MY YULETIDE LOVE - by Ahmangaihi violette khiangte

Moderator: writers

Ahmangaihi violette
Posts: 148
Joined: February 1st, 2020, 3:14 pm

MY YULETIDE LOVE - by Ahmangaihi violette khiangte

Unread post by Ahmangaihi violette » November 4th, 2020, 6:03 pm

MY YULETIDE LOVE



By - Ahmangaihi violette khiangte





Accident vangin kum hnih zet chu Wheelchair ah hun ka hmang liam tawh a, ka nun kum 22 ka hman tawh a hun hrehawm ber lai a ni, a chang chuan ka inngaihtuah lungpuama, ka ṭha chhuak leh tawh dawnlo niin ka hre ṭhin a, nun hrehawm tih chang ka ngahin ka beidawng ngawih ngawih ṭhin, chutianga hmalam hun thim hmachhawn dawn tlata ka in hriatna chuan ka rilru lamah nghawng nasa takin a lo nei a, rilru lam Doctor ka pan a ngai hial bawk.






Ka chungte leh ṭhianten theihtawp chhuahin min kawm hlim an tum a, ka tan an ṭawngṭai awllo, chutah chiah chuan a ni mahni inkhawngaihna rilru hi mihring hmelma lian tak a lo ni tih ka zirchhuah tak ni.






Min hmangaihtu te ṭawngṭai sakna zarah rilru fim tak ka pu leh thei a, 'Ka taksa chanve hmang lo pawhin ka hlim thei lutuk' tiin keimah pawh ka infuih ru sauh sauh a harsa erawh ka ti ngang mai, mahni inhneh hi damkhaw chhuahna atana pawimawh ber pakhat a lo ni.






Chhunah ka chhungte hnathawkin an chhuak a, ka u mipa te lah College an kal vek avangin ka khua a har ṭhin a, tlai ban huna ka ṭhianten min lo tlawh kawi leh hun chu nghakhlel takin nilengin hun ka hmang liam a, lehkhabu ka chhiar a, suangtuahna in duhthu ka sam kual a, chutiang chuan ni chu ka hmangliam ve mai ṭhin.






"Mampuii awmpui tu tur nula chu kan hmu tawh a" ka nuin chawei laia a tih chuan ka phur hle a, chhun lama kawm tur anlo awm ve tawh tur ringawt pawh chu naupang Christmas thawmhnaw thar nei tluk hialin ka lawm a ni.







Ka ṭhian thar hming chu Zorini a ni a, kan inhmuh tirh aṭangin kan innel hle a, zingah class a kal vaangin kei aimahin a tho hma ṭhin a, ka mu rei thei vak biklo a, ani alo tho hma ve kher chu a tihzia ka ti hle, khum aṭanga min kaitho tura chhungte pun kha zinghma takah chuan thil nuam a nibiklo, an khua thingtlang lam chanchin te, a bialpa chungchang te chu min hrilh a, a titi chu ngaihnawm ka ti em em ṭhin, ngaihzawng ka nei em tih min zawh chuan zak ru tak chungin ka Phone a thlalak ka kawl ho chu ka hmuh ve a, a nuih a za kher mai, keipawh ka nuilo theilo.







A chhan chu ka thlalak kawla mipa lang chu hla deuh aṭanga lak vek a ni a, a lang chiangloin a hmel pawh a hmuh chian theih meuhloh "A takah chuan a chhelo lutuk, thlalak ah a fiahlo anih kha" ka ti chung pawhin min nuih zui kiah kiah a, ka hmuh leh hunah chuan hei aia fiah hian a thla ka la tawh ngei ang.







"Kawmthlang Waiting shed khu a van ang" a tih chuan ka lo bu nghat a, "I ral khat star a ni maw?" tiin min chhaih zui a.





"Ni e, zing Exer lain a lo tlana tahkhuan a chawl ṭhin a, heta ṭang hian ka lo thlir ṭhin" ka lo ti vat a, min khawngaih hmel deuhin ka hria.






"Zingtin a lo kal a mi, naktuk zingah ka hmu ve duh" a ti leh takah chuan lu ka thing a "Hmuh i phal ve lo a mi?" inthlahrung hmel lek leka nui chungin min zawt a, lo kal dawn sela chuan hmuhtir chu ka phur viau ang chu mahse, keipawn thla tam fe chu ka hmu tawhlo.






Nikum November thla tawp vel khan ka hmu ṭhin a, tuk tin hian kan kawmthlang kawngpuia Waiting shed ah chuan a lo ṭhu a, a lo kal hun awm velah chuan rang lutukin tukverh bulah chuan ka lo ṭhu lawk ṭhin a, min hmu velo mahse ral aṭanga lo thlir chu ka lo hlimpui tawk ve em em ṭhin.






Ka mumang thlengin ka hmu a, ka vei zui em em bawk a nih kha, a hming ka hrelo a, khawi a mi nge anih takngial pawh ka hrelo, chuti chung chuan a zûnah ka uai zo a ni ber, hriat chian ka chak a; hmai chhana biak pawh chak tak ka ni, ka ṭhiante chuan 'Kan zawng chhuak dawn nia' an ti tak nain zing thawh an hre hlawm silo a, ani hmataka lo kal ṭhin kha an nang hman ve ngai silo a, a thla ka lo laksak ve aṭang lahin tu nge tih lah a hriat theih ṭhin siloh nen ka buai ṭhin teh a sin aw, ka ke chu hmang theiin han pen sawn thei ila, vawi khat chauh pawh kawngah han tawk ila ka lawm tawk viau ngei ang.







Exer ala ngai tawhlo nge a tlanna ṭhin lam a thlak tih chu zawhna lian tak a ni. A chang chuan hmun dangah lehkha zirin a awm bo anih ka ring a, November thla tawp ah a lo kal a Jannuary thla tira a reh tak daih vang khan chawlh hmanga lo haw zawk anih te ka ring thul, lo kal ngai talo mahse, a lo kal hun awmah chuan tukverh bula ṭhut chu ka sim phah chuanglo a, a lo kal thut tak mialin beisei lo tak beisei ru chung siin ka nghak ziah a ni.







Tukkhat chu beiseiloh lutukin ka hmu leh ta, November thlatawp ni a ni. Ka Diary ah a chuang lian khawp ang, ka chhungte ka au chel chula, ka û te zing murei tho duhlo ṭhin pawh an tho chiang teh a sin. Tukverhah chuan kan chhungin kan dak ṭhap a, a va nuam dangdai tak.






A Basketball pawm chungin a rawn tlan phei a, kan kawmthlang Waiting shed ah chuan a rawn ṭhu leh ta ngei a, kum tira ka hmuh aikhan a sa aṭha in a chhelo zual daih zawk bawk. A sam dumhlap mai kir lek lek chu a han hui thuak a, sawitur pawh ka hrelo ka en ngawih ngawih ringawt mai a ni.






"Ka hmuh tawh hnu ava ang e" ka u chuan a ti niah niah a, "A pa lo e" ka pain a lo ti thung. "Enge a pa loh na, a ban vel aṭang khuan Sixpack pawh a nei dawn tih a chiang reng" ka lo ti ve hmak thunga, ka pan a palo a tih chhan chu a ngo vang anih ka ring, ka pa chu a hang a, chutiang bawkin ka u mipa te pawh, keichu ka nu ka chhun vangin ka ngo ver a, chuvangin an vun ngo velo chu uang taka insawi theihnan a hmang zeih ṭhin.







Tuk tin a lo kal lehta, ka hmuh phaka a awm thleng chu a thla ka la mawlh mawlh reng a ni ber, chutiang bawkin Zorini pawn, zan aṭangin zing thawh hai hlau reng rengin Alarm nen ka inring ran a, kan inzawn a lo thlen hmain tukverh bulah chuan ka lo ṭhu fel hman reng zel a, ka chhungte nuih a za kher mai.






Tukkhat chu Zorini chuan hnaideuh hleka min hmuhtir a rawt a, a tir chuan ka duh chiahlo a "Be loin kan kalpel tawp dawn a lawm" a tih vang chuan ka remti a, ka zam ru ngang maia ka hlehhawlh bawk.






Kawngpuiah chuan Zorinin min nawr thla a, zing ṭawngṭai inkhawm bang hoin min lo be sap sap a, chutih laimek chuan min tawk zawngin amah ngei mai kha a rawn tlan phei a, ka va han zam chhe tehreng, melh pawh ka melh ṭha ngamlo, ka mitsirin ka en thuak chauh a ni. A hnai ah phei chuan a sang hle a, ahmel ṭha takzet bawk, min tlan pel chu ka en zui a, a pian pawh nalh tak a ni, a chhan pawh ka hrelo vannei ka inti ve ringawt nia mawle!







A lo tlan lêt leh laichuan tukverh aṭangin ka lo thlir a keimahin ka nui reng mai, Waiting shed ah chuan ṭhuin a tui Bottle a hawng a, a in mai dawn emaw ka tih laiin chiang fahran mai hian min rawn en chho ta mai a, a lungphu han ran nasat zia mai chu! Biru dawn ila min hmu vek tawh si, lai lutukin hmun dang te chu ka thlek kual ta ringawt a, a hmel ka zuk en leh chuan mit la sawn miahloin min lo la en reng a, enge a ngaihtuah ang le? Amah ka en tih kha a hria a ni thei mai angem!







A tui pawh in ta lo chuan a kal leh mai a, nilengin ka rilruah a cham thung, min rawn en lai ka ngaihtuah let apiangin ka thinphu lah chu a rawn rang nghal dut dut zela, a nuam hrehawm vel a ni ber e.






A tukah ka hmuh leh pawh chuan a rawn hawi chho zawk a, a vawi khatna ang ka phu tawhlo, mahse ka lai chhe hle thung.






"I thlir ṭhin tih a hre tawh chiang a ni" Zorinin a ti a, keipawn ka ring, a lo hawi chho ve ta ziah mai, Mahse, ka en tih a hriat vang nge ni a rawn hawi thuak a Waiting shed ah chuan a ṭhu duh tawh miahlo mai a ka awm a tinuamlo deuh tlat, chuta ṭang chuan parda zarin parda kar aṭang chuan ka en ta ṭhin a, a rawn hawi chho ka hmuh lai chuan ka lo nui var var ṭhin, amit chuan min rawn zawng niin ka hre tlat a.







"A in auh phak reng sia bia la" ka u in a ti a, chutiang te em em chu ka ngam teuhlo, a chhelo bawk si a, kei heti mai ka ni a, a ngaihtuah pawh ka ngaihtuah ngamlo.







Zirtawpni tukkhat chu aw thian kharhin Zorinin a lo chhaih peka, ka va han inthlahrung tak, a lawmlo viau in ka ring.
Mahse, a tukah chuan tukverha ka dah laitakin a lo tlan a, ka biru hman lo kan kawt zawn a lo thlen hmain a lo hawichho tlat a min hmu vek tawh miau.




Chutah mawi em em mai hian min rawn nuih a nih chu!





Nuih pawh ka nuih let lo, ka pil lut rang kher mai, ka lungphu a ranga ka thaw a rang bawk, ka â riai maiin ka hria.






Ka va dak leh chu Waiting shed bul aṭang chuan a kut pahnih a tukkhuma suih chungin a rawn hawi chho a, a rawn nui leh a, keipawn ka nuih lêt ve ta.



Bul ṭanna anih ka beisei.





A tuk aṭang chuan tlan pahin a ban min rawn vai ziah a, a rawn nui ta ziah bawk. ka va intithei chiang tak. Ka ṭhiante leh ka chhungte bulah hahipin ka sawi a, an ni chuan "A phone number dil rawh" an ti a, chu zawng ka beisei ngam teuhlo nasa mai.





"A hming tal zawt rawh" an ti thul, zawh te chu ka chak ve renga ka zawt ngam ngang silo a lawm.





Christmas tuka kan inhmuh chuan a kutin min rawn hui a, kawngpuia chhukthla turin min sawm niin ka hria, ka van chhuk chak tak, mahse, nui chungin ka lu ka thing ta zawk a, dar chhin ak chungin a kal ve mai bawk a, ka Wheelchair ban chu vuanin ka inhumruh ngar a, vanduai ka inti leh ta.






Chuta ṭang chuan ka rilru ka siam ta a ni, 'He ṭhutthleng hi thawhsanin engtikah emaw chuan ka kein ka la kal leh ngei ngei ang' tiin ka infuiha, ka bei bawk. A hma zawnga Therapy la ṭha duh lo khan ka thar thawh a, ka ṭha leh ngei dawn tih chu ka thupui ber a ni ringawt.






Ani nena kan inkar erawh ral khat inkar inzawmna awm lemlo a ni, a tlan pahin ban min vaia, min nuih bawka chubak a awmlo. Mahse chuti chung chuan tuktin a lo tlan hun chu ka chang tho ṭhin.






Chirstmas kan hmang zo a, a reh leh ta vang vang mai, kumtluan in ka hmu leh tawh dawnlo niin ka hria a, ka hnual nasa hle bawk, alo kal leh tawh dawnloh chuan min hrilh se ka ti rilru thul, ka rilru erawh chu kei ngei pawhin a atthlak ka ti viau lawi thung a.







November thla ka nghahhlelh zia chu pui tak a ni, a thlalak ka ena amah ka ngaihtuah apiangin Christman rim hi nam telin ka hre ṭhin a, ka khum bula Calender chu ka thai bial thlap thlap bawk, October thla chu a rei ber ṭum nihialin ka hria.






November thla tir kan kai ta, thla tirah chuan ka la beisei ngamlo, ahma pawn thla tawpah ka hmu ṭhin a, a awmna aṭangin a lola haw lo anih ka ring.




Khawiah tak awm ang maw?





November thla a ral ta reng mai, enga tinge alo lan loh le! A lo hawlo em mawni zawk ni? Ram dangah Chistmas a hmang dawn em tihna maw ni?






Christmas a hnai telh telh a, Zorini pawn an khuaah min haw san tawh, a hmel hmuh tur a la awm theilo, ka lung a leng a ni, ka ngai bawk.






Kumtluanin ka nghaka ka nghak chhuak zo ta lo, 'Kum tharah a lo haw ang a?' tih chu ka beiseina a ni leh a, chupawh a thleng ta chuanglo, ka nun a nguai zo vek mai, hrehawm ka van ti tehreng.






Kum tharah Zorini a lo chhuk leh a, Therapy la turin zingah ka nu hoin kan chhuak ṭhin a, kawnga mipa sang ve deuh Exer la a tlan ka hmuh chuan ka hrechuak ziah ṭhin, tawk hlawl mai ila ti a duhthu ka sam chang leh a tam.






Chumi kum pawh chuan ka hmu leh ta lo a, a kum leh ah pawh chuti tho, ka beisei ngam ta lo a, tukverh bula ṭhut pawh ka sim ta.






Kum hnih zet Therapy ka lak hnu chuan ka kal thei ve ta sawlh sawlh a, pangngai taka kal tur chuan hun chu a la duh deuh, Zorini pawh kan hnenah a awm tawhlo a, Keimahin zingah Exer la turin ka tho ṭhin a, muangchangin kawtthlerah chuan ka kal ve bauh bauh ṭhin, hma ka sawn chaklo a, hmasawn lo tawp zawng ka nilo.






Ka ke a dam tawh a, College pawh a rualpui te phaklo mahila ka zawm ve ta hram a, ngaihzawng te pawh ka nei a mahse, khapa ang em em a vei kha chu ka la nei hauhlo, ani kha ka First love a ni hialin ka hria.






Kan kawmthlang Waiting shed ah chuan ka ṭhu vang vanga, kan In lam ka hawi chhoh chuan ka thlir ṭhin na tukverh chu chiang takin a lang a, ban a rawn vai lai leh min nuih lai kha ka ngaihtuah lêt a, keimahin la nui leh sak sak ṭhin.






A thlalak ka neih te hmang chuan ka ṭhiante chuan min zawnpuia, zawnhmuh chu a har hrep mai, kum 5 hial avei leh hnu ah pawh tunge anih kan la hre theilo, ka hmuh hnuhnun ber ṭum pawh ka theihnghilh ve lek lek ta, khami ni khan min nuih em tih takngial pawh ka hre talo.






A thlalak erawh Computerah ka dahṭha ve ta renga, engmaw changa ka hmuhfuh hian lung a leng ve veng veng zel.






Nikhat chu University a ka Classmate te nen kan inah chaw kan eikhawma, mipa hoin ar an rawh a, chutih laiin Malsawma leh Fred-an computerah thlahrang Film an en a, keini hmeichhe hoin eirawng kan bawl ho laih laih a, kan buailai takin Malsawman min lo ko a "Hei hi a mi hmana i sawi ṭhin kha?" a lo ti a, ka va en chuan ka Gallery an lo en kual hi a lo ni a, kha ka First love thlalak kha Screen ah chuan a lang chiang hle bawk.






"Ni e, a rei tawh lutuk" Ka bialpa Fred-a a awm ve reng vanga ka i thlahrung deuh chuan ka ti liampuata, "Ka lo en ve" tiin midang ho chuan an rawn bawr nghal huang bawk a.






"Ui ...hei chu U Brandon-a anih hi, a van rei hmel tawh, ala naupan ve hmel reuh lutuk" Sangpuiin a lo tih chuan a lam chu kan hawi rual ṭhup a.






"I hria maw?" phawk zetin Malsawman a lo ti a, keipawn Sangpuii chu thaw dep dep chungin ka lo en a.






"Kan inṭhenawm reng a lawm, a fel lutuk a chhelo sia a luck thei a nia aw" nui hak hak chunga Sangpuii a tih chuan zawh chian ka chak kher mai, Fred-a a awm ve reng si a ka tan han zawh vak a mawi silo.






Zanah muthmunah Sangpuii nen chuan kan inbia a , a thil min hrilh chuan min ṭhawng hle a ni.






"Brandon a chu a boral tawh a lawm" tiin min lo chhang a, kum 7 lai liam ta ah khan Hyderabad aṭanga a lo haw chu Lengpui leh Aizawl inkarah Car accident ah a boral a ni.






Ka rilru ana vawng vawng, inlaichinna nei lemlo mahila a thi tih ka hria chuan min ṭhawng a, ka hnîm ruih mai. Hriat chhuah lo tum kher lo ila khawiah emaw awma a la dam ve reng turah khan lo ngai mai mai zawk ila te ka ti thul.






Computer hmaah ṭhuin a thlalak chu ka en ngawih ngawih a, a mitthla ah kawmthlang Waiting shed a a ṭhu lai kha a lo lang a, engtin emaw hian ka chhungrilah hian min vilh ngut ngut ni berin ka hria.






"I hmu leh tawh a mi a?" ka pan a lo tih chuan lu ka thing a, "Pa....a lo thi daih tawh a, a mak ê.." ka ti hap a. "A thi tawh a, eng tikah nge?" ka nuin a lo ti ve bawk.






"Kum 7 liam ta khan a nia, Hyderabad aṭanga alo haw lamah a accident an tia" ka sawi zawng chuan ka mittui ahnam ringawt a, "Ka va han ṭhing tak, ka bialpa pawh a nitawp silo" tiin keimah ka han innuih zat leh rih a, ka chhungte chu an lo ngawi ṭhap thung.






"Ka van ui reuh tak" ka ti leh hluai ṭhin a, khami kuma a lo haw hun ka nghahhlelh zia te pawh kha ka hrechhuak thar leh a, November thla khan a lo haw ta lo emaw ka ti a mahse, a lo haw ve ngei chu a ni tak sia, vanduai lutuk mai.







Kum tawpah Sangpuii te inah chaw kan eikhawma, Fred nen kan in Break lai anih vangin ani chu a lo kal ve lo, Sangpuiin Brandon te in chu min kawhhmuh a, an kawtkai lawkah a lo ni nghe nghe a, an in chu chhawng hnih a ni a, invar kawtzawl zaupui nei a ni.






Chaw kan eikham hnu chuan Sangpuii pa chuan "Pu Thantluanga lehkhaip hi i va pe lawk dawn a mi, i ṭhiante thlah pahin" Sangpuii en chuan a ti a, Sangpuii chuan min rawn mitmei rang kher mai.






"Midang hi haw phawt se, ka rualin lo kal rawh anu bulah a thlalak vel en kan dil dawn nia" tiin min hrilhru sar sar a, thil tih chi ni pawhin ka hrelo a zahthlak ka ti.






"Â... a chi loh emai" ka lo tih chuan "A chiloh na a awmlo an fel lutuk, i ṭhian hlui anih thu kan sawi anga, an lo lawm viau zawk ang" a lo ti leh mai a, ka chak ru ve tho a, ka hnial zui ta biklo.






Midang ho chu kan thlah liam zet hnuah Brandon te inlampan chuan kan in zui phei dun ta a, kawngka kan kik lai chuan ka zam hle a, reilo teah nu lianpui ngo suah mai leh Samkir hmel deuh hian kawngka chu a lo hawng a, "Nu Muan, Pa Tluanga lehkha kan lo dah dawn a" tih pahin Sangpuii min pawt lut deuh nawk nawk a.






"Lo kal rawh u i pa Tluanga Committee a lo la haw lo a" innei tunu chuan a lo ti vara, an inchhung chu ka lo hawikual thuak thuak a, a changkang viau.






"Nu Muan, hei ka ṭhiannu hi UBrandona ṭhian ve tho anih hi" Sangpuiin a tih leh chuan ka lo ipru deuh a.






"Chutia law, Mampuia ṭhiannu maw ?" phawk leh phur hmel zeta In neitunuin a lo tih chuan ka lo bu zauh a, ka nilo han tih chi a ni tawhlo.






"I va lo kal ngailo ve, engtin nge in i hriat?" a zawhna chu chhan vak ngaihna ka hrelo, "Kan inhre ve tawp" ka lo ti tawl a, ani a lo nui thung. "Ṭhian hi kan rinnaiin a lo kawm zau a hmelhriat a pui hi angah ania, lo ṭhu ula thingpui ka lo lum ang" a tih chuan hnial ka tum zeta Sangpuiin ṭhutna min lo kawhhmuh nghal mai si a, ka hnial ta bik em lo.






Thingpui kan inho laichuan Brandona nu chuan min be seuh seuh renga, a nelawmin biak a nuam ngang mai, Brandona thlalak kan en duh thu Sangpuiin a hrilh chuan "Kan la ange" tiin a tho nghal thuai a.







A lo let leh chuan Photo Album lianpui pui hi a lo pawmbawr ṭeuh a, kan enlai chuan a lo sawifiah zat zat a, Brandon a naupan lai leh Hyderabad a Law zir tura a kal dawn thleng chu hmuhnawm ti takin ka en a, ka lung a chhe chhe lek lek bawk.






Thlalak dang kan en leh laichuan thilmak deuh ka zuk hmu a, chu chu kum 8 kalta a Hospital aṭanga ka nuin Wheelchair-a min nawr chhuak lai a ni!







"Hei chu keimah ka nih hi?" rang lutukin ka lo ti a, "Chutia law?" tiin Brandona nu chuan a lo bih ve nghal thuai bawk a.







"Anih chuan nangmah hi Wheelchair nula kha i ni maw?" tiin phawk fein min zawt leh a, engmah ka hre thiamlo, Thlalak ka hmuh mek hunlai khan Brandon kha ka la hrelo a, kumtir jannuary thla a ni a kan Accident hlimchhawn kha a ni, Brandon kha chu a kum tawp November thla ah ka hmu chauh a nih kha!





"Hetih hunlai hian kan la inhre miah silo a" mak ka ti a ni.






"Ngawiteh u a û alo haw ṭep kan zawt chiang dawnnia" Brandon a nu chuan a lo ti zung zung a, thlalak dang min hmuh a, ka thlalak chu a tam ngang mai, ka damloh tirh, Depression ka neih ṭan tir laia Therapy la tura kan kal chhuak lai te pawh a ni, Brandon khan min lo enthla ru reng tihna em mawni dawn le, ka van hrethiamlo kher em!







Brandona û nula lo haw chuan ṭhutthlenga kan lo ṭhu chu thlarau hmu ang maia phawk hian min en a "Enge...i..lo tih a?" a ti bah nak a, min hre sa nimai awma a rawn ṭawng chuan min ti hamhaih der a, chhan mai nachang pawh ka hrelo.






Chuta kan han inbia chu thil engkim ka hrechiang ta a ni.





Kum 8 kalta kum hlui thlah zana Motor a min su tu kha Brandona leh a u te hi an ni, kawtthler reh lai tak ani a, tuman min su tu kha an hrelo. Min su tu te lah kha chak taka an tlan tlang hnuah thehhmeh ang hlauhin an reh zui anih kha.






Sawitur reng ka hrelo, ngaihdam min dil tlawk tlawk a, keichu ka chawmawlh vek thung. Kha leh chen kha tu nge pawi khawih tu kan hrelo a, an ni lah chuan hnai taka min lo thlir reng a lo ni.






"Ih maw...Brandon kha a inthiam theilo a, vawi tamtak lo kala rawn inpuan a tum ṭhina, mahse, ti lo turin ka lo khap zela, a chhan chu Law a zirchhuak ve chauh a, thubuai a nei anih chuan Bar exam pawh Pass mahsela hna a zawnna kawngah harsatna tam tak atawk thei si a, chuvangin kan thil tihsual kha kan thup anih kha.






A ngaihtuah che a, i chanchin te hi min lo zawt reng ṭhin a, zing hma taka tho a i hmel hmu chunga a rawn haw te khan a hlim ṭhin lutuk a sin ngaidam hram rawh aw, i lung a dam theilo a hremna i lek duh anih chuan ka chungah i thinrimna chu leihbua la, ka nau thi tawh thlarau chungah chuan zahngai la hawlo hram rawh, kha a pawikhawih vang khan Lawyer ni tlak pawhin a inhre lo hial a, hun reitak chu mu theilo leh thil ei hleitheilo in a awm phah a, Damdawiin aṭanga i chhuah ni te khan i chanchin ngai changin kha hmunah khan kan awm ve a, i ke kha i hmang theilo hlen ang tih mawlh kha a hlau a, i Doctor kha kan va zawt nghe nghe a, tunah i ṭha leh tawh tih hi han hre ve se kan van ti tehlul em" ṭap chunga a tih ngawi ngawih lai chuan thawk harsa khawpin min vilh ngut ngut mai a ni.






Ngaihdamna thu emaw engmah ka sawi theilo ka rilru a na tlat, "Hun liam tawh hnu a lawm, kan tan a ṭangkai tawh lo" tih zawng ka sawi a ni. Brandon erawh ka rilru chuan a ngaidam vek a, chumai niloin a damlai ngeia kan sawidun hmanlo chu pawi ka ti, ka ngaihdam thu te lo hrilh hman ila ka ti bawk, mahni inthiamlo tak chunga a kal ka phal hauhlo ang.







Brandon-a Diary min pek chu lain ka haw a, ka chhungte bulah tak ngial pawh ka hrilh lo, khumah muin thawk ka la leh hawk ṭhin a, sawifiah hleihtheih silohin min mawlh a ni.







Diary chu ka keu a, a hmasa berah 'My Yuletide love' tih hi hawrawp mawi takin a inziak kalh a, a hnuaiah chuan Damdawiin ka awmlaia ka Cabin kawta Wheelchair a ka ṭhu lai a inbel bawk.






"Min ngaidam thei angem, thil liantham tak a chungah ka tisual a, khatiang chung khan a hmaah ka ding thei nganglo a ni, a hmahun leh a nun zawng zawng, a taksa leh a rilru thlengin ka hliam a, enge a hnenah chuan ka sawi ang, ngaihdam ka dil ngamlo a, ral aṭangin ka thlir ngam ṭawk chauh a nih laiin.....enge a hnenah chuan ka sawi ang?" chu chu phek hmasa bera inziak chu a ni.






A dang zawng chu a hun hman dan te Phai aṭanga alo haw a zing kara min hmuh ṭhin dan te pawh a tel nawk a, tukverh bula ka lo ṭhu a hmuh changa a hlim zia te pawh.






Phek tawp berah chuan heti hian a inziak a, "Engkim ka hrilh ang, ngaihdam ka dil anga, mawhphurhna laka enkawl ka duh thu pawh ka hrilh ang, min ngaidam theilo anih pawn keimah tal ka inngaihdam theih phah mahna" tiin.






Nithum hnuah an inah chuan ka kal leh a, ka ngaihdam thu chu ka va hrilh ta a ni, a thlanah kan kal a pangpar kan dah a, hmanah khan a tu ve ve pawn huaisenna chhe te lo nei ila tun hun te hi hetiang lo deuh hian kan hmang ngei ang.






"Brandon Vanlalremdik, ka thusawi hi i hre thei anih chuan ka ngaidam che tih hria ang che aw, keichuan ka ngaidam che a, ka nuna i lo telve chhung khan ka hlimpui lutuk che, beiseina thar min pe leh tu, damvara min siam leh tu i ni a, min tinatu ni mahla min tidam lehtu i ni tih hria la, nangmah pawh inngaidam ve ang che" tiin Brandon a zalna thlan chu ka hnuchhawn ta a ni.








A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)