GOMENASAI by Ahmangaihi violette khiangte (Completed)

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: GOMENASAI by Ahmangaihi violette khiangte (Completed)

Unread post by Ngaia » March 28th, 2021, 12:07 pm

GOMENASAI - by Ahmangaihi violette khiangte




CHAPTER - 24






"I lo buaina tur engmah a awmlo, ka pasal tur chungchang i sawina lamah i inti mualpho mai mai zawk a ni" ka tih chuan hmel danglam eihlo in a la nui thei cheu a, kei erawh thinrim luatah ka aw thlengin a khur zo a ni ber.







"I lo hre ve tawh a ni maw, ka chanchin i hnena a sawi ka ring renga, nupui neih dawnah pawh min la sawi bang thei biklo a nih chu" nui hak chungin a ti a, min zahpah nei lekloa a ṭawng sak sak reng chuan ka ngaihdan a pel takzet.







"Ka hre chiang tawh khawp mai che, Bisexual i tih tih pawh min hrilh a lawm, engtin nge inlo khawsak dun ṭhin lam kha chu sawi sawi mahla a ṭangkai tawhlo, JH-an a duh tawhlo che" ka lo ti ve sak a, a mitmeng inthlak danglam nghal ruaiin thip zetin min melh a "Kan en ang chu, i lakah a duh a hmuh leh hmuhloh a thu a niang chu" a ti ram hmak a, a la duhtawk mai lo "Tu nge atana tling zawk chu a hre vat mai ang" nuisak chungin a ti leh a.







"A chiang viau tawh a nilawm ni, keimah zawk anih hi min neih dawn" nuilui sakin ka ti ve ngat a, kan inmelh ṭûr ṭha ngang mai.







"Chona angah ka ngaihsak ang che" kan hma a milemin a haklai Nighty dum pan ṭha zet chu enin "Hei hi ka lei ange, tu emaw min ti hrechhuak tlat" nuihak chungin a ti leh a, a chezia chu enin ka lo inhumruh ṭeuh ringawt a, midang mitmei veng hauhlo a han ankhum chiam ka duh rum ruma, ka la insum thei hram hram a ni. Min tih thinrim a tum hrim hrim tih ka hriat vangin chutianga han chêt em chu ka duh biklo.







Milem pakhat zawkin a haklai Maroon red chu ka ban ve vat a, a lo nui hak chu enin "Rore par aia Phuihnampar thlan chhan tur a awm hleinem tiraw" ka ti deuh kher a a huat hmel kher mai. "In khatah kan cheng ho dawn bawk a, a nuam viau ang chu" ner sak sak chungin a ti leh a, a thilsawi awmzia chu ka man pha ta chiahlo, in khata chen dun a?







"Enge in lo tih a?" tih ri vang chuan ka hawilet vat a, maktih hmel zetin Alawmin min lo en a "Lo en ve teh, hei hi analh em?" tiin ka Nighty thlan chu ka lo hmuh nghalthuai a. "Awi leh! Mambawih a nalh lutuk" Alawmin a lo tih laia ka bula mi lo thaw hak chu ka va en a, ngeiawm thei angber turin ka nuih kher bawk a, tifuhlo chu a inti ve viau maithei, a duh duh dana inṭawng khum tir ka tum biklo, JH-an chiang takin a duh tawhloh thu min hrilh tawh a, ani ṭawngkam chhe sathliah vanga lo intih hrehawm chu ka tum hauhlo bawk.






"In duh zawng in hmu em?" Apuii lo chhuakin a lo tih chuan ka thil thlansa ho chu ka lo la nghal zung zung a, a man kan pek fel hnuah thil eiturin kan inzui chhuaka, Judy chu a tum bar reng tawh.






"Nichin khan nula nen khan enge inlo sawi a, in awmdan kha; in inhau a nilo maw?" ka bengbulah Alawmin a lo ti sar sar a, "Nakinah ka hrilh ang che" ka lo ti ve vat a.







"Tlaiah kan inah chaw kan eikhawm dawn ania aw" Apuiin a ti a, JH-an min hrilh tawh tho nain ka hniala mahse, a hnial luih theihloh "Kan inbuatsaih tawh a lawm, kan khualṭha tur te ber in lo kal lohin le" a lo ti hmiah a, Alawmi lah a phur phurah aṭang bawk si a, keimah chauh niila chuan ka kal kher lo ang, inneih hma a an ina va kal fo chu ka zak deuh tlat.







"E...in lo la hriatloh takin, Judy hi kan unaunu tho a nia, kan inah a cheng ve rih dawna, Fiona leh Zualtei pawh kan ṭhenawmah an awm a, kan inkawm ho thei dawn a, kan bazar ho anga engkim kan ti ho ṭhin anga anuam viau ang" Apuiin ṭawng mawlh mawlh laichuan phawk lek lekin ka lo en a, ka awih lo rum rum hial a ni.






Judy an hnenah a chêng ve dawn a maw! Enge thil awm zia!





Ka thil ei ka hak lo chauh a ni, Judy lo nui ka va hmuh rual chuan ka ngaihtuahna a buai hle ringawt tawh, JH-a ngaihzawng hlui nen inkhatah maw? Karei leh! Ka â thei mai dawn, ani nena inkhata chen dun chu inhremna tluk hial aniang chu.







Thawmhnaw ena kan kal lehlai te chuan rilru ah thildang a leng meuh tawhlo, Judy leh Reny te thil en dun lai chu ka va melh leh ṭhina, inneih ka phurna pawh a reh vek thei hial a ni. JH-a ka text a "Tinge Judy hi in hnenah a cheng dawn tih min hrilh loh?" ka va ti tawl a, a chhanna ka dawng mai bawk si lo a, ka tawt up up a, Bazar mood lam reng a lang tawhlo.







Alawmi kawr ka leisaka, a lawm thiam khawp mai, awm ve lo phei sela chuan ka talbuai zo vekin ka ring, "I ning tawh a mi, kan haw tawh mai dawn a mi niang?" Apuiin a lo ti a, ka hniallo khawp mai, JH-a hmuh vat ka ngai, he thil hi sawipui ka duh a ni.







Haw lamah chuan Reny leh Judy an inphur haw a, sambuang Zamte ti a an koh chu kan bulah a lo chuang thunga, Judy bulah ka ṭhu tawhlo chu tlem chuan ka awm a nuam deuh, haw kawngah JH-an minlo phone a "I message kha.." a lo tih rualin "Kan lo haw meka" ka lo ti vat a, midang awmve laia sawi chu ka duhlo.







"Lo thleng phawt la, kan sawi dawn nia" a lo tih chuan chhang tawhloin ka dah daih a, amah pawh ka ngei lek lek mai, an hnenah Judy a awm ve renga hriat pawh ka hrelo ania, tukina alo kal ve te pawh kha mak ka lo ti em em a, engtin nge ka lakah a lo zep reng theih zawk le!






An Gate a kan tlan luh laichuan an kawt hla deuha JH-a leh Liansangzuala lo ding chu ka va hmu thei a, amah ka hmuh rual chuan ka lungawilo zual ting mai bawk a, chutih laiin Alawmi erawh phur hmel em emin a hawikual a "I awmna tur chu a van nuam deuh ve le" a lo ti sar sar a, ka phurloh zia han hre ve ngat sela chuan chutiang chuan a sawi bik hauhlo ang.






An thawmhnaw bag khaiin midang chu an chhuk sap sap a, Motor lampana JH-a lo kal mek chu enin thawk ka han la te te a, ka che muang lutuk chu Alawmin min lo en ve reng bawk a, ka awmdan chu mak a ti tih a hriat reng. "I nuamsam nange?" tiin min lo zawt ta reng a.





"Nuam e, ka chau ve deuh aniang" Motor aṭanga chhuk pahin ka ti a, JH-a nen kan indinchilh nghalzat bawk. Tawitein min min lo nuih a, keiin lawmlo fein ka lo en ve thunga, min en chîk bawka ka ngaihtuahna te chu a rawn hre hial in ka ring.






Ka bag khai lo ban a tum chuan hnunglamah ka lo dah vat a, engmah sawi loin min en a, midang awmlai anih vangin ka sawiduh rih biklo, biakloh ah ka tlak ringawt a, Apuii nen an inbiak laite chuan ka lo en ve renga, a nui suk suk hmel te chuan min ti lawmlo zual ting mai lehnghal a.






Inchhung lam pana kan kal laichuan "Biak che ka duh a nia" ka ti a, chutihlai chuan Gate-ah Reny Scooty pawh a lo tlanlut ve mek a, an lo thlen ve hma a JH-a chu biak fal ka duh, Alawmi chu Liangsangzuala leh Fiona te nen kan hma ah an kal a, min lo ngaihven vaklo bawka ka awmdan chu an hre ve kher lo ang.






"Min lo zui rawh" JH-an a tih chuan inchunglamah kan inzui chho a, a room kan luh rualin kawngkhar bulah chuan ka ding renga, a rawn lehhawi lai te chuan rum theih tawpin ka lo melh bawk a, a nui tawi tak mai. "Ti nge i zêp?" vin lek lekin ka ti zui a, "Ka zeplo, hrilh che ka tum a lawm" a lo ti sam et a, tun huna ka tum la tih chauh chu ka hriatthiam zawng a ni lo nasa.






"I bialnu hlui nen inkhata min chen dun tir i tum a maw?" ka ti vin ṭhat a, ka thinrim em em laia a Cool ruih reng chuan thinrim a ti zual ting a ni.






"Engah mah ngai suh" a lo ti sup a. Huhh....awih a van harsa ve! Engah mah ngaihloh theih te chu ka duh a lawm mahse, vawina min ṭawngkhum dan zawng zawng te kha, engtin nge engahmah ka han ngaihloh theih tehlul ang.






"Thla reilo te chiah hetah a awm dawn a, kan tan buaina tur a awm lo, i ngaih ti ṭhalo duh suh" ka lam rawn pana min kuah mai a tum chuan ka lo tawlhsawn vat a "Khanu nen khan kan inngeihlo" ka lo ti ram hmak a.




"Keipawn ka ngeihlo" min en run chungin a ti a, beidawn thlak chuan a!





"Ih maw....inneih pawh hi ka phurlo zo vek tawh, ka phurna a bo ṭhen tawh" ka ti leh tawla, "Kan ngaihsak angailo, kan mikhual angin ngai tawp la, rei tak a awm dawn chuang hleinem, ka chhungten heta awm tur hian an ti tlata, ahma pawn kan hnenah a awm ṭhin tih ka hrilh che kha" awki damthlupa tiin ka biang a rawn dawm a, nui lek lek chungin min en bawk.






"Engtin nge i nuih theih a, ka ṭah i ti chhuak a nia" ka lo ti vin leh hlak a. "Ka inthiamlo deuh a, i phurna a reh ṭhen bawk si a" hnai takah min enin ka hmai bulah a rawn thaw lum ham ham a, hah zetin thawk ka lo la halh thung. A hma pawn an hnenah a cheng a; an inngaizawng zui ania, tunah a cheng leh dawn a, ngaihtuah zawng ringawt pawhin thawk a ti ipik vek thei mai.






"Min ring rawh, thil i ngaihtuah nasa mah mah anih kha, keichuan nang ka nei che a hmeichhe dang ka mamawh hleinem, Judy vang chuan ngaihṭhatlohna tur i neilo aw, a ni chu engmah a nilo" tih leh min fawh a ruala, ka ṭang deuh nain dan theih a nilo.






"Vawin a aṭawng dan i hriat ve loh vang anih kha" nam sawnin ka inla hrang leh thuai a, "Engthil nge a sawi a?" lawmlo awka zeta a tih chuan a hmel chu ka en ren rawn a, ka rilru a thil awm te hi ka sawi chhuak lo anih chuan ka hah dawn tlat.






Ka bag-a ka thil khai chu phawrh sawk sawkin a hmuh ah chuan ka lek chhuak a "Mawilo i ti em?" ka ti nghek ringawt a, ka tum aiin ka ṭawng ring lehnghala, a hamhaih hmel hle bawk.






Ka Nighty lei thar chu rawn banin a enkual vut a "A van mawi ve" a tih rualin thawk ka lo la hak a. "Dawt sawi suh" ka lo tih chuan ka lam lo hawiin "I van lei nalh ve" a lo ti leh sup a, a nui lo a athutak hmel hle bawk a, hmai chhanah kan in en ran mai.






"Khawi lo la rawh" ti a pawh thlaksak ka tum chu alo dahsawn vut a, "Engtika i hak tur nge?" a la ti zui a. "Min pe teh" ka ban phakloh turin a khaisang daih a "Inneih zana i hak tur a mi?" nuisuk chunga tiin mitmeng dava zet hian min melh a, a landan chuan min ti mur sung sung thei hial a ni.






"Enge, a dum lei zawk se min ti a mi?" zahzelah ka ti vin leh hlaka, "Hei hi a nalh" a la nui cheu chu tum bar chungin ka en a, laksak ka tum lahin a phal derlo.






"I duh chuan Judy ta zuk ensak la, i duh zawng tak a dum a lei a lawm" inhersan hmak pahin ka ti a. Chutah ka kawngah rawn kuahin amah si chet chuan min pawt hnai a, "Maroon hi nalh ka ti, Dawtsawiṭhintunu chuan enge i bulah a sawi ka hrelo a engpawh sawi sela dawt hlir a sawi ka ring, he i thil lei hi nalh ka ti lutuk ringawt, i ha lai pawh hmuh ka chak tawh khawp mai" ril ruiha tihpahin ka darah a khabe a rawn nghat dat a, "Min ring tawp rawh, i mi rinzat aia tamin ka lo rinawm dawn nia" ka kawnga a kuahna chu ti nghet zual sauhin "Min ring la a bak zawng chu keiman ka ti vek mai ang" ka biangah dimtein a rawn fawp a "I phurna bo ta kha kan zawng dawn em niang" nuisuk chunga a tih leh takah chuan ka inhmuam up reng thei ta biklo.






Lak vung viau tum pawhin JH-a lakah hi chuan thinrim rei hi a har ṭhin em a sin, a chhan chu ka laka a awmdan hi huat viau tur a awm ngailo tlat a, chu a hnekin ka tan a ṭha em em reng bawk, thu tlem te hi a sawi a, ka thinrimna pawh a reh leh vek tawh, ka ringlo a nilo a rin phei chu ka ringtawk lutuk a; ka hlauthawng deuh mai chauh a ni.







An chhunkaw inrelbawlna thila lo inrawlh viau tur pawh ka ni hleinem, Judy vang leh lek phei a boruak ṭhalo siam chu thil ṭha tak a nilo bawk a, amah JH-a ngeiin chiang takin a sawi a, a thilsawi bawhchhe zawnga a khawsa anih si loh chuan enge keia lo enghelh ve viau hian sawngsawhlawtna a neih ang, rinloh chhan tur engmah ka nei hauh bawk silo a.



images (85).jpeg
images (85).jpeg (22.61 KiB) Viewed 12723 times



CHHUNZAWMNA





Inhnuai lamah inzui thlain choka a awm midang te chu kan va pawh ve thuai a, "Eheu, tun aṭangin a ṭhiangtê in maw ni dawn a" nui hui chungin Liansangzualan a lo ti a, Alawmi pawn min lo nuih var var a. "Ka thilsiam hi lo en teh" ti a JH-an min kai hrangin Gas-a an chawhmeh chhuan lai chu a hawnga, an thilsiam chu a rim a tuiin a tui hmel hle bawk.






"Engthil nge a, i siam a mi?" ka lo ti vat a.






Fian lian deuhah suakin "Tem chhin teh" phur hmel taka a tih chuan ka lo la ve vat a, ama bai siam anih ngat chuan a thiam kher mai, "A tui lutuk" ka lo tih chuan "Pasal eirawngbawl thiam deuh i nei dawn aw" ka beng bulah a rawn ti sar sar a, kei ka lo nui hak hak thunga, mipa eirawngbawl thiam hi ka ngaihsan zawng tak a ni, JH-a lakah erawh beisei ngaihna ka hrelo a, a lo thiam lehzel chu ka ngaihdan a sang leh ta sawt mai.







Apuii leh Judy an lo inzuilut a, an lam ka hawilai chuan Judy chuan min lo en ve renga, JH-a ka en leh a ani erawh chuan a lo en ve hauhlo a Liansangzuala nen an inbe mawlh mawlh a, Judy a awm ve tih hreawm pawha a langlo chuan min ti lawm lehzual, Judy lahin dawhkan kil a ṭhu chungin min lo la en renga, ka ngaipawimawh duh bik tawhlo.







"Mambawih Bawngsa kha ka siam anih kha han ei ve chhin teh" Liansangzualan a tih chuan ka lo ner nang a, "Eilo mai rawh se aw" JH-an a lo ti chuan eiloh hmel zetin alo ṭhen ṭha a, chutah Fiona-i lam hawiin "Bawngsa i ei duh em?" a ti zuizat a, JH-an min rawn mitmei chu ka lo hrethiam lawk lo a, Liansangzuala leh Fiona i inbia ka hmuh chuan ka hrethiam ve ta chauh a, an inngaizawng ve deuh ni ngei tur a ni.







Zanriah kan kil ho a, Reny erawh a bo ta vang vanga, midang zawng kan titi barh barh laia Judy ngawireng leh a khat tawka JH-a a rawn en leh ṭhin chu ka hmuhhmaih lo, Apuii bulah ṭhuin Apuii chu a be leh zauh ṭhin a, JH-a a ṭawng hlek chuan a lo hawi vat a, JH-an a en ve em tih te nen lam chuan ka lo chîk a, tuna ka hmuh dan maiah chuan engmah ngaihhuat tur ka hmulo a, ka awm a nuam deuh huai bawk.







"Khawnge i nu leh pa te hi?" chawhmeh min suahsak laichuan ka lo ti a, "Apuii dawr tur an buaipuia an lo haw har deuh ang, " a lo ti maia, "Dawr ka siam dawn ania Mambawih, heta i awm hunah chuan kan pahnihin kan nghak anga" Apuiin a lo ti ve a. "Leh ngawta hna anei a lawm" ka chhan hmain Liansangzualan alo ti a. "Ni dawn tak e, ka lo theihnghilh daih, anih chuan Judy ani leh mai alawm tiraw" nuisangin Judy lam chu a hawi a, "Tehreng mai" pakhat lah chuan a lo ti var a, an inngainat hmel viau mai, Judy awm ve tur chuan awm chu ala ti nuam zan lo chu a ni.







"Hostel ah chuan i awm dawn lo tak tak elaw?" Liansangzualan a lo ti leh a "Dawn nang hetah ka awm dawn, zingah chauh class ka nei dawn a lawm, Hostel luh buai ka peihlo" pakhat zawk chuan a lo ti vat a, Alawmi ka va melh zawka, ani erawh Fiona leh Samkiri nen khan an titi a, engmah a hrethiam ve lo bawka nuam a tih hmel viau a ni.







Zanriah kan eikham hnu lawkah JH-a nu leh pa te pawh an lo thleng a, "Mambawih Vawin chu anuam bawk em" JH-a pa chuan min hmuh veleh ah a lo ti a, kei ka lo nui var var a, Alawmi chu ka lo hmel hriat tir ve nghalthuai a, Judy leh JH-a nu nui bawk bawk chu ka en leh zauh ṭhin, Apuii dawr tur chungchang sawiin an phul hlut a, "Judy hi chhunah a awl dawna, min nghahpui thei dawn a" Apuiin a tih chuan "Avan tihzia ve, i zir chhung chu hetah awm la a ṭha ang" JH-a nuin a tih te chuan ka thik lek lek hial a, JH-a nen an inkar te, an inṭhen chhan te hi an hre ve vek angem tih te pawh ka ngaihtuah a, rilru a buai nuai reng a ni ber.







Judy chu an ngaina tlang hle tih lah a chiang renga, inneih hma ni tlem te chauh a awm tawh nain ka awmloh hlana thil thleng thei te ka zeldin kuala, inneih hun chu ka nghakhlel hle ringawt tawh, ka hmuh phakloh china ka bialpa leh a bialnu hlui inkhata an cheng dun tur mawlh chu ka ngaitheilo chhia va a ni.







Rei awm tawhloin Alawmi nen chuan min thlaha, Ramhlunah Alawmi kan dah hmasa te te a, kan inlampana kan tlan lêt leh lai chuan a Motor khalh lai chu ka en leh ṭhin a, zanriah kan eilai zawng khan amah ah danglamna hmuhtur a awmlo a, Judy kha awmve lo ang maiin biak khat pawh a belo a, a melh lai takngial pawh ka hmulo, a lungawi thlak viau mai. Mahse, ka awm erawh a nuam chuanglo, a bula awm ve vat vat ka duh tawh, ka thlahfal hreh lutuk tawh tlat.







"Ka lo lut kawi lawk ang" ka lam hawia a tih chuan ka lo phu deuh zawk a, ngaihtuahna ka lo kawm thui deuh chu a ni. "Liansangzuala khan a nghak lo che mâw?" ka lo ti let hâ a. "Ngaihtuah duh suh, ani te chu kan inhrik a lawm, a duh hunah a haw veleh mai ang" a lo ti mai a, "Fiona nen khan?" a sawilai chuan a lo nui a, zawh leh hran a ngai tawhlo "An inhmeh reuh e" ka ti leh ngawt a. "Nang leh kei chiahin kan hriatpui aw, Fiona hi a la naupang deuha ka ni Sangzualin a hriat an hlau a" nuihza lek lek hian a ti a.







"Taka, i card hi ka theihnghilh dawn a lawm" ka Baga aṭanga pawrh mai ka tum laiin "Kawl rawh, i haw leh hmain ka bazar pui dawn che nia" a lo ti leh khauh a, "I mamawh lo em ni?" ka tih lahin a lu a thing maia, "A...ka kawl duh kherlo, kan inneih hunah zawk le" nui chungin a jacket ipteah chuan ka khung sawk sawk a, a bianga ka fawhsak zauh laichuan ka ban a lo vuan ṭunga, duhkhawploh hmel zetin min en bawk.







A motor tlan muang riai riai chu ka hriat rualin ka lo chek hlaka "A hunlo aw, tlan mai mai teh" ka tih chuan a nui suk a, a tlan chak ve leh mai bawka, chutih laiin ka kut ala vuan reng thung. "I haw hunah mu nghal daih rawh aw" ka ti chu a nuih a za kher mai, "Nui suh, ka ngaihtuah char char dawn che ania, ka rilru ti hah miah suh" ka ti leh hram a. Ka zeplo ka thik miau sia lawm le, ka ngaihtuah tluk tluk dawn tih lah ka chiang viau a ni.







"Ngaihṭha deuhin awm rawh ka tih kha, i ta a lawm ka nih" ka kut hmersalh pahin a ti a, ṭawngkam chauh ni mahse ngaih aṭha viau lawi si, ka ringtawk ve em asin, a lakah chuan ngaihṭhatlohna ka nei lo a Judy mawlh kha a ni ka buaina zawk chu, hmeichhe zahpah nei lemlo tak a ni tih ka hrechiang viau tawh a, JH-an lo hnar viau mahse a duhna lamah chuan zah a dâwn hauh lo ang, a lo bia emaw alo hnaih hrim hrim tur pawh ka duhlo, vawin a a ṭawng duhdan te kha ka ten zawng tak a ni lehnghala, ngaihtuah zawng ringawt pawhin thin a tirim thar leh tut tut thei nia!







Kan inkawt kan thlen rualin "Ka lo lut dawn em?" beisei nei zetin a ti a, "Lo lut la" ka lo ti ve vat a, keipawn ka la ngai ve tho a, bakah an inah Judy a awm lehnghala, la hawlo mahse pawi ka ti lo nasa mai.







Nu Muani leh Patean TV an lo en a, min hmuh rualin JH-a chu an lo be vat a, inthlak turin room ah ka luhsana, ka chhuah leh laipawh chuan an lo titi ho barh barh a, "Jonaka te nen khan unau inlo ni reng a ni maw?" Nu Muani chuan a ti a "Ka nutei fapa ania" JH-an a lo ti a, keipawn an inchhûn dan ka lo la hre bik hauhlo, a Cousin tih zawng ka hria a, an colony an awm ve loh chhan kha mak ka ti deuh a a nu chhungte lam zawk an lo ni tih ka hre ve chiah a ni.







Thingpui kan inho a, Patea nen an titi laichuan ngawirengin ka ngaithla a, ka chungchang an sawi laite chuan ka lo insangmar ṭeuh reng. "Hei i hriat angin Mambawihi heti hi a ni a, nu leh pa kar lohah a seiliana i tan pawh mawhphurhna a sang viau a nia, nu leh pa belh tur a neilo a, a tan nu leh pa chan te pawh i chan angai dawn a, keini chuan ka ringngam che a i kutah ngaihṭha deuhin kan hlan dawn che a" Patea chuan a ti dap dap a.







A haw dawnah kawt thleng ka thlah a, kut inkaih hi nuam a ti viau a niang ka kut chu a vuan leh chawt tawh, motor a a luh dawnah min fawh zauh pahin min mangṭha a, a tlan liam thleng chuan keiin ka thlir zui bawk a, a tlan liam ta chu ka ngai zui vawng vawng mai.







Mut hmunah Alawmi nen kan inbia a, JH-a te in nuam a tih zia te a unau te fel a tih zia te chu hahîpin a lo sawi a, "Judy kha a cousin ve tho a mi?" tiin min lo zawt bawk a; hrilh hun tak niin ka hria.






"Judy kha maw.....JH-a bialnu hlui anih kha" ka ti tawl mai.






"Enga, tunge ti? aman a sawi a mi!" a lo ti nghal chula, "Um, keipawn ka hriatna ala rei vaklo" tiin ka hriat dan leh Office a ka hmuh dan te chu ka hrilh a, ngawirengin ka ṭawng chu alo ngaithla a, a khat tawkin a lo chek leh hlak ṭhin.







"Engemaw awm deuh tlatin ka hre renga" a lo ti ve a, "Engtin nge i lo ngaih a?" ka lo tih chuan "Ka hrethiamlo, a en dan ṭhin che kha ka lo duhlo ve deuh tawpa, bakah JH-a kha a en nasa lutuka, a star deuh emaw ni ka ti ve rum ruma chutiang a lo nih vang anih mai mai chu, ka va haw reuh e" a ti leh nghal hmak hmak a.







"Vawina a ṭawngkam te chu hre ve la chuan i ngei ve ngawt ang" ka ti leh a, a dilchhut lehnghal kher mai, a zawng zawng phei chuan ka hrilh duhlo "JH-a hi ala ngaizawnga, bazarna ah pawh khan min insawitheih khum vela" ka lo ti maia, "A van zak theilo em em, in inbiak laikhan inlo inhau a ni maw, min hrilh ve vek ta che, a tihbuai che chuan maw a chaklo ngawt ang, i ṭhiannu hian maw ka beng hrep a ni mai" a ti zui khar khar a, kei ka lo nui hawk a, ani pawh anuih a za ve tho.







"Ka ti tak tak Mambawih, buaina a siam che chuan min hrilh nghal rawh aw, ka nasa khawp ang" ala ti tak deuh deuh a, Alawmi thil hrilh hi chu thaw hi a lo tiveng huai zel, inchhungkhur boruak chhia zawng zawng nen lam kan inhrilh a, min chhan pah a a duhtawka a han inhrosak tawh hi chuan ka lo dam ve huai ṭhin, ka lungawilohna ka hrikthlakna ve ber a ni miau a, engthilah pawh mi hi alo thlawp ve em em zel ṭhin bawk, ṭhian ṭha ka neihchhun ve liau liau a ni.








Kar tharah keipawh ka haw chho a, in lamah ka ni te ho an lo buai khawp maia, man eitur kan vua leh vang te pawh ka ni in min tlawh kual puia, ka thuam chhawm tur pawh ka roomah a awm ve rûih tawh a, ka ni pasal pa Tluangan Dressing table nalh deuh min lo siamsak bawk a, Alawmi alo thleng zui ve mai bawk nen kan kokim thawkhat viau tawh, ka nu chauh lo chu.








Ka phone-a alo kal hreh ka hlau ngang mai, "Mambawih, kan vaiin kan lo kal thei dawnlo a, Sentea nen chiah kan lo kal ang, a u te pahnih hi an exam a hnai tawh sia" a lo ti a, "A pawilo, nangmah ber kha i lo kal theih chuan a ṭha a ni mai, i tello a pasal neih ka duh miahlo ania aw" ngenngawl zetin ka lo ti ve a.







JH-a nen zantin kan inbia a, a lung a leng ni ngei tur a ni, kan inbiak lai hian uang deuh deuhin Alawmin min lo tibuai ṭhin a, thutak deuhin kan inbe hleithei ṭhinlo. Apuiin minlo phone chuan kan kawr Theme tur minlo zawt a, Nu muanin a pawl a thlang mauh maia, puanthan pawh a lo leilawk diam a ka ni bia in sumo ah a lo thawn a, ka ni awmloh laiin Alawmi nen kan hlep ru a, kan khua puanṭhui hnenah ka nu ta tur a rukin ka ṭhui tir a, ka ni bulah chuan ka nu lo kal ve tur thu ka sawi duhlo a, ka pi leh pu erawh ka hrilh thung.








Man inhlan dawn ni ah ka Patea te chhung pawh an lo thleng chho a, tlai lamah ka nu te an lo thleng ve bawk a, kan ina innghat ve mai tura ka hrilh chuan min hnial tlata, apa zawn te inah a innghat a, tlaiah chaw an lo eiphei ve thunga, ka ni pawn engmah a sawizui biklo, a rilru tak phei chuan a lawm vaklo maithei a ni.







"Mo neitu hmel kan hmu ve phawt duh e" ka chhungte lamin an ti mauh maia, JH-a ka hrilh chuan a lo phur em em mai a "Lo kal ka tum hrim hrim" a lo ti hmiah mai bawk. Eirawng bawl leh inchhung chet engkim chu Nûtein min pui ve zela ka ni fa te tleirawl te te ho pawh an ṭangkai viau mai, Pa Tluanga lah a buai em em a, chhiatṭhat nikhua a makpa te lo pawimawh zia leh ṭangkai zia chu Pa Tluanga aṭang hian ka hmu chiang zual a, kan mawina ber a ni ka tilo theilo.







Zanah chuan man hlanna hun neiturin chhungte ho an lo kalkhawm sap sap a, mikhual ho pawh an lo thleng hma ngang mai, JH-a leh Liansangzual lo lut chu phawk fe hian an lo en hlawma, an palian dun si a, hmuhnawm thlir takin an lo thlir a ni ber.







Ka ni chuan hmelṭha a ti ngang mai a "A zahawm khup mai a, ka duh zawng tak a ni" a ti sek sek renga, kei ka lo intithei ru em em bawk. Ka nu leh JH-a titi dun erawh ner nang chungin a en a, a rilru tur chu ka hrethiam ruak tho, ka ni hian ka nu chan hi a inti chang ve riau a, ani aia ka nu leh JH-a inbe tlangnel zawk chu a lawm vak lo anih mai hmel.







Palai ten man hlanna an nei a, ka man sem tura JH-a nen min din chhuah tir laite chuan hnuk a ulh lek lek hial, ka bula mipa ding chu ka en ṭhin a, zam hmel a pulo, a hmelah chuan mipa inringtawk tak hmel ka hmu a, a mitah thu neihna ka hmu tel bawk, tunah chuan a ta ka ni tawh a lawm, intineitu hmel taka min en te chuan a ta ka nih zia ka hre chiang hliah hliah a ni.



******



Tuk ṭhuan kan inlamah kan eiho a, inthlahna hunserh te kan hman zawh hnuah Aizawl lampanin kan kal a, kei leh Alawmi, JH-a leh Liansangzual motor khatah kan chuanga, Alawmin ka nu leh ka nau Sentea chu an ina thleng turin a lo tifel diam tawh bawk a, kan belebut lutuka keiphei chuan engmah ngaihtuahna chang ka hre bar tawhlo.







"Mambawih i chau viau lo maw?" hnunglam lo hawi paha Liansangzualan a tih chuan JH-a lo hawi ve zawk a, "Chau hranlo e" ka ti taknain ka chau takzet, mawng hung hmanlo lekin kan phar kuala, kan zi luih luih reng bawk nen a chauh thlak kher mai, Alawmi pawh a chau ve ngawtin ka ring a ni.








Irene-in a ṭhiante sawmin thingpui an lo lum a, vawin zet chu ani pawh a ṭangkai khawp mai, JH-a haw hnuah ka nu chu Alawmi te inah ka va thlah veleh thlap a, an ni chhung an fel bawka ngaihṭha deuhin ka hawsan leh a, in ka thlen veleh ah inbualfaiin ka muzal rih a, zanriah eirel erawh ka pi leh pu awmlai a ni bawk a Nu Muani a che char char a ni ber, ka ni alo awm ve bawk nen kei ka awl phah hleuh thung.








"Naktuk zing kha insiam nen kan buai dawn sia zaninah hmai facial vel hi ti vek ila, ka cousin Mitei hi Beautician ania ka lo hruai anga" Alawmin a tih chuan a remchang khawpin ka hria. Irene-i chu hmai facial a duh ve em tih ka zawt thuaia, Nu muani leh ka ni pawn an lo duh a, Patean "Aman ka lo tum dawn nia" a lo ti var bawk a. "Ka nu kha lo tih sak ve rawh u" tiin Alawmi chu ka chah leh hram a.







Zanriah eikham hnu lawkah an lo thleng phei a, hmeichhe hoin hmai kan Facial tir sap sap a, kan zawh meuh chuan zan dar sawm a lo ri hnai thuak tawh, ka khumah muin kan kawr hak tur Alawmin a nawt mawlh mawlh laichu titi pahin ka lo en a, "Nau lo la pai thawt thawt suh aw, kum thar lamah kan ti ve thut maithei ania, Rina pa a zai dawna, an zai zawh hunah chuan kan ti ve nghal thei mai dawn a, ka ṭhianah i ṭan angai dawn ania" nui hak hak chungin a ti a, 'Nau lo la pai suh' a ti kher chu ka lo la fuh a, pum dawm meuhin ka lo nuihpui a, "Ka ti tak tak, ral puar ûl a din i duhloh chuan" a la ti tak deuh deuh a.








JH-a reh vang vanga, an haw hnu aṭangin kan la inbe leh miahlo, zanin hian engtin nge hun an hman ve ang aw, an buai ve viau chuan ka ring, mikhual an ngah thu te pawh a sawi tak a lawm.







Alawmi te haw hnuah muturin ka insiama, JH-a ka call zui bawk a 'muttui' tih thu tal sawi ka duh. Mahse, phone ala thei hauhlo! Ka call nawn tluk tluk a, a Ring ral zela, a muhil tawh em mawni ka ti rum ruma, a mut dawn thu lah engmah a lo sawi bawk silo.







Khum a ka mut fel hnuah ka call nawn leh ngat a, rei deuh hnuah chuan a lo chhang ta hram a, mutchhuak thophang aw zet ka hria chuan min ti bangbo takzet a ni!





JH-a aw a nilo!




Hmeichhia a ni.






Tho chhuak hluaiin "Judy" phawk zetin ka ti a, engvanga JH-a phone lo chhang nge anih, tun ang zan rei tawh ah lehnghal!






"A muhil tawh" tih zawng sawiin phone chu a dah hmak a, min ti hamhaih kher mai!






(Kal puat puat lawk ang, a chianglo intih chuan lo sawi mai ru, comment kha aw duat te u)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:07 pm

GOMENASAI - by Ahmangaihi violette khiangte

(CHAPTER -24 ah khan zawmna chhiar hmaih i nei em lo en rawh)




CHAPTER - 25





Tun ang hunah tinge Judy nen an awm dun! Ka ngaihtuahna a thilawm vang chuan ka hlauthawng ruaia thinphu a rang nghal zaih zaih a, ka phone nawn leh ngat a a chhan chu ka la ring phallo a ni, JH-a chu a awm hnai tak tak a nih chuan amah ngei chu biak ka duh bawk.







Rei lo teah Judy bawk chuan a lo chhang leh a "Enge i hriat a? Mu ve mai mai ta che naktuk thawhhma i ngai a ni lawmni?" a lo ti vin hlar a, a ṭawng chauhlo thawm dang a awm ka beisei ru hle a mahse, chutiang engmah a awm tlat lo. "Ih...i bulah khan...a awm ve tak tak em?" inthunun tum sateh mahila ka theilo chhia va a ni, ka aw a khur nasa lutuka ka taksa te pawh an vawt sung sung maiin ka hria.







"Awmlo sela a phone ka lo chhang dawn a mi, chawlhhmuna an inah kan riak chho a lawm" awlsam zet mai hian a lo ti leh a; ka vai riai tawh, ka mittui a rawn hnam ringawt bawk a; ka awmchhung lah chu a thip hlur mai bawk.








"Dawt min hrilh em?" ka aw chu a ri che che chauh a ni, ka biang a rawn lum thla nghal pap pap bawka, ka ṭah chhuahloh nan erawh ka insum ve ṭang ṭang thung.







"Dawt sawi ka ang a mi, tunah chawlhhmunah kan awm mek, JH-a chu a muhil tawh" a ti leh laite chuan ka nghilhdup ni maiin ka hria, "E chuan, ka Lingerie leikha mawi a ti teh a sin aw, a dum la rawh ka tih reng che kha i duhlo vela, ani duh zawng te chu ka hria a lawm" nui hak chungin a ti leh a, a ṭawngkam tin chuan ka vilh ngut ngut a ni ber.







"Kan inkar hi chu a buaithlak deuha mahse, kan la induh tawn tih chu i hrethiam ve tawh ang chu, tunah pawh hei min hnar thei chuanglo chu anih hi, inneih thu inlo thlungfel tawh si a, a rilru a buai khawp mai zu a inphah vak lehnghala" a nui ri chu rapthlak ka ti kher mai.







"Dawt i sawi" inpetruh fan fan chungin ka ti leh hrama, chu erawh ka duhthusam a ni, Judy chuan min tih hrehawm a duh vanga dawt sawi mai mai nisela ka ti takzet.







"I awihloh chuan i phone kha lo en rawh" tiin call chu a titawp zui daih a, chumi hnu lawka a message lo thleng ka en chu awm ngaihna reng ka hrelo, ka taksa chu khur nghal dawt dawtin ka ṭap chhuak hawk a, ka thinlung chu chemte a vih ang maiin a na a , ka na takzet a ni.








Engthil nge ka chungah thleng ta hi le? thlalak a JH-a muhil Judy-in a kuahlai leh Judy nuihmel lo lang chu ka mittui kar aṭang chuan ka hmu phe ruaia, sawi leh chuan tur a awm tawhlo, zanin hian judy kiangah hun a hmang tih chu a chiang viau tawh.








Kei hi bum ka ni, chupawh ka pasal nimai turin kan inneih dawn zanah a bialnu hlui nen min bum a ni. Engtin nge hetiang thil hi ka chungah a tih theih zawk le? Judy min ṭawngkhum danah te kha tinge engmah ka lo hriatthiam loh! Ka ṭap a; ka ṭap nawn leh ṭhin, ka mittui te chu an tawp theilo a, hetiang em ema rilru na leh kehchhia hian ka la awm ngailo, ka lo hmangaihin amah ah ka lo innghat nasa hle tawh a lo nih dawn hi.







Ka phone a ka pasal nimai tur hlimthla lang chu ka en a, insum turin chakna reng ka neilo "Nang lehzel chuan min tihnat ka ringlo asin, ka rinzat che aia tama i rinawm tur thu min hrilh na kha hun rei pawh a la nilo a mahse, tinge tunah hetiang dinhmuna kan din tawh hnu ah hian....." ka insut hlawp hlawp a, ka hrawk te chu a thip hlur mai bawk, hetianga a phatsan leh mai tur hian a lakah enge tihsual ka lo neih le? Judy zawk a duh anih si chuan tinge kei hi min neih a tum?







Chawmawlh zetin khumah chuan ka ṭhu a, mahni kallo pawhin hawina lam apiangah rilru a vakkual chiama, rilru a fimloin a chawl hahdam thei chuanglo, thlalak chu ka en nawn leh ṭhin a ka na zual ting mai. Ka muhil theilo a, engtia awm tur nge tih lah ka hre heklo, naktuk inneih ni a ni mai tawh a, engtin nge kan awm zel ang? Hetah ka chhungte zawng zawng nen kan awm tawh a, hun hlimawm tak hman kan tum mek laiin eng hun nge kan tawn tak hi!








Sana in dar thum a kawk va tawh a, kei erawh chhuat dungah chuan vei tawn sekin ka inngaihtuah buai ngang mai, duhthlan tur chhe tak pahnih ka neia, inṭhen ka duh na leh duhlohna chu a inzat reng a ni, ka ṭap leh rih ṭhin a, ka ṭahna lamah ka pik ṭûpa ka lu a na ngut ngut mai bawk.







Khumah bawk thlawpin banga ka mo kawr inkhai chu ka en vang vang a, hah zetin thawk ka la leh ringawt ṭhin, tih theih dang a awm chuanglo, hetiang chung chuan kan innei theilo ang mahse, kan van mualpho nasa dawn tehlul em, ka chhungte; ka nu leh ka pi leh pu te ka ngaihtuah a ka ngaihtuah nasat poh leh ka lungchhe zual ting mai bawk.








Khawvar lamah chuan ka chhing siar siar a, ka chau tawng khawng a niang ka harh leh chuan khua a lo eng ut tawh, ka room kawngkhar kik ri ka hriat rualin rang takin ka tho chhuaka, ka lu lah chu a rit luk mai bawka, ka mit pawh duhthusamin a bui chur mai. Ka pindan kawngkhar ka hawn chuan ka ni hmel ka hmu nghalzat a "E...Mambawih i va tho har ve, i ṭhiannu pawh a lo thleng phei tawh a nia, han intifel ve zung zung rawh" khuma ka puanthuah thlehfel sawk sawk pahin a ti a, chhuat dungah chuan chawmawlh zetin kei ka ding khawngreng thunga, engtin nge ka hrilhfiah tak ang le?








Sitting room a Alawmi nui hak hak thawm te chu ka hre pha a, rilru a buai kher mai. "Ni pasal ka nei...." ka sawi laitakin khuma ka phone dah a lo ri a, ka ni chuan ban vatin "JH-a a nih hi" ti a nuisang chungin min lo pe a, ka lo ban rang kher mai, "Lo intifai rawh" tiin ka ni chuan min chhuahsan a, Phone ka lakruala "Bawihno" tih ri ka hria chuan ka thin a ti rim nghal hlur mai bawk.








Ngawt rengin phone chu ka hum ngawt ngawt a, ka thinrim luatah ka ṭawngchhuak thei mai lo "I la tho chhuak ve nange?" a rawn tih laichuan thawk ka lo la hawk a, engmah thlenglo ang maia zangkhai taka a rawn ṭawng te chuan a rilru a ti na thar leh a ni.








"Nizanah khawnge i awm a?" ka ti chhuak thei hram a "Chawlhhmunah kan riak chho a, tihpalh aw ka lo muhil daih a" awki damthlup hian a lo ti a, dawt sawia a lo phat ka rin tehlul nen a pha miahlo chu mak ka ti lek lek a, ngaihdan dang ka nei nghalruai a, Judy nena an khawsak dan chu tlang taka min hrilh a tum te pawh a ni mahna.








"Tu nen?" ka lo ti chang bawla, ka lawmloh zia chu ka aw aṭangin a hrethiam ve ngei ang.







"Ka unau ho in?" a tih chuan "Tak tak maw?" ka lo ti nghat a, ka zawh buai ngailoin sawi tlang law law sela a ṭha ang.
"Michaela a lo haw a, Bachelor night hman an rawt alawm mawle" a lo ti leh maia, rilru a ti buai nak mai. "Tu te ho nen?" dilchhut zetin ka lo ti leh a "Mipa ho chauh, kei leh Victora, Michaela leh Remruata te nen, i lungawilo em ni, tlemin ka lo rui ve deuh a" inthlahrung aw deuh tak hian a ti a, chutih laimekin Alawmi room ah a lo luta, keiin tukverh lam ka pan nghalthuaia.








"Hmeichheho an tel lo maw?" Alawmin nuisanga min lo en vangin awki pangngai thei ang ber tur chuan ka ti a. "Tel lo" a lo ti chu awihlo tak ka ni. Judy nen an awmdun tih lah kha ka chiang ngang mai bawk si. "An tello tak tak maw?" ka ti nawn leh ngat a, "Ka hre miahlo" a tih rualin "Engtin nge i hriatloh theih a?" vin angreng zeta ka tih chuan Alawmi a lo kal hnai nghal thuaia, min lo din hnaihin ka Phone chu a lo ngaithla ve a, zawhna mitmengin min en nghal ran bawk.








"Mipa ho chauh, ka zep lo ang ka rui lutuka...tipalh, nidangah chuan ka in tawhlo ang nizan kha chu...." Alawmi lo nui hawk vang chuan a ṭawng tawp chawt a, keipawn phawk zetin ka lo en a, "A ho lutuk tiang te kha chu hrethiam ta che Bachelor night an hmang ve anih dawn kha" min nghawk zauh pahin Alawmi chuan a ti a. "Bawihno hei Apuiin a be duh che" tih ri ka hre zui zat bawk.








Phone chu Apuiin a lo chhang a "Mambawih chei tu tur che kan lo tir phei chiah aw, lo incheitir hmasa la nangmah a chei zawh ah che hetah keini min chei leh dawn a, i hman hma chuan lo incheitir nghal mai la" a lo ti zung zung a, chhan ngaihna pawh ka hrelo, engkim hi a laklawh zo vek tawh a ni.







Kan inbiak zawh hnuah JH-a pawh pe tawhloin Phone chu a dah zui maia, ka hriat duh ka la hre hman lo, call leh mai ka tum laiin "Awii....dah rih teh, chaw ei vat ang, insiam chhung a rei dawn si" tih pahin Alawmin min pawt nghal dawr dawr a, room pawn lamah chuan chhungte ho an lo buai nuai nuai a, ka nu te pawh an lo thlengfel der tawh a, naupang hoin chaw an lo ei mek bawk.







An thawmhnaw hak tur te nawtin an phur hlawm ngang maia, ka nu pawn a kawr thar a lo ha at tawh a ka pi nen sitting roomah ṭhuin an lo titi dun a, an hlim hmel ka hmuh chuan rilru dang put a har takzet a ni, hetianga ka chhungte hlim tlang taka an awmho lai hmel hi ka hmu ngailo a an hlimna tihchhiat sak chu ka theiin ka ringlo, vawin hian ni duhawm tak an hmang meka, keimah chauh inngaihtuahin engtin nge an ni ho hlimna chu ka chhuhsak theih ang ni, ka thei hauhlo ang.







"Mambawih chaw kha eivat ula, a huhoin a eitheih tak tak chuangloh, insiam induh hma dawn chuan i ṭhiannu nen khan einghal mai rawh u" Pa Tluangan a lo ti a, "Inrualin ka lo ei ang" ka nuin a lo ti ve bawk a, rilru pangkhing ru ṭeuhin ka awm renga, ka engtih tha mah a tho tawhlo a ni ber e.








"Tlai lamah Mo pa te inah chaw kan eidawn sia, sa hi a vaiin ka siam lo ania" ti a Pa Tluanga leh Nu Muani an inbiak lai chuan chawei dawhkan kilin ka ṭhu ngui bar reng a, "Enga ti ber bur nge ni?" Alawmin a lo tih chuan chhan a har ṭalh, ka thil vei chu sawichhuah chak viau mahila a rem teh ṭeuh silo a, chuti chung chuan ka ipik ṭun mai bawk si.








Chaw kan eilai mekin Fiona-i leh nula pakhat hi an lo inzuiluta, a rawn kalpui chu min chei tu tur a ni ngei ang, "Min lo nghak rawh u, kan hman har lo ang" Alawmin a lo ti var a, helhkham nei run chung chuan ka ei hleithei meuhlo. "Hun serh lai te khan i ṭam chhawl mai tur a sin, ei lui rawh" Alawmin a lo ti ve sek renga, ka rilru hi han hreve sela engtin tak lo ngai ang maw?







"Min hrethiamlo anih kha" ka ti zawi sap a, "Hrethiam e, i awmdan hi chu ka hrethiam lutuk, midang pawh an ni ṭhin a lawm, ka u pawh kha an inneih dawn ni khan a huphurh tlat a 'pasal neih ka peih lehlo e' te kha a tia, nangpawh kan inbuatsaihna vuakvet hian a ti chau ve deuh che anih dawn kha, Programme zawh hunah i zia huai mai ang" chaw bar mawlh mawlh pahin a ti a, kan bula ka nu lo ṭhu ve chu enin tawitein ka lo nuih a, a hmel hlim tak chuan lung a ti che ram ram mai lehnghal a.








Engpawh nise he hun hi ka paltlang ngei chu a ngai a ni, tum angin kan khawsa lo chhunzawm zel anih tak leh a nih nih kan ni tawh mai aniang chu, tunah chuan thuzuk leh thei pawh ka ni tawhlo, chutiang tur chuan thil a kal thui tawh mah mah chu a ni, ka dinhmunah hian hmeichhe dang te hi han ding ve sela eng ang thutlukna nge an siam ang le, midang te chuan i he loin tawpna an siam nghal maithei a mahse, keichuan chutiang turin chakna ka nei ve tlat lo a ni.








Tukṭhuan eizawh ah ka inbual leh te te a, rilru tih thawven hram hram tumin ka inti phur lui ngial a, ka hmai an chei laite chuan thildang daih ka ngaihtuah vangin Alawmi leh Fiona-i ti ti pawh ka hre mumal meuhlo, "Tiraw Mambawih?" Alawmin a lo tih chuan "Maw?" ka lo ti he haw a. "Hotel-a riahchhuah mawle, inneih zan angah te chuan in duh zawk ang ka ti, Fiona hian riak ve nghal rawh a ti ngawta, khual khua pawh a ni silo a, duh leh a tukah ka lo phei veleh anga a ni mai a" a lo ti sap sap a.








"I thu thu a ni mai" ka lo ti hul hak a. "I hreh deuh em?" a tih leh chuan "Hreh hranlo e" ka ti leh maia, ngaihṭhatloh hmel deuhin min en a, "I nuamsamlo tak tak emaw ni, Energy drinks in teh mo thar tukah te khan i va damlo hluah ange" a ti zui nang nang a.








Fiona-i te haw hnuah min hruai turin Liansangzuala a lo thleng a, pindana alo luh rualin mo kawr ha a ka lo ding chu minlo nuih vur vur a, "Lo kal vat teh" ka lo tih chuan dar san akin min lo pan a "Nizanah chawlhhmunah i riak ve a mi?" ka ti zuizat a.








"Riak e, nizan chu inpa ka hrairui a a chatthla hmawk mai mawle" nui hau chunga a tih chuan "Zu a in ṭhin tih pawh ka lo hre miahlo a" lawmlo fe mai hian ka ti leh a. "In ngailo e mahse, nizan chu nizan a nia" a lo ti sam et a.







"Judy te an lo kal ve e law?" dawp titih hian ka zawt a, min en run run a chumi hnuah "Ka hre..nang" a ti vei nghuta, dawt a sawi chianga, zep a nei tih lah ka hai hauhlo, tunah sawi duhlo mahse, reilo teah ka hre chhuak leh dawn khawp a lawm, min bum thei hauhlo ang.








"I va par nasa awm ve" Alawmin a lo ti ve a, "Loh thei nang, tlangval kan thlah a lawm le" nui suk sukin a ti leh a, Alawmi nena an infiam zui bawrh bawrh te chu thawk ipik ṭeuhin ka en reng a, "Kan kal dawn a mi?" a lo tih te chuan ka phur lo takzet a ni.








Motor-ah chuan ka ṭhu ngawi ran a, hnunglam hawia Liansangzuala a lo ṭawng chuan tum bar chungin ka lo en a "Ka lu hi a rit lûk a inpa pawh a nuamsamlo ve ngawt ang chu, tukin pawh a mu zawi reng mai" nui huk huk chungin a ti a, nuih a za duhlo kher mai, nizan chu an lo hmang nasa hrep a nih hmel e.








Biakin kawt kan thlen chuan pawnah mi an lo awm ṭhup tawh a, Alawmi nuisang reng thei bik chu a awh awm rum rum a ni, thawk la halhin biakin lampan chuan ka pen lut a, mite te chuan keimah ngawt min en ṭhap reng bawk. Ka lo suangtuah dan leh ka awm dan chu a inpersan kher mai, nimin kha chuan ka la phur em em a mahse, vawin zet chu engkim mai hi anihdan tur a nilo tlat tawh, vawiin ka pasal neihni hian hlim tur ka ni a sin, duhdan leh suangtuahna ka lo neih ṭhin te kha engmah lo mai a ni.








Mite chu an hlimin an nalh takzet, rilru hlim mawlh heklo kei erawh ka chuai rawih rawih maiin ka hria. Maicham lampanin Patean min kalpuia, JH-a farnu te ṭhutna zawn ka kalpelh laichuan Apuiin hnai takah thla min lo laksak mawlh mawlh a, Judy hmel chu ka en rei ngamlo, a hmel ka hmuh ringawt pawhin ka lungphu a diklo nghala, a mitah chuan min elsenna ka hmu thei a ni. "Hmelchhe mawl" tih melhin min melh bawka, min nuihzat hle tih lah alang reng.








Patea kawrban chu vuan nghet sauhin ka pen ve zela, pheikhai a zanglo kher mai, ka hma a JH-a leh Liansangzuala lo ding chu enin thawk ka te te a, JH-a hmel ka hmuh rual rualin ka ṭah a chhuak tet tet mai bawk, a hmelṭha leh pa zet mai te, a dar rinawm tak te chu ka thlamuanpui thei tawh heklo, mitmeng damthlupa min enin a kiangah min ṭhuttira, a hmel chu ka en leh rih ṭhin a, thikna leh huatna in chhungrilah min ṭham reng mai bawk, hnunglama nula ṭhu chu ka ngaihtuahna aṭangin ka paih hleithei der bawk silo a, engkim mai chuan thawk an ti ipik zo tawh, he hun hi ral thuai sela, engkim kalsana mahni te chauha awm ka duh ber.







"I nalh lutuk Bawihno" a aw ri ka hriat rual chuan ka en vat a, mitmeng nung sarh leh hlim hmel tak mai ka hmuh rualin thawk a chham lo chauh, hepa hi ka pasal a ni dawn! tun darkarah ngei mai hian, ka van haw tehlul em, vawin ka tana ni pawimawh tak maiah hian ka rilru a tihnat zia te min tihhrehawm zia te hi hre duh hauhloin ka nalh thu min hrilh vei tak chu a nia, sual leh lutuk.








Pastor a lo kala thutiam lak dan tur min hrilh laite chuan ka bing chuk chuk a ni ber, thawh lawka tlan chhuah daih mai tur em mawni?







Hnunglam ka lehhawia, reilo teah hunserh kan ṭan tawh mai dawn, ka chhungte pawh an lo thlengkim vek tawh tih ka va hmu thei a, ka nu pawh ka hmu a, a hlim a ni tih pawh ka hria, ka pi leh pu te midang zawng pawh, he hmuna hlimlo awmchhum chu keimah chiah ka ni mai a ngem, nilo JH-a pawh hi a hlim tak tak bikin ka ringlo, he a nui hmel phenah hian thup a lo nei reng zawkin ka ring.







Ka kut khur dar dar chu tuaiin ka hum rauh rauh a, ka thlan a tla hluam mai bawk "I van khur nasa ve a, Rehearsal kan nei silo a i che buai vek ange, pastor thil sawi kha theihnghilh suh aw" a rawmawl a ka bek rawn hruk mawlh mawlh pahin a ti a, kei ka lo nui tawi tak thung.








"I nuamsam lo em ni, engtin nge i awm?" ngaihṭhatloh hmel zeta JH-an a lo tih chuan "A zam anih hi" Alawmin a lo ti vat a, "Zam miah suh, i bulah ka awm hi" tih paha ka kut a lo hum chuan ka lo ṭang ru ṭeuh a, a kut te chuan ka vun chu a ti kang thei mai dawnin ka hria, ka sa pup pup a, ka awmdan a dikloin ka vai riai ringawt tawh, kei hi ka inthunun a ngai mahse, engtianga han inthunun tur nge tih tak ngial pawh ka hre silo.







Ka ṭhungil hluaia kan piah lawka kawngkhar lam chu ka melh nghalruai bawk.


IMG_20210212_222716.jpg



CHHUNZAWMNA



Ka theilo, duh chu ka duh ngei mai a mahse, ka theilo a ni. Ngaihtuah chianglo takin thil ka ti tawh a, a belhchhah nana chet lak leh chu thil tihchi a ni tawhlo, mahni chauh inngaihtuahlo a ka chhungte pawh ka ngaihtuah tel an ngaia, rilru fim tak hman ka mamawh bawk.







Ka ban a rawn vawn takah chuan hawilet vatin ka en a "Enge ni, diklo a awm em ni?" a tih laia a hmelah chuan maktihna leh rinhlelhna ka hmu thei, sawi chu ka duh ngei maia sawihun a nih mawlh silo, tunah ngei hian a fala biaka kan pahniha sawidun pawh ka duh, thil chhe zawk a thleng anih pawhin ka thawl phah huaiin ka ring zawk.







"Pawnah chhuak lawk ang, ka be duh che" ngenngawl zetin ka ti a, a mitmeng buainak kara a nui hmel chuan min tina zual emem bawk, kan inkar kaltluang tak leh duhawm em em kha a chhiat ka phal biklo a, hetiang thil hi thleng loin nupa hlim tak nih ka duh, a bula ka damchhung hun hman pawh ka duh alawm mahse, tun dinhmun ah hian han innei ngawt mahila buaina zakhua chauh kan hmachhawn dawnin ka hre si a, ka hlauthawng a ni.







"Tunah hian maw, ava hun rihlo ve aw!" a sawilai mekin Pastor a lo ding chhuak a, "Nakinah kan sawi dawn nia" ti leh zatin ka ban chu a thlah a, chutih rualin ka lamah rawn tawlh hnai sauhin ka mal chunga ka kut chu lain kan inkarah chuan a dahthla a a hum zui vang vang bawk a, a hmel ka en laichuan min lo en ve chiah a kan mit a intawng chiang kher mai. "Ka hmangaih che" phun supa tiin mawi emem mai hian min nuih a, sawi ve tur reng reng ka hrelo, ka dang a ro zo a, ka chau nghulh ringawt mai a ni.







Dinhmun laklawh taka ka thenvel mek laihian kumkhaw daih chhechhamna thu ka tiam a ngai a, thutiam la tura kan dinchhuah laite chuan ka tiril a khur nasa in ka vai riai renga, kohhran leh Pathian mithmuhah chhechhamna zungbun min bun tira, a nupui ni tura thu ka tiam laite chuan ka khur nasa kher mai.







JH.Lalhruaitluanga nupui ka ni tak tak ta, nizan mai kha chuan vawina ka awmdan tur kha hlim takin ka suangtuah kha ni a, a hun a thlen meuh chuan beisei a ang lo kher mai, ka hlimloh chu thuhran engkim mai chu a nih dan tur a nilo. Mite hmuh ah chuan ka nui a, ka chhungrilah erawh ka hlim der silo. Sawipui chu duh sateh mahila inbiak falna hun ka nei mai bawk si lo a, midang awm ve laia inthup ngai reng bawk si te chuan min ti hah hluah hluah a ni.






Biakin a ṭanga kan haw hnu chuan ka pasal te in lama lawi turin ka chhungte chu an inbuatsaiha, Alawmi leh ka nu che vel thlir chuan kei ka ṭhu tlawk tlawk thung.







"I damlo tak tak a law?" pindan aṭanga ka nu chhuah hnua Alawmin a tih chuan hahzeta thawk la kawk chungin "Ka damlo tak tak" ka ti tawl a, "I enge na a?" hlauthawng taka a tih leh lai te chuan ṭah vak mai ka chak ber.







"Min kawpin ka hria" Alawmi hmel buainak chu enin ka nui tawi taka, "Enge chu chu a awmzia, tu nen nge a kawp che?" ka bulah lo ṭhu hnaiin ngun fe in min thleka "Judy kha, nizanah min lo bia a, an riak dun a...thlalak te pawh" sawi hleitheilo in ka ṭap titih der mai.







"Tak tak a ni em, i hriatsual palh te a nilo maw?" hlauthawng takin a lo ti ve a, kut khur dar darin ka phone a thlalak chu ka entira, lu thing mat mat chunga thlalak a thlek vang vang laichuan ka lo ṭap hliam hliam thung, min kuaha min hnem ve tak nain kei ang thoin a rilru a na ve tih ka hria a, min hnem vak ngaihna a hre biklo.







"In innei fel der tawh sia, a van buaithlak tak" thlalak chu ennawn lehin beidawng zetin a ti a, "Engtin nge ka tih tak ang?" ti a ka zawhna chu chhan ngaihna a hre lo, min en vawng vawngin ka bianga mittui luang chu min hruksaka, "Ama bulah i sawi tawh em, engtin nge a lo chhan che?" a ti leh a.







"Sawina hun a la awm lo a, inneih ṭhulh chi a ni tawh bawk silo a, ka chhungte hi...." ka ṭap leh rih a, ani pawh a ṭap ve ṭeuh a, reingial chu inhnemin kan sawiduna engtia han tihzui tur nge tih chu kan bangbo dun a ni.







"Amah nen sawidun ula, thlalak te pawh hi hmuhla, Judy te chuan in inkar chhiat a duh ber a lawm, rilru tina nghal mailoin hriatchian leh deuh tum phawt ang aw, kan inrin ang ngawt pawh hi a lo nilo ve thei a, a insawifiahna te pawh ngaithla phawt la" a ti sap sap a.






"Ka zawt tawh a mahse, nizanah Judy bulah ka awmlo, ka rui a engmah ka hrelo a ti tlata, insawifiahna tur a neilo aniang" ṭap ṭiau chungin ka ti leh a, Alawmi erawhin thlalak chungchang chu chiang zawka zawt fiah turin min la duh fan thung.








"Engmah sawi rihlo la, hun fal inneih hunah i sawi dawn nia, a chhandan che a zirin thil tih dan tur chu a awm thei mai ang, nangman chinfel tumlo la, Judy suahsual rawngbawlna te alo nih lek phei chuan JH-a kutah dah tawp rawh, an lo inngaizawng reng anih phei chuan thu tawp siamnan khua ala tlai hleinem, inti pachang la, hetianga i awm nghal ngawt anih chuan Judy a lawm dawn lutuk a sin" thlalak chu lo lek hnaiin "Han en mahla JH-a hi a muhil daih a, Judy a awm ve tih a hrelo pawh a nithei tho a, Liansangzuala pawh ka lo zawt dawn nia" a ti leh a.







"JH-a chu ka sawipui hmasa ang, nangchuan lo zawt rih suh" ka lo ti ve a. Alawmin a sawitakah chuan JH-a zawh chian hmasak chu a ṭha berin ka hria, ka ngaihdan chu diklo hlauh sela Judy dawtsawi mai mai nisela ka ti kher mai.







Mo hruaitur an lo kala, keini pawh infuih sauh sauh chungin kalturin kan insiama, Alawmi hnena ka inbunruak ta chu ka thawl huai mai a, awmve lo sela chuan ka ngaihtuahna ringawt pawh chuan min ti chau chhe der ang chu.







Ka bungrua te chu Motorah an hlang zung zunga, pheikhai zanglo viau mahse kan kaltho a ngai miau si a, Motora kan chuan hnu thleng pawh chuan Alawmi chuan awmdan tur min hrilh mawlh mawlh renga, keipawh ka insum rih hram hram a ngai a ni, midangten kan boruak an lo hriat ve mawlh mai chu thil hlauhawm tak a ni bawk.







Mite tih dan angin tluangtak leh pangngai takin ka lawiluta, ka chhungten duhsakna zawng zawng nen hlim takin min thlah bawk, JH-a hmelah chuan ngaihṭhatlohna tur awm ang ka hmu lo a, Judy erawh inkhawmna a ka hmuh bak kha ka hmu leh ta lo vang vanga, zanriah eidawnah Reny leh Apuii te nena chaw an eiho tur chu ka hmu leh chauh a, pawisawiloh hmel taka min lo nuih chu Alawmi nen haw em emin kan lo en a, a nui hmela huatna lang chu hmuh hmaih theih ziazâng a nilo.







"Vawin chu i chau deuh a ni maw?" ṭhutna min kawhhmuh paha titu ka pasal chu enin tawi tein ka nuih a, "Zanriah eikhamah i chawl hahdam vang vang tawh dawn nia" ti a ka darah chulin duat hmel takin min en bawk.







"Eilui hram hram rawh, ngaihtuah duh rih suh" Alawmin anlo ti ve a, ka tilui ve ngial tak nain eiluih chu a har ngang mai thunga, Patea ina lungawilo chunga chaw ka eiluih ṭhin nen chuan a danglam a ni, ka rilru a na em a, chuti chunga tuiti taka thil ei chu a tu a te mah hian an thei bikin ka ringlo.







JH-a chuan chawhmeh ka eiduh tura a rin apiang min suah saka, min ngaihsak poh leh ka hrehawm tih a zual a ni ber, Alawmi nen kan in en leh zauh ṭhina, ani erawh engmah hrelo angin a inthup thei hlauh a, kei ve thung chu ka ngawiran renga JH-a leh Liansangzualn min biak pawhin a rul tawk lek lekin ka chhang a, ka awmdan chu mak an ti deuh viauin ka ring.







"Umam in riak thla dawn ta em?" Apuiin a lo tih chuan ka lo hawichhuak ve vat a, "Nangni chu hetah awm ang che u, zingkarah kan lo chho leh ang" JH-an a tih laimekin Alawmin min lo mitmei a, "Khawiah nge kan riah dawn a?" ka lo ti ve vat a.







"Zanin chu chawlhhmunah kan riak dawn nia, hetah chuan kan ri nuai nuaia, nangpawn nuam i ti zawk ang" min râwn titih hian a ti a, ka hnial buailo, midang awm veloh laia sawidun tur kan neih kha sawina hun remchang tak a ni bawk ang chu.






Zanriah eikhamah chuan Alawmi hoin kan room ah kan inzuiluta, ka bungrua pawh remfel mumalloin an la awm nuaih maia, han khawih vel pawh ka chak vak rih lo, Liansangzuala leh Alawmin a zualpui chu an hungrem a, ka thawmhnaw hakthlak ken tur ka lo siam mawlh mawlh thung.







"Mate, puh nghal ringawtloin ṭha takin zawt chiang rawh aw" Alawmin a ti ru sar sar a, ka sawichhuah dan tur ka hrelo, ka sawi tawp anga a bak chu a tlachawpin ka ngaihtuah ang.






"I in peih tawh a mi?" kal mai inpeih sa a JH-an a lo tih chuan "I thawmhnaw i keng ve dawn lo ami?" ka lo ti let a, "A awm sa a, nangpawh keng vak duh suh, zingah kan haw leh angai dawn ania" a lo ti var a.







"Kan lo kalve phawt dawnlo a mi?" Liansangzualan a lo tih chuan kan inenkual hrek hrek a "A ngai ve zel a mi?"JH-an a lo tih chuan Liansangzuala nuih a za kher mai, "Ngai ve zello e" nui ruh ruh chungin a ti a, keipawn lo kal ve kher lo sela ka duh mah zawk.







"Naktukah kan inhmu dawn nia, mut dawnah inbia ang" tiin Alawmi nen kan inthlah a, inhnuaia kan chhuk chuan ka chhungte ho pawh haw turin an lo inṭham ve mek a, an kal chhuah hun kan han nghak leh zeta, chutihlai chuan choka kawngka bula dingin Judy leh Reny ten min lo en reng tih ka va hmu a, an ni pahnih awmdun ka hmuh hian ka chungchang sawidun tura ka ngaitlat ṭhin hi ka thiamloh nge an mahni thiamloh ka hre tawh lo, ka ngai diklo he hu vek tawh a ni ber.







"Mambawih, kan hawsan ang che aw" hlim hmel nung sarh mai pu a ka nuin a tih chuan a lam ka pan vat a, a darah kuah chungin pawnlam kan pandun a "I haw hmain kan bazar dun dawnnia, naktukah pawh Alawmi rualin lo kal ve leh rawh aw" ka ti a, "E... chutia ka lo lan zut ten a ṭha nang le" uang deuh a atih chuan kan nui dun hak hak a, Alawmi Scooty a an inphur chu ka vailiam a, midang ho an haw kim tak hnu chuan inchhungah kan lut leh riha, Liansangzualan haw a la hreh ngang mai.






"I duh leh zui ve zel la" Apuiin a tih chuan a ner nang nanga, Fiona-i nen an inmitmei leh zauh ṭhin chu hmuh an nuam viau a ni.







"Zanah i ril aṭam takin eitur keng rawh" JH-an a tih chuan Apuii a lo inrawlh vat a, "Nidawn tak e chaw i ei tlem si, lo kal rawh eitur ken ngei ngei angai, dawr a hla bawk si a in buai palh ang" tiin choka lamah min kai phei dawr dawr a.







Choka dawhkan kila Reny, Judy leh Zosangliana lo ṭhu chu ka va hmuh chuan ka enrei duhlo. Apuii chuan Fridge a hawng rak rak a, engthil emaw hi Polythene ah min bawk sak ṭeuh a "Ice cream hi ka ti tel anga inhnuai Fridge ah khan i dah mai dawn nia" tiin a khung belh mawlh mawlh a, dawhkan kila ṭhu pathum te chuan min lo mitmei ve ran bawk.







"Vawin chu min ral miahlo lehnghala ka chhass in pasal anei asin mawle" meinei zeta Zosanglianan a tih chuan an nui hak hak a, Apuiin phawk zeta a lo en chuan an nui tawp hmak a, "Tu i chhass maw?" ti a Apuii zawhna chu tuman an chhanglo. "Mambawih ka lingerie dum leithar kha hawh tir che ka tum nen nizanah ka ha daiha, tlaiah khan ka su a ala ro lo sia a pawi tak tak" Judy'n a lo tih chuan ka va melh hrawka, engtin nge a sawi ngam zawk ni!







"I mamawh a mi, ka leithar kha hakloh ka la nei nual asin" Apuiin a lo ti vat a, Judy thilsawi awmzia a hrethiamlo hlauh mai. "I hak hnu te tunge duh bik anga?" Reny chuan a lo ti ve hlak a. "Ka nei alawm, a ti ve mai mai anih kha" ka tih laia Judy hmel chu huatthlalaawm ve duh tak a ni.







"Kan kal dawn a mi?" choka a lo luh pahin JH-an a lo ti a, Apuii thil khai chu laksakin "A ngai vak hleinem nizana kan thil ken ho pawh kha ala awm nual asin" a ti zui niah niah a, "Fridge ah khan Beer ka dah kha aw" mit min siai zauhin Apuiin a ti leh a, "Kal ang le" JH-an atih tak vangin ka chhang zui tawhlo.







Pawn thleng chu Apuii leh Liansangzualan min lo thlah a, Motor a ka luhhnu thlengin Apuii chuan min nuih var var reng a "Naktuk kha lo let hmanhmawh duh suh u, vawin i chau awm si a tui deuhin i mu dawnnia, chuan naktukah nalh tawkin Shooting kan nei dawnnia" a lo ti siam siam a, a nelawmin a ṭawngkam reng ngaihthlak anuam a, an chhungkaw zingah chuan ka ngainat ve ber a ni hial awm e.




"A vawt i ti em?" Gate a kan tlan chhuah hnua a tih chuan lu ka thing mai a, ka kut rawn vuanin a hum lum vang vang a, a hmel hlim sarh mai chu enin ka hrilh dan tur mawlh chu ka lo ngaihtuah ve rauh rauh a, a ngaihdan a nilo viau angem tih te chenin ka ngaihtuah zuia, han sawichhuah pawh a phurawmloh a ni, kan inneihzan a lo ni kher bawk si a, boruak ka ti khawlo zo vek dawn tih lah a chiang reng.




"Thil hrilh tur che ka nei a" ka ti zawi sap a.




"Umm...han sawi la" ka thilsawi tur chu a ngaihtuahna thleng phalo aniang a nui tlat. "Kan thlen hunah ka hrilh ang che" ka lo ti vat a. "I nu kha phone la, naktuk tlaiah i pu te nen Alawmi hoin chaw lo ei sela, Alawmi pawh a riak thei tawh ang chu" ka thilsawi ngaihtuah zuilo fe chuan a ti a, hmalam ena ka ṭhu ngawireng chu ka kut rawn hum nghet sauhin "Vawin kha i nalh lutuk ania" a ti leh sup a.






In kan thlen chuan thawm a reh ṭhapa, Motor aṭang chuan chhukin a motor a hun ṭhat laichuan Gate bulah ka lo dinga, ka sawitur mawlh mai chuan rilru a kap ran renga, ka hmanhmawh tawh kher mai, thil sawi duh rilrua pai reng hi ka ti hleithei ṭhinlo. Alawmi lahin kan chanchin a lo ngaichang ve reng bawka, tunah pawh min lo zawt leh hman tawh hialin ka ring.






"Lut ang le" ka Polythene khai lai chu min laksakin inchhung lam min panpuia inchhung thim ṭhap ah chuan ngawirengin ka pen lut a, light a rawn tih en rualin a lam hawiin ka inher ve nghalzat bawk.






"JH" fridge lampana a pen lai chu lo hawiin a bu zauh a, sawita mai lo chuan ka lo en renrawn a, Fridge ah a thil khai chu a khung mawlh mawlh a "Intur i duh em?" a tih leh chuan ka chhanglo. Min lo en zawk a "Thil hrilh duh che ka nei" ka lo ti leh tawl a.






Ka lampana a lo kal ta chu thinphu a rang dup dup mai, ka bul a lo thlen rualin a hmai zawnah tak ka phone chu ka lo lek chhuak a "Hei hi sawifiah rawh" ka ti leh thawr a, a mengtal tap bak chu a hmelah danglam a awmlo.





"Engtik a mi nge?"




"Nizan a mi" awihloh hmel zeta min en laichuan ka lo melh ve ran a, chutah nuisukin "Nizan chu a zialo hle mai" tih zawngin min chhang a, a mi chhan dan tehtawp chuan minti bangbo takzet.






Ka thlalak hmuh ber kher chu amah chauha a lanna ka lo hmuh chu niin, pakhat zawk Judy lanna chu ka hmuh leh vata, chutah zet chuan a meng dur ta khap a, tifuh inti zetin ka lo ner sak a "Hei hi nizan maw?" tiin min zawt let ta khauh a.






"In riakdun ti raw, dawt min hrilh miah suh" ka phone chu banin ngun fe mai hian a thlek a "Engmah ka hrelo, nizanah an lo kal ve hauh silo a" a ti leh ngawta, kei aimaha bangbo hmel apu chu ka hrethiam ta chiahlo.






"I bulah Judy a awm a heihi ama min lo thawn a nih hi" ka aw chu a ring ṭha viau tawh, min chhangloin min en reng ringawt a a lu a thing ringawt chu ka chhanna duh a nilo.





"Dawt min hrilh a mi, in riakdun em?" ka ti nawn leh a, ka aw lah a khur nasa leh tawh mai, ka insum leh thei tawh meuhlo.





"Judy nen kan riakdun lo, Michaela leh Victora te nen chiah kan ni" chiang fek fawka a tih chuan a lawmloh zia chu a hmelah a hriat theih.





"Anih chuan engtin nge Judy khan ka call kha a lo chhan theih?" dawt min hrilh a tum alawm, hetianga chiang fiahna ka hmuh laiin engtin nge a phat tlat theih zawk le!






"Chu chu ka hrelo mahse, kan riak dun lo" min rawn ban atum chu ka lo tawlh hla vat a, "Bawihno" tih paha a rawn pen hnai chu awmah ka lo nam nghek bawk.






"Ti lo teh, engtin nge... kha Dawtsawiṭhintunu kha i rin theih?" nui hawkin a mitmeng thim khup chuan min melh ran a, thinrim luatah ka ṭawng hleithei tawh meuhlo.






"Nangmah zawk hi ka ringlo che" thawk la sak sak chunga ka tih chuan "A ṭha e, amah kan zawt ang" a kut zungchala min kawh zauh hnuah inher leh vutin a tie awrh lai chu a pawt phelh a, kan piah a sofa ah chuan duhdah zeta ṭhuin mitmeng thim run chuan min melh reng bawk.




"Nizanah ka rui" chang zetin a ti leh a.




"Ka hria, i thiltih engmah i hriatloh thu i sawi a, anih chuan engtin nge Judy chu i bulah a mu lo tih chiang taka i sawi theih si" ka zawhna chhanglo chuan thinchhe zetin a lu a tuaivuta, "Ka van kham ve, kha nu hming kha zanin hian kan sawi tawhlo thei em?" vin lek leka a tih leh chuan ka rilru a na vawng vawng a ni.





"Enge i hnenah chuan a sawi a?" awki dam deuh zawka a tih leh takah chuan ka lungchhe zual tinga, ka insut zui hlawp hlawp chu rang lutuka lo thoin min lo pan a, chutah a awmah min kuah rawpin "Enge a sawi?" a ti nawn leh a.






"JH-a nen kan riak dun a ti a, chuan....a kawr lei kha...."




"A tawk tawh" ka biangah dawmin min kuai daka "Min ring rawh, dawt ka hrilh ngailo ang che, ani kha ka tan engmah a ni tawhlo" ka biang leh hmuiah fawp mawlh mawlhin "Inphatsan hi ka duhlo, i lakah ka ti ngailo ang, ka hmangaih che" tih leh ka hmui khar a rual a, rawp leh duhthawh zetin min fawp zui bawk.





Che changlo in a che chu ka lo dawhmawl tawp thung, a thilsawi chu rintur nge rinloh tur ka hrethiamlo, rin chu ka duh a ka rilru tak chuan a ring hlawl silo a, a fawhna pawh chuan min ti hrehawm zual mai mai zawk.






A inlak hran rual chuan ka tawlh hla nghalvat a, thawk la sak sak chunga a hmel ka en chuan min lo en ve reng a, "I bulah ka mu dawnlo" ka tih leh rualin a mit a chhing sawka, a inhumruh nghal ṭiam ṭiam bawk. "Tinge kan lo inneih kher le" ka ti chhuak hlawl chu a lawmlo nasa mai.






"Lo kal teh" tih pahin min pawt nghal dawr dawra, a chetdan chuan min ti hamhaih in minti hlauthawng hle bawk, pawna min pawh chhuah laichuan ka ṭang ve phat a, tha kan inngah hleih em vangin awmzia a awm lo hle thung.







Motor lampanin min kai phei dawr dawr a, "Enge tih i tum?" ka tih lahin min chhang duh tawhlo, Motor kawngkhar hawng zuizatin "Lut rawh le" dam dupin a ti leh lawi bawk si a, a chet dan chu ka hrethiamlo tak zet a ni.






"Khawnge kan kal dawn?" hlauthawng fe a Seat a ka ṭhulut chu ka ke rawn siamrem sawk sawkin "I hre mai ang" tih zawng a sawi a, a aw ah thinrimna langlo mahse, a chet dan sawk sawk chuan min ti hlauthawng tak zet.






Motor a a rawn ṭhutluh hnu chuan ka biak leh hmain chak lutuk maiin a tlan chhuak zui a, ṭah insum ru ṭeuh chungin kan kalna tur chu ka zawt mawlh mawlh a, "Hlauthawng suh" a ti leh hmuk a, zu rui ang maia a che buan buan si chuan min ti hlauthawnglo theilo, a thinur hle tih lah a hmelah a langreng.






An inlampanin kan tlan let leh tih ka hriat rualin "Tinge kan lêt leh a?" ka lo ti chul a, "Inah kan riak zawk ang" a ti leh mauh mai, "Angailo, lêt leh ang" ṭap ṭiau chungin keiin ka lo ti a, chutah ka kut a rawn hum vat a ka zawhna erawh a chhang duhlo, ina kan lêt leh anih chuan midangin engtin nge an lo ngaih ang, zawhna min lo zawt dawn a sin, ani lah thinrim em em hmel a pu bawk si.






"Inah ka riak duhlo" ka ti nawn leh a, "I zawhna chhanna chu ka pe dawn che alawm" tih zawngin min chhang leh a, "Angailo" ka tih leh ngial pawhin a ngaihsak duh tawhlo, a thiltum chu rin dan ka nei thiam riai ruai a, hetiang zawnga thu kalpui kher hi chu ka duhloh dan ber a ni.







Gate a kan tlan luh laite chuan thaw dep dep chungin ka en a, a thinrim zual sauh emaw tih mai tur hmel a pu tawh, kawtah Motor a ti dinga a chhuk tur chu a banah ka lo vuan ve ṭang ṭang a "Lêt leh zawk ang, engmah ka sawi tawhlo ang, ka ring ang che" ka ti mawlh mawlh a, beidawnthlak tih hmel zeta min en hnuah "Chhuk rawh le" zawi supa tiin a chhuak nghal vut a, zanina ka thil sawichhuah te kha inchir tak ka ni.






Motor hma ah chuan dingin ka chhuah hun min nghak renga, kei erawh che chang mailoin ka la ṭhu a; engthil nge tih a tum ka hrethiamlo, kan inhau tih midangin an hriat ka duhlo a, heta riak tura kan let leh ringawt pawh mak min van ti dawn tehlul em.






Motor lampana a rawn pen leh rualin kawngkhar chu ka hawng ve nghalthuaia, kawngkhar ka khar fel rualin ka bulah a lo ding leh hman der tawh. "Ṭap suh, midangin ka vel che emaw an ti ang" nuisuk chungin ka mittui luanna huh hliam chu a rawn tuaihula, "Nangchu ka hau miahlo che ania" damthlupa ti lehin ka chalah a rawn fawp a, engmah ka hrethiam tawhlo, hetiang mizia hi JH-an a pu ang tih ngaihna pawh ka hrelo zawk.






"Buaina siam lo ang" ngenngawl zeta tiin a banah chuan ka vuan a, a bu nghat nghat nain ka la ringhlel ṭhum tho, "Lut ang" tih leh min kaih a ruala, inchhung kan lut tur te chu ka zam ru kher mai.






Liansangzuala leh Fiona-i lo chhuak tur nen kan intawk hlawla "Eh...tinge in lo let a?" Liansangzualan a lo ti he haw a, "Nangpawh lo let rawh" tih paha JH-a lut vut chu makti zetin an lo en ve bawk.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:07 pm

GOMENASAI - by Ahmangaihi violette khiangte



CHAPTER - 26





"Tinge a?" Liansangzual'n a lo ti a, chhan mai ngaihna ka hre leh lo pek a, ka ngaihtuahna a buai nuai tawh a ni ber mai, "Lo lut ru" tih pahin a inchhunglam chu ka pan ve thuaia, Sitting room lama JH-a kal phei ta chu ka va hmu hman thuaka, hmanhmawh takin a kalna lamah chuan ka pen phei hlawk hlawk a, midang ho hmel ka hmuh rualin an lo ngawidak si a, engthil emaw chu a lo sawi hman tawh a nih hmel!






"Zosangliana tih loh zawng khan min zui rawh u, nang....nangpawh" a kawk kual zung zung a, chutah ka lama lo inherin "Choka lamah" tih pahin min kalpel zui zat a.





"Tinge inlo let leh a?"




"Tinge ka u kha tikhan a awm, a va thinrim hmel ve?" makti fe a Apuii zawhna chu chhan a har a ni, Judy lahin thîp fahranin min lo melh a, kan buaina chu hresa niawm tak hmel a pu bawk.






"Tihsual ka nei a mi a, enge ka lakah a lungawiloh ve ngawta?" lawmlo zetin Zosanglianan a lo ti a, "Jonak nangmah lam anilo ang, tikhan lo awm phawt mai rawh" hnunglama tih ri chu kalsanin Liansangzuala leh Fiona-i te lo kal chu ka zui a, midang te pawh chuan minlo zui ve mai bawk a.






Dawhkan lianpui nghenga JH-a lo ding chu ka va hmuhrualin ka mitmeiin ka khap ve viau na a min enrei duh hauhlo, ka hnunglam zawk ami te chu a melh nghal run a , chutah "I phone kha lo la teh" tiin ka lama a kut a lo phar a, a pek loh theih siloh, rilru a hah duh ngang mai.






"Victor" aw thum duta a tih chuan Liansangzuala pawh a ngaih a ṭha zanlo a niang "E..nge..?" ban charhin a lo ti a.






"Nizan khan hmeichhia i hruai em ni?" thutak zet mai hian Victora hmel chu a en a, "Hruai nang" pakhat lah chuan a lo ti vat a. "Anih chuan engtin nge Hmangaihsangi hi kan riahna ah alo kal theih?" Victora mawhpuh a tum daih mai chu ka hrethiamlo, tinge judy zawk a zawh mai loh?






"U....nizanah kan lo kal a lawm, i muthilh hnu khan, tinge chu chu buaina a awm a mi?" Apuiin a lo ti ve vata, Apuii en chuan a ngawi ta hmuk a, thil awmzia chu a chiang khat viau tawh a. Mahse, a la duhtawk mai hauhlo "Enge in lo tih?" chang fek fawkin a ti leh a. "JH.." khap tum sateh mahila min en zawk bak chu engtin mah min chhang chuanglo.







"Michaela thil kan chah kha a lo ak tlang daih sia kan lo lam alawm" Apuii bawk chuan a ti leh a. "Hmangaihsang, ka lo phone i lo khawih tiraw?" Judy en loin Apuii zawk chu a la en ta renga, Judy hmel buai nak chu ka va hmu nghal a, a chhan mailoh vang chuan "Sawi vat rawh" pakhat chuan a lo ti leh a.






"Tuman i phone kan khawihlo, engthil nge buaina i neih chu sawi vat mai la" Apuii chuan a ti ve kha kha a, ka lam lo hawiin "Enge han sawi thuai teh u?" a ti zui leh zat a, JH-an sawi law law sela ka tih vangin changloin lu ka lo thing ringawt thung.






"Hmangaihsangi khan heihi enge sawifiah rawh se" phone lek chhuah paha a tih leh rualin ka lo ban vat a "A tawk tawh, ka hre vek tawh a lawm" ti a lo laksak mai ka tum chu min lo dang hmiah a, "Lo inrawlh suh" a ti leh hmak mai. Judy lam a pan laichuan kan en ṭhap a "Ka nupui hnenah engthil nge ilo sawi?" a dawhtheilo tial tial tih chu a bula la awm tlem ber kei ngei pawhin ka chiang viau.






Judy ngawiran hmaah chuan dingin phone chu a lek chhuak a, "Tun hnuah hetiang thil hi i ti leh tawh tur a nilo, ka sawi chu i hrechiang em?" a ṭawng ringlo mahse, a chiang khel khawl viau a ni.







"Khawi maw, in sawichiang duh silo" tih leh JH-a kut aṭanga Phone chu lak pahin Apuii chuan a bih nghal vat a. "Hei te chu fiamthu mai mai a nih hi, keipawn inthla ka la ṭeuh a lawm, enge huattur awm a?" Apuii bawk chuan a ti leh a, ka awm a nuam lo takzet tawh, ka pasal lah chu insum ve eih pawh a tumlo emawni Apuii zawk chu thiamlo zawk melh tak hian a melh a. Hepa hian ka tan thil a ti harsa zo vek takngial dawn a nih hi.







"Ka fiam mai mai a lawm.... i phone a lo rik khan i muhil sia ka chhang anih kha, kha te chu fiamthu a nia" Judy'n a lo tih ve takah chuan Apuii chu a nui hak a "Mambawih, engmah huat tur a awmlo, fiamthu a nih kha aw" ka lam hawiin Apuiin alo ti a, lawmlo tak chungin ka lo nuilui ve ngiala, boruak ṭhalo awmlo hram sela ka duh vangin JH-a pawh ka beng daih vat a ngai a ni.






"In va ho ṭhin e aw, tiru nangni pawh lêt tawh ru in neihzan zanah tinge in lo infiam" Liansangzualan a lo ti ve ta vat a, kal chhuahpui nghalmai tumin JH-a ban chu la lo vuan ve nghalthuai a.






"Fiam a dawllo e" Judy'n a lo ti leh ngat chu ka melh rang kher mai, infiam na chi pawh ninghallo chuan, khathil vang khan vawin lama ka hah phah zia te kha a hrelo nge a hrelo der zawk, keichuan a fiamthu niin ka ngai theilo.






Chhan mai tuma ka ang hman zuau chu JH-a lo ṭawng leh vang chuan ka tawp chawt a, "Ka mu dun anga ka nupui hnena i sawi kha fiamthu maw?" a sawi zawng chuan ka lo ip chawih thei, midang ho pawn mak an ti tih chu an hmelah a hriat theih.






"Chutiang chuan i sawi a mi?" phawk zeta Apuiin a tih leh chuan Judy hmel chu a buai nasa maia, a hawi chhuak ṭha ngam meuh tawhlo. "Ka sawilo" a ti zawi sap a, "Engtin nge a sawi?" keimah min lo zawh takah chuan ka lam an lo hawi leh ṭhap a, sawi chhuah leh tawh ka duhloh tehlul nen, tinge ka pasal hian buaina lam a pan ngar ngar mai le?






"Bawihno?" mitmeng dur khapa min en chung chuan min zawt nawn leh a, chhan ka hreh lutuk chu ṭah vak mai te pawh ka chak rum rum tawh, min en reng hlawm bawk si a a chhan loh theih siloh a, inhumruh ṭeuh chung chuan "Nizanah kan riakdun a ti" ka ti tawl mai a, midang ho chu an lo thum hak a "Khai a!" Liansangzualan a lo ti hluk bawk.






"Judy, i ti awmanglo lutuk anih chu, Mambawihi tan chutiang fiamthu te chu lak thutak loh chi a ni hleinem, a.....i thiamlo hulhual a nih chu" Apuiin a lo ti zung zunga, "A awih tak tak ka ringlo a" Judy chuan a ti ve sap a.






"Mambawih hrethiam mai rawh, fiam a tumna che anih chu engahmah ngai duh suh aw" Apuii nuisang hmel chu enin ka lo bu nghata, JH-a nen an riakdun lo tih chu chiang viau mahse, Judy thiltih erawh fiamthu mai mai a nilo tih chu ka hrechiang a ni, a fiamthu angah ngaihsak lui pawh niila min fiam na mah mah ka la ti tal ang, infiamna chi thil pawh ni nghallo chuan, kan inkar boruak ṭha tak pawh nilo karah lehnghal. Mahse, tun hunah hi chuan fiamthu anga ka laksak ve mai angai tlat.







"Ka lo ngaihtuah tlem deuh a ka thiamloh zawk a ni e, naktukah insuan chhuak la a ṭha ang, inkhata cheng ho thei kan ni dawnlo tlat" Judy en chunga JH-an a tih leh chuan a ban ka lo hmer vak a, "Ka nuin hetah awm sela a ti anih kha" Reny chuan a lo ti ve khauha, mittui parawl kiang chunga Judy inpetruh fan fan chu a khawngaihthlak lehling zawk mah tawh.







"U...hriat sual palh thil anih chu mawle" Apuiin a ti ve leh tak nain JH-a erawh rilru sawhsawn tum leh mai tur hmel a pulo, "Lo kal teh" ti leh hnunglama pawh ka rual a, fridge hunna bulah chuan pawt pheiin "Tikhan ti kher lo la, thil awmzia chu kan hriat tawh kha, keipawh ka lungawi tawh a lawm, lêt leh tawh zawk ang" ngen titih chuan ka ti mawlh mawlh a, min chhangloin thutak fe chuan min en ngul ringawt a, lawmlo hmel ala pu reng tho.






"Chen ho i duh em ni?" a lo ti hmuk chu hamhaih zetin ka en a, "I ti buaithlak mai mai" ka ti leh ngawt a, midang ho lakah mawlh mai chuan ka inthlahrung tawh a ni.






"Chenho i duh loh kha, keipawn ka duhlo" inher vutin "Naktukah chhuak ang che" a ti leh mauh mai, "Chutiang vang ringawta inchhuahtir te chu i ti ve mah mah lo maw?" Apuiin a lo ti ve leh a. Chutah ka lam lo hawiin "Mambawih, inchhuahtir ringawt nan chuan a ho e tiraw?" beisei nei zet hian Apuii chuan a ti a, ka talbuai zo leh vek tawh.






"Enteh ṭhiana Judy a thiamlo hulhuala kan hre vek tawh a lawm, chuti rum ruma thil tih tur a ni ngailo" Liansangzualan a ti a.





"Mambawihi ber pawn angai haw tawhlo a, tinge maw i tih ṭang ṭang le" Apuiin a lo ti ve bawk.






"Ka sawi ang chuan awm rawh se" tih leh kal a rual ta mai a, rang lutukin keiin ka umzuia, engtia han tihzui zel tur nge tih lah ka hria a zeng pawh a nilo, zep loah chuan Judy chu chhuak sela ka duh ngei a lawm JH-an a ngaihdan pawh chu ka duhthusam zawk a ni a mahse, tuna a thiltih kher hi chuan thilṭha aiin thil ṭhalo a thlen zawk ang, nikhat em pawh an kiangah ka la chenglo a, zan khatna aṭangin heti ang kan ni nghal ringawt chu kan chhungte lakah pawh a inthlahrunawm lulai deuh chu a nî.







Sitting room zawn a thlen chuan a lo inher leh vut a "Heta riah i duh em, nge kan lêt zawk ang?" awki damthlup hian a ti a, beidawng fein keiin ka lo en ve thung a. "Tinge tikhan i tih a, ka tan a nuamlo a sin, va let leh la chhuahtir kher angailo a nia va hrilh ve leh zawk rawh" ka lo ti sek sek a. "Awm ve lo sela kan ṭha tlang zawk" a lo ti duh lek a.






"Midang lakah khan ka inthlahrung a lawm" ka ti leh rih a.






"Inthlahrunna tur a awmlo, mikhual mai chauh a lawm anih, zan a rei tawh sia hetah riak ila naktuk zanah kan chhuk mai dawn nia, ṭha em?" a zawhna chu changloin ka en tlawk tlawka, pasal luhlul deuh ka nei tih ka inhre ve chiah a ni, a tih ngaihna tak pawh ka hre tawhlo, midangho lo phei thawm a awm rualin "Room ah lo han chho rawh, Liansangzuala kan be lawk ange" tiin a let leh a, awm ve reng pawh ka tan anuam tawhlo, a thu thuin engkim a ti tho bawk a, lo inthiarfihlim mai chu a ṭha zawkin ka hria.







Hmanhmawh takin Room lam ka pana, kan nupa room reh ruih leh hnawk niai chu thlirin thawk ka la leh rih a, vawin zet chu ni ṭhalo tak ka hmang liam a ni, ka chau takzet. Engtin nge an inbiak zui zel ang tih chu ngaihtuah zawng ringawt pawhin thawk a ti ipik a, zanin thilthleng te hi puitling hoin an hriat hunah chuan engtin tak ngai ang maw?







Alawmi ka phone a "JH-an Judy hnawhchhuah a tum a, a zialo tak tak a ni" ka ti nghal thawr a. "A pawiloh chu chhuak daih rawh se" a lo ti ve leh hmiah a, an ngaih hi a sam ṭhin, thil thleng thei tam tak keichuan ka ngaihtuah a, anni hi chuan min ngaihtuahpui ve pha meuhlo zawng a ni.







"I hrethiamlo a mi, Judy te chu Nu Hmingi ṭhiannu fanu ania, keimah hi min dem daih dawn a sin" ka lo tih chuan "Dem ngawt biklo ang, a thiamlo zawk ania lawm, bakah inchen ho reng chuan neuh neuh te inla nei chho ang tih a hlauhawm ve alawm" a lo ti leh a, chu chu thil awm thei tak chu a ni tehmeuh mai mahse, a bak thil awmthei a la awm miau si a, ka rilru a buai takzet.







Ka bungrua ka remfel laichuan JH-a a lo lut a, a hmel chu ka lo en reng a "Ti duh rih suh, naktuk lamah i ti dawn nia" a kawr phelh mawlh mawlh pahin a ti a, "Engtin nge ni dawn?" ka lo tih chuan nuisuk chungin min en a "I inbual hmasa duh em?" a lo ti a, "Judy kha?" ka tih leh chuan "Ka inbual hmasa ange" tih leh min hnungchhawn a rual a.






A inbual laichuan ka lo inremfel thawkhat tawh a, Bathroom aṭanga alo chhuak chu Sofa a ṭhu chungin ka lo en ran a "I lu ti huh suh aw" Closet lam pan paha a tih chuan thawk ka la haka, ka thil zawh tum a lo pehhel zel mai.







"Awmve lo sela chu ka duh a mahse, tuna hnawhchhuah kha chu angailo a sin keimah vang leh lek phei chuan" ka ti zui hram a, "Apawilo, ngaihtuah zui vak duh suh, chhungte a nei a lawm" a ti leh mai a. "I nu a lawmlo viau angem?" ka tih chuan lo hawiletin a lu a thing nghut a, "Keiman ka hrilhfiah dawn nia" tiin a inha zui mawlh mawlh a.






Inbual turin Bathroom ah ka luhsan a, ngaihtuahna ah thil dang a leng meuhlo, thawk a ti ipik riau a ṭah te lam lam a tichhuak, JH-a bulah khan lo sawi kher lo ila a ṭha zawk angem le, Alawmi lah khan a ṭha zawk a lo ti ve tlat mai a, a ṭhat zawkna tur kha ka hre mang derlo a, Judy aimah chuan midang ho kha a ni ka ngaihtuah chu, eng angin nge min ngaih ang, pasal te laka vui thu thlen chhen ṭhin mi ah min ngai mai lawng maw? A....Ka rilru ahah a ni.






Bathroom aṭanga ka chhuah leh chuan room chhung chu a lo thim khup tawh. Ekhai...! Kei hi ka lo theihnghilh daih a ni, zanin hi kan lawiṭhatzan a ni a, engtin nge ka theihnghilh theih? Ka rilru ah thildang ka lo dah daih a tin a ni.







"Lo mu rawh" ka thawmhnaw bawm hai ka tum lai chuan a lo ti a, "Light min lo on sak teh, ka thawmhnaw hak tur ka hmu theilo" ka lo tih chuan a che zui sawt sawt a, a on mailoh vang chuan lehhawi meuhin ka en a, ka hnungah alo ding reng tawh chu niin!






Tukverh aṭanga thla eng lo lut aṭang chuan a taksa chu fiahlo riaiin a lang thei a, kawr aha miahlo tih pawh ka hmu thei, "A vawt em?" tih pahin ka kawngah a lo kuah a, a taksa lum ka deh rual chuan ka zam chhe nghal der mai, khur ru dar dar chungin a nghawngah ka lo kuah ve chial a, "I van rimtui ve" ti supin ka hmuibul chetah a rawn thaw lum ham ham bawk.






"Thildang ka ngaihtuah nasa lutuka" ka lo ti hap a, "Keimah chiah min ngaihtuah rawh, thil dang chu naktukah" nuisuk chunga tiin min pawm nghet sauh a.






"Ka la inthlak lo a" ka aw khur dar dar chu a hrethiam ngei ang, "A pawilo" tih pahin ka hmui a rawn tawk a, nghet zeta min kuah salh salh pahin min pawm kanga kan nupa khum lian zeta min nghah lai te chuan engthil nge thleng leh tur chu ka hrechiang hle a ka zamin ka tiril a khur a, khawvawh vang ni hauh siloin ka vawt seng seng hialin ka hria.






Min fawpa, duat taka min kuah chungin a ta ah min siama, engtikah mah kan theihnghilh tawh loh tur hun kan nupa tan a awm anih chuan tun hun hi a ni ngei ang, min tihnat a hlau em em a vawitam min zawt bawk, a hmangaihna dawng chungin engtin nge ka nat theih ang? Chu a hnekin ka tih lawm zawhlo mawlh ka hlau a ni, chu chu ka laka a chanvo a ni tlat si a.







Zan boruak chu a reh ṭha kher mai, am zeta thawk kan la dun ri bak chu hriat tur a awm lo, ka sira a leh thlak rualin a lamah min pawt hnai zuizat a, a awm ngheng chiala min kuah lehin ka chalah a fawp vang vanga, chumi hnuah min hmangaih thu min hrilh leh a, chutiang bawkin keipawn ka hmangaih thu ka hrilh a ni.







Ka muthilh lai ka hrelo a, ka taksa puan huha a rawn hruk laite chu ka mang hriat riai ruai chauh tawh, ka harh leh chuan khua a lo var fel der tawh a, thlanglam bathlara nizung eng riai riai lo lut chu a mawi kher mai, inlet thakin ka bula ka pasal muhil thaw sak sak chu ka en a, mipa hmelṭha tak a ni. Tall, Handsome and Nice shoulder.







Sana ka en chuan zinglam dar 5:30 a lo ri tawh a a la hma viau mai, midang pawh an la tho bikin ka ringlo, mothar tuka thawh hai hi ka hlau a, thawh hma viau chi niin ka hre chiah silo a, ka inbual hman zan ang chu. Bathroomah lutin Shower ah ka inphuh tira hmabak ko deuh nei ang maia ka awm reng chuan awmnuam deuhin min awmtir thei meuhlo.






Rei zet chu Bathroom ah ka awm a, Judy chungchang chu JH-a sawipui leh a ṭhain ka hria, heti ngawt chu a diklo ang keipawn ngaihdan chin ka thiam tawh anga buaina kan nei leh tawh kher nang, engtiang pawhin ani chu lo awm sela ka pasal nena kan inkar a lawm pawimawh ber zawk chu, kan nupa inkar a ṭhat phawt chuan thildang chu ka tan enghelh vak tur a awmlo tiin ka infuih a, ka pu khan a sawi fo ṭhin "Inchhungkhur nuamlo hi mihring nuna thil hrehawm ber pawl a ni" tiin, chuvangin he inchhung nawmlohna thlen tu hi ka ni tur a nilo.






Ka inbual zo ka chhuah leh laichuan khum a lo siamfel diam tawh a, Darthlalang hma a ngun zeta a lo in en chu ka nuih var var bawk, nalh a intih hmel lutuk tlat a. "Ti nge ilo tih duh a, keiman ka lo siam dawn a sin" ka tih chuan a lo hawi vat a, "Bed sheet ah hian nizan hnu hma a awm a nia?" a lo ti khauh a, min ti zak ram ram mai.






Hmanhmawh deuhin Bed sheet chu ka thlak a, kawng lehlam zawng tak chuan ka inchhuang ru ve hle thung lawia,"I tho nuam em?" ka bianga fawh zauh pahin a ti a, "Enteh Judy kha..." ka lo ti dek dek chu "Kan intifai ange" tih pahin min inhersan daih a, "Ka sawi nawn leh dawn tho ania aw" ka ti zui chu a ban rawn vai zauh pahin Bathroom ah a lut a, hepa pui hi a duhlohna ah chuan a luhlul ve hrep anih dawn hi.







Khumah ṭhuin sana ka en sek a, mo thar te hi hetiang hian an awm ve ṭhin tho angem le, ka thawh hma lutuk chuan nidang zelah ka tho hma thei lo palh ang tih ka hlau ve tumhranga, mo thar hlim chauha tho hma nih chu a zahthlak dawn nasa mai si, â....tuktin hna ka kal dawna ka tho har ngai pawhin ka ringlo mahse, midang thawh hma em ema thawh chu ka duh chiah bawk silo a, ka awmdan mai mai chu a laklawh viau a ni.







"Enge i tih a?" tih ri vang chuan ka hawi vat a, towel veng chungin min lo en a ani chu zingkar aṭangin a hmelṭha em em bik mai a, keichu ka la bui churin a nia ka inhriat ni.




"JH....judy kha maw..."




"Kan inthlak ange" a ngaite bawk chuan min inhersan leh a, enga ti ziah nge mawni le.






"I nupui thusawi i ngaithla duh dawn lo maw?" ti tau awka zet chuan ka ti a, min ti lawmlo lek lek tawh.






"Ka ngaithla che" damthlupa a lo tih chuan "Judy kha...." a rawn hawi nghal vut a ka ṭawng tawp chiang kher mai.




"Vawin inrinni a ni em?" a lo ti hluai a.



"Ni e tinge?"




"Ni ka hai anih chu" tih pahin a inher leh hmuk a, a thawmhnaw khai a hai zui mawlh mawlh chu beidawng zetin ka en a, "Min bia la" ka ti leh ngawt a, a nui ri chu ka hre pha, min chhaih em mawni zawk le.






"Nupa angin inbia ang, chhungkaw tana pawimawh deuh sawitur ka nei ania" lawmlo fe chuan ka ti leh kha kha a, a T-shirt hak paha ka lam rawn panin "Mu leh zawk ang" mit min siai zauh chungin a ti a, "Aaiiihhh....!" phawk zeta ka lo ti chu anuih a za kher mai.





"Dar 6 a ri ṭep tawh a lawm"




"Ti nge chu chu?" a lo ti khauh a, ka kawngah min kuah zui zat bawk.





"Enteh, dar engzatah nge thochhuak ṭhin ila ṭha ang le?" ka tih chuan a kiai suka "I duh hun hunah i tho thei alawm" tih leh paha min fawh mai a tum chu a hmui ka lo hup chawt chawt a, "Ka zawh chhan che chu in thawh hun ka hriat loh vang a lawm, insiamrem ka tum anih hi aw" ka lo ti a, nuihza insum hmel apu in ka hria.






"Kan tho rual ngailo, Princess-i chu Dar 8- 10 inkar ah, ka nu leh pa dar sarih velah, kei dar ruk mahse, nupui ka nei hnu hi chuan ka tho tlai tawh ang" ka lo nui hawk chu min fawh tum chuan alo kun hniam lehnghal zat a, a hmui lo hup leh pahin "Anih chuan kan thawh a hun chiah e dar ruk a ri tawh" ka lo ti hmak a.






"Dar ruk chu ka thawh hun a lawm, i duh chuan tukṭhuan eihunah ka pa bulah i zing thawh hun tur dar zat i hauh ve dawn nia" a nuihza hmel chu ka lo melh rum ram ram a, "Ka bawihno" ngenngawl zeta a tih leh takah chuan a dan theih tawh loh, duhthawh zetin min fawp zui a, ka hnar a ti sen zo leh vek dawn in ka hria.






Darthlalang hmaah dingin kan in en vang vanga, ka hmui tlang leh hnar vel tai hlar chu enin a nui suk a, kei ka lo ner nang thung. "Judy kha sawiṭha leh rawh aw" ka ti chu ka sawi zawh rual rualin zuk nui tawp nghal hmuk chuan!






"A dik theilo a lawm, thil awmzia kan hria a midang pawn an hre tawh a, a tawk mai alawm, kan pahnih pawh hei kan ṭha a" ka ti sap sap a, ani a ngawi ran a, min chhang tawh dawn lo emaw ka tih hnuah "Kan thawh a hun ta e" tih sup pahin ka darah a rawn kuah a, pawn lam min pan pui nghal zat bawk.



IMG_20210116_194207.jpg
IMG_20210116_194207.jpg (27.21 KiB) Viewed 13973 times


CHHUNZAWMNA



Inhnuaia kan chhuk hnu chuan thingpui ka lumsaka, ani chu chanchinbu chhiarin ṭhutthlengah a ṭhu awn diai a, kawt kaia naupang ball pet ri ṭak ṭak bak chu a la reh ṭha viau mai, kawngpui hnaih a ni lo bawka motor thawm riva takngial pawh hriattur a awmlo.







"In va lo let hma ve" tih ri vang chuan ka lehhawi vat a, choka lam pana ka pa lo phei chuan hlim hmelpu tak chungin keini pahnih chu min lo en a "Nizanah kan lo let leh a lawm" JH-an a lo ti a. "Thingpui ka siam nghal ang che aw?" ka lo ti ve var a, "A sen hangin han ti rawh, zing karah chuan a paw chu pumpai a ti nuamlo riau zel" JH-a bula ṭhutpahin a ti a, chanchinbu phek lehlam chu a bih ve nghalzat a, an han awmdun phei chuan an lo inchhun pafa khawp mai, Apuii leh Reny chu an nu lam an kal deuh a mahse, JH-a erawh a hmaitlang leh fûke engkimah a pa hlauh a ni thung.







Thingpui ka pek laichuan "Enga ti maw inlo let leh chhan chu?" keimah zawk min en vangin ka lo nui tawi tak a, "Chhan vak a awm chuanglo" JH-an a lo ti leh a.





"Michaela hi a lo haw em?" JH-a a zawt ve thunga "Ka hre bik miahlo" ngaihsak manglo zet chuan pakhat chuan a lo ti a. "I nute Chhuani te inlamah a riak a nih dawn chu, hepa pui hi ina riah a tumlo reng reng mai" ka pa chuan a ti leh hlak hlak a. Michaela chu ka la hmu bik miahlo, nimin kha chuan alo telve ngeiin ka ringa; a tu kha nge tih erawh ka hre mai theilo.




.

Eirawngbawl ṭan mai dan tur chu ka bangbo riaua, chaw han chhum ringawt dawn ila an ei duh mang hlawmlo tih kha ka hre ve ran tawh si a, a tih ngaihna tak pawh ka hrelo. Fridge hawngin ka en kual diat diat a, Fridge chu pathum lai a inhunga, ka hawn ber kherah chuan intur lam chi hlir a awm a, a dang chu ka hawng leh a mahse, chutah pawh chuan chawhmeh siam tur chi reng reng ka hmulo, JH-a chu ka va en a, a thil chhiar laiah chuan a lo la bur ngar ngar thung a.






"Eirawngbawl dan tur hî?" bangbo deuha ka tih chuan ka lam an lo hawi rual zawt a, "Ti duh suh, an lo tho ṭep ang" JH-an a ti leh mai a, "Lo awm mai mai rawh" ka pain a lo ti ve bawk, chutia a tho chhuak hmasa berin a engmah tiloa midang thawh hun lo nghah ngawt chu nithei pawn ka hrelo, ka pasal lah chuan a chanchinbu chhiar lai a bih leh daih a, min ti khawlhkham zo vek a ni.



.

Fridge chu ka bih leh ṭhin a, Tomato leh Hmarchapui chu a awm ngei mai a, ka râwt dawn em mawni, an ei duh angem le? Thil pack hrang hrang chu ka en kual a Frozen meats lam a ni, siam ringawt dawn ila an duh angem tih tho ah chuan ka buai leh a, han chet zui chiam ngaihna ka hre derlo.







Thawm ri nak nak a rawn awma, reilo teah Apuii leh ka nu an lo lang a "Good Morning Mambawih" Apuiin a lo ti var a, "Morning" ti a nuisangin ka lo chhawn ve a, "I va tho hma ve, kan mu rei ṭhin ania keini chu, hna in kal dawnloh chuan tho hma vak duh suh" beiseiloh deuh a ka nu in a lo ti ve chu hriat nuam tak zawng a ni.






"Eirawng bawl ngaihna ka lo hrelo a, ka tho hma ve pawh ka ṭangkai lo khawp mai" ka lo ti a. "Bawl vak pawh angailo, zing lampang hi chu kan awlsam lutuk, tlaiah pangngai deuhin kan bawl dawn nia" Apuiin a ti leh a, Frozen meats awmna Fridge chu hawngin thil pack lian ṭha nelh nawlh hi a lo la chhuak a, an nufa chuan an che zui mawlh mawlh a, puih duh ve si han puih mai dan tur hrelo chuan kei ka ding zum renga, engmah lah chu lo ti ve rawh min ti mang bawk silo a, a awmdan chu ka lai ru riau a, an chevel chu ka en leh ringawt ṭhin.






"Engtin nge ka puih ang che u?" ka sawilai in JH-an min lo en zawk a, "Eirawng chu lo bawl duh suh, i peih chuan pangpar tui lo pe la, ka zawh veleh ka lo pui ang che" Apuiin a tih chuan ka che ve ta vata, ka kal chhuah rualin JH-an min lo zui ve nghal zat bawk.






"Tui Pipe ka lo vuah sak ang che" tiin Tanky lianpui awmna lamah chuan a kal phei a, pangpar tui ka pek laichuan veranda aṭangin min lo thlir a, chutih laimek chuan hnunglam aṭangin "U mambawih" an rawn ti lang lang mai. Ka lehhawi chuan ṭhenawm inchungsang aṭangin Fiona-i te unauin ban an lo vai lauh lauh a, "Zing Exer an la ṭhin a, i duh chuan i zui ve ṭhin dawn nia" JH-an a lo ti a, ka phur zawng tak a ni, duh ve viau ṭhin mahila ahma kha chuan zingkar Exer lakna hun ka nei ngailo a, Alawmin min sawm chang pawhin ka hnial fo ṭhin anih kha.







Ka tui pipe ken lai chu min laksakin inhmalam banga pangpar zam chi chu a phuh tir a, Fiona te unau chuan minlo au leh rih a "Vawinah Shooting kan nei dawn em?" a uanaunu zawk chuan a lo ti a, "Tlai lamah kan kal dawn nia" JH-an a lo tih chuan "Tlai ah kan tum dawn nia " ka lo ti ve vat a, a phur hmel nghal kher mai.






Inchhunga kan luh leh hnulawkah pa pakhat a lo lut a "Tluanga, kan thlam sak dan tur saw hisap a buai deuh tlat mai, i ni Zuali lah hian Balcony zau ringawt a vei hlur, inchhung a zim zo vek dawn lo enpui ve teh, Rod te saw Bundle sawmhnih ngawt kan lak belh a, ala daih theilo va en pui lawk la a ṭul chuan Remruata lak belh tir leh mai rawh, kan lei hnem tawh tehlul nen a daihlo a ti renga engtin emaw a tehtheng nimaiin ka hria" a lo ti lut bawng bawnga, chumi hnuah engthil emaw sawiin JH-a nen chuan an inzui chhuak a, ani a kalchhuak daih bawk si chu ka ṭi leh duk tawh.






"Mambawih lo kal lawk teh" ka nuin a lo tih chuan choka lam chu ka pan ve nghalthuaia, choka dawhkan kila Judy lo ṭhu nen chuan kan inmelhfuh chiang hle a, awm a ti nuamlo nghal ram ram mai.






"Nizanah engthil nge thlenga?" ka nuin a lo tih chuan Judy chu ka va melh zawka, a lo sawi tawh a ni ngei mai a, ka nu in min en reng bawk si chu chhan dan tur ka van riau a, chutihlaiin Apuii a lo inrawlh ve ta hlauh a "Thil hriatsual palh mai mai a lawm, ka u pawn a theihnghilh leh tawh anih kha, sawi zui tawh su" a lo ti zung zung a.







"Nu, engahmah ka ngai hleinem, insawn ka lo tum sa hrim hrim a" inthlahrung awka deuhin Judy chuan a lo ti ve a. "Insawn a ngai reng renglo, i nu bulah ka sawi tawh kha, ka fanu ve tho i nia, helama i awm angaih chuan kan hnenah i awm tur a lawm" ka nu chuan a lo ti damthluama, thil ti diklo chan tak ka changin ka hria, awm a nuamlo zualting mai bawk.







"Mambawihi pawh a hmai zahawm ve tawh a lawm, an awm te ka lo tinuamlo palh ang" Judy bawk chuan a ti leh a "Engthil chiah maw inlo inbakkaih chhan chu?" Judy lam hawia ka nuin a tih leh lai chuan "Amak e.. nu" Apuii a lo ti hlak a, ka nu min rawn melh dan mawlh chuan min ti mur sung sung thei. Engmah phei chu a sawizui ta lo hlauh a, a ruktak chuan min lawmlo tawh khawp ang chu.







Din reng chu a ni thei mang silo a, Apuii leh Judy ṭhutna bulah chuan ka ṭhu phei ve a, Judy nen chuan kan inmelh leh ralh ṭhina, inthiamlo hmel te pawh a pu ve tak takin ka hria, a inthiamlo tak tak anih ngai chuan keichuan a lakah harsatna ka nei lo ang, chuloah ani lo do tlat chu chhungkaw boruak ka ti diklo zo mai mai dawna, chu chu thil ṭhalo tak a ni.






"Nizan khan a sawi zawm em?" Apuiin a lo ti ru sar sar a, "Sawi zawmlo e" ka lo tih chuan Judy nen chuan kan inmelh leh ralh a, "Judy pawh a inthiamlo lutuk a nia, nang pawn ngaidam ve rawh aw, ka u pawh lo bia la, nangin i sawi te chuan a ngaipawimawh ang, ka u hi chu a rilru a sehhel ve sia a tih tawh lam hi a ti tlut zel a" Apuii bawk chuan a ti leh a "Ka lo be dawn nia" ka tih laia Judy lo ner sak chu ka hmu hman a, he nu hian eng rilru nge a put chiah ni le? Tun mai khan a inthiamlo ve viau khan ka hria a ka thilsawi alo chhawn dan chuan rilru a ti buai leh lawi bawk si.







"Ka u chu lo sawipui leh ngei ngei rawh, judy pawh reitak a awm dawn chuanglo a, a chhuah chuan i tan pawh a ṭhalo zawk ang, ka nu hian thil hi a hrethiamlo leh dawn lutuka" ka lamah lo hnaiin Judy hriat phakloh tur chuan a ti leh sap sap a. "Ka sawi tawh a, a ngaithla duh vak lo" ka lo ti ve vat a, chutih laiin JH-a a lo lut ve chiah bawk.







Kan lo en ṭhap chu phawk lek lek hian min melh kual a "In tih dan chuh" tih hluk pahin kan lam a lo pan a, ka ṭhutna Chair tlang vuana lo dingin ka hma a ṭhu Judy ep chiah chuan a ding a, ka hnunglama a din vangin a hmel chu ka hmu theilo.






"Mampui enge Judy lakah lungawilohna i neih a?" ka nu in a lo ti ve khauh a, "Amah ka hrilh tawh" pakhat lah chuan a lo ti hmuk a, "Inbuaina chu sawi ta che u mawle" vin zeta ka nuin a tih leh chuan ka lo phu chiam a, "Tikhan ti tawh lo teh" zawi sapa tiin ka en chho a, min lo en ve ran a, a lungawilo hmel chu alo pe na leh tawh ngang mai.






"A ho lutuk, ka chhuak dawn a lawm, tlaiah ka pu in min lo hruai ang" nuisangin Judy chuan a ti a, ka nu lungawilo hmel nen kan boruak chu a rit lûk a ni ber.





"Insawn a ṭul reng renglo" ka nuin a tih rualin "Insawn rawh se" pakhat chuan a lo ti leh mauh mai a, Apuii lah chuan sawi ve rawh tih melhin min lo melh bawk.






"Insawn a ngai hleinem, kan inhrethiam vek...tawh tho ....a" ka tih laia JH-a lo thaw hawk chu ka han melh a, "Sawi tawh lo hram teh" ka rilruin ka lo ti ve mawlh mawlh a, tinge ka awmdan aṭang hian a hriatthiam ve mai ṭhin loh le, boruak ṭhalo inmung mek te hi a hmu thiam velo em mawni?






"Duhtawk tawh la, engmah lungawilohna tur a awm tawh lo" lawmlo lek lek chuan ka ti a, Judy laka lungawilo zawk mah niila ka pasal chet dan ṭhin chuan min ti lawm tawh biklo, ka hlauthawnga; ka inthlahrung lutuk bawk, mo thar tuk aṭanga neuh neuh neih nghal hi a zah pawh a zahthlak lutuk a ni.






"I duh dan a ni tak tak maw, midang hmaizah vanga hetianga i tih ve kher angailo a nia" JH-an a tih leh laichuan "Sawi tawh lo teh u, ka insawn dâwn...." ring angreng zetin Judy chuan alo ti leh a. "Lo ngawi rawh Judy" Apuiin a lo ti ve zat bawk.







"A ninawm ve a lawm, khatiang te chu fiamthu mai mai ania an hrethiam duhlo anih te chuan ka tan pawh awm ve reng a nuamlo" a ti leh hmak hmak a, a fiamthu ang leka a sawi leh ṭhin chu ka ngaihdan a ni lo ve leh tlat tawh.







"Infiamna chi chu a nih loh kha, kan bazar ni pawn ṭawngkam dukdaklo tak takin anih kha min biak" ka lo ti ve ta ngat a.






"Kha i la lungawi tawplo anih kha" nui hak chungin a ti leh a, ka insum reng peih bik tawhlo. "Nangpawh nila i lungawi bik miahlo ang, a hma a i mi ṭawngkhum dan zawng zawng ngaihtuah phei chuan i lakah hian ka insum thei zawk ngawt a sin" ka lo ti hlak a, ka bula mite chuan min en reng a, mahse, ka zam duh bik tawhlo, ka thinrim na te pawh kha an lo thar leh a ni ber, a ṭawngkam chu thuhran thamloh hmel zeta min melh kher ṭhin te chu ka huat tawk a tling viau a ni.







"In va han mak e aw" ka nuin a lo tih chuan ṭawng tawhloin Judy nen chuan kan inmelh ran a, "A tawk e, ka sawi tawh kha" Judy lam hawi pahin "Min chhuahsan ang che" a ti nawn leh a, chutah tho chhuak vatin choka chu ka chhuahsan nal nal a, ka sa pup pup a, ka chau nghulh maiin ka hria, "In buaina chhan ber chu engmaw?" vin zeta ka nuin a tih ri te Apuiin a lo hrilh ri te chu ka hrepha riai ruai a, room lampana ka chhoh lai te chuan ka mittui a lo luang zung zunga, ka thawk ipik lutuk vang chuan ka awm chhung a thip hlur mai bawk.







Ka pa nen kan intawk hlawl a, be loin hmanhmawh deuhin ka kalpela, hawilet lo pawhin min enzui tih ka hre thei, room a ka luh rualin ka ṭap ṭeuh ringawt tawh.







Bathroom ah lutin ka hmai ka phih sawk sawk a, am zet zetin thawk ka la a, ka thinphu rang lutuk chu ṭah ka insum vang anih ka ring.





"Bawihno" tih ri ka hriat rualin ka hmai chu ka tuai leh thuak thuak a, kawngkhar ka hawn rual chuan ka hma a JH-a lo ding nen chuan kan inhmachhawn nghalzat a.
"Hei, a pawilo...khatia i sawi kha a ṭha zawk" a lo tih chuan ka chhang zui duhlo, khatianga ka ṭawng kha thil ṭhalo tak a ni zawk a, ka insum thei tawh hlawl biklo a, a pawi takzet a ni.






"Ka fello tiraw" nuilui zetiin ka en a, "Dawtsawiṭhintunu lakah khan fel turin ka duhlo che" a lo ti hmiah thung a. Judy chungchang chu ka sawi tum ber anilo, mo thar fello tak ka nih thu zawk a ni ka sawi chu, kan inneih zan aṭangin inchungah buaina ka pu lut nghal dera, ka fello takzet, ka pasal chhungte lakah chuan ka inthlahrung tak meuh a; a van hrehawm tehlul em.






"A chhuak anga engkim a ṭha vek mai ang"



"Sual minti ngawt ang" ka lo ti vat a.




"Teuhlo lutuk, chutiangin tuman an ngaidawnlo che" min nuihsuk chungin a ti leh a, ka rilru a ka thil vei hi a rawn ngaihtuah thleng pha ve tak tak lo.






Room pawn aṭangin a pain a lo ko a, hmanhmawh deuhin a kal chhuak a, a chhuah hnu chuan rei deuh chu khumah ṭhuin ka ingaihtuah a, engtia han chinfel nge tih chu ka hrethiamlo takzet a ni. Tukṭhuan ei a hun tawh a; a lo let leh tak mailoh vang chuan awm khawmuang rei tawh loin ka chhuk ve vat a, Sitting room ka thlen thlak laichuan inchhung chu a lo reh ṭhapa, choka lam ka pan zui chu phun sar sar ri ka hriat rualin ka ding leh renrawn a, Apuii leh ka nu an niin ka hria.







"A fel viau dawn a maw ka tia keipawn mahse, ka rin ang a lo nilo, ka u bula a sawi kher zel the hi a ṭhalo, kei chu ka ngainalo zo vek tawh" Apuiin a tih lai chuan ka lo inhumruh ṭiam ṭiam a, kha maw! Ka duh lo em em leh ka hlauthawn chu a thleng ta nghal pang a lawm.







👇👇A hnuaia ads khu min lo click sa ve hram dawn nia, khawngaihin 💚

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:07 pm

GOMENASAI - by Ahmangaihi violette khiangte




CHAPTER -27


images (23).jpeg



"Hruaitluanga pawh a ti dik biklo a nih chu, i pa hnenah sawi ula a nin rem ruatfel rawh se, inchhung nu ber ka ni a ka mo vanga ka faten an tawrh a awmnuamlo a an awm ka remti reng renglo" ka nu awkâ a min demna ri ka hriat rual chuan ka bîng chûk chûk a, thaw a ti ipik kher mai.







"Judy pawn ngaihdam dil ve sela, chutilo chu thu mu hnu in kaitho leh mai mai dawn a, a mizia anga kan enthiam ve te pawh a ngai dawn a nih hi" Apuii chuan a lo ti ve a, an mi ngaihdan chuan minti hrehawm zual deuh deuh a, an hmuh ah chuan mo fel ka nilo tawp tihlah a chiang reng tawh.







"Tiang em em hian an lak vung ka ring biklo a, bakah JH-a nen kan inṭhenna pawh a rei tawh a, ṭhian ang bak kan ni tawh der silo a, chuvang ania keipawn ka fiam ngam" insawithiam tum takin Judy chuan a ti leh a, "Nuamlo ti duh suh, thil awmzia a hre ve tawh tho alawm ani pawn, tikhan engmah sawizawm tawhloin awm tawp la ka u in sawi a neih leh chuan ka nu leh keiin kan phalloh thu i sawi tawp dawn nia" Apuii chuan a ti leh a.







"Chhuah ka tum tak tak hleinem, ka tih êl ve deuh mai mai anih kha, ka chhuah te chuan ka tan pawh a mualpho thlak dawn a sin, zep loah chuan in mo nu hi a tawrhhlelh awm ve ê, JH-an a ṭan nasa mai si a inngamlo thuai dawn anih hi" nui hak hak chungin Judy chuan a ti a, a thilsawi duh dan kher chu ka lo hlelh leh ngang mai, va kala va chhuahchhal leh mai tak ka nap a mahse, ka insum lo anih chuan boruak hi ka tipunlun zual zel dawn a, he inchhungah lah kei aiin lam ṭang a ngah zawk tlat bawk si a duhanga han che chhuak thei chi ziazâng ka nilo.







"Enge maw i tih le!" tih thawm ah chuan ka inher vata, Mit nuai chat chat paha min enin "Mi thusawi i ngaithla ru a law?" phawk fein a ti a, "Aih" ka ti tak nain min melh tur khai a, chumi hnuah phun hluk chungin choka ah chuan a lut zui a, "Enge in lo sawi a, mi rel nei in va ang ve" a ti lut zuizat a, "Nangmah kan lo rel che mawle, tho har thei em em lutuk" Judy'n a lo tih chuan Reny chuan a chhanglo a, luh ve nghal mai pawh chu ka hreh lek lek a ni.







"I chhoh leh pahin Mambawihi kha lo ko thla rawh, tukṭhuan ei dawn teh ang u" ka nuin a tih leh chuan Reny ṭawng chhuah hun nghakin ka lo ip ru ṭeuh a, engmah phei chu a sawilo, "Ka ko peih vel lo e a" tih leh hlak pahin tui Bottle keng chung hian a lo chhuak a, min hmuh rualin ngaihtheihloh hmel zetin min melh zui bawk a, ka awmna a sawi mailo chu mak ka ti lek lek hial a ni.







"Ṭhing lutuk, mi ṭawng ngaihthlak ruk " tih pahin min kalsan nal nal a, muangchangin kei ka inher a, pawn bathlarah chhuak pheiin ka ngaihtuahna ka kawm zui chiam a, he in lian leh chhungkaw hung tak nisi ah hian khawhar takin hun a lo hman theih dawn anih hi tih te ka ngaihtuah a, ka pi leh pu ka ngai takzet a ni.







Gate-a Bike lo tlanlut mek chuan ka lam a rawn pan nal nal a, tlangval lianṭha zet zawt hi lo chhukin a Helmet ala thla a, ka lo enreng laichuan ka lam lo hawiin min lo en zawka, JH-a emaw ka ti hmanthuak a ni, an in ang viau mai.







Bike a hunrem hnu ah ka dinna lamah chuan a lo kalphei zela, Micheala anih ngei ka ring, a hmelah chuan hai theih ruallohin he chhungkaw vua leh vang ngei a ni tih a hriat a, phawk lek lek a min en pahin ka hma ah chuan a lo ding a " U Tluanga nupui kha i ni tiraw?" a ti nghal thawr bawk a, ka nih thu ka hrilh rualin min chibai nghal thuaia, "Nimin khan ka lo tel ve lo a, kan ṭhianhoin thil pawimawh tih tur kan nei leh sia, ka hmuhtirh che pawh khan ka hre mai lo che a lawm le" a ti a, a ṭawngri chu JH-a ang chiahin a dam dup mai bawk.







"Kei chu ka lo hre nghal che a sin" ka lo ti vat a, lai angreng zeta a nui suk suk hmel phei chu JH-a nui hmel nen in ang tak an ni, a incheidan vang nge a u ang em chuan a lang zahawm ve lo thung a, a thlirtu mit a zir te pawh a nia nga mahse, ka mitah erawh ka pasal chu a ṭha mah mah zawkin ka hria.







"Mi nghah i nei em ni?" a tih chuan "Nei hranlo e" ka lo ti vara, "Tirawh lut ang" tih leh pahin a che hrut a; ka dara min rawn kuah kher chu ka lo beisei loh vangin ka lo phu deuh a, phawk lek leka ka en lai chuan nuichungin min kuai hera, min kalpui zui zat bawk.







Min thlah leh mai dawn emaw ka tihlaiin min la kuah ta renga, tal hran ka tum deuh uaih chu minlo kuah nghet sauh thunga, a mawihnailo ka tiin midang hmuh ah pawh a zahthlak ka ti, min nel nghala a lawmawm viau na chu in ngainatna lantir nana taksa innek hnai zawnga awm chu ka tih ngailoh tawp a ni a, mi rei tak ka la hriatloh lakah phei chuan ka duh hauhlo, hmeichhe lakah pawh ka tih ngai mangloh laiin ani chu mipa a la ni tak zui a, chawpchilh deuh taka inhria kan nih chu thuhran inkuah tur khawpin kan la inpawh mang hauh siloa chuvang chuan a tihdan chu ka ngaitheilo lammah a ni.







A kut chu lain ka dahthla ta kher a, chutih rualin "Chaw in ei tawh em?" a lo ti nghalvata, "La eilo deuh" ka ti leh maia, "Ka rawn nang chiah a nih chu, ka ril a ṭam tawh lutuk" tiin kawngka ah chuan a lut hmasa a, kei ka tawi khawmuang deuh thung.







Midangho chuan an lo chiauau hluta an thawm aṭha ham ham viau mai, Sitting room a an lo chhuahphei leh hnu chuan "I pa te an la rawn let lo a mi?" tiin ka nuin min lo zawt a, chutih laimekin an lo thleng ve zat a, "Kan fapa vakvaia chu a lo thleng ve ta hram maw kha?" ka pa chuan a lo ti a, an nui dar dara, JH-a thei lo khai haw chu lain choka ah ka luhpuia, Reny leh Judy lo ṭhu chu ngawirenga kalpelin fridge ka hawnga, Judy chu tho nalhin sitting room lam a pana, henu hian chhuah chu a tumlo tak tak anih hmela, ka pasal bula ka lo dilsak ngang ngang te chu ka tha a na dawn dawn zawk a lawm mawle!







"Heih..." pawr zeta Reny lo ṭawng chu ka en let ha a. "Fimkhur viau rawh" a lo ti ram hmak a, "Engvangin maw?" Ka lo tih chuan min melh ram ram a, "I mawl anih kha" lungawilo fe chuan a ti leh a, tho rawkin a kal chhuak zui daih a, engvanga min han vau ve ringawt nge maw anih le? A tu a te pawh hian ka lakah buaina an nei ni ta berin ka hria.







"I ril a ṭam tawh em, kan ti nek neka kan tlai thei lutuká" JH-an a lo tih chuan ka thil tihlai dah meuhin ka va en a, reilo te min kalsan chhung khan ka lo ngai hman hle a ni, ka endan vang chuan a nui deuh suk a "Ti zo la, chaw kan eidawn nia" ti a ka lam lo panin a sam a rawn chul thuak a, kan inena kan innuih ringawt mai bawka, min fawh tuma alo kun laitakin mipa aw thian kharh ri vang chuan kan hawi rual zat a, Michaelan nui ṭhaw chungin min lo en reng chu niin a zahthlak duh ngang mai.







"Get a room" chalak hmel zet a tih leh chuan ka beng a lo sa hat hat thei, "Nimin ah chuan eng maw i tih a?" JH-an a lo ti thunga, "Thil pawimawh deuh a ni tawp mai" pakhat chuan a lo ti ve vat a, a hma khan in ang hlein ka hria a an han awmdun chiah chuan an in ang leh vak chuang pawhin ka hrelo, ka mitah hi chuan ka pasal hi a ṭha lawrlak mai a ni.







"Nizan chu enge a an a?" Michaeal an tih chuan rang lutukin ka va en a, eng zawhna nge ni ngai, a mawihnailo lutuk tlat.







"Ka hrilh che chuan i puitling theilo palh ang" nuisuk chungin JH-an a lo ti a, zawhna mawihnailo lutuk anga ka ngaih chu anni tan erawh zawhna pangngai mai mai a nih hmel, ka hriatthiamloh zawng tak a ni.







"I hlim hmel hle mai" Michaelan a ti leh a "I hmuh ang hian" JH-an a lo ti leh mai bawk a, Apuii lo lut chu kan lo en rual ṭhap a, phawk lek lek hian min lo melh kuala chutah nuichungin "Enge in sawia?" tiin min zawt a ngaihṭha zanlo hmel a pu bawk.







"Nizan khaw awmdan ka lo zawt a?" Michaelan kuah paha alo tih chuan Apuii nuih a za kher mai. "I mawl em ni?" nuihza insum fe a a tih chuan ka lo la en ve renga, an fiamthu chu nuihpui chiam ngaihna ka hrelo, ka pasal pawh a nuilo a ani pawh a nuih a za biklo anih ka ring. "Hman zanah ka sawi kha ani em tih ka hre duh a lawm?" Michaelan a ti a, "Chu te chu chiangsa alawm" nuichungin Apuiin a lo ti ve leh a, "Ka unaupa hi ka ringtawk a lawm" Michaelan a tih te chuan ka bo hle ringawt tawh. He inah hian tlang deuhin an sex life chungchang hi an sawi ho mai ṭhin a nih dawn hi, JH-a lah hian huatah ala miahlo a mak ka ti deuh tlat.







"Enge a an a?" ka lam hawia Michealan a lo tih chuan ka lo ṭim sung sung niber tawhin ka hria, ka biang a sa hat hat a ka sen awp awp hialin ka ring a ni.







"Amak e!" nghawk zauh pahin Apuiin a ti a, Michaela erawhin nui chungin ka chhanna hriat ngei ngei tum niawmin minla en reng thunga, min ti bangbo riaua ka thinrim lek lek bawk, JH-a ka en chuan a lu a lo bu nghat a, kha kha enge! Chhanna pe turin min ti tihna a mi?







"Michaela hian i virgin a ringlo a" Apuiin a lo ti ta chiah a, hrep chuan a, a ngaihtuah ve tawploh tur thil an ngaihtuah a nih mai mai hi! "I lo buai ve na tur a nihloh chu" rapthlak ti zet hian ka lo ti let ve sak a, ngeiawm lamah a kal zawk a lawm mawle.







"Rinhlua nen khan in inzui rei ve hman em?" Micheala bawk chuan a lo ti leh a, "A tawk viau e" JH-an a tih pawh chuan ala duh tawk mailo, "Princess-i lakah chuan zep rawh u" a ti leh zat a. "Zorinpui a tawk ka tih chu" JH-an a tih leh chuan dar san ak pahin min nuih a, a ṭawngzui duh ta em biklo.








"Kar tharah i Document lo peih la Apuiin a kalpui thei ang che, a senso chu ka lo tum dawn nia" JH-an a tih chuan "Ka hman dawn ngawt hleinem, dawr ka hawng tawh dawn a sin" Apuiin a lo ti hluai a "Pawisa a awm chuan ka ti thei vek" Michaelan a lo ti ve mai bawk. Tuk ṭhuan eilai chuan Judy hmel ka hmu miahlo a, a haw in ka hre bawk silo a kan rualin a kil ngamlo a nih ka ringa, ka khawngaih ve lek lek hial a, ka tha a na deuh tlat lawi bawk a, ka awmdan pawh chu ka inhrethiam tawh bik lo, min ti buai zo ve takzet chu a ni e.







"Engah nge hetah innghat hmasa loa i riah chhuah reng a?" Chaw eilaia ka pa in a tih chuan "Ka thiamloh a ni e" rangzetin Michaelan a lo ti a, "Ka thiamloh zawk aniang, a lo thlen zanah chawlhhmunah ka riahpui nghal a anih kha" JH-an a lo ti ve vat a, "In thiamlo ve ve anih chu" damdupin ka pa chuan a lo ti a. Chumi hnuah "Judy chungchang kha i thu thua i tih ka remtilo ania" JH-a en chungin ka nuin a lo ti veleh a, JH-an min lo en a a mitmei hmangin min râwn niin ka hria.








"Kha kha a pawi hle mai, in riahna ah khan ka lo hruai ani bawk sia, keipawn fiamthu mai mai anga ka ngaih kha a nia" Apuiin a lo ti a, ka lam an lo hawi hlawm vang chuan engemaw sawi turin min beisei a nih hmel.








"Intih ....dan dan.. a ni mai" ka lo ti bah nak a, "Chhuak se i duh zawk chuan sawi tawp rawh" JH-an a lo tih chuan ṭawng mai ngaihna ka hrelo, chhuak sela ka duh zawk a mahse, chutianga ka sawi anih chuan ami vuak let tur ka hre ve kara inrawlh tawh miahloh ka duh zawk a ni.







"Inhrung miahloin sawi rawh le?" ka pa in a lo ti ve leh a, "Ka...hre..thiamlo ṭha in tih ang ang kha a nimai alawm..." ka nu lam hawi pahin "Awm mahse, pawi ka tilo" ka ti zawi sap a, thaw huai hmel alo pu chuan tlemin ka awm a ti nuam ve deuh.








"Mambawihi chu a rilru a ṭha a lawm, a haw reilo ang ka tih reng kha" Apuiin a lo ti a, Reny lo ner sak ka hmu zui zat bawk a, ka hrethiam tawh niai nuailo, JH-a a ngawi ta daih a, ka chhan dan vang khan a lawm vaklo a nih ka ring a hmel aṭang ringawt chuan a rilru tur ka ngaihtuah thiamlo, boruak a rit churh maiin ka hria, ka hahdam lo riau bawka, chaw pawh ka eihleithei meuhlo.







Chhunah Alawmi a lo kala, kawta JH-a leh Michaelan Motor ke an thlakna bulah chuan ṭhuin kan lo titi a, ka nu lo kal ve loh chhan ka zawh chuan "Vawinah Sentea nen bazar an tuma, naktuk chawlhni a ni tho bawka duhleh naktuk lamah a ti anih kha" a lo ti sap sap a, ka nu chu bazarna tur pawisa pawh anei em mawni ka ti rilru a, zin veivah man ringawt pawh a sang si a, a haw dawnah pawisa pai ve ila aṭha ang.







"Thil mak deuh ka hrilh ang che" kan rooma kan chhoh hnu chuan ka ti a, a lo bengkhawn rang kher mai. "Ka chhungte hi an mizia amak lutuk" ka ti hlawla, a hmel buainak chu han hrilh fiah dan tur erawh ka haihchham viau lawi a.






"Engtia mak in?" a lo ti he haw a.






"Ka hre thiamlo, chhungkaw tihdan phung a niang, an Frank lutuk" ka ti leh ngawt a.






"I la insiamrem thei rih nang, zawi zawiin i insiamrem dawn alawm, hmanhmawhlo la" a lo tih chuan ka thilsawi tum a hrethiamlo takzet a ni.








"Hrilhfiah dan che pawh ka hrethiamlo, ihmaw.....an nihna lo puiin a chang chuan an langa, ngaihdam indil an hreh ngai miahlo, chuan thu an inrawna an sawiho thlap ṭhina mahse, zepruk nei vek an ang bawk sia" ka sawi uar mah mahin ka in hre leh hnuhnawh a, ka hmuhdan chu ka sawichhuak thiamlo a ni ber. "JH-a pawh a ni ve tho ami?" a tih chuan "Ani chu a danglam ber, JH-a chu a landan ang tawp hi a nia....a...ka hrelo le, ka hmuh chinah chuan JH-a chu a danglam bik....in ka hria" ka ṭawng bah leh nak tawh, engmah hi chiang takin ka sawitheilo ka pasal lakah erawh engmah vuina tur ka neilo a, mahse, engthil emaw hi chuan min mawlh ve reng bawk si a, ka hlauhthawn vang anih ka ring.







"Mahse Alawm JH-a bulah hian engkim sawi chi a nilo, thil hi a ti nghal rum rum zela, min ṭan zia chu ka hrilh tawh che kha, ka tan a harsa zo vek zela" ka ti leh a, "Mate, ngawi ṭang ṭang rih mai rawh i awm rei anga i insiamrem thiam hunah chuan aṭha vek mai ang" a lo ti a.







"Nia, keimah hi ka diklo ve deuh bawk aniang tiraw, ka rilru hi a hrisello huat tur nge huat loh tur tih ah hian an thusawi hi ka chang reng ringawt a, keimah hi insiamrem ka ngai nasa anih hi" ka lo ti ve a.







"Apuii a fel hlauha Reny leh Judy lo chimawm deuh mahse Apuii a awm tala ka ngaih aṭha deuh" Alawmin a tih leh chuan ka rilru a buai leh naka, Apuii hi ka hriatthiamloh ber chu a ni tlat lawi si, tukina a thil sawi leh chawei laia a thilsawi inpersan lutuk mawlh kha!







"A hrehawm i ti viau a mi?"Alawmin a tih chuan ka inngaihtuah harh vata "Hrehawm hranloh e, ka hmuh dan ka hrilh mai mai che a lawm, chutiang lam harsatna chu engmah ka neilo" ka lo ti nghal thuaia, amah zawk hi han awm vein ka chhungte hi han belchiang ve sela a ngaihdan tur mawlh mai chu hriat ka chak a ni, kum inrual reng mahila ani chuan kei aiin thil a thlir thiam zawk miau a.








"I awmdan hi rilru chawmawlh deuh i ang, thil ngaihtuah kual vak vak lo la aw, Depression te ilo nei palh hlauh ange" a tih chuan "Neilo ang, chutiang lamah chuan harsatna ka neilo, mi mizia ka chik vang mai mai a lawm" ka ti ve tlata, nia...mi mizia hi ka chik ṭhin renga, thil an sawi pawhin engang rilru puin nge chu thil chu a sawi, eng angin nge lo ngaisela min tih, engvanga sawi nge a nih ang tih te thlengin ka lo ngaihtuah ṭhin reng a ni.







Chawhnu lamah shooting neiturin kan inbuatsaiha ka mokawr hak tum kha Apuiin ṭha alo ti vaklo nge ni a dangin min lo thlaksaka "Hei hi kan inneih ni chiah ka ha a analh an ti teh asin" tih paha mo kawr min lo pek chu Alawmi nen kan lo ensak vat a, Biakin hak atan chuan zahthlak tak tur a ni, ban aneilo a a dar bahna chu te angreng zet a awm a, a hnunglam chu kawngthleng hmawkin a inhawnga, awmbawr te zawk zawklo kei ang tan chuan a lang thui duh kher mai.








"A nalh chiang lutuk a to hmel bawk sia mahse, a Sexy mah mah deuh anih hi" ka beng bulah Alawmin a lo ti ru sar sar a ka ngaihdan ve chiah a ni. "Han ha chhin teh" Apuiin a lo ti ve sek sek reng bawk a, ka ha chhin ta chu en mai aipawhin hak chuan taksa pianhmang alang chianga, hnam dangin ha sela mawi titakin ka thlir thei thoin ka ring na chu ka hakah em chuan ka iai deuh chu a ni, hnial erawh ka hnial ngam derlo.







"Professional photoghapher kan ruai dawna, sitting room a tar turin nalh uchuak deuhin kan la dawn nia, i inhmeh teh ania, kei aipawhin i inhmeh daih zawk, i pian a van lo nalh ve" a ti leh zung zung a. "Taksa alang tam mah mah deuh anih hi" Alawmin a lo tih chuan "A vun analh tho a a inhmeh a lawm, inneih ni a i hak kha chu a mawilo emai" a lo ti leh mauh maia, sawizui zel chi pawh a ni tawhlo.








JH-a lo lut chu zawhna mitmengin ka lo en a, hak remtilo tlat se ka ti kher mai, ngun zet hian min lo en vung vunga chumi hnuah "I nalh lutuk" a lo ti sup a, Micheala lo lut ve chuan ka thla a lo la mawlh mawlh a, Alawmi hnungah chuan ka ding deuh tlata chutia ama phone lehnghala thla min laksak chu ka duh vaklo. "Enge itih a?" JH-an a lo tih tak hlukah chuan "Ele, a thla ka la" tih pahin a phone chu a ak ṭha vata, Alawmi pawn mak a ti ve deuhin ka hria.







Ka inthlak fel leh hnuah kan thawmhnaw bag nen chuan inhnuaiah kan chhuk hlawm a, reilo teah Liansangzuala hoin nula ho an lo thlenga, Makeup artist lar zet mai hi an lo hruai bawka, sitting room ah chuan kan inchei sap sapa, inchei sa veka thawmhnaw chu a hmuna inthlak mai turin min ti a, mipa ho erawh an insiam peih at tawh thung.







"Inpa hi a Tuxedo hak hi a inhmeh lutuk" Alawmin a lo tih chuan "Het, lo it miah suh" ka lo ti hlaka a nuih a za kher mai.







In aṭanga kan chhuah chuan tlailam dar 3 a ri dawn thuak tawh a, "Ni tlak dawnah thlalak chu analh duh ania" Apuiin a ti a, eitur an inkeng lawk ṭeuh bawka haw hma chu an rilruk lemlo anih mai hmel.







Kan chuanna Motor ah chuan Apuii leh min cheitunu kha an chuang ve a, midang ho zawng chu Liansangzuala hoin motor dangah an kala, kawngtluanin Apuii titi kan ngaithla a ni bera, kan hma a tlan te chu a tlan chak viau aniang kawiah takngial pawh kan hmu pha tawhlo.







"Ka ṭhianpa te resort ania, vawin atan hian min lo tih awlsak hlauh a a tihzia tak tak a ni, a neitupa hi Mumbaia ka lehkha zirpui ṭhin a nia, an resort hi book lawkloh chuan chan a harsa a sin, a fel tak tak ani beisei pawh ka beisei vak ngamlo a nia, chawpchilh deuhin ka bia a minlo ngaihpawimawh sak hlauh a" Apuii chuan a ti barh barh a.







Resort chu ahla phian a ka muthlu lek lek renga, kan thlen chuan khua pawh a tlai lek lek tawh, Gate ah chuan 'FINO RESORT' tih lianpuiin a intara, mi tu tu te emaw hi an lo awm nuala an lo haw dawn chiah niawm tak a ni, kan ṭhiante thleng hmasa ho chuan ral aṭangin ban min lo vai lauh lauh a, kan piah hla deuh hlekah chuan dil lianpui a awm a, lawnga chuan an tum hlawm anih hmel.








Ka chhuk laimek chuan Gate chhunglam aṭangin Bike pakhat hi chak lutukin a rawn tlan chhuak thut a, min su lo chauh nghe nghe, ka lo rak ṭhat rualin midang pawh an lo au ve a, JH-a pawh a rawn chhuak rang kher mai mahse, Bike chu hmuh hman pawh a ni tawhlo.







Mipa pakhat hi lo kalin "Kan Malsawmhlua vuk vuk ṭhin hi chu âw..." a rawn ti phei nang nanga, "I ṭha em?" hlauthawng takin JH-an a lo ti bawk, min su chiahlo nain thinphu chu rang duh tak a ni, thawk a ti hah nghal vek thei a lawm mawle!







"A tai hial lo che maw......mawl thei vuk vuk lutuk mai" mipa lo kal chuan a lo ti a, lu ka lo thin laiin "Mal-a" Motor aṭanga lo chhuk pahin Apuiin a lo ti ve a, an in hresa aniang an inchibai leh rih a, Resort neitupa chu anih ka ring.







"Gabe khan darthum aṭangin a awl ang a tia, in haw tawh dawn a mi?" Apuiin a tih chuan "Haw kan lo tum chiah a" chupa chuan a ti a, JH-an kan bag alo khai chhuah takah chuan hmanhmawh deuhin ka zui a, Cabin-ah lutin Alawmi nen kan inthlak zui mawlh mawlh a, Apuii lo thlen chuan kan lo insiam peih diam tawh a, kan chhuak phei chu midang awm ve ho chuan min enduh hlawm ngang mai a, a zahthlak duh kher mai.







"A hma ami kha i ha mai lo a ni, a vawt i ti em" ka dara min kuah pahin JH-an a ti a, "Inah khan i sawi lo a" ka lo tih chuan a mengtal tapa "Hei hi nalh i tilo ami?" ka tih leh chuan "Nalh ti e, a nalh vek a lawm" hlim sarh a min en chung chuan a ti leh maia, thawmhnaw lampang hi chu a vei ve tak tak lo niberin ka hria, a Tuxedo hak erawh inhmeh tak a ni, mikhual nula awm ve ho pawn an enzui vawng vawng a, ka lo intithei ru ve riau a sin.







Duhtawka thla kan lak zawh hnu chuan thil kan eileh te te a, khua pawh a thim deuh chhulh tawh, mipa hoin tui an cheng a, Liansangzualan Alawmi leh Fiona-i a lo pawt lui tlat a, an pathum chuan an inzui phei a "Va cheng ve rawh" ka bula JH-a ṭhu chu ka tih chuan "I lokal ve duh em?" a lo ti vat a, "Tui cheng chi ka nilo ka hritlang hma lutuka"ka lo ti a, Liansangzualan lawngleng aṭangin a lo au lauh lauh reng a, min kalsan hreh deuh aniang ka kut khal niap niap chung chuan a la ṭhu ta reng a.







"Va kal rawh ka lo va inthlak ange" ka tih leh takah chuan a kawr chung leh a pheikhawk te chu a phelh mawlh mawlh a, "I thawmhnaw zingah hei hi lo dah tel mai rawh, ka ha tawhlo ang" tiin a kawr chu min pe a, a kaldawn chuan "Ka reilo ang" ka hmui rawn fawh zauh pahin a ti a, dil kama an nui ho dar dar chu hmuh an nuam kher mai.







Inthlak turin cabin lamah ka kal a, Alawmi inthlakna lo awm hnawk niai chu ka khung ṭha nghal mawlh mawlh a, ka inthlak dawn laimekin kawngkhar chu alo inhawng riai riai a a Perfume rim aṭang chuan tunge tih ka hre thei, ka tello chuan nuam a tilo a niang a lo let leh rang kher mai.







"Ka lo phei ve dawn reng a sin...ka kawr hnung zipper hi ka lo hawng lawk teh" ka lo ti nghal thuaia, muangchangin zipper chu a pawtthla riai riai a, a kut lehlama ka dul rawn dawmin a awm ngheng dawtin min pawt hnai bawka, a taksa ka nghen rual chuan a lungphu rang zet chu ka hrethei hial a ni.







Ka hnungzang chu a chul kual ruaia, a kut lehlamin ka awmbawr a rawn ṭham nghal salh bawka, thawk a rang duh kher mai, hetah hi chuan a tum loh hram ka beisei mahse, ka hnar thei meuh angem tih chu zawhna a ni.







Ka dar ruak kang chu a hmuia rawn nulin ka kawr chu apawt thla riai riaia, ka mo kawr hak hnuaiah chuan kawrhnuai hak a remloh vangin ka taksa zahve chu ruak ngalngat a ni tawh....a hmui chuan ka nghawng a rawn nul chho zai zai a a thawlak a rang tial tial bawk a mahse, thil diklo a awm!






Enga tinge ka pasal hian Beard a neih miahloh a?






Rang lutukin ka inhera ka hma a ding ka hmuh rualin ka awmbawr chu ka khuh nghal chawt chawt a, min ti hamhaih lutuk chu ka ṭawng chhuak thei mailo, ka thinrim a, ka sa pup pup a ni ber. Ka ngaihtuah buai hmanlo a biangah chuan ka beng ri sawka, ani alo nui chhuak hawk thung!







"Mi tenawmpa" ka ti chhuak thei hrama, thinur luatah ka khur nasa hle bawk.





(Comment char char ru le)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:07 pm

GOMENASAI - by Ahmangaihi violette khiangte



CHAPTER - 28




"I la nui ngam elaw, i unaupa ka hrilh anga i chaklo khawp ang, zaktheilo em em lutuk" aw khur dar dar chung chuan ka ti leh sak a, a lo la nui cheu chuan min ti thinur zual hle bawk.






"Chhuak vat rawh" tih leh nam ka ruala, kawngkhar ah a lo in vawn behtlat vangin ka tha chuan awmzia a nei thui lemlo. "I van mamnalh em em ve a" a la ti tak ang deuh deuh a, min runluih em mawni zawk ni! "Mi tenawm, i chhuak vat lo anih chuan ka au dawn a nia" tiin ka nam nawn leh a, a harsat poh leh ka haw zual ting mai, ka mithmuh phak loah awm sela a duh ber a ni.







Chutia thei leh theilo a kan innam buai fat fat laichuan "Engthil nge ni a?" tih thawm vang chuan kan hawi rual zawt a, kan lampana ka pasal lo pen hlawk hlawk chu ka hmuh takah chuan kei aimahin ka bula mi chu a phawk zawkin ka hria. Kawngkhar a vawnna kut chu thlah hlawkin a inher a chu veleh thawm a ri nghal chawrh a, ka lamah lo awn thutin keichu min rawn delh thlu lo chauh a, na tuar rum ṭiah ṭiah riin a zui zat bawk.







Ka hma a Zosangliana let hlawm reng chu pawt tho lehin a hnek nawn leh a, lo dan buai tumna ka nei lo, a hnek zui mawlh mawlh chu ka dinna aṭang chuan ka lo en mawl tawp a, thinrimna leh huatnain ka khat zo a ni ber.







"Mambawih" tih ri ah chuan ka hawivat a hmanhmawh taka Alawmi lo kal chu enin thawk ka la a, kan bul a lo thlen rualin JH-a chu a lo pawt sawn nghal chawt chawt a, chutih lai pawh chuan Zosangliana hmelah chuan pawi tihna lam reng a lang lo a, kut a tawrh vanga a hmui thi chu hup chungin a la nui thei cheu a, min ti hamhaih lehling zawk a ni!







"Engthil nge thlenga?" Alawmi chuan a ti nghal chul a, "Ka inthlak laiin a lo lut ringawta, nangmah emaw ka lo ti a" JH-a lam hawia ka lo tih rualin Zosangliana lo tho chhuak tur chiah chu a dul thuarah a chhirsak leh zawt a, Alawmi nen kan lo rak rual ṭhawt a, Zosangliana erawh che zui leh tur a awm tawhlo, rum ṭiah ṭiah chungin a let hlawm ta reng a, reilo te chhunga thil thleng vang chuan thinphu a rang ṭha duh zaih zaih kher mai.





"Kawngka i kalh lo em ni?" ka pasal aw chu a chang ṭha hle a, keimah min thiamlo tih lah a chiang reng bawk.






"Ka lo kalh lo a" inthiamlo tak chuan ka ti a, mitmeng dur khapa min enin a ngawi run a, a bek a thisenzam pawng ṭalh ṭalh aṭang chuan a thinur hle a inthunun a tum ve hle tih pawh a lang thei a, kut thawh leh mai duh tur hmel a pu bawk.







Zosangliana bulah chuan a ṭhuthla a a kawr awm ah ṭhamin a phih kang lawp a "Kan hmuh phakah rawn inlan leh tawh ngai suh, a lehpek i nei a nih chuan tho chhuak theilo khawpin ka siam tawh ang che" a aw aṭang chuan a thinrim hle tih hairual a nilo, pakhat zawk pawh chuan a melh hle hle ringawt tawh a, a thlah mai loh vang chuan a hnek leh duh takngial dawnin ka hria a, ka inrawlh ve ta vat a, JH-a ṭhu pawh thawh mai ka tum chu a lo ṭang fat a, thip zatin min melh zui bawk.







"I kawr va ha vat rawh" alo ti chang bawl a, min ti hamhaih lek lek a ni. Rang lutuk a thlahin Cabinah chuan ka lut a, rilru a na veng veng mai. Awka vina min biak vawi khatna a ni a, tuartu zawk ni a ka inhriat laia chutianga min lo chhang chuan ka rilru a tina tlat a, ka mittui a hnam ṭiam ṭiam a, ka inthlak laite chuan ka ṭap ṭeuh ringawt a, Cabina Alawmi lo lut chu ṭah insum ṭeuhin ka lo melh a, ani pawh a rilru a buai ve aniang, ngawirenga inthlak vein ka kawr chu min lo khung fel sak mawlh mawlh bawk a, thil thleng zo chiah chu ngaihtuah letin thawk ka la leh rih ṭhin.







"Engtin nge a tih che a?" zawitein Alawmin a ti a.






"Hetah hian ka dinga, ka inthlak laiin ka hnunglam aṭangin min lo kuah a, JH-a maw ka lo ti a" ka sawi zawng chuan ka mittui a lo lum thla pap a, hawi let nachang ka hre miahlo te chu mawl ka inti hluah hluah.







"JH-a kha ka lakah a thinrim anih kha?" zawhna mitmengin Alawmi chu ka en a, "A hlauhthawn vang anih kha, i kawr kha ha zo thuai la, i va bengdai dawn nia" tiin ka darah a lo vuan a, engtia bengdaih tur nge pawh ka hrethiamlo, nichin lawka min en dan kha ka ngaihtuah zuia biak pawh ka hupurh lek lek zawk a ni.






Cabin kawngkhar chu pawn lam aṭangin a lo ri karh karh a "Lo hawng teh" bung zeta JH-an a lo tih ri ka hre nghala, "Ka chhuak anga lo inbe ru aw" Alawmin a tih chuan ka phur lo kher mai, kawngka a hawn rualin pawn lama Apuii ṭawng ri chu ka hre thei a "Damdawi a rui tel anih dawn hi, hetiang te chu enge hruai pawh i rawn hruai" a ti hlak hlak a, "Hetiangin a awm dawn tih ka hre bik hleinem" Michaelan a lo ti ve bawk.







Kawngkhar khar riin a zui a, ka inher rualin ka pasal nen kan inhmachhawn ta chiah a, a huhang na zet chuan Cabin chhung boruak chu a luahkhat hnehin min uap rit churh a ni ber a, a mitah pawh ka en ngam meuhlo.







Min lo din hnaih pahin ka kawr hma chuar chu dimlo fe hian a pawt mar zawt a, chutah muangchang hian a lamah min pawt hnaia nghet zetin a awmah min kuah zui a, engmah sawilo in chutiang chuan min kuah hle hle ringawt a, ka mittui a hnam leh ṭiam ṭiam tawh.







A awmah chuan hmai phum sauh sauhin ka ṭap ta ringawta, Jonak-a chet dan aimah chuan a mi vinna khan ka rilru a tina zawk nita berin ka hria, min hau turin a lo lutah ka ngaia mahse............







"Engtin mah a tilo ang che kha mi tenawm khan" ti hlukin min kuah nghet sauh a, keipawn a nghawngah kuahin ka pawm nghet sauh a, chutah ka khabe ah dawmin min kuaidaka ka mittui vanga mitmeng fiahlo riai karah chuan a hmel chu ka en let ve a, thimrim hmel a pu tawhlo a lungngai hmel a pu tawh zawk.







"Ka hai che a...." ṭah aw ṭeuh chuan ka ti leh a, "Ka tihpalh aw....ka lo fimkhur lo-" ka sawi zawh hmain ka hmui a lo khar a, min fawp vang vang a, chutah inla hrang leh vatin ka bianga mittui luang chu a kutin a tuai a, a mitmenga min duatna lo lang chu ka hmuhhmaihlo, nichin lawka min en dan nen chuan danglam tak a ni.






"Min ngei em?" ka tih chuan tawi tein a nui a, ka kut chu la in a hum vang vanga, chutah ka banah a chul cho riak riaka ka nghawngah nen, a tawhna hre hrang tura min duh nimai awm hian...chu chu ka ngaihtuahna ani a, a ngaihtuahna ani ve em tih ka chianglo.







"Nidangah chuan ka hai tawh lo ang che" ka ti leh hap a, "I hai tawh tur a nilo" khauh tak leh thupe aw zet hian a lo ti ve a, kan ngaihtuahna chu a in ang ngei anih hmel e.






"Ka hmangaih che" a mitah tak enchungin ka ti a, ka rilru zawng zawnga sawi ka ni, ka hmai zar tu ka sam chu lo hui kiangin muangchangin thawk a la a, "Keipawn ka hmangaih che" ti a ka lama a lo awn rualin ka mit ka lo chhing a, a kut lum vang vang leh a hmui te, a thaw lak zawnga a lungphu ri te thlengin tu mipa dang lakah mah hian ka hai leh tawh ngaiin ka ringlo.







Cabin aṭanga kan chhuah hnu chuan Alawmin min lo pawh vat a, "Khawnge Michaela?" JH-an a lo tih chuan "A hawpuia an kalliam deuh chiah" Alawmin a lo ti a, kan lampana Apuii lo pen phei hlak hlak lam chu kan hawi a "Mambawih, i ṭha maw, a zialo tak tak ani kha, a rui nawi lehpek a nih kha" a lo ti zung zunga.







"Haw turin insiam rawh u" ka chhan hmain JH-an a lo ti a, "Kan Bag kha ka va la ange" tiin Alawmi a kal zui thuai a, Apuii kal ve mai tum chu JH-an a ko let a. "Midang hnenah sawi lo la chhungkaw mualphona mai mai tur a nih hi, ka nu leh pa te pawh hrilh a ṭul lo ang, keini ho buaina ah hian tawp rawh se" a tih chuan ka lo en vat a, Apuii pawn mak a ti deuhin ka hria.






"A che mawilo angreng sia upa hoin zilh sela a ṭha zawk lo ang maw?" a lo ti a.






"Nilo e, Mambawihi lo awm aṭangin thil a thleng hnem tawh mah mah a, midang ngaihah pawh a mawilo e, thil hrechiang tak taklo a ngaihdan siam tawk an awm zel, kan hriattir anih chuan ka nutei te lam pawn Mambawihi an ngainatloh phah thei a" a ti leh a, hnial buaina tur ka neilo mai niloin ngaihdan ṭha tak niin ka hria, amah JH-a berin ka sawifiah duah ngailoin engkim a hrechianga, a nin a hriat tawh a liam midang hriattir ve kher ngai ka tilo bawk.







"Ka nu leh pa te tal chu hrilh ve ila, an ni pawh an thinrim ngawt ang" Apuii chuan a ti leh a, chu chauh pawh chu ka rilru tak chuan ka duhlo, neuh neuh neih reng ringawt pawh chu a zahthlakin a inthlahrunawm leh dawn em asin, ngaihloh lamah te pawh min lo ngai tawh zawk ang.







"Ka sawi ang khan a ni mai, kan inkara thil thleng zawng zawng hi nu leh pa ten an hriat ve kher a ṭangkailo" JH-an a lo ti ta khauh a, Apuii pawn a chhang zui ta biklo, Judy a hrilh mawlh mai ka lo hlaua, a nin a hria anih chuan min nuihzat dawn em asin.






In kan thlen meuh chuan kan chhungte pawn zanriah an lo eikham tawh a, Alawmi chu Liansangzualan "Ka thlah ang che" a tih vangin kan chelh ve rih a, riak tura ka sawm lahin a duh bik der lo a, Fiona-in a sawm ve ngial a mahse "Mambawihi nu te an awm ve a, ka awmloh san daih chuan an lo inthlahrung palh ang" a ti ve tlat a, ka sawm zui duh ta biklo.







Zanah chuan ka nu nen kan inbia a "Chawlhni tlaiah kan lo thlawh ang che u" ka ti a, a tuk maiah haw an tum tawh a, ka bazar pui hman dawn ta lo anih hmel e.






Kan thlalak ho te chu kan en a, kan ri dar dar renga, Judy hmel rawn inlan miahlo chu mak ka ti deuha a chhuak ta anih ka ringa, zawh phei chu ka zawt ngamlo. Mut hmunah JH-a chu ka zawt a "A awm a nilawm ni" tih zawngin min lo chhang a, a hmu bik a zeng pawh a ni chuanglo, a ngaihvenlo ve hrim hrim niin ka hria.







Zingah hma takah thoin Apuii eirawngbawl ka pui a, a ṭawng duhin a ṭawngkam a zangkhai hle a pawnlang taka kawm nuam em em chi an tih ang hi niin ka hria, Mumbai a an awmlai chanchin sawiin a ṭawng bawrh bawrh reng a, a pasal ṭhen tak chu ala ngai viau tih lah a hriat a, a rawn lam leh ala beisei fan anih hmel.







"Tlaiah zanriah eiturin kan sawm zawk dawn a mi?" JH-an a tih chuan ka lo ip ru ṭeuh a, ka pa lahin "A pawi hleinem, khaw dangah daih an awm i tih chuan inhmuh leh hun a hla dawn si a" a lo ti ve vat a, JH-a chu ka va nghawk ru leh ṭhin a, min en laichuan hmuiphunin ka lo riat nawi niah niah a, chaweilaia midang zawng zawng hriata sawichhuah a rem teh ṭeuh silo.







"Ka nu kha sawm a chiloh ania" room a kan chhoh hnu chuan ka ti tawl a "A chiloh na té?" a lo ti let a.







"A chiloh, amah pawn a duhlo ang" ka ti leh ngawt a, dik tak chuan chaw pawh a eipuar ngam nang, chaw eidan phung in ang bawk silo, Table manner tih ang reng kha ka nu chuan a peih pawh a peihlo hrim hrim ang, sawm pawh niila min lo hnial ka ring a ni.







"Han zawt ve phawt ila, keiman ka sawm chuan a duh ve maithei a sin" ka pasal chuan a lo ti mai a, sawifiah kher ngailo sela ka ti asin mawle. "Sawmlo zawk mai ang, keimahni kan va leng anga a tawk mai a lawm" ka ti leh a, a ngaihdan anih hmel loh ngang mai.






"A makpa ka nih hi, ka mawhphurhna hlen ka tum ve mek bawk a" a lo ti chu ka lo nui hak a, "Mawhphurhna hlenna tur chu thildang a awm mai ang, bakah ka ni te hoin an hriat chuan an lawmlo ang, chhungkaw thil ania" ka tih chuan zawhna mitmengin min en a "An inpawh vak lo a" ka lo ti a, a miko a sak ak bak chuan min chhang zuilo.






"Tlaiah va kal ila naupang lawm te kan lei sak anga, an lawm viau tho ang" ka ti nawn leh a, "A ṭha a lawm, i pu te pawh kan thlawh kawi dawn nia" a lo ti ve a.





Inkhawm tura ka insiam laichuan ka puan chhawm ho kha ka la dah chhuak miahlo tih ka hre ve chiah a, bawr ṭunin ka inpawm thla a ka pa in min lo hmuh chuan "Eng thil nge ni?" a lo ti he haw a, "Mo puan anih hi" nuisangin ka lo ti a, ka nu pawn a lo en ve vat a. "Inkhawm banah a ni te hoin sem rawh se" a lo ti var a, a phur ve hmel viau bawk.






In aṭanga kan chhuah laichuan Fiona-i te unau leh ka ni te ho chu an lo chhuak ve sap sap a, ke-in kan kal turah ka ngaia Motor vekin an lo kal dawn tih ka hre ve chiah a, "Biakin a hla viau a mi?" ka lo ti he haw chu Reny chuan min lo melh nghal rawm a "A hla ve deuh, pheikhawk sang nen chuan a hrehawm ang" JH-an a lo ti a, keichuan pheikhawk sang lutuk ka bun lo a, nula ho erawh in an bun sang hlawm viau a ni. Motor panga ngawt kan inzui chhuak a, Minister bial fang tur te pawh kan ang lek lekin ka hria.






Inkhawmna ah pawh mak ka la ti tluang zel a ni, he Zahau chhungkaw ho hi miten eng ang chiahin nge an lo hmuh tih zawhna ka inzawt lo theilo. Mi min thlir dan te, min en paha an inbe zui sar sar te, eng ang chiahin nge maw an lo hmuh le, mi hausa ho hi kohhran ah lehzel pawh an lo vawklallen thei anih dawn hi, a chhan awm thei tur erawh ka hrechiang hle, sum bawk a ni, kohhranah huangah lehzel pawh maw!






Inkawm banah Biakin kawta thingpui kan inlaiin Malsawma nen kan inhmu hlawl a min hmuh veleh ah min lo pan a hna chungchang te kan sawi luam a, kan kohhranah chuan KṬP hruaitu a lo ni awm e, Apuii pawn a lo hre viau a, kan inbe bawrh bawrh a, tlangval fel tak a ni.






A kalsawn hnu chuan "Tunge a?" ka bengbula rawn titu chu ka en vat a, a tum hmuk danah a thîk anih ka ring, "Malsawma" kei lah chuan ka lo ti mai pek a, "Ka hria a lawm" a lo ti ram hmuk a, "I hriat chû!" sawifiah duhlo chuan ka lo ti leh kher a, a hmel chuan nuih a ti za dawn dawn a, ka chhan dan chu a lawm vaklo tih lah a lang reng, engmah a sawizui lemlo a, haw kawngah min zawt leh khauh a.







"Ka thawhpui ṭhin ania" ka lo ti a, "A ngaizawng che em?" a lo ti leh khauh a, "Teuh nang" nui chunga ka ti chu a awih vaklo aniang " Dawt i sawi tlat mai" a lo ti sup a, a lungawilo tak tak em mawni. A lam ka va hawi chuan a kiaisuka "Ka uang anih kha" a lo ti chu ka melh rum ringawt a, min ti awm nuamlo hman a lawm mawle.







"I pu te hi an bang ve tawh angem aw" a ti leh a "Chawhnu inkhawm an tlang nghal ṭhina, la banglo deuh ang, Alawmi te chu an bang tawh ang" ka lo ti var a.






Alawmi te lam panin kan tlan a, kan thlen chuan mi an lo awm nuala, Sentea pawh ṭhenawm naupang ho nen an lo inkawma ka biak pawh chuan min chhang mumal meuhlo, kan inhmu ngailo em a kan inhmuh ve chhunah lah ka buai em vangin kan be lumlam hman meuhlo a, min la nel vak lo a tin ni.






Alawmi u chuan JH-a chu a en duh ngang mai a, ahma in Alawmin alo hrilh ve nasa ṭhin si a, ṭhiante ngaihzawng hlui nei ang mai hian awm a ti nuamlo a, Alawmi nen a an inbe ru sar sar a an nui leh ṭhin te chu nuamlo ka lo ti deuh a, a hnuah Alawmin "Ka u khan inpa hi a hre lutuk a sin, Mumbaia college trip an neih ṭumin an lo buaipui tawh a ni awm e" a lo ti a, JH-a bula ka zawh chuan a hre ve tawh der lo a, han i hmelhriat tir tehchiam ngaihna pawh ka hrelo, ka pasal anihna ang tawp bak chuan.






Ka nu chu pawisa pai ka tum viaua ala duh tlatlo maia, a tih luih theih der loh. Alawmin ṭhenawm dawrah min kalpuia naupang ho thil hawn tur chu Polythene lian khat ṭanin ka lei sak a, chu erawh lawm takin a lo dawng thunga, JH-an pawisa pai a tum pawhin a hnar tlat thunga, Alawmi chuan "Hnar rawh se, i pasal laka ba insiam a duhlo aniang, i tan vek zawk anih kha" a lo ti mai a, chulam zawnga ngaihtuah nachang pawh ka lo hrelo.







Haw lamah patea te in kan tlawh kawia, ka pi leh pu inkhawm bang pawh nalh taka incheiin an lo awm a, tlai chawei nghal turin min sawm a, kan sawilawk sa silo a JH-an a pawilo a ti tak nain ka hnial ve rih a, "Nilaini ah kan haw dawna, chumi hma chuan chaw inlo ei dawnnia" ka pu chuan a ti a, kan haw chuan eirawngbawl a hun leh der tawh a, in kan thlen laiin ka puan kha JH-a ni te leh nula hoin an lo en laih laih a, an thawm a ṭha kher mai.







Jonak-a chhungte pawh an lo kala, min biak danah engmah nimin thil thleng an hrelo tih a hriata, a tihzia viau a ni, tlai chaw eikhawm an rawta, eirawlbawlin kan buai hle a, zawhna ka chhang deuh mawlh mawlh a ni ber, JH-a nen kan inzui reilo lutuk chu mak an ti ṭheuh a, "Engtin nge i neih nghal theih mai zawk, lo fello ta sela i tisual ve duai dawn anih chu a" Ni Zualzelin a lo ti hlut a, "Innei tur tak tak hi chu inzui reiloin an innei thuai zel alawm" Ni kimpuiin a lo ti thung.







Kei ngei pawhin thla tlemte chauh inkawpa kan innei nghal mai hi mak ve deuh chu ka ti a ni, hnunglama sabarh an sawi ang maiin ka nunah a lo lang ve hlawla, sawi ve ka neih hma hauhin a ta ah min siam ni ta berin ka hria, engkim hi a thleng zung zung a ni ber a, a kal chak lutuka midang tan tak pawh a awih awmloh zawk lek lek a lawm, mak an ti deuh pawh an demawm hran loh e.







Kar a thar a, nitin hna kal turin kan inzui chhuak a, ka pi leh pu haw chhoh dawnah chaw kan va eipuia, an haw hnu lawk kar aliam awrh ang tih ah kei ka damlo a, a ruka palzam mai ka tum laiin ka ti hleithei meuhlo, ka khua a sik hluah renga, ka zung hleithei bawk silo a ka zun kawng lampang a fello leh tawh a nih ka ring, chaw ka eitheilo a zan ka muhil theilo bawka, ka tlun zankhua a ni deuh ber zel, nachhawkna ka ei chuan zinglamah ka muhil ve thei chauh zel a, hna kal angai leh bawk si a ka awmdan chu a hrehawm tak zet a ni.







"Pasal neih hlim Effect anih kha" Apuiin a lo ti mai a, "Chutiang Effect te a lo awm a ni maw?" ka lo tih chuan min nuih min nuih a, "Ka u Effect anih kha" Reny chuan a lo ti ve a, an thil sawi duh dan ṭhin hi chu!







"Ka zunkawng lam niin ka hria, ahma pawn zunkawng hnai awm ka nei ṭhina" ka ti a, "I rai ani zawk ang a" Reny bawkin a lo ti leh a, ka rai chu ka ringlo, ka awmdan chu rai lampang ni pawn ka hrelo, ka zunkawng lam zawk niin ka hria.






Han damloh chiah chuan pasal neih a lo nawmzia ka hre ve leh thunga, a hma kha chuan ka damloh pawhin keimah ngawt ka inbuaipuia, ka tuar dam ve thei mai ṭhina, a chhan chu pangchanna tur kha ka nei hlawllo a Nu Muanin damdawi min leisak ve zeuh ṭhin bak chu keimah vek ka inngaihtuah angai ṭhin.






Mahse, tunah chuan chutiang a nilo, ka muthilh theihloh chang pawhin zankhuain ka pasalin min vil peih a, rei tak tak bualkuanga ṭhu a Bathroom a ka inkhung pawhin muhil loin min lo nghak ngar ngar ṭhin, ka khur nasa thei hle a a pangtilum tello chuan ka tuar thei meuhlo, a damzawk chuan keiai mahin mut a hmu ṭhalo zawkin ka hria, kei chu hna ka chawl maia ani a chawl ve silo a, zingah hma takah thoin damdawi leh chhuna ka eiduh tur thil leiturin a chhuak a, chumi hnuah hna a kala angai te bawkin zanah ka men leh a, a chau ve ngawtin ka ring.







Chawlhni zing pawh ka inkhawm ve ta lo a, chhunah chuan ka zia deuh nain ka chau riau a, ka taksa lah a zawiin tha ka neilo em em a, Doctor-in thil tuiril in tam turin min ti taknain zun ka harsat em vangin ka in hreh tlat zela, JH-an ka intura theitui alo lei pawh la paih ru leh ṭhina, damna zawk tur tih hretho mahila nat laichuan chutiang ngaihtuahna ṭhalam chu a neih leihtheih loh.






Chawlhni zan chuan ka khawsik a sang kher mai, zantir aṭangin ka khur ka khur tawh maia, men pawh ka meng ṭha peih meuhlo "Naktukah kan inentir leh dawnnia" puanlum min sin belhtir sauh sauh pahin JH-an a ti a, "Damdawi min chawh leh ringawt ang" ka lo ti a, rilru a no riau a ṭah chhuah em em vang pawh niloin ka mittui a tla reng mai bawk.






"Ka ning e" ka ti leh ringawt ṭhin.






Ka bulah lo ṭhuin min pawm tho a, ORS min intir a tum chu melh pawh ka melh peih lo, "Ka zung duhlo" ka lo ti hlak a, dik tak chuan a na ve em a ni, ani chuan a hrethiam ve lo ang, chhun ah pawh thiin ka zung ania, thil tuiril in tura min ti chhen chu thinrim lamah a kal tawh zawk.







"Tlem tal i in angai" tih paha min tulh mai a tum chu ka lo vai thlaksak hmiah a, ka tum em em vang pawh ani lo, ka che thut a ni ber, ka inthiamlo hnuhnawh hle a, amah en chung chuan ka ṭap hliam hliam ringawt a, ka ṭah takah chuan ka ṭah a chhuak zual telh telh lehnghal a.







"Ava buaithlak ṭhîn" a awmah min kuah hlu hlu a, "Ṭap tawh suh le, naktukah Doctor dang kan pan anga i dam vat mai ang" aw nelawm leh damthluam hian a ti a, pa in a fanu ṭap a thlem ang hi ka inchan ber, ka pangchang a sin, aman chutianga awm chu min phalsak tlat a ni.







Nachhawkna ka eia ka khawsik sang lutuk pawh a zia ta deuh a, mahse dar 1 velah khawsik chuan min ṭham harh leh a, "A vawt ee...." tiin JH-a chu ka va kuah hnai talh talh a, a ban chu la kangin ka inkuah tir bawk a, zan thum vel zet chu a muhil mumal tawh biklo a, tih harh pawh ka inthlahrung ve zozai tawh.







Ka pang a rawn dek vuta, a muhil biklo tawp mai! Tho chhuak vatin damdawi minlo laksaka, chumi hnuah min lo kuah lum leh a, zing khawvar thlengin kan muhil zui ta lo, nachawkna chuan min chhawk tak nain thaw a sa hluam reng a, khawvar dawnah bualkuangah reife ka ṭhu bawka, muthilh leh theih chi pawh a ni tawhlo.







Tukṭhuan eikhamah in entir turin kan inphur chhuaka angai tein damdawi min lo chawha, ka eilai ka Doctor hmasain min chawh te chu min thlaksak veka, tui in lui turin min chah nasa hle bawk a, "Tui i inloh chuan i dam thei lo ang, dam i duh chuan tui in ṭhat angai" haw kawngah chuan ati mawlh mawlh a, kei ka ngawi rana, a hmel chu ka va en ṭhin a ka nuih te pawh a za lek lek a ni.







"Ka pa i van ang e" ka ti chu a hamhaih kher mai! Nuih pawh a nuilo a, mawl min tih hmel deuhin min ena... nilo.....rapthlak min ti hmel a pu zawkin ka hria.







"Hmeichhia hian an pa te mizia ang deuh pasal an nei ṭhin an tia" ka tih leh takah chuan thaw huai hmel a pu.






"Bawihno....i khawsik kha i thluakah a lut ta emaw ka ti a lawm" motor khalh chungin a nui suk suk a, chutah a kutin ka sam a rawn chul a, vawin chu hna kalloin nilengin min awm thei sela ka ti kher mai, hna lam an buai vanglai tak ani bawk si a han chelh luih chu nitheiin ka hre bawk silo a.






"I lo haw har angem?" in kan thlen hnuah ka ti a, sana ka en chuan chawhma chu a ral leh ṭep tawh.







"Chawhnu Meeting kan nei a, kan zawh veleh ah ka lo haw dawn nia, eichak te i nei em?" insiam mawlh mawlh pahin a ti a, "Neih pawh ka hrelo" ka lo ti mai a, ngawirengin a insiam zui mawlh mawlha , kal mai tuma a inpeih tawh hnu chuan ka mutna aṭanga tho kangin ka va thlek a, min hnungchhawn zawngin ani a ding thunga, darthlang hmaah chuan a hmel pawh chu ka va hmu thei, min hmuh rualin alo kiai suk a, a Necktie a suih mek a ni.







"I langṭha hle mai" ka ti zuai raih a, mitmeng damthlup bak chu a hmelah danglam a awmlo.






"Ka lo haw hma a i khua a sik chuan Apuii ilo phone dawnnia" a ti a, a sam a tuai ṭha zui mawlh mawlh a "Nalh deuh a kal angai em ni?" ka lo ti chu a nui suk a, a suit hak rawng lah a in hmeh em em a, hnung lam aṭang phei chuan a pian a langnalh hle bawk.






"Mi tu emaw in Tall, Handsome and Nice Shoulder a ti che a sin" awki zuai raih chuan ka ti leh a, chutah ka lamah rawn inherin ka mutna lam a lo pan a, ka thumal sawi zawh ang chiah kha a landan chu a ni.





"Anih nangin"




"Engtin mah ka ti ve lo" ka lo ti zawi sap a.





"A sawi leh hunah chuan KA PASAL anih saw ilo ti dawn nia" a sawilai chuan nuihza insum hmel a pu.





"I intithei a ni maw?"





Min lo hnaihin ka chalah a lo fawp a "I pasal nih chu intihtheihna tlak a ni reng a ni" tiin ka hmui a lo fawp zauh a, min ti dang der mai, puan min sin ṭhat tir hnuah a chhuak zui, a motor tlan liam ri chu ka ngaithla reng a, Gate aṭanga a tlan chhuah thleng chuan, ka ngai zui vawng vawng mai.


IMG_20210208_092247.jpg



Chhunah chuan ka khua a siklo hlauh a, tui te pawh chu ka inlui ve ngial a, a mi ṭhin let dan erawh na tak a ni thung, JH-a ka text chhen a, an meeting aniang engmah Message a chhang lo a, ka eiduh zawng engzah nge ka chah hman ang ka hrelo, chi 10 chu a chuang ngei ang.







Tlai eirawngbawl dawnah ka nu a lo haw a, ka room ah alo lut zawka Theibuhfai min lo pe a, enge ka an te min zawt ve luama, nelawm viaulo mahse, misual tak chu niin ka hre biklo.







JH-a lo haw har lutuk chu ka thin a rim lek lek tawh a, Meeting zawh veleh ah ka lo haw ang a tih vang khan nidang aia alo haw hma la lo beisei ve tumhranga mahse, nidang zawng aiin alo haw har a, tunah dar 4 a pel tawh a, a sawi anga a awm leh silo chuan mi ti lawmlo takzet, ka ngaih em vang te pawh ani mahna, nupa dang anglo takin keini chu kan inneih hnuah pawh bul ṭan hlim ang chauh kha kan la ni a, kan inhriat aṭangin kum chanve em pawh a la liamlo a, hmangaihna zûn a zâm nasat hunlai ber ang kha kan tawng ve mek tlat a ni.







Dar nga pelh ah pawh a lo la hawlo a, ka lungawilo tak zet tawh, chau tak chungin inhnuaiah ka chhuk thla a, ka chhungte lahin a ngaihna an hre biklo a , phone lahin a Ring ral zela a chhang thei bawk silo, pawnah chhuakin Gate lam chu ka thlir renga, khua thim hmaa a lo haw loh chuan ka hau hrep ang ka tih mekin Gate ah chuan a Motor a lo tlan lut a, hauh chu a hlau hle aniang.







Motor aṭanga a lo chhuk laichuan ka lam a lo hawia "I zia em ni?" a lo ti a, ka chhang duhlo, a bana rawng sen kai nian chu a lo kal hnaih chuan ka lo en vat a, " Ti nge a, i inhliam a mi?" phawk fe in ka lo ti a.







"I ṭhiannu Alawmi kha mawle, a haw lamah Motor nen an insu a" a ti chu ka nghilhdup maiin ka hria. "I zia deuh chuan kan va kal dawn em ni?" a ti zuizat a

👇👇 a hnuaia ads khu click theuh ang u aw, khawngaihin 💚

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 28th, 2021, 12:08 pm

GOMENASAI - by Ahmangaihi violette khiangte



CHAPTER - 29






"Engtin nge a awm! A na viau em?" ka lo ti nghal chul a, ka darah min kuahin inchhung lamah min luhpui a "A hlauhthawn awm loh, a chhungte an lo thlenga ka lo hawsan rih a nih hi, zanriah eiphawt ila, i zia deuh chuan ka hruai dawn che nia" a ti leh a, "Ka zia a lawm, engtin nge a Accident a, nangman i bawihsawm em ni? A hlauhthawn awmloh tak tak a maw?" ka ti leh zung zung a.






"Hlauhthawn awmloh e, Victor-a nen Damdawiinah kan hruai nghal a thisen pawh ka pe nghala, kan thisen a lo inmil hlauh a a tihzia khawp mai, ka lo chhuah dawn chuan a harh tawh a, a lu a sawh ve deuh a mahse, hlauhawm loh e" a tih chuan ka lo thaw huai a, Alawmi chu ka ngaihtuah ngang mai. "Tinge min lo hrilh vat loh aw?" ka ti nang nang a. "I lo chiai ruai ang ti ka hlau mawle" tiin ka pang a rawn dek a, ka khua a siklo tih a hria chu thaw huai hmel a pu ve a "Chaw eiloin kal mai ila" ka lo tih chuan min en renrawn a, "Hmanhmawh thlak a ni tawh chuanglo a, eiphawt zawk ang" a tih leh khauh a, a ril a ṭam tawh anih ka ringa ka hnial duh ta biklo.







A inthlak zawh veleh chaw kan eia, ka rilru ah Alawmi ngawt a awm vangin ka ei hleithei meuhlo, "Ngaihtuah hah suh, a Serious viau lo a nia" chawhmeh min suah sak pahin ka sam a lo chul a "Vawin ah i khua a sik leh em?" tiin min zawt zui a.







"Siklo e, Alawmi chu engtia Accident nge a nih a, engtin nge i hmuh a?" ka lo ti vat a. "Haw kawngah Car nen an insu a, midangin an lo bawihsawm lai kan va hmu a, amah a ni tih ka hre lo a kan va en chiang kha amah alo ni sia Damdawiin-ah kan hruai nghal a lawm" damdiai hian a ti a, a sawi danah chuan hlauhthawn awm takin langlo mahse ka ngaih a ṭha thei chuanglo.







"In va kal dawn em ni?" Ka pa in a lo tih chuan "Kan va kal leh ange" JH-an a ti a, "Mate, in unauin va kal rawh u, i u Mambawihi ṭhiannu a nih chu" ka pa bawk chuan a ti leh a, "Micheal-a nen kan lo zui ang che u" Apuiin a lo ti ve bawk a.







In aṭanga kan chhuah dawnah U Zodinan min lo phone a "Alawmi a accident a ni awm e, vawin khan kan haw rual sia ka hnungah a lo tlan ve mai emaw ka tia, keilah chuan ka tlanliam san nal nal a, a zialo tak tak a ni" inthlahrung deuh hian a lo ti a. "A zialo khawp mai hei mahse, ngaihtuahawm a ni lo e" ka lo ti ve a. "Tunah Damdawiinah chuan i awm a mi?" a lo ti leh vat a, kan kal mek thu ka hrilh hnuah ani pawh a lo kal ve nghal tur thu sawiin kan inbiakna chu kan titawp rih a.







Damdawiin kawt kan thlen chuan U Zodina pawh chu a lo thleng ve nghal mai a, kan inbiak zawh khan a lo chhuak ve nghal mai ni tur a ni. Apuii leh Michealan min zui bawk a mahse, Security ten kan vaia min luhtir an phal tlatlo a, JH-a leh U Zodinan an dil ngial hnu ah "Pathum chiah lut rawh u" a lo ti leh mauh mai a, "Hetah kan lo nghak mai ang che u" Apuiin a lo tih takah chuan kan pathum chuan Ward lamah kan inchhawm chho a, kan han lut ta chu Alawmi chhungten min lo chiau au a, khuma Alawmi lo mu bam chu panin ka va ṭhutchilh nghal chawt a, a lo muhil mek a ni.







"Nichin deuh lawk khan a muhil a" Alawmi nu chuan a lo ti a, JH-a en chungin lawmthu a hrilh zui mawlh mawlh a "In lo awm hlauh a, thisen te inlo pe a ni awma kan lawm tak tak a ni, i ṭhianpa lah kha lawmthu pawh kan hrilh ve hman ta lo a kha, kan lawm lutuk tih min lo hrilhsak dawnnia" a ti sap sap a.







Enge maw chen chu titi pahin kan ṭhutpuia dinhmun hlauhthawn awm engmah a awmlo bawk a, ani lah a mutui em em a, a lawmawm kher mai. Kan rei deuh vangin Apuii leh Michaela chu JH-an a phone a lo va haw leh mai turin a ti a, Alawmi u thingpui min lo thlitsak chu in leh tetein ka la ṭhu khawmuang ta rih a, Uzodina pawh a la ṭhu ve renga a inthiamloh thu a sawi leh ṭhin a, "E...inthiamloh na tur a awm reng reng lo, hei Mambawihi pasal te an lo awm remchang hlauh a lawm, zan lamah pawh inla rawn ngaichang zel a lawmthu sawisenloh kan ba zawk che u a nia" Alawmi U chuan a lo ti var a.







Tih ve nei hauhlo mahila ka pasal thiltih ṭhat chuan awm a ti nuam em em ringawt mai a ni, ka ṭhian ṭha ber lakah a lo ni vei bawk nen, Alawmi ka tana a ṭangkai tawhna zozai te chu hen zo chuang hauhlo mahse ṭanpui letve theihna hun kan nei chu kawng lehlam zawng tak chuan a lawmawm hle bawk.







"Kan haw tawh mai dawn em ni?" JH-an a lo tih chuan ka hniallo, ka awm a nuamlo leh ṭan riau a ka khua a sik leh mai dawnin ka hria. "Keini hi kan va hawphei phawt ange, hei kan nu hi a nuamsam vaklo a" a ti zui zat a, "Keipawh ka haw ve nghal mai ang, naktuk lamah ka lo kal leh dawnnia" U zodinan a lo ti ve bawk a.







"Va haw rawh u, ngaihtuahawm anih loh hi naktuk lamah phei chuan kan chhuak thei maithei a ni" tiin Damdawiin kawt thlengin Alawmi nu chuan min lo zui chhuak a, "Naktukah inentir pahin ka lo kal leh ang" ka ti ve a.







Haw kawngah chuan "Inentir tur chuan ka hruai dawn che em, i duh vak lo khan ka hria a nge ni a zingah ka ṭhianpa clinic ah khan kan kal leh zawk dawn?" JH-an a tih chuan "Min hruai duhlo mai rawh, Alawmi kan pahin a awmna ah khan ka lo inentir ve mai ang, min admit an tum leh ka hnial mai anga" ka lo ti a.







"Hnial lo e, tinge Damdawiin awm i hreh em em a, a ṭul chuan ka awmpui mai dawn che a" a ti a, Damdawiin pangngaia han inentir chu ka duh vak lo a, min admit anih chuan mo thar hlimah Damdawiin ah ka awm angai dawna ka duh vaklo, chu loah JH-an min awmpui thei kher pawhin ka ringlo a, tuna ka natna ang te hi chu a hma pawn ka lo tuar ve fo tawh a, Damdawiin leh inlama in enkawl a inang deuh rengin ka hria, Bathroom kal leh thil dang dangah pawh inlam chu a nuam zawk nge nge a, duhtawkin ka pasal bulah ka pangchang thei bawk a chu ngawt pawh chu ka tan chuan a thlakhlelh awm zawk a ni.






In kan thlen chuan nachhawkna ka ei a, zun lam chu a hma nia ai ngawt chuan a hrehawm lutuk ta lo a mahse, na tak chu a la ni tho. Ka muthilh theih mailoh vangin kan inneih thlalak te ka bih kuala, inneih ni a ka rilru buai zia te kha ka ngaihtuah lêta nuih te lam lam a za a, thlalaka ka hmel landan ah pawh ka lo tilang viau a ka nui lai hmel a awm miahlo a, min hmutu te khan mak min ti ngawt ta ve ang.







A inbual zo Bathroom aṭanga a lo chhuahlai chuan inneih thlalak enin khumah ka lo in chap hnawk nuai a, "I la mu dawn nange?" a tih chuan rang lutukin "A la chhuak lo a" ka lo ti zat a. Nuisuk chungin ka lam a lo pan a, ka thlalak enlai chu a lo bih ve a.






"Inneih ni hian ka lang chhe ngawt mai" ka ti chu a nuih aza ngang mai. "Tinge maw ka nupui chu a tum char char le Victora bulah ka lo ti a sin" a lo ti a, khawngaihthlak zawk chuan. "Judy nena kan inbiakna vang khan ka rilru a buai lutuka Biakin chhung aṭang khan ka tlan chhuahsan ṭep che a ni" uangthuang tak chuan ka ti a.







"Ka hria a lawm" dar san ak chunga a lo ti chu phawk lek lekin ka en a "Engtin nge i lo hriat?" ka ti he haw a, "I awmdan kha tlan thut duh hmel i pu a lawm, chuvang ania ka chelh reng che" in enin kan nui dun a, min hrechiang lutuk hi ka inthlahrung zawk a ni, keilah chuan a kut pawh ka lo hre hranglo vel tak chu a nia.







"Muthilh tum dawn rawh le, i dam vat angai ania" thlalak ho lakkhawm pah chuan a ti a, a che zia chu ka lo en ve renga, tuna ka hmangaih aia nasa hian han hmangaih lehzual thei ila ka ti a ni, kha zan khan lo intawnglo ila tunah hian ka pasal a ni kher a ngem, a....intawng tura ruat kan ni zawk ang, ka nun buai leh khawhar tak lak aṭanga min khai chhuak turin amah hi Pathianin min pe zawk anih ka ring, a tello nun chu ngaihtuah pawh ka ngaihtuah ngam tawhlo, ka tan hian a hlu ve em a sin.







"A mak ti raw, kan pahnih hi chuan inkawp tura ruat kan niang, ka tan i lo piang a nih ka ring" ka bula a lo mut lai chuan ka lo ti a, ani chu a nui maia, puan min sin tir hnuah duat takin min kuah leh a, a hmel chu ka lo en reng thung.





"A mak e...!"




"A mak em ni?"




"Aw mak e, ka thlalak dun hmasak ber pawh kan inneih thlalak a nia" ka ti chu a nui ve suk mai, "A van ṭha ve" a ti leh sup a, mut chhuak mitmeng damruiha min enin "I tan ka piang anih chu, muhil tawh rawh le" tih pahin min kuah nghet salh a.
A muthilh hnu pawh chuan ka la muhil ve lawklo, a muhil lai hmel chu ka en reng a, dimtea a hmuia ka fawhsak lai chuan a che ṭalh ṭalh a, inleh mai a tum chu ka lo pawt bet ṭang a, keimahin ka nui leh rih ṭhin.






Zun chhuakin min ṭham harh a, sana ka en chuan zinglam dar 8 a lo ri thuak tawh a, thawh kan hai chiang a ni. Muhmelṭha-a pawh a la harh bik miahlo, ka damdawi ei thar kha ka ngeih a ni ngei ang, zun lam harsatna pawh a zia chho viau a, tuk dang zawng aiin ka tho nuam bawk.






Kai tho duhloin inhnuaiah ka chhuksana, choka aṭanga Reny lo chhuak nen kan intawk chu "I van tho hma ve" tiin ka lo bia a, "I va tho tlai ve" ner nak chunga a tih hnuah min kalpel zui maia, a mizia pawh ngaihkhatah ka ngai ve thei ta in ka hria, Lalrinhlua a lo kal ngailo a; Reny lah inlamah a tawm chawt chawt a an inthlahfel ta a nih ka ringa, ka buai ve na tur awm tawh hauhlo mahse awm chu a ti nuam ve deuh a ni. Ngaihzawng hlui lo huat ruk em em te nena intlawhpawh reng chu thilnuam a ni bik tlatlo.






Choka a ka lut chu ka tum lo lutuk mai ka hmuh vang chuan ka ding chawt a "Kan mothar chuan khum a thawhsan phal mang nange a" chimawm zeta min melh chunga Judy min lo chhaihna chu chhan ngaihna pawh ka hrelo, min ti hamhaih lek lek zawk a ni!






"Tunlai chu Mambawihi a damsamlo a" Apuiin a lo ti a, "Mampuia a la mu em ni?" ka nuin a lo ti ve bawk.





"A la muhil a alo tho ve ṭep ang" zawi te in ka lo ti a, Judy lo nui pat pat reng chu kalpelin tui ka va intulh ṭeuh a, Apuii nena an titi bawrh bawrh chu ka va mitmei veleh zauh ṭhin. "Mambawih hei lo eive rawh, Judy lo hawn anih hi" engthil emaw ni an eilai chu min kawhhmuh paha Apuiin a lo tih chuan "Eiru, tui ka in ṭeuh phawt ka ngai a" chhuanlamah ka lo ti a.







"Michaela pawh chu ava mu rei ve mawle, Admission tih a tum a ni lawm ni" tih paha choka aṭanga ka nu kalchhuah hnu chuan "I enge na a?" Judy chuan a lo ti ve khauh a. "Ka zun kawngah hnai a awm a" ṭha tak chuan ka lo ti ve a, an bula ka va ṭhutlai chuan nui rah rah chunga min lo thlekin "In va bei nasa awm ve" a lo ti zauh a, ka melh rum nghal hrawk nghe nghe.






"LalJu.....amak thei" nui hak chungin Apuiin a lo ti a, a ṭawngkam ngeiawm leh a mi fiam duh dan ṭhin hi ka ngaihtheihloh zawng tak a ni. "Ka tleirawl lai aṭanga ka nih ve dan ania" ka lo ti hlak chu a awihlo hmel em em leh ta nghal a.






"Pha kher duh mahta che, mo thar ho natna vei ṭhin tlanglawn a lawm" tiin a la nui ring tak deuh deuh a. "Keipawh pasal ka neih hlim khan ka ni ve alawm mahse, Mambawihi ang em em chu ka nilo a, a hrehawm ania aw, Regan khan min duat hlauh a zia tak ala awm a" Apuii chuan alo ti leh a, thawh mai ka tum laiin JH-a a lo lut hlawla, Judy a hmu chu a rawn en nghal chat a "Engtikah nge i lo kal a?" a ti chang bul a.






"Nizanah ka lo thleng" awlsam zetin pakhat chuan a lo ti a. "I haw a mi a?" ka tih chuan a bu nghata, thil a ei zui mawlh mawlh a, ka be zui ta biklo.






"I tho nuam em?" JH-an a lo tih chuan "Ka dam ṭanin ka hria" ka lo ti vat a. "Tui i in ṭeuh em" a ti zawm leh zat a, "In zo chiah" ka tih laimekin Judy leh Apuii chu in mitmeiin an nui an nui a, awm an ti nuamlo kher mai.






Ka awm aṭanga kar khat hnua vel aṭang khan tukṭhuan kan eirual ngai meuh tawhlo, a tho hmasa sain an duh insiamin an ei mai zela, kei ka damloh zui tak vangin JH-an kan eitur a lo siam mai ṭhin bawk "Kan eiduh zawng a in anglo vek, in duh duh ei ve mai rawh u" ka nu berin a ti mauh maia, an tih dan ṭhan a nih vang nge ka pa lahin a sawisel eihlo a, chawhmeh bazar te hi ka thiam vaklo a, thlai hnah tih angreng kei leh pasal tan chauha han lei ziah chu a diklo riauin ka hre ve tumhranga, JH-a lah a tih tamloin a awm awm hi sawisel loin a eithei mai zela, keimah ber hi insiamrem ngai chu ka ni.






"Chaw chhum i duh em?" ka tih chuan a sana a en zauh a, "A tlai tawh emai, thil dang ka ei mai ang" a lo ti a, "Tho hma ve deuh la eirawng te bawlla inpa hian chaw tak tak a duh ania" Judy in zawitea a lo tih chuan ka ngawi ran a, "A ho lutuk ka u te chuan ei in lam a Care ve vaklo, a awlsam thei lutuk" Apuiin a lo ti ve tak nain Judy thil sawi chu a dikin ka hria, keima thiamloh zawk tak pawh a ni.






Room a ka chhoh leh laichuan a lo insiam mawlh mawlh a "Judy kha a lo let leh tih ka hrelo a, engtikah nge a lo thlen a" a lo ti a, "Ka hre bik miahlo, nizan kan chhuah hlan emaw kan muthnu ah aniang" ka tih chuan a thil tih lai dah meuhin min en a. "Ka chhuahtir lehnghal dawn a mi?" a lo ti leh hmiah a, "A ngailo, awm mai mai rawh se, harsatna min thlen loh chuan palzam ve mai mai tawh ang" ka ti leh a, a ngaihdan a ni vaklo tih a hmelah a a lang thei.







Chhunah Alawmi ka va kan a, ani pawh a lo tho harh ve deuh tawh a, a ban leh nghawng vel na a ti deuh tihloh chu insawisel na a nei lo a, a lu a sawh kak na thisen a hloh hnem vangin a chau ve deuh aniang a mu zawi ngial reng a, chuti chung chuan a ti ti barh barh reng tho a, Doctor a lo kal lahin chhuah a lo dil khuchuk a, "Damdawiin rim hi ka ning" a ti chhen reng bawk.






A dil ngun bawk aniang nithum hnu ah chuan an chhuahtir ve leh ta mai a, a chhuah zanah JH-a nen an inah kan va kan a "Victora kha lawmthu min lo hrilhsak rawh, nangmahni kherin minlo bawihsawm chu ka lawm tak tak a ni" a lo ti siam siam a, JH-an kan nan cheng sanghnih a pe a a lawmthiam ngang mai.







Rinmawia lo lang miahlo chu mak ka lo ti deuh a, chhungkua an inti tlangnel tawh tho si a, a lo lan ve ka rin tehlul nen, amah ka zawh lahin min chhang ṭha duh derlo mai a, an intitau leh tawh a nih ka ring, hetiang hian hriatloh karin an lo inṭhena, hriatloh lai bawkin an lo inkawp leh ṭhin a, keipawn ngaihkhatah ka ngai ve tawh aniang ka zawt zui zel duh ta lo, nakin lawkah an ṭha leh vat thoin ka ring.







Ni a liam ve zela, keipawh ka damṭha ta bawka hna ka ṭan veleh ta a, kan nupain office kan kal a, ka nu Clinic lamah a buai em em thung, ka pa lahin dawr lian tak a a siama, Apuiin sumdawnna a khawih ṭan veleh bawka bungraw lain a zin chhuak deuh reng ṭhin, Michealan Mizoramah Law a zir ve leh a, a zirna a laklawh a vangin a bul a ṭangin a ṭan ṭha leh nghe nghe a, kan inbe ngai mang meuhlo, chuti chung chuan ka inbiak chhunah fiamthu bawlhhlawh deuha mi chhaih a ching reuha ka ngaina vaklo mahse, a cousin te ho pawh chutiang zawng tho chuan a lo chhaih ṭhin tih Fiona-i hnen aṭangin ka hria a, ten lamah a kal deuh tlat!







Midang zawng zirna leh hna lama kan kalchhuah laiin Reny leh Judy ten in an lo nghaka, Judy chuan Apuii zin laiin dawr a lo nghak ṭhin bawk a, tumah inngaihsak lemloin kan khawsa ho a ni ber, zinglam chaw ei ho loh chu tlailamah pawh kan ti chhunzawm deuh titih der a, haw a inrual hlawmlo a, kar tawpah bak chaw kan kilho ngai ta meuhlo, ka awmrei telh telha chhungkaw zeizia pawh ka man thiam ve zela, ka rin ang a nilo telh telh mai bawk.







Buaina pakhat ka neia, han huat viau theih lah a nilo, JH-a pawn mak a ti ve deuha chaw ei laichuan kan in melh leh ṭhin a, a ngaihna a hre bik vaklo aniang, a sawizui hranlo a, lawm hmel emaw lawmlo hmel a pu chuanglo a, chutiang tho chu keipawh ka ni.






Tuk dang ang bawkin ka tho chu eirawng a lo bawl peih leh diam tawh a, ka pa in a chawhmeh siam alo tem sak laimeka ka va luh chuan min lo nuihsanga, thawh khalh ka tum pawh hian a ṭuan a ṭha leh lutuka ka thawhkhalh thei ngailo, tunah pawh dar 6 chiah a la ri a, eirawng a lo bawl fel leh vek tawh.






"Judy chu kan hnenah awm hlen mai rawh se i nu bulah ka va ti ange, eisiam i thiam emai, i nu leh i unau ten angaihna chai an hre hleinem" ti a ka pa in a fak lai chuan min lo melh pah kher a, engvanga min rawn melh kher nge maw anih le, min tih el deuh em mawni dawn ni!






"Judy awmdan hi mak i ti ve em?" mut hmunah chuan ka pasal chu ka zawt hlawl a, "A awm awmin awm rawh se" a lo ti mai a, ka ngaihtuah ngun poh leh ka ngaih a ti ṭha lo zual. Hetianga a awm hian keimah min ti dâwng zela, chumi a duh vang chu a ni thei angem? Ka chhungte lahin an fak em em a, tuk tin nidanga kan hmuh phak ngailoh Mizo chawhmeh tuihnai tak tak hlir min lo hlui a, kan sap suak ho pawn tui ti takin an ei hlawm a nih kha mawle!






"Zing ah hian a tho hma thei lutuk a, ka thawh khalh theilo reng reng" ṭhu chunga a Laptop khawih laimek chu ka han melh a, "Thawh khalh a ngai hleinem, nang chuan office hna i thawk alawm" alo ti leh mai a, a ngai holam viau a ni mahse, keichuan thil tum nei tlatin ka hria, ni e....he nu hian tu emaw rilru chu hneh a tum chiang a lawm.





"I rilru hmin a tum a niang a?" ka tih chuan min chhangloin a kiaisuk a.





"Dah rih la sawi lawk ang" ka ti leh a, ka vei tut tut bawk si a, sawipui tur ka mamawh a ni.





"Ka ngaithla che a lawm" a tih leh laichuan a laptop chu ka lo bih pui a, "Patea thlam sak dan tur ka lo hisap anih hi" a lo ti zawi sup a.




"Judy chu..."




"Awm se i ti a nilawm ni?" tiin min zawt let khauh a.




"Ka sawi tum zawk chu tun lai a khawsak dan hi" ka ti leh ngawt a, sawifiah chiam ngaihna ka hrelo, zep loah chuan a inlafel lutuk khan min hek ni berin ka hria, awm a ti nuamlo zo vek tawh a, laktlak loh deuh angah min lantir lo theilo.






"A eirawngbawl kha tui iti viau em?" tiin zawhna atthlak zet chu ka zawt leh hram a, ka lamhawiin min en vung vunga "Muhil tawh rawh" a ti thum dut a, engmah sawi tawhlo chuan ka inhersan a, chumi hnu lawkah a Laptop chu dahin min lo kuah a "He inchhungah hian buaina neuh neuh hi chu a khat tawkin a awm reng ṭhin, a changin an fel viau anga a changin an huatthlala awm ṭhin ang, ka nau te pawh an puitling tawh, i pasal hi midang tihlawm tum chi leh thu vaivir tu a ni ngailo, nangpawh chutiang chuan awmla i hahdam ve thei chauh ang" a lo ti a, a lam hawia inherin a mitah ka en ran a, engmah ka hrethiamlo.



"Enge ka tih ang?"



"En liam tawp rawh"



"Mahse...."




"Ka sawi ang chuan ti rawh" dam dup leh khauh tak si hian a ti a, ka chhang zui ta biklo. Alawmi ka hrilh chuan "JH-a sawi chu a dik chiah a lawm, a aia mark ṭhat tum kha angailo in inel a ni ringawt dawn a sin, nangin i lo tih ve zel chuan a thil tih te khan awmzia a nei vek dawn zawk a, engtin mah i tihloh khan awmze neilo ah i chhuahsak zawk dawn a lawm, a thiltih te kha han faksak vel la, neitu chan chang tak khan awm la, i awm pangngai reng khan awm la i thiltih ṭhin pangngai bak tilo bawk la, a reng rengah a van zaktheilo em em, ngawirengin a hek char char che anih chu" a lo ti hlak hlak a, a ang zui bawrh bawrh a, min ṭan hi a pe na thei bawk si a, Alawmi biak hi chu infuihpawrhna ṭha tak a ni ringawt.


images (1).jpeg



CHHUNZAWMNA..




Alawmi hi zawng hmeichhe tuarchhel leh harhvang ngang hi ania, a Accident vang chuan nikhat pawh hna a ṭhulh phah chuanglo. Office hour chhung hian kan inhmu hleithei meuh ṭhinlo a, kartawpah kan bazar dun loh chuan kan inah te a lo leng ve mai ṭhin a, kan inhmuh chang hi chuan sawi tur a tam ṭhin ngang maia ṭawng hmasak hi kan inchanlo lek lek ṭhin.






Zirtawp tlaiah lo len a duh thu leh Inrinni Bazar paha lo kawi a tum thu a lo sawilawk diam a, keini pawh chawhhma lamah Fiona i nen kan bazara a, Apuii dawra kan awm laiin min lo be leh a, kan inah a lo thleng phei der tawh chu niin, hmanhmawh takin kan haw a, kan va thlen chuan JH-a nen Veranda ah ṭhuin an lo titi a, a u Cheese cake siam min lo ken sak bawka, thingpui te lumin kan pali chuan kan in ho a, ka chhungten min la rawn tlawh leh miahloh laiin Alawmi thung hi chuan min tlawh awllo a, ka chhungte lam chan tak a chang ve a, a lo kal hi chuan awm hi a ti nuam ve riau zel.







"Mate i rai a nilo maw, i intest reng reng em?" cake ka ei mawlh mawlh laia Alawmin a tih chuan phawk fe mai hian ka lo en a, "Teh ringawta, rai ka ang em ni?" ka lo ti lêt a. Fiona-i thleng sil lai chu melh zak zak pahin "I damsamlo reng sia, i raino anih ka ring deuh a, i thil ei a tui viau bawk sia, i cher bawk si" a lo ti leh a, a han sawitakah chuan ka inringhlel ve hnuhnawh a, ka thlabi chhiar hun a pel tawh bawk si a, engmah taksa lamin Warning a la rawn pe mang silo a, ka ṭhiannu thil min zawh chu thil ni thei tak chu a ni.







"Ka la Period miah lo" ka lo ti vat a, "I rai a ni ngei ngei ang, intest teh" phur hmel taka a tih leh chuan rilru a buai nak tawh. Mahse, tinge luak chhuak tih vel angreng kha engmah ka neih miahloh le, ka thil ei chu a tui em em reng a, chu erawh tun hma aṭangin chaw eituilo tih vel hi ka nei ngailo hrim hrim a, keimah ah danglam vak a awm lo vei nen ka inhrethiam chiah lo. Nau ka pai chu ka la ring ngam zanlo nain beisei erawh ka sang duh ngang mai.







Choka a JH-a lo lut chuan "Bawngkawnah sangha ka lei dawna ka va thlah nghal dawn che a mi?" Alawmi hnenah chuan a ti a, "Ka lo kal ve ang" ka lo ti nghalthuai a, Test kit lei vat a intest hmasak phawt chu ka ngai a ni.







"Lo inpeih ula motor ka lo la chhuak ang" a tih leh hnu ah JH-a chu a kal chhuak a, ka ṭhiannu chu ka en ren rawna "Ka rai a niang a, ka in test teh ang," nui var var chungin ka ti a, kei aimah chuan a phur hmel zawk mah.







"I rai chiang a lawm, i awmdan aimah chuan inpa awmdan ah hian ka ringhlel zawk, cake te kha a eitheihloh zia kha a, a meng dul bawk si, a chauh hmel hluah hluah a lawm le, a Nu hah anih dawn kha" a lo ti zung zung a, chu erawh ka man pha ve meuhlo.







"Ka damloh laikhan zan kan meng rei thei lutuka a la kulcho pawh a ni maithei a sin" ka ti leh a, chu loah cake chu Artui a tam vangin JH-an a eive ngai manglo a, a ei chang pawhin tlem a tem hlek chauh ṭhin a nih kha. A....nupui te rai vanga mipa lo danglam ve ngawt chu ka hrethiam pha ve chiah lo e a.







"A Nu hah a ni hrim hrim a awmdan ah khan a lang reng" a ti ve leh tlat a, "Ka rai tih pawh a la chian loh hi chutin lo puh ngawt lo la" ka tih chuan a nui rah rah a, "I rai hma e, i van inla pasal nei tak, i fa ten ka fa te an vel an vel bik dawn anih hi ka van ngei e aw" a ti zui niah niah a, kan in ena kan nui leh rih a.






"Lungngai suh, nangni pawh kumthar ah in innei dawn a lawm, naute kan neih zawh hunah chiah inneih a ngai tihna a ni mai dawn a" ka lo tih chuan a ner nang a, "Tinge in la inbe ṭha lo a mi?" ka lo ti hluaia, tunlai chu Rina chungchang a sawi khat viau a ni, "Nizanah pawh a lo kala, kan inbe ve reng tho a mahse, kan inṭhen tho" a ti chu ka man pha leh tawhlo, inṭhen hlen tak tak silo hian an heti reng maia, an inṭhen chhan pawh ka zawt buai peih ta lo, a hma ang thoin an inhnial anga tlawm zawk nih hreh si la induh bawk si inkarah awm leh tawh anih mai hmel e.







"Ngaihzawng dang neih daih ka duh, Rina nen chuan hma kan sawn thei tak taklo, a bul aṭangin kan kual kan kual zel, nangmah ang hian inngahna tlak tak tak tur mipa ka zawng anga ka hmuh veleh Lalrinmawia chu pasal ka neihsan hmak ang mawle" nui hak chungin a ti a, hetiang hian a sawi ve ziah ṭhin a, lo phurpui emaw lo sawipui chiam chi pawh a nilo, a hnu lawkah Rina nen bawk an inzui leh ṭhina, lo sawipui hi a inchhirawm leh rum rum ṭhin.







Sitting room aṭanga JH-an min lo koh takah chuan kan inzui chhuak thuai a, "Test kit chu lei nghal rawh aw" motor a ka luh dawnah Alawmin a lo ti ru sar sar a, "Chumi tur chuan a lawm ka lo kal ve" ka lo ti var a, "Min hrilh hmasa ber ang che" a ti leh hram, a lo phur tawh ngang mai.







"JH tunlai i damsam mang nange i va chauh hmel ve" kan tlan chhuah hnua Alawmin a lo tih chuan ka lo chik ve vat a, "Tunlai chu ka nuamsam meuhlo, ka awm awl deuh aniang" a lo ti mai a, Alawmi nen chuan kan inmelh ralh a, kan rilru chu inhmu dun kher ang chu, Alawmi ṭawng leh lai te chuan thildang daih ka lo ngaihtuaha, naupai tur ang riakah ka inchan tawh a, rilru a hlim veng veng mai a ni.






"Zanah min lo be rawh" motor aṭanga a chhuk dawnah Alawmi chuan a ti leh zauh a, "Ka haw veleh ka lo bia ang che" keiin ka lo ti ve thung.






"Tinge Bawngkawnah kher sangha lei i duh a?" kan tlan chhuah hnu chuan ka ti a "Kan leiṭhanna ania, dil sangha tharlama deuh an nei ṭhina, i damkawr sia i tan aṭha ang" ka lam lo hawi zawk pahin a ti a. "Damdawi dawr kan hmuh chuan ding lawk ang aw, pum damdawi lei ka ngaia" a ti leh a, "Haw lamah kan zawng phei dawnnia" a lo ti ve maia, lo rai ta ila engtin tak ngai ang maw? Fa neih chungchang kan la sawidun ngai miahlo a, ka inbeisei ang hi lo ni ta ila ka ṭhawng viau em lo ang chu maw?







Sangha kan lei zawh hnuah kan let leh vang vang a, Damdawi dawr kawta kan din ruala lo chhuk ve mai a tum chu "Lo awm rawh, ka reilo ang" tih leh motor aṭanga chhuk ka ruala, hmanhmawh deuhin dawr lam chu ka pan a, a chian hma chu la hriattir ka duh rihlo, ka lo rai hlauh a nih chuan enge a ngaihdan reng reng hriat nana ṭhawn thut chu ka duh.






.Test kit chu panga ka leia chuanlam tur tingah pum damdawi chu ka leitel bawk a, motor a ka let leh hnu chuan ka thil lei chu min lo laksak vat a, "I damdawi eilai kha thlah chuang lo la, i eizo ngei ngei dawn nia" a lo ti a, nau ka lo pai hlauh a nih chuan eng damdawi mah ka eitawh rihlo ang, Doctor ka rawn phawt a ngai a lawm, ka lo ei tawh zo zai te kha a pawi thui em lo ang chu maw?






Tukverh lamhawi chuan ka ṭhu ngawirana, a kekawr iptea ka thil ah chuan rilru a luah ve reuh reuh a, ka pum dawmin ka nui leh ṭhin, kei hi lo rai leh silo ila ka rilru ana thei mai dawn anih hi, beiseina chauh pawh hetiang tak hian ka hlimpui tawh chu a ni vei tak sia.






"I pum a nuam lo elaw?" JH- an a lo tih chuan ka hawichhuak vat a.






"Nuam e, ka... puar deuh a niang" ka lo ti bah nak a. "Damdawi i ei nasa si a tui i inhnem dawnnia, i kal in a lo tuar palh ange" hmalam en ngar chunga a tih leh chuan ka nui mai a, a hmel chu a ngui bar a, a chauh hmelin Alawmi sawi ang tak khan a nu hah ve deuh emaw te ka ti rum rum a, nau ka pai turah ka inngai nghet hmiah tawh.







Kan thlen veleh ah room ah chho nghalin Bathroom ah ka luttlanga, ka test kit chu la chhuakin darthlalang hma ah chuan ka han ding ren rawn a, ka zam deuh riau mai. Darthlalanga ka hlimthla lang chu ka han en vang vang a, ka mitkhur tla deuh leh ka awmruh lang riak te chuan chhan leh vang ṭha tak an neih ka beisei.






Minute sawm hnu velah ka phone a lo ri a a Alawmi a ni, cabinet chunga ka Test kit dahtlar ṭhap chu melh dauh dauh pahin phone chu ka chhang a, "Mate i in test em?" a lo ti nghal tawng a.





"Test zo chiah, vawi nga ka test nawn?"




"Enge result?"



"Nau ka pai, a vaiin a Positive vek" ka hnuk a ulh lek lek hial a ni, "Awi leh!" lehlama a mi in a lo tih chuan ka lo nui chhuak hak a, "Ka lawmpui che aw mate...yes, naute kan nei dawn e" a lo ti nawn leh a.






Bathroom aṭanga ka chhuah laichuan ka pasal chu a lo lut ve mek a, nui var var chunga ka lo en chu bangbo zetin min lo enlet a, chutah a kawr phelhin a thawmhnaw bawm a hawng a, "Zanriah eikhamah chawlhhmunah kan kal dawn nia" a ti zui zat a. "Kan riak dawn a mi?" ka tih chuan a bu nghat nghat a, "Kar tawpah kan kal ṭhin ang chu" a ti leh a, a kawr la chhuakin a ha ṭha nghalthuai bawk a.







"Nau ka pai a sin" ka ti hlawl mai. Ka lamah a lo inher vut a, a hamhaih hmel lutuk chu keiin ka lo nuih var var thung.






A nuilo, rinhlelh hmel lek leka min en in "I ti tak tak em?" awih ngamlo hmel pha dai hian a ti leh a, a mitmenga phurna lo lang chu ka hmuh hmaih biklo.






"Umm....tak tak e, ka in test zo chiah a" ka sawilai mekin ka lam panin a lo kal a, eng khaw sawi set set loin a awmah min kuah bet rawp a, "A ṭha e?" tih zawng a sawi a. Min kuahna a thlah hnu ah min enin a nui a, "I lawm em?" ka tih chuan mit chhing sak chungin a bu nghat a, sawi ngaihna vak a hrelo a niang, sawi zui chiamlo mahse, a hmelah a lawm tak zet tih chu a hriat reng thung.







"I damdawi eilai kha lo eizawm rih lo la, naktuk zingah Clinic ah kan kal dawn nia, Iron te pawh i ei angai ang, awm hahdamla thei leh thlai lam te pawh ei aṭha ang, i mu tam deuh dawnnia, in chhung chet chu midang kutah dah la" a Laptop bih pahin a ṭawng mawlh mawlh a, nau ka pai thu ka hrilh hnu lawk khan a Laptop bihin internet ah a va enkual ni tur a ni, ka tih leh tihloh tur a sawi nghal mawlh mawlh a, a awmdan chu nuihloh theih pawh a nilo.






"Wine emaw beer lam in lo la, pheikhawk sang i bunlo hram dawn nia......"





"A tawk tawh, ka hre ve tho a lawm" ka ti chu "I hria maw?" a lo ti let heu a, a chi ai deuh emaw ni!






"I awmdan kha awm i ti nuamlo ania" nui hawk chunga ka tih chuan a kiai ve suk mai "Ka vawikhat na tur a nia" a la ti tak deuh deuh a.




"Keipawh ka vawikhatna tur a lawm" a chezia chu a lai zo vek tawh, "Thil eiṭha viau rawh" a ti leh khauh a, a bula kal hnaiin a sam ka va chul a, chu velah a mal chungah min pawt ṭhuin min en ran a, nui lek lek hmel a pu reng bawk.






"Alawmi nen chiah in la hria a, midang pawh ka la hrilh lo" ka tih chuan min chhangloin ka hmui a lo khar a, lungchim zeta min fawpin min kuah a, sawimai aipawhin a chezia chuan a lawmzia a tichiang zawk mah awm e.






Zanriah eilaiin kan chhungte chu kan hrilh ve a, an phul nghal hlut a ni ber. "A va lawmawm ve aw, chhungkua a chaw eikhawm hluai na tham a nih chu" ka pa chuan a lo ti a, ka nu pawh a phur ve hmel ngang mai, "Eichak te i neih chuan i sawi dawn nia, thil hrisel tur chi eitam la, naupai laia inenkawl uluk chu naupang hrisel chhoh zel nan a pawimawh a nia" alo ti ve a, Apuii chu a lawmthiam berah a ṭanga "Ka u chu fa ka neih khalh dawn emaw ka ti tawh ania, ka van lawm tak, in naute chu ka duat ngawt ang" ka ti nghal siam siam a, Reny leh Michaela erawh an ngawi ran a, Judy hmel ka hmu chu min lo melh tur khai a, a tum deuh bara naupang titau te pawh a ang lek lek hial a ni.







Zingah kan inentira damdawi chi hrang hrang Doctorin min lo chawh a, kq chhung ten inchhungah ka chet ve an phallo nghal hmiah bawk a, inchhung sekrek khawih tur nula an la a, langin a lo kal ṭhina, inlamah chuan ka awlthawng viau mai. Khawdanga ka chhungte pawn phone call-in min lawmpui thu an lo sawi sap sap a, "Lo zin chho ula Arpui tuilai ka lo talh sak ang che u" ka puin a lo ti bawk.





"Chhun lam hna kal ka ngai sia, nakinah nau neih chawlh te ka lak hunah kan lo la zin zawk dawnnia" ka lo ti ve a.





Ka beisei phak bakin chhungkua in min ngaihsak a, JH-a ni te ho chenin ei in tur min ngaihtuahsak a, thil ei tui loh engmah ka nei bawk silo a, kar thum lek chhung pawhin ka thau ulh hman nghe nghe. Ka nu leh Apuiin an chhuahna lamah thei emaw thil eitur engemaw tal min leisak ziah a, hetiang hian ka naupai vanga min ngaihsak ṭha em em dawn anih chuan rai reng mai pawh a chakawm thei mai dawn a lawm, ka pasal lahin min duat em em reng a, ka eichak ka sawi hlek chu i he loin min lamsak zung zunga, ka tih leh tih loh tur List a siam fel thlap bawk.





👇👇 a hnuaia ads khu click theuh ang u aw, khawngaihin 💚

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)