrim hrim chu a ngai, a rilru a siam fel theih nan zawk i ṭhen dawn tihna a nih chu, ngaihzawng dang a neih vat chuan i ṭhen hlen anga, chuti nilo a rawn inlamlet chuan i lo pawm leh dawn nia, intihhlum i tum lo a, a tello pawhin i awm thei tih kha a hriat a ngai a lawm" a ti leh luam a, kan inbiak zawh hnu chuan ka ngaihtuah buai nasa khawp mai, Nunui thil sawi chu a fuh chiah a ngem tih ka hre lo, ngaihdan pawh ka nei thiam lo.




Assignment ka tih zawh chuan dar 10 a pel tawh a, ka chau ve deuh bawk nen mut nghal mai tumin ka intintuah zui a, Pa Ruata lo haw chuan Sitting room-ah Tv a la en a, Nutei a muhil tawh thung.




Khuma ka mut hnu rei vak lo ah Bike tlan thawm ka hria a, a ri aṭangin Henry-a Bike niin ka hria. Mahse, rei lo teah Bike dang thawm ka hre leh a, pakhat mai a ni lo, ṭhenawm te kawta an din rualin an ṭawng ri lawng lawng a, an ruih hmel hlawm viau bawk.




"Ka bekah min rawn hnek ve ringawt a, a hrawkah ka reh sak hrep kha, Sihde-an min rawn ṭhelh lo sela chuan ka rek hlum hman maithei a ni" ti lang lang tu chu Betea a ni, a aw aṭang ringawt pawhin a rui hle tih a hriat theih.




"Hmeichhia vanga insual leh ṭhin hi chu a ninawm khawp mai" Avisa a ni ve thung, tu te nen nge maw an lo inbakkhaih leh tak chu?




"Nuihiaua kha khawiah nge a lo kal hman ziah a, lo inthiarfihlim hman ziah mai" Lalchhanchhuaha bawk chuan a ti leh a. "Tel ve lo turin ka ti a nih kha, amah te chuan lo kal ve a tum reng a lawm" Avisa bawk chuan a ti leh a, Henry-a chu a awm ve reng lo em maw ni?




"I ṭan ziah lehnghal a, kan ṭhian zinga tel ve reng si engmah a ti ve ngai lo reng reng mai" Lalchhanchhuaha chu Henry-a lakah a lawm vak lo niin ka hria.




"Zanin a i zu lakna kha Nuihiaua pawisa aw, a kuttum niloin pawisa a thawh ṭhin, thil dangah phut suh" Avisan a tih leh takah chuan tlem in an thawm chu a zawi ta deuh.




Inchhungah an lut ta vek emaw ka tih hnuah "Khawimaw, De ve ve zu lawk ang u" Saidingpuian a tih ri ka hre zui a, "Khawiah nge kal i tum?" Lalchhanchhuahan a tih ri ka hre nghal thuai bawk.




"Chhingi a la men ka ring, ka va be lawk teh ang" Avisan a tih takah chuan ka mu ngil nghal at a, a pen thawm ka ngaichang nghal ran bawk a, min lo kaihthawh a tum anih ngat chuan ka hre duh lo hmak ang ka ti rilru a.




"Ti nge zanin a lo kal loh a, in intithiam lo a mi a?" Saidingpuia a ni.




"Min lo ṭhen alawm maw le" Avisa chuan a chhang tawi tek tawk khawp mai.




"Ehee...ve teh khiah chuan, i hriat loh hlanin a ṭhen che a law?" Lalchhanchhuaha chu a nui kur kur a, ka lo ner nang nang ringawt tawh.




"Duh hun huna ṭhen theih ka ni reng reng lo" Avisa chuan a ti deuh hmuk a, lawm lo ve tak tak te pawh a ang, chutih rual chuan ka Room lampana lo pen phei thawm ka hre zui a, ka puansin chuan ka inkhuh ṭha rang khawp mai.




"Bengchheng suh aw, a beng a var ṭha teh mai a nia" Lalchhuansanga pui chuan a ti leh reuh a, "Au rawh, kan lo zilhhau ange" ti tu chu Lalchhanchhuaha a ni, mai mai hlawm hian a.




Ka lukham awmna zawn bang chu a rawn ti ri karh karh a, tu emaw zawk chu ka tukverh zawnah a ding mek bawk. "Chhingchhengte, i mu tawh em?" a rawn ti thum bul bul a, bang zawna ding zawk chu Lalchhuansanga a nih hmel e.




"Chhingbawih" a rawn tih leh a, ka chhang lo kher ang chu.



"Tinge, Pitar hming te an phuahsak le" Lalchhanchhuahan a tih nui nui laichuan ka ner nasa mai, Avisan a khap zauh a, "Lo ṭawng suh" a tih sur sur ri chu ka hre chiang viau a ni.




"I la meng tih ka hrereng ania, lo hawng lawk teh" che loin ka mu meng kar a, ring deuh zawka bang a rawn kik leh chuan rum fahranin bang chu ka melh thawr a, zingah ka phur thut anih chuan ka be chauh anga ka ṭhen zui bawk ang, tunah erawh ka be chak hlawl lo, amah pawh chu a rui lehnghal emaw ni!




"Kai tho zo dawn nange, pa lo ve, kan insawi ang he hu kan va nih loh hmel ve" Chhanbetea chuan a lo ti leh hmanhmawh a, "Lo va kal sawn teh" pakhat zawk chuan a lo ti hluk thung.




"Enge kan duh, inṭhen loh kan duh" Chhanchhuaha chu a ṭawng ring ta viau mai, "Bang kha hnek bur la, a inperh tho zawk mai ang" a ṭawng ri lawng lawng tawh a, Nutei te Room aṭang pawhin a hriat phak vek tawhin ka ring.




"Nangmah zawk chu ka hnek bur dawn che mawni le, kalsawn vat rawh" Avisa chuan a ti hlur mai.




"Ṭhianpa, hmeichhia in a ṭhen che a nia aw, inla Champ viau suh, tunah tak hi chuan i nep hle a nia aw" ka thinrim bawk sia ka nuih a za lek lek bawk si, thawm ka chhuah loh nan ka insangmar vek tawh.




"Ka room ah Number One ka dah, va la la i nei dawn nia" Avisan a tih takah chuan Chhanchhuaha chu a kalsawn niin ka hria.




Bang phena ding chu a che sawn hrut a, chutih rualin ka lukham bula ka Phone chu a rawn ti ve zat bawk a, a tih dan chu ka ngei tak tak a ni, ka luhlul chhuahin ka chhang duh lo lui ngar ngar a, a beidawng ve tawh ang chu tih laimekin tukverh darthlalang chu ring deuh tak hian a rawn kik a, "Lalrochhing, lo dak teh" a lo ti leh a, a vin lo nain a dawhtheihna a pan ṭan viau tawh niin ka hria, ka ngaipawhmawh therte lo.




"A la hawnsak duh na che nge aaaa...?" Hla deuh aṭangin Lalchhanchhuahan a rawn ti leh lawng lawng a, ka bang pawn lama mi thawk la hawk ri ka hre bawk a, hawn sak chi pawh an ni lo, Nutein min man chhuak dawn chiang lutuk, tunah te hian a harh ve reng tawh zawk in a nia ka rin ni.




"Hei, induh nu...naktukah i chak lo ngawt ang" a rawn ti thawr nia, ve leh ringawt chuan a.



"Chhingi.." ka Room lam rawn pan pahin Betean a rawn ti phei lawng lawng mai!



"Lalchhuansanga hi a ṭap ṭep tawh a nia lo hawn sak teh" mai mai chuan, an han au ring em em lehnghal a.




"Chhuihthangvala hi i sakhmelmawi kha rawn hmuhtir zuai rawh" Saidingpuia a ni ve thung, an nui ri kur kur hlawm a, ti chi loh lutuk.




"Chhuihthangvala Ar ang a vaih hi...hnem thiam awm ang maw, damlaiiiii...." Room chaklam tukverh inhawng ri khap vang chuan aw chu a zuih lawi rat mai! Rang lutukin ka ṭhu chhuak a, chutih rualin "In va bengchheng ve, kha laiah khan eng nge in tih?" Nutein a rawn ti vin ta ṭhak a, an tlan phei khut khut thawm ka hre zui zat bawk.




"Kan tihpalh aw, U Mahriat" hla deuh aṭangin Lalchhuansangan a rawn ti leh hram a, ka lo ip ru ṭeuh lehnghal, Nutei chu a va lawm lo leh dawn tak.




"Pi Hitler..." Chhanchhuahah a rawn ti leh hram a, Nutei phun hlak hlak ri chu ka ngaithla kar a, "Mawl hlawm lutuk" a ti niin ka hria, thawm a reh tak hnu chuan Music play ri ring vak lo in a rawn awm a, zan reh lai anih vangin an hla Play chu ka hre chiang viau a ni, he mi te ṭhian ho hian hla dang Play tur an hre ngang lo anih dawn hi "Naupang si, mawl si, pawisa nei si lo" an mahni nihna bak va ni suh.




Dar thum vel bawrah ruah a sur nghek mai a, vawtin min ṭham harh vangin ka tho chhuak a, zung tura Bathroom a ka va kal laichuan Pa Ruata pawh a lo tho chhuak ve a, tuidawn a siamṭha dawn a nih hmel e, "Kan Room-ah puan sin thuah tur a tam kha, i duh chuan va la rawh" a lo tih vang chuan ka va la ve mai bawk a, ka mut leh hnu pawh chuan rei deuh chu ka muhil lawk lo, thil ka ngaihtuah kual a, Lalchhuansanga bak chuan ngaihtuahna a la peng meuh lo chu a ni.




Zing ka tho chu mawng pawh ka hun hman hmain min zilh malh malh a, Pa Ruata nen kan nui tawi tak tak ringawt a, Nutei chu a lawm lo khawp mai "Mi changkang lo zia lutuk, an duh leh ṭha te tein rawn leng ve ang hmiang, rui chunga zan reia in auh mai mai tur a ni ngai lo, zan dangah an rawn ti leh anih pawhin lo hawn sak reng reng suh ang che" a ti hlak hlak a, hmai a uang lo khawp mai.




Khawnvartui la turin Nutei leh Pa Ruata an inphur thla a, eirawng bawl vak kan ngai lo bawk nen Veranda chhuat huh chu ka nawt fai hlarh hlarh a, ruah chu a sur nasa bawk a kawtkai pawh a chiau hneh viau a ni.




Faifuk ri ka hriat ruala ṭhenawm te in lam ka va hawi chuan Lalchhuansanga an kailawn aṭanga a lo pen thla chu ka va hmu thuai a, Exer la tur niawm takin a in ṭham at a, Iptepui akin chempui a rawn lek chhuak larh larh bawk!




Rum zetin min rawn melh hmasa phawt a, chutah a chempui hum ṭha sauh sauhin min rawn pan ta mai! Phawk zetin ka lo en a, a tih dan chu min sah chawrh duh mai tur hmel a pu!




Inchhunga luh nghal mai tuma ka inher rualin "Chemte hriam deuh in neih chuan lo keng la, min lo zui rawh" a lo tih vang chuan ka ding leh dat a, ka lehhawi leh laichuan kan inhnuai a mautlawn chu a lo la chhuak mek a, min ti hawihai let der a ni!



"Eng nge i tih a?"



"Eng nge ka tih loh anga" a ti deuh hmuk a, a la tum bur zui.



"Mau kha Nutein laksawn a phal lo a nia" ka tih laiin ka ke lam chu chik fahranin a rawn en a, "Kekawr va ha phawt la, min lo zui vat rawh" a ti leh hluk a, a tho â deuh emaw ni le?




"Khawih ah maw?" ka lo ti he haw a, min melh rum em em ringawt.




"Ka thawh hma hian ka thinchhe vek zel a nia, thil tui deuh i ei duh chuan min lo zui mai rawh" a ti leh nghat a, ringawt zel chuan, tunah hian ka thinrim mek a, inṭhen hial ka duh tih te pawh kha a hre lo em maw ni.




Mau hmawr a suih ṭhat mawlh mawlh laichuan ka chhuat hnawhna pho turin tlangban lam chu ka pan a, min lo zui ve tih ka hriat chuan ka lehhawi rang khawp mai, "I va muang ve" a ti leh hluai a, he pa hian eng nge maw a hriat ni?




"Khawiah maw, sawi chiang ta che" ka ti vin ta hlar a, a hmui a pet sawi duh lek thung.




"Khawiah mah ka kal hman lo, tih tur ka ngah lutuk" kal pelh mai ka tum chu ka banah a rawn vuan chawt a, "Nizana lo kal Vaipa khan a ngaizawng che a ni maw?" a ti ta khauh a, a meng dur khup bawk nen 'aw' ti ngat ila chuan min hnek thlu tawp duhin ka ring.




"Sir Boon-a anih kha" ka ti hlak a.



"Duh leh Baloon-a pawh ni se, lo be ṭha hawrh reng reng suh, i lerh dawn riau mai" a ti khar khar a, zawk zawmah chuan a!




"Nang anga lerh ka ni lo" ka ti vin ta ṭhak a, 'Lerh' min ti ve khanglang chu ka run tawk a tling viau a ni.



"Ka ring che a lawm, ring lo che ila ka insum miah nang" a ti leh lawi a, ka ka hau ringawt tawh!




"I tho â deuh a maw ni le?" lawm lo zeta ka melh laiin a lo nui leh vur vur tawh. "Nizanah khan lo hawn ve mai tur che a nia, i Nutei bulah min chawk Zero vek a lawm" a ti leh mauh mai! Huhh...ham ham hian!




"Min thlah teh, ka lut dawn" a kut pawhthlak ka tum chu a hum nghet sauh a, "I la thinrim a law, i va beirei em em ve!" phawk deuh hian a ti leh hluai a, awi....he pa hian min ti dam lo zo takngial dawnin ka hria.




"Ka titau mai mai hleinem Lalchhuansanga ka ṭhen tawh che a lawm maw le" ka ṭawng chu a ring lam mah a ni.




"Awi, a ngai lo" a rawn ti, huhh....he pa hian thutak hlatak engmah a pai lo anih hi.




"Ka ṭhen che, i ṭawmpuina ka mamawh lo a; ka ṭhen fel hmak...." ka sawilai mek chuan "A buaithlak, khitah tihtur kan nei" tih leh min pawh a rual a, Forest tlang lampana min pawt chho dawr dawr chu ṭang ve sateh mahila awmzia a awm lo kher mai.




"Min thlah rawh" tal bat bat chungin ka ti chul a, min thlah hlawk a mahse, a aia nghetin ka darah min rawn kuah a, a pen chak sauh sauh bawk a, min ti hlauthawng chhiava a ni!




Mau tlawn sei em em leh chempui nen khawi a min hruai nge a tum, intihhluma ka vau hnu lawkah ka ṭhen zuia, phuba lak a lo tum te hi a ni a ngem, nichina ka chawn a rawn en dan te kha, min pawngsuala min thah a tum em mawni zawk le! Ka ngaihtuah kual nasa hman lutuka ka thinphu te chu a rang zo vek tawh.




"Khawiah nge min hruai dawn a?" ka ti zawi sep a, ka aw chu a lawi rat bawk.




"Ruam thim pukah" a ti nghut a, Tower lam ni lo zawk tlang letliam lampanin kan kal mek bawk nen ka awm a nuam tawh lo tak zet, ka bialpa mah nise he mihring pa hi chu a chin hi ka hre hlawl si lo a, ka ṭih riau a lawm.



"Mau kha enga tan nge i tih a?" ka ti leh hap a.



"Neihfaka ril bawmah" a ti.


"Ril bawm a..!?" phawk zeta ka en laiin min lo nuih suk a, ka awmbawr a rawn en zui zat nen ka kawr awm kau deuh chu ka hup chawt chawt a, min en dan chu a hur hmel ka ti.




"Inthlak rawh ka ti ka ti che a, Sexy viau mahla vangvat chaw i ni mai" a ti hluk hluk a, awm nawmloh sa nak a lai chuan!




Kan kal thui tawlh tawlh a, kan kalna hmun chu a chheng chhe tawlh tawlhin ka hria, Thomitchhaih leh Thosi an tam em em mai lehnghal a, kawrfual pan deuh chauh ka hak vangin ka thak sep sep tawh.




Rei vak loah thing lian pui pui awmna kan thleng a, chhuk zawngin kawng a lo awmthla zui mai, a nal bawk si a vawthlep chauh ka bun bawk nen ka kal sawt hleithei meuh lo. "Ka pua ang che" a tih lahin ka duh lo ve tumhrang a, inṭhen tawh hnua inpuak tir leh te chu a.




Kawr niawm tak ruam thim ruih kan thlen chuan a mau ken chu leiah sawh phun chawrh a, thingkung lampang a thlek ngial hnuah leiah chuan engthil emaw ni zawng hian a kun dun dun a, a ngaihna ka hre lo khawp mai, kan awmna laiah chuan hling ang deuh deuh hi a ther fur bawk si a, boruak hnawng churh leh Thosi te nen ka ṭah an ti chhuak hlur ringawt mai a ni.




"Khalaia lo ding hmelṭha vuk ringawt lo khan chhar ve rawh" a rawn tih takah chuan a lam chu ka hawi vat a, engthil emaw hi a chhar mawlh mawlh a, a ipteah chuan a khung zel bawk a, a thil chhar ka va en chian nak chuan Thingsemim a lo nia, mah se, ka Thingsemim hmuh tawh ah chuan ala lian ber awm e.




"Sehawr a nih hi" a lo ti vat a, ka bul vel ka hawi kual nak chuan Thingsemin ruah a sur bik emaw tih mai turin kan velah chuan a lo tam a, a ṭhen phei chu ke zungpui tiat dawn dawn a lian an ni!




"October thla tawp lamah chhak lama Thingsemim ho khi chu an keh ve chauh ang, hei hi ahma bik a, tlai lamah chuan naupang hoin an chhar zawh khalh vek che ka hlauh vangin zingah ka hruai che anih hi" a ti mawlh mawlh a, a thil sawi pawh chu ka ngaihsak vak tawh lo, chhar tur ka hmu hnem lutuka chu chuan ka ngaihtuahna a luah fe tawh zawk.




"Fimkhur rawh aw, a hling kha a hriam a nia" a tih leh chuan amah pawh en hlei loin "Ka fimkhur lo ang" ka ti zauh a, a rawn ding hluai mai.




"Ka bialnu chu ni lo la chuan aw.." a ti vang vang a, "Engtin nge min tih anga?" pawr zeta ka tih laiin "Engtin tin emaw" a kiai leh suk a, a thophang hmel chu a hmelṭha takzet!




"A tir te khan min hrilh ṭha ve mai ta che, Thingsemim chhar ang chuti la chuan ṭha deuhin ka zui mai tur che ania" ka ti kha kha a, chutah ka lam rawn hawiin "Engmah ka hrilh lawk dawn lo che, min Risk rawh, keimah ah chuan Risk lak zel a ngai ang, i tihfuh loh leh i chhe duai anga, i tifuh leh chuti hlauh" a ti nghat nghat a, vel tak hian a.




"I in la Value deuh a mi a" ka ti let hlak a, a nui pat pat a, tukin chu a nui mawi ṭhin khawp mai.




"Chung te chu min ngaihdan a zir a niang chu, min ngaihhlut viau leh ka hlu viau anga, min ngaihnep viau leh ka nep viau a nga" a nui zui kur kur a, "Risk rawh tih te chu a, ka Risk ngam teuh lo che" ka sawilai chu min lo pawt chatin "Min Risk rawh" thutak zet hian a rawn ti a, ka ṭhen tawh sia tinge maw hetiang thu te ka sawipui leh daih chu a, a zia lo dawn tlat, Nunui nena kan Plan a Fail vek mai dawn a sin.




"Ka uang lo ania inṭhen kha ka duh tak tak a lawm, kan inmil lo emai" awki pangngai thei ang ber leh thutak deuh chuan ka ti leh a, min chhang miah lo.




"Duh lo mahla, i duh loh vang ngawtin kan inkawp reng thei lo a, kan hlim dun tak tak chuang lo ang" min la chhang ta lo fo.



"Lalchhuansang.." ka va hawi chuan min hnung chhawn zawnga dingin thingkung lam chu a thlir chho a, ka va han ngei thei tak.



"Pangparhnim, inṭhen ka duh ka tih chu i hria em?" a rawn lehhawi ve ta hram e.



" Mi Thingsemim ei lai laia inṭhen i lo sawi sek le" a ti duh lek chauh!




A Thingsemim ken laichuan ka chal darah tak a rawn vawm a, a na em em lehnghal a, Thingsemim hling chu la lawkin vawm ka tuma a pen sawn rang khawp mai, phun hluk hluk chungin ka Thingsemim chhar chu ka ei ve chhin a, a hma a ka eitawh ṭhin aiin a thlumin ka hria, a lian bawk si a hlawk thlak tak a ni.




Lalchhuansanga ka va en leh chuan min hnung chhawn bawkin a lo ding leh tawh a, a Phone a khawih mual mual a, inṭhen chungchang kha mumalin kan la sawi ta lo cheu chu a nia.




"Pangparhnim ka ṭhen..." ka sawilaimeka ka chawn rawn vawt thler vang chuan ka ṭawng tawp chawt a, hnuailam ka en nak chuan ka chawnah Vangvat seiṭial lian lutuk tak hi a lo khap chho diau diau chu niin!




"Awi ka pa..!" tih leh Avisa lama tlan ka rual a, a lo lehhawi tur chiah chu a hnungah ka va beithlawp a, ka bawp pahnih chuan a kawngah nghet lutukin ka kherhbet zui hmiah bawk a, a men hian ka meng ngam tawh lo hrim hrim!



Ka ke veilam zawk chu a hmuh theih turin ka lek kang vawh a, Vangvat lo khap chho chuan ka taksa pum a ti za chhuak vek a ni ber e!




Ka mawngah rawn dawma min rawn thlek laichuan "Engemaw ti vat ta che" ka lo ti vin hlur a, "Eng maw?" a lo la ti zui, ka ṭap lo chauh tawh.



"Ka ke a kha...eng lo..ih..." ka sawi mai dawna a hming ka theihnghilh leh ta nghal a, "Zombie" ka ti vak ringawt.



"Huiha...Vangvat hi maw...min it thut emaw ti a ka lo phur ve hman tawh nen" a lo tih chuan chhan pawh ka chhang buai peih tawh lo.






(END OF CHAPTER - 26)

(Comment la, a hnuaia Ads khu lo click bawk rawh aw)

Link:
BBcode:
HTML:
Hide post links
Show post links

Ngaia
Site Admin
Posts: 19502
Joined: April 30th, 2016, 4:07 pm

Unread post by Ngaia » October 24th, 2021, 3:54 pm

CHAPTER - 27




"Vangvat hlauh chuan kekawr hak tur a nia, ka sawi ve reng a sin maw le, kekawr ha la i ngalrekah hruiin phuar chip chawih la chutiang chu tih dan ṭha ber a nia, i kap thleng thlengin a rawn lawn ang tih a hlauhawm a nih hi" a ti bul bul a, la ta mai lo chuan ka khup bawrah a kut a lo dawh a, keilah chu thawk pawh la ṭha ngam lo khawpin ka lo ip tawh.




Meng de re chungin ka zuk bih dak dak a, a kuta vah tir a tum emaw ni? "La vat ta che" ka lo ti hlur a, "Khawnvartui lo intat la ṭha tur, thisen rim hi an hre thei a nia, an taksa pum hi hnar hlang anih hi, an rim hriatna a chak khawp mai" a ti lehzel a, ka thinin a tuar ta meuh lo, mi mah hlau thlabara awm laia chutiang thufing lo sawi lo sawi ringawt mai.



A kokiah chuan ka theihtawpa nain kan seh sak mai a, ka mawnga a rawn dawm leh rualin vangvat chuan ka khup a lo thleng fel der tawh, "Kha a lo lawn zel a nia" ka ti leh chul a.



"Min lo ti buai reng mah ta che, i taksa nem lai a rawn pan a lawm maw le" a ti hluk a, thinrim phei chuan a sawi lo.



"La vat rawh" ka ṭap tep tawh tak tak, ka hmulthi te chu an ding sung sungin ka hria.




"En rawh le" a rawn tih chuan ka hawi chhuak vata, rapthlak hian! Vangvat chu a lo lek kang vaw vaw a, a tal nasa bawk si, chutih laiin ka hmuh chianloh hlau niawm fahranin ka lamah a rawn lek hnaia, a hnungah chuan hmai ka phum rawk rawk a ni ber.




"Kan tihlum ange, chhuk rawh le" a tih hnu pawh chuan ka chhuk ngam mai lo, a kawngah chuan ka la kherhbet tlat a, a koki ah ka inhamtang ṭai bawk. Ka lama rawn thlek pahin "I chhuk dawn nange?" a rawn ti leh a.




"Dawn e" tih paha chhuk mai ka tum chu "Ngawi lawk, khuta pawh khu a awm" a tih leh vang chuan ka kuah ṭha leh rang khawp mai.



"Khawihah nge?" lei lam chu ka en kual ruai a, min lo kawhhmuh nalam ka zuk hawi chuan a ken lai aia te deuh hi a lo awm a, hnahthel chungah vakin a lu nge a ke pawh ka hre lo a rawn tun hru hru a, hmuh ringawt pawhin ka ṭim sung sung thei a, Lalchhuansanga chu ka kuah nghet hle tawh.




"Min rek hlum mai a nge?" nui chunga a rawn tih leh takah chuan ka inthlahdul ve chauh nghe nghe; Mahse, Vangvat lianpui kha a lo la keng chu niin!




Kan piah deuha lung lianpui awmna lam chu min pan pui a, chhuk tura min tih hma hma chuan ka lo chhuk sawk sawk a, lung chunga a vangvat ken a rawn dah laichuan ka lo ṭe ṭhat a, min melh rum khawp mai. Chutah lung lian vak lo chu chharin vangvat vak sawn tur chiah chu a rawn chhut hnan bur a, a chhutna lung pawh a keh sawk thei, a thi chiang viauin ka ring a ni.




"Haw tawh ang" ka ti nghal thawr a, min chhang loin thingkung bula a mau dah kha a va la a, thingkung zar chu a han vaw ri pawp pawp a, a rawn ṭil thla ur ur mai. Chhuk ve ngam tawh hek lo, lung chung aṭang chuan a che vel chu ka lo thlir reng a, min be lo a, keiin ka be lo bawk a, a hmanhmawh lo lutuk mawlh mai chu a ni.




"A tlai tawh ngawt ang a" ka tih takah chuan ka lam a rawn hawi ve ta chauh a, a Phone a bih zawk hnuah ka lampanin a rawn phei a, a hnung a rawn dawh leh mai bawk a, ka hnial hauh lo, ke a kal ai te chuan ka duh daih tawh zawk.




Kawng chho ah muangchangin min paw chho a, Cigarette a zu pah bawka, a tih dan chu putar a ang ka ti tak tak a ni. Kal lama a thui ka tih tehreng nen let leh lamah chuan rin aiin zawl kan thleng chho rang a, phul awmna kan thlen rual chuan min nghat thla ve chauh a, "I kawng a kham em?" ka lo tih laichuan a hmui a pet sawi nang a, min chhang loin a zial chu a pak khu talh talh thung.



Min chhang tawh dawn lo emaw ka tih hnuah "Tar leh mihur kawng chiah a kham ṭhin" a ti vei fahran a, ka nui chhuak huk mai.




"Putar i ang a lawm le" ka lo ti zauh a, a zial zuk lai la thla meuh a min enin "Ka tar lo a, ka hur" a ti hmuk a, ka lo ṭhen ṭha ringawt, "I rit khawp mai" a kawng dawm pahin a rawn ti nawn leh kher a, kan kal mai dawn emaw tih laiin phulah chuan a ṭhu rem sauh sauh a, a iptepuia a thil ah chu a bun ruih a, bawk lawih tham a lawm a lo chhar hman chu niin; a lian hlawm em em lehnghal a.




"Lo ṭhu rawh" min rawn mitmei zauh a, a bulah chuan ka va ṭhu ve mai bawk. Chutih laichuan hmeichhe naupang pali hi Bucket te khaiin an lo phei hnak hnak a, "UViste, Thingsemim kan chhar dawn a" an lo ti var a, an thawmhnaw hak ka lo en chian chuan an kekawr hmawr chu a ṭawnphui ṭhap a, min kalpelh zawng chuan Petrol rim an nam ham ham bawk a, nachang an hre bik khawp mai.



"A thlang berah khan chhuk rawh u, a nal a nia fimkhur ula" Lalchhuansangan a tih chuan an 'Aw' sap sap hlawm.




Thomitchhaih a tam vangin ka invai thuak thuak reng a, Avisa erawh an chhaih buai ve lo nge ni, zial a zu khu hlat hlat a; a ṭhu awn dar dar reng bawk. Ka lo invai buai laitak chuan ka bulah rawn tawlh hnaiin ka malchungah a rawn mu a, chiang fahrana hnuai lam aṭanga min rawn melh pahin min nuih var vara a, a zial chu rawn lek zauhin "I zu ve duh em?" tiin min lo zawt a, ka la ve hmiah mai.




"Mi zingah chuan zuk ka rem ti lo ang, keimah chiah ka awm vangin ka phalsak che anih kha" a tih leh laichuan ka lo pak khu hlat hlat tawh, ka zu thiam hran lo a, a tuina emaw a nawm na pawh ka hre hran lo, a khu chauh chu ka duh a, chu pawh chu rimtui ka ti lo viau a ni.




A chempui ken chuan Thingsemim chu a kheh mawlh mawlh a, ei lemloin a iptepui chungah chuan a dah khawm zel a, a kheh khawm ruih mai, a hmuh loh laiin ka lo ban zauh zauh reng a, min hau lemlo bawk a ka ei tura a kheh nihmiang ka ti mai.



"Dar eng zat nge?" ka ti hluai a, a tlai tawh viauin ka ring.



"Dar 8 a la ri lo, hmanhmawh suh ka thlah dawn che nia" a tih chuan ka ngawi ran a, kan awmdan hi a; inṭhen pawh kan ang lo.



A duhtawk a kheh tawh a niang a tho kang uaih a, a Thingsemim khehsa chu pakhat te te hian hmun hnih ah a chhep a, a rilruin a chhiar pah emaw ni? Lo ban leh ka tum laichuan ka kut a rawn hnawl kiang vut a, min ti hamhaih lek lek zawk!




A chhiar zo ṭep tawh tih ah, "Ka kheh a nih vangin pathumin ka chang tam ang" a rawn ti mauh mai. Ka lo nui huk a "Ka kheh laiin i lo eiru ṭeuh lehnghal" a ti leh zel a, a tih dan chu a naupangchhia ka ti tak tak a ni.




Thingsemim chu iptepuiah khung lehin ak ta mai lo chuan min rawn awrh tir a, "Ka pa Zara ipte anih kha, lo dah theihnghilh lo la" a ti liampuata, ka hma a pen vut laichuan ka thil ah chu ka bih vung vung ringawt a, min pe dawn tihna anih hmel e.



"Pangparhnim" a rawn lehhawi rang khawp mai.



"Hming hnaisailo lutuk khan min ko fo lo teh" a rawn ti deuh hluk a, "Ka lawm e aw" ka tih takah chuan a dar a chhin ak a, a kiaisuk bawk. Chutah a lampan chuan ka pen phei vuta, engmah pawh a sawi hmain a hmuisir ah chuan ka han fawp chawt a, tum aichuan a lo am leh reuh sia, keimah zawk ka in dang chawt chawt a ni ber.




Ka kawngah nghet deuha vuanin min chawi kang nawlh a, duhthawh zetah min fawh takah chuan ka hnar duh ta bik lo, inṭhen chu khawilam rilru ah pawh a lang leh meuh tawh lo. "I hmanhmawh em?" thawk la halhin a ti sup a, "Enga tinge?" keiin ka lo ti he haw a, a mitmeng aṭang chuan a zawhna awmzia chu ka chiang viau lawi a, thil tih chi a ni lo.



"Nutei te an lo haw ṭep tawh ang" ka ti hap a, a pawi ti hmel nur nang chuan ka nuih a ti za viau bawk.



"Enteh, inṭhen ka duh..."Ka sawi laimekin min rawn fawp a, "Keiman ka duh lo" a ti hmuk mai a, a chhiang khel khawl viau a ni.



"Ka sawitum zawk chu inṭhen ka duh ka tih chhan kha a nia" ka ti ṭha leh a, zawhna mitmengin min en tawh.




"Intihhlum ka tum miah lo ania, i hlauthawng ni a ka hriat vangin ka uang a nih kha, ka lungawi lo ringawt a, khatiang lam zawng kha chu ka tum miah lo, ka tum ngai lo bawk ang" thaw huai hmelpu a min en ka rin laiin a hmelah chuan danglam vak a awm lo. Mahse, a thutak hmel hle thung.



"Ka lungawiloh chhan kha chu i hriat kha" ka ti leh hap a.



"Ka hria a lawm, ka dem lo che a nia" a tih chuan chhan mai dan tur ka hre lo.



"I ngaih ang kha engmah a awm lo, ṭha famkim chu ka nilo, mi rinawm lo pawh ka ni chuang lo, a hma chuan hmeichhia ka kawp ṭhin a...i hriat kha nangpawn...ka zep lo, midang pawn an hria" a ṭawng chu a bah deuh niai a, insawifiah a tum ve ni ngei tur a ni.




"Aa...ka bum lo che a nia" a ti leh tawl a, a dang a awk deuh emaw ni!



"Tunah khan ka dang a awk tiraw" ka lo nui hak a, ani pawh a nui ve tho, "A chang hian ka dang a awk ṭhin a, ka zam miah si lo a" a ti niah niah a, a hmel chu pawisawi lo lutuk hmel a pu bawk a, a duhawm ka ti!




Kan inlam panin kan inzui haw a, kan thlen fel hnu rei loteah Nutei te an lo haw ve chauh a, dawhkana ka Thingsemim dah a rawn hmuh chuan a phur hmel khawp mai, "Naupang hoin an lo zuar a mi, engzat man nge?" a ti sawk sawk a, ka lei emaw a ti anih hmel e, ka neih na chu sawi chi ni hek lo, "A tlawm reuh lutuk" ka ti ṭha ve mai a, a ei tiam tiam laichu enin ka lo nui leh pat pat ṭhin.




College kal tura ka chhuah dawn ah chuan Nutei Bathroom ah a lut hlauh a, chutih lai chu chuhin hmanhmawh deuhin ka kal chhuak a, ṭhenawm te in lam ka pan laiin Avisa leh Henry a an lo chhuak ve chiah a, muangchanga a Bike a hru leh phawt chu hmanhmawh ru deuhin ka lo nghak a, a bulah chuan dingin ka lo tur ve sek reng bawk.




Hlauh ang ngeiin Nutei chu Veranda ah a lo chhuak a, kan lam a lo hawi vung vung bawk nen Avisa chu ka din hlat thuai a, "Henry-a rualin ka lo chhuk ang, tlan hmasa la kawnah min lo nghak ang che" phun ser ser a ka tih laichuan mipa pahnih te chu an bangbo dun hle a, "Tlaiah lo kawi rawh aw" Nutein a lo tih lang lang takah chuan an hrethiam ve leh mai bawk.




"Tlan hmasa rawh" Henry-an a lo ti ve vat a, "A va ho angreng e" ti niah niah chung chuan a tlan chhuak a, Nutei chu a la lut ta mai lo. Henry-a Bike ah ka ṭhu fel awrh ang tih ah R.O a rawn chhuak hlawl a "Khawnge kan Dawrdur-a kha a awm, ka Denim Jacket ban a lo tan leh ringawt tawh hi" a rawn ti chhuak lung lung a, a kutah chuan kawr ban zaithlak niawm tak hi a rawn khai a, a thinrim hmel viau bawk.




"Baidai baw zawnga harh tih zawng zawng hi a nei a, a tih ngaihna tak pawh ka hre tawh lo, thawmhnaw ṭha lah ka nei thei lo, heti hian kan inbun hmiah hmiah zel mai" Nutei lam hawi chuan a ti leh hluk hluk a, Nutein a lo nuihpui bawk bawk takah chuan a thinrim lutuk ta bik lo niin ka hria.




Dawr kawn kan thlen chuan min lo nghak ve ran a, mi dawr kawtah mipa ṭhenkhat ho nen ṭhuin Cigarette an lo zu khu luai luai a, a kawr hak ka en nak chuan a pa Denim niawm tak; a zak ṭhuina laibawra tan thlak hmawk tih hriat reng hi a lo ha a, a hnuaiah T-Shirt a ha leh chung pawhin a thawl viau mai, a inhmeh vei phian lehnghal a, a pa tan erawh chan duaina chu a ni chiang a lawm, patling hak ve tlakin chhuah sak hek lo le.




Min hmuh rualin a zial zuk lai chu midang a pe a, "Lo kal rawh le" tih pahin a Helmet a khum a; a Bike lam a pan nul nul bawk. Ka chhuk laichuan Henry chuan min lo en ve reng a, ka nuih var var laiin a nui ve hauh lo, ka chungah lawmlohna a nei emaw tih mai tur a ni.




Kan tlan chhuah dawn ṭep ah Henry chuan min rawn tlan khalh a, a tlan chak angreng khawp mai, Avisa pawn a en zui vung vunga, nidangah Henry hi a tlan chak ngai lo a, mi fimkhur leh zawiawi tak anih ṭhin vangin chutia a tlan chak viau chu mak ka ti deuh a, lungawilohna engemaw chu a nei anih ka ring.




College kan thlen hnuin kan Class neihna lam tur ve ve kan pan dinga, Classroom ka va luh chuan Henry a hmel ka hmu hauh lo! Siambawihi leh Erica bulah ka ṭhu ve a, Erica chuan min be seuh seuh reng a, Siambawihi erawh Assignment ziakin a buai khawp mai.




"I la Submit bik lo tiraw, i ruala thehluh theih ka inbeisei a" Siambawihi chuan a ti mawlh mawlh a, "Thei ang, aman naktukah lo Submit rawh a tia lawm" ka ti ve mai a.




"Chutiang a sawi lai ka van hre lo ve, nimin kha Last date a ti zawkin ka hria" Eric-an a lo tih chuan "Nizanah a sawi a lawm" ngaihtuah lem loin ka lo ti liampuat a, Siambawihin min rawn en rang viau a ni.



"Phone ah in in be ṭhin a mi?" a ti ta khauh a, "Bia tih a chiang reng" Eric-an a lo ti bawk.



"Be nang.." ka tih laimekin "A lo len kha" Siambawihi bawk chuan a lo ti leh a, ka riat nawi hle ringawt.




Sir Boon-a ni lo a Sir Hminga zawk a lo kal vang chuan ka hamhaih lek lek a ni, ka dawhkana Assignment submit tur ka dah chu ka Bag-ah ka khung ṭha leh thuai a, ama Period pangngaiah a lo kal zawk dawn anih ka ring.




Mahse, rin loh deuhin Sir Boon a Period ah chuan Sir Hminga bawk chu a lo kal leh a, kan Assignment erawh a la ta tho a, a chhuah dawnah "Nizanah in Sir Boon-a tlangval zuruiin an lo sawisa a, Damdawiinah a luta naktuka a Class pawh keiman ka rawn la ang" a tih chuan kan hawi phawk hra hlawm a, ka awm a nuam lo nghal et et mai.




"In va kan ve dawn nia, eitur te ken sak ve ula" chhuah pah chuan a ti leh a, Sir Hminga kal liam hnu chuan an sawi zui sap sap a, kan hma chiah a kan CR ṭhu chuan chanchin a lo hre tawh ni awm tak a ni, dawhkan bawh uaihin a thilsawi chu kan ngaithla a, a sawi dan hmangah chuan vengchhak a a leng a haw kawngah tlangval ṭhenkhatin an lo tiding a ni awm e.




"A Bike an taithluk sak a, kawrah a tla luta, a Bike pawh a chhe nual mai, a ban ruh a sawh pelh a, a hmai vel an hnek na pawh a duk chur a, na lutuk chu a ni lo ang; mahse, a hmai duk vel kha chhuahpui a hreh ve deuh anih ka ring" a ti niah niah a.




"Chhungte hetah a nei bawk si lo a, tunge awmpui a?" pakhatin a tih chuan "A inluahna nuin a awmpui a, pawisa thawhkhawm ila tlaiah kan va kan dawn nia, kan tu vak a nei dawn si lo a" Cr chuan a ti lehzela ka khawngaih reuh khawp mai.




"Tu ten nge lo sawisa ang le, mi pawi a sawi loh tehlul nen?" Siambawihin a tih chuan chu zawhna chiah chu ka lo inzawt ve mek bawk, kan in aṭanga a haw lam anih hmel bawk si a, mi a tibuai dawn lo tih lah a chiang reng si.



"Ṭhian ho an ni a tia, a tlan lai an um a, a tlanmuan deuh hnuah pakhatin a rawn tai thlu a, ka rin dan chuan an tlawh thlu anih ka ring mah zawk, ani tlan ṭha hle hle lai lo tai thlu duh chuan engemaw huatna riau a nei sa aniang" CR bawk chuan a ti leh a.



"Vai anih vangin an lo ngam ve hrim hrim a ni lo maw?" Erica a ni thung.



"Ka hre lo le, ani ve thei tho, mawl deuh deuh hi an tam em a ni. Mahse, amah kha chuan 'Min lo chang an ang' a tia, tu nge tih hria i la chuan han piai sak hlak pawh a chakawm khawp mai" kan CR pawh chu a lawm lo hle tih a hriat theih a, Sir Boon-a nen innel tak an lo ni bawk nen a rilru tur chu ka lo hriat thiampui viau a ni.




Chaw chhun eihunah Canteen lamah kan inzui phei a, Senior Semester ho erawh an lo la chhuak ve lo anih ka ring, Siambawihi chu a ṭhian ten an lo koh vangin a kalsawn zawk a, chutih laiin Erica chuan min rawn bekbawr sar sar a.




"Boon-a khan a ngaizawng che sia, i rilru a na ngawt lo maw?" a rawn ti reuh a, ka lo melh haw ringawt.



"Min ngaizawng hleinem?" ka ti hap a.



"Kan hre vek a lawm, Siambawihi pawh zawt rawh hmanni ah Siambawihi bulah i chungchang te a zawt a, bialpa i neih thu a lo hrilh a nih kha" a ti leh zat a, Siambawihin ka bulah engmah a sawi si lo chu ka hrethiam lo dawn dawn a ni.




"Kan lo zawt a nge?" ka tih chuan a bu nghat a, a hnu lawka Siambawihi lo ṭhu phei hnenah chuan "Sir Boon-a nen ka chung chang in sawi dun a mi?" ka lo ti thawr a.




"E, ni dawn tak....Hmanni ah Henry nena inchung chang min lo zawt a, 'An ni tawh lo' ka lo ti anih kha, a duh hmel teh mai che a nia aw, tlaiah pawh va kan ve la a lo lawm viau ang chu" nui pat pat chung hian a ti zui a, ka nuih a za ve vak lo.



Class-a kan luh leh hmain dawrah thil leiturin kan kal a, Gate kan thlen hma deuha Lalchhuansanga te ṭhian ho lo ṭhu ka va hmuh chuan ka en vung vung a, min hnung chhawn zawnga a ṭhut vangin min hmu ve lem lo thung.




Lalchhanchhuaha lo hawi chuan ban min rawn vaih lauh a, midang ho pawh chu an rawn hawi sap sap bawk a, Avis an min rawn hui zauh mai. "Lo va kal ru, ka lo zui ang che u" tih leh Siambawihi te pahnih chu kalsan ka rual a, Avisa te ṭhutna ka va thlen chuan Saidingpuian ka ṭhutna tur min lo kian vat a, an hmel ka han en nak chuan insual na ah an tel tih hai rual lohin an lo pilh pheng phung hlawm a, Lalchhanchhuaha khabe phei chu a duk ruih mai.




Avisa chu ka thlek vuta, engmah hliam tharlam a nei ve awm pawhin ka hre lo. "A nghawngah khan" Chhanchhuahan a lo ti zauh a, a kawr nghawng ka keu sak chu a duh vak lo aniang a tawlhsawn deuha mahse, ka keu hman tho.




A koki ah chuan vuakna nge hnekna niawm tak hi duk a awm a, nasa phei chu a ni lo, amah phei chuan eng he hu ah a ngai lo a ni ngei ang, "Tute nge insualpui leh tak a?" ka ti kha kha a, an khi ṭha ringawt a, tumah mah chuan min chhan pawh an tum hlawm lo.




"Nizanah in rui nawi lutuk, tiang khan vawikhat mah awm tawh suh u, insual na ah in la tel leh nghal a, Nutei.." hriat chhuah zawk ka neih vangin ka ṭawng lai chu ka tawp chawt a, engnge thil awm zia?




Nizanah khan he mi te ho hi insualna ah an tel? Chuan an ṭawng ka ngaihthlak laikhan Avisa khan hmeichhia vanga insual an ni angin a sawi bawk a nih kha, tlangval zurui, ṭhian ho, Bike nen, Awi leh..!!




Ka thaw a sa pup pup mai, an ni lo ang ti ngawt dawn ila, ṭan chhan tur tingin ka lo hre thawi ve tlat bawk si, Sir Boon-a kan ina a lo leng kha hemi te ṭhian ho hian kawngah an lo chang tihna em ni le?




"Engnge khatia min en kual hruk hruk a, hetiang hliam te hi chu maw mipa chhinchiahna anih hi" Lalchhanchhuahan a ti hluk hluk a, kei chu ka awm a nuam lo hle ringawt tawh.




"Lo kal teh" tih leh Avisa chu pawh ka rual a, "Khawnge in kal dawn?" midangin an lo tih pawh chuan chhang loin ka pawt kal dawr dawr a ni ber.




"Building hnuaiah chhuk ila" a lo tih chuan chhang loin Gate pawn lamah ka pawt chhuak a, Hmawng kung lianpui awmna bulah chuan pawt phei zelin zunin bulah kan indinchilh ta ran a, nuih za lek lek hmel a put laiin kei chu ka lo hah leh tet tet tawh.




"Sir Boon-a kha nang mahni sawisak a mi?" ka ti nghal tawl a, a mit ko a lo san uk ringawt.




"Min chhang ṭha rawh" ka ti vin hlar a, "Sir Boon-a chu vaipa kha a ni lawm ni?" a aw ki ah chuan a ngaih nep hmel khawp mai.




"Nizan kan ina a lo leng haw kha tlangval ṭhenkhat; ṭhian ho, Bike nei in an lo changa, a Bike tlawhthluk sakin an sawi sa bawk" ka ti ta sak sak a, nur nanga min en ringawt loin anmahni an nilo tih min hrilh sela ka ti takzet a ni.




"Tlangval hoin an lo piai liam liam anih dawn chu, Vai velh te chu thil thleng ngai lo pawh a ni hleinem" a lo ti sam et mai, hahthlak hian a..




"Lalchhuansang, Damdawiinah a awm ania aw" ka ti leh fak a, a ngai pawimawh lo fahran lutuk chu ka ngei zawng tak a ni.




"Hmmm...Mizo pa in piai hlek kan tih hi chu a tih tham fe zel a nia" tih pahin a lo nui huk anih chu! Ka awih thei lo zawk....



"Enga tinge in sawisak?" ka ti vin ta ṭhat a, ka ṭawng ring em em mai bawk.



"Eleeee...min puh ringawt a law?" a ti heu mai!



"Nangmah ni in ni lo tiraw?" ka ti leh hluai a, an nih loh hram ka beisei, an nih vaih chuan a pawi dawn lutuk.



"Vai velh mai mai te chu tuai ho tih awm tawk anih chu" a ti nghut a, ka puh ringawt chu a lawm ta mang vak lo aniang, a tum lian viau tawh.




"Kan in aṭanga a haw lam a nia, nang mahni in nih ka hlau thawng a lawm, in nih loh chuan ka thaw huai mai" ka awm dawmin thawk ka la vang vang a, ka hahdam sawt pawhin ka hre chuang lo.




"Tlaiah Betea te inah kawi lawk ila" a lo tih chuan "Ka hman lo ang, Sir Boon-a kan va kan lawk dawn a" ka ti sam mai a, "Het..." a lo tih hluk vang chuan kan inmelh no vak lo.




"Kan Class hoin kan va kan dawn a lawm" ka tih pawh chuan a hmui a pet sawi nang nang tho.




"Ner ner suh, kan ina a lo leng haw lam a ni lehnghal a, ka va lan ve a ngai a lawm, i ngaih ang kha engmah a awm lo" ka ti kha kha a, a la tum zui.



"I thik a mi a, in la rilru zau hle si" ka ti leh hlak a.



"Damdawiina ka awm ve hunah min rawn kan ve ang che" tih pahin min kal pel hmak anih chu! A van han naupangchhia tak..




Gate bulah chuan min lo nghak leh lawi a, "Damdawiinah chuan ka hruai ang che" a lo tih chuan ka chhang tawh lem lo. A ṭhiante bul kan thlen leh chuan "Zorem-an min lo Phone a, thla tharah an lo chhuak dawn anih chu" phur fein Chhanchhuahan a lo ti a, Zobuaii leh Tluangzeli an lo thleng ve zat bawk a, an phul ve hlut mai.




Siambawihi te lo let leh hnua kal mai ka tum chu Avisan ka banah a rawn vuan a, "Tlaiah ka lo nghak ang che" a tih leh zet hnuah ka kalsan a, Class-a kan luh leh hnu chuan Sir Boon-a chung chang bawk chu an sawi leh a, pawisa te thawhkhawmin kal tur an inzawt kual a, ka kal ve theih tur thu ka lo sawi thuai bawk a, Siambawihi erawh a tum ve lem lo aniang, ani a tum loh chuan Eric pawh kal lo tur chiang sa ah ka ngai.




Tlai banah Avisa chu ka nghak renrawn a, an lo chhuak har zek a; dar thum leh a chanve pelh hretah an lo chhuak ta hram a, "Betea te inah kan kawi anga i Nutei dawrah a mi ka dah dawn che?" a ti phawr phawr a, a lo theihnghilh leh hman emaw ni?




"Damdawiinah" ka tih hlak takah chuan a ṭhen ṭha a, "Vaipa kan va kan lawk ange" tiin a ṭhiante bulah chuan a sawi kher a, ho an han tih hmel hlawm khawp lehnghal a, an Professor anih lam zuk han hre duh hauh lo chuan.




Damdawiin lam ka pan laichuan ka Bag a ka Phone ah lai chu a ri sek reng a, ka en chuan Rammuani a lo ni a, ka chhang lo kher ang chu.




Ka va thlen rualin CR leh midang ho lo chhuak tur chiah chu ka va hmu a, "I va tlai ve, kan haw tawh dawn a sin" CR chuan a lo ti thuai a, "Kan han lut ve zawk ang" tiin kan luhsan a, Sir Boon-a awmna kan thlen chuan nu pakhat hian a lo awmpui a, min lo be siam siam a, Sir Boon-a pawh a lo ṭhu chhuak ve peih a, a mit leh hmui bawr vel a vung lek luk a, a ban an lo cher sak bawk a, na dang em em chu a nei lo anih hmel e.




"Vawiinah kan chhuak thei nghal dawn a, Doctor lo kal hun kan nghak mek a" a lo ti ve vat a, ka hnunga ding Avisa chu a melh leh zauh ṭhin. Avisa erawhin a en ve lem lo a, hnunglam panga midang awm chu a thlek daih a, ka va hawi laichuan ka hmuh hnu ang deuh tlangval pakhat hi ka va hmu a, damlo a awmpui ve niin ka hria.




Kan chhuah leh hnua tunge anih ka zawh chuan "Zonunmawia" tih zawngin min chhang a, "Anih a awmpui pa kha" ka ti lehzel a, "A u anih kha, Lalzidinga" a ti thawr bawk a, tu nge Lalzidinga pawh ka hre lo.




"Zonunmawia chu hmana mi kha a ni em?" ka ti he haw a, a bu ta nghat mai. "Lalzidinga nen khan in insual chu a ni em lo maw?" zawt em em loin ka ti liampuat a, a ngawi ta tlat a, an insual tih na.




A hnungah chuan ka beng zawt a, ka ngei tak tak a ni, insual reng mai, Nutei sawi ang tak takin hetiang chuan mi pawi a khawih hun a la awm em em ang.




"In sualna ah tel tawh suh ang che, zu i inngai lo a, rui lo hai loin mi i sual anih chuan misual tawpkhawk i ni tihna a nia, zu in si lo a ruih i neih chuan eng nge i ruih, damdawi i ti em?" ka ti mawlh mawlh a, min chhang duh miah lo.




A Bike dahna kan thlen hnu chuan lawn duh mai loin ka ding ran a, "Damdawi ka ti lo, ka insual tawh lo ang; lo chuang rawh" tih leh ka bana rawn pawh a rual a, ka la lungawi zo meuh lo.




"Nangpawh thil pakhat lo ti ve ang che" a rawn tih chuan tum burin ka en chho a, "I ṭhianpa vawiina i kalpui kha a bul hnaiah awm tawh suh" a ti mauh mai a, tu chungchang nge maw a sawi le?




"Henry maw?" ka tih laiin "Erica kha.." a ti khauh a, a Bike-ah a lawn zui thuai bawk.




"Tinge Erica chu?" kan tlan chhuah hnuah ka ti leh hram a.



"Ka mit a ti kham a ni mai?" tih zawngin min chhang.



"I mit ti kham zawngin engtin nge a awm?" Erica chungchang a sawi teh daih chu mak ka ti deuh a, chuvanga dil chhut viau pawh ka ni.




"Nizana in Sir Balloon-a sawisa tu kha amah anih kha" a rawn tih chuan ka phawk hle ringawt tawh.




"Tak tak a ni em, engtin nge i hriat?" ka ti hlut a, a ngawi zui vung vung chu ka thin in a tuar lo ṭep tih a, "Ka hria, ka chik ngai lo che emaw i ti mai mai anih kha, i hnungah ka awm reng ṭhin a lawm" a ti bauh a, ka thil zawh lai leh a mi chhan dan chu a in zawmna ka hre ta hauh lo.




"Ka hriat thiam theih turin sawi teh" a darah ka va beng salh a, Sir Boon-a khawihtu a Erica a puh ngawt dan chu ka hre duh.




"Nizanah khan ka kal lamin ka hmu tawh, ka haw lamah ka hmu leh bawk, vawiinah a Bike a lo keng em, a ken ka ring lo, Vaipa Bike a sut na ah khan a ti hmelhem ve deuh aniang" a ti sap sap a, vawiin ah Eric-an a Bike a keng lo tak tak, Siambawihi Scooty-in an lo inphur a nih kha.




"Mahse, an sawisa lai i hmu bawk si lo a" ka ti leh hap a.




"In Sir Balloon-a kha keiman a lawm Damdawiinah dah, amah vanga hetiang thil hrilh che ka ni lo aw, kha Erica khan eng vanga ti nge anih tih zawk a nia ka buaina zawk chu" a ti fak fak a, ka va thlek dak dak laichuan "A enthla ṭhin che tih pawh i hre miah nange?" a lo ti hluk a.




"Enthla a?" hepa thil sawi hi a awmzia ka hrethiam lo takzet a ni.



"Nizanah khan nangmah vanga insual kan ni tih pawh i hre leh chuang miah lo a" a nui deuh suk a, min ti bang bo lehzual.




"Zidinga leh Erica chu ṭhian an nia, Zidinga leh kei chu ui leh kel thlunpawlh ang vel kan ni, a nau kan sawisak hrep tawh kha, Erica khan a ngaizawng che tih chu i hriat hnu a ni bawk" a tih takah chuan ka hrethiam ta kuar kuar a, rinloh lamah Sir Boona tawhsual tawh chu keimah vang a lo ni daih a, keilah chuan themte pawhin ka lo hre ve hauh lo lehnghal.




"I buaithlak thei emai, tunah pawh khan keimah niloin Balloon-a zawk i ngaihtuah a ni maw?" a rawn tih chuan ka inthiam lo angreng. "Teuh lo" ka ti zawi sep a, ka rilru a buai nuai a, ka ngaihtuahna te chu a tawi turhin ka hria.




"I nutei dawr kawtah ka dah ang che" a rawn tih leh takah chuan "Khawiah nge i kal dawn?" ka lo ti vat a. "Nizana kan thil tih zawh loh tih tur kan nei" tih zawngin min chhang a, a thilsawi awmzia chu ka hrechiang viau a ni, Erica hmuh an tum.




"Hetiang thil hi ti tawh lo teh u" ngenngawl zetin ka ti a, ka hlauthawng ṭhin a ni, Erica phei chu ṭhian ṭha anga ka kawm a ni a, ka la ring chhe hleithei meuh lo.




"I tan vek a lawm, kan vau zam lo anih chuan i tan a ṭha lo ang" a ti sam mai a, a tih ngaihna tak pawh ka hre tawh lo, ka hriat miah lohin buaina hian min lo huai vel reng nge ni a, ka hriat miahloin venhim na ka lo dawng reng zawk. Ka hmalama kawng eng chauh ka thlir vangin ka hnung lamah thim a awm tih ka lo theihnghilh zawk em ni? A tu a te pawh hian min ṭhawng dawt dawt reng mai a nih hi.




Nutei dawr thlen hmain ka chhuk a, ka a deuh chhulh maiin ka hria, "I va chau awm ve, vawiin chu ka inhralh thei lo emai kan haw hma dawn nia" Nutein a lo ti sawk sawk a, min biakna pawh ka chhang mumal meuh lo.




In kan thlen chhoh chuan dar 5 a la ri lo deuh a, Avisa chu biak ka tum zuau zuau a ka ṭhulh leh ṭhin, Erica thil tih chu Siambawihin a hriat pui a ngem tih chu zawhna lian tak a ni, vawiin lam ngaihtuah erawh chuan a hre ve awm pawhin a lang si lo.




Ngawiteh, Siambawihi khan engtin nge Sir Boon- a a lo leng tih kha a rin chat theih?



Hmanhmawh deuhin Siambawihi ka Call a, Phone chu a Ring rei khawp mai, vawihnih na ah a rawn la thei hram a, "Erica thil tih kha i hria tiraw?" ka ti nghal thawr a.




"Engnge a tih a?" a lo tih chuan za lo zetin ka nui a, "I hriat reng kha, Sir Boon-a a lo leng tih pawh i hriat kha" ka ti leh zat a.



"Kha te chu Eric-an min hrilh a lawm, Sir Boon-an Erica lenpuiah a sawm a, Eric-an a kalpui peih lo anih kha" a lo ti sap sap a, Siambawihi hian engzat chiah nge maw a hriatpui ang le?




"Eric-an i bulah engtin nge min sawi?" ka ti leh ta zel a, a riat nawi khawp mai. "Siambawih, nizanah Eric-an Sir Boon-a a sawisa a, ṭha deuha thil min hrilh loh chuan i tel ve thu ka sawi dawn a nia" ka ti ta fak a, a hlauthawng ta deuh aniang min chhang ṭha duh ta khawp mai.




"Sir Boon-an a ngaihzawn thu che hi ka hrilh a, ka hrilh ni chuan a thinrim lutuk, i be ṭha thei bawk sia a thik a lawm, Avisa nen in inngaizawng tih a hriat khan Avisa hi a ngaithei lo bawk a, chu bak chu thil dang engmah ka hriatpui lo, pawi a khawih tih pawh ka lo hre hleinem" a ti deuh luam a, thinrim luatah ka thin te chu a thip hlur mai hian ka hria.




"A ṭhian te kawiin Avisa pawh lo khawih an tum a, a lo inveng thei hlauh zawk a, Sir Boona lehzel an lo khawih chu..." sawi zo thei loin ka inhumruh ṭeuh a "Avisa chu a ngam lo ang, midang a sawm anih loh chuan, ahma pawn Avisan a khawih tawh a thungrulh a duh thu chu a sawi zauh tawh" a rawn ti ve leh a, Avisa ka dang tlat lo kha ka inchhir ta vak lo, tunah kher kher hi chuan a zal raih na tur khawpin zirtirna pe sela ka ti hle tawh zawk.




Zanriah eikham hnu thleng pawhin Avisa chuan min la rawn be lo a, Henry-a hnenah chanchin zawh mai tur nge maw ni, vawiin lah khan ka hmu zui ta miah si lo a, Henry a tak pawh chuan ka rilru a tibuai a ni.




Ka mut dawn ṭep ah Phone call ka dawng a, Avisa anih beiseia rang fe a ka en chuan Delhi a awm mek ka Ni Tetei ka pa farnu neihchhun zawk a lo ni.




"Bawihi, i mu tawh em?" ka lak rualin a lo ti thuai a.



"Mu lo e, mut ka lo tum chiah a" ka tih laiin "I pa nen in in be tawh em?" a lo ti leh zat a, thil ṭha lo thleng ang maiin a aw ah chuan hlauhthawnna ka hre tlatin ka hria.



"Be lo, eng nge ni ta?" ka ti leh thuai a.



"In pa fa hian ka rilru in ti hah khawp mai, thingtlangah i awm tih te pawh ka lo hre reng reng lo a, i pa pawh ka han hau ringawt dawn a, ka lainat ve tho bawk si a, min ti hawihai leh lutuk a lawm" a ti hlak hlak a, ka Ni hi a buai ṭhin em vang leh kan inhmuh lohna a rei thawkhat tawh em vangin kan inbe khat thei hle a, engemaw chang zeuha kan inbia tih loh chu chan chin pawh kan inhrilh mang meuh lo.




"I pa nupui khan in a chhuahsan a, i pa khawharin vawiinah min lo bia a, kha i bulah pawh a sawi ngam lo anih kha, 'Keiman ka lo han bia a nge" ka tia, amah pawh be tur chein ka ti a, a lo biak che ka ring tawh zawk maw le" a tih chuan min ti hamhaih angreng hle a.




Chuvang chu em mawni dawn le vawiina Rammuani Call ka dawn chhan kha? "A va zia lo ve, ka pa chuan eng nge a lo sawi a, a rilru a na viau a mi?" ka ti hap a, amah tea a awm tur chu ka khawngaih ru ve khawp mai, ka thin a tih rim rualin ka pa hi chu ka haw hleithei ngai lo chu a ni, ka pa a ni miau a.




"A rilru te chu na ve ang chu, i lakah ber a inthlahrunga, a lo biak hunah che pawh ṭha deuhin lo chhawn la, i haw thla leh vat dawn nia" a tih leh chuan chhan mai ngaihna ka hre lo, haw thlak kher chu a ngai dawn em maw ni le?




"Ka lo be dawn nia; mahse, Class ka laklawh ve a, haw kher te chu ka thei nang" ka ti niah niah a, ka haw te chuan ka zirlai a sukuk zo vek dawn tih chu chiang sa a ni.




"E, i haw ngei ngei a ngai, mahni chauha pa te awmtir tur a ni ngai lo, zan khat mitchhin pawh tawh palh theih a ni a, mahni te a khawsak chu a fel lo a lawm, rei rial loin haw thuai rawh, i pa khan a ko ngam lo che a, chuvang a nia ka lo biak che" a ti leh dap dap a, ka Ni chuan sawi dik loh a neih lo, ka pa chu ka ngaihtuah lutuk tlat. Mahse....ka zirlai te, Avis a pawh, engtin nge ni ang; mahse...he thu hi ka hua a ni.




"Ka zirlai hi a laklawh e, ka haw thla zawk anga Nu Matluangi chu koh ka rawt mai dawn nge ni..?" ka tih vang vang laiin "A tih chi teuh lo lutuk" ka Ni chuan a lo ti hlar a, min ti dang dawn dawn a lawm le!




"Enga ti maw?" ka ti leh hluai a, koh sak ila kan buaina a fel maiin ka ring tlat a ni.




"A chi in a chi loh reng reng, i nuhrawn khan i ro chan tur i pa hnena a fanu hminga dah ṭhen tura a dil vangin a lawm an inṭhen" a rawn tih takah chuan sawitur reng reng ka hre tawh lo, chu kher kher chu ka beisei loh tawp thil a ni!






(END OF CHAPTER - 27)

Ads click lo bik tawh awih lo, lo click ve tawh la

Link:
BBcode:
HTML:
Hide post links
Show post links

Ngaia
Site Admin
Posts: 19502
Joined: April 30th, 2016, 4:07 pm

Unread post by Ngaia » October 24th, 2021, 3:54 pm

CHAPTER - 28





Muhil thei loin ka inlet zankhua ṭhak a ni ber e, ngaihtuahna a chirí nuai a, rilru han siam mai dan tur pawh ka hre lo, haw chu ka duh emaw duh lo emaw a ṭulna in min nan miau si chuan; keia lo duhloh ngawt theih lah a ni mang si lo a.



Ka pa chu ka khawngaih reuh khawp mai, mihringin hma hun kan hriat loh zia hi a tu a te pawh hian ka hre nawn zel zawng a nih hi, ka Ni lah chuan "Zirna lam chu lungkham lo mai rawh, i pain pawisa a nei a, i damchhung pawhin thawk lo pawh nila i khamkhawp a awm ang" a ti sam mai si a, ka zirna lam chu a enghelh ve lem lo.




Haw ta ila engtin nge ni zel ang le, helai hmuna ka awm dawn vangin ka bialpa nen kan inṭhen tawh a, tunah haw ta ila Avisa nen chuan khatiang dinhmun tho kha kan tawngbaw leh lo ang maw tih te ka ngaihtuah a, ka hreh a ni.




Zingah ka pa chu ka bia anga, haw loh hram dan ngaihtuaha sawipui ka rilruk ta ringawt a, a lo berah kum khat vel te chu amah chauh pawn a khawsa ve thei turah ka ngai, chuti anih loh pawhin kartawpah haw a; helai hmun nena kartawn ang tur tal pawhin, chutiang tal pawh chuan ka zirlai chu zawh hram ka duh a, rem a ti lo bikin ka ring lo.




Ka muthilh ve meuh chuan khua a var tawh maithei, darkar khat bawr vel chu ka chhing ve sek awm e, ka thawh veleh ah ka inbual a, Class kal turin ka insiam mawlh mawlh a, choka aṭanga Nutein min lo koh chuan ka sam ṭawn ṭha mawlh mawlh chungin ka chhuak phei a, "Eng nge Avis te kha an awmzia ni a?" a lo tih chuan ka bangbo khawp mai.



"Eng thil ah?" ka lo ti let ha a.



"R.O leh Henry kha zingkarah an tlan thla a, Avisa Lockup-ah a awm an tia" a tih phei chuan ka phawk hra ringawt tawh.




"Engmah ka hre ve hleinem" tih leh Room lampan ka rual a, ka Phone ka en chuan Zobuaii Missed Call a lo awm ṭeuh a, ka Call let lai te chuan ka hlauthawng ru hle a, nizan lamah Erica te nen boruak ṭha lo zet an nei anih ka ring hmiah bawk a, a chan chhe zawkah an ṭang lehnghal emaw ni?



"Chhingi, biak i va har ve" a rawn ti nghal tawng a, "Enge nge thil awmzia?" keiin ka lo ti ve thuai bawk.



"Nizanah an insual a, Police-in an rawn rut a lawm, Erica phei chu a hnar ruh te a tliak a, kan ṭhian te chu an na vak lo, Betea a inhliam ve deuh a ni mai" a lo ti zung zung a.




"I kal ve a mi, engtin nge an awm dawn?" ka tih leh chuan "An Bail theih mai ang, Street fight mai mai a lawm" a ti sam leh mai a, an Bail theih dawn a tih vang chuan tlemin ka awm a nuam ta deuh, Zobuaii sawi danah Erica te pawh man an ni ve tho a, Bond an Sign anga chawhma lamah an chhuah leh theih hmel a, lawm viau na tur awm si lo chu ka thawk phah huai huai lawi a, keimah vanga buaina thleng a ni vei nen nuam lo ka ti ru khawp mai.




Ka pa chu tlai bana biak ka rilruk ta zawk a, ka biak hmasak ngai loin aman min lo be mai sela ṭha tur a nia, inthlahrun hun lo lutukah a inthlahrung leh tlat si chu ka ngei dawn dawn a lawm le. Amaha kan in lianpuia a tei ruk ruk tur ka mitthla erawhin ka khawngaih viau lawi a, haw ka duhna leh duhloh na hi a inchen hial in ka ring.




College ah chuan Henry-a takngial pawh hmuh tur a awm lo a, chutih laiin Siambawihi pawhin min pehhel a, chungkaw lam buaina nen thawk a zing mup a ni ber e.




Tlai ban dawnah Avisa Message ka dawng a, "Ka haw tawh a, in ban dawnah lo sawi la ka lo lam ang che" tih te mai hi min lo thawn a. Minute 15 hnua kan ban tawh tur thu ka hrilh ve thuai bawk a, a lo kal nghal dawn ni awm tak a ni.




CR nen Last period ah kan ṭhu dun a, min be seuh seuh reng a, Sir Boon-a chung chang ngawt mai chu min sawipui a, a sawi dan aṭang chuan Sir Boon-an min ngaizawng tih a hre ve emaw tih mai tur a ni. "Tlaiah va kan i la, Damdawiin aṭangin a chhuak tawh a" a tih chuan ka chhang lem lo a, ban veleh ah Handout a sem laiin ka ta tur ka va la sawk sawk a, min lo ngaihven hmain ka kalsan nal nal bawk.




Avis-an College piah kawngpuiah min lo nghak a, a bul ka thlen rualin hliam a nei em tih ka en hmasa ber a, a mitko veilam chu a duk ruih mai, a kut ah hliam nasa vak loin a nei bawk, ka chek tlak tlak laiin "Chaw ei ti tui tham lek" a lo ti zauh a, a na tehchiam lo aniang chu a la nui vur vur tlat.




"Engtin chiah nge in khawsak a, Police man ngai khawp a han awm chu" ka ti kha kha a, a vau ringawt dawn ang khan a insawi si a, a lo che na leh hle chu a ni phawt ang.




Min chhang ṭha duh lo em em lehnghal a, "Ka lu ka sawh a ka theihnghilh ṭhen tawh" te a tia, a hman hmawh em em ringawt a, zawh fiah hleihtheih pawh a ni lo. Khawiah emaw min hruai a lo tum leh pek hi a lo ni a, kan kal na tur lah chu a sawi ṭha duh der lo mai a, kan venglamah ni hlauh lo sela chu ka zui lo chiang viau ang.




College kal tura ka chhuah dawn khan Nutein min kamkhat leh zauh a, Avisa ka zui leh anih chuan ka pa hnenah tlangval ṭhalo ka kawm thu hrilh a tum a, "He laia i awm chu duh viau mahila i nun a chhiat phah aichuan Aizawl lamah awm leh zawk mah la a pawi lo" a ti luam a, ka pa boruak nen ka thiltum a ti sukuk zo ang tih ka hlau thawng ru khawp mai, chuvang chuan ka fimkhur fe a ngai bawk.




Tower lampanin kan tlan chho vawk vawk a, "Haw har thei ka ni lo, Pa Ruata te tuikawng siam turin an kal a, eirawngbawl ka ngai a" tiin ka hrilh sa a, "Haw na a hnai a lawm, kan Spot-ah ka hruai ang che" a ti mai a, chutih laichuan Tower chhohna kawng peng kan thleng leh reng tawh, midang ho Bike a lo awm a, min lo nghak tu an awm nual dawn anih hmel.




"Lo kal rawh le" tih pahin ka darah min rawn kuah a, Tower peng lamah niloin kan Thingsemim chharna kawngah khan min kalpui a, ruam lamah chhuk tawh loin phul hmunah chuan kan phei zel a, kawng tereuh te feh kawng tiat lek lo awm chho ah chuan inzui zelin tlang chung zawl kan han pawh hlawl a, midang ho pawh an lo ṭhu far a, min hmuh rualin an lo hawi ṭhap bawk.




"I lo lam em?" Saidingpuian a lo ti thawr a, Avisan a kekawr ipte aṭangin engemaw fun a pe ru zauh chu ka mitsirin ka hmu reng a, ka hmuh hlau fe a Saidingpuian a kalpui laichuan kan piah deuhah Chhanchhuah-an pipu a lo suih mawlh mawlh a, ka la hriat ngai loh mipa pahnih an awm ve bawk a, tlanglam hawiin mei an zu hlat hlat mai.



"Kawlthei i ei duh em?" ka bula miin a lo tih chuan a hawi na lam chu ka en ve thuai a, kawlthei kung hnuaiah kan ding tih ka hre chawp chilh a, a rah puam a tam khawp mai. A zar chu kuai hniamin a lo mawlh mawlh a, panga lai chu min lawhsak a, ka rin aiin a thlum tui daih lehnghal.




Rei kan awm lo, an tih tur an ṭan chu a ni der mai, Rinpuii leh Tluangzeli an lo thleng chho ve bawk a, phul ah chuan ṭhu bial laihin zu an in a, a ṭhenin Ganja an zu a, an bul hnaia ka awm peih loh vangin Pipu awmna lamah ka pheisan a, an zu in nghak tur mai mai chuan min hruai ve lo sela ni zawk tur, ka rilru te a rawn chhuak leh ta aniang ka tawt up up mai a, thawk ka han la leh hluai ṭhin.




"Ka lo thên ang che" Avis-an a rawn tih chuan ka chhuk leh rang khawp mai, "Ka uai ngam lo" ka lo tihsan a, chutah ka kut rawn vuanin "Ka rui ve lo a nia" a ti zawi sup a.




"Ka haw mai dawn" ka tih chuan a phal rih tlat lo. "Rei lo te nghak i la, ti zo phawt sela kan haw rual vek dawn nia" a tih vang chuan bet lo deuhin phulah chuan ka ṭhu leh ta nge nge. Ka bulah min si cheta a rawn ṭhut takah chuan Weed rim a nam ham ham mai, chu chuan min ti lawm lo hle bawk.




Min rawn kuah chial a, ka nghawng vel chu a hmuiin a rawn nul leh thuak ṭhin a, a kut pawh chuan min kuah fet sawt viau mai a, midangin min lo hmuh hlauin ka lehhawi sek renga, a ngaipawimawh ve lo nasa mai bawk si.




"Awm ṭha teh" ka tih lah chuan a nui suk suk duh chauh a, ka kawr chhung ah a kut a la rawn zen lut tak deuh deuh a, a rui meng phi chiai reng bawk nen ka ti hleithei ta meuh lo, a rawn kun hnai chu a chalah ka lo tauh ri bawp a, a dawm vung vung a; midangin min rawn pawh tak vangin a inla hrang ve leh mai bawk.




Zobuaii nen kan titi mawlh mawlh laiin Chhanchhuah-an min lo ko sek reng a, pipu a in then durh durh chungin a ban a rawn vai ṭhin a, midangin a hnunga an va nam chuan a au leh lung lung ṭhin a, a mawl ka ti tak tak a ni.




"Chhingi, lo kal la min lo thên teh" Saidingpuia te kalsawn hnu chuan a rawn ti leh ṭhin a, ka ngaihsak duh mai lo.



"Rochhingpui, min lo thên teh" a rawn ti leh a, ka va melh rawm ringawt.



"Pangparhnima bialnu lo kal vat teh, thli thawt lai hian" a turin min rawn tur a ni ber, "I va ninawm reuh tak" ti niah niah chungin ka tho chhuak a, vawithum vel chu ka then hman awm e Avisan haw a rawn rawt a, kal mai ka tum laiin "Vawikhat leh" a lo tih vang chuan ka ding leh rih a.




"I uai ve duh em?" a tih chuan "Duh lo, ka hlau e a" ka ti vat a, a thlanglam hnim a pik ṭha bawk si a tlak palh pawh hlauhawm tak a ni.




"A hlauhawm hleinem, a hrui hi a rinawm teh a nia, anih chuan ka lo inthen phei leh hunah i lo bengberek dawn nia" tih leh uai thlak a rual a, a rawn inthen let leh chu ka lo en mawl tawp thung.



"Lo bengberek ta che" inthen pahin a rawn ti lang lang a, eng nge a thilsawi chu ka hrethiam hauh lo.




"Lo bengberek rawh ka tih kha hlau suh, hrui hi a rinawm lutuk" ka bula rawn din chawt pahin a ti leh a, "I va ho mai mai tak" ka tih laiin "Ka inthen phei anga, ka hnungah khan inring sa in lo ding la, ka lo hnaih veleh ah i lo bengberek dawn nia" a tih chuan ka bu ve nghat nghat a, chuti na na te chu...




Sang deuh hian a inthen phei nal nal a, a rawn let leh dawn chuan ka lo inring hle tawh, chutah ka bula a rawn inthen hnai chiah chu a tukkhum phekah tak chuan ka theihtawpa nain ka lo beng ri thlawp a, hma lamah a bu dawrh a, a pipu uaina a inthen thlak leh rual chuan kawng thlangah a liam thla vawn vawn mai!




"Ekhai aw..!!" midang ho chu a rawn ding suau a, hman hmawh deuhin kawng thlang an pan sap sap bawk. Saidingpuia a tlan thla hmasa ber a, Avis-an a hnungah a zui bawk a, hmeichhe ho zawngin pipu awmna bul aṭangin kan lo thlir a, Bete-a tlakna bawr vel hnim chu a phai duk nain amah tak phei chu kan hmu pha lo.




A rum ṭiah ṭiah ri chu ka hre pha reng a, ka bula hmeichhe ding ho lah chuan min melh phawk em em mai bawk, ka inthlahrung leh hamhaih bawk si chu dek pawh ka ti ngam tawh lo, an thawm rawn neih hun ka ngaichang ve kar ringawt mai a ni.




"I ṭha em, i hnang a mi?" Sihde-an a tih hnu lawkah in chum dat dat ri ka hria a, "Meidil i hmu hman em?" a tih leh takah chuan ka thaw huai huai tawh, Sihde-a a nuih kur kur takah chuan a na vak lo a nih ka ring.




Avis-a a lo chho hmasa ber a, a hnungah mipa pahnihin an lo zui bawk a, "A na lo a mi?" Tluangzelin a lo tih chuan "An lo chho" tih zawngin Avis-an a chhang thung, a hmun an zuk thlengthla ve chiah lo a niang.




Rei vak lo ah Saidingpuia nen an rawn inkuah chho a, phul zawl an lo thleng chu lei chhuah hlui hian a ṭhu thla hnawk a, a kawra hnah ro leh bal kai chu a bengfai mawlh mawlh bawk a, chutah Avisa lam rawn hawiin "I bialnu hian min thah a tum a nia..!" a ti heu mai.




Ka lam rawn hawiin min han melh rum ṭha em em lehnghal a. "Mawl ve maw...Ve..innnn" a ti tlak tlak a, "Tihpalh" ka lo ti zeuh laichuan midang ho chu an lo khi ṭha hlawm.



"Fimkhur ṭhin ta che...Ṭhin..innnn" a ti leh chiam a, min melh rum em vangin ka nui ngam tawh lo.




"I nat vak lo kha.." Avisan nui chunga a lu a zuk tuaisak zauh laichuan a ner nang a, "Tawmte hmawr de zawk khawpa kan Dive chu le" tih leh thawh a rual a, a kawng dawm a a kal kun ṭai ṭai chu kan en zui ṭhap hlawm a, a hma a an ṭhutkhawmna ah khan va ṭhuin zu a va inthlit karh karh a, "Zun ka cheh a ti" Sihde-an zawi te a a lo tih chuan an nui huk mai.




Kan thawm hriain a rawn lehhawi vut a, "Bialnu nei zawng haw vek se" a rawn ti kher a, Avisa khi sawng chu a rawn melh kher bawk a, "Duhaiin pahnihin kan tam tlat" a ti leh kher a, a uang nge a ti tak tak pawh ka hrethiam lo, midang chu an nui mai mai a kei erawh ka inthlahrung tak tak a ni.




A bula kan va ṭhutphei hnu chuan "Engvanga min beng ringawt nge i nih a, thikthu chhe reuh lutuk" a lo ti khur khur a, "Nangman min beng rawh i ti a anih kha" ka tih chuan a thil in ṭhulh meuhin min rawn thlek a.




"Min beng rawh chu ka ti lo deuh ang a" min chhuahchhal awka zet hian a rawn ti a, a tih dan chu ka ngei ve deuh tlat tawh, 'Min beng rawh' a tih vanga beng ka ni reng sia, inthiam lo viau mahila he thu ah kher hi chuan ka dik ve tlat.




"I tih vangin a nih kha ka ben che" ka ti ve ta tlat a, chutah phawk deuha Avisa en chungin "A va han kaw lo em em ve!" a ti leh hluai a, mai mai chuan a, a tukkhum phekah chuan ka beng leh dawn zawk a maw ni.




Dar 4 velah Avisa nen kan haw a, eirawng bawl ka ngaih vangin inthlak buai tawh lo chuan ka che zung zunga, ka pa pawh inah a awm tawh ngeiin ka ring, ei ka rel zawh veleh ah Sitting room ah ṭhuin ka pa chu ka Phone ta a, ka Phone call a lo chang reng emaw tih mai tur hian a rawn la rang a, a aw ka hriat takah chuan sawi tur a bar pawh ka hre tawh lo.




"Eirawng i bawl ve tawh em?" ka ti ringawt a, ka aw pawh a zawi ṭha khawp mai.




"Tukinah ka bawl a, ka ei seng lo deuh a hei; zanin tlai chu a ṭhing ka ring ang, chaw ka chhum mek a" a lo ti ve mai a, ka ngaihbel nge mawni a aw te chu zuai riau hian ka hria a, a khua a har viau anih ka ring bawk.




"Pa, Nu Matluangi chu enga timaw?" ka ti leh te te a, a chhan hre tawh mahila ka pa ka aṭang ngeia hriat chu ka duh, eng ro chungchang nge tih te pawh ka hre duh a, ka pa ngaihdan te chenin a niang chu.




"A...ngaih thutak vak tur a awm hran lo a nia, in rem lohna engemaw kan nei ringawt a lawm" a tih chuan ka ngawi ran a, a sawi dawt hreh leh tawh anih hmel e.




"Ni Tetein min lo hrilh alawm, engthil nge Rammuani tan a dil che a?" ka ti ta khauh a, chutia ka sawi takah chuan thawk a la hawk mai. "A...Falkland-a kan ram emaw ka Pension emaw hi a beisei a" a tih chuan ka lo ner nang ringawt.




"Tunah i la Pension bawk si lo, kum 5 lai Service i la nei a, engtin nge chungte a dil ngam zawk che a, Rammuani zirna leh mamawh dang danga i insen nasat tehlul nen" ka ti hlak hlak a, ka thinrim thar et et mai bawk.




"Kan ram saw chu i nu nen kan inneih hlima kan pawisa khawla kan lei a nia, kan duhthusam tam tak awmna a ni bawk a, tunah a hlutna a sang tawh a, saw kher saw chu i ta tur a nia, i nu thawh rim rah a ni bawk a, ka Pension hi chu nakinah i la mamawh ka ring a, tuman hma hun kan hre lo a, heng kan neih sa te hi chu zankhat thil thua ral vek thei an ni, dinhmun chhe bera kan din hun a awm palh thei tih thil thu ah ka rem ti lo anih kha.




Rammuani chu eizawnna tur dawr ka siam ang pawh ka ti reng maw le, amah pawh khan a pawiti lo a, a nu zawk kha a lungawi thei ngang si lo a" a ti charh charh a, ka pa thilsawi chuan ka hnuk a ti ulh lek lek a ni.




A chunga ngaihdan ka lo neih te leh amah ka huatna vanga ka thinlung ka tihsak tlat tawh kha; a rawn ti nem leh chiang khawp mai, 'Tui aiin thisen a chak zawk' tih thu kha ka rilru ah a rawn awm a, a hlimna tur a um vanga min ngaihthah tu ni a ka ngaih ngei khan a hlimna kalsanin min thlang zawk a, kei hian ka hlimna kalsanin ka thlang ve thei angem tih chu a ni ka buaina ni ta chu.




"Pa, ka lo haw i duh a mi?" ka aw chu a zawi hle tawh.



"A...Bawihi.." a ngawih vung vung hnuah "Lo haw la ka ti deuh a, i hreh lem loh chuan" a ti fan ta raih a, chhan mai dan tur ka hre leh ta pek lo.




"Ka zirlai hi engtin nge ni ang, a laklawh e, insawn leh chi pawh a ni tawh si lo.." ka ti niah niah a.




"A ni khawp mai, i laklawh ve bawk si a" a ti ve hap a, ngaihdan mumal a nei bik chiah lo anih hmel e.




"Pa, tun kum chu ka tluan phawt anga, kum thar lamah khata ṭangin ka kal mai anga kartawp velah ka lo haw ṭhin anga" ti a ka rawtna chu min chhang fum fe thei meuh lo.




A inngaihtuah vung vung hnuah "Lehkha zir hi i duh viau a mi, eizawnna dang te i duh zawk lo a mi?" a rawn ti khauh a, haw tur in min duh hle tih chu a chiang khat viau tawh.



"Kum khat chiah ka ngai tawh sia, thla tharah External exam ka nei dawn bawk a" ka ti zuai raih ringawt.



"Ni e, kumin chu han tluan phawt la mah se, Christmas hmang turin lo haw la, kum thar lam chu kan ngaihtuah ṭha leh dawn nia" a tih takah chuan ka thaw huai mai, min ko haw chuk chuk ang tih mawlh kha ania ka hlauh ni, tun tut tut a haw tur chuan ka inpeih lo takzet a, kum thar lama ka awmdan tur chu tha tharin ka sawipui leh anga; zirzawm leh dan kawng a awm leh mai turah ka ngai bawk.




Zanriah eilaiin ka chhungte chu ka hrilh a, "Haw mahla pawi ka ti lo, ka ui viau na chein helaia i awm hi a ṭha lo tlat, i pa a ngaihtuah awm bawk" Nutein a ti hmiah mai a, Pa Ruata erawhin sawi vak a nei ve lo. "I pa chu a khua a har dawn anih chu, kum upat lama mahni a chen chu a hrehawm viau ang" a ti niah niah a, Nutein haw tura min duh chhan chu ka hre thiam ruak bawk a, Avisa nena kan chung chang vang a nih mai hmel.




Avisa hnenah engmah ka la sawi ve lo a, kum thar lam daih anih dawn vangin Christmas chawlha ka haw dawnah ka hrilh chauh ang tiin rilru ka siam bawk.




November thla tirah Zorema a lo haw a, ka rinai daihin a zia a; an in a kan zuk len thlak pawhin a lo tho chhuak peih a, a cher deuh e tih loh ah chuan danglamna a nei lo niin ka hria.




Ka Ni nena kan inbiak leh chuan ka haw nghal lo chu min lo hau titih a, "I pa i ngaihsak lo emai, amaha awmtir aichuan hetah lo chhuk mai sela a ṭha anga, a damṭha em; thil a ei ṭha em tih pawh hriat loh" a rawn ti hlak hlak a, ka pa chuan hna a nei a khawiah mah a awm sawn thei lo tih chu kan hre ve ve tho a, min hauh nana rawn sawi a ni ber.




"Kumtawpa i haw hunah chuan awmpui chawt la, hmun dangah awm sawn tawh lo ang che" a tih erawh ka chhang lem lo. 'Aw' ka pawh lo nain ka rilru a buai ru hle thung.




External exam turin kan inbuatsaih a pawnlamah ka chhuak ngai meuh lo, Class kan kal tawp niah Zorema te inah kan leng khawm a, Zorema thla hualna an tia Ar an kang a, chawhnu pumin kan leng khawm a, mipa hoin Carrom Board an pen a an ri dar dar reng a, ka hawsan hun a hnaih vang nge an zinga awm chu ka am ve hle a, min sawmna pawh ka hnar phal meuh lo chu a ni e.




Exam chhung chuan Henry nen kan inzui leh chawt tawh a, kan zirlai pawh kan endun nasa a, kal lam leh haw lam pawh kan inthurual zel a, Avisa pawn min hrethiam khawp mai. Henry nen lehkha kan zir nasat em em laiin Lalchhuansanga chu a mu tluk tluk thunga, a pa lah chuan "Question a Copy dawn a niang" a ti sam mai a, 'Zir ṭha rawh' tih chu hnai lo tak a ni.




"Henry, Avisa te insawn hunah zui i tum em?" ti a ka zawh chuan a thil ziah lai chawlin min lo en a, "Zui lo ang, Avisa pi te inah ka awm rih anga, ka zir zawh hunah Aizawlah ka awm tawh ang" a ti sam mai a, chuti anih chuan Avis pawh a awm ve mai ka ring ta deuh.




Zana kan inbiak chuan Lalchhuansanga chu ka zawt veleh a, "Ka lo ngaihtuah ve mek a, nang i la awm dawn sia, awm ve pawh pawi ka ti lo" a lo ti ve mai a, ka rilru a buai leh ta, ka awm lo maithei si a.




"Kum tirah i Graduate tawh dawn sia, i zir zawh ah engtin nge i awm dawn?" ka ti leh zel a, kei hi awm ringawt pawh ni ila kan inṭhen hran tho tho chu a ngai dawnin ka hria.



"Ka lo nghak dawn che nia" a ti sam leh mai a, eng ti turin nge maw min nghah dawn le?




"Sawi chiang la" ka tih laiin "I zawh hunah Aizawlah i awm dawn em?" a lo ti khauh a, "Chu tak chu a nia, Aizawla ka awm hunah nang engtin nge ni ang, kan inhlat viau tawh awm si a, Henry chu a haw dawn a, nang pawh Aizawlah rawn awm ve mai la" ka ti sap sap a, a in ngaihtuah nge ni a ngawi vung vung thung.




"Pa Zara hi amaha awm tir reng chi a ni lo ang, ka tel loin a nung thei lo a" a rawn nui kur kur a, fiamthu angin sawi mah se, chhanna chu min pe chiang khawp mai, a pa zui a tum tih na, kei ang lo takin a pa kianga awm ani chuan a duh.



"I pa tel loin i awm thei lo zawk aniang a?" ka tih leh chuan "Umm" tih zawngin min chhang.



"Kan van inhlat tawh dawn ve aw" ka ti leh hap a.



"Lungngai suh, tih dan a awm mai ang" a ti liampuat a, a ngai awlsam bik ṭhin khawp mai.




December thla tirah Exam kan zo a, zanah Nunuin min lo Phone a min hruai turin ka pa rualin a lo kal ve dawn a ni awm e, "I pa in min lo sawm a, ka phur tawh rapthlak" a rawn ti chul a, Nunui ka ngai tawh viau nain ka huphurh ru ṭeuh thung, kal lam khan ka hreh em em a, ka let leh dawn takah chuan ahma a ka huphurhna kha chu engmah tham a lo ni lo.




Zana ka mu chu ka Room bang kik ri ah ka harh hlawl a, parda ka va keu chuan Avisan a Phone a lo vai eng zauh zauh a, tukverh ka hawn rual chuan ka biangah rawn dawmin min lo fawp nghal chawt a, zu rim a nam huam mai!




A hmel ka en chian nak chuan a lo vual sen leh ṭul tawh. "Enga ti leh pek nge?" ka ngei tak tak a ni, a in thei lo tih a inhre ve reng sia.




"Ka Cold drinks in turah an lo pawlh a, ka hre lo a lawm" a ti sam mai a, a rim nam tur khawp chuan a in tam hle ang chu, "I rim hriatna a ṭhat em kha, hrereng chungin i in aniang?" ka ti hram a.




"Hre tho, a buaithlak tawh a" tih pahin a nui heu a, engah nge maw zu a in thei lo tih hi a zep tlat le.




"Damdawiin kal i ngai lo a mi?" ka tih chuan a lu a thing vut a, "Engmah tham a ni lo" a ti leh mai a, chuti chung chuan a in hiat ang sawt sawt a, a tih ngaihna tak pawh ka hre tawh lo. Nutei a rawn khuh kharh kharh takah chuan "Kal vat rawh" tih leh nam sawn ka ruala, ka inkalh ṭha sawk sawk bawk a, zingah min hau leh ngei ngei dawnin ka hria.




Mahse, zingah chuan engmah a sawi miah lo, tukṭhuan eilaiin "Engtikah nge i pa chuan a lo hruai dawn che?" tiin min zawt a, kartawpa an lo kal tur thu ka hrilh ve mai bawk.




Kartluanin Nutei nen dawr kan nghak dun a, Avisa nen inhmuhna hun remchang kan nei meuh lo, zan lamah lah hian Nutei chhang siam zir hi a meng rei ṭhin lutuka, dar 2 dawnah te a mu chauh zel a, kei aimah chuan Avisan a ning zawk in ka hria.




An ṭhian ho chu Zorema te inlamah an tap chawt hlawm a, zan reia a lo haw hian min hmuh hi a duh ṭhin a, Nutei a lo la men vangin kan inhmu thei lo leh zel a, lo len a tum lahin ka phal lo emaw a ni zel bawk a, hun kan nei dun khat ta khawp mai; Mahse, in hmu thei lo ta nafam chu Phone hmangin kan inbiak nasat phah a, thil ho te te sawi pawhin rei deuh deuh kan inbia a, kawng lehlamah chuan kan inpawh phah ve hlauh thung.




Kar tawpah Nunui leh Ka pa chu an lo kal ta ngei a, chumi ni chuan khua a dur a, chhum a zing nasa hle bawk, zan khat an riak anga a tuk zinga haw mai tawh tur kan ni, ka pa chu ka Pi te inah a innghat a, Nunui kan hnenah a rawn thleng thunga, ka pi leh pu pawhin ka pa chu an lo lawm thiam leh khawp mai, nupui dang a neih dawn khan ka pa khan a râwn thlap a, an pawmpui na nen thlapa nei pawh a ni nghe nghe a, an makpa ang niloin an fapa ang takin an en ve bawk.




Ka pa chuan thawmhnaw lum leh chawhmeh eng ilo a lo ken sak ṭeuh a, ka puin sarep tih angreng a lo zawn khawm sak ve bawk a, an induhsak theihna ang angah hian an inlawm tawn a, ka nu awmloh hnu hian an inlaichinna hi a ṭha zual sauh zawk emaw tih tur a ni.




Buaina pakhat ka nei a; chu chu Avisa engmah ka la hrilh lo, hrilh ka tum a, engemaw vangin ka ṭhulh leh ṭhin a, tun ang hun tep ter lutuk tawhah hrilh ngei ngei ka ngai ta chu a nia, lo lawm lo viau pawh ni se ka dem thei hauh lo ang.




"Zanah Henry nen lo leng rawh u" ka ti ta ngawt a, a tukah kan haw tawh mai dawn avangin Nutei pawn sawisel a nei bik lo turah ka ngai a ni.




Chutia ka sawm chu a phur khawp mai, Vengthlangah an riah ṭhin vangin kan vengah an awm tlem lai a ni a, leng tur ringawtin an lo chho dawn anih hmel, Nunui lah chu Henry-a a lo kal dawn tih a hria a; zanriah eikham aṭang tawhin darthlalang hmaah a ding sek reng a, a sam pawh a khuih ṭha zing malh malh viau tawh.




"In khua hi a vawt emai" tih pahin Lip gloss a inhnawih mawlh mawlh a, "I nalh lutuk" ka lo tih chuan a lei a chhuah tat ringawt.




Pawn lam ka va en chuan chhum a zing chhah hle a, Bike tlan thawn hriat tur a la awm lo, Nutein Pancake zawrh tur a siam a, a siam zawh a piang chu pahnih te tein ka lo Pack zel a, Nunuin a kan leh tur a lo chawhsak thung a, Pa Ruata erawh zan tirah kohhran mipa pawl hla zirna ah a kal daih bawk.




Dar 8 rik dawn ṭep ah Bike lo tlan chho thawm kan hria a, Nunui nen kan inmelh ralh ralh mai. Mahse, Bike ri chu pahnih khat mai a ni lo, tu tu te emaw chu an lo tleh chho huk dawn anih hmel!




Rin ang ngei ngeiin Thawvengers ho chu a hmei a pain an rawn lang ṭak ṭak a, "Hei, Zawhte ka rawn man, bel lian deuhah pum chhum ang aw" Bete-an a rawn ti lut lang lang a, an rawn phul hlut a ni ber.



"Thulphenthangi law?" tih zauh pahin Avis-an min rawn kalpel a, "LalMan.." tih pahin Nunui a lo khi ṭha thung.




"Eng nge in tih dawn?" Nutein a lo tih chuan ka chhan hmain "Kan lo rim che..." Chhanchhuaha bawk chuan a lo ti leh a, Nutei chu a nui ṭha duh vak lo. Avisa leh Henry chu Sitting room-ah an ṭhu phei a, hmeichhe ho erawhin kan thiltih laichu min lo ṭhutchilhin min lo Pack pui a, Nutei leh Nunui an lo hawi â heu reng bawk.




Mipa ho chuan Tv-ah inkhel an en a, an titi barh barh a, Zorema pawh a ṭawngtui khawp mai, hmeichhe ho lah chuan Nutei chu leisak an lo dil ve mek bawk a, Nutei pawh a phur ve ta deuh chuan ka hria. Zobuaiin za man lai a leisak a, mipa ho bulah kala a va tem tir chuan Sunday thingpui hmeh atan an tia an rawn duh ve sup sup a, zaruk man chu karloh ah kan hralh chu a ni der a, Avisan zahnih man lei a, engatan a ti chu ni maw?




Vanneihthlak takin Nutei a nui var var thei tawh a, kei ka lo thaw huai huai thung, hmeichhe ho lah chuan phur deuhin an lo tih pui sauh sauh a, titi a kal ta viau mai bawk. Nunui chu Henry-a lam a hawi leh zauh ṭhin a, Henry-a erawhin a Phone ngawt a bih a, Games a khel leh tawh anih ka ring.




Rei an ṭhu hman lo Sitting room lamah chuan an thawm huk, ka va hawi rual chuan mipa na tuar niawm taka rum ri ka hre zui a, tudang niloin Zorema a ni!




Kan tlan phei rawk rawk a, a ṭhiante lah chu an chiai a tih vak ngaihna an hre hlawm lo. Avisan a pawm bet chawt ringawt a, Zorema lah chu khawng vek e tiloin a khur che dawt dawt a, a chil phuan a tla buah buah bawk nen a awmdan chuan min ṭhawng hle ringawt!




"A phungzawl em ni, enga tinge hetia a awm a?" Nutein a tih chuan "Phungzawl lo" Betean a lo ti vin hlur a, chutih laia Zorema rum ri chu rapthlak zawk tak a ni.




"Chapal seh tir rawh u" Nutein a lo tih leh chuan Chhanchhuahan a lo melh rum khawp mai, "Sihde.." Avisan a tih takah chuan hmanhmawh deuhin Saidingpuia a tlan chhuak a, midangin Zorema chu an zawn chhuak nghal bawk a, Damdawiinah an hruai dawn anih hmel e, Saidingpuia Motor-ah an in hlang lut a, an tlan liam dawn thleng chuan kawtah Nunui nen kan dinga, tum ang reng rengin engmah a tih leh theih ta loh, ka haw tur thu pawh Phone hmanga ka hrilh mai angai dawn anih hmel.




"Enge a awmzia le?" Nunuin a tih chuan chhan dan a vang khawp mai, a Accident vang kha ti dawn ila khami hliam kha chu a dam tawh niin ka hre bawk si a.




"A awmdan kha chu Phungzawl awmdan anih kha, a chil phuan te a tlak kha" Nutein a tih chuan ka tha a lo na ve deuh a, Phungzawl tih sak chu ka phal hauh lo, mi pangngai tak leh tlangval thothang ṭha tak a ni a, Phungzawl anih chu ka ring lo hulhual a ni.




Minute sawmhnih vel hnuah Avis-an min lo Phone-a "Damdawiinah kan awm a, a zia deuh tawh e, an Admit bawk si a, kan lo let tawh lo mai ang" inthlahrung deuh hian a lo ti a, tun hi sawina hun ṭha ni lo mah se, ka sawi ngei chu a ngai.




"Thil hrilh tur che ka nei a, i thinrim viau mai thei" ka tih chuan "Engtikah maw haw i tum?" a lo ti khauh a, engmah ka la sawi hman tawp si lo!




"Engtin nge ka haw dawn tih i hriat a?" ka ti hluai a.



"Thuli kha a lo kal sia" a ti leh mai a, a lo ring thiam ve nghal mai anih hmel e.



"Ka pa pawh a lo kal a lawm, ka pi te inah a thlenga, naktukah kan haw nghal a ngai dawn a" inthlahrung ru taka ka tih chuan min chhang ta hauh lo, a lungawi lo ngei dawn anih hi ka ti rilru a.




"Hrilh hmasa tur che chu ka nia, keipawn ka hre lawk bik lo a" tiin dawt ka sawi ta ringawt a, ka inthiam lo hluah hluah ringawt tawh.




"Dar engzatah nge in chhuah ang?" a rawn ti ta daih a, a aw pawh a zangkhai viau mai, lungawi lo aw ri ka hre miah lo bawk.



"Zingkara chhuah an tia" ka ti zawi sep a, kan inhmuh hman ka ring tawh lo.



"Ka tho hman dawn lo anih chu, tluang deuhin kal ula, i lo haw leh vat dawn nia aw, ka ngai dawn hle mai che" a rawn tih takah chuan ka thaw huai huai mai. "Keipawn ka ngai ngawt ang che" ka ti ve ta vat a.




"Engtikah nge i lo haw ang?" a rawn ti leh a, 'Haw' ti a a sawi zel chuan engtin emaw hian min hneh riau bawk.



"Min ngaihdan a zirin a ni mai" ka ti uang ve ngat a, a nui suk ri ka hre zui a, chutah "I tum aia hmain i lo haw a ngai dawn anih chu" a rawn ti let a, midangin an lo koh tak vangin kan inbiakna kan ti tawp thuai a, ka beisei aia ṭha a min thlah vang chuan ka zangkhai vawkin a nia ka hriat nghe nghe ni.




Dar 11 velah kan mu chauh a, khumah Nunui nen kan titi a, Henry-a hmelṭha a tih thu chu hahipin a sawi a, "Ka sawipui dawn che nia" ka tih chuan a riat nawi a; mahse, a phur ru hle tih chu ka hre ru reng thung. Avis-a Message ka dawng a, a thui lo; mahse, ka hnuk a ti ulh lek lek mai.




"Cham hlen lo la, lo haw leh la, awm reng lo la, lo kir leh la, bo daih lo la, lo let leh la, hetah ka lo nghak reng dawn che nia..zinkawng zawh nuam le Chhingchhengte" tiin.




Zingkar hma takah thoin Aizawl lampan chuan kan chhuak a, khaw chhung kan tlan pelh dawn te chuan ka ruak ngawih ngawihin ka hria, let leh tawh lo tur ang mai hian chhungrilah min fan tu a awm a, Motor darthlalang chu tihniamin ka dak chhuak leh rih ṭhin.




Khawpawn a chawlhna inte Avisa te Spot kan thlen phei chuan ka mittui a lo hnam a, hmana zan thim hnuaia ka bo ṭuma min rawn zawh hmuh laite kha mitthla ah a rawn lang thar a, engkim....engkim mai tak tak chu a rawn thar leh niin ka hria.



Engpawh nise ka let leh dawn a lawm, cham hlen tur pawh ka ni hleinem tiin ka insehruh a; mahse...he thu hi chu ka haw ngawt mai.



Chawhnu lamah Aizawl kan lut a, Nunuin chaw a lo einghal dawn vangin tlaiah kan va Bazara, khawpui chhung boruak rit churh leh mipui zi hut hut te chuan ka thaw an ti ipik tet tet mai a, ka hah hlui ringawt mai a ni.




Kum dangah chuan Christmas dawn a Bazar hi nuam ka ti ṭhin a, No Vehicle Zone an siam ni ah ngei hian kan leng chhuak ṭhin anih kha, mah se, ṭum dang ang kha a ni thei tawh tlat lo, boruak chu a uap a; min delh rit churh ni ber hian ka hria a, hawina lam a piangah kim lo thil awmin ka hre bawk.




Zana Avis-a nen kan inbiak chuan ka ngai khawp mai, ka hnuk a ulh ṭeuh reng a, ani pawh a lung a leng ve a niang a ṭawng zawi hle a, ka haw hun tur min zawt sek reng bawk.




"Kum thar veleh ah ka lo haw ang" tiin a zawhna chu ka chhang a, "Kum tharah Pa Zara insawnna tur tifela zin lawk ka ngai dawn a, chu mi hma chuan lo haw rawh" tiin min lo chah ve thuai a, a pa ruala insawn a tum loh thu sawi tawh mah se, ngaih a ngam tak tak thei lo, kal ve leh thut thei reng a ni, a pa a ngaihtuah ve miau a.




Chistmas inrinni ah ka pa nen bazar kan tum vangin zing hma takah ka tho a, eirawng ka bawl mawlh mawlh laiin ka Ni in min lo Phone a, "I pa eng nge a an?" a rawn tih chuan a ṭhat thu leh a la thawh loh thuin ka lo chhang a, tunlai chu ka pa a rawn ngaihsak thar riauin ka hria!




"Engtik aṭangin nge Chemo a khai dawn?" a rawn tih leh chuan min ti bang bo hle ringawt!



"Chemo a?" ka ti he haw a.



"Aw...a la hrilh leh pek na che nge" a rawn ti nghal hlur a, chhan mai ngaihna pawh ka hre lo.




"I pa kha a thin a Cancer a nih kha, Chemo khai vat angai ang, tinge tun thleng thlenga i la hriatpui loh, i pa pawh hi ngawi thei leh lutuk mai, lo inngaihsak viau rawh u, keini helamah kan awm daih bawk si a, theih phei sela chuan helamah inenkawl turin rawn chhuk thla nghe nghe ula ka duh a nia" a ti hlak hlak a, engmah ka sawi thei tawh lo, ka awm chhung chu a rawn tawt up up a; ka mit aṭangin mittui a luang zung zung bawk.




Phone chu dah lawkin ka pa Room lam ka pan a, a mutna bulah chuan bawk thlawpin rawl chhuah meuhin ka va ṭap hawm hawm a, insum thei ziazâng ka ni lo, ka rilru a na vawng vawng em a ni.




"Engti zia nge ni?" tih paha min rawn kaihthawh a tum laichuan ka lo ban sawk sawk a, a kawngah pawmin a dulah chuan hmai ka phum a, a zawhna pawh chhang hleithei loin ka ṭap uar sauh sauh thung.




"Tinge... i dam loh a, tinge... min thihsan.. i tum?" ka khur nasa lutuka ka ṭawng chhuak hleithei meuh lo. Ka hnungah chuan a rawn beng thuk thuk a, "Bang rawh le, nula i nih tawh kha" a ti bul bul a, a aw ri te thleng chuan min ti hrehawm a ni.




Kei fanu laktlakloh lutuk hian a bula awm pawh thlahlel loin pehhel dan ngawt ka lo zawng a, chân mai thei dinhmuna ka dinlai lehnghal hian maw...




"Min ngaidam rawh aw...ka ngaih sak lo che a..." ka ti lawi rat a, ka ṭawng tawp lam phei chu ka ri chhuak meuh tawh lo.



"Khai khai...ṭap tawh suh, i thiam loh engmah a awm hleinem" tih pah a ka sam a rawn chul lai chuan ka mit sulh sulhin ka hria! Ka ṭap ri thei lo a, ka awm a insep dawrh dawrh thung. Rei deuh chu ka pa malchungah chuan muin ka thaw hle hle ringawt a, a thu min hrilh te pawh chu ka hre mang meuh lo.




Bazar tur pawh chuan chhuak tawhloin inah kan awmdun chawrh chawrh a, biangah mittui a luang deuh reng a; lu a rit luk mai bawk. TV hma a a muthlu lup lup chu ka en leh ngawih ngawih ṭhin a, ka lung hi a van awilo tehlul em.




Tlaiah ka Ni nen kan inbe leh a, "I pa kha lo sawipui la, helamah Doctor thiam deuh deuh an tam a, hetah inenkawl turin lo chhuk mai ula, in pafa ringawt chuan inngaihtuah awm emai, a na a zual hunah phei chuan i tlin dawn miah lo a nia, hetah keini nufa ho nen kan inenkawl ṭha thei zawk ang, i pa khan i zái a ngai ve bawk si a, nachang hrelo chi anih bawk kha; nangmah zawk khan lo bengvar zel rawh" a rawn ti dap dap a.




Kei hi inngaihtuah lungpuam hman ka ni lo, chhungpuinu ka nih angin mawhphurhna ka ngah lutuk, tunah chuan thil pawimawh emaw rokhawlhna dang engmah ka nei tur a ni lo, ka zirlai emaw ngaihzawng pawh tiamin, a pawimawh hmasa ber chu ka pa a ni. Mahse....'Mahse' tih thu hi ka haw ngawih ngawih...




Zanriah eilaiin ka pa chu ka ni nen kan inbiakna ka sawipui a, "I tih dan dan a ni mai, i awm ve dawn chuan ka hreh hran lo" tiin min lo chhang a, a hna lamah chawlh harsatna a awm lo a, a Damdawi bill phei chu sawrkar tum tur a ni nghe nghe, engmah harsatna a awm lo...kal turin harsatna kan nei lo, chu thu chuan min van hnem chuang si lo ve maw le!




Ka Phone a rawn ri a, Avis-a Call a ni. A hnenah eng nge ka sawi tak ang, ka haw tawh dawn loh thu ka hrilh dawn em ni, nge ni a Mizoram ka chhuahsan tur thu hi ka hrilh zawk dawn?








(END OF CHAPTER - 28)

Link:
BBcode:
HTML:
Hide post links
Show post links

Ngaia
Site Admin
Posts: 19502
Joined: April 30th, 2016, 4:07 pm

Unread post by Ngaia » October 24th, 2021, 3:54 pm

CHAPTER - 29




Phone ka lak rual chuan thawm a ri mam mam a, an ṭhian ho an awm khawm leh tawh anih ka ring, "Zorema te inah kan awm a, zanina kan eitur Ar kan puah a" a lo ti zung zung a, Lalchhanchhuaha ṭawng ri lang lang pawh ka hre pha a, a nui ring ṭhin khawp mai.




"A va nuam dawn ve aw, ka van tel ve chak ve" ka lo ti ve mai a, engtin nge ka hrilh ang tih ngawt chuan min mawlh reng tawh, ka ngaihtuah laimekin "Kum thar chu lo hman tum la, kum hlui thlah zanah.." a sawilai chuan ka lo pawt chat a "Ka theih pawh ka ring lo" ka ti tawl a, ka ti hamhaih deuh nge ni a ngawi zui vung vung a, sawitlang vek law law chu ṭhain ka hria.




"Ka pa a dam lo a" ka ti zuai ta raih a.



"A va zia lo ve, a enge na a?" a aw ah chuan lawm lo awki a lang lo.



"A lo Cancer reng a, vawiinah ka hre ve chiah" ka sawi zawng chuan ka hnuk a ulh ṭeuh mai, ṭah hmuam ru ṭunin ka inpet ruh a, ka mittui a hnam leh ringawt tawh.




"A van pawi ve aw" a ti vang vang a, sawi mai tur hre loin engemaw chen chu kan ngawi dun a, chumi hnuah "I awmdan tur a va buaithlak tawh awm ve?" a rawn ti khauh a, ka sawi ngailoin a lo ngaihtuah thleng leh vek a nih hmel.




"Ka zir zawm tawh rih lo mai ang, hmun danga awmsan thei ka ni si lo a, tunah hian kan pahnih chiahin kan cheng bawk si a" tiin ka pa leh a nupui inṭhen thu te chu ka hrilh ve luam a, a rilru a buai ve hle niin ka hria.




"Lo inti chak hram hram la, keichu min veng thawng duh suh, Aizawlah chuan ka lo kal fo dawn a lawm" a rawn tih chuan thawk ka la hluai ringawt a, Delhi a kan awm tur thu ka la hrilh tlat lo.




"Hetah kan awm lo ang, inenkawl turin phaiah kan kal dawn a, engemaw chen chu kan awm rih dawn a, ka awm hun chhung tur pawh ka sawi lawk thei lo, a kum a kum pawh a ni maithei" ka ti duah a, engtin tak lo ngai ang maw?



"Phai in pan theih chuan a ṭha lutuk a lawm, mi pawn an Survive thei a; i pa pawn a thei ngei ngei ang, inti lungngai reng reng suh" a rawn tih chuan ka beisei loh lam daih a ni.




"I ṭap em ni?" a rawn ti leh a, ka mittui luang chu ka hru hul nghal sawk sawk a, "Ṭap lo e" ka ti tak nain ka hnar a ping ṭup a, ka aw ah lah hai theih a ni hek lo. "In ti lum ṭha rawh i hritlang a nih kha" amah ngei pawh chuan ka hritlan vang a nilo tih a hriatthiam mai ka ring.




"Kum thar veleh ah kan kal ka ring a, kan inhmu leh har tawh viau maithei a ni..." ka aw chu a lawi khawp mai. Mahse, ka beiseiloh deuh bawkin min lo chhang leh a, "In kal hmain lo hmuh che ka lo tum dawn nia" tiin.




"Hetah i lo kal dawn maw?" ka ti leh thuai a, a ti tak tak em ka la chiang ngam zan lo.




"Aw, in kal ni tur lo sawi chiang la, Airport thleng thlah che pawh ka lo tum ve ang" a tih leh lek phei chuan ka hnuk a ulh lek lek zawk. "Ka ngai dawn lutuk che, ka awm loh hlanin engtin nge i lo awm ang.." ka ngaihtuah zawng ringawt pawhin ka rilru a hah a ni, ral aṭangin kan inkar kaltluang tak hi hetiang reng hi a ni thei angem ka chiang ngam si lo a, amah ka rin loh vang ni hauh loin engthil ah mah hian rinna ka nghat ngam lo a ni zawk mah awm e.




"Chulam ngaihtuah hah duh suh, kan inbe ziah thei dawn a, chanchin kan inhrilh zel dawn a lawm" a ti mai a, a tan hi chuan thil hi a awlsam bik riauin ka hre ṭhin.




"Min ngai ve vak lo ang a nang chuan" ka tih chuan a nui suk mai, "Enge i ngaihtuah kha ka hria a nia, khatiang zawng khan ngaihtuah lo la, kan awmdun loh vangin engmah a danglam dawn hleinem, i lo haw leh hunah chuan Aizawlah khan ka lo nghak hman tawh maithei che a ni" a ti a, a aw chu a ring lo mahse, hriatnuam tak zawng a ni.




"Min lo nghak reng rawh aw, rilru dang lo pu lo la, ka lo haw leh vat dawn a nia" ka tih chuan "I duh chen chen ka nghak ang che" a lo ti var a, kan inbiak dan chu zangkhai tak angin lang mah se, engthil emaw min mawlhtu a awm a, chu chuan min ti hrehawm tak zet bawk, ka awm ang tho hian ani pawh a awm ve tih ka hria.




Ka pa thawm ka hriat vangin ka lehhawi vat a, ka hnung maia Filter a tui chu dawhin ka lam a lo hawi a, engtik laiin nge choka ah a lo luh reng ka hre lo. "In urlawk boruak ka lo ti chhe palh ang duhtawk rih ang aw" ka ti ta ngawt a, Phone dah mai ka tum laichuan "Chhingchhengte" a lo ti vangin ka vuan leh rih a.




"I lamah ka ṭang aw" a rawn ti a, eng a sawi tumna nge ka hre chiah lo nain chu thu chuan min ti hahdam huai huai thung. Ka rinai takin min lo dawngsawng thiam a, kan inbiak zawh te chuan ka awm a ti nuam ve huai mai a, hmabak ko viau e ti lo chuan beiseina thar min pe a ni ber ang chu.



"I ṭhiante i bia a mi?" ka pa in a lo tih chuan ka bu nghat a, dawhkan kila a ṭhu chu ka va pawh ve thuai bawk.




"I hreh em lo maw?" a bula ka va ṭhut laichuan a lo ti leh a, a inthlahrung deuh riauin ka hria. "Hreh lo e, kei te chu ka awmna apiangah ka tui mai zel a lawm" pangngai thei ang berin ka ti a, a bulah hian ka inthup ve hram hram a ngai, min vengthawng bawk si a, a awm ka ti nuam lo zo takngial dawnin ka hria.




"I Pitei khan khilamah bialpa i nei a tia..?" zawhna mitmeng hian min rawn melh a, ka lo nui tawi tak ringawt.



"I hrilh ve tawh em?" a rawn ti leh a.



"Hrilh tawh e" ka ti mai a, min chhang zui tawh lem lo.



"Engtikah nge kan kal ang, Ticket te tihfel a ngai dawn a, ka Ni khan a hma thei ang berin a ti sia" ka tih chuan a lu a thing mat mat a, "I duh hun hunah a ni mai" a ti zawi sup a.



"Kum thar veleh ah aw, Treatment lak hma a ngai dawn a" ka tih chuan min hnial lo a, mu tura inchung lam a pan hnuah ka Ni chu ka bia a, kum thar veleh a chhuk kan tum thu chu ka hrilh bawk. "A hma thei ang ber kha a ṭha, helamah a ṭul tur ho chu ka lo buaipui vek ang" a lo ti zung zung a, chutia kan kal hun tur kan rel fel tak si ah chuan Ticket pawh a ranglama ka buaipui a ngai dawn a, Nunuin tih dan tur a hriat mai ka ring.




Dar 9 velah Nunui te unau an lo thleng a, Ar kan hem hmin ve a, kan chhungkaw boruak vang chuan kan ngui nghiai hlawm a, kawn chei en tur takngial pawhin kan chhuak peih hlawm lo.




"Man-a chuan engtin nge a lo chhan che, inṭhen a rawt ve em lo maw?" fiamthu titak deuh hian min zawt a, "Tluanga ang a ni hleinem, min hrethiam lutuk, kan kal dawnah min lo thlah a tum bawk a" tiin kan inbiak dan chu ka hrilh a, "A va fel ve; mahse, inhmuh loh rei chuan mipa hi chu an danglam chak em a ring bur lo rawh, thil chhe ber thleng tur hian inring ila, kan na lo zawk" a ti sap sap a, ngaihtuah a ti thui khawp mai.




Zanrei deuh ah Avisa nen kan in be leh a, a aw ah chuan ruih a nei tih ka hre thuai a, a ṭhian dangte an lo inrawlh leh ṭhin vangin kan in be mumal thei meuh lo, Henry-a min lo biak tir a, rei deuh Henry nen chuan kan inbia a, a thiam ang tawkin min rawn hnem ve bawk a, Avisa ruala lo kal a tum a nih hmel e.




"Ani chu ngaihtuah duh suh, ka awm a lawm" a tih chuan ka nui tawi tak ringawt, "I lo veng chawt dawn nia, insualna ah te khan a lo tel leh a nge, nang chu ka lam ṭang i nih kha, chanchin min lo hrilh zel ka phut tlat a nia" ka ti ve luam a.




Kan inbiak laichuan Guiter an perh a 'Kumpui sul a lo vei chang hian' tih hla sain an zai ṭhap ṭhap a, an zinga tel ve pawh chu chakawm tak a ni. "Avisa chuan a ngai viau ang che, mi lungleng thei deuh mai a nia, zanin chu hei hmun danga lenchhuah pawh an ti lo aniang, Zorema te inah Sikri kan ai a; kan awm kim ṭhap mai" a tih phei chuan mitthlain chhum zinna khua a chhui a, Zorema te Veranda zau puiah Sikri ai paha an zai tur chu a hmuna awm ve ang maiin ka mitthla thei.




"Ka lo bia ang" tih ri ka hriat leh hnu lawkah Avis-an Phone chu a lo chhang a, "In hmang nuam em?" ka lo ti var a, "Awm ve la a nuam chauh ang" tih zawng chuan min lo chhang a, tunah hian an bula awm ve ka chak zia hre ngat sela chuan a sawibuai duh lo zawk ang maw le.



"Zorema eng nge a an?" ka ti ta daih a.



"A kaih zeuh zeuh a, a Nerve a chiang lo, chet harsa a ti sawt riau a, kum thar hmain in Checkup turin an lo kal dawn" sawipui chiam ngaihna ka hre lo "A van pawi ve" tih ngawt bak chu.




Nunui te unau an lo riaka, eng em em ti lo chuan ka tlaivar chu a ni thawthang a, Avisa nen a khat tawkin kan inbe reng bawk a, Zorema te in bak hmun dangah an kal lo a nih hmel a, rilru a lo nuam ve em em ringawt.




Christmas leh kum thar inkarah Nunui nen Air Ticket ka va tifel a, January ni 8 chu kan kal hun tur a ni, Avisa pawh ka han hrilh a, min thlah tura lo kal ngei a la tum ruh ve hle bawk.




Kum thar nan ni hnih a la awm ti ah ka pa chuan tukṭhuan kan eilaiin beisei loh lam daih thil min zawt a, "I Nu te khua ah kumthar kan han hmang chho dawn em niang?" a ti hlauh mai a, ka aw rang kher a sin, ka phur lutuka chaw ka ei hleithei tawh der lo.




Ka thleng thawhsanin Sitting room lam ka pan nal nal a, Avis-a ka Call hmasa ber a, a la tho lo nge ni Phone a la thei ṭhak lo mai a, Henry-a zawk ka Call chuan min lo chhang rang hle thung a, rin ang ngeiin Avisa chu a la tho lo a ni awm e.




"Ka pa nen kum thar hmang turin kan lo chho dawn a, chhum a zing nasa em, kawrlum ken hnem a ngai em?" tiin ṭullo pui ka han zawt nghal luam a, a nuih ka ti za lek lek in ka hria. "A hriat hunah chuan a phur ngawt ang, sa kan leitir ang chaw kan eikhawm hluai dawn nia" tih pahin a nui huk huk a, chutah "Sawirem nghal ula" a lo ti leh zat a, min ti lai dawn dawn mai.




Kan inbiak laimekin R.O ṭawngri ka hria a, "Hen-a va kar chhe rawh, a khum ke chawp sawn kan vaw ṭhiat vek law law teh ang" a ti hluk hluk a, Henry-a a nuih kur kur laiin "Mi Broken Heart ve laia tho rawh i lo tih sek le" thatchhe aw zetin Lalchhuansangan a lo ti a, ka lo ṭhen chiam ringawt.




"Nupui neih i ngen anih loh chuan rawn tho rawh" R.O bawk a ni, Henry chu a kal hnai a niang an thawm pawh ka hre ring viau tawh.




"Ka Broken heart vangin ka muhil thei lo ka tih ka tih kha" pakhat zawk chuan a lo ti leh a, "Muhil thei chuang si lo mut reng kha eng nge a awmzia ni ngai, tlangvala pumpa mu chawhma ṭhak ṭhak ringawt mai" bang a beng ri zui dawp a, chutih rualin "I tawn ve hunah i la hrethiam ve mai ang" a lo ti duh lek chauh.




"I be duh em?" Henry-an a lo tih chuan "Ngai rih lo mai rawh se, lo hrilh la, amah min lo Phone tir dawn nia" ka ti ta zawk a, kan inṭhen pawh ni hawt silo a lo in la Broken heart ringawt chu ka hmuh hunah a chak lo khawp ang.




Dar 1 velah Avis-a Phone call ka dawng a, a tho chhuak ve tawh ni ngei tur a ni "Good moring lo chiah chiah, Mangpui i mang em?" ka lo ti nghal thuai a, "Ka la ngaihtuah let hman lo a, engtikah maw i lo kal dawn?" a aw aṭang chuan a phur hmel khawp mai.




"Ni 31 ah aw, ka pa nen..." ka tih laimekin "Ṭha lutuk, ni 31 chu chaw kan eikhawm dawn nia, i pa pawh i lo sawm dawn nia, Uisa a ei ngai em?" a lo ti zung zung a, engmah pawh ka sawi hmain "Sihdea te Vawksa ka lo hauh ang, zanah kan Ride dawn a, ka hruai ve ang che, nuam i ti viau ang" a ti leh zel a, ṭawng na hun ka chang ve meuh lo.




"Pangparhnim..." ka ti leh hap a, "Ngawi teh" a lo tih hluai vang chuan ka tawp leh rih. "Nuihiau, ni 31 ah a mi leilet kal an tih?" tiin Henry-a a au lung lung a, "Pawi lutuk" a tih hluk chhan chu ka hre lo.




"Midang ho kal se, keinin eirawng kan lo bawl anga a ni mai a lawm" a tih takah chuan ka hrethiam ve riai ruai a, an ṭhianho letlet kal an lo tum anih mai hmel.




"Lo thleng chho phawt la, tih tur chu kan ngaihtuah ṭha dawn nia, vengthlangah chuan vawksa chu ka zuk hauh a nge, kan la chang em ang chu maw..?" Ka chhan hma hmain a ṭawng chhunzawm a.




"An ta tur pawh kan chhuh lui tawh mai dawn nia" a ti niah niah a, amah leh amah a inbia ni mah ang, a insiam pah nge mawni a ri sawt sawt reng a, mumal tak pawn thil a sawi theih loh, a phili ni ber hian ka hria.




Kan kal hma niin ka pa nen ka pi te thil hawn tur leiin kan Bazar a, Nutei te nupa tan Couple T-shirt ka leisak bawk a, naupang ho lawm eng ilo nen kan bawr ve luk mai, Nunui ka sawm ve zeta, lo kal a chak khawp mai a, a nuin hunpui hmun danga hman a phal ngang si lo a, a titau bar bar a, "Henry a kha min lo biak rawh" tiin min chah ve zan bawk.




Ni 31 tuk zingkar hma takah ka pa nen Chhum zinna khaw lampanin kan inkhalh chhuak a, pheikhai a zang khawp mai, Motor darthlalang tihniamin ka dak chhuak vauh vauh a, kawlkila nichhuak tir eng no riai chu a lang mawiin khua lah chu a thiang vuk mai a, kawngsir kopang velah chuan thlasik par kan tih mai ṭhin chu an vul chek chuk bawk, Tlaizawng par mawi tak tak te leh thlifim thaw heuh heuh te nen lam chuan hawina lam a piang chu a mawi em em vek tawh.




Kawngkam Hotel lian vakloah chaw kan ei a, Motora chuan hi chuan ka thil ei hi a tui vak tawh ṭhin lo a, tih tham engmah ka ei lo. Thingtlang Bazara kan din leh chuan ka pain Zawngṭah leh Balhla tih angreng a lei ṭeuh a, bel lianpui hian Balhla zu an lo zuar a, Driver hoin an lei sap sap a Thawvengers ho duhzawng a nih kan ring ve ringawt a, um nga teh meuh mai ka lei chu ka pa chuan min en phawk viau a ni.




"Mi ka hawnsak dawn" ka ti thawr a, a sawi buai lem hlei lo a. Kan chhuak hma bawk nen kan thleng har lo, khaw daia inte awmna kan thlen chuan ka za ruai a ni ber, ka Seat nghengin ka ṭhu ngil auh a, ka nui var var reng bawk.




Leilet peng kan thlen chuan kan hma ah Motor pahnih an lo ding a, kan thlen dawn tawh thu hrilh tuma ka Phone ka hmeh mual mual laichuan "Fu tui lo in ve ru, no khat cheng sawm" tih ri ka hria a, ka hawi chhuak rang khawp mai, a aw kha ka hriat hnu a ni tlat.




"I in ve duh em?" ka pa in a lo tih chuan dak meuhin ka va hawi chhuak a, kan hma a Motor chu a tlan chhuak ve chiah bawk a. Bottle leh no nena kan Motor lampana lo kal chu tudang ni loin kan Beteluliana ngei a ni, "Chhanbete" ka tih rual chuan a phu zuk lehnghal!




"Eng nge in tih" ka lo ti var a, "Ehiau...hrang hlui" tih leh min rawn pan a ruala, "Kan sumdawng a nih hi, zanin Pocket money tur" a lo ti sawk sawk a, kan duh thu pawh kan sawi hmain a Fu tui ken chu min thlit fel der tawh.




"Ka ṭhiante an nih hi" ka tih takah chuan ka pa pawn a lo nui vur vur a, "I zuapa maw, khawmaw insatkak i la" tih leh ka pa chu rawn ban a rual a, an han inchibai veleh lawp lawp a, chutih laiin kan piah ah chuan midang ho pawn min lo thlir ṭhap a, Saidingpuia leh Zobuaii an lo phei ve thuai bawk.




"In va lo thleng hma ve, lo tel ve nghal rawh" Zobuaiin a tih chuan ka nui mai a, Avis leh Henry a ka hmu ve lo thung. "In lamah eirawng an bawl a" Saidingpuian a lo ti zauh a, an thil zawrh ka va thlek chuan Malpawl te, Nimbu leh fu tih angreng a ni, mau hmanga siam dawnkan te ah an lo inchhawp ve far a, Motor tlan apiang an lo phar ding anih hmel.




Ka pa chu a chhuk a, thei thur ngaina tih takah Nimbu chu ava pan leh chat tawh, "Va leitir ṭeuh rawh u" ka tih chuan an phur khawp mai, "Mi harsa te ṭanpui nan kan intuak a" Saidingpuian ka pa bula a tih ri chu ka hrepha a. Hahthlak hian...tun mai khan Betean an zanlam Pocket money tur an tuak thu a sawi zo chiah a sin maw le.




Ka pa in Maipawl lianpui a khai takah chuan Motor aṭang chuan chhukin ka va en pui a, "Ziona kha a lo la let na nge?" Rinpuiin a tih laimekin thlanglam leilet kawng aṭang chuan Zion-a a rawn lang hlawl a, "Dawngzela Rulin a chuk a nia" a rawn ti ta mai!




"Kan Dawngzela maw?" ka tih laichuan min chhan pawh an tum hlawm lo, min tlan pel thuak hlawm a, leilet kawngah zuk liamthla diak hlawm chuan!




"An va mawl e, pawisa pawh ka la pe hleinem" an tlan liamna lam enin ka pa chuan a ti bul bul a, a tih ngaihna tak pawh ka hre bik lo, an Phone leh pawisa Bag te chenin an tlansan a, han kalsan daih chi ni bawk si lo chu an lo chhoh hun kan nghak ta reng a, an rei hrep lehnghal.




An Phone kalsan a lo rik chuan ka va thlek dak dak a, 'Pangparhnima' tih hming a lo lang va va mai, Lalchhanchhuaha Phone a ni ngei ang.



"In va rei ve" ka lak rualin a lo ti bak hlur lehnghal.



"Keimah" ka tih chuan min hre lo emaw ni? "Nuihiaua a lo kal a, Dawngzela kha rawn thawn haw rawh u" a ti leh hluk a, "Keimah...min.." ka sawi laimekin zuk dah hmak reuh chuan, mawl telh tulh lutuk mahni bialnu aw pawh han hriat hran loh mai chu.




Rei vak lo hnu ah an lo lang ve ta hram a, Dawngzela chu Chhanchhuahan a rawn kai chho bawk a, "Engtin nge a awm?" ka lo tih chuan "A chuk lo aniang, a hliam awm pawh ka hmu lo, a ke a bilh ve deuh anih hmel" a ti mai a, a sawi ang tak takin Dawngzela pawh a bai ve suih suih a lawm.




"Khawimaw keiman ka lo en ange rul chukna chu hmuam hma a awm ang chu" ka pain a lo tih chuan Chhanchhuahan Dawngzela a lo kai phei vat a, ka pa chu a bang bo khawp mai.



Min sawm ve viau tak nain ka hnial a, ka pa chuan a dawr hnem bawk a; kan kal dawn te chuan an khi ṭha hlawm a.




Tun ṭum chu Nutei te inah innghat loin ka Pi teinah kan innghat a, ka pa bulah chaw kan eikhawm tur thu ka hrilh sa thlap bawk. Ka pi leh pu chuan ka pa chu an lo lawm thiam ngang mai, a damloh thu pawh Phone-in kan hrilh tawh a, ka pi phei chuan a lo ṭahkhum titih hial a ni.




Ka inbual zawh veleh ah Zorema te inlam pan chuan ka chhuak phei a, Lalchhuansangan kawtah min lo hmuak a, ka thil hawnsak chu pein "Tem ve kher suh" ka ti zauh a, a ner nang thung. Rei lo tehah midang ho pawh an lo thleng a, an pawisa hmuh an chhiar a, an ri luih luih a; rin ai daihin an hlawk a nih hmel bawk.




Chaw eikhamah khaw ṭhenawma len an rawt a, ka chhungte ka hrilhlawk loh vangin haw phawt ka rilruk thung, "I pa chu ka lo dil ang" Avis-an a ti a, ka hnial lem lo.



Midang ho chuan Nutei dawr kawtah min lo nghak ṭhap a, keini Zobuaii hoin kan pathumin kan lut a, ka pa bula inhmelhriattirna ka neih laichuan ka pa chuan a en chik khawp mai, "Zanlai inkhawmah in tel dawn lo a mi" ka puin a lo ti khauh a, "Tel dawn e, kan tel hmain kan leng khawthawng ve lawk ang" Zobuaiin a lo ti zung zung a.




"Leng rei lo ula, in lo haw leh vat dawn nia" ka pain a tih takah chuan hmanhmawh deuhin ka insiam a, kan kalchhuah dawn thleng chuan fimkhur turin min chah ṭawk ṭawk a, kawt thlengin ka pa chuan min lo zui chhuak bawk.




Khawpawn lampanin kan tlang vang vang a, midangin hma an hruai a, keinin a hnung berah kan zui a, thlasik khua chu a vawt ṭha bawk a hnar a hit tuk thei a, Leather Jacket ka ha chung pawhin vawt ṭha tak a la ni, kan tlan kual nasa hle a, kawngah zial zuin an ding khawm leh zauh ṭhin a, kan let leh lamah inteah khan kan chawl a, an ṭhian dang ten min lo pawh ve ta bawk nen mi sawmhnih dawn chu kan inzui tawh a, khaw ṭhenawm kan pan tur chu kawiah kan inzui duah duah a ni ber.




Dar sawmpahnih dawnah thil eiturin kan let a, Zorema te veranda ah thingpui in pahin kan titi ho a, ka pa chuan min la rawn be miah lo bawk a, a ngaih a ṭha viau anih ka ring a, ka hmanhmawh lutuk duh ta bik lo.




"Min lo zui teh" Avisa a rawn tih chuan midang bul a ṭangin kan kalsawn a, khawiah emaw min hruai a tum a niang a Bike-ah inphurin Forest veng lam kan pan a, Nutei te in kan thlen chhoh hmain Quarter hlui lamah kan peng nghal a, ka awm loh hlanin Quarter hlui chu an lo ṭhiat zo titih tawh, thlabal deuhin a lo la dingsawi bam a, a hmalam bang bak chu bang tih tur a lawi a awm tawh lo.



Kawtah chuan Bike a dah a, kan Thingsemim chharna kawngah chuan kein kan kal dun a, thla a eng riai ruai bawk nen thing hmun leh phul hmun te chu an lang mawi hle a, a vawtin a reh ṭha hle bawk a, thli thaw heuh heuh ri bak thawm dang hriat tur a awm meuh lo.




Kut insuih rialin phulah chuan kan ṭhu dun a, a khat tawkin kan hmui a insi deuh reng, "Dar khat velah kan chhuk leh dawn nia" tiin zial a ṭan a; a pak khu hlat hlat a, min rawn pek chuan ka lo ban ve thuai bawk. Phulah chuan muin van lam chu a thlir vang vang a, a bula ka va mut thlak chuan min lo kuah thuai a, muchunga chunglam ka han thlir chuan Arsi pe un mai chu ka lang mawi kher mai!




"Kum khat vel a mi niang?" a ti zawi sup a, "Ka hre lo, a aia rei pawh a ni maithei" ka tih laiin min rawn kuah a, a pang ngheng chiala muin ka lo kuah let a, a rimtui inkah rim chuan min zem chiai chiaiin ka hria.




"Kum hnih thum vel maw?" a ti nawn leh a, a hmel ka han en chuan van lam hawiin a dak vang vang ringawt a, a hupurh hle tih ka hre thei, amah aiin ka huphurh zawk mah maithei bawk.



"I hreh a mi?" ka ti ta ringawt a.



"Hreh lo e" a ti tak nain hreh hmel a pu lawi a, chhan zui vak ngaihna ka hre tawh lo.



"Khilaia Arsi pathum khi i hmu em, a laitak khi en la a piah ah khian Arsi eng sen bik meialh rawng khi" tiin ka kawhhmuh a, "Ka arsi anih khi, zanah i lo thlir ṭhin anga min lo hrechhuak ṭhin dawn nia aw" ka ti sap sap a, min chhang lem lo.



"A zawna mi Arsi eng var deuh khi i Arsi ti ve ang aw?" ka tih leh chuan a nui ri suk a.



"Ka Arsi chu a lang ve lo" a ti zawi sup ringawt.



"A lang ve lo maw?" ka ti leh hap a.



"Lang lo, a chang chang chauhin a rawn lang a, Second reilo te chiah a rawn lang a, a bo leh vat ṭhin.." a ngawi zui vung vung a, van lam chu a thlir reng bawk.




"Eng Arsi nge ni ngai?" ka tih chuan, "Arsi mawi deuh mai a nia, a lo lan chang chuan khing Arsi dang zawng zawng te mawina khi a rawn hliahkhuh vek a, chumi hnuah a bo leh ṭhin" a tih chuan a ngaihna ka hre lo khawp mai.



"Shooting star a ni em?" ka tih chuan a bu ta nghat a.



"Shooting Star, nangmah ang chiah a mawi leh duhawm a nia, engtikah nge ka hmuh leh theih ang pawh ka hre lo, a lo langa Arsi dang mawina rawn hliah vekin ka duhaisam zawng zawng a liampui ṭhin a, nangmah ang chiah a ni" a ti sap sap a, van lam ka hawi leh laichuan ka hnim ruih thei.



"Shooting star ang maw ka nih?" ka aw chu a ri che che chuah a ni, tunah hian ka ṭah a chhuak hle a, a ipik ṭup mai bawk.



"I ṭap em ni?"


"Aih" mah se, ka ṭap tak tak.



"Ṭap suh, beiseina kengtu Shooting star chu a lo lang nawn leh ṭhin a lawm" a thil sawi a piang chuan ka lung a ti chhe zual ting mai.




"A lo lan leh hun chu i nghak reng thei a ngem?" a awmah hmai phumin thawk ka la hak a, "Tehreng mai, engtikah emaw chuan ka beiseina kha a rawn her chhuahpui leh anga chutih hunah chuan ka lo chelh tlat tawh ang" a ti zawi sup a, chutah ka khabe ah rawn dawmin hnai fahranah min en a "I lo haw hunah min nei duh angem?" tiin min zawt a.



Ka chhang mai thei lo, duhaisam chu kan nei ve ngei a mahse...



'Lo damṭha la, lo inthlak danglam lo la, kan inhmuh leh hunah min zawt nawn leh dawn nia, Shooting Star chu bo daih mahse, a rawn lang leh dawn tih i hriat chian kha, keipawh ka rawn let leh dawn a, i beiseina ka kalpui te pawh ka hlan let leh vek ang che' chu thu chu ka sawi chhuak thei lo, ka rilru in ka sawi a, tunah zet chuan min nghak tura tih pawh ka hreh zo tawh, engtia rei nge ngaidawn ka hre lo a, a beisei ang ka hlen zawh loh ka hlau a ni ber mai.




Phone ri chuan ngaihtuahna a rawn la peng thuai a, a indap rak rak laichuan kei ka ṭhu chhuak ve thuai bawk, "Tu tu nge kal a?" lawm vak lo awki hian a chhang a, chutah "Lo awm rawh, kan rawn chhuk dawn" tih leh thawh a rual a, ka din chhuah rual chuan thawk leh khatah thli a rawn thaw vuk a, ka tlu lo chauh nghe nghe!




"Thli a tleh dawn a mawni le?" ka hawi kual ruai a, thing hmun te chu a ri hum hum a, khua lah chu a dur hauh si lo!



"Kan chhuk vat a ngai, zu la turin Betea leh Ziona an kal a, hmar veng tlangval ho nen an inti buai a nih chu" a lo ti thuai a, a leather Jacket chu phelhin min rawn hak tir pah mawlh mawlh a, amah lah chu a hman hmawh hle tawh bawk.



Engthil emaw ka hriatthiam loh hlauhthawnna mak deuh hian ka chhungrilah min ṭham a, a run tur tinga thli rawn thaw vuk vuk chuan ka thauah min man a; ka ṭim sung sung thei, Sarthli te pawh a ang zawk a lawm maw le!




"Thli a van tleh nasa em em?" Quarter hlui lampana kan kal hlawk hlawk laichuan ka ti leh ṭhin a, "Thing hmuna kan awm vang anih hi" a tih chuan tlemin ka ngaih chu a ṭha ve ta deuh.




"A bengchheng i ti ve em?" ka ti leh hap a, thli thaw ri ah chuan engthil emaw hriattum niawm takin ka beng ka chhi a, Avisa kal hlawk hlawk banah chuan ka vuan nghet sauh sauh bawk a, "Engmaw bengchheng?" a rawn tih chuan ka lu ka thing ringawt thung.




Thawk lehkhatah na lutuk tak maiin thli chuan min rawn beng leh a, ka au chhuak ṭhat mai! Thaw hlawp hlawpin ka awm ka dawm a, tunah khan eng ri emaw ni ka hrechiang a lawm! Phawk zeta min en tu chu kalpel vutin a pawhin ka pawt a ni ber tawh.




"Thli kha a rawn ṭawngin ka hria!" ka tih chuan a nui huk a, "I beng hi chu a ṭha maw le..." tih leh ka darah min rawn kuah a rual a, kan Bike dahna kan thlen thleng chuan kan inbe leh tawh lo.




"Zorema te inah ka dah rih che anga, ka rawn let leh hunah ka thlah mai ang che aw" a tih chuan haw mai ka pawi tih loh thuin ka chhang a. "Haw lo e, kan rei lo ang" a tih ṭalh vang chuan ka hnial ta em lo, ka Phone ka en chuan ka pa Missed call a lo awm a, min koh haw nghal ka rin vangin ka Call let duh lo a, min hau em bik lo ang chu.



Zorema te in kan thlen chuan Saidingpuia Car bulah an lo ding khawm laih a, Chhanchhuah a leh Ziona chu an lo awm leh lawi bawk sia!




"In va tlang a maw?" pen phei hlawk hlawk paha Avisan a tih laichuan an lo hawi ṭhap a, Betea te ṭhiandun chu an hnar leh hmui bawr te a pilh pheng phung a, an lungawiloh hmel hlawm khawp mai.




"Nu Khumin a lo nei tawh lo a, kan va tlang a lawm, kan hnungah Zidinga te ṭhian ho kha an lo tlana, kan Race pah a, engmah buaina kan siam lo, kan let leh lamah khaw ṭhenawm tlangval ṭhenkhat nen min lo chang a lawm maw le" Zionan a lo ti zung zung a, chutih laiin Avisa chuan Lalchhanchhuaha hliam chu a lo ensak ve mek bawk.



"Engzah nge an nih a?" Avisa aw chu a pawr lam mah a ni.



"Paruk vel" tiin Zion-a bawkin a lo chhang a.



"In kal dawn chuan ka lo kal ve ang" tiang hawl chunga Zoreman a lo tih chuan hmeichhe hoin "Nang chu kal a ngai lo" an lo ti sap sap a, mi mah hlauhthawn sa nak a lai chuan kal chhuak lo se ka duh tak zet.



"Chhana te an lo let tawh tho hi, chhuak tawh lo mai rawh u" ka tih chu tuman min bengkhawn lo.



Inchhunga kan inzui luh hnu pawh chuan Veranda ah an ṭawng ring hle a, an infuih phur leh niin ka hria, Chhanchhuahan tu emaw hi Phone-in a bia a, an in cho chhuak ringawt anih hmel, an thawm leh huk a, "Kal ang u" tih leh chet an rual a, Henry-a Games khel chu Lalchhanchhuahan a rawn pawt rawk rawk bawk.




Kawta an inhawr khawm chu Veranda aṭangin hmeichhe hoin kan lo thlir a, rei vak loah Bike pathum an lo thleng a, "Far zawlah min lo nghak anih chu" tiin lo thleng thar te chu Chhanchhuahan a lo hrilh a, an ṭhiante tho an nih hmel.




"Lo kal ve lo mai rawh, Chhingi te hi lo awmpui la" Avisan Henry-a bula a tih chuan Henry-a chu a bu nghat a, engmah pawh ka sawi ve hman hmain an Bike-ah an chuang a; an tlan chhuak fel der tawh.




"Zidinga te chuan khaw ṭhenawm tlangval ṭhian a ngah em a lawm, mahse, Hmingmuana te ṭhian ho an tel a an hneh tho ang" Zobuaiin a ti zat zat a, "Ka kal ve chak asin le" Tluangzelin a lo ti thung.




Darkar chanve dawn kan nghah hnuah Henry chu an lo Phone a, kan ṭhiante chu khaw ṭhenawm VDP hoin an lo kawl a ni awm e. "Ka kal dawn a sin" Henry-an a tih chuan Tluangzelin "Ka kal ve dawn" a lo ti thuai a, chutia an ni pahnih an kal leh daih si chuan awm bikah ka ṭang duh hauh lo.



"Ka lo kal ve ang" ka ti tawl a, Zobuaii lahin chuti bawk.



Henry nen kan inphur a, Tluangzeli leh Zobuaii an inphur thunga, kan tlan chhung zawng chuan hlauhna hian min fan kawng tluan a ni ber, "An sualpui te pawh an man ve tho a lawm, an zilh anga; khawtlang hruaitu te hnen ah an thlen anga chubak engmah an ti lo ang, hlauthawng suh" Henry chuan a ti ve luam a, engnge ka hlauh ni, ka awm a nuam thei lo reng reng.




Kan va thlen chuan YMA rûn ah an lo awm a, khaw ṭhenawm pa ho an lo awm laih bawk a, an mahni tak phei chu ka va hmu ve lo, Henry-a a lut, keini pawnah kan lo ding thung a, a rawn chhuak leh har khawp mai.




Darkar chanve dawn hnuah a rawn chhuak a, kawngka bul aṭanga min rawn hui zauh zauh takah chuan kan phei ve thuai a, dawhkan chunga Avisa ṭhu ka va hmu hmasa ber bawk. A lampana ka kal laichuan patling pakhat hian a lo bia a, chupa chu ka hmuh hnu ni tlata hriat na ka nei.




"Ka sawi vek tawh kha aw, midang ho pawn an thiam zawk che u a, nidangah chuan fimkhur ula, kan Duty ngawrh a nia tunlai chu" a lo ti bul bul a, a fel hmel khawp mai. Ka lam hawia min rawn nuih takah chuan ka hmuh hnu a ni tih ka chiang hle tawh.




"Hei hi ka ṭhiannu kha a nia, i la hria em?" Avis-an a lo ti thuai a.




"Hria e, ka hai lo khawp che u a nia, ka hmuh tirh che pawh khan nangpawh ka rawn hre nghal chat che a lawm" chupa bawk chuan a ti leh a.




"Chhingbawih, hei ka pu hi Leileta kan kal ṭuma kan hmuh kha anih hi, an khaw YMA President a lo nia" tiin Avisan min lo hrilhfiah a, Leileta kan kal zana Rul in a chuk kan buaipui hrep kha a lo ni reng mai!




"E he..! I dam ṭha maw?" ka ti ve hluai a, nuisangin kan han inchibai leh rih a, midang awm ve ho mit chu kan chungah a fu ṭhap hlawm.




"Tlangval fel lutuk anih hi, awm lo sela ka thi daih tawh ang, ka nunna chhanhim tu anih hi" tih pahin Avisa darah chuan a kuah salh a, Lalchhuansanga intithei hmel chu hmuh a nuam hle ringawt mai a ni, rin ang lo taka thil thleng chuan min ti hahdam huai huai bawk.




"Kan inah thingpui in in phawt loh chuan in haw lo ang" YMA President in a tih tlat vang chuan kan khawmuang leh rih a, YMA rûn bul lawk chu an in a lo ni nghe nghe a, in pawh an lo nei nuam khawp mai.




Kha mi zan chung chang kha sawiin an titi dun a, in neitupa chuan lawmthu a hrilh leh rih ṭhin a, Avisa ṭhian te ho erawh an bangbo deuh tih ka hmu thiam mai bawk.



"He lamah chuan zu rawn la tawh suh u, hunpui lai hian kan Strict khawp a, kha Duty ho lakah ka hum thei hram che u anih kha, tikhan haw phei ula, nidangah chuan in fimkhur dawn nia, tleirawl thaza rual in nia thisen a lo lum hma deuh anih pawhin khatiang in phek sual ang kha thil tih chi a ni lo, lehlam pawlin hriamhrei an chelek lehnghal a kha, vanduai palh chuan chuti hlauh a ni mai, kan paltlang hnu ania, tun thleng hian a lo hlauhawm zia mawlh kan la ngaihtuah ṭhin a nih hi" a ti charh charh a, a ṭawngkam a ṭang rengin pa zaidam tak a ni tih a hriat theih.



Kan haw dawn meuh chuan dar thum a ri hnai ruak tawh a, khua lah chu a vawt tawlh tawlh emaw tih mai tur a ni, "I Jacket hi i ha duh em?" ka tih chuan "Nangman ha rawh, i hritlang palh ang" a ti sam et a, a Bike khalh lai chu ka kuah ṭha sauh sauh bawk a, chhum a zing nasa in kan thaw khu hlat hlat reng bawk.




Tlan hmasa ber kan ni a, chhum a zin nasat vangin kan hnunga lo tlan ho chu an Head light eng bak a hmuh theih meuh lo, chupawh fiah lo rian ruan tak a ni. "Tlan chak suh aw, chhum a chhah emai" ka tih takah chuan a tlanmuang ve mai bawk.




Khaw inrinna a inte kha kan thleng ṭep tihin hnunglamah chuan an rawn ri hluah hluah a, ka lehhawi rualin Bike chak lutuk hian min rawn tlanpel vawk a, a hnung lama a mi te chu an rawn vung fua fua hi a ni ber tawh.




"Mai mai chuan!" Lalchhuansangan a ti nghal hluk a, chutah a Bike ti muangin midang chu a ngaichanga, Lalchhanchhuaha Bike rawn tlan kan hmuh rualin "Min rawn umzui a nia, min lambun an tum anih kha" a rawn ti nghal ṭhawt a, tlan reng chunga inbia an nih vangin an ṭawng chu hriat hleihtheih pawh a ni lo.




"Tlan chak la, i tlan pel dawn nia, hmeichhia kan hruai bawk si a tumah din loh tur" Avis-an a tih leh chuan ka lungphu chu rang tawh tak a ni.




"Hnunga mi te khu lo hrilh mai rawh, an lo ding a nge" Chhanchhuahan a tih leh laichuan ka lehhawi vat a, kawiah an rawn lang ve tliar tliar mai, Tluangzeli te lah chu an tlan muang em em mai bawk si. Henry an hnung a dawl a, kan ṭhian dang tlangval ho lo tlan thleng hmasa chu Avis an tlan tlang turin a lo ti zel a, kan chhangchhe mah mahin ka hria a ni.




"Zo...chak thei angberin tlan tlang rawh u" ka tih rual chuan "Eng nge an tih dawn?" a rawn ti lang lang a, chhan hman pawh a ni lo, "Tlan tlang tawp rawh u" ka tih leh ri chu an hre hman tawh kher lo ang.




"Bawiha, chak thei ang berin" kan zawna Henry-a tlan chu a hrilh a, "Min lo um ru" tih pahin Henry chu kan hma ah a tlan a, ka pian a hnu lamah hetiang ang em em Bike tlan chakah hian ka la chuang ngai lo, thawk a chham lo chauh a ni.




In te awmna kan va thlen chuan beisei ang reng reng thil a thleng lo, tumah an tlan tlang lo em mawni zawk ni!




An lo insual nasa hle a, chhum a zing nasa bawk nen kan ṭhiante hmel pawh thliar hran har tak a ni, "Bike bulah hian awm la, lo kalsawn miah suh" tih leh Avisa chu din a rual a, a Bike hung sawk sawkin a tlan phei nghal a, a va ṭham hmasak ber chu a hnek nghal siah siah mai bawk!




Zobuaii te ho kha khawnge an awm ka hre lo, an insual ri chu a rapthlak em vangin ka beng ka hup a, ka khur chhe der mai!



"Zoi a lu ah khan vaw rawh" Tluangzelin a tih ri ka hriat vang chuan ka pan phei ruak a, thui ka kal hman lo Zobuaii leh Tluangzeli chhaklam ko bula an ding ka han hmu a, hmanhmawh lutukin ka pan phei a. "Hrui an lo pawt a, an nep leh hle sia" Tluangzelin a lo ti hlak a, hlau hmel aiin thinrim hmel an pu zawk chu mak ka ti!




Khaw ṭhenawm tlangval ho chu an zal te deuh nge ni an thawm a zawi tial tial a, "Kan phalsak lai che u hian let rawh u" Avisan a tih na lam ka va hawi chuan mipakhat hi a hnung zangah a lo pet sak chawrh a, chupa chu tho kang ṭuah ṭuahin a Bike awmna lam a pan zui a, a ṭhian ten an zui thuai bawk.




An insaseng laichu kan thlir ṭhap a, chutah a hnung bera tlan chhuak tur chuan kawngsira Henry-a ding chu a rawn thlawh thlu hram a, an thawm leh huk tak nain chet lakna hman a awm tawh lo thung.




"In inhliam em?" Avisa chuan a ti zung zung a, "Ka ha ah a rawn hnek a, a nghing deuhin ka hria" tlangval pakhatin a tih bak chu hliam nei an awm lo a niang, liamlian dungah chuan an ṭhu zawi nguai hlawm a, thawk a lo veng ve huai mai.



Mahse, chutih laia natuar thawm; ri hrawih vang chuan kan hawi phawk hra hlawm a, thlanglam ka zuk hawi chuan Parapet nghenga Henry-a lo ṭhu sawp nuai chu ka zuk hmu a, hmanhmawh lutukin ka tlanthla nghal bawk.




"Tinge, i khawi lai nge na?" ka ti chula, a pum lamah chuan hliam a nei a nih ka ring, na a tih hmel khawp mai.




Midang ho in an rawn bawrh ve nghal huk a, "Nichin khan Parapet bawh zawng hian a tlu a a insawh a niang" Zobuaiin a tih laichuan Henry chu a rawn khuh ṭhawt a, thisen a rawn baw nghal hawk anih chu!




Avisa lo kun hnai chu a rawn ban ṭawk ṭawk a, Avisan a lo kuah thuai bawk a, a natuar rum ri chu hriat a hrehawm takzet a ni, a ka aṭangin thisen a chhuak a, a mittui a luang zung zung bawk a, thawk harsa a ti tih a hmelah pawh a lang thei.




"Parapet tlangah khan a insawh anih dawn kha, Internal Bleeding a nei tlat mai" Saidingpuian a lo tih chuan ka nghawng awrh phelhin Henry a hmui leh awmbawr vel chu ka va hru mawlh mawlh a, "Khawih che rih suh u, Motor a kan phurh mai loh chuan Bike-a phurh chi a ni lo ang" Pakhatin a lo ti leh bawk a, engthil nge tih hmasak ber tur kan hre lo tlang a ni.




"Motor ko rawh u, a rang thei ang berin" Avisan aw ah chuan hlauhthawnna ka hre thei, "Ka pa kan Phone ange" Saidingpuian a lo ti thuai a, chutih laiin Henry chuan Avisa kawr awm a ṭham ngawt ngawt tawh.



A vawihnih nan a ka aṭangin thisen a rawn baw leh hawk a, ka hlauthawng lutuk chu thawk ka la dep dep ringawt tawh, a kut chu lo vawn sakin a rum leh hawk ṭhin chu ka melh tlawk tlawk a, tih ngaihna chai ka hre si lo.




"A na lutuk.." a rawn ti chhuak hrawih a, Avisa tak pawh chu a talbuaiin ka hria. "Hlau miah suh, i u in ka pawm tlat che a nia, engtin mah i awm dawn lo" a ti mawlh mawlh a, "Motor chu hmanhmawh tir rawh u" tiin midang chu a vin leh rih bawk a, Henry-a khawih sawn ngam a ni bawk si lo chu tih ngaihna a vang takzet a ni.




"Ka thi dawn.." a rawn ṭap chhuak hawk a, mipa meuh a ṭah na chu a na hle a ni ta ve ang.



"Dawn lo, dawn lo lutuk, chutiang ka phal reng reng lo.." Avisa chu a hawi kual leh ṭhin a, "Ka pa a lo kal mek" tih bak chu chhanna dang a awm lo.




"Bawiha, ṭang fan fan rawh aw.." Henry-a khur dar dar chu a pawm ṭha sauh sauh a, a kamsir leh khabe vela thisen luang chu a kutin a tuaisak thuak thuak bawk a, ṭap purin keinin kan lo en tlawk tlawk a, Henry a meng a riai chuan min ti hlauthawng lehzual bawk.




Rei vaklo ah Saidingpuia pa chu a lo thleng a, mipa hoin Motor-a Henry a an zawn luh dawn laichuan Avisa kalsawn tur chu a la rawn pawt ṭawk ṭawk a, "Lo kal rawh aw" ti a thei leh thei lo a rawn melh lai chuan ka insum thei lo, ka mittui a luang zung zung mai.




Hmanhmawh deuhin Damdawiin lam kan pan a, Damdawiin kan thlen ve meuh chuan Henry chu an lo luh fel pui tawh a, Avisa chiai lutuk chu Corridor ah a vei thuak thuak reng a, R.O leh Avisa chhungte pawh an rawn lang ve thuai bawk.




Aizawl lam an Phone a, lo kal an tum thu R.O in a sawi laimekin Doctor a lo chhuak a, "Emergency a zai a ngai dawn a, hetah chuan kan ti thei lo ang, Aizawl lam pan thuai rawh u" a rawn ti ta mai a, Doctor ṭawngkam aṭangin a hlauh thawnawm hle tih chu haitheih a ni lo.



"Kan kal dawn a, engtin nge i awm ve dawn?" Zobuaiin a lo tih chuan ka kal ve tur thu ka hrilh a, ka pa Phone tumin Damdawiin sir lam chu ka pan thuai bawk.




"Pa, kan ṭhianpa in Accident a tawk a, Emergency a zai tur ania, zui ve ka duh sia, i phal em" ṭap ṭuauin ka va ti a, "Khawiah nge i awm?" a rawn tih chuan Damdawiina ka awm thu ka hrilh leh rih a, "Lo haw phawt rawh, a ṭul leh naktukah kan haw zawk dawn nia" a ti ta tlat a, ka dil viau chung pawhin "Lo haw phawt rawh" tih bak chuan min chhang lo.




Corridor a ka va let leh chuan Ambulance-ah an lo inhlang lut mek a, Henry an a lam reng vangin Avisa tan chuan kalsan theih a ni lo, "Naktukah ka pa nen kan lo zui ang che u" ka tih laichuan ka inthlahrung takzet.




"Aw le, lo hlauthawng lo ula" zang khai deuhin Avisan a lo ti a, Ambulance hnungah chuan an pafain an ṭhulut thuai bawk, midang kal tur chu an tlan liam thlengin Tluangzeli nen kan thlir a, tih theih ka neih tlem tehlul nen ka zui ve thei lo lehzel chu pawi ka ti a ni.




Tluangzelin ka pi te in thleng min thlah a, kan ṭhian mipa dang an hming pawh ka hriat loh te kha Henry leh Avisa Bike la turin an let leh dawn anih hmel a, ṭawngṭai mawlh mawlh bak chu tih ve theih ka nei lo.




In ka thlen rualin ka pa ka kaitho a chanchin ka hrilh mawlh mawlh a, ka ṭap titih der mai bawk nen ka pa pawh ka ti mangang viau ta ve ang, "Mu phawt la, khua te var phawt rawh se, eng em a ti lo ang" ka pa chuan a ti mai a, muthilh chu khawilam chhin khat te mah ka chhing lo, ka lungphu chu a phu dup dup a reng a, hlauhthawnna in ka tirilah min ṭham reng bawk a, a chhe ber thlengin ka rilru chuan a ngaihtuah kual a, ngaihtuahna ringawt pawh chuan min ti na ngut ngut thei a ni.




Henry chu a La a lo sawh thler a lo ni a, Emergency a zai nghal a ni. "A hlauh thawnawm tawh lo e, a La an paih anga a ṭha leh mai ang" tiin Zobuaiin min lo hrilh a, thawk khat chu a veng ta deuh.




Tukṭhuan eikhamah ka pa nen Aizawl lam kan pan a, kan thlen tuka kan haw leh nghal chu ka chhungte lakah ka inthlahrung hle a, engmah phei chu an sawisel lem lo, ka pa thung chuan Henry a chung chang chu min zawt seuh seuh a, ka ṭhian ṭha tak anih thu ka hrilh bawk.




In lamah lut hmasa loin Damdawiin ah kan tlang a, kan thlen chuan Henry a chanchin kan hre ve leh chauh a "Chhunah khan a thawk a rawn buai a, ICU ah a awm mek" R.O in a lo tih chuan min ṭhawng khawp mai, a damchhuah leh rin na ka nei miah lo, engnge a chhan ka hre lo, a kal mai dawna hriatna nei a, ka vai riai ringawt tawh.




Step-a Avisa ṭhu chu ka han pan chho a, "Thil i ei tawh em?" ka tih chuan a bu nghat a, ka kut lo hmer vawng vawngin "Ka kalsan a hlau lutuk.." a ti zawi sup a, a fimlo hle tih a mitmeng aṭang chuan ka hrethiam. Betea te hoin min rawn pawh a, zawi tete a titi in Step-ah chuan kan ṭhu ngui nghiai hlawm a, chutih laia kan piah deuh hleka puitling ho inbe thawm chuan ka beng a verh rang khawp mai.



"In lam pawh lo in singsa turin ka hrilh tawh a" Tlangval chuan a ti a, a hmel ka zuk enchian chuan Henry a u kha a ni tih ka hre nghal mai bawk. In lampang in singsa tura a ti anih chuan beisei a nei bik lo tihna...Karei leh..!




Avisa dara chuan kuahin ka inpetruh fan fan a, chutah ka kut rawn hum lehin "Hlauthawng suh u, a ṭha leh mai ang, a tuarchhel a lawm" tiin min la hnem ta zawk a, ka thil hriat ang hi hria se engtin tak ngai ve ang maw.




Rei a rial lo, "Kan nau chuan min peih loh san ta a ni e" tih thu chu kan thu hriat hmasak leh ber a ni. Nutling ṭap rawng rawng ri in a zui a, mittuiin ka mit a rawn chim khat nghal vek bawk.




Chutah Lalchhuansanga chu a tal phut a Step-a a pen chho hlawk hlawk chu hmanhmawh deuhin kan umzui a, ICU aṭanga Henry a ruang an rawn nawr chhuak chiah chu pan pheiin a va sawi nawk nawk a "Tho rawh" tih paha tun thawh mai a tum chu a ṭhian ten an chelhbet ṭung bawk a, a nu but a ni ber e.




"Kai tho rawh u, an zai dawnah pawh kan la inbia a, engtin nge tunah hetianga a awm ringawt theih, tunge a zaitu kha, rawn ko teh u" a au lung lung chu enin ka ṭap chhuak hawk mai.






(End of chapter - 29)

Link:
BBcode:
HTML:
Hide post links
Show post links

Ngaia
Site Admin
Posts: 19502
Joined: April 30th, 2016, 4:07 pm

Unread post by Ngaia » October 24th, 2021, 3:54 pm

LAST CHAPTER - 30


IMG-20211019-WA0167.jpg


Pa Zara leh Chhanchhuahan an pawt ṭawk ṭawk chung pawhin a tal chhuak zel a, Henry-a an khuhṭhat vek tawh chu haihawng lehin va khaihharh teh chu a tum a, a darah vuanin a sawi nawk nawk reng.




"Mampui, Vistea pawh i ti hrilhhai lutuk a lawm, tinge hetia i awm mai le, zingah pawh 'Min ngaihtuah suh u' i ti mawlh mawlh a, i hliam kha a lo na em a nih hi ti raw" ti a nutling ṭap rawng rawng ri chuan ka awmchhung a vilh ngut ngut mai.




"Bawiha, tho rawh..kan haw dawn" Avis-a chuan a tukkhumah chawiin hnai deuhah chuan a en ngawih ngawih a, a ṭap lo, mahse, a na tih ka hria, a aw a khur a, a kut a hum ruh hle bawk.




Che lo chang loin engemaw chen chu chutiang chuan a awm a, midangin va pawhsawn an tum pawh chuan a duh lo nasa mai, Henry-a lu chu chawi kangin a awmah a pawm bet tlat a, pawhhran tum a piang chu a lo vai sawk sawk a, a â riai a ni ber e.




Henry-a hnar leh ka aṭanga thisen lo chhuak ṭiam ṭiam chu a kutin a tuai a, a kawrah a tat ringawt bawk a, Doctor leh Nurse te takngial pawhin tih ngaihna hreloin an en ṭhap a, chulaia awm zawng zawng chuan lainat takin kan thlir a, tumah hnuk ulh lo kan awm lo.




"Mama, a ka kha kan tuam a ngai a" Nurse-in a lo tih pawh chuan a en run run ringawt a, Nurse pakhat lo kal hnaiin "Ka lo tuam ang aw, i chawikan chuan thisen a put zel a nia, i nau tan khan a hrehawm lutuk ang" a tih leh takah chuan a inthlahdul ve ta chauh a, chuti chung chuan pen khat pawhin a awm hlat phah chuang lo, leiah chuan ṭhu hniamin Henry-a mutna khum tlangah chuan a bawk a, Nurse ho che vel chu a en ve reng bawk.




"Va hruai sawn rawh" Zobuaiin a lo tih chuan ka hreh khawp mai, inhru hul sawk sawkin ka pan phei a, a bana ka va vawn rual chuan na zetin ka kut a lo thing thla a, min en hauh lo bawk. Ka bulah Chhana a lo ding thuai a, tih ngaihna kan hre lo dun takzet a ni.




"Dim deuh rawh aw, anih loh chuan.." Nurse-in a ti dek dek chu "Kal sawn rawh" a lo ti vin hluk a, chutah tho thutin Henry-a chu tun thawh leh a tum a, Henry-a U leh Pa Zaran an lo pawt sawn dawr dawr thung. ICU piah lam Corridor-ah chuan an pawt phei dawt dawt a, chutih laiin Henry chu midangin an lo nawr chhuak ve mek bawk.




Damdawiin kawtah chhuakin Motor-a an inhlang chu kan thlir ṭhap a, Zobuaii nen tak pawh chuan inhnem thei chuang kan awm lo, ka pa pawh kan bulah a ding ngawi ve reng a, Avisa te pafa kha an la rawn chhuak leh miah lo bawk a, a khat tawkin ka va thlir leh ṭhin.




"Engtin nge kan awm ang, inah kan lo haw phawt dawn nge, kan zui ve dawn?" ti a ka pa in min zawh chuan lu ka thing ringawt a, tunah chuan engmah mumal pawhin ka ngaihtuah thei rih lo, Avisa kha a ṭha tih ka chian hma chu ka kalsan thei lo ang.




Ka va lehhawi leh laichuan Henry-a u kha a lo chhuak a, a hnunga Avis-a te pafa lo kal chu ka hmu bawk. An lampanin Chhanchhuaha leh Saidingpuia an kal vat a, kan awmna aṭanga hla deuh hlekah chuan dingkhawmin an inbia a, rei vaklo ah lo pheiin kan bulah chuan an lo ding a, ka lam a lo hawi laichuan sawitur reng ka hre lo, ka hamhaih zo vek a ni ber.




Ngawirengin midang che vel chu kan thlir dun a, a hmel chu ka han en leh ṭhin, pangngai tak anga a lana phenah hian engtiang takin a rilru hliam ang maw? An chhung te an tam ve bawk nen ka tan lo biak fal theih a ni lo a, hnem dawn pawh ni ila hnem dan tur ka hre chuang pawhin ka ring lo.




"Insum hram hram rawh, midang hnem tu tur zawk inih kha, a nu pawh i ti khawlo zo mai dawn a sin khatiang chuan" a pa chuan a ti sap sap a, chhang loin a ngawi reng ringawt.




"Chhuansanga kha hetah a chuang dawn em?" ti a ruang phur Motor bula miin a rawn zawh chuan "Dawn lo, hnungah kan lo zui ang che u" Pa Zara bawk chuan a lo ti leh a, chutih laia Henry-a U lo kal hnenah chuan "Ani chu ruang pawh kil ve lo mai sela a ṭha ang" Avisa hriat phak loh tur chuan a lo ti bawk a, Lalchhuansanga lam ka va hawi chuan a kekawr ipte zenin bang ngheng hian a lo ding a, a ke chu a per et et reng bawk a, a bula a ṭhian te pahnih ding pawh chu an hmel a ngui khawp mai.




"Piantharna tel lo a lusun zawng rapthlak deuh mai a nia, a tuar rei khawp ang" Pa Zara chuan a ti vang vang a, ani pawn a tuar nat tur zia chu ka hrethiam pha ve in ka hria, puitling zawk na na na chuan a tuar dan a thiam zawk mai chauh a ni ang.




"Ka nu kha Motor-ah a chuanga, kan lo zuk thlen thlak vat loh chuan Te-i te ho chauh an awm a" tiin Henry-a u chu a kalsawn leh thuai a, ka pa pawn zui ve nghal a pawiti vak lo aniang engmah a sawi zui tawh lem lo.




Kan Motor-ah Zobuaii nen kan pathumin kan inphurthla ve a, kan hma ah Saidingpuia Motor a tlan thung, Henry te in kan thlen chuan ruang pawh an lo la lut fel tawh a, mi an tam khawp mai. Pawnah Chhanchhuaha te ṭhiandun ka hmu a, Avisa te pafa erawh ka hmuzui tawh lo thung.




Reilo te chu ruang kan va kil a, an chhung leh khat te an lo thlen tak ṭak ṭak vangin kan tho leh thuai a, hmeichhia an rual bawk a ṭap thawm a ring hle a, a nu ṭah hla mawlh mai chuan rilru a ti na leh ṭhin, pa a nei tawh lo ti te ka hre lehzela, unau pathum zinga an pang ber a ni bawk.




A ka leh hnar vel an tuam tlat vangin a hmel a hmuh theih mangloh a, a lang thei chin erawh a dang hle, chiang deuh hian a damlai hmel ka mitthla ah a awm reng a, thi angin ka la ngai hleithei meuh lo, kum 22 chauh; a vanglai hmang ṭan tur chauh a ni, chu erawh lungti zing zualtu mai a ni ta si.




"Kum tharah ka lo haw a nga, sipaiah ka rawn intlar ve anga ka nu keiman ka chawm ang che u a ti a, a lo haw leh dan hi na ka van ti em, ka naute hian tu pawi mah a sawi ngai lo a sin, mi inkiltawih chi leh mi huatthu sawi hlau tak a ni a, hetiang khawpa na tuar tur hian Pathian pawi pawh i sawi lo a sin ti raw Mampui, thih ngama hliampui i tawrh laikhan i nu hi thlamuan tur che leh bawihsawm tur che pawhin ka awm si lo a, he ti mai a min kalsan hi ka va run tak em" chu ṭap ri chu ka bengah a kiu vawng vawng a, mittui a sur zung zung bawk.




Tlai dar 4 thlengin ka pa nen kan ṭhu ve reng a, kan hma tlara Zobuaii te ṭhu nen pawh chuan kan in be mang meuh lo, ka pa in haw phawt a zan lama kal leh a rawt a, in lama haw pawh chu rilru a nuam chuangin ka ring lo, ka ṭah na lamah ka lu a rit hle a, ka hnar a ping ṭup mai bawk.



"Zo...kan haw dawn a sin, min lo zui ula, hma deuhah kan kal leh dawn nia" tiin ka ṭhiante chu ka sawm ve ngial a, an hreh hmel hlawm khawp mai.




"In veng a hla em?" Chhanchhuahan a lo ti bauh a, "Chaw te lo ei ula, in intifai anga in kal leh dawn nia" ka pa in a lo ti ve thuai bawk. Chutih laichuan Pa Zara a lo kal a "Hmun dangah innghat buai suh u aw, in ṭhianpa khu in ngaihsak a ngai a nia, kan Jection muhil rih a, a lo thawh hunah in awm loh chuan a rawn sapatal leh chiam ang" a tih vang chuan ka sawm hlawhtling ta lo.




Avisa mawlh mai chuan a ni ka rilru ti hah zual ni, thil sawipui hleihtheih a ni bawk si lo, keini chu kan ṭap bawrh bawrh a, kan in ṭap thawl leh mai thei zawk a, ani erawh chutiang a ni ve si lo a, a natna te pawh lanchhuah tir dan thiam loin thinur lamah a tlak zawk a, chu chuan mu leh mal nei loin a siam bawk.




"Zanah lo kal leh vat rawh aw, tumah hriat ka nei si lo a, ka lo nghak reng dawn che a nia" Zobuaiin a lo tih chuan ka kal leh vat tur thu hrilhin ka thawhsan a, ka pa chu awm ve lo sela ka haw kher lo tur.




In kan thlen hnu thleng pawh chuan mittui a la hul hleithei meuh lo, Henry-a kha engtikah mah ka hmu leh tawh dawn lo tih hi rin har ka la ti fan a, ka ui ngawih ngawih a ni. Khawiah nge a kal anga thih hnu piahah chuan eng tiang chiaha nun nuam nge a neih dawn chu ka hre ve teh meuh mai mahse, engtikah mah ka hmu leh tawh dawn lo tih thu mawlh mai chuan min ti na em a tin a ni.



Zanriah eikhamah Nunui a rawn lang hlawl a, khawi aṭangin nge a lo hriat ve pawh ka hre lo, ka hmun phiah lai chuan dawhkan bawha ṭhuin ṭah insum ṭeuh hian a inpetruh reng a, a ṭap hreh leh ṭah chhuak ve bawk si chu a lainatawm zawk khawp mai.




"Enteh Mate, ka rilru a na e, ka ui lutuk..." a ti leh hap ṭhin a, ka inhru zauh zauh reng bawk nen a insum hleithei bik lo chu a ni.



"I duh thu pawh ka la hrilh hman miah lo" tiin ka ṭah nuih hak a, a bu ve nghat nghat mai.



"A pawi lo, hmana an lo kala kan inchibai laia a nui hmel kha ka mitthla reng a,...aa...hetiang em em hian kan chhungte nilo boral hi ka la ui ngai lo a sin le....ka ṭhian emaw tal te lo ni ve hman sela, duhtawka ṭah bawrh bawrh ka chak" a chak thu sawi mahse, tunah pawh a ṭap chu a ni reng tawh zawk.




"Ṭap rawh, kan ui vek a lawm...thil sual a ni hleinem" ka sawi lai te chuan keimah zawk chu ka insut hlawp hlawp reng. "Bathroom ah ka va ṭap lawk" tih leh thawh a rual a, rei deuh chu a va inkhung a, a rawn chhuah leh chuan a mit a sen ve ram a, a duhtawk a va ngah ve a niang, ka lo sawisak hman lo kha ka inthiam lo zual a, lo inhmelhriat tirin ṭawngkam hnih khat chauh pawh lo inchhawn ve hman sela; tunah te hian ka nuam deuh huai ang maw le.




Zan lam pawh chu Nunui leh ka pa nen kan kal a, Zobuaii pawh chu kan va hmu ta chuang lo, ka pain 'Tlaivar lo mai rawh u' a ti deuh tlat a, amah a riah tir ka hreh ve tho bawk nen zanlaiah kan haw a, kan haw kawngah Zobuaii nen chuan kan inbia a, inhnuai Room-ah an lo awm khawm daih a ni awm e.




"Avisa hi a inkalhkhum tlat a, kan biakin min chhang duh bawk si lo a, tih ngaihna kan hre tawh lo" a rawn tih chuan ka rilru a hah leh tet tet tawh.



"Naktuk zing karah ka lo kal ang" ka ti ve rawk a, kei hian eng ruai ka va ti thei bik pawhin ka ring lo, midang ai thlawt chuan ka laka a inhawn chu ka beiseia, beiseina erawh a chaurau em em thung.




In thlen veleh ah Avisa chu ka call a, Signal a nei lo nge ni a tlang thei lo a, a hnu ah phei chuan Swich off a ti ta tlat a, a ngaihna ka hre lo takzet a ni. Nunui a lo riak a, kan muhil lo tlang a ni ber e, ka Phone-a Henry nena kan thlalak te chu entirin kan hun lo hman ho tawh dan te ka hrilh sap sap a, a khat tawkin mittui kan hru leh ṭhin.




Zing ah chuan hma deuh ah ka insiam sawk sawk a, Nunui pawh hrilh tawh lemlo chuan Henry te veng lam ka pan a, mitthi in a tlaivar ho pawh an lo ṭin fel tawh a, ṭhenawm khawveng nu leh pa ho an lo zai a, mi an lo awm tam leh hman viau tawh.




Zobuaii ka Phone lawk vangin kawtah min lo nghak ran bawk, inhnuaiah pawh mi an lo awm nuk a, kan ṭhiante pawh mut kham lo tih hriat lutukin an lo ṭhu ngui bam a, min hmuh rual rualin "Va ko ve chhin teh" Lalchhanchhuahan a lo ti thuai a.




Pindan chhungah chuan kan inzui lut a, chhaklam kil bera Room min kawhhmuh lam chu ka pan ding a, kawngkhar ka kik chuan min chhawn lo chiang khawp mai. "Avis, keimah Miriami, lo hawng la" thawm chu a reh vung vung ringawt.



"Avis, kan rilru i ti hah lutuk a nia, nang tal chu ti hian awm lo teh" min ngaithla tu awm lo ang mai a ni.



"I rilru a na tih ka hria a lawm mahse, nang chuan i hriat chian tawh kha, tawpna niloin bul ṭanna a nia lawm, tunah chuan i nu leh ka nu te kiangah Henry-a pawh a kal tawh a, hlim deuhin an awm tawh a lawm" ka hnuk a ulh ṭeuh mai, hnemtu tur zawk hi ka zuau lutuk a, ka ti thei ngang lo a ni.



"Betea te nen pawnah kan awm ania aw, i tan kan awm reng a nia, kan kalsan dawn miah lo che..." ka sawizawm thei ta tlat lo, kei hi ka kal a ngai dawn.




"Avis, ka hmuh ngei ngei che a ngai, thil hrilh tur che ka ngah lutuk" kawngkhar chu ka chum ri bur bur a, min chhawntu reng reng awm si lo chu ka hah hluah hluah a ni ber, ni 8 ah ka kal a ngai dawn a, hetiang boruak chhe lutuk kara inkalsan hi ka thei dawn em ni, ka thaw a rawn hah tet tet a, ka muttui chu dan sen a ni lo.




Rei deuh chu a kawngkhar bulah chuan dingin ka insut leh fap fap ṭhin a, Room chhunga awm lah chu theh meh an sawi ang hlauh a ni.




A tih ngaihna ngang a awm loh vangin kan chhoh san a, Henry-a thlah liam turin rilru kan buatsaih a ngai tawh, duh loin ui eng ang mahila kan tih ngei a ngai si, Nunuin kal ve a duh vangin inlamah ka let leh a, rei kan rial lo kan thleng phei leh rang khawp mai.




An kawngka bula Henry-a thlalak lianpui intar chu kan ṭhian dunin kan en vang vang a, 'Henry. Lalramhmangaihzuala kum 22. Thihni January ni 1.' thlalaka a nui hmel chu hmuh a nuam hle a, a mitmeng damdup leh a nui hmel ngaihawm em em kha tunah chuan thlankhur thuk takah engtikah mah kan hmuh leh tawh loh tura zalh a ni tawh dawn chu a nia, he hringnun zet hi chu...chunglama rorel tu khi a Fair lo nge a Fair lutuk pawh ka hrethiam pha tawh lo.




Thlana kan kal dawn chuan Pa Zara leh Henry-a U kha Avisa awmna Room aṭangin an lo chho a, chanchin kan lo zawt thuai hlawm a, "Ngaihtuah suh u, a zia leh mai ang" tih zawngin min chhang a, patling pui pawhin tih ngaihna an hriat loh chu a zia mai dawn lo tih lah a chiang reng si.




Thlanah chuan ka ṭap ta em lo, rilru erawh a hrehawm takzet a ni, a kuang an vur dawn chuan hla deuhah kan ṭhian hoin kan dinga, Pa Zaran min lo koh pawh chuan Betea leh Sihdea chiah an kal a, Zobuaii pawh a lu a nat vangin nachhawkna a ei a, a thlan va thlir chu kan hreh a ni ber ang chu, midang ho an haw rem deuh hnuah kan Pangpar ken dah turin kan kal hnai ve chauh a, Pangpar kan han dah meuh chu hnuk a ulh ṭeuh mai.




"Ka ṭhiannu fapa thlan bul chiah a chang a, hmun ṭha lai tak ani lehnghal a" Henry-a nu chuan a ti sap sap a, chhaklama thlan ka han en chuan Rose par bawr nalh deuh hi thlanlung hmaah chuan a lo let ve ngat a, 'Gordon Zothantluanga' tih a lo inziak bawk, thlan lunga hlimthla intar chu tlangval la naupang tak ve tho a ni.




"A thlanga mi hi ka ṭhianpa a ni ve thunga, Bawiha chu ka ṭhianpa nen an inhmu tawh ngei ang chu" tih vang vang pahin Henry-a u chuan thlanglam pan a rual a, rilruah ka nu a rawn langa, tunah chuan Henry a te nen an awm ho ngei in ka ring, keini aichuan an hlim zawk ngei bawk ang.




Zan lam thleng pawhin Avisa chu hmuh theih a ni lo, chaw a eilo a, tui a lam hek lo, pindanah a inkhung chawrh chawrh a, a mu nge a ṭhu tih takngial pawh ka hre lo. A pa chuan kawngkhar karchhiat mai a tum ut ut a, Ropuian a lo khap ve thunga "Tuar chhuak rawh se, a nu boral pawhin hetiang tho hian a lawm a awm, mahni a awm a duh rih a nih kha" a ti mai a, kei erawh ka rilru a hmanhmawh tawh tak zet a ni.




Kei aimah chuan Betea te ṭhian thum chu an hmanhmawh zawk a, a tuk lam haw tawh tur an ni vei nen an ṭhianpa chu kalsan an hreh ṭheuh a, khawlama awm Zorema leh midang ho lahin chanchin an rawn zawt khat tawk ve reng bawk a, an khawngaihthlak zawk mah a ni.




Nihnih zet an cham leh hnuah chuan awm ve reng theih ni hek lo, rilru khingbai deuhin an haw a, keini lam pawh pheikhai a zang lo ṭhin khawp mai. Pa Zaran chanchin min rawn hrilh zan chuan ka mu meuh lo. Kawngkhar chu tichhiain an lut a, tumah a be duh lo a, a lut te pawh bungruain a lo vawm chiam a ni awm e, a tana ṭawngṭai sak ngawt bak chu keilahin tih theih ka nei der lo bawk.




Zobuaii nen kan inbiak hmasak ber chuan an khawlam chanchin min rawn hrilh zung zung a, Betea te ṭhian dunin Henry-a Accident-na Parapet kha Tuboh kengin an lo han vaw chhe vek a ni awm a, an rilru dam phah tak ang maw?




A tlawhthlu tu ber lah kha tunge tih an hre thei lo a, mi paruk lai an ni a, an hmelhriat mang loh leh zanthim hnuai anih vangin kawh chhuah mai theih an ni lo a, rinhlelh chu an nei tih vel chauh a ni rih.




Delhi kal turin kan la inbuatsaih ve zel a, ka pa nen chuan kan phur loh dan a in chen vel in ka ring, kan in chhuahsan chu hreh tak tein a hreh a, zan a muhil mang ngai meuh lo, amah te hian inchhung dungah hian a tei kual leh ruk ruk ṭhin a, ka khawngaih reuh khawp mai.




"Pa, kar khat vel tal la tawi khawmuang rih i la, a pawi a ngem le?" Zanriah kan eilaia ka tih chuan min en vut a, "Thlawhna Ticket lam zawk hi a nia, keini lamah chuan buaina pawh a awm lo a" a ti ve mai a, ka Ni erawhin "Doctor Appointment ka lo ti vek tawh a, lo hmanhmawh rawh u, in tlai zel chuan i pa Stage kha sang zel thei anih kha" a lo ti hlur a, ṭhulh leh rih chu a har ṭalh ṭalh khawp mai.




Tlai tin Avisa hmu turin ka kal a, hlawhchham bawkin ka haw nitin a, keimah thleng hian min hua ni ta berin ka hria, a pa bulah chuan tihian a lo sawi a, "Ka hmu lo ang, rilru nuam deuhin tikhan kal zawk rawh se" a lo ti mauh mai a, ṭha te tein min thlah ni sela ka rilru a nuam deuh zawk ang maw le.




Ka thawmhnaw ka siam mawlh mawlh laiin ka pindanah ka pa a lo lut hlawla, "He Jacket hi motor ah i dah reng a" tih pahin Leather jacket khami zana Avisa min haktir ngei mai kha a rawn khai chhuak a, ka lo ban rang khawp mai.




"Tu ta nge?" a tih lai chuan "Keimah" tih leh ka Bag-a khung ka rual a, hman deuha a pheikhawk ka neih sak tak kha chu ka Showcase ah ka dah lut a, ken a rem zan lo bawk nen a Jacket ka lo kawl chu ka lawm ru angreng viau zawk a ni.




Ni 8 tukah chuan a Phone call dawn ka la inring fan a, kal tura kan inpeih vek hnu pawhin ka Phone chu ka en leh ṭhin a, a reh tlawk tlawk thung. Nunui leh kan ṭhenawm te nupa in Lengpui thleng min thlah a, ka pa Motor pawh ṭhenawm pain a khalh haw leh anga min lo enkawl sak anga tih ralna tur pawh anin a lo buaipui dawn a ni awm e.



Dar khata thlawk chhuak tur kan ni a, ka Phone lah chu a ri thei reng reng lo mai a, ka mangang ru tak zet a ni, ka laka a awmdanah hi chuan vuina ka nei lo, ka hmuh phakloh ah hian nun hrehawm leh natuar in hun a hmang liam ang tih mawlh a ni ka hlauh ni, kei nena kan inkar chu engtiang pawh lo ni se la; amah a dama a hlim phawt chuan a bak duh ka nei lo.



'Mahse'...he thu bawk hi a ni kan kar dang tu chu.



Ani chu a ngawi a 'Mangṭha' tih thu takngial pawh a sawi lo, nikhat emaw kar khat mai pawh a nilo, thla a liam a; kum hial a vei hnu ah pawh a reh vawng vawng mai.




Ka pa nen Delhi kan thlen thlak aṭangin Damdawiin leh in kan kartawn a, chumi kar lakah chuan keiin Designing te ka zira, kan ṭhenawm hnai lawkah a nih vangin ka pa enkawl lamah harsatna ka neih phah lo a, ka lungleng lutuk tur pawh min hnem ve niin ka hria.




Kum hnih zet kan awm hnuah pawh ani erawh a la ngawi ta zel a, engtin nge a awm tak pawh ka hre meuh tawh lo, rindan bak chu a chanchin ka hre zui ta lo bawk. A chhanchin ka hriat chhun lah chu lung ti zing zual tu mai an ni.



Zobuaii nen kan la inbe fo a, Lalchhuansanga chu a pa hnathawhna lamah a awm tih min hrilh a, a ṭhiante tumah a be pawp lo a ni awm e, Lalchhanchhuaha lah chu Avisa lakah a lawm lo em em a, "A bulah phei chuan a chanchin sawi chhuah ngam a ni lo" tiin min hrilh a, an ni lehzel a hlat chu ka hrethiam pha ta meuh lo.




Lalchhuansanga a kehchhiat rual khan Thawvengers ho pawh an kehchhe ve a, Saidingpuian ṭhian dang a kawm tawh a, Lalchhanchhuaha nen pawh an inkawm ngai tawh lo, Rinpuiin pasal a nei tawh a, Tluangzelin sawn a pai bawk, an vaiin an darhsarh ta vek a ni ber e.




Chu aia thu lawm awm lo lehchhawng chu Zorema a zeng tih thu min lo hrilh chu a ni, a Accident tirh kha chuan ṭha leh mai tur angin a awm a, khatia a kaih zauh zauh ṭhin kha a Nerve lam a lo chhiat vang zawk a lo ni a, tunah chuan Wheelchair-ah a hun pum a hman a lo ngai tawh, a chanchin ka hriat tirh chuan min deng na khawp mai, vanglai hun hlimawm hman tur a la ngah tehlul nen....




Ka pa chuan ti hian min hrilh a, "Mihring damchhungin vanglai leh ṭhatlai hun hi hun nuam ber a ni, chuvang a nia Thuhriltu pawhin 'I vânglai hian i siamtu hre reng rawh' a lo tih ni. Hlimhlawp leh nawmsakna ringawt um hian kan tum loh luipui min daitir theih zia hrereng la, i vanglai nun tihchhiata a awm loh nan Pathian hrereng chungin i nun hmang ang che.




Nunna leh thihna inkar hi pen khat lek a ni a, hun leh ni te lah kan thuhnuaiah an awm hek lo, eng ang hunah pawh hlim taka Pathian tawk thei turin inbuatsaih ang che" tiin.




Kan titi dun chang hian a thiam ang tawkin thu ṭha min hrilh ṭhin a, natna khumah mu mahsela, a nuna a lungawi zia ka hmuh hian ka hahdam ṭhin, a natna chuan dam lam pan loin zual lam a pan deuh deuh chung pawhin a hmelah chuan êng ka hmuh theiin ka hria, ka pa taksa chu a dam lo, a rilru erawh a dam thung, a chhan chu a chatuan hmun tur a hre chiang miau a.




Delhi lama kum 4 kan inenkawl hnuah ka pa chuan min Boral san a, ka tuar na lo ka tih chuan dawt ka sawi ngei ang. Mahse... Ka pa kha a dam tawh tih ka hria, chu chuan ka rilru ah thlamuanna min siamsak a, a thlakhlelh em em Pa ang chungah natna a tuar tawh dawn lo tih ka hriat vangin ka hahdam a ni.




Nikhat chu ka Off day ah ka Ni ka pui ve e ka tia, chumi ni chuan Mizo lo kal pawh an ṭhahnem khawp mai, Mizo inhmu khawm ta na na na chu inhmelhriat sa lem lo pawh innel takin kan inbe thei zel a, hei hi chu Mizo nih nawmna laitak te pawh a tih ve theih ang chu.




Kan inleng pa leh ka Ni an titi bawrh bawrh laichu ka lo hre fuh hlauh a, Vanlaiphai khua a lo niawm e, a fanu tlawha lo zin a nih thu a sawi laimek chuan thil dang daih ka lo ngaihtuah a, chawpchilh lutuk hian ka thinphu te chu a rawn rang a, khawdang ka hawi thei tawh hlek lo.




Ka zawt chiang chak hle a, ka zak ve tumhrang bawk si chu ka tawi leh rih ṭhin, chutih laichuan amah zawk chuan min rawn en ta hlauh a "Hei hi i fanu em ni?" tiin ka Ni chu a zawt a, ka Ni in a chhan laichuan ka lo nuih var var tawh.



"A va hmelṭha ve, nangmah pawh a chhun che a nih hi" tiin ka Ni chu a fiam pah a, an nui dun hawk hawk a, ka inthlahrung lutuk duh ta bik lo.



"In khaw R.O hming i hre mial em?" ka ti tawl a, a rawn hawi phawk angreng khawp mai, ka Ni pawh chuti tho; min ti lai lek lek zawk a ni.



"R.O a...Forest R.O em ni i tih?" a ti he haw a.



"Aw ni e, ka hmelhriat in khua ah a awm tlatin ka hria a" ka tih leh chuan a ṭhen deuh ṭha a.



"Ngawi teh i hriatsual a niang a..." a sawilai chuan lo pawt chat lehin "Pu Zara a nia, a fapa chu Lalchhuansanga" ka lo ti hmanhmawh a, a lu a thing mat mat thung.



"Kan khua chu R.O ṭhuthmun a ni hleinem, S.Vanlaiphai khua kan nia, kan khaw ṭhenawm Sangau ah hian R.O chu a awm" a tih chuan ka bangbo hle ringawt, Vanlaiphai a ti ngei khan ka hre sia, ka hriat sual em mawni dawn le?




A ngaihna ka hre lo khawp mai, ka pa boral a kan haw chhoh laikhan a chanchin hriat ka tum viau a, Zobuaii lah khan an awmna khaw hming a hriat tawh loh thu a sawi mai bawk si a, min lo zawh chhuah sak lah chu a tum der lo a, ka thil zir laklawh a ta langin rei awm hmanloin kan chhuksan leh ta kha a nia, Avisa pi te tal kha chuan an awmna an hria ang maw le, Nute Hriati ka zawh lahin min lo zilh let nek mai a, ka zawt ngam tawh der si lo.




Zanah chuan muthei loin ka inlet sek a, Zobuaii chu ka Call leh ta nge nge. Mahse, a tlang thei ta hauh lo mai a, a Number a thlak anih ka ring, kan inbiak hnuhnun ber ka ngaihtuah let a, kum chanve dawn a lo ral ve reng tawh a, kan inbiakloh karin a lo thlak hman a ni ngei ang.




Ka tih tur hre lo chuan thlalak hlui te ka enkual a, ka lung a leng thar khawp mai, suangtuahnain nunhlui a chhuikir a, khang hun Chhum zinna khua a ka hman ral tak zawng zawng kha ka nun ka hmanliam tawh a zawnga ka ngaihber hun a ni hial ang.




Mit chhingin thawk ka la vang vang a, a rim te hial keimah ah ala cham emaw tih mai turin ka la chhuilet thei, thingkung leh phul hmun mawi tak tak te, a boruak thiang leh vawt raih mai te kha, engkim kha ka ngai a ni. Chhum zinna khua ngaihtuah chhuah chang apianga a hming lang ve lo thei lo 'Avis Lalchhuansanga' kha engtin tak khawsa zui ve ang maw?




Nupui a nei tawh a ngem? Min lo la hre ve reng a ngem? Tunah hian a dam tawh a ngem? Kan Pangparhnima khan a nun engtiang in nge a hman ve ang?




Zawhna tam tak hi ka inzawt ṭhin, chhanna lah rinthu mai mai bak ka nei ngai lo chungin inzawh ka ṭhulh ngai lo, mipa dang ka hawi theih loh chhan a ni a, kum 4 zet a liam hnuah pawh amah lo chu ka la ti fan a, kan la intawn leh ngei ka beisei tlat bawk, chu erawh a chauthubarawh ṭhin khawp mai, intawng leh ta tehreng pawh ni ila tunhma ang kan ni tawh ngutin ka ring lo, tunah chuan engkim a danglam zo tawh.




Kan kum a lo tam tawh a, kan lung tileng tu pawh a dang zo tawh anga, keimahni chauh lo pawh danglam tam tak a awm tawh ngei ang, 'MAHSE'....he thu hi tunah chuan ka in hnemna ber a ni, 'Mahse' tih thu a awm chhung hi chuan rilru hian ka ngaihtuah loh lamah kawng dang a awmzia min hriattir leh ṭhin.




Zankhat chu ka rilru a zawhna awm reng ṭhin pakhat chhanna ka hmu chhuak nawlh mai a, ka rinloh leh beisei loh lutuk lam aṭangin a ni a, min ti hamhaih hle bawk.




Delhi kan kal dawn a Avisa Leather jacket ka Bag-a ka khung kha kan thlen tirh khan ka thawmhnaw bawmah ka khai zeta; ka dah chhuak leh tih reng ka lo hre tawh lo a. Ka Luggage-ah ka dah bik reng a, U Remruata, ka Ni fapa in a lo hak ka hlauh vang a ni pakhat a, a thawmhnaw su peih lo hian kan T-Shirt leh kawrlum a hak theih tur ang hi a lo dap leh mai ṭhin a, chuvanga dah thukru chu ka ni, a rei hnu khan ka lo mangnghilh daih hi a lo nia.



Chu ai pawha mak ka tih zawk chu a chhunglam ipteah Lalchhuansanga Mobile Phone a lo awm reng chu niin!



Ka hmu chiah chu ka au chhuak ṭhawt lo chauh a ni, a Phone chu a Batry a lo chhe hman nge ni a nung thei mai lo a, Phone siamna ah kar hnih dawn ka a dah hnuah an siam ṭha thei ta hlauh a, tlaivar dawn thawin a Phone chu ka haikual a ni ber e.




Ka Number chu 'Chhingchhengtei' tiin a lo in Save a, a Message hlui leh a thlalak te pawh a lo la awm vek a, 'Naupang si, mawl si, pawisa nei si lo' tih hla chu vawi sawm chuang zet ka ngaithla nawn bawk. Ka lung a leng zual khawp mai, he hla dukdak lo zet hi ka ṭahpui hliam hliam ang tih ka lo ring pha ngai lo.




Henry-a nena an inbiak na chuan ka lung a ti chhe zual a, a nau a hmangaih zia ka hre chiang zual ting mai bawk. "Pawisa i nei em?" tih thu hi nitin chaw chhun eihun velah a zawt ziah a, khang hunlai khan chhuna an inhmuh awm ka hre ngai lo; mahse, Avisa khan Canteen-ah pawisa a lo dahsak diam ṭhin tih te ka hre zui a, ka ngaihtuah let hian Henry-a khan eiman a pe lai ka hmu ngai lo reng a ni.




Phone ka enzawh meuh chuan zinglam dar 2 a lo pel tawh a, Balcony ah chhuakin boruak ka va hip vang vang a, zanin zet chu ka lung a leng a ni, Mizoram ka ngai a; haw ka duh bawk, kha Chhum zinna khua ah ngei khan...




Van lam hawiin ka thlir vang vang a, zinglam Arsi pawh an khat pharh tawh nain a lang mawi kher mai. Phul hmuna Arsi kan thlir dun lai mitthla ah a lang lo thei lo.



Ani khan 'Shooting Star' ang mai ka nih thu a sawi a, a Beiseina liampui tu Arsi min ti anih kha, ka tan pawh chutiang tho chu a ni. Shooting Star....ka duhaisam kengtu Arsi, engtikah nge ka duhaisam te kha i rawn her chhuah pui leh ang?



Hello, Shooting star...nangchu rawn lang thut in Arsi dang zawng zawng te mawina i rawn hliah a, beiseina nena lo nghaktu che thinlung chu dawnpui loin; a duhthusam te chu i liam pui vek mai si a...



Hello, Shooting star again.. Engtikah nge ka hmuh leh theih ang che? Nang chu biak hman loh leh chelh din theih lohin i liam thin a, suangtuahna leh duhthusama khat ka thinlung hian a nghak reng thin dawn che anih hi..



HELLO, SHOOTING STAR....I'M WAITING FOR YOU ALWAYS.






(END OF SEASON - 1)


@violette - Smile squad, ka hmangaih leh ka thinlung neitu te u, kan thawnthu kallai kan lo zo leh ta, in chungah ka va han lawm ṭhin tehlul em... In duhsakna leh inpekna te ka dawng nasa mawlh mawlh hle mai a, kan thawnthu pawh in inpekna rah chhuah liau liau a ni e, inzara mawina ka chan zawng zawng sawisen a ni lo, lawmthu ka sawi mawlh mawlh e.

Kan thawnthu 'PANGPARHNIMA' hi in duh angin ka ziak chhuak zo ngutin ka ring lo, ka theihtawk a tlem si... eng le khaw le...i hmuhdan leh ngaihdan kha Comment ah han sawi leh la, i Comment ka lo chang leh dawn nia, tin, Post a Video clip ah hian in tan thu ka hnutchhiah bawk aw...Thawnthu ah hian eng Mood nge i neih te kha han sawi ve reng reng teh le....




*A tawp nan Ads click leh keuh*


*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)