POSSIBLE NIGHT BY Ahmangaihi Violette Khiangte (Completed)

Moderator: writers

Ngaia
Site Admin
Posts: 22491
Joined: April 30th, 2016, 4:07 pm

Re: POSSIBLE NIGHT BY Ahmangaihi Violette Khiangte (Completed)

Unread post by Ngaia » May 29th, 2022, 7:17 pm

POSSIBLE NIGHT - by Ahmangaihi violette Khiangte

CHAPTER - 25





"I va nawmsam loh hmel ve" min biakna chu chhang loin ka kal pel a, choka lam ka pan lai te chuan ka lu chu a rit luk a, ka pum lam fel loh vang nge ni ka luak a chhuak ut ut reng. Chaw chhum han siam mai ka tum chu chawbel ka hawn rualin ka uak leh ṭhat a, nizana kan chawei bang chuan mi ngei ni ta berin ka hria, melh pawh ka melh ṭha peih meuh lo.




Ka rilru no a rawn chhuak a, ka ṭah chu a chhuak em em mai bawk a, eng ka ti ta nge maw ni, nizan thil thleng kha ka la ulh laklawh nge ni ka ti rilru a, Marcosa ka ngaihtuah ringawt pawhin ka thin a la rim thei.




"Puia chu i be tawh em?" ka hnung lam aṭanga a rawn tih chuan "Be tawh" ka ti mawl tawp a, Hotel a kan awm laia min lo biak kha U Puia nena kan inbiak hnuhnun ber chu a ni.




"Airport-a lam a phut em?" a rawn ti leh a, dawh thei lo zeta in herin "Be ve mai la, ka buaipui thei dawn chuang hleinem" ka ti bul hmuk a, min en ren rawn a, a sawi nawi zui lem lo thung.




Chaw chhum ka siam zui mawlh mawlh a, ka chhuan zawh velah dawhkan bawhin ka ṭhu zawi ngiai a, inchhunga Marcosa vei sek chuan ka thaw a ti ipik ṭup a, melh takngial pawh ka melh ṭha peih lo, a khat tawkin min rawn be leh ṭhin a, "Ka rualin i lo kal ve dawn em, lei ngai te i neih chuan Fancy Bazar-ah kan kawi dawn nia" tih angreng min zawt a, min ti dam lo thei takngial dawnin ka hria.




"Khawiah mah ka chhuak peih lo" tih zawngin ka chhang a, chutih laia ka chaw chhum rim rawn chhuak chuan pum a ti let nghal but a, hmanhmawh lutukin tui khawihna lamah ka tlan a, ka va uak tuarh tuarh a, engthil emaw dik lohna chu ka nei a ni, 'Ka rai em?' tih thu chu ka rilru ah a lo lang hmasa ber a, a la hma riauin ka hre bawk si.




Ka chhut neuh neuh a, thla khat zen zawn chu a lo liam ve reng tawh a, a la hma chu ti viau mahila thil theih loh tawp chu a ni bik si lo, ngaih ṭha lo deuhin ka pum chu ka han dawm a, ka Period hnuhnun ber ka ngaihtuah zui a, ka inringhlel ta viau mai!




"Bazar chu i duh em, i duh duh ka leisak dawn che nia?" ka rawn tih leh chuan thawk ka la hluai a, pawisa a ngah viau em maw ni, nge hmanna tur dang a nei miah lo zawk, kei ka lo inren tehlul nen, nizan aṭang khan min nuihsang reng a, min tlawn te pawh a ang zawk a lawm.




"Ka thinrim tawh lo, engmah leisak ka ngai lo" ka ti chhuak khawl a, Boney-a pawm chunga min lo en laichuan ner sakin ka inher a, "Hadasi.." a tih ri ah chuan a lawm lo tih ka hre thei.




"Ṭha deuhin ka bia che a, engvanga khatiang hmel kha min hmuh reng nge maw i nih le?" a tih chuan ka chhang mai lo. Ngawi rengin Artui ka kang a, ka chaw chhum rimin min ur reng bawk nen thawk ka lak zawngin ka luak lo chauh zel a, ka rai anih ka ring ta ber, ka awm nawm loh em vang chuan han lawm viau ngaihna pawh ka hre rih lo. Test kit ka lei anga; ka in Test hmasa phawt ang ka ti rilru a, ka rai ngei chu ka ring viau tawh thung, ngaihtuahna a vak kual nasa a; hmathlir erawh a thui hleithei meuh lo.




"I nuamsam lo em ni a, i pum a na nge?" a ṭawng lai chuan ka uak leh ṭhat a, lo kal hnaiin ka chal a rawn khawih a, min khawih rual chuan ka ter nghal at thung, "Kal teh" tih leh tui khawihna lam pan ka rual a, min la rawn zui cheu vang chuan ka ṭah a chhuak hluah hluah tawh, kal bo daih sela ka ti, ka thaw a ti ipik, hnai taka min dinchilh phei chuan ka sa pup pup theia; a hrehawm duh takzet.




Pum dawm chungin tui khawihna bulah ka ding ran a, Motor rui ang mai ka ni, ka taksa lah chu na lai ber sawitur awm si loin a na ngut ngut lawi a, ka pum lam aṭang chuan min ṭhoh urh reng a, ka uak leh chiah chu ka luak ṭeuh mai!




"E khai aw! I dam lo tak tak anih hi, damdawiinah ka hruai ang che" ka darah rawn vuanin tui a herh haw sawk sawk a, ka hmui a rawn tuai fai laichuan ka ṭap chhuak hawk a, ka mittui a luang zung zung bawk.




"I khawi lai nge na, i khua a sik bawk si lo" ka chal a rawn dawm a, a lam hawia min kawih her rual chuan a banah ka chum chawrh a, "Kal teh, i ninawm lutuk" ṭap ṭiau chungin ka ti a, lo buai ve sek lo sela ka duh, zawhna a ngah bawk si a, engmah a hre thiam ve tak tak chuang si lo.




"Ka ning hle mai, na i neih chuan ṭha deuhin sawi rawh" a ti vin hluk a, a ṭawngkam vin te chuan ka thin a ti ur hlur a, ka nam sawn rawk rawk mai.




"Nang mah vang vek anih hi" Gas-a ka thil chhuan lai chu Off in Room lam ka pan a, ka kawr thlak sawk sawkin ka Purse ka la chhuak a, a chhung ka han en chuan a lo ruak hiai tawh, pawisa nawi takngial pawh kawl ka nei lo.




"Pawisa min pe teh" a au in ka au a ni ber e, pindana a lo lut leh chuan phawk deuh tak hian min en a, "Eng nge i tih dawn?" a tih chuan kham tawh tak ka ni. "Pawisa chu min lo pe vat rawh, damdawi dawrah ka kal dawn" ka ti chang bawl a, amah chu ka tir zawk dawn em mawni?




Ngawi rengin a Closet a hawng a, "In entir hmasa phawt la a ṭha a sin, mahni thua damdawi ei ringawt zel loh tur" a ti nuah nuah a, pawisa a rawn phawrh rual chuan rang deuhin ka lo pawt thla a, ka chhuak zui nal nal a, kawt zawl ka thleng thla chu ka nuam deuh huaiin ka hria.




Kan chenna aṭanga hla lo teah damdawi dawr chu a awm a, Auto leh Taxi ding a awm nual nain kein ka kal hlawk hlawk a, lo rai ta ila tih ringawt chuan min mawlh lehnghal a, nau ka neih hun tur thlengin rilru chuan a ngaihtuah zui a, Marcosa nen chauha paltlang chu a harsa dawn hlein ka hria.




Rei vak loah damdawi dawr ka thleng a, Text kit chu pathum lai ka lei a, ka haw leh lam chu ka kalmuang hle tawh, Step-a ka chhoh lai te chuan inchhung luh chu ka hreh deuh dawn dawn a, ka hreh chhan ber pawh ka hre chuang lo. Kawngkhar ka hawng chiah tihah Marcosa Phone hmang thawm ka hria a, a aw ri ringawt te chu ngei tak te hian ka ngei a, a ṭawngkam aṭang chuan kha Reena kha a be mek tih ka hre miau a ni.




"Keimaha kal ka lo tum a, i patean a hun tur pawh a rawn ruat fel mai turah ka ngai" a ti bul bul a, ka lut thawm a hre lo aniang Balcony kawngkhar bulah min hnungchhawn zawngin a ding a, thawm dim deuhin Bathroom lam ka pantlang a, ka in Test tur chu ka zam ve lek lek mai, naupai chu ka duh lo pawh a ni lo; mahse, ka huphurh ru takzet.




Rei tawk fang ka nghah hnuah ka Test kit chu ka bih ta chauh a, rin sen pahnih a rawn lang ta kalh a, ka thaw huai huai thei, ka lo rai ngei e, ka Test hma a ka huphurh tehreng nen ka rai tih ka han hriat chian takah chuan nuam tihna a rawn awm chawpchilh a, thawk a veng huai bawk. Darthlalang hma ah chuan dingin thawk ka han la vang vang a, phurna mak deuh mai ka nei zui a, naute ka pai a; nu ka ti ve tak tak tawh dawn, ka pum chu dawmin ka han chul leh ringawt ṭhin.




Bathroom aṭanga ka chhuah leh pawh chuan Phone a lo la hmang cheu a, a hnunglam chu ka han melh rum hmasa te te a, ka hrilh chak lem lo khawp mai, tunah lah vai nuthlawi a la be mek zui a, a English in ti thiam vel lutuk te chu ka ngei zawng tak a ni.




A phone hman zawh hun chu nghakin ka ding rih a, a la hmang rei hrep zui. "Ngai lo rawh se, Office lam zawk kha i kutah ka dah anga, kan ṭan hma leh kan ti zo hma thei a ni mai" a tih laichuan ka pan phei hlawk hlawk a, eng khaw sawi set set loin a tukkhumah ka nam bu lawp a, phawk deuha a rawn lehhawi chu rum theih tawpin ka lo melh a, Room lam ka pan zui nal nal bawk.




A Phone hmang thawm ka hre zui lo a, a rawn lang rang khawp mai. Hamhaih deuh hian min la rawn en a, "Eng nge?" a tih chuan ka melh rum em em ringawt a, a Phone chu vawm chhiat sak daih ania ka chak ni.




"Ka mu dawn, eirawng kha lo bawl chhunzawm rawh, chaw pawh ka eichak lo" khumah chuan lawnin puan ka sin nghal hlun a, a la rawn kal hnai tak deuh deuh a.




"Inentir chu i duh em?" aw ki dam deuh zawk hian a ti a, ka chhan hma hma chuan a Phone bawk chu a chhang leh a, "I bia a nih chuan i lo tur deuh thei ang" a nui suk nia maw le, mai mai hian a..




"Saw tah va be rawh" vin lutuka ka lo tih chuan a nui tawp chiang hle, "Duh tawk teh ang" a Phone chu a dah zui a, khumah rawn ṭhuin nur nang hian min en a, "Han sawi teh le, i eng nge na?" chiang fek fawk hian a ti zui a, ka lo inpet ruh ṭun thung.




"Ka dam lo.."
"I rilru a na anih kha" min lo tih kalh zauh a, ka ngawi leh hmak tawh.



"Hna thil a ni ka tih kha, i hrethiam duh lo tlat anih chuan i inti hrehawm mai mai ang, heng hna vanga kan nupa kan buai hi a ngai miah lo ania" a ti charh charh a, min zilh te pawh a ang zawk lek lek.




"I thik thu a chhe mah mah a ni Hadasi, ka duh zia che i hre lo pawh a ni lo a, duat pawh ka duat che, hetianga titau kual lo hian.." ka kham lutuk chu ka ṭhu chhuak hluai a, a kut chu la kangin ka Test kit hum lai chu na deuh tak hian ka hmehbel a, "Nei rawh, ka dam loh chhan pawh hi nangmah vang vek anih hi, min mawhpuh tawh reng reng suh" ka aw chu a lawi lek lek a ni, ka rilru a na leh tlat tawh a lawm maw le.




Test kit chu a bih vang vang a, a rawn ṭawng mai loh vang chuan keipawn ka lo en ve reng a, a tih dan chu ka thin in a tuar leh tawh meuh lo. "Khawi.." tih leh ban ka rual a, a la sawn rang kher mai!




"Ka lawmpui che Hadasi, nau i pai anih hi.." a ti zawi sup a, karei leh..! Keima fa chauh niawm ang ziazang a.




Test kit chu la bih reng chungin a kiai suk suk a, chutah rawn hawi chhuakin min nuih var var a, "Eng nge i duh, i duh apiang min dil rawh, khawvel min pe a ni ringawt a lawm Hadasi.." a tih chuan ka ner khum nang a, "Ka lawmpui ve dawn che em?" ka ti zui kher a, a thil sawi hmasa kha ka helh tlat.




"Thil ṭha deuh ka lei sak dawn che nia" a hmelah chuan a phur zia a lang thei; mahse, engmah duh ka nei lo, ka luak a chhuak lutuka, min ṭham ut ut reng bawk si a, mut mai mai pawh chu thil nuam a ni lo, a phur hmel te pawh chuan ka awm a tih nawm phah hek lo.




"Eichak i nei em?" ka bulah chuan rawn ṭhu hnaiin min rawn kuah a, ka pum a rawn chul chiah chu ka ip chawih thei, hmanhmawh lutukin ka tho sawk sawk a, Bathroom lam ka pan thuai bawk. Pum na vek khawpin ka va uak a, luak tur a bar pawh ka nei tawh lo, ka lu lah chu a han rit em em khawp a, a chhah deuh tupin ka hria.




"Engtin nge i awm a?" a rawn ti thum dut a, Bathroom khawngka ah a lo ding leh run tawh. "Min hmuh ve reng hi" ka ti tawl a, tui vawt chuan ka hmai ka phih zui a, "Bawngsa i ei chak em, ka va siam dawn em ni?" a lo ti leh pek a, Bawngsa berkher, a hming ringawt pawh chu chuan luak a ti chhuak thei a lawm le.




"Engmah ka ei chak lo, thil ei thei pawh ka nih loh hi" ka kam ka ṭhuah bawrh bawrh a, chau deuhin ka ṭhu tung at a, hetiang chuan ka luak chau vek thei ang.




"Thil ei loh ngawt chu a chi loh ang, nau i pai bawk si a; eitur hrisel i ei ṭeuh a ngai a lawm" ka va hawi let a, min lo nuih sang a, a nui hmel chu ka haw lutuk, a tan chuan a nuam viau a ni chek anga; mahse, kei chu ka hrehawm hluah hluah, min be reng loin min awmtir rih mai mai zawk sela ka duh maw le.




"Ka mu dawn, U Puia chu Airport ah lo va hruai mai rawh" ka kal pelh hnu pawh chuan min lo la zui ve zel a, khum bul ka thlen chuan ka bawk thlawp a ni ber, ka chau chhe der tawh.




"Ka nu kan hrilh ve a nge" a tih pawh chuan ka chhang tawh lo a, a nu a Phone zui aniang Sitting room lamah a ṭawng bul bul a, "A nuamsam vak lo a, a peih deuh hunah ka hruai dawn nia, a thin pawh a chhe tik tek khawp mai" tih angreng sawiin a phul hlut a, a ṭawngkam aṭang ringawt pawhin a phur zia chu a hai theih loh.




Ka nu Tluangi chuan eng nge a rawn sawi ni "Ka chhuah pahin ka lei nghal ange, Puia pawh a lo thleng ṭep ang" a ti leh a, an in be rei vak lo, rei lo teah a lo let a, ka bulah rawn inthawlhin min rawn kuah nghal thawr a, ka biang a rawn fawh lai te chuan chau hle lo ila chu ka tawlh sawn duh hial ka ring, ṭha taka ka chhawn thei lo chu dik ka inti bik lo; mahse, min ngaihsak poh leh min ti hrehawm zual a, ka thaw a ti ipik bawk.




"Eirawng chu va bawl ta che" ka ti bak hluk a, "Bawngsa chu i ei duh em?" a lo ti leh kher a, ka uak leh lo chauh a ni.



"Duh lo...kal tawh rawh" vin pawh ka vin peih tawh lo. Muangchangin a tho chhuak a, choka lama a thawm ka hre zui thuai a, chutih laia ka Phone ri chu ka melh peih ṭawk a ni, Amawii a ni tih ka hria a, ka ṭawng tam peih loh em vangin ka chhang rih lo, ka thawh harh peih hunah ka be zawk mai ang.




Ka muhil ve sek aniang ka harh leh chuan engthil emaw rim na deuh hi ka hria a, kalchhuak turin Marcosa chu a lo insiam mek bawk. "Saw lamah va inkap rawh, a rim a na lutuk, Room chhungah a nam khah vek hi" ka sawi zawng te chuan ka ṭah a chhuak zawk, a Perfume rim chuan pindan chhung a luah khat vek a, thawk pawh hrehawm khawpin a rim chu a na a, ka pum lam a rawn thawk leh ut ut tawh mai.




"Sorry" tih sup pahin Sitting room lam a pan a, a kal chhuah hnu chuan ka uak ṭhat a, chhuata ka luak chu tuiril hlang a ni tawh.




Tho chhuakin Bathroom ah rei deuh ka va ṭhu a, "Ka kal dawn a sin, thil min chah duh i nei em?" pawn lam aṭangin a rawn ti a, "Nei lo" tih zawngin ka chhang thung, a thawm a reh zui vang vang a, ka chhuah leh chuan a lo awm tawh lo a, ka inluak thawl ve ta deuh aniang chu ka awm nuam lo lutuk pawh ka reh ve ta deuh. Khum lam pan tawh loin Balcony ah ka chhuak a, kawngpui lam chu thlirin rei deuh ka ṭhu a, mahni tea han awm tlawk tlawk chu khua a har duh ngang mai.




Marcosa te lo haw leh chuan dar 3 a ri dawn thuak tawh a, U Puia leh a ṭhian pakhat hi Luggage nen bawr deuhin an lo lut a, an ṭhian lo kal thar chu palian pui sam dum hlap leh hmel ṭha deuh mai a ni. U Puia a rawn rik nghal bawrh bawrh laiin chupa erawh chu a ṭhu ngawi ran a, U Puia lah chuan "Va thar rang leh si ve, hman zan te kha chuan i sawi hnai lo ve hle si a" tiin min fiam zurh zurh a, a dan ngai te tein a khi ṭhaw reng.




"Thil ka thawn ang che, ka vahte ho ta tur a nia, Amawiin i kut aṭangin lo lam mai sela aṭha ang" ka ti a, Christmas dawn khan ka thawn hman ta si lo a, U Puia lo kal chu thawn a rem dawn khawpin ka hria.




Thingpui lum tura ka kal chu Marcosan min lo zuiin a thil rawn lei chu dawhkanah a phawrh mawlh mawlh a, thei chi hrang hrang a ni, ka ril a ṭam tawh bawk a, Apple hring chi a rawn lei chu ka vel nghal mawlh mawlh a, chutih laichuan Bag te reuh te pakhat hi ka hma ah rawn dah pahin "Naupai lawmpuina thilpek aw" zawi deuh tak hian a ti a, min ti hamhaih lek lek.




"Tu min pek nge?" ka tih chuan a hmui a pet sawi zauh a, "E le...keimah" a lo ti sam et a, ka han en chuan IPhone chhuak thar ber hi a lo nia, pawisa ka lo ui zia mai chu.




"Hetiang te enga ti nge i lei duh, a to ropui si" ka ti hap a, "I phu a lawm" tih pahin ka biangah a lo fawp zauh a, hnunglam aṭangin min rawn kuah hlu hlu bawk, pang insi a awm chu ka ti hleithei ta hauh lo, ka awmdan erawh a dik loh zia ka hre ve reng lawi a, ka insum nasa hle bawk.




"I awm a nuam deuh tawh em?" ka sam a chul pah hliau hliau a, kei ka lo bu nghat a, "Ka nu khan damdawiinah hruai rawh a tia, i nawmsam deuh hunah kan kal dawn nia" a ti zui luam a, chutih laichuan U Puia te ṭhian dun chu an lo ti ti dun ve a, naktuk lama kal leh nghal mai an tum anih hmel.




Thingpui chu ka siam sak a, ka va pek laichuan "Bawngsa siam teh aw, lo lei haw ka tuma in pa hian leisa kan nei a tia" a lo ti hlut a, ka nui tawi tak ringawt.




Phur lo deuhin eirawng ka bawl a, engkim tak meuh chuan mi ngei ni ta berin ka hria, bawngsa kan rim te, chaw chhum rim te, U Puia ṭawng ri leh a nui ri thlengin ka haw fai vek, a khat tawkin ka uak ṭhat ṭhat reng a, tih luihna nen tak meuh ka bawl zo thei hram a ni.




Zanriah chu ka ei lo chiang hle, chaw ka hmuh ringawt pawhin ka pum a let but but thei, Marcosa thei min lo hawn erawh ka ei thei ta phian a, U Puia lah chuan min chhaih nan tak a hmang a, "Mut mai mai loh man" te a ti thul, a ṭhianpa J.Mala a awm ve vangin ka insum hram hram a, chuti chung chuan thin a ti ur ṭeuh reng.




Zan pawh ka mu mang meuh lo, ka sahal a, a khat tawkin ka tho chhuak reng a, Marcosa bula mut phei chu a hrehawm lamah a kal a, thaw a ti ipik riau zel. Amawii Message ka han thawn a, a lo la muhil bik lo a, ka naupai thu ka hrilh chuan min lo Call nghal a, rei deuh chu Balcony ah dingin ka bia a, ka awmdan te pawh ka hrilh ve luam a, hrehawm ka tih tehlul nen ani erawh a rawn nui kur kur a.




"I pasal i rai huat anih ber chu, raino laia mihring huat neih hi a hrehawm ber an tia lawm, ka khawngaih reuh lutuk che, Marcosan han duat che a chak dawn tehlul nen; pasal te duatna pawh i dawngsawng hleithei dawn lo anih chu, in pa tak pawh a khawngaihthlak" a ti duah a, a sawi dikin ka ring. Marcosa ka mil lo lutuk hi Cathy leh Reena vang chauh niin ka hre thei lo, engtia han tih chi nge mawni dawn le, Doctor hmu vat ila; damdawi min chawh sela a ṭha ang.




U Puia te chu chuhnu lama chhuah an tum vangin zing hma deuhah ka Bazar a, naupang ho tan Nerf gun leh thawmhnaw ka lei nual a, Marcosan an zirlaibu leh eng i lo leinan pawisa a thawn bawk a, an kal tur chu Sumo Counter thleng a va thlah thlap bawk.




Tlaia a lo haw leh laichuan Ser ka lo vel mek a, "Chaw kha ei luih tum teh, chaw ei loin thei thur hlir i ei a, i pumin a ngeih lo ang" a ti bul bul a, ka ngaipawimawh zui lem lo. Amahin zanriah a ei a, kei chu Sitting room ah ṭhuin TV ka en a, ka bula a rawn ṭhut veleh ka tho tharh a, pindana ka luh hnu maiah rawn lutin ka bulah a rawn mu a, min rawn kuah chuan hah zetin thawk ka la a, "Min ning em ni?" a ti chu ka chhang lo chiang hle.




Ngawi rengin ka mu a, ka kawr chhung a rawn zen chu ka tuar thei ta meuh lo, "Tawlh hla teh, a hrehawm a nia" ka ti ta thlawt a, zawhna ngah hmel deuha min en vang chuan ka inthlahrung ru ngang mai.




"Rei lo te chu mu hrang rih mai teh ang" a kut chu dah sawnin ka tawlh hla zui a, min pawt let leh rang viau thung.




"I ti mah mah dawn, i pangchang duh anih chuam i theih tawkin pangchang rawh, hetiang zawnga i awm a nih chuan.." sawi zo loin a ngawi leh daih a, a ngai te bawkin min rawn kuah ṭha leh a, ka ke a rawn khan te chuan thaw lak a tawi duh mat mat viau mai, ka kawr chhung rawn zenin ka awm lamah a rawn rawlh chho a, ka insum thei tawh ngang lo.




"Keimah zawk ka mu hrang mai ang" tih leh thawh ka rual a, "Hadasi.." a rawn tih ri chu ka hre reng tak nain ka ngaihthah lui a, Sitting room ka thleng phei rual chuan a phun hluk ri ka hre leh a, a tih ngaihna tak pawh ka hre lo.




"Va mu rawh" kawngkhar bul aṭanga a rawn tiin min en ran a, a thinrim hmel hle bawk.




"Mu rawh, ka mut a chhuak rih lo" TV on tuma ka chet laichuan a rawn pen phei hlawk hlawk a, "Va mu rawh" ka Remote ken lai chu min chhuh sak pahin a ti chang leh bawl a, kan awmdan chu a hahthlak takzet.




"Nangmahin i mu thei mai lo a mi, ka zun a chhuak reng a, thawh sek ka ngai a lawm" ka ti hap a, min melh rum ul ringawt.




"Hotel a kan kal zan aṭang khan i awmdan hi a dik tawh lo, ka chungah lawm lohna i nei anih chuan tlang deuhin sawi rawh" a ti nghat a, han sawifiah dan tur ka hre lo takzet.




"Ka thaw a ipik a, ka naupai vang aniang.." ka ti sawi zep a.



"Ka hrethiam viau che, i raino a, i suaksual bawk; mahse, i duh ang anga awm chu a rem lo, tunah va mu rawh" vin zet hian a ti a, a ṭawngkam chuan min vilh ngut ngut a, ṭah khum chiam mai ka duh.



"A hrehawm a lawm, ka ke a sa a..." ka ṭap ti tih der..



"A va mak, i awmdan kha ka hrethiam ka ti a ni lawm ni, min ngaithei lo a, i damloh chhanah min puh bawk a, keimah vanga na inih vang chauhin ka hrethiam ang che, kal la...khumah va mu rawh" a hmelah chuan hrehawm a tih zia lang ve bawk mahse, a thu chu a rum em em thung.




Chhang zui loin pindan lam ka pan a, a thawm ka hre zui lo a, eng nge a tih lah ka hre hek lo. Rei deuh chu khumah ka mu meng reng a, ka va thawh leh chuan Sofa ah a lo muhil tawh a, min hnaiha a mutin nuam ka ti lo a, min hlata a mut lahin nuam ka ti chuang lo, dinhmun laklawh deuhah ka awm a ni ber e.




Muhil loin ka tlaivar ṭhak a, khawvar hnuah tlem chu ka chhing ve sek a, ka harh leh chuan ni a lo tlangsang tawh viau mai, kumthar tuka inkhawm miah loh chu a zia lo ka ti rilru a, Marcosa lah chu khawiah nge a kal ka hre der lo, thawh veleh aṭanga a hmel hmuh tur awm lo chu ka ruak huaiin ka hria.




Tlai dar 3 a rik hnuah pawh a la rawn haw lo a, zanlama ka awmdan vang khan a lungawi lo viau anih ka ring, ka inthiam lo a, ka ngai takzet bawk. A lo haw hunah chuan ṭha deuhin ka bia anga, ka insum thei ngei ngei tur a ni tiin ka intipaukhauh ve bawk a; mahse, a lo haw chuan ka ti leh thei chuang lo.




Ṭhi mawi deuh mai min lo hawn a, min awrh tir laite chuan ka taksa pum chu a na ut ut mai hian ka hria, ka bing deuh chuk chuk a, ka hmuia a rawn fawh pheichuan ka kawchhung a sa pup pup thei. Mahse, ka la insum ve fan a, ka kuah let ve nghe nghe.



"Hmun danga riah chhuah i duh em?" tiin min zawt a.



"Khawiah maw?" phawk deuhin ka en a, riah chhuah chu chak lo tak ka ni.



"Hotel-ah, Radisson blu ah khan kan va riak dawn em ni?" nelawm deuh hian min nuih a, "Duh hran lo, ka nuam lo lutuka, khawiah mah kal pawh ka chak lo" ka ti niah niah a, tih ngaihna vak a hre bik lo aniang chu a nui tawi tak a, "Naktukah kan in entir dawn nia" a ti tawl a, chu chu keipawn ṭha berin ka hria.




Zanah Sofa ah a mu leh a, a mut hmain Beer a in a, zing a tho hma ṭhin bawka zan lam hi chu a muhil hma viau zel. Zingkar luak chhuak ka neih ṭhin vangin keipawh ka mu rei thei meuh lo, inentir tur chuan min hruai a, Doctor-in Iron leh Vitamin ei tur te min lo chawh a, kan haw leh chuan eirawng bawl a hun tawh a, chaw rim hian min tih buai ṭhin vangin eirawng pawh aman a bawl a, ka ei pui ngai lo bawk a; a eirawng bawl chu a awlsam viau zel.




Chutiang chuan kar kan tluan a ni ber, nilengin inbe mang loin kan awm a, kei pindanah ka inkhung chawrh chawrh a, kan nupa kar chu a hla ta sawt emaw tih mai tur a ni. Kan boruak chu a nu hrilhin a lo han rawn ve ngei a, chuta ṭang chuan min hrethiam ve ta deuh a, min enliam a ni deuh ber tawh a, ka tan erawh inthlahrun a na duh em em thung, a zia lo tak zet, fa kan nei mai dawn a, heti renga thla 9 chhung kan awm anih chuan engtiang takin nge kan inhlat hman ang tih chu ngaihtuah tham tak a tling.




Thla khat zen zawn kan mut hran hnuah zan khat chu pindana ka awm laiin a lo lut a, "Ka nuin a be duh che" tih leh Phone min lo pek a rual a, ka nu aw dam thluam mai han hriat chuan hah a dam sawng sawng thei.




"I raino chu i la na viau ava nih hmel ve, Mampuia lah khan a hrethiam lo deuh tlatin ka hria a, ka rawn awmpui lawk mai dawn che u nia, eichak te i nei em, eng nge ka rawn ken sak ang che?" a lo ti luam a, min duatna awka chuan hnuk a ti ulh lek lek a ni.




"Ei chak em em pawh ka nei rih lo, i lo kal theih chuan ka lawm ngawt ang" ka ti ve thuai a, Marcosa nen chauh a khawsak a ngai lo tur mawlh chu ka lawm a ni, ama tan tak pawh a nuam zawkin ka ring. Kan inbiak laimek chuan ka hma a ding chuan Phone chu Speaker on turin min lo ti a, ṭha deuh chuan ka On ve mai bawk a, ka nu ṭawng chu kan ngaithla dun a, min rawn fuih mawlh mawlh a ni ber.




"Mampuia kha a awm hnai em?" a rawn tih chuan a ngaihthlak ve thu ka lo hrilh vat a.




"Naupai tirh thla engemaw chen hi chu khatiang kha a ni ve ṭhin a lawm, thil pangngai anih kha, Mampuia bulah pawh ka lo sawi tawh a, rei tak a awh lo turah ka ngai a, chu zawng aia pawimawh chu in nupa kar kha a nia, mipa tam tak te hian nupui te rai tirha danglam hi an hrethiam ṭhin lo a, nupa inṭhen na hial te a thleng ve ṭhin a, a tu ve ve pawh kha in dawhtheih hram hram a ngai ania" a rawn ti luam a, dawhtheihna in a tlin ṭhin lo hi a buaithlakna ber chu a ni.




"In hriat tur chu nupa a insiam ringawt hian inlaichinna ṭha a siam lo va, nupa a insiam hnua thil ṭul tak chu inlaichinna ṭha neih hi a ni. Inlaichinna ṭha neih loh chuan Kristian chhungkua a din theih ngai loh, nangni pawh hei chhungkua din turin rahbi hmasa ber in han rap ve ta a, inlaichinna ṭha nei thei tur chuan a tu zawk zawk pawhin ṭan in lak a ngai tih hria ula, nupa inlaichinna ṭha nei te inneihna chu lungpui chunga in sak ang; thlipui leh ruahpui pawh dawl zo khawpa nghet a ni ṭhin, inlaichinna ṭha awm lohna ah chuan chhungkaw hlim a din theih loh reng reng.




Mampuia pawh i duh ber chu chhungkaw hlim tak neih a nih kha, engtin nge inlaichinna ṭha kan neih ang in lo ti maithei a, a hmasa berah chuan inhriatthiam tawnna in nei tur a ni, in zahtawnin in ngaihsak tawn rawh u, engtin nge Pathian thuin nupui te laka pasal awm dan tur leh pasal te laka nupui awm dan tur a sawi kha.




Ephesi bung leh changah chuan 'Pasalte u, in nupuite hmangaih rawh u' tih leh 'Tupawhin mahni a inhmangaih angin mahni nupui hmangaih theuh sela, nupui pawhin a pasal hlau thiam rawh se.' tih thu a awm kha.




Hun khirh laitaka awm nia in inhriat chang pawhin pumkhat in nihna theihnghilh ngai lo ula, inchhawmdawl tawnin paltlang zel rawh u, Farṭuah pawh hling lerah mawi taka a par ṭhin angin harsatna tawpah hian hlimna tak tak a awm thei tih ring tlat ang che u" ka nu chuan a ti dap dap a.




Phone kaltlangin min ṭawngṭai sak a, kan nupa inkara inhriatthiam na te, kan inhmangaihna te a lo pun theih nan min dil sak a, a ṭawngṭai zawh hnu chuan engthil emaw danglam riau hi a awm tawh, ka sawi chhuak thiam hauh lo anga mahse, keimah a danglam awm chu ka hre thei tlat thung.




Ka nu kan biak zawh chuan khumah kan ṭhu dun reng a, sawi tur a vang duh tak zet, "Engtia rei nge anih ang?" a rawn tih chuan "A tir thla hnih thum vel hi a zual lai an tia, hmeichhia zawng zawngah a in ang vek lo ang" ka ti ṭha ve mai a, min chhang let lem lo.




"Ṭhenkhat chu an rai chhung zawng te pawh a ni tho, huat zawng a in an loh ang bawkin an lak nat zawng pawh a in ang lo a" ka ti leh a.




"Thla hnih thum chu ka thei ve mai ang; mahse, thla 9 chu tawrh tham tak aniang Hadasi...zo vat rawh se" tih pahin ka lam a rawn hawi a.




"Naute neih hi i chak viau pawh ka lo ring lo a sin" ka tih chuan min melh leh ralh a, "Ka chak a lawm; mahse, tunah tak hi chuan ka chak ang he hu chu a ni lo phawt mai" tiin min nuih suk a, kan boruak tawnin a zir lo ve bawk em a ni.




"Ka nu a lo kal dawn chuan kan ziaawm deuh ka beisei" a ti leh a, keipawn ka beisei, ral aṭang pawhin heti tak hian ka thlamuan pui a, min awmpui thei anih chuan kan heti reng bik lo turah ka ngai.




"Mu dawn tawh rawh" ka darah zawitein a rawn benga, a tho zui thuai a, pindan a chhuahsan dawn chuan ka khawngaih ta tlat anih chu.




"Marcos.." ka tih chuan a rawn lehhawi a, zawhna mitmengin min en bawk.



"Khumah mu ve tawh rawh" ka ti zawi sep a, zawhna mitmenga min enin "Ti lui duh suh, naute nen khan tui deuhin mu rawh u" a ti sam mai a, a hmelah chuan lungawi lo hmel a lang lo.




A kal chhuah hnu lawkah a rawn let leh a, kawngkharah chuan lo dakin ngunthluk fahran hian min lo en a, "Ka duat ngawt mai che u" thutak deuh hian a ti a, ka chhan let hmain a kal leh daih lawi a, eng rilru nge a put dawn ni?




Nihnih hnuah ka nu pawh a rawn thleng thla a, a lo thleng ta chu chhungkua tak tak kan ang tawhin ka hria, a nuam pawh ka ti, hetiang hian cheng ho reng thei ila tiin ngaihtuahna ka nei hial a; mahse, rei tak min awm pui thei dawn lo a, kar hnih khat lek cham tura lo kal a ni.




A awm chhung chuan ka ei theih tur thil chi hrang hrang min siam sak a, thu ṭha tak tak min hrilhin min fuih reng bawk, ka luak chhuak reh thei lo leh zan lama ka ke sa ṭhin chuan min ti chau zual a, mut mu ka tuah ṭha meuh lo, chhun lamah hian muthilh hi ka harsat bawk si a, thil ka ei hleithei lo bawk nen ka cher deuh kuam a, ka mitkhur te chu a tla dawk mai hian ka hria.




Chhunah Marcosa hna ah a kal a, a awm loh hi chuan ka ngai ṭhin ngang mai, Message te pawh kan inthawn fo a, ani pawn min ngai a, a ti lang fo bawk. Mahse, a lo haw tawh hi chuan hrehawm khawpin chhungril lam hian min hlat tir dan a zawng a ni ber, a ṭawng ri hriat loh hram hram ka duh a, a hmel hmu tlem thei ang ber turin ka awm bawk.




Ka nu bulah chuan ti hian a lo sawi a, "Hei bak hi chu fa nei tawh lo mahila pawi ka ti lo" a lo ti ni ngei tur a ni, hna thawka a chhuah hlanin ka nuin min hrilh a, Bathroom ah lutin ka va ṭap ringawt a, hetiang reng anih dawn chuan Marcosa duh dan chu keipawn ka ṭawmpui ang, hrehawm ka ti ve takzet.




Kar hnih zet a cham hnuah ka nu chuan min haw san a, a haw tuk maiah Aizawl lam aṭangin Phone call kan dawnga, ka pa Lura a damṭha lo viau a, damdawiinah an lut leh tawh hi a lo ni a, Angaihi lah chuan a rang lama haw turin min rawn tur a, a u a biak hreh vanga keimah min lo bia a ni nghe nghe.







(End of chapter - 25)
(Next ah chuan kan zo thei tawh turah ngai ang aw)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 22491
Joined: April 30th, 2016, 4:07 pm

Unread post by Ngaia » May 29th, 2022, 7:17 pm

POSSIBLE NIGHT - by Ahmangaihi violette Khiangte

CHAPTER - 26





Tlailamah chanchin ngaichangin Angaihi chu ka han be leh a, damdawiin aṭangin a lo haw chiah a nih hmel a, "A zia rih a; mahse, engmah chin hriat a ni lo a, ka u kha a beisei ru ve reng a nia, a rilru hahdam nan tal lo haw rawh se" a rawn ti ve luam a, Marcosa ka hrilh tur thu leh kan haw ngei tur thuin ka chhang a, inrinni anih vangin karthar lamah bak chuan kan haw thei kherin ka ring lo.




Dar 4 bawrah Marcosa chu a lo haw a, pindan aṭanga ka chhuah laichuan "Zanriah ka ei tawh a nia" tih pahin a kawrchung a phelh a, Sofa ah a mu zawi ngiai a.




"Ka pa chu damdawiinah a lut leh tawh a, kan haw chhoh ve ngei a ngai tawh ania, i hna i laklawh viau em?" tiin ka zawt a, a haw duh lo anih pawhin kei tal chu haw a ngaiin ka hria. Beisei nei sang lo taka ka ngaihchan laichuan "Motor ka khalh peih pawh ka ring lo, Flight ticket ka lo la dawn nia" a lo ti khauh a, chik taka a hmel en chuan damlohna a nei em mawni tih tur hmel a pu a, tunhnai chu hna a thawkrim a, zan pawh a mu tlem riauin ka hria, nge ni a kan nupa kar vang zawk ni?




"I damsam vak nange?" ka tih chuan "Ka chau" tih zawngin min chhang a, a chau hle tih chu hai theih pawh a ni lo.




"Tuilum in va inbual la" ngaihṭha zan loin ka ti a, Sofa a mu chungin in chung lam a melh vang vang a, a pang ka deh sak chuan a dai diai thunga, a hah vang anih ka ring ta ber.




"Ka dam lo hleinem" min rawn melhchho ran a, "Vitamin ei ve i ngai anih dawn hi, in enkawl ṭha rawh" ka ti zawi sep a, ka ngaihthah chhungin a mitkhur te chu a lo tla ve dak a, a biang pawh a ki leh lek lek tawh.




"Ka mut ṭhat loh vang aniang, zan hnih thum ka mu ṭha anga a zia mai ang" a tih chuan min ti hrehawm ru khawp mai, keimah vangin zantin Sofa ah a mu ṭhin a, chaw ka eipui ngai bawk si lo a, a chaw ei ṭhat leh ṭhat loh takngial pawh ka hre lo, eirawng chu kan bawl ve ziah a, ka kilpui lohna pawh a rei thawkhat viau tawh thung a, a sa duh ber Bawngsa lah a rim ka huat vangin a la ei leh miah lo bawk.




"Ka bulah lo mu rawh" ka ti ta ngawt a, ka thilsawi chuan a ti hamhaih deuh a nih hmel; chal ti chuar tap chung hian min en a, muangchanga rawn ṭhu chhuakin ka ban a rawn vuan a, "I hrehawm phah lo ang maw?" a ti zawi sup a.




"Ka zia tawh lutuk, nangmah zawk kha i ngaihtuah awm zawk anih kha" ka han ti ve tak nain a tir angreng kha ka la ni thung. Mahse, ka pal luih ve a ngai, nu ka nih dawn tak vang maiin nupui ka nihna ka hlamchhiah thei tlat lo, ka pasal hian min hrethiam em em a, keipawn ka hriatthiam ve a ngai, nupa tam takin an paltlang thei a lawm; keini pawn kan thei ve em em ang.




A inbual chhungin Bed sheet te ka lo thlak a, rei vak loah Towel veng chungin a lo lut a, khuma ka ṭhu chiah chu ngawireng hian min en a, sawi duh nei ṭeuh hmel a pu bawk. "I ke a vung a nih kha" phawk deuh tak hian a ti a, nimin piah lawk aṭang khan a rawn vung a, a mar deuh ṭung a, nat phei chu a na hran lo.




Khumah chuan rawn ṭhu vein ka ke chu a rawn hmet a, a mitmeng dul lutuk leh a chau hmel te chu hmuh a nuam lo takzet a ni. "In thlak la lo mu vat rawh, i chauh hmel emai" ti a ka ke laksawn mai ka tum chu a la vuan tlat a, chutah ka lam rawn hawiin "Hadasi.." thuk raih hian a ti a, duat mamawh ngawih ngawih hmel a pu.




"I nu hah ve deuh em mawni le?" a nui mai a, a nih ka ring ta viau mai. Ka nu khan a sawi tawh tak a lawm, "Marcosa pawh a nu hah deuh aniang a cher riau" a tia, ka lo chik ngai loh vangin ka hrethiam lo mai mai zawk a ni.




"Ei chak te i nei em, thei chiah chaw ah i rin chuan naute a hrisel loh phah a nge" a tihdan ziah a ni, chaw ka ei lo hi a hrethiam lo a, ka nu bulah pawh a lo sawi fo a, ka nuin Vitamin ka ei ṭhat thu a hrilh pawhin a ngaih a la ṭha thei chuang lo.




"Ice cream ka eichak" ka tih chuan a ṭhu ngil hluai a, sana a bih vut bawk a, zan tir chauh a la nih vangin ice cream dawr a la inhawngin ka ring.




"Ka va lei a nge, duh bik i nei em?" a ti nghal sawk sawk a, tho chhuaka a thawmhnaw bawm lam a pan laichuan ngaihdan dang ka lo nei a, "Dawrah va ei zawk ila, ka lo kal ve ang" ka tih chuan "I ke a vun kha" a ti mai a, "Kal tam ka ngai a lawm, Exer a ni mai" ka lo ti leh vat a.




In aṭanga kan chhuah chuan dar 6 a la ri lo deuh a, mi veivak pawh hmuh tur an la tam a, zan lama dawr inhawng ṭhin pawh an lun vanglai tak a ni. Kan kalna dawr chu kan chenna aṭanga hla lo te a ni a, an Ice cream pawh kan lei ve fo tawh a, Guwahati ah chuan helai a mi aia tui hi a awm pawh ka ring lo.




Dawhkan kila Ice cream eipahin ka pa chungchang ka sawipui a, "I hreh deuh anih pawhin ka pa rilru nawm nan tal ngaihsak rawh aw, ani lo pa i nei lo a, a fapa neihchhun i ni bawk a, i kut zala tla liau liau anih hi, tun hma thil te vangin in inkar ti chhe hlen miah suh, nakinah i inchhir leh zawk ang" ka ti ve luam a, min chhang lem lo.




"Angaihi chuan thil dang a sawi em?" a ti teh daih a, "Engmah a sawi lo, ani pawn haw turin a duh tak tak chein ka hria" ka tih chuan muk fe hian a inngaihtuah zui a, "Ka pa beisei chu ka hria a lawm; mahse, ina luh leh chu nangpawn i duh reng reng em ni a, naute kan nei anga, midang ho kianga chen chu i tan a nuam vak lo ang" thutak deuh hian a ti a.




"Kei chu min vengthawng suh, ṭha ni a i hriat ang khan ti tawp la, ka zui zel dawn che nia" ka ti a, indan a tih pawn ka hnial lo a, inpuia luh leh pawh chu ka hreh hran lo.




"Hetah hian awmin kan fa te nen chhungkua din ve pawh ni ila, nu leh pa tel lo chuan kan khingbai reng ang, nangpawn ka pa hi i theihnghilh thei tak tak dawn lo a, min boral san anih phei chuan kan inchhir fo mai thei" ka ti sap sap a, ka duh ber chu fapa anihna angin a mawhphurhna hlen sela, a pa tan innghahna niin chhungkaw khaiding tu ni sela, a duhthusam chhungkua chu a nei thei zawkin ka ring bawk, ka nu duhdan tak pawh niin ka hria.




"Nuam ka ti bik hleinem, ka pa chuan min vau nan leh min hremna angah a ngai ṭhin a, a puihna tel lo a ka awmtheih zia hi hria sela ka duh a, a bikin nangman hria la ka duh, ka pa pawisa leh a puihna tel lo hian ka chawm thei che a, ka fate thleng pawhin.." a ti nghat nghat a, englai mahin chu kher chu ka ringhlel ngai lo, ni lo sela chuan ka zui hauh nang.




"I thei lutuk, a hre chiang ber tu ka ni ang; tunah chuan midang pawn an hre vek tawh a lawm, i tuarchhel a, i thawkrim em em bawk, i rilru sehhelna phenah i nem zia pawh ka hria, ka pa pawh i ngaihtuah reng ṭhin ka ring, i theihna lantir i duh vang hian huaisen ka ti che a; mahse maw... Marcos, tlawm hreh suh, tlawm i hreh chhung chuan i huaisen tawk ngai lo ang, tlawm i hreh na khan i rilru a ti hrehawm anga, a tlai hnuah phei chuan a sawhkhawk vangin i la inchhir vawng vawng zawk ang" a mitah tak ka en a, haw a remtih rual hian ka pa laka a rilru hi danglam sela ka duh, ka pa chuan engthil emaw a lo sawi ngei anga, chhanna pe thei turin a rilru siam bawk sela ka duh a ni, hei bak hi chu tihngaihna ka hre lo a, amah zui zel bak chu tih theih ka nei hek lo.




Ka haw leh lamah chuan luak chhuak bawkin min rawn ṭham leh a, in kan thlen veleh Bathroom lam ka pan a, ka Ice cream ei zawng zawng chu ka luakchhuak leh a ni ber, pum na vek khawpa ka luak hnu chuan ka lu a hai chhulh tawh a, a chau thlak takzet.




Thei thur eitur ka zawng a, Nimbu te chi a lo la awm hlauh a, tui ah ka sil sawk sawka; ka keih nghal bawrh bawrh a, ka nuam deuh huaiin ka hria. Ka ke sa vang hian zan mut ka harsat a, Nerve ṭha lo nei ang mai hian ka za mur mur reng bawk a, ka muthilh ve meuh hi chuan khawvar hnaih lam a ni tawh ṭhin.




Khuma ka va mut ve chuan sir deuh takah a tawlh hla a, a khat tawkin kei ka uak leh ṭhin a, a inthlahrun phah a niang chu min hnungchhawn zawngin a mu ngat a, ka nu khan thla thum hnu velah a reh ve mai ang a ti a, keimah ber chuan ka kham riau tawh.




"Amawiin mipa anih a ringa, ka lak nat danah hian keipawn ka ring deuh" rawn hawi loin a nui ri suk a, "Lo chhuak vat rawh se" a tih chuan tawi tein ka nui ve a, a muthilh hnuah ka tho leh a, ka muhil lo tluan ta ṭhak a, chhun lam erawh ka mu tui khawp mai, dar 6 bawra ka muhil kha chawhnu herah ka tho chhuak chauh a, Sitting room a ka va chhuah laichuan Sangha chhum rim ka hria a, ril a ti ṭam raih raih thei.




Engmah pawh ka sawi hmain thleng lianpuiah min lo suah sak a, a tui hang te chu a thlum dep dep mai hian ka hria, hetiang em em a Sangha chhum ka eitui awm ka la hre lo, TV en pahin ka ei a, ani erawh Bathroom ah a thawm sawt sawt reng a, a in su niin ka hria. A lo chhuah leh chuan min rawn nuih ringawt a, tukin chu a tho nuam deuh aniang nimin aingawt chuan a hmel pawh hmuh a nuam ta deuh.




"Angaihi chu ka be tawh a, naktukah kan lo haw ang ka tia, Airport ah min lam tur a rawn tir ang" zangkhai deuh hian a ti a, "Ka pa chu eng nge a an?" ka lo ti let a.




"A ṭha rih, Aizawl chu a vawt viau dawn a, thawmhnaw lum keng tam rawh" a ti leh mai a, Balcony ah insuk a va zar ta in ka hria, rei lo teah Phone-a hmang ri ka hria a, "Kan rawn thleng lo mai ang, rei deuh awm tur kan ni chuang lo bawk a, ka pa te inah kan innghat zawk ang" tih angreng a sawi a, ka nu nen an inbia a nih hmel e.



"Hadasi.." a rawn tih chuan ka lehhawi vat a.



Ka lamah lo kal hnaiin ka dar a rawn vuan a "Rei lo te kan cham anga, kan haw leh dawn nia" nghet charh hian a ti zui a, "I tih dan dan a ni mai" ka tih chuan min chhang zui loin pindan lam a pan a, a rilru a siam fel ta anih hmel. Engpawh nise kan ka pasal thutlukna chu keipawn ka zahsak a ngai ang, kha leh chen kha a lo tuar tawh a, a lung a dam thei ngang lo ania nge.




Zana kan insiam laichuan "Guwahati hi nuam i ti ve deuh tawh em?" tiin min zawt a, ka lo nui mai thung.




"I khua a har ṭhin riauin ka hria" a ti leh a, zep loah chuan khawhar tih hian a sawifiah zo lo zawk ang, tumah ṭhian ka nei lo a, ani lah zan lam chauh inah a awm a, damsam loh phei chuan a hrehawm duh takzet.




"Kan awmrei hnuah chuan a nuam ve mai ang" ka ti hap a, "Aizawla awma inluah te i duh zawk em, kartawpah ka lo haw thei anga, Mawii pawh Aizawlah a awm a ni lawm ni" ti a a rawtna erawh ka duhzawng a ni hauh lo.




"Min ngaihtuah suh ka tih tawh kha, i awmna apiangah ka awm ve mai dawn a lawm" ka ti hmak a, ka khawhar a hlauh vang tih hre mahila a rawtna chuan engmah a ti danglam lo ang, kan pahnih tal chu awm dun reng ila a ṭha zawk bawk.




"Nau i neih dawnah chuan ka nu bulah awm la ṭhain ka hria a, a rawn zin theih loh chuan nangmah i chho anga" a ti leh zel a, ka thin a rim ṭeuh tawh.




"Aizawla ka awm dawn anih chuan nangpawn Aizawlah hna thawk mai la, anih loh chuan i bulah ka awm ang, khawiah mah awmhran ka duh lo" ka tum zui bar a, ka sam a rawn chul laipawh chuan en loin thawmhnaw ka khung sawk sawk a, "Kan naute chu a vannei ngawt mai, nang ang nu a nei dawn che a" zawi deuh tak hian a ti a, a lam ka hawi chuan min lo nuih a, ka hnuk a ulh ta lek lek.




"Kan chhoh hunah chuan awmpui tur kan zawng dawn nia, Mawii kha a inhlawh duh em zawt la, a buaipui thei deuh ang che" a ti leh a, keimah vangin a rilru a buai ve hle chu a ni sia, lo tihtauh khum chi ziazang a ni lo.




Zingkar hma deuhah kan tho a, kan chhuah hmain U Puian a lo Phone a, Airport ah min lo lam dawn anih hmel e, ka ke lah chu a vung nasa tawh mai a, pheikhawk pum pawh bun loin vawthlep pan te ka bun a, Motor-a chuan a ngai lo tur erawh a tihzia phian mai.




Ka luak duh thut takah tiin Ziplock bag kan keng ṭeuh a, vanneih thlak takin ka hmang miah lo thung. Thlawhna a kan luh hnu lawkah ka muthlu a, ka harh leh chuan kan lo thleng dawn reng tawh a, mahni ram boruak chu a dan a dang a, hawina lam apiang chu hmuh a nuam em em vek tawh. Airport ah U Puian min lo hmuak a, Jeep berkher a rawn keng chu Marcosan a lo hau a, "Muang changin kan tlan dawn nia, rawn sawh chhuak tham pawh a la awm loh kha" a lo ti sam et a.




Aizawl kan thlen chuan in lam pan hmasa loin Damdawiinah kan tlang a, Angaihi leh putar pakhat hi an lo awm a, chupa chu palian pui sar vung mai hi a ni a, Marcosa a hmuh chuan lo chibai vatin a be zui luam a, ka pa Lura ṭhianpa a ni awm e. Ka pa Lura pawh a lo zia viau a, biak pawn ṭha deuhin min chhang thei a; thaw a veng huai huai thei.




"Va haw ula, naktuk lamah in lo kal leh dawn nia, Angaihi pawh naute a lo tlei lo ang, i nu kha rawn tir phei rawh" a ti bul bul a, chutah ka lam lo hawiin "Damsam lo i va ang ve" a ti leh bauh a.




"A uak a uak tawh" U Puian a lo tih chuan ka pa leh Angaihi chuan phawk deuh hian min lo en a, "I rai a mi?" Angaihi zawkin a rawn ti phawng a, "Thla khat a pum tawh" ka tih laia ka pa hmel danglam chu ka hmuhhmaih lo, a nui lo nain hahdam huai hmel a pu a, Angaihi erawh a ner a ner a, engmah phei chu a sawi zui lem lo thung.




"Hmani khan Gabriela in dawrah a lo kal a, i thawh tawh loh thu an lo hrilh a, in chanchin kan lo hre ve chiah a lawm, i pa a heti ta si a, sumdawnna lamah hian i rilru han pe deuh teh, puih che pawh ka inhuam viau a nia" Putar lo awm ve khan Marcosa dar vuan chungin a ti chuar chuar a, Marcosa erawh a ding ngawi ngul a, he putar hi 'Kan VIP' ti a an sawi fo kha anih ka ring.




"I Pa Saia nen kan lo sawi dun a, dawr hi hmunkhatah insawr bing ila, Rental lam te hi.." a ti hman chauh tih ah "Chawlh ka rawn la zawk a, kan let leh vat ang" Marcosan a lo ti khauh a, ka pa chuan a sawizawm ta lo. "I rawn thleng ve chauh a, haw leh han sawi nghal te chu a" Angaihin a lo ti hlak a, a u chu a melh tur khai bawk.





"Eng hna ber maw i zuk thawh a?" Putarin a tih leh chuan "Digital Marketing lam a nia" Marcosa chuan a ti mai a, "I awm loh chuan in dawr saw a va buaithlak duh awm ve maw le, i pa lah thawk thei a ni tawh si lo a" Putar bawk chuan a ti leh a, kan boruak chu a ipik sawt riau a, U Puia pawh pawnah a chhuak daih tawh nghe nghe.





"Va chawl hahdam phawt rawh u" ka pa chuan a ti a, "Phei phawt ang" Marcosan a rawn tih chuan ka tho ve vat a, pawn thlengin Angaihin min lo zui chhuak a, "Ka pa hian i hmingin engkim a dah vek tawh a nia, Malsawma a rui reng bawk si a, naute nen engmah kan ti thei bawk si lo" a ti niah niah a, "I lo haw ve nghal dawn em?" ka tih chuan lu a thing a, "Ka nu kha lo kal phawt sela, ka lo haw ang" a tih zuai raih a, zan a mu tlem tih hriat takin a mit a bui lak a, kan inhmuh hnuhnun ber aikhan a cher tawh bawk.




In lam pana kan tlan leh hnu chuan kan ṭawng meuh lo, U Puia leh Marcosa pawh an ṭhu ngawi ran a, Angaihi thilsawi te chu ka ngaihtuah let neuh neuh a, hetiang anih chuan keini nupa hi awmbo reng thei kan niin ka hre tawh lo a, ka pasal chuan eng nge a ngaihtuah ni tukverh lam hawiin a ṭhu a, a rilru thlak thei sela ka ti takzet.




Ka nu Sangpuiin min lo hmu chu a phul ve hlut a, min lo lawm thiam khawp mai, chutih laiin Angaihi fanu chu a ṭap bai bai reng a, "Matei chu a rawn haw ve nghal mai lo a ni, a nau hi a tlei lo lutuka" a tih chuan naute chu lo laksak ka tum a, min duh tlat lo. U Puian a lo ban ve chuan a la thei mai a, a ṭap bang nghal hmiah bawk.





Kan thawmhnaw Bag te kan dahfel hnu chuan thingpui te kan in ho a, U Puian naute a pawm muhil zui bawk nen Nu Sangpuii chuan damdawiin lamah min phei san a, eirawng a lo bawl peih vek tawh vangin tih tur a awm lo a, kan pindan hlui ah chho lehin kan nupa khum hlui zau fahranah chuan ka tlu zal a, pindan chhung ruak ang bawkin ka ngaihtuahna chu a ruak a, rilru put dan tur pawh ka hre ta meuh lo chu a ni.





Angaihi lo haw chuan dar 5 a ri dawn tawh a, U Puia pawh chaw ei ve nghal tura kan tih vangin a la awm a, amah chiah nautein a duh vangin an in paw hnup hnup reng a, pafa ni mai awma mawi an ni. "Ka pa in zanah lo kal teh se a ti che ania, titi pui che a duh aniang va kal lawk ang che" Angaihin Marcosa bula a tih chuan "Khawiah nge Malsawma?" a lo ti let khauh a. "Ka hre lo, ka ngaihven peih lo" pakhat chuan a lo ti let hmak a, a lawm loh hmel viau bawk.




Zanriah kan ei laiin Malsawma chu a rawn haw a, vung deuh hian inchung lam a pan nghal a, a chaw eilai thawhsana Angaihi han chho chu a thang rei khawp mai, rei deuh hnuah amahin a lo chhuk a, dawhkan kila a ṭhu fel leh awrh tihah Malsawma chu lo chhuk thlain a Helmet a la a, "Khawiah nge i kal leh dawn?" ti a a nupuiin a au zui pawh chu ngaihsak loin a chhuak nal nal a, a Bike tlan chhuak thawm chu chhanna awm chhun a ni.




"Damdawi a la khawih em ni a?" Marcosan a tih chuan "A khawih nasa lutuk, tih loh pawh a nei tawh lo" Angaihi chuan a ti zuai raih a, a ṭap lek lek a; ka khawngaih reuh khawp mai.




"Tunge Dawrah awm a?" Marcosan a tih leh chuan "Ka kal zeuh zeuh a, a hma chuan ka pa a kal" a ti leh sep a, Marcosa pawh a rilru a buai ve hle tawh in ka hria, keichuan ngaihdan dang ka lo nei a, hetianga a mit ngeia chhungkaw buaina a hmuh hian amah ah awmzia eng nge maw tak aneih ka beisei a ni, chhungkaw khai ding tura a pawimawh zia te, a mawhphurhna te pawh a hriat chian lehzual phah ka beisei.




Zanriah eikham veleh U Puia nen an inzui chhuak a, keini Angaihi nen TV en pahin kan ti ti a, nu a han nih tak vang te pawh a niang danglam ta riau hian ka hria a, a thil thlir dan thlengin a danglam tawh, "Ka u a awm loh chuan chhungkua pawh kan ang lo, kan duh duh kan ti vek a, kan zalen viau nain a nuam chuang lo, ka pa lah a damṭha bawk si lo a, Sawma lah zantin a leng chhuak a, a khawhar thlak duh tak tak a ni. Ka u awm lai kha chuan mitmei kan inveng tawn tal a, tunah chuan tumah hi kan inngaipawimawh tawh si lo a" a ti sap sap a.




"Lo haw leh hi a la duh lo viau em ni a?" ti a min zawh chuan "Duh e, a duh reng ṭhin a lawm; mahse, haw leh chhan tur ṭha tak a duh a, mipa hi chu Arpa ang deuh hi an nia, ramri an insiam tlat ṭhin a, mamawh an nih lohna ah hi chuan an awm duh ngai lo" thutak deuh hian ka ti a.




"Kan mamawh zia chu nangpawn i hria ang chu, dawr kan enkawl hman si lo a, hmeichhia ni lo ila chuan ka ti ve thei mai tur a nia, kan pa laktlak loh lutuk vang vek maw le, ka pa a han dam ṭha lo lehzel bawk nen" a ṭawnglai chuan a aw a lawi lek lek a, dinhmun harsa taka a dinlai a ni bawk a, a rilru pawh a no hma khawp mai.




"Nangman i u chu hrilh la, nang te chu a duat che a; i nun nawmna turin engpawh a tih duh ka ring" ka tih chuan lu a thing mat mat a, "Ka hrilh ngam lo" a ti zawi sep a.




"Engah nge i ngam loh, tunhma pawn ka pa ṭawngkam aichuan i ṭawngkam chuan awmzia a nei ziah a lawm, in chhuahsan a duh chhan ber pawh i haw leh theih nan ania" phawk deuh hian min lo en a, "Keimah vang a ni tak tak a law?" a lo ti let ha a.




"Aw, chen dun kha i duh tawh si lo a" ka tih leh chuan a in pet ruh ṭeuh tawh. "A hrehawm e, ka u hian min ngaidam duh tawh pawhin ka ring lo" a insut ri faih a, keimah zawk pawh chu ka hnuk a ulh deuh a, han hnem dan tur pawh ka hre lo.




"I be dawn nia, ṭha deuhin titi pui la, i ṭawngkam ṭha ringawt pawhin awmzia engemaw tak a neih ka ring tlat, 'Ka taksa peng pakhat' a tih ṭhin che kha" ka sawilai chuan a nui hak a, a ṭah nuih a ni mah zawk.




Dar 9 velah Marcosa a rawn haw a, Angaihin Bed Sheet leh puan sin tur te min lo pe a, khum ka siam laichuan kawngka bulah nau paw chungin a ding reng a, tui Bottle kenga Marcosa lo lut chu a en leh vung vung ṭhin a, Marcosa lah chuan Phone a hmang a, Reena biain hna chungchang a sawipui a, chawlh a lak mumal loh vangin Office lam an lo buai viau niawm tak a ni.




"In la mu ve dawn na nge?" a Phone hmang zoin Angaihi lam hawia a tih chuan "Mu dawn tawh e" tih pahin Angaihi chuan Sana a melh zauh a, "In pa a la rawn haw na nge?" Marcos chuan a ti leh a.




"Dar 2 velah a rawn haw chauh ang" Angaihi chuan zangkhai deuh hian a ti a, "Anih chuan va mut san rawh u" Marcosa chuan a ti deuh hluk a, ka lo ip ru angreng.




"Muttui u aw" ti a Angaihi te chhuah hnuah ka khum phah marah chuan a rawn let thawk a, "Ka thaw an ti ipik" a ti chhuak hlawl a, zawhna min zawt niawm tak hian min en ran bawk.




"Han insawi thawl la" ka lo ti mai a, thawk a la hluai a, "Ka pa chuan engkim ka kutah a dah, tuna kan awmna in thleng hian ka hmingin a dah vek" a ṭhen zui sak a, lawm tur nge lawm loh tur pawh ka hrethiam lo.



"Mawhphurhna a sang lutuka, a delh rit deuh che tihna a ni maw?" ka tih chuan a bu nghat a.




"Engtia han tih nge ṭha ang?" ti a ka zawh chuan "Min zawt suh Hadasi...nang leh kan naute chiah kha ngaihtuah ka duh" a ti khawl a, a theih dawn loh tih chu kei aimahin a hrechiang zawk ang.




"Angaihi hi a rilru a buai lutuk a, ka khawngaih reuh khawp mai, an pa hi a haw tlai ziah anih ka ring, tuna i mawhphurhna lak duh loh mek kha a koah a tla a, fa sen pawmlai anih saw Marcos...a pasal vangin a rilru a hah dawn bawk si a, ka pa lah heti hi a nia...nichina a hmel te kha..." ka sawilai mek chuan a rawn tho hluai a.



"Ngaihawmi hi a suaksual a, tunah a lungngai anih hi" a ti nghut a, min ti dang lel mai.




"Ka hrilh lawk vek a sin maw le, ka va bia a nge" tih leh thawh a rual a, han inbe mawlh teh se, an phurrit te pawh inchhawk thei nghe nghe sela a ṭha ang, Angaihi tan chuan tuna a phur hi chu a rit mah mah a ni.





(End of chapter - 26)

* Uiha...ka zo hman ang ka ti ve ngawt a, neuh neuh a lo la awm ṭeuh anih chu, Next ah chuan ka zo tawh tak tak ang *


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 22491
Joined: April 30th, 2016, 4:07 pm

Unread post by Ngaia » May 29th, 2022, 7:17 pm

POSSIBLE NIGHT - by Ahmangaihi violette Khiangte

CHAPTER - 27





Marcosa chhuak ta chu a rawn let leh ta lawk lo a, darkar chanve chuang zet chu a thang tawh awm e, ngaihven tuma ka va chhuah lai chuan Angaihi te pindan lama an phun bul bul thawm chu ka hria a, lut nghal mai loin kawngkhar bulah chuan ka ding a, Angaihi zawk chuan Phone a hmang niin ka hria.




"Ka lo bia ang?" Marcosan a tih chuan "A biak tlak loh emai, in inhau leh mai mai zawk ang" Angaihi chuan a ti a, an pa chungchang an sawi mek a ni.




"Va mu tawh rawh ka u" a tih hnu chuan Phone chhangin a ṭawng mawlh mawlh a, "Zan a rei leh mai dawn, lo haw vat rawh, i lo haw hma chu ka nghak leh dawn che a nia" a ti zui hlak hlak a, Marcosa erawh a ngawi ran a, va pawh ve mai chu ka hreh deuh a, rei awm loin ka letsan leh thuai a.




Pindan chhunga Sana intar chuan dar 11 a lo kawk va tawh, bathlar lamah chhuakin ka hawi kual a, kan piah ral a eng de sep sep chu zan thim hnuaiah chuan a lang mawi ngang mai. Thla pawh van zawlah a eng seki raih a, lung a ti leng ve vawng vawng thei, he ina ka luh tirh lai te mitthla ah a rawn lang a, tun hun hi chu suangtuah ngaihna pawh ka hre ngai lo, beisei loh thil a thleng indawt zut a, mumang te pawh a ang lek lek zawkin ka hria.




Marcosa lo lut thawm a awm zui tak vangin pindan lamah ka lut thuai a, "Mu tawh ta che" a lo ti vat a, amah zawk chuan mut a la tum lo aniang dawhkan lam a pan a, a Laptop phawrhin a ṭhu rem sauh sauh a, ka chauh deuh vangin mut mai pawh pawi ka ti lo.




"I la mu ve dawn nange?" ka tih chuan "Angaihi kan men pui a nge" min en lem loin a ti mai a, Malsawma biak a duh ni ah ka ngai a, a hau ngei bawkin ka ring.




"Angaihi chuan eng nge a lo sawi a?" ka tih chuan a rawn hawi ta chauh a, "Thil thleng tur hrilh hlawk thiam ka niin i hre ve lo maw, sawtiang sawn a la awm dawn tih ka hre sa daih tawh a, ka hrilh lawk vek bawk a, min awih duh sela chuan tunah pawh a lungngai miah lo tur a nia" a ti zui duah a, a lawm loh hmel viau bawk.




"A inchhir viau tawhin ka hria, zan tir khan kan lo titi dun tawh a" ka ti ve mai a, "Inchhir hi a pawi anih hi" tih zawngin min chhang a, "Nangpawh i inchhir leh loh nan in ngaihtuah ngun viau rawh" ka lo ti chu min rawn melh leh rulh a, min chhang lem hlei lo a.




Ka chau bawk a, ka mutui khawp mai, mumang takngial pawh ka nei lo, ka ṭhanharh chuan khua a eng uang tawh a, ka pum lam chuan min mawlh leh reuh reuh tawh a, zing lam hi a hrehawm lai ber a ni, tho chhuakin Bathroom ah rei deuh ka va awm a, zingkara luak hi chu thil pangngai takah ka ngai a ni ber tawh.




Inhnuaiah chhukin eirawng ka zuk bawl sawk sawk a, ka BP a hniam deuh aniang ka lu a hai lek lek ṭhin a, khawsik hluah si loin ka awm a nuam lo reng a, nachhawkna han ei em chu ka hreh ve tumhrang a, ka pa tlawh pahin in entir ka rilruk a, vawiin ah ka kal hman turah ka ngai.




Angaihi te nufa an lo thawh chuan dar 7 a pel zawt chauh a, a hmel han en chuan a mu meuh lo tih a hriat theih, dawhkan kila a rawn ṭhu pawh chu a ham bai bai a, a mit hnuai a dum kual raih bawk. "In pa chu dar engzat ah nge a lo haw a?" ka tih chuan "Dar 4 vel khan, ka u a muhil hman hlauh a, a tihzia ang reng, a ruih a reh hunah inbe chauh sela a ṭha ang" a ti niah niah a, a fanu chu hnute pein a sam a chul sak hliau hliau a, a inngaihtuah muk hmel hle bawk.




"Fa neih hnu chuan insiam ṭha ve tawh sela ṭha tur" ka ti hap a, ka lam rawn hawiin "A ṭha chhuak tawh lo ang, engmahin a ti danglam zo tawh lo, ruih bak thlakhlelh a nei tawh tlat lo a" beidawn hmel zetin a ti a, ka lainat ve takzet.




"In ti chak hram hram rawh, i fanu tan tal chhel taka i awm a ngai anih kha" ka tih chuan tawi tein a nui a, "Kei chuan ka enliam vek thei ṭhin a; mahse, fa te han neih takah chuan tun hma a ka ngaih ang ngawt kha a ni tawh tlat lo, ka hmakhua chu ka ngaihtuah lo a, ka fanu hmakhua ka ngaihtuah hian ka lung a chhe tlat zel" a ti leh reuh a, a thil sawi chuan ngaihtuah a ti thui duh angreng khawp mai.




"Keima thiam loh vek a ni, Shalom-in pa Addict a nei tih a hriatthiam hunah chuan min la rawn dem ve ngawtin ka ring" hnuk ulh ṭeuh chung hian a ti leh a, han sawipui chiam ngaihna pawh ka hre lo.




"Ṭawngṭai tam la, Pathian hnenah inkawl tir reng rawh, keipawn ka ṭawngṭai pui dawn che nia, mihringin tihngaihna kan hriat loh hnuah pawh Pathian chuan tih ngaihna a hre zel a, kan beisei aia ṭhain rem min ruat fel sak leh mai ang" tiin ka han hnem ve a, ka thusawi chuan a hnem zo ngut a nge maw.




"Nang i ziaawm deuh tawh em, ka u khan i nuamsam lo atia, i luak nasa viau e law?" a tih chuan ka nui tawi tak a, "A la zia thei meuh lo, zingkarah hian ka luak nasa ṭhin a, huat neuh neuh hi ka ngah bawk si a" ka ti ve luam a.




"Keichu huat ka nei miah lo a sin, ka chawei te a tui phah zawk hlauh a; mut theih loh pawh ka nei lo" a tih chuan vannei ka ti angreng. "A va nuam dawn bik ve, kei chu ka pasal thlengin a tuar a, i u hi ka rai huat tlat a lawm maw le, tunhnai hian ka ziaawm deuh chauh zawk a, a tir lam khan a hrehawm ve lutuk; mahse, ka ti lui ve thei viau tawh" ka ti leh duah a, kan boruakin a zir lo bawk si a, ka pal lui ve ṭang ṭang rih a ni ber.




"I la vannei zawk tho tho, nang chu ka u in a la ngaihsak tal che a, kei chu ka rai lai pawn min ngaihsak lo reng reng, zan tin a leng chhuak ziah tho, ka ngaihtuah let hian ka inkhawngaih zawk ania" a ti leh hap a, rai a haw ve lo chu vannei ka tih viau rualin a dinhmun chu ka awt lem lo, a sawi ang takin kei chu min ngaihsak tal a, ka ngaithei lo chung pawhin min ngaihtuah em em reng anih kha, ni e...vannei tak ka ni.




"Mipa i nei dawn anih ka ring riau, rai huat pe na deuh deuh hian mipa an nei duh an tia" a tih chuan ka phur ve hluai a, "Mipa chu ka awt lutuk, i u lah chuan 'Hei bak hi nei tawh lo mai ila a ṭha ang' a tia, ka la na lutuk hi hrehawm a lo tia" ka tih chuan a nui hak a, "A ning ngawt ang chu, a thinchhe ve angreng bawk sia" tiin a nui zui kar kar a.




Marcosa lo thawh chuan eirawng ka lo bawl zo tawh a, damdawiin lama ken tur Tiffin ka lo buatsaih mawlh mawlh laichuan "I va luak nasa awm ve, i thawm kha ka hria a" tih pahin ka bulah chuan a lo ṭhu a, "Luak nasa hran lo e, vawiinah chhuah pahin in Check up chu ka duh" min chhang tawh loin Angaihi nau pawm chu a lawm a, kan naute pawh a nu malchung aṭang chuan chhaih a nuam a; a nui ve sen sen a, Marcosan a han chhaih uar deuh chuan a khek ve raih ṭhin a, hmuh an nuam dun ngang mai.




"Nau han chhawnchhaih pawh a hnehsawh dawn riau hi tiraw Hadasi, a lo Training nasa tawh bawk a" Angaihin a rawn tih chuan ka nuih a za vak lo, nuilui zet hian Marcosa chu ka va en a, ani pawh a nuih a za fahran lo aniang a kiai suk duh chauh.




"In pa chu a la mu a mi?" tiin Angaihi chu a zawt zui a, "La mu e, a fim deuh hunah i be dawn nia" pakhat chuan a ti mai a, "Biak tehchiam pawh ka tum lem lo, ka ngaihdan chu a la ngai reng, ṭhen hmak la ka duh" Marcos chuan a ti chang bawl a, ka lo mitmei ve taknain awmzia a nei tlem viau a niang chu "A awm leh awm lohin kawngro a su vak chuang lo a ni lawm ni?" Angaihi lam hawi chuan a ti leh nghat a.




"Chutiang ngawt te chu nibik lo e, laktlak loh leh rui thle mai mai pawhin nung se, ka fanuin pa ti a koh tur a nei ve tal a lawm" a ti zuai raih a, Marcosa ṭawng leh tum chu a banah ka va sik hlawk a, a ngaihdan a nih loh hmel khawp mai. Engmah phei chu a sawi zui ta lo hlauh a, ka nu in a rawn Phone ta bawk nen min thawhsan thuai a, rei vak loah U Puia a lo thleng a, a lo luh rualin a rawn phul nghal hlut a, ani hi zawng eng lai mai pawh hian a thothang a ṭha em em reng a, nui hmel a pu reng mai hian ka hria.




Tukṭhuan kan eilaiin U Puian Shalomi a lo pawm a, kan inpeih fel veleh insiam in Damdawiin lam kan pan a, ka pa pawh a ziaawm ve zel a, tukin lam chu khawsik pawh a nei lo niawm tak a ni, chaw te pawh a ei thei a, ka awm chhung zawngin a ṭhu chhuak peih bawk a, a Doctor chuan 'I Tumor hi chu a ṭhang lem lo a, tun ṭuma i natna hi chu i taksa chauh tawngkhawng vang anih hi" a lo ti ta hlauh a, thawk khat chu a veng huai mai.




"Rilru tih hah vak vak te, taksa chauh lutuk te kha a ṭha lo ania" tiin inenkawl uluk turin a chah zui mawlh mawlh a, inah hahdam taka a awm mai mai theih chuan a ziaawm ve leh maiin a ring bawk.




Kan haw hmain Clinic lamah Gynae doctor kan va hmu a, luak danna in min lo Jection a, a ei chi min chawh bawk a, Marcosa tan Vitamin chawh tel tura ka ti erawh a nuih a za deuhin ka hria, "A nuhah ve a" ka ti leh zet chu min nuih kur kur a, "I ngaihbel mai mai anih dawn chu" a tia, "Nuhah a awm ngai lo" a ti tlat bawk a; mahse, Internet ka en ve fo a, engmah hrethiam lo ka ni bik lo.




Vitamin chu a chawh ve ta tho a, chaw ei ti tui thei lam chi a ni thung a, chaw a ei tlem ṭhin em a, ka lawm viau tho mai. Kan haw hnu chuan chaw ei dawn thlengin ka luak a chhuak leh ta lo a, zan lam pawh zan dang aichuan ka mu tui ta deuh.




Kar khat zen zawn kan cham hnu chuan ka pa pawh a rawn chhuak ve thei ta a, in khata kan han awm khawm leh meuh chuan danglam riau hi a awm tawh a, boruak a dam ru riau a, nuam pawh ka ti, haw leh min ti chak lo lek lek ṭhin. Angaihi nen kan titi dun thei tawh a, ka pa lah tun hma aimahin kan nupa chungah a ṭha a, a bikin Marcosa lakah, ka chungah hi chuan a ṭha reng ṭhin a, danglam falua a awm lo. Marcosa chunga a ṭawngkam leh mitmei erawh a dang ta hlak a, a thlahlel ve ngawih ngawih niin ka hria.




"Kan chhuk hmain ka nu kan va tlawh dawn nia" a tih chuan ka rilru a buai angreng khawp mai, duh min thlan tir ni sela chuan helaia awm hi ka thlang zawk ang maw le; mahse, a ti tlat si lo.




"Ka pa chuan a chelh che em?" tiin mut hmunah ka zawt a, "Tum chu a tum a, kan hnial a ngai ang, heta kan awm ve reng chuan rei lo teah neuh neuh a awm leh vat dawn a, chuvangin in pawh hi Angaihi hmingin awm zawk sela a ṭha ang" a ti nghat nghat a, ka hre chiang thawkhat tawh a, a rilru hi awlsam takin a thlak ve mai ngai lo, ṭha ni a a hriat lam chu luhlul takin a pan ngar ngar zel.




Inrinni ah Amawii a lo leng a, tlai thlengin kan inkawm a, Guwahati a min awmpui tura ka han sawm chuan a chak ve viau a; mahse, aw min pawh thei rih mai lo, "Ka nau te an Exam dawn a, nau i neih dawn hnaih ah chuan rawn awmpui dan che ka lo ngaihtuah ang, engmah hlawh tih vel a ngai reng reng lo" a ti ve luam a, han sawm luih viau theih pawh a ni bik lo, nau neih dawn hnaih te anih loh chuan keipawh ka inbuaipui ve theih mai ka ring a ni.




Zan khat chu ka mu ka harh hlawl a, pindan lehlama thawm ri chu ka hre zui thuai a, sana ka en chuan dar 1 a pel awrh a, thawm ka hriat leh rual chuan ka ṭhu chhuak vat a, ka tho rang viau mai, Marcosa pawh kai tho loin ka tlan chhuak a, an pindan aṭanga Shalomi pawm chunga Angaihi rawn ṭap chhuak chuan min ti hamhaih takzet!




"Engtin nge a awm a?" ka ti hlut a, min chhang thei lawk lo, thaw hlawp hlawp chungin Shalomi chu a thing a, a sawi zui nawk nawk a, min ti chiai chhia va a ni.




"Marcos, lo tho vat teh" tiin ka au nghal chul a, Angaihi lah a ṭap hlawp hlawp a, Shalomi ka han en chian chuan a lo duk vek tawh!




"Marcos.." ka ti leh chul a, ka tha te chu a khur titih der a, ka awm a tawt urh a, ka luak thei mai dawnin ka hria!




"Eng nge ni?" tih pahin Marcosan min rawn kalpel vut a, Angaihi kut aṭanga Shalomi a laksak lai te chuan ka thaw mang meuh tawh lo. "Hnute ka pe a, ka lo muthlu a, ka hnawh hlum a niang..." ti a Angaihi ṭap hawm hawm ri chuan beng a luh chhuah chhuah thei!




"Lo insum rih rawh, engtin mah a awm lo ang" ti hlukin Marcosa chuan a naupawm chu a thing nawk nawk a, chutah a keah vuanin a letling zawngin a khai a, a hnunga a ben sak laichuan ka lo ip nasa ngang mai, ka hlauthawng a, ka chiai nasain ka taksa te chu a sai dar dar a, Angaihi lah chuan a en ngam tawh lo a; bang lam hawiin a khur hlawk hlawk a, kan thawm hriain ka nu leh pa te an lo tlan chho ve bawk a, thil awmzia min zawh lai pawh chuan ka chhang thei meuh lo.




Marcosan naute a buaipui laichu ka en reng ringawt a, "Naupai lai i nih kha, lo va kalsawn rih rawh" ka Pa in a tih pawh chuan che thei ka awm lo reng reng.




"A awm kha nem ta che u, thawk te pe rawh u" ka nu chuan a ti chel chul a, "Naute mai anih hi" Marcosan a ti vin hluk thung a, a thi tawh nimaiin ka hria!




A letling zawnga khai chunga a hnung a han ben leh rual chuan thawm a rawn chhuah a; mahse, vawikhat chauh a ni! Ka din hnaih nghal thuai a, Angaihi pawh a rawn hawi rang khawp mai.




"Tunah khan a ṭap a mi?" aw khur dar darin a rawn ti a, tuman kan chhang lo.




"A hnung kha han beng leh teh" ka Pain a tih chuan Marcos chuan a vawithum vel a han beng leh a, chuveleh a rawn rawn ṭap chhuak ta rawng rawng a, kan thaw huai hlawm tawh. "Damdawiinah hruai nghal ang u" ka nuin a tih laichuan Marcosan Angaihi kutah naute chu a pe a, "Lo pawm thla rawh, Motor ka lo la chhuak ang" a ti zui zat a, chutah ka lam lo hawiin "Inah lo awm rawh" tih leh kailawna penthlak a rual a, Angaihin a zui ve zat bawk.




A kal hnu chuan ka pa hoin Sitting room ah kan ṭhu a, an lo Phone hun kan ngaichang a ni ber, "Malsawma lah chu inah a awm hlek lo lehnghal a, hepa khawsa zia hian mit a ti kham tawh khawp mai" ka pa chuan a ti hluk hluk a, dem loh theih pawh a ni lo, mutmu pawh tuah ṭha thei lo khawpin a nupui a siam a, zanin thil thlengah pawh hian amah chu demawm ber niin ka hria.




Darkar chanve hnuah Marcosan min lo Call a, "Naute chu a ṭha aw, hnute tui a hak vang pawh a ni chiah lo, a ṭap hnang zawk a lo nia, kan rawn haw ṭep" a rawn ti zung zung a, ka inbiak zawh hnuah ka pa te ka hrilh ve nghal a, ngaih a ṭha huai tawh.




Marcosa te lo let leh hnu chuan Shalomi pawh a tlei angreng viau mai, a taksa duk te pawh a reh tawh a, a nu lah chuan laksak hlau emaw tih mai tur hian a pawm bet chawt a, a fanu chu a en tlawk tlawk reng a, a hmel a pawr fap bawk nen hmuh a hrehawm lam mah a ni.




"Malsawma chu kan Phone a nge" Marcosan a tih chuan Angaihin a lo khap vat a, "Phone buai duh suh, a rawn haw veleh ka chhuah tir dawn, ka tuar thei tawh lo" a lo ti bur a, an pawm tlang bawk a niang chu tuman an hnial lo.




Ka mut leh meuh chuan dar 3 a pel tawh a, mut a chhuak tawh lo viau thung. Thil thleng te khan min la chenchilh bawk a ka hlauhthawnna a la reh thei tak tak lo, vawtin min ṭham ang mai hian ka tiril a la khur a, ka thinphu a rang em em bawk.




"Muthilh tum rawh, zingah i chau lutuk ang" puan min rawn sin ṭhat tir paha a tih chuan a lam ka hawi vat a, "Ka hlauthawng hman lutuk a, ka thinphu a la pangngai thei lo reng reng" ka ti hap a, a chiai ve miah lo thei chu mak ka ti lek lek zawk a ni.




"A ṭha vek tawh a lawm, hlauthawng tawh suh" a ti leh mai a, ka lam rawn hawi vein ka sam a rawn chul a, a mitmenga min duata lang chuan thla a ti muang siai siai thei a, ka thinphu rang lutuk pawh a zia ta deuh.




"Angaihi chu a ngaihtuah awm a ngem le?" ka tih chuan lu a thing a, "A muthilh ngam ka ring chiah lo" a ti zawi sup a.




"Naupang enkawl hi a lo harsa viau anih dawn hi, keipawh ka inringtawk lo zo vek dawnin ka hria" ka tih leh chuan min nuih suk a, "Ka awm a lawm, nangmahin i enkawl dawn hleinem" nghet charh hian a ti a, ka ringhlel hauh lo, min thlahthlam dawn lo tih chiang taka hriatna ka nei a, sawi kher lo mah se ka chiang a ni.




"Kan naute chu a vannei ngawt mai, nang ang pa a nei dawn che a" ka tih chuan min en vang vang a, ka lamah rawn tawlh hnaiin ka chalah a rawn fawp a, a awm nghengin min kuah zui zat bawk.




Ka muhil ka harh leh chuan dar 8 a lo pel der tawh, Marcosa pawh a lo tho chhuak daih tawh a, Bathroomah luta ka va inphih harh hnuah ka inthlak sawk sawk a, inhnuaia chhuk ka tum laimekin Marcosa chu a lo lut a, "Malsawma chu a chhuak chiah" a ti a, lawm hmel emaw lungawi hmel a pu chuang hauh lo.




"Nangman i chhuah tir nge?" ka tih chuan "Angaihin" tih zawngin min chhang a, thil thlen dan tur chu ka ngaihruat thiam tho mai.




"Ṭha deuhin a chhuak ve mai a law?" ka ti leh a, "A rui leh pek a, thinrimin a chhuak a nih kha" a Cigarette phawrhin a ṭan a, khumah chuan ṭhuin min rawn en vang vang a, "Naktukah ka chhuk dawn a, hetah i lo awm dawn nia" a tih leh chuan ka hrethiam ta hauh lo.




Bangbo lutuka ka en laichuan "In luah tur kan zawng anga, kan hmuh hma chu hetah kan awm rih ang" a ti leh nghat a, ka la hamhaih tho mai.




"Awm hran kha chu ka duh miah lo ania aw, a thawi pawn sawi miah suh" ka ti kha kha a, "Awm hrang lo ang, ka banna ka zuk tifel anga, kan bungraw lak pahin" a tih leh chuan ka ka hau ringawt a, a rilru a lo thlak va ta hram a nih hmel e.




"Hetah kan awm tawh dawn maw?" ka nui lek lek, ka lawm em a ni.




"Hetah chuan awm dawn lo, kan indang ang" a ti leh mai a, chu pawh chu ka duh tho, Aizawla kan awm chuan a pa a pui thei anga, indang mahila chhungkua kan ni leh thei ang.




"Ka pa te i hrilh tawh em?" a lo bu nghat a, "Puia nen kan kal anga, naktuk zingah kan chhuak ang" tiin a zial zuk laichu a pak khu talh talh a, a khu chu ka lo vai kiang thuai thuai thung a, rilru ah thil dang a leng rih meuh lo.



"In dan chu a hnial lem lo che a mi?"



"Hnial e" a ti bul hmuk a, ka rindan vel tho a ni, luhlul takin thutlukna a siam leh tawh anih dawn hi, a ṭha vek tho e, a rilru a thlak tal a lawm.




"In dan chu i tan a ṭha zawk daih a nia, ka nuhrawn khuan min ngaithei rei lo ang, in hi ka hmingin a la awm a; a lawm vak lo tih pawh hriat a ṭha, a ṭawngkam ṭha a hmuh tir vang che hian khakna a pai lo tihna a ni lo, hmuh theihloh hi hlauhawm tak zawk a ni, in luah tur kan zawng anga, zawi muangin kan inkhawl anga, nakinah in ka la leisak dawn che nia" a ti charh charh a, engmah hnialna ka nei lo, a sawi apiang chu i he lovin ka pawm vek tawh, thutlukna ṭha tak a siam pawh ka ring.





A tuk lamah Upuia nen Guwahati panin an chhuak a, kei ka pa Sangliana te tlawhin ka kalchhuak ve a, hmuh loh karin Norahi te unau pawh an lo ṭhang ve uak tawh a, ka naupai thu ka han hrilh te chuan a lawm thiam thiamah an ṭang a, "Nei thuai thuai rawh, kan lo awm sak ṭhin ang che" an ti ve hlut a, chaw eiah min sawm tak nain Angaihi te nufa ka ngaihtuah deuh a, awmpui kan neih loh lai a ni bawk nen nau nena eirawngbawl chu a buaithlak riau zel a, rei tak lengchhuak thei pawh ka ni lo.




Ka haw chuan Angaihin eirel a lo tintuah mek a, inthlak lem loin ka pui sawk sawk a, nidang aiin a hmel pawh hmuh a nuam daih tawh. "Hrehawm ka ti viau dawn emaw ka tia; mahse, ka nuam huaiin ka hria, hnar a hlit phawi ang mai a lawm maw anih zawk le, hetiang tur tih hriata hman hmanah khan lo ṭhen daih tawh tur" a ti nuah nuah a, chutiang zawnga a ngai thei anih chuan a lawmawm lamah ka ngaihsak a, a hlim phah ngei ka beisei pui bawk.




"Shalomi a lian anga, i nula leh mai dawn a lawm, i nu leh pa an la dam bawk a, eizawnna ngaihtuah chawp i ngai chuang bawk si lo a, inti lungngai duh reng reng suh" ka ti ve duah a, ani zawng ka lungngaih pui vak lo, mi hausa fanu mal a ni a, thawk lo pawh nise duh duh nei thei kha a ni tlat a, rilru nei chi ni phei sela chuan nun nuam taka nung thei tur zawk a ni.




"Matei tana ti zawk ka nia, keichuan ka pawmzam vek thei ka tih kha. Mahse, ka fanu hmakhua ka thlir tel ve a ngai tawh a, pasal Addict neih ka pawisak loh laiin ka fanuin pa Addict a neih chu ka phal lo a lawm, tihian ka enkawl anga, a pa tel lo pawhin kan awm ve thei lutuk ang, ka u sawi ang khan a awm leh awm lohin kawngro a su vak chuang lo a, rilru hah reng renga awm a ngai lo ringawt pawh hi a thlamuanthlak" a ti ve sap sap a, ani pawh hi a unaupa ang chiah a ni, mahni ngaihdana kal ngat ngat chi, tih tawh loh lama kawih her harsa lutuk chi ve tho a ni.






(End of chapter - 27)

(Last tur hi a thui dawn lutuka, ka rawn ṭhen leh rih a, zaninah kan dah leh dawn nia)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 22491
Joined: April 30th, 2016, 4:07 pm

Unread post by Ngaia » May 29th, 2022, 7:18 pm

POSSIBLE NIGHT - by Ahmangaihi violette Khiangte

LAST CHAPTER - 28




Guwahati a zan khat an riah hnuah Marcosa leh U Puia chuan engkim an rawn ti fel a, kan bungrua te pawh a theih ang ang rawn hawnin bungraw rit sak chi erawh a ṭhen an tiral hlawm a, an rawn thlen veleh U Puia chu in luah tur a zawn tir nghal bawk. Ka Pa lah chuan in dang lo turin min sawm ve reng bawk a, ka nu Tluangi pawn a rem ti meuh lo, "Fapa inpui chang tur i awm reng a, in dan te chu i pa tan a mualpho thlak dawn a nia" a ti lawm lawm a, Marcosa lah chuan a rilru a sawhsawn duh mang si lo a, ka tan pawh sawi tur a vang duh viau mai.




In luah tur kan hmuh lawk loh vangin kan la awm ve reng rih a, thla hnih dawn chu a liam leh tawh a; kan duh ang kan la hmu thei tlat lo, keichuan duhzawng em em pawh ka neih loh laiin Marcosa zawk duhtuiah a ṭang a, ni chhuahna lam ni loin ni tlakna lam a ti deuh tlat a, a chhan ka zawh chuan "Tlai ni tla tur kan thlir dun thei anga a nuam khawp ang chu" a lo ti then a, a Romantic loh ṭhin tehlul nen chuan, ka nuih a ti za lek lek a ni.




Ka naupai pawh insawiselna em em ka nei ta lo, ka chaw ei a la tui lo tluang zel tih zawng a ni tawh a, thei leh hmawmsawm lam hi chu ka eithei viau zel thung. Eichak te pawh ka nghah chho a, kan inleisak malh malh reng a, a hna kal thil han chah te hi a nuam hranpa ve riau zel. Tlai tin hian ka eitheih tur chi thei leh chhang chi hrang hrang min lo hawn a, Angaihin a kal chhuah changin a rawn lei fo bawk a, in a awm lahin eng engemaw eitur a siam a, ei ina induhsak hi induhsakna rau rauah chuan a nuam ber pawl niin ka hria.




Puipuia leh Hruaia pawh an zirlai an ti ṭha viau anih hmel a, U Zopuiin min rawn hrilh chuan an Pass lawmnan eng engemaw eitur lam chi ka thawn ṭheuh a, U Zopuii dawr pawh an ti muk chho a, thlalak te pawh min rawn thawn ve nghe nghe a, an chanchin hriat a nuam ṭhin khawp mai. Ṭum khat chu ka pa leh Marcosa Lawngtlai kalin an lo han tlawh a, naupang mamawh leina tur te pawh an lo pe a, ka pi leh pu tan Vitamin te pawh an lo leisak nghe nghe a, chanchin lawmawm lam hlir hriat chu rilru a hlim bawk a, a hahdam thlak takzet a ni.




Ni a liam a, in luah tur pawh ni tlakna lam vengah kan hmu ta hlauh a, a man a to deuh nain a zau ṭha a, han chei hranpa vak pawh a ngai lo. Bathlar zau deuh a nei bawk a, ka duhthusam thlap a ni ber ang chu. Ka buaipui ngai miah loin engkim Marcosan a lo buaipui a, Amawii sawmin Furniture vel kan lei dun a, bungbel erawh ka pa ten an ngah vangin lei ngai em em a awm lo thung.




Kan insawn ni chuan Amawii leh Angaihin chaw min lo eipui a, zan rei deuh thleng kan inkawm ho a, Marcosan a va thlah chuan a tlai viau tawh nghe nghe. A thang chhung chuan Sofa ah ka lo tlu zal a, ngaihtuahna ah ka u Dika a rawn lang a, la dam vein tun hun te hi min han hmuhpui ve thei sela ni tur, van aṭanga min lo hmu ve anih ngat chuan min lawmpui ve ngeiin ka ring.




Ngaihtuahna kawm melh melh chunga ka mut laichuan Center table a Marcosa Phone dah chu a ri ral ral a, ka ve en chuan Number hlang tawp hi a lo ni a, hna lam thil anih ringin ka la duh rih lo a, thil pawimawh anih chuan a lo haw hunah a Call let leh mai turah ka ngai.




Ka lak mai loh hnu pawh chuan vawi thum zet a rawn ri nawn a, chhan ka tum ut ut tawh tih ah Marcosa a rawn haw ta hlauh a, "I Phone hi a ri ngun tawh a nia, lo chhang rawh" ka tih chuan a rawn kal hnai thuai a, a chhang dawn emaw ka tih laiin a hmet tawp daih a, a ipteah a ak zui hmiah bawk.




"I ṭhiannu khan naute kan neih hunah min lo awmpui thei dawn a, duh leh inchhung sekrek khawih tur chu nula kan zawng dawn nia" ka bula rawn ṭhut pahin a ti a. "Buaipui vak pawh ka ngai chuang lo a, muangchangin kan la ngaihtuah zawk dawn nia" ka ti ve mai a, awmpui kan nei dawn anih chuan kan khawlam a mi zawn ka rilruk a, zirlai awmna tur mamawh te pawh an awm ka ring.




Zirtawp tlaiah Angaihi leh Kimkimi bazar an lo kawi a, Kimkimi chuan eng engemaw min rawn hrilh duah lehnghal a, Cathy chungchang ka hriat loh na pawh a rei thawkhat viau tawh.




"Pasal a nei duh lo a, a fanu lah a nu te bulah a dah a, zu a in nasa an ti viau lehnghal" tih angreng a ni. A pasal hlui kha a nei leh tawh turah ka lo ngai a, Aizawlah a awm tih takngial pawh ka lo hre lo a, Marcosa nen an lo la inbia em tih te chenin ka ngaihtuah a, a lo biak ka ringhlel ru viau mai.




Angaihi lah chuan "Ka u in engah mah a ngai tawh lo ang, an tawp felna pawh a rei ve tawh a lawm" a ti sam et a, zana Marcosa Phone ka ensak chuan engmah hmuh ka nei lo a, ngaih han tih ṭhat loh na tur engmah awmin ka hre lo.




Ka pu damloh thuin min lo deng a, Serchhip damdawiinah a awm a, a thawhah a zual viau a ni awm e, Amawii te unau haw chho tur ka zui a, kartawp lamah Marcosa a rawn chho ve anga; ka pu dinhmun a zirin a karleh thawhṭan lama haw leh turin rem kan ruat bawk a. Ka thlen chhoh tirh chuan Oxygen pek ngai khawpin a lo buai a, meizial lah chu a nghei thei der lo lehnghal a, ka Ni pawhin tih ngaihna vak a hre lo, khap nasat leh a chak a zual a, a khap hleihtheih loh a; a buaithlak reuh khawp mai.




Thawhleh ni a chho ka ni a, nihnih zet damdawiina kan awm hnuin a zia ve ta viau a, kan khaw lama kan haw pui hnu chuan inleng kan ngah viau zela, a chang phei chuan ṭhutna an in chan lo hial ṭhin, a han ziaawm ve deuha a ṭha lo leh ṭhin a, amah lah chuan damdawiin kal a duh tawh der lo a, "Ka thi dawn a nih chuan ka in chhungah ngei thih ka duh, i pi pawhin min dawm hlum te a duh ang chu maw le" a ti hluk hluk ṭhin a, damdawiin kan sawi rik hlek chuan a ṭeu hlur zel.




Zirtawp tlaiah eirawng ka bawl mawlh mawlh laiin Kimkimin min lo bia a, "In pa chu a tlukna ngaiah a tlu leh ta a ni maw?" a rawn ti tawla , "Eng nge i sawi awmzia?" phawk deuh taka ka tih chuan "Cathy'n a birh leh tluk tluk tawh, vawiin pawh dawra ka va kal laiin Office ah an lo ṭhu dun a, an inṭhut hnaih khawp mai, hetiang chuan i awm loh laiin an inluhkhung leh duh mai ang" tiin min sawi ṭhaih zui a, a tir chuan ka hlauthawng a, ka rilru a na dawn dawn a; mahse, Marcosa ka ring a, thu chiang awm lo rinhlelh chu dikin ka hre thei lo, amah ngei ka zawt anga, a lo dik anih chuan anih nih kan ni tawh mai ang tiin rilru kan siam a.




Zanriah eikham veleh ah ka Call a, tum loh lutukin hmeichhe aw hian a lo chhang a, sana ka en chuan dar 7 a pel tawh a, Marcosa chu inah a awm tawhin ka ring, in a thlen hnuah min lo Phone ziah ṭhin a, zanin chu min rawn Phone har em vanga Phone hmasa ka ni nghe nghe.



"Khawiah nge Marcosa?" ka tih chuan "Gym-ah kan awm" a rawn ti hmuk a, "Engvanga a Phone lo chhang ngawt nge i nih a?" ka ti leh fak a, ka thinrim deuh hlur tawh.




"In zawh hranpa vak a ngai em ni, kan kal dun a, a Phone pawh min kawltir a ni mai a lawm" a rawn ti a, min zahpah vak lo.




"Ka pasal kha lo hnaih vak duh tawh suh, i ngaih ang mai mai chu ka ni miah lo ang.." ka ti vin khar khar a, "Eng nge maw i tih chuan ang le, i duap leh zul tho ang" nui hak hak chungin a ti a, ka thin in a tuar ta meuh lo. "Ka rawn haw anga i hre mai dawn a lawm, i sam kha ka pawt kawlh vek ang tih hre rawh" a ti vin nghek a, ka au khum a ni ber, ka bul hnaiah awm ngat sela chuan ka tih duh tak tak ka ring.




"I va han khawngaih thlak tak, engmah lah hi i hrethiam ve bawk si lo" a rawn tih leh chuan ka inhumruh ṭeuh a, ṭawng leh ka tum lai chuan "Ka Phone kha lo la rawh" tih ri ka hre zui a, Marcosa aw ngei a ni bawk.




Thawm a ri zui sawt sawt a, rei vak loah "Hadasi.." tih ri ka hre zui a, ka thinrim lutuk chu ka sa pup pup thei.




"In chanchin ka hre lo emaw ti reng reng suh, ka hre vek, kha nu kha i duh leh tawh anih chuan sawi chiang la, ka rawn haw tawh lo zawk ang" ka ti vin hlak a, ka thinrim lutuk chu ka aw a khur hial a, chutih lai chuan thawk a la hluai ri ka hre pha a, "I ngaih ang kha engmah a awm lo, ngai kawi nghal ringawt lo teh.." a rawn tih te chuan ka thinrim zual ting mai, dawrah pawh an awmdun a, Gym-ah lehzel an kal dun anih chuan eng ngemaw tak awm turah ka ngai hmiah tawh.




"I duh chuan nei rawh, a ngaia kual kual hi ka peih ve lo, khatianga a la rawn ngampa thei anih chuan i hnar tak tak bik lo ni ah ka ngai..i lo sawichiang vat dawn nia, bungrua kan rawn la nghal ang" tih leh Phone chu dah ka rual a, a rawn Call leh pawh chuan chhang duh loin lukham hnuaiah Phone chu ka thawlh a, ka chhuahsan zui daih bawk.




Eng vanga ka thinrimna chu so nghal bulh bulh nge maw anih le, ṭha te tein ka zawt fiah hmasa ang ka ti kha ania, Cathy aw ka hriat rual khan ka danglam vek a ni ber, ka inthunun thei lo a, ka awmchhung lah chu a tawt up up a, ka luak a chhuak em em bawk a, ka tawt hluah hluah mai.




Thingpui luma ka buai zui tak vangin Phone chu ka ngaihven leh lawk lo a, ka va en leh chuan Missed call 10 chuang zet a lo awm a, Marcosa call hlir a ni, Message pahnih lo awm chu Cathy a ni ve thung.




'Khatianga i rawn thinrim chiam khan nuam kan ti daih zawk a nia, a hma ang khan en liam leh mai mai zawk teh, i thikna a nasat poh leh khum kai kan chak zual phah ṭhin tih hria la, zanin pawh a bulah ka riak ang, ral khat aṭang khan lo insawh tau ve mai mai rawh, in pa hian duat a mamawh tawh riau a, i awm loh chhung chu ka lo duat sak ang che'




'Tunah chuan a duh zawng zawng a nei tawh a, hei hi a tum reng vanga nei leh chauh che a nia, ka rem tihna thlapin a lawm a rawn hruai leh che, a pa kan bum anih loh chuan kawng dang kan nei tlat lo a, i hriat sa vek tho ania; a ṭhawn lutuk loh che ka beisei' tih angreng a ni duah a, Message ka chhiar zo chu ka nghilh dup mai hian ka hria.




Rinna ka lo neih ve ṭhin zawng zawng kha thawk leh khatah a bo nghal duak a, ka chhungrila natna chuan min hnawh tawt leh lutuka; ṭah chiam mai ka duh, ngawirengin Bathroom lam ka pan a, ka luh rualin ka biangah mittui a luang zung zung a, thawk ka han leh chiah chu ka pum aṭangin min rawn ṭhama; thawk pawh ka thaw hleithei lo. Ka uak tuarh a, ka luak chiam lehnghal a, ka uak na lamah ka thin te chu a thip hlur thei.




Rei deuh chu Bathroom ah ka inkhung a, ka chhuah leh chuan dar 10 a pel tawh a, ka ngaihtuahna chu thil pakhatah chauh a insawrbing tawh, tunah hian an awmdun mek a ngem? Eng nge an tih ang?




Ka pum chu ka han dawm ringawt a, chu erawh lung ti zing zualtu mai chauh, ka fa hi engtin nge ni ve ta ang, a pian hma hauh aṭangin vanduaina tinreng a tawng dawn tihna em ni, chutiang tur chuan ka phal lo, a lainat awm lutuk.




Ka Ni in min lo biakna pawh chhang loin pindan lam ka pan nal nal a, ka thlen rualin khumah ka bawk thlawp a, ka mittui luang chu vawi engzata tam nge ka hruk tawh ang le, ka hru zo thei lo reng reng. Ka chhungte min ngaihdan tur ka ngaihtuah a, ka zah rualin ka tha a na tel bawk, hetiang leh tur tih hriata lo zui malêk tur hi a nia.




Cathy Message chu ka han chhiar nawn leh ṭhin a, 'Ka remtihna thlapin a lawm a rawn hruai leh che' tih thu mawlh chuan rilru a ti na zual a, ka pa an bumna hmanrua mai mai ka lo ni ang tih hi ka ring pha ngai lo, Marcosa ka zui laia a laka ka innghah nasat zia te ka ngaihtuah let a, engtin nge awlsam taka ka lo inbum tir theih le! Dawt a niang han ti ngawt dawn ila a chiang viau lawi si.




Rilru a fim lo a, ka chau takzet a ni. Hei vang hi em ni ang Marcosa khan in dan ngei ngei a lo duh chhan kha, awlsam taka Cathy a neih leh theih nana min in dan pui a nih ngei ka ring.




Ngaihtuahna buai tak chunga Phone ka bih laichuan Amawiin min lo Call a, "Ṭhiannu thawhṭan ni a in chhuk dawn chuan in rualin ka lo kal ve leh mai dawn nia, ka nau te chu duh leh Sumo in an lo chhuk ve mai anga, lo zuk thlen hmasak pawh pawi ka ti hran lo" a rawn ti zung zung a, ka chhang lawk thei lo.




"Ka hrethiam tawh lo" ka tih laia ka aw chu zawi tak a ni, ka hrawk chu hnawh tu awm ang maiin a tawt a, thawk a sak hle bawk.



"Enga tinge? I pu a zual leh deuh a mi, tlaiah khan a zia tawh i ti khan ka hre sia?" phawk lek lek hian a ti a, hrilh ve vek mai ka duh, tunah chuan inbun ruah na tur ka mamawh takzet.




"I mu tawh em, ka rilru a hah lutuka, i peih chuan lo phei lawk teh" ka ti ta ngawt a, "Engti zia nge" a rawn ti leh hluai a, "I lo thlen hunah ka hrilh ang che" ka tih hnuah a lo kal tur thu sawiin Phone chu a dah a, keipawh ka tho chhuak ve thuai a, Sitting room a ka chhuah laichuan ka Ni pawh muturin pindan lam a pan ve chiah a, ka pu thawm hriattur a awm lo a, a mu ṭha thei ta anih hmel e.




Rei vak lo ah Amawii a lo thlenga, kan ṭawng thawm midangin an hriat hlauin tap bulah ka ṭhut pui a, "I hmel a va dik lo ve, i ṭap a ni lo maw?" a ti hmasa ber a, "Ka Message dawn hi chhiar teh" tih pahin ka Phone chu ka entir nghal thuai a.




"I awih em ni a?" a tih chuan ka bu nghat a, a awih vak lo aniang chu a ner nang thung.




"Ka Call lai pawhin an lo awmdun a, a hmeichhia zawk khan Phone a lo chhang a, a ṭawngkam te chu ngeiawm tak a ni" ka ti hlak hlak a, "Ngaihdan ka la nei thiam mai lo, Marcosa i bia em?" a tih leh chuan thawk ka la hluai a, "Engmah sawi tur a hre lo, a bialnu hlui hi a kalsan phal lo anih ber hi, in dan a lo duh chhan pawh kha hei vang hi anih ka ring" ka ti leh duah a, ka insawi thinur ṭha leh a ni ber.




"Ka van awih chiah lo, Marcosa aichuan he nu hi ka ring lo mah zawk, in inkar tih chhiat a tum vang lek te a lo ni thei a, in pa chu thil awmzia zawt fiah hmasa teh" a tih chuan "Ka zawt tawh a lawm, rawn sawi chiang la, bungrua kan rawn la ang ka tia, tunah chuan biak pawh ka chak rih lo, naktukah ka be leh chauh ang" ka tih laia Amawii hmel danglam deuh chu ka hmu a, sawi sual ka nei em maw ni.




"Bungraw lak te i sawi ngawt a, bungrua pawh i neih tawh loh kha" a tih chuan ka ṭah a chhuak et et mai.




"Anih chuan heti hian kan inṭhen anga a ni mai" ṭah aw ṭuau chungin ka ti a, "Keiman ka lo be dawn a mi?" a tih leh chuan ka duh hauh lo, "A ngai lo" ka ti bur a, an khawsak dan ngaihchan ringawt chu tlawm thlak viau mahse, ṭhen chhan ṭha tak a tling thung ang.




"Keichu Marcosa zawh chian phawt ka duh, kha nu thusawi kha ring nghal vek lo la.."




"An awmdun a lawm, zaninah pawh an riah dun ka ring" ka hnuk a ulh ṭeuh a, ka aw te thleng chuan a khur thei.




"I ringtawk viau khan ka hre sia, tunah i ring lo leh em em lawi bawk sia, nangpawh hi hriatthiam i har emai, tunhma thil thleng kha chu ngaihtuah tel lo la, thu chiang zawk hriat tum zawk teh ang" ka Phone min chhuhsakin Marcosa a Call a, ka dang lui ta bik lo, an awmdun ngei tih chian pawh a ṭha a lawm.




"A tlang thei miah lo" a tih chuan Phone chu ka laksak vat a, ka Call ve ve leh zat a, a tlang thei hauh lo.




"A Switch off anih hi" ka tih hlak a, insum hle lo ila chuan Phone chu ka vawm chhe vek duhin ka ring, ka inngaihtuah lungpuam a, ṭah chiam mai ka duh.




"A van buaithlak tak, in inkar a ṭhat ve tawh tehlul nen, engpawh nise..thil lo ti rum rum lo la, amah kan biak hma chu i chhung te pawh hrilh rih suh, a hmain in lo buai tawh bawk si a, tun ṭum chu rilru fim taka ngaihtuah hmasak a ngai a nia" ka ṭhiannu chuan a ti leh a, ka ngaihtuah ngun poh leh ka inkhawngaihna a zual a, a chhe ber thlengin ka dawn lo thei lo. Lo inṭhen ta ila engtin nge ka awm zel ang? Chu ringawt pawh chu ngaihtuahna tham tak a tling.




Rei deuh chu kan titi a, a nuin a rawn Phone tak vangin min haw san a, a haw hnu chuan khumah ka mu meng ve reng a, a khat tawkin mittui ka hru zauh zauh reng bawk. Tunah hian Cathy bulah mu in duat takin a kuah ngei awm si a, kei chu min hrechang tawh hauh lo ang, ka thikna leh rilru natna te hian an induhna a ti sosang zawk ngei anga, Cathy sawi ang chiah khan...ka thil ngaihtuah vang chuan ka ṭap chhuak hawk a, ka pum dawmin thawk ka han la leh hluai ṭhin, ka Ni a rawn harh ka hlauh vangin ka puansin tlang chuan ka hmui ka hup a, thawm chhuah loin ka ṭap rawng rawng a, ka ṭah na lamah ka hnar te chu a ping ṭup tawh.




Ka lo ṭap muhil a ni ngei ang ṭawng bul bul thawmin min ti harh a, ka Ni aw ni tlatin ka hria. Mipa ṭawng ri ka hre zui a, Fakawma a lo kal em maw ni ka tih laimekin ka ni aw ka hre leh a "Zan zanah te i lo kal tehhlawl a, in nu lahin a sawi bawk si lo a" a tih chuan harh chiang tawh tak ka ni!



Marcosa a lo kal a maw?!



"Ka rawn tum chawp deuh thut a, ka pu chu eng nge a an?" tih ri ka hriat rual chuan ka ṭhu chhuak hluai a, "Zanin chu a mutui khawp mai, Hadasi pawh a muthilh na a rei tawh, zan hmasa lam kan mu tlem deuh a, kai tho loin va mu ve nghal mai rawh" ka ni chuan a tih zawma, Sitting room lama an lo pen thawm ka hre zui leh a, khumah chuan muṭha sawk sawkin puan chuan a inkhuh hlun a, "Thawm dim rawh aw, bang lehlam lawkah khan i pu te an mu ania, a harh chuan kan mu leh thei lo ang, kha lukham hi.." ka Ni chuan a ti sar sar a, lukham an in pe mek anih hmel.




A thawm chu ka ngaichang ran a, ka ngaihtuahna chu a vak kual ruai bawk, tun ang huna a rawn thleng anih chuan zantir khan a lo chhuak tihna a nih hmel a, ka biak zawh hnu khan a lo kal nghal a nih hmel viau bawk. Ka rilru a buai nak a, ka lo ringhlel sual deuh em mawni!




Ka sira a rawn mut rual chuan khum chu a hniam salh a, ka inkhuhna puan a rawn hai hawng zui thuai bawk a, muhil ang hmiahin ka la awm thung. Min rawn thlek a niang chu a pangtilum pawh chiang takin ka hre thei tawh. Ka sam a rawn hui kianga, ka bianga a fawh zauh hnuah mu ṭhain ka kawngah a rawn kuah hlun a, ka pum a chul leh laite chuan ka thinphu chu a rang hle a, ka ṭah a chhuak leh ṭun mai.




Ka insut ri faih a, chuveleh a lamah min pawt hnai salhin nghet lutuk hian min kuah a, "Lo hawi teh" a tih chuan ka che chang mai lo. "Ka ngai che ania" a aw ril ruih chuan ka lung a ti chhe zual, engah nge maw ka ṭah reng mai le, hetianga ṭahbelh hi chu ka ni ngai lo a sin!




"Engah nge i lo kal" ka ti chhuak halh a, ka kawngah a kuahna kut chu ka vuan nghal ṭung bawk.




"Engah nge ka lo kal loh ang, ka ngai che a lawm" ka beng bulah a hmuia rawn nawrin a thaw lum ham ham a, hneh zetin min kuai her zui bawk.




(Zawmna)



"Ka hmangaih che tih i hria a ni lawm ni? Enga tinge thil ho teah i chiai vak ni" ka biangah dawmin min en ran a, ka boruak tawn inlumlet thut thut vang chuan ka ngaihtuahna a mang zo vek tawh, ka mittui lah chu a la hnam ṭiam ṭiam renga, ka rilru no a chhuak laklawh bawk a; ka insum thei lo reng reng.




"I Phone a lo chhang a, Kimkimin dawrah a hmu dun bawk si che u a, zan thlengin i bulah a awm tih ka hriat khan..." sawi zo loin ka ngawi leh rih a, ka hriat tirha ka hlauh thawnna kha thu chuan a sawifiah zo kher lo ang, ka talbuai chhiava anih kha, a hma ang thil kha thleng leh turah ka ngaia, thinurna aiin hlauhthawnna a nasa zawk bawk.




"Kimkimi chu i ring lo emaw ka tia..?" a tih chuan hamhaih deuhin ka en a, "Cathy chu a pa nen an lo kal a lawm, Motor an rawn en a" a ti leh nghat a. Mahse, Cathy'n a Phone a lo chhang thei mai kha mak ka la tiin zawhna ka la ngah viau mai.




Ka rilru hria ni awm takin "Gym ah khan kan kal dun lo a, a rawn lang ve hlawl anih kha, i ngaih ang kha engmah thleng a awm lo, kan inkar tih chhiat duhna rilru pu ila tunah hian ka rawn kal hauh lo ang, hei hi ka duhthlan hnuhnung ber ah ngai hmiah tawh rawh" a ti leh nghat nghat a, ka hahdam sawng sawng thei.




"A Message chu hmu ve la chuan ka ringhlel che hi mak i ti miah lo ang.." ka ti hap a, "Eng Message nge?" a tih chuan ka lukham hnuaia Phone chu ka pawrh sawk sawk a, a chhiar laichuan engtin nge a ngaih hriattumin ka lo en ve renga, a hmelah chuan danglam tehchiam a awm lo.




"I hriat angin kha lehchen kha kan lo inzui tawh a, kan inkar tawpna siamtu zawk pawh keimah ka ni a, a rilru a la dam vak lo anih dawn hi, kan inkar thil hi chu nangin i lo dawnsawn dan a zirin a ni mai Hadasi...keichu ka rinawm a, nangin min ring anih chuan tuman kan inkar an tichhe thei lo ang, Cathy emaw hmeichhe dang reng reng pawhin.." a sawi laichuan 'Min ring rawh' tih melh tak hian min melh a, rin chu ka duh ngei mai, hun liam tawh thil te vanga ka rilru hliam hian min dal tlat a, thil dangah ring zo viau mahila Cathy lakah hian ka hlauthawng leh ṭhin a, tun thlengin he ka hlauhthawnna hi a la reh thei tak tak lo, chu vanga tal buai zo ta vek pawh ka ni.




"Kan awmdanah hian ka lungawi a, ka hmathlir pawh kan pahnih leh ka fa lo piang tur tan chauh a ni, nakin zelah pawh hetiang thil vang hian buai loh tum rawh aw" a hmel chu a thu takin a ṭawngkam chhuak chu a nghet charh a, a sawi liam mai mai lo tih a hriat theih.




"A la beisei reng che anih chuan min tih buai zel tho ka ring, a sim hmak na tur khawpa i hnar te anih ngawt loh chuan" ka ti a, ka beisei chu a hai hauh lo ang, Cathy hi a la hnar tawk lo tlatin ka hria a, an inkar zawng zawng hriat pui lo mahila keichuan ṭhian ang pawhin en zui lo sela ka duh.




"Ka hrilh chiang viau tawh a sin maw le, engtin nge maw ka tih dawn ni?" zawi deuh taka a tih chuan "Be ṭha tawh lo la, ṭha taka i biak chhung chu i lakah a ngampa reng dawn a sin, kan inneih lai renga i kawp ṭhin anih vangin te khan min zahna a nei lo tih chu i hriat kha, i inlak hran thiam viau loh chuan kan heti reng mai ang" ka ti chu a pawm hmel viauin ka hria.




"Awmdan thiam a har ve bawk a ni, buaina ka tawh laia min pui ṭhin tu ber a nia, han hmelhriat loh en mai hi a harsa ve ṭhina; mahse, i rilru a tina anih chuan tih theih dang a awm lo, a pawimawh ber chu maw..min ring rawh, min ring anih phawt chuan Cathy thil sawi te hi chu Ui ek tlukah pawh i ngai lo thei tur a nia, ka rin ang che hian min han ring ve la, i tan chuan engpawh ka ti thei" a nui tawi tak a, Dim light hnuaiah chuan a mitmeng chu a de sar a, a mak ṭhin ngawt mai! Ka thinrimna te, ka hlauhthawnna te kha an bo duak mai hian ka hria, duat taka min han kuah leh meuh chuan ka thla a muang veng veng a, ka lungawi leh nghal thei zel mai chu a nih hi.





Zingah Amawii a lo kal a, "Engtin nge ni dawn, a rawn be leh tawh che em?" a tih laimekin pindan aṭanga Marcosa lo chhuak chu a hmu leh sia, a nui chhuak hawk hawk a, "Ka lo rin sual lutuk loh hi, hei a zan zanin a rawn thleng chho nghal mai a lawm" a ti zui hlut a, Marcosan "I lo fuihpawrh a ni maw?" a lo ti chu a duh lo nasa mai.




"Ka ṭan char char che a, min ti beidawng leh anih teh chuan i chak lo khawp ang, fimkhur viau tawh ang che" a lo ti kha kha a, an infiam zui hlut a, kan ruala chhuk ve turin Marcosa chuan a sawm bawk.





Chhun lamah ka pi leh pu te thawmhnaw ka suk sak a, tlaiah vawkchaw kan chan leh tih loh chu ka awlthawng angreng a, Marcosa erawh ka pu mutna pindanah rei deuh a va ṭhu a, ka ni leh ka pi te nen an ti ti ho a, ka va luh ve laichuan lungphun chungchang an lo sawi a, "Kum tawp lamah hian ti dawn ila a hma viau a ngem? Keichuan phun vat mai kha ṭha ka tia, a lung te pawh Aizawl lamah kan lo lei anga, kan rawn thawn mai dawn a" Marcosa chuan a ti a, U Dika lungphun lam chu a lo ngaihtuah ve ang tih ngaihna pawh ka hre lo a, ka lawm ru viau mai.




"Phun hma chu a pawi lo, Zopuii pawhin pasal te a nei leh duh maithei a; mahse, kan vawk hi a la te ang reng lutuka, a ṭhang mawh reuh bawk si a, engtin nge maw kan tih dawn ni? Kum thar lamah ti zawk ila" ka Ni in a tih chuan "Senso lam kha chu buaithlak a awm lo ang, a ṭul apiang chu rawn sawi mai ula, pawisa ka lo thawn mai dawn a lawm, kan chhuk hunah a lung te pawh chu ka lo en nghal dawn nia" Marcosa chuan a ti sam et a, ka pu dam lai ngeia phun hman chu keipawn ka duh.




Zanah U Zopuii te inah kan leng chho a, lungphun chungchang ka sawi chuan a ngui deuh a, "Ka hmanhmawh hran lo a sin, lung phun chu a tawpna ber a ni tawh sia, naupang ho len deuh huna phun te ka lo rilruk zawka" a ti sap sap a, hnial phei chu min hnial hran lo.




Kan haw lamah Amawii te inah kan kawi a, a nu pawh a lo la meng ve nghe nghe, thingpui te in hoin kan ṭhu ve reng a, zawi te tein Amawii chuan a zilh a, kei ka lo nui leh hak ṭhin a, Marcosa erawh a ner a ner thung.




"Mipa hi chuan hmeichhe hnar hi in hreh thei lutuka, hriatthiamna chen chu ka nei a; mahse, in nupa chu midang ang in ni lo a, a hma a in buai tawhna te kha a ngaihtuah let loh theih loh, Hadasi rilru tur pawh i hriatthiam pui ve a ngai a nia, lo kal nghal lo phei la chu ka rawn tawng hrep maithei che a ni. Mahse, i lo kal vangin ka ngaidam leh thlap tawh che.." uang deuh tak hian a ti a.




"Kan ṭhianni pawh chu kamkhat deuh la a ṭha ang" a tih hnuah "A ngai leh lo, nang chuan lo ngaihthah hmak la, hmeichhe buaina ah kan ngai mai dawn nia, keimahni zawkin kan lo kamkhat a nge" a ti leh hlak hlak a, a hma khan ka en liam mai ṭhin a, tunah chuan kan enliam tawh hauh lo ang, tin hriam nei ve lo turah min ngai anih hmel a, a hma kha chuan a hming maia nupui ka nih vangin loh theih loha ka en liam a ngai a, tunah erawh khag hun kha a liam tawh a, kan dinhmun pawh a danglam tawh, ka chhungkua tih buai tuma harsatna min siam tum tu apiang ka hmachhawn zel tawh ang.




Thawhṭan tukah Aizawl lampanin kan liam thla leh ta a, lung phun pawh kumthar lam kan tintuah a, kan chhuak hma bawk a kan thleng hma khawp mai, Amawii nau te an la rawn chhuk ve loh vangin kan hnena awm rih turin kan sawm a, a lo duh ve mai a, in Checkup te ka ngaih leh dawn vangin keipawh ka lawm viau a ni, kan in a min dah zet hnuah Marcosa chu dawr lamah a kal leh nghala, kan ṭhian dunin eirawng kan bawl a, Cathy chungchang te sawiin kan titi bawrh bawrh a, kei aimah chuan a haw ta emaw tih tur hian a ṭawng ṭhin a, ka tan ṭhahnem a ngai ṭhin bawka ka thlamuan pui ve riau zel.




Nilaini a in entira kan kal chu beisei loh lutuk thil min lo hrilh a, min ti hamhaih viau nghe nghe, ka naupai chu pakhat mai niloin pahnih zawk a lo nia, phir ka pai ang tih ngaihna reng ka hre lo!




"A hma khan i sawi miah si lo a?" Doctor hnenah chuan ka ti ringawt a, "Thla thum a tlin hma hi chuan naute a la insiam tak tak lo a, a hriat theih mai loh a lawm, i lokal leh mai bawk si lo a" tiin min lo chhang a, Amawii a lawm em em laiin kei chu ka hamhaih deuh nge ni rilru a chiri nuai a, han lawm chiam ngaihna pawh ka hre rih lo.




In lam pana kan haw laite chuan ngaihtuahna a kal thui viau a, ka lawm rualin ka huphurh tel bawk. A vawikhatna tur a ni a, buai a nat tur zia lah ka hre ve reng a, naute a leikan deuh hunah Marcosa dawrah ka thawk ve ang te kha ka lo ti hman a, pahnih ka pawm dawn takah chuan hna thawh lam chu a harsa dawn riauin ka hria.





Angaihi ka hrilh hmasa ber a, a phur ngang mai a. "Mipa leh hmeichhia nisela a ṭha ang, naupai i la na bawk si a, a hlawk zawngin i pai hlauh a, a tihzia khawp a lawm" phone aṭang chuan a lo ti siam siam a, a lawm nan Cake Order a rawt a, a tuk lama chaw ei turin min sawm bawk. Ka pa te lo hrilh turin ka chah a, Marcosa chu hmai chhanah ngei hrilh ka duh vangin ka Phone duh rih lo a, ka sawi laia a hmel awm dan tur hmuh ka chak tlat a ni.




Gym a kal leh tawh a, dar 7 pelh ah chauh a lo haw ṭhin a; mahse, zanin chu chanchin hre lawk ang hrimin a rawn haw hma a, a chhan ka lo zawh chuan "Kan Gym kalna neitu te fapa a thi ṭep a, ICU ah a awm mek a, ka va kal ve lawk ange" a ti a, a hmelhriat ṭha tak te an ni aniang chu zanriah pawh ei loin a insiam zui a, ka hrilh ta rih lo.




Zanah Angaihi leh U Puian an lo kal a, Cake te an rawn keng a, ka nu Tluangi pawh Phone in ka hrilh ve nghe nghe a, "E..Pathian malsawmna in dawng nasa anih chu, lawmthu sawi mawlh mawlh rawh u" a lo ti ve hlut a, a sawi dik chiah reng bawk, Pathian malsawmna tamtak kan dawng a, hun harsa kan paltlang tawh zawng zawng te pawh chhiar senloh malsawmna hlir zawk a ni.




Marcosa chu dar 12 pelh ah a rawn haw chauh a, a rawn nguai haw bur mai a, a dam lo kan chu a dinhmun a ṭha vak lo em mawni ka ti deuh. "A daih rei ka ring tawh lo, a la naupang viau asin maw le, a nupui nen lah fa an la nei mang bawk si lo a" a ti nuah nuah a, a rilru buai laitaka hrilh chu a ṭha ber a ngem ka hrethiam chiah lo.




Ka inngaihtuah buai laichuan ka bulah rawn inthawlhin min rawn kuah tharh a, zawi muangin ka dul a rawn chul a, "Hmeichhia nge mipa a nih ang aw" a tih chuan "Hmeichhia leh mipa a ni maithei" ka lo ti zauh a, "Chutiang ka duh lo" a tih chuan ka melh phawk hra a, Angaihin a lo hrilh em mawni ka tih laimekin, "Mipa anih chuan pa viau sela, hmeichhia anih chuan nu viau rawh se, a tuai emaw a patil tur a ni lo, a laklawh vel anih teh chuan ka vaw hrep ang" a la ti zui a, a ngaihtuahna tehdaih chu!




"Anih mipa ve ve nita se?" ka tih takah chuan phawk deuh hian min en a, dilchhut leh zawhna ngah lutuk hmel a pu bawk.




"Phir ka pai a, vawiin ah ka in Checkup a ka hre chiah" ka ti leh a.




"Dawt i sawi em?" a tih chuan ka melh rum ram ram a, "A va ṭha ve Hadasi, phir kan nei dawn, ka lawmpui che" a ti leh tawh.....ngah nge maw min lawmpui bik ziah ni, amah pui hi lawm viau sela nimai tur.




"Min lawmpui bik ziah suh, naupang pahnih te pa i ni tawh dawn a nia, engtin nge i ngaih ve reng reng?" ka tih chuan a kut khing hnihin ka biang a rawn dawm a, "Ka duh lutuk, naupang pahnih te pa nih chu ka tlin viau ang" phur fe hian a ti a, ka nuih a ti za angreng.




"Anih, an zun leh ek i then vek a ngai ang, ka hrin hnu chuan i kutah ka dah tawp dawn ania, zanah pawh nangmah i tho zel anga, i buaipui vek a ngai ang" tiin ka fiam zui a, ka bianga la dawm reng chungin ka chalah a rawn fawp a, "Han hring phawt mai la, a bak chu ngaihtuah buai reng reng suh, duhthlan ngai lo hram bawk rawh se" a ṭawng chu a zawiin a thutak hle a, a hmel ka en chuan rilru buai deuh hmel a pu a, keimah ang thoin a huphurh ve deuh anih ka ring.




Zing lam hna a kal tur chu tuk dang a ang ta tlat lo, biak lah chuan a phu zawk zawk a, engthil emaw ngaihtuah ngut ngut hmel a pu a, dawr lam thil nge a Gym kalna neitu te fapa damlo vang zawk pawh ka hre lo. Amawii pawh a naute an lo thlen tawh vangin a haw phei a, zui vein chhun thingpui te kan in ho a, ka awm rei lo thung.





Tlaia Marcosa lo haw chuan rangkachak bengbeh mawi lutuk tak mai hi min lo hawn a, "Naute pakhat zawk lawmpuina" tiin min pe a, ka rai thu ka hrilh tirh a a ṭhi min leisak pawh kha ka la awrh chhuak miah lo a, a Phone min leisak erawh ka hmang reng tawh thung a, lawmpuina min pe bik ziah sia engmah ka leisak ve ngai der lo thung a.




Ka nu Tluangi nen kan inbiak leh hmasak ber ṭum chuan Marcosan engtin nge a ngaih min lo zawt a, "Ka hrethiam chiah lo, a lawm ve viau chuan a hria, a huphurh ve deuh nge ni a awm dan chu a mak deuh a, naupang pahnih neih nghal chu mawhphurhna a sang em a lawm ti raw" ka ti zui luam a, min lo chhan leh dan erawh ka beisei loh lam daih a ni.




"A phir pui a hrechhuak a niang, farnu a nei a, a boral zawkah a ṭanga" a rawn ti a, phir pui a neih thu ka lo la hre miah lo a, min ṭhawng angreng khawp mai.




"Chuvang chu a niang a, 'duhthlan ngai lo hram rawh se' te a tia, a awmzia pawh ka lo hre lo a" ka ti niah niah a, kha thu a sawi chhan kha tunah pawh ka hrethiam pha chuang lo, eng duhthlan chungchang nge maw a sawi le?




"A pa ṭawngkam thlahdah lutuk vang maw le, an inhauh ṭumin 'I farnu zawk kha nang aiin lo damtir ila, nang hi lo thlang lo zawk che ila ṭha tur' tih angrengin a lo ṭawngkhum a, kan duh kan thlang emaw a tih phah a, mipa zawk anih vanga damtir angah min ngai a lawm" a ti sap sap a, ka pa ṭhin hi chu, thil dangah ka fak tehlul nen a fa enkawl danah kher hi chuan ka dem ve a ni.




Ka pa te ina kaltura kan insiam laichuan Marcosa chu ka zawt a, "Phir ka pai tih ka hrilh hlim che khan i farnu boral ta kha i hrechhuak em ni? Ka nuin min lo hrilh a" tiin inthlahrung ru deuh chungin ka zawt a, "Ka lawm lo tihna a ni miah lo ania, tih lan dan ka thiam lo zawk aniang" a ti mai a, a phir pui chungchang chu a sawi zui duh miah lo a, zawh zel chi niin ka hre ta bik lo.




"I lo piang ve hi ka lawm teh a nia, awm lo la chuan engtin nge ka awm ang le, tun ang hian ka hlim pawh ka ring lo" Closet bula a ding chu pan hnaiin a kawngah ka va kuah a, ka lamah rawn inherin duat deuh hian min kuah let a, lungchim zetin min fawp zui bawk.




"Ka hmangaih che, i pum chhunga kan fate pahnih pawh" a nui hmel chu hmuhnuam tak a ni, uar takin ti lang thiam lo mah se a mitmeng aṭangin a hlim zia chu ka hmu thiam a, thu a sawi ai pawhin a fiah zawk hial ang.




"Keipawn ka hmangaih che, ka hmangaih zual zel bawk ang che" a hmuiah ka fawp leh vang vang a, "Mahse, min duat ber ang che" a tih chuan ka nui hak a.




"Duat ber dawn chiang sa" a pangchang hmel chu duhawm tak a ni, ṭhu hniamin a dulah a biang a rawn nawr si a, a ngaithla zui vang vang a, "Pakhat zawk chu mipa a ni chiang a" a tih chuan ka nui hak hak a, "Hmeichhia a awm ve em?" ka tih chuan ngun leh zualin a han ngaithla a, hre thei tak tak te pawh a ang a lawm maw le.




"Tuai chu a awm lo phawt a" a ti thum leh dut a, a samah chuan chul sakin ka nui var var a, fapa hmelṭha deuh hrin sak tluka chak ka nei lo.




Ka pa te in kan thleng ṭep tih ah U Puian min lo tlan pel a, Gate bulah min lo nghak a, pawnah Marcosa nen inbia in an ding leh rih a, keiin ka luhsan thung, Angaihin leh ka nu Sangpuiin eirawng an lo bawl a, an lo inbuatsaih nasa ngang mai a, ka pa erawh Sitting room ah TV en in a lo ṭhu a, ka lut thawm a hriat chuan min lo ko thuai bawk.




"In enkawl ṭha viau ang che aw, phir pai chuan hrisel ṭhat viau a ngai a nia, ei chak te i nei em?" a lo ti ve luam a, lawmpuinan pawisa min pe bawk a, Marcosa lo lut chu bawm te reuh te a pe a, a hawn chuan Motor chahbi a lo awm a, Car thar a pe anih hmel.




"Pali in ni tawh dawn a, Motor lian zawk in mamawh tawh ang" ka pa in a tih chuan "Eng rawng nge?" a lo ti bul hmuk a, "A dum" ti a ka pain a chhan chuan a nui ve ta suk a, U Puian chahbi chu lo chhuhsakin Garage lam an pan a, rei lo teah Motor dum lian ṭha zet hi an rawn khalh chhuak a, kawta an tlan kual vel chu Angaihi nen kawngka bul aṭangin kan lo thlir a, engthil emaw sawia an ṭhiandun nui hmel chu an hmuhnawm viau mai.




"Rorelpuia sawn nuam a ti leh dawn mange, a rawn la chhuak leh sek maithei a ni" Angaihin a tih laichuan U Puian ban a lo vai zauh zauh a, Shalomin kal ve a lo ngen chu "A ninawm sek" a ti vin zui hlak a, "Va chuan pui ve rawh" ka ti chu a duh vak lo. "A ngen ve ziah lehnghal a, a pa emaw a ti deuh tlatin ka hria, pawmtir tawh lo zawk ila a ṭha ang" a ti fiamthu a, keichuan thil dang daih ka lo ngaihtuah a; an inhmeh dawn riau in ka hria.





Kan chaw eilai chuan ka pa in haw leh mai turin min sawm a, "Phir in neih dawn phei chuan in puiah khawsa ula a nuam zawk ang, Hadasi pawh a buai lutuk lo deuh anga, a nu leh Angaihin an enkawl pui thei anga" a ti duah a; mahse Marcosan a lo chhanna chu kan beisei loh lam daih a ni ta thung.




"Ka nu hi nakin lawkah kan awmpui a ngai dawn a, a pasal sawn rei tak a dampui tawh lo ang, helaia chen ka hreh vang ringawta in dang ka ni lo a, ka nu vang zawk a ni" a tih chuan tuman hnial hmel an pu tawh lo. Kei takngial pawhin chulam ngaihtuah nachang chu ka lo hre lo a, a sawi takah chuan dik ka tiin a pawmpui viau tawh, hun a rei anga ka nu chu kan hnena chen a ngaih hun a la rawn thleng ngei anga, fa dang lah a nei bawk si lo. He lai hmuna kan lo chen daih si chuan tih ngaihna a awm dawn der lo a, ka beisei ang ngeiin ka pasal chuan thu tlukna ṭha tak a lo siam reng a ni.




Angust thla tawpah nau nei turin Damdawiin lam kan pan a, zai chhuah ngai anih vangin ka zam ru hle a, kan khaw lama ka chhung te pawn chhun aṭangin min rawn Phone sek tawh a, ka pum na vangin ka chhang hleithei meuh lo, in zai hma darkar khat a la awm tih ah kan chhungte chu an lo kim ṭhap tawh a, ka Nu Tluangi leh Amawiin min ṭhutchilh chawt a, Marcosa pawn dawr a khar hma khawp mai.




Tlai dar 4 ah zai turin min nawr lut a, hnimhlum min hnim tir laichuan ka thinphu a rang nasa mai a, ka rilru in ka ṭawngṭai mawlh mawlh reng, engkim chu mumang ang ruai a ni, ka harh veleh a ka hriat hmasak ber chu naute ṭap thawm a ni a, "Fapa pahnih i nei a nia, an lian em em lehnghal a, an hmelṭha dun lutuk" ka beng bulah Amawiin a rawn ti sar sar a, ka sir lam ka en chuan Marcosan naute a lo pawm a, pakhat zawk chu ka bulah a mu thung.




Ka fapa te hmel ka han hmu chu dam man a awm hliah hliahin ka hria, sam buang thang mai leh tisen no siah mai mai an ni a, an duhawm dun takzet. Marcosa pawm zawk chu a ṭahbelh reuh hle a, ka bula mu erawhin thawm a chhuah ve meuh lo. "Hei hi ka chuam" ka tih chuan Marcosa min rawn melh rulh a, "A ṭahbelh zawk min chan tir i tum a maw?" a rawn ti nghut a, midang chu an nui dar dar hlawm a, lung a awi hliah hliah tawh mai a ni.




Ka Nu Tluangin ka bula mu zawk chu a hming a phuahsak a, Roderick Zosangliana tih a sa a, Angaihin 'Rico' tiin Nickname a phuahsak a, ka Fapa ṭahbelh zawk erawh a pain "Frederick-a" a ti thung a, Frederick Lalhmachhuana tih a ni zui a, Fred-a aimahin Rico chuan a pa a chhun zawk a, ka nu Tluangi pawn "Marcosa sen lai chiah chiah a ni, a ṭahbelh bawk si lo, Marcosa pawh a sen laichuan a ṭap thiam ve lo emaw kan tia, lian deuh anih hnuah a ṭap thiam tih kan hre chauh a lawm, pakhat zawk a ṭahbelh loh chuan buai pawh a na lo deuh ang" a ti ve luam a.




Hnu te tui ka neih mai loh vangin Angaihin an hnute hnek tur a buaipui a, in lama kan haw hnuah ka nu Tluangi leh Amawiin min awmchilh chawt a, Amawii phei chu rei deuh thleng a awm ta nghe nghe, Marcosan hlawh pek a han tum chu a lo hau let nek a, kawrmawi an inlei sak ta niin ka hria.




An pian hlim ang chiahin Rico chu a mu chiah chiah reng a, a ṭap ri kan la hre ve miah lo bawk, chutih laiin a unaupa erawh englai pawha ṭap reng ang a ni, ka in zaina hliam vangin ka buaipui tam thei lo a, Amawiin a pawm chawt reng a, a bual turin Angaihi nitin a lo kal bawk a, ka tih ve ngai loin min buaipui hnehsawh viau mai.




Marcosa lah chuan atchilh lo chauh khawpin a buaipuia, zana ka ṭhanharh te hian an puan sin keuin a lo en vung vung ṭhin a, a lungawi hmel hliah hliah reng, a veng zankhua ṭhak zel emaw tih tur hian ka ṭhan harh apiangin chutiang chuan ka hmu ṭhin a, khap sateh mahila awmzia a awm tam lo, a ngai tein a lo ti leh zel tho.




November thla chu khua a vawt viau tawh, zan dang ang bawkin Fred-a ṭap chu ka awi mu a, ka mut fel hnua Sitting room lama ka chhuah chuan Bati rimtui hal rim ka hria a, Celine dion-i zai ri ka hriat leh takah chuan bathlar lam ka hawi vat a, thla eng lam thlira ka pasal ding chu ka va hmu zui zat bawk.




"Nangmah chauhin thla eng i lo lawm a ni maw?" a hnung lam aṭang chuan a kawngah ka kuah a, "Ka lo nghak che maw le, Ṭahbelhtea chu a muhil tawh em ni?" a lo ti vat a, "A muhil deuh chiah, dar sawm pahnih velah chuan a rawn harh leh mai ang" a lo ṭhen sak a, "Hun kan va nei tlem ṭhin" a tih chuan ka nui ta ringawt a, fa pathum nei ang mai hi ka nia, Rico-a fel hlauh lo sela chuan ka buai viau maithei a ni, hei pui lah hian a hun hi a lo nghak ve tlat zel bawk si a.





"Zanin chu Thla bial zan a ni maw" a bulah chuan ding ṭhain Thla eng bial kulh lam chu ka thlir vang vang a, thlasik rim nam ṭan leh boruak vawt raih chuan lung a ti lengin hah a ti dam ru riau lawi a. Chutih laichuan ka kawngah rawn kuahin "Thla bial zan chauh chu ni lo e, inhmangaih nana zan duhawm lutuk a nih hi" ka beng bulah a rawn ti zawi sup a, a lamah min pawt herin duhthawh takin min fawp a, a hmui nem thep leh ngenngawl lutuka min fawhna te chuan min fan hneh ngang mai, nupuiin a pasal a thlakhlelhna chu tisa thil tiin ka sawi phal lo ang, hmangaihna a luanliamna thil zawk a ni.




Sitting room lama min pawm phei lai chuan a hmel zun nei tak, ṭha ka tih em em ṭhin chu ka thlir reng a, a rim te chu rimtui zual ta riau hian ka hria, ni e...zanin chu Thla bial zan mai a ni lo, zan thlakhlelhawm ber a ni.





Ni a liam ve bek bek a, ka tan chuan nitin hi a ngai ang patin hmang liam mahila hun nuam tak ka hmang thei ṭhin, tuktin a ka pasal hna thawk tur ka thlah liam thei te, chhun lama ka fa te nena hun hman ho te, an pa lo haw hun nghakhlel taka kan lo thlir ho ṭhin te chu a nuam danglam ve riau zel a, hlimna hi chu kan khawvel thlir dan ang zela lo danglam chauh niin ka hria. Ka tan chuan khawvel pakhat a awm a, chu chu he ka chhungkua te hi an ni, chutah chuan khawvela hlimna ka mamawh zawng zawng ka nei a, ka lungawi hle bawk.




Christmas urlawkni ah chaw ei turin ka pa ten min lo sawm a, zing hma takah thoin inchhung ka ti fai a, Fred-a ṭap rawng rawng ri chuan inchhung chu a luah khat vek a tih theih ang, kal chhuak tura kan inpeih thleng chuan a la ṭap a, Rico erawh a la mutui khawp mai, a nau ṭap ri pawhin a ti harh zo meuh lo.




"Rico hi kan pawm khat bik lutuka, Depression a nei anih ka ring tlat" a tih chuan ka nui hak a, Motor kan chuan hnuah a rawn harh va ta chauh nghe nghe. Kan thlen hma deuh chuan dawr kawnah dingin naute hnute hnek tur kan lei a, Shalomi eitur te pawh kan lei nual a, dawr nghaktu nula lah chuan ka fapa te pahnih chu a lo lawm khawp a, "An kal theih hun ka hmu chak e, an lawmawm ngawt ang, an in ang reuh si, an hmelṭha dun dawn lutuk" a ti siam siam a, chutih laia Cathy lo lut tur chu a ka va hmu hman a, min hmuh rualin a let leh rang viau bawk.




Pawna kan chhuah chuan kawngka bulah a lo dinga, Marcosa nen chuan rei lo te an in ena, ka lam hawia "Christmas he lamah in lo hmang dawn em ni?" a tih chuan "Chaw kan ei ringawt ang" ka ti mai a, an inbe dawn emaw ka tih laiin an ngawi dun reng a, "Naute chu ka lo en chhin" Cathy'n a tih leh chuan ṭha deuhin ka lo entir a, "An pa an chhun hle mai a" a ti zawi sep a.




"Kal ang" ti hmukin Marcos chuan ka darah min rawn kuah a, Motor dahna lam min pan pui thuai bawk, "I la be leh miah lo em ni a?" ka tih chuan "Be tawh e, engmah buaina a rawn thlen tawh lo ang" a ti mai a, ka tlan liam thlengin a hawi let leh tawh lo.





*The end*


Kan thawnthu kal lai POSSIBLE NIGHT chu kan lo zo leh ta, thawnthu chhiar tu zawng zawng te, Like leh Comment min pe tu te, Ads min lo click sak ṭhin tu zawng zawng te, in zavaia chungah ka lawm tak zet zet e, min fuihna te, min phurpuina zawng zawng ah te lawmthu sawi sen lo ka ba che u, 'Ka lawm e' tih thu hian sawifiah zo vek thei sela ka ti, hun dangah pawh min han ṭawiawm zel ang che u aw, PN hi ka beisei phak bakin min lo tuipui a, heti zah zah view kan nei phak turah pawh ka lo ngai lo a, a tira tawite a ziah tum khan Plot sei lutuk ka han duang ṭha leh a, kan hun neih danin a zir chho leh ta si lo a, theihtawpin kan han kaitawi leh a, kan duhthu pawh a sam zan lo maithei e, engpawh chu nise...kan dama Pathianin rem a tih chuan thawnthu dang kan la ziak leh zel turah ngai ila, thawnthu dangah in hmuh leh ṭheuh kan tum dawn nia.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)