GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:08 pm

CHAPTER - 30



"I hlim hle mai maw, i beisei ang he hu a ni awm silo a, naupang an awm ve tawh hi chuan neuh neuh hi a tam tawh ṭhin a nia mahse, kha i chi chu a la hût lo tih chu a chiang ta phawt mai a" nui suk suk chungin Liansangzualan a ti a. Huhh...."Kei aiin kum 4 zetin i upa ania, midang bulah lah kan inrual angin i lo sawi thul, nangmah zawk kha in buaipui chu a hun ve tawh viau lo maw?" ka lo ti zauh a.






"Keizawng ka duhberi inpeih hun ka nghah chungin ka tar hman duai dawn anih hi" a nui vur vur tak nain a beidawn hmel riau a, hei chu a hma aṭanga ka hrilh sa ania, tleirawl um duan duan lo hian a rualpui ngaihven zawk turin ka ti fo ṭhin, Fiona chu kum 18 a pum zawt chauh a, ka ni Sangzuali te nupa in zirna an
ngaipawimawh si a, inneih lam chu an la hlat hmel viau a ni.







"Pa han nih dawnlai vel boruak chu enge a an a?" a rawn ti ṭha leh a, kei ka lo nui mai a, hrilh pawh ni ila ka awmdan leh ka thil ngaihtuah te hi a rawn hre thiam phak ve kher lo ang.






Ropui tak zawng a ni, engtia han inenkawl chhoh tur nge tih hre maplo mah ila.





Kan naute pawn a nu pum chhungah chawlhkar rukna a hmang ve mek tawh a, naute hrisel tak a ni tih chu a nu hmelah a hriat theih, vanneihthlak takin Bawihno-in naupai a hawlo hlauh a, insawisel eih pawh nei loin a thil ei a tui em em reng a, a tam thei ang ber ei leh ina mut tam chu a tan a ṭha ber reng a ni. Ka chhungte pawh ka hrilhlawk a an theihtawk chuan an ngaihsak ve hlawmin ka hria.






Fahrah ti a han sawi em chu ka phallo, a seilen dan erawh ka chhungte pawn an hre ve ṭheuh a, duat leh ngaihsak a mamawh laitak a ni vei nen a rai lai na na na hi chuan a mamawh tihsak tura inpumpek chawt mai ka duh a, zinna tur pawimawh ka neih ang pawh midang kutah ka hlan vek rih a, Victora meuh pawhin ti mah mah chu min ti ve ang.






Victora haw hnuah kan nupa in bathlarah ṭhuin thla eng kan thlirdun a, kuah mai ka tum chu a awmbawr alo dang ṭung a "Ana a, min lo tawk miah suh aw" a lo ti reuh a, dimtein a darah ka kuah a, a mut a chhuak leh der tawh, a ham bai bai reng tawh a, zantir teah hian a mut a chhuak nghal mai zela, kei erawh ka muhil ve thei lawk ngailo.







Khumah insawnin puan ka sin ṭhat tira, ani chu a muhil zui mai a, reilo te chhung hian a muhil nghet hman viau zel, a dul ṭhang chuang miahlo chu chulin hahdam hmel taka a tawh sak sak chu ka en reng a, ka lo hmanhmawh leh tawh viau aniang a dul chu ṭhang muang ka ti takzet a ni.







Ka phone lo ri chu chhang turin ka tho chhuaka "E...Tluanga in mu tawh em?" putar aw damdiai in a lo ti a.






"Kei chu la mu lo e, Mambawihi chu a muhil chiah a, i be duh em ni?" ka ti nghalthuai a, Mambawihi hriat lemloh hian kan inbe ve fo a, a tunu be mai loa keimah min be ṭhin hi ka tan tak pawh a lawmawm ve riau zel. "A...a muthilh tawh chuan be duh hranlo e, nangmah zawk a ni biak che ka tum" a lo ti leh a.





"Engthil nge ni ta?" ka lo ti vat a.




"Kan inbiak hnuhnun ber ṭum khan ram lei tur ka duh i ti em ni khah?" a lo ti charh charh a, ni dawn tak maw, ka sawi ngei tak e. "Aw...ka ti a lawm, chu chu enga ti nge?" chumi sawi tuma min lo phone hrim hrim chu a nih mai hmel.






"Ram puitling sa a nia, serthlum kung 30 vel a awm a, balhla kung tlem a zawng leh lakhuih thei a awm nual bawk a, thei kung dang pawh kutchang thliah tham lek lek chu a awm a, chhungkaw harsatna an tawh vangin tihral an duh a, a man phei chu a to angrenga, marawh chu hmun awl zau lai dil siamna tur chi leh thlai i lo han dah belhna tur kha awl zau deuh mai a awm bawk a, kan hriat chian a nia ka awh pui khawp mai che a" a ti leh charh charh a.





"A va ṭhat hmel tak ve, han hmuh ve pawh a ṭhat chu, remchang hmasa berah Mambawihi nen lo en kan tum dawn nia" ka lo ti ve a.






"Tukinah a ni pasal nen kan zuk en a, ni a kang ṭhain Fu huan han siam nan pawh a ṭhat hmel khawp mai" phur hmel takin a ti a, "Ka pu enkawl i chak deuh em ni" ka tih chuan a ngawi rauh rauh a, enge maw a ngaihtuah dawn ni, a tar tawh tehlul nena, a tha hah na tam mai mai tur ringawta an khaw ram lei chu thil tihchi a ni a nge maw?







"A...kan huan ve hi chu ei hi a tlinglo khawp a, han enkawl zui vak pawh hi tha kan seng thlawn mai mai tawh a, i lei ta anih chuan ka lo enkawl sak thei ang che ka han ti deuh mawle, lo lam hna kan nei lo bawka, awlthawng mai mai aiah" a ti dap dap a, ka ti buai viau angem tih ka ngaihtuah ve rauh rauh a, Bawihnoi lahin an inbiak chang apiangin hna thawkloa chawl hahdam turin a ti ziah si a, ngaihdan siam a har viau a ni.






"Nangin ṭha i tih chuan lo hauh chhin phawt la, kartawpah enturin ka lo kal dawn nia" ka ti ta ngawt a. "Pawisa i nei em ni, a to dawn a nia aw" awka zawi lek lek hian a ti a, min hupurh pui lehhnuhnawh deuh a ni maithei.






"Nei thei mai turah ngai ang, an chhiar zat te han hre phawt ila" ka ti leh a, "Naktukah ka lo zawt chiang anga, kan lo sawi leh dawn nia" tiin phone chu a dah a. Ram lei tur a hriat leh hriatloh thu kha thu tak em em lo in ka sawia hetiangin min lo ngaihven sak zui pawh ka lo ring hranlo. Chutih rualin huan lo ram puitling tak neih hi chu ka chak ve reng ṭhin, Aizawl aṭangin a hla lemlo bawka, a sawidanah thei leh thlai puitling sa anih hmela, ka pa pawn a duh ngawt ang chu.






"Anaaa....ana lutuk" rak ṭhawt ri ka hriat rualin ka hawilet vat a, khuma ka nupui ban vai ruai chuan min ti hamhaih kher mai! Rang takin a lam ka pan a "Ka chawn kha, ana lutuk" ṭhen chak chakin a bul ka thlen rual chuan min lo ban nghal chunga, a vawi hnihna a ni tawh, a puansin chu thehhlim rawkin a chawn vung deuh ul chu ka nuai sak a, chawn tha chat hi chu mipa tan pawh na ve tak zawng a ni.







"Ana dim deuh teh" a lo ti ṭeu hlar a, thil dangah insawiselna a neilo raino thinchhiat erawh a pe na ve ngang mai. " Ka dim che, nangmah kha lo ṭang lo la" a chawn ka hmehlai chuan ka mal alo hmer ngar ngar a, ana bawk aniang a ṭap zui hliam hliam mai.






Rei tawk fang ka hmeh hnu chuan a inthlahdul ta riai riai a, "Lo mu tawh rawh, tinge ilo thawh leh daih" tum bar a tiin side table a tui Bottle chu a ban a, "Tui pawh a awm miahlo" Bottle chu dah lehin a mu ṭha sat sat a, "Okay, lo mula ka lo lak ang che" Bottle la in ka kalchhuak nghalthuai a, inhnuai ka chhuk chu ka chhungte ho an lo la meng ṭhap a, Michaela hoin Board game an lo khela, an thawm a ṭha ham ham viau mai.





"U...lo tel ve rawh" Apuiin a tih chuan lu thinsan pahin choka lam ka pan a, choka ka luhrualin Judy ṭawng sar sar ri ka hre zawm a, phone hmang mek chunga min lo enin min lo nuih var var a, eirawng a lo bawl lawk anih hmel.






"Nu ka dah phawt ang aw, zingah ka lo be leh ang che" tiin Fridge ka hawn laichuan kan lam a lo pan a, "Mambawihi chu a muhil tawh a mi" a lo ti zui zat a.



"Muhil lo deuh"




"Chawhmeh chu chhuan lum chiah a ngai tawh, zingah chaw i ei hman zan zan ang" ka bulah lo dingin min en ran a, "Mengrei duh mah ta che" ka lo ti nghut a. "Zan kan mu thei lawk ngai chuanglo a, zingah hmanhmawh deuha chet aichuan a ṭha zawk a lawm, hun kan khawhral mai mai tho a" ka chhanna beisei zeta min en vang chuan "I ti lawmawm ṭhin hle mai" ka lo ti ve a.





"E....frying pan a ka thil chhuan saw telah niloin Oven ah i tihlum tir dawnnia, ka thawh hma theih chuan ka lo ti hman tho anga"






"Ka lo hrilh dawn nia" inhera kal mai ka tum chu ka banah chelhin min lo pawt chawt a, "Enge ni?" ka lo ti chu min chhang mailo chuan min han nuih leh rih a, "Tinge nupui i neih tak vang maia min pehhel ngar ngar zela, i lakah theihtawkin ṭhat ka chhuah ve a nia, min be ṭha ve tawh em em la" a ti zawi sap a, thawk ka lo la hawk thung.






Chhanglo a kal mai ka tum chu min la chelhbet ṭang a "Ka inthiamlo ve a sin, hetia i awm hian hrehawm ka ti a nia, i lungawi theih nan enge ka tih dawn a?" min chhuahchhal awka fe mai chuan a ti leh a, a tih ngaihna tak pawh ka hrelo.







"Engmah i lakah buaina ka neilo" ka lo ti chang bula.



"Anih chuan min be ṭha ve tawh la"



"Ka be ṭha lo che em ni?"




"Min ngaihtheihloh hmel em a lawm, i nupui hian i bulah min hek ṭhin a ni lo maw?" aw tham chhelin a ti a, lunghnur tak hmel a pu bawk.






"I chungchang a sawi ngailo, in chhungkhura i puihna ah a lawm viau zawk a nih kha" ka tih chuan men deuh par chungin min en a "Ṭhian ang talin min ngai ve tawh rawh, a hma ang kha chu ka beisei tawhlo mahse, mikhual hmelhriat ṭhanloh ang chuan min pel mai mai tawh lo la, in nupa tan pawh ṭhianṭha tak nih ka duh ve a" a ti leh sap sap a, chu zawng thil lawmawm tak a ni ang chu.






"Ni e, ni rawh se" ka kut a vawn na ka phelhsak lai chuan "Ka ngai thei lutuk che" a lo ti leh hram a.






"Tinge thil awmzia hrilhfiah nana ka khakfawk hi i ngaih kher ṭhin le, ka thil sawi te kha i beng lehlamah a chhuak lehnghal zel nge ni a kei hian sawidan ka lo thiamlo zawk?" vin lek leka ka tih takah chuan mit khap sak sak chungin min en a, ṭah a tum leh ringawt tawh, he inchhunga hmeichhe ho hi engvanga ka bulah ṭah tum ringawt zel nge maw an nih le.






Hman zanah khan huaisen leh ngampa takin min la duh reng thu kha a sawi a, a rilru putdan thlak vat tur leh chuti a nih loh chuan kan khawsak ho reng theih tawhloh tur thu hrilhin ka vau lawk tawh a, a beng a rawnga ka thilsawi kha a lo thun lo tawp a nih hmel e.






"Ka hria a lawm, tunah chuan naute in nei tawh dawn a, ka rilru pawh siamfel ka tum tawh a lawm mahse, ka laka i awmdan hian ka rilru a ti na ve alawm" a insut nghal faih faih a, hahthlak chuan a!






"Heh....engtia awmturin nge min lo beisei a?" chang fek fawkin ka ti leh a. "I farnu te ang hian ṭha takin min be ve rawh" a ti leh mauh mai, zep thu a chenglo ka be ṭha lo a a lakah sawitur ka neilo miau a ni, chu loah ka nupui a awm ve renga, a mitmei te pawh ka veng ve bawk a lawm, sawi dawt lo mahse, ka nupuiin a thik miau a, buai neuh neuh neih aichuan inthiar fihlim san mai chu thil awlsam leh thlan na-awm zawk pawh a ni reng reng.






Kan lampana thawm a lo awm takah chuan min thlah ta hram a, Princess-i lo lutin makti hmel fahrana min lo melh takah chuan ka che sawn nghal thuai a, "Enge in tih a?" hnung lama a tih ri chu ka hre hman a "Midang hriat ve chi loh" Judy in a tih ri te pawh.







Room a let leh laichuan ka nupui chu a lo muhil fel leh hman der tawh, puan sin ṭhat tirin a bulah chuan ka inthawlh a, a muhil hmel chu duhawm tak a ni. Tun hnai hian Judy nen an inbe ṭha viauin ka hria a, eirawng te pawh an bawl dun a an titi ve fo khan ka hria a, ka hriatdan hi a lo dik chiahlo em mawni dawn le.







Zing ka harh chuan ka sir a mutna chu a lo ruak hiai tawh a, tunlai chu ka thawh khalh hman meuhlo, pawnlama ka pa zai rat rat ri ka hre zawm zat a, "Chanchinbu a lo thleng tawh em?" tiin inhnuai lam chu a ko lang lang a, tho chhuakin ka inphih harha, inhnuaia ka chhuk laichuan sofa ah ṭhuin ka pa chuan chanchinbu a lo chhiar mek a. "I patea thlam chu an la sa zo thei nange, an va beirei tawh mai mai ve?" min hmuh rualin a lo ti hlut a.








"Lalremruatan an châk lamkhawm a lo hralh ṭhen zel alawm, an nupa duh dan a in ang bawk silo a an zo lawk lo ang" a chanchinbu phek leh lam min pek chu lo bansak pah chuan ka ti a.






"Tih ve ṭalh an tuma, mi taima leh rilru nei deuh tan lo te chuan tih mai mai a ni hleinem, mi tih ang apiang tawngpawng zuam ve ngawt chi em maw ni" a ti zui niah niah a. Patea te huan chu huan ṭha rai tak pawh a nilo, Dragon fruit leh kuva kung tlem a zawng a awm ve a, eitling tur chi ni pawhin keichuan ka hrelo, an ṭhianten huan an nei fura an fehna ah an sawm ve fo a, chumi it chuan mita to deuhin an leia, a thlai leh tih vel aimahin thlam sak ringawt mai an la buaipui ta zuia, ka pa chuan a ngainep thiam viau a ni.






"Lunglengah ram lei ka tum a sin, huan puitling sa ania" ka ti chu min bengkhawn rang khawp mai.



"Eng huan nge?"





"Serthlum leh Balhla tih ang reng a nia, sangha dil te ka siam ang chu ka ti"





"I thilthlai tawh em ni?" a lo ti leh a.






"Mambawihi pu leh a ni pasalin min lo ensaka, min duh pui khawp mai, kar tawpah en turin va kal ila" ka ti chu a phur hmel ta sarh mai a, "Sangha dil siam a rem ang maw?" a lo ti nghal hlut a, "Ka pu khan a rem e a tia lawm, kan en phawt anga kan duh zawng anih tak leh kan lei anga" ka ti leh a, a ruka a lo it ruk ve reng tawh vang a niang min hnial buai hauhlo in "Inrinni ah kan kaldawn nia" a lo ti hmiah a.







Ka nu bulah "Mampuia nen inrinni ah ram lei tur kan en dawn" a lo ti bawk a, "In enkawl hman awmlo emai, tibuai duh suh u" Michaelan a tih pawhin "Kan enkawl hmanloh leh huan enkawla riahchilh tur kan la mai dawn a lawm, mi tih dan vek a lawm" a lo ti sam et a, kei aimah mah chuan a phur ta zawk a a tihzia phian mai.






Kar tawpah ka pa leh Michaela nen Lungleng lam kan pan a, Bawihnoi hruai ka tum ve viau nangin "Thui deuh motor chuang rih suh se, insawh khawloh te pawh a hlauhawm" ka nu leh Apuiin an ti deuh tlata, a ṭhiannu lo len a tum vei bawk nen min zui ta rih lo.







Lunglengah tukṭhuan ei nghal turin kan zing chhuah a, ka pu in a arpui tuilai ngei mai min loh talhsaka, tukṭhuan kan eikham hnu lawkah chuan ram neitupa chu a lo thleng fel der tawh a, an huan chu khua a ṭanga hla lo te niin a hmun thleng rakin Motor a kal thei a, tui hna a ṭhain sangha dil siam pawh a remchan hmel viau a; ka pa pawh a lungawi khat a niang, a man tur a zawt deuh chhen reng ringawt tawh.







Thlai puitling ṭhiau a awm a, a man pawh a tlem zawk zawk lo, lungawi deuh chuan kan inbe rem nghal a, a hnim samfai leh thlam sak bakah sangha dil siam chu hmabak ko tak ala ni. Ka pa a phur ngang maia "I buai chuan keiman hlawhfa ruaiin hma ka lo la dawn nia" a lo ti zung zung a.







Haw dawn a ruaiah Mambawihi ni te an lo thlengphei ve leh a, zanriah ei leh nghal rawh u an tih tak tlat vangin kan khawtlai leh rih a, Mambawihi ni nena kan titi bawrh bawrh laiin Michaelan min lo ko a "Apuiin ka phone tlang theilo che a tia, in nuin harsatna a tawk a nih chu, tunah damdawiinah an awm mek" a lo ti ta mai a, min ti hamhaih kher mai!







Apuii chu ka phone let thuai a, "U engmah thil awmzia ka la hre biklo, chaw eidawnah roomah a awm tlat sia ka han kal chu thisen nen inchiahpiah nuaiin Bathroom ah a lo thu a, a pum na a ti lutuk a, lo haw vawt teh u" a lo ti nghal chul a. Thil dang reng ngaihtuah thei dinhmun ah pawh ka ding tawhlo, ka chiai riau a, zanriah pawh tlem te tak tak chauh ka bar a, dawhkan thawhsanin Apuii bawk chu ka be leh a.






"Engtin chiah nge a awm, hliam te a nei em?" a tlu sual anga a pum a sawh a nih ka ring a chutiang chu lo ni ta sela nau a chhiat thei mai angem, ngaihtuahna a vak kual nasa duh ngang mai.






"A ṭha deuh tawh mahse, lo haw vat rawh, a khawngaihthlak reuh lutuk a nia" Apuii aw ah chuan thil ṭhalo tak a thleng a ni tih a hriat theih.


.

"Tu tunge Damdawiinah kal che u?"




"Kan vaiin kan kal, in lo la haw dawn hnai lo a mi?" a ti nghal sek sek a, "Tunah kan lo chhuak dawn chiah ka ti ve nghalthuai a, thil awmzia chu chhungte ka hrilh "Va haw thuai thuai ula chanchin lo sawi leh rawh u" hlauthawng aw khur dar dar chungin ka piin alo ti a, khawmuang tawhloin Aizawl lam kan pan ta nghal a, ka pa in thil awmzia min zawt ve tak nain ka chhang mumal thei meuhlo. "Bathroom ah a tlu a, a insawhna deuh ni awm tak a ni" ka pa bulah chuan ka ti maia, Apuiin min lo biak khan thisen a chhuak a ti bawk si a, thawk a venglo takzet, Bawihnoi emaw kan naute chuangah thil ṭhalo tak a thleng mai ang tih hlauhthawnna ka nei reng bawk.






Kan tlan chak bawka kan thleng harlo, Damdawiin kawtah Apuii leh Judy ten min lo nghak a, "Ward ah kan insawn chiah, Cabin awl pawh a awmlo" an lo ti sawk sawk a, hmanhmawh takin Ward lam kan pan zui a, kan va lut chiah chu kan lamah engthil emaw hi a rawn thlawk phei fua a, ṭap rawih rawih chunga kan lam lo hawiin a lukham leh a hmuh remcham a piang chuan min lo vawm a, a awmdan chuan min ti bangbo lehzual.






Thei leh theiloin Alawmin a kuah bet ṭawk ṭawk a, chuti chung chuan a tal fat fat a, Ward a awm zawng zawngin min thlir ṭhap bawk si a, eng thil nge thleng tih chu rindan ka nei thiam a, rilru a na ve takzet a ni.





Ni e, kan naute kan chan, zawh ngailo in chu chu a chiang reng, a lampana ka kal phei chu min lo ban ṭawk ṭawk a, a khumah ṭhuin ka kuah a, lungchhe em em a a ṭap chu hnem vak ngaihna ka hrelo ka a deuh chhulh maiin ka hria.






Doctor lo kalin "Pakhat khan min lo zui lawk rawh u" alo ti a, "Tluanga nangmah va kal rawh" ka pa in a lo tih chuan thawhmai tuma ka che zui chu a phal tlat lo, engemaw sawi tum hian a ang zuau ṭhin a, a chau titih nghal der mai a "Inthunun tum rawh, ṭap tawhlo la, insum hram hram rawh" ka ti tak nain a awmdan chuan keipawh min ti buai chhia va a ni.






Ṭap chhuak hleitheilo a thawk a la kawk kawk chu Alawmi nen kan buaipuia, hmanhmawh takin Apuiin puan a lo zar hliah a, midang awm ho pawh kan ti phawk lek zo vek a ni ber. "Chhunah te kha chuan a ṭha vek sia, ka haw san hnu lawkah heti hian a awm a, enge a chhan pawh ka hrethiamlo" Alawmin a lo ti a. "Lo awmpui ula "Doctor ka va hmu lawk ange" tiin ka thawhsan zui a.







Doctor thil min lo hrilh chu angaihna ka hrelo takzet a ni, "A hmain insawiselna a nei miahlo a nih chuan hetiang teh thuta nau a chhiat chhan tur a vang ang, amah lahin ka tlu lo a; ka insawhlo a ti bawk si a, nau tihtlak na damdawi a ei te anih ngawt loh chuan a chhan tur a vang khawp mai" kei ang tho a bangbo chuan a lo ti a, "Nau tihtlak kher chu a tum ka ringlo" ka ti chang bawl a, thil theih pawh a nilo, chutiang chu ka nupui hian a ti hauhlo ang.





"I hmu a ni lawm ni amah pawh a talbuai vek a nih kha" ka ti leh ngat a.





"Hmu e, amak khawp mai" Doctor chuan ka ngaihtuah ang tho a ngaihtuah ve anih hmel, thinurna in chhunglam a ṭangin min hnawh tawt nghal up a, ka inhumruh nghal ṭeuh bawk. "A chhul kan ziat anga, a ṭha leh vat ang, ngaihtuah awm ani lo a nia" a thil sawi chu bengkhawn tawhlo in ka pen chhuak hlawk hlawk a.






"Mampui Cabin-ah kan insawn dawn" ka pain a lo ti chu kalpelin chau zeta mu ka nupui chu ka pan a, lungchhe taka min lo melh tu chu a kut vuanin a hmai huh hliam chu ka tuaihul sak a, "Hmangaihsangi kha khawiah nge a awm?" Apuii lamhawi chuan ka ti vin nghal hluk a, "Michaela nen Cabin awl buaipui turin an chhuak chiah" phawk lek lek hian a lo ti a, chu nu phiangsen chu ka rinhlelh ang hi a lo ni a nih teh chuan a pawi a ti khawp ang le.







"Minister ka bia a, min lo ngaihsak khawp mai, Cabin pawh an ti awl chuk chuk anih kha" ka pa in a lo tih chuan chhan pawh ka chhang theilo, thawh mai ka tum chu Mambawihin ka kut a vuan tlat a, chutih laiin Michaela leh Hmangaihsangi an lo inzuilut ve zat a, "Nang kha kan inbia ang" Hmangaihsangi lam hawia ka ti chu phawk zet hian min en hlawm a, midang ngaihdan ngaipawimawh sise thei pawh ka ni tawhlo "Tunah min lo zui rawh" Hmangaihsangi chu ka pawt chhuak nghal dawr dawr a Apuiin min lo umzui ve nghal bawk.






"Engthil nge ka nupui chungah khan i tih?"





"U enge i hriat a?" Apuii zawkin min lo chhang chu "Lo ngawi hmiah rawh" ka lo ti vin ṭhawt a. Judy hmela hlauhthawnna lo lang chuan thinurna a tisosang zual ting mai.





"Enge ka tih a?"


"Pha reng reng suh, dawhtheihna ka tla chham viau tawh a nia" kut ka thlak duh mai dawnin ka hria.





"A thil eiturah damdawi ilo pawlh a, chu chu a dik em?"





"A va awihawm loh tak" Apuii bawk a ni.






"Engtin nge chutiang ti duh tura min rin theih a?" ṭah aw ṭiaua tiin Apuii chu a en a "I u hi a ti mak ve ngawt mai, a nupui naupai tihtlaksak angah min chhuah a nih hi" ṭawng leh ka tum laitaka ka pa a lo lan ve tak vangin ka ngawi rih a "Enge khatah khan intih a, Cabinah kan insawn dawn a nia" kan pathum chuan min melh kual hlawm a, "Pa JH-a hian a nupui nau chhiat chhan ah min mawhpuh ringawt a nih hi" ṭap faih faih chunga Judy'n alo tih chuan thawk ka la hawk a, ka ngaihdan a ni lo nasa mai.






"Lalhruaitluang, thil awm anglo lutuk anih chu, lut la i nupui saw Cabin-ah va sawn rawh" a ti vin nghal hlar a, hrep tak chuan a. "Haw nghal ang che vawikhat mah kan hmuh phakah lo inlan tawh suh" ka ti chang leh bawl a, kan kalsan zui nal nal bawk.







Cabinah kan insawn a, thil awmzia Bawihnoi ka zawh chuan min chhang hleitheilo a ṭap titih nghal zel mai a, a mangan thlak tak zet a ni. "Keipawh ka awm ve reng a, chhunah Judy leh Apuiin pasta an siam a, kan vaiin kan ei sia, a van mak em" Alawmin a lo ti ve bawk.






"Bawihno a hma in i insawisel miahlo ti raw"





"Aih, thil eizawh hnu lawkah khan ka pum a nuamlo ṭan a, ka thi a lo put ringawt a" lungchhe fe hian a insut hlawp hlawpa, chutah ka lam lo hawii "Tur in min hrai a niang" a ti leh mauh mai.




"Judy a ni em?"




"Ka hrelo"




"In inchhungah hian ka ṭhiannu hi a himlo khawp mai" Alawmin a lo ti ve leh hlak a, ngaihtuahna a buai zo a ni ber e.


images - 2020-12-20T103731.372.jpeg



*MAMBAWIHI*


"In nupa hian indang mai ula a ṭha lo maw, hetiang chuan ngaihtuah in na emai, i nu leh i unau ten Judy chenpui an duh tlata Mambawihi tan lo hnial a chi a ni mang silo a, awm hrang daih ula a ṭha zawkin keichuan ka hria" Alawmi ṭawng mawlh mawlh chu mitmeiin ka lo khap a.






"Keiman ka riahpui dawn che nia, i chhungte lakah hian ka thlahfal ngam tawhlo che" ti leh hlakin a tho zui a, chutihlai mekin ka pa leh midang ho chu an lo inzuiluta, Doctor-in min chekup lai chuan an lo ding ngawi ran hlawm a, ka khuma JH-a ṭhu chu ngaihtuah ding hmel takin a ṭhukun lup reng a, taksa na leh chauh chu thuhran, ka rilru thlengin ka la mumal thei biklo.







Ngawirenga Apuii ding chu ka va en leh ṭhin a, tunah zet chuan tu nge ka lakah rilru chhia pu tih hre dawt lo mahila rindan ka nei thiam riai ruai a, min ngaihsak hmel taka Apuii lo che sawk sawk pawh chu ka ngaitheilo lam mah a ni. Engvanga hetiang rilru hi pu ta mai nge ka nih chu Alawmi chiahin min hriatpui thung.







"Zanin chu keiman ka lo riahpui ang" JH-a lam hawia Apuiin a tih rual chuan "A ngailo" ka lo ti ram hmuk a, "Keiman kan riahpui ange" Alawmin a lo ti ve nghalthuaia, phawk lek leka min en tu chu ngaitheilo fe in ka lo melh bawk, chau hle lo ila chuan midang awm ve lai ngeia han cha chhuah nghal rum rum tak ka nap a, ka rindan hi a lo dik a nih teh chuan ka rul let ve dawn khawp a lawm.







Ka awmdan a hmuh rualin JH- a chuan ka kut a lo ban vat a, Apuii nen chuan min entawn zak zakin zawhna mitmengin min en a, tunah chuan engmah ka sawi thei rihlo, rilru leh ngaihtuahna zawng zawng nen ka chau hluah hluah a ni.







Ka mit chhingin thawk ka la vang vanga, vawin thil thlen dan chu Album keu let ang maia chiangin ka hmu nawn a, ka mittui luang chu dan theih lah a nilo, kan pum chhunga naute kha min thahsak ngei a nih ka ringhlello a, chu aimah chuan tihtheih engmah ka neilo chuan ka rilru a ti na zawk, ka naute ka thawk ruala thawk la ve min rinchhana thlamuang taka awm laimek khan tu pawimah a sawilo a, chawlkar ruk chauh a upa a la ni a, engvanga a nun ve phalsak lo nge an nih ka hrethiam lo a ni.






Chhunah khan Judy leh Apuii khan eitur an siam a, Pasta ka ngainat loh vangin an thilsiam kha eisaklo in Alawmi nena kan eiturin Noodle kan siam hrang a, Apuiin an thilsiam kha eive turin min ti lui tlat anih kha, tlem chu ka eisak a, Alawmi erawhin a eive ta lo a, kha an thil min pek ah khan engthil emaw ka puma naute hnuk chhah theihna tur thil an lo telh a ni ngei ang, Alawmi haw hnu lawkah ka pum ana zui a, pum na satliah mai anih ringin ka mu a mahse, chutiang ngawt zawng a lo nilo, ka thi a rawn put a, tawrh harsa khawpin ka na zui ta anih kha.







Tichuan tun hun hi kan thleng a, ka hriat chhuah meuh chuan ka naute a hmel hmuh hun nghakhlel taka kei leh ka pasalin kan lo thlir kha ka lo chanfel der tawh.







Ka pasal hmel ngui tak chu en pawh ka en rei ngamlo, ka ngaihtuah mek hi hria sela eng rilru nge a put ang? Chhungkaw kehchhiat vek theihna thil chu a hnena sawi lo a ngawihbo pui chu ka thei kherin ka ring lo, kan naute tan, kei leh ka pasal tan kan chunga he thil titu hi chu ka thungrul ve ngei ang.







Inhumruh sauh sauhin Apuii chu ka en ran a "Na i nei em?" min ngaihsak hmel taka a lo ti te chu ka haw hlur ringawt tawh, a hmel ringawt pawh chuan ka luak a ti chhuak et et a ni ber.







"Kan haw phei phawt dawn a mi, duhleh i u chu awm sela" ka pa in a lo tih chuan "Va haw ve rawh" JH-a lam hawi chuan ka ti a, a hreh hmel ngang mai. "Ka riahpui ve zawk ang che" ka sam chulin min en vawng vawnga, "Haw zawk rawh, Alawmi a awm a lawm" ka lo ti leh a.







"Ni e va haw ve rawh, i zin chau awm si a, naktukah i lo kal leh hma zawk dawn nia" Alawmin a lo ti ve bawk.







"Khawnge Judy kha?" ka pa in a tih chuan ka hawichhuak rang kher mai, "Pawnah Reny nen an awm" Apuiin a lo ti vat a, chu mi tenawmnu chuan ka hmel pawh a hmu ngamlo anih hmel e.







"Mami ka Drip khai hi heti chen anih hunah hian i lo titawp dawnnia, awm hahdam sela a dam ṭha leh vat mai ang" Alawmi en chungin Doctor chuan a lo ti a, chumi hnuah ka pa nen an inzui chhuak a, midang ho pawn a zui ve a, JH-a erawh a la ṭhu ta reng a, "Va haw la, naktukah hma deuhah i lo kal dawn nia" ka lo ti ve a.






"Lungngai miahsuh aw, i rilru tih hah lo la thlamuang deuhin awm rawh, i chunga he thil titu hi ka zawng chhuak anga hremna ka pe ngei ang" a aw aṭang chuan a ti mai mai lo tih ka hria a dan buai tumna ka nei heklo. Tu chungchang nge a sawi chu ahrelo nge hre chungin a sawi tih erawh zawhna lian tak a ni, mi a a ni biklo a thil thlen dan aṭangin ngaihdan chu a nei thiam ve tho ang, pawi ber ta chu kan laichin te hmelmak angai chu a ni. A thei kher angem, kei min ṭanin ka pawikhawih tute hi a do thei angem?







Mahni hmasial takin chutiang thil chu thleng sela ka duh a ni, Apuii a ni emaw Judy a ni emaw tu mitmei mah ven ka tum tawhlo hulhual bawk.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:08 pm

GOMENASAI - by Ahmangaihi violette khiangte


(Chapter 30 a zawmna ka dah kha i chhiar hmaih em en rawh)


CHAPTER - 31





"Mate Pasta kha i ringhlel ve tho em?" mut hmunah a lo ti hlawla, ka ṭhiannu chuan ka ngaihtuah ang tho alo ngaihtuah ve a ni.





"Ka hrelo le" rilruin rindan nei thiam riai ruai mahse chiang taka han sawifak tur leh fiahna tur kan nei silo chu thil buaithlak tak zawng a ni, kan rinhlelh lah pakhat mai niloin pahnih lai an ni a, a tu zawk nge ni ang, an pahnih inthuruala ti an ni zawk angem? Zawhna hlirin ka khat a, kan inpuh sual mai ang tih pawh hlauhthawnawm tak a ni.






"A tu zawk nge ni a i rin?" ka zawhna chuan ka ṭhiannu rilru pawh a ti buai ve nak a, "Judy hi ka ring ber Apuii hi chu i lakah a ṭha bawk si a mahse, ka ring ngam bik chiah chuanglo, a landan anglo tak mizia pawh a lo nei ve thei tho a, incheng ho a ringhlelh awm niin i hre zawk em?" tiin min zawt let a.






"Mate, an inkawm ngeih dun nasa mai si a an lo inthurual ve thei tho a nia, Judy hi chu in pa ngaihzawng hlui anih na ah rinhlelhawm tak zawk chu ania" a ti leh sap sap a, "Pasta kha niloin kan noodle zawk kha a ni a ngem, Artui ka siamlai khan Judy khan a lo tem ve tak a sin" ka tih chuan a ngaihtuah zui rauh rauh a.






"Mahse, noodle te chu keipawn ka eive reng sia engtin mah ka awm silo a"





"Nau i pai ve hleinem" ka ti hap a.




"Ni dawn tak, kan ice cream eiho te kha a ni thei zawk angem, kan vaiin eimah ila naupai ve lo kha chuan huat ve ngaihna a awm dawn lo a" a ti leh a, thil ni thei a tam lutuk a, rindan pawh ka nei thiam tawh lo, ngaihtuahna a vir kual muai muai a, ka chau zo vek a ni ber tawh. Thawk ka han la leh hluai ṭhin a, engtin nge kan khawsak chhoh zel dan tur pawh ka ngaihruat thiam tawhlo.






"A tu emaw zawk zawk chu an ni a lawm" ka ti nawn leh ringawt ṭhin, Judy zawk ni angah ngai ta ila, he thil a tih chhan chu JH-a vang a ni ngei dawn a, ka inneihna a hlim ve lo hmeichhe awmchhun a ni tlat. Anih Apuii ve hi? Ka lakah a felin a ṭha em em reng, ka naupai chungchangah lah ei leh in lam chenin min duhsak a, naute lo pian hun atan alo inbuatsaih sa ṭeuh tawh a nih kha! Mahse, inthurual thei reng an ni bawk a, chuloah ngaihdan thlak zung zung chi mize nghet nei lemlo a ni vei nen ka ringhlello thei biklo.






"Ngaihtuah tawh rih suh, naktukah ngun zawkin kan sawi ṭha leh dawnnia, i chau lutuk ange" puan min sin ṭhattir pahin Alawmin a ti a, hahdam tum chu thil theihloh tawp a ni, ka ngaihtuahna buai lutuk vang chuan ka â riai thei mai.





"Inlam boruak pawh a ṭha bik vak lo ang a?"





"Ṭha lo ang" ka lo ti vat a, ka pasal khan enge maw chu a tih ngei ka ring. A mitmenga zawhna ka chhan mai theihloh te kha hriat tumin a bei ve ngei bawk ang. Keiin ka hrilh ngailoa aman a zawn chhuah chu ka duh dan zawk pawh a ni.






"Indang daih ula ka ti em mai, an hmeichhe ho saw an rapthlak lutuka i awm ve na chi pawh a nilo, JH-a dilla indang tawp rawh u, sawng mi rapthlak ho kianga khawsak reng chu ka rilru i ti hah vek tawh, indang ula itan a nuam zawk ang" min kuah pahin a ti sap sap a, indan chu ka lo la ngaihtuah ngailo, ka pasalin a rawt te anih loh chuan rawt hmasak ka tum heklo.






"Dil lo e, chhungkaw pawt ṭhentu ka ni mai dawn asin, an chhungkua chu awmkhawm duh chi an ni tih i hriat kha" ka ti chuan "Anih leh fimkhur takin awm rawh aw, ngaihtuah i na emai" zawi sapa tiin puan a sin ṭha sat sat a, a muthilh hnu thleng pawh chuan ngaihtuah zawmin ka inlet tawn sek a, zan a rei duh ngang mai.






Ka phone lo êng zak zak chu banin ka tho chhuak a, pawnlam boruak chu a thiangin a vawt var a; a reh ṭha hle bawk. "I muhil thei nange?" ka tih chuan lehlama mi thawk la hawk ri chu ka hre zawm a "Ka ngaihtuah che a mut pawh a chhuak theilo, na i nei em?" a zawhna chu 'aih' tiin chhang ila chuan dawt ka sawi ngei ang, taksa na chu engmah tham a nilo a ka rilru zawk a ni na chu.






"Kha lam inṭha em?" a zawhna chhanglo chuan ka ti leh a.





"He lam chu lo ngaihtuah duh suh, thil zawh duh che ka nei a" thutak zet hian a lo ti a.




"Min han zawt la"




"Ka farnu te hi i lakah an lo sual ṭhin em, zep miahloin han sawi teh, ka hmuhloh chinah engtin emaw an lo ti ṭhin rêng che em?" a zawhna chu chhang mailo chuan ka ngawi vang vang a, Apuii chu han ringhlel sateh mahila chutiang zawhna han dawn takah chuan ka laka a sualna em em sawitur ka hre hauhlo, Reny lah chu ti bawk; ngeiawmin min ngaitheilo tak angin lang mahse, ralpui phiara han phiar tur em chi chu a ni chuanglo.






Ka chhân lawk loh vang chuan "Bawihno, sawi hreh suh" a ti nawn leh a, hlauhthawn nei ang mai a ni.






"Chutiangin ka lakah an sual lo" ka ti zuai raih a, nichin maia ka thil ngaihtuah te kha chu han hrilh pawh niila fiahna tur a awm tlat lo a, rinhlelh thil thu mai mai a ni a sawizui vak ngaihna pawh ka hrelo. "Umm, a ṭhat chu" ka chhan dan chuan a ti hahdam ta huai a nih hmel.






"Inenkawl ṭha la, thil te kha ngaihtuah kual vak vak lo la, mite pawn nau an chhiat fo ania, kan chantur ala nilo te pawh ania nge, Pathian in a hun a tih ah chuan min la pe leh mai ang?" damthlupa tiin min hnem zui mawlh mawlh a. Rei tawk fang chu inbia in kan titi dun a, kan inbiak zawh hnu pawh chuan corridor ah chuan ṭhuin ka pasal zawhna min zawh chu ka inzawt nawn a, ngaihtuahna a kal thui duh ngang mai.






Ani chu tikhan a ngaih a ṭha zui mai a nih hmela, kei erawh ka la dam thei hlawl silo, nauchhiat pangngai a nilo tih ngaihdan nghet tak ka neia, ka rai tirh aṭanga insawiselna nei miah siloin nikhat thilthua han chhiat tawp mai chu thil diklo a awm ngei a lawm mahse, rinthu mai mai chu pasal te hnena zualko pui chiam dan a vang a ni. Fiahna awm lo chuan midang pawn min ring dawnlo nasa maia, mi diklo chan tak pawh ka chang ang.






Ngawihbo pui mai tur em ni dawn le? Ka ngaihtuahna vak kual nasa lutuk chuan min ti tawt ṭup mai, ṭah chhuah hawm hawm mai ka chak a ni, ka thawl phah hawkin ka ring, thawk la vakin vanlam chu ka thlir a ka pa ka ngai takzet.






Damdawiinah chuan kar khat dawn ka awm a, ka inngaihtuah luangpuam nitin a ni ber, ka awm chhung zawngin Alawmin min awmpuia, JH-a a lo lang awllo bawka inchhungkhur boruak a ṭha vaklo anih hmela, Damdawiin kan luh zana an haw phei ta kha an lo indawp na deuh hlek ni ngeitur a ni. "Umama chuan U Apuii leh U Judy a dawp a, U Judy a chhuah tira U Apuii a beng bawk a" Fiona i lo kalin a tih chuan Alawmi nen min ṭhawng hle a, JH-a chuan a beisei ang chhanna a hmulo tih lah a chiangreng.






"I pasal bulah engtin nge maw i lo sawi ni, mite pawn nau an chhiat ve tho a, kei ngei pawhin ka chhiat ve tawh, midang mawhpuh tur tuman kan zawng ngailo, nangma inenkawl ṭhattawkloh vang pawh a ni theia, i taksa lam felloh zawk pawh aniang chu, khatiang zawnga pasal te lo fuihpawrh reng reng, kan vaiin min ti buai zo ta vek anih hi" ka nu lo kal chu a rawn ang bawrh bawrh a, chhan ngaihna ka hrelo, Alawmi nen kan inmelh leh ringawt ṭhin a, ka chungte chu ka lakah an lungawilo viau anih hmela ka pa phei chu a rawn lang leh ta miahlo, ka nu leh JH-a bak chu midang pawh an reh ta vang vang mai.







"Haw leh pawh ava huphurhawm duh ve mawle, mate engemaw chen chu Lunglengah awm daih mai rawh, inchhungkhur boruak a hrehawm dawn emai" ti a Alawmi rawtna chu a ṭha ta berin ka hria.






Inrinni ah JH-an min lo hruai a, Alawmi pawn hawtlang loin kan inlamah min zui ve nghal a, kan va thlen laichuan Reny leh kan awmpui langa kal ṭhin chiah kha an lo awm a, midang zawng chu hna lamah an kal a, roomah chhoin ka mu thlawpa Alawmin eitur engemaw a siama engmah tham ka eitheilo, thawk a pik ṭup renga ngaihtuahna fim ka hmang hleitheiloin ka vai riai reng a, ka lungphu a rang em em bawka, englai mai pawhin ṭah a chhuak reng mai.







Kan thil eina seng fela Alawmi a chhuk lai chuan JH-a nen khumah kan lo ṭhu a, phone a Liansangzuala nen an inbe lai chu ka ngaithla ve reng a, ka chungchang a sawi lai chuan a lam ka hawi vat a.






"Rawt ve bawk e mawle, ka pa hian indan hi a remti lo tlat a, Michaelan nupui a la nei bawk silo a chuvang pawh chu a ni pakhat ang, ka sawi ṭan dek dek a a theihloh a ti nghal hmiah a lawm" ka lamhawiin min lo en a, enge a awmzia! Ka pa bulah in dan a lo rawt tihna maw?






"Ni e...Kan nu hian a duh a thu aniang chu, pawi ka ti hran hleinem" a ti zui leh zat a.






"In dan chungchang i sawi em ni?" Phone a dah rual chuan ka lo ti vat a.




" I duh em?"




"Ka pa in a phallo i ti sia"




"I duh phawt chuan kan in dang dawn nia" a ti leh maia, zep loh ah chuan duh tehlul mai, phur tak anga lan erawh ka duhlo, ka pain a lo phallo viau anih phei chuan kan innawr lutuk te pawh a hlauhawm.






"A hmanhmawh thlak chuanglo a, tunah tut tut tilo ila" ka lo ti a, ka rilru tak pawh a ni. Kum chanve thuak chauh ka la awma indan nan chuan ala hma ve bawk a, kan in dang dawn anih pawhin a leila lo zawngin chhungte remtihpui thlapa in dan ka duh a, heti mai hi chuan kan inhaw zui mai ang tih pawh a hlauhawm ve a lawm. Pasal te fuihpawrh chan ka chan tawh naklaia indan lo rawt chu thil tih chi pawh a ni rihlo, a harsa deuh a nih tak leh ka tuar ve hram hram tawh aniang chu.







"Kum thar lamah kan tum dawnnia" ka pasalin a tih chuan ka hnial biklo a, kumthar lam chu a remchang khawp ang, chumi chhung chuan kan boruak ṭhalo te pawh a lo zia hman tawh em turah ka ngai.






Apuii lo haw laichuan Alawmi nen choka ah ṭhuin ice cream kan lo eia, Sitting rooma a ṭawng lang lang ri leh Reny a ko ri chu kan lo ngaithla reng a, "A biak hmasak loh che chuan lo be miahlo ang aw" Alawmin a lo ti sar sar a, chutihlai mekin choka ah Apuii chu a lo penlut ve chiah a, min hmu chu a phu zawk nghe nghe.







"Thawm te nei ve ta che u, min ti phu a lawm mawle" a ti zui hlaka, nidanga min biak ṭhin dan nen chuan a dang ta viau, Fridge hawngin Bottle a la chhuak a, chumi hnuah a thil khai lai chu Dawhkan chungah a rawn dah a, melh khat pawh min melh tawhlo.






"U Rin, Bean Sprout thenfai angai ania" Sitting rooma U Rini chhuatnawt lai chu a ko leh a, a che sawk sawk chu lungawilo ti tau a ang ber.






"Khawmaw Jam kha min lo pe teh" Alawmi lama a ban a rawn phar rualin ka bula Jam bur chu ka lo ban thuai a, pek ka tum chu a inher nghal hmaka, min ti hamhaih lek lek a ni! JH-a a lo luta "E...Puii i lo thlenna a rei tawh em?" a lo ti vara, "Ka thleng chiah" bung deuh taka Apuiin a tih laichuan kan lam a lo hawi a.






"Alawmi chu chaw eive nghal rawh aw" lo kal hnaiin kan bulah chuan a lo ṭhu a, Alawmin a lu a lo thing vat vat thung, "Ka nu bulah ka haw tur thu ka lo hrilh tawh a, nidangah ni rawh se" keimah zawk min en chungin a ti a, la awm ve rih se ka ti viau nangin ka tan hun a seng hnem tawh si a , ka inthlahrung tawh a ka chelhlui duh ta biklo.






A haw tur chu JH-a bulah "Va thlah la" ka ti tak nain "A ngailo, bazar ah luhkawi lawk ka ngai a Taxi ka la zawk ang" a ti deuh tlat a, Gate thleng chuan ka va thlah a, "Mate, fimkhur rawh aw, an ngeiawm deuh pawn chhang miahsuh, in in dan ṭep tawh kha dawhthei hram hram ang che, harsatna i neih pawn nangmahin pai reng lo la JH-a hrilh zel rawh, in nupa inṭanrual tlat chuan tuman an tiduhdah ngamlo ang che" a ti mawlh mawlh a.






"Hrilh zel chi pawh a nilo, JH-a chu thil a ti nghal rum rum zela a buaithlak vek zel" ka lo ti ve a, "Ani bawk si mahse, a ṭan tlat zel che hi chu ka fak khawp mai, lungawilo deuh siin i lawm ru ve hle zel lo maw?" a thilsawi chu ka nihna chiah a ni, kei min ṭan vanga a chet rum rum chang pawh khan engtin emaw chhungril lamah hian min ti hlim ve riau anih kha mahse, thil ṭha erawh a thlen lo viau thung a ni.






"Zanah kan inbe dawn nia, chanchin min lo hrilh ṭhin la, ka bulah chuan engmah ṭawng insum angai ve lo aw, a ṭul chuan kan rel hrep zel dawnnia" a tih leh chuan kan nui dun hak hak a, "Ka hrat viau maithei a ni" ka lo ti ve a, inbun ruahna tur Alawmi ka nei lo ang tih hi ka hlau ṭhin, ahma ata tawh phur takin min lo ṭawiawm thei zel a, ka tan hian a hlu vet vet em a sin.






Inchhunga ka lêt leh laichuan inchung aṭanga Reny lo chhuk nen kan intawk hlawl a "Nang hi buaina rallian i nih hi, in sum ve deuh tawh teh" min melh ram ram chungin min kalpel a, choka ah lutin Apuii nen an va invin khar khar ri ka hre zui a, "Koh hian enge i ngawih tlat zel, ka chau teh ania U rini lo pui rawh" Apuiin a tih laiin "I mo nu saw tir ve mai la, tih tur a nei hleinem" a lo ti sam et a. "Ani ka tir lo ange, a hmel pawh hmuh nin nak a laiin" Apuiin a lo ti zui hlak a.






Ka thinphu rang zaih zaih chu thunun tumin thawk ka la vang vang a, awmzia a awmlo kher mai, ka tawt up up a, a awmchhung chu a thip vawng vawng maiin ka hria. Inchung lam aṭanga JH-an min lo koh rualin hmanhmawh takin ka pen chho hlawk hlawk a, ka awmdan chu ka chiai ruai a ni ber.






"Ka inbual dawn a, i lo lut ve duh em?" room a ka luh laichuan a lo ti a, "Zanah ka inbual mai ang" ka tih chuan min hnial zuilo. "I thawmhnaw bal ho kha Rini haw hmain suk tir la, lo mu hahdam rawh" tiin Bathroom ah min luhsan a, mut pawh ka chak tawhlo, inhnuaia chhuk lah ka chak hlawllo a, ka engtih tha mah a tho lo.






A inbualzo a lo chhuah leh chuan ka thawmhnaw thlak fel tawhin Sofa ah ka lo ṭhu a, "Kan pahnihin eirawng bawl ila" ka tih chuan a nui suk a, "Eichak i nei em, dawra eichhuah te i duh em?" inhak mawlh mawlh pahin a ti a, "Duh pawh ka hrelo, nidangah a ni mai" ka lo tih chuan ka lam lo hawiin min en ran a engmah phei chu a sawizui lo, ka awm dan chu a hrethiam ve ni hmiang ka ti mai.






Inhnuaia kan chhuk leh hnu lawkah Zamtei pa Pate Sanga a lo luta a thlam sak chung chang bawk chu lo sawiin JH-a chu a lo ko a, an inzui chhuah leh tak hnu chuan phurlo tak chungin choka lam ka pan ve a, Dawhkan kila U rini leh Apuii te unau lo ṭhu chu va pawh mai pawh ka hreh hle a, "Mambawih i nuam deuh tawh em?" U rinin alo ti var a.






"Ka ṭha tawh lutuk" tih tur hrelo takin Cabinet bulah chuan ka tawi khawmuanga, nuihza lek lek hmel pu a Reny in min lo en chu ka va hmuh rualin tawitein ka nuih ringawt bawk.






Apuii a tho ta nalha "Lo thian rawh u" bak hluka tiin a chhuak zui a, a ṭhutna ah chuan ṭhu ve nghalthuaiin Bean sprout chu ka then pui a, U Rini a ṭawng siam siam reng a tlem chuan awm a ti nuam ve ta deuh.







"I nauchhiat chhanah ka u te i puh a mi a?" Urini kalsawn laia Reny in a tih chuan phawk fein ka lo en a.





"Chutiang chuan an sawi a mi?"



"Ka hre ve vek, i zaktheilo ve ê, enge chutiangah te midang i puh daih a, i roomah nau tihtlakna damdawi an chhar reng sia tuman an sawi bik hleinem, an haider sak hram hram che anih kha nangpawh ngawi ve mai mai ta che, ka ni te ho pawn mak an tih hlawm khawp che kha"






"Enga!" awih lo zeta ka ti chu min ner khum zauh a, "Eng damdawi maw an chhar a?" ka ti nawn leh ngata, a sawi zui duh tawh hauhlo. "Ni Zualzelin a kawl va en ve mai rawh" a lo ti duh lek a. "Chutiang damdawi ka nei hleinem engtin nge an chhar theih a, tunge chhar tu?" ka ti zung zung a, "In buainaah hian ka buai ve peihlo, i duh leh U puii zawt ve mai rawh" a ti hmak a, min ti bangbo kher mai.






JH-a lo lut chu "Ka room ah damdawi inchhar em ni?" ka lo ti tawl a. "Eng damdawi maw?" ka bula lo ṭhut paha a tih laiin "A va han dak thei zawt zawt tak, ka u hian engmah a hrelo aw" thawh hluai pahin "Ṭawng tam suh" tih melh hian min melh a, "Khatin i u be suh, Engthil nge i sawi ka hriat theih turin sawi rawh" ti a JH-an a lo khak hlak chu a melh rum kha kha a, "In buai buaiin lo buai ve mai mai teh u" ti leh pahin a kal tau nghawng nghawng a, Urini pawn mak tih hmel zetin min lo en a, thil awmzia ka hrethiamlo kher mai.






"Thil tihbo i nei em ni?" JH-an a tih chuan lu ka thing ringawt a, Reny thilsawi chu ka ngaihtuah zuia, Apuii te insawithiam tumna thil em mawni dawn ni! Mahse, JH-an engmah a hre chuang silo a, ngaihdan takngial pawh ka nei thiamlo.






Ka nu leh pa lo haw chuan ṭha takin ka lo bia a, ka pa awmdan chu a danglam lo a tunhma ang tho a damthlupin min bia a, ka nu erawh a ṭawng ve vaklo, damdawiina a lo kal khan a lo ang chiam tawh a a duhtawk tawh te pawh a ni mahna.






Sangha ka chhum laimekin Apuii a lo kal a "Hei, midang awmlaiin fimkhur hle ang che dawta min puh leh anih teh chuan i chaklo tawh khawp ang" hnai set sawta min din chilh ran chungin a ti a, "Dawta ka puh lai che ka van hrelo ve" ka lo ti ve sak a, a lawmloh hmel kher mai.






"Judy nen damdawia hrai che ah min puh a ni lawm ni, nangmah vangin Judy pawh in aṭanga a chhuah phah hi, in pa in min ben ai kha ka beng ve zawk dawn che emawni chu le?" thinrim vanga thawk la sak sak chungin thip fahranin min melh a, a nawm a maka chutia inṭawngkhum tir chu ka thei ta biklo "A chhuak ta chu a va lawmawm ve, hmanah khan lo chhuak tawh sela ṭha tur" ka ti leh ngat a, min melh thluk tawp duh tur hmel a pu tawh.






"Engtik laiin nge Damdawi ka pek che sawi rawh" a ti vin ṭhat a.





"Min pek thu ka sawi em ni?" ka lo ti ve hlak thung.






"Ka u bulah Apuiin ka eiturah damdawi a pawlh i ti a nih kha aw Zawngi" khabe sai dar dar chungin min melh ngar a, thawk a rang ve phat mai.





"KA TI BAWK LO E"





"Zaktheilonu pha vel khang langlo mai teh, ka khawih duh tak tak dawn che ania, nge ni a i room a Pills kan chhar te kha i pasal ka hrilh zawk dawn?" rapthlak ti zetin ka melh ringawt tawh, ka lo beisei phak bak a ni, rindan ka neih thiamloh kha a chiang ta kuar a lawm.






Pills ka lei lo a, kawl pawh ka kawl heklo, an ni hian ka room ah an chhar anih chuan thiamloh min chantira min puh an tum tihna a ni, insawithiam an ngai anih chuan tih dikloh an nei tihna a ni mai, ka pasal hrilhlo mahse, midang laka insawi thiamnan an hmang ngei bawk ang.






Karei leh! Ka naute kha thah ngei a ni, chupawh a Ni a thisen zawmpui ngei hian maw! Rinhlelhna chauh pawh ka chauhpui tehlul nen Aw Lalpa, ka â thei tak ngial dawn.







"Ka naute khan enge i pawi a sawi a?" ṭap ṭeuh chungin ka ti a, ka mittui a luang zung zung mai.






"Zawk zamah chuan a, naute kha nangma tihtlak...." ka insum hman tawhlo a hmaiah ka beng nghal sawk a "I va ngam zawk ve a?" aw khur dar dara ka tih lai mek chuan a rawn che thut a; ka awmah namin min hnaih nghal ruak bawka kan insual chu a ni zui der.







Kei aiin a lian zawka tha erawh a nei vak biklo, a duh angin min khawih thei biklo chu a ṭe teng tung a, ka theihtawp tak meuhin ka sual let ve a ni, ka dikna, nu ka nih na anga ka chanvo, ka ril a rah ka naute vang chauh pawhin ka tlawm bik hauhlo ang.






Kan thawm hria in midang chu an lo tlanlut a, ban tha chak takin ka kawngah pawmin min pawt hrang nghal hlawk bawk a, ka tal viau nain min chelh bettu lak aṭang chuan ka talchhuak zo lo, ka samhnawk zet chu hui kiangin Apuii rak ruai ruai chu ka va en a, a pa leh a nauin an chelh bet chung pawhin min khawih tum chuan a la tal ve fat fat a, thinrim vanga a hmai sen ṭawn ṭawn chu enin ka mittui a lo sur zung zung thung, ṭah chhuah erawh ka tumlo ka mittui erawh ka dang zo nganglo a ni.


images (83).jpeg



(Like, comment, click kha theihnghilh lo tlang ila)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:08 pm

GOMENASAI - by Ahmangaihi violette khiangte





CHAPTER - 32






"Enge thil awmzia ni a, khatia nutling pui tawh inlo sapatal chiam a?" ka pa aw chu a vin ṭha kher mai, a awrawl vin ka hriat vawikhatna a ni a, ka inthlahdul nghal riai riai bawk.







"Saw mo zaktheiloi sawn ka hmaiah min beng ngam nia, zahna chhang thlawt a hrelo, a naupai ka tihtlaksak angin ka u bulah a lo sawi bawk a, a ni em em tawhlo" Apuiin a tih zat zat laichuan ka lam an lo hawia, "I pasal farnu i sual ngam a maw, zahpawh i zak lawmni? Ka rin i va ang lo deuh ve" ka nuin a lo ti ve hlar a, "A mizia hrelo in kan lo duat em em ringawt a, zaktheilo lutuk" Apuii bawk a ni, an vai chuan lungawihloh hmel emem in min melh hlawm a, ṭawng nachang hreloin thawk ka la leh ringawt ṭhin.







"I beng a maw?" ka pasal aw ri pawh chu midang ang tho a nelawmloh a ni, ka tihsual chu ka hrechiang hle a, ka lo insum hram hramlo chu inchhir tak ka ni tawh, ka dang a ro zo a, ka hit sung sung maiin ka hria.







"Ngaihdam dil vat rawh le" zaidam deuh zawk chuan a ti leh a, inchhir rilru pu tawh tho mahila chutianga ranga ngaihdam dil chu ka hreh ngang mai, kut ka thlak hmasa a ka thiamlo tih chu ka pawm ve bawk a lawm mahse, tilo theilo in ani pawn min nawrlui ve bawk a, a ṭawngkam deng khawng tak khan ka insumtheihna min phehsak ve bawk a tin ni, ka beng kher chu ka inthiamlo ve tho a bengloa ṭawngka a chhang thei pawh ka ni a mahse, chu vang ngawt chuan ka ngaidam thei tihna a ni bik chuanglo.







"Ngaihdam chu dil rawh" dawhtheilo zetin a ti leh a, ani meuh pawhin thiamlo zawk chan min chan tir chuan rilru a ti na vawng vawng a, mahni inkhawngaihna hlirin ka khat zo a ni ber e.







"Awi....a ngaihdam dilna kha nga tan mah ka ti hlawllo, inchhir tak tak pawh nilo midang sawi vanga ngaihdam indil kha a ṭul lo e" Apuiin a lo ti leh sak sak chu Ka pain a lo khap a, "Engthil ah chiah nge buaina in neih" tiin a zawt zui a.







"Âw.... ka sawi chu a naupai tihtlak nan a eiturah damdawi pawlh ru ah min puh a nih hi, a zaktheilo a nia" rum theihtawpa min melhin min ner khum a, kan boruak rit lutuk chuan min ti chawmawlh zo lek lek tawh.







"Engvanga Apuii chu ringhlel nge i nih?" ka lam hawia ka pain min zawh chuan sawi ngaihna pawh ka hrelo, ka chhan mai loh vang chuan " Sawi ta vat che" vin zetin ka nuin a lo ti ve a, a mitmenga min huatna lo lang chu melh pawh ka melh rei ngamlo.







"A khum hnuaiah nau tihtlakna damdawi kan chhar a, puh tur a zawng pek anih kha" a vawihnih sawina mah nise chu thu chuan min den dan angai reng, kei hian naute kha ka ti tla ang maw, a teuhlo lulai lutuk! Ka fa a nia, engtin nge chutiang thil nunrawn thlak lutuk chu a chungah ka tih theih ang ni? JH-a ka melh chiah chu mit senruma min enin minlo melh tlawk tlawk a, a hamhaih hmel kher mai.







"Chutiang damdawi ka eilo, ka ta a nilo" ka ti nghal chul a, "Anih tu ta nge ni a, i ta anih loh vangin ka ta tihna a nia mi?" nuihak chungin Apuiin a lo ti ve leh a.






"A tawk e Puii keima tih diklo a nia nge, Mambawihin a puhlo che a keiman ka zeldin thu mai mai hmangin Judy nen ka dawp ta ringawt che u anih kha" chutah ka lam lo hawiin "Ngaihdam chu dil rawh" a ti nawn leh a.






Duhthlan tur a awmlo, nu leh pa te hma ah ngawhngawl chhuah tlat chi a ni tawhlo, kan boruak sosan zel loh dan ngaihdam chu ka dil ta hram a, min chhangloin a ner nang a, a pawm tehchiam lo a nih hmel.






"Puii" ka pain a lo tih rualin "Aw, ka hria, ka rilru dam deuh hunah ka ti ve mai ang" a lo ti bak hlar a. Ka pa chuan dawhkan kila ṭhukhawm turin min ti zui leh a, kan han ṭhukhawm chu sawitur a vang duh ngang mai, ka hawichhuak ṭhangam lo a, ka hma zawn taka ka nu leh Reny ṭhu lah chuan min melh ran a, "Engthil emaw sawi i lo nei em ni?" tia JH-an Apuii a zawh chuan chhanna a awmlo.







"Mambawih, a engvang chiahin maw damdawi chu lo pe che angah i ngaih, Tluanga lahin a naute pahnih a dawp phah chiam mai a, kha Judy lah titauin a chhuak ta kha a nia" damthluam mai hian ka pa chuan min zawt a.







"Anin engmah sawi a neilo, ka chiai tih ngaihna hrelo thiltih anih kha, min hrethiam teh u" thum duta JH-an a lo tih chuan ṭawng ka tum chu ka tawp leh rih a, ka rinhlelh thu Alawmi bulah chiah ka la sawia, "Tur in min hrai aniang" tih ringawt ka pasal hnenah ṭawngkam ka lo la nei biklo chu lawm ru tak ka ni.






"Nangpawh enge min rinhlelh ve ngawta, tun lawka i nupui min ṭawngkhum danah khan i bula a thilsawi chu a chiang nghal vek tawh alawm" Apuiin a tih leh laichuan "Engtin nge a lo tih che a?" ka nuin alo ti ve leh a, chu erawh a chhang zui ta lo a, ka nu hmel erawh min huatna hlirin a khat tawh thung.






Ka pa chuan "Thu in inhmu sual palh ni ah ngai ila, tun hnuah hetiangin awm leh tawh ngai suh ang che u" tiin min zilh zui mawlh mawlh a, Apuii chu ka hnena ngaihdam dilve nghal turin a ti bawk a, a zahawm duh kher mai. Ṭha tak chuan Apuii pawn ngaihdam min dil ve ta a, kei ang thoin a rilru tak tak a sawi phei chu a ni biklo, boruak sosang erawh a zia phah huai in ka hria.







Choka aṭanga JH-an min chhuahpui hnu chuan an la ṭawng ri barh barh a, ka chungchang an sawizui a ni ngei ang. "Damdawi engmah ka ei miahlo a nia aw" ka pasal hmel chu enin ka ti ṭha ve leh a, "Ka hria a lawm, sawi tawh suh" a lo ti mai a, ka hria a tih leh mai vang chuan zawhna ka zawt leh a.






"Engtin nge kan room ah a awm theih ang, ka ta ani silo a, tu emawin alo dah tihna em ni?" ka ti leh zet chu "Damdawi vanga nauchhiat anga i inngai tlat mai hi ka hrethiam lo che!" a lo ti daih mai. "Chu min lo ring nange?" ka lo ti he haw a.






"Chulam ka sawi tum a nilo, a tirah khan keipawn mak ka ti ve tho a, mahse, i rai tirh khan damdawi i ei nasa lutuk a chutiang vang te pawh chuan i chhiat ve thei a lawm, a felhlel zawnga thil ngaihtuah luih ṭalh tur a ni ngailo e" a ti leh dap dap a, nichin lawka Apuii nen kan inbiak danah khan keichuan chiang khat viau tawhin ka lo ngai mai a, damdawi ka kawl ni miahlo ka room a an lo hmuhchhuah mai danah te pawh khan enge maw; ka ngaih luih ṭalh vang ni loa felhlel chu a awm ngei a lawm.







Alawmi nen phone in kan inbia a, thil thlen dan ka hrilh chuan alo sa ve phat a, "Chutiang damdawi i room a alo awm ngawt chhan pawh chu rinhlelh awm tak anih chu, inchhunga cheng tu emaw ber kha an ni tih a chiang reng tawh a lawm, damdawi vanga nau chhiat i nilo tih pawm ngawt dawn pawhin i room ah an lo chhar leh zel chuan diklo a awm tih a ti chiang reng" a lo ti nghal bawrh bawrh a, chu chu keipawh ka ngaihdan ve chiah a ni.






"Mahse, Mate engmah sawi tawh suh, JH-a bulah pawh i vui thu thlen tawh suh, a rang thei ang bera indan dan ngaihtuah zawk rawh" a ti leh tawl a, tunah zet zawng eng boruak ṭhalo mah neih ngam chi ni tawh nghal lo chuan, fimkhur theih tawpa ka fimkhur angaia ka pasal lakah pawh sawichin ka hriat viau angai bawk, chutiang tur chuan keimah pawh ka infuih a, thawk erawh a veng hlawllo thung.







Zanriah eilai chuan hmeichhe ho chu kan ngawi ṭhap reng a, ka pa chuan Dil siamdan tur leh huan enkawl dan tur chungchang JH-a a sawipui a, "Michaelan Dawr lo vil sela ka lo va ṭan pui nghal mawp mawp anga duhleh riak nghal turin zirtawp tlaiah i lo kal anga, innu pawh i lo hruai mai dawn nia, an ina innghah te pawh a ngai dawn a" keimah min râwn pah deuh chung chuan a ti a, ka chhang zui lemlo.







Ka ni nen kan inbe zeuh zeuh a, ka pi leh pu damdawi tur leh chawhmeh eng ilo sumo ah ka thawn fo a, zan mut dawnah phone in kartawp inrinni a kan haw tur thu chu ka hrilh a, an mamawh eng engemaw min chah nual a, lei tura a hranpa deuh taka bazar ka ngai dawn a ni.








Hna kala kan chhuah hlanin Judy a lo leng fo ni ngei tur a ni U Rini min lo hrilh a "Apuii dawr nghah puiah a lo sawm ṭhin a, i chungchang an sawi nasa ṭhin khawp mai, in nupa hian inṭhen daih ula an ti viau ania chuvangin fimkhur nasa rawh, nupa inngeih leh inhmeh tak in ni a in inṭhen ang tih mawlh ka lo hlauhpui che u ania" a lo ti ve sap sap a.







Kan thu a kal diklo zo ta vei nen Apuii nen pawh kan inbe fuh hleithei ta lo, eirawng te han bawl duna nitin inhmuh bawk si chuan inbiak loh theihloh chin a awm a, ṭha tak chuan ka bia a, mahse, ngaihmawh leh chhân zui tlak em em ni silo huat awm tawk lek a mi han khak zauh zauh a ching hle a, kan inkar boruak chu a pangngai thei tawh meuhlo chu a ni.







In checkup tura ka kal leh ṭum chuan Doctor chuan naupai ṭan tirah Damdawi ka ei nasa lutuk kha a pawi a tih thu min lo hrilh luam a, kei lah khan ka zia tawh hnu ah pawh a Course ei zawh law law ka duh vangin ka la ei zawm ta zel a, nau ka pai ṭan lai pawh khan tihtham fe chu ka lo eihman tawh a, Doctorin a han sawi takah chuan ka damdawi ei zozai te kha nau ka chhiat chhan nithei dawn ta tlatin ka hria a, ngaihdan veilam ka lo neih pawh kha ka ringhlel leh ta rum rum zawk hial a, rilru a ti buai ru leh nak mai. Ka lo ring sual a nih teh chuan a pawi khawp ang le, khatiang khawp khan chhungte nen kan boruak a chhiat phah a, keima lam felloh a lo nih leh si chuan ka inthiam thei ngailo ang.







Zirtawp ni chuan zing hmatakah bazar tumin ka tho chhuak a, thawh hai ka hlauh luatah tum aiin ka harh hma a, ka thawhlai chuan khua avar ṭan dek dek chauh a, tun ang ṭhal laiah hi chuan thingtlang lamah pawh chawhmeh a vang ve rih a, Aizawl ah chuan thlai ten hunbik an nei tih pawh hriatlohin a hnianghnar reng a thingtlangah erawh a hun bik te te ah lo chuan chawhmeh duh duh a han leitur a awm ve ngailo a, dawr chawhmeh siam theih chi lah ei reng a ralah chuan a tui mang bawk silo, ka pi leh pu lah chawhmeh zawng thei ani tawh derlo a, chuvanga thawn fo ṭhin pawh ka ni.







Zinga ka bazar lawk anih chuan haw hunah zin chuak tura buai chuk chuk ka ngai dawnlo a, zinglamah thlai thar a tuihnaiin a ṭha zawk bawk nen a remchang khawp ang. Inthlak zung zungin ka insiam mawlh mawlh a, khuma ka pasal che ṭalh ṭalh chu tih harh hlauin thawm dim thei ang berin ka che a, a la hma tho bawka inhnawh puar hmasak zet phawta bazar a fuhin ka ring.







"I va tho hma ve" tih ri chuan min ti phu nasa kher mai! A mutna aṭanga inbeng kang meuhin min lo en renga, "Enge i tih dawn a?" thophang aw fe in a ti leh a.






"Chawhmeh leiin ka chhuak lawk dawn?" tiin kawr chung ka ha zui mawlh mawlh a.




"Rini lei tir mai ta che"



"Kan khua a ken chhoh tur a nia" ka ti a, U Rini chu chhunah a bazar leh dawn tho tih chu ka hria a, kan khaw lama ka hawn turin tamtham deuh hlek lei ka ngai si a, keini chhung bakah ka ni te chhung leh ṭhenawm te han hawnsak ve ngei kha ka duh dawn a, U rini kuta dah tawp chi niin ka hrelo.







"Khua pawh a la var loh hi" mit chhing siar siar chunga a hawi kual vel chu ka lo nuih mai a, a sam dam hlap mai kir lek lek chu a delhna lamah a tho siang a, a thophang hmel nen chuan nuih a ti za dawn dawn mai.







"I men loh ten i hmu thei nang, a var daih tawh a lawm" nui hak chungin ka ti leh a, a mu ṭha leh mai dawn emaw ka tihlaiin che changlo chuan a ṭhu ngui bar reng a, "Mu leh rawh" ka tih pawh chuan engmah sawilo in a la ṭhu tum bar reng a, chhuahsan mai ka tumlaiin "Hruai i ngailo a mi?" a lo ti leh khauh a.





"I lokal ve duh a mi?"





"Lo mu leh phawt la, nakin deuh ah kan kal dawn nia" meng chiang mang hleilo hian a ṭhensuka "A chiloh, hei ka insiam zo vek tawh a lawm, lo kal ve duhlo mai rawh, ka reilo ang" ka ti ve tlat a, chhungte dang thawh ve hmaa bazar zawh veka lêt leh hman la hisap ve a, Urini dar kua velah a lo thleng tlangpuia ṭhin a, zinglam eirel hun nen a insu buailo zawk bawk.







"Hruai i ngaih chuan min lo phone dawn nia, ka dawhkan sira pawhdawh ah khan ka wallet a awm" khumah chuan mu ṭhain a puan a sin ṭha sawt sawt a, a wallet a pawisa chu lain ka kalchhuak zui a, inhnuai reh ṭhap leh eng dul riaiah chuan thawm dim takin ka pen thla ṭhem ṭhem a, ka thawm siam bak chu eng thawm dang mah hriattur a awm lo.







Choka ah thingpui ka luma ka inlai mekin kawngkhar ri rak thawm ka hria a, rang deuhin sitting room lamah ka va dakchhuak a, tumah phei chu ka hmu lo. Let leh tuma ka in her leh rual chuan pen ri khap khap thawm ka hre zui leh zat a, ka lehhawi leh rang kher mai.







Thawm chu kawngkapui lamah niloin Sitting room a kawngka te zawk a ṭangin a ni, kal hnaih nghal thuaiin puanzar phen aṭang chuan ka va bih dek dek a, a pheikhawk khai chunga inchung kailawn pana Reny kal ṭhem ṭhem chu ka va hmu a, khai aw! A riak chhuak a nih hmel, JH-an hria sela chuan a lawmlo khawp ang le.







Ka lam a rawn hawi chiah chu ka lo ip chawih a, minti phu nasa ngang mai, tunhnai aṭang hian ho te te ah ka phu chiam zel a, ka taksa chaklo vang anih ka ring, chhan sawi tur awm silo hian ka lungphu hi a rang chiama thawk a hah nghal ṭeuh zel mai.






Bengchheng siamlo turin zaizirin min lo hrilh a, ka lam pana a lo kal laichuan puanzar phen aṭang chuan ka kalchhuak ve vat a, "I mawl a mi, min va tiphu nasa ve" a lo ti bak nghal hlar a, zawk zamah chuan a "I haw ve chiah a ni maw, nizanah i mu hma daih emaw ka tia" ka lo ti chu a ner sak a, zu rim lah chu a nam huam a, a kawr hma lah chu a thil in a tihfar na emawni a rang nuai bawk "Zanlaiah ka chhuak ru a lawm" a lo ti sam et a, ka phawk ta pawh chu engteh ualah chuan a ngaih hmelloh.







"Ka u leh ka pa i hrilh teh chuan i chaklo khawp ang" a ti zui khar khar a, "Sawi lo e" tiin choka lamah ka luhsan zui maia, ka hnungah min lo umzui nghal thuai a. "Lalbawihno, i va han sawi awlsam ve a, i dakthei bawk si ilo sawi teh na chuan aw" a ti zui kha kha a, a hmel ka en chuan hlauthawng hmel a pu deuh.







"Midang chungchangah buaina neih ka peih tawhlo, ngaihṭha deuhin awm teh mahse, zanlaia chhuah ruk ṭhin chu a him lo ania, i kalchhuak tih tuman kan hre silo a tawhsual te pawh lo tawk ta la...." ka sawi zawh hma hma chuan a ban a lo phar vut a, "Excuse me " a lo ti vin hlar a ka tawp chiang kher mai.







"Min zilh turin ka engmah i nilo, ka chungchang sawiin ṭawnglo la i tan a ṭha a ni mai, a thawi pawha ka u in a hria anih chuan ka ringhlel nghal dawn che ania" rum fahran hian min melh zui kha kha, ngawirengin thingpui ka insana, ka ngaihven zui ta silo chu hriatthiamloh hmel zetin min lo thleka, amah pawh en duhlo chuan ka phone ka bih san leh a, "Zep ang che" tih leh hlak pahin a kalchhuak a, a awmdan chuan nuih te lam lam a ti za, ka tan hian nelawm tak hian a awm duh ngailo nain mi rilru chhe tak erawh niin ka hrelo.







Retheih hreloin a seiliana, khawvel thilah tlanin a nun a chên a, chuti chung chuan a hlim hmel hmuh tur a awm ngai chuang hauhlo a, engtikah tak nunkawng diklo a zawh tih hi rawn inhre chhuakin rawn inlamlêt ve tak ang maw?







Bazar ka thlen chuan mi pawh an lo tam leh ngang tawh, ka bazar duhthawh bawk nen haw lam chu ka rit hle a, ka pi leh pu damdawi pawh ka en hman ta lo a, Office kal dawnah emaw ka en tawh mai aniang chu. In ka thlen leh chuan zinglam dar 7 a lo ri tawh a, inchhung ka luh rualin choka lamah thawm ka hria a, Apuii a tho leh tawh a ni ngei ang.







Ka rin ang ngeiin wash basin nghenga alo ding kun lup chu ka va hmu a, "I va tho har ve a" min en hleilo a a lo tih chuan chhang taloin ka thil khai rit zet chu dawhkanah ka nghat a, chutihlaiin ka nu a lo lut ve chiah bawk.







"Kha, eng em em nge i lei a?" ka nu chuan a lo ti hlut a. "Ka bazar lawka" ka tih laiin "Eirawng i bawl ziah hman anih loh chuan khatiang tuman kan siam hmanlo, tui pawh kan ti ve lo" Apuiin alo ti leh hmanhmawh a, ka thiltih a piang a sawisel ta ṭhin hi chu ngaiah ka nei ve ṭan tawh a, ka haw zui duh lemlo.






"Tlaiah kan khua ah kan kal dawn sia, ka hawn turin ka leia" ka lo ti a.






"Hehh....kan inchhungkhur tan i bazar emaw tih a!" Apuiin a lo ti leh kher a, "Bazar e, heta mi tur pawh ka leikep vek a lawm; a vai khan ka hawn lo ang, Maite leh Parbawr kha ka lo siam dawn a mi?" ka lo ti nghal sawk sawk a. Chet zui tuma chawhmeh ka ban uk chu "Maite tih vel kan ei ngailo" Apuiin a lo ti leh a.







"Siam duhlo mai rawh, i pa a awm bawk silo a, tuman an ei leh manglo ang, i duh leh inpa eitur tawk lek khan siamla" ka nuin a lo ti ve a, keipawn ka duh ve reng tih an hrelo leh tawh anih ka ring, eirawng bawl dawn hian duhzawng a in ang ṭhin silo a ka la buai fo ṭhin. An eitur an siam lahin min siam kep ve loh chu thuhran "In pa eitur chaw chhum rawh" an tih loh leh "In pa in a duhlo" chutiang hlir chu a ni, keipawn chaw kher ka eive ṭhin tho a, An duh ve lemlo anih pawhin 'In eitur" han ti tal sela ka ti rilru reuh reuh a, min hmer telve ngailo leh awmve lo ang maia min hmaih zel chu langsar taka huat theih ni mang silo in mi chu a tihnual ve deuh ṭhin a lawm, mahni inkhawngaihna min neih zual tir ṭhin a, eitur chung changah ngat phei chuan rilru ana hma riau zel.







Chaw chhum ka siam laichuan "Engah i chhum ṭeuh a, kan eive dawn hleinem" Apuiin a lo ti leh pek a, "Chaw ka heh a lawm" a hmel pawh en duh lemlo chuan ka ti ve hmak a, ka sir maiah dingin min la en ta renga, engthil tak ngaihtuah ang maw. Bai ka siam laipawh chuan a lo la ding renga, ka bawlhlo telh tur chu rawn enin a hnar a len vat vat a, "I va han ṭawp tak" min chek tlat tlat pahin a ti a, a hma pawhin saum chu ka lei tawh a, rim chhia a tih thu a sawi miahlo a, buaina kan neih aṭang khan ka thil tih engkim ah chuan huat tur a zawng ni ta berin ka hria, a hmaa eng he hu a angaih duhloh kha a ngaitheilo ta vek a ni ber.






Thlai rah ka chan mawlh mawlh laichuan ka saum dahna Polythene chu ten hmel zeta la kangin hnawm bawmah a lo thlak hmak a, chutah ka lam lo hawiin "Rimchhe lutuk inchhung zawng zawng i nam zo dawn a lawm mawle" a ti khar khar a, ka insum theilo leh teuh kher mai.







JH-a lo lang ta hlauh a, lo lutin ka thil chan lai chu min lo dinchilh nghalthuai a "Enge i siam dawn a?" a ti zui zat a, Apuiin ka ṭawngchhuah hun nghakin min lo en ve ran bawk.







"Iskut bai ka lo tuma, sanghal sa rep nen ka bai thak ang chu ka lo tia" tawi tein ka nuih a, "A van tui dawn ve" nelawm zetin a lo ti thung, "Thil hang leh thak i uar lutuka in hrisel theilo ang, Saum te in la telh ṭhin zuia ka u pawh a hmel a dang vek tawh" Apuiin a lo ti zauh a, JH-an nui lek lekin min lo en a, chutiang chuan a sawi ve tak nain thil hang leh thak tih vel chu a ei nasa sa an ni, engtin mah phei chuan ka chhang zui duh lo.







Kan hawn tur chawhmeh ka lei chu Percel ah khungin min lo pack sak thlap a, "I va lei duh thawh ve, chawlhni kan cham dawn em ni?" tiin min zawt a, "I duh em?" phur takin ka lo ti ve a, min hnial lemlo aniang a nui maia, Lunglenga chawlhni cham chu chak tak tein ka chak a, ka pi leh pu ka ngaih chu thuhran inchhung boruak rit lutuk reilo te chhungtal pawha han kalsan chu ka thlahlel ve hrim hrim bawk.







Kan nupa chiahin tukṭhuan kan eiduna, ka nu hi chu zing aṭanga Clinic ah ṭhut angaih vangin tukṭhuan a ei ve hman ngai meuhlo a, ka pa lah lunglengah a kala, midang Apuii bak tho an lo awm lo a, Apuii lah kan rualin a ei duh der lo a, zing lampang hi chu dawhkan kan kil mumal ngai meuhlo. JH-a eirawngbawl sak chu a tih a tam lo bawka ka siam apiang tui ti takin a ei a min fak sak thei zel bawk a, eirawng bawl thiam ve ta riau hian ka in hre ṭhin.







Office khata thawk dun e tiloin kan buaina a inchenlo ema, chhun ah hi chuan kan inhmu hman ngai biklo. A chang chuan chaw chhun te kan eidun veleh zauh ṭhin. Tlaiah chuan damdawi zawn kual a ngaih vangin ka hawsan a, banah kal kualna tur ani pawn a la nei ve tho bawk a, Liansangzual rualin ka haw a, damdawi te pawh ani in min zawnpui a, kan in thleng min thlahthlap bawk.







Inchhung kan luhrualin choka lama nui har har ri kan hre zuia, Judy a lo leng a nih hmel. "Ka nu bulah ka sawi duhlo a, a lo be lo che a mi?" Judy in a tih lai chuan Liansangzuala chu choka lampanin a kal a, "Sawi reng reng suh, ka chungah a lungawilo ang, min pui nasa thei bik si a ka inthlahrung ania" ti tu chu ka nu aw a ni.







"In mo neih fuh loh ka han tuar ve ta chu ania" nui hak chunga Judy in a tih leh laichuan Liansangzuala chu ding meuhin a lo lehhawia, a hamhaih hmel hle bawk a, a lam panin ka kal ve nghalthuai bawk.


images (4).jpeg



(Nizan kha ka lo muthlu daih maia, min lo ngaidam mai dawn nia)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:08 pm

GOMENASAI - by Ahmangaihi violette khiangte



CHAPTER - 33






"Nu, a hlawh te hi a pe ngai che u em?" Judy in a tih leh laichuan Liansangzuala dinna chu ka thleng phei ve chiah a, lut mailo turin a banin min lo danga, in en renrawn chuan ka nu ṭawng chu kan ngaithla ta rih a, huatawm hranlo mahse, ka chungchang an sawi lo ngaihthlak chu a nuam duh tehchiamlo.






"I pa in a hnar a lawm, an inneih tirh khan min pek a tum a, i pa khan a mamawh leinana hmang tur leh kan hnena pek luh angaihloh thu a lo hrilh a, ka fate tuma hlawh ka chhawrlo a, ka mo nu hlawh phei chu ka beisei hranlo, ka hlawh zahve pawh a hlawhlo a, ani hlawh tello pawhin kan khawsa thei a lawm" ka nu chuan a ti hmak hmak a.





"Chuti chu a inkhawl ṭen ṭen dawn anih chu a?" nuihak chungin Judy chuan a ti leh a.






"I duh leh lo han insiam rawh, inpa chu ka lo nghahpui ang che" Liansangzualan a tih chuan inchung lama chhoh mai tum chuan kan inhera, ṭawng thawm vang bawk chuan ka tawp leh ta rih a. "A hlawh a pek bawk siloh che u chuan a va awm nuamsa em em, U Jh-an a duat bawk si, inchhung sekrek in khawihtir mang bawk silo" Judy bawk a ni, engvanga ka chhungchang ringawt sawi nge maw a nih le!





"Awm nuam ve bawk e, a fing em a an pa hi a bawlkual hneh lutuka, enge maw hlekah an pa hian a chhan hlur zel a, hauh pawh kan hau ṭha ngam hleinem, Mampuia lah hi a rilru tluangtlam leh lutuka an nu sawi apiang hi a awih zela" ka nu chuan a ti leh hlak hlak a, Liansangzuala nen kan in enran mai bawka, sawitur a vang duh kher mai. Ka hriatloh chhungin pasal fuihpawrh chan ka lo chang der tawh a, JH-an min ṭan nasat poh leh chutiang ngaihdan chu a lian hlur tawh dawn tihlah a chiang renga, fimkhur a ngaizual ta kher mai, ka vui ngai hauhlo chung pawhin heti hi a nih chuan pasal te bula vui thu thlen chu thil tih chi a ni dawnlo tawp a nih hi.






Muangchangin room lampan chuan ka kal a, engtin emaw ka ni deuh nghulh maia, ka thawk a rangin a vai riai mai bawk. Thawk la vakin ka inthingharh luia, JH-an a thawmhnaw ken tur a lo dah chhuah diam tawh chu Air bag ah ka khung nghal mawlh mawlha, Chawlhni kan cham ka rin vangin a thawmhnaw bawma a suit nalh ka tih ber chu ka khung tel a, ka thawmhnaw ka siam zawh chuan inhnuaiah ka inkhaithla a, sitting roomah ka nu leh Liansangzuala lo ṭhuin an lo titi a, Judy hmel erawh ka hmulo.






"Inpa nen inlo haw rual nange?" ka nuin a lo ti var a, "Ummm...khaw tlaina tur enge maw a nei lawka, a lo haw ve ṭep tawh ang" ka tih laimekin Gate inhawng ri ruai ruai thawm ka hre zui a, "Chu a lo thleng a lawm" Liansangzualan a lo ti ve thuai bawk.






"Chawlhni cham intum em ni?" tiin JH-a lo lut chu ka nu chuan a lo zawt a, "Cham pawh a pawilo ang, kan tlawh khat emai" tih paha ka lamlo hawiin a mitmeiin min lo râwn a. Ka sira ka Bag dah a hmuh chuan "I inpeih tawh a law?" a lo ti leh thuai a.






A thawmhnaw pawh ka khungfel vek tawh thu ka hrilh hnu chuan kan thawmhnaw Bag chu lain pawnah a khaichhuak zui a, choka a mi percel a chawichhuah laiin Liansangzuala nen pawnah kan lo inzui chhuak a, Judy leh ka nu inbiakna chu rilru ah a la cham reuh reuh a, ka sawi chhuak duh chiah silo a Liansangzuala pawn a sawi hreh deuh aniang min melh leh zauh ṭhin a, rilru buai tak leh helhkham nei te pawh a anga inchunga ka chhoh hnu khan engthil emaw an lo sawi leh zawk em mawni dawn le?






"Enge...?" nui lek lekin ka ti ta ngawt a, min en leh ṭhin vang chuan sawi duh anei anih ka ring.






"Hrehawm i ti em?" a lo ti zawi sup a. "Ti hranlo e" ka nui leh maia a ni erawh a thutak phian lawia. "Engvakah mah ngai duh lem suh, Judy chu ngaihkhat deuh hleka i ngaihthiam ve angai a nia" a ti nawn leh a, sawi vak ngaihna a hrelo aniang a, a bula ban ding chu a chhuih leh dat dat ṭhin. "Buaina i neih chuan JH-a hrilh la, buaina chinfel a thiam ṭhin teh a nia" a ṭhianpa chet ṭhin dan a hrelawk nge ni a nui deuh suk a.





"Engmah a nihloh kha, ka ngai haw hleinem, hmeichhia hi chu ka rilru ni emem lo pawh hi ka sawi phawng phawng zel ania, i tih dan takah ngaih khatah ka ngai alawm" ka lo ti ve maia, khatiang ṭawngkam ani mihrang daihin a lo hreve chu nuam lo ka ti ru hle a, sawimam hram dan ka ngaihtuah a ni ber mahse, kei aimahin ani chuan nuamlo a tih hmel mah mah zawk.






"Tak takah tunlai chu inpa pawh a rilru a hah deuh a niang, Cctv te...." a sawilai meka JH-a a lo kal vang chuan a ṭawng tawp chawt a, "Lo kal ve mai ta che, ramvahna tur te a awm a sin" phurfe a lo tiin percel chu motor hnungah a hlang a, "Ngawi rawh, naktuk hi ka nute Zomuani Kolasib a mi pasal neih hun tur kha a nia, keini pawh kan zing chhuah ang, ka nuin kal ve rawh min ti tlat a, ka peihlo tak tak a ni" Liansangzuala chuan a lo ti ve hlut a.






"Ni dawn tak maw!" JH-an a lo ti ve vat a, Motor hnung a khar leh mai tur chu rang zeta kal hnaihin Liansangzuala chuan enge maw hi a va ban rawk rawk a "Hei chu ava zia ve a, khawilam a mi nge?" a ti leh hlut a, a thil lo lek chhuah ka lo en saknak chuan Air gun hrawl zet la thar diai mai hi a lo ni a, nui ṭhaw chunga Liansangzualan a thlek kual laiin bangbo zetin ka lo en ve a, JH-an "Ka hmelhriat te ta ka lei anih kha" phur fein a lo ti bawk.






Silai ringawt buaipui chuan an thawm leh hlut a, Liansangzuala lah chuan kah chhinna tur a dap chunga "A chiloh Patean a lo hmuh chuan min chhuh leh duh mai ang" JH-an atih pawh chuan inhnung lamah chuan a kalpui ta tho a, a hnungah nui chungin kan nupa in kan zui ve ta zel a, silai kapthiam tak te pawh a ang ve viau a ni.






"A hmasa ai kha chuan a rit deuh zawkin ka hria, Kg 3 a tlinglo maw?" kan piah deuh a ṭang chuan a rawn ti lang lang a.






"2.3kg" anih kha, a hma a mi kha chu a man pawh a to zawk alawm, an lo thleng thar tur ka nghak zo tawh silo a kha kha ka la tawp a nih kha" Liansangzuala lampana kalphei pahin a ti a, silai chuan min ti ṭi deuh riaua hnai takah ka kalhnaih duh lo a, an ni lah an phur dun em em thung a.





"Engzahin nge i lei?"




"Tlem te chauh" a tih rualin pakhat zawk chuan a kap ri nghal zawta, "Scope pawh a ṭhat fu hi" tiin a thlek zui vut vut a.






"Fx impact mk2 ka chah meka, hei hi a hman tlak ve tho chuan midang ka khul chhawn tir ang" JH-an a tih leh chuan "Impact chu neila, hei hi ka lo khul ange" Liansangzuala a ti ve thung a.




"Automatic a ni em?"




"Trigger locking"




"Ava zia ve, sava veh nan a mi i tih?"





"Ni deuh ber e, Thehlei te pawh" ṭullo ka lo ti ngang mai, ka dinna lampana an lo kal laichuan nuisangin ka lam an lo hawi a, "In khua ah chuan sava veh a va chakawm ve" Liansangzualan a lo ti phei a. JH-an a sawm zuia, a kalchak zia chu a hmelah a lang renga, tih tur ruahmansa a lo neih tawh vangin aw a pawh ngam chiah silo a, a riat nawi a riat nawi a, "Sawm tawhlo mai rawh iti khawngaihthlak" ka lo tih lahin a ṭhianpa lah chuan sawm chîk takah a nei a, "Luiah te kan kal anga, ka ram lei lah chu aṭha nasa mai sia i rawn hmu ve ang chu" tiin uang deuh deuhin a sawm a, pakhat lah chu a chak tulh tulh emaw tih mai tur a ni.






"Naktukah ka lo kal ang" a ti ta nge nge a, kan ruala kal ve nghal mai tura a sawm leh chuan a hnial ve tlat thung. "Chu ka chhungte pawh ka hrilhlawk ve loh chuan motor khalhtu tur an buai ang, naktukah tukṭhuan eihman turin ka lo kal zawk dawn nia" a ti mauh mai a, "I nu chu hrilh nghal ila a ni mai alawm" JH-an a lo ti leh chu ka lo khap a, a sawizui ta emlo.






"Enga tinge khatia i sawm char char a" kan tlan chhuah hnua ka tih chuan "A nuam a ti dawn em a, a rilru buai hmel kha i lo hmu em?" nui suk suk chungin a ti a, a lo bawl deuh tihna em mawni?



****



Lungleng kan thlen hma chuan kawng lakah nupa ramchhuak haw kan nang a, khua ala hlat deuh vangin kan phur ve a, an kohhran mi an ni a keipawh min lo hre viau nghe nghe, "I nu hi enge a an a damṭha em, i pasal neih ṭuma a lo zin khan ka hmu ve hman ta silo a" nu zawk chuan a ti a, a damṭhat laitak anih thu ka lo hrilh a, JH-an an pa zawk chu ramchin te zawtin a be ve luama, anin sava vehna tur hmun te a lo khawhhmuh a, a sawina lam hrethiam ve awm taka a bu nghat nghat chuan nuih a ti za lek lek a ni.







"Ka pu i sawilai ram bawr vel engmah a hre ve lo ang" ka tih chuan kan nui dar dar a, i puin a hre khawp ang chu ani kan khaw pasal ṭha ania lawm, i zawt hlauh dawn nia" a ti leh a, khawchhung kan luh meuh chuan khua pawh a thim ṭan der tawh.






Chaw eiloin kan chhungten min lo la nghak a, ka pa leh hlawhfa ho pawh an lo awmfara, a ṭhen an inbuala an lo phusa laih laih a, ka pa tiamlohin panga an ni a kan va thlen belh leh chu kan ṭhahnem ta viau a, ka puin tlangval ho riahna turin VC quarter kan inchhak lawka mi chu hawh a dila, a remchang hlauh maia, tlangval ho pawh an phur khawp mai, ka pa chu riak chhuak ve duh kherlo turin ka ti tak nain a duh biklo a, "A huhoa riah te hi a nuam ve alawm" a lo ti maia, ka sawm lui duh ta biklo.






Ka pa ho chuan hlawhfa hoin zanriah an ei hmasa a, an eina ka sengfel hnuah keinin kan eive leh a, chutih laichuan kawtkaiah an ri dar dar renga, "Mi engzah vel nge a chhawr a?" tia a ka pu ka zawh chuan "Sawm bawr vel an niang, khawtual tlangval a chhawr nual bawka" a ti a, "Eirel vel a buaithlak em?" JH-an a ti ve leh a, "Buaithlak hranloh e, tlangval ho saw an fel khawpa, anmahni in an ti zung zung mai" ka piin a lo ti ve thung,






Zanriah eikhamah ka ni pasal pa Tluanga a lo leng phei a, "Naktuk chu ka lo thawk ve tawh ang" nui hauh hauh chungin ka pa lo lut leh bulah chuan a lo ti a "E lo thawk tak rawh, chutia nang meuh ilo thawh dawn te chuan ui leitur zawng ila kan talh dawn nia" ka pa in a lo ti var a, an phur tlang ngang mai, a zan a zanin ui leitur an zawng chawp chuk chuka, vengthlangah an zuk hmu hlauha, an lo kai haw chu keiin ka lo ui em em a "Hei chu vulh daih ila Arsa hmeh zawk ula" ka ti chu an nuih a za hlawm ngang mai.






Zanah Nutei te inah kan leng chho a, kan ti ti dun barh barh a, ka bul maiah JH-a a ṭhu ngawiran a, a hmelhriat vak loh bulah chuan a heti leh tlat ṭhin, "Nuamlo i ti em?" thingpui luma nutei thawh zawk hlan chuan ka ti zauh a, "Ka mu chak tawh, ka mit a thip" nui deuh sukin alo ti a, "Thingpui in zawh ah kan haw vat dawn nia, ṭawng ve la Nutei pawn mak a ti che ange" ka tih takah chuan Nutei chu a be ve ta zauh zauh a, Nutei lahin fiamthu ti tak deuh hian a lo chhaih ṭhina. Kan nui leh ham ham ṭhin.






"Aizawlah i lo zin hunah kan hnenah i lo thleng dawnnia" JH an a tih chuan "Ka lo kal dawnah ka lo hrilh che anga Chawlhni chawhnu ah min lo hruai anga" Nutein a lo ti a, hmana min lo hruai ṭum kha sawi chhuakin "Risk fuh chat chat si" tiin a chhaih zuia, dar kua thleng chu kan leng a, kan haw chuan ka pa te pawh an riahna tur lamah an lo chhuak tawh hlawm a, ka pi vawkchaw chhum a lo la meng a, ṭhutthlengah ka pu a lo muhil sak sak bawk, mutna tur keiin ka siam zung zung a, JH-a muthnu chuan ka pi meivil chu ka va ṭhutchilh ve a, ka nauchhiat chungchang minlo zawt a, a tir khan pangngai deuhin ka hrilh ve maia a hnu leh thilthleng vel erawh engmah ka hrilh lo thung.






Ka pi chuan min fuihin min ṭawngṭai pui ṭhin thu a sawi sap sap a, a thlamuanthlak duh ngei mai. "I Nu muanin min lo bia a, i tlawh ngailo em ni?" a tih chuan ka ngawi ran a, kan inneih hlim ka pu nena an la cham laia ka tlawh bak kha ka la tlawh lehlo a, hun ka neih loh bakah va tlawh chu ka chak emem lo bawk nen ka la kal leh ta miahlo chu a nia, anin min lo be lo bawka an damṭha nihmiang ka ti maia, let leh hun chuan ka tlawh ve vat chu angai tawh ang.






Room a ka let leh laichuan JH-a phone hmang thawm ka hria a, ka va luh laichuan khumah muloin thlanglam tukverh hawngin tukverh bulah a ding a, a aw aṭang chuan a lawm vaklo a nih hmel. Tunge a biak ang tih ka lo ngaihtuah rauh rauh laiin a lo lehhawi thuta, a phone hmanlai chu a dah nghal hmiah mai bawk.







"Tunge i biak a?" ka lo ti vat a, "In lampang" tih zawnga min chhangin khum lam a lo pan a, ka hmaah lo ṭhu hniam in ka chapal bun chu min phelhsak a, min en leh vawng vawnga a awmdan chu thilzep nei te pawh a ang deuhin ka hria, "Buaina a awm em ni?" ka ti leh a, " Awmlo e" a ti leh maia, a sawizui duh tlatlo.






Inkuah dun rialin khumah chuan kan mu a, a chep viau nain kan nupa room lianpui aichuan he hmun zimteah hian thla a muang zawk a, min ti hahdam zawk bawk. Kan ti ti dun sap sap a, rei deuh chu kan meng ta tho a. "I thinphu a van rang ve" a tih chuan ka awm dawmin ka thinphu chu ka ngaithla ran a, a chhan sawitur awm siloin ka thinphu hi arang leh dawt dawt ṭhina, thawk a ti sak lek lek zel bawk.






"Tunlai chu a lo rang thut zel" hrethiamlo takin ka lo ti a "I rilru ti hah vak tawhlo la, a ṭha veleh mai ang" min kuah ngheh salh salh pahin a ti a, rilru hahna sawitur pawh ka hrechuanglo. Mahse, engthil emaw hi chuan min mawlh reng lawia, awm nuam tak pawn min awmtir theilo.







A tukah chuan tlangval ho uitalh thawm ah ka harh hma hle a, Liansangzuala pawh hma takah a lo thleng vein an ṭhiandun chuan ka puin Sava vehna tur hmun rahtlan awmna mual te alo kawhhmuh a, tukṭhuan eikham veleh ah kan ṭhenawm naupang pahnih nen an inzui chhuak nghal nal nal a, chawhma chhung zawng an va thanga, an lo haw chu an ngui nghiaia an beisei ang hehu an va tawnglo a ni ngei ang, sava chu tereuh tete pariat an lo hawn ve a, chu erawh ṭhenawm naupang te chu nan pe daih thunga, an chau hlawm em em mai bawk.







Rei chawlloin ka pa hnatawhna lamah an kal leh a, inlam eirawngbawl chu ka pi nen kan lo ti duna, Nutein lo len pahin min pui bawk a, ka kutah eirel chu an dah si a sa bai lam chu ka lo thiam vak silo a, ka siam fuhlo zo vek ang tih ka lo hlauthawng hman hle a Nutein tihdan a lo thiam hlauha a, an phuihnam hnah lain engtin tin emaw a ti kual a, a rim aṭang ringawt pawhin a tuihnai viau tawh a, ani a lo awm hlauh chua a tihzia ngang mai, chawei tur erawhin a sawm chhuah thei leh miahlo thung.







Tlaia an lo haw chuan an intifai sap sap a, JH-a inbualna tur tuilum siamsaka ka buai laitak chuan "Lo kal lawk teh" tiin min lo ko a, pindana kan inzuiluh rualin ka lamah a lo inher thuta "Nimin tlai khan engthil nge ka nuin a sawi a?" a ti chang bula, min ti hamhaih kher mai.






"Liansangzualan zawt rawh min ti a, ka nu chuan sawi anei em ni?" a ti nawn leh a, ka hrethiam ve ta chiah, engah nge maw Liansangzuala pawh chuan a lo sawi kher kher chu le!







"Engmah.....chutiang... huattur chi..a sawilo" a lo ti bah naka, "Sawi hreh suh, i tan vek zawk anih hi" a ti leh mai a, nimina ka nu thil sawi te chu sawichhuah leh kher ngai chi thil pawh a ni lo a, boruak tipunlun thei tur chi thil phei chu thar thawh leh emaw pawh ka duh tawhlo.






"Engmah ka hre tawhlo, bakah huat tur thil engmah a awmlo, awm sela chuan nimin khan ka sawi tawh ang chu" ka lo ti ve vat a, ringhlel deuh chuan min en vungvung a "A chiang maw?" a ti nawn leh a, ka chiang tih lantir nan ka lo bu nghata, min zawt zui ta biklo.








Zanah chuan Nutei a lo leng ve thung a, Liansangzuala a awm ve ta bawka, kan titi ho rei ngang mai, a tuk chawlhni tlaiah Liansangzuala a haw a, cham ve tura kan tih pawhin a duh tawh tlatlo a, pawt tu a na deuh tawh a nih hmel, zingkarah ka pa rualin a haw a, ka pa chu thawhṭan tukah a lo let leh dawna, keini pawh zing chhuah kan tuma, tukṭhuan ei zet phawta chuak tura ka puin min tih vangin inlamah lut kawi tawhlo a hna a tlang nghal kan rilruk a, insiamsa veka kalchhuah kan ngai dawn tihna a ni.






Thawhṭan tuk chuan hmatakah tukṭhuan kan eia, kan chhuah dawn chuan pawn kawt kai thlengin ka pi leh pu ten min lo thlah a, ṭum dang zawng aia kalsan ka la hrehṭum a ni hial ta ve ang,






Tluangtakin Aizawl kan thlenga, kan thlen chuan dar kua a ri thuak tawh, office lam kan panding nghal a, kan thlen thlak rualin Annexe building kawta Alawmi ding ka va hmu nghal mai bawk a, kan lampanin a lo kal ve mek bawk.







"A nuam bawk em?" ka bul a lo thlen rualin a ti nghal var a, "Fu ka lo hawn che" ka lo ti chu a phur ngang mai. "Banah min lo nghak la kan inpe dawnnia" tiin kan office lam ve ve ah kan in ṭinsan a, chhunlam kan buailo bawka chaw chhun eilaiin kan inpe ta zawk a, Rina nen an chanchin a sawi siam siama, rin ang ngeiin an lo ṭha ve leh reng tawh, an inṭhen hlen kha ka ring meuhlo reng a ni.







Tlai ah chuan "Ka rualin haw la, bazar ah min kawipui lawk teh" a tih tlat vangin a rual chuan ka haw a, Bazarah hmaihnawih enge maw leiin kan ding zawk a, kan inkawt thleng min thlah leh zan bawk.






Inchhung ka lut chu a lo reh ṭhiap a, U rinni hmel takngial pawh hmuhtur a awmlo, thawmhnaw bag chu pawmin inchung room lam ka pana, kawngka a luhmai ka tum chu ka lu chung lawka ka thil hmuh vang chuan ka ding nghal chawt a, min ti bangbo hle!




Kan room kawngka luchungah Cctv maw!



Tu lo tih nge mawni dawn le?


IMG_20210309_091825.jpg



CHHUNZAWMNA






"Reny, i awmchuan lo chhuk teh, chhuah lehnghal ka ngaidawn ania" inhnuai lam aṭanga Apuiin a lo tih ri ka hriat rual chuan ka Bag chu dahlut vatin ka chhukthla nghal thuai a, Sitting room a Judy lo ṭhu awn diai ka zuk hmu hmasa ber a, choka aṭangin Apuii a lo chhuak ve mek bawk.







"E...i awm a ni maw, Kaleba Agency a ṭangin Ice cream an lo dah dawna, Dozen khat ṭheuhin a chi hrang hrang ilo la dawn nia, sa lam kha a awm kim em lo check la min lo phone leh rawh, kan neihloh lo sawila ka lo chah belh ang, chhuah leh nghal kan ngai" a lo ti nghal zung zung a.







"Apui Cctv khi i hmu em?" min hnung chhawn zawnga a kal chu lo lehhawi vatin a ner nanga "Sawi pawh ka sawi peihlo, in over nupa lutuk" a ti bak hlar a, min ti bangbo leh zual, anih chuan JH-a lo tih tir em mawni dawn le?







"Urini a lokal tawh dawn lo ania, eirel leh inchhung sekrek khawih kha chu i kut ani tawh" a ti zui zat a, "A lo kal tawh dawnlo maw?" ka lo ti he haw, a sawidanah chuan lo kal leh tawhlo tur ang mai a ni.




"Aw, a bang tawh"



"Tinge a ban a?"



"Ka ban mawle, hna kan indaih lutuk, hmeichhia kan tama a tello pawhin kan ti thei vek" a ti leh hmak hmak a, inchung aṭanga Reny lo chhuk mek chu enin "Ice cream a lo thleng dawn lo enpui rawh" tiin Judy nen chuan an kal chhuak zuia.







"A tuiral hmaa vur bawma khung a ni mai, kal chhuah lawkna tur ka nei a" darsan ak a tiin min kalsan veleh a, choka ah lutin eirawngbawl ka ṭan a, JH-a ka phone nghal thuai bawk.






"Aw Bawihno, ka lo thleng ṭep" a lo tih vang chuan sawi zawm duhloin ka dah leh rih a, chawhmeh siamtur ka chan laimek chuan a lo thlengzui ve mai bawk a, thei eng engemaw a rawn khai haw nual bawk a. "I buai em, ka inthlak anga ka lo pui ang che" tiin ka biang a lo fawp zauh a, a thil khai lai chu dawhkan ah a dah zui a, ka enreng chu zawhna mitmeng hian min en ve nghal a.





"Enge ni?" a nui deuh suk a.





"Cctv i ..dah a!" ka lo ti ban charh a, "E..kha kha maw, ka lo la hrilh lo che a ni maw" a ti awlsam leh maia, "Tinge i dah kher a, a langsar em em lehnghala" ka ti leh hluaia, "Kan mamawh a lawm, langsar deuha a awm khian a ṭha" a ti zawi sup a, ka hrethiam pha lo.







"Kan mamawh ni a i hria anih chuan mi thil ti ru man tuma dah i nih hmel bawk sia, a ruk deuh hlek tein dah zawk la i man thei zawk ang, khitiang ten tunge thil tiru ngam anga" ka lo tih chuan a lo kiai suk a, ka kawngah min rawn kuah nghalzat bawk. "Chuvang alawm langsar taka ka dahni, tuman thilsual an tihloh phah beisei teh ang" a kutin ka hmui a rawn tuai a, mitmeng damthlupin min en bawk. "Chhungkua kan ni tlat sia" a aw chu a zawi hle a, a thiltih dan chu hrethiam lo viau mahila, engemaw vei ruk riau chu anei tih ka hre thei.







"Enteh, damdawi kan room a an chhar kha mak ka la ti reng, tu nge lo dah ang le, ka dah a ni bawk silo a, i ringhlel ve tho a chuvang chuan a mi Cctv chu i dah" ka ti leh hap a. "I dah a nilo tih ka hria alawm, lo ngaihtuah hah duh suh, ka hrechhuak thei ṭep tawh" thutak fe hian a ti a, engtin nge a han tih zui dawn chu hre maplo mahila awm chu a tinuam ve em em tho.







Kan nupa in eirawng kan bawl duna, ka pa Lunglengah a kal leh tawh a, kan pahnih chauha eitur siam a ni maia, a awlsam ṭhin khawp mai, inchhung nawhfai ngai lai te chu ka nawt zung zunga, han tibal tur chi vak kan awmloh vangin hun a heh lemlo bawka tlai khatah pawh tihfai a sawt viau.







Ei kan rel zawh hnuah inbual turin min chhohsana, a chho fel zawt chauh tih ah Ice cream a lo thlenga, a rawn dah tupa tleirawl te in Memo min pek chu ka thlek ngiala han check ngaihna vak ka hre silo a "Pi, a tui harlo ania, dah lut vat la" alo ti ve sek sek nen, hmanhmawh deuhin choka ah ka thiar phei a, Apuii ka phone miahlo tih la hrechhuak leh hnuhnawh bawk.







"Mama enge Frozen foods i lo kena" ka tih chuan a ken nual thu sawiin min lo hmuh nghal sat sata, freezera a awmlo ang apiang chu ka dah luta, kan neihloh chu chi 6 chauh a lo ni nghe nghe. Apuiin min lo phone zui ve zata, ka dahluh fel tawh thu ka lo hrilh chuan "Kaikuang kha lo kang rawh, Michaeala eitur engemaw siam hran bawk ang che" ti hmakin phone chu a dah a, kaikuang chu la chhuakin ka siamzui mawlh mawlha, an duhdan ka hresilo a, hmarchapui leh tomato nen kan kan pawlh hluaia, an duhdan a ni ve em ang chu maw?







Ka nu lo haw chu thingpui ka lo lumsaka, ka thilsiam pawh enin a sawisel lo hlauh a, kei ka lo thaw huai bawk. Inbual turin ka chhoh sana, ka inbual zawh a ka chhuk leh laichuan choka lamah eng thawm emaw hi a ri ṭawk ṭawk a, ka va luhphei chuan nichin deuhlawka Frozen meats ka remṭhat ho kha chhuatah a lo hnawk niai a, enge maw thisen ang deuh hi a kai nuai mai bawka, ka nu chuan a lo tifai mawlh mawlh a, Apuii chu vur bawm chhungah a kun luh vangin min la hmu lo, tihdikloh ka lo nei em mawni dawn ni?





A lo dakchhuak leh chuan min hmuh rual rualin a sausage ken lai chuan min lo vawm zawt a, min ti hamhaih kher mai.






"Arthin hi la tel rawh ka ti che a mi, thildang zawng zawngah a kai luai hi, a rimchhiat zia te chu i hria em rawn hrufai vek rawh" a ti vin hlar a, thil pack keh chu ka enchianga ar thin chu alo ni ngeia, enge kan kawla kan kawlloh ṭhin ka hrechiang silo a, ka la ve tawp mai kha a nia, ka ti fuh ta vaklo anih hmel e.






"Nu amah kha tihtir rawh" a ti leh ṭhat a, hmanhmawh takin ka ban ve nghal a, a rimtui tehchiamlo. Mahse, saranga pack vek anih vangin a chhunglam a thleng pha dawn chuanglo a, enge maw a thinrim viau le! Chawei dawn thleng chuan a kut a hnim chhen a; a phun leh ṭhin a, Michealan engmah a namloh thu a hrilh pawh chuan a chaweilai a dah tau hmaka, Wash basin ah ava uak deuh ṭhat ṭhat a, awm a nuamlo duh rauh rauh kher mai.






"Enga ti nge" JH-an a lo tih chuan "Engmah" a lo ti bak hlara, lo sawi ve ngam chi pawh a ni lo. "A inla ten chhe der mai mai mawle" Reny in alo ti zauh chu a haw ngang mai.



****



Ni a liama, christmas kan hnaih ve ta ruak a, Patea te chhung Delhi ah bazar turin an kal dawna, chumi hma chuan an inah chaw kan va ei bawka, Nu Muanin sum dawnna chungchang min lo sawipui chiama, pawisa puk tir hlawk zia hahipin min hrilh a, ka pawisa te chu amah anga sumdawng ho puk tira tipung turin min ti a ni.







JH-a ka rawn a "A pung awma pawisa puk tir chu Pathian phalloh thil anih chu" alo ti maia, aw min pawh mang silo a ka ngaihven zui duh ta biklo, Nu Muanin min lo phone leh chuan "Silver min lo hawn sak zawk rawh, pawisa ka lo thawn ang che" ka lo ti a, a lawm vaklo tih chu a aw ri ah a hriat theih a, "Silver zawrhna ah kan kal kher lo maithei, kan kal chuan a ni mai" a ti duh lek a, ka nawrlui duh lemlo.







Ka pa pawn a sangha dil siam a zo a, thlam a sa ṭan leh a, in lamah a awm hman meuhlo, Michealan a dawr a ensak reng theihloh vangin midang a chhawr ta bawka, kartluan hian Lungleng lamah a riak ṭhin a, kan inlamah thleng tawhloin huanah an riaka, inrinniah JH-an a va hruaia chawlhni a lo hmang a; thawhṭan lamah a liam leh mai ṭhin.







Kan inchhungkhur boruak chu damdup anga lang siin a ṭang ru hle a, inkhak fawk fawk leh thiltih insawisel sak te chu sawiloh a lum a ni. September thla aṭang khan ka nu laizawnnu tunu hi kan hnena awmturin an la a, a nu a boral vangin fa anga la an ni deuh bera, hmeichhe naupang kum 4 mi fel ve tawh tak a ni a, kei nen phei chuan kan in ngaina viau a, in a ka awm chuan kan inzui kual deuh reng ṭhin.






Ka nu chuan "In fa angin Adopt ula aṭha ang" a ti fo a, a fiamthu ti dawn ila a thutak viau lawia, Remremin min ngainat bik em vanga sawi mai mai anih ka ring.







Hmeichhe naupang kan neih aṭang chuan inlamah ka buai zual hle a, a nu ang maia min ngaia ka bulah a tap chawt vang a ni pakhat, ka hna kaltur hi ngen tak te hian min ngen ṭhin a, zanah lah ka bulah mut a tum tlata, a tir kha chuan ka mutpui ve mai ṭhina, a tum tak ziah ah chuan ka pasal lakah pawh ka inthlahrung ta deuh a, midang lahin lo sawm emaw lo lakhran an tum silo a, a buaithlak leh nak ṭhin.






JH-an min hrethiam zel lo sela chuan nupa tamtak te inhmuhthiamloh phahna tur khawp chu a ni tawh, Remremi lahin 'apa' tiin a ko maia, kei min nu bawka, chutih laiin Apuii leh Reny te chu a ngaina leh manglo. Mahse, an duata thil leisak an peih em em thung.







Chhunah awm a ngaih vangin Apuiin a dawr ngahna ah a hruai ṭhin a, ka pain nau awmtu la mai tura a tih lahin mihrang hnena dah an hreh ve tumhranga, "Han awm hmanla ṭha tur a ngai ber che sia" Apuiin a ti leh zauh ṭhin a, min phut tih chu ka hriatna a rei tawh a, ka ngaihsak duhlo lui tlat thung.






A hnu lawkah ka nu chuan "I hna hi chawl mai ta che, Remremi hi a khawngaihthlak reuh si a, rawngbawlna angah ngaila enkawl mai rawh, pawisa te chu i pocket money tur ka pe mai dawn che a lawm" thu tak zetin a ti ta a, chhan mai ngaihna pawh ka hrelo, ka ngawirana chutihlaiin Apuiin "I duh leh thla hlawh kan pe dawn che nia" a lo ti bawk a.







An sawi ta fo mai "Kum thar aṭang chuan bang maila, Remremi school a kal ve tawh dawn sia" an tih loh leh "Inpa i sawipui em?" an ti sek sek reng a, keilahin hna ban chu hreh tak tein ka hreha, ka hna chu hnasang tak leh hlawh ṭha tak la nilo mahse engemaw thil chhe ber pawh tawk dawn ila ka vauchher ber a ni ve a, ka pi leh pu te damdawi leh eng ilo ka lo phuhruk sak ve thei ringawt pawh thil hlu a ni.







Christmas dawn hnaihah ka pu a lo zina, minlo thlawh ṭum chuan ka nu chuan a lo sawipui hmanhmawh a, rilru a na ve lek lek mai, "E... chutia chhungkua in in mamawh anih chuan in thu thuin a awm tur a ni zawk a lawm, a tihtur ve reng te pawh anih zawk chu" ka pu chuan a lo ti mai a, chuta ṭang phei chuan min beisei nasa zuala, hna kal tura han insiam pawh a inthlahrunawm lek lek ta.






Office chawlhin a zui ta hlauh a, inlama kan awm tak chawtah chuan an sawi reng ta biklo a, thaw a veng huai mai.






Ni 24 tuk chuan Remremi ka bazarpui a, a ni Apuiin vanity set leina tur min thawna, a quality ṭha ber chi leisak turin min ti bawka mahse, amah Remremi te chuan Barbie Doll house a thlang ta tlata, aman a to zawk nain JH-an thil leisakna tur pawisa min ken tir ve tho bawk a; a man zahve lai chu belhsakin a duh zawng chu tiin keiin ka lo leisak ve a, Apuii ngaihdan a lo nilo kher mai.






"Naupang thu thu a awm tur a ni hleinem, Ni Kimpuiin Doll house a leisak vangin a lawm Vanity set kha leitura ka tih che, i pawisa te ilo belh lehnghala, khatiang ten ka leisak pawh a nih veloh kha, ka pawisa kha min pe la, a hran ka va lei leh ang" a ti hmarh hmarh a, chutih laiin Remremin Doll house chu a lo khal meka, a ni thilsawi chu a hrethiam ve vek si a , khawih ṭha ngamlo chuan a lo hawi leh ṭhin.







"A man in intum ṭawm tihna a ni mai alawm" Reny in a lo tih te chuan a thinur zual emaw tih tur a ni. "Tu nen mah engthil mah hi inṭawm ka duhlo, nang nen pawh" alo ti bak hlar a, "Anih chuan a laiah sawn va bung la a ni mai a lawm" Reny chuan a la ti tak deuh deuh a.







Remremi chu ka bulah lo kalin a ṭap faih faih a "Anu ..Doll house an zai bung dawn a mi?"a lo ti reuh a, Apuii pawha inthiamlo ta deuh aniang Remremi chu lo banin "Kan pahnihin bazar ila Barbie Dream house lianpui ka leisak ang che aw" aw nem taka tiin a thlema, "Anu nen kan lei dawn" pakhat lah chuan a lo ti leh a, lawmlo deuh chuan min melh ralh ralh ringawt tawh.







Thil awmzia chu JH-a ka hrilh a, pawisa pek lêt angaih thu ka sawi chuan ngai a ti vaklo a, "Tam tham a nih loh chu, present leinan tho a lawm i hman" a ti mai a, mahse, a hnu ah a lo pe let a ni ngei ang, pasal te bula vui chan ka chang leh der tawh a, JH-a chuan a lo khak pah ni ngei tur a ni.







Christmas kan hmang liama, thuthar lawmawm lutukin kumthar chu min lo hmuak a ni ber, a vawi hnih nan nau ka pai leh ta a, tun ṭum erawh a hmasa anglo takin ka la na ngang mai thunga, huat theih dan zawng zawngin ka hua a ni ber e. Thil ka eitheilo a, pum na vek khawpa uak chang ka neia, khawsik tlun hluah ang mai hian ka awm renga, inchhungkhur boruak lam nen ka chau chhe der mai a; ngaihtuahna fim neih pawh har tak a ni.






Tlai lamah Psychiatrist ka pana, Anxiety ka neih nasat thu min lo hrilh a, min ṭhawng lemlo ka awmdan zawng zawngah a chiang viau a ka lo inbeisei sa viau zawk. Mahse, rai laia chutiang natna neih chu thil ṭha lo tak a ni a, naute tan pawh a hriselna thlenga a nghawng ve thei tih ka hriat vanga Doctor pan ta pawh ka ni reng a.







Ka pasal inpekna ah bawk a ni ka lawm ni, a lakah hian han vuina tur emaw sawisel tur reng reng a awm ngailo, a theihtawkin min duata, JH-a nen hi chuan in khatah khum khatah mu dun reng siin khawvel hran daihah kan cheng ni berin ka hria, JH-a khawvel chu a dam dupa, buai nuai nuai te a awm velo a engemaw changa ka hahchawlhna, thawk ka lak ve ṭhin na ber a ni, awm lo sela ka tuar zel thei pawhin ka ring chiahlo.







Naupang Admission tih a huna, a ngaite bawkin ka chhungte chuan min tur leh tawh, tun ṭum chu ka naupai an chhuanlam tel a "I chhiat leh ang tih pawh a hlauhawm, in lamah awm hahdam rawh" ka nu chuan a ti sap sap a.







Chumi zan chuan JH-a ka hrilh a, a ngaihdan a lo nilo nasa mai, "Ban chu i duh em?" a ti hmasa zeta, aw ka pawh bik lo a, zep lo ah chuan ban kha ka duhlo miau a ni. A zan a zanin ka nu chu an room ah a zuk kal chilh a, hlauthawng lutukin keiin ka um zui bawka, inhnuai ka thlen thlak laichuan ka nu te kawngkhar inkhar ri dawp chu ka hre hmana, Apuii pawh a lo lang ve nghalthuaia, kawngkhar bulah chuan ding dunin thawm chu kan ngaithla a, ka pa ṭawng bul bul ri pawh ka hre thei a, thil awmzia a lo zawt mek a, ka pasal aw chu vin hauhlo mahse a lawmlo hle tih a hriat theih.







"A laka i awmdan sawisel ka nei ngailo che, a chhan chu i mo nu a ni a lo inrawlh fo hi ka duhlo mahse, ka nupui a nihna hi min lo hriatsak rawh, a theihtawka Remremi a enkawl hi pawi ka ti a ni lo a, a theihbak chuan lo nawr tawhlo ang che, chhungkua in kan enkawl zo lo ni a i hria anih chuan pi leh pu te pawh a la neive a i dahlet leh mai dawn nia" ka pasal aw chu a ringlo a khauh ṭha hle thung.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:09 pm

GOMENASAI- by Ahmangaihi violette khiangte




CHAPTER - 34

images (65).jpeg



Mihring te hian harsatna hi tuar miahloin engtia rei nge kan pumpelh theih ang le? Ka nu chuan mihring nun chu 'A tuarchhel apiang dinchanna' tiin min hrilh a, inneihna pawh hi chutiang deuh chu nita in ka hria.






"Bawihte, kan nunkawng zawh chu dang hlei tak angin lang ṭhin mahse, a tu a te pawh hian hun harsa hi chu kan paltlang ṭheuh a, ṭhenkhat a khirhkhan deuha, ṭhenkhat kawng a awlsam deuh a ni mai a mahse, sawitur ting hi chu tupawn kan nei vek ang, harsatna kan tawrh nasat poh leh kan tawrh chhuah hunah hlimna a nasa zawk ngai a nia, tuarchhuak peihlo ten an tawpsan a, a tawp hlimna an thleng zo ve lo fo ṭhin a, nang chu tuar hram hram la mihring dinhmun a ngai reng ngai biklo e" ka nu chuan a ti dap dap a.







A englaiah khan nge kan tihsuala kan kal dikloh tak ka ngaihtuah let fo ṭhin, chutiang hunah chuan mahni inthiamloh na hlirin ka khata, ka nun hman liam tak kha thawnthu anga duhlai thai chhiat a ziahṭhat leh theih han ni sela chuan ka nun chu ziahṭhat tur ka van ngah dawn tehlul em, han theih ngat sela chuan kan vawiin hun pawh kan hman dan a danglam ngeiin ka ring.






Khami zan aṭang khan ka chhungte chuan ka hna bansan turin min nawr leh ta lo a, ka lakah chuan ka nu a lungawilo hle a, Remremi ka buaipui chu a phallo zui hmiah mai bawk. Zanah kan bula lo mut hi a ngen fo a, a piin a phal silo a a ṭap leh hliam hliam ṭhina, a lainatawm reuh khawp mai.







Ka hrisello zui ta em em a, hna chawlh duhloh vanga chhungkua innghirngho e tiloin hna pawh chu ka kal thei ta chuanglo, rilru hian taksa hi a lo thunun hnehin nghawng alo nei nasa ngang mai, ngaihtuahna ka hman nasat luat chu ka taksain tuarin a ni telin ka cher a, thil tuiril takngial pawh lem harsa tih chang ka nei ṭhin, ka thil ei te pawh ka hrawkah tang dawn tlata hriatna neiin ka hlauthawng ruai ṭhin a, engthilah mah inrintawkna ka nei heklo.






Ka muthilh hlanin naute chu ka lo chhiat mai angem? Zun takngial pawh ka hreh a ni, ka puma naute insiam mek chu damkhawchhuak zo dawnlo a hriatna lian tak ka neih chuan min ti â riai thei a, ka awmdan vang chuan ka pasal lahin zawhna min zawt leh ṭhin a, a lakah pawh inthup a ngai viau mai, ka ngui deuh chang chuan a awmloh laiin ka chhungten min hau anih ringin a chhan min zawt fo a, Anxiety vanga ka talbuai thu erawh a hrelo thung.






Keimah ber hi thil kal diklohna bul chu ka niin ka inhre ta, mahni pawh inhneh theilo hian engtin nge midang rilru chu ka hneh theih tehlul ang ni, ka nu nen kan in be fo a ka natna chungchangah chuan a thurawn te ka la ṭhin a, a lo paltlang hnu anih vangin ka awmdan a hrethiam hle a, "Mahni inkhawngaihna lamṭanga i siam chhung chuan hlimna tak tak i nei thei ngailo ang" ti a min hrilh chuan ngaihtuahna a ti thui viau.






Ni e, mahni inkhawngaihna rilru ka put reng ṭhin khan mi khawngaihthlak takah min siam ta chauh zawk alo ni, midang chuan ka lakah eng rilru pawh lo pu mahse keimah ka inngaihdan kha ka nihna dik tak chu a ni zawk a, ṭha chhuak leh tur pawhin keimah ka inngaihdan tho a ni pawimawh ta ber chu.






Ka nu ka bia chu ka thawl phah huai mai, Anxiety natna nei ve midang te chanchin ka ngaihven kuala, mahni hmel takngial pawh hmu ngamlo khawpa talbuai te an awm nawk hlawma, ṭhenkhat zan khawthim hlau tlat a thaw ṭha thei manglo te pawh, keichu chutiang em ka ni ve lo chu vannei intihna rilru ka nei ta zawk a, Panic attack erawh ka nei ve ta zauh zauh a, zing tak phei chuan a ni ngailo, chutiang hunah chuan Bathroom ah lutin tuivawtin ka chhip aṭangin ka inleih huh a tlem chuan ka zia ve phah ṭhin.







Zantin ka nu nen inbia in kan ṭawngṭai dun a, Pathian aṭang lo chuan damna famkim tak tak hmuh ka inbeiseilo, ka ṭawngṭaina chu chhan anih dawn thu uar takin keimah ka inhrilh bawk.






"Ka natna chhan hi ka hre tawh a sin" ka Doctor bula ka tih chuan hlim hmel taka min enin "Enge i natchhan ni a i hriat?" tiin min zawt a.






"Keimah ka inkhawngaih em ṭhin vang a nih ka ringa, ka nuin mahni inkhawngaihna rilru kha i natpui anih kha min ti a, a sawidikin ka hria, ka rilru hi a ṭha biklo a, ka thiltih sual vuak let ka tawrh changin ka inkhawngaih leh si anih hi" thawk la hak chungin ka ti a.







"Thil pakhat hria la ka duh chu, mahni inkhawngaihna kha i natna veiin a ken tel thil a ni tih hi, he natna hi khawvel kentel natna chikhat mai a ni a, Virus niloin kan thinlung mangang leh chi ai na a khat ṭhinin a rawn thlen mai chauh zawk a ni, kan sual vang emaw, kan thiltih man tuar kan nilo, inthiamlohna rilru kan neih hian natna chu keimahni ah kan vulh lian zawk ngai, chuvangin i thiamloh angah ngai reng reng suh, i thiamloh a nilo.






A pawimawh berah chuan beidawnna khur pawh va thleng la, tla lek lek hial pawhin awm mahla i kut chelh tlat tu Isua i nei tih inhria ang che, i nunna chaklo tak kha engtik laipawn a chelhsak che a, he natna khura i tlakluh hi a phal hauhlo ang, i thinlungin au la, chhan chhuak tur chein sawm rawh, sawmtu hnar ngailo kan Pathian hian i sawmna chu a hnarsak bik hauhlo ang che"






In ka let leh thlengin ka Doctor thusawi chu ka rilru ah a cham zui a, ka ṭawngṭai mawlh mawlh a ni ta ber, a chhanna chu ka dawng mai lo a, min chhan erawh ka beisei tlat thung, beiseina chauh pawn awmzia a nei ngang mai.






Bible te chhiarin kan nupain kan ṭawngṭai fo ṭhin, ka pasal chuan min fuih dan a hre ve vaklo a, mahse, anxiety ka nei tih a hriat a ṭang khan min ngaihsak zual hle a, nikhatah vawithum tal hi min hmangaih thu min hrilh ṭhina, fuihna thu tam tak aipawhin ka tan awmze nei tak zawng a ni, damchhan ṭha tak min siamtu a ni miau a, amah vangin nun ka thlahlela, hma hun beiseina min pe tu a ni ka tilo theilo.






Thingtlang lamah zin chhuakin a buai deuh reng ṭhina, a zin dawn hi chuan ka lo huphurh lawk thei ngang mai, ina a lo haw chang lah hian hmeichhe phone call hi a dawng nasa thei hle a, khaw pakhat an kalna a mi phei chuan zan rei deuh deuh a lo biak a chinga, ngaihtuah loh loh min ngaihtuah tir a a huatthlalaawm dawn dawn ṭhin.






Ka lakah erawh a thup hranlo a, "A zialo tak tak a ni, nupui ka nei tawh tih a hre reng a sin mawle"a ti niah niah a, han huat viau a amah demna chhan tur awm silo chu ka nuih liampui lo thei bikloa, ngaihtuah erawh a na duh sawt viau mai. A phone chu ka ensak ta fo a, nula nge nuthlawi ka hre lo, hmeichhe tutu te emaw chuan ka pasal hi an lo beisei nasa hle tih ka hmuchhuak lehzela, rilru hah a ti zual deuh deuh a, a zin chhuah lai ngat phei chuan awm nuamin ka awm thei ngailo.






In a awm chang pawhin phone a khawih tamlo hrim hrima, mipa phone lawm tak hum deuh chawt chi ang kha a ni ve lo a, hunawlah chuan lehkhabu a chhiar loh leh inkhel a en a, tlaiah Liansangzuala nen kan veng Hall ah Tennis an khel ziah a, a phone pawh a keng ngai chuang lemlo a, JH-a chu hetiang hi a ni, han chik ve viau dawn pawhin hmuhbelh leh tur chuang hi a awm ṭhin lo, mi langtlang tak a ni a, a landan ang tawp hi anihna chu a ni deuh ber mai, kei nen chuan danglam tak kan ni.






Zankhat chu thingtlang lam aṭangin phone call a dawng a, Ruantlang khua Tetei a inti nghe nghe, "A inbual a engthil nge ni ta?" pangngai tak chuan ka lo ti a, " A inbual zo ṭep tawh em?" tiin min lo zawt let a.







"La zo ṭep lo ang a lut chiah a, ka lo hrilhsak theih chi che thil a ni em?" ka ti leh chu "A enge i nih a?" a lo ti he haw a, "A nupui ka nia" ka ti chu a ngawi dat a. "Anih chuan ka pi, Ruantlang a mi Tetei Pi Remsangi fanuin a be duh che lo ti mai rawh aw" a awki thlakin a hma aia no zawk leh nelawm zet chuan a rawn ti a, ka chhan hma hmain phone chu a titawp zui nghal daih bawk.







JH-a lo chhuak chu a phone keng chung chuan ka lo nghak ran a, "Min lo call an awm a mi?" Towela a sam huh hruk thuak thuak pahin a ti a, "Ruantlang khua Pi Remsangi fanu Tetein a lo phone che a" ka lo ti chu hmel nur deuh nang hian min en a, "Lo chhang duh tawh suh" tih zawng a sawia, chutiang tehtawp sawifiahna awmlo chu ka ngaihdan a ni vak tawhlo.







"Hmeichhe ho hi i number i van pe nasa awm ṭhin ve" ka lo ti zauh a, " MHIP hruaitu te an ni hlawma, hna thilah ka pek an ngai ṭhin a lawm, a nu phone aṭangin a lo la a nih dawn kha" a ti leh maia, min hnungchhawn zawnga ding chuan kawr a ha nghal mawlh mawlh a, ka ngaihtuahna vak kual vang chuan ka rilru a nuamlo leh viau tawh.





"I phone let dawn lo a mi?" ka ti leh a.




"Dawn lo, a pawimawh lo ang" a ti leh mai a, ka ngaih a ṭhalo zual ting mai.




"A ngaizawng che a mi?"




"Ngaizawng lo ang"





"Anih engatan nge a lo biak che" min chhanglo in a ngawi vung vunga, "Ngaihzawng ka neilo ania" a ti thum duta, dawp hma hma in!






" I message te hi ka lo chhiar vek ania" ka ti a, chutah ka lam lo hawiiin phone chu a lo bana, ka pe hreh ringawt chu keimah ngei pawh ka in hrethiamlo. Ka kut aṭanga la thlain a side pocket ah a rawlh thana, "Khatiang rilru kha pu loin ngaihṭha deuhin awm rawh i pasal ka nih hi" a ti zawi deuh sup a, 'Min ring rawh' tih melh hian min melh bawk, ka darah vuanin ka chal a rawn fawp zauh a, "Nanglo ka neilo" ti lehin ka hmui a rawn chhilh a, ka awmdan inthlak danglam hlawk chu hnara hlit phawi an sawi ang huai a ni.






Ṭum khat a zinchhuak tur chu ka huphurh zual hle a, a hma ni lawkah Apuii nen thawmhnaw suk chungchangah kan inhmuthiamlo a, kuta nuai tura a tih chu khawlin ka lo nuaitir peka, thawmhnaw rawng kal a lo awm vei nen a rawng a chhe deuh hleka, "Ka hrelo a lawm" tiin kei ka ṭanga, a nin "I tilui" min ti deuh tlata, ka suk hmaa min lo hrilh lâwk chu keia buai phêng chuan ka lo theihnghilh zui daiha, chaw pawh a ei duhloh phaha, a hnu ah Reny hnen aṭangin Christmas present a pasal hlui lo thawn zinga mi a ni tih ka hre lehzela, a nuamlo duh kher mai.






Reny bulah "I u hi a damsam vaklo a, i lo ngaihven ṭha dawn nia" tiin JH-an a chah a, ni hnih khat cham tur chauh an ni tak nain inchhung boruak hrehawm laia a awmlo tur chu huphurh tak te in keiin ka lo huphurh a, a kaltur insiam te chu ṭah chhuak lek lekin ka en leh rih ṭhin.






"Zan khat chauh kan riak ang, ka lo haw hunah kan in chekup dawn nia" insiam mawlh mawlh pahin a ti a, Liansangzuala biain office kaltura min lo sawm mai turin a chah bawk.






Chhunah chuan an thlen chin min lo hrilhin Liansangzuala ruala haw leh mai turin min lo ti a mahse, Alawmi rualin ka haw ta zawk a, a awmlo chu inchhung chu a reh rawih maiin ka hria. Eirawng bawl ka tum laimekin Reny leh Remremi an lo inkailuta "I lo haw tawh maw, ka buaizia mai chu a, Remremi vangin ṭhian pawh ka kawm ve thei reng reng hleinem hetiang te chuan nuthlawi ang chauh a lawm ka nih le" a rawn ti lut bawng bawng a, Remremi chuan tui intur min dil nghal chung a, an thlan hluam mai bawk.






"Khawnge in kal a?" tui bottle lo pek pahin ka ti a, "Kan kal kual nasa lutuk, dawra kal na ah a zun a chhuak ngun bawk si, lenpui chi pawh a nilo, a reng rengah school a va lam ziah a ngaia a buaithlak emai, nilengin inah ka awm hman bik hleinem, nau awmturin min dah ringawta mawl hlawm lutuk" a ti zui hlak hlak a, a lo phar buai ve viau a nih hmel.






Eirel pahin Remremi chu a Homework ka tihpuia, thu a awih hlauha zirtir a harsa lemlo, dawhkan kila kan ṭhudun chu Reny chuan kan piah deuhah a phone khawih malh malh pahin min lo ṭhutchilh ve reng a, "Enteh..Lalbawihno" a lo ti hluaia. A lam ka va hawi chuan "Fiona leh U Victora hi an inkawp em ni?" a ti ha a.






"Tinge...?" a ner zui nanga, "An ni ve in ka hria, hman zanah Ânî pangpar huan bulah sawn an ding dun ka hmu a, Fiona-i chu ka rin ang a lo nilo, fel hmel deuhin a awm a, ka chhungte hian min zilh nan an hmang ziah lehnghala, Victora te cu kan chhungkaw zinga mi ang a nia lawm ti raw, ka u ṭhianpa a ni lehnghal" phawk lek lek a min en chungin a ti a, "Mihrang daih an ni tho a lawm, thisen inzawmna an nei chuanglo a " ka ti chu a pawmlo nasa mai.






"U Vic-a te chuan kan tet lai pawh a hrevek a sin, kum 15 chuangin an in thlau ania aw, U Vic-a chu ka ten chuangloa Fiona-i chu ka ten tlat, ngaihzawng neilo ang deuhin a awm vela, a la rai pawpin ka ring, a mawl bawk si inven dan pawh a hre miahlo ang" a ti zui hlak hlak a, chhan lêt ngaihna pawh ka hre lo, ka nuih liam ta ringawt a.






A hnu lawkah Fiona-i a lo luta, Reny chuan a lo melh râm râm a "Zep thei ve a" alo ti chu Fiona-i chuan a hrethiamlo ngang mai. "Umambawih inchhung chet ka lo tihpui tawh dawn che nia, tlai lam chu computer class ka kal vangin ka hman vaklo a zinglamah zawk ka lo kal ṭhin ang, naktuk zing aṭangin ka lo ṭan dawnnia" a ti zui siam siam a.






"I buailo em ni, chutin puih em em pawh ka ngailo a sin" ka tih laimekin Reny chu a nui chhuak hawk a, Fiona in a va melh chuan a ngawi leh nghal hmak thunga, a ngeiawm thiam leh ngang mai.






"A thlawnin ka ti dawn hleinem, U JH-an inhlawhna ka siam sak ang che min tia lawm, Dubai zinna tur ka intuak dawn a, Ânî te ruala kal ve ka duh sia" Reny lam hawiin "I duh chuan i scooty pawh ka lo silfai sak ṭhin ang che" a ti zui zat a.






"Awi, a ṭullo" nuih hawk pahin pakhat chuan a lo ti a. Fiona i hmel a thutak em em laia Reny lo nui kur kur bawk si chuan sawipui zui dan tur minti hrelo zo.






Fiona i chhuah hnu chuan "A puih kha lo duh miah suh, ka u bulah inhlawhna a dil ve ziah a, U Remruatan pawisa te chu a ngah lutuk damdawi leinan mai mai a lawm a hman" a ti leh hmak hmak a, Remruata damdawi tih vangin an inchhungkhur an buai ve lek lek ṭhin tih chu ka hriatsa a ni, an thlam sakna tur châk an lam sa pawh a lo hralh ru zel anih kha maw.






"Enteh, U Victora nen chance neih a duh vang a ni ngei ngei ang kan inah kher lo thawh a tum" ṭhu ngil hluai in a chek zui tlat tlat a, a duhloh zawng hmel chu pe na ve tak a ni.






"Chutiang a ni dawn a mi, Dubai kalna tur ka intuak dawn aman a tih khâ" ka tih chuan min rawn ṭhuthnaih nghal sawt sawt a, "A chhuanlam anih kha, awii...an chetsual tawh i ring em?" a ṭawng ring nasa si, Remremin a lo ngaihthlak ve reng vang chuan ka lo khap chula "Engmah ka hriatpuilo" ka ti hnuah pawh "An chesual tawh chiang mai, virgin awmin an awm leh ringawt anga" ala ti hram pek a.






"Enga tinge Fiona-i hi i ngainat miahloh a, keiin fel ka lo tih tehlul nen?" ka ti a, mak chu ka ti ve deuh a ni, Reny chu upa deuh zawk mahse, an Cousin ho zingah rau rau pawh inkawm rual ber an ni a, an inngaina miahlo chu mak ve tak zawng a ni.






"A fel over em a lawm, thil reng rengah Over a tel tawh chuan engmah hi ṭha a awm lo, suallo mahse a Over tlat, a thurualpui theih ngai bawk siloh a, a awmdan hian min hêk a ni tawp mai, hman deuhah Hlutean a lo chhaih a chu te chu ka u bulah a lo sawi mawle, a ruka lerh hle si a inlak strict zia chu" a ṭawngzui mawlh mawlh a, ka laka Irene ṭawngkam ang chiah a ni, thil awmzia chu ka man thiam nghal maia ka lo um e liam ta mai maia, sawipui vak chi pawh a nilo, ka ti zuaikai mai mai zawk dawn tlat.






Remremi Homework ti zo chu kawtah naupang dangte nen an infiama, chhuat ka nawh mek laiin ka puin min lo phone a "Mambawih, i pi ṭhiannu Mission venga mi kha a boral thuta, i pi kha midang rualin alo kal ve a lo ngaihven deuh ta che" a lo ti a.






"Ava zialo ve aw, ka Patea te i hrilh em, hetah a mi lo thlen a tum?" ka lo ti zung zunga, "Chhuana chu ka hrilha, an nu nen an lo zin daih a, Irene i kha lo hmuak tur chuan a chah a mahse, nangman lo ngaihven zawk mai rawh, kawng chin a hre silo a lo buai palh ange" ka pu chuan a ti leh a, rilru a buai duh ngang mai.






Irene-i chu ka bia a "Lo riak phei la" a lo ti sam et a, amah chauh a a awmlaia ka pi thleng tur mawlh chuan awm a ti nuamlo, Irene-i lah a laktlakloh nasa mai si.






JH-a phone ka tum laimekin amah zawk chuan min lo phone a "I pu nen kan inbia a, i pi chu i lo va riahpui mai dawn a mi?" a lo ti ta hlauh a, ka thaw huai mai.






Ka nu leh pa an lo haw chuan ka lo hrilh zung zung a, ka pa chuan a remti leh mai a; ka nu erawhin aw min pawhlo a, JH-an ka pa a lo be bawka "Michaelan lo va dah rawh se" a lo ti niawm tak a ni, a remlohna a awm takloh ah chuan keipawh ka insiam zung zunga, saw lamah eirel ka ngaih dawn tho vangin a hma thei ang bera kal mai chu ka rilruk a, Irene-i chu Sumo lo chang turin ka hrilh bawk.





Insiam peih at in inhnuai lamah ka chhuk thla a, Michaela mu thoin "Min lo nghak lawk rawh, kan inphih harh ve lawk" a lo ti leh rih a, chutih laiin Apuii leh Judy an lo inzui haw a, choka ah Beer in ruin an titi dun sar sar renga, an chhuahna ah an in tawh nge ni an ruih dun hmel viau bawk.







"Enge i tih dawn a?" Apuiin a lo tih chuan ṭha deuhin ka lo hrilh a, engmah phei chu a sawi zuilo, a hnu ah "Ka nuin a phal a mi, riah chhuah tih vel hi a remti vak ngailo a sin" a ti leh a, "Hrilh tawh e" ka lo ti leh maia.






Michaelan min lo ko a, kalchhuah nghal mai ka tum chu "Lo haw tawhloin awm hlen daih sela a ṭha ang, a hmun hi i rawn luah daih anga" Apuiin a tih ri vang chuan ka pen tawp chawt a, Judy nen chuan ka hriat phakloh turin engemaw an sawia an nui leh ṭhin a, zu rui kamliam satliah anga lak chu har ve duh tak a ni.







Inhumruh ṭeuh chung chuan ngawirengin ka kalchhuaka, "Hmanhmawh teh, kal kawina tur ka nei ania" Michealan a lo ti hluka. A Bullet bike ri chu a bengchheng bawka kawngtluanin kan inbe lo, ka chhuk dawnah chuan hruai leh ka ngaih dawn chuan phone mai turin min ti a, chumi hnuaah a tlan chhuak zuia, kawtah ṭhuin Irene-i leh ka pi chu ka nghak ta riha, tlai deuha takah an lo thlenga, mitthi inah ka pi chu a lo zuk lam ni ngei tur a ni.






Eirawng ka bawl sawk sawka, kan pîtu chuan zanriah kan kilho a, Irene-i pawh zan lam a leng chhuak ta lo hlauh a, ka pi hmai zah nachang a hre ve a ni ngei ang. JH-an min lo Phone lai chuan muturin ka lo insiam mek a, "Zanin lam te enge kan an a?" nelawm zetin a lo ti a, "Kan ṭha tlang e, naute nen kan ngai hle che tih a ni deuh mai" ka lo tih chuan a lo nui risuk a.






"Keipawn ka ngai che u, Nakinah hun thawl kan neih hunah ka la zinkual pui dawn che nia" thu tak deuhin a ti a.






"Khawiah nge kan zin ang" ka lo ti var a, zin chhuah chu ka chak zawng tak a ni, awm hmun ngaia awm chawt chawt mai ṭhin ka nih vangin Mizoram khawdang thlawhpawh hi la nei tlem hle a, ka hmuh ve chhun te pawh kawnglaka kan tlan pelh thuak ang chauh hi a ni.




"Ka hrelo le, i nu te khua ah i duh em?"





"Aw, ka duh" ka sawi rang lutuk chu min lo nuih a, "Ka duh tak tak a nia, chhangchhiat hma hian kal thei ila aw" ka ti nawn leh a, "Tih dan ka lo ngaihtuah dawn nia, nangmah kha han damṭha phawt mai la" a lo ti leh a, a nin a sawi tawh chu a ti ngei ngei dawn tih lah a chiang reng a, ka nu hrilh hlan mawlh ka nghakhlel.







"Mahse, i dam ṭhatloh chuan kan kal theilo ang, kalvat i duh chuan damṭhat vat a ngai tihna a ni mai" a ti leh a, a thusawi ringawt pawh chuan min ti dam sawng sawng thei hialin ka hria, ka nu te khua chu Mizoram chhim tawp bulah a nih vangin khaw hrang hrang kan tlanpel thei dawn bawk a, naute in thla thum a tlin tawh chuan Motor chuan pawh a hlauhawm tawhlo ang, tun thla hi a thla thumna chiah a ni bawk a, ava han remchang lehzel em.







Rei deuh kan inbia a, zin ka chak zia chungchang mawlh chu ka sawia, chumi hnuah ka nu te chhungkaw chungchang sawiin ka pa Rema Accident dan kan sawikaia engtik laiin nge ka lo muthilh réng ka hrelo, kan inbiak laklawh laiin ka muhilhsan tih chu zing ka thawh hnuah ka hre ve chiah a ni.







Ka pi leh Irene-i khawhar in kal tur nen kan chhuak ruala, kei ka hman silo chu Irene-in phurlo deuhin a zui a, chawhnu lamah kan khaw lamah an let leh tawh dawn a, a lo kalpui te rual tho a a haw leh theih dawn vangin ngaihṭha deuh chuan Office lamah ka kalsan a, ka ban dawnah chuan in a thlen tawh thu min lo hrilh leh hman der tawh.






"I chau em?" ka ti a, khua a lum bawk si a a chau ve ngawtin ka ring.






"Chau lo e, kan la ṭhalai a lawm" tiin a lo uang ve a, ka pi pawh kum 80 a tling ve reng tawh, Pathian zarah insawiselna em em neiloin a hrisel ṭha hlauh a, Mahse, rilru hi chu a buai ve leh nak ṭhin, ka ni te chhung chuan fin mai sela ka duh laiin makpa chhungkhung Pa Tluangan a hreh tlat a, "Loh theihloh hunah te chuan kan la fin ang chu, an ni pawn hetia awm hi an duh rih a lawm" ka ni chuan a ti maia, ral aṭang ngat phei chuan ingaihtuah a na duh ngang mai.







Zanriah kan eilai chuan ka nu chuan Remremi dah let leh mai a duh thu a sawi a, ka thil eilai ṭhulh meuhin ka va en a, ka awm a nuam loin ka inthiamlo nghal em em ringawt, ka bula Remremi chaw ei chu ka leh ṭhin a, rilru a buai takzet a ni.







"Pawisain kan ṭanpui mai aniang chu" ka nu chuan a ti leh hlak a, "Ka haw duh lo âpi" Remremi lah chuan a lo ti lehzel bawk nen thawk an ti pik ṭeuh mai.







"Kan bulah nuam a ti ve ṭan chauha dah let leh te chu a, i ti khawngaihthlak e" Apuiin a lo ti hlak hlak a. "A tih ngaihna a awm silo anih hi, a len deuh hunah kan la leh mai dawn a lawm" ka nu chuan a ti a.







"A len huna lak tih chauh te chu a, hetah pawh awmpui laksak la ani mai alawm, i dah lêt pawhin midang thoin a lawm enkawl dawn" Apuiin a tih laichuan kan ngawi ṭhap a, ka pa pawn sawi ngaihna vak a hre biklo aniang Remremi chu a en vung vung ringawt ṭhin a, Ka nu lahin engmah a sawi duh tawh derlo a, ka lam a lo hawi chang chuan ka lo inthiamlo em em ringawt mai a ni.







JH-a lo haw tukah in checkup turin kan kalduna, ka naupai chu a fual lek lek a, "Dawm angai ang, a tlak mai a hlauhawm" Doctor chuan a lo ti a, min ti hlauthawng hman khawp mai, kei aimahin ka pasal chu a hlauthawng zawka, hna pawh aikai la a chawl rih mai turin min ti a, awmnuamlo na riai riai nei ve reng ka ni bawk nen, reilo te aikal han lak zawk chu ka hreh hranlo.







Chutia naupai chhung aikal ka la dawn tho anih chuan tiin Remremi pawh dah lo tur chuan a ti ta a, chhungte ho pawh an lungawi viau niin a lang, ka nu pawh ka lakah a nelawm veleh ta deuh.







Fiona-i u Zamtein ka ai min kalsaka, kum leh lama an Dubai kalna tur intuak an duh bawk nen Ka ni Sangzuali ho in an lo lawm khawp mai, chhungte an lo ni hlauh bawka, kan tan tak pawh a tih zia.







Ka naupai thla 5 na ah chuan ka cher tawh hle a, thil ei ala tui thei meuhlo, JH-a a manganga Food supplement ṭha an tih ang zawng zawng chu leiloh a bar pawh anei tawhlo ang, nikhat chu hmun ka phiah laiin ka thi alo put a, hlauthawng leh hmanhmawh takin Bathroom lam ka pan a, thi duk deuh hi a lo chhuak a; tam phei chu a nilo, a hma lawka kan inentir ṭum khan thiput riai riai ka neih thu kha ka sawi tawh a Doctor chuan a tam lemloh chuan hlauh thawnawm a nilo a ti mai a.







Mahse, tuna thi chhuak chu a tam nge a tlem Doctor chuan a tih ang tih ah chuan ka buai a ni, JH-a ka phone a 'Meeting zawh ah ka lo haw thei chauh dawn a, lo mu rih la, tlaiah clinic ah kan kaldawn nia" a lo ti a. Ka kal zawnga ka tai na ta em em chuan min ti hlauthawng zual bawk, ka mut erawh chuan a zia a, engemaw chen chu ka mu ren rawn a, Remremi school bang lam ka ngaih vangin ka tho chhuak leh thuaia mahse, ka kal zawnga ka tai na chu a reh hleithei chuanglo.







Remremi hruaia ka let leh hnu chuan ka mu ta renga, 2nd trimester lai kan thleng ve tawh a chhiat leh chu hlau tawh tak ka ni, hma deuhah JH-a a lo haw a, a rawn hmanhmawh hmel ngang mai bawk. Ke a kal pawh min phalsakloin Motor awmna thleng min pawmthla a, sawichhuak lo mahse a hlauhthawn zia chu a hmelah a lang thei.







Doctor chuan "I chhul a chaklo hle a nih hi, a hmain nau ilo chhiat tawh bawk si a, inenkawl ṭhat viau i ngai ania" tiin Bed rest min lo chawh a, thi a put leh anih chuan kal leh vata ka chhul ṭawn a ngaih dawn thu a sawi bawka, eng em chu kan ti ta lo.







Inlama awma tihtur ṭul hmuh ve reng chuan mut mai mai chu a harsa a ni, hei hi chu hmeichhe dang pawh an ni ve ṭheuhin ka ring, zingah chaw ei hmanloa JH-a kal fo te chu a dik theiin ka hrelo a, tuk thum vel chu ka mu ve hman ang a hnu leh lam erawh ka thei tawh nganglo.







Thla rukna kan kai ve hman ṭep a kar khat chauhin a dang tawh tih ah chuan pumna riai riai hi ka nei ṭhin a, ka han mu leh renrawn ṭhin a, awmzia phei vak zawng a neilo, zirtawp ni vawikhat chu chhuat ka nawh laiin ka thi a lo put leh thuta, a hma zawng aiin a tam zawk bawk. Nau chuan san a rawn pe ta mai emaw ka ti hmana, ka pum chu na tak a ni.







Reny leh Michaela ten damdawiinah min hruai a, "JH-a phone rawh u" ka ti chul bawk a mahse, damdawiin a lo thlen ve meuh chuan engkim anih tur ang a ni zo tawh. Ni e, a vawi hnihna a tan nau ka chhiat leh ta a ni, ka taksa lam dikloh liau liau a ni a, ka pai puitling zo ve nganglo a ni e.







Rilru chu ana, a vawi khatna aia anat nep chuanna a awmlo, a na daih zawk maithei a ni, JH-a chu a chi ai ni berin ka hria, ka kut humin min ṭhutchilh chawt a, tawi te a min nuih bak chu engmah sawi a neilo, a hmelah chuan lusun hmel ka hmu a, pa nih hun a nghahhlelh zia hrechiang ber tu hian ka hnem thei bik silo a, a rukin kan tuar dun tlawk tlawk mai a ni.







Min tlawh turin ka pu a lo kala, kan nupa chuan kan luchungah kut khatin min ṭawngṭaisak a, Damdawiin aṭanga kan chhuah hnu thlengin min champuia, a haw hma ni chuan chaw eiah kan sawma kei chu Bed rest a ka la awm avangin zanriah pawh ka kilpui ve lo.







"I titi dun lawk teh ang" tiin zanriah an eikham hnu chuan min lo ṭhutchilh a, rei pawh kan titi hmain JH-an Remremi alo luhpuia, ka pu chu a thlah haw zui mai bawka, a haw hnuchuan a thu min râwn te chu ka ngaihtuah zui rauh rauh a, keipawn ka tih makmawh ni ve tain ka hria.







Ngun takin ka inngaihtuah a, ka nu pawh ka rawn ve thlap a, chumi hnuah thutlukna ka siamfel thei ta a ni. Alawmi erawhin min pawm puilo hle a mahse, ka chhungte lam duh dan vek a nih zawk vangin thil ṭha tak anih ka beisei ve fan thung.







"Ka hna hi bansan ka tum a" ti a JH-a ka hrilh ṭum chuan a thiltih lai dah meuhin min lo en a.





"Ka nuin sawi a nei leh tawh em ni?" a lo ti khauh a.






"Chulam a nilo, ka hrilsel lo em a, hahdam deuh a awm ve ka chak tawh vang a nia" ka ti ṭha leh a. "Nakin lawkah i inchhir leh lo ang maw. Ka nu thil sawi vang te kha alo nia nge?" a tih chuan ka lo nuih var var a, "Inchhir lo e, Officer nupui dangte ang hian ka pasal thawhchhuah ringa nuamsa deuh a khawsak ve ka chak tawh a lawm, nangman min chawm zo em em tho a, ka ni te ho ang hian inlamah nalh takin lo intuai hnum ve tawh zawk ila" uang hmel pu lek lek chuan ka ti a, thutak deuh mai hian a lo bu nghat nghat thunga, a nuilo a uang hmel a pu ve heklo.





"I phal maw?" tiin ka zawt nawn leh a.





"Um....Ka duh dan zawk a nia lawm" a lo ti mai a, a aw chu a thumin a fiah ṭha hle bawk.







"A ṭhat chu" ka ti hap a, i he lo a ka thil sawi min lo pawmsak vang chuan ka lawm hle bawk, "Zing i hna kal tur ka thlah ziah che anga, i lo haw leh hunah hlim takin ka lo chhâwn ṭhin bawk che anga, i hah deuh changin i dar te ka hmehsak ṭhin che anga....i tan ka hun....." ka sawilai chuan alo nuisuk a, chutah ka lam lo panin ka bula Sofa ah chuan a lo ṭhuthla a, a mitmeng thuk raih chuan min enin ka kut a rawn vuan a, he thu hi min hrilh a.







"Nupui a ka neih dawn che khan nuamsa takin ka siam ang che ka ti ṭhina mahse, tun thlengin engmah ka la tihsak lo che a nuamsa pawhin in ka la dah lo che anih hi, hun hrehawm tak i paltlang zo chiah a, tunah chuan engmah lungkham loin i chak zawng apiang chu ti rawh, ka ni te ho ang hian i duh leh bazar la, i eichak zawng te ei la, i nawmsak theihna tur a piang chu ti zel ang che, khawvela nupui vannei ber ka nih tir theilo che a ni maithei mahse, khawvela pasal in nupui a hmangaih ber i ni tih i inhre dawn nia" tiin, a lakah chuan sawi ve tur reng ka hrelo, ka mittui a lo hnâm a, a nin lungchim zetin min fawp thung.







Mi te hian Romantic tih thumal hi eng ang chiahin nge an lo hmuh ve ang le? Thawnthu a nula leh tlangval te inrimdan, duhsakna thil pek inpek te, biahthu inhlan te chauh hi Romantic a lo nilo, nupa inkara inhriatthiam tawnna rilru kan pu ringawt te pawh hi kei chuan Romantic ka ti. Pasal feltak, min hmangaih em em tu ka nei a, hmeichhe vannei tak chu ka lo ni reng tawh zawk a lawm.








(Story kalmuang, boring, inlo ti anih pawn tunlai pawlna ka dawn chhun a ni rih tlat mai ah buaithlak khawp mai, engpawh nise, vai film a changtupa leh misualpa last fight tur hun chho vel ang a tawp lam hnaih ah kan awm tawh aw, tun kar emaw kar leh velah chuan kan complete thei tawh turah ngai ang, chuvangin he story chhiar zawng zawng comment la pe ve eihlo te, pe fo tawh te, chhiar ve tho chhiar anga lang hreh tlat te, thatchhe ve hrim hrim te, hul em em reng te, midang comment dan entawn ching te...hihi (Ka dak theih hmel tawp) pawn story tawp hma ngei hian comment ṭheuh ang lê.) Tunah a fel zualin Ads an lo click nghal thlap ang, Ads click ṭhin zawng zawng leh comment pe ṭhin zawng zawng te CHUKS CHAWRH ULE.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:09 pm

GOMENASAI - by Ahmangaihi violette khiangte



CHAPTER - 35






Mihring te hi rilru natna inpe miahloin engtia rei nge kan inhmangaih theih ang? Ni tin hi angai reng angin lang ṭhin mahse, hun hian engthil emaw chu a her danglam tel ṭhina a, kan rilru sukthlek te chen in a lo danglam zo ṭhin.







Ka hna ka chawl anga, ka hun tam zawk ka pasal rawngbawlsak nan hmangin nupui ka nihna anga ka mawhphurhna chu ṭha takin ka hlen chhuak ang tiin thutlukna ka siam a, chu chu ka puin thu min râwn kha a ni.







Vawihnih ngawt nau ka chhiat vang khan ka pi nen an lo hlauthawng hle hi a lo ni a, kan chhungte nena kan inkar te, ka taksa dinhmun mai bakah ka pasal nena kan inkar chhiat phahna thil anih an lo hlau a, nupa tam tak fa neih theihloh vanga inṭhen chu ka hre ve ṭhin a, nei theilo tawp zawng la nilo mahila chulam ven thawnna rilru chu pu turin min duh anih kha, a tir khan ka inngaihtuah buai nasa hle a, hna kha ui ve viau mahila chhungkua a lawm pawimawh ber tiin ka inhnem ve bawk.







JH-a ka rinhlelh vang ni chuangloin ka pasal tana hmeichhe dang zawng aia tling zo nih ka duh a, hna leh inchhungkhur buaina nen chuan a tan hunawl ka nei thei manglo fo a, zan lamah lah ka hriselloh vangin kan nupa nun thlengin a nghawng chho der tawh, ka pasal in vui neiloin min hrethiam em em mahse mihring rilru nghet ber pawh Second hnih khat danah lek pawh danglam thei a ni miau si.







Ka nu ka va râwn ve pawhin "Chhungkua in an thlahlel che anih chuan an tan awm zawk rawh, i pasal pawhin a tana hun i pek chu a duhzawk ngei ang, inchhung luahlum la, chhungkua in hlim phawt chuan engkim a kaltluang zawk ang" tiin min lo hrilh nghe nghe.







Hna ka chawl ta chu inlamah ka tap chawt a ni ber, ka thi put a la reh theih mailoh vangin ka Bp a hniam hle a, nawmlohna han sawifak tur awmlo hian ka chau ngiai renga, pawn lama han lenharh pawh ka chak meuhlo. Fionai zingtin a lo la kala eirel leh inchhung sekrek khawih te min pui renga, JH-an thlahlawh angin lawmman a siam sak a, a phur thei khawp maia, a zarah keipawh ka awlthawng viau a ni.







Remremi ka chang ve chawt thunga, chawhma chauh school a la kal ṭhin vangin nitin a School kal hruai leh lam a ngaia, a tan chuan nu chan tak ka chang a, ka tan lah chu ti bawk, an school a va lam tura ka kal changte hian nu ho dangte nen ṭhuin naupang lo chhuah hun nghakin kan titi ho ṭhin a, midangte pawn anu ang riakah min ngai hlawma, nuam ka tiin min ti hlim ṭhin viau mai.







Tuktin ka pasal hna kaltur thlahin hlim takin kan invai liama, "Lo in enkawl ṭha la, tlaiah kan inhmu leh dawn nia" tiin duat taka min kuahin ka chalah a fawpa, chumi hnuah min hmangaih thu min hrilhin a kal chhuak chauh ṭhin, a lo haw leh hun nghakhlel em emin ni ka vuiliam ve a, chutiang chuan thla kan hmang liam ve zung zung ṭhin.







Kum tawp a lo hnai tain kum khat chhunga boruak nawm lai ber Favang a han thlen chuan keipawh ka hrisel ve leh ta deuha, inlam aṭanga pawisa peipunna tur thil te ngaihtuah ve ṭhain ka hria, a hma deuha Nu Muani thilsawi kha ka ngaihtuahna ah a awm reng ṭhina, Bank a ka pawisa khawl chu tihpun nan a ṭhat ka ring bawk. Tun laiah chuan a pung awma pawisa puktir chu Business pakhat a ni tawh a, a puk tu te pawn hlawkna an chang ve tho bawka thil sual em em niin ka hre hranlo, kan inṭanpui tawn tihna te pawh a ni zawk ang chu.







A hma a ka sawi ṭum khan ka pasal chuan a remti vak lo a mahse, he tia hna ka han neih tak lohah chuan a phal ve tawh maiin ka ring, kum thar lamah Lungleng lamin In sak ṭhat an lo tum ve bawk nen, pawisa mamawhna a sang ve rih tlat a ni.







Ka sawi leh ta chu a hma ang thoin a lo remti lo a "Hetiang pawisa inpuktir chu ba khawn leh te i ngai anga, an pek ṭhat theihloh che chuan i chan hlauh thei zawk ania, a tih chiloh ang; chu ai chuan Bank ah Demat account ka hawn sak che anga Company share lei lampang te i ti zawk dawn nia, a rintlak zawk ang" a lo ti a.







"Chutiang ka hrethiam hleinem, pawisa puk tir aiin a hlawk zawk a mi?" ka lo tih chuan "Investment tho ania, a hlawk zawka a rintlak zawk bawk" tih pahin min en vung vung a "Enga tinge maw pawisa thawhchhuah ringawt hi i tum mai le, ka chawm zo viau che a sin" a ti leh tawla, kei ka lo nui hak a, ani a beidawn hmel ngang mai thung.







"Kum thar lamah Lunglenga kan in sak ṭhat an tuma, a ban tal chu RCC a tih ve ka duh sia" ka tih chuan thaw huai hmel a pu a, "Chutia law, anih chuan kan puih ve a ngai hrim hrim alawm" chutah mitmeng dur khapa min enin "Enga tinge i sawi mai loh, i pasal ka nih hi, i pu makpa ka ni bawka, ka hriat miahloin pawisa thawhchhuah dan ilo ngaihven chung lehnghala" lawmlo awka fe hian a ti a, hmelpha dai chunga lo en in ka lo nuih a, a nui ve duh hauhlo.







Zanah chuan ka pu chu a bia a, insak an duhdan ang te zawtin an titi luam a, ka pu chuan "A ban leh Beam vel hi Concrete in kan ti ve ang chu kan tia, kan indaih dan a zir te pawh a niang chu" alo ti a, "A rem chuan kha lamah kumthar hman kan lo tum anga, kan sawi ho leh dawn nia, keini pawn engemaw chen chu kan lo tum ve thei ang" JH-a chuan a ti a, ka pu nen an inbe lai chu an piah lawk aṭang chuan lungawi em emin ka lo ngaithla a, vei tak te a ka lo vei, ka lo hahpui chiam ṭhin thil kha JH-a hnena thlen hi chuan awlsam te hian a fel duak mai zela, a lungawi thlak ṭhin viau a ni.







'Fa neih i chak em' tih zawhna hi ka zawt leh zauh ṭhin, keimah zawk hian ka chak ema, duhthu han sam duna fa kan neih hun tur sawidun hi nuam ka ti ṭhin, fapa ngei mai hrinsak ka chaka fanu ka duhlo tihna lam niloin a hmasa berah fapa neih ka duha a chhan pawh hriselna chin hriat a ni silo a a dang kan neih theihloh hlauh phei chuan a thlah kal zel turin fapa amah chhun em em mai hrinsak ka chak a ni.







"Fa neih chu ka chak a lawm mahse, kan pahnih chauh nih pawh hi ka hreh reng reng lo ania, kan nei ta lo anih pawhin nangmah chiah ka hmangaih reng dawn che tihna a ni mai a" a ni chuan a ti mai a, mipa nge nge thil kan thlir dan a dang bik ṭhin teh e, keichuan fa neih theihloh mawlh ka hlaua, ka hrinsak theilo anih chuan a laka ka dinhmun chu hniam dawn riau te in ka ring thula, ngaihtuah loh loh ka ngaihtuah kual ruai reng ṭhin.







Bungraw lain Nu Muani leh patea an zin a, chumi hlanin Irenei kan hnenah a lo riak phei a, duh in ang ta nafam chu Reny nen an inkawp fuh ngang mai bawka, Jonaka hoin an lo inkawm fo tawh a, mikhual room ah pawh muloin Reny bulah a mu a, zantir aṭangin room ah an inkalh khum hmak ṭhina, an rui dun zantin a ni ber. Han zilh vak theih lah a nilo, u zawk alo nih ve bakah Reny a kawm tlat mai si a, ka ṭha en liam mai mai a ni ber.







Mahse, a lo riah aṭang chuan thil bo a awm fo maia, Apuii bungrua hlir a ni bawk si a, a inthlahrunawm duh ngang mai, Irene-i ka zawh lahin a lo ṭeu nasa maia "A room ah ka lut ngailo hrim hrim" a ti ve tlata, Apuii lungawilo in a zawh ve pawh chuan a ṭang ṭâk maia, Reny in a lo ṭan ve bawka, Unau an inhmuh thiamloh phah der bawk a, Irene lo riak chu a tih chiloh ta kher mai.







"Haw phei mai rawh, thil a dik dawnlo" ka ti ta ngawta, lungawilo deuhin a haw phei a, an inlamah Reny in a va lenchilh ve leh thunga, enge maw changa pawisa min puk sak zauh a chinga, phalloh dawnin min dil ngawrh thei si a kan inpuk tir leh nge nge ṭhin, puk hming te hi a han pu ve tak nain a lakah chuan a let beisei ngam tawh chi a ni der lo.







Chawlhni tlai khat chu inchung zawla insuk ka seng laiin Apuiin ring fahran hian min lo ko a, inhnuaia ka chhuk chu ka nu hoin min lo en ṭhap a, an hmel aṭang chuan thil ṭha lo tak a thleng a ni tih a hriat theih.







"Ka tlereuh te hi engtia lo tih nge i tuma?" Apuii chuan a lo ti bak hlar a, min ti bangbo kher mai. Chutah sarang a tlereuh enge maw zah in bawk hi lo lek chhuakin thip fahranin min melh a, "Belbawmah hei hi ilo dah thukru a ni maw?" a ti zui zat a.







"Teuh nang" ka lo ti hluai a, sawi ngaihna ka hrelo kher mai, kei min puh ringawt chu ka hrethiamlo hle bawk.






"Amah ani ngawt lo ang, i dahna i hai a ni lo mâw?" aw damdiaiin ka pa chuan a lo ti a, "Belbawmah engvangin nge ka tlereuh ka dah ngawt ang" pakhat zawk chuan a lo ti bak leh hlar a. Tlereuh chu Remremi Chocolate zawngin a lo va hmu ni ngei tur a ni, Remremi zawtin a awmna laite chu a sawiṭhat tir a, ka nu leh Apuii chuan min ringhlel zetin min en bawk, ka pa leh Michaela an ngawi ran thung.






"Nangmah bakin saw belbawm saw i hawng ngailo a nia, sawi fiah vat rawh" a ti leh mauh mai.






Chutih mek laichuan JH-a leh Liansangzuala kalchhuak an lo haw ve hlawl a, chutia choka luhna bul lawka kan lo ding ṭhap chu ngaihṭhatloh hmel fe hian minlo en a "Enge in tih a?" JH-an a lo tih rualin "Kan indawp mek a nih hi" Apuiin a lo ti hmanhmawh a, "A va mak ṭhin e aw" ka pain a lo ti ve bawk.







"Engthilah maw?" kan lampana lo kal hnaiin keimah zawk chu min lo en a, "Ka hrelo" ka lo ti mawl tawp thung, a awihawm loh lutuka nuih te pawh a ti za lek lek zawk a ni.







"Apuii tlereuh bo choka belbawmah a lo awm anih hi" ka nuin a lo tih rual chuan tlereuh awmna sarang chu Apuii chuan a u chu a lo pe vat a, Liansangzuala pawn a lo thlek rang khawp mai.






"Engtika bo nge ni?" thlek vat vat pahin JH-an a ti a.






"Kar hmasa bawr vel khan, tlem te te in a bo a, kha a hlawmin Remremin a rawn hmuchhuak a nih kha" Apuii chuan a ti leh a.







"Tichuan Mambawihi hi in ringhlel a ni maw?" ka lam lo hawiin min lo en a, hmel nur nanga lo en vein "Ka lak a nilo" ka lo ti ve vat a, tlereuh chu Apuii pe letin "Chianna i neih loh chuan engemaw hlekah midang puh zel loh tur" a ti leh maia, Apuii lawmlo hmel chu hmuh nuam tak zawng a nilo.







"I hmuh let tawh ber a hnu duhtawk rawh" ka pa in alo ti ve bawk.






"In nu bakin belbawm saw a khawih ngailo aw" Apuii aw chu a vin ṭha leh tawh viau mai.






"Ka lak a ni lo a tih kha i hria em?" JH-an a lo ti leh khauh a.






" A chiang reng a lawm, a lo awm ve hmain engmah a bo ngai hleinem"






"He inah hian a ni chauh an awm loh hi" JH-a bawk a ni. "Ani bak tunge rinhlelh tur dang awm chuang, i nau ten engthil mah an chheprelh ngailo" ka nuin a lo ti ve leh a, huhhh....min puh thluk an tum ngar ngar ni berin ka hria, tlereuh ka lawmloh tehlul nen enga tan nge maw ka han tih tehlul ang ni.







"A duh anih chuan a lei ve thei a lawm" ka pasal aw pawh a khauh sawt ta viau a, thinrim tak angin langlo mahse a lawm vak tawh lo tih a hriat thei bawk. Liansangzuala lo inrawlhin "Apui in In te chu mi lutchhuak an awm reng a lawm, Mambawihi a ni ngawt nang" a lo ti dek dek a "Chungkaw thilah lo inrawlh ve suh" pakhat zawk chuan a lo ti hmak a, "A tawk tawh" JH-an a lo ti vin hluk a, a lawmlo tak zet tawh.







Thil a kal fuh lo zo leh dawn a ka hriat vangin JH-a chu ka mitmei vat a, thinrim taka Apuii kal tau nghawng nghawng chu enin thawk ala hawk a "A pasal kha phone ula rawn hruai leh teh se, inchhunga buaina nei reng ringawt mai" a ti zui leh hlaka, chu chu ka nu ngaihdan alo nilo ve leh thung "Khatin i nau ti reng reng suh, a duh vanga heta awm anih loh hi" a lo ti ram hmak a, a kham ta deuh a niang a nu chu chhang zui tawhloin ka lam a lo hawi a "Inchungah lo chho lawk teh" tiin min inhersan a, Liansangzuala nen kan zui ve nghalthuai bawk.






"Chhunah lo kal ṭhin an awm em?"





"Tun hnai chuan Judy leh Irene-i bak an lo kal hleinem, zing lamah Fiona-i a ni leh mai a mahse, Fiona -i te chu rinhlelh chi ni pawn ka hrelo, Irene-i kha a ni mai thei zawk" ka ti sap sap a, "Fiona chu a ni lo ang" Liansangzualan a lo ti ve a, keichuan Irene-i anih ka ring hmiah a, ka thil a lo ruk tawh vanga ring pawh ka ni, tunlai ruihna tur pawisa a mamawh em em
reng bawk si a, heta a lo riah hnua thil thleng a lo ni vei nen, ka ringhlel lo thei lo.







"Hmangaihsangi a nih dawn chu" chang fel fawlin JH-an a ti a, Judy chu Apuii sawmin nitin deuh thaw alo kala, Apuii room ah pawh a lut fo a, a lo nih ve theihna chen pawh a awm tho. Mahse, chiang tak lo chuan a tumah mah chu ka puh nghal ringawt duh biklo.







Zanah Irene-i phone in ka va zawt a "Chutiang tlereuh tih vel engahmah ka tilo e, ka duh chuan ka nu ka chah ve thei reng, zawrh tur pawh a lo hawn ziah a lawm mawle" a lo ti kha kha a, "I lak a nilo tak zet maw, i lo nih hlauh si chuan midang bula lo ṭan viau che hi a tihchi loh teh mai a nia" ka ti leh dap dap a, a ṭang ve nasa mai si a, han dawp vak theih pawh a ni biklo.







Boruak a ṭha ve ṭan dawn chauh emaw tih ah kan buai leh ṭhin a, chutiang karah chuan a meizang hlap tu ber chan hi ka chang ziah bawk si a, ka pasal pawh hian a ni em em tawhlo chu min ti ru ve riau tawhin ka ring a ni, min hmangaih em vangin min la ṭan hram hram te pawh a ni tawh zawk ang.







Judy lo kal leh chuan min nuihzat hle a "Kut kem i lo nei lehzel a ni maw?" min nuih pahin a ti a, Apuii inchhungah a awm ve reng si a, ka chhang anih chuan kan inchhang bah leh zo dawna ka hriat vangin ka insum hram hram a ni ber.






Reny lahin "U remruata a lo kal a nilo maw?" a lo ti he haw a, Remruata chu kan inah a lo kal khat khawpa, a lo kal chang pawhin choka ah thil a lo ei maia, a bak room dang a kal ngai awm reng ka hrelo, Remremi ka hruai hlan emaw a a ruka a lo lut te anih ngawt loh chuan.


images (5).jpeg



CHHUNZAWMNA






Rilru bet manglo deuhin ka awm reng a, tunge Apuii tlereuh la chhuaka kan choka belbawma lo dah ringawt duh tur chu, Remruata ti dawn ila ani chuan la se belbawma dah loin tihral dan a ngaihtuah daih zawk ang chu, a......a ni chu a ni theilo.






Irene ni ta sela chuan a ni pawn dah tawp lo a a hawn ka va ring em! Anih Judy ni ta zawk se, min tal awhtir duh vang hrim hrim pawn a ni chuan a ti duh maiin ka ring, a tih ni tak tak ta se heng thil vang hian enge maw hlawkna neih a in beisei reng reng ang le, JH-a vang ti dawn ila ka pasal in min ṭan zel tih a hresa tho awm si a, ka chhungte nen inngeihlo takin awm reng sela min tih vang a ni thei zawk a ngem, chu chu thil nithei tak a ni.






Mahse, beisei loh deuh chhanna ka hre ta tlat mai.






Thawṭan tlaiah Remremi nen Ni Kimpuii dawrah thawmhnaw thleng thar en turin kan kal dun a, "I nu a lo pengkawi dawna Remremi chu lo awm rawh se, pheikhawk ka en pui nghal ang a ti anih chu" Ni kimpuiin a tih vangin Remremi chu ka haw san a, In ka thlen leh chuan kawngka a lo inhawnga, sitting room lam pana ka kal laimekin choka a phone hmang thawm ka hre zui a Reny a ni. Tunge a biak ka hrelo mahse, ka hming a lam ri tel tlat!







"A zialo tak tak a ni, ka tumloh zawk an puh daih a, kan monu zawk an puh a ka tum zawk chu a thawi pawhin an ringhlello mawle, an lo van ngai fel awm em em, an mawl ka ti hlawm a sin aw..." a ti vawng vawng a, a thilsawi awmzia chu ka hrethiamlo nasa.





A tumloh zawk kei min puh a maw?






"Aw....thil ruk ching anga an hriat kha a ṭha ber a lawm, en hrek hrek sela, ṭih riau tawh sela ka ti, ka u lah hian hlawh nei ten a chhawr a, i birthday kan lawm dawn zana chahbi a kawl tir duh ringawt te kha ka ngei a nia" a ti leh barh barh a.






Ka rei leh!.....chunu mai mai chu, Fiona-i puh chhiat a lo tum a nih hrep chu a.







"Aw ni e, U Puiin midang hma ah kan monu zawk a dawp vaka, ka u pawh a thinrim nasa mai mawle, an in suallo chauh, ka tum danin kal sela chuan a han fuh chhoh dawn tehlul nen, U Puii leh Mambawihi inkar chhia ka lo theihnghilh daih a, Belbawmah berkher ka lo dah a, a pawi tak tak a ni" a chek zui tlat tlat a, va thawh lawka va ṭham nek mai ka lo chak a, amah vanga inchhung khur buaina thleng lah a vei pha ve der silo a, chhungte lahin rukru ah hial min ngaih phah a nih kha.







"Ngawihbo pui hmak a ni tawh mai, ka buai peihlo, a hma pawn an inhau ziah tho a lawm, a ṭha ve leh vek mai ang" ti a a sawi lai te chuan ka lo inhumruh ṭeuh tawh.







"Engtin emaw tihdan tur ka ngaihtuah leh tho ang, hmanni ah pawh Upuii kawr an suk tur kha Machine ah ka lo thlak a, a chhe veka, chutah pawh kan monu vanduai-i tho a puh a....hehhh....kan monu hi mi vanduai a nih hi, Lalchhete-i lah hi a him pial zel lehnghal a, zawnga tuar ai Ngau in a tuar a ni ringawt, mahse, Vanduai-i vangin a lawm hetah a lo kal ziah phah tiraw, Naute kha chhiatlo se hrisel ve deuh sela chuan Fiona-i mamawhna a awmlo ni mai tur a nia, a pawilo ah ngai mai ang" a nui har har reng te chuan min ti sa pup pup a, ka dawhtheih zawng a ni ta tlat lo.







Choka lam pan chuan ka pen phei mawp mawp a, ka hmel a hmuh rualin a nui tawp chiang hle bawk. "Nakinah ka lo be leh ang che" tiin phone chu a dah vat a, chutah min melh tur khai pahin "Rukru ang mai, thawm te nei ve ta che, min ti phu a lawm le" a lo ti kha kha a.







"Nangma lo tih vek a ni maw, i u tlereuh lain Fiona-i ruk anga lo sawi i tuma, chu chu keiin ka lo tuar a" thinrim luatah ka ṭawng ring hle bawk.






" A lo la ngaithla ru zui..." ti a ner nak chungin a mit meng lian kal mai chuan min en a, "Naupang te te si i rilru a va chhe em em ve mawle" ka tih laiin ngaihpawimawh loh hmel fahranin a hmui min pehsawi khum leh khera, "Tum danin thil a kal lo a ni ve mai a lawm" a lo ti nghat chu ben hrep mai ka chak a ni.







"I thil tih vanga chhungkaw buaina te kha i hre ve reng reng em?" ka zawhna chu chhan pawh min chhang lo, a ṭhutna aṭang chuan a tho tharh a, "Eng vangin nge Fiona-i rawn che ve pawh chu i lo ngaihtheihloh viau a?" ka lo ti leh a, henu hi ka hrethiam theilo, a tih ai a ti peih a zeng pawh a ni lo, Fiona-i lahin engtin a ti pawh a ni silo, engah nge a han ngaihtheihloh em em ringawt ni!






"Ka hua a ni mai a lawm, lo buai ve suh" a lo ti bak hlar a, "I nasa emai, i U Puii hnenah ka sawi ang" ka ti leh chu a haw nasa mai, "I sawi a ngailo e, i ngam chuan han sawi na teh aw, a pawi dawn ania" a lo ti leh kha kha a.







"A pawi zo vek tawh zawk a nih hi, ka nihna lo pui a midangin min ngaih ka duh bik reng reng lo, Apuii lo haw sela ka lo hrilh vek ang" ka ti nawn leh a.







"I duh leh sawi rawh, a ring chuanglo ang che" ti hmakin choka a ṭang chuan a kal chhuak nghawng nghawng a, he nau te hi a mizia hi mi an lohna riau a nei nge mawni dawn ni! Tunah pawh thil sual ti angin a la inngai miahlo chu anih kha, infiam ang lek ah alawm le a inngaih le, "Tum angin thil a kal lo" te a la ti lehta nghal a.







Rei vaklo ah Apuii a lo haw a, a room ah a lut tlang nghal daih a, ei ka rel lai a nih vangin a hmel pawh ka hmu hman lo. Ka nu leh Remremi te an lo thleng ve thuai a, Apuii pawh towela a sam tuam luk chungin alo chhuk ve a, choka kawngka bul maia ka lo ding chu melh khat pawh min melh chhin eihloin min kal pel a, "I tlereuh kha ka ruk a ni lo ania" ka ti chu a lo hawilet rang khawp mai.







"Reny anih kha, a room ah a awm va zawt chiang rawh" tih zawng sawiin thildang ka tih san a, min awihlo deuh chunga Reny room lam a pan chu a lo chhuah leh hun ka lo ngaichang reng a, lo chhuak ta mailoin ka nu a rawn au a "Lo lut lawk teh" a lo ti lang lang a, ka nu luh tak chu chuan rei an awm lo, an pathum chuan an lo chhuak a, keichu min lo ko nghal bawk a.







Sitting room a ka va phei laia min lo en dan chuan awm a ti nuamlo ram ram thei, misual melh takin a lawm minlo melh hlawm le.






"Tinge Reny puh i tum ngawta, keipawn ka sawi zui tawhloh hnuah engvanga rawn thar thawh leh nge inih?" Apuiin a lo ti khar khar a.






"Mi dang hmaizahna hi ilo nei miahlo a nih dawn hi" ka nuin a lo ti ve a.







"A pasalin a ṭan vang hian kei tak emaw a inti tawh a nih hi, keini pawh bawlzan mai mai theihah min ngai anih hmel" Apuii bawk a ni. Reny chu a ngawiran a, ka va en chuan rei pawh min melh ṭha ngamlo, a ban thenin a hawikual ruai a, ka dawhreng thei ta biklo, dawta inpuh hi ka duhlo a, rukru a inpuh ngat phei chu na ka tiin ka tlawmlak ve na zawng tak a ni.







"I thil tih dan kha ṭha deuhin sawi vat rawh, Fiona-i puh tuma ti inih kha i u leh i nu hi hrilh rawh" chang fek fawkin ka lo ti a, "Engmah...ka ti lo e" bak zetin a lo ti hlar thung a, engmah ti lo angin vawin kan inbiakna te pawh a hrelo der hmiah mai.







"Reny, Fiona-i puh i tum tih chu enge a awmzia?" Apuiin a lo ti vat a, "Awihawmloh e a, induh leh Fifi pawh zawt ula kan inhaulo a intihbuaina kan nei reng reng lo" a lo ti leh zung zung a, thawk a ti hah a ni, tunah pawh thiamlo zawk ka ni leh der tawh, Apuii bula sawiloin JH-a emaw ka pa emaw lo hrilh zawk ila ṭha tur.







"Eng ang mo nge maw ka han neih che hi le, pasala farnu te ngeih theilo reng reng, thubuai nei reng ringawt bawk si..." thip fahrana min melhin in ka nu chuan a ti a, sawi ngaihna pawh ka hre tawhlo, a ti tu berin 'ka tih a nilo' a ti mauh mai si a, ka insawithiamna lah vut lak vawih an sawi ang chauh a ni.







"Lalbawihnoi chu min ngai rilru chhe ve hle mai" nui lek lekin Reny chuan a ti leh a, "Reny thudik chu sawi mai rawh, i nu leh i u te; i chhungkua an nih hi nangchuan engmah chân tur i neilo a mahse, khatia i zep a kei min puh tlat a nih chuan ka zahawmna zawng zawng a chhe dawn a sin, mo sualtak ka ni ringawt dawn a nia" a hriatthiam theih beisei takin ka ti leh a, a hmel ah chuan inthiamlo hmel a pu ve ta deuhin ka hria.







Apuii chu a en renrawn a, chutah ka lam lo hawi leh in a tum zui bar a, "Ka ti anih bawk lo" a ti leh hmak mai. Ka ngaihdan a ni biklo chutia inpuh ngawt aichuan he inchhungah hian ṭan tu ka neilo ani bik hleinem, ka pa awmlaiin sawiho ila thu a fel thei zawk ang, JH-a pawh ka hrilh mai angai a ni.







"I u lo haw hunah ka lo hrilh anga a bulah chuan dawt sawi tawhlo ang che" tih leh paha inhersan mai ka tum chu tu emaw hian ka tukkhumah a rawn beng zawt a, min bengtu chu Apuii a nilo a, ka nu zawk a ni, hamhaih zetin a hmel chu ka en a, min beng ringawt chu ka hrethiamlo hle bawk!







A vawihnih nan ka bekah min rawn beng nawn leh a, a kut thlak chu ana lo a mahse, ka rilru a na takzet. Kut thlak ngai hial khawpa tihsual ka neih ka hre silo a, he thilah kher kher hi chuan thiam ka inti ve em asin.







"Enga tinge i ben ngawt!" Apuiin a lo ti chul a, Reny pawh a bangbo viau aniang a nu chu phawk deuhin a lo en a, ka nu hmel erawh kei min huatna hlirin a khat thung.







"I pasal laka vui thu i thlen zet zet reng hian ka mit a ti kham zozai tawh, min hmaizahna nei miahlo a i la rawn sawi ngam zawk chu le.....i awmna hmasa ah pawh i chhungten an ngeihlo che a, pasal chhungte ngeih thei chuang bawk silo, inenfiah hle rawh"







Ka mittui rawn luang chu hruk pahin ka kalsawn ta thuai a, kawngkhara JH-a lo lut mek chu ka va hmu bawk a, min hmuh rual chuan ka hmui hupin inchhung kailawnah chuan ka tlanchho nghal hlawk hlawk a, ka ṭap tih a hriat hmanloh hram ka beisei.







Kan room ka thlen rualin thawk ka la vak vak a, ka hmai phihin ṭaplo ang leh danglam engmah awmlo tur chuan ka in siamrem ve ngial a mahse, ka ṭah a chhuak zual tet tet mai lehnghal.







JH-a chu alo chhoh tak mailoh vang chuan midang ho nen khan an inbia a nih ka ringa, engthil nge an lo hrilh dawn ka hre chiang hle a, ka hlauthawng nghal ruai bawk, a rilru an lo hmin mai angem, kei min ringlo in an thusawi chu a ring a ngem? A vawikhatna atan rilru chhia leh mahni hmasial takin ka pasal hauhna rilru ka pu a, ka lam ṭangloin a chhungte lam a ṭang ang tih ka hlau hle bawk.







Kei chu hmeichhia ka ni, hmeichhia a zawnga derdep ber mai, mahni suangtuahna ringawt pawh chauhpui ṭhin ka ni. Ka ngaihtuahna ngei pawh huain sual ka in ti a mahse, ka rilru a ni tlat si a, duhlo eng ang mahila ka ngaihtuah miau a ni. Hmeichhia hian rilru leh thinlung hi a hrang daihin kan nei ani mahna, mipa thinlung chu a rilru a ni maia, hmeichhia erawh chu kan ni velo.







Tuna ka pasal laka ka rilru pawh chutiang chiah chu a ni, a chhungte laka min ṭan lutuk ṭhin te khan harsatna min siamin midang nena kan inkar buaina a ti punlun zawk ṭhin a, lawm viau mahila ka inthlahrung ṭhin a, min ṭan vak ṭhin lo sela ka duh zawk mah ṭhin, a lakah pawh a zawng zawng ka hrilh duh ngailo a tunah pawh chutiang chu thleng sela ka duh chuanglo mahse, kei min ṭanlo a midang a ṭan ka hlauthawng leh lawi si a, chutiang chuan ti sela ka rilru pawh a na viauin ka ring.







A pen ri ka hriat rualin ka hmai chu ka tuai thuak thuaka, sofa ah ṭhuin thinphu dep dep chungin a lo lut tur chu ka lo en bawk, kawngka ah a lo pen luta a hmelah chuan eng rilru nge a put ka hre theilo mahse, engthil emaw chu a ngaihtuah tih ka hre thei.







"I chau em?" aw ki pangngai takin ka ti thei hram a, min chhanna aw chu a zawi ṭha hle thunga, lungawilo hmel a pu tlat bawk.






A inbual lai pawh chuan inhnuaia chhuk loin ka nghak reng a, a lo chhuah leh hnu chuan a hmel lungawilo deuh pawh a awm ta biklo, a awmdan tur chu ka hrethiamin a lakah chuan ka inthiamlo em em bawk, dinhmun laklawh deuhah ka dah a, min ṭan ziah laite khan a rilru ana ve vawng vawng ṭhin in ka ring a ni.







Zanriah eilai, kan ngawih ṭhep ṭhawp laichuan beiseiloh lutuk mai thil ka pasal chuan a rawn sawi a, kan vai chuan min ṭhawng bawk aniang amah ngawt chu kan en ṭhap a, a ni a thutak ngang mai thung.







"Kar leh aṭangin kan insuan chhuak ang" a ti mauh mai.






"Chu in dan i tum a maw?" ka pa chuan a lo ti nghalthuai a. "Aw, rem iti tawh em ang chu" ka pa râwn deuh pah chuan a ti leh a, midang lah chuan kei chu min rawn melh leh ṭhin.







"A...rem han tihlohna em em tur phei chu a awmlo a mahse, enga ti rum rum nge ni, lungawilohna nei te pawh in va ang ve mawle?" ka pa chuan ti lehin kan nupa chuan min en tawn zak zak a, chhan ngaihna pawh ka hrelo, in dan chungchang engmah ka pasal chuan min sawipui biklo a; a tih ngaihna tak pawh ka hre biklo.







Choka a thleng ka sil lai chuan sitting room ah an ṭhu khawma, an ṭawngri chu ka lo ngaithla ve reng a, kan chhungte chuan in dan chu an hnial a a bikin ka nuin a phallo hle, Reny lahin "In in dan chuan ka lo awm ve ang" a lo ti chhen bawk.







"Zep miahloin lungawilohna i neih chhan han sawi teh?" ka pa chuan a ti a, ka thil tih lai dah meuhin JH-a chhan na chu ka lo ngaithla a, ka â riai maiin ka hria.







"Ka nupui in ngeih silo a, awmho reng hi a tu lam zawk zawk tan pawh thil nuam a ni tawhlo, a tan chauh nilo in nangmahni tan pawh kan insawn chhuah mai hi a ṭha zawk, hetia kan chen ho reng chuan nakin lawkah chhungkua kan inhmelma ringawt ang tih pawh a hlauhawm alawm, kan in dan vangin kan in mi hran ta tihna a ni chuang lo a, ral khat aṭanga intih ṭhat a awl tawh zawk ang" ka pasal chuan a ti a a ni.







A englaiah khan nge kan kalsual tih hreloin, hun liam tawh chu thlak thei tawhlo mahila dinhmun siamṭha lehin bul kan ṭan ṭha leh thei a lawm, ni e...bul kan ṭan ṭha leh ang.







(Thil ropui deuh chu maw ka nin em em lai ka ziak pel ta, ka duh lai ka ziah chak zek zek lai plot kan thleng chho tawh dawn e, a changtute hi an free tawh dawn nasa mai si a....8+++ chho hrep maithei a ni, comment leh click min pe ru aw, chuan like button kha hmet keuh bawk ula)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)