KA LALBERA By Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: KA LALBERA By Ahmangaihi violette khiangte (Completed)

Unread post by Ngaia » November 1st, 2020, 5:06 pm

CHAPTER - 19






Nu Siamtei nen kan inbiak zawh hnu chuan ka ngaihtuah zui rauh rauh a, engtia han awm tur nge pawh ka bangbo riau a ni. Ṭawngkam chhe tak nena min rawn tawng chu ni hauhlo mahse, min deng na em em a kan ṭah a chhuak hle bawk.





Lalbera ka call zui a a rawn lak veleh "Khawnge i awm, enge itih a?" ka lo ti vat a "Nsa nen.." a tih rualin a thil sawi tum ka lo hre nghal mai a, zan dang ang bawkin Nsa nen an chhuak dun leh tawh a nih hmel. "I haw dawn tawh em?" zawi sapa ka tih chuan "Ka haw ṭepa ila mut dawn loh chuan ka lo tlawh kawi ang che aw" a lo ti a, chu chu aṭha khawp ang inhmuh a enge maw sawidun ka duh a ni.




Kan inbiak zawh hnu chuan khumah ṭhuin engtia awm tur nge tih mawlh mai chu ka ngaihtuaha, inṭhen ka duh thu hrilh ringawt ila a chhan min zawt ngei anga, engtin nge ka chhan ang? Chhuanlam awm thei hrang hrang te chu ka ngaihtuah kuala ka thawk a ipik kher mai.





Emma-i leh a fanu nen chhungkua dina awmdun tur ang tein ka mitthla thul, ngaihtuah zawng ringawt pawhin thikna in min rawn tuama, ka tuar thei meuh a ngem tih ka chiang lo a ni. A nu lah khan ngen tak tê in min rawn ngen a, an ina ka kal changa min lo biak ṭhat lai te khan ka chungah hetiang rilru hi a lo pu daih tawh a ngem tih chu ka ngaihtuah zui ruai bawk a.





Lalbera lo thlen chuan hman hmawh takin inhnuai kailawnah ka chhuk thla a, ka chhung te an muthilh vek tawh avangin inchhung chu a reh ṭhap a, dimtea kawngkhar hawngin pawnlamah ka chhuak zui a, kawta Lalbera lo ding chu ka zuk hmu nghalzat bawk a ka lam hawiin a lo nuisang mai.





A bul ka thlen rualin ka kut a lo vuan nghalthuai a, a hmel hlimsarh aṭang chuan engmah ka rilru tibuai tu thil hi a hre velo tih a hriat hle bawk. "Min zui la reilo te Ride lawk ang hmiang" nuisang chungin a tih chuan ka lo bu nghat a. A bike ah lawnin a tinung vat vat a, rangtakin ka lawn kai ve nghalthuai a.






Zan reh takah chuan khawpui fangin kan tlankuala, thla a engin a reh nuam em em bawk, thlafim thaw heuh heuh te leh kawtthler reh ruih te, a Bike tlan ri te chauh lo chu thawm dang hriat tur a awm meuhlo. A kawngah nghet taka kuahin a hnungah chuan ka bei thlam a, a taksa lum vung vung te chu chiang takin ka hre thei a ni.





"A vawt em, i duh chuan ka Jacket hi i ha dawn nia" a tih chuan ka lo kuah nghet sauh sauh a, a kawnga ka kuahna kut chu a kut lehlamin a lo hum vang vang a, la kanga a hmui a tawh tir lai te chuan rilru buai em emin ka lo ṭang ru ṭeuh thung.





Vanduai bik riaua inhriatna ka nei a, chu chuan ka lung a ti chhe riau mai bawk a, enge kan tihsuala heti taka kan inlaichinna hi dodal a nih bik mai le, kei emaw ani emaw a tu ve ve pawh chuan tihsual kan neiin ka hre hauh silo.





Kawtthler zau laiah dingin a Bike chu a hung ṭha a, min kaiin kan piah lawka Waiting shed lam chu min pan pui a, "Lo ṭhu la Coffee ka va lei a nge?" a jacket hak lai phelh mawlh mawlhin pahin a ti a.
A jacket min pek chu ka lo ha nghal thuai a, a lum vung vunga Lalbera Perfume rim a nam chem chem bawk.





Dawr inhawng lampana a pen phei hlawk hlawk chu ka thlir zui a, a nu thil rawn sawi chu ka bengah a rawn ri nawn tluk tluk niberin ka hria.





Reilo teah coffee no pahnih chawi chungin a lo let a, "I mut a chhuak tawh a mi i va tum lian ve?" Coffee min pek pah a tih chuan ka lo nui mai a, "Ka hmel ve hrim hrim a lawm" ka tih chuan a nuih a za kher mai.





Min si chêtin ka bulah chuan a rawn ṭhu a, a kut lehlamin ka kut a hum ran bawk. Street light eng hnuaiah chuan a hmel chu ka en chiang a, a khabe bawr vung deuh lâk chu tuai sak zoh pahin "Hei hi ti nge a?" ka lo ti vat a.

.


"Hruaisanga te ṭhianho nen kan inhmu a lawm mawle" a tih chuan thawk ka lo la hak a, "Ti nge maw in insual reng mai le, mipa naupang pawh in nih tawhloh hî....inrui a ni lo maw?" ka ti vin nghal hlak hlak a.





"Tihpalh aw" ka lam hawiin a ti zawi ruih a, a hmel chu a thu tak hle bawk, han thimrim viau ka tum tehlul nen a hmel chuan min ti tîm a ni.




"Zu ruih te, insual te, heng i nun dan vel hi keichuan ka duhlo, i sim thei lo anih chuan kan inkawp rei tak tak hma hian tawp mai a ṭha zawk" hma lam hla deuh thlir pah chuan ka ti a, ka kut a hmer na salh chu hrelo ang maiin ka melh ngai ka melh ngar a, inṭhen chungchang han sawiluh pui chu harsa ka ti takzet a ni, a chhanchu inṭhen ka duhlo.





"Ka rui ngai tawh lo tih i hriat kha" a tih chuan ka melh zawk a, inthlahrun hmel zeta minlo en chuan ka khawngaih leh tlat tawh.




"Ka hre hleinem dawt pawh min lo hrilh char char thei" ka la ti hram a, "Hrilh lo" tih pahin ka kut chu a hmui a tawh tir leh vang vang a, mitmeng damthlupin ka mitah tak min en ran a. "Ezra kum sawm thum i ni ve ṭep tawh, engtikah nge puitlin i tum?" chang fek fawka ka tih leh chuan thawk a la hluai a "Ka hria" tih leh a lama min pawh hnaih a rual zat a.





"Inhnial ka peihlo ania, i coffee kha in tawh rawh a dai a nge" a tih chuan sawitur hrelo fein Coffee no chu ka la a, ka rilru tawt lutuk chuan ka ngaihtuahna zawng zawng a la peng a ni.





Ngawi rengin coffee kan in duna, a lam ka hawi chuan dak meuhin van lam alo thlir a thla êng la bial chiah lo chu vanlaizawlah a lo êng ut a, kawtthler chu ati lang mawi em em bawk. Nu siamtei thil min hrilh chu sawi chhuah dan a vang kher mai.





"Ezra..." ka tih chuan "Lalber tirawh" rang fahran hian a ti a, ka lam a rawn hawi leh chuan nui hmel a pu a, a hmel hmuh a nuam hle bawk.





"Lo inṭhen ta ila engtin nge i awm ang?" chhanna beisei nghala ka tih chuan zawhna mit mengin min rawn en a "Kan in ṭhen dawn hleinem, i telloa ka awm theihloh zia chu i hriat kha" a lo ti awlsam et a, sawizui ngaih a minti hrelo kher mai.





"Eng thil emaw vanga kan inṭhen lo ngai ta se?" ka tih leh chuan a meng taltapa "Ipan sawi a nei a mi?" a lo ti vat bawk.




"Neilo e mahse, a rilru chu i hriat kha kan chhungten kan inkawp an remtih loh chuan tilui zel pawh niila kan tluang chuanglo ang" ka tih chuan a lamah min kuai her sawk a, a hmel tum hmuk chu ka hmu nghalzat bawk.





"Inṭhen i duh a maw?" ner sawk chunga tiin ka mitah tak min en a, chhan mai chu harsa ka tih vangin a hmel chu ka en tlawk tlawka, chhanna ka pek mai loh vang chuan a lawmloh hmel hle bawk.





"Min chhang rawh?" tih pahin min thing nawk a, "Um ....inṭhen mai ang aw, a buaithlak emai" ka sawi zawh rual chuan ka ban a rawn hmer na riai riai a, a hmel chu a rumin huat hmel zetin min en a.





"Inṭhen ka duhlo tih i hria mahse, i chhungte vang anih chuan duhlo hle mahila ka pawm a ngai miau a lawm, a chhan chu i kalsan duh silo a" thawk lak hawk pahin ka bana min chelhna kut chu a thlah a, lu a tuai nghal vut a.




"Chhungte thu zawm mai hi kan tan pawh a ṭha zawk ang" zawi tea ka lo tih chuan ka lamah rawn thle nghutin a ṭhenzui sak a "Hmanlai mi an ni, thil pakhat lo ti ta che ipa chuan engtianga awm turin nge min duh zawt rawh a duh ang a piang chu ka ni thei ang, sawrkar hna a duh a nih pawn neih ka lo tum dawn nia" nui lek lek chungin a ti a, a awki ah chuan chapo na a lang tel hialin ka hria.




"E.....ngawi teh kha a makpa hual inti Raja deuhin a tih theih chu ka ti ve thei tih hrilh zawk rawh, khatiang mipa tuai hmel lutuk kha....." tih pahin a nui deuh hak a, a hmel chapo hmel taka hawisang vah ah chuan hmana ka hriat ṭhin Lalbera kha ka hmuin ka hria.




"Ka dinhmun ah hian han inchan la nangin engtiangin nge i tih ang" thawk ipik zet chung chuan ka ti a.




"E le.. ka kawppui chu ka zui mai ang chu, ka duh anih te chuan" vin deuh hluk a lo ti chu phawk fêin ka en a, a va han sawi awlsam tehtawp ve le, hepa hian ka rilru tur engmah a hrethiam phalo a nih hi!




"Chu reng chu i buaithlakna ania lawm Ezra, nanghi ka tana innghahna tlak leh rinngam turin i khawsa ngai silo a engtin nge i he loa zui tur che a min beisei theih zawk a" vin zeta ka tih chuan a lo nuisuka, a nuih dan chu a huatthlala awm hle bawk.




"Ka beisei hleinem che, chuvang a lawm ka nawr ngailoh che, han inzawt teh kei hi min duh takzet em?" zawhna mitmenga min en chunga a tih chuan a mi en dan chu dang riauin ka hria a, min ti hamhaih lek lek a ni.




"Duh takzet lo che ila hei leh chen hi ka tawrh peih i ring em ni?" ka lo ti hap a.





"Ka hrelo le i luhlul vang ringawt anih loh ka beisei" a lo ti chu ka haw kher mai. Ṭha tete a kan inkar thu ka sawipui laiin engtin nge ka duh tak taklo ang zawnga thu a lak kual daih theih le! Ka ring theilo zawk a ni, amah ka duh em vangin Remtluanga pawh ka kalsan a, a chhan chu ka thinlungah amah duhna a awm reng vang kha a nia, ka chhungte duhloh zawnga ka awm luih ngar ngar na te kha amah ka duh em vang a ni bawk, ka luhlul vang ringawtah min chhuahsak chu ka tha a na takzet a ni.





"Nang pawn min duh tak tak nila i nundan hi i thlak daih tawh ang chu, ka thei ti reng siin tun thleng hian zantin fawr ila ṭhulh hleinem ti raw" ngeiawm zeta melh chung chuan ka ti a.





"Tun dinhmunah hian chhuanlam i zawng kual em?" min en ran chunga a lo ti chuan ka thin a ti sa phat mai. "Chhuanlam zawn buai a ngai a mi, nangmah zawkin min pe zat zat a nih hi, zan rei tak tak thleng enge itiha khawiah nge i awm a, tu bulah nge i khawsak ṭhin pawh ka hre hrep lo e, innei ta ila hetiang i nih si chuan ka chan tur ka ngaihtuah lawk ve bawk a sin" ka thinurna vang chuan ka aw chu a khur titih der mai.





"Kha kha chhuanlam chu a nih kha, ka kalna ka hrilh ziah che a, min rinloh vang zawk a nih kha, che tisa viau turah min ngai a i laka ka rinawm zia hi engmah i hre lo, ka ṭhianten Call girl an awmpui vek laipawhin keichuan ka kut hmawr pawhin ka tawk ve duhlo tih hre rawh, chutih laiin nangchuan i theih tawkin min ringchhia a nih hi....mai mai chuan" a lu a tuai nghalvut chu che chang loin ka lo en reng a, "Call girl a?" phawk zeta ka tih chuan tum bur chungin ka lam a rawn hawi a.





"Theihnghilh rawh, i tan chuan mirinawmlo ka ni leh tho ang mahse, ka khawihlo, an thawm ka hriat phak rengah ka ṭhianten hmeichhia an khawsakpui laipawhin keichu i tan ka insum thei a sin, kha nula bulah khan ka hmangaih thu che hi ka hrilh bawk" a tih laichuan ka chhungrilah hian engthil emaw hian min rawn ṭham ut ut nimaiin ka hria.





"Chu chu engtikah maw?" zawi tein ka lo ti sap a.




"Ka hre tawhlo" a lo ti hmuk chu "I hria ang ngaihtuah let rawh" ka lo ti vin hlar a, maktih hmel zeta min lo en pahin "Kar hmasa a nimai thei?" a dar kan ak chungin a ti a, za lo zeta ka lo nui hak chu zawhna mitmengin min rawn en nghal a.





"Tenawm lutuk, kei ka room ah i bialnu rinawm tak ni chunga min lo call hun ka ngahlai khan Call girl ilo awmpui a" ka nui leh hak a, "Vanlalhlan..." a rawn tih chuan rum zetin ka lo melh a.




"Ka khawihlo tih ka hrilh che kha" vin hluka a tih te chuan ka thin a tirim telh telh mai. A khawih emaw khawihlo emaw Call girl kianga a awm ringawt pawh a huatthlala awm tawk tawh.





"I nun hi a ṭawp takzet a nih hi Lalber" ka tih chuan "Engtin maw i sawi a?" lawmlo zet hian a lo ti a.





"Engtin nge Call girl kiangah chuan i thlen theih? I pan zawk nge an pan che, i duhlo chung chung chu a bulah chuan i awmlo tawp ang, zan rei thleng thleng i leng chhuaka engtin mah in awm dunlo tih i sawi vang ngawt khan ka awih che ring suh, engmah keichuan ka rawn hmu ve lo" thinrim thaw sak sak chunga ka tih chuan "Engvangin nge i rin mai loh ang, Call girl bulah ka awm tih thu pawh keima sawi tho" bung zeta a lo ti leh chu a hmaia ka ben sawk lohnan ka insum ngar ngar tawh a ni.





"Ka sawi sei peihlo i nun hi buaina hlir a nih hi ka tel peih tawhlo, i sawi zawng ringawt pawhin ka luak ati chhuak" ka sawi laia min rawn ban a tum chu a kut ka lo vai thla tawp a, hepa hian insawifiah a tum lutuk na lamah a chet khawloh thu a rawn sawi chhuak ta zawk a, engtia tam nge hetianga ṭawp hnawk tak taka a nun lah ka hre derlo chu a nia.





"Barbie....min ring teh" tih paha min rawn ban leh chu ka lo tawlhsawn dawrh a, tihngaihna hriatloh hmelzeta min melhin "I tan ka rinawm reng ṭhin" a ti a, tunah hian a thilsawi engmah hi rinsak chi niin ka hrelo.





Ka lama a rawn tawlh hnai chiah chu a awma lo nam pahin "Ka peih tawhlo inṭhen ang" ka ti tawl a, "Engvangin? Ka phatsan ngai miahlo che a, ka bula hmeichhe ṭhu ringawt chu inṭhen chhan tur a tlinglo lutuk" nur zeta min en chungin a ti a. Ka thawk te lam lam a ti buai zoin ka hria, tinge maw hepa hi Essay type a chhanna pek kher a ngaih ṭhin le!





"Inṭhen duhna chhan chu tam tak ka nei, ka chhungte vang a ni a, i chhungte vang pawh a ni a bul ber erawh chu nangmah hi i ni, chhan tam tak infawk khawm vangin kan inṭhen a ngai tihna a nih chu" a mitah tak enchung chuan ka ti sak a.





"Tinge ka chhungte i sawi tel an ni chuan an duh che a an ngaina bawk che, min nei duh anih phawt chuan keini lam chu kan inpeih reng a sin, a ṭha...i duh anih phawt chuan ka nundan hi ka thlah vek ang, ka tiam a che" tih paha a kutzungte a rawn tihpir chu phawk fein ka lo en a, ka awih theilo zawk, kan thilsawi a inpersan takzet a ni.





Ka thinrim luatah Nu siamtei min lo biakna pawh ka sawichhuak teuh kher mai. "Haw tawh ang" tih paha ka tho chu min pawt ṭhu leh a "Lungawi phawt la kan haw dawn nia" damthlupa a tih chuan a kut chu ka lo thinthlak sak a.




"Engmah ka sawi peih tawhlo inṭhen ka duh" ka ti chang leh bawla, a hmel chu ka hawisan nghalthuai bawk.





"A ṭha i duh tlat chuan ka tilui lo ang che, i pa duhthusam thlap kha i nei dawn nia" tih paha a ding hluai chu ka melh zawk a, ka lam rawn hawiin "A makpa hual tuai deuh nen khan an inhmeh tawk chiah" a rawn ti leh kher chuan min ti lawmlo hle bawk.




"Nia nia...nangpawn i nu duhthusam thlap kha neila, i fanu tan pawh a ṭha ber tak ang chu" ka ti ve ta ngat a.




"Ka chhungte sawiluh tum suh" bung zeta a rawn tih chuan "I fanu chiah ngaihsak mai teh " ka lo ti leh sak a, a huat hmel kher mai.




"Nang hi fanu ka neih vanga min nei duhlo te ini hial lo maw?" a rawn tih chuan ka lo inhumruh vak a, a teh hlauh chuan a!




"Nang leh i fanu ah hian ka buai peihlo tih i nu kha hrilh rawh, kan inṭhen thu te hi i haw veleh i hrilh nghal vek dawn nia" ka ti vin nghal hlaka, chutih laia a hmel chu dur ṭha tak a ni.





"A ṭha e...nang hi ka rin ang ilo ni biklo tawp a nih hi" a tih chuan "Tumah hi kan rin ang an ni lo" ka ti nghal vat a. A lu hawisangin thip zetin min melh a, min melh thluk tawp tum te pawh a ang.





"Enteh...Aruati hi ka fanu a ni a, ka enkawl pawh a la ngai maithei, anu pawn pasal neih leh te pawh a la duh anga chutih hunah chuan ka hnena a awm ala ngai ang, chuvangin kei leh ka fanu nena min pawm theitu hmeichhia ka neih a ngai, hei hi i buaina a nih chuan tlang takin sawila keipawn ka chelhlui biklo ang che" ka mitah tak chiang taka min en chunga a tih chuan ka na vawng vawng mai, ka ṭah a chhuak a au chhuah chiam mai te pawh ka chak a ni.




A fa neih vanga harsatna nei ka nilo ti dawn ila kan inkar buaina siamtu a nih na chen a awm ve tlat si, anu khan Aruati fahrah hlauin naute nu nena suihzawm leh an duh thu min rawn hrilh anih si kha maw, ka hma a ding lah hian engmah a hrethiam ve der silo a ni.





"Inṭhen chu i duh takzet a maw?" zawi deuh taka a rawn tih leh chuan ka ngawi ran a, ka ngawih reng na chuan chhanna a pe a niang a che zui vat a, a Bike lampana hmanhmawh hmel taka a kal chu a hnungah muangchangin ka zui a, a bul ka thlen chuan Bike a ṭhu chungin min lo en a "A hma aṭang khan ne ne kual loin engkim sawitlang tur a lawm" a lo ti leh nghata ka sa pup pup in ka hria, Aruati duhloh vanga amah hnar angah min puh letder mai chu a nia!





Ka mittui a rawn hnam ṭiam ṭiam a chutihlaia "Lo chuang ta che mawle" vin zeta a rawn tih chuan ka phu nasa kher mai!




Min vin kher kher chuan min runa a Bike a chuan pawh ka duhlo "Kal rawh" a dara nam pahin ka ti a ka ṭap lek lek bawk.




Hmalam pan chuan ka pen phei hlawk hlawk a, kawtthler reh ruih te chu hlauh tinah pawh ka tin tawhlo, chak deuhin ka kala ka awm tawt lutuk chu dawmin ka lungphu rang zet chu ka hre thei bawk.





Ka sirah chuan Bike a rawn ding zawt a "Luhlul chhuahlo khan lo chuang mai mai teh" a rawn tih chuan haiderin ka kal lui zela min rawn umzui ve zel bawk.





Ka hnunga a Bike a din rual chuan ka kal chak sauh a, thui ka kal hmanlo hnunglam aṭangin min pawt her sawk a ka lo rak zui ṭhat a. "Ana min thlah rawh" tih leh a ban chu chum ka rual a. "I â em ni, zan rei a nih hi" a tih chuan thip zetin ka melh a.





"A ṭha i duh ang chuan kan awm dawn a nia, ka rawn tibuai leh tawh ngailo ang che, chu vang chuan ṭha deuhin lo chuang mai rawh" chang zetah a tih chuan ka rilru a na zual sauh mai, amah ngeiin inṭhen thu a sawi hian ka na leh tho si a ṭhen chu ṭha ti viau mahila min ṭhen pawi tilo anga a ṭawng ve hlek pawhin ka rilru ana a ka ṭah a chhuak takzet a ni.





Ṭhen ka duh takzet anih chuan kha thu a sawi khan pawm viau tur ka ni zawk lawm ni? Mahse, ti nge chutiang chu ka nih siloh?





Anuin min rawn biakna te kha ka hrilh ve vek zawk dawn em ni tiin ka rilru chu a buai hle a, hrilh ve mai aṭha in ka hria, hei chu kan inkar a ni a kan pahniha kan buaina te pawh kan sawidun zel mai hi a ṭha ber zawkin ka hria, chutiang nilo a alaka ka zep hi a ṭhalo zawkin ka ring ta bawk, ani pawn ka pain a duhloh thu chiangtakin a hria a a chhungten ka lam an hawi biklo tih hi a hriat ve ngei angai a ni.





Ka banah kai a a Bike dahna lam min pan pui hlawk hlawk lai chuan "I nuin min lo bia a" ka ti ta ngawt a.



images (37).jpeg
images (37).jpeg (23.28 KiB) Viewed 8350 times





CHHUNZAWMNA




"Enge ka nu chu?" maktih hmel taka min lo enchungin a ti a, chhan ka tum laimekin "Enge a rawn sawi a?" a ti leh zat a.




"Nupui neiturin a duh che a" a mitah tak enchunga ka tih chuan chiang fein min en ran a "Ka hrilh che a nilawmni ka chhungte chu an inpeih tawh tih kha" lawmlo awka zeta a tih leh chuan thawk ka lo la hak a, ka hrilh hi ka inchhir leh loh hram ka beisei.






"Ih e...I nu chuan Aruati nu nen innei turin a duh che u a, i lak aṭanga inthiarfihlim tur hian min duh bawk" sir lam hawia inher pahin ka ti a.






"Eng maw i sawi?" tih pahin ka ban a rawn pawt sawk a "Ka sawi chu i hria a lawm" ka tih chuan a hmel chu a nur nang a, a landan chu a nelawmloh hle bawk.






"Nu leh pa kara seilen chu Aruati tan pawh a ṭha ber ang keimah vanga a fahrah " ka tih laimekin "Chu chu ka buaina tur zawk a nih chu, ka nu chu ka bia anga kan sawidun leh dawn nia" a lo ti a.





"I nu chuan hrilhlo tur chein min ti a mahse, nang nen hian kan sawidun ngei ngaia ka hriat vangin ka hrilh che a nih chu, a chhan chu i fa neih vanga pawm duhlo che angah min ngaih i tum tlat bawk si a" ka tih chuan min rawn din hnaih a, "En teh nanglo midang neih tumna ka neilo, ka chhungte chu ka bia ang, he thil vang anih chuan inṭhen tih vel kha chu theihnghilh daih rawh" tih pahin ka dar tawn tawnah chuan a rawn vuan a, ngenngawl tak min enin ka chhanna a ngaichanga, chutihlaiin ka rilru chu a buai nuai nuai ni berin ka hria.





"Kan pahnih hian inkawp tura ruat kan nilo aniang" ka ti zuai raih a, chu chu ka ngaihdan tak pawh a ni, mi inngaizawng dang te ang pawhin ual au takin kan inkawm ngailo a, khawlaia inzui chhuah phei chu kan nei khat hle, a tu ve ve mahin chhiatpui leh enge maw nana kan inhmang miahlo chung pawhin dodalna kan tawk renga, ahmasa berah ka pa a ni a, ani pawh a tawrhhlelhawm tawh tehlul nen tunah Lalbera chhungte an ni veleh a, heti chunga kan inlaichinna kaltlangpui zel hi kan tluang pawhin ka ring tawh meuhlo a ni.





"Khuanu ruat tih velah ka buailo ka nu chu ka lo sawipui ang, harsatna dang i la nei em?" a rawn tih leh chuan "I sawipui theilo ang, i sawi a nih chuan ka hrilh che tih a hre dawn a sin, ka tan a nuam hleinem" ka lo ti ṭeu hlar a.





"Anih chuan inru mai ang" a lo ti chu phawk zetin ka en a, inruk hi tinge maw a sawi awlsam em em le, tun dinhmunah ngat phei chuan a chhungten min lawm dawnlo nasa mai a, chutiang chiahin ka pa pawn.





"Kan inru ngawt thei hleinem" ka tih chuan "Enge a theihlohna tunah min zuila thingtlangah kan kal dawnnia" a la ti tak tak deuh deuh a.





"Ka duhlo, ka thaw iti ipik ania" ka bana a chelhna phelhsak pah chuan ka ti a, ka ngaihtuahna a buai a ka tawt up up mai, inṭhen leh inruk chauhah duhthlan tur kan nei ta mai chu a nia, a khawi ve ve pawh chu thlang ila inchhir leh dawna inhriatna ka nei a ni.






"Anih chuan engtia awm nge i duh, min nei duh lo a, chuti chunga i chhungte remtilo kara inkawp reng hi ka tan pawh a tha nat thlak ve a nia" awki chang zeta a rawn tih chuan ka ngawi ngal a sawi mai tur pawh ka hrelo.






Zui ringawt ila engtin nge kan awm zel ang, hlauhthawnna in min ṭham a a laka innghat pumhlum tura zui chu hreh taktein ka hreh a, a chhungten min lawm dawnlo tih ka hriathnu phei hi chuan ka zuam hlawllo a ni.






"Aṭha e, kan inṭhen dawn nia" a rawn tih chuan rang lutukin a hmel chu ka en a, thinur hmel pu lek lek chungin a hawisang vah a kan piah hla taka street light lam chu a thlir bawk a, a thilsawi chuan min vilh ngut ngut maiin ka hria.






"Inṭhen i duh tak tak maw?" zawi te a ka tih chuan "I duhdan a nilawm ni?" bung zetin a lo ti thung a, min en duh miahlo te chuan min run a ni.






"Ni e, ka duh dan a nia lawm, kan vaia tan pawh a ṭha zawk" ka ti ve ta ngat a, ka chungril lam erawh a na vawng vawng thung, ka rilru zahve chuan inṭhen chu ṭha ka ti a mahse, tunah hian inṭhen a duhloh thu sawi sela min leh ngen tlat sela tihna rilru ka pu lawi si a, mahni hmasial tak leh chapo tak ka lo nih dawn hi.






"Lo kal rawh ka thlah ang che, a tawpna a ni tawh dawn bawka ṭha deuhin lo ṭhu mai mai teh" tih leh hnunglam aṭanga ka dara vawn a ruala, a Bike dinna lamah chuan min nam phei dat dat a, 'A tawpna' tih thu a sawi te chuan min run deuh deuh a ni, engmah sawibuailo chuan a Bike ah chuan ka ṭhukai a, a hnung thei ang berah ṭhuin ka invuan ṭunga, a taksa dehloh hram ka tum bawk.






Chak deuhin a tlana, kawng kawiah te chuan a hrut hniam lui vak vak a min runluih nimaiin ka hria min ngaihsakna nei maploa chutianga a tlan chu ka hua a mahse, engmah sawi erawh ka tumlo bur thung.





Ka be lo a ani pawn min be biklo. Min bia sela ka ti, chu chu ka rilru a ni.





Min bia sela ṭha deuhin a biakna ka chhang ang, nidangah chuan ka tihtauh pawhin min thlem char char ṭhin a, a Bike hnunga ka invawn chang phei chuan ka kut lain a kawngah min kuah tir ziah ṭhin a mahse, zanin chuan a ti hauhlo. Tawpna tak tak kan siam dawn a ka hriat vangin a tawt up up a, ka awmdan chu a hrehawm vel vek a ni ber mai.






Kan kawt kan thlen chuan a ding dawt a, a hnungah ka va bet chawt a ni ber e, engmah sawisel loin ka insiamrem zui a "In mangṭha na a nih kha" nuisuk chunga a rawn tih chuan chhan let ka tum zuau a mahse, kan inhnial leh mai dawna ka hriat vangin ka ngawi leh ta zawk a.





A Bike aṭanga chhuka kal mai ka tum chu ka kut a rawn vuan a, a hmer vawng vawng a a hmel ka en chuan Helmet a khum vangin a mit chiah ka hmu thei a, a landan chu ka hrethiamlo a nui nge a tum tih takngial pawh.





"Hlim deuhin awmla keimah ang hi chu ngaizawng duh tawh suh, ngaihzawng ṭha deuh i nei tawh dawn nia" awki zang vahin a ti a, chhang lo turin ka insum hram hram a chhan let erawh ka chak takzet, sawi ve duh pawh ka ngah mahse, inṭhen a zuam lutuk hian ka tha a ti na deuh tlata ka luhlul chhuahin ngawih ka chuh lui hram hram thung.





"Mangṭha aw" nui lek lek chunga a rawn tih leh chuan "Mangṭha le" awki dam thei ang bera tihpahin ka inhersan a, pen hnih awrh ka pen hman ang tih ah "Ka rawn tibuai lo ang che ka thei nge theilo chu i lo en dawn nia" chapo aw zeta a rawn tih leh vang chuan ka ding dat a, inhumruh ṭeuh chungin ka hma lamah chuan ka pen zui hlawk hlawk a, step ka thlen ruala chak lutuka a tlan chhuak ri chu ka hre zuizata, inherin kawng kawia a tlan liamna lam chu ka thlir zui a, ka tawt lutuk chu ṭah chhuah hawm hawm ka chak a ni.






Ka chhungte chu an reh ṭhapa, ka chhuah hlanin tumah tho chhuak an awmlo a nih hmela a tihzia hlauh e, choka ah lutin tui vawt ka in khawlh khawlh a, ka sa pup pup chu a tihzia phah chuang hauhlo. Chawmawlh zetin dawhkan sira Chair ah chuan ka ṭhu a, ka ngaihtuahna tawi tup vang chuan che changloin ka ṭhu ta reng a, engtia rei nge ka ṭhut hman ka hrelo ka phone rawn eng zawk chuan ka ngaihtuahna a la peng a, tu dang niloin Lalbera message a ni.




"Barbie" tih te mai, a message ka chhiar zo chu thawk ka la hawk a, dawhkanah ah chuan bawkin turverh darthlalang aṭanga thla engin inchhung a rawn chhun en lam chu ka melh ngawt ngawt a, Lalbera nen kan inbiak dan zawng zawng te chu ka ngaihtuah let leh a ka mittui a rawn hnam zui ṭiam ṭiam a. Ka insum buai peih tawhlo, ka hmui hupin ka ṭap a, ka insut zui hlawp hlawp a, tihian ka ṭap anga ka rilru tawt lutuk hi ka in ṭap thawl huai thei mahna.
*
*
Ezra - pov




"Bawiha i harh tawh em?" ka room kawngkhar pawnlam aṭanga ka u in a rawn tih chuan ka inkhuh ṭha sauh sauh a, Hmeichhe naupang aw in "Âpa" a rawn tih ri vang chuan ka harh chiang hle thung. Zing zingah enge hetah a rawn tih chu le?





"Ezra, rawn tho la inkhawm kan duh a chawiei hma a ngai a nia" kawngkhar ben leh dawp paha ka u in a tih chuan ka tho chhuak ve nghal thuai a.





Ka inphih harh hnu a inhnuaia ka chhuk chu Sitting rooma Emma-i leh ka pi lo in be mawlh mawlh chu ka va hmu a, chutih laiin choka lam aṭangin ka U in Aruati a lo pawm chhuak mek bawk a, chawlhni tuk zing hma taka an nufa a ka hmu chu ka hamhaih lek lek a ni.





"Âpa kawr mawi ka nei a" tih paha ka fanuin min lo nui var var chu ka nuih tawi tak a, "Lokal teh" tih pahin ka U chu choka lamah ka pawt phei zui a.




"Enge an lo tih dawn a?" Aruati en paha ka tih chuan "Chaw an lo eidawn a nih hi" a lo ti sam et a, ka nu hian a sawm a ni ngei ang, engvanga a thu thu a thil lo tikual vel nge maw anih le? Min rawn eihlo lehnghal!





"Ka nu hian enge a ngaihtuah a hetiang thil hi tih a ṭul miahlo a sin" lawmlo fe a ka tih chuan ka U chuan min lo mitmei zauh a, a hmeichhe naupang pawm laichuan ngun fêin min lo en ve kiau chu niin.






"Reuh chuan a" tih hluk pahin Fridge ka hawng a, tui ka in mek laiin choka Bathroom aṭangin ka pu a lo chhuak a "Mapui in inpeih tlan chuan chhung inkhawm nei ila" a ti a. "Inpeih a ni mai Mitein kawr ala nawt laklawh a nih kha" ka U chuan a lo ti vat a. Chutihlaiin an chawhmeh siam enin bel ka lo hawng kual dan dan a "A hrana ei tawhloh tur aw" ka u in a lo tih chuan ka chhanglo a, an ruala chawei erawh ka chaklo hle thung.




"Sunday tuka vawksa hmeha UPC nihloh bawk hi chu..." ka U in a tihlai mek chuan ka lo nuichhuak hak a, "Aruat vawksa i ei ve duh em?" ka fanu lamhawi chuan a ti zui a "Um..ei duh" Aruatin a lo tih chuan ka lo nuive suk a, chutah ka lam hawiin min rawn nuih var var a, a hmel hmuh a nuam kher mai.





Ka pa Envelope sem rawn haw chu Sitting room ah a lut tlanga "Emma inlo thlenna a rei tawh em?" a tih ri chu ka hre pha a, an tih dan teh hluak chu ka duhloh zawng tak a ni.






"Âpa chuan maw a tetlaiin vawksa a ti thiamlo a Savawk a ti ṭhin a" ka fanu en paha ka U in a tih chuan Aruati chu a lo nui ve hak hak a. He hmeichhe naupang duhawm zet hi ka enkawl hreh hauhlo ka chhungten an zuam anih phawt chuan mahse, a nu telloin.





A chhanchu hman aṭanga tun thlengin Emma-i hi duhna ka la nei hauhlo a ni, kan inhriat ṭan tirh kha College ka kal lai ania, kan Basketball khelhna ah an ṭhiante an lo ṭawiawm ṭhina chuta ṭanga inhria chu kan ni, kan Spot ho fo a nula hmelṭha pangngai tak leh hawisang ve larh mai a ni a, an ṭhianho chu college ah an lar viau bawk a chhan pawh tumah zah em em an neilo a khawiah pawh leng em em vek chi an ni.





Min ngaizawng hmasa a khatih laikhan nula kawp kual ka chin lai ani a, Lalfakawmi tiamin hmeichhe hrang hrang ka kawpkual a, chutih laiin Emma-i a lo rai a, tum lawk leh beisei hauhlohin pa ka ni zui dera, a hunlai khan eng he hu ah ka ngai ngailo mahse, tun hnu hian ka nun pawlawh lutuk kha ka inchhir ṭhin, ka bialnu bulah pawh hmai a uang thei meuhlo chu a nih kha.





Ka fanu tan erawh pa ṭha tak chu ka la nih ka inbeiseia harsa erawh ka ti ṭhin, a hmel ka hmuh hian tlingtawklo intihna leh insitna ka nei fo a, midang kianga ka awmdan anglo zetin ka inthlahrung bawk a ni, hetianga ka awm chhan hi ka hrethiam bik tawh biklo Magic ang mai a ni.






"Vitei te kha Adventist an ni em khah?" ka u in alo tih chuan Roman Catholic kohhran an nih thu ka lo hrilh a, "Ala zia chu vawksa eitheihlohna kohhran ah chuan keichu ka awm dawnlo reng reng " nui ruh ruh chunga ka u in a tih leh chuan "U mama chu Catholic ah a la lut dawn chiang lutuk" Dintein a lo ti a, zaizirin sawilo turin ka lo hrilh a, Sitting room atanga lo chhuah paha ka nu in rum zeta min lo melh chu ka lo nuihtlawn a, Catholic ho tihdan phung an Office aṭangin a lo hria a tunlai chu ala vung thar ngang mai.





Catholic kohhran chu inneihna thilah an strict a, hmeichhiain kohhran pawn mi pasal a neih dawn chuan mipa chuan Catholic kohhran a zawm ve a ngai a, chutiang an theihloh a inneih ṭal an duh si chuan Hmeichhe lamin nula man chu an dawng theilo a inhranga an chhungten an dawn sak mai ṭhin niawm tak a ni.





Ka pu hi Presbyterian kohhran upa a ni a, Synod executive committee member a ni bawk, ka pa lah pavalaiah nihna eng engemaw a chelh ziaha chutiang bawkin ka nu pawh, ka chhungte hian ngaihdan nghet tak mai an neia, ka pu rawngbawlna hi kan zui turah an ngai bur a, Vîte nen kan inkawp tak si ah chuan kohhran danga ka pelhe mai ka nu leh ka pi hian an hlau a, ka nu hian engemaw chang hian sawichhuah zauh a chinga, a thawhna School lama mi titi aṭangin Catholic dan leh hrai te a lo hre ve leh zel bawk nen hetiang meinei deuh deuha min chhaih hi a ching ta a ni, engahmah phei chuan ka ngailo.





"Rosary hi ka ta tur lei ve ka duha, Mîte an zawrhna i hre mial em?" ka tih chuan ka hnung lamah ka nuin min melh rum tih ka hre thei, a chawhmeh chhuanglum tur thawm chu a reh hmak a, ka farnu te chuan nui tet tet chungin ka hnunglam an en bawk.





"Malsawmhlu pâwt loh loh khan pâwt pâwt suh, ka vaw zuang ṭawk tur che nia" a rawn ti zui zat a, a la duhtawk mailo "Mipa zawk hmeichhe kohhrana lawi te phei chu apa loh thlak emai" Gas thuk kah alh phat phat pah chuan a ti hlak hlak a, keini ho chu kan lo nui ṭhaw thung a.





Ka pi leh Emma-i sitting room aṭanga lo chhuak mek vang chuan ka i her daih a, ka nu dara kuah pahin "Ka U ṭawngṭai hun a nia aw" a beng bulah ka ti sar sar a. "I zah theihloh chu a" tih paha ka naka min nghawksawk chu chhanna ka dawn a ni.





"I hre viau ang" ka kutchang elh rik khap paha ka tih chuan min phun khum leh hluka, min ṭawngṭaitir a nih chuan a sa khawp ang le, enge ka tih chu a hre mai ang.





Sitting room ah chhung inkhawm neiturin kan kal a, ka Pa hun hman tuk a ni a, kei ka ṭawngṭai hun a ni bawk, ka u- chu ding turin ka mitmeia a ding duh ṭhaklo, a naupang pawm chiah a ni a ngaihtuah ni.





"Ezra ṭawngṭai sela, a ṭawngṭai zawhah zinglam ṭawngṭaina sawiin kan hun kan titawp dawnnia" ka pan a tih chuan "Ka u hun a nia" ka lo ti vat a, Emma-in min lo melh reng vang chuan ka hawisawn rang hle bawk, mikhual awmlaia ṭawngṭai chu ka duh hauhlo, ka ṭawngṭai hian ka dang a awk deuh ṭhina, kan chhungkua nilo te hriata ṭawngṭai ka duh lo a ni.






"I ṭawngṭai hun a nih kha" ka Pu in a lo tih chuan ka U chu ka va melh leh a, a mitko san ralhin ding turin min lo Signal a, an tihdan mai mai chu le...






Ka nuin ka naka min rawn nghawk tak sawk vang chuan phur lo fê chuan ka ding ta nge nge a, ka ṭawngṭai chu ka ngaihtuahna a tawi vek mai, ka ṭawngṭai ve changa ka sawi ziah ṭhin te chu ka han dil nawn leh a a chang pawh a khat ṭha leh viau mai.





"Ropuina chu pa leh fapa leh thlarau thianghlim hnen ah awm rawh se, a tira awm angin tunah leh chatuanin Amen" ka ṭawngṭai zo chiah chu ka lam a rawn hawi ṭhap a, ka nu hmel ka en chu a lawmloh hmel nasa ngang mai bawk a, kei erawh ka lo nuisuk thung.






Chhung inkhawm kan zo chu ka nuin ka hnungah min rawn sik hlawk hlawk a "Kha kha a zir tir che em ni?" vin kha kha chunga a tih chuan chhangloin ka lo nuih liama, a huat tawk chu a tling leh viau a ni.





"Chaw eikham veleh min thlah angai dawn ania aw" Emma-in a tih chuan "Car in inhaw dawn nia" ka lo ti sam et a, ka sawm a nilo a duhleh a sawm tu ten an thlah mai aniang chu.






Chawei laia ka bula Emma-i te nufa ṭhu chu melhin pahin ka nu chuan "Chhungkua in ang tawh emai, tiang khan han awm thei tak tak ula ka duhthusam a thleng a nimai" nuisang chungin a ti a, ka U lo nui hak chu enin "Over i ti ve tho e law?" ner sak chunga ka tih chuan "Ezra, chaw eilai a nih hi" ka pain a lo tithuai a.





"Ka duhthusam ka sawi anih chu" meinei zeta ka nuin a lo tih leh chuan "Aw....i duhthusam leng thlawk kualvel" ka lo ti hluai a, min melh rum ram ram chu enin ka nui duh bik hauhlo, nizana ka thil hriat chung chang kha engmah ka la sawipui hauhlo tih ka hrechhuak chiah bawk.







(Tunlai chu ka regu lo khawp mai...min han hrethiam hram teh u...tin, ka kua a ṭhalo lo a, ka railo a, period thi put vak2 ka neilo bawk a, fa sual deuh ka neilo a, nu ka nilo a, pasal ka neilo bawk a, nula hnahkhat Gin chikima Gin ka ni e...hahhaha...Whatsapp group 1 ho khan dawt an rawn sawi chiam2 mai a, chhul ṭhalo awmkhawm ania ngaihkhatah inlo ngai mai dawn nia..Love you all Smile squad)






??Ads la click lo tan a hnuaia milem khu in lo click ve ngei ngei dawn nia aw ??



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:06 pm

CHAPTER - 20



(A tawp note khu chhiar rawh aw)




Engtin nge maw ka lo theihnghilh daih theih chu le, nizan te kha chuan ka lawmlo hle a, In ka thlen ruala ka nu muhil tawh chu thil awmzia zawt tura khaihthawh mai te pawh ka duh rum rum a nih kha!




Muthmunah pawh insehruhin ka muhil theilo a, zan rei tak thleng ka men phah bawk kha a nia, engtin nge maw ka han theihnghilh theih zawk ni!




Keihi ka â tawh takzet a ni.





Tukṭhuan eikhama ka nu insiam tur chu an pindan lamah ka zuilut a "Inkhawm i tumlo leh pek em ni?" ti a maktih hmel taka min lo enlai chuan tum bar chungin an khumah chuan ka ṭhu a. "Puitling anga kan inbiak a ngai a nia" melh rum râm râm chunga ka tih chuan min nuih duh lek a, "I inkhawm dawnloh chuan Aruati te nufa khan inkhawm an duh kha lo va thlah rawh" min hnung chhawn a a thawmhnaw bawm hawn pahin a ti zui a.




"Chu chu a nia ka sawitum chu engvanga chaweia sawm ngawt nge maw inih le? Ngaihloh lamah a chhungten an lo ngai thei a sin, min suihzawm tumna rilru te inlo nei anih ngat phei chuan ka duh hauhlo a nia" ka ti a, ka beisei anga anlo inngaih chu ka duhlo, chutiang anga an lo ngaih chu ka hlau a Aruati pawh ka tlawh pawhloh phah fo ṭhin.




"Ngaihtuah chiang mangloin ṭawng mai mai suh, i pi leh pu te nena inrâwn khawma kan thutlukna a ni, Aruati hmakhua pawh ngaihtuahla, nu hrawn emaw pahrawn kara seilian turin i fanu hi i phal a mi, keini chuan kan phal reng reng hleinem" ka nu in a tih chuan ka lo nui hawk a.






"Bialnu ka neih kha i theihnghilh a mi?" pawr fe a ka tih chuan ka lam a rawn hawi a, "Kan thu awihla Emma-i hi ngaihven zawk rawh, Vîtei chu keiman ka lo hrilhfiah ang, hmeichhe fel tak a ni a a hrethiam lutuk ang che" a tih chuan awihlo zetin ka lo en a, tinge maw hetiang rilru hi a put thut le? Tunah khan hmeichhe fel tak a nih thu a sawi a mahse, min ṭhen turin alo va hrilh leh lawi bawk si a.






"Emma-i chu theihnghilh rawh, engvanga Vîtei hi duhlo thut nge i nih a?" hrethiamlo fe in ka ti a. "Â â suh, i len ṭumin a pan alo ṭawng khum hrep che a nilawm ni, ka fapa hmelṭha leh fel lutuk hi alo duhlo ngam vela mai mai a. Tum tawk leng an bo lo a fanu changlo pawh kan hmu ve lutuk a lawm" a ti zui hmarh hmarh a, min ti dang lek lek a ni.






"Engtin nge i hriat a?" ṭi deuh dai a ka tih chuan " Emma-i u in min hrilh a lawm, a tirah ka awihloin i ṭhianpa Ropuia kha ka lo zawt a, in lendun ṭum pawhin a lo ti zak hrep tawh che u a niawm a kha, induhtawkna te pawh nei ve ta che, a len
pawh va leng tawh hlek suh" a aw ah chuan a lawmlo hle tih a hriat theih, ka nu hi chu hetiang hian a thinur lai hian a ri hluaia a pai rei ngai lemlo thung.






"Ka leng ngailo e a" ka lo tih chuan "Len len angailo" a lo ti leh hluk a. Ṭhinrim deuha biak tum zawk ka nihlaiin amah zawkin min la thinrim khalh char char zawk chu le. "I va bia a nimaw, tinge khatianga i va tih a keimah min sawipui zawk tur i nia sin" lawmlo fe chuan ka ti ve ta a, min melh zawka lehlam a hawi lehnghal thuai bawk a.





"Ka be lo" ṭeu zetin a ti a.



"I biak kha" ka lo ti ve nghalzat. Rum fahranin min rawn melh a "Iak iaklo khan thu awihla a nimai, i tana ṭha ber tur a nia kan ngaihtuahsak che, Vîtei pain a hmuhsit che ka phal reng reng hleinem" a tih leh chuan thawk ka la hawk a "Va kal duh tawh miah suh, Sawrkar pisa a thawk pakhat ve maiin ka fapa a hmusita ka lawm hauhlo, sawrkar hna te chu ipa nen kan thawk ve reng a lawm, inla Officer lian viau mahse, a neih theih ang chu kan nei ve thei vek" a thinrim inhrosa vel chu nur nangin ka lo ngaithla a thawk a ti ipik riau a ni.





"A induhtawk theihloh a nih hi" bung zetin ka lo ti a, "Engah ngawt chuan maw?" a puan bih ṭhat mawlh mawlh pahin min lo en "Engah nge ka lo huat ngawt ang, a duh dan danin ka lakah ngaihdan a nei thei a lawm, ka nihna anih miau chuan ka huat theih a ni hleinem" ka tih chuan ka nu hmel chu a ngui bar a.




"Mahse, Vîtei hi chu a danglam a sin, a pa nen chuan an mizia a danglam a lawm, chulo ah a niin tihsual a neilo a, he thil vanga kan inkar tawpsan a nupui dang neih tihvel chu tumna ka nei lo a nia, min nawrluih tum miah suh" ka nu en chunga ka tih chuan ner sawng chungin min lo en a.




"Thil dang zawng zawng aichuan Aruati i ngaihtuah zawk tur a ni" chiang fek fawk hian a ti a.



"Chuvang a lawm nupui ṭha tak neih tuma ka buai reng ni" awlsam fe a tih pahin ka nu lamhawi chuan ka nui a, a nui ve duh hauhlo "Aruati hi nuhrawn hrawn turin i duh chiah maw?" zawhna mitmenga min en chungin a ti, enga tinge hetiang zawng hian angaihtuah fo mai le, kan sawilai mek hi Vîtei a ni a hmeichhe fel tak anih piahlamah Aruati pawh a nelin a duat bawk a, nuhrawn sual tak tur ang maiin ka nu hian a ngai nghal ngawt nimaiin ka hria a ni.





"Vîtei pa chu ka la hneh thei em em ang, chuvangin nangtal chuan kan dinhmun lo ti harsa lo teh" ka ti nghat a.





"Bawiha i va thlah dawn a ni lawm ni?" pindan kawngkhara lo dah pahin ka U in a ti a, "Motorin va thlah mai rawh" ka lo ti vat a. "I inkhawm dawnloh chuan nangman va thlah rawh, i u inkhawm tura insiam angai a buaithlak" ka nuin a lo tih chuan phurlo fein ka U chu ka zui a.




Kawtah Emma-i nufa chuan ka nu pangpar chin an lo enkual a, min hmuh rualin "Enge i tih reng a i va rei em em ve?" a lo ti nghal tawng a. Chhanglo chuan ka Bike chu ka tinunga, an nufa chuan an lo ṭhu kai ve nghalthuai bawk a.




"Malsawmhlu kan lo kal hi i va lawm awmlo ve a?" Emma i chuan a ti a, ka chhang buailo. Chak deuhin ka tlana ka fanu te chuan ka kawngah min lo kuah ṭai a, kan tlanchhak chu nuam a tih hmel viau bawk.




"I bialnu nen khan in la ṭha maw?" Ka Bike aṭanga chhuk pah a a tih leh chuan "Ṭhatloh lai kan neilo" ka lo ti nghat a, ṭhensak chungin "A nih ka ring" a lo ti a, nuihza hmel a pu lek lek bawk.





"I bulah ka nuin engthil pawh sawi sela ka hriatpui vek lemlo tih i lo hre dawn nia" awki pangngai zawka ka tih chuan "Nula bak ngaihtuah ila neilo a nih hi" nersak chungin a ti a, ka ṭawng leh hmain Aruati kaiin inchhunglam a pan zui vat a.




In ka thlen leh chuan ka chhungte chu an lo chhuak diak tawh a, ka ngaihtuahna ah chuan thildang a leng hleithei meuhlo a ni. Nizan lam thil thleng te ka ngaihtuah a, engtia han tih tur nge tih chuan ka rilru a luah a, Barbie nen kan inkar hian hetiang ngawt chuan hma a sawn thei dawnlo tih ka hrechiang hle bawk.





Enge maw ka tih a ngai a rilru buai zia ka hria a, chutih rualin inṭhen tak tak a duh biklo tih chu ka hria, a rilru zahve chuan ka lam a awn a, a bak zawng erawh hlauhthawnna in a uai bet thung, keimah a rinna nei turin engtin nge ka siam theih ang? Engtia hma han lak chi nge tih chu ka bangbo riau a ni.





A hmasa in ka chhungte nen inlaichinna ṭha zawk ka siamsak a ngai a, a pa rilru ka hneh a ngai bawk, chu mai niloin a rinna ka hlawhchhuah a la ngai cheu! Ngawi teh chumai ala nilo nizan khan kan inṭhen daih a lawm mawle. Ngaihtuah rawh Malsawmhlu engtin nge i inchinfel dawn?





Hrep chuan a....Ka ngaihtuahna buai lutuk chuan ka lu a rawn tina thei hialin a nia ka hriat ni.



___________________

VLI - pov


"Rema a lo lenga lo chhuk ta che" ka nuin a lo tih chuan ka lo meng rang hle a, "Ka chhuak lawk dawn a, thingpui te lo zuk lum sak rawh" a tih vang chuan peihlo zetin ka tho zui a, inhnuai ka thlen thlak ruala Remtluanga hmel ka hmu chuan ka thawk a ti ipik deuh deuhin a nia ka hriat ni.




"Question hlui ka lo Collect a" nuisanga a tih chuan za lo zetin ka nuih a, a lehkha min pek chu ban pahin phur fahranlo chuan lawmthu ka hrilh a, ani erawh a hmel a hlim sarh a, a ṭawngkam a zangkhai hle bawk.






"Thingpui kan lum ange" tiin choka lam ka pan a, ka let leh chuan ka pa inkhawm bang a lo thleng ve chiah a, kan bulah chuan lo ṭhuin Remtluanga chuan a lo be nghal bawrh bawrh a, Kohhran chung chang a sawi vangin Tv ka en san ta daiha an titi chu ka ngaithla peih meuhlo a ni.




Nau-a leng lo haw chuan kailawn bul aṭang chian min rawn signal zauh zauh renga, enge a awmzia ka hrethiamlo, a kut zaizir meuhin a sawi a, ka pa hriat a hlau a ni tehchek a niang chu.






Thingpui no senga choka a ka phei leh chu min lo zuia "U vîte, pawnah a awm a nia, min lo koh sak lawk teh a ti" Nau an a tih chuan phawk fein ka lo en a, Lalbera chung chang a sawi ang tih ngaihna reng ka lo hrelo.





Thlanglam tukverhah chuan ka daka, kawta a dinna ṭhin chu a lo ruak huaia a hmel hmuh tur a awm hauhlo. "Khawiah nge i hmuh a?" ka tih chuan "Dawr kawtah khuan a awm mahse, a rui maithei a nia, a nam deuhin ka hria" a ti a.





"Enga tan nge min tih a?" ka tih leh chuan "Ka hre bik nang?" a lo ti vin hluk a ka rilru a buai kher mai, tun ang zan la hma takah tinge maw a lo kal reng reng le, ka pa a la menga a ni zu rim a nam lehnghal a nih phei chuan hmu tura zuk chhuk chu thil atthlak ber a ni hial ang.




"Chhuk duh suh, ka pa a awm bawk sia Phone zawk mai rawh" Nau an a tih chuan ka lo bu nghat a, Sitting rooma ka let leh chuan Remtluanga leh ka pa chu an lola titi mawlh mawlh a, Pathian thu aṭangin Politics lam an lo sawikai der tawh.





"Ka chhoh san mai dawn che a sin, tih tur neuh neuh ka la ngah a" a paper min lo kensak lek chhuah pah chuan ka ti a. "Awle...ṭha deuhin i inbuatsaih dawn nia" nuisanga a lo tih chuan kailawn lam chu ka pan zui a.





"I lo enpui thei ṭhin chu a tih zia hle mai" ka pa in a tih ri chu ka zui zat bawk.




Ka Room Balcony aṭang chuan thlanglam chu ka thlir a, amah awm reng reng tumah ka hmulo a , a haw tawh anih ka ring. Luh mai tuma ka inher laichuan ka phone a lo ri a, tudang a nilo amah Lalbera ngei a ni.




"Aw.." zawi tein ka ti a, chumi rualin "Barbie" a lo ti ve chiah bawk.




"Enge nita...?" awki pangngai taka ṭawng ka tum viau nain ka aw chu a zawi hle tho. "Tun dinhmunah hian khawiah nge ka awm i hre duh em?" zangkhai zet a tih chuan kawt lampang chu ka hawithla leh a, hmun dangah a awm a nih ka rin vangin "Khawnge i awm a?" ka lo ti ve mai a. "Inkawtah i nu dawr bulah hian ka awm a, reilo te inhmu lawk ila" a lo tih takah chuan ka thinphu a rang nghal dut dut mai.





"Lehkha ka zir a" tiin chhuanlam ka siam a, hmuh chu ka chak ngei alawm tunah ngat phei chuan ka ngai em em a ni, a chhan chu kan inkawp tirh aṭanga kan inṭhen hmasak ber na a nia, nikhat chauh la liam mahse, a hrehawm lutuk tlat a ni.





"Ka lo chho mai dawn aw" a rawn tih lah chuan "A ngailo, a chiloh" ka lo ti tlat lawi a, "Reilo te hmuh che ka duh a" a tih leh te chuan a aw ri chuan min fan rawih rawih a ni.





"Nizanah kan inṭhen tawh kha.." ka lo ti zawi sap a.




"Kan la kir leh thei lawm ni?" muang raih hian a lo ti a, a aw ah chuan zu rui chu a ang hauhlo.





"Tinge..?" ringhlel rum rum chuan ka ti leh a, ka awm ang tho hian alo awm ve em mawni dawn le? Hlimna mak deuh ka nei a, chutih rualin ka lungchhe tel bawk.




"A chhan chu maw ka ngai lutuk che Barbie" a tih chuan sawitur hreloin ka ngawireng ringawt a, ka lungphu ri dut dut te chu ka hre pha hial a ni.





"Min ngai ve em?" thawk la hak chunga a rawn tih chuan ka heh ka pet fan fan a, tunah hian ṭawngkam khat lekin chhang ila kan ṭha leh thei mai dawn tih ka hria, mahse, kan hmabak hun tur chuan thawk a ti zing em em si a ni.





"Inṭhen mai hi kan tan a ṭha a sin" ka ti zuai raih a "No no....Idea ṭhalo tak a ni" nui lek lek chungin a lo ti a, nuihza aw erawh a lang hauhlo.




"A tawi zawngin ka hrilh ang che aw...inṭhen ka duhlo, i tello a ka awm theihloh zia i hriat kha" a tih ri chuan min fan raih raih mai, ka lungchhe lek leka a mittui a hnam ṭiam ṭiam bawk.





"Anih engtin nge kan awm ang han sawila, kan chhungte rilru kan inhre tawn ve ve a..." ka sawilai mek chu minlo pawt chatin "Lungngai suh kan pahnihin engkim kan paltlang dun dawn a lawm, min ringlo anih chuan i tana ka inhuamna te hi fiah rawh" inringtawk tih hriat zet hian a ti a.





"Lalber, ka zui che anih chuan nangmah chiah rinchhan tur ka nei dawn tih i hria em?" ka aw chu a vin lek lek a ni.




"Ka hria a lawm" damthlupin a ti a, tunah hian ka ngaihtuahna buai zia te hi a rawn hre phak ve a ngem le?




"I rilru i thlak leh anih chuan ka chan tur chu i hrethiam em, ka pa mizia i hria a let pawh ka let leh thei tawh kherlo maithei"




"Barbie..i ngaihtuah nasa lutuk a nih kha, let leh turin ka ti dawnlo che min ring hram teh" a ti a, ka ringlo a nilo ka hlauthawng a ni. A chhe ber thleng ka dawn a, thil ngaihtuah lemloa ti puat puat mi ka nilo bawk, ka thil tiha inchhir leh hi ka hlau em em a ka duhloh ber te zing a mi a ni.





"I la rui ṭhin em?"


"Aih..ka sim tawh ka tih kha"



"Ruihhlo vang mai maiin i nunna thap tawh suh aw, ka tan i hlu lutuk a nia" ka tih chuan "Ka hmangaih che, min zui ang tiraw?" chhanna mamawh tih hriat zetin a ti a, ka tan thutlukna siam a hun takzet ta.




"Barbie..."


"Aw.." ka ṭawng chu a zawi kher mai.


"Min zui angem?" a ti leh a. "Aw ka tih chu" ka lo ti vin hlar thung, a nui hawk a ka tum aia vina ka ṭawng chu keipawh ka nuih a za lek lek a ni.




"Lo inpeihla ka lo hruai dawn che nia" a rawn ti a, chu thu chuan ka pum hian min ti mur sung sung thei hial a ni.




images - 2020-08-25T153531.218.jpeg
images - 2020-08-25T153531.218.jpeg (16 KiB) Viewed 9723 times





CHHUNZAWMNA





Dar 11 a ri tawh a ka roomah awmin ka mamawh tur a ka rin ang ho chu ka Bag ah ka khung a, han ken tur awm chi pawh ka thliar hrang thiam meuhlo, ka phili buai a ni ber a, ka let leh vat angem tih lah ka chiang derlo bawk, engang hun nge ka hmachhawn ang tih lah ka ngaihruat chhin mai pawhin a thaw ipik thlak a ni.






"I mamawh zualpui chiah keng rawh aw, Bike a kal a ngaidawn a nia" Lalberan a tih vangin mamawh zual tura ka ngaih ho chu ka lawr dan dan a, ka insiam nghal thuai bawk, a vawh ka rin vangin thawmhnaw lum lam ka ha a, chutih laimekin ka phone a lo ri ve chiah bawk a.






"Ka lo thleng aw, i inpeih tawh em?" a tih chuan ka chhuk nghal tur thu hrilhin ka phone chu ka dah a, ka room chu ka hawikual leh vang vanga na zeta thawk la in "Inchhir loh tur" tiin ka inhrilh ru mawlh mawlh bawk a.






Dawhkana ka lehkhabu inchhap hnawk niai te chuan lung a ti zing zual nimaiin ka hria, ka nun leh ka hma hun engkim kalsana ka mipa hmangaih lam ka pan hi a tihsual lian takah a chanloh hram ka beisei a ni.






Sitting room thim leh reh ṭhuap ah chuan thawm dim thei ang berin ka pen thla a, kawngkhar lampana ka inher tur chiah chu choka aṭanga Nau-a lo chhuak nen kan intawk hlawla, kan i hmu thut chu kan meng phawk dun kher mai!






"U Vîte enge i tih dawn a?" ka Bag khai leh keimah min entawn zak zak pah a a tih chuan bengchheng siamlo turin ka lo zaizir nghal thuai a.





"Sawi miah suh aw...naktukah chiah i hrilh dawnnia" ka tih chuan meng phawk hra chungin "In inru dawn maw?" a ti a, a hmelah chuan a hlauhthawn hmel hle bawk.






"Aw Nau...kan awmdan hi ka hne tawh, duhthlan tur dang a awmlo a nih hi" a hiatthiamna beisei ru tak chunga ka tih chuan mitmeng nur nangin min en a "Ka pa in a hriat hunah chuan a sa viau dawn a nia aw" tiin min sawiṭhaih zui zat a.






"Ka hria a lawm, lo han hrilh nghal miah suh aw" a sawi nghal mai hlau ru tak chuan ka ti a, Dodo-a chu nise pawisa pein a ka a hup theih mai anga, Nau-a erawh a duhna te ah lo hi chuan tu thu mah hi a awih ngai tlatlo a ni.






"Anih khawnge in kal dawn a?" a tih leh chuan ka hman hmawh ru tawh ngang mai, "Ka la hre biklo, an hriat chhuah hma chu min lo zep sak tawp mai rawh, ka nau fel inih kha" a dara ben thak pahin ka nuih tlawn a.






"Ka kal a nia aw, kawngka hi lo kalh rawh" tih leh kawngkhar lampana pen chu ka rual a. "Chhung lama kan kalh daih ten keimah zawk ka tal awk dawn a sin, kan muthilh hlanin i chhuak ru a, kawngka te chu a kalh chi nang" tih bul bul pahin ka hnungah chuan a lo kal ve zel a.






"Ka lawm e aw" ka tih leh chuan engmah sawi duhloin a ngawi ngal a, a hmelah chuan a lawm tehchiamlo tih ka hre thei, mi erawh a dang ṭalh biklo a min zep sak dawn tihna anih ka ring.






Kawt la thlen thlak chuan a Bike nghenga ding chungin min lo nghak a, thawmhnaw dum vek a ha a,Helmet full face a khum bawk. Za vakloa ṭhensak chungin a lam chu ka pan phei a, a bul ka thlen hmain a kut a lo phar chhuak thuai a, a Bag ah lianlo te ka hmu chu ka rilru ah zawhna a lo lut zui a.






"Tinge thawmhnaw i ken ve loh a, khawiah nge kan kal dawn?" ka kut aṭanga ka Bag ken lai lakthlak pahin "Thingtlangah zanhnih khat kan riak anga kan inah kan haw ang" awlsam zetin a ti a, sawibuai tur ka neilo mai niloin ka hrelo a ni, engtin nge kan khawsak zel dawn tih tak ngial pawh ka ngaihtuah zawm theilo, ka chawmawlh vek a ni ber e.






"I ṭha maw, i rilru i thlak leh lo ang chu ti raw, kawng laka kir rawt leh kha ka phal dawnlo a nia" ka bianga rawn tuai zauh pahin a ti a "Tlan chhuak vat zawk teh ang, ka pa a rawn tho a nih teh chuan min hnuk let nghal dawn a nia" ka lo ti a, nuisuk chungin a Bike ah chuan a lawn a, a che vel chu ka lo en a engtin emaw riau hian min thlamuan a ni, tunah ngat phei chuan ka innghahna a ni ta mai chu a nia, heng a pian ṭha tak te, a dar rinawm hmel tak te hi ka tana rintlak leh innghahna tlak a nih ngei ka beisei a ni.






"Lo kal rawh le" ka chuan rem tura a Bike rawn ti âwn in ka lam a lo hawi a, ngawi rengin ka lo en a chet mai nachang pawh ka lo hrelo ka ngaihtuahna te chu a tawi tup niberin ka hria.






"Barbie, i hreh em ni? Anih chuan ka la nghak leh thei tho a nia" ka kuta a rawn vawnna chu ka lo hmer vang vang a, ka rilru chu a buai nuai nuai a ni ber mai, tunah hian ka In chauh hi ka kalsan a ni dawnlo tih ka hrechiang em a ni. Mahse, nakin hun pawh nghak ila hetiang bak hi duhthlan tur kawng dang kan nei chuanglo ang, tun hun a ni emaw nakin hun pawh nise a danglam phah chuangin ka ringlo a ni.






Bike ah chuan ka lawn zui thuai a, ani pawh a lungawi a niang, ka kut chu hum vang vangin a Jacket inteah a dah luta amah si chêtin min pawt hnai zui bawk a, khawiah nge min hruai dawn ka hrelo, amaha rinna nghat chung chuan a hnungah chuan ka bei thlam a. Ka mit chhingin rilrua mahni inthiam chawp chung chuan thawk ka la leh kawk ṭhin a, ngaihtuahloh tum pawhin a ngaihtuahloh theiloh a ni.





"Khawiah nge min hruai dawn?" khawpui kan tlan pelh laichuan ka ti a, "Ka ṭhianpa te khua ah kan kal dawn nia, an mahni pawh ka hrilh lawk tawh" a lo ti var a, tlem chuan ka awm a nuam ta deuh.




Thla chu a êng ṭha hle a, khawkar kawng reh ruih chu thla êng chuan a ti lang Romantic viau bawk, a Bike tlan thawt zawng chuan a vawt ve lek lek ṭhin a, vawt ka tih a piangin ka va kuah nghet salh salh a ani pawn a khat tawkin ka kut a rawn hum leh zauh ṭhin a, kan awmdan chu thu a sawizui chiam a ngailo, kan inhrethiam dun em em a ni.





Khawkar Hotelah thil eiin kan chawl zawk tihloh chu kan tlan char char a, kan thlen chin chu a thui ka ti tawh viau mai. Kan kalna tur ka zawh lahin "Kan thleng ṭep tawh, kan thlen hunah i hre mai ang" a lo ti mai zel a, ka zawt lui ṭalh duh ta biklo.





Serchhip kan tlan pelh laichuan ka mut a chhuak lek lek tawha, a hnungah beiin ka mit ka chhing leh siai siar ṭhin a, Bike a chuang nilo ila chuan ka muhil daih tawh ngeiin ka ring.





"Muhil suh aw, kan thleng har tawh dawnlo a nia" dam thlupa a lo tih chuan ka inthing harh lehnghal thuai a, a hnu darkar tam vaklo hnu a kan thlen chuan khua pawh a var lam lek lek tawh a ni.






Kan kalna khua chu thingtlang khaw lian ve angreng tak hi a ni a, kawttler reh ṭhuap ah chuan a tlan zela kawng pengah tlan lutin thuilo te kan tlan chho a, chutah chuan In pakhat tual zawl zau leh pangpar vul khah chik chek na hmun hi kan va thlenga, thla eng dul lam tawh hnuaiah chuan an compound chu a lang mawi hle bawk.





Kawta kan dinlai chuan kan lampanin tu emaw hi a rawn pen phei hlawk hlawk a, a lo kal hnaih chuan Ropuia a ni tih ka lo hre vat a, helaiah a hmel hmuh ka lo inbeisei loh em vang chuan lo biak lawk nachang pawh chu ka lo hrelo a "I chau em?" amah zawk chuan tiin kan Bag te chu min lo laksak thuai a.





"Ka patea te nupa an zina, kei leh ka Cousin nen chiah kan awm rih a, inthlahrun miahlo tur aw Vîte" inchhung lampana kan kallai chuan a ti a.






An inchhung chu a lo reh ṭhuap a, Bathroom leh kan mutna tur room te chu Ropuia chuan min kawh hmuh nghal zung zung a, kan inbualna tur tui a lo lumsa diam tawh bawk.





"Helamah inkhua a awm ang tih ngaihna ka lo hre miahlo a" ka tih chuan a nui ṭha a, Ropuia hi tuipuiral lam khaw chhuak ni turah ka lo ngai a, a chhan pawh University kan kal laia kan zinho ṭum khan kan tlan pelh khua apiang kha "Ka kal tawh" a lo tih theih zel vang a ni.





"Ka mutsan dawn che u, zingah duh chen chen a muttheih aw, mitmei ven tur tumah an awmlo ania" Lalbera lamhawiin a ti a, Lalbera lo bu nghut ka va hmuh chuan chauh hmelfein a lo meng dul raih a, a sam chu a thur siang a a meng sen ram bawk.





"I inbual hmasa duh em?" ka tih chuan a lu a thing a, "Inbual hmasa rawh rei deuh awmlo la, i hritlang ang" tih pahin kan Bag chu room lamah a khailut a, ka towel leh thawmhnaw vel la tura ka va luh chuan khumah a lo ṭhu awn duai a, nui hmel pu lek lek hian minlo en a "I chau em?" tih leh a lama min pawh hnaih a rual zata.





A mal chungah min pawt ṭhuin min kuah hlun a "Tunah chuan ka ta tak tak i ni ta" ka dara a khabe rawn nghah pahin a ti a, "Kan la inneih em loh hi, hei te chu inneih kan ngenna hmanrua mai mai alawm" ka lo tih chuan a nuisuk a.





"Inbual rual ang" a tih chuan phawk fêin ka lo en a "Ka duh teuhlo mai a" ka ti chu a nuih a zat hmel kher mai.





"Ka uang a nih kha, va inbual thuai la i muhil vat dawn nia, i lu kha su rih lo la" min duat hmelzeta min melh paha a tih chuan ka lai lek lek a ni, a duh phawt chuan mi han duat vel pawh a thiam hmel kher mai, a tihzia nasa.





Tuilum sa ver vawra ka inbual chuan ka taksa rawl leh sil ṭhem ṭhum pawh a zia huaiin ka hria, ka thawmhnaw ka hak ṭhat laimekin Bathroom kawng khar chu a lo kik a "Barbie lo hawng la" pawn lam aṭang chuan a rawn ti thum dut a.





"Ka zo ṭep" tih pahin ka in ha nghal sawt sawt a, kawng khar ka hawn chuan Sleeveless pan te nen a lo ding a, a nghawngah Towel batin Boxer chauh a ha bawk.






"Ka ruala inbual chu i duhlo maw?" min rawn din hnaih pahin awmze nei fe hian min melh a "Ka inbual zo daih tawh" ka tih chuan a meng rang ralh a, "Ka lo va mu mai teh ang, ka chau deuh tlat" lai angreng zeta ka tih chuan min chhangloin ka hmui a rawn nul thuak a, "I rimtui lutuk" tih leh min fawh a rual a, ka kawngah nghet zeta chelin duhthawk fahranin min fawp a, a inlak hran meuh chuan thawk a chham lo chauh a ni.






"Lo va mu rawh ka reilo ang" tihpahin min fawhna vanga a hmui huh hliam chu a tuai zauh a. Bathroom a a luh hnu chuan ka thinphu rang dup dup chu awm dawm meuha ngaithlain thawk ka la leh halh a, ka rilru nawmna leh nawmloh rukna chu a inzat thuak ta ve ang.






Khumah chuan muin kan awmdan chu ka ngaihtuah let leh ṭhina, naktukah chuan ka chhungte pawn thu an rawn nei tawh ngeiin ka ring. A hriatchhuah huna ka pa awmdan tur ka ngaihtuah zui a, midang tan pawha tawrh hlelhawm khawpin a thinrim chu a in hrosa ngei bawk ang chu.






"Muthilh tum rawh" tihri vang chuan ka ngaihtuahna aṭang chuan ka harh zawk a, a taksa huh hruk mawlh mawlh paha Lalbera lo lut chu en in "I chhungte i hrilh tawh em?" ka lo tih chuan alu a bu zauh a " Ka U chiah ka hrilh a, midang chu aman alo hrilh ang" ka mutna khum lam rawn pan pahin a ti a. Ka bula a rawn inthawlh takah chuan ṭawng leh ka tum chu ka tawp ta zawk a, ka lama a rawn tawlh hnaih laite chuan ka che ṭha ngam meuh tawhlo.






"Muhil rawh le, naktuk lamah chuan thu lawmawm em em lemloh te kan hre nawk dawn a nia" puan min sim ṭhattir pahin a ti a, a pang si chet a ka mut vang chuan ka khur ru dar dar bawk.






"Ṭah ka phal lo ania aw" a hmui a ka nghawng rawn nul dan dan pah a a tih chuan ka kawnga a kuahna kut chu ka lo vuan vat a "Ka ṭap reng reng lo" ka tih laimek chuan ka nghawng bulah a rawn thaw lum ham ham reng a, ka zam chhe leh der tawh mai!






"Muhil tawh rawh le, thil ngaihtuah vak vak lo la lungngai miah suh i bulah ka awm tlat dawn a lawm" a tih chuan a lamah ka inher a "Engkim a ṭha leh vek mai ang" ka chala fawh vang vang pahin a ti a, a awmah beiin duat deuhin min kuah a, reilo teah mut chhuakin min rawn zem nghal chiai chiai a, chumi hnua ka thil hriat leh hmasak ber chu ring zeta ka phone ri a ni.






(A zawmna ang chauh a nia, min lo hrethiam deuh tawp mai teh un, Tin, story hi chawlh rih ka rilruka ka whatsapp group lamah chuan ka sawi tawh nghe nghe a, mimal harsatna lam vang a ni e, rei tak phei chu la chawl lo ang, story hi inziah khawl ka duh a, ka lo let hunah chuan zantin hma tak takah ka dah thei tawh anga chu chu nangni pawn ṭha intih zawk ka ringa, tun anga kan kal hi chuan a tu ve ve lam pawh kan hah a nih hi tiru, tunlai chu story mood ah hian ka cheng theilo a ni, hmanhmawh takin ka type a, story hi ka ti khawbaw zo takngial dawnin ka hria, ngun tak ngaihtuahna hun ka mamawh rih a, min lo hrethiam rih hram dawn nia)





💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:07 pm

CHAPTER - 21





"I chhang dawn em?" thophang aw fea a rawn tih laichuan lak mai nachang hreloin ka phone chu ka lo melh tlawk tlawk a. "Ka nu call a nia" ka ti a, ani pawh a lo ṭhu chhuak ve nghal thuai a.





"Ka lo chhang mai dawn em ni?" ka chhang hreh hmel a hmuh chuan a lo ti vat a, "Aih keiman kan chhang a nge" tih leh thawh ka rual a, ka nu nena kan inbiak laia a lo awm ve chu ka duh chiahlo.






Sitting room lamah chhuak in Bathroom ah ka lut zui a, Phone ka lak rual rualin "Khawiah nge i awm, min va ti mangang êm êm ve?" ka nuin a lo ti nghal a. A lawmloh zia chu a aw ri aṭang chuan a hriat theih.






"Khawdangah kan kal a" inthlahrung deuhin ka ti a, ka pa ṭawngthawm a awm leh awmloh ngaichangin ka beng ka chhi ran bawk a. "Mi puitling tak ini emaw tih a, hetiang zawnga i khawsak duh ka ring miah hleinem, i pa mizia engkim i hria a, i bialpa kan duhloh zia chen in i hre si a khatia i awm khan i hlim phah reng reng em ni?" ka nu zawhna chu chhan mai ngaihna pawh ka hrelo.






"Ka pa chuan enge a sawi?" ka ti a. "Enge sawi sela itih a" a sawi laimek chuan ka pa ṭawngri chu ka hre zui zat a "Amah em ni i biak, vawinah rawn haw nghal rawh se, anihloh chuan ka rawn hnuk haw nghal dawn tih hrilh rawh hmeichhe nikhualo lutuk" a phun zui hluk hluk chu ngawi rengin ka ngaithla a, "Khawi khua ah nge in awm?" ka nuin a rawn tih leh chuan chhang tawhloin phone chu ka dah ta ringawt a.






Bathroom bang nghenga ding chungin thawk ka la leh halh ṭhin a, duh ber zui e tiloin ka awm a nuam thei chuang hauhlo, ka chhungte do zawnga ka khawsak vang a ni. Ka phone chu a rawn ri nawn leh a tun ṭum erawh chu ka pa zawk a ni ve thung, ka la ngamlo ka pa biak chu hreh tak tein ka hreh a ni, Screen a a hming ka hmuh ringawt pawhin ka thinphu chu a rang zawih zawih thei mai.







Chhang lo chuan ka hmai ka phih sawk sawk a, ka phone chu ka silent zui ta bawk a, Bathroom a ṭanga ka chhuah leh chuan mipa tleirawl Nau-a te ang rual vel tur sang zet zawt hi room dang aṭangin a lo chhuak a, kan inhmu thut chu ka zak lek lek a Ropuia cousin chu anih ka ring, min hmu chu ani pawh a phâwk ve deuhin ka hria. "Ropuia ala mu a mi?" ka tih chuan bu nghatin pawnlam kawngkhar chu a hawng a, pangpar tuipekna a keng chhuak nghal bawk a.






Room a ka luh leh chuan thlanglam tukverh bulah Lalberan Phone a lo hmanga ka lut thawm a hrelo a ni ngei ang, khumah chuan ṭhuin a Phone hmanglai chu hnunglam aṭangin ka lo en a a ṭawngdanah a chhungte a bia niin ka hria.





"Ṭha i tih dan ka zawt che a nih chu, nupui ka ru tih ka hrilh che a, ka lo haw pui dawn nge dawnlo chu sawi mai mai teh?" pawr angreng zet hian a ti a, a tu ber nge a biak ang rin ngaihna ka hre hauhlo.






"Aṭhat chu naktukah kan lo haw ang" a tih chuan ka lo thaw huai a, anu bia se ka ti rilru kher mai. "Vawinah kan lo haw hmanlo tihtur kan nei" vin deuha a tih hnuah Phone chu a dah a, ka lam hawiin a rawn nui nghal sang a "Ka nu a nia, zaninah ngaihdam dilin an kal dawn a nih chu" a ti zui zat a.






"Engtin nge alo tih a?" ka lo ti vat a, a chhungte chu an lawm bik tehchiamin ka ringlo.






"Lo haw vat rawh u a ti" a hmelah chuan a hlim tih a hriat a, keipawh ka awm anuam huai mai, a landanah anu nen chuan an inbe chhe lemlo tih a hriat a, a chhungte lam talin hmel hlim min hmuh a nih chuan kan chan a chhe lutuk biklo ang.






"Chuan naktuk ah maw kan haw dawn?" ka tih chuan ka kut vuanin ka bulah alo ṭhu a "Vawin chu kan chau bawk sia awm hahdam ila, nge kar tawpa haw i duh zawk?" a ti a.






"A...a hma thei anga haw chu ka duh, mi In a ni bawk sia" ka ti a, ka rilru hrethiam takin a bu nghat a "Kan intifai ve lawk ange, i duh chuan mu leh rawh" tiin a tho zui a.




Room aṭanga ka chhuah leh chuan Ropuia nen thingpui in pahin an lo titi a, "Vîte eirawng i bawl peih angem?" Ropuian a lo tih chuan "Aw, ka lo bawl ang" Bathroom lam bawk pan leh chung chuan ka ti a, ka tai bawr leh kawng bawr na urh chu zankhua a Bike ka chuan vang a nih ring tho mahila chhan dang engemaw ka nei tlat a ni.






Ka rin ang ngeiin ka lo Period a engmah indanna tur Pads kawlsa ka nei hauhlo, kan Ina ka room ah kha chuan ka leikhawlsa ka nei ṭeuha, ka mamawh thut ang tih ngaihna ka hrelo a tin ni. Bathroom a ṭanga chuan dakin Lalbera chu ka au a, a thingpui no keng chungin a lo kal a.






"Mamawh i nei a mi?" a tih chuan inthlarung zetin alo nuih a. "Dawrah i kal peih em?" Ropuia hriat hlau tak chuan ka ti ru sar sar a. Zawhna mitmenga min en a "Ka period a" ka ti chu a lo nuisuk mai.






"Lo awm rawh ka lo lei ang" tih paha kal mai atum chu "Lawk.." ka lo tih chuan a lo hawi leh vat a. "Cotton aw..a thla nei" zawi sap a ka tih chuan a meng tal tap a. "Thla nei a?" mak tih hmel fein a rawn ti a, laklawh viaulo ila chuan ka tir hauhlo ang mawle, ka pen ṭha ngam tawh tlat silo a tin ni.






"A thla nei ti tawp la, an hre vek mai ang" ka tih chuan a la meng rang kher mai, "Kal vat vat râwh ka mamawh tawh a nia" ka lo ti ṭûng a, Room ah lutin kawr pangngai ava ha a, hmanhmawh deuhin a rawn chhuak leh a min en zawk pahin "Lo tuar hram hram rawh" tih leh pawn lama kal chhuah a rual a, a chhuah hnu chuan kawngkhar chu kalhin Bathroom chhungah chuan ka ding ta reng a, ka tai na chu a mar ṭung tawh mai, a hunbi pangngai aiin a hma a, a hun a insawn dawn anih pawhin a tlailam zawng ani ṭhin si a ka Bike chuan rei lutuk vang te pawh ani mahna le.







Rei a riallo a lo thlen chuan kawngkhar a rawn kik karh karh a, ka hawn rualin a rawn lut nghal rawk rawk mai. "Eh..enge i lo tih dawn?" ka lo ti chul a. "Tinge puih i ngailo a mi?" a lo ti heu mai, engtia min han puih nge maw a tum le! Bawm ruk ngawt a rawn lei lehnghal.






"Ngai nang lo va chhuak rawh" tih leh nam chhuah ka rual a, inthlak mai ka tuma Underwear ka lo keng lut hauhlo mai.






"Lalber tah khan i la awm em?" ka tih chuan Bathroom pawn mai aṭangin "Mamawh i nei a mi?" a lo ti vat a, kawngkhar chu hawng lehin "Ka Bag-ah ka Underwear ka dah daih, min lo lak leh lawk mai teh Please in" ka sawi zawh rual rualin a in her vut a, a van zialo ṭhin tak, ka dahna te kha a va hmu em ang chu maw.






Ropuia ṭawng lawng lawng chu thawm awmchhun a ni rih, kawngkhar ka hawn leh de de chuan pindan aṭanga alo chhuak mek ka va hmu a, ka Underwear chu a te thei ang bera hum khawrin min lo pe a, Ropuia hmuh a hlau ve deuh aniang, ka zak ve ram ram mai.






Ka inthlak fel hnu chuan eirawng ka bawl a, chhunah tlanga len an rawt a, ka taina vang chuan ka phurlo kher mai, Ropuia Cousin chu a ṭawng mawh hle a, a chhungte dang an awmlo chu ka lawm rilru hle bawk.






"Tetein a lo bia che em?" Ropuia chuan a ti a, Tetei a hrilh a ni ngei mai. Ekhai aw! Tetei a hrilh a nih chuan a nin Remtluanga a hrilh ngei anga, chutih anih chuan Emma i te lam pawn kan inruk thu chu an hre tawh ngei bawk ang.






"A na em, nachhawkna te i ei duh em?" Lalberan a lo tih chuan a hmelah hlauthawng hmel a pu a, "Na ve deuh, nikhatni hian a na ve ṭhin a, nachhawkna ka eichuan a tawp daih ang a ei chiloh" ka lo ti ṭha ve mai a. Kal lehloh mai a duh tut tut a, min ngaihtuah vang a ni. Ropuia nen an sawidun laia a chak zia ka hre si a ka ṭhulhtir erawh ka duh biklo.






Ropuia nen kal mai turin ka ti ta ngawta min hnial biklo a, chhuna an chhuah hlan chuan kawta pangpar vel chu ka lo thlir kuala, Ropuia chhungte chuan huan an nei zau ṭha kher mai. Inchhunga ka luh leh hnu chuan Margaretin min lo bia a, zingah ka nuin ka awmna chin zawtin a lo va bia ni ngei tur a ni.






Lalbera te lo let leh laichuan ka lo muhil a, ka harh meuh chuan an ṭhian dunin eirawng an lo bawl peih diam tawh a, ka chau bawka ka mutui ngang mai, an thawm takngial pawh ka hre hauhlo.






Zanah Ropuia ṭhiante an lo leng ṭak ṭak a, zu an inho in ka hria, kei erawh room ah ka tawm renga, ka chhungte lam chu an reh ta vang vang mai, Nau-a Whatsapp ah ka text a, a online loh vangin min la chhanglo a, Lalbera lah an lola be bik silo a, a rilru a mawlh ve reng vangin khumah chuan ka inlet sek a, ka taina bawk si nen ka hui leh pap ṭhin a, chutih laia Sitting rooma tlangval ho thawm nei ham ham reng chu ka ngaitheilo viau a ni.






An zinga Lalbera tel ve chuan a lo lem ve leh ngawt ang tih ka hlau hle bawk, "Monu tur chu lo chhuak ve sela" an ti lung lung ri chu ka hre pha a, chhuah erawh ka tumlo nasa mai, Zu an in ho ringawt pawh chu thinlung takin ka ngaitheilo a, Lalbera nui ring lutuk te chu ka haw hlur bawk, room a alo luh chuan Beer hawnsa a lo keng lut a. Rum zeta melh pahin "I in veleh ngawt alaw " ka lo tih chuan "Inlo hei Beer anih hi ka in" a lo ti a, Beer pawh zu tho ania, ti nge maw ngaihhnathiamna a neih tlat le.





"Beer pawh chu.."




"Barbie zu ka inloh hi Beer mai mai alawm a pawi hleinem" ala ti hram a.





"Anih chuan keipawn Beer chu ka lo in ve ange" ngeiawm zetin ka melh pah a "Ti teh suh khai" nui hawk chungin alo ti a. A in thu a sawi khan thil holam tak angin a sawi a, ka in chu a phal leh chuang hauh silo.






"Zu a nichuanglo a nilawm ni, Beer mai mai alawm" Sitting room lampan tuma ka tho chhuak chu minlo pawt let vat a, "Beer in hmeichhia ka duhlo aw" chang fek fawk hian a ti ta a.





"Enge i duh loh chhan zu a ni chuanglo a" ka awki chuan mei a nei viau a ni.





"Hmeichhe Beer in chuan Zu an in thei vek, a tirah Beer a hnuah Zu ah an kai ṭhin, min ring rawh hmeichhia ka kawm nasa a ka hria alawm, mipa hian hmeichhe Beer in kan ngaisanglo, a bik takin keiman ka kawppui chuan Beer a in tur a nilo" nuisuk chungin alo ti a, a nui tak nain a mitmeng chu a thutak hle thung.





"Beer in ṭha iti silo a, tinge i in si?" ka lo ti leh a, "Mipa leh hmeichhia chu a dang a lawm Barbie" khum lama min nawr phei pahin a ti a, enge a dan bikna ka hrethiamlo, hmeichhia ka nia mahse, keipawn ka kawppuiin Zu emaw Beer a in chu ka duh bik hleinem, a sawi ang takin Beer aṭangin Zu ah a kai leh ringawt mai dawn a sin.






"In tawhlo la, tun hma ang khan Zu i in leh ang tih ka hlau teh mai a nia" mu tura a thawmhnaw a pelhlai chuan ka lo ti a, "Awle" a lo ti ṭha veleh mai bawk a, min chhang awlsam viau mai a tih tak tak beisei leh phawt mai teh ang.






Mu chungin kan titi a, inkuah riaiin duhthawh takin kan infawp a, a baka thui erawh kan kal lo, tunah chuan a remrihlo a ni. Insum erawh harsa a ti ngang mai a, taksa lamin rokhawlhna min siamlo phei sela chuan hei aia thui hi kan thleng tawh ngeiin ka ring.






A phone a lo ri a, a chhungte an nih ka rin vangin ka inbeng kang nghalthuai a, "Ka nu" hmuiphuna a lo tih chuan thinphu chu a rang ṭha duh dup dup ngei mai, Phone chu lain a ngaithla vung vung a, enge a nu chuan a rawn sawi ka hrelo nain Lalbera hmelah erawh thu lawmawm lam chu a nilo tlata hriatna ka nei a.





"In tih dan dan a nimai, zingah kan lo chhuak anga ka lo hrilh leh ang che" tiin an inbiakna chu a titawp a, "Engtin nge a tih?" ka lo ti vat a.






"In inah chuan an va kal a, i pa a lo awmlo a, ipa awmlaia ngeiin kal an duh sia naktuk zanah an kal nawn leh ang" a ti a, thaw a ti ipik zual sauh mai, ka pa chuan ṭha taka alo chhawn ka ring miahlo, "Ngaidam dil kher hi tinge maw a ngaih le, dilloh nen a in ang reng ang" ceiling lam melh leh vung vung chung chuan ka ti a.






"Angai a lawm, chhungkaw thil hlu tak ka ru miau sia, ngaihdam dil chu kan tihtur ania lawm" min kuah pahin a ti a, Lalbera ka duh em em chhan hi ka chiang ta in ka hria, ka hre chiang telh telha a landan maiah chuan mipa tihmawh leh uang tak angin lang ṭhin mahse, a rilru ṭhatna hi ka hmu chiang telh telh a ni.






Zingkar hmatakah tho in kan insiam a, Ropuian chaw eikhama kal tura min tih tlat vangin kan hmanhmawh duh ta bik lo a, "Chawhma a kan chhuah hman chuan kan thleng har lo ang, i nuamsam silo a muangchangin kan tlan dawn nia" Lalberan a tih chuan ka hniallo.






Dar 11 velah kan chhuak a, an in kan thlen chuan a pi leh pu chiah an lo awm a, minlo lawm thiam khawp mai a, kan Bag te dahfelin kan intifai a, eirawngbawl tura inhnuai ka chhuk lehlai chuan Lalbera Farnu te an lo thleng ve chiah a, kan inhre nel sa tawh bawka min hmu chu minlo be nghal bawrh bawrh a, an inah chuan ka mikhual lutuk biklo, titi pahin eirawng kan bawl ho a tlai deuh taka Usangpuia a lo haw a "Vîte, chêtpui angai hleinem awm hahdam rawh nula mawng zang deuh deuh an awm kha" nelawm takin a ti a.






Engmah tilo a lo awm mai mai erawh ka duh biklo, Lalberan chawhmeh min chanpui a, an farnu ten an fiam leh zauh ṭhin chu uang deuh deuhin alo chhang let a kan nui leh dar dar ṭhin a, a nu leh pa lo haw hnu erawh chuan ka ṭi deuh duk a, Nu Siamtei chuan min be chhe hran miahlo na chu kan awmdan hi a lawm kherin ka ringlo a ni.






Chumi zan chuan ngaihdam diltur chuan Lalbera pa Pa Rina leh a Patea veng dang a mite chu an kal a, an kal hlan chuan Nu Siamtei hoin Tv kan en a, Lalbera eizawnna tur ruahmanna an neih te chu kan pahnih chuan min sawipui a, "A u hi a indaih silo a pui rih mai sela a ṭha in ka hria a" a ti siam siam a, ka beiseiloh dan deuha min be ṭha leh chuan ka awm a ti nuam sawt a, "Vîte i pawh kan fanu i ni tawh a" a tih ri te chuan min thlamuan viau bawk.






Nau-an minlo Text a "Ka pa chu amak ka ti a sin aw, nangpawn mak i ti ve ngawt ang" a lo ti a. Min ti hlauthawng ru kher mai, "Engtin nge a lo tih a?" ka lo ti lêt vat a.






"I hre mai ang, a ṭha lam a nia" tihzawng a sawi leh a, a ṭhalam a tih vang ringawt chuan ngaih a ngam chuanglo.






Pa Rina te lo haw chuan ka beisei ruk ka beisei ṭhat ngamloh thu an lo hawn ta tlat mai. Ka pa chuan ṭha takin alo dawngsawng a, lawmlo hmel a hmuhlo a ngaihmawh awm zawngin a ṭawnglo a ni ngei mai. "An heti ta si a, ro hran rel daih thei kan ni tawh hleinem, amah pawh lo haw ve phawt sela, thu kan inngaichang zel dawn nia" a lo ti niawm tak a ni.






"Haw leh kher ngailoin a sawi fel nghal theihloh a mi?" Lalberan a tih chuan a Patea a nuih a lo za a, ka pi leh pu in an lo hrilhfiah bawk a, a hmel tum bar chuan nuih a tiza deuh deuh a, ka haw leh tur chu a hrethiamlo nasa a ni.






Kan nu in min lo bia a, naktuka min lo hruai nghal tur thu a lo sawi a, a hma aichuan ka nu aw pawh a zangkhai ta. Inleng te ka pan a lo chhan dan chu ka zawt a, ka pain a rilru a thlak chu a ni pawh a lawm ve tho tih a aw ri ah a hriat theih a ka pa nena kan boruak kha a ning ve em a ni.






"Lo kal kher a ngai hleinem, kan dah zawk tur che pawh a nia lawm, i chhungte chu han hrilh leh tawh" ka puin a ti a, ka nu ka hrilh leh chuan "A ṭhat chu, naktuk ah ngei ngeiin lo haw la" a lo ti a, keipawn chu chu aṭhat ka ring. Lalbera erawh a lawm vaklo a engmah phei chu a sawizuilo.






Mu tura room a kan chhoh hnu chuan "An let leh kher ṭhin tih ka lo hre miah hleinem, a ho hle mai a" a ti nang nang a, "Thlawi hnihna a ilo hmang dawn tihna a nia" ka lo ti zauh a. "Nia...Thlawi thumna em chu ka ni tawhlo ang chu" tiin a nuisuk suk a.






"Hun a duh reiin i ring a ngem, pailai kal chhung leh inneih buaipui chhung hi, ipa hian Exam tir phawt che a tum in ka ring deuh a" khuma kan mut hnu chuan a ti a, ka hrebik hauhlo ka pa rilru sukthlek lam lam ka awn tawh ang chu, ka ba ve tlat a ni. Tunah chuan Lalbera pawh a lo leng thei tawh anga, Exam hmachhawn a ngai anih pawhin ka huphurh hranlo chu a hnekin rilru a hahdam tak chung chuan a hma aipawn ka zir ṭha thei zawk bawkin ka ring a ni.






Margareti nen kan inbia kan chanchin ka hrilh chuan kei aimahin a lawm a, ka pa khirh lutuk hi hrehawm min lo tihpui ṭhin a, kan inru pawh a rilru alo hah phah viau ni tur a ni.






"Margie a law...ka lo be ve ang" Lalberan a tih chuan Phone chu ka pe a, a awma bei chungin an ṭawng chu ka lo ngaithla a "I dam ṭha em..i pasal chut deuh khan a duat che em?" a tih chuan hawi chho meuhin ka han en a, min en loin minlo kuah nghet salh a.






"A ṭhat chu, in enkawl ṭha la nu i nih hnu hian i hrisello riau mai" duat leh ngaihsak hmel deuhin a awki a thlak a, ka ṭhiannu mah nise Lalbera tan erawh a Ex a ni ve tlat, a hunlai khan a duh ve ṭhin nasa mai si a, thik ena ka en ngai miahlo kha a thilsawi dan vang chuan ka thik deuh reuh tlat nia! A....kei hi ka rilru a ṭhalo anih hi, ka Period vang aniang tiin ka inthiam chawp a ka nuih te lam lam a za.







A phone hmangzo ka lo en ran chu zawhna mita min enpahin a mitko a san ak a, "Tlem te talin i la duh em?" ka lo tih chuan a nuih a za ngang mai. "Kan duh ber kawppui kan nei ve ve tawh a lawm" min kuah ṭhat sauh sauh pahin a ti a.






A tukah chuan ka haw ta ngei a, ka nu a lo awma ka pa leh ka naute an awmlo thung, Usangpuia leh Lalbera ten min thlaha ka nuin dawr a lo hawn avangin Ina chho nghal mailoin dawrah chuan kan peng a, ka nu chuan ṭha takin a lo bia a an unaua an kal hnuah keipawh inah ka chho nghal a, ka pa a awmloh vangin ka lawm rilru viau a ni.







Tlaia ka pa lo haw chuan min hauh nek ka rin laiin min melh thuak duh chauh a, hauh inring sa ren rawna kei ka awmlaia engmah a sawilo leh thinur hmel takngial pawh min hmuh miahlo chuan minti ham haih lek lek a, inchhungah chuan minti ṭi dek zawk a ni.






Zanah Zari leh a nu an lo kal a ka haw tih an hriat vanga lo kal a ni bawk a Zari nu chuan min hau nghal mawlh mawlh a, ka nuin a lo tuihnih ve bawka Zari lah chu alo nui kur kur a, ka pa erawh lehkhabu chhiarin a ngawi ran reng thung, biak ka hrehin ka zah thar em em a, chutia Zari nu leh ka nuin min zilh lai pawh chuan a mitmei chu ka veng ru hle reng a, ani erawh chuan a ngaihven hmelloh viau lehnghal a.






"Kan kohhran mi pawh a nilo em ni kha?" Zari nuin a tih chuan ka nu chuan anihloh thu a lo hrilh thuai a, "E..chu leh nghal Vîte , i ṭhiannu lahin tlangval fa anei tawh a ti emaw ni kha keichu ka tuilo emai, nanglah nula hnahkhat tleirawl tirh aṭanga lerh pawh hrelo tia kan lo chhuan em em i nia, zirna lamah lah i chungnunga hma hun eng tak i nei bawk a, nakin lawkah a la Officer luah dawn a nih hi tia kan beiseina che a san lai takin pasal neih lam i awn ta daih hi chu i pa Hruaia nen chuan kan ui emai che.






I la naupanga pasal nei rihloin zirna lam hi tileh zawk teh, pasal neih te chu tlai a awm tak tak hleinem" a ti zui bawrh bawrh a, ka pa lo hawi chhuak zawk chuan min rawn melh a, a lawmlo tih chu a hmel aṭang pawhin a hriat theih a engmah phei chu a sawizui lehta chuanglo. Sawilo mahse, awm a nuam mawlh lo a ni.






Zari te chhung nen hian tette aṭanga inṭhenawm rawt kan ni a, an In hi kan chuankai tamna ber a nih bakah chhungkhat ang tak taka in en kan nih vanga Nu Rami pawn chutiang taka min zilh ngam pawh chu a ni nghe nghe a, Lalbera fa neih chung chang a sawi erawh ka ngei deuh lek lek a mahse, ka pa in engmah a sawilo chuan minti thawveng huai thunga, ka zep reng thei dawnlo a nakin lawkah an hre dawn tho si a ka hrilh ngai miahlo a chutia a hria pawh chu a ṭha zawk mahna.






"Tlangval fa a nei i tia law, enge chu chu a awmzia Bawihi?" ka nuin a rawn ti ta chiah. "Fanu kum thum mi a nei tawh anih pek kha" ka chhan hmain ka pa chuan a lo ti hmuk bawk a, a hma in a lo hre lawk daih tawh anih hmel, sawitur ber pawh hrelo chuan kei chu ka lo ngawi dak a sawi chhunzawm a chakawmloh kher mai, ka pa chuan engtin nge a hriat le? Lalremtluangan a lo hrilh ani leh pek ang chu.







"In ti tak tak a law, engtin nge i lo hriat a?" ka nuin ka pa lam hawia a zawh chuan ka pa chu a lo ner sawk duh chauh a "Ka sawi buai peihlo e" tih pahin a tho chhuak zui zat a.






"Fa nei tawh te chu a va tuiawmloh ve mawle, tinge ahma te khan i sawi miahloh a, a theih hram chuan tlangval pangngai neih tluk a awmlo a sin" beidawn hmel zeta min enin ka nu chuan a ti a. Nu Rami lahin a lo ṭawmpui veleh zat bawk a.








" Vîte palai an lo la kal nawn lehlo bawka inngaihtuah ṭha leh rawh, nakin hun thlir la i bialpa berkher hi chu i tlakchhiat phah vek mai ang thla leh ah Exam in neih dawn kha chulam chu ngaihtuah zawk rawh i tling hlauh anih phei chuan pasal te chu a lungngaih thlakloh reng reng i hma ah an la rawn intlar pet put dawn a lawm" a ti leh hmak hmak a.







Za lo tein ka lo nui sak a, an sawi vang ngawta in lamlet thei ka ni tawhlo tih an hrelo a ni, ka hmangaih laklawh tawh a thawk leh khatah chu ka rilru puthmang chu a danglam thut thei tlat silo a tin a ni.






Nu Rami te nufa haw hnu chuan ka nu chuan min sawipui ngial a mahse, ka lo hnial ve zel thung a, ka nu hian min hnar sak bur hranlo na chu ka rilru thlak leh se min duh hle a, ka tan pawh chhungte duhloh tak mai vawn chu a hrehawm kher mai.






"Ṭhen daih mai ta che ala tlailo bawk a palai anlo kal leh hma hian, nau i pai chuang pawh a ni silo a" damthluam mai hian a ti leh ṭhin a. "Nû...amak thei e, ka pa pawh tih tawh naklaiin nang lehzel chuan tiang hian tilo teh, in ngaih anga misual kha ani hleinem hrechiang ula chuan in ngaina dawn lutuk a sin" ka lo ti ve vat a.






"A..amah hrim hrim te chu a sualna ka va hre emem pawh a ni chuanglo a mahse, nang ka fanu neih chhun i nia, ani ang ngawtlo te chu ka beisei ve alawm, i nawmloh hi ania ka hlauh zawk ni, vawinah pawh ṭha tak te chuan ka biak ve kha, amah ringawt pawh duhthu a sam tawhloh tehlul nen fa a nei tawh inla ti zuia keichu ka tui lo zual telh telh, hmelṭha ringawt hi zawnloh tur ania" a tih mek lai chuan ka lo pawt chat a.






"Nu, fa a neih te chu kan intawn hma thil daih ania, mitupawhin nun hlui te chu kan nei alawm, kan inhriatreng sak aichuan tumah ṭha famkim kan awmlo tih kan inhriat tawn sak hi kan tun hun atan leh nakin hun atan a ṭha zawk alawm" ka lo ti ve a.






"Chute chu ni tho mahse a nilo midang hi nei zawk daihla ka ti, a innghahna tlakin ka ringlo, amah phei chu a ṭawngkam aṭhain a hmel pawh a ṭha reng a mahse, pasal a tan em chuan ka duhpuilo che a ni, i pa nen hian i dinhmun te i han siamrem phawt anga pasal ṭha tak i la nei ang chu kan tia kan beiseiloh ang deuh hian nangchu i awm ṭhin a" a sawizawng chuan a rilru a nat hmel hle a, chu chuan keipawh min ti na vawng vawng a ni.






"In ngaih ang kha a nilo a sin le" ka ti zawi sap a, ka ṭah a chhuak hlur mai. Ka mittui rawn hnam titih ngawt chu ka nu TV enlai chuan ka hru zauh a, Nau-a leng a lo haw tak avangin ani pawn engmah sawi zui ta lo.




Lalbera nen kan inbiak chuan "Ka pa in kartawpah kan leng leh ang atia, kha lam enge in an?" a lo ti a, ka pa in engmah sawi aneih loh thu ka hrilh chuan a phur zual sauh a "A remti tihna a ni thei mai engem?" nui aw lek lekin a rawn ti zui a.





"Anih ka ring ka lakah a beidawng tawh anga a phalta a niang" ka lo tih chuan a nuih a za kher mai.





"Phallo na tehse, ka lo hruai leh nghal ang che" a tih chuan ka lo nui ve thung a.





Kar tawp chu beiseina sang tak nen kan nghak dun a ni, Nu siamtein min rawn be zawk a "I pa te lam thu hi enge ni ve reng reng le, lo kal nawn leh hmain enge an rilru tak hi hriat hmasak ka duh a" a lo ti a, chhan ngaihna ka hrelo ngang mai, a thil min rawn zawh chu a ṭul ka ti lo viau bawk a ni.






"Engmah an sawilo Nu Siamte, palai te nen an inbe leh dawn a nilawmni?" ka lo ti ngawt a. "Anih i haw tirhin engtin nge an tih che an hau che em, Ezra chung chang sawi an nei reng reng em?" a lo ti leh a, "Neilo e, engmah min haulo" awki pangngai thei ang ber chuan ka ti a "Engmah an sawilo tak tak maw?" a la rawn ti leh hram a, kan inbiak zawh hnu te chuan ka ngei deuh rum rum mai.






Amah hian eng rilru nge a put zawk ni, ka chhungte ṭawngkam bah sual a ngaihven em em ringawt hi ka ngaithei viau biklo, tunah lah kan inkar do na lam engmah ka pa chuan sawi a nei tawh bawk silo a, sawi leh se ti niawm zia zanga chutia a rawn ti chuan ka awm a ti nuamlo vek thei mai.






Zirtawp zanah Zarin a piancham lawmpui turin min lo sawm a zanriah kan eilai a ni nghe nghe a "Naua nang pawh lo tel ve rawh aw sawhchiar siam a ngai dawn a mipa kan mamawh tam a nia" nui har har chunga a tih hnuah a chhuak zui leh maia.




"Nang chu kal ve duhlo mai rawh i nau te pahnih kal sela palai an lo kal dawna i nu nen inah awm rawh u" ka pa in a lo tih chuan ka meng deuh awk a, ni dawn tak e kartawp a lo ni reng tawh tak a lawm.





"A pu te ho i râwn ve phawt dawn emaw ka tia?" ka nuin a lo tih chuan "Kan la râwn ang chu" tih zawngin a lo chhang a, Lalbera chungchang han sawi vel chu a chak vaklo anih ka ring.





Zanriah eikhamah Lalbera chu ka Call a a chhang thei miahlo a, Call nawn leh ka tum laitakin Remtluanga Message a lo lut a, a thil rawn sawi chu ka hrethiamlo kher mai, a hawi zawng tak ngial pawh ka hrelo.





'Vite, ti lo thei loin nangman min siam anih hi min dem miah suh ang che' tih a ni, eng a rawn sawi tumna nge ka hre hauhlo, a chungah thil ṭhalo tih a tum te anih ka ring rum rum a ngaih a ti ṭha lo duh kher mai.





'Mi puitling tak i nih kha engthil ṭhalo mah ti suh' tih tê chu ka va thawn let ve hram a. A rawn chhan letna erawh ka nuin min lo koh tak vangin inhnuai lamah ka chhuksana ka en zui tawhlo thung.






Patling upa ve lam lek lek tawh pathum leh ka nu leh pa te chu Sitting room ah thu tak hmel zet hian an lo ti ti a, palai an ni tih ka hriatthiam nghal vangin hman hmawh deuhin choka lam ka pan zui a, ka chhuklai minlo hmuh vang chuan ka zak ram ram bawk.






Fridge a tui chu ka lem khawlh khawlh a ka thinphu arang dup dup a ka mur deuh sung sung lehnghal, Lalbera call a hrilh ve ka tum zeta Room ah ka Phone ka dah daih a va chhuah phei kha ka zak deuh tawh si a, keimah chuan choka chhuat dungah chuan ka vei tawn sek reng a ka za cheng a ni ber e, chutih rualin ka hlim hle bawk a ni.






Ka nu lo kal phei chu choka a lo thlen rualin "Engtin nge an tih?" ka lo ti vat a, nur zeta min enin "I pa hi a ti mak khawp mai, ka duhloh zawng tak a ni" a lo ti a.







"Engthil nge a?" hlauthawng tak chunga ka tih lai chuan ka nu chuan "I bialpa in leng te an ni reng reng lo" a lo ti hlak a.






"Tu te nge a?" ka lo ti leh a, ka inleng te an ni emaw ka lo ti hman tak tak a ni.






"Remtluanga palai te an nih saw?" ka nuin a tih rual chuan ka lo hawihai nasa mai.







(Chutia in phun luai luai takah chuan ka tum aia hmain ka rawn zawm leh ta rawih mai a, min telpui ṭha leh peihlo na teh u in chak lo ang..in hriems Mawh3😆😆)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:07 pm

CHAPTER - 22


"Remtluanga palai te a! Awihawmloh lutuk" thawk la hak chunga ka tih chuan "Ani sia lawm mawle âw" ka nu chuan a lo ti ve hlak a.





"A van ngam zawk ve a, ka pa remruat ani maw?" ka ti a, ka ring theilo zawk a ni! Choka kawngka aṭanga Sitting room lan theihna lam chu panin ka pa leh midang ho titi lai chu ka va thlek a, ka thinrim lutuk chu ka sa pup pup a a insehruh ṭeuh bawk.






"Va kalchhuak suh an haw hunah i pa chu kan be zawk dawn nia" ka hnung lam aṭanga ka nuin a lo tih lai chuan thinrim luatah ka ṭap lo chauh tawh a "Enge hetiang hian a tih ziah le, ka pa hi tinge le.." ka ṭap deuh pur bawk a ka insum hleithei meuh lo, ka rilru ana a ka thinrim bawk.





"I pa hi chu a manganthlak khawp anih hi a thu hi a duh ve bawk si a" ka nuin a tih chuan ka lung a chhe zual ting mai a, "A duh dan danin ti rawh se Lalremtluanga chu ka nei lo chiang khawp ang, min nawr luih a tum a nih chuan ka tlanbo daih anga a nimai, tun angah tuman hetiangin an fate an ti ngai tawhlo, a duh duha min tihkual a tum anih hi " ka ti ve pang pang a.





Beidawn hmel taka ka nuin min melh vung vung laichuan kei chu thinrim vanga insehruh ṭeuh chungin ka lo thaw sak sak a, ka ngaihtuah ngun poh leh ka thinurna chu a zual ting maiin ka hria. Ka haw tirh khan engmah a sawilo a, mi hauh emaw a ngaihdan engmah sawichhuah pawh aneilo a chumai niloin Lalbera palai te ngaihdam dilna pawh ṭha taka lo chhawnin beiseiawm takin a lo thlah bawk a, keilahin engkim a fel vek ta emaw tiin ngaihṭha takin ka haw a, engmah a sawilo te pawh a rilru a thlak a min hnial a tum tawhlo ni turah ka lo ngai mai a, hetiang thil hi a lo tum ru reng zawk chu a ni tak sia.





Inleng te chu ka nuin thingpui a pe a an haw har ka ti tawh ngang mai, ka ngawi mai mai thei tawhlo ang ka bialpa min duhpuilo a a theitawpin min do a chu chu ngaihkhatah ka la ngai thei a chhan chu keimah zawk hi a thu awihlo leh thil tisual tu ka ni tlat a mahse, tun ṭum erawh a ti lutuk tawh bawk a ni. Ka remtih na leh ka hriatpuina awm hauhlo lehnghalin inleng ka nei ania, hei hi Lalremtluanga nena min phiarrukna a ni tih lah hai theih rual a nilo.





"Lalremtluanga pawh hi chapona te hi a nei ve eihlo amaw ni le?" ka ti chhuak phawng a, "Ani pawh i pa ang chauh an luhlul dun ngang ngang a nih hi, Rema pawh mi puitling tak emaw ka tia a tu a te mah hi ka rin ang lo hian in khawsa vek mai" lawmlo awka zetin ka nu chuan a lo ti ve a.





Kan inleng te haw tuma an thawhchhuah lai chuan Choka aṭangin ka lo mitmei ru ran a, ka pa chuan engtiangin nge a lo chhawn ka hrelo a mahse, an hlawhtlin a ni chêk aniang an khi hui hlawma, kawngkhar ah an kal chhuak hlawm ta maw tih ah chuan ka dinna aṭangin ka che chhuak ve nghalthuai a.





"Kha kha enge a awmzia?" tur khaia ka pa melh chunga ka tih chuan "Palai an nih kha" tih te mai hian minlo chhang a.





"Palai an nih thu chu ka hria a lawm Lalremtluanga nen engmah inzawmna kan nei tawhlo a engtia lo kal ringawt ngam nge an nih a!" awki vin lek lek leh thinrim vanga khur dar dar chung chuan ka theihtawpa rumin ka pa chu ka melh ngar a, a hmel chu hmuh anuam fahran bik lo.





"Pasal i nei dawn ro ro anih chuan i nu nena kan lungthluk zanna i nei ang chu chu ka thu tawp a ni, Rema te lam an hmanhmawhlo a i Exam i zawh phawtah kan ti a nih kha, i zirlai chiah tunah chuan ngaihtuah tawh ang che, i bialpa laktlakloh zet lakah i hming chhe zo chauh chung pawha ala nei duh che chu lawm zawk hle ta che, i pu te pawh naktukah ka zuk hrilh ang, i khawloh vangin mi hriatah pawh a zahthlak a a ruk thei ang bera tih angai zawk anih hi" a ti zui hluk hluk a, Sofa a a ṭhu chu mittui tling pam chungin ka melh tlawk tlawk a, ka ṭawng chhuak mai thei lo.






"A hma khan ṭha deuh khan i chhang sia, an lo kal leh dawn a sin" ṭap tiau chungin ka ti a, ka ṭah insum nasa lutuk chu ka khur dar dar bawk. "I thil tih dan hi kan mualpho tamna mai mai tur anih zawk hi, hetiang dinhmuna kan ding tawh chung hian tinge i ngawhngawl i chhuah tlat reng le?" ka nuin a lo ti ve bawk a, ka nu lo inrawlh ve chu thip zeta melh pahin "Lo ngawi rawh" chang fek fawk hian a ti leh hluk a.





Chutah kei chu min rawn melhin "Sawi buai angai tawhlo inleng dang aw kan pawh tih chu an hre thuai ang, lo len nawn leh pawh a ngai tawhlo e, an lo kal anih chuan kan remloh thu ka lo hrilh mai ang" a ti leh hmiah a.





"Ka nei chuanglo ang, i duh leh min vaw hrep pawh nila ka nei chuanglo ang" ring fe a ka lo tih chuan a ṭhutna aṭanga rawn tho vutin min rawn pana ka hmaiah a rawn beng nghal chawrh mai!




Ka lu a hai nghal chhulh a ka dinna aṭang chuan ka tlu lo chauh a ni, "Ava mak em aw, kut inthlak zawng a thil tih kha..." ka nuin a lo ti dek dek a "Nang kha lo ṭawng ve tawh suh" a lo ti vin hlur a, ka pa hmel chu ka en tawhlo, ka mittui sur zung zung chu tuai hul pahin pawn kawngkhar lam ka pan hlawk hlawk a.





"Va pan daw daw teh ka rawn hnuk haw chiang khawp ang che" khawngkhar ka thlen ruala a tih ri chu ngaithah luiin ka chhuak ta tho a, Step ah chuan dingin ka insut hlawp hlawp a, eng thil nge tih tur ka hrethiam tawhlo, ka rilru natna chuan chungril lamah min vilh ngut ngut reng a ni.





Zari te In aṭanga Dodo a lo haw nen kan intawk a, ka mittui ka hruhul sawk sawk chu phawk deuhin min lo en a "Uvîte ti nge a?" a tih chuan ka aw ka thian kharh kharh a, "Dô...i phone ka lo hmang" ṭah chhuak aw tham ṭuakin ka ti a.





Maktih hmel deuha min en leh zetin a Phone ken lai chu min pe a "Ka pa nen in inhau a mi a?" a tih chuan ka chhanglo. "Zanin chu i Phone hi ka kawl rih dawn aw, ka room ah ka phone a awma lo han hmang mai rawh, ka nu bulah Zari te inah ka riak tih i hrilh mai dawn nia" ka ti a, a hmelah chuan a phal vak lo tih ka hria a mahse, hnial chi ka nilo tih a hrethiam ve a ni chêk ang a lu a bu nghat a, "Han lut rawh" tih leh Step ah chuan chhuk ka rual a.




Enge maw chen chu Garage ah ka dinga ka ṭap zo hleitheilo, Zari ka phone a reilo teah a lo chhuak a, min hmuh rualin thil awmzia a hrethiam aniang engmah min zawt loin min kuah ringawt a, keilah ka lungchhe zual sauh thung a, thim thamah chuan ṭhuin min hnem ve mawlh mawlh a, thil awmzia ka hrilh chuan Remtluanga ṭan zawk mahse, ka chunga an thil tih dan chu a lawmbik lo, "Rema chu ka rin ang a nilo, ipa in lo sawipui pawh nise tiang thil a tih duh ka ringlo a sin" a ti sap sap a, ka pa min benna vanga ka biang sa hat hat chu a dawmin ka ṭap leh rih ṭhin a.




Lalbera ka Call a, a la thei silo chuan ka rilru na a ti zual ting mai bawk a, ka ṭah nasat luatah ka thawk a chham mai dawnin ka hria. Na zet zetin thawk ka la leh kawk ṭhin a, ka thinphu rang zaih zaih te pawh chu ka hrethei.





"Tirawh kan inah lut phawt teh ang, ka bulah i riak dawn nia" Zarin a tih chuan "Nakin deuhah" ka lo ti a, tunah rih chuan ka ṭahna vangin ka bui luka a chhungten zawhna min lo zawt ngei ang.





Reilo te kan ṭhut leh hnuah Zari te Inah chuan kan luta, "Vîte i chu iva lo lang har ve, Fridge ah khan Cake ala awm kha" Pa Hruaian a lo ti a.




"Pa Hruai ka puar rih lutuka, Zari nen kan riak dun dawna zan rilṭama eiah a ni mai" tiin ka chhang a, TV an en avangin min ngaihven zui lo bawk a Zari nen a room lamah kan inzuilut nghal thuai a.




"Rema chu ka van ngei reuh e aw" Zari chuan a ti leh ngawt ṭhin a, kei erawhin Remtluanga aimahin ka pa ka thiamlo a ni, a thu hmuloin Remtluangan engmah a ti ngamlo ang.





Lalbera bawk ka Call leh a, a vawi hnihna ah chuan a rawn la ta hram a "Tinge Phone i lak theih miahloh a?" ka ti vin nghal hlar a.





"Barbie tlaia ka mu kha ka lo muhil nghal daih a lawm tihpalh lutuk" a lo tih chuan "Mut hun pawh a nilo" ka lo ti leh hlak a.





"Nizanah ka Patea nupui kha a Stroke thuta ICU ah an dah a, kan tlaivara ka chau deuh a ni" a tih chuan ka inthiamlo leh hnuhnawh a.




"Engmah i lo sawi silo a, enge a an tawh a?" awki pangngai zawk chuan ka ti a, "Ala zia vaklo, ka u leh ka nu leh pa te an kal a" a lo ti a.





"Kar tawpah palai an lo kal dawn i ti sia, chanchin engmah i lo sawi silo a" zawi sapa ka tih chuan hrechhuak thut niawm tak hian a chek hlak a "A va zialo e âw, ka hrilh che emaw ka tia ka lo theihnghilh daih anih hi, naktuk zanah an lo kal dawn ang zanin chu damdawiin lamah an buai lutuka, tiang boruak karah hi chuan a buaithlak ve rih lutuka lo hrethiam hram rawh aw" inthlahrung deuhin a lo ti a, ka ṭah a chhuak leh tlat tawh.





"Hmuh che ka duh a...." ka ṭap titih der mai.




"A tlai tawh sia, ka U ka va thlak angai dawn bawk sia naktukah timai ila a pawi em?" a lo ti a. "Umm..pawilo" inpetruh reuh chungin ka ti a, ka ṭah tawhloh nan ka insum hram hram a ni.




"Tih palh aw, ka lu hi ana lutuka kan tlaivar kha ka zo chiah lo aniang" a ti zui zat a. "Damdawi i eilo a mi?" ka lo tih chuan "Ei tawh e a zia veleh mai ang, lehkha i chhiar lo a mi?" tiin min lo zawt let a.





"Chhiarlo, thil hrilh tur che ka ngah lutuka naktukah chuan kan inhmuh ngei ngei angai a nia" ka tih chuan "I thu ber a lawm, damdawiin aṭanga ka haw pahin ka lo tlawhkawi dawn che nia" a lo ti var a. Kan Inah chuan a lo kal a la remlo cheu tih engtin nge ka hrilhfiah ang.





"Damdawiinah chuan keimah ka lo kal anga, khawiah emaw leng chhuak lawk ila" ka ti ta ngawt a, a lo pawm ve mai bawk. "Lo hruai i ngaih chuan i lo sawi dawn nia" a tih chuan ka chhang zuilo. A tuka inhmu tur chuan kan in mangṭha a, ka inbiak zawh chuan tlemin ka thaw ipik zual chu a ven phah deuh huaiin ka hria.





"Tinge i hrilh vek mai loh, zaninah hian inru leh daih mai ula" Zarin a ti a, chu chu ka duhdan pawh a ni. Mahse, an chhiat tawh laia buaina dang lo siam chu ka inthlahrung ve deuha, duhleh naktuk lama kan inhmuh hunah hmaichhan ngeiah ka sawipui zawk anga a nin remruat dan tur te pawh a hre zawk ang chu.




Zingah Nau-an min lo min lo ko a "Ka pain lo haw rawh a ti" a ti deuh tawnga, tum bar chunga ka haw chu kawngka ah tak alo ding ka han hmu hlawla, a dinna bulah chuan ka thawmhnaw Bag a awm leh awmloh ka melh nghal ruai mai. Mahse, a awmlo hlauh a, a hmel erawh nizan ang thoin a la nelawm chuangloh.





"Insiam la Father Joseph-a i va hmu teh ang" inchhunga luh pahin a ti a, hei hi a tih dan fo ṭhin a ni, a thu kan awihloha a duhloh zawng anga kan awm chuan Father hnenah min hruaia min ṭawngṭai tir ṭhin a, a zahthlak duhin kan unau chuan chu chu kan hlau hle ṭhin, kan len deuh hnu hian a ti ngai ta lo a hman ni deuh kha chuan Dodo-a weed zu ru lai aman a chumi ṭum chuan a hruai a, tunah kei min hruai a tum a ni.





"Ka hmanlo nidangah a ni mai" choka a luh phei paha ka tih chuan "Engah nge i hman loh?" bak zetin a lo ti nghal vat a. "Damdawiinah ka classmate a awma ka kan lawk dawn" tiin chhuanlam ka siam a, a awih emaw awihlo emaw ka pawisa lo, kal erawh tum ruh hle.






"I haw tlai dawn a mi, kal zawh ah i kal thei tho a lawm" a tih chuan chhangloin Bathroom ah ka luhsan a, ka chhuah leh chuan ka nu nen Bazar turin an lo chhuak hman a, a awmloh laia chhuah hman tumin ka room ka pan thuai a.





Ka khumah chuan ka Phone a lo awm a, Lalremtluanga Message leh Call alo tam ngang mai, engmah chhanglo chuan ka insiam zui mawlh mawlh a, biak chakna ka nei hlawllo a ni, he an thil tum hi kal tlangpui ka tumlo bawk a, ani nena va inbakkhaih kher chu ka peih buai lo law law.





Ka insiam zawh ah Lalbera ka call a a Phone alo la vat a "Damdawiin aṭangin ka lo chhuak dawn chiaha lo kal duh kher suh ka lo kawi mai ang" a lo ti leh ta tlat a, kawnah ka lo nghah tur thu hrilhin phone chu ka dah zui a.





Kawn ka thlen chuan a lo la thlen loh vangin Waiting shed ah ka ṭhu rih a, Remtluanga Message te chu ka chhiar a, minla duh thu leh amah hrethiam tura min ngenna lam hlir a ni.





Ka hma a hlimthla rawn lang ka hmuh rual chuan ka hawi chhuak vat a, hlim hmel pu sarh chungin minlo en reng tawh, "I lo thlen lai ka hre miahlo" ka lo ti vat a, "I phone i bih nasa lutuk a" tih pahin a kiai sak a, ka kalna tur ka zawta ka kal duhna min zawt lêt thung.





Kan len chhuah dun hmasak ber ṭuma kan kalna hmunah khan kal ka rawt a, a Bike a kan inphurh lai chuan ka thil sawi dan tur ka ngaihtuah lawka, a hmeichhia zawkin in ruk rawt chu a zahthlak ti deuh viau mahila duhthlan tur dang ka nei tawh tlat lo a ni.





A kawngah chuan nghet deuhin ka kuah salh salh a, a taksa chu a lum vung vung a a hnung phei chu a sa huam a, a nghawng ka khawih chuan a lo thlan dap bawk si a a khua a sik anih ka ring.





"Lalber i damlo a mi?" ka tih chuan "Ka zia tawh lutuk nichin lawk khan nachhawkna ka ei a" a lo ti a, ngaihṭhalo deuh chuan a hnungah chuan ka bei thlam a, a bula ka awm lai reng pawn ka ngai ngawih ngawih reng mai, chân ka hlau tawh em a sin.





"Sawi duh engemaw i nei tiraw?" khawthlirna hmun kan thlen chuan min kuah vawng vawng pahin a ti a, a hmel chu ka en a nidang ang chiahin a hmelṭha a mahni inringtawk tak hmel kha a la danglamlo.





"Tlanbo daih i la i duh em?" ka tih chuan a nuisuk a, "Duh deuh tho mai" ner sak chungin a ti a, ka thu sawi chu ala thutak vak lo nge min chhang awlsam hle a ni.




"Ka pain minlo bum reng a" ka tih chuan ngun zetin min en a zawhna min zawt hauhlo.





"Nizanah Remtluanga palai te an lo kal a" a mitah tak en chung chuan ka ti a. Ngawi renga min en ringawt chu mak ka ti a ni.





"Ti nge i ngawih reng a" ka ti a, ka lawmlo lek lek mai.




"Tukinah ka nuin min hrilh tawh a" a rawn tih chuan thawk ka la hak a, an lo hre leh vek tawh, ral aṭangin an lo hre si a an ngaihdan pawh a dang khawp ang le.





"Chuan engtin..?" mittui a hnam leh ṭan ringawt mai.





"Ka nu chuan zaninah Palai an tir ang" a ti zawi ruih a, khai a palai an lo kal anih chuan ka pa in engtin nge alo chhawn dawn lah ka chiang si, palai inkal thuah chu mi hriatah pawh a zahthlak lutuk deuh chu a ni.





"Mahse, ka remti lo a" a ti leh lawi a, enge a awmzia ka hrethiam pha hauhlo "I remti lo maw?" ka aw ah chuan mak ka tihna a lang thei hial a. Ani chuan a lu alo bu nghat a, ka rilru ana veng veng mai.





Lawmlo ngam tur erawh ka ni hauhlo mahse, ka rilru ana takzet a ni. "A hma pawn ka hrilh tawh che kha nupui ka nei dawn anih chuan nangmah chiah ka nei ang che, Emma-i chu neih ka tumlo" a lo tih leh chuan ka heh ka pet fan fan ringawt. Keima chung chang a sawi emaw ka ti a Emma-i chung chang zawk a lo sawi a ni.




"Emma-i nei turin an ti leh che a ni maw?" ka ti zuai raih a.




"Emma-i u in ka nu a lo bia a, inleng dang i neih thu a lo sawia ka nu thinrim remruatna mai mai a nia, engahmah ngai suh nidangah pawh a thu ka awih ngai chuang hleinem" min kuah ngheh salh pahin a ti leh a, ka taksa te chu an zawi zo vek mai in ka hria.





Dakin a hmel chu ka en vang vang a "Min la nei duh tho em?" lungchhe tak chuan ka ti a, ani chu alo nui a a biangsum mawitak lang chungin.





"I ta a lawm ka nih, Ezra... i Lalbera hian engtik hunah pawh neih che a inpeih reng" a tih chuan ka mittui ka dang thei tawh lo, ṭah a phallo mahse, ka ṭap ta tho a ni.


images - 2020-08-28T102938.384.jpeg
images - 2020-08-28T102938.384.jpeg (31.95 KiB) Viewed 5807 times




"Engtin nge kan tih tak ang?" ti a a hmel ka en laichuan a kutin ka bianga mittui luang chu a rawn tuai a, muang changa rawn kun hniamin a hmuiin ka chal a rawn nawr a, min tawhna chu a sa ham ham a, a bianga ka lo dawm chuan a khua alo sik vur a amah lah chu engmah na neilo ang hlauhin a awm thung.






"I duhthlanna ni rawh se aw, In saw ka chhuahsan anga minlo zui ve duh angem? I duhlo anih pawhin sawi hrehlo la i duhdan apiangin kan ti dawn nia, ka duh ber chu hlim taka i awm hi a ni mai" ka mita chiangtaka min en chungin a ti a, engah nge maw ka han zui duh loh tehlul ang le, hei hi ka beisei mek chu a ni zawk reng a lawm.





"I kalna a piangah ka zui zel dawn che" ka tih chuan a nuisak a, "Mahse, a hrehawm deuh mai thei a nia ka chhungte ka kalsan anga nangpawn chutianga itih ve chu a ngaidawn a, engmah neih kan nei lo anga i duh ang zawng zawng pawh ka pe thei kher lo maithei che a ni" a tih chuan "Teuhlo mai, kan inchhirlo ang" ka lo ti ve vat a.




A duhdan chuan kan In kan chhuahsan ve ve anga In luahdun a duh a ni, a ṭhianpa te inbulah inruak a awm thu a sawi a, zingah a lo zawng lawk sa vek tawh ningei tur a ni, mite ngaihah chuan thil mawilo tak chu a ni ngei ang mahse, enge tih theih kan neih tawh chuan le.






Zanah chuan ka pa leh Nau-a nen Father Joseph a hnenah chuan kan va kal ta ngei a, Naua nen kan luchunga kut nghatin min ṭawngṭai sak a, sual puanna em chu min neihpui lo, keini pawh rei awmloin kan haw lehnghal thuai a.



***


"Naktuk zanah inleng kan nei leh dawn ania, khawiah mah lo tei chhuak suh" tukṭhuan an eilaiin ka pa chuan a ti a, rilruah ruahmanna ka lo neih lawk sa avangin a thilsawi chu ka chhang buai duhlo a, a hun lo thleng sela a tum angin thil a thleng em tih chu kan en ang chu.





Zanlaiah chuan ka thawmhnaw ka siam mawlh mawlh a, ka Document leh ka thil pawimawh te chu Air bag ah ka khung khawm hnawk a, Lalberan dar 1 ah min lo hruai tur thu a sawi a mahse, tunah chuan dar 11 leh a chan ve chiah a la ni.





Ka phi cheng tawh mai a ahmasa aiin ka bungrua te chu ka keng duhthawh hle bawk, ka haw leh tawh dawn lo tiin ka inhrilh mawlh mawlh a.



Ni e, ka haw leh tawh tur a nilo.




Dar 12 a pel hlek tih ah min lo Text a, a ṭhiante a nghah mek thu leh an inpeih ṭep thu alo sawi a, Ropuia a lo haw thla veleh tawh si a alo thurualpui ka hlau ru kher mai, Ropuia chu ka ringlo tihna ni hauhloin a bialnu Tetei hnena a lo sawi palh hlauh a nih chuan kan tum aia hmain Remtluanga leh ka pa beng a thleng hman ngei ang.





Ka call nghal thuaia a lak rualin "Tu nen nge inlo kal dawn a?" ka ti vat a.





"Nsa leh J.mala nen" a tih chuan ka lo thaw huai a.




Kan inbiak zawh hnu lawk chuan ruah a rawn sur zuia, kan remruatna chu a tlawlh phah ang tih ka hlau kher mai, a sur han mai dawn emaw ka tih laiin a tla tam tial tial lehta nghala, tukverh ah chuan dakin kawngpui lam chu ka thlir sek renga hetianga ruah a sur tam anih chuan an lo kal thei hauhlo ang.





Khumah chuan ṭhuin ka phone chu ka en sek sek renga, ka call leh pawhin a tlang thei tawh hauhlo, ka mangang leh ṭan der tawh. Zanin a nih loh chuan naktuk chu a tep ter lutuk dawn a, chhunlamah lah ka chhuak leh theilo emaw anih phei chuan zanin ngeia he In hi ka chhuahsan hman angai a ni.






Dar khat a ri a ka mi nghah te chu an la reh vung vung mai, pawn Step a lo zuk nghah lawk tur em mawni ka ti rum rum a, ruahsur hnuaia an lo kal chu ka beisei ngam chiah silo mahse, an lo kal thei hlauh a nih chuan ruahsur bengchhen laia ka bungrua thiarthlak chu a rem khawp ang.





Chiang ngam chiahlo chung chuan ka bungrua chu ka thiar chhuak ta tho a, thawm dim takin inhnuai kailawnah chuan ka pen thla ṭhem ṭhema Nau-a emaw ka pa zun zung tur thochhuak ka tawk thut ang tih chu ka thil hlauh ber a ni.





Pawna ka thlen rual chuan ka thawhuai mai, Step tawpah chuan ṭhuin ka nghak ta ran a ruahsur bengchheng zet bak chu thawm dang hriat tur a awmlo, a vawt hle a ka khur lo chauh bawk, kawngpui sir tuiluan kawr a tuihawk luang dam dam te Zari te inkawt Street light ruahsur hnuaia eng paw phat te chuan thil min ngaihtuah chhuah tira, khami zan Lalbera ruahsur nasa tak hnuaia min hmu tura a lo kal zan khan tunah ka dinna lai hmunah ngei hian inkuahin lungchim takin kan infawp anih kha, Step a kan ṭhut dunna hmun chu ka en vang vanga tunah tak hian ka ngaizuala a hmelhmuh hlan ka nghakhlel hle bawk.





Ka phone a rawn rik rualin kan kawtah chuan Car a rawn ding ri dat a, a hnungah Bike a lo lang ve nghalzat bawk a, anmahni ngei an ni. Tukverh a ṭanga lo dakin Nsan min lo hui a, chutih meklaiin ka lampanin Lalbera a lo phei hlawk hlawk bawk a, "Car ah sawn chuang rawh aw, a sur nasa lutuka i hritlang palh ang" ka Bag pahnih khai vat pah chuan a ti a.






Gabrielan Car hnung a lo hawng a alo tel ve ang tih ngaihna ka hrelo, Seat hmaa J.mala ṭhu pawh chuan min lo nuihsang a, an lampan chuan hmanhmawh takin ka tlanpheia kan inkar chu tawi viau mahse ka huh nasa hman viau tho a ni. Ka thawmhnaw Bag te chu Car hnungah a vawm lut nawlh a, kan tlanchhuah rual chuan ka hahdam sawng sawnga ka hlim hmel chu ka lo ti lang deuh aniang J.malan min lo chhaih zui zauh a.






Kan hnung maiah Lalbera a lo tlan a, kan tlan chak bawk si a an Accident ka hlau ngang mai, "Ns hman hmawh viau angai tawh hleinem tlanchak vak duh suh hnunga mi saw a tlanchak lutuk" ka tih chuan Gabe chu a lo nui a, "I ṭhiannu engmah i hrilh lo em ni, a vui nasa a nia" Gabrielan a lo tih chuan ka inthlahrung kher mai.





"Nangpawh i lo telve ka ring miahlo a, tunlai chu hetiang niai nuai hi kan nia engmah hi ka ngaihtuah hmanlo mahse, in lo hre tho ka lawm hle mai" ka lo tih chuan "Tlaiah khan a lo kal a, a phili ema i ṭhiannuin kalpui turin min ti a lawm" hnunglam melh zauh pahin a ti a, an ni hoin min telpui chu thla an timuang takzet a ni.





"Khawilamah nge kan kaldawn" ka tih chuan Nsan an venga kan kal tur thu a lo sawi vat a, "In inah maw?" ka lo ti leh vat a. "In inah zawk kan vengah inluahtur kan hmu a lawm, in nupa a inluah tur" nui vur vur chungin a ti a, "Hna i mamawh chuan ka lo ngaihtuahsak dawn che nia" Gabrielan a lo ti bawk a, ka nui lo theilo tunah hian ka hlim hle tih bak chu ka awmdan sawifiah ngaihna ka hre lo a ni.





Kawtzawl zau vaklo ah hian Motor chu a tidinga "La chhuk rih suh" J.malan a lo tih vang chuan kan la ṭhu ta rih a, Nsa chhuak ta chuan kan hma zawna in pakhat hi a pan a Lalberan a hnungah a zui nghal thuai bawk.




Reilo teah lo let lehin an lo chhuahna bul maia Assam type In la thar angreng tak chu an pana chu chu kan In tur chu a ni ngei ang, kawngkhar an hawnga inchung lamah chuan êng a rawn awm nghal thuai a, Lalbera lo chhuak leh kan lam a rawn pan chu ka hmu zui zat a.





"Tiru le.." J.malan a tih takah chuan kawngkhar chu ka hawng a, Lalberan a Jacketin min lo zarhliah nghal thuai a, In lampana kan kal laia chuan a hmel chu ka en a kei ang thoin a hmel chu a hlim a ni.




Kan In tur chu a lian lo mahse, a chhung chu a felfai thlap a Bed room pahnih awmin sitting room leh choka chu a inzawm a, midang la luahloh sak thar a ni tih a hriat hle bawk.




"Kan luah atana ka hauh sa a nia, ka kian che u a nih hi" Nsan a lo tih chuan lawmthu ka hrilh zui mawlh mawlh a, "A manah chaw ka lo ei ziah dawn nia" uang fein a ti a "Kan phallo ang" Lalberan a tih chuan a duhlo nasa mai, kan thawmhnaw te ka rem fel lai chuan an ṭhianho chuan an ri barh barh a, zan rei anih tawh vangin rei awmloin min hawsan zai an rel a, "Naktukah Maggie nen kan lo kal ang" Gabriela chuan a ti a, "Naupang ho pawh lo hruai rawh" tiin an haw tur chu ka thlah zui a.






"Inthlak la, i sam kha tiro thuai rawh" ti a duat hmel zeta min melh tu chu panin ka kuah vawng vawng a, a thawmhnaw huh a phelh tawh vangin Sleeveless nen chiah a awm a a taksa chu a lum vung vung mai.




"I hritlang ange.." a tih chuan "Nang pawh" ka lo ti a, kan in ena kan nui leh rih ṭhin. "Khum leh ṭhutthleng te hi khawi aṭanga i neih nge?" inthlak mawlh mawlh pahin ka ti a, choka bungrua thlengin a awm sa vek bawk si a mak ka ti deuh viau a ni.




"Ka ruk khawm" a lo tih chuan phawk zetin ka va en a, khumah chuan ṭhu awn duai chungin min lo nuih a.




"Choka bungrua hi Nu siamtei ta ka ruk a nia, khum leh ṭhutthleng hi chu Nsa ta an indanna tur ka hawh rih a nakinah kan rul mai dawn nia" a lo ti a, ka nuilo theilo a va lo phar buai nasa dawn tehlul em, keilah chuan engmah ka ngaihtuahpui derlo a ka thawmhnaw bak engmah ken luh ka neilo lehnghal.




"Nsa chuan a lo phal ve mai a maw..?" ringhlel rum rum chungin ka ti a, hetiang em ema a inphal hi mak a ti lek lek a ni.





"Ka pawisa a ba ṭeuh a lawm, a phallo ngam hleinem, a nupui pawh kan rukpui ve tho a nia" a lo ti sam et a.




"Chuvang ngawt chuan maw?" ka lo tih leh chuan "Chuvang ngawtlo pawh chuan a phal angai a lawm a phalloh ten kan vak vai dun dawn a sin" uang fein a ti a, ka zawt zui zel duhta biklo ṭhian inkar thil te pawh a nia nge.




"Nsa chu lawmthu kan hrilh ṭhat angai anih chu" ka ti a.




"Ka hrilh tawh a lawm a theihnghilh leh vek tawh zawk ang" tihpahin a mutna khum sir chu a beng thak thak a, a bula ka va i thawlh rualin duat deuhin minlo kuah a "Nu siamtei bungrua i ru nasa bawk sia jail ah kan tang mai lo ang maw" ka tih chuan a nuih a za kher mai.




"J.malan min bazar puia ka lei ve nual a lawm, Nu siamtei chu lo kal pawh nise a bungrua engmah a hre hrang lo ang" min kuah ngheh salh salh pahin a ti a.





"Kan chhungte chu an sa ngawt ang le" ka lo tih chuan "A pawilo kan tih daih an ngai chuang hleinem, tun aṭang chuan ka nupui chiah hi ka ngaihtuah tawh ang" tihpahin ka hmui a rawn fawp zauh a, a lungawi hmel hi hmuh a nuam takzet a ni.





"Ti hian kan innei tihna maw?" ka ti a, mumang ram te pawh a ang rum rum zawk a ni.




"Tinge..a mak i ti a mi?" nui lek lek chungin a ti a "Mak ve e mahse, a nuam ê" ka tih chuan ngaihawm fahran hian min melh a.





"Hetianga rang hian engkim i lo ti vek a a mak a lawm, ka mumang a ni ang tih ka hlau zawk" ka sawi zawng chuan ka lung a chhe lek lek hial mai.





"Ka theih phawt chuan ka la tihsak zel ang che" tih pahin min fawp leh vang vang a, ka kham theilo lungchim takin a fawhna chu ka chhang a ka hmangaih laka ka luanliamna hian tawp chin a nei tawh kher lo ang, hun harsa tak kan paltlang chung pawhin ka tana a inpekna te a mi ngaihsakna te hi engtia chhanlet tur nge hre rihlo mahila atan nupui ṭha tak nih erawh ka tum tlat a ni, naktukah enge thleng dawn tih lam ngaihtuah ka duhlo tun hunah chauh hian chên rih ka duh.





"I chau em, muthilh i duh tawh em?" min zawt tak nain a zawhna chhanna chu dawnglo mahse pawi a ti hauhlo tih chu a mitmengah a lang reng mai.





"Ka mut a chhuaklo" ka tih chuan a mitmeng nalh fahran chuan awmze nei zetin min melh a, ka ngaihtuah ang hi a ngaihtuah ve mek tih ka hria.





Ka kawr haklai chu dimtein a pawt chho riai riai a, ka lo puih lai pawh chuan ka lak aṭanga mit la sawn lêkloin min en a, ka zam a ka khur ru dar dar tih te chu a hre ve hauhin ka ringlo.





A thawmhnaw phelhin min fawp leh a duhthawh leh uar takin a chet chhunzawm a, a chetdan a piang chu ka tan a vawikhatna a ni, duhthu ka lo sam ṭhin dan ang chu a nilo mahse, ka tana mipa hmasa ber a ni a ka hmangaih bawk, chuvangin Pathian leh kohhran hmaah chhe chhamna thu tiam pui kherlo mahila atana inpumpek chu ka la duh fan a ni.





Ka bianga mittui luangchu tuaihulin dimtein min fawp a, ka engkim ka hlan tak hi ka hmangaih ka Lalbera a nia lawm midang te chuan engpawh sawi sela a pawilo a ta chauh ka ni tih hi mi zawng zawngin an la hria ang.





"Enge i ngaihtuah a?" min en vung vung laia ka tih chuan "A danglam bik" tih zawngin min chhang a.





"Enge danglam?" a thilsawi chu ka hrethiam phalo.





"I vawikhatna a nia ka tan a ni velo tih i hriat kha" a tih chuan ka hnual rawih a, tinge tun hunah chutiang thu te a sawi chhuah kher kher le!





"Ti nge a danglam?" lawm fahranlo chunga ka lo tih chuan "Ka hmangaih vang che in" a lo ti leh mai a.





Ka sam chu ka bek lama hui chhoh pahin min en leh vang vang phawt a "Nang chuan i hrethiam pha kherlo ang kan hmangaih tak te nen chuan a danglam bik a ni, hetiang hian ka la awm ngailo, ka tan hian i danglam bik tak zet a ni" a tih chuan ka hlim veng veng mai, ka tan a Special ang bawkin a tan ka Special ve tih a sawia chu bak thildang ka mamawh chuanglo. Ni e, inhmangaih te inkarah chuan danglam bikna a nei ngei tur ania lawm, a awmah chuan ka bei hle hle a, tun hun hi kan tawng nawn leh tawh dawn silo a chelh din theih ka chak a ni.






(Dik taka thil ti ṭhintu chuan insawifiah a mamawh ngailo)


💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:07 pm

CHAPTER - 23




Zingah chuan hma takah ka tho a, ka nuamsamlo a ka na deuh ṭhemthumin ka hria, kan mu tlem viau nain ani pawh a harh rang hle a, a lo thawh chuan intifai zo tawhin eirawng bawl dan tur ka lo ngaihtuah mek a ni.





"I van tho hma ve?" ka sam rawn zut thuak pahin a ti a, Gas thuk bula ngawi renga ka lo ding chu maktih hmel lek lekin min en bawk a.





"Thildang zawng chu kan nei a, a eirawng bawl tur ber kan neilo a nih hi" ka lo tih chuan ṭhen sak sakin "Haihawt thlak lutuk" a lo ti chhuak hluk a.





"Nsa te inah frozen meat ka lei ho pawh ala awm vek, a hla chuanglo a ka va tlan lawk ange tuilum lo chhuang mai rawh" tiin a Helmet nen a inkhai chhuak zui a, nui var var chungin a kal liam chu ka en a ka hlim ru veng veng mai, ti hian nupa ang chuan kan awm chu a ni tawh mai si a, kan chhungten engtin tak ngai ang maw.





Gas ah chuan tuilum ka chhuanga, lo ngah pahin chhuat nawh ka tuma nizan khan ruah asur bawk nen kan rap chiau hneh viau a ni. Mahse, chhuat nawhna tur tak ngial pawh kan lo neilo, Veranda a thir tlangbanah chuan pawn chhe rawng kai nian nuan hi a lo inbanga a, chu chu sufaiin ka hmanga a fai mawh hrep mai.





Carpet kan phah vat angai dawn anih hi ka tih rilruk lai mekin Lalbera chu a lo thleng a, Polythene bag in eng enge maw hi a rawn khai haw ṭeuha thlaihnah leh sangha tih vel ang reng a ni, "Fridge kan nei silo a i va lei hnem ve" ka tih chuan "Thlai hnah hi Nsa nu min pek a nia" a lo ti a.





"Mahse, tinge buhfai i lei loh a" nui ṭha chunga ka tih leh chuan a chal a beng ri thlawp a, a haihawt a chhuak leh tlat tawh. "Ka va kal leh mai ange" tih pahin a in her vuta, chutah rawn lehhawi lehin "I pasal hi" nuisuk chunga ti lehin a kalzui nul nul a, ka nuih zui kar kar a a haihawt lutuk hi amah nen a inhmeh hlawllo a ni.





Eirawng ka bawl mawlh mawlh laichuan dawhkan tereuhte a a Phone a kalsan chu a lo ri ral ral a, lo Call tu chu a nu a ni, lak tur nge lakloh mai tur tih chu ka inngaihtuah buai nasa mai a, lo chhang ringawt ila enge ka sawi ang ka hrelo chuvangin ka rik zawh tir ṭhak ringawt a, ka awm a nuam theilo a ka hlauthawng nghal ringawt bawk.





Ka phone ka en a ka chhungte lam thung chu an la reh vung vung rih a, tunah zing dar 7 bawr chauh a la ni a, thawh pawh an la tho chhuak kherin ka ringlo.





Lalbera lo let leh chuan buhfai Bag a rawn phur haw a, lo hlanthlaksak tuma ka lo ban pui chu min hel nulh a "Nsa a lo kal dawna chaw chhum kep angai ang, tui khawihna inneitupain min siam sak lawk dawn anih chu" a ti zui zat a.




"Tui dahkhawlna pawh engmah kan neilo, chhuatnawhna pawh, neihloh kan ngah lutuk, vawin chu kan Bazar dawn a mi pawisa ka nei ve nual a nia" ka ti a.




"Pawisa chu ka nei alawm chawhnu lamah kan chhuak dawn nia" a lo ti ve mai a. Eirawng kan bawl dun a, choka chêt chu zeilo ve haih haih tak a ni "Lo va mu leh mai teh" ka ti deuh sek reng a, a ning ve deuh aniang inbual turin Bathroom ah a lut ta daih a, inbual paha a zai ri chu ngaithlain ka nui ka nui a, tihtak zetin han zai ve ṭhin sela chuan zaithiam tak zawng a nia lawm.





Inbual zawh chuan tukṭhuan kan eidun a, fiamthu thawh hranpa hauh silo hian nuihna tur zawngin a ṭawng renga a bula awm chu ka nui reng mai a a nuamin a hlimawm takzet a ni, ka chhungte pawh ka lo mangnghilh dera Nau-an min lo Call lo phei sela chuan ka rilru hahna te kha ka lo hrechang reng reng tawhlo.





"Uvîte tuithlar a duh anihloh chuan ka pain rawn haw rawh se ngaihdamna chhete ka la lantir theih laihian a ti a nia" Nau-a chuan a ti a amah zawk chu a rawn hlauthawng khawp mai. Mahse, let leh tuma chhuak ka ni tawhlo a, haw leh pawh niila pasal dang min neih tir a tuma chuvangin let leh chu ka tum tawh lo bur a ni.





"Ka lo haw dawnloh thu hrilh rawn Nau, a duhna lam lam hawi ka tum tawhlo min tuithlar a duh anih pawhin a pawilo a thu thu a lawm" ka lo ti ve hmak a, thinrim viau mahila ka rilru chhungril erawh ana vawng vawng tho a a chhan chu min hringtu ka pa ani tlat a.






Ka nuin Phone chu a laksak a "Khawiah nge in awm a?" a lo ti a, kan awmna chu hrilh pawh ka duh rihlo, ka nu chuan min ṭan tih hre tho mahila ka pa laka thil zep chu a tan thil hrehawm tak ani ve tlat si a, chuvangin ka hrilh thei biklo a ni.





"I pa nena in awmdan hi chu min ti mangang khawp mai, tih ngaihna che u pawh ka hre tawhlo, engpawh nise puitling i ni tawh a, i tana ṭha tur pawh i thliar hrang thiam turah ka ngai che a, ani kha i thlang mauh mai si a keichuan ka hnial bur lo ang che, i hlimna tho a lawm kan duh ber chu, i pa erawh a rilru a sehhel ema nangpawn awmdan i thiam dawn nia" a ti dap dap a, ka nu aw chuan ka lung a ti chhe leh ruai mai.





"Nu ka lo haw tawh dawnlo, ani pawn an in a chhuahsana" hnuk ulh ṭeuhin ka ti a, "Eng pawh nise in enkawl ṭha la, ani pawn a chhungte chhuahsan apan ngam che anih chuan a duh ve tak tak che anih pawh ka ringhlel lo, in duhdan khan han awm phawt mai teh u" thawk la hak chungin a ti a, ka nu rilru ka ti buai leh hle tawh a ni.






Ka nu nen kan inbiak zawh hnu lawk chuan Nsa leh pa pakhat hi an lo lut hlawl a, "Vîte tui khawihna kan lo siam dawn nia" Nsan a tih chuan Bathroom ah Lalbera a awm thu la lo hrilh a.





Chawhma chhung zawng chu tui khawihna an siama, an buai rei em avangin Bazar tur pawn kan chhuak lawk theilo a, an haw meuh chuan chawhnu her a ni ruai tawh a.






Kan thil leitur list te chu ka siam a mamawh chu a lo tam ngang mai "Fridge kan lei dawn ami?" a lo tih chuan "Aih angailo, a zualpui chiah ti rih ang kan inseng nasa dawn lutuk" ka lo ti vat a.





"Pawisa ka nei a lawm, ka u nena kan Join account a mi ka la chhuak thei ang, ATM card ka kawl a lawm" a lo ti mai a, Usangpuia sum lo hmansak ringawt pawh chu ka inthlahrung a ni. "Ka account a mi hi hmang hmasa ila" ka tih lahin a duh bik der lo.






Bazar turin kan chhuak a, kan mamawh ka ziah chhuah zawng zawng ka lei hnu chuan Bike a inphurh haw ngaihna a awm der lo mai a, a ṭhen ka phurh tira kei taxi in ka haw thunga, in kan thlen hnu chuan ka inrem ṭha mawlh mawlh a, chutih laiin Nau-a leh ka nuin min lo Phone chhawk sek renga kan awmna hmun chu ka pain hre ngei ngei turin a lo ti niawm tak a ni.






"Lo haw la Exam phawt la i pain a duh a, Remtluanga palai te pawh kan remloh thu kan lo hrilh ang ati anih chu" ka nuin a tih chuan ka awihlo ru kher mai. A hma pawn min buma a rukin Remtluanga nen min lo phiar ru anih si kha.






"Ka lo haw dawnlo, pasal ka nei tawh" ka ti ringawt lehnghal a, ka nu bula chutiang tehtawla ka sawi chu ka inthiamlo viau nain lungawiloh sa nen han hnial ngaihna vak ka hrelo a ni.






"Karleh ah in Exam dawn a Exam i tum lo ami?" a tih leh chuan "Tumlo hna ka zawng mai ang" ka ti lehnghal zat a. "I lo haw dawnlo anih pawhin Exam tho rawh, i lehkhabu ho chu i nau ka lo dah tir ang in awmna chu sawila" lawmlo zeta ka nuin a tih chuan ka ngaihtuahna a tibuai takzet a ni, Exam chu a ṭha mahse, tunah tut tut kan awmna hrilh chu ka duhlo.






Ka nu ka biaklai meka kan kawngkhara rawn lang te vang chuan ka tim chawih a, "Nu zanah kan inbe leh dawnnia" tiin phone chu ka ti tawp rih a, Lalbera nu leh pa te lo inzuilut mek chu ngawih rengin ka lo en tawp a, pindan aṭanga Lalbera lo chhuak chuan a rawn hmu ve nghalzat bawk a.





"Lalnunsanga in lo Ambush lehpek a nimaw?" nersawk chunga a nu en pah chuan a ti a, "I laktlakloh êmai, hetiang ringawta khawsak reng ringawt mai" anu chuan a lo ti hlak a.





"Inlo kal dawn chuan lo sawi hmasak ve tur a lawm, ka Guiter kha lo chah che u ka duh a sin" tum hmuk chungin a lo ti leh a, Nu siamtei meng thip ram chu nui lek lek chungin a en a, kei erawh ṭi zetin an piahah chuan ka lo dinga, nuamlo ka ti kher mai.




"Mawlah pawh hian mawl chin tawk a awm Malsawmhlu" a nuin vin zeta a tih takah chuan a kekawr ipte zen hlan chungin a nu chu a en a, "Bengchheng hluai ṭhin suh, ṭhenawm hnaiin an hre pha ange" a pa chuan alo ti ve bawk a.





"Vîtei pa in a tihdan zawng zawng che kha i hrereng a nilawm ni, i duhtawkna te pawh nei ve ta che" anu thilsawi laichuan ka lam lo hawiin "Lo va kalsawn lawk mai rawh" zawi sapin a ti a, chu chu keipawn a ṭha zawkin ka hria, Veranda ah chuan chhuakin an ṭawng chu ka ngaihthla zui ta tho a, a nu ang hlaih hlaih ri chuan min ti na ngut ngut mai.





"Khatiang khawpa a hnar hnuah che pawh keini chuan kan pawm sak che a, amah lamah harsatna kan nei hmasa ani biklo, kan palai te dawtin a lo chhawn a khatiang misual lakah khan inphah hniam kan tum reng reng hleinem, nangmah leh nangmah i inti te mai mai tih te hi i hria em, an fanu hi i phulo te an ti che a nilawm ni" Nu Siamtei chuan a ti hmarh hmarh a, ka dang a ro zo vekin ka hria.





"A duh duh danin min sawi sela pawi ka ti hleinem, ka phulo miau a lawm" Lalbera chuan a lo ti mai a. "Malsawm..nangmah chiah inngaihtuah loin i chhungte hi ngaihtuah ve rawh" vin zeta Nu siamtein a tih leh chuan "A va mak vak vak e aw, a thinrimlo zawngin a sawi theih" Pa Rinan a lo ti hlak a.





"Khatin lo ṭan ziah zel suh, nangman i khuahkhirh loh lutuk vanga rilru puitling pu thei miahlo anih hi, tunah hei han en ta che chhungkaw innghahna tur, min chawmtu tur ani tih pawh hreloin nupui a ruk zanah a indan nghal rik ngawt hi" Nu siamtein a tih leh chhuan "Ka chawm hmelloh che emai, school aṭanga i chawlh hunah pawh pension i la dawn a, chawm theihna tur che Chance ka neilo hrim hrim" nui lek lek chungin Lalberan a lo ti a, an hmel chu ka va hmu pha kherlo nain Nusiamtei chu a lawmlo kherin ka ring.





"Rawn haw ang che i pi leh pu te ngaihdan pawh a ni zozai tawh biklo, palai inkalthuah te phei chu a zahin a zahthlak lutuk tlat, Aruati pawh ngaihtuah tella, hetia awm ringawt tur a nilo" awki dam deuh zawka Nu siamtein a tih chuan Lalbera chhanna chu ka lo ngaichang a.





"Ka lo haw theilo ang, Vîtein a chhungte a kalsan a tunah chuan keimah chauh hi a chhungkua ka ni tawh, ka lo haw dawn anih chuan amah nena kan lo haw angai ang" Lalbera aw chu a nghet charh mai. Ka dinna hmunah ka lo i petruh fan fan a, a thilsawi tawi te chuan a ta ah min siam hliah hliah a ni.





"I duh leh rawn haw malêk la animai alawm, apa chêtdan vang hrim hrim pawh hian lo lut turin kan duh tawh biklo" bak zeta a tihlai chuan Pa Rina chuan a lo khap vat a.





"Anih chuan va haw tawh rawh u, nidangah chuan i nui var var thei anihloh chuan lo kal tawh suh" Lalbera a lo ti nghut a, inbeng ri thlawp ri ka hre nghalzat mai, anu chuan Lalbera chu a beng niin ka hria.




"I tum hmel kha keng loin i lo leng ṭhin dawn nia" nui chungin pakhat lahchuan ala ti tak deuh deuh a, tun hun hi a nu runluih hun a ni hauhlo asin le, ka hlauh ang ngeiin a ri leh thlawp mai, anu chu a chhaih kawlh chiang a ni.






Tukverh darthlalang a ṭanga ka en laichuan Lalbera chuan a ban a tuai vut vut a, nu ṭhaw chungin a nu chu a melh bawka, an nufa inkar chu ka hrethiam pha ve hauhlo.






"Thlatin i in checkup a ngai a, therapy lak i ngai reng bawk, engtia khawsak nge i tum i Bike pawh i thawhchhuahin i enkawl zo lo anih laiin ka indang e te itih, i rawn haw lo anih chuan cheng khat pawh ka pawisa i hmang tawh dawnlo ania" a nuin a tih hlak hlak lai chuan "A mâk!" tih pahin a lo chek leh hlak ṭhin a.






"Mipa ka nia lawm le hna ka zawng mai ang" pakhat lah chuan a lo ti sam et a.




"I u Gym enkawl dil mai la" a pain a lo ti zauh a, "Lo sawi mai mai suh" Nu siamtei chuan a lo ti nghal hlar a, a pa zawk chu a ngawi dak mai.




"Hna ka hmu mai ang, min ngaihtuahlo ula va haw tawh rawh u" Lalbera bawk chuan a lo ti leh a.





"Lo haw la i Bike duh deuh kha ka leisak dawn che nia, i sumdawnna tur pawh ka ngaihtuahsak ang che, i lo haw anih chuan VLI pawh a let veleh mai dawn alawm" damthluamin Nu siamtei chuan ti leh a, a awki a thlak zung zung mai chu mak ka ti lek lek a ni.





"Lo haw te chu ka duh alawm mahse, ka nupui nenlo chuan ka lo haw dawnlo" pakhat chuan a lo ti ve leh hmiah thung a.





"Chu ti na na na lo haw reng reng suh, ka thlem nawn tawhlo ang che " a nu chuan a ti ta erh a, haw tuma kawngkhar lam a rawn pan laichuan kei chu a hmuhloh theih ang ber turin tui zem phenah chuan ka ṭhulut nghal thuai a, "Tiang em ema fapa mawl han neih mai chu" an motor dahna lampan chung chuan a la ti phei hlak hlak a, an tlan liam hnu chuan ka thaw lo huai mai a, ka ṭanna lamah ka kut ka lo hum thlamdup hman nghe nghe a ni.





"Lo lut tawhla" ka hnunglam aṭanga a lo tih chuan ka hawichhuak vat a, tukverh hawngin min lo en reng tawh a.





Ka tho chhuak ṭhem ṭhem a ka tha a zalo kher mai, chawei ka siam a Lalbera chuan thil thleng zo chiah kha engmah thlenglo ang hmakin a awm a, sawipui chak viau mahila aman a sawizui silo a, sawi ngai ah a ruat lo ania nge.




***

Kar a liam a ka chhungte lam pawn haw turin min la sawm ngawrh hle a, chutiang bawkin Lalbera pawh mahse, a tu ve ve mah chuan kan uksak ṭha duhlo a, U sangpuia erawhin min rawn tlawh zauh zauh a, hmel hlimlo min hmuh ngailo a, mipa puitling tak leh fel tak niin ka hria.




Exam chu ka nei ta lo a, a dawn hnaiha ka inbuatsaih ṭhatloh vanga zuamlo ka ni deuh ber. Lalbera ṭhiante an lo lengfo a chawei khawm te pawh an nei a, kan inah zu in ka phalloh vangin an lo leng tam lutuk hranlo zawk a.





Remtluangan min lo biak a tum fo a vangin a number chu ka block a, ani nen engthil pawimawh mah sawitur kan neilo tih ka chiang viau a ni. Hna ka zawnga Gabriela te hotelah hna chhe te chu a awm a, hna ṭha zawk ka hmuh hmaa thawh mai mai rih ka hrehloh laiin Lalberan a remti tlatlo a, Hotela thawh chuan tlema ka haw tlai deuh angai dawna, chu chu rem a tihloh chhan ber a ni.




Private school ah ka thawk ta rih a hlawh phei chu a tamlo mahse, a hna erawh nuam ka tih chi tak a ni thung, Lalbera chuan Usangpuia Gym pakhat a enkawl riha, ani pawh a chhungte dang nen chuan an la intlawhpawh biklo a, a nu leh a pi erawhin a ruk tak chuan an ngaihtuah a Usangapuia hnenah incheckup leh therapy lak tur chu an lo chah awllo a, a hunah chuan Usangpuian a hruai mai ṭhina , amah pawh a damṭha sawt viau mai.






A ṭhiante an lo leng fo tak nain amah ber hi a leng chhuak khat hle a, a lenchhuah ṭum pawhin hma takah a lo haw le ṭhin a, zu rim anam ngailo a, rui hmel a pu ngai heklo, kan inkar pawh aṭhain kan hlim dun a kan hlimna tizual turin thla thum hnuah nau ka keng zui a, ka hrilhtirh chuan a hamhaih lek lek a a hlim hle bawk.





Naute chu mipa nise a ti ngang mai, a phur a min duat em em a reng bawk, eitur naupai tana ṭha tur an tih ang chi chu a lei mawlh mawlh reng a, ka pai aṭangin ka hna chu chawl mai turin min ti nghal thawr mai bawk a, keilahin ka pum a len hma chu chawlh ka duh bik aw kawnglo.





Beiseina sang tak nen hma hun kan thlir duna, sum lamah harsatna kan nei rihlo a kan pahnih inkar a ṭhat bawk avangin kan hlimdun takzet a ni.


images - 2020-08-25T153549.451.jpeg
images - 2020-08-25T153549.451.jpeg (33.95 KiB) Viewed 5862 times



Ka naupai thu chu ka nu ka hriattira min hmu turin a lo kal thuai a, a lo kal ṭum chuan Vitamin leh eitur chi hrang hrang minlo ken a, aṭawngka in sawilo mahse min lawmpui ve hle tih ka hre thei a ni, damdawi eitur te naupailaia tih leh tihloh tur te chu min hrilh mawlh mawlh a, kan inluah chu a thlek kual a "Nakinah in mamawh lo sawila, i nau ka lo leitir dawnnia" a ti a.





Lalbera chanchin pawh min zawt duah a, "A fel em? Ala rui ngai em?" tih ang reng a ni, ka chhandan vang chuan hahdam huai hmel a pu a, tlai eirawngbawl hunah Nau-an a lo lam a, an kal dawn chuan pawisa min pe a "Naupai laichuan in enkawl ṭhat angai a nia, i eichak zawng leinan i hmang dawn nia" a ti a, nu te nge nge a mi duhsakna chuan thla a timuang sawng sawng a hnuk a ulh lek lek hial a ni.





Ka nu te kal liam hnu lawkah Lalbera chu a lo thleng ve a "Inleng kan nei elaw?" dawhkana thingpui no ruak a hmuhrual chuan min zawt a, "Umm...ka nu a lo leng a, thei leh damdawi te min lo ken a" ka lo ti a.





"A va fel ve, vawin i chawl a mi?" a thil khailai min pek pahin a ti a, nidang ang bawkin ice cream leh eitur chi hrang hrang a ni. "Ka nuin minlo Phone sia chawhnu ah ka haw hma daih a lawm" ka tih chuan "Chawl daih tawh maila, i naupai chhung chu inah lo awm zawk la" a lo ti a.





"Keimah chauha ina awm ka peihbik hleinem, nanglah i chhuak daih zel bawk si" pangchang fe a ka tih chuan a lo nui a "I duh chuan ka bulah i lo kal ve dawn nia mahse, nilengin mi ritchawi lai hmuh a ngaia a hahthlak i ti mai thei a ni" a ti a, chutiang kher kher chu ka chak lo tawp mai.





"Zanriah eikhamah ka Laptop ah Movie kan en duna, a muthlu lup lup renga a chau deuh ningei tur a ni, puan ka sin ṭhattir a kei erawh ka ke sa vang chuan ka muhil lawk theilo a, hetiang hian tunhnai lawk a ṭangin ka awm ṭhina, zanah hian ka muhil theilo ziah ṭhin.




Ka inlet tawn seka reng a ka puansin te ka leng thla thul, a hrehawm duh ngang mai.





"Ezra, ka muhil theilo" pangchang zeta a awma bei sawt sawt paha ka tih chuan min lo kuah vat a, ka ke ka leng zui at at chu a ke chuan a rawn tlawh a "Ka ning tawh ê" ka lo tih tlawk tlawk lai chuan khum aṭanga tho chhuakin Oil ava la a ka ke chu min hmehsak a, a malchungah chuan ke thluang ar chungin khumah ka ṭhu awn diai a, ka ke a hmet lai chu ka en reng bawk.





"Vitamin tlak chham i nei ani maithei" a tih chuan ka ngaihtuah zuia tlakchham enge ka neih ang ka hrethiamlo kher mai, ka taksain a mamawh ang tur aia tam mah hi nitin ka eizawkin ka hria.





"A reh ve leh mai ang lo mu tawh rawh" ka tih chuan min enin a nui a "Tikhan muhil rawh, i muthilh hnuah ka lo mu ang" a lo ti ve tlat thung a.


***


Inrinni tlaikhat chu Johana leh Ruatan chaw an lo ei a, Nsa chaw eikham lo leng nen kan ri laih laih a, engtik laiin nge zu an lo in ho hman ka hrelo, a rim ka hriat chuan an lo kai hlawm viau tawh a ni, ka zawh lahin "Beer mai mai" an ti tlat pek a, Lalbera erawh ka zawt zui duh tawhlo, ka duhloh zia a hria a ka duhloh zawnga khawsak a duh tlat anih chuan sawitheih ka nei tawhlo.





A ṭhiante tana nelawmloh tak nih hi ka duh ngailo a, chutiang tak chuan ka awmin ka inhre bawk, an zu in hi ngaitheilo viau ṭhin mahila ka insum hram hram ṭhin. Midang hmuhlaia inhauh leh inchhuahchhal te ka duhlo a, a ṭhiante hmuhlai ngat phei chuan ka lungawilo hle anih pawhin ṭawngkam vin a lakah ka hmang ngailo.





Thingpui ka siamlai chuan Fridge a tui bottle ala chhuak meka, ka lo en reng tih a hmuh chuan kal mai atum chu a ding leh dat a, ka lam rawn panin min nuihtlawn titih in ka hria.






"Ka in ve lo ania aw, a rukin an ina an zahloh vang che anilo ania, i hmuh an hlau lutuk" an ti ringawt peka, "Chuti maw?" tih zawngin ka lo chhang a, phal tak anga lo lan kha ka duhlo a ni.





A ṭhiante haw hnuchuan in ka tifai mawlh mawlh a, mut dawna a inbual ṭhin avangin a inbualna tur tui ka lum sak a, pindan aṭanga Towel bat chunga a lo chhuak chuan a chal a dawm vung vunga a ngui lupin ka hria.





Bathroom a a lut zui tharh chu umzuiin kawngkhar chu ka beng dat dat a "Ezra tuilum ka chhuang asin" ka tih chuan a lo hawng leh vat a, nichin lawkah a tui a sat tawh thu ka hrilh a a lo theihnghilh leh hman der tawh a ni, a natna vangin a haihawt zo vek tih ka hriat tawh vangin a theihngilh tih hriattir kherlo in ka hrilhnawn leh mai ṭhin a, chu chu atan pawh anawm zawk ka ring.






"Ka lo khâiluh sak dawn che a mi?" ka tih chuan ka bianga fawh zauh pahin "A ngailo, lo va mu lum tawh rawh" a lo ti var a.





Ka mutsan a alo mu ve vat ang chu ka tihlaiin a inbual rei hrep mai, mut hmunah Margareti nen kan inbiak avangin ka lo hre lawklo nghe nghe a, tho chhuaka ka va en chuan Bathroom ah a lo la awm reng a darkar chanve zet a inbual tawh a chutiang em em a rei chu nidangah a inbual ngailo, thlasik vanglai ani a khua lah chu avawt nasa mai bawk si a.





"Ezra i zo dawn tawh em?" ka tih chuan min chhang hauhlo a.





"Lalber" Bathroom kawngkhar chu ka beng ri dawt dawt a, a hawn rualin phawk zetin ka lo en zui a.




"Ih...englo ..kha.." a ṭawng a bah nak mai.




"Engmaw, i inbual zo tawh em?" ka lo tih chuan a mitmeng tal tap chu ka hmu zui zat a. "Towel ka theihnghilh daih" a tih chuan min ti buai ta nak "Ezra Towel chu i veng reng a lawm" ka tih chuan a in en vut a "Anih hi" tih leh pahin a nui tawi tak a, a meng phi deuh riai maiin ka hria.





"Ka inbual reilo ang, lo va mu rawh" tihpaha luh leh mai tuma a che vut chu kuai herin ka kut pahnih chuan a biang lehlam ve ve a ka dawm sak a, zu a in ve nge ni ruih nei a ang riau a ni.






"I rui nge ni a i nuamsamlo?" a mitah tak en chunga ka tih chuan "Ka rui ngai tawhlo tih i hriat kha" tih pahin ka hnar a piai zauh a. Bathroom a a luh leh hnu chuan mutsan tawhloin ka nghak a, ka ke sa chu tuiluma chiah ka duh vangin tui ka chhuang zui a, a lo chhuahlai chuan chhuatah ka ke chu tuilum chuan ka lo chiah mek a, engmah sawi set setloin ke hrukna ala a, ka ke chu a rawn hru nghal mawlh mawlh a, min en miahlo a a nui ruh ruh chu enin keipawh ka nui a, a duh hi chuan miduat thiam tak hi chu a ni ve chiang a ni.





Ni a liama ka naupai pawh thlahnih a pum ve ta reng mai, insawiselna ka neilo a chu ahnekin thil ei a tui a ka thau telh telh a ka in Fit-lo zual deuh deuh bawk, tai bawr na leh kawngna ka neih zeuh zeuh chu ka awm awl lutuk vangah ka ruat ber a, School banah Ezra bulah ka kal ve ta fo a an Instructor palian pui mai hian naupai laia Exer lak pawimawh zia minlo hrilh ṭeuha chuta ṭang chuan hma deuhah thoin kan kawt kawngpuiah chuan ka teihawi ṭhin a, ka sil ṭhem ṭhum reng pawh chu a tiziaawm phah deuhin ka hria.





Tuk khat chu kan pahnihin kan Exercise kan la duna, veng ṭhenawm thleng kein kan kaldun a, khawlaia eitur zuar awmna ah thil ei ka rawt a, kan hawlam ah chuan Bike chak deuha rawn tlan hian min rawn tawi thuaka leiah ka ṭhuhnawk nghe nghe. Ka bula mi chuan ring zetin a au zui a, ka lehhawi chuan kawngkawia Bike tlanliam chu ka hmu hman ṭawk a ni.






"Ka Bike keng ila chuan ava han chak dawnlo mai mai e aw" Lalberan a ti zui hluk a, min kaihthawh a tum chu ka tho chhuak mai theilo, ka ke rek chu ana ngut ngut a ka ṭhutthlak zawng khan ka bilh sual deuh ni ngei tur a ni.





Ka kal bai suih suih a "Ka pua ang che" a tih lahin ka duh biklo, kawng kal an tam si a a zah pawh a zahthlak.




In kan thlen chuan a vung deuh ula, min tuam khawng sak hnu pawhin ana nget nget reng a, khawvawh vangin a na zualah ka ngai a School kal ka ngaih si vang chuan ka thinrim thar hle bawk.





"Ka hruai ang che, bang tawh mai la aṭha ang Headmaster hnenah vawinah sawila" a lo tih chuan ka tum bar a, nau neih dawn hnaih chu ni se chawlh pawi ka tilo a, tunah chuan a la hla rih si a, engmah tihtur nei lemlo a chawlh ringawt chu ka duh biklo.





School ah chuan min thlah a, tlai banah min rawn lam tur thu a sawi avangin kan ban hnu chuan kal mailoin ka nghak rih a, alo kal har em vangin ka call a, Gym instructor in Phone chu a lo chhang a, a phone a theihnghilh ni awm tak a ni "Kan nu hruai ka ngai a tia a lo chhuak tawh a, hei a Phone hi a theihnghilh a nih hi" a lo ti a.






A lo kal mek anih ka ring, midang an haw tak sap sap avangin pawn Gate bulah chuan ka lo nghak a, thawhpui ten an ruala haw tura min sawm pawhin "Kan pa in minlo lam dawn a" tiin ka lo chhang a.





Ka nghak rei ta zek mai, dar kar a tling ṭhelh a ni, ruah a sur mai a hlauhthawn awm bawk si a, nghak tawhlo chuan Taxi lain ka haw vang vang a, kan in bul ka thlen chuan Veranda a alo vei vut vut chu ka va hmu a, minti lawmlo takzet a ni, sawtah khan rei fe ka nghak a, haw ringawt lo phei ila chuan ka va han nghak thlawn nasa dawn tehlul em.





Min hmuh rualin rum zetin min lo melh phawt a "I va haw tlai ve" a lo ti bak hluk mai, veleh ringawt ṭhin chuan a.





Chhan pawh chhang buai duhlo chuan ka melh ve hrawk a, inchhung lamah ka luhsan zui zat bawk, "Dar engzatah nge in ban a, kha i meng rum lehnghal" tihpahin pindan ka lut tlang chu min lo zui ve zel a.





"Ka lo hruai ang che i tia nilawm ni i lo kal leh tawp silo, mi te chu ilo la vin lehta nghal a" titau bar bar chung chuan ka Bag chu khum chungah ka thehthla hnawk a, ka enlai chuan a hmui a lo petsawi nang a.





"Vawin chu ka buai deuh a" a ti zawi ta sup a, "Anih dawn kha, i phone pawh i theihnghilh daih a lawm" ka tih chuan a indap rak rak a.





Eirawng ka bawl laichuan dawhkan kilin a lo ṭhu a, a tum vuau reng mai chu ka nuih ta ringawt a, thinrim chak em em thinrimna tur hresilo hi a ang ber.





"Ka phone chu ka va la teh ang" tihpahin a tho hluai a, dawhkana a Helmet dah chu a ban nghal vut bawk a.





"Lak lak a ngai hleinem naktukah ring nghal mai rawh" ka tih chuan inthlahrun hmel deuh hian min lo en a, Chair ah ṭhu lehin a ngawi vung vung a, thawk a la leh hluai ṭhina engthil emaw rilru kap ru tu nei ang maiin a awm a, ka ngaih a ti ṭha lo kher mai.





"Ka nuamsamlo emai ka mudawn ania, Johana te an lo kal chuan min lo kaitho dawn nia" a ti a, mu tura a kal zui chu ngaihṭha zanlo chuan ka en zui a. Ani hi anatna vang hian a talbuai leh deuh tlat tawhin ka hria, Usangpuia hrilh mai tur em mawni dawn le?





Zanriah eitura kaihthawh ka tum chu a muttui em vangin ka kaitho duh ta lo a, kalsan leh mai ka tum laichuan a ṭawngvai niah niah a, a pang ka deh chuan a lo sa leh vur tawh.





Ka kai tho zuia "Chaw ka ei chak rihlo, nangmahin eimai rawh aw" mengphi chial chungin a ti a, min ti mangang takzet a ni, nachhawkna ka eitir hnuah chuan a mu ṭha sat sat a.





Usangpuia chu ka bia a "Naktuk hi a in checkup ni a nia lawm, a damdawi kan thlak tir dawnnia" a lo ti a. "A khua a sik hluah kher zel hi ka hrethiamlo, enga tinge mawni dawn le?" ka tih chuan a ngaihna vak a hrebiklo, Doctor ten a natna hi pawnlam niloin Mental lam a ni an ti mauh mai sia mahse, a natna a chhuah a piangin a lu a na a, a talbual nghal zel mai a, engemaw tak hi thil felhlel a awm a ni.






A bulah chuan muin ka kuah hle hle a, chutah ka lam rawn hawiin ka awmah a hmai a phum sauh sauh a nghet deuhin min kuah a, a thaw sa ham ham chu ka kawr hak chhan a ṭang pawh chuan ka hre thei a, a muhil miahlo ti ka hria.





A hnung chu ka beng thek thek a, duat a ni tih inhre takin ka awmah a bei thlam a, ka fapa ah ka chan a ka nuih a za ru kher mai, "Min kuah rawh" ka kawnga a kuahna tih ngheh sauh paha a tih chuan aia nghet lehzual chuan ka lo kuah a, a thaw ri sak sak a reilo teah a muhil lehnghal thuai bawk.





Zinga ka thawh chuan a lo tho chhuak daih tawh a, choka lama thil kang ri sar sar ri ka hriat chuan ka nuisak a. Ka va chhuah phei chuan Artui a lo kang a, damṭha var hmel a pu leh tawh chu mak ka ti lek lek hial a ni.





"I ṭha deuh tawh a mi a" ka tih chuan "Ṭhatloh lai ka neilo" mit min siai zauh chungin a ti a, "Lo ṭhu rawh, chaw ei ka lo siam dawn" tih leh Chair a min nam ṭhut a rual a, a chawhmeh siam a rawn chhawp ho chu enin ka nui ka nui a, a thilsiam chu Artui leh Tomato aṭanga siam hlir a ni.





Hma deuhah Usangpuia a lo thleng a, incheckup tur chuan an inzui a, kei erawh School lampanin ka kal chhuak a, ka thlen hnu thleng pawhin Doctorin engtin nge a lo tih ang tih hriatchakna chuan ka rilru a luahlo theilo a ni.




Tlaia ka haw chuan a lo thleng leh diam tawh a "Enge vawin result chu" awki zangkhai vah a ka tih chuan a ner sak a,




"Angai ang tho kha a nimai damdawi dang min chawh leh a " ngaih sam fein alo ti a, chumi zan chuan Johana te ṭhianho J.mala telin an lo lenga, an ri le lu a, Lalbera pawh na a neilo a niang a nui ring ham ham viau a, chu chuan ka awm a lo ti nuam ve em em thung.





Thla a liam leh meuh chuan ani pawh a damṭha leh tawh viau a ni, Gym lamah nitin a kala, Usangpuian a Gym pakhat zawk chu a kutah a dah chawt a, a hna chu a tui a niang peihlo taka chhuah a nei ve ngailo.





Kei ve thung chuan insawiselna neuh neuh ka nei chho a, School a thawk tawhlo tura min hrilh cham chi chung pawhin ka la ti lui ve zela, kan inhauh phah lo na chu a lawmlo hle thunga, chu vang chuan keipawn chawlh mai chu a ṭhain ka hria a, Headmaster bula ka sawi chuan "Thla hnih vel chu kal leh la, ila rai lianlo bawk a, Final exam zawh ah law law chawl mai rawh" a lo ti a, keipawn ka hnial zui ta biklo.





Zankhat ka mu chu ka mutna huh dap vang chuan ka harh hlawl a, zun ka cheh ta emaw ka ti hman hial a mahse, ka en chian chuan ka hlauthawng ta kher mai, ka thi a lo put a atam em em bawk.




"Ezra tho teh" sawi nawk nawk chungin ka ti a, a harh rang kher mai.




"Ka thi a put a nia" ka tih chuan "A thla nei a awm kha" inkhuh ṭhat leh sat sat pahin a ti a, "Harh rawh, harh rawh ka thi hi a put tur anilo, railai a thi put chu anihdan tur a nilo" ka tih leh chuan a rawn ṭhu chhuak nghal zawt a.




"Tinge, diklo a awm a mi?" a hmela hlauhthawnna chu ka hmuhhmaihlo, kei aimahin a hlauhthawn hmel zawk.




"Ka hrelo ka nu kan bia ange" tih leh ka nu call ka rual a, ani pawh a lo mu tawh a thil awmzia ka zawh chuan "Hlau thawng vak suh thi put ve zeuh chu a awm ṭhin a lawm a reh ve leh mai ang, Dodo a ka pailai khan keipawh a put a, a reh ve leh mai alawm, duhleh naktukah incheck up ula" a lo ti a, ngaihṭhatloh na em em ka nei ta lo, Margareti rai lai pawh khan hetiang hi chu ka hre tawh a ni.





Mahse, a tukah pawh chuan a reh hauhlo mai a, a tam telh telh zawkin ka hria, ka chau a ka taksa chu ana em em bawk, School ah pawh chuan ka ṭhu hleitheilo a, haw ka dila kawng kal tak ngial pawh ka ti hleithei meuhlo.





In ka thlen chuan intifaiin ka muzal a, ka tai bawr leh kawng na lutuk vang chuan mut pawh chu a nuam chuanglo. A dik dawnlo tlata ka hriat vangin Lalbera ka phone a a lo thlen chuan ka chau hluah hluah tawh.





"Hna ah kal tawh suh ka ti che a, in dim rawh ka ti mawlh mawlh chung che in ka thu i zawm duhlo a i tawrh phah a nih hi" tiin min mawhchhiat zui der lehnghal a. "Hetiang ani dawn tih ka hre biklo a lawm" ka tih pawh chuan a lo thinrim hlur a ka ṭawngzui ngam tawhlo.





Damdawiinah kan kal a, Doctorin minlo en chhuan kan beiseilo zet mai chhanna minlo pe a, kan Doctor thil min lo hrilh chuan min ṭhawng dun kher mai!





"Naute hi kan tih tlak mai angai ani, chuti anihloh chuan i nunna atan ahlauhawm lutuk" tih thu min hrilh lai chuan ka vai riai mai.




Naute tih tlak maw!



"Chulo chu tihdan kawngdang a awmlo ami?" Lalberan a lo ti vat a.





"Tunah chuan awm tawhlo, insawiselna i neih tirh khan lo kal vat la chuan tihdan a awm mai thei a mahse, kan tlai deuh tawh a ni" Doctor chuan a ti a, sawi ve tur reng ka hrelo.





"Kan paih zawh ah i chhul kan ziat bawk ang, i tan naupai lehna chance a tlem viau bawk" Doctor chuan a ti leh a, a thil sawi tin mai chuan min ṭawng dawt dawt a, ka rilru natna lakah chuan ka taksa na chu eng tham mah a nilo, ka pasal mitmenga min huatna lo lang chuan min ti na zual hle bawk.





Ka naute, thla thum ngawt ka pum chhungah awmin ka thawk lak rualin thawk a la ve a, ka lungphu min ṭawmpuia keimah rinchhana nung ve kha a awmtawh dawnlo maw?




Naute, i hmel kan hmu thei dawnlo maw?



Ka mittui a sur zung zung a, Lalbera kalchhuak chu melhin ka heh ka pet fan fan a.





'Keima thiamloh ani, ka fimkhurlo a thildang ngaihtuahin nang ka lo ngaihthah che a, min ngaidam rawh aw naute, inu tlaw luatah ipa nen pawh in inhmu thei dawn ta silo. Ânu hi ngaidam lul ang che aw naute'





(Sunday zan awl ang aw....ka whatsapp groupah sunday story ka dah e)


💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 1st, 2020, 5:08 pm

CHAPTER - 24




Ka pum chhunga Naute insiam mek chu lak chhuah a ni a, chumi hnuah ka chhul an ziat leh bawk a, Doctor-in Bedrest tura mintih zui tak avangin engmah ti theiloin ka mu chawrh chawrh a reng a, a khawhar thlak ṭhin kher mai.







Ka nuin a rukin min lo kan fo a, Margareti te nufa an lo leng zeuh zeuh bawka naupang an harh em avang leh ka damsamloh vang chuan a duh ang pawhin ka ṭhiannu chuan min ngaihsak thei biklo.







Nu Siamtei pawn min rawn tlawh ve a, eitur eng engemaw te pawh min lo ken a, ka muthilh laia a lo kal avangin biak phei chu kan inbe lo a, min lo tlawh hrim hrim pawh chu ka lawm tawk viau a ni.







Zanah Lalbera ṭhiante ho an lo kal fo a, khuma ka mut tlat vang chuan tutu te nge lo kal tih phei chu ka hre ngailo, an thawm a ṭha thei viau a, an ṭawng ri te chu ka muthmun a ṭangin ka lo ngaithla ve ṭhin a, an aw aṭang mai chuan an ruih hmelin hmeichhia te pawh lo kal an awmin ka hria a, zan thum laichu hmeichhe aw ka hre tel tawh a ni, a hmel ka hmuh theihloh vangin tunge tih phei chu ka hrelo, Lalbera ṭhian te ngaihzawng anih ka ring.







Zan khat a ṭhiante haw hnua a lo mu chu zu rim a nam a, rui tak phei chu niin ka hrelo, nau kan chhiat hnuah kan nupa kar hi inpawh tak angin lang mahila tun hma kan phalo a, a ṭhiante an lo len ṭhin a ṭang phei hi chuan a ngawi chawi a, kan titi dun khat ta viau mai.







Chumi zan aṭang chuan zu a in ve leh ta fo maia, a rim erawh thup a tum ve viau ṭhin a keilahin ka hre rang nasa mai si a, a thup zo meuh lo a ni. Naute kan chân vang chuan kei ang bawkin a tuar ve tih ka hria a zu lama a ṭuan kher erawh a pawi ka ti vawng vawng ṭhin.







Hnem ngaihna ka hrelo a, han hnem thei bik pawh ka awmlo, zawi zawiin a zia ve mai ang ka tih laiin kan inkar ṭhalo chuan punlun lam a pan zawk zel niin ka hre tawh. Usangpuia lo len ṭum chuan ka lo sawipui zauh a "Ka lo be dawn nia i rilru ti hah suh, Mental illness hian a sawp chau ve tawh em a nih hi, naute in chhiat vangin a zualkai te pawh aniang naktukah hna a a lokal hunah a Doctor ka va hmuhpui dawnnia" a lo ti a.







A tuk tlaia a lo haw chu a ngui hle a, ka biak pawhin a rul tawh lek lekin min chhang a, chaw ei ka siam dawn chuan bak zet hian "Lo zuk ṭhu mai mai teh" alo ti vin hlar a, ka rinloh lutuka minlo vin chiam vang chuan ka thinphu a rang zawih zawih hial a.







Chawei dawhkan kil chuan ka ṭhu ngui bar a, chawhmeh a lo chhawp laia ka lo en pawh chuan min en duh lo a, chuta karah lawmlo tih hriat lutuk hian a hmel chu a dur khap a, ka awm a nuamloin ka ṭi dek ringawt mai.






Chaw min pe a "Ei rawh" tih ngawt a sawi a, ka rilru no rawn chhuakin ka ṭah a chhuak et et a ka ṭah lohnan ka inpet fan fan thung.






"Ei ta che" vin zeta a rawn tih leh chuan bar luih ka tum ngial a, ka ṭah chhuak insum nasa lutuk chuan ka awm chhung lamah min hnawh tawt urh reng bawk si a ka lem hleithei lo chuan chaw chu ka hmuam ṭun a, dawhkana thleng inchawp ho chu ka melh ngawih ngawih reng ringawt a, ṭah chhuah hawk ka chak ber.







Ka awmdan a hmuh chuan rum nghat chungin ka thleng chu a pawt sawk a, chawhmeh kan tuichuan a chawm bawrh bawrh a, ka lamah rawn nawr phei leh zawtin "Ei rawh" a ti leh nghat a, a hma aichuan a aw chu a vin tawhlo mahse, ui ang lekin min ngaiin ka hria a, a aw pawhin nelawmna a nei chuang hauhlo.







Chaw chu fianin ka hawp a, lem ṭha hleitheilo chuan ka inbarh mawlh mawlh a, min en tih ka hria. A hmel chu ka en duh lo a ka en chuan ka ṭap thei mai dawnin ka hria a, chaw chu ka inbarh mawlh mawlh ringawt mai a ka lem leh thei silo chu tho vatin tuikhawihna ah ka va uak tuarh tuarh a ka chak chhuak leh vek mai.







Ka hnungah a rawn beng dat dat a, chutihlaiin ka mittui a lo luang zung zung thung a ka lungchhe tak zet a ni, a duatna ka thlakhlelh em em laia min ngaihsak dan chu ka lungawilo bawk, engmah ka tih phalloin min ngaihsak teh meuh mai mahse, a hmel hlim min hmuh ngailo a, a thinlunga min huatna pai ru reng chunga a mi ngaihsakna chu ka hre ve reng si a, chu vang chuan ka chungril lam hi a na ngawih ngawih a ni.







"Lo kal teh" ka kuta min kaiin ṭhutthlengah chuan min nem ṭhu a, ka bulah lo ṭhu ve in a Chair chu ka lamah a rawn tawlh hnai a "Muang chang khan eirawh ka hau lo che a nia" aw zawi lek lek hian a ti a, a thiamlo aw ka hriat chuan ka lung chhe zual sauh a, ka ṭap nghal hliam hliam bawk a.







Chutah "Tihpalh" ti chungin ka chaw chu a thlengah a bun a, chaw nem lai min khawrhsak lehin a chawm ṭha leh a chutih chhung chuan kei chu ka lo insut faih faih a, min ena a rawn nuisuk te chu ka nuih let ve lo, ka ṭah a tichhuak zual sauh a ni.







"Tihpalh, Ka vin tawh dawn lo che" a nui leh tawhlo a, am fein thawk a la kawk ringawt a, ka darah min rawn kuahin chawhmeh te chu min suah lawr dan dan a mahse, ka duh khawp ka la hmu lo. Ka ṭah a la chhuak lutuk tlat, engthil emaw hian min mawlha chu chu engthil nge tih pawh ka sawi chhuak thiam chuanglo.







"Ei rawh le" a rawn tih chuan ka la inpet ruh ṭeuh a, ngun fe a min rawn thlek chuan a mah en chungin ka ṭap ṭiau a, "Ei rawh le Duati" a ti ril ruih a. Chutianga min duatna aw chu thla khat dawn ka hre tawhlo a ka rilru no a kaichhuak chiang hle bawk.







"Tinge min ngaihsak duh miahlo a" ṭap pur chunga ka tih chuan ka sam rawn chulin "Ka ngaihsak che a lawm" a lo ti thung a.






"Nichin ah pawh khan puih che ka tuma min vin ringawt a" ṭah vanga aw khur hlak hlak chungin ka ti a. "Ka tihpalh ka tih tawh khâ" a lo tih chuan "A hma pawn min vin ziah, ka rualin i mu ngailo a, min ngaihthah char char a, i ṭhiante nen...." zawi zo theiloin ka ṭap zui hlawp hlawp a.







Duat taka min rawn kuahin ka mittui luang chu a kutin a rawn tuai hul a, "Engmah i hrelo anih chu, ka ngaihsak reng ṭhin che a lawm, ka thinchhia hi kan paih bo daih ange aw" tiin min nuih a, a nghawngah kuahin a awmah ka lo bei sat sat a, ka taksa tihchak nan hian chaw niloin amah zawk hi ka mamawh tawh zawk nimaiin ka hria.







Zanah chuan Nsa leh Johana an lo lenga keipawh TV enin ka ṭhu chhuak ve a, reilo teah Ruata leh mipa pakhat hi lo lutin an rawn phul nghal hlut a, an ṭhianho chuan choka dawhkan kilin an ṭhu bial laih a, keiin Tv ka ensan daih thung a. Pindan aṭanga lalbera lo chhuak chuan naute kan neih hun atana kan thil leikhawl sa te chu alo pawm chhuak ṭeuh a, makti taka ka lo enlai chuan Nsa chu pein "Nei rawh" a tih chuan Nsa pawh a hawihai viau a ni.







"Hei chu a thar vek anih hi, dah ṭha rih ula a naute in neih leh hun atan inla mamawh dawn a sin" nuisangin Nsan a ti a.







"A ngailo innu in a san chhuah ṭep tawh kha in mamawh zawk" Lalberan a tih chuan Nsa chuan ka lam lo hawiin minlo ngaichang a, "La rawh Ns, naupuan pawh ka dahṭha nuala ka rawn la ang, thil min tihsak hnem tawh bik si" tih leh thawh ka rual a.







Ka naupuan leikhawl sa zawng zawng te ka nuin naute mamawh tur lukhum, mawza, Oil leh cream eng engemaw min lei sak zawng zawng te chu ka la tel vek bawk a, naute pheikhawk pakhat erawh chu ka phal nganglo. Ezra lei ani a, nau ka pai thu ka hrilh tuk lawka a rawn lei a ni nghe nghe. In a a rawn haw a a hlim hmel te kha ka theihnghilh theilo a chuvangin hei hi chu dahṭhat reng rih ka duh a ni, kan naute chantak hriatreng nan tal pawh.







Inpawm bawr luk chunga pindan ka chhuahsan dawn laichuan ka ding leh dat a, choka lama an titi chu ka ngaithla zui ran a.







"In pai veleh mai ang, kan chhungte pawn kun 3 hnuah an nei leh alawm in nu ang chiah hian a awm ve a" Ruatan a ti a.







"Kan pai tawh dawnlo" Lalbera chuan a lo ti mauh mai a, a aw chu a lawmloh hmel hle bawk. "Engah chuan maw? In pai leh awm emai a, i sazu i veng thei te a nih ngawtloh chuan" Ruata chuan a ti zui ham ham a, an nui dar dar chu Lalbera lo ṭawng leh chuan an ngawi dak thung a.







"Naupai leh tawhlo sela a ṭha zawk, a ṭul anih chuan Aruati ka la mai ang" a ti a ni. Keichu ka na leh ta vawng vawng mai, ka chil ka lem dak a, ka dang a ro hulh bawk. Ka tlawm ngawih ngawih niberin ka hria, amah chu ka dem bawk.







A chhan chu ka duh reng vanga naute kha chhiat ka ni biklo a, kan naute chhan nan khan tih theih nei ila chuan ka ti hreh hauhlo ang, tunah khan a ṭawngkamah min demna a lang a, a hma pawhin min demna chu a tilang fo tawh bawka, ka thiamloh ka fimkhurloh luat tih chu hre teh meuh mahila ami ngaihdan chuan ka rilru a ti na ngawih ngawih tho a ni.







Ka va chhuahlai chuan titi dang sawiin anlo ri leh ham ham tawh a, "Hei pawh aw" dawhkana dah pahin ka ti zawi sap a, anmahni pawh en lo chuan ka inher lehnghal thuai bawk, khumah muin puanin ka inlukhuh ṭha sauh sauh a na zet zetin thawk ka la kawk kawk bawk a, hmun reh taka kala au chhuah vak vak ka chak a ni, ka awmchhunga min hnawh tawt tlat tu chu au vaka veng hawk thei nisela ka ti kher mai.





**

Ka muhil lai chu ka harh hlawla Lalberan ka ke oil in a lo hmet mek tih ka hmuh chuan ka hamhaih lek lek a, "Muhil leh rawh" a lo tih chuan ka sana ka en vat a, Dar 11 a lo ri der tawh.







"An haw na a rei tawh em?" ka tih chuan a lo bu nghat a, ka ke a hmeh lai chauh chu a melh a, zu rim a nam in ka hria.







Min enṭhat duh miahloh vang chuan ka en chîk lehzuala a lo hawi zawk chuan a mit rawng chu a sen ram a, a meng chhah deuh tap bawk a a rui chiang a ni.







"Engtikah nge zu hi i nghei dawn le?" beidawng zeta ka tihlai chuan a ngawi reng a, a ṭawng duhloh vang chuan ka ke a hmehlai mek chu la sawnin puanin ka inkhuh zui a, che sawn lawklo chuan a awm ngaiin a awm reng a, a hnu deuh ah chuan a thawmhnaw hlipin arawn inthawlh a, min hnaihin min rawn kuah mai dawn emaw ka tih kaiin a sir thei ang berah chuan a mu a, keimah zawk chuan hrehawm ka ti leh em em lawi si a, va kuah hmasak lah ka duh bik der silo.







Nitin hian kan inrunluih tawn dun nimai tawh in ka hria, a chang chuan inngeih takin awm leh ṭhin mahila engemaw hleka inhauh kan sam em em a, tlawm zawk nih kan duhlo ve ve bawk.







A ṭhiante kiangah hun a hmang tam tial tial a, a rui zing ta malh malh hle bawk a, keipawn ngaihkhatah ka ngai lek lek der mai a chu chu thilṭhalo tak a ni.







Ka tan hun a nei ngai ta manglo, zingah kei aiin atho hmasa zawka, zanlama eirawng ka bawlsa ṭhin vangin chawhmeh a tilum a, chaw ei lemlo a kal chhuah mai a ching a Gym ah tiffin ka va pe mai ṭhin, chaw eilo a a kal chhuah aichuan tiin a thawh rualin ka tho ve ta ziah a, chu chuan tlemin inbiakna hun min neih tam tir deuhin ka hria, tlaiah a lo haw zawka zanriah eikhamah an ṭhianhoin an chhuak leh daih a, a lo haw chuan ka lo muhil hman emaw a ni ṭhin a, nikhata kan inhmuh theih chhung chu a reilo hle a ni.







"Zanin chu lo haw hma la" hna a kal tur insiam mawlh mawlh chu ka bia a, "Ka hmanlo maithei ka u nen bungraw thleng tur buaipui kan ngai a" a lo ti a, ka Birthday a ni tih ala hre miahlo a ni.







"I lo haw har angem, zanah Margareti teinah min kalpui lawk anga" darthlalang hmaa a ding chu kal hnaih pahin ka ti a "Enge itih dawn, ka ṭhiante an lo kal dawn a sin" lawm vaklo hmelpu chunga a tih chuan "Ninawm ṭhiante ti reng mai" ka lo ti ve hlak a.






Min chhanglo, min chhanloh vang chuan ka lungawilo hle bawk. "Keimahin tlaiah ka va kal mai ang" lawmlo fe a ka tih chuan darthlalang a ṭang chuan min rawn en vung vung a. " A pawimawh viau a mi?" a lo ti a, "Pawimawh lo se ka sawilo ang, thil pawimawhloah ka chhuak ngailo" ka lo ti nghalzat a, chhuah ka sawi apianga min hnial ziah hi ka kham tawh a ni, zantin ani a chhuah theih laia ka laka a inla Strict bik chu ka duhlo. 'Hmeichhia i nih kha' a ti thlazen zel lehnghal a!







"Ka lo haw harlo ang Inah lo awm rawh" a tih hnuah a chhuak zui a, nilengin keimahin Inah ka awm lehta chawrh chawrh a, Margaretin a cake min siamsak thlalak te chu min lo thawn a, ka lam hman dawn em tih min lo zawt bawk. Ezra nen kan kal tur thu ka hrilh chuan chaw eitur law law a kal turin min lo hrilh a, chu em chu ka hnial ta thung.







Tih tur a awmloh em vangin Whatsapp status te chu ka enkual a, Remlala pawn a nun hlimlai tak a tawng mek a ni, fa pahnih neiin chhungkua a din tawh a, an nupa an hlimin an awhawm dun ngang mai, an nizawng chhungte duhpui thlapa innei an ni bawka an nun chu a tluang bik tak zet a ni.







Usangpuia status ka hmuh chuan ka ṭhutna aṭanga tho chhuak meuhin ka ennawn a, Lalbera leh a fanu inpua a an nuidun lai a ni a, an ni pahnih aimah chuan an hnung maia Emmai leh Nu Siamtei ten hlim tih hriat taka lo nuisang chunga Lalbera te pafa an thlir lai chu ka en chiang zuala, ka thik hle a ni ka rilru a ṭha lo takzet.







Phone ka tum uka mahse, sawidan tur mai ka hriat loh vang chuan ka ṭhulh leh rih a, Gym a va kal ve pawh ka chak ngang mai, tunah hian an la awm angem? Lalbera hlim hmel mawlh chu ka mitthla ah a lang a, ka tello a a hlim hian hrehawm ka ti a ni.







Tlaiah chuan a lo thlen veleh a chhuak thei turin ka insiam lawk diam a, hma deuhah eirawng ka bawl diam bawk a, dar 4 ah chuan ka lo inpeih fel vek tawh a. Mahse, dar 5 ah pawh a lo la thleng hauhlo mai a, ka phone lahin a chhang thei silo a, ka rilru anuamlo takzet tawh.







Usangpuia ka phone ta ringawt a "Vîte vawin chu kan inkhar hma a, bungrua kan hlan luh zawh ah kan inkhar daih a lawm, khawiah emaw a kal kawi lawk aniang" a lo ti mai a, a ṭhiante zawng zawng chu ka Phone kuala "Hetah chuan a awmlo" an lo ti thei zel mai.






Titau bur bur chunga ṭhutthlenga ka ṭhutlai chuan ka Whatsapp message a lo thleng a, tudang niloin Lalremtluanga a lo ni a, a thlalak min lo thawn chuan min ti sa zak mai!








Lalbera chu Emmai te nufa kiangah a awm a, Restaurant ah zanriah an lo kil ho mek a lo ni a, keiin ka Birthday ah pawh Dineout ka phut ngamloh laiin ani chu hlim takin a fanu leh fanu nu kiangah hun a hmang a, thlalaka a nui hmel te chuan min vilh ngut ngut ni berin ka hria.







Margaretin min lo biak leh chuan Cake kan lam hman leh loh thu ka lo hrilh tawl a, a chhan min zawt a chhanna mumal pawh peloin "Naktukah ka lo lam ang Fridge ah lo dah mai rawh" ka ti ringawta bawk.







Dar 8 velah a lo haw ta ṭawk a, kawngkhar bulah dingin a Bike a ṭanga a lo chhuk chu ka lo en a, Guiter a rawn ah haw avangin an Inah a rawn kawi tih ka hre mai a, min hmuh chuan a phu deuh zawkin ka hria "I va haw tlai ve?" aw ki pangngai thei ang bera ka tih chuan "Guiter ka la a" tih zawngin min chhang a, a haw tlai chhan ka hriat chian em vangin ka thin a rim ru hle bawk.







"Chaw ei ka siam dawn a nia, inthlak vat la" ka aw chu a chang lam mah tawh a ni.






"Ka ei tawh" tih te maiin min lo chhang leh a, "Maw...khawiah nge i eia?" phawk hmel fe a ka lo tih chuan "Kan inah" tiin min chhang a ka sa pup pup mai, inbeng daih tumin thawk ka la sak sak a, chu erawh awm zia a awmlo nasa a ni.


images - 2020-08-25T153248.517.jpeg
images - 2020-08-25T153248.517.jpeg (7.15 KiB) Viewed 4111 times




"In inah maw?" zawi sapa ka tih chuan min chhang tawhlo a, pindanah a lut fel hman der tawh, a lo chhuah leh chuan ka dinna ngaiah ka lo la ding renga "Chaw ei ka siam dawn che a mi?" tiin min zawt a.





Ngawirenga ka inhersan laichuan ka hnungah minlo zuia, Kitchen Rack aṭanga thleng ka la chhuak tur chu min lo ban khalhin "Lo ṭhu la keiman ka lo siamsak ang che" a ti a, a nui hauhlo nangin a hmel chu lawmlo hmel a pu hranlo a lawm hmel a pu chuang hauhlo bawk.






"I nu te inah chaw i ei dawn anih chuan lo sawi lawk ve tur a nia" amah en ran chung chuan ka ti a, min la chhang ta chuanglo. Ngawirengin a chêt chhunzawm mawlh mawlh ringawt a, enge maw sawi se ka dam phah a ngem chu ka hrelo mahse, a awmdan chuan ka rilru a ti na leh vawng vawng tawh a ni.






Dawhkan kila ka ṭhutlai chuan ka bulah a lo ṭhu a, chawhmeh chu min suah lawrsak den den a, kei erawh chuan chawmawlh zetin a chetzia chu ka lo thlir a, chaw eichakna reng ka neilo.






"Ei rawh le, i eikham veleh ah Guiter perh ka zirtir dawn che nia" duat hmel taka min en chunga atih chuan ka mittui alo hnam ṭiam ṭiam a, tunah pawh ka piancham a ni tih ala hre miahlo, chu a hnekin dawt min hrilhin ka lakah zep ruk a nei zawk a, eng rilru nge a put hi ka hrethiam lo a ni.





"Ka eichaklo" ka ti tawl mai.




"Ka siam vek tawh hi, tlem tal eirawh" a lo tih chuan a mitah tak enin "Nangpawn ei ve la mahni chuan ka ei chaklo" ka ti ve ta kher a. "Keichuan ka eitawh alawm ka puar tawh lutuk" tiin min nuihsak a.






"Ka ril ṭam hunah ka ei mai ang" thawh mai tuma ka che zui chu ka banah pawtin alamah min hnuk hnaia, "Lungawilohna i nei anih chuan sawi rawh, chaw eiduhloh phahna tur a nih chuan ka hriat ngei angai anih chu" min en ran chungin a ti ta a.





"I chaw eina kha ka hria Malsawmhlu" ka ti chang fak mai, ka zep ṭit ṭet thei tawhlo, sawi chhuah vek law law ka duh, inbum aichuan anih nih kan ni tawh mai aniang chu.





Lawmlo tih hriat lutuka ka enlai chuan a mitmeng lian kal mai chuan min melh ran a, a hmel landan chu a talbuai chhin eihlo.





"Emma-i nen chaw in eiduna, ka hre leh vek tho sia engvangin nge dawt min hrilh kher?" thinrim aw sai dar dar chunga ka tih chuan a lo nui hak a "I hresual anih chu" tih zawngin min chhang leh a.






"Ka hresual i ti maw? Ka hriatsualloh zia ka hmuh ang che" tih leh ka Phone a an thlalak ka neih chu hmuh ka rual a. A hmu chu a hmel a danglam viau tura ka rinlaiin eng hmel danglam mah a pu lehta chuanglo.





"Khapa nen khan inlo la inbe ṭhin a ni maw?" lawmlo awka zet hian a rawn ti ta hlauh a, tehdaih chuan! Min ti hamhaih zawk lek lek a ni.





"He thlalak hi sawifiah rawh" ka tih laiin "Engvanga la inbia nge in nih, hetiang thlalak thawn chhan che hi a nei anilo maw?" a lo ti thunga, keimah zawk min mawhchhiat lel mai. Min lo chhan dan tehdaih chuan minti hamhaih letling a ni.





"Tinge dawt min hrilh?" ring zeta ka tih takah chuan thawk a la hawk a, "I ngaih ang kha engmah a nilo" tih leh ka Phone chu ban a rual a, ka lo pe phal bik aw kawng lo, ka Phone ka lo pawh let vang chuan a meng nur nasa hle bawk.






"Thudik hrilh che ila i lungawi a ngem?" min melh ran chunga a tih leh chuan "Dawt sawi ka duhloh, inrinawmloh sanna anih hi" ka lo ti vin hlar a, dawt min hrilh vang hian ka lawmlohna a lehhnih zawk.





"Aruati ka ba a lawm tunah phei chuan a damlo a, ka hrilh che anih chuan i lungawiloh ka hlau a chuvang a ni" a kuta min rawn ban leh paha a tih chuan ka lo tawlh hla vat a, "Tih teh suh, Birthday ah chuan hlim zawk tur" nuisuk chungin a ti leh a, hepa hi ka hrethiamlo takzet a ni.






Ka piancham tih a hre reng mahse, min ngaihpawimawh sak miahloh thu nui chunga sawi ang vel a ni, piancham min lawmsak chu khawilam! Min ngaihthahin a bialnu hlui leh a fanu kiangah hun a hmang zawk a, hetiang rilru hi put ka duh ngai miahlo mahse, hmeichhe naupang ringawt pawh ka thik ngawih ngawih a ni.






"Birthday a?" nui hak chunga ka lo tih chuan "Tihpalh aw, tlaiah khan ka hrechhuak chiah a, zaninah kan lawm dawn nia chaw ei phawt la" a kut chuan min rawn ban leh a ka lo ṭang ṭak thung.





"Duati, inhauh ka duhlo ania" a tih chuan a lan dan chu a damthlup tawh a, hepa hi enge a awmzia ka hrethiam lo, a mizia hi Minute hnih khat dan lek lekah a inthlak zung zung mai!





"Emma-i kha ila duh em ni?" ka aw chu a a vin hle a, ka la dam ve tlatlo a ni.






"Kawppui nei lai ka nih hî" nui chunga a lo tih leh chuan "Kawppui i nei em tih ka zawt lo che" ka lo ti chang leh fak a.





"Duh ila hmanah khan ka nei tawh ang, i ngaihtuahna kawi kha paihbo rawh, ani nen chuan inhmuh chhan pakhat chiah kan nei" a ti a. Chutiang pawh chu lo ni tehreng se ka laka zep a dawt min hrilh kher kha ka palzam theilo a ni.






"Enteh, nangman i sawi kha hmangaih pahnih i nei anih chuan a hnuhnung zawk thlang rawh, a hmasa kha i duh tak tak anih chuan a hnuhnung zawk a awm theilo i tih kha, I rilru thlak i duh anih chuan min hrilh dawn nia, hetianga dawt inhrilh te zep ruk neih te hi ka duhlo a nia, i duh anih phawt chuan kan inkar hi kan ngaihtuah ṭha ang" a ṭhutna aṭanga a rawn thawh chuah rualin ka inher vut a, pindanah ka luhsan zui daih a, choka a a che ri rak rak chu ka hrepha a, tâwngin ankhum chiam mahila ka thaw a ven phah chuang hauhlo, chu a hnekin ka hrehawm zual sauh zawk a ni.






Ka muthnu reivak loah a lo lut phei a, "Barbie.." a tihri ka hriat rualin ka lo muhil der vat a, ka muhil em tih min rawn en chuan ka mit ka chhin tlat avangin Towel bat chungin a chhuak leh a, Bathroom lama a thawm sat sat chu ka hrezui thuai bawk.






Ka rilru a tawt a ni, tunhnai hun engemaw ti chhung lawk aṭanga kan inkar ṭhalo tak mai chu ka ngaihtuah rauh ruah a, hun reilo te chauh ala ni kum em pawh a la vei hmanlo, kan inkar hlatna chhan ber ni a ka hriat chu kan naute chhiat vang kha niin ka hria, fa neih inring em em a kan awmlaiin kan chan ta kha nia, a lungngaihna vang chuan Aruati lakah inhnemna a zawng a ni thei mai angem? Chu chu haw tur ka nih loh thu ka inhrilh mawlh mawlh chung pawhin Aruati leh anu chu kan nunah telve lo maisela tih rilru ka pu a, a hmasial thlak tih pawh ka hre tehmeuh mai, keimah leh keimah ngei pawh rilru chhia ka inti a ni.





Rei vakloah a inbual zo chu pindanah a lo lut a, amah hnungchhawn zawnga ka inlukhup tlat vangin a chetla chu ka hmu theilo a, a thawm erawh ka ngaithla reng thung. Choka lama a Phone dah chu a lo ri a, chhang tura a chhuah leh hnu chuan ka inlukhuhna puan chu ka haihawng ve nghal thuai a, a Phone chhang ri chu ka hre zawm zat bawk.





"A damsamloh leh chuan ka nu emaw ka pa hnenah sawi la, anihloh pawn ka u an nin buaipui dan an hre zawk ang" a ti a, lehlama mi chuan enge a rawn sawi a tu chungchang nge an sawitih chu ka hrelo a, Aruati anih ka ring deuh ringawt a.






"Tunlai chu ani pawh a damsamlo a, min tih tauh khum deuh reng mai, keilah hi ka haihawt si a vawiin a piancham tih pawh ka lo theihnghilh daih anih hi" a tih leh lai chuan ka lo inpetruh ṭeuh a.






"Ka hrelo Emma, engpawh thleng se ka ngaihthah dawn hleinem, thlamuang deuhin awm rawh kan nu pawn a la hrethiam ve mai ang" a ti zuia, a thilsawi chu ka buai ta nak mai, thil hriatthiamloh enge maw nei ang maiin min sawi a ni. Emma nen chuan engthil chiah nge an sawidun, hemi te pahnih hian inzawmna engemaw tak chu an la nei ani thei mai angem?






"Naktukah kan Test anga chanchin ka lo hrilh leh dawn che nia" tiin an inbiakna chu a ti tawp a, an inbiak danah lah an inhuatloh dun hmel nasa mai si a, ka ringhlello theilo.






Pindana a lo let leh laichuan ka lo inkhuhṭha sawt sawt a, ka bulah rawn inthawlhin a mah si chet chuan min pawt hnai a, ka kawngah nghet deuha min kuah bawkin a ke chuan min rawn tlawh a, ka biangah min fawp zauh bawk a.





Rei pawh a ral hmain a Phone bawk chu a lo ri leh a, tun ṭum chu tho kang tawhloin khumah chuan a chhang a, " Aw sawirawh le..Pu Than" a ti a, a biak mek chu ka hriat ngai mi a ni lo tlat.





"Naktukah kan lo kal dawn nia" tiin lehlama mi chu a chhang a, reilo te an inbiak leh hnuah a Phone chu dahin min lo kuah leh a "I muhil tawh tak tak maw?" zawi te a atih ri chu ka hre pha a, ka muhil der ta zela reilo teah ka muhil zui thuai bawk.





Zingah chuan kei aiin a tho hma a, ka thawh laichuan thingpui ka duh em tih min lo zawt a, chhang duhloin Bathroom ah ka luhsan a, hei hi ka nih dan a ni, ka thin a rim tawh chuan ka lungawi mai mai thei tawh ṭhinlo.





"Duati vawinah kan chhuak dun dawn a mi?" Bathroom aṭanga ka chhuak chu nuisangin min lo en a.





"Ka peihlo" ka ti chang bul a. Chutah ka lam rawn panin ka dar tawn tawn ah a vuan a "I Brithday present pawh ka leisak nghal dawn che nia" a tih chuan, "Ka Brithday chu a liam tawh" ka lo ti bul hmuk a.





"Ka ba che a lawm"


"Min rul duh suh" ka lo ti thung.




"Tinge i luhlul viau mai le" thawk la hawk chunga a tih chuan ka ner nak a, ka kalsawn zui nghal thuai bawk.





"Anih Clinic ah min kalpui lawk hman angem?" a tih chuan ka hrelo der hmak a, pindanah lutin ka insiam zui nghal mawlh mawlh a. Ka lo inchei tih a hmuh chuan makti lek lek hmel a pu a ni.





"Kan kal lawk anga i duh na ah kan kal dawnnia" darthlalang chhana min en ran chungin a ti a, "I bulah kalo kal dawn lo, tihtur ka nei ve" ka lo ti leh tawl a, "Enge itih dawn atih chuan ka chhang leh duh tawhlo. Heng mizia vel hi chu amah tihdan ka entawn a ni, nidangah min sawm ngailo a, a laka ka lungawiloh lai ber khera min sawm vang chuan ka zuilo chiang viau ang.





Sawisel chiah silo hian min en leh vung vung ṭhin a, keiin ka pehhel char char thung bawk a, kan inkar chu engthil emaw chhah deuh hian min dang ang vel a ni.





Nilengin Margareti te inah ka awm a, Cedric nen Computer ah Games kan khel a, an bula awm chu rilru ahahdam huai, kan games khelhah ka rilru ka pe deuh bawk a haw a hun tawh tih ka hriat meuh chuan tlailam dar 4 a lo ri leh der tawh a, ka haw zui nghal thuai bawk. In ka thlen chuan a lo la haw biklo a, ka Phone duh hran tawh biklo.






Tlai deuh takah a lo haw a, "Chaw ei ka chaklo aw, min siam kep lo mai rawh" a tih chuan ringhlel fe hian ka lo melh a.





"I Nu te inah a mi ?" ka lo tih kher vang chuan kal mai a tum chu a lo hawi let leh a, ṭawngtumin a awng zuau a, a sawi dawn emaw ka tihlaiin a ngawi leh daih ang lawi a. Ngaipawimawh duhloin keipawn chaw ka eisan ve hmak a, a rawn haw hmain hmun dangah a ei a nih ka ring hmiah bawk.






Chaw eikham hnu pawh chuan Room lamah a tawm ta char char a, tukverh bulah ṭhuin Guiter a perh a, zawi te tein a zai bawk a. Sitting room ah ṭhuin keiin TV ka en a, a thawm a reh rei tak em vangin ka va en a, chhuat melhin a lo ṭhu ngawi renga a awmdan chu kutdawh zai ṭhin a ang kher mai.





"I mut a chhuah chuan mu rawh" ka ti hluk a, min rawn en a engmah a sawi zui lo.




Mutna tur khum ka siam fel lai mek chuan ka hnung lam aṭangin min lo kuah chawt a, kun hniamin ka darah a khabe anghat bawk a. "Awm bo daih ta ila engtin nge i awm ang" a tih chuan za lo fahranin ka lo nui a. "I thu thu a lawm" tih zawngin ka lo chhang a, a ruk tak chuan ka thinrim tut tut mai, tunah pawh min kalbo san a lo ngaihtuah der tawh chu a nia, ka rilru ana vawng vawng a ni, hei leh chen hi engkim tuar huamin ka zui a, hetiang mai mai hi chu ka beisei lo a sin mawle.





Ka mut hnu pawh chuan zawi te tein Guiter a perh renga, a lung aleng ngang ania nge tukverh bulah chuan a ṭhu rei kher mai. Ka en leh ṭhin a awmdan chu ka khawngaih riau a, engemaw rilru natna thuk deuh nei hmel apu in ka hria.





Stress a nei nasa tih ka hria a, hetiang dinhmunah hian ṭanpuitu tur pawh ka ni, a landanah chuan Stress nei nasa deuh hmel a pu tlat.





Ka awm ang hian a lo awm ve tho em mawni dawn le? Tuar ve ve si hian kan lo insawipawp lo mai mai anih te pawh ka ring ta rum rum.




Tho chhuaka a bula ka va kal chuan ka lam a lo hawi vat a "Ka ti muhil theilo che a law" tih pahin a Guiter pawm lai chu a dahthla nghalthuai a, a inthlahrun hmel kher mai.





"I dam ṭha em?" ka tih chuan min en kal chungin a bu nghut a, damṭha hmel erawh a pu lo nasa a ni.





"Min zirtir la" ka ti ta ngawt a, inthiamlo rilru deuh hian ka awm reng mai. A malchungah min pawt ṭhuin ka kut ala a, Guiter hrui chu min tawh tirin a Key thlakdan chu min hrilh sap sap a, a thil min hrilh te aichuan a taksa lumnuam deuh chu ka hrechiang zawk mah a ni.





Ka pasal hi ka ngaia ka thlahlel tawh takzet, Guiter perh inzirtir aichuan min kuah vawng vawng sela ka duh zawk mahse, ka ngaihtuah te chu a ngaihtuah ve hauh silo a.






"Han perh chhin teh le" a tih chuan min hrilh ang chuan ka ti ve mai a, ka thiam nghal der mai "I thluak avan ṭha em?" ka bianga rawn piai zauh paha a tih chuan ka lo nui hak a, a lam ka hawi chuan minlo en ve ran bawk a, kan mit a intawng chiang hle a ni.





"Hetia awm hi anuam, inhau tawh lo ang aw, inngeih taka awm hi ka duh" ka tih chuan a nui suk a.




"A zialo hle mai tih phal chi anihloh tawp chu" a tihrualin ka lo ner nang a, ani a lo nui ve thung.






Zanrei deuh thleng chu tukverh bulah chuan ṭhuin kan titi in kan nuidun a a changin kan zai dun bawk a, zan hlimawm tak a ni, min pawmin min fawp a, nupuiin pasal hnen aṭanga a dawn tur hmangaihna chu am takin kan chên dun bawk.






Thil hote mai tih hmaih palh kan neih chu ka hrechhuak tawh a, kan inkarah chuan inhriatthiam tawnna kan mamawh ber a ni, tlawm zawka ṭan mai te ka hreh a, kan inhauh chang pawhin a dik zawka ṭan ka tum ngei ngei ṭhina, chu chuan inngeih taka awmdun thei reng kha minlo dah hla zawk niin ka hria, enge a rilru ka hre ve hauhlo na chu, chu chu a chhan anih ngei ka ring. Aruati leh anu lakah pawh rilru zau zawk ka put angaiin ka hria, nakinah chuan kan enkawl pawh ala ngai maitheia, hetiang rilru ṭhalo thikna rilru hi hmeichhe naupang rilru thianghlim tak lakah khan ka pu tur a nilo.






(Hehe...inhau lo ang u keini pawh)






💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇
💜💜 Ads i la click ve lo a ni maw? A hnuaia ads milem khu lo click ve rawh le 👇

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)