DUHLAI DAISY BY Ahmangaihi Violette Khiangte

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

DUHLAI DAISY BY Ahmangaihi Violette Khiangte

Unread post by Ngaia » September 1st, 2019, 10:01 am

5uh61o8x.jpg
5uh61o8x.jpg (21.98 KiB) Viewed 10852 times

DUHLAI DAISY

(COMPETITION 2019)

December thla tir chauh a la ni na a,thlasik khua chu a vawt vur tawh. Aizawl ka thlen aṭangin ni li a liam tawh a, he khawpui hian ka thinlungah hmun thuk tak a chang a ni. Shillong a seilian ka ni a, ka pa hna vangin tettê atanga awm kan ni nghe nghe, chhungkua pawhin vawi engemaw zat Aizawl chu kan kal tawh a, tun ṭum erawh kan kal chhan a dang deuh, nupui ka neih dawn vanga kal kan ni.

Ka nupui tur chhungte chuan ngen tak têin min ngen a, "Mo tur pi leh pu te an la dam ve ṭawk ṭawk a, khawi ilo a zin chhuak thei zia zâng an ni tawh si lo a", ti a min ngenna chu tih hlawhtlin sakin, inneih chu Aizawl lamah tiin thu kan ti tlu ta a. Shillong-ah chhung hnai tak kan nei lem lo a, Aizawlah chuan kan chhungte tam zawk an awm ve bawk nen; kan tan pawn a rem chang zaw mah awm e.

Tichuan kan chhungkua, ka farnu leh ka nu leh pa bakah kan ṭhian tlema zawng nen inneih hma kar khat zet ala awm tihah Aizawl chu kan thleng chho ta kha a nia.

Kan thleng chho ta chu le! Tum lawk leh beisei ang reng rengin ka khawsa thei ta lo, ka thianpa Dantea ka hmuh rual rualin ka theihnghilh ta emaw ti a ka ngaih kha a rawn lang leh ta a ni.

Thla êng te, romei zam te leh thil mawi te changlo pawh hian lung an lo ti leng thei vek mai; mahni kal lo mahila hawina lam apiangah rilru a vak chiam zel a, thinlai mu hnu a kai tho leh a ni hawt e. Ka theihnghilh ta emaw ka tih; ka la theihnghilh lo a ni tih ka hriat chhuah leh tak nu kha thinlaiah hian a thar leh thin.

Nupui nei tur e ti lovin ka ngaihzawng hlui ngaiin ka kûr tak ruai ruai a, innei tura han inbuatsaih pawh rilruah a lang meuh tawh lo, chhung rilah hian ka tawt ru ṭeuh mai a ni.

A ninga ni chuan ka tuar thei ta ngang lo a,dawhkana ka nau pangpar khawi chu lain; ka inkhalh chhuak ta nge nge. Ka inngaihtuah harh meuh chuan kawng chanve aia tam mah ka tlan tawh a, "A tawpna tur a ni tawh tho alawm" ti a mahni inthiam chawpin ka tlan ta zel a.

Secretariat ka tlan pelh dawn chuan chiang zetin mitthlaah a rawn lang a, kha mi ni khan ruah a tla seng seng a ka putea car ka khalh chhuak a nih kha, Daisy leh anu chuan ruahsur hnuaiah Taxi an lo chang a, va din ka châk a; ka châk tluk zetin ka huphurh si a; mahse, ka tlan pel thei ngang lo ka ding ta tho a, mak tih hmel zet hian min en a, a sam te chu a huh hnianga chutah a biangsum khuar seka min nuihin "Andria" a ti sap a a duhawm tak zet.

"Lo chuang rawh u, ka va thlah ang che u" ka tih chuan phur zetin ka lam a rawn pan a mahse...

"LALREMFEL" vin ṭhata tih paha a nu'n a pawh let sawk kha; ka mitthlaah chuan ala chiang ngang mai, thinrim ṭeuhin ka tlan san ta kha a nia. Khatih hunlaia ka thinrimna te kha a rim chenin ka la hre thei hial mawle!

Ka thil ngaihtuah chhuah te avang chuan ka nui chhuak hak a, hun hlimawm tak chu a ni hauh lo; mahse, khang hun kha ka nuna a tel ve lai a ni miau a, a hlimawm emaw a lungchhiatthlak a nih pawhin ka tan a hlutna a dang chuang lo.

Aizawl khawchhung chu rei tlan ni hek lo le, zing dar ruk chauh niin Traffic jam tur a awm loh lai a ni bawk a; kârloah ka kal tumna chu ka thleng a, a pangpár ngainat ber Gladiolas ka ken sak chu ka han hnim vang vang phawt a, hetiang réng hian ka lo la ngaiin a lakah hian ka lo la luangliam a ni tih pawh ka hre lo.

Ka nupui ni mai tur vang khan hun engemaw chen chu amah ngai lo leh hrechang lo lêkin ka awm a; mahse, a saseh ka han thlen dawnah meuh chuan ka thinlunga amah ka hmangaihna meisî kha a rawm zâp alh leh ta a ni.

Car aṭang chuan ka pen chhuak a, zing hma tak a la nih vang nge ni a reh ṭhiap mai! Hmun zawl laiah te chuan Tlaizawng pâr an vul chêk chûk a, christmas a hnai tak zet tawh tih a lan tir niin ka hria.

Thlasik boruak zet chu zingkarah ngat phei chuan a vawt tawh ngang mai! Thaw khu hlat hlat chungin ka kal tumna chu ka pan zel a, min chhawntu rêng an awm lo, a run tur ting hian thli chu vawt zetin a thaw heuh heuh reng a, chu chauh chu ka lampantu a ni.

Ka pangpar ken chu ka dah thla a, ka zam deuh tlat mai! Chu chuan ka nuih a ti za bawk, a hnaih a ka awm chang chuan ka zam ve viau ṭhin a nih kha.

"Min lo beisei hauh lo a ni tiraw?" chhanna ka dawng lo a, ka ipik ṭûn ringawt.

"Karleh mai hian nupui ka nei dawn asin" tehtawpa a hre ve vek tawh ang chu: midang ka ṭawng ngaithla emaw min hmutu an awm em tiin ka hawi kual leh zet a, tumah an awm lo hlauh e.

"Nupui ka neih hunah chuan ka lo kal thei tawh lo ang a, ka rawn hmu thei tawh lo ang che", ring deuh tak chuan ka han ti a, âtthlak viau mah se ka rilru a thil awmte hi ka sawi chhuak lo a nih chuan ka hrehawm tlat.

"Hmeichhe ṭha tak ka tawng a, ani chu nupuiah ka nei dawn asin mahse, i laka ka thutiamte kha ka la hre reng a ni tih hria la ka duh, ka phatsan che angah chuan ngai lo la, ka la hmangaih reng che tih hi hria ang che aw, vawiin thleng pawh hian ka la ngai lutuk che", ka âw chu a zawi hle a, a tawp lam phei chu a ri che che chauh a ni.

Ka thil beisei ber pawh ka hre lo, min pawmpui a ni tih hriatna tur engemaw tal ka beisei te pawh a ni mahna.

Ka ke hit mup mup avangin ka ngaihtuahna aṭang chuan ka harh hlawl a, ka piah lawka ngawi renga hmeichhe lo ding chuan min ti hamhaih ngei mai! Tudang ni lovin ka nupui ni mai tur Rempuii a ni. Engtia rei nge chutia a lo din tawh ka hre hauh lo, vawt tiin a khur hlak hlak a, engtin nge ka awmna te pawh a rawn hriat zawk ni?

"I chhuak kha ka hmu che a, i tlan chak bawk si a Taxi-in ka lo ûm che a", tiin ka rilru hria ni mai âwm hian min chhang a, ka lo bu nghat a, chutah min rawn panin ka awmah a rawn bei thlawp a.

"Daisy hi a boral tawh tih hre lo in ka lo thîk thin lutuk asin", ati sap a. Ni e, Daisy boral thu hi ka sawi ngai lo, a boral tawh tih hi kei ngei pawhin awih harsa ka la tih avangin ka sawichhuak ngai lo a ni. Rempuii chuan ka hmangaih zia a hriat vanga thîk pawh a ni ngei ang.

A thlana pangpar dahsak chu a tana ka tih theih chhun a ni ta mai sia le! Rempuii chu ka kuah vawng vawng a, he nula hi ka hmangaih em tih ka hre lo mahse, ka tana hmeichhe hlu tak zawng a ni ngei mai, kei zu ngawlveia thi mai tur min chhan chhuak a, ka tana Pathian vantirhkoh min pek a ni ka ti lo thei lo.

"Tunah chuan engkim min hrilh tawh rawh, a chanchin hi hriat ve ka duh a ni", tiin ngenngawl takin min en a.

" A ṭangkai lo emai", ka lo ti a.

"Min hrilh duh loh chuan ka thinrim viau dawn a nia", ka nui chhuak hak a, a van naupang chhia e âw! Hrilh loh avanga thinrim tum tu chu hrilh pawh ni ila a thinrim phal loh nachhan tur a awm lo, hrilh loh ai pawn a thinrimthlak zawk daih mai thei, a chhan chu ka thil hrilh chuan a tina zawk hial thei si a.

"Thil ṭha ber a ni lo ang", ka tih sak leh mai a, a dawh thei bik vak lo.

"Sawi mai mai teh aw", tiin a ner nang a, Chutah a chet dan thlakin min rawn ṭhut hnaih a, ka kut vuana ngunthluk zeta min en takah chuan "awle" ka ti ve ta nge nge.

"Computer science ka zawh hlim khan Aizawla ka putea te tlawh turin ka thianpa ka lehkha zirpui Dantea ka zui chho a, chutah chuan a nia Daisy nen kan intawn ni. Dantea farnu; a cousin a ni a, hmeichhe nu zêm mai ze zawi deuh mai hi a nia, tisen nei ve ser sawr lo mah se hmelṭha tak a ni. Ka hmuh tirh aṭangin ka mit a la a, ka vei zui em em mai a, ka duh thu pawh ka zêp hek lo, ṭawngkain min chhang ve lêm lo mah sela a chêtziaah erawh min hnar bik lo tih ka hria.

Kar thum vel châmin shillongah ka lêt leh a nuam tihna erawh ka nei tawh lo, Aizawl nula ngawtin rilru a luah tawh tlat a. Shillong chu ka tan chuan khawram ang mai ni tawh hek le; rei rial lovin Aizawlah bawk ka kir leh a. Inbêngbel ve deuh reuhin in te ka luah hrang ve a, Dana te Computer institution-ah chuan instructor-ah te ka ṭang ve ta lâwp lâwp a, Daisy nena kan inkâr pawh a ṭha chho zel a khang hun kha kan hlim hunlai ber a ni.

A unaupa nena inkawp chawt kan ni bawka an inah pawh kan chuangkai ve fo a, mihausa tak an ni nghe nghe. Aizawlah chuan dawr pawh pathum ngawt an nei a, unau hmeichhia ve ve pahnih te chauh an niin, Daisy chu a upa zawk a ni a, anu chu sumdawng mi tih takah a hmel en reng reng chuan fin hmel zet hi a nia, apa IAS retired niin; kei a kara sawrkar office a hna chhete thawk fapa ve mai chu anu chuan min lawm viau lo, kan lenluh chang pawhin min ṭawng el khum zauh zauh fo mai.

Chutiang anih avang chuan an ina len luh fo kha a nawm lohna chen a awm a mahse, kan kar thu erawh a dang chuang lo, kan in hre chiang zel a, ani chu a zaidamin a nun a nêm a, amah a indahsang ngai lo, dâwt min hrilh ngai lo a, midang thusawi pawh a ring nghal mai zel a, hmangaih awlsam tak a ni.

Hun a liam rualin kan induhna pawh a zual zel a, midang mitmei veng viau mah ila thup vek sen ni hek lo le, reilo teah anu beng a thleng thuai.

Nikhat chu zirlai ho theory class ka neih pui laiin a rawn kal a, ka zirlaite hriatah a rawn âng chiam a, a fanu chu ka phu loh zia te, ka hmuh a rem tawh loh thu te a rawn sawi ta piap piap a, ka thinrim na ai mai pawhin ka zahna chu a sosang zawk, tlangvala pumpa nu tling han hnial zut zut chu tlawmah ka la ve ting tang sia, ngawi rengin ka ding tawp mai a ni.

A chhuah tak hnu chuan ka ngaihtuah leh ṭhin a 'i phu lo' min ti kha ka la na em em mai a, ka bengah hian a ri nawn tluk tluk a ni ber mai, ka nu leh pa ten a hmingin sawrkar hna an thawk ve bawk a; kan unau lah chawmhlawm kan awm tawh bik lo, engemaw chenah rual awh loh theih lohna lai te chu awm ve bawk mahsela, kan tettê aṭangin kan duh ang chu kan nei ve thei zel ṭhin a, kan mamawh kan nghei ngai bik lo, chuvang a 'i phu lo' tih thu pawh la na viau ka nih ka ring, kha thu khan ka induhtawkna a kai tho a ni ber mai.

Chuta ṭang chuan Daisy chu ka hnaih leh zual sauh a, an inah pawh ka lêng lui ngat zel, chungte chu anu huat tawk a tling leh em em a, kei lahin nuam ka lo ti ve tum hranga mahse, ka hmeichhe hmangaih tan khan buaina zâkhua ka siam sak mai mai lek a ni tih ka ngaihtuah pha lo.

A nu chuan pawn chhuah a khapsak zui ta réng a, inhmu thei ta rih lo mah ila phone-in kan inbe renga kan inkarah harsa lian a thlen lem lo. A tana ka rilru a danglam lo ang bawkin ka tana a rilru a la ngai reng tho.

Nikhat chu ṭap ṭiauin min lo phone a, inleng a nei hi a lo nia, chupa chu a nu thiannu fapa niin MCS tling thar hlawl a ni a, a nu chuan lo be ṭha viau turin a ti a, an neihtir mai a hlauh thu te a rawn sawi a, a nu-in a duh a nih chuan a pa chuan a aw veleh mai dawnin a hria a.

"Min lo hruai mai rawh, inru daih ila shillong-ah chhuk mai ang," a tih chuan rilru a buai map mai, ka hrechiang ve thawkhat tawh a; dân khatna ngeia pasal neih duh leh inneih hma zawnga mipat hmeichhiatna thila fihlim duh mi a ni. Chutianga inruk tawp mai chu kan buaina chinfel dan ṭha ber niin ka hre thei lo.

"I lungngai hma lutuk a nih kha min ring ta che, ka la dam ve ṭek ṭek chhung hi chuan tuman i duh loh chung pasal an neihtir lo ang che," tiin ka han ṭawng thlamuan ve sasawi a, awmzia erawh a nei tehchiam lo a nia nge a tukah chuan a ngai te bawkin "min ru mai rawh" a rawn ti leh a. kan dinhmun ten a zir lo chho zel a nih tak leh chu thutlukna chu ka siam lo ang tih ka sawi thei bik lo.

Mumbai aṭangin Email ka dawnga ka 'Game Develop' te presentation pe tura sawmna a ni a, chu ta thlan ka ni ve hlauh a nih chuan company lian tak nen inremna siamin an tan ka thawk thei dawn a, ka tan chuan chanchin lawmawm tak a ni. Kal turin ka rilru ka siam a, thla hnih khat vel chu ka cham ngei a ngaih hmel, ka thianpa Dana ka hrilh chuan min lawmpui khawp mai a, kei ai mahin a phur zawk emaw tih tur a ni.

Daisy ka hrilh ve chuan " ka kal ve duh," a ti nghal tawl mai.

"A tih chi loh ang, bakah i chhungte pawn an rem ti lo ang," ka ti a.

"I lo let hun tur pawh i chiang si lo a, i tel lo-in eng tin nge ka lo awm ang i awm loh hlanin eng thil pawh a thleng thei asin", a ti a ka khawngaih reuh khawp mai.

"Chaw lo ei ṭha la i rihna kha a tla hniam nasa a nia, harsatna engpawh i neih chuan min lo hrilh anga rang takin ka lo thlawk haw mai dawn alawm" ka tih chuan a nui hak hak a.

Chutiang thuartham vel chuan kar khat zet chu a liam leh ta a, ka kal pawh a hun dawn ta. Ka kal dawn zan chuan zan dar sawm a ri vel tawh ang tihah tu emaw hian ka kawngka chu a rawn kik karh karh a. Dantea a nih ka ring a, ka hawn hnu erawh chuan min ti hamhaih nasa mai!.

A bag puar ul chu a pawm a, hmanhmawh taka lo kal tih hriat zetin awmhmun kawr leh vawthlep a bun a, sawi mai tur pawh ka hre lo.

"Eng thil nge ni ta?" ka ti bah nak a. Min nuih var varin " ka lo luhkhung dawn che," a ti reuh a, a van buaithlak thin tak em!.

Rei ngial inhrilh fiaha a changa kan inhnial rap rap hnu chuan a ngawi ta daih a, kei a kara min thlahlela min rawn pan lawp lawp chu a zia lo hle mai han tih phal chi ni lo mah sela kan awmdanin a la zir rih tlat lo. Ṭhutthlengah ṭhua Laptop ka khawih lai chuan ka bulah lo kalin chhuatah chuan a ṭhu sawp niai a, a lu chu ka mal lehlamah chuan nghatin at haw lum ham ham a, a pang ka han deh chuan a lo sa vur a.

" I khua a sik a nih hî, damdawi inah kal ang," ka tih chuan a ṭang ṭak mai a " min dah let i tum," a ti tlata a tih luih theih ngang loh.

"Min hruai ve dawn lo tak tak maw?" pangchang zetin min en a, min zui a duh takzet tih ka hria mahse, hnathawk tur ka nia, ani damsamlo chu ka buaipui hlei thei lo emaw a nia nga a tan leh ka tan a hrehawm mai mai dawnin ka hria a.

"Kan hun neih dan tur ka hre si lo a, i dam bawk si lo, hetah min lo nghak mai rawh a theih anga rangin ka lo let ang", ka ti a, a mittui a tling pam mai.

"Ka thil tih lai hi ka hlawhtlin chuan i nu pawn min pawm tawh dawn asin", ka tih chuan a nui a "a tha alawm," a ti sap a. Hmeichhe rilru tluang tak a ni a, tih nat a awlsam ang bawkin tih lawm a awlsam em em.

"Ka chhungte hian kan inneih phal chuang lo ta se kan innei tho ang tiraw?" a ti a.

"Tehreng mai, tuman min dang thei tawh lo ang, ka lo kir leh hunah chuan i pasal ni turin ka lo kir tawh ang, damchhung daih warranty nen" tia ka lo chhan chuan a nui hak hak a, a kutzungte chu a rawn tipir vâ a, ka tiam leh ta nge nge.

Thlamuang zetin ka malchungah chuan a muhil sek sek a, a muhil hmel chu ka en kham thei lo, khuavang naute ai pawn a duhawm hial ang. Dana ka phone a reilo teah Daisy pa nen an lo thleng a, Daisy pawh ka kai tho zui a.

An kal dawn chuan mittui tling pamin min chelh bet tlat a, a pa a chhuak hmasa a, a kal liam ta maw tihah min kuah leh vawng vawng a.

" Naktukah ka lo thlah ve che ka nu'n a remti leh dawn si lo a, tluang deuhin kal la inenkawl ṭha rawh aw, i tan ka ṭawngṭai reng ṭhin ang," a ti a. Ka fawp lo theî lo.

An kal liam hnu chuan ka ruak huai a, in chhung dungah chuan ka tei sek a, ka lo hruai ve mai lo a ni te ka ti rilru leh hnuhnawh a, chutihlai chuan ka phone a lo ri ṭet a, Daisy message a ni.

"Ka hmangaih che, Andria" ka call nghal a, vawi hnih chiah a ri hman ang a-in swiched off nghal hmak, Danan min lo call a, Daisy phone chu a nu-in a chhuhsak tih min lo hrilh a.

"Lungngai suh thianpa, ka awm a lawm i biak duh hunah ka va kal ang a, ka phone-in in inbe thei tho alawm," a tih takah chuan thawk khat chu a veng deuh.

Nguai zetin Mumbai ka thleng thla a, hna lama ka bur nghal char char avangin chhun lamah chuan lunglen pawh a tawrh theih viau mai, mut hmunah erawh ka ngaihtuah reng thin, ka hmuhphak lohah hian hrehawm deuh te hian a lo awm ang em tih te ka ngaihtuah a, ka mumanga ka hmuh ve lah hian a ṭap lai ringawt ka hmu a, ngaih a ṭha zan lo a ni.

Danan min rawn be zeuh zeuh a, bawihi chu a nuin room-ah a kalh khum a hmuh a harsat thu a rawn sawi a, ka ngaihdan a ni lo leh pek kher mai "ka awm hnai a zeng pawh ni hlei lo," ka ti hluk a.

"Nu Rinpuiii hi zawng a rilru a sehhel ve a, awmhnai lo mah la a fanuin a rilru a thlak hma chu a hrem a ni mai, lo lungngai lutuk lo la helam chu kan ṭha a nia," ka ṭhianpa chuan a ti a, kan inbiakna pawh kan ti tawp zui a.

Hun a liam a engemaw chen min lo call loh hnuah vawikhat chu chhun chawlh ka neih laiin min lo call a, Daisy a lo nia; thlakhat dawn a âw ka hriat loh hnua ka han be leh chu ka hahdam huai mai. Room-ah kalh hnan a nih tawh loh thu te min hrilh a, hlim takin min bia a, a titi siam siam a, min ngaih thu a sawi ngun hle bawk.

"Mo kawr tur i lo en lâwk thei ang", ka han tih chuan a au vel chul a, a biangsum mawi tak langa a nui tur chu mitthla in ral aṭangin ka lo khikpui ve suk suk a. Phone chu dah a hun a; mahse, mangṭha tih kan sawi thei lo, keimah zawkin dah turin ka ti ta nge nge.

"Ka lo be leh vat ang che", tiin a dah a, kha kha kan inbiak tawp berna tur a ni tih hria ila chuan a phone call kha ka dahtir hauh lo ang.

Kar a liam a, Aizawl lam chu an reh vawng vawng mai, Dana ka call ṭhin a; a la thei ngai si lo, thinrim ṭunin ka call nawn leh ṭhin a, call back tange pawh min ti chuang lo.

Presentation chu nithum chhung kan nei a, a ti ṭha pathum zingah ka tel bawka, YG company chuan an game develop turin min thlang a, a tukah lehkha pawimawh zawng zawng kan ti fel nghal a, rilru hahdam takin Aizawl lam ka pan thei tawh ang.

Airport-a ka awmlai chuan Dana message a lo thleng a" ka lo hmuak ang che," tih zawng a ni. Ka hlawhtling em tih te pawh min zawh ve âwm ka ti rilru a, ka thinrim ṭun avang chuan ka chhang duh ta lem lo; mahse, lengpui airport ka thlen erawh chuan ka zawng leh du du lawi a.

Kan han inhmu te chu a inla mûk em em mai a, biak lahin a rul tawk lekin min chhang a, kawngtluanin inbe mumal loin Aizawl kan lut a, ka in luah lam pan loin an veng lamah a tlan nghal zat a, an ina min hruai a tum a nih ringin ka zawt ta bik lo.

Daisy te kawta a din takah chuan ka nuih suka, tha tho fê-in ka chhuk a, ani erawh lei rah chim hlau ni awm hrim hian a rawn kal a, ka tei thei der lo mai. Inah chuan ka lut thawr a, mi an lo awm huang a, ka tîm leh deuha kawngka lam ka hawi chuan Dana chuan min lo zui hlek lo lehnghal a.

Lu thak lo pui hiatin ka hawi kual thuak a, kil khata Pi Rinpuii lo thu ngui bur chu ka va hmu a, chutah tleirawl te hi ka lam pana rawn tlanin min rawn pawm ta thlawp a.

"Awii! ka û ,hei i nghahhlelh em em kha alo haw tawh asin, engtin nge ka lo chhawn ang ka û?" ti a ṭap chunga ka káwnga kuahtu chu Daisy nau Sangtei a ni. Engmah ka hrethiam lo, ngaih erawh a ṭha lo takzet.

Ka kawnga a kuahna kut chu phelh sakin "khawnge i u?" ka ti a, min chhang ta lo chuan a insût hlawp hlawp a, a khawng ti tih der mai. Midang ho chuan lo bawihsawmin room-ah an luhpui thuai a, kei erawh hamhaih zetin ka la ding ta reng, ṭhutkhawmna pindan a thlalak leh pangpar intarte ka hmuh chuan thil awmzia ka man ve ta kuar mai.

"Ni lo, ni lo nang chu nilul lo e," ti mawlh mawlhin Daisy room lam panin ka pen zui pâwk pâwk a, ka hnungah Dana'n min ûm bawk a.

A hmel hmuh tur rêng a awm lo, ka mit sulh sulh ni maiin ka hria, khumah chuan ka ṭhu thla hnawk a, "Engtin nge a thlen theih," ka ti tham ṭuak a.

"Doctor chuan thluaka khawsik lut a tia, a rang lutuka kan vaiin min ṭhawng asin, a tuk maiah presentation i pe dawn si a, ka rawn hrilh thei ngang lo che a ni, a pawi ka ti lutuk, bawiha," ka ṭhianpa chuan a ti a.

Chutihlai chuan Sangtei bawk kha ka lo lut a, ka bulah chuan rawn ṭhu-in ka kut vuanin a ṭap rawih rawih a, inhnem tur chuang kan awm lo, ka mittui dang tur pawn chakna ka nei bik lo a ni.

"Mangṭha tal pawh i ti dawn lo maw?" tiin ka rum chhuak hrawih a.

Midangte inthlah danin a ruang tal pawh duat taka kuah chungin thlah ila, a nih loh pawhin a nat lai te khan a kiangah awm tlatin bawihsawm ve ni ila chuan tiang em em hian ka na lo tur.

A damlo a ni tih pawh ka hriat miah lohin ka hmangaih ber chu thih ngamin a na a, kei lah chu amah hnem a thlamuan tur tak ngial paw'n a kiangah ka awm si lo, "Min hruai ve mai rawh," a tih lawm lawm lai te khan engah nge ka lo hruai mai loh lê, a pawi tih hian a sawi fiah zo lo ang.

Nitin ka ngaihtuah a, zantin ka mumangah lo kalin duat takin min kuah thin, a nui a; mahse, a tak a ni si lo. Zu ina mu leh mal nei lo lêka ka ruih lai pawhin ka theihnghilh ngai lo asin, ka mit ka men hian chiangtakin a hmel ka hmu a, ka mit ka chhing a, a fiah zual sauh ṭhin. Â lo chauhin ka awm a ni ber e.

Thil ka ei thei lo a, ka mu thei hek lo, ni khatah kawng khar chu vawi eng emaw zah hawngin ka kalh leh ṭhin, khami zan ang khan a thawmhnaw bag pawm ṭuna a lo kal ka la beisei fan a ni.

Mahse, ani chu duhthusam mai a ni ta, ka duhthusam puitling zo ta lo kha, ka suangtuahna a ni a, he ka thinlunga la cham ve ta reng hi, ka mumang a ni a; ka ṭhanharh ruala thamral ve ṭhin kha. "

Rempuii chuan a kut vawt thler chuan ka biang a rawn khuap a. A mittui a luang ngiai ngiai a.

" A van khawngaih che em! Andria"

" Thil ṭul lo zet ka hrilh che a nih hi," ka ti hap a.

"Chutiang sawi suh, engkim min hrilh avangin ka lawm zawk," a hmel chu a thutak ngang mai. Thlan lunga Daisy hlimthla chu enin "a hmelṭha hle mai," a ti sap a. Ka pangpar dah chu la-in thlan lung ngheng chuan a tung ṭha a.

"Enteh Daisy, Andria nen hian kum khat kan inzui ve tawh a; mahse, tun thlengin a la hmangaih che a nih hi, a ṭawngvaih pawn i hming a lam ṭhin a, ka khawngaih lutuk asin, tunah a hnehah i awm thei tawh si lo a min pe tawh mai rawh aw, a hlim theih nan theih tawp chhuahin a tan nupui ṭha tak nih ka tum ang".

Rempuiii kut chu vuanin "haw tawh ang," ka ti a, a la duhtawk mai lo.

" I pawm a ni tih entir nan engemaw tal chu i ti ang ti raw?" a la ti zui hram a.

"A atthlak lutuk," ka lo tih sak a. "Nangpaw'n i tih ve tho kha aw" a tih duh lek chauh. A kut chuan ka biang a rawn khuap leh a.

" Tun aṭang chuan eng harsatna pawh tawk la, nangmahin tuar tawh suh ang che, i tan ka awm reng a ni tih hria la," a ti a.

A chang chuan mite'n thu ho tê an sawi a; mahse, chu chu tu emaw thinlung ruak tan a lo tawk chauh ṭhin, he hmeichhia zet hi zawng a danglam a ni.

"Lawmsangkima elaw?" tih ri chuan beng a verh zar mai, kum tam liam pawh ni se chu âw kher chu ka hai ngai lo ang. Pangpar pawm ṭunin nutling pathum hi an lo phei mek a, an chhungte thlan chei tur an ni ngei ang, a laia kal chuan kan lam a rawn pan ding nal nal a.

Rempuii chuan, "Tu nge a ?" a rawn ti sa sa a, "Daisy nu" ka tih chuan ka âw a ṭang pawn ka ngaina lo tih a hriat hle. Rempuii kutah chuan kaiin kal pelh mai ka han tum a.

"In be lawk teh ang," a rawn ti khauh a, Rempuii chu motor-a min lo nghak rih mai tur a tiin Pi Rinpuii nen chuan kan indin chilh ta ran a.

"Han sawi mai dan tur pawh ka hre lo; mahse, ngaihdam ka dil ngei che a ngai a ni," a tih chuan ka beisei loh lam daih a ni.

"A ngai kher hleinem," ka ti tawl a, a laka hawihhawm chhuah hi harsa ka la ti tlat.

"A.. a pawi ka ti tih hian sawi fiah zo se ka ti khawp mai, nang leh Mambawihi hrehawm reng rengin ka siam che u a, tun thleng hian ka tawrh phah a nih hi," a ti a, a insut hraih a, a khawngaih thlalaawm reuh khawp mai, tun hma ang lo takin a taksa te chu a cher kuam tawh a, a mit khur te tlain a tar ve bawih a , a rilru leh taksa zawng zawngin a tuar ve a nih ka ring.

"Ngaihdam che harsa ka tih zia i hre kher lo ang mah se i rilru nawm phahna tur a nih chuan ka ngaidam a che", ka ti ve ta a.

Rempuii min nghahna lam chu muang changin ka pan a, ni chhinchhiahtlak tak niin ka hria, amah Daisy ngeiin helai hmunah hian min lo hruai khawm te pawh a nia nge.

Motor-ah chuan ṭhu lutin ka thaw chhuak ham ham a, ka hahdam huaiin ka hria, Rempuii chuan ka darah kut a rawn nghat a.

"En teh, i bawm hnawk deuhah hian hei hi ka chhar a", tiin a thil ken chu a rawn lek chhuak a. Thla leh Arsi lem awmna key chain hi a lo ni a.

Lehzel chuan leh!...Tukin teh reng chu eng ti zai zia nge ni? Chu key chain chu hun rei tak ka dah ṭha tawh a, a bo emaw ka tih, a awm tih pawh ka hriat tawh loh a ni.

"Daisy min pek a nih kha," ka tih ruala a meng kawk chu ka hmu reng, mak ka tih tak turin a rawn che zawm a, ka kuta car chahbi ka ken lai chu min laksakin key chain chu a vuah zui mawlh mawlh a.

"Hmang ila pawi i ti lo a mi?", ka ti hap a. Min nuih seih a "Engvangin?" tiin min zawt let a.

"Daisy min pek a ni sia," inthlahrung takin ka lo ti a, a nui ver ver mai.

"Pawi ti lo e, ti khan Daisy nena kan pekah che ngaih hmiah mai rawh, kan inneih tur min pawmpui tih entir nana min pek a nih kha," a ti a. Ka lamah pawt hnaiin ka kuah ta vawng vawng a.

Khang hun harsa kha tawng lo ila Rempuii hi ka nunah a lo lut kherin ka ring lo, eng anga harsatna nasa pawh tawk ila kan tan a ṭha turin khuanu'n rem min ruatsak leh ṭhin tih hi a tak ngeiin ka tawng a ni.

Tu emaw chuan ti hian a sawi a, "Mihring te hi kan nunah thli pui lo tlehin lungngaihna chhum a lo zing ṭhin a, kan kawng takngial pawh kan hmuh theih loh hun a thleng ṭhin, chutih hunah chuan kawng min kawh hmuha nun khawnvar min chhit saktu tur kan mamawh ṭhin," tiin. Daisy chu nunhlui niin hlimthla chauh a ni tawh a, ka tan khawnvar min chhit sak thei tawh lo, chutiang hun a lo thlena ka kawng min en tur leh ka tana khawnvar min chhit sak tur chuan ka nupui ni mai tur Rempuii tluka duhawm hi ka tan an awm thei tawh dawn chuang em ni?.

Inneih ni chu a lo thleng ta, Biak in kawngka a mo, a kawrfual var ha a lo kal mek chu ka en a, ka lung a van awi kher em! Mo neitu a zawnga hlim ber ka ni hial ang. Ka bul a lo thlen chuan eng dang sawi lovin ka lo kuah ta vawng vawng a, mipui chu an lo thum hak a, ka zak teuh si lo.

Tunah chuan ka nupui hmangaih tlat tur leh a tana pasal ṭha tak ni turin ka intiam thei tawh ang.

( Min lo chhiar chhuah sak avangin ka lawm e) - Ahmangaihi violette khiangte



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)