KA LALBERA By Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: KA LALBERA By Ahmangaihi violette khiangte (Completed)

Unread post by Ngaia » November 1st, 2020, 5:08 pm

CHAPTER - 25





Hun a liam ve zel a Christmas kan thleng veleh dawn ta reng mai, kan ṭhenawm lawkah chuan hmeithai fapa pahnih nei Pi zai ti a kan koh ṭhin hi a awm a, tukkhat chu Bean chi min lo pe ṭeuha kawmthlang huanah chuan ka tuh ve a, zingtin tui pe turin hma takah ka tho ṭhin a, nuam ka tih zawng tak a ni.








Thlasik a nih vang nge Ezra erawh thawh a hrelo thei hle a, a chang chuan dar 10 thleng dawn dawn te a muthilh chang a awm a, Gym lamah an buai deuh anga a chau viau a nih ka ring, mi hnuaia thawk a nilo bawka ka kaitho duh ngai lemlo.







An inlamah pawh ka chuangkai ve ta fo mai, puitling zawk an lungawilo anih chuan naupang zawk chuan tih lungawi chu kan tih makmawh niin ka hria a, Nu Siamtein min lo lawm tehchiamlo mahse, ṭhatna a hneh chu ka tum ruh hle thung, kan chunga ṭha tlat te chu tumah kan haw thei tak tak ngailo, keipawn chu chu ka beisei a ni.








A changchuan zahloh der te pawh angai ṭhin, Ezra kal changin ka zui ve ta fo a, midang chuan min be ṭhain min lo ngaihsaka Nu siamtei thung chuan ṭul tawp anih loh chuan min be ngailo, huattur thil phei chu a sawi miahlo nangin a hel deuh tlat nimaiin ka hria, ka luhlul chhuahin keiin ka be lui ngar ngar thunga, U sangpuian ka thil tihdan chu a lo hrethiam rang kher mai. "Ka nu hi tihmawh deuh angin a langa a rilru chhungril a nem a nia, i hneh thuai ang" a lo ti ru zauh a.







Mi han tlawn leh tihlawm tum hi ka pachhiatna lam tak ani lawi a, Nu siamtei bulah pawh chuan ka khawr riau a ni. Han tih vak ngaihna ka hre der lo, chuvangin min ngainalo tih chu ka haider lui tawp mai a ni.








"Inneih ṭhat lampang te hi insawidun tawh em?" Sunday tuka an ina chaw kan eilai chuan Usangpuian a ti a, chulam chu kan lo la ngaihtuah ngai miahlo.







"Man dawng tur an awm hleinem" Nu siamtein a lo tih chuan kan ngawi ṭhap a.







"Amah hian a dawng mai dawn alawm, tam tham deuh hlek pe ila thil ṭha deuh a lei theih nan" Lalberan a lo ti zauh pek a, an nui dar dar a. "Nia ka dawng hreh miahlo ania" uangthuang taka ka lo tih ve chuan min melh rum râm râm a.







"I damṭhat deuh tawh chuan hna te zawng ve leh la, inpa damdawi man a to sia i duh pawh i lei ve thei nang, hmeichhia pawn mahni mamawh thawh chhuah ve hi a ṭha a nia" a lo ti a. Ka pi erawh chuan "Hmeichhia te chuan inchhung enkawl tur a lawm, naute in pai leh vat theih nan i hriselna chiah ngaihtuah zawk rawh, kum 30 hnulamah chuan fa neih aharsa tawh ṭhin a nia, inla naupan laihian neih zung zung a ṭha ngai" a ti charh charh a, Lalbera chu ka melh zauh a a ngaihdan hriat ka chak kher mai, hman deuh a a ṭawngkamah kha chuan fa neih kha a duh tawhlo nimai ang khan a sawi tlat a ni.







"Kum thar lamah te chuan an pai veleh maithei asin, an la naupang a hunṭha an la ngah a lawm" ka pa chuan a lo ti thung a.







In a kan haw leh hnu chuan inkhawm turin ka insiam a, ka kal chhuah dawn chuan Sitting room ṭhutthlengah a mu ngat a, inkhawm chu a thatchhe ve ngang mai, ṭhenawm tlangval chuan a lo sawm fo ṭhin a, an insawm chhuak ngai lem hleilo a, kei erawh nu Zaii rualin ka kal a Presbyterian ah ka inkhawm ve mai ṭhin, Catholic kohhran lian vaklo chu a ding ve tho nain ka pasal kohhran chu ṭawmpui ka duh ve reng reng a, ani erawhin kohhran lam chu engteh ualah angailo a, Catholic ah pawh lawi mahila a sawisel duhin ka ringlo.







Inkhawm ban chuan inah a lo awmlo a, ka Phone chuan Nsa te ina a kal thu a lo sawi a, Nu Zaiin thingpui lo in rawh min tih a vangin ka inthlak zawh hnuah an in lamah ka phei a, rei pawh ka awm hma chuan alo haw leh si a, min lo koh vang chuan thingpui pawh in ta chuangloin ka phei leh a, Johana leh Ruata an lo awm ve bawk a. Thingpui ka lumsak lai chuan an titi bawrh bawrh a khawi ah emaw kal chhuah an tum a ni.







"Lo haw har suh aw, chaw ei hunah te khan i lo thleng leh lo pek ange" pindana a insiam mawlh mawlh laichuan ka ti a.







"Ka tlai dawn chuan ka lo hrilh ang che" tih zawngin min chhang a, Johana leh Ruata bula a awm hi chuan ka ngaih a ṭha thei ṭhinlo. Thingpui an in zawh ah an kalchhuak nghal thuai a, a ṭhiante an rui dun phual bawk si a, ka awm a ti nuamlo ru kher mai.







Chawhnu pum chu insuk nan leh intihfai nan hun ka hmang a, eirawng bawl ka peih meuh chuan khua a thim leh dawn ruai tawh. A lo haw har em vang chuan ka Phone sek reng a, Call a chhang thei miah lo chuan min ti lawmlo hle bawk.







Thim hnu a ka Call nawn leh chuan hmeichhe aw hian a lo chhang a, "Tunge inih heihi Ezra Phone a ni lo em ni!" ka lo ti vat a.







"Ni e tun ah chuan a hman rihlo" tiin min lo chhang a. "Tu nge inih a?" ka tih nawn leh chuan "Keimah" nui hak chungin a ti a, ka pasal Phone a lo chhan vang ringawt pawh a ngei ruk tawh tehlul nen, chutianga minlo chhang chu ka lawm fahran lo a ni.







"Khawimaw amah chu ka lo bia ange" ka tih leh chuan "A hman rihlo, i lo Call tih ka lo hrilh mai ang, inla Strict viau lo la" a lo ti ram hmak a. Kan vawikhat inbiakna ah chuan min zuam mah mahin ka hria.







"Ka pasal kha Phone pe mai teh" amah aia vin chuan ka ti ve ta kher a, an nui har har ri chauh chu ka thawm hriat awm chhun a ni.







"Malsawmhlu i Boss in a be duh che anih chu" lehlama miin a tih lai chuan thawk ka lo la hak a, a awmhnaih ve reng laia aman min chhanglo a hmeichhia alo chhan tir chu ka huat tawk a tling hle bawk.







"Chaw minlo eisan mai rawh se" Lalbera aw ngei maiin a tih ri chu ka hre pha a, nula chuan "I be dawnlo a mi?" tiin a zawt a, zaizirin a chhang nge ni a chhanna ka hrezui tawhlo. "A buai rih anih chu aw ka pi" tiin nula chuan Phone chu a dah zui ta daih a, ka thinrim chu ka sa nghal pup pup mai.







Chaw eilo chuan ka nghak ta tho a, ka inngaihtuah kual nasa hle bawk. Ka ngaihtuah nasat poh leh ka thinrimna a zual a, ka insehruh nasa tawh kher mai.






A lo hawlai chuan ṭhutthlengah ka lo muhil a, a rawnlut thawm ka hriat veleh ka thochhuak nghal thuai a, a pai tak takin a rawn pai lut a chutiang khawpa a rui chhe lai chu ka vawikhat hmuhna a ni.







Dingngil hleitheilo hian min rawn nuihsuka, ka sana ka en chuan dar 9 a lo ri der tawh a, a haw tlai ringawt pawhin mintih lungawiloh tawh tehlul nen rui chhe lutuk maia a lo haw chuan min ti thinur zual a, ka hamhaih lek lek bawk.








"Tui minlo lumsak teh" meng phi riaia min en chunga a tih chuan ka lo melh rum kha kha a, ngaipawimawhlo lutukin pindan lamah chuan a lut zui daih a ka zui ve nghal thuai a, khumah bawk chungin a rum ṭiah ṭiah a, a pheikhawk pelh tur takngial pawn tha a neilo anih hmel.








Ân khumna tur ka ngah tehlul nen a biak hleihtheih derloh, tun ah tak hi chuan an khum hrep pawh niila awmzia a awmlo kher ang. A pheikhawk chu pelhin a dah tau sawk sawk a, dimlo zetin khumah chuan la nam let a, a thawlak ruala zu rim rawn nam te chuan ka ṭah a ti chhuak hlur mai.








"Hahthlak lutuk mai.." ti chung chuan a jacket hak lai chu ka phelhsak sawk sawk a, "A.. ngai.. tawhlo" vai riaia a lo tih chuan a lu chu ka nam thle lehnghal sawk a, a lo la nui suk suk zui a.








"Hei hi enge?" a Jacket ipte aṭang chuan ka ṭham chhuak nawlh a, CD pathum lai a lo ah chu phawk lutukin ka en a "Malsawmhlu...he thil hi" ka tihlai chuan ani chu a lo chatthla fel der tawh. Thinrim lutuka thaw sak sak chung chuan ka thil ken lai chu ka hum ngawr ngawr a, ka tawt up up mai.







Heng thil hi enga tan nge a kawl ang, nupa nun kan hmanin keini chuan kan hmang ngailo, anih si chuan engatan nge a tih, ka rilru ah chuan zawhna a lo lut zung zung a, a chhanna tur chu ka ngaihtuah kual ruai bawk a, ka thil ngaihtuah mek vang chuan ka thaw a ipik hluah hluah a ni.







Ka muhil theilo chu ka inlet sek a, ka bula muhil tui tih hriat lutuka a thaw ti sak sak te chu ka haw hlur bawk, ka lamhawiin a rawn inlet thawk a, a zurim vang chuan ka lo ner nang a, chutihlaia a nghawnga ka thil va hmuh vang chuan ka tho chhuak rang kher mai!







Aw Lalpa....Hickey a rawn hawn a maw?






A nghawngah chuan fawh dukna hnu tih hriat lutuk hian hmun hnih ah a duk raih mai! A hmaiah chuan ben sawk tumin ka tin uaih uaih a ka kut chu ka la thla leh ṭhin lawi a, ka thawk a chham thei mai dawnin a nia ka hriat ni.






Ngaihzawng dang anei em ni? Hmeichhia te nen an lo khawsa ho anih chiah hi!







Ka awmdan hrehawm lutuk vang chuan muhil theiloin ka ṭhu chhuak leh hluai ṭhin a, ngaihtuahna tenawm tak tak chuan ka thluak a fan kual vel a, thil dang reng a leng theilo. Ka pasal hi ka hriat lohin a lo che tisa ṭhin reng em mawn ni le?







Khuma ṭhu chunga thil ka ngaihtuah lai mek chuan a Phone a lo ri a, a Pattern ka hriat sa vangin ka hawng nghalthuai a. "Babes..naktuk chawhnu ah aw Hruaisanga chu Nancy kutah ka dah, a lo kal ngei ang" tih thu lo thawntu chu tudang niloin Lalfakawmi a ni.







Huhh...Lalfakawmi nen anlo inkawp a maw! Hrep chuan...



***



Zinga a rawn tho chhuak chu melh pawh ka lo melh duhlo a, dawhkan bula a lo ṭhut rualin ka thawhsan nghal thuai bawk. Ṭhutthlengah ṭhuin Tv ka On ta ringawt a, sawichhuah dan tur mawlh chu ka ngaihtuah a ni.







Sitting room lama a lo phei chuan ka tho lehnghal thuai a "Duati..." a tih rualin ka kalpel vut a, min enzui vung vung ngei ang.







Chawhmeh ka siam mawlh mawlh lai chuan ka sir a ding chungin minlo en reng a, "Ka lu hi ana lutuka" a tih pawh chuan ka melh duh hauhlo. "Barbie...ka damlo ania" a rawn tih leh rualin "I penṭawng anih kha, ka hriatah lu na kha rawn sawi duhlo maiteh" ka lo ti vin hlar a, a ngawi nghal hmak mai, naupang thilsual ti ang maia ding chungin makti fein min en a, keiin rum em emin ka lo melh thung.







Sleeveless chiah a hak vangin a nghawnga hickey chu a langsar hle bawk a, min van ti thinur zual tehreng em.







"Kal bo teh" lehlam hawi hmak pah a ka tih chuan ka lampanin a lo kal a, min rawn kuah mai a tum chu ka bai chawhna fianpui chuan a kut ka lo vuak sak chawrh a, ana a ti ngang mai.







Lehlam ka hawisan lehnghal thuai a, ka bulah chuan a la ding ngawi ta reng a, a awm ve reng vang chuan ka thinurna chu chungril lamah a so bulh bulh ni berin ka hria.







"Enge ka tih?" a zawhna vang chuan ka ner sak a, ka chhang lo.






"Anih ka dam, ka lu pawh a na lo" a rawn tih leh chuan ka lo melh rum hrawk a, tunah tak hi chuan biak ka chak hlawllo a ni, ka thinrim em vangin ka thil sawi duh te pawh ka sawi chhuak thiamlo ang, chuvang chuan ka la insum hram hram rih angai.







"Tihsual ka neih chuan tihpalh" zawi ruih hian a ti a, min ti thinrim zual sauh mai. "Tihsual engmah i neih ka hrelo, i nun ania i duh tawkin rui la, i duhtawkin nula kawp rawh keichuan engkim ka chân tawh chân leh chuan tur pawh ka nei tawhlo" ka aw chu a ring hle a ni.







Ngawi renga ading chu kal pel mailoin a zawnah chuan ka ding dat a, a mitah tak en chungin "Nangmah tiamin" ka ti leh ngat a.





images - 2020-08-25T150135.989.jpeg
images - 2020-08-25T150135.989.jpeg (18.16 KiB) Viewed 4034 times





CHHUNZAWMNA




Ka kal pel tur chu min pawt let nawk a "Khatianga min be fo lo khan i lungawiloh chhan chu sawi rawh, i sawi duhlo anih chuan ka tan thlem ngaihna che a awmlo a nia" a tih chuan rum lutuka lo melh chungin "Thlem ka ngai bawk lo e" ka lo ti vin hlar a.







"Thlem iduh siloh chuan enga tan nge i titauh a?" alu a tuai vut chu rapthlak ti zetin ka lo melh a, titau a ti nia! Titau niloin thinurna in a tuam hneh lutuk vanga beiseina neitawhlo leh chumi avanga hlimna hmu tawhlo a lungngai mek ka ni, titau ang leka min lo ngai anih pawhin tunah ngei hian chhan awmlo a titau mai mai ka niloh zia chu ka hriattir dawn khawp a lawm.






"Lalfakawmi nen inlo inzui leh tawh a ni maw?" ka tih chuan a meng nur nang a, "Awm anglo emai" a ti sup duh chauh a.






"Nizana ka lo Phone che a i lo chhan tir kha tu nge?" en let kar chung chuan ka ti leh a. "Ruata bialnu a nih kha, thil kan tih laklawh vangin a lo chhang anih kha, kha vanga i thinrim anih chuan engmah ngaihkawih tur a awmlo, ka lo call let che a a tlang theilo anih kha" a lo ti leh mai a, chhuanlam siam eng ang mahse ka awih thei tlat lo.







"I Phone kha min pe teh" tiin a hma ah chuan ka kut ka dawh nghal vat a, mitko san uk chunga min enin "Enga tan?" alo ti a. "Min lo pe mai teh" ka tih leh chuan a kekawr ipte aṭangin muangchangin a lo phawrh chhuak a.






"Tu nge biak i tum?" min pek paha a tih chuan ka lo pawhthlaksak zawt a, mak tih hmel deuha min lo en te chu ka haw hlur mai. Nizana a message ka chhiar sak te chu ka zawng kuala alo awmtawh hauhlo lehnghal a, a lo Delete hman vek a nih chu!






"Huhhh....zep chu tum ve hle mai maw, nizanah ka chhiar vek tawh" tih leh a Phone chuan vawm ka rual a, "Vanlalhlan" a rawn ti vin nghal hluk a, kei erawh ka thinrim zual deuh deuh.






"Mitenawm i nih hi, vawin aṭang hian kan inṭhen nghal ang" ka lo ti vin tuarh a, mengrum ul chungin min en haw ringawt a, ka thil sawi chu a beisei hauhlo tih a hriat reng.






"Duhtawk teh nawmsamloh nen i ang ri ka hre peihlo" a benghupin min kalpel vuta, thinrim lutuk ka melh zui laichuan a benghup tlat chungin tukverh ah chuan min hnungchhawn zawngin a ding a "Malsawmhlu" ka tih leh pawh chuan a hrelo der hmiah a, min ti beidawng takzet a ni.






"Aṭha, i duh tawk khan min ngaihthah la, keipawn ka ngaihthah ve tawh ang che" ti chungin pindan lam ka pan a, ka thawmhnaw bawm hawngin ka hmuh hmasak sak chu Luggage ah ka vawmlut hmiah hmiah a, thawm ka dim lo kher mai, ka thawm ri chu hre pha ngei sela ka duh bawk.






A rawn lut ve nghalthuai a "Engthil nge i tih kha?" vin zeta a rawn tih chuan ka lo hrelo der ve ngat a. Ka kut a rawn vawn rualin ka lo thing thla nghal hmiah bawk a, rum lutukin kan inmelh leh ta. Ka thawk a sak ṭalha ka thinphu a rang zaih zaih bawk. "Kha tianga tih kher kha angailo aw" a tih chuan ka lo nui hak a.





"Ni dawn tak e, nangmah chhuak zawk rawh, nangte chuan haw na tur i nei tak a lawm" a awma nam sawk chungin ka ti a, khumah chuan ṭhuin ka insiam zawm duh tawh lo, keichu ka pan min tuithlar a haw leh thei pawh ka ni tawh reng reng hleinem, ani erawh a nuin a thlem cham chi a, hetiang dinhmun ah hi chuan amah zawk chu haw tur niin ka hre leh hnuhnawh a ni.






"Haw rawh" ka bula a ding chu melh chho hrawk chung chuan ka han ti leh a, min en ngawt ngawt bak chu a che chang duh hauhlo. A phone a rawn ri a "Kan sawi dun ang, tikhan lo awm ang che" min kawk zauh chunga tiin pindan aṭang chuan a chhuak zui a, a chhuah hnu chuan na deuh deuhin thawk ka la sek sek a, ka chhah mup mup ni berin ka hria.






Tun dinhmunah pawh min ngai pawimawhlo leh tawh, ka che vuta ka Bag chu lain ka inhnuk chhuak nghal dawt dawt a, choka a Phone hmang lai chu a rawn hawi tih ka hria, en duhloin kawngkhar lam ka pan zui zat a "Vanlalhlan" pawr zeta a rawn tih chiah chuan ka hawilet zawk a, ka ke ka chhep sual ta zui a, pawn step ah chuan ka inbilh thla nawk nawk a, Step tawpah chuan ka ṭhusawp nghal nuaih a ni ber!






"A na lutuk" thawh mai ka tum chu ka tho chhuak theilo. Ka ke rek chu a sa hut hut a na ka ti lutuk chu ka ṭap chhuak hawk a, chet tak ngial pawh ka chêt thei derlo.






"Ava hahthlak ṭhin e aw" tih paha a lo chhuak chu ṭap pur chungin ka lo melh a, phun hluk hluk chungin min kaih thawh mai a tum a, ka ke chu chhe te pawhin ka chet ngamlo, ana chuan ka chawn a rawn zawh chho ni tawh maiin ka hria, ka ke ruh chu a tliak chiang a ni!






Ka ke rawn khawih a tum chu "Min khawih suh" ka lo ti vin hlur a, ka ṭap zui hliam hliam bawk a, tih ngaihna a hrelo kher mai.





"Tinge pawnah te i tlan chhuah daw daw ni" chek hlak pah a a tih chuan ka ṭap tawp hmak a, ka melh rum zui nghal zat bawk a, a lo nui sung chu ka haw kher mai.





"Ka ke kha a tliak a nia" ka tih chuan "A tliaklo a pelh a nih hi" a lo ti vat a.





Thawhtuma ka chêt leh rualin "Lo ṭhu mai mai teh" tih pahin ka ke che theilo lam chu a dah rem a, a la nui cheu nia mawle!





"Nuihzatthlak a awm a mi Malsawmhlu" ka tih pawh chuan nuihza insum lutuk hmel hian min en a.






"He luggage hi en rawh nang aipawn a len daih zawk hi, a rit zawk bawk ang, ken chhuah a ngaih chuan min hrilh la ka tihsak mai dawn che a lawm, engatan nge i tih reng reng a" a lo tih chuan min ti hawihai der mai!




Mawl vuk vuk lutuk!





Inchhungah min pawmlutin khumah min mut tir a, ka ke a tuam mawlh mawlh lai chuan ka mittui ka lo hru zauh zauh reng a, min ngaihsak ang taka a awm te chuan ka rilru a tina zual ting mai a ni.





"Kan inṭhen dawn tho tho a nia, milerh leh rinawmlo bulah ka awm peihlo" ka lo ti hlak hlak a. "Chutiang an sawi ngailo Duati" ka ke tuam mawlh mawlh paha tiin a nui suk suk a, ka ti tak tak lo turah a lo ngai emaw ni zawk ni?





"He inah hian tih ve tur ka nei tawhlo" ka tih chuan "I ta a lawm" a lo ti leh mai a, ka enlai chuan a nghawnga Hickey chu a lang chiang ngai mai a, ka thin a rim thar lehzual.






"Mawi hle mai" a nghawng en chunga ka tih chuan min melh zawk a kei ka lo nui thung, ngeiawm leh diriam fahranin a ni ka nuih ni.





"I ta lawm ka nih" ka thil sawi hrethiamlo lutuk a tih chuan thawk ka la hawk a "Midang ta ini tih chhinchhiahna pu chung kha chuan sawi ve lo mai teh" ka lo ti bak hlar a, "Ti teh suh...." a tih rualin ka lo pawtchat vat a "Khaî.....darthlalangah sawn k nghawng kha va en zawk rawh" ka lo ti leh sak a, a tho zui ve mai bawk.





"Hmeli mai mai chu leh.." tih pahin a nghawng chu a nuai nawk nawk a, ava han sawi chiang ve leh, hmeichhe fawh duk ngei a ni tih chu a inpuang ve chiang a lawm.





"Nuai vak vak mahla a reh lo ange, fawh hrep hnuah duk a nih kha" nersawk chunga ka tih chuan min lo en zawk a, a kut zungchala min rawn kawkin "Khatiang zawng kha chuan ngai miah suh" a ti zui hram a.





"Mi lerh tenawm lutuk" ka tih leh chuan min melhrum nasa mai. "Heihi engtik ami nge ka hrelo" a ti bak hluk a, nuihzatthlak chuan a.






"Nia nia, i hre leh pek nang, i theihnghilh zel zul reng a lawm" ka lo tih sak a, hepa hian a hrelo der vel mai mai ani tih ka hailo nasa, a haihawt chhuanlamah hman a tum mai mai a ni.






"Lalfakawmi a ni ngei ang" min en lo chuan a ti zawi sup a "A ni ngei ang" ring fahrana ka lo tih chuan min melh zawk a "Khatiang khan lo ngai suh" a ti leh ngawt a "Ka ngai vek tawh, sawifiah eng ang mahla kha a chiang vek alawm, nizanah in lo...." ka sawi lai mek chuan "Barbie..." a rawn ti hluai a, a meng nur nasa hle bawk.






"I duhchuan kan Phone ang" a ti zui a, phone eng ang pawh niila awmzia a awm chu ka ringlo nasa a ni, a insawifiah tumna chu ka ring hauhlo bawk. A phone a hmet nuap nuap a, a biak tum chuan a lak rualin Speaker ah a dah a mipa aw in a rawn chhan vang chuan ka lo ner sak a, Lalfakawmi a be dawn emaw tih a Nsa zawk a lo call chu niin.






"Lalnunsang, nizan khan ka chatthla em ni?" a ti nghal tawng a, Nsa lo nui kur kur chu eilo fe in ka lo ngaithla ve a.





"Chatthla ang chu mawle, i in khat lutuka i zo lo anih kha Ruata khumah i Die ringawt a lawm" a lo ti zat zat a. "Hei ka Boss hian min hnawh chhuah a tum a, a chhan chu ka nghawngah hian Love Bite lianpui pahnih a awm a" min melh ralh pah chuan a ti a, Nsa nui nasa lutuk chu hmu pha ngat ila chuan ka vawm ṭawk duh ngei ang.






"Khawmaw Boss chu ka lo biaksak dawn che a mi, Johana leh Ruata an nih kha an ha thla te pawh a lang hiallo maw" nui kur kur chunga a tih chuan 'Kha i hria maw?' ti niawm hrima hawisang hian min rawn en a, awih mai chi pawh a ni dawn emaw ni, an ṭhianho chu an inṭan ṭham a min bum zeih zeih lo ang tih ka hrechiang reng reng hleinem le.






Ka ngaihtuah laimek chuan "I jacket ipte kha en chhin rawh" Nsa chuan a lo ti a, "Enge..?" bung zeta Lalberan a lo tih chuan "En la i hmu mai ang" Nsa bawk chuan a lo ti leh a, Lalberan nizana a Jacket haklai a zawng vut vut chu tum bur chungin ka en reng a, ṭawng pawh ka ṭawng chhuak peihlo tiang khawp khan ka thinurna a sosang a, zan pawh ka muṭha hlei theilo anih laiin an ṭhianho fiamthu lek alo ni a, ka lawmlo a ni. Mahse, ka lawm hle bawk, ka ṭah te pawh a chhuak rum rum.






"Ka la chhuak tawh bawlhhlawh bawmah khan ka paih" ṭap pur chunga ka tih chuan a thawmhnaw hailai chawl meuhin minlo en a, bawlhhlawh bawm a pan laite chuan ka insut faih faih a, a va en chuan "Hei hi enge?" a hmelah maktihna a lang bawk.




"Condom anih kha?"



"Ani tih chu ka hria a lawm, khupa khuan kan bawlhhlawh bawmah enge a lo tih a?"





"I jacket iptea ka chhar a nih kha" ka ti tham ṭuau a, a lo nui chhuak hawk thung. "Amak Barbie, chhe te tal hian min ring teh, nanglo hmeichhe dang hi ka mamawhlo ka tawk ngailo bawk ang" tihpahin khumah chuan a rawn ṭhu a, ka ke na lam chu la kangin a hmui a tawh tir vang vang a, ka rilru nat hman zia kha min hriatthiam pui sela ka ti a ni, hrethiam ngat sela chuan eng ang chiahin nge ka hmangaih tih pawh a hrethiam ngei ang.







"I ṭhiante kha ka ngei ania" ṭah chhuak inpet ruh ṭeuh chunga ka tih chuan "Keipâwh........" hmui petsawi nang chungin a lo ti a, min ti nui lo theilo. Ka ṭah nuih a ni, a chhan chu ka hlim em a, ka ngaih ang kha engmah alo nilo a, ka lawm lutuk chu ka lung chhe hial a lawm.





"Lalfakawmi Message ve kha?" ka tih chuan "Theihnghilh rawh, ka chhang ngailo a rawn ti tluk tluk zel a lawm, i tan thik tham a nilo" a lo ti leh mai a, kan la hria ang chu.






"Zana i chhuah tam man anih kha, tianga i awm chuan kan inkar a ṭhalo telh telh ang nizan pawh i rawn rui haw a, i nghei thei tak tak lo anih hi" ka lo ti sap sap a, "Ka duh hun hunah ka nghei thei" ka kut vuanin a mitmeng lian kal mai chuan min en ran a, "Anih chuan engtikah nge i duh dawn a?" ka ti leh a "Tun aṭang hian a ni mai a lawm" a lo ti awlsam et a, tiang hian a ti ve ziah, a theih tak tak pawh ka ring tawhlo.


***



Mak ka tih deuh turin a awm chhunzawma thla thum ngawt chu a nghei ve ta reng mai, a tir chuan tlai a lo haw hi a za cheng a, a tei vut vut ṭhin a a zu in chak niberin a ka hria a, a awm mai mai theilo chu inchhung sek rek khawih tur a dap renga bel zawng zawng ka nawh tlet sa te chu a nawt nawn vek a, a bel nawh chu a eng sêt sêt thei hial a ni.






Zanah guiter kan perh dun ṭhin a, zan pawh a chhuak khat leh hle tawh, Hruaisangan a rawn Phone zeuh zeuh ṭhin a, an inbiak apiangin an inchhang thinrim a, Hruisanga lah a lo ṭawng ngeiawm ve ṭhin bawk nen, ral aṭang chuan an intawng fo mai a, Nsa leh Johanan anlo fuihpawrh bawk nen kalchhuah mai a tum ut ut chu ka la dang thei hram hram chauh a ni.





Zan khat chu an insawm chhuak ta nge nge a, tlai aṭanga Ruata leh Johanan a lo birh tlat vang a ni, Margareti te chhung an lo len lai anih vangin ka hnial bur ta biklo a. A lo haw hma tur thu sawiin an ṭhian thum chuan an inzui chhuak a, tlan chak lo tura ka hrilh ṭawk ṭawkna pawh a zawm chuan ka ringlo, rin ang ngeiin a tlan chhuak chiah chu ka phun zui hlak a.






A lo haw hma chu ka muhil theilo, ka ṭhiannu pawn angaihtuah deuh aniang "Inpa alo haw tawh em?" tiin min lo zawt a, kan inbiak zawhhnu pawh chuan a lo la haw har hle a ni.





In a lo thlen chuan dar 11 a ri thuak tawh a, a kawr var hakah chuan thisen a kai liai bawka, ka zawh hma hmain "Kan insual hlek a" a lo ti var a, sawi zui ngaihna pawh ka hrelo, naupang chhia ang mai an ni.





"Tinge in insual ziah, in thu a ho thei si" ka lo tih chuan "Ruata an lo khawih a kan chhan ve a ngai a lawm" a ti leh mai a, mipa ho hi ka hrethiam theilo. A chal aṭang chuan thi a rawn luangthla ngiai ngiai a "Kha i lu ah i inhliam anih kha!" ka lo ti chul a.






"Lalhruaisanga nep lutuk mawle, pakhat leh pakhat pawn min cho lo, hmanrua a chuh nghal zela" ti nang nang chungin tui khawihna ah chuan a lu chu ava sil thuak thuak a. "Khawi maw keiman ka lo en teh ang" ka tih chuan ka bulah a lo ṭhu a, ka en sak a pem thuk tak phei anilo, a duk deuh raih tihloh chu chhe te chuahin a pem a ni.






"Lu a invuak te chu thah che a tum a nilo maw?" lawmlo fe chuan ka ti hlak hlak a, "Mahna..." a lo ti ve sup a.





"Engtin mah iti hmasa ngai silo a, nangnena buaina neih hrim hrim hi a cho a niang, a pawi sawila a ti zawk mah che in ka hria" ka tih chuan "Ni hmiang ka ti mai a, mi nep alawm a nih" a ti leh hluk a, thinrim hmel phei chu a pu hauhlo.







"Patling ṭhiau tih a tan chuan a mawilo ve e" ka ti sap a, anui suk suk a "Nia tiraw mahse, a nuam ve a lawm" a lo ti a, hei hi mipa ka hriatthiam theihloh chhan pakhat a ni, buaina ka duhlo an tia an thinrimin an inhuat vanga insual an nih pawhin nuam tihna riau hi an nei thei zel a.






"I khawihna ve hman em?" nui ruh ruh chunga ka tih chuan "Loh theih nang, inpa hi ka che bawn viau ah ngai tawp rawh" nui sang chuanga a tih chuan ka lo nui chhual haka, a pemah chuan Dettol ka hnawihsaka Bandage in ka tuam sak bawk a, a thi zui ta biklo.





"Insualna a i tel leh anih chuan hliam zawkah ṭan awih tawhloh" ka lo ti zauh a, phawk zeta min en chungin a nui a, "A khawihtu chiah ka ni tawh ang" a lo ti vat a. "Chutiang ngawt ni loin, tumah tihbuai hmasak loh tur ania mahse, miin min tihbuai chuan tlawm miahlo tur, chuan a hliam zawkah ṭan miahlo tur" nui hak hak chungin ka ti a, mak min tih hmel deuh si hian a nui suk suk a, "Min hauh vak ka ring asin le" a ti zawi sup a.





Nia, hauh kha chu ka tum ve ngei alawm mahse, ka hau leh ta lo a ni, ṭhian te tana inpe zo tak, hmangaihna ngahtak ani tih ka hria a, a ṭhiante thlavang a hauhsak chu lo huatpui ka tum biklo, insual erawh sim sela ka duh a, buaina pum pelh sela ka duh bawk, chu erawh tun hunah nilo ah ka la sawi ang.





"Ka nu i van ang e" a hliam ka tuam zawh hnu chuan a rawn ti chhuak phawng a, "Ka fapa a lawm inih" ka lo ti zauh a, a mitmeng nalh fahrana min enlai chuan a hmuiah ka fawp leh zauh a, a malchungah min pawt ṭhuin min fawp nghal vawng vawng a lungchim leh duat takin, ka awm a nuam veng veng mai.






Zing ka tho chu Bathroom bula a ding ka va hmu a, kawngkhar vuan hian a ding ngar ngar a, "Ezra enge itih a?" ka tih pawh chuan a lo hawilo, ka ṭawng chu ahrelo em mawni zawk ni.






"Vanlalber.." ka tih leh chuan a lo hawi zawk a, a hmel chu a dang bei mai, "I lo tho tawh a ni maw" ka ti zawi ruih a, a vai riai maiin ka hria.






"Engtin nge i awm a?" hlauthawng tak chuan ka pan hnai a, "Ka lu hi a rit luk a" a chal dawm vung vung pahin a ti a, Hruaisanga vuak na vang kha em mawni dawn le?!







(Muthlu hmanlo chiah chiah...in comment ṭhat viau chuan naktukah 26 ka dah ang)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:09 pm

CHAPTER - 26






"I hliam kha a mi!" ka tih chuan "Nih pawh ka hrelo, ka tho fuhlo deuh aniang ka ni bûr mai" a lo ti a. Bathroom a aluh zui daih a vangin keipawn eirawng ka bawl zui mai a.





A nuamsam vak lo a hna pawh a kal peih nganglo aniang tukṭhuan eihma aṭangin a mu zawl zawl reng a, eirawng ka bawl lai chuan ka Classmate hlui Rinzualin min lo Phone a "Bank exam pe ve ila" alo ti a, chawhma lamah inhmuh kan tum zui nghe nghe a, Lalbera ka hrilh chuan "A ṭha a lawm" a lo ti ve mai bawk a.






Tukṭhuan kan ei a ka insiam mawlh mawlh laiin khumah ṭhu awn duai chungin Guiter a perh rat rat a "Vawin i chawl dawn maw?" ti a ka zawh chuan "Chawhnu ah ka kal mai ang, ka mu rih dawn" a lo ti a.






"I lu kha X-ray a ṭhain ka hria, lu lam hi chu ngaihthah chi a nilo ania, kal hma deuh la ka tih tur ka tih zawh hunah ka lo kawi anga ka kalpui dawn che nia" ka tih chuan a lo bu nghat nghat a.






Ka chhuah hmain Rinzuali chu ka be lawk a ani pawh a lo inpeih ve chiah a, inhmuhna tur te kan inhrilh hnuah keipawh ka kal chhuak zui a.






Rinzuali nen kan inhmu chu sawitur kan ngah dun ngang mai, ani chuan UPSC exam te pawh a lo pe a ka tih ve loh chhan te min zawt a, Lalbera nen kan chanchin te pawh alo hria a "A tir chuan mak ka ti lutuk a, in inhmehlo ka ti sia mahse, ka ngaihtuah chianga in inhmeh telh telhin ka hria, in inzui kual nasa ṭhin bawk a" nui var var chungin a ti a.





Exam kan pek na tur Bank chu HDFC Bank a ni a, Exam pe tura hming thehlut pawh an lo tam viau tawh a inbuatsaih nan thla khat zen zawn chu hun kan la nei a, inbuatsaih lai vel hi ka thil nin ber nita in ka hria, thil zir ṭhat leh hi ka peih tawh meuh lo Exam thawr mai chu ka duh tawh a ni.





"Enteh, Vîte Exam theih apiang chu ka ti kual duah dawn Percel khat vel hna ka dil hunah chuan engmaw ber chu ka hmu tho tho ang, ka Exam ngun poh leh Experience ka neih belh a, a dawt leh atan ka confi phah sawt ṭhin, nangpawh tikual ve ṭeuh rawh tunlaiah mithiam tak tak an tam tawh si a inchuh tak tak angai tawh a nia" Rinzuali chuan a ti a.





Bank lam hi ka chak zawng a ni ngailo mahse, a tir aṭangin ka kaldan a fuhlo ta laklawha duh thlang thei ka ni tawh bik lo a ni, Bank a thawh pawh van a rah ang ni tawh berin ka hria, tum ren rawn ni ila ka zir zawh te khan Coaching mumal takin lo kal ila chuan huphurhawm tak niin ka hre lo mahse, tunah chuan a beih a beih ve fat chu angai tawh.





Question pawimawh thei tur ang te Rinzuali nen chuan kan dap kual a, Phone a inbe chhunzawm turin kan in ṭinsan a, Gym ka thlen phei chuan chaw chhun eihun vel chiah a ni.





"I lo kal a ni maw? Pu chu a chhuak lawk a" instructor thar hian a lo ti a "Lo nghah pahin Steambath ka lo ti mai ang" ka tih chuan min kawhhmuh nghal sawk sawk a.





Ka zawh hnu pawh a alo la kir loh vang chuan ka Phone zui a "Ka lo let ṭep, lo awm rawh eitur ka lo lei haw ang" a lo tih vang chuan Counter ah chuan ka lo ṭhu ta rih a, rei vak lo ah a lo thleng ve mai bawk a, Momo leh Pizza la lum thar thar min lo lei a "Kan eizawh ah kan haw thei a ni mai" a ti a.






"Aw...X-ray chu kan va ti lawk dawn lo a mi?" a tih chuan "Naktuk ka incheck up ni a nia chumi pah chuan a nimai, a ṭha ang engtin mah a awmtawh hleinem" a ti awlsam mai a, kan vei zui ta lem biklo.






Kan haw hnu lawkah ṭhenawm nu a lo kal a Mautuai pickle ama siam leh huana a thlai thar eng engemaw min lo pe a, thingpui te lum sakin kan titi luam a, kan chhungkaw chanchin min zawh chuan ka ne ne kual a, Ezra nen chuan inneih pangngaia innei turah kan ṭhenawm te hian min ngai vek a, ka nihloh thu hriattir chu ka tum hauhlo bawk.





"Lehkha in zir sang nikhan ka hria a Kohhran school ah te sawn i thawk duh lawm ni?"a tih chuan "School lam chu ka bansan tawh a lawm, hna nghet thei tur chi engemaw ka zawng mek a" ka lo ti a.





"Tuition te pe la, Lalthani fate sawn a duh tak a sin, a nu khan hmanni khan a sawi a sawi a sin, a fa te sawn chhiarkawp an thiamlo lutuk a" a ti sap sap a. "Lo sawi la Tuition pek te chu ka hman a lawm" ka lo ti ve a, a haw hnu chuan ka ngaihtuah chianga ka pe thei ngut angemaw ka ti leh hnuhnawh a, a chhan chu zingah naupang School an ṭan hma si a zanlamah lah Lalbera ṭhiante an lo kal fo a, an bengchheng thei si a a tih chi dawnloh riau in ka hria a ni.





Lalbera ka hrilh chuan "I tih dan dan" a lo ti mai a, ṭhenawmnu in a lo bawhzui anih hranloh chuan va sawi leh kher chu ka tum ta lo. Mahse, ni hnih hnuah ka Bazar chhuak tur chu minlo ko peng a "Naktuk tlai aṭangin lo kal an duh a, zinglam an hman lo a, tlai banah i thei angem?" a lo ti a, tlai chu a remchang khawp dawn in ka hria.






Ka Tuition pek naupang te chu Class ten zirlai unau hmeichhe pahnih leh an ṭhenawm mai a mi mipa naupang an ni a, Maths chu an kaw lo tlang khawp mai, Trigonometry leh Algebra phei chu angaihna an awm hlawllo a ni, a bul te aṭangin ka ṭan pui a, Time table aṭanga bul ṭangin Step ho te te ka tihpui hmasa a, a bulṭhum a ṭanga ka tihpui loh chuan an man dawn tlatlo, ka sawi an hriat thiamloh ka hlauh luatah ka hahpui hrep bawk.





School chawlhni chuan zing lamah an lo kal ṭhin a, eirawng bawl pahin ka enpui mai ṭhin a, hmeichhe pahnih te nu min hrilh leh danin School lamah pawh an Tuition kal chu hma an lo sawnpui ve viau ani awm a, an Test result te min hmuh a keipawh minti hlimin ka phur phah ve khawp mai, ka tan tak pawh Bank exam ka neih tur atana inbuatsaihna kawng ṭhen khatah chuan a ni ve pah a, a hranpa a Maths ennawn leh hi ka taimak lohna lam tak a ni.






Tukkhat chu zing lamah an lo kal a, kan inzirtir lai mekin Ezra chu a lo tho a, ka laklawh em vangin ka lo hmu lawklo a, a hmel la hmu chiah chu min ti hamhaih kher mai!






"Ezra...i hnar kha a thi a nia!" ka tih chuan tui khawihna lamah a phei hlawk hlawk a "Zan ka mengrei ṭhin lutuk hi a lawm" a tizui nang nang a, "Vawin chu keiman ka kalpui dawn che a mi?" a hmai a phih lai chuan a hnunga va chulsak pahin ka ti a.





"Chawhma kan buai dawn a chawhnu lamah aw" ka biang a piai zauh pahin a ti a, nidang aiin naupang ho pawh ka zirtir rei ta lo. "X-ray chu kan ti nghal anga, chuan muttuina lampang damdawi kan inchawh tir bawk anga" chaw ei lai chuan ka ti a. "Ka mut a tui reng a lawm, mu hma ve deuh ila a ni mai" a lo ti liampuata a, a hnar a thi bawk si a Vitamin engemaw tal chu a mamawh thoin ka hria, kan pahnih a kan eitur engemaw min chawh turin Doctor chu ka râwn hrim hrim ang.





Thleng ka sil zawh chuan a insiam mai turah ka ngai a, khum a lo muhil ka va hmu chuan min ti hamhaih lek lek a, nizanah a lo meng hrep em mawni dawn ni?





"Hei...hna i kal dawnlo mi?" a bula va ṭhut pah chuan a hmuiah ka fawp zauh a, rawn meng siar siar in "Ka mut a chhuak lutuk" tih pahin a inlet thawk a, naupang tho duhlo nuar ang mai a ni.





A bulah chuan mu ve nghalin a kawngah ka kuah a, min lo ngheng salh salh a ka nuih a ti za lek lek a ni, "Hnathawh ṭhulha mut i tum a maw?" inbeng kang chunga ka tih chuan meng hleiloin a nui ve suk a "Chawhnu ah ka kal mai ang" a lo ti a.





"Chawhnu ah te chuan kan inentir dawn kha, anih chuan tho la chawhma hian in entir ila, chawhnu ah hna ah i kal anga" ka ti a, a che zui duh miahlo chu a kawngah ka dek a a thochhuak rang kher mai.





"Ka la mu duh a sin" tum deuh bar chunga a tih chuan "Mut thlahlel suh ilo pachhe dah ange; I mitmengla tichuan..." ka sawi zawh hma hmain "Ka hria a lawm" tih leh khuma min kawih thluk a rual a, zawi lutukin min bawh bet thlawp a, a rit kher mai.





"Ka thaw theilo a niâ, ka tlawm, ka tlawm" ka lo ti chul a, "Minute 30 chiah ka mu lawk ang" a lo la ti cheu mai "Minute 3 chiah a" tih leh namsawn ka rual a, nui hawk chunga min enin "Ka ngai che alawm, vawin chu mu mai ang" tih leh a lama min pawh hnaih a rual a.



***


Chhuak tura kan insiam chuan dar 10 lai a lo pel leh tawh "Kal hma ila, kan haw hma thei zawk ang" inthlak mawlh mawlh pah chuan ka ti a, a thawmhnaw hak a tum lai chu ka va en chuan a lo inthing buai hle a, a let kual a let kual a "Khawi ka lo hak tir ang che" nui hak chunga ka tih chuan min lo pe ve mai a.





"Tukverh lo kalh la, Bathroom ah ka lut leh lawk dawn ania" tiin choka lam ka pan a, ka ha te ka nawt leh zet a, ka chhuah leh chuan inchhung chu a lo thim ṭhiap a, ka Phone light ka hmet eng nghal chung a "Lalber light zawng zawng i Off nghal vek a" vui nang nang chunga ka tih chuan a reh ṭhiap ringawt a, pindana ka lutzui chu a hmel ka hmu ta hauhlo.




"Ezra..." enge maw a tih le, a uang em maw ni?




Pawnah min lo nghak anih ringin kawngkhar lam ka pan vat a, kawngkhar ka nam chu pawn lamah a lo inkalh ta tlat mai! Enge a awmzia?




Hepa hi tinge min kalh khum ringawt a!?




Ka Phone a a chhang thei hauhlo lehnghal a, a ngaihna ka hrelo kher mai, tukverh chu hawng eng lehin ka ṭhu tau ta bur ringawt a, ka thinrim hlur bawk.






Minute sawmhnih hnu velah chuan min lo Phone a "Ka thleng chiah a, min lo call a mi?" zangkhai zet hian a lo ti a, "Mawla, enge kawngka min kalh hnan daih a?" ka lo ti vin hlar a, "Hmmm...ka kalh pawh ka hrelo" a lo ti pek a. "I kalh, i kalh....hei ka hawng thei reng reng hleinem mawle" ka tih leh chuan "Lawk aw.." tiin a che zui sat sat a. "Khai leh...ka kalh tak tak a nih hi, lo awm rawh ka lo let ang" tih leh Phone chu dah a rual a, hahthlak chuan a!





Rei vaklo ah chuan a Bike ri ka hria a, phun hluk hluk chungin kawngka bulah chuan ka ding a, a rawn hawn rualin min nuihsang a "Tihpalh" hmuipet sawi zauhin min nuihtlawn a, "I tihluih" tih leh a dula hnek ka rual a, anuih a za kher mai.





Gym a kalhmasa tawhloin Doctor chu kan va hmu a, damdawi dangin alo thlaksak a, X-ray pawh kan ti nghal a, X-ray ah chuan engmah harsatna a awmlo, a lu a hliam a neih chhan Doctor in a zawh chuan "Kan insual" tih te maiin a lo chhang a, Doctor pawn ṭullo chu a ti ve khawpin ka ring.





Gym ah chuan let ve tawhloin Bazar turin ka kalsan a, ka naupang te kha tlai lamah an lo kal leh dawn vangin ka haw hma hle bawk.






Inrinniah ka nuin min lo tlawh a, ka pa chuan ka duh phawt chuan let leh tura min duhthu te min hrilh a Lalbera nena inneih lam erawh ala duhlo chhunzawm ta zela, ka let leh anih chuan dawr min siamsak a tum thu te pawh a lo sawi niawm tak a ni.





Ka Nu haw hnu lawkah Usangpuia leh Lalbera an lo thleng a, Usangpuia chuan chaw a lo einghal a, Zanah an unauin Games an khel dun a, Usangpuia pawh a leng rei ve zek a, riak mai turin ka sawm a "Ka nuin min lo phone ngun tawh emai ka va haw ange, naktuk tlaiah chaw lo ei ta che u" a tih chuan ka lo nui mai a, "Sawm ṭhata min sawm te chu ni ula lo eipawh a chakawm khawp ang" Lalberan a lo tih chuan nui hawk hawk chungin a chhuak zui a. Nu siamtei emaw ka pi leh pu ten min sawm anihloh chuan chaw kan ei phei ngai meuhlo.






"Ezra..Toothpaste i hman hian chhin leh ṭhin teh aw" ka tih chuan a hmui a petsawi nang a, "I hman duh takah ka tia ka lo hawngsa a" a ti chu ka awihlo ngang mai.






Zingah Nu siamtein min lo Phone a chawei tur chuan minlo sawm ta ngei a, Usangpuia khan a lo sawi ani ngei ang. "Khawmpui kan dawnga mikhual kan ngah a chawei hma te angai ania lo tlai suh ang che u" tiin Phone chu a dah leh vut a, a duh a sawi zawh hi chuan Phone hi a dah nghal hmak zela, a chang hi chuan ka ngei leh lek lek ṭhin.






"Ahruaii te inah kan leng lawk dawn a, lo insiam la ka lo lam ang che dar 2 velah kan phei dawn nia" a tih chuan ka hniallo a, Nsan a lo sawm a an chhuak zui mai a, ṭhenawm nu nen inkhawm turin kan inzui chhuak ve nghal bawk a, inkhawm ban chuan tihtur em em ka neih rihlo vangin ka mu zal a, ka harh leh meuh chuan Dar 2 chu a lo pel fel der tawh.





Ka inphih harh sawk sawk a Lalbera ka phone zuizat a, "Ka lo haw dawn chiah lo insiam rawh chhuak nghal thei turin" a lo ti a.






Kan inbiak zawh aṭanga darkar 1 hnuah pawh a lo la thleng ta chuanglo, ka Phone nawn leh a a chhang thei bawk silo chu Nsa ka Phone ta ringawt a "A lo chhuahna a rei tawh, a lo thleng daih tawh ang chu tih a!" a lo ti si, ani alo la thleng der bawk silo, min ti mangang hman kher mai.






Darkar chanve dawn a liam leh hnu chuan a lo thleng ta hram a, thaw hlawp hlawp chungin a lo tlan lut titih a "Tingê?" hlauthawng zeta ka lo tih chuan "Timah, a van mak em em!" tih zawng a sawi a, ka hrethiamlo nasa mai.






"I van lo thleng har em em, darkar 1 leh a chanve vel i thang ania" lawmlo fahran hian ka lo ti a, "Nia, a zialo hle mai, ka â vek tawh anih hi...i hman tawh hrim hrim em?" a ti a, "Hman daih tawh" bak zeta tih leh pawn lamah chhuah ka rual a. Kawngkhar a rawn kalh lai te chuan ka tum bar a, lai deuha nui suk suk chungin "Tihpalh aw" a ti zawi sup a, ka chhang peihlo, tihpalh tih thu hi a thupui hlur ringawt tawh.





Kan va thleng phei chu Nu siamtein "I ṭhulh ta emaw tih a" a lo ti hluk a, a inthlahrunawm duh ngang mai.


***


Kan Bank Exam tum hun pawh a hnai ve zel a, Exam dawn hnaih chuan keipawh ka beingawrh ve hle a, a mit ṭha vaklo nen ka lu ana bur thei a, Question awm thei te Rinzualin min lo thawn ho chu enkualin zanrei tak tak thleng ka meng ṭhin a, Ezra erawh zantirah a mu daih zel a chuti chung chuan zingah a thawh hma phah ngai chuanglo, dar 10 dawn dawnah a tho chauh a, kei ka mut rei ve bawk avangin tlai chu ka ti ṭhang ta viau lehnghal a.






Zirtawp tlaiah Usangpuian chaw lo eichuan "Doctor thar ṭha deuh a awm an tia, kan insawn daih dawn a mi?" tiin a nau chu a râwn a, "Tu Doctor nge a?" ka lo tih khalh vat a.






"Ka la hrechiang chiah biklo, ka ṭhiannu ka lo zawt chiang anga Appointment ka lo siam tawp ang" a ti a, "A pawilo, a dang râwn chhin te pawh a ṭha a lawm" ka tih chuan a bu nghata, Lalbera erawhin engmah a sawi ve lo.





A haw hnu chuan Usangpuia chuan aṭhiannu chu alo bia a, min lo hrilh vat a "Thawhṭan ni atan Appointment ka siam ania chawhnu dar 1 ah aw, ka zin angai dawn a ka kalpui hman dawnlo che ania, innu nen inlo kal mai dawn nia" a lo ti a, kei ka Exam ni tur anih vangin ka rilru a buai ngang mai.





Ṭhawhṭan tukah chuan "Nangmahin i kal hreh em, ka nu kan be mai dawn ami?" ka ti a, "Hreh lemlo, Nsa nen kan kal mai ang" alo ti a, Nsa a hruai theih dawn chuan a tihzia nasa. "Ṭha deuhin i exam dawn nia, i Fail pawn ka hmangaih tho tho che" ka bianga fawh zauh paha a tih chuan ka lo nui hak a, "Anih chuan Fail pawh a inthlahrunawm loh sawt" ka lo ti zauh a.





"Ah...i Pass tur a ni, pa zawk inia min chawm tu tur inih kha" nui vur vur chunga tiin a chhuak zui a.





Exam chu a har ka ti hranlo, Fair taka an kalpui anih chuan hna pawh ka hmuh ve mai ka ring, Interview tih vel chu ka hnehsawh lam tak a ni bawk a, beiseina ka nei sang hle a ni.





Dar 4 pelh hnu ah a lo haw a, a hmel chu chîk deuhin ka lo en a "Engtin nge Doctor chuan a tih che a?" ka lo tih chuan "Ṭha vek" a lo ti awlsam et a, ka thawveng huai mai.





Zanah chuan ka pa in minlo Phone ve tehmiala, kan inbia chu sawitur a vang ngang a ni "I damṭha maw?" te chu ka han ti tawng a "Ṭha mai ang chu" tih tê in min chhang a, zunthlum a neih vangin engemaw changa chauh deuh hi anei ṭhin a, chuvanga zawt te pawh chu ka ni.





"Inpa khan zu a la in ṭhin em?" a tih chuan "In ngaitawhlo e" ka lo ti vat a.





"Enge i thawh ve ṭhin a, naupang i la zirtir a mi?" a ti leh a, a lawmlo awki chu ka hre rang viau bawk.





"School aṭang chuan ka bang tawh a, inlamah Tuition ka pe a" ka ti a, ka pa chu a ngawi vung vung mai. A hnu deuh ah chuan rawn ṭawngchhuak lehin "Lo haw daih mai ta che, khatiang ringawt tur kha chu i nilo mawle" beidawn hmelzet hian a ti ta a, hei leh chen hnu ah pawh a rilru ala danglam hauhlo chu a ni tak sia.





"Pa..i mak eeee..." ka ti hluai ringawt a sawi ngaihna pawh ka hrelo.





"I nute pawh i ngai ve lawm ni" muang charha a tih chuan thawk ka la vang vang a, "Ngai ve tehlul mai mahse, pasal ka nei tawh a lawm, pasal te chhuahsan tura intih ngawt te chu a" ka lo ti ve hlak a, engmah a sawizui tawhlo "Hrehawm itih hunah i lo haw dawn nia" tiin kan inbiakna chu a ti tawp ta daih a, ka pa thilsawi chu Ezran a lo hre ve palh ang tih pawh ka hlau rum rum a ni.





Ni hnih a liam leh hnu ah Nau-an min lo bia a "U vîte inpa kha kan inah a lo kal a, ka pa nen room ah an titi a, kan pa in a ko a ni maithei, an inhnial deuhin ka hria" a rawn ti a, Bazar a ka chhuah laitak a ni a ka ṭawngring ngam silo ka thin a rim kher mai.





Tlaia Ezra lo haw chu "Kan inah i kal a mi?" ka lo ti vat a, "Kal lawk, i pa ka va hmu lawk a" a lo ti mai a. "Engthilah maw?" ka tih leh chuan "Inneihṭhat a man inhlan a duhthu a lo sawi a" tiin min chhang a, ka beiseiloh lam daih a ni.





"A van ṭha ve, i nu te hrilh vat ila" ka ti chul a, ka hlim zia chu sawingaihna ka hrelo zawk, ka pa meuhin a remti anih chuan Nu siamtei te chuan an remti ve nghal dawn tih ka chiang hle bawk.





"Inneihṭhat kher angai hleinem, kan awm ang hian a ṭha zawk" a lo tih tak hlukah chuan phawk fein ka en a.






"Hetiang boruak vel hi ka kham tawh, kan awm awmin min awmtir rawh se" tih pahah pindan lama a lut zui chu hamhaih lutukin ka enzui a, a lawm ve ka lo rin tehlul nen, tinge khatiang khan a sawi le?






"Ka pa chuan thildang sawi a nei ami a?" ka va ti dek dek chu "Ka kham tih ka sawi tawh kha" a lo ti vin hlur a, min ti phu chiam lehnghal, deuh vak vak chuan a.





"Malsawmhlu, innei miahlo a inkawl hi aṭhalo daih zawk, hethu ah kher hi chuan i lam ka ṭanglo" ka tih ve takah chuan rawn ṭhu chhuakin rum lutukin min melh a, "Anih chuan enge, inneih ka duhlo a engtin nge i tih ang?" a ti bak leh hluk a, hepa hi ka hrethiam theilo, tinge hetiang hian a awm tlat a!





"Min neih i duhlo amaw?" ka sawizawng ringawt pawhin ka thaw a sa pup pup mai.





"Ka sawi tawh kha, inneih ka duhlo min zawt nawn leh tawh suh" tih paha thochhuakin thawmhnaw bawma a jacket chu a la chhuak a, a insiam zui nghal mawlh mawlh a, tihngaihna hrelo zetin la lo en renga, ka rilru a buai nuai nuai mai, kal chhuah mai a tum chu "Khawnge i kal dawn a?" ka tih vang chuan a ding leh dat a.





"Ka ṭhiante bulah" tih zawngin min chhang a, a aw chu a nelawm loh hle bawk. "Engvanga inneih chu duh lehlo tlat nge inih sawi chiang hmasa phawt rawh" ka aw chu a ring ta viau a ni.






Nur fea min melh chungin "Tu ah nge min ngaih a, duh duha tihkual tur maw, inneih leh inneihloh chu chu kan thutlukna siam tur a ni, ka thu i zawm theilo anih chuan i haw thei ang" a ti chang ta fak a. Huhh...a va han sawi awlsam teh tawp ve le!






images - 2020-08-25T153959.984.jpeg
images - 2020-08-25T153959.984.jpeg (19.28 KiB) Viewed 4838 times




CHHUNZAWMNA






Ka chhanzui tak loah chuan ngawirengin a kal chhuak a, kawngkhar a khar rik bur chu a thawm ka hriat leh hmasak ber a ni. Ka inngaihtuah buai kher mai, ka pa khan inneih chungchang ringawt lo engthil emaw sawi a neih ka ring nghet hmiah a, a lakah ka lawmlo nghal hle bawk.






Ka nu ka Phone a "Vawina Ezra lo kal khan Inah i lo awm em?" ti a ka zawh chuan dawra a awm thu min lo hrilh a, "Tinge, buaina in nei leh tawh em ni a, i pa lah hriatthiam theih manglohin a phun a phun a, engthil nge thleng a?" a lo ti a.






"Ka hrethiam biklo, engthil nge maw an sawidun ni, ka pa chu lo zawt chhin la min lo hrilh leh teh" ka tih chuan a lo zawh tur thu min hrilh a, ngaihṭha zanlo chuan kan inbiakna chu ka titawp a, Nau-a ka call zui leh zat a.






"Nau vawin chu ka pan engthil nge a sawi i hria em?" ka ti nghal tawng a, "Ka hre chianglo, an inhnial chuan ka hria, an in be rei vak lo a, inpa haw hnu ah khan ka pa chu a thinchhe khawp mai, 'Tiang mi laktlakloh lutuk neih' te a tia, a phun char char a" a lo ti ve a, Nau-a pawn an thilsawi chu a hre fumfe bik lo.





Ka rilru a buai a ni, ka pa chu zawh mai ka duh ut ut a mahse, Lalbera nena sawidun leh hmasak phawt ṭhain ka hre bawk si a, tih hmasak ber tur pawh ka hre tawhlo.





Tv en pahin a lo haw hun chu ka nghak a, zanrei tak hnu ah pawh a lo la haw lo a, ka Phone lahin a chhang thei mang silo a, Nsa leh a ṭhian dang te pawh ka be kual a, Nsan a len chhuah loh thu min lo hrilh a, midang ho lahin "Kan awmho lo" anlo ti mai si a, zan dar 12 hnu ah pawh a lo la haw loh vang chuan ka mangang takzet tawh.





Mutsan mai ka tum lahin nitheiin ka hre bawk silo, a khawsak dan chuan min tih thinur rual rualin hlauhthawnna min neihtir a ni. Inneih chung chang a sawilai khan thinrim taktein a thinrim a, ka pa in alo remtih tawh a hnu enge a thinrim ringawt chhan kha ka hriatthiamloh ber chu a ni, inneih duh vanga inzui chhuak ni chung si a, tun a takah a duh leh lo tlat chu mak ka ti takzet, ka zawt leh anga a chhan min hrilh duhlo anih chuan ka pa ka biak ngei angai ang.





Khuma ka mutfel hnu rei vaklo ah chuan a lo haw thawm ka hria a, pindana lo lut tlang mailoin choka lamah chuan a thawm a rak rak renga, rui tih hriat taka a ṭawng bul bul ri te pawh chu ka hre pha a, tho chhuakin pindan kawngkhar aṭang chuan ka va en a, chutihlai chuan chawei dawhkan kilin zu a lo in a, a awmdan chuan rilru a tina vawng vawng mai.






"Inchhungah zu ilo la lut der tawh a maw?" ka aw chu a zawi hle a, a chhan chu ka rilru a nat em vang a ni. Min en zawk tihloh chu min ngaihsak zui lo a, a no ah chuan thli lehin a in pap pap a, tun hma a Zu a in zeuh zeuh chang pawhin ka hmuh lai kher hi chuan a in ngailo, a ṭhianten ka hmuh laia an in emaw kan inchhunga anlo ken luh chu a remti ngailo a, an induh anih pawhin inhnuai thimlai deuhah a chhuk tir mai ṭhin kha a nia.






"Ka pa nen in inhau tih ka hria, engthil nge thleng chu min hrilh rawh" ka tih leh chuan a lo kiaisuk a, min en emaw min chhan emaw pawh a tum chuanglo.






"Chutia inneih i duhloh viau te chuan kan inneilo tawp anga ani mai a lawm" Bathroom lam pan tau nghawng nghawng chung chuan ka ti a, Bathroom kawngkhar ka khar rualin ka inhumruh vak vak a, ka ṭah a chhuak tet tet bawk, kan inngaihzawn lai kha chuan hetiang em em kan nih hi ka ring ngailo. Mahse, kan han inzui chhuak ta cheng a, hlimna aiin hlimlohna lam chi hlirin min la tlakbuak char char a ni, ka zui pawh ka inchhir ta rum rum hial mai.





Ka hmai ka phih zawh hnua ka chhuah leh chuan a lo awm tawhlo a, khumah kawi zeta alo mu chu ka melh tlawk tlawk a, a mutdan ka siamrem laichuan rum ṭiah ṭiah chungin ka ban a lo vuan a "Ka thu i zawm tur a ni" ṭawngvai ang ruaia bahnakin a ti a a harh chuang hauhlo.






Ka mu chu khawvar dawnah ka muhil ve thei chauh a, ka harh meuh chuan ni a lo tlangsang hman viau tawh a, Lalbera chu tukṭhuan pawh eiloin a lo zingchhuah daih a, ka Phone chuan "Ka thleng phei tawh" awka nelawmloh deuh hian a lo ti a, ka be kher kher chu ka inchhir lek lek a ni.





Tihtur em em ka neihloh vangin kawmthlang huanah chuan thlasik thlaite tuhin ka thlofai paha chaw chhun eipawh ka lo theihnghilh hmin der a, ka zawh meuh chuan tlai eirawngbawl a lo hnai leh ruai tawh. Freezer a Vawksa ka dah chu Lalbera tui tihdan berin ka siam a, engtianga mood ṭhalo pawh nisela tlai thleng thleng chuan a put haw loh hram ka beisei.






Tlaiah chuan Zu nam thual chungin a lo haw leh a, ka lo biak pawh chuan a rul tawk lek lekin min chhang a, a mood chu a la ṭhalo nasa a ni. A inbual zawh chuan a insiam mawlh mawlh a "Chhuah i tum a mi?" ka lo tih chuan "Aw" tih te maiin min chhang a.






"Chaw ei a hun tawh a sin" ka ti leh chuan "Ka eidawnlo, ka lo haw hunah ka ei mai ang" tiin min chhang a, a chhuak zui chu ngawirengin ka en liam a, khawiah nge a kal dawn lah ka hrelo, rilru erawh a tina hle.





A rawn haw tlai leh hle a, ka bula a lo mutlai pawh chuan ka la menga, a hnungchhawn zawnga ka mu chu min lo thlek a, la bianga ka sam chhawlleng uaithla chu huithuakin a mu zui mai a, kei erawh zinglam thlengin ka muhil theilo a, ka muhil ka harh veleh meuh chuan a lo kalchhuak leh tawh a, chutiang hlir mai chuan kar kan tluan a, an inkar chu a hla telh telh nimaiin ka hria.






Ka pa chu ka be ta ngei a, Ezra nena an inhmuh chungchang ka zawh chuan a lo ter nghal hle a "Khatiang mi laktlak loh kha lo hawsan hmak rawh, ka runluih e te min ti khanglang anih kha, inneih ka remti a lawmtak a ruanga ka thutlukna tur a ni lo inrawlh tawh suh te mintih khanglan" a lo ti hluk hluk a, ka pa thiamloh niloin Lalbera thiamloh liau liau niin ka hre ta.






"Ka pa bulah chuan ṭha deuhin i sawi mai lo em ni, a mizia i hresa vek tho a inneih kan la inpeihlo nia i hriat pawn hrilh ṭha leh la" ka tih chuan a ngawi ngal a, min chhangloin a leng chhuak tur chu a insiam mawlh mawlh a. "Zanah i haw har thei sia, lo haw hma ve tawh rawh mahni a awm a nuamlo a nia, tawhsual tawh palh te pawh a hlauhawm a" ka tih pawh chuan min bengkhawn lo kher mai.






Chaw eilai leh mutlai chiahin kan awmdun a ti ta bera, zing lamah phei chuan a hmel ka hmu hman ngailo, tlaiah rui deuhin a lo haw a, chawei dawhkan kan kil dun ve tak nain hmelhriat ngailoh ang mai kan ni, kan inbe tlem telh telh a, chutiang bawkin kan inkar pawh a hla tial tial a, kan inbiak chhunah pawh ṭawngkam vin kan hmang tam ta.






Zaidam taka thil sawipui ka tum lahin ngeiawm tak takin min chhang a "I duh chuan i haw thei ang" awlsam zet zet hian a ti a, huatloh hram tum pawhin ka ti hleithei bik meuhlo. A leng chhuak tam lutuk ber chu kan buaina a ni, a chhuah a piangin Zu a rawn rui haw a, lo hau hlek ila a thinrim nghal hlur bawk si a, a ruih tawh chuan biak lohah ka tlak mai ṭhin a, a ruihloh lahin ka biak a chhangṭha duh ngai silo a, min ning tawh niberin ka hria.






Ni e, ka beidawng a ni, a tan ka ṭawngṭai fo, zu a nghei theih nan te, rilru puitling zawk a put theihnan te leh kan inkar a lo ṭhatleh theih nan te, chhanna erawh ka dawnglo. Mahse, atana ṭawngṭai sak chu ka ṭhulh ngailo, ho lama taka nungim theuleu vel mahse a hlim phah lo tih ka hre ve tho a, a rawn inlam let leh ka beisei a ni.





Chu ka beiseina erawh a thlawn chiang hle thung.





A chhan chu min phatsan a ni, ngaihzawng dang anei tih ka hriat ni chuan ka â lo chauh a mahse, ka mit ngeia ka hmuh chu phat theih rual a nilo.




Chumi zan chuan Margareti nau nei tur buaipui angaih avangin Gabrielan min lo hruaia, Ezra chu tlai aṭanga a lo la hawloh a vangin engmah ka hrilh lo a, Phone erawh ka tuma a chhan theihloh vangin la hrilh ta rih lo a, damdawiin aṭanga kan haw leh lam chuan Lalfakawmi nena an inphur chu kan tawk a ni. A tir chuan mak ka ti satliah mai a, inkawp tur ang phei chuan ka ngaihtuah miahlo "Zui i duh em?" Gabrielan a lo tih vang chuan ka umzui chauh bawk.





Kan kalna hmun chu ahma pawha min hruai tawhna an Bike racing na hmun kha a ni a, Lalbera leh Faki chu an inkuah deuh chial reng a, ral aṭanga kan thlir avangin min hmu ve theilo thung.






"Kan va chhuak phei dawn em?" ti a ka bula miin min zawh chuan ka lu ka thing a, "A ngailo, kan hmuh tur ang chu kan hmu tawh a lawm" ka lo ti a, rilru erawh ana a ni, mahni chauha awma ṭah rawih rawih ka chak ber.






In a min thlah leh hnu chuan "Nangmahin i awm thei ang maw, i duh chuan kan inah lo riak la" min ngaihtuah zetin a ti a, "A...angailo, nangpawh damdawiina let leh i ngaih kha, naktukah hma deuhah keipawh ka lo kal ang" ka ti a, a haw hnu chuan inngaihtuah lungpuamin ka ṭap ṭeuh renga, Lalbera leh Faki khawsak dan tur chu rilruin ka zeldina ka na ngawih ngawih a ni.






Dar khat vela a lo haw chuan ka la muhil lo, a inthlak a Bathroom ah rei deuh a awm hnuah ka bulah chuan a lo mu a, a ngai te bawkin min lo thlek leh a, ka lo muhil der tlat thung.






Chumi zan aṭang chuan zantin Faki nen an chhuak dun ṭhin tih ka hre ta a, min phatsan chiang hle a ni.






A phone ka check ruk sak fo a, ka thil hmuh te chuan a tichiang deuh deuh bawk, hei vang hian a ni ngei ang haw tura min lo tihfo ni.






"Hei hi sawifiah rawh" a phone lek paha ka tih chuan min pawhthlak sak nghal zawt a, "Ka phone hi lo khawih tawh ngai suh, keipawn i Phone ka Check ngailo" a lo ti hlur a.






"Ngaihzawng i nei anih kha" ring fahrana ka tih chuan min kalpel hmakin Pindanah a lut a, insawifiah emaw pawh a tum chuanglo.






Pindana ka va luh ve lai chuan tukverh bulah ṭhuin thlanglam a hawi vang vang a "Inṭhen i duh anih chuan nangmah zawk i chhuak dawn nia, keichu hetah hian ka awm ang" ka luhlul chhuahin ka ti ta ngat a, min rawn en a "A ṭhat chu" a lo ti mai a, min chhan dan tehtawp chu a beidawn thlak kher mai.






Zanah chuan a chhuak leh a, mahni chauha awm pawh ka tiṭhang ve ta, pindan tukverh bulah chuan ṭhuin Guiter ka perh a, ka muthlu ni ngei tur a ni, ka dara a rawn sawi vang chuan ka phu chhuak zawk a, ka harh chiang hle bawk.









(Ads click leh comment min lo tihsak dawn nia aw)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:09 pm

CHAPTER - 27





"I pa chu ka be tawh, naktukah anlo hruai ang che, keipawh ka haw phei ve nghal ang" min hnungchhawna inher lehnghal mai pah chuan a ti a, ka taksa chu a zawi vek mai, keilo hmeichhe dang duh a nei a, kei chu atan hnawksak mai ka ni ta, rilru nat vanga ṭah erawh ka tum lo a chanchhe zawk mahni ila induh tawkna tlem te chu ka la nei ve a lawm, inṭhen hlau ang emaw tuar tak anga lan chu ka duhlo reng reng.






Ka zawt buailo a, ngawirengin a che chu ka en tawp mai a ni "Mu ta che, keichu ṭhutthlengah ka mu ang" ka lam hawia a lo tih pawh chuan ka chhanglo a, a sawi chu ka zawm chuang heklo.






Tukverh thlanglam hawi chuan ka ṭhu ta renga ngaihtuahna a kal thui ngang mai, keimah chu thiamlo ka inti a, zui tura thutlukna ka lo siam kha ka thiltih tawh zawng zawng a ka tihsual lian ber niin ka hre bawk.






"Enge khatah khan itih reng a?" tih ri ka hriatrualin kan phu chhuak dawrh a, a muhil daih tawh ang chu ka lo ti a, a lam ka hawi laichuan mitmeng thip fahranin min lo melh a, ka chet zui mailoh avang chuan ka lampana lo phei nghal hlawk hlawkin ka ban vuanin min rawn pawt tho lawpa kei ka lo ṭang ve thung.






"Enge i hriat, min thlah vat rawh" ka ti nghal hlar a, ka ban a vawn na chu thlahin khum lam hawi chuan min nam kal dawt dawt a, ka ṭang ṭung tak nain min nam kal zel tho, a kut chu ka lo vai thla sawk a "Min khawih tawh hlek suh mi tenawmpa" bak hlaka ka tih chuan ban phar ak chungin "Ka tawk dawn lo che" a lo ti nghat a.






Tau burin khumah chuan ka mu a ka thaw a ipik tak zet a ni. Sitting room aṭanga a Phone hmang ri chu ring hranlo mahse ka hrechiang hle a, a biak mek chu Lalfakawmi anih ngei ka ring bawk.






"Naktukah ka chhuak dawn a, tlai chaw eikhawm na ah kan inhmu dawn nia, In tur lam kha chu Ruata leh Nsan an lo la mai ang, lo lungai lo phawt rawh u" nuihak chunga a tih lai te chuan ka tawt up up a, ka tello a hlim zia chu ka beisei phakbak a ni, hetianga ka tello a hlim hian na ka ti zual sauh bawk.






Dar 2 hnih a ri ta, khum aṭanga tho chhuakin ka insiam mawlh mawlh a, ka thawmhnaw bak chu he inah hian bungraw laktur takngial pawh ka lo neilo, chu ringawt pawh chuan inchhirna min neih tir zual a ni.






A mut lohna lam ṭhutthlengah chuan ṭhuin a muhil hmel chu ka en vang vang a, a bulah chuan zial bung leh zu bur a let ngat a, engtik lai aṭang khan nge zial a lo zuk ṭhin tih takngial pawh ka lo hrelo, ring taka ṭah chhuah ka chak ber mai, hetiang tur tih hria ila ka zui hauh lo ang mawle, mihring te hian hma hun hi kan van hrelo tehlul em.






Bathroom ah lutin ka nu ka Phone a, an la muhil ang tih ka hria mahse, ka nghak thei tawh nganglo a ni. Ṭap ṭiau chungin "Ka lo haw dawn â...." ka ti a, ka hnuk a ulh ṭeuh mai.






"Tunah maw khua pawh a la var loh hi, ipa khan zingah ka hruai ang a ti si a" a lo ti a, zing chu ka nghak zo tawh tlat silo a ni. "Nu...Nau-a kaitho la, min lo hruaitir rawh aw" a mittui luang hruk hul thuai thuai pahin ka ti leh a, ka rilru nat changa ka nu ka biak apiang hian a aw hian ka rilru na a tizual ṭhin.






"Kan kaitho a nge" min zawt buai miahloin ka nu chuan a ti a, kan inbiak zawh chuan ka hmai ka phih pawk pawk a, ka ṭap chhuak lo chauh a ni. Hnar ping ṭup khawpa duhtawka ka ṭah hnu chuan Bathroom a ṭang chuan ka chhuak a, dawhkan sir nghenga min en chunga lo ding chu melh duhloin ka kalpel a, "Khawvar hma a kal kher angailo, ka hnawtchhuak hleinem che ṭha deuha tawpna kan siam theih reng laiin hetianga i tih kher hi a ngai hleinem" a lo tih chuan ka ding leh dat a.






Ṭha deuha tawpna siam kan ni pawhin ka hrelo, ngaihzawng dang a neia kei haw turin min ti a, chu chu a chhe thei ang bera tawpna zawk niin ka hria, hei aia chhe leh chuang tur pawh awmin ka hre tawhlo.






"Naktuk zingah i haw dawn nia, a hmanhmawh thlak loh tunah khua ala thim vek hi" a ti leh a.






"Ka haw hun turah thu neihna i neilo, ka engmah i nilo" ka ti ve ta ngat a. "Tak tak maw" nersak pah a a tih chuan ka thawmhnaw Bag lain pawnlam ka pan a, tunah tak hian min chelhin ngaihdam min dil sela, a nundan a sim tur thu te min hrilhin bul ṭan ṭhat leh rawt sela ka ti, chutiang chuan tisela keichuan ka ngaidam ngei ang, kawngkhar pawn ka thlen hma ngei hian.




Mahse, a tilo.




'Min han ko let teh, vawikhat chauh ngaihdam min dilin ka lakah tlawm leh lul teh' ka ti rilru mawlh mawlh a mahse, ani chuan "Mangṭha le" tih zawng a sawi a, let leh thei ziazang ka ni ta lo.






Pawnlam chu a thim chhah zual lai tak a ni, pan tur lam pawh hrelo chuan kawtthlerah chuan ka kal mawp mawp a, kawtthler chu a reh vung vung a, Street light lo awm hmasa ber hnuaiah chuan ka thawmhnaw Bag chu nghatin ka ṭhu a, rei vaklo hnu ah chuan Nau-an minlo Phone a alo chhuah dawn chiah thu min lo hrilh chuan ka thaw huai a, phurna erawh ka neilo kher mai.






Thil tam tak ka ngaihtuah kual a, engtin nge ka nun chhoh zel dan tur thlengin ka ngaihtuah, rilru a infuih ru sauh sauh chungin ka beidawng ngawih ngawih thung si a, mahni inkhawngaihna rilru ka pu lo theilo a ni.






"Hahthlak lutuk mai" tih ri ka hriat rualin ka hawi chhuak vat a, thim zing aṭanga ka lampana a lo pen phei hlawk hlawk ka hmuh rual chuan ka tho chhuak vat a, min chelh turin a lo kal em mawni le!






"Min zui rawh, chutia haw i chak tawh viau chuan ka va dah ang che" tih leh ka Bag chu ban a rual a, rang lutukin a kut a ṭang chuan ka lo pawtthla ve nghal a, ka pawm bet nghal ṭung chu lawmlo fe mai hian min melh zui bawk a.






"I mawl em ni, misualin man chein i chungah thil ṭhalo tak a thleng thei tih te hi i ngaihtuah pha ve em?" min ngaihtuah ber ang zia zang a a tih chuan "I ngaihtuah ka ngailo, duhleh min pawngsualin min that pawh nisela i ngaihven ka ngai lo e" amah enlet kal chuan ka ti a, ka thilsawi chuan a ti lawmlo hle tih chu a hmelah alang reng, a lawmna leh lawmlohna ngaihven sak erawh ka tum tawh biklo, a nupui ka nilo a chu hnekin a bialnu takngial pawh ka ni tawhlo tlat.






"I In i thlen hma chu ka mawhphurhna i la ni tlat sia lawm, ngaihven che hi ka chak bik viau lo ania, luhlul chhuahlo khan min zui rawh" tih leh min pawh a rual a, ka ṭang nasa mai. A kut lehlama a Helmet a ken avangin min pawt lui thei vak biklo a, keilahin ani inthlahtir chu ka tum biklo nasa mai bawk a, tunah pawh ka tlawm tawh tehlul nen a aia tlawm leh zual tura inthlahtir aichuan thih tha a ṭan pawh ka thlang zawk ang chu.






Nau-a Scooty a lo thleng ta hlauh a, kan bula a lo din rualin "U vîte" a lo ti vat a, chutia kan lo inpawt buai chu mak a tih hmel hle bawk. "I nauin a lo hruai dawn che tih te chu sawi mai tur a lawm" nersak chunga min en ran chuan a ti a, chhan let ka duha sawitur erawh ka hrelo, a hmel chu ka en tlawk tlawk ringawt a, ka mittui a hnam nghal ṭiam ṭiam bawk.






"Kal rawh" vin hluka a tih hnu ah a inher a, thim lama a kal liam nghal nal nal chu ka enzui reng ringawt a, ka van tlawm nawn nasa tehlul em.





"U Vîte, in inṭhen chu ka lawm daih zawk, a bula i awm chuan ka pain intlawhpawh a phal bawk silo" In kan thlen hmaa Nau-an a tih chuan ka ngawi reng a, a chanchin sawi emaw titi chu ka chak hlawllo a ni.






In kan thlenga ka nu leh ka pa chuan Sitting room ah min lo nghak a, an hmel ka hmuh rualin ka chawmawlh zo vek ni maiin ka hria. Ka pa hmelah chuan a thusawi ka awihlo vanga ka chawh zia ka hmu thei a, ka nu hmelah erawh hmeichhe khawngaihthlak tak ka nih zia ka hmu thung.





"Han mu phawt la, naktuk zingah kan inbe dawn nia" aw damthlapa ka pan a tih chuan ngawirengin ka room lam ka pan a, ka nuin min lo zui thuai a, ka mutna te pawh min siamsak vek a, ka awngphah a siam ṭhat lai chuan ka ṭah a chhuak leh hlur tawh.





"Nu.. ka van ngai che" ka nui a, ka ṭap tel bawk.





"I rilru tina duh reng reng suh Pathian in i tana a ruat anilo tih ring tlat la, i kawppui tur dik tak ila tawn theih zawk na turin i tana a ruat nilo chu a dahhlat sak ta che ah ngaila, a eng zawngin thlir zawk rawh" ka nu chuan a ti sap sap a, chutianga ngaihtheih chu ka chak a ni, ka tana ruat nimiahlo anga ngaih theih chu.





Mahse, kha kan misuala kha ka thinlung zawng zawngin ka hmangaih a, tuna ka rilru a tihnat em em lai pawh hian amah ka duhna kha chhungril lamah hian a la cham tlat a, chuvanga rilru na em em pawh ka ni, hmangaih tlat lo ila chuan hetiang hian ka natpui hauh nang.






"Ka bulah mu la.." ka tih tlat vangin ka nu chuan min mutpui a, kan titi dun a ka rilru natna te pawh a hnenah chuan ka inbun ruaka, ka ṭap nasa hle bawk. Ka duhtawk ka sawizawh hnu chuan ka thawl huai mai.





"Ti teh, ka ṭawngṭaisak ang che" ka nuin a tih chuan ka hniallo, khumah chuan ṭhingṭhiin ka lu chungah kut nghatin min ṭawngṭaisak a, ka nu duhsakna leh min hmangaihna te chuan mahni ka inkhawwgaihna kha min phehsak ta a ni, ka mallo ka chhungte ka kiangah an awm tlat a lawm, an lakah helin pen bosan mahila duat leh hmangaih takin minlo pawm leh a, chu aia thlakhlelh tur dang chu ka nei reng reng em ni?






Ka let leh hnu chuan inlamah ka tawm chawta, inkhawm tur pawn ka chhuak ngai meuhlo, Margareti te naute thar en turin ka nu nen kan kal a, naute chuan Cedd a hmel a phawkchhuak fuh hle a, mipa naupang duhawm tak a ni, ka nau chhiat tak kha ka hre chhuaklo theilo, lo piang ve sela chuan mipa naupang emaw hmeichhe naupang duhawm tak chu ani ve ngei ang.






'Pianglo ngaiin an ṭap ngailo' tih chu ka hria a lawm. Mahse, ka pum chhunga thla reilo te a awm chhung khan suangtuahna tam tak ka lo nei a, a lo pian huna hlimna tam tak kan tawn tur te pawh ka mitthla a ni, ka naute khan ka thinlungah hian hmun nuam tak min dinsaka, chu hmun chu Peter Pan-a Never land aipawha hmun nuam zawk a ni.



*****


U sangpuia nen kan inbe zeuh zeuh ṭhin a Lalbera chu a la haw ve lo tih min hrilh chuan mak ka ti deuh a mahse, J.mala hnen aṭanga ka hriatdanin kan inluah ah khan a la awm a, an ṭhianhoin zantin an inkawi khawm ṭhin niawm tak a ni.






Chutiang anih chuan a rui zantin anga Faki nen pawh an riak dun fo in ka ring. A nun dan ṭawp tak hrereng chung pawh ngaihtuah chhuahloh ni ka nei ngailo, a ngainat zawng thil tui deuh ka ei chang te hian ka hre chhuak ziah ṭhin.






"Hmeichhia hi chu kan mak a ni kan rilru tina em em tu te pawh hi kan la hmangaih zel thei a, hmangaihna dawng tur zawk nisi hian kan theihtawkin kan va hmangaih ta ṭhin a, Pathian min siam dan hi a ropui bik a sin, midanga te tana in pe ral ṭhak tura siam kan ni hialin ka hria" Zarin a tih chuan ka lo nui mai a, hetiang hian nitin ka nu dawrah lo lengin min lo kawm hlim ṭhin a, a lokal tawh hi chuan a ri bawrh bawrh a, ṭawngkam a thiam si a a bulah awm chu beng a tlai ṭhin viau a ni.






Ka pa chuan Father Josepha hnenah ṭawngṭai turin min hruai a, tuktin chawei laiin min zilh a min vau lawk niber hian ka hre ṭhin, a thu ka awihloh vanga ka dinhmun chhiat zia chu a sawi uar thei hle a, a ṭawng tawh hi chuan ka thin a sa leh phat zel a, engmah phei chu ka sawi ve ngailo. Mahse, Remtluanga ka nei zawklo chu ka mawlzia thu a sawi tel kher ṭhin chuan min ti thinur leh ṭhin a ni.






Remtluanga pawh a lo leng zeuh zeuh a, pangngai tak chuan ka lo kawm ve mai a min la beisei tih chu ka hai biklo mahse, ani a ni emaw midang nena inlaichina siam leh chu ka duh rihlo, hma hun chu ka sawi theilo a tunah rih chuan tu mipa nen mah inzawmna siam ka duh lo a ni.






Ka chhuahsan hnu aṭangin Lalbera nen kan la inhmu leh ta miahlo a, thla hial a vei ve ta reng mai, Rinzuali nena kan hna dilah khan Interview tura koh kan ni ve ve a, ka pa chuan ho a ti viau nangin thildang zir leh tumna rilru ka pu silo a min hnial bik em lo.






Interview ah chuan ka tling ta ngei a Rinzualin erawh a tling zo ve ta lo a, mi erawh a lawmpui thiam khawp mai, hna ka zawm ni chuan ṭhian thar ka siam a, a hming chu Siampuii niin nula senior lam ṭawng duh deuh mai a ni a, Cashier niin ka dawhkan bul maiah a ṭhu a, kan thawhpui dangte aiin ka ngaina zuala ani erawhin tupawh mai chu a ṭhianṭha tak emaw tih mai turin a kawm thiama a bula awm chu a nuam ṭhin hle bawk.






Lalbera nen kan inhmuh lehna hmasa ber chu Air ticket lakna hmunah a ni a, chumi nichuan Siampuii nen kan kalduna chhun chawlh kan neih laiin Siampuii u tan Calcutta thlawk tur ticket kan la a, kan chhuak leh tur chiah chu alo lut tur nen kan intawk a, ka hmu chu ka ding chiang hle bawk.






Ka hma a kal Siampuii nen chuan a insu thawi thuak a "Tihpalh lutuk" tiin a rawn kalpel a, keipawh min rawn hmu chiang hle a mahse, min hre ngailo ang maiin min kalpel thung a, chutia min hrelo der na na na chu ka enzui duh ta biklo, tuilo chunga inbiak angailo a a lawmawm zawkah ka ngai.






Eitur leia dawra kan pen leh laichuan pawna Foot path a a lo kal phei chu ka hmu leh a, a Phone ena a din vangin a hmel chu chiang takin ka hmu thei a, a cherin a bawrchhawr hle a, a bek leh khabe hmul vel pawh a ziat fai ngai meuhlo ani ngei ang, a sam a thur sianga a kawr a letling zawngin a ha bawk, dawr aṭanga kan chuah lai chuan kan lam a lo hawi leh a, min en hauhlo lehnghal a, min pehhel chu a tum ve ngar ngar hle a ni.






Kawngpui kan kân hnu chuan a hawikual vel chu ka va thlek leh hram a, a rui nasa thei hle ani ngei ang ka hriat ṭhin Lalbera an na a nei hauhlo, tlangval pawlawh leh rui thlep mai mai ṭhin tih a landan ringawt aṭang pawhin a hriat theih a ni, mawza tak ngial pawh inkhingin a bun lo chu a nia, haw viau mahila a nun tla chhe lutuk erawh chuan min la tina thei cheu mai.






Office a kan lêt leh hnu pawh chuan ka ngaihtuah zui lo theilo, a landan ringawt pawh chuan ngaihtuah chu a ti thui a ni, ka tello a hlim khan hrehawm ti viau mahila khatiang taka a nun a khawlo ta erawh a pawi ka tiin ka ngaihtuah zuilo theilo, zu leh sa a tlân a boralna lam kawng a zawh aichuan hlim tak leh awhawm takin hmeichhe dang tawngin awm zawk sela, Emma nen inneiin chhungkua din zawk pawh nisela keipawn ka la duh zawk fan ang, tun maia a hmel ka hmuh dan kha chuan ka rilru a tina tlat a ni.






Kei aia a thlan zawk thil chu thil ṭha tak nisela ka duh a, hlimna ka pek theihloh tam tak neiin hlimpui hle bawk sela ka duh, a tan thil ṭha engkim ka la duhsaka em em si a.





Ka ṭawngṭaina ah ka theihngilh ngailo, ani erawhin min hrechang tawh hauhlo ang tih ka hria. Mahse, chutianga ka awm ve theih hma chu keichuan atan ṭawngṭai ka thlah ngai dawn lo, a chhan chu ka hmangaihna kha a la ngai reng a lawm.






Zari nen inkhawm kan taimain kohhran lamah pawh ka tal chho veleh ta a, ka chanchin erawh hria an tam vangin ka inkiltawih fo a, hmai a uang duhlo kher mai. Zari awmlo phei sela chuan CTP a hun hman chu a ti hleithei meuh pawhin ka ringlo.






Lalbera nen kan inhmuh vawi hnihna chu Margareti te inah a ni, chumi ni chuan Gabriela Office bangin minlo lama an ina chawei nghal tum ka ni bawk, an chhang chhe bawk nen kei Office banah lo ka hman ṭhin bik silo a, tlawhna hun ṭha pawh ka nei ngai bik meuhlo.






Zan dar riat vel thleng ka awm a, ka haw tur kawngka a ka chhuak chu Lalbera lo lut tur nen chuan kan intawk a, a hma a ka hmuh aingawt chuan a hmel pawh hmuh anuam ta deuhin ka hria Zu rim a nam huam tihloh chu.






"Pawnah khan lo ding lawk teh aw, hei hi kan pe lawk" a Polythene khai lek zauh paha a tih hnuah inchhungah chuan a lut a, a sawi vang niloin min hruai tura Nau-a lo la thlenloh vang chauha ding ka ni thung.






A lo chhuah leh chuan Gate bulaha ka lo dinga, min hmuh chuan a kiaisuk a, ka nuihlet ve thei derlo. "I dam ṭha em" ka bul a lo thlen rualin a ti var a, zarzir tawpa ka lo chhan vang nge ni min en vang vang a, melhloh ka tum zet nain min thlek reng a vang chuan ka en ve ta a, a mitkhur thuk lam mah chuan a ti lang upa in a tilang rorum zo vekin ka hria, nui mahse a landan chu a nelawm loh viau a ni.






"Ka lo thlah dawn che a mi?" a tih chuan "A ngailo ang" ka lo ti vat a.





"Tinge, ka khalhchak dawn hleinem" nuisang chunga a tih pawh chuan ka ngawi ngal a, hmundang ka hawisawn nghal thuai a.






"I chunga ka thiltih kha min ngaidam dawn nia" a ti leh takah chuan a mitah tak ka en ve ta a.





"Ngaihdam dil angai lo, tunah chuan mihrang ka ni tawh a lawm" ka lo ti sak a.





"Chutia law, ṭhian kan ni thei tal ang chu rem itih chuan?" min en vung vung chunga an tih chuan ka lo nui hak a. Ṭhian nih a duhloh vangin inlaichinna dang kan siama chu chu a duhloh leh hnuah ṭhian nih a duh leh si a, hepa hi a lêlo takzet anih hi.






"Khatiang thil thlen tawh hnuah ṭhian kan ni leh thei anih chuan kan lo inhmangaih ngai miahlo tihna aniang, i rilru chu ka hre phaklo a keichu chutiang chu ka ni ve lo" ka ti a, chu chu ka rilru tak pawh a ni, ṭhian nihna mai aia thuk rilru a a awm tawh hnuah ṭhian nih leh chu thil theihloh tawp a ni, a mi phuarna a la phelhlo a chutiang bawkin ka thinlung a hliamna ser pawh a la reh hauh hleinem, hai der eng ang mahila rilruah a cham reng tho tho a chuvangin ṭhian nih chu ka duhlo hul hual a ni.






"In hriatrengna ṭhalo taka inhriat chhuah fo aichuan a ṭha zawk a lawm, a hma pawn ṭhian kan nih ṭhin kha, ngaihzawng thlan i thiamlo bawk si ṭha deuh ka zawn sak bawk che anga, ṭhianpa fel deuh chu ka nih ṭhin kha" hmalam en vang vang pahin a ti a, kei erawh ka nui thung.






"Ka duhlo kawppui atan emaw ṭhian a tan pawh ka duh tawhlo che, kan inkara khichat hi a zau tawh lutuk, min phatsan tu tan ṭhian ka ni thei ngailo ang, ngaihzawng i zawn sak ka ngailo bawk, nang ang mipa hi chu kawp leh ka tum tawhlo hulhual " nui hak chunga ka tih chuan inher meuhin min lo en a.






"Ka nawrlui lo che tihian ka hlim ve tawk mahse, ka ngaihtuah ṭhin che" a kekawr ipte zen at chungin a ti a, a hmel chu a thutak hle bawk.






"Mi mak i nih hi, mipa nep tak i ni bawk" ka tih rual chuan "Ka hria a lawm" a lo ti khauh a, sawi leh tur pawh ka hre tawhlo. Ngawi rengin kan in ena a hmel chuan ka thin a ti rim thar et et lehnghal a, ka thaw a sa pap pap mai.





"Ka nun aṭang hian ka hmuh phakloh ah kal bo vang vang teh, i hmel hi ka hmuh hian ka thinrim a zual ania" inhumruh ṭeuh chunga ka tih chuan a nuisuk a, kawngpui lam hawia inherin leia lungṭhil chu a chhuih a chhuih a; ala nui cheu mai.





"Kan inhlat tawh em hi mawle" a tih chuan "Hmuh phakloh ah awm rawh" ka lo ti leh hlak a.






Nui hawk chunga van lam hawiin ka lam a rawn hawi leh a "Dak la han en ve teh, vanhnuaiah kan lenga he khawvelah hian kan inhlat ngai silo" zawi deuh tak hian a ti a, a aw chu zawi viau mahse, ka hrechiang hle a ni.








💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:09 pm

CHAPTER - 28




A vawikhat sawina anilo, chuthu chu a hma pawhin a sawitawh, a sawi hmasak chuan thla êng hnuaiah inkuah riala ṭhu dunin duhthu kan sam dun anih kha, nau ka pai hlim mai a ni nghe nghe a, khatih laia kan hlimna kha khumkhaw daih tur emaw ka ti ṭhin. Mahse, kum em pawh a vei leh hmain kan heti zui ta mai chu a nia. Tuna a thil sawi teh daih pawh chu a awmzia ka hrethiam pha tawh hauhlo.






"Thlah i ngai em?" tiin ngawi renga ka ding chu min lo thlek a, "Ngailo e" zawi sapa ka tih chuan min en leh vang vang a, sawitur a vang duh kher mai. "Ka hmanhmawh lo a sin" a ti leh a. "I hmanhmawhloh chuan muangchangin haw la ti nia" ka lo ti bak hlar a, a nuisuk tihloh chu kan inbe zui ta lo, Nau-a a lo thlenga a hmel pawh en tawhloin ka hawsan zui ta a ni.






December thla kan kai a mitin mai chuan Christmas lam kan hawi tawh a, Office kan la chawlh loh vangin tlai banah ka nu dawr lamah ka pui ṭhin a, a buai si a Zari pawh kan ko peng ve reng ṭhin, ka nau mipa te an laktlakloh bawk nen ka nu chuan duh angin inchhungkhur a enkawl hman biklo a keilah nitin ka chhuak bawk si a, chuvangin eirawngbawl leh inchhung chêt eng engemaw min khawihpui turin thingtlang lam nula tleirawl tê hi kan awmpui a, a zuan a zangin a fel reuh khawp mai a, alo awm achin chu ka buai lutuk ta biklo.






Remtluanga a lo leng fo a ṭha tak chuan ka lo kawm ve mai a, ka biak ṭhat chuan ka lakah beisei anei leh dawn tih ka hriat chian em vangin ka inveng lawk hle thunga, mi pangngai ta nafam chuan a laka ka rilru puthmang chu a hrethiam ve maiin ka ring a ni.





Kohhran lama ka tal tam tak avangin kan inhmufo lo theilo a, han inhmuh tam na na na chuan in hel theih reng ni biklo le inkhawm banah a lo leng fo bawk a Zari nen kan pathum chuan kan inzui ho leh ta fo mai, Zari pawn a mizia a man ve deuh tawh a, a ngaina ta lutuk bik lo aniang kan inkhawm bang kan haw dawna "Min lo nghak ru" a lo tih te hian a ner leh nang nang ṭhin a.






Zan khat chu Zari a inkhawmloh vangin Remtluanga nen chauh chuan kan inzui haw a, min biakna chu a rul tawk lek leka ka chhang chung pawhin a ṭawng mawlh mawlh reng a, mimal thil deuh deuh min zawh te chuan ka ngei lek lek ṭhin a, duhaiin ka pa nen an inpawh mah mah niin ka hria.






"I hmu ngai em?" a tih chuan Lalbera chungchang a sawi tih ka hre nghal mai a. "Hmu ngailo, ka buai thei lutuka" tih zawngin ka chhang a, ngaihtuah fo loh duh nak alaiin a lo sawichhuak chu ka haw lek lek mai, ka ngaihtuah zui leh chiam ṭhin a, a chhanchin te pawh hriatloh hram hram ka duh vangin Margareti te pawh ka tlawh ngai meuh tawhlo a nia, tun ang Christmas hun chho ah phei chuan theihnghilh hmak ka duh a ni.






"Emma-i nen an inneih ka ring, an ni nufa pawh naute pa te inlamah tunlai chu an leng zut reng mai, a u lah chuan ka bulah zep a tum lem hleilo a i beng thleng se an duh a nih ka ring" a ti charh charh a, chutiang thu han hriat ringawt pawh chuan rilru ala tina veng veng thei a ni.






Mahse, ka van hrethiam lo ve Lalbera chu Faki nen an i kawp si a tunah Emma-i a nei maithei tih tak chu ka hrethiam ta chiahlo, Emma-i neih a tum anih chuan Nu Siamtein a nawr leh tawh pawh ani maithei. Â...ngaihtuah tawh lo teh ang.





"Chutiang lam chu sawilo teh ang, ti daih ila Engtik nge school in chawlh dawn a?" tiin thildang ka zawt ta daih a.





"Kar 2 vel chu kan la kal ang, nang ni le?" a lo ti ve vat a, keini pawh chutiang zah vel tho chu kalna hun kan la neih thu ka hrilh chuan "In chawlh hunah naupang ho nen Picnic teh ang u" a lo ti hlut a.





"Thlasik lai hian maw?" ka lo tih chuan "Tui lamah niloin thingtlang lamah zin khawthawng ila" a hmelah chuan a phur zia a lang reng mai, kalpui phei chu ka tum lo, chhanglo chuan ka nuiliam mai mai a, a ṭawng mawlh mawlh ka ngaihthlak chhung chuan kan inkawt kan thleng der a, ka nu dawr kawta ka mi hmuh vang chuan ka ding dat a, enge maw hetah te a rawn tih chu le?





"Johan.." ka tih chuan ka lam a lo hawi vat a, hmanhmawh deuha a lo phei nghal hlawk hlawk chuan min ti hamhaih deuh a, zu rui te pawh a ang lek lekin ka hria.





"Malsawmhlua i lo hmu em?" ka bul a lo thlen rualin a ti tawl a, a hmanhmawh hmel hle bawk. "Hmu miahlo, ti nge a?" ka tih chuan "Tlai aṭangin a awmna kan hrelo a, a lo kal takin ka tia" tiin beidawn hmel fê hian a thaw zui hak a.






"Zawn loh na turah i zawng anih chu" Remtluangan a lo tih chuan Johana a meng dur nghal khap a, Remtluanga nen chuan in teitheihloh hmel fahran hian an inmelh zui a, Johana a rui bawk si a buaina an neih chu ka duh hauhlo, an in karah lo tlazep in "Johan, khawiah emaw a kal a nilo maw, U sangpuia in hrilh em?" ka lo ti thuai thuai a.





"Hrilh tawh e, kan hmuh chuan ka lo hrilh ve ang che, ka kal leh phawt ang" a tih lai mekin a Jacket ipte aṭangin a Phone a lo ri ral ral a, "Nsa a nih hi" tiin Phone chu a chhang thuai a, keini pawh kan la kalsawn biklo, an inbiak dan chu ngaichangin ka lo en ve kar a, Remtluanga pawn a la ding ve ta renga 'Lo han chho mai rawh' tih ka tum zeta a tum hmuk vang chuan ka ti duh ta em biklo a.





"A ṭhat chu ka lo lêt nghal ang" tiin Johana chuan Phone chu a dah a, thaw huai hmel a put avang chuan chanchin ṭha lam a nih ka ring. "Lalfakawmi nen an lo chhuak daih a nih chu" ner nanga min en in a ti a, a inthlahrun hmek lek lek bawk a.






Keichu ka lo nui mai a nuih erawh a za lo nasa, "A ṭhat chu a awmna in hriat chuan" pangngai thei ang bera ka tihlai chuan Remtluanga chu a lo nui chhuak hawk a, "In ṭhianpa nula fawr pui chu engah nge in zawn chiam a, a vawikhat tihna pawh a niawm tawp silo...Enteh ṭhiana nangni tal hi chuan Vîtei hi buaina rawn siamlo teh u, khapa hming hriat reng pawh kha a tan anuamlo a nia" Remtluangan a lo tih chuan Johana chuan min entawn zak zak a, Remtluanga lo inrawlh ve kher chu ṭul ka tilo viau nangin a thil rawn sawi erawh ka haw lemlo.





"Ka kal tawh ange, anih aw Vîte" Remtluanga en ran chunga tiin Johan a chu a kal a, "Engah mah ngai suh" Remtluangan alo tih chuan ngawirengin Step lam chu ka pan a, a ngaihtuah lehta tluk tluk mai.






Lalfakawmi nen bawk, enge Lalfakawmi lakah hian a hmuh teh fakau le, a hmelṭha tih chu ka hria alawm, a duh anga a awmpui theih zu pawh a inpui theih mai ania, chuvanga thlang chu ti dawn ila kei lah Beer takngial pawh ka in a phal derlo a, hepa hi ka hrethiam theilo.






Mahni induhtawkna ngah ve tak hmeichhia ka nih vang a ni mahna kei niloa Lalfakawmi a thlang hi mak ka la ti reng, a ṭhiante pawh khan ka rilru ang hi an pu ve te pawn ka ring hial zawk. Ṭha leh famkim zawk nia inhre chung siin hnawl zawk ka ni a Lalfakawmi chu ka thik em em thung si.






Ka inthlak zawh chuan Sitting room ah ka chhuk leh thuai a, ka pa leh Remtluang lo titi barh barh chu thingpui ka thlit sak a, ka va pek laichuan "Rema kumin chu hetah urlawk ang aw" ka pa chuan alo ti a, Remtluanga chu a phur hmel kher mai.






Rei a leng lo, a haw hnu chuan mu tura chhoh mai ka tum chu "Lo la ṭhu lawk teh" ka pan a lo tih vang chuan ka ṭhu leh rih a. "Inngaihtuah ngun rawh aw, nula naupang tak ini tawhlo a, i dinhmun a tleu laklawh bawka Reman i lama a la hawi lai hian..." a ti dek dek chu rum lutukin ka lo melh a, "Pasal neih ka tum lo" ka lo ti bur a.






"Chutin ṭawng pung pung suh, ani ang tlangval felin a la iai lo che hi a lawmawm zawk ngawt a sin" a lo ti khar khar a. "Pasal neih neih angailo" ka nuin a lo tih ve chuan ka nu chu an melhrum leh râm a.






"Nanga pawh chu enge pasal neih tir ngawt i tum reng, kan thlahlel a keini chuan kan bulah awm reng sela kan duh, kan in chawm zolo pawh nihleilo" ka nu chuan a ti zui barh barh a.






"Ka thu hi zawm la i tan a ṭha a nimai, nakinah chuan i nau ten nupui fanau an nei anga, keini kan awmloh hunah phei chuan nuam i sa reng lo ang, hmeichhia hi pasal telloin an mawi tur angin an mawi thei ngailo, Rema hi neila i inchhir lo zawk ang, i la naupan deuh laia i neih vat loh chuan i phu tawk an hniam viau dawn ania" ka pan a tih leh chuan chhangloin ka ngawi ta daih a, ka chhan zel chuan kan inchhang thinrim mai mai dawnin ka hria.


***

Thawhṭan tuk Office ka kal chu Siampuii nen kan thleng hmasa bera, Coffee kan chah a titi paha kan inlaiin Johana nupui Ahruaii kha a lo lang ve hlawl a, min hmu thut chu a meng phawk lek lek a "Vli chu hetah hian ani maw i lo thawh?" a lo tih chuan "I dam maw, in hmuh a va khat ve" ka lo ti var a.





"Kan dam ṭawk ṭawk e, Pu Roberta hi a lo thleng tawh em?" tia min zawh chuan "Manager chu dar sawm velah a lo thleng chauh ang, lo ṭhu rih la" ka lo ti thuai a.





"Ka hmanhmawh a sin mawle" ti niah niah chungin a ṭhu a, a hmelhriat zawk ka nih vang chuan biakloh chu a nuamlo riau a, a bula kala ka va kalhnaih chuan min lo nuih sang a. "Naute a lian tawh awm, a chhang in la nei leh dawn hnai lo a mi?" a bul ṭhutna awla ṭhut pahin ka ti a.






"Nei ve leh ṭep e, thla hnihna chiah" a dul ben thak paha atih chuan ka lo nui a. "Ka van lawmpui che u, a hmelṭha leh dawn si" ka tih laichuan chîk lutukin min en a, "Ezra i tlawh ngai em, kan chhangchhe lutuka ka ngaihven hman manglo a, nangtal chu awmla chuan ngaih a ṭha deuh tur a nia" a lo ti a.





"Tlawh ...hran..lo, a ngaihtuahawm lo ang" nuisaka ka tih leh chuan "I van tlawhlo thei zawk, tun dinhmunah hi chuan i hawsan duh ka ring miahlo zawk a sin mawle" a lo ti a, a thilsawi dan chuan minti buai nak mai, a sawituin zir viaulo phei sela chuan a thilsawi chu ngeiawm tak tur a ni.





"Ka khawngaih a sin, Doctor lah khan rilru natna nasa lutuk vang atia, a buai hmel ka hmuh te hian ka ṭap ringawt zela ka kan ṭha ngamlo" a lo ti zawp sap a.






"Tunlai a dam ṭhalo leh tawh em ni a?" a damdawi a eiṭhalo emaw Therapy ala leh tawhlo ngawt anih ka rin vang chuan ka ngai thutak lutuk duhlo a, a hma pawn thawhfuhloh ṭuma damloh ngawt aching a, hriat chian chuan a damdawi alo eiṭhatloh vang emaw a mut tlem lutuk vang te emaw a lo ni ṭhin.





"A ṭhalo telh telh ang, dam reng chunga thihna a ni" thawk la hak chunga Ahruaiin a tih chuan ka la bo viau a ni. "Engtin chiah nge a awm a?" dilchhut fe mai hian ka lo ti a. Min enin makti hmel a pu lek lek a "I hre nange, Alzheimer Dimentia a nei a lawm" a tih chuan min ṭhawng kher mai!





"Alzheimer a! Ani te chu kum 28 chauh a lawm a la nih, chutiang natna te chu tar ho natna a ni lawmni" awih manglo zetin ka ti leh a. "Ani tawh ngawtlo, naupang te te pawhin an vei tawh a lawm, i lo hre ve vek tawh ang chu tih a" a ti leh zat a, ka talbuai vek maiin ka hria.




"Engmah.... ka.. hrelo" ka aw chu a zawi hle a, ka chau nghulh mai.





"A hrilh lo che mi?"



"Aw...."


"Ezra chu a talbual deuh reng zawk a, in chen dun lai aṭang tawh khan a nia, kan in a a lo kal tur te kha a rawn bo nasa thei sia, ilo kal ngun tawh nen i tlaw lutuk te ka lo ti chiam zela, a natna vang lek a lo nia ka ngaihtuah let leh hian ka khawngaih ania aw" Ahruaii thilsawi chuan ka thluak a ti let but but niberin ka hria, ka thawk a sak a, ka thin a thip hlur bawk.




Tinge engmah ka lo hriatloh theih le, kha leh chen ka chenpuia Alzheimer a vei ang tih rinhlelh nachang pawh ka lo hre miahlo a.




Ngawi teh, hetiang thil vanga kan inkar hi chhuchat a ni thei mai angem? Aw...Lalpa engthil nge maw thleng ta hi le!





"Bathroom ah kan kal lawk" tiin hmanhmawh takin ka tho a, Wash Basin ah hmai phihin ka ding khur hlak hlak a, danrual lohin ka mittui a rawn sur nghal zung zung bawk, ka Phone lain a Number chu ka Call zui a, a chhang thei bawk silo.





"Mawl em em lutuk, ka lakah i lo thup char char a, i va han mawl tak em" ka ti mawlh mawlh a, kan chên dun lai te ka ngaihtuah lêt a, engkim a theihnghilh rem rum ṭhin a, a inbual zawh hlawtah pawh a inbual tawh tih theihnghilhin a inbual nawn leh fo a, khangte kha Mental illness chikhat a neih vangah ka lo ngai maia, damdawi a eiṭhat a dam leh mai turah ka ngai anih kha.




Keimah zawk hi ka lo nih hrep hi mimawl zawk chu!




Bathroom aṭanga ka chhuah leh chuan mi an lo awm nuk tawh a, thawhpui te ho pawh an lo thlengkim tawh a. "Siampui, ka ṭhiannu kha khawnge a kal?" ka tih chuan Manager room a a luh chiah thu min lo hrilh a.





Pitar pakhat dawr tu ka neih vangin Ahruaii lo chhuak leh chu ka lo be hman lo a, lo koh pen ka tum viau nain Phone hmang chunga a lo chhuah vang chuan ka au zui ta lo a. Nilengin ka ngaihtuah tluk tluk a ka awm anuam thei hlawllo, inthiamlohna hlirin ka khat a, ka ṭah a chhuak ṭeuh reng mai.





Chhun chawlh laiin Nsa ka Phone a a lak rual rualin "Lalnunsang" ka ti tâwng a, ṭah ka insum nasat em vangin ka ṭawng chhuak thei lawklo nghe nghe a.





"Enge nita U Barbie" a rawn tih chuan "Aizheimer a nei tih engmah ka lo hrelo a" inthiamlo deuhin ka ti a, ka ṭap lek lek tawh.





"Eng tin nge i lo hriat zawk a?"ban charha a lo tih chuan ka lawmlo dawn dawn a, ani pawn a lo hresa vek a, keimah chauh chu hrelo em ni ka nih!





"Tinge ka lakah in tlat zep a?" ka ṭahchhuak aw chu a vin kher ṭha mai.





"Zep turin min ti sia lawm" damthlup hian a lo ti leh a, kei chu ka insut zui hlawp hlawp a. "Tinge a..." insum nasat vangin thawk pawh ka thaw ṭha hleitheilo. "Haw la a duh sia?" a lo tih chuan ka hrethiamlo lehzual.





"Tinge haw tur chuan min duh kher a?" ka tih leh chuan ka ṭap takzet tawh.





"Vîte i hre ta ro ro a ka hrilh vek mai ang che, a natna kha a hriatna a rei tawh a lawm, nau i chhiat hlim khan a in ringhlel tawh a, Doctor ka va hmuhpui khan MRI leh CT scan min lo tih tir a, Doctor chuan a thluak a Vein chu Protein mak deuh maiin ahnawh tlat thu a lo sawi a, chung Protein chuan a Vein chu a ti chhe zual zel dawn a ti bawk a, hrilh nghal che kha keichuan ka duh a, amah khan a phal silo a" Nsa thil sawi chuan ka lung a ti chhe zual ting mai, dawhkan khat kildunin khum khatah kan mu dun reng chung pawh khan amaha danglamna kha ka lo hriatpui hauhlo chu ania.






"In zai chi a ni em, a dam leh thei angem?" ṭap pur chunga ka tih chuan "Vîte awmzia a awmlo, Doctor chuan phailam pawn pan mah ula engvak anilo ang a tia, heti hian ani chu a ral telh telh mai dawn a nih hi" a lo ti leh a.






"Duhtawk teh...." ka ti chhuak thei hram a ni, ka khaw hmuh chu a phe ruai a, ka ke chuan min zo meuh tawhlo, Basin tlang vuan chuan chhuatah ka ṭhu hnawk a, ka ṭap tlawk tlawk ringawt mai.






"Ih maw, ka duh dan chuan a bulah lo lêt leh rawh, nangman enkawl la ka tia ama duhdan phei chu anilo, hrehawm i tawrh kha a duhlo bera chuvanga i pa kha va hmu pawh ania, i let leh lo phalsak che a, i duhlo chung pasal neihtir lo tur chein ipa kha ava ngen anih kha, khatianga zu a in te Faki a kawp te kha amah nena kan ruahmanna vek a ni"






"Lalnunsang sawi tawh suh" ka lo ti tham ṭuak a, ka thin na lutuk vang chuan ka thaw hleithei meuhlo.






A ngawi vang vanga kei ka ṭap tlawk tlawk thung, rei ngial hnuah ka inṭap thawl ta deuh ka Phone chu la kangin "Ka lo let leh dawn tih lo hrilh rawh, a phal emaw phallo emaw ka lo let leh ang" ka ti ta a.


****

Tlai banah chuan kan inluah ṭhin lampanin ka chhuak vang vang a, ka va thlen chuan kawtah Nsa a lo awm vang tawh a. "A awm em?" tih leh In lampan ka rual chu min lo umzuiin "A muhil rih a, nizan a muṭha lo aniang a mu rei tawh khawp mai" a lo ti thuai a.





Inchhung ka luh rualin ṭhutthlenga alo mu chu ka va hmu a, a bul ka thlen hma hmain ka ṭah a chhuak leh nghal ringawt a. A bulah chuan ṭhuin a biang chu ka tawk de de a, mutui tih hriat taka thawk ala sak sak ri chu min lo chhawn tu a ni.





"I ril aṭam em?" Nsan a lo tih chuan ka lu ka thing vat a, Choka lama a phei chu ka zui nghal thuai bawk.





"Tinge a haw mai loh a?" ka tih chuan "A duh rihlo a mahse, tukin khan a u kha ka hrilh a, tlaiah an rawn hruai ka ring" a lo ti a, chuti anih chuan engtin nge niang le?






"Engkim i hre vek tawh sia engtin nge niang?" ka rilru hria niawm taka a lo tih chuan ka nguai bur mai. "A ma thu thu ani mai" ka lo ti zawi sap a.






"Ka pa nen khan inneih chungchang an sawi emaw ka tia, aman min hrilh dan kha chuan..." ka sawilai mekin min lo pawt chat a. "Inneih chung chang te chu sawi e, i pa hnenah khan a natna pawh ava hrilh a lawm, haw leh tura a duh thu che a hrilh bakah i duhlo chung chung pasal neihluih tir emaw thil engemaw ti tura nawrlui tawhlo tur chein i pa kha a va ngen a, i pa khan aw a pawh chuanglo nain i haw leh chu a lo remti anih kha" a lo ti a.





Ka rilru a hah a ni, ka tih theih tlem lutuk chu nep ka inti bawk. Ka tlawktlaw vang liau liau a ni tihlah ka hailo, keimah chauh ka lo inngaihtuah hlura amah kha chhete pawn lo ngaihtuah ve ila hetiang tehnuai hi chi kan nilo ang mawle.





"Ka ringhlel miahlo kha ka mak tiraw" ka ti chhuak hak a. "Mak hranlo e, i lakah a thup tlat a lawm" Nsa chuan a lo ti leh mai a, chu erawh ka pawm lo. Mi mak ka ni tih pawm chu ka la duh zawk daih.





"Thil hi a theihnghilh nasa thei lutuka, Accident vanga a hriatna chianglo la kaltluang zel nikhan ka ngai maia, ka lo ngaihthah lutuk a ni"




"Khatin inthiamlo vak suh.." ka men pur pur a hmuh chuan a lo ti a.





"I hre lo anih kha, a thil tih zawh a piang a theihnghilh a, Towel a ven reng laipawn a Towel awmna min zawt a, thil chhin a hawn lahin avuah theihnghilh a, Phone la theiloa a tin reng laite takngial pawn ngaihṭhatlohna ka nei miah hleinem,...Lalpa leh!..Kan lenchhuah dawna kawngka min kalh khum ang te kha, khang hunlai pawh khan a lo talbuai hle tawh chu ania nga" Nsa en chung chuan ka ti leh tlawk tlawk a, ka lung a chhe em a tin a ni.






"Kan len chhuah te hian dar chuti zatah haw ka ngaia min hriatpui rawh a ti ṭhin a, keilah hian ka lo theihnghilhsak veleh a, i lo Phone hian hmanhmawh deuhin a lo haw ṭhin a, a lo thleng daih tawh ang chu kan tih hnuah hian lo Phone lehin 'Kawng ka bo tlat mai, kan inkawng kha ka hre thei miahlo' a lo ti leh a, Video call a ka inhrilh chang a tam asin" a lo ti sap sap a, ka ngaihtuah let ṭhin a ka lung a chhe zual deuh deuh mai.





"Tinge ka bulah a sawi mailoh le.." heh pet fan fan chunga ka tih chuan "I tana ṭha tur a nih a beisei tlat a, ipa in haw a remtih chuan nunbul i ṭan leh thei anga, fa in nei ta lo bawk nen i tan bul ṭan leh theih anih reng laia ani rawih ral tawh maitur khan uaibeh tlat che a duhlo ani ber mai" Nsan rawihral a ti kher chu ka lo la na a, "Khatin rawihral tur ti kher suh" ṭap ṭiau chungin ka lo ti a.





"Ani ber tawh alawm nakin lawkah chuan nangmah leh amah ngei pawh ala intheihngilh dawn a nia" ṭawng leh tuma a ang zuau chu "Sawi tawhlo hram teh" tiin ka lo phar a, a ṭawng zui ta biklo.





Lalbera bula ka ṭhutlai chuan lokalin "Inah ka va haw lawk dawna tlaiah ka lo kal leh ang" tiin a chhuak zui a.




Lalbera mutna sirah chua inthawlhin a kawngah ka kuah a, a lo meng chhuak siar siar chu hrelo derin a bawp karah chuan ka ke ka rawlh sat sat a. "Enge ilo tih a?" a rawn tih chuan chhangloin a awmah ka bei thlawp a, ka kuah nghet salh salh bawk.






Min nam deuh a mahse, ka thlah duh biklo. "Vanlalhlan.." a tih pawh chuan hawichhuak duhloin a awmah ka beilui tlat a, tihngaihna a hre vaklo nge ni ka hnungah chuan zawite te hian alo beng dat dat a, "Min lo kuah..." tiin ka kuah nghet leh salh a, engmah sawi buailoin min kuah zui ve mai bawk a.







(In tih ve tur ho kha aw)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:10 pm

CHAPTER - 29





"I ṭap e law?" ka biangah dawmin min en a tum a, a awmah chuan ka hmai ka lo phum ṭha sauh sauh a "Kan Lalnunsanga han dakdaih theih zia hi chu âw..." tihpahin min kuah ta vawng vawng a, kei ka lo ṭap hliam hliam thung.






"Min en teh.." a tih chuan insut fap fap chungin ka hawichhuak a, a nui hmel ka hmuh rualin ka lung a chhe zual sauh a, a awmah bawk bei lehin a kawr awm chuan ka bianga mittui luang chu ka hru a, tunah rih chuan engmah sawiloa inkuah vawng vawng rih ka duh a ni.






"I tan hian enge ka nih..?" ṭah chhuak insum zeta ka tih chuan "Ka tan hian enge i nih?" nuisuk chungin a lo ti a. Uan hun a van nilo em?






"Ka uanglo ania" dak meuha ka tihlai chuan ka chalah fawp vang vangin "Hetah chaw eila tlaiah ka thlah ang che" a ti a. A bula awmtura min ti zawklo a chutiang thu a sawi chuan minti beidawng hle a ni.






"Ka thawmhnaw kan va la lawk anga kan let leh angâ" thlem titih hian ngenngawl takin ka en a, a mitmeng dul riai ah chuan lungngaihna tam tak hmu in ka inhria. Min chhanglo a min en reng avang chuan "I bulah ka awm tlat tawh ang, ka duat tawh che anga ka ngaihsak tawh ang che" ka lo ti sap sap a.






A mitchhingin thawk a la vang vang a, min hnar a tum tlata ka hriat vangin ka kuah nghet leh sauh a. Chutah min enin "Keipawh ka haw tawh dawn a lawm, chumi hma chuan ka thlah ang che" a lo ti nawn leh a, haw chu thil ṭha tak a ni ngei mai mahse, ka zui ve thei dawn em ni, min nei leh duh anih ngawt siloh chuan.






"Min hawn la.." ka tih chuan a nui chhuak hak a, kei erawh ka thutak ngang mai. "Uang tawhlo teh, ka rilru ana lutuk ania" ka ti a, ka ṭap leh ringawt tawh.






"Engkim i hriat vek tawh kha, kei chu itan pasal ṭha tak ka ni thei ngailo a, engtikah mah ka ni thei ngai tawh dawnlo a..." a sawi zawh hmain a hmui ka lo hup a, "Pasal ṭha tak i ni ṭhin reng a lawm, keimah zawk hi nupui ṭha tak ka lo ni ngailo a, nupui tlaw tak pasal te harsatna pawh hriat thiampui ngailo leh a hrehawm tawrh pawh hmusak miahlo khawpa tlaw ka ni zawk mahse, i tan nupui ṭha tak ka ni tawh ang, ka theihtawka ṭhain ka enkawl tawh ang che" ka lo ti ve thung a. Aman a duh a nih phawt chuan tun hunah ngei pawh hian a bula let leh a a nupui nih chu ka duh a ni.






"Ka thluakah hian nawhrehna lianpui a awm a" ṭhensak chunga alo tih chuan ka mittui a hnam ṭiam ṭiam a, "A pawilo, engtiang pawhin awm mahla keichuan ka zui zel duh che a lawm" a biangah dawmin ka fawp vang vang a, ani chuan engmah a sawi ve lo, ka fawhna pawh chu a dawh tawp a, chumi hnuah ka kut chu phelhin a tho zui a, thochhuakin choka lama a phei chu ka zui veleh a, tui a in a min hnungchhawn zawnga a ding chu panhnaiin ka va kuah leh a, nghet deuha ka kut lo humin "Haw tawh mai rawh" a lo ti a.






"I dam leh dawn a lawm, tinge i beidawn nghal ringawt mai le, kan pahnihin kan ṭang dun anga he natna hi kan hneh thei em em ang Pathian kan lamah aṭang dawn a lawm, hun harsa tak tak kan paltlang dun tawh a mahse, kan pahnih chuan thlifim awmlohna tlangchhipah pawh hahchawlhna kan hmuh theih zel ṭhin kha" ka ti leh sap sap a, a rilru beidawn loh nana fuih sauh sauh chu ka tihtheih ṭha ber a ni rih, beiseina a neilo anih chuan a natna chuan a eichhe hma dawn lutuk a ni.






"Ka nun buarchuar takah hian telve ṭalh duh mahta che, keichuan lungngaihna bak i tan pek theih che ka neilo" ka kut chu a hum vang vang a, ṭah chhuak hle mahila a hmuhlaia ṭah fo chu ka duhlo, a rilru ka tina mai mai in ka hria, ka mittui a luan mai lohnan ka khap let sak sak a, thawk a sak ṭalh mai.






Nsa a lo let leh hnu chuan min thlah haw chu a tum ruh hle a, a rilru hneh tum viau mahila awmzia a awm biklo, tihngaihna hrelo zetin ka en leh ringawt ṭhin a, hlim hmel a pu reng thei te chu mak ka ti hial zawk a ni, a nui a a mitmengah erawh natna thuk tak ka hmu thung si.






"I thlah thei ang maw keiman ka va thlah zawk dawn a mi, i u pawh a lo thlen ṭep tawh ka ring a" Nsan a tih chuan "Ka thlah thei a lawm" a lo ti vat a. Insiam turin pindanah a lut zui a, a insiam rei viau mai!






Ka phone ka bih lai mek chuan "Vîte i va pui mai dawn a mi?" Nsan alo ti a, ngaihṭha manglo zeta pindana ka luh chuan a thawmhnaw bawm aṭangin thawmhnaw te chu alo hai thla mawlh mawlh a, a hmanhmawh hmel hle bawk.





"Enge i zawn a?" ka va tih chuan min lo en zawk a, min chhang lemloin a hai zui mawlh mawlh a "Lalber.." ka tih leh chuan a tawp ta chauh a.





"Ka...hrelo..hetah hian ka awm ang" a ti bah niai a, a thawmhnaw haihnawk ho chu ṭham khawm rawk rawkin Closet ah chuan a dah luta, a hak tur ka lakchhuahsak laichuan ka bulah a lo ding reng a, ngaihtuah ding tak hmel a pu bawk. "Hei hi i ha duh em?" a kawr var ka lakchhuah chu lekkan pahin ka ti a. A lo bana hak nghalmai a tum chu ka lo phihthlaksak leh vat a.






Ka lehlinsak leh thlap hnua a ka pek chuan hmuiphunin lawmthu min hrilh a, tunah pawh heti khawp hian a talbuai tawh chu ania, nakina a awmdan tur chu ka ngaihtuah thui ngamlo, a mizia ka duh em em ṭhin te amaha Ezra Malsawmhlua, Ka Lalbera nih na zawng zawng te kha an bo vek mai dawn tihna em ni, ngaihtuah zawng ringawt pawhin thawk a chhamlo chauh a ni.





"Hetah hian kan pahnihin awm leh mai ila" ka ti leh ta hram a.






"Lo kal teh, ka lo kuah ang che" tiin a ban a phar duai a, ka hnaih rualin min lo pawm vawng vawng a "Lalbera hmeichhe hmangaih ber i nih hi intithei viau rawh aw" nuisuk chungin a ti a, a uang leh ta.
Ka ṭah insum hmel min hmuh chuan a hmui a petsawi nang a "Kha kha maw Regular confident hmel chû?" a tih leh chuan ka lo ṭah nuih a. "Kha kha over confident hmel anih kha" ṭappur chunga amah ka kawh chuan a nuih a za kher mai.






"Ka bula awm ve lo tura ka duh chhan che hi i hrethiam tiraw, nakin lawkah chuan i hming te i hmel te pawh ka theihngilh anga, tunge i nih pawh ka hre tawhlo ang, hei chu ahma ami ang kha ani dawn lo a, nakin lawkah chuan damreng chungin mitthi ka ni dawn a ni, nang erawh i hlima nuam taka i khawsak theihna tur apiang chu pan zel ang che, nun hlut zia kan hriatdun kha, i theihtawkin hlim tumla I Lalbera hian a dem dawn reng renglo che tih i hre dawn nia" ka bianga mittui luang chu tuaipahin min en leh vawng vawng a, sawi tur reng ka hrelo, mahni hmasial taka hlimna zawn chu engtin nge ka neih ang, anin hrehawm a tuar laiin keiin hlimna ka zawng ang maw?






A kutzungchala a lu kawkin "Engteh Barbie, helai ami hi chuan alo theihnghilh che anih pawhin hepa hi chuan a theihngilh ngailo ang che" ka kut lain a awmah chuan a nem hnan a, ka ṭaplo theilo.






"Hepa hian a hmangaih lutuk che ania, keichuan engahmah ka ngaitawhloh hnuah che pawh hepa hi chuan a hmangaih reng ang che" a ti leh a, a mita mittui hnam chu ka hmuh hmaihlo, chuti chung chuan nui hmel min hmuh tho a, ka lung a tichhe zual em a ni.






"Chuti maiin min dahhrang hma suh Pathianin thilmak a thlentir thei a lawm, kan dil anga, vawitam tak kan dil anga, kan dil nawn leh anga...." ka ṭah vangin ka aw chu a richhuak hleitheilo a, ka insut zui hlawp hlawp chu min lo kuahin khumah chuan min ṭhutpui a, a malchungah min ṭhuttirin ka ṭah chhung zawng chuan duat takin min kuah a, a awmdan engkim mai hian ka lung a ti chhe zual zel a ni.






"Hetiang lutuka laltlakloh chu nilo ila chuan ka bula awmturin ka ti ngei ang che, keimah vanga engkim i chân ngam zia pawh ka hria alawm, i chhungte i tuithlar phah ṭhakna mi laktlaklohpa hian nakin lawkah a theihnghilh che anga, amah ngei pawh in hreloin mitthi kaltheiah a chang anga chutih hunah chuan kei niloin nangmah zawk kha mi khawngaihthlak tak i ni ang, chutianga i awm chu ka phallo, chuvangin ka thu awih rawh aw, khawngaih takin ka thu i awih ngei ngei tur a ni" ngenngawl zeta min en chunga a tih chuan sawi ve tur reng ka hrelo, tunah pawh amah zawkin min hrilhfiahin min thlem a, min hnem tu zawkah a ṭang leh tawh chu a nia.






"Kan inhmu reng tho angem?" kan inhmu theilo ang tih mawlh ka hlau ani, nitin emaw chu aia zinga hmuh fo ka duh a, a theih phei chuan enkawl ka duha kâwm hlim tur emaw ṭanpui turin a bula awm reng ka duh a ni.






"I duh chang a piangin kan inhmu thei ang" tiin min seih a, ka duhdan tak chu nilo mahse, ka pawmsak mai loh chuan enge tih theih dang ka neih chuan le.






Bike a kan inkhalh chhuak tur chu Ns-an ngaihṭhalo deuhin min thlah a, Usangpuia alo nghah tur thu a sawi hnuah kan tlan chhuahsana, a Bike a ka chuan lohna pawh a rei ve ta reng mai, a kawngah nghet deuhin ka vuana, nakin lawkah chuan Bike pawh a khalh thei tawhlo emaw a nia nga, tun hi kan inphurh dun hnuhnung ber tur anilo ang tih pawh a hriat ta lo.





"I hman hunah ilo kal anga Bike khalh ka zirtir ang che" ka ngaihtuah laimek hria niawm tak in a lo ti a, ka hnial hauh hleinem, a tih theihloh zawng zawng chu tihsak vek ka tum ang. "Chuan ka phur ṭhin ang che" ka tih chuan "Ni e" a lo ti ve a.






In kan thlen chuan dawr chhung aṭangin ka nuin min lo thlek nasa maia, "I lo lut duh em, thingpui lo in la" ka tih chuan min hnial a tum zeta "Reilo te lo lut la" ka tih leh vang chuan min hnial ta biklo a.






Ka nu dawrah ka pen puia ka nu hmel buainak chu ka hmuh hmaihlo kher mai. "I dam ṭha em Nu zomuan?" Lalberan a tih chuan "Dam ṭawk ṭawk e, nang i dam ṭha em?" ka nu chuan a lo ti ve mai bawk a, ka nu hi chuan a lawmloh zawng mi pawh ṭha takin a be thei zela, ka pa anglo takin mi huatthu sawi hi a hlau em em reng ṭhin. Lalbera nen kan chendun lai zawng pawh khan Lalbera hi mawilo takin emaw a leila zawngin a be ngailo a, Lalbera pawn a zah phah hle a ni.






"Ka lo lutlo mai dawn a mi, ka u kha a lo thlen tawh ka ring a" a tih chuan ka en vawng vawnga, a haw chu ka la phallo ru ṭeuh mai. "I pa a lo haw tlai ang?" ka nu chuan a lo ti zauh a, ka pa vanga lo lut ngam chiahlo niin a ngai ani maithei.






"Thingpui lo in lawk la" ka ti leh ta hram a.





Thingpui ka lumsak lai chuan Sitting room ah ṭhuin ka Phone a bih melh melh a, a bula ka va kal lai chuan a Phone chu a ri a mahse, chhang loin a lo en renga, "I chhang dawnlo a mi?" ka tih chuan rang lutukin a ak leh daih a, min lo nuih nghal ringawt chuan min ti hamhaih lek lek a ni.






"Treatment i la nghal dawn em?" thingpui kan inlaia ka tih chuan a bu nghat a, "Ka nuin a lo tifel mai ang, min ngaihtuah suh" tiin ka kut a lo hum vang vang a.






"Ral aṭanga inthlir angai leh dawn a nia" thawk la hak chunga ka tih chuan min en ran a, diktak chuan a bula awm turin min sawm sela ka ti takzet a ni, a duhlo chung nawr luih erawh ka hreh ve si a, a rilru ka tih hrehawm ka hlau ve tho bawk.






A haw dawn chuan lungchim takin kan infawp a, kawt thleng thlahin a tlanliam ta chu ka thlir zuia, ka hmuh tawpna tur ani ang tih ka ring pha lo reng reng.






A tuka ka biak chuan a u nen Calcutta ah in checkup tura an kal dawn thu a lo sawi a, zinga an chhuah avangin kan inhmu hman ta lo a, kar hnih lai an thang a alo haw zan chuan hmuh ka duh viau nain a tuk office bana kal mai turin amah zawkin min lo ti mauh mai si a, zan chhuah a phal tlatlo.






A tuk Office bana ka va kal chuan alo awmlo a, a pi leh a Cousin Mitei chiah kha an lo awma "Ezra chu anu nen an kalchhuak lawk anih kha, lo ṭhu la an lo haw harlo ang" api chuan a lo ti a, ka nghak ren rawn a an lo thlen har em vang chuan haw mai ka rilruka, ka Phone call lah a chhang theilo zui nen ka hawsan leh ta a ni.






Chumi zan chuan beiseiloh lutuk maiin palai an lo kala, tudang niloin Lalremtluanga palai te bawk an ni, ka inbual zo chu Dodo-an min lo hrilh a ka hamhaih ngang mai!






Remtluang nen chuan a hma aite chuan kan inbe ṭha ngei mai a, inkhawm na ah kan inzui tam avangin ṭhianṭha ah kan inchhuah nimaiah ka ngaia chutiang lam reng reng chu a ti leh duh tawhin ka lo ringlo hulhual a.






Engkim chu ka pa remruat bawk a ni palai te pawh ṭha takin a lo chhawn a, ka nu hnen aṭanga ka hriat danin Ezra nen kan inzui leh deuh niin ka pa chuan a hria a, chuveleh hetiang hian hma a la zui ta a ni.






Ka pa hi ka hua, ka duhdan leh ngaihdan te ngaipawimawh miahloa a thu thua min awmtir a tum hi ka haw takzet a ni, atan chuan ran ang mai niin ka i hre ber tawh, Bazara a uite lei, a kawppui tur adang pawh leisak leh mai theih ang hi alakah chuan niin ka inhria.






Tunah chuan hmeichhe naupang a thu apiang a kawi a ngila zawm ṭhin kha ka ni tawhlo tih ka hriattir angai a ni.





Inleng an haw hnu chuan Sitting room a alo let leh chu kan inhmachhawn ta ran a, "Engvangin nge hetiang hi i tih a?" rum em em a melh chungin ka lo ti a. "Pasal zawng thiam heklo che, ṭha kan tih ang neih kha i tan a ṭha ni mai" alo ti vin hlak a.






"Min chawm peih tawhlo anih chuan min thehthangna ngaihtuah chunglo khan tlangtakin min hrilh la, ka chhuak mai ang" ka lo ti ve ta sak a, a haw kher a sin.






"Khanglang che chuan chutiang te a mi han ṭawngkhum chu le, nanga kara nuthlawi mai mai an iailo che chu lawm hle ta zawk che" min ben mai duh tur khawpa rum chuan min melh zui a, ka thinrim lutuk chu ka sa pup pup tawh, tunah hian inbengdai thei ziazang ka ni tawhlo.






"Ka sawichiang ang Lalremtluanga hi engtikah mah ka nei dawnlo, ka pasal neih leh neihloh tur chu ka thu a ni, min nawr luih i tum anih chuan he inah hian ka awm peih tawh biklo" ka ti ve ta piap mai a, ka pa hmel dur khap khap chu ka en let ve ran mai bawk a, kan boruak chu a sosang ngang mai.






"Ka châwm leh ka hrâi ka thu thu a awm tur i ni, ka chhuak ang te itih ngam khanglan chu le, kha i bialpa hlui nakin lawka mi â la ni mai tur kha..." a ṭawnglai chuan rapthlak tizetin ka lo en a, "Pathian pawhin malsawm tlakah a ngailo anih kha a damṭhatlai pawha a laktlakloh tehlul nen zu rui thle kawi mai maia fawr kual zantin kha natna zawng zawng zingah Alzheimer a vei tak kha Pathian an chhe dawng nena inhnim hnaih ka duh themte lo, a sim pawh i sim tawh lawmni, zantin a fawrsan vang che ani lawmni i lo haw leh?" a ti phiar phiar mai a, ṭawng pawh ka ṭawng hleithei tawhlo ka ṭap khur ngar ngar a ni ber, heti tak hian ka pa hi alo nunrawngin a ân a chhe thei ang tihngaihna ka lo hre lo.






"Amah lo kalin engthu nge alo sawipui che kha, ka tan i hnenah a dil zawk anih kha Pathian anchhedawng ti chuan sawi miah suh, aman haw turin min ti lo sela ka lo haw miahlo ang" ṭap ṭiau chungin ka ti a, ani pawh ala duhtawk mai biklo.






"Nakin lawka ka â dawna lo haw tir leh rawh tih mai mai kha engatan mah ka ti lo e, mipa anilo zawk anih kha. Mipa chuan mawhphurhna a la tur a ni, thih ngama ana anih pawhin, nang zawng a hrehawm chinah a phatsan che anih kha" a lo ti leh hmiah a, ka pa ngaihdan chu ka hrethiamlo takzet a ni.






"A damlo chung pawhin ka hrehawm a hlauh vangin a sin a tih, min enkawl thei dawnlo tih a hria a, nakin lawkah thil a theihngilh vek anga, keipawh min theihnghilh anga chutiang huna ka hrehawm a duhlo vang chuan a sin khatianga a tih" ka pa chuan hrethiam ve se ka duh takzet a ni mahse, a nilo. A hrethiam ve ngailo ang, a rawn ṭawng chhuah leh dan chuan ka pawi a sawi tak zet.






"Theihnghilh vek rawh se, engmah hriatreng tlak a nei hleinem" a lo ti mauh mai! Ka hau chungin a hmel chu ka en a a thilsawi chu ka awihlo lek lek hial zawk!






"A mak em em mange, naupang bula i ṭawng duh dan ṭhin hi chu aw" ka nuin a lo tih chuan a ngawi ngal a, ka naute pahnih lahin Step tawp aṭangin min lo thlir reng bawk.






"Kartawpah inleng te kha an lo kal nawn leh anga, tun ṭum chu beidawngin kan haw tir tawh lo ang, nangpawn i rilru siamfel ang che, khapa ve kha neih tlak anilo tih i hre ta bawk a" a tih leh chuan ka mittui hru hul sawk sawkin ka intipaukhauh a "Nilo e, neih ka tum lo e" ka ti ve leh ta ngat a.






"I nei ang ka tih chuan i nei ang" a ti leh zat a "Ka duhloh chu ka nei lo ang" ka lo ti ve sak thung. Hnai set sawtah kan in en ta ran a, Khiangte pafa diktak chu kan lo ni ngei e.






"Anih chuan chhuak rawh, ka thuzawmlo fanu hi ka mamawh reng renglo" a ti ta nge nge a, "Ka chhuak dawn, i inah hian ka awm peihbik lo ui ang chauh ah min ngai anih hi" ka ti ve leh ngata, ka bek a ri nghal sawk mai!






Ṭap zawih zawih chungin inchung Step ah chuan ka chho a, ka naute pahnih hmel ngui tak chu kalpelin ka thawmhnaw ka khung sawk sawk a, Sitting room a ka chhuk leh chuan ka nu chuan min lo pawt a, "Chhuah angailo, zan rei anih dawn hi, zingah kan sawi ṭha leh dawn nia i pu te pawh kan râwn ve phawt ang" a lo ti a, ka Bag chu pawm ṭha sauh sauhin chhuah chu ka tum lui ngar thung a.






"Chhuak rawh se, chhuak rang rawh se" ka pa in a lo tih chuan ka nu min pawhna aṭanga talchhuakin kawngkharah chuan ka chhuak a, pawn ka thlen rualin ka thaw kawk kawk a ni ber, ka ṭapa ka khuhzui bawrh bawrh a, ka chau hluah hluah a ni.






Lalbera ka Phone a a chhang thei bawk silo chu ka ṭap hliam hliam reng a, a hnu deuha a nuin a lo chhang a, ka aw a hriatthiam hlauin ka inpetruh fan fan a "Vîte a muhil a a damdawi a rui deuh a, vawin kan chhuak a chau bawk si a" damthlup hian a lo ti a, kan inbiak zawh chuan kalna lam tur ber pawh hreloin ka hawikual ruai a, kan chhungte in lama kal lah ka duh der bawk silo, Taxi ka hmuh hmasak ber pharin Margareti te in bawk ka pan leh ta a ni.






Ka thlen chuan naupang anlo mu tawh a, thil awmzia chu ka hrilh vek a, an nupa in min manganpui khawp mai. "Zanin khan kan va kan a, a chau riau a hmuh pawh kan hmu reilo" ka ṭhiannuin a tih chuan ka ngaihtuah ngang mai, a lo chau viau anih chuan abula awm tur niin ka inhria a, ka awmthei silo chu ka hrehawm tihna a zual bawk.






Mahse, naktuk aṭang chuan ka awm thei tawh dawn tho a lawm tiin ka inngaihtuah a, tlem chu chutianga ka ngaihtuahna chuan min chhawk deuh a ni.






Zingah chuan kan inbe fuh thei ta hlauh a, a fartu tê khan Phone a lo chhang hmasa a chumi hnuah amah chu ka bia a, a aw ka hria chu ka ṭah a chhuak tet tet a insum ṭang ṭang a ni ber. "Nizanah In ka chhuahsana" ka ti tawl a, ani pawh a ṭawng ve deuh aniang "Tinge...keimah vang bawk a mi?" inthlahrun hmel tak hian a ti a, a aw chu a zawiin a a ṭham chhela a mu anih ka ring.






"Aih ka pa nen kan inhau a, min hnawtchhuak ve tawp" ngaih holam hmel tak chuan ka ti a, ani erawh a ngawi vung vunga, engemaw a ngaihtuah ni?






"I pa chu ka lo bia ang, keiman ka thlah dawn che nia" a lo tih chuan ka zuai rawih mai, ka lunghnur bawk. "Ka haw duh tawhlo" bung fe mai hian ka ti tawng a, hah hmel taka thawk ala ri chu ka hre pha.






"Nsa ka lo hruaitir ang che aw, kan inluah ah khan lo va haw la, ka inentir zawhah ka lo haw ang" a rawn ti ta a, a sawidan chuan beiseina min siam rang kher mai.






"I lo haw dawn maw?" ka lo ti vat a. "Umm...i lo chhuak bawk sia" a ti zawi ruih a, ka inthlahrunga ka lungchhe tel bawk. "Ka tibuai ngawt mai che mahse, tinge in inah kan awm tawh dawnlo ami?" ka tih chuan "I thu ber, i duhna ah kan awm ang" a lo ti var a, a aw chu zawi hle mahse, ka bengah a ri nawn tluk tluk mai "Ka lo nghak ang che" tiin kan inbiakna chu ka titawp a, ka hlim a ni.






Chawei khamah Nsan min lo hruai tur thu a sawi avangin phur takin min lo hruai hun chu ka nghak a, a lo kal har ka tih em vangin ka Phone sek sek a "Gas ka la phawt dawn" a lo la ti chêk chêk si a, fiamthu ti tak deuha Gabrielan "Ka va dah ang che" a lo tih chuan ka nui hak haka, "Nsan chahbi kawl daih lo sela chuan ka zui ang che" ka lo ti a, chutihlai meka kawta Motor lo ding chu ka beiseiloh tak mai a ni!





A lo kal, amah ngei a ni!!







(Comment ah inhmu ang)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:10 pm

CHAPTER - 30




Enge alo tih dawn! Ka pa Motor ka hmuh rual chuan ka thinphu a rang dup dup mai.






Haw leh chu ka van chaklo tehlul em, min hruaiturin ka nu nen an lo kal miau mai si a, thingpui ina an ṭhut khawmuan laichuan "Avan zialo ve" ka ṭhiannu chuan a lo ti sar sar a.






Gabriela nen an pathum chuan eng engemaw sawiin an titi luama, ka chanchin erawh an sawilo, thingpui an in zawh hnu chuan "Ti rawh le, Office ka tlai mai dawn hei" ka pa chuan vin hauh silo thupe aw zet mai hian a rawn ti ta a, hnial thei zia zang ka nilo, ka nu leh pa an ni tlat a, lungawilo chung pawha ka zui mai a ngai a ni.






Ka Bag la tura pindana ka luh laichuan Lalbera chu ka Phone leh a mahse, a chhang leh thei tawh tlat lo. Muangchangin ka inkhai chhuak ta hna hna a ka va han phurlo kher em, Motor hnungah chuan ka ṭhu ngawi kar a, "Chaw in eitawh em?" ka nuin a lo tih chuan "Aw" tih zawngin ka chhang a, a bak chu tumah kan ṭawngzui ta lo.






Kan inkawta Motor a dinrual chuan "Ka tlang nghal dawn ania" ka pa chuan a ti a, ka nu zawk a biak avangin keichu ka chhuk nghal thuai a, midangin min hmuh hmain ka Bag pawm chung chuan Step ah ka tlan chho nghal hlawk hlawk a, ka rooma ka luh rualin Nsan min lo Phone ve chiah bawka.






"Ka hman tawh a sin, i awmna kha minlo hrilh chiang la" a lo ti a, a van pawi tak. Lêt leh ka chak zia chu hrehawm tak a ni.





"Ka nu leh pa ten min lo hruai a, tunah chuan kan inah ka awm tawh" ka lo tih tak si ah chuan "A va pawi tak, ka hman har lutuk a nih chu mawle, a va zialo e aw" a ti zui niah niah a. "A pawilo Ns inthiamlo duh suh, Ezra hi ka be thei miahlo maia, biak han tum ve chhin teh, i biak theih chuan min lo Phone turin lo hrilh la" ka ti leh a, a biak nghal tur thu sawiin Phone chu a dah zui a.







Hna ah kal a, a khat tawkin ka Phone chu ka bih leh sek ṭhin a, tu ve ve pawn minlo biak hun chu ka ngaichang renga mahse, tlai thleng pawhin min lo be leh ta lo a, ka awm anuamlo takzet a ni.







"Bazarah kawi lawk ila" kan ban dawna Siampuiin a tih chuan ka hnial lo a, thlasik thawmhnaw lum lam chi lei ka ngai ve reng reng a, kan chhuah hnu rei vaklo ah Lalbera chuan minlo Phone a, Motor tlan a beng chhen em vangin a ṭawng chu ka hrechiang hleitheilo a, Line a in Cut zui bawk nen in ka thlen hunah ka Phone tawh mai aniang chu.






Hmanhmawh takin ka haw a, inthlak hmasa loin ka Phone ta ngei a, a lo chhang rang kher mai. "Lalber, inah ka awm a" ka ti ringawt a, Nsan a hrilh tawh chu ka ring tho. "A pawilo, keipawh ka thleng chiah e" a lo ti a, 'A pawilo' a lo ti chu ka helh deuh tlat a, min lo hruai tum tho sela emaw "Lo kal tho rawh" min ti sela ka duh zawk mah, ka beisei ru deuh bawk.






"Chuan engtin nge niang?" beisei nei taka ka tih chuan a ngawi vung vung a, ka rilru a hmanhmawh ru ngang mai, a thawi te pawn sawi sela ka pan nghal duh mai ang mawle.







"Barbie, lungngai suh i pa chu ka lo bia ang, i duhlo chung chu pasal an neih tir lo ang che, ka la dam ve chhung chuan i hrehawm hauhlo ang" a tih chuan kan ngaihtuahna inpersan lutuk chu ka hrethiam chiah a ni.







"Lo kal ka la duh tho a sin" ka ti tawl mai a, tukin zinga a rilru kha thlaklo se ka ti takzet. "Khata i awm kha i tan a ṭha ber zawk a lawm, keichu min ngaihtuah duh mahta che" zawi deuh tak hian a ti a, a van buaithlak ṭhin tak.






"I tih tlat te chuan ka awm mai aniang chu, ka pasal neih hunah ka lo sawm ve dawn che nia" ka ti a, ka lungawilohna chu ka thup zo meuh tawhlo. A ngawi leh vang vang a "Hello" ring taka ka tih chuan "Umm" tih te mai hian min lo chhang a, bei avan ti dawng ṭhin tak.







"Malsawmhlu, Lalremtluanga hi nei turin min duh em ni?" chang fek fawk chuan ka han ti leh a, ka sawi zawng pawh chuan ka aw chu a khur ti tih a, ka thinrim tak tak tawh a ni.







"Duati engthil pawh ti la keichuan ka pawmpui ang che ka tih kha, i duhlo chung pasal an neih tir che kha ka duhlo mai a ni, i duh anih chuan chu pawh chu ka pawmpui ang che" A thil rawn sawi chu lawmtur nge lawmloh tur pawh ka hrethiam tawh neklo, "Pasal nei ila pawi i lo chiah maw?" ka ti nawn leh kher a.






"I tan a ṭha tur ni a i hriat apiang chu ti rawh" a lo ti leh mai a, a va han sawi awlsam deuh ve le.







"Anih chuan i bulah ka awm duh" ka ti leh hmiah mai, "Min lo hruai dawn nge, keimahin ka lo kal dawn?" ka zawhna chu min chhanglo in a ngawi reng a, ka rilru ana veng veng mai.






"Min hmangaih tak taklo anih kha, min hmangaih ve tak tak la chuan i bula ka awm i duh ngei ang chu, pasal dang ka neih pawh i phal anih chuan i rilru a hriat emai, ka lo be buai tawh miahlo ang che" tih leh Phone chu dah ka rual a, mit chhingin thawk ka la vang vang a, min lo Phone leh mai ka beisei laiin a reh zui ta hmiah a, khatianga kan inbiakna ka titawp pawh kha engahmah a ngai tawh hauhlo chu ania, chu chuan rilru a ti na zual deuh deuh a ni.







Mut dawnah chuan ka Text leh ta tho a "In enkawl ṭha rawh aw, ka hmuhloh na che a rei tawh a ka ngai em che a ni" ka va tih chuan "Ka duhsakna zawng zawng leh keimah tiamin i ta kan ni" tiin min lo chhang a, ka rilru a buai a ni.







Nithum lai a liam leh ta, hna lam kan buai zual lai anih vangin hunawl ka nei ngai meuhlo a, ka nutei khaw danga awm te an lo zin lai a ni bawk nen kan ri lelu a, Lalbera hmuhna hun remchang pawh ka nei thei ta lo.







Ka Phone ṭhin a, a Phone chu a tlang mawh ngang mai, a tlang ve chhunah pawh chuan a Ring ral leh ṭhak ṭhak ṭhin a, ani hi min pehhel dan a zawng ni tawh berin ka hria.







Nutei te haw zan chuan Zari nen hla zir turin kan kalchhuak a, Remtluanga a kal ve lo hlauh a, ka lo lawm ru ve ringawt mai, a chhan chu a hmel ka hmuh ringawt pawh hian ka thinrim ṭun reng ṭhin a, ka hmuh leh hmasak berah an khum hrep ka tum bawk, a chët dan ṭhing lutuk vang khan engtin emaw taka han tih chu ka tum ruh hle a ni.





Kan haw kawnga ka Phone ka en chuan Usangpuia Missed call a lo awm nual a Nsa leh Johana te pawh, thil ṭhalo engemaw a thlen hlauthawng tak chunga Usangpuia ka Phone chuan "Ezra nen in inhmu em?" a lo ti thuai a, a hmanhmawh hmel hle bawk a.






"Hmu miahlo, tinge a?" ngaihṭhalo tak chuan ka lo zawt a, "Zinga a chhuak a lo la haw lo a, kan Phone tlang thei bawk silo a, khawihah emaw te hian a talbuai deuh anga a lo bo em maw ni dawn ni" a lo ti zung zung a.






"Usangpui a ṭhiante i Phone kual em, kei chu min lo hmu miahlo, keipawn vawinah ka la Phone tlang thei miahlo a" ka lo ti ve nghal thuai a, ka ngaih a ṭha lo takzet a ni.







"Ka be kual tawh a, an chanchin kan ngaichang leh lawk ange" tiin Phone chu a dah a, hlauhthawnna in ka thauah min man a, ka chi ai zo vek mai!





Zari nen kan inpensan hnuah hman hmawh takin ka tlan chho a, inchhung ka luh rualin "Nu ka ṭhiante an lo kal em?" ka ti nghal lawng lawng a, Nsa Phone ka tum lai mekin Sitting room aṭanga min lo thlir tute vang chuan ka tawp chiang hle bawk.






"Enge inlo tih a?" ka insum thei tawh hlawllo, upa zawk leh puitling zawk mah nise, ka insumtheihna min phehsak tawh tlat.






"Hei hi a ni maw, kan nula rîm chu" nui heu chunga pakhatin a lo tih chuan rum fahranin ka lo melh a.






"Min lo ngaithla teh u aw, Lalremtluanga leh kei hi inngaizawng kan nilo a, ka thu engmah hmulo a hetianga a rawn che hi ka lawm hauhlo ania, neih tumna rilru ka pu miahlo bawk" ka tih laia ka pa hmel chu rum ṭha tak a ni.






Choka aṭangin ka nuin thingpui a lo chawi chhuak mek a "I room ah chho rawh" ka pain a lo tih hluk chuan ka nu hmel chu ka va en a, ani zawng ka pa thu thu a ni, ka lam aṭang em tih takngial pawh ka hretheilo, ka malṭan mai angai a ni.







"I duh duh dan khan lo ti rawh, min vaw hrep dawn pawh nila ka nei chuanglo ang" ka lo ti leh nghat a. "I ṭawngtam palh ange aw" ka pa aw chu a chang ṭha kher mai mahse, ka hlau tawh bik hauhlo.






"Ka sawizo law law dawn, Lalremtluanga hi ka nei dawnlo, thih phah hial dawn pawh niila ka nei chuanglo ang" a aia ringa ka tih leh chuan ka pa chu a lo ding chhuak vut a, "Naupang te te i va dak tam ve mawle, khawnge vuak harh deuh i ngai a nih hi" tih leh min rawn pan a rual a.






"Ngawi teh Pu Thanglian hetiang zawng a diklo e, keini lam hian hriatthiamloh kan nei niin ka hria" inleng zinga pakhat chuan alo ti thuai a, kei ka lo nui hak thung.






"In hriatthiamloh chu ka pa hi zawt rawh u Lalremtluanga nena an indawr na ah hian telve ka tum miahlo ania" ka lo ti leh a, ka pa rawn ṭawng leh hma chuan inchung kailawn lampanin ka kal nghal hlawk hlawk a, engtin nge an inbiak zui chu ka hre tawhlo.






Nsa chu ka Phone a "Vîte kan buai khawp mai, a awm theihna tur ang chu kan dap vek tawh tihngaihna kan hrelo" a lo ti mauh mai si a, ka mangang takzet a ni.







"Tunah khawiah nge in awm ka lo kal ve duh ania" tiin ka insiam sawk sawk a, "Lo inpeih la, Ezra te inah kan phei dawn nia, ka lo lam kawi ang che" a lo ti vat a. Ka insiam lai te chuan ka thaw a ipik takzet a ni, ka ṭah a chhuak et et a, ka mittui a rawn hnam nghal ṭiam ṭiam bawk.






"Vanlalhlan kawngkhar hi rawn hawng rang rawh" ka pa aw ṭeng chhuai ri ka hriat rualin ka inhru hul sawk sawk a. Ka room kawngkhar a rawn sawi rik bur bur lam chu pana ka va hawn chuan ka inrin hmain a rawn nam sawk a, ka tlu lo chauh a ni!







"Hmeichhe suaksualnu hian min va han ti zak tehreng em ve le" tih leh ka samah ṭham a rual a, min hnuk zuiin chhuatlaiah min theh thal nghal ṭhuai mai!






"Khawnge vuak harh deuh i ngai anih hi, i nungchang ṭhalo sim hmak khawpin kan vaw teh ang che" tiin a kawnghren chuan min rawn vai nghal ṭhuai a, ka chawnah leh ka banah te a rem remah chuan min hlap pawp pawp a, kut min thlakna avanga ka taksa na hit mup mup aichuan ka rilru na chu tawrh a har mah zawk. Ka lo indang ve taknain awmzia erawh a awmlo.






Ka hmaia a rawn hlap chiah chuan ka ṭap chhuak hawk a, ka nu lo tlan lutin ka pa chu a lo dang a, kei erawh chhuatah chuan ka let hlawm renga ka ṭah rik loh nan ka inpet ruh fan fan a, ka mittui erawh a sur zung zung tho, ka thinlung rum vawng vawng ri chu chiang takin ka hria a ni.






"I rapthlak lutuk emai" tih tlawk tlawk paha ka nuin min kaihthawh a tum lai chuan rang takin ka lo tho chhuak a, ka biang sa hat hat chu dawm pahin ka pa chu ka va en a, chutiang renga a thinrim hmel dur chu ka lo hmu ngai biklo, a landan chu sakawlh thinrim inhrosalai ka chan ber.






"Chhuak vang vang la, rawn haw leh tawh ngai suh ang che, pa te tih mualpho chiah thiam fanu hi ka mamawh reng renglo, chhuak rang rawh, i hmel pawh kha ka hmu peihlo a nia"a kut zungchala min kawh sak sak pahin a ti a, ka nu lo ṭawng leh tum chu "Nang pawh kha i chhuak ve duh zawk a mi" ka ti vin hlar a, ka nu chu a ngawi leh ta, ka demlo ka nu a ni tlat, kei erawh fanu luhlul tak ka ni. Chhuah chu ka tuma, min hnawt chhuak chu ka lawm hle bawk, he in aṭanga min chhuahtir a tum ta ro ro anih chuan pasal neia chhuah aiin hetianga chhuah hi ka thlang zawk miau a ni.






Ka thawmhnaw tlem te nen chuan a vawi engemaw zahna atan ka pa in chu ka chhuahsan leh ta, tun ṭum erawh ka na vawng vawng mai a chhan chu ka duh reng vangin ka chhungte rilru ka hliam a ni, mahni hmasial takin ka kal bawk.






Kawnah chuan dingin kawtthler zaupuiah chuan ka hawikuala, ka taksa thip ṭhem ṭhum leh ka thinphu dup dup te chu ka hre chiang hle, ka ngaihtuahna erawh hmun dang daihah a awm thung.






"Lalber, khawiah nge i awm?" ka rilru in ka zawt mawlh mawlh a, hlauhthawnna in ka tiril a fan reng vangin ka khur ru dar dar bawk a, a chungah thil ṭhalo a thleng dawn tlata hriatna ka nei a ni.





"Vîte..hetah" tih ri ka hriat rualin ka hawi chhuak thuai a, Nsan ka piah deuh aṭanga min lo hui zauh zauh chu ka va hmuh rualin a lampan chuan ka phei hlak hlak a, Bag nena min hmu chu a hamhaih deuha mahse, a hrethiam thuai a niang zawhna min zawt buailoin ka Bag chu a Motor ah a hlang thuai a.






"Johana te pawh an thleng phei tawh" tih paha min en chuan "Tinge i biang kha?" a ti lehnghalzat a, chhanglo chuan ka biang chu ka dawm ringawt a, "Nangni pahnih hi chu âw" ti vawng vawng chungin a inkhalh chhuak a, ka hmaivun chhahtup chu ka Phone Screen ah chuan ka bih zawka ka vung deuh lãka, midangin min zawh ka hlauh vangin ka Bag aṭangin nghawngbah ka la chhuak a, ka inkhuh nghal sat sata, ṭah hmuam ṭeuh chunga ka insut leh hraih ṭhin chu Nsa chuan min lo en leh ṭhin a, Lalbera kiang ka thlen hma chu ka ṭap hauhlo ang tiin ka inpetruh fan fan thung.






Kan thleng phei chu Nusiamtein ṭap ṭeuh chungin min lo kuah a, an mangang hlawm khawp mai an bul ka thleng chu ka chiai ve zo vekin ka hria, a pi leh pu hmel hmuh te chu hrehawm tak a ni, a tu a te pawh chu an ngui nghiai a, Usangpuia hmel erawh ka hmu ve lo.






"Information a autir mai chi em mawni dawn ni" a pan a tihlai mek chuan kawngkharah Usangpuia a lo lang hlawl a, "Zawng tawh lo ang, hetah a awmlo" a rawn ti bak hluk mai!






"Khawiah nge a awm i hria a mi?" Nu siamtein phawk zeta a lo tih chuan "Niminah Air ticket a la tih zawng ka hria, hepa hi midang tihbuai chauh thiam mai" a ti zui hluk hluk a, "Khawilam Air ticket maw, pawisa pawh anei em ni, a thawmhnaw leh a damdawite pawh engmah a keng silo" Nu siamtei bawk chuan a ti leh a.





"A wallet chu a keng aniang, Tekheuhi a pan maithei phone chhin teh" Usangpuian a tih chuan, "Tê-i te chu Guwahati ah a awm a nilawm ni" Pa rinan a lo ti ve vat a, "Awm tawhlo kum tir aṭang khan Mumbaiah an unauin an chhuk a lawm, an hnenah a kal ani maithei" Usangpuian a lo ti leh a, an thilsawi te chuan ka thluak a ti buai nuai ani ber mai, kut humruh ngar ngarin ka lo thaw dêp dêp a, ka taksa te pawh an zawi zo vek tawh.





Nu siamtei Phone hmang chu kan ngaichang ṭhap a "Tekheuhi chuan a lo kal lo a ti si a, kal dawn sela chuan a biak te pawh a bia ang chu" a phone hmang zo chuan a ti niah niah a.





Engthil ngemaw thleng hi le ka thaw a chham mai dawnin ka hria.





"Mumbai ticket chu a la chiang a lawm Ṭpa a te hnenah ngei a la anih kha, Tê-i te bak apan lo ang, a la pawhlo mai mai aniang" Usangpuian lungawilo em em a a tihlai chuan thawk ka lo la leh hak ṭhin a, khawiah emaw hmun fianrial takah awm ka mamawh a ni, ka thin tawt lutuk leh ka ngaihtuahna buai em em chuan mu leh mal min neihtir lo thei takngial ang.






"Naute u va haw tawh mai rawh u, in ṭhianpa chu angaihtuahawm loh ang, chanchin kan inhrilh leh zel dawnnia, in lo ngaihven ṭhin a in fel hle mai" Nusiamtein a tih takah chuan a ṭhiante ho chu an chhuak sap sap a. "Kal ila" Nsan a lo tih chuan keipawh ka ding ve nghal thuai a.





"Vîte, ngaihtuah lutuk duh suh chanchin a awm veleh ka lo hrilh dawn che nia" tiin Usangpuia chuan pawn thleng min thlah a, Motora kan ṭhulut leh chu tha a zalo kher mai. Engtin nge ka awm zel ang tih pawh ka hrethiam ta lo.






Kan tlanchhuah hnu chuan ka ṭap chhuak rawih rawih a, ka awm tawt lutuk chu ka chum dat dat a, thawk ka la leh kawk ṭhina, Nsa tihngaihna hrelo lutuk chuan min lo en leh ringawt ṭhin a, min hnem ngaihna a hrebiklo.






A hnu deuh ah chuan "Khawiah nge kan kal ang?" a rawn ti ta a.





"Ka hrelo khawiah nge ka kal dawn?" ṭap chungah ka tih chuan keimah zawkin kalna tur ka neihloh zia chu ka inhre chiang a ni.






Ka chhungte inah emaw ka ṭhiante inah chuan ka kal thei ngei mai. Mahse, tunah hi chuan haw leh angaih tawhlohna tur hmun ka mamawh takzet a ni.






"Ka haw lutuk Ns" tiin ka ṭap ṭha leh a, ṭah reng mai hi ka theih chhun a ni ta.






"Kan inah ilo riak mai dawn a mi?" a tih chuan lu ka thing a, "Thih daih mai ka duh" ka ti leh ringawt a, "Chutiang an sawi ngailo, Ezra pawh a lo haw leh vat mai ang" a lo tih chuan ka ṭah a chhuak zual sauh a. A kalbo hmaa min ngaihtuahna a nei miahlo te chu ka dem ngawih ngawih a ni.






"E...in inah khan nangmahin i awm hreh em, bungrua pawh engmah kan la la chhuak lo a" Nsan a lo tih chuan ka hawichhuak vat a, "Aw, tah chuan min hruai rawh" ka lo ti rang kher mai, chu aia ṭha hmun dang pan tur ka nei hauhlo, ka tan chuan a ṭha mah maha ka lung a ti chhe rum rum zawk.






Kan chenduna inchhungah ngei mai chuan ka pen lut a, engkim ala ngai vek mai, ka chhuahsanlai ang chiahin bungbel dahna khum khuhna leh thildang tamtak pawh ka sulhnu vek a la ni, a bal deuh tihmai loh chu.





Pindanah lutin Lalbera thawmhnaw bawm chu ka hawnga, a lola inkhai ṭhap a, chhung ka hmu chu ka ṭaplo theilo, a bungrua te kha a lakchhuah vek tawh ka lo ring a sin le.






"Kumin luahman a pe sa a, thla thar aṭang chuan i pek angai dawn aw" Nsan a lo tih chuan ka bu nghat nghat a, "Ka lawm lutuk Ns, hetah hian ka awm anga alo let hun ka lo nghak ang" ka tih chuan min en vang vang a, zan rei anih dawn tawh avangin rei awm tawhloin min hawsan a "Kawngkha kalh ṭha la, fimkhur rawh aw, harsatna i neih chuan minlo be vat dawnnia" tiin min thlah a.






A kal tak hnu chuan ka thawmhnaw te chu ka remfel mawlh mawlh a, ka muhil thei dawn chuangin ka hrelo a, inchhung bal zawng zawng leh tih tur ṭul ang ang chu ka ti kual a, mu tura ka inpeih chuan zinglam dar 4 a ri thuak tawh a, Rosary la chhuakin urhsun takin ka ṭawngṭai a, khawiah pawh awmsela Pathian awmpuina leh thlamuanna ka dilsak a ni.






A tir khan ka hrethiamlo dawn dawn a mahse, ka ṭawngṭai zawh hnu chuan ka damhuai mai, ani zawng a nun a chaurau ema kei lahin harsatna ka siam fo si a, kan lak aṭanga hla taka kala hahchawlh a mamawh ve rih pawh aniang, a kalbo hlenin ka ringlo a a lo kir leh ngei bawk ang, a inpeih hma chu keichuan rinawm takin ka lo nghak dawn a ni.




Video ka dahna aw.
http://www.youtube.com/shorts/GseXRsIcpV4




(Mut chhuak lutuk..zingah ka reply ang che u..edit hman tawhlo)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)