SAWININ LOH MK - Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SAWININ LOH MK - Ahmangaihi violette khiangte (Completed)

Unread post by Ngaia » November 29th, 2020, 3:36 pm

SAWININ LOH MK - By Ahmangaihi violette khiangte



CHAPTER - 14



"Tenawm lutuk" ka lo ti chhuak hlak a, ka insehruh nghal ṭeuh bawk.







Muansangan mak tih hmel zeta min thlek lai chuan Bike hnung aṭang chuan ka chhuk sawk sawk a, "Zoramlian..." ring deuh tak maia ka tih rualin chhaklam Step-a a kal chho tur chiah chu a lo hawithla a, min hmu chu a phawk deuh viau a chumi hnuah "Muanpuia teh daih chu!" tih pahin a han ding rem leh te te a, engkhaw sawi set set tawhlo in Step ah chuan ka pen chho hlawk hlawk a, a bul ka thlen rualin a bekah kan hnek nghal bur mai a, a ri sawk mai.







"Mai mai che chuan" tih leh min nam a rual a, ka tlu ṭhelh nghe nghe. Che zui leh in a kawr awmah chuan ka ṭham ṭawka lo ṭang ve bawk mahse tha ah min hneh heklo a biang leh khabe bawrah te chuan ka hnek mawlh mawlh a, Muansangan min lo pawh sawn lai chuan vawihnih lai chu min hnek ve hman awm e.






Kan chhak tukverh aṭang chuan mi an lo dak huang a, Remruatpuia leh patling pakhat an lo tlan thla nghal thuai bawk a, Muansanga chelh behna aṭanga tal fat fat pahin Zoramliana dulah chuan na fe mai hian ka tlawh zui leh a, Step ah chuan ṭhu hnawkin a pum a dawm ngawih ngawih a, a na ve khat ang ka theihtawp a na in ka tlawh miau a, Remruatpuia te lo thleng thla chuan an lo bawihsawm thuaia, a tho chhuak thei mai lo.







Keilah Muansangan min chelh beh tlat avangin ka che zui thei ta biklo a, "Insum teh, tih chiloh lutuk" tih pahin Step tawpah chuan min pawt thla dawt dawt a, chutih laichuan Patling lo kal ve khan min lo melh tur khui a, "Tu fa lubawk nge i nih a, ka inbul maiah ka fapa kut i han thlak ngam chu le, i ngal kha vuak tliah i duh em?" tiin kan piah tuiluan kawr bula thing tlawn lian ve ang reng tak chu a va chuh ruai a, a lo let leh chuan min lo tin nghal uaih uaih mai bawk a.









"Ka hlau ther te lo che, saw i fapa tenawm ngalruh zawk saw ania tliak tur chu" Zoramliana lo ding chhuak leh ka hmuh rual chuan Muansangan min chelh na aṭanga tal chhuah tumin ka che zui a, chu veleh ah ka hma a patling ding chuan ka malah a rawn hem nghal zawt mai!






Phiangsen chuan le!!






"In duh tak tak a ni maw?" tih leh tal ka rual a, ka talchhuah rualin min vaw tupa chu ka bawhthlu rawp a, kut phei chu ka thlak zui lo, a thing tlawn ken lai chu chhuhsakin Zoramliana te bawk chu ka pan a, min lo dan tuma Remruatpuia lo che ve chu a darah ka hlap nghal zawt bawk a, min la rawn ban hram a vangin vawi hnih lai chu ka vaw nawn leh a, Zoramliana ka pan leh tur chuan Muansanga leh Remruatpuia chuan min lo chelh bet a, ṭhenawm tlangval leh pa ho an lo chhuah khawm tak vangin ka tan chet ve ngaihna a awm tawhlo.








Kut min thlak rawn luai luai a, Muansanga lo inrawlh tum pawh chu an khawih ve lo chauh zawk a ni, Zoramliana lahin thil awmzia chu a lo sawi zat zat a "Ka nupui tur ngaihzawng hlui ania a thîkthu vanga hetianga rawn che hi a nih hmel" tiin a lo sawi a, tlangval ṭhenkhatin min pet rawn luai luai tak hnu chuan leiah ka let hlawm ta renga, taksa a che theilo a ngaihtuahna erawh fim tak a ni thung, thinrimna in min tuam so bulh bulh a, ka damchhunga ka thinrimna sosan ber ṭum ala nihial ta ve ang.








An duhtawka kut min thlak zawh hnu chuan ka che thei tawhlo a, ka vai riai ringawt tawh, ka taksa na chu chiang takin ka hre thei a, ka rit luk mai bawk si nen min dinhual tute hmel pawh chu ka hmu chiang hleithei meuhlo chu a ni.








"Kima, Rinsanga nen khan kan inlamah zawn lut teh u, a ṭul leh Police kan ko dawn nia. Pu Hming, lo ngaihsak duh suh u, khawtlang hruaitute ka Phone tawh a, an nin buaipui rawh se vengdang mi niin ka hria" pakhat chuan a ti charh charh a, chumi hnuah tute emaw hian min zawn a, Muansanga kha a awm ve ta lo emaw ka ti hman a, inchhunga min zawn luh hnua a hmel ka hmuh leh chuan ani pawh a bek a lo vung deuh lak a, kut a lo tuar ve hlek chu anih hmel.








In neitupa chuan tlangval ṭhenkhat chu chu a chhuahtir a, kawng a kalh zui mai bawk a, inchhungah chuan Muansanga leh kei tihloh mipa pali nga vel an awm a, nutling pakhat leh naupang pahnih nen, min dinhual deuh tuau a, "Zu a rui nge mawni?" pakhatin a lo tih chuan "A nam pawh a nam a lawm a rui anih chhia va hi" pakhat chuan a lo ti ve leh a.









Ka mutna aṭanga inbeng thawh tuma ka che chu in neitupa khan min lo pui thuai a "I chêt theih danah rui chhia chu i ni hauhlo, mi pangngai tak hmel pawh i put vei nen engtia rawn sapatal chiam nge maw inih le?" a ti zui niah niah a, kei ka lo ṭhensak thunga, ka la inhumruh ṭeuh reng bawk.








Muansanga chuan thil awmzia a lo sawi ve a "Ka makpa ania in ṭhenawm Pu Hminga fapa Remruatpuia leh a nupui ka farnu hi an lo che khawlo dun deuha, kan thinrim kan rawn insum zo lo a chuvang zawk chu a ni e" tiin a lo sawi ve nghal thuai a, sawi belh tawhlo tura khap ka tum pawh chu min en nachang a hrelo.








"Chuti si engah nge Remruatpuia Cousin zawk kha in sawisak chiam mai?" Pa chuan a lo ti khauh a, Muansanga chuan zawhna mitmengin min rawn en a, a ngaihna a hriat loh hmel kher mai, keilahin ka chhang duh hauhlo.








Chutih lai chuan kawngka an rawn kik a, Remruatpuia pa leh nu pakhat hi an lo inzuilut a a nupui a ni ngei ang, min hmuh rualin thip fahranin min rawn melh a, rum zet maiin keiin ka lo melh lêt ve thung.









"Kha chu, kan lo la khawih na tawk nange" Remruatpuia pa chuan a lo tilut nghal hluk a, in neitupa kha lo inrawlh ve vatin "E hei, na thaw khat tawh bawk a lawm, an rui suakbak ve anih hi puitling zawk chuan ngawihsan mai chi" a lo ti zung zung a, chutih laia rum fahrana ka lo melh si chu min ngaihtheihloh hmel kher mai.









"Veng pawn lam mi lehnghalin ka kawt kaiah kei leh ka chhungte kut min thlak ngam ania, vengkhat tlangval awmṭha duhlo tih hriat reng reng....." min melh rawm rawm chunga a tih leh chuan "A....Pu Hming zurui thiltih anih kha" innei tupa chuan a lo ti leh a, chuti chung chuan midang hnung lamah chuan a la phun deuh hluk hluk reng a, a la inbengdai thei bik mailo anih hmel e.









"Hei Pu Hming a nupui leh i fapa Remruatpuia te an lo in chûkha deuh niawm tak a ni, hethilah hian i fapa pawh a lo inrawlh ve anih hmel" pakhatin a lo tih chuan a ṭeu nghal kher mai.









"A va zak theilo em em ve, chutiang te a ka fapa a han puh le, Zoramliana nupui tur a thik vang zawk anih hrep kha, kan nau-an thil awmzia chu a sawi vek tawh a lawm, khawnge chutianga dawt te a sawi ngam a, kan hlap leh dawn zawk em ni?" ka lama rawn kal phei ruak paha a tih chuan midang ho chuan an lo chelh thuai a, kei ngeiawm fe in ka lo nui thung.









"Khawtlang hruai tute an lo thleng zui a, nelawm fahranloh a min zilh hnuah ka hming, ka nu leh pa hming leh ka Address te lain min haw tir an phal mai a, "Police hnenah phur chho zawk teh u" Remruatpuia pa chuan a lo la ti khar khar reng a, in neitupa khan a fala a biak hnuah haw tur chuan min ti ta tho a, kan haw tur chu Bike a chuan pawh a har lam mah a ni.









"Rui chungin mi lakah buaina i siama, i thiam chu ka ti lo, midang mitah pawh i thiam chuanglo a mahse, i ṭanna lam erawh ka ring thung che, Muana nau leh Remruatpuia inkawp ṭhin thu chu veng chhung mite chuan kan hre fur a, a chhungte khan an pha ve mai mai anih kha, Remruatpuia pawh khawtlangin kan zilh ve fo ania, mi pangngai chin chuan ngaihdan tawk kan thiam vek ang, mahse, an inbul khera i che erawh i ti fuh ta chiahlo a ni, a lehpek i nei anih ngai chuan hetiang hmuna chet a fuhlo tih i hre tawh dawn nia" In neitupa chuan a ti charh charh a, ka chhang zui tawhlo.







Muana chuan lawmthu a hrilh hnuah kan tlan chhuak a, duh ang thala ka che thei ta lo chu pawi ka ti ber a, a lehpekah chuan hetiang ngawt chu ka ni tawh hauhlo ang le.








Muansanga te in aṭangin Zo-an a Motor in min lo hruai a, ka pem leh hliam dukah te chuan damdawi kan bel sen liai luai a, In kan thlen chuan vanneih thlak takin chhungte an lo mu tawh hlauh a, ka chauh em vangin Zo-a pawh ka titi pui peih meuhlo, Sofa chuan muin min biakna pawh ka um e liam mai mai a ni ber.







"Mu hahdam phawt mai teh, naktukah kan sawidun mai dawnnia" tiin min hawsan a.







A haw hnu chuan ka muhil thei lawk lo a, ka ngaihtuahna ka seng nasa ngang mai, kha Zoramliana hrep khan heng thil hi a lo thlen tir chu a ni tak sia, lo ngawi tak rawh se, zanin kha chu a aitechhin na chauh ala ni, enge ka tih ve theih chu a hmu dawn khawp a lawm.








Zingah chuan ka harh lawklo a, ka fapa in ka biang a rawn chula ka chunga a lo lawn rual chuan ka nak bawr chu ana nghal ut ut a, a harh lohtheih ta loh.








Ka men chhuah rual chuan chiang fe maia ka nuin min lo enin "Enga ti liai luai nge i hmai kha!" phawk zetin a lo ti a. Chhang hleilo chuan Bawiha chu ka sirah muttirin ka kuah zui a, Room aṭanga ṭi zeta Zothanpuii lo chhuak chu ka lo hmu nghalthuai a, "Thanpui" ka tih rualin kawngka ah a chhuak fel hman der mai.








"I hmai chu enga ti nge?" ka nuin a lo tih leh chuan "Ka Accident na" tiin ka chhang mai a, awihloh hmel fe a min chek tlat tlat hnuah "I hliam awmdan aṭang khan Accident na ani theilo, i vei lam bek a duk a dinglam biangki a belkang a i khabe nen i hnar a him thunga, mi nen in insual anih chiah kha" a ti zui kha kha a.








"Teuh nang a, ka tlu a lawm" tih paha nuih ka tum chu ka nui thei der lo, ka biang chu a in pawtmar ṭunga ṭawng zawng pawn ka ang ṭha hleithei meuhlo chu a ni.








Ka pa zingtho chuan angaite bawkin minlo zawt a, ka chhan hma hmain ka nu chuan "Nizanah khawvelin a bawhbet anih kha" a lo ti zauh a, ka pa chuan min melhrum khar khar a. "Patling ini ve tawh, hetiang mai mai a khawsak ching suh, tunlaiah mi an tualthi mai mai tawh lehnghal a, mi huatthu sawi palh ringawt pawh hlauhawm deuh tawh a sin, fimkhur viau tur" a ti zui mawlh mawlh a.








"I pa sawi kha a dik chiah, fimkhur viau rawh ka inngahna leh kan neihchhun i nih kha, tunlaiah mi an sual tawh si, hriamhrei chelek mai duh tawk lah bo lo, kan Zoram pawh hi a rapthlak tawh lulai emai, khatiang khan nung tawh hlek suh" tiin ka nu in a lo tuihnih ve bawk a, Bawiha ka chhaihsan daih tak nain an thilsawi erawh ka ngaihtuah zui rauh rauh a, engmah lah chu an la hre ve mang silo.








Bawiha pawm chunga thawh mai ka tum chu ka rinaiin ka lo na erh mai a, ka ṭhen chak chak mai, "Âpa..!!" mangang zetin pakhat lah chuan a lo ti a, "E he!..." ka nuin a lo tih hlut vang chuan keipawh ka hawi phawk hra a, ka chawn leh khup vela pem thi seng sung chu a lo hmu lek chu niin.








"I rapthlak lutuk emai Lalmuanpui, kha tlema tlemah i thi lo chauh chu anih kha" a rawn ti leh deuh hluai a "A vun chhia chauh a nih hi" keiin ka lo ti thung a.








Zing thingpui kan in lai mekin Pa Tluanga a lo kal a, "I chanchin ka hria a ka lo kal nghal anih hi, enga tinge ni ka rin ang reng renga i awmloh zat zat mai ni!" a rawn ti lut ve leh a.








"Eng chanchin maw ni a?" ka pan a lo tih chuan min rawn melh te te a "Kha i va han hliam nasa awm ve a?" tiin min zawt a, "Nasa lemlo" ka tih chuan hmel nur zet hian min en zui vung vung a, "Vanmawii te ho ka aṭanga ka lo hriat danin Muankimi te inneih tur tihbuai i lo tuma nizanah Zoramliana i lo va sawisa nek ani awma kha, a zia lo lutuk emai Mapui" Pa Tluangan a tih leh rual chuan ka nu leh ka pa chuan zawhna mitmengin min lo enrual zawt a.








"Chu chu em ni khang i hliam i neih na kha?" chang fak mai a ka pa in a lo tih chuan "Zoramliana min khawihna a nilo" tih zawngin ka lo chhang a.








"Sawi chiang rawh" a aia chiang maha a lo tih leh chuan "Pa Tluang, engtin tin nge an lo sawi a?" tiin Pa Tluanga chu ka zawt thung a.








"Aw.. chu ka sawi ang chuan, Lalmuanpuia thikthu chhia in Zorama leng tur zuiin an lenna vengah a khawih e an tia lawm, kha a patea te pafa pawh ilo khawih niawm tak a ni, Kulikawn khawtlang hruaituten an lo hnawt haw e an tia nih kha" lawmlo fe chuan ati leh hmak hmak a, chutiang chuan engtia thui tak lo thang hman ang maw.








"Zahthlak lutuk emaia, tinge maw Muankimi pawh hi i hawisan theih miahlo mai le, i nupui lakah pawh a inthlahrun awm zozai emai" ka nu chuan a lo ti tlak tlak a, "Chutiang a ni lo e" keiin ka lo ti hmak thung.









"In sawifiah rawh" ka pan a lo tih rual chuan thawk ka la deuh hak a, chutah "Mki vanga kal ka nilo Zothanpuii ngaihzawng sawisak tuma kal zawk ka nih kha" kawngka a Zothanpuii lo lut mek en pah chuan ka han ti a, nizan ang maikhan ka thinrim leh tet tet tawh mai.








"MUANA" chang fek fawka ka pan alo tih chuan "Dawt ka sawilo amah saw zawt rawh u, tu nge a pum a a naute pailai pa pawh saw ka hnawh chhuah hma hian zawt ve reng reng teh u" ka ṭhutna aṭanga dinhluai paha ka tih chuan Zothanpuii chuan hlauhthawn hmel zetin min lo en a.







"Enge inthilsawi awmzia hi...." ka nuin a lo ti leh hluai ṭhin.








"A tawi zawngin ka sawi ang, Zothanpuii hian ngaihzawng a nei a, chupa fa chu tunah hian a pai mek bawk, a tir aṭang khan a ngaihzawng pa nen inthurualin minlo bum renga, Mki nen min inṭhentir in ka hnenah ka chengzui a, chutianga lo tih tir tu chu Zoramliana saw a ni bawk" seh chilh deuh rap rap chunga ka tih lai chuan Pa Tluanga hoin phawk zetin min en hlawm a.








Sawi mai chu ka duh tawk tlat tawhlo "Tunah i chhuak dawn nge ka hnuk chhuak zawk dawn che?" vin zeta ka tih leh takah chuan a che rang khawp mai, Room lamah tlan luh mai a tum chu "Tunah chhuak rawh" ka ti vin leh ṭhawt a, in herin kawngkharah chuan a tlan chhuak hlawk hlawk a, ka pa meuh pawn min dan buai a tum lo a, ka tih tur dik tak ka ti ani mahna.








(He he...mipa nih hi buaithlak emai...)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:36 pm

SAWININ LOH MK - By Ahmangaihi violette khiangte




CHAPTER - 15



IMG_20201110_144517.jpg
IMG_20201110_144517.jpg (72.48 KiB) Viewed 3661 times




Rei pawh a liam hmain Muansanga nuin min lo bia a "Enge thil awmzia ni a?" pawr fe mai hian a rawn ti a, "Thil awmzia chu i fanu kha zawt rawh, dawt a sawi em tih i chian duh chuan i fapa kha i zawt leh bawk dawn nia" tih leh Phone chu dah ka rual a.









Pa Tluanga ho chuan thil awmzia chu min zawt nawn leh a, ka hriat dan ang ang chu ka hrilh a, a zawng zawng phei chu ka hrilh duh biklo, ka han sawi chu an pathum chuan an lungawilo kher mai "A naupai kha a bialpa fa chu a lo ni reng a maw,..karei leh! A va han ngam zawk tehlul ve le!" ka nu chuan a ti tlawk tlawk a.








"A ngaihzawng chu ka hmu tawh mai thei a ni, hman deuh khan ka inkhawm kaltur ka tarmit theihnghilh a ka let leh ṭumin kan Veranda ah sawn tlangval la naupang deuh tak hi alo ding reng a, min hmuh velehah a kal sawn nulh a, rukru emaw ka ti nghe nghe a" ka pa chuan alo ti ve charh charh a.







"Kan hriatloh laiin a lo kal fo ang chu" keiin ka lo ti hluk thung.







Zanriah eidawnah Muansanga nu chuan ka pa zawk a lo be leh a, ka pa awki vin hluk hluk aṭang chuan an in be ṭha tehchiam lo tih chu a hriat theih a, "A pasalin a duh angin tirawh se, inrawlh buai ka tum tawhlo, a duhlo chung nawr luiin kan inneihtir a, a hmeichhia zawkin ka rinawmloh san e te a tih ni" ka pan a tih lai chuan ka lo kiai suk a, ka nu erawh a ṭhu tum bar reng mai.








"Bawihpuia hi ka khawngaih emai a" chhuata Nsa toys khal lai enin ka nu chuan a lo ti chhuak hlawl a, engah nge maw a khawngaih ngawt ni, Zothanpuii ang hmeichhe tenawm lutuk enkawlna hnuaia a seilen a ngailo tur chu a lawmawm zawk ngawt ang chu.








"Khawngaih a ngai reng renglo, anu telloin ka fapa hi chu a tlei lutuk, a awmlai pawn a enkawl tu ber ani chuang hleinem, nu a mamawh miahlo" ka lo ti chang bawl a, phawk lek leka min enin ka nu chuan "Chutiang ngawt ani biklo a hrisel lo bawk si a, nu leh pa kar lo a a seilian tur hi ka lainat em a sin" a ti leh sap a, chu zawng rilru hah na tur a awmlo ka ti ve tlat, ka fapa hi keimah chauh pawn enkawl ka zuam ve chiang emai.








"Thanpuii nu chuan engtiangin nge in rawn chhuahtir in rawn ma tihna em ni a ti anih chu?" ner nawk chunga ka pan a lo tih chuan "Mak chhiatin kan ma ti rawh" ka lo ti bak hluk a.








Chhunah Zo-a leh Zorina an lo kal a, Zorinan ka sawm ve lo chu a lawmloh thu ka sawi mawlh mawlh a, ka pem leh hliam erawh min nuih kur kur reng a, "A lehpekah chuan ka tel ve tawh ang" a ti zui zat a, "Lung ngaisuh a lehpek a awm har dawnlo" ka lo tih lai chuan ka nu in min lo vin hlak a "Mai mai a che engthil mah iti lo ang, i fapa chiah ngaihtuah rawh" a lo ti vin hlar a.








A tukah zing karah chuan bungrua an lo la nghal a, an lo thlen rualin Pa Tluanga te in lamah ka pheisan nghal daih a, engtin nge an khawsak zui chu ka ngaihven peih tawh hauhlo.








Pa Tluanga te ina ka awm lai chuan Nu Vani a rawn lut ve hlawl a, "Muanpuia chu i va duk nasa cher chur ve a" min hmuh rual rualin a ti nghal a, ka lo nui tawi tak chu min thlek zuiin "Vengchhak lamah pawh i thang nasa hat hat tawh khawp mai, kha Zorama lah a ban ruh i lo vaw pelh deuh nitur a ni" atih chuan awihlo zeti ka lo nui hawk a, "Chu chu tunge ti a?" damthlupa ka lo zawh chuan "Vengchhak nu ho mawle" tiin min chhang a.








Hrep tak chuan a, Zoramliana chuan engtin tak min lo sawi zui ang maw, a ban vuak pelh maw huhhh... ama ka a ṭanga chhuak ani ka ring mah zawk.








"A mipuitling tih chiloh emai ka ti, Zorama te phei chu chhungkaw zahawm tak an nia Muankimi nen pawh an inhmehin innei awm tak an ni zawk a , nang nupui leh fa i nei tawh a la duh viau mahla inneih dawn a ruaia Biakinah pawh an puan vek tawh hnua han tihbuai te chu" ner nang nang chunga a tih leh chuan Pa Tluangan min lo melh zauh a, ka hmai hmaah pawh hetianga a sawi ngam anih chuan a vah kualna a a sawi dantur ka ngaihtuah zuia, Mki te inneih tihbuai tum hrim hrim than in ka lo thang dawn anih chhia va hi.








"Â...Vani i hriatsual anih chu, nizan buaina te chu thil dang daih a lawm" Pa Tluangan a lo tih chuan sawi lo turin ka lo mitmei a, "Eng thildang maw?" phawk fe a a lo tih leh chuan "Engthil mah" ka lo ti hluk a, mi nuna buai reng reng mihring hi ka ngaihtheihloh zawng tak a ni.








"Muankimi pawh a hlauthawng khawp ang chu, khi nau khi ka khawngaih ania i phatsan hnuah i la tibuai...." a sawi zawh hmain "Ngawi hmak rawh" ka lo ti vin ṭhawt a, a ngawi chiang kher mai.









"Thil i hrechianglo anih chuan sawi sawi ve tawh suh" Pa Tluangan a lo ti ve bawk. Min melh rum râm râm chunga a kal chhuah hnu chuan "Khawiah emaw chuan a va sawi leh ngei dawn anih kha" Nu Maengin a lo ti a, chu chu thil chiang sa reng a ni, midang ngaihdan chu ka ngai pawimawh tehchiam lo a Mki ber hian alo hre ve tawh ngei anga, eng ang takin lo ngai ang maw?








LPK bungraw phur lo tlan ka hmuh chuan rei awm tawhloin ka haw thuai a, kan Room ka lut chu a lo ruak deuh huai a, rilru nuamlo viau mahse thawk khat chu a veng hrim hrim e.








Chhunah chuan Bawiha chu a piin a chhuahna ah a hruai a, keimahin in ka nghak a Tv ena ṭhutthlenga ka mut der der laiin ka Phone a lo ri a Mki a ni tih ka hmuh chuan lak mai nachang ka hrelo, Phone ah hrilh lo a zanah hmaichhana hrilh ka tum a sin mawle.








Phone ka lak rualin "Inhmu ang" a lo ti nghal tawl a, a awah a alawmlo hle tih ka hre thei a, ka awm a ti nuamlo kher mai. "Zanah maw?" ka lo tih chuan "Tunah Unicky te inah ka nghak che" tih leh Phone chu dah a rual a a zialo hle mai, Zoramlianan engemaw chu a lo sawi hman tawh ani ngei ang.








A pawilo engkim ka hrilh anga, chuti chunga min mawhchhiat a a nei duh ta ṭalh anih leh ama thu ni tehse, keichuan neilo turin ka ti ngei ang.








Ka insiam zui mawlh mawlh a, ka hliam vel vang chuan thawmhnaw hak pawh a har kher mai, kekawr bul han hak tawp lah ka ke lam a belkang nasa mai si a, Mki pawn mak minti em em lutuk ang.








Ka chhuah dawn ṭep ah "I Motor-in lo kal suh" tih min lo thawn a, midangin min lo hmuh a hlau ani ngei ang, ka lawmlo dawn dawn mai ka ti, Zoramliana ṭan zawk tlatin ka hre lehnghal a.








Ka kal chak theihloh vangin ka thleng har zek a, ka va thlen chuan an lo reh ṭhiap a, Room lamah an awm anih ka rin vangin kawngka chu ka han kik ṭha leh te te a, "Lo lut rawh......" tih pahin Unicky a lo chhuak a, "I van rei em em ve, ka roomah a awm va lut rawh" min thlek kual dan dan pahin a ti a, ka hmai bawr vel a hmuh chuan min nuih tat tat a, a ṭawng leh hmain "Nui suh" tih leh kalpelh ka rual a.







"Pa rem rem hle mai" a la rawn ti zui hram.







Room ka luh rualin thlang lam tukverh bula a ding chu ka hmu a, ka thawm a hriat veleh a lo hawi ve vat bawk a keiin hauh inring sa leh insawi thiam tum takin ka lo hmachhawn ve thung.









"Rilru i van ti hrehawm thei tak" thawk la hak chunga ka lampanin min rawn en chiang a, a ner zui nang nang chu keiin ka lo nuih thung. "I nupui i ṭhen a ni maw?" tiin min zawt leh khauh a, ka zeplo nakin lawkah a hre leh vek dawn tho, a lo hresa tawh zawk maithei.








"Tinge.......?" beidawn hmel zetin a ti zuai raih a, a ṭap lek lek bawk.







"Zoramliana hi nei suh" keiin ka lo ti chang bul thung. "Chuvang chuan ami heng thil hi itih?" zawi sepin a ti a. A thilsawi chu ka tih chhan tak nilo mahse aw tiin ka chhang tho.









"Mapui hei vang hian ania a tir khan ka zawh che, nei rawh i ti sia ti nge tunah hetiang hian i tih leh â, kan mualpho zual zel asin" thawk la hak chungin a ti a, ka khawngaih kher mai tunah tak hian kuah vawng vawng ka chak hle bawk.









"Reilo te ka lo kuah lawk che" ka tih chuan men deuh pur chungin min en a, ṭah vak a chak tih pawh ka hria. Ka kut ka phar rualin "I hahthlak emai" tih pahin min lo kuah a, keiin nghet zetin ka lo pawm vawng vawng thunga








"An khawihna viau che em?" tiin min zawt a "Zoramliana kha ana zawk ang" ka lo ti mai a.







"Ana vaklo aniang zing karah a rawn in report thei a lawm, nangmah hi an chil rawn che an tia min ti hlauthawng hman lutuk a" tih pahin ka biang chu an thlek leh te te a, ka laka thinrim miahlo anga a awm chu ka beisei loh lam daih a ni.








"Min huat viau ka ring a" ka tih chuan "Haw lutuk che" tih leh ka dara min ben a rual lawi a, ka nuilo theilo.








"Enge i ngaihtuah a, nei suh i tih vang ngawt te Zorama i sawisak vang ngawt te hian ṭhulh leh mai chi ani tawh hleinem, nang lah chu i nupui i lo ṭhen thawt thawt a, ka rilru i tih hah lutuk engtia awm nge i tum" ka darah bawk chuan a rawn beng leh a. "I beisei ang khan ka awm thei ngawt lo" nur zeta min en leh laichuan a mittui a lo luanga, enge ka tih ka ngaihtuah hmanlo ka hriat leh hmasak ber chu a hmuiah lungchim zetin ka fawp a ni.







Min chhanglo a min namsawn hek lo, ka inlakhran leh hnu chuan a mit a chhing tlat a, "Thil hrilh tur che ka nei a" ka tih chuan a rawn meng a, min zawh pawh a tum chuanglo.







"Lo ṭhu teh" tiin khumah chuan ka pawt ṭhu a, ṭha deuh chuan a ṭhu leh mai a chutah min rawn enin "I nupui kha ko leh rawh, hetiang hi chuan kan awm theilo ania" a ti zui a, ka lo nui min hmuh chuan a lawmloh hmel kher mai, "Mapui.....!" a ti leh hap a, "Lo ngawi rih rawh ka sawi dawn" ka tih takah chuan tum hmak chungin min en a, a duhawm kher asin.





"Zorama nen hian Delhi ah in inhmu tiraw?" tiin ka han zawt hmasa te te a.






"Aw...kan awmna bul lawkah an awm ve a tinge?"






"I awm hma khan helamah a awm char char sia" nuisuk chunga ka lo tih chuan a hriatthiam loh hmel viau.








"Engkim hi a bul aṭangin a lo ruahman vek anih hi, nangnen kan inṭhen theihnan Zothanpuii a hmang ṭangkai a, chumi hnuah nang a a umzui ta che a" nui hawk chunga ka tih leh chuan "Enge i thil sawi awmzia chû!" a lo ti veleh a.








Thil thlen dan leh ka hriatchhuah dan zawng zawng ka hrilh ta vek a "Pasal nei suh ka ti dawnlo che a mahse, ani kher chu nei suh ka ti ang che, i zawm leh zawmloh erawh i thu ni sela i lakah ka duhsakna erawh a danglam chuang lo ang" a kut hmersak vang vang paha ka tih chuan a inpetruh ṭeuh a, a mittui a luang zung zung bawk.







"Remruatpuia, Zorama cousin kha Thanpuii bialpa maw?" ṭah insum ṭeuh chungin a ti a, "Aw" ti a ka chhan rualin a lo ṭap chhuak hawk a, ka awmah kuah bet chawtin ka pawm vawng vawng a, "Min ngaidam teh Mapui mi zawng zawngin kan thiamlo che a mahse, keimah vangin i lo tuar char char zawk anih hi" ka awmah hmai phumin thawk a la leh hak ṭhin.









"Chutiang anilo, engkim ka thiamloh a lawm ka fimkhur loh vang leh ka chêt khawloh vang zawk chauh a ni" ka ti a. "Keimah vang a lawm, Zorama kha na takin ka hnawl a, kan pahnih lakah rilru chhia a put chhan ka nia lawm" a ti ve tlat thung.









"Ka u hnenah ka sawi anga, inneih chu kan ṭhulh mai ang" insut fap fap chunga a tih chuan ka lainat kher mai, amah a la inthiamlo ta zui a, Zoramliana chuan Mki neih a tum vanga khathil te kha ti pawh lo ni eng ang mahse ka thiamloh a nih na ala bo chuanglo, Thanpuii kha ka chêtsualpui miaua engkim bul chu keimah ka ni tho tho a, ka thiamlo hulhual bawk.








Zanah chuan Phone in kan inbe leh a, Zorama chuan a û Hruaia bulah zan hmasa kan insual dan a hrilh niawm tak a ni, Hruaia chu a lo thinur khawp a chuvangin "Engkim ka hrilh ve vek mai dawn ania?" tiin min lo zawt a, "A pawilo, ṭha i tih dan danin ti tawp rawh" ka lo ti a.









Mut dawnah kan inbe leh a "Ka nu pawh ka hrilh a a thinrim khawp mai, mahse ka u chuan vawihnih lai inneih ṭhulh chu zahthlak a tia, Zorama pawh kan bia anga a insiamṭha ve thei lutuk ang a tia inneih ṭhulh kher chu a ṭul a ti lo a, engtin nge kan tih ang" tiin min lo zawt a.








Ka sa nghal pup pup niberin ka hria, ka thinrima ka lawmlo hle bawk. "Mk, neih chi niin ka hre tawhlo" ka tih chuan thawk ala hak a. "Neih ka duhlo, engemaw tihdan tur ngaihtuah teh" a lo ti ve nghal vat a, ka rilru a buai kher mai.








"I û chu ka lo bia ang" ka tih lahin "Biak a fuh dawn a mi ka û chuan ala haw deuh che a, Zorama lah hian a tlawn thiam bawk si" a lo ti a. Biak ve hrim hrim erawh a ṭha in ka hria "Keiin ka nu ka lo be thung anga, U sanga chu Uhruaia thu thu ani mai a, Uhruaia ber hi a rilru hneh angaia a ni mai" a ti sap sap a, Hruaia nen hi chuan tunhma pawn kan inpawh hranlo a, Sanga nen thung chuan inrualpui tetlai pawha inkawm ve zauh zauh ṭhin kan ni a kan inngaina hle thung. A tlangval tirh aṭanga Delhi a a awm vangin kan in pawh zui ta lo mai pawh a ni.








Zan a rei deuh tawh avangin naktuk lama ka biak tur thu chu ka hrilh a, chumi hnuah titi phungleng ho te te sawiin rei zet chu kan inbia a "Ka rilru hi a nuamlo, ka pa chu la damsela ani chuan ka duhdana awm turin min ti mai awm si a, nangpawh a ngainat ṭhin em che kha" a tih chuan ka rilru a buai nak mai.








Heng thil ka sawipui chhan hi neih lêt leh ka tum vang anilo, keimah ang bawkin Zoramliana hian a phulo a, rilru chhe tak a pu vei bawk nen atan Mki hi ka phallo a ni ber, nakinah a ti hrehawm duh mai lo ang tih pawh a hriat hauhloh, Hruaia chuan a insiamṭhat theih ring eng ang mahsela ka mi rin zawng a ni ve hauhlo bawk.









Kan in mangṭha fel hnuah keipawh ka mu a, zingah chuan hma takah ka nuin minlo kaitho a "Lo tho rawh, Hruaia a lo kala biak che a duh ania" a lo tih chuan ka tho chhuak rang kher mai.








Sitting room a ka chhuah phei laichuan "Ka rawn kalhma lutuk deuh a ni maw" alo ti sup a. "Nizan ka mengrei deuh a lawm mawle" ka lo ti ve a, ka inphihfai te te hnuah Sitting room ah chuan ka va ṭhu phei a ka nuin thingpui min lo thlit nghal var bawk.








"Enge i an a, i inhliam na em?" min thlek zauh pahin a ti a , "Hehh...chawei ti tui tham lek" ka lo ti mai thung.








"Kha a zialo hle mai, i lungawilohna pawh awm ka tihpui khawp mai che a, Zoramliana pawh ka va hauh hrep tawh kha" a thingpui in zauh pahin a ti a. "A. keima thiamlo zawk pawh a nia lawm" ka lo ti ve vat a.








"Matei lah chuan inneih ṭhulh mai a rawt a, Zoramliana lahin ngaihdam min dil cham chi a" a thilsawi dan chuan awmzia a nei riauin ka hre tlat pek a.








"Chu inthiamloh nachang te alo hria maw" nuisuk chungin ka lo ti a, Hruaia inla mitak lutuk pawh chu ka ngaithei tehchiam bik tawhlo, a ṭawngkamah hian a rilru hi a hriat mah mah tawh. Mahse, Mki bulah ka lo sawipui ang ka tih vang erawh chuan ka insum hle thung.








"Pehhel lo deuhin ka sawi mai anga, hei i hriat angin Mki hi a mualpho nasa tawh a, tunah inneih kan ṭhulh leh anih chuan chhungkua thlengin kan hmingchhe tawh anga, kan tan thil zahthlak tak anih tawh ang, Zorama berin ngaihdam min dil ruai bawk a, hetiang khawpa a inchhir anih chuan a tihsual nawn leh ka ring tawhlo..." a sawilai mek chuan lo pawt chatin "I van chiang awm ve a" ka lo ti zauh a.









"Ka ring ngam a lawm inchhirna tak tak anei a, Matei pawn a hnial bik lo ang, a thu hrimin i buaipui nasa si a Zorama nen lo innei theilo sela enge i rilru ni ang aw ka lo ti deuh a, nang leh Zorama te ka ngaihdan che u hi in in ang reng bumtu ve ve in ni, i bum dan erawh kha chu a tawpkhawk ema kan ṭhulh ta kha ania, tun ṭum erawh ṭhulh leh pawh kan tan a zakthlak zozai tawh, Mki zawng a vanduai anih hi" awki hniam ruih chuan a ti leh sap sap a.









"Zoramliana chu kei aichuan i la dahsang deuh zawk ani hmel chu a" ner saka chunga ka tih chuan ka lam a lo hawi a "Heng thil bul tumtu hi chu nangmah ber hi ini zawk Muana, hmanah khan lo ti suallo la vawin ah hi chuan ka makpa ini tawh ang" a lo ti khauh a, minti dang lel mai.









"Inchhirin ngaihdam dil ve ta che ila" ngeiawm chhuah chuan ka la ti ta hram a. Ka nuin choka aṭanga min lo melh rum pawh chu ka hmulo der hmak a. Hruaia nuisuk chu ka enreng thung.









"Chutianga itih a kan lo ngaidam che anih chuan kan chhungkaw tan thil zahthlak tak anih dawn chu" a ti leh kher chuan ka insumtheihna min phehsak ṭhelh a ni.









"In chhungkaw zahna thlen chu ka duh hleinem, mahse thil pakhat Zoramliana hian lo bum ve ta che sela i farnu nun i tichhe vek thei tih hi i hria em, Mki tan pawh ṭha tawk ka inti lo a, intahluh leh tumna pawh ka nei heklo, keimah ah chuan hlauhthawn tur i neilo tihna anih ber chu, Zoramliana zawkin enge ala thlen ang che u tih ah hlauthawng zawk rawh, Mki lakah thil ṭhalo a ti anih chuan ka enliam mai mai lo ang, chuan nangpawh Mki duhlo chung i nawrlui anih chuan ka chhuah biklo ang che" ka thilsawi chuan a ti lawmlo hle tih a lang reng.









"Ka farnu chuan ka thu a awih ang, min la hnial ngai hauh hleinem" a tih chuan ka lo bu nghat a. "I thu a awih anih chuan a ṭha, mahse, a awih duhloh a i tih luih chuan ka sawisa hrep ang che, i sawi duh ang chu a hriatthiam theih vek tawh bawk a va haw tawh rawh" tih leh thawh ka rual a, pindana ka luhsan hnu chuan a chhuak zui ve mai bawk a.








Mki ka bia a "En teh, i duh ang a awmtur in huaisenna nei ang che, tumah in nawrluih tir lo la, i duhdan chiah in awm rawh, pasal neih i duh chuan a pawilo keichuan pawm tho anga mahse, i duhlo chung chuan tumah i innawr luih tir tur anilo, chutianga nawr tum che an awm anih chuan min hrilh dawnnia" tih zawng sawiin Phone chu ka dah zui a.








(Nizan lam kha inhriatthiamna ka dil e, hemi chapter bik phei chu angaihnawm loh khawp ang story mood ah ka cheng theilo reng reng a, minlo hrethiam rih ru aw)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:36 pm

SAWININ LOH MK - By Ahmangaihi violette khiangte



CHAPTER - 16







Kan ina Hruaia a lo kal aṭang chuan ni hnih a liam leh tawh a, chawlhni tuk a ni nghe nghe, inkhawm tura Bawiha nen kan insiam laimekin ka Phone alo ri a, Mki Phone Call a ni.









"Mapui inneih ṭhulh chu ka nu nen kan duh a mahse, ka u hian a duh tlat lo a, kan mualpho nasa dawn lutuk a ti tlat a vawin hi kohhrana an puan vawi thumna tur a ni a, engtin nge ka tih tak ang" mangang zetin a lo ti a, Hruaia nen kan inbiak dan ngaihtuah chuan a rilru a thlak mai khan ka ringlo reng a ni.









Keimah vang ngawr ngawr pawhin Hruaia chuan kaltlangpui chu a duh zawk ngei ang chu, Zorama leh a farnu an inneih loh chuan Mki chu ka hnenah a lo kir leh a hlau tih lah a hriatreng á. Hrep chuan a! Zoramliana hi eng ang fakauin nge maw alo hmuh bik dawn ni.









"I u chu râwn tawh lemloin Kohhran Chairman hnenah puan chhunzawmlo turin ti tawp mai rawh" ka lo ti a, ka thurawn tur neih chhun lah chu a chauhthubarawh kher mai.








Ka sawi ang chuan a ti ta tho aniang inkhawmna ah chuan inneih thu lam reng reng a ri ta lo a, inkhawm banah erawh Hruaia hmel emaw Mki hmel reng reng ka hmu zui lo, a û hmaisâ a tâwn ngei dawna ka hriat vangin ka awm a nuam lo hle bawk.








Bawiha chu ka nu bulah ka dah a, in ka thlen rualin chhuak turin ka insiam sawk sawk a, Unicky bia in Mki lo va ngaihven turin ka ti ringawt bawk a "An inah va leng phei teh, chanchin min lo hrilh leh dawnnia" ka tih chuan phun zui hluk hluk chungin a kal ve mai bawk a.








Kei Zo-a te inlamah ka phei thung, ka thlenphei hnu rei vaklo ah Text message ka dawnga "Mki chu a û nen an inbakkaih deuh a, a û in a beng a niang a mu tlata tunah a roomah ka awm mek a" tih Message ka hmuh chuan ka thisen a lum nghal pup a ni ber e.







"Ka lo kal ang" ka tih nghal hluk a.





"Lo kallo ang, zanah kan inah ilo kal zawk dawnnia hetah chuan a chiloh" a lo ti nghalthuai a, "Chuti anih chuan Mki kha hruai chhuah dan lo ngaihtuah phawt mai rawh" ka ti leh a rem han ruat zel dan tur erawh ka bangbo hle thung.








"Ru tawp mai rawh" ṭhianpa Zo-a lah chuan a lo ti ve chhen a, chu erawh ka ngaihtuahna nen a inpersan lulai lutuk. "Mki neih letleh tum vanga heng thil hi ti ka nilo" ka ti chhuak hlawl a, ka ṭhianpa chuan a hrethiam leh ta hauhlo.








"In inhmangaih a, ani pawn a la duh em em che a nanglahin chuti bawk, inbuaina chinfel nan chuan inruk a ṭha ber ania " a lo ti leh mauh mai a.








"Chutiang ka ti theilo, nupui ṭhen hlim chauh ka ni a, Mki nen langsar taka inzawmna kan nei leh anih chuan a hma aikhan kan mualpho zual ngei ang, keichu ka inngaihtuahlo a ka ngaihtuah zawk chu Mki bawk a ni" ka ti a.







"Â..Ṭhiana i insit mai mai anih kha, tunah chuan daltu innei tawhlo kaltlang pui tawp rawh eng ang pawn insit mahla i hmeichhe hmangaih ber a nia, nang baka hmangaihtu a hmu tawh biklo ang" ka ṭhianpa chuan a ti leh charh charh a, ngaihtuahna a kalthui duh kher mai.








Keimah ngei pawh ka hmeichhe hmangaih tan chuan ka in iai chu a ni tak si a, midang nei tura ka ngaihtuah chang lahin hrehawm ka tiin ka thik leh em em zel bawk si, tun dinhmunah hian ṭanpui chu ka duh ngei a inrukpuia sawm em chu thil tih chi niin ka hre bawk si lo.








Zanriah eikhamah chuan inkhawm turin ka kalchhuaka Unicky te inlam ka pan thung, a nu leh pa inkhawm kaltur nen kan intawk chiah a, min be lo hluah mai.








Inchhunga ka luh rualin "A lo kal mek" a lo ti sar sar a, Sitting room ah ṭhuin kan nghak ren rawn a, rei vak loah chuan a lo thlenga a hmel bui deuh lak ka hmuh chuan a ṭap zo hlim chiah tih ka hrethei a, ka lainat reuh kher mai, chuti chung chuan min hmuh veleh min nuihsanga "Ka rei em?" aw thian kharh chungin a ti a, a aw lawi lek lek pawh chu ka hailo.








Roomah kan inzuiluta, a fala kan awm veleh chuan kan han inkuah vawng vawng phawt a, "Ka hman reilo ania, Biakinah ka û in min hmuhloh chuan min ringhlel nghal ang" ka awma bei chungin a ti a, a hmai zartu a sam chu hui kiangin ka kut lehlamin nghet zetin ka kuah a, kan dinhmun chuan han zir ngat sela chuan min zui tura sawm hun tak a ni tih te chu ka hre ve renga mahse, engthil emaw hian chutiang sawi theilo tur chuan min dang tlat lawi si.








"Engtin nge kan tih tak ang?" ka chhanna beisei takin min en a, eng chhanna nge a duh ang le? Chhan dan tur a vang kher mai.








"Tlanbo daih mai ka duh" ka chhan hma chuan a ti leh tawl a, "Lungngai suh" engkim a ṭha leh vek mai ang" ka han ti ve leh ngawt a tih vak ngaihna ka hria a zeng pawh a nilo ka rilu te te chuan Hruaia emaw Zorama chu sawisak hrep mai tur emaw ni tiin ka ngaihtuah zui a, chu chuan kawngro a su kher a nge maw? Ka thilsawi chuan a thlamuan ve nge ni thawk la ham ham chungin min kuah nghet leh sauh a "Tunah chuan i thu thu ani tawh, ṭha i tih dan a piangin ka awm mai ang" a ti leh sap sap a.








Zo-a thilsawi kha ka rilru ah a lo lang rauh rauh a, sawm ta ila engtin tak min chhang ang maw? A...Kei hi ngaihtuahloh tawp tur thil ka ngaihtuah a ni.








Eng pawhnise aman a duh a thu te pawh aniang chu, chu lo kan buaina chinfel dan tur kawng dang ka hre bik tawhlo.








Inkhawm dar a rik nawn leh tak vang chuan hmanhmawh deuhin a kalchhuak a, keini erawh Unicky nen titi in rei deuh chu ka leng zui a, Unicky pawn inruk mai chu ṭha a tih thu a lo sawi a, "Anih tur ang ang chu a ni vek tawh, duhloh chung pasal inneihtir aichuan mualpho pawh huamin inru tawp mai rawh u, chuti anih loh chuan nakinah inla inchhir ang, 'Chutiang chuan lo ti ta zawk ila' in tih sek duhloh chuan inru tawp mai rawh u" alo ti ve mawlh mawlh a.








"Min ṭanlo emaw ka tia?" nuisuk chunga ka lo tih chuan min melhrum zui rawm a "Zoramliana lo che tenawm hle lo sela chuan ṭan dawn teuh nang, ka ṭhiannu ka khawngaih vang chauhin ka ṭan leh hram ang che" ner sak sak pahin a ti a.








Kartluanin boruak dang kan nei zuilo a, Mki lah in lamah a tawm chawt a, Phone a kan inbiak bak chu chawlhni zan aṭang khan kan la inhmu leh ta lo. Hruaia a zin a, Zorama a leng zeuh zeuh -ṭhin tihloh chu harsatna a nei zui ta lo a, an ṭhulh tlang ve dawn ta nihmiang a ka ti mai.








Kar khat hnuah office kal tura ka insiam mawlh mawlh laiin Thanpuii nauchhiat thu chu minlo hrilh a, "Step-ah a tlu sual a, a dul a sawh na deuh ni ngei tur a ni !" ka nu in a tih lai chuan ka lo ner sawk a. Tluksual palh tih chu ka awih zawng ani hauhlo, nau a titla anih ka ring nghet hmiah a, ka fa ni lo mahse ka thin a ti rim thar leh urh mai.








Ka rin ang ngeiin nau chu a lo ti tla a, chupawh Muansanga hnen aṭanga ka hriat a ni. Remruatpuia nen chuan an inzui chhunzawm lo lehta nghal a, a tuar viau aniang zu in lamah a ṭuan zuia Muansanga rilu pawh ati hah ve ngang a nih hmel. "Vuak hrep mai hi ka duh ṭhin, tenawm dun lutuk mai, Remruatpuia lahin a thlahthlam hmak mai a, a chawh zawkah ṭanglo sela chuan ka vaw dawn a sin mawle" a ti zui niah niah a.








Tlai khat chu ka Office bang ka haw hnu lawkah a lo lang ve teh hlawl a, a hmel chu a pawr fap a, a ruih hmel hle bawk. "Engti turin nge i lo kala?" nelawmloh fe mai a ka lo tih chuan "Bawiha ka ngaia ka lo hmu lawk dawn" a lo ti a, inthlahrung hmel phei chu a pu hauhlo.








"Bawiha..." tiin ka fapa chu a au zuia, ka fapa lah chuan ṭhuthlengah ṭhuin Tv a entui ngang maia, anu kohna chu a hre map lo.








"A ngai velo che aniang, vaw haw leh zawk mai rawh" ka lo tih laimek chuan kei min kalpelin Bawiha ṭhutna lam chu a pan a, ka fapa lah chuan a TV en chiah chu a thlek doh doh a, a nuin a biak pawh chu a chhang mumal meuhlo, a beisei ang a hmu ta lo chu a ner zui nang nang a. Chuti chung chuan minla melh rum kha kha a.








"Nidangah chuan lo kal buai duh tawh suh" ka lo ti bung nghut a ani alo nui thung, ṭawng leh tuma a ang zuau chu lo khapin "Haw nghal vang vang rawh, i zu rimnam chung phei kha chuan ka fapa hi hnaih ve lo tum buai duh tawh suh, tunah chuan nu a nei tawhlo a, a tan pawh mitthi i ni tawh" ka ti leh fak a, chumi hnu ah "Ila chaklo ang" tih paha insawh tau nghawng nghawng chungin a kalchhuak a, rui chunga kan in a lo lut leh ngam ringawt pawh chu a huaisen ka ti zawk khawp mai.








Mki hnen aṭanga ka thu dawn leh hmasak ber chu "Kartawpah man inhlan ka u in a ti a" tih a ni, Hruaia chuan a tum lui ngat ngat hle a ni, engthil emaw chu ka tih ngei a ngai dawn anih hmel.








"Ka hnial nasa lutuk Mapui, amah Zorama ngei pawh ka hrilh vek chung pawhin ka thilsawi leh duh dan te hi engahmah min ngaihsak lo a ni, ka nu lahin ka u thu a hnial ngam bawk silo" ṭah aw ṭeuh chungin a ti a.








"Engthil nge ti tura min duh, i duh sawila i duh danin ka ti dawnnia" ka ti ta ngawt a, a ngawi veng veng a ani pawh a rilru a buai ngang a ni. "I tih dan dan ani mai" a ti leh rinngawt a, a chhanna chu ka duhkhawp meuhlo.








"Mk, nangmah zawk khan sawi rawh keichuan i duh ang ka piang ka tihsak ang che, i û leh Zoramliana ngen sak tur che emaw, sawisa hrep tur pawn min tila ka ti vek ang" awki damthlupa ka tih leh chuan "Mapui..." a rawn ti deuh hluai a, sawi zawm mailo chuan a ngawi leh vung vung a, keiin a ṭawng chhuah hun ka lo ngaichang reng thung.









"Zanah ka lo be leh ang che, in ngaihtuah fim deuh phawt ka ngaiin ka hria" zawi tea a tih chuan "Ni e..ngun takin inngaihtuah phawt rawh, nangmah chiah kha inngai pawimawh bawk la" ka lo ti vat a, kan inbiak zawh hnu chuan thawk ka la kawk a, sawifiah thiam phakbakin ka thinphu chu alo rang hman nia! Engthil emaw hian min mawlh a min ti tawt ṭeuh reng bawk.








Zan tirah Zo-a a lo kal hlauh a, ka rilru buairuk deuh na ka lo hrilh chuan a ngai holam khawp mai a "Mi zawng zawngin in induh zia te chu an hre vek a lawm, innei ula a tirah chuan a sawi hat che u anga areh leh har dawnlo, chutin in hming chhelo ang, i nupui hlui lah khawngaih tur zawngin a awm bawk silo, kawppui nei lo ve ve innia thil thlir thiam chin chuan in inhmangaih zia an hre zawk ang" a lo ti hmiah mai a, a sawia sawi hi chu a tak nen chuan a inanglo deuh alawm, mahse risk lak ka ngamlo tihna a ni biklo Mkin a duh phawt chuan kei chu ka inpeih a ni mai e.








Mut dawn thleng chuan min lo be lo a, a reh vung vung mai chuan ka awm a ti nuamlo riau a ka muhil thei lawk lo nghe nghe, ka phone chu ka tuai let sek reng a, a muhil tawh zawk em mawni dawn ni.







Bawiha puan lengthlak ka sin ṭhattir laimek chuan min lo Phone ta chiah a, ka la rang teh e.







"I muhil tawh em?" aw ngaihno bei zet hian a lo ti a, a aw chuan min ti hahdam huai lehnghal a, keimaha danglamna a siamhneh ṭhin lutuk hi chu ka thiamloh nge ama thiamloh pawh ka hre tawh neklo, heti em ema a zuna ka uai hi ama thiamloh anih zawk mah ka ring, engah nge a ṭhat chung chuan em em tehreng ni.








"Zanin chu ka nu room kan singsa a ka buai deuh hlek a, i lo muthilh daih tawh ka ring a" a tih leh chuan "Ka lo nghak che alawm, i mu ve tawh em?" ka lo ti lêt thuai a.








"Ka mu fel chiah e, vawt reuh khawp mai" nui lek lek aw chu a ngaihnawm viau a ni, ka bulah ka kuah phak maiah lo mu ta sela tia ngaihtuahna ka put rualin ka nui chhuak hawk a. "Tinge i nuih a?" a lo tih chuan "Engmah nilo e, pangtilum i neilo ve si a thla ala sik dawn chauh sia.." ka lo tih chuan "Ka ngaihtuah fel vek tawh chutiang te chu" a lo ti sam et a...








"Engtin a?" ani leh anilo anga chutiang thu a sawi chuan nuih a ti za deuh deuh a ni. "Enge i awih lo deuh a mi, thlasik te chu zual mai mai rawh se, mahniin ka mu tawh dawn chuanglo a" nui hak hak chunga a tih chuan kei la lo tum hmak thunga, pasal neih chu a tum thlu ta tih a ṭawngdanah a chiang reng a ni.







"Chuti chu thlasik pawh a huphurh awm dawnloh chu" ka lo ti nghut a.







"Niang chu, ka ke khan lum tu tur ka mamawh tawh viau a ni" a la nui cheu chuan min run deuh tlat tawh. Keimahin ka nui tawi tak tak mai.








"Ka lawmpui che aw" inthup hi chu ka thiamlo a ni, ka aw lah duhaiin a chang leh mah mah tawh a, lawmlo awka chu a hai leh lo khawp ang.








"Lalmapui tu chungchang sawi ah nge ilo in ngaih a" nui hak chunga a tih chuan ka chhang mailo "Zan pawh a tlai tawh e, muhil dawn tawh rawh" aw ki pangngai deuh zawka ka tih leh chuan "Lalmuanpui" a lo ti leh fak a.






"Ummm..."





"Ka ngai che" a thil sawi chu hriat hrehawm tak chu anilo chiang a lawm.








"Keideuhin" ka lo ti a, hetiang thu kan sawidun lohna chu rei ve thawkhat tawh tak a ni.








"I duh apiang ka ti ang i ti tiraw?" zawi sapa a lo tih leh chuan "Ti nge, duh i nei tawh em ni?" beisei ka nei tih pawh a hre leh tawh ang chu, ka phur hmel mah mah deuh chu a ni.









"Nupui ruk tur i mamawh chuan min hrilh dawn nia" a lai tih ka hre thei, a aw chu azuih ral hle bawk.









Sualthiam chhuahin "Ka mamawh pawh ka hrelo" ka lo ti awlsam eta, a ngawi leh veng veng a, a zak nge mawni dawn ni. "Tinge i ngawih char char a?" ka tih leh takah chuan thawk a la ri halh a "Keichu, tu emaw min ru bo tu tur ka mamawh in ka hria" zawi te fiah ang reng tak si hian a lo ti ta a, ka nui lo theilo a ni, ka nui ri ngam derlo thung a ani lah a thutak nasa mai si.








"Ru bo tu tur a?" hrethiamlo derin ka zawt nawn leh ngat a, nin hmel taka a lo chek hlak ri te chu hriat anuam kher a sin.









"Aw.....min ru bo tu tur...I va man lo tak....ka pasal neih hma a min rubo a nupui atana min nei daih tu tur ka duh" a tih leh chuan ka nui ri lo thei tawhlo, kan thil sawilai chu thil serious tak a ni a nuihpui mai mai tur thil chu a nilo mawle mahse, kan hlimpui miau sia lawm tuman min dem suh se.







(Tlai theih chhak2 ve le..comment ula aw..)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:37 pm

SAWININ LOH MKI - By Ahmangaihi violette khiangte




CHAPTER - 17






Zan rei a la nilo tunah tak hian a hmel hmuh ka chak hle a ni, ka sira tuitaka muhil mek ka fapa chu puan ka sin ṭhattir te te a ka kut lehlamin ka Phone chu ka la ngaithla reng bawk a, a phunzui niah niah te chuan minti lungawi hliah hliah si, thil mawi leh mawilo thlu thei pawh ka ni tawhlo ka rilru ah pawh kha lam kha alang pha tawhlo reng reng, a han ṭawng chhuah ve takah chuan saruak leh inhawng sa an tih ang hi ka ni ta berin ka hria.







"Ka lo kal dawn lo chhuak lawk la" ka tih chuan "Eng â!?" a lo ti tehhluai a. "School bulah khan ka lo nghak ang che" tih leh khum aṭanga thawh ka rual a.








"Nâ.....Mapui zaninah em em chuan ka inring hleinem" a tih chuan ka nuisuk suk a, "Lo chhuak rawh ka lo kal ania" ka thawmhnaw lum in bel mawlh mawlh pahin ka ti leh a, "I ti tak tak elaw, naktuk zanah te ti tal la" ngenngawl takin a lo ti a, ka chhang ṭha duh der lo. "Ka lo chhuak ania" tih leh Phone chu dah ka rual a.








Pawnlam chu a reh ṭha tawh kher mai, Motor tlan zeuh zeuh tih loh chu mi veivak hmuhtur an awm lo a, zan boruak chu a thiangin van lamah arsi a pe un mai bawk a, thlasik khaw vawt lam lek lek nen zanin zet chu boruak anuamin engkim a mawi zual emaw tih mai tur a ni.








School bul ka thlen chuan Gate bul Stepah ṭhuin ka nghak a, ka Phone eng zak zak ka hmuh rual chuan nuisuk chungin ka chhang a "Lalmapui, tihian ka lo kal tawp dawn ania, ka zui haw nghal dawnlo che ania aw" a la rawn ti ta hram a, "Ka nghak reng tawh che ania, a vawt bawk si lo kal vat rawh" nui kur kur chunga ka tih leh chuan thawk an la ham ham a, "I van phili reuh tak, ka lo kal" tiin Phone chu a dah a.








School aṭang chuan an In chu a hla hranlo a a lo lang ve nghalthuai bawk, ka lampana a lo pen phei hlak hlak ka hmuh rualin ka ṭhutna aṭang chuan ka thochhuak thuai a, Gate bula ka ding min hmuh chuan a lo pen chak sauh a, mutkawr pan te chungah kawrlum fual a ha a vawthlep a bun bawk a, min hmu rualin a nuisanga a lai deuh emawni!







"Ka insiam lo ania aw" an ti leh ringawt a.






A banah vuanin Gate bul thim laiah chuan ka pawt lut thuai a, Stepah chuan pawt ṭhuin eng khaw sawi set set loin ka fawp nghal hmiah mai bawk a, min hnar biklo. Zan reh tak thla eng dul riai hnuaih chuan duhthawh fahranin kan inkeih dun mial mial a, lung a van awi kher em.







A rim nu chek mai leh a kut nem thep te, a heh mawi zet mai leh a mitmeng no nghalh mai te chuan zan boruak mawina chu a van tizual tehreng em. Lungchim taka kan infawh hnuah kut insuih rialin kan ṭhu dun a, sawi leh chuan tur hi a awmlo kan in en a kan nui leh rih ṭhin.








"Chuan...?" min melh ralh pahin a ti a, a lo thlen tirh ata alak aṭangin mit ka la la sawn lo reng reng a ni. "Enge chuan...?" a meng nur nghal nang a, fawh leh mai tuma ka kun hnai chu ka hmui lo hupin "Sawi phawt ang" a lo ti ve tlat a.







"A dar zat sawila a tawk mai" ka lo tih chuan a heh petin a nuia, "Tun ang hun velah hian aw" a tih leh rualin a hmui ka lo khar nghalzat a, a biang tawn tawnah ka kut pahniha dawmin uar fahranin kan fawh leh kha.








Duhtawk chinlem a awm lo, zankhua pawhin he a hmui tui tak hi ka kham chuang lo ang, "Let tawh rawh a vawt sia i hritlang ang" ka ti ta ngawt a, "I duhtawk tawh a mi?" mit min han siai khum zauh a, "I awm reng chuan i hmui kha ka ei zo vek ang" ka ti chu a nuih a za kher mai.







"I ei zawh daih ten fawh tur i nei tawh nang" nui hak hak chunga tih pahin min nek hnai salh a, keiin ka lo kuah vat thung.







"I van lumnuam bik" ka ban chu a awmah pawmin ka darah a lu a nghat a, a hmel ah chuan a hlim tih a hriat reng bawk. Tinge maw pasal nei tur te a ka lo tih phal zawk reng reng le, tunah kan awmdan ang ringawt pawh hian mipa dang bulah han awmin han nekhnai sela ka thik dan tur mawlh mai chu!







"Ka ta inih hi" kan ti leh ngawt mai pek a, ka awmdan chu keimah leh keimah pawh ka innuihzat dawn dawn mai. "Nia..." tih paha min enin min seih leh a, a hmui chu mak tak a ni nula hmelṭha hmui satliah a nilo Magnet ang maiin min hip hnai riai riai mai nia mawle!







Zankhua pawhin kan inning hlei lawng nge, keimah zawkin haw chu ka rawt leh ta nge nge a, a tuk zana kan hmachhawp hre ran chungin kan in mangṭha a, a kalliam tur chu ka en vawng vawng a hetiang hun hi kan tawng leh thei tawh pawhin ka lo ring ngailo a, mumangah tak ngial pawh ka mangphan ngamlo anih laiin a tak ngeiin ka tawng leh a, phu zo turin tih ka nei hauh silo, he khawvel mipa zawng zawnga vannei chungchuang ber ka ni mai lawng maw tih te pawh ka ngaihtuah rum rum a ni.








Chutiang taka thil ṭha hria chu thup thei reng hek lo zing zingah ṭhianpa Zo-a muhil ka va ṭhawng harh a, "Zaninah nupui ka ru dawn a nia, mo lawm turin lo in ring rawh" ka tih chuan thophang hmel bo hmak khawpa phawkin min en a. "I ti tak tak em?" awih deuh reuh awih ngam chiah silo hian min zawt leh a.







"Tak tak ang chu le" nui chunga ka lo tih chuan "I ti har ka ti reng a ni, Mki chuan a duh mai ang ka tih reng khá" nui suk suk chungin a ti a.








"Zoramliana chu a hawihai ve khawp ang chu" tiin a nui zui hawk hawk a, "Lo hawihai mai mai teh se, min ti khawtlai rei tawh bawk alawm le, a nupui tur ka chhuhsak pawhin ka inngailo ka ta ka let ah ka inngai" ka lo ti ve nghat a.








"Ni chiah e, hun kan khawhral hnem tawh lutuk, a vanduaina khua ati sei peih mai mai zawk a lawm chawh tak rawh se, a hawi hai hmel ka hmu chak ngawt mai" a ti zui hluk hluk a. Thingpui ina kan titi zui luam hnuah hna kal turin ka hawsan a, phei khai a zang duh viau a ni.








Chhunah kan inbia a "Ka insiam tawh a mahse, ka thawmhnaw hi Unicky ka hawn tira a hnena lam leh turin" nui kar kar chungin a lo ti a. "Engtin nge a lo tih a?" ka tih chuan "Lalmuanpuia chu a vannei lellawl hle mai a ti" a lo tih chuan ka nui chhuak hawk a, henu tak hi chu mi hi a hnehsawh ṭhin a ni.








"Ka haw hunah ka lo be leh ang che" tiin kan inbiakna chu ka titawp rih a, hmabak ko lam ka ngaihtuahlo rilru a nuam hle reng ringawt, ka chhungte chuan engtin tak lo ngai ve ang maw, ka ṭhawng dawt dawt reng mai chu a nia.








In ka thlen rualin Zo-a leh Zorina an lo lang veleh nghal a, an phur dun viau a ni. "Kal pui i ngai em?" a tih chuan ngai ka tilo kan inhlat lo bawk a, veng chhung kar lek anih bakah puih viau theih pawh ka ni chuanglo.








An ṭawng ring tur chu ka khap deuh renga ka pa lah chanchinbu chhiarin kan piah maiah a ṭhu ve renga a hun ka tih hma a an lo hriat ve chu ka duh rihlo, ngaihdan veilam te an lo nei ve leh ang tih mawlh a hlauhawm tawh, engthil mahin min ti sukuk tawh tur a nilo tih chu ka changvawn a ni bur rih.








Hma deuhah Bawiha ka mutpuia, zantirah hian ka Phone a khawih duh ṭhin vangin ka bulah ka mutpuia a muthilh hnuah ka nu hian a lo la mai ṭhin, zanin tehkher chu a mengrei ve hrep a "Muhil tawh rawh le" ti a Phone laksak ka tum lahin a phal tlat lo a, a piin a Phone enpui tura a thlem takah chuan a pite room lamah an inzui phei a.







A Message ka en chuan a Text a lo awm nual tawh, ka chhang lawk silo chu ka rilru ka thlak emaw tiin a lo mangang hman viau nghe nghe a.









Ka Call zui a, a chhang rang kher mai "Minti hlau hman a alawm, engmah ka Message i lo chhang silo a" a lo ti nghal hlut a. "Nsa'n ka Phone a chang tlat a lawm mawle, ka lo kal tawh mai dawn a mi?" tiin ka zawt zui a.








"A la hma deuh, ka chhungte an la mulo" a lo ti nghalthuai a. "In leng i nei em?" Zoramliana a leng zantin tih ka hriat vanga zawt ka ni.








"Nei e mawle, a lo kal a biak pawh ka be peihlo, ka u leh ka nuin an kawm" a lo ti bak deuh hluk a, lawmlo awka mah nise hriat erawh a nuam viau. "Ṭha deuha lo biak tur a lawm, naktukah a hawihai nasa dawn sia" ka lo tih chuan a nui ri hak hak a, "Ka be tui thei thlawtlo a lawm, a hmel te hi ka ten zo vek tawh" a la rawn ti zui a, ani meuhin ka tenzawng a ti chu nuih a ti za viau mai.








"I û nen hian tun hmain an inhre ṭha viau a nilo maw?" ka ti leh a. "Ka hre biklo, an kum a inruala apa in min bial lai vel khan an inkawm ve maithei, hman deuha a lo len hmasak ber ṭum pawh khan ka u nen chuan an in be tlangnel sa tawh niin ka hria" a lo ti sap sap a. Ṭhian an nih chu ka ring deuh reng a ni, chuti nilo sela han duhsak bik viau chhan tur a awmin ka ringlo.








Dar 11 velah chhuan ka chhuak phei a, School kawta lo awm tawp aichuan tiin an inlam pan chuan ka kal ta zel a, an in ka thlen dawn ṭepah hmanhmawh taka min tawk zawnga a lo kal chu ka hmu a, puana a inkhuh deuh hlun vangin min hrelo nge ni min kalpelh mai a tum chu a banah lo vuanin ka pawr lêt hrawk a, min chum an tum ngawt pek ah, ka hmel a hmu chu thaw huai hmel a pu a "Ka hai dawn che a lawm le" tih pahin min pawt nghal sawt sawt a.








"An la mulo nge ni, i va hmanhmawh em em ve?" min pawt kal dawr dawr chu pawt ding velehin ka zawt a. "Â....in in thleng vat vat zawk ang, rilru a nuam theilo" a lo ti leh hliai a.







Hmanhmawh takin kan In lampanin kan inzui a, in chhung kan luh rualin thawk an la leh kawka, hahdam huai hmel a pu bawk.








Ka room ah ka luhpuia, ka chhungte an muthilh tawh vangin thawm dim tak chuan kan inbia a, min kuah deuh chuk chuk reng a ni ber, intifai tura Bathrooma a luh laichuan a kawr hakthlak turin ka T-Shirt ka lo lakchhuah sak a, a lo chhuak leh chuan tawngchham lutuk mai hian Towel a lo veng chhuak a, hmuhnawm thlir taka ka lo thlir chu min lo nuih leh var var a.








Ka bula a lo mut hnu chuan ka lo kuah vat a "Mumang a ang tiraw" nui sen sen chunga a tih chuan "Mumang anih chuan harh leh tawhlo ka duh ang" ka lo ti zauh a, "Keipáwh...." tih paha ka biang a lo piai chu a kut lo mansakin ka lamah ka hnuk hnai sauh a, thawmhnaw pan te chhana a taksa nem thep mai ka deh reng takah chuan ka mipa nihna pawh a lang chhuak rang hle a ni.








Zinga ka harh chuan keimah chiahin khumah ka lo mu a, ka tho chhuak rang kher mai, thawh phan chu khawilam hman hmawh takin Sitting room lamah ka chhuak phei zui a, Ka nu leh Mki te inbe mawlh mawlh paha eirawng an lo bawl dun ka hmuh chuan ka thaw huai a, reilo te chhung khan ka ngaih a ṭhalo hman viau a ka nu nena inpawh taka an lo inkawm chuan zingkar boruak a ti famkim zual bawk.








Ka pa in min lo koh takah chuan an room lamah ka phei thuai a, khum bul Chair ah ṭhu chungin min lo en ran a, a lungawi vak lo tih pawh ka hre thei.







"Engtia han khawsak zel nge i tum a?" a sawi laichuan nelsual hlauhawm tak hmel te pawh a puin ka hria







"A tla chawpin ka ngahtuah ve tawh mai ang chu" ti a ka chhan na chuan a ti lawm fahranlo hle bawk .







"Hei pasal neih dawn aruaiah i ru ta mai sia, eng rilru nge maw i put le, a bul aṭang bawkin ṭan leh intum zawk em ni?" a ti charh charh a. "A bul aṭangin ka ṭan hleinem ka pa, kan rial rei tawk tawh a tawrh reng hi ka duh tawhlo, eng ang pawhin miten kan chungah ngaihdan siam mahsela pawi kan ti tawhlo ve ve a, kan duhdana awm turin tuman min dang thei tawhlo ang" ka sawilai chuan ka pa chuan chal chuar tapin min en a, inngaihtuah chianglo taka thil ti mai mai leh thuhnu dawnlo chu ka nibiklo tih pawh a hrethiam ngeiin ka ring.








"Mi inneih tibuaitu tiin an sawi luai luai dawn che a nia aw" a tih leh chuan ka lo nui mai a "A pawi ka tilo, chutianga misawi chhiat chu kan tawn ngai loh pawh a ni chuang hleinem, mi sawidan ngaihtuah reng aichuan hlim taka Mki awmtir hi ka duh zawk, a tuar rei tawh ah tunah chuan hrehawm taka a awm ka phal tawhlo ang, Zoramliana a ni emaw a chhungte pawn min dodal mahse, ka theihtawpin ka beilet ang" ka lo ti leh hmiah a, engmah sawizui tawhloin min en vung vung ringawt a, a sawizui lo a a pawm anih ka ring.








Ka nu thung chuan engmah min zawt buailo, Mki laka a rilru chu hman nen chuan dang tak a ni tawh bawk. Tukṭhuan kan eikham awrh tih ah Hruaia te nufa an lo lang ta hlawl a, Office kal tura ka insiam chu ka ṭhulh leh rih a, Mki lah Room-ah a tawm tlat si a, phurlo tak chung pawh a ka lo chhawn mai an ngai.








"Muankim lo chhuak vat teh aw" Hruaian a tih bul bul laichuan "In hruai haw chuanglo ang" ka lo ti chang bula ka pa in min lo khap rang kher mai.








"Lo haw phawt sela, ṭha tetein kan indawr zawk dawn a nia" a nuin a tih laichuan ṭawng ka lo tum leh zuau a, ka pain min lo mitmei vang chuan ka ṭhulh leh a. "Lo haw nghal sela a ni mai, a hnu lam thil sawi vak kher angailo" a nu lam hawiin Hruaia chuan a lo ti ve nghat a, pawr ve viau mahsela a thu ang chuan engmah ka thlentir dawn hauhlo, a rah mek In hi ka ta a ni miau a, he inchhunga thil thleng leh thlenglo tur chu a ni sawitur a awm hauhlo bawk, a ṭawngkam pawh chu ka huattawk a tling a, chhungte awm ve kherlo phei sela chuan ka hnek duh tawh ngeiin ka ring.









"Min han hrethiam ula, hei leh chen hi kan fate hian an sepui ruah tuar tlawk tlawk tawh a, an chunga hleihlen chhuahtu lah pasal atana neih tir intum ngei mai ala ni zui a, inchhungkaw thu hla chu thu dang ni sela, in fanu hlimna i duh ang bawkin keini pawn kan fapa hlimna kan duh a, induh tawn em em te nuna inrawlh hi keichuan ka tumlo a, Mki berin a zui duh leh zui duhloh che u thu ni mai rawh se" ka dara rawn hmer salh pahin ka pa chuan a ti a.








Room aṭanga Mki lo chhuak phei ve mek lam chu kan hawi rual ṭhap a, "Ka lo haw dawn lo ania aw, hetah hian ka awm tawh dawn" a ti ve hmiah mai a a U Hruaia hmel chu dur ṭha khep khep tak a ni.







"I lo haw em em ang" chang fel fawla Hruaian a tih leh lai chuan ka lo inrawlh a. "Ngawiteh aw, a nawr lui ang zawng kha chuan engmah i ti lo ang, a duhlo chung i hruai ka remtilo" ka lo ti ve vat a.








"Inneih in ṭhulh emaw Mapuia nena inneih min phalsak anihloh chuan lo haw ka tumlo" pakhat chuan a lo ti veleh mauh mai.








(Naktukah ka lo dah leh ang...a la tawp theilo deuh tlat mai)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:37 pm

SAWININ LOH MK - By Ahmangaihi violette khiangte




CHAPTER - 18




images - 2020-11-06T181653.104.jpeg
images - 2020-11-06T181653.104.jpeg (6.82 KiB) Viewed 4279 times



Thinrim tihhriat zet maia Hruaia dinchhuah rual chuan ka ding ve nghalthuai a, ka pa in min khap a lo tum chu haiderin Mki chu ka pan a, Hruaia nen zawk chuan hmaichhanah kan inmelh ta ran a, kan mitmengah kut thawh kan hniallo ve ve tih chu hai theih rual a nilo.








"Mapui ka û hi ka be lawk ange" ka bula miin a lo tih chuan chhangloin ka ngawi a, engthil pawh ti dawn sela a duhthlan turah ka dah tawh a, a duhthlan anga a awm theihloh na tura daltu a piang lo hmachhawn chu ka tum a ni ber tawh.









"Puia" ka pa in a lo tih rual chuan ka kalsawn ta hram a, an unau inhmachhawn ta chu midang ho chuan kan en ṭhap a, "U....i thu ka hnial ngailo a, ka zah em em ṭhin che a mahse, tunah chuan ka hnial dawn che, Mapuia nen kan inkar hrechiang ber tute zinga mi i ni a, min dang tawh suh" a aw chu a ringlo nain a fiah kher mai.









"Chhungkaw mualphona tur pawh i ngaihtuah miahlo a nih hi" Hruai-an vin hluka a lo tih chuan "Ngaihtuah ve bawk e, ka ngaihtuah reng ṭhin vang zawkin ka duh ang te pawh engmah ka ti thei ngailo zawk a mahse, tunah chuan ka thei tawhlo, khapa midang nun tihchhiat vek pawh pawisa lo tu nupui nih aichuan mualpho pawh pawiti loin ka kal anih hi, min hrethiam dawn nia" a u mita enran chung chuan a ti leh a.








"Nu...nangpawn pawi iti lo tih ka hria ka û hi nangman ilo hrilhfiah dawn nia" a sawilaia Hruaia inhumruh ṭiam ṭiam chu ka lo en reng a, a nau kut thlak mai duh hmel a put avang chuan ka ṭhu mai mai theibik lo. Ka ṭhutna a ṭanga ka lo dingchhuak chu min lo enin a farnu chu a melh leh a, "A hma pawn a bum tawh che a, i la ring ngam cheu a maw?" nersawk in kei chu min rawn melh leh a, thil hlui a rawn thar thawh leh chu ka lo beisei sa reng a ni.









"Zoramliana thil tih vek ani tih i hriat tawh kha" Mkin a lo tih chuan a lu a thing a "I hrechiang lo anih chu, a duhthu rengin Thanpuii a chetsual puia, sawn a thlak tih a hriat hnu ah chauh a lawm Zorama te chuan khang thil kha a tih, Thanpuii rai tawh hnuah a hmang ṭangkai chauh a, a bumna che kha chu ala ngai reng, a thiltih ngaihtuah chuan Zorama tih ve chu engmah a nilo, bum tu zawk che chu amah zawk saw..." chalak fahrana ka lama rawn thlek zauh paha a tih leh laichuan thawk ka lo la hawk a, kha thilah kher kha chuan sawitur ka neilo ka thiamlo hulhuala, tun thlengin ka la inchhir bawk.









"Zoramliana leh Thanpuii chu an inthurual a lawm, an remruat bawk a nih kha Mapuia hi tal awh tira min inṭhen tir an tum tlat alawm" Mkin a lo ti leh khauh a, insawi thiamna tur neih loh chu a hrehawm duh kher mai.








"Tal awh tir tum pawh ni eng ang mahse, bum tu che anihna a bo chuang em ni, mi thangkama a tal awh hma khan a phatsan fel der tawh che, Zothanpuii khan Zu a pe luilo a a kawhhmuh mai chauh a, chumi hnuah ama duh thuin a ruia a duhthu ngeiin a phatsan bawk che" Hruaian a tih leh chuan ka lo insehruh ṭeuh reng ringawt. Hrep tak chuan a!








Mki chu ka en a, a rilru a na thar leh tih chu ka hrethei, a mittui a hnam a chu chuan min ti hrehawm zual hle bawk.








"Lo haw rawh, ani hnen aṭang hian thilṭha engmah i hmu dawnlo, nakin lawkah a bum lehlo ang che tih pawh hriat va ni suh" tih pahin keichu min lo melh leh kher a, kei erawhin Mki ngawt chu ka en thung, a rilru a thlak duh mai angem?









Ka lam a lo hawi chuan ka in en vawng vawng a, "Insawifiah tumna ka neilo, min hriat chian kha, keichuan nang chauh ka hmangaih reng dawn che" tih zawng ka sawi a, eng duhthlanna pawh siam sela a duh dan chu pawm thiam ka la tum fan a ni, chu chu atana ka tih theih ṭha ber a ni bawk.








Tawitein min seiha, chu chhanna awmzia chu ka hrethiam mang hauhlo. A mittui hnam chu hruk zauh pahin ka lam a rawn pana ka bulah chuan lo dingin min en a "Insawifiah a ngailo, khang thil khan min ti hrehawm tawk tawh, ka hrechiang che a chuvanga zui che ka ni" ka mitah tak min en chungin a ti a, chhanna tawite mah nise ka tan avan tawk tehlul em.









"I va han â em em ve lé....." beidawn hmel fe a a farnu enchunga Hruaian a tih leh chuan ka lo inrawlh ve ta vat a "Zoramliana an a chêt dan zawng zawng a hrilh hnu ah che hetiang rilru ila pu hi mak ka tilo, mak ka tih zawk chu engtin nge a hrilh ngam zawk che tih hi a ni" ka lo tih chuan min melhrum ṭha kher mai.








"In chanchin ka hriat tirh khan kan inbia a, ngaihdam pawh min dil" chang fek fawka alo tih chuan ka awihlo nasa, a hma kha chuan rinhlelh nachhan tur mumal tak ka neih loh vang leh Mki û anih vangin inhnamhnawih ve turah ka ruatlo a mahse, tun maia a thilsawi danah kha chuan a bulthum aṭangin thilthlen dan a lo hre vek a, ka beisei aiin a hre hnem mah mah bawk.








"Zu ka in tih kha i nau hnenah chiah ka sawi a, chu chu lo hrilh che pawh nisela Zothanpuiin min kawhhmuh tih kha khawi aṭangin nge i hriat?" ka aw chu avin lam mah a ni, thinnurna in chhunglam aṭangin min hnawh tawt mah mah tawh, ka chhungte awm ve vangin insum ngar ngar lo phei ila chuan kut thawh meuhin ka dawp nghal ngei ang.









"Zoramliana.... hnen aṭangin engkim ka hre vek" a ṭawngbah deuh nak chu ka haw kher mai, a mitmeng tlan chhe ruak chu ka hmuhhmaih hauhlo bawk. "Dawt sawi suh" ka lo ti ram hmuk a, midang ho lahin hawihai zetin keini pahnih chu min entawn a, chutah a awmdan thlakin "I insawithiam tumna ah midang puh i tum ngam elaw i va nep ve" min melh tur khai chungin a ti leh a, nuihzatthlak chuan a.








"Nangmah leh nangmah i inhnial ania, tunah mai khan Thanpuii nena kan chetsual hnu ah chauh Zoramlianan chet la angin i farnu bulah i sawi zo chiah a mahse, chungthil thlen hma a thil thleng kei leh Zothanpuii chauhin kan hriat kha engtin nge nangin i lo hriat theih?" thinurna in min hnawh tawt urh vang chuan ka ṭawngpawh a sehchilh nak tawh.








"Mama enge Muana thilsawi chu a awmzia?" a nuin a lo tih chuan a meng buai ta nak a, ka rinhlelh kha a dik ngei tih chu ka chiang tawh viau a ni.







"U...i in rawlh ve a mi?" Mkin a lo ti bawk.






"A teuhlo emai a" vin hluk in a lo ti a, "Anih chuan engtin nge Zothanpuiin Zu dahna min kawhhmuh chung chang kha i hriat tak?" ka lo ti chang leh bawl a, a sawi duhlo anih chuan ka hnek duh tawh hial ang.







"Zoramlianan min hrilh ka tih kha" a lo ti leh khauh a, a vin ṭha ngam meuh tawh lo.







"Zoramliana chuan sawn ka thlak tih a hriat hnuah a hmang ṭangkai i ti zo chiah" ka lo ti nawn ve leh ngat a. Kan inchhang buai ta nak mai.








"Hruaia.." makti tih hriat renga a nuin a lo tih leh chuan hnuailam bihin a inpetruh ṭeuh ringawt a.








Chutah lo hawichhuakin thamlo zetin min nuih zuia "Ka bengin a a hriat ang ka sawi mai a ni, engmah hriat ka neilo e" ner sawk chungin a nau lam chu a hawi a, "I duh leh lo haw malek la a ni mai a lawm, i beisei ang he hu anih loh leh i inchhir anga a hrehawm tur chu nang bak i ni hleinem, lo haw reng reng suh" tih hluk hluk pahin a inher vut a, "La ding teh" ka ti chung pawhin min bengkhawn zui tawhlo.









Tunah khan ka duh ang chhanna ka la hmu hauhlo a, hethil hi ka bawhzui ṭhat leh ngei chu angai dawn a ni, ka rin aiin zung a kaih thuk dawn tlat Zoramliana ah mai a tawp lo tih chu a chiang khat viau tawh a ni.








Hruaia chhuah hnu chuan kan ṭhu khawma, Mki nu erawh pangngai takin a titi pui theih a, kan pa nen an inbiakna chu kan lo ngaithla a ni ber.









"Mambawihi berin a neih duhloh hi chuan keichuan tihluih tumna ka neilo, Hruaia rilru hi chu a sehhel ve pakhat a, inneih han rel chu a theih mai loh ang tihian duh leh in kawl phawt mai sela, kan chhungkua kan lo inrawn khawm anga chanchin kan inhrilh leh dawnnia" a ti dap dap a, kei erawhin an thilsawi chu ka ngaihtuah hleithei meuh lo, ka rilru ah chuan thildang daih a awm a ni.









A haw hnuah chuan roomah kan inzuilut a "I û khan thil zep a nei" ka ti nghal tawl a "Nia...keipawn zep a neih ka ring" a lo tih ve chuan "I ring maw?" ka ti nawn leh a.








"Umm... a awmdanah khan zep nei a ang ka tia, a ṭawng buai deuh nuai sia a mak e!" zawhna mitmengin min en a, ka rilru a buai viau mai.








"Thilsawi nuam chu a nilo, i bulah phei chuan sawichhuah fo loh ka duh a mahse, hria la ka duh bawk si a" ka tih chuan "A pawilo sawi rawh, engmah sawi hreh tur a awm hleinem" a lo ti nghal thuai a.







"Kha mi zan khan in Inah ka lo kala, i u leh i nuin ka chungchang sawia an hauhna che kha ka lo hria a, ka thinrimin Muansanga zu inpui tumin ka kal a mahse alo awm lo a Thanpuii chiah a lo awm a, let leh ka tum kha Thanpuii khan Muansanga zu dahna min lo hrilh a, a roomah lutin ka in a lawm, chuan Thanpuii kha ahnu ah a lo lut a, min lo inpui a....." ka sawilai mek chu min lo pawt chatin "Ka u khan a hnu daih ah Zoraman a lo hmang ṭangkai ang khan a sawi sia" a lo ti ve vat a.







"Nia chu tak chu, i u khan a hre bawk sia"






"Zorama leh ka u hian Thanpuii an thurualpui ani thei mai angem" ka rilru hria niawm takin a lo ti leh khauh a, "Thil ni thei a ni mahse Zothanpuii niloin kha thilah kha chuan Remruatpuia zawk an thurualpui ang, Remruatpuia thu thuin Thanpuii chuan thil a ti mai a lawm" ka thil ngaihtuah buai em em ṭhin chhanna chu hmu ta in ka inhria, a lawmawm rualin a thinrimthlak hle bawk.









"Remruatpuia chu Zoramliana Cousin ania" Mkin a tih leh chuan ka lo bu nghat nghat a, "Anih chuan ka u hian Zoramliana hnenah kan inneih tur ṭhulh theih nan a tih tir ani thei mai angem?" a zawhna chu ka chhanglo, a hmel buai nak chu ka en vawng vawng a, engmah sawi tawhloin ka hmuiah ka fawp a, he thil hi chu keimah ngeiin ka chingfel ang.









"Thil pakhat hria la ka duh chu engtiang pawhin midang te chuan minlo phiarru mahsela ka thiamloh a ni, kha zan khan zeprual lohin ka phatsan che a min ngaidam ang che, phatsan lo che ila khangthil kha a thleng dawn hauh silo a, ka thiamloh liau liau a ni" ka ti a, ka biangah a kut pahnih a dawmin "Kha chu kan sawi zawh tawh kha sawi nawn tawh suh, theihngilh tawh ang, hun liam tawh chu a siamṭhat theih tawh hleihnem" mittui tling pam chungin a ti a.








Chutianga a sawi vang maiin kan rilru a ṭangin a thi thei ngawt lo tih erawh kan hrechiang ve ve a, inchhir tawp ni ka nei ngai dawn lo tih lah ka hrechiang hle bawk, kum tam avei hnu ah pawh kha zan hunrei lo te chhunga ka thil tihsual vuaklet kha ka la tuar malh malh mai chu a nih si hi.








Ka pa chuan "Bawh zui angailo, thil awmzia chu a chiang tawh a lawm inti buai duh tawh suh" a ti tak nain chuti maia ngawihbo pui chu harsa ka la ti ṭalh a, engmah phei chu a bulah ka sawizui tawhlo, ka rilru erawhin thil thlen dan zawng zawng a bulthum aṭanga chhuichhuah vek ka tum ngar a, tu hnena ṭanga ṭan tur nge tih lah ka hre tawh bawk a, ka hma lawka sa kah tur awmreng hel ṭalh chu ni theiin ka hre hauhlo, Mki nen pawn kan phu ve a lawm ka bawhzui loa ka ngawihbo pui anih chuan a nep zawk chan ka chang reng dawnin ka hre tlat.









Zo-a leh Zorina an phur a, tlai thim hma aṭangin an phi ruai reng tawh a, kei erawh ka hmanhmawhlo kher mai, sa kah tur thlun beh tlat tawh ang vela ka ngaih vang te pawh a niang.








"Min ti hlauthawng ania, tihian tawp maila bawhzui duh tawh suh, kan pahnihin kan awmdun tawh a buaina a awm tawh dawn hleinem" ka insiam mawlh mawlh lai chuan a lo ti a.








"Hlauhthawn tur a awm hleinem, thlamuang deuhin lo awm rawh" a bianga fawhsak zauh paha ka tih chuan hnual rawih hmel a pu a "Thil ṭha lo deuh i va ti anga kan buai zo leh vek ang tih ka hlau a lawm" a hmel chu a khawngaih thlakawm reuh khawp mai, a u a tel ve tih a hriat vang anih ka ring.








"Ka û chu i ngaidam ve thei mai lo ami?" a lo ti ta rêng a, a zawhna chu ka chhanglo "Min lo mutsan la ka lo haw harlo ang" tih zawngin ka chhang a, chutah ka kawngah lo kuahin "I bulah ka awm tlat dawn alawm, chân tur engmah i nei hleinem" a ti zawi sap a.








"I û ka hmu dawn lo, midang zawk a nia" ka tih chuan min en rang kher mai. "Zorama maw?" phawk fe a min en chungin a ti a.








"Mahse, Mapui chu pawh chu a ṭha lo emai, engmah kan chân tawh min pe let thei dawn chuanglo a" ngenngawl zetin a ti leh mauh mai a, tinge maw hmeichhia hian mi ngaihdam hi an sam em em mai zel le, khang kum chhunga a hrehawm tawrh zawng zawng te kha rulh lêt a chak ve lo em mawni!








Mahse, a ngaihdamna vanga kei nen pawh a inzawmna nei leh chauh chu kan ni lawi bawk si a.








"Enteh, i ngaih ang khan engmah ka ti dawn lo, thudik hriat ka tum mai chauh a lawm, lungmuang deuhin lo awm la ka lo haw harlo ang, ṭha em?" nui chunga ka tih leh takah chuan ngaihṭha zanlo chungin min thlah a, "I lo haw hun ka lo nghak dawn che a nia aw" tiin ka kalchhuak tur chu min lo thlah a.









Kawtah Zo-a motor a lo ding reng tawh a, ka ṭhutluh rualin "Zorin-an a enzui mek a, ṭhianhoin an chhuak a niawm e, a hruaifal theih mai ang" a lo ti zung zunga, pawn lama a chhuah chuan a ṭha nasa, zanin chu kan indawp chhuak lo anih chuan tu emaw in kut a tawrh angai tihna a ni mai.







(La tawp theilo...van buaithlak tak)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 29th, 2020, 3:37 pm

SAWININ LOH MK - By Ahmangaihi violette khiangte



CHAPTER - 19 (LAST CHAPTER)




Zorina chu ka Phone nghal thuaia, an awmna min lo hrilh lampan chuan chak takin kan tlan chhuak a, an awmna hmun chu Aizawl chhuahlam veng pakhatah a ni a, veng mawng ang reng tak ah a ni.








Field zau ang reng taka kan tlan luh laichuan ka phone a lo ri a, Zorina bawk a lo ni a "In motor kha ka lo hmu che u, kawng chhak lamah kan awm mek a, kan naua te ṭhianho pawh an kai tawh khawp mai, tah khan lo awm ula kan rawn kal falpui thei mai ang, hei haw an tum tawh hlawm a" a lo ti zung zung a, a aw ri ah chuan ani pawn a lem ve nual tawh tih a hriat theih.









"A lo chhukpui dawn anih chu, lo nghak lawk mai ang" chhaklam Field ko thlek chho thuak thuak pah chuan ka ti a, "Amah kha a rui ve leh pek lo maw, tlaia min lo biak pawh khan a kai hmel tawh nasa sia zu lo deuh te kha an lo pe ve anih phei chuan kan plan a ti Flop vek ange" ngaihṭha lo zetin Zo-an a lo ti thunga.








"Ala rui chhe lo ang" keiin ka lo ti ve deuh tlata, Zo-a chuan an awmna lama han pawh chhoh mai chu a duh ut ut a, Zorina kan han ti khawlhkham zo vek ang tih ka hlauh ve deuh vangin reilo te nghah chu ṭhain ka hria.









Dar kar chanve dawn Zorina thawm ngaichanga kan ṭhut hnu chuan chhaklam kawng aṭang chuan thawm a rawn ri thla ta nak nak a "Ka Bike lo keng ila chuan ka tlangpui nghal tur che ania" pakhatin a tih laiin "A ho lutuk, ka ṭhianten Motor an keng a lawm, an lo thleng tawh ang" Zorin-an a tih ri chu ka hre pha a.









"Pawisa pawh ka nei tawh chuanglo, vawinah ûm hnihlai kan khulh zo tawh a" Remruatpuia chuan a rawn ti thla bawng bawng a "Lo la chhuak ve miah suh, i hmel kha lo thup rih ang che" tih leh Zo-a chuan chhuah a rual a, anni pahnih lo kalmek te lampan chuan a pen zui hlawk hlawk a, an inbe thawm chu ka hre zui zat bawk.








"In va rei ve le, lak chawp kan ngai lehnghal a sin" Zo an a tih ri vang chuan ka ṭhuthmunah ka lo nui suk a, ka ṭhiante pahnih zet hi chu kawng engkimah ka tan an ṭangkai em em reng, Chhangchhepa Zorina lah a phur phurah a ṭanga, an nuin a awmdan hi hre ngat sela chuan a ngaihdan a nilo kher ang chu.









"Tiru kal vat teh ang u, kan haw tlai lutuk palh ang" an tih takah chuan Seat ah chuan kun deuh hlekin ka ṭhu a, Motor bul an lo thlenlai chuan ka hawichhuak lo "Tunge a?" Remruatpuia chuan a rawn ti hram a "Kan ṭhianpa a nih kha, in rei lutuka a chiri hman deuh alawm" Zo-an a lo ti leh var a, kan tlan chhuah hnua ka ṭhutngil takah chuan hnunglama ṭawng bawrh bawrh thawm chu a reh nghal hmiah mai.








"Ṭhianpa chuh!" min rawn thlek tih hriat taka hnunglam thawm vang chuan ka lehhawi ve nghal thuai a, min hmu chiah chu a meng tal tap mai a, a hmelah chuan hlauthawng hmel a lang nghal ruai bawk.








Zorin-an alo chelhbeh nghalvut vang chuan a hlauthawng lehzual emaw tih tur a ni, "Tal buailo khan ṭhu hle hle rawh" ka lo tih ram hmuk a, "Eng thil nge tih in tum, engmah tih ka neilo ania, mi min tih tir vek anih kha" a ti nghal ruaia, Zo-a lo nuisuk chuan ka rilru ang tho a pu ve a ni, a awlsam dawn khawp e.









Chite road ah kan thlan thla zel a, Lei bul kan thlen chuan hmun zau laiah Motor chu a tidinga, Car kawngkhar hawnga ka chhuah rualin Zorin-an Remruatpuia chu alo pawt chhuak nghal rawk rawk a, a kawr awma ṭhamsak pahin "Thil ka zawt dawn che a, ṭha takin min chhang la kut i tuar lo animai" ka tih chuan a hawikual ruai a, "Tumah puitu tur che an awmlo" Zo-an alo ti bak nghal hluk a.









"Engmah ka hrelo, ka bialnu in i fa apai vangin ka thinrim..a... inṭhentir leh che u ka tum ringawt a lawm.." a tih bah nak a, chu zawng dawt a ni tih chu kei aimahin a hrechiang ta ve ang.









Motor ngheng dawt khawpin ka nam bet a "Ngaithla rawh, thudik tak i sawilo anih chuan enge ka tihtur chu i rin phakbak a ni ang" ka sawilai mekin Zo-an a chemte ah lai min lo pe vat a, chemte a hmu chu a meng phi nghalruai a "Engmah ka hrelo, U Zoraman tirawh a tih ang chiahin a lawm ka tih, i nupui kha ka duh tawhlo, neih leh pawh ka tumlo" a ti nghal chul a, hepa pui hian minute tlem te dan lek lekah a thilsawi a thlak reng mai, ka dawhtheihna in a tlin lo ṭan tlat tawh.









Ka chemte ken chu a nghawngah chuktuahin "Engthil nge Zoramliana khan ti turin a tih che" vin zetin ka ti leh a, ka ṭhiante pahnih chuan ka sir tawn tawnah min lo dinhnaih nghal hmiah mai bawk a, a inpuang duhlo anih chuan kan sawisa hrep duh tak tak dawn tih chu a hrethiam ve ta chêk aniang "Ka sawi ang, khawngaihin min tina suh u" chemte a ka tinna kut hmer vawng vawng pah chuan a ti ta nge nge a.








"Sawi vat mai rawh" dawhtheilo zetin ka lo ti leh a, ka kut chu ka la lasawn duh bik derlo.








"U Zorama khan Ṭhuampuia an inhmun min pek a tiama, nupui aneih hma chu nangmah lo tibuai tur che in min ti a, Zothanpuii nen inhmun chu hralha a hralhna pawisa insemturin kan inthuruala kan tibuai zui ta che anih kha" a thilsawi chu a hma a ka rindan deuh sa tho anih vangin min ṭawng lemlo mahse, a tir aṭanga ruahmanna an lo nei vek erawh ka ring ngam lutuklo kha a nia.









"I bialnu leh ka ṭhianpa chetsualna kha in ruahman vek alo ni a maw?" Zorinan a lo ti vin hluk a, kei aimahin ka ṭhiante pahnih chu an thinur zawk emaw tih tur an ni.









"Aw khami zan khan Umuana hmu turin a kal tih kan hria a, Umuana kha khawharinah a kal si a, Puiin a û roomah zu i in mek tih min lo hrilh khan kan tum chawp chuk chuk anih kha, chuan i inturah khan tisa chakna kaitho thei tur chi damdawi kan telhtira, a bak kha chu kan duhdan ang takin nangman i thlentir a nih kha"





Hrep chuan leh! Chu zawng ka lo beisei loh lam daih a ni!








"Chuan Zothanpuii rai ta kha hmang ṭangkai zuiin Mapuia te inneih tur kha intibuai zui ta a" nui hawk chungah Zo an a lo tih lai mek chuan ka mi reh mek chu a lo thaw ri hrawk hrawk a "Mapui i rek na leh lutuk anih kha, inpuan zawh tir phawt rawh" Zorinan a lo tih takah chuan ka thlah hlawka, a khuhzui nghal bawrh bawrh chu han chhir zui mai tak ka nap a, insum harsa ka ti kher mai.









"Puii khan naupai kher kha a duhlo a mahse, inneih ṭhulhtir tur kha chuan a pai a ngai sia, kan inhauh vangin vawikhat phei chu tihtlak a lo tuma, nau apai anih chuan Uzoraman kan damdawi man engkim min tum a tiam vangin a paitlang ta tho a, i hriat angin damdawi kan ti ve ve a" leia a ṭhusawp nuaih chu ka melh ngawt ngawt ringawt tawh, ka ṭhiante pahnih chuan ṭhutchilhin a zawt zui zela, a sawiṭha duh phian mai lehnghal a.








"Zoramliana lo inrawlh midang an awm em?" tih zawhna chu ka bengkhawng rang kher mai.








"A tirah khan ka hrechianglo a mahse, inhmun niloin a pawisa fai kan duh tih kan hrilh ṭumin mipa pakhat chu alo kal ve a, amah chuan pawisa chu min pe a, a hnuah Uzorama nupui tur unaupa ani tih ka hre ve leh chauh a" a sawi zawh rual rualin ka ṭhiante pahnih chuan min lo mitmeia, thinrim lam aimahin nuih te pawh a za tawh zawk, heng thil zawng zawng hi Hruaikima ruahmanna vek chu lo ni phiangsenin!








Thudik a hriat hnuah pawh Hruaia khan Zoramliana a ṭan tlat anih tak kha mawle, inthurual an lo nih vang hrep a lo nih dawn kha.








Remruatpuia ṭhu sawp nuaih chu a kawr awmah ṭhamin ka pawt tho nawlh a, a bekah ka hnek nghal bur mai bawka, a na ti chu a rak ring kher lehnghal a, a ṭap deuh pur chu hnek leh mai ka tum laiin "Khawngaihin kut min thlak tawh suh, min ngaidam hram rawh" a lo ti nghal chul a, ka hnek zui ta em lo.









"Engtin nge niang" Zo-an a lo tih chuan "Ka hrelo" ka lo ti bung nghut a, tunah tak chuan rilru mumal ka pu rih tlatlo, thinrimna hlirin min tuam hlawp hlawp a ni ber. A chungchang kan sawi emaw a ti ningei tur a ni "Min that lo hram rawh u" pakhat lah chuan a lo ti ngawih ngawih a, Zorina lahin a khattawkin a lo beng thle sek reng a, amah chauh tawrhtira duhtawk mai chu ka thei dawn tlatlo, sa talh turin a mei chauh hlehthlak sak ang vel a niang chu. A chaldarah ngei kan chhut loh chuan chutin kan sa talh tum hi a tlu mai hauh lo ang.








Khaw chhung lampana kan inphurh let leh laichuan ka jacket iptea ka Phone ah chu a ri sek renga, Mki anih vangin biak rihloh ka duh a, haider luih erawh anuamlo duh kher mai.









"Tunah phone rawh" hnunglama Zorinan a tih bul bul takah chuan ka inher vat a, Remruatpuia phone hmanglai chu ka en ran a, a landan chu khawngaihthlak awm angreng viau.









"Ka hmanlo a ti" men ṭiau chunga ka lam a lo hawi chuan "Phone nawn leh rawh" ka lo ti hluk a, a Phone nawn leh ta ngei a Loud speaker a adah vangin lehlama mi ṭawng bul bul thawm chu kan hrepha a "A zahve kan pe tawh che u a, in hlawhchham a, a tu ve ve mahin kan duh kan neilo a, chuvangin a theih tawhloh" a lo ti hluk hluk a, "Pawisa lam a nilo inhmu lawk teh ang" Remruatpuia a lo tih luih tlat vang chuan "Inah lo kal rawh" lawmlo zetin a lo ti a.









An Inah kan kal theilo kan Pastor hlui te in ania, va sapatal chiam chu a chi hauh loh ang, koh chhuahdan kan ngaihtuah a ngai. "Message thawnla, i ruih em vangin an ina i kal theihloh tur thu hrilh rawh" ka ti leh a, ka sawi anga a tih hnuah Zoramliana chuan inhmuhna tur a lo sawi a, amah aia thlen hmasak tumin kan tlan chhuak nghal a, ka va thlen khalh chiang hle bawk.








A lo thlen chuan kei leh Remruatpuia chuan kan lo nghak a, min hmu chu zamloh hmel fahranin min lo pan a "Naupang ilo vau a nimaw, engmah tih theih i nei chuanglo ang" a rawn ti nghal khur khur a. Remruatpuia lam hawia "I kal thei" ka tih chuan a che chhuak rang kher mai.









"Hruaikima nena min bumna zawng zawng kha ka hrechhuak vek tawh" ka sawilai chuan a lo kiai suk a "Hmeichhe luhlul lutuk ngaizawnglo ila chuan kan hlawhtling ang mawle" a lo ti duh lek a. A mi chhan dan teh tawl chuan ka thin a khei leh zar tawh, hnek mai ka tum laiin ka ṭhiante pahnih lo kalhnaiin Zorama chu kan chhaka mi inrel thimlaiah chuan an pawt chho rawk rawk a, thim thamah chuan kan inhmachhawn ta ran a, ani alo duai bik lo, keilah kutthawh mai chaknain chhunglam aṭangin min tur et et bawk a kan boruak chu a ṭang ṭha kher mai.









"Ka thiamloh vek angah i ngai maithei mahse, Hruaikima duh dan ka zawm anih hi, anin makpa atan min duh tlat sia, i vanduai hle mai" a la ti tak deuh deuh a, ka nun hrehawm taka siamin ka hmeichhe hmangaih rilru an tih natna zozai kha ka kut tum hian thungrul zo dawnlo mahsela tih nat let ve theihna hmanraw ṭha ber a ni rih tlat.









"Muankimi hmeichhe tihmawh lutuk vang khan hun ka khawhral hnem lutuk..." a ti leh chiah chu a ngalcharah ka chuih nghal zawt a, pan hnaiin ka hnek zui mawlh mawlh a, tha ah min khanlo chai chai bawka min khawihlet ve hleithei der lo, cement lei charah chuan ṭhutbet sauh sauhin duhtawka ka han nuai chu kar loah a zal der mai.









"Kha i ka bawlhhlawh zet khan a hming lam ve tawh lo ang che" tiin a mu kawm reng chu a nakah ka chuih leh hram a, a rum ṭiah ṭiah thawm chu min chhawn tu a ni leh mai, kan kalsan dawn lai pawh chuan che changloin a let hlawm renga, ka ṭhiante pahnih chuan khawih ve an chak tih ka hria, pakhata lah khawih zui tlak a awm tawh derlo.









"Engtin nge niang Hruaikima pawh i duhphawt chuan kan ṭham chhuak leh law law dawnnia" Zo-a chuan a ti zui bul bul a, chu erawh ngai ka ti tawhlo, kuttum tello pawhin ani chu tlawm dan tur ka hrechiang viau a ni. A hlauh ber chu a farnu ka neih ania, a phal emaw phallo emaw ka hnenah min la pe dawn khawp.









In kan thlen chuan ka chhungte chu an lo la meng ṭhap a, min hmu chu phawk lek lekin min en a, inchhung engah chuan ka thawmhnaw a bal hle tih ka hre ve chiah a ni. Zo-a leh Zorinan min zui lut chu hamhaih angreng zetin min en hlawm a, ka pa erawhin thil awmzia a hrethiam nghal mai a, "Kal chhuak tawh suh u" tih zawng a sawi a, ka nuin thil awmzia min lo zawh pawh chuan "Mutsan teh ang" tiin min lo chhan khalh a, Mki pawn kan landan aṭangin a hrethiam a niang, min zawt zui lo a, a hmelah erawh a hlauthawng tih a hriatreng.








Thingpui in a kan titi ho laichuan ka ṭhiante chuan thil awmzia an hrilh mawlh mawlh a, mittui tling pam chungin min en a, amitah chuan natna leh inthiamlohna ka hmu thei a, inneih lampang Zo-a ten an sawizui takah chuan tlem chuan a hlim ve hmel ta deuh.









Haw leh tawh kherloa insawirem mai chu ani pawn a duh a, ka duhdan apiang min hnialloh thu a sawi chuan thinrimna pawh a bengdai huai a ni.









"Uhruaia chuan hetiang thil atih duh hi ka ring miahlo a sin le, ka pa in rem a tih hnu khan a pawm ve mai turah ka lo ngai a" khuma kan mut hnu chuan a ti sap sap a.







Changloin ka kuah hle hle a, engmah sawi buai ka peih tawh lo, a rang thei ang bera inneih chu ka duh ber a ni tawh.








"Ngaihtuah tawh suh, tunah chuan tuman ka nupui inih na tur hi an dal thei tawhlo ang" tiin ka fawp vawng vawng a.








Zingah ka pa ka sawipui a "Chutiang tut tut tur em mawni, in inkawl tawh tho a, boruak rehfel hma a inneih em em te chu" a ti nang nang a, keilahin "Ka nghak thei tawhlo ang" ka lo tibur mai si a, a zan a zanin Pa Tluanga a ko phei a, Pa Tluanga chuan min lo hrethiam khawp thunga, Mkin Phone in a û thiltih dan chu a nu a lo hrilh ve bawka, an chhungkua pawh an lo inbakkaih nasa viau nghe nghe a, chutiang kara palai tirh chu ka nu chuan nitheiin a hrelo a, ka rilru erawh thlak ka tum hauhlo, kum kha leh chen khang mitenawm ho thiltih vang khan kan inneih tur kha ṭhulh anih hnuah beiseiloh tak maiin hunṭha kan tawng leh a, nghak leh zel thei ka ni tawhlo a ni.









Palai chu an kal ta nge nge a, nu ber rilru ka hneh ta bawk a niang, Hruaikima rawn eih tawhloin zankhatna ah chuan kalnawn ngai tawhloin thu an rawn titlu fel der a, inbuatsaih ngai vak keini lamin kan neilo bawk a engkim mai chu ka thleng zung zung a ni ta ber.









Thla khat a liam fel awrh ang tih ah kohhran hall ah kan kan invuan ta a, mi sawi sep kan kaiin thil awmzia hre maploa min dem tawk lah an bo lo, mi ngaihdan ngaichang rengin kan awm ṭhina, tunah erawh kan pahnih ngaihdan leh duhdan chauh chu ka ngaih pawimawh ber a ni tawh thung.









Nupa hlim tak kan ni chho a, ka fapa Nsa lahin a nu chu angaina em em a, ka nupui lahin chuti bawk, hmangaih taka enkawlna a dawn vang nge Bawiha pawh a hrisel chho ta viau a, nun chu a kaltluang tak zet a ni.









Zoramliana erawh miten a chanchin an sawi dan tur ngaingam loin a hna a bansana Delhi ah a kal tih chu a chanchin ka hriat chhun a ni, Zothanpuii pawn pasal a nei veleh a, a pasal erawh chiang takin ka hriatpuilo a tlangkam titi aṭangin Drugs addict tho anei anih hmela, a hmel ka hmuh loh na pawh a rei ve ta reng mai.









Hruaia nen kan inpawhlo chhunzawm ta zela, intlawhpawh loh theihloh chinah pawh kan inbe ngailo, Mki thung chuan angaidama a û anihna angin a hmangaih hle bawk a chu erawh ka tih ve theihloh tawp thil a ni.









Kum hnih hnuah ka nupui chuan fanu hmelṭha em em mai min hrinsak a, ka pain a hmingah Malsawmsangi tih a sa a, a nu hmelṭhatna a phawk chhuak fuh kher mai, a nu ang chiaha hmangaihna ngah leh nunnem tak ni a a ṭhanchhoh ka beisei bawk.








Nsan school a kal ve ta bawka, Zorina fapa Ezra nen chuan kum inrual chiahlo mahse an inkawm ngeih hle a, an inngai em em mai bawk si a, an inpawl rual theih nan Nsa chu a class ngaiah kumkhat kan ṭhut tir leh tawp mai a, kei ka hna ah ka kaisanga, eizawnna leh inchhung khurah Pathian malsawmna kan dawng tak zet a ni.








Mi te chuan kan inneih khan kan hmanhmawh mah mah min ti in min sel ru fo ṭhin mahse, keini chuan hmanhmawh kan inti hauhlo, kan duhaiin kan nghak rei kan ti zawk a, kan awmdun theiloh nana ṭanla tute, khang kan hun min khawhral tir tute khan khuanu remruat chu dan theih leh pawh ṭhen theih an nihloh zia an hre ve tawh ngeiin ka ring.









Hun leh kum a liam a kan inneih kum 25 na a lo ni ve ta reng mai, Nsa leh a nauin ropui takin min lawmsaka, Hruaia fanu Nancy pawh kan inlamah ngawt a tap a apa anglo takin ani erawh ka ngaina a, Zo-a fanu Faktei te nen inkawm chawt anni ve bawk nen keipawhin fanu ang chiahin ka en ve a ni.








Inngaihdam chu a harsa teh meuh mai, huatna thinlung ka put chang apiangin he thu hi ka nupui hmangaih ka sawinin loh Mki hnen aṭangin ka dawng ṭhin "Ngaihdam dan awlsam ber chu huatna atana kan thinlunga hmun siamsak loh hi a ni" tiin, a harsa takzet a mahse, ka tum anih chuan ka la ngaidam ve thei mahna le.








A TAWP TA.




('Sawinin loh Mki' story chu kan lo zo ve leh ta, damlohna ten min tlakbuak avangin duh ang thalin a tawp kan khar thei ta lo a, hei te hi min lo pawmsak tawp rih mai ru aw, in comment te ka chhiar vek zela a man hlain a hlawkthlak ṭhin khawp mai, in zavaia chungah kan lawm e)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)