SILENT EYES (Modern fairytale P2) by Ahmangaihi violette Khiangte

Moderator: writers

Ahmangaihi violette
Posts: 148
Joined: February 1st, 2020, 3:14 pm

SILENT EYES (Modern fairytale P2) by Ahmangaihi violette Khiangte

Unread post by Ahmangaihi violette » December 4th, 2022, 7:57 pm

SILENT EYES by Ahmangaihi violette Khiangte
Mizo love story / Short story





Vau thla, khaw lum vanglai tak a ni a, ka chhungte chuan ka pu lungphun na hun hmanga haw turin min rawn chah a, ka insiam te chu ka phur lo ru khawp mai, ka haw hun nghakhlel ber ṭhin tu ka pu a awm tawh lo a, a awm loh takah chuan kan khaw lam ngaihna pawh ka nei ta vak lo a, kum khatah vawikhat; Christmas hmanga ka haw tih loh chu ka haw ngai ta meuh lo.





Kan chuanna tur Sumo chu zingkara a chhuah dawn vangin zana insiam lawk a ngai a, College kal lai ka ni a; ni rei ka cham hman lo ang, kan khua a kan inah ka thawmhnaw ken loh a tam tho bawk a tiin ka inkeng am duh lo a, zangkhai thei ang bera haw ka rilruk a ni. Mahse, hmeichhe zin tur tih takah ka han insiam ta chu ken tur a pui a lo tam a, Bag puar awk khawp chuan ka inhnawh leh ta tho a.




Mut dawnah ka nu ka bia a, "Biakin sakna lamah thingpui kan lum dawn a, i pain a lo hmuak ang che" tih angreng a rawn sawi a, rei pawh kan inbe lo, zan hmasa lamah lehkha ka chhiar rei deuh avangin ka muhil sam viau mai a, ka Alarm ri a ka harh leh chuan zing lam dar 5 chiah chiah a ni.




Tho sawk sawkin ka inhnawh puar a, ka inpeih chuan dar 5;30 a lo ri der tawh, ka Nutei fapa U Hminga nen Scooty in Chanmari lam kan pan vang vang a, kan tho hma ve viau emaw tih pawh hian mi fate hi kan thawhkhalh hleithei meuh lo.





Counter kan thleng chu a thleng hnuhnung ber ka ni leh pek a, ka veivah dawn apiangin ka heti ziah a, kan khaw Sumo Driver pawh hian ngaiah min nei tawh in ka ring. "Dindini a lo thlen chuan kan chhuak nghal thei" a lo ti nghal reng a, Passenger dang phei chu Motor-ah an ṭhu ṭhap tawh. Ka thawmhnaw Bag an hlan hnu chuan U Hminga ka mangṭha a, ka Seat tur lam chu ka pan ve ta nghal a, a hnungber tukverh bul chu ka Seat a ni; ngawi teh, tu nge ka Seat a ṭhu khi?





"Ṭhianpa.." Seat hnung nghengin a ṭhu dar dar a, a Cap khum hmalam a pawhhniam vangin a mit a chhing nge pawh ka hre lo. A khupa ka sawi takah chuan a rawn ṭhu ngil hluai a, a Cap chu a siam ṭha zui thuai bawk a, ka inen ta ran mai. Tlangval la naupan hmel tak tila kei aichuan kum hnih thum velin a upa maithei.





Min hmu chu phawk lek lek hian min en a, "Ka Seat ah i ṭhu" ka ti nghal thawr a, a tawlh phei sawt sawt mai. Hmanhmawh deuhin ka ṭhu lut a, ka ṭhu chiah chu tukverh lam ka nek ran a, kan tawt mah mah deuh chu a ni. Kan piah ah chuan nau pawm a lo awm ve a, nausen a pawm lai bakah mipa naupang kum 4 mi vel tur a awm bawk a, amah leh a pasal niawm tak leh ka Seat a lo ṭhu tlangval nen, ka bula ṭhu lah chu a bawp a han sei khawp a; Seat hma a do run mai a, a lu pawhin motor chung a hnaih hle, ṭhu ngil phei sela chuan a tawng mai lawng maw ka ti deuh!





Kan tlan chhuah hnu chuan tlemin ka ṭhu rem ve ta deuh a, Motor chhung lah chu a uap churh a, hetiang chuan ka rui har lo tawp ang, tukverh chu ka hawng rawk rawk a, ka dah chhuah rualin thli thawin ka hmai a rawn chhem a, boruak thianghlim han dawn chuan awm a nuam huai huai thei.





"BZ, in tawt viau em, i nuin min lo be har lutuka" Driver in a rawn tih chuan "Tawt lo e" ka bula mi chuan a lo ti thum dut a, a aw mawlh mai chu! A lam ka va hawi chuan kan mit a intawng chat a, hnai takah kan inen bawk a; a hmel pawh hmu chiang tawh tak ka ni. A han hmelṭha em em lehnghal a, sam dum hlap leh mitmu rawng uk kharh a nei, min enchian em avang chuan ka thinphu te chu a rang dup dup a!




Tawi te hian a rawn kiai suk a, tukverh lam ka hawi leh rang khawp mai!




"Dindin, nang i ṭhu nuam thei maw?" U Liantea bawk chuan a rawn ti leh a, "Umm" ka ti zawi sep ringawt. Khaw pawnah zunram thiarin kan ding zawk a, ṭawngṭaina te kan neih hnuah kan tlan leh vang vang a, kan chuanpui naupang ninhlei lutuk mawlh chu, a pa malchung a ṭhu chungin Toys a khal a, ka bula ṭhu kekawr pawh a tlawh paw phual tawh, chutih laiin ka tlangval ṭhutpui lah chu a muthlu nge ni mitchhingin a ṭhu ngawi ran a, kan ban a insik reng avangin a pangti lum vung vung chu ka hre thei a, engtin emaw tak hian min mawlh lehnghal a!





Kawng lakah thingpui in in kan chawl zawk a, Motor ka chuan hi chuan engmah hi ka ei peih tawh ṭhin lo, Chips leh theitui ka lei a, ka ṭhu lut leh thuai a, ka ṭhutpui pa kha chu U Liantea nen an inzui ta in ka hria, sana ka en chuan dar 9 a lo ri tawh a, chhun lai velah kan thleng tawk velin ka ring.





Rei vak loah kan Motora chuang ho chu an rawn lut leh sap sap a, ka chuanpui te pawh a chep a chepin an rawn inhnawh lut a, kan tlan chhuak leh te chu kan tawt zual sauh emaw tih tur a ni, mipa naupang lah khan "Ka mut a chhuak e" a tia, a pa malchungah a mu zawi nguai a, a ke lam phei chu ka ṭhutpuipa malchungah a rawn hlang at a, a kephah bal lutuk chuan ka nuih a ti za khawp a, ka lo nui ru pat pat chu ka bula mi pawh chuan a lo hria a niang min rawn nghawk zauh a, "Insum rawh" a tih ve na anih hmel. Ni e, ka insum a ngai, nupa te khan min rawn melh hrek hrek a lawm.




"Chips i duh ve em?" ka tih chuan lu a thing a, han biak lumlam dan tur pawh ka hre lo. Mi taptawm chi tih takah mi biangbiak hi ka zei lo ṭhin lutuk a.





Sawi tur hre lo a ka ngawih rauh rauh laichuan "Thil i ei ve nange?" a rawn ti khauh a, "Aw, ka luak a chhuak deuh a" ka lo ti let var a, chu chu kawngtluanga kan inbiak chhun a ni ta awm e. Ka mutthlu lawp lawp a, a dar te chu ka va ngheng ṭhin in ka hria, vawikhat phei chu tukverh lamah min nam sawn a, ka harh chiang zui mai bawk nen ka zak lutuk chu ka meng ngam lo a, ka muthlu der ngar ngar tawh a, che miah loa ka muthlu thei chu mak a ti ve ngawtin ka ring.




"Dindin.." ka chhang mai lo, ka muhil der tlat a lawm, a vawikhatna a 'Eih' chi pawh ni nghal lo chuan.



"Ramdinsang.." U Liantea bawk a ni.




"Umm.." phak tawkin ka ti a, ka bula ṭhu chuan min en leh reng tawh tih ka hria, mitsir pawhin ka melh ngam tawh lo. "I pain Pi Siami dawr kawtah a lo hmuak leh dawn che em?" nui kur kur chungin a ti a, ka haw apiangin Pi Siami dawr kawtah ka pa'n min lo hmuak ṭhin.





"Hmuak ang" ka chhang tawi tek tawk hle. Midang ho chu an ṭawng bawrh bawrh a, chutih laichuan Phone a rawn ri a, ka Ringtone anih vangin ka Bag ka hai nghal rawk rawk a, ka bula ṭhuin "Hello.." a tih rual chuan ka tawp chiang hle thung.





"Khawi lai nge kan thlen..." ka lo chhang hmanhmawh a, a ṭawng tawp lamah "U Liante" a ti tel leh sia, ka zak lutuk chu ka sa pup pup tawh. Min la rawn en lehta nghal a, min en laih tum te pawh a ang zawk a lawm, min en vung vung a, keiin mit ka la sawn zal zal thung a; chutah, zawi tea a nui ri ka hria a.




Kan khua kan thlen chu ka pa'n Pi Siami dawr kawtah min lo hmuak leh ta ngei a, U Liantean ka Bag a hlan thlak laichuan ka ṭhutpui pa pawh chu a rawn chhuk ve a, ka piah a a rawn ding chu ka va melh zauh a, a sangṭha ziai zuai khawp mai, a pheikawk bun ka hmuh chuan Basketball a khel ṭhin ang tih ka chiang ngam sak.





Ka pa chuan Motor ka rui em tih angreng min lo zawt a, ka rui chiah lo nain luak chhuak bur chu ka nei, chutih laimek chuan kan ṭhenawmpa; kan kohhran upa ni bawk Pu Dolungkhama lo kalin ka sira tlangval ding chu a rawn bia a, nui heu chungim a hnungah a bensak thak thak a, tlangval pawh chuan a lo nuih let var a, Pu Doa te chhung em mawni dawn le?




"Pa Do, i tupa em ni?" Pi Siamin a lo tih chuan "Anih ve hi, Thansangi fa upa ber kha" intithei tih hriat takin Pu Do-a chuan a ti a, kan chuan pui ṭhenkhat pawh chuan an lo thlek ve huang a.





"A va lo lian tawh ve, tlangval tak tak a lo ni reng tawh a lawm, Biakzual min la hria em? I ṭhianpa Dika nu ka nia, Dika nen in la in be ngai em?" Pi Siami chuan a ti zui luam a, ka hre chhuak uar uar mai.




He pa hi Biakzuala maw? Khai leh! Engtin nge ka lo hriat miah loh theih le?




Middle school kan kal lai khan High school an kal ve mek a, ka rualpui hmeichhe ho khan an ngaizawng nasa ṭhin a, keipawh tiamin, a bialnu hlui pawh ka la hre reng, kan khua aṭanga an pemna pawh kum 6 lai a liam tawh, ka ṭhiannu Shalomi cousin a ni lehnghal a. Ka han enchian deuh takah chuan ka chiang leh hle lawi sia. Mahse, ani erawhin min hre ve kher lo ang, he ta an awm lai pawh khan kan inhre ṭha lem lo a, kan lo ralkhat star ve ṭhin tih te pawh a hre tawp nang, Shalomi nen lah High school kan kal hnuin kan inkawm chauh kha a nia.





Ka lo ngaihtuah let rauh rauh laichuan a rawn hawi a, tawi te hian min rawn nuih a, min be dawn emaw ka tih laiin a inher vut a, a pu darah kuahin an kal zui mai bawk. An kal ta chu ka en ren rawn a, engti zawng emaw tak hian keimah ah danglam a awm a, ka sawifiah thiam loh thil a ni, ka lungphu te chu a muang reih reih mai hian ka hria a, nuam tihna deuh ka nei tel bawk.





Ka pa nen kan veng lamah kan inchhawm chho a, ka in thlen hma deuh Hall kawtah ṭhalai ṭhenkhatin Volleyball an lo beng a, entu pawh an tam khawp mai. "Tunlai chu Ball beng an awm reng, karleh ah hian Tournament a awm dawn a" tiin ka pa chuan min hrilh a, Volleyball beng zingah chuan ka ṭhiante pawh ka va hmu ve nghe nghe.





"Laldindin, i lo thleng chiah a mi, zanah ka lo leng ang" Nubawihin a rawn ti lang lang a, "Hma deuhah lo kal rawh" ka tih ri chu hre awm pawhin a awm tawh lo, enzui tawh loin ka pa kal chu ka zui a, ka ni leh ṭhenawm nuin in lo nghakin thingpui te min lo siam sak a, ka nu erawh a hnatlang a lo la haw lo thung.




Ka inbual a, ka inthlak laimekin Nubawihi leh Rinhlui an lo kal a, an rawn ri nghal bawrh bawrh a, zana an Volleyball khel en turin min sawm bawk a, tih tur ka nei chuang lo tiin ka lo aw ve mai bawk.





Ka nu hnatlang chu dar 4 dawnah a lo haw a, chaw ei lai te chuan ka pu lungphun tur chungchang mawlh chu kan sawi a, 'I Pu Zawma ten thingpui leh a hmeh kan tum ang an lo tia, i u Hmingan rawn keng chho mai sela a ṭha ang' ka nu chuan a ti luam a, ka pu ka tih hi ka nu pa zawk niin ka pa lama ka pi leh pu te erawh an la dam thung a, ka pu Zawma hi ka nu nuṭa neih chhun; Aizawla ka nutei nen an inkar a mi a ni nghe nghe.




"Min lo chah hma sia, class ka ṭhulh hnem ngawt ang" ka ti niah niah a, Test kan neih dawn hnaih tawh vangin lehkha zir tur pawh ka inkeng am viau reng a ni.





"Nula che tur kan nei si lo a, tih tur a tam angreng a, naktuk aṭang chuan saw lamah i va ṭul viau a ngai ang" ka nu chuan a ti mai a, "I Ni pawn a rawn pui thei dawn che u lawm" ka pain a lo ti bawk a, ka Ni nen hian khawi ilo kal na ah kan inzui chawt ṭhin a, ṭhian ang mai hian kan inkawm bawrh bawrh ṭhin.




Chaw kan eikham deuh chauh tih ah Nubawihi te an lo thleng a, an rawn hma khawp mai, Muanpuiin a rawn zui a, an rawn inchei khawp lehnghal a, kei awmhmun nena kal mai tum kha ka ni a, chutia ka kalpui tur te ber an inchei tak vur si ah chuan hmanhmawh deuhin ka insiam leh a, khua a lum viau nain Jacket pan chi ka ha a, ka awmhmun kawr ṭha ve ber hain ka ṭhiante chu ka zui chhuak a, kan in kan pelh rualin Hall kawt vela an thawm chu a hriat phak tawh.




"Shalomi chu kan sawm dawn em?" Rinhluin a ti hluai a. "A u a lo haw a, a rualin ka lo kal ang a tia" Muanpuiin a tih chuan tu nge a sawi chu ka hre nghal a, vawiin lama ka chuanpui ngei kha a ni.




"Bza maw?" ti tu chu Nubawihi a ni thung.



"Aw, vawiinah a lo haw a tia" Nubawihi leh Rinhlui an lo phul nghal hlut a, "Shalomi chu a Number lo dil tir teh, neih ve hrim hrim ka duh a nia, ka Star na a rei tawh lutuk, ka be lo anih pawn a Number chu ka duh ve hrim hrim" Rinhluin a tih chuan ka lo zak deuh.





"Kan dil dawn nia, ka dil ngam a lawm" Nubawihin a lo ti ve bawk a, Muanpuii lah chuan "Shalomi kher chu ka dil lo ang, Laldika ka lo dil dawn nia" a ti ham ham a, kei chu ka ngawi ran mai.




"Dindin, vawiinah in lo chuang ho lo a mi?" Nubawihin a lo ti he haw a, "Chuang ho e" ṭha deuh chuan ka ti ve mai a, chutih rualin ka darah a rawn beng zawt a, a kutthlak a la na em em zui a.




"I va sawi lo thei ve, ka Forever Crush te pawh a ni ve em em a" a ti zui nang nang a, chutiang lam reng reng sawi nachang ka lo hre lo a, ka ṭhiante chuan mawl min ti leh hlawm khawp mai.




Hall kan thleng thla chu mi an lo tam khawp a, Vanapa section leh Taitesena section YMA te an lo inkhel dawn mek a, Tournament a tel tur select na an nei dawn niawm tak a ni. Ka hmelhriat ṭha ten min lo be ve sap sap a, kan khaw mi te hi an felin an hawihawm a, khualkhua aṭanga haw te hian min chibai sap sap zel a, mikhual lo kal te pawhin nuam a ti viau ṭhin reng a, he aia khaw nuam hi chu a awm bikin ka ring lo.





Ṭhuthmun kan rem fel awrh ang tih ah, Rinhlui chu an Section leader ten an lo ko a, bawl beng turin a kal nghal nal nal a, Nubawihi erawh a tel ve pha lo anih hmel e. Muanpuii leh kei hi chu naupan lai aṭang tawh a a kotlang A Team kan ni ṭhin a, Football kan khelh ve pawhin Goal vangah kan ṭang a, phul kan suih vel mai mai ṭhin, Team an thlan pawhin thlan hnuhnun ber pawh kan ni deuh ziah a, infiamna lamah chuan thawhhlawk lo dun tak kan ni.




"Saw Shalomi te" Muanpuiin a tih chuan Nubawihi nen kan hawi rual zawt a, Volleyball court sirah Rindika nen an lo inzui phei mek a, an ni pahnih aimah chuan an hnunga mipa lo kal chuan mit a la zawk a, Nubawihi pawn ani tho chu ania a thlir ve ni.





"Muani lo ko rawh" tih pahin ka ṭhiannu chuan min rawn nek talh talh a, ka sirah chuan mi pathum vel ṭhutna a la awl a, kan bula ṭhuttir a tum a nih ka ring.





An lo kal hnai zel a, Muanpuiin a lo au lauh mai. Kan lo en reng laichuan Shalomi leh Rindika chu an inhrilh ru mek a, kan lam lo hawiin an ding ren rawn a, "Hetah lo ṭhu ve ru" Muanpuii bawk chuan a han ti leh a, an lo phei laichuan Nubawihin min rawn piai hlawk hlawk a, "A laiah hian lo ṭhu teh" a rawn tih chuan rang deuhin ka tho a, ka thu fel chiah tih ah Shalomi te chu an lo thleng a, "In va hma ve, Dindin...i khel ve dawn em?" Shalomi chuan a lo ti var a, lu ka thing ringawt chu min rawn thlek lehin "A la tawlh phei theih em?" a rawn ti zui a, kan tawlh phei nghal sawt sawt a.




Nubawihi bul chiah ah Shalomi a ṭhu a, Bza erawh a sir berah ṭhuin a Phone a hmet mual mual a, a lam ka va hawi laichuan a hmel ka hmu pha lo a, Rindika lo hawi ve nen kan inmelh chiang hle thung. Min rawn nuih var var a, tawi tein ka nuih ve a, ka hawisawn leh rang hle.




"Dindin.." ka bula mi chuan a rawn ti sur sur.



"Eng nge" ka lo ti he haw a.



"A chhe lo chiang e" uiiii...deuh tehthlawt ṭhin a. "I lerh lutuk" tih pahin a nakah ka nghawk sawk a, Muanpuii lah chuan Shalomi a lo mitmei ve bawk a, Shalomi lah nula bengvar chi a ni a, a sira ṭhu te lam chu hawiin "Ka ṭhiante hi hmelhriat ve ru" a ti zung zung a, "U Bza anih hi, in la hria em?" tiin min chibai tir ta hlawm a, Bzan min rawn chibai tur chu ka lai deuh ṭut a, ani lah chuan min rawn enchiang khawp a, min ti zam ru der der thei.





"I van lo haw khat em em" Nubawihin a tih chuan a nui suk a, engmah phei chu a sawi lem lo, a ṭawngmawh ve hle anih ka ring.




"Keipawh min chibai ve tho ula" tih pahin Rindikan a kut a rawn phar duai a, Nubawihin a lo hnawl sawn chuan an nui dar dar a, "A laia mi kha ka chibai tal ang" tiin a rawn phar nawn leh a, ka hma ah tak a rawn phar vangin ka chibai ve lo thei lo a, a kut ka han vuan chu a thlah duh ta lawk lo a, ka pawt let ṭung mai a, min nuih pawh chuan ka nuih let ṭha duh vak tawh lo.




Chutih laichuan Bza chuan min lo en ve reng a, Rindika lah chuan Nubawihi malchungah ka kut a la hum tlat a, ka zak lutuk chu ka sa pup pupin ka hria.




"Thlah tehhh" lawm vak loa ka tih takah chuan min thlah hlawk a, ka kut ka laklet rualin ka sir lamah ka nuai nghal nawk nawk a, ka ngei nghal ṭhum mai a, mipa fiam hi ka dawl vak lo hrim hrim a, engemaw ti deuh takah min chhaih te hian ka thinrim leh mai ṭhin.





Inkhel te chu an ṭang hlawm bawk a, a hmuhnawm bawk aniang tumah kan inbe lo a, kan Section lam in Point an hmuh chuan kan bul vela ṭhu te chu an au dur dur a, Nubawihi leh Shalomi pawh an au ring khawp mai. Rei vak loah Shalomi chu an rawn ko a, "Min kalpui rawh" tiin Nubawihi chu a thawhpui zui a, an ṭhutna awlah chuan Rindika a rawn tawlh phei nghal vat a, ka dar si chet khawpa hnaiah a rawn ṭhu a, khuva min ṭheh a tum chu ka la duh chiah lo.




"I ei duh em?" tiin Muanpuii ka melh a, a lo duh ve mai bawk a.




"Bro, lo ṭhu phei rawh" Rindikan a tih rualin ka va hawi zawk a, kan inmelh fuh thei viau mai. Muang changin a rawn tawlh hnai a, a lo ṭhuthnaih ve takah chuan a rimtui inkah rim a nam hak a, a rimtui hliah hliah hian ka hria a, ka va hawi changa kan inmelh fuh lah chuan min nuih suk ringawt a, min hre tawh lo tawp chu a ni lo ang; mahse, min be mang si lo a, biak hmasak chu ka hreh ve tlat a ni.




"Dindini, eng Semester nge i zir khah?" Rindikan a rih chuan "4th sem" tih zawngin ka chhang a.




"Naktuk a ni em hnatlan hun kha" a tih leh chuan ka pu lungphun chungchang a sawi tih ka hre nghal a, ka bu nghat a. "Kei pawh ka rawn thawk chhuak ve ang, kan kal ho ang chu" ka lamah rawn awnin a khi vur vur a, "Ka kal pawh...ka ring lo...in lamah chetna tur a tam a" ka ti niah niah a, "Thingpui lumpui te in ngaih chuan lo sawi hreh lo ula" a han ti leh zat a, kei ka lo bu ve leh mai bawk a.





"Aizawlah chuan Chhas i ngah an ti tlatin ka hria" nui ruh ruh chunga a tih chuan ka melh rum hrak a, "Awih awm loh e a" ka lo ti hmuk a, dawta inpuh hi ka haw tlat, khaw danga awm ka mi bawk si a, lerh ang zawnga in sawi phei chu ka duh miah lo.




"I chhe lo bawk sia, i Luck ngawt ang a" ka nui tawi viau tawh.




"Bialpa i nei em?" a tih leh chuan "Nei lo" ka ti bul hmuk a, ka tim ru leh angreng khawp mai. "Ehiau! Chuti chu i Number min lo pe teh" a ti ta chiah reng a, a Phone a rawn phawrh zui mai bawk nen ka thaw a ti ipik riau a, Bza lo hawi ve chiah lo sela chuan ka pe duh miah lo ang maw le.




"Lo type rawh" ka awki ah chuan ka lawm lo tih a lang deuh maithei, Number chu ka sawi a, anin a lo type zel a, Bzan a type ve em ka va melh a, a Phone a eng miah lo, ka thil beisei chu atthlak ka ti hle a; mahse, ka beisei ve miau mai si a.



"Ka lo text ang che" ka chhang lo chiang hle.




"Bro, kan khaw nula chhe lo ber a nih hi aw" a ṭhianpa chu a va nghawk pah zauh a, ka lo lai ve ram ram, Rindika sawi mah nise hriat nuam ve tak a ni, kan khaw nula hmelṭha ber ka nih loh zia chu ka hrechiang hle a, Bza hriata a sawi vanga lawm ka ni mah zawk. Chutah Bza chu a rawn hawi a, "Hmelṭha khawp mai" zawi supa a tih chuan ka beng a sa hat hat a, ka thin zawn chu a za ruai mai hian ka hria!





"Kan khua chu nula chhe lo ho an awm bo vek a, rim tur an vang thei khawp mai. Mahse, Dindini a lo haw bawk a, kan la rim dawn nia" Rindika chuan a ti leh ham ham a, ka lamah rawn inher lehin "Kan lo len i phal em?" a ti leh zat a, ka va hawi chuan nui hmel pu lek lekin Bzan min lo en ve a, "In lo leng dawn nia" ka tih laichuan amah ka en kher bawk. Ka sawi zawh rualin volleyball court lam ka hawi vat a, a nuih danah khan a hrethiam chiang a ni, a hrethiam chiang a lawm.





Chuta chin chu a lam ka hawi leh ngam ta lo, Rindika chuan min be seuh seuh reng a, a rul tawkin ka chhang ve zel a, Muanpuii lah chu kei ang tho Nubawihi te an awm ve loh hi chuan a ngawi tlat zel. Mipa ṭawng sur sur chi, thuril sawi ang maia mi bekbawr ṭhin te hi ka ngaina lo a, hnai tak taka Rindikan min rawn bekbawr ṭhin pawh chu ka ngaithei vak lo, in lak zei a tum ni mai hian ka hria a, zei ka ti lo va, ten lamah a kal dawn tlat.





Hmeichhe inkhel an zo a, chuveleh mipa ho inkhel tur an insiam a, "Lalrindik, i lut ve duh em?" Taitesena section a mi ten an rawn tih chuan Rindika a ding nalh a, "Khel ve ila a ni mai a lawm" tih pahin a thil ah lai chu a pawrh mawlh mawlh a, Bzan a phone leh Cigarette te chu a lo laksak a, a kal ta chu lawm tak ka ni, chutih rualin ka che chang ngam miah lo thung.




Bza chu a rawn tawlh phei lo a, ka mitsira ka va melh pawhin inkhel te lam a thlir vung vung a, a sir zawng phei chuan chhe lo tak a ni, kan tleirawl tirha kan lo ralkhat star ṭhin lai aikhan a chhe lo tawh zawk a, hmanah kha chuan ṭhian ten an sawi ngun em vang te, ṭha an ti em vang te khan ka hmu ṭha ve mai a, tuna ṭha ka tih dan erawh a dang ta deuh.




A rawn hawi thut vang chuan ka ṭhu ngil hluai a, zah zelah ka Jacket chu ka han siam ṭha ringawt a, a rawn tawlh phei chiah chu ka mur sung sung thei. A lam ka hawi rualin min lo nuih sak a, "Vawiin chu i sil viau lo maw?" nelawm zet hian a ti a.




"Sil lo e, nang zawk?" a lo bu nghat nghat a, "Ka kawng a kham lutuk" a tih chuan ka nui hak mai.




"A tawt ve em a ni" sawi tur vang lutuk chu a hrehawm lam mah.



"Nia" kan in en a, kan innuih leh ringawt a.



"I kekawr te kha a bal vek lo maw?" ka tih chuan "Shalomi ka suk tir nghal a" a lo ti vat a, sawi zui tur ka hre tawh lo. Inkhel chu kan thlir dun rauh rauh a, Muanpuii lah chuan "Be ta che" a rawn ti ve sek a, biak te chu ka duh ve lutuk a, biak dan tur hlawl ka hre lo a ni.




"Eng Section nge i nih ve?" a rawn tih vang chuan a lam ka hawi rang hle.




"Keimah maw, Vanapa section" ka chhang rang viau.



"I khel ve ngai em?" a tih chuan nui chungin lu ka thing a, "Nang..?" ka han ti veleh a.




"Khel ve ṭhin e, Basketball leh Batminton ka khel nasa zawk a" ummm..ka ring dik zan mai.




"Khel ve la.." a lo nui mai a, min chhang loin inkhel mek te chu a thlir a, rei vak lo hnuah "Heta ka awm laikhan ka hre ngai miah lo che" a rawn ti khauh a.




"Keichuan ka hre lutuk che, Shalomi te nen pawh kan inkawm ṭhin a lawm" ka lo ti let var a. "In la nau deuh anih dawn chu, khaw dangah ka awm hma a, kan pem na pawh a rei deuh tawh" a ti zui a, kei ka lo bu nghat nghat a, ka rin aidaihin biak a nuam.



"I lo zin khat viau em ni a?"



"Zin khat angreng, hun a awm lo ṭhin lutuk a" min en loh vangin ka hawisawn rang hle. Eng nge a tih ṭhin te pawh hriat ka chak viau a, zawh ngai loin sawi zung zung mai se ka ti, zawhna ngah lutuk chu dilchhut min tih ka hlau a, titi vawrh tu zawka ṭan pawh ka hreh.





"Engtikah nge i haw leh dawn?" a rawn tih chuan "Hei tunah kan khua ah ka haw a lawm" nui chungin ka ti a, ani pawh a nui ve tho. "Aizawlah" a tih leh chuan "Kar thar velah anih ka ring, nang zawk..?" Nubawihi te an lo thlen vangin ka zawhna chu a hre ta lo aniang, ka ṭhiante ṭhutna kianin a tawlh hla thuai a, Shalomi a rawn ri nghal bawrh bawrh a, kan inbe zui leh ta lo.





Rei vak loah chuan Phone hmang tur niawm takin a tho chhuak a, Nubawihin Shalomi hnena Number a dil te pawh chu ka hre reng a, a Number chu neih ve ka chak ru khawp mai. "Lo sawi miah suh aw, heti hian ka kawl ve mai mai ang" Nubawihin a tih chuan "Be ru, a fel lutuk" Shalomin a ti mai a, keipawn fel ka ti takzet.




Ka nuin min lo Phone vangin haw ka rawt a, kan inpeng thlengin ka ṭhiante chuan min thlah a, inkhel en zo turin an let leh thung a, kei erawh ka intifai a, ka mu nghal mai a, mut erawh a chhuak mawh khawp mai a, vawiin zet chu ngaihtuah zui a awi khawp mai. Ka mitthla ah a hmel a cham reng a, a Perfume rim te pawh ka hnarah a la cham hialin ka hria a, kan inbiak laia a nui hmel mawlh kha.





Ka inlet sek a, ka harh tulh tulh thung. A khat tawkin ka Phone chu ka bih leh ṭhin a, ka phone number min dil ve sela ti tein duhthu ka sam a, vei tak tein ka vei chu a ni der mai. Lehkhazir chauh ngaihtuah ṭhin, inchhunga tawm chawt ṭhin ka ni a, ngaihzawng lam hi ka awn tehchiam ngai lo, min ngaizawng tak tak tu hi chu ka tawng ve fo a, tun ang renga mipa vei ka neih hi ka la hre lo thung, ka ngaihtuah nasat poh leh ka duh zual telh telh mai a ni.





Zingkarah ka nu nen ka pi te inah kan kal a, vawiin lamah lungphunna tur thing an phurh dawn vangin nilengin ka buai ang. "Chaw eikhamah i kal leh vat dawn nia, buh thlei te pawh a ngaih ka ring" ka nu chuan a ti a, ani chu ka pa nen ram lamah kal ve an tum a, an hmanhmawh deuh vangin kan haw leh thuai bawk.





Ka Phone ka en chuan Rikdika message a lo awm a, "Good morning, vawiin chu ramah lo kal ve la, ka lo sawm ang che" a rawn tih chu ka chhang let lem lo. Chaw eikhamah insiamin ka pi te in lam bawk ka pan a, ka thlen hmain dawrah ka peng kawi a, eng engemaw chhun thingpui hmeh tur ka lei nual a, dawr aṭanga ka chhuak leh chuan Scooty a Shalomi lo tlan ka tawk a, "Laldindin, star tu che ka hria" a rawn ti zurh zurh a, ka biak ve hmain min tlanpel zui daih a, keilah chu zawhna hlirin ka khat.





Tu nge niang, a u Bza a ni a ngem? A ni ngei ngei ang, awiii....Shalomi bulah a lo sawi a ni maw, engtin nge a sawi ang le?




Keimah chu ka inzawt mawlh mawlh a, kawngah chuan Bza ka tawk ang tih ka hlau zek zek a, chuti chung chuan ka hmu chak em em lawi a.




Nilengin Shalomi thil sawi chuan ka rilru a luah a, Message talin min rawn hrilh chiang sela ka ti. Ka phone chu ka bih sek a, Shalomi lah chuan rawn sawi a tum lo reng reng, hetiang em em hian Shalomi biak ka chak ngai hi ka la hre lo.





Ka piin "Naktuk chu i ṭhiante sawm la, buh thlei tur a tam a" a tih chuan phur lutukin ka ṭhian te ka hrilh kual a, midang ho chu Message a ka hrilh laiin Shalomi chu ka va Call bik kher a, ka han sawm chu a lo aw rang viau a, Star tu tih vel kha a sawi miah lo, keimah zawk chuan ka zawt phawng mai dawn nge ni?





Ka zawh ngam tak loh vangin Phone chu ka dah a, thaw a ipik riau, min delh rit luk tu a awm. Tu emaw Star neih hi a lo nuam miah lo anih hi, mahni tein rilru a hah em em ringawt a, nuam ka tih zawng a ni ve lo.





Tlaia ka haw hnu chuan Shalomi hnen aṭangin Message ka dawng nawlh a, "Dindin, zanah inkhel en ang aw" a rawn ti a, ka phur leh ta surh mai, "Ka hman chuan aw" tiin ka chhang a. "Hman lo tum rawh, duh deuh tu che ka hria a nia, zanah ka hrilh ang che" a rawn ti leh chu keimahin ka khi vur vur tawh.




"Tunah sawi mai la" ka tih lah chuan "Zanah ka hrilh ang che" a ti ve tlat a, "I sawi nghal loh chuan ka lo kal lo ang" ka tih pawhin "A zak a, aman a hrilh ngam lo che a lawm, zanah kan lo sawm ang che, ka lo kalpui ang" a ti lehzel a, Bza chu a zahzum hmel ka ti reng a ni.




Zanah chuan inkhel enturin ka insiam a, ka nu chuan a remti vak lo; mahse, ṭhulh thei niin ka inhre lo thung. "Ka lo haw khat si a, ṭhiante zinga hun hman ka duh ve a lawm, anni pawn min ngai ve a" ka tih chuan min hnial zui lem lo a, ka ṭhiante lo thlen hmain ka lo inpeih diam tawh.




Dar 7 velah Nubawihin min lo Phone a, "In kawmthlang ah kan awm tawh, lo chhuk mai rawh" a rawn ti lang lang a, "Shalomi te khan kan lo sawm ang che an tia..." ka sawi laimekin "Kan awm ho vek, nangmah chiah kan nghak che" a rawn ti leh a, ka inbiak zawh a ka Phone ka en chuan Rindika Message a lo awm a, "I hman tawh em, kan nghak che" tih a ni a, chu pawh chu ka chhang chuang lo.





Hmanhmawh deuhin ka kal chhuak a, kan kawmthlanga Tengtere kung lianpui bulah min lo nghak ṭhap a, Bza pawh a tel ve nghe nghe. Hall lam kan pan a, Rindikan ka dara min lo kuah vang chuan ka awm a nuam lo hle a, a khat tawkin Bza chu ka va melh leh ṭhin. Kan hma chiah ah Shalomi nen an kal dun a, Shalomi zawk chu a rawn lehhawi zauh zauh a, zawhna ngah ru taka ka en laia "Lalrindik, ti huam huam suh" a tih chuan a ngaihna ka hre lo hle mai. 'Eng nge a awmzia?' tih melh hian ka melh a, min lo nuih vang chuan ka awm a nuam lo zual bawk.





Thil lei an rawt vangin Rindika nu dawr lam kan pan leh te te a, Rindika kalsawn veleh Shalomi chu ka pawt hrang a, "Rindika saw em ni i sawi chu?" vin lek lek hian ka ti a.




"Ni e..." thawk ka la hak a, ka ṭah a chhuak hlur.



"Min rawn tur sek a lawm, a duh tehmai che a nia"



"Anih tak chu" ka chhan dan vang chuan phawk deuhin min en a, a hrethiam aniang chu "Tu nge anih i lo rin a?" nuihza aw deuhin a ti a, sawi chuah chi pawh ni nghal lo chuan.



"Tumah"


"Midang i beisei a ni maw?"


"Teuh lo mai"



"A ni chiang mai" min rawn nek talh talh a, tum hmel put loh hram ka tum a, dawr chhunga Bza leh Rindika awm chu ka va en leh rih a, ka rilru a na riau lehnghal.




Hall kawt kan thlen chuan Ball an lo beng ṭan tawh a, Rinhlui pawh a Teammate te awmna lamah a kal leh nghal nalh a, keini erawhin lungphun bula ṭhutna inhung lam chu kan pan a, Rindika pek chuan ka bula ṭhut a tum a niang chu; ka hnungah min zui zel mai.





Ṭhutthlengah chuan kan vaiin kan leng ta lo hlauh a, Rindika ṭhu uk tawh chu kalsanin Nubawihi ka zui a, lungphun chungah chuan kan pahnih tein kan han ṭhu a, kan ṭhu fel chiah tih a Bza lo hawi chuan phawk lek lek hian min lo en a, a hawi sawn leh vat thung. Rinhlui te ball beng nge Bza chu ka en tam zawk ang aw? A khat tawkin ka melh reng a, ani erawh a Phone khawihin a ṭhu kun deuh lup a, phone a khawih reng maiin ka hria, ngaihzawng a nei anih ka ring deuh.





Hmeichhe inkhel an zo a, Rindika pawh a tho rang khawp mai, "Lo keng teh" tih pahin a Phone leh a thil ah te chu min rawn pe rawk rawk a, chutih laimek chuan Bza pawn a lo insiam ve a, Shalomi jacket a pek laichuan min rawn melh zawk a, ka lo en lai tak anih vangin keimah zawk chu ka lai a, min melh ringawt pawn ka thinphu a rang thei nia maw le!




Volleyball court lama an kalphei chu ka en zui renga, a dinna tur ka thlen hnu a a chevel te chu hmuhnawm ti em emin ka lo thlir a, a sangṭhain a pian a nalh si a, hmeichhe dang awm ve ho mit pawh a chungah a fu ṭhup tih ka hai lo. Inkhelh an ṭan a, Bza chuan ṭan tu a ngah bawk aniang Ball a khawih ve apiangin thawm a ring fal a, a chet ṭhat phei chuan Court sira hmeichhe ṭhu ho chuan kut an beng dar dar ṭhin.





An ṭan hmun an thlak tak avangin a hmel ka hmu chiang thei ta a, Ball a liam a an chawlh zawk kar chuan kan ṭhutna lam a rawn hawi ṭhin a, ka lo thlir tih hre ve sela ka duh vangin ka mit ka la sawn ngai lo, a rawn hawi zing riauin ka hre lehnghal a, ka ngaihbel nge ni keimah chu min rawn en tlatin ka hre bawk.




"Shalomi chu a u Phone a khawihsak char char a, a u saw a rawn hawi sek mai" Nubawihin a tih chuan ka lo zak ru chem chem.




"A Ex in a rawn text a, kan lo chhan sak a nge" nui pat pat chungin kan ṭhiannu chuan a lo ti a, "A Ex maw, tunah a nei lo tihna?" Nubawihin a lo ti thuai a, "Thla hmasa khan kan inṭhen a ti, Nagpur ah a awm daih a, an inhmu lohna pawh a rei tawh ang" Shalomi bawk chuan a ti leh a, ngaihzawng chungchang an sawi dun ṭhin chu a ni phawt mai.





Inkhel an zawh chuan haw mai ka rilruk a, Rindikan "Ka thlah ang che" ti lo se chu ka haw nal nalin ka ring. Midang ho chuan Shalomi te inah Noodles chhum an rawt a, mi lah chu an han sawm nghawrh khawp a, "A la hma a lawm, lo phei ve rawh" ti a Bza ṭawngkam ṭha chu umin ka zui ve ta hlawm a, zep loah chuan an kianga awm na hun ka nei tam dawn lo tih ka hria a, Bza nen phei chuan kan inhmuh leh hun tur hriat phak a ni tawh lo.





"Shalomi khan a hrilh tawh che em?" ka beng bula Rindikan a rawn tih chuan lu ka thing rang hle, "A hrilh lo che maw?" a ti nawn leh kher a, keilah pek chuan "Hrilh e" ka ti leh lawi sia, min nuih erawh ka nuih let ve lo. 'Min hrilh lo' ka tih tlat chuan aman min Bem ṭhat leh ka hlau a, chuvanga min hrilh tawh thu sawi leh hnuhnawh ka ni.





"Chuan, chhanna chu keimah min hrilh mai la" a rawn ti leh sur sur a, a rawn kun lohna lamah ka thlesawn vat a, chuti chung pawh chuan min la hnaih em em tho. Ka dar leh lamah rawn vuanin kan inzui ta zel a, kan hmaa Bza kal chu an rawn hawi let eih lo, a kal chak hle a, midang ho chuan kan um a ni deuh ber. "I pen hlawk lutuka, kan pen hnih vel hi vawikhat penah i hmang a, muang tetein kal teh" tiin ka ṭhianten an fiam a, a chhang lo a; a kalmuan phah hek lo.





Shalomi te in thlen hma deuh dawrah Noodles leh intur vawt kan lei a, a man pawh mipa pahnih ten an pe vek a, keimah ber chu siam turin min ti hlawm a, kan ṭhianho thil tih khawmna reng rengah hian eirawng bawltu ka ni ziah ṭhin a, chaw eikhawm ṭum pawhin buai berah ka ṭang ṭhin.





Noodles ka chhum laichuan Veranda lamah an ṭhu a, an titi thawm leh an nui ri te chu chiang mang lo deuhin ka hre pha a, ka hnung lama pen thawm ka hriat rual erawhin ka lehhawi rang hle. Kawr ha loin Bza chu a lo kal a, "Puih i ngai em?" tih pahin min rawn nuihsâng a, an inkhelhna vang khan a awm leh chal bawr vel te chu a thlan hluam bawk.





"Ngai lo e, a hmin har lo ang" ka lo ti var a, chutih laichuan dawhkanah a kawr rawn dahin ka thil chhum chu a rawn bih dak dak a, "A va rimtui deuh ve" a tih laia min rawn en chuan in en hnai tak kan ni. Hnai takah chiang lutuk tak maiin kan in en a, a hmui sirah ser tereuh te a nei tih chenin ka hria.





"Ka inbual zo hman a ngem?" zawi ruiha a tih chu chhan lawkna chang pawh ka hre lo, a mitmeng chuan ngaihtuahna dang daih min neih tira, min en dan leh a thil min zawh chu a inpersan hle bawk.





"Kan inbual lawk a nge" mawi fahrana min nuih leh takah chuan ka hrechhuak zawk a, "Nghak rawh, a ei theih ṭep, a so chuan a hmin a ni mai" ka ti nghal sawk sawk a. Dawhkana a kawr chu lain a darah a bat a, chutah ka lam rawn hawiin "Min lo eisan rawh u, ka tuihnai vak lo" tiin a chal a tuai puat a, keichuan ka hmu tuihnai viau tho mai, mipa vunah chuan a ngo deuh maithei tih turin a vun a eng a, a sam dum hlap chuan a ti lang sarin; a lang fai sar reng a, en mai pawhin tlangval in uluk tak a ni ang tih a hriat theih.





"Anih ka lo dah mai ang che" tiin bualin a a lut tur chu ka au zui hram a, "A ngai kher lo ang" a rawn ti let chungin ka dah ta tho a, Tomoto a ngainat ringin a Tomato leh Artui lai chu duhsak tawkin ka dah tam a, mahni te chuan ka hlim ru veng veng mai a ni.





Ṭhiante nen dawhkan kila kan lo ei laimekin a rawn chhuak a, ei ve nghal turin an lo sawm sap sap a, ani erawh pindan lamah lutin a va inthlak a, a lo let leh chuan kan lo eizo diam tawh hlawm a. Nubawihin a eitur a lo suah sak vat a, thil pawlh tam bik lutuk chu a lo hre nghal chat mai a, "Hetah hian a tui lai a tam bik anih hi, kan eiah khan ka hmu mang lo reng reng" a ti nuah nuah a, ka ip ru deuh a; mi phei chu a sawi chhan lem loin ka hria.




"A mawng lamah a lo awm vek aniang" ka tih laia Bza lo hawi ka hmuh chuan ka sa pup pup thei. Mahse, tui tih hmel deuhin ka thil chhum chu a ei a, a nuam ve duh takzet.





Kan thil eina te kan sengfel hnu chuan Veranda lamah kan ṭhu chhuak a, Bza'n Sweet a rawn sem diat diat a, min pek ka han en chuan Center fresh a lo ni a, midang ho Sweet a pek ṭheuh laia, Chewing gum min pe bik chu ka ngai kawi lo thei lo. Midang hmuh ve hlauin ka thukru ṭat ṭat a, Bza lam ka va hawi chuan ka rinhlelhna belhchhah tur ting hian min lo nuih a, ka sira chuan lo dingin a Center fresh ken lai chu a kheh zui a, kan pahniha a in ang kan nei bik te chu nuam ve duh tak a ni.





Shalomi pi in thingpui min lo siam sak a, "Rei deuh meng suh u, zingah i pu huana kal in tum kha" tiin Shalomi te unau chu a chah a, Pu Doa te hian khaw pawn lawkah huan zau deuh mai an nei a, kan naupan deuh lai khan Lakhuihthei leh serthlum an ngah thei hle a, zing Exer lak pahin kan lo ru fo ṭhin.





"A va thli khat ve aw, duh belh in awm em?" Bzan a tih chuan ka no ka lek kang vat a; mahse, amah hnaih zawka ṭhu Nubawihin a lo dawh ve vang chuan ka la let leh thuai a, an inpe mai ang chu ka tih laiin "Dindin, i no lo dawh rawh" Bza'n a rawn ti a, ka ṭhutna bulah a rawn ding hnai zat bawk.




Chutah, ka thingpui no khat pap khawpin a rawn chhung a, a no ah chuan a chanve vel bak a awm tawhin ka ring lo. "A tam lutuk, la ṭhen leh rawh" ka lo ti chul a, "Zun i cheh mai angah?" tiin min lo fiam a, pek ṭhen leh ka tum chuan a duh tlat lo a, Rindikan a no a rawn dawh phur hle thung.





Hlauhthawn ruk ang ngeiin Rindikan min thlah a tum leh ta tlat, midang ho chu ka han mitmei ṭhin a, Nubawihi te nen kan veng a inkarkik si, Bza lah a ṭhu ngawi reng ringawt a, an vai chuan Chance min pek tum hi an ang berin ka hria. Mahni a haw ngam hek lo; phur lo deuhin ka zui chhuak a, thui pawh kan thlen hmain a tih dan ngai tein a ṭawng leh sur sur tawh a, a sawi zawng pawhin ka lo hah hluah hluah thei. Min bem mawlh mawlh a, min duhzia thu leh hmelṭha min tih thu te pawh hahipin a sawi a, ka tan chuan a ṭawngkam chu a ril lo a, a thlum hek lo, ka dawngsawng thiam meuh lo zawk a ni.




"Ka zirlai ngaihsak rih ka duh a" tiin ka hnar a, inhnar dan mawi hnai ber ni a ka hriat chhun a ni bawk, a nuih mai danah a ngawi haw hran lo niin ka hria.





"Ka Message tal chhang ve ṭhin la, i message dawn te pawh kan chak ve a" tiin a phun bul bul a, chu em han hnial chu a mawi bik awm lo e. Ṭha deuhin ka chhang a, ka ṭawngkamah erawh zuamawm leh beiseina siam lo tur zawngin ka fimkhur hle a, ṭhianṭha ah chhuah ka tum ti ila a dik ber ang.





Kan kawt thleng min thlahin min let san a, ka chhungte chu an lo reh ṭhiap tawh, ka nuin min lo koin kawngka kalh nghal turin min ti a. Mu tura ka insiam laimekin Rindika chuan min lo Call a, a Phone call chu ka la hreh ru khawp mai, zawi tein ka chhang a, lehlam a mi erawh a rawn ri nghal lung lung a, "Ka thleng phei chiah" tih angreng bak chu a rawn sawi chuang lo, ho ka ti khawp a, ka aw e liam vel a ni ber.





Mut hmunah thil tam tak ka ngaihtuah a, ngaihtuahna a thuiin eng engemaw thleng tak tak tura ka beisei loh thlengin ka zeldin a, ka mitthla ah lah hian a hmel hi a chiang thei em em mai a, zanin a a inbualtur khawsa zia te kha a hunlai angmaia chiangin ka la mitthla thei a, ka khik pui leh sak sak ṭhin.





Zing karah ka pi te inah ka phei a, chaw ka ei nghal a, ka ṭhian te pawh an lo thleng har lo, chawhma chhung zawng chu buh kan thlei a, inchhung sekrek te kan khawih bawk a, chawhnu lamah ka nutei te lo thlen chuan kan lo inpeih diam tawh. U Hminga rawn thleng chu a in la khual lian khawp a, min kawk kual sek mai, Nubawihi lah chuan ṭha a tih thu ngawt a sawi a, ka tan chuan lawmawm tak a ni. Bza kan duh ru ve ve kha nuam tih lohna lian tak ka nei a, Middle school kan kal lai pawh khan keichuan ṭha ka tih thu ka sawi ve ngai lo a, ṭhiante nena thil in ang neih te hi ka mizia a ni ve lo anih ka ring.





Tlai lam pawh kan ṭhianhoin chaw kan einghal a, chawei kham veleh kan in lam kan pan a, TV en pahin thei kan bawl a, kan nui ho bawk bawk a, kan awmkhawm hi chuan kan ri le lu ṭhin. Dar 9 velah Shalomi chu a u in a rawn hruai a, a leng haw lam a rawn kawi anih hmel e, kan in a a lo kal vawikhatna a ni bawk a, kan piah a a rawn ṭhu chu a inthlahrun hmel riau hian ka hria a, ka Ni in a lo biak pawh chuan a ṭawng tui tam vak lo.




Kan inmelh fuh chang chuan min mawlh tu hi a awm tlat ṭhin, ka hmuh ngun poh leh ka duh zual a ni mai tawh a, ka en sek chuan tawrhhlelhawm khawpin ka vei ngei ngei dawn, en reng loh ka tum lahin ka lo melh leh palh ṭhin a, ka mit hi a nghal viauin ka hre ngai lo asin maw le.





"Rindika i lo sawm ve lo a" Meinei zeta Shalomin a tih chuan ka ner nang a, Bza lam ka va hawi chuan min lo en reng tih ka va hmu a, tawi tein ka han nuih a, ka mit ka la sawn rang hle. Rei vak lo an ṭhut leh hnuah an unau chuan an haw a, Nubawihi nen Tengtere kung awmna thlengin kan zuk thlah a, zanin chu kan in en deuh reng mai, an kal tur ka han mangṭha te chu min rawn en vang vang a, "Mangṭha u" ka ti erawh Shalomi zawkin min chhang a, Bza hmelah chuan sawiduh a nei tlatin ka hria, a chhan chu min en ngun ve bawk em a ni.





Min duh ve tlata hriatna ka neih hi a dik anih ka ring ta hial a, chik taka mi kan en hian min ngainatu leh ṭha min ti tu te hi chu an mitmeng aṭanga hian a hriat ve theih mai ṭhin, Bza mitah pawh chutiang chu ka hmu in ka hria a, nge ni a ka lo ngaihbel zawk?





Kan in lampana kan chhoh leh laichuan; Nubawihin ka beisei loh deuh a rawn sawi ta tlat! "Bza hian a en duh lutuk che, ka lo hmu fuh thei lutuk, hmelṭha a ti che a ni hrim hrim" a tih thu chuan min ṭhawng zawk khawp mai. Zawhna ka lo inzawh ve mek, ka beisei ruk leh ka rin ngam chiah si loh kha min tih fiah sak a ni ringawt a lawm.





"A awih awm loh e" tiin ka nui kar kar a, ka rilru erawh a hlim hle thung a, a rin thu sawi ni mahse ka tan chuan rin thu mai a ni tawh lo a, mei de set set kha a rawn alh hluai ti ila a in awm berin ka ring.





"Ka ti tak tak a lawm, a en duh lutuk che Dindin, a nelawm loh ṭhin nen i awm ve hian a nelawm bik ziah bawk, i awm laichuan a nuih duh em hi" ka ṭhiannu chuan a ti luam a, "I hresual aniang, kei te chu ka hmelchhe emai, ani duh chi ka ni lo" ka la ti ve fan a, ka ṭhiannu chuan ka hlim ruk zia hria sela chu min hnial ṭang ṭang lo ang maw le.




"Ka mit a fing a lawm, ka hre thei lutuk, Rindika nen in ṭhut dun te khan a rawn melh ngun thei che a nia aw, a thik anih ka lo ring a" a ti leh zel a, keichuan tak tak nitur vekah ka lo ngai tawh a, pakhat te mah chu rinhlelh pawh ka ringhlel phal lo, chaw duh zawng tak inpek ang maia lem nuam a ni tlat.





"I duhzawng a ni ve reng reng em?" ti a min zawh chuan "A hmelṭha chu ka ti; mahse...mipa hmelṭha hi chu rin an har e" uang deuh takin ka ti a, "Hriat chian ka lo tum ang aw, a lo sawi ngam lo te pawh a ni thei" a ti leh erawh ka khap thuai a. "A zahthlak lutuk ang, engmah lo sawi suh, min duh te chuan aman a sawi ve ang chu" ka ti a, "I duh ve reng ti raw nang pawn?" a tih leh chuan ka pha duh ta bik lo.





"Mahse, va tih hmasak kha ka duh miah lo ania, bul ṭan tu nih aichuan hetia awm tawp hi ka duhzawk, min duh ve rêng em tih pawh kan chiang si lo a, kan inti mualpho mai mai ang" thutak deuhin ka ti a, "Tih dan ka hre mai ang, amah inpuan tir ka lo tum ang" a la ti tak ṭalh a, min sawi khaw lo zo ang tih pawh ka hlau ru angreng.




Dar 10 pelhah ka ṭhiante chu an haw a, mut hmunah Nubawihi nen chuan kan inbe zui a, a phawk angreng si a, "Ka Phone anga ka va zawt dawn" a tih loh leh "Tunah ka Text dawn" a rawn ti thul, keiin ka lo khap chul a, zanreiah hlauthawng reng rengin min siam a, ka muhil thei lawk lo. Ani lah chuan min sawiṭhaih chu nuam a ti a, ṭhian ho zingah pawh fiamthu duh ber a ni reng reng a, zah ṭit ṭet lah a nei hek lo, ka khap lo anih chuan a ti leh duh tak tak dawn tih ka chiang viau a ni.





Zung tura ka thawhsan lawk hlan chuan a Message a lo thleng leh a, ka en leh chu "Message ka thawn?" a rawn ti ta mai. Rang lutukin ka call a, "Eng thil nge i thawn chu" ka ti vin hlar a, ka hlauthawng lutuk chu ka thinphu a rang zaih zaih a.




"Nangma sawi angin engmah ka sawi lo, 'Dindini hi i duh a mi?' ka va ti ringawt, i tan engmah pawi tur a awm lo" a ti sam mai a, ka zak lutuk tihngaihna hre si lo chu ka ṭah a chhuak tet tet, Nubawihi lah chu ka han hau ve tak nain a ngai ho lam mai bawk si.




"A lo chhang che em?" ka sawilai pawh chuan ka rilru a hrehawm hluah hluah tawh.




"La chhang lo, hmanhmawh lo la, a muhil tawh aniang" a ti leh mai a, hetiang chuan ka muhil ve thei lo tawp ang.




"Ka hming sawi tawh miah suh aw, kan thil sawidun te pawh hi sawi lang miah suh, ṭawng fimkhur tawh rawh aw" tiin ka chah mawlh mawlh a, "Ka hre vek, lo hlauthawng chiam zel suh" a rawn ti let hlar a, ka rilru a ti hah zual sauh, a ṭawng phawng phawng zel si a, ngaihṭha taka lo awmna chi a ni lo.




"A lo chhang chiah" a rawn tih chuan ka tho chhuak rang hle.



"Eng nge a lo sawi?" thinphu dep dep chungin lehlam thawm chu ka ngaichang a, a chhiar chhung te chu rei ka ti.




"Engvak mah a lo sawi lo, 'Eng nge min zawh chhan?' a rawn tia, engtin eng ka chhan dawn?" mi lah chu a rawn zawt let hlauh a, keichuan be leh tawh lo tawp sela ka duh.




"Chhang tawh suh" ka tih laiin "I mitmengah ka hre thei ka va ti" a rawn ti leh mauh mai, awii..!!..ka khu ruai...thawk ka la hawk a, phun hlak hlak chungin inpui lamah ka phei a, zanlai nilo sela chu ka ankhum nghek ang mawle.



"Engatingeeeee...i tih buaithlak zawh vek a?"



"A ho lutuk, ka rinhlelh vangin ka va zawt a ni mai a lawm, i tan engmah pawi a awm lo" a ti sam zel a, a tihngaihna tak pawh ka hre tawh lo.




"Engtin pawh lo chhang se zawh belh tawh suh" ka aw te chu a vin ṭha viau tawh.




"A lo Reply leh.." a tih chuan "Eng nge a sawi?" ka ti leh hluai a.




"I hresual aniang a rawn ti anih hi, haha...vel tak hian, ka hresual lo tih ka chiang emai, ka dawp chhuak tho tho ang che, inzep rei duh lo mai teh" tiin amah te chuan a phun zui mual mual a, "I chhang leh ngawt a nge" ka tih pawh chu min ngaihsak zui lo nge ni a thawm sat sat a, "I inpuang dawn khawp" a tih ri te chu ka hre pha.



"Nubawih, i chhang tawh lo em?"


"Chhang zo chiah.."


"Awi....chhang zel lo la, min ti mualpho vek a nge" kei chu ka ṭap ṭep tawh, ka rilru a hah hi chuan ka ṭah a chhuak hluah hluah zel.




"Hei bak hi chu ka chhang tawh lo ang" a tih pawh chuan ka thla a la muang thei chuang lo.




"Engtin nge i chhan?" ka han ti leh hap a.



"Hmelṭha i ti reng reng em ka va tia, a inpuang lo thei lo ang, a lo chhan dan a zirin kan bawhzui chauh dawn nia" te chu a la ti tak deuh deuh a, a hmeichhia zawkin bawhzui sawi te chu ka zah zawng tak a ni.




Message chu a rawn chhang har ta viau a, kei lah muhil thei ziazang ka ni tawh lo, Nubawihi pawh chu Phone dah lo tura tiin chhuat dungah ka vei sek a, a chang leh ka ṭhu a, ka ṭhu hle hle thei chuang si lo a, 'I lo muhil a nge?' ka va ti nawn sek a, "Nangman anih kha lo hre chak ber" ti a min lo fiam chuan ka nui duh hauh lo.





"Ka tih loh i ring em ni, mitdel ka nih bik loh hi" Nubawihi thil rawn chhiar vang chuan ka mur chhuak vek, zanin thil thleng hi pawi ka ti nge nuam ka ti pawh ka hre ta chiah lo, ka hriat zawng chu Bza'n ṭha min ti a, min en chang pawh khan hmelṭha ti takin min en ve ṭhin tih hi.




"Engtin nge ka chhan leh dawn?"




"I chhang tawh lo ang, engmah va sawi tawh suh" a hma ang em em chuan ka vin ta lo.



"Nuam i tih em kha?" a la rawn ti ham ham, zep loah chuan nuam ka ti a lawm. Mahse, Bza lo chhan na kha ka tan chuan a tawk rih viau a ni.




"Bem rawh ka'n ti ang aw?" a tih leh chuan "A ṭul lo" ka lo ti bak hlur a, a nui kar kar chu ka han hau leh rih a, a va ti zui ta bik lo niin ka hria.




Lungphun ni chuan Shalomi pum a nat vangin a lo kal thei lo a, ani ber awm ta lo chu a ti deuh nge ni Nubawihi min chhaih zuk zuk a, midang hnenah pawh zep theih a ni ta lo, a khat tawkin min fiam deuh reng a, ka lo lai ve em em ṭhin. Bza chu min duhpui ṭheuh a, kan inhmeh tur zia thu an sawi te chuan ka bialpa emaw an ti ni tawh mai hian ka hria a, a inthlahrun awm ka tiin aman a hria ang tih pawh hlauhawm duh tak a ni.





Pathianni tlaiah Nubawihi chuan min lo Phone leh a, "Inkhawm ban khan Shalomi te inah ka va leng a, Bza pawh a lo awm a, i chungchang kan sawi ṭeuh mai" a rawn ti a, engtak chu sawi ang maw ka tih laimekin "Rindika'n a bem che tih pawh a lo hria a" a rawn ti ta khauh a, a hriat kha ka ring reng a, engtin nge a ngaih ang aw...?




"Engtin nge a sawi?" ka hlauthawng ru angreng khawp mai. "Bem rawh ka tih khan a hreh deuh niin ka hria, 'Hetiang khawp hian ṭhianten an duh ve sia, ka tan a nuam chiah lo' a tia" a tih chuan pawi ka ti ru vawng vawng.




"Rindika chu ka hnar a sin" ka tih chuan "Ka hrilh tho a lawm; mahse, an inkawm reng bawk sia, a inthiam lo anih ka ring" thutak zet hian a ti a, sawi tur a vang duh khawp mai.




"Anih chu maw le" ka ti zawi sep a, sawi zui vak ngaihna ka hre lo.




"Ka lo biak tir ang che aw, Bza hi chu ngam deuha tih bawrh bawrh chi a nia, nangpawh inthlahrung lo la, Rindika i duh loh thu te pawh chu hrilh la, i sawi ngei anih chuan a dan a dang deuh maithei" a rawn ti luam a, tlem chuan ka rilru a buai ve deuh, ka ngaihtuah tluk tluk a, nithei ngangin ka hre lo, ka en danah te, ka biak danah te a hai lo tih ka hria a, a duh chuan min zawt thei bawk a lawm, min duh leh duh loh a thu ni ah ka ngai.





(Kan zawm leh dawn nia, tlem tein ka damloh laihian ka rawn zo hman maithei, )



Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » December 19th, 2022, 1:21 am

SILENT EYES
- 2 -



Zingkarah ka Nutei thlah turin ka pi te inah ka phei a, ka va thlen chuan kal turin an lo inpeih diam tawh. Nutein ka let hun tur min zawh chuan Pathian ni ka cham rih tur thuin ka chhang a, mahni khua han thlen hi chuan kal leh hi a peihawm loh riau ṭhin a, chu loah thil engemaw dang dang vangin la awm rih chu ka chak ve bawk a ni.




Ka Nutei te nufa kan thlahliam hnu lawkah Nubawihi te inlam ka pan a, ka thleng chu a nu a lo ang bawrh bawrh a, ka ṭhiannu chu a la tho lo anih hmel. A nuin kai tho tura min lo tih vangin a mutna pindan lam ka pan zui a, a pindan lah chu a han hnawk khawp a, khum bulah chuan tui Bottle leh zial bung a lo inchhawp rum a, a chhungte pawn a zial zuk ruk hi ngaiah an nei tawh anih ka ring.




"I va lo kal hma ve?" a ti chu chhang lem loin khum tlangah chuan ka ṭhu a, nizan lam thil khan min mawlh tlat a, keimah a pai reng chu hrehawm ka ti a, sawipui tur ka mamawh.




"I Phone ka lo en" ka tih chuan nuihza lek lek hmel a pu. Chutah, rawn ṭhu chhuak vein a Phone chu a hmet mual mual a, ka va bih ve chuan a thukru ṭat ṭat a, "Khawimaw, min hmuh teh" tih leh ban ka rual a, a la phal mai lo.




"I chhiar dawn nia" ti chungin a nui pat pat a, muang ka tih em vang chuan ka lo ban leh zuau ṭhin, ka helhhawlh a ni ber.



"Ka mut hnu khan in inbe leh a mi?"



"Be vak lo, rei lo te chu ka Reply leh a" a phone a rawn lek chu rang deuh ka ban a, Bza hming chu "Big B" tiin a Save a, a Number chu lak ve ṭhain ka hria, min lo biak thut a ka lo hriat nghal theih nan.




An inbiakna chu a awm thla dul a, ka chungchang an sawi dan chhiar tum ka ni a; mahse, nizan lama ka hriat chin bak kha chu an sawi lem lo. Nubawihin engtikah nge a haw leh dawn tih angreng a zawt a, Bza chhanna ah chuan a la awm rei hmel khawp mai. A pu te in a sak pui dawn a, kumin chu kan khaw lamah a awm dawn anih hmel e, kei lah chu karthar maiah ka kal a ṭul dawn a, let rual leh thei ila ka tih tehlul nen.




"I zirlai i zo tawh a mi?" tih zawhna chu a zawh rih thuin a chhang a, ka ṭhiannuin eng nge a zir a zawh chuan Architect a zir thu a rawn sawi a, chung zawng chu an biakna chu a ni, ka chungchang thil dang sawi lo mah se; a chanchin dang ka hriat belh chu ka lawm viau tho, Architect a zir tih ka han hriat leh takah phei chuan ka duh zual sawt a, ka awm a ti nuam veng veng mai a ni. Mipa lehkhathiam hi ka ngaisang a, ka duhzawng ka tih ve ṭhin ang zawng zawng kha amah ah hian a awm vek niin ka hria.




"Nuam i ti e, zing zingah i rawn tlan phei nghal a nia" min nuih ruh ruh vangin a Phone chu ka pe let vat a, a ruk chuan ka zak ve lek lek; mahse, ka ṭhian ṭha ber a ni a, a lakah chuan engmah thup ngai lemin ka hre lo.




"Ka chungchang chu sawipui tawh suh" ka ti thla rawk a, sawi dun sela chuan hriat chakin ka za leh ruai sia nga, ka zahzel ve a ni ber ang chu.




"A lo bem mai ang che, tikhan lo nghak phawt mai rawh" a tih chuan ka nui leh ringawt. Beisei engemaw tak chu ka nei a lawm, Bza rilru tur te pawh chu ka hrethiam vein ka hria, a ṭhianṭha berin min ngaizawng mauh mai si a, min lo duh ruk ve phei chuan a rilru a nuam bik dawn lo va, a inngaihtuah buai nasa ve ngawtin ka ring a ni.




"Engemaw a lo sawi chuan min lo hrilh vat dawn nia" ka awmdan chu a hrethiam a niang a nui kar kar a, "Lo dawhthei phawt la, Shalomi nen tihdan kan lo ngaihtuah dawn nia, Rindika boruak vel hi han reh fel sela, chet a rawn la ve duh mai ang" a ti zui luam a, keipawn chu chu ka beisei, tunah chuan a la hlimchhawn em a, a ṭhianpa a vengthawng a; a rilru tur a dawnpui te chu ṭha ka tiin a puitling ka ti. Mipa lerh leh hawklak mai mai chi anih loh zia a langin ka hria a, ka ngaisang bawk.




"Aizawl ah ka kal leh vat dawn sia, engtin nge niang le?" ka han ti leh hap a, chu mawlh chuan ka rilru a ti buai, kan inhmuh theih chhung a rei dawn si lo a, kan dinhmun lah a laklawh em em mai bawk si.




"Lungngai suh, Phone a awm a lawm, tih dan a awm zel mai ang" Nubawihin a tih chuan ka hmin leh nghal thlap, hmai chhana inbiak aichuan Phone a inbiak chu a nuam zawkin ka ring, a zahthlak lutuk lo bawk anga, ka duh duh ka sawi ve ngam bawk ang.




Ka haw tur chu kawngpui thlengin min thlah a, kan kal dun chhung zawngin Bza leh Rindika chungchang kan sawi dun a, "Ka kutah dah vek rawh" a ti hmiah tawh a, ka khap dawn zuau a mahse, a puihna tel lo chuan engmah kan ni thei pawhin ka ring lo, ka duhtawk chin te chu uluk deuhin ka hrilh nawn a, hmeichhia zawkin bul ṭan chu ka la hreh ve fan a ni. Nubawihi chuan ngaihdan a lo nei ve a, ka lam aṭanga thu hmu lo ang takin Bza chu kawm tlangnel a, min tihpui chu a tum thung a, a ṭha ber angem tih ka hre lo. Ka rilru a buai deuh a, khap em chu ka khap ta lo thung.




Min let san hnu te chuan ka ngaihtuah tluk tluk a, Pi Siami dawr kawt ka thlen lai reng ka hre lo. Rindika aw ka hria chu ka phu chiang ngang mai! A nu dawr kawt aṭangin min rawn nuih vur vur a, ka kalna min zawh pawh chuan ṭha deuhin ka chhang a, Bza ka duh tih a la hre ve lo a ni chek ang.




"Zanah kan lo leng ang aw?" a tih chuan tawitein ka nuih a, "Engtikah nge i kal leh dawn?" nuisang hian a rawn ti zui a, "Kar tharah" ka ti mawl tawp a, dawra awm ve dangin an lo biak takah chuan hmanhmawh deuhin ka pen hlawk hlawk a, Step ka chhoh dawna ka va hawi leh chuan a nu dawr kawt aṭang khan min lo la thlir reng a, ka inthlahrung chu a ni em lo anga; awm erawh a nuam zan lo.




Inrinni anih vangin chhun lam chu ka buai khawp mai, ka ni nen tlangban khat hnawk khawpin kan insu a, tlai lamah pawh buai a chawl meuh lo. Ka Ni dawr zuk kal lah chuan tu sawi nge a hriat ni "Rindika nen in inngaizawng em ni a, Siamkungi dawrah Lalṭana ten min lo fiam a, 'I makpa tur' te an lo ti lehnghal a, khutiang zuheh lutuk khu ngaihzawn tlak ani lo" a rawn ti bawrh bawrh a, ka pha viau chung pawhin min hau tlaitluan mai a, Rindika chu ka huat a zual ting ringawt mai a ni.




Zanriah eikhamah chuan Rindikan min lo Phone ta ngei a, "Kan lo leng dawn" a rawn ti deuh thawr a, lo hnial ka duh viau nain em a ka ti ve deuh si. "Tu te nen nge in lo len dawn?" ka tih chuan "Bza nen a ni mai" a ti awlsam et a, ka hnial duh ta lo.




Chaweina ka tihfel zawh veleh pindanah lutin ka sam te ka va khuih a, ka hmai pawh eng engemaw ka chulh thuak thuak a, helhkam nei ṭun chungin ka phur viau lawi a, Bza rawn tel dawn vang a ni. Ka inpeih hnua ka ngaihtuah chian chuan ka rilru a nuam zan lo, a ṭhianpa a rawn kalpui dawn a ni a, hetia Rindika nen inhnimhnai niawm taka min ngaih chuan engkim a dik lo zo ngei ang, a inthlahrung zual emaw a nia nga, beisei chi ah min ngai lo ringawt ang tih pawh ka hlau, Rindika lo len kha phal lo zawk tur ka nia sin le.




Dar 8 dawnah an lo thlenga, Rindika chu a rawn ri nghal hlut a, kan kawmthlang Tengtere kung hnuaiah a lo inchhuih thlu ni ngei tur a ni, "Puanchhia min lo pe teh, ka kekawr a paw vek a lawm" a rawn ti hlut a, a hmuh loh lamah ka Ni a lo ner a lo ner a, ka nu erawhin ṭha deuhin a lo chhawn thung. "A zung khu a lian tawh angreng sia, a pawng chhuak nasa bawk si a, thim zingah phei chuan hmu lo a chhuih a awl riau a nia, i tlu na ang tih pawh a hlauhawm a ni kha" ka nu chuan a ti siam siam a, Rindika lah chuan "Kit daih rawh u, Tengtere mai mai a tui lo ropui si, kawng a ti hnawk mai mai a lawm" a ti bui bui a, a rui deuh phualin ka hria.




Bza erawh a ṭhianpa lam hawiin a lo ding ngawi reng a, Rindika a intihfai zawh hnuah Sitting room lam kan pan ta chauh a, han biak dan vak pawh ka hre lo. A hmelah chuan phur hmel emaw phur lo hmel ka hmu lo a, ka Nu biakna pawh zangkhai takin a chhang mai a, a cham rih dawn em tih ka nuin a zawh pawhin a pu te in a sak pui tur thu a hrilh a, ka nu pawn a fak ve luam mai. Aizawl lama a nu chanchin te zawtin ka nu zawk chuan a be seuh seuh a, an titi chu han ngaihthlak ka duh tehlul nen Rindikan min be mawlh mawlh reng a, duh ang pawn an thusawi ka hre fumfe thei lo.




"I haw hmain chaw eikhawm ang u, Bza pu te inah kan ti dawn nia. Anih loh pawhin khaw dâiah leng ang u" ti a Rindika rawtna chu a engamah ka um e lo. "Thawhṭan ni ah em ni kal i tum?" a tih chuan ka lo aw vat a, Bza pawn min rawn en ve chiah a, ka kal leh vat dawn tih chu a hma pawn ka hrilh tawh a, a la theihnghilh bikin ka ring lo.




"Engtikah nge i lo haw leh ang" Rindika bawkin a ti leh a, "Ka hre mai lo, ka Nutei te an buai ṭhin a, kum tawpah ka haw thei chauh ṭhin" tiin ka chhang a, June thla ah chawlh chu kan nei dawn a; mahse, ka haw theih ka ring lo a ni, kum dangah pawh Nutei min chelh ziah ṭhin.




Ka nu tho chhuak chuan thingpui a va siam aniang, "A thlum nge in duh a hâng" tiin a rawn au lang lang a, Rindikan ring leng lawnga a chhan laichuan Bza nen kan lo nui hawk a, a au ṭial ve bawk em a ni.




"Biakzuala hi i ṭhiannu kha tihpui teh" tih thu vang chuan ka ipchawih thei. Phawk deuhin Rindika chu ka en a, Bza lo phun hluk riin a zui bawk.




"Tu..ka ṭhiannu maw...?" an pahnih chuan ka melh tawn zak zak a, "A ti mai mai anih kha" Bzan a tih laiin "Aw...i ṭhian te zinga mi kha a ni mai" Rindikan a lo ti leh zat a, a ngaihna ka hre lo hle ringawt.




"Muanpuii maw, nge Nubawihi?" zangkhai thei angberin ka han ti leh a, Bza lam ka va hawi chuan nui hmel ka hmu a, ka awm a nuam vak tawh lo. Tu emaw duh a nei tihna em ni ang?




"A tu emaw zawk zawk kha a ni mai, tihpui teh, hetah ngaihwng nei ve rawh se, a awm rei dawn ropui si, vairam nula kha chu biak leh a ngai tawh lo, khaw hmun lo ngaihzawng neih chu a ho emai, awmzia a awm lo" Rindikan a ti bul bula, kei chu ka lo thaw huai huai thei.




"Duh deuh i nei em ni?" ti a Bza ka fiam chuan chiang fahran hian min lo melh a, ka tim leh hnuhnawh hle a; mahse, ka en lui ve tlat thung.




"Engahmah ngai suh" a tih laia a mitmeng chu danglam riauin ka hria a, ka laka insawifiah tum hi a ang ber.




"Hman zanah i hmuh vek kha ṭhian pathum a nei, i duh thlang tawp rawh, an duh lo phal teuh lo mai che, i phu loh a ṭha tumah an awm loh kha" Rindikan a lo ti chu ka va melh rum khar khar a, ka rin aidaihin ṭawngkam a thlahdah.




"A rui deuh tawh aniang, tui vawtin kan leih harh dawn nia" tiin Bza a lo inrawlh vat a, a lam ka va hawi rualin mit min lo siai sak a, min nuih var var bawk.




"A va inhnem awm ve a" zawi angreng taka ka tih chuan ka lamah a lo kun hnai ve vat a, a sama a thil hnawih rim te pawh chiang takin ka hre thei.




"A intam lo, a phawk ve laklawh anih kha, a tihdan ve a nia" a thil sawi lam chuan ngaihtuahna a luah meuh lo, chu aichuan a ṭawng zawnga ka biang rawn lum leh hak ṭhin te, min hnaih em avanga ka thin phu rang zaih zaih te chu ka hre chiang mah zawk. Thawk pawh la ṭha ngam mang lo chungin ka melh a, ka awmdan hi hrethiam vek sela, ka thinphu rang te pawh hi hrepha sela ka ti takzet, inhrilh kher ngai lo thei se.




"Eng nge insawidun ser ser a, mi te kha in lo rel vel a nge" ka piaha ṭhuin a tih chuan a tawlh hla ta vat a, "Thingpui kan in zawh ah kan haw vat dawn nia, leng rei chi i ni dawn lo tlat" Bzan a ti chu a duh vak lo aniang, "Mai mai a, ka rui eih lo, ruih tham pawh ka in hleinem" a ti nuah nuah a, ṭhutthleng ban ah a kiu nghatin khabe a dawm a, a ṭhut dan aṭang pawhin a zawi zia chu a hriat theih.




"I hria maw Dindin, ka rui miah lo" a khat tawkin a rawn ti sek a. Chutah, rawn tawlh hnaiin "Min ngei lo ti raw?" ring deuh tak hian a la ti zui a, Bzan a lo khapna pawh chu a ngaihsak lo reng reng.




"Min khawngaih ve mai la, ka duh tak tak che a nia" ngenngawl zet hian a ti leh a, a ṭawng ring ta vak lo. Mahse, hetianga a tih hi chuan chhan dan tur ka vai a, awm ngaihna min ti hre lo ṭhin, Bza a awm ve reng bawk nen, ṭawngkam mawi hman tur hlawl ka hre lo. "I rui anih kha" ka han ti ringawt a, anin "Ka rui lo, no khat bak ka in lo" a ti ve tlat thung a, "I ho emai, chutiang an sawi mai mai ngai lo" ka tih pawh chuan a la tawp duh lo reng reng.




"Ṭha deuh talin min be ve ṭhin la, i zin daih phei chuan engtin nge ka lo awm ang" te a ti thul. Vanneihthlak deuhin ka nu a lo phei a, a tawp ta hlauh zawk a, ni lo sela chuan kan inkhak duh maiin ka ring. Ka thaw a ipik zo vek a; Bza a awm vanga insum thei hram hram ka ni, ani pawh a awm a nuam chiah lo niin ka hria, thingpui kan in lai pawh chuan a ṭawng tuitam ta lo hle a, kan inmelh fuh chang pawhin mit la sawn hmasa zawkah a ṭang zel a, insawifiah thei ni ila ka ti takzet.




Thingpui kan in zawh hnu rei lo teah haw an rawt a, an haw tur chu kawtkai thlengin ka zui chhuak ve a, kawmthlang kawng chu a thim deuh bawk nen an chhuk thla pawh chu an liam thlengin ka thlir a, ka hnim ruih thei mai. Inchhunga ka luh leh hnu pawh chuan TV hma ṭhuin ka inngaihtuah bing hle a, ka nu lah chuan "Rindika nen khan in inngaizawng em?" a rawn ti chhuak phawng a, chutia min zawt ringawt pawh chuan min ti thinur ṭun tawh.



"A teuh lo mai" ka lo ti bak hlur chu mak ti hmel a pu a, han sawifiah vak pawh ka chak lem lo.



"Biakzuala zawk kha em ni?" a tih leh chuan ka melh rulh ringawt.



"An rawn lang ve teh nawlh a" ka nu mitmengah chuan zawhna a ngah tih a lang reng.




"Ni chuang lo, Rindika a rawn len pui mai mai anih kha" thawk ka la zui halh a, ka nu bulah hian sawi vek mai ka chak a ni, "A ngaizawng che em ni a?" a rawn tih leh phei chuan ka ipik zual sauh a, ka hrilh a ngem tiin ka inkhâp buai a, ka ngam chiah bawk si lo.




"Rindika kha chu ngaihzawn chi pawh a ni lo ang, zu a duh an ti emai, eng ang mi pawh nise zu in mi chu hnaih loh a ṭha, in ve zeuh zeuh tih te pawh hi ngaihṭhatna chi a ni lo, zeuh zeuh hian a bak a hril zel a, in zeuh zeuh ho hian an nghei mawh khawp a nia" thutak zet hian a ti zui a, hetiang thu hi chu min hrilh fo ṭhin a, ka zawm ṭha ve viau chuan ka hria, ka nu hian zu in mi a ngaina lo va, keipawn zu in mi hi chu ngaihzawn loh hram ka tum ṭhin.




"Min ngaizawng a, ka hnar fel tawh a lawm" ka tih chuan thlek meuh hian min rawn en a, "A tu zawk kha maw?" a rawn ti leh khauh a.




"Rindika kha maw le" ka ti ve ta khawl a, zawhna dang a la nei nge ni min la en chik viau. Engemaw chen kan ngawih dun hnu ah "Nichin khan in va inchei ve melh melh sia, i bialpa te an lo leng dawn emaw ka ti hman a lawm" a rawn ti leh a, a nui tak nain min en dan chu; min dawp hi a ang ber.




"Bialpa ka nei hleinem" ka han ti a, ka nu chuan min hre ru em mawni ka ti deuh.




"I rualpui te hi chuan an nei fur tawh a, i la sawi ve ngai si lo va, i lo nei ru khiau zawk aniang chu ka tia" fiamthu ti tak deuh hian a ti a, "Ka neih hunah ka hrilh nghal ang che" ka ti fiamthu ve hlut a, ka hrilh duh tak tak dawn tih ka chiang.




"I zirlai chiah ngaihtuah rih la, ngaihzawng neih nan khua a la tlai lo, i zirlai i tih chhiat phah hlauh chuan a pawi dawn emai, han zir chhuak la; hna ṭha deuh i neih phei chuan duhthlan tur ṭha tak tak a la rawn awm mai ang, ngaihzawng neih hma lutuk te hi min ti ṭhuanawp tu a ni chawk a nia" tiin pasal a neih hma vanga a inchhir thu te a sawi zui luam a, naupang tein ka nu hian pasal a nei a, kei min hrin hian kum 23 mi chauh a la ni nghe nghe. Lehkha a thiam thei a, tun thlengin a zir sang lo hi a la inchhir ve fo ṭhin, chuvang tak chuan amah anga ka inchhir a hlau a, min fuih nasat phah bawk.




Mut hmunah Nubawihi nen kan inbia, Bza te ṭhiandun lo len thu te pawh ka hrilh ve a, "Rindika kha a tel dawn chuan hnar zel tawh rawh, khatiang a nih chuan Bza tan chet lak a har zo vek ang, Rindika kha be ṭha miah lo mahla a pawi lo" a rawn ti bawrh bawrh a, Bza hmel awmdan mawlh kha ka mitthla ah a cham a, Nubawihi sawi chu zawm ila ṭha berin ka hre ta.





Pathianni tuk ka tho chu ruah a lo sur cherh cherh a, ka nu buhfaiṭham khawn hun a lo ni awm e, ani lah chu eirawngbawlin a lo phi buai khawp a, "Thawh ka lo hai a, chawei hmain va tlan zung zung mai teh, i Nu Mawii te inah i rawn dah nghal dawn nia" a lo tih vang chuan hmai ka phih sawk sawk a, nihliap lianpui nen ka inphur chhuak a, a buhfai angzawnga pe hi an tam vak ngai lo, tun ṭum pawh pawisa min pe an tam zawk a, a zangkhai duh viau a ni.




Ka thilkhawn chu Nu Mawii te inah ka va dah a, ka let leh lamah chuan ruah pawh a lo han fel der tawh. Kan inlam ka pan laimekin "Mami, Shalomi ṭhiannu" ti a min rawn au tu vang chuan ka lehhawi vat a, kawngchhak lam mi bathlara Shalomi pu ding chu ka han hmu ve thuai a, min rawn hui zauh zauh mai.




"Hei hi min lo zawn pui lawk teh, ka kawng ka herh deuh a, ka ti lui thei tlat lo" a rawn ti lung lung a, engthil emaw hi saiip Bag ah a dah a, a rit viau aniang chu chawi pawh a chawisawn hleithei lo.




"Eng nge ni a?" ka tih chuan "Balhla um tur anih hi, ka tu te hian Phone pawh an chhang thei hlawm lo" a ti hluk hluk a, saiip chhung ka han bih chuan Balhla hel hlir a lo ni a, Bag chanve lawih a ni, zawn lah chu a han rem lo em em khawp a.




"Em ah hian ka lo phur mai dawn em niang?" a chawi zawh loh vangin ka pui nghal thuai a, a ip a lian ṭha bawk a, ka Em a khat hmuk thei. Muangchangin an in lam kan pan dun a, kan thlen hma aṭang chuan ka zak deuh riau a, Bza a lo awm ngei dawn si a, kei lah chu zing tho hlim hlawl ka ni vei nen, ka inchei bawk si lo.




Ka ngaihtuah neuh neuh laichuan Bza aw ka hre thut a, tum aia hmain min rawn hmu lehnghal a, ka laichhe zo a ni ber tawh. "I lo let har lutuka, Patea te inah an chhuk vek tawh a sin" a rawn tih laichuan hnuailam ka bih ngar a, a pu chuan lo chhangin "Balhla ka la dawn ka tih kha, tuman Phone in chhang thei si lo a, Shalomi ṭhiannuin min phurh sak a nih hi" Bza chuan ka lam a rawn hawi a, chhip na chung chungin kei ka lo ṭhen ṭha a, ka hmel a hmu chu a phawk ve deuhin ka hria.




"A va rit awm ve, khawi ka lo la ang" a tih chuan ka hnial ve tlat, "A rit lo, ka lo phur thleng law law ang" a rawn ban zuau tawh nain ka pen zui a, an putu chuan min lo zui ve mai bawk a. Ka hnungah chuan an ṭawng mawlh mawlh a, an ṭawng dan aṭang chuan Shalomi Patea te inah chaw an eikhawm dawn niawm tak a ni.




"Dindin, a rit viau em?" Bzan a rawn tih chuan a rih loh thu ka la sawi ve fan, ka intitlawmngai ve laklawh tlat.




Pu Doa te inkawt kan thleng chiah tih ah ruah mal a rawn tla leh phuar phuar a, "Khai a!" tih ri ka hriat rualin ka phur chu a zâng vuk a, ka hma a Bza lo kal chuan Saiip chu a lo khai daih tawh, chutah rawn lehhawi leh vatin "I huh a nge, lo tlan rawh" a rawn ti hlut a, engmah pawh ka ngaihtuah hman lo; ka tlan lut veleh thawr mai.




An inchhung chu a thim deuh khup a, midang hmel hmuh tur an awm lo reng reng. Choka lama an inzui lut chu an thawm bul bul a, Balhla kha an um nghal nge ni an rei phian a, nihliap ka ken vangin ruah han hun nghah chu ngai kherin ka ring lo. Kal mai tuma nihliap ka phelh laichuan "I huh hman em?" Bza aw ngei maiin a rawn ti a, ka lehhawi leh rang hle.



"Huh lo e" ka aw te chu a lawi lek lek.



"Haw i tum a mi, ruah a sur tam emai" a tih chuan ka rilru a buai nak. Nia...a sur tam, sur tam viau lo mah se, Bzan sur tam a ti sia, leng ve rih turin min duh a ni maithei.




"I sam a huh anih kha, lo hru hul phawt rawh" ti lehin ṭhutkhawmna lam a pan a, eng ka hria chu ni maw ka zui ve leh ringawt tawh. Pindana a lut chu ding chungin ka lo nghak a, ka sam chu a huh nasa lo a, a hnawng deuh chauh a ni.




Rei vak lo hnuah lo letin Towel a rawn keng a, min pe ta mai lo chuan min rawn khuh hlun a, zak viau chung chuan nuam chu ka ti ve reng, Bzan ama Towel ngei mai min hman tir a nia.


"I inkhawm dawn em?"



"Aw" ka chhang rang hle, zahzelah "Nang zawk" ka ti let var a, Towel pek pah chuan kan inmelh ran a, "Khawm ve ang, hmun dangah chaw kan eidawna, kan tlai viau maithei" a kiai suk a, a lai ve deuh nge ni.




"Shalomi te an kal tawh a mi?" an kal tawh tih ka hre reng.



"Nichhin deuh khan an chhuk a" Veranda lam a pan a, Towel kha a va zar a niang, rei lo teah a rawn lang leh thuai a, "Ṭhu ta che, Sa um kan nei lo a nia" a tih chuan ka lo nui var var. Ṭhutthlengah chuan ṭhuin ka Em chu ka hung rem te te a, ka khawr deuh ṭut a, a lam pawh ka melh ṭha vak ngam lo.




"Zanah kan lo leng maithei a ni, Dikan a lo sawi em?" a tih chuan ka nuih a za vak lo. "Sawi lem lo, Shalomi te ho nen lo kal ula, inthlahnan thingpui kan in ho dawn nia" ka ti ta daih a, Rindika chungchang sawidun chu ka duh lo a ni.




"Engtikah nge i lo haw leh ang?"



"Kum tawpah a niang" a hmel chu a thutak sawt hian ka hria.




"Lunglen deuh an awm dawn a ni maw" tiin min rawn nuih a, ka nuih let duh miah lo.



"Min dem ringawt suh" ka tih ri chu a zawi viau mai.



"Ka dem che pawh a ni chuang lo, a sawi zing em che a, a duh ve hle che aniang" a nui suk suk a, 'Ka duh daih zawk che' ti ta ila engtin nge a ngaih ang le, a hrethiam lo chuan ka ring si lo va, a hrethiam duh lo der mai mai zawk em mawni dawn le.




"Ka va phei teh ang" thawh mai ka tum laiin "Ruah a la sur hi, tunlai chu hritlang a tam a nia, a do chi loh ang" a lo ti a, ka ding uk tawh chu ka ṭhu leh rih, Sana ka en chuan dar 8 a ri ṭep tawh, inkhawm tur tan chuan chawei a hun tawh viau. Ka phone chu ka bih sek a, ka ep chiah ah ṭhuin min lo en run mai hian ka hria a; mahse, ka va hawi chuan Phone a lo bih ve mek a, Cement chhuatah chuan ke a per at at reng.




"Phone number te in pe ve ila" a rawn tih chuan ka hawi â heu mai, ka lo beisei loh lutuk lai a nia! Min ṭhawng zawk a lawm..




(Zawm leh ang)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » January 5th, 2023, 2:53 am

SILENT EYES
P - 3 -


"Maw..!" ka ti he haw a, ka hamhaih hle.



"Phone number" tih leh pahin a rawn tho chhuak a, chutah ka sirah lo ṭhuin min han en ren rawn a, ka zam dawn dawn.




"Aw, Type la..." ka phur zia chu aw, a va nuam mai mai tak! Ka Number ka sawi a, anin a lo Type a 'Dindini' ti a ka hming a Save pawh chu ka va hmu pha.



"Engtikah nge i lo haw leh ang?"



"Ka hre mai lo, chawlh hunah a niang" a ṭhu sawn mai lo a, a Phone la bih chungin a ṭhu kun reng a, keipawn ka thlek vak ngam lo a, kan lai ve ve niin ka hria.




"I inkhawm ve dawn em?" ka tih rual chiahin ka ipte chhunga ka Phone dah chu a lo ri a, ka han en chuan Number hlang tawp hi a ni a, amah ngei a ni.




"Lo Save ve rawh" a tih chuan ka nui ringawt, phur ru deuh chungin ka Save a, a rawn bih ve tih pawh ka hria.




"Rindikan a lo be ngun che em?" rang deuhin lu ka thing a, "Be vak lo, sawi tur vak kan nei lo a" nuih insum zetin ka ti a, a hrethiam aniang ani pawh a nui ve a, ngaih a ṭha huai mai.




"I duh lo viau em ni a?" a zawhna chu engtia han chhan tur nge mawni, a ṭhianpa a ni ve bawk si a, a lo ṭan viau loh ka beisei.



"Duh lem lo" ka ti tawl a, nui hmel a pu miah lo.




"Eng lo, ngaih loh lamah ngai lo la.." a lam ka hawi lai chuan a lo ṭhu hnai sauh a, kan dar a insi ran tawh, ṭawng tuma a an zuau laichuan a pu a lo lang thut a, a ṭhu sawn rang lutuk chuan min ti phu zawk a, Pu Do-a pawn mak min tih hmel hle, phawk lek leka min rawn enin "In tihdan chuh, in in ngaizawng em ni a?" a ti bul bul a, lo chhan dan tur pawh ka hre lo.




"Tunlai mi ho hian ni lo lo hi in tia, inngaihzawn dan mak deuh deuh hi in hmuchhuak a, 'In Khisss' te in ti thul, i pi nen hian kum 48 kan innei tawh, vawikhat mah hi kan la In Khisss lo e" Bza lam ka va hawi chuan min lo nuih var var, a pu lah chuan phun nuah nuah chungin an pindan lam a pan a, sawifiah pawh a tum buai lo reng reng.




"A hmusual ve hle anih kha" ka lo nui ve mai a, sawi tur a vang si; haw mai ṭhain ka hre tawh. "Nihliap ka keng tho a, ka kal mai teh ang, ka chhungten chawei an duh tawh ang" tiin ka ding a, min lo zui ve thuaiin kawngka bul thleng min lo thlah a, "Anih aw" tih bak chuan kan inbe zui lo, ka haw lam chu ka nui pat pat reng, ka Phone chu ka bih sek a, min lo biak huna ka chhan let dan tur ngawt a ni ngaihtuah tawh ni.




In ka thlen chuan ka chhungten chawei an lo siam dawn mek a, ruah pawh a han fel der tawh, chawei kham veleh thleng pawh sil loin ka insiam a, Rinhlui sawmin Nubawihi te in lam kan pan a, ka ṭhiante bulah chuan engmah ka hrilh lova, ṭawng tam loh leh ngaihdan sawi tam loh hi a ṭha tain ka hria, keichu ṭhiante sawi ang ang awih mai chi ka ni a, min ti phawklek zo vek ṭhin a, an sawi dan zula ngaihdan siam ve mai pawh ka ching ṭhin.




Inkhawm banah Nubawihi te inah kan lengkhawma, Shalomi pawh a rawn tel ve tak nain Bza chungchang kan sawi lo a, Rindika min dem pawhin ka nuih liam mai a, an thilsawi aichuan Message ka dawng tawh em tih chuan ka ngaihtuahna a luah zawk a, ka Phone ka bih ngun khawp mai. Bza chu a la reh veng veng a, min lo biak tuma Number min dil chu anih ka ring a, a insum thei ka ti tak tak a ni.




Zanah chuan Message ka dawng ta, TV hma a ka nu leh ka Ni nen kan ṭhut laimek in a ni. "Dar engzatah nge in chhuah dawn?" tih te mai hi a nia, hmanhmawh deuhin ka pindan lam ka pan a, ka chhan hmain khumah ka mu fel phawt, anih loh chuan ka khi hui reng a, ka nu ten mak min ti dawn tlat.




"Dar 9 velah aniang"



"Mut hma a ngai a nih chu" nui lai lem a rawn thawn tel a, a nelawm ka ti.




"Nang i mu tawh em?" tih ka thawn leh a, a mut loh thuin a lo chhang thuai a, Message pawh a chhang rang ṭhin fu mai.



"Kei chu ka mu tawh" sawi tur ngang ka hre lo, kan mizia pawh a in ang riauin ka hria.




"I chhuk leh hma e" a rawn tih chuan ka hnim ruih thei, la awm ve rih se min ti anih hmel e.



"Nia, Class chawlh lai a ni bawk si lo a, a buaithlak ve em a ni"


"Kan innel ve dawn chauh a, i ngaihawm dawn hle mai" ka nui var var, min ngai dawn maw, ka awih lo phal teuh lo.




"Nangni deuh inngaihawm dawn, min lo be ve ziah ru" nui var var chungin Message chu ka Type a, rei lo teah lo chhang lehin "Khu lamah nghakhleltu i nei aniang a?" a rawn ti a. Ka neih loh thu sawi tumin Message chu ka Type ṭha sek a, 'Bialpa ka nei lo' tih ngawt lah chu min zawt mang si lo a, hrilh thuai thuai ka chak si, min zawt vat mai se aw...




Ka chhan hmain a Message dang a lo thleng a, "Ral aṭanga inbiak hi chu lung a leng duh riau" a rawn tia, eng a sawi tumna nge, min duh tih a puang em ni, ni lo se hetia rawn sawi ngawt chhan tur a awm dawn em ni? Pehhel deuha min hrilh a tum a ni ngei ang, ka lo man thiam hle dawn tih a hre sa tlat a, a va han zei reuh em...




"A pawi hleinem, Phone a awm tho a lawm" ka ti ve rawk, ka thawn hnuah ka zak ve ram ram a, a rawn chhan hma chu thinphu a mumal thei lo.



"Hrehawm i ti ve ngai lo a mi?" kha maw....ka ring dik.



"Ti lo e.." Long distance relationship hi pawi ka ti lo va, kan nghet duh daih zawkin ka ring. A reh zui vang vang a, darkar chanve dawn hnuah "Muttui aw" tih zawng hi a rawn thawn a, a lungawi lo em ni aw?




A Message ka chhan hnu chuan ka mu meng reng a, ka inbiakna pawh ka chhiar nawn ngun viau a ni, ka chhan dan chu zahthlak ka ti deuh a, min bem a ni si lo va, awlsam lutuk min tih pawh ka hlau.




Zingkar hma deuhah ka tho a, dar 9 ah Sumo a chhuah dawn vangin ka insiam lawk diam tawh a, ka Ni eirel puiin Phone ka bih zauh zauh reng, a la tho lo em mawni le? Ka kal hma a hmuh ka chak a, anih loh pawn Message ho te tal min lo thawn sela, heti ringawt chuan ka rilru a nuam thei dawn lo.




Ka ṭhianten Message in min rawn thlah sap sap a, "Tluang deuhin i kal dawn nia" tih ang reng a ni. Heti em em a kan khua ka thlakhlelh hi ka la hre ngai lo, kar khat vel chu cham leh thei ila ka ti ngawt mai.




Tukṭhuan eikham chuan dawrkawn lam kan inkhai thla a, ka nu leh pa ten an tih ziah danin min thlah leh a, Sumo kan nghah chhung te chuan Sumo chu a lo thlen mai ka hlau a, hmar veng lam kawng chu ka va thlir leh ringawt ṭhin, ka lung a leng, ka khua a har, engthil emaw hian min mawlh a, ka kal hreh hluah hluah.




Minute 10 dawn kan din hnu chuan ka beisei ruk chu ka va hmu ta, Rindika nen kawiah an rawn lang hlawl mai, Jacket dum a ha a, a rawn hawi tih ka va hmu thei a, min thlah tura lo kal anih ka han ring ringawt a, lo biak ngei pawh ka tum.




Kan bul an lo thleng ṭep tih ah Sumo a rawn thleng a, "A hma ah hian ṭhu rawh le" ka pa'n a lo tih chuan lut hreh tak ka ni, muangchang thei ang berin ka che a, ka ṭhu lut fel awrh tih ah Bza te pawh an lo thleng a, ka biak hmain Rindikan min rawn be mawlh mawlh, tukverh bula a lo din avangin a hnung lam chu ka va thlek ru deuh a, min lo en ve reng a, lungngai hmel a puin ka hria.




"Shalomin eng nge a tih dawn?" nuichunga ka tih chuan a rawn kalhnai ve vat a, "Huanah kan kal ang" a ṭhianpa dara kuah pahin min en ran a, ka nuih ṭha vak ngam lo.




"Vawiin aṭangin Tournament a awm dawn ti raw?" ka tih chuan Rindika zawkin min lo chhang a.




"I tel ve dawn em?" Bza zawk ka zawt thung.



"Dika te Team ah ka tel dawn a" a nui ve ta hram e, "Ṭha deuhin khel ru aw" ka tih leh chuan "Kan Champion ang chu" tiin min chhang a, ka van en ve chak tak.




"En ve a chakawm hle mai, chanchin te min lo hrilh ve ṭhin ula" beisei nei fein ka han ti leh a, "Ka lo be ziah ang che" Rindikan a lo tih chuan ka nui tawi hle ringawt. Driver a rawn ṭhutluh takah chuan an tawlh hnung thuai a, kan tlan chhuah hma zawng chu ka melh ṭawk ṭawk a, ka ṭah a chhuak ṭep.




Kan tlan chhuak te chu ka lung a leng ngawih ngawih mai, ka ṭhiante ka Text a, vawiin lama an tihtur te ka zawt hlawm a, chawhnu lamah Volleyball beng en an tum ṭheuh a, ka tel lo a an awm ho tur te, inkhel an en ho bik tur te chu ka awt a, vanduai ka inti bawk. Kawng tluanin ngaihtuahna dang a leng meuh lo, tunah eng nge an tih mek ang tih angreng chu ka zeldin a, mitthla ah a lang uar uar bawk si.




Chawhnu lamah Aizawl kan thleng a, in ka thlen veleh ka intifai a, Nubawihi Phone in khel an en tawh em tih ka va zawt ringawt a, a kal hman loh thu leh zan lama en a tum thu a lo sawi a, keia lung leng; ngaihtuahna vak kual nasa bawk si chu ka insum zo lo va, ka hrilh ta vek mai.




"A van mak ve, tiang tawh hnuah te chuan pangngai deuhin a Bem ve tur che a lawm, a chhai kual che a maw ni le?" a tih chuan ngaihdan ka nei thiam lo, min Bem mai lo erawh zawhna lian tak a ni.




"Ka lo ngaihven chhin ang, zaninah te chuan a rawn be ve mai ang che" a ti a, zanah inkhel a en dawn vangin chanchin lo sawi turin ka chah mawlh mawlh a, ahma aichuan ka awm pawh a nuam ve ta deuh.




Zan dar 7 velah inkhel en tura an kal thu a lo sawi a, rei tak pawh kan inbe lo, an reh zui veng veng hlawm a, keilah lehkha pawh zir thei loin ka rilru a hah a, a khat tawkin Phone bawk chu ka en leh ṭhin. Dar 10 pelh hnua Nubawihin min lo biak chuan "An chak aw, a lo hrilh tawh che em?" a rawn ti a, Bza engmah a rawn sawi lo, ka ṭhiannu pawh chuan awm lo a ti deuh aniang "Mipa in i duh tih a hre vek tawh a, engmah a sawi lo anih chuan a duh lo che ah ngai rawh, nawr ve deuh hlek a ngai dawn anih hi" a ti bawrh bawrh a, rawtna mak deuh deuh a rawn nei zui a, 'In thik tir' tih angreng a rawn sawi luam a, a tih vak ngaihna pawh ka hre lo.




"Rindikan a lo bia che em?" a tih chuan Rindika Message ka dawn nual thu ka hrilh a, ka thlen tirh aṭang khan Message 5 vel chu a lo thawn tawh.




"Ṭha deuhin lo chhang teh, Biakzuala khawsak dan hi ka haw tlat, beiseina a siam te te che a, ti leh tak tak si lo" a rawn ang zui hlak hlak a, Rindika be ṭha deuh turin min hrilh bawk a, chu kher kher chu ka chak vak lo.




"A lo ngai kawi mai mai ang" ka tih chuan "A pawi hleinem, tikhan Biakzuala a hrilh leh anga, Biakzualan chet a rawn la vat mai ang" a tih chuan a sawi awmzia chu ka hrethiam a, min duh tak tak anih chuan thikthu te pawh a nei ve turah ka ngai.





Nubawihi nen kan inbiak zawh hnu chuan ngun deuhin ka inngaihtuah a, a rawtna chu ṭha dawn riauin ka hria a, Rindika Message chu ka chhang ta bawk, an chak ka lawmpui thu te, Champion ngei tura duhsakna thu te ka thawn a, a rawn Call erawh ka mut tawh thu hrilhin ka chhang lo. Message min rawn thawn mawlh mawlh a, ṭha deuh chuan ka chhang ve zel a, chutih laimekin Nubawihi Message a lo thleng a "Hei Rindikan a sawi mek che, in in Text thu te a sawi a, a ṭha lutuk, Bza pawh a ṭhu ngui lup mai, a thik hmel teh mai ania" tih angreng a sawi chuan awm a nuam veng veng, thik rawh se, min be ṭha duh lo na na na, tih theih dang a awm tlat lo.




Ka muhil dawn ṭep tih ah "Muttui" tih zawng hi Biakzuala hnen aṭangin ka dawng a, ka thin a ur ṭun, Nubawihi ka hrilh leh vat a, "Chhang duh suh, ngeiawm lamah a kal" a tih chuan ka ngei nghal ṭhum a, ka chhang duh ta bik lo.





Class ka kal a, Test kan neih dawn vangin zirlai lamah rilru ka pe deuh a, ngaihtuahna tam zawk erawh kan khaw lamah ngawt a awm. Bza te Team pawh an la chak ve zel a, Rindikan Report a rawn pe zing khawp mai, Bza bula awm tam ber a ni bawk a, a chanchin leh eng nge a tih ka hriat theihna anih vangin huatah a kal meuh tawh lo a, a zarah an len na te, chaw an eikhawm thu te chenin ka hriat phah a, biak pawh kan inbe zing ta viau nghe nghe.




Final an khelh dawn tlaiah a Message ka dawng veleh hlawl a, "Ka duh lo i tia, i be ṭha leh hle sia, min hrilh ṭhat ve mai tur a nia" tih a ni. A thik tih chu hai rual a ni lo, min rawn chhuahchhal a ni ber a, Nubawihi thu min rawn chu a thawk niin a lang; mahse, nuam lo chu ka ti ve reng mai, dawt sawi te pawh ka ang a, min ngai kawi deuh tlatin ka hria a ni.




"Min lo bia a, ka chhang ve mai a lawm, ṭhian inbiak pangngai a lawm" tiin ka chhang a, ngaikawi lo sela ka la duh fan. Nubawihi erawhin "Khatiang zawngin lo chhang suh, ngaih ṭha deuha awm tir loh a ṭha zawk, tunah pawh a thik vang anih kha a rawn biak che, thik zel rawh se" a rawn ti ve thung a, Message chhan dan tur tawk hi ka thiam ṭhin lo, engtin nge ka chhan dawn tiin Nubawihi ka zawt sek a, a sawi angin ka chhang zel bawk.




"In inbe ngun viauin ka hria, a sawi ziah che"



"Be ve zeuh zeuh, engtin nge min sawi?" ka ti a, Rindika min sawi dan chu ka hre chak lem lo, Nubawihin ti tura min tih vang chauh zawt ka ni, chutih rualin Biakzuala awmdan chu hriat ka chak bawk.




"Ka hrilh kher che a ngai lo, ni ru, ka tibuai lo ang che u" a rawn ti hmak a, khai a! A thin a ti ur viau anih ka ring, "Kan ni lo, chutiang zawngin kan inbe lo" ka ti vat a, a rawn chhang duh tawh hauh lo.




An inkhel mek anih ringin ka nghak reng a, an zawh hun awmah pawh a la reh reng vangin ka va Text leh a, an chak leh chak loh ka va zawt a ni. Rindika Message a lo thleng hmasa a, an chak thu a rawn sawi a, ka lawmpui vak lem lo, ka rilru a nawm loh em vangin ka chhang rih lo a, Bza zawk ka la nghak ran bawk.




Dar 10 pelh hnu thleng pawha min la rawn chhan loh vangin Nubawihi ka va zawt a, an lo haw daih tawh anih hmel. "Be hmasa duh suh, i duhzia thu ka lo hrilh anga, nang chu tikhan lo ngawi tawp rih la, ka rawn biak tir dawn che nia" a tih takah chuan ngaihṭha deuhin ka mu a, mut erawh a chhuak lo ngang mai.




Dar 1 thleng ka meng a, Rindika lo sawi danah an leng ho mek a, tlangveng lamah an awm tih pawh ka hria. Hetiang tur a ni lo, min lo biak leh hunah chuan a ruh lang rawtin thil ka sawipui tawh ang, kan awmdan hi inngaizawng ang mai kan ni a, kan inthikin; kan intihtauhsan ngam a lawm, midang zawt kual a, mi ngaihdan la reng tur pawh hi kan ni lo, min duh anih chuan ani pawn a sawi mai tur a ni, keipawn ka zep bik lo ang.




Chhun lamah Class ka kal a, Test kan zawh ni a ni bawk a tiin Bazarah te ka kawi a, ka haw chuan tlai lam dar 4 a ri thuak tawh. Rinhlui leh Nubawihin min lo bia a, an ṭawng duh barh barh khawp mai. "Vawiin chu Shalomi ten in an ṭhiat a, kan va pui ve a" tih ang reng an rawn sawi a, Rinhlui pawn chanchin a hre ve aniang chu min lo chhaih zurh zurh a.




"Ka lo sawi tawh kha aw" Nubawihin a rawn ti zauh a,



"Eng nge i sawi" ka lo ti ve vat a.




"In ni tawh angin ka fiam bawrh bawrh mai, Dindini chu a ṭawng tlem a, a zakzum bawk sia, nangman bul ṭan zel a ngai ang ka tia, a nui mai mai, engtin mah min chhang lem lo, Rindika laka inthlahrung lo tur te pawn ka hrilh a, min hnial loh danah khan a ṭha anih ka ring mai" a ti luam a, ka ṭhiannu chungah hian ka lawm ṭhin a ni, engkim takmeuh hi ka zawt a, ani lah ka lam a ṭang em em reng a, min lo thinrim pui ve thul, kei ni ila a tan ka tihsak ngam loh tur thil te pawh a ni zawk a, lawmthu hrilh ka ba hial ang.




"A lo biak che chuan ṭha deuhin i lo hrilhfiah dawn nia, thil hi insawi tlang mai ṭhin lo a, inpawh deuha sawi a hun tawh" a tih chu ka pawm khawp mai, ka lo ngaihtuah ve mek pawh a ni.




Zanriah eikham chuan pindanah ka inkhung chawt a, Movie en pahin min lo biak hun chu ka nghak ru deuh a, ka nghak rei vak lo, Call a rawn lut a; mahse, a aw chu a dang riau a, ruih nei a ang ka ti!




"I ṭhiannu bulah kan chungchang i sawi vek ṭhin a mi?" a rawn ti tawl, thinrim aw aichuan a nelawm deuh zawk anga, lawm tak aw erawh a ni lo.



"Tu ka ṭhian?" Nubawihi a sawina a ni tih chu ka hria.



"Engmah a ni lo, ka sawi lo angah ngai rawh" a ti leh lawi sia, ka awm a ti nuam lo zo.




"Dika nen chuan in la in be ṭhin em?" tlemin a awki pawh a dang ta deuh.




"Be ṭhin tih lemah in Champion thu a lo sawi a, chu bak chu kan inbe zui lo, engmah min hrilh ve bawk si lo a" vui hmui pu awka takin ka ti a, ka vui rilru tak tak reng a.




"Biak che hi ka tan a inthlahrunawm ṭhin, i hre lo anih kha" a tih chuan ka sawi duh kha sawi a hun tih ka hria.




"Bz, i awmdan hi hriatthiam i har lutuk, eng nge inthlahrun tur awm, i ṭhianpa bialnu pawh ka ni hleinem, ṭha deuhin ka inbia emaw tih hnuah i reh leh daih zel a, Rindikan min lo biakin i lawm chuang si lo a, ka tan lo biak che hi a inthlahrunawm zawk daih a nia, tlang deuhin ka sawi mai anga, nizan te khan thik ang deuhin i awm a, engmah i sawi ṭha duh tak tak si lo" ka tih chuan a ngawi deuh vung vung.




"Min duh ang deuhin i awm a, min duh tak tak i ang bawk si lo" ka ti nawn leh ngat a.



"Zawk zamah chuan.." ti a a nui hawk ri chuan min ti hrilhhai hle.



"Engtin maw" ka aw chu a zawi viau.



"I awmdan zawk anih chu, min duh ang deuhin i awm a, i nih na vek anih chu i sawi" a tih chuan chhan ngaihna pawh ka hre lo, engtin nge ka lo awm le, a lakah chuan ka ṭha viau rengin ka hre si a.




"Engtin nge ka awm a, kei te chu ka pangngai reng a lawm, min lo biak pawhin ṭha deuhin ka chhang zel che a, min lo biak khat tehreng nen" ka rilru a na deuh zawkin ka hria.




"A tir kha chuan ka duh viau che; mahse, a buaithlak telh telh, ka rilru i ti buai zo vek tawh" a rawn ti leh halh a, a ṭawngkam chu ka lo la na ngang mai, 'A tir kha chuan ka duh viau che' a tih tak mai chu a ni, tunah min duh ta vak lo tih na em ni?



"Eng chu nge buaithlak chu?" ka hrethiam lo takzet.




"I awmdan kha ngaihtuah chiang ta che, ka ṭhianpa i chhai kual a, ka lo biak chhan che i hre vek a, hetiang mi i nih hi ka ring miah lo, rilru thianghlim deuh ni turah ka ngai che a, i lerh vak lo emaw ka ti che a" a tih leh chuan ka rilru a na veng veng, insawifiah ngaihna pawh ka hre lo, chutiang zawnga min ngai chu pawi ka ti, ka nih na a ni der si lo, ka duhzia hi hria sela chuan aw.




"Lerh min ti maw..?" ka rilru a na bawk a, ka chhang bung viau mai.



"I lerh lo a mi, engtin nge Dika nen in inbiak ṭhin pawh ka hre hleinem, zantin in inbia a ni lawm ni"




"Ṭhian ang bakin kan inbe ngai lo ka tih kha, i duh leh kan inbiakna te chu chhiar la, dik lo deuha inpuh chu ka duh bik lo a nia" ka ti ve ta salh a.




"Ka chhiar vek" a ti leh tho si.



"I chhiar anih chuan eng kha nge ngaihkawi tur awm a, kan inngaizawng lo tih te chu i hmu vek lawm ni" ka tih chuan a ngawi leh vang vang, rei vak lo hnuah "Mut dawna in in mangṭha ziah te, nitin zantin a inbiak te kha eng nge a awmzia, in thiltih apiang in inhrilh a, inngaizawng nen eng nge in danglamna" chhan tumin thawk ka la hluai a, a sawi dik ve tho bawk si, Rindika khan min lo be ngun a, ka thil tih min zawt fo a, ka hrilh ve mai ṭhin kha a nia; mahse, kan inbiakna a lo chhiar anih chuan inngaizawng kan nih loh zia chu a hre ngei tur a ni, a la kawi laklawh niin ka hre bawk.




"A thil min zawh ka chhang mai a lawm, nangpawn min zawt la; ka chhang tho ang che chu..."




"I man thiam lo lui mai mai anih kha, i ṭhiante khan ka Bem loh chhan che min zawt a, Bem che ka tum ziah; Rindika nen in inbiak loh hun nghah reng hi ka duh miah lo a nia. I Number ka dil che a, hetia ka lo biak hnu che hi chuan i hriatthiam ve ka ring a sin maw le" a thil sawi chu ka hrethiam lo a ni bik lo, a sawi takah phei chuan ka chiang ta lutuk zawk, kan boruak heti anih laia Rindika lo biak sek kha a ṭha lo reng a ni, hun ṭha a nghak tih hria ila in thik tir ka tum miah lo tur a nia.





"Rindika chu hrilh mai la, kan pahnihin inkawp pawh nilo mahila ka nih pui dawn chuang lo a, nangman tlang deuhin.." sawi pawh ka sawi zo hman lo "Ti lo zawk ang, hetiang vang mai maia ṭhiante nen inhuat phah ka duh hleinem, keimah zawk ka lo kiang mai ange, Dika chu be rawh, i nihpui leh nihpui loh chu i thu thu, i duh dan danin ti rawh" a sawi zawh rualin Phone a dah hmak a, ka tlawm, ka tlawm vawng vawng, sawi leh chuan tur ka nei lo reng reng.




Zankhuain ka muhil lo, ka ngaihtuah nasat poh leh ka thaw a ipik zual, ka duhna ka tilang vek a, zep loah chuan hmeichhe tiha zahthlak khawpin a lakah ka inhawngin ka hria, a hre vek a, mahse, chu chuti chung chuan tlawm takin min siam tho a ni. Ka zak a, hrehawm ka ti takzet, kan inkar chu a rem dawn lo tih a chiang tawh a, a ṭhianpa leh keimahah a duh a thlang hmiah bawk a, kan inkawp theih hram dan ngaihtuah aichuan bul ṭan loh law law a thlang a, kei chu hnawl ka ni.




Keipawn rilru ka siam a, theihnghilh ve ka tum a, a Number pawh ka delete ta nghe nghe, Nubawihi nen kan inbiak chang erawhin a chanchin ngawt kan sawi a, ka rilru nat thu ka hrilh pawhin min hnem a, ani ka biak chang hi chuan ka rilru a dam ve sawt ṭhin. Min biak sak a tum fo va; mahse, ka khap tlat thung.




Bza nen chuan kan dinhmun a laklawh vek tawh a, hmeichhe pakhat vanga an ṭhiandun kar chhiat a duh lo, chutah chuan ka dem lo a, ṭhian hlut zia hre ve tu tho ka nih vang a ni. Kei chu a ngaihzawng em pawh ka la ni lo a, duhna ringawt a lawm awm tiin hriatthiam ka tum tlat ṭhin. Ka huat phah lo a, chu vang tak chuan ka tan hian theihnghilh a har bawk.




Nubawihi chuan a lo be ta tho a, an inbiak dan te pawh min hrilh ve leh a, "Ṭhiante ngaihzawng chhuhsak tur ang maiin ka inngai, in kawp pawh niila ka rilru a nuam tak tak lo ang, Dika nen kan inhuat phah ringawt a nga, chu aichuan ka be tawh lo law law zawk ang" tiin Bza chuan a lo hrilh a, "A rilru pawh a na vein ka hria, a duh lutuk che a lawm, Rindika hi tihpui tur dang ka lo zawng a nga, ngaihzawng a neih veleh in inkawp daih dawn nia, Bza pawh ka lo sawipui ang" a ti siam siam a, nuih te pawh a za tawh zawk.




"Engmah tih a ngai tawh lo, ka tan pawh a zahthlak tawh" tiin ka hnial ta tho a, beisei neih tawh loh law law ka duh, Rindikan ngaihzawng dang lo nei ta pawh ni se engmah a danglam chuang lo. A ṭhianpa mitmei a ven vanga a hnawl, a ṭhianpa aia a thlan loh zawk ka ni reng tawh dawn, chung thil hrereng chunga inkawp chu ka thei bikin ka ring lo a ni.




A chanchin ka hre khat telh telh a, Nubawihi pawn a rawn sawi peih ta vak lo, Rindika erawhin min la rawn be reng a, ka chhang tlem ṭhin khawp mai. Class chawlh hun a lo thleng a, thla khat dawn chawlh kan nei a, Nutein haw lo mai tura min tih pawh chuan hnial loin; ka chhungte hnenah ka haw loh tur thu ka hrilh a, chawlh chhung chu ka nutei dawr nghah puiin ka buai ve hle ṭhin.




Ni a liam tam hnu chuan ka ṭhiante nen pawh kan inbe khat hle a, Class kan ṭan leh hnu lawkah mipa dang ka tawng ve ta bawk, kan Senior student a ni nghe nghe a, pehhel lo zetin min duhthu a sawi a, Call leh Message in min rawn be awl lo, pangngai leh ṭha takin ka chhang mai zel a, ngaihzawng lam ka ngaihven loh thu tlang takin ka hrilh bawk, ka duhzawng hi ka tawng zen zen bik lo va. Rindika erawh a reh ta vang vang, Bza phei chuan min ngaihtuah ve ngai pawhin ka ring lo, min ngaihtuah chhuak ve anih pawhin a lung ti lengtu chu ka nih ka ring miah lo bawk.




September thla a ni a, beisei loh lutuk hnen aṭangin ka piancham lawmpuina thu ka dawng ve leh nawlh a, Nubawihin a lo hrilh a nih hmel e. A Message chu a tawi hle a, han sawi zui vak tur pawh a awm lo, lawm thu ka hrilh a, chu zawng chu kan inbiak chhun chu a ni.




"In be ṭha tawh ula, Rindika pawn nula rim ngawrh deuh a nei a, a rawn buai phah ka ring miah lo" Nubawihin a tih chuan ka nui mai a, "I duh tawh lo nge, i awm dan hi duh tawh lo i ang e?" tiin min zawt zui a, "Khatiang hnuah kha chuan a dik thei tawh tak tak lo, ani pawn ngaihzawng dang a neih vat ka ring" tiin keipawn midang neih ka hreh loh thu te ka sawi ve duah a, ka ṭhiannu hriatah chuan nep lutuk anga lan ka hreh a, engkim a hre ve bawk si a, tuar bik lutuk angah min ngai lo sela ka duh.




"I chanchin min zawt ve zauh zauh ṭhin a, a la duh ve reng che anih ka ring, Christmas hmang turin lo haw ngei ngei rawh, in inhmuh leh hunah insawifel thei mai ang, ral aṭang chuan boruak siam ṭhat a har emai" a tih pawh chuan ka la hnial fan.




"Kha lam chu ka ngaihtuah tawh lo, College ka zawh hma chu ngaihzawng ka nei tawh rih lo ang, zirlai ngaihtuah a ngai" ka ti a, min ring zan lo aniang "Khatianga i sawi danah khan nangpawn i la duh a ang" a rawn ti khauh a, a sawi dik reng mai. Ka duh na a la ngai reng, a rem lo tih ka inhrilh mawlh mawlh chung pawhin ka duhna chu a danglam chuang lo, keimah a pai a, a ruka pai dam ka tum mai zawk a ni.




Zan khat chu Rinhlui nen kan inbia a, "Thil hrilh tur che ka nei, mak i ti deuh mai thei" a rawn ti reuh a, engthil nge ka zawh chuan "Ka la chiang bik lo a, ka hriat chian deuh hunah ka hrilh ang che" a ti leh a, Christmas dawna lo zin a tum thu te sawiin kan inbe zui luam a, Rinhlui te hian Aizawlah chhungte an nei lem lo va, a lo kal chuan ka awmna a lo thlen a rilruk a, keiin lo thleng ngei ngei turin ka lo chah ve a, kan tum dan chuan Class ka chawlh hnuah a lo kal anga, kan haw rual thei bawk ang tiin rem kan ruat a, October thla chauh a la nih vangin hun a la tam viau mai.




Kan ṭhian ho zingah chuan Nubawihi nen kan inpawh ber a, Rinhlui leh Muanpui hi chu Nubawihi ang lutuk chuan ka pawh lo a, ka ṭhian ṭha tak tho an ni. Shalomi erawh engemaw changa ṭhian ṭha tak a ni ber a, ka ṭhian ho zingah chuan a hla deuh ber ti ila a sual tam lo ang. Nubawihi nen hi chuan chhiat ṭhatna pawh kan in pur tam ber a, engkim tak meuh hi kan sawi dun ṭhin a, ka ṭhianṭha ber ti a ka sawi ṭhin a ni bawk.




Ṭum khat kan inbia chu ngaihzawng ka nei tawh em tih min rawn zawt hlawl a, ka neih loh thu leh min Bem tu an awm thuin ka chhang a, a rawn dilchhut khawp mai a, a bulah chuan zep engmah ka nei lo, kan Senior min ngaizawngtu chanchin te chu ka hrilh ve luam a, a thlalak te pawh ka thawn ve a, ṭha min tih pui viau mai, "Duh ta che, a hmelṭha ka tih zawng tak a ni, Bza i duh tawh loh rau rau chuan ka duhpui che, ngaihzawng i neih loh reng chuan i theihnghilh thei tak tak lo ang" a ti luam a, a sawi dikin ka hria, heti ringawt chuan engtikah mah ka theihnghilh theiin ka ring lo.




"Tunlai in inhmu ngai em?" tiin ka zawt zui a, "Hmu khat khawp mai, Shalomi nen pawh kan inhmu ngai lo, in an sa a; an buai thei lutuk" a ti mai a, an in an sak mek vangin Shalomi Patea te in lamah an awm thla a ni awm e.




Nubawihi thu râwn kha bawhzui ka han tum ut ut hman a, keimah hi ka fel lo nge ni ka ti hleithei lo a, Bza theihnghilh tum kher chu ṭulin ka hre thei lo. Ka hriatreng chu sualin ka hre lo a, hetia ka duh ruk reng pawh hi a fel lohna ka hre hek lo, Christmas dawnah ka haw anga, hmuh te pawh kan inhmu leh anga, eng rilru nge ka put zel dawn chu hunin a la rawn hril turah ka ngai.




Mahse le, December thla tira Rinhlui thil min rawn hrilh chuan min ṭhawng khawp mai. Nubawihi a rai a, Kohhranin an phuar thu min rawn hrilh mauh mai a, naute pa chu tudang ni loin Bza a ni! Engtin nge a nih theih, Bza berkher maw ni a? Enga ti nge a ni kher? Engmah ka hrethiam lo! Ka hriatthiam chhun chu ka ṭhianṭha berin min phatsan tih chauh a ni.





(Next ah chuan a tawp thei tawh ang)

Link:
BBcode:
HTML:
Hide post links
Show post links

Ahmangaihi violette
Posts: 148
Joined: February 1st, 2020, 3:14 pm

Unread post by Ahmangaihi violette » January 8th, 2023, 11:24 pm

SILENT EYES
- 4 -




Rinhlui chuan tihian a sawi a, "Heta i awm lai pawh khan an inbe reng ṭhin a lawm, Nubawihi zawk hian a be hmasa ziah in ka hria, a tirah kha chuan i chanchin a sawipui ṭhin a, keipawn a tihpui che ni ah ka lo ngai a; mahse, a be ngun leh lutuk kha mak ka lo ti ve deuh a, ka zawh lah hian min hrilh ṭha duh ngai lo a, Bza nen in inbiak hnu kha chuan a tihpui tak tak che anih ka ring a" tiin Nubawihi a dem thu a sawi mawlh mawlh a. Muanpuii nen pawh an lo sawidun a, min hrilh pawh an lo hreh viau a ni awm e.





"A lo be tawh reng reng che em?" ti a min zawh chuan kan inbiak zeuh zeuh thu ka hrilh a, kan inbiak hnuhnun ber ka ngaihtuah let a, a lo rei leh deuh tawh a, kha mi ṭum kha chuan ngaihzawng nei turin thu min rawn nghe nghe anih kha.




"Eng tik aṭangin nge an inkawp ang le?" ka ti sawi sep a, zawhna ka ngah a, rilru a buai nuai mai.





"Ka hrethiam chiah bik lo, i kal leh hnu khan an in be zing viau aniang, Nubawihi te chuan mipa biak a thiam em a lawm, Bza te chu a Star theih em kha, a duh ve reng anih te chuan engah nge a tihpui kher che ni, a phakar ka ti teh mai a nia, kan ṭhian ho kar a chhiat phah vek dawn, a rai thu pawh min hrilh miah lo a, Muanpuii nen kan hriat tirh chuan kan lo ngei pui lutuk che a" a ti leh luam a. Ka rilru nat em em chhan hi Bza vang ngawr ngawr chu a ni lo ang, ani chu mihrang zawk a ni a, ka unaunu ang hiala ka ngaih; ka ṭhiannu vanga ka rilru natna chu a tam zawk mah ang.




"Inneih an tum em?" ka ti leh a, ka ngaihtuah zawng ringawt pawhin ka ṭah a chhuak thei, thikna ka nei a, a chhan ber pawh hre loin inchhirna ka nei bawk, engkim ka sawipui kha ka inchhir ni ta berin ka hria.





"Engmah ka la hre bik lo, Shalomi ka lo zawt chiang ang, Nubawihi chu ka be peih lo a, nangman lo be chhin rawh, i duh leh i lo ankhum hrep dawn nia, keini chuan kan ṭan tlat che" a rawn ti hmarh hmarh a, chu kher chu ka tih ka ring lo, kan ṭhiandun inkar a thleng thei thil pawh a hria a lawm, keichu min ngaihtuah ve lem lo tih a lang reng a, anih tur chu a ni vek tawh a, ka lo sawi ve chuan engmah awmzia a nei tawh chuang lo.





Mu thei loin rilru ka kawm a, zawhna chhangtu awm si lo chu ka inzawt a, ka ngaihtuah nasat poh leh thaw a ipik zual a, ṭah em chu ka ṭahpui lo; mahse, ka rilru a na ngawih ngawih thung a, Christmas hmanga haw leh pawh chu ka chak hlawl lo. Nubawihi chu bia pawh ni ila eng nge ka sawi ang le? Ani pawn min hmu tui bikin ka ring lo, chutiang thuartham ngaihtuah chuan ka inlet sek a, hah zetin thawk ka la leh ringawt ṭhin.





Ka ṭhianten min lo be zeuh zeuh a, eng engemaw thu thar te pawh ka hre ve leh zel a, an rawn sawi danah chuan inneih an tum lo niawm tak a ni. Bza te lamin sawn man an pe tih te ka hre leh zel a, Nubawihi ṭawngkam hriat ka duh khawp mai, ani lah chu a reh hmiah a, ka be hmasa duh bik lo va, bia pawh ni ila sawi tur ka hre lo ang, ka rilru chuan a dem lo thei lo a, chutih rualin khawngaihna ka nei lawi a, Biakzuala chu ka dem ber tawh, heng thil zawng zawng hi a rilru mumal loh vangah ka puh a, innei ta sela ka lawmpui thei kher lo ang tih chu ka inhria, chutih rualin nau an pai tawh a, a fa pai tu a nei leh duh lo chu ka dem hle thung.




Shalomi nen kan inbiak ṭum chuan eng engemaw a rawn sawi ṭeuh a, thil awmzia pawh a chiang ta deuh, "U Bza hi chuan a duh vak lo, a ruih vangin an chesual palh a, Nubawihi zawk hian a rawn Phone tluk tluk zel, hmanni ah pawh a nu a lo kal a, a rawn ankhum hrep a, lo hrilh che ka tum ṭhin a; U Bza'n a phal lo a, chuvangin ka hrilh lo che anih kha, nangmah hi a duh daih zawk che" tih angreng a sawi luam a. A thil min hrilh pakhat chuan min ti hamhaih viau a ni.





"Hmana Star tu che ka hria ka tih pawh kha U Bza a nia, nangmah aiin Nubawihi ka hrilh hmasa zawk a, i bula sawi lo turin min tia, U Bza a duhna a rei tawh si a, in ṭhiandun kar a chhiat ka hlauh vangin dawt ka hrilh ringawt che anih kha, Nubawihin 'Dindini nen an inkawp chuan ka rilru a na viau ang, kan inkawm thei tawh kher lo ang' a ti bawk si a, U Rindikan a Star ve tho che vangin dawt ka sawi mai mai a lawm, hetiang hian aman a lo ngaizawng leh ang tih ngaihna ka hre bik lo a" ti a Shalomi thil sawi chu chhan ngaihna pawh ka hre lo.




"A va mak ve.." ka ti hap a, nuih a za lek lek! Hetiang hi a ni ang tih ka ngaihtuah pha lo.




Ka inngaihtuah tluk tluk a, chuang ta riaua inhriatna te ka nei a, an ni pahnih inkara ka tel ve pawh chu ka zak lek lek ṭhin, hetia lo na ve em em tur hian tu nge ka nih ve tih thlengin ka inzawt a, mahni inkhawngaihna ka nei lian hle ṭhin.





December thla laihawlah Rinhlui a lo zin a, zan khat chiah a lo riak a, a lo thlen zan chuan kan tlaivar deuh thaw a, Nubawihi leh Biakzuala chungchang ngawt kan sawi dun a. Ka ṭhian dang te hian ka beisei loh takin min vui pui a, Nubawihi an dem thu pawh an sawi hmiah hmiah mai ṭhin a, ṭawngkam pawh an duhtui vak lo. "Ṭhian ṭha ah a ngai ve tak tak lo che anih kha, ṭhiante ngaihzawng hlui te, an Star te lo ngaihzawn ve hi ṭhianṭha tih ah a mawi lo hrim hrim, dik tak chuan Bza lo pawh mipa duh a ngah thei emai, i duh tih hrereng chunga a fa a pai duh hi a tenawm, a pawisa lo hle che anih kha, be ṭha duh tawh reng reng suh" Rinhlui chuan a ti hmarh hmarh a, a bulah chuan ka vui thu ka sawi lang lo a, Nubawihi chanchin chhe lam hriat chuan ka awm a tihnawm phah hek lo.





A tuk tlai lamah Rinhlui chuan min haw san a, Aizawl lama Christmas hman ka rilruk vanga zui ve ta lo ka ni. Ka nu chuan haw ngei ngei turin min lo chah a; mahse, ka Ni chuan khawi emaw aṭangin chanchin a lo hre thawi ve a, Phone call a min lo zawh chian hnuah "Lo haw duh lo mai rawh, i hmuh chuan i awm a nuam lo zual mai mai ang" a rawn ti ve khauh a, ka nu pawh hrilh tawh loin haw loh chu ka rilruk a, ka ṭhiante pawh ṭawng fimkhur turin ka chah nghe nghe a, ka hming a rik tel ve mawlh ka hlau a ni.





Zan khat chu Nubawihi hnen aṭangin Message ka dawng ve ta hram a, "Tihpalh aw" tih zawng hi min lo thawn a, chhan dan tur ka ngaihtuah rei khawp mai, ṭha takin ka be thei lo a, ka thinrim thar a ni ber. Rei tawkfang ka inngaihtuah hnuah "Ti nge ngaihdam min dil kher, ka lakah tihsual i nei em ni?" tih chu ka thawn let a, 'Tihpalh' ti tawp lo a a insawifiah ka beisei a ni, Bza a duhna kha ka hriatthiam loh ber a ni lo miau a, min sawipui hmasa zet a, ka hriat loh lamah rilru dang a lo pu reng zawk a, kei lahin engkim takmeuh ka hrilh a, a thu rawn ka la zel bawk a, min bum ni ta berin ka hria, ngaihdam min dil anih pawhin Bza fa a pai vang ni loin ka chunga a thil tih vang zawk hi ni sela ka duh.





Message chu a rawn chhang let lo a, ka insum thei ngang lo chuan ka han Call a, a chhang hauh lo, rik pawh a rik zawh hmain a tawp hmak a, ka Call nawn leh chuan a Switch off tih ka hre zui a, chuta chin chu biak tumna ka nei leh tawh lo.




Ka eng tih mah a tui thei lo a, haw ka chak lo chungin Aizawl lama Christmas hman pawh chu ka chak chuang lo, Nutein ka haw dawn em tih min zawh chuan ka la chian loh thuin ka chhang a, ka nu lah chuan min rawn tur sek sek a, Sumo Ticket a Full tawh vangin tih ngaihna a awm tawh chuang lo a, "Kum tharah ka lo haw ang" tiin ka chhang ta ngawt a, a lungawi lo hle ang chu.





Chutia Aizawl lama Christmas hman ka rilruk laimek chuan Nubawihi Message ka dawng leh a, Rinhlui te hnen aṭangin ka haw loh tur thu a lo hria anih hmel e.




"Min va ngei awm em em" a rawn ti thawr a.



"Engah ngawt maw?" bangbo ang takin ka ti a, huatna lam aimah chuan rilru natna ka pai tam zawk a, dem chu ka dem ngei a lawm; mahse, kan rilru erawh a inpersan viauin ka ring.




"Keimah vangin i rawn haw duh lo a ni maw, min ngei ngawt ang tih chu ka hria a lawm, nang aiin ka rilru a na daih zawk, ka tihsual rah ka seng anih hi" a rawn ti duah a, chhan dan tur ka van khawp mai.





"Nangmah vanga lo haw lo ka ni lo, Nutei dawr nghah pui a ngai alawm" ka ti mai a, kan buaina sawi chhuaktu nih chu ka tum lo, sawi lo mah ila kan rilru a lian ber a ni tho tho.




"Biakzuala chu i la duh viau a mi, kei chu ka kiang hmak ang, i duh leh min haw mahla sawi theih ka nei lo, in inkawp leh anih pawn kei chuan ka hrethiam che u" a tih leh chuan ka rilru a na veng veng, sawi tur chu ka ngah a, sawi mai dan tur pawh ka hre lo.




"Biakzuala vangin ka thinrim lo" ka ti tawl a, engtin nge ka hrilhfiah ang, amah vanga ka rilru nat zia hi a hrethiam lo em ni!





"Min hriatthiam pui phak lo ang Dindin, hetianga mipa tenawm anih hi ka ring bik lo, vawikhat mai pawh ni lo kan chesual a, a fa anih a ring lo a nia, a lo tenawm khawp mai, nangmah i ni lo a, vannei in ti zawk rawh" a Message chu chhang loin ka en tlawk tlawk, thinrim tur nge lo hnem zawk tur, nge ni a ka ṭah pui chiam zawk dawn?




"Sawi tur engmah ka nei lo, keichuan hriat ka nei ve lo a, engkim hi ka beiseiloh thil vek a nia" tiin ka chhang a.




"Min duh ang takin a awm a, 'I rai anih pawhin ka nei ang che' min ti a, mipa zawng zawngah a nep ber, ka haw hluah hluah, ka rilru a na lutuka ka ṭap tlaivar ṭhak zel, sawipui tur ṭhian ka nei bawk si lo a"




"Min haw suh aw, hetianga duh hi ka la nei ngai lo a, ka la thutak viau pawhin ka ring lo a; mahse, ka lo hmangaih viau anih ka ring"





"Amah runluih nan hrim hrim pawh nau hi ka pai tlang ang, ka la inchhir tir ve dawn a lawm" a Message chu a rawn thleng zut zut a, Bza demna thu leh naute neih ngei a tum thu te, phuba a la lak tur thu te a rawn sawi mawlh mawlh a, chhan ngaihna ka hre lo reng reng, ipik zetin a Message chu ka chhiar a, rilru thianghlim put a har takzet.




"Ṭhian angah hian min lo ngai ve tak tak em le?" ka ti ta thlawt a, ka insum zo tawh ngang lo a ni.





"Ih maw, hetianga in awm tawh hnu hi chuan ka tan ngawih mai a ṭha zawk a, tunah pawh hian Biakzuala chungchang sawipui che ka tum lo. Mahse, i sawi duh tlat a nih chuan ka rilru diktak kan hrilh ang che. Demna chu ka nei che, ṭhian kan ni a, ka ring em em che a, ngaihzawng chungchangah pawh ka rawn nasa ṭhin che, Bza nen kan chungchang pawh kha engkim ka hrilh che a, engah nge zep i neih tlat ni, ka haw lo che a, ka rilru chu i ti na khawp mai, nilo sela chuan ka hnem ngei ang che; mahse, tunah chuan hnem che ka duh lo." ka ti leh tawl a, ka rilru dik tak a ni. Na lo anga inlantir ka tum lo a, ka rilru nat ve zia hi hre rawh se.





"I la duh reng a mi?" tih a rawn thawn chu chhan loh ka tum zet a; mahse, ka chhang leh ta hram a.





"I duh ang em em hi chuan ka duh in ka ring lo, keichuan kan inṭhianṭhatna chhe ta kha ka ui zawk" pehhel lo zetin ka ti a, a hriatthiam ka ring, inkawm leh pawh niila tunhma ang kan ni thei tawh dawn lo a, ṭha tak chuan kan in be leh thei mai anga; ṭhian kara inzawmna, kan inrintawnna te, kan induhsakna te kha a awm thei tawhin ka ring lo.





"In ngaizawng ni ula chuan a bum ve tho ang che" a tih chu ka chhang tawh lo a, Phone ka dah hnu chuan ka rilru a na telh telh. Hetiang khawp hian a duh tih lo hria ila chuan ka tel ve hauh lo tur.





Chuta chin chu kan inbe leh ta lo vang vang a, a chanchin pawh ka hre khat khawp mai, engemaw changa Rinhlui nen kan inbiak hian a rawn sawi ve zauh ṭhin a, hriat tam loh ka duh zawk vangin ka zawt duh ṭhin lo a, chanchin thar an nei zui vak lo niin ka hria.





Kum tharah rei lo te chauh cham turin ka haw a, ṭum danga ka haw hi chuan ka haw ni la lain ka ṭhiante an lo kal ṭhin a, tun ṭum erawh tumah an lo kal ta lo. Nubawihi a tel loh hi chuan Rinhlui te hi chu a reh viau ṭhin reng a, chutia an lo lang ta lo chu rilru pawh a hnim ve ruih thei.





Ka Ni chuan Rinhlui u; U Matluangi hnen aṭangin chanchin a lo hre vek tawh a, mi pawh a zawt chik ṭhin khawp mai, keipawn zep nei loin ka hrilh mai zel a, thu rawn te pawh min pe ve luam a, Nubawihi chu be chhe miah lo tur leh kawm tam tawh lo turin min ti bawk. Kan khua a ka awm lai hi chuan kohhran lamah theih tawkin ka inhmang ve ṭhin a, Nubawihi te in hi Biakin panna kawnga awm anih vangin kal pelh a ngai a, ka lut kawi ngai lo nain min lo hmuh ṭhin chu ka ring.





Tlai khat chu Rindika nu dawrah Bza nen kan inhmu hlawl a, Alu ka buk laimekin a rawn luta, min hmu thut chu a phawk hmel hle a, en pawh ka en rei duh lo, pawisa ka pek lai pawh chuan kawngka bulah a la ding reng a, a lai deuh riauin ka hria. Ka chhuak tur a lama ka inher chu min lo nuih a, tawi te chuan ka nuih let ve a, min biak hmain ka kal nal nal thung.





Chumi zan chuan Shalomin min lo biain eng engemaw min lo zawt a, Nubawihi ka tlawh tawh em tih angreng a ni. Kan inbiak zui loh thuin ka chhang mai a, "A pawi loh chu, keipawn ka ngei deuh hlek a, a nu nen hian U Bza an rawn tawng vak vak zel a" tiin min hrilh a, ṭawng insum ṭha a ka hriat avangin ka sawi pui duh lem lo.





"U Bza nen in inhmu a mi?" a tih chuan Bzan a hrilh anih ngei ka ring.



"Hmu zawk a, kan inbe lo" tiin ka chhang a.




"Tlaia a lo haw khan a sawi a, a be ngam lo che aniang, i haw ngawt ang a, i lakah a inthlahrung lutuka, i ngaidam thei ngang lo em ni, ṭhian ang tal pawn be ve leh la" inthlahrun awka zet hian a ti a, chutih laichuan zawitea phun ri hi ka hria a, ka ṭawng ngaithla ve tu dang an awm anih hmel e.




"Ngaihdam ngai turin ka lakah tihsual a nei hleinem" ngaipawimawh lo ang takin ka han ti a, chu chu thil nih dan pawh a ni reng a, kan inngaizawng lo miau a lawm.
"Rindika pawn vengchhakah bialnu a neih kha i hria em?" a tih leh chuan ka la hriat loh thu ka sawi leh mai a.




"An nghet ve tawh lutuk, zantin a leng tluk tluka, hetah pawh a rawn lang khat khawp mai" a ti leh a, chuvang chu aniang Rindikan min lo be ngai ta lo a, ka tan chuan a lawmawm lam a ni.




"A ṭhat hlauh chu..in in sa zo dawn tawh em?" ka zawhna chhang loin "U Bz, Dindini i be ve duh em?" ring deuh tak hian a ti a, hnial ka lo tum laimekin mipa aw hian Phone a rawn chhang a, ka hnial hman ta lo.




"I dam ṭha maw...vawiin khan kan inbe hman ta lo a.." a aw ri ah chuan inthlahrung aw ka hre tel a, a ṭawng zawi viau bawk.




"Dam ṭha a lawm.." kan ngawi dun vang vang a, rei vak loah "I Number ka lo nei tawh lo a" zawi sup hian a ti a.





"A ni maw, engti zia nge?" ka thil zawh chu ṭul lo tak a ni.
"Ka hre bik lo, ka nei reng emaw ka tia, hman deuh khan lo biak che ka tuma, a lo bo daih a, ka Delete bawk si lo a" ka nuih a za lek lek, a Delete anih loh chuan tu emaw tak chuan a Delete aniang chu maw le.





"A nih chu maw le.." ka ti leh mai a, sawi zui vak tur ka hre lo, sawi duh loh chin ka ngah vang te pawh a niang.




"Shalomi Phone a mi hi ka lo la leh mai ang?" a tih chuan ka nui ta ringawt a, Shalomi rawn ṭawng zuiin "Kartawp chu min lo pui ve rawh aw, inchung hi Slab kan chhung dawn a, Rinhlui te pawh ka sawm a, thingpui min lo lumpui dawn nia" a rawn ti zung zung a, chu pawh chu ṭha takin ka aw ve mai a, tumah hi pehhel ṭulin ka hre lo, khaw khatah kan awm veka kan inpehhel rei thei chuang lo ang.





Phone ka dah hnu chuan ka awm a nuam deuh huaiin ka hria, ka Ni thu min rawn angin Nubawihi pawh ṭha takin ka bia anga, kan boruak siam ṭha tu zawkah ka ṭang ang ka ti rilru a, inbiak duh loh zui chu dikin ka hre lo, chutih rualin rilru ah erawh inkharkhip chin a awm reng tawh dawn.




"Dindin, ka chanchin i hre vek tawh ang ti raw?" Bza Message chu ka en vang vang a, a Message ka dawn hmasak ber ṭum te kha ka ngaihtuah kir a, ka hlim zia te pawh kha ka la hre reng.




"Hre ve tawh e, Biakinah an puang dum dum a lawm.." ka chhan dan chu a ngeiawm maithei a ni.




"A pawi tak tak a ni, keima thiam loh vek mawle, ka ruih laiin thil ka lo ngaihtuah chiang lo a"




"I rui fuh lo zeuh aniang maw?" meinei deuhin ka ti a, zan khat thil thu mai niin ka hre thei lo, Phone pawn an inbe fo tih kha ka hre ve reng a, awm chu a awm a lawm.
A rawn call zui a, ka lak rual deuh thawin "Zan khat chauh tak tak, dawt ka sawi lo, tihsual palh liau liau a ni, dik tak chuan ka ngai thei lutuk che a, i ṭhiannu a lo ni ve bawk sia, min lo biak khan ṭha deuhin ka chhang ṭhin a, i chanchin te ka zawt..." a sawi laimekin "Chuan in lo induh ta a" ka lo tih khalh a, min hnial rang ngei mai.





"Duh miah lo...ka duh lo hrim hrim, ngaihzawng dang nei lo la chu..." a ngawi leh daih a, a thil sawi chuan beng a verh tlat!




"Tu in maw ngaihzawng nei..?" ka ti let thuai a. "I nei a ni lawm ni, in College a mi i nei an tia...." thil awmzia chu ka hrethiam riai ruai.




"Nubawihin maw?" ka tih chuan a lo aw ve mai a, kei ka lo nui hak thung.




"Ngaihzawng ka nei lo, dawt a hrilh che anih chu.." lehlam thawm chu a reh vung vung a, eng thil tak ngaihtuah ang maw. Rei dawn a ngawih hnuah "Tihpalh lutuk, min ngaidam thei angem?" thawk la halh chungin a ti a, ka khawngaih reuh khawp mai. "Ngaihdam in dil a ngai hleinem...engmah huatna che ka nei lo" pangngai thei ang berin ka ti ve a, ka chhungril lam erawh a tawt ṭun a, engthil mah hi lungawina tur a awm lo.





"Ka la duh reng che..." ka ngawi reng a, ka hminga min rawn koh pawh chuan a chhang lo. "Dindin..ka ṭawng i hria em?" phone chu ka la thla riai riai a, ka hmet tawp zui zat bawk.





Mut hmunah a inngaihtuah vang vang a, kan ṭhiannu nena kan inkar te, Bza nena kan inkar ngei pawh; ka duh a nih phawt chuan ka siam ṭha thei. Chutih rualin duhthlan ngai erawh ka nei dawn thung a ni, ka mipa duh em em leh ka ṭhianṭha ber ni ṭhin te karah hian tu zawk nge ka thlan ang. Nubawihi bulah khan Bza ai pawh a ka ngaihhlut thu kha ka sawi a, ka chunga a thil tih zawng zawng te vang hian ka thlang thei dawn em ni?





Anih leh Bza ve hi le, kan inkara mei de set set kha tun thlengin chhem alh a la ni lo a, daltu kan nei tlat ṭhin a nih kha. Mahse, tunah chuan min daltu an awm tawh lo a, a awm chhun chu ka dunthlanna chauh a ni tawh, ani ka thlang anih chuan ka rilru a ka ngaihhlut em em ṭhianṭha nihna chu ka thlauhthlak a ngai thung anga, Nubawihi ang chauh kha ka ni ve tawh ang.





Pathianni tlaiah Nubawihi te inah chuan ka va leng ta a, min hmu chu engmah thleng lo ang maia hmel hlim hian min lo bia a, "Serṭawk i ei duh em, kan vel dawn nia" a lo ti siam siam, a hma kha chuan kum tawpa ka haw chang hian an Serṭawk hi kan lo ṭeuh a, kan ṭhian hoin kan eikhawm laih laih ṭhin, tun ang hun hi Serṭawk tui lai tak a ni a, an ta phei chu thlum tui tak a ni.





"I van cher ve, i damṭha meuh maw?" ka tih chuan lu a thing mat mat a, "Chaw ka ei thei lo lutuka, ka luak nasa bawk a" a ner zui nang a, a mit khur pawh a lo tla ve dawk a lawm.




"Vitamin te i ei ṭha lo em ni?" ka tih chuan a nuin min lo chhang thuai a, "Damdawi ei hi a hreh leh lutuka, a lei sa pawh a ei rei leh khawp ang" a lo ti hluk hluk a, a damdawi ei hreh thu hi chu a hma pawn ka lo hre tawh, khawsik hluah chung pawh a tuar lui ngar ngar duh kha a ni miau a.




Kan ti ti a, a lungawi lohna te, a rilru natna min hrilh chuan keipawn ka hnem ve thei tawh a, rilru ka siam fel ta bawk a, hetia ka tih hian ka awm a nuam sawtin ka hria. Zan inkhawm ka tum vangin rei ka ṭhu lo a, ka haw tur chu kawt thlengin min lo thlah a, tun hma ang tho khan nui var var chungin kan in mangṭha a.




Bza nen Message kan inthawn zing hle a, min duh thu pawh tlang takin a sawi tawh a, a pu te in sak zawh hunah chuan Aizawla a awm tur thu te, kan pahniha thutak zawka inngaihzawn a duh thu te a sawi ve luam a, chhanna mumal ka pe lo thung. Thil ngaihtuah chet chet hi ka ching thar a, engpawh ti dawn ila ngun taka ngaihtuah ka duh a, midang tumah râwn ka tum tawh hek lo.




Kartawpah chuan Rinhlui leh Muanpuii te nen an in sa chu ka va pui a, thingpui lum pahin inhnuaiah kan ti ti a, Nubawihi chu be ṭha tawh lo turin min ti vek hlawm a, ka kan tawh tih thu chu ka sawi duh lem lo.




"Bza fa lo ni lo tal sela ṭha tur" Rinhluin a tih chuan "Sawn man an pe daih tawh a lawm" Muanpuiin a lo ti a, keipawn zawhna ka nei.




"Shalom, sawn man an lo dil ṭumin Bzan 'Ka fa a ni lo' a ti em ni?" tiin Nubawihi thil sawi kha ka zawt a.




"Ti lo e, U Bza chuan a pawm thlap a lawm, an chesual dun miau a, naute pawh a lo pian hunah chuan kan ngaihthah lo ang, U Bza pawn enkawl a pawiti vak lo a, han nei phawt sela, a ṭul dan ang angin kan ngaihsak ang" a ti luam a, dawt dang bawk, ka hriat leh loh hi a ring em mawni le, engtia tam nge Nubawihi hian dawt min lo hrilh ang ni! Shalomi thilsawi vang chuan ka thutlukna siam ah khan ka inchhir dawn lo tih ka chiang zual a, ka awm a nawm phah zawk mah in ka hria.




Thingpui in zawh a Bza lo chhuk chuan min rawn mitmei zauh zauh a, a bula ka va kal chuan mawi fahran hian min lo nuih a, a nui hmel chu ṭha ka tih dan a la ngai reng a, min la hip em em reng.




"Nizana ka thil sawi kha min chhang tawh la" zawi deuh tak hian a ti a, nizan khan ka chhanna min zawt sek a, ka la pehhel rih kha a nia, chhanna pek ngei erawh ka tum.




"Zanah ka hrilh ang che" ka tih chuan phur hmel deuhin min en a, "Tak tak aw, ka lo leng dawn em?" a tih chuan lu ka thing rang hle.




"Min lo Text la, ka lo chhuak ang" a lo bu nghat nghat a, lungawi hmel taka a kalsawn chu ka en vang vang a, mahni inringtawk taka thutlukna ka siam chinah khan thlamuanna riau ka nei a, a lungawithlak ti ila a dik ber ang.




Kan haw tlai deuh vangin chhungte rualin chaw ka ei lo a, ka inpeih fel meuh chuan dar 8 a ri dawn thuak tawh. Dar 8 pelh hretah Bza'n min lo Phone a, Tengtere kung hnuaia min lo nghak tura ka hrilh hnuah ka inbun sawk sawk a, pawn lam Step a ka chhuk laichuan Tengtere kung bula a ding chu ka zuk hmu a, a lo awmsa reng tawh a nih ka ring.




"Khawiah nge kan kal ang?" a lo ti var a, hmun dangah kal kher pawh ka lo tum lem lo.




"Hetah hian ka hrilh mai ang che" ka sawi ṭan hma hauhin a hmel chu a buai nak a, a nui hmel pawh ngaih ṭha vak lo hmel a pu a.




"Ahma khan i ṭhianpa nena inhuatphah i hlauh vangin kan inkawp thei lo a.." ka sawi laichuan ṭawng tumin a lo ang zuau a, lo ngawi rih turin ka mitmei vat a, a ngawi zui ve mai bawk.




"I ruih sual zeuh vangin ka ṭhiannu nen kan inkar a chhe ve ta thung a, Nubawihi thiam loh vek a ni bik lo, i thiam loh pawh a ni ve a nia" fiah fek fawka ka tih leh chuan ṭawng tum hmel a pu tawh lo reng reng.




"Heng boruak te hi han reh fel sela, Nubawihi rilru a dam hunah kan inkawp dawn nia, nau in nei anga, nangpawn tun a i rilru ang reng hi i pu tawh kher lo ang, Rindika rilru dam hun kan nghah ai kha chuan a rei deuh chu ka ring" min en run a, ka nuih pawh chuan min nuih let lo chiang hle.




"Inkawp i duh tak tak lo ti raw?" a tih chuan ka han en vang vang a, a mitah tak ka en bawk.




"Min ngaidam thei thlawt lo a mi?" thawk la halh chungin a ti a, "Ngaidam thei tehlul mai" tiin ka chhang ve thung. Ka ngaidam a lawm, huatna ka nei hauh lo.




"Anih chuan ti nge...?"




"Nangmah ang thoin ṭhiante ka ngaihlu ve a, nangpawn i ṭhianpa vangin min thlah ve tho kha, Nubawihi vangin ka thlah che a ngai ve anih hi" a mitah ka la en reng, a hmel chu a dur khap a, ka sir lam a melh zui daih bawk.




"Shalomin min lo hrilh vek tawh a, i ṭhiannu vanga hetia awm hi kan ni"




"Insawi fihlim i tum elaw..?" Phawk lek leka ka tih chuan min en leh vat a, "Ngaihdam ka dil tawh che kha, ka tihpalh, i rilru ka ti na anih chuan min ngaidam rawh, ka insiam ṭha anga, ka ti nawn tawh miah lo ang" ngenngawl zetin min en a; mahse, keichuan thutlukna ka siam fel tawh miau a ni.




"I ṭhiannu chu i ngaidam a, kei min ngaidam ve dawn lo tihna a mi?" a ti zuai ruih a, chu tak chu a lawm hman zan khan ka inzawh chiam chiam ni.




"Ka ngaidam ve ve che u, chuvang chuan inkawp thei kan ni tawh lo. Nubawihi rilru a dam hunah kan ngaihtuah ṭha dawn nia" a lo nui ri hawk a, "Min hnar vang hian ka neih phah dawn miah lo ania" bung zet hian a ti a.




"I thu thu a lawm, ka ngaihdam vang che u hian thil thleng lo ang hmakin ka ngai thei bik lo va, rilru ah hian a awm reng tawh dawn a, in pahnih pawn in nih ve tho ka ring. Nubawihi chu ka ngaidam a, chuvang chuan a rilru tihnat ve kher ka tum lo, nangpawh ka ngaidam che a, chuvang chuan ṭha takin ka thlah che anih hi" a hmel chu thinrim hmel aipawhin hmuh a nuam lo zawk a, engmah phei chu a sawi lem lo. A zial ṭanin a han fawp vang vang a, ko chhak lam ngheng chuan ngawi rengin kan ding dun a, kan in melh leh ringawt ṭhin.




"Min duh tawh lo" a tih chuan ka melh vat, "Ka buk tawn reng che u a, in pahniha duh lo thlan aichuan keimah chiah inngaihtuahin ka kalsan ve ve ang che u" tiin ka rilru diktak ka hrilh a, a tih ve tawh hnu tho a ni a, ani aia min hriatthiam pui tur dang an awm lo ang.




"KARMA" nui suk chungin a ti a, ka hnial lo, a in hrechiang a lawm.




"I ṭhiannu rilru dam hun chu ka nghak lo anga, i rilru dam hun ka lo nghak zawk dawn nia" ka inrin hmain min rawn hnaih rawk a, ka hmuiah tak rawn fawpin rang deuhin min thlah leh a, ka hamhaih lutuk vang nge ni; min hnungchhawn a a kal chu ka thlir reng ringawt.




Nubawihi pawh tlawh leh tawh lohin Aizawlah ka chhuk a, kar hnih hnu lawkah Nubawihi nau chhiat thu ka hre zui a, ka ṭhiante chuan a ti tla anih an ring a, keichuan ngaihdan siam ka duh lo, ka be lo a, anin min be lo bawk a, Bza Message leh Call ka chhang ngai hek lo, ka zirlaiah ngawr ngawr rilru ka pe a, hun a rei anga, ka hrereng bik lo ang.




College kan chawlh hnua kan khua a ka haw leh chuan Nubawihi a awm lo a, Lungleia a pu te hnenah a awm anih hmel e, Rinhlui min hrilh danin ngaihzawng dang a nei leh tawh a, a lo haw ngai meuh lo. Shalomi pu te pawn in an lo sa zo diam tawh a, Bza lah hmuh tur a awm tawh lo. Kha mi zan aṭang khan Biakzuala chu ka hmu leh ta lo vang vang a, Phone takngial pawhin ka be zui ta lo.




Ka First love a ni em?


Biakzuala ka hmuh hmasak ber ṭum khan hmangaihna ah ka luangliam a, a hmasa ber a ni a, ka ngaihlu em em reng, ka First love min zawh apiangin ka ṭhiannu bialpa hlui hi ka hrechhuak ziah tawh dawn a, ka theihnghilh tawh ngaiin ka ring lo, a mitmeng kha ka mitthla ah a cham reng a, ka melh fuh changa a nui hmel te pawh. Chuvang chu a niang ngaihzawng ka nei rei thei lo a, ṭhian pawh ka kawm ngai meuh lo, mahni inthurual ka ching a, ka mi rin ber min zawt sela 'Keimah' tiin ka chhang duh maithei.





Kum 6 zet a liam hnuah ṭum khat ka haw tur chu; hmana kan inhmuhna Sumo Counter ah khan ka hmu leh hlawl a, ka chuanna Sumo ah chuan Bag a rawn hlang a, min hmuh ve loh vangin ka lo en reng a, tun hma aikhan a vun a thim deuh a, a hmel erawh a danglam lo, khabe hmul a zuah tawh vangin a lang upa ve deuh tih chauh a ni. Ka en reng lai chuan Driver hnenah a Seat tur a zawt a, chuta ka lam a rawn hawi nen chuan kan inmelh fuh ta chat a.




A mitmeng mawlh chu! Hmana ka luanliamna ngei kha. Chutah, mawi fahran hian min rawn nuih a, a chhan chu; a hrethiam a ni.



"Ṭhiannu, ka Seat turah i ṭhu a nia" nuisanga a rawn tih chuan ka tawlh phei ta vat a.





- A TAWP TA -

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)