GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:05 pm

GOMENASAI - by Ahmangaihi violette khiangte



CHAPTER - 18


images (93).jpeg
images (93).jpeg (12.49 KiB) Viewed 8992 times



Sawitur ka hrelo a ngaihdan pawh ka nei thiamlo, dawt sawi hmel a pu silo a a thilsawi zawh chiah chu thudik a nih ngat chuan rapthlak ka ti! A thinrim viau pawh kha a lo awm viauin ka hria a ka dem ta hauhlo mai, a dinhmun turah ka inchan chhin a ka laizawnnu emaw ka nuṭapa emaw chutianga a khawsa duhdah laichu mit ngeiin hmu ve ta ila keipawh ka insum zo bik kher lo ang.







"Lalrinhlua kha..." ka sawi zawh hmain ka hmui a rawn khar a, chutah min en leh vawng vawng phawt a "Ka hre tawh alawm, kha vang pawh khan kan chhungkaw zinga a tel ka duhlo a, nang hi lakluh ngei che ka tum si a" a rilru a buai hmel ve naka, chutiang bawkin keipawh ka rilru a buai takzet.







"Keimah vang chuan ngaimawh suh, miṭha ani chu ka tilo a mahse, keimah vanga i farnu nen in inkar a khikphah ka duhlo ania aw, buaina a tam mai mai ang" han sawifiah vak ngaihna ka hrelo, zanina ka laka Reny awmdan te khan thil thleng thei tam tak min ngaihtuah tir a, JH-a nena kan hma hun tur chu ngaihtuah ringawt pawhin rilru a ti hah lawk riau a ni.







"Ka farnu te hi ka enkawl zo lo chu anih ber hi mahse, min ring rawh nang chu ṭha takin ka enkawl ang che" a lamah min pawt hnaiin min kuah vawng vawng a, dim tein ka chalah a fawp bawk. Rin chu ka ring tehmeuh mai ani tluka rin hi ka la neilo hial zawk ang mahse, engthil emaw kan inkarah chuan boruak ṭhalo tak a inmung mek ni hriatna ka nei a, ka awm anuam thei meuh lo.







Motor kawngkhar kik ri kharh kharh thawmah chuan kan inthlah vat a, Irene-i hmel ka hmu nghalzat bawk. "Ka kal tawh ange, kan in be dawnnia" tiin ka chhuk ta vat a, "I leng chhuak ami a?" zu rim nam huam chunga Irene-in min lo zawh chuan "Umm" tih zawngin ka chhang a, ka inkhawm kal dawna a chhuak zawk kha alo lêt ve chiah niawm tak a ni.







Ban min rawn vai zauh hnuah JH-a chu a tlanchhuak a, kal nghal mai tuma ka inher chu Irena-in ka banah rawn vuan vatin "Lut rual ang" a lo ti a, a thil beisei chu a hrethiam ve nghal mai, "Khawnge i kal a?" ṭha tak chuan ka ti ve vat a, zanin chu keipawn ka mamawh ve tlat, dar sawm a pel tawh si a ka hman ṭangkai ve mai loh chuan chhungte hmaisa bak chan tur ka nei biklo.







"Sawtah ka kal lawk, kan chhuak rual tiila i bulah ka kal angin sawi teh" a ti ta rêng a, "Nangman sawi zawk rawh" keiin ka lo ti tlat thung. Patea aimah chuan Nu Muani mitmei ka veng zawka Irene-in a sawi anih chuan min hau dawnlo tih ka hre tlat a, Patea lahin ka telve tih a hriat chuan a hrethiam leh mai bawk ang.







"I ruih hmel viau ania, i inthunun loh chuan i pa in a hrethiam tho ang che" ka ti leh a, inchhung kan luh chuan a lo thim ṭhap tawh, choka lam panin Fridge a hawng rak rak thawm chu ka hrepha; a zu rim tih rehna tur engemaw a zawng a ni ngei ang. Min rawn koh avang chuan ka phei ve vat a "An mu tawh aniang a?" a lo ti sar sar a, a sawizo hman awrh tih a choka lampana ke pen thawm kan hrenghal zat a, kan inmelh phawk nghal hra mai.







Nu Muani a lo lang hlawl a Fridge phena Irene-i ding chu a hmu mai lo aniang keichu thip fahran hian min lo melh a, "Tunah dar engzah nge, chu chen chen hla i zir a maw?" a ti nghal khur khur a, thaw huai hmelpu chunga Irena lo pen chhuak a hmuh rualin mak ti hmel a pu bawk.







"Min lo lam kawi turin ka ti anih kha, ka pa a muhil tawh em?" a lo ti ve khauh a, lawm hmel pu lo mahse a tum ang ngawt chuan min hauhna tur a hmu lo nge ni, min melh hrek hrek ringawt a, kei ka lo thaw huai thung. "A mu chiah anih kha, naktukah a hau tho ang che u" tiin an room lam a pan zuia. "I lawm em?" Irene-in a lo tih chuan ka chhang duhlo, nidang atan phut lêt a neihloh hram ka beisei, keipawh a lehpek a awm tawhloh nan ka fimkhur zual angai, zan chhuah kher hi chu tih tawhlo ka duh.







Ka nu pawh a lo muhil tui viau aniang, a thaw ri sâk sâk a, karleh maiah an zai tawh dawna lawngtlai lamte pawn a rawn ngaihtuah ve ngang mai, naupang ho lahin phone-in an be awllo.







Zingah chaw eilaiin Patean min zilh lehta ngei a, a sawi ṭan dek dek chauh tih a Nu Muani a lo inrawlh hlauh a "Hla an zir anih kha" a lo ti chu kei ngei pawhin ka awihlo lek lek hial, thil ṭha chu a ni hauhlo inthlahrung ru tak chung chuan lungawi taka ka pawm mai angai tlat, thleng nawn leh tawhlo hram bawk rawhse.







Thawhṭan tuk chu kan buai ngang mai, Nu Muani bungrua a lo thlenga damdawiinah ka kalve hman lo a, Patea lah hna ṭul buaipui tur a nei bawk a "I û nen lo han chhohpui ula zai dawnah chuan ka lo thleng hman mai ang" a ti mauh mai si a, Irene-i laktlakloh zia ka hre si a ka huphurh ru nghal ṭeuh a, Alawmi ka phone ta ringawt a ani a lo kal thei hlauh zawk a, tlem chuan ka awm a nawm phah deuh a inthlahrun erawh a na hna a rawn kalsan phah tawp mai bawk si a.







Inzaina rooma ka nu an nawr luh hnu lawkah Alawmi a lo thlenga, JH-a leh Liansangzualan an lo zui bawk a, ka thaw a veng ta huai mai, "Nangmahin a mi i awm a?" JH-an a tih chuan ka hawikual vat a, a awm ve reng emaw ka tia engtik laiin nge Irene-i kha a lo kalbo hman ka hrelo reng reng.






Waiting roomah ṭhuin kan nghak ta ṭhapa, ka rinai daihin an zai rei leh nghala rilru a nuam thei meuhlo, Patea a lo thleng ve a a hnu deuhah Irene alo lang veleh bawk a, apa lo ṭhu fel der tawh ahmuh rualin "I thil min chah chu ka hmulo" a lo ti tehngawt a, chhan pawh ka chhang buai peihlo.







Dar kar chanve a liam meuh chuan an zai zo ve ta hram a, Nurse pakhat lo chhuakin "Mipa kha lo kal ula, ward lamah a nawr phei theih e" a lo ti var a, JH-a te ṭhiandun leh ka Patea an kal nghalthuaia, Alawmi nen kawngka bulah chuan dingin kan lo nghaka, an lo nawr chhuah laichuan ka nu chu harh chiang hleitheiloin a rum ṭiah ṭiah reng bawk si a ka khawngaih takzet a ni.







Mipa ho chuan a khumah an mut feltir hnuah Nurse te chuan inthiarfihlim ṭhen turin min lo ti nghalvata, damdawi leingai min hrilhna lehkha lah Liansangan min lo ban khalh hmiah a, hnial viau mahila a tih luih theihloh "A harh thleng kan lo awm ang" ka darah vuanin JH-an a lo ti a, pawn thleng chu ka zui chhuak ve a, ka nu awmpui angai bawk nen Alawmi a awmve tho bawka ka luhsan lehnghal thuai a. A hnu deuhah ka nu eitheih tur chi hrang hrang leh Nurse-in damdawi leitur an tih te kha Liansangan a lo dahlut a, lawmthu pawh ka hrilh ṭhat hma hmain a kal leh ang vut a Phone -in JH-a ka hrilh tawh mai aniang chu.







Chawhnu lamah chuan ka nu pawh a lo harh ve ta a, an zaina hliam erawh na a ti ngang mai, ka mangangin Nurse ka ko tawpa nachawkna in an Jection a chumi hnu chuan a muhil leh ta siai siai a, midang ho chuan reilo te an lo hmu leh zawk a, kan kiang hnaia awm ve te chuan JH-a te ṭhiandun lo lut chu an en hrek hrek reng, Nurse ho lahin chuti bawk.







"Va haw tawh rawh u, tihian a ṭha a ni tawh mai" ka tih chuan an hreh hmel deuhin ka hria "Tlaiah i u in chaw alo pe dawn che nia" tiin Patea leh Irene-i chuan min hawsan a, pahnihin a awmpui theih chuang bawk siloh a Alawmi pawh hna ah lêt leh mai tumin Liansanga nen an inzui chhuak a, kei leh JH-a kan la ṭhu thung.







A ṭhu ngawirenga ka kut a hum rauh rauh reng bawk, Nurse ho chuan an lo thlek leh ṭhina, a chhuak har a ti deuh nge ni min ti awmnuamlo riaua, ani lahin kal mai a tum chuanglo "Va chhuak tawh rawh" han tih lah chu nibik chiahin ka hre silo.







"Hna ah i lêt ve leh dawn em?" a tih chuan a bu nghat a. "Dar hnih ah meeting kan nei dawn a" a tih chuan sana ka en vat a, tunah dar khat leh a chanve a ri tawh a chutiang si chu tinge maw a la ṭhut reng ni.







"Pawisa i mamawh em?" a rawn ti chhuak leh hlawl a, "Aih..."phawk lek leka ka lo tih laiin ka kut chu a hmer na salh a, engthil emaw a sawi hreh deuh min hrilh tum hi a ang ber. "I hmanhmawh lo a mi?" tiin Nurse ho bawk chu va ka en a, kan lam lo hawiin an nui tet tet hlawma JH-a ṭhu tlat chu an rawn nuih ani maithei.







"Inneih chungchanga ka sawmna che kha lo ngaihtuah ṭha leh rawh aw, ka mamawh tawh che ania"a kut lehlamin ka dar a rawn chul thuak a chumi hnuah a tho zui vat bawk. A ding hluai chu midang awmve ho chuan an lo en ṭhap mai, a sangṭhain a smart thlup bawk si a an hmu duh ni berin ka hria, ani lah chuan tumah ngaihsaklo tih hriat zetin a khawi kual chhin eihlo.







"Tlaiah ka lo tlawh kawi leh ang che u, mamawh i neih chuan min hrilh vat dawnnia" kal mai tuma a inher zet hnuah rawn leh hawi lehin "Thil eiṭha ang che" a ti sup a, a aw a thum dut bawk nen midang chuan an hrepha ve hialin ka ring.






An kal liam hnu lawkah ka nu pawh a lo harh veleh a, thil tuiril lam a eitheih zawng chu ka lo pe nghalthuai a, "I pa te kha an haw tawh em? Tlaiah chaw an lo pe dawn che em?" tiin min zawt a. "Patean kan lo pe ang che a tia, min pe lo mahse a pawilo chaw pangngai ila eithei chuangloa, damdawiin chaw ka dawh ve mai dawna" ka lo ti vat a.







A khat tawkin JH-an enge kan an min lo zawt deuh reng a, aman min zawhloh pawhin Liansanga min rawn zawh tir thul "I bual â tawh anih hi a za sek mai hei, meeting neih lai laiin pawnah chhuaka in chanchin zawt tur chein min lo tir anih hi" nui kur kur chungin a lo ti a, hriat nuam tak zawng a ni ngei mai.







Kan khum bul chiah pitar awmpuitu nula nen chuan kan inbe tlangnela, a lo fel khawp mai Mamuani niin a pi chu a mît an zai ve hi alo ni a, ka nu chanchin te min zawtin kan titi luama, an ni chu kar khat dawn an lo awm tawh nghe nghe a, api chu zai zawh hnuah a khua a sik avangin Doctor-in chhuahtir ala phallo a ni awm e.







"Enteh ṭhiannu, kan lane chhak bera awm te khi thla khat dawn an awm tawh" tiin min kawhhmuh a. Ka va hawilai chuan pa te lampang sa pan deuh hian a nupui mu chu tungthoin tui alo intir mek a, an hmel en reng reng chuan mi awmthei tak chu an nilo tih a hriat reng.







"An nu saw lunglam ṭhalo ania, an harsa ve sia an khaw VC te pawisa puk chawpin an inenkawla, nimin khan an fate pawn an lo tlawh a an lainatawm a sin aw, eitur te ka leikep ṭhina, kan tu vak pawh an neilo, damdawi pawh an free tawp an ti" a ṭhiannuin a tih takah phei chuan ka en deuh chhen renga, han ṭanpui theih ka chak kher mai.







An mutna lamah chuan kalchhoin "Enge in an a?" tiin kan han zawt ve luama, an mutna bulah chuan Biscuit bawm khat leh tui bottle ngawt an inchhawp a, kan eitur neih te chu pek ve chak viau mahila ka ngam mai silo, ka ṭhiannu ka hrilh chuan "I phal phawt chuan kan pe dawnnia, an lawm khawp ang chu kan ward a awmho hian kan pe fo alawm" phur takin a lo ti hlauh a, ka nuin tuiril lam lo chu engmah ala eithei lo bawka JH-a thil min leisak ho chu ka pek tir vek a, lawm taka lo dawngin an pa chuan lawmthu min hrilh mawlh mawlh bawk.







Tlai chaw dawh dawnah JH-a a rawn lang leh hlawla, a inthlak tawh a in aṭangin a lo kal a ni ngei ang, engthil emaw hi alo khailuta min rawn pek pahin "Nu Siampui enge i an a?" tiin ka nu zawk chu a bia a, ka nu pawn a lo nuih var var a.







"Tinge hetiang te ilo tih duh ka chhungten min lo pe dawn a sin" a Tiffin rawn ken en chuan ka ti a, a rawn keng hnem nasa mai si. "Phone la, angailo ti mai rawh" a lo ti sam et a. "Tiffin i lo keng a law, ti nge i tihbuai duh" ka nuin a lo ti ve bawk.







"In pa a mi?" kan khum lama lo kalpahin Mamuanin a lo ti a, ka chhan hmain ka bula mi chuan "Aw" a lo ti ve hmiah mai, ka nu pawh a lo nuisuk. "Nichin khan ka hmu tawh tak che, chaw in dawh dawnloh chuan ka va dawh lawk teh ang" tiin Mamuani chu a kalsawn lehthuai a. A kal tak hnu chuan ka lam rawn hawiin min nuih a, "Duty ten lo luh an phal ami a?" ka tih chuan "Chak tawkin pawimawh hmel deuhin ka lo kal" ka lo nuichhuak hawk a "I fel hle mai" ka nuin a tih ve chuan tifuh a intih hmel em em lehnghal.







Irene-i phone in chawpek kan ngaih loh thu ka hrilh a, "Makpa hual chuan chêt hun a va hre deuh ve" a lo ti duh lek chauh. A ṭhut leh reng takah chuan kan titi a ka nu bulah chuan a ṭawng leh barh barh tawh, a sawitur hrelo lutuk chu ka lo ip ru ṭeuh reng a, ka lo nuih lahin phawk deuh deuhin min en a, hna chungchang te thlengin ka nu chu a hrilh duah mai. Ka nu lahin muhil siar siar chungin a chhang ve zela, hepa pui hian inlak mak ṭhat chu tum ve ngar ngar tak a ni.







A haw hnu chuan keini pawn chaw ka eia, Mamuani nen kan chhaka mite chu chawhmeh te kan han pe ve a, JH-a Tiffin min pek chu a tamin a tuihnai ngang mai, ama siam anih ka ring, chaw a tlem viau nain chawhmeh chu duhthusamin a tam thung.






Ka nu pawh a ṭha ve zela zan muttheihloh kan nei ngailo, zing lamah ka chhungten Tiffin min lo pe a, tlai lamah JH-an min pe ziah bawk, a lo kal apiangin Nurse ho lah hian an lo thlek huang zela, an hmu duh ta lutuk chu kei ka lo intithei ru viau lawia, amah lah chuan a hrethiam ve derlo a; a rukin awm a nuam veng veng zel mai.






Kar tawpah damtakin kan chhuak a, ka nu chuan thawhṭan lama haw ngawt chu a sawi sek renga, thui tak motor chuang tur chuan ka ngaihtuah ngang mai, ani lahin "Ka ṭha tawh emai, ka chuang thei ang" a ti mauh mai a, han chelh luih viau theih a ni lo, a lungleng tawh anih loh vek chuan a inthlahrung anih ka ring. Lawngtlai lam lahin an ngai ve bawka an lo phone ve seka chuvang te pawh chu a ni maithei bawk.







Chawlhni zanah JH-a leh Liansanga an lo leng a, ka nu chu thei leh eng ilo an lo ken sak ṭeuha, innel taka an inbe bawrh bawrh tawh chu hmuh an nuam viau , ka nu lah a hlim hmel sarh reng mai bawk.






Thawhṭan ni ah haw a tum luitlat si a keipawn ticket te ka hauh lawk sak ta nge nge a, a haw dawn zan chuan kan muhil meuhlo, engtia rei nge kan inhmuh leh loh ang tih a hriat siloh a ka ngai nghal em em ringawt a, ka muhil thei heklo. "Mambawih i ṭhianpa khan nupui atan min dil ve ringawt che a, ka enkawllo che tih hi i hrilh lo em mawni le" a tih chuan a lam ka hawi vat a, "Chutiang a sawi maw, engtikah nge a sawi a?" ka lo ti haw a, zanin khan kan ṭhu ho deuh reng si a chutiang a sawi lai awm reng reng ka hrelo.







"Thingpui i lum laikhan kan lo sawi duna, i pi leh pu te be zawk turin ka lo ti anih kha, keichuan ka pawm thlap ania i pi leh pu ten rem an tih phawt chuan nei ngei ngei rawh, tlangval fel tak anih kha" a lo ti sap sap a.







"Â....nu pasal nei thei ka la ni hleinem, nang leh ka pi leh pu te pawh nuamsain ka la dah ve hman lo che u a, pasal neih ringawt te chu ka duh lo, hna te ka thawk anga ngaih ṭha deuha ka kalsan theih hunah che u ka nei chauh ang" ka lo ti ve vat a.







"Chutiang ngaihdan nei mahta che, keichu ngaihtuah ka ngaihloh hi dinhmun chhiat zual lai kan tawng ve a ni maia, kan dam anga hetiang reng kan ni dawn hleinem, keimah lam chu min ngaihtuah duh reng reng suh, kha...ani lah khan inneih a duh tawh hmel nasa mai si a, i innghah tir reng chuan a ṭhalo zawk ang, mipa hi chuan thil nghah hi an theilo ania innghahtir reng tur a nilo, nangpawn i duh tih ka hria a boruak dang a awm hmain nei tawp la keichuan ṭha ka ti, mi ṭha tak ani bawka, i pi leh pu te tan pawh makpa ṭha tak anih ka ring" ka nu chuan a ti leh a, ngaihtuahna a ti buai ve map mai.







JH-a neih chu ka hreh a ni hranlo, ani aia pasal ṭha tur ka hre bik chuang hauhlo bawk. Chu a hnekin hmeichhia te duhthusam ang mipa a ni a, ka innghahtir reng vang hian beidawngin min hawisan ta sela ka na viauin ka ring bawk.







Ka ngaihtuah tluk tluka thil nilo lo thlengin ka ngaihtuah kual ani ber, JH-a hian hmeichhe dang tawng ta sela, nupui neih a duh tawh bawk si a, ka lakah beidawngin hmeichhe dang neita ang sela ti te in, khai leh.....kei min duat ang chiah a hmeichhe dang duat tur anga ka ngaihruat chhin ringawt pawhin thikna hlirin ka khat chu ania!







Ka rilru a buai ve ta nak mai, hetia innghah tir reng pawh hi thilṭha niin ka hre ta chiah lo mahse, thu tlukna siam zung zung erawh ka hlauthawng leh lawia, hmeichhe tan chuan inneihna hian damchhungin min phuar tawh, duh eng ang mahila ka chhungte ka ngaihsak thei kher tawhlo anga, kawng engkimah ka pasal mitmei ven angai tawh ang, ka pi leh pu te tana suangtuahna ka lo neih ve zawng zawng te kha engmahlo mai ah ka chan tir mai angem, thutlukna siam harsa tak a ni.







"JH-hi ring tawp mai rawh, rin loh chhan tur i nei anih loh chuan" ti a ka nu thil sawi chu ngaihtuah zuiin ka tlaivar ṭhak a ni ber. JH-a hi rinloh chhan tur ka nei miah bawk silo, engah nge maw a engamah hmaa ka han hlauhthawn em em ringawt ni, kan chhungkaw dinhmun engkim a hria a, ka pi leh pu te pawh min hmuhpui tawh a ka mawhphurhna pawh a hre tawh a lawm mawle, heti chunga min neih a duh anih chuan ka hnial lui reng bik tawhlo ang.



****



Ka nu chu a haw ta a a awmlo chu khua a har ve rawih mai, a thlen velehah min lo phone a, naupang ho pawh minlo biaktira ka thil leisak te chu lawmthu an lo sawi liam liam a, an hmel hmuh a chakawm duh ngang mai, "Lo zin thuai thuai rawh aw" an lo ti ve sap sap a, keiin remchang hmasa bera ka zin tur thu ka lo hrilh ve bawk.







JH-a a zin daih a, Alawmi a buai bawk nen kawm tur ka nei meuhlo, Jonak te ṭhianho an lo leng zantin a, an lo thlen ruala ka inthiarfihlim nalh ṭhin chu Irene-in min phunkhum hlak hlak ṭhina, engahmah ka ngai duhlo lui zel thung.







Nitin Nu Muani ai dawr ba ka khawn a hna harsa ani lem lo bawka, tihtur neiloa ina awm reng aichuan a zia deuh. Zirtawp tlaia ka bazar haw chu Alawmin min lo phone a, a call ka chhan rual rualin a rawn rak chel chula, a thil sawi chu ka hre hleithei meuhlo.







"Ka sawi i hria em......hna i hmu a nia, engtin nge kan lawm dawn.....ui ka lawm lutuk hi hei min nuih nasa ania" a rawn ti lang lang a, ka hamhaih lek leka chhan letna chang pawh ka hre lawklo, "Tak tak ani em..thlalak min lo thawn teh, ka awih thei lo ania" nui var var chungin ka ti a, thlalak min lo thawn vat a, ka hming chu a lo chuang ve vanga, hnuk a ulh ṭeuh mai.








Ka pi leh pu phone-in ka hrilh a, ka han ṭap ṭeuh a, chutiang bawkin an ni pawh. "Chawlhni hmangin lo haw chho la, Ar kan talh sak dawn che nia" hlim takin ka puin a lo ti a, min lawmpui thiam ngang mai.







Patea pawn "Lawm ngei angai anih chu" a lo ti ve a, "I hlawh lak hmasak berah thil min leithei" Irene-in a lo ti bawk a, "Engzah nge i hlawh ang?" Nu Muanin a lo tih chuan ka hlawh zat tur bawr vel chu ka hrilh a, chiang tak phei chuan ka hrilh duh lo "A va tlem ve" tihzawngin min lo chhanga, ka tan erawh a tam tawk viau a ni.







JH-an min lawmpui thiam leh khawp mai, "Ka lo haw veleh ah kan lawm dawnnia" a lo ti var a, "Ka rualin i kal anga, ka rualin i bang ṭhin bawk anga" nui lek lek hian a lo ti a, "Hmm....i office ah ka thawk dawn lehnghal a, midangin mak min ti viau ange?" ka tih chuan a nui hawk a. "A pawilo, ka duhdan phei chuan inkhat aṭangin hnathawk turin chhuak dun ila, haw dun leh ṭhin zawk ila" alo ti mai a, a sawi zawng ringawt pawn min ti lai chhia va a ni. Mahse, harsatna ka nei leh ta, hna hmuh veleha pasal neih nghal daih chu, ka duhaisam te a puitling ve ṭan dawn chauha, chutianga ka awm anih chuan chhungkaw tan ka van chhenfakawm duh awm loh ve mawle, ngaihdan ṭhalo tak a ni, tun maiah chuan ka theih ka ringlo.








Inrinni ah Nu Muani Guwahati ah thawmhnaw lain a kala, tun ṭum chu Bazar pui turin Pate Hruaia a kalpui a Irene-i nen chiah in kan nghak a, Inrinni a an kal kher chhan pawh Thawhṭan lamah Motor kawng a tlang dawn loh vang a ni, an zin tak vangin keipawh kan khua ah ka haw thei ta bik rihlo. Zanah JH-a alo haw ve dawn chiah bawka ka hnathar min lawmsak a tum chu hunthawl zawk te pawh ka nei thei dawnin ka hria.







Tlaiah ba ka khawna, chawhmeh ka bazar nghal diam bawk. Eirawng ka bawl laiin zan chhuahpui turin Irene-in min sawm tlut tlut renga, ka hnial viau pawhin a tilui ngawng ngawng renga a hneawm duh kher mai.







"I lo kal ve loh chuan ka riah chhuahsan daih dawn che ania" tiin min vau thul, "Nangmaha i riah ngamloh chuan min zui la, kan haw har dawn hleinem" a ti ṭang ṭanga, riak chhuak daih mahse pawi ka ti hranlo, ka hlau a zeng pawh a nilo a ani kianga kalchhuah chu ka tan a him lo fe zawkin ka hre ve tlat.







Zanah ka inkhawma, ka haw chuan a lo awm tawhlo a, ka phone -a a la har hrep mai, kawngka chu kalh tur nge kalhloh tur tih ka chian duh vanga phone mai chauh ka ni, rin ang ngeiin "Ka lo haw dawnlo, ka pa i lo hrilh teh chuan i chaklo ngawt ang" a rawn ti nghal pang pang a, ka off leh rang teh e.







Mut dawnah JH-a nen kan inbe zawk a, khawkar kawnga an tlan lai a ni nghe nghe, signal a chiang vaklo a rei inbe loin kan titawp leh maia, dam chuan chawlhni tlaiah inhmuh kan tum a, keimah chiahin ka riak tih hria sela engtin tak ngai ang maw?







Irene-i pawh zingah chuan a rawn haw veleh maia, "Nizan chu ka rui miahlo, tunlai chu ka in theilo" tiin a phun bul bula, "Zanin chu lo kal ve tawhla, JH-a bialnu hlui ka hmuh ang che, chhelo tiktek ania" a tih chuan ka melh ralh a, ka awihlo nasa mai, eng chhuanlam pawh siam mahsela ka zui tawh hauhlo ang.







Tlaiah JH-a a lo thlenga "Zanah ka lo lengphei zawk mai ang, pawi itih loh chuan" inthlahrung takin a lo ti a. "Pawi tilo e hahchawl ve rih rawh, zan inkhawm ka tuma inkhawm banah i lo kal dawn nia" ka lo ti var a.







Inkhawm tura ka insiam laichuan Sitting room lamah thawm a ri hlut a, ka insiam zo ka chhuak phei chu ka tum loh deuh deuh ka hmu nuk mai "Zanin chu hetah kan riak khawm dawn" Irene-in a lo ti vat a, Jonak te ṭhianho lo nui sawng chu lungawi manglo zetin ka en a, hmeichhe nasat hmel deuh deuh an rawn hruai tel bawk si a, riah khawm tum chu ka ngaihdan a ni lo viau, Patea hrilh mai tur em mawni?







"Riah khawm kher a ngai a mi?" ka ti dek dek chu "Sawi ve lo mai teh, i ka kha veng ṭha deuh rawh aw, hrelo turin an lo hriat teh chuan" tiin min vau zui khar khar a, inkhawm dar a lo rik tak vangin ka chhang buai tawhlo.







Zan dang aiin chawlhni zan inkhawm kan tama, zai pawh a nuam viau mai. Inkhawm bang ka haw chuan kan kawt hla deuh hlek aṭanga zai play dup dup ri chu ka hre pha a, kan in aṭanga ri lo chhuak ti ka chiang viau bawk. Inkhawm bang ho pawhin makti deuhin an thlek hrek hrek hlawma, hmanhmawh takin keiin inchhunglam ka pan bawk.







Ka lut chu an lo phusa nasa mai a, a ṭhen an lam a, a ṭhenin zu an in a, sofa a duhdah zeta lo mu tawk an awm bawk, ka room ah lut tlangin ka inthlak nghalthuaia JH-a lo kal a tum bawk si a hetiang a min rawn hmu a nih chuan mak a ti ngawt ang, Irene-i khawsak duhdan chu a ṭhalo tak zet, hei kher chu thup sak chi pawh a nilo.







Room aṭanga ka chhuak leh chiah chu tu emaw hian min lo pawt sawka, Sitting room laiah chuan min kai pheiin min thehkual chiama, "Ka lampui ve duh" ṭhenkhatin an lo ti bawk.







Tal chhuah tuma ka ṭang vel chu za emem in Irene-in min lo nuih a, chutah a ṭhutna aṭanga lo tho in Zosanglianan min lo pan bawk "Henry, hei chu ka chanpual bik aw" tiin min lamluihpui tum tupa chu a namsawn rawka, chutia min thlah hran takah chuan kei ka lo insiam rem ve chiah a Jonaka lo hnai leh chu na zetin ka lo nama, a rui deuh tawh bawka Sofa ah a ṭhuthla hnawk nghe nghe.







Rang takin pawn lamah ka tlanchhuak a, thinrim luatah ka khur chhe lo chauh a ni, Patea phone tuma ka indap chu Phone ka lo keng chhuak hauhlo, engpawh nise khang ho awmlai kha chuan inchhunga awm ve chi ziazâng a nilo anih kha, hlawm tak chuan a! Engvangin nge hmun dang an pan mai loh le? Irene-i em em lutuk hi chu.







Alawmi te veng lampanin ka kal hlawk hlawk a, kan veng piah lawkah an awm bawka ke pawhin a kar a hla lo a, a phone hmansakin JH-a pawh ka hrilh tawh mai ang, Jonak te ṭhian ho an ni bawka anin tihdan a hre zawk bawk ang chu.







Alawmi chu a lo mu tawh a a chhungte an lo la meng thung, a nuin min kaihthawh saka, min hmu chu mak a ti hmel viau a, a room ah inzuilutin thil awmzia ka hrilh a min thinrimpui leh ngang mai "Hetah riak mai rawh, i patea chu hrilh vek ang che a ni em em tawhlo" a ti hlak hlak a.







A phone hmansakin JH-a chu ka phone a, "Inah Irene-i te ṭhianho an awm a, ka lo chhuahsan rih a, hei Alawmi te inah ka awm a min lo lam mai rawh" ka tih chuan a lo chhuah dawn chiah thu a lo sawi ve a, address te ka hrilh a, a lo thlen thuai tur thu min hrilh bawk.







JH-a lo thlen chuan ka sawi hmain Alawmin a lo hrilh zung zung a, a lawmlo bawka a ang zui tawn tawn a ni ber, JH-a chu a ngawi reng a, min rawn en paha "Haw ila?" a tih bak chu engmah a sawilo, a mitmeng aṭang erawhin a rilru puthmang chu ka hrethiam ruak tho, a lawm hauhlo kutthawh duh maitur mitmeng a pu bawk.







Alawmi nuin "Thingpui inphawt rawh u" a tih tlat vangin kan ṭhu khawmuang leh rih a, kan titi paha hmeichhe ṭawngduh ngang chu kan ṭhu ve leh reng rih a, kan haw meuh chuan dar 10 a pel thuak tawh.







"I chhungte an awmlo tih min hrilh lo a" Motor a khalh laichuan ka lam a lo hawi zawk a "Hrilh che chu ka tuma" tih te maiin ka lo chhang a, a ner nak chu a lungawihloh vang tih ka hrethiam mai, ka inthlahrung hle bawk.







"Harsatna emaw min mamawhna i neih chuan min hrilh rawh ka tih che kha, ka lo kal nghal ang tih pawh ka hrilh che a" a ṭawng ring hauhlo nain a aw chu a chang ṭha fel fawl hle a, ka lakah a lawmlo takzet anih hmel.







"Hei ka lo hrilh che a, ilo kal hi" ka tih chuang beidawn hmel zetin min en a, thawk a la zui hawk ringawt.







Kan ṭhu ngawidun ta renga, kei min thiamlo ringawt chu ka lawmlo ve dawn dawn a, ka ṭhu tum ve bar a, ani lah Motor khalh chungin hmalam a melh run renga, a tum hmuk mai bawk si, a nuamlo duh kher mai.







"Ka hau lo che ania" a rawn tih leh takah chuan ka va melh a, min lo melh ve chiah bawk.





"Min hau suh" ka lo ti a.





"Ummm....ka ngaihtuah vang che anih kha" ka nui nghal var var mai, ani pawh a nui ve suk a, a kut a rawn hum zui zat bawk, "Ka ngai hle mai che" tiin min rawn en leh a, keipawn ka ngai takzet a ni, harsatna ka tawh laiphei hi chuan ka ngaizual ṭhin.







Kan in kan thlen chuan thawm a lo reh duk tawh, kawngka chu hawn mai tumin ka pawta, chhunglam aṭangin a inkalh tlat mai, ka beng ri dawt dawt a chhunglam thawm engmah a awm eihlo, tumah inchhunga awmlo ang mai an ni.







JH-an a dawhthei ta vaklo, a chum ri nghal bura, chutah ring zetin "Thlawk bo rawh" Irene-in a rawn ti vin ṭhawt mai.
"Irene, kawngka lo hawng rawh" tiin ka au zuia, thehmeh an sawi ang hlauh a ni, min chhang zui leh tawhlo.







Pawnah chuan engemaw chen chu kan nghak duna, a khat tawkin Irene-i chu koin kawngkhar chu ka tiri reng bawk a, awmzia erawh a awm chuanglo. Ka piahah chuan ngawirenga dingin JH-a chuan min lo en a, tihngaihna a vang takzet.







Kawngkhar chu ka bengnawn leh a, "Lalnunkim lo hawng rawh, Patea ka hrilh dawn ania" ka tih pawh chuan min chhang duh chuanglo, kawngkhar chu ka beng a; ka beng nawn leh ṭhin.







"Bawihte" tih ri vang chuan ka tawp dat a, chutah kawngkhar ka beng leh tur chu ka kut rawn vuanin a lamah min pawt hnaia, "A tawk tawh e" tih leh min kaih a ruala, Motor lampana min kaih phei laichuan ka ngaihtuahna a buai nuai mai.







Kawngkhar a hawnga ka hnial biklo, ka tana kawngkhar inhawng awmchhun a ni rih tlat a, kan tlan chhuah leh lai te chuan ka ngaihtuahna a buai nuai a ni ber.





"JH....."


"AW...."




"Khawnge min hruai dawn?" kan pan lam ka hriat vang zawka zawt ka ni.





"Kan inah" tiin min lo chhang a.




"Engtin maw?" ka ti nawn leh ngat.





"Zanin aṭangin ka bulah i awm tawh ang, min hrilh la i duh apiang chu ka tih sak ang che, let leh kha chu ka phal tawhlo" a ti mauh mai, a ṭawng ring hranlo mahse, a fiah ṭha kher mai.







(A thui ania, ka tlai theih em vangin Bonus che u aw, Story a kalmuang tih ka hria e, a muan a ngai tlat kim taka tarlan angai ve tlat rih sia mawm....tin, kan chapter hi a tawi a ahmaa story ka dah te chanve ang chauh ani a, a muanglo theilo a ni, naktuk zanah min lo beisei leh dawnnia......comment min pe ṭhin te, like leh ads min click sak ṭhin tute ho kha....KA HMANGAIH VEK CHE U)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:06 pm

GOMENASAI - by Ahmangaihi violette khiangte




CHAPTER - 19

images (41).jpeg
images (41).jpeg (10.72 KiB) Viewed 9269 times



"A chi loh ang; chutiang ngawt te chu" tiin thawk ka la halh a.






"Ka bulah i him a lawm, ka thlazar hnuaiah awm la ka engkim hi min ṭawm rawh, kha Inah khan nuamsa takin i awmlo tih ka hriatna pawh a rei tawh, duatna leh ngaihsakna i dawn ngailoh te kha ka pe vek ang che, hetianga hmuh fo che pawh hi ka thei tawhlo" ka lam lo hawiin ka kut a rawn hum chawt a "I bialpa ka nih hi" thutak zetin a ti leh a.







"I ni a lawm" zawi te in ka lo ti ve a mahse, hetiang teh tawpa han inzui ngawt chu nithei ngangin ka hrelo. Alawmi te inah tal min dah zawk sela, Irene-i suahsual rawngbawl vang ngawta tumloh dan deuha thutlukna siam chu a dik thei lo, Patea te nupa an awm bawk silo a; thiam lo zawk chan te pawh ka chang ta ve ang.






"Alawmi te inah min dah leh mai zawk la, Patea te pawh ka be mai anga" ka tih chuan min en zawk a, a motor a tiding zui zat bawk.







"I ṭhiante inah ka dah che anih chuan mipa a zawnga nep ber ka ni tihna a ni ang" a ti leh khauh a, tinge maw chutiang zawnga a ngaih daih le, chulam chu ka ngaihtuah dan a nilo, a nêp phah nachhan tur ka hre miahlo bawk.







"Irene-i te chu ngaihkhata ngaih ve angai a, lak thutak vak chi pawh a nilo, Patea te an lo haw leh vat dawna" inthlahrung ru deuh chuan ka ti leh a, neih ka hreh vang em em pawh a ni tawh biklo, kan innei dawn anih pawhin pangngai taka chhungkua indawr tawna inneih te pawh a ṭha a, hetianga inzui haw tawp lo hian.







Min chhang loin seat ngheng chuan a ṭhu ngawi ran a, enge a ngaihtuah hriat ka chak kher mai. "Min va dah la" ka tih leh lai mekin ka kut a rawn hmer salh a, a lu a thing bawk.







"Ka dah theilo ang che, zanin chu chawlhhmuna kan inah kan riak mai dawn nia, i rilru pawh ka hmin thei maithei a sin" Motor tinung leh nghalin a tlanchhuak a, a fuh dawnlo tlat mai.







"Ka rilru chu i hminsa daih tawh a lawm, nangmah bak rinchhan tur ka nei hleinem" tiin a hmel enlo chuan tukverh lam ka hawi a, min en tih erawh a hre thei.






"I hlauthawng a nih kha" za lo zeta nuihawk chungin a rawn ti a, a sawi diklo chuanglo, hlauthawng ve bawk e, ka nunpum hi hlauthawng reng rengin ka hmanga, thuthlukna diklo ka siam loh nan ka tihtur ngun takin ka ngaihtuah lawk ṭhin bawk, zanin hian i he loin zui ta ila nakin lawkah ka inchhir leh mai a ngem tih te thlengin a ni ka ngaihtuah.







"Keilo hi nupui ṭha deuh i hmu zawk ang mawle" ka ti leh ngawt a, engvanga chu thu chu sawi ngawt nge ka nih ka hre biklo, a laka ka rilru put hmang hi kei ngei pawh ka indem ve lek lek fo, ka hnar phalloa nupuia a sawmna erawh ka pawm hreh lawisi a, hmeichhe lêlo tak ka lo ni te pawh ani mahna.







"I tan kei chauh ka awm thung, midang tawng leh pawh nila ka hmangaih ang che hian an hmangaih zo ve lo ang che" fiah tak leh inringtawk tih hriat em em si hian a ti a, a lam ka hawi rang kher mai. "Min khawngaih em ni" nuilui sak chungin ka en a, ani erawhin hmalam ngawt a en a a kut lehlam chuan ka kut a la hum reng bawk.







"Chutiang chauh chu nisela chuan nupui a tan ka sawm kher lo ang che, mahni hmasial takin tunah pawh ka hruailui mek che anih hi" a ti leh mai a, "Tinge kei kher min duh hi ka hrethiamlo hle mai" ka tih chuan min en leh zawk a. "Ka hre bik miahlo Bawihno, ka nupui atan ka duh hle che tih chiah ka hria, ka ta angin ka ngai tawh che pawh ani maithei, hrehawm i tawrh hian hrehawm ka ti ve ṭhin, enteh.... hlauthawnglo khan min ring tawp mai la, inchhirin ka siam hauhlo ang che" nelawm tak leh damthlup si hian a ti a, chhan zui ngaihna ka hre tawh derlo.







Alawmi te inah min dah duh tlat silo a keiin an ina kal ka duh bik der lo a, chawlhhmun lama kal chu ka pawm ve ta ringawt mai, inru ang chuan awmzui ka la duh hauhlo thung, "Zingah ka haw mai ang" ka ti ta hram a, min chhang tawh bikloa a pawm ve nihmiang ka ti mai.







In kan thlen chuan a room ah kan chho a, Closet aṭanga puansin tur rawn la chhuakin khum a siam zui mawlh mawlh a, engtin nge kan khawsak zel dawn tih ah chuan ka la chiang ngamlo. "Tah khan ka mu dawn a mi?" ka tih chuan a lo bu nghat a.







"Khawnge i mut ve dawn?" ka ti leh kher chu min rawn lehhawi zawka, engmah phei chu a sawilo. Bathroom awmna min kawhhmuh a "I inthlak duh chuan tahsawn ka thawmhnaw a awm" a ti leh maia, kan mut dan tur a sawi chianglo ber mai chuan ka rilru a mawlh thung, inru anga awm chu ka duh lo miau si a, khum khata mutdun pawh ka la duh chuanglo, chutilo zawng mahni inthiam chawp pawh a harsa zo vek ang.







"Lo inthlak la, ka intifai hmasa ange" tiin Bathroom ah a lut a, a lo chhuah leh lai pawh chuan chechang loin ka lo la ding reng a, ngaihtuahna a tawi tup a, ka chawmawlh zo vek bawk.






Hnung lam aṭanga min kuah pahin ka biang a rawn nawk a Citrus rim a nam veng veng mai, "Ti nge i inthlakloh?" a hmuiin a biang a rawn nawr a, min ti zam chhia va a ni. "Mu tawh ila" tih leh sup pahin ka kawngah a kuah nghet salh a, a pang tilum chuan min ur nghal ham ham bawk nen ngaihdan mak deuh deuh rilru ah a rawn lut nghal zut zut a ni ber.







"Zingah ka haw leh dawn ania?" ka ti leh ta hram a. Aw min pawh loh vang chuan a remti lo dawn tlata hriatna ka nei zui bawk, chutah a lamah min kuaiherin a kut pahnihin ka biang a rawn dawm a, lungchim zeta min fawh takah chuan ka ngaihtuahna vir muai muai kha an chawl ta vek in ka hria.







"Mutawh rawh le" min thlah vut pahin khum lam a pan a, ka zui mai loh vang chuan lo hawi lêt lehin min rawn nuihsuk a "Sofa ah hian ka mu ang, a vawt i tih chuan min hrilh dawn nia" khuma a puandah chu keu thak pahin a ti a, ka thaw huai thei nia mawle, "Lo mu rawh le" a tih takah chuan ka pan ve nghal thuai a, khuma ka mut thlak rualin puan min lo sin tira, a chêt dan chuan min ti lawm takzet a ni. Sofa a a mulai chu ka enzui ve renga, lungawilo hmel a pu em tih chu ka chîk viau bawk a mahse, chutiang hmel a pu lo hlauh.







Kan awmna In chu a reh ṭha bawk a, thli thaw vuk vuk chu a ring ṭha duh kher mai, thli thawt ruala thingkung in sawi ri sang sang ṭhin te chuan hmulthi a ti ding sung sung thei nia mawle, ṭhu chhuak hlawlin JH-a mutna chu ka va en a, a muhil tui viau aniang a che eihlo, ruah mal a rawn tlak tak phuar phuar ah chuan a vawt var mai bawk a, thochhuak vatin Closet chu ka hawng a puanlum lak belhin JH-a chu ka sinthuah tir a, a muhil lai hmel chu a hmelṭha takzet a ni.







A hmuiah dimtein ka fawp de de a, zawi tea thawk ala ri bak chuan min chhanglo, khumah ka mut leh hnu chuan ruah pawh a sur tam ta kher mai, muhil thei mailo chuan ka inlet seka, Veranda pawnlama ruah tla ri cherh cherh chu ka ngaithla ran bawk. Mut a chhuahloh chu thuhran ka harh chiang telh telh a, kawl rawn phe leh zawr zawr ṭhin te chuan ka thauah min man deuh tlat lehnghal, sana ka en chuan zing lam dar khat a pel zawt chauh a ni.







Ṭhu chhuakin JH-a chu ka va en leh ṭhin a ala mutui nasa mai si, mu leh zetin puan chuan ka invur ṭha sauh sauh a, ahma aia thawm a rawn rin tak sauh vang chuan ka mu hle hle thei tawhlo, rial asur chiang a ni, ka piah lawka tukverh darthlalang chu a rawn per leh dat dat ṭhin a lian tak phei chu nilo mahse, rial tla kher hi chu ka rap zawng tak a ni ve tlat.






"JH...." a bengchheng bawk si a a hrepha lo ani mahna min chhang hauhlo. Chutih laichuan Current a rawn thim hmiah mai bawk a, kawl rawn phe leh chiah ah chuan ka rak chhuak lo chauh tawh, thinphu chu rang ṭha zaih zaih tak a ni.






JH-a mutna lamah chuan thawm awma ka hriat vangin ka beng ka chi vat a, "Mambawih.." tih ri ka hriat rualin ka thaw huai mai. Khum mawnglam chu rawn delh hniam satin ka puansin chhana ka ke a rawn deh rual chuan ka lo ban ve vat a, "A vawt em?" tiin minlo ṭhuthnaih ve nghalthuai bawk.






"A sur nasa reuh lutuka, min ti muhil theilo" ka tih laimekin ka puansin chu lo keuin ka bulah chuan a rawn inthawlh a, min kuai mu riai riain amah si chetin min pawmbet zui bawk, hnial buai tumna reng reng ka pu tawhlo a chu a hnekin a pangtilum ka deh rual khan ka thla a muang huai a ni.







"I vawt vek tawh, min khaihthawh nghalvat tur a lawm" min kuah ngheh salh salh pahin a ti a, keipawn a taksa chu ka lo ngheng hnai ve talh talh a, ka ke rawn khan chialin hnunglam aṭang chuan ka kawngah a kuah a, ka nghawng bulah a thaw lum ham ham reng bawk. A lama ka inher laichuan a hmel chu chiangtakin ka hmu theilo, a khabe kual hmulṭo na vanga thap hrak chu khawih niap niap pahin ka mu ngawirenga, a muhil leh tawh anih ka ring.







A muhil emaw ti a a hmui fawh leh ka tum chiah chu min rawn chet khalhin duhthawh leh uar zet hian min fawpa, ka hnar theilo a ka chhanglet thei heklo, ka kawr hak chu hlim chho hrawkin a kutin a chul kual nghalruai a, kan thawk a reng dun nasa tawh mai.







"A chiloh, tiang chuan awmlo ang" ka ti vat a, a tawp mai lo chu tihngaihna tak pawh ka hrelo, zanina hetianga kan khawsa duna a tawp kan thleng dun anih chuan engmah insawithiamna tur ka nei tawhlo ang. "Aw.. ti teh bawihte, ka mamawh che" a hmuiin ka bengkawm a rawn nul thuak a, min hiplo a ni biklo, hmeichhe dang te chunga thleng ṭhin ang kha keimah ah pawh a awm ve tho a, ka insum mai chauh a ni.







"JH...." thawk la hak hak chungin a biangah ka dawm a, "Ka duh rihlo" ka ti tawl mai. A che zui ta biklo a min kuah hle hle ringawt tawh, a thaw lak erawh a la mumal biklo, "Innei vat ang" a ti leh mauh mai a, chhan ngaihna ka hrelo kher mai.


****



Zingah hma deuhah thoin ka intifai vat a, alo thawh ve rual chuan chhuak mai thei turin ka lo inpeih diam tawh. "Hna i kal dawn chuan hmanhmawh la, min va thlah hmasa dawn nia" khumsira a lo ṭhu chhuak chu nuisangin ka lo en a, a zingtho hmel tum deuh bar leh a sam mumallo zeta tho deuh siang te chu a inhmeh lehpek viau.







"I duh chuan hetah ṭukṭhuan a siam theih ania, inhnuaia fridge ah khuah Frozen food siam mai theih tur chi a awm ang" a ti a, "Inah eirawngbawl ka ngai, Irene-i zurui pawh a inchhir ru viau tawh ang" nui hak chungin ka lo ti a, a tlai tak tak hma a haw vat chu ka duh ber, a unaute emaw Liansanga pawh nise midangin kan riakdun tih an hriat ka duhlo a, helai hmuna min lo hmuh phei chu hlau tak ka ni. Min hnialbuai loin a insiam ve nghal mai a, ngawichawi leh tih tamlo ve tak chu ani chiang a lawm, ka thil sawi a ngaipawimawh ṭhin te hlei hlei hi a bula awm ti nuam zualtu a ni.






Kan In lampana kan lêt leh laichuan a phone a ri sek renga, a chhan laichuan keiin ka lo en ve reng bawk a Alawmi alo ni awm e. "I unaunu chuan a zawng che anih hmel" min melh ralhin pahin a ti a, Alawmi te inah ka awm ringin a lo va kal niawm tak a ni.







"A rui a reh tawh anih dawn chu" ka ti maia, ka hmuh hun chu a chaklo ngawt ang, Patea ka hrilh dawn khawp a lawm, ngawirengin ka tuar mai mai tawh dawnlo.






In kan thlen chuan kawngkhar a lo inhawng huau a, inchhung chu a lo reh ṭhap mai, kawngka pawh khar miahloin khawnge maw a kal leh ni? Hmun hnawk niai chu ka tifel zung zunga. JH-a thingpui ka lumsak laimekin Irene-i a lo lut hlawla, min hmu chu a phu zawk lehnghala, chumi hnuah rum zeta min melhin "Ka pain a be duh che ania Phone rawh" a ti hluk a, kei aiin Patea chu a lo zuk be hmasa chu niin, a lo zuk insawithiam zuah zuah in ania ka rin ni.






"Nizan lam in hmang nuam bawk maw makpa hual" Sitting room a aluh rualin a ti ham ham a, "A lehpek i nei leh a nih chuan a pawi i ti tawh viau ang" pakhat chuan a lo ti hmuk a, Irene-i nui hak thawm chu ka hrepha.






Chaw ei ve nghal tura ka sawm chuan JH-a chuan min hnial a, "Hna ah ka tlang ang, harsatna i neih chuan min hrilh dawnnia" a kal dawn chuan tiin min chhuahsan zui a, Sitting rooma ka lêt leh laia Irene-i min lo melh dan chuan min ti bangbo lek lek zawk hial a ni, JH-a nen khan engtianga awmdun tur ang tehhrepin nge maw min lo ngaih ni, min nuihzat hmel te pawh a pu lek lek a, nizan thil thleng Patea ka hrilh hunah chuan a nuilo kher ang chu.






Room ah ka phone dah chu la vatin Patea chu ka call zui vat a, a tlang thei mailo. Ka call nawn leh a a Busy ta tlat a, chutih laiin Sitting room lamah Irene-i phone a lo ri ve chiah a, "Aw pa...." a tih duai ri chu ka hrepha. Rang takin ka phei a, ka hmel a hmuh rualin min lo nuihsuk mai!






"Hmu e, hei amah pawh a awm tawh alawm" a tih chuan ka chungchang a sawi a ni, "Ka va hruai mawle, amah hi bia la" a ti leh zat a, hrep chuan! Engtiangin nge maw min lo sawi le?







"Kha...be rawh" tih leh Phone chu min lo pek a rual a, phone ka chhang chiah chu "Mambawih" tih ri ka hre ve zat a. "Pate, lo biak che ka tuma a tlang theilo a" ka ti hmasa te te a. "I u i va ti mangang em em ve, i nu nen pawh rilru nuamin kan awm hleinem" a lo ti bak hlur a.







"Nizan ah...." ka tihlai mekin min lo ṭawng khalh a "Inruk kher angai hleinem, inneih induh te chuan palai te pawh a rawn tir anga kan inrem mai dawn a, a puitling zialo emai" a lo ti hlak hlaka, ka ngawichiang kher mai. "JH-a te chu kan hnar rual anilo a, a mualpho zawnga awm tur a ni ngailo" a tih leh laia Irene-i lo nui sawng hmel chu enin ka inhumruh vak a, a thil lo zuk sawi dan chu a chiang ta viau e.






"Pate, nizanah Irene-in kawngka min kalhkhum alawm, inah an ṭhianhoin an riak khawm anih kha" ka ti ve nghal hmiah a, min melh rum ṭha kher mai, ka hlau biklo nasa ngawirenga enliam chu ka tum tawh bik hauhlo bawk.







"Chu chu enge a awmzia? Nizanah i û kan rawn bia a nang lah i biak theihloh hmak a" Nu Muanin a lo ti ve a, an pahnihin an lo ngaithla dun a ni ngei ang.






"Kawng min hawn duh lo alawm" ka ti ta nghek a, Nu Muani aw chuan min ti thinur zual a ni ber.






"Reilo te pawh inhaulo hian in awm thei thlawt lo em ni?" vin zetin Nu Muani chuan a lo ti leh a, Patean a lo khap ri pawh ka hrepha.






"Anih chuan khawnge i riah a?" Patea zawkin a rawn ti leh a, chhan dan tur a vang kher mai, "Aw....Bawihin a sawi zawh chiah kha mawle" Nu Muanin a lo ti hlak a.






"JH-a bulah i riak a mi?" Patean a tih chuan ngawirengin ka heh ka pet fan fan ringawt tawh. "Aw" ti a chhan chu harsa ka ti ngang mai.






"A chiang reng a lawm, chhan pawh a chhan duhlo che hi, a u nen an inhauh den chhenin a ngaihzawng a um a ni maia, ṭhiannu te pawh a neilo a ni bik hleinem" Nu Muanin a ti leh a, "Lalthanpui min chhang vat rawh" vin lek leka Patean a lo tih chuan thawk ka la hawk ringawt.







"JH-a bulah ka kala mahse, kan inru lo" ka tih chuan Nu Muani lo chek tlat tlat chu ka hrethei. "Hahthlak hlawm emai a, khawmaw Lalnunkimi kha Phone han pe teh" Patean a tih chuan Irene-i chu ka va melh a, tum burin min lo en ve reng bawk.







"Kha..." tih leh phone chu sofa ah thehphei ka ruala, apa nena an inbe laichu ka lo en ve reng bawk a a insawithiam leh nasa mai.






"Reilo te chiah a lawm, ka hawn te chuan a lo kal daih tawh" min rawn melh zuk zuk pahin a ti a "Rei deuh kan nghak che" ka lo ti vin hlar a.






"Zingah ka va lam ka ti mawlh mawlh chu" daw thei ka ti kher mai. "A ṭhiannu te inah pawh ka va kal a, tiang te chu inru a ni reng a lawm tiraw Nu" a nu zawk a bia aniang, lehlampang ṭawng ka hre theilo nain a nu chuan a lo thlawp leh kher ang chu.







"Nia, JH-a te chu a ṭha a lawm, an induh te chuan thinrimna tur a awm hleinem" nui lek lek chunga min rawn en leh pahin a ti a, hrep tak chuan a!







Thildang dang sawiin a nu nen an inbe zui luama han tih vak ngaihna pawh ka hre tawhlo, ka sawi tur ang ka sawi a an ngaih ngaih ngai tawh rawh se ti rilru chungin room ah ka luhsana, zanin chu Alawmi riakah sawm tawh ila a ṭha ang, Irene-i nen ringawt zawng buaina a punlun zual mai mai a ni.







Chhunah Alawmi nen kan inbia a, zanlam thilthleng ka hrilh chuan a lo sa leh pek ngang mai "Kan inah lo riakla ṭha tur ania mahse, JH-a pawn a tidiklo chuanglo, i Unaunu mawlh chu ka ngei a ni, phuba lak ka van chak ve" a ti hlak hlak a. "Zanah lo riak teh, Irene-i nen chauha awm chu a fuhlo emai" ka tih chuan min hniallo a, "Ka nu ka lo zawt anga, a phal chuan ka lo hrilh ang che" a lo ti ve vat a.







Tlaiah a lo riah theih dawn thu min lo hrilh a, zanriah eitura lo kal nghal mai turin ka lo hrilh ve a, eirawng ka bawl lai mekin a lo thleng a, a rawn ang lut a ni ber. Zanah JH-a te ṭhiandun an lo leng a, rei deuh an lenga, Patea nen kan inbiakna chungchang chu kan sawi ho a "A pawiloh tawp chu innei ula a ni mai a lawm" Liansangan a lo ti sam et a, JH-a erawhin engmah a sawizuilo, inneih a duh miau a, Liansanga rilru ang tho chu a pu ve a ni ngei ang.







Irene-i chu zing aṭanga a chhuak a lo la hawlo a, kan mut hnuah a lo haw chauh a ni ngei ang. Zing ka thawh chuan Room-ah a inkalh hnan bura, chawei tur pawhin ka kaitho duh biklo, "Nula awm mawh ve tak chu a ni, zu heh bawk si, rilru chhe bawk si, a la thatchhe zuia, tihtur nei hlawl bawk silo" a hriat phak tura ring chuan Alawmin a ti hlak hlak a, a muhillo anih chuan a hre ve kar ang chu.







Chawhma ah Patea te an lo thlenga, bungrua an lo hawn hnem avangin thildang buaipui hmanlo lekin tlai thleng kan buai a, "JH-a a lo leng dawn em?" ti a chaw eilaia min zawh chuan ka hriat loh thuin ka chhang a, chumi hnuah Irene-i nen min zilh neka, kei aimahin Irene-i chu a burbun zawk a, ka bulah erawh JH-a biak a duh thu a sawi leh a, engvanga biak duh nge anih chu rindan ka nei thiam riai ruai.







"Kan inru a nilo ania, engtin mah kan awmlo bawk" ti a ka insawithiamna chu a pawmloh hmel hle bawk. "Kan duhlo tih kan sawilo" Nu Muanin a lo ti hlak a, "Naktuk zanah ka va leng phei ange, apa pawh biak ka duh reng reng a lawm" Patean a tih chuan ka awm a nuamlo kher mai.







A tuk zanah chuan Patea chu alo va lengphei tak tak chu niin, JH-an min lo phone laichuan Nu Muani bungraw sem tur siamfelin ka lo buai hle a, a phone ka chhang chu ka beisei loh deuh thil a lo sawi a "Hei i patea a lo lenga, kan inru ah angai anih hmel hi, inneih kan duh chuan palai tir turin min rawn a, ka duh dan chu i hriat kha, i chhungten rem an ti ta bawka enge i rilru ni le?" tiin min lo zawt a.







"Kan inruk loh kha, i hrilh lo a mi?" keiin ka lo la ti ṭang ṭang a. "Bawihte, chutiang ka ngai pawimawhlo, min nei duh em tih chauh ka hre duh, i rilru diktakin min han chhang teh" zawi te fiah zet si hian a rawn ti a, chhan mai dan tur chu ka bangbo takzet a ni.






"Neih te chu nei duh tho a mahse......"





"Mahse enge harsatna i neih le?" a lo ti leh var a.





"I hriat kha, kei chu.... pasal nei ringawt thei ka nilo a....." ka ti niah niah a, a lo nui hawk mai.






"Nui suh, ka ti tak tak ania" ka rilru a buai nuai a ni ber, ka pi leh pu te ka ngaihtuah chhuak ruai bawk.






"He khawvel phur rit tak hi tinge maw nangmah te chauha phurh vek mai i tum le, ka chhawk ṭhen ang che ti ta ila min pawm thei angem?" nui lek lek aw hian a ti a, a sawi awmzia ka hrethiam chiah lo.






"In nei ang aw, kan inneih hnuah pawh i duh chu iti thei em em ang, i chhungkua a member pakhat tel tir ringawt chu a harsa lutuk lo ang tiraw" a ti leh a, "Engmah i hrethiam ve lo anih kha?" ka ti leh hap a. "I rinaiin ka hrethiam zawk ang che "Aw" tih zawng a ni mai ka mamawh chu" a ti nawn leh a.







"Ih maw, ka pi leh pu te hi ka enkawl an ngaia, keimah lo midang enkawl thei tur an awmlo a, awm chu an awm a mahse, keimah chauhin ka tih theih thil a awm a" tiin ka hrilh duaha, a hriatthiam pawh ka ring chiah lo, chutianga ka sawi chhan tak chu Patea te ka Nî te chhung pawh ka pi leh pu enkawl tur chuan an awm tehmeuh maia mahse, ka ngaihsak ang em em hian an ngaihsak ve tlatlo, inhrang changin chhungkaw hran an nei tawh a a zawng zawngin an ngaihsak thei tawhlo a, chuloah ka beisei an phakloin ka ringzo lo bawk a ka mawhphurhna ah ka la lo theilo a ni.






"Chuvang chuan min neih ngei angai anih chu" lehlama mi chuan a lo ti leh hmiah a, a inhuam tihna a nih hmel e.





"I pawm thei ang maw?" ka ti nawn leh khera, ka sawilawk vek loh chuan a hnuah harsatna a awm ka duhlo, hrilhlawk sa vek hi ka duh dan a ni.






"Pawm e, anih ka sawm na ve kha le?"






"Anih chuan Lunglengah zawk palai chu i tir dawn nia" ka ti ve ta nge nge a, ka sawi zo chu ka thaw huai mai, ka hlim veng veng bawk, thutlukna inchhirawmloh tak anih ka beisei.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:06 pm

GOMENASAI - by Ahmangaihi violette khiangte



CHAPTER - 20



images (88).jpeg
images (88).jpeg (34.08 KiB) Viewed 11895 times


*JH.Lalhruaitluanga*




Zanriah eilaia ka thilsawi vang chuan ka lam an lo hawi ṭhap a, mak an ti tih chu an hmelah a lang thei hlawm. Victora lo khi ṭhaw reng chuan min ti awmnuamlo dawn dawn lehnghal a.






"Mambawihi em ni a hming kha? In la inkawp reilo deuh viau lo maw? " ka pa in a tih chuan "Rei tawh e" ka lo ti zauh a, a tu a te mah chuan an awihlo tih lah an hmelah a lang thei.






"Nupui neih i duh anih chuan a remlohna a awm hleinem, mo lawm pawh kan chak tawh hlawm a nilawm ni?" ka nu enchung chuan a ti leh a. "Judy vang mai mai te hian nupui neih i lo duh lek a nia nge aw" ka nuin a lo ti ve meka, min rinhlelh hmeltaka min en leh hnuah "Pu Hruaizela fanu em ni khah?" a tizui zata.






"An hnenah a khawsa rih mahse, palai chu Lunglengah zawk an kal angai ang" ka tih chuan zawhna mitmeng hian min en hlawm a. "Pu Hruaia kha chu a patea a nia a pa tak chu a boral tawh, Lunglengah chuan an inpui an awm a, a pi leh pu te an awm bawk" ka lo ti a. Ka pa chu a bu nghat nghat a "Zaninah unaua inrawn khawm angai anih chu, i pa Zuala leh i pu Liana te palai tur chuan an ṭha ang" a ti zui mai a.






"Keichu ka tui vaklo, kan la hrechiang bawk silo" a thilsawi vang chuan a inthlahrung leh deuh aniang min rawn melh zawkin "I nei duh chiang tak tak maw?" tiin ka nu chuan min zawt nawn leh a. "Duh e" ti a dawhkan thawhsan mai ka tum laichuan Reny a lo luta, chhuahtum niawm taka a inchei ka hmuhrualin ding renrawnin ka lo ena, dawhkan kalpela vur bawm a hawng chu ka enzui reng vang chuan min rawn melh zawk bawk.






"Chaw i eidawn nange?" ka pa in a lo ti a, "Ei dawnlo" a ti bak hluk a, hman zan aṭang khan a kalchhuah ka khapsak a, a bialpa chu ṭhen hmak turin ka hrilh bawk.
"Enge..?"tum hmuk chungin min kalpel leh a, "Enge lungawilohna aneih a?" tiin ka nu chuan min zawt a, "A tih fo dan a lawm" ka lo ti duh lek a.







Zanriah eikhamah ka pa chuan kan chhungte chu a ko khawma, thil awmzia a hrilh chu an phur hlawm viau mai, a bikin huau huau lawm ka Nî te ho an phur zual a, unau zingah ro ro pawh ka nupui neih hun hi an nghakhlel fal a ni.






Mambawihi chungchang an zawhna chu phur takin Victoran a chhang zat zat a, ka office a thawk lai tiin a sawi bawk. "Thingtlang nula maw, a ṭha lutuk alawm an fel duh zawk, kan mo tur atan chuan hmeichhe rilru zau tak an ngai Judy te ang ngawt aichuan a ṭha zawk ang" ka Ni Sangzualin a ti a Fiona-in Mambawihi chanchin a lo hrilh nual tawh vanga phur viau pawh a ni. "A hmelte pawh kan va hmu ve chak ve Mampui a thlalak te i nei lo em ni?" an tih leh chuan ka lo hawihai der a, Mambawihi thlalak engmah ka lo nei hauhlo.






Victora ṭawngtui laichu hui zauhin "Chhoh san teh ang, lo sawi ho rawh se" tiin ka thawhsana, thiltih khawm buatsaih kan harsatlo bawka inneih han rel pawh kan chhungkua ah chuan thu a tlu zung zung mai ṭhin, hmeichhe lam an phur tawh hi chuan a awlsam purh zel mai.






Room kan lut fel awrh tih ah ka pa chhang chiah ka Ni Zualzeli a lo lut ve hlawl a, a hnungah midangin anlo zuilut bawka an ri nghal chel chula zawhna lah an ngah.






"Khawi maw a thlalak chu min hmuh teh?"





"Eng ang mi nge?"





"A hmelṭha em, a fel em?" tih angreng zawhna a ni. "Matein a hmelṭha in a fel lutuk a tia, kei chu a hming aṭang reng pawhin ka ngaina nghal" Ni Sangzualin a ti a, "Ka hmuh ve hma chu ngaihdan ka siam dawn lo, min han Nî viau phawt sela a ni mai" Ni Zualzelin a lo ti ve barh barha, Victor an hahipin a lo fak zel bawk a, beisei ang aidaiha an lo phur chuan keipawh minti hlim viau.






"Engtik aṭangin nge in inngaihzawn reng renga, i ngaihzawng ṭhen thu chauh kan hria a i neih leh lai kan hre mang silo a, nupui neih i ti nghal hmiah a min ti bangbo deuh alawm" Ni Kimpuiin a lo tih chuan "Hetah pawh chaw alo eitawh kha in lo hmu ve nange?" ka a lo ti vat a. "Engtikah maw?" an ti rual zawt a, hman deuha Mambawihin chaw a lo eiṭum khan Ni Zualzeli chu a awm ve ngei kha chuan ka hria.







"Ngawiteh i sawi takah chuan i nu Birthday khan a lo kal tak ti raw? I pa Muana ruih lutuk vangin en pawh ka lo enchiang hman hleinem, ka hre deuh riairuai" a lo ti ve leh a, "A hmel pawh a ṭha viauin ka hria ka hmu hman thuak ringawt a nula sa pan zawk zawklo no suah mai a niin ka hria" ka lo nui min hmuh chuan "I va han intithei e aw?" tiin min nuih zui kar kar a.






"Anih Mampui Judy kha engtin zel nge, pasal a nei ta a mi?" Ni Kimpuii thilsawi vang chuan ka nui tawp chiang hle "Ka hriatloh lam tak a nih chu" tiin ka chhang a, Victor-a nen kan in en zawk a ka rilru rawn hmu tlang vek hmel te pawh a pu, kha hmeichhe chanchin sawi chhuah fo pawh hi ka kham ta.






"Judy kha chu a hmelṭha ve bawk a ni, Mampuia nen hian inhmeh hi ka ti thei a sin aw" Ni Zualzelin a ti leh zat a.






"Hmeichhe hausa mahni pawh a kei ka ni inti ve chin ho hi chu an buaithlak nak zel a lawm, Mampuian a han duat tehlul nen a inluling lutuk anih kha, kei chu mo atan chuan fing vaklo rilru ṭha nisela ka duh zawk, judy te ang fing leh lutuk kha chu Mampuia nen inhmeh ka ti ve lo" Ni Kimpuiin a ti ve pâng pâng a.






"Judy kha ka lo belchiang miahlo a mahse, a hmel kha chu a ṭha ve chiang a ni" Ni Sangzualin tih zawm lehin an ti ti zui barh barh a, Victor-an nui chungin min rawn thlek leh zauh ṭhin, sawi zawm chak zawng sawi heklo chu ngawirengin an titi chu ka lo ngaithla a beng an ti kham lek lek tawh, "Ti ru, naupang ho nen inneihni a kan Theme tur te zuk sawi ho ang u" Ni Zualzelin a tih takah chuan inhnuai lamah an inzuithla a, an chhuak ta chu hnara hlitphawi ang huai a ni.






"Bengchheng hlawm ve le" ka ti zui hluk a, Victora nui kar kar chu melhin ka nui tawi tak bawk. "Hmeichhe ho zawhna leh buaina hi chu 'Aw' leh 'Aih' a sawifelpui theih vek a nia, tinge beng sen ṭawn ṭawn khawpa i ngaihthlak duh ni?" a lo ti awlsam et a.






"Chhan hman pawh an nihloh kha" ka tih chuan lu thing mât mât chungin a ṭhu awn duai a. "Judy hming an sawi aṭang khan i dik tawhlo a lawm, khatianga i awm fo chuan i nupui neih tur hian awmzia a nei tam lo maithei" a ti zui leh a, chuzawng ka ringlo, awmzia a nei dawn tih chiang takin ka hria Mambawihi laka ka rilru puthmang ringawt pawh hian awmzia a nei tawk tawh tih chu kei aia hrechiang an awm hauhlo.






"Awmzia anei ang titu zawkin chutiang i sawi dawn a maw?" ka ti a.






"Ka sawi te kha chu dik e mahse, nangmah zawk khan i tum lo anih chuan a hlawhtling kherlo ang ka toihna anih chu" ṭhungilin ka lam a lo hawi a "I la duh reng em ni a?" a ti leh khauh a.






"Huhhh...teuhlo mai" ka lo ti nghal hluk chu min lo endan vang chuan dawt ka sawi ta emaw ka inti rum rum. "Duh tawh hauhlo mai" ka ti nawn leh ngat a. Chu chu ka rilru diktak a ni, ka duhtawh hauhlo mahse, a hming an sawi ringawt pawh hian keima ah hian danglam a la awm tih chu ka pha biklo, chuvang erawh chuan ka la duh reng tihna a ni hauhlo bawk.






"Judy nge Mambawihi?"




"Atthlak leh lutuk Victor"



"Chhang ve mai la" a la ti ta ṭalh a.





"Mambawihi chu Angel ang mai a ni, Judy nen tehkhin suh" vin lek lekin ka ti a, "Thinrimna chhan tur a awm em ni?" ner sawk chunga tiin zial aṭan zui mawlh mawlh a, hepa hi chuan duhaiin min hrechiang mah mah chu a ni.






"A hming an sawi rik apiangin i la thinrim a nia ṭhiana, engahmah i ngaihloh theih hunah chiah keichuan nupui neila ka duh, nupui nei rawh chu ka ti ngei mai che a mahse, i hmanhmawh mah mah deuh a ni, Mambawihi tan ka hlauhthawnpui deuh tlat che" thutak zet hian a ti leh a.






"Ka hmanhmawh viau a mi?" ka ti chuan a bu nghat a, Victora hi uangin ho mai mai in pâwt ṭhin mahse thil thlir thiam tak a ni a, ka thurawn lakna ber pawh a ni ṭhin, a sawi takah chuan ka hmanhmawh lutuk em aw tiin ka ngaihtuah ve tho. "Mambawihi hi ka duh em vangin ka nei ang" Victora nge keimah zawk ka inhrilh pawh ka hre tawh neklo.






"I duh ang, hmeichhe hmelṭha leh nunnem tak nupui tura duhthusam ania lawm" a lo ti leh mai a.






"Ni e, ka tawn tawh ah chuan ala ṭha ber réng bawk" ka ti veleh a.






"A lakah i rilru kha chu khawngaihna leh duhna inpawlh a nih kha, i hmangaih tak chu Judy ala ni reng tho a" lawmlo zeta ka va melh vang chuan a lo kiaisuk a, Judy ka la hmangaih anga a sawi kher chu ka pawmlo tawp mai, a hming ringawt pawhin thin a tihrim hlur laiin engtin nge ka la hmangaih anga angaih theih! Huhhh....nuihzatthlak zawk chuan.





"Hrep che hian..Victor"




"Mahse, thil tam tak ala thleng thei a lawm tiraw, Mambawihi zawng hmangaih awlsam tak tur a nia, beiseina sang tak nei phawt teh ang" chhangloin ka en reng ringawt tawh. A haw tur pawh chu thlah tawh loin ka ṭhutna ngaiah ka ṭhu renga ngaihtuahna a kalthui duh viau mai.






Engvanga hmanhmawh em em nge ka nih Victora khan a hrelo a ni, ka hmanhmawh chhan chu Mambawihi vang a ni tih te pawh, a tirah kha chuan ka ngaihzawng hlui theihnghilh nan ka hnaih a, a chhan pawh ka duhzawng tak hmeichhia ka hmuh chhun a ni tlat a, ka hrechianga ka duh zualzel anih zawk kha, a awmna inah sawn a retheih zia ka hriat hnu phei kha chuan ka kianga cheng turin ka duh nghal ruaia, a hrehawm tuar lah ka hmu thei heklo, hei hi hmangaihna chu a ni mai lo em ni!







A bak enge ni chuang ang, Judy laka ka rilru chu eng pawh ni sela chu thil vang mai maia ka nupui pawi sawilo tawrhtirh chu ka tum hauhlo bawk. Victora mai mai khan khawngaihna a ti maw, chu aia ṭha zawk thil tam tak ka la pe dawn a lawm, hmangaihna a tih teivet pawh hi nupui dang zawng zawng te dawn aia tam ka pe bawk ang.



********


*MAMBAWIHI*





Chawlhni zan ka inkhawm bang chu kawnga ka kal laiin ka puin min lo phone a, palai hmel an lo hmuh thu chu min lo hrilha hun remchang hmasa bera haw chho turin min lo ti bawk, JH-a nen kan inbiak hnuhnun ber khan palai an kal tur thu chu min hrilh tawh a, zanina an len tur thu erawh ka lo hre lawk bik chiah lo a, ka pu ṭawngdan aṭang ngawt chuan a rilru put hmang ka hre thei mai lo lehnghal, sawizui chiamlo mahsela ka inthlahrung rilru kher mai.







Kan inbiak hma chiahin Patea a lo be tawh ningei tur a ni, inchhung ka lut chu Nu Muani nen an lo sawi dun barh barh ri ka hre zui a "Senso a hautak dawn mange mipa lam chhung venthawn ana dawn bawk si" Nu Muanin a tih ri chu chiang takin ka hria a, ka lut thawm a hriat rualin a ṭawng tawp nghal daih bawk.






"Mambawih i Ni Tlani te khan Ar an la vulh em khah?" min hmuh rualin a lo ti var a, "Ka chiang chiah lo, ka zin chhoh lai kha chuan an la vulh ve nual a, an la tiral lo mai thei" ka lo ve ti vat a. "Ka pa ten vawk an vulh tho bawk chuan a tawk thei mai ang a, chhungkhat laina hnai tak tak bak sawm an ngai dawn chuanglo a" a ti a, "Ka pa kha chuan kan vawk ala te deuh atia, duh leh a dang kan lei anga a ni mai a lawm" Patean a tih chuan Nu Muani chu a tum zui hmuk a, minti inthlahrung zual deuh deuh a ni.







A tuk zanah palai chu an kal nawn leh a, ka puin Patea a lo biak lai chuan Sitting room ah thawmhnaw ka thlep fel a "Thlathar ni 25 atan an ruatfel a nih chu" Patean a tih chuan rilru a buai zual ting mai lehnghala, inbuatsaih dan pawh ka bangbo takzet. Muthmunah ka nu nen kan inbia a, haw chho phawta ka chhungte nena rel ho turin min lo rawn a, JH-a erawh chuan "Inbuatsaih vak a ngailo, thuam chhawm te kha enghelh vak duh suh, a hming mai mai khan a tawk" a lo ti mai a, a sawi awlsam mai bawk si a, a sawi ang ngawt lah a ni bik der silo.







"I haw chhoh hmain ka chhungten chaw lo eiturin an beisei che a" a la ti tak deuh deuh a. Hna ka ṭan hmain kar khat vel hunawl chu ka la nei a, chumi chhunga haw chhoh zawk chu ka tum rilru a ni.







"An chhungkua an hung si a, hmeichhia an rual bawk si, i tum ang chuan a nuamlo tawp ang, tawrhchhel ve deuh chu a ngai ang" Irene-in a lo ti ve seka, mahni lo maha hupurh rilruk nen min lo sawiṭhaih ve chhen reng chuan awm a ti nuamlo zual.







Ka Ni in Patea alo bia a, ka pasal tur chhungte chu eng ang nge an nih a lo zawt a, chumi hnua ka ni nen kan inbiak chuan a huphurh thu a lo sawi chiam a "Kan phuloh pasal i nei dawna a lawmawm viau nangin kan do zo ve meuh angem tih hian rilru a tibuai a, engpawh nise kan theihtawp kan chhuah anga mawihnai tak chuan i kal ve thei turah ngai ila" ka Ni chuan a ti dap dap a, lei tur ṭul neuh neuh kan sawi takah chuan ka rinai daihin alo hautaka inneih hi hetiang em em hian alo hautak ang tih ngaihna pawh ka lo hrelo zawk a ni.







Zirtawp ni tlaiah JH-an min lo lama, an ina chaw ei chu ka phurlo ru kher mai, min belhchian an duh vanga min sawm an nih ka ringa ka zam ru riau mai bawk.







"Naktukah ka haw dawna kartharah ka lo let leh ang" a bulah chuan ka ti a, "In enkawl ṭha la, i han damlo hlauh ange" ka sam chul thuak paha tiin min nuih a, inneih inbuatsaih vel ka phurloh zia chu a hrethiam ve der lo, mitih ang zawng zawnga kan ti ve vek dawn a nih phei chuan kan in sak nana ka pawisa khawl te pawh ka hman deuh vek angai dawn tih lah a chiang renga, Nu Muani te pawisa tih hek chu hreh taktein ka hreh bawk si a, ka pi leh pu te rilru pawh a ruk tak chuan a hah ru ve viauin ka ring.







"I van ngawichawi ve, ka hriatloh hian i lung ka lo tiawilo reng a mi le aw....?" min rawn melh ralh pahin a ti a, ka ngaihtuahna ka lo sawrbing lutuk deuh anih ka ring, "Thil ngaihtuah tur a tam lutuka, pathum vel nih theih a chakawm, karleh ah hna ka ṭan tawh dawn bawk si a" tiin chhuanlam ka siam a, "I haw phawt anga ilo let leh thuai anga, chumi hnuah a ṭul dang kha chu kan pahnihin kan buaipui dun dawn nia, ka pui dawn che alawm, Victor-a pawh a awma i duh duhna ah i tir kual zung zung mai dawn nia" a ti maia, tum thuhmun ṭheuh ṭheuh kan inawlsam hleih bik mange.







An in kan thlen chuan an lo ṭhahnem ngang mai, keimah chauh chu chaw eitura sawm ka nilo tih pawh ka hre chawp chilh a an colony a an chhungkua zawng zawng nen zanriah kan eiho dawn zawk a lo ni. Min hmu chu min lo chibai sap sap a, Nu hmelṭha deuh deuh pathum hian ka thlen tirh aṭangin min lo pawt hrang chawt a, min enchîk nasa mai bawk a, an mahni erawh a ṭawng duhin an bula awm anuam viau.







"Fiona-i nu ka nia I ni sangzuali ka nih hi aw" pakhat chuan a ti a, Fiona-i ang chiaha nelawm a ni. An zinga hmelṭha ber chuan an in min kawhhmuhin zanriah eikhama lenglut ve turin min sawm bawka, an pasal te min hmelhriat tir ṭheuh bawka ka kal hmasak aikha chuan ka tlangnel ve ta deuh.







Kan thleng tlai deuh bawka zanriah ei a rawt zui mai a, JH-a kalsawn ta daih chu ka zawng nghal ruai a; hmuhtur a awm lo chuan min ti awmnuamlo deuh tlat, ka hawikual laimekin inchung kailawn ah Reny nen an lo inzuithla lai ka hmu a, ka lampanin an lo kal ve mek a ni. Reny chuan min en zawk tihloh chu min be zuilo a, min lawmlo hmel phei chu min hmuh lo na chu a nuamlo duh kher mai.







"I ril aṭam tawh em?" tiin choka lam min panpuia, nula leh tlangval lo awm ho zinga Jonak zosangliana hmel ka va hmu chu ka phu deuh zawka, a awm ve ang tih rin ngaihna ka lo hre leh tawh reng renglo, he Colony a an chhungkua an cheng ve lo hlauh erawh lawm tak ka ni.







"Lo ṭhu la ka lo lak ang che" tiin JH-an min kalsan a, naupang ho nen kan nih nuai vangin thawm pawh a ṭha hat hat viau, "Mambawih puar deuh a eitur aw, zanriah eikhamah kan inkawm ho dawn nia" lo ti tu lam chu ka hawi vat a, JH-a pa in nelawm taka min lo nuihsang chu lai angreng takin ka nuihlet ve a, "In la eive dawn lo em ni?" JH-a nuin a lo ti ve chiah bawk.







"Mampuian a laksak anih saw" ka chhan hmain JH-a pa chuan a lo ti a, kei ka lo bu nghat thung. "Tirawh ṭhalai hoin a hranga ei an tum anih kha" tiin min kalsan a, an kaltak hnua ka bula lo ding ve zat chu tudang niloin Zosangliana a ni.







"Kan inngaizawng ve ṭan dawn chauh a ka monu i ni mai dawn chu ania, nang hi i zei ru riau mai, mahni monu te kan thlir zui vawng vawng zel mai dawn anih hi" phun sar sar a atih chuan nuih aza duhlo viau. "Tinge Irene-i ilo hruai ve loh?" a ti leh zat a, engah nge maw ka han hruai ngawt ang ni "A chhangchhiat thlak duh awm emai" ti a ka lo chhan chuan "Ni e ti raw" tiin a nui zui hawk hawk a, JH-an min lo hui tak vangin ka kalsan zui thuai a.







Kan zanriah chu a tamin a tuihnai viau na chu ka puar em tih takngial pawh ka hrelo, engemaw hian min mawlha ka ti hleithei meuhlo, "Ṭhutkhawm an duh vangin chaw ei hma an rawt anih hi, i ril a la ṭam vak loh chuan nakinah i eiṭha leh mai dawnnia" JH-an a ti a, chawhmeh te chu min suahsak zung zunga min ngaihsak dan chuan awm a ti nuam em em lawia, midang ho zawng zawng hmuhah pawh tim miahloin min duatna a tilang mai zel a, awmve dangte lakah pawh hlu ve riauin min inhriattir bawk.







Zanriah eikhamah Dessert an lo sema, chu erawh ka eive ta nuala a mawi tawk chuan ka puar ve ta tho mai, JH-a Nî Hmelṭha-i khan an ina lut kawi turin min lo sawm leh a ka kal hreh deuh chu "Ka Ni Zualzeli a nih kha, va kal rawh thilpek duh che a nei anih dawn kha" JH-an a lo ti a, "Lo kal ve la" ka tih leimekin Fiona-i a lo kala "Umam Princess-i hi ka hmuh miahlo chaw ala ei ve awm pawh ka hrelo" alo ti a, "Jonak kha zawng rawh" JH-an a tih chuan tlangval pakhat lo kalin "Jonak leh Princess-i chu an kalchhuak chiah" a lo ti ve a, JH-a inhumruh nghal ṭalh ṭalh chu ka hmuh hmaihlo.







"Lo kal teh" tiin kei chu min kalpui nghal hlawk hlawk a, a Ni Zualzeli te ṭhutna lam min panpuiin a ni bulah chuan "In inah chuan lo va kal ula ka chhuah lawk hlanin" a ti zuizata, chumi hnuah hmanhmawh takin a kal chhuaka, engthil nge ava tih ang tih chu ngaihdan ka nei thiama, buaina a va tawng ang tih mawlh chu ka lo hlau a ni.







"Phei ila" Ni Zualzelin a lo tih takah chuan keini pawh kan inzui chhuak ta nghala, pawn kan chhuah laichuan khua pawh a thim ve lek lek tawh, Ni Zualzeli te in chu Gate hnaih bera in var lianpui hnunglamah chuan a ni a, kawtzawl zau angreng tak a ni "U Kimi te in hian min hliah hneh leh lutuka awm ve lo kan ang a nia" niin a nui hak hak a, an inchhung kan luh laichuan Jonak leh Reny Sitting room a mei lo zu hlat hlat chu ka va hmu hmasa ber a, min rawn en paha Reny nersak rual chuan Jonak chuan min lo nuih a, "Ka rualin i haw duh em, in inah ka kawi dawn a sin" a lo tinghal var bawk.








"Chaw in ei tawh a mi?" Ni Zualzelin a tih chuan lu an thing leh maia "Ala hma emai a, ril ṭam pawh a la hun hleinem, lawm tur awm pawh ni hleilo engemaw chaw eikhawm te an rawt" zial pak khu hlat hlat chungin Reny chuan a ti a, JH-a kalchhuak khan a zawng a ni reng si a, an ni lah hetah an lo awm daih chu niin.







Veranda ah chhuak lehin JH-a chu ka call a "Jonak te chu hetah an awm aw, i ni te inah kan awm ho" tiin ka hrilh a, a lo let nghal tur thu sawiin phone chu a dah a, a nau a ngaihtuah tehlul nena ka khawngaih zawk lek lek hial a ni.







"Beer kawl i nei lo ami Nî?" Inchhung ka luh leh laimekin Reny chuan a lo ti a, NI Zualzelin Fridge a a awmthu a hrilh chuan phur zetin a tho a, awmve lo ang maia min kalpel nghauh nghauh chu pawi tihna ka neilo teh e.







"Mambawih lokal lawk teh thil engemaw ka pe ang che" Ni Zualzelin a lo tihna lam chu ka pan vata, Bag khaichi mawi deuh mai pali hi a lo phawrha, Bag manto chi hlir an ni nghe nghe. "I duh ber thlang rawh, i thlan loh kha midangin an chang ve ang" a tih chuan che chang mailoin ka ding ngawirenga, lak tur nge han hnial tlat mai tur tih ka hrethiamlo takzet.





"Angailo a sin" ka ti leh zeta.






"Thlang rawh" a tih leh chuan a ngaihna hre lo zetin ka lo en bawk. "Ka thlansak mai ang che" tiin Savun rawng bag mawizet mai chu ka kutah a rawn hmeh bel a, a thil minthlan sak chu ka duhzawng tak a ni.







Jonak te pahnih chuan Beer in in an lo ti ti dun barh barha, tute emaw an huat deuh chungchang sawiin an inhrosa thul, "Phei san ang, midang pawh an inpeih hlawm tawh ang" Ni Zualzelin a tih takah chuan kan chhuak leh thuai a, midangho te pawhin chaw an lo eikham tawh a, an lo la ri laih laih a, naupang infiam tlankual vel nen thawm a ṭha viau mai.








Kan ṭhu fel awrh ang tih ah JH-a nuin min lo ko a, an rooma kan inzuiluh lai chuan ka zam ru ngang mai, room chhung chu zaupui leh eng ut mai a ni a, King size khum lianpui inhung chungah chuan ṭhuin "Hetah lo kal teh" a lo ti a. A bula ka va ṭhut laichuan a bul maia a bag inchhawp chu a hai rak rak a, "I pi leh pu te chu kum engzah nge an nih tawh a?" tiin min zawt a "Kum 60 an tling ve ve tawh" ka tih chuan min rawn en lehin "An pahnih chiahi a mi an chen a" a ti leh a, ka lo bu nghat nghat a hmuh rual chuan ngui hmel a puin ka hria.







"Kha hei hi la rawh" tih leh ka kut ban a ruala, ka kutah pawisa tel lian ṭha nelh nawlh chu a rawn hmehbel nghal chawt chawt bawk a min ti bangbo kher mai! A pawisa min pek chu cheng za hnih khat mai a nilo a, a nuaitel tehmeuh mai a ni tih lah hai theih rual a nilo, zawhna nita chu engvanga min pe ringawt nge anih ang, eng rilru pua heng pawisa te hi min pe nge a nih!







"Ngawirawh hei hi chu ka la thei lo ang" pawisa tel chu pek let leh pahin ka ti a, a la duh tawh ikhaw lo mai. "Ei leh in bakah i thuam chhawm tur leinan i lo hmang dawnnia" a ti leh zat a, "Min hrethiamla hetiang chu ka la lo zawk ange" ka ti nawn leh a, a ni em emlo ve bawk alawm, harsa te mah niila pasal tur chhungte hnen aṭanga thuam chhawm tur leina em lak chu ka tha ana ve tlat.







"La mai mai rawh, Mampuia tan vek ania, thuam chhawm ṭha tawk tak i lei angai alawm" a ti leh mauh mai, engthil emaw sawifiah thiamloh hian min hnawh tawt up up a ni ber.







"Kan ti ve thei tho ang" tiin ka pe let leh a, chutah lawmlo zeta min melhin "I tan ka ti hleinem mawle, kan tan alawm ka tih, inneih hunah kan ṭhiante an lo kal dawna i thuam chhawm an en dawn asin, in harsa ve tih ka hriat vangin anih hi ka pek che mualpho ka duh hauh hleinem" a ti tawl mai a, ka te chem chemin ania ka hriat ni, ka zak a; ka na tel bawk.







"Kan theihtawpa ṭha kan lo tum ve zawk dawn nia" insehruh ngar chungin ka ti a, ka aw te chu a khur lek lek hiala ka ṭap lo chauh tawh.







"I lak loh chuan ka chungah Mampuia pawh a lawmlo ang" a ti leh a, hethil hi JH-an a hriatpui a maw! Ka nihna ang angin min pawm khan ka hre si a mahse, tinge tunah hetianga a tih, induhtawkna tlem te ka la neih ve te kha min van phehsak chiang ve le!







Ngawirengin pawisa chu ka Bagah a rawn khung a, "Min hnialbuai lo zawk rawh, tikhan ak hmak la, midang hriat ve kher pawh angailo, thil manto leh ṭha chi i duh ang apiang chu i lei dawn nia, chumi hnuah ei in siamna a daihlo anih chuan min lo hrilh bawk la, " vin hauhlo mahse a thilsawi te chuan min vilh ngut ngut a, min ti na vawng vawng thei si.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:06 pm

GOMENASAI - by Ahmangaihi violette khiangte



CHAPTER - 21





Sitting room a kan chhuah leh hnu te chuan ngaihtuahna mumal ka pu hleithei meuh tawhlo, ka fimloin ka vai riai a ni ber. Room zau tak chhungah chuan thawk lakna tur hmun zawngin ka hawi kual ruai a, ka ipik ṭup mai bawk.






Bathlar lampana ka kal hlawk hlawk laichuan tu emaw hian ka banah a rawn pawt a, a lam ka hawi rualin JH-a nen kan inhmachhawn ta chat a, a hmel ka hmu chu ka hahdam tawhlo reng reng, ka thinurna chuan chunglam aṭang hian min rawn hnawh nghal tup tupa, an khum nghal chiam mai te pawh ka chak a ni.







"I va hmanhmawh ve" thawk la hak chungin a hmel chu ka en ran a, "In be lawk teh ang" tiin a banah ka pawt nghal dawt dawt a, bathlar kan chhuah phei rual rualin rum theihtawpin ka melh zui bawk, ka awmdan chuan a ti hrilhhai hle tih chu a hmelah a hmuh theih.







"Thil diklo a awm en ni?" min en vung vung chungin a lo ti a, sawi mai ngaihna pawh ka hrelo, ṭah khum chiam mai ka chak ber. Ka mittui rawn hnam ṭiam ṭiam chu ka hru zauh a, a ngaih a ṭhatloh hmel nasa mai.







"Engthil nge?" min dinhnaih sauhin chîk fein min en a, thinrim luatah ka khur dar reng a, ka aw a chhuak mai theilo lehnghal chuan min ti thinrim zual ting mai bawk.






"Tinge hetiang thil hi i tih a, thuam chhawm turah i buai dawn anih chuan tinge kei hi min neih i tum?" ka tum aiin ka ṭawng ringa ka vin viau bawk, a hawi kual zawk a chutah ka banah kaiin bangkil lam chu min pan pui a "Eng chungchang nge i sawi?" hrethiamlo fe hian a ti a.







Ka Bag a ka pawisa ah chu phawrh sawk sawkin a kutah chuan ka hmehbel chawt a "Hei hi ka duhlo la lêt rawh" ka mittui chu dan sen lohin ka biangah a luang nghal zung zung a, ṭawng tumin ang zuau zuau mahila ka ṭawng hleithei tawhlo. "Hei hi ka pa in a pe che em ni?" a kuta pawisa tel chu enin min zawt a, ka biang deh tuma a rawn chet ruala ka lo tawlh hla nghal vat chu hrethiamlo fe in min thlek zui a.





"Bawihno...!" a hrilhhai hmel te chuan rilru a ti na zual.






"I nu in thuam chhawm leina tura min pek a nih kha, ih maw....hei hi chu ka ti thei nganglo, kan rethei tih chu ka hria alawm i pawm vek emaw ka ti a" ka sawi rual chuan "Aw pawm e" a lo ti vat a "Mahse, he pawisa hi ka la anih chuan i lakah hian...." sawi zawm theiloin ka insut zui hlawp hlawp a, a awma min kuah hnu pawh chuan ka lung chhe zual deuh deuh, inneih chu ṭhulh leh mai te pawh ka ngaihtuah hman rum rum a ni.






"Pawisa hi la la keichuan ka duh a sin" a sawirual chuan phawk zetin ka en a, ama sawi ngei han hriat phei chuan min vilh ngut ngut mai.






"Khatin ngai suh, ka sawi duh zawk chu thuam chhawm lam ka ngai pawimawhlo, puih che ka duh mai ania" a ti leh a.







"Ka thuamchhawm tak ngialpawh ka ta niloin i inah hian zahawmna leh induhtawkna te ka nei ve tawh dawn em ni" enga tinge ka rilru tur hi a ngaihtuah phak ve miahlo le?






"Nilo e, kan inneih tur vanga i thil tum te tihbuai ka duhloh vang zawk a lawm, ka tan chuan engmah danglam a awmlo, heti tawpa ilo kal anih pawhin pawi ka tilo..." a thilsawi tum chu ka hrethiam tehmeuh mai mahse, ka van duhkhawp lo kher em.






"Ka nih na ang leh ka neih ang tawk hi i pawm thei mailo anih chuan ka nei theilo ang che" ka ti chhuak hlawl a.






"Bawihno, chu thilah chuan buaina ka neilo tih ka sawi.....!"





"Chutiang chuan midangin an ngai ve lo" ka ti vin ṭhata, inneih chu ṭhulh leh mai ka duh tak tak tawh, ani chuan hetiang hian sawi mahse a nu sawi dan erawh a dang hle thung a nih kha, ka thuam chhawm vanga mualpho a duhloh thu min hrilh a nih kha mawle.






"Enge ka nuin a sawi?" zawi te chang zet hian a lo ti a, a pawilo nakina buai leh aichuan hre ve vek sela a ṭha ang.






"Keimah vanga mualpho a duhlo" ka ti leh tawla, a lo thaw hawk chu en in "Keipawn tih zah che u ka duh biklo, chuvang chuan ṭhulh leh mai ang" ka ti nawn leh a, ka thilsawi awmzia chu a hriatthiam ngei ka beisei.







"Min lo zui rawh" tih leh min pawh a rual a, inchhunga min pawt lut chu midang ho chuan min lo en ṭhap a, a kuta a pawisa ken chu an en duh viau bawk, a nu chuan min hmuh rualin lawmloh hmel fe hian min lo en a, a nuamlo duh kher mai.







A nu te room ah min pawt lut dawt dawt a, ṭang ve deuh mahila awmzia a awm hauhlo. Room a kan luh hnu lawkah anu leh a pa an lo lut ve a, kei ṭhutthlengah ka ṭhu a, JH-a erawh pawisa hum run chungin a ding ngawirenga, "Buaina in nei em ni?" lawmloh hmel fe a a nuin alo tih chuan "Aw kan nei" a lo ti hmiah mai bawk.







"Pawisa kha ila duh lo e law?" min rawn en paha a nuin a lo tih chuan ka melh ṭha ngam tawhlo, "Puih a ngai em tih zawt tur ringawtin ka ti che a, ti nge hetiang zawnga i tih?" chang zeta JH-an a tih laichuan ka inthlahrung kher mai. "Ka zawt reng a lawm mawle" a nu chuan a lo ti ve hlak a.







"Eng thilah maw inbuai?" hrethiamlo zeta tih pahin a pa chu ka ep chiah sofa ah chuan a lo ṭhuthla a, thinphu a rang dup dup a, JH-a chu ka han melh leh ringawt ṭhin.






"Nawr lui turin ka tilo che" JH-a aw chu a vin hauhlo nain chang ṭha tak a ni. "Ka nawr lui che em ni?" chhuahchhal awka zeta hian a nu chuan a rawn ti fak a, chhan ngaihna reng ka hrelo, JH-a ka lo hrilh kher kher chu ka inchhir hle ringawt tawh.






"Keimah min be rawh" pakhat lah chuan a lo ti leh hmiah.






"Ṭhu phawt ula sawi rawh u" a pa in a lo tih takah chuan kan ngawi ṭhap a, lawmlo fea JH-a nu a lo ṭhut ve lai chuan hnuailam bihin ka ṭhu ngawi reng ringawta, ka awmdan chu hrehawm tak a ni.






Ka bula JH-a lo ṭhu chu ka melh zawk a, chutah a pawisa ken chu dawhkanah a theh hlawm tawp a, kan boruak chu a ṭang ṭha ngang mai, hetianga a chêt hi ka beisei hauhlo, ka tan thil ati harsa zual mai mai dawn tihte hi a ngaihtuah ve miahlo em mawni le?







"Pawisa pek chu enge a pawina, inbuaisaih nan ka tihsak ve a ni mai a" a nu chuan a ti leh hlak a. "A tan nge i tihsak i tan zawk?" JH-an a tih leh laichuan a kawr hnung lamah ka lo pawt ṭûng a, chu erawh a hrelo der hmiah mai bawk si.







"Engthil nge i lo tih a?" JH-a nu en chuan a pa chuan a lo ti ve a. "E le...pawisa ka pe mawle?" pakhat zawk chuan a lo ti nghal hluk a. "Thuam chhawm leina turin pawisa a pe a nih hi" JH-an alo ti ve leh! Thawk ka lo la vak a, ka ṭhuthmunah ka lo inhumruh ṭeuh reng bawk.







"I inrawlh lohna turah inrawlh suh kha ka ti lawk ve viau che sia" damdiaia JH-a pa in a tih chuan ka hawichhuak a, chutah ka lam lo hawiin "Mambawih, i nu hi chu hriatthiam angai ve ṭhin a, fel a tum lutuk na lamah ngaihsak rawh aw, ngaih huat tur a awm lo e, thuam chhawm te phei chú engmah buaina tur a awmlo, i haklai nen chauh pawh lo lutla pawi kan ti reng renglo ania, nangmah kha kan duh ber chu i ni zawk " a ti damthluama, inthlahrun a na duh kher mai.







JH-an ka kut a rawn hum rual chuan ka lo ṭang ṭung a "Engmah ngaihtuah buai lo la, kan hun tiamsa ah khan kan innei ang, ṭulh leh tih kha chu ka hriatah sawi pawh sawi tawh suh, engmah thildang a ngailo, nangmah chiah hi ka nei duh che" tawi te a min nuihsuk chungin a ti a, a nu leh pa hmuh lairenga chutiang thu a sawi te chuan min ti hrehawm zual deuh deuh, hetia a sawi vang hian kan boruak chhe tawh hi a fel thei in a ring tihna em ni! Hetiang boruak chhe sa lutuk hnuaiah hian engtin nge hlim taka inneihna kan han neih theih tawh tehlul ang.






Chutah ka beiseiloh deuh mai ka hre zui a,
"Ka thiamlo a ni e, ka lo tih mah mah deuha min hrethiam dawn nia" vin hauhlo leh nelawmna awm chuang hauhlo a a nuin a lo tih chuan chhan mai ngaihna ka hrelo, "Ka nuin ngaihdam a dil che ania" JH-an a lo tih chuan ka ho chungin ka lo en a, ka beng bula lo kun hniamin "I pawmsak tih lantir nan Welcome ti tawp mai rawh" a rawn ti sup a, heng thil hi ka hrethiamlo takzet "Aw le" tihzawngin a nu chu ka chhang a, min nuihsak chunga "Ka lawm e" a lo tih te chuan ka hrethiamlo telh telh a ni!







JH-a pa chuan kan khaw chanchin leh kan chhungkaw chungchang te min zawt zui nual a, ani chu a ṭawngkam a damdupa a nelawm em em bawk, a ṭawngkam aṭang rengin pa rilru tluang leh ngun taka thil ngaihtuah mi a ni tih ka hretheia, kan boruak ipik zet pawh a ti zâng huaiin ka hria.







"Fanu thar fel leh hmelṭha deuh i nei dawn a, i ṭhian te ho chuan an thik leh dawn che mange" tiin a nupui chu a fiamzui hlut a, JH-a nu pawh a nui tawi ve tak tak a, he chhungkaw ho zeizia hi ka la man pha zan lo, hriatchian ve fe chu an ngai dawn a nih hmel.







An chhuah hnu chuan keini pahnih chu kan la ṭhu dun ta reng a, nichin lawka thil thleng khan min la chen chilh renga ka awm a la nuam thei zanlo, ka lam lo hawiin amah hmachhawn zawng chuan min pawt her a "Thil min hrilh duh i nei em?" ka sam rawn huiin ngun zetin min en a, sawi tur engmah ka hrelo, ka ngawng zo vekin ka hria.







"Ka awm a nuamlo" ka ti chu a lo nuisuk mai, "Heta i awm hunah chuan i hrethiam ve vat mai ang, i huphurh tih ka hria a lawm" ka biangah dawmin min en vung vunga, sawi mai aipawhin ka huphurh zawk ta ve ang. "Mahse, i bulah ka awm dawn alawm engmah hlauthawng suh, i rinai daihin ka nu pawn a ngaina ang che, in la inhriatchian loh vang mai mai anih kha" a tih leh a, chutiang chu anih ngei ka beisei mahse, tun dinhmunah erawh ka ngaih a ngam thei hlawllo a, he hmun hi ka awmna tur hmun dik tak angin ka la ngai theilo bawk, tun lawka thil thlen hnu ah phei kha chuan engthil emaw hian min mawlh tlat a ni.



images (14).jpeg
images (14).jpeg (24.87 KiB) Viewed 7064 times



Ka haw hnu ah pawh chuan mut hmunah ka ngaihtuah zui renga, ngaihtuahna a vak kual nasa duh ngang mai, ka nuin min lo phone hlauh a, a rilru tih hah duhlo viau mahila ka sawipui tur neihchhun a ni rih tlat si a a thurawn te pawh la ila ka tan pawh a ṭhat zawk ka beisei.







"Naktukah maw i haw chhoh ang?" a aw a phurna lang chu ka hre thei a, rilru hah laia ka nu aw han hriat hi chuan engtin emaw riau hian min ti hahdam leh veng veng ṭhin, "Umm...naktuk chawhnu lamah ka tum a, enge i an a i damṭha zel em?" ka lo ti lêt vat a.







"Ka damṭha tawh lutuk hei, in inneih ni ah lo kal ve ngei ka tum bawk sia damlo hman pawh ka ni tawhlo, i nau te ho lah an phur nasa tawh mai a, engtikah nge kan zin dawn an ti sek a" a lo ti a.







"Zanin tlai khan JH-a te inah chaw ka va ei a" ka lo tih chuan "Chutia law, enge an an hmel a, an lo be ṭha bawk che em?" ka nu chuan a lo ti var a. "An chhungkaw chanchin kha ka la hrilh lo che tiraw?" a zawhna chhang lemloa ka tih chuan "Hrilh miah nang, eng ang chhungkua nge an nih a?" a lo ti leh vat a.







"Chhungkaw hung deuh an nia, an awmthei bawk a" ka sawi zawh hmain "Ka rindan chiah" a lo ti leh mai a. "Nu....Vawin khan JH-a nuin thuamchhawm leina turin pawisa min pe a" ka ti chiah chu "E khai aw, chu i la em ni?" hlauhthawn hmelzet hian a lo ti hlut a. "La lo e mahse, ka lak duh loh vangin kan inti thiamlo lek lek a mahse, ka pe kir leh tho a" sawifiah duah ngailoin ka nu chuan thil awmzia a hrethiam tih chu min lo chhan danah ka hre thei bawk.







"A ṭhat hlauh chu, chutiang te chu lak duh tur ani ngailo, an pek chhan che rilru chu ka hre ve lo nain thuamchhawm te chu i bungrua bik liau liau tur ania, an pawisa hmanga i lei anih chuan a chhe ber lo thleng pawh ni se i la ngam nang, kut lawnga i chhuah a ngai dawn tihna a ni a, an ni pawh chuan tinge chutiang te an tih duh reng reng ni?" hrethiamlo takin a lo ti ve a.







"Nu, ka awmdan hi ka hrethiam lo ka huphurh tlat tawh, kan dinhmun inthlau lutuk te, kan khawsak phung in millo lutuk te hian ka awm a ti nuam theilo, ka ngaihtuah tluk tluk a ka thawk te hi a ipik zo vek" ka nu bia ka ni bawk a ka sawi zawng ngawt pawhin ka lungchhe dawn dawn mai.






"JH- an a hre ve em?" a lo ti leh a.





"Hria e, ka hrilh ringawt a mahse, ka ti diklo leh deuhin ka hre bawk sia, ani lah khan anu chu a chhuahchhal nghal ringawt bawk a, a nuamlo duh a sin aw, a nu kha ka chungah a lawm vak bawk silo a, a ruk tak chuan min haw viau maithei a ni" ka ti leh sap sap a.







"A chhungte vangin i hlauthawng mai mai anih chu, hlauthawng duh mahta che an pawisa pek che ilo hnar kha i tih awmreng a ni zawk a lawm, an kianga i awm hunah i theihtawp chhuahin pawh i tum anga, mite chunga kan ṭhat luih tlat chuan tumah in min haw thei tak tak ngailo, ṭhat leh ṭhat in lawm tawn tur a ni ngai" ka nu chuan a ti dap dap a, ṭullo puiah a rilru ka lo ti hrehawm ve chiam ang tih phei chu ka hlau leh hnuhnawh.







"Ka hrilh ve mai mai che a nih kha aw, tunah tak phei hi chuan engmah inrem lohna kan neilo a nia, anu pawh ka lakah a inthiamlo lutuka ṭha deuhin ka sawiho bawk a, a remchang ema ka hrilh ve che anih chu" ka ti leh nghalthuai thuai a, "A nimaw a tihzia hlauh chu, chutia ṭha te te a in rel ho theih chuan mahse, Mambawih mo nih hi chuan hrehawm tam tak tuar inring sa leh tlawm sa a luh tur a nia, lungawilohna i neih chang pawhin i pasal hnenah thlen ngailo la, ṭhatnain mite thinlung kan hneh thei tih hi thupui berah i nei dawn nia" ka nuin a tih ri chuan min hneh ngang mai, ka hlauhthawnna vanga ka rilru ipik zet kha ka veng deuh huai bawk.







Zingah Alawmin min bazar puia, ṭhiana hman ka tum thu ka hrilh chuan a phur tawh nasa mai a, "Enge ka leisak ve ang che?" a ti nghal chuk chuk a. Engmah lei vak ngaihna ka la hre rihlo, ka man eitu ten enge min tihsak hlawm dawn ka hrelo a, inchhung singsak leh ei in siamna turin Bank a ka pawisa chu ka la chhuak ve nuala, lei ngai awm ka pu ka han zawh lahin "Lo haw phawt la kan rel ho dawn nia" a lo ti then mai si a, rei pawh Bazar tawh loin kan sumo chuanna tur counter lam kan pan a, kan va thlen chuan tlan chhuak nghal mai thei tawh turin an lo inpeih fel diam tawh.







"Mokawr hawhna tur vel lo ngaihtuah la ka lo chhuk hunah kan en dun dawn nia" tiin Alawmi chu ka chah a, ani a phurna lam tak anih bakah thil mawi hre em em mai alo ni vei bawk nen inneihni leh a behbawm vela kan thawmhnaw hak tur chu a kutah ka dah nghal chawt mai.







Inhmu leh vat turin Alawmi nen chuan kan invai liam a, kan tlan chhuak deuh awrh thui pawh kan la thleng hmanlo tih ah JH-an minlo phone a "Meeting kan nei rei lutuka Office aṭangin ka lo chhuak dawn chiah, dar engzatah nge in chhuah dawn?" a la rawn ti ve chhek chhek a.






"Kan tlanchhuak daih tawh a lawm, ṭawngṭaina hmun kan pel tawh" ti a ka lo chhan chuan "Pawi lutuk" a lo ti hluk a. "Tinge min lo thlah i tum em ni?" ka lo ti let ha a. "Tum ve e, i pu thil thawn duh ka nei bawk a" a tih chuan ka lo nui hak a, "Engthil?" ka tih lahin a sawi duh miahlo lehnghal a.







"Tluang deuhin In i thleng dawn nia, i thlen hunah min lo hrilh la" tiin kan inbiakna chu kan titawp rih a, mahni khawlam pan e tiloin lung a leng ru ve rauh rauh mai.







Kawt kaiah ka piin min lo hmuak a, in kan thlen chuan an lo inbuaisaih ve ni ngei tur a ni, inchhung bang rawng te pawh an lo hnawih eng ve ut a, kan kawt zawl lah chu an lo lai thar surh mai bawk a. Ka thlen tlaiah ka ni te chhungin chaw an lo ei nghala, ka man eitur te pawh ka niin a lo ziak chhin a; an tlar dul tawh a, man eitur chutih zah zah ka neih ka lo rinloh laiin ka rin ai daihin an lo ṭhahnem a thla a muang ve riau a ni.






Mahse, ka man eitur List ah chuan ka nu hming a tel hauhlo!





"Pi ka nu hian ka man a ei ve tur a ni lo a mi?" tiin a rukin ka pi chu ka zawt a. "Tel tur ni e, Nu man eitur a nia lawm" ka pi chuan a lo ti mai a. "Mahse, a tel ve si lo a, ka ni hian a tih hmaih palh a mi le?" ka ti zui niah niah a.







"Nu man ei tur zingah khan Mambawihi nu i ti tel ve nange?" ti a ka piin ka ni a zawh laichuan ka thlengsil lai dahin ka ngaithla ran a. "Nu man ei an tam tawh lutuk, a ngai ve kher dawn a mi?" ka ni chuan a lo ti heu mai.







"E, ani te chu hmaih chi a ni reng reng hleinem, mizo dan dik takah phei chuan Siampuii chauhin a lawm Nu man eithei zawk ni, han ti tel leh rawh" ka pi in a tih chuan ka lo thaw huai mai. "A lo kal pawh ka va ring chiahlo, fanu a nei tih pawh a hre tawh ngut dawn emaw ni" ka ni chuan a ti zui hlak hlak a.







"A lo kal thei emaw theilo emaw a fanu ania lawm a ei ve ngei angai, a lo kal theih tak loh leh Sumo ah kan thawn mai dawn nia" ka pi chuan a ti leh a, Ni Tlani pawn a hnial zui ta em biklo.







Innei tura inbuatsaih chu ropui lelu a tih tum loh pawh senso erawh a hautak viau tho, ka pawisa lakchhuah ka pu hnena pek ka tum chuan min lo hnial tlat mai a "I pawisa khawl hi chu nakinah i la mamawh zawk ang, pawisa chu kan nei ve rih a lawm hei hi chu dahṭha leh zawk rawh" tiin min pe let leh a, pawisa a khawl ve awm reng ka hre silo a, min ti hamhaih viau a ni.







A hnuah ka Ni hnen aṭangin ka hre leh chauh a, ka pu chuan veng hmawr lama a inhmun zau ṭha angreng tak chu Anganwadi sakna turin a lo hralh chu niin, nuai khat laiin a hralh tih te ka hre lehzela, kan khua thingtlang khaw lianvak lo a inhmun ah chuan a hralh to ve ngang mai.






"Sawrkar in an lei a, Pu Lianzela in hmun te pawh an zawrh reng a, mahse, ka pa ram hi a hmun hma a rem bawk sia an awt ve tlat a, i pasal neih tum nen alo in nang fuh bawk nen a tihzia tak tak a ni, i rilru te kha lo ti hah duh reng reng suh i puin ropui takin kan thlah ang a tih che kha" ka Ni chuan a ti sap sap a, mittui a hnam sawk thei mai, rilru hah reng rengin kei ka lo awm a mahse, engkim ka tih ve ngai hauhloin pek ka ni a, heilo liama hmangaihna leh malsawmna hi nu leh pa kianga seilian tu fa mahin an dawng bikin ka ringlo, ka tan chuan ka pi leh pu te hi a hlu ve em asin, pek let theih ka nei tlem em mai pawh a ni.







Ka awmloh laiin ṭhenawm nula ka ṭhiannu Nutei kha kan inlamah a lo ṭangkai viau mai bawk a, inchhung rawng hnawih te pawh a lo pui vek a "Kar leh lamah pawn lam hi kan lo hnawih leh ang, i lo haw leh hun chuan a dang zar tawh ang" a lo ti siam siam a, keilah thawhṭan lam aṭangin hna ka kal angai a Joining report pek ka ngaih vangin zing kar hma takah Aizawl lampan ka ngai bawk si a, engmah tak tak ka pui ve hman meuhlo, ani alo awm hlauh chu a tihzia ka ti kher mai.







"Ka pa bulah i hlawh hi a zahve tal hauh ṭhen turin ka ti a, a duh tlat silo a, mi tih loh dan pawh a ni lo a sin le, a duhloh viau pawhin kum hnih khat tal te chu han hauh ve sela" chawlhni tlaia zanriah kan kilho laichuan ka Ni chuan a ti barh barh a.






"A ṭul ka ti lo a lawm" a puin a lo ti mauh mai thung a.





"Aw, ani te chu ngaihtuah vak angai dawn hleinem, pasal Officer a nei dawn a lawm mawle" a niin a tih leh pawhin "Mi inah mo a ni dawn a, ani chu kan ta niloin a pasal chhungkaw ta ani tawh dawn alawm" tih pah a ka lam lo hawiin "Mambawih mi mo i nih hunah pawh helam hi rawn ngaihtuah hah reng reng suh, keini pahnih chauh i pi nen chawm leh hrai neiloin kan awma ngaihtuahawm ka ni miahlo a nia, chu loah i pasal chhungte tana mitmei veng thiam takin awmla, i pasalin a awm a lawm a ti anih loh chuan enge maw hleka lo zin te kha tih miahloh a ṭha ang" a ti zui leh zat a, thildang sawi zuiin min fuih zui mawlh mawlh bawk, an lak aṭang chhuan hla ta riauin ka i hre leh peka, min ti hnîm ruih a; khua a har lawk em em ringawt mai a ni.







Zan inkhawm banah Nutei a lo leng kawi a, eng enge maw sawiin kan titi luama kan mengrei hrep mai, ka mut dawna ka phone ka en chuan JH-a missed call a lo awm dula, inkhawm dawna ka phone ka silent khan ka lo Set ṭha leh tawh hauhlo chu niin, a mut tawh ka rin vangin Message ka thawn ta ringawt a, a lo la muhil biklo.







"Ka lo hruai dawn che em?" a phone call ka lakrualin a lo ti vat a, "Tunah hian maw?" phawk zetin ka lo ti ve bawk, zan lai a ri dawn hnai thuak tawh a, inhruai chi pawh ni nghallo chuan!






"A tlai mah mah tawh anih hi" zawi ruih a a lo tih chuan ka lo nuisak a, "Nia phone en nachang ka lo hriatloh vang a ni, bakah zingah ka lo haw dawn a lawm, inhruai kher angai chuanglo" ka ti a. "Ka ngai tawh che a, kan inneih hunah pawh hetiang hian min zinsan fo anga ka khua a har ṭhin dawn anih hi" thutak zeta a tih chuan insum a har kher mai.







"I lo kal ve ṭhin mai dawn a lawm" ka tih chuan a nui ve suk a. "Zan pawh a rei tawh e, mu dawn tawh rawh, zingah kan inhmu dawn nia" tiin min mangṭha a, a hmel mitthla ah a cham zui vawng vawng mai, thil pakhat ka hrechhuak zawka, JH-a nen thla kan la ladun miahlo tih chu, tinge ka lo ngaihsak miahlo le, tun ang hunah te hian a thlalak en tur nei ila ṭha tur a nia, JH-a hmel chu ka mitthla zui a, a mitkhur thuk lam deuh leh a mitmeng ril ruih mai te, a hnar ngul sang lam lek lek, a khabe kual nalh zet mai te kha, mipa hmelṭha tak chu a ni ve chiang a ni.







Mumang mak deuh ka neia, zinga motor kan chuan laite chuan ka ngaihtuah zui rauh rauh a, JH-a ka mumanga ka hmuh vawikhatn a ni hial in ka hria, ka mumangah chuan a Suit pawl inhmeh ka tih em em ṭhin kha hain In lianpui kawtah Present tuam mawi keng chungin ka hmu a, nula samdum sei siau mai hi a thilken laichu pek a lo tum mek bawk, chu nula chuan a lo laksak duh hauhlo a an inhnial ni ngei bawkin ka hria, ka va kalhnaih lai chuan JH-a chuan ka lam a lo hawia, min rawn panin a thil ken chu min rawn pe a nih kha, mumang mai mai mahnise rilru ah a cham reuh reuh mai.







Dar 7 pelh hlekah in ka thlenga, kawtah Alawmi scooty a lo ding vang tawh bawk. Ka thlen veleh ah chaw ka ei sawk sawk a, Alawmin "Hmanhmawh suh" min lo ti ve tak nain ka helhhawlh riau a, zam viau e tiloin ka huphurh ru hle thung.






Ka formal dress inhmeh ber ni a ka hriat chu ka ha chhuak a, Alawmi nen New Secretariat lam panin kan tlan thla vang vang a, Office ngaia kan thawk tawhlo tur mawlh chuan ka ṭhiannu rilru chu a luahzo a ni ber, amahin a inhro sa a a phun leh hluk ṭhin.






Ka thawhna Office thar turah chuan min kalpui a, ahma a ka thawhna aichuan a lian zawk mah a, JH-a room pawh ka hmu a, a la thlen loh vangin pawn lamah a la in kalh ṭhiap thung a.







"A nuam dawn mawnge, i dawhkan aṭang lah hian Boss kawngkhar zawn a lang chiang na sa mai si" nui hauh hauh chungin a ti a, pasal te nena office khata thawh dun dawn mai chuh, a engemaw tih nawm riau bawk si.







Midang an lo thleng sap sap a, Alawmi pawh rei awmloin a chhuak thuai a, JH-a lo kal har lutuk chu phone mai tur em mawni ka tih rum rum laiin a lo lang hlawl a, a rawn hawikual nasa mai, min hmuh rualin ka lam a rawn pan a, "I thlenna a rei tawh em?" tiin min zawt bawk. "Ka thleng deuh chiah, Alawmi nen kan kal" ka lo ti ve vat a, Staff hoin "Good morning sir" an lo ti ve mek a.







"I phone kha lo en rawh ka lo bia ang che" a tih hnua a room lam a pan chu ka enzui reng a, ka thawhpui dang te erawhin zawhna mitmengin min lo en ve bawk.






"JH-a nupui tur kha em ni i nih?" ka piah chiaha ṭhu nu lianpui chuan a lo ti a, ka lai ru kher mai, "Aw" ka tih rualin an lo phul hlut a, "Masang hei kan nula thar tê hi anih chu JH-a nupui tur chû" a ti nghal chula, "Ka rin aiin i hmelṭha daih" ti a min chibai pahin min fiam zui hluta, hming te inhrilhin nikhat ni chu beisei ang aidaihin ka hmang nuam a ni.






Chaw chhun eihunah eitur an chah sap sap a, ka bula mi nen eitur chaha kan buailai mek chuan kawngka ah nula hmelṭha zet mai hi a lo lang hlawl a, a hmelhriat pakhat chu rawn pan dingin "A awm em?" a lo ti zauh a, chu nu chu ka hmuh tawh hnu a ang kher mai, ka hmuh tawhna awm reng ka ngaihtuah chhuak thei hauh silo, a pian a nalh chu thu hran a ngo in a vun a no nalh ngang mai a, ala hmelṭha cheu bawk.






"Appointment i nei em?" a zawh mek pain a lo tih chuan "Neilo, ka rei dawnlo" a lo ti vat a, kan lo en ṭhap na lam chu lo hawiin a nuisang a, hmeichhia mah nise hmuh a nuam ngang mai.






"Miss Judy amah kan zawt hmasa lawk ange aw" tiin mipa chu a tho a, JH-a rooma a luh hnu reilo teah a lo chhuak leh thuai a, "Va lut rawh" a lo tih chuan ka ngaihven rang kher mai, ka bialpa office chhunga nula hmelṭha eltiang kallut chu engamah ngaihloh luih chu a har ve det a ni.







(Lo comment ṭheuh ru aw)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:06 pm

GOMENASAI - by Ahmangaihi violette khiangte



CHAPTER - 22

IMG_20210204_003803.jpg
IMG_20210204_003803.jpg (91.85 KiB) Viewed 11821 times


Liansangzuala alo lut hlawla, min hmuh rualin "Bawihno" a rawn ti nghal thawr nia! "I va tlai ve a" ka lo ti chu khi suk suk chungin ka dawhkan bawh ti tih chuan a lo kun hniam a "Eitur lo chah rih suh thil eiturin kan chhuak ho dawn nia" mit min siai zauhin JH-a room lam a pan a, nula hmelṭha deuh leh JH-a chauh an awm ta lo chu ka ngaih a ṭha huai mai, Nula kha Liansangzuala bialnu anih ka ring rum rum a, kan pali in kan chhuak ho dawn anih ka ring.






"Bawihi enge kan ei ang" ka dawhkan piah chiaha ṭhu nichin lawka min lo be tu nu khan a lo ti a "Ka chah rihlo mai ang, lo chah phawt rawh" ka tih tak vang chuan a eitur chu a chah a, "Kan U.S-a nen chuan engtik maw in inneih ni tur kha?" pa pakhatin a lo tih chuan ka chhan hmain ka bula ṭhu chuan "Tunthla ni 25 hi a ni lawm ni" a lo ti khauh a, chhang loin kei ka lo nui var var thung.







Room khawngkhar a lo inhawng rawk a, hmanhmawh hmel zeta JH-a lo pen chhuak chu phawk lek lekin kan lo en haw hlawm a, a lungawilo hmel chu ka hre rang kher mai, a mitmengah a hai theihloh.







"Thil eiturin kal i la" ka bul a lo thlen hma chuan a lo ti a, chutah chiang zawka min lo enin "Eitur i lo chah em?" a ti leh zat a. "Chah nang, Liansangzual khan lo chah suh a tia" ngaihṭhalo fe a amah en chuan ka ti a, "A ṭhat chu, kal ang le?" ti lehin kalchhuah mai inpeih chuan ka dawhkan hma ah a dinga, midang ho chu an lo nui tet tet hlawm, damthlupin min be na chu a hmelah erawh lungawilo hmel a la pu cheu a, Liansangzuala nen khan an va inhnial deuh em mawni dawn ni.







"I ṭhianpa kha kan nghak dawn lo a mi?" pawn kan chhuah ruala ka tih chuan "A buai rih anih kha" tih zawngin min chhang a, zawh zui zel chu a chakawmloh kher mai. A motor lampana kan kal laichuan ka darah min rawn kuahin "Hna thar chu enge a an hmel a?" dam deuh zawk hian a ti leh a "A nuam ka ti, ka thawh thiamsa tho ania, thawhpui te ho pawh an fel khawp mai, an upa deuh tawh hlawm nain" ka lo ti ve vat a.







"Tunlai chu hna ka ngah deuh hleka Office hour chhung chuan ka ngaihsak vak hmanlo che anih kha, tlaiah min lo nghak la, zingah pawh ka rualin i kal dawn nia" a Motor kawngkhar min hawnsak pahin a ti a, ka hnialloh zawng tak a ni.







Motor seat a ka ṭhulut chiah chu "JH" ring fahrana tih ri vang chuan ka hawi chhuak zawk a, JH-a inher vut rualin nichin lawka nula ka hmuh kha kan lampana lo pen hlawk hlawk chu ka hmu nghal a, a hnungah Liansangzualan a lo zui ve bawk.







"Tunge a?" ka tih laimekin na zetin kawngkhar a rawn khar ri bura, min ti phu chiang kher mai! "Tihpalh" hrechhuak thut niawm taka inthiamlo hmel pu a ti lehin a kiaisuka, hepa hian engthil emaw lungawilohna chu a nei chiang a lawm.







Liansangzuala leh nula lampana a kal ta chu ka enzui ve reng a, Motor piah deuh ah chuan indinchilhin an in bia a, inhau te pawh an ang lek lekin ka hria, tukverh aṭanga dak meuha ka va en laichuan engthil emaw sawiin JH-a chu a lo hawi a, nula pawh chuan min lo en ve bawk a, ka chungchang an sawi anih ka ring, nula chuan min lo nuih sang mai a, bangbo angreng deuh chuan ka lo nuihlet ve a, enge ansawi erawh ka hrepha lo.







Liansangzuala chu ṭawng ve loin a ding ngawirenga, JH-a hmelhriat zawk em mawni dawn ni! Motor lampana a lo let leh tur chiah chu nula chuan a chelh bet ṭung mai a, min ti bangbo zual deuh deuh. Liansangzuala chuan engemaw a sawi ve a, nula lah chuan thinrim hmel fe hian a lo chhang a, chu aimah chuan JH-a kut a vuan bet tlat chu ka hrethiamlo zawk mah.







Naupang thil ngen ang mai a lawm anih le! JH-a pawn a ngaithei ta vak biklo aniang, a bana a chelhna kut chu phihthla sawkin Motor lam a rawn pan nghal vut a, nula chuan a la rawn umzui cheu! Ṭhu ngil meuhin keiin ka lo en ve bawk a, Liansangzuala pawn a rawn umzui rang khawp mai.







Motor bul maia an in man bet leh chu makti zetin ka en a. "Vawikhat chauh, tun chiah hi, ka tisual tawhlo ang, i thu thuin ka awm tawh ang" insut hraih chunga nula in a tih chuan Seat lehlama tawlh phei meuhin ka va dak a, thawk la hawk chunga JH-an min lo melh chu zawhna mitmengin ka lo en bawk a, engmah phei chu a sawilo.







"Victor" nulain a vawnna kut chu phihthla lehin "Kalpui rawh" a ti ram hmuka, Nula lah chu a ṭap pur tawh mai, "Judy, khawlai anih hi" tih paha Liansangzualan a pawh sawn laite chuan kun meuhin JH-a lo ṭhulut chu a la rawn melh ṭawk ṭawk a, an awmdan chu ka hrethiam lo takzet!







"Tu nge a?" ka tih laichuan Motor ati nunga, a hmel chu dur ṭha tak a ni. "Ti nge a ṭah a?" ka ti nawn leh a. "Engah mah ngaisuh minti tlai zo vek a nih hi, i ril a ṭam tawh em?" ka zawhna chhangloin a ti daih a, "Ṭam em em lo?" chhanna beisei zeta en chung chuan ka ti a, ka lam hawiin a kiaisuk tihloh chu a sawizui duh miahlo.







"Liansangzuala bialnu a ni maw ka lo tia?" ka rilru tak phei chuan ka ring tawhlo hulhual, JH-a bialnu hlui anih ka ring mah tawh zawk. Ka thilsawi vang chuan a lo nuisuk a "Tunge a?" ka ti nawn leh ngat.







"Ka nu ṭhiannu fanu ania, kan Inah kan hnenah lehkha zirin a lo awm ṭhin a" a ti ve ta nge nge a mahse, ka chhanna duh tak a la sawitel lo. Tinge khatianga ṭap ṭuau chunga a ban a vawn tlat chhan kha ka hre duh a lawm.







"I bialnu hlui a mi?" min lo en zawka, motor a khalh vangin hmalam a en leh thuai a, min chhang dawnlo emaw ka tih laimekin "Anih kha" a lo ti hluk a, a lawmlo hmel zawng zawng nen chuan min ti hamhaih lehzual.







"Sawi chiang deuh teh" ka dawhthei bik vak tawhlo, nichin lawka thil thlen dan kha ka mitthla zui chiam bawk. "Engmah a ni tawhlo, kan tawpna a rei tawh" a ti leh mai a, chutiang chuan sawi teh mahse keimah ah chuan thikna rilru a rawn inhawrkhawm nghal tup tup a ni ber.







"Anih chuan enge alo sawi a, ngaihdam a rawn dil leh che tihna a mi?" ṭhu ngil hluaiin a lamah ka inher hmiah a, a sawiṭha duhlo anih teh chuan ka lawmlo khawp ang.







"Aw, i hmuh ang khan" a ti leh tawp a, ka thinrim ru ṭeuh mai, kha nu khan kan innei dawn tih a hrelo em mawni le, nge a hriat vang zawk?






"Chuan i ngaidam dawn em?" ka aw chu a zawi ṭha kher mai, thinrim ru ṭeuh chungin hlauhthawnna ka nei nghal ruai bawk. "Bawihno, chutiang chu thil theih a ni tawhlo, nupui nei mai tur ka nih tawh hi" min nuihsuk chungin a ti a, a chhanna chu ka van duhkhawp lo tak. "I la duh em?" ka aw chu a ri che che chauh a chaurau ek thai an sawi ang hlauh ka ni.







"Duh hauhlo, nang ka nei che a lawm" a ti leh sup a mahse, ka rilru a na em em tho si, engthil emaw beisei dang ka neia, ka beisei lah ka hrechuang derlo.






"I duh tawhlo tak tak maw, a buaithlak vek ange?"






"Khatiang kha engmah ngaihtuah suh, nang awmlo pawh nila ani nen kher kha chuan kan inkawp leh tawh dawnlo" Motor tidingin ka lam a lo hawi a, "I rilru ti hah suh, enteh... ani nen khan ṭhalo takin kan inṭhen a; inngaihdamna awm leh thei chi ani tawhlo, keichuan nang ka nei tawh che a chu chu a pawimawh ber, nunhlui lam ngaihtuahloin kan pahnih hmahun chiah ngaihtuah ang aw" ka biangah dawmin dimtein min fawpa, min ti dam huai mai, a sawi kha a dik chiah reng a, hun liam tawh chu liam tawh ani a, chuvanga lo buai chu a sawtlo bawk, tinge ka lo buai nghal chung chung mai ni.







Kan tlan chhuah leh hnu chuan "Enge in inṭhen chhan?" tiin ka zawt leh hrama, Steering a hum nghet ṭalh ṭalh ka hmuh rualin ka zawt ta chu ka inchhir hnuhnawh viau a mahse, ṭha tak chuan min lo chhang ve tho. "Min lo kawpa ti mai teh ang aw" za lo zeta kiaisuk chungin a ti a, zawh zui leh chi pawh a ni tawhlo.







"Keichuan ka kawp ve miahlo ang che" ka lo ti zauh a, a nui suk suk ka hmuh chuan thokangin a biangah ka va fawp zauh a "Ka ring tawk che" ka mitah tak min enchunga a tih chuan min vau hmel a phu mah zawk a ni.







Khatla kan thleng chho a "Take away mai ang" a sana en zauh pahin a ti a, ka hnial biklo rin aiin a lo tlai hman tawh, Lunch break pawh a tawp ṭep tawh nghe nghe, dawrah eitur kan fun tira Burger leh eng engemaw kan leinuala, kan let leh lamah ka eithla mawlh mawlh a, a motor khalh lai chu ka va barh leh ṭhin a, min lo hnial tlat biklo bawka Burger chu kan inkeih chhawk a kan awmdan chu naupang chhia viau mahse a nuam angreng viau mai.







Office kan thlen hmain Liansangzuala Bike kan tawk a, nula kha a hnungah a phur bawk a, min hmu chu tlanmuang deuhin min rawn nuih ṭhaw a, JH-an alo hmulo der hmiah mai thunga, a nula phurh chu ka khawngaih ang reng, JH-a phatsana midang a kawp erawh ka hrethiamlo hle, Ani te chu pasal a tana hmeichhia zawng zawng te duhthusam ang chi mipa anih laiin engtin nge a kawp theih zawk le! Keichuan ka ti ve hauhlo ang.







Tlai ban dawnah Alawmin nghah ka ngaih leh ngaihloh tur min lo zawt a, JH-a nen kan haw rual dawn thu ka lo hrilh vat a, Liansangzuala lo lut leh chu lo zawh chian ka chak kher mai.







Office ah chuan engemaw chen ava awm a, alo chhuah leh hun ka lo chang ran a, midang phei chu haw turin an insiam sap sap tawh. Chief secretary hlui Pu Sapkaia a lo lut hlawla, JH-a room a luh hnu lawkah Liansangzuala chu a lo chhuak a "I hman tawh elaw, Boss hlui a lo kal a nghah leh deuh angai ang" a rawn tih phawr phawr laichuan "Lo kal lawk teh" tih leh bathlar thlanglam pan ka ruala; thuawih deuh chuan min lo zui ve nghal mai bawk.






"Nula kha tunge?" ka ti nghal tawnga, a lo ip chawih lehnghal a , a sawi hreh deuh emaw ni?





"A bialnu hlui tih aman min hrilh daih tawh" ka lo ti vat a.





"Nia..." nui hui chungin a ti a, "Min lo hrilh chiang teh" ka ti leh vat a.






"Enge ka sawi ang, a bialnu hlui a duhtawh miahloh anih kha" a lo ti deuh kher a. "Min hrilh vek rawh, enge alo tih a? A rawn beisei leh tihna mi? JH-an engtin nge i bulah a sawi?" ka zawt nghal mawlh mawlh a, a lo ka hau ringawt chu ka en ran bawk.







"Thik tlak pawh a nilo, engah mah ngai duh suh" a lo ti leh tawng a, ngawirengin ka lo la enran thung. "Judy te kha chuan ala duh lutuk, ngaihdam a dil char char a, inpa hian duhtawh heklo, nangmah ah hian a nghet tawh lutuka" nuisuk chungin a ti a.






"Enge an inṭhen chhan ni a?" ka lo ti leh a.






"Judy khan alo kawp a, mipa pawh nilo hmeichhe lakah lehnghal, JH-a tan chuan a thanat thlak ve em a ni" a thilsawi vang chuan ka lo ka hau a, mipa pawh nilo hmeichhe lakah a ti chu ka awihlo rum rum hial!







"Hmeichhe lakah a?" ka lo ti he haw a, ka beiseiloh lam daih a ni, rin ngaihna pawh ka hrelo zawk!







"Aw, Judy ṭhiannu Hostela a room mate ania, JH-an aman chhuak a lawm, han ngaihtuah ve teh mipa dang chu nise ngaihthiam te pawh a awl deuh hmeichhia berkher laka bialnu ten inphatsan chu na ve deuh mai a nia, chuvang chuan hlauthawng duh reng reng suh ka ṭhianpa hian a rilru a lamlet tawhlo ang" a ti leh hmak hmak a.







"A hmelṭhat reuh nen a van mak em em" ka lo ti ve a. "An ruihtheihthil khawih vang bak a nilo, awmṭha duh heklo, tikhan ngaihdam dilin a phi lehruaia, a chawh ania" a ni nawn leh ngata, ka dang a ro hulh mai, JH-a ka ngaihtuaha engtin nge Judy chuan a tih theih zawk le? Inchhir ngawih ngawih awm reng a lo ni.






CHHUNZAWMNA


*JH.Lalhruaitluanga*






Vawin thil thleng vang kha a ni maithei haw kawngah chuan a ngawichawi hle a, ka biak erawh chuan ṭha takin min chhanga tho nain engthil emaw vei ruk chu a nei tih a hriat theih a, ka chungchang a ni ngei bawk ang.







"Vawin enge kan an lé?" zangkhai vah tiin ngawirenga a ṭhu chu ka va melh a, thawk a han la hak hmel chu a duhawm viau bawk, hmeichhe hmelṭha tak a ni!







"A nuam khawp mai" ti a darchhin ak pahin min rawn seih a, a ṭawng paha nuisang hmel a pu thei ṭhin hian a ti ngainatawm zual a, a ka tereuhte hmanga a han ṭawng siam siam ṭhin hi hmuh a nuam hranpa ve hrim hrim bawk.







"Thil zawh duh che ka nei a nia?" engemaw chen kan ngawihdun hnuah a lo ti leh a, "Min zawt rawh" ka tih chuan sawihreh hmel a pu a, a thil min zawhduh chu rindan ka nei thiam riairuai a, min zawt lo sela ka duh zawk mah a ni, tinge maw hmeichhia hian an hlimpui chuan loh tur thil hi hriat an duh tlat zel hi ka hrethiam lo.







"Ka sawi tur ka theihngilh daih?"rilru bet manglo tihhriat taka hmalam en vang vang chungin a ti a, ka lo nuisuk chu min lo enin a nui tawi tak a, a sawitum chu a theihnghilhlo chianga engemaw sawi hreh deuh a nei zawk a nih hmel. "Min zawt rawh rawh, dik takin ka lo chhang dawn che nia" ka tih leh taka chuan min han en renrawn phawt a, "Ih....Liansangzuala kha ka lo zawt a" inthlahrun hmel lek lek hian a ti ta a.







"Engthil nge a lo hrilh che a?" ka ti a, Liansangzuala chuan min hrechianga mi mawl a nilo bawk a sawi chin tur leh sawiloh tur chin chu ka khap buai a ngai hauhlo, engthil pawh ka bialnu hnenah chuan sawi mahse, thil pawi a sawi dawn lo tih chu ka hrechiang a, pawitihna ka nei lemlo bawk.








"Chuan i hre ta a?" kei leh Judy chungchang a ni tih ka hre mai a, kan inṭhen chhan a zawt a ni ngei mai, a lakah chuan zep buai ka tum lo a, Liansangzuala pawn chu chu a hre ve tho bawk a tlang taka a lo hrilh mai ka ring.







"Ka lawm hle mai, kan intawn hmaa i lo ṭhenfel tawh chu" thutak fe hian a ti a "Keipawh" ka lo tih ve chuan mawi fahranin min nuih a, pehhel deuh takin sawi mahse a sawi chhan erawh ka hrechiang hle, Judy laka ka rilru put hmang hriatchian a chak a han hrilhfiah chiam dan erawh ka hre biklo, sawiduah aichuan atakin hmuhtir ila a chiang zawk ngei ang.







An inkawta ka thlah hnuah lutkawi loin ka haw tlanga, vawin thilthleng tehhrep vang khan keipawn nuam ka tibiklo, engvanga ka office a rawn lang hlawl nge maw a nih le, Bawihnoi hmuh laia a chet dan khan minti lungawilo hle bawk a, anin minlo hrethiam viau lo phei sela chuan kan boruak a ti khawlo zo vek dawn a nih kha, hrep chuan a.







Ngaihdam min dil vanga rilru hmin leh mai thei turah min ngaia, khami ni a thutawp ka siam khan keichuan ka tlauhthla fel der tawh. Engthil nge ani khan a tih kha, hmeichhe nikhua lo tak a ni. A ṭhiannu min hmelhriattir khan hmeichhe nu hnâp a nilo tih chu hre tho mahila khatiang turah khan ka ngai lo anih kha.







Lunglei lama ka nu ṭhian ṭha tak fanu a ni a, Lab technician zir tura lo kalin kan hnenah a innghata, kum khat zen zawn chu kan kiangah khawsain keinen phei chuan ṭhian mai piahlam inzawmna kan neia, hmeichhe hmelṭha leh fingtak mai a ni, Mumbaia lehkha ka zir zawh hnuah Mpsc ka exama hna ka neih nghal mai vangin ngaihzawng nei turin nula dang hi ka ngaihven hman meuhlo, Judy ka tawng zui mai bawk nen ani khan min tihlawm dan a hriain ka lakah a pangchang thiam hle bawk.







Khatih laikha Apuii pasal nei dawn lai vel a ni a, chhungkua ah ka lungawilo a ka duhdan lah tuman an ngaipawimawh heklo, kha vai hausa kha makpa atan an duh mauh maia, Apuii ka hrilhfiah ngial pawhin a ti lui ngang ngang mai si a, Judy chauh kha ka kianga awma ka lamṭang a ni.







Reny lah a ngaihzawng nen buaina an neia, ka puih ala ngai zui a, chutah ani pawhin ka thu awih duhloin ama thu bawkin a kal a, khata ka lungawilo khan ka farnu te hawisanin Judy lam ka hawi a ka theihtawkin ka duat zuia ka farnu te pawhin a thîk ta reng bawk a nih kha.







Ni e, Ka duh viau ṭhin alawm nupuia neih ngei pawh ka duh a, zirlai ala nih vangin ka sawm rihlo mai chauh zawk anih kha, huhhh....ka hmuhloh lamah engtin nge a lo khawsak ṭhin ka hre derlo.







Engthil vang nge kan inhauh ka hre ta chiahlo, thingtlanga ka zin hlan a ni a, a ṭhiannu nen khan an lo inhnêm ve ṭhin ni ngei tur a ni, ka haw hnuah pawh ṭha tak chuan kan la inbe thei a, Hostel aṭang pawhin ka va la chhuak nghe nghe a. A phone ka en hi a hlau riau ṭhina, en ka tum pawh ani lo a bul hnaia ka awm hlek tawh chuan rang takin a phone hi adah ṭha nghalvat ṭhina a tih ngun tak em vangin ka ngaih a ti ṭha lo riau bawk.







Engtia rei nge min lo bum hman ang, kum chanve zet chu ani hman maithei, Secretary han ka thawhtirh ka buai em em lai a ni a , atan hun ka neiloin ka zin deuh reng ṭhin a, ka ngaihsaklo tih chu ka phalo mahse, ka haw chang a piangin a tan hun ka insiam sak ṭhin a, a duh zawng te leisakin hun kan hmang dun ṭhin, kha mi ni pawh khan chawlhhmunah kan kala, nidang ang bawkin hun nuam tak kan hmangdun bawk.







A muthilh laiin a phone a lo ri seka, a ṭhiante call anih vangin ka chhanglo, a rik nawn sek vangin phone chu ka en a Hostela a roommate Hlimi kha a lo ni a, call a tawp hnua a Message lo thleng ka en chuan ka beiseiloh lam daih ka hmu ta nih kha.







A ṭhiannu chuan inṭhen a duhlo thu leh a tello a a awm theihloh tur thu sei tawk tak maia a lo thawn chu enin ka inhumruh ṭeuh ringawt, an inbiakna chu ka enzela Judy chuan inṭhen alo rawt a, pakhat zawk chuan a theihloh tur thu a sawi cham chi thung. Huhhh....kha kha kan tawpna chu a ni, ngaihdam min dila, a ṭap bawk. Engkim titawpa a ṭhiannu chu kawm tawhlo hial a tum thu a sawi a mahse, keichuan ka thei ve tawh tlatlo.







Khatiang tak maia ka haw zui leh ka ngaidam theilo kha midang chuan mak pawh an ti maithei, min zawt anih pawhin an zawhna chhanna chu ka neilo "Kan inṭhen tawh" tih bak chu, ka lo hmangaih tak tak lo te pawh a ni mahna a tan ngaihdamna ka nei tlat lo a ni.


***




"Apuiin a lo phone mial che em?" inchhung ka luh rualin ka nuin min lo zawt a, "Call miahlo, enga ti nge?" ka ti vat a. "Bawihan min lo phone a, an nupa an intithiamlo a tia a chhuak tau niawm tak a ni, amah biak ka tum lahin phone ala thei mang si lo a" a ti niah niah a, "Biak ka lo tum dawn nia" ngaihsak zui vakloin ka ti liampuata, rilru erawh a tibuai viau mai.







Ka farnu te hi ka ngaihsak reng ṭhin a, an duhaia an nuna ka inrawlh chang lah a tam, Michaela hi chu mipa a ni bawka chuti tehchiamin ka buaipui a ngailo hlauh a, Mumbaiah lehkhazirin ka awmpui veka, upa ber nafam chuan nu leh pa chan ka changa, tun thleng pawhin ka mawhpurhna ah ka la ngai deuh tlat a chuvanga Reny lakah pawh Strict em em reng ka ni. Tunah pawh Apuii chu ngaihsaklo ang takin lang mahila ka rilru tak chuan ka ngaihtuah ru ngang mai, hetiang hun ka ngaihtuah lâwk vang hi ania hnamdang pasal neih kha ka remtih loh chhan.








Amah nen phei chuan tun thlengin pangngai takin kan la inbe thei meuhlo, a pasal neih tum ka dodal miau a, min huat phah ta a ni. Apuii pasal Regan hi Mumbaia hotel liantak nei tu a ni a, hnamdang anih chu thuhran nise; nula mi leh nawmchen ngaina mi tak ni a ka hre tlat kha ka lo hre dik ta chiah renga, kum 2 ṭha awrh an innei hman ang tih a hetiang hian neuh neuh an nei chho ta a, a chanchin hi ka ngaihsak duhlo lui ngar ngar nain harsatna a han tawh tak tak hi chuan rilru hi chu a tibuai leh nak ṭhin.






Michaela phone-in chanchin ka zuk zawt
ta tho a, Apuii chu a pasalin ngaihzawng alo neihsan a ni awm e "Ka pa nen an inbia a, a ṭhiannu te inah tunah chuan a awm a, amahin a lo haw dawn a nih chu" a lo ti a, "Anih nang engtia khawsak nge i tum, flat i luah mai dawn a mi?" ka ti a, "Mahni a awm chu ka peihlo deuh a, ka ṭhiante inluah ah ka insuan lut ve mai ang chu ka ti" a lo ti a, haw chho ve rih mai tura ka tih chuan a duh bik tlat lo, amah a inngaihtuah thei ania nge.







Zanriah eikhamah Liansangzuala a lo thleng ve nghalzata, keipawh ka insiam ve nghal zung zung a "Nilenga inhmuh tawh hnuah pawh len ila rawt ta zela, i duh tak tak tain ka hria, a ṭha hle mai" nui hui chungin ka insiam chu min en a, hepa pui hian ka rilru hi a hrethei a sin. Ni e, ka duh tak tak tawh, vawina Judy lo kal khan chu chu a rawn ti chiang kuar a lawm, a chhan chu alakah khan inthiamlohna ka neia, ka office chhunga Judy nen kan awmlai khan bang piah lawka ka nupui hual khan engtin nge alo ngaih ang tih te pawh ka ngaihtuah ve a lawm.







"Tihian naktuk nilengin in inhmu leh dawn a, zanah kan leng leh bawk sia, mut lai chiahin anih hi in inhmuhloh" ka Bike hnung aṭang chuan uar zet zet hian a lo ti a, "Kan kal angai alawm" ka lo ti maia, kan in a lo thlenruala ka chhuahpui nghal mai chu a lawmlo deuh tih erawh ka hrereng.







"Kan haw har dawnlo, i la hmu hman em em ang, an mengrei thei lutuk" ka tih chuan a lo nui hawk a. "An Exam lai ania, ka hmu tawhlo law law mai ang, han Exam zo te te phawt sela ka bêm dawn" alo ti hmak hmak a, Fiona-i chuan engtin tak lo ngai ang maw, an ni tan chuan Vic lulian-a kha a ni maia, an inchhang ṭha ve em ang chu.








Kawta Bike ka hunṭhat laiin min lo va kalsan hmanhmawh a, lut ta mai biklo chuan kawngkhar bulah a ding reng a, ka va kalhnaih chuan zaizirin thawm siamlo turin min lo hrilh a Nutling ang barh barh ri ka hre zui zat bawk.








Thawm chu ngaithlain ka ṭhianpa nen chuan kan inmelh ran a, hriat a nuamlo kher mai, mipa tupawh hian an bialnu ten tih duhdah an tuar ri hi hriatnuam an ti bik lo ang, luh mai tuma ka che vut chu Victor-an min lo pawtbet a "Nakin deuh ah" tiin min chelhbet ṭung a, chutih laiin inchhung lam chu an thawm a ring sawt thung.







"I unaunu hi puh hlek tawh suh, i pasal neih dawn vang mai hian ilo in luling a nia nge, kan remtihna telloin i nei thei hauhlo ania, kan duh anih phawt chuan inneih tur hi kan ti tawp hmak thei, kan puihna tello hian engtin mah nang ve tehlul hian pasal i nei hleilo ange" chu aw ri chuan ka dawhtheihna min phehsak a ni ber, kawngkhar chu ka pawt hawng rawp a, ṭawng thawm chu a reh chiang kher mai.






Victor-an min la pawt ṭunga ka pen zui takah chuan min zuilut ve mai bawk, "In awm maw?" ka hnung lama a tihlai mekin Sitting room lam ka pan nghal hmiah a, hmeichhe pathumin phawk zeta min lo enlaiin pakhat chauh chu keiin ka en thung. Center table alo hru mek a, min hmuh rualin a sam a hui ṭha nghal thuaia, lehlam a hawi rang kher mai.







"E....Nangni inni maw, lo ṭhu ru" inneitunu chuan zaidam hmel fe hian a lo ti nghal zung zung a, engtin nge minute khat dan lekah a awki a thlak theih zawk le?







"Lo ṭhu ru aw" min enthuakin a tho zuia, ka hnunga miin min nghawk zauh takah chuan tuilo fe chuan ka ṭhu a, an nufa a an inmelh tawn zawk zawk chu insehruh ṭeuh chung chuan ka melh ngur mai bawk a, inthlahrung hmel te pawh an pu ve lek lek.






"Pa Hruaia a awm nange" Liansangzual-an a ti a.





"A inkhawm a alo haw ve ṭep ang, in van lo leng duhlo ve, a chiang tawh tho tiin ngaih a ṭha tawh lutuk a ni maw?" ka lam hawia a rawn nui chu ka nuihlet ve thei derlo. Bawihnoi lo let leh chu ka bulah a lo ṭhu a, engmah sawloin min nuihsak a, a hlim hmel chu ka hrethiam lo kher mai, thup tum eng ang mahse, ka lakah kher hi chuan engmah a thup theilo ang.







Engemaw chen chu tuilo tak chungin kan titi ho a, keiphei chu ka ṭawng meuhlo, an ni nufa chu biak chakna ka nei hleklo bawk, inneih chungchang phur hmel taka an sawilai phei chuan ka lo inhumruh ṭeuh a Liansangzualan min lo en leh hruk ṭhin, ka bula nula lah chu a ngawichawi ngang mai bawk si, hetiang chuan zanah ngaihṭha takin min awm tir thei lo ang, zantin kan len angai dawn anih hi.







Ṭhuthnaih deuhin a ban si chet chuan ka tawlhphei a, "Thingpui ka in dawnnia mahse, a la hma emai la leng phawt rawh u" a lo ti var a. Engvangin nge ni 25 kher kan inneih ni atan anlo ruat le, duhai chuan a hla mah mah deuh a ni.







Haw dawnah pawn thleng min lo thlah a, "Kan lo luh hma khan engthil nge thleng?" ka ti nghal tawl a, "Engmah a nilo, Irene-i nen kan inhau mai mai alawm, kan tih ve dan ania" nui lek lek chungin a ti a, a sawiṭha duh derlo. "Min lo zui haw mai ta che" ka ti chu a nuih a za kher mai, duh ngat sela chuan pawi ka han tih dawnloh tehlul nen. "Va lut tawh rawh, naktukah ka lo lam ang che" a bengbulah kun hniamin "Zantin ka lo kal tawh ang" ka ti a, aw leh aih min pawhloin min en vang vang ringawt a, min hnial hauhlo tih erawh ka hria.







Mut hmunah kan inbia a ka ngaihtuah ngang mai "Khalai kha a hrehawm viau em?" ka ti leh ngawt ṭhin a "Hrehawm loh e, chhungkua te chu inbakkaih chang te a awm ve ṭhin a lawm, hetiang kan ni reng biklo" a ti ve tlat a, sawipui vak dan avang a ni. Ni 24 chauh angai tawh alawm, chumi hnuah chuan ka hnenah a awm tawh anga, engkim a ṭha vek mai ang.







Zingah ka Nuin min lo kaitho a, a la hma angreng viau mai ka Alarm pawh a la ri hauhlo. "Mampui lo tho teh, Chaltlangah Judy i han lam angai" a ti chu awihlo zetin ka en a. "Engvangin nge ka han lam angaih?" ka ti changbul a, "Matluangin min lo phone a, Judy chu Steno class kal a tuma, hetah awm mai rawh se a hrisello bawk sia Hostel a awmtir chu a khawngaihthlak emai" a ti zui mawlh mawlh a, chuzawng ka ringlo "Dawt an hrilh che anih chu" tih pahin ka tho a, Judy te nufa chuan ka nu rilru an lo hmin fel leh der tawh.







"Han lam ang che aw, nangni inṭhen ringawt mah ula tette aṭanga nu anga a en ve ka nia, hetianga in-mihran nghal ngawt thei kan nilo ania, nangte chuan nupui i nei daih dawn tho a; ani reilo te lo awm chu ngaimawh lo mai rawh" a ti leh sap sap a.






Hrep chuan a!

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:06 pm

GOMENASAI -by Ahmangaihi violette khiangte



CHAPTER - 23





"Ninzanah inlo inbakkaih leh a nimaw?" tukṭhuan kan eilaiin Patean a ti a, ka hawichhuak duhlo lui tlata, "Enge a pawisa la ah min puh ve ngawt ni?" Irene-in a lo ti zauh a, a la ṭang ve ngang ngang mai. "I pawisa a bo em ni?" tiin Patea chuan min zawt a.







"Umm..hmanni lawka Bank aṭanga ka lakchhuah a nia, niminah pawh ka la ak chhuak a tlai eirawng ka bawl laiin ka Purse chawpin a bo anih kha" ṭha tak chuan ka ti ve tho a, nimin khan ka room aṭanga Irene lo chhuak chiah ka hmuh vanga ringhlel ka ni, a lak anihloh chuan a bo ngawt chhan tur ka hrelo, "Engzah nge ni a?" a tih chuan "Sing nga leh sang thum" ka lo ti leh vat a, ka ah zat pawh ka la hrechiang khawp mai; Singnga chu ka pu pek ka tum kha a ni a, min lo laksak ta silo a Bank a dahluh leh ka tum vangin a ngai ngaiin ka la dahṭha a ni.







"I Office kalna ah i ti bo aniang chu a?" Irene-in a lo ti leh hlak a.






"In i lo thlen leh tih i chiang mâw?"dam diaiin patea chuan a ti a, min khawngaih hmel deuh lek lek bawk. "Ka en lo a mahse, ka kaldawn chuan ka ak chhuak chianga niminah ka Bag aṭangin ka phawrh chhuak lo hrim hrim bawk a" ka ti leh a, an pathum chuan min en ṭhap hlawm a.







"Chhunah te thil i eive lo em ni, thil tibo chuan dawt an sawi châwk ania, i thil leina te ngaihtuah rawh" Nu Muanin a lo ti hlak chu ngawi turin Patean a lo khap nghalvat a. "Niminah thil ka leilo" ka ti chang bula, nizanah pawh ka sawi vek tawh, nimin khan Taxi ka hmanglo a chhun thil eitur leinan ka pawisa ka hmang miahlo bawk anih kha, chu chu an nufa bulah nizan khan ka sawi tawh a; Patea awmlaia an han hre ṭha duhlo leh kher chu ka ngei ru ngang mai








"Taxi te i hmang em?" Patean a lo ti leh a "Hmanglo, Alawmi leh JH-an min thlah a" a tih chuan Patea hmel pawh a buai ve ta nak a, Irene-i chaw eilai chu a melh deuh ran ran a, ka room aṭanga a lo chhuak ka hmuh thu te chu sawi mai tak ka nap a mahse, ka sawi leh nih chuan an nufain an ṭangdun leh ngei dawna, Patea lahin tihzui chiam ngaihna a hreleh tawp lo ang, boruak ṭha a awm theih nan ngawih mai chu a fin thlak ber.







"Lalnunkim i nau pawisa chu i la em ni?" Patean a tih takah chuan ka hawi chhuak vat a, Irene-i pawh alo ṭeu nghal hlar mai. "Teuhlo lutuk, engvangin nge ani pawisa chu ka lak ngawt anga ka nei ve reng alawm" a lo ti bak hlur a, thip zetin min melh zui râwm bawk.







"Nanga pawh chu enge maw khatia i han rinhlelh ve nghal ngawt le, tunhma zawngin pawisa emaw inchhungah thilbo a awm ngailo hrim hrim, a chhuahna ah a hloh tihna a ni mai alawm, chenpui te inrinhlelh ringawt awm anglo lutuk" mitmeng tur khâia min melh rân chungin Nu Muanin a ti hlak hlak a, sawi tur a vang duh kher mai.







"In Office te pawh check ve reng reng rawh aw, i lo theihnghilh palh te pawh ani ve maithei asin, JH-a pawh zawtla Motor ah te pawh i lo thlauh te hi a nia nge" Patean a tih chuan ka chhang zui tawhlo a, Irene-i lak tih erawh ka chiang viau a ni.







Pawisa hi ka tibo mai mai ngailo a, ka pawisa neih te hi harsa taka ka thawh chhuah a ni bawk, duhzawng leh eichak zawng te pawh lei ngamlo a ka khawl ve ṭang ṭang kha Irene-i chuan ruih nan emaw mai mai a hmang dawn tih lah ka chiang si a, ka pawisa kha ka ui takzet a ni.







'Rilru tina suh, he inah hian i awm rei tawh dawn hleinem, thlakhat em pawh angai tawhlo' tiin ka inhnem ru a, tunah zet chuan he hmun chhuahsan vat vat tluka chak ka neilo, ka kham ve tawk tawh bawk e.







JH-a a lo thlen chuan inpeih atin kawtah ka lo ding tawh a "I van tlai ve, min theihnghilh daih emaw ka tia" Seat a ṭhutluh pahin ka ti zauh a "Sorry" thu tak deuh mai hian a lo ti sup a, ka lawmlo emaw a ti a nih ka ring, "Ka ti mai mai anih kha, tukin chu ka inpeih hma deuh a" nui chungin ka ti ṭha leh a. "Tukin chu ka buai deuha, ka theihngilh reng renglo che ania" ka sam rawn chul thuakin min en vang vanga, "I nalh hle mai" a ti zui zata.







"ATM ah kal ka ngai dawn a" kan tlan chhuah hnu chuan ka ti a, "Pawisa i mamawh chuan ka ta hmang ta che" a lo ti var a, "Ka duhlo e a" rang zeta ka lo tih chuan min nuih a, bialpa te emaw midang pawisa hmansak hi ka hreh zawng tak a ni. "Ka lakah inthlahrung ṭhin teh suh, i ta ka nih hi" a sawi laichuan ka en rang kher mai, sirzawng min chhawn a nui hmel chu a hmelṭhain a langpa em em mai lehnghal a, a thilsawi lah chu pawm a nuam em em bawk si, min ti lai ringawt nia!






"Ka ni lo em ni?" a rawn ti leh ngat a.





"Ni e" lai fe in ka lo ti ve a. Ka kut a rawn hum takah phei chuan ka lai chhe hle ringawt tawh, "Nangpawh ka ta i nia" ka kut chu la kangin a fawp zauh a, JH-an zei taka ṭawngkam thlum a han hman ve hi chuan a mi deh dan a dang riau zel a, dawt a sawilo tih lah a chiang thei em em mai bawk si a; a nuam ka ti ve em a sin.







"Tukin lam te kan ṭha tlang maw?" ti a min zawh chuan ka lo bu nghat nghata, ka pasal ni maitur mah nise, chhungkaw buaina neuh neuh kan neih ṭhin hi chu hre ve rihlo sela ka duh bawk, tunah pawh ka duhaiin a hretam mah mah tawh a ka kawppui tur anih na angin a hriat ve chu a ṭul tehmeuh mai mahse, hmeichhe tan zawng chhungkua hi kan zahawmna ber a ni miau si a, he kan chhungkaw boruak awhawmlo zet mai a laka han phawrh mualpho fo mai hi ka lo îp ru leh ṭeuh ṭhin.







Vawin chu hna pawh ka buai ve ta tak tak ta, thawhpui te nen chaw chhun kan eiho a, tlaiah JH-a nen kan haw dun leh a, kar tluanin chutiang chuan hun ka hmang liam a, Alawmi nen kan inhmu hman ngai meuhlo. Zan lamah JH-a te ṭhiandun an lo leng zantin a, in lam boruak pawh a ṭha chho viau mai, Irene-i nen kan inbe tuilo a ṭul fetah lo chuan kan inbe ngai mang meuhlo, kan tan erawh a thawven thlak huai thung.








Nu Muanin Bazarah dawr lei tur a hmu hlauha, buai ana ngang mai. Tlai ban velehah inthlak lemloin bazar lamah ka liam nitina zanah chuan ka chau ve hnap ṭhin, JH-an min hrethiam hlauh zawka, zantin lokal erawh a ṭhulh ngailo nain rei tak an leng ngailo a; min ngaihtuah vanga lo kal ni ta berin ka hria, min hrechiang hi a ṭhatna laichen pawh a awm kan inpawh phah zel zawk chu a nih hi.







Kan inneih hun tur pawh a hnai ve ta viau mai, ka puin pawisa min lo thawn veleh mauh mai a, ka lawm viau rualin ka inthlahrung rilru hle a, a ti hek tu ka la ni ta zel chu a ni tak sia, ka mawhphurhna a ka lo la ve ngawt te pawh a zahthlak dawn dawn a lawm mawle. Ka ni lahin thuam chhawm ka neih ṭhatloh mawlh a hlau a a khat tawkin minlo be reng bawk, tlangkam aṭangin JH-a te chhungkaw chanchin a lo hria a, kan do zawhloh mawlh a hlau a, kan inbiak chang lah hian a rilru lah hi a hahthei em em mai bawk si a, "I pasal tur chhungte an hung lutuk an tia, puan te hi engzah vel nge ken ngai ang aw?" a ti chhen mai a, kei lahin lo sawipui chiam dan ka hre derlo a ka lo um e liam mai mai zel a ni ber, pasal nei tura inbuatsaih hi ka rinai daihin a lo hau tak hrep mai.







Zirtawp tlaiah Alawmi nen mokawr hawh tur kan enkual a, kan duh ang kan hmuh ho lah a to zek zel a, nikhat chauh hak tur si a sing tel tehmeuh insen chu kei ka tha a lo na a, Alawmi lahin min lo veng thawng ve bawk a, a ni khatni chuan engmah kan hauh fel thei derlo.







Zanah min lo phone a "Ka cousin hian a mokawr hi a hak duh chuan ha sela a tia, nikum kumtawpa an inneiha an ṭhuitir kha ania, in intiat angrenga i hak tawk ve mai ka ring, moṭhian kawr hi keipawn ka ha tawk chiah a, kan ti mai dawn a mi, a nalh reuh lutuk a, i phone kha lo en la thlalak ka lo thawn ang che " a lo ti zung zung a, kan inbiak zawhah mokawr thlalak chu min lo thawn a, a nalh phian mai!







Dawra an zawrh te anga inchei khat buai ang kha a nilo a, a simple in a zahawm em em lawi a, ka duhzawng tak a ni. Atukah Nu Muani dawra lo keng mai turin ka ti a, man mangloa hawh theih chu keini tan pawh a tihzia viau ang chu.







Zingkar aṭangin Nu Muani nen dawr kan nghak a, Patean Tiffin min lo pe a, chumi hnuah an nupain thilpawimawh titurin an kalchhuak a, Alawmi lo thlen chuan chawhnu her a ni ruai tawh, a sawi ang chiahin a mokawr lo ken chu ka ha tawk chiah a, ka han ha chhin vel chu dawra lo kal te chuan nalh an lo ti ve ngang mai a, kei ngei pawhin inhmeh ka inti ve viau mai, a hma ni a kan en ho ka hak chhin te aimah khan ka inhmeh zawkin ka hria.







Alawmi hak tur chu rawng senno Purple rawng kai lek lek a ni lehzela, kan duhthusam thlap a ni. "Ha ila" kan ti rual zawta, kan kawr hak turah chuan kan lungawi dun ngang mai. "Engzahin nge kan haw dawn" ka tih chuan "Hawh man angailo, ha tawp rawh se a tia lawm" a lo ti sam et a, lehzel chuan! "Vawin hi ka vanneih ni a niang a?" Ka tih chuan kan nui dun hak hak a.







"Veil leh tlereuh te kan lei anga i cousin chu kan pe tel daih dawn nia, kan hawh man a ni nghal mai" keiin ka lo ti ve vat a. Nu muani te lo let leh hnuah keini chu bazar turin kan chhuak a, Alawmi chu puan leh pheikhawk ka leisak a, min hnial ve nasa ngang mai a ka tihluih tak tlatah erawh chuan a lawm thiam leh em em mai bawk a, nula fel ve tak chu a ni chiang a lawm, ka tan lah ṭhian nih a tling em em reng bawk.







Kar khat chiahin min dangta, keini lam pawh kan inpeih thawhkhat viau tawh na chungin rilru erawh a hahchawl thei meuhlo, kan inneih ni tur chu a kar leh mai Zirtawp ni a ni a, a hun a han thlen dawn ah tak tak phei chuan ka zam ta riauin ka hria, Irene-i leh Nu muanin min lo sawi ṭhaih ve chhen mai bawk a.







JH-a nu Nu Hmingliani ber chu min lo huphurh pui a "An khawsak a sang si, nu ber chéng i man lo anih phei chuan hrehawm i ti dawn mange, tih tauh bur bur te kha an hrethiam ve dawnlo che a nia" Nu Muanin a ti a, Irene-i lahin "I no bawk si a i awm rei theih pawh ka ringlo, hmeichhia an tam bawk sia, i zia i thlak ve viau chu angai ang" a lo ti ve bawk.







Mahse, Patea a thung chuan a hranin min titi puia "Hruaitluanga te chhung chu ka hrechianga han huphurh vak tur an awm lo e, i nu leh i u sawi ang em em an ni lo ang, nang chu i fela i awm thei lutuk ang, Pi Hmingliani pawh ang hluk hluk ṭhin mahse mi rilru chhia a nilo a, a engamah hma khan i lo hreh ringawt ange, chhungkua hi chuan kal dan phung leh chin dan hrang te te hi chu kan nei fur a, nangpawh i va awm anga kar loah i insiam rem thiam vat mai ang, hmeichhe fingin laina an huikhawma hmeichhe â in laina an hnawt ṭiau ṭhin tih anih kha, fel takin va awm la, nang chu i u aiin i puitling zawk a ka ngaihtuah vaklo che" a ti dap dap a.








Nu Muani te nufa min fuih ve na ngawt aichuan hriat nuam tak zawng a ni, rilru paukhauh leh zawldawh taka awm turin kei pawh ka infuih ru ve renga, ka nu pawhin 'ṭhat leh ṭhat inlawm tawn tur' a tih tak kha mâw, midang chunga ṭhat ka chhuah tlat chuan tuman min ngeihloh chhan tur a awm hleinem, tu te chungah mah rilru chhia pulo phawt ila midangte pawh sual ngawt tura ngaih pawh a dik biklo ang.








Zirtawp ni ah hna kal turin min lo lama, a khabe hmul a rawn met fai vung mai a, a lang naupangin hmelṭha viau tho mahse khabe hmul kha inhmeh ka ti a ka lo ui ru kher mai, "Inneih niah chuan khatiang khan in mêt mam vek suh aw" ka tih chuan nuihza hmel lek lekin min en a. "I thu vek a lawm" a lo ti ve mai bawk a.







Chhunah Liansangzuala leh Alawmi te nen thil kan eiho a, Liansangzuala leh Alawmi awm kawp naah chuan ṭawng hun kan chang ve meuhlo, an bengchheng dun bawk si a, kan in ena kan nui leh ringawt ṭhin.


IMG_20210207_002945.jpg
IMG_20210207_002945.jpg (82.46 KiB) Viewed 9957 times



"Naktuk bazar chung chang chu i hrilh ta em?" Liansangzualan a tih chuan hrechhuak zawkin "Naktuk i buai angem?" a lo ti vat a. "Ka hrelo, dawr ka nghak mai thei" ka lo ti ve a.







"Ka chhang chiah Apuii kha a lo haw a, naktukah bazar pui che an duh a, Alawmi nen kal ve ula, hmeichhe ho zawng in ni ang" a tih chuan chhan lawk ngaihna ka hrelo. A wallet aṭangin Card a rawn phawrh a "I duhzawng i lei dawn nia, i ṭhiannu pawh" tih pahin min pe a, minti hamhaih viau mai.







Alawmi ka melh zauh a, engmah sawi loin a hmui a lo petsawi chiam ringawt a, a Card min pek chu ka tuai letsek reng ringawt. "Apuii ho a bazar chu a nuam viau ang Bawihno" Liansangzualan a lo tih chuan JH-an nur fein a lo melh a "Khatiang khan i ko ve thei ka ti che em?" a lo ti nghut a, "Ahh...ka tih....Mambawih" khi sung chungin Liansangzualan a ti ṭha leh a.







"I unaunu tur te ho an nia, inpawh nan a ṭha" Liansangzuala bawk chuan a ti leh a, hnial chi pawh ani dawn em mawni ngaihdan siam a har kher mai, chak viaulo mahila Liansangzuala sawi ang tak khan inpawh nan chuan a ṭha viau lawi bawk si a, an mahni lam rawt a ni vei bawk nen i he loa lo pawmsak mai chi zawk em mawni dawn le?







"Pawisa kan nei bawka kan kal dawn nia" Alawmin a tih takah chuan ka hnial zui ta em biklo. "I card hi a ruakin kan pe let leh maithei che aw" tiin JH-a chu a fiamzui hlut a.



***



Inrinni ah JH-a farnu te nena kan bazar ho tur chu rilru ah a awm run a, ka chakna leh chaklohna chu a inzat thuak ta ve ang. Alawmi a tel ve dawn hlauh zawka nilo sela chuan ka phurlo kher ang chu.







"Naktuk kha i chak vaklo em?" zana kan inbiak chuan a lo ti a, chak vaklo angin ka lo lang em mawni? Kei hi ka inthup thiamlo mah mah ṭhin.







"Chak e, ka phur lutuk a lawm mahse, i Card hi min pe kher duh a angai lo a sin" inthlahrung rilru deuh chuan ka ti a, "In la innel vak silo a kal ve la chu ka duh a, i kawm rual lek lek an nia nuam pawh i tih ka ring ringawt a, mahse ka ngaihtuah leh deuh che a kan pahnih chauha bazar dun i duh zawk em?" a lo ti leh a.







"A....a ngailo, inpawh tlannan bazar ho chu a ṭha alawm, Alawmi pawh a kal ve dawn a ani pawh a phur a lawm, Fiona i kha a kal ve dawn bawk ti raw?" ka lo ti zung zung a, "Aw...an rawn kal vek ang, Princess-i hi a kal ve peih ange maw?" chiang manglo deuh chuan a ti a, kal ve lo se ka lo ti rilru hmanhmawh a, ani kha zawng ka ngaina tehchiamlo chu ani nghal ber e.







"Ka phur tawh, Apuii pawh ka la hmu ve lo a" ka ti a, a nuisuk ri chu ka hrepha. "Nuam deuhin hun inhmang ho dawn nia, i duh zawng a piang leila inren hauh suh aw, i ṭhiannu pawh kha lo sawm la tlaiah hetah chaw in einghal dawn nia" a la ti ta deuh deuh a, "A....chaw chu einghal lo ang" ka lo ti hluai a.







"Ei dawn e, nula hoin chaw kan eikhawm nghal dawn an tia, in bazar laiin Victora nen eirawng kan lo bawlsak dawn che u a lawm, zanin ka lo leng silo a ka lo ngai hman viau dawn che ania" a ti a, a ṭawng tawp lam chu a ril ruih mai.






"Ka ngai che" ka ti ve sap a.




CHHUNZAWMNA





Rei deuh kan inbia a ani leh nilo angin zanin chu sawi tur a haihchham bik miahlo, kan thil ngainat zawng te ka eiduh loh zawng te chenin kan i hrilh a, kan titi tui phian mai. JH-a chuan Artui a eitheilo a, a pum a na ṭhin, chuvangin Artui telna lam chi reng reng a ei ngailo, ka khawngaih reuh khawp mai, Artui te chu keiin ka han duh tehlul nen a.







"Keichu eitheihloh vak ka neih awm pawh ka hrelo sa ka ngaina lo a a ni mai" ka tih chuan a lo nui suk a, "Ka hria a lawm" a lo ti leh maia, min hriatchian hmel bik ṭhin.







"Thil dang daih in zawt ang" sir zawnga inleh thak pahin ka nui kar kar a "Zawt rawh" a lo ti thum dût a, a mutchhuak aw chu a mawi ka ti!







"Ngaihzawng engzah nge i neih tawh?" a nui ri ka hriat rualin ka nuihak a, enge.. hreve chak miau hek lê.






"Bawihno chu kher chu a va ṭangkai lo êm?" nui hawk chungin a ti a.






"Nâ.....sawi mai mai teh aw" ka lo tih chuan a la nui cheu a, JH-a hi a zaithiam ka ring tlat tawh, a zai ngai a ngem le?







"Okay...i kut ṭanga pahnih zat kha chu a tlinglo" a sawi chiang duh lo ve tlat, "Keichu pahnihna i nia" ka tih chuan "Ka hria a lawm" a lo ti leh mai a, ka hria alawm hi alo ti thei zela hepa hian min enthla ru reng emaw ni le!







"Ka ti mai mai anih kha paruk na i nia" ka ti leh chu a nuih a za kher mai, a nuilai hmel awmdan tur ka mitthla zui a, a taka hmuh ka chak ngang mai bawk.







"Tunah hian ka bulah lo mu la chuan ka kuah veng veng ang che" thutak deuhin a ti a, lai zetin kei ka lo ṭhensaka, a bula mut a a pangtilum nghen ar ar kha nuam ka ti viau anih kha, a bula ka mut lai kha ka ngaihtuah zui vang vang a, a hmuhloh lamah ka nui var var reng.






"Min ngai a mi?" ka aw chu zawi ṭha tak a ni mahse, a hrepha tho.






"Ka ngai che, engtik laipawn ka ngaiche" a lo ti supa, pawi ka ti lo teh a sin aw, tun darkar ah hian keipawn ka ngai ve chiang em a sin.







"I hmui no deuh kha fawh vawng vawng ka chak a nia" chu thu zet chuan thinphu a ti mumallo dawn dawn mai.






"Min lo fawp la" ka tih chuan a chek hlak a "Naktukah" a lo ti nghut a. "Aih tunah hian ka duh, tunah min lo fawp rawh" nui kar kar chungin ka ti leh a, thawk ala hawk ri chu ka hrechiang hle.






"I sual hle mai, naktukah ka hmu ang che, chuan ka fawp bawk ang che, i sawi belh leh anih chuan a dang pawh" a ti leh tawl a, nuihza viau mahse hriat nuam tak zawng a ni.







"Zan a rei ta e, muhil dawn tawh rawh" aw damthlupa a tih takah chuan kan inmangṭha zuia, kan inbiak zawhhnu te chuan ka muhil lawk theilo, ka inlet tawn sek renga, ka nui leh ṭhin. Kan innei tawh mai dawna inngaizawng tir ang chauh kan la ni thunga, nitin mai hian kan induh tawnna hi a zual deuh deuh niin ka hria, ahma aimahin ka vei nasa bawk.


***




Nu Muanin dawr nghak rawh min ti lo hlauh a ka lawm ngei mai, chawei laichuan ka chhuah tur thu leh JH-a farnu te nen kan chhuah ho tur thu chu ka sawia, "Apuii a lo haw maw! A rawn tlân tihna a maw ni le?" Nu Muanin a lo tih chuan "Leh ringawt a che!" Patean a lo ti nghalhluk a.







"Tlân a niang chu a pasal kha a lerh em alawm, an inneih rei ka ringlo sa hrim hrim" Irene-in a lo ti ve hmak hmak a. "Hnamdang pasal neih chu a ṭha lo reng asin, engah nge maw an han neihtir phal zawk le, keichu ka fate an ni emaw ka laichin tawh phawt chuan hnamdang an nei tur a ni lo bur mai" Patean a ti a, "I hria maw chu?" Irene-i lam hawia va tih kher chu ka chak ngang mai, Mumbaia kan awmlai khan hnamdang hlir a ngaizawng ṭhina, Patean han hria sela engtin tak ngai ang maw.







Dar sawm dawnah Alawmi a lo thleng phei a, alo thlen hnu lawkah JH-an min lo call-in kan inpeih tawh em tih min lo zawt a, "Apuii nen in be rawh u" tiin Phone chu a farnu a pe a "Hello, Mambawih" hmeichhe aw no nghalh mai hian a lo ti nghalthuai a.






"In insiam zo tawh em?" rawn titu aw chu ngainatawm tak a ni.




"Aw kan inpeih chiah e" ka lo ti ve vat a.





"In inkawtah lo awm la kan lo chhuak dawn chiah aw kan reilo ang, i ṭhiannu nen chuan a mi in nih?" a ti leh zung zunga, thawm a ri nak nak renga ka chhanna chu a hre fum fe pawhin ka ringlo.







Kawtah Alawmi nen kan lo nghak a "Apuii chu a mi Princess-i?" tiin Alawmin min zawt a, Reny chungchang kha ka hrilh ve nial nual tawh a, Lalrinhlua bialnu tih ka hrilh tel vangin a ngaina lo ve nghal hmiah mai bawk.






"Nilo, Apuii chu JH-a chhang chiah a nia, Princess-i chu an naupang ber" tiin ka hrilhfiah a.






Minute sawmhnih dawn vel awmah JH-a motor a lo thlenga Driver erawh midang a ni thung, Seat hma a ṭhu hmeichhia chuan nuisangin min lo en a, ka hmingin min rawn ko nghal lauh mai bawk a, Apuii chu a ni ngei mai, Motor aṭanga an lo chhuk laichu kan lo en renga, Apuii chu nulian ziah zuah ngo var mai leh hmelṭha zet mai a ni, JH-a nen pawh an hmaifang chu a in ang deuha, a nu a chhun viau bawk.







Ka enreng laichuan Motor seat hnunga ṭhu te chu an lo chhuk ve a, ka tum loh deuh ka va hmu tel ta mai a.




Judy kha!??



Tinge a lo tel ve le?




Ka lam hawiin a rawn nuisang a, nuih let ve erawh harsa ka ti ṭalh a, tawite chuan ka nuihlet ve, Fiona-i leh a cousin samkir kha a tel bawka Reny erawh a tello thung.






"Min lo nghak rei em, Traffic jam ah kan tang a" tiin Apuii chuan min chibai a, hnai taka en phei chuana hmelṭha ngang maia a nulian bawk si a a zahawm khup mai.






Alawmi chu ka hmelhriattir ve te te a, Judy nen kan inchibai chu sawitur a vang duh kher mai a, ka dang a ro nghal huam mai bawk, a lo telve chuan ka awm a ti nuamlo ngawt mai bawk a, Alawmi bulah lah tunge anih ka la sawi der lo a, ani chuan nuisangin a lo chibai a, Judy-in min melh dan te chu danglam bik riauin ka lo hre leh pek a, kei hi ka diklo deuh tlat.






"Fiona, bawihi nen khan a hnungah ṭhu chho ula" Apuiin a tih chuan Fiona leh a cousin samkir te kha a hnungah an ṭhu chho a, Judy, kei leh Alawmin kan ṭhu ho a, Judy nen chuan kan inmelh leh ralh ṭhina, tawitea han innuih bak chu kan inbe zuilo.







Apuii a ṭawng barh barh renga, hnung lamah Fiona-i leh samkir kha an ti ti char char bawka keini pathum erawh kan ṭhu ngawi ran a, sawifiah thiam siloh hian awm a nuam zan lo chu a ni, ka bul ṭhu lah chuan min nuih bak chu min biak a tum bik derlo a.







"Mambawih, thil ei hmasak in duh em?" Apuiin a tih chuan "Chaw kan eikham deuh chiaha, ril pawh a la ṭamlo' ka lo ti vat a, "Khawiah nge kan Bazar ang?" Alawmin a lo ti ve vat a.







"Ka nutei te dawrah kal hmasa ber ang u" Apuiin a ti a, chutah kan lam lo hawiin "Enteh Mambawih, thlalak aiin i hmelṭha daih zawk" min nuih var var chungin a ti leh a, khawi aṭangin nge ka thlalak a lo hmuh dawn ni?







Kan va kalna dawr chu lian leh changkang deuh mai a ni a, an thawmhnaw zawrh te pawh man to tak tak hlir a ni. Thawmhnaw kan enlai mekin Reny leh hmeichhe pakhat an lo lang ve hlawl a, pakhat zawk sam ti buang thang chu JH-a te ina ka kal hmasak ṭum khan ka hmu tawh nghe nghe " In va han rei em em ve a, kan nghak rei lutuk che u " Reny chuan a lo ti nghal hlak hlak a, kei min hmu chu ner nghal nakin a hawisan hmiah mai bawk a.







"Chimawm hmel reuh e" Alawmin ka beng bulah a lo ti sar sar a, nuih a za duh lo kher mai.







Thawmhnaw an enkual sap sapa, Apuii chu an Boss emaw tih mai turin an be hlawm a, "Hei hi a mawi i ti em?" ti a an zawh a Apuiin mawi a tihloh chu an dah leh hmak hmak zela, an mahni duhzawng lei an tum miahlo niin a lang, sawi hmaih theihloh sap ṭawng hlirin an inbe hlawma, dawra awmve midang ho pawn an en duh hlawm ngang mai.







Tlereuh dawra kan kal chuan "Mambawih ṭhi hi i duh ber lo thlang rawh le" nuisanga min enin Apuii chuan a lo ti a, "Enga?" ka lo ti he haw chu "Ka leisak ang che" nelawm zet hian a ti leh a, kal mai nachang pawh ka hrelo, Alawmin hnunglam aṭanga min nam takah chuan ka kal ve chauha, thlang tura min ti ṭhi ho lah chu aman ato em em mai lehnghala, pakhat thlan pawh inthlahrunawm duh tak a ni.







"Aa....A to sia..Min leisak duh kher suh" ka ti bah nak a, min nuihzat hmel lek lek a Reny aw lo thian kharh chu Apuii chuan a va melh zawk a, lehlam a hawi nghal daih a, a ngeiawm duh angreng.







"I duh ber kha la tawp rawh, awrh chhin vel la" Apuii bawk chuan tiin bawma an ṭhi zawrh chu a bih kual dan dan a, Alawmin min lo enpui ve takah chuan keipawn ka bih hnaia, a tlawm ber chu ka pawt chhuak ta hrama, ka awrh chhin laichuan Judy leh Reny te chu an lo inbe sar sara, ka lam an lo hawi bawk a vangin min rel anih ka ring ringawt bawk a, rilru a hrehawm ru ṭeuh reng mai.







"I inhmeh lutuk" Fiona i te pahnih chuan an lo ti vat a, Alawmi pawn mawi a ti aniang a lo bu nghat nghat a, rangkachak ṭhi ka vawi khat neih na a ni tak nain lawm ngaihna vak pawh ka hrelo, a thlawna thil dawn tawp mai chu awm a nuam zan lo.







Lawmthu te chu ka sawi ve luama, ka sawi laklawh laiin "A dangah kal ang ule" tiin Apuiin min kai nghal dawr dawr a, dawr danga kan luh laichuan Judy leh Reny te chu pawnah an tawi khawmuanga, keini erawh Underwear vel enin kan phul hluta, lei ka tumsa anih vangin Alawmi nen kan duhzawng kan zawng kual, a man to hlawm viau mahse, hei chu ka mamawh tak a ni.







"Pasal neih dawnah chuan a tam thei ang ber hi underwear hi lei phawt mai ila a dik vel vek a ni mai" nui rah rah chungin Apuiin a ti a, sexy deuh deuh Alawmin min lo hmuh bawka, kan nui leh ham ham ṭhina, Apuii min thlansak ho erawh a lua deuh a ni, hak pawh ka ha ngamin ka ringlo, engkim a lang tlang vek hlawma hakloh nen a in ang reng dawnin ka hria.







Alawmi leh Fiona i chu an inkawm ngeih nghal chat a, samkiri nen an pathum chuan an inzui dat dat a, Swim suit an en a an nui leh dar dar ṭhina, Alawmi pawn nuam a ti ve viau aniang. "Lo en rawh aw, hei hi hi kan ha chhin teh ang" Night gown keng chungin Apuii chu dressing roomah a lut a, keiin kawr hnuai ka lo en ve thunga.







"C cup nge D cup i neih a?" tih ri vang chuan ka hawilet zawk a, Judy a ni. Ka thil ken chu ngun zetin a lo thleka nersakin "Kha chu a mawilo e, lawiṭhat zana hak turah chuan" tih leh lo ban a rual a. "Lawiṭhat zana hak tur bik pawh anilo, lei ka ngai hrim hrima" pek pah chuan ka lo ti ve a.








A dang ho chu enkualin min hmuh chhin zela, hak nuam tur chu keiin ka zawn laiin ani chuan a mawi leh lang sexy tur chi hlir min hmuh a, ka thlan ve te chu "A mawilo" a tih loh leh "A ṭhing lutuk" a lo ti zela, thlan ngaihna ka hre tawh derlo, keichuan Sister hood ka duh ber miau a, ka hak tam ber a ni bawk.







"Mate hei hi analh lutuk" tih pahin Alawmin Navy blue rawng hi min lo pe a, ka duhzawng chi tak ani, a puan a nemin hak nuam chi tak a ni. Alawmi kalsawn leh hnu chuan "Khawi maw" tih pahin Judy chuan min lo pawhthlak sak vat a, "In van duh ṭhing thei" ti nang nang chungin a dang zingah chuan a dah leh daih a, enge maw a hriat ni, ama ta tur kan en pawh a ni tawp silo a.








Ban leh ka tum laichuan "Enteh" a lo ti hluai a "Ih maw, khatiang kha chu ha duh suh, JH-a duhzawng a nilo, ani chuan a dum nalh a ti ber ania, Hostel ka awm laikhan a dum hlir min lo leisak ṭhin" nuisak chungin a ti a, min ti hamhaih kher mai.








Ka nui tawi tak chu nuisang chungin min en renga, min nuihzat hmel lek lekin ka hria, ngaihsak duhlo luiin a dang chu ka en a, chutih laichuan ka bul hnaiah lo kalin a lo en ve leh a, biak pawh ka chak tawh neklo.







"Panty leh Bra inrawnglo deuh te chu ha lo la, JH-a chuan rawng in suit thlap hi a duh ania" a rawn ti leh ngat a, ka lo melh hrawk chuan a ti buai chhin eihlo, chalak zetin min melh ran a, a nui hmel lem zet chu ka hmuhhmaih hauhlo bawk.







"Enge i hriata?" midang hriat phak loh tur chuan ka lo ti hlaka, "Ka hriat chu ka hrilh che hi" a lo ti duh lek chauh a.







"Tam deuh hlek leirawh thurawn ka pe ve mai mai che anih chu" a sawi zawnga a nui sang reng chu a ngeiawm duh kher mai, hmelṭha viau e tiloin a rilru chu a kha zêk anih hmel.







Kalsawn mai ka tum chu min rawn dinhnaih leh a "Tam deuh hlek leirawh ka tih chhan chu maw, a insum theih tawhloh chinah hian a pawt chhe vek zela, a tlolo thei lutuk" ka lamah rawn kun hnai sauhin " Kan inhmuh dawn te hian a Spare ken zel angai" nui hak chungin a ti leh a, a bianga ka ben sawk lohnan ka inhumruh ngar ngar a ni ber tawh, a sawi belh leh anih ngat chuan ka beng chawrh duh tak tak ang.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)