SAWININ LOH MK - Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SAWININ LOH MK - Ahmangaihi violette khiangte (Completed)

Unread post by Ngaia » November 29th, 2020, 3:34 pm

SAWININ LOH MK - by Ahmangaihi violette khiangte




CHAPTER - 7







Hmangaihna hi ṭawngkam khat chauhin sawifiah rawh min ti ta sela "Induhsakna" tiin ka chhang ngei ang, thil ṭha engkim kan duhsak te hi kan hmangaih te chu an ni, chuvang chu a ni ani pawh kha ka kalsan tak ni.







Khami zan ruahsur hnuaia lungchim taka kan infawh zan khan ngen tak meuhin min ngen a nih kha. "Hetiang hi chu thil dik a nilo, ka hma ka sial mah mah a ni, i chhungkua ngaihtuahloin keimah chiah ka lo inngaihtuah a nih hi" tiin ka kuahna aṭangin a inla hrang a, khatih laikhan a tan engkim ka huam tawh, anin a sawi anih phawt chuan Pathian pawh ka dodal hreh hauhin ka ringlo.








Mahse, chu chu a duhdan a nilo a, "Mi chhungkaw tibuaitu nih ka duhlo, keichuan ka chân tur chu ka chân vek tawh a, hetianga kan khawsa dun anih chuan ka tawrh ang chiah kha ka hmeichhiatpui lakah ka thlen ve dawn a, chu mai niloin i fapa leh i chhungte pawh ka ti kehchhe vek ang, kei chuan ka tuar chhuak ṭep tawh alawm, ka natna ang hi midang ka thlen ve theilo ang" mitmeng natna akhata min en chunga a tih khan sawi ve tur reng ka hrelo.








"Ka duh ber chu i hlim ania, i hlimna tur anih phawt chuan ka nupui pawh hi ka ṭhen thei" tiin ka hrilh ta hram a, chu erawh min hnial fithla ṭhak thung.









"Mapui, vawikhat i ti sual tawh a, i tihsual vangin engkim a khawlo zo tawh, hun liam tawh hnu chu a siamṭhat theih tawhloh a, ka lo huat che lahin awmzia a neilo chuvangin keichuan ka ngaidam che mahse, ti sual nawn leh tawh suh, Uire na hi Pathian mithmuha thil tenawm lutuk a ni, kan theilo. I tan pawh, ka tan pawh" ka hmai hma ah ngei mai a ti anih kha, a lakah chuan ka te chem chem maiin ka hria.







Mittui nena a kalliam tur kha ka thlir a, thil tamtak sawi ve duh chu ka nei ngei maia, mahse, a bulah chuan ka ka kha phuar ang hlauh a ni tawh, ka dang a ro zo a engmah sawi tur reng ka hrelo, mipa zawk ka ni a, kum lamah lah kum thum ngawtin ka upa zawka mahse, a ngaihtuah ang te kha keichuan ka ngaihtuah pha ve hauhlo.








Ka zah thar a, ngun taka ka ngaihtuah hnu phei chuan hnaih ve tlak leh a kawppui ni tlak pawh ka lo nihloh zia chu ka hre chiang telh telh a ni.







Veng khatah kohhran khata lawi chu inhmuh lohtheih a nilo, hlat chu ka tum ka hmuhfuh chang pawhin en loh hram hram ka tum ṭhin, chutiang chiahin a nipawn min hel a. Mahse, a hma zawng aiin kha zan aṭang khan ka rilruah a cham a ka vei zui bawk. Amah pawh ka awmdan ang chuan a awm ve tho a, min hel hram hram chhan chu chuvang pawh chu anih ka ring.





Engtin nge chhungthil chu ka hriat theih?






Ka laka a rilru puthmang te inthunun a tum dan te chu hrilhin a ṭhiannu hnenah a inbun ruak ve ṭhin a, chu chu Zo-a hnen aṭangin ka lo hre veleh ṭhin, keimah zawk hian a duhdan chu tihpuitlin sak ka tum mai angai tih ka hria a, chuvanga ngaihsaklo ang taka awm zui ve ta pawh ka ni nghe nghe.







Kan duh em em te duh lo leh hmelhriat ngailo anga awm tawp chu hrehawm ngar ngar tak a ni, a duh dan nilo phei sela chuan ka tilo chiang kher ang chu.







Zankhat chu KṬP hnathlan naah lohtheih lohin kan inbiak angai a, pangngai tak chuan ka inbia in ka hria, a pangngai mah mah maithei bawk, mihrang inhre ṭha lemlo ang maiin kan inbia a ni. A tu ve ve pawn kan tum dun em a, kan thei ngei bawk a, kan rilru erawh a inhmu tlang dun ngang mai bawk si, mi hrang anga in en ka tum poh leh kan theihloh zia chu keimahni ve ve kan inhria a ni.







Ban hun dawnah chuan kan hmanrua senghawia kan buailai mekin Zorama nena Biakin choka ṭanga an lo chhuak chu ka hmu a, midang awm ve nuk tho mahse, Zorama nena inhnaih taka an kaldun chuan engtin emaw keimah ah nghawng a nei a, ka thinur dawn dawn a, mi hmuhloh lamah ka inhumruh ṭeuh reng ringawt.








Tun hma a kan inkawp chhung khan Zorama hian a hel ve fo a, inngaizawng nghet tak kan nih avangin midang hi chuan beisei enah a tu ve ve pawh hi min en loin ka hre ṭhin, Mahse, Zorama hi a rawn lang ve hlawl a, kan Pastor Pention tawh tupa a ni a, chhungkaw awmthei leh khawsak nuam tawk tak an ni bawk, phaiah hnathawka rei tak a awm hnuah helamah a rawn inbeng bela, reilo teah hna pawh a hmu thuai reng a, Mki nen kan inkawp tih kha a tirah khan a hrelo nge ni alo ngaizawng a a lo Bem ve ngei bawk a, a ṭhianten kan chungchang an hrilh hnuah a inthiar fihlim ta kha a nia.







Tunah Mki bulah ka hmu leh ta bawk si chuan ka awmdan a ti danglam lo theilo, hun dangin dinhmun dang tawh mahsela hmangaihtu thinglung kha a la danglam ve tlat silo a, ka thiklo theilo a ni.







Nula ho chuan thingpui an lo sem a, a ṭhiante kianga Zorama nui hawk hawk chu ka mitmei zauh zauh reng a, ka lawmlo ṭun rinngwt a, an inkawp ang tih mawlh mai chu ka hlau a ni, ka rilru a chhia a ka hmasial zia pawh ka inhre chiang mahse, chutiang rilru chu pulo turin ka inthunun thei tlat silo.







Kan ṭhutna lampana Mki thingpui lo chawi phei chu ka lo en vat a, chutah a ṭhiannu koin "Chhaklam ka lo sem ang" tiin kan awmna lam chu a kalpel a, keimah min hel a duhvangah ka lo ngai leh hmanhmawh a, zanin tehreng chu ka thin a tawt urh mai a, ka inbengdai hleithei meuhlo.







Ka ngaihtuah lai mek chuan Zorama pek chuan "Mk ka rualin haw la" ka hriat phak ngei tur maiah chuan a la ti ta zui a, nuih a za duhlo kher mai.






"Saw chuan thlun a va tum hmel ve" nui tet tet chunga Zo-an a lo tih pawh chuan ka nui ve theilo, chhungril lamah ka sa pup pup ringawt mai a ni.







Zorama nen chuan Bike-in an inphur haw ta ngei a, an kal hmaa Zoraman nui chunga min rawn en kher chu ka run hle bawk, khapa phiangsen khan ka thik dawn tih a hrechiang hle, chapo hmel hawisang tak chungin min lo en ngei bawk anih kha.







In ka thleng chu thinrim burin inchhung ka luta, ka nu leh ka pa ten Tv an lo en a, midang erawh hmuhtur an awmlo. "Khawnge Thanpuii hi?" ti a ka zawh chuan "Bawiha hruaiin khawnge maw akal ni tun mai kha chuan a awm reng kha" ka nu in a lo ti mai a, "Ṭhenawmah khan a niang" ka pain a lo ti ve bawk.







Inbualna tur tui ka lum chawpa ka nghahlai mek chuan Thanpuii chu Bawiha pawm chungin a lo lut a, langsara taka ka ding chu min melh eihloin Room ah a lut tlanga, a mengsen deuh rama ka hriat a vangin ka zui ve nghalthuai a, mutna a lo siam mek chu khumsir lehlam aṭang chuan ka han thlek a, a ṭap emaw ka ti zeta, a hnu deuah thlanglam tukverh lampana a zai tak avang chuan a ṭap ni chuan ka hrelo.






A lo let leh chuan "Khawnge in kal a?" ka lo ti hlak a, "Sawtah Rini te inah" a lo ti liampuat a, a zai leh nghal rat rat chu han biakzui vak ngaihna ka hrelo a, kal leh mai tuma ka inher chu khuma ka fapa thil khawih ka hmuh rualin ka tawp chawt a, a kut aṭanga ka pawhthlak sak chuan a lo ṭap pur a, Thanpuii chuan min lo en rang hle bawk.







"Hei hi eng damdawi nge?" lek vut paha ka tih chuan "Lu na damdawi anih kha" tih leh min chuh a rual a, ka lo pe duh bik mailo, luna damdawi a nilo tih ka hre ve kar.







"Zothanpui hei hi i Bag aṭanga bawihan a rawn phawrh chhuah a nih hi, lu na damdawi a nilo tih ka hrechianga engvanga kawl nge i nih sawi rawh" ka tih leh chuan "En chiang ta che hritlang damdawi a nih kha" a lo ti vin hlar a.








"I hritlang em ni?" awihlo fe mai chuan ka ti a, "Hritlang" tih leh ka kut aṭanga pawhthlak a rual a, a mitmeng ka chik chuan a rui deuh phualin ka hria a ka chiang ngam zanlo, chu loah a hritlang nge hritlang lo tih ka hre bik bawk silo a. "I hritlan chuan chhuak daw daw loin muhmak rawh" ka ti leh a. "Damdawi kan lei a lawm mawle" bak hlarin a lo ti thung.








Chhang buai tawhloin inbual turin ka kalsan a, ka inbual zawh chuan a lo muhil der tawh a, ka fapa erawh a la harh ṭha hle thung, na nei ang maiin a tleilo a ka nuin "Ka lo mutpui ange" a tih chuan ka hnial lo a, a nu bul aichuan a pi bulah a tlei zawk reng reng a, a nu lah zawng kah thlak an sawi ang hlauhin a let hlawm tawp ringawt tawh.









Mut hmunah chuan ngaihtuahna a vak thui duh ngang mai, Zorama leh Mki chungchang mawlh mai chu a ni. Zaninah khan an inphur haw a, eng vang nge ni ang, veng inhnaih em em an ni lo a, Zorama te in awmna lam nen phei chuan a inkarkik daih nghe nghe a, khati chunga a thlah anih chuan chhan engemaw tak chu an neih ngei ka ring a, ngaihtuahna a ti chhawmawlh pha kher mai.







Zingah chuan hna kalturin ka insiam mawlh mawlh a, ka mawza leithar bun mai ka tum chu ka hmuzo lo a, "Puii ka mawza kha khawiah nge i dah?" Bathrooma a awm chu ka au lang lang a, a thawmhnaw bawma a dahluh thu a lo sawi chuan ka hawng nghal thuai a, mawza chu a lo awm ngei a, Safe inhawng sa chhunga ka thil va hmuh chuan min ti sa kher mai.







Hritlang damdawi bakah chi dang dang a ni, ruih theih chi lam hlir mai lehnghal, Bathroom aṭanga alo chhuak thawm ka hriat rualin Safe chu ka khar thuai a, "Ka nuamsamlo ka mu leh rih dawn" ti a khuma a let leh thak chu a ruih vang tih ka hrechiang tawh ngang mai.








"Damdawi i va kawl hnem ve" chang fek fawk a ka tih chuan a rawn ṭhu chhuak hluai a. "Ringawta!" a tih rualin a Safe bul maiah ka lo ding si a, a hrechhuak leh hnuhnawh aniang "E...khang te chu invennana ka leikhawl anih kha, ka ṭhiannu Lindai kha Medical MR a nia a tlawmin min leitir, Bawiha damdawi te pawh a tel nual kha" a ti zui mawlh mawlh a, ka awihlo riau nain ka chhang buai duh ta lo a, a ti lai ka man chat te anih ngawt loh chuan tuna dawp hian awmzia a nei dawn hauhlo, phat mamna tur a hre mah mah tlat.








"Anih chu, damdawi te hi ei zen zen aṭhalo ania, a nazawngin eimai ṭhin suh, i kal a khawihpawi thei ania, i kal a chhiat chuan chuti hlauh a ni mai" tiin ka sawi ṭhaih zui hlak a.








Chhunah chuan Rini ka phone a "In dawrah ka nupuiin Damdawi a lo lei ṭhin em?" ka va ti tawl a, a tir chuan mak a ti deuh a, ka uang emaw a tih hnuah ka hriat ngei ngei angaih thu ka lo hrilh tak vang chuan min hrilh ta hram a.







Thangpuii chuan tlai tin damdawi a lei ṭhin a, amah ta anglo leh mihrang2 ta ang vekin a sawi ṭhin, an lo ringhlel ve mek a, a lei leh dawn pawha pek tawhloh mai an rilruk tawh tih te nen lam min lo hrilh ta a, damdawi a ti ni ngeiin an hre bawk. An ni mahin chutianga an sawi takah chuan phat rual a ni tawhlo.







Tlai ka haw chu Safe chu ka hawng lawk a, zinga ka damdawi hmuh zozai kha a lo awm tawh hauhlo, Pum lam damdawi a tui chi bur hnih chiah a lo awm tawh a, a dah sawn nge a ei zo vek tih chu ka hrethiam tawh neklo.







Ka nu eirawngbawl laimek chuan Thanpuii chu Bawiha pawm chuangin a lo haw a, a mengsen riauin ka lo hre tlat pek a, ka ngaihbel nge mawni a fim lo riauin ka hria a ni.







A che zia chu ka en zui ta reng a, a rui tih lah ka ringhlel telh telh a, han hriat thawi takah chuan a awmdanah chuan hriat a lo harsa lo. "Zothanpui lo kal vat teh" dawhtheihna neilo fe mai chuan ka ko a, a la rawn kal duh lawklo chuan ka dawhtheihna min phehsak ṭhelh a ni.







Muangchanga Phone khawih chunga a lo phei chu "I phone kha dah teh" ka lo ti vin hlak a. Min melh rum nghal ram ram chu "Enge i ruih?" ka lo ti chang fak a.







"Ve leh ringawt che chuan" a ti chu ka dawp kual peih ting tang ta lo "Damdawi i tihna a rei tawh em?" ka ti vi nghal hluk a, a meng tal tap chu ka hmuh hmaihlo. "Ka ti lo e.." bak zetin a ti nain a mitmeng a tlan chhe hle a, tunah pawh a rui mek tih chu a inhre ve kar ang.







"Zep buai hauh tawh suh ka hre vek tawh" ka tih leh chuan a ner nang a, "Nangpa hi min ṭhen dan tur ngawt i ngaihtuah leh tawh anih kha" tiin a phun zui hlak hlak a. "I damdawi kawl zawng zawng kha rawn la chhuak rawh" chang zeta ka tih chuan a mengrum ṭha tawh viau.







"Ka safe ah khan a awm reng kha" kei aia vin mah chuan a ti leh zat a. "I lak chhuah tak ho ka a nia ka sawi chu" ka lo ti leh kher chu "I daw thei lutuk, min puhna tur ringawt i zawng anih kha, min hnawhchhuah tum tum mahla ka chhuak chuanglo ang" a lo ti let erh mai a.







"Damdawi chu rawn la rawh" chiang fek fawka a mitah enchunga ka tih leh takah chuan hlauthawng hmel a pu deuh a. "A expire a ka paih daih tawh" a lo ti a, chu zawng ka awih hauhlo.







"I paih chu va chhar leh rawh?" ngei hmel zeta min melh lai chuan "Tunah" ka lo ti leh nghat a. "Vawinah bawlhhlawh paih motor ah kan paih tel daih tawh" a tih laia a aw chu a zuih ral hle a ni.








"Nsa an hnute ala hne a, a hrisel lo em em bawk chutih laiin nang hian damdawi ilo rui ṭhin a, i fapa hi tihhlum i lo tum leh tawh em ni?" ka sawizawng pawn ka thinur zia chu ka aw ah a lang thei. "I zaktheilo e a" a la rawn ti leh kher bawk nen ka insum zo tawh nganglo khum chungah chuan ka vai thlu nghal ṭhuai mai, a rak ṭhat a "LALMUANPUI" tih leh pahin rum fahranin min melh a, a lo duai lo nasa mai.







"Hmel a, kut min thlak a maw, i ngaihzawng neih vanga kut min thlak hi ka sawi khawp ang" tiin rang lutukin choka lam apan a, ka umzui nghal thuai bawk.








(Ka type sa ka cut palha ka tlai ta vek a ni, sorry u) ADS click kha theihnghilh lo hram



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:35 pm

SAWININ LOH MK - By Ahmangaihi violette khiangte


CHAPTER - 8


"Lalmuanpuia hian kut min thlak ringawt ania" tih leh ṭah a rual ta mai a a ṭap ring viau lehnghal, mangan hmel lutuka ka nuin minlo en chuan sawi ngaihna hrelo zetin thawk ka la hawk ringawt a, Zothanpuii awmdan chuan ka thinurna a tizual ting mai.






"Engthil nge ni, eng buaina nge in neih a Mapui?" ka nuin a lo ti nghal chul a, ka chhanglo.






"Lo kal teh" tih leh Zothanpuii chu ban ka ruala a lo duh i khaw lo zui a, ka kut chu a beng thla hmak ngam nia! Chutah thîp zeta min melh chungin "Mi tenawm i nih kha, zanah School a Muankimi nen intawm ruk te kha ka hre vek ania, in inzui laikha miin an hmu vek che u" a ti zui pang pang a, sawi leh tur pawh ka hrelo, min ti dang lel a ni.






"Mapui enge chu chu a awmzia?" ka nu bawkin a lo ti leh a, "Engmah chutiang a awmlo" Thanpuii melh rum khai chunga ka tihlai chuan thip zetin minlo melh ve rân bawk.






Khazan khan tupawn min hmu sela ruahsur hnuai thim tham a ni a, kan infawp lai phei kha chu an hmu dawnlo tih ka chiang viau, kan inzui haw dun leh ruahsur hnuaia School building kan pan dun lai kha an lo hmu chauh zawk niin ka ring.






"Nangmah zawk khan han sawi teh?" Thanpuii lamhawia ka nuin a tih leh takah chuan "Muankimi nen an inhmu ru a lawm, kohhran ah an inhmang dun a Chance an lo neidun ṭhin a, midang pawhin an sawi sep sep tawh" a sawi laichuan ka lo nui hak a, School chungchang kha engtin nge a lo hriat chu ka hrelo a, chulo chu sawi sep sep ngai khawpa kan awm ka hre hauh lo.






Mki nen chuan engemaw zauh changa indinchilha kan inbiak chang pawhin thil pangngailo se se thu lam kan sawidun ngailo a, inhmelhriat ṭha satliah ang chauhin ka inbia a, chuta karah kan inbe khat hle bawk, ka ngaihtuah ngial pawhin sawisep tur awma kan awmlai reng reng ka hrelo.






"Min rawn zui teh" chang fek fawk tih leh pahin kan room lam ka pan zui a, a tawi khawmuang deuha "Ka nghak che a nia" ring lenglawnga ka tih leh takah chuan muang changin a lo phei a, "Enge?" kawngka a luh rualin a ti bak hlar bawk a.






"Khumah hian lo ṭhu rawh thil sawidun kan ngai" ka lo tih chuan lawmloh hmel fahranin khumah chuan a ṭhu a, kei ka ding thung.






"Sawi rawh" ram hmukin a ti leh a, thinrim zawk ka nih laia min lo chhawn dan chu ka huat zawng tak atling a ni. Mahse, ṭha taka sawipui ka duh vangin ka insum lui hram hram thung.






"Inṭhen i duh em?" chiang fek fawka ka tih chuan phawk zetin min en a, a meng ling nghal hlar bawk.





"Kha tia min en lo khan i duh nge duhlo chu sawi rawh" ka dawh theilo lam mah tawh a ni.





"Duhlo ta ila engtin nge i tih ang" ner sak chungin a ti a, ala naupan tehlul nen a mizia hi a huaisar zek a, a luhlul zia phei chu ka hrechiang tawh hle, tiang khawp hian luhlul lo sela chuan a chen pawh kan chengdun tawh hauh nang.






"A ṭha e, inṭhen i duhlo a heta la awm ve i duh a nih chuan, i Damdawi tih kha sim ang che, inah awm tam la i fapa bak hi thil dangah pelhe sek reng tawhlo la, ka dawh theih hram hram lai che hian min runluih hauh suh ang che, damdawi i khawih a i rui leh ani tih ka hriat vaih chuan sawi buailoin ka ṭhen nghal ang che" chiang leh fiah kelh kawlh a ka tih chuan min en ran a.





Min chhanglo a a ngawihreng vang chuan a hrethiam ni hmiang ka ti mai, Sitting room lampan tuma ka tho chhuak chiah chu "Min ṭhen pawh nila ka haw leh hawloh chu ka thu thu" a lo ti khauh a, ka beng leh teuh hman kher a sin.






"I ngam anih chuan min han runluih teh enge ka tih chu i hre mai ang" vau aw ka a ka tih chuan min chhang zui duh leh tawhlo, inhumruh ṭeuh chungin Sitting room ah ka chhuak phei a, ka pa leng chhuak chu kawngka ah a lo lut ve chiah bawk a.






"Enge in inhauh chhan ni a?" ka pa hriat hlau tak leh zawi fahrana ka nuin a lo tih chuan "Engmah a nilo, thil enge maw mai mai ah kan i hnial anih kha" ka lo ti liampuata.






"Mki chungchang te kha a sawi sia" a lo ti leh hram a "A hriatsual palh mai mai anih kha" tih zawngin ka chhang a, ka thil sawi chu a awih vaklo tih chu a hmelah a hriat reng.






Thanpuii chu ka chîk ru ta renga, amah pawn ka chîk tih a hria aniang chu kar tluanin a leng chhuak ta biklo a, Linda-i te lam ka zawh chuan an hnenah Damdawi a lam tawhloh thu min lo hrilh a, a sim dawn ta niin ka hria a ka thawk a veng ve deuh huai a ni.






Kan fapa Nunsanga lah a hrisello nasa maia, engemaw hlekah tlang hrileng a kai deuh reng hi a ni ber a, Damdawiin in han luh chhuah zawk zawk chu kan nei deuh reng ṭhin, chuta karah Thanpuii a rai no lehta zui a beiseiloh laitak lehnghalin, Nsa pawh kalhfal ala ngaih laitak a ni, a raino chu a mu deuh chawt renga Nsa chu ka nu kutah a tla a ni deuh ber.






Office kalin ka chhuak tih loh chu keipawh inlamah ka tawm chawt renga, inkhawm zanah pawh ka nu leh pa te inkhawm an duh ṭhin vangin inah Nsa ka lo awm ve thunga, Zo-a a lo leng zauh zauh tih loh chu ṭhian pawh ka kawm tamlo khawp mai, tun hma angin Muangsanga nen lah kan inmil ta vak silo a, a farnu laka ka awmdanah min sawisel zauh zauh a lo ching vei bawk nen, kan inti hleithei meuh tawhlo a ni.






Thanpuii raino chu a mu reng maia, Bathroom a thleng peih awrh chauh anih laiin na nei hmel lah a pu mang silo a a awmdan chu ka hrethiam phalo kher mai, mut hmunah Video enin a nui iar iar reng a damlo natak chu a nilo chuan ka hria.






Sunday inkhawmna ah Mki chu ka hmu zeuh zeuh ṭhin a, a Usher chang chuan hnai takah ka hmu ṭhin, chubak chu inhmuhna ka nei meuh tawhlo a kohhranah ka tal tam ta vaklo zui nen, rilru in theihnghilh ngailo mahse, zawi zawin hetiang hian kan inhlat thei ta chu a nia, chu chu atan thil ṭha tak a ni bawk.






Zorama kha an inah a leng ngawrh hle tih ka hre zui a, Mki pawn dawr siamin hna lamah a ṭul ve thei hle tih chu a chanchin ka hriat hnaivai chu a ni leh mai, thik rual loh thikloh theih siloh Zorama kha mipa vannei tak zawng a ni.




Mite titi aṭang pawhin palai kala an inrem vat an beisei ṭheuh a ni.





Thanpuii naupai pawh a lian ve zel a, Nsa a pai laia a awmdan ka hrelo a tun ṭum erawh raipuar hrawn hrehawm ve tak niin ka hria, a tih a tamin a phun chiar ngang mai bawk a, ka nu pawh a vik kha kha reng a, ka lo ngaitheilo lek lek a ka lo khak ṭhin chu ka nuin min hau zawmah lehnghal a "Naupai ala na ve rih a nih hi, a rei anga a zia chhawm ve mai ang" ti a a thlavang a lo hauhsak chu ka hrethiam pha meuhlo.






Nupa kan ni tak nain Nupa nun lam hi kan ṭha dun vaklo a, tun hma ang tho kha a la ni, enge maw chang chuan min nawr ve deuh ṭhin a chutiang hunah chuan a duh ang chu ka pe mai a, chu chuan kan nupa inkar a tih ṭhat phah chuang hauhlo bawk.






Kum tawpah Zo-an nupui a nei a, kan nupa a kal ve tur kan nihlaiin Thanpuii dul a puar lian ve tawh si a, chu chu a lo chhuanlam vei bawk nen ka fapa nen chauh chuan kan kal a, kohhran dan khatna a innei an ni bawka a ropui ngang mai.





Miten an hlutsak zia ka hmuh chuan rilru in nunhlui a chhuikir leh ṭhin a, ngaihtuah loh loh min ngaihtuah tir a, Mki nena kan inneih tum kha lo puitling ta sela vawin te hi hetiang lo hian kan hmang anga, nun hlimawm zawk ka nei angem tih te chenin ka ngaihtuahna ah a lo lang a, ka nupui neih ve dan lah khati tehtawp mai kha ania, mihring nun hi lehkhachaih tuin a duhtawka a chaih kual ang mai hi nita ber in ka hria.






Tlai lamah Mo lawmna ah Mki nen kan inhmu hlawl a, a thau ta deuh hleka chutih rualin a hmelah a upatna a lang ve ta deuh a, a hmel erawh a ṭha zual telh telh mai. Min hmu chu keimah min be loin ka fapa zawk a bia a, "I inkhawm ve em?" ti a ka lo zawh chuan min en ve chauh a, "Khawm ve e, ka hmu reng che a lawm" tiin min chhang a.






"Naute innei leh dawn tih ka lo hria a?" a ti zui zat a, chhan ngaihna vak ka hrelo "Nia" ka lo ti mawltawpa, chutah mawi fahrana min seihin "Ka lawmpui che aw" a ti zawi sap a, ka chungchang sawi chu nuam ka tilo ru hle a, a lakah chuan ka la inthlahrung dek reng bawk.






"Nang engtin nge, pasal neih lam té?" tiin a chanchin chu ka zawt lêt a, "Maithei, kum sawmthum ka chuan hnem hmaa neih tur zawn ve vat angai" uang deuh takin a lo ti a, zangkhai tak hian min be thei zel mai.






"Zorama chu a fel a lawm, in inhmeh khawp ang chu" ka lo ti a, thikna rilru chu chhungril lamah a awm rauh rauh a, min ti hrehawm ṭun reng bawk.






"Zorama tih ka sawiloh kha Mapui" nuisak chunga a tih chuan ka hamhaih deuh a "A nilo a mi?" ti a ka fiam zui chu a nui hak hak a. "Ti hian len rei manah ka thing kual hrep phawt anga, atawpah miṭha deuh an lo chhuak maithei a sin" nuisanga min en chungin a ti a.






"Keimah anglo deuh zawng la, miṭha an ni vek mai ang" ka lo tih chuan a nui tawp daih a, a lung ka ti awilo em mawni ka ti rum rum a, nuamlo ka ti leh kher mai, a hmaa ka lo bum tawhna kha ka hriatchhuah tir anih ka ring.






"Miṭha deuh i tawng mai ang, i phu a lawm" inthiamlo deuha ka tih leh chuan min en vang vang a.




"Nia phu ve e... Mahse, nangmah ang deuh hi ka zawng a, an vang em em bawk si anih hi" a ti zawi sap a, eng rilru pu a chutiang thu chu sawi nge anih ka ngaihtuah buai nghal chung a.






"Mk....." sawi leh ka tum laitakin Unicky a lo kal a "Haw tawh ila, khua a thim dawn ania" tiin kan titi chu arawn pawt chat a, kan in en vawng vawng a, engmah kan sawi zui tawhlo, an haw dawn te chuan kawngka bula ding chungin min lo en leh ṭhin a, a landan chu ka khawngaih reuh hle a a lung a leng deuh anih ka ring, midang in an biaka a nui tawi tak tak te chu ka en zui ve ta renga, a rawn hawi leh zawk ṭhin a, a awmdan chuan min ti buai ru hle thung.






An haw tak hnu chuan rei awmtawh loin kan haw ve thuai a, In kan thlen chuan ka nupui chu a lo awm hauhlo a, ka nu leh pa lah damlo kanin an lo chhuak daih bawk.






Nsa ka mutpui a, a muthilh dawn siar siar ah Zothanpuii chu a lo haw ve hlawl a, min hmu chu a phu deuh zawkin ka hria.





"Khaw nge i chhuah a?" chang fek fawka ka lo tih chuan "Dawrah thil ka lei lawk, in van lo haw hma" tih leh min kal pelh a ruala, Polythene baga a thil khai bawr luk chu nepnawi eng engemaw a ni a, chutiang ei chu a chin em vangin ka hau fo ṭhin.






"Khatiang kha a hrisello a sin" ka lo tih chuan ka thusawi ngai pawimawh lo fein a kheh zui rak rak a, mu chungin a Phone a bih a, a rawn nui leh thut ṭhina a thawmah Nsa a phu zawk zawk reng nen "I mut ala chhuah loh chuan saw lamah va awm rih rawh" ka lo ti hluk a, min melh rum leh zet hnuah Sitting room lam a pan a, a lo mut leh lai phei chu ka hre zui tawhlo.






Ka ṭhanharh laichuan ṭawng ri bal bal thawm ka hria a, Bathroom a ṭang niin ka hria, Thanpuii mutna a ruak a amah a ni tih ka hriat vangin ka fapa chu puansin ṭhattirin ka mu ṭha leh maia.






Muthilh ka tum zeta thawm ri sat sat reng vang chuan ka muhil thei ta mailo a, Thanpuii lah Bathroom ah chuan a la awm ta ngar ngar a, Dar 12 a ri dawn tawh a, thlasik vawh lai ani vei nen chu chen chen Bathrooma a awm chu mak ka ti ta deuha, koh chhuah tuma ka tho chhuak chu Bathroom bul ka thlen rualin a Phone hmang thawm chu ka hre zui a, khawng khar kik ta mai biklo chuan kan ngaihthla ren rawn a, tu emaw ngam tlak tak bia a anui kar kar ri chu ka hrechiang hle bawk.






"Kuahlum tu neih loh te chu khati mai ang, a hreawm zia chu keiman ka hre chiang" tiin a nui hak hak a, a thil sawi chu ngaihdan ka nei thiam hauhlo. Kik mai ka tum leh lai takin "Kan pa te chu a nep em a lawm" a tih ri vang chuan ka tawp chawt a, tu phiangsen nge ni a biak ni?






"Mi lah hi i ringlo ve sia, lo ngawi tak rawh naute ka neih zawh hunah ka la tlanbo san daih ang, pathlawi chhang chhe deuhah kan siam phawt anga maw a la chawh khawp ang" a tih ri chuan ka thin a ti sa phat mai.






"Enge ka sual na, ka khamkhawp pawh min pe duhlo te chu lerh san ziai ziai mahila tuman min thiamlo awmlo emai, inla pa ve em em ringawta nep tak a ni, min tihdan kha ka lungawiloh vangin ka la awmlui ngat ngat anih hi" nui hak chungin a ti leh a, kei ka lo ner sawk thung.





"Ani aichuan a lêt in i ṭha" tih ri chuan nuih a ti za lo hle bawk.





Hrep chuan, ngaihzawng ka nei e te a lo ti anih chu!






"A vawt si ka mu tawh dawn, naktuk zanah kan inhmu leh dawnnia" a tih rual chuan ka inher vuta, khumah ka mu fel chiah tih a Bathroom kawngkhar chu a lo ri rak a, a thawm ka hriat hnu lawkah ka bulah chuan a lo mu a, ka kawr a rawn zen nghal rawk rawk a, ka thinrimna thunun tumin ka in sum hram hram tih hria sela chuan min hnaih ngam hauhlo ang mawle.






A muthilh hnu chuan a Phone chu ka ensaka, tu emaw Ruatpuia tih nena an inbiakna chu ka enkuala, ka ngaih ang chiahin ngaihzawng chu a lo nei ngei a, zanin pawh khan an lo i hmu ru tih chu a chiang ngang mai.







An inbiak danah tun hnai lawk aṭanga inkawp pawh an anglo, College pawh an lo kaldun niawm tak a ni. Hrep tak chuan a..!






A inbiakna ka en zel chu ka beiseiloh pui pui ka hmu tel ta nawk mai a, min ti ham haih let der a ni!





(Happy ending in beisei mauh mai sia, tlemin kual hlek ang aw, buai map map ang chi khan inbum kual leh vel ila induh em, comment leh click lam kha han ṭang ve bawk ula, keipawh ka lo ṭang ang...hihi)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:35 pm

SAWININ LOH MK - By Ahmangaihi violette khiangte




CHAPTER - 9







Engthil phiangsen nge!!!






"Naute hi i fa a nia tinge a kiangah ka neih kher angaih ang?" tih zawhna ka nupui Zothanpuii ngei maiin a thawnna ka hmuh chuan min ṭhawng takzet a ni!






Ngaihzawng a nei satliah mai niloin ka fa anga ka lo ngaih char char a puma a pailai hi a ngaihzawng fa tih na maw? Hrep tak chuan leh!







An inbiakna chu ka chhiar zel a, mipa thil rawn sawi chu mak ka ti deuh deuh mai, "Ka u ka lo zawt phawt ang, a thu loin engmah kan ti tur a nilo, tih tlak angaih leh kan ti tla anga mahse ka u in engkim a tihfel hma chu kha mi laktlaklohpa kiangah khan i la chen rih angai ania, lo tuar hram hram phawt rawh, kan pahnih tana ṭha tur vek anih hi" tih thu chu ka hrethiam pha chiah lo.







Inbiakna ṭhenkhatah chuan kei min ṭhen huna an hmalam hun a remruatna an neih te an sawidun zauh zauh a, Zothanpuii lah chuan ka kianga chen a nin tawh thu chu hahipin a lo sawi ve bawk a, a ngaihzawng pa lahin amah a hmangaih tak zeta a kianga chen a duh tak tak anih chuan chhel taka tuar hram hram turin a lo fuih ve cham chi bawk.







An inbiak karlakah chuan tu emaw hi an sawi lang leh zauh ṭhin a, tu emaw an mahni pahnih duhsak deuh tu nimai awm a ni, a hming a sawi lang lemlo a mahse, an thil tihruk nena inzawmna liantak nei chu a nih tih an sawidan aṭangin a chiang renga, "A thu kan awih hi nuamsa taka kan awmdun theihna zawk tur a lawm, kan zawh ṭep tawh hi" tiin ṭum khat chu mipa zawk chuan a sawi zauh a, tu chung chang nge an sawi tih chuan ngaihtuahna a ti buai ru nak mai!







Zan khuain ka muhil zui ta lo a mut lah a chhuak hek lo, ka ngaihtuah chianga ka thinrim zual telh telh mai a, thlasik khawvawh laimah nise ka thinrimna sosang lutuk chuan min ti sa pup pup thei hial a ni.







Zothanpuii muhil hmel chu ka va en ṭhin a, pawh thawh lawpa a zan azana hnawhchhuah rum rum tak ka nap a, a rilru ṭhenkhat chuan dikin a hre bawk silo, engthil emaw a bialpa nena zep ruk an nei tih lah ka ring nghet bura, hlawhtling taka min bum tawh hnuah chu em hrechhuak lo a chet nghal but chu a diklo deuhin ka hre lawi bawk si.







Engpawh nise, ka lakah engpawh tum neiin zep ruk lo nei sela, engthil nge tih chu ka hrechhuak dawn khawp a lawm, kha a ngaihzawngpa nen khan min la bum chhunzawm zel em tih chu kan la hre khawp ang le.






Zing a rawn thawh chuan khumbul Chair a ka lo ṭhu chu phawk lek lekin min en a, chumi hnuah mit nuai chat chat chungin "I va tho hma awm em em" a ti zui a, ka lo kiai suk duh chauh a ni. Ka fapa lo harh ve chuan ka hming a lo lam nghal mai avangin ka lo pawmkang thuai a, Nsa pawh hi ka fa a ni chiah em tih ka ngaihtuah buai ta hial!






Hlauhthawnna ka nei a, rilru ana tel deuh tlat bawk, ka fapa takngial pawh a pa ka ni em tih ka ring zo ta lo chu a nia, a thanat thlak takzet a ni, nep ka inti ru vawng vawng a, englaiah khan nge tihsual ka lo neih lah ka chiang si.







Ka fapa chawei lai hmel chu ka en leh veng veng ṭhin a, tupawn lo sawi mahsela ani hi chu ka fapa ngei a ni, a mit, hnar leh lu ûm te pawh min chhun in ka hria a midang fa chu ni thei ngangin ka hrelo, Zothanpuii pum chhunga mi erawh ka fa chu a nilo tih a chiang phawt mai a, he thil hi ka chinfel thuai chu a ngai ang.






"Chaw i ei mang silo a, tinge Bawiha pawh chu i thlek vung vung reng le?" mak min tih hmel lek lek ka nuin min zawh chuan ka hawi chhuak vat a, ka pa leh Zothanpuiin min lo en ve chiah bawk.






"Bawiha hi a thau ve deuhin ka hria" ka awmdan thup tum taka ka tih chuan ka nu chu a nui a, ka fapa sam chul pahin "Tunlai chu chaw a eiṭha ve deuh a, a thau ve sâwt a nia" tiin Nsa chu chawhmeh a suah sak dan dan a, Zothanpuii erawh ngaihtuah zuilo zetin a ei mawp mawpa, a chetzia engkim chuan ka mit a tikham a ka haw hlur ringawt tawh.






Office kal tura ka insiam laichuan "Tlaiah Thei lo lei haw teh, neih sa kan nei tawhlo ania" ka hnunglam aṭangin a lo ti a, a lam ka va hawi chuan duhdah angreng zeta khumah muin a Phone a en a, min uksak zui hmel a pu lo.






"Eng Thei nge i duh a?" bung fe a ka tih chuan "I duh duh kha a ni mai, Coconut tui pawh aw naute tan a ṭha an tia" a lo ti zui leh zat a, ka lo ner deuh sawk chu min en zui leh tawh lo, "Ka lo lei ang" chu ka ti ṭha ve mai bawk a.






Office ka thlen hnu pawhin ka ngaihtuahna ah thil dang a leng hleithei meuhlo chu a ni, engtianga han tih zui tur nge niang tih chu mawlh mai chu ka ngaihtuah a, Zothanpuii ngaihzawngpa Number ka lak chu ka hmetchhuak leh ṭhin a, ka rilru a buai ru kher mai.






Nizana an inbiak khan "Naktuk zanah kan inhmu leh dawnnia" tih Zothanpuiin a sawi kha ka ngaihtuah chhuak a, a ṭha dawn khawp e, han inhmu teh poh sela enge ka tih tur chu i he loin a chiang tawh mai ang chu.







Banah chuan Thei chi hrang hrang leiin ka inkhai haw a, kan In thlen hma kawng pengah Mki leh a ṭhiannu ka tawk hlawl a, ka biak hmaa min lo nuih avang chuan keimah zawkin ka be hmasa a, tum loh deuha tawk ka ni vei bawk nen ka lai deuh huih a "I va bawr ve, i bazar a mi?" Mkin a lo tih chuan "Thei vel ka lei a, in duh ve em?" ka ti ngawt pek a, nui chungin a lu a thing a, "Innu tana i lei ani awmsia kan kan lei te a pan palh ang" uang taka a ṭhiannuin a lo tih chuan ka nui tawi tak a.







"I va inkhawm ngailo ve, in damsam lo em ni?" a ṭhiannu bawk chuan a tih zawm leh a, " Damṭha rih e" ka tih laimekin "A chhang chhe ve tawh a hmuh a har riau tawh" Mki chuan a lo ti ve zauh a.






A hmel chu ka en ren rawna, kan nupa chung chang chu han hre ve sela engtin tak ngai ang maw?







"Mapuia chu a nupui a duat lutuka hna pawh a thawhtir phallo an tih ka hria ania, nang hi ilo thaihbawih ru riau anilo maw?" Unicky'n a lo tih leh chuan ka nui ringawt a, Mki hmel zawk chu ka en reng thung.







"Ka kal phawt ange" ka tih chuan a bu nghata, anmahni zawk chu kal hmasa ah an ṭanga, nakinah chuan ralkhat aṭang pawhin kan chung chang hi ala hre ve leh emaw ania nga, min lainat ang nge chawh min ti viau zawk ang tih chu ka ngaihtuah zui rauh rauh a, keimah zawk chu chawh ka inti telh telh thung.







In ka thlen chuan Zothanpuii chu a lo awm ve tehmial a, ka Thei lei dawhkana ka dah chu banin Apple chu a vel mawlh mawlh a "Coconut chu khawnge?" ti a min zawh chuan "Ka theihnghilh" ka lo ti bung nghut a, a ner nang nang chu Bathroom ah ka luhsan a, ka chhuah leh lai chuan pindan aṭangin a lo chhuak a "Coconut lei turin ka kal lawk dawn ania, min ngaipawimawhlo leh lutuk" tih hlak hlak pahin min melh ruma, "Va lei rawh" ka lo ti hluk chu min melh rum zual kher mai.







Titau bar bar chungin a kalchhuak a, nuih te pawh a tiza dawn dawn, khatiang taka min bum hnuah ngaih pawimawh ala phut ngam cheu chu a nia, khawvel hi chu kan inngam hleih deuh chu a ni.







Zanriah eilaiin Zo-a te inah lenphei ka tum thu ka sawi zauh a, Zothanpuiin min melh ralh chu ka hmuh hmaih lo. "I pa nen vengchhakah damlo kan kan lo tum a sin" ka nuin a tih chuan "Naktuk zanah ti mai rawh u, Zo - a nen Ruata te ina kal kan lo tum laklawh emai" ka lo ti leh vat a, Zothanpuii ngawi reng chuan engemaw chu angaihtuah vel mekin ka ring.







"Va kal rawh, keini pawh kal theihloh thu a awm hleinem, Puiin in a nghak thei a lawm" ka pa chuan a lo ti awlsam mai a, ka rilru a buai ru deuh viau a, Nsa awmtu tur an awmlo anih chuan Zothanpuii chu a che chhuak thei kherin ka ring silo.







Zanriah eikhamah chuan ka insiam ta tho a, ka nu leh pa an chhuak hmasa a, ka chhuak tur Nsan min ngen deuh ti tih chu a nu lah chuan thlem tange a ti lem silo a, a ṭap bai bai reng a "Chocolate lian deuh ka lo hawn ang che" tiin ka thlem ta ngawt a.







"I lo haw har dawn em, i haw har chuan a lo muhil hman daih ang" ka chhuah dawna Thanpuiin a tih chuan "Haw hma vak lo ang, duh leh dawrah i lo va leipui mai dawn nia" tiin pawisa ka pe a, eitur leina tur min dil belh zat a, "A mut dawnah a ha kha i nawhsak theihnghilh leh ange" tiin pawisa ka chu ka pek belh a.







Ka chhuah dawn chuan Nsa ṭap chu a thlem a "Dawrah kan kal dawn, Chocolate kan lei ṭeuh dawn" ti a a thlem ri chu kawngka bul aṭang chuan ka hre pha a, kalna tur em em pawh nei hranlo chuan kan kawtah chuan ka pen chhuak a, kan In lan chian theihna tur kawng chhaklam chu ka pan zui a.







Kan inzawn kawng chhak zawlah chuan Pu Thanzuala te Garage thinga siam lian vaklo hi a awm a, a bulah chuan Vantlang zunin a awm bawk a, Street light engin a chhun pha lo a, chuta ṭang chuan kan kawt chu a lang chiang hle a, midang kawngkal pawhin chulaiah chuan ṭhu ila min hmu dawnlo bawk a a remchang khawpin ka hria.







Rei ka ṭhu lo, Thanpuii chu kan fapa pawm chungin a lo chhuak thuai a, dawr lam panin an inpawm phei hlak hlak a, a hnu rei vaklo ah Polythene a thil kai bawr ṭeuh chungin an lo in kai phei leh a, inchhunga an luh hnu chuan ka sana ka en a dar 7 a lo pel zawt chauh a, ala hma ang reng viau.







Ka chhuak hma leh lutukin ka hre deuh a, ka duhaiin ka ṭhu rei dawn riau mai, veng chhak dawrah kalin zial han lei lawk ka rilruk a, hman hmawh deuh chuan vengchhak lam dawr chu ka pan a, a hla lemlo bawk a ka lei zawh hnu chuan ka chhuk leh nghalthuaia, ṭhutna siam remin zial ka ṭan te te a, chutihlai mek chuan kan inlampana mipakhat jacket pawl ha lo kal phei hlawk hlawk chu ka hmu a.







Ṭhu ngil meuhin chupa chu ka enzui a, kan veng mi niin ka hrelo, ka hmuh awm ka la hrelo a kei aichuan kum 5 kum 6 velin a naupang zawk maithei bawk, ringhlel ru taka kan enlai chuan kan In chu a kal pelh nulh a, ka lo beisei ruk reng veng nge ni ṭang ṭeuha ka ṭhu chu a kalliam tak hnu chuan ka thawk ka la teh hluaia, ka mi beisei chu a nilo phawt niin a lang.







Fawh hnih vel ka zial zuk lai chu ka fawp leh hman ang tih ah, khapa te kha a kalliamna aṭang khan a lo let leh a, tun ṭum chu muangchanga kalchungin Phone a hmang a, ka ṭhutna a ṭang chuan ka lo thlir reng a, a hawi kual deuh zuk zuk chu ka hmuh hmaihlo.






Chutah kan inkawtah tak chuan dingin kan nu pangpar kung bul maiah chuan a tawi khawmuanga, a kekawr ipte zenin an hawi kual leh te te a, chutah a phone hman lai chu la thlain a indap rak rak a, engthil emaw chu a dap fuh aniang nui ṭhaw chungin kan inlamah chuan a inher ta a, ka mi nghahruk ngei chu a lo ni e.






A va zialo e aw! A thla lak nachang ka lo hre hauhlo, ral aṭang maia hmu ka nih vangin a hmel chu ka chhinchhiah rei theihloh mai ka hlau si a, inah zuk lutin zuk nang ching ta ila an thil zep ruk kha ka hre thei kherin ka ring silo, ka chêt zui dan tur ka bo ta viau mai.






Chhuk thlak rum rum mai chu ka duh tawh bawk si, chhuk ila tum ang he hu thil zuk hmu loin ka nupui awmherhi kha lo insawithiam leh leuh si sela ka hun ṭha ka bawh pelh a ni lek mai angem?







Engthil pawh nise, thil thleng tur ang ang chu a thleng zo tawh a, zuk sapatal chiam khan awmzia a awm dawn tlat lo, fim taka inngaihtuah chungin hma ka lak angai zawkin ka hria, an duhtawkin han khawsa dun sela keiin ṭhen chhan tur ka nei anga a ṭha zawk mahna ti rilru chungin chhuk chu ka tum duh buai ta lo.






Rei tak phei chu a awmlo, darkar chanve zen zawn chauh a liam ang tih ah, kawngka a lo inhawnga Thanpuii lo lawr zawk chu ka hmu thuak a, kawt chu a enkual thuak a, chumi hnuah kawng khar khar leh zetin reilo teah a ngaihzawngpa kha hmanhmawh ang reng takin a lo chhuak a, a thla chu ka la a, a fiah viau lo mahse, zoom hnaih chuan eng ang hmel pu nge tih chu a hriat theih maiin ka ring.







A kalliam tak hnu chuan ka ṭhutna aṭangin ka tho chhuak ve thuaia, Thanpuii lo chhuak lehin kawt chu a rawn thlithlai ni ngei tur a ni, a duh angin a fel fai a ni chêk ang a lut veleh nghalthuai a.







Hmanhmawh takin kei kawngpeng lampanin ka kal a, khapa kha va nanching hman ka tum hle bawk, kan in lam aṭanga lo kal anih vangin kei aiin kawng peng chu a hlat zawk a, ka thlen chuan kan in thlen phei hma a Culvert bulah chuan a lo ding mek ka va hmu a, zial a zu mek a ni, tlan titih a kal ka ni bawka ka thleng rang viau mai.







A lampan chuan ka kal phei mawp mawp a a zawn ka thlen laichuan Phone a lo hmang a, "Ngaihtuah vak duh suh, ani te chu ka thu thu a lawm, lo inti fel ve vat la i lawmman min pek tur kha min pe vat zawk rawh, i muan lutuk chuan kan tan a buaithlak ve ania, Puii pawh ka khawngaih ve tawh em em" a ti niah niah a, tu nge a biaka engthil nge a sawi chiah chu hrelo mahila ngaihdan erawh ka nei thiam ruak tho.







A bulah chuan ka va ding ren rawna chutah phawk lek leka min enin "In ka thlen hunah ka lo be leh ang che" tiin a Phone biak lai chu a titawp a, "Enge a?" tiin hlauh thawn hmel takin min zawt a, a dawih viau anih loh chuan tunge ka ni tih min hre sa tawh tihna a ni.







"Lighter i nei em?" bung nghuta ka lo tih chuan a indap rak rak a, a hmel chu ngun takin ka lo en a, ka hriat ngai ani lo takzet, sa pan lam deuh a ni a, sam buk lek lek hmaitlang hriam lam deuh a ni, hmelchhia ti a sawitur a nilo, a ngo vera nula naupang lam deuh duh chi tak a niang, Thanpuii te ang rual vel tho a ni.







A Lighter min pek ban pah chuan "Khawnge i len a?" ka lo ti zauh a, "Ih...sawtah ka ṭhiante inah" rang zetin a lo ti bah nawk a, chhang zuiloin zial ka ṭan a, zial ka fawh vang vang laichuan min ngaichangin ka bulah chuan a ding renga, keilahin a Lighter ka hmansak chu ka la pe duh bik mai lo.






(Ka regu ka intih ve hlarh hlarh nen in regu lo bik mange ka ti.....i regular tlang ang u...heheeeh)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:35 pm

SAWININ LOH MK - By Ahmangaihi violette khiangte



CHAPTER - 10




"Ṭhianpa ka Lighter khá?" inthlahrun hmel deka min enchung hian a ti a, ka lo pe ve mai bawk a. "Kan veng mi hi i ni lo tiraw, ka la hmu ngai miahlo che" ka tih chuan a nui hui a, "Ni lo e, ka ṭhiante damlo ka lo kan lawk a, keichu Chanmari lam mi ka nia" a Lighter ah ṭhat sawk sawk pahin a ti a, chuti maia an veng hming a sawi duh chu ka lo beisei hauhlo.






Zorina te veng a mi a ni hlauh lehnghala, a tihzia viau dawnin ka hria, a kalsawn tak hnu chuan ṭhianpa Zo-a te inlam panin ka kal ve nghalthuai a, thil awmzia Zo-a ka hrilh chuan a bangbo hle a, a thinrim hlur mai bawk.







"Ṭhiana i va insum thei zawk ve le, kei ni ila a zan a zanin ka hnawt chhuak nghalin ka ring" a ti hlak hlak a, keipawn a tir khan chutianga chêt chu ka tum ve rum rum tho a mahse, thil phiarruk nei ang taka an lan vangin ka insum leh rih zawk chauh a ni.







"Eng Game emaw an khelin ka hria a, chuti nilo se Zothanpuii hi ka hnena a awm tlat duh chhan hi a mak deuh a ni, ngaihzawng a nei reng anih chuan keiin ka ngaihsak lo chungin ka bulah a cheng lui tlat a, a ngaihzawngpa hnenah lah a nin tawh thu a sawi chamchi a, khapa lah khan la tuar hram hram turin a lo fuih ve mek bawk a" ka tih chuan a lo bu nghat nghat a.







"I sawidan chuan a nih hmel, Mipa ṭawngkam aṭang phei chuan tu emaw in engthil emaw chu a tih tir a nih hmel kha" a lo ti bak hluk a.







"Thlalak hi Zorina thawn ila, a hriat zawng a ni em tih ka zawt ang" ka sawi lai chuan ka Phone a thlalak chu a lo bih ve vat a, "A hmel hriatchian a va har ve le, a hla mah mah deuh anih hi" a lo ti niah niah a.







"A hmel ka hmu chiang tho a, ka hmuh dan ka hrilh anga, a hmuh tawh hnu anih chuan a lo hre thei mai ang" ka lo ti ve thung a.







In lampanin ka haw ve nghalthuai a, haw kawngah chuan ka inngaihtuah buai nasa mai a, Zothanpuiin min uire san chu huatthlala awm viau mahse, chuti tehchiamin ka la na lo a, ka nupui mah nisela ka hmangaih miahlo vang a nih ka ring ber, min chhuahsan sela tih rilru chu tunhma pawn ka lo pu tawh ṭhin a, hetiang a han nih tak hnu ah phei hi chuan kawng lehlam zawng takin a tihzia phian zawkin ka hria.







Inchhung ka luh chuan pindan aṭanga Zothanpuii lochhuak tur nen kan intawk hlawl a "Ehe...i van lo haw hma" phawk lek lek a min en chungin a ti a, pangngai thei ang berin kei lan ka tum thung, a khawsak dan ka hre tawh tih hi ka lantir ala rem rih tlat lo, chu a hnekin ngaihṭha taka ka awm tir zawk a ngai, hlauthawng taka in veng reng tura ka siam anih chuan ka tan an thiltih dan hriatchhuah chu a ti har zual thei tlat.







"Thil chhut ngai ka nei nuala, naktukah Print hman a ngai dawn sia" tih pahin ka kalpel maia, ka inthlak zawh hnuah Computer hmaah ka ṭhu chawt a, ka Phone a thlalak fiahlo deuh ka neih chu Zorina ka thawn a, a hmel ka hmuh dan chu chiang zawkin ka hrilh bawk a, thil awmzia kimtakin ka la hrilh lo, thlalaka mi chu a hriat ngai ani em tih chauh ka zawt rih.






"Hei chu ka hriat hnu ava ang ve mawle, a sam a kir i ti em khah?" Zorina chuan a lo ti thuai a.






"A sam a kira sa pan lam deuh sangṭha ve deuh mai a ni" ka tih leh chuan "A hnarah khuavang a nei mial em?" a lo ti vat a, chu erawh ka chianglo zan thima inhmu kan ni a a khuavang neih leh neihloh em em chu ka en kilhkelh tlat lo.







"Khuavang chu ka hrelo, a nei maithei" tihzawngin ka chhang a. "Remruatpuia a ang riau mai, a landan i sawi ang deuhin cher ve deuh samkir Remruatpuia chu hriat ka nei a" a lo ti a.







"Chu chu nih dawn chu" ka lo ti leh vat a, Zothanpuii ngaihzawng hming kha Ruatpuia a ni tak a lawm, Zorina hmelhriat Remruatpuia chu a nih ngei hmel e.






"Mahse, Remruatpuia te chu veng dangah an insawn tawh a, ka venga an awmlohna pawh a rei leh tawh, tunhnai phei chuan ka la hmu leh miahlo, a hrim hrimin enga tan nge min zawh a, a thlalak te i nei lehnghal?" dilchhut deuh taka alo tih leh chuan "Engmah nihran lo e, mamawh deuhna ka nei a, kan inhmuh hunah kan sawi ṭha dawnnia" tiin kan inbiakna chu ka ti tawp a.







An veng diktak min hrilh lo mahse, hriat chhuah a har dawnloh khawp hi mâw, he khawpui zim teah hian tumah han inthup theihna tak tak hmun awm nghallo chuan a chenna hmun leh kei nena inzawmna kan neih dan chu kar loah ka hre chhuak thuai ang.







Kartluanin Zothanpuii chet dan chu ka thli thlai ru a, a muthilh hlanin a Phone ka Check sak fo a, khami zan hnuah khan a ngaihzawngpa nen chuan an inbe leh ngei a, "I pasalin a ringhlel che em? Fimkhur viau ang che" tiin khapa khan a lo chah a, an inhmuh zana kei nena kawnga kan intawh chungchang kha chu a sawilang lo.







"Ringhlello, min ngaihsak hran vak hleinem hlauhthawn tur a awmlo, kan awmdan tur chu lo chiang vat vat zawk rawh" tiin Zothanpuiin a chhang a, chu erawh chhanna ka hmu tawhlo thung.







Zirtawp zanah Zo-a nen Zorina te vengah chuan kan leng phei a, Zorina Room ah thingpui hang inpahin kan titi ho a, hna chungchang kan sawi mawlh mawlh laichuan "Remruatpuia kha engatan maw i tih a?" Zorina chuan a lo ti chhuak hlawl a, chumi sawipui tuma kal chu kan ni reng reng a, mimal thil sepsel te te sawiin kan lo tlak hmasa duah zawk a ni.







"E...kha pa kha khawi vengah nge an awm a?" tiin ka lo zawt lêt a. "Ka hre mailo, URemremin a hre mai thei a ni, Remruatpuia û Mafaki te nen khan Bial zaipawlah an tel ho a, an inkawm tam ve a" a lo ti a.







"Mak ka tih chu maw Mapui engthilah pawh lo phiar ru ta che pawh nisela, i hmelhriat ngai ani silo a, enge inzawmna huatna chhan tur che a neih ngawt ang le?" Zo an a lo ti khauh a, keipawn chu chu ngaihdan ka nei thiam chiah biklo.







"Zothanpuii hi chuan mipa thu thu leh a tihtir ang angin a ti mai niin ka hria" Zo-a bawk chuan a ti leh a, zawhna awm thei ta chu engvang nge? Enge a chhan tih chu a ni!







"Remruatpuia pawh hi tu emaw chuan a tih tir chiang a, an ni pahnih phenah hian tu emaw a awm a ni" Zorinan a lo ti ve bawk.






"Nia, tu emaw in a tihtir ngei alawm mahse, mak ka tih chu a bialnu Zothanpuii kei min neihtir a ka fa hial min hrinsak tura a tih chhan hi ngaihdan ka nei thiamlo, engthil pawh ti nita sela, an inhuam thui hle chu a niphawta chhawr tu an nei anih ngat phei chuan lawmman ṭha tawk tak tu emaw chuan a tawk tarh ngei ang chu" ka lo ti ve nghal thuai a.







"E taka...inla hriat veloh takin Remruatpuia chu Number 4 Addict ania, damdawi hmuh nan chuan engthil mah a ti hreh vak lemlo ang, hetia han en mai phei chuan damdawi a ti tih a hriat loha, a inthup thiam angreng viau lehnghal a" Zorinan a lo ti leh a.






"Zothanpuii te nen college khatah an kaldun ṭhin niawm tak a ni" tiin an inbiak dan tlangpui ka hmuh ho chu ka hrilh a.






"Chuti anih chuan innu pawh chuan Number 4 chu a ti ve hiallo maw?" Zo-a zawhna chu ka ngaihtuah zuia, ka chiang ngam zanlo deuh tlat, damdawi kha chu a ti ve ngei maia mahse, ani tih ve te kha chu hritlang damdawi tih ang reng kha a nia.







"Ka hrelo le tih pawh a ti ve mai thei, hmanni deuh khan damdawi tui ruih chi lam chu ka man sak a, Number 4 tak chu ka hrelo le" chianglo deuh taka ka tih chuan "Tih ve chu ka van ring deuh e" Zorinan a lo ti leh khauh a, ka ring ve deuh viau tho mai, a ngaihzawngpa nena an inlungrualna tak thil pawh a lo nilo ang tih a sawi theih miah hleihnem le.







"Han inngaihtuah chiang deuh teh Mapui tu emaw hmelma i nei anilo maw, College i kal lai daih te pawh ngaihtuah la intih thiamlohpui tu emaw i laka hleihlen chhuah duh tur chi an awm em?" ṭhianpa Zo-an a tih chuan ka ngaihtuah lêt vang vang a.







"College kal lai te kha chuan insual mai mai te kha kan la ching a, College function engemaw a han lem ve deuh chang phei chuan tu tu emaw nen chuan kan inbakkaih ve fo a mahse, chutianga rei huatthlala awm tur khawp thil ka tih awm reng reng ka hrelo thung.







Kan haw hnuah Zorinan minlo Phone zui leh a, ka mutna aṭanga tho chhuakin Phone chu ka chhang a "Remruatpuia te kha Khatla ah anih chu an insawn hei ka Uremremi ka lo zawt zo chiah a" tih thu chu min lo hrilh a.







Khatla anih chuan Zothanpuii te nen veng khat anni tihna ani phawt mai a, hriat chhuah a har dawnlo khawp e. A rang thei ang bera ka pi zawn te inlama kan lenphei angai dawn tihna a ni mai.







Ka remruat dan Zo-a ka hrilh chuan lo tel ve a chak hle a, ani hruai chhan tur awm heklo, chawlhni chhunah Zothanpuii leh Bawiha nen kan kal ta zawk a. Kan thlen chuan ka Pi zawn chuan over theihtawp chhuahin min lo chiauau leh ngei a, Muansanga erawh min hmuh veleh a chhuak nulh a, kan la inteitheilo chhunzawm zel chu a ni.







Zanriah eikham hnu chuan a rukin Zothanpuii thlengsil lai chuan a Phone chu ka en sak a, Remruatpuia chu an venga kan kalthu a lo hrilh hman der tawh a, keiin ka tih kher a ngailo hlauh chu a tihzia nasa a ni, ka tih tum ve chiah tho kha ania.







Ka enlai mek chuan Message chu a lo thleng a "In kawmchhakah ka awm, ka awmrei hmanlo ania lo la vat rawh" tih te zawng a ni a, ka en zawh hnuah ka fapa Nsa chu Phone pe in ka kalsan thuai a, pawn ka chhuah chuan kawngpui chhak lama Remruatpui ding chu ka han hmu a, a lampana ka kal veleh ah che vutin a kalsawn nghal nal nal a, keiin ka zui ve zel bawk a, a kalchal zek mai.







Ka hmuh phak reng vang chuan keiin muangchangin ka zui thunga, inkhawm kal hun anih vangin mi kawng kal an la tam a, va hnaihchilh viau chi a la nilo, fianrial deuh kan thlen hun ka la nghak a ni.







Street light zawn ka pel chiah tih ah chuan a tlan thut a, umzui mai ka tum chu "Muana.." tih ri vang chuan ka hawilêt zawk a, thlanglam dawr aṭanga Muansangan min rawn pan mek chu ka va hmu a, ka lehhawi leh chuan ka mi umzui kha a lo pilbo hman der tawh.







"Pawi lutuk.." tih hluk pahin Muansanga lam chu ka pan ve ta zawk a. "Hengah te enge i tih daih daih a?" lawm hmel fahranloha minlo zawh chuan chhuanlam tur ka rilru in a dapkual nghal ruai a. "Dawrah ka kal dawn" tih zawngin ka chhang a, ka aw chu a nelawm bik viau loh.







"Dawr i rawn kal pelh hnem tawh em hi" nur fe a min en chunga a tih leh chuan "Nia, ka Cigarette duhzawng an lo neilo a" tih leh inher ka rual a, ani pawh chuan ka hnung maiah min lo zui ve zel a, zanin kan kal chhan chu a tlawlh ta phawt mai chu a nia, hun remchang dang a awm leh em ang chu.







Kan haw hnuah Zo-an chanchin minlo zawt a, ka hrilh chuan ngaihdan mak deuh mai a lo nei a "Muansanga hi ani thei mai angem?" tih a ni.





Muansanga tehdaih chu? A ningawt dawn em mawni!






"Han ngaihtuah chiang teh Mapui, Muansanga nen hian in inkawmna chu la rei lutuk lo mahse, thawkkhat laikhan kei aimahin i kawm hnema, in inah pawh a lo kal ngun em kha, a chang phei chuan i kawm ngeih lutuk kha ka lawmlo lek lek ṭhin a, ani lah khan a ti ṭha deuh huam reng che kha ania.







Chuan khami zan Thanpuii nena inchêtsual zan te kha han ngaihtuah lêt la, Muansanga awmloh hlan ania, Zu a lo dah lawk vek ani lawmni, heng thilah hian Muansanga hian a tal awhtir che anih ka ring deuh ta tlat" Zo a chuan a ti charh charha, ka rilru a ti buai riau a ni.






"Mahse, Thanpuii nen a kan inkara khatiang thil a thlen hma khan Muansanga nen engmah boruak chhia kan nei silo a" ka lo ti vat a.






"Neilo mah ula, engemaw sawichhuah duh siloh a huatchhan che a lo nei ru reng te pawh a ni thei tho a sin" Zo-a chuan a ti leh maia, Muansanga han rinhlelh viauna tur chu ka hmu mang der lo.







"E...Mapui, fimkhur ru hle rawh, kan hmelma te pawnlam mi niloa chhunglam mi an nih hian inven thiam a har duh ania" te chu a la rawn ti tak deuh deuh a.






"Ngawi teh ṭhiana, Muansanga hi rinhlelh vak ngaihna ka hre derlo mai, engmah tun hmain thu inbah palh tak ngial pawh kan la nei ngai silo a" ka han ti leh te te a.







"Ring vaklo phawt mai rawh, tunah chuan engmah a la chianglo a, a chhan ber chu a la rawn chiang chho zel mai dawn a lawm, i nupui kha han ngaichang leh deuh hlek la, tum an nei anih phawt chuan an awm mai mai dawnlo an rawn che leh thuai mai ang" hriat chian hmel fe hian Zo-a chuan a ti leh barh barh a.






Zo-an a han sawi takah chua ka ringhlel ru ta riau a, Muansanga nena kan inkawm chhoh dan te ka ngaihtuah leta, Taxi ka lak dawn tirh khan Driving class kan kal duna, chuta ṭanga inhria chu kan ni a, nitin World bank road ah Motor khalh zirin kan liamdun ṭhin a, Zu a in fo a keilah in ve thei mai chi ka lo ni bawk nen kan inkawp fuh chho viau kha ania.







Ngaihtuahna a buai a ni, inhuat chhan tur kan nei tlat lo, chuti e tiloin ka ringhlel ru ve ṭhum tho a, chîk zawka he thil hi ka bawh zui leh chu angai dawn a ni.







Zothanpuii Phone chu zantin a muthnuah ka en a "I pasal khan min ringhlel a, ka lo be rihlo ang che, ka lo biak hunah che chuan number dang ka lo hmang ang, ka number pawh hi Delete rih rawh" tih Remruatpuia Message a awm a, chumi hnu chuan a reh ta vang vang a, a hnu a Phone ka Check leh pawh chuan an inbiakna awm reng reng chu ka hmu ngai ta lo.






Zothanpuii pawh ka lakah a ṭi ru dek reng a, ka biak chang lahin a phu zawk zawk reng mai a, hlauhthawn a nei tih hai chi rual anilo, ka ringhlel tih a ngaihzawngpa in a hrilh aṭang khan chutiang chuan a awm a ni, keilah ka hriat duh engmah ka hriat hma chu pangngai thei ang berin ka awm a, ringhlel leh chîk angin ka lang ngai hek lo, chuvang te pawh chu aniang maktih hmel deuh hian min en leh vung vung ṭhin a, a awmdan chu ka lo hrethiam hle thung.







"Heti ngawt chuan hma kan sawn thei dawnlo, Zothanpuii pawh hi duhaiin ka hnenah a khawsa rei dawn tlat" Zo-a hnena ka tih chuan "Tlai banah lo peng rawh tihdan kan ngaihtuah dawnnia, thil hrilh tur che pawimawh deuh ka nei bawk" a lo ti a, ka tlawhkawi tur thu ka lo hrilh ve nghal thuai bawk a.







Ban veleh ah Zo-a te inlam ka pan a, inhnuai Room ah a lo awm a, ka thlen rualin an nuin a ko lang lang a "Lo chhuk rawh se" a lo tih tlat vangin inhnuailam chu ka pan a.






"Hei, ka thil hrilh che kha engtin nge niang, bum chhuah a dawp mai ka duh tawh ania" ka ti nghal hluta, khum aṭanga lo tho chhuakin a tarmit a vuah te te a, "Kha naupang kha nge i tih Muansanga?" hmai zangthal haw a min enchungin a lo ti heu mai a, kei ka lo nui hawk thung.







"Ka hre nang, an pahnih pawhin a pawi hleinem" ka tih chuan a nui ve suk suk a. "Ṭhu phawt teh, thil pawimawh dang hrilh tur che ka nei ania" a tih leh chuan a khum mawnglam ah chuan ka ṭhu phei a, nuisanga min en chungin "Mki in pasal a nei dawn tih i hria em?" a lo ti a.







(Comment ru...ka reply vek dawn che u)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:35 pm

SAWININ LOH MK - By Ahmangaihi violette khiangte



CHAPTER - 12



Muansanga ka rinhlelhna kha a dik dawnin ka hria a, ka buaina ber chu engvanga ti nge anih tih a ni?







"Mki hi alo ngaizawng ve ani thei mai angem?" phawk zeta min enchunga Zorinan a tih chuan ka lo ner sak a, chu zawng ka ringlo, chuti nisela khang hun chhung zawng khan Mki lakah a ṭuan tawh ngei ang chu. A farnu nena kan inkar tichhia anga sawiin Mki û bulah ṭawngkam a lo nei zawk anih kha mawle!








"A farnu ṭanghma a hai luat vang anih hmel ka tia mahse, Thanpuii nena nangmah an tih buai chhan che nen hi chuan a inpersan riau in ka hre bawk si" Zorina chuan a ti leh niah niah a.








"A buaichuar nuaih, ngaihdan pawh ka nei thiam tawhlo!" Zo an a lo ti thung. "Muansanga hi kan enthla ru mai dawn em ni, hrai rui ila dawp ila" Zorinan a lo tih leh chuan ngaihdan ṭha tak niin ka hria.








"Zaninah ka va hmu ange" ka tih rualin Zo an "Ka lo kal ve dawn" a lo ti vat a, Zorina pawh sawm hran a ngailo, zana inhmu leh turin kan in ṭin san a.







In ka thlen chuan ka nuin Bawiha awm chungin eirawng a lo bawl a "I van bangtlai ve in nu inentir lah a lo la haw thei silo a, Mampuia a tlei bawk silo" a lo ti hlak hlak a. "A khua a sik leh tawh ami?" ti a ka fapa chal ka han dek chu a lo lum deuh a, "Nilengin a chiauhiar tawh anih kha Puii kha Phone la damdawi lo lei haw rawh se, ani pawh hi a fapa damsamlo ngaihtuah na a neilo reng reng mai, chu chen chen a inentir lo ang, a leng kawi leh pek tawh aniang" ka nu chuan a ti zui barh barh a, Thanpuii awmdan chuan ka nu mit pawh a ti kham ve tawh ngang a nih hmel.








"Keiman ka va lei ange" Room a Nsa pawm luh pah chuan ka lo ti a, ka fapa lah chuan ka nghawngah kuahin ka darah alo bei thlam a a zawi ngiai mai bawk si a, kan boruak chhe zet kara ani lo damlo ve reng bawk si nen thawk a venglo kher mai.







Ka inthlak zawh hnuah damdawi leitur chuan ka kalchhuak leh nghalthuai a, ka let leh chuan Thanpuii pawh alo thleng ve chiah a, min hmuh rualin "Thuthar ka hria a nia aw" nui var var chungin a lo ti a, chhanglo a ka kalpel chu ka nu lamhawiin "Vengchhak nula senior khan pasal anei dawn an ti nih chu" a la rawn ti zui hram a.








"Tuin maw?" phawk fe a ka nuin a lo tih chuan "Muankimi mawle, a nei har ka ti reng a ni, len tar a tum emaw ka ti hman a" nui hak hak chungin a lo ti leh a, ka nu chuan min lo melh ralh a, engmah phei chu a sawi zuilo.








Kan taxi Driver a lo thlen tak avangin pawn lamah ka chhuahsan a, vawin lamah Bike nen an lo insu niawm tak a ni, a Bumper tlem alo rang a kan Driver chu a inthlahrun hmel khawp mai a "A nasat vak loh hi, duh leh naktukah va khawih tir la" tiin a siamna tur pawisa ka lo pe a, inchhunga ka luh leh chuan ka nuin minlo ko zauh a.








"Mki chuan pasal a nei dawn a maw?" tiin min lo zawt a, "In leng a nei tih chauh ka hria" ka tih chuan min en vung vung a "I rilru a na deuh em?" a tih leh chuan ka lo nui hawk a. "Na lo e.." ka ti chu ani pawh a nuih a za ve tho.








"A...tak takah Mki pawh pasal neih a hun ve tawh a lawm, a nula rei ve mai dawn a, nanglah nupui fanau i kawi ve diah tawh dawn si a ani a nulat reng kha chuan mi sawisep kai leh hmingchhiat mai te pawh a awl a, mi lah hi an mak ania in nupa tuk ṭhatloh ṭum apianga Mki lo hmer tel duh tawk hi an awm a, ṭhenawmnu Vani te ang te saw...." a thil sawilai chu ka lo pawt chat vat a. "Mki i pasal tur chu Advocate a nia, kan Pastor Pension ta fapa Zoramliana kha i la hria em?" ka tih chuan ka hau chungin min en a.








"Zorama kha maw, anih chuan pasal a hmuh ṭhat khawp chu le!" ka nu chuan a lo ti nghal thuai a, kei erawh ka nui tawi tak thung. Zothanpuii inbual zo a lo chhuah tak vangin kan sawi chhunzawm ta lo a, zanriah eilai chuan ka pa chuan "Pastor Buanga fapa khan nupui a nei dawn e an tia, kan kohhran mi niawm tak ani tunge maw ni dawn le?" a ti bul bul a, Zothanpuii lo nui hak hak chu ka pa chuan a va melh leh ṭhin a, a tu a mah chuan kan hrilh lem hleilo a.







Dar 7 dawnah Zo-a a lo thleng a "Zorinan minlo lam phei rawh u a ti ania" a lo ti lut bawrh bawrh a, ka insiam min nghak a kan chhuah dawnah a inpeih tawh thu leh min lo nghah tawh thu Zorinan min lo hrilh ve bawk a, kan chhuak chiah chu "Ka lo keng a sin" tiin a jacket hnuaia a paipawn chu min hmuh zauh a, Muansanga chu kan hrilh lawk lemlo a an in a alo awm ngei ka beisei.







Zorina kan hmu chu ani pawn Whisky a lo inring ve ran a, Zo an a thil ken lai ahmuh ve chuan an nui dun hawk hawk a, keiin Zo-a motor ka khalh a, Muansanga te veng lampan chuan kan in khalhchhuak ta nghal a.







"A thilsawi te kha kan record vek angai ania" hnung lam aṭanga Zorinan a lo tih chuan ka lo bu nghat a, "Remruatpuia kha zawn chhuah vat aṭha zawk lo maw Muangsanga nena an inthurual dan hriat a chakawm?" Zo an a ti ve bawk a.







Muansanga te in lanphakna chin kan thlen lai chuan an in bul Garage a ṭanga a Bike a alo inkhalh chhuak lai kan va hmu thei a "A va zialo e aw" Zo an a tih rualin keiin umzui ka rual a, "Umzui chi ani dawn a mi, a nula rimtur lek te hi ania nge?" Zorin an a lo tih chuan ka chhang buailo, ka um lak lawh tawh tlat, a nula rimna hmun pawh ni eng ang mahsela kan ko chhuak mai tur a ni.







Kulikawn lamah kan tlan zela Muansanga chu kawng kawia a tlan liam tur kan hmu zauh zauh renga an tlan chak zek mai lehnghal a "Hnaih deuh la" Zo-an a lo tih vang chuan ka tlan chak ve sauh a, kawi thum vel kan tlan leh chuan ka hmu zo ta hauh lo, kawngsir vel chu ka enkual deuh a "Saw ta saw" Zorinan a lo tih rual chuan kawng chhak lama a Bike a hung ṭha mek lai chu ka va hmu a, keini pawh Bus stand bul kawng sir zau laiah chuan kan ding ve nghalthuai a.








Muansanga dinna bul maiah chuan Concrete in sak mek hi a awm a, tlangval pali nga vel an lo ṭhu bawk a, pakhat chuan Muansanga chu a lo pan thla nalh a, a lo kal hnaih deuh chuan Remruatpuia ngei kha ani tih ka va hmu thei a, Muansanga nen chuan enge maw sawiin an in dinchilh a, inhnial te pawh an ang lek lekin ka hria.








"Ava chiang ta ve" Zorinan a lo ti zauh a, chutih lai chuan Muansanga chuan Remruatpuia kawr awmah ṭhamin hnek a tum uaih a, Remruatpuia ṭhutpui midang ho kha lo tlan thlain an lo ṭhelh a. "An inthurual fuh vaklo ava nih hmel ve" Zo an a lo ti a, Muansanga a thinrim hmel em em laiin Remruatpuia erawh uan hmel takin a hawisang hle a, a ṭhianten Muansanga an lo chelh bet ve bawk nen a hlau bik tehchiamlo tih chu a hmel aṭangin a hriat theih a ni.







Ka phone a lo ri a enchiang hleilo a ka chhang chu "Muanpuia i ni em aw?" mipa aw in a lo tih vang chuan min Phone tu number chu ka han en ṭha leh te te a, a number chu ka lo Save lo a "Ni e, tunge i nih?" tiin ka lo chhang thuai a.







"Zorama ka nia" a lo tih vang chuan ka ṭhiante chu ka melh zawk a, kawngpui chhaklama mi te chu an lo la en daih thung. "Aw, enge ni ta?" ka tihrualin "Biak lawk che ka duh deuh a, in vengah ka awm a ka lo kal dawn a sin" a lo ti mai si a "Eng chungchang nge ni a?" ka ti deuh hluk a, rindan erawh ka nei thiam tho a, mahse ani nena kan sawidun erawh a ṭulna tehchiam ka hrelo.








"Hmai chhanah in be teh ang, biak hrim hrim che ka ngai" a lo ti leh a, "Tunah chuan inah ka awmlo, ka chhuak rih" ka ti teh tawl a, ka aw chu a nelawm tehchiam loh, chutiang bawkin ani nena inbiak ka chak lemlo tih chu a lang thei bawk.







"I haw har dawn em, ka lo nghak ang che" a lo ti leh mauh mai, "Ka hrelo, haw har vaklo ang" ka tih takah chuan "I haw hunah min lo hrilh la" a lo ti leh maia, ka hnial zuita em biklo.







Muansanga te lam ka hawi lehlai chuan an lo inthlah fel tawh a, Remruatpuia nen chuan kawngpui lam hawia ding dunin engemaw an sawidun a, Muansanga chhuan a Phone phawrhin a entira an thilsawi dun chu hriat theih a chakawm kher mai, an inkalsan hnu chuan Muansanga chu a Bike khalhin a tlan chhuak lehnghal thuai a, umzui zel tur em ka hrethiam ta chiah lo.







"Kan zui dawn lo ami?" Zo-an a lo tih chuan ka tlanchhuak ve nghal vat a, kan tlanna hnu lamah kan let leh mek a ni. Mission veng kan thlen rualin Muansanga chu kawng pengah a tlan lut ta daih a, ka zui ve tho nain rei lo teah mi compound ah a tlan lut a, nula chu a rîm dawn a ni ngei ang "Zanin chu kan duhtawk rih mai dawn nge mawni le?" ka tih chuan "Tinge?" an lo ti rual zawt a, Zorama khan min lo nghak anih chuan duhaiin kan rei hmel dawn tlat.







"Naktuk zanah tum ṭha leh zawk ila" ka ti leh maia, an ngawidun kara a hnu deuha Zo-a zawk chuan "A pawilo, kha a chiang ta viau tho a lawm tikhan" a lo ti a, "Ka hmanhmawh tawh a sin le" Zorinan a lo ti bul bul thunga.







An inthurual tih kan hre tawh tho a, an thiltum chu Zothanpuii hnen aṭang pawn a hriat theih mai tawh ang, chumi hunah chuan Muansanga ani emaw Remruatpuia an pahnih hian lawmman chu an dawng dawn khawp a lawm.







Zorina ka thlah hnuah Zo-a nen kan inlam panin kan inkhalh haw a "Ṭhiana keichu Muansanga hian Mki hi alo ngaizawng anih ka ring tlat ania" a han ti leh hluai a.







"Chutiang anih chuan Mki pasal nei tur hi tihbuai tum zawk tur ania lawm kei minti buailoin" ka lo ti ve thung a.







"Ani ngawtlo, inneih intum laikhan a farnu hmathehin a pawt ṭhen che u a, Mki nen in inṭhen phah vang vang a, in nupa inkar thuah pawh Mki û bulah ṭawngkam a lo nei zui a, in pahnih inhnimhnaih leh a hlau viau chu ani phawt mai a, ngaichang reng mah rawh Mki pasal neih tur pawh hi buaina chu a siam leh ngei ngei ang tih ka ring tlat" a ti leh charh charh a.







"Rindan neih thiam a har khawp mai, i sawi ang chu lo nita sela, hethilah hian Remruatpuia leh Zothanpuii hian enge hlawkna an neih dawn tih hian ka rilru a tibuai mah zawk" ka lo ti a, a bialnuin pasal dang aneia, Remruatpuia lah a phusa ah a ṭang tlat mai a, engthil nge tih an tum zel ang tih chu hriat minti chak riau a ni.







"Mki hi be hrim hrim teh a, Muansanga hian alo ngaizawng ve reng em tih te pawh zawt teh" Zo an a tih leh laichuan kan inpeng kan thlenga, "Ka lo zawt dawnnia, kal kawi lawk duhna ka neia heta ṭang hian inkhalh haw mai rawh" ka ti zui zat a, mak tih hmel fêa min enin "Mki te inah i kal dawn a mi?" a lo ti leh heu a.








"Dawn lo e, hmun dangah tihtur pawimawh ka nei a" tih leh chhuah ka rual a, "Phone talin zawt hrim hrim ang che, ka ring dik anih chuan kan buaina chu a fel nghal ani mai" a tlan chhuah dawn chuan a tizui hram a.







Zorama chu ka call a ka Phone Call a chhan rualin "I lo haw tawh a mi?" a lo ti nghal thuai a, "Haw e, peng bulah ka nghak che" ka tih chuan "Lo awm rawh School bul peng kha a mi i sawi?" tiin min lo zawt lêt a, ka chhan leh hnu chuan a lo kal nghal tur thu sawiin a phone chu a dah zui a.







A lo lang rang kher mai, Veng chhak lam aṭangin a lo kala Mki te inah a leng anih ka ring nghal ringawt a, a laka nelawm taka lo lan chu ka tumbuai peih ting tanglo, a lo thlen rualin "Enge i sawiduh chu?" ka lo ti nghal tawl a.







"Tirawh tah sawn ṭhu phei lawk teh ang" ka dara ben thawk pahin School gate bula Step lam chu a pan a.







"Kan chanchin kha i lo hre tawh anga.." tiin bul a han ṭan phawt a, za lo zetin ka lo nuisuk thung. "Chu chu engtin?" ngaitheilo fe a ka tih chuan a ngawi ren rawn a. "A....engpawh nise Mki hi ka duh takzet tih hria la ka duh.." a sawi lai chu lo pawt chatin "Nang leh anin inhriat chuan a tawk mai lovem ni?" ka lo ti lêt khauh a.







"Tawk mai sela ṭha tur ania Mapui mahse, a tawkzo tlat lo a nih hi, a chhan chu Mki hian a la hmangaih reng che a, i pawmpui thlap anihloh chuan innei pawh niila a hlim thei tak tak lo ang" thawk la hawk chungin a ti a, a hnen aṭanga hriat ka beiseiloh lutuk thil a sawi daih mai!







"Chu chu enge min hrilh chhan?" nur fea en chung chuan ka ti leh a, "A zahthlak angreng viau mai" tiin a nui suk suk a.







"Lo sawipui la, nangin i sawipui anih chuan kan rem thei maiin ka ringa, i ṭanpuina ka rawn ngen deuh tawp mai che a nih hi" tiin min chhang a.








(Zaninah kan dah leh dawnnia....)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:36 pm

SAWININ LOH MK - By Ahmangaihi violette khiangte



CHAPTER - 13




Mut hmunah Zorama thilsawi chu ka ngaihtuah let a Mki rilru ka lo la tih hrehawm zia te pawh ka hre thar leh a mahni inthiamlohna hlirin ka khat a ni, Zorama tan tak pawh ka hnena khatianga han sawi tawl mai kha a tlawmthlak tur zia lah ka hailo.








Ka ṭawngkam khat te vanga Mki awm a nawm phah dawn anih chuan ka ti vek mai tur a ni tiin rilru ka siam a. A tukah Mki chu ka be ta ngei a ka sawi ṭan hma hauhin "Ka u in lo biak che a tum anih chuan lo chhang duh miah suh" a lo ti a, chutia a lo ti nghal ngawt chuan min ti bang bo lek lek a. "Thil diklo a thleng em ni?" ka tih lahin a sawi chhunzawm duh mang silo a, ngaih a ti ṭha zanlo.








"Muansangan a lo be ṭhin che em, tun hnai emaw tun hma deuh khan?" ka tih chuan "Tinge a?" a lo ti veleh nghalthuai a. Ka chhan hma bawk chuan "Hman deuh ti ila in inneih hlim kha chuan be ve zeuh zeuh a, pawi atih thu te alo sawia ngaihdam minlo dil a" a tih leh chuan "Chu zawng chu a mi alo biak che?" ka lo ti leh vat a.







"Um ni mai e, nimin khan Bazarah kan inhmu a, "Pasal i nei dawn maw?" alo tia, engmah thuchiang kan la nei silo a chhan pawh ka chhang mumal duhlo a, engtin nge a lo hriat ve zawk ni?" a ti zui niah niah a.








"Hman zana kan thil sawi chung chang kha lo sawipui leh lawk che ka lo tuma" ka tih leh chuan zangkhai zet hian "Tak tak maw, han sawi la" a lo ti vat a, phur hmel taka a lo ṭawng vang chuan awm a ti nuam hle bawk.








"Zorama hi miṭha tak niin ka hria a a hmangaih takzet bawk che in ka hria, a bulah chuan i hlim ngei ka ring tlat" ka tih chuan a ngawi vang vang a "Chuan i rilru a na miah lo tiraw?" zawi te inthlahrun hmel zet hian a lo ti reuh a, ka nui hak a rilru lamah erawh a thilsawi chuan min fan reih reih thung.







Tun hma khan inngaizawng ro ro ah pawh inkawm ngeih tak zep ṭit ṭet neilo a ngaihdan engkim inhrilh ṭhin kan ni a, chuvangin thutlukna engthil emaw a kan siam dawn pawhin kan duhdan tur kan in hriat lawk sak vek ṭhin tih theih hial khawp kan ni, tunah erawh zep ruk a tam ta, kan rilru put hmang te pawh kan inhriat sak thiam meuh tawhlo chu a ni.







"Na lo e, ka hrilh tawh che kha thil ṭha zawng zawng ka duhsak che a lawm, ka pek theihloh ang che thil ṭha engkim kha dawng theila ka ti bawk a" ka tih leh chuan "Ka hlim laia ilo hlim ve loh ka hlau mai ania, keichu pasal ka nei anga khawvel dang hlaka cheng ang maiin ka pasal nun ka ṭawm a ngaidawn a, kawnga kan inhmuh hunah pawh nel takin kan inbe thei tawhlo maithei a, tuna ka duh duh i bula ka sawi ang te hi ka sawi a rem tawh lo anga, Phone a lo biak fo che pawh hi a mawi tawhlo bawk anga...." a ṭawng tawplam chu a zuih ral hle a , a ṭap ani maithei a ngawi vang vang mai.








"A pawilo a nia, i hlim phawt chuan a ṭha vek mai...." ka lo ti vat a, thawk ala hak ri chu ka hrepha.








"Keichu ka hlim dawn lutuk, ka hlim dawn tih ka chiang mahse, Mapui i hlim ve angem, in inneihna ah khan i hlimlo tih chu zep duh suh i hmel ka hmuh khan i mit aṭangin ka hmu thiam ve vek ania, tunah i ṭawngka chuan i sawi a mahse, nakinah i hlim leh siloh chuan i khawngaih thlak viau dawn ania" a ti leh sap sap a.







"Ka hlim em hi naupang leh eizawnna nghet zawk nen bul ka ṭan chho ve mek a, hlimlo emaw min ti mai mai anih chu" ka lo ti ve tlat thung.








"Nitin hian ka inngaihtuah a ka rilru hi ka thlak reng bawk a, ka awmdan hi ka in hrethiamlo, a tirah kha chuan pasal ka neih chuan engkim a ṭha vek mai ang ka ti a mahse, rilru na deuh hian pasal ka neihsan mai che a ngem tih ka ngaihtuah leh hnu hnawh a, he ka rilru tak hi kan pahnih chiatna thlen thei tu kha a ni bawk si a" lungngaih hmeltakin thawk a la leh hak a, a rilru a buai hle tih chu haitheih rual a nilo.








"Min ngaihtuah duh reng reng suh, hlim tak leh lungdam takin pasal chu nei la ka duhsakna zawng zawng nen ka thlah dawn che nia" ka tih chuan "Ni e..." a ti ve mai bawk a, kan inbiak zawh hnu thleng chuan ka hrehawm ṭeuh reng mai.








Kar tawpah chuan Palai chu an kal nawn leh a, an inrem ta nghala inneih ni leh dar an ruat fel nghal bawk a, ka awmdan chu mak ka ti lek lek mai! Hmanah khan ka chân tawh emaw ka ti a mahse, a lola ni hauhlo pasal a han neih dawn chiah chuan ka ta anih tawhloh hnu ah pawh ka chân nawn awn awn maiin ka hria, rilru hliam a rawn thar leh ani hawt e.








Ka muhil thei lo a, thil ka eitui thei derlo mai bawk a, ka ngaihtuah tluk tluk reng lawisi, zu in lamah ka ṭuan thul, chutih laiiin ka ṭhiante pahnih lahin chanchin min lo zawt sek reng bawk a, engmah tih theih a ni rih lo Mkin pasal aneih fel hma chu ka la inching fel theilo a ni.







Muansanga erawh ka thlithlai renga chêt lak a tum emaw Mki pasal neih tur tihbuai tum zawnga hma a la a nih teh chuan a tum ni la la chu a tawp ni tur ani ve nghal ang.








"Hun kan khawhral mai mai lo maw, an ngawih reng danah hian tum an nei ani mai lawmni, Zothanpuii lahin a bum nitin reng che a" Zo-an a tih chuan ka insehruh va ṭeuh a, zep loah chuan kei tluka hethil haw tu hi an awm reng reng lo, nitin, tuktin, zantina Zothanpuii hmel hmuh ngai te hi ka kham ve hluah hluah a lawm, mahse, ṭhen chiah ila engthil nge thleng ang Mki ka ngaihtuah lo theilo a ni.








"Tluang takin pasal nei fel phawt sela keichu ka inchingfel chauh ang" ka tih chuan Zo-a ngaihdan a ni vak lo a, "Mahni inngaihtuah hrang ve ve tawh teh u, in awmdan hi a hahthlak emai" a ti hluk hluk a, thil liantham tak tisualin a nun ka ti hrehawm rei tawha, hlimna a tawn ve dawn veleha a rilru tihnat leh chu ka thei tlat silo a ni.








"Keichuan ka nghak thei a lawm" ka zu no ken lai tlak pap chunga ka tih chuan ka ṭhianpa chuan min lo chek tlat tlat a "Mapui nupui i ṭhen dawn tih hria sela a hlim zawkin ka ring" a ti bul bula, chu zawng ka ring ve lo, a rilru tina tam tu mai tur a ni.







"Pasal neih pawh a ṭhulh phah daih maithei a nia, pasal neih a chak vaklo tih lah a chiang reng a" Zo an a tih leh chuan lu ka thinsan a. Chutiang a thlen ka duh loh vang chuan a lawm a pasal neih hun ka ngah reng zawk ni.








Engkim a kalsan duh mai ang tih pawh ka ringhlel reng renglo, mahse keiin ka pek theihloh thil ṭha zawng zawng aneih theih dawn laiin engtin nge chutiang thil chu ka thlen tir theih tehlul ang, ani nen chuan a rem teh ṭeuh tawhlo a ni.








"Ka phu ve tawhlo a lawm" nuisuk chungin ka ti a, ka ṭhianpa chuan min en reng ringawt a tihvak ngaihna a hre bik tawhlo.








Ni e...kha hmeichhe duhawm lutuk rilru thianghlim em em kha kei mitenawm leh ṭawmkailo Lalmuanpuia hian ka phu ve mawlh lo a ni, kha nula ka Sawinin theih loh Mki kha midang ta ani tawh dawn, mahse ka hrereng ṭhin ang, hun a liam anga kum alo upat huna di ngaih lunglen hril chang pawh in ka theihnghilh tawh ngaidawn lo, kum tam liamin an sawi khuarei a lo thlen hunah pawh 'Sawinin loh Mk' ka la ti fan tho ang.




****


Zothanpuii, Remruatpuia, Muansanga te thlithlai reng reng chuan ka phar buai a ni deuh ta ber, Zothanpuii leh Remruatpuia inbiakna erawh se se thulam hlir anih vangin a laktlak tehchiam loh a, Muansanga mawlh mai chu rilru kap tu a ni, khami zan hnu khan Remruatpuia nen chuan an inhmuh leh thu Zo-an min hrilh a, Zorina nen inthurualin an lo va thlithlai dun a ni.







Muansanga pawh zu inpuiin an lo va hrai rui ngei a, engthu mah phei chu an hriat belh lem hleilo a, kan beisei ang he hu ngawt chu a lo ni dawnlo a ang, rin aiin a tawh khirh zek mai!







Mki te inneih tur pawh a vawi khat nan Biakinah an puang ta a, Zorama pawh a hlim aniang a hmel hmuh a nuam viau, ka Office ban rual hian a Motor hi ka tawk leh zauh ṭhin a, Mki nena an bazar dun pawh ṭum hnih lai ka hmu a, hmuh nuam tak zawng anilo, Mki nui hmel tihloh chu.







Mki û Hruaikima chuan min vau deuh reuh a, ka bulah tak phei chuan a sawilo a Unicky bulah a ni, min la lawmlo tluang zel chu ania, School a kan inbiak ṭum kha tu ka emaw aṭangin a lo hre ve teh chek aniang Mki pawh a lo vau niawm tak a ni.







Hun a liam ve zela, Biakinah pawh vawihnih an puanna a ni ta, ka chêt hun a hnai ve zela thu thar erawh ka la hriat belh thei mailo, ka ṭhiante pahnih lah chuan Remruatpuia chu phuar hlawm a dawp an duh et et tawh mai si a, keiin ka la khap dai thei hram hram chauh a ni.







Ṭum khat Thanpuii nena an inbiakna ah chuan "Inneih pawh ahnai tawh a lawm, kar khat vel bak angai tawhlo ang, ka u chuan inneih tukah ka account ah a lo thun nghal dawn a lawm" tih Remruatpuia Message a awm a, naute chungchang sawiin "I fa hmasa kha chu ka enkawl dawnlo ania, ka fa nilo enkawl ka tum lo, tah khan i hnut chhiah angai" a ti zui a, Thanpuiin Nsa hruai a tum loh thu a lo sawi bawk a, thin a rim ṭeuha nuih te pawh a za dawn dawn a ni.






"Hruai tum eng ang mahla ka fapa kher kher chu i va han hruai awm hleilo e aw" ka ti rilru a, mut hmunah ka inhumruh ṭeuh reng a, ka ngaihtuah ngun poh leh thin a tirim zual ting mai.







Ka thil ngaihtuah chhuah zawk avang chuan tho chhuak lehin Thanpuii phone chu ka va ennawn leh ngat a, an sawi danah Mki te inneih tih buai tum an ang tlatlo, inneih zawh hun an nghakhlel hle a, inneih tukah pawisa an dawng dawn bawk!






Ka thil ngaihtuah chu ka duhlo kher mai, hetiang hi chu nilo hram teh se.







Lohtheihloh in ka ringhlello theilo a ni, ka ṭhian te hrilh ve nghal mai ka tuma ka la chiang ngam chiah silo, zeldin thu mai mai a ṭhiante tihbuai fo lah ka hreh ve ting tang tawh si.







A tuk zanah Muansanga te veng lamah ka inkhalh phei a, a leng chhuak tur chiah nen kan intawk a, "I lo kal dawn chuan lo sawi lawk ve ta che" lawmloh hmel zeta a tih hnuah inchhung lamah kan inzui lut a.







"I in duh em?" a tih chuan ka hnial lo, titi dun kan ngai, tun hma angin kan inpawh tawh manglo a, zu indun chuan kan boruak pawh ati zia deuh mahna.








Veranda thlanglamah bawk ṭhu chhuakin kan in duna, sawi tur a hre vak lo aniang angawi rauh rauh reng a, "Hna lam i tluang em?" ka tih chuan "A zia rih" tih zawngin min chhang a, "I bialnu nen khan i la ṭha em?" ka han ti leh te te a, a nui ve ta suk suk mai.







"A dang ka nei leh daih tawh" a tih takah chuan ka lo nui ve suk a, "Ngaihzawng ngah ila tum viau elaw" ka tih leh chuan a nui ta kur kur a "Tunah pahnih ka nei" tiin amah leh amah chu a han innuihzat a, a lem zeuh zeuh a kawm a nuam ṭan viau mai.








"Tlangval hi a lo nuamber a nia, nangpawh kham hnapin tlangval phawt rawh" a no thlit khahsak paha ka han tih chuan min en vung vung a "Ka nau i nei hi chu a zialo hle mai" a lo ti zauh a. "Engah ngawt maw, kan phulo iti deuh em ni?" nui chunga ka lo tih chuan a ṭhen zui sak a.







"Puii hi chu a tihmawh ve si a, enkawl a hahthlak dawn tih ka hria a lawm, i dawhtheihna hi chu ka fak khawp mai che, rei tak in inneih theih pawh ka lo beisei lemlo a" inthlahrun hmel takin a ti ta a.








"Nia keipawh ka rin aiin kan innei rei a" ka lo tih ve chuan a nui leh mai a "Miṭha tak chu ilo ni" ka dara rawn tuai thuak pahin a ti a, vei nei a ang lek lek bawka ka hriat vangin ka enchik hle bawk.







"Thil enge maw vei deuh i nei tlat" ka tih chuan phawk lek lekin min en "Engthil maw..." pha deuh daia min en hnuah a ti a, a mitmeng tlan chhe ruak chu ka hmuh hmaihlo.







"Ka sawi duh biklo" nuisuk chungin ka lo ti ve thung a min en chîk khawp mai.







"I hria a mi a?" ṭi deka a tih chuan "Aw" awlsam zetin ka lo ti a. A hmel pawh en hleiloin ka no chu ka tlak leh a, mak a tih zia erawh a awmdanah ka hre thei thung, min en reng ringawt mai a ni.








"Engtik aṭangin nge i hriat a?" a ti he haw a, "Nangzawk?" ka lo ti lêt ve leh thung a. "A la rei lo, an inṭhen fel vek tawh turah ka lo ngai a, i hriat chhuah hmaa hmeh mih pawh ka tum ve mawle, a zialo tak tak a ni" ner sak chunga a tih chuan a darah ka lo kuah a.








"Kha pa kha khawiah nge an in a awm tih min hrilh teh" ka tih rual chuan min en leh rang khawp mai, hetiang a awlsama kan sawidun erawh ka lo beisei lo a, a tihzia takzet a ni. Remruatpuia te in hre kher lo pawhin thil kalkual dan chu ka man thiam hle tawh bawk.







"Aa....ka vau nasa tawh a sin, Puii zawk hi ania thiamlo chu" a ti zui niah niah a, "Keimah ngei in vau ve ka duh a lawm, ka tihmak mawh ania" ka lo tih tak tlat ah chuan min hrilh ta tho a, "Ka lo kalpui ang che, tum loh deuh te khan inva inbakkaih chiam palh ang" a ti ve thunga, ka hnial hran biklo.







Muansanga awmlaia engmah va tih erawh ka tum lo, zan dang atan an in chu ka hriat ngei angai tlat.







A Bike zawk chuan Remruatpuia te in lam chu kan pan a, "Khi khi an in chu ania mahse, a awm ka ringlo tun ang hunah chuan inah a awmlo ang" kan chhaka inhring lam hawi paha Muansangan a tih laimek chuan kan piah deuh lawkah chuan Bolero var alo ding a, Passenger seat aṭangin Remruatpuia ngei mai chu thatho zet hian a lo chhuak a.







"Keiman kan be dawn ami?" tih paha Muansanga chet nghal tum uk chu ka lo vuan vat a "Ngawi lawk" ka lo tih lai mek chuan Remruatpuia chuan Motor hma kal hualin an in pan na Stepah chuan a pen chho hlak hlak a, chutih rualin Driver side kawngkhar chu a lo inhawng ve chiah a, ka mi beisei ngei mai kha a lo chhuak bawk.







In khai bawr ṭeuh a Zoramliana lo chhuak chuan thinur luatah nuih te pawh a ti za hial zawk a ni.







(He story ah hian Zo tih an va tam ve)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)