GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:09 pm

GOMENASAI - by Ahmangaihi violette khiangte


CHAPTER - 36

images (1).jpeg

Ka pa chuan "Kumin Christmas chu hetah hmang ho phawt ang u, kumthar lamah inbuatsaihna ṭha deuh hlek nen in indang zawk dawn nia" a ti a, JH-an a hnial deuha keiin ka lo thlawp ve thung.






Muthmunah chuan ka pa ka thlawp chhan chu min zawt a, "I hmanhmawh tut tut lutuka, titau chhuak tur pawh kan ang dawn dawn a lawm, inbuatsaihna hun pawh a awm silo a, kan belebut lutuk ang" ka lo ti mai a. Ka rilru tak erawh chuan midang mitmei ka ven vang zawk a ni, ka nu leh Apuii ngaihdan a ni vak bawk silo a, chhuah chu duh ve viau mahila kan chhuak dawn anih pawn midang ti lunghnur miahlo a chhuah ka duh a, chutiang kan ni thei dawnlo anih chuan indan loh mai pawh pawi ka ti hranlo.






"Inbuatsaih vak pawh kan ngailo ang, chawlhhmunah kan awm dawna kan mamawh chu a awm sa vek a, tlem chei ṭhat deuh kan ngai a ni maia, Furniture leh Bungbel vel chu i duh zawng lo en la, kum thar veleh ah kan insuan lut dawn nia" a ti a, ka lam lo hawiin min en vang vanga "I phur vak nange?" tiin min zawt leh a.






"Phurloh pawh a awm chuanglo" zawite a tiin a hmel chu ka en a, a hma khan indan chu ka ngaihtuah ve ṭhina, kan han rel thlu ta chu ka phurna leh phurlohna hi a inzat rengin ka hria, ka inthiamlo deuh tlata engtia han awmzui tur nge pawh ka bangbo riau a ni.






"I duh zawk lutuk ang, a khawharthlak deuh mai thei a mahse, helai aingawt chuan nuam i ti zawkin ka ring, a hmun a fianrialin boruak a hrisel bawk a, i tan pawh damṭhat phahna a lo ni hlauh mai thei zawk a" a ti leh sap sap a.






Ni e, midang mitmei ven tur awm miahlo a kan nupa chauh a kan khawsa dun tawh tur ringawt pawh rilru thawl phah huaina tur chu a ni hrim hrim a, thil ṭha tak zawk pawh a nih ka ring e, mi nupa te pawh in dangin a tirah chhungkaw inhmu thiamlo lek lek te pawh an awm ve tho a mahse, chhungkua nge nge chu reilo teah an inpawh leh mai ṭhin a nih kha, kan theihtawp kan chhuah ve aniang chu.






Alawmi ka hrilh chuan a phur hle a, chutiang bawkin ka nu pawh, ka pu thung chuan ka sawi rual rualin "Midangin an remti tlang em?" a lo ti var a, ka pain kum thar lama tum tura min tih thu te chu ka lo hrilh a, amah mi fing ngang a ni bawka ka chhungte rilru suk thlek pawh a hre hneh ngang mai.






"I pasal tih lawm aichuan i chhungte tih lawm kha tih makmawha nei la, a chhungte nena in inkara a ṭhat phawt chuan inpa pawh a lawm zawk ngei ang, in dan chu a ṭhalo ka tihna niloin buaina chinfel dan ṭha ber niin inpa khan an hria tihna a ni ber tawh a, i thiamloh te pawh a nih ve na chen a awm a nia" ka pu thilsawi chuan min hamhaih lek lek a ni, chhungkaw boruak chhia chu khawi aṭangin nge a lo hriat reng reng le? An lo hriat ve ka hlauh tehlul nena.






Irene-i hnen aṭangin a nih ka ringa, a nin a chhungte bulah a sawi anga, Nu Muani emaw in a lo sawi ve leh anih ka ring, ka tan an rilru an lo seng hah viau ang tih pawh ka hlau ta kher mai. Ka pu thilsawi chu ka ngaihtuah zui rauh rauh a, engtia han tihzui tur nge tih lah ka hre derlo, midang tihlawm chu ka thilduh ber a ni a mahse, tih dan tur ka hre silo a ni, an huat zawngin awmrawh pawh min ti sela, tun ang tho hian ka bangbo thoin ka ring.






Christmas dawnah Alawmi nen Chawlhhmunah chuan kalin kan han thlithlai a, Furniture te chu leivak angai pawhin kan hre lemlo, bungbel leh eng ilo lei ngai te chu kan ziak chhuak a, kar tluanin tlaitin mai chumi buaipui chuan kan vir buai a, ani a phur em em renga a tira ka phurloh ang aiin keipawh ka phur ve ta viau mai.






JH-an inchung room chu kan nupa room atana hman a duh a, pawn lam aṭanga kalpawhna chu ṭhiahtirin inchhunglam aṭanga chhuk chhoh theih turin a siam ṭhat ṭir a, Christmas dawn karah chuan kan inpeih thawkhat viau tawh a ni.






Apuii leh ka pa lokalin an lo en ve zawk a, CCTV awm thliah thluah chu ka pa chuan a hrethiam lo hle a, keipawn ka ngaimawh deuh viau a sawi ka lo tum ve nghe nghe. A hma a a nau te hoin eng engemaw tih ho nan tak anlo hman ṭhin vanga dah a ni awm a, Liansangzuala pek in "Mawng thak pawh kan hiat ru ngam dawn hleinem" tiin a lo nui kur kur reng a, JH-an a lakthlak tir ta vek a, thawk a ti veng huai mai.






"Mambawihi chuan a hlaulo ang maw, a fianrial ang reng si a, helai daih daih a awm aichuan kan colony ah pawh tihdan a awm reng a sin" ka pa chuan a ti a, "Awmpui kan la ang" JH-an a lo ti tawl a, Alawmi lahin "An colony a in awm te chuan in danglo nen in in ang reng ang, indang ve ta ro ro inhmu pha manglo ah awm ula a ṭha zawk" ka bulah a lo ti ve bawk a, ngaihdan ka nei ve vaklo, ka pasal tih dan dan chu ka ṭawmpui a ni ber.






Ka ni fanu upa zawk Manuntein pawl sawm pakhat a kal ve tawh dawn a, chu chu awmpui ka rilruk a, mihrang daih awmpui aichuan an ni lamin khawpuiah zirna ṭha zawk an mamawh ve tho bawka tiin ka pasal chu ka râwn a, alo pawm khawp mai. Ka ni ka hrilh chuan "A van tihzia ve, kan lo ngaihtuah ve mek a, i Pa Tluanga farnu te hnenah dah kan lo tuma nangni in lo remchan chuan in hnenah awm hlauh rawh se" a lo ti bawk a, Manuntei lahin kan hnena awm chu a nite kianga awm aichuan a lo duh daih zawk a, a tihzia ngang mai.






Ka nu chuan Remremi hruai ve turin min duh a; keichuan ka hnial hranlo mahse, JH-an a remti tlat lo a, ka sawipui ngial pawhin "A tih chi loh ang" a ti mauh mai a, a chhan zawh lahin "A buaithlak mai mai" tih bak a sawizui duh derlo a, ka nu pawh a la lawmlo tluang zel a, ka bulah a vui leh ṭhin a "Fa angin Adopt mai ula a mamawh te chu kan tum vek dawn a lawm" a ti leh ṭhin a, pasal te thu loin ṭawngkam ka nei ngam bik silo a, ka pasal lahin a um e duh mang silo a, tih ngaihna tak pawh ka hrelo.






"Awmpui chi a nilo ang, nakinah inbuai leh zawk ang tih a hlauhawm a lawm, i enkawl danah an lung a awi reng lo anga neuh neuh in nei leh lo ang tih a hriat loh, JH-a pawn chutiang chu a ngaihtuah ve aniang, lo nawr tawh miah suh" Alawmin a ti a, "Inchhung buaina tlan san duh na na na hruaitel a ngailo" Apuiin a lo ti ve bawk, chutia Apuiin a sawi takah chuan ka nu pawh lungawilo deuh chungin a ngawi ta a, Remremi chu ka ngaihtuah ngang mai thunga, rilru a buai duh kher mai.






Christmas chu buaina dang awmloin damtak chuan kan hmang ho a, kum thar erawh Lungleng lamah kan hmanga, Remremi pawh kan hruai ve nghe nghe. Kan awmlai chuan Insakna tur châk te kan lam khawma, ka pu chuan a ban leh Beam chauh Concrete a tih a tum kha JH-an "A chhuat pawh kan tinghal dawn nia" a lo ti a, pawisa engemaw zat a pe bawka, keiin ka pawisa khawl ka pe ve bawka, Pa Tluanga pawh a phur ta viau a, han fin pawh a hreh ta vak loin ka inhria.






Kan haw dawn tlai chuan ka nite chhungin zanriah an lo ei phei a, Nutei a lo leng thla bawka naupang ho nen kan ri laih laih a, kan mengrei hlawm ngang mai.






Ka ni chuan Sarzuk hnah ka hawnturin min lo laksak ṭeuh mai a "Chhul lam ṭhalo tan a ṭha an ti ania, i chhum anga atui hi i in ṭhin dawn nia" a ti a, a siamsa ṭhenkhat chu Bottle ah dahin minlo ken sak bawk a. "I indang rih em, naupai leh rih suh aw, i taksa a fit hma chuan la in dang rih ang che" a ti zui mawlh mawlh a, "In dang hran nang" ka lo ti maia, in dan lampang chu ka ngaihtuah lo, nau pai leh vat vat chu ka duh zawka, ka pai leh vat lo ang tih mawlh a ni ka hlauh zawk ni.






A tukah chuan kan haw ta a, Manuntei pawh Admission kan lo ti anga School ṭan dawnah lo kal mai turin kan ti a, kan insawn fel phawt anga chu aia hma pawh chuan alo kal a ngai maithei bawk.






In kan thlen chuan ka nu leh Reny an lo awma, inthlak fela ka chhuk leh chu ka nu chuan min lo ko a, choka dawhkana a thil hun chu min hmuhin "Hei hian ka indan ve ang che u" a lo ti a, bungbel Set nalh leh manto hmel tak hi min lo leisak a, a hmel lah chu a ngui nghiai a, lawmthu ka hrilh chu min um e meuhlo nangin a rilru chu ka hmu thiam ve ta in ka hria.






"I duh zawng a ni em pawh ka hrelo, in pain engmah mamawh kan nei lo a tia, a bak chu engmah ka pe lo ang che u" a ti zui hlak a, "Ka duhzawng tak a ni, kan bazar khan ka lei ngamlo a, a to dawn si a i in seng hnem viau lo maw" ka lo ti vat a.






"Seng hnem teh nang, thu in awihlo emai a engmah thil ṭha leisak pawh in chakawm hleinem" a ti leh hmak hmak a, hnuk ulh lek lekin keiin ka lo en a, a thil lei chu manto tak a ni tih ka hria a, chuzawng aichuan a mi duhsakna chu a ni ka ngaihhlut zawk, a malsawmna dawng angah ka inngai a, ka hnuk a ulh ru ṭeuh mai.






"Ka lawm lutuk aw, i zarah hetiang bungrua te ka han nei dawn ania" Choka a JH-a lo lut chu enin ka lo hmuh vat a, "Enteh hei, ka lei ngamloh ang kha ka nuin min lo leisak a" ka lo ti var a, "A va fel ve" tih zawng a sawi a, lawmthu sawi ka thiamloh tehlul nen ani lahin chuti teh tawp chuan a sawi a, ka inthlahrung lek lek zawk a ni. Mahse, ka nu hmelah chuan intithei hmel ka va hmu ta hlauh zawk a, "Ka thu awih ṭhin phei ula chuan a aia ṭha kha ka leisak ang che u mawle, in phu tawk chauh kha kha" a lo ti leh zauh a, JH-a meng rang ralh chu ka va mitmei a, a hrethiamlo nasa mai.






"Thu awih ziah kan ngai tawh anih chu" ka tih chuan ka nu pawh a nui ve suk suk a, "Awih ta fo reng che u" a lo ti leh nghat a.






Thil hi ka thlir thiamlo fo ṭhin, chuvang chu ania ka kal sualna lai kha ka hriat chhuah theih miahlo, hun kha a kal zung zunga, ka insiamrem hman lo nita berin ka hria, ka pasal nu nena kan inkar te, siamṭha tur khan kei hian ka lo tum tawk lo em mawni zawk le? Eng hi nge ti ila ṭha ang, eng thil ka tih khan nge thil duhawmlo rawn siam a? Eng thil ka tih hian nge thil ṭha zawk rawn thlen leh ang?






"Nu Remremi hi engtin nge kan tih ang?" ka zawhna chu a hua ang tih hlauthawng tak chungin ka zawt ta tho a, a thiltih lai dah meuha min lo en laichuan ka zam ru kher mai.






"I tih dan dan a ni mai" ka ti nawn leh a, ka pasal pawh ka ngen tawh mai aniang chu, hei hi kan inkar chhe tak kha siamṭhat nana hman ka duh a ni.






"Enkawltu tur kan la tawh mai ang chu, Sangzualin nula ka biaksak ang che u atia lawm" lawmlo awka awm miahlo hian a ti a. Chutah min rawn en lehin "Awm hran vang khan chhungkua ah mawhphurhna nei tawhlo angah te khan i lo inngai ange, kan mo ila ni reng ania, i pasal thu thu a awm tur chauh i nilo, i pasal pawh kan ta tho a nih hi" thuneih hmel zetin a ti leh a.






"Chutiangin ka awmlo ang, min mamawhna i neih chuan min lo phone anga, ka lo kal vat zel dawn nia" nui var var chungin ka lo ti a, a thil tih lai a tih chhunzawm mawlh mawlh a, a nui hmel chu ka va hmu a, engtin emaw hian a nui hmel chuan min fan deuh tlatin ka hria, vawin hi kan nuihdun hmasak ber na a ni.






Mut hmunah ka nu nen phone-in kan inbia a, vawin thil thleng te chu ka hrilh a, ka aw aṭang ngawt pawhin ka hlim hle tih chu a rawn hre pha ve in ka ring.





"Ka pasal nu hi maw a rilru a chhe miahlo" ka nu bulah chuan ka ti tawl a.





"Mi hi kan nihna kan inpawm sak thiam hi a pawimawh reng a sin, mahni chauh in ngaipawimawh ṭhin mi chu amah chauh a pawimawh loh thu hrilh aichuan amah a inngaih dan anga lo en mai kha a ṭha zawk a, fel inti em em pawh a fellohna hmuhsak reng mahla amah a inngaihdan ang kha thlaksak tum kher suh, tumah hi ṭha famkim kan awmlo tih hi inhriat sak ila kan dam tlang zawk ngai.






JH-a nu pawn enge a duh chu tikhan i hre ta a, engtin nge a lakah awm tur tih chu i hre tawh ang chu, thil ropui tak kan intihsak kher angailo a nia Bawihi, thil ho te te a zahna kan inlantir te, mawihnai taka kan han inrâwn tawn ṭhin te hian a lawm hlutna neia min siam chauh zawk ni, chu bak chu JH-a nu pawn i lakah a beisei hauhlo ang" ka nu chuan a ti dap dap a.






"Kawmin i titi pui ngai em? I thiltih turah te a ngaihdan i zawt ve ngai em? A nihloh pawhin a puih theih turin a hnenah i harsatna te i thlen tawh ngai em?" Ka nu zawhna chu chhan ngaihna ka hrelo, chhanna chu ka nei ngei mai a mahse, ka ka aṭang chuan a ri chhuak thei lo, ka thinah min hnawh tawt urh reng ringawt.






Khang hun chhung zawng mahni inthiamlo em em rilru ka put laite khan ka thiamlohna diktak kha eng chiah nge tih ka lo hre ngai miahlo a nih chu, hetiang hi engtin nge ka lo nih theih zawk le? Ngaihtuah pawh ka ngaihtuah thui ngam lo.





*JH. LALHRUAITLUANGA* - POV





Kan in dan aṭanga kar khatna chiah a ni, ka nupui muhil thaw sak sak lai chu enin a sam chhawlleng a hmai zar tu chu ka huikian saka, harh chiang manglo a a rum ṭiah ṭiah te duh a duhawm zual ngang mai.






"Dar engzat nge, tukin chu ka mu rih mai ang" tuk danga a tih dan ngaite bawkin Exercise lak a peihlo leh tawh, zingah hian darkar chanve tal kawngpuiah ka tlanpui ṭhin a, a hrisello lutuk hi buaipui deuh chu a ngai, Anxiety anei a, mut reng aichuan intih harh hram hram a mamawh zawk bawk.






"Mut hun a pel tawh e" a hnara ka va piai leh ṭhin chu phun niah niah chungin min inhersan a, "Hetiang chuan mifaten boruak thinghlim an hip zawh khalh vek ang che" a puansin chu hlim sakin ka pawm tho nawlh a, "Ka cher em hi Exer lak ka mamawh ve hleinem" a ti zui niah niah a.






Bathroom kawngkhar bulah nghatin "Minute nga aw" tih leh namluh ka ruala, kei ka insiam zui mawlh mawlh a. Inhnuai ka chhuk thlak hnu rei vaklo ah a lo lang ve a, pawnah inzui chhuakin kawngpui dungah chuan ka tlanpui a, ṭhalai ṭhenkhat zingtlan ho pawh an lo let leh reng tawh.






"Kar khat vel i tih hunah chuan zing thawh pawh i hre viau tawh ang" ka tihlai mekin ka ban a rawn vuan chawt a "Ngawi teh, i tlan chak lutuk ka kal a thip a nia" thaw hliam hliam chungin a ti a, ka lo nui hawk chu phawk fein min melh a, "Ka kal a thip" hi a ti ve ziah a, a kal awmna zawn pawh a hre der lo.






Ka Bottle ken lai chu pein ka tlanpui lui zela, kal lamah hi chuan a ti ti phei char char a haw lamah hi chuan a ngawihmak mai ṭhin, a hah changa a biang sen ṭan ṭan ṭhin hi hmuhnawm ka ti a, ka en ning thei ngailo.






"Alawmi nen in inhmu angem?" in a kan let leh hnu chuan a ti a, "I hmanloh pawn lo va hmu hram rawh aw, thil enge maw ka chah a" a ti leh zat a.






"I duh leh zanriah eiturin sawm la, Victora rualin a haw leh maidawn a lawm"





"Tak tak maw mahse, a hman a nge maw?" a phone zuia, inbual turin ka luhsan thunga, tuilum sa ver vawra ka inphuhtir zawh hnua ka va chhuah phei leh laichuan phone a lo la hmanga, ka phone zawk a hmang anih hmel, ka thawm a hriat rualin a lo hawi vat a, "Ruantlanga mi Tetei i be duh em?" a mitmeng chuan engemaw hi a rawn sawiin ka hria, 'aw' tiin chhang ila chu min melh thlu tawp duh mai tur hmel a pu.






"Va inbual rawh le" ka lo tih rual chuan a inher leh nghat a "A buai rih a, i lo hrethiam mai dawn nia"tiin a dah hmak a, engah nge maw Ramchhuani pawh chuan ala rawn call fo mai le.






A thawm reh dak vang chuan hnunglamah min en rengin a ding tih ka hre thei a "He nu nen hian inlo inkawp ve deuh tawh a mi?" lawmlo fe hian a lo ti zui a. "A teuhlo lulai emai, naupang chumchiap mai anih kha" nui hawk chung chuan ka ti a, Ramchhuani chu kum 18 mi an khua ah pawl 12 zirlai a ni,






"Hehh....naupang chumchiap chu a ni tawhlo deuh chu a niang!" a lamhawia ka inher ta chu alo thutak hle tih ka hmuhrual chuan ka nui tawp chiang hle. "Aw haw...i lo la thutak elaw?" ka lamah pawt hnaiin a kawngah chuan ka han kuah a, a tum bar bar a "Engah nge ka lak thutak loh ang, nang lahin i sawi chiang duh silo a" a ti deuh hmak a.




Huhh...lehta mai mai ṭhin a.



"Lo kal teh"




Ka malchungah pawt ṭhuin ka lo kuah hluna, a phone ken lai chu chhuhsakin a call zui bawk a "Tinge i call kher, i ti zialo e..." a ti zui nang nang a, he tia ka tih lohin a thik dawn dawn bawk si a insawifiah reng a ngai kha ka peihlo a lawm mawle.





Hmeichhe tleirawl aw in "Hello..." a rawn tih rual chuan hnai set sawtah kan inmelhran a, ṭawngtura ka mitmei chuan a lu a thing nasa mai.




"Aw..Tete"




"Uii....U JH-a!!!!" Hmeichhe tleirawl rual nui har har ri ka hre zui a, "Speakerah dah rawh" an lo tih ri te pawh.





"Min biak duhna i nei em ni?" an thawm chu a reh dawka, an phun sar sar a, chumi hnuah "Nei em em chuanglo, Malawmi hian i aw a la hre velo a, a hre chak a" Bawihnoi a lo nui hawk a, a hrethiam ve ta a niang.





"Khai a...a van pawimawh lo ṭhin ve" ka tih chuan an nui har har hlawm a an inpuh kual vel a ni.





"Engtikah nge i lo zin leh dawn, i lo zinleh hunah chuan Tetei te inah thleng tawhlo la, kan inah i lo thleng tawh dawn nia" pakhat chuan alo ti lang lang a, chu chu a ṭhian dang ten an fiam zui bawk a.






"U JH, i nupui kha a aw a nalh kan ti rap, a hmelṭhat hmel bawk sia i lo zin leh hunah lo hruai ve rawh aw" chutiang thuartham vel chu a ni, hmeichhe tleirawl rual ngaihsan zawng la pe na tak mai an ni a, chutia kei min lo ngaisang chu han huat viau theih lah an ni biklo, an ninawm ve deuh ṭhin e tih mailoh chu.





Ka malchung aṭang chuan tho vatin, Bathroom lamah a pan a, ka en reng laichuan a rawn hawng leh a, sexy zeta min rawn melhin a kutin min lo hui a, phone chu ka dah rang teh e.





Kawngkharah chuan indinchilhin reingial chu kan infawp a, "Lo chhuak teh" ka tih lahin a duh derlo maia, kawngka lah a hawng zau ṭha duh manglo a, pawhchhuah ka tum lahin a ṭang ṭak a "Ka la inbual ve hleinem, nangmah lo lut rawh" a ti deuh tlat a, in fawh chauh chuan patling ṭam hnêm hek lo le, kan inbual nawn leh mai a niang chu.






Nupa rek a awm chu thil a awlsam khawp mai, kan awmna hi a hlat deuh vangin kartluana tla tur kan bazar lawk mai a, eitur stock na room kan siama, kan inchhek khawl nasa bawka dawrte siam te pawh kan ang mah a ni, Deep feezer liantawk tak ka leisak bawka, sa lam pawh kan hniang hnar viau, chhun lamah inah a awm chawt a, hna zawn a tum uk uk a min râwn leh ṭhin a, ka uksak duh lemlo thung.





A hna hmasa kha chu kan inneih hmaa a neih kha ni a, office khatah kan thawk bawk nen amah lah a tui vei bawk si a a bansan tura han tih kha ka duh biklo a, hetia a bansan ta ro ro anih chuan hna dang zawn leh erawh ka remti tawhlo thung, keimah a innghat pumhlum turin ka duh a, ka chawm zo nganglo te anihloh chuan hna zawn leh chu rem ka ti lo bur a ni.





"Chhunah enge ka lo tih ang aw?"




"Kawngka kalh ṭha la" ka lo ti zauh chu a tum zui bar a "I rualin ka lo chhuak ve lawk dawn a mawni le, ka BP check tir te ka duh a, Remremi pawh ka ngai a, thil lei ngai kan nei nual bawk a" a ti sap sap a.






"Anih chuan han insiam rawh" ka ti chu a phur khawp mai. Hmeichhe dang angin a insiam rei ve vak ngailo a, hmai hnawih leh eng ilo pawh a hmanglo tluk a ni, nau a chhiat aṭang khan a tisen nung sarh ṭhin kha a dang bal reuh a, a cher ta riak mai bawk a, Liansangzuala lah hian "Kham khawp eihmu lo a ang emai" a ti leh ṭhin a, chu chu ka tha a lo na deuh nge ni, eitur tuihnai leisak loh a bar ka neilo, ina a kawl sa te pawh thla engemaw zah chu a daih ka ring, Vitamin ṭha an tih chenin a ei peihloh thleng thleng kan inleisak a ni ber a; ani thung chuan "Sarzuk hnah ka ngeih" a ti mauh mai a, Liansangzuala nen kan Joint Secretary Pu Rotluanga te huanah kan zuk laksak vang vang kha a nia.






A Bp check tur chuan ka ṭhianpa clinic ah ka hruai hmasa zeta, a hma aichuan a lo zia tawh ni awm tak a ni, ani kan inpuiah ka phei a, kei hna ah ka kal thung.






Chhunah kan inbia a "Alawmi chu a lo kal hman dawn lo a, ka thil chah kha a lo lei vek tawh si a lo lam mai rawh" a lo ti a, engthil nge a chah ka zawh chuan "Nakinah ka la hrilh ang che, hmeichhe lam thil a nia" a lo ti maia. "Min lo nghak law law la, ka rualin i haw dawn nia" ka lo ti ve a.







Tlaiah chuan Gate bulah Alawmin minlo nghak ran tawh a, "Ka lo chuang dawn Scooty ka kenglo a" a lo ti var a, an thil inchah chu ka lo ensaka, Pregnancy test kit leh damdawi eng engemaw a ni.





"A rai em ni?" ka bulah engmah a sawi silo, min ti bang bo kher mai.






"Rai awm pawh a sawilo, kawl ve atan hrim hrim a ti aniang, in awmna a hla lutuka, mamawh chu i kawl sa a ngai a lawm" alo ti sam et a, ngaihtuahna a ti thui khawp mai.







"Naupai leh mai hi a hriselna atan a ṭha lo angem aw" ka tih chuan "Keipawn ka ti a lawm, in dang rih rawh ka tia, ka upa telh telh a naupai na chance a tlem zel a ti tlat a, a hriselna hian a tuar vak anga a awngrawp der mai ang tih ka hlau a nia" a ti niah niah a, chu chu thil hlauhawm tak a ni, tunah pawh a chaklo em em a, luhai a sawi reng a, naupai leh ta sela a chhiatpui leh hle dawn tih lah a chiang reng.






"Nangmah hi a vengthawng lutuk che a, fa neih theihloh mawlh a hlau a" min nuihsak chungin a ti a, "Nei theilo ta ula engtin nge niang?" a ti zui zat a.







"Neih theihloh thu a la awm hleinem?" ka ti hul haka, fa neih loh pawi ka tihloh thu hi kan nu dinhmun vang hian ka sawi ve leh zauh ṭhina mahse, han ngaihtuah chiana fa nei miahlo tur anga han inngaih hi chuan engemaw khingbai deuh hi chu a awm ve ṭhin.







"Fa in neihloh vanga hmeichhe dang kawpsan te hi i lo tum vaih chuan i chaklo ang aw" kan nui dun hak a "A teuhlo emai" ka tih rualin "Tak tak maw?" thutak fe hian a lo ti a, eng ang hmuhin nge maw min lo hmuh dawn ni, chutiang khawpa mipa laktlakloh chu ka ni bik lo.






Kan veng kan thlen chuan chhuk mai a tuma, veng khat chauhin min kardan tawh a tiin ka va thlah ta tho a, thingpui intur in min sawma "Bawihnoi lam kawi ka ngai sia nidangah a hranpa deuhin kan la rawn leng dawn nia" tiin ka hnial a, kan in ka thlen phei leh meuh chuan dar 4 a lo ri fel der tawh.







Ka nu a lo awm a, enge maw sawiin choka ah an lo titi dun a, naupai leh chungchang an sawi ni ngei tur a ni "Tluanga ka pai hma hian keipawn ka chhiata ka thihpui lo chauh a lawm" ka nu chuan a lo ti ve hlut a, ka va lut ta chu an lo ngawi dak a "I rawn tlang nghal lo em ni, in nu in a nghak rei lutuk tawh che a lawm" ka nu chuan a lo ti hlak a.







"Ka nu hian naupai lehna chance a la tam lutuk a lo tia, ka thaw veng huai mai" ka nupuiin a lo tih laiin "In mangang hma mai mai anih kha, inla naupang alawm inpai leh vat mai ang, mi pawn pahnih thum te an chhiat hnu ah te a lawm an neih chauh ni" ka nu chuan a ti zui bawrh bawrh a, ka lo inrawlh ve na chi a niloin ka hria, ka inthiar fihlim thuaia, chutia inpawh taka an titi dun thei chu ka tan chuan hriat nuam tak zawng a ni.







Ngawirengin Sitting room ah chuan ṭhuin ka lo nghak a, Micheala lo haw chu a zirlai enge a an ka lo zawt a "Ka zia rih" tih zawnga min chhangin a room ah a lut a, in ka chhuahsan kha a lungawi vaklo a, inpui changtu nih hi a duhlo ni berin ka hria. Amah chuan "Ram fankual ka duh a, awmna ngaiah ka awm reng theilo" a ti tak nain hna ala neihloh vanga a inrintawkloh chhuanlamah ka ngai thung.






Inlamah kan let leh hnu chuan a ti ti siam siam a, "Ka nu mizia hi ka lo hre ngailo a mahse, ka lakah a sual miahlo, keimah hian nachang engmah ka lo hrelo mai mai anih hi, Judy nen kan intih thiamloh ṭum te khan, a bulah khan lo sawiin ka lungawiloh thu te kha lo thlen ve ni ila thil a danglam vek zawk tur a nia, Judy rilru pawh ka lo tlukpha miahlo tih ka hre ve chiah a ka lo tlaw ngawt mai" ngaihtuah ril hmel taka ral lam en vang vang pah chuan a ti a.







"Ka nu hi chu Reny ang deuh hi ania, thil hi a hriat hmasak ang ang hi a ring mai zela, paukhauh deuh anga lang si hian a nem ru viau bawk, Judy khan a cheng a man a, chuvang ania nel pawh an innel bik, Apuii leh Reny aipawn a ti thiam zawk tlat a, nangpawn i hrechiang anga i ngaina ve zel mai ang, in inngainat tawh vek vek chuan kawng engkimah a ṭan tlat tawh mai ang che, kei aipawn a duat hial maithei che a ni" nui var var chungin a awmah a lo bei a, duat takin keiin ka lo kuah bawk.






Kan inhnung lamah chuan zawl zau angreng deuh hi a awm a, "A lei saw a dur ṭha sia thil chin nan a ṭha dawn riauin ka hria a" a ti leh ṭhin a, Inrinni ka awl ni chuan ka samfaisak a, thawhṭan tuka ka Office kal tur min zui chhuakin, pangpar chi vel a lei a, zing leh tlai tin hian a buaipui a, a thil chin lah chu pangpar lam reng reng a awm lo, thlai leh thei lam chi hlir a ni.






"Pangpar chin nan i ti emaw ka lo tia" ka tih chuan a nui hak hak a, "Enteh, Duata pangpar hi a mawina ka hrelo reng reng, pangpar aichuan thei rah leh thlai rah te hi mawi ka ti zawk daih" a lo ti mauh maia, hmeichhia pangpar mawi tilo ka hriat chhun a ni.






A ni fanu tleirawlte pawh chu kan awmpui ta a, a zuan a zângin a fel reuh khawp maia, Bawihnoi pawh a khawhar lutuk ta biklo, kartawpah Remremi ka hruai haw leh zauh ṭhin a, ka va thlenphei tawh hi chuan min lo ngen ngei ngei ṭhina, ka nu lah hian hruai tur hian min lo ti ve sek reng nen kan inzui haw leh nge nge ṭhin.






Nikhat chu Office a ka awmlaiin min lo phone a "I lo haw lawk thei em?" a lo ti a, hlauhthawn nei a ang kher mai, a chhan ka zawh lah chuan "Lo thleng phawt rawh" a ti teh tlat a, hmanhmawh takin ka haw a, in ka thlen chuan Sofa ah a lo muzal a, min hmuh rualin min lo pan nghal ruak bawk.






"Nau ka chhiat leh in ka hria" a lo ti a.





"I rai bawk silo a" ka lo ti he haw a, min ti bangbo kher mai. "Nia ka raiin ka hre lo a, mahse, ka lo rai reng a niang, ka thi neih pawh ka la awl hmanlo a, chuvang chuan ka hrelo aniang, kar hnih liam ta a ṭang khan ka awm anuamlo a ka BP hniam vang anih ka ring ringawt a mahse, nichin deuh lawk khan ka tai alo na a, thihlawm a la chhuaka" rilru nat hmel takin a ti a, a khur der der reng bawk.







"Ui vak ngaihna pawh ka hrelo, min ṭhawng lutuka, lo hre hman ila chuan ka rilru a na ngawt ang" a hmelah chuan a ui zia leh a rilru nat zia chu alang reng thung.






"Lo kal la, ka lo kuah lawk ang che" ka ban ka phar rualin ka awmah alo bei thlawpa, a taksa khur dar dar chu nghet takin ka lo pawm a, "A pawi reng reng lo a nia, kan chan tur a la nilo anih kha, rilru tihhnual nan hmanglo la, Pathianin a hun a tih ah chuan min pe ve mai dawn alawm, hmanhmawh mah ta che, Pathian hi kan dilna chhang tur hian a hmanhmawh ngailoa a ko tu mihring zawk hi a ni hmanhmawh ṭhin chu, Isuan Lazara a kaihthawh dawn khan mite chuan tlai mah mah tawh an ti mahse, ṭawgkam khat chauhin Isuan khan a kaitho a nih kha, keini pawh a hun a tih takah min pe mai dawn a lawm, mi pe ta lo anih pawhin engemaw remruatna ṭha tak kan tan a nei ang tih ring tawp mai rawh" ka sawi laichuan a thawlak rang lutuk pawh a zawi tial tial a, a taksa khur pawh a reh ṭanin ka hria.






Rei awmloin Doctor hmu turin kan chhuak a, ka ṭhianpa Doctor chuan "Naute ang turin a insiamlo hrim hrim anih dawn chu, nau chhiatah inngai suh u" a lo ti maia, kan harsatna erawh a kiamphah chuanglo kher mai.






"A falin in be lawk teh ang" ka lo ti vat a, a Office ah kan inzuilut a "A dinhmun dik tak han sawi teh" ka ti tawl a. "Han ṭhu ve phawt la mawle" hmanhmawhlo fein a nin alo ti thung.






"Nau neih hi hman hmawh rihlo la a ṭhain la hria"






"Ka hmanhmawh reng renglo" ka lo ti vin hluk a, "Aw, nang chauhlo in nu pawh" enge maw lehkha ah hian thil a ziak mawlh mawlh, "Heng hi i lei dawn nia" tiin min pe zui a.







"Kum hnih khat vel tal chu indang ula, in nu pawh han chakvak ve phawt sela, in la pai leh zawk dawnnia, nau pai theilo ani miahlo a nia,a chhul chaklo lutuk vang hian pai puitlin a harsat mai chauh a nih hi, heti ngawt chuan innu hriselna atan pawh a hlauhawm thei mai ang, nauchhiat hi nu taksa hian a tuar teh ania" a ti sap sap a.







"Ni e, in dan rih chu a ṭha ang mahse, amah ber hi ania, in dan a duh a nge maw?" a duh dawnlo tih chu hriat sa a ni, damdawi eitura ka tih pawhin a ei ta chuanglo kha a nia, Birth control lak hrim hrim chu a duh lo a ni ber.







"Nang mah i indang mai dawn a mi, CD te i hmang mai anga?"






"Chu aia ngaihdan ṭha chu i nei lo em ni" ka tih chuan a nui huk huk a, ka thu tak viau laia a lo nui leh ṭhin chu ka ngaitheilo, "Chu chu a ṭha viau lo em ni?" a ti leh chuan "Ṭha ka tilo" ka lo ti leh hluk a, "A nih chuan hmeichhe taksa a dah chi lam te pawh a awm alawm" a ti leh a "Kan nu lam niloin eichi emaw ka tan min chawh mai rawh" ka lo ti a.






"Ngawi teh eichi chu ka chawhlo ang che, a hma in ka tisual tawh a, Birth control a lak tawhloh hnu ah pawh fa a neithei ta miahlo maia i lakah phei chuan risk ka la ngamlo, tih fuhloh palh chuan chi thlah hma hauhin i chi an mang der mai ang, ka tih ang chuan ti zawk mai rawh u" a ti leh mauh mai.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:09 pm

GOMENASAI - by Ahmangaihi violette khiangte


CHAPTER - 37

images (100).jpeg



Kar tluanin inah ka tawm chawrh chawrh a, bazar tur takngial pawhin ka chhuak peih lo, Zirtawp tlaiah Alawmi lo kalin thei leh vitamin te min lo ken sak a, zanriah eiturin ka lo sawm nghala, tlai eirel zawhah ka huan thlai te en pahin inhnung lamah chuan kan ṭhu chhuak duna, hna thawh leh ka chak thu ka lo hrilh mawlh mawlh a, nilenga kan in fal taka in khung reng chu ka khua a har bakah ka ning ve tawh em bawk a ni.






"Private school ah i thawh peih chuan kan lo biaksak ang che" min ti a, an laina hnai tak te school a ni awm e.






"JH-a hian hna zawn leh hi a phallo lutuka" ka lo ti a, engthil emaw rilru lakpenna tur hna ka mamawh in ka inhria a, hetia ni leng lenga ngaihtuahna kawm reng ringawt chu ka ti hleithei meuh tawhlo.







"Dil leh chhin rawh, hetia awm ringawt chu keipawh niila ka peih bik lo ang, hawi harhloh lutuk chuan damloh a awl zawk a lawm" ka ṭhiannu chuan a lo ti ve bawk a.






JH-a ka hrilh chuan a remti lo nasa maia, "Hetia ina a awm chawrh chawrh reng chuan ka damlo zo mai dawn, school hna te chu hahthlak lutuk pawh a nilo a" tiin ka dil lui ve ngar ngar a, kar khat hnuah hna chu thawh a rem tur thu School nei tute lamin min lo hrilh a, Alawmin "I duh chuan thawh a rem dawn a, lo sawichiang vat la, midang an lak hmain" a lo ti ve sek tawh bawk nen, JH-an aw min pawh chiah lo nangin keima thu chuan ka lo aw ve ta ringawta, ka pasal chu a lawm fahran lo kher mai.






Min hau hranlo a, mi erawh a be tuitam vak duhlo a, kar khat vel zet chu kan nupa kar pawh a ṭhaloin kan inbe tlem hle bawk, nupa ṭhenkhat intithiamlo angin in hau ve bawng bawng lo mahila kan awmdan chu a hrehawm em em tho.






Kar khat a liam hnu chuan a lungawi veleh mai bawka, thawhṭan mai school ka ṭan ni tur a ni a, a bulah erawh ka sawi ngam lo hle a, chawlhni zan thlen chuan engmah sawi loin a TV en na bulah chuan ka ṭhu a, a hmel ka enlai chuan min lo kuahin amah ngheng chaih chuan min pawt hnai a, a theihnghilh tak vanga lungawi anih ringin han sawichhuah leh pawh chu ka inthlahrung ngang mai.






"Naktuk kha aw?" a hma a thei zai sa chhawp hnaih sak pah chuan ka han ti a, a thil en ngawt chu melhin min chhanglo a, inkhel hmuhnawm tak a en mek bawk si a, mut hmunah sawi zawk ila a ṭhain kan hria.





"Dar engzatah nge?" a lo ti khauh a.





"Dar kua a nia, i rualin ka kal thei dawn a" ka lo ti vat a, min chhang zui leh tawhlo. Manuntei lehkha zirzo mu tura a insiam mek lai chuan "Va mu tawh rawh" a ti leh khauh a, a lungawi leh tawhlo niin ka hria, Alawmi nen kan intext a "Engtin nge i awm dawn tak, naktukah chuan i zawm thei dawn em?" a lo ti ve reng bawka, JH-an a ruala kal a remti lo anih chuan ka tan hna han zawm ngaihna a awm der lo, hna ṭan dawn zanah pawh engmah ka la sawi chiang thei lo chu rilru a buai duh ngang mai bawk.






Khumah muin a lo mut ve hun chu ka nghak ran a, "Dar engzatah nge in ṭan dawn tih a zawh tawh ber che chuan a phal tihna a ni mai a lawm" Alawmi chuan a ti a, "A lawmloh hmel lutuka, he ti chung chung chuan ka ti luilo mai dawn emaw ni le" ka lo ti ve leh a.






Min lo phone zui zat a "I theih dawn loh chuan sawichiang vat rawh, midang pawh zawngloin an ring ringawt che a nia" a lo ti a, ani pawh chu a lawm bik vak tawhlo, "JH-a chu keiman ka lo biaksak mai dawn a mi?" a ti leh a, chu chu a ṭhain ka hria, a lo remtilo tlat duh bik em lo ang chu, biak dan tur te chu kan han inhrilh leh hnu hnawh a.






Rei vaklo hnuah inchung kailawna a lo pen ri khap khap thawm chu ka hre nghal a, phone a hmang ri pawh ka hre zui a, room kawngka a a lo lut chu ka lo en reng a chutah a phone chu dahin khuma ka ṭhu chu min lo en a, a hmel landan chu hriatthiam har tak a ni, lawmlo hmel a pulo a, lungawi tak hmel pawh a pu chuanglo, a landan chu a zahawm em em ringawta, sawi tur a vang duh hle bawk.






"Hna thawh ka remtiloh thu kha ka sawi chiang tawhin ka hria" a aw chu a khauh ṭha kher mai, min en ran a, a mitmeng chuan min ti zam rum rum thei hial a ni. "Nichin khan dar engzatah nge i ti bawk sia" ka lo ti hap a.






"I in entir tur hun a nih kha ka zawh che, hna chungchang ka sawilo, kan sawi leh tawh lo ang, i hrechiang em" a ti chang leh fak a, chu tih laimekin ka phone a lo ri ve bawk a Alawmi a ni, lak mai nachang pawh hrelo chuan ka en renga, "Chhang la i thawh theihloh tur thu hrilh rawh" a lo ti hluk a, ka tawt up up maiin ka hria.






Phone chu ka chhang a "Mambawih, inpa chu ka bia a, amah ka lo sawipui ang a tia" a lo ti nghal sar sar a, JH-a lam ka va hawi chuan khum lam a lo pan mek a ka chhanna ngaichangin min en ve reng bawk.






"Principal kha min lo biaksak la ka thei leh dawnlo tih min lo hrilhsak mai aw" aw lawi angreng zet chuan ka ti a, ka ṭah a chhuak nghal tet tet mai a, ka inthunun theilo lek lek a ni, aw thian leh tete in phone chu ka hum nghet sauh a "A zialo hle mai, keimah vangin an buai em lo ang chu" ṭah chhuak insum ṭeuh chung chuan ka ti a.




"In pa chuan ka phallo a ti bur a law?"




"Ummmm" ka ti zawi sap a.





"A tihloh lamah chuan a harsa ve reuh hle mai a" nui hawk chungin a ti leh a, "Min lo hrilhsak mai rawh aw" tiin phone chu ka dah vat a, lehlam hawiin puan ka sin nghal sawt sawt a, ka piah lawka mipa ruangam lianzet ding chu melh pawh ka melh leh tawhlo.






Hna thawh ringawt ka dil kha a nia, khati teh vaka min lo chhan kha ka beisei lo a, chu chuan ka rilru a ti na a ni, nilenga mahni chauha inkhung hrehawm zia ani chuan a hreve lo a, khawhar leh mal taka awm turin min duh anih ka ring hial tawh.






"I titau elaw?" khumah lo ṭhu thlain ka darah vuana min kawih her mai a tum chu ka lo ṭang a, ka puansin chuan inluhkuh zui zatin amah hlat thei ang berah chuan ka tawlh hla bawk.






Thawk a la hawk ri chu a thawm ka hriat leh hmasak ber a ni, tho chhuak lehin a thawmhnaw bawm bulah chuan a ri sat sat a inthlak a ni mai thei, ka puansin hnuaiah chuan Alawmi nen kan intext a ka rilru nat thu te chu ka hrilh ve mawlh mawlh a, a ni pawn min lawmloh pui ve hle a, khawpawn deuh thaw ah kan awm leh chhuak thei manglo a ka awm chu a lawmloh chhan ber pakhat a ni.






Kan sawi kan sawi takah chuan ka lunghnur zual a, ngaihthah ni tlatin ka inhre bawk. "Scooty lei dil rawh, hna thawh a phalsak lo che anih pawn chu tal chu a tihsak tur che a ni, khatiang te chuan Jail tang ang chauh a lawm i nih, a thu loin khawiah mah i kal thei hleinem" ka ṭhiannu chuan a ti leh a, scooty lei tih lampang chu ngaihtuah pawh ka ngaihtuah lo, chuzawng aichuan nichin lawka min vinna khan ka rilru a luah a, hrehawm ka ti bawk.






Ka mutna khum a rawn hniam salh takah chuan ka piah lawkah chuan a mu tih ka hria nghala, chutah ka puansin lai chu rawn pawtin keimah chawp chuan min pawt her lawp a ni ber!






"Khatin in lukhuh tawh suh, a hrisel lo" ti hlukin puan chu min sin ṭhattir leh a, inher lehnghal mai ka tum chu ka lamah rawn tawlh hnaiin a awmngheng chuan min pawm bet nghal hmiah bawk.






"Ka tho lawk dawn" a kut chu pelh ka tum a, a nghet ṭha kher mai.




"Enge i tih dawn?" a ti chang bula.





"Bathroom ah ka kal lawk dawn" ka aw a tham nghal ṭiau a, ka mittui a rawn luang leh ringawt tawh. Inbeng kang meuhin a nin min en a nazetin thawk a la bawka, ka hlau nge a lakah chuan ka thinrim tih pawh ka inhre thiam tawhlo.






"Va kal rawh" tih pahin min thlah nghal hlawk a, ka thochhuak chu min en zui reng bawka, hetiang hian ka lakah a lo nelawm loh thei ang tih rinngaihna pawh ka lo hrelo, kan inhriattirh lai ang maia nelawmloh leh beiseiawm bawk si ang kha a ni leh tawh.






Bathroom ah chuan ṭhuin Alawmi bawk chu ka text leh a, kan inbiak pah chuan ka ṭap leh rih ṭhin a, ka damloh ṭan aṭang khan ka rilru hi ana hma em em a, chhan sawi tur em em pawh hrelo a ṭah vawng vawng chang ka nei ṭhin, ka lungchhe hma hle a tunhma anga chak leh tuarchhel kha ka ni tawh hek lo. JH-a nen kher khera in hauh phei chu ka rilru a na zuala, ṭah inpeih reng nih tawh sa nen ka mittui te chu lungchhe zual tura min puibawmtu ṭha tak a ni ringawt mai a ni.






"Enge i tih a?" Bathroom kawngkhar a rawk kik ri khauh khauh a, chhang loin kei ka ṭhu ngawi reng thunga, tunah tak hi chuan tibuaitu awmlo a mahni chauh a awm ka duh ber.




"Bawihno"




"Lo va mu rawh" pangngai thei ang bera ṭawng ka tum chung pawhin ka ṭap tih chu ka aw ri ah chuan a hrethiam thoin ka ring.





"Lo hawng teh" che changloin ka ṭhu renga, na zet zetin thawk ka la leh ringawt ṭhin, a dawhthei bik ta vak lo aniang kawngkhar chu a rawn beng ri zawt a "Lalthanpui, hawng vat rawh" a aw chu vin ṭha tak a ni. Ka thinphu a rawn rang nghal dawt dawt a, hlauthawng lutukin kawngkhar chu ka hawng nghal ruai bawk.






Kut min thlak mai dawn emaw ka tih laiin "Enge i tih a?" tih leh a lamah min pawh hnaih a rual a, "Engmah.. ka tilo" ka lo ti vat a, kut min thlak a tum lo ni a ka hriat vangin ka thaw huai a mahse, ka thinphu ala rang ṭha kher mai.






"Enga tinge i ṭah a, hna thawh ka phalloh vang kha a mi?" ka bianga mittui luang chu rawn tuai hul pahin a ti a, chumi vang ngawta ṭap chu ka ni lo tih ka inhria a a chhan erawh ka hrelo, engkim chuan ka rilru a tina zo vek tawh.






"Hna thawh ka phalloh chhan chu awm hahdam la ka duh vang ania, i tana ṭha tur ka ngaihtuah vang a nih hi, nau neih vat i duh a nilawm ni, i duh a nih chuan i hrisel ṭhat angaia, hna thawh lampang niloin i hriselna chiah ngaihtuah zawk rawh" a kut lianpui chuan ka biang dawmin ngunthluk zetin min en a, chutih laichuan ka thaw a chham mai dawnin ka hria! Ka pum lam aṭangin min rawn hnawh a, am zetin thawk ka la leh rih ṭhin.






"Bathroom ah i awm rei lutuk, vawt iti a nih kha, kha i khur a lawm" khum lamah chuan min pawt pheiin min muttir a, ka awm thlenga puan min rawn sintir chiah phei chu awm ngaihna reng ka hrelo, ka bing chuk chuk a, ka tha a zawi riai riai bawk, inchung Ceiling a Electric light te chu ka han hmu phe ruai a "Engtin nge i awm a, i va khur nasa ve?" rawn ti tu ka pasal pawh chu ka en hleitheilo. A aw ri te pawh chu mumang ang ruai a ni!





Hmeichhe aw ka hria a "Drip kan khai nghal ang, a Bp a hniam lutuk, Oxygen kan pe nghal bawk dawn nia" a aw chu a hman hmawh hle a, ka pasal aw ka hriat ve loh vang chuan hlauthawnna ka nei nghal bawk a, men ka tum lahin ka meng thei der lo.






Mumang ang maiin engmah a chianglo a, ka awm chhung na veng veng erawh ka hre thei, bawm chhung zimtea khung ang maiin thawk a sak a, tuipui mawnga pil riai riai angin ka taksa chu enge ka tawh ka hre thei heklo.






Aw ka hriat leh hmasak ber chu ka pasal aw a ni, "Thawh hah a nei em mawni le" hmeichhe aw ka hriat ṭhan deuh hian a ti a, "A Bp a hniama, a taksa chakloh lutuk vang a nih hi, Anxiety a nei bawk a" aw thum dut chuan a ti a, ka mit ka men rualin ka chhungte hmel ka hmu zui mai bawk a, an vai chuan hlauthawng hmel an pu a, ka lamlo hawiin an nuisang mai bawk.






Ka ka ah Oxygen mask an la vuah reng vang chuan ka ṭawng ri an hretheilo a, an nin min be mawlh mawlh a, ka pasal chuan ka kut vuanin hnai takah min lo en a, a nui hmel chuan min ti hahdam sawng sawng thei.






Ni thum Damdawiinah chuan ka awm a, ka awmchhung zawngin ka nu leh Reny ten min awmpuia, zanlamah JH-an min riahpui thunga, Alawmi pawn min tlawh awllo, a inthlahrung hle a "Thil nilo lo ka lo sawipui che a ka lo ti chi ai zo vek che anih hi, ka inthiamlo lutuka, ka ṭah te hi a chhuak zawk" a ti sap sap a, keiin ka lo hnem ve thunga, kan nui dun leh rih ṭhin.






In lama kan haw leh hnuah chuan Therapy ka la leh ta a, JH-an a hna banah min hruai mai ṭhina, a hma a ka Doctor pan tho kha a ni, ka awmdan a hrechiang tawh a "I kaisang deuh anih hi" nui chungin a lo ti mai a, ka pasal awmve laia engkim han sawi chu ka hreh vangin ka insum thei hle a, a hranpa deuha ka biak theih nan a number ka la ringawt mai bawk.






Zan mut theihloh ka nei chhunzawma, chhun lamah ka mu tluk tluk thung, puan ka sin theiloa puan tlangin ka awm a rawn delh rual hian ka hlau thawng ruaia, ka thawk a mumal lo nghal ringawt mai ṭhin, ka doctor chuan mi dang awmpui neiloa mahnia awmlo turin min râwn a, Manuntei school lai hlan chuan ka nu te in lamah ka awm ṭhina, Reny inah a awm a, nilengin a phone hmang ri ka ngaithla a ni ber.






Tlai khat chu Doctor chuan min lo phonein Damdawi a neih thar thu leh a neih tamloh vanga lam ve vat turin min lo ti a, min lam tura JH-a a lo la kal loh vangin keimah chuan ka va kal a, midang inentir an awm ve vangin pawnah chuan ka ṭhu rih a, midang pawh nghak an awm nual mai, damdawi la tur ve tho an nih ka ring, puanzar phena ṭawng bal bal ri chu a hrepha meuhlo, ngaihthlak chian ka tum laimekin mipa pakhat hi a lo chhuak a, sang leh hmelṭha deuh mai a ni.






Ka bulah chuan lo ṭhuin "An zo ṭep" a lo ti zauh a, "I chhungte a mi?" ka lo ti ve a.





"Ka nupui leh ka u an nia"




"An pahnihin maw" ka lo ti he haw a.




"Ahh....nilo e, keimah hi a nia damlo, Doctor sawn ka thih ṭep tawh thu a hrilh mek a nih saw" nui var var chungin a ti a, chhan mai ngaihna ka hrelo kher mai.






"Eng harsatna nge i neih ve a?" tiin min zawt leh a "Anxiety ka nei a, damdawi la turin ka lo kal a nih hi" ka lo ti vat a, a hmel chu ka en renga, damlo hmel a pu nain a hlim hmel em em bik chu ka hrethiam lo, midanglam tak niin ka hria.






"Enteh, ka kawng zawh hnu i lo zawh ve anih chu, ka natna hmunah khan chhan dang vangin i lo na ve a mahse, thil pakhat ka hrilh ang che.." ka lamah rawn inherin ngun zetin min en a.





"Mihring nun hi thil thlawn pek a ni a, a hlu a; a tawi hle bawk. Hun hlimawm chauh hriatreng hi enge a hlut bikna, kan nun pumpui hi hriatreng tur a ni zawk, hun hrehawm laiber pawhin engemaw min zirtir ṭhin a, chutiang zawng chuan ngaihtuah ve la thlifim awm miah lohna tlangchhip ah pawh hahchawlhna i hmu thei zel mai ang....kei chu..." sawi leh a tum laitakin "Ezra..." tih ri vang chuan a hawisawn thuai a, a nupui leh a unaupa niawm tak lo chhuak chu ding meuhin a lo chhawn zui a.






Hmeichhia chu ṭap zo chiah hmel a puin ka hria, "Enge ka an a?" a lo ti var a, mipa zawk chuan a ṭhat thu a lo hrilh a, dawt a sawi tih chu a mitmengah a lang chiang ngang mai thung.






"Ka sawi kha, ṭhatlohna ka nei hleinem" ka bula mi chuan a lo ti leh mai a, a nuisang reng bawk. An kal dawn chuan ka lamah lo kun hnaiin "Hlau suh, nang chu i dam leh vat mai ang, ka thilsawi kha theihnghilh lo la" nuisuk chunga tiin a kal zui a, an kalliam tur chu ka en renga, a nupui darah kuahin a unaupa kut a vuan bawk a, chhungkaw inhmangaih tak an ni tih an hriat theih, eng natna nge a neih ka hreloa mahse, a natna chu kei angin lungngaihna ah a tlak ve lo tih a chiang ngang mai.





Doctor pathum lai an lo awma, ka Doctor chuan min lo koin a damdawi thar chu min lo pe a, "Damdawi chak deuh a nia, i mut dawnah chiah i ei dawn nia, nikhatah pakhat aia tam ei miahlo tur aw, harsatna i neih chuan min lo phone zel dawn nia, inpa nen pawh kan inbe zauh zauh a, pasal fel tak i nei anih kha, i van nei hle mai, hmeichhe ṭhenkhat lo kal ṭhin te hi hetiangin an pasal ten an ngaihven ve chiam ngai hleinem, inpa chuan a enkawl dan turah che ah thurawn te ka hnen aṭangin a rawn la a, nupa inhmangaih tak an nih dawn hi kan nu bulah pawh ka lo ti a, in nupa a inṭanrual phawt chuan Anxiety te lek lek chu i hneh vat mai ang " a ti sap sapa.






JH-an ka Doctor a lo be ṭhin ang tih ngaihna ka hrelo a, min ti hlim takzet a ni. Ka chhuah hnu lawkah min lo phone a , ka let leh mek thu ka lo hrilh a, ani pawh a lo haw mek ni tur a ni, Manuntein kan inchahbi awmna a hre tho a, kan chhuah chang chuan eirawng a lo bawl ve mai ṭhin bawk a, ka hmanhmawh duh ta lemlo.






Ka mipa damlo hmuh kha ka ngaihtuah chhuak leh ṭhin a, a thil min hrilh mawlh kha ka theihngilh theilo, hun harsa in engemaw min zirtir angin ani khan a ngai a, chuti anih chuan hun harsa ka tawh te khan engthil nge min zirtir ang le?






Ka damdawi thar chuan min hneh mah mah ṭhin a, ka eihnu reilo teah hian ka muhil nghal mai ṭhina, zankhuain ka harh leh tawh ngailo, mumang ka nei ngailo a ka muhil nghet thei hle ni ngei tur a ni.







Tuk tin Exercise lain kan nupa in kan tlandun a, fianrialah kut insuihin ṭawngṭaima hun te kan hmanga, ani pawh hna emaw tihtur pawimawh fêtah lo chuan a chhuak ngailo, chawlhni leh chawlhni zan inkhawm kan ṭhulh ngailo a, a bak erawh kohhran ah kan inhmang tamlo khawp mai, Manuntei kohhran dang a ni a, inkhawm a duh chang hian kan kalpui ve leh bawk ṭhin a, biak in pahnih ah kan inkhawm tawn ṭhin tihna a nih ber chu.







Christmas dawnah chuan min hawsan leh ta vang vanga, JH-a te hna an la chawl silo a, khua a har duh ṭhin khawp mai. Irene-i leh Reny ten min lo tlawh leh zauh ṭhin a, an lo kal tawh hi chuan Zu in tur an lo keng ziaha, ka hauh lah hian engmah an ngai duh lo a, min runluih emaw tih tur hrimin an che ziah bawk a, an tihtak fo ah phei chuan hauh pawh ka hau buai peih ta lo.







"Ka nu te zin hunah ka lo awm rih dawn a nia" Irene-in a ti a, "Bungrua an la dawn a mi?" tiin ka lo zawt a, "Lungphunna ah an kal dawn a, ka kal ve peihlo a" a lo ti maia, kan hnena a lo riah tak tak ka rinloh laiin a kar leh nilai ni chuan a thawmhnaw Bag nen a rawn thleng rupa, reitak awm tum ang maiin a rawn inkeng hnem bawk.







Ka ngaihṭhalo chuan Patea ka phone a, "A zan chhuak ka haua a rawn tlan tau anih kha, zirtawpah a nu nen Thenzawlah zin lawk kan ngai sia, tikhan lo awm rih mai rawh se" a lo ti a, JH-an pawitih na a neilo bawka a room tur te siamfel sakin kan awmpui ta riha, ani a lo awm ta chu Reny-in rawn awm veleh a tuma, a u hnenah a lo dil chung chunga, an lo invau khan lawk nasa khawp a, a rawn awmchhoh ni chuan "Thu tiam 10 pu chungin ka lo lut" a ti ham ham a, engtin nge an lo invau dawn ni.







An ni pahnih lo awm ta chu khawhar an hnem viau e tiloin an hnu chhui reng angaia, ka pasal bulah lah dawt sawia phat sak an ngai fo bawk. Zanah JH-an chhuah a phal silo a, Reny chuan a tumlui ngamlo a, Irene-i ber chu a za zek zek ni berin ka hria.






Zankhat chu tlai aṭangin an inchei hle a, JH-an an kalchhuah an tum em tih a zawh lahin uar fein kalchhuah an tumloh thu an sawi a, mahse, chaw kan eikham hnu lawkah kan kawtah chuan motor a lo dinga, Irene-i phone a lo ri nghalzat bawk a, "Inleng ka nei dawn a" tih leh pawna chuah a ruala, reilo teah Jonak Zosangliana nen an lo inzuilut a, a hmel ka hmu chu ka thinrim nghal ṭeuh mai.







Sofa ah ṭhuin an pathum chuan an inkawm a, kan pindan aṭanga JH-a lo chhukin a rawn hmu chu a rawn pan ding nghal hmiah a, "Enge hetah i rawn tih?" a va ti nghal tawl bawk a, "Ka inleng a nia U JH" Irene-in a lo tih vang chuan eng em a ti zui ta biklo.







Room ah kan chhohsan a, mut dawnah kawngpui an lam parda zar phui tura ka phei chuan kan Gate bul maia Irene-i leh Zosangliana infawp lai chu ka zuk hmu a, min ti bangbo kher mai, ṭhian satliah mai ni turah la lo ngai a, an lo inngaizawng ang tih ngaihna reng ka hrelo.







"Jonak leh Irene-i te hi an lo inkawp reng anih hi..." ner nang chungin ka pasal chu ka va en a, "Chutia law?" a lo ti maia.







"Kawta an infawp lai ka zuk hmu a" ka ti leh a, chutah ka lam lo hawiin "Lo kal la ka fawp ve lawk ang che" a ti zui a, a uang hmel chu ngei zetin keiin ka lo melh a, hetia min tih laih hi nuam a ti tlat zel mahse, ka hnar ngai chuanglo, a chang chuan a inbual dawn te hian "Reilo te ka inbual anga chumi zawh ah ka kuah ang che" a ti sa a, a inthlak dawn lahin chutiang lam hawi chuan a tih tum a sawi lawk zauh ṭhina, kei ka lo lai em em ṭhin.







A bulah chuan ka va mu leh a min fawh zauh pahin "I damdawi i ei tawh em?" a ti zui a, "Nakin deuh ah" ka lo ti vat a, kan muthilh duh hunah tak tak lo chuan ei chi ka nilo, ka chatthla zui der zela, meng rih tur pawn min lo duh eng ang mahse, awmzia a awm tawh vak ṭhin lo, chuvang chuan muthilh ka duh tak tak hunah chauh ka ei ṭhin, ka eiloh chuan ka muhil thei der tawhlo bawk.







"I ṭhianpa Doctor khan nau ka pai leh thei tur angin a sawi tak tak maw?" ka tih chuan a lo bu nghat nghat a, tunah kum a tawp leh tawh mai dawna kum thar ah tal chuan ka pai ve leh thei em ang chu maw? Beisei a sanglo viau a, ka beisei lo phal der chuanglo.







Min kuahin min rawn fawp leh a, ka kawr hlimin a hmui lum thar thar chuan a rawn nul kual a, a thaw lak rang tial tial chu chiang takin ka hre thei, keipawh ka bang biklo. A kawr chu ka lo phelhsak ve nghalthuaia, a awmbawr tihrawl nalh tak lo lang chu ka chul kual ruai bawk a, a nin lungawi hmel zetin min lo en thung, nupa nun lamah hian mi nupa te laka kan dinhmun chu ka hrelo a, inlungrual ve tak chu kan niin ka hria, in nawr luihna a awm ngailo a, inpawh takin hmangaihna kan chen dun ṭhin, tun ang chiah hian.







Christmas urlawk hma chiah ni 23 zanah kan mu tur chu Phone call hmanhmawh thlak deuh mai a dawnga, Office lamah an Pu Chief Secretary kha Lunglei daiah an accident a ni awm e, a ruang la turin an kal dawna Liansangzuala kal ve tumin JH-a chu a lo sawma, "Ka han kal ve ange, naktukah kan lo let nghal dawn tho a" tiin a insiam zui mawlh mawlh a, "Inthuamlum ṭha rawh, a vawt dawn ania" ka lo ti ve bawk a, thlasik lai anih bakah chhimlam chu a vawt zual hle tih an sawi ka hria a, ka huphurh pui ngang mai.







Liansangzualan a lo nghah dawn vangin hmanhmawh deuhin a chhuak a, Aizawl an chhuahsan hnu ah min lo phone bawk a, Reny leh Irene-i an la meng ve reng bawk nen, ka mu duh lawk biklo a, TV en pahin kan titi ho a, kan meng rei ta phian a, kan mut dawn chuan zinglam dar 3 a ri dawn thuak tawh.







Ka damdawi pawh ei tawhloin mu turin ka insiam a, ka muhil thei lawklo chuan ka han phone leh hram a, Rawpui ah zunram thiara an lo din lai tak a ni nghe nghe, "A vawt em?" ka tih chuan "Ac kan on a lawm, a vawt hran lo e, damdawi i eilo em ni tinge i muthilh loh?" a lo ti vat a.







"Kan nula te nen kan inkawm tui deuh a" ka lo ti mai a, "Mu tawh rawh le, kan thlen hunah ka lo hrilh ang che" tiin kan inbiakna chu kan ti tawp a, a tuk zing dar 8 velah min lo phone leh a, an lo let leh mek thu sawiin "Ruang hi an khua Vairengte ah kan zui lehnghal angai dawn a, reilo te kan lo chawl zawk anga, khatah rawn kawiloin ka nuteinah ka chawl mai ang, i duh leh min zui ve ta che" a lo ti a, Christmas vuak vet anih vangin a inthlahrung deuh niin ka hria.







"Zui em emlo e, ka ngaihtuah awm loh ania, fimkhur la nizan i tlaivar bawk si Liansangzuala kha inkhalh chhawk tir rawh, i muthlu palh hlauh a nge" ka ti a, ka ngaihtuah ngang mai.







"Vairengte a kan kal anih chuan ka Urlawk pui hman dawn lo che anih hmel" inthlahrung deuh hian a lo ti leh a.







"A pawilo, kha lam chu ngaihtuah duh suh, damtlang taka Christmas kan hmang thei kha a ṭha mai alawm" ka lo ti ve a. Tukṭhuan eikham veleh ah ka nu te inlamah chhukin a thawmhnaw hakthlak tur leh Energy drinks te ka ken sak a, an lo thlen ngahpahin Alawmi nen kan bazar bawk a, Alawmi chu chaw eiah ka sawm nghal a, Rina nen an inbreak lai anih vangin urlawk puitur a nei biklo a, kawng lehlam zawng tak chuan a tih zia phian mai.







JH te an lo thlen chuan inah ka lo awm leh hman diam tawh a, ruang chu an chhungte ṭhenkhatin dinpui rih tura an lo ngen vang a ni, an in tifai thuak a, thil pawh eihman loin an chhuak leh nghala "Kan thlen veleh kei chu ka lo let lehnghal ang" a ti tak nain ka lo hniala, "Hman hmawh duh reng reng suh, i chau tawng khawng lutuk ang" ka lo ti ve thunga, Vairengte a hla bawk si a, zana rawn let leh chu thil tih chi ni pawhin ka hrelo, accident te pawh a hlauhawm a lawm mawle.







Apuiin "Ka u a awm bawk siloa, in inlamah kan urlawk mai dawn a mi, mahni ina tih tlawng aiah, Reny a lo haw duh chuang silo a" inthlahrung deuh tak hian a ti a. "In duh phawt chuan lo ti rawh u" ka lo ti var a, "Mahse, Judy ka sawm ve dawn ania, ka u a awm chuanglo a a pawi lo ang tiraw?" a ti leh a, phur em emlo chung chuan ka aw ta tho a, Alawmi a lo riak nghal dawn tho bawka, kawm tur ka neih chuan ka duhtawk viau a ni.







Mahse, zanah chuan ka beisei loh deuh deuh an rawn lang ta zut a, party tenau an siam a ni hawt e, an ṭhian ṭhenkhat an hmel pawh ka la hmuh ngailoh a hmei a a pain an lo kawilut a, music ring deuhin an play a, inchhung chu weed rim a nam rum rum mai bawk.







JH-a nen kan inbiak chuan ka lo hrilh vat a, "Apuii leh a ṭhiante an lo kala, an ṭhahnem khawp mai" tih zawng ka sawi a, an awmdan tur chu a hriatthiam tho ka ring.







"Apuii chu ka lo be dawn nia, zaninah kei pawh ka lo let ang" a lo ti a, inhnuaia ka chhuk laichuan Alawmi Beer in ka zuk hmu a, "Tinge....i in ve ngawta" ka ti chul a, "Zanin angah te chuan ka in ve ṭhin a lawm" a lo ti maia, a rilru nat vang emaw ni dawn ni.







Jonak leh Irene-i chu room ah an tawm chawt a, Michaela leh a ṭhiante ho chu pawnah meichhemin an ri dar dar reng bawk, dar 12 pelh velah chuan kawtah Bike thawm ring zet hi a lo ding a, Reny tlan chhuak nghal vut ah chuan tunge anih zawhhran ka ngailo, hetiang thleng thleng hi chu ka lo beiseilo a sin mawle.







Chopo hmelzeta Lalrinhlua lo pen lut chu nam chhuah leh tak ka nap a, ka lam hawia a rawn nui kher te chu ka ngaitheilo lam mah a ni. "Kan va kokim sawt vele" Alawmin a lo ti hlak a, kei ang thoin nuam a ti vak biklo niin ka hria.







Ka thawk a hah riaua, an boruak chu ka zo ve meuhlo, thawm bengchheng leh an zial rim nam te chuan min ti tawp up up a ni ber.







(Keu let in ngaihloh nan in chhiar uluk hle reng dawn nia aw, Ads lo click leh ula Comment lo pe leh zan zan ula)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:09 pm

GOMENASAI - by Ahmangaihi violette khiangte



CHAPTER - 38

IMG_20210316_211658.jpg


Dar 12 pelh thleng chuan an la ri laih laih a, tumah haw mai tum an awm lo niin a lang, Alawmi pawh an zingah chuan a tui ta zek a pawna Michaela leh midangho sa hemna bulah chuan meilum aiin a ṭhu phei ve a, inchhung lamah Apuii eitur siam chu ka lo pui ve thung.






"Ka u chu dar engzat velah nge a lo thlen dawn a?" tiin Apuii chuan min zawt a, "Ka hre thiam chiah lo, khawvar hnu ah pawh a ni mai thei, a chau dawn bawk si a tlan chaklo sela a ṭha ang" ka lo ti a. "Reny te bulah zanin chu ka riak ve nghal anga zingah ka haw mai teh ang, Michaela pawh saw a haw peihlo maithei a ni" pawn lam hawi chuan a ti leh a, tunah 12 a pel tawh a kan muhil hlawm tak tak dawn chuangin ka hrelo.







Nu Muanin min lo call a "I u kha a phone a chhang thei silo a, in inah a awm lo em ni? Zanin angah te chuan lo haw sela aṭha asin" a lo ti a, Irene-i lah chu zantir aṭangin Zosangliana nen roomah an la inkhung renga, eitur la a a rawn chhuak leh reilo te Zosangliana a rawn ṭhu chhuak bak chu an hmel pawh ka hmu leh tawhlo, JH-a unau te an awm ve reng bawk si a, Reny chuan eng he hu ah ngailo mahse, Apuii leh Michaela lakah chuan ka thlahrung ngang mai.







"An ni pahnih hi an lo chatthla reng tawh a ni lo maw" Apuiin a ti a, Micheala lo lutin "Ka u awmlo hlauh chu a va tihzia e, in in hi kumtina kan urlawk na ṭhin a ni sia, hmundang tihna hi a vang lutuk a" kan Pudding siam lai rawn tem zauh zauh pah chuan alo ti a, Apuiin haw a tum em tih alo zawt a, a riah dawnloh thu leh an ṭhianho a riahkhawm an tum thuin a lo chhang a, "Zingah ka u a lo thleng anga, heta lo awm te chua ka duh teuhlo mai" a ti zui niah niah a, ka darah min rawn kuahin hmanraw awmna min zawt zui a.






Min kuahna lo paihthlak sak pahin hmanraw awmna chu ka khawh hmuh ve mai a, kal ta mailo chuan ka darah bawk chuan min rawn kuah leh a "Min lo hmuh rawh" a ti deuh tlat a, Apuiin pawn a lo ngaithei bik vaklo, "Mi hi kuah chung chung zel ṭhin suh" a lo ti hlaka, pakhat zawk chuan eng he hu ah a ngai duh lem hleilo a.






Eitur kan siam zo chu room lamah chhohsan mai ka tum laiin Sitting room ah Lalrinhlua nen kan intawk hlawla, "Kan inhmuh loh chhungin i lo van cher ve, i pasal chuan a duat vak na che nge a?" min nuih suk suk chungin a ti a, chhang lemlo chuan ka kalpel maia, pen hnih thum bak ka pen hmanlo ang tih ah ka hnunglam aṭangin ka banah a lo pawt chawt a, "Inbe lawk ang, reilo te" tih leh min pawh a rual zui a, ka ṭang viau nain tha a ngah si a awmzia a awmlo kher mai.







In hmalam veranda ah chuan min pawt chhuakin inhmatawn chuan kan indinchilh ta ran a, "Enge i sawi duh chu?" chang fek fawkah ka tih laichuan min lo nuih sawng a, a ngeiawm duh ngang mai bawk.






"Engvanga min la haw em em nge maw i nih leh, i tan hian awmzia ka la nei tihna a ni thei mai angem?" a sawi rualin thawk ka lo la hak a, "Awm anglo lutuk" ka ti zui hlaka, engtin nge chutiang zawngte a a lo la ngaihtuah ngam zawk le.






"Thil pawimawh sawitur i neih loh chuan kalsawn rawh, biak ṭulna che engmah ka neilo" tih leh nam ka rual a, chu veleh ka kutah lo manin a lamah chuan min pawt nghal zawt a, kan intauh lo chauh a ni, ka kawngah a rawn vuan zui a, keiin ka lo nam ṭang ṭang thung, "I cher hian i nalh ka ti, a hma kha chuan ka duh aiin i thau deuh a, tunah hian i nalh tawh khawp mai" kun hniamin ka beng bulah a rawn ti sar sar a, zu rim a nam a rui tak phei chu nilo, thahrui pawh a ngah lutuk tlat.







"Min thlah vat rawh midangin min lo hmu ange!" min lo hmuh ka hlau ngei mai, ka thinphu a ranga, ka hlauthawng hle bawk. "Hetah kan awm tih tuman an hrelo" ti leh supin ka bengkawm chu a hmuiin a rawn nul nghal thuak a, a chet dan chu tenawm tak a ni, ka theihtawp tak meuhin lo namsawn ka tuma a nin a tum lui ve ngar ngar bawk.







"Min thlah vat lo anih chuan a pawithui khawp ang" ka vauna awka chu engah mah a ngailo, ka kawnga a vawnna chu ti nghet sauhin min kuah beh ṭalh chu ala tum a, ka tihngaihna hrelo chuan a ban puamah ka seh sak ta nghek a, min thlah chiang ta kher mai.







Rapthlak ti zeta min enin min chek tlat tlata, keipawn chutiang tho chuan ka en ve a, ka thinrim em vangin ka taksa te chu a hit mup mup ni berin ka hria. Inchhunga luh ka tum chu min lo danglui ta zel a, a hmaiah chuan ben sawk mai ka duh tawh hial, mahse, chutih laimek chuan thawm a lo awm a, khawngkhar rawn innam hawng rawpin Reny a lo lang zui zat bawk.







"Hmeli i chak dawnlo lutuk" tih leh rawn tlan phei a ruala, min khawih mai tuma a lo phar chu Lalrinhlu-an a lo dang bet a, min ti hamhaih kher mai!





"Min thlahrawh mi tenawmpa, in pahnih hian ka that dawn che u" ti a rak ruai chungin Lalrinhluan a chelhbeh na aṭang chuan min lo ban tumin ala tal fat fat a, kan thawm hriain midang an lo chhuak sap sap bawk.






"Engthil nge ni?" Michaelan a lo ti vat a, chhang ngaihna pawh ka hrelo, a zahthlak duh kher mai, Alawmi lo kalin ka bulah chuan a lo dinga, Reny thinrim inhrosa chu kan thlir ṭhup ringawt tawh, a rui bawk si a, zahpah a nei tawh derlo.







"Min thlah rawh ka tih chû......min thlah vat rawh ka ṭhen che a nia, i hria em ka ṭhen che" amah chelhbet tu Lalrinhlua sam leh kawrte chu a ṭham buan buana, pakhat lahin thlah a tum bawk silo a, an insual a ni thawthang mai.







"Nangté hi engah nge maw buaina i siam reng mai le!" tih pahah Michael an a pawhsawn lai chuan keimah zawk chu min rawn bitum leh mai tumin a rawn che zui ruai a, Michaela leh Lalrinhluan an chelh bet leh thuaia, chuti chung chuan ṭawngkam che pui pui in min ankhum reng bawk.






"Hmelchhe sual leh tenawm i nih kha, ka u hnenah ka hrilh anga a ṭhen nghal ang che, kan chhungkaw zingah te engtin nge i rawn tel ngam zawk a, zahna chang te i hre ve em?" Reny min ṭawngkhum dan vang chuan midang awmve ho chuan zawhna mitmengin min en hlawm a, "Enga tinge hetia a awm a?" Alawmin a lo ti bawk, "Englo....a lo lang thut a....thil hriatsual a nei a niang" ka ti bah nak a, chhan pawh ka chhang hleitheilo, Rinhlua nena hnai taka kan indinchilh lai kha a lo hmu anih mai hmel.






"Ṭawng zuah zuah suh" Michaelan ti vin hlukin Reny chu khap a tum a, alo ngaipawimawh lo nasa mai, a aia uar sauh chuan a ang zui leh a, "Pui, henu hi anih hi, Mumbai a Hlua lo kawptu kha, engkim hre sa vekin ka u te a rawn nei ngam a nih hi, tenawm lutuk" chil min rawn chhak ṭhat a, chuveleh "Mambawih lo kalsan rih rawh u" Michaelan a lo ti vat a, Alawmin min kalpui mai a tuma ka duh bik rihlo.






Insawifiahna ka neilo anih chuan tunah hian ka pasal unau leh an ṭhiante hian hmeichhe tenawm tak hmuhin min hmu dawn tih a chiang reng.






Ṭawng ve ka tum chiah chu Alawmin min lo ṭawng khalh a "Enteh, Reny thil i hriatsual a nih kha, he thilah hian Mambawihin tihsual a neilo a nia, i bialpa zawk kha i dem tur chu aw, ani khan Mambawihi leh nangmah kha a bum ve ve zawk che u a lawm...kha tin" a sawilai mek chuan Alawmi hmaiah chil a rawn chhak leh ṭhawt a, a rui lungpuam bawk nen awlsam te a bengdaih mai chi a ni dawnlo niin a lang.






"Enge thil awmzia hi, nang leh Hlutea hi inlo inkawp ṭhin tih chu a dik em?" Apuiin a lo ti he haw a, "A rei tawh lutuk, i u nena kan intawn hma daihin a nia" ka lo ti hap a, Lalrinhlua chuan engemaw sawi ve sela ka ti kher mai mahse, a ngawi tlata, insawifiah pawh a ti harsa zo vek a ni.






"Tunah engmah an inkarah a awm tawhlo, kawppui an nei ve ve tawh a, buai leh na tur a awm tawhlo" Alawmin a ti leh a, ani pawh a lawmlo ve hle tawh.






"Anih he lai thim zingah hian enge in lo tih dun a?" Apuiin a lo ti leh khauh a, chuzawng ka chhan tur niin ka hrelo, Lalrinhlua chu ka va melh a "Sawi ta che" ka ti ram hmak a, a chet dan mawilo tak kha sawichhuah leh pawh zahthlak tak a ni.







"Sawi vat rawh enge inlo tih dun kha, in infawp a ni lawm ni" Reny chuan a lo ti vin khar khar a, Rinhlua sawi tur hrelo hamhaih hmel chu kan thlir ṭhap mai bawk, Reny te unau chu a en leh ringawt ṭhina, a sawihreh hmel em em lehta nghal a.






"Eh..engmah chutiang lampang a awmlo!" a ti dek dek chu "I sawi duh loh chuan ka ṭhen vang vang ang che"Reny chuan a lo ti bak hlur a, Lalrinhluan kei min lo melh leh kher chu ngaitheiloin a hmaiah chuan a lo beng nghal sawk mai bawk, Michealan a chelhbet leh thuai a.






"Engmah kan tilo, amah sawn biak duhna che ka nei a tia, min ko chhuak a lawm, kan inbe ringawta engmah a bak a awmlo" thawk kan lo la hak a, engtin nge chutia ka hmaihma ah ngei dawta min la puh ngam zawk ni "Biak duh na che ka nei ka lo ti a maw!" ka thinrim luatah ka aw chu a khur thei hial.






Kei min enloin Reny chu a en a "Min ring rawh duati engmah i ngaih ang kha a awm lo ania, ka phatsan tawh ngailo ang che tih ka sawi tawh kha, henu mi nupui lakah phei chuan a teuh tawhlo lutuk, a hma pawn nangmah a nih kha ka thlan zawk che" Reny darah a kut khing hniha vuan chung chuan a ti zui mawlh mawlh a, thawk a chham zo mai dawnin ka hria.





"Anih helaiah hian enge in lo tih dun?"




"Ka sawi tawh kha, thil engemaw sawi duh a neia, ṭhian ang chauhin a lawm kan inbiak" a insawifiahna ah chuan ka lungawi hleithei meuhlo, ka lo insawifiah veleh anih chuan buaina ka ti punlun dawn tlatin ka hre bawk si, Lalrinhlua zawkin min pawt chhuaka, mawilo taka min chhaih thu te kha sawi ila engtin nge an lo ngaih ang, ṭhian ang chauha kan inbiak thu a sawi chu ka pawm thei maia, keiin ka ko chhuak anga a sawi tel kher erawh ka helh ngang mai thung.






"Enga tan nge ka bialpa hi biak i lo duh chu sawi rawh, lo thlem i tum a mi a?" Reny chuan a ti leh ta rênga.






"Ka koh chhuah a ni lo, i bialpa lakah khan engmah sawi tur ka neilo bawk" ka ti ve ta fak a, Lalrinhlua zawk chu sawifiah turin a ti leh a, kan piah lawka Judy te ṭhian hoin nuihzat hmel zeta min lo thlir ka va hmu ngat phei chu ka bing chuk chuk a ni ber. Alawmi kut chu ka hmer ngar ngara, ka tawt up up mai bawk.






"Ka sawi kha amah sawn min ko chhuak a lawm, enge a hnenah sawn sawitur nei sela min tih a, ani aisawn kei min ringlo zawk tihna a mi?" vin fahrana Lalrinhluan a tih leh takah chuan thip fahranin Reny chuan min rawn melh leh a, Lalrinhluan a ban lo vawn a tum chu phihthla nghal sawkin an inpawt zui chawt chawt chu ngawirengin kan lo thlir a, sawitur a vang duh ngang mai.






"Ngawi rawh?" Rinhluan a ti vin ṭhawt a, Reny che pawh a tawp chiang hle.






"In monuin min beisei chu enge ka thiamloh na, ka thiamloh anga i ngai tlat dawn anih chuan i duh leh min ṭhen mai rawh"






"Lo ngawi teh aw" ka aw chu a ring ṭha viau, an vai chuan ka lam an lo hawi nghal ṭhup bawk a, zah ah la thei pawh ka ni tawhlo, hei bakah mualpho leh tur pawh awm chuangin ka inhrelo, ka insawifiah ngei ngei a ngai tlat.






"Kei beisei lo che a, chutiang chuan engtikah mah ka awm lo bawk ang, biak duhna tur chhan che engmah ka neilo bawk, min pawh luih ṭalh vanga helai hmuna awm chauh hi ka nih hi aw" thinrim luat vanga thaw sak sak chunga ka tih lai chuan Michaela lo inrawlhin Lalrinhlua chu inchhung lamah a pawt lut dawr dawr a, Reny in a umzui nghal thuai bawk.






Ka thawlak a rang hle a, ka hnuk a ulh hial mai mahse, ṭap lo turin ka insum ngar ngar a, Judy te ṭhianho hmuh laia ṭah ngat phei chu ka duhlo hul hual a ni, JH-a ka ngaihtuah lo theilo, awm ve sela chuan hetiang tehhrep hi ka chungah a thleng hauh lo ang.






"Engahmah ngai duh suh, JH-a lo haw sela kan lo hrilh vek dawn nia, duh duh a inpuh ringawt zel mai, ka ngaihdan a ni tawh em emlo" ka darah min lo kuah pahin Alawmin a ti sap sap a, Apuii hmela zawhna awm chu chhan chakna pawh ka nei tawhlo mahse, min zawh a chak hle tih chu a hmelah a lang thei.






"A va lo inzêp rei thei deuh ve le" nui hak chungin Judy'n a lo ti ve a, Alawmin alo melh rum kha kha a, engmah sawi zui tawhlo chuan inchhungah an inzuilut a, chutih laiin inchhung lamah thawm a ri hlut a "Kal nal nal rawh" Michaelan a tih ri kan hre zui bawk.






Hmanhmawh deuhin Lalrinhlua a lo chhuaka, kawngka bula Apuii lo ding chu a rawn su her deuh lawk a "Enge maw i hriat chu le?" Apuiin a tih pawh chu ngaihsak loin kawta a Bike chu a tinung sawk sawk a, chak lutukin a tlan chhuak zui a, Reny lo tlan chhuak vein a au zui chiama, Gate a a tlan chhuak chu Apuiin a zui ve nghal bawk a, midang ho chuan ngawirengin kan lo thlir a, thil thlendan thut thut chu a hilhhai thlak lehling viau a ni.






"Hahthlak hlawm lutuk, awmkhawm a pianga buaina nei reng hlawm mai" phun niah niah chunga Michaela lo chhuak leh chu kan bulah a lo dinga, "Va luhsan daih rawh u, Apuii nen kan lo buaipui ang" a tih takah chuan Alawmin min pawt lut thuai a.






"A rawn ang lut leh ringawt anga a nasa ve bawk si, han mu daih rawh" Alawmi chuan a ni nang nang a, Room ah kan inzui chho a, rei deuh chu khumah ṭhuin kan titi duna ka thinphu chu a la pangngai hleithei meuhlo.






"Enge kha pa khan i bulah a sawi a?" Alawmin a tih chuan thil awmdan chu ka lo hrilh vat a, a thinrim thar leh hnu hnawh a, "Keiman ka zuk sawi teh ang, nang chu lo awm rawh, i thawhah a chhuak leh palh ang" tiin a chhuak zui vut a, enge inhnuai lamah chuan thleng ka hre zui tawh lo.






JH-a ka phone, khawkar kawngah signal a neilo ni ngei tur a ni Call a tlang thei lo a, thil thleng te chuan min ti chau nghulh thei mai.






Rei vaklo ah Irene-leh Alawmi an lo luta, "Midang chu an haw tawh a, Reny pawh Michaelan a haw pui tawh, keini chu kan riak ang" Irene-in a ti a. "Reny bialpa kha Mumbaia kan ṭhenawmpa kha a lo ni reng a law, a ang kha ka ti deuh reng a" a ti zui niah niah a, chhan pawh ka chhang buai peih tawhlo, Alawmi nen chuan an ti ti dun sap sap a, Apuii lo lut vein Rinhlu a nena kan chung chang chu min zawt mawlh mawlh a, zep awm miahloin keiin ka lo hrilh bawk a, Reny bulah pawh a lo sawifiah ve ngei ka beisei bawk.






"Hlua thiamloh a nih chu, a lerh kha ka ring hrim hrima Reny lah hian a ringbur a, han sawisel sak lah hi a haw bawk si a, a buaithlak khawp mai" Apuii chuan a ti ve a, "Mahse, zanin chungchang hi chu ka U Tluanga bulah sawi chhuak lo ila a ṭha ang, Reny te kha an inṭhen hlen thei tak tak lo anih phei chuan chhungkaw buai leh na tur tho a nia, duh leh Michaelan hrilh sela, keini chu lo ngawi tlat ang u" a zui mawlh mawlh a, a ngaihdan chu thil ṭha ber ni pawhin ka hrelo, Alawmi ngaihdan pawh a ni bik vak lo aniang, min rawn en in a ner nang a, engmah phei chu a sawi zui hranlo.







"U Tluangan Rinhlua bialnu hlui i ni tih a hrelo em ni a?" a ti leh khauh a. A hriat thu ka lo hrilh chuan mak a ti deuh tih chu a hmelah a lang thei. Dar hnih velah Michaela te ṭhian ho an lo let leh a, an sa hemhmin kha an la ei hman silo a, tlaivar law law turin an lo kal a ni.






Keichu chhukthla ve tawhlo a mut nghal mai ka tuma, Alawmi chu chhuk ve turin ka ti thunga, Phone ah Rina nen an inbiain an in hau ve reng bawk nen keilahin ka titi pui luam thei bik silo a, midang bula hun hman chu a tan pawh a nuam zawkin ka ring.







"I duh leh muhil tawh rawh, ka zuk lâm vak anga, zanin chu ka rui chhum hmawk ang" tih pahin min nuih var var a "In tawhlo teh, lo mu ve zawk rawh" ka lo tih chuan "Ka muhil thei dawn chuanglo, Apuiin engemaw ka nei a tia, ka zuk tihpui teh ang" a la ti tak deuh deuh a.







"JH-a ka be theilo a khawi nge a lo thlen tawh ang le, ka meng tlang ve zawk dawn a maw ni?" ka ti niah niah a, ka phone tlang thei bawk silo chu ka ngaihtuah ngang mai. Rei lo te chu inhnuaiah chuan ka chhuk veleh a, ka lu a rih zual tak em vangin mu turin ka chhohsan a, ka damdawi ka ei te te a ka mutfel leh meuh chuan dar thum a ri hnai thuak tawh.







Khawvar lamah chuan ṭawng thum deuh bal bal ri hi ka mang hriat ruai ruai a, ka bulah lo muin duat deuhin min lo kuah a, ka harh chiang hleithei meuhlo. Puan min sin ṭhat tirin a tho leh a, men ka tum ngial pawhin ka meng hleitheilo, reilo teah ka muhil leh thuai a, zing ka harh leh meuh chuan ni a lo tlangsang hman viau tawh nghe nghe.






Ka bula mutna chu a ruak huai a, khum piah lawka leather Jacket in bang ka hmuh chuan ka pasal a lo thleng tawh tih ka hre nghala, ka thawmhnaw thlak sawk sawkin ka inphih harh vat a inhnuai ka thleng thla chu thingpui no dawm chungin Liansangzualan min lo nuihsanga, a mut a chhuah hmel ngang mai bawk.






"In lo thlenna a rei tawh em?" ka lo ti var a, "Minute sawm vel, nizan chu inva par nasa awm ve a" Sitting room lam melh zauh pahin a ti a, ka va hawi phei chu chhuat leh sofa ah chuan zan lama kan inleng te ho chu an lo thal phung mai chu niin, zu bur leh Cigarette bung a let rem rum bawka, an thil eina bangnawi leh plate te nen inchhung chu a hnawk ṭha kher mai. Nula ho lah an la mutui nasa maia, khaih thawh ngam chi pawh an la nilo.






Inhnung kawngkhar lamah thawm a lo awm a, Hmunphiah keng chunga JH-a lo lut chuan tawi tein min nuih a, a chau hle tih chu a hmelah a hriat theih.






"Christmas chibai ule" Liansangzualan nui ṭhâ chungin a lo ti a, chhan pawh ka chhang let lo, chutiang bawkin JH-a pawn.





"In chau em, lo han mu hahdam rawh u" ka lo ti sawk sawk a, "Heng ho hi kaitho la chhuahtir vek rawh" tih pahin chhuata zu bur chu a chhuih ri nghal rawp a, a inthlahrunawm duh ngang mai.






Apuii te mutna room lama a phei laichuan "A chau deuh anih dawn kha" Liansangzuala a lo ti zauh a, "A nih ka ring a thin pawh a chhe tâk mai alawm" nui chungin ka lo ti ve a, awm erawh a nuam duh vaklo.







"Puii tho ula haw rawh u, inkhawm in tumlo em ni?" Room chhunga a tih bul bul ri chu ka hre pha, a lo chhuak leh chuan min rawn melh zauh a "In chhungah chuan zu ken luh tir loh tur a sin" a ti leh hmuk a, ka inthiamlo viau nain nizan kha chu tumah khap theih tak tak pawh an nilo, a tir te kha chuan kan no an hmang tur te kha ka lo phallo ve ngei maia mahse, midangin hmuh loh lamah an lo ti leh zela, inkhap sen tak tak a nilo, ka pasal unau te, a farnu te an lo ni vei bawk nen, lo inlak fekfawn chiam kha a nuam bik lo a tin ni mahse, hetiang em em an lo khawsak erawh chu ka ring pha bik miahlo thung.







"Michael, tho ula haw rawh aw?" Sitting room a aw thum dut dut chu Liansangzuala nen kan ngaithla reng a, choka hnawk ka tihfai lai mekin tlangval ho chu an lo tho chhuak a, an hmel a pawr hlawmin zu ṭhing rim an nam huam hlawma, an mutna vel hnawk chu ka va phiat fai zung zunga, "Heta riah ka tumlo a sin mawle" Michaelan a ti nang nang chu JH-an a melh tur khai a.






"Va Inphihfai vat rawh, Victora rualin haw la, i Bike hetah dah ang che" a ti chang bula, "Ka khalh thei alawm" a lo tih chuan "Ka sawi ang chuan ti rawh" pakhat chuan a lo ti leh hluka, a changzui ngam tawh biklo.






"Puii te kha va kaitho rawh, Victora rualin haw thla rawh se" ka lam hawia a rawn tih leh takah chuan Apuii te mutna lampan chuan ka kal thuai a, khumah Alawmi hoin an pali chuan an lo mu kawisawi nuai maia, JH-a kha a va lut mai bawk si a, an taksa a lang thui hlawm bawk si nen ka ip ru nasa ngang mai.







"Apuii, Alawm..tho tawh ru, a tlai tawh a nia" ka tih laichuan ka koh loh ber Judy a lo tho chhuak nulha "Dar engzah nge?" mit nuai chat chat a tiin khum aṭang chuan a lo chhuk thuai bawk a, midang erawh a la che ve eihlo.






A sir bera mu Irene-i chu ka sawi nawk nawk a, chutih laiin choka lamah Judy ṭawng ri leh JH-a nena an inbe ri chu ka hre pha a, "Merry christmas" Judy in a tih ri te pawh. Liansangzualan a lo be hluta, chutih laiin nula muhil ho tho duhlo chu ka sawi nghal nawk nawk a, Apuii leh Alawmi an lo tho a, Irene-i erawh ala let hlawm ta reng a, ka kaitho lui peih ta biklo.






Judy chu a che zung zunga "A zia lo tak tak a ni, nizan kan mengrei lutuka" a ti nang nang a "Aw...nizan te chu khatiang tur kha a lawm, kum hlui pawh kan thlah ho leh ang chu" Apuiin a lo ti ve thunga, a u hmel a hmuh erawh chuan a ngawi zui ta hmak a, ka lam lo hawiin lei a rawn chhuah tet tet a, keipawn ka pasal chu ka be ṭha ngam meuhlo chu a ni.







"Tukṭhuan chu i eilo ang maw?" ti a Liansangzuala a biak chuan a aw chu a nelawm ve ta deuh a "Ka nuin kan lo nghak dawn che a tia eilo mai ang i motor ka hman theih dawn tho chuan" Liansangzualan a lo ti a.






"Heng ho hi i Drop nghal law law dawn nia, zanriah eiturin lo kal leh la" JH-an a lo ti leh a, "Tunah kan haw nghal dawn maw, ka inkhawm peih pawh ka ring chuanglo a, chaw ka ei nghal ang chu ka lo ti a sin" Apuiin a lo ti he haw a, JH-a hmel chu a dur ṭha kher mai.






"I urlawk nasa viau a ni lawmni, alo thleng ta chenga i lawmleh vak si na nge?" chiang fek fawka a u in a ti chu chhan zui ngam chi pawh a nilo, a ngawi ta dâka a kalsawn zui nal nal bawk.






Tlangval ho chu an inkhalh haw sap sap a, Zosangliana leh Michaela an la awm thunga, Michaela chu a u in a Bike chahbi a chhuhsak hmak mai si a, a ṭhu tum bur renga hmeichheho insiam an rei bawk nen, a tur sek reng bawk. "Ka phur haw mai ang che, hmeichhe ho chu Vic-a rualin haw sela a nimai a lawm" Zosanglianan a ti ta hlauh a, Victora pawh nghak tawhlo chuan an inkhalh haw a, Irene-i chu Victora motor khalhah a chuang thunga, a haw tur chuan a christmas pocket money tur min dil leh hram a. Alawmi erawh a buai ngang mai, a nuin a lo phone seka, chhung inkhawm neih hmaa haw thleng hman turin a lo ti a, a hmanhmawh chu a phi ruai maia mangṭha pawh kan inmangṭha hman meuhlo.







An haw tak hnu chuan kan in chu a reh ta huai mai, kan room lama JH-a chho chu ka umzui thuai a, "I inbual hmasa dawn em, i mu phawt dawn nge, chaw kan ei hmasa dawn?" ka ti sawk sawk a, inbual a tum a niang, a inphelh nghal mawlh mawlh a, chutah ka lam lo hawiin "Nangmahin lo va inkhawm mai ta che, ka chau riau mai" a ti zawi supa, ka beisei ai daih a nelawmin min chhang chu kei hahdam huai thung.






"Nia, lo mu hahdam rawh" nuisangin ka lo ti ve a, ka lam rawn panin uar zet mai hian min rawn fawp a "Christmas chibai le" aw thum dut hian a ti a, chumi hnuah Bathroom ah a lut zuia, awm a ti nuam veng veng thei mai nia!







A inbual laichuan eirawng ka lo bawl a, a mu nghal anih ka ring a lo chhuk leh tawh mailo a, room a ka han chhoh laichuan a lo mutui ngang mai a, a chau tawngkhawng viau a ni ngei ang.






Chaw ka eisana, chumi hnuah inkhawm turin ka insiama, ka kalchhuah dawnah chuan a lo harh zawka "Kawngka kha pawn lamah i lo kalh mai dawn nia" tiin a mu ṭha leh a, dar rik a hun tak vangin keipawh ka kalchhuak thuai a, Biakin ka thlen chuan inkhawm hun an lo pawt tlai tih ka hre ve chauh a, darkar khat vel zetin ka thleng hma a ni, haw leh a buaithlak ting tang tawh vangin Biakin kawtah chuan inkhawm hun haive tho midang te nen chuan kan ṭhu ho a, Christmas tuk a nih vangin inkhawm pawh kan ṭhahnemin kan banghar viau mai, kan ban leh meuh chuan chawhnu alo ni der tawh.







In ka thlen chuan a lo la muhil a, a phone ri pawh a hre derlo, a phone chu ka lo chhansak a, Liansangzualan tihtur pawimawh a neih vanga a lo tlai deuh tur thu a lo sawi a, "Eng chawhmeh nge in eichak ang, nizan chawhmeh chuang a tam lutuka sa chiah ka lo siam thar mai ang" ka lo ti var a, "Kei chu ka eithei vek, in pa duh duh kha siam rawh, uisa ka lo khai ang; chuan tu emaw ka lo hruai dawn a nia" a lo ti a, Fiona-i a nih ka ring.







Kan inbiak zawh chuan khum sirah ṭhuin ka pheikhawk ka phelh mawlh mawlh a, ka lamah rawn tawlh hnaia ka kawnga a lo kuah takah chuan a lam ka lo hawi vata, a mit ala chhing siar siar reng a, a harh peih nganglo anih hmel.







"Liansangzuala alo tlai dawna, Fiona i a lo tel bawk ang, eng sa nge i eichak" a beng bulah ka ti sar sar a, "I kawr kha phelh la lo mu rawh" that chhe aw zetin a lo ti thung, "Ka la inthlaklo a, in tihfai te pawh ka ngai a sin" ka ti maia, zingah khan chhuat ka la nawt hmanlo a, pawn pawh zanlama an sa hemna leh an meichhemna vel kha tihfai ka ngai bawk.






"Tlaiah ti la...ka chau lutuk.. ka ngai che a... ka kuah duh che, lo mu ve phawt rawh" tiin min kuah nghet sauh a, a inla pangchang thiam ve ngang mai. Inthlak tetein ka Nighty ka ha a, a bulah chuan ka va inthawlh nghalthuai a, a nin min lo kuah nghalthuai bawk.







Rei lo te a chhing leh seka, chumi hnuah mu chungin kan titi dun sap sap a "Nizan chu enge a an a?" ti a min zawhna chu ka chhang mumal meuhlo, "Liansangzualan motor a khalh chhawk lo che a mi?" tiin ka zawt let vat a, "A mit a chhe lutuka, zanlam chu a khalh theilo a, kal lam khan a khalh thunga" a lo ti a, nizan lam chungchang bawk min zawt leh a "Lo phalloh tlat mai tur a nia, sawi lawkna chang ka lo hrelo a ni" a ti zawi sup a, kei ka lo nui mai thung.






Apuii khan sawilo tur khan min ti si a, rilru a buai ru riau a, ka hrilh anih chuan a phûl leh hlut anga Reny lakah a ṭuan ringawt ang tih ka hlau si a, engmah ka sawi duh ta lo. Dar thum dawnah tho chhuakin kan inbual a, kan inpeihfel hnu lawkah Liansangzuala te pawh an lo thleng a, Fiona-i ngei mai alo hruai bawk.






Bawngsa JH-an a siam a, keini in Salad kan chana, Fiona-i a titi siam siam renga; Liansangzuala lah chuti bawk, an bula awm chu a hahdamthlakin nizan kan boruak nen chuan dang hlei tak a ni.







Ei kan rel zawh ah inhnunglam kawt chu ka tifai leh a, JH-an min lo pui bawk a, Liansangzuala te pahnihin Veranda ah Chair lo la chhuakin ṭhu chungin min lo thlir dauh dauh a, kan nupa chuan min lo fiam leh zauh ṭhin.






"In chungah han chho la, khum bul chair ah khan ka Leather jacket ka bang a, ipte ah khan Victora Pendrive ka dah a han la lawk ta che" inchhung kan luh hnua JH-an a tih chuan inchung lamah ka chho nghal thuaia, pendrive la a chhuah leh mai ka tum chu khuma ka phone dah lo ri zauh vang chuan ka let leh a, Message ka dawnga, ka number hriat ngai a nilo, ka Message dawn ka en chiah chu ka nghilhdup maiin ka hria!






Ka hmuh sual emaw tiin ka en nawn leh ngata mahse, danglam a awmlo, thlalak a mi chu chiang tak maiin keimah ka ni.




"Engtin nge a nih theih zawk?"





Thlalakah chuan tu emaw awm nghengin tui em emin ka muhila, ka awmbawr khuhtu awmlo chuan tuemaw chu a ngheng chial mai bawk, tu nge a nih ka hrelo a chiang takin JH-a a ni lo tih erawh ka hria, chuvang chuan ka hamhaiha ka banglo hle bawk!






Ka muthilh hlanin tu nge kan room ah lo luta ka bulah lo mu ang, nizanah khan mipa enge maw zah chu an awm ngei mai a, chutianga ka laka che duh tur chu tu nge ni ang?




Eng vanga ti nge a nih?





Message dang a lo lut a "Thlalak dang tam tak ala awm, video pawh ka nei, midang i hmuh anih chuan internet ah i thlalak zawng zawng hi dahchhuah nghal a ni ang" tih a ni.






Ka call a mahse, number chu a in switched off nghal hmiah mai!






(Chapter kan nei tam tawhlo khawp mai, hemi story zawh lamah hian ka chawlhsan tawh dawn che u a, chumi hma ngei chuan Ads click leh Comment te kha uar em emin min han pe teh unn...)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:10 pm

GOMENASAI - by Ahmangaihi violette khiangte



CHAPTER - 39





Engtin nge hetiang thil hi a thlen theih zawk le? Min fiam chu a ni hauh silo! Engtin nge kan roomah pawh an lo luh theih zawk, kawngka ka kalh thlap si a, ka hrethiam lo hle mai!






Nizan ka mutur khan Alawmi kha ka sawma, a men tlang ve dawn thu leh a lo chhoh tawh loh tur thu sawiin kawngka pawh kalh nghal mai turin min ti a; ka kalh nghal thlap kha a ni sia, kan room chahbi spare lah JH-a chahbi bawrah kan in chahbi spare te nen a awm a; ani a zin daih a room chahbi awmchhun lah kan Drawer ah a awm reng bawk si, chuti anih chuan pawnlam aṭanga kawngka lo hawn chu thiltheih niin ka hrelo, a nih chuan tunge kawngkhar chu lo hawng ta ang?






Kan Drawer chu ka en vata, chahbi pawh a la awm thlap! Ka lungphu chu a rang ṭha kher mai, ngaihtuahna fim ka hman hram hram a ngai tih ka hria, tun hunah hian chiai thei ka nilo, mahni inthunun tumin thawk ka la leh rih ṭhin a, ka thin zawn chu a thip hlura thawk a sak ṭalh mai bawk.






Ka duhloh deuh thil ka ngaihtuah a, chu chuan min ti hrehawm zual a ni, he inah hian ka pasal nena kan chendun hmain lo khawsa ṭhang tawh leh a hmunhma engkim hrechiang tur chahbi thleng pawh a lo nei thei tur chi chu mitlem te chauh an ni, Michaela te unau leh Judy!






"I ringhlel ngawt tur a nilo" tiin ka inhrilh mawlh mawlh a mahse, ka ringhlello thei silo, nizan kan boruak te thil thlen dan te chu ka ngaihtuah leta, thlalak chu ka ennawn leh ṭhin, amak tih bak sawi tur ka hrelo, min ti â riai thei mai.






Bathroom ah lutin ka hmai ka phihsawk sawk a, chutih laimekin number dang aṭangin Message ka dawng leh a "I pasal emaw, i ṭhian te bula i sawi chhuak anih chuan i video hi internet ah upload a ni ang, lo ngawi rengla i tih tur chu hrilh leh i ni ang" Message ka en zawh rualin a number chu ka call leh vata, rei a rik hmain phone chu a lo chhang a, aw chu ka hriat awm ka la hrelo.




"Sawi rawh" a rawn ti chang bul a.




"Engthil nge i tih hi, tunge i nih a?" ka aw chu a khur thei hial. Ka zawhna chu chhangloin min ngaithla reng ringawt a, "Tunge i nih?" ka tih leh pawh chuan min chhang chuanglo.






"I thiltih hi thilsual liantak a nih hi, police hnenah ka report che anga ka man tir ang che" ka sawilai chuan a lo nui hawk a, "Engtin nge min man tir ang, tunge ka nih i hre silo a?" min thamlo fe mai hian a lo ti a, a nui ri te chuan min ti ṭim sung sung thei hial a ni.






"Nizana lo kal zingah i tel a, hriat chhuah i har dawn lo, Cyber crime ah ka report ang che, ka thla ilo lak vangte, hetianga mi i rawn vau vang te hian Jail i tang thei ania, tunge i nih hrelo che mahila anni chuan an rawn chhuichhuak rang khawp ang che" ti lehin ka inti paukhauh lui ve ngara, hlau leh zuamawm tak anga ka lang anih chuan he mihring hian chu chu remchangah hman a hrehlo tih a chiang reng tawh, chutianga lan loh hram chu ka tum bawk.






"A pawi hle mai pi-i chutiang te chu ka lo ngaihtuah lawk ve vek a lawm, keimah lam aichuan nangmah zawk kha inngaihtuah rawh, FIR i thehluh chhungin keichuan thlalak leh video te hi awlsam lutukin internet ah ka dah thei, min lo man tir pawh nila i damchhungin i hming chhe tawh ang, e khai aw....a va pawi dawn ve" a nui zui hawk a, a aw chu a rapawm kher mai.






"Thil liantham tak ka phut dawn hleinem che, vawikhatah i tlak nghal vek thei ang mahse, min kalh zawnga chet ilo la anih chuan ka tih tur chu i hriat kha, thlamuang deuh khan lo awm rih phawt teh" ka ṭawng leh hmain phone chu a dah hmiah a, chumi hnu lawkah video hi min lo thawn a, nizan video a ni a, ka en chhung zawng chuan thawk pawh ka thaw ṭha thei meuhlo!






Ka mang hriat riai ruai a, chiang lo deuh chuan ka hre thei, ka kawr a phelh lai te chu engtin nge maw ka hriat loh theih zawk le "I chau em..." tiin meng manglo chuan ka la kuah let ta zui a, JH-a emaw ka ti a ni ngei ang. Ka mittui a rawn hnama ka phone screen pawh chu ka hmu chiang hleithei tawhlo, ka vai riai ringawt tawh.






Ngaihtuahna a vak kual ruaia thil nithei awm chu a tam lutuk, video a mi chu tupawh nise nizana Michaela ṭhiante zinga lo kal ve kha a ni ngei dawn a, aman camera a kengloa, puitu an awm tih a hriat theih bawk, Michaela a ni a ngem? Nge Judy zawk?





Aw Lalpa...!!! ka â thei takngial dawn.





"Bawihno..." aw thum dutin a tih ri leh room kawngkhar inhawng ri ka hre zuia, ka thinphu chu a rang zual sauh maiin ka hria, inhruhul sawk sawkin bathroom aṭang chuan ka chhuak a, JH-a lo hawi vut chu melh pawh ka melh rei ngamlo.





"Enge itih a, chaw ei kan siam a sin"




"Ka hmai ka phih lawk a" ka sawilai mek chuan chik deuhin min lo en a, "Pendrive chu i hmu em?" tiin min zawt a.






"Hmu e" pendrive chu pek pahin inhnuai a chhuk mai tum chuan ka inher a, chutih laiin ka phone message tone alo ri leh a, rang lutukin ka kawr ipte ah chuan ka khunga, JH-a ka va melh chuan min lo la en ve renga, "Bathroom ah khan i ṭap a mi a, panic attack bawk a mi?" a lo tih chuan lu ka thing vat a, a bulah chuan sawi chhuah vek mai ka chaka mahse, ka ngam hlawl silo, a unaupa thiltih anih ka rinthu ngat phei chu ka sawi ngamlo hul hual a ni.






"Zinga i lo haw khan room kawngkhar hi a lo inkalh em?" ka ti a, meng rang ralh chunga min enin "Kalh lo, tinge room kalhlo te a i muta, hauh che ka lo tum tak a sin" ka hmel a hmuh rualin a ṭawng tawp chawt a, chutah awki thlakin "Thil bo i nei em ni?" nelawm deuh zawkin a ti leh a.





"Neilo e" ka ti mawl tawp a.




Ka hrethiamlo hle mai, Room kha ka kalh ngei a, zingah kalhloh in a awm a, ka chahbi kha hmangin an lo lut nge ni a, chahbi dang an nei zawk niang le, ka chahbi an hmang anih chuan luh nan chauh hmangin Drawer ah an dah anga kalh loin an chhuak ta a ni thei a, chutiang a nih loh chuan chahbi dang an nei a ni ngei ang.






Room aṭanga kan chhuak uk tawh chu "Lo zuk chhuk rawh, kawr lum kan ha leh lawk ang" tihpah a let ka rual a, ṭhutthlenga a Leather jacket ipte chu ka dap nghal chunga, chahbi bawr pawh a lo awm ngei a, kan in leh room chahbi pawh a awm thlap si a, ka rindan engemaw zawk zawk kha a dik a ni ngei mai, Drawer ka kawl lai saw an hmang a nihloh chuan an lo nei ve reng tihna a ni a, chuti anih chuan ka rinhlelh mek te hi ani tih a chiang viau tawh, a tu ber nge ni ang?






Zanriah eilai chuan ka ṭawng tamlo hle a, ka thil ei chuan ka hrawkah min hnawh tlat vangin ka lem ṭha thei heklo. Ka tho hmasa ber a, midang erawh muangchanga eiin an titi bawrh bawrh a, chawhmeh ka suah belh laichuan "I nuamsam lo em ni a?" Liansangzualan a lo ti a, "U Mambawih i nawmloh chuan lo ṭhu mai mai rawh, khawi keiman ka lo suak ang" Fiona in a lo ti thuaia, ka thilken chu min lo chuh nghal vat bawk a, JH-a bulah chuan ka ṭhu leh rih a, a nin ka darah min lo kuahin "Nizan an mengrei lutuk a a chau deuh a nih hi" nelawm tak hian a ti a.






Zanriah eikham hnu chuan reivaklo an ṭhu leh a, Michaela Bike chuan inkhawm turin min hawsan a, kei pawh JH-an Christmas ni a inkhawm loh a hreh vangin phur lo tak chung chuan ka insiama, inkhawm lai a ni emaw englai pawh chuan ka ngaihtuah tluk tluk a ni ber, thildang ngaihtuah thei ziazâng ka nilo.






Zanlamah pawh Message chu ka la dawng ta zel a, enge a duh tih ka zawh lahin a sawi duh mang derloa, a ṭawngkam a bawlhhlawhin a huatthlala awm thei ngang mai bawk.






A tukah ka nu te in lamah kan kal a, an Gate a kan tlan luh laichuan kawtah Judy leh Apuii an lo ṭhu a, Remremi leh naupang dang ho chu tualzawl ah chuan an infiama, kawta Michaela bike a awmlo tih ka hmuh chuan rilru ka siam nghet sauh a, thu chiang hre manglo a JH-a bula sawi leh ngawt ṭhin aichuan mahni inbuaipui mai chu ka duh tawh zawk a ni.






Midang ho chu ruaiṭheh turin an kal a, ni Zualzeli te chhung bakah keini nupa chu in lamah ei kan rel thunga, Liansangzuala ruai ṭheh zo rawn peng kawi chu ni Sangzuali te inah JH-a nen an phei a, an inbawr velah tal tam viau mahse, amah chauhin ala lenglut ngam meuhlo a nih hmel.






Michaela lo haw chu a roomah a lut tlang maia, hmanhmawh deuhin ka umzui bawk a, ka room ka luh laichuan khumah bawkin phone a lo khawih mek a "Michaela, lo tho teh" ka va ti tawng a, ka va lang hlawl chu mak ti zetin minlo en bawk.






"I phone kha ka lo hmang lawk ang" a phone ken lai chu ban ka rual a, ṭha tak chuan min lo pe ve mai bawk a, Number pahnih ka neih te chu ka zawng kual a, a enga mah mah chu a lo neilo.






"Enge i tih a?" a phone ka ken lai rawn bih pah chuan a ti a, "Engmah a nilo" ti hapin phone chu ka pe zui a, a hmel chu chik lutukin ka en zui a ka awmdan chu mak a tih hmel hle reng ringawt.






"Nizana i mi rawn hruai ho kha an vaiin ka hre vek duh a nia" ka ti chang bawla, a hamhaih hmel lehzual.






"Tinge, thil bo a awm a mi?" a lo ti vat a, "Tu emaw kan room ah ka muthilh laiin alo lut ru a, pakhat mai niloin pahnih lehnghal" ka sawilai chuan chik lutuk tak maiin a mitah ka en a, min lo chhawn danah chuan han rin dan ka nei thiam chiahlo.






"Anva mawl ve, eng thil nge bo a, ka lo chhuh sak lehnghal dawn nia" ner nang chungin a ti a, ka lo ngawi ran chu zawhna mitmengin min en zui zat bawk.






"Buaina zawk chu maw, room kawngka kha ka kalh veka, engtin nge an lo luh theih, kan room kawngka kalhna awmdan te chu in hriat kha, i u nen chiah chahbi kan kawl a, lo lut te kha engtin nge an lo luh theih?" ka inthunun ve viau nain thinrima sawi te pawh ka ang lek lek tawh zawk.






"A va mak ve, inkalh chungin engtin nge an lo luh theih a, i chahbi chu i ti bo a mi?" a lo ti he haw a.






"Bo hauhlo, zingah pawh ka dahna ngaiah ala awm a lawm, a spare awm chhun lah i u chahbi bawrah ka dah tel a anin a zinna ah a keng daih bawk a?" a hmelah chuan thil dang engemaw hmuhtumin ka en a ni ber.






"A va mak ve, kawngkhar chu a chhia em?" tiin min zawt leh khauh a.





"Chhelo, chahbi dang an nei zawk niin ka hria, kan room chahbi lo nei ve ngawt tur chu tunge ni ang?" ka sawizawng chuan keimah zawk chu ka thinphu a rang hle a, ka inhumruh ngar ngar a ni ber.





"Nangtê chu, mi te i ringhlel a ni lo maw?" a rawn ti ta phawng a.





"Michael i ṭhian a nia lo lut, ka pawi a sawi hle bawk a nia" ka ti chang leh khawl a, "Enge an lak a?" ka ti leh a, "Thil pawimawh" tih zawngin ka chhang a. "Ka hrethiamlo e a, ka lo zawt kual ang" ner nak chunga tiin min kalpel a, a computer hmaa ṭhuin a khawih zui mual mual a, engtia han tih chhunzawm zel tur nge ka bo riau tawh, min lo chhan danah kan puh dawt theih chhan tur ka hmu der bawk silo a, ka buai ru kher mai.






Chhuah mai tuma ka inher laichuan "Chahbi chu ka u zawt chiang rawh, U judy i a pe ve em?" a lo tih vang chuan ka hawi let leh vat a, "Judy in a nei ve a mi?" ka ti nghalthuai a.






"Ka hre nang, hmanah chuan in chahbi a kawl ṭhin a, an han che CK zeuh zeuh ṭhin alawm" dar chhin ak pahin a hmui a petsawi nanga, ka rilru a buai leh nak tawh, Michaela hi ka ringhlel sual a ni lo maw lê...mahse, Michaela mipa ṭhiante an ni bawk si a!





"I ṭhiante ah khan Judy hmelhriat ṭha te an awm em?"




"Mipa an nia, judy te ang chu tu pawn an be ṭha ang chu, zankhua a zu inpui hnuah phei chuan" min en vang vang a "Judy chu i ringhlel a mi a, i thil a ruk duh chu ka va ring chiah lo e...." a ti zui niah niah a.






"Ka hrelo mahse, ka hre vat ang" ka phone a message lo thleng chu enin Michaela room chu ka chhuahsan nghal thuai a, "Bawihte, vawin nilengin kan thlalak hi ka en a ka ngai riau mai che" tih a ni, Michaela kha ka va zawt phawng mai dawn nge mawni le tiin ka ngaihtuah a, amah a nilo emaw a lo ni emaw ka hrilh a nih chuan midang zawng zawngin an hre ve tluk a ni ang, chutiang chu thleng ta se ka thlalak te kha Internet ah chuan phochhuah a ni a ngem?






Chung zawng aichuan JH-an min ring a ngem tih ah a ni ka buai, hetia ka hrilh loh hian thilṭha a thlen dawn lo tih hre mahila thilṭhalo tal chu a thlenloh ka beisei, engti kawng zawng pawha ka inchinfel vat angai tihna a ni mai.




*JH. LAlHRUAITLUANGA*

IMG_20210318_125155.jpg


"Enge i thilsawi awmzia chu, ka va awih chiah lo e" phawk lek leka min enin Victor-an a ti a, keipawn chiang takin ka hre bik lo mahse, tuna ka rin dan hi a tak tak a ni ang tih erawh ka hlau ru viau lawi a, nupa kar mah nise Victor-a bula ka han sawi mai chhan pawh hetia min lo chhan hi ka beisei vang a ni pakhat, ka nupui ring turin min lo ti sela, ngaihdan diklo tak ka nupui lakah ka pu tih min lo hrilh sela la duh.






"Ka hriatsual pawh a ni mai thei" chianglo tak chung chuan ka ti leh a, Victora niloin keimah zawk chu ka inhrilh a ni mah zawk, mi rinhlelh hi ka tihtheihloh lam tak a ni, min ti hah riau zel.






Thla khat liamta aṭang khan ka nupui chuan ka lakah thil engemaw thup nei tlatin ka hre ṭhin a, han sawi fak tur phei chu ka hria a zeng pawh a nilo mahse, ka lak aṭanga a inlahrang tlat te, a ṭawng tlem em em te leh ka biak changa hlauthawng hmel a pu reng ṭhin te kha ka tan chuan mak tih tur chu a tling ve reng reng , Victora chuan engkim a rawn hmu ve miau lo a, a pasal ka nih na angin ka nupui danglamna chu ka hria a lawm.







"Mambawihi hi chu ka ring ve tlat, nangmah hi i diklo aniang enge maw hlekah in rinhlelh tur a ni ngailo, nupa phei chu inrintawn em em zawk tur, kan inrintawn loh chuan inneihna hi hremhmun pate ah a chang thei a nia" Cigarette ṭan mawlh mawlh pahin ka ṭhianpa chuan a ti leh a. Nih pawh a ni mahna, ṭhiante bulah engkim sawi chu thil ṭha ber pawh a nilo e, mahni intih mualphona mai mai a ni.





Ka Office aṭanga Victora chhuah hnu chuan ka ngaihtuah zui rauh ruah a, Judy thlenga ka ngaihtuah chhuak chu ka duhlo hle a mahse, hmeichhe thil zep nei hi chu chik hranloh pawhin a hai theih meuhloh, ka nupui ngat phei chu rilru lam damlohna a neih vangin ka chik a chuvang pawh a ni zep a nei ni a ka hriat.






Zanah a tho ru fo a, muthilhna damdawi a ei ngai ta miahlo niin ka hria, a mu tlem hle a phone a khawih nasa hle thung, ka hmuh veleh ah a phone a dah nghal vat zela, a hma a Judy awm dan ang chiah kha a ni. Nunhlui sawi tlakloh zet ka lo neih tawh nen khan tunlaia ka nupui awmdan chu ngaihbel loh theih pawh a nilo.






Ka rinhlelhna ti zual tur tingin ka bul hnaiha a phone a chhang duh ngailo a, hla deuh hlekah a kal sawn kher ṭhin, ani chuan ka ngaihven tih a hrelo pawh a ni mahna.






A muthilh hlanin a phone chu ensak ṭhain ka hria, privacy hi ka ngaipawimawh a, a phone in check sak tih angreng hi chu ka tih ngailoh tawp thil a ni. Mahse, tunhnaia ka nupui awm dan chuan chutianga tilo theilo chuan min siam ti mai teh ang.






A phone chu en a har hrep mai, a muhil ve ngai tlat lo a, chhun lamah a muhil ṭhin a nih ka ring. A phone lah a hum chawt reng a, chu ringawt pawh chu thil pangngailo tak chu a ni.






Tlai khat Office aṭanga ka haw chu pawn veranda ah Manuntei nen an lo ṭhu chhuak a, an bula ka va ṭhut veleh a ngai te bawkin side table a a phone dah chu a ak ṭha nghal hmak a, a mitmeng tlanchhe ruak te chuan ngaih a tiṭhalo zual ting mai bawk. Zanriah kan eilai pawh chuan a ṭawng tlem ngang mai, a hmel lah chu a dâng em em a khawsik hluah te pawh a ang zawk lek lek. A pang ka dehsak chuan a dai diaia "Ka dam ṭha alawm" a lo ti maia, chaw lah chu a ei tlem hle bawk.






Liansangzuala a lo leng a "A doctor hi ka phone sak ang, a Anxiety hi a nasa niin ka hria" ka lo ti a, ani pawn min lo thlawp khawp mai. Liansangzuala haw hnu lawkah Doctor phone ka tum lai mek chuan inchung aṭangin a lo chhuk a, eng thil emaw hi a lo keng a, ka bul a lo thlen rual chuan a thil ken chu min lo pe a, ngawirengin ka lo la a, sawi tur engmah ka hrelo, min ti hamhaih hle ringawt.





Ka nupui a rai! Huhhhh....Ropui tak zawng a ni.





Engtin nge ka lo ngaih tih hriat tumin min lo en ran a, a lakah chuan engmah sawi tur ka neilo, Pregnancy test kit chu ka pe let a, "I rai a maw?" ka ti chang bul mai bawk.







"Aw, tinge i lawm lo a mi?" a hmelah chuan inthlahrung hmel ka hmu nghala, lawm chu khawilam ka thinur hle a chu chu thunun tumin ka insum ngar ngar zawk a ni.






"I van lungawi loh hmel em em?" a lo ti leh a, maktih hmel takin min en bawk.





"Nang i lawm em?" ka ṭawng dan chu a ngeiawm lek lek ta ve ang.





"Aw, lawm e, tun ṭum chu ka paitluang tawh maithei a sin" a ti leh a, thinur luatah nuih te pawh a za lek lek zawk. Ka rinhlelhna, engthil emaw awm ni a ka hriat kha hei hi a chhanna chu a lo nih ngei hi.



"Lalthanpuii hian nau a pai anih chu!"




"Enga, tak tak maw?" kei ang chiahin Victor a pawn mak a ti a, za lo zeta ka lo nui hawk chu min enin "Engtin nge i tih dawn?" tiin min zawt a. "Ka ngaihtuah mek" ka lo ti ram hmuk a, "Tunge niang, nangmah nih theihna chance a awm em?" a zawhna chhanna chu pek hran a ngailo tih chu a hre ve tho ang.






Hna ka ngaihtuah theilo a, thildang reng reng rilru ah a leng theilo, ka ngaihtuah tluk tluk a, min ti buai chhiava a ni. Insum theihna neilo lekin ka che zui dawn nge tih ah chuan ka inkhap buai nasa mai bawk. Ka hmangaih êm a, chuvang chauh a la insum hram hram thei chauh chu ka ni.






"A ngaihzawng chu tunge i hre thei em?" Victora thil rawn sawi dan kher chuan min ti thinur zual a, dawhkan hnuaiah ka in humruh ṭeuh reng. "Engtia han chinfel nge i tum a?" a ti nawn leh a "Eng ang kawng zawng pawhin ka chingfel vat ang" tih zawngin ka chhanga, tharum ka thawh duhlo ang tih ka sawi theilo, ka thinur a tlawm ka intiin ka zak hle bawk, Bomb puak tur inṭham vel ang mai ka ni.






"Chiang takin thil hre phawt la a ṭha ang, a ngaihzawng chu tunge tih hriat a pawimawh hmasa a nia, amah lo tawng vak rih lo la" Victoran a ti leh a, chu zawng ka insum theihna in min daih dan a zir a niang chu. Ṭha taka Lalthanpuii a inpuang duhlo anih chuan a ṭham pawh kan inṭham chhuak lawp tawh anga a ni mai, duat leh dimdawi lutuk a ka enkawl vang khan palzam mai mai theihah min lo ngai ania nge, ka dawhtheihna hian tawp chin a nei ve bawk.






Ka haw dawnah min lo phone a "Thei leisa kan lo nei tawhlo a, i lo lamkawi hman em?" inthlahrung tih hriat zet hian a lo ti a, nizana a naupai thu min hrilh a ka awmdan vang khan a inthlahrung nge ni a chhan dang vang zawk tih pawh ka hre tawh neklo.







"Ka hman ka ringlo, kawnah chhuakla lei mai ta che" ka ti tawl a, ka sawizawh rual chiah chuan inthiamlohna ka neia mahse, ka inthiam chawp leh vat thung, haw vat chi pawh ka ni dawn emaw ni, nizan kha chuan ka hamhaih em vangin ka insum thei mai a mahse, vawin zet hi chu ka insum thei angem tih ka hrelo.







Liansangzuala kalchhuak tur chu in tur ka chah a, tlai banah an in lamah kawiin a room ah kan indun a, inbe loin kan lem sek a, zu inṭhanglo tih takah ka kai hma viau mai, inbelh leh mai ka tum chu ka no min lo chhuhsak a "Duhtawk rawh, motor khalh i ngaih kha" tiin kan thil inlai chu a seng hawi thuai a, min lo hmuaktu tur hriatsa ni bawk chu pheikhai a zâng duhlo teh e.







In ka thlen chuan ṭhutthlengah a lo mu a, ka hmel a hmuh rualin a lo thochhuak thuai a min biakna chhanglo chuan "Min lo zui teh" ka ti vin hluk a, room lam pana ka kal chu min lo zui ve nghal mai bawk.






Engthil in nge min mawlh ka hrelo, a mitmeng mawi ka tih em em ṭhina min melh laichuan ka ka a chih zo ni berin ka hria, ka kawrchung phelh tur chu min lo pui vatin min be seuh seuh renga, a thilsawi pawh ka hre mumal lo, "Naktukah in entir ka ngai dawn a" a tih chu ka hriat chhun a ni. Duh aiin ka rui mah mah tlat.







Ka kamis phelh a tum chu lo nam sawn rawkin khumah chuan ka bawk thlawp a, ka harh leh chuan zan dar 10 a lo ri der tawh, ka bula ka nupui muhil thaw sak sak chu che chang loin ka en reng a, tunah tak hi chuan ka chhungrila natna leh thinurna hi a inzat thuakin ania ka rin ni.






He hmeichhia hi ka hmangaih em asin, engkim dang aiin ka thlang a, a tan tiin ka chhungte leh ka ro chantur te pawh ka kalsan phah hial anih kha. Midangten 'i ti mah mah' an tih thlengin a lam ka ṭang a, Pasal dang ten a an nupui te an tihsak ṭhin ang zawng zawng chu ka tihsak ve in ka inhria mahse, enge ka hlawh chhuah hi!






Khum aṭanga thawhchhuah ka tum laimekin kan lukham pahnih inkara phone chu a lo eng zak zak a, vawikhat chauh a ri hman a chutah rang lutuka lo banin call chu ka chhanga, mipa aw vin angreng zet hian "Hotel Fino ah zirtawp chawhnu ah lo kal ang che, hun ka nei bik vaklo a nia, ka nghak thlawn tawh tur che a nilo" a sawiduh a sawi zo a phone chu a dah nghal hmiah mai bawk.





Hrep chuan! A ngaihzawng anih phiangsen kha.




Phone ka la ken reng lai chuan Picture message a lo thleng a, engmah in zawh leh tur chuang a awm tawhlo!





Ka bula mu chu lo ṭhu chhuakin rang lutukin ka phone ken laichu ka kut aṭangin a rawn pawtthla a, ramhuai hmu ang maia hmel dang sawp sawp chu thinurna nen ka lo en ve thung. Phone chu bihin ka lam a lo hawi leh a "I ngaih ang kha a ni lo" a ti nghal chula, ka ngaih ang nilo chu enge ka hrechiang khat tawh viau a ni.






"Engtik aṭangin nge?" ka aw ri a beidawnna lang tel chu ka duhlo kher mai.






Lu thing chungin ka ban a lo vuan ṭung a, a mittui te chuan thinurna a ti sosang zual mah zawk tih a hrelo anih hi, kut ka thlak mai loh nan ka la insum thei hram hram a ni tih hria sela chuan hetiang hian insawifiah a tum buai hauhlo tur.






"I ngaih ang kha a nilo, miin min blackmail anih hi, sleeping pills ei a ka muthilh hlanin kan room ah an lo luta heti hian ka thla an lo la a, michaela ṭhiante zinga mi... urlawk zan khan..." chutiang chhuanlam dawrawm lutuk chu engtin nge ka lakah ala siam theih cheu!






Blackmail a ti maw....huhh! Hetiang hian keiin man chhuak lo ila a naupai hi ka fa anga lantir a tum chu anih si hi! Tichuan kha a ngaih zawng nen khan Hotel ah inhmuin....hrep chuan.






"Nangmah emaw ka ti a, ka...." a ṭawng tur chu khumah ka vai thlu nghal tawp a, ka inthunun thei tawh ngang lo a ni. Ṭap chhuak hawkin a bek chu a hup a, chutianga ka che mai chu ka inthiam biklo, kut ka thlak vanga na a tawrh aichuan ka thinlung min hlimna hi a na daih zawk.







"Engmah sawi tawh suh...." thawk la hawkin khum aṭang chuan ka tho chhuak a, a ṭap ri chuan min ti chawmawlh zo takngial dawn in ka hria, phatsanna vanga amah ka huat na a sosan laiber pawhin a ṭap ri chuan ka tan awmzia a la nei cheu mai! Mahse,chuzawng lung tizing zual tu mai a ni.






Hetiang tak hian hmeichhia in ka rilru alo ti na thei ang tih hi rin thiam ngaihna pawh ka hrelo mahse, phat ruallohin min ti na lutuk tlat, chu chuan mipa nep tak ka nih zia min inhriattir bawk, he bumtu vang hian na tur ka ni em ni? 'Lalhruaitluang, vawikhat bum i tawhna pawh a nilo a, engah nge bum la tawk ngai miahlo ang maia i intihnat? Bumtu che chu thlauhthlain i nun aṭangin i thehchhuak mai ṭhin a ni lawm ni, mi nep tak i nih loh zia chu fiah ta che' tiin keimah leh keimah chu ka inhrilh a mahse, ka hmaa ka nupui.....nilo.... phatsantu hmel chuan engmah chutiang ti theilo tur chuan min siam thung si.







Bathroom ah lutin tui vawt chuan ka hmai ka va phih ṭhawt ṭhawt a, chutiang maia inbeng dai thei ka nilo, ka ngaihtuah nasat poh leh ka thinur zual zel bawk. Chhuak leh vutin khum chunga Lalthanpuii mu chu ka va pawt tho lawpa, ka khawihna vanga a bek leh biangsen ṭal chu ngaihthah luiin a samah chuan ṭhamin ka pawt dak sawka. Na zeta thawk lain ka en ngawt ngawt a, tinge maw sawi harsa ka tih tlat mai le!







"Ka phatsan lo che asin, min ring hram teh, tu emaw thangkamah ka awk mek anih hi.." a kuta ka biang rawn tawh a tum chuan ka thlesawn hmiah thung, "Tu emaw thangkam vangin nau inlo pai a maw?" sawi zawng ringawt pawhin luak a chhuak nghulh thei.





"Naute hi i fa a lawm, tinge tiang khan i sawi!"





Na zeta a pum chu ṭhamsakin "Hei hi ka fa a ni lo" ka ti chang bawl a, ka ban vuanin natna a khat mitmengin min melh ngar ngar a. Chutah "Naute hian nanglo pa a neilo, kha zana thil thleng kha ka hre mumallo a ni maithei mahse, naute hi chu i fa a ni" a ti leh mauh mai, mitchhingin thawk ka la hawk a, he hmeichhia hian duhthlan tur dang engmah min siam lo anih hi.







"Kha zana thil thleng kha engmah i chianloh laiin i naupai hi ka fa a ni tih chu i chiang viau si a maw" awihlo fe chuan ka ti leh a.




"I fa a ni a lawm" a la ti tak ṭalh a, hrep tak chuan a!





"Enga tinge min rin miahlo, vawikhat mah ka la phatsan ngailo che a, min hmangaih zia hre chung hian ka phatsan ngailo ang che, nanglo tumah innghahna tur ka neihloh hi...JH, ka thusawi hi awih lul teh, tu te emaw thil tih a nih hi" ngenngawl zeta min en chungin a ti a.






"Tu te thiltih nge?" a puh tum awm ang chu ka hriat sa vanga zawt ka ni, ka unaute felloh zia chu ka hria mahse, hetiang ti duh tur khawp chuan an rilru a chhelo, insawifihlim tum nana ka unau te a puh anih ngat chuan a pawi a ti khawp ang.





"Ka hrelo, room kawngka ka kalh chungin an lo lut a lawm"





"Anih chuan an pawngsual che tih min hrilh i tum em ni?" reilo te chhungin ka lungphu chu a rang hman kher mai, chutiang alo nih ngat chuan tu pawh ni rawh se a inchhir vawng vawngna tur khawp thil a chungah ka ti ngei ang. "Aih, min khawih nisela chuan ka hria ang" a ti leh lawi a, engmah ka hrelo ti zo chiah bawk si, enge awih ber tur pawh ka hrethiam nek tawhlo, pawngsual chu a tawklo a ni phawt ang, tawk nisela ka hnenah a sawi tur ni ah ka ngai, ka lakah engmah sawi a nei miau hleinem, a zep zawk a nih kha maw.






Tenawm leh mahni hmasial takin tawhsual tawk zawk ni sela tihna rilru ka pu ringawt nia mawle! Min phatsanlo in chutiang chu thil thlen dan ni zawk sela....ngaihtuahna atthlak lutuk a ni.






Naute erawh chiang takin ka fa a nilo a, chu chuan thil thleng awm ang tur chu ngaihdan min neih thiam tir mai bawk, ka laka thuruk neia zep tam tak neitu hi ka tan rin mai theih lah a ni hek lo, ka tih tur chu ka hria, chu chu mahni hmasial taka ka duhthlan theih ṭha ber a ni.






Ngawi rengin ka insiama, ngaihtuahna a tawiin room boruak lah chu a rit churh mai bawk, room aṭang chuan ka pen chhuak a ka hnunga insawifiah reng chunga min umzui tu chu bengkhawn duh loin pawnlam ka pan a, motor a ka lut tur chu ka kawngah pawm bet chawtin ṭap chungin min ngen lawm lawm reng.






"Min ngaidam rawh....ka tihpalh aw, engmah ka hrilh ngamlo che a, ka hlauthawng lutuk vang a nih kha...ka tihpalh" a ti mawlh mawlh a, nghet zeta a kawngah kuahin ka hnungzangah a bei thlawp a, a kut phelhsak ka tum chu duhloin min kuah nghet sauh sauh mai bawk.






"Ka tiam ang che, i thil hriatloh chu ka zawng chhuak ang mahse, kan cheng dun thei tawhlo" ka ti chang bula, ka rinngam loh leh mipa dang fa pai mek tu hi ka chenpui thei tawhlo ang, tunah lehlek phei chuan a insawi ang hi a ni em tih chianna a awmlo a, ngawihbo pui a tumna rilru ringawt pawh kha a huatthlala awm tawh hle bawk. "Ka hrelo" tih bak ka zawhna chhanna a nei derlo lehnghal a, tawh sual a tawk ngei tih chianna a awm te anih ngawt loh chuan rilru thlak leh mai thei ka ni tlat lo.







Ka kawnga a vawnna chu phih thlaksakin motorah chuan ka ṭhu luta, chak zetin ka tlan chhuak zui bawk. Ngaihtuahna a fimloin rilru a nu but a ni ber.






Enge thil awmze dikdak chu hrelo mahila naute erawh ka fa a nilo tih ah ka chiang hle a, chu chu min ti hrehawm zual ber tu pawh a ni, engtin nge ka fa a nilo tih chu ka chian viau theih, a chhan chu kei hian Vasectomy ka ti mek a lawm, kum hnih chhung atan...hrep chuan...naupai leh tura Lalthanpuii inpeih hun chhung atan Birth control ka la tihna anih chu.






(CHAPTER tlem te tak tak a awm ta)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:10 pm

GOMENASAI -by Ahmangaihi violette khiangte



CHAPTER - 40




*MAMBAWIHI*


A tlan liam tur chu ka au zui lawm lawm a, hetianga kal tir ringawt tur hi ka nilo, insawifiah ka duh a, tuartu ka ni tih te pawh hriattir ka duh. Ka hlauhthawn em em duhthlanna ka siamsual a ngem ti a ka inzawh fo kha chhanna chu ka hmu ta ngei mai a, a mi nghawng erawh hetiang em em hi a ni ang tih ka ring phalo.






Kawngpui ah chuan kalna lam tur bik pawh hreloin ka pen phei hlawk hlawk a, ka bianga mittui luang chu ka dang senglo, aw rawl chhuah meuha ṭapin ka hmalama kawngpui zau leh reh lutukah chuan ka hawi kual ruaia, ral khat kawng hla taka motor eng chu ka hmu thei a, min hlat zawng a kal a ni.






Luak lo chhauh khawpa ka ṭah hnu chuan ka vai riai ringawt tawh, kawngpui char ah chuan ṭhu thla hnawkin ka pasal tlan liam tâkna lam chu ka en tlawk tlawk a, ngaihtuahna a bing mup mup reng.







Reilo te tak tak chiah hun nei leh ila chuan keimah pawhin ka inchingfel thei turah ka ngaia, JH-a hnen ka thlen chuan chhungkua a kang kai mai ang tih ka hlauthawng bawk, ka ngaihzawng hlui leh kha zana thil thlen dan zawng zawng nen lam ka sawifiah a ngai ngei anga; kan chhungte lakah chuan eng ang hmeichhe tenawm nge ka nih tak ang. Mahse, a aia dinhmun chhe zawk dang a lo la awm cheu a, tunah chuan ka pasal lakah hmeichhe ṭawmkailo, bumtu mai chauh ka ni ta.....







Ka ṭahna lamah ka dang a ro zo a, ka ṭhutna aṭanga tho chhuak tur pawhin tha ka nei meuhlo, ka vel thim chhulh te, kawng chhak leh thlang lama thing hnah thliin a chhem zawnga insawi thawm te chauhlo chu thawmdang hriat tur a awmlo, ka hlauh em em khawharna khan chungril aṭangin min rawn tuam hlawp hlawp a ni ber. Ka taksa a rawn sawi che thei hial a, ka hlau a, ka chi ai bawk,






Lalhruaitluang, khawi hmunah pawh awm mahila ka mamawh hunah che lo kalin ka tan i awmtur thu i sawi ani lawmni, 'Sawila, rang takin ka lo kal ang' i tih kha.....mahse, ti nge tunah ka mamawh lai che hian min hlat zawnga ke i pen leh si, ka mamawh che sin, ka thusawi ngaithla turin ka duh che a, min ringturin ka mamawh che a sin.






"Lalhruaitluang, min ko la ka lo kal ang i tih kha, tunah ka koh che hi.....?"






Ṭap chhuak hawkin ka awm chhung na ngut ngut chu ka kut pahnihin ka dawma, ka taksa pum chu chhunglam aṭanga nataka nghawr tu nei ang maiin a insawi che dawt dawt bawk, thei leh theiloin ka inbeng kang a, khamlo zetin thawk ka la kawk kawk reng. Ka puma ka naupai mek chu ka ngaihtuah chhuak a, ani vang chauh tal pawn intih chak ka ngai, heti maia kehsawm tur ka nilo, mahse......a van har tehlul em.






In ka thlen meuh chuan thlanin min bual huh hluam tawh a, Bathroom ah lutin tui vawt chuan ka chhip aṭangin ka inleih bawrh bawrha, ka taksa chu a sahal ni berin ka hria.






Thawmhnaw pawh ha loin towel nen chuan khumah ka bawk thlawpa, kan khum bul side table a ka damdawi bur chu en vang vangin thawk ka la leh rih a, ka ngaihtuahna ngei pawh chu ka hua in ka indem bawk. "Lalthanpui, hetiang thil hi i ngaihtuah tur a nilo, tunah chuan i taksa hi i ta chauh a ni tawhlo" ka dul la puar thamlo chu dawmin ka ṭap leh ringawt ṭhin, a chhan chu maw ani khan 'ka fa a nilo' a ti a nih kha....!






"Naute, i pa thilsawi kha i hre miahlo ti raw, i hria a nih pawn lo ngai haw suh aw, i nu hian maw i pa rilru kha a tina em a, i pa khan a rilru tak tak a sawilo a nia; a tum loh puiin a sawi chhuak palh a nih kha, ka chungah pawh a thinrim vawikhatna chauh ania, khatiang kha a ni ngai miahlo ania, pa ṭha tak leh hmangaihna ngah tak a ni zawk a, a hmangaih loh vang che emaw a duhloh vang che a nilo, i lo pian chhuah hma hauh aṭanga i pa nen in inkar ka tih hlat vang che u in keimah zawk hi ka thiamlo a ni...ka tihpalh a nih kha...naute....i nu hian engkim ka siamṭha leh vek ang, nang chuan min ring thei ang ti raw...." ka ṭahna vanga ka beng kiu vawng vawng chauh chu chhanna ka dawn chhun a ni.






Ka ṭap chau nge ni ka muhil chhunzawm ta hlauh a, damdawi eimiahlo a ka muthilh lehna hmasa ber a ni bawk, ka harh leh chuan khua a lo var ṭan ek ek tawh a, ka lu a na kher mai, nizan ka inbual zo ka mutdan ngai ngai khan ka lo la mu a, ka mutna sir chu a lo la ruak huai bawk a, a lo haw lo! Ti mai hian min chhuahsan a tum em ni?






Rang lutukin ka inbeng tho a, ka thawh thut vang chuan ka lu a hai nghal chiai mai bawk. Khumah chuan ka ṭhu leh ren rawn a, ka hma zawn bang nghenga Dressing table inhungah chuan ka thla ka va hmu thei. Min lo en let tu chu hmeichhe derdep hmel tak lungngaihna in a uai kun mek hmel a ni.






'Hetiang tur hi a nilo, i dikna hailang tura che chhuak tur i ni a sin, beiseina thlawnin i tum anga thil a kal lo anih pawn tih theih neihlo tawp i la ni hleinem' tiin keimah leh keimah ka infuih a, Pathian hnenah ka ṭawngṭai mawlh mawlh bawk.






Tukṭhuan eikhamah kalchhuah nghal mai tumin ka insiam lawk a, Manuntei zing tho inhnuai lamah a che rak rak thawm ka hriat takah chuan ka chhukthla ve nghal thuaia, zanlam lehkha zirin a mengrei thei si a, nizan kan inhau thawm kha a lo hria a ni ngei ang, tuk dang anglo takin min be lumlam vaklo a, a hmel a ngui riau mai bawk a, a lakah chuan ka inthlahrung angreng viau mai.







"U Mambawihi Anî te inah Exam chhung chu ka va awm phei anga, i duh chuan nangpawh U JH-a te inah chho ve la" kan chawei lai chuan a ti ta reng a, "Chutiang a ngai chuang hleinem" ka ti zet nain kan awmdan tur chu a khawlhkham ru ve riau a, han phalloh bur chi chu ni thei pawhin ka hrelo.







Ka ngaihtuah chianga, keipawh chuan ṭha zawk dawnin ka hre leh hnuhnawh a, a chhe ber thlenga dawn phei chuan Manuntei chu a ni te inlamah lo va awm tir rih mai chu a ṭha ta in ka hria, kar thar maiah exam an ṭan dawn a, hetia kan nupa kar boruak chhe lutuk hnuaiah nen phei chuan exam pawh a ti ṭha thei ngut lo ang.







School kal tura a insiam laichuan ka va hrilh ṭha ve leh a, "Tunlai chu engthil emaw vangin i u JH-a nen kan ṭha vak lo a, thil chhete tak tak ania, i nu te pawh lo hrilh miahlo la, kan ziaawm veleh ka lo hruai leh dawn che nia" a bulah chuan ka ti a, "Tlai aṭangin ka phei mai dawn a mi?" a lo ti let ha a, hmeichhe naupang fing ve tawh tak chu a ni, thil awmzia chu sawi ngailoin a man zung zung mai, Zarkawt lama ka kal a nih chuan ka let leh hun tur chiang takin ka sawi thei bik tlat lo a, tlai aṭanga a nî te inlama lo va haw mai chu a tan a ṭha ber réng bawk a ni.







Insiam mai a tum laichuan "I tlai zo vek ang kal tawh rawh, i thawmhnaw mamawh zualpui chu keiman ka chhuah pahin ka lo dahsak dawn che nia" ka lo ti vat a, bungrua a ngah lemlo a, kensan mai pawh a harsa hranlo. A kal chhuak tur chu a nu leh Lungleng lam ho hnenah engmah lo sawilo tur chuan ka chah leh hrama, "Aw sawilo ang' ṭha tak chuan alo ti ve mai bawk.







Number hriatloh hnen aṭangin phone call ka dawng leh a, nidang ang bawkin call chu ka chhang duhlo a, a hnu ah message lo thawnin Hotel a inhmuh na tur a lo sawi a, min vau nan thlalak a lo thawn lehnghal zat bawk, hetiang hian vawitam a ti tawh, pehhel dan ngawt ka zawng kuala chutih chhungin keiin tu nge anih hriat hmasak tumin ka lo beive thung. A hun ka khawhral sak vang erawh chuan a dawhtheilo ṭan viau a, ka pasal hnenah thlalak leh video te chu thawn a tum thu in min vau ṭan leh a, chumi chu ka thil hlauh ber a nih vangin JH pawh hrilh mai ka tum uk uk ṭhin, ka rilru ka la siamfel thei mailo a, chutih laimekin nizan thil kha a lo thleng ta a ni.







Ka thiamloh leh ka felloh liau liau a ni, ka pasal pawhin min ringzo lo a, a lakah khan lo zeploin a tir khan lo hrilh tlang ta ila khatiang tak khan min ngaihaw tho angem tih chu zawhna lian tak a ni, ngaihdan ka nei thiamlo. Ka thiamthu chiang taka ka sawi tur ka hre silo a, kha khan a bula sawi ngawt mai kha min ti tim a, ka ṭan chhan neih ve chhun lah ka muhil a engmah ka hre chianglo tih ngawt mai kha ani a, chuta karah kan laichinte an nih ka la ringhlel cheu bawk si a.






Kha mipa kha a chanchin ka hre thui hmanlo hle a, hriat neilo tawp zawng ka nilo. Michaela ṭhiante ho kha Law zirlai vek an ni a, zir ve lo mipa lo kalchhun chu Jonak zosangliana leh Lalrinhluaa an ni maia, an ni pahnih aw chu ka hriat hnu an ni a, Lalrinhlua a haw a; Apuii hnen aṭangin a lo let leh tawhlo tih ka hre bawk, rinhlelh theihloh tawp chu a ni chuanglo, Jonak thung kha ka men laiin a chatthla a mahse, chhungkaw mi leh sa chahbi pawh a lo nei ve thei mai awm mange ka tih zingah khan a tel ve leh tlat thung, a Birthday lawmna pawh he inah ngei hian kan lo nei nghe nghe tawh anih kha.







A tu a pawh chu lo ni dawn sela, phone a min lo be ṭhin tu hi chu mihrang hlak a ni, video ah khan mipa khat chauh an awmloh vangin inthurual zinga pakhat angah lo ngai ta ila; he pa min lo be ṭhin tu hi chu Law zirlai anih mai hmel.







'Tunah chuan hlauh chhan tur i nei tawhlo e, engkim anihloh tur ang ani zo tawh' tiin ka inhrilh a, Ni e, ka duhloh dan berin thil a thleng tawh a, ka chân tur chu ka chân tawh, ka pasal rinna ka hloha, ka nei let leh tawh kher a ngem tih pawh ka hre heklo. Mihring in a chân a chân tâk hnuah chiah tih theih nei ve chauh an awm anih ngai chuan chu mihring chu ka ni mahna.






Ni e, risk ka la ang, ka ti fuh emaw ti fuh lo emaw, ka tih theihṭha ber a ni.





Ka phone a lo rik leh rual chuan ka chhang nghal ta vat a, aw chu a vin ṭha kher mai. "Hmeli enge ka tih theih hi ka hmuh dawn che em ni, i pasal hnena heng thlalak hi thawn nge i duh Hotel-a lo kal mai chu" a ṭawng zui bawrh bawrh a, kei ka lo inti paukhauh lui ve ṭang ṭang thung.






"I duh ang chuan ti rawh, internet ah chuan thlalak chu dah la, ka pasal pawh chu thawn rawh, i tih rual rualin Cyber Crime ah ka Report che anga, Jail ah ka dah ang che, ka lo hming chhia anih pawhin pawi ka tilo, kei aichuan chan tur i ngah daih zawk in ka hria, i zirlai leh i Career te, Bar exam i hmachhawn tur te, i ṭhatlai hun te thlengin nang chuan chan tur i ngah lutuk..." lehlam thawm chu a reh ta dak a, ka tifuh niin ka hria, Law zirlai chu a ni ngei mai!







"Tu pawh chu lo nila, i thurualpui hnenah khan i lo hrilh dawn nia, ka hlau miahlo che u, he thil hi intawp san lo a min ti buai chhunzawm anih chuan ka sawi ang khan keipawn ka ti ang, mi nupui tih mualpho tuma Blackmail tu chu in mualpho ve loh na tur reng reng ka hrelo, keichu tuar tu ka ni a nangni chu tisual tu, miten an ngaihdan tur che hriat kher i duh chuan thlalak chu i theh darh thei a, anih loh chuan ka sawi aṭang hian in duhtawk thei bawk ang, in thu thu ni rawh se" ka ti chang leh faka, ka sawichhuak ta chu ka inrintawk phah sawtin ka hria, hlauhna ka nei tawh miahlo chu mak ka inti lehling hial a ni.






"Zawngi leh...hmeichhe nasa tak i lo nih hi" tih leh hluk pahin phone chu a dah hmak a, kei ka lo thaw huai mai.





"I ti ṭha lutuk Bawihno..." ka han inti ve ngial nain ka hlimna chu lungngaihna in a rawn thlak leh nghal vat thung. Ka phone chu ka hum rauh rauh a, JH-a ka ngaihtuah zui bawk, eng angin nge a lo ngaih ang tih a buai aichuan anih nih kan ni zo tawh a, ka dikna hailang turin mahni hmasial tak anga ka lan pawh ngai dawn mahse ka tih ngei angai a ni, ka puma ka nau pai lai tan tal pawh hian.






Ka kal chhuah hmain Apuii a lo lang hlawl a "Ka pa in lo hruai tur chein min lo tir a" chik fe a min en pahin a ti a, "Lo kal ka tum chiah a lawm" ka lo ti ve a, "Enge thil awmzia ni a, ka u in ka nu leh pa bula a sawi kha ka hria a" a aw chu vin lek lek a, a hmelah min ringhlel hle tih a lang thei.






"In kan thlen hunah kan sawi dawnnia, sawi thui angai lutuk" ka thil tihlai chu ka tih chhunzawm mawlh mawlha, ka pa in min lo koh tir tih ka hriat rual khan ka zam leh riau tawh, ka sawifiah dan tur mawlh ka ngaihtuah a, ka rilru a buai kher mai.






Apuii nen chuan inlam panin kan inphur chhuak a, kalkawngah chuan min zawt sek sek renga, amah chauha a awmlai chuan engmah ka sawi duh biklo, tu lakah pawh ka fimkhur em em reng a ngai, Apuii chu ka ringngam lo a, chuloah a bula lo sawi chuan engmah lukhawng a neih ka ringlo bawk, rilru nei taka ka awmloh chuan tu emaw thangkama tla reng thei niin ka inhre zo ta a ni ber e, hah a dam mawlh lo a ni.


images (46).jpeg



Gate aṭang chuan kan inkawt hla deuha JH-a lo ṭhu chu ka va hmu thei a, Chair ah ṭhuin kan lam a lo hawi a, kan tlan hnaih tak hnu chuan ka hmel a hmu chu a lawm tehchiamlo tih a lang thei bawk. A ṭhutna aṭanga lo tho chhuakin inchhung lam a pan zui daih a, ka kal chu a beisei lawk ve tho anih hmel e.






Ka beiseiloh deuhin inchhungah chuan an lo awm ṭhap a, min lo nghak reng tawh zawk tih ka va hre chawpchilh a, JH-an eng chiah nge a lo sawi hre lo mahila rindan chu ka nei a, inthlahrun a na duh kher mai.






"Hetah hian lo ṭhu teh" min hmuh rualin ka pa chuan a lo ti vat a, mitmeng huatna a khata min lo melhtu chuan a bula ka ṭhu tur chu a lawm hmel tehchiamloh, engmah sawiloin a ngawi hmuk ringawt a, a bula ka va ṭhu chu melh khat pawhin min melh leh tawhlo bawk.






"Inpa sawi chauh ngaithla loa i hnen aṭang ngeia hriat ve hi a ṭhain ka hria a.." ka pa chuan a han ti hma sa te te a, a thutak hmelah chuan kei min huatna a lang ve lo chuan ka awm a ti nuam huai mai, Reny tih loh zawng an awm a, Ka nu hmelah chuan min demna a langa, Apuii leh Michaela erawhin thu chiang engmah an la hrelo anih ka ring.






"I naupai chu tu fa maw ni a?" ka nu chuan a rawn ti nghal tawl a, ka pain a lo khap deuh hluk a, keiin JH-a ka en ringawt thung.






"Enge a awmzia?" ka aw chu a zawi hle mai, nizan khan a thinrim in a sawi palh mai mai ni ah ka lo ngaia mahse, chutiang ngawt zawng a lo ni lo deuh anih hmel e.







Ka lam rawn hawiin "Zawhna chu chhang rawh" tih zawng a sawi a, a mitmeng sen deuh rum mai chuan rapawm lam a pawl lek lek bawk. "Mambawih thil chiang takin zep awm miahloin sawi ho ang aw, tichuan kan vaia tana ṭha ber turin thu tlukna kan siam ang" tiin ka pa chu a lo inrawlh vat a, ka chhang tawhlo, a engamah hmain ka rilru a na em em ringawt mai a ni.







"Hei i naupai hi ka fa a ni lo a ti tlat mai si a..." a ngawi leh dat a, sawinuam a ti vak biklo a ni. "Ani ṭan lam chu kan lo ngaithla tawh a, Tluanga chu lo ngawila, in nu hian han sawi ve rawh se" ka pa in a tih leh laichuan hnuailam bih in ka inpetruh ṭeuh a, "A chin chhuakin engkim han sawi teh le?" ka pa chuan a ti nawn leh a.







"Urlawk zan khan ka roomah tu emaw lo lutin ka thla te alo la a, sleeping pills ka eivangin engmah ka hre mang bawk silo a, chu chu min blackmail nan a hmang ta a ni"






"Chupa fa chu i pai tihna a mi?" Apuiin a lo ti hluai a.





"Aih!...teuhlo lutuk, ka harh chiang manglo nain tu emaw ka bula lo mu an awm tih kha ka hre thei riai ruaia, min khawih tak tak nisela chuan ka hre ngei ang" JH-a lam chu hawiin "I lakah ka lo zep a a pawi ka ti lutuk mahse, naute hi chu i fa a nih hi aw, khatiang zawng kha chuan min ti miah suh" ka mittui a hnam a, ka ṭah mai loh nan ka insum fan fan bawk.






"Ṭawng fimkhur rawh" en pawh min en hleilo chuan a ti zawi sup a, banglo zetin keiin ka melh ngawt ngawt thung.






"Mambawihi i bula lo mu chuan a khawihlo che tih i chiang chiah a maw?" ka pa chuan a lo ti ve leh a, ka hrethiamlo tunge ka room ah lo luta min blackmail tu tih ah buai hmasa loa tinge ka naupai thu hla ah ringawt chuan an buai mai le?






Ka phone chu phawrh sawk sawkin thlalak leh video te chu ka entir a "Heng zawng hi a nia, video ah hian ka kawr hi a pelh a mahse, a bakah engmah a thlenglo anih ka ring, ka kuah lai hi chu mumang ang deuh chuan a hre thei a, zinglam pang a nia JH-a a lo thleng tawh emaw ka ti a, chu loah ka phalna reng vanga min khawih theih nan heng thil hi chu an ti ve lek chauh a nih ka ring, Hotel-a kal turin min ti ṭhin a" ka sawilaia ka pa hmel chu a buai nak a, thlalak chu a en vung vung a, "Ni e, hei i harh deuh chu anih tak hi khawih che sela i hre tur chu a nih hi" a ti niah niah a.






"Chuan tukin ah min lo biakna ka record bawk a" tiin zinga kan inbiakna ka record chu ka ngaihthlak tir a, ka pa chuan a hrethiam ta viau a, a thinrim chu a inhrosa zui hluk hluk bawk.






Chuveleh ka bula ṭhu chu lo che thutin ka pa kut aṭang chuan phone chu a phihthla sawk a, beiseina nei em em ka lo en laichuan ka phone chu center table dimlo fe hian a thehthla a, "Khami hnua thil thleng engmah a hriatloh, hnim hlum emaw pawh an pe thei che.." min zawt nge min hrilh pawh ka hrethiam lo, ka mitah min en ran a, a buaina hi ka hrethiam lo leh zual.






"JH....i ngaihang chu a thlenglo ang, lo thleng palh ta pawh ni se, i nupui hi pawngsual ka ni tihna a ni dawn a sin" hnukulh ṭeuh chungin ka ti leh a, a rilru a buai hmel ve ta nak mai. "Michael, khami zana kan in a kal zawng zawng kha an hming leh address list siam rawh" bung zetin a ti a, Michaela a tho nghal thuai a, chumi hnuah min lo en lehin "Naute pa chu tupawh ni se ka that deuh thaw dawn" min vau awka hian a ti leh a, chhan ngaihna pawh ka hre tawhlo, thil awmzia hi ka hrethiam tawhlo ka hriat chhun chu ka naupai hi a hnawl chiang hle tih zawng a ni.







"Police hnenah FIR kan thehlut dawn nia" ka pa chuan a ti zuia, chulam ka ngaihtuahna ah a leng rih lo, ka pasal hmel chu ka en renga, ṭhu hle hle theiloin a ṭhutdan a siam ṭha sek renga, chuzawng aiin kan ngaihtuahna inpersan lutuk mawlh mai chuan ka rilru a luah zawk.







"Tinge naute pa hi nilo anga i inngaih tlat mai le?" ka ti leh ringawt a, min en rang khawp mai, ka lungawilo ve bawk a lawm, khang hun chung zawng khan engmah tiloin kan mu mai mai ṭhin biklo tih pawh a hreve reng a, telve miahlo ang hmaka min ṭawngkhum fo chuan ka rilru a tina em a ni.






"Ka u hian Vasectomy a ti tlat a lawm, i hre miahlo em ni a?" Apuiin a lo ti khauh a.






"Eng maw a tih?" ka lo ti he haw a, a thilsawi chu ka hrechiang ngang mai thung.





"U, za ah zain a chiang bik chuanglo a ni lawm ni?" Apuiin a ti leh zat a, min enrengtu ka pasal hmelah chuan enge a ngaihtuah ka hretheilo, "Keimah niloin amah ah zawk hian chian ka duh" a ti leh mauh maia, chu chu eng a sawina nge pawh ka hrelo, "Enga tinge Vasectomy i tih a?" ka aw te chu a khur hialin ka hria.







Ka pasalin a chikawng ṭawn tirin Birth control alo la ang tih ngaihna reng reng ka hrelo, engmah a sawi chhunzawm tawhlo a, Michaelan alo koh rualin a tho zui daih bawk. Reilo teah Paper nen an lo let leh a, engthil emaw an sawi ho mawlh mawlh an thilsawi te chu engmah ka hre fumfe tawhlo.






Ka pasalin Birth control a la a, Birth control ah pawh Vasectomy, za ah sawm pawh a suallo ang tih tur a ni...Chutih a nih si chuan....Ka rei leh....kei hi....!!!!!




A â riai maiin ka hria.




"U mambawih hepa aw hi chu ka hriathnu chu a ang lutuka, kan ṭhiante ṭhian leh chhawng te ka lo hruai ve sia, phone aṭang chuan chian a har lutuk" Michaela min biakna chu chhanglo in ka en mawl tawp a, ka mit sulh sulh mai.






"Engtin nge i awm?" aw thum dum mai pawh chu hla deuh a mi ang mai a ni, amah lahin hnai takah min en a, a hmel phei chu ka hmu chiang theilo. Ka taksa a zawi a, ka thaw ṭha hleitheilo bawk, che hleitheilo e tilo chuan ka taksa chu a khur dar dar reng lawi a.





Hlauhna in min rawn tuam hlawp hlawp a ni ber, an aw ri te, inchung zau pui mai te, ka taksa an rawn deh rual te chuan ka hit chhuak vekin ka hria.






"Lokal teh" tih pahin min pawm tho lawpa, ṭah takngial pawh ka ṭap chhuak theilo.






"Hey, Let's take a deep breath...I mit chhing la, zawi muangin na deuhin thawk la rawh aw, vawi thum ka chhiar anga a vawithum na ah zel i theih anga nain thawk i lo la dawn nia" ti a min hrilh mawlh mawlh tu chu ka pasal a ni, vawi engemaw zah a sawi ang chuan ka ti a, tlem chuan ka zia phah deuh, thawk erawh a la sak ṭalh tho.






"Ni Sangzuali Inhaler ka va laksak mai dawn a mi?" Michaelan a ti nghal thuai a. "A ngailo, a Doctor-in chawh bik a nei a" ka pasal chuan a ti leh a, thawk la turin min hrilh zui mawlh mawlh reng.






Room ah min pawm chhoin khumah min muttir a, chumi hnuah a chhuak zui daih a, Apuii lo kalin tui leh Nebulizer min lo chhawp sak a, ani pawh engmah sawi loin a chhuak leh a, inchung sitting room a inbe ri chu ka hre pha a, ka ngaithla zui ran bawk.






"Zosangliana ilo va hmu dawn nia, Puii Reny ko haw rawh" ka pasal aw chu a khauh ṭha hle reng.






"Rinhlua chhungten an ui bet tlat a, hmanni ah pawh ka pa in a ko tawh a lawm" Apuiin a ti nang nang a. "Keimah ka va kal ange, ka nupui kha i lo ngaihven dawn nia, ka lo let leh hma chu a chhungte pawh nise tumah lo luh tir miah suh, Judy leh ka nu pawh tiamin" thu pe aw zeta ti lehin kailawna a pen ri khup khup thawmin a zui a, a thawm chu a hla tial tial bawk.






Room pawn a vei thawm leh hla deuh hlek a ṭawng ri te, ṭhenawm kawt lama Motor lut chhuak thawm bak chu hriattur a awm meuh lo, kan in awmna chu a tlang deuh a tukverh thlang lampang aṭang chuan thlifim a lo thaw vawt ver ver reng a, mut chawrh chawrh ka nin vangin ka ṭhu chhuak hluai a, ka phone dap mai ka tum chu inhnuaiah ka dah daih tih ka hre chhuak a, chhuk leh mai chu ka hreh deuh tlat tawh.







Che lo changlo chuan khumah ka ṭhu ta renga, ngaihtuahna a vak thui duh ngang mai, thil tamtak ka zeldin kual a, ka thawk a hah nghal tet tet zel mai bawk si a, ka awmdan chu a hrehawm hluah hluah tih hian a hrilhfiah zo ber ang.







Eitur min pe turin Apuii a lo lut zawka, zui thlak ve nghal mai ka lo tum chu "Lo chhuk suh" a lo ti bak hlar a, JH-an min chhuahtir miahlo turin a lo hrilh niawm tak a ni.





"Enge inhnuaiah khan an tih a?"





"Engmah an ti lo, a lo la let lo" tihzawnga min chhangin a chhuak leh nghal thuai a, awm a nuamlo zual telh telh mai.






Ka naupai hi JH-a fa chu a lo nilo rêng em mawni le tih te pawh ka ngaihtuah ve ta hial, ka van chiang ta lo em? Ka muhil ringawt kha min khawih nisela chuan hriatloh tlat tur thu awmin ka hrelo a, anih chuan JH-a sawi ang kha thil thlen dan a ni thei mai a ngem?






Hnim hlum min pe a...nilo...min chiu muhil anga.....engtin emaw ka harhlohna tur damdawi chak tak min pein min pawngsual tihna a ni angem?





Nilo, nilo, nilo, nilo.........





"Bawihte, i pa chhun lutukin lo piang ang che aw, I pa JH.Lalhruaitluanga chhun em em in lo piang ang che" ka ṭap lo theilo a ni, lukhamah chuan ka hmai nawrin chhuak lutukin ka ṭap hlawp hlawp a, insum thei zia zâng ka nilo.







Dar thum velah JH-a chu a lo leta, eitur eng engemaw min lo ken sakin a phone hman lai chu min pe a, "Ka phone kha khawiah nge?" ti a ka lo zawh chuan "Hman lawk duhna ka neia, kha kha lo hmang rih rawh" a ti mai si a, ngaih a ṭhalo duh kher mai, enga tan nge a tih chu rindan ka nei thiam a, lo inrawlhbuai lo a amah a rinna nghah mai chu ka duh zawk bawk.







In ah haw thla tawhloin zan kan riak a, ka chhungte chuan engmah an sawi chhuak leh tawhlo a, an lo inkhap em maw ni aw ka ti rum rum hial a, chutia an ngawi ta hmak mai te chuan ngaih a ti ṭhalo lehzual a, engthil emaw ka lakah chuan zep nei tlatin ka hre bawk.







Zariah eikham ah chuan Liansangzuala a lo kala, sitting room ah enge maw hi an sawi dun sar sar a, chumi hnuah engmah sawiloin an inphur chhuak a, an lo haw har ngang mai. Ka nghak rilru deuh a, ka nghak chhuak zo nganglo a ni, damdawi telloin ka muhil ve thei tawh a, a tir kha chuan a harsa ka ti hle a, zan lam ka meng tlang ṭhak ṭhin, ka taksa chau tawngkhawng chuan mutlam min ṭhing ta hlauh zawk a, a tihzia phian mai.







Zing ka harh chuan kan room ah chuan thawmhnaw Bag lianpui hi a lo awm a, chawlhhmunah kalin ka thawmhnaw leh eng engemaw ka mamawh tur chi a lo zuk la hi a lo ni a, hetah min awmpui rih a tum a nih ka ring.







Inhnuaia ka chhuk chu an lo tho chhuak hlawm tawh a "Manuntei thawmhnaw chu ka pe tawh" min hmuh ve lehah a lo ti a, ka lo theihnghilh hmin der tawh.







"Hetah kan awm rih dawn a mi?" ti a ka zawhna chu min chhanglo, ka pa a be zuia, "Tlaiah emaw, naktuk zingah ka lo let leh ang" ka pa hnenah chuan a ti a, zin chhuah a tum em mawni ka ti rilru a mahse, ka beiseiloh daih thil a lo tum zawk a.







"Ka zin chhuak dawn a, ka zin hlana heta lo awm chu a chiloh ang, Lunglengah ka dah rih che anga, ka haw hunah ka lo lam leh dawn che nia" thutak fein a ti a, a bula awmlo a awmhran chu hreh tak tein ka hreh a, kan boruak tawn mek nen amah hlata awm chu ka zuam lo a ni ber.






"Engtik nge ilo haw leh dawn, i cham rei dawn a mi?" tiin ka zawt a.






"Reilo turah ka ngai, i tan chawlh hahdamna remchang tak ani dawn a, i pu pawh ka biak tawh kha, an lo nghakhlel tawh khawp ang che" a ti leh sap sap a, a hmelah chuan lungawi hmel emaw phur hmel a langlo a, ṭawng damdupin ṭha takin min be mahse tun hmaa min biak ṭhin dan nen chuan danglam tak a ni thung.







Lunglenga awm chu ka hreh a nilo, kawng lehlamah chuan a hahdamthlak zawk daih a, ka pi leh pu te pawh ka ngai ve bawk. Mahse, ka rilru kam tu chu ka pasal mawlh mai hi a ni, rilru hlimlo tak chunga kan han inzinsan tur chu awm a nuam thei meuhlo.







Chhunah hna a kala mahse, hma takah a lo haw a, Lungleng lam pana kan tlan chhuah chuan dar thum vel a ni, kawngah kan inbe tamlo hle a, kawng chhia a motor a han insawh deuh changa min lo en vat ṭhin chuan tlem chuan ka awm a ti nuam ve deuh, naute chu ngaihsaklo hulhual angin a langlo ve tal a lawm.







Kan khua kan thlen chuan thlen veleh kan intifai a, ka pu nen engemaw sawiin an ti ti hnuah zanriah eikhama a kir leh mai tur thu a sawi a, cham ve rih turin duh viau mahila engmah a lakah chuan 'ti suh' 'ti rawh' ka ti ngamlo, kawng engkimah a lakah chuan ka inthlahrung a ni ber.







A kir dawn chuan pawisa tam tham deuh min pe a, ka kut hum vang vangin "Hrisel deuhin lo awmla, ka lo hruai leh vat ang che u" a ti a. 'Che u' a tih lai thu tê chu ka lo hrechiang bik ngang mai, tunah khan naute a lo sawitel a, thu tawi te mah nisela ka tan a tawk em em a ni.







A kalta chu ka ruak huaiin ka hria, a huhang na zet mai leh ngaihawm em em khan a tlanliam thlengin min la chenchilh a, kan intawn tirh aṭanga vawin ni thleng hian hetiang em em hian ka la ngai ngailo, a hmel te, a aw ri te, a rim te chenin ka ngai em em ringawt mai a ni.







Zan rei deuh hnuah Apuii phone in a thlen thu min lo hrilha, tluang taka zin turin keipawn ka hrilh ve a, a bak chu sawitur a hre vak lo, hmelhriat satliah inbia hi kan ang deuh tlatin ka hria.







A tukah chuan a zin ta a niang, a reh vang vang a, a kal tur thu min lo hrilh lo a, a thlen thu min lo hrilh heklo, ka call dawn a mahse a phone zawk ka kawl daih si a, Apuii ka va be ta ngawt a, Phone a la lei loh thu leh a zin rih thu zawngin minlo chhang a, chu zawng chu a zin aṭanga karkhat chhunga a chanchin ka hriat chhun a ni.







(Mikhual special ka nei a, Tripura ṭangin ka nî in min lo tlawh a, comment ka lo la chhang thei rihlo a, nakin deuhah ka lo chhang vek ang che u aw....)

Story a thlawna chhiar tur kan ziahsak thin che u avangin story chhiar manah Ads khu i lo click ve thin dawn nia, i tan hekna a awm lo a, a ziaktu tan erawh ziah hah man top up hlawhna a lo ni ve a, i lo click ve ziah tawh dawn nia

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:10 pm

GOMENASAI - by Ahmangaihi violette khiangte


CHAPTER - 41

images (94).jpeg



Kar khat hnuah chuan ka tan bawm a lo thleng a, thei leh Vitamin chi hrang hrang bakah chhang ka duh em em chi te, chocolate leh chips tih angreng a ni. Ka pa huan kal tur chuan min lo tlawh pahin min lo kensak hi a lo ni a, han lawm vak ngaihna pawh ka hre rih lo, "Apuiin eichak a neih chuan lo sawi zel rawh se a tih che kha, ka lo kal ziah dawn a i mamawh chu min chah dawn nia" ka pa chuan a ti a, ka pu nen huan chungchang sawiin an ti ti zui luama. Mahse, JH-a chungchang engmah a sawilo a, tun thlenga a la haw loh chu ka ring bik silo, thil awmzia chu hrethiam lo viau mahila rindan erawh ka nei thiam a rilru a na em em bawk.






Heti mai te hian min ṭhen a tum ta anih hmel e, engmah inṭhen thu a la rawn sawi lo a, a inngaihtuah mek anih ka ring a, chuti a nihloh chuan keimahni lampang min nghak pawh a ni maithei. 'Lalthanpui mâk tawh nge sumchhuah chu inṭhen nan i duh zawk?' tih zawhna ka inzawt fo a, a eng zawk zawk pawh chu ka duhlo, inṭhen ka duhlo a, ka naute vang tal pawhin lêt leh ka duh a ni.







Ka kawng zawh ang kha ka fa chuan lo zawh ve turin ka phallo, fahrah dinhmun ka hria a, ka natna ṭhin angah khan lo na ve turin ka phallo a ni, nu hmangaihna chu ka pe thei mai anga mahse, pa hmangaihna dawnglo tur chuan ka ngai ngamlo.






Ka haw aṭangin Nutei nen kan inkawm chawt a, ka haw chhan chu min zawt chik thei hle a, a reia reiah chuan keipawn ka zep reng thei ta biklo, kan nupa inkar zawng zawng erawh hrilh loin pehhel deuh takin ka sawi a, ka pasal nen kan inkar a ṭhatloh vanga heta min lo dah a nih thu te chu hrilhin min lo hruai leh ka rin tawhloh thu te pawh ka hrilh a, min lainat nang mai.






Min hnem in min fuih sauh sauh a, thurawn te pawh min pe ve fo ṭhin mahse, kan nupa inkar thil thleng zawng zawng hre ve lo ta nafam chu kan ngaihtuahna erawh a inpersan thei hle thung.






"Naupang pakhat chauh te chu tun laiah enkawl zawhloh tur thu a awm hleinem, lungngai duh reng reng suh, i pu hnenah hrilh la sum chhuah tir tawp rawh, a telloin i awm thei lutuk ang, i pi leh pu te an la hrisel bawk a nau an pawmpui thei dawn tho che a i tan lungngaih vak tur a awmlo ania, lehkhathiam i nia hna te pawh i zawng leh anga, a êng zawngin thil thlir zawk rawh" Nutei chuan a ti mai a, chuzawng ka ngaihtuah dan a ni velo, fahrah ka ni a, nu leh pa thlazar hnuaia khawsa velo te nun chu ka hrechiang hle a, ka fain a rawn tawng chho ve tur chu ngaihtuah ringawt pawhin ka na a ni.






"I la naupang bawka i han i tuaihnum anga ila hmelṭha dawn chauh lehnghal, nakinah in pa chu a la rawn inchhir ruai anga, chutih hunah chuan i lo hawisan hmak tawh dawn a lawm, keiin ka lo nuihzat bawk anga, Ṭhamawla chu kan hawi tir lawl lawl dawn nia" fiamthu ti tak deuh hian a ti bawrh bawrh a, kan nui dun leh hak ṭhin, a duhthawh ṭhin bawk si a, a duhtawka a khabe a han sep tawh hi chuan a nuihloh theih ṭhin loh.






Nutei chu mahni inringtawk em em a ni a chu chu kan danglamna a ni, keichuan hma hun thim chauh hmachhawn dawna ka inhriat laiin ani thung chuan hmahun eng tak min hmuhsak a, amah anga huaisen leh paukhauh chu ka ni ve lo tih a hrelo a ni mahna.






Nitin inah ka awm a, ka mu chawrh chawrh a ni ber, raino luakchhuak ka nei nasa hle a, thil ka ei hleithei loin ka BP a hniam reng bawka, inchhung chet takngial pawh ka ti hleitheilo. Ka pi leh pu ten min duat a, ram damdawi leh eitur hrisel kan hmuh phak ang tawk te min dap sak ve zela, taksa chau viau mahse, an kianga awm chu a hahdamthlak hle thung.






Zanah Nutei a lo leng thla a, ka khawhar lutuk tur pawh min hnem ve deuh a chhunlam ah hnathawka a feh chhuah daih ṭhin vangin chhunlam erawh ka pi nen kan awmdun rek rek a, ngaihtuahna kawm vak vak bak tih tur ka nei meuhlo.






Ka chhungte chuan ka pasal nen inbe pawp reng turin min ngaia, an bulah chuan engmah ka sawi ngamlo, Alawmi bia in ka rilru buai thu ka hrilh mawlh mawlh reng a, "A va ti awm anglo ve, ka lo va be dawn a mi, a thiltih dan hi ka duhlo reng reng, inṭhen a duh anih pawhin ṭha takin sawi mai sela hetianga intih te chu" a ti zui hlak hlak a.






"A...be lo ang, a rilru a hah ve rih a niang, ka naupai hi a fa anih a ring bawk silo a" ka tih chuan "A awm anglo emaia, a reng rengah nupui te hriatloha Vasectomy pawh lo tih reng reng, amah anih chu buaina zawk, pawngsual i lo tawk em tih te pawh hriat tum sela, police hnenah te pawh report mai sela, khatia Lunglenga a dah ringawt che kha thil ṭullo tawp a ni, nupa in ni a harsatna engpawh tawk ula ṭang dun tur zawk in nia lawm" a ti leh hmak hmak a, chu tak chu a ni ka dikloh hmasak na chu.







"A tir khan ka zep a, lo hrilh tlang vek ila chuan kan ṭangdun thei zawk tur a nia" ka ti leh ringawt ṭhin. "Mate, i diklohna ka hre hranlo, kei ni ila ka hrilh mai hreh ve tho ang, JH-a te chuan enge thleng tur ngaihtuah chiangloin thil a ti buan buan zel a, a chhungte bula a lo sawi thawt thawt te pawh chu a ti awm anglo ka ti kei chuan, thuchiang zawng hmasa loin a burbun vek che a i thiamloh ni miahlo ah thiamloh a chan tir ringawt che a nih kha....an inah kalin ka va be dawn a mi?" ka ṭhiannu chuan a ti leh a. Lo va hmuh chu ka remti loh tlat vangin min hnial zui ta em lo.







Ka lakah chuan a inthiamlo hle a "Khami zan khan midang bula awmloin i bulah khan lo awm tlat ila engmah a thleng awm silo a, a pawi tak tak a ni" a ti zui vawng vawng a. "Inthiamlo duh reng reng suh, ka pasal kha min lo ngaihven sak la" tiin ka lo chah ve thunga, tih theih dang a vang takzet, min be duhlo a ka lak aṭanga inla hrang ta chu biak va tum luih ṭalh chu ka hreh bawk si a, ka ngaihven lo thei ngang chuang si lo a, Alawmi pawn tihngaihna a hrelo kher ang chu.






"Ka nu entir turin Vellore ah kan kal dawna, ka haw veleh ah ka lo tlawh ang che, in pa pawh chu ka lo ngaihven reng dawn nia, lo lungngai miah suh, i rilru te kha ti hah lo la, i naupai chiah kha ngaihtuah rawh aw, kha kha i dikzia tilang tu tur a nih kha, naute kha a lo piang anga a fa anih zia a hriat hunah chuan ala inchhir khawp ang...." a thilsawi lai chu lo pawt chatin "Alawm, a fa a nih i ring ve tho ti raw, ka ngaihtuah let ngial pawhin ka hre thiam tawhlo, ka mut laikhan min khawih ni sela hre tur ka ni a mahse, damdawi ten min chiu ta ang sela engmah ka hriatloh laiin..." sawi zo theiloin ka ṭap leh rih a.






"Chutiang a thlen ka ringlo, kha mi zan a awm ho kha i pasal vua leh vang hlir an nih kha, chutiang ni sela chuan thil tih tum engmaw neiin an lo inring lawk sa thlap tihna a ni dawn a, chu aichuan in pa Birth control kha ka ringhlel daih zawk, amah pawh hi ka ringlo, a awmloh lai khera thil thleng a nia, a chet zui duh dan te hi..." a ngawi dat a, rilru a ti buai nak mai.







"A unau ten i lakah an rilru put hmang a hre vek si a, a hma a nau in chhiat dan lah kha, zep lo ah chuan a ngaih a ṭha mah mah......" enge maw ngaihtuah nei tih hriat tak hian a ngawi leh vang vang a. Chutiang em tur chuan JH-a chu ka ring phallo, Alawmi thil sawi pawh chu ngaihtuah pawh ka ngaihtuah zui ngamlo.






"Ka lo thlithlai sak ang che, ka inbe zel dawn nia, nang chuan biak tumlo la, a duhdan ang hian thil han ti phawt sela enge a tum chu a rawn lang vek mai ang" ka ṭhiannu chuan a ti leh sap sap a, kan inbiak zawh chuan ka chau nghulh thei mai, ka ngaihtuah nasat poh leh thil engkim a hnawk zuala, tunge rinhlelh a rin tur ber pawh ka hrethiam tawhlo.






Kar a liama thla hial a vei ta, ka pa pawh a lo kal khat ta hle a, Aizawl lam chu an reh ta vang vang mai, ka Nî chuan ka haw hun tur min zawt leh ṭhin a, Manuntei a ngaihtuah thu a sawi leh zauh ṭhin. Engmah chhanna ka pe mumal thei silo chu a ngaih a ṭha bik vak tawhlo.






Alawmi Vellore ah a kal daih a, kan inbiak chang lahin a buai thei si a kan titi ṭha hman meuhlo, a chang chuan ka inngaihtuah lungpuam a ka pu chu hrilha sum chhuah mai chu duh thut thut chang ka nei ve ṭhin a mahse, naute vang bawkin ka rilru ka thlak leh ṭhin.






Pathian zarah ka pai tirh ang em emin ka insawisel ta lo a, taksa ala chakvak lo deuh e tih lohah chuan luakchhuak leh tih pawh ka nei ta lo. Tun ṭum chu pai puitlin ngei ka tum ruh hle a, keia duhthlan theih ni hauhlo mahse beiseina sang tak ka nei bawk, ka pain min lo tlawh hnuhnun ber khan "A lo pian chhuah hunah a hmel aṭang pawhin kan thisen kai a ni em tih chu keiman ka hre thei ang" tiin a sawi zauh a, a tir khan a thilsawi dan vang khan ka lunghnur hle a, mahse tunah chuan chu chu beiseina min siam tu ber a ni ta.






Internet ah te ka en kual a Vasectomy pawh a fail chang a awm ve tho a, eng damdawi inenkawlna mah hi za ah za a chiang a awmlo, za ah pakhat lek pawh Chance awm dawn sela ka pasal thisen kai ngei anih chu ka la beisei fan a ni.







2nd Trimester, ka naupai pawh a rit ṭan viau tawh, "Mipa anih ka ring, ka rin aiin a lianchak tlat" Nutei zan lo leng chuan a rawn ti hluta, "Tunlaiah chuan hmeichhia pawh an lian tawh lutuk a lawm" ka piin a lo ti ve a, ka pum rawn khawihin "Mipa a ni chiang lutuk" Nutei chuan a la ti ṭalh a, ngaihdan ka neih thiamloh lam tak a ni, ka mut laihian a rawn che ve ṭalh ṭalh ṭhin a, a damṭha tih min rawn hriattir ṭhin ni ah ngaiin a lo chet tawh hi chuan ka nui leh var var ṭhin.







Ka theih tawkin ka inenkawla, rilru tih hah loh hram tumin ngaihtuahna pawh ka kawm vak duh tawhlo, rilru lak pen nan tiin Nutei te fu herna ah te ka kal ve ṭhin a, mahni chauha awmlo a midang kianga ka awm chuan ka inngaihtuah lungpuam hmanlo a a tihzia ta phian mai.






Anxiety vangin ka talbuai leh ta miahlo a, Nutei ngaihdan te pawh ka ṭawmpui ve lek lek tawh.





Ni e, nu ka ni a, ka fa lo la piang tur tan chhel taka ka awm angai, pa chan ka chan kawp angai anih pawhin hnual mailo a chhel turin ka infuih sauh sauh bawk. Eng hun nge kan tawn chhoh dawn chu ka hrelo, Pathian hnenah innghah tawp chu ka tihtheih ṭha ber a ni, a remruat ang zela hma hun thlir turin rilru ka siam a, a hnenah ka inhlan tawp mai a ni. Bible chhiar in ka ṭawngṭai fo a, ka dilna chhanna pawh ka dawng ta ngei e.






Suangtuah ram ka bansana, a nin ka dawn phakloh ramah min hruai thung, a thu ah lungawina ka hmu a, chu chuan hlimna ka la tawn ve ngailoh min neihtira, engkim a kaltluang leh vek dawn tih min hriattir bawk.






Ka innghahna ka pasal kha ka lak aṭangin a dah hla a, ka ruahmanna te thlawnin ka beiseina te min laksak a; a ruahmanna kawng hi ka zawh zawk theih nan beidawngin min siam a, amah chauh ka beisei theihnan.






Ka ke te phehin an awm a, a ke chauh ka rin chhan theih nan, chutah chuan a ni a laka mikhual ang lek rilru pu ṭhin hian amah ah hahchawlhna ka hmuh tak ni. Ka nun kaltawh zawng zawnga min enkawlna ah khan vuina tur reng reng alo awmlo.






Nu leh pa karah seilianlo mahila an hmangaihna aia nep chuanglo tur pi leh pu te hmangaihna in min tungding a, ka patea te hnenah khan awmlo ila thingtlang nula mawlmang tak chauh ka ni ang, hmangaihna awmzia min hriattir turin pasal ṭha tak mai min pe a, chân ni a ka inhriat hnuah pawh damchhan tur ṭha tak naute min la pe cheu bawk. Vuina tur reng a awmlo, lawm a hlim em em tur zawk ka ni.






Thil a kaltluan hnu ah chauh hlim ka tum a mahse, a kal tluang reng silo a ka na ṭhin anih kha, Ni e, ka hlim hmasa anga, ka hlim phawt chuan engkim a kaltluang zawk ang, hlimna tur tam tak ka neih laiin tinge min ti lungngai thei tur thil chauh ka lo ngaihtuah zui ṭhin ni.






'Lawngawina" chu chu ka zawh fo ṭhin chhanna kha a ni, ka lungawilohna khan ka chantawk te duhkhawp loin min siam a, hmeichhe khawngaihtlak takah min in ngaihtir a nih kha, Depression, Anxiety te chuan he thu mal Lungawina hi an lo ngam reng renglo, eng ang hun harsa ah pawh lungawina ka neih tlat chuan engkim ka tuar chhuak thei zel ang,







Vellore aṭanga Alawmi a lo let leh hnu chuan ka tan thu thar lawmawmloh tak mai min lo hrilh a, ka pasal chuan nula a kawp a ni, hmeichhia chu tudang niloin Judy. Vanlalhmangaihsangi ngei mai kha, min ṭhawnglo ti ila chuan dawt ka sawi ngei ang, min ṭhawng mai niloin min deng dawt a ni ber.






Rilru a inpeih ve viau tawh hnuah pawh mihring rilru hi chu a nghet lo khawpa, rilru siam fel te, ka ti ang han tih mai te chu awlsam tak a ni a, a taka thil a han thlen meuh hi chuan kan rilru ngei pawh hi kan ta a ni ta lo emaw tih mai tur a ni ṭhin. Ka hlim anga thil a kal tluang mai ang ka ti a mahse, thil a kal tluan loh chuan ka hlim thei si lo, a chhan chu maw....mihring ka ni miau a ni.






Alawmi chuan keima thu a lêt mai turin min duh a, inṭhen ka duh tak tak anih loh chuan Lunglenga awm reng chu thil tih chi niin a hrelo, "I duh chuan ka lo hruai ang che, inṭhen in ni lo a, haw leh tawp mai rawh, mipa hi chu tihluih ve deuh te hi an ngaih chang a awm a, JH-a phei hi chu a chêt hun nghah aichuan nawr chi a ni zawk a, hetia in awmdun loh reng chuan in inṭhen hlen tak tak thei maiin ka ring, inṭhen i duh tho te anih chuan thuhran ania, i duh lemloh chuan nangma thu pawn lo lêt tawp mai rawh" tiin min hrilh a, chu em chu ni theiin ka hrelo.






Aman hetah min dahin min lo hruai leh tur thu a sawi a, a sawi anga a awmlo anih chuan tihluih chu ka duh lo a ni, ka inti paukhauh lui a, ka ṭhiannu bulah chuan lêt ka tum tawhloh thu ka hrilh bawk.






"Pathian zarah kan dam a nih chuan eng em kan ti bik lo ang, ka pi leh pu ten remruat mai rawh se, keichuan ka duhtawk ka hmu tawh e, kan boruak ngaihtuahin han inkawl leh pawh niila buaina zakhua mai mai tur pawh a ni thei a, hei hi kan tana ṭha zawk tur pawh a ni maithei a ni" tiin ka ṭhiannu chu ka chhang a, ka rilru tak pawh a ni.






Keima thuin haw ringawt ila, nupa karah inrintawnna a awmloh chu thuhran tunah ngaihzawng a nei mek a ni a, tun hma pawha chhungkaw boruak hlim tak neih loh sa nen hei aia chhe leh chhawng hian kan tawp lo ang tih a sawi theihloh, tun hun hi inthiarfihlim nana hun remchang leh a awlsam lai ber a ni zawk ang.






"Mate, ngaihtuah chiang rawh aw, JH-an a hmangaih em che kha, ka lo hruai leh ang che pawh a ti che a ni lawmni, a rilru na chiai hian tihloh loh a ti te pawh a ni thei a, a mamawh laitak che ani thei ania, inhnem na tur a duh em em laia i awmloh tlat vangin Judy a bel ta te pawh a ni thei a"






"Alawm, keimah zawk hi ka inngaihtuah angai a lawm, JH-a bulah khan ka hlim zel angem pawh ka chiang ngam tawhlo a, hei hi kan nupa tana ṭha zawk pawh a ni maithei...." ka ti hap a, ka rilru a insualbuai nasa hle a ni.






"Vawinah khan Office ah Judy leh Apuii an lo kala, an pathumin an chhuak ho niin ka hria, ka ngaihdan chuan i lakah an chhungkaw ho hian Game an khel anih ka ring, nang chuan ral aṭangin i lo hria a, ka mit ngei hian ka hmu bawk si a ka lo thinrim lutuk hi...." thawk a la hak a, a lungawilo ngang mai, ni e... ka mit ngeia ka hmuh veloh vang chuan a lawm ka tawrh theih zawk, hmu ila chuan ka chi ai vek hialin ka ring.






Mut hmunah ka ngaihtuah a ka ṭap leh rih ṭhin, Judy a duh tawhloh thu chiang takin ka hnenah a sawi tawh a, tunah an inkawp leh nghal mai thei anih chuan ka hnenah khan dawt a lo sawi reng zawk a ni ngei ang, an lo la induh reng ṭhin tihna a ni dawna, khang hun chhung zawng pawh khan.






Zirtawp ni chaw chhun ei hun velah Alawmin min lo phone leh a, scooty khalh chungin min lo be nghe nghe a "Mate ka hma ah sawn an tlan a, henu hian nitin a rawn birh tluk tluk a nia, Canteen ka kal turin ka hmu fuha ka zui ringawt mai hei, ka hmu tih an hrelo aniang, motora an chuan dawnah pawh an infawp a, vawin chu ka chapchar tak tak tawh mai dawn, i duh tawhlo anih pawhin kamkhat ve reng reng ka duh" a rawn ti bawrh bawrh a, thawm a bengchhen em vangin a ṭawng ring hle bawk.






"An duh duhin awm rawh se, kei min ngaihtuah vang anih chuan tih a ngailo aw, ka na miahlo ania" chutiang chuan ka sawi ve tak nain ka awmchhung na vawng vawng chu a chhan ka hrechiang hle thung, ka na lutuk a thawk harsa khawpin ka thil hriat te chuan min vilh ngut ngut bawk.






"I rilru nem lutuk hi chu aw, keilah hi ka lo sa phat zela, kawng lehlamah chuan khatiang rilru i pu kha ka a ṭha tho mai mahse, Mate in inneih thutiam hriatpui tu che i ṭhian ka nihna ang pawhin ka mithmuh laia an awmdan hi chu kamkhat ve awm pawh niin ka inhria, nang nen in ṭhenfel ni ula chuan ka en liam thei anga, nang ala ṭhen lo che a, tunah hi chuan i pasal a la ni tlat a, a awmdan hi uirena a nih hi aw, a lakah sawiduh te i nei ve miahlo em ni?" tiin min zawt a.







Sawi duh chu ka nei teh meuh mai, zawh duh tam tak ka nei a mahse, chhanna ka natpui leh tur zawh chu ka duhlo, chu aichuan thil thleng mek vanga nalo tura lo insiamrem ka duh zawk. Mahni inhmangaihna min lo tihsak anih pawhin chu chu ka damkhawchhuah theihna tur ṭha ber niin ka hria.







"Anih nangin ṭul i tih tlat loh chuan ka ngawi mai ang, nangmah i rilru a dam zawk chuan a ṭha a ni mai" a rawn ti hap a, "Ni e ṭhiannu, tihian kan ṭha tlangah ngai mai ang aw" ka lo ti zuai raih a, "Umm, lo inenkawl ṭha la, enge maw chanchin a awm chuan kan inhrilh zel dawn nia, alo bia che anih chuan min lo hrilh rawh aw" a ti leh a, ka hrilh nghal tur thu keiin ka lo hrilh ve bawka, kan inbiak zawh chuan khumah muin ka ṭap keuh keuh a, a ṭah zawh chuan ka thawl huai bawk, hei bak hi chu ka ṭap tawhlo ang tiin ka inhumruh a, ka pum lo che dat dat chu dawmin ka rilru ka siam nghet sauh sauh bawk.







Chawlhni ah Apuiin min lo bia a mamawh ka neih leh neihloh min lo zawt a, "Neilo e" tih zawngin ka chhang a, JH-a chungchang engmah ka zawt duh lo.







"Ka u in pawisa i mamawh em a hre duh a, eichak zawng engpawh i neih chuan lo sawi zel rawh, sumo ah ka lo thawn zel ang che" a ti leh a, Judy leh a unaupa inkungkaihna hrelo ang hmaka min lo be thei chu ka lawmlo ru hle a, ngawih ṭang ṭang chu a har ve ngang mai.






"Engmah mamawh ka neilo, min ngaihtuah duh suh se" ka ti tawla, ka lawmlo awka chu a hai bik hauhlo ang.






"I ning tawh em, i lo haw duh tawh em?" te chu a han ti ve sasawi a, eng rilru pu a min zawt nge maw a nih dawn ni.






"Haw duh hranlo" ka ti leh mai a, a ngawi zui rauh rauh a, tu emaw phun sar sar ri ka hria a, ka ṭawng ngaithla ve dang an awmin ka hria.







"Helai aichuan khalam kha a nawm zawk ka ring" sawitur hrelo zetin a rawn ti leh a, thil pangngailo chu a hai biklo, chuti nilo sela a unaupain min biakloh chhan chu kan sawidun ngei tur a ni a mahse, ka zawt lo a, ani pawn a sawi heklo, kan inbiak danah chuan mi mawl ber pawn ṭawng kan insum dun hle tih chu an hrethiam vek ang.







"Lo inenkawl ṭha la, kan ngaihtuah viau che a nia, naute nen khan hrisel deuhin lo awm rawh u, naute mamawh tur ka lo lamkhawm anga, i lo let leh hunah ngaihtuah buai ngailo turin" a ti leh sap sap a, chuzawng a thlen ka ringlo. Hmuhloh lamah chuan ka ner sawka, a rawn ṭawng leh hmain phone chu ka dah zui daih bawk.







Rei vaklo ah Nutei leh mipa pahnih hi an lo inzuilut a, Lalhriatpuia leh Lawma te hmel ka hmu chu kan phul zui hlut a, ka haw tirh khan Lawma zawk chu ka hmu zauh zauh ṭhin a, Hriatpuia thung chu ka hmu ngai meuhlo, Falkawnah zirtirtu hna thawkin a lo awm daih tih ka hre leh ta zela, school chawlh hmanga a lo haw lawk lai a lo ni nghe nghe.







Nutein ka chanchin a lo hrilh ru nge ni, zantin deuh thaw hian an lo leng ta zut a, kawm an nuamin fiamthu an duh a, an bulah chuan titi ho tete sawiin kan nui leh dar dar ṭhin. "Ṭhiannu Hriatpuia hi nei daih mai la, a duhruk na che a rei tawh nasa mai sia, a endanah che hian tun dinhmun ah pawh ala duh viau che a nia" Nutei chuan a ti sar sar a, min ti hamhaih let der a ni.







Chutiang zawngin Lalhriatpuian minlo en ṭhin ang tih ngaihna reng reng ka hrelo, "I hriat sual mai mai a nih dawn chu, fiamthu pawn sawi mai mai suh" ka lo ti hlak a. "Hman kuma Christmas kan hman ho aṭang khan a duh tawh che a lawm, ka bulah pawh i chanchin min zawt ziah a, pasal i nei tih ka hrilh khan 'ka van ui e' a ti che a lawm, keipawn khata ṭang khan a duh ru hle che tih ka hre ve chiah a, Ṭhamawla angin hausain hmelṭha velo mahse mi pangngai tak ania, ngaihven ve chhin rawh in lo inmil phian maithei" a ti leh charh charh a.







"Ngawiteh, pasal ṭhen ka la nih loh hi" nui chungin ka lo ti maia, dinhmunin zirlo viau pawh nisela mipa dang ngaihven hi ka tum tawhlo a ni ber, thinlung pakhat ka nei a chu chu mipakhat hnenah ka pe tawh a, ka duh a ka laklet leh theih lah a ni tawhlo, hetiang taka kan inkar boruak a awm tawh hnu pawh hian ka hmangaihna kha a la danglam chuanglo a, danglam tura beisei tlat aichuan inkawprem tur kan nilo tih pawm zawk chu ka tan awlsam zawk bawk.







"In inṭhen mai hmel em a ka han ti mai mai anih chu, engtin nge in awm zel dawn tak, naute neih hnuah ṭhen i tum nge in inhruai leh zawk ang?" tiin min zawt zui a, "Ka hrelo le" tih tein ka lo chhang a, a ngaihdan a ni leh ta vaklo aniang "Keichu niila ka ṭhenfel tawh ang mawle, i la duh hluah hluah lutuka i ṭhen phal nganglo a nih kha, i pi leh pu te pawh i la hrilh ngamlo ania" tih el awka deuh hian a ti a, ka chhang zui tawhlo, a sawi dikna chen a awm ve tlat.






Ka rilru hi a inkhâp buai renga, naute lo piang sela JH-a fa nichungin lo piang sela ka duh a, a fa ah a pawm lo anih pawhin chutiang sawibuai duh tur em chu a nilo tih ka hria, nau ka neih hma a kan inṭhen anih chuan a pa anga dah chu ka thei kher angem ka hrelo a, kan inṭhen chuan ka fa a rawn ti zui duh angem pawh ka chianglo. Pa hming put tur neilo a ka naute a awm chu ka duhlo a, chuvangin thutlukna ka la siamfel theilo a ni, thla tlem te chauh angai tawh a, kan awmdan tur chu hunin a la rawn hril chho mai ang chu.







Ka nu nen kan inbia a "Lunglengah i awm tho chuan helamah nau rawn nei ta zawk che, keiman ka lo buaipui dawn che nia" a lo ti a, ka pi leh pu ka zawh chuan an lo remti ve mai bawk a, 3rd Trimester a ni tawh a nau neih a hun ṭep tawh bawk nen ka nu hnena awm chu ka tan pawh a thlamuanthlak khawp ang.







"I pasal zawt la, a phal kher lo maithei ania, anin a tih vakloh chuan tilui lo la, nau i chhiat ngun si a, zinchhuah kha a remtih ka ring vaklo" chaw kan eilaiin ka pu chuan ti a, ka hrilh tur thu chu ka sawi ṭha ve mai a, hrilh erawh ka tumlo hulhual thung.







JH-an ka pu bulah ka hriselloh vanga thingtlanga awm ka mamawh thu a lo sawi a, ka pi leh pu in min lo thlahlel bawk si a i he loin an lo pawm hmiah mai kha a ni a, ka awmtak hnu a min lo tlawh miahloh chhan pawh engmah rinhlelh an neilo, an makpa hi an ring em em a, kan inkar boruak ṭhalo chu ka sawi bik siloa chuvang chuan a thawi pawhin rinhlelhna an neilo a ni.







Lawngtlai kaltur chuan ka insiam a, Lungleng aṭangin Aizawlah ka let phawt anga, nau neih huna ka mamawh tur ang zawng zawng lei hmasain Lawngtlai lam pan chu ka rilruk a, Aizawla cham ngailo turin ticket pawh ka hauhlawk sa a, bazar na hun erawh ka nei tlem dawn viau thung, Lawngtlai sumo a chhuah hma angai si a, ka rilru a buai ru nak mai. Mahse, vanneih thlak deuhin Hriatpuia Aizawl kal a lo tum ve hlauh a, "Zingkar hma deuhah ka kalpui dawn che nia' a ti ta hlauh a, a remchang khawp mai.







A tukah Hriatpuia nen chuan an Motorin Aizawl kan pan a, ka dul a puar lian tawh bawk si Bag lianpui ka han ak kual tur chu min ngaihtuah nge ni "Ka hmanhmawh lo ani a aw, i phal chuan ka bazar pui che anga, Counter ah pawh ka va thlah dawn che nia" a khat tawkin a ti leh ṭhin a, chuti na na na chu ka hnial ta biklo.







Ka nuin "Helamah leitur a awm ve vek tho" a tih vangin mamawh zualpui leh ka naute ho thil hawn tur chu ka lei sawk sawk a, darkar chanve pawh ka bazar awm lo e, Counter lampana kan tlanlai chuan Zarkawt kan tlanpel chu ka lung a leng vawng vawng maiin ka hria, kan in awmna lam chu ka hawichho a, langphak lo mahse, engthil emaw hian min mawlh tlata, min tawk zawnga Scorpio var lo tlan ka hmuh lahin ka kimki chawih chawih reng bawk a, ka pangngailo nasa mai a, ka awmdan chu mak a ti deuh aniang Hriatpuia pawn min lo en leh zuk zuk ṭhin.






Lawngtlai sumo a ka chuang ta chu ka thaw huai mai, khaw dangah nunthara bul ṭan tur hi ka inchana ka nu bulah ngei mai ka khawsa dawn bawk a, buaina zawng zawng kalsan tur nimaiin ka inhria.






Sialsukah chaweiin kan dinga, Motor chuan hi chuan chaw ka ei hleithei meuh ṭhinlo, thui tak tlan tur anih vang erawhin ka ei luia, ka dawhkan kilpui pakhat chuan "I rai lian tawh si a, a hma ah sawn lo ṭhu rawh, i lo insawh khawlo palh ange" tiin a ṭhutna min thleng ta hlauh a, a hnung kan tawt si a, ka lawm kher mai.







Lunglei TNT ah zunram kan thiar zawka, Driver chuan ka vawikhat kalna anih vangin kan thlen chin chu uluk deuhin min hrilh zel a, kawnglah chu an laih vangin a khu em em maia, kan inkhar phui hmuk si a a lum duh kher mai. "Nau kha i lo cheh thut ange, a lian si a phir i pai a nilo maw?" tiin min fiam hlut a, "Pakhat chiah" zaizir meuha ka lo tih chuan an nui hak hak hlawm a.







Ṭawipui S ah thingpui kan inzawk tihloh chu kan ding leh tawhlo, Lawngtlai kan lut a "Hei hi AOC veng anih hi" Driver in a lo tih takah chuan ka nu in AOC veng in lo thlen hunah min lo be rawh atih kha hrechhuak zawkin ka phone nghalthuai a.







Driver nen chuan an inbia a, ka kalna tur veng an inhrilh a ni. "Mami, i thlenna tur chu Lawngtlai 3 ah a nih chu, hemi veng zawh ah hian ania" Driver chuan a ti var a. Rei vakloah Biakin bulah hian kan dingah kawngchhak lamah ka nu leh ka nau Sangsangi an lo ding ran bawk, kan inhmu chu kan hlim teh e, ka lungchhe lek lek hial a ni.







Kar khat zet ka cham hnu chuan an bulah chuan nau neih thleng awm ka tum nghet hle tawh, naute hoin min ngaiin ka bulah an awm chawt a, ka nuin ka chet a phal silo a nilengin TV kan en a, ṭhenawm nu ho an lo leng a kan titi ho a, chhunah eitur siamin kan inkawm khawm laih laih a, Lungleng aimahin nuam ka ti ta zawk a, nu te bul nge nge a dan a dang te pawh ania nge.







Thawhṭan tlaiah ka puin min lo bia a, "Hei i ṭhiannu a lo kal a, enge thil awmzia i pasal nen in intihthiamloh chungchang engmah i sawi silo a?" tiin minlo zawt tawl a, ka bangbo lek lek zawk a ni.







"Alawmi chu ka lo be lawk ang?" ka lo ti nghal thuaia, reilo teah Alawmin phone a lo chhanga, "Hmun dangah kal sawn phawt teh" ka lo ti leh sawk sawk a.






"Mate, i zin tih ka hrelo a, a zialo tak tak. Hei i pu nen kan inchhang buai vek lehnghala thil nilo pui pui ka sawi a, engtin nge niang" inthlahrung deuh hian a ti a. Keima thiamloh zawk tak pawh a ni, kar leh ah ka lo tlawh ang che min ti a, ka zin tur thu pawh ka lo hrilh derlo.






"Eng chin nge i sawi, naute chungchang i sawi em?" hlauthawng fe in ka lo ti a.






"Aih khalam chu sawi teh nang, Aizawlah lo haw vat sela a ṭha ang tih ang zawngin ka sawia, JH-a ngaihzawng neih kha ka sawi chhuak palh a, i awmreng chuan a buaithlak tih thu sawi ka tum kha mawle, awi...a pawi e, ka tibuai zo vek dawn che anih hi" a ti zui vawng vawng a.






"A pawilo, thil diklo i sawi chuang hleinem, keipawn ka zep rei tawh reng reng emai, anih nih kan ni tawh mai ang chu" ka lo ti ve a, ka chuti ta rau rau anih chuan hrevek tawh mahse pawi ka ti tawh bik lo.







Ka pu chuan "Chumi vang chu em ni hetah a rawn dah che?" tiin min zawt a, "A nih ka ring" ka lo ti chu a lawmlo nasa mai, "I va han ngawi thei ve mawle, Tlan-in inpa nen inti thiamlo anga a sawi khan ka lo awihlo a, nang lah i ngawi tlata, kum a tling mai dawn anih hi hei, mawl em em lutuk" a ti zui hlak hlak a, chhan zui dan vak ka hrelo, an rilru ka tih buai hle ringawt mai a ni.







Ni Tlani chuan Manuntei ka aṭangin a lo hre sa deuh tawh a, kan buai chhan tak tak phei chu a hre biklo, ka pu chuan "Bungrua kan la anga, sum kan chhuah nghal ang" a ti tawl mai.






A zan a zanin chhungkua an inrawn khawma, a tuk zingah kal nghal turin thu an ti tlu a, a tukah chuan Alawmi pawh ka puin a ko tel a, kan inbe pah reng bawk. "I ruahmanna ka ti buai vek lo maw, a lo haw tir vat che ka rin zawk nen, a buaithlak ee...inṭhen lampang daih i puin alo rilruk a" a ti zui niah niah a.







"A pawilo, inṭhen ka duh a lawm" ka ti tak nain ka lung a dam zan lo hle mai, thla tlem te nghak leh lawk ila naute pian hunah ngaihtuah chauh ka duh kha a ni a, thil a thleng rum rum ta mai si a, ngaihtuahna a mang hle ringawt tawh.






Ka nu chuan thil awmzia min zawt chîk hle a, a kip a kawiin a lakah chuan engmah zep awmloin ka hrilh a ni. "Inṭhen kher chu in ngaih ka va ringlo em aw" min en vang vang chungin a ti a, engvanga chutiang thu sawi chu nge a ni ka hrethiamlo hle.







"Ngaihzawng a nei tawh bawk sia!" ka lo ti hap a. "Mahse, engemaw vang a ni thei a lawm, i awm bawk siloa, i ṭhiannu sawi ang khan haw tawp zawkla a ṭhat ka ring, nangma thu a haw loin hruai tur chein i ti zawk anga" ka nu chuan a ti leh a. Enge maw a awmzia le.







"Nu, JH-a lakah chuan ngaihdan dang i nei zawk a mi?" ka ti he haw a, a thil sawi dan chuan min ti bangbo riau a ni.






"I laka JH-a awmdan zawng zawngah inawm hrang rei mah mah tihloh chu sawisel tur ka hrelo, a rawn be lo che a, nang pawn biak i tum biklo a ni lawmni, ngaihzawng nei angin in inngai thawthang chu a ni ve ve a, ih e....hmeichhia hi chu pasal tello hi chuan kan lo mawi zo lo khawp a nia, sum ngah viau in thiamna sang tak nei mahila, pasal tello hi chuan miten min hmuh dan hi a dang tho tho a nia bawihi, in inṭhen chhan tur ngaihtuah ṭalh loin in inṭhenloh chhan tur ngaihtuah ṭang ṭang zawk la, inhmu hlawllo anih hunah chauh thutlukna siam zawk rawh u.






Lunglengah a dah lai che khan 'Ka lo hruai leh ang che" a ti a ni lawmni, 'Awm hlen rawh' ala rawn ti reng reng hleinem che, nupui ṭha tak chuan i lo nghak ngar ngar mai tur a ni, kum em pawh a la vei hleinem, a unau ten an lo bia che a, i mamawh te an lola zawt che a, nau neih hun tur atan pawh an inbuatsaih a ni lawm ni?"






Ka nu thil sawi chuan ka rilru a ti buai zo vekin ka hria, tunah ka bungrua la turin ka chhungte an thang mek bawk a, eng rilru nge put tur ka hrethiam tawhlo.







(Le...he story hi midang copy anga min ngai te khan ka copy intih story in sawifak theilo anih chuan lo sawi tawh miah suh u, tu story mah ka copy ngailo a, a ngaihnawm leh ngaihnawm loh chu thuhran lo ni se copy loin ziak thei ka inti ve tawk viau a nia, thil hrechiang loin sawi mai mai zel loh tur.....Ads min click saka comment ṭha tak tak min pe tu te in zavaia chungah ka lawm e, min han tihsak zel turin ka sawm bawk che u aw.)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)