SENDING MY LOVE TO HEAVEN - By Ahmangaihi violette khiangte

Moderator: writers

Ahmangaihi violette
Posts: 148
Joined: February 1st, 2020, 3:14 pm

SENDING MY LOVE TO HEAVEN - By Ahmangaihi violette khiangte

Unread post by Ahmangaihi violette » March 22nd, 2020, 3:52 pm

SENDING MY LOVE TO HEAVEN

(Based on true story)

by Ahmangaihi violette khiangte






"I hun lola awmtura vanneihna sangtamtak i tawn turah hian ka tel velo ani" harsa tizeta thawkla kawk kawk chung chuan a ti sap a, ka mittui a hnam sawk mai.




"Nilo e, Gordon i dam leh vat dawn alawm, doctor pawn i ṭha chho zel atih che kha, ṭawngṭaipuitu tam tak i nei tih hria la, thlaphang reng reng suh aw, zaninah pawh kohhran hoin i tan ṭawngṭaina hun an nei dawn asin" a chal vawt thlerah chuan ka chul a, lehlamin a kut lianpui lumna neilo zet chu ka hum ran bawk.





Engemaw chang chuan hrehawm taka damreng aiin Thihna chu atan a hahdamthlak zawkin ka ring ṭhin mahse, engtikahmah hmu leh tawhlo tura thlah erawh ka zuamlo; ka hmangaih em em si a, a telloin engtin nge ka awm theih tehlul ang? 'Brain Tumor' ka haw takzet, he natna ṭihbaiawm zet hian nitinin ka hmangaih nunna chu a eiral mek a ni.





Awmbawr sep kang dawrh dawrh khawpa thawk ala leh kawk ṭhin chu hmuh hrehawm ka ti a, a hmuhloh laiin mittui ka hru zauh zauh reng, ka ṭawng thlamuan ve tak nain kei hi ani beidawng chu, a ṭhatchhuah leh a beiseiawm tawhloh thu Doctorin anu hnena a sawilai ka hria, phailam pana an beidawn hnuah an rawn haw pui a, a Tumor chu alo nasa tawh a, enkawl damtheih an beisei tawhlo a ni, Pathian thilmak tih chauh kan beisei tawhlaiin engmah hrelo ang maia "I dam leh vat dawn" tia ka lo ṭawng thlamuan chu ka chhungrilah ka tawt ṭeuh ringawt.





"I ṭap leh tawh ami?" a tih chuan a lam ka hawi vat a, a mit alo chhingchial a, anui suk, a mitkhur tla dawk te ataksa tihrawl nalhtak ṭhin cher ta kuam te chu hmuh hrehawm ka ti ngawih ngawih a, ka kalsan phal der chuanglo, thla thum dawn damdawiinah an awm ta a, thildang tih ṭhulh meuhin ka vil ve chawt bawk.





"Big girls, don't cry" tia a phun sup chu ka nuih sak a, a kut vawt riai chu ka biang ka deh tir vang vang a, amah vengthawng hauhlo a ṭah chhuah hawm hawm ka chak takzet, ka thawl phah hawkin ka ring.





"Aremruat, i duh chuan va let tawhla, ka lo awmpui ve tawh ang" Cabina rawn luhpahin kan Pastor farnu Gordona nu Nu Zopuii chuan ati a, eitur neuh neuh arawn khai chu min pe nghalzat, zing ka thawh velehah Damdawiin lam ka pan nghala engmah ka la ei hauhlo na chu ril a ṭamlo kher mai.





"Lokal lawk teh" tia min hui zauhin Nu Zopuii chuan thlanglam tukverh lamchu a pan a, ka zui ve nghalthuai.




"Naktuka, Zamtea te chhung an haw chho dawn a, an rualin i haw ve duh em?" Gordona hriat hlau takin a ti sa sa a, ka rilru a buai map, thla khat dawn Aizawlah ka cham ve ta a, chhungte lakah leh school-a ka thawhpui te lakah pawh a inthlahrunawm tawh lutuk mahse, Gordona kalsan chu hreh tak tein ka hreh lawi bawk si, ka hmel a hmuhloh hlekin min zawngruai reng a, anu leh keima chaw pek chiah a eiduh bawk, anutei leh a cousin te ho phei chuan an pe thei derlo a, intihfai leh inthiar vel chu pakhat chauh tan a buaithlak bawk nen nilengin ka ṭhutchilh ve chawt ṭhin a, tlailamah a muthilh laiin ka hawsan leh mai ṭhin.





"Ka hrelo le, remchan chu a remchang viau a mahse.." saisira min hnungchawn zawnga Gordon-a inlet ṭalh ṭalh chu ka melh zauh a.





"Ee...ngaihtuah duh reng reng suh, han haw chho phawtla, duhleh tha tharin i rawn kal leh zawk anga i chhungte duhdan pawh ani tawh zawk ang, keini chu hei hmasawnna em em awmlo mahse, eng em kan tih bikloh hi, ngaihṭha deuhin haw chho rawh" a ti sap sap a.




Pawnah chhuakin U Zamtea kan khawpa chu min biaksaka, Gordona muhil bam chu thlirin ka ding khawng reng, a puansin a lengthla sawt sawt a, rangtakin ka sin ṭhattir a, a chalah ka fawp vang vang a, ka mittui aluang nghal zawih zawih. Ka awmloh hunah min zawng leh ruai anga, chutih hunah chuan ka duat leh bawihsawm phaklohna hmunah ka hawsan tawh thung ang.





Nu Zopuii nen chuan kan titi a, kan khua lam chanchin ngawt kan sawi a, Gordona pu Nu Zopuii Nuṭapa hi kan khuah Presbyterian Pastor a ni a, an mahni hi kan khawchhuak an nih bawk avangin an pem chhuahna rei deuh tawh mahse, kan khaw chanchin chu sawi tur chu ala ngah viau.




Gordona muhil a rawn harh chuan inthiar a duh thu a rawn sawi a, rangtakin Nu Zopuii nen Bathroomah kan zawn phei a, keiin a ke lamah ka chawi a, Nu Zopuiin a zakhnuaiah kuahin a pawmkang bawk a, chutiang chuan harsa lotein Bathroom kan luhpuia, kan ṭhutfel ṭir hnuaah ka chhuahsan a, khuma kan mutfel leh hnu chuan Doctorin rawn checkin damdawi lei ngai te a ziak a, Canteen ah leiturin ka kal nghal nal nal.





Tlaiah chuan a cousin leh ṭhiante hoin an rawn kan sap sap a, Gordon hi ṭhian ngaina tak leh ṭhenrual kawm thiamtak ani a, kantu neuh neuh pawh a ngah ṭhin hle a mahse, Doctorin chim luih luih a phalloh vangin a inchhawk te tein anlo lut a, a ṭhiante an hawfel hnu chuan a muhil leh siai siai a, a nu unaunu Nu Sangbawihi a rawn thlen ve tak bawk avangin a muthilh laichuan hawsan chu ka rilruk a, a men laia haw ka tum chuan a phal leh dawn hauhlo tih ka chiang viau, chuvangin ka haw duh chuan a muthilh lai ka chuh hram hram ṭhin.





Bazarah ka mamawh te ka lam kawi a, ka innghahna ka Patea te in ka thlen chuan khua a tlai viau tawh. "Aremruat, i duhleh inbual hmasa phawtla, i inbual zawhah chaw kan eidawn nia" ka patea nupui Nu Kimin alo ti a, an In hi Aizawl ka kal apianga ka innghahna ṭhin a ni a, min duat em em a, inchhung chet pui hman miahlo a Damdawiina ka tapchawt pawh min sawisel chhin eihlo a, chu ahnekin min hrethiam em em a, Damdawiin min kalpui changlah a tam, Gordona chhungte hi an mihriat chian leh kan khawchhuak ve tho an lo nibawk nen kawng engkimah min support em em reng a ni.





Ka inbual zawh chuan Gordona Missed call alo awm leh ṭeuh tawh a, a harh veleh minlo call tih ka hrethiam nghal, ka call let vata, reipawh Ring-lo in a lo la vat.




"Ka muthilh laiin i haw ziah â" aw zawizet hian a rawn ti a, ka lo nui suk.




"I harhlaia haw i phal ngailoh kha aw" chhuahchhal awka hian ka chhang a, ka nui ve tho tih ka hria.




"Vawin chu ka ngai lutuk che, ka harhin ilo awm tawh silo a, min tlanbosan emaw ka ti hman a" a rawn ti zawi sup a, ka nui tawi tak mai, naktukah hawsan ka tum tih hriasela engtin tak ngai ang maw? ka chhungrilah inthiamlohna ka nei ru nghal ṭeuh.





Doctorin phone hman a phalsaklo a, chuvangin reitak kan inbe ngailo, Phone hman chuan amah ah harsatna a siam thei a, chuvangin min rawn biak chang pawhin ka dah tir leh vat ṭhin a, insum erawh a harsat ngang mai, a khat tawkin min rawn call leh ṭhin a, a chang phei chuan a nu zawk biain a sawiduh ka zawhtir tawp mai ṭhin.





"Pate, naktukah U zamtea rualin haw ka tum deuha" chawi eilaiin ka chhungte chu ka hrilh a, min pawmpui zetin Pate Chhuana chu alo bu nghat a, "Chutia nangberin i zuam te chuan aṭha a lawm, i chhungte pawn an mamawh ve tawh ang che, hetah tih theih tak tak a awmrih chuanloh hi" Pate Chhuana chuan lo ti a. Zanriah eikham veleh ka Nu Phone-in ka hrilh ve nghal.





"A zia deuh em ni? helam chu ngaihtuah kan ngailo ania ilo inthlahrung te a nia nge" ka Nu chuan a lo ti var a, ka hnuk a ulh ṭeuh mai, ka nu hi chuan min hrethiam em em a ka tan chuan ṭhian ang mai niin Gordon nen kan inzui tirh aṭangin kan chungchang engkim ka hrilh vek ṭhin a, Gordon a natna a hriat pawhin min ṭahpui hial bawk.





Ka pa thung chuan "Lo haw kha a ṭha, inngaizawng mai innia khatia lo zuk awmchilh rawt kha a mawilo, i thawhpuite lakah pawh a zahthlak" a lo ti nghut a, a thlirna lam aṭang chhuan a dik ka ti viau tho mai.





Ka mutdawnah Nu Zopuii ka Phone leh a, an chanchin ka zawt a "Tunah chuan a muhil rih a, lo call che a tum reng a, a Phone ka thuruk sak a titau chungin a muhil ta anih kha, ngaihtuah duh reng reng suh chanchin kan inhrilh zel dawn a lawm" alo ti damthlup a, kan inbiak zawh chuan khumah ṭhingṭhiin ka ṭawngṭai a, Gordon a tan nitin vawi thum tal ka ṭawngṭai ṭhin.





Tukṭhuan eikhamah Uzamtean min rawn lama, A nu kum upa lam tawh nen chauh an ni a, ka thawmhnaw Bag te min Load felsak hnuah a car hnungah chuan ka ṭhu lut a, khawpui chhuahsanin kan tlan ta vang vang.




Ṭawngṭaina hmun kan tlan pel awrh tihah phone call ka dawng a, Gordon a hnen aṭangin a ni. "I haw ta maw?" a rawn ti zawi ruih mai.




"Umm..tukin i tho nuam em?" zangkhai theiang ber turin ka lo ti var a, a rum nghut ri ka hre zuizat.



"Ka ṭhalo..." titau tih hriatzet hian a rawn ti nghut a, ka lo nui ringawt. A damloh aṭang hian a thinchhia a, ho tete ah a titau ṭhin a mahse, a natna vanga hetiang mizia hi nei a ni tih ka hriat avangin ka hrethiam em em, midangin chaw emaw damdawi pek an tum phei chuan a lo vaithlak sak tawp mai ṭhin, hetiang nghut nghut anih tak vang hian a Nu ngawtin a awmchilh rawt mai thin bawk.




"Ka lo let leh vat dawn a lawm, tihtur ṭul te ka han ti anga, fel deuhin lo awmla thil te lo eiṭha la, i fel viau leh ka lo chhuk leh hma a nimai" ka tih chuan a ngawi vung vung a, a hmel awmdan tur ka mitthla a, rum deuha mengin a hmui a petsawi ngei bawk ang. Naupang chhia zeta treat te hi angai ta ṭhin a, a damṭhat lai nena a mizia chu dang tak ani tawh.





"I lo chhuk duh tawh pawh ka ringlo"



"Chhuk leh dawn chiang lutuk, i rinaia hma pawn ka lo chhuk maithei a sin"



"Ka thih hunah chauh i rawn chhuk tawh ka..."



"Gordon.." ka lo ti vin ṭhat a, a ngawi nghal hmak. "Enteh Gordon...i rilru tihnat ka tumlo, ka lo let leh vat dawn a lawm, fel deuhin lo awmla, damdawi eiduhloh te kha lo ching tawh miahsuh aw, phone aṭangin ka lo be ziah dawn che.." ka sawilai mekin phone chu a off hmak a, a titau laklawh tlat, Phone hman rei a tan a ṭhatloh avangin ka call duh ta rihlo a, ka thlen hunah ka be tawh mai ang chu.





U Zamtea te nufa min biakna ka chhang zeuh zeuh tihloh chu ka ṭhu ngawi kara, ka chhungril tawt zet chu au vaka veng hawk thei nise ka ti, tukverhah chuan dakin ral hlataka tlang pang ding ngirkhup lam chu ka thlir vawng vawng a, tlang chung maia van boruak thiang ṭha zeta pawl raih te chuan a tilang nalh zual a, lung a tilengin nunhlui min hriatchhuah tir a, khang nunhlui Gordon ka nuna a rawn luh aṭanga vawin ni kan hmachhuah dan zawng zawng te kha.





Gordon ka hmuh hmasak ber chuan hriat ngailoh mikhual khawpui aṭanga lokal, tlangval hmelṭha zet leh inkhaithli thlarh mai a ni, a landan hrim hrim chu a faisar bawk, ka School thawhna compound-ah rawn tlanlutin a Bike a ṭanga a rawn chhuk chu chiang deuhin ka lo en a. A Helmet khum a pelh chu chhelo tizetin ka lo thlir bawk, mitmeng fiahzet leh ha nalhzet aneih tih pawh ka vawikhat hmuhna ah ka hrethei nghal, ka lam rawn hawiin a rawn nuisang.




"Pu Ramtea aikal tur ka nia" mitmeng damthlupa min en chungin a ti a, Pu Ramtea chu kan Senior Teacher niin thla hmasa mai khan Stroke vangin damdawiin an pan a, a rawn haw hnuah pawh a ke a hman hleihtheihloh vangin a aiawh tur a rawn ruai ta anih ka ring.




"Lo lut rawh, midang an lo la thlenglo a, an lo thleng ṭep ang" ka lo ti a. Pu Ramtea dawhkan chu ka kawhhmuh a, phurzeta a ṭhu thauh chu ka lo en ran a, henglaiah ka la hmuh ngai awm reng reng ka hrelo.




"Gordon ka nia, Gordon Zothantluanga" ka lam hawiin a rawn ti a "Aremruati" ka lo ti leh var. Midang an rawn thlen chuan chibaiin a hming a lo hrilh nghal zat zat a, a inti polite khawp mai a, ka lo nuihru tet tet ringawt.





Mathematics Class a chang a, a nikhatni aṭangin thawhpui te leh naupang hoin an ngaina nghal em em a, a insawi danah kan Bialtu Pastor Pu Sanglura tupa niawm tak a ni, a nu pawh ka nu ṭhianhlui a ni nghe nghe a, kan khawchhuak niin an pemna a reideuh tawh avangin kan khawlamah an rawn kal khat hle thung a, a puin a rawn bial tak avanga rawn kal leh chauh anih thu a sawi bawk.




Ahnua ka hriat leh danin Vety Doctor zirchhuak a ni a, hna ala hmuh mai rihloh vangin a pu Pastor Sanglura chuan kan zirtirtu Sir Ramtea aikal turin alo chah chho ani awm e, inkhawmna ah pawh kan inhmu ta fo a, biak phei chu kan inbe ngai lem hleilo a, ral aṭangin kan innuihsuk suk ṭhin, Solfa a thiam viau mai bawk a, a lo awm aṭangin kan Biakin Keyboard a chang chawt a tihtheih, kan khua thingtlang khaw lian ve angreng takah chuan reilo teah a tlangtla nghal der mai.





A hming aimah in 'Pastor tupa' tiin miin an hre zawka, a School kal lam leh hawlam naupangin an zui dul dul ṭhin, han bia ila zangkhai vahin minlo chhang a, a hmel hmuh a hahdamin a mitmeng adamthlup reng a, a ṭawng ngaihthlak a nuam hle bawk. Nula lamah atla na a, tleirawl thlengin Star tu a nei ṭeuh tih ka hre bawk, a thawhpui te ngeipawn a ruk tak chuan kan mil viau vekin ka hria, keipawh ka bang biklo tawp mai mahse, a hriat kher erawh ka duh hauhlo thung.





Nikhat chu Sport kan nei a, hetianga Sport kan neih hunah hi chuan Teacher senior ho hi an kal ṭha peihlo ṭhina, a ṭhalai deuh ho zawng hi kan kal mai ṭhin a, tun ṭumah pawh Sir Remruata, Miss Puitei leh Gordon te nen chiah kan kal a, hmeichhe tan phei chuan naupang infiam lo thlir bak tihtur a awm ve meuhlo.




"I number minlo pe teh a" ka bula rawn ṭhut pahin a ti a.



"Enga tan?" nui tet tet chungin ka lo ti a.



"Ka lo bia ang che" mitmeng damthlupa min enchunga atih chuan ka zahna thup hram hram ka tum.



"Hmm...sawi tur avang awm eee" uang zetin ka lo tihsan leh maia, lailo thei angber turin ka aw ka ti danglam bawk.




"Vânglo ê a...Vanhnuaia thu zawng zawng te hi kan sawidun senloha tam a awm alawm, kha...i number lo type rawh" tihleh a phone min rawn pek a rual a, ṭha deuh chuan ka lo ban ve mai bawk a.




"I phone chu ava hlai ṭha em em ve" a phone enkual vut vut pahchuan ka ti a, a hnawksak ka tih zawng tak ani.




"Kha chu Tablet anih kha" a lo ti zauh.



"Tablet a ni tih chu ka hria a lawm" ka lo ti hap a, min ti zak deuh dawn dawn a lawm le, Tablet tih te chu ka hreve reng sia.



"China ho hi chu thilsiam an thiam ve ngawt mai" zah zelah ka ti leh a, nuisuk chungin min rawn en a. "Samsung anih kha, Korea zawk" a rawn tileh khauha, ka beng a sa nghal hat hat mai, engvanga chelai ṭut nge maw ka nih le?




Tlaiah chuan Number hriatloh hnen aṭangin Message ka dawn ta nghal a "Zanah kan lo leng dawn nia aw" a rawn ti a, kan atih avangin ṭhian rawn hruai a tum ani ngei ang. Inleng hi ka nei vak ngailo a, midang han kawm seuh seuh hi ka zeiloh lam tak ani bawk a, ka huphurh ru angreng viau.




Zanah chuan anlo leng ta ngei mai a, a rawn hruai chu tudang niloin Sir Remruata a ni, Gordon chuan titi a thiam ngang mai, kei a ngawichawi zet pawh chu min be ṭawng bawrh bawrh mai, midanglam ve tak niin ka hria. A chapo loin a eiawm em em tho si a, miten anlo ngainat viau chhan pawh ka hrethiam ta e, a bula mite mizia ang zela kawm alo thiam em vang a ni.





Chumi zan aṭang chuan kan intext ta fo a, nitin schoolah kan inhmu ṭhin bawk nen kan inngaina chho telh telh a, kum avei meuh chuan kan inzui nghet viau tawh. Kei aiin kum 2 chauhin a upa a mahse, upa zawk chan a chang thiam em em thung, kan inhau ngai meuhlo a, kan inhauh ve chhunah pawh ka lungawi hma chu min thlem mai ṭhin.





A mizia a damthlup a, thinrim theilo emaw tih mai turin a zawldawh zawkah a ṭang mai zel bawk, school lamah a class ten hma an sawn nasa em em a, an result percentage pawh a in vawrh dawrh a, a taimak vang liau liau a ni, zing leh tlaiah ran enkawlin a buai a, an ko phar ve reng ṭhin a, a tuina lam tak alo ni bawk nen buai chung chung pawhin a kal ṭang ṭang zel, ka chhungte mit pawh a tlung viau mai. Chu chu amah pawn a hre ve kar a, "Tupa in nge makpa atan min it?" uang zetin a tifiam ṭhina, min tihzah hi a tir aṭangin a ching dawklak a, kan awmfal dun tawh chuan min chhaih lai ngei ngei ṭhin.





Zantin deuhthaw Sir Remruata nen anrawn in zuilut ṭhina, exam question check pawh kan inah kan tiho mai zel a, inkhawm leh khawtlang thil tihna ah pawh kan pathum chuan kan inzut chawt reng, a ṭawngkain sawilo mahse, a nungchangah Pathian a ṭihzia a hmuh theih a, ka pa chauhlo tu tute emaw pa te pawn makpa atan an it ve ṭheuhin ka ring.





A kum hnihna kumtir lamah chuan Aizawl lam aṭangin Phone call a dawng a, hna Interview turin a nuin a rawn chah a, a tuka chhuk nghal mai turin a rawn ti nghe nghe a, a chhukdawn zan chuan Sir Remruata telloin a rawn leng a, a haw dawnah pawn thleng ka thlah a, zanrei mi mut reh vek tawh anih vangin thla eng hnuaiah lungchim zetin kan infawp vawng vawng a, tluang taka Interview hmachhawn turin duhsakna nen ka thlah bawk.




A haw ta chu ka mal rawih rawihin ka hria a, chhun zana awmdun chawt reng kan nih vang nge ni? a tello chuan ka kim lo a ni. Zanah kan inbia a ka awm ang chiahin alo awm ve tho a, kan awmhrang chu kan inngai dun ngang mai mahse, puitling kan ni a, naupangchhe inngaizawng ang maiin kan ti hluak ngai lemlo. Anu chuan Interview result nghah chhung pawh chho tawhlo a awmtlang mai turin a duh a, min lo hrilh chuan ka lo hnual rawih mai.




Apa a boral tawh a, anu leh anutei te nen rawta cheng an nih avangin chhungkaw pa chan a changa, a nute pahnihin anlo thlahlel ve ngawih ngawih chu lo pawt lui viau thei niin ka inhre biklo. 'Pathian zarah damtein kan awm anga, kan awmdun theihnan hunṭha ala inher chhuak leh em em ang' tiin ka inhnem a, a hawthlak hnu reilo teah aikal dang khawṭhenawm tlangval in a rawn thlak a, a hmunruak erawh a luahzo kher mai.




"Hna ka hmu anih chuan, inneihlam ngaihtuah ka duh dawn a nia, lo inring rawh" fiamthu titak deuh hian a rawn ti a, "I inringtawk sual ange" tiin ka lo nuih kar kar. Thlakhat dawn hnu ah an Interview result chu a chhuak a, a tling hluah mai a, min rawn hrilh chuan ka lawm lutuk chu ka zuang lo chauh ani, a tukah nihnih cham turin a rawn chho nghal a, kartawp anih vangin Sir Remruata hoin luiah kan kal a, kaikuang te manin chengkawl te kan chhar a, a tuk sunday-ah min hawsan leh vang vanga, lunglen a rawn kaitho leh hi a ni ringawt.




Exam thil velah kan buai em em a, extra class ka pe ziah bawk a, Kohhranah naupang pawl zirtirtuah minlo ruat veleh bawk nen, inlamah ran kan vulh a indaihloh alo na ve bawk nen hun awl ka nei hman meuhlo a, zanah chuan hma deuh deuha ka muhil hmak zel a inbiak duahna hun kan nei khat telh telh a mahse, vawikhat pawh min rawn phun khum ngailo a, ka hman huna ka en turin Message alo dah ṭeuh mai ṭhin, a dawhthei hi ka ti ngawt mai, mipa ṭhenkhat ang chu nisela chuan min ringhlel emaw ania nga, tukṭha kan hmu ngai meuhin ka ringlo mahse, chutiang mipa chu nilo in ka Gordona a ni tlat.




"Vawiin chu khum kan siam a, kan inneih hun ami tur inbuatsaih ka ṭan der ania" a rawn ti a, a message chu chhiarin ka nui suk suk.




"Bei hma lehsi ve, engtik nge kan inneih dawn a?" a ti tak takin ka ringlo a, ka la chhang uang vel mai mai ani. A message ka nghahlai mekin a rawn call a.




"Hna hi ka han zawmfel te te anga, a ranglamin ka rawn tum ang" thutak zet hian a rawn ti a, ka rilru a hlim veng veng mai, a nupui nih chu ka chak takzet, "mangṭha" tih kan sawidun ziah a ngaitawh dawn silo a.




"Dunlop pawh ka lei vek tawh a sin" a rawn tih chuan ka lo nui chhuak hak, a va han hmanhmawh rum rum ve le!!




"Mahse, ka khum tharah hian ahma a ka phah kha a thawl lutuk a, a thar hi ka phah nghal mai angai dawn a, a pawi iti em?" a rawn ti a, pum dawm meuhin ka lo nui "Pawi tilo e, lo phah hmiah rawh i delh dup sa ah ka lo mu ve mai dawn a lawm" tiin nui hawk hawkin ka chhang a.




A hnu zanthum vel aliam hnu ah " Dunlop hi zantin ka delh lam ka thlak kual a, ka delh ngai ka delh ngawt ngawt chuan i mut ve hmain alo bél hman ka hlau bawk sia" tih min rawn thawn a, chhungte nen Tv ena kan reh ṭhep ṭhawp laiin ka nui chhuak hawk a, ka pain min melh no lo nasa!





Mutdawnah Phone callin kan inbia a, a aw aṭangin a nawmsamloh hmel riauin ka hria a "I damlo a mi?" ka lo ti vat a.


"Umm..ka khua a sik ser ser a" alo ti hap.


"Ehh..damdawi i ei em?"



"Ka eitawh alawm, kar hmasa khan ka in entira rannung seh anlo tia, damdawi minlo chawha mahse, ka ngeih vak pawh ka hrelo" a ti a, ka lo chek hlak. A damlo tih reng reng ka lo hrelo, kar hmasa daihtawh aṭang lehnghalin!?



"Enga tinge engmah min rawn hrilhloh a?" ka lo ti hliai a.




"I buaithei sia, i chau thei bawk nen i rilru tihhah ka duh hleinem" a lo ti awlsam et a, ka lung a tichhe dawn dawnin ka hria.




Exam kan zawh veleh a rawn zin chho a, rei phei chu a cham theihloh thu a sawi a, ni khat chauh pawh nisela a bula ka awmthei anih chuan ka lawm tawk em em thung, zana Sir Remruata nen anrawn lenglut chu ka lo nuihsang a, a landan chu a dang riauin ka hria a, a rui emaw ka lo ti hial!?




Ka bula anlo ṭhut rual chuan ka hnar ka lo lên vata,zu rim engmah a namlo, "Tinge i mit kha?" ringhlel zet hian ka lo ti haw a, a mit chu a khap nghal sak sak a, "Tunlai chu ka mit hi ahah thei lutuk" tiin min chhang a, ngun zetin ka lo en kar a, tunhma a; a mitmeng damthlup thin kha a meng sen rûm a, a nelawmloh zo vekin ka hria.




A tuk zanah chuan khaw ṭhenawmah a Bike-in kan Ride a, inkawmna hun fianrial tak kan nei theita bawk a, kan am dun kher mai, a pang chu ka dek vuta; a khua a sik ser serin ka hria a, "I nuamlo ami?" ka ti nghalzat a. Ka zawhna chhanglo chuan min kuah hlu hlu reng a, a thawk sa ham ham avang chuan a khawsik a sang ṭan tih ka hre nghal bawk. Haw ka rawt nghal vata, in kan thlen veleh nachhawkna ka pe nghal sawk sawk a, chauh hmel zetin kan ṭhutthlengah chuan a mu zawi ngiai a, ka nau te hlazir bangin maktih hmel zeta an rawn en haw chu zarzirin ka lo signal vat vat.





Zan ala reilo bawk a Pastor Quarter thleng rawkin ka va thlah a, "I chhukthlak leh hunah inentir ṭha leh ngei ngei ang che, an damdawi chawh i ngeihloh thu te pawh kha hrilh vek la" ka ti a, a bu ve nghat nghat a, ka kal tur chu pawn thingbuk awmna thleng min rawn thlah leh a, thingbuk hnuaiah chuan duhthawh zeta kan infawh leh vang vang hnuah, "Muttui" tiin ka mangṭha zui a.



A hawthla leh ta chu ka ngaihtuah ngang mai, thingpuiina a chawlh laiin min rawn call a, "I khua a sik em?" ka lo ti nghal var a. "Siklo e, ka ṭha lutuk alum tih mailoh chu" a rawn ti a ka thawveng deuh huai.



Tluang takin a thleng a, Video call-in min rawn bia a, anu leh anutei min rawn biak tir bawk, a zahthlak duh ngang mai, sawi tur hrelo zetin ka ṭhenṭhaw reng ringawt.




Nilai zana min rawn biak chuan "Naktukah MRI ka ti dawn" a rawn ti a, a inentir ṭha leh tih ka hre nghal bawk a, a natna dik tak an hriat fuh chuan damdawi an chawhfuh ngei tawh bawk ang chu. "Result ṭha deuh i neih theihnan ka lo ṭawngṭaipui dawn che nia" ka ti sap.




Atukah chuan MRI titur chuan anu nen an va kal a, a luh dawn leh a zawh hnuah min rawn hrilh thlap a, awmhnai ila chuan keiman ka kalpui ngei ang, test result chu a karleh lamah daih a lam theihdawn a, result ṭha tak aneih ka duhsak tak zet.





Monday zanah min rawn text a "Brain Tumor ka lo nei a" tih min rawn thawn!?



Rang lutukin ka call nghal a "Naktukah ka lo chhuk ang" ka ti nghal tawl mai.




"Lo chhuk duhsuh, phaiah min Refer a Wednesday ah ka nu nen kan kal ang" a ti a, ka ṭap ṭeuh ringawt, a tan hian tih theih ka van neitlem tehlul em. "Gordon, ka hmangaih che tih i hria tiraw? eng dinhmunah pawh dingla ka hmangaih reng ang che" ṭap ṭuau chungin ka ti a, "Keipawn ka hmangaih che" zangkhai vahin a ti thung, Class pawh ka la mumal theilo hma deuhah haw ka dil a, in ka thlen chuan ka ṭap chungin ka ṭawngṭai nghal mawlh mawlh.




Phaiah chuan an kal a, thlakhat dawn an zuk cham a, nitin kan inbia a; aman sawilo mahse, a chhungte hnen aṭangin a dinhmun ṭhalo telh telh chu ka hre ve zel a, ka eng tihmah a tui theilo. Tih theih neilo mahila a bulah awma, duat taka kuah chunga thlamuan theih ka duh. Ral aṭanga lo ṭawngṭaisak bak tih theih ka nei bawk silo a, chân mai dawna ka inhriat vangin ka ṭap fo a, ka nun ram hi a chau takzet. Engmah ka eitheilo a, ka awmdan chu ka chhungten anlo hria a, a nuin min zawh chuan engkim ka hrilh nghal vek a, ka nu nen inkuahin kan ṭap dun rawih rawih a, chu erawh lung ti zîng zualtu chauh a ni.




Pastor-in ṭawngṭai Subject ah a thawh a, inkhawm banah chuan Gordona chanchin min zawt sap sap hlawm a, ka chhang theilo, ka thinah hian min hnawh tawt ṭeuh a, ka bing mup mup ringawt. Ka chhungten min hrethiam em em a, Aizawla an rawn let leh ni chuan Sumo-in ka chhungte phalna thlapin ka chhuk ve nghal a, engmah tihtheih neilo mahila amah thlamuan tur tala a bula awm ka duh a ni.




Kan inhmu chu a cher ruaka, a mitmeng damthlup ṭhin te kha a thim khup tawh, an kawtah dingin kan in en vawng vawnga, ka ṭap chhuak hawk chu a awmah min kuah bet nghal hmiah bawk.



Damdawinah kan lut a, ka kalsan phallo a a kut vuanin ka ṭhutchilh chawt reng a, a na tuarlai hmel hmuh hrehawm ka tihzia chu ka sawichhuak thiamlo zawk, miṭha tâwp ani a hetiang natna a pe ta mai hi Pathian lakah pawh ka vui rum rum ṭhin.

__________


"Aremruat, thil eipuar ang aw" Uzamtean atih chuan ka ngaihtuahna thuk tak aṭangin ka harh chhuak zawk a, pawnlam ka hawichhuak vuta, khawkar thingpui dawr kawtah kan lo dingfel reng tawh hi alo ni a, rangtakin ka chhuk ve nghal thuai a, thil ei chakna erawh ka neilo kher mai.





In kan thlen chuan ka chhungte minlo chiau auna pawh ngaihsak loin ka room ka pana, khumah chau zetin ka bawk nghal thlawp a, hah zetin ka thaw chhuak ham ham ringawt, ṭawngṭai chakna pawh ka nei tawh meuhlo. Ka Gordon kha ana em a, chu chuan sawifiah thiamloh natna thuk tak min pe bawk.




"Pathianin kan tana ṭha turin engkim a rel ṭhin, a kutah kan tlukluh tawp hi kan tan a ṭha ber" ka nuin ka sama chul hauh hauh pahin a ti a, ka rilru tetein ' Pathian chuan ka Gordon a damna hi kan tana ṭhaber ani tih a hrelo em ni le?" ka ti ru vawng vawng.




Ka call a engmah ka sawi hmain "I thleng tluang em?" zangkhai zetin a rawn ti a, a lungawi lehtawh a ni tih ka hrethiam nghal a, ka thawhuai mai. "Umm..ka thleng tluang e, enge i an? damdawi i ei tawh em?" ka ti nghal zung zung a. "Ei tawh e, min ngaihtuah suh" alo ti var. Chutianga min chhang ka lawmzia chu a hrepha kherlo ang.




School ka kal chhunzawma, ka awmloh rei avangin Sir Remruatan ka class minlo kep ṭhin a, a indaihlo ve tho nen hmabak a tam bawk si a, extra class lamzawngin ṭan ka la lehnghal char char a, ka thawhpui te fel zarah inthlahrunna awm hauhloin engkim a pangngaiin kan kal chho a, rilru erawh a pangkhing ṭeuh reng tho, naupang ho Devotion thlengin Sir Gordona tan ṭawngṭaina hun te kan nei a, naupang ho pawn an Sir hlui ngainat em em tan chuan an theihtawkin an ṭawngṭai ve bawk.




"Rilru inbuatsaihna neila, a hun a thlen hunah pawh i tuarna lutuk lo deuh ang" ka pain a ti chu phawk zetin ka en a, engtin nge rilru inbuatsaihna chu ka neih theih tehlul ang le? tu temah hi an hmangaih te chan tur hian an inbuatsaih zo thei tak takin ka ringlo, tunah pawh nitin ka chan mek chu ani reng si a.




Ral aṭangin a chanchin ka ngaihven reng ṭhin, min rawn call khat telh telh a, anu ka call tlut tlut thung, Ka hawsan hnu aṭang khan kaih zauh zauh a ching ṭan a, a chang phei chuan a hriatna a hlauh hial ṭhin tih minhrilh a, ka hna chu bansana chhukthlak leh nal nal mai ka duh rum rum.




Moday class ka kal chu Headmaster-in a office ah minko a, "Sawrkar aṭangin Fund kan dawnga, Aizawlah mahni kala lam angai a, i kal hman angem? Remruata tirh ka tuma tihtur pawimawh i neih thu leh chumi tipah chuan nangmah kaltir tur chein minlo ti a" a ti a, ka lawm lutuk chu ka ṭap lochauh a ni.



"Ka kal ange Sir" ka ti nghal tawl mai.



Sir Remruata class la zo Corridora rawn phei chu ṭah hmuam ṭeuh chungin ka lo nuih a, ka lam rawn panin khawngaih hmel zetin min en vawng vawng.



"Ka lawm e aw"



"Lawmthu sawi angailo, ka ṭhianpa a ni ve tho alawm, min rawn biak ang che" rilru nat hmelzeta thawk hawk pahhian ati a, ka lo bu nghat a, ani pawn a tuar ve hle tih ka hria, Gordona tan thil min thawn a duhthu te sawiin kan titi luam a, "Âremruat, naktukah kal nghal la karleh Monday chawlh ania, tunkar pum i chamthei dawn tihna ania" a ti a, a va han tihzia lehzel. Miss Puitein ka class alo lak tur thu a sawi nghal var bawk.




Aizawl lamah chuan atukah sumo-in ka chhuk lehta a, ka thleninah ka innghat fel tete a Damdawiin lampanin ka chhuak nghal nal nal a, an awmna Cabin ka va luh chuan khumah awn deuhin alo ṭhu a, a hma ai khan a cher lehzual tawh bawk, min hmu chu chik zetin min rawn en a "Iva lo kal har ve" a lo ti sup.




"A hre dawnlo che emaw ka lo tihman a, midang chu 'tunge?' a lo ti zel a sin" Nu Zopuiin alo ti a, min en rengtu Gordona kut chu vuanin ka awmah ka kuah vawng vawng.



"Ahma aikhan a cher leh tawh tiraw Nu Zopuii?"



"Umm..a lakluh lam hi a tlem em a, thil tuiril takngial pawh hi a inṭha duhlo a"



"Chu ilo fello a ni maw?" melhrum kha kha in Gordon chu ka en a, alo nui vur vur mai.



Sir Remruatan a kal ai min kal tir vang chauha chhukna hun nei thei ka nih thute chu ka hrilh a, a bu ve nghut nghut a, ngaihtuah ding hmel deuhin chhuatlam chu a melh a, a landan chu a lawmawm reuh lutuk.



"Sir, Remruatan minlo biak ang che a tia, heihi i tan alo thawn che a" tiin Sir Remruata thingfanghma leh Balhla min thawn te chu Nu Zopuii chu ka pe a "A van fel ve" Gordon chuan a lo ti ve sup a.




Thingfanghma chu ka velsak a, ka siamsak mawlh mawlh laiin min rawn en vut a "Kan sawi, kan sawi taknain Sir Remruata chu tunge anih ka hrethei mailo" zawhna mitmenga min enchung hian a rawn ti a, ka heh ka pet fan fan ringawt.




Zanthum Damdawiinah chuan ka riahpuia, amah kan tura lo kal a hriatchian deuh te pawh hi a hrefuh hleithei tlatlo ṭhina, chutihlaiin vawikhat tê pawh keichu min hai ngailo, ka awm a ṭang chuan thil a eiṭha a, a hmel a hlimin hmuh theih takmeuhin a danglam, Doctor pawhin hma asawn lutuk alo ti a, beisei sang viaulo mahse, kan va hlimtlang kher em!!




Chawhnu vawikhat chu keimah chauha ka awmpui laiin inthiar aduh ta tlat mai a, Anu ka phone-a In aṭangin a lo chhuakdawn chauh bawk si a, "Ka pua ang che" ka ti ta ngawt a, hrehzetin ka hnungah chuan a rawn bei a, khum aṭanga ka thawhpui tur chu ka tlukpui a hlau deuh a niang a ṭangṭung mai.




"E he! hei ka paw zo ve reng che alawm, Bathroom kal i ngaih chuan keimah ngatin ka hruai ziah tawh ang che aw" nui hak hak chunga ka tih chuan ka hnunga bei chungin a rawn nui ve suk a, min kuah nghet salh salh bawk.




Bible te chhiarsakin kan ṭawngṭai dun fo a, a bula ka awmchhung chuan a rilru tihhlim hram hram ka tum ṭhin, kar thar a rawn inherchhuak a, ka hawsan a hun leh ta, ka haw tur chu a huphurh ngang mai a, thil lei tura ka chhuak tur ringawt pawh ka haw dawn emaw tiin thei leh theiloin a rawn inbengkang ṭawk ṭawk ṭhin a, a kalsan hleihtheih hauhloh.




A muthilh hlan bawkin ka hawsan leh ta, thui pawh kan thlen hmain anu phone-in min rawn call a, a aw aṭang chuan a ṭapin ka hria, a ṭap chiang ani. Ka Gordon ka hmangaih em em kha min ngaihvangin a ṭap anih chu! Na tuara a vial ngawih ngawih laipawhin a chhel em em a mahse, keimah vangin a ṭap ta si.




"Lo let leh mai rawh, ilo kal leh hunah chuan ka lo awmtawhlo ang" a tih te chu ngaihthlak a van hrehawm tehlul em.




Chumi zan chuan ṭhalai ṭhenkhat Biakina ṭawngṭainaah Sir Remruatan minlo sawm a, Gordona tan ṭawngṭai turin midang pawh chu kan sawm a, kan ṭawngṭai zo ina kan haw chuan "Gordon chu a kaih a, ICU ah an nawrlut chiah" tih a nute Sangbawihin minlo hrilh a, awm ngaihna reng ka hrelo ka ṭha akhur a, ka bing nghal chuk chuk ringawt.




Khur dar dar chungin Pathian hnenah ka ṭawngṭai leh a, a damchhuah nan ka dil tawhlo, ka Gordon kha ana em a, chuvangin hahdamna ka dilsak, Pa angchungah chuan natna leh hrehawmna a tuar tawh dawn silo a.



Gordon chu a kalta!!!



Schoola ka awm laiin min rawn hrilh a, ka thluak a chawl nghal duk, ka mit sulh sulhin ka hria, Sir Remruatan min hruai haw a, ka pain Motor hman tur a ngaihtuah chuk chuk te chu ka manghriat ruai ruai chuah a ni. Ka ṭap chhuak theilo, ka thinah hian min hnawh tawt ṭeuh a, harsa takin thawk ka la hawlh hawlh ringawt, Pathian hnenah hahchawlhna ka dilsak a, a chhanna chu ka hmu ta ngei a mahse, na ka van ti kher si em!




Ka nu leh Sir Remruata nen Gordona pute lam nen kan chhukho a, ka cousin Mahriatin min zui bawk a, ani hi Pastor Quarter bul lawkah an awm avangin Gordona nen pawh an inkawm ngeih hle nghe nghe.




Kan thlen chuan an inlam kan pan ding nghal nal nal a, kan va luh chuan mi anlo tam ngang mai, ruangkilin anu leh nutein leh a cousin te ho lo ṭhu chu kan va hmunghal a, kan lut chu ṭhutna minlo kian nghal thuai a, Anu te pahnih chuan chhuak em emin minlo ṭah a, an rilru natna chu ka hriatthiampui takzet.




"Ka lo thleng tawh a sin Gordon, vawikhat chauh min han en leh teh, Vanhnuaia thu zawng zawng te hi kan sawidun senloh atam a awm iti anilawm ni, kamkhat te pawh min chhawn tawhdawnlo a maw?"
A hmel chu ka en a, hahdam hmelzetin a mit a chhing chial a, a biang vawt thler chu ka chul vel a, ka mittui a rawn luang zawih zawih a, ka ṭah chhuah hawk lohnan ka inpet ruh fan fan.




Ka insum thei nganglo, a chal leh ka chal chu chuktuahin ka ṭah ta hawm hawm a, a nute pahnih lungngai hmel chuan min run em em bawk, an innghahna an fapa rangkachak an duhlai ngawih nghawih ani si a.




Kuanga an khung dawn te chuan ka la kuah ngawih ngawih reng a, inchhunga awm te chu ṭaplo reng an awmlo. A hmel ka hmuh tawpna tur ani tih ka hria a, dinhmun duhanga paihbo theih nise ka van ti tehlul em.




(You are my sunshine, my only sunshine,
You make me happy, when skies are gray
You'll never know dear how much i love you
Please don't take my sunshine away.)




A liamta, thlankhur thuk taka zalh turin an kalpui ta, ka thinlungin a au lawm lawm a, ani erawhin vankohna min chhansan thung ta si, a rawng a bawlsak ṭhin Pathian hnenah natna leh hrehawmna tuar tawhloin hlimtakin a awm ang tih ka ring a, chu chuan min hnem ber a ni. Vanhnuaiah lengdun tawhlo mahila, ka thinlungah erawh a chamreng tawh ang.




"Arempui, kan lo tum dan chuan hna te a han zawm fel te te anga palai te kan rawn tir ang kan ti a mahse, kan khati chho ta si a, zanin chuah chu inkhum tura alo siamsa ah hian mu ve reng reng ang che" a nuin a tih avangin ka cousin Mahriati nen chuan kan riaka, a khum siam chu a zau khawp mai, a Dunlop leithar chungah ngei mai chuan kan mu a, mittui a sur zung zung, min rawn hrilhlaia a phur zia te kha ka hre chhuak awn awn.



"Rilru lo ruahman lawkna chu mihring chan a ni a, lei chhanna erawh Lalpa aṭangin a ni" (Thufingte 16:1)




A tuk tlaiah chhungkhat laina te nen a thlan kan tlawh a, reingial chu anu nen inkuahin kan va ṭap a, inhnem tur chuang hi kan awm lo, an inah chaw ei nghalturin min sawm a, minlo thlahlel ve bawk si a, Mahriati leh Sir Remruata nen kan ei a, ka nuin ka Patea te inlamah min hawsan thung.





Rei chamloin kan khaw lamah kan haw a, ka engtihmah ni a tui theilo, phurna ka neilo a incheia han intuaihnum te hi ka chak hlawllo. Hun a liama, kum hial a vei a, Gordon ka ngaihna erawh rilruah a hlui thei tak tak chuanglo, "Khuareiin a hnem an ti mahse, an sawi khuarei chu engtia rei nge ni ang le?"




A kumkhatna thihcham chu Aizawlah mamawh lama ka kallai tak ani a, diktak chuan chumi nang tura insiamrem ka nimah zawk, an inah kalin a chhungte chu ka va hmanpui a, min hmu chu anu alo ṭap leh ṭeuh mai, a thlanah kalin pangpar te ka va dah a, a thlan en chuan ka ding vang vang a, tunah hian vana ṭangin hlimtaka min lo thlir ngei ka ring.





"Ka hmangaih, helei piaha kan intawh lehhunah chuan maw, hlimtak leh danglamna awmloin, banah vuanin lamtluang kan chhuidun leh anga, inṭhen tih hi a hming kan hre lehtawh ngailo ang"
ka hriatphak tawk lekin ka phun sap sap a, ka hmangaih zalna thlan khawhar tak chu hawikir leh tawhloin ka kalsan ta.









(This is Modern Fairytale no happy endings.)
<<<<<<<<<>>>>>>>>>>>>>



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)