KA LALBERA By Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: KA LALBERA By Ahmangaihi violette khiangte (Completed)

Unread post by Ngaia » November 1st, 2020, 5:03 pm

CHAPTER - 7









Khawngkhar a kalh zui a, a chet dan chu hamhaih zetin ka lo en a, ka lama rawn inherin thip fahranin min melh a "Sawibuailo in i room ah chho rawh" a ti vin hluk a, natna leh zahna ka chhungril aṭangin a rawn inhnawh tup tup a, thawk a sak ṭalh mai. Ka dinna ngaiah chuan che chângloin ka ding ngara chutiang bawkin ka pa pawh.








"Chhuahtir i phalloh te chuan ṭha te tein sawi ve mai la aw, engah nge khatia i tih kher?" ka nuin a lo tih ve chuan "Lo inrawlh suh" ka pa chuan a lo ti leh hluk a.








Ka lam rawn hawi lehin "Khatiang tlangval hawklak, zu nam thial thual reng lehnghal lakah hun khawh ral mai mai a ngailo, in inzui ṭan chauh bawka thlauhthla hmak ang che" a ti a, ṭawng tumin ka ang hman zuau a ka ṭawng chhuak thei mai lo lehnghal a, ka hnuk a ulh ṭeuh mai.








Mawilo taka che kher lo khan ṭha takin a sawi ve thei reng a, rem a tilo a nih chuan ka kal lui kher hauhlo ang mahse, a chêt dan kher kher chuan min ti lungawilo takzet a ni.








"Hetah lo phei teh" vin fe hian Sitting room aṭang chuan a rawn ti leh a, ka luhlul chhuahin choka lam ka panlui ve ngat a. Tukverh darthlalang aṭangin kawngpui lam chu ka thlir thla a, muang changa a Bike-a a lawnlai chu ka zuk hmu a, a hamhaih ve hle tih ka hria.








Tlan chhuak mailo chuan a ṭhu renga, chutah rawn hawi chhoin min lo a, a landan cool ruih vang chuan a rilru tur ka hrethiam pha ruak a ni. A Bike tinungin chak zetin a tlan chhuak zui a, a tlan liam ta chu ka ruak vek mai, ka ngaia tun dinhmunah tak hian a bula awm ka chak takzet.








Ka thin tawt lutuk tih reh tumin Fridge a tui vawt chu ka la chhuak a, ka in laimeka "Vanlal..." a rawn tih leh takah chuan ka che zui sawk sawk a.







Sitting room a ka lêt leh laichuan a tarmit vuahlai kuai hniam meuhin min lo en a ka lungawilohna chu ka hmelah a lang chhuak a ni chêk aniang "Ka titau e te i tia law?" a lo ti khur khur a, chhangloin Tv lam ka hawisan a. "Khapa mai mai vang khan Remtluanga i ṭhen phah te a lo ni lo maw?" a rawn ti leh a, a lam hawi duhloin ka melh ngai ka la melh ngar a. "Thlah hmak ang che, khatiang mipa kha ka inchhunga lut chhuak sek tur pawn ka duhlo, a inchei dan leh a sam te reng reng kha khawilai emaw a mi awmṭha duhlo a ni tih hriat reng" ngeiawm fea a lo tih leh chuan ka sa pup pup thei mai.








Chhan ve mai ka tum laiin ka nu a lo inrawlh a "I ti mah mah dawn e, ṭha te te in sawipui ve mai la aw" damthlupin a rawn ti a, ṭawngloin ka ngawi leh ta zawk a, ka pa erawh a lo ter lehnghal viau a.









"Ka tih mah mahna ka hrelo e, zan thim hnuaiah lehnghal ani ang mipa khan hmeichhe lak aṭangin beisei pakhat chiah an nei ṭhin..." a tih chuan ka mit ka lo chhing sawk a, ka pa hian kan inkar engmah a hrelo angaih ang kan ni lo bawk.








"Ka sawi chu i hria em Vanlalhlan? Nge ni a, a lakah i lo inphalrai tawh zawk?" thinrim aw lek leka a rawn tih leh takah chuan ka insum thei bik tawh lo. "I ngaih ang kha kan ni bawk lo, i over mah mah" tih leh thawh ka rual a, ka aw ri pawh a ring ve kher mai.








"Mite chu ila vin ngam zawk elaw?" a rawn ti leh a.








"Chhuah i rem ti lo anih te chuan ṭha deuh khan sawi ve mai ta che, khatia rem ti awmtaka langa mintih zah kher a ngai a mi, vawikhat pawh i thu ka awihlo ngai tawh a mi?" ka tihlai chuan ka aw chu a khur dar dar a, ka ṭap lek lek bawk, mahni ah ṭha leh fel intih ve tawkna rilruah a awm ran a, ngaihzawng chung changah ngat phei chuan sawisel ngaiin vawikhat te pawh ka la awm ngai hauhlo.








"I tana ṭha tur zawk ka hrilh che a nih chu" zawi te chang zetin a ti a "Ka hre ve bawk" tih leh room lama chhoh ka rual a, Step tawp ka thlen rualin ka nu nen an inhnial zui barh barh a, an ṭawng ri chu ka ngaithla peihlo, room ah lutin ka inthlak sawk sawk a ka che chu ka che phelh phung a, ka phili ruai ringawt.









Ka Phone a a ri ve tak nain a chhanglo a, ka lakah a thinrim anih ka ring ringawt a, ka rilru a hrehawm takzet, khumah muin ka ngaihtuah zui ngut ngut a, enga tinge ka call a chhan loh le? Bike a khalh laklawh vanga min chhang theilo mai mai a nih te ka ring thul.







Ka call nawn leh ngat a, reizet hnuah chuan a lo chhang ve ta hram a "Ummm.." a lo ti zawi ruih a.








"Khawnge i awm?" ka tih chuan "Ka ṭhiante bulah" bung zetin a lo ti a, a lungawilo tih a aw ah a chiang hle. "Khawiah?" dilchhut tak chuan ka ti leh a, tu a ṭhiante nge tih te pawh ka hre duh a ka zawt hreh riau bawk si, a lakah chuan ka inthlahrung a ni ber mai.








"World bank road ah" a rul tawk lek lek a min chhan vang chuan sawitur ka haihchham vek tawh, "Umm" ka ti ringawt a, ka phone ken lai chu ka hum nghet sauh sauh a.








"I pa kha..." a rawn ti ta ngei a, sawi chhunzawm loin a ngawi lehdaih a, ka pa chetdan vanga pawi ka tih thu leh hrehawm ka tih zia thu te chu a bula sawi ka duh hauh bawksilo. Chutianga a laka ka sawi a vuivaina ka thlen anih chuan ka pa diklohna a rilru ah ka tuhsak anga a dem ve nghal mai dawn a, chu chuan an pahnih inkarah inlaichhinna ṭhalo zawk a siam thei a, chulo ah ka pa a zahloh phah mai ka hlau bawk, chuvangin ka pa thiltih vanga pawi ka tih thu chu ka hrilh theilo a ni.








"Chhuah dawn te chuan zu inloh ve mai tur a nia" ka ti a, kawng ṭhen khatah chuan amah pawh ka thiamlo tho, zu nghei turin vawi tam ka hrilh tawh a, kan chhuahdun dawn zan berkher phei chuan ka mitmei veng ve tur pawh a ni.








"Tihpalh aw" a rawn tih chuan ka beiseiloh dan deuhin min chhanga ka sawi tur ka theihngilh zo vek lehnghal a.








"I chhungte khan min duhlo tiraw, keimah vangin an hau che em, zep miahloin han sawi teh?" a zawhna chu chhan harsa ka ti kher mai, ka nu chu ka hrelo mahse, ka pa chuan a duhlo chiang hle a ka nu pawn a duh biklo maithei, zeploin sawi dawt ila min ṭhen mai angem?








"Chutiang duhloh a awmlo, zu leh ruihtheihthil lakah an fîr deuh hlek a, zanin pawh kha chu vang chu a nia" ka ti sap sap a. Mipa induhtawk ve tak mai a ni a, ka chhungten an duhlo anih chuan min kiansan daih duh mai ka ring, thutlukna ka siam tawh a; hni hne taka tawpsan lah ka tum heklo, ani pawh a insiamṭha thei alawm, a thei talo anih leh kan nih nih kan ni tawh mai aniang chu.








"Zu hi intawhlo la ka duh khawp mai, i in reng a nih chuan a buaithlak telh telh ang" ka ti leh a, a ngawi vung vung a a hnu deuhah chuan "Ka lo tum dawn nia" ban charhin a rawn ti a, a tum dawn chauh tih sawi mahsela a mi chhandan chuan min ti lawm hle thung.









"Barbie..zu ka inchhan chu ruih ka duh vang hrim hrim a ni biklo a nia, fim taka ka awm hian ka hah ṭhin, Evolution hian ka banah min kai dawr dawra chak takin min tlanpui nimaiin ka hria, ka nunah hian mikhual ang mai ka ni, tute nge ka ṭhiante ni a tute nge ka hmelma te tih pawh ka thliar theilo, keimah tak ngial pawh hi ka inhrechiang hleitheilo a; harhfim hi ka tan a hreawm a ni" a ti a, a aw ah chuan a rui tih hre mahila a thilsawi erawh a zu rui kamliam satliah mai a nilo.








"Mahse, i tan a ṭhalo a sin nunna hlut zia i hriat kha, ruihtheihthil vang mai mai chuan i nuna thap suh" ka lo ti a, Pathian thu nena han hrilh a fuih te pawh ka duh mahse, sawipui dan tur ka hrelo lutuk chu ka inhaw lek lek hial a ni.








"Ka bulah awm reng ang che" ril raih hian a rawn ti leh a, tunah tak hian ka bulah awm sela chuan ka kuah vawng vawng ngei ang. Kan inbiak zawhhnu chuan ka mutsan zui a, a haw thu min rawn hrilh chu zingah ka hmu ve chauh bawk.








A tukah ka nu nen clinic ah kan kal a, ka mit chu min lo khawihsak a, kar khat vel zet chu Recover nan hun a ngai a, pawn pawh chhuak loin inlamah ka tawm deuh chawt reng a, Coaching class pawh Janet-i bulah kan Teacher hnena lo sawi turin ka chah a, Ezra nen kan inkar thu min rawn zawt zui chiam a ka chhang mumal meuhlo thung, ka mi hriat chhianloh te hnenah ka mimal chanchin ka sawiduah ngailo.








Zanah min hmu turin a lo kal ṭhin a, kan ina lo luh ka phal silo a Zari te ina kal chhuanlamin Garage ah kan inhmu ṭhin a, tleirawl inngaizawng ru ang maia a ruktea kan inhmu chu a nuihzatthlaka, a hlimawm viau lawi thung.








"Ka hrethiam theilo che, zu ka in miah hleinem, in Inah ka lo leng duh" Garage a ka pawh luh laichuan a ti bul bul a, "Zan a rei tawh hi" ka lo ti ve thung.







"Zan dangah pawh i phal loh kha"







"Ka phallo tih ka sawiloh kha" nui chungin ka ti a "Pawnah lo awm rawh i ti zel a lawm" a lo ti ve leh a.








"Heti hian a nuam iti zawk lo a mi? Inchhungah te chuan inhnaih tak pawn a ṭhutngam hleihnem" a kawnga kuah ngheh salh pahin ka ti a, a awm lumnuam deuhah chuan ka bei hle hle bawk a.








"Nuam e..mahse, Garage aṭang ringawt chuan i chhungte rilru ka hmin har dawn em a" nuisuk chungin a ti a, a duhphawt chuan ka bialpa hi mifel tak a ni tih ka hria a rilru a ṭha a, a tih tawh lamah chuan mi nghet churh chi a ni mahse, a mize ṭha lam hi mi nazawng bulah a chhuah duh ṭhinlo hi a buaithlakna lai ber a ni, a damloh hnu hian a zia a dang deuha, a cool-in chimawm taka khawsak a ching ta lo hlauh a, ka ngainatna chhan deuh pakhat a ni zui bawk.









"I mit chu enge a an?" min kuah ngheh salh pahin a ti a, a kut lehlamin ka biang a rawn tuai hauh hauh bawk a, ka hmu ngun telh telha hmelṭha ka ti zual telh telh mai!







"A dam ṭha var tawh, ka la dim deuh rih mai mai a ni, kar tharah chuan tarmit vuahloin kan lengchhuak dun dawn nia" ka lo tih chuan a nui hak hak a.








"I mitmeng nalh tak hi midangin an hmu ve fo tawh dawn tihna a nia, ka dinhmun hi a derthawng mai lo maw?" uangthuang taka alo tih chuan a nakah ka lo sik vak a.







A kawnga ka kuahna kut pahnih chu la kangin ka lu chungah a dahchho a, a tihtur ka lo hriat sa vangin ka lo nuisak a, bangah chuan min nawr beta lo kun hniamin uar fahranin min fawh chhunzawm nghal a, engtianga han infawh tur nge tih chu hre tak a ni, min fawh apiangin a hma aiin a tui a, a Special ziah bawk. Thunun hleihtheihloh khawpin ka thinphu te hi a rawn rang ta ṭhina, Movie ami ang mai a ni.








"Tinge min chhan let loh?" a hmui la sawn hlekin min en a, a hnar ngul chuan ka hmai a rawn nul thuak thuak bawk.








Ka kut a hmer beh tlat chu laksawn tumin ka tal a "Min thlah teh ka chhoh leh vat angai a nia, chumi hma chuan ka kuah lawk duh che" ka ti a, ka sawizawh rualin min thlah nghal a, ka chet ve hma hauhin min kuah bet zui a.







Ka phone a rawn ri a ka nu a ni "Ka kal angai?" tih zat pahin Call chu ka titawp vata "Vawikhat chiah" tih leh min fawh a rual a, duhtawh zetin ka infawp leh a; tawp mai hi a harsa ṭhin.








"Haw har suh aw, ka duhloh zawng i hriat kha" melh rum kha kha chunga ka tih chuan "Ka reilo ang, ka lo text ang che" a lo ti vat a. A vawi engemaw zah nan kan han infawp leh ngial phawt a kan in kalsan thei ta hram a.



*

*



Coaching Class ka kal chhunzawma, tarmit vuahlo a awm chu a tirah chuan ka khawr deuh tlat a, ka vuah emaw ka tih loh leh ka vuahlo tih hrechhuakin ka zawng thul, ka landan erawh a hahdam sawtin ka hria.








Kan class ah chuan Ramropuia a awm a, ngo lampang samdum kirchiat a ni nghe nghe a, a vunin a chawi bawk a lang Fresh sar renga a chhelo han tih mai tur chi chu a ni ve hrim hrim a, ka number min dilfo a, ka lo nui mai mai ṭhina pek enah pawh ka lo en lemlo.









Zan khat chu minlo text hlawla Janet-i hnen aṭangin ka number a lo dil ningei tur a ni, a tirah zirlai chung chang min rawn zawt a, Number hriatloh hnen aṭanga text ka dawn hian ka reply ngai meuhlo chungin ani erawh a rawn insawi nghal thlap a, lo chhan duhloh chu Class khatah ṭhuin tuktin kan inhmu vei bawk si a nuamdawnlo tlata ka hriat vangin pangngai takin a zawhna chu ka lo chhang ve mai zel a, a hnuah chuan thu sepsel te te sawiin min lo text ta fo mai.








Chhanloh theihloh chin hi a awm ta ṭhin a, ningru tak chungin ka be lui hram hram a, thil pawimawh ni lem lo thlengin min text zui zel a, bialpa nei laiin tlangval dang be reng chan ka chang deuh tlata ka inhriat vangin awm a tinuamlo ṭeuh lehnghal a.








Ka ning deuh ta ngang a niang "Ngaihzawng ka nei tih i hria em?" ka ti tawl mai a.









"Hria e..tinge?" awlsam zetin a lo ti a, ngaihzawng ka nei reng tih a hre tho a nih chuan engvanga min lo be reng nge maw a nih le? Chiang tak phei chuan min bem dawt lo a mahse, ngaihkhawihloh theihloh siin a awm thiam em em thung.









Class ah Janet-i nena kan inkarah rawn ṭhut a ching a, kan thil eina ah min zui a ching bawk nen ka bialpa emaw an ti fur tawhin ka hria, Whatsapp-ah Class group an siam a, chutah pawh chuan min chhaih ṭan ta fo mai.









Kan class ah chuan a thiam thei ber ka ni a, zawhna min rawn zawh a ka lo chhan chang te hian a lo lang vata "Kan nu hi chu ka chhuang a nia" uangthuang tak hian a lo ti ṭhina, midang hoin an lo fiam zui te chuan a chhanglet zel bawk si a, han hau deuh ila "I la na a nih kha fiamthu mai mai alawm, ka fiamthu tih an hre vek" a lo ti awlsam leh et a, han huat zui em em theihin a awm ṭha duh mang bawk silo a rukin ka ngei ru ṭeuh ringawt.









Ka ṭhiannu Margareti Birthday ah zanriah eiturin Lalbera nen min sawm a, tukṭhuan eilaiin ka chhungte ka hrilhsa thlapa, Margareti nena thil kan tih dunna reng rengah hi chuan min hnial ngailo, ka nu leh pa te hian Margareti an ngaina a, a fanu ang maiin an en ve a ni.









"Haw har lo la i hman veleh lo call la i nauin a lo hruai dawn che nia" ka pa in a tih chuan "Gabrielan min thlah theitho alawm" tih leh dawhkan hnuaiah Nau-a ke tlawh ka rual a, a lo meng râng ralh mai. Ka mitmei zui a a hrethiam ve vata "Ka hmanlo mai thei, duhleh a remchan chuan lo inthlahtir la, an remchhan loh leh min lo phone anga" a lo ti ve nghalthuai a.









"Enge tih itum hmanloh thu te i sawi a?" Nau-a en chunga ka pan a tih chuan "Rank kan push dawn" a lo ti liampuat a.








"Ho mai mai e a, lehkha kha zirṭha hle reng la a nimai" tih hluk pahin ka pa chu a tho zui a, ka lamhawi thil engmah a sawizui takloh vang chuan ka lo thaw huai bawk.








"Class ah lo awmla, ka lo lamkawi mai ang che" Lalberan a tih vang chuan ka insiamsa vek a, nidang zawng aiin ka inchei uluk bawka, ka sam chu ka pawt ngil te te a, a hmawr tlem ka herhkawi hlek a, Sneakers var bunin kawrfual ka khup khuhlo deuhin ka ha a; a chungah Denim Jacket ka ha leh tawp a, ka landan chu a simple ru riau thung. Makeup pawh ka hmang ve nual , tarmit ka vuahloh aṭang hian ka mit pawh ka chei ve ta fo a a chei phei chu ka tjiam hranlo.








Class ka thlen chuan ka lut tlai bera, min lo enṭhup a ka zak duh mai biklo. Ka ṭhufel awrh tih ah ka bulah Ramropuia a lo insawn tharh a "I va tlai ve, i lo kal dawn lo emaw ka ti hman a" ka beng bulah a rawn ti nghal sar sar a.








"I van rimtui tak" a tih chuan ka nui leh mai a, ka Note leh Pen ka phawrh a, ka phone ka ensan daih bawk a. Ka sir lehlama ṭhu Janet-in "Chhuahna tur pawimawh i nei a mi?" a lo tih chuan Birthday lawmna a ka kaltur thu in ka lo chhang a Ramropuian min lo thlek uluk nasa mai!









"Enge..?" melh rum lek lek chunga ka tih chuan "Nidangah pawh i chhelo tho a, vawin hi i chhelo zual lutuka, ka hawi sawn hleitheilo" nuisuk suk chungin a ti a, ka bawp khawkherh a rawn melh thlak chuan ka kawrfual tlang ka lo pawt ṭha nghal chawt chawt a.








"I bialpa chu enge a thawh ṭhin a?" Ramropuia bawk a ni. Chhan mai dan tur ka hrelo, Lalberan hna thawh a neilo tlat.







"Gym a enkawl" ka lo ti ve hmiah mai.








"Tunlai hmeichhe ho hi chu Body builder hi in lawm leh lutuk a" eilo tih hriat tak nui hak chungin a ti a, chhang zui loin Lecture ka ngaithlak san a, a hnu deuh lawkah "A fel em?" a rawn ti leh sup a.








"A fel viau ka ring, nang meuh han hneh theitu chu a thîk awm rum rum mai" nui lek lek chunga a tih lehtakah chuan "Fel tehreng mai" ka lo ti ve nghata, ka rilruah erawh a zuin ṭhin te, a party ṭhin te, insual a chin te chu ka ngaihtuah zui rauh rauh a, ka duhna kiam phah hauhlo mahse, hmai a uanglo viau a ni.









"Fimkhur hle rawh mipa hi rin nghal mai loh tur, hmeichhia hi chu bum in nuam leh lutuk a, mipa hian ngaihzawng pakhat mai kan duhtawklo tlangpui a nia, i bialpa pawh chuan belhchian a dawl bik vaklo maithei a ni" Ramropuia bawk, a ṭawng renga rilru a la penglo thei ṭhin silo, 40% vel zet chu amah vangin Lecture ka hre mumal lo ngei ang.








"Ka belchiang vek tawh" rum zeta melh hrak chunga ka tih laichuan "I va duhawm thei tak" tihpahin ka biang a rawn piai kher a, a kut chu ka lo vaithlak sak rang kher mai.








"A phone te i Check sak ngai em, anih loh pawn a lengchhuak zui ruk te, han ti chhin ve mah teh ka ṭhian hmeichhe ho ka tihtir tawh te hi chu hlawhtling thei tak an ni" ngawi mai lo a la sawi chhunzawm zel chu hne tawh tak ka ni.









Banah chuan ka note copy min rawn dil sap sap a, Class khata ṭhu ṭeuh ṭeuh heti hian an ti ziah mai a, ka hmanhmawh tawh tehlul nen, phal loh chi a ni mang bawk silo. A ṭhenchuan an Phone-in thla an la mai a, Ramropuian a tawp berah a copy leh ta bik tlat a, Dawhkan chungah ṭhuin ka phone ka khawiha, min be mawlh mawlh nain ka ngaihsaklo der tlat thunga.







"Ka lo let leh vat ang, Sir kha Syllabus chungchang kan zawt lawk ange" tih pahin Janet-i chu Sir room lamah a kal a, midang ho erawh an chhuah tawh hlawm avangin Ramropuia nen chauh chuan kan awm tawh a. A muangchang lui emaw ni, a zai pah a ,a copy rei em em lehnghal a.








"I phone khan a thla la ve mai la" tihlahin a duhlo ve khanglang lehnghal a "In lamah chuan ka thatchhe tlat zel" a ti deuh tlat a.









"Kan bang tawh a, class room ah ka la awm meka duhleh lokal tawhla" tih ka va thawn a, reilo teah a lo hmu nghal a, "Rawng hring i ngaina em?" a rawn ti tehdaih a, a thawmhnaw hakturah a buaive deuh em maw ni!








A lerh ṭhin bawk a, University kan kal ho lai pawhin incheithiam tak a ni tih chu ka hre daih tawh, an hausa bawka thawmhnaw phei chu ani aia nei ṭha bik vak he khawpuiah hian an awm ka ringlo.








"Rawng hring chu...??" nuilai lem nen ka va thawn a, zawngte hmaihup min rawn thawn a, ka nui chhuak hawk chu Ramropuian phawk zetin minlo en a.








"A hring ka ha min dem miah suh, ka sam i hmuh hunah pawh" a rawn tih leh chuan ka meng tal tap a, a sam a tih sen loh hram ka beisei, a ti buang ringawt pawh ka enliam hram hram a inhmeh viau lo phei sela chuan ka sawisel tawh ngei ang.








"Ka zo e" a rawn tih rualin ka Note chu ka lo la vat a, ka inkhung zui mawlh mawlh a "Janeti chu a va rei ve mawle, ka nghaklo mai dawn emaw ni?" ka tih laichuan "Ka nghak peih bik hleinem, kal daih bik suh" a lo ti ṭung a, Lalbera a lo la kal dawn chauhin ka ring bawk a, ka nghak leh ta rih a.







Ka phone ka en mual mual laichuan hnunglam aṭangin ka sam a rawn huia, ka darah rawn kuah nghalin ka Phone chu a rawn bih ve a, a ngampa lutuk hi ka ngaitheilo, ṭhianhnai tak anga ka la enloh vang nge ni ka dara min rawn kuah kher chu ṭullo ka ti em em bawk.








"I ninawm kalteh" tih hlak pahin ka tho zui a, ka pensawn tur chu ka banah a la rawn chelh ṭung mai.








"Ramropui...over viau suh aw ka ngaitheilo che ania" tih leh min vawn na chu thinthlak ka rual a.








"Anih lokal rawh kawtah lo zuk nghak ang" tih paha a rawn dingchhuak chu Pen emaw ni thil a rap piala ka lamah a rawn awn nghal ruai a, kei ka lo inher ve chiah bawk nen ka hnunglam aṭangin min rawn bawhthlu rawk a, ka hmaa dawhkan ah chuan chal tauh dawtin ka bawknghal thlawp a.









"Ekhai!...kan style hi ka duh lutuk" a rawn tih chuan "Tho vat mai teh" ka lo ti vin hlar a, tho mai lo chuan a nui kur kura a rit bawk si a ka che thei mailo lehnghal. Ka bawhna dawhkan chu ka malpui chen vela sang a ni a, ka tlukna lamah ka chal chu ka tauh na viau bawk.









"Ramropui..."ring zeta ka tih leh rualin a thokang vut a, "Zeilo leh lutuk mai" tihpahin ka insiamṭha zui mawlh mawlh a.









"Tunge.." Ramropuian a rawn tih leha ka hawi chhuak chu Lalbera nen kan mit a intawng chiang hle a ni, ka phu nasa em em lehnghal! Janet-i nen kawngka a ding chungin min lo melh ran mai a, kawr chung hring a ha a, a chhip sam chu a dum hring inpawlh nawk a ni, a inhmehin a langṭha em em bawk "I van lo thleng hma" tihpahin ka lo nuih a, a nui ve hauhlo!









Ngawiteh!... Tuna thil thleng kha an lo hmu tihna em ni!



IMG_20200707_001730.jpg
IMG_20200707_001730.jpg (38.13 KiB) Viewed 11114 times





Ani chiah mai, a men rum danah a hriat mai a lawm, min ngaikawi hmel a la pu zui lehnghala!








"I ngaih ang kha a nilo a nia aw" a rawn pen luh ruala ka lo tih chuan min enloin Ramropuia zawk chu a melh ngar a "Tunge inih?" tih pahin a awmah a ṭham zui ṭawk a, Ramropuian a lo ngaithei biklo, "Min thlah vat rawh" tih leh nam a rual a, an inhnek chhunzawm chu ani nghal mai, ka thlabar chu ka ṭe teng tunga, Lalbera pawhsawn ka tum lahin a chak bawk si a, a che buan buana ka pawtsawn hleithei derlo.









Janetin min lo puia, kan pawt hrang thei ta hlauh a, Lalber chu hmanhmawh takin pawnlamah ka pawt chhuak zui bawk a, thinrim lutukin ka kut chu a thingthla a "Kha thil tehhrep kha sawifiah rawh" a ti vim khar khar a









"I ngaih ang kha a ni lo ka tih kha" vin lek lek chuan ka lo ti a, Ramropuia nen an insual vanga hauh hrep ka tum rilruk laiin amah zawk chuan minlo thinrim khalh leh tawh. Thinrim tihhriat zetin a thaw ri sak sak a, a khabe sir chu chhetein a duk raih bawk.








"A tlusuala ka hnunglam aṭangin min rawn delh a nih kha" awki pangngai zawka ka tih chuan awihloh hmelzetin a lo ner sawk a.








"Class ban hnua in pahnih chauha inlo awm chhan kha i sawifiah thei em?" a ti zui leh zat a, "Janeti pawh a awm ve kha, Sir room ah a kallawk lai anih vang a lawm" insawifiah tum tak chuan ka lo ti a.






"I ngaizawng lo maw?" a tih chuan "Teuhlo lutuk" ka lo ti leh hlak a.






"Amah khan a ngaizawng che em?" a aia chîk lehzualin min en a, min tizam rum rum thei nia, "Min ngaizawng pawn ka hrechuanglo" ka ti ban charh a, min bem bawk silo a, min ngaizawng han tih dawt theih chu a nilo a lawm.









"Anih chuan engvanga thinrim ngam ringawt nge anih ka zawh a ngai a nih chu" tih paha inher leh mai atum chu ka lo pawt a "Engah mah ngai suh, a chimawm ve ṭhin hrim hrim a lawm" tihpahin a ban ah chuan ka lo vuan ṭai a, lungawilo fein a lu a tuai leh vut a, chutihlai mek chuan Ramropuia leh Janeti te chu Step aṭangin an lo chhukthla ve mek a.







Lalbera chu a Bike dahna lamah ka kai phei a, a khawng auh reng chu ka pawt lui ṭang ṭanga, tualzawla Janeti te pahnih lo chhukthla mek lam chu awm pho lah chungin a hawi a "Ka bialnu hi ilo hnaih leh a nih chuan pawi iti khawp ang?" a ti ta hram a. Ramropuia ner sawk hmel chu ka va en a, a hmai te chu a dukin a vung deuh el ul a, hnek a dawng hman nial nual tih chu a hriat theih mai, ka inthiamlo vak miahlo chu mak ka inti lek lek a ni.








An kalliam hnu chuan "I ngaizawnglo takzet a maw?" a han ti leh zet a, min rinloh hmel taka min zawt nawn leh kher chuan ka thin a ti sa ve phat mai.








"Nang aia chhe leh chhawng kha ka duh in i ring a mi?" ka ti let ve hlar a, "Dik chiah" tih paha ka hnar a rawn piai hlak pahin "Kei aia khapa kha i thlang a nih chuan keiniloin nangmah i chawh zawk ang" a thilsawi chu ka hrethiam hauhlo, chawh tih ṭawngkam lah hi a hmang ve ziah lehnghala.








A la duhtawk mailo "Minep a nih kha" tih leh hlak pahin Bike a tinunga, ka lamah rawn ti awnin ka lo lawn ve nghalthuai , "Insual hi chingviau suh, duhaiin i kut hi a rang mah mah ṭhin, sim hmak ang che" ka tih chuan ka lamah a rawn thle bak a "I thu ber" tih pahin a tlanchhuak zui nghala.








Margareti te in kan thlen chuan kawtah Margareti leh a fanu an lo awm a, ka ṭhiannu chuan Lalbera chu a lo be nghal sawk sawk a, a la lungawi zanlo nge ni bung deuh deuhin a chhang a, ka ṭhiannuin mitmeiin thil awmzia min rawn zawt nghalthuai a.








"I damṭha zel em?" Margaretin a tih chuan a bu nghat a, inchhunglam aṭanga Gabriela te pafa rawn inpawm chhuak lam chu hawiin za lo zetin a nersak a.






"Chaw einan ala hma deuh sia, pudding kan siam dawn ami?" Ka ṭhiannuin a tih chuan inchhung lamah kan inzuiluta, "Hman niah Hruaisanga hoin buaina in nei a ni maw?" ti a Gabrielan a zawh chuan Lalbera lo nuihak chu ka en vat a.








"Hmeichhia ang maia kam tam a nih dawn chu" a lo ti duh lek a.








"Engmah hi hriat mumal i la neilo em ni?" thei vel mawlh mawlh pahin Margaretin a ti a, "Ka theihnghilh hmak hleinem, ka chianglo mai a ni" a Apple ken lai keu phel phawk pahin a ti a, Cedd an alo lawm khawp mai, "Ti leh teh" a lo ti sek seka.





Kan pali chuan zanriah eikham thlengin kan titi a, haw a rawt sek a vangin rei awm khawtlai loin min thlah haw a, zan dang ang bawkin lo len luh a duh a, kan inkawp lui ta tho tho bawka ka hnial ta biklo. In a kan luh chuan ka nu leh Dodo-an Tv an lo en a, ka pa a awm lo hlauh.







"I dam ṭha tawh em enge i an?" ka nu chuan a lo ti a, phur fea a damṭhat tawh thu a lo hrilh lai chuan inchung lam aṭangin Nau-a a lo chhuk a "Ehe, zuhehpa chu i va lo leng khat ve ka pa i rawn runluih nghal dawn a maw ka tia" alo tih nghal phawr phawr vang chuan rum zetin ka lo melh a.








"Lalmuanpui rak rak lo khan lehkha han zir rawh" ka nuin a lo ti bawka.








"Englo kha ila nei em, hmana kan Saiar hem hmina i telh ang kha"Dodo an a lo ti khauh a, zawhna mitmenga Lalberan minlo en chuan ka lo hrebik hauhlo.








"Ka Birthday ah Saiar hem hmin tur ka lei dawn a, lo ngaihtuahla" Dodo chuan a la ti tak deuh deuh a, "Engthil nge ka telh" tia Lalberan a zawh lêt chuan "I French Paradox kha a tihna anih chu" Nau an a lo tihkhalh zauh a.








"I naute hian zu chungchang min zawtin ka hria ka pe ṭhin em ni? I nu awmlai hian zawh chi pawh a nilo ang" zawi tein ka beng bulah a rawn ti sar sar a, a banah ka lo hmersak vak ringawta. "Dodo chutiang eiturah tuman an telh ngailo" ka lo tih chuan "Eitura telh atan kan ti hleinem" Nau an a lo ti ve leh a.






"Ehh...anih chuan engatan nge in tih a?" ka lo ti hluai a, naupang te tein chutiang tr an han sawi ngam ni "Engatan nge tih zawh vak a ngai a mi" Naua bawkin a lo ti leh a, a ṭawng duhdan chu ka huattawk alo tling em em, he nau hian min zahlo telh telh mai. "Engthil maw?" ka nuin a lo tih chuan an pahnihin an ngawi daiha, Lalbera pawh a ṭhu ngawi ran a, a lo len hmasak ber ṭum ka ngaihtuah let a, khami ṭum kha chuan vawitam tak kan inchhung lo chuangkai tawh ang maiin a rawn ngampa nghal kha a nia, tuna a mizia nen chuan dang tak a ni tawh.








A haw dawn chuan kawngpui thleng ka thlah a, ka bianga a fawh zauh hnua a tlan chhuak chu ka thlir zui vawng vawng a.








"Enge pawnah i tih a?" ka hnunglam aṭanga aw ka hriatrualin ka phu chiang ngei mai, ṭhenawm te ina ka pa leng a lo haw chiah chu niin Lalbera a hmu hmanlo chu lawm tak ka ni.


*


*

"I bialpa chu ngaihzawn hahthlak chi a nih dawn kha, a thikthu a chhe emai" Ramropuian a rawn ti a, a message chu ka chhang letlo a, pawi ka tih thu han hrilh pawh ka tum lemlo. Engemaw chen chu class a rawn kallo a, Janeti hnen aṭangin ahmai duk nasat vanga a chhuah ngam rihlo thu ka dawng a, ka inthiamlo ru ve tho.








"Ezra nen khan inlo ni renga, min hrilh ve tur che nia" nuisang chungin Janetin a ti a, a ṭhiannu bialpa hlui a nih thu a sawi kha ka hrechhuak nghalzat bawk. "Tu nge Emma-i?" nuisak chungin ka ti a, "Kha te chu a rei tawh a lawm" a lo ti sam et thung a.








"VL...Ramropuia hian a ngaizawng teh mai che ania aw, hmanni kha chu ka khawngaih tawp" a rawn ti leh a, ka lo nuihliam mai mai nain awm a tinuam zanlo.






Ni li zet a chawlh hnuah a rawn kal ve ta a, a zia erawh a la ngai reng. Ka bulah ṭhuin min be seuh seuh renga kei erawh ka inlahrang lui ṭang ṭang thung a.






Zirtawp zanah Lalberan minlo bia a, kan kawta a awm thu a rawn sawi chuan Bathlarah chhuakin kawngpuia a ding chu ka zuk en a, a ban a rawn vai lauh lauh a "Ka chhuak dawn a, minlo zui duh em" Phone aṭang chuan a lo ti a, zanin tehreng chu zui ka chak tlat. Ka pa zin lai a ni a ka chhungte an mu vek tawh bawk.







"Kan haw har dawnloh chuan ka lo kal ve ang" ka tih chuan a phur kher mai, insiam sawk sawkin ka chhukthla ve nghal thuai a.








"Khawiah nge kan kal dawn?" a Bike a chuan pahin ka zawt a "Bike Racing na ah" a lo tih chuan ka nersawk a.








Khawpawnah a ṭhiante hoin an lo nghak a, hmeichhia te pawh an awm ve nual mai. Biker sawm dawn nen inzuiin khawpawn lam kan pana, a hmun kan thlen chuan mi an lo awm nual a, ruih hmel fe fe pawh an kat nuk a.








Mei an chhem a, hmeichheho pawn Beer can an hum far a, an bulah chuan ṭhuin an titi karah chuan ka lo ṭhu ngawiran a, hmeichhe ṭhenkhat chuan min en duh viau bawk. Fiamthu nuihzatthlak tak tak an sawi a, an zinga awm chu a nuam dangdai phian mai, enghelh neive awm pawn an langlo a, an nun chu heheu tak angin lang mahse, nuam an ti tih a langreng a, an nundan anga nun ve hi ka chak ṭhin.








"Malsawmhlu...kan pahnihin aw" pawr zeta rawn titu chu Hruaisanga kha a ni. "Zanin chu ka tello mai ange" Lalberan alo ti a, "I bialnu hmuhlaia chakloh i hlau deuh a mi?" a rawn ti leh pek a, "I nep lutuk" midangho chuan an lo ti tliar tliar bawk a.








"A ho emai, Accident a hlauhawm" ka loti ve thung, meichhem alh mek en chuan a nuisuk duh chauh a. "A hriatna a hlauh a, Bike khalhdan pawh a theihngilh vek" pakhat chuan a lo ti leh kher a, chuveleh Lalbera chu a tho nghalvut a, ka ṭhutna aṭanga tho chhuakin "I ti tak tak dawn e law?" phawk fein ka lo ti a, "Ka reilo ang hetah lo awm rawh" tih pahin Hruaisanga te ṭhianho dinna lam chu a pan zui nghala.








Intlansiak tur ho chu kawngah chuan an ding far a, hmeichhe pakhat infeng chhing zet rawn kalchhuakin a Jacket a pelh a, chunglamah banpharin a fai thuak a, Biker ho chu an dawk chhuak nghalzat bawk. An tlanchak kher mai, kawia an tlanliam hnu chuan thinphu dep dep chungin ka ṭhutna lam ka pan a, Accident a thleng ang tih mawlh ka hlau a ni.








Minute 20 vel hnuah an rawn let leh a, Lalbera lo tlan hmasa ber ka hmuh chuan dingchhuak meuhin ka lo en, hmeichheho chuan kawngah dingin an lo au dar dar a, Finishing line a rawn pelh rual chiah chuan a lampanin ka kal ve nghala.








"A va nuam ve" hlim tih hriatzeta nuisang chungin a lo ti a, "A hlauhawm emai, ti tawh miah suh" ka lo ti mawlh mawlh a. Mei chhemna lama kan let lehhnu chuan ka darah min kuah chungin ka ṭhiante chu a be mawlh mawlh a, Nsa leh Ruata pawh an lo thleng ve chiah a.








"I lo telve a ni maw Vîte" Ns-an alo ti vat a, "Kan chân hman chiah chiah a ni maw" Ruatan a lo ti bawk a. Zu an rawn kenga, Lalbera an ko hrang zui nghal chu lawmlo takin ka en a, thinrim ṭeuhin meichhemna bulah chuan ka ṭhu tau bur reng ringawt.








Hnunglam aṭangin min rawn kuah thut a "Ka inlo a nia aw, an bulah ka awm ringawt dawn a lawm" ka bengbulah a rawn ti sar sar a. Ka biangah min fawp leh zauhin a ṭhiante lampan chuan a kal leh a, in a tumlo tih min hrilh vang chuan ka awm a nuam ve tho mai, a inlo phal tak tak angemaw chu.








Hmeichheho Beer in ṭawng mawlh mawlh chu ngaithlain ka ṭhu ve ta renga, tumahin min be lemlo a, ka hmaa vut chu hmawlh tea thaikualin ngawi rengin ka ṭhu a, chutih lai chuan ka lu chung aṭangin tui a rawn baw nghal hawk hawk mai!








Au chhuak ṭhatin ka ding nghalthuai a, hnunglam ka hawi tur chu ka hmaiah a rawn theh lehnghal ṭhat a, tui pangngai a nilo Beer a ni, a rim ka nam nghal huam huam bawk!








Ka hmai chu tuai pawkin Beer a min leih tu chu ka en chianga "Engthil nge i tih hi?" vin zetin ka ti nghek a "Tikhan kan inrul tawk chiah" ka hma a ding mek chuan a lo ti nghat a.








Hmeichhe ṭhenkhat chu an lo nui dar dar a "Lalfakawm...i rui nawi leh tawh a mi a?" kan lampana rawn phei pahin Ns-an a ti a, Lalberan a Jacket min rawn haktir pahin a hnunglamah min pawt let nghal thuai bawk a.








"Ka sawi nawn tawh lo ang, hmeichhia inih vang maia kutthlak duhlo turah che min ngai suh, ka dawh thei vak lo a nia" thinur tih hriat fê a Lalberan a tih chuan Faki chu a lo nuichhuak hak a, thîp zetin min la rawn melh zui rawm bawk a.








"Ezra, kha nu khan i hriatna i hloh remchangah lain i bialnu lem a chang mai mai a ni, U sangpuian ka U hnena a sawi ka hre vek" hmai zangthal ha a enpahin Faki chuan a ti a. "I dawtsawi man hi ila hmu dawn khawp" ka lam rawn hawiin a rawn ti leh kher a, ka chil ka lem khalh a engmah sawi ve tur reng ka hrelo, Beer a min leih vangin ka thin arim hle tih loh chu.








"Insual tir ula a nimai alawm" hmeichhe zu rui pakhat hian a lo ti a, "U...i ṭhianpa hi nangpawn hrilh ve teh, he hmeichhia hian a bum mai mai ani tih hi" hnunglam aṭanga rawn penchhuah pahin Nancy-in a lo ti bawk. "Lo ngawi rawh" Ns-an a tihchuan a ngawi hmak thung a, kan lam rawn hawiin "Ṭhianpa lo va kalsawn pui rawh, keiman kan bia a nge" Ns-an a tih chuan "Aṭha a lawm" tihpahin min kai hrang nghal thuaia.








"A zialo hle mai, a vawt em?" ka sam huh rawn tuai thuak pah chuan a ti a, "Vawtlo... mahse, ka rimchhia" ka lo ti sap a, nuisuk chungin min rawn hnim a "Kan haw nghal dawn nia" tihpahin a Jacket ka haklai chu min rawn siamṭhat sak mawlh mawlh a.









Nancy leh Faki thilsawi chu ka ngaihtuah zui tluk tluka, ka ti diklo niin ka inhre telh telh a ka awm a nuam theilo, ka inthiamloin ka hlauthawng ruai bawk a, haw kawngah te chuan engthil dang mah ka ngaihtuah theilo.








Kan inkawt kan thlen laichuan kawtthler chu a reh ṭhuap a, Street light engdul zet hnuaiah chuan a hmel chu ka en vang vanga, chiang takin hepa hi ka duh a ni. Mahse, ka bum mek chu a ni si a, kan inkar hi a tan hian a Fair lo takzet.








"Lut la, han intihul vat rawh, i hritlang hlauh ange" min ngaihtuah hmel takin a ti a, amah chu enin ka la ding ta renga.







"Ezra Malsawmhlu"






"Lalber tirawh" tih sup pahin mit min sial zauh a, Bike a a ṭhu chu a nghawngah kuah thutin ka lamah ka pawt hnaia a hmuiah ka fawp zauh a. Min chhanglet tur chiah chu ka inla hrang leh vat a, hawihai zeta min en pahin "Ka khamlo" a ti zawi sup a, a hmel hlim sarh chu hmuh a nuam hle bawk.







"Thil hrilh duh che ka nei a?" ka tih chuan "Sawila" tiin ka lama a beng rawn dawh hnaih pahin a nui a, "Englo a nia" sawi ṭan dan tur hrelo zet chuan ka lo ti a.








"Englo...sexy deuh a mi?" uang zeta a tih chuan ka lu ka thing a, thutak zawka "Enge ni le?" a rawn tih leh chuan thawk ka lo la hak a.







"Lalber..."





"Ummm"







"Diktak chuan maw i bialnu ka ni lo" ka ti tawl mai. "I nih mek si hi" a rawn tih rualin ka lu ka thing nar nar a "Ka sawi awm zia chu" tiin thawk ka la leh halh a.









"Tunhma a i bialnu ka nilo, i Accident hmasaka i bula awm kha ka nilo a ani kha chu Daphne a ni, a vawi hnihna a mi pawh kha keimah ka ni chuanglo Margareti a nih kha, keichu maw i ṭhian ve mai chauh ka ni" a mitah tak pawh en ngamlo chuan ka kun ta daih a, a ngawi vung vunga kawngpui chu a reh tlawk tlawk thung.









"Dik tak chuan nitin hian ka duh telh telh che a, Faki leh Nancy te thil sawi kha ka nihna diktak anih kha, i hriatna hloh hi remchangah ka lo la mai mai a lawm mahse, ka inthiamlo reng ṭhin" tiin hnuailam ka bih ngar a.







"Ka hre vek tawh a lawm" a rawn tih chuan phawk zetin ka hawichhuak a!








"I hria maw?!" a thil rawn sawi chu mak ka ti a ni, a hria a nih chuan tinge engmah a sawiloh!








"Ka tihpalh, ka hrechhuak tawh a ni tih ka hrilh che anih chuan min kalsan daih ka hlau a, Vanlalhlan nangmah kha ka duh che, harsatna ka tawh lai zawng zawngin ka kiangah i awm ṭhin a, hman aṭang khan lo hmangaih daih tawh tur zawk che ka ni" a tih leh chuan sawitur pawh hreloin a hmel chu ka en reng ringawt tawh, engtin nge? Engtik aṭang khan nge?








A hmel thutak zet te chu ka ringhlel rum rum mai!









Ka hau chunga milim ang maia ka ding khawng reng chu ka kut a rawn vuan a "Nithum kalta mai khan" tihpahin min nuih var var a.









(Kan ti chho leh bek bek thei turah ngai ang aw)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:03 pm

CHAPTER - 8






Mut hmunah ka ngaihtuah zawm a ka hlim a ni, a damṭha tawh chu ka lawma ka lawmna chhan ber erawh min duh thu a sawi kha a ni, a hriatchhuah hunah min dem mai ka hlauh vangin inthiamlo ṭeuhin ka awm reng ṭhin a mahse, a hriat vek tawh hnuah pawh min lo la duh ve reng a, ka beisei phak hauhloin ka rilru tur a dawn vanga min lo hriattirlo zawk a lo la ni zui a.









Khumah chuan inlet tawn sekin ka nui leh rih ṭhin a, ka awmdan chu a nuam takzet, tunah chuan engmah enghelh nei tawhloin ngaihngam takin kan inkawp thei tawh dawn, ka phura ka helhhawlh bawk.








Ka rilrua ka pa alo lan rualin ka nui tawp nghal hmak a, ka pa hian rilru a ti hah riau mai mahse, Lalberan zu a nghei anga engkim a ṭha vek ang, ka pa in a duhloh chhan ber kha zu vang a nia; a nghei anih chuan buaina a awm tawhlo a nimai.






Zing a ka harh chuan khum aṭanga ka thawhchhuah hmain ka Message ka Check te te a, Lalbera message lo awm va ka hmuh chuan phur fahranin ka en a "Morning, i class banah ka lo hruai ang che" tih a ni a, chutihrual chuan message dang a rawn lut lehnghal zat a "Mipa lam hawiin lo nui miah suh" tih a rawn thawn leh a, thikthu chu pe chhe ve hle mai maw a ṭawngkam hawhin "I thu ber" tih ka va thawn ve ngat a.







Janet-in minlo sawm a, class kan thlen chuan pali nga vel chauh an lo la awm a, kan ṭhufel awrh tihah Ramropuia pawh a lo lang ve nghal a, ka ṭhutna bul chu a rawn melh zawka ṭhutna awla ka Bag ka lo dah vangin ka hma chiaha ṭhutna awlah chuan a ṭhu a, kan lam a rawn hawichho nghalthuai a.







"Thil eiho ila, ka treat ang che u" a rawn tih chuan "Chiah maw?" phur fahranin Janet-in a lo ti, min ngaichanga min rawn melh rual chuan "Ka hmanlo ang, in pahnihin lo ei mai ru" ka lo ti vat a.







"Ti teh Ck puiah ka sawm che pawh a nihloh chu" lawmloh hmelzet hian a ti a, ka chhan leh hmaa kan zirtirtu a rawn luh tak vangin ka sawi zui ta lo a, ani in treat tir tumna chu ka nei hauhlo bawk.









Banah haw tum a ka lehkhabu ka khung mawlh mawlh lai chuan "Thil chu eiho ila?" Janet-in a ti a, "Ezra a lo kal dawna, vawin chu min hrethiam mai ru" ka lo ti liampuata, "Ani pawh sawm ve mai la" a lo ti leh a. Sawm chi teuh nang, a duh pawh a duhlo hrim hrim ang.









Kawt kan thlen thlak rualin Lalbera Bike bula a ding chu ka va hmu nghal a, min hmuh veleh a ban a rawn vai zauh a. "I lo thlenna a rei tawh em?" ka tih chuan "Ka thleng chiah, i ril a ṭam tawh em?" a lo ti var a.







"Ezra thil eiho ila kan lo tia" ka bula rawn din paha Janet-in a tih chuan ka melh ralh ralh a, kei min enloin Lalbera a en daih thung. "Ti ru kal ang u" tih leh min pawh a rual a, sawibuai theih pawh a ni tawhlo, Lalberan min zui bawk a, a lo duh ve mai bawk nen ka ṭanglui duh ta biklo a, dawr chhunga Ramropuia kan va hmuh erawh chuan thip zetin Lalbera nen an in melh zui ran ran a, an boruak a ṭang leh at tawh.








"Nang elaw?" Ramropuia chuan nuilui tih hriat zet hian a lo nuihsang a








"Ṭhu ila" tih pahin Lalbera banah ka pawt zauh a, ka lamah chuan rawn kalin Ramropuia ep zawng chuan a ṭhu deuh kher a, hetiang kara thil ei chu ka chak fahranlo hle a ni.








Eitur kan han chah dawn a "Nangman order ziakla" ti a Ramropuian min rawn biak chuan "I ta tur chu nangman ziak ve mai rawh" Lalberan a lo ti nghut a, inhmachhawna ṭhu an ni bawk a, an inmelh hnai dun ngang mai.







Lalbera nena kan eiduh chu ka chah a, a hranpain Janet-in Ramropuia nena an eitur chu a chah ve bawk. Sawi tur hrelo zetin kan ngawi ran a, Janet-i lo nui hak chu kan en rual ṭhap a.









"Titeh u...hmanni kha chu hriatsual palh vang a nia, theihnghilh daih ang u" a rawn ti zui a, "Nia mawle, hriatsual palh liau liau a nih kha ṭhianpa" Lalbera en chung chuan Ramropuian a lo ti ve bawk a.








Lalbera a ṭawnglo a, a ṭhu ngawi ngul. Chutah Ramropuia chuan ka lam rawn hawiin "Ka treat dawn che u nia" a rawn ti leh sup, "A ngailo min treat duh suh" ka lo ti nghal thuai a "Order siam hma khan chu chu i sawi theilo em ni?" Lalberan a lo ti ram hmuk, enge a hriat!?








A malah chuan ka va sik ru a, a ngaipawimawh eihlo "Min treat dawn chuan kan chah belh ange?" tih leh Menu chu bih a rual a, Waiter a ko a an Special menu chu a kawk kual nghal zung zung a, chutah Ramropuia lam en pahin "Min treat dawn tak tak maw, anih loh chuan pawisa ka nei ve miahlo ania" a la ti zui a, min ti zak kher mai! Janeti nen makti zetin kan lo en haw ringawt a.







"Treat dawn e" ka lam hawia rawn nuihsuk paha Ramropuian a tih te chuan ka zak telh telh tawh.







"A zialo hlemai tih phal chi anihloh tawp chu, intur kan chah tel teh ang" tih pahin Menu chu a keu zui leh a, hrechhuak thut niawm taka rawn hawichhuakin "Pawi i ti em lo ang chu" Ramropuia lam hawi chuan a ti leh ngata, za lo zeta Ramropuia kiaksuk chu a lawmlo hle tih ka hre thei mai.








A malah chuan ka va sik leh ṭhin, miin ṭha tetein an be tawh a, engah nge maw chimawm a chhuah ṭalh ni!







Ka kut a lo hum hmiah a, ka lam hawia nuihsuk pahin "I ei ṭeuh dawn nia" a la tizui a, kei nge Ramropuia a runluih pawh ka hrethiam tawhlo.








Kan thil chah chu an rawn chhawp a, Janeti nen kan in en a, kan nuih a za lo dun kher mai, Lalbera thil chah te chu a hmel en reng reng pawn a man a to dawn tih a hriat reng, Ramropuia hma a chhawp hnaih pahin "Min treat tu tur i ni bawk sia, a tui hmel ber hi eirawh" a ti leh kher a, mengrang ralh chunga Ramropuian a rawn en chuan "Duhsak lêtna" tih pahin a lo nuihsuk a.









Ka inthlahrung bawk si, zak bawk si chu ka thil ei pawh a tuilo. Kan thil eiman te chu keiman pek ngei ngei ngaiin ka hre bawk. Lalbera thil ei mawlh mawlh chu ka va melh leh ṭhin a, Janet-in min biak pawh chuan ka nuilui ve hram hram tawh. Vawin a a chet dan chu a Over takzet a ni.









Ramropuia pawh chuan a eimang meuhloin ka hria, a hawi chhuak leh hluai ṭhin a, pawisa a nei daihlo em mawni dawn ni "Kan eiman hi chu tum duh suh aw, keiman ka pe dawn nia" ka tih chuan "A ngailo ka treat dawn che u a lawm" a lo la ti ve ṭang a. "A thlâwn a nih kha, eiṭeuh rawh" ka lama rawn thlek pahin Lalberan a lo ti leh. Midang hmuhloh laichuan rum zetin ka melh a, Ramropuia lam hawiturin min la rawn signal hram a, a fiamthu thawh dan hi a ṭhing takzet tih te hi a hre ve lo em maw ni!








"Ka puar e" tih pahin a ṭhu ngil at a, Plate li lai a chah a, a ei leh mang tawp silo, a intur chah a la rawn thleng zuia, pakhat mai niloin kan pali tan bawk a lo chah lehpek a! Hepa hi pawn kan thlen hunah a chaklo ngawt ang chu.









"Anih kalna tur pawimawh deuh kan neia kan kal mai ang" tih leh din a rual a, ka ṭhiante pahnih chuan min uibeh pawh an chak lo a niang, an lo nui tawi tak ringawt.







Ka Bag aṭangin pawisa ka la chhuak a chuveleh Ramropuian "A ngailo, ka la dawn chuanglo" a lo ti vat a, pek luih ka tum ngial pawhin a ṭang ve tlat a, thinrim dawn dawnin kan inhnawn a, dawhkana ka dahluih lahin ka Bagah a rawn khung leh nghal a, Lalbera kalsawn ta daih chu pawisa pawh pe ta lo chuan ka umzui nghal hlawk hlawk a.









Kan dawhkan aṭanga lang phaklo chinah a side pocket zen atin a lo ding a, ka thin a tirim lutuk chu a bul ka thlen rualin "I a em ni, tinge khatiang zawng khera itih a?" ka ti nghal bawrh bawrh a.








"Ni hmiang" tih leh ka dara min rawn kuah a rual a, ka lo ṭang deuh at chu nghet zeta min kuah pahin Counter lam min pan pui a, nu pakhat lo ṭhu hnenah chuan "Card in Swipe thei em?" a ti zui a, thawk ka la huai ringawt, mai mai chuan ngeiawm lutuk mai.








A ATM card a phawrh lai te chuan tumbur chungin ka lo en a, "Dawhkan 13 na" tih pahin a kiai suk a, "In eitui em, lo chawl ziah ang che u aw" Lalbera card lak pah chuan dawr nghaktu chuan a ti siam siam a, a dawr hnem bawka, a be ṭha kher mai.








"I hmel kha ka ngei, i che ṭhing lutuk bawk, ka lawmlo" pawna kan chhuah rualin ka ti nghal hlak hlak a "Keichuan ka ngai che, ka treat bawk che sia enge min tihsak ve ang" nuisang chungin a ti a, "Bialnu te treat vanga phut let neih te chu a pa lo emai a" ka tih chuan ka hnunglama a nui hawk chu ka kalsan nghal hmiah hmiah a.








A bike dinna ka thlen chuan inher meuhin ka en a, a pen lai tawp chawtin phawk zetin min en thung "I thikthu chhiat vang a ni em?" ka tih chuan a nui ruh ruh a.









Min chhangloin Bike a tinunga, Ramropuia a tihdan tehhrep vang khan lawmlo viau mahila, a thikthu chhiat vang ni tlata ka hriat vangin nuam tihna deuh chu ka nei lawi bawk si. A bike a rawn ti awn a chuangta mailo chuan "Min chhang phawt rawh" ka lo ti leh a.







"Eng chu maw?" uang zetin a ti a, an hrelo der velah.







"I thikthu chhiat vang a ni tiraw?"







"Thikthu vang a ni tih i hriat chuan aṭhat chu, ka ta phei hi chu chhe teu teu tak a ni" a nui suk suk reng bawk si a, a bulah hian thutak hi a har ṭhin a ni.







Inah min thlah a, a u Gym a kal a ngaih vangin lo lut kawi loin a tlang nghal a, zanah Ramropuian min lo call a ka chhan loh vangin Message min lo thawn a " i bialpa pawisa kha naktukah ka pe ang tih lo hrilh rawh, keima pek tur a nia, a chet duh dan chu ka lungawilo khawp mai" a rawn ti a, ka inthlahrung ru veng veng mai.








Mahse, engmah ka sawilo ang, a zialo hle mai te va ti ta ila, Lalbera ka mawh chhiat a ni nghal ringawt dawn si a, kan inkar a ngaihdan ṭhalo an lo siam theih tur ang zawnga ṭawngkam neih chu ka duh bik hauhlo. Ramropuia a ni kher lehnghal bawk nen.




*
*



Sunday ah Vaivakawnah inkhawm turin kan kal a, kan haw dawnah Remtluanga nen kan inhmu hlawl a, Mary te ṭhianho nen an ni nghe nghe. "Tarmit i vuahloh chuan ka hai mai dawn che a lawm" nuisangin a lo ti a, "Thingpui lo in kawi ta che Rema" ka pain a lo ti zung zung a. Kan inṭhen tawh tih a hreve reng si a, engah nge maw a sawm kher chu le?








In kan thlen chuan thingpui ka lumsak a, chutih laichuan Sitting room ah ka pa leh Remtluangan Pathian thu an lo sawidun a, an awki pawh a ring ṭha dun viau mai. Thingpui ka va pek laichuan ngun zetin Remtluangan min lo en a "I inbuatsaih ṭha thei maw?" a lo tih chuan aw ka a chhangloin ka bu nghat a.








"A hmeichhia ber lakah hian kan beisei sang ber chu a nia hei, hna te an han hmu ve hlauh a nih pawhin pasal neih a hun ruai chu a ni tawh mai dawn sia, hmeichhia hi zawng an chhenfak awmloh khawp mai" a thingpui lem khalh khalh pahin ka pa chuan a ti a.








"Vîtei te zawng a puitling a lawm, a la chhenfakawm khawp ang, hmeichhia te chu pasal an neih hnuah pawh nu leh pa an ngaihtuah zui reng zel alawm" Remtluangan a lo ti a, TV en chungin an titi chu ka lo ngaithla kar a. Ka pa bula min han fak zui chiam chu a ṭullo ka lo ti kher mai.








"Nang college ah i la thawk em ni?" ka pa in a tih chuan "Thawk e, mi ai ka kal rih a, Associate professor an lak thar tur kha ka dil ve a, ka tling ve ngut ange maw" a ti sap sap a, "E chu...nang chuh hna nghet i neih thuai dawn chu, nupui neih chiah i hmabak der alawm" ka pain a lo tih chuan "Hma bak ako khawp mai" nui hawk hawk chungin a lo ti a.









Door bell a rawn ri a, hawnsak tuma ka tho uk chu choka lam aṭanga ka nu alo chhuah vang chuan ka ṭhu leh a "Lo leng ru " a tih ri te chu ka hre pha a.










"Vli a awm nange?" tih ri ka hriat rualin ka hawi chhuak nghal thuai a, "Sitting room lamah a awm kha, lo leng ṭhu rawh u" ka nu chuan a ti leh a.









Sitting room a Ropuia leh Lalbera rawn inzuilut ka hmuhrual chuan ka ding chhuak hluai a, ka pa pawn chîk zetin ka in leng te chu a lo en ve nghal a.








"Hei chu hmanzan a mi kha a ni maw?" ka pain a tih chuan "I damṭha maw ka pu?" Lalberan a lo ti sup a, Remtluang hmel a hmuhrualin zawhna mitmengin min rawn en nghal bawk.








"Thingpui kan lo inmek a, ka siam ve nghal ang che u" tih pahin choka lam ka pana, ka pa leh Remtluanga te awmdun lai berkhera an lo leng chu awm a tinuamlo duh viau mai.








Thingpui ka chhawi phei lai chuan "Eng kohhran nge in nih ve?" ka pain a lo ti mek a, "Presbyterian" an lo ti rual ṭhawt a, ka pa nersak chuan ka awm a tinuamlo leh zual.










"Matei classmate te an nih hi" ka pain a lo ti leh chuan "In hmuh a va khat ve" Lalbera en pahin Remtluanga chuan a ti a, "In inhresa elaw?" kapa chuan a lo ti leh hluai a.





"Hre em em chuanglo e " Remtluangan atih laiin "Vawi hnih khat chu kan inhmu tawh" Lalberan a lo ti nghalzat a.









" A ṭhat chu ani hi ka makpa nimai tur College Professor anih hi" ka pain a tih lehrualin thil keh chhuai riin a zui nghalzat a.



[attachment=0]images - 2020-06-26T110940.660.jpeg[/attachment





Ropuia a ni, Center table a ka no dah chu a ban a, a chawikang tur chu a thlauh keh vek mai! Kan enṭhap vang chuan Inthlahrun hmel takin minlo en a "A pawilo, a dang ka lo siam leh ang che" ka lo ti var a, chhuata thingpui bua chu ka hrufai nghal sawk sawk a, chutihlai chuan ka pa leh Remtluanga chu anlo inkawm bawrh bawrh a, Lalbera leh Ropuia erawh an ṭhu ngawi ta renga.






Ka inlengte awmlai renga ka pa han chhal chu nitheiin ka hre mang bawk silo, ka thinrim ru ṭeuh a, a thil rawn sawi dan kher khan min run hluah hluah bawk. Intithei zeta Remtluanga lo nui te chu ka haw hlur mai, Lalbera chuan min melh zawk tihloh chu engmah a sawilo a, engthil nge a ngaihtuah ang le?






Ka va ena kan mit a intawng chiah a, a landan chu ka hrethiam lo, ka nuih ringawt a tawitein a lo nui ve suka, thinrim hmel phei chu a pulo.






Kan titi a, kan piah lawka thutak zeta Pathian thu lo sawite pahnih vang chuan titi a kal lo hle thung "Kan haw mai dawn a sin" zawi supin a ti a, nuam an tilo tih ka hre ve reng si a, chelh khawmuan chi ni pawn ka hrelo, mawi hawihah "A la hma a lawm" te chu ka ti ve tak niin ka ding ve nghal mai bawk a "In haw tawh dawn e law?" a ṭawng karlakah ka pa chuan a lo ti liampuata, Ropuian "Kan haw phawt ange, nidangah kan lo la leng leh ang" a tih pawh chu hre awmpawhin a lang zui tawh chuanglo a.






"Thil min hrilh duh i nei em?"Pawna kan chhuah rual chuan a ti a, Ropuia kan hmaah kalin Step ah chuan a chhuk nal nal a, inbiakna hun remchang min siam tih ka hria. "Ani kha ka tan engmah a ni tawhlo, ngaihṭhat lohna tur a awmlo a nia" ka ti a, min ring tih hriatzetin a bu nghat mai a, a van nuam ṭhin.






An haw hnu chuan room ah ka chho tlang daih a, Lehkha chhiar ka tum ngial a ka rilruah a lut theilo. Ka pa lo lut chu thulawmawm a rawn keng lutlo tih hriat fein a meng rum ul a, ka melh zawk a rang takin Lehkhabu chu ka bih lehnghal thuai a.






"Kha i ṭhianpa kha hmu tawhlo ang che, Roman catholic nilo pasal i nei thei dawnlo tih i hriatkha, i nu pawn a hrilh chiang viau tawh che a ni lawm ni" a ti khur khur a, ka lehkha chhiarlai bih chuan ka ṭhu ngawi reng thung, ka nu khan tunhma khan min hrilh tawh, kan kohhran hian nupui pasal neih chungchangah hian dan khauh tak an neia, kohhran pawn lam mi neih a remlo a ni. Ka lo neilui ta ṭalh a a nih chuan ka man chu ka chhungten an dawng theilo bawk.






"A mihring mihrinna ang zawh pawhin khapa kha chu miṭha a nilo hrim hrim, bansan hmak ang che, i tan chuan Remtluanga a awm a, a ni mipuitling leh kohhran mi nibawk, hna ṭha tak anei mai dawn leh nghal a, a ni ve kha zawng.." a sawi lai chuan ka lo thaw chhuak hliai a, a la sawizo mailo "In inzui leh tih ka hre tawh tur a nilo" a ti chang leh bula, "Remtluanga kha i ngaih ang em em a fel a ni biklo" ka lo ti ve khauh a.






"Tumah ṭha famkim an awmlo mahse, i bialpa ve kha zawng a chhe lulai em a ni, ka thu sawi awihin thlah chu tum zawk rawh, i tana ṭha tur ka ngaihtuah vang a nih chu" awki damthlupin a ti a, a ṭawngdan dang ta daih chu mak tizetin ka en a "Remtluanga hi chu i nu nen pawh makpa atana kan duh zawng tak a ni, Christian chhungkua dinpui theihtur mi hi hmeichhia chuan thlan zel tur, khawvel chena phar kual vel ṭhin mipa nen chuan hmahun eng innei hleitheilo ang" a ti dap dap a, chhangloin a thusawi chu ka ngaithla reng ringawt.






"Ka sawi chu i hria em?" ka chhan mailoh avang chuan a rawn ti leh a. Thawk la hak chungin ka en a "Remtluanga kher chu ka nei dawn chuanglo" ka ti ve nghat a.






"I luhlul i chhuah chuan a tuar tu tur chu nangmah bawk ini mai, thil hre zawkin kan sawi chu awih mai rawh" chang zetin a ti a, chhan leh ka tum laitakin zanriah ei turin ka nuin minlo ko a, kan sawizui ta lo, chaw eilai erawhin Pathian thu min hrilh a kan unau chuan min zilh mawlh mawlh bawk a, zanlam inkhawm chu lehkha chhiar chhuan lamin inah ka awm a, inkhawm ban hma aṭangin ruah a tla cherh cherh reng a, ka lung a leng kher mai.






Dar 11 velah ka phone ri vangin ka harh chhuak hlawl a, Dawhkan ka bawhna lamah ka biang a kham hlur bawk. Min lo call tu ka hmuhrualin phur zetin ka tho chhuak a, ruah sur ri a bengchhen em vangin a aw chu ka hre ṭha theilo, Call chu a titawp vat a, reilo teah Message a rawn thleng a "Barbie, ka ngai lutuk che a, ka lo kal dawn" tih a ni.






"Ruah a sur sia, a tih chi loh emai" tih ka thawn let a. Rang takin a rawn chhang lêt nghal a.





"A pawilo, reilo te ka lo hmu ang che, pawna Step ah khan minlo nghak la, ka lo thleng harlo ang" a lo ti a, "Ruah do suh, naktukah kan inhmu zawk dawnnia" tih ka thawn leh a, chu erawh a rawn chhang tawhlo, a lokal tak tak dawn tih ka hriat chian em vangin thawmhnaw lum ka ha sawk sawk a, ka room aṭangin ka chhuak nghal thuai a.






Pawna Step ah chuan ṭhuin ka nghak a, ruah a sur tam ang reng bawk si a, ka ngaihtuah ngang mai 'Luhlul lutuk ruahsur hnuaiah te chuan lo kal rihloh mai tur a nia' ka ti rilru neuh neuh a, a lo thlen hun erawh ka nghakhlel viau lawi thung.






Street light eng paw riai hnuaiah chuan kawngpui chu a reh ruih a, tuihawk luang dam dam lam thlir chuan ka ding khur hlak hlak a, ka rin aiin a thang rei zek mai.






Ka ngaihtuah laimek chuan chak zetin Bike a rawn tlan a, kan kawtah dinga a rawn chhuk lai chu ka lo en renga, huh hnuang chunga ka lampan a rawn phei hlawk hlawk chu ka lo nuih var var a, eng khaw sawi set set loin ka bul a rawn thlen rualin min rawn fawp nghal chawt a.






"Ka ngai lutuk che" min pawm kanga min fawh mawlh mawlh pahin a ti a, "Keipawn ka ngai che" tihpahin duhthawh zetin ka lo chhang lêt a, bang nghenga ding chung chuan kan inkeih dun mial mial a, kan duhthawh dun ngang mai.






Step ah chuan inkuah rialin kan ṭhu dun a, a thawmhnaw huh vang chuan ka kawr pawh a huh hneh viau mai, chuti chung chuan hnunglam aṭangin min kuahlum vung vunga, a awm nghengin ngaihngam zetin ka ṭhu awn diai bawk, a hmui lum thar thar chuan ka biang a rawn nul a, ka tal chhuah hlau niawm hrimin min kuah nghet salh salh a.






"I hritlang ang tih ka hlau, ruah do hi a ṭha lo nidangah chuan ching tawh miah suh" ka tisep a, ruahsur hnuaia min hmu tura a lo kal vang vang erawh chuan min ti hlim em em lawi si.






"Engtikah emaw chuan tun hun te hi kan la ngaidawn asin" ril ruih hian a ti a, a lam ka hawi chu ka hmui a rawn chuktuah leh vang vang a, ka chhang lêt lo phal biklo.






Kawngka inhawng ri kan hriat rualin kan inthlah vat a, rang takin kan hawichho nghal vat bawk. "A vawh em hi, lo lut har suh" ka nuin a lo ti a, thinrim hmel a pulo "Ka lo lut ṭep" ka lo ti thuai a, engmah sawizui loin a khar ve leh mai bawk a.






"Lut tawh rawh, keipawh ka haw tawh ange" Lalberan a tih chuan "Ruah ala sur nasat em hi" ka lo ti ve leh a, "Ka huhsa vek tho a, a pawilo" a tih chuan inkuah riai chungin kawngpui lam chu kan hawidun leh vang vang a.






Thil engemaw vei nei a ang ka ti. Vawina ka pa awmdan vang te pawh kha a ni thei mai angem?






"Engah mah ngaisuh aw, ani kha ka nei dawn hauhlo a nia" ka tih chuan chîk fein min en a "Ka ring che a lawm" zawi tea tihpahin ka biangah min rawn fawp leh zauh a.






"Han lut tawh rawh le, in ka thlen hunah ka lo hrilh dawn che nia" tih leh min pawhthawh a rual a, kal mai tum a a penthla chu a hnunglam aṭangin ka kuah a, "Ka hmangaih che ania aw" ka tih rualin thawk a la hawk a. "In ti hul ṭha la, mu lum vat rawh aw" ka lama rawn inher pahin ngunthluk zetin min en a, chhan tuma ka ang hman zuau chu ka hmui rawn hupin "Keipawn ka hmangaih che" a ti a, in mangṭha nan rei zet chu kan infawp leh a, chumi hnuah hmanhmawh takin kawtkai lamah chuan a pen thla a, a tlanliam ta chu ka ngai zui vawng vawng mai.






Ka thawmhnaw huh chu ka thlak sawk sawk a, khuma ka mut fel hnu lawkah a Message a lo thleng ve leh chiah a. "Barbie, i tana ṭha ber tur ka duh tih hria la, min hnar hreh miah suh, i duh dan sawila i duh angin ka awm ang" tih a lo thawn chu a sawitum tak ka hrethiamlo. Inṭhen a duh tihna em ni? ka lawmlo dawn dawn mai.





Ka call a "I sawi awmzia ka hre thiamlo" ka ti nghal tawl a.






"Ka ngai che" ril ruihin a rawn ti a, enge maw a ngaihtuah le, rilru kap tu lian deuh neia sawi hreh si a ang ber. "Lalber engthil emaw sawi duh i nei anih chuan tlangtakin min hrilh rawh" ka lo ti a, lehlama mi chu a ngawi vung vung a.




"Muhil tawh ang zan a rei tawh"




"I rui a mi?" ka ti leh ringawt a, nichin lawka kan awmdun khan zu rim anam lo a, rui ni pawn ka hre silo.






"Rui lo e, ka rui tawh dawn hleinem" a rawn ti ve leh mai a, thawk ka lo la hak a "Anih chuan sawila, enge i ngaihtuah kan inkarah zep tur a awm hleinem" damdiaiin ka ti a.






"Keimah vangin harsatna i tawh ka duhlo mai a ni, kalsan tur chea nangmah ngeiin minti anihloh chuan keichuan ka kalsan lo ang che" a ti leh ang lawi a, chiang takin ka pa chungchang kha a sawi tih ka hre thei. "Min kalsan turin ka ti ngailo ang che" ka tih chuan "Ti miah suh, kalsan che ka duhlo" a lo ti leh vat a.






Kan inbiak zawh hnu chuan ka ngaihtuah zui renga, a bula awm ka chak a ka ngai ngawih ngawih reng mai. A thil sawi danah a lo inngaihtuah buai ve hle anih hmel a, a laka ka pa awmdan te ka ngaihtuah zuia ka khawngaih zual em em bawk.






Kartluanin kan inhmulo a, U sangpuian Gym a hawn belh a, chulamah chuan a buai ve hle a, kei Class ka kal a lehkha ka zir tluk tluk reng bawk a, zantin Remtluanga a rawn lenga, kei niloin ka pa a rawn kawm ṭhin, kei erawh ka room lamah ka tawm chawt renga, ka pa leh Remtluanga in belbul ta riau te chuan ka awm a tinuam theilo, ka pa lahin ka bulah a fak cham chi renga, an pahnih inkawm tlat hian buaina lian tak min siam thei dawn tlatin ka hre bawk.






Kartawpah Remtluanga chu chawei turin a sawm ta zuia, ka bialpa hlui nena inzawmna a siam lui tlat hi ka hrethiam theilo, Remtluanga lah a phur em em a, kei min ngaihsak ang takin langlo mahse, ka pa a kawm tlat hi chhan dang awm theiin ka hrelo, a tu emaw zawk zawk hian engthil emaw tum chu an nei a ni, nge ni a anlo in thurual reng zawk!?








(LALBER- an chhakchhuak ka nilo, induh duh min puh ngawt su a ti anih chu haha...Ralte pawh ka ni chuanglo, chutin ka dak thei viaulo a ti bawk anih chu..haha)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:03 pm

CHAPTER - 9







Zantin deuh thaw a rawn leng ta tlut tlut mai, kei min lenchhan nibawk silo chu lo huat theih viau lah a ni bik silo, ṭha deuhin min bia a, a rul tawkin ka chhang mai a, chumi hnuah room lamah lehkha chhiar turin ka chho leh mai ṭhin a, kan inkar thu chu dai vek tawh mahsela bialpa hlui a lo nih na chenah awm a ti nuamzanlo a ni, hetianga a hmel ka hmuh apiang hian Lalbera ka hrechhuak a, ka ngaizual em em zel bawk.









Lalbera pawn lo len a tum fo a, zan lam lehkha chhiar ka ngawrh vang leh ka pa mitmei ka ven deuh vangin ka rem ti lutuk lo a, a leng haw lam erawhin min rawn tlawh fo a, chhungte muthlih tawh hnu a ni ṭhin bawk a, Step ah inkuah riala ṭhuin kan titi dun melh melh ṭhin.









"Ka bulah lo leng ve la, ṭhianten ngaihzawng an hruai ṭhin a, ka mal thei lutuk a nia" ka lehkha chhiar laia a message lo thleng chu enin ka nuisak a, "Tunah khawnge i awm a?" tiin ka chhang leta, "Ka chhuak ṭep" a rawn tih chuan a bula kal ve chak na riau ka nei a mahse, ka chhungten an remti hauhlo ang.









"Haw har lo la, i ngaihtuah awm ve ṭhin si a" ka ti a, "Ole..i thu ber" a rawn ti leh mai a, a kalchhuah dawnah min lo hrilh thlap bawk. Inhnuaiah tuivawt la tura ka chhuk laichuan Remtluanga pawh a lo ṭhu leh reng tawh a "I zir ṭha thei em?" min hmuh veleh a lo ti a "Ṭha thei e" tih pahin choka lam ka pan a, "Thingpui lo lum nghal rawh" ka pain a lo tih vang chuan ka lum leh rih a, a so ka nghah chhungin tukverh aṭangin kawngpui chu ka thlir a, thlabial zan a ni a; a eng ut mai, a khawharthlak riau lehnghal.








Ka thingpui siam chu ka va pe a, ka nuin "Green tea min lo siam ve la" a lo ti a, ka siam laichuan Bike tlan ri ka hriat vangin tukverh lam chu ka hawithla vat a, a tlanliam fua chu ka hmu hman "Mawl lutuk, ti vak vak a tlan" ka ti zui hluk a, min bye bye tur tal pawn lo ding hlek sela ka ti rilru a, ka vui deuh dawn dawn mai.








Room a ka chhoh leh hnu te chuan ka ngaihtuah zui renga, ka ngai takzet a ni. Ka lehkhabu chhiarlai chu khupin thlanglam bathlarah chuan ka chhuak phei a, thla enghnuaiah chuan khawpui chu a lang damruih a, ral hlataka tlangpawng dingkhup te chu a hmuhnawm em em bawk, ngaihtuahna a vak kuala tunah hian ka bialpa khan enge a tih mek anga tute nen nge an awm ang?








Ka call a min chhang thei lo a, ala thlenglo anih ka rin vangin ka call zui ta lo, Chair la chhuakin thla êng hnuaiah chuan ka ṭhu a, ka phone ah zai play-in Tanya tucker hla ' I'll Tannessee you in my dreams' tih chu ka sakpui a, tiang em em a lunglen hi ka la neih ngai pawh ka hrelo. Ngaihbik em em ka neih pawh ka nei chuanglo, engkim mai chuan ka lung a tileng a, ka hunliam tawh sawitur fak hre siloin ka kur nguai mai.








Darkar chanve a liam hnuah ka call leh a, call chu a tlang a ala thei leh peklo, ka call nawn leh a a lak theihloh zel vangchuan ka thinrim ṭeuh a, a tawp nan vawikhat chiah tiin a number chu ka call leh a, a la dawnlo emaw ka tih zet hnuah a rawn la ta a mahse, beiseiloh deuhin hmeichhiain a rawn chhang tlat mai.








"Khawnge Lalbera...oh Ezra" ka ti vat a, "Dawrah thil leiin an kal lawk a, a lo let hunah ka lo biaktir ang che" a tihlai mekin mipa aw hian "Hriatpui, khawnge Lalfakawmin kha, Ezra kha a zui ve a mi?" a rawn ti lang lang a, ka call lo chhangtunu chuan "Aw..an lo thleng ṭep tawh ang" tih leh call chu dah a rual a, ka thin a sa phat mai, tunah hian Lalfakawmi nen an awmdun mek anih hmel e.






Lalfakawmi nen?






Ka ngaihtuahnain ka zeldin kual vela, ka awmdan chu hrehawm tak a ni, ka ringhlel ngawih ngawih a, che tisa hle turah ka ngai hmiah bawk, ka ringphal chiah bawk si lo, ngaihṭhatlohna in chhungrilah min ṭham reng bawk.







Bathlar leh room chhung chu kar tawn sekin thawk ka la leh hap ṭhin a, thinrim tihngaihna hrelo zet chuan ka inpetruh ṭeuh ringawt, ka phone chu ka en sek a, ka thin a rim telh telh lehnghal.









Darkat chanve dang a liama call ka la dawng eihlo, tumbur chungin khumah chuan ka bawk thlawp a, mit chhingin thawk ka la ham ham a, min lo call hunah chuan a chaklo teh ang chu.









Ka muthilh lai ka hrelo reng reng ka phone Vibrate ri in min ti harha, amah Lalbera ngei alo ni a, sana ka en a dar sawm a pelfel der tawh, a hming ka hmuh ringawt pawhin ka thinrim hlur mai.







"Min lo call a mi, Dawrah ka kala ka phone ka lo ken theihnghilh a" a rawn ti var a "Khawiah nge i awm?" ka lo ti bak hluk.







"Ruatpuia te huanah kan awm mek, pawnah khan han chhuak teh, thla a êng lutuk a nia" zangkhai zetin a rawn ti a, ka lo ner nasa mai.







"Zu i in em?"




"In lo" a lo ti leh var a, "Faki te ṭhianho an awm ve em?" ka tih leh chuan a ngawi vung vung a, "Kan ṭhianho chu kan awm vek" a lo ti khauh a, "I bulah a awm em?" ka ti leh kher a, "Barbie...kan inkar tichhe thei zawngin ka awmlo" a lo ti nghut.







"Min lo hruai rawh" bak zet hian ka ti a "Enga, tunah maw?" awihlo hmelzetin a rawn ti a "Aw tunah, ka lo insiam ang" ka lo ti leh a, lo kal tak tak se ka ti pawh a nilo, a rilru tihbuai hrim hrim ka chak tlat.







"Zan a rei tawh hi, keipawh ka haw ṭep tawh a lawm" a rawn ti damthlup a, "Min lo hruai dawn nge dawnlo, khalaiah khan min hruai duhloh chhan te i nei a nilo maw?" ka lo ti vin hlar. "A va mak e aw, hmeichhia ka mamawhlo" a ti ram hmuka, "Min mamawhlo chiah maw?" rang zeta ka lo tih chuan thawk a la hawk.







"Chutiang ka sawi tum a nilo, hmeichhia hi mamawh viau turah min ngaisuh, buaina dang ka ngah lutuk, hmeichhe tello pawhin ka hlim" a rawn ti a, a sawitum chu ka hre tehmeuh mai mahse, ka rilru luhlul zet chuan hriatthiam a la duh rih tlatlo.








"Chutianga hmeichhia i mamawhlo viau anih te chuan min ṭhen la a nimai a lawm" ka lo ti leh nghek a, a rum nghut mai.






"A bawplawkah thu ila mai mai a ni, ka sawi awmzia chu nanglo hmeichhe dang tumah ka mamawhlo ka tihna a nih chu, min hriat chian kha Barbie" awki dam deuh zawk hian a rawn ti a, ka la lungawi thei nganglo "Ka hriat chian vak che pawh ka hrelo, tunah pawh tute nen nge in awma enge intih pawh ka hrelo e a?" ka lo ti ram hmuk a, hah hmelzetin thawk a la hluai.









"Ka ṭhiante nen kan awm tih ka hrilh tawh che kha" changzetin a rawn ti leh a, a awki chu ka ngei lutuk "Nia nia...Friends with benefits te pawh an awm kha tiraw" ka lo ti leh sak.









"Aw le... Mood phaknu ka lo hruai dawn che lo insiam rawh" tih leh phone chu dah a rual a, rang takin ka call backa a la duh tawh ṭhaklo.










Ka chhungte an mu tawha, thawmhnaw lum hain ka insiam mawlh mawlh a, thawmdim takin inhnuai lamah ka chhukthla ṭhem ṭhem a, choka aṭanga Nau-a lo chhuak nen kan intawk hlawl!








Phawk zeta min enin ka incheidan chu a thlek kuala, engmah phei chu a sawizuilo. Pawnah chhuakin Step ah chuan ka nghak a, kan inbiak aṭangin darkar chanve dawn chu a liam tawh. Ka sana ka bih leh laimek chuan a rawn ding ri hrawk a, ka ṭhutna aṭanga ka lo dingchhuak chu ka lamah rawn pen phei hlawk hlawkin min rawn fawp nghal nawk nawk mai.









Chhanlet ngaihna pawh ka hrelo, a che buan buana bangah min nam betin min eizawh vek tum ang hrima rawpin min fawp bawk. Ka thaw a chham lo chauh tawh tih ah a inla hrang hram a "Kal ang" tihpahin ka sam chu min tuaiman sak thuak thuak a, a incheidan vel chu ka thlek kuala, a chheloin a thawmhnaw hakte chu a inhmeh kher mai, nersak chungin "Tu hmuh ah nge maw ti teh vaka i inchei le" ka lo ti lehkher a, min thlem tum tih hriat zetin min rawn ban ruak a, a kut chu vaithlain ka kalpel hmak.









Hetianga han titauh khum vel hi nuam ka ti, lawmlo si tilang ṭha ngam bawk siloin a awm a, han chhaih kawlh vel hi a nuam dangdai riau a ni. A bike bulah chuan ka dinga a tinung vut vut a, ka lamah a rawn ti awna han lawn mai ka tumlai tak chuan nichin maiah Lalfakawmi nen an inphur tih ka hrechhuak leh ta tlat.









Lawn ka tum uk tawh ka ṭhulh leh min rawn hmuh chuan mak tih hmel zetin min en a "Nichin khan Faki nen in inphur chhuak tiraw?" ka ti deuh hmuk a, "Huiha.." a lo ti kher chu rum zetin ka melh zui nghek a, a ngawi chiang hle.









"Hmeichhe dang i phurhna hnuah hian ka chuang peihlo" tihpahin ka tum hmuk. "Beer ka lakpui ringawt a lawm titeh rawn ṭhu rawh" a kut lehlama min rawn ban pahin a ti a, nghet zetin ka banah chuan min rawn chelh a "Titau lo la" zawi tein a ti sep a, Lalfakawmi nena an inphur kualvel tur chu a mitthla a ka thik hluah hluah.








A Bike seat a sang bawk si Faki chu hnung lamah a invuanin ka ring miahlo, ka mitthla a ka thin a rawn rim thar leh tut tut mai.








"Tinge tikhan i thawk sek seka, i damlo em ni?" tih pahin ngunzetin min rawn thleka, thle sawk khawpa abianga lo nam pahin "Ka chuang peih bawk lo" ka ti leh nghek.








"Engvang chuan maw, ahma ah hian i ṭhu duh tihna a mi?" nuisang chungin a ti a, ka chhan hma hmain "A tih chi loh Barbie, i bawp ana vek ang" a lo ti leh a, a nui chhuak hawk bawk.









"I Bike seat hi zai thler vek mai ania ka duh" ner sawk chunga ka tih leh chuan mit meng tizim sunin min rawn en a "Awle, ka hrethiam e sawitlang ve mai tur alawm" tihpaha nuisuk chungin a jacket a phelh a min rawn pe nghal vat a, lo laksak pahin ka hmui ka tihpawrh khuma, alo nui ri hawk. A Bike seat hnungah chuan phahin a jacket chu ka ṭhuthnana, ka chêt dan chu keimah ngei pawhin ngeiawm ka inti mahse, a bulah hian titauh bar bar leh han pangchan vel hi a nuam ka ti takzet.









A kawngah kuah hlan chungin a hnungah chuan ka beia, a tlanchak em vangin a vawt lam mah a ni, a shirt hak chhan a ṭang chuan min rawn ur lum veng veng a, a rimpa zet chu ka hip lut vang vang bawk. "Ka hria a lawm, duat i phut tih chu" nui hawk chungin a rawn ti a "Min duat reng ta che" ka lo ti vin hlar.









Ruata te huan kan thlen chuan an lo ri laih laiha, pawisa inchawiim Playing card an lo khel a, kan va lut chu Faki leh Nancy ka hmunghal zat a, min lo melh tur khai mai. Eng hehu ah ka ngai duh biklo, kiaisuk chungin lehlam ka hawisan ta daih a.









Lalbera chu Card khello bula chair ah chuan a ṭhu thla a, a ṭhian pakhat chu tihdan tur a lo hrilh zat zat a, a chair vuan chuan a lo ding ve ran a, an inkhel ṭang vel chu a hmuhnawm zek mai.









"A hmingin a bialnu a nia, a taksa mamawh erawh keiin ka pe thung, zanin pawh duhtawka min khawsakpui hnuah a hruai ve chauh a nih hi" hnunglama Faki aw ka hriat rualin ka inher nghalvat.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:04 pm

CHAPTER- 10

(@violette khiangte)





Ka hmai zawnah Cigarette a rawn pak khu laih a, rang lutuka ka lo vai kiang vat vat chu Nancy nen chuan min nuihzui hak a "Hmel en aia in han mawl dun zek chu le" ner sawk chunga ka tih chuan an nui tawp nghal hmak mai.







"Hmeli i chapo ve deuh em ni a, i bialpa saw ka theih hnu anih saw" Faki chuan tiin Nancy nen chuan min han nuih tha leh rih a, ka thin hian a tuar leh dawnlo in ka hria, ka sa pup pup chu inbengdaih tumin ka inhumruh ngar mai.






"Hmeichhe zak theilo deuh deuh hi kawi tinah hian anlo awm anih hi a" tih pahin ka inhersan ta hram a, "Hmeli leh!!" Fakin a rawn tih pawh chuan ka hawilet duh tawhlo, Lalbera ṭhutna bulah chuan kal hnaiin a darah ka vuana, min rawn en rang kher mai. "Vawikhat ka khel ve anga kan haw dawnnia" a lo tih chuan ka lo bu nghat a, a phur lutuk hmel chu hmuh a nuam hle bawk.






"Ṭhiannu..." ti a nuisanga min rawn en tu nula chu hman deuha Nsa Party a ka hmuh hmeichhia kha a ni. Ka bulah rawn kal hnaiin "In thlenna a rei tawh em" a lo ti var a "Rei vaklo, nang zawk?" ka lo ti ve thuai a "Kan lo thleng chiah lo kal rawh sawtah sawn ṭhu ang" ka bana min rawn pawh pahin a ti a, thlanglam bathlar tereuh te lam chu kan pan zui nghal a, kan ṭhu fel awrh tih ah mipa sangṭha zet hi rawn kalin "Mer bawih, tahkhan a nimaw i lo awm" kei leh ka bula nula min rawn melh tawn zak zak chung chuan a rawn ti a. Ka bula nula chuan "Ka ṭhianpa J-a anih hi" a lo ti leh var bawk.








"E khai aw...nang chu!" phawk zeta min en pah a a rawn tih chuan Margareti te inneih na a mopa ṭhian J-a kha a ni tih ka hre chawpchilh ve nghal "Awii...i langdang lutuka ka hai che alawm" ka lo ti hluai a, a sam buang thang ṭhin kha a dum tak hlup vang te pawh aniang ka hai chiang hle a ni.







"Mary kha lo awmpui rawh aw, hetah hian ṭhian a nei ve silo a ilo awm chu a tihzia hlauh e" Mary lam en pah chuan "Inkhelhna ah sawn ka ṭhu dawn ania" tih leh kalsawn a rual a, a kal tak hnu chuan titi ho tete sawiin kan inkawm a a fel reuh phian mai, ka kawm peih chi tak a ni.







Lunglei lam mi a ni a, kei aiin kum khatin a nau zawk bawk, a ṭawngduh viau a J-a kha a bialpa a ni tih ka hrezui bawk a an inhmeh viau lehnghal. Darkar khat dawn kan ṭhuthnu chuan Phone number te kan inpe a ṭhian inkawm ngeihtak ka ni zui der mai.






"Haw ila" J-an a rawn tih tak vangin min thawhsan zui a, keipawh mipa ho inkhelhna lamah chuan ka phei ve nghalthuai a, Lalbera ka hmu hauhlo chu ka hawihai der mai. "Vîte...in kal tawh emaw ka tia" Ruatan a rawn tih chuan phawk zetin ka lo en a "Khawnge Lalbera kha?" ka lo ti nghal vat a.






"Nichin deuh khan a rawn thawh tawh kha" a lo tih chuan ka hawikual nghal ruai a, ka hmu hauhlo. Phun hlak hlak chung chuan pawn lamah ka chhuak zuia, Mary leh J-a te inphur liam chu ka va hmu zui a, Lalbera hmel hmuh tur awmlo chuan min ti thinur hlur ringawt tawh.







Huan thlam piah deuha tlangval ṭhenkhat ṭhutkhawmna lam chu ka pan a, an lam pana ka kal chu min rawn thlek zauh zauh hlawm a, Lalbera ka la hmu chuanglo "Ezra i zawng a mi?" pakhatin a rawn tih chuan "Inlo hmu em?" ka lo ti vat a "Tun mai khan inchhung lamah a rawn luh chiah kha" pakhatin a lo tih leh rual chuan hmanhmawh zetin ka inher lehnghal vat a, Farm house aṭanga Nancy lo chhuak chuan "Chawh lutuk" tih pahin min rawn nek nghalsawk a, rum zeta ka melh zui chu min nuihsak chungin a kalsawn nghawng nghawng a, ka ngei reuh kher mai.






Inchhung luhna kailawn ka rap fel chiah tih ah, veilam sir thim zing aṭanga phun sar sar ri ka hriat vang chuan ka tawp leh rih a, hmeichhe aw niin ka hria kailawn aṭanga chhuk leh zetin thawm ka hriatna lam chu ka pan a, chutih chhung chuan ṭawngri chu a la awm reng tho, chiangtak phei chuan ka hre theilo nain mipa leh hmeichhe in hau thawm nimaiin ka hria a ni.






"Ka hrilh vek tawh che kha Nsa pawn thudik ka sawi tih chu a hria" hmeichhia zawk chuan a ti a, "Min thlauhthlak i tum vangin lem i chang mai mai anih kha, tum eng ang mahla ka tibuai zel tho ang che" hmeichhia bawk chuan a tih zawm leh zat.







"A ninawm a nia Lalfakawm hunkal tawh lamah ka buailo, tun atan chuan mamawh na che ka neilo" Lalbera aw ngei maiin a tihri ka hriat rual chuan ka ding dat a, "Inngaihtuah harh teh, heihi i nihna ani lo, mifel pawh i ni lo tun hmaa i nun kha nuam i ti zawk daih a sin" beidawn hmelzeta Fakin a lo tih leh chuan kalsawn mai loin ka la ngaithla zui ta zel a "Khanu pawh kha i hmeichhe duhzawng a nilo" a tih leh chuan ka chungchang a sawi tih ka hre thei.






"Nangnu te hian ka hriatna ka hloh emaw iti a ni maw, engkim ka hre vek ât so reng lo khan kalbo teh" thawm ri datin a zui a, ka dinna lampana ke pen ri ka hre zuizat bawk.







Ka hmel a rawn hmu chu a ding ve dat a " Barbie" tihpahin min rawn nuih nghal sang a. "Min lo zawng ani maw?" inthiamloh hmelzeta min rawn ban pahin a ti a, a hnung mai aṭanga Fakin rum zeta min lo melh chu ka lo hmu ve reng bawk.






Haw kawngah chuan Bike khalh chungin ka kut a rawn ban a, a lama min pawh hnaih salh pahin a jacket ipteah a khunga nui var var chungin a hnungah ka lo bei thlama, Faki hmuh laia min ngaihsakna a lantir dan vel khan min ti lungawi hliah hliah a ni.






Kan inkawt kan thleng a "Lo chhuk duh suh" ka ti tak nain Step thleng min rawn zui hram a, lungchhim zeta min fawh vawng vawng hnuah kan in mangṭha a, kawngka ka luh hmain a Bike tlanchhuah hun chu ka nghak veleh kher bawk, a tlan chhuah hnu chuan thawm dim takin kawngkhar ka hawng ṭhem ṭhem a, zan a rei tawh bawk nen chhuatah chuan pen ri chu a ring lam mah a ni, ka pheikhawk bun lai phelhin Sitting room thim khup lama kailawn chu ka pan a, kailawn ka rap tur chiah chu a rawn êng nghal uarh mai!






Ka phu nasa lutuk chu ka rakchhuak lo chauh a ni!! Ka pa hmel dur khup nen chuan kan inmelh nghal ran mai bawk a.






"Khawiah nge i chhuah?" a ti vin ṭhat a, a aw ri ah chuan a thinur zia a hriat a, a landan phei chu hlauhawm tak a ni. "Ih....englo a nia" ka ti bah nak a, ka dang a ro hulh mai, min en run vang chuan ka zam chhe hle a ni.






"Khapa nen khan inchhuak ani maw?" a tih chuan sawi tur hrelo zetin hnuailam ka bih ringawt a "Min chhang vat rawh" a rawn tih leh rual chuan ka lo phu dawrh mai. "Khûtah kan kal lawk a?" inthlahrung dek hian ka ti a, "Tunah dar engzat nge?" bak hluk a a tih chuan ka ngawiran ringawt.






"I sana kha en rawh" a aia ringa ka pa in a rawn tih chuan khur dar dar chungin ka sana chu ka en a, dar 12 alo pel fel der tawh.





"Zan rei tawhah in va bengchheng ve" mit nuai chat chat chunga Room aṭanga rawn chhuah pahin ka nuin a rawn ti a, min hmu chu a ding dat a "Bawihi kal chhuah i tum a law?" phawk zeta min en chungin a rawn ti zui zat a, "I fanu hi a leng a rawn haw chiah a nih hi" ka pa chuan a lo ti ram hmuk mai.







"Khawiah nge i kal a, i muhil daih tawh emaw tih a" ka nu chuan a ti leh a, ka chhan hmain "Tlangval nen an fawr dun anih hi" ka pa bawk chuan a lo ti leh. "Tunen maw?" zawhna mitmengin ka nu chuan min en a, "Ezra nen kan ṭhiante kan hmu lawk a" inthlahrung dek chuan ka ti a, "Kha zu ngawlvei kha vawi engzat nge kawp tawhlo tura ka tih che" ka pain vin zeta a rawn tih leh chuan sawitur hrelo zetin ka heh ka pet ringawt a.







"Zanrei anih tawh hi ṭawng ring vak vak suh, zingah sawi zawk rawh u" damthlupa ka nuin a rawn tih chuan kan ngawi ta ran a, hnuailam bih a ka ding chu ka pa chuan min la melh ngar ngar tih ka hre thei.






"I ching leh anih teh chuan i nghalruh kha ka khawng tliak ang, chho la han mu rawh" ka pain a tih chuan inpetruh fan fan chungin kallawn lam chu ka pan a, a phun zui hluk hluk ri pawh chu ka la hrepha hram tho.






Ka mutfel hnu chuan message pathum ngawt minlo hnutchhiah hman a, In a thleng tawh a, a inbual tur thu min rawn hrilh a ni, ka chhanga a hnu deuhah chuan Video call a rawn lut nghal a, a hmel ka hmuh rualin a inbual zo chiah tih a ka hre ve nghal bawk.






"I mut a chhuak tawh em?" dam zet hian a rawn ti a, a hmel chu ka lo en vang vang a "Diklo a awm em ni?" ka chhan hmain a rawn ti leh nghalzat. "Awmlo e" nuilui zet chuan ka han ti a, nichin maia thil thleng te kha chu hriattir ve kher ka duh hauhlo.






Kan inbiak zawhhnu chuan muthilh ka tum ngiala, ka muhil thei mailo chungril lamah hian a tawt urh ringawt mai; ka inlet seka ka sa pup pup bawk, muhil chianglo zetin ka awm renga zing lamah erawh ka mutui ta viau thung.






"Nizan ang khan khawsa tawh hlek lo ang che, mipuitlinglo zia diktak a nih kha" tukṭhuan eilaiin ka pa chuan a ti leh khur khur a, ka nuin minlo hauh chhunzawm ve mial mial bawk, buaina a tam mai mai dawna ka hriat vangin engmah sawiloin ka ngawi renga, ka naute pahnihin min melh hrek hrek tih pawh ka hrereng, an u hi ka entawn tlak bik vak loh tih an hrethiam ve chêk ang chu.







Kartluain class ka kal a, class banah inchhung sekrek ka khawih a, Lalbera pawh U Sangpuia Gym hawn thar lamah a buai ve thei hle a, inhmuh na hun kan nei mang meuh lo, ka zan chhuak ru min man aṭang khan ka pa a Strict zual a ṭhenawm dawra ka kal tur pawh Dodo a min zui tir zel mai a, Dodo a leh Naua bulah "A ṭhianpa nen khan an inhmu ru leh anih chuan min hrilh vat ang che u" a lo ti bawk niawm tak a ni, ka pa zia hi kan hrechiang tawh hlawm bawka ka naute pawn ngaihkhatah an nei tawh, hlau viau e tilo hian kan palzam lui fo mai.







Zirtawp zana min rawn Text chuan "Ka lo leng dawn" a rawn ti tawl mai a, Sitting room a ka pa ṭhu run chu ka va melh zawk a, han chhan mai dan tur pawh ka hamhaih lek lek a ni. "Lehkha zir ka ngai a sin" tih ka thawn let a, "Reilo te a ni mai, Minute 20 vel, thil ṭha deuh ka leisak che a" a rawn ti leh vat a, inchhungah chhoin ka call zui nghalzat bawk.







"Engthil maw? Naktukah timai la bazar turin ka lo chhuak dawn tho a" ka ti nghal sawk sawk a, "Ka pe chak tawh che a lawm, bakah ka ngai che a" zawi sap hian a rawn ti a, mit chhingin thawk ka la siai siai a anuam ka ti a ni mahse, lo len a tum erawh ka hnial ngei angai si.






"Naktukah kan inhmu dawn nia, chaw chhun ka leisak ang che" ka ti deuh vut a, a ngawi ta ran mai.






"Lo len ka tum apiang hian tinge chhuanlam i siam ziah"






"Chhuanlam ka siam pawh a nilo, lehkha zir ka ngai a, naktukah kan inhmuh dawn tho chû" ka la ti ve ṭang ṭang a "Ka lo len phal loh chhan i nei tiraw?" a rawn tih leh chuan "Aihhhh" ka lo ti deuh hluai a.







"A ṭha e..i remti lo chung chu ka tilui lo ang che mahse, naupang chhia ang maia a ruka inngaihzawn hi ka duh hauhlo aw, i chhungte vang anih chuan i pa pawh ka be hrehlo ania" a rawn ti a ka beiseiloh lam daih a sawi tlat, ka pa in a laka a rilru putdan te chu hrilh vek mai ka duh hman rum rum a mahse, ka insum leh ta zawk a ni.






A tukah chuan ka pa chu kohhran thilah a kalchhuak a, Naua leh ka nu Damdawiinah inentir turin an kal thung "Haw pahin kan rawn bazar mai ang" ka nuin a ti tak nain chhuahdan mawlh ka ngaihtuah, Dodo-a sawmin lehkhabu leiturin kan chhuak a eitur tui tawk leh Lego leisak ka tiam vang chauha min zui a ni.





"Ka lo chhuak lo mai anga, hetah lo tlang ula ka chhungte an chhuak veka keimah chauhin ka awm" Lalberan a rawn ti a, a remchang phian ang mahse, Dodo-a hi ka inkalpui tir thei ange maw chu?






"Do...KFC lei ila ka ṭhiante inah ei ila, a hmuna einghal chu ka zak deuh" GK bu keu lawr dan dan pah chuan ka ti a. "A zahthlak loh e, enge azahthlak na mi pawn an ei tho a lawm" a lo ti deuh hmuk a "Ka zak a lawm" sawi tur dang hrelo zet chuan ka lo ti leh a.






"Enge i zah ek chhuah leh tur tih hriatreng ei i zak a mi" a lo ti deuh kher chu ka ner khum nawng a, Britannica Encyclopaedia bu chu a Set in a rawn pawm chhuak ṭun a "Awi...Dominic i chhiar lul lo ang" ka lo tih chuan "Tar mawiah ka duh a lawm" a lo ti a. "Anih ka lei anga ka ṭhiante inah chuan kal ila" mitko san ralh ralh pahin ka nuih a "Umm..U Margareti te inah maw?" a tih chuan ka lu ka lo thing vut.







"Ka ṭhianpa te inah" zawi sapa tih pahin a lehkhabu ken lai chu ka laksak a, Counter lam pana ka kal chu min rawn lehpelhin "I bialpa te inah maw?" min en haw chungin a rawn ti a "Lalbera te inah" ka lo ti deuh ngat a, a hmui a petsawi nasa mai.








"Hmeichhia zawkin han rim chuh, a zahthlak duh awm, pawnah ka lo nghak daih ang che a nihloh pawn ka ṭhiante inah ka lo va leng ang" kan scooty dahna lampana kan kal lai chuan a ti a "A ṭullo " ka lo ti vin nghal hluk, a awm ve zelloh te chuan ka kalthei bik nang, a haihawtin a ngaih a sam bawk si a kan chhuakdun tih theihngilha min lo hawsan daih te pawh a hlauhawm chutiang anih teh chuan kapa in min man chhuak chiang khawp ang.







"Ka bulah i kal ve zel angai, ka pa bulah a sawi chi dawn miahloh ania aw min vaw hlum duh nghal ang" ka tih chuan "Zahthlak ê" a lo la ti nang nang a. "I bialpa pawh a ni lo a enge ilo zah ve vak, amah chiahin a lawm a awm" ka tih chuan min melh phawk nasa mai.






"Amah chiahin a awm maw! Anih chuan aṭhat chu" tihpahin kan thil lei chu Seat hnuaiah a khung mawlh mawlh a, eitur kan lei zawh hnuah Lalbera te veng lampanin kan tlanchhuak zui a, an In kan thleng chu Dodo-a phawk zetin min rawn en a "Ka rin ang a lo nilo" a rawn ti deuh hluai.







An kawt phul ah chuan a Uite var Dumtea nen khan an lo chhuak a, kan lam hawiin a rawn nuisang mai, "Hetiang hian a hausak ka lo ring miahlo" Dô-a chuan ka bengbulah a rawn ti leh sar sar a "A thawmhnaw te pawh a nalh theih em kha" ka lo ti ve leh kher a.






"Khangte chu Damdawi vel a vawrh ṭhin ah ka lo ngai alawm" a rawn tih leh chuan ka lo melhrum kha kha a.






"Kha chu a va lian chak ve" Lalbera lama pen pah chuan ka ti a, Dumtea chu a lo bauh chul a, Lalbera kut aṭanga lakthlak pahin ka pawm a, a ngawi zuita hle hle mai.







"Dodo...i va tlangval ve" Dô-a lam enpah chuan a ti a, "In i van nei lian em em, a Building pum hian a mi?" Dodo an hawikual ruai chunga a lo tih chuan "Aw..Ka room i hmu duh em?" a lo ti nghalzat.






Inchhung reh ṭhiapah chuan lutin inchung room lamah kan chho a Dô-a chuan "Wow" a lo ti deuh sek mai. Lalbera room a kan lut chu "E khai, i room aṭang pawn khawvel i chen thei dawn a nih hi le" a ti leh hluai a, Lalbera en chuan ka nui ta ringawt a.







"Guiter i van ngah mai mai" tihpahin Lalbera Guiter tarna lam chu a pan a, a thlekkual nasa ngang mai "I fel viau chuan ka la pe ve ang che" Lalberan a rawn tih chuan "Engtia fel?" phur zetin a rawn ti nghal a, ka lo nui chhuak hak.







"Tiru thil ei phawt ang u" kan eitur lei dawhkana chhawp chhuah pah chuan ka ti a "Inhnuaiah eitur a tam a sin tinge i lo lei duh" a lo ti zui nang nang a.






Thil kan ei zawh chuan khuma a thawmhnaw hnawk niai te chu ka thlehfel sak a, Dodo an Lalbera bungrua ngawt a lo la ngaihtuah thung.







Thawmhnaw ka thleh mawlh mawlh lai chuan ka sirah chuan a rawn muthla a, sirzawnga muin a rawn inbengkanga "Ka van ngai che" a rawn ti zawi deuh sup a "Hei i bulah ka awm reng hi" tihpahin a sam ka va tuaisak thuak a, ka kut lo man chawtin a hmui a tawhtir nghal vang vang bawk.






"Khawi maw.. i thawmhnaw thleh ka ngaih hî" tih pahin ka kut chu han phihthlak mai ka tuma a lo la phal î khaw lo mai. "Ka fawp chak che" a rawn tih leh chuan Dô-an a rawn hriat hlau takin ka hawi nghalvat a, ka mitmeiin ka kut vuan tlat tu chu ka hau zui mawlh mawlh bawk.







"Ka ti tak tak a nia" a rawn ti leh hram a ka lo nuih ta ringawt.






"Mawh..." tih paha min rawn hnaih nghal ruak chu a awmah ka lo nam chawt a "Ti awm anglo lutuk" Dodo a hriat hlau tak chuan ka ti a, a lo nui chhuak hawk chu ka ngei kher mai.






"Hei hi ava sial ve a ri pawh a nalh bik lutuk" kan bula rawn kal pahin Dodo chuan Guiter pakhat chu a rawn keng phei a, khumah chuan rawn ṭhu kaiin ka perh zuia "Ka duh ber anih kha" Lalberan a lo tih chuan a "Ka la lei ve ang pakhat tal chu Dô-an a lo ti veleh hmiah.







A thawmthaw ka thlehfel zawh a thawh mai ka tum chu ka kut a rawn man a, kan bul maia Dô a ṭhu chuan min lo melh lo hlauh. Hmui phunin ka hau a eng he hu ah ngailo tih hriat zetin min hum nghet salh salh bawk.






"Dodo i makpa a tan min duh em?" uang zeta atih chuan ka lo nui hak a "Maithei" Dô- an a lo ti ve khauh.







"Bialnu te i nei ve tawh em?" a ti leh a Dodo-a lo hawichhuak vut chu ka lo en ve vat a "Kum 17 ka ni tawh alawm nei ve ang chu" a lo tih chuan Lalbera chu ka lo melh ralh a "Chance te innei dun ve ngai em?" a tih leh chuan a thil sawitum chu ka lo man thiam nghal, ava han ṭullo ṭhin tak.







"Nei ang chu" Dô-a chuan a lo ti leh a, Guiter chu ring zet zetin a perh a Lalbera thilsawi awmzia a man lo chu ka nuih alo za ru kher mai.








Ka kut a vawnna chu phelh sakin ka phone ka khawih a, Dodo a Guiter perh lai chu en chungin khumah chuan a muthla leh a, a ngawih vang vang hnuah "Dodo chance min pek i tum nange?" a rawn ti ta mai!







Phawk zetin ka va en a, Dô-a pawn ka hau chungin a rawn en "Minute sawm vel te chu inhnuaiah lo zuk awm rih la" ala ti tak deuh deuh a, inpetruh ṭeuh chungin ka lo melh rum nghek a, min en duh hauhlo lehnghal!






"Chance ka pe dawnlo che i phakar hmel si" Dodo an a rawn tih chuan lehlam hawiin ka lo nui dir char char a, "Reilo té te chu, tlangval i nih ve tawh kha i zeilo tlat" khum a ṭanga nam thawh paha a tih chuan ka nuih a za telh telh mai.








"Inhnuaiah kher chuan ka chhuk dawnlo, pawn ah sawn ka lo ṭhu mai ang" thlanglam Balcony lam chu pan pahin Dodo-a chuan a ti a, Guiter pawm chunga a kalphei hnak hnak chu nuihza insum zetin ka en a, a kal liam chiah tih ah ka hnung lama mi chuan min kual her sawkin ka hmui a rawn chhilh nghal hmiah mai.






Thawm hriat phak rengah ka nau a awm a, chutih laia lo infawh chu awmdan ka thiamlo, a awmah chuan ka nam dawt dawt a, inla hrang hlekin nuisangin min en a "Tui lutuk" a la ti sup zui a. "I chimawm emai, midang bula a sawi chhuah teh chuan a chiloh viau ang" tih leh thawh ka rual a "Lawk...vawikhat leh chiah" a rawn tih chuan ka hmui ka lo petsawi vak a. Rawn tho kangin min rawn fawp leh vang vang a, zawi tein ka lo chhang let ve ta bawk, a lungawi kher asin.








"I thawmhnaw hi khawiah nge ka dah ang" khuma ka thawmhnaw thlehfel sa pawm ṭun pah chuan ka ti a, "Saw tah sawn va khung tawp mai rawh" a tihna lam chu ka pan a, a Closet chu lian leh hrawl zet mai a ni.







Ka hawn rualin a Perfume rim a rawn nam nghal chek chek mai, thawmhnaw chu ka dahlut zung zung a, a thil khai leh eng engemaw a dah te chu ka enkual pah bawk a, a safe chhunga Toys alo dah ruih ka hmuh chuan ka nuichhuak hak.







Ka khar tur chiah chu Closet chunglam aṭangin enge maw hi a rawn tla ri rawk a, Percel lianvaklo a ni a chhunga thil awm te chu a rawn inbun thla nuai a, la kanga ka en chiang chu ka thingthla rang kher mai!







"Ekhai aw" tih paha arawn phei hlawk hlawk chu rum zetin ka en a "Tu ta nge?" ka lo ti vin ṭhat.






Chhuata thil tla chhar pah chuan "I ta lo te tu ta nge nia nga" a tih chuan ka thin a sa zak. "Ka ta ani bawk lo e" ka lo ti vin hlar a.






"Anih te chuan tu ta nge tih ka hre bik hleinem, kar hmasa khan ka hmuchhuak ve chiah tho alawm" ṭi zeta min en pah hian a ti a, thinrim vanga thaw ri sak sak chungin a hmel chu ka en lêt ngar mai bawk a.






"I ta anilo tih i chiang chiah maw?" a rawn tih leh chuan ka in inpetruh vak ringawt.






"Malsawmhlu...kekawrte mawng zep ka ha ngailo" ka lo ti leh nghek.






"Aa...ṭawng ring vak suh i nauin a hria anga sin" a lo tih chuan ka lo thaw hak a.






"Tu ta nge khang kekawrte ho kha, i ha ṭhin tih chu min hrilh tum hauh suh" inhumruh ṭeuh chung chuan ka ti a "Ka hre nang U sangpuia ta pawh a ni thei a" a tih chuan awihlo zetin thawk ka lo la leh hluai a.







"I ta anih kha i ta, i hmeichhe kawp ṭhin te kekawrte chu Trophy atan ilo dahṭha anih hrep dawn kha...awileh!! mihrang ta vek ani em?" ka hmui hup chawtin zawhna mitmengin ka en a, "Engmah ka hrelo" tih pah min rawn ban chu ka lo tawlhhnung dawrh a, ka ke in thil enge mawni ka rap ri rak a, hnuailam ka en chuan engthil emaw hi a lo let ngat mai.






Phiangsen chuan leh!





La kangin "Malsawmhlu hethil hi enge?" ka ti leh nghal tuarh.







"A va mak e aw...ka hrelo ka tih chu" a rawn tih leh rualin "Mawla Pregnancy test kit a nih hi" tih leh amah vawm nana hman ka rual a, ka thinrim lutuk chu ka puak keh thei mai dawnin ka hria.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:04 pm

CHAPTER - 11





"Dominic haw ang" ring zeta ka tih rual chuan ka ban a rawn phihsawka "Min ring rawh kar liamta khan ka hmu ve chauh a lawm" tih pahin min pawt bet ṭung a. Thip zeta ka lo melh chu inthlahrung hmel pha deuh dai hian min lo melh ran a, ka la inbengdai thei mai teuhlo.






Ka kut chu phihlet pahin "Khang kekawrte leh Test kit kha tuta nge tih i hriat chhuah hma chu min lo be leh tawh suh" ka lo ti ram hmuk a "Barbie" a lo tih leh rual chuan ka pensawn nghal vat thung.






"Dominic haw ang ka tih chu i hrelo ami" vin lek lek chuan ka va ti a, "Tunah kan haw dawn maw?" min en hau chunga tih pahin a rawn tho ve sawt sawt a, a Guiter ken lai chu chhuhsakin hmanhmawh deuh chuan a awmna ngaiah ka va dah a a tarna a san deuh vangin Chair ah lawn kan a la ngai zui lehta nghal a.






Chair te chu ka nghat ri ang bur bura, ka che reng reng chu ka che vut vut bawk, Lalbera lah chuan ngawirengin ka kalna lam apiangah min lo zui kual a, ka Bag ka ak chiah chu "Ka tihpalh" a rawn tih vang chuan ka ke pen tawp meuhin a hmel chu ka en a, a lungngaih hmel kher mai.






"Enge i tih palh chu?" ka lo ti leh hlak a, hmeichhe dang te hi tuna ka dinhmunah hian ding sela an thinrim ve tho chuan ka ring, ka bialpa in a pindanah hmeichhe kekawrte leh rai leh railoh in testna a lo kawl ang tih hi rinlawk ngaihna ka hrelo a tin a ni.







"Ka ta a nilo tak tak, a ni anih pawhin kan inkawp hma daih a mi a niang, engtik ami nge ka hre tawhlo" thawk la hak chung hian a ti a, a hmel buainak chu ka lo en reng thung.







"I hriat chhuah hunah min lo hrilh dawn nia chumi hma chu ka be peihlo che" ka lo ti leh ngat a, lawmlo tih hriat zetin a ner nang mai.







"Dodo kal ang" tih leh kawngkhar lampan ka rual nghal a, pawn thleng min la rawn zui hram tho "In i thlen hunah minlo hrilh rawh aw" zawi deuh sup chuan a rawn ti a, chhangloin ka lo tum khum hmuk ringawt. Haw kawngah chuan "In inhau ani maw?" Dodo an alo ti sek sek reuh a, ka chhanglo ang ka tih hnuah pawh "Ti nge a, tikhan in inṭhen tihna a mi?" a rawn tihzel tak vang chuan ka insum leh thei pek lo "Dominic ṭhu ngawi kar reng rawh" ka lo ti vin ṭhat a, a ngawizui ta hle hle mai.







In kan thlen hnu reilo teah Lalberan min rawn call a ka chhanglo, ka be chak hlawllo a ni, min Text zui a "Min ring rawh kan inkar tichhe thei zawngin ka awm miahlo ania" tih min rawn thawn a chupawh chu ka chhang ta chuanglo.








Enge maw chen chu ka be duhlo zui ta a, a laka ka rilru puthmang chu ka hrethiam bik chiahlo a ni, lerh kualin hmeichhe dang ngaihzawn a duhthu min hrilh ta ang sela chuan ka chapona vang chauh pawhin i he lovin ka lo pawmsak nghal hmak theiin ka ringa mahse, tunah tak hi chuan chutiang ti duh tur khawp chuan ka ring leh chuang silo a ni. A mak e! Min kawp ka ring miahlo, tuna ka lungawiloh chhan ber chu thikna vang niin ka hreta a ni.






Ni e...ka thik chiang a ni, kan inkawp hma daih thil pawh lo ni tehreng sela dan theih ruallohin ka thik a ni. Hmeichhe dang nen lo che tisa tur anga ka ngaihtuah phei chuan ka thinrim urh thei hial nia. A hmel ka hmuh lah hian ka thinrim hi a rawn zual tut tut a, biak duhlo ah ka tlak leh mai ṭhin a, chuti chung chuan a hun hmandan te chu ka la ngaihtuah fo ang lawi bawk si a.








Kartawp ah ICFAI a ka kalpui ṭhin Tetein a piancham lawmna a kalturin minlo sawm a, Ropuian ka kal loh hlau lutukin min lo tur sek sek bawk a.Tetei piancham lawmpuina tur thilpek leiturin Class zawh veleh ah ka chhuak nghal a, ka duhzawng thil han lei tawp mai aichuan amah rawnin a duhzawng leisak zawk ṭhain ka hria a; amah chu biain ka va zawt a "Lei kher kher pawh a ngai hleinem" a lo ti tak nain leisak ka tum hle thung.







Miniso ah kalin Leather Bag nalh deuh ka leisak a, chumi zawh ah chaw chhun ei turin dawrah ka lut a, ka eitur chah ka nghah mek laiin dawr kawngka ah Lalfakawmi te ṭhianho an rawn lang ve hlawl mai, a hnungah Lalberan a rawn zuilut bawk a a hmel ka hmuh veleh ah bang lam hawi chuan ka insiamrem sawk sawka min hmulo hlauh e.






Thlanglam tukverh bulah chuan ṭhuin an titi barh barh hlawma Ruata leh Nancy ṭhudunin Faki leh Lalbera an ṭhu dun bawk, melhloh tum viau mahila ka insum theilo ka va en leh ṭhin a, nuam a tih hmel riauin ka hre leh ta tlat pek.






Faki nen chuan engemaw sawiin an inbe sar sar reng a, ka ṭhutna aṭangin ka lo inhumruh ṭeuh thunga zep lohah chuan ka thik a ni. Ka thik lutuk chu ka sa pup pup thei hialin ka hria. A phone a bih zauh zauh chu remchangah lain ka va Text a "Enge itih a ?" tih zawng ka va thawn a, a Phone dawhkana a dah chu la kangin a en vung vung a, min chhanglo a a dahna ngaihah a Phone a dah let leh ka hmuh chuan ka tawp up up mai, karkhat dawn kan inbiak mumal loh chhung khan minlo hawisan fel der tawh a nih ka ring rum rum bawk.







Ka thil chah a lo thlenga ka hmuhphak maia ṭhute vang chuan ka eituilo kher mai, tho kangin an ṭhutna lam aṭang kher chuan Counter chu ka pana min hmusela ka duh a ni, ka Text te kha a chhang duhlo vela ka hmu ru reng tih hre ve mawlh tehse.






Counter hma a ding chunga an dawhkan lam ka va hawi chuan maktih hmelzetin min lo en a, a ṭhutna aṭanga a rawn dingchhuak hluai chu pawn lampanin ka kalsan nghal hlawk hlawk bawk. Min rawn umzui tih ka hriat vangin hmanhmawh takin kawngpui lam chu ka pan a "Barbie" tih ri ka hriat rualin hnunglamah min pawt lêt nghal dawrh a ka Balance ka hloh ṭep lehnghal.






"Enga tinge min be lo a i kal daih a?" a tih chuan ka lo meng nur nasa mai "Ka text pawh chhang duhlo hi biak kher a ṭulna ka hrelo" ka lo ti let ve sak a, "Chhan che ka tum reng a lawm, thil eizawh ah rawn hmu tur che a lokal pawh ka lo rilruk mek a sin" a tih leh chuan awihlo zetin ka lo ner khum a, chawp leh chilhin dawt a sawi zung zung ṭhin a nih dawn hi.







"I bialnu khan a lo ngaihtuah ang che va let tawh rawh" tih paha ka pensawn chu min rawn umzui leh nghal a, ka banah a rawn pawt ṭûng bawk. Midang kawngkalin min en hruk hruk vang chuan kawngpui sir fianrial lampanin ka kai phei veleh thung a "Tihtur pawimawh ka ngah a nia, va let vat rawh" tihpahin a kut chu ka thlah nghalvat bawk.








"Underwear neitu kha ka hre tawh a sin" a tih chuan ka hau chungin ka lo en a, "Lalfakawmi a lo nia" a tih leh chuan sawitur reng ka hrelo, a hmel chu ka en tlawk tlawk ka rilru a tihnat em em lai hian engtin nge hlim hmel a put theih zawk!







"Anih chu a, ka kal tawh a nge" tih leh inher ka rual a, chuveleh ka darah a rawn ṭham sawk a, a kut lo vaithlak pahin "Thlawk bo rawh" ka lo ti vin nghal tuarh a, a hmelah chuan lungawilo hmel a rawn lang chawpchilh ve nghal bawk.








"Enge thinrimna ringawt hi i zawn, khathil neitu kha hrechhuak rawh min ti a, ka hriatchhuah hma chu min be suh iti bawk anih kha, tunah ka hrilh che a engvanga lungawilo hmel minla hmuh cheu nge inih?" lawmlo zet chuan a ti a, a thil min hrilh kha lungawina chi ni nghallo chuan!







"Lungawi chhan tur ka nei em ni, sawi rawh enge ka lungawi chhan tur chu Lalfakawmi kekawrte i lo kawl vangin ka lungawi anga maw?" ka thinrim lutuk vang chuan ka aw a khur thei hial mai.








"Ṭawng ring vak suh" tihpahin hnunglamah chuan min pawt phei leh a, mi hmuh phaklohna vel awmah chuan inhma tawnin kan in en ren rawn a "Tenawm lutuk" ka lo tih chuan rum zetin min rawn en nghal a, a landan chu a fiamthu hle lehnghal a, tun ang hunah pawh ala uang cheu chu ka ngaithei derlo mai.







"Ka hmu leh tawh ngailo ang che, i hmel ka hmuh hian ka luak a chhuak..." ka sawi laimek chuan ka hmui a rawn hup a, rang takin ka lo ben thlaksak nghal vat a "Engmah hrechiang loin thinrim vak zel suh, Faki ka duhlo nangmah ka duh che" a sawi zawng chuan a la nuisang zui a, hepa hian min ti â thei takngial dawn!







"I tan hi chuan engmah hi a pawimawh ve lo a nih hi, i kawp mai mai tur atan chuan ka inphal biklo inṭhen ang" thutak zet chuan ka en ta a "Teuhlo mai" a lo ti chu ben pawp ka chak a ni.







"I duh emaw duhlo emaw keichuan ka ṭhen dawn che" ka hma a ading chu nam sawnin ka kalsan zui hlawk hlawk a, ka hnunglamah chuan minla rawn zui cheu mai, tlan ti tihin Taxi stand lam ka pan a, ka bul a rawn thlen hma a kan tlanchhuak hman chu ka thaw huai bawk. Min rawn call zui a ka lak duhloh vangin Message a rawn thawn nghal bawk a.





"Ang pung pung zel suh, thil hrilh tur che ka nei a nia, zanah ka lo kal ang" tih a ni, thawk la hak chungin ka phone chu ka melh a, ka thinrim lutuk chuan min hnawh tawt urh mai bawk a, ka awmdan chu ka sahal nimaiin ka hria.







Enge ka hnenah a sawi kha "Kekawrte kha Lalfakawmi ta" a ti anih kha, tenawm uchuak leh lutuk mai. Ngawiteh Pregnancy test kit te kha Lalfakawmi ta tho tihna a mi!?







Ka phone a a Message chu enin ka inhumruh ngar ngar a, ka puakkeh thei mai dawn emaw tih tur khawpin chhunglam aṭang chuan min rawn hnawh tawt a. Hemi te pahnih inkarah hian engthil nge maw thleng chiah le?







In ka thlen rualin a Message a rawn lut leh a "Zanah Tetei birthday lawmna ah kal ang aw, ka lo hruai ang che" tih a ni, a Message te chuan min ti thinur zual ting mai lehnghal a, "Ka va han zui chhuak awm hleilo, a ruala kal aichuan kal loh ani mai" tih zui nang nang pahin ka pindan lam ka pan a, ka inthlak laiin Message dang a rawn thleng leh a, rang deuh chuan ka en leh vut ang lawi bawk a, keipawh hi ka â deuh tawh chu anih hi.






"Present chu keiman ka rawn leidawn nia" tih ka chhiar chu thawk ka deuh hluai a "I rualin ka kal awmlo Ropuia nen kan kaldun dawn" tih ka va thawn ta hram a. "Ka lo sawm ang che" a rawn tih leh chuan ka chhang buai peih ta lo.






Zanriah eilaiin ka chhungte bulah Birthday lawmna a kal ka tum thu chu ka hrilh a "Remtluanga nen kal ula" ka pain a lo tih chuan phawk zetin ka en a "Ringawta Remtluanga ṭhian a ni ve hleinem, University a ka classmate a lawm" ka lo ti ram hmuk a, Tetei leh Remtluanga tu inchhung hnai tak an ni tih chu ka hre tawh. "Nau-a nen kal rawh u" ka pa chuan a la ti hram tho a, ka phur tehchiamlo kher mai.







Ka insiam zo inhnuaia ka chhukthla chu Naua pawh a lo inpeih diam tawh a, ani pawh a ṭhiante ina len a tum a chhuak dun zeta haw rual leh mai turin kan intiam sa a ni. "I ṭhianpa zuheh deuh kha a tel ve dawn em?" ka pain ringhlel zeta min rawn en paha a tih chuan "Chutiang engtin nge ka hriat ang" ka lo ti vin hlar a, min rin hmelzan loh chuan min han en leh vung vunga tihngaihna vak a hrelo aniang "Dar 9 ah chuan lo haw tawh ula" a ti dam ta thlup a, keini pawh chu kan chhuak zui ve nghal a.






Khatla ah Tetei te inlam panin kan inphur a, kan thlen chuan Rinzuali te, Ruthi te ho an lo awm nawk mai, Nau an min letsan hnu chuan eitur te siamin kan titi ho a kan nuih dar dar laiin Ropuia leh Lalbera an rawn inzuilut hlawl a, Present bawm lian deuh an rawn khailut bawka, min rawn en veleh ka lo hawisawn vat a, ka lampanin ala rawn kal ta hram.






"Ka lo sawm dawn che kha ka ti sia" ka beng bula a rawn tih chuan "Thlawk bo rawh" zawite fiah zet hian ka lo ti a, ner sawk chungin Tetei leh Ropuia ding dun chu a pana a Present khai Tetei a pek lai chu ka lo en reng a, Tetein a hawng chu midang ho chuan an lo enpui a ka ṭhuthmun a ṭangin ka lo thlir ve thung.






An present hawng chu an ri hluai a, an thil rawn lek chhuah chu ka lo thlek ve vat bawk, Branded Perfume, Skin care Combo leh Makeup eng engemaw man to tak tak chi hlir a ni, a lerh bawka hmeichhe duhzawng pawh a lo hre khawp e, kei Chocolate chiah min la leisak ania ka ngei kher mai, Tetei lawm lutuk chuan a kuah deuh chuk chuk a a bialpa Ropuia Bag present aipawn Lalbera thilpek chu a lawm zawk emaw tih maitur a ni.






"Nangni pahnih hi in inkawp an ti che u sia, enge in awmzia in inbe mang silo" Tetein a rawn tih chuan ka lo ner sak a "Kan inkawp tawhlo" ka lo ti deuh hmak bawk.







"Chutia law, E...Vîte Remtluanga pawh a lo kal dawn a sin, i lokal dawn leh dawnloh tlaiah khan min rawn zawta" a tih chuan "Maw...tunah hian maw?" ka lo ti haw a, "Umm..paper check tur anei nuala a lo tlai deuh dawn a" a la ti tak deuh deuh a, ka haw vat angai tih ka hrechiang hle. Remtluanga hmuh chu ka chak hlawllo a ni, Nau-a ka phone a "A la hma ê" a rawn ti nui nui a, thil kan eichhunga lo thleng hman turin ka hrilh zui bawk.







"Haw i duh tawh em, ka lo leng kawi ang" Lalberan a rawn tih chuan "A ngailo" ka lo ti mawl tawpa "Lo kal lawk teh" tih pahin choka lamah min pawt phei nghal rawk rawk a, a ngaitêin inhmatawnin kan ding leh ta rân mai.







"Enge i lungawiloh em em chhan hi ka hre duh, Underwear vang ngawt kha chu a nilo tiraw, mipa dang duh i nei em ni?" a rawn tih chuan ka lo melhrum khai khai a "Ngaihzawng neih ka peih tawh bawk lo e" ka lo ti vin nghal hlar a.






"Engvangin, i duh ang apiangin ka awmin ka hria, ka care bawk che a enge i la lungawiloh cheu chhan chu, chhan ṭha tawk tak i nei anih loh chuan ka kiang hauhlo ang?" thutak zet hian a rawn ti a, a hmel a uang hauhlo bawk.






"Mipa kekawrte lo kawl ve ta ila nangin eng angin nge min ngaih ang?" ka tih chuan "A neitu chu ka sawisa hrep ang mawle" a lo ti nghalzat chu phawkfe a enin thawk ka la hak a, dak thei lutuk.







"Chu nangpawh i lawmbik dawn loh tawp chu tiraw?" kiaisak pahin ka han ti a " Ka hrilh che kha Barbie nangman min be duhlo nghal ringawt a, a neitu i hriatchhuah hunah chiah min be rawh itia, ka hrilh che a i lawm leh silo anih kha, ka hrilhloh chein i thinrima ka hrilh che in i lawmlo zual a, diktak chuan maw i thu i duh mah mah a ni Miss Prejudice diktak i ni" a rawn tih chuan inpetruh ṭeuh chungin ka lo melh ngar mai, Miss Prejudice te min han tih chu le, ani pawh enge anih bik Mr. Pride anih loh nachhan tur ka hrebik hauhlo.







"Hrilhloh aipawha huatthlala awm zawk thil min hrilh tlat hek che" ka tih chuan a nuisuk a. "Tirawh ka thlah ang che inhauh ka peih tawhlo, nangpawh lungawi ve tawh rawh" ka kut rawn vawn pahin awlsam zet hian a ti a, a nui leh nghal sang a Minute hnih thum dan lek lek ah hian a landan hi a thlak a, a mood te hi a chhia in a ṭha lehnghal zung zung a kei erawh chutiang chu ka ni ve der silo.






"Thlah ka ngailo, Nau-an minlo hruai dawn" tih leh ka kut a chelhna chu phelh ka rual a, "Angailo, ka thlah ang che" a rawn ti lehnghal zat.





"Lalfakawmi va rimla anih chu" ka lo ti hlak a, a nui hmel chu a tum nghal hmuk mai. "Engmah lah hi i hre silo, Underwear chung chang kha chu kan kalpel thei tawh em?" a hmui pehsawi zauh pahin a ti a, "Nang angin ka che tisa ve ngailo a, chutiang maiin ka pawmzam ve theilo, mipa lepchiah deuh ngaihzawng ka duhlo bawk" amah pawh en duhloa hmalam melh ngar chung chuan ka ti a, ka lo nuiri suk mai.





"Ka che tisa lo, Faki chu kan pahnih inkawp hma ami daih a nia lawm, i ngaih ang kha ka nilo, nangnen kan inzui hnuah tu hmeichhia mah ka la tawk lo, ka hmui pawh hi nangma sulhnu vek anih hi" ka hmaibul cheta rawn kunhniam pah chuan a ti a, min fawh a tum emaw tiin a hmui ka hup nghal chawt a.





"I Lalbera i duh duh dana itih kual theihpa hian a thlah ang che" nuisuk chunga a tih leh chuan sawitur ka hre tawhlo ka dang a ro hulh mai.






Thil eiturin kan kal a, eitur tuihnai apiang chu min lo laksak zat zat a, ka bulah a ṭhu tlat bawk a, ngei viau mahila nuam tih ruk deuhna ka la nei tho. Mi duat thiam tak a nia, hmeichhe dangte tana awhawm tak turin min lantir dan a thiam hle bawk.






"Vîtei hmuh laiin zu in tawh suh, kan inkawm bawk si a min rinhlelh phah ang, nuam ka tilo a nia" pindan chhung aṭanga Lalberan Ropuia bula a tih ri chu ka hria a, hepa hian min ngaipawimawh ve tak tak a ni thei mai angem?







Nau-a a lo thleng har ka tih em vangin sana ka bih seka, Remtluanga a lo thleng hman ang tih ka hlau et et tawh "Haw i duh tawh em?" Lalberan a rawn tih leh laitakin Nau-a chu a lo thleng a, ka kal tur chu "Ka thlah ang che" a la rawn ti ṭang ṭang a. Nau an "Inthlahtir mai rawh" a lo tih ve bawk si vang chuan ka inphurhtir ta nge nge a, lungawi tak anga lan erawh ka la harsat ṭeuh mai.







"Lalber Faki hi i duh tawh eihlo maw?"a Bike hnunglam aṭang chuan ka va ti a "Eihlo" tih zawngin min lo chhanga, min chhang tawi tek tawk hle a, ka thin a tirim riau lehnghal.






"I duhtawh lo a nih si chuan engvangin nge a kekawrte kha i kawlsak a?" thinrim ṭeuh chuan ka ti leh ta nge nge a.







"A mak mange Barbie, ka kawlchhan ka hrelo ka tih kha, bakah ka ruihlai te pawh a ni thei a, sawi tawhlo teh" a rawn ti lang lang a, a dara ka kun hnaih pahin "Paih bo nghal vat ang che" chang zeta ka va tih leh chuan "Yes Boss" a lo ti leh hmak mai.






Hrechhuak zawkin "Test kit kha sawifiah rawh" a hnunga benthawk pah chuan ka han ti leh a "Ka hrelo sawi tawhlo teh a ninawm a nia" a rawn ti a, min ti sa leh phat mai.






"Malsawmhlu nang hian sawn i thlak a nilo maw, Faki a rai a mi?" ring fê chuan ka ti leh a, min chhang lawklo te chu ka haw hlur tawh mai.






"MALSAWMHLU" ka ti lehnghal tuar a, "A mak ee...engmah ka hrelo" a rawn ti chu ka la na leh ngang mai.






"I hria i hrelo der anih kha" ka lo ti ram hmuk a.






"Ka hrelo a ka hre der zawk a nih hi" a rawn tih chuan a thilsawi awmzia ka man pha hauhlo.




images - 2020-06-06T082050.679.jpeg
images - 2020-06-06T082050.679.jpeg (31.44 KiB) Viewed 8641 times






CHHUNZAWMNA





"Nangpa hi engmah ila hrelo ani zawk lo maw, min bum a mi?" tihpahin a darah chuan ka nam leh sawk a "Ka hre vek, nangpawh i hun kal tawh i hre kim biai bik a mi, Faki nen kan inzui tawhlohna chin pawh rei tawh a lawm" a lo ti leh a, a hnungah chuan ka ṭhu ngawi ta reng ringawt a, thinrim em em siin ka thinrim chhan ber pawh ka hrethiam tawhlo, ka lawmlo kual vel vek niber tawhin ka hria.






Mahse, a ngaihzawng hlui vanga tuna lo buai chiam lah thil ṭha anilo tih ka hre ve tho a, chutih rualin Faki nen an lo che tisa hrep tawh tih thu chuan min vilh ngut ngut reng lawia, ka thikna rilru chu aṭhalo tih hrereng mahila ka thup zo meuhlo a ni.






"Duatte min lo kuah" nuihza lek lek a tihpahin ka kut a rawn ban a, ka hnial ta biklo a kawngah kuahin a hnungah chuan ka bei thlam a, a lum vung vung mai. A bike ah pawh ka chuang ngun ta aniang awmnuam deuhin ka ṭhu ve thei tawh a, a phurha chuan nuam ka ti telh telh bawk, Bike khalh ah na na na chuan ka ring tawk ve em a sin.





"Ezra" ka tih chuan "Lalber" ti rawh a lo tinghal vat a, ka lo nui chhuak hak a chumi rualin a lo nui ve suk bawk. "Tetei present atan khan i van inseng hnem awm ve a" ka hrechhuak zawk bawka a awmah ka beng nghal dat a. "Tam ve tho mai" atih chuan "Eng zah?" ka lo ti nghal var a.






"Diktak chuan itana ka lei ania, i sual reuh lutuka ka pe daih anih kha" a lo ti chu hnunglam aṭangin ka melh rum nghal râm râm a.





"Engmah min pek pawh ka la hre velo" ka lo ti deuh hmak a. Tetei ka thik pawh a ni hran chuanglo, lawmloh na tur ka zawng kual vel a ni ber e.





Min chhanglo a angawi reng chu a Helmet ka va hiat ri hrawih a "Ka bazar hman tawhlo a lawm" a lo ti awlsam et a. "Min lei ve ang che" ka lo ti leh hmak a, a lo nuichhuak hak chu ka ngei leh ta riau mai.





"Min lei tawp suh, ka lei ve thei reng" ka ti chu "Barbie i duh phawt chuan kan lei ang" a rawn ti vat a, "A ngailo pawisa ka nei alawm" ka ti leh a, a kawnga ka kuahna chu ka la sawn vat bawk a. Thil lei ngen te pawh ka anga, ka ṭawngchhuah dan chu keipawn ka duh bik chiahlo nain hetianga tih buai vel hi a nuam ka ti laklawh a ni, chu bakah ka la lungawilo chiahlo hrim hrim bawk a.






"Ka leisak dawn chiang lutuk tlat" tih leh ka kut rawn ban a rual a, ka lo ṭang deuh ṭung chu amah ngheng dawta min pawtin ka kut chu a fawp vang vang a, a nuam chu ka ti ve reng, lungawi tak anga lan erawh ka la tum hauhlo. "Ka ti mai mai anih kha, lei ka ngailo ka neisa alawm bakah makeup ka mamawh lo" ka ti leh ta hram a, min lei tak tak se ka ti pawh a nilo, makeup te phei chu ka nuin a zuar ve ṭeuh a, ka thil sawi chu lo sawilo tawp tur ka ni, ka sawi chu ka inchhir leh hnuhnawh hle bawk.






Kan kawt kan thlen chuan Nau-an kawtah min lo nghak a, chhuk pahin "Ka la ngaidam miahlo che a nia" ka ti zui hram a, a Helmet phelha nuisang chunga min en in "Ka hria alawm" a lo ti leh mai a, a thinchhiat vei ṭhin nen a zaidam ta riau hi a mak ka ti ṭhin. "Anih chuan a ṭhat chu, fimkhur ang che" tih leh paha ka inher chu min pawt letin min rawn hnaih a, kan Step bula Nau-a tawi khawmuang chu a melh pah zauh a.






"Buddy min en renglo khan lo han chho la" a tih chuan "Angailo kan haw rual a ngai alawm" ti a kal leh mai ka tum chu min chelh beh pahin "Thil tih duh ka nei alawm mawle" meinei zeta atih takah chuan ka lo meng deuh kawk a, Nau-a hmuh laia min fawh chu hlau tak ka ni.





"Inpeih mai mai e a" tih paha zawimuanga Nau-a chho chu ka en a, ka inrinloh laiin minlo fawp nghal hmiah bawk. Infawh hi chu a zei a ni, mipa dang a khaikhin loh theihloh mahse, ka ngaihtuahna ah Faki a rawn langa a ni nen kha chuan hei aia thui hi an thlengdun fo tawh awm si a, rilru ah thikna a rawn awm leh nghal tup tup mai.





"Tawk tawh" tih pahin a chalah chuan ka nam a, khamlo tih hriat zetin a chhunzawm leh a, ka chhang let ve leh ta chu a nia, hepa hi chu hnar a har ṭhin a ni.





A tlanchhuak chu a lan tawp thlengin ka thlir zui a, a ngaihawm leh nghal vung vung mai, kawngpui lam thlira ka din lai chuan hnunglam aṭangin "Au Vîteee" a rawn ti sar sar a, Nau-a lo lêtthla leh chu en in "Enge?" a lo ti haw a. A kutin inchung lam a kawk ru zauh zauh mai.





Ka hawi chhoh nâkchuan choka tukverh aṭangin ka pain minlo enreng chu niin! Chiloh lutuk...a va sa leh dawn kher em, min hmuh veleh ah tukverh chu a khar hmak a, Nau a lama phei hlawk hlawk pahin "Tinge min hrilh vat loh" ka va ti chul a, "Ka hre bik hleinem" hlauhthawn hmel zetin a lo ti a, inchhung luh chu hrehtak ka ni.






"Engtin nge a tih i rin?" ka hma a Naua kal chu ka pawt ṭung a, a hmel nur nang chuan min ti hlauthawng zual bawk. Veranda kan thlen chhoh rualin kawngkhar a rawn inhawng a, ka pa ngei mai chu mengrum ul chungin a lo chhuak a "Nang kha lut vat rawh" tihpahin Nau-a chu a melh a, ṭi deka min en chunga Nau-a lut chu thinphu dawt dawtin ka lo en a, ka pa in min rawn melh lai te chuan ka ṭim sung sung thei.







Engmah pawh ka sawi hman lo "Hmeichhe ṭawmkailo i duh a hnu i tlangvalpa kha va um ta poh che" tih pahin kawngkhar a khar zui nghal hmiah mai!







Hawihai zetin kawngkhar bulah chuan ka ding ta reng a, ka thaw a ipik hluah hluah a ka rilru ana hle bawk, inchhung lama ka nu leh pa inhau ri leh ka pa vin khur khur ri thawm chu ka hre pha a, ka tawp up up a ka ṭah a chhuak hlur bawk, ka mittui a rawn hnam ṭiam ṭiam a, ka phone rawn eng pawh chu ka hmu phe ruai mai bawk a.







Message chu ka en a, Screen a ka mittui lo far fap chu ka tuai thuak a, Lalberan in a thlen tawh thu min lo hrilh a ni, chhanglo chhuan step ah chuan ka ṭhu reng a, inchhunglam thawm pawh a reh ta vang vang mai. Ka rilru a buai a enge tih ber tur pawh ka hrelo, ka pa chungah ka thinrim a ka haw bawk mahse, thiamlo zawk ka ni tih ka inhre si a ka pa dem ringawt thei lah ka ni der si lo, ka chhungte duhloh zawng mipa ka ngaizawng lui miau a ni.







Dar kar khat dawn hnuah chuan kawngkhar a rawn inhawng ri rak a "Lo lut rawh" ka nuin a rawn tih chuan rang lutukin ka tho chhuak nghal a, inchhunga ka luh chuan ka pa hmel ka hmu tawh lo "I pa thu awih tawh rawh, i tana ṭha tur a duh vang anih kha, lungloh ah engmah la lo la athu awih tawp mai rawh" zaidam takin ka nu chuan a ti a, hei hi ka nu zia a ni, ka pa chêt danah lawmlohna deuh anei anih pawhin kan unau bulah a sawisel ngailo.







Ngawirengin ka room lam ka pana, ka ṭah chhuak lutuk chu Bathroom ah lutin tuiin ka inleih bawrh bawrh a, ka ṭap ṭeuh reng bawk.







In tihulin ka inthlaka, ka mu fel chiah tihah Nau-a a lo lut a "U vîte" a rawn tih chuan ka lo inkhuhṭha nghal sawt sawt a, tunah tak hi chuan tumah ka be chak rihlo a ni, ka khuma a rawn ṭhutlai te chuan lehlam ka hawisan ngal a a phone khawihin a lo ṭhu ngawi ve reng bawk a.






Ka phone ka en chuan Lalbera message dang a lo awm leh tawh a "Ka bialnu tihtauh hrat te ka ngai lutuk che..muttui suk suk aw" tih a ni, a message chuan min tih lawm viau rualin rilru a tina zual ting mai. Hetiang kara inkawp reng hi kan atan a harsa telh telh mai dawn in ka hria a chu chuan minti hrehawm takzet a ni.







"U vîte i bialpa hi ṭhen mai la, a buaithlak duh dawn emai ka pa in a duh bawk si lo a" Nau-an a tih chuan "Va mu rawh" ka lo ti hluk a, "Hmmh...i va thinchhe tak" tih pahin a tho zui ṭuih ṭuih a, a chhuah hnu chuan ṭhu chhuakin ka ṭawngṭai ta ringawt a, chu chuan ka awm a tih nawm phah ka hre chuang hauhlo.







Zingah ka nu nen eirawng kan bawl laiin ka pa a rawn tho a, a hmel chu ka en ṭha ngamlo, ka bai chhuanlai chu chawkin a en ngar a ka bul hnaia a rawn tei vel te chu enge maw a sawi hlauin ka lo ip ru ṭeuh a, engmah sawi zui loa choka a chhuahsan chuan ka lo thaw huai a.







Tukṭhuan kan eilai chuan ka pa chuan min melh run run a "Engtik ah nge Prelims exam in neih dawn?" a ti a "Thla tharah" ka lo ti zawi sap.






"Zan chhuak tawh loin zir ngawrh hle ang che" a tih chuan ka ngawi dak reng a, engmah a sawi tawh dawnlo emaw ka tih hnuah "I bialpa kha ṭhenfel nghal ang che, i zirlai bak engmah ngaihtuah suh, khatiang zu ngawi vei mai mai" tih pahin a tho zui a, chhan tuma ka ang zuau chu ka nuin min lo khap a, ka chhang zui ta lo a ni. Lalberan zu a nghei tawh tih han hrilh mai ka duh vei nen.







Class kan kal ta lo a, in lamah zirin a pawimawh tur chu Whatsapp group aṭangin kan inhrilh mai tawh a, pawn lamah pawh ka chhuak tlem ta hle bawk, Lalbera pawn lehkhazir ka ngai tih hriain inhmuh a rawt ngai ta lo a, kar khat zet chu kan inhmu tawhlo, Phone aṭang erawhin kan la inbe reng a, kan exam dawn zanah eitur chi hrang hrang kengin min hmu turin a lo kal a, ka nu leh pa a awmlo a Dodo-a nen chiah kan awm vangin reilo te a lo lut nghe nghe a, ka nu leh pa te lo haw hmaa haw tir vat vat ka duh vangin lehkhazir ka duhthu sawiin ka haw tir lehthuaia, a eitur minlo ken te chu ka room lamah ka keng chho vek bawk a, a tam ngang mai Thei leh eitur tuihnai chi hrang hrang Energy drink lam thlengin a ni.






Prelims exam chu ka beisei aiin ka chhang ṭha a, Mark sangtak nen ka tling chiang hle a ni, ka pa pawh a ṭhiante bulah a hmai a uang leh viau mai, October-ah Main exam nei turin ka inbuatsaih leh nghal angaia, reilo teah class pawh kan ṭan lehnghal thuai a, exam awm leh tur kar a la hlat deuh avangin kohhran lamah pawh ka tal tam veleh ta deuh bawk a, kan ṭhenawm nula U zari nen kan inzui chawt reng a, Remtluanga nen erawh kan inhmu zing ta malh malh hle bawk.






Sunday zan kan inkhawm chu banah ṭhalai ho ṭawngṭaina ah kan tel a, kan bang pawna kan chhuak chu Remtluangan min lo ko dinga "Ka lo leng kawi dawn ania min lo nghak rawh u" a lo tih chuan ka phur fahran lo kher mai.






"Rema hi tinge i nihpui leh mailoh a fel viau sia tunah phei chuan hna nghet anei tawh lehnghala makpa atana it fe fe pawh an tam a sin" Zarin a lo ti a, Biakin chhunga Remtluanga che vel en pah chuan ka nui tawi tak a, makpa atana it tu te zingah chuan ka pa pawh a tel ve ngei tak chu a ni sia, langsar takin kohhranah a in hmanga mite hian a chung en em em bawk, chutih laiin kei erawhin a mizia hi ka ngaithei lo telh telh thung.






"Ti ru kal ang ule" Remtluangan a rawn tih takah chuan kan In lampanin kan inzui a, reilo te Zari a lo peng kawia rei pawh awmloin a haw leh thuai thung, thingpui ka lumsak a, ka pa chhuak lo hawin Remtluanga a hmuh chuan alo be luam a, inthlak mailoin kan bulah chuan a rawn ṭhu a, Remtluanga a biak ṭhat dan em em chu ka ngei ru lek lek mai, enge amah hian a hmuh bik ni? A mize diktak a hriatloh vang niin ka hria, pawnlang takin ṭha mahsela, Lalbera mizia nena khaikhin chuan keimahah a hniam hle thung.







"Chu...Vîte main exam chu ahma aiin ṭan angai dawn anih chu, Prelims hi chu an tlang zuta Main ah hian an tla tam ṭhin a nia" Remtluangan a tih chuan ka pa chuan a lo tuihnih thuai a "Zir tam lehzual angai tihna a ni mai, ṭhalai ṭawngṭaiah te pawh lo hre ve teh u" ka pa in a tih chuan "Ti zahthlak e a" ka lo ti hlak a.







"Zahthlak loh e Zirlai leh Exam tur te chu kan ṭawngṭaipui zel alawm, keipawh PH.D tih ka tum ve deuh a" nuisang chunga Remtluangan a tih leh chuan ka pa beng a lo verh leh ngang mai a "Han ti tak teh nang zawng i ti thei dawn tlat PH.D tlangval han ni ngat la chuan nula in an um duan duan reng che in ania ka rin ni, ti ngei ngei rawh" fiamthu titak deuh hian ka pa chuan a ti a, Remtluanga intithei hmel chu ka hmuh hmaihlo nasa mai.







"I exam leh tur chu Question hlui te ka lo enkual sak dawn che nia" ka lam rawn hawi pahin a ti a "Angai hleinem, ka ti buai mai mai ang che" ka lo ti vat a, "Ti buai nang aw, Class kan la kal ṭan lo a tih tur em em pawh ka nei rih hleinem" a lo ti leh var a "Lo pui tak teh, kei leh a nu hian lehkha chhiar rawh tih tawp bak han enpui ngaihna kan hre der silo a, nangin i puih theih hlauh chuan a tihzia khawp ang chu, zanlam te hi Tuition ang deuh hian rawn enpui ṭhin la, chawhma Class ringawt hi chu eng ual a ni lo ang" ka pain a lo ti duam duam chu ka ngei kher mai "En pui ka ngai hran hleinem, naupang lehkhazir anga zir kan ni tawh lo a" ka pa lam en chuan ka lo ti ve ngat a.






Remtluanga nui tawi tak tak chu ka haw hlur bawk, ka pawi em sawilo mahse, ka pain heti taka a pak huam hian ka huat a ti zual ting a, Lalbera khawngaihna thinlung min puttir lo theilo a ni.






Inrinni chuan Bazar tur angin ka chhuak a, Lalbera nen a cousin Ahruaii te inah kan lenga, an naute thar entura kal kan nih vangin naute enna tur eng engemaw a rawn lei ṭeuha, keimah zawk min pek tir kher bawk. Ahruaii te nupa chu felin min lo lawm thiam khawp a "Hmanni ah hepa hian min hrelo der vel anih chu" Johanan a lo tih chuan Ahruaii nuih a za kher mai.







"Insual tih vel kha ti tawh hlek suh u, Johana pawh ka hauh hrep kha puitling zawk tur hi a che ṭhing thei lutuk a" an pa melh ram ram paha Ahruaiin a tih chuan "Vîtei pawh hi a bawn teh ania" Johanan a lo ti zauh a, khami ni zet kha chuan kan che na tlang a ni.






J.mala leh Mary a rawn lang ve hlawla "Mala hi! helamah i awm tih ka hrelo reng reng" Ahruaiin a lo ti hluai a, an inhmu khawm chu mipa ho chuan nuam an tih hmel hle a Johanan Nsa leh Ruata a call a reilo teah an rawn thleng ve a, pindanah an inluh chhawk diat diat a, a hnu deuh ah chuan an tawmbo ta diak a, enge pindanah an tih chu ka hre thiam hauhlo.







"Zu an in in ka hria" Mary'n a tih chuan "In leh pek anih kha an awmkhawm tawh hi chuan an mak ania" Ahruaiin a ti hlak hlak a, a nghei tawh emaw tih nak alaiin enge maw ava tih ve reng ni, ka ngeiru kher mai a ruka lo in te chu nise hriatthiam te pawh a la theih deuh anga chupawh niloa ka awmve laireng lehnghal a; a in anih teh chuan a chaklo khawp ang chu.







Rei vaklo ah chuan nui bawk bawk chungin an rawn chhuak a "Mary inpa mawnghmul a kang a nia" Ruata a rawn ti chhuak lang lang a, a hnungah muangzeta J-a lo chhuak chuan a mawng a hup ṭut a "Tinge a?" Mary'n a lo tih chuan an Cigarette dah ka ṭhut mawle" a lo ti a, midang chuan an lo nuih dar dar a.






"A mawnghmul a mût palh a" Ruatan alo tih leh chuan an inhnek zui ṭawk ṭawk a, "Bengchheng su naute inti harh ang" Ahruaiin a lo ti nghal chul a. "Enteh Mary a mawnghmul hi chek sak chhin rawh" Ruatan a tih leh chuan "A mawng a hmul bawk lo" Mary'n a lo ti hlak a, phawk hrain an rawn hawi hlawm a, "A hmul lo a mi?" Nsan nuihza insum zeta an lo tih chuan an nui leh dar dar a, Mary zak chu a sen ṭan ṭan mai.







"Mipa te chu an mawng a hmul vek alawm, J.mala chu mipe ania a hmul ve lo" Ruatan a ti leh chu a lu a ri nghal lawlh a, an infiam dan chu an naupang chhia ka ti takzet.







"Tak tak a mi?" ti a ka bula Lalbera lo ṭhu ka lo zawh chuan a bu nghat a "I mawng a hmul maw?" ka ti chu phawk zetin min rawn ennghal a "Malsawmhlu i insawitheih ṭhin tehreng nen chu em pawh i bialnu kha i la hriattir nange?" Ruatan a rawn ti leh a an titi chu ka bo deuh ta tlat.






Mary nen thingpui kan lum a, kan in zawh ah keini pawh kan haw zui a, Ruata leh Nsa erawh chawei nghal an tum niawm tak a ni.






"Lalber" a Bike hnung aṭanga ka tih chuan a lo thle deuh a "Zu i in em?" ka tih leh chuan "In lo, i tan ka nghei tawh alawm" a lo ti sam et a, "I inloh chuan a ṭhat chu mahse, ka tan niloin i tan zawk nghei rawh aw" ka tih chuan "I thu ber" a ti leh mai a, ṭhiante ho kianga a in ve miahlo thei chuan min ti lawm takzet a ni.






"Lalber" ka ti leh hluai a.




"Enge?"



"I mawng a hmul tak tak a mi?" ka tih chuan a rawn nui chhuak hawk mai!






(Tragic lamah kan lut chho tawh ang, comment leh click ngaipawimawh ang aw)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:04 pm

CHAPTER - 12


(Chapter hmasa ah zawmna i chhiar em en rawh aw)




Zari te in zawn kan thlen a ka din tir chuan a hriatthiam loh hmel kher mai a, chhuanlam tur dang vak ka hresi lo "Zari te inah kal lawk ka ngai a" ka ti ta ringawt a, a sawi buai lo hlauh mai. Lo len a duh tih hi chu ka hria lehkhazir ka chhuanlam ṭang ṭanga, ka awmdanah hi chuan a ringhlel ve tawh tho chuan ka ring, a hma a Ropuia nen an lo len ṭuma ka pa awmdan vang ringawt pawh khan hriatloh theih chu a ni tawh lo mahse, engmah a sawilo a, a ngawih rengna chuan inthlahrunna min neihtir loh phah chuanglo a ni.







Zanriah eikhamah Remtluanga a rawn lang hlawl a, Lehkhabu eng engemaw a rawn keng nual bawk a, min zirpui tak tak alo tum chu niin a tih dan chu ka ngei kher mai, ka pa tihlawm dan a hre zek lehnghal a, a chunga ka pa ṭhatna remchangah la a kei min hnaih a tum tih lah hai theih rual a nilo.






"Ka lo en chhin ang, puih em em pawh ka ngailo" a lehkhabu minlo pek ban sak pah chuan ka lo ti a, ka aw ah ka lawm fahranlo tih chu a hre ve chêk ang chu.








Ka nau te ho chu sitting room aṭangin an inthiar fihlim zui a, lohtheih lohin Remtluanga nen chuan kan inṭhut chilh ta ran a, Question hlui te chu kan en kuala a ṭawng tui viau nain ka ngaihsak tha a tho lo a ni. Kan piah lawka Bible chhiara ṭhu ka pa chu ka melh leh ṭhin a, hetianga Remtluanga zawk kan In a a ngampat em em laiin Lalbera lo len tak ngial pawh a remti leh silo a ka lawmlo takzet a ni.







Thingpui lum turin ka thawhsan a, Gas ka chhuan lai chuan Remtlunga chu choka ah a lo luta "A sen hangin ka duh ang aw" tih pahin Fridge a hawng zuia, chhang lemloin ka Phone ka lo bihsan thung. "Thil hrilhtur che ka nei a" a rawn tih leh chuan ka hawichhuak zawk a, ṭawngmai loa tui a in leh tete chu ka lo en ran a, ka lam rawn hawiin "Englo a nia, i chhungte hriata sawi rik kha ka duhlo a, i bialpa khan a kawp che a nia" a rawn ti zawi sup a.







"I hriatsual anih dawn chu" nersak chunga ka lo tih chuan "Ka hresual hauh lo, khapa kha i hrechianglo anih kha, kan thawhpui Ziri nau nen pawh an lo che dun nasa viau tawh a nia" a lo ti leh a, ka awihlo nasa mai. Bakah kan inkawp hmaa a ngaihzawng te vanga buaina neih hi ka tum hranpa lemlo, ka thikthu ka thup zawhloh vanga ka tihtauh bur bur ang te kha chu thuhran a ni a, chuti nilo a kan inkar boruak tihchhiat phah nana hman chu ka duhlo a ni.







"Mi thilsawi nazawng ka awih ve ngailo tlat" thingpui siam mawlh mawlh pah chuan ka ti liampuat a. "Dawt ka sawi lo a nia, Kha pa khan tlangval fa anei ania, Ziri nau Emma-i nen inkawpin fa hial an nei dun alawm mahse, khapa khan nei leh duh siloin a ṭhen a, chumi hnu lawkah hmeichhe dang a kawpsan lehta nghal a, Ziri chuan a sawi tuihnailo viau a nia" chal chuar nang hian a ti a. Ka awihlo mahse, ka awm a ti nuamlo viau lawisi.







Emma-i chu Janet-i ṭhiannu kha ni tih ka hria, hman deuh pawh khan Janet-i khan a sawitawh tak kha mawle mahse, Remtluanga sawi ang em em chu a ni thei dawn em mawni le? Ka ngaihtuah ta tluk tluk mai a, lehkha ka bih leh hnu pawh chuan ka rilru ah a lut hleithei tawh meuh lo, hriat chian ka chak takzet a ni.








"Enteh, ka thil hrilh che kha dawt a ni miahlo ania, hman zan kan leng haw in kawngah ka tlanpela Bike ah hmeichhe pakhat a phur bawk a sin" Remtluangan atih leh te chuan ka chawmawlh vek tawh mai, amah en ran chung chuan "Emma-i chu maw?" ka ti zawi sap a. "Niloin ka hria hmeichhe te lam deuh a nia, chak deuhin min rawn tlanpel a ka hmuchiang hman lutuklo samkir deuh ania" ngaihtuah let niawm taka chal chuar nang hian a rawn ti a, a landan a sawi aṭang chuan Faki a ni tih ka hre thei.







"Engtik zanah maw?" ngaihsak loh hmel fêa lehkhabu keu pah chuan ka ti leh a "Kar hmasa Zirtawp zan a ni ta in ka hria" Remtluanga chuan a lo ti a, ka pa in kan thilsawi a hrepha em tih ka en zauh a min lo ngaihven lemlo tih ka va hmuh chuan thawk ka la deuh hawk a. "Engpawh nise kha pa kha rin vak tlak niin ka hrelo, tlangval fa anei tih i lakah a thup anih hmel lehnghal a" zawi deuh taka a rawn tih chuan ka lo ṭim ru sung sung tawh, ka ngaih a ṭha hauhlo mai, Remtluanga thil sawi anih vang hrim hrima awihloh ka han duh tehlul nen, a sawi thutak mai bawk si a, ka ngaihtuah let pawhin thil ni thei tak niin a lang bawk si.








"Pa Thang ka va haw phei tawh mai ange" tih paha Remtluanga tho hluai chu ka melh zawk a "Ni e...i ti lawmawm ṭhin e nang nge nge, zan dangah i la rawn pui leh ang chu" ka pa chuan a lo ti var a, thlah tur chuan kawngkhar lamah kan in zui chhuak dun ta nghal a.







"Ka thilsawi kha i awihlo deuh tlatin ka hria mahse, hriat chian tum la thudik ka sawi zia chu i hre mai ang, diktak chuan khatiang mipa tan kha chuan i uihawm mah mah a ni" pawn kan thlen hnu chuan a rawn ti a, chhangloin ka lo ngawi reng thung.







Mut hmunah ka ngaihtuaha ka sa pup pup a, ka dang a ro huam bawk, ka ringhlel a ni....Ni e ka ringhlel takzet tawh a room a Pregnancy test kit ka hmuh te khan ka rinhlelhna chu a tizual ting mai bawk a, hriat chian lehzual ka chak a ka huphurh viau lawi si.







"I mu tawh em?" tih message min lo thawn a, ṭha tak chuan ka lo chhang maia ka awm erawh a nuam hlawllo, Fa a neih leh neih loh chu ka zawt tawp ngam bawk si lo.







"Keipawh ka mu chiah a, vawin chu ka nuamsamlo khawp mai" a rawn tih chuan chhan mai dan tur hreloin ka Phone chu ka tuailet sek a, ka hah ru riau lehnghal.







"Lalber...eng thil emaw min hrilh duh i nei mial lo maw?" tih ka thawn ta ringawt a, rangtakin min lo chhang let a "Neih awm pawh ka hrelo" tih zawng a ni. "Tak tak maw?" ka ti leh ta ngat a, Fa a nei emaw hmeichhe dang a kawp emaw chutiang lam chu a sawi ka beiseia, ka thil beisei chu atthlak ka ti viau thung si, min bum anih chuan engtin nge maw min han hrilh duh ngawt ang le, hei hi chu keimah ngeiin ka zawn chhuah a ngai dawnin ka hria.






Min lo call zui a ka lak rualin "Ka hrilh duh che chu maw ka ngai hle che a chu chu a ni mai" a rawn ti ril ruih a, lawm viau tur ka nih laiin ka lawm hleithei der tawh lo. "I mut a chhuak tawh em?" a rawn tih zawm a "Aih" ka lo ti mawl tawp ringawta, a bulah chuan sawitur ka haihchham zo vek mai nia.





"Lalber?" ka ti leh hap a "Umm" thatchhe aw zeta a rawn tih chuan "I tan hian enge ka nih" ka ti leh tawl a, a nui ri deuh suk chu ka hre thei.






"Ka tan hian enge i nih?" ka zawhna pawh chhanglo chuan a rawn ti a, min tih thinrim hmasak a duh a nih hmel e. "I mawl a mi i tana ka nihna te chu nangman i hre zawk daih ang chu" vin lek leka ka tih chuan a la nui cheu mai.






"Min kawp em?" ka tih chuan a nui tawp ta hmak a "Teuhlo emai a" a rawn tih rualin thawk ka lo la vak a, a hnen aṭanga min kawp loh thu ka hriat chuan tlemin ka thawl deuh a mahse, sâwn a nei em tih ka la zawt lo, chu kher chu zawh ka hreh a ni.






"Hmanni a i room a Test kit kan hmuh kha.." ka ti dek dek a "Engmah anilo" a lo ti hmuk a, ka ṭawnglai ka tawp chawt ringawt. "Ka lakah hian engthil emaw zep i nei em?" ka tih leh chuan a ngawi vung vung a "Vanlalber" ka ti vin ṭhat a "Ka mut a chhuak tawh lutuk..ka muthlu lek lek tawh a nia" muang ban charh hian a rawn ti a, tihngaihna hrelo zetin ka ngawi zui daka Phone aṭanga sawipui aichuan hmaichhana sawipui mai ṭhain ka hre ta.






Ka inbiak zawhhnu te chuan ka inngaihtuah hah telh telh a, min chhan danah te khan thil zep engemaw nei tlatin ka hre tawh a ni.







Zingah Class kal turin ka insiam mawlh mawlh a, Nau-a inthlahtir mai ka tum a vangin ka hmanhmawh lo hle bawk, kan chhuah dawn ṭep Janet-i a rawn lang hlawl a, Scooty a lo ken tho avangin a rual chuan ka kal ta zawk a, ka thil hriat te kha zawh mai ṭhain ka hria.







"Janet i ṭhiannu Emma-i khan fa a nei tiraw" Class a kan ṭhut fel hnu chuan ka ti chhuak hlawla, a mitmeng tlan chhe ruai chu ka lo hmu thiam nghalvat a "Ka hre vek tawh a nia, sawi tawp rawh" ka lo tih chuan a nui tawi tak a "Nia kum 4 mi a nei a, engtin nge i hriat zawk a" a rawn tih chuan ka thaw a chham lo chauh a ni.







Tunge a pa niang! Zawt ila min hrilh duh a ngem? "Ezra'n a hrilh che a mi?" a rawn tih leh chuan ka kut ka lo hum ruh ṭeuh a, chhan pawh ka chhang theilo ka lu ka bu ringawt a "A hrilh har che ka lo ti lutuk a, engmah i hre ve bawk silo a , ka lo tha nat pui lutuk che a" a tih leh chuan engkim a chiang ta kuar.





"Naute chu i hmu tawh a mi, kar tawp hi a birthday ania, hmu la chuan lawmawm iti ngawt ang" a la rawn ti tak deuh deuh a, nuih a za duhlo kher mai.







"La hmu biklo, ka hre ve deuh chauh a" za lo zeta kiaisak chung chuan ka ti a "I hmuh hunah chuan i ngaina ngawt ang, duhloh pawh aneilo, a pa a chhun iti ngawt ang" nuisanga Janet-in a tih lai te chuan ka lo ip ru ṭeuh a. "Enge a hming?" ka ti chhuak thei ṭawk.






Class ban veleh ah inah ka haw vat a, ka khumah muin ka inngaituah lungpuama ka ṭah a chhuak hluah hluah, kei hi meng reng chunga bum ka lo ni.





Lalbera ka call a "Zanah inhmu teh ang" ka va ti tawng a "Zan in chu ka hmanlo a sin, Nsa nen.." a tih lai chuan "Inhmuh kan ngai" ka lo ti vin hlar a, "I tih tlat te chuan chhuah pahin ka rawn tlawh dawn che nia" a rawn ti a, ka biak zawh hnu chuan ka chhuahchhal dan tur ka ngaihtuah zui nghal mawlh mawlh a, ka rilru ipik lutuk chuan ka thaw a ti hah hluah hluah thei.





Kei hian pathlawi ka lo ngaizawng reng chu a nia! Ka zawh chhuah kher ngailoin min hrilh nghal mai nisela chuan hetiang em em hian ka na lo anga pawm thiam dan dan te pawh a awm zawk in ka ring. Mahse, min hrilh tum miahloin a lo thup ṭang ṭang tak chu a ni sia.







Engtianga han tih chi nge niang, ka hau hrep anga ka ṭhen dawn nge, a nih na ang angin ka pawm leh zawk ang? Hmeichhe dang te hi ka dinhmunah hian ding sela engtin nge an tih ang le?




images - 2020-06-06T082036.076.jpeg
images - 2020-06-06T082036.076.jpeg (37.34 KiB) Viewed 7512 times







CHHUNZAWMNA



Zanah chuan dar 8 dawnah a lo thlenga, Garage bulah kan indinchilh ren rawn a, han sawi ṭan mai dan tur ka bo riau a ni. Ka zawt phawng mai dawn nge ni a aman a sawichhuah hun ka nghak ang, nge ni a ka dawp zawk dawn? Aaa...kei hi ka a tawh a nih hi, fa a nei tih ka hriat tawh ahnu engah nge amah ka la ngaihchan zawk cheu chu le a atthlak tak zet.







"Ka hmanhmawh lutuk lo reilo te chu ka lo lut kawi ang chú?" nuisang chungin a ti a, a mood a ṭhat hmel lehpek kher mai. Ka nu leh pa damlo kanin an chhuak deuh chiah bawka Dodo-a nen chiah kan awm avangin lo lutkawi mahse pawi ka tilo, kawtkaia in biak aichuan a sawi pawh kan sawidun thei zawk ang chu.







In ah kan inzui chho a, ka sawichhuah dan tur mawlh chu ngaihtuahin ka rilru a insual buai a, ṭhutthlenga ṭhu chunga a phone a khawih mual mual chu ka en leh rih ṭhin a, sawi ka chaklo kher mai mahse, ka sawi ngei a ngai si.






"Lalber" ka tih chuan chiang zetin min rawn en a, a phone khawih lai chu dahin a Jacket ipteah a ak zui hmak a thiltih ruk engemaw nei turah ka ngai leh ringawt bawk.







"Sawila" a rawn tih chuan ka lo nui tawi tak a "Thil engemaw min hrilh duh i nei miallo maw?" ka han ti te te a, ngaihtuah nei niawm takin chunglam a melh ralh a chutah ka lam lo hawiin "Ka sawi anga mahse, thinrim miah suh aw" a rawn tih chuan a lam hawiin ka lo ṭhu ngil thuai a.






"Englo a nia, hrilh che ka tumlo pawh a nilo, i thinrim ka hlau a" ṭhensak chungin a ti a "Umm..ka hria a lawm mahse, zep loa thil sawidun hi a ṭha zawk a" ka lo ti vat a, a chungah lawmlo viau mahila kan intawn hma daiha thil thleng a nia, ṭha taka min hrilh anih chuan kan inkar tihtawp kher chu a ngai ka tibiklo a ni.






"Nsa nen Bike racing na ah kal kan tuma" a rawn tih chuan ka lo meng phawk hra a, ka beisei thil kha a sawi hauhlo mai!






"Ohh..." ka lo ti hap a "Ka fimkhur dawn a lawm min ngaihtuah duh suh" a ti zui zat a, ka thil hriat duh tak a sawilo chuan minti thinrim leh ṭun tawh, engtia rei nge ka lakah hian zep a lo tum le, a thupbo hlen theih hi a ring zawk emaw ni! "Thinrim ringawt suh" a tih leh rual chuan thawk ka lo la hak a, keimah zawkin ka sawi chhuah mai a ngai dawn a nih hi.







"Ka bulah hian thil enge maw zep i nei em?" ka ti chang bul a "Engthil maw?" tih pahin a meng rang ralh mai. "Keimah min zawt daih suh i thil zep chu nangman i hre zawk ang chu" ka lo tih chuan chîk fe hian min lo en ran a "Engmah zep ka nei hleinem" a ti dam thluam a, ka dawh theihna in a tlin meuh tawhlo chu a ni.






"Engmah sawi duh i neihloh chuan a ṭhat chu" ka ti ta hmak a, sawi chhuah tuma ka rilru a siam ut ut tawh chu ka la insum hram hram a ni. "Ka kal tawh mai dawn a sin" min rawn pah a a tih chuan ka insum reng thei ta biklo "Fa i nei tiraw?" ka ti tawl mai.





Thawh mai a tum tawh chu phawk zetin min rawn en a, engmah sawi zawmloin min en ngara keiin engemaw a sawi beiseiin ka lo en ran bawk.





"Chu chu tunge sawi?" a ti ram hmuk a, lungawilo hmel a pu nghal ringawt chu ka hrethiam ta chiahlo. "A sawitu a pawimawhlo, ka zawhna chu min chhang rawh" ka lo ti ve thunga "Enteh Barbie...engtin nge i lo hriat chu ka hrelo a mahse, i ngaih ang kha a nilo a nia" a ti zuai raih a, ka mit ka chhing sawk mai.






"Anih chuan i pha lo maw?" tih pahin thawk la la zui kawk a, a hmel ka en chuan a mit a sen ram a lungngai hmel a pu in ka hria. "Phat ka duh hle mai" tih ringawtin min lo chhang a, min chhan dan teh tawp chu ka la duh tawk theilo.





"Sawichiang rawh" vin lek lek a ka tih chuan ka lamah a rawn inher a "Aw..ka nei a lawm mahse, kan pahnih tan buaina tham a ni lo ania, a ni chu a nu hnenah a awm daih a lawm" tih paha ka kut a rawn ban chu ka lo thingthla sawk a, buaina tham nilo a tih awmzia chu ka hrethiamlo nasa mai.






"Enga ti nge i zêp a, a tirah khan min hrilh tur i nia sin" ka sawi zawng te chuan ka ṭah a chhuak et et mai. "Hrilh che ka tum ṭhin a lawm mahse, a harsa a ni" a tih chuan "Min bum ching hle mai" za lo zeta nui hak chungin ka lo ti a, ka zawh vang chauha min hrilh duh te chuan ka thin a ti ur zual hle bawk.






"Ka tihpalh a ni, he thil hian buaina min siam ka duhloh vang a nia" a kut pahniha a hmai hup chuan ka ṭhu kun ngul a "Ka lakah hian i zep hlen theih i ring a mi? Tunah pawh sawi hmasa lo ila chuan min hrilh i tum miahlo a nia" thinrim ṭeuh chung chuan ka ti leh a "Hrilh che chu ka tum a lawm" a tih chuan awihlo zetin ka lo ner sawk thung, min hrilh tum tak tak sela chuan midang ka aṭanga ka hriat ngai hauhlo in min hrilh daih tawh ang chu.






"I tan enge ka nih le?" ka ti hap a, ka thaw ipik lutuk chuan min hnawh tawt takzet a ni, ngaihzawng satliah mai mai nei rual pawh kan ni tawhlo mahse, tleirawl inngaizawng inkawp satliah ringawt hi kan ang ber in ka hria, ka chungte phallo chung chungin ka kawpa ani lahin minlo bum let der mai chu a nia.






"Ka hmangaih che min ring rawh ka fanu chuan buaina engmah a thlen lo ang che" a rawn tih chuan ka hau chungin ka lo en a, a mit sen rum te chuan ka thin a ti ur telh telh mai. "Buaina min thlen chu ka hlauh i ring em ni, buaina zawk chu nangmah hi i ni" a dara nam sawk pahin ka ti nghek a ka mittui a rawn hnam nghak ṭiam ṭiam bawk. Sawi ngaihna pawh ka hrelo, hepa hian enge maw a ngaihtuah le?





"Fanu i nei tih hre lawk ila chuan nang nen hian kan inkawp miahlo ang" ṭap lek lek chung chuan ka ti a, "Ka tihpalh" a rawn tih leh te chuan ka thin a rim zual ting mai.






"Kal tawh rawh" ka bianga mittui luang hruk tawk pah chuan ka ti a "Aih, hetiang chuan ka kalsan duhlo che" a rawn tih chuan rum zetin ka lo melh a, a hmaiah te chuan ham tawn tawn mai ka chak a ni.






"Ka insum theih lai hian kalvat la a nimai, i hmel ringawt pawh hian ka thin a ti rim a nia" thinrim lutuk vanga aw khur dar dar chung chuan ka ti a, chu veleh ka kut rawn vuanin "Min ngaidam rawh, nang nen hian kan i tawng anga kha thil vang khan i rilru ka tina dawn tih hre lawk ila chuan khangthil te kha ka ti hauhlo ang" a ti zawi ruih a, a hmel ngui zet en chung chuan ka heh ka pet fan fan ringawt.







Kan intawn hma thil thleng vanga chhuahchhal chiam chu thil awmze neilo tak a ni tih hre tho mahila ka rilru a dam theilo a ni. Tunah engtin nge hmalam kan pan zel theih tawh ang, a hma kha chuan beiseina chaurau tak kha ka la nei tal a chupawh chu tunah chuan beisei ngam a ni tawhlo, sawn a nei tih hrelo chung pawhin ka chhungten an pawm theilo a nia tunah engtin nge ni tawh ang?




"Inṭhen mai ang" ka ti chuan ngawi rengin min en tlawk tlawk a, "Ṭhen che ka duhlo a sin" a rawn tih chuan ka lo ṭap leh ṭuau tawh.





"Enteh, fanu ka neih vanga min ṭhen i duh anih chuan ka hrethiam ang che, i duh anih phawt chuan ka hlat bawk ang che mahse, keichuan ṭhen che emaw hlat che ka duhlo...enge ka tih chuan ang hun kal tawh ka siamṭha theilo a, chumi avanga i rilru tihnat ka pawh ka duh chuanglo" rilru nat hmel zeta min en chungin a ti a, ka chawmawlh zo vek mai. Rei fe inbe loin ka ṭhu dun ta reng a, inchhung chu a reh tlawk tlawk a kei erawh ka ipik zual deuh deuh thung.






Ka rilru natna chhan te chu ka ngaihtuah kual a; a ruka fa alo neih reng vang nge ni a engmah min hrilh loh vang zawk ka hrethiam tawhlo, fa alo nei reng chuan min ti na vawng vawnga mahse, amah ka duhna a ti kiang chuang hauh silo a ni.






Ka laka a zep erawh ka lawmlo hle a chu chu zanina ka thinrimna siamtu lian ber pawh niin ka hria mahse, chumi avang chuan kan inṭhen ringawt tur a ni dawn em ni, kan inngaihzawn hnua pawikhawih a nilo a a hunlai te kha chuan hriat pawh kan la inhre hauhlo bawk. Buaina lian ber zawk chu ka chhungte lam an ni, la inkawp zel ta ila engthil nge kan hma chhuah tur chu ka ngaihtuah ringawt pawhin ka hah hluah hluah a ni.





"I naute nu nen chuan inla inbe ngai em?" sawitur hrelo zet chuan ka ti ringawt a, ka lam a rawn hawi chu ka en duh hauhlo bawk. "Thil pawimawh a awm chauhin kan inbe ṭhin, inngaizawng kan ni hleinem zankhat chetsual palh vang chauh a ni" a tih chuan thawk ka lo la hak a, ka hriat tam poh leh minti na zual ni tawh maiin ka hria, chuti chung chuan engkim hriat ve erawh ka duh tlat lawi si a.







"Kum engzah maw a nih?" Janeti sawi hre tho mahila ka zawt nawn leh ta hram a. "Kum 4 na tur chiah a nia, amah pawh ka hmu ngai manglo, kan inpawh vaklo a" a ti a, a ṭawngdanah a inthlahrung hle a insawifiah a tum deuh bawkin ka hria, a fanu nena inpawh tak anga ka bula lan chu a hreh deuh a ni maithei, an inpawh ka duhlo emaw a ti a nih ka ring.






"Tinge i tlawh ngailo a mi?" chhuat lam melh ngar chung chuan ka ti leh a "Ka chhung te chuan tlawh ve ṭhin tho, keiman ka hmu ngailo" a lo ti leh vat a, kha maw...ka huat loh nan a sawi tih ka hre thei mai.






"Tlawh ve ṭhin tur che a lawm, pa laktlak loh tak i ni tihna anih chu" ka tih chuan a nui ri suk a, min chhan a tum mek laichuan "Tinge in inneih loh a?" ka lo tih khalh a, na zeta thawk la hawk chungin ka lam a rawn hawi a "Ka hre tawh biklo le, induhna tak tak a awm loh hi chuan nupa hlimtak kan ni dawnlo tih kan hresa a ni mahna" a ti zawi ruih a, a lam ka va hawi chuan ngun zetin min lo en ran bawk.






"Enteh, Barbie nangnen kan intawng dawn tih hre lawk ila chuan ka nun hi ka uluk ve deuh tur a nia" a dar kan ak pahin a ti a, chhang mailo a ka en reng a vang chuan hnuailam a bih leh daih bawk a, a awmdan chu a lai deuh ṭutin ka hria.






"Engmah ka lakah zep tawh suh aw" ka tih chuan rang lutukin a rawn hawi chhuak a "Engmah i lakah zep ka duhlo" inpetruh ṭeuh chunga a tih chuan ka mittui a lo hnam leh ṭiam ṭiam tawh.







"Ruihtheih thil hi i sim thei angem, i in ngai tawhlo angah ka ngai a, ka hmuh phakloh ah engtin nge i awm ka hrelo na chu ka ring thei che a ngem?" ka ti leh a chulehveh a kutin ka biang huh hliam chu a rawn tuai zauh a "Min ring rawh, thil dang zawng aiin nang hi ka thlang che, ka hmangaih ka nupui tur i nia lawm" duat taka ka biang chul pah chuan a ti a, nupui tur tih thu chuan min delh rit churh maiin ka hria, hmabak ko tak kan nei tih te hi a hre ve a ngemle, kan inkara zep nei chu amah chauh a ni biklo tih chu kei chauhin ka hre thung si.






(Changtupa hrem duh ho kha kan la hrem dawn chauh lo lungngai lo phawt ru)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)